MARKOS

MARKOS

¹ Kito ka Fiya fag Barita nogfabago kawa han Kiristo Hisos, in Diyos anak. ² Hyabi hyabi is Isayas, in Diyos fangampang nasorat kitay, is Diyos iglwang, Fandog ngay, hogsogo angko sogowan ha hyamo fagonan, Kaarakitay igyawa hyamo bato lahawan. ³ Kiti kat fwayong kagtawag marigon marigon sas basad fakahyabogan, Fatalagaan in Diyos bato lahawan, Fahaslongan it manga dalan. ⁴ Ginya madis Hwan kagfatogna manga taw inbangkad wa ngay, igbanwanan basad fakahyabogan. Is Hwan igfwayong kitay, no fakta ka somoyo hanggan fatogna hanya, is Diyos faliyam it manga naogali dwat. ⁵ Fagayo gis sakop Hodiya hanggan ka manga gis banwa Hirosalim, fagayo nagobok in Hwan. Manga taw nogbaya ista manga sadili naogali dwat, is Hwan igfatogna hanya sas safa Hordan. ⁶ Gis nanya in Hwan rotay olad kamilyo mahaligan, anit yadit fagyahos, manga fan, manga dyahot it fanganon. ⁷ Is Hwan igtoltol has taw, iglwang kitay, Ha akwa omoyan sangko ginanan ha kangayanan abwat man angko, ho kaya wan ngadi manlohas it famaganit lapak. ⁸ Sas danom aho nogfatogna hayo, dapat sas Maliyaw fag Falad hanya no fatogna hayo aban. ⁹ Ginya madi, gis nanya fag manga masohod, is Hisos inbangkad gis banwa Nasarit, sakop Galiliya, hanggan is Hwan nafatogna in Hisos sas safa Hordan. ¹⁰ Is Hisos no kabangon gis basad danom, hanya nalag ka manga banwa sas tongod dagos wanboklas hanggan ka Maliyaw fag Falad kayokfo ha hanya kitos salompati. ¹¹ Ha sadik hasnog gin Diyos banwanan sam tongod iglwang kitay, Haw wa kangko fagalwasiyon fag anak, hogbaya wa dahol dahol hyamo. ¹² Ka Maliyaw fag Falad nadagos wa nafalahaw in Hisos has basad fakahyabogan. ¹³ Is Hisos nadogay sinya ofat ik safolok sirang hanggan is Satanas nasolay igfaloksowan hanya. Manga odi myala fag hayopan banwanan sinya, dapat ay, manga anghil nafarigon in Hisos gis nanya. ¹⁴ Ginya madi, ta no nagamat in Hwan kaarakitay igfaporiso hanya, is Hisos hawas sakop Galiliya, nanoltol in Diyos Fiya fag Barita. Is Hisos iglwang, ¹⁵ Kati wa fag masohod im-anod wan in Diyos sakop, yakanga ham fag soyo wan. Ham fag katiwala ka Fiya fag Barita. ¹⁶ Is Hisos nogdalan sas bahalan linaw dahol, tagngayan Dagat Galiliya, nalag inda Simon da Andris dowasay. Da Simon gokas sarap has basad danom maskin manga fangoyang. ¹⁷ Is Hisos nalwang handa Simon, Ham tahinan angko. Ho fabali hayo manga fangiktan manga taw. ¹⁸ Ginya ginan ta nadagos wa naobon it manga sarap a, nahin wan Hisos. ¹⁹ Ta noglahaw yapdi, is Hisos nalag inda Santyago, da Hwan dowasay, in Sibidiyo manga anak. Da Santyago masahayan yadi sat basad baloto, igsip it manga sarap. ²⁰ Is Hisos dagos natawag wa ka dowasay. Ta naobon wan Sibidiyo, it ama, sas basad sahayan, ha ofod yapdi manga famalo. Ginya madi ka dowasay nahin wan Hisos. ²¹ Da Hisos indasog wa has banwa Kapirnaom. No sas Sirang Kafahowayan, is Hisos dagos wansakbaw ha basad fanimbaan Hodyo, igfaadal has taw. ²² Tantaka wagdog is Hisos nogfaadal has taw, maskin kitos ha kangayanan hanya nogfaadal, idwag hono, bondi kitos mangag faadal Batasan Hodyo. ²³ Sadi odi ginan sadik ama nasakbaw has basad fanimbaan, labang wa kagfahoriyan hanya. ²⁴ Ka ama igtawag marigon, kitay, Haw, Hisos taga Nasarit, kana haw nogmawat hyami? Haw awkin hastay kaarakitay domaog wa hyami? Ho fadi wad twa no faktaw haw. Haw wa ka Maliyaw kanbangkad gin Diyos. ²⁵ Dapat is Hisos nangabaya ka labang, nalwang, Ha hawa gawang gawang. Haw fag galin gis nyamo fag taw. ²⁶ Ginya madi, ka labang no nafalimboyagan yapdi ka ama, narokyaw dahol, bago nalin gi hanya. ²⁷ Fagayo fag manga taw intaka wan, ta fagayo nangarintawan kitay, Kana to fag kadonongan? Ngatay sadik adal bago. Ha kangayanan igfasognod, hanggan ka manga labang katanog odi hanya. ²⁸ In Hisos naibolon dagos wandahit ha sadik dahonya manga banwanan sas ligongan, sas sakop Galiliya. ²⁹ Da Hisos dagos wa nalahaw gis basad fanimbaan, nasakbaw handa Simon da Andris balay. Da Santyago da Hwan naofod yadi wansakbaw. ³⁰ Gis nanya in Simon nogang ina maigyanan maskin it sagit kagnaw a, tadwa nafadogayon nafadog in Hisos kawa hanya. ³¹ Is Hisos naakbang has ina, nagamit hanya, nafabangon. It hagnaw dagos wanfiya. Ginya madi ka ina natogbong is taw. ³² Araw, no kayabi wan, myanit no kasangday wan, manga taw nataban han Hisos fagayo sinya fag banwanan ka ha manga sagit, hanggan ka ha manga labang igfahoriyan istaw. ³³ Sadik banwa dahonya, ta nanifonan dayo sakbawan. ³⁴ Is Hisos nafafiya kaaywanon fag manga taw ha sagit bokod bokod, nafaalin yadi aywan fag manga labang kagfahoriyan is taw. Is Hisos idwa nafaawang ka manga labang maskin ta kilala wan Hisos. ³⁵ Ginya madi, no marom, is Hisos inbangon, yabi yapdi, idya kasirang, hawas talon, nandarangin sinya. ³⁶ Araw, da Simon naoyan hanya. ³⁷ Ta no nalag in Hisos, ta nalwang hanya kitay, Fagayo fag manga taw igsayak hyamo. ³⁸ Is Hisos nasagot kitay, Tam hawas masoson fag manga banwa kaarakitay ho manoltol is taw sinya. Maskin tonya wa kangko bato ibolonon, ho nalahaw wa gintam ginanan. ³⁹ Is Hisos nasafong ka manga banwanan fagayo sas sakop Galiliya. Igtoltol sas basad manga fanimbaan Hodyo, igfaalin yadi ka manga labang gis taw. ⁴⁰ Sadik taw ka ha sagit kitong naakbang han Hisos, nanlingkohodan, iglwang hanya, Haw nangos no kasaya digfafiya angko, haw fadi wad somyagan. ⁴¹ Kawas Hisos kaawa hanya, natawid hanya a, nalwang kitay, Ho kasaya ngay, haw fag imfiya wan. ⁴² Ginya madit kitong dagos wanfiya, ogali wan it anit. ⁴³ Is Hisos nabando hanya fiya fiya, bago nafalahaw, ⁴⁴ nafwayong hanya, Hawag fwayong nyawa haday fag manga taw, dapat fag hayapdis fagalan-han-Diyos, fabantayan hanyam habilogan, ginya madi ha disagan kan Mwisis natogon bato disagon, bilang faorongan has taw kitay haw infiya wan. ⁴⁵ Dapat ka ama nonlahaw wan, dagos wagtoltol has manga taw, nafadahit wan. Kawa kitonya, is Hisos idwa has basad manga banwa, dapat nabaybay odi has manga ligongan. Nyawa kitonya, manga taw gis fagayo fag manga banwanan inbarangkadan wa hanya.

¹ Idya bangan dogay, is Hisos no nwali has banwa Kapirnaom, manga taw nadog kitay is Hisos sawat oliyanan. ² Kaaywanon fag manga taw inbangkad, nanifonan sinya, iglabi di sasta balay hanggan wa sayo sokayan, ³ hanggan is Hisos igtoltol has taw. Ha ofat ik ama inbangkad naosong sadik ama kadwa syagan kimot. ⁴ Ta nodwa twa gakbang in Hisos kawa kaaywanon wa fag manga taw, ta nabol ka atop san Hisos tongod. Ginya nonlosbong ngay, ta natonton han Hisos akbang, ka ha sagit sat baba sagmak. ⁵ Ginya madis Hisos no nalag kitay tagsyag marigon ha hanya, iglwang has ama kadwa syagan kimot, Anak, hogfaliyam im manga naogali dwat. ⁶ Dapat gis nanya, ha akwa mangag faadal Batasan Hodyo matokawan sinya. Ista fangayofan iglwang, ⁷ Yakana mayon to fag taw no kampang kitonya? Igsway odin Diyos. Bohonwa awkin is Diyos lamang ka ha kangayanan igfaliyam manga ogali dwat? ⁸ Dapat is Hisos nasarom ista fangayofan kitay ta gisip kitonya. Yakanga nafwayong has taw, Kana mayon ham no nangarisipan kitonya? ⁹ Sida ka malpos fwayongon has idwa syagan kimot, ngatay, Im manga naogali dwat fag imliyam wan, ngatay, Haw fag kabangon wan, anggongan wam sagmak, haw fag lomahaw wan. ¹⁰ Dapat ho falag ha hayo kitay aho, Kanbali Taw, ha kangayanan istay sas baba daga, igfaliyam ista manga ogali dwat. ¹¹ Ginyas Hisos nafwayong has idwa syagan kimot, Aho wa kaglwang kitay, Haw fag kabangon wan, dyan wam sagmak, nyawa ha mwali wa kati. ¹² Ginya ka ama nalindog, dagos wa naanggong it sagmak, sasta faglagan fagayo, ginya nalahaw wan. Yakanga tandolaw wa dahol dahol, nafasayagdog in Diyos, iglwang, Nyawa ginahin, tam idwa ha lagan kitonya. ¹³ Sadi ya ginan is Hisos inlahaw, hawas akbang linaw dahol. Kaaywanon fag manga taw naakbang hanya, hanggan is Hisos igfaadal has manga taw. ¹⁴ Araw, da Hisos noglahaw yapdi, ta nalag in Libi, in Alpiyo anak, matokawan sas fanohotan bohis Roma. Is Hisos nafwayong hanya, Ha tahinan wangko. Ginyas Libi dagos wanlindog, natahin wa hanya. ¹⁵ Ginya madi da Hisos no matokawan san Libi balay, sas bilog fanganan, aywan fag manga fanohot bohis hanggan tiba taw kadwa fiya it ogali, nanayowan kwan sinya, maskin kaaywanon naoyan in Hisos, hanggan in Hisos manga katogbong sinya yadi wan. ¹⁶ Ka mangag faadal ka Batasan Hodyo hanggan manga Farisiyo, no nalag kitay is Hisos igsayowan kwan has manga ha ogali dwat hanggan manga fanohot bohis, taglwang han Hisos manga katogbong, Kana mayon is Hisos nogsayo has manga fanohot bohis Roma, hanggan has manga taw ka ha ogali dwat? ¹⁷ Is Hisos no nadog ista fwayong, iglwang has manga taw kitay, Ka manga ha sagit ka kasaya has famolongan, no kadidwa ha manga sagit idwa kasaya hanya. Maskin ngay honbangkad hastay angko fagsayahon ka manga ha ogali dwat, bohonwa ka gayfan kitay it manga ogali fiya. ¹⁸ Gis nanya fag manga masohod in Hwan manga katogbong, hanggan manga Farisiyo idwa kwan hanon kaarakitay mandarangin mahogod. Manga taw naakbang in Hisos, naintaw hanya kiti, Kana mayon in Hwan manga katogbong, hanggan ka manga Farisiyo manga katogbong, nomtoon idwa kwan hanon kaarakitay mandarangin mahogod, dapat kam manga katogbong idwa gogali kitonya? ¹⁹ Is Hisos nasagot has taw, Ka mangag fasakop has famabayan idwa awkin kwan hanon kagbabay no gofod yapdi has taw, ham gayfan? Kagbabay no sinya yapdi, ta homwan yapdi hanon. ²⁰ Dapat ay, aban ha gomamat tomaban kagbabay. Gis nanya ta bago didwa kwan hanon kaarakitay mandarangin mahogod. ²¹ Idwa haglonob rotay kadyan yamos has daanon fag rotay. Noglonob kitonya, ka daanon fag rotay labi wamdwat aban. Maskin ka bago no sas daanon, kadahol ya kat losbong. ²² Idwa yadi ha taw somiblag bago fag alak ha basad daanon fag sohadan anit. Maskin ka alak bago fabosni ka anit daanon, ginya ka alak im-odolanan lamang. Ka fiya, fag somiblag bago fag alak has bago fag sohadan anit. ²³ Sadi ginan, sas Sirang Kafahowayan, da Hisos nadalan sasta namay ha tirigo. Ta nogdalan sinya, in Hisos manga katogbong igfabago igbol manga haway sayok. ²⁴ Manga Farisiyo iglwang han Hisos kitay, Yabay kana mayon im manga katogbong no gibolon kadwa maangay sas Batasan Hodyo, maskin sawas Sirang Kafahowayan? ²⁵ Is Hisos nasagot has taw kiti, Ham awkin idwa nabasa, nyawa ginahin, in Dabid naibolon hyabi, da Dabid hanggan it manga ofod nonhori kawa kalonos? ²⁶ Kawas Dabid nasakbaw han Diyos basad balay, nos Abiyatar kasta gorangon has manga fagalan-han-Diyos. Ginyas Dabid nahwan ka tinapay kandisag han Diyos. Ka Batasan Hodyo iglwang ka manga fagalan lamang ka fiya homwan tonya fag tinapay. Dapat ay, is Dabid nahwan, ginya nadisag yadi hat manga ofod. ²⁷ Is Hisos nalwang ya has taw, Ka Sirang Kafahowayan kagtogbong has taw, bonwa ka taw kagtogbong has Sirang Kafahowayan. ²⁸ Maskin ngay, aho, Kanbali Taw, kagbahala yadi has Sirang Kafahowayan.

¹ Sadi ya ginan is Hisos nasakbaw has basad fanimbaan Hodyo. Sinya ha sadik ama it gamat inrifis wan. ² Ha manga taw igbantay in Hisos, ngatay mamafiya basad Sirang Kafahowayan maskin tagsayak it fabangdanan iglaban in Hisos. ³ Is Hisos iglwang has ama kanrifis it gamat kitay, Ha fag hastay. ⁴ Ginya madis Hisos iglwang has fakaaywanan kitay, Sida ka maangay has Batasan Hodyo, ham gayfan, ngatay ka gibolon fiya, ngatay ka gibolon dwat sas Sirang Kafahowayan? Ngatay igbawi taw, ngatay igfahatay taw? Dapat idwa ha nasagot in Hisos. ⁵ Ginyas Hisos namalantayon has taw sat ligongan, kahori wa dahol it fangayofan, maskin karongkot iglag manga taw myasa wa maganit it fangayofan. Ginya madis Hisos igfwayong has ama, Falogdayan im gamat. Ginya ka ama nafalogday ngat gamat, infiya wa dagos, ogali wan. ⁶ Dapat ay, ka manga Farisiyo igdokson a, dagos wa goyonan igtoltolan han Hirodis sakop, no kindasta halimbawan kaarakitay fahatay in Hisos. ⁷ Ginya madis Hisos nataban it manga katogbong, nafatawas wan, hawas linaw dahol. Aywan fag manga taw gis sakop Galiliya goyan is taw, hanggan gis sakop Hodiya, ⁸ gis banwa Hirosalim, gis sakop Idomiya, hanggan gis difay Hordan, hanggan gis ligongan manga banwa Tiro hanggan Sidon, kaaywanon kaaywanon fag manga taw. Kawa tagdog in Hisos manga ibolon myasa wa fiya, ta gobok hanya. ⁹ Ginya madis Hisos igfwayong hat manga katogbong kitay, Fag fatalaga hangko sadik baloto kawa taw kaaywanon, matohon wa dahol, ho ngandayo imlibit. ¹⁰ Is Hisos iglwang kitonya maskin fagayo ka ha manga sagit igpilit han Hisos kaarakitay is Hisos mandog, manawid ka manga taw. Inbali kitonya kawa kaaywanon kan Hisos nafafiya. ¹¹ Nyawa ginahin ka manga labang noglag in Hisos, ka labang fagfahoriyon iglohoban san Hisos fon bitis, ginya ka labang igtawag marigon, iglwang, Haw in Diyos wa Anak. ¹² Is Hisos igbando marigon has manga labang kitay, Hagfahilala has taw no fakta aho. ¹³ Ginyas Hisos hawas moyod, nafatawag it manga fakilalaon tiba. Tagtahin yadi wa hanya. ¹⁴ Is Hisos nafatohoyan safolo ha dowak taw ka omofod hanya fagaba, it fagsogoon yadi kaarakitay manoltol has taw. ¹⁵ Ha kangayanan yadi igfaalin manga labang gis taw. ¹⁶ To kat manga ngayan ka safolo ha dowak katogbong. Bago bago is Simon, kan Hisos nafangayan is Pidro, ¹⁷ hanggan da Santyago da Hwan, in Sibidiyo manga anak, kan Hisos nafangayan da Boanirgis, it kahologan, Manga anak dalogdog. ¹⁸ Hanggan da Andris, da Filipi, da Bartolomi, da Matiyo, da Tomas, in Santyago sangay in Alpiyo anak, da Tadiyo, ginyan Simon sangay, ka goyon marigon it manga kapariho Hodyo, ¹⁹ hanggan is Hodas Iskariyoti ka naoyon in Hisos kalaban. ²⁰ Ginya madi da Hisos nwali wan. Kaaywanon fag manga taw nanifonan sadi ya ginan, yakanga da Hisos idwa twa kwan hanon gis nanya. ²¹ In Hisos manga kaiban no nadog kitay kitonya, ta naoyan kaarakitay tomaban in Hisos maskin taglwang, Is Hisos ngandayo kaliyam it fangayofan. ²² Ka mangag faadal Batasan Hodyo kandasog gis banwa Hirosalim, iglwang kiti, Is Biilsibol, ka tahinan manga labang, kagfon in Hisos, yakangas Biilsibol, kagfasyagan hanya igfaalin manga labang. ²³ Ginyas Hisos nafaakbang hanya ka manga taw, nafahalimbawa kitay, Kinday araw is Satanas nogfalagyo it sadili, ham gayfan? ²⁴ Halimbawa, ka sadik gorangon sakop nombali dowak layonan, idwa domogay. ²⁵ Kitonya yadi nangos, no sadik talanahan imbali dowak layonan, idwa yadi domogay. ²⁶ Kitonya yadis Satanas, noglaban it sadili sakop, igfabali dowak layonan, idwa domogay, imliyam di. ²⁷ Dapat ay, kagfon balay no marigon, idwa ha somakbaw hat basad balay kaarakitay ignahaw it botang nodya gomafos yap hanya, ginya madi idwa somawad it manga botang. ²⁸ Hogfwayong ha hayo, bonwa bohag, kasta manga naogali dwat fagayo twam liyam hanggan ista hampang nogfadwat igdog in Diyos ngayan, ²⁹ dapat, nyawa faktaw nogfadwat igdog ka Maliyaw fag Falad, tonya sadik ogali dwat idwa twam liyam, nyawa ginahin. ³⁰ Is Hisos iglwang kitonya maskin taghalwang kitay, Ha sadik labang kagfon in Hisos. ³¹ Yabay, in Hisos ina, hanggan it manga fadwasay indasog wan, mafanayan di sas sokayan a, igfatawag in Hisos. ³² Gis nanya kaaywanon fag manga taw matokawan san Hisos ligongan. Ta nafadog hanya, iglwang, Im ina hanggan im manga fadwasay sas sokayan galingawan hyamo. ³³ Ginyas Hisos nasagot has taw, Fakta kangko ina, fakta kangko manga fadwasay, ham gayfan? ³⁴ Ginya, nogbarantayon it mata has manga taw ka matokawan sat ligongan, is Hisos iglwang, Yabay, to kangko ina, hanggan angko manga fadwasay. ³⁵ Maskin, nyawa faktaw no katanog in Diyos kafangayofanan, tonya wa kangko manga fadwasay, angko ina.

¹ Sadi ya ginan is Hisos igtoltol sas bahalan linaw dahol. Kaaywanon kaaywanon fag manga taw igtifonan yadi sinya, yakangas Hisos nasakbaw has basad baloto, baba danom, matokawan yadi sinya. Ka fakaaywanan fag manga taw sinyas baba daga sas bahalan linaw. ² Yabay, is Hisos igfaadal has taw sinya, dapat sayapdis manga halimbawa. Nogtoltol, is Hisos iglwang, ³ Ham fag matalingan. Sadik ama fangiyab hawat namay kaarakitay mamamgas. ⁴ Hanya nogfamgas igsabod odit binhi, yakanga tibak bolhog indagdag has boknga dalan. Ka manga manok indasog a, nahwan wa tonya. ⁵ Ha akwa yadi manga bolhog indagdag has daga libabaw, baba odi dalifi. No kitay di dagos wa natobo kawa libabaw maskin ka daga sinya. ⁶ Ka myanit no nasalog sinya, myanit wa dahol dahol, kat manga tobo inlayong di, maskin idwa ha dalid abasad. ⁷ Ha manga bolhog yadi indagdag ha sayo manga lamnon madogi. Ka manga lamnon inlangba, nasakfaw di ka manga tanom. Ka tanom idwa nabohad. ⁸ Dapat ay, ha akwa yadi manga bolhog kandagdag has fiya fag daga. Yabay tonya ka natobo hanggan inabwat a, malangba, nabohad wan. Ha akwa nabohad tolok safolok bolhog, ha akwa nabohad onom ik safolok bolhog, hanggan ha akwa nabohad sadik daan bolhog. ⁹ Is Hisos nalwang, Ham no ha manga talinga ya ngadi, fag talinga wan. ¹⁰ Ginya madis Hisos nonboktong, ka tiba taw naintaw hanya, hanggan it manga katogbong, safolo ha dowa, naintaw yadi, kawa hat manga halimbawa no kanat kahologan. ¹¹ Is Hisos nalwang has taw, Kati indisag wa ha hayo kitay ham fag tomwa ka mangadyag fadogon kawa han Diyos sakop baliwa, dapat no has iba taw, fagayo sas manga halimbawa yapdi ta no domog. ¹² Kaarakitay, Nyawa tanyaya wagbantay, tadwa lomag. Nyawa tagtalinga wagtalinga wan, tadwa tomwagdog. Inbali kitonya kaarakitay tadwa somoyo faliyam ista manga naogali dwat. ¹³ Is Hisos nalwang has taw kitay, Ham aw idwa twagdog to fag halimbawa? Kinda odi ham no tomwa wagdog fagayo fag halimbawa, ham gayfan? ¹⁴ Kagsabod igsabod in Diyos hampang. ¹⁵ Ka manga bolhog kandagdag sas boknga dalan, kito yadi nangos ka manga taw no nadog tonya fag hampang, is Satanas madali wagbol gista basad fangayofan ka nasabod hampang sinya. ¹⁶ Kito yadi ka manga bolhog kandagdag sayo baba dalifi, sas daga libabaw. Ta no nadog tonya fag hampang, igtanggap wa dagos, masolong wan no kitay di. ¹⁷ Dapat, idwa nadalid abasad sasta fangayofan. Ngalay di gagwanta. Dapat no ha donggon ya nga manga mahori, ngatay tagfahoriyan hanya maskin katiwala ka hampang, dagos wa nadayo. ¹⁸ Ka manga bolhog kandagdag ha sayo lamnon madogi, igfahalimbawa ka mangag talinga has hampang, ¹⁹ dapat kat manga fagisipon fagaba it manga kakorangan, ngatay kawili wa dahol kaakwaan, ngatay kasaya manga iba bagay. To fag manga fagisipon ka kalangba, ginyag sakfaw ka hampang sat basad fangayofan, yakanga tonya idwag bohad. ²⁰ Dapat ay, ka manga bolhog kansabod sas fiya fag daga, ka mangag talinga ka hampang, igfaanod yadi tonya, ginyag bohad wan, tiba tolok safolo, tibat bohad onom ik safolo, tibat bohad sadi wak daan. ²¹ Is Hisos iglwang has taw, Tam awkin igdiya salong kaarakitay tam tomago ka salong sas daga gantangan, ngatay sas daga igyanan? Idwa awkin tam igsalifit ka salong sas tongod salangan, ham gayfan? ²² Idwa ha matagowan, kadwam lag aban. Idwa yadi ha mafyaloman kadwam diya aban has faglagan. ²³ Ham no ha manga talinga ya ngadi, fag talinga wan. ²⁴ Ginyas Hisos iglwang has taw, Ham fag matagahan no kana ka hayo fagtalingaon. No kinday ham nogfalag has iba taw, ta aba kitonya yadi nogfalag ha hayo, hanggan bondi kitonya kat disagon ha hayo aban. ²⁵ Dapat ay, ka ha akwa, ha tanggapon ya domwag, hanggan kadwa ha akwa, nyawa ka ogbot sa hanya, imbol di tonya aban. ²⁶ Is Hisos iglwang has taw kitay, kito yadi nangos in Diyos sakop. Sadik taw igsabod manga botol sas baba daga. ²⁷ Ginya kagsabod, no yabi intoyog wan, no sirang mabangon. Dapat ka botol igtobo di, kaabwat wan, nyawa kagsabod idwa twagdog no kinday no kabali kitonya. ²⁸ Yabay, ka dagag fatobo wan it natanom. Bago bago igtorang, ginya kaabwat, ginya kaway, ginya ha afo wan. ²⁹ Ka manga bohad no loto wan, igdagos wagfangta, kawa fanganiyon wan. ³⁰ Ginyas Hisos iglwang, Kinday odi ngap intam fatoladan in Diyos sakop, ham gayfan? Kinday tam nogfahalimbawa tonya? ³¹ Kitos sadik botol mostasa, ka ogbot man has fagayo fag botol kasta tanomon sadik baba daga, ³² dapat tonya nontanom, kalangba aban, kabali dahol man has fagayo fag fangofiyon, somanga yadi dahol fag manga sanga, yakanga manga manok igfogad sinya. ³³ Is Hisos nafwayong has fakaaywanan fag manga taw kaaywanon fag manga halimbawa kitonya, no kinday ka manga taw no tomwa wagdog. ³⁴ Idwa yadig toltol no bohonwa las halimbawa. Dapat nafwayong it manga kahologan fagayo hat manga sadili katogbong, ka tiba taw nodwa matalingan. ³⁵ Araw no kayabi wan, is Hisos nalwang hat manga katogbong, Tam domifay wa has difay danom. ³⁶ Ginya ta no naobon ka fakaaywanan fag manga taw, ka manga katogbong nataban in Hisos, danwa masahayan, nafalahaw wat baloto has baba linaw. Tiba sahayan nahoyog yadi was taw. ³⁷ Yabay araw nabagyo dahol dahol, ka manga taob nabakbak ha boknga baloto, yakanga kapno wa ka danom sinyas basad baloto. ³⁸ Dapat is Hisos sa dis ginanan ginanan, basad habot sahayan matoyogan, matangyawanan. Ta nafolaw in Hisos, nalwang hanya, Haw kagfaadal hyami, haw awkin idwa galibitan tam nomlogom ha daga danom? ³⁹ Ginyas Hisos infolaw wan, nabando has bagyo, nalwang yadi has danom kitay, Fag kahalyaw wan, fag katohas wan. Ginya ka bagyo insiwang wa dagos, inhalyaw ya fiya fiya ka danom. ⁴⁰ Is Hisos nalwang hat manga katogbong, Yakana ham no kadala? Ham awkin idwag syag angko? ⁴¹ Tandolaw wa dahol a, ta nangarintawan ha sadi ha sadi kitay, Yabay faktaw to? Nyawa manga bagyo, manga danom katanog it fwayong.

¹ Da Hisos indasog wan sas difay linaw sas banwanan manga Girasino. ² Is Hisos no nadokson gis basad baloto, sadik ama ka ha manga labang igfahoriyan hanya natagbo in Hisos. Ka ama inbangkad gis basad manga lohib fanlobgobanan taw, ³ kawa sinya no maoliyanan. Kati idwa ha taw syagan gafos ka ama, nyawa kadina ka fanggafos. ⁴ Itfagonan ta fagaba wagbinggas ya, gafos ya manga lobid baol, dapat hanyag bogloy digbogloy di ka kadina, igtogo digtogo di ka binggas. Idwa ha taw syagan igdaog ka ama. ⁵ Fagaba wa marokyawan, yabi sirang, sinyas basad manga lohib fanlobgobanan, hanggan wa basad moyod. Igfabaran wat sadili habilogan ha sayo manga bato. ⁶ Dapat ay, ka ama no nalag in Hisos gis ayayo, nadalandan hanya a, nanlibabaan hat atobangan, ⁷ igtawag marigon, iglwang, Hisos, in Diyos ka Abwat-man-has-Fagayo-Fagayo it Anak, kana haw nogmawat angko? Is Diyos igdog angko, aho nogtangkod kitay haw fag idwag fahoriyan angko. ⁸ Ka labang nalwang kitonya kawas Hisos nafwayong hanya kati kati haraw, Haw sadik labang dwat, fag galin gis nyamo fag ama. ⁹ Ginyas Hisos naintaw hanya, Faktam ngayan? Ka labang nasagot kitay, Ahos Mahabanan maskin hami kaaywanon. ¹⁰ Ka labang nafaawaon in Hisos, nalwang, Ha nangos fag idwag faalin hyami gistay fag talon. ¹¹ Gis nanya ha sadik tifonan baboy ayo ayo kwan manga lamnon sasta akbang, baba moyod. ¹² Ka manga labang nafwayong in Hisos, kitay, Ha nangos sogowan wa hyami has manga baboy, mi fag has basad manga baboy. ¹³ Yakangas Hisos nafaangay wa ngay. Ginya ka manga labang, no nalin gis ama, hawas basad manga baboy. Ka tifonan manga baboy, manga 2,000, dagos wa nanhadalandanan madali has lwad indahodan, has basad linaw dahol. Fagayo inlimos wan. ¹⁴ Ka manga gano ista tifonan baboy nalagyo wan, namarita has manga basad banwa hanggan sas ligongan. Ka manga taw inbarangkadan, namantay no kana ka sinya. ¹⁵ Ta nondasog han Hisos, taglag ka ama ka haraw ka labang, is Mahabanan, it fagfahoriyon, kati matokawan yadi sinya, ha solong rotay, it fangayofan ogali man di. Tandala waglag. ¹⁶ Ka manga nalag is Hisos nogfafiya ka ama, natoltol kawa hanya hanggan has manga baboy. ¹⁷ Ginya ka manga taw igsogo wan Hisos kitay, fag lahaw gista banwanan. ¹⁸ Ginya madi araw araw, is Hisos nogsakbaw wan has basad baloto, ka ama, ka manga labang fagfahoriyon haraw, gwayan wa kasaya mahin in Hisos, ¹⁹ dapat is Hisos idwag faangay, iglwang hanya, Haw fag goli yapdi ham manga fakilalaon. Fwayongan has taw ka hayo Fon naibolon kafiyaon sa hyamo, hanggan in-awa hyamo. ²⁰ Ginya ka ama nwali wa ngay, namarita has taw sas banwanan Safolok-Banwa kitay, in Hisos naibolon ha hanya kafiyaon. Ka manga taw fagayo intaka wagdog. ²¹ Da Hisos nondasog ya has difay linaw, kaaywanon fag manga taw nagobok hanya sas baba daga, sas bahalan danom. ²² Ginya madi sadi kagbahala sas fanimbaan Hodyo, kawas Hayro, inbangkad wan. Ginya, no nalag in Hisos, nanlibabaan san Hisos atobangan, ²³ igfaaronganon wan, iglwang kitay, Angko anak ina kaodikitay sas balay yapdi. Haw nangos tahinan angko, fwalidan yap im manga gamat hanya kaarakitay hanyam boyag yapdi. ²⁴ Yabay, is Hisos naofod wan Hayro. Sadik tifonan taw kaaywanon naoyan yadi wan, igdarotdotan wa hanya. ²⁵ Ya mangharaw, ha sadik ina mahoyogan yadi has taw. Ka ina ha fagdogon dogay, kawa safolo ha dowak fangaraw idwa kafiya it sagit ina. ²⁶ Inhori gis manga famolongan ayo no kitay di, hanggan di namin it manga sangkap, nabayad fagayo fagayo has manga famolongan, dapat ay idwa kaoman. Yatokitay, mahori man kat fagonan. ²⁷ Ka ina nadog kawas Hisos igfafiya ista manga sagit, yakanga naakbang han Hisos gis ginanan, dayo goyoy, sas fagbokngan fakaaywanan, nasapkid in Hisos rotay. ²⁸ Maskin ka ina fangayofan iglwang, ngadi ho somapkid in Hisos rotay, homfiya wan. ²⁹ Dagos wanfiya it sagit ina. Ka ina nadog kitay fawag folot yabay. ³⁰ Ginya madis Hisos no natwa kitay ha nabol karigonan gi hanya, namalihidan wan sas fagbokngan fakaaywanan taw, iglwang kiti, Fakta kagsapkid angko manga rotay? ³¹ In Hisos manga katogbong nafwayong hanya, Haw fadi wadaglag taw kaaywanon, igdarotdotan wa ha hyamo, ginya haw iglwang, Faktaw kagsapkid angko? ³² Dapat is Hisos nafasaligawan it mata sat ligongan kaarakitay lomag no faktaw ka nasapkid it rotay. ³³ Ginya madi ka ina, maskin natwa kitay hanyan fiya, naakbang hanya, indala wa dahol, nangarokogan wan, nanlibabaan san Hisos atobangan a, nabaya wa fagayo han Hisos. ³⁴ Ginyas Hisos nalwang hanya, Anak ina, maskin hagsyag angko, haw infiya wan. Nyawa ha mwali wa kati, im fangayofan fag imhoway wan, hyamo fagdogon infiya wan. ³⁵ Is Hisos no kampang yapdi has ina, tiban dasog wan gin Hayro balay. Ta nafwayong hanya kiti, Hyamo anak ina natay wan. Hawag falibang yapdi kagfaadal has taw. ³⁶ Dapat is Hisos idwa nabati ista nafwayong, nalwang has ama ka fagtahinan sa sadik fanimbaan Hodyo, Haw fag idwa kadala, haw fag syag di ngay hangko. ³⁷ Is Hisos idwa nafatahin ka fakaaywanan. Nataban lamang in Pidro, hanggan da Santyago da Hwan dowasay. ³⁸ Ta nondasog san Hayro balay, tagdog ka manga taw gagran igwaraywayan wan, goraw ka anak natay. ³⁹ Is Hisos nonsakbaw, nalwang has taw, Yakana ham no gagran hanggan goraw? Ka anak idwa natay, matoyogan di. ⁴⁰ Ta kasay odin Hisos. Dapat is Hisos nafadokson fagayo fag manga taw. Ginya nataban ka anak it ama hanggan it ina, hanggan in Hisos nataban manga katogbong, ginya ta nasakbaw has basad oliyanan anak. ⁴¹ Is Hisos igtawid ka anak gamat, nafwayong kiti, Talita komi, sat sadili sanglitan. It kahologan nangos, Anak ina, hogfwayong hyamo, fakabangon wan. ⁴² Ginya ka anak ina dagos wanbangon a, iglahaw ya. Ka anak ina ha safolo ha dowak fangaraw it kadogayan. Fagayo fagayo fag manga taw indolaw waglag. ⁴³ Ginyas Hisos natogon fiya has taw kitay, Ham fag idwag fwayong nyawa haday ka hayo mata lagan. Ginya madis Hisos natogon has taw, Ham fahwanan fafa has anak ina.

¹ Is Hisos inlahaw wa ginya, nwali hat sadili banwanan. It manga katogbong natahin yadi hanya. ² No sas Sirang Kafahowayan, is Hisos igfaadal ya ngay has basad fanimbaan. Kaaywanon ka manga nadog in Hisos toltol, intaka wan, taglwang, To fag ama gindak nabol to? Kana fag kadonongan ka nafalobos hanya? Twa oman gibolon ka kitonya fag manga madolaw? ³ Bohonwa awkin to ka famanday balay, in Mariya anak, inda Santyago, da Hosi, da Hodas, da Simon fadwasay? Idwa awkin istay yadit manga fadwasay ina no maoliyanan? Yakanga tadwa katalinga in Hisos. ⁴ Ginyas Hisos nafwayong has taw, Nyawa siday manga taw magalang has fangampang, nodwa sat sadili banwanan, it sadili iba, ngatay sat sadili talanahan. ⁵ Is Hisos idwa nasyagan naibolon manga madolaw sinya, no bonwa sayok odi kat nafafiya ista manga sagit no nandog is taw. ⁶ Is Hisos ngap indolaw wan kawa tadwa katiwala hanya. Ginya madis Hisos nasafong has manga tifonan balay sas sokayan banwa, igtoltol yadi sinya. ⁷ Ginyas Hisos nafatifonan ya ka Safolo-ha-Dowa, nafalobos has taw it kangayanan hasagfaalin manga labang gis taw. ⁸ Natogon yadi hat manga katogbong kitay, Ham fag idwa ha balon ngadi kana sas lahawan, no bohonwa sokod odi hayo diya. Nyawa fanganon, nyawa boyog, nyawa kwarta sa hayo hagkos, fag idwa ha diya. ⁹ Dapat fag ha lapak di, fag idwa gosniban hayo rotay. ¹⁰ Ginya nafwayong yadi hat manga katogbong, Nyawa siday hayo nagdasogan fag balay, ham fag sinya wak gigya ham nodyag lahaw ginya fag banwanan. ¹¹ Nyawa sida fag foro ta nodwag fasakbaw hayo, nodwa yadig talinga hayo, ham no kalahaw ginya, fadagdagan ka fogis daga gi hayo manga bitis, bilang wagfaayfan ka taga sinya fag manga taw. Ginya madis Hisos nasogo ka Safolo-ha-Dowa ha sadik foro, ha sadik foro, myasa dowa, myasa dowa. ¹² Yakanga ka Safolo-ha-Dowa inlahaw wan, natoltol has taw kitay ta fag soyo wan. Ta fag dayo wasta manga ogali dwat. ¹³ Aywan fag manga labang kasta nafaalin gis taw. Ta naasnahi lana ogbot sasta baba alfoyo nogfafiya aywan ka ha manga fagdogon. ¹⁴ Gis nanya fag masohod, is Hirodis kasta gorangon sas sakop Galiliya, nadog yadi kan Hisos manga naibolon madolaw, maskin in Hisos ngayan inbantog wan. Tiba taw iglwang is Hisos kawas Hwan kagfatogna manga taw hyabi. Hanya hono, inbangon ya gis kahatayan, yakangas Hisos syagan gibolon manga madolaw. ¹⁵ Tibag lwang, To is Iliyas wan. Tibag lwang, To in Diyos fangampang sadi, kito mandi ka hyabi it manga fangampang. ¹⁶ Dapat is Hirodis, no nadog, nalwang, To kawa ngas Hwan, kangko nafalifong it liyog hyabi, dapat ay, inbangon ya. ¹⁷ Maskin hyabi, is Hirodis mandi ka nafagamat has manga taw in Hwan, nafagafos yadi, nafaporiso wan, kawas Hwan gato in Hirodis maskin is Hirodis nabol in Hirodiyas, it tagyaw, in Filipi babay. ¹⁸ Kawas Hwan igfwayong han Hirodis kitay, Idwa fiya haw no kagaw im tagyaw. ¹⁹ Is Hirodiyas kahori in Hwan, kasaya wagfahatay hanya, dapat bago bago idya syagan, ²⁰ maskin is Hirodis kadala in Hwan. Is Hirodis natwa kitay is Hwan sadik ama fiya it ogali, maliyaw, yakangas Hirodis gapin in Hwan. Is Hirodis kasayag talinga in Hwan manga toltol madi ngap, nyawa gadowan it fangayofan. ²¹ Dapat ay aban, is Hirodiyas nalag it halimbawan kaarakitay fahatayan in Hwan. Ta nogtohod in Hirodis kasagayan fag sirang, is Hirodis nafasyahod is taw kaaywanon fag manga hanon. Is Hirodis nafatawag it manga nahalig, ka ha manga kangayanan, ka manga fagtahinan has manga sondalo, hanggan kasta manga fakilalaon fag manga taw gis sakop Galiliya. ²² Araw in Hirodiyas anak ina, nasakbaw, natayok sasta faglagan manga ama. Is Hirodis, hanggan ka manga ama matokawan yadi sinya, igbaya waglag ka dayaga nogtayok. Ginyas Hirodis, ka gorangon, nafwayong has dayaga, Ho domisag hyamo nyawa kana kam fagsagadon gingko, nalwang ya domwag, ²³ Is Diyos igdog wan aho noglwang, bonwa bohag, nyawa kanam fagsagadon, ho domisag hyamo, nyawa hanggan wagboknga angko sakop. ²⁴ Ginya ka dayaga hawat ina, naintaw hanya, Kana araw angko sagadon? It ina nalwang kitay, Fag kawas Hwan, kagfatogna manga taw, fag it alfoyo im fagsagadon. ²⁵ Ginya madi ka dayaga infwali ya madali has gorangon, nanagad madali, iglwang, Ho kasaya nangos, in Hwan alfoyo basad finggan, ka Hwan kagfatogna manga taw hyabi, fag tonya kam disagon angko. ²⁶ Ginya madi yabay, ka gorangon is Hirodis inrongkot wa dahol it fangayofan. Dapat idwa nasyagan nabawit hampang kawat manga fakilalaon nadog wat nafatohoyan has dayaga haraw. ²⁷ Is Hirodis dagos nasogo sadik sondalo, nalwang, Lifongan in Hwan liyog a, diyan it alfoyo hastay. Ka sondalo hanya wan, nalifong in Hwan liyog basad porisowan. ²⁸ Ginya ta nadiya it alfoyo basad finggan, nadisag has dayaga, ginya madi ka dayaga nadisag hat ina. ²⁹ In Hwan manga katogbong, no nadog kitay ta nafahatay in Hwan, ta hawas porisowan, nabol in Hwan habilogan a, nafwalid basad lohib fanlobgobanan. ³⁰ Ka manga Fandiya-Barita nwali ya gis famaritaan. Ta natoltol han Hisos it manga naibolon fagayo fagayo hanggan it manga natoltol has taw. ³¹ Ginya madis Hisos nalwang hat manga katogbong, Tam hawas basad fakahyabogan, kaarakitay tam fahoway yap ogbot. Nalwang kitonya maskin kaaywanon fag manga taw igsaliwan wan, tadwa twa kwan hanon. ³² Yakanga ta nasahay baloto, hawas difay sayo fakahyabogan ngay, masamanan nangos gis taw. ³³ Dapat aywan nalag wan ta no kaginan, nalag kitay da Hisos wa tonya fag manga taw. Ta nandalandanan sas baba daga gis fagayo fag manga banwa, has bahalan danom. Ta nagona man inda Hisos indasog. ³⁴ Is Hisos no nadokson gis sahayan sat nakadagsaan, iglag ka manga taw kaaywanon. Hanyan awa waglag is taw, maskin ka manga taw bilang wa topa idwa ha gano taw. Ginyas Hisos natoltol kaaywanon fag manga bagay has taw. ³⁵ Ka myanit no kasangday wan, in Hisos manga katogbong hawan Hisos, nalwang, ³⁶ Tam istay basad fakahyabogan, kayabi wan. Falahawan yap nangos has manga tifonan balay sas ligongan ka manga taw kaarakitay ta manali ista sadili fanganon. ³⁷ Dapat is Hisos nasagot hat manga katogbong kitay, Fag ham wa ka domisag fanganon has taw. Ginya ta nasagot han Hisos, Mi manali awkin 200 dinariyo tinapay, ginya fahoray has taw? ³⁸ Ginyas Hisos nalwang hat manga katogbong kitay, Kayodak tinapay hayo diya? Famantay ngay. Ginya ta no namantay, taglwang, Lima di hanggan dowak oyang. ³⁹ Ginyas Hisos nafatokaw sas baba lamnonan ka manga taw, malayonan. ⁴⁰ Ginya ka manga taw intokaw wan, malayonan ngay. Tibak layonan sadik daan, tibak layonan limak safolo. ⁴¹ Ginya madis Hisos nabol ka limak tinapay, hanggan dowak oyang, natangdan has tongod a, nabaya in Diyos ka fanganon. Ginya nafaarogbotan ka tinapay a, nadisag hat manga katogbong kaarakitay homoray has taw. Ginya no nafaarogbotan ka dowak oyang, nahoray yadi has taw fagayo. ⁴² Ginya madi fagayo nangwan wa a, napsog wan. ⁴³ Ta natifon ista sawad nakanan mafaarogbotan, safolo ha dowak boyog napno manga tinapay hanggan oyang. ⁴⁴ Manga 5,000 ka manga ama ka nangwan tinapay. ⁴⁵ Is Hisos nafasahay wa dagos it manga katogbong, has basad baloto nafagona wa has difay linaw dahol, hawas banwa Bitsayda. Is Hisos in-goyan, nafaoli yap ka fakaaywanan fag manga taw. ⁴⁶ Ka manga taw nonlahaw di ngay, is Hisos nalahaw yadi wan has baba moyod kaarakitay mandarangin. ⁴⁷ Araw, nonyabi wan, ka baloto sawas fakabokngan linaw, is Hisos sadi odi sas baba daga. ⁴⁸ Ginya madis Hisos nalag kitay it manga katogbong kahori waglowag, kawa bagyo igsibwa wa has bohid. Dapat no kayawa wan, is Hisos naoyan yadi wat manga katogbong, nalahaw sas baba danom, kawas Hisos kasaya nangos gomona hasta fagonan. ⁴⁹ Dapat in Hisos manga katogbong no nalag in Hisos iglahaw sas baba danom, ta gayfan ngan wa labang. Tagharokyawan wan, ⁵⁰ kawa ta gafalad wan Hisos. Dapat is Hisos dagos nahampang has taw, nalwang, Fag marigon hayo fangayofan, aho di, ham fag idwa kadala. ⁵¹ Ginyas Hisos nasahay has basad sahayan. Ka bagyo dagos yadi wantolong. ⁵² Ta kadolaw waglag, kawa tadya twagdog no kinday is Hisos nafatimawa no nafaaywan ka tinapay, maskin tadyag syag orangan in Hisos. ⁵³ Ta no nadifay ka linaw dahol, tandagsa wan sas banwa Ginisarit, natarabing it baloto sinya. ⁵⁴ Ta nondokson gis basad sahayan, ka manga dan sinya fag manga taw is difay, dagos wa nahilala in Hisos. ⁵⁵ Dagos nasonson ka ha manga sagit git manga balay sas ligongan. Ta naanggong sasta baba fangigyanan kaarakitay domiya han Hisos. Nyawa ta sidak nadog in Hisos, ta hanya yadi wan. ⁵⁶ Nyawas Hisos haday kandasog, ta nafaigyan ka manga ha sagit sas manga faktaban balay, nyawas Hisos has manga tifonan balay sayok, nyawa has manga banwa dahol, nyawa has moyod, tagsagad kitay, Ha fatawidan yap man ka manga ha sagit, ngadim tobwan rotay, kaarakitay tamfiya wan. Fagayo ka natawid infiya wan.

¹ Ginya madi, gis banwa Hirosalim, ha manga Farisiyo hanggan ka mangag faadal Batasan Hodyo, naakbang in Hisos, ² taglag kitay in Hisos manga katogbong tiba, kwan hanon nyawadya naogas fiya fiya ista sadili gamat kito ka togon magorang fwayong. ³ Maskin ka manga Hodyo fagayo, labi man ka manga Farisiyo, tadwa kwan hanon nodya nanggonaw it manga gamat kito kasta kaogaliyan gis magorang hyabi. ⁴ Hanggan ta no goli gis fanaliyan, ta nodya nanggonaw it manga gamat kitonya, tadya kwan hanon. Tadwag liyam it manga ogali gis hagorangan kitay, fag kitonya no manga gogas it manga fanginoman, manga anglit, hanggan manga sangkap tanso. ⁵ Ginya ka manga Farisiyo hanggan ka mangag faadal ka Batasan Hodyo naintaw yadi han Hisos kitay, Kana mayon im manga katogbong no kaliyam wa ka manga ogali hyabi, gis manga magorang, kawat manga gamat idwan gonaw kito kantam ogali gis hyabi, ta no kwan hanon? ⁶ Is Hisos nalwang has taw kitay, Anod, kitonya ngay in Diyos fangampang Isayas fwayong kawa ha hayo, manga taw ka ha takan. Kito kanfwalid sat sorat kitay, Hampang odik masayagdog, Dapat ista fangayofan ayayo gingko. ⁷ Idwa ha kahologan ta nogsimba hangko, Maskin ogali odi taw kasta fagfaadalon. ⁸ Ham igfasigpala in Diyos togon, dapat ham matawidan fiya fiya has ogali magorang. ⁹ Is Hisos iglwang has taw, Anod ham, ham igdayo in Diyos togon kaarakitay hayo sadili fag manga ogali fagayo ka hayo fakatanogon. ¹⁰ Maskin is Mwisis nalwang kitay, Haw fag idwag falamang im ama hanggan im ina. Nalwang yadi kitay, No fakta ka kampang igsabayon, ngatay hat ama, ngatay hat ina, fiya man hanya no matay wan. ¹¹ Dapat ham iglwang, Nyawa faktaw noglwang, ngatay hat ama, ngatay hat ina, Kangko togbong hara hayo, ya Korban wan. It kahologan no Korban, nadisag wa han Diyos ka kitonya. ¹² Basta nalwang kitonya, gis nanya ham fawag fafalo tonya fag taw it ama hanggan it ina, nyawa kana. ¹³ No kitonya ham idwag fahalga in Diyos togon maskin ham igfalamang odig fadog hayo manga ogali has taw. Dapat aywan yadi fag manga bagay, bonwa kitay matoonan odi tonya, ka hayo fagfalamangon. ¹⁴ Ginyas Hisos nafaakbang ya hanya ka manga taw, iglwang kitay, Ham fagayo fagayo fag matalingan hangko. Ham fag tomwagdog kitay, ¹⁵ idwa ha fanganon igfadwat ista fangayofan, dapat gista basad fangayofan kagfadwat ista ogali. ¹⁶ Ham no ha manga talinga ya ngadi, fag talinga wan. ¹⁷ Is Hisos nonsakbaw ha basad balay, saman gis fakaaywanan taw, it manga katogbong naintaw hanya kat nafahalimbawa haraw, no kanat kahologan. ¹⁸ Ginyas Hisos nalwang hat manga katogbong kitay, Ham aw idwa yadi natwagdog? Ham awkin idwa twa kitay bonwa ka hanon kagfadwat ista ogali? ¹⁹ Ka hanon idwa has basad fangayofan, dapat ha odis basad tiyan, ginyam olay di aban. Maskin nafwayong kitonya, is Hisos nafatohoyan kitay idwa ha fagbaybayon fanganon. ²⁰ Ginyas Hisos iglwang, Kadi gis basad fangayofan taw kagfadwat it ogali. ²¹ Maskin gis fangayofan taw nogfabago ka gisip dwat, nyawa anahan nyawa dayaga nogdoyogan lamang, mangag nahaw, mangag fahatay taw, ²² mangag fabayowan, manga kaingli is taw. Ginya yadi ka manga dwat fag ogali, kitos igbalibad, mangadwa ha nahayan, hanggan igsadili odi, ka mangag fadwat igdog ka tiba, igfataka has manga taw, hanggan manga dwat fag hakot. ²³ Tonya fag manga dwat fag ogali fagayo gis basad fangayofan taw nogfabago, igfabali ka taw idwa fiya. ²⁴ Ginyas Hisos inlahaw ginya fag banwanan, hawas akbang banwa Tiro hanggan banwa Sidon. Is Hisos insakbaw sasta balay, no kitay di, kwangit igfadog has taw kitay hanyan dasog wan. Dapat, nyawa kitonya, taglag di hanya. ²⁵ Sinya ha sadik ina, it anak ina ogbot ha sadik labang igfahoriyan hanya. Ka ina no nadog kitay is Hisos sinya, hanya dagos wa naakbang in Hisos, nanlibabaan san Hisos dayo bitis. ²⁶ Tonya fag ina taga Sirofinisya, it fangampangan Girigo. To fag ina igfaaronganon in Hisos kitay, Faalinan ka labang gingko anak ina. ²⁷ Ginyas Hisos nasagot kitay, Idwa fiya bomol ka anak taw fanganon ginyag disag has manga ido. ²⁸ Dapat ka ina nasagot kitay, Anod, angko Fon, dapat nyawa di kasta manga ido sas daga fanganan, kwan ka manga anak tingaw ka kadagdag. ²⁹ Ginyas Hisos nalwang has ina kitay, Kawa haw nalwang kitonya, nyawa haw mwali wa kati, ka labang nalin wan gim anak ina. ³⁰ Ka ina nwali wa dagos hat balay, nalag it anak maigyanan sas baba sagmak. Kat ina nondasog, ka labang danwa nalin ginya fag anak. ³¹ Is Hisos nwali ya gis manga sakop Tiro, nadalan sas banwa Sidon hanggan wandasog sas Linaw Galiliya. Nadalan yadi sas sakop Safolok-Banwa fag banwanan. ³² Ka sinya fag manga taw nataban han Hisos sadik ama gabongkok, idwa twa kampang fiya. Tagfaaronganon in Hisos kitay nangos, in Hisos gamat fag manawid yap man ka ama boyon. ³³ Is Hisos nafasaman ka ama boyon gis fakaaywanan taw, natolsok it manga timoyo faniyo has ha bongkok fag manga talinga. Ginyas Hisos natofay a, nasapkid has ama baba dila. ³⁴ Ginyas Hisos, no nabantay has tongod, naayangasan a, nafwayong hanya, Ifata, sat sadili sanglitan. It kahologan, Fag katolas wan. ³⁵ Ginya madit talinga intolas wan, it tahod dila inlohas yadi a, ginya nahampang maslong. ³⁶ Is Hisos iglwang has manga taw kitay, Hawag fwayong has taw, ngadi siday. Dapat is Hisos nogbando has taw, kwangit igfadog, ta labi man igfwayong di ngap has taw. ³⁷ Tantaka wa dahol dahol igdog, tagfwadfwayongan kitay, In Hisos manga ibolon fagayo myasa wa fiya. Nafafiya ka gabongkok, ginyag dog ya. Nafafiya ka boyon, ginya ogali mandi, kampang mandi fiya fiya.

¹ Gis nanya fag manga masohod, sadi ya ginan taw kaaywanon nonbangkad han Hisos, tadwa ha hanon, hanggan is Hisos nafaakbang hanya it manga katogbong, iglwang kitay, ² Ho kaawa wa to fag manga taw kaaywanon, maskin kati tolo wak sirang ta no gofod intam, namin wat manga balon. ³ Aho nogfaoli was taw hat manga balay, ta no kalonos yapdi, tamlombay wat lonos boknga dalan, kawa tiba giwas fakaayayowan. ⁴ Ginyan Hisos manga katogbong nasagot hanya kiti, Kinda fag mapsog fanganon to fag manga taw istay, maskin tam sawas basad fakahyabogan. ⁵ Ginyas Hisos naintaw hat manga katogbong, Kayoday hayo tinapay is nyamo? Taglwang, Fito dik tinapay. ⁶ Ginyas Hisos nafatokaw ka manga taw sas baba daga a, nabol ka fitok tinapay. Nontabo wagbaya in Diyos, nafaarogbotan, ginya nadisag hat manga katogbong kaarakitay ta homoray has manga taw. Ginyat manga katogbong nangorayan wan has fakaaywanan. ⁷ Ha ofi yadi oyang ogbot. Ginya madi; is Hisos, no nabaya yadi han Diyos ka manga oyang, nalwang, Toy ham fahafodan yadi has taw. ⁸ Fagayo nangwan, napsog ya ngadi. Ta no natifon ista sawad nakanan fanganon mafaarogbotan, napno fitok baban. ⁹ Ka manga taw sinya manga ofat ik libot kaaywanan. ¹⁰ Is Hisos nafaoli wan ka fakaaywanan a, ginya madi nataban it manga katogbong, dagos nasahay has basad baloto, hawas akbang banwa Dalmanota. ¹¹ Ka manga Farisiyo inbangkad ya ngay han Hisos, nafabohondit toltol. Tagsagad kitay is Hisos fag ha falagon madolaw gin Diyos banwanan sam tongod, kawa tagsolay in Hisos. ¹² Yakangas Hisos inhori odit fangayofan, nalwang has taw kitay, Yakana ka kati fag masohod fag manga taw nogsagad falagon madolaw? Hogfwayong hayo, orongan wan hodwa ha falagon madolaw ha hayo, ham ka kati fag masohod fag manga taw. ¹³ Is Hisos nafatawas was taw. Ginya madi nasahay has baloto hawas difay linaw. ¹⁴ In Hisos manga katogbong idwa natohod nadiya it manga balon tinapay, sadi odi ista nadiya. ¹⁵ Ginyas Hisos iglwang hat manga katogbong kitay, Ham fag matagahan, fag idwa kasaya ka manga Farisiyo hanggan in Hirodis famadahol tinapay. ¹⁶ In Hisos manga katogbong nangarintawan no kanat kahologan in Hisos fwayong. Taglwang, Kawa tam idwa ha balon tinapay. ¹⁷ Kawas Hisos nadog ta nogtoltolan, hanyag Iwang kitay, Kana ham nagtoltolan yapdi kawa ham idwa ha balon tinapay? Ham awkin idya twagdog? Hayo fangayofan laya idyag dasog sinya, kawa maganit. ¹⁸ Kawa bilang odi bota, idwag lag, nyawa ha mata. Bilang odi bongkok, nyawa ham ha manga talinga. Ham awkin idwag tohod? ¹⁹ Aho no nafaarogbotan limak tinapay has 5,000 ama, kayodak boyog ka napno nafaarogbotan tinapay ka hayo naanggong kasta sawad nakanan? Ta nasagot in Hisos, Safolo ha dowa. Ginyas Hisos naintaw ya domwag, ²⁰ Sadi ya ginan aho no nafaarogbotan fitok tinapay has 4,000 kayodak baban ham igdog kasta sawad nakanan ka hayo naanggong itfagonan? Ta nasagot, Fito ya. ²¹ Ginyas Hisos nafwayong has taw, Ham awkin idya twagdog? ²² Da Hisos nondasog wan has banwa Bitsayda, ka manga taga sinya nataban sadik ama bota, galibitan wagfwayong han Hisos, is Hisos fag tomawid yap. ²³ Is Hisos nagamit ka ama bota, nafasaman yap gis taw, hawas dayo manga balay. Is Hisos natofay ka ama bota mata, ginya natawid ka ama, naintaw hanya, Kati hagdog awkin hanfoga wan? Haw awkin iglag wan? ²⁴ Ka ama namarantayon wan, iglwang, Hoglag manga taw bilang wa manga hayo iglahaw. ²⁵ Ginya, sadi ya ginan is Hisos nandog it mata, ginya ka ama igdoro wan, it mata infoga wa fiya fiya, nalag nyawa kana fag bagay. ²⁶ Is Hisos nafaoli ya ka ama, dapat iglwang kitay, Haw fag idwag dalan sas tifonan manga balay. ²⁷ Ginyas Hisos hanggan it manga katogbong nafadagos it lahawan. Hawas manga tifonan balay sas sakop Sisariya, ka Sisariya ka san gorangon Filipi sakop. Ta noglahaw yapdi, is Hisos naintaw hat manga katogbong kitay, Fakta hono aho, ta noglwang? ²⁸ Ginya madi ta nasagot han Hisos, Tiba taw noglwang, haw, hono, hyabi, is Hwan kagfatogna manga taw. Dapat tiba taw iglwang, haw kawas Iliyas hyabi, ginya tibag lwang, haw in Diyos fangampang sadi hyabi. ²⁹ Ginya madis Hisos naintaw ya domwag hat manga katogbong, Dapat no ham kaglwang, faktaw aho, ham gayfan? Is Pidro nasagot, Haw wa kan Diyos-natogon-Famawi. ³⁰ Ginyas Hisos nabando has taw kitay ta fag idyapdig fwayong nyawa hada fag taw kitay hanya in Diyosnatogon-Famawi. ³¹ Ginya madis Hisos bago digfadog hat manga katogbong kitay hanya, Kanbali Taw, omagwanta aywan fag manga mahori aban. Ka manga fagtahinan sas banwa, ka manga fagtahinan fagalan-han-Diyos, hanggan ka mangag faadal Batasan Hodyo domayo, hanggan wa fahatay hanya. Dapat ay aban, nomsagaya tolok sirang, hanyam boyag ya. ³² Is Hisos no nalwang kitonya, nafatigna fiya fiya. Ginyas Pidro nafasaman ogbot gis taw in Hisos, igfabago gato hanya. ³³ Dapat is Hisos nasayango hat manga katogbong tiba, naato in Pidro, nalwang, Satanas, fag lahaw wa gistay haw. Hadwa goyon in Diyos, haw goyon odis taw. ³⁴ Ginyas Hisos nafaakbang hanya ka fakaaywanan fag manga taw hanggan it manga katogbong, ginyag lwang, Nyawa faktaw no kasayag tahin angko, falibangan fagaba it sadili fakasayaon, fasanan it sadili fatimbangan hayo, ginya madi tahinan wangko. ³⁵ Maskin, nyawa faktaw, not sadili haboyagan it fagfahalgaon, tonyam liyam di, dapat ay, nyawa faktaw kadwa kwangit it sadili haboyagan kawa hangko, hanggan ka Fiya fag Barita, it haboyagan idwam liyam. ³⁶ Kana kat fakinabangon, ham gayfan, sadik taw no omafo sadi wak dahonya baba daga, halimbawa, dapat ay it sadili haboyagan nomliyam di aban? ³⁷ Kana ara it bayad kaarakitay bomawi it sadili haboyagan, ham gayfan? ³⁸ Maskin aban, aho, Kanbali Taw nombangkad ya, angko Ama kafiyan imlag sangko gis nanya, hanggan ka manga maliyaw fag anghil mahoyogan yadingko. Gis nanya aban ho maya wagfadog ista ngayan nyawa faktaw, hanya no kayag fadog angko ngayan hanggan angko manga hampang has manga taw, kati fag kasohodan, ka ha ogali dwat, hanggan dayog fasakop hangko.

¹ Is Hisos iglwang is taw, Hogfwayong hayo, bonwa bohag, tiba taw istay idya matay nodya lomag kitay is Diyos kabali wa hari, ha karigonan dahol. ² Nonsagaya onom ik sirang, is Hisos nafasaman git manga katogbong iba, inda Pidro, da Santyago, da Hwan, nataban ka tolo has baba moyod abwat. Ta no sinya wan, ta nalag in Hisos habilogan in-oman wan, fiya wa dahol kabantay, hanggan ³ it manga rotay it kaabohayan di masilaw wan, abohay wa dahol dahol, bondi kitos nabakbak non-abohay kat rotay, nyawa faktaw. ⁴ Da Pidro nalag inda Iliyas da Mwisis kampang han Hisos. ⁵ Yakangas Pidro nalwang han Hisos, Kafiyaon, hyami Fon. Tam fag istay yapdik madogayan. Mi fomalo hayo tolok dongdongan, insadi hyamo, insadi in Mwisis, insadi in Iliyas. ⁶ Is Pidro nalwang kitonya kawa ka tolok katogbong indala wa dahol iglag, yakangas Pidro gadaliyan wa kampang. ⁷ Ginya madi sadik linyabo nalanbong is taw. Gis basad linyabo ha nahampang, iglwang kiti, Toy angko fagalwasiyon fag anak, fag hanya ka hayo fagtalingaon. ⁸ Ginya da Pidro fadi wadnamarantayon madali hasta dayo, yabay tadwa ha lagan kasta ofod haraw, no bonwas Hisos lamang kasta lagan kan-goyan. ⁹ Araw, ta noglahaw has lwad, is Hisos natogon it manga katogbong kitay, Aho, Kanbali Taw, nodyan boyag ya gis kahatayan, ham hayap igfwayong has taw kan Diyos nafalag hayo kati haraw. ¹⁰ Yakanga da Pidro idyapdig fwayong has taw it lagan, dapat ta garintawan no kanat kahologan is Hisos no gwas kitay, hamboyag ya domwag gis kahatayan. ¹¹ Ta gintaw in Hisos, Kana mayon ka mangag faadal Batasan Hodyo noglwang kitay bago bago is Iliyas fag imbangkad yapdi? ¹² Is Hisos nasagot kitay, Bago bago is Iliyas imbangkad ya ngay, mamatalaga fagayo fag manga bagay. Kana mayon nonsorat yadi kitay, aywan angko fagagwantaon mahori, aho Kanbali Taw, manga taw yomod yadingko. ¹³ Dapat hogfwayong hayo, is Iliyas inbangkad wan. Manga taw naibolon ha hanya no kinda odista fakasayaon. In-anod wa ngap kito kansorat hyabi no kinday ha hanya. ¹⁴ Da Hisos nondasog hat manga katogbong tiba, ta nalag manga taw kaaywanon sasta ligongan. Ka mangag faadal Batasan Hodyo igfabodbohagan yadi in Hisos manga katogbong. ¹⁵ Ginya madi, ka manga taw ayo ayo, no nalag di ngay in Hisos, ta dagos wandolaw wa dahol. Ta nagobok hanya a, ta gintaw, Ha gindawan? ¹⁶ Is Hisos naintaw has taw, Kana ka hayo fagfabodbohaganon has taw? ¹⁷ Ginya madi sadik ama gis basad fakaaywanan taw nasagot in Hisos, iglwang kiti, Haw, kagfaadal has taw, ho nataban angko anak ama ha hayo, maskin sadik labang kagfaboyon, igfahoriyan hanya. ¹⁸ No siday no natoid, ka labang igfahakfo hanya marigon marigon, it bibig igboraan wan a, hanggan it ngifon garigitan wan. It habilogan di kagwang wan. Maskin di nga hogfaaronganon ha hyamo manga katogbong ta nangos faalinan ka labang, dapat tadwa nasyagan nafaalin. ¹⁹ Is Hisos nalwang has taw, Ham kawa ka kati fag masohod fag manga taw idyag syag angko. Ginahin ya kin aho nangos fag omofod yapdi hayo, ham gayfan? Kandogay da aho fag gagwanta yapdi hayo? Tabanan ka anak hastay. ²⁰ Ginya madi ta nataban ka anak han Hisos. Ka labang no nalag in Hisos, dagos wa nafakidkisayan ka anak, nafahakfo hanya has baba daga. Ka anak infolid wanfolid. It bibig igboraan wan. ²¹ Is Hisos naintaw hat ama, Kandogay day im anak no kito? Ka ama nasagot, Giwas ogbot ginan danwa kitonya. ²² Ka labang fagaba wagfahakfo angko anak has basad afoy, hanggan igfatogna has basad danom kaarakitay igdaog hanya. Dapat, haw no somyagan di, fakaawa wa hyami, togbongan yap hyami nangos. ²³ Is Hisos iglwang hanya kitay, Kana mayon haw noglwang kitay, Aho no somyagan di? Manga taw nogsyag angko nyawa kana im-anod wa ngay. ²⁴ Ka ama madali wa nasagot, nahampang marigon, iglwang, Hogsyag ha hyamo ngay. Haw noglag aho korang yapdi nogsyag ha hyamo, togbongan yap angko igsyag marigon. ²⁵ Ginyas Hisos no nalag ka fakaaywanan fag manga taw kabarangkadan ya ngay, is Hisos nangabaya ka labang. Nalwang hanya kitay, Haw, ka sadik labang kagfaboyon yagfabongkok ya, hogsogo wa hyamo, fag galin wa gis nwa fag anak. Ha fag fawa kafwali domwag hanya. ²⁶ Ginya ka labang no nafarokyaw ka anak hanggan nafahidkisayan wa dahol dahol, ginya yabay nalin wa ginya. Ka anak in-igyan wa baba daga, bilang wa natay. Yakanga aywan ka nalwang, Yabay yabay, natay wan. ²⁷ Dapat is Hisos natawid ka anak gamat a, nafabangon ka anak. Ginya ka anak nalindog ya. ²⁸ Is Hisos nonsakbaw has basad balay, it manga katogbong naintaw hanya, idwa sas manga taw fagdogan, Kana mayon mi nodwa nasyagan nafaalin tonya fag labang? ²⁹ Is Hisos nafwayong is taw, Kito fag labang idwa malin no bohonwa kitay ham domarangin mahogod. ³⁰ Da Hisos nalahaw wa ginya, nadalan sas sakop Galiliya. Is Hisos idwa kasayag fadog is taw kitay hanyan bangkad, ³¹ kaarakitay hayapdit manga katogbong nogfaadal. Is Hisos iglwang kitay, Ta kaakbang wa fagamat angko has taw aban, aho Kanbali Taw. Ta fahatay yadingko. Dapat ay nomsagaya tolok sirang, ahom boyag ya. ³² Dapat in Hisos manga katogbong idwa natwagdog kan Hisos faglwangon, ta kadala yadi gintaw hanya. ³³ Da Hisos indasog ya ngawan has banwa Kapirnaom. Ginya ta nonsakbaw wan hasta basad balay, is Hisos naintaw hat manga katogbong, Kana hayo fagdaraogon haraw sas boknga dalan? ³⁴ Dapat tadwa naawang, maskin it fagdaraogon sas dalan no faktaw sas taw ka abwat it kangayanan. ³⁵ Ginya madis Hisos no matokawan, nafaakbang ka Safolo-ha-Dowa. Ginyag lwang has taw, Fag bali man ista ginanan nyawa faktaw no kasaya kabali abwat man it kangayanan. Hanya fag imbali ista sogowan fagayo fagayo. ³⁶ Is Hisos nagamit sadik anak ogbot, nafalindog sasta fagbokngan. Ginya, is Hisos no nasafofo ka anak, iglwang has taw kitay, ³⁷ No faktaw kagtanggap sadik anak kito, maskin galwasi angko, aho yadi kat fagtanggapon. Kagtanggap yadingko bondi aho kat fagtanggapon, igtanggap yadi kagsogo angko. ³⁸ Is Hwan nafwayong in Hisos kitay, haw kagfaadal, Mi nalag sadik taw ka gwas hyamo ngayan nogfaalin manga labang. Mi nabando hanya maskin idwa gofod intam. ³⁹ Dapat is Hisos iglwang kitay, Ham fag idwag bando hanya maskin nyawa faktaw no gwas angko ngayan no gibolon manga madolaw, idwa lomibak angko madali. ⁴⁰ Maskin kadwag laban intam, intam yadi wa kaoyon. ⁴¹ Hogfwayong hayo, orongan wan, nyawa faktaw nogfainom hayo sadik ongot danom maskin ham in Diyos-natogon-Famawi sakop, matohoyanan wa kitay hanya tomanggap it fasalamat aban. ⁴² Nyawa faktaw nogfayayom has ogali dwat sadik anak ogbot to kagsyag angko, fiya man ha hanya ta no somiyok sadik bato gilingan mabyat sat boknga liyog kagfayayom has dwat, ginya omokas tonya fag taw ha basad dagat. ⁴³ Nom gamat ibolon kagtaban hyamo has ogali dwat, lifongan lamang tonya. Nyawam gamat nodwam dowa ha no hayap man has haboyagan, balay balay, fiya man has gamat no dowa haw nodyap man has fadosaan taw sas afoy kadwa kapsa. ⁴⁴ (Sinya manga olod idwa katay, idwa yadi kapsa ka afoy.) ⁴⁵ Nangos nom bitis lahawan kagtaban hyamo has ogali dwat, lifongan yadim bitis. Nyawam bitis nodwam dowa ha no hayap man has haboyagan, balay balay, fiya man has bitis no dowa haw nodyap man im-okas has fadosaan taw. ⁴⁶ (Sinya manga olod idwa katay, idwa yadi kapsa ka afoy.) ⁴⁷ Nom mata lagan man kagfasayag lag hyamo has ogali dwat, sowatan wam mata ka sadi, nyawam mata nodwam dowa ha no hayap man han Diyos sakop, balay balay, fiya man has mata no dowa haw nodyap man im-okas has fadosaaan taw. ⁴⁸ Sinya manga olod idwa katay, idwa yadi kapsa ka afoy. ⁴⁹ Fagayo im-aktom sas afoy kito yadi ka fanganon no ha asin. ⁵⁰ Tam fadi wadtwa kitay ka asin kafiyaon. Dapat ay, nonbol wat tamis, kinda odi nogfatamis ya ka asin, ham gayfan? Hayo manga fangayofan fag bilang wantamis kitos fanganon ha asin, ginya ham mangafiyan wa ha sadi ha sadi.

¹ Is Hisos nalahaw wa ginya, hawas manga banwanan sakop Hodiya, hawas difay safa Hordan yadi. Sadi ya ginan manga taw kaaywanon inbarangkadan ya ngay han Hisos. Is Hisos nafaadal has fakaaywanan kawa dandi kitonyat ogali. ² Ha manga Farisiyo gakbang han Hisos, igtikis wa nangos igfasalan hanya. Yakanga ta gintaw hanya kitay, Maangay di aw has Batasan Hodyo ka ama no omobon it babay? ³ Ginya madis Hisos iglwang has taw, Kinday in Mwisis togon hayo? ⁴ Ta nafwayong kiti, Is Mwisis igfaangay di ka ama no domisag yap fangobonan kasoratan hat babay bago di gobon hanya. ⁵ Dapat is Hisos igfwayong has taw, Kawa maganit hayo fangayofan yakangas Mwisis nasorat tonya fag togon. ⁶ Dapat gis bago bago, is Diyos no nahalig manga taw, nahalig ama hanggan ina. ⁷ Maskin kitonya, ka ama somaman git ama hanggan git ina, omofod hat babay. ⁸ Nyawa dowa haraw, tambali sadi di. Yakanga ginya ginan fawa dowa, inbali wa sadi. ⁹ Yakanga kan Diyos nafasadi, fag idwa ha taw igfasarowayan. ¹⁰ Araw no sas balay, in Hisos manga katogbong naintaw ya domwag in Hisos kawa has manga godgobonan. ¹¹ Ginyas Hisos nafwayong is taw, Nyawa fakta fag ama no gobon it babay, ginyag babay has iba ina, igfabayowan, ha kasalanan wan hat babay gona. ¹² Ka babay no omobon it indogan, ginya omindogan has iba ama igfabayowan yadi wan. ¹³ Ginya madi tagtaban manga anak han Hisos kaarakitay is Hisos tomawid ista manga anak. Dapat in Hisos manga katogbong nangabaya was taw. ¹⁴ Is Hisos no nalag it katogbong naibolon, inhori dit fangayofan, igfwayong hat manga katogbong kitay, Ham hawa kabaya ka manga anak no gakbang hangko. Ham fag idwag bando tonya, maskin ka manga ha fangayofan kitos anak ka omafo in Dios sakop. ¹⁵ Ham fag tohod kitay nyawa faktaw kat fangayofan kadwa kitos anak ogbot nogfasakop han Diyos, tonya fag taw idwam-aktom san Diyos sakop. ¹⁶ Ginya madis Hisos nasafofo ka manga anak a, nahampang mahoway, gayohap odi kaawa. ¹⁷ Da Hisos no kalahaw wan, sadik ama nadalandan han Hisos, nalingkohodan sat atobangan, naintaw hanya, Haw kagfaadal kafiyaon, kana ara angko ibolonon kaarakitay hombali ha haboyagan idwa ha katabowanan? ¹⁸ Ginyas Hisos naintaw ya hanya kitay, Kana haw no nalwang kitay aho fiya? Is Diyos lamang ka fiya. ¹⁹ Haw fadi wadtwa ka manga Batasan Hodyo kitay, Haw fag idwag fahatay taw, haw fag idwag fabayowan, haw fag idwag nahaw, haw fag idwag bangdan is taw, haw fag idwag daya iba taw, haw fag idwag falamang im ama hanggan im ina. ²⁰ Ka ama nasagot in Hisos, No kitay di, gingko ogbot ginan, ho katanog wa tonya fagayo. ²¹ Yabay is Hisos nogbantay hanya, kabaya waglag no kitay di. Ginyag lwang kiti, Dapat ha ha korang yapdi sadik fakatwawon. Haw fag goli yap, fag fasali im manga botang fagayo fagayo. Ginya fahafodan has manga myabog it manga sali. Yabay, no kitonya, haw ha kaakwaan san Diyos banwanan sam tongod. Ginya madi haw fag hayastay, tahinan wangko. ²² Ka ama kabayong odi, nalahaw wan, maskin hanya maakwa wa dahol. ²³ Ginya madis Hisos namarantayon has manga taw sat ligongan, nalwang hat manga katogbong kitay, Ka maakwa fag manga taw, mahorig fasakop han Diyos. ²⁴ In Hisos manga katogbong indolaw wagdog in Hisos fwayong. Dapat is Hisos naolit yat hampang has taw, nalwang kitay, Angko manga anak, mahori wa dahol igfasakop han Diyos. ²⁵ Malpos man ka hayopan kamilyo nogdalan has basad toho dagom, ha sadik taw maakwa nogfasakop han Diyos. ²⁶ In Hisos manga katogbong indolaw wa dahol igdog, ta gintaw in Hisos, No kitonya mangharaw, fakta fag manga taw kambawi? ²⁷ Ginyas Hisos no mabantayan hat manga katogbong, iglwang, No taw di, idwa ha somyagan omibolon tonya, dapat is Diyos syagan di omibolon fagayo fag manga bagay. ²⁸ Is Pidro igfwayong han Hisos kitay, Lag nga hami kati toy, mi naobon wa hyami akwa fagayo a, migtahin wa hyamo. ²⁹ Ginyas Hisos iglwang kitay, Hogfwayong wa hayo, bonwa bohag, nyawa faktaw no omobon yap it balay, ngatay it manga fadwasay, ngatay it ina, ngatay it ama, ngatay it manga anak, ngatay hanggan it manga daga, kawa ahot fagalwasiyon, hanggan angko Fiya fag Barita, ³⁰ hanya tomanggap kati kayonya fag gatos, nyawa manga balay, manga fadwasay, hanggan manga bilang wat ina, hanggan it manga anak, hanggan manga daga. Nyawa kitonya, manga taw igfahoriyan yapdi hanya. Ginya madi yabay, hanya lomag yadi haboyagan kadwa ha katabowanan gis nanya fag masohod nomdasog aban. ³¹ Nyawa kitonya, aywan ka gona omoyan man, hanggan ka goyan gomona wa aban. ³² Ginya madi da Hisos noglahaw has bohid, hawas banwa Hirosalim, is Hisos gona wa gona was taw. In Hisos manga katogbong kadolaw kitay is Hisos hawas Hirosalim. Ta kadala odi goyan. Is Hisos sadi ya ginan nafasaramanan ka Safolo-ha-Dowa gis fakaaywanan manga taw, ginyag fabago iglwang no kinday hanya no lomag mahori aban. ³³ Iglwang kitay, Yabay, tam hawas bohid has Hirosalim kati. No sinya wan, ta fagamat angko, aho Kanbali Taw, hasta manga fagtahinan fagalan-han-Diyos, hanggan has mangag faadal Batasan Hodyo. Tonya fag manga taw fatohoyan angko has kahatayan. Ta fabahala yadingko has manga Hintil. ³⁴ Ka manga Hintil yomod wangko, manga tomofay, manga bomakbak hanggan wa fahatay angko. Dapat ay, nomsagaya wa tolok sirang, ahom boyag ya. ³⁵ Ginya da Santyago da Hwan, in Sibidiyo manga anak naakbang han Hisos, iglwang kitay, Haw kagfaadal hyami, mi ha fagsagadon nangos gi hyamo, haw faangayan nangos. ³⁶ Is Hisos nasagot handa Santyago da Hwan, iglwang kitay, Kana ka hayo fagsagadon gingko? ³⁷ Ta nasagot in Hisos kiti, Aban, tam no sawam kafiyan, haw faangayan hyami fag ha kangayanan igtokaw sa hyamo akbang, insadi sam balis sihon, insadi sam balis wala. ³⁸ Dapat is Hisos nalwang has taw, Ham idwa twa hayo fagsagadon. Ham awkin syagan omagwanta ominom gingko fanginoman kahoriyan aban? Ham awkin syagan yadi fatogna hayo sas mahori, kito yadingko no fatogna angko aban? ³⁹ Taglwang, Ala, mi somyagan di. Ginyas Hisos iglwang has taw, Ham ominom ngay gingko fanginoman kahoriyan aban, hanggan ham fatogna hayo kito yadingko aban. ⁴⁰ Dapat bonwa aho ka bahalag fili no faktaw ka tomokaw aban sangko balis sihon, ngatay balis wala, dapat ka hayo faglwangon tokawan, danwan talaga no fakta fag manga taw ka tomokaw sinya. ⁴¹ Dapat in Hisos manga katogbong tiba, ka safolo, no nadog ista fagsagadon, ta kahori wa dahol inda Santyago da Hwan. ⁴² Yakangas Hisos nafaakbang ha hanya it manga katogbong fagayo, ginyag lwang, Ham fadi wadtwa ka manga gayfan kitay, hanya ka manga fagtahinan Hintil, ha takan nogbahala has taw, hanggan ista manga gorangon igbaya wagfasognod it sakop. ⁴³ Dapat ham fagayo fag idwa kitonya. Yatokitay, nyawa fakta sa hayo ka kasaya kabali abwat it kangayanan, fag kabali di ngap hayo sogowan. ⁴⁴ Nyawa faktaw ka kasaya kabali fagtahinan, fag kabali di ngap bilang hayo nasali sogowan. ⁴⁵ Kitongko, aho Kanbali Taw kanbangkad hastay, bonwa kitay aho kasta fagtogbongon, fag aho di ngap ka tomogbong is taw, hanggan igdisag angko haboyagan ka fangafiyan, kaarakitay tomobos has fakaaywanan taw. ⁴⁶ Ginya tandasog has banwa Hiriko, dapat ta noglahaw wa ginya, in Hisos manga katogbong hanggan ka fakaaywanan fag manga taw nahoyog yadi wan. Sadik ama bota, is Bartimiyo, fanagad fanagad odi, in Timiyo anak, matokawan sas bilog dalan. ⁴⁷ Is Bartimiyo, no nadog kitay is Hisos taga Nasarit kagdalan sinya, igtawag marigon, iglwang, Hisos, in Dabid hasokfonan anak, haw fakaawa wangko. ⁴⁸ Ginya madi ka fakaaywanan fag manga taw nangabaya in Bartimiyo, tadwag faawang nangos. Dapat kadahol di ngap nogtawag, mapiit wan, igtawag, In Dabid hasokfonan anak, fakaawa wangko. ⁴⁹ Ginyas Hisos intorosan, iglwang has taw kitay, Tawagan tonya fag ama. Ginya ta natawag ka ama bota, iglwang kiti, Hadwa ha fakadalaon. Fag lindog wan, is Hisos igtawag hyamo. ⁵⁰ Ka ama bota nabol it homot, nalokso, nalindog, naakbang in Hisos. ⁵¹ Ginyas Hisos naintaw hanya kitay, Kanam fakasayaon angko bato togbongon hyamo? Ginya ka ama bota nasagot hanya kitay, Haw kagfaadal has taw, angko mata fag imfoga ya nangos. ⁵² Is Hisos nasagot hanya kitay, Nyawa ha mwali kati, kawa haw igsyag wangko, im mata imfoga wa yabay. Gis nanya yadi dagos wanfogat mata, nalag wa fiya fiya. Yabay ka ama natahin wan Hisos.

¹ Kati yabay, ta kadasog wa has banwa Hirosalim. Araw ta nondasog sas Moyod Oliboan, sas akbang manga tifonan balay Bitfagi hanggan Bitanya, is Hisos nafagonat manga katogbong dowa. ² Is Hisos natogon kitay, Ham fag hawas masoson fag tifonan balay. Ham araw nomdasog sinya, ham dagos lomag sadik anak habayo libaba, matarabingan, idyapdi ha taw nasahay sinya. Lohasan it tarabing a, goyodan hastay. ³ No ha gintaw hayo kitay, Kana hayo fakamolon is nyamo? Ham fag lwang kitay, Kagfon intam kasayag sahay, fomwali ya araw, ngalay di. ⁴ Ginya ka dowak katogbong inlahaw, nalag ngay ka anak habayo sas boknga karsada, matarabingan sas bilog sakbawan balay. Ta nalohas it tarabing. ⁵ Ginya ka manga taw malindogan sasta akbang naintaw has dowak katogbong, Kana hayo fakamolon is nyamo noglohas ka anak habayo tarabing? ⁶ Ginya ta nasagot has taw kan Hisos togon fag manga hampang. Ginya madi ka manga taw nafadiya han Hisos manga katogbong ka anak habayo. ⁷ Ta nagoyod ka anak habayo han Hisos, nasagmak it manga rotay aba sas baba goyoy anak habayo, ginyas Hisos nasahay wan. ⁸ Kaaywanon fag manga taw nasagmak yadit manga rotay san Hisos fagonan lahawan. Tiba nabonggo manga sanga hayo galabongan gis talon, ginya ta nasagmak sas dalan san Hisos fagonan. ⁹ Ka manga taw ka gona in Hisos hanggan goyan igtarawagan marigon, taglwang, Kafiyaon kafiyaon, Ka kadasog hastay san Diyos ngayan, fag bomaya wan. ¹⁰ Is Dabid intam pinagka wa ama, it sakop ka kaakbang wamlag fag bomaya yadi wan. Kafiyaon ka san Diyos banwanan hayam tongod im tongod. ¹¹ Is Hisos hawas basad alad banwa Hirosalim a, nasakbaw yadi has basad Fanimbaan-Dahol. Ginya madi, no namarantayan di nga sat ligongan, is Hisos nadokson ya, igtaban ka Safolo-ha-Dowa has Bitanya, kawa kayabi wan. ¹² Nonsirang wan, ta no kafwali ya gis Bitanya, is Hisos kalonos wan sas boknga dalan. ¹³ Is Hisos no nalag sadik fon igos malabong, ayayo yapdi, nagobok has fon igos maskin gayfan ngandayo ha bohad. Dapat is Hisos no akbang wan has fon igos, idwa ha lagan bohad sinya fag fon, manga odi labong maskin idya famolon manga bohad igos. ¹⁴ Is Hisos iglwang has fon igos, Fag idwa ha taw homwan domwag bohad igos gistay fag fon. In Hisos manga katogbong nadog it hampang. ¹⁵ Ginya madi ta nondasog wa sas Hirosalim, is Hisos nasakbaw basad aladan Fanimbaan-Dahol a, dagos nasogo has dayo alad ka mangag balidya hanggan igsali sas basad aladan. Nafatobong lamang kasta fwalidan kagbalyo kwarta hanggan ka mangag balidya salompati manga tokawan. ¹⁶ Is Hisos kwangit igfalahaw has basad aladan Fanimbaan-Dahol nyawa faktaw no ha diya. ¹⁷ Is Hisos nafaadal has taw kitay, Gwadi insorat san Diyos kasoratan kitay, Sas fagayo fag layonan taw, ta fag ngomayan angko balay, Balay Fandaranginan, Dapat ham nafabali angko balay oliyanan odi manga fangnahaw. ¹⁸ Ka manga fagtahinan fagalan-han-Diyos hanggan ka mangag faadal Batasan Hodyo nadog in Hisos fwayong. Yakanga ta gisip no kinda nangos ta nogdaog in Hisos, maskin ta kadala hanya, kawa ka fakaaywanan intaka wagdog in Hisos adal. ¹⁹ No kayabi wan, da Hisos inlahaw gis basad banwa. ²⁰ Nonsirang, da Hisos no hanya ya has basad Hirosalim, ta nalag tonya fag fon igos, hanggan wat manga dalid intonga wan. ²¹ Is Pidro natohod in Hisos sabayon, yakangag lwang hanya, Haw kagfon hyami, fanlag kin, tonya fag fon igos, kam nasabayon, intonga wan. ²² Is Hisos nalwang hat manga katogbong kitay, Ham fag syag fagaba han Diyos. ²³ Hogfwayong hayo kitay bonwa bohag, nyawa faktaw no lomwang toy fag moyod, Haw fag galin wa gis nyamo, loksowan ha basad dagat, tonya fag taw nodwa gadowan it fangayofan, dapat sadi wak fangayofan igsyag kitay im-anod wat fwayong, orongan wam-anod kitonya. ²⁴ Yakanga, hogfwayong hayo, ham nogsyag kitay ham tomanggap gin Diyos hayo fagdaranginon, ham tomanggap wa tonya. ²⁵ No ginahin ham nogdarangin, taw no ha nafahoriyan hayo, ham fag faliyam tonya, kaarakitay hayo Ama ka sat banwanan sam tongod, mamaliyam yadi hayo manga naogali dwat. ²⁶ (Dapat ham nodwag faliyam kasta nafahoriyan hayo, hayo Ama sam tongod idwa yadi mamaliyam hayo manga naogali dwat.) ²⁷ Ta nonfwali ya has banwa Hirosalim, is Hisos igsakbaw ya domwag has basad aladan Fanimbaan-Dahol. Manga fagtahinan fagalan-han-Diyos, hanggan ka mangag faadal Batasan Hodyo, hanggan ka manga fagtahinan sas banwa naakbang han Hisos. ²⁸ Ta gintaw hanya kiti, Kanam kangayanan haw no gibolon to fag manga bagay? Fakta ka nadisag hyamo kangayanan gibolon kitonya? ²⁹ Is Hisos nasagot has taw, iglwang, Ho ngap omintaw yadi hayo, ham sagotan angko, ho bago di fomwayong ha hayo no kana kangko kangayanan gibolon to fag manga bagay. ³⁰ Ginda kan-ginan in Hwan kangayanan igfatogna manga taw, ngatay gim tongod, ngatay gis taw? ³¹ Ginya madi tagfabarohagan ha sadi ha sadi, taglwang, Tam no lomwang, Giwam tongod, is Hisos lomwang, Kana mayon ham nodwa katiwala in Hwan hyabi? ³² Dapat tam no lomwang, Gi odis taw, tam kadala has fakaaywanan, maskin ta katiwala kitay is Hwan in Diyos fangampang orongan. ³³ Yakanga ta nasagot in Hisos kitay, Midwa twa, Ginyas Hisos nafwayong, Hodwa yadi fomwayong hayo no ginday angko kangayanan gibolon to fag manga bagay.

¹ Is Hisos igfabago igfahalimbawa ya has taw iglwang kitay, Ha sadik taw nananom manga obas sat baba daga, maaladan ya ngadi. Natigib dalifi yadi ista fanlidan obas. Nahalig sadik ansagan abwat, ista bantayan, nafabahala it obasan hat manga fangano, ginya nalahaw hawas ayayo. ² Nondasog was famohadon, famangtaon wan, kagfon obasan nasogo wat sogowan sadi kaarakitay mamol ista horay hanya bohad obas. ³ Dapat ay ka manga gano obasan nabakbak di ngap kat fon sogowan. Ta nafaoli wa gominan, idwa ha diya. ⁴ Ginya kagfon obasan nasogo has manga gano obas, sadi yak sogowan. Ta kaisog ya ngay hanya, nafabaran hat boknga alfoyo. Ta nafahayan ya ngadi hanya. ⁵ Fatolo wa ginan kagfon obasan nasogot sogowan. Ta nafahatay wa hanya. Hanggan wa ka tiba sogowan ayo dogay dogay. Tiba ta nabakbak yap man, dapat tiba ta nafahatay wan. ⁶ No dogay, ka odit fakaawaon fag anak ama kan-goyan sa hanya. Yakanga hanya ka goyan goyan kat nasogo. It fangayofan iglwang kitay, Gwadi ta gomalang wa nangos angko anak. ⁷ Dapat ka manga gano tanom nanoltolan yap kiti, To wa aba ka omafo it ama kaakwaan. Kalibang, tam fahatay wa hanya, ngan aba tam wa ka omafo ka obasan. ⁸ Yakanga ta nagamat hanggan wa nafahatay hanya, ginya naokas lamang it habilogan has dayo alad obasan. ⁹ Kinday nangos ham gayfan, kagfon obasan ibolonon hat manga fangano? Anod, hanyam bangkad, fahatay yadi wa ka manga gano, ginya faano ya has iba taw. ¹⁰ Ham idya awkin nabasa to fag toltolan gis Kasoratan? Ka manga fangalig balay fagdayoon fag bato, Tonya di ngap kagfaganit ka balay sas basad solok. ¹¹ Tam kadolaw waglag, To in Diyos naibolon. ¹² Yakangan Hisos manga kahampang kasaya gomamat hanya, maskin ta nasalom kitay hawa ngap ista manga sadili in Hisos fagfatangonon sat natoltol halimbawa. Dapat tadyapdi nagamat in Hisos kawa ta kadala ka fakaaywanan fag manga taw. Yakanga gis nanya ta nwali yapdi, naobon wan Hisos. ¹³ Ginya madi ta nasogo han Hisos manga Farisiyo hanggan tiba gin Gorangon Hirodis manga sakop, kaarakitay igsayak fabangdanan gin Hisos hampang. ¹⁴ Tagmaswag odi hanya, taglwang kitay, Haw kagfaadal has taw, mi twa kitay haw idwag bohag, haw idwa ha fagihidon taw, maskin hagfapariho wan di fagayo fag manga taw, hanggan sonson wa orongan kam faadalon has taw kan Diyos fakasayaon ista manga ogaliyon. Maangay awkin sas Batasan Hodyo tam nogbayad bohis han Sisar, ngatay idwan? ¹⁵ Ngatay tam fag bohis yadi, ngatay fag idwan? Dapat maskin is Hisos twa kitay tagfataka odi, is Hisos igsagot has taw, iglwang kitay, Kana mayon ham nogtikis wa nangos igfasalan angko? Falagan angko sadik kwarta mabilog, diyan hastay. ¹⁶ Ginya ta nafalag ngay sadik kwarta mabilog han Hisos. Is Hisos naintaw has manga taw kiti, Gafo tolad hanggan ngayan insorat istay? Tagsagot, In Sisar wa nga tolad tonya. ¹⁷ Ginyas Hisos iglwang has taw, Kan Sisar disagan wa han Sisar, kan Diyos disagan wa han Diyos. Tandolaw wagdog in Hisos sagot. ¹⁸ Ginya madi manga Sadosiyo, kagfabohag kitay ka manga natay idwam boyag ya domwag, gakbang han Hisos. Taglwang kitay, ¹⁹ Haw kagfaadal has taw, is Mwisis nasorat it togon hantam kitay, Sadik ama no ha fadwasay ama natay, dapat it babay in-goyan dit indogan, idwa ha anak, ka ama fag babay kat tagyaw ka balo, kaarakitay no ganak, bilang man di ka natay it ama. ²⁰ Yabay ha tasayan fitok ama kagdowasayan. Kasta ahan nababay, ya ginya no katay idya ha anak. ²¹ Ka masoson it ahan nababay yat tagyaw kanbalo, dapat natay yadi wan, idwa yadi ha anak. Kitonya yadit fatolo wan. ²² Hanggan wa kat fafito fag indogan, ka ina idyadi wa naanak. No natay wa fagayo fag tasayan ama, hanggan ka ina natay yadi wan. ²³ Yabay, gafo babay tonya fag ina ta nomboyag ya aban, kawa ka fitok tasayan nababay hanya istay? ²⁴ Is Hisos nasagot is taw, nalwang kitay, Ham fagaba wagfalamang maskin ham idwa twa ka Kasoratan hanggan ham idwa yadi twa in Diyos karigonan. ²⁵ Maskin manga taw nomboyag ya gis kahatayan, manga taw fawag babay, gindogan gis nanya aban. Tambali kitos manga anghil san Diyos banwanan sam tongod kadwa yadig babay. ²⁶ Dapat ay, kawa has manga natay no kaboyag ya, ham idwa awkin nabasa gin Mwisis nasorat, kawa no sas kakbang fon hayo libaba hyabi, is Diyos nafwayong hanya kitay, Aho in Abraham wa Diyos, aho in Isaak wa Diyos, hanggan in Hakob yadi Diyos. ²⁷ Ka manga taw boyagan lamang kan Diyos fagsakopon, bonwa ka manga mahatayan. Ham noglwang kitay taw idwam boyag ya, ham igfalamang wa orongan. ²⁸ Kati kati haraw, sadik ama kagfaadal Batasan Hodyo naakbang inda Hisos. Nadog manga taw nogdaraogan hanggan nadog yadi in Hisos sagot kafiyaon. Yakanga, hanya naintaw yadin Hisos, Sida fag togon sas Batasan Hodyo ka marigon man has fagayo fagayo? ²⁹ In Hisos sagot kitay, To fag togon ka marigon man has fagayo fagayo kitay, Ham, in Israil manga ha sokfonan, ham fag matalingan, is Diyos kagfon intam sadi lamang, idwa ha akwa tiba Diyos. ³⁰ Haw fag galwasi in Diyos kagfon hyamo, fag sadi wak dahonya fangayofan, sadi wak dahonya isip hanggan sadi wak dahonya karigonan. ³¹ It fadowa fag togon kiti, Haw fag galwasi im kapariho taw kito yadim sadili. Idwa ha togon iba marigon man to fag manga togon. ³² Ginya kagfaadal Batasan Hodyo nalwang han Hisos kitay, Anod, haw kagfaadal is taw, orongan wan hyamo fwayong, Is Diyos sadi di. Idwa ha akwa tiba Diyos. ³³ No galwasi hanya sadi wak dahonya fangayofan, sadi wak dahonya isip, hanggan sadi wak dahonya karigonan, hanggan no galwasi intam kapariho taw, kito yadintam sadili, tonya fagayo nom anod, bondi kito kantam manga nasogba hayopan kan irog sadik dahonya, hanggan tiba disagon fangafiyan. ³⁴ Ginyas Hisos no nadog kafiyaon it sagot, iglwang kitay, Haw mangharaw akbang han Diyos sakop. Ginya wa ginan fagayo fag manga taw fawag fasolopan han Hisos kaarakitay omintaw hanya, maskin tadwa syagan igfasalan hanya. ³⁵ Is Hisos nogfaadal is taw basad aladan Fanimbaan-Dahol, iglwang kitay, Kana mayon ka mangag faadal Batasan Hodyo noglwang kitay, In Diyos-natogon-Famawi in Dabid wa hasokfonan anak? ³⁶ Kawa ka Maliyaw fag Falad nogfaisip in Dabid, hanya mandi kaglwang, Is Diyos nafwayong hasagfon angko, Haw fag matokawan yap sangko balis sihon, no baliday hodya nafasakop fiya fiya ha hyamo im manga kaaway. ³⁷ Yabay is Dabid mandi kagngayan in Diyos-natogon-Famawi, kagfon hanya. Kinday hanya nogfon in Dabid, not sadili odi hasokfonan anak, ham gayfan? Ka fakaaywanan fag manga taw nabaya wagdog in Hisos fwayong. ³⁸ Is Hisos nogfaadal has taw, igfwayong kiti, Ham fag idwag sokfon ka mangag faadal Batasan Hodyo it manga ogali. Ta kasayag solong manga rotay aba aba, hanggan ta gwayan wa kasayag dog manga taw nogbaya hanya ta noglahaw basad banwa. ³⁹ No sas basad manga fanimbaan ta kasayag tokaw sas fanokawan ka manga ha kangayanan, hanggan ka manga fanokawan akbang hasagfon balay no sasta fanyahodan hanon aywan. ⁴⁰ Bohondi tonya, taglogos wa ngap manga ina balo banwanan, hanggan ista odi famadogan is taw ta nogdarangin kadogayon. Ka fadosaan kamtohoyan has taw aban mahori man ka tiba taw. ⁴¹ Is Hisos natokaw sas akbang haban ista fandisagan kwarta basad Fanimbaan-Dahol. Is Hisos mabantayan manga taw kaaywanon nogfwalid kwarta sinya. Kaaywanon fag manga taw maakwa, aywan it manga nafwalid kwarta sinya. ⁴² Ginya madi sadik ina balo myabog naakbang has haban, nafwalid sinya dowak saga, it halga nangos idya sika walo. ⁴³ Ginyas Hisos nafaakbang hanya it manga katogbong, nalwang kitay, Hogfwayong hayo, bonwa bohag, to fag ina balo myabog, it disag mahalga man kasta disag fagayo. ⁴⁴ Maskin ka tiba nadisag gi odista sadili labi kwarta, dapat to fag ina balo myabog, nadisag wa ka hanya sadik kayonya.

¹ Da Hisos nogdokson gis basad aladan Fanimbaan-Dahol, it katogbong sadi iglwang kitay, Haw kagfaadal, lag nga kin, to fag manga bato gorangon, hanggan dahol fag manga balay, kafiyaon kabantay. ² Dapat is Hisos nasagot kitay, Nyawa kitay kati haglag kafiyaon to fag manga balay gorangon, aban idwa hamgoyan dowak bato igtarongbawan, fagayo imrofad lamang. ³ Araw, da Hisos no matokawan sas baba Moyod Oliboan, sas masohod Fanimbaan-Dahol, da Pidro da Santyago da Hwan da Andris naintaw in Hisos, idwa sasta fagdogan fakaaywanan, ⁴ iglwang kitay, Ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay to fag manga bagay kaanod wan? ⁵ Ginyas Hisos iglwang has taw kitay, Ham fag matagahan. Ham fag idwa gadayaan nyawa faktaw, ⁶ maskin aywan kambangkad aban, ngomayan yadingko ngayan, lomwang hanya wa kan Diyos-natogon-Famawi. Ta fatalang aywan fag manga taw aban. ⁷ Ham no domog aban ka manga madalagdog gis awayan, hanggan manga barita awayan dahol dahol, ham fag idwa galibitan, maskin talaga wa kitonya kamlag aban, dapat bonya tonya ka katabowanan. ⁸ Maskin aban ka manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. No sida no siday aban ka daga lominog, ha manga banwanan idwa aba ha hanon hanon, dapat to fagayo kat fabagowanan lamang kahoriyan. ⁹ Ham fag matagahan hayo sadili maskin ta fagamat hayo hasagtalinga hampangan aban. Ta fabakbak hayo sas manga fanimbaan Hodyo. Maskin aho hayo fagalwasiyon, ham aba lomindog sas atobangan manga gobirnador hanggan manga gorangon, ham mamaorongan yadi sasta fagdogan. ¹⁰ Dapat ay, ta nodya natoltol fiya fiya ka Fiya fag Barita has fagayo fag manga layonan taw, ka katabowanan fagayo idyam lag. ¹¹ Ta nogtaban hayo hasagtalinga hampangan, hanggan fagamat hayo has taw, ham fag idwa galibitan hayo bato fwayongon, dapat no kana ka nafatohod hayo gis nanya, fag tonya wan kam fwayongon, maskin im hampang aban idwa gi hayo sadili fangayofan, dapat gis Falad Maliyaw ka faisip hayo. ¹² Gis nanya fag masohod aban, kayadit fadwasay kagfagamat it fadwasay has iba taw kaarakitay ta fahatay hanya, kitonya yadi kat ama hat sadili yadi anak. Manga anak lomaban it magorang, fasognod has iba taw kitay fahatayan wan. ¹³ Maskin aho hayo fagalwasiyon, fagayo fag manga taw kadwat iglag hayo aban. Dapat kadwag fagomon hanggan wa has katabowanan, yabay hanya wa kambawi. ¹⁴ Dapat aban ham lomag kagsagaya wa ogali fag dwat, idwa ha fag kitonyan infwalid sas idwa fiya fwalidan. Kagbasa fag tomwa wagdog tonya. Nom-anod aban, ka manga taw sas sakop Hodiya, fag dan waglagyo has moyod. ¹⁵ Ka sas sokayan balay fag idwam libang somakbaw domwag has basad balay kaarakitay bomol it botang. ¹⁶ Ka sas iyab, fag fawa goli kaarakitay bomol it rotay. ¹⁷ Isyay wan, no ka yangadi manga gabosog hanggan ka ha manga anak ogbot, igfasoso yapdi gis nanya fag masohod aban. ¹⁸ Ham fag darangin kakitay to fag manga bagay fag idwa tomoon dayo abagat. ¹⁹ Maskin gis nanya fag manga sirang manga taw domog mahori wa dahol dahol. Gi yapdis hyabi, is Diyos no bago di nahalig ka daga, balis kati, tadya ha nagdogan kitonya fag mahori, hanggan idwa yadi domog mahori man inya aban. ²⁰ No bonwas Diyos kagfatohas ngalay tonya fag manga mahori, idwa hamsawad manga taw, ngadi sadi. Dapat ay, maskin is Diyos kaawa yapdit manga nafili fag manga taw, hanya ngalay digfatohas tonya fag manga mahori. ²¹ Aban, no ha akwag fwayong ha hayo kitay, Istay wan kan Diyos-natogon-Famawi, ngatay sinya wan, ham fag idwa katiwala. ²² Aban ha akwa mangag faniring in Diyos-natogon-Famawi. Ha akwa yadi manga bohagon fag fangampang imbangkad. Ta mamalag aban manga madolaw fag manga falagon, hanggan manga fatimawa, kaarakitay fatalang in Diyos manga nafili, no somyagan di. ²³ Yabay, ham fag matagahan. Ho dan wa nafadog hayo fagayo kamlag aban. ²⁴ Dapat gis nanya fag manga sirang, tonya fag manga kahoriyan nomtolas wan, Ka myanit imharom, Ka magdanon idwa yomawa. ²⁵ Ka manga fanggasan imdagdag yadi gis banwa sam tongod, Hanggan ka manga karigonan sam tongod sas boknga fakayawan imhadhawigan wan. ²⁶ Ginya madi ta lomag angko, aho Kanbali Taw, kadasog sas baba linyabo, ha karigonan dahol hanggan kangayanan abwat. ²⁷ Ginya madi aho, Kanbali Taw, somogo angko manga anghil, fatifon angko manga nafili fag manga taw gis ofat ik fongfongan daga gis fagayo fag manga banwanan. ²⁸ Ham fag twagdog ka adal kawa gis fon igos. Nogsalingsing, igsofot wan, tam twa kitay ka fangaraw kaakbang wan. ²⁹ Kitonya yadi ham noglag to kangko manga nafwayong kaanod wan, ham tomwa kitay aho, Kanbali Taw, kaakbang wa kadasog, sawas sakbawan alad. ³⁰ Hogfwayong hayo, bonwa bohag, to fagayo im-anod wan ka kati fag masohod fag manga taw no boyagan yapdi. ³¹ Ka banwa sam tongod, hanggan ka daga imliyam wa aban, dapat ay angko hampang idwam liyam nyawa ginahin. ³² Dapat idwa ha taw twa no ginahin fag sirang, no kana fag oras gis nanya tonya nom-anod. Nyawa ka manga anghil ka san Diyos banwanan sam tongod, nyawa aho in Diyos anak, no bohonwas Diyos angko Ama, idwa ha twa no ginahin. ³³ Ham fag matagahan, fag danwa matalagan maskin ham idwa twa no ginahin fag masohod kangko nafwayong nom-anod. ³⁴ Kitos sadik taw mamaklay has ayayo, halimbawa. No kalahaw igtogon yap igfaano it manga sangkap has taw, igfahafod hat manga sogowan ista bato ibolonon. Ginyag togon yadi hasagbantay sakbawan kitay, fag fagaba matanodan. ³⁵ Kitonya yadi ham fag matagahan maskin ham idwa twa no ginahin kagfon balay nomdasog, ngatay kayabi, ngatay boknga yabi, ngatay manok igtaraokan wan, ngatay dayo marom marom. ³⁶ Ngandayo hanyam dasog sadi odi ginan, tomahod hayo kalibang odi matoyogan. ³⁷ Kangko fwayong ha hayo, hogfadog yadi has fagayo fag manga taw, ham fag danwa matagahan.

¹ Kati dowa yak yabi bago dista Fanohodan Nagsagayan, ta nogtohod ka anghil nogsagaya ista balay hyabi, hanggan ka Fanohodan Tinapay Mayangfis. Ka manga fagtahinan fagalan-han-Diyos, hanggan ka mangag faadal Batasan Hodyo, igsayak it halimbawan no kinday ara ta no gomamat mafyaloman in Hisos hanggan wagfahatay hanya. ² Maskin fag idwa hono sas Fanohodan, ngandayo manga taw mangagran wan. ³ Da Hisos no sawas Bitanya san Simon balay, ka Simon ka ha kitong hyabi, sadik ina naakbang in Hisos, ha diya sohadan alabastoro fag bato, napno famabanglo nardo, idwa ha aktom iba, dahol it sali. Is Hisos no sas bilog fanganan, ka ina nabolang ka sohadan, nabohos ka famabanglo han Hisos boknga alfoyo. ⁴ Dapat ha manga taw tiba sinya kahori odit manga fangayofan. Ista fangayofan iglwang, Anogon di famabanglo, ⁵ balay balay no nafasali yapman tonya, bondi tolok gatos dinaryo haraw, ginyan disag has manga myabog it sali. Ta nangabaya ka ina. ⁶ Dapat is Hisos nalwang kitay, Ham fabayaanan wa ka ina, kana ham no kabaya hanya? Kafiyaon to kat naibolon hangko. ⁷ Maskin ka manga myabog idwa ha fagalinan gi hayo akbang, nyawa ginahin ham no kasayag togbong has myabog, ham tomwa wan, dapat aho idwa fagaba maofodan hayo aban. ⁸ Ka ina naiblon kat fagsyaganon kati, nagona wa nabohos famabanglo, maskin igfatalaga angko habilogan has lobgoban aban. ⁹ Hogfwayong hayo, bonwa bohag, nyawa siday, sadik baba daga, ta no tomoltol ka Fiya fag Barita aban, ta fagaba wa aba omowas to fag ina it naibolon, yakanga tomohod hanya fagaba. ¹⁰ Ginyas Hodas Israkiyoti, ka sadi gis Safolo-ha-Dowa, hawas manga fagtahinan fagalan-han-Diyos kaarakitay goyon in Hisos manga kalaban. ¹¹ Ka manga fagtahinan fagalan igbaya wan ta no nadog kitay is Hodas goyon is taw. Taglwang ta tomangdan ara hanya. Ginya wa ginan is Hodas gisip no ginahin no somyagan wa fagamat has taw in Hisos. ¹² Ka sirang gona ta no kwan Tinapay Mayangfis indasog wan hanggan gis nanya yadi fag sirang tagsogba ka anak topa fangafiyan kawa hasta Yafon Fanohodan Nagsagayan. In Hisos manga katogbong naintaw hanya, kitay, Siday nangos araw hyamo fakasayaon hami nogfatalaga intam Yafon Fanohodan Nagsagayan? ¹³ Is Hisos nasogot katogbong dowa, nalwang kitay, Ham, fag hawas basad banwa. Ham homablang araw sadik ama ka ha songgoy tapayan fwalidan danom. Ham tahinan wa hanya. ¹⁴ Nyawa haday hanya no somakbaw, intawan hasagfon balay, fag lwang kitay, Kagfaadal has taw iglwang, Siday fag lingoban araw angko fasakbawan famaklay kaarakitay manayowan yadi, angko manga katogbong no kwan intam Yafon Fanohodan Nagsagayan? ¹⁵ Hanya falag ara hayo sadik lingoban dahol, matalagaan, sas tongod fag salogan. Ham fag fatalaga intam Yafon sinya. ¹⁶ Ginya madi in Hisos manga katogbong inlahaw wan, hawas banwa, hanggan ta nalag wa fagayo kito kan Hisos fwayong, yakanga ta sinya wak nafatalaga ista Yafon Fanohodan Nagsagayan. ¹⁷ Ginya madi araw, no kayabi wan, is Hisos hanggan it manga katogbong, safolo ha dowa, ta fagayo sinya wan. ¹⁸ Ta no sas bilog fanganan, kwan yapdi, is Hisos iglwang, Hogfwayong ha hayo, bonwa bohag, insadi sa hayo kaoyon angko kalaban, sadi kagsayo angko kati. ¹⁹ Ginya madi ka manga katogbong inrongkot wagdog, igsadig sadi gintaw kitay, Aho awkin kam faglwangon? ²⁰ Is Hisos nasagot kitay, Sadi sas Safolo-ha-Dowa, angko kasayo kati igtogna tinapay sas basad mangkok. ²¹ Maskin aho, Kanbali Taw, kaakbang wa kalahaw kito kansorat hyabi, kawa angko dalanon, dapat ay, isyay wan, angko ofod ka goyon angko manga kalaban. Fiya man hara ha hanya, hanya nodwan sagaya git ina hyabi. ²² Ta no kwan yapdi, is Hisos nabol tinapay, nabaya in Diyos, nafaarogbotan, ginya nadisag has taw. Is Hisos iglwang, Toy angko habilogan, ham fag bol. ²³ Ginya madi is Hisos nabol ka fanginoman ka ha sohad danom obas, nabaya in Diyos, ginya nafagamit is taw. Ta fagayo nainom wan. ²⁴ Ginya madis Hisos nalwang has taw, Toy angko folot kagfaganit intam taranggapan. Angko folot kamwatwat kawa has fakaaywanan fag manga taw. ²⁵ Hogfwayong ha hayo, bonwa bohag, hodwa ominom domwag danom obas, nodwa aban ya aho no ominom bago fag danom obas san Diyos sakop banwanan. ²⁶ Ta no nangambahan sadik ambahan, tanlahaw wa a, hawas Moyod Oliboan. ²⁷ Ginyas Hisos iglwang hat manga katogbong, Ham fagayo omobon wangko, maskin insorat sas Kasoratan kitay, Ho fahatay ka fangano, ginya madit anoon fag manga topa manarowayan wan. ²⁸ Dapat ay aban, aho nomboyag ya domwag, aho gomona wa hayo has sakop Galiliya. ²⁹ Is Pidrog lwang han Hisos kitay, Nyawa ta fagayo omobon hyamo araw, hodwa omobon hyamo. ³⁰ Ginya madis Hisos nalwang han Pidro, Yatokitay, lag nga araw, araw basad yabi, bago it fadowa ginan fag kataraok tabag, tolo ginan haw tomangkod angko has taw. ³¹ Dapat is Pidro marigon wagfwayong, Nyawa ta hanggan wa fahatay intam dowa, hodwa tomangkod hyamo has taw. Ka tibak manga katogbong iglwang yadi kitonya. ³² Ginya madi da Hisos nalahaw wan, hawas sadik foyo, taglwang, Gitsimani. Is Hisos iglwang hat manga katogbong, Ham fag matokawan yap istay, aho nogdarangin yapdi. ³³ Ginyas Hisos nataban inda Pidro da Santyago da Hwan. In Hisos fangayofan igfabago wagdog marongkot, galibitan wan. ³⁴ Is Hisos nafwayong handa Pidro, Angko karongkotan bilang wa kodkod sangko basad fangayofan. Hogdog angko kahoriyan ho bilang wa kahatay wan. Ham fag mafanayan yapdistay, matagahan. ³⁵ Is Hisos nonayayo ogbot gis taw, iglohoban wan sas baba daga, igdarangin kitay, no katwa di nangos, ka gis nanya fag mahori fag kasohodan, fag somagaya lamang hanya. ³⁶ Nalwang kitay, Mama, angko Ama, idwa hagsagaya hyamo fagsyaganon. Fag bol nangos gingko to fag fanginoman kahoriyan kati. Dapat, nyawa hoglwang kitonya, fag hyamo kafangayofanan kam-anod, bohonwa angko. ³⁷ Is Hisos nonfwali ya hat manga katogbong tolo, nalag kitay ta matoyogan wan. Nafwayong han Pidro, Simon, haw awkin matoyogan? Haw awkin idwa gagwanta mafolawan matagahan mangharaw, ngadi sik tama sinyahod? ³⁸ Ham fag matagahan, fag darangin wan kaarakitay idwa hagfaloksowan hayo. Ka fangayofan orongan wa kasaya has fiya, dapat ka habilogan malombay. ³⁹ Fadowa ginan is Hisos nasaman ya gis taw a, nandarangin, kito mandi ka haraw. ⁴⁰ Sadi ya ginan is Hisos infwali ya hat manga ofod, ya mangharaw, ta matoyogan ya ngawan, maskin ista mata matapyaton. In Hisos manga katogbong kaya wan, idwa twag sagot hanya. ⁴¹ It fatolo fag swali araw is Hisos naakbang ya, ginya nalwang handa Pidro kitay, Ham awkin matoyogan yapdi, mafahowayan odi, fiya wan. Yabay, kati wan, ka yadi angko ofod ka goyon angko kalaban igfagamat angko, aho Kanbali Taw, has manga taw dwat. ⁴² Ham ha kalibang, fakabangon wan, tya wan, kangko ofod ka goyon has taw. ⁴³ Sadi wa ginan, is Hisos no kampang yapdi, is Hodas, sadi gis Safolo-ha-Dowa, indasog wan. Ha taban kaaywanon fag manga taw, salawidan manga talibong, mabitbitan manga pinotol. Ka manga fagtahinan fagalan-han-Diyos, mangag faadal Batasan Hodyo, hanggan manga fagtahinan sas banwa ka nasogo tonya fag manga taw. ⁴⁴ Ta nodyan dasog sinya, kanoyon has taw danwa nafatohoyan is taw, iglwang kitay, No sida kangko ayohon fag ama, tonya wan kantam iktanon. Gamatan wa dagos tonya. Tabanan wan. ⁴⁵ Is Hodas nondasog wa sinya, naakbang wa dagos han Hisos, iglwang kiti, Haw kagfaadal has taw. Ginyas Hodas naayok in Hisos faringfing. ⁴⁶ Manga taw natoklos in Hisos a, nagamat hanya. ⁴⁷ Dapat insadi ka malindogan akbang sinya nagonos it talibong a, nabasing ka gorangon fag fagalan sogowan, natigbas it talinga. ⁴⁸ Ginya madis Hisos nalwang has fakaaywanan fag manga taw kitay, Aho awkin tolisan, ham gayfan, maskin ham ha diya manga talibong, mabitbitan manga pinotol famogfog, kaarakitay gomamat angko? ⁴⁹ Sirang sirang ho gofod hayo igfaadal basad Fanimbaan-Dahol, bati ham idwa gamat angko gis nanya. Dapat fag im-anod wan no kinday kansorat sas Kasoratan. ⁵⁰ Ginya madi in Hisos manga katogbong fagayo naobon in Hisos idwam dowa, nalagyo dan. ⁵¹ Sadik anahan maholimpayan homot goyan yadin Hisos. Manga sondalo nagamat yadi hanya, ⁵² dapat ka anahan nalfas di, it homot odi kangoyan sasta gamat. Nalagyo idwa ha rotay. ⁵³ Ka manga nagamat in Hisos nataban hanya has gorangon fag fagalan-han-Diyos. Ka manga fagtahinan fagalan fagayo, ka manga fagtahinan sas banwa hanggan ka mangag faadal Batasan Hodyo matifonan yadi sinya. ⁵⁴ No kitay di, is Pidro goyan haraw in Hisos, dapat ayayo sat ginanan. Ginya, nondasog sas gorangon fag fagalan it balay, is Pidro nasakbaw has basad aladan, intokaw maofodan yadi has manga bantay sondalo, mafanayangan afoy. ⁵⁵ Yabay, ka manga fagtahinan fagalan-han-Diyos hanggan ka tifonan manga fagtahinan Hodyo fagayo igsayak manga taw ka bomangdan in Hisos kaarakitay ta fahatay hanya. Dapat tadwa ha lagan it fagbohagon han Hisos. ⁵⁶ Maskin ha akwag bangdan hanya, dapat idwa pariho ista fwayong. ⁵⁷ Dapat ha akwa yadi tiba nalindog, nabangdan in Hisos, iglwang kitay, ⁵⁸ Mi nadog to fag ama igfwayong kitay, Ho domwat to fag Fanimbaan-Dahol ista gamat nahalig. Dapat ay, sas tolo lamang ik sirang, ho fatobo ya sadi yak Fanimbaan-Dahol, bonwa gamat taw nahalig. ⁵⁹ Dapat nyawa kitonya, ista bangdan idwa myasa kitonya. ⁶⁰ Ginya madi ka gorangon fag fagalan-han-Diyos nalindog sasta fagbokngan, naintaw han Hisos, Haw awkin idwag sagot? Kana tonya kasta sombong kawa ha hyamo? ⁶¹ Dapat is Hisos idwa naawang, idwa yadi nasagot. Ka Gorangon fag fagalan naintaw ya domwag in Hisos, nalwang kitay, Haw awkin in Diyos-natogon-Famawi? Haw awkin kantam Fagbayaon, it anak? ⁶² Is Hisos iglwang, Ala, aho ngay. Aban ham lomag yadingko, aho Kanbali Taw, matokawan sat akbang, sat balis sihon, kadwa ha bosal. Ham lomag yadi wangko, kadasog aban sas baba manga linyabo gin Diyos banwanan sam tongod. ⁶³ Ginya madi, ka gorangon fag fagalan-han-Diyos naragyang it sadili solong rotay, nalwang, Kana mayon tam nogsayak yapdi ista sombong tiba taw? ⁶⁴ Ham ngap fadi wad nadog kati, gi wa ngap it sadili bibig, igsway wa orongan in Diyos. Kinday hayo fangayofan? Fagayo fagayo nafatohoyan kitay ka fiya fahatayan in Hisos. ⁶⁵ Ginya madi ka tiba igtofay in Hisos. Tagtaklob it mata, ginyag sontok hanya, bago diglwang, Sogi, boktongan. Ginya ka manga bantay sondalo natofa yadi marigon in Hisos. ⁶⁶ Is Pidro no sayapdista basad aladan, ka gorangon fag fagalan sogowan ina sadi inbangkad yadi sinya. ⁶⁷ No nalag in Pidro igfanayang afoy, nabantay hanya fiya fiya, ginyag lwang, Haw mangharaw tonya fag ama it ofod yadi, kawas Hisos taga Nasarit. ⁶⁸ Dapat is Pidro natangkod wan, iglwang wa hanya fag ina, Twa man. Hodwa twagdog im faglwangon. Is Pidro igfatawas wan, hawas bilog sakbawan alad. ⁶⁹ Ka sogowan ina nalag ya in Pidro, nafadahit ya has manga taw ka manga malindogan sinya kitay, To fag ama in Hisos wa nga ofod. ⁷⁰ Dapat is Pidro sadiya ginan natangkod. Ginya madi, araw araw ogbot, ka manga taw sinya, sadi ya ginan nalwang han Pidro, Yabay, haw it ofod yadi wa sadi, matohoyanan wan, haw taga Galiliya yadi. ⁷¹ Dapat is Pidro natangkod marigon, iglwang, Nyawa ho matay wan, orongan wan hodwa kilala tonya fag ama hayo faglwangon. ⁷² Ginya madi ka tabag dagos wa nataraok it fadowa ginan. Is Pidro bago di natohod in Hisos fwayong hanya kitay, Ka tabag nodyag taraok it fadowa ginan, tolo ginan haw tomangkod has taw angko. Ginya madis Pidro naoraw wa marigon.

¹ Araw, no dayo kasirang, ka manga fagtahinan fagalan-han-Diyos, ka manga fagtahinan banwa, hanggan ka mangag faadal Batasan Hodyo hanggan ka fanifonan magorang Hodyo sadik dahonya nangampangan wan. Ginya ta nagafos in Hisos a, nataban hanya han Pilato. ² Ginya madis Pilato naintaw in Hisos, nalwang kitay, Haw awkin ka gorangon manga Hodyo? Is Hisos iglwang, Haw wa ngap kaglwang. ³ Aywan ka manga fagtahinan fagalan-han-Diyos igbangdan han Hisos. ⁴ Is Pilato naintaw ya domwag in Hisos, Kana kin ha nodwag sagot? Fandog kin kaaywanon ista manga sombong ha hyamo. ⁵ Dapat is Hisos idwa nasagot domwag. Yakangas Pilato kataka wan. ⁶ Ka manga Hodyo nogtohod ka Fanohodan Nagsagayan, is Pilato ha ogalig falfas sadik Hodyo kanporiso, no fakta ka manga Hodyo fakasayaon falfason. ⁷ Itfagonan ha manga taw iglaban ista gorangon hanggan wa nangadkatayan noglaban. Insadi ka nalaban is Barabas, kati maporisowan. ⁸ Ka fakaaywanan nalwang han Pilato, Haw fag idwag liyam im ogali. Ha fag falfas mandi sadik Hodyo kito ka nogbanwan. ⁹ Ginyas Pilato nasagot has taw kitay, Kinda nangos hayo fangayofan? Fag ka gorangon manga Hodyo awkin kangko falfason? ¹⁰ Maskin is Pilato naintaw ngatay fag is Hisos kat falfason, hanya natwa wa kitay kawa manga fagtahinan fag fagalan kaingli odin Hisos, yakanga ta nataban hanya han Pilato. ¹¹ Dapat ka manga fagtahinan fag fagalan nafasognod has manga taw kaaywanon kitay, ta fag somagad gin Pilato fag is Barabas kat falfason. ¹² Is Pilato naintaw has taw, iglwang sadi ya ginan, No kitonya, kana araw angko ibolonon has nwa fag ama ka hayo faglwangon gorangon manga Hodyo? ¹³ Ta nanarawagan di ngap, Fapakowan wa hanya sas nafatimbangan hayo. ¹⁴ Ginyas Pilato gintaw ya domwag has taw, Kana mayon? Kana kat naibolon dwat? Dapat ta labi wan nanarawagan marigon, Fapakowan hanya sas nafatimbangan hayo. ¹⁵ Maskin is Pilato kasaya kitay ka fakaaywanan fag manga taw fag igbaya hanya, ya nafalfas in Barabas. Ginya madis Pilato no nafabakbak in Hisos it manga sondalo, nafabahala hanya has taw kaarakitay ta fapako hanya sas nafatimbangan hayo. ¹⁶ Yakanga ka manga sondalo nataban in Hisos hasta gorangon basad balay dahol. Ta nafatifon sadi wak habanan sondalo san Hisos dayo. ¹⁷ Ka manga sondalo nafasolong di nga hanya sadik rotay aba, boragaw. Ta nahoskos di lamnon madogi a, nafasangbaw tonya in Hisos baba alfoyo. ¹⁸ Ginya ka manga sondalo igsway odi in Hisos, iglwang, Anod, kafiyaon mangharaw ka gorangon manga Hodyo. ¹⁹ Ta nabakbak in Hisos boknga alfoyo pinotol bagahay. Tagtofay hanya hanggan igsway odig lingkohodan hanya. ²⁰ Ginya madi ta nonsagaya wagyod hanya, ta naloslos ya ka rotay boragaw, nafasolong ya in Hisos sadili rotay, hanggan nataban wa hanya has dayo, kaarakitay pomako wan sas nafatimbangan hayo. ²¹ Araw, ta no sawas boknga dalan, ta nahablang sadik ama goli has banwa git iyab, kawas Simon, taga Sirini, inda Alihandro da Rofo ama. Ka manga sondalo napilit wa nafafasan hanya ka nafatimbangan hayo kasta fag fapakowan araw in Hisos. ²² Ta nataban in Hisos ha sadik foyo, tagngayan Golgota, it kahologan Botol Alfoyo. ²³ Ka manga sondalo nafagamit in Hisos langgaw ha aktom lamnon mira. Dapat is Hisos nadayo di. ²⁴ Manga sondalo napako in Hisos sas nafatimbangan hayo, ginya ta nangafodan wan in Hisos manga rotay, tagpostahan no kinday nogfahafod. ²⁵ Myanit faginan wa kaabwat ta no napako in Hisos sas nafatimbangan hayo. ²⁶ Kasta sombong masoratan sat tongod alfoyo iglwang, Ka gorangon manga Hodyo. ²⁷ Gis nanya yadi ta nafapako dowak tolisan, insadi san Hisos balis sihon, insadi san Hisos balis wala. ²⁸ In-anod kansorat sas Kasoratan kitay, Ta nafatimbang hanya bilang sadik taw ha kasalanan. ²⁹ Ka manga taw kagdalan sinya, igmaswag, igyod, mabaringan odista alfoyo, taglwang, Nabi, anod, haw ka domwat nangos ka Fanimbaan-Dahol, ginya fatobo ya tolo lamang ik sirang, ³⁰ kati, bawiyan hyamo sadili. Fag dokson lamang gis nyamos fatimbangan hayo. ³¹ Kitonya yadi ka manga fagtahinan fagalan-han-Diyos, hanggan ka mangag faadal Batasan Hodyo noglibak in Hisos, tagtoltolan, Bati hanya nabawi ongay ka tiba taw, dapat not sadili wa habilogan, idyadi wa syagan igbawi. ³² Tagmaswag iglwang, Tonya fag in Diyos-natogon-Famawi, ka gorangon manga Israil, fag domokson nga kati gis nwa fag nafatimbangan hayo. Nontam wa mata lagan, tam imtiwala wan. Ka manga tolisan kanpako yadi san Hisos akbang nafasidyowan yadi hanya. ³³ Ginya madi yabay, gis boknga wa sirang fiya fiya, balis myanit kabohid wan, sadi wak dahonya banwanan inharom wan. ³⁴ Myanit no kabohid wan, is Hisos natawag marigon sas fangampangan Aramaik, Iloy, Iloy, lama sabaktani? It kahologan, Angko Diyos, angko Diyos, kana mayon haw nogfabayaan angko? ³⁵ Tiba taw ka sinya malindogan, no nadog kitay is Hisos igtawag kitonya, taglwang, Yabay, igtawag in Iliyas. ³⁶ Sadik taw nadalandan wan natogna famasopsop has basad langgaw maiglis, nasongkit sas tobwan bagahay, ginya nafasopsop in Hisos, iglwang has fakaaywanan, Faya, tam bomantay yap, ngatay is Iliyas imbangkad araw kaarakitay fadokson hanya. ³⁷ Is Hisos natawag ya domwag marigon, ginya nafos wat ipsaw. ³⁸ Ginya yabay, ka fanahop rotay sas fagbokngan Fanimbaan-Dahol inragyang sadi odi ginan, gis tongod has daga baliwa, namokngan wan. ³⁹ Ka fagtahinan sondalo ka masayangowan in Hisos, no nalag no kinday in Hisos ipsaw no nafos, iglwang kitay, Bonwa bohag to fag ama in Diyos wa Anak. ⁴⁰ Ha akwa yadi manga ina sinya mabantayan gis ayayo. Tonya fag manga ina tiba kawa da Mariya Magdalina, da Mariya inda Santyago sangay ina, hanggan in Hosi ina, hanggan is Salomi. ⁴¹ Gi yapdis sakop Galiliya to fag manga ina nogtahin in Hisos hanggan igtogbong hanya. Ha akwa yadi sinya tibak ina aywan kan Hisos manga ofod no hawas Hirosalim itfagonan. ⁴² Kawa myanit kasangday wan sas Sirang Famatalagan hanggan no marom Sirang Kafahowayan, is Hosi, gis banwa Arimatiya, inrigon it fangayofan, hawan Pilato, nasagad in Hisos habilogan. Is Hosi sadik ama ha kangayanan, sadi sas fanoltolan manga fagtahinan Hodyo. Hanyag fanaya no ginahin is Diyos nogfabago it sakop. ⁴⁴ Dapat is Pilato gadowan ngatay is Hisos idya ha lahaw natay. No nafatawag ka fagtahinan has manga sondalo, naintaw hanya is Hisos ngatay natay wa ngay. ⁴⁵ Is Pilato no nadog gis fagtahinan manga sondalo kawas Hisos natay wa ngay, nafaangay kitay is Hosi bol wa nga kan Hisos habilogan gis nafatimbangan hayo. ⁴⁶ Is Hosi nasali sadik homot madamol fag rotay kafiyaon, ginya nabol in Hisos habilogan, nasafot basad homot. Ginyas Hosi nafaigyan in Hisos habilogan sas basad natigib lohib bato. Ginya madi nafabalolang bato dahol dahol it tahop sas sakbawan lohib. ⁴⁷ Da Mariya Magdalina hanggan da Mariya in Hosi ina mabantayan yapdi hanggan ta nalag no sida nafwalid in Hisos habilogan.

¹ Nonsagaya wan ka Sirang Kafahowayan, da Mariya Magdalina, da Mariya in Santyago ina, hanggan da Salomi nasali famabanglo kaarakitay fomiyad in Hisos habilogan. ² No dayo kayawa sas sirang gona sa sadik simba, ka manga ina hawas lohib bato. ³ No boknga wa dalan tagtoltolan wagtoltolan wan kitay, Fakta araw ka fomalo intam bomoklas ka tahop bato gis boknga sakbawan lohib? ⁴ Ta no nabantay wan, taglag ka lohib fanahop bato in-oson wan has dayo sakbawan maskin kadaholon ka bato. ⁵ Ta nonsakbaw wa has basad lohib bato, ta nalag sadik anahan matokawan sas balis sihon, ha solong rotay abohay. Ka manga ina inhinol odi. ⁶ Ka anahan nalwang has taw, Ham fag idwa kahinol. Ka hayo fagsayahon is Hisos, taga Nasarit, kasta napako sas nafatimbangan hayo. Hanyan boyag ya domwag, idwastay. Ham bantayan ista nagfwalidan hanya is nwa. ⁷ Ham fag goli wan, fwayongan han Hisos manga katogbong, labi man han Pidro, kitay is Hisos gomona hayo has sakop Galiliya. Sinya ham bago di lomag hanya, kito kat togon hayo. ⁸ Ka manga ina nadokson di ngay gis lohib bato, nalagyo wan, karokog wa kadala, indolaw wan. Tadwa nafwayong nyawa hada fag taw maskin tandala wan. ⁹ Ka manga ina hawan da Pidro hanggan nafwayong has fagayo kasta lagan anahan, basad lohib, it nafwayong fagayo has taw. ¹⁰ Ginya madis Hisos nasogo kitay it manga katogbong fag bomarita ha sadik dahonya baba daga. Ta nafaadal has taw ka maliyaw hanggan maanod fag barita no kinday tam nombawi hanggan aban aban. ¹¹ Dapat nyawa ta nadog kitay is Hisos inboyag ya, nyawa in Mariya wa mata lagan, tadya katiwala in Mariya fwayong. ¹² Ginya madis Hisos nafalag it sadili hat katogbong dowa, ta noglahaw has moyod, dapat it fanwalongan in-oman. ¹³ Tanfwali ya has basad banwa, nafwayong han Hisos manga katogbong tiba kitay ta nalag wan Hisos. Dapat tadwa katiwala ista fwayong. ¹⁴ Ginya madis Hisos nafalag it sadili hat manga katogbong Safolo-ha-Sadi, ta no kwan fafa. Is Hisos nangabaya is taw, maskin maganit ista fangayofan, tadwa katiwala ista fwayong, nyawa kagfadog has taw nalag kitay is Hisos inboyag ya. ¹⁵ Ginyas Hisos natogon has taw, Ham fag hanya wan sadik baba daga, fwayongan ka Fiya fag Barita has fagayo fag manga taw. ¹⁶ Ka manga taw kantiwala hanggan igfatogna yadi hanya imbawi wan, dapat kadwam tiwala imtohoyan has fadosaan. ¹⁷ Ka mangam tiwala mamalag to fag manga falagon madolaw. Ta nogsyag angko, ta somyagan igfaalin manga labang gis taw, ta tomwa yadi homampang ka tiba fangampangan. ¹⁸ Nyawa abyanon homoskos hanya, hanggan nyawa ta domaya igfainom fakalangoon hanya, tadwam kinday. Ta nogfalangday it manga gamat has manga taw ha sagit, tamfiya wan. ¹⁹ Ginya madis Hisos nontabo wagtogon kiti hat manga katogbong, inabwat has tongod, intokaw san Diyos balis sihon. ²⁰ Ginya madin Hisos manga katogbong nalahaw wan, natoltol has fagayo fag manga banwanan taw. Kagfon intam gofod yadi has taw gibolon, igfalag yadi manga falagon madolaw has manga taw kaarakitay igfaanod kitay orongan ista toltol.