MATIYO

MATIYO

¹ To in Kiristo Hisos manga hasokfonan gis hagorangan, gin Dabid fag Gorangon hasokfonan, ka yadi gin Abraham fag hasokfonan. ² In Abraham anak is Isaak, in Isaak anak is Hakob. In Hakob manga anak is Hoda, hanggan it manga fadwasay. ³ Da Faris da Sara in Hoda manga anak san Tamar. In Faris anak is Isrom hanggan in Isrom anak is Aram. ⁴ In Aram anak is Aminadab, in Aminadab anak is Naason. In Naason anak is Salmon. ⁵ Is Boos in Salmon anak san Rahab, ginya madi is Obid in Boos anak san Rot. In Obid anak is Hisi. ⁶ In Hisi anak is Dabid kawan bali gorangon fag Dabid. Ginya madi is Salomon in Dabid anak san Oriyas babay hyabi. ⁷ Ginyan Salomon anak is Roboam. In Roboam anak is Abiyas. In Abiyas anak is Asa. ⁸ In Asa anak is Hosafat hanggan in Hosafat anak is Horan. In Horan anak is Osiyas. ⁹ In Osiyas anak is Hotan. In Hotan anak is Akas. In Akas anak is Isikyas. ¹⁰ In Isikyas anak is Manasis. In Manasis anak is Amos. In Amos anak is Hosiyas. ¹¹ In Hosiyas manga anak is Hikoniyas hanggan it manga fadwasay. Gis nanya fag masohod ka manga taga Babilonya igpilit wagtaban in Israil manga ha sokfonan has Babilonya. ¹² Nondiya has Babilonya, in Hikoniyas anak is Salatiyal. In Salatiyal anak is Sorobabil. ¹³ In Sorobabil anak is Abiyod. In Abiyod anak is Iliyakim. Ginyan Iliyakim anak is Asor. ¹⁴ In Asor anak is Sadok. In Sadok anak is Akim. Ginyan Akim anak is Iliyod. ¹⁵ In Iliyod anak is Iliyasir. In Iliyasir anak is Matan. In Matan anak is Hakob. ¹⁶ Ginya madin Hakob anak is Hosi, kawa ka nababay in Mariya fag Hosi. To fag is Mariya kan Hisos ina. To fag is Hisos kawasta faglwangon, in Diyos-natogon-Famawi. ¹⁷ It kahologan, gin Abraham balin Dabid, safolo ha ofat ik hasokfonan taw, ginya madi, gin Dabid balis tagpilit wagtaban in Israil manga hasokfonan taw has Babilonya, safolo ha ofat, ginya safolo yadi ha ofat ik hasokfonan taw gistag pilit wagtaban has Babilonya balin Diyos-natogon-Famawi. ¹⁸ Kito is Kiristo Hisos nonsagaya. Is Mariya, kambali aba in Hisos ina, hanggan is Hosi, intohoyan talsawa aban. Dapat is Mariya danwa gabosog nyawa idyan saya in Hosi. To fag madolaw ka Maliyaw fag Falad nafatimawa. ¹⁹ Is Hosi, kan Mariya bato indoganon, mahoway, idwa kasayag fahaya in Mariya, yakanga hanya gayfan domayo lamang in Mariya, nyawadwa ha toltolan. ²⁰ Is Hosi gisip wa gisip wa hanya baliwa. Ginya madi, sadi ginan, hanya no matoyogan, nalag kagfon intam it anghil sadi. Ka anghil nalwang han Hosi kiti, Hosi, in Dabid hasokfonan, haw fag idwa kadalag dagos han Mariya, kawa hanya gabosog maskin ka Maliyaw fag Falad nafatimawa. ²¹ Ka anak nomsagaya aban, ama wan. Haw fangayanan hanya is Hisos, maskin hanya ka bomawi it sakop fag manga taw git manga ogali dwat. ²² To fagayo inlag kitonya kaarakitay im-anod in Diyos fwayong git fangampang kitay, ²³ Fandog ngay, sadik dayaga kadya hansaya ama, imbali gabosog, ginyat anak nomsagaya ama wan. Ta lomwang, Tos Imanyowil, it kahologan, Is Diyos sawantam. ²⁴ Ginyas Hosi nonfolaw, intanog kagfon intam it anghil fwayong, nataban wan Mariya, naano hanya. ²⁵ Dapat is Hosi idyan saya in Mariya hanggan wansagaya ka anak dararag ama, kat nafangayan is Hisos.

¹ Sawas banwa Bitlihim, sakop Hodiya, is Hisos nonsagaya. Gis nanya fag masohod, is Hirodis ka gorangon sas Hodiya. Ya mangharaw, ha akwa yadin bangkad manga fiyahin ik famaklay madonong, kawa ha nagadalan has fanggasan baliwa. Tanbangkad has banwa Hirosalim git banwanan sas salogan myanit baliwa. ² Ta nondasog, ta gintaw wa gintaw wa kitay, Siday ka gorangon manga Hodyo ka bagon sagaya hyabi ogbot? Mi no sa hyami banwanan yapdi, sas salogan myanit baliwa, mi nalag it fanggasan. Yakanga hamin bangkad kaarakitay manlibabaan hanya. ³ Is Hirodis, ka gorangon, no nadog kitonya, nangalibitan it fangayofan, hanggan sadi wak dahonya Hirosalim kitonya yadi. ⁴ Is Hirodis nafatifon fagayo fagayo fag manga fagtahinan fagalan-han-Diyos, hanggan ka mangag faadal ka Batasan Hodyo, ginya naintaw has taw no siday mayon kan Diyos-natogon-Famawi, intam Gorangon, nomsagaya. ⁵ Ta nasagot kiti, Sas banwa Bitlihim, sakop Hodiya, hanya nomsagaya, maskin kiti in Diyos fangampang nasorat hyabi kitay, ⁶ Hanggan haw, banwa Bitlihim, san Hoda banwanan, Yatokitay im kangayanan ogbot man has manga banwa kanbantog sas sakop Hoda, Maskin giwa hyamo sadik Gorangon imbangkad Ka bomahala sangko sakop, in Israil manga hasokfonan. ⁷ Ginya madis Hirodis nafatawag ka manga famaklay madonong, kaarakitay tomwa no ginahin ka fanggasan nonlag, dapat idwag fadogon has iba taw. ⁸ Ginyas Hirodis nafalahaw has Bitlihim baliwa ka manga famaklay, dapat natogon yap kitay, Ham fag hanya wan, sayakan fiya fiya ka anak. Ginya ham no nalag, fwayongan ya angko no siday tonya kaarakitay hanggan aho hanya wan, lomibabaan yadi hanya. ⁹ Ka manga famaklay madonong, no nadog ka gorangon togon, inlahaw ya ngawan. Sadi ya ginan ta nalag ka fanggasan kasta lagan sas salogan myanit baliwa itfagonan, yakanga tagbaya wa dahol dahol. Ginya ka fanggasan nagona ya ngay has taw hanggan wa tandasog. Ka fanggasan natorosan sas tongod oliyanan anak. ¹¹ Ginya ta nonsakbaw has basad balay, ka manga famaklay nalag ka anak san Mariya it ina akbang. Ta nanlibabaan hanggan nafasayagdog has anak. Ta nabongkat manga sohadan, ginya nadisag has anak, manga ginto, manga salong banglo kamangyan, hanggan tagok hayo mahalga, kawa mira. ¹² Ginya madi ka manga famaklay madonong natagimfan kitay, ha nafwayong, Ham hawag dalan han Hirodis no goli. Yakanga ta hawas iba dalan no nwali hat banwanan. ¹³ Ka manga famaklay madonong nonlahaw wan, is Hosi natagimfan ya ngay, nalag sadik anghil gintam Fon. Ka anghil iglwang, Kalibang, fakabangon wan, tabanan wa ka talanak has Ihipto. No baliday hodyag fwayong hyamo, ham hayap galin ginya, maskin is Hirodis igsayak ka anak kaarakitay fahatay hanya. ¹⁴ Yakangas Hosi dagos inbangon gis nanya, inlahaw wan, yabi yapdi, nataban ka talanak has Ihipto. ¹⁵ Ta sinya wak nadogayan hanggan is Hirodis nodya natay. In-anod kito kaarakitay fatonglos kagfon intam it fwayong git fangampang kitay, Ho nafatawag angko anak gis sakop Ihipto. ¹⁶ Is Hirodis no natwa kitay ka manga famaklay madonong nabohag odi, nabaybay wa hanya no goli, hanya kaisog wa dahol dahol. Yakanga nasogot manga sakop, natogon kitay, Fahatayan fagayo fag manga anak ama balis dowak fangaraw it kadogayan, hanggan wa ka bago sagaya sas banwa Bitlihim hanggan wa ka sas manga ligongan. Is Hirodis nafwayong kitonya maskin no naintaw gis manga famaklay madonong, taglwang kitay dowak fangaraw kantolas giwasta nalag ka fanggasan bago bago. ¹⁷ Yakanga in Hirimiyas, in Diyos fangampang nafwayong in-anod wan, noglwang kiti, ¹⁸ Sadik hasnog indog sas banwa Rama, igngongoy hanggan igrokyaw marigon. Is Rakil ka naoraw it manga anak, Fawa kalibang it fangayofan, Maskin it manga anak natay wan. ¹⁹ Ginya madis Gorangon Hirodis no natay wan, is Hosi natagimfan ya ngay sas Ihipto, nalag in Diyos anghil. Ka anghil nafwayong han Hosi, ²⁰ Haw fakabangon, tabanan ya ngay ka talanak has banwanan Israil, maskin ka manga kasayag fahatay ka anak hyabi natay wan. ²¹ Yakangas Hosi inbangon, ginya nafaoli ka talanak has banwanan Israil. ²² Dapat is Hosi no nadog kitay is Arkilao man ka natobos it ama is Hirodis, kanbali gorangon sas Hodiya, is Hosi kadala goli has banwa Bitlihim. Sadi ya ginan ha nafatagak in Hosi basad tagimfan, yakanga hawas sakop Galiliya. ²³ Ginya da Hosi nabanwanan sas banwa Nasarit, kaarakitay faanod in Diyos fangampang fwayong kitay, Ta ngomayan hanya sadik taga Nasarit.

¹ Gis nanya fag masohod, is Hwan, kagfatogna manga taw, indasog sas sakop Hodiya, sas basad fakahyabogan. Sinya no nafaadal bago bago. ² Hanyag lwang, Ham fag soyo, obonan yadi ka hayo manga ogali dwat, maskin ka gim tongod kaakbang wa kabali Gorangon. ³ Kawas Hwan iglwang kitonya, hanya kan Isayas, in Diyos fangampang, faglwangon no danwa ngap nafwayong kitay, Kiti kat nafwayong kagtawag marigon marigon sas basad fakahyabogan kitay, Fatalagaan in Diyos bato lahawan, Fahaslongan it manga dalan. ⁴ Gis nanya in Hwan rotay olad kamilyo mahaligan, anit yadit fagyahos, manga fan hanggan dyahot it fanganon. ⁵ Ka manga taga Hirosalim fagayo, hanggan fagayo gis sakop Hodiya, hanggan ka gis bali bali difay safa Hordan, nagobok in Hwan sinya. ⁶ Is Hwan nafatogna manga taw sas safa Hordan, hanggan ta nabayat sadili manga naogali dwat. ⁷ Dapat is Hwan noglag kaaywanon fag manga Farisiyo hanggan Sadosiyo gakbang ha hanya kaarakitay fatogna wan, is Hwan nalwang has taw, Ham bilang odi manga abyanon no madaya. Fakta kagfatagak hayo kitay ham fag lagyo wan gin Diyos fadosaan ka kadasog aban? ⁸ Fag hanggan wa hayo manga bohad ogali kagfalag kitay ham igsoyo. ⁹ Ham fag idwa kasyag kitay maskin ham in Abraham manga hasokfonan, ya fiya wan. Gwadi hogfwayong ha hayo kitay, gistay fag manga bato is Diyos syagan kalig in Abraham manga hasokfonan orongan. ¹⁰ Gis kati ginan ka wasay danwam hatak sas dalid hayo, omobang fagayo fagayo fag manga fon hayo kadwa fiyat manga bohad, omokas wa has basad afoy. ¹¹ Sas danom ho fatogna hayo, kawa tandaan kitay ham igsoyo, hanggan ham gobon yadi hayo manga ogali dwat. Dapat ka goyan angko, gingko ginanan, madonong man angko, sas Maliyaw fag Falad hanya no fatogna hayo, hanggan sas afoy. Ho kaya mandiya ngadit lapak. ¹² Hanya ha bitbit fanayang kaarakitay falayon fiya fiya it opa, manga ohot. Tomifon it tirigo sas basad dongdong, dapat ay, somonog wa ka manga ohot sas afoy kadwa kapsa. ¹³ Ginya madis Hisos indasog sas safa Hordan gis sakop Galiliya, naakbang han Hwan kaarakitay is Hwan fatogna nangos hanya. ¹⁴ Is Hwan nasanggala in Hisos, nalwang, Fag haw ngap nangos ka fatogna angko, dapat haw di ngap ka gakbang hangko. ¹⁵ Dapat is Hisos nasagot kiti, Kati fag masohod faangayan wangko, maskin to fag im-anod kaarakitay in Diyos kafangayofanan imtonglos wan. Yakangas Hwan nafaangay wan. ¹⁶ Is Hwan nontabo wa ngag fatogna in Hisos, is Hisos hawas dayo danom. Ka manghara banwa sam tongod inboklas wan, ginyas Hisos nalag in Diyos Falad kitos salompati kayokfo ha hanya gis tongod. ¹⁷ Ginya ha nahampang gin Diyos banwanan sam tongod, nalwang, Tongko fagalwasiyon fag Anak, hogbaya wa dahol dahol hanya.

¹ Ginya madi ka Maliyaw fag Falad nataban in Hisos has basad fakahyabogan, kaarakitay is Fandaya somolay faloksowan hanya. ² Ofat ik safolok yabi hanggan ofat ik safolok sirang is Hisos idwa ha nahwan hanon, yakanga kalonos wa dahol. ³ Is Fandaya kagsolay hanya nondasog, nalwang han Hisos, Haw non Diyos wa nga Anak, haw fabaliyan nangos tinapay to fag manga bato. ⁴ Dapat is Hisos nasagot, Insorat kitay, Bohondi ka fanganon kagfaboyag manga taw, Dapat fagayo fag manga hampang gin Diyos bibig kagfaboyag manga taw. ⁵ Ginya madis Fandaya nataban in Hisos has baba atop Fanimbaan-Dahol, abwat abwat sas Hirosalim, ka banwa kantohoyan han Diyos. ⁶ Hanyag lwang han Hisos, Haw non Diyos wa nga Anak, fadagdagan nangos hyamo ham daga, is baba daga, maskin insorat kitay, Hanya tomogon it manga anghil kitay, ta fag omano hyamo, insorat yadi kitay Ta somambot di hyamo kaarakitay im bitis idwam iktan has bato. ⁷ Is Hisos iglwang hanya, Insorat yadi kitay, Haw fag idwag tikis igsolay kagfon hyamo, hyamo Diyos. ⁸ Ginya madi, sadi ya ginan is Fandaya nataban in Hisos ha baba fongso abwat abwat, sas fakabantayan, nafalag hanya ka manga gorangon sakop fagayo fagayo sadik dahonya baba daga, hanggan ista manga kaakwaan sinya. ⁹ Is Fandayag lwang han Hisos, Haw no ha ngangkok manlibabaan hanggan somimba, ho domisag wa hyamo to fagayo fagayo hyamo lagan. ¹⁰ Is Hisos nasogo in Fandaya, nalwang, Satanas, haw fag idwastay, haw fag lahaw wan, maskin insorat kitay, Fag is Diyos kagfon hyamo kam fagfasayaon igdog, Fag in Diyos lamang sogo kam fakatanogon. ¹¹ Ginyas Fandaya naobon in Hisos. Manga anghil inbangkad, natogbong hanya. ¹² Ginya madis Hisos nadog kitay ta nafaporiso in Hwan, yakanga nwali has sakop Galiliya, ¹³ dapat nabanwanan sas banwa Kapirnaom, idwa sas banwa Nasarit. Ka banwa Kapirnaom sas gobang linaw dahol, linaw Galiliya, sas bahalan manga banwanan Sabolon hanggan Niptali. ¹⁴ Yakangan Isayas, in Diyos fangampang fwayong in-anod wan, kitay, ¹⁵ Ka banwanan Sabolon hanggan ka banwanan Niptali Has dagat baliwa sas difay Hordan, Ka bali Galiliya ka banwanan manga Hintil, ¹⁶ Ka manga taw sinya fag manga banwanan Sawas basad fakaharoman hyabi, Dapat, no dogay wan, taglag yawa masilaw. Kati to fag yawa yomawa Has fagayo ka hyabi maayfanan odi daga gohom kahatayan. ¹⁷ Ginya ginan is Hisos nafaadal has taw, iglwang kiti, Ham fag soyo wan hanggan obonan hayo manga ogali dwat, maskin ka gim tongod kaakbang wa kabali Gorangon. ¹⁸ Ginya madi, aban ogbot, is Hisos nogdalan sas bahalan linaw dahol, tagngayan tonya fag linaw Dagat Galiliya, is Hisos nalag dowak ama, is Simon, kawasta faglwangon is Pidro, hanggan it fadwasay is Andris. Gis nanya ta gokas it manga sarap ha basad linaw, maskin pariho fangoyang fag manga taw. ¹⁹ Is Hisos nalwang has taw, Ham tahinan wangko, ho fabali hayo manga fangiktan manga taw. ²⁰ Ginya ginan ta nadagos wa naobon it manga sarap, natahin wan Hisos. ²¹ Ta noglahaw wan, is Hisos nalag yadi inda Santyago da Hwan, dowasay, in Sibidiyo manga anak, sas basad baloto, gofodan hat ama. Tagsip it manga sarap. Is Hisos natawag wa ka dowasay. ²² Ta dagos wa naobon it baloto hanggan it ama, ginya natahin wan Hisos. ²³ Is Hisos nafahaskat sadik dahonya sakop Galiliya, igfaadal sas basad manga fanimbaan Hodyo, natoltol yadi ka Fiya fag Barita kawa han Diyos sakop baliwa. Igfafiya yadi ista manga sagit fagayo, hanggan ista manga fagdogon mahori. ²⁴ In Hisos ibolon kabantog wan sa sadik dahonya sakop Siriya. Yakanga ta nadiya han Hisos fagayo ka manga ha sagit, hanggan kasta manga fagdogon mahori bokod bokod, ka manga ha labang kagfapaong hasta sadili, ka manga kalobay, hanggan ka mangadwa syagan kimot no kasagit. Is Hisos nafafiya lamang fagayo. ²⁵ Yakanga kaaywanan wa fag manga taw gis sakop Galiliya, gi yadi sadik layonan ka ha safolok banwa, gis banwa Hirosalim, gis sakop Hodiya, hanggan kawa gis difay Hordan naoyan wan Hisos.

¹ Is Hisos noglag manga taw bilang wa tigasaw it kaaywanan, is Hisos hawas baba moyod. Is Hisos no natokaw sinya, it manga katogbong naakbang yadi hanya, ² ginyas Hisos nafaadal has taw kiti, ³ Ka mangadwa ha takan bomaya wan, maskin in Diyos sakop is taw wan. ⁴ Ka ha karongkotan bomaya wan, kawas Diyos igfalibang ista fangayofan. ⁵ Ka manga mahoway bomaya wan, maskin ta omafo in Diyos natogon fagayo. ⁶ Ka manga gwayan wa kasaya katanog in Diyos fakasayaon, bomaya yadi wan, maskin im-anod wa kasta fakasayaon. ⁷ Ka manga maawaon bomaya wan, maskin is Diyos im-awa yadis taw. ⁸ Ka manga maliyaw it fangayofan bomaya yadi wan, maskin ta lomag in Diyos. ⁹ Ka mangag faamigosan ya has manga gawayan bomaya wan, maskin is Diyos lomwang kitay tonya fag manga taw it manga wa anak. ¹⁰ Kasta manga fagfahoriyon kawa ta no katanog in Diyos kafangayofanan bomaya wan, maskin ta omofod in Diyos san Diyos sakop aban. ¹¹ Manga taw nogyod hayo, mangag fahoriyan hanggan igfadwat odig dog hayo, maskin aho ka hayo fagalwasiyon, ista manga hampang dwat sonson wa bohag, idwa ha fakaanodan, ham bomaya wan. ¹² Fag masolong di hayo fangayofan, fag idwa kabalaw, kawa dahol hayo tanggapon fasalamat aban san Diyos banwanan sam tongod. Kitonya yadi kasta naibolon hyabi ta nogfahoriyan in Diyos manga fangampang ka nagona hayo. ¹³ Ham bilang wa asin istay is baba daga. Dapat ka tamis nonbol wan gis asin, kinda odi nogfatamis ya ka asin, ham gayfan? Fawa ha fakinabang tonya fag asin, ta omokas odi, manga taw lomid lamang. ¹⁴ Ham bilang yadi wa salong istay is baba daga. Idwa ha syagan tomago sadik banwa, ka banwa no sas baba moyod. ¹⁵ Idwa ha taw igsonog salong ginyag fwalid sas daga gantangan. Yatokitay, fag sawa ngap is salangan fiya fiya nogsalifit ka salong, kaarakitay yomawa has fagayo sadi wak dahonya basad balay. ¹⁶ Ham fag kitonya yadi, ham fag fayawa yadi hayo salong sas faglagan manga taw, kaarakitay ta lomag hayo fiya fag ogali, ginya ta mamasayag dog yadi hayo Ama sat banwanan sam tongod kitay, hanya kafiyaon. ¹⁷ Ham fag idwa gisip kitay honbangkad hastay kaarakitay iglaban ka manga Batasan Hodyo, hanggan in Diyos manga fangampang adal hyabi. Yatokitay, maskin honbangkad hastay kaarakitay ho fatonglos tonya fagayo. ¹⁸ Ham fag matohodan kitay ka banwa sam tongod hanggan ka daga imliyam di aban, dapat ngadi ogbot ogbot fag bagay sas Batasan Hodyo idwam liyam it karigonan, tonya nodyan anod fagayo. ¹⁹ Yakanga nyawa faktaw kagfabali idwa ha kahologan ngadi sadik ogbot fag bagay gis Batasan Hodyo, hanggan igfaadal has taw kitonya, is Diyos igfatimbang hanya libaba man has fagayo it kangayanan sat sakop sam tongod. Dapat ay, ka katanog ka manga Batasan Hodyo fagayo, hanggan igfaadal kitonya has taw, is Diyos iglwang kitay, abwat it kangayanan sat sakop sam tongod. ²⁰ Maskin hogfwayong hayo, no kito odi ka mangag faadal Batasan Hodyo hanggan manga Farisiyo ham no katanog in Diyos kafangayofanan, ham idwam aktom hat sakop sam tongod. ²¹ Ham nadog kitay hyabi ta natogon has taw, Haw fag idwag fahatay taw. Nyawa faktaw nogfahatay taw, ka fangabaya mamatohoyan hanya has fadosaan. ²² Dapat kati kangko fagfwayongon ha hayo, ngadi ka gisog it fadwasay, ka fangabaya fatohoyan hanya hat fadosa. Kagyod dit fadwasay, ka manga ha kangayanan Hodyo sasta Fanoltolan fatohoyan hanyat fadosa. Hanggan nyawa faktaw noglwang hat fadwasay, Paong paong haw, ngandayo imtohoyan has fadosaan manga taw sas afoy. ²³ Yakanga haw no ha diya fagdisagon fangafiyan han Diyos, dapat igtohod kitay im fadwasay ha fakahoriyon ha hyamo, ²⁴ obonan yap im disagon sas dayo fanogban. Ha fag hayap im fadwasay, haw famatohoyan yap hanya fiya fiya. Ginya ara ha fakafwali ya, fag bago domisag im disagon han Diyos. ²⁵ No hagsombong ha hyamo has fangabaya, famatohoyan yap hasagsombong, ha no somyagan di, haw nodya sas fagdogan fangabaya. Maskin haw nodwa syagan igfatohoyan, ta domiya wa ara hyamo has fangabaya. Ginya ka fangabaya ka domisag hyamo hasag bantay porisowan, ginya madi hamporiso wan. ²⁶ Hogfwayong hyamo hadwa malfas ginya aban, haw nodya nabayad hanggan wa kat kahaminan fag saga. ²⁷ Ham nadog kitay ta natogon has taw hyabi, Haw fag idwag fabayowan. ²⁸ Dapat kati hogfwayong ha hayo kitay, nyawa fakta fag ama kagbantay has ina, ha fangayofan wa kasaya hanya, sat fangayofan nafabayowan wa hanya fag ina. ²⁹ Nom mata kagtaban hyamo has ogali dwat, sowatan lamang im mata ginya okasan wan. Maskin im habilogan it baliw nomliyam, tonya fiya man has habilogan sadi wak dahonya nom hadasogan has fadosaan manga taw sas afoy. ³⁰ Nom gamat man kagtaban hyamo has ogali dwat, lifongan wam gamat, ginya okasan wan. Maskin im habilogan it baliw nomliyam, tonya fiya man has habilogan sadi wak dahonya, not hadasogan has fadosaan manga taw sas afoy. ³¹ Ka Batasan Hodyo gin Mwisis nalwang yadi kitay, sadik ama no gobon it babay fag ha kasoratan kitay hanya nadayo wan. ³² Dapat kati hogfwayong ha hayo, ka ama no gobon it babay, nyawat babay idwa ha nafabayowan, ginya kat babay omindogan iba ama, kawat indogan gona ka ha dwat, maskin igfangolo it babay hasagfabayowan baliwa. Hanggan nyawa fakta fag ama ka bomabay ista nagobonan fag ina, tonya fag ama igfabayowan yadi wan. ³³ Ham nadog yadi kitay ta natogon has manga taw hyabi hyabi, haw nogtangkod marigon kitay haw ha togon bato ibolonon, haw fag fatonglos kam natangkod san Diyos fagdogan. ³⁴ Dapat kati hogfwayong ha hayo, ham fag idwag faaywanon hampang ha no ha tangkod. Ham fag idwag lwang, In Diyos banwanan sam tongod fadi wadagdog angko hampang, maskin kat banwanan sam tongod in Diyos wa fanokawan gorangon. ³⁵ Fag idwa yadig tangkod wa kitay, Ka daga fadi wadagdog angko hampang, maskin ka daga in Diyos wa lidan bitis. Fag idwa yadig lwang kitay, Ka banwa Hirosalim fadi wadagdog angko hampang, maskin ka Hirosalim ka Dahol fag Gorangon it sadili banwa. ³⁶ Haw fag idwa yadig lwang Nyawa aho matay wan, maskin no kadi haw, hadwa syagan igfabanonan, mangag fahasding im bok alfoyo ngadi sadik ogat. ³⁷ Fiya wam fwayong, hawag dogang ya domwag, no ala, fag lwang ala wan, nodwan, fag lwang idwan. Maskin no ha dogang yat tangkod giwas kadwatan tonyat fagfonan. ³⁸ Ham nadog kasta fwayong kitay, No mata man di kasta nafadwat, ta fag gomanti, domwat mandi ista mata. No ngifon, ngifon mandi kasta fagfadwaton. ³⁹ Dapat kati hogfwayong ha hayo, ham fag idwag laban ka dwat fag taw. No hagtofa hyamo marigon balis sihon fag faringfing, fag hanggan wa ka balis wala. ⁴⁰ No hagsombong hyamo hasagtalinga hampangan kaarakitay igbolay im balokas, disagan yadi wa hanggan kam rotay ka aba aba. ⁴¹ No hagfafasan hyamo it diya sadik liho, fasanan dowa man ik liho. ⁴² Disagan hasagsagad gi hyamo, fag idwa kwangit ka manga goyam hyamo. ⁴³ Ham nadog kasta manga fwayong hyabi, Haw fag kaawa im manga fakilalaon dapat fag kaisog im manga kaaway. ⁴⁴ Dapat to yadi kangko fwayong, Ham fag kaawa hayo manga kaaway, ham fag darangin yadi kawa has mangag fahoriyan hayo, ⁴⁵ kaarakitay ham imbali hayo Ama manga anak orongan, hayo Ama ka sat banwanan sam tongod. Maskin hayo wa Ama ka sat banwanan sam tongod kagfasalog ka myanit has manga dwat fag manga taw hanggan has fiya. Hayo yadi wa Ama kagfahwayan has manga taw kantohoyan hanya, hanggan has manga taw ka kafang hanya. ⁴⁶ No ka lamang manga kaawa hayo, ka hayo fakaawaon, kana ka hayo fagfanayaon fasalamat aban, ham gayfan? Idwa awkin kitonya yadi kat ogali ka manga fanohot bohis? ⁴⁷ No ka odi hayo manga fadwasay ka hayo fakampangon mahoway, kana ka hayo ogali ka fiya man has taw? Ka manga Hintil, kadya kilala in Diyos, kampang mahoway no hadit manga fadwasay. ⁴⁸ Yakanga hayo manga ogali fag kabali fiya wa malayon, kito yadi ka hayo Ama sat banwanan sam tongod no fiya wa malayon.

¹ Ham fag matohodan kitay ham no gogali fiya, fag bohonwa kitay famalagon odis taw. No famalagon odis taw, ham idwa ha tanggapon fasalamat gi hayo Ama ka sat banwanan sam tongod. ² Yakanga, haw no kasayag disag has myabog, haw fag idwa gawang has fakaaywanan, kito kasta ogali ka manga ha takan nogfadog sas fanimbaan, hanggan sayo basad karsada. Kitonya ista ogali kaarakitay manga taw mamasayag dog ha hanya. Hogfwayong hayo ta natanggap wat fasalamat. ³ Dapat haw nogdisag has myabog, sakwag fadog nyawa kawa kam fakilalaon fiya fiya, ⁴ kaarakitay bohonwa famalagon odis taw haw nogdisag has myabog. Ginya madi hyamo Ama kaglag hyamo ogali fiya, haw no nadisag kitonya, domisag fasalamat ha hyamo. ⁵ Ham nogdarangin, ham fag idwag sokfon ka ogali manga ha takan. Ta nogdarangin, ista fakasayaon, ta fag malindogan sas fanimbaan, ngatay sas basad fagsalahan karsada, maskin famalagon odis taw. Hogfwayong hayo ta natanggap it fasalamat. ⁶ Dapat haw nogdarangin, haw fag sakbaw ham basad balay, fag tahop wan. Ginya madi haw fag darangin ha hyamo Ama kaglag hyamo, nyawa hadyapdi nalag hanya, ginya hyamo Ama domisag yadi ha hyamo fasalamat, kawa fiya kam naogali nogdarangin, bohonwa famalagon odis taw. ⁷ Ham nogdarangin ham fag idwag faaywanon hampang kito kasta ogali manga Hintil. Ta gayfan kitay ista fagsyagon domog wan kawasta hampang kaaywanon. ⁸ Ham fag idwag sokfon is taw kitonya. Maskin ham nodyag sagad gi hayo Ama, hanya danwa twa no kana ka hayo kakorangan. ⁹ Yakanga fag kiti ham nogdarangin, Hyami Ama ka sawam banwanan sas tongod, Hyamo ngayan bohonwa fagswayon. ¹⁰ Haw fag kabali hari, kagsakop has fagayo. Im kafangayofanan fag kaanod fagaba istay is baba daga, no kinday no fagaba kaanod sam banwanan sam tongod. ¹¹ Disagan nangos ha hyami hyami fanganon ka homosto tangona fag sirang. ¹² Haw fag faliyam hyami manga naogali dwat, no kinday hami nogfaliyam ista naogali dwat ha hyami. ¹³ Fag idwag faakbang hyami has manga dwat kaarakitay igsolay hyami, Dapat bawiyan hyami gin Satanas. (Maskin haw wa ka Hari kagsakop fagayo, haw kadwa ha bosal, sawa hyamo yadi ka kafiyan, nyawa ginahin. Fag kitonya wa ngay.) ¹⁴ Maskin ham nogfaliyam ista manga naogali dwat ha hayo, hayo Ama sat banwanan sam tongod, mamaliyam yadi hayo manga ogali dwat. ¹⁵ Dapat ham nogbotang yapdi ista manga naogali dwat ha hayo, hayo Ama idwa yadi faliyam hayo manga naogali dwat. ¹⁶ Ham nodwa kwan hanon kaarakitay mandarangin, ham fag idwag falagon kitay ham roko-roko kito ka manga taw kagfalagon odis taw. Tadwag fafiyanon it habilogan kaarakitay manga taw tomwa kitay tadwa kwan hanon gis nanya fag masohod. Hogfwayong ha hayo ta natanggap it fasalamat. ¹⁷ Nyawa haw idwag yafon, idwag yabas kaarakitay mandarangin, haw fag fafiyanon im habilogan, im bok fag masorodan di, fag yamos yap im mata, ¹⁸ kaarakitay manga taw idwa kadolaw kitay hadwa kwan hanon. Im Ama kaglag hyamo, nyawa hadyapdi nalag hanya, hanya lamang ka nalag kitay haw gibolon kitonya, gogali fiya, bohonwa famalagon odis taw, hanya ka domisag fasalamat ha hyamo. ¹⁹ Ham fag idwag tifon kaakwaan istay sas baba daga, maskin ha manga tipakong kagat, ha manga aningga kwan yadi, ha akwa yadi manga fangnahaw igsakbaw. ²⁰ Ka fiya, ham nogtifon hayo kaakwaan, fag san Diyos banwanan sam tongod, maskin sinya idwa ha tipakong homagat, idwa yadi ha aningga, idwa yadi ha fangnahaw igsakbaw. ²¹ Maskin no sidak mabotangan hayo kaakwaan, hayo fangayofan sinya yadi wak maisipan fagaba. ²² Ka mata ka bilang wa salong sas haboyagan. Yakanga im mata no fiya, igfayawam haboyagan sadi wak dahonya. ²³ Dapat im mata no dwat, im haboyagan sadik dahonya inbali yadi wa marom. Yakanga ka yawa sa hyamo no marom mangharaw, marom wa dahol dahol tonya. ²⁴ Idwa ha taw syagan igfasohodan katanog has dowa kagsogo hanya. Matohoyanan ha fagfiliyon, ngatay kawilit fon sadi, ngatay kadwat iglag kat fadowa, ngatay katanog fiya fiya ka sadi, dapat igfasigpala wa kat fadowa. Ham idwa syagan katanog in Diyos hanggan has kaakwaan igsohodan. ²⁵ Yakanga hogfwayong ha hayo, ham fag idwa galibitan hayo fanganon hanggan inomon kaarakitay ham imboyag, ngatay hayo rotay bato solongon. Idwa awkin ka haboyagan bohondi kitos fanganon no mahalga, ham gayfan, hanggan ka habilogan bohondi kitos rotay? ²⁶ Fanlag ngay, ham bantayan ka manga manok, idwag famgas, idwa yadi gani, idwa yadi ha tifon basad dongdong, dapat ay nyawa kitonya, hayo Ama sat banwanan sam tongod kagfahwan di ka manga manok. Gwadi ham bohondi kitos manga manok ik mahalga. ²⁷ Fakta fag taw sa hayo syagan igfadogay it haboyagan sas baba daga, ngadi sadik tama sinyahod kawa no galibitan, ham gayfan? ²⁸ Kana ham no galibitan hayo solong rotay? Yabay ka manga borahan igborak basad talon, gwadi tonya idwag bonang, idwa yadi kalig rotay. ²⁹ Dapat hogfwayong hayo, nyawas Salomon igsolong it rotay fiya man has fagayo, ka sadik borahan fiya man inyak kabantay, idwa ha matoga. ³⁰ Is Diyos no bilang wagfasolong rotay kafiyaon kabantay has manga lamnon, ka kati malangba basad talon, dapat ay, no marom ngandayo imsonog lamang, idwa awkin labi man is Diyos wa ka farotay hayo? Laya ogbot yapdi ham nogsyag hanya. ³¹ Yakanga ham fag idwa galibitan hayo fanganon, hayo inomon, hayo manga solongon rotay. ³² Maskin tonya fag manga bagay ka manga Hintil fagalibiton. Hayo Ama sat banwanan sam tongod fadi wadtwa kitay korang yadi sa hayo ham nodwa ha akwa tonya fag manga bagay. ³³ Bago bago ham fag fasakop fiya fiya han Diyos hanggan fag katanog it manga fwayong, ginya madi ham tomanggap yadi tonya fag manga bagay fagayo. ³⁴ Yakanga ham fag idwa galibitan ka manga bagay ka bago marom. Nomdasog sa sadik bago marom, gis nanya yabay, bago mangisip kitay kinda odi kati. Sa sadik sirang it fagisipon hosto wan.

¹ Ham fag idwa gato fagaba hayo kapariho kaarakitay is Diyos idwa yadi gato hayo. ² Maskin no kinday ham no gato is taw, kitonya yadi is Diyos no gato hayo. No kinday hayo gantangan has taw, kitonya yadi is Diyos no gomantang ha hayo. ³ Kana mayon haw nogbantay ka rokrok sam fadwasay basad mata, dapat hagfabayaan ka sa hyamo sadili mata bilang wa dahos batang? ⁴ Kinda araw haw no lomwang ha hyamo fadwasay, ho nangos bomol ka rokrok gi hyamo mata, dapat sa hyamo, ya manghara, ha akwa yadi daho was batang? ⁵ Hagfataka odi, gwadi bol yap ka daho was batang ka sa hyamo sadili mata, ha bago di lomag fiya fiya, ginya madi ha tomwa bomol ka rokrok gim fadwasay mata. ⁶ Ham fag idwag disag has ido ka manga bagay kantohoyan han Diyos, ngandayo ka ido bomantay araw, ngomarngar ha hyamo. Ham fag idwa gokas has baboy hayo ono bolawan, ngandayo lomid odi tonya. ⁷ Ham fag sagad, ginya ham tomanggap hayo fagsagadon. Ham fag sayak a, ham lomag wa ka hayo fagsayahon. Ham fag sagam gi dayo balay, ginya ta fasakbaw hayo. ⁸ Maskin fagayo kagsagad tomanggap wa kat fagsagadon, fagayo kagsayak lomag wa kat fagsayahon, hanggan fagayo kagsagam gi dayo balay, ta fasakbaw wan. ⁹ No tinapay ka hayo anak fagsagadon, ham awkin domisag bato? ¹⁰ No oyang man kat fagsagadon, ham awkin domisag abyanon? ¹¹ Gwadi no ham, nyawa kitay hayo manga ogali idwa fiya, ham idwag disag ha hayo manga anak kadwa fiya hanon, idwa awkin bohondi kitonyak mahoway hayo Ama ka sat banwanan sam tongod? Fiya fag manga bagay kat fagdisagon has mangag sagad gi hanya. ¹² No kinday hayo fakasayaon ista ogaliyon ha hayo, ham fag gogali yadi kitonya ha hayo manga kapariho. Kitonya yadi ka Batasan Hodyo it manga kahologan hanggan in Diyos manga fangampang adal hantam. ¹³ Ham fag danwag sakbaw has ogbot fag sakbawan alad, maskin dahol ka sakbawan hanggan gorangon ka dalan ka hawas kadwatan, aywan kaglahaw hanya. ¹⁴ Dapat ay, ogbot ka sakbawan, mahori yadi ka dalan ka hadasogan has haboyagan, hanggan sayok di kaglag ka ogbot fag dalan. ¹⁵ Ham fag matagahan ka manga bohagon fag manga fangampang. Magop wan no kalag di, ta nombangkad ha hayo, bilang manga topa, dapat ka orongan sasta basad fangayofan kitos ido maisog gi basad talon. ¹⁶ Ham lomag wat manga ogali no kinday. Tam awkin igfangta bohad obas gis lamnon madogi, ngatay bohad igos gis fon haya-haya, ham gayfan? ¹⁷ Ka fon hayo no fiya, igbohad yadi fiya, dapat ka fon hayo no dwat mandi, igbohad mandi dwat. ¹⁸ Maskin ka fiya fag fon hayo idwa somyagan bomohad dwat, kitonya yadi ka dwat fag fon hayo idwa somyagan bomohad fiya. ¹⁹ Fagayo fag fon hayo kadwag bohad fiya, ta omobang lamang a, somonog wan. ²⁰ Yakanga ham homilala ka manga bohagon fag manga fangampang git manga bohad ogali. ²¹ Idwa fagayo kagngayan angko, Angko Fon, ka somakbaw han Diyos banwanan fag sakop sam tongod aban, dapat ka katanog lamang angko Ama sas tongod it kafangayofanan ka somakbaw sinya. ²² Ka mahalga fag Sirang nomdasog aban, aywan ka lomwang hangko, Hyami Fon, gwadi mi namaadal yadi has taw im hampang, mi nafalagyo yadi ka manga labang, mi naibolon yadi manga madolaw sa hyamo ngayan karigonan. ²³ Dapat ho lomwang has taw, Nyawa ginahin hodwa nahilala hayo. Ham fag ayayo gingko, ham ka manga gogali dwat fagaba. ²⁴ Yakanga fagayo kagtalinga angko manga hampang to, hanggan katanog, kito yadi ka sadik taw madonong, ka nahalig it balay sas baba bato. ²⁵ Nahwayan dahol, nabaha ya ngadi, nabagyo yadi marigon, nabakbak ka balay, dapat ay, ka balay idwa nakfo maskin in-ganit sas baba bato. ²⁶ Dapat ay, fagayo fag manga taw kagtalinga angko manga hampang dapat idwa katanog, kito sadik taw, bilang odig bongol, kalig it balay basad odi onay. ²⁷ Nahwayan dahol, nabaha ya ngadi, nabagyo yadi marigon, nabakbak ka balay. Ka balay nakfo lamang, insarowayan wan. ²⁸ Is Hisos nontabo wagtoltol kitonya, ka manga taw indolaw it manga fwayong, ²⁹ maskin is Hisos nogfaadal matohoyanan wan, kitos sadik taw ha kangayanan, idwa kito ka mangag faadal Batasan Hodyo.

¹ Is Hisos nondasog has lwad gis baba moyod, aywan fag manga taw naoyan hanya. ² Yakanga sadik taw ha sagit kitong naakbang hanya, nanlingkohodan sat atobangan, iglwang, Ama, haw no kasaya di, haw fadi wad somyagan igfafiya angko sagit. ³ Is Hisos natawid hanya, ginyag lwang, Ho kasaya ngay, haw fag imfiya wan. Ginya madit kitong dagos wanfiya. ⁴ Is Hisos natogon ha hanya kitay, Hawag fwayong nyawa haday fag manga taw, dapat fag hayap has fagalan-han-Diyos, fabantayan hanya im habilogan. Ginya madi ha disagan kan Mwisis natogon bato disagon bilang faorongan has taw kitay haw infiya wan. ⁵ Is Hisos no hawas basad banwa Kapirnaom, sadik fagtahinan sondalo taga Roma naakbang hanya, nalwang, ⁶ Ama, angko sogowan idwa syagan kimot. Hanya sinya dik maigyanan sa hyami balay, kahori wa dahol dahol it sagit. ⁷ Is Hisos iglwang, Tam hanya wan, ho fafiya hanya. ⁸ Dapat ka fagtahinan sondalo nasagot, Ama, ho kaya wa hyamo, nyawa hadwam dasog hangko balay. Haw fag lomwang lamang kitay, angko sogowan fag imfiya, ginya madi im-anod wan. ⁹ Kawa aho sadi yadik taw kagfasakop has manga abwat fag kangayanan, dapat ay, aho ha fagsogoon yadi manga sondalo. Aho noglwang ha sadi, Ha fag hanya wan, yakanga hanyan tanog wan. Aho noglwang ha sadi ya, Haw fag hastay, hanyam bangkad wan. Aho noglwang hangko nasali sogowan, Haw fag gibolon to, hanya omibolon wa tonya. ¹⁰ Is Hisos no nadog it hampang, indolaw wan, nafwayong has manga taw ka goyan hanya kitay, Hogfadog ha hayo, hodya ha donggon no kitay iba taw kitonya wa kagsyag angko marigon, nyawa sawan Israil manga hasokfonan. ¹¹ Ho danwag fatagak hayo kitay, aywan kambangkad aban gis salogan myanit hanggan sangdayan myanit baliwa, manayowan san da Abraham da Isaak da Hakob, san Diyos sakop fanganan sat banwanan sam tongod. ¹² Dapat aywan in Israil sakop fag manga hasokfonan im-okas lamang has basad marom sas sokayan, sinya ta mangodgorawan wan hanggan wasta ngifon di mangarigitan wan. ¹³ Ginyas Hisos nalwang has fagtahinan sondalo, Nyawa ha goli wa kati, maskin hagsyag wa fiya fiya angko, im-anod wan kam fagsagadon gingko. Gis nanya yadi fag masohod ka fagtahinan sondalo sogowan nonfiyat sagit. ¹⁴ Is Hisos nonsakbaw san Pidro basad balay, nalag in Pidro nogang ina sinya, maigyanan kagnaw. ¹⁵ Is Hisos natawid ka ina it gamat. It hagnaw dagos wanfiya, ginya ka ina inbangon, ogali man di, igtogbong in Hisos. ¹⁶ Ginya madi araw no kayabi wan, ka manga taw nataban han Hisos aywan ka ha manga labang igfahoriyan is taw. Sadi lamang ik hampang is Hisos nafaalin ka manga labang, nafafiya yadi fagayo ka ha manga fagdogon. ¹⁷ Is Hisos naibolon kitonya kaarakitay in Isayas, in Diyos fangampang fwayong im-anod wan, noglwang kiti, Hanya nabol intam manga kagomowan, Nadiya yadintam manga fagdogon. ¹⁸ Is Hisos noglag kaaywanon ka manga taw sat ligongan, hanya nasogo hat manga ofod kitay, tam ara domifay wa has difay linaw. ¹⁹ Araw araw ogbot, sadi kagfaadal ka Batasan Hodyo naakbang han Hisos nalwang, Haw kagfaadal, ho tomahin yadi wa hyamo, nyawa ha hadawan. ²⁰ Is Hisos nasagot hanya, Ka manga ido maisog ha oliyanan basad lohib, ka manga manok ha fogad yap man, dapat ay, aho, Kanbali Taw, idwa ha toyogan, idwa ha fahowayan. ²¹ In Hisos katogbong sadi iglwang, Angko Fon, ha faoliyan yap dingko, ho manlobgob yap angko ama. ²² Dapat is Hisos nafwayong hanya, Ha tahinan wangko, fabayaanan yapdi ka manga mahatayan, ta bahala waglobgob it sadili kapariho ka natay. ²³ Araw is Hisos no nasahay was baloto, it manga katogbong natahin yadi wan. ²⁴ Yabay araw nabagyo dahol dahol baba danom, taob di godgoyanan wan myasa wa dahol sas baba linaw, ka odi kitay idyag tabon ka baloto. Dapat gis nanya is Hisos matoyogan di. ²⁵ Yakangat manga katogbong hawan Hisos, nafolaw hanya. Taglwang, Hyami Fon, hyami Fon, kalibang kalibang, togbongan hyami, tam kalogom wan ha daga danom. ²⁶ Ginyas Hisos iglwang, Kana mayon ham no kadala? Yabay ham idwa bangan igsyag angko. Ginyas Hisos inbangon wan, nangabaya ka bagyo hanggan taob. Yakangan tohas ya ngawan ka danom, inhalyaw ya fiya fiya. ²⁷ Yakanga ta fagayo indolaw waglag, taglwang, Kana wa to fag taw? Nyawa bagyo, manga dagat, katanog it fwayong. ²⁸ Da Hisos nondasog sas difay sas banwanan manga taga Gadara, ha dowak ama gis manga lohib fanlobgobanan taw natagbo in Hisos. Ka dowak ama ha manga labang kagfahoriyan hanya, maisog ya ngadi, yakanga ka manga taw kadala wagdalan sinya. ²⁹ Ginya madi ka dowak ama ha labang, dagos wa narokyaw, iglwang han Hisos, Haw in Diyos wa Anak, haw fag idwag mawat hyami. Haw awkin inbangkad hastay kaarakitay igfahoriyan hyami nyawa idyapdin dasog gis nanya hyami fadosaan? ³⁰ Idwa ayayo bangan ginya ha sadik tifonan baboy ayo ayo, kwan manga lamnon. ³¹ Ka manga labang igsagad in Hisos kiti, Haw nogfaalin hyami gis taw, faangayan nangos hyami, sogowan wa hyami has nwa fag manga baboy ayo ayo. ³² Is Hisos iglwang, Sogi, ham fag hanya wan. Yakanga ka manga labang nalin wa gis taw, hawas basad manga baboy. Ginya ka manga baboy dagos wa nandalandanan madali has lwad indahodan has basad linaw dahol, fagayo inlimos wan. ³³ Ka manga gano tifonan baboy nalagyo wan hawas banwa, nafadog has taw fagayo kat lagan hanggan no kinday ka manga ama ka ha labang haraw. ³⁴ Yakanga ka manga taga banwa, sadi wak kayonya manga taw, nagobok in Hisos. Ta no nalag hanya, ta garonganon igsogo hanya gista banwanan.

¹ Yakanga da Hisos nasahay wa baloto, nwali ya has bali difay linaw dahol, nadagos wa hat sadili banwanan. ² Yabay tiba taw nadiya han Hisos sadik taw kadwa syagan kimot, maigyanan sat baba sagmak. Is Hisos no nalag kitay tagsyag marigon ha hanya, is Hisos nafwayong has taw kadwa syagan kimot, Ama, ha fag marigon im fangayofan. Hogfaliyam im manga naogali dwat. ³ Tiba kagfaadal ka Batasan Hodyo naayfan sat basad fangayofan, To fag taw igsway in Diyos. ⁴ Dapat is Hisos nasalom ista fagisipon, yakanga nalwang has taw, Kana mayon ham no gisip kitonyak dwat? ⁵ Sida ka malpos fwayongon, ngatay Hogfaliyam im manga naogali dwat, ngatay Ha fag kabangon, anggongan wam sagmak, fag lomahaw wan. ⁶ Dapat ho falag ha hayo kitay aho, Kanbali Taw, ha kangayanan igfaliyam ista manga ogali dwat istay sas baba daga. Ginyas Hisos nafwayong has idwa syagan kimot, Haw fag kabangon wan, dyan wam sagmak, nyawa ha mwali wa kati. ⁷ Ka ama nalindog wa ngay, nwali wan. ⁸ Ka manga taw no nalag kitonya, indala wan, hanggan tagbaya yadi han Diyos ka nadisag kitonya fag kangayanan has taw. ⁹ Da Hisos nalahaw wa ginya fag banwanan. Ta noglahaw yapdi, is Hisos nalag sadik ama, it ngayan is Matiyo, matokawan sas fanohotan bohis Roma. Is Hisos nafwayong hanya, Ha tahinan wangko. Is Matiyo dagos wanlindog, natahin wa hanya. ¹⁰ Araw da Hisos no matokawan san Matiyo balay sas bilog fanganan, yabay aywan fag manga fanohot bohis hanggan tiba taw kadwa fiya it ogali, nagobok in Hisos. Ta fagayo nanayowan kwan sinya, hanggan in Hisos manga katogbong. ¹¹ Ka manga Farisiyo no nalag kitay tagsayowan kwan hanon sinya, ta naintaw in Hisos manga katogbong, Kana mayon kagfaadal ha hayo nogsayo has manga fanohot bohis hanggan has manga taw ka ha ogali dwat? ¹² Is Hisos nadog ista manga hampang, yakanga nasagot kiti, Ka manga ha sagit ka kasaya has famolongan, no kadi idwa ha manga sagit idwa kasaya hanya. ¹³ Gwadi ham fag twagdog it kahologan noglwang, Ka kaawaan kangko fakasayaon, fiya man ka fangafiyan fag sinogba. Maskin ngay honbangkad hastay, angko fagsayahon ka manga ha ogali dwat, bohonwa ka gayfan kitay it manga ogali fiya. ¹⁴ Ginya madi in Hwan manga katogbong hawan Hisos, naintaw hanya kitay, Gwadi hami fagabadwa kwan hanon kaarakitay mandarangin, hanggan ka manga Farisiyo kitonya yadi. Kana mayon im manga katogbong nodwa gogali kitonya? ¹⁵ Is Hisos nasagot has taw, Ka mangag fasakop has famabayan marongkot awkin kagbabay no gofod yapdis taw, ham gayfan? Dapat ay, aban, ha pomilit tomaban kagbabay, gis nanya ta bago didwa kwan hanon kaarakitay mandarangin mahogod. ¹⁶ Idwa haglonob rotay kadyan yamos has daanon fag rotay, maskin ka bago maganit man ka daanon, yakanga labi man imdahol ka losbong sas daanon. ¹⁷ Idwa yadi ha taw somiblag alak bago has basad sohadan anit daanon. No omibolon kitonya ka anit imbosni, ka alak im-od-olanan lamang, ka sohadan anit imdwat yadi wan. Yatokitay, tagsiblag bago fag alak has bago fag sohadan anit, ginya fagayo dowa dogay imdwat. ¹⁸ Is Hisos nogtoltol yapdi has taw, sadik fag tahinan Hodyo insakbaw wan, nanlingkohodan san Hisos atobangan, iglwang, Angko anak ina bago di nafos it ipsaw. Haw nangos tahinan angko, fwalidan yap im gamat ha hanya kaarakitay hanyam boyag ya. ¹⁹ Is Hisos nalindog wan naofod hanya, hanggan it manga katogbong hanya yadi wan. ²⁰ Ya mangharaw, sadik ina ka ha sagit ina, safolo ha dowak fangaraw, naoyan inda Hisos. To fag ina naakbang han Hisos gis ginanan, dayo goyoy, nasapkid it tobwan tobwan rotay, ²¹ maskin it fangayofan iglwang, Ngadi ho somapkid it tobwan rotay homfiya wan. ²² Is Hisos inbalihid, ginya no nalag ka ina, nalwang, Anak ina, fag marigon im fangayofan, maskin hagsyag angko, haw infiya wan. Gis nanya yadi ka ina infiya wa dagos it fagdogon. ²³ Da Hisos nondasog sas balay fag tahinan, nalag tagfaoni manga palawta, hanggan aywan fag manga taw, mawang wan. ²⁴ Is Hisos nalwang, Ham fag dokson wa has sokayan. Ka anak ina idwa natay, matoyogan di. Ka manga taw kasay odi in Hisos. ²⁵ Dapat ka manga taw nondokson wan, is Hisos nasakbaw wan, natawid ka anak gamat, yakanga ka anak inbangon ya. ²⁶ Ginya madi in Hisos naibolon inbarita wa sadik dahonya sinya fag banwanan. ²⁷ Da Hisos no nalahaw ginya fag banwanan, dowak ama bota goyan wa goyan wan Hisos. Tagtawag marigon, iglwang, Haw in Dabid hasokfonan anak, haw fakaawa hyami. ²⁸ Is Hisos no nasakbaw hasta basad balay, ka manga bota naakbang hanya. Is Hisos naintaw is taw, Ham awkin katiwala kitay ho somyagan omibolon to? Taglwang, Ala, hyami Fon mi katiwala ngay. ²⁹ Ginyas Hisos nasapkid ista manga mata, nalwang yadi kitay, Maskin ham igsyag wangko, im-anod wa kitonya. ³⁰ Ginya madi dagos wanfoga ista mata. Is Hisos igbando mahogod kitay, Ham fag idyag fwayong nyawa haday. ³¹ Dapat ta nondokson di ngay, ta dagos wa nafwayong sadik dahonya banwanan sinya in Hisos naibolon. ³² Ka manga bota kanfiya nonlahaw di ngay, ta ha nataban ya han Hisos sadik taw boyon, labang kagfahoriyan. ³³ Ka labang no nalin wan, ka boyon kampang ya. Ka fakaaywanan fag manga taw indolaw wan, taglwang, Nyawa ginahin tam idwa ha lagan kadonongan kitonya sas Israil. ³⁴ Dapat ka manga Farisiyo iglwang, Ka manga labang fagtahinan kagtogbong in Hisos, yakanga syagan digfalagyo ka manga labang. ³⁵ Is Hisos naskatan ya ngawan ka manga banwa hanggan sas manga ligongan manga banwa, igfaadal sas manga fanimbaan Hodyo ka Fiya fag Barita kawa han Diyos sakop baliwa. Is Hisos nafafiya yadi ka manga taw ka ha sagit, nyawa kanat manga sagit, manga fagdogon. ³⁶ Is Hisos in-awa ka fakaaywanan fag manga taw, maskin ista fangayofan balaw balaw odi, bilang wadwa ha kaawa has taw, kitos topa kadwa ha gano. ³⁷ Yakangas Hisos igfwayong hat manga katogbong. Kaaywanon ka aniyon, dapat sayok ka fangani. ³⁸ Ham daranginan hasag fon namay, hanya nangos fag somogo, fag ha omani wa kat aniyon.

¹ Is Hisos nafatifon ka safolo ha dowak katogbong, ginya nafalobos has taw it kangayanan has mangag faalin manga labang hanggan igfafiya manga sagit. ² To kasta manga ngayan ka safolo ha dowak Fandiya Barita. Bago bago is Simon kasta faglwangon is Pidro, hanggan is Andris it fadwasay. Da Santyago da Hwan in Sibidiyo manga anak, ³ da Filipi da Bartolomi, da Tomas da Matiyo, ka fanohot bohis, in Santyago sangay kan Alfiyo anak, hanggan is Tadiyo. ⁴ In Simon yadi sangay kagbaliwa it manga kapariho Hodyo, hanggan is Hodas Iskariyoti ka naoyon in Hisos kalaban. ⁵ Is Hisos nasogo tonya fag safolo ha dowak Fandiya Barita, natogon kiti, Ham fag idwa has manga banwanan Hintil, fag idwa yadi has manga banwa manga taga Samariya. ⁶ Ham fag sayak yapdi ka manga topa kanliyam san Israil sakop fag manga banwanan. ⁷ Ham noglahaw wan, fag faadal has taw kitay ka gin Diyos banwanan sam tongod kaakbang wa aba kabali hari. ⁸ Ham fag fafiya ka manga ha sagit, faboyagan yadi ka manga natay. Fafiyaan ya ka manga ha sagit kitong, faalinan yadi gistaw ka manga labang. Ka hayo natanggap idwa ha bayad, yakanga ham nogdisag has taw fag idwa yadi ha bayad. ⁹ Ham fag idwag diya kwarta, nyawa ginto, nyawa pilak, nyawa tanso sa hayo hagkos. ¹⁰ Ham fag idwa yadi ha diya boyog, ham noglahaw, nyawa hayo falhosan rotay, nyawa fanobos lapak, nyawa sokod, fag idwa ha diya, maskin ka fangibolon fiya di tomanggap it fangaboyagon. ¹¹ Nyawa siday fag banwa, ngatay tifonan balay, ham nomdasog sinya, ham sayahan ka taw danwasta fakilalaon fiya fiya sinya. Ham fag sinya wak domogayan no baliday ham sinya yapdi. ¹² Ham nogsakbaw sasta balay ham fag lwang, Fag ka kahowayan kagbahala istay sa hayo balay. ¹³ Ka manga taw sinya fag balay no fiya it manga ogali, ham fag mahoway odi has manga taw sinya kito hayo nafwayong. Dapat nodwa fiya, bawiyan hayo fwayong. ¹⁴ Sa sadik balay, ngatay banwa, ta no kafang igfasakbaw hayo, kafang yadi igtalinga, ham noglahaw wa ginya, fadagdagan yadi ka manga fogis daga gi hayo manga bitis. ¹⁵ Hogfwayong ha hayo, bonwa bohag, ista fadosaan aban, sas Sirang Fangabaya bohondi kito ka fadosaan sas manga banwa Sodoma hanggan Gomora. ¹⁶ Kati yabay, hogsogo hayo bomarita, bilang manga topa magop magop sas fagbokngan manga ido maisog. Yakanga ham fag bilang wa abyanon no maaman, dapat ham fag kito was limohon ik mahoway. ¹⁷ Ham fag matagahan maskin ha manga taw aban fagamat hayo hasag talinga hampangan. Ta fabakbak yadi hayo sas manga fanimbaan Hodyo. ¹⁸ Maskin aho hayo fagalwasiyon, ta gomoyod hayo has atobangan manga gobirnador hanggan manga gorangon. Ham mamaorongan sasta fagdogan, hanggan sas fagdogan manga Hintil. ¹⁹ Ta nogfagamat hayo has taw, ham fag idwa galibitan hayo bato fwayongon ngatay no kinday ham no somagot. Nomdasog gis nanya fag masohod aban, is Diyos fatohod hayo hampang bato sagoton has taw. ²⁰ Maskin hayo hampang aban idwa gi hayo sadili fangayofan, ka hayo hampang gi wa hayo Ama it Falad ka faisip hayo. ²¹ Aban kayadit fadwasay kagfagamat it fadwasay has iba taw kaarakitay ta fahatay hanya, kitonya yadi kat ama hat sadili yadi anak. Manga anak lomaban it magorang, fasognod has iba taw kitay fahatayan wan. ²² Maskin aho hayo fagalwasiyon, fagayo fag manga taw kadwat iglag hayo aban, dapat kadwag fagomon hanggan wa has katabowanan, hanya wa kambawi. ²³ Ta nogfahoriyan hayo sa sadik banwa, ham fag lagyo ha sadi yak banwa. Hogfwayong ha hayo, ham idya domasog has fagayo fag manga banwa sas Israil, aho Kanbali Taw, nombangkad ya. ²⁴ Idwa ha katogbong ha kangayanan abwat man hasag faadal hanya. Kitonya yadi idwa ha sogowan ha kangayanan abwat man hat fon kangayanan. ²⁵ Ka katogbong nogtolad kagfaadal hanya, fiya wan, hanggan ka sogowan nogtolad yadi kagfon hanya. Ta nogngayan kagfon balay is Biilsibol, labi man inyak dwat ta no ngomayan it manga ofod. ²⁶ Yakanga ham fag idwa kadalas taw. Ka manga matagowan kati fadi wadamlag aban. Fadi wamfyalom aban, imdog di has fagayo. ²⁷ Kangko fwayong ha hayo basad marom, olitan ya sas basad mayawa, kasta nainas ha hayo, ham fag golit igtawag fiya fiya sas sokayan sasta fanifonan. ²⁸ Ham fag idwa kadala kagfahatay habilogan taw, dapat idwa syagan igfahatay hayo falad. Yatokitay, ka syagan igfadwat habilogan hanggan falad sas basad fadosaan afoy, fag tonya wa ka hayo fakadalaon. ²⁹ Idwa awkin tam nogfasali dowak maya sadi dik saga it halga? Nyawa kitonya, no bohonwa hayo Ama kafangayofanan, nyawa sadik maya idwam dagdag has baba daga. ³⁰ Gwadi nyawa hayo bok sas alfoyo, hayo Ama twa wa no kayoday it manga ogat. ³¹ Yakanga ham fag idwa kadala, ham mahalga man has kaaywanon fag manga maya. ³² Nyawa faktaw kagbaya sas manga taw fagdogan kitay hanya angko wa sakop, ho bomaya yadi aban, sangko Ama atobangan sam tongod, kitay tonya fag taw angko wa sakop ngay. ³³ Dapat ay, nyawa faktaw kagtangkod angko sas fagdogan manga taw, ho tomangkod yadi hanya sangko Ama fagdogan, ka sawat banwanan sam tongod. ³⁴ Ham fag idwa gayfan kitay honbangkad hastay kaarakitay igdiya kahowayan hastay is baba daga. Honbangkad hastay ha diya yadi talibong, bohonwa kahowayan. ³⁵ Maskin honbangkad hastay kaarakitay ho falaban kasta anak ama hat ama, kasta anak ina hat ina, kasta nogang ina hat nogang ina magorang. ³⁶ Hanggan ista kalaban ka yadi talanahan. ³⁷ Ka galwasit ama ngatay it ina bohondi kito hangko no galwasi, idwa maangay sangko. Ka galwasit anak ama ngatay ina bohondi kito hangko no galwasi, idwa yadi maangay sangko. ³⁸ Kadwa gagwanta mahori, bilang kafang igfasan it sadili fatimbangan hayo, ginyadwag tahin angko, idwa yadi maangay sangko. ³⁹ Ka kwangit it sadili haboyagan hangko, hanya abadwa ha akwa haboyagan, dapat kadwa kwangit it sadili haboyagan kawa hangko, hanya ha tanggapon haboyagan. ⁴⁰ Kagtanggap hayo, aho yadi it fagtanggapon, hanggan kagtanggap angko igtanggap yadi kagsogo angko. ⁴¹ Kagtanggap sadik fangampang maskin tonya in Diyos fangampang, tomanggap ka fasalamat ka maangay han Diyos fangampang. Kagtanggap sadik taw fiyat ogali, maskin ka taw fiya, tomanggap ka fasalamat ka maangay has fiya fag taw. ⁴² Nyawa faktaw kagfainom, nyawa di sadik ongot danom magnaw, hangko sakop fag taw ka ogbot it kangayanan, maskin tonya angko wa katogbong, hogfwayong ha hayo kitay, matohoyanan hanya tomanggap it fasalamat aban.

¹ Is Hisos natogon di ngay hat manga katogbong Safolo ha Dowa, ginyan lahaw ya ngawan kaarakitay mamwayong, mamaadal ya has manga banwa sinyat akbang. ² Is Hwan kagfatogna manga taw hyabi sayapdis basad porisowan gis nanya. It manga katogbong nafadahit han Hwan in Kiristo manga naibolon, yakangas Hwan nasogo yadit manga sogowan hanya. ³ Ta nangos intawan han Hisos kitay, Haw awkin kawan Diyos natogon kitay imbangkad hastay, ngatay mi ha fagfanayaon yapdi sadi ya? ⁴ Is Hisos nasagot kiti, Ham fag goli ya ngawan han Hwan, ham fwayongan ka hayo donggon hanggan lagan. ⁵ Fag fwayong kitay, ka manga bota infoga ya ngat mata, ka mangan fihong it bitis iglahaw ya, ka manga ha kitong infiya yadi wan hanggan ka manga bongkok igdog ya, ka manga natay inboyag ya yadi, hanggan ka Fiya fag Barita nafaadal has manga myabog. ⁶ Ka taw kadwa gadowan igsyag angko bomaya wan. ⁷ In Hwan manga katogbong nonlahaw, Is Hisos nafwayong has manga taw kawa han Hwan, iglwang, Kana mayon hyabi ham no hawas basad fakahyabogan? Kana ka hayo fagasolopon sinya? Ham awkin kasayaglag ka bagyo nogfafarayfayan igfafarayfayan ka iyano? ⁸ Kana ham no hanya? Ngatay hayo fagasolopon sinya sadik taw myasa wa fiya it manga solong rotay? Gwadi sawasta gorangon balay ka myasa wa fiya it manga solong rotay. ⁹ Kana ka orongan hayo fagasolopon sinya? Ngatay in Diyos fangampang sadi? Ala ngay, tonya wan, hanggan hogfwayong ha hayo ka hayo lagan sinya it kangayanan bohondi kito kan Diyos manga fangampang. ¹⁰ Maskin is Hwan kat faglwangon sas Kasoratan, noglwang kiti, Fanlag ngay, hogsogo angko sogowan ka gomona hyamo. Hanya mamatalaga hyamo bato lahawan. ¹¹ Hogfwayong ha hayo idya ha anak kansagaya git ina ka abwat man in Hwan kangayanan, ka Hwan kagfatogna manga taw, dapat ka ogbot man has fagayo san Diyos sakop, it kangayanan abwat man in Hwan. ¹² Giwan Hwan igfaadal ka barita, hanggan balis kati, kan Diyos banwanan fag sakop igdog mahori hanggan ka maisog fag manga taw igpilit wa omaktom sinya fag sakop fag manga taw. ¹³ Maskin hyabi hyabi in Diyos manga fangampang hanggan ka Batasan Hodyo nagona wa nafwayong kawa han Diyos banwanan fag sakop, hanggan was Hwan nafwayong yadi hanya baliwa. ¹⁴ Ham no kasaya yadim tiwala, hanya is Iliyas ka hastay. ¹⁵ Ham no ha manga talinga ya ngadi, fag talinga wan. ¹⁶ Kinda odi kin angko fatoladan ka kati fag manga masohod fag manga taw, ham gayfan? Kito odis manga anak matokawan sas famahowayan, igtawag hat manga ofod anak, iglwang, ¹⁷ Mi fadi wad nafaoni palawta, dapat ham kafang digtayok, Nyawa hami nangodgorawan, ham kafang yadi goraw. ¹⁸ Kawas Hwan nonbangkad hastay, nomtoon idwa kwan hanon kaarakitay mandarangin, idwa yadi ginom alak, ginya taglwang, hono, Labang wa kagfon in Hwan. ¹⁹ Ginya madi, aho man, Kanbali Taw, inbangkad hastay, kwan yadi hanon hanggan ginom kitos iba taw, ginya taglwang, Yabay, to fag taw, mahogod wa kwan a, iglango ya ngadi, koyog yadi has mangag falo igsohot bohis Roma hanggan has tiba taw ka ha dwat fag manga ogali. Nyawa taglwang kitonya, in Diyos manga ibolon kagfatohoyan kitay in Diyos kadonongan myasa wa fiya. ²⁰ Ginya madis Hisos nangabaya ka manga banwa kat nafalag ka fakaaywanan fag manga ibolon madolaw sinya, maskin tadwa nasoyo, idwa yadi nadayo it manga ogali dwat. ²¹ Isyay wa, isyay wan, haw, banwa Korasin. Isyay wa, isyay wan haw, banwa Bitsayda, maskin ka manga taga Tiro hanggan taga Sidon no nalag di ka hayo manga lagan madolaw, ta dan wa nasolong manga sako hyabi yapdi, hanggan natokaw sas fogis dafog kaarakitay igfalag kitay tagsoyo wan. ²² Dapat hogfwayong ha hayo, gis nanya aban, sas Sirang Fangabayan, ka fadosaan kamtohoyan ha hayo bohondi kito kamtohoyan has manga taga Tiro hanggan manga taga Sidon. ²³ Haw yadi, banwa Kapirnaom, Haw aw kasayag faabwaton hyamo han Diyos banwanan sam tongod? Dapat ho fadagdag lamang hyamo hawas Daga Salad. Maskin no nangos sadis Sodoma no nalag ka hyamo lagan madolaw kati, ka banwa Sodoma idwa ara indwat, hanggan kati sinya yapdi. ²⁴ Dapat hogfwayong ha hayo, sas Sirang Fangabayan aban, im fadosaan bohondi kito ka fadosaan kandalan hyabi sas banwa Sodoma. ²⁵ Gis nanya fag masohod is Hisos nalwang, Mama, haw kagfon im banwanan sam tongod hanggan ka daga, hogbaya hyamo, maskin no hadis manga madonong, manga ha nagadalan, hadyag fatwagdog to fag manga bagay, dapat hagfatwagdog fiya fiya has manga taw kat fangayofan kito yapdis manga anak it fakatwawon. ²⁶ Anod mama, maskin kitonya ngay kam fakasayaon. ²⁷ Ginyas Hisos nalwang has taw, Angko Ama ka nafaano hangko fagayo fag manga bagay. Idwa ha kilala angko, in Diyos Anak no bohonwa angko Ama. Idwa yadi ha kilala in Diyos angko Ama, no bohonwa aho, kat Anak, hanggan nyawa kayoday angko fagfaangayon mamahilala has taw angko Ama. ²⁸ Ham fagayo ka kayaya basad fangayofan, fag gakbang wangko, kawa ham kabyat hayo manga fasan, ho fahoway hayo. ²⁹ Fasablayan angko singkaw ha hayo, ham fag gadal gingko. Kawa aho mahoway, idwa yadi ha takan, yakanga hayo fangayofan lomag yadi wa kahowayan. ³⁰ Maskin angko singkaw fiya wa donggon, malokmay a, angko fafasanon ha hayo magan wa dahol.

¹ Gis nanya fag masohod, sas Sirang Kafahowayan, da Hisos igdalan sasta namay ha tirigo. Gis nanyat manga katogbong kalonos wan, yakanga ta nabol manga haway tirigo sayok, ginya kwan wan. ² Ka manga Farisiyo no nalag ista naibolon, taglwang han Hisos, Lag ngay im manga katogbong gibolon kadwa maangay sas Batasan Hodyo, maskin sawas Sirang Kafahowayan. ³ Is Hisos nasagot, Ham awkin idwa nabasa in Dabid naibolon hyabi no kalonos hanggan wat manga ofod kalonos yadi? ⁴ Is Dabid nasakbaw han Diyos basad balay a, hanya hanggan wat manga ofod nahwan ka tinapay kandisag han Diyos. Ka Batasan Hodyo iglwang ka manga fagalan-han-Diyos lamang ka fiya homwan tonya fag tinapay. ⁵ Ngatay ham idwag basa sas Batasan Hodyo kitay, fagayo fag Sirang Kafahowayan ka manga fagalan sas Fanimbaan-Dahol igfalamang di ka Togon kawa hastay fag sirang. Nyawa kitonya bohonwa dwat ista naogali. ⁶ Hogfwayong ha hayo, aho Kanbangkad kati hastay bohondi kitos Fanimbaan-Dahol angko kangayanan. ⁷ Ham nangos no natwa wagdog to fag manga hampang kaglwang, No sa dingko, fiya man no kaawa manga taw hasag sogba fangafiyan, ham nangos haraw idwa naato kadwa ha naibolon dwat. ⁸ Maskin aho, Kanbali Taw, kagbahala has Sirang Kafahowayan. ⁹ Is Hisos inlahaw wan hawas basad fanimbaan Hodyo. ¹⁰ Sinyas basad fanimbaan ha sadik ama it gamat sadi inrifis wan. Ha akwa yadi manga taw sinya kagsayak it fabangdanan gin Hisos manga ibolon. Yakanga ta gintaw in Hisos, Ka Batasan Hodyo awkin igfaangay di kitay, nyawag fafiya sagit sas Sirang Kafahowayan, fiya di? ¹¹ Is Hisos nasagot, Nyawa faktaw sa hayo, no ha topa indagdag has basad tabyo sas Sirang Kafahowayan, ham awkin idwa bomol ginyas basad tabyo? ¹² Idwa aw ka sadik taw labi man ik mahalga ha sadik topa, ham gayfan? Yakanga ka Batasan Hodyo igfaangay di no gibolon fiya nyawa sawas Sirang Kafahowayan. ¹³ Ginya madis Hisos nafwayong has ama kanrifis it gamat, Haw fag falogday im gamat. Yakanga nafalogday ngat gamat a, infiya wa dagos, ogali wan, kito mandi kat gamat balis baliw yabay. ¹⁴ Dapat ay, ka manga Farisiyo nadokson wan, goyonan igtoltolan no kindasta halimbawan kaarakitay domaog in Hisos. ¹⁵ Is Hisos natwa di kitay ta kahori hanya, yakanga inlahaw yadi wa ginya. Aywan ka goyan hanya a, is Hisos nafafiya yadi ista manga sagit fagayo. ¹⁶ Dapat is Hisos nabando marigon kitay ta fag idwag fadog has taw kawa ha hanya. ¹⁷ To in-anod wan kaarakitay igfatonglos in Isayas, ka fangampang fwayong kiti, ¹⁸ Lag ngay, to kangko sogowan kangko yadi nafili, Ho gwayan wa galwasi hanya, hanya angko yadi fagbayaon. Ho domisag hanya angko Falad. Hanya fadog has fagayo fag manga layonan taw kitay, hodwa ha fagapinon taw nogfadosa. ¹⁹ Hanyadwag daraogan, mahoway di no kampang has taw, nyawa basad wa karsada idwag ringgit, ogali wa no kampang. ²⁰ Hanyadwa lomifong ka iyano kanbokong, Idwa yadig fahapsa ka salong ka ganos ganos odi, No kandogay day hanya, kadwa ha fagapinon taw nogfadosa, nodyag daog has fagayo ²¹ Hanggan fagayo fagayo fag manga layonan taw hawa hanya no somyag aban. ²² Ginya ta nataban han Hisos sadik ama bota, boyon ya ngadi, kawa labang kagfahoriyan hanya. Is Hisos nafafiya ka ama, yakanga ka ama nahampang ya, infoga yat mata. ²³ Fagayo intaka waglag, taglwang, To aw mayon kan Dabid hasokfonan anak? ²⁴ Dapat ka manga Farisiyo no nadog ista hampang kitonya, iglwang, Tyamo fag ama it kadonongan igfaalin manga labang, gi odin Biilsibol ka fagtahinan manga labang. ²⁵ Is Hisos nasarom di ista fagisipon, yakanga nafwayong has taw, Fagayo fag gorangon sakop imdaog di nombali dowak layonan, yakanga idwa domogay. Nyawa sida fag banwa, ngatay talanahan, nombali dowak layonan ginyag labanan wan, idwa domogay. ²⁶ Nos Satanas kagfalagyo in Satanas sakop, hanyag laban yadit sadili. No kitonya, kinday it sakop no domogay, ham gayfan? ²⁷ Nos Biilsibol kagfasyagan angko igfaalin labang, fakta, ham gayfan, kagfasyagan hayo manga anak igfaalin labang? Yakanga hayo manga anak mandi kagfatohoyan kitay ham gwayan wagfalamang. ²⁸ Dapat non Diyos Falad kagfasyagan angko igfaalin labang, it kahologan in Diyos sakop indasog wa sa hayo. ²⁹ Fakta ka somyagan somakbaw hasta basad balay kaarakitay ignahaw ista botang, kagfon balay no marigon, nodwa gomafos yap hanya bago bago? Kagfon balay no magafosan wa bay, ginya madi idwa somawad it manga botang. ³⁰ Kadwa kaoyon angko iglaban angko. Kadwag togbong angko igfatifon manga taw, yagfasarowayan di ngap. ³¹ Yakanga hogfwayong ha hayo, nyawa kana kasta ogali dwat, nyawa hanggan igfadwat igdog in Diyos, twam liyam, dapat ay, ista hampang nogfadwat igdog ka Maliyaw fag Falad, idwam liyam nyawa ginahin. ³² Nyawa faktaw no kampang dwat donggon kawa hangko, Kanbali Taw, fiya digfaliyam ista nahampang dwat, dapat ay, ka kampang dwat donggon kawa has Maliyaw fag Falad, ista naogali kitonya idwam liyam nyawa kati, nyawa hanggan aban. ³³ Ka fon hayo no fiya, it bohad fiya yadi. Ka fon hayo no dwat, it bohad dwat yadi. Kat bohad kagfalag no kinday fag hayo it fon. ³⁴ Ham bilang odi manga hasokfonan abyanon no madaya. Hayo fangayofan no dwat, kinday ham no twa kampang fiya, ham gayfan? No kindawasta fangayofan, kitonya yadi ka kadog. ³⁵ Ka taw no fiya, it fwayong fagaba yadi wa fiya, maskin it fagayfanon fagaba wa fiya. Dapat ka taw no dwat it fangayofan, it fwayong fagaba yadi wa dwat, maskin it fagayfanon fagaba wa dwat. ³⁶ Hogfwayong ha hayo kitay aban sas Sirang Fangabayan, ta ha sagoton wa fagayo fag manga hampang kat nafwayong kadwa ha kahologan. ³⁷ Maskin gi wa hayo sadili manga nahampang imtohoyan kitay, ngatay ham fiya san Diyos faglagan, ngatay ham fag has fadosaan. ³⁸ Ginya ha mangag faadal Batasan Hodyo hanggan tibak Farisiyo nafwayong han Hisos kiti, Haw kagfaadal, falagan nangos hyami sadik falagon madolaw kagfatohoyan ha hyami haw no faktaw. ³⁹ Is Hisos nasagot, Ka kati fag masohod fag manga taw dwat wa dahol, kawa has iba fagsyagon ham nogfasakop. Ham igsayak falagon madolaw, dapat hodwa ha falagon ha hayo, no bohonwa kanlag san Honas, in Diyos fangampang nadalanan. ⁴⁰ No kinday is Honas hyabi tolok sirang hanggan tolok yabi sas basad tiyan oyang dahol dahol, kitonya yadi aho, Kanbali Taw, tolok sirang hanggan tolok yabi sas basad basad daga aban. ⁴¹ Aban, sas Sirang Fangabayan, ka manga taga Ninibi fatohoyan has fadosaan ka kati fag masohod fag manga taw, maskin ka taga Ninibi nasoyo hyabi, kawas Honas nafaadal has taw, dapat ay, kati yabay, kastay bohondi kiton Honas it kangayanan. ⁴² Gis nanya yadi fag Sirang Fangabayan, ka ina gis Ihipto baliwa, kanbali gorangon hyabi, fatohoyan yadi has fadosaan ka kati fag masohod fag manga taw, maskin tonya fag ina hyabi inbangkad gis bali fongfongan daga kaarakitay domog in Gorangon Salomon kadonongan, dapat yabay, kastay kati bohondi kiton Salomon it kadonongan. ⁴³ Ka labang no nalin gis sadik taw, igswaliyan igswaliyan has daga magwang magwang, igligaw it famahowayan, dapat idwa ha lagan it oliyanan. ⁴⁴ Yakangat fangayofan iglwang, Ho kafwali ya ngawan hangko nagalinan. Nonfwali ya, iglag it nagalinan idwa ha goli sinya, malinay di, maangay wan. ⁴⁵ Yakanga ka labang hanya ya ngay, igtaban fito yak labang ka dwat man hanya a, hawa basad taw, sinya wak rnaoliyanan. Yakanga sas katabowanan ka taw mahori man ka gona it fangayofan. Ka kati fag masohod fag manga taw dwat lomag yadi wa kitonya. ⁴⁶ Is Hisos nogtoltol yapdi has taw, yabay it ina hanggan it manga fadwasay indasog wan, mafanayan sas sokayan, ta kasaya mangampang in Hisos. ⁴⁷ Ha nafwayong han Hisos, Im ina hanggan im manga fadwasay sas sokayan, ta kasaya mangampang nangos ha hyamo. ⁴⁸ Dapat is Hisos nasagot, Fakta kangko ina, fakta kangko manga fadwasay, ham gayfan? ⁴⁹ Ginyas Hisos igsiyo hat manga katogbong, iglwang, To kangko ina hanggan angko manga fadwasay. ⁵⁰ Kawa nyawa faktaw no katanog angko Ama kafangayofanan, ka sat banwanan sam tongod, tonya wa kangko manga fadwasay, kangko ina.

¹ Gis nanya yadi fag sirang is Hisos nalahaw wa gis balay, natokaw sas bahalan linaw dahol. ² Manga taw kaaywanon nagobok in Hisos, yakangas Hisos nasakbaw has basad baloto baba danom, akbang has bahalan linaw, sinyak matokawan. Ka fakaaywanan fag manga taw sinya dik malindogan sas baba daga sas bahalan linaw. ³ Yabay is Hisos igfaadal has taw sinya, sayapdis manga halimbawa dapat. Hanyag lwang kiti, Sadik ama fangiyab hawat namay kaarakitay mamamgas. ⁴ Hanya nogfamgas, igsabod odit binhi, yakanga tibak botol indagdag has boknga dalan. Ka manga manok indasog a, nahwan wa tonya. ⁵ Ha akwa yadi manga botol indagdag has daga libabaw, baba odi dalifi. No kitay di dagos wa natobo kawa libabaw maskin ka daga sinya. ⁶ Ka myanit no nasalog sinya, myanit wa dahol dahol. Kat manga tobo inlayong di, maskin idwa ha dalid abasad. ⁷ Ha manga bolhog yadin dagdag ha sayo manga lamnon madogi. Ka manga lamnon inlangba, nasakfaw di ka manga tanom, ka manga tanom nadaogan di lamnon. ⁸ Dapat ay, ha akwa yadi manga botol kandagdag has fiya fag daga, yabay nabohad wan. Ha akwa nabohad sadik daan bolhog, tiba onom ik safolok bolhog, tiba tolok safolo. ⁹ Ham no ha manga talinga ya ngadi, fag talinga wan. ¹⁰ Araw in Hisos manga katogbong naakbang hanya, naintaw kitay, Kana mayon haw nogfadalan yapdi las manga halimbawa hyamo bato toltolon has taw? ¹¹ Is Hisos nasagot, Indisag wa ha hayo kitay, ham fag tomwa ka mangadwag fadogon kawa han Diyos banwanan fag sakop baliwa, dapat idyapdin disag has taw. ¹² Maskin ka danwa ha akwa ho domogang ya hanya, im-aywan, dapat kadwa ha akwa bangan, nyawa hara ha akwa ogbot ogbot sa hanya, tonya abam bol di. ¹³ Maskin kitonya, sa yapdis manga halimbawa aho nogtoltol has taw, maskin nyawa tagbantay, tadwaglag, nyawa tagtalinga, tadwagdog, yakanga idwa yadi twagdog. ¹⁴ In Isayas faglwangon kawa hanya fag manga taw in-anod wan, hanya noglwang, Nyawa ham igdog fagaba, ham idwa yadi tomwa wagdog. Nyawa ham iglag fagaba, ham idwa yadi tomwa waglag no kana tonya ¹⁵ Maskin to fag manga taw in-ganit ista manga fangayofan Ngadit manga talinga dayo wagdog, Tagfotikan wan it manga mata, Maskin ta dayo waglag, Ta dayo yadi wagdog. Ista fangayofan ta fag idwa yadi tomwagdog. Ta kafang kafwali hangko, Dayo yadig soyo, Tadwa kasaya kitay aho fag fafiya is taw. ¹⁶ Dapat ham igbaya wan ka hayo mata lagan madolaw fagaba, hanggan ka hayo manga talinga donggon madolaw. ¹⁷ Hogfwayong ha hayo, no kitay di, aywan in Diyos manga fangampang, hanggan fiya fag manga taw hyabi hyabi, kasaya wa dahol lomag ka hayo lagan kati, ka tadyapdi nalag hyabi. Ta gwayan wa kasaya nangos fag domog wa haraw ka hayo donggon kati, ka tadyapdi nadog hyabi. ¹⁸ Kati dog ngay it kahologan ka halimbawa kawa hasagfamgas baliwa. ¹⁹ Ka mangagdog ka toltol kawa han Diyos sakop baliwa, dapat idwa twagdog tonya, ka kitos manga botol kandagdag boknga dalan. Is Satanas indasog di ngay, igbol lamang kansabod sasta basad fangayofan. ²⁰ Ka botol kansabod has sayo baba dalifi igfahalimbawa ka manga taw kagtalinga ka toltol, igtanggap wa dagos, masolong wan no kitay di. ²¹ Dapat idwag dalid abasad sasta basad fangayofan. Ngalay di gagwanta, maskin no ha donggon ya nga manga mahori, ngatay tagfahoriyan hanya maskin katiwala ka toltol, dagos wagdayo. ²² Kandagdag ha sayo manga lamnon madogi igfahalimbawa ka mangag talinga has toltol, dapat it manga kakorangan istay is baba daga kat fagisipon fagaba, ngatay kawili wa dahol ka kaakwaan, yakanga nasakfaw ka Toltol sat basad fangayofan, yakanga tonya idwa nabohad. ²³ Dapat ay, ka botol kansabod sas fiya fag daga igfahalimbawa ka mangag talinga ka Toltol hanggan natwa wagdog tonya. Ginya yabay nabohad sinya, tiba sadik daan, tiba onom ik safolo, tiba tolok safolo. ²⁴ Is Hisos natoltol sadi yak halimbawa has taw, nalwang kitay, Kiti kan Diyos banwanan fag sakop, nogfahalimbawa, kitos sadik taw nafamgas fiya fag botol sat baba namay. ²⁵ Ta no matoyogan araw, basad yabi, it kalaban nasabod kadwa fiya fag bolhog lamnon hasta basad namay tirigo, ginya nwali wan. ²⁶ Ka tirigo no natobo hanggan kaboskad wat borak, inlag yadi wa ka manga dwat fag lamnon sinya maaktoman sayo tirigo. ²⁷ Yakanga ka manga sogowan hawasagfon namay, iglwang kitay, Bohonwa awkin fiya fag manga botol ka hayo tanom? Kana mayon no ha manga lamnon kati? ²⁸ Kagfon namay nasagot, Angko kalaban sadi ka nasabod tonya. It manga sogowan naintaw hanya, Ha awkin kasaya mi nangos fag gomoyod tonya? ²⁹ Kagfon istaw nasagot, Ham fag idwa goyod, ngandayo hanggan wa ka tirigo imtahin. ³⁰ Ham fabayaanan wan hanggan fanganiyon. Tam aba no gani wan ho fomwayong has manga fangani, Tifonan yap ka manga lamnon, ham fogongan wa fogongan wan kaarakitay somonog, ginya madi ka tirigo ham tifonan wan hangko basad dongdong. ³¹ Is Hisos natoltol sadi yak halimbawa has taw, iglwang, Nogfahalimbawa in Diyos banwanan fag sakop kiti wan. Ha sadik taw igtanom sadik botol mostasa sat baba iyab. ³² Kat natanom hat basad iyab ka ogbot man has fagayo fag botol, dapat no natobo wan, kabali dahol man has fagayo fag fangofiyon. Kabali wa fon hayo it kadaholan, manok digfogad wan sat baba sanga. ³³ Is Hisos natoltol ya ngay sadi yak halimbawa, In Diyos banwanan fag sakop kitos famadahol tinapay ka sadik ina nafaaktom sas tolok sarok harina, hanggan wandahol sadi wak dahonya. ³⁴ To fagayo is Hisos natoltol has fakaaywanan fag manga taw sas manga halimbawa, idwa yadig toltol has fakaaywanan no bohonwa las halimbawa. ³⁵ Is Hisos natoltol kitonya kaarakitay ka fangampang fwayong hyabi im-anod kitay, Las manga halimbawa lamang ho no homampang has taw, Ho fadog has taw ka manga idyapdin dog gi yapdis kalig daga. ³⁶ Ginya madis Hisos naobon wa ka fakaaywanan fag manga taw, nasakbaw wa has basad balay. It manga katogbong naakbang ha hanya, iglwang, Ha fatwaan igdog hyami ka toltolan ka dwat fag lamnon sas basad namay. ³⁷ Is Hisos nasagot has taw, Kagtanom fiya fag botol kawa aho, Kanbali Taw. ³⁸ Ka namay kawastay sas baba daga. Ka fiya fag botol kawan Diyos sakop fag manga taw, hanggan ka dwat fag lamnon in Fandaya sakop fag manga taw. ³⁹ Ka kalaban kagtanom tonya idwa ha iba, kawas Fandaya. Ka fanganiyon sawas katabowanan fag sirang hanggan ka manga gani kawa manga anghil. ⁴⁰ No kinday nontifon ka manga lamnon hanggan insonog, kitonya yadi aba kamlag sas katabowanan fag sirang. ⁴¹ Aho, Kanbali Taw, somogo angko manga anghil aban, ta domayo a, tomifon fagayo kagfasayag dog has dwat iba taw, hanggan ka gogali yadi dwat, ka maaktoman sangko sakop, ⁴² omokas yadi tonya ha basad fadosaan afoy. Sinya ta mangodgorawan, hanggan wasta ngifon di mangarigitan wan. ⁴³ Dapat ay, ka mangan tohoyan han Diyos bilang wagyawa kitos myanit sat Ama sakop aban. Ham no ha manga talinga ya ngadi, fag talinga wan. ⁴⁴ In Diyos banwanan fag sakop kitos kaakwaan malobgoban basad iyab. Sadik taw no nangodkod sinya nalag wan, ginya madi natabon ya. Nabaya wa dahol dahol kat lagan matagowan basad daga. Yakanga nafasali it manga botang fagayo, ginya nasali tonya fag iyab. ⁴⁵ Kitonya yadi in Diyos banwanan fag sakop, kitos sadik fanlako kagsayak manga mahalga fag ono. ⁴⁶ No nalag nga sadik ono kafiyaon, hanya nafasali it manga botang fagayo fagayo, ginya nasali ka ono mahalga. ⁴⁷ In Diyos banwanan fag sakop kito yadis sadik sarap dahol kasta fagokason ha basad dagat, giktan yadi bokod bokod fag manga oyang. ⁴⁸ Ka sarap no napno ta nagoyod has bahalan bintalan. Ginya ka manga taw intokaw wan, igfalayon ka manga oyang bokod bokod. Ka fiya fag oyang ta natifon sasta basad sohadan, dapat naokas lamang kadwa fiya fag manga oyang. ⁴⁹ Kitonya yadi kamlag aban sas katabowanan fag sirang. Ka manga anghil imbangkad falayon ka manga ha ogali dwat hanggan ka mangan bokod han Diyos, ⁵⁰ omokas ha basad fadosaan afoy ka ha manga ogali dwat. Sinya ta mangodgorawan hanggan wasta ngifon di mangarigitan wan. ⁵¹ Is Hisos naintaw has taw, Ngatay ham natwa wagdog tonya fagayo? Taglwang, Ala. ⁵² Yakangas Hisos iglwang, Kawa kitonya fagayo kagfaadal Batasan Hodyo nombali yadi in Diyos banwanan fag sakop it katogbong, kitosagfon balay kagbangkad git fwalidan manga botang fiya fag bagay bago, hanggan ka gona. ⁵³ Nontabo wagtoltol to fag manga halimbawa, is Hisos inlahaw wa ginya. ⁵⁴ No nwali hat sadili banwanan, is Hisos igtoltol sasta basad fanimbaan. Ka manga matalingan kataka wagdog, taglwang, To fag taw gindak nabol it kadonongan? Twa oman gibolon kitonya fag manga madolaw? ⁵⁵ Bohonwa awkin it ama ka famanday balay? Bohonwa awkin it ina is Mariya, hanggan da Santyago, da Hosi, da Simon, da Hodas, it manga fadwasay ama? ⁵⁶ Idwa awkin istay yadik maoliyanan it manga fadwasay ina? Gindak nabol to fag kadonongan fagayo? ⁵⁷ Yakanga tadwa katalinga in Hisos. Dapat is Hisos nafwayong has taw, Nyawa siday manga taw magalang has fangampang, nodwa sat sadili banwanan, ngatay sat sadili talanahan. ⁵⁸ Yakangas Hisos idwa naibolon aywan fag manga madolaw sinya maskin tadwa katiwala hanya.

¹ Gis nanya fag masohod in Hisos manga naibolon indahit han Hirodis ista gorangon sas sakop Galiliya. ² Ginyas Hirodis nafwayong hat sadili manga sogowan, Tos Hwan kagfatogna manga taw hyabi. Hanyan boyag ya mangharaw, yakanga syagan gibolon manga madolaw fag manga bagay. ³ No kitay di, hyabi is Hirodis mandi ka nafagamat has manga taw in Hwan, nafagafos yadi, ginya nafaporiso wan kawas Hwan naato in Hirodis, maskin is Hirodis nabol it tagyaw, is Hirodiyas, in Filipi babay. ⁴ Is Hwan fagaba kabaya in Hirodis, hanya nalwang, Idwa fiya haw no kagaw im tagyaw. ⁵ Yakangas Hirodis kasayag fahatay in Hwan, dapat hanya kadala ka manga Hodyo, maskin ta natwa waglag kitay is Hwan in Diyos fangampang. ⁶ Ginya madi aban, gis nanya fag masohod ta nogtohod in Hirodis kasagayan, in Hirodiyas anak ina natayok san Hirodis manga fakilalaon faglagan. Labi was Hirodis insaya waglag, ⁷ yakanga hanya nafatohoyan has dayaga, nalwang, Nyawa kanam fagsagadon ho domisag wa ha hyamo. ⁸ Ka dayaga naolit kat ina nafasognod, kitay, Kati wan, disagan angko sas basad finggan, in Hwan alfoyo, ka Hwan kagfatogna manga taw hyabi. ⁹ Is Hirodis no nadog ka dayaga fagsagadon, hanyan rongkot wan, dapat idwa nasyagan nabawit hampang kawat manga fakilalaon nadog wat nafatohoyan has dayaga, yakanga nafasognod has taw kitay, Disagan has dayaga it fagsagadon. ¹⁰ Yakangas Hirodis nafalifong is taw in Hwan liyog. ¹¹ Ta nafwalid ka alfoyo sas basad finggan, ginya nadisag has dayaga. Ka dayaga nadiya wan hat ina. ¹² Araw in Hwan manga katogbong hawas porisowan, nabol in Hwan habilogan, nalobgob wan. Ginya ta nafwayong han Hisos no kinday kasta naibolon han Hwan. ¹³ Is Hisos no nadog di ngay kitonya, nasahay wan basad baloto, ginya hawas difay linaw, somaman yap nangos gis fakaaywanan fag manga taw. Dapat ka fakaaywanan fag manga taw no nadog kitay is Hisos hanya wan, tanbangkad gis manga banwa, nalahaw baba daga, natagbo hanya. ¹⁴ Is Hisos no nadokson sat nakadagsaan, iglag ka manga taw kaaywanon. Hanyan awa waglag is taw, hanggan nafafiya ka manga ha sagit kasta nataban hanya. ¹⁵ Ginya madi, araw, myanit no kabalihid wan, in Hisos manga katogbong hawan Hisos, iglwang, Tam istay sawas basad fakahyabogan, ka myanit kasangday yadi wan. Falahawan yap nangos has manga tifonan balay sas ligongan ka manga taw, kaarakitay ta manali ista sadili fanganon. ¹⁶ Is Hisos iglwang, Ham hawag falahaw ka manga taw, fag ham wa ka domisag fanganon has taw. ¹⁷ Taglwang, Tam idwa hanon nodwa limak tinapay, dowak oyang. ¹⁸ Is Hisos iglwang, Ham diyan hastay. ¹⁹ Ginyas Hisos nafatokaw sas baba lamnon ka manga taw. Ginya no nabol ka limak tinapay hanggan dowak oyang, natangdan has tongod a, nabaya han Diyos ka fanganon. Ginyas Hisos nafaarogbotan ka manga tinapay a, nadisag hat manga katogbong, ginya ka manga katogbong nahoray has manga taw. ²⁰ Ginya madi fagayo nangwan wa a, napsog wan. Ta natifon ista sawad nakanan mafaarogbotan safolo ya ha dowak boyog ka napno. ²¹ Manga 5,000 ka manga ama ka nahwan, bokod wa ka manga ina, hanggan manga anak. ²² Ginyas Hisos dagos wa nafasahay has basad baloto it manga katogbong, nafagona wa has difay linaw dahol. Is Hisos in-goyan yapdi, bago di nafaoli ka fakaaywanan fag manga taw. ²³ Ka manga taw nonlahaw wan, is Hisos nalahaw yadi wa has baba moyod kaarakitay mandarangin. Inyabi wa sinya sas baba moyod. Is Hisos idwam dowa sinya, ²⁴ dapat ka baloto sawas baba linaw, ayayo gis gobang, manga taob bilang wagsampok, kawa bagyo marigon nogsoba wa has bohid. ²⁵ Dapat, no kayawa wan, is Hisos naoyan yadi wat manga katogbong, nalahaw sas baba danom. ²⁶ Dapat ay, it manga katogbong kadala wa dahol dahol iglag, taglag haglahaw sas baba danom. Tagrokyaw wan, Tya labang wan. ²⁷ Dapat is Hisos nadagos wa ngap nahampang has taw, nalwang, Ham fag idwa kadala, aho di. ²⁸ Is Pidro nalwang, Angko Fon, no haw wa ngay, haw falahawan yadi wangko sas baba danom. ²⁹ Is Hisos nasagot, Fag hastay ngay. Yakangas Pidro nadokson gis basad baloto, nalahaw yadi wa has baba danom, hawan Hisos baliwa. ³⁰ Dapat is Pidro no bago di naayfan kitay ha bagyo mangharaw, indala wan, hanya ganong wan tabon has daga danom. Is Pidro natawag, Angko Fon, angko Fon, ha salahapan wangko. ³¹ Is Hisos nadagos wa nasalahap yabay. Ginya nalwang han Pidro, Laya hadwa bangan igsyag hangko maskin. Kana mayon haw no gadowan? ³² Ta nonsahay has basad baloto, ka bagyo dagos wantohas. ³³ Ka manga taw basad baloto nafasayagdog in Hisos, taglwang, Haw orongan wa in Diyos Anak. ³⁴ Ta no nadifay ka linaw dahol, tandagsa wan sas banwa Ginisarit. ³⁵ Ka manga taga sinya no nahilala in Hisos, ta dagos wa nafadahit has manga taw sinyasta ligongan kitay is Hisos indasog wan. Yakanga ta nataban hanya fagayo ka ha manga sagit. ³⁶ Tagsagad kitay, Ha fatawidan di ngay ka manga ha sagit, ngadim tobwan rotay, kaarakitay tamfiya wan. Fagayo ka natawid infiya ngay.

¹ Aban, tibak Farisiyo hanggan mangag faadal Batasan Hodyo gis banwa Hirosalim naakbang han Hisos. Ta naintaw hanya kitay, ² Kana mayon im manga katogbong nodwa katanog intam manga magorang ogali gis hyabi hyabi? Ta kwan wa hanon nyawa tadya naogas fiya fiya ista sadili gamat kito ka ogali magorang fwayong. ³ Is Hisos nasagot is taw, Kana mayon ham nodwa katanog in Diyos Togon maskin ham katanog yapdi ka ogali magorang gis hyabi hyabi. ⁴ Is Diyos natogon kitay, Ha fag idwag falamang im ama hanggan im ina. Natogon yadi kitay, No fakta ka kampang igsabayon ngatay hat ama, ngatay hat ina, fiya man hanya no matay wan. ⁵ Dapat ham iglwang, Nyawa faktaw noglwang, ngatay hat ama, ngatay hat ina, kangko togbong hara hayo ho nadisag wa han Diyos, ⁶ No nalwang di nga kitonya, nyawag falamang it ama, fiya di. Ka hayo fakatanogon ka odi ogali magorang, yakanga ham idwag fahalga in Diyos togon. ⁷ Ham ha takan wan. Anod, kitonya ngay in Isayas, in Diyos fangampang fwayong hyabi kawa ha hayo, ⁸ Is Diyos iglwang, Hampang odik masayag dog, Dapat ista fangayofan ayayo gingko. ⁹ Idwa ha kahologan ta nogfasayagdog angko Maskin ogali odi taw kasta fagfaadalon. ¹⁰ Ginyas Hisos nafaakbang hanya ka manga taw, iglwang kitay, Ham fagayo fag matalingan, ham fag tomwa wagdog yadi angko bato fwayongon ha hayo. ¹¹ Bohonwa kasta hanon ka has basad bibig kagfadwat ista fangayofan, dapat ista hampang kadwa fiya gista basad bibig kagfabali idwa fiya ka taw. ¹² Ka manga katogbong naakbang han Hisos, nalwang, Haw fadi wadtwa kitay ka manga Farisiyo inhorig dog im fwayong. ¹³ Is Hisos nasagot, Fagayo fag fon hayo ka bohonwa angko Ama sam tongod it tanom, imgoyod lamang aban. ¹⁴ Fabayaanan lamang tonya fag manga taw, manga odi bota kagfangolo manga taw. No bota ka gamit bota, fagayo dowa imdagdag ha basad ohang. ¹⁵ Dapat is Pidro nafwayong han Hisos, Ha fatwag dogan yap hyami im halimbawa haraw. ¹⁶ Is Hisos nafwayong, Ham awkin idwa yadi twagdog? ¹⁷ Ham awkin idwa twa kitay nyawa kana kasta samsamon, nontolon wan hawas basad tiyan ginya aban imolay di? ¹⁸ Dapat ka hampang kalfas gis basad bibig giwas fangayofan, tonya wa kagfabali idwa fiya ka taw. ¹⁹ Maskin giwas fangayofan nogfabago ka manga isip dwat, ka mangag fahatay taw, ka mangag fabayowan, hanggan nyawa anahan, nyawa dayaga gofodan lamang, ka mangag nahaw, ka mangat fwayong bohonwa orongan, hanggan ka mangag fadwat igdog ka tiba taw. ²⁰ To fag manga ogali kagfabali idwa fiya ka taw. Dapat ta no kwan hanon, nyawa tadwa naogas ista gamat fiya fiya, kito ka ogali magorang, tonya idwag fabali idwa fiya ka taw. ²¹ Ginya madis Hisos inlahaw wan hawas akbang banwa Tiro hanggan banwa Sidon. ²² Yabay sadik ina taga Kanaan, kagbanwanan sinya naakbang han Hisos, nahampang marigon, nalwang, Angko Fon, in Dabid hasokfonan Anak, gwadi ha fakaawa angko. Labang gwayan wagfahoriyan angko anak ina. ²³ Is Hisos idwa ha naawang ngadi sadik hampang. Ginyan Hisos manga katogbong iglwang hanya, Disagan nangos hanya it fagsagadon kaarakitay omobon wantam. Tam kanbang wagdog, fagaba wa goyan santam ginanan. ²⁴ Is Hisos nasagot kiti, Is Diyos nasogo angko has manga topa matalangan gin Israil tifonan lamang. ²⁵ Dapat ka ina naakbang ya han Hisos, nalibabaan sat atobangan, iglwang, Angko Fon, togbongan angko. ²⁶ Is Hisos nasagot, Idwa fiya bomol ka anak taw fanganon, ginyag disag has manga ido. ²⁷ Ka ina nasagot, Anod, Angko Fon, dapat nyawa di kasta manga ido kwan ka manga tingaw kandagdag git afo nakanan. ²⁸ Yakangas Hisos nafwayong hanya, Ina, marigon mangharaw haw nogsyag hangko. Im fagsagadon fag im-anod wan. Ginya madit anak dagos wanfiya. ²⁹ Da Hisos no nalahaw wa ginya, infwali ya has bahalan linaw dahol, linaw Galiliya. Ginyas Hisos hawas baba moyod, sinya wak matokawan. ³⁰ Kaaywanon fag manga taw inbarangkadan han Hisos, ha taban manga gafilay, manga fihong, manga bota, manga boyon, ha akwa yadi tibak sagit. Ta nafwalid ka manga ha sagit han Hisos atobangan. Is Hisos nafafiya wasta sagit fagayo. ³¹ Ka manga taw indolaw wan, ta noglag ka manga boyon haraw kampang ya, ka manga fihong infiya wan, ka manga gafilay iglahaw ya, hanggan ka manga bota infoga yat mata. Yakanga tagfasayagdog in Israil Diyos. ³² Ginya madis Hisos nafaakbang hanya it manga katogbong, iglwang, Ho kaawa wa to fag manga taw kaaywanon, maskin kati tolo wak sirang ta no gofod intam, namin wat manga balon. Ta nodyapdi ha nahwan hanon, hodyapdi kasayag faoli ka manga taw, ngandayo tamlombay wat lonos boknga dalan nodwa ha nahwan hanon. ³³ It manga katogbong nalwang, Tam sawas basad fakahyabogan, tam gindak bomol manga tinapay homosto no kayo was nwa fag manga taw? ³⁴ Is Hisos naintaw has taw, Kayoday hayo tinapay is nyamo? Tagsagot, Fitok tinapay hanggan ha oyang yadi sayok garogbot. ³⁵ Is Hisos nafatokaw ka manga taw sas baba daga a, ³⁶ nabol ka fitok tinapay hanggan manga oyang. Ginya, nontabo wagbaya in Diyos, nafaarogbotan ka fanganon, nadisag hat manga katogbong. Kat manga katogbong nafahoray wan has manga taw. ³⁷ Fagayo nangwan, napsog ya ngadi. Ta no natifon ista sawad nakanan fanganan nafaarogbotan, napno fitok baban. ³⁸ 4,000 ama ka nangwan, bokod wa ka manga ina hanggan manga anak. ³⁹ Ginya madi is Hisos nafaoli ya ngawan ka manga taw. Ginya nasahay yadi wa has baloto hawas banwanan Magadan.

¹ Ginya madi manga Farisiyo tiba hanggan manga Sadosiyo naakbang han Hisos. Ta kasayag solay hanya, yakanga tagsagad in Hisos kitay hanya fag ha falagon madolaw gin Diyos banwanan sam tongod. ² Dapat is Hisos nasagot kitay, Gwadi no kayabi ham iglwang kitay, No marom aban, fiya fag sirang no kalag di, idwa ha dangga sas banwa. ³ Ginya madi no marom marom ham iglwang, Homwayan wa araw maskin malanbong wa ka banwa. Ham bilang yadi wagbasa ka hayo manga faglagon sas banwa sam tongod, dapat ham idwa twag lag ka hayo manga lagan ka madalanan kati fag masohod. ⁴ Ham ka kati fag masohod fag manga taw myasa wa kitonya, dwat hayo manga ogali, ham idwag fasakop in Diyos. Ham igsayak yapdi ka falagon madolaw, dapat hodwa ha fagfalagon madolaw nodwa kito kan Honas nadalanan nafahalimbawa. Ginyas Hisos nafatawas was taw, nalahaw wan. ⁵ Da Hisos no nadifay ka linaw dahol, it manga katogbong bago di natohod kitay tadwa nadiya it balon tinapay. ⁶ Is Hisos iglwang has taw, Ham fag matagahan, fag idwa kasaya ka manga Farisiyo manga Sadosiyo famadahol tinapay. ⁷ It manga katogbong nangarintawan no kanat kahologan in Hisos fwayong, taglwang, Kawa tam idwa ha diya tinapay maskin is Hisos iglwang kitonya. ⁸ Dapat is Hisos natwa wan kasta faglwangon, yakanga naintaw is taw, Kana ham nogtoltolan yapdi kawa ham idwa ha balon tinapay? Ham idwa bangan igsyag angko. ⁹ Ham awkin idya twagdog mangharaw? Ham awkin idwag tohod aho no nafaarogbotan ka limak tinapay, kawa has 5,000 taw? Kayodak boyog tinapay ka nalabi ka hayo natifon? ¹⁰ Kitonya yadi ka fitok tinapay kawa has 4,000 taw, kayodak baban tinapay ka nalabi ka hayo natifon? ¹¹ Kana ham nodya twagdog kitay bohonwa tinapay kangko faglwangon? Ham fag matagahan has manga Farisiyo hanggan Sadosiyo famadahol tinapay. ¹² Yakanga ta natwa wagdog kitay ka manga Farisiyo hanggan Sadosiyo manga faadalon kan Hisos fagfatagahon, bohonwa ka fagfaaktomon famadahol has tinapay. ¹³ Ginya ta nondasog sas sakop Sisariya, ka Sisariya ka san gorangon Filipos sakop, is Hisos naintaw it manga katogbong kiti, Fakta, hono, aho Kanbali Taw, ta noglwang? ¹⁴ Ta nasagot kiti, Tibag lwang, haw, honos Hwan kagfatogna manga taw hyabi. Tibag lwang haw is Iliyas hyabi. Tibag lwang yadi kitay haw, hono, is Hirimiyas hyabi hyabi, ngatay haw in Diyos fangampang sadi ya. ¹⁵ Ginyas Hisos naintaw hat manga ofod, Dapat no ham kaglwang, faktaw aho, ham gayfan? ¹⁶ Is Simon Pidro nasagot, Haw wa kan Diyos-natogon-Famawi. Im Ama kawas Diyos boyagan. ¹⁷ Is Hisos iglwang han Simon, Simon, in Honas anak, haw bomaya wan maskin angko Ama ka sat banwanan sam tongod ka nafatwagdog ha hyamo no faktaw aho, bohonwa taw ka nafatwagdog hyamo. ¹⁸ Hogfwayong yadi ha hyamo, haw is Pidro, sadik bato. Sinya fag baba Bato ho homalig angko Tifonan, hanggan nyawa sakbawan Daga Salad idwa domaog angko Tifonan. ¹⁹ Ho domisag yadi ha hyamo ka manga sosi sakbawan han Diyos banwanan fag sakop. No kana kam fagbandoon istay is baba daga, kitonya yadi ka san Diyos banwanan sam tongod ka fagbandoon. No kana kam fagfaangayon istay is baba daga, kitonya yadi ka san Diyos banwanan sam tongod ka fagfaangayon. ²⁰ Ginyas Hisos nabando yapdi marigon hat manga katogbong kitay ta fag idyapdig fwayong nyawa hada fag taw kitay hanya in Diyos-natogon-Famawi. ²¹ Gis nanya ginan is Hisos bago di nafadog fiya fiya hat manga katogbong kitay hanya fag lomahaw has banwa Hirosalim, hanggan aywan it agwantaon mahori sinya aban. Maskin ka manga fagtahinan sas banwa hanggan manga fagtahinan fagalan-han-Diyos hanggan ka mangag faadal Batasan Hodyo fahoriyan hanya sinya, fahatay yadi wa hanya. Dapat ay, aban, hanyam boyag ya sas fatolo fag sirang. ²² Is Pidro nafasaman ogbot gis taw in Hisos, igfabago gato hanya, iglwang kiti, Hyami Fon, is Diyos nangos fag idwag faangay tonya. Idwa fiya ha hyamo no kitonya. ²³ Dapat is Hisos nasayango wan Pidro, ginyag lwang, Satanas, fag lahaw wa gistay haw. Haw igtoplan dingko bato lahawan. Haw idwa goyon in Diyos, haw goyon odi has taw. ²⁴ Ginya madis Hisos nalwang hat manga katogbong, Nyawa faktaw no kasayag tahin angko, falibangan fagaba kat sadili fakasayaon, fasanan it sadili fatimbangan hayo, ginya madi tahinan wangko. ²⁵ Nyawa faktaw not sadili haboyagan it fagfahalgaon, tonyam liyam di, dapat ay, kadwa kwangit it sadili haboyagan, kawa hangko, it haboyagan idwam liyam. ²⁶ Kana kat fakinabangon, ham gayfan, sadik taw no omafo sadi wak dahonya baba daga, halimbawa, dapat ay, it sadili haboyagan nomliyam di aban? Kana ara it bayad kaarakitay bomawi yat sadili haboyagan, ham gayfan? ²⁷ Maskin aban, aho Kanbali Taw imbangkad ya, angko manga anghil mahoyogan hangko, hanggan angko Ama kafiyan malagan yadi sangko gis nanya. Gis nanya aban aho gomanti has fagayo kawasta naibolon no kinday. ²⁸ Dog ngay, bonwa bohag, tiba taw kastay idya matay nodya lomag angko, aho Kanbali Taw, kadasog kabali hari hangko sakop.

¹ Nonsagaya onom ik sirang, is Hisos nafasaman git manga katogbong tiba, inda Pidro hanggan da Santyago da Hwan dowasay, nataban has baba moyod abwat. ² Ta no sinya wan, ta nalag in Hisos habilogan inoman wan, fiya wa dahol kabantay. It walong igyawa kitos myanit, it manga rotay it kaabohayan di, masilaw wan. ³ Sadi odi ginan da Pidro nalag inda Mwisis da Iliyas kampang han Hisos. ⁴ Yakangas Pidro nalwang han Hisos, Yabay kafiyaon, hyami Fon, tam fag istay yapdik madogayan. Haw no kasaya, ho fomalo hayo tolok dongdongan, insadi hyamo, insadi in Mwisis, insadi in Iliyas. ⁵ Is Pidro no kampang yapdi, sadik linyabo masinay nalanbong is taw. Ginya ha nahampang gis basad linyabo iglwang kiti, Toy angko fagalwasiyon fag anak, hogbaya wa dahol hanya. Fag hanya ka hayo fagtalingaon. ⁶ Ka manga katogbong indala wa dahol dahol ta no nadog tonya fag hasnog, ta nakfo di malohoban. ⁷ Dapat is Hisos naakbang has taw, natawid, ginyag lwang, Ham fag kabangon wan, ham fag idwa kadala. ⁸ Ta no natangdan has tongod yabay, tadwa ha lagan taw no bohonwas Hisos lamang. ⁹ Araw, ta noglahaw has lwad, is Hisos natogon it manga katogbong kitay, Aho Kanbali Taw nodyan boyag ya gis kahatayan, ham hayap igfwayong has taw kan Diyos nafalag hayo kati haraw. ¹⁰ Ka manga katogbong naintaw in Hisos, Kana mayon ka mangag faadal Batasan Hodyo noglwang kitay bago bago is Iliyas fag imbangkad yapdi? ¹¹ Is Hisos nasagot, Is Iliyas imbangkad ya ngay, mamatalaga fagayo fag manga bagay. ¹² Hogfwayong ha hayo, no kitay di, is Iliyas inbangkad wan, dapat ka manga taw idwa nahilala hanya. Ta naibolon hanya no kinda odi ista fakasayaon. Kitonya yadi aban ta no fahoriyan angko, aho Kanbali Taw. ¹³ Ginya madi ka manga katogbong natwa wagdog kitay is Hwan kagfatogna manga taw kan Hisos fagwason. ¹⁴ Araw, ta nonfwali ya has lwad, ta nalag aywan fag manga taw matifonan. Sadik ama naakbang han Hisos, nanlingkohodan sat atobangan, iglwang ha hanya kiti, ¹⁵ Ama kin, haw fakaawa angko anak ama. Hanya fagaba wa kalobay. No natoon ya nga kitonya, mahori wa dahol dahol, maskin fagaba kakfo has basad afoy, nomtoon katogna has basad danom. ¹⁶ Ho nataban hanya ha hyamo manga katogbong, dapat tadwa nasyagan nafafiya. ¹⁷ Is Hisos nasagot, Ham kawa kati fag masohod fag manga taw ka dwat wa dahol kawa ham idwa yadig syag angko. Ginahin ya kin nangos aho fag omofod yapdi hayo, ham gayfan? Kandogay day aho fag gagwanta yapdi hayo? Tabanan ka anak hastay. ¹⁸ Is Hisos nangabaya ka labang, ginya ka labang dagos wa nalin gis basad anak. Ginya madi, ka anak infiya wa dagos. ¹⁹ Araw, in Hisos manga katogbong naakbang hanya, nodwa yadi hagdog iba taw, ta naintaw hanya kiti, Kana mayon mi nodwa nasyagan igfaalin ka labang? ²⁰ Is Hisos nasagot, Maskin ham idwa bangan igsyag angko. Hogfwayong ha hayo, orongan wan, no daho yap man has botol mostasa ogbot ogbot, ham nogsyag angko, ham tomwa waglwang toy fag moyod, Haw fag malin wa gistay, haw fag hanya wan. Ginya yabay hanya wan. Ham somyagan di omibolon fagayo. ²¹ Dapat ka kito fag labang idwa malin no bohonwa kitay ham idwa kwan hanon kaarakitay mandarangin mahogod. ²² Aban ogbot, is Hisos hanggan it manga katogbong nogtifonan sas sakop Galiliya, is Hisos nafwayong has taw, Ta kaakbang wa fagamat angko has taw aban, aho Kanbali Taw. ²³ Ta fahatay yadingko, dapat ahom boyag ya sas fatolo fag sirang. In Hisos manga katogbong inrongkot wa dahol dahol igdog. ²⁴ Da Hisos nondasog sas banwa Kapirnaom, ka mangag sohot bohis Hodyo kawa has Fanimbaan-Dahol naakbang han Pidro. Ta naintaw hanya kiti, Kagfaadal hayo igbayad awkin bohis Hodyo? ²⁵ Is Pidro nasagot, Ala, igbayad ngay. Ginya madi, is Pidro no nwali has balay, is Hisos dagos wa naintaw in Pidro, iglwang, Kanam fangayofan Simon? Ka manga gorangon sas baba daga, gindak somohot manga bohis, ngatay manga kabahagi, ngatay giwat manga kapariho, ngatay gis iba taw? ²⁶ Is Simon nasagot, Giwas iba taw nogsohot. Ginyas Hisos iglwang, No kitonya, ka manga gorangon idwag sohot bohis git kapariho. ²⁷ Nyawa kitonya, fiya man ta nodwa ha faglwangon intam, haw fag hawas gobang linaw, haw fag banwit wan. Bol kam iktan oyang gona, haw fag fangangan it bibig, haw lomag sinya sadik kwarta pilak. Bol tonya, bayadan intam bohis, tam dowa.

¹ Gis nanya fag masohod in Hisos manga katogbong naakbang hanya a, naintaw, Fakta aban ka abwat man it kangayanan san Diyos banwanan fag sakop? ² Is Hisos natawag sadik anak ka sawasta akbang a, nafalindog ka anak sasta fagbokngan. ³ Ginyag lwang, Hogfwayong hayo, bonwa bohag, hayo manga fangayofan nodwam oman, ham nodwa tomolad kitos anak, nyawa kindawan ham idwam aktom san Diyos banwanan fag sakop. ⁴ Nyawa faktaw kagfalibaba it fangayofan kito fag anak, tonya ka abwat man has fagayo it kangayanan san Diyos banwanan fag sakop. ⁵ Nyawa faktaw kagtanggap sadik anak kito, maskin galwasi angko, aho yadi kat fagtanggapon. ⁶ Dapat ay, sadik taw nogfayayom has ogali dwat sadik anak ogbot kito kagsyag angko, fiya man ha hanya ta no somiyok sadik bato gilingan mabyat sat boknga liyog, kagfayayom has dwat, ginya omokas tonya fag taw ha basad kaabasadan dagat. ⁷ Isyay wan istay is baba daga, maskin ha akwag fayayom manga taw has dwat fag ogali. Idwa kabol id ha akwa ka gibolon kitonya, dapat ay, isyay wan ka manga taw kagfayayom tiba taw has ogali dwat. ⁸ Nom gamat ibolon, ngatay im bitis lahawan kagtaban hyamo has ogali dwat, lifongan lamang tonya, okasan wan. Nyawam gamat, ngatay im bitis nodwam dowa, ha no hayap man has haboyagan balay balay, fiya man has gamat no dowa, ngatay bitis no dowa, haw nodyap man im-okas ha basad afoy kadwa kapsa. ⁹ Nom mata man kagfasayag lag hyamo has ogali dwat, sowatan wan, okasan wa yadi. Nyawam mata idwam dowa, ha no hayap man has haboyagan, balay balay, fiya man has mata dowa haw nodyap man im-okas has hadasogan fadosaan taw sas afoy. ¹⁰ Ham fag matagahan, ham fag idwag yod ngadi sadik anak ogbot kito. Hogfwayong ha hayo kitay, ista manga anghil sam tongod fagaba sangko Ama atobangan sat banwanan sam tongod. ¹¹ Maskin Aho Kanbali Taw inbangkad hastay kaarakitay bomawi ka mangan liyam. ¹² Kinda kasta ibolonon, ham gayfan, ka taw no ha topa sadik daan, sadi nogtalang? Idwa awkin omobon yap ka siyam ik safolo ha siyam kwan lamnon sas moyod, ginya madi somayak ka topa ka natalang? ¹³ Hogfwayong ha hayo hanya no nalag ya kanliyam, hanyag baya wa dahol dahol tonya, bohondi kito ka siyam ik safolo ha siyam kadwan talang nogbaya. ¹⁴ Kitonya yadi, hayo Ama sat banwanan sam tongod, it fangayofan kitay, ngadi sadik anak ogbot kito fag idwam talang. ¹⁵ Im fadwasay no ha naibolon dwat ha hyamo, ha sabangan hanya. Ham dowa dowa fangampangan yap. Hanya nogtalinga hyamo, ham ogali mandi aban mangofodan. ¹⁶ Dapat hanya nodwag talinga hyamo, tabanan sadi yak taw, ngatay dowa kaarakitay ha faorongan hayo toltolan fagayo. Ngatay dowa, ngatay tolo kagfaorongan. ¹⁷ Hanya nodwa yadig talinga has taw, fwayongan han Diyos Tifonan. Ginya madi, hanya nodwa yadig talinga han Diyos Tifonan, ham fag fatimbang hanya bilang sadik Hintil, ngatay sadik fanohot bohis Roma. ¹⁸ Hogfwayong ha hayo, no kana ka hayo fagbandoon istay is baba daga, kitonya yadi ka fagbandoon san Diyos banwanan sam tongod. Kitonya yadi, nyawa kana ka hayo fagfaangayon sas baba daga, tonya yadi ka fagfaangayon san Diyos banwanan sam tongod. ¹⁹ Hogfwayong yadi ha hayo, ham nogdarangin, ham no dowak taw kasadi hayo fangayofan nogsagad nyawa kana fag bagay, angko Ama sat banwanan sam tongod faanod hayo fagsagadon. ²⁰ Maskin nyawa siday ta nogtifonan, manga dowa, ngatay tolo, kawa galwasi angko, aho sinya yadi maofodan is taw. ²¹ Ginyas Pidro naakbang in Hisos, naintaw hanya, Hyami Fon, kayoday ginan nangos aho nogfaliyam angko fadwasay naogali dwat hangko? Balis fito ginan, aho awkin igfaliyam yapdi? ²² Is Hisos nasagot hanya, Hodwag lwang kitay fag balis fito ginan lamang, yatokitay, ka fito ginan fabaliyan fitok safolok olit ham nogfaliyam kitonya. ²³ Maskin kito kan Diyos banwanan fag sakop. Halimbawa, sadik gorangon igsohot it manga sogowan bayadan ha hanya. ²⁴ Kasta nataban gona has gorangon ka ha bayadan 10,000,000 piso. ²⁵ Maskin ka sogowan idwa ha famayadon, kagfon sogowan iglwang has taw, Fasaliyan wa hanya hanggan wat babay, it manga anak hanggan it manga sangkap fagayo fagayo, kaarakitay hanya lomag it bayad. ²⁶ To fag sogowan nanlingkohodan hat fon atobangan, igfaawaon wa hanya, iglwang, Hayap igfatangon angko, aho aba bomayad di fagayo. ²⁷ Ka fon sogowan in-awa di hanya, yakanga nafaliyam it bayadan fagayo, idwa ngap nasohot. ²⁸ Dapat tonya fag sogowan nonsagaya ginya, nahablang yadit kapariho, it ofod sogowan ka ha bayadan yadi ha hanya, 500 piso. Nagamat ka ha bayadan ha hanya, yakanga nasohol, iglwang, Ha bayadan im otang hangko. ²⁹ Kat ofod sogowan nanlingkohodan ha hanya, nafaawaon yadi, iglwang, Hayap igfatangon angko, aho aba bomayad di fagayo. ³⁰ Yatokitay, ka sogowan gona idwag fagomon igsohot hanggan wa nafaporiso hanya hanggan wad bomayad. ³¹ Kawasta manga ofod sogowan, no nalag ka sogowan gona naibolon, tanhori wat manga fangayofan, hawasta fon, nafwayong wa fagayo kat lagan kat sogowan gona naibolon dwat. ³² Yakanga kasta fon nafatawag hanya, nalwang, Ha dwat wa dahol fag sogowan, gwadi ho nafaliyam im otang fagayo maskin hagfaawaon wangko. ³³ Hon-awa hyamo, gwadi ha fag kaawa yadim kapariho. ³⁴ Ginya madi, kawat fon kaisog yadi wa hanya, nafaporiso yadi wa hanya hanggan wad bomayad it otang fagayo. ³⁵ Kitonya yadi kangko Ama sat banwanan sam tongod it ibolonon ha hayo fagayo ham nodwa yadig faliyam, sadi wak dahonya fangayofan, hayo fadwasay naogali dwat ha hayo.

¹ Ginyas Hisos nontabo wagtoltol tonya fag manga halimbawa, ta nalahaw wan gis Galiliya, hawas banwanan Hodiya sas difay safa Hordan. ² Kaaywanon fag manga taw ka naoyan hanya, hanggan is Hisos nafafiya yadi ista manga sagit sinya. ³ Ha manga Farisiyo naakbang han Hisos, naintaw hanya, igtikis wa nangos igfasalan hanya. Taglwang, Maangay di awkin has Batasan Hodyo ka ama no omobon it babay ngadi kana kat fasingyanan? ⁴ Is Hisos nasagot, Ham awkin idwa nabasa sas Kasoratan kitay, gis fabagowanan, kawa Nahalig taw nahalig ama hanggan ina? ⁵ Hanya yadi ka nalwang kitay, Kawa nahalig kitonya, ka ama somaman wa git manga ama manga ina, ginya ka talsawa mangofodan wan, tambali wa sadi di. ⁶ Yakanga ginya wa ginan fawa dowa, dapat tanbali sadi di. Kan Diyos nafasadi, fag idwa ha taw igfasarowayan. ⁷ Ka manga Farisiyo naintaw ya in Hisos kiti, No kitonya, kana mayon is Mwisis no natogon kitay ka ama domisag yap fangobonan kasoratan hat babay, bago di gobon hanya? ⁸ Is Hisos nasagot, Kawa hayo manga fangayofan myasa wa maganit, is Mwisis nafaangay yadi wan nyawa mangodgobonan. Dapat no gi dis bago bago idwa kitonya. ⁹ Yakanga hogfwayong ha hayo, nyawa fakta fag ama no omobon it babay, no bohonwa kitay it babay fabayowan wa dahol, ginya bomabay has iba ina, yagfabayowan wan. Hanggan ka bomabay ista nagobonan igfabayowan yadi wan. ¹⁰ In Hisos manga katogbong nafwayong hanya, No kitonya mangharaw, ka ama fiya man nodwa hara igbabay. ¹¹ Dapat is Hisos nasagot kiti, Idwa fagayo omagwanta kitay idwa bomabay, no bohonwa kan Diyos kafangayofanan fag kitonya. ¹² Maskin bokod bokod ista fadalanan, manga ama idwa kasaya bomabay. Tiba kawa gis anak dararag danwa kitonya, tiba kawasta naibolon ha hanya, yakanga idwa kasaya ina, ginya madi ha akwa yadi tiba kagtikis wadwag babay kaarakitay tomogbong in Diyos banwanan fag sakop. Ka omagwanta kitonya fag tomonglos kitonya. ¹³ Ginya madi, ha akwa manga taw nataban manga anak han Hisos kaarakitay is Hisos fomwalid it gamat sas manga anak baba alfoyo, hanggan mandarangin. In Hisos manga katogbong nangabaya was taw. ¹⁴ Dapat is Hisos iglwang, Ham hawa kabaya ka manga anak no gakbang angko. Ham fag idwag toplan tonya maskin ka ha fangayofan kitos anak ka omafo in Diyos banwanan fag sakop. ¹⁵ Is Hisos nafwalid di ngay it gamat sas manga anak baba alfoyo, ginya nalahaw wan. ¹⁶ Ginya yabay ha sadik anahan naakbang han Hisos, naintaw kiti, Haw kagfaadal, kana kangko bato ibolonon ka fiya, kaarakitay ho lomag haboyagan kadwa ha katabowanan? ¹⁷ Is Hisos nasagot, Kana haw no gintaw angko no kana ka fiya? Sadi lamang ka fiya. Haw no kasaya tomanggap ka haboyagan, haw fag katanog ka manga Batasan Hodyo. ¹⁸ Hanya naintaw, Kana kin nangos fag manga Batasan? Is Hisos nasagot, Haw fag idwag fahatay taw. Haw fag idwag fabayowan, haw fag idwag nahaw, haw fag idwag bangdan is taw. ¹⁹ Haw fag idwag falamang im ama hanggan im ina, hanggan fag kito yadim sadili habilogan haw no kaawa im kapariho. ²⁰ Ka anahan nalwang, Gwadi ho katanog wa tonya fagayo. Kana yapdi araw angko bato ibolonon? ²¹ Is Hisos nasagot kiti, Haw no kasaya kitay fag kabali hosto wa fiya fiya, haw fagoli wan, fasaliyan im manga botang fagayo fagayo, ginya ha fahafodan has manga myabog it manga sali, ginya yabay, haw ha akwa wa kaakwaan san Diyos banwanan sam tongod. Ginya madi, ha fag hayastay, tahinan wangko. ²² Ka anahan no nadog kitonya, nalahaw wan, inbalaw digdog, maskin hanya maakwa wa dahol. ²³ Ginyas Hisos nafwayong hat manga katogbong, Hogfwayong ha hayo, bonwa bohag, ka maakwa fag taw mahori kaaktom han Diyos banwanan fag sakop. ²⁴ Hogfwayong ya ha hayo, malpos man ka hayopan kamilyo nogdalan has basad toho dagom has taw maakwa nogfasakop han Diyos. ²⁵ In Hisos manga katogbong indolaw wa dahol igdog it fwayong, yakanga ta naintaw kiti, No kitonya mangharaw, fakta fag manga taw kambawi? ²⁶ Is Hisos no mabantayan hat manga katogbong, iglwang, No taw di, idwa ha somyagan omibolon tonya, dapat is Diyos syagan di omibolon fagayo. ²⁷ Ginyas Pidro iglwang, Lag nga hami kati, mi naobon wa hyami akwa fagayo a, mi natahin wa hyamo. Kana ara kin ka hyami? ²⁸ Is Hisos nafwayong has taw, Fanlag nga aban, aho, Kanbali Taw, no tomokaw wan sangko fanokawan gorangon sas bago fag daga, ham kagtahin angko kati, ham tomokaw yadi sas safolo ha dowak fanokawan gorangon kaarakitay kabali manga fangabaya in Israil safolo ha dowak layonan taw. ²⁹ Nyawa faktaw no gobon it balay, ngatay it manga fadwasay, ngatay it ama hanggan ina, ngatay it manga anak, ngatay hanggan it manga daga, kawa ahot fagalwasiyon, kayonya fag gatos it tanggapon, ginya madi tomanggap yadi haboyagan kadwa ha katabowanan. ³⁰ Dapat aywan ka gona imgoyan man, hanggan ka goyan gomona wa aban.

¹ Is Hisos iglwang, In Diyos banwanan fag sakop kito, halimbawa. Sadi kagfon obasan nalahaw marom marom yapdi, igsayak it famalo. ² Ta no nanaranggapan it tangdanan, sadik sirangan limak piso, ginya kagfon nasogot manga famalo has obasan. ³ Kagfon obasan noglahaw, myanit no kaabwat wan, nalag tibak taw matokawan odi sayo faktaban balay. ⁴ Nafwayong has taw, Ham fag hanya yadi, ham fangibolon angko obasan, ho tomangdan hayo hosto. Yakanga ta hanya wan. ⁵ No boknga wa sirang araw, kagfon obasan nalahaw ya ngawan, hanggan myanit no kalibaba, dowa ya ginan, naibolon kito ka haraw. ⁶ Myanit no kasangday wan, hanya nalahaw ya ngay, nalag ya ka tiba kadwa ha ibolon. Nafwayong has taw, Kana ham nostay di, sadi wak sirangan kalibang odi matorosanan? ⁷ Ta nasagot, Maskin idwa hagfafalo hyami. Hanyag lwang, No kitonya, sogi, ham fag hanya wan, ham fangibolon wa sangko obasan. ⁸ No kataklob wa marom, kagfon obasan nafwayong hat natogon kagbahala hat manga sogowan, Haw tawagan angko manga famalo. Haw fag tangdan was taw, fabagowan yap ka manga goyan nangibolon hanggan bago ara ka gona. ⁹ Ka manga bago nangibolon no kayabi wan natanggap myasa limak piso. ¹⁰ Ginya madi ka manga nagona naibolon gayfan it tanggapon ngandayo dahol man inya, dapat fagayo pariho di ngap it natanggap, myasa limak piso. ¹¹ Ta no natanggap wat tangdanan, tagsohot yapdi gisagfon obasan, igmanaw yapdit tangdanan. ¹² Taglwang, Kandasog goyan sadi odik tama sinyahod no nangibolon dapat hami sadi wak sirangan gibolon, minyaya wa maalhagan basad myanit. Yakana haw nogfaparihowan hyami tangdanan? ¹³ Kagfon iglwang ha sadik famalo, Ama, hodwa nadaya hyamo. Gwadi intam taranggapan dandi limak piso, idwa aw? ¹⁴ Haw fag bol no dahoday ka hyamo, haw fagoli wan. Ho kasayag tangdan ka goyan daho yadi ka hyamo tangdanan. ¹⁵ Kana ha no kahori, bohonwa awkin aho ka bahala kangko sadili akwa? Ngatay ham kaingli odi kitay aho mahoway has taw. ¹⁶ Yakanga ka goyan gomona wan hanggan ka gona imgoyan man. ¹⁷ Da Hisos noglahaw yapdi has bohid, has banwa Hirosalim baliwa, is Hisos nafasaman ka safolo ha dowak katogbong gis fakaaywanan. Ta noglahaw yapdi is Hisos igfwayong has taw kiti, ¹⁸ Yabay, tam hawam bohid has Hirosalim kati. No sinya wan ta fagamat angko, aho Kanbali Taw, has manga fagtahinan fagalan-han-Diyos hanggan has mangag faadal Batasan Hodyo. Tonya fag manga taw fatohoyan angko has kahatayan. ¹⁹ Ta fabahala yadingko has manga Hintil. Ka manga Hintil yomod angko, manga bomakbak, ginya pomako angko sas nafatimbangan hayo. Dapat ay, ahom boyag ya sas fatolo fag sirang. ²⁰ Ginyan Sibidiyo babay hanggan wat manga anak naakbang han Hisos, nanlingkohodan sat atobangan, ha fagsagadon. ²¹ Is Hisos iglwang, Kanam fagsagadon gingko? Ka ina nasagot, Haw faangayan nangos tongko manga anak dowa fag ha kangayanan igtokaw sa hyamo akbang, haw nombali hari, insadi sam balis sihon, insadi sam balis wala. ²² Is Hisos iglwang, Ham idwa twa hayo fagsagadon. Ham awkin syagan omagwanta ominom gingko fanginoman kahoriyan aban? Taglwang, Ala, mi somyagan di. ²³ Is Hisos iglwang, Ham ominom ngay gingko fanginoman aban. Dapat bonwa aho ka bahalag fili no faktaw ka tomokaw aban sangko balis sihon, ngatay balis wala. Ka hayo faglwangon tokawan, angko Ama ka danwa nafatalaga no faktaw ka tomokaw sinya. ²⁴ In Hisos manga katogbong tiba, safolo, no nadog ista fagsagadon, ta kahori wa dahol tonya fag dowak fadwasay. ²⁵ Yakangas Hisos nafaakbang ha hanya it manga katogbong fagayo, ginyag lwang, Ham fadi wadtwa kitay ka manga fagtahinan Hintil ha takan nogbahala has taw, hanggan ista manga gorangon igbaya wagfasognod it sakop. ²⁶ Dapat ham fagayo fag idwa kitonya. Yatokitay, nyawa fakta sa hayo ka kasaya kabali abwat it kangayanan, fag kabali di ngap hayo sogowan. ²⁷ Nyawa faktaw ka kasaya kabali fagtahinan, fag kabali di ngap bilang hayo nasali sogowan, ²⁸ kitongko, aho Kanbali Taw, kanbangkad hastay, bohonwa kitay aho kasta fagtogbongon, fag aho di ngap ka tomogbong is taw, hanggan igdisag angko haboyagan ka fangafiyan, kaarakitay tomobos has fakaaywanan taw. ²⁹ Da Hisos nontolas gis banwa Hiriko, aywan ka goyan gin Hisos ginanan. ³⁰ Yabay, ha dowak ama, pariho bota, matokawan sas bilog dalan. Ta nogdog kitay is Hisos igdalan wa sinya, tagharokyawan wan, taglwang, Haw, in Dabid hasokfonan Anak, haw fakaawa hyami. ³¹ Manga taw nangabaya ka manga bota, tadwag faawang nangos. Dapat ka manga bota kadahol di ngap nogrokyaw, igsakitan wan, Hyami Fon, haw in Dabid hasokfonan Anak, haw fakaawa hyami. ³² Is Hisos intorosan, natawag has bota, naintaw, Kana ka hayo fakasayaon angko togbongon ha hayo? ³³ Tagsagot kitay, Haw kagfon hyami, hyami mata fag imfoga ya nangos. ³⁴ Is Hisos in-awa ngay, naayohap ista manga mata. Yakanga infoga wa dagos, ginya madi ta natahin wan Hisos.

¹ Kati yabay ta kadasog wa has banwa Hirosalim. Araw, ta nondasog sas tifonan balay Bitfagi, sas Moyod Oliboan, is Hisos nafagona kat manga katogbong dowa. ² Is Hisos natogon kitay, Ham fag hawas masoson fag tifonan balay. Ham araw nomdasog sinya, ham lomag wa dagos sadik inan habayo libaba matarabingan, ha anak yadi sinya. Lohasan it tarabing a, goyodan fagayo dowa hastay. ³ No ha taw gintaw hayo, ham fag lwang, Kagfon intam kasaya somahay, ginya madi kagfon habayo fadiya wa hayo dagos ka manga habayo. ⁴ In-anod wa nga kitonya kaarakitay ka fangampang fwayong hyabi imtonglos wan kati noglwang kitay, ⁵ Ham fwayongan has banwa Siyon, Lag ngay tya wamlwad ka hyamo gorangon kadasog wan. Hanyadwa ha takan, masahayan sa odis habayo libaba, Sa odi sadik anak habayo libaba. ⁶ Ginya madit katogbong dowa inlahaw wan, intanog in Hisos sogo. ⁷ Ta nagoyod ka inan habayo libaba hanggan wat anak, ta nasagmak it manga rotay aba sas baba goyoy manga habayo. Ginyas Hisos nasahay wan. ⁸ Kaaywanon fag manga taw nasagmak it manga rotay san Hisos fagonan lahawan. Tiba taw nabonggo manga sanga hayo, nasagmak yadi sinyas boknga dalan. ⁹ Kaaywanon fag manga taw ka gonan Hisos hanggan goyan igtarawagan marigon, taglwang, Kafiyaon in Dabid hasokfonan anak. Ka kadasog san Diyos ngayan fag bomaya wan. Kafiyaon ka san Diyos banwanan sam tongod im tongod. ¹⁰ Araw is Hisos nonsakbaw basad alad Hirosalim, sadi wak banwa gagran. Ta garintawan, taglwang, Fakta mayon to fag ama? ¹¹ Ka fakaaywanan nasagot, To kawas Hisos ka fangampang gis Nasarit, sakop Galiliya. ¹² Ginya madis Hisos nasakbaw has basad aladan Fanimbaan-Dahol. Nasogo ha dayo alad ka mangag balidya hanggan ka mangag sali basad aladan. Nafatobong kasta fwalidan kagbalyo kwarta hanggan ka mangag balidya salompati manga tokawan. ¹³ Is Hisos nalwang, Gwadi insorat sas Kasoratan, Ta fag ngomayan angko balay, Balay Fandaranginan, Dapat ham nafabali angko balay oliyanan odi manga fangnahaw. ¹⁴ Ha manga bota hanggan manga fihong sinya ka naakbang han Hisos basad aladan Fanimbaan-Dahol. Yakangas Hisos nafafiya is taw. ¹⁵ Ka manga fagtahinan fagalan, hanggan ka mangag faadal Batasan Hodyo, kahori sat manga basad fangayofan no nalag in Hisos manga naibolon madolaw. Ta kahori yadi ka manga anak nogtarawagan sas basad aladan Fanimbaan-Dahol, maskin tagfasayagdog hanya, taglwang, Kafiyaon in Dabid hasokfonan Anak. ¹⁶ Ka manga ha kangayanan naintaw in Hisos kiti, Haw awkin igdog yadi wan ista fwayong kawa ha hyamo? Is Hisos nasagot, Hogdog ngay. Ham idwa awkin nabasa ka kito fag manga toltol sas Kasoratan, Giwas manga bibig anak ogbot, hanggan ka mangag soso yapdi haw nafahosto nogfasayagdog hyamo? ¹⁷ Da Hisos nadokson ya ngawan, nalahaw gis banwa, hawas Bitanya. Sinya wak nigya. ¹⁸ Nonsirang, da Hisos no kafwali ya has banwa Hirosalim, is Hisos kalonos wan. ¹⁹ Is Hisos no nalag sadik fon igos sas bilog dalan, hanya nabantay. Dapat idwa ha lagan bohad sinya fag fon, labong odi. Yakangas Hisos nahampang has fon igos, iglwang, Hadwa bomohad domwag nyawa ginahin. Yakanga ka hayo dagos wanlayong, intonga wan. ²⁰ Ka manga katogbong no nalag, tandolaw wan, ta gintaw, Twa oman intonga wa dagos to fag fon igos? ²¹ Is Hisos igsagot, Bonwa bohag, ham nodwa gadowan igsyag in Diyos, ham somyagan yadi omibolon bondi kitongko naibolon has nwa fag fon igos. Nyawa ham lomwang toy fag moyod, Haw fag galin wa gis nyamo, loksowan has basad dagat, im-anod wa ka hayo fwayong. ²² Ham nogsyag in Diyos, ham tomanggap nyawa kana ka hayo fagdaranginon. ²³ Araw da Hisos nasakbaw has basad aladan Fanimbaan-Dahol. Is Hisos nogfaadal yapdi sinya, manga fagtahinan fagalan-han-Diyos hanggan manga fagtahinan sas banwa naakbang hanya, naintaw, Kanam kangayanan haw no gibolon to fag manga bagay? Fakta ka nadisag hyamo kangayanan kitonya? ²⁴ Is Hisos nasagot has taw, nalwang, Ho ngap omintaw yadi hayo, ham no somagot angko, ho bago di fomwayong ha hayo no kana kangko kangayanan gibolon to fag manga bagay. ²⁵ Ginda kan-ginan in Hwan kangayanan igfatogna manga taw, ngatay gin Diyos banwanan sam tongod, ngatay gis taw? Tagfabarohagan ha sadi ha sadi, taglwang, Tam no lomwang giwan Diyos banwanan sam tongod, is Hisos lomwang hantam, Kana mayon ham nodwa katiwala in Hwan hyabi? ²⁶ Dapat, tam no lomwang, Gi odis taw, manga taw ngandayo omisog intam, maskin ka fakaaywanan fag manga taw natwa waglag kitay is Hwan in Diyos fangampang. ²⁷ Yakanga ta nasagot in Hisos kitay, Midwa yadi twa. Ginyas Hisos nafwayong, Hodwa yadi fomwayong hayo no ginday angko kangayanan gibolon to fag manga bagay. ²⁸ Kinda ham gayfan no kito? Ha sadik ama it anak ama dowa. Ka ama hawat anak sadi, igsogo hanya, iglwang, Haw fag gibolon hantam obasan kati. ²⁹ It anak nasagot kitay, Ho kafang di. Dapat araw araw ogbot in-oman yat fangayofan, ya hanya wan, nangibolon. ³⁰ Ka ama hayat anak sadi ya, nafwayong yadi kitonya. Yakanga kat fadowa fag anak iglwang, Ala, ho hanya wan, dapat idwa ngap ginya. ³¹ Fakta kantanog it ama fwayong, ham gayfan? Ta nasagot, Kat nasogo gona kantanog. Is Hisos iglwang has taw, Hogfwayong ha hayo kitay, bonwa bohag ka manga fanohot bohis Roma, hanggan ka manga fabayowan fag manga ina gomona man ara hayo kaaktom han Diyos sakop. ³² Maskin is Hwan indasog ha hayo, fadi wad nafwayong ha hayo ka fiya fag ogaliyon, dapat ham idwan tiwala hanya. Dapat ka manga fanohot bohis Roma hanggan ka manga fabayowan fag manga ina intiwala hanya. Ham fadi wad nalag kitay kitonya, dapat ham idwa yadi nasoyo, idwan tiwala hanya. ³³ Ham fag matalingan sadi yak halimbawa. Ha sadik taw nananom manga obas sat baba daga, maaladan ya ngadi. Natigib yadi dalifi ista fanlidan obas, nahalig sadik ansagan abwat, ista bantayan. Ginya madi nafabahalat obasan hat manga fangano. Kagfon obasan hawas iba banwanan ayayo. ³⁴ Nondasog wa famohadon, famangtaon wan, kagfon obasan nasogo it manga sogowan kaarakitay bomol it kahorayan bohad git manga fangano. ³⁵ Dapat ka manga gano obasan naisog di ngap ka manga sogowan. Ka sadik sogowan ta nabakbak. Ka sadi ta nafahatay. Ka fatolo ta nabintok bato. ³⁶ Kagfon obasan nasogo ya domwag, aywan man ka gona it nasogo sogowan, dapat kitonya mandi kasta naibolon has taw. ³⁷ Ginya madi, no dogay, ka man it anak kat nasogo. It fangayofan iglwang, Ta gomalang wa nangos angko anak. ³⁸ Yatokitay, ka manga fangano obasan, no nalag kagfon obasan it anak, tagtoltolan kitay, To wa aba ka omafo it ama kaakwaan. Kalibang, tam fahatay wa hanya, ngan aba tam wa ka omafo ka obasan. ³⁹ Ta nagamat wa hanya, nagoyod hanya has dayo obasan, nafahatay wa sinya. ⁴⁰ Yakanga kagfon obasan no mwali aban, kanat ibolonon hat manga fangano, ham gayfan? ⁴¹ Ta nasagot kiti, Hanya fahatay yadi wa araw tonya fag dwat fag manga taw, faano ya domwag it obasan has tiba taw ka domisag it kahorayan no ginahin aba sas famangtaon. ⁴² Ginyas Hisos naintaw has taw kiti, Ham idya awkin nabasa to fag toltolan gis Kasoratan? Ka manga fangalig balay fagdayoon fag bato, Tonya di ngap kagfaganit ka balay sas basad solok. To in Diyos naibolon, Tam kadolaw waglag. ⁴³ Yakanga hogfwayong ha hayo, bohonwa ham kambali in Diyos sakop, dapat sadik layonan taw ka katanog it sogo fiya fiya, tonya wa kambali in Diyos sakop. ⁴⁴ Kamdagdag hanya fag baba bato, imbolang, dapat ka bato no kadagdag sasta babaw, kamlibit sas daga bato imrogrog lamang. ⁴⁵ Ka manga fagtahinan fagalan hanggan manga Farisiyo no nadog in Hisos manga halimbawa, nasarom kitay hawa ngap ista manga sadili in Hisos fagfatangonon. ⁴⁶ No kitay di ta kasaya wa gomamat in Hisos, dapat ta kadala di ka manga taw, maskin kat fakaaywanan natwa waglag kitay, is Hisos in Diyos wa fangampang.

¹ Sadi ya ginan is Hisos nafahalimbawa has taw, iglwang, ² In Diyos banwanan fag sakop kito nangos. Sadik gorangon nafatalaga fanganon ayo ayo kawat anak ama mamabay wan. ³ Ginya ka gorangon nafasabang ya it manga sogowan has taw kat manga nafadog itfagonan, dapat ta kafang kabangkad. ⁴ Nasogo ya domwag ka tiba sogowan, natogon has taw kitay, Ham fag fwayong hantam manga nagsabangan itfagonan kitay, intalaga wa yabay ka fanganon, ho nasogba wan angko manga baka, hanggan kangko manga nafalakbog manga anak baka. Fagayo fag manga fanganon intalaga wan. Fag lwang has taw, Ham fag hastay wa kati has fanganan famabayan. ⁵ Dapat kasta nagsabangan itfagonan bilang didwa nadog. Ta nanarowayan it lahawan bokod bokod, insadi hat iyab, insadi mamalidya wan. ⁶ Tiba nagamat di ngap ka gorangon manga sogowan, nabakbak ya ngadi hanggan wa nafahatay. ⁷ Ka gorangon in-isog wa dahol dahol is taw. Nasogo wat manga sondalo, nafahatay yadi wa ka mangag fahatay taw. Ta nasonog yadi wat banwanan. ⁸ Ka gorangon nafwayong hat manga sogowan, No kitay di intalaga wan ka fanganon, dapat kantam nagsabangan fag manga taw idwa fiya igfasakop hastay. ⁹ Yakanga ham fag hawas basad karsada ka ha manga taw ayo ayo. Ham tabanan hayo lagan fagayo hastay has fanganan famabayan. ¹⁰ It manga sogowan inlahaw ya ngay has manga dahol fag karsada, nataban wan kat lagan fagayo, nyawa ka manga dwat fag taw, nyawa ka fiya. Yakanga napno wa taw sat fanganan famabayan. ¹¹ Araw, ka gorangon nasakbaw mamantay ka manga taw, nalag sinya sadik taw kadwa ha solong rotay famabayan. ¹² Ka gorangon naintaw hanya, Ama, yakana haw no nasakbaw hastay idwa ha rotay famabayan? Ka taw idwa naawang. ¹³ Yakanga ka gorangon nafwayong hat manga sogowan, Ham gafosan it gamat hanggan bitis. Ham okasan hanya has basad marom sas sokayan. ¹⁴ Sinya manga taw omoraw hanggan wasta ngifon di mangarigitan wan. No kitay di aywan ka gorangon nafatawag, dapat sayok kat nafili. ¹⁵ Ginya madi, ka manga Farisiyo inlahaw wan, nanoltolan no kinda no omiktan in Hisos git sadili hampang nangos. ¹⁶ Yakanga ta nasogo han Hisos ista sadili manga katogbong tiba, hanggan in Gorangon Hirodis manga sakop tiba. Tagmaswag odin Hisos, taglwang hanya, Haw kagfaadal has taw, mi twa kitay haw idwag bohag, hanggan sonson wa orongan kam faadalon has taw kan Diyos fakasayaon ista manga ogaliyon. Hadwa ha fagihidon taw, maskin hagfapariho wan di fagayo fag manga taw. ¹⁷ Yakanga, fwayongan hyami, kana kam fangayofan? Maangay awkin sas Batasan Hodyo tam nogbayad bohis han Sisar, ngatay idwan? ¹⁸ Dapat ay, is Hisos fadi wad twagdog kasta bato lwangon dwat, yakangag lwang has taw, Hayo hampang bilang wa fakyason no kadog di. Kana mayon ham nogtikis wa nangos igfasalan angko? ¹⁹ Tay, ka kwarta, falagan angko ka kwarta famayad bohis. Ta nadisag ngay han Hisos sadik kwarta mabilog. ²⁰ Is Hisos naintaw has taw, Gafo tolad hanggan ngayan insorat istay? ²¹ Ta nasagot, In Sisar wa nga tolad tonya. Ginyas Hisos iglwang has taw, No kitonya, kan Sisar, disagan wa han Sisar, kan Diyos disagan wa han Diyos. ²² Tandolaw wagdog in Hisos sagot, ta naobon di hanya, nanarowayan lamang. ²³ Gis nanya yadi fag sirang, manga Sadosiyo kagfabohag kitay ka manga natay idwam boyag ya domwag, naakbang han Hisos. Taglwang hanya kitay, ²⁴ Haw kagfaadal has taw, is Mwisis natogon kitay, Sadik ama no matay idwa ha anak sat babay, it fadwasay fag bomabay ya kat tagyaw kanbalo kaarakitay no ganak, bilang man di ka natay it ama. ²⁵ Itfagonan sa hyami ha tasayan fitok ama kagdowasayan. Kasta ahan nababay, idya ha anak, natay wan. Nafamataw it babay hat fadwasay ama. ²⁶ Kitonya yadi kanlag kat fadowa fag indogan, hanggan fatolo hanggan wat fafito. ²⁷ No natay wa fagayo fag tasayan ama, hanggan ka ina natay yadi wan. ²⁸ Yabay gafo babay tonya fag ina, ta nomboyag ya, kawa ka fitok tasayan nababay hanya istay? ²⁹ Is Hisos nasagot has taw, Ham igfalamang wa dahol dahol, kawa ham idwa twa ka Kasoratan, idwa yadi twa in Diyos karigonan. ³⁰ Maskin ta nomboyag ya aban, fawa hagbabay gindogan, tambali kitos manga anghil san Diyos banwanan sam tongod kadwa yadig babay. ³¹ Kawa has manga natay no kaboyag ya, ham idwa awkin nabasa sas Kasoratan in Diyos nafwayong ha hayo? Hanyag lwang, ³² Aho in Abraham wa Diyos, aho in Isaak wa Diyos hanggan in Hakob yadi Diyos. Ka manga taw boyagan lamang kan Diyos fagsakopon, bonwa ka manga mahatayan. ³³ Ka fakaaywanan fag manga taw no nadog in Hisos sagot, tandolaw wat manga fwayong. ³⁴ Dapat ka manga Farisiyo matifonan odi ta no nadog kitay ka manga Sadosiyo nadaogan din Hisos sas toltol. ³⁵ Sadik Farisiyo ka madonong wa dahol has manga Batasan Hodyo, naintaw in Hisos kaarakitay igsolay hanya, nalwang, ³⁶ Haw kagfaadal, sida ka marigon man has fagayo fag manga Togon kan Mwisis natogon? ³⁷ Is Hisos nasagot, Haw fag galwasi in Diyos kagfon hyamo, sadi wak dahonya fangayofan, hanggan sadi wak dahonya isip. ³⁸ To ka gona hanggan marigon man has fagayo fag manga togon. ³⁹ Kitonya yadi kat fadowa. Haw fag galwasi im kapariho kito yadim sadili. ⁴⁰ Ka manga Batasan Hodyo fagayo hanggan ka manga fangampang adal sinya wa kansakop sas dowak togon. ⁴¹ Ka manga Farisiyo no matifonan yapdi, is Hisos naintaw is taw, ⁴² Kana ka hayo fakatwawon kawa han Diyos-natogon-Famawi, ka Kadasog fag Gorangon? Gafo hasokfonan anak tonya? Ta nasagot, In Dabid hasokfonan anak. ⁴³ Is Hisos iglwang, No kitonya, ka Maliyaw fag Falad no nafaisip in Dabid, kana mayon is Dabid nogngayan it hasokfonan anak, kagfon hanya, noglwang ⁴⁴ Is Diyos nafwayong hasagfon angko, Haw fag matokawan yap sangko balis sihon, No bali day hodya nafasakop fiya fiya ha hyamo im manga kalaban fagayo. ⁴⁵ Kati nos Dabid man di ka nangayan in Diyos-natogon-Famawi, kagfon in Dabid, kinday hanya nogfon in Dabid not sadili odi hasokfonan anak, ham gayfan? ⁴⁶ Ngadi sadi sas taw idwa nalag it sagot han Hisos. Ginya wa ginan ta fawag fasolopan hanya kaarakitay omintaw hanya.

¹ Ginya madis Hisos nahampang has fakaaywanan fag manga taw, hanggan hat manga katogbong, nalwang kiti, ² Ka mangag faadal Batasan Hodyo hanggan ka manga Farisiyo ka bilang in Mwisis tobos kati nogfaadal in Mwisis togon. ³ Yakanga ham fag talinga ista fwayong, fag katanog ista sogo. Dapat ay, ham fag idwag tolad ista manga ogali maskin ista manga ogali idwag faanod kasta adal. ⁴ Tagfogong ka manga mabyat fag ogali, bilang fagdiyaon, igfafasan hat sakop, dapat ay, tadwag sapkid ngadi ngap ista timoyo kaarakitay igsafat tonya. ⁵ Kasta manga ogali famalagon odi has taw kitay fiya. Tagfadahol it sohadan oksong sas boknga gamat hanggan sas boknga alfoyo. Ka masohadan sinya in Diyos hampang tiba. Tagfaaba yadit barobayan sat tobwan rotay. ⁶ Tagfahasa yadi ka tokawan hasta fon akbang fiya fiya, sas manga fanganan, hanggan ka fanokawan ka manga ha kangayanan sas fanimbaan. ⁷ Ta kasaya yadi manga taw fag fadaholon hanya ta no gayayag basad banwa, manga taw fag ngomayan nangos is taw, Kagfaadal. ⁸ Dapat ham, ham fag idwag fangayan ha sadik taw kitay, Haw kagfaadal, maskin kagfaadal hayo sadi di, ham fagayo dowasay. ⁹ Ham fag idwag fadaholon ngadi faktaw sas baba daga nogngayan hanya hayo Ama, maskin sadi di hayo Ama, ka hayo Ama sat banwanan sam tongod. ¹⁰ Ham fag idwag faangay nyawa faktaw igngayan hayo, it fon, maskin sadi di kagfon hayo, kawan Diyos-natogon-Famawi, ka Kadasog-fag-Gorangon. ¹¹ Ka abwat man ha hayo it kangayanan, fag tonya di ngap kambali mahogod igtogbong, bilang hayo sogowan. ¹² Kagfatakagdog is taw, it kangayanan imbali ngap libaba, dapat ay kadwag fatakagdog, imbali ngap abwat it kangayanan. ¹³ Dapat, isyay wan, ham ka mangag faadal Batasan Hodyo, hanggan manga Farisiyo. Ham igfalagon odis taw kitay ham fiya. Ham igtaktak ka manga taw kaarakitay tadwag dasog han Diyos sakop. Bohondi kitay ham idwag sakbaw in Diyos sakop, ham igtaktak ya ngadi ka kasayag sakbaw. ¹⁴ Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham iglogos wa ngap manga ina balo banwanan, hanggan hayo odi famalagon is taw ham nogdarangin kadogayon. Kawa kitonya ham, hayo fadosaan kamtohoyan ha hayo aban, mahori man ka tiba taw. ¹⁵ Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igdifay ya ngadi dagat. Ham iglahaw ayayo baba daga kaarakitay ham fatiwala ngadi sadik Hintil has ogali Hodyo. Ginya ham no nataban wan, ham igfabalit ogali dwat man ka hayo. Yakanga tonya fag taw aban, bohondi kito ka hayo no fiya fagfadosaon sas afoy kadwa kapsa. ¹⁶ Isyay wan ham manga bota kagfangolo is taw. Ham igfwayong kitay ta nogngayan ka Fanimbaan-Dahol nogtangkod marigon, nyawadwam tonglos tonya, dapat ham iglwang, ta nogngayan ka ginto sas Fanimbaan-Dahol ta nogtangkod, fag orongan wam-anod ista natangkod. ¹⁷ Ham manga bota, ham ka manga idagdog odi. Sida ka mahalga man, ham gayfan, ngatay ka ginto, ngatay ka Fanimbaan-Dahol maskin sinya wa ka ginto no nafabokod han Diyos. ¹⁸ Ham igfwayong yadi ka taw nogngayan ka danglayan nogtangkod marigon, nyawadwam tonglos tonya, dapat ay, ta nogngayan ka sinogba sas baba danglayan nogtangkod, fag im-anod wan ista natangkod. ¹⁹ Ham manga bota. Sida ka mahalga man, ham gayfan, ngatay ka sinogba, ngatay ka danglayan ka sinyan disag han Diyos ka sinogba? ²⁰ Yakanga, ta nogngayan ka danglayan, ta nogtangkod marigon, igsakop yadi fagayo kasta disag sinya. ²¹ Ta nogngayan ka Fanimbaan-Dahol nogtangkod marigon, igsakop ka Fanimbaan-Dahol hanggan ka goli sinya. ²² Ta nogngayan in Diyos banwanan sam tongod ta nogtangkod marigon, igsakop in Diyos fanokawan gorangon, hanggan kagtokaw sinya. ²³ Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igdisag ka hayo fasafolo gis manga tanom famabanglo odi ofi, dapat ham igfasigpala di ka mahalga man fag adal gis Batasan Hodyo, kitos fag idwa ha fagihidon taw nogbolay fangabaya, ham fag kaawa ha sadi ha sadi, hanggan fag sonson wa maanod hayo hampang. Fiya ham nogdisag ka hayo fasafolo madi ngap, dapat ham fag katanog yadi to fag manga ogali mahalga. ²⁴ Ham manga bota kagfangolo manga taw. Ham matanogon no kadi garogbot fag bagay, dapat ay no ka mahalga fag manga bagay, ham idwa katanog, ham igfasigpala odi. ²⁵ Isyay wan ham mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham gogas ya ngadi ka manga baba ongot, manga baba finggan, dapat ka sas basad manga odi bafaw wa dahol dahol kawa ham igtagagonaon, manga maingliyon ya ngadi. ²⁶ Ham manga Farisiyo bota. Falinayan yap man sas basad ongot, basad finggan, ginya madi ka sas babaw imbali yadi malinay. ²⁷ Isyay wan, ham mangag faadal Batasan Hodyo, manga Farisiyo. Ham igfalagon odis taw kitay ham fiya. Ham bilang kitos lobgoban kasta nafaabohay, fiya kabantay sas babaw, dapat sas basad manga odi boyok, manga botol natay, manga sitam. ²⁸ Ham kitonya wa fiya fiya. No sas faglagan di manga taw, ham kafiyaon wan, dapat ka orongan, dwat wa dahol dahol hayo manga ogali. Ham igfalagon odis taw kitay ham fiya. ²⁹ Isyay wan ham mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igfafiyan in Diyos manga fangampang lohib lobgoban, hanggan ham kalig yadi fatohodan ka manga taw fiya hyabi. ³⁰ Ginya ham iglwang, No hami di nangos ka boyagan hyabi gis nanya fag masohod, midwa ara naoyon has taw ta no nafahatay in Diyos manga fangampang. ³¹ Ham noglwang kitonya, ham igfatohoyan kitay ham ista manga hasokfonan anak ka manga nafahatay in Diyos manga fangampang. ³² Sogi, ham fatonglosan wan hayo manga hafofowan nafabago. ³³ Ham manga abyanon wan, bilang odi hasokfonan abyanon no madaya, kinday nangos ham no bomaybay ka fadosaan sas basad afoy kadwa kapsa? ³⁴ Yakanga hogsogo yapdi ha hayo angko manga fangampang, hanggan ka manga madonong fag manga taw hanggan mangag faadal togon. Tiba aba ham fahatay wan, tiba ham fapako sas fatimbangan hayo, tiba ham bomakbak sa hayo basad fanimbaan, tiba ham mamahoriyan omalaw ha banwa ha banwa. ³⁵ Kawa kitonya, ham wa aba ka domog ka fadosaan fagayo ka nafahatay manga taw fiya sadik baba daga, gi yapdis hyabi hyabi, ta no nafahatay in Abil kadwa ha kasalanan, hanggan ta no nafahatay in Sakariyas in Barakiyas anak. Ham nafahatay hanya sas faktaban fanonogan ista manga disag hanggan ka balay Fanimbaan-Dahol. ³⁶ Hogfwayong ha hayo, bonwa bohag, kasta fadosaan fagayo ka naibolon kitonya, ka manga taw ka kati fag masohod ka somagot. ³⁷ Haw, Hirosalim, Hirosalim, haw igfahatay in Diyos manga fangampang hanggan igbintok ya ngadi kan Diyos manga nasogo ha hyamo. Kayoda wa ginan ho kasayag lohob hyamo sakop fag manga taw, kitos ina ofa noglohob it anak sat daga fakfak, dapat haw Hirosalim, ha dayo di ngap. ³⁸ Yakanga kati ho orongan wa fabayaan lamang im oliyanan. ³⁹ Hogfwayong hyamo, haw fawa lomag angko domwag nodyam dasog gis nanya fag masohod haw no lomwang Ka kadasog hastay san Diyos ngayan fag bomaya wan.

¹ Ginya madi da Hisos nadokson gis basad aladan Fanimbaan-Dahol. Ta no kaginan wan, it manga katogbong naakbang han Hisos, igfasayagdog kitay kafiyaon ka manga balay Fanimbaan-Dahol. ² Dapat is Hisos iglwang, Lag ngay, to fag manga balay kati. Hogfwayong ha hayo, bonwa bohag, aban, idwa hamgoyan dowak bato igtarongbawan, fagayo imrofad lamang. ³ Araw da Hisos no matokawan sas baba Moyod Oliboan, it manga katogbong naakbang hanya, naintaw han Hisos, idwa sasta fagdogan fakaaywanan, iglwang kitay, Ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay haw kaakbang wa kabangkad ya domwag, hanggan to fag daga it katabowanan wan? ⁴ Is Hisos nasagot has taw, Ham fag matagahan, ham fag idwa gadayaan nyawa faktaw. ⁵ Maskin aywan kambangkad aban, ngomayan yadingko ngayan, lomwang kitay, hanya wa kan Diyos-natogon-Famawi. Ta fatalang aywan fag manga taw aban. ⁶ Ham domog yadi aban ka manga madalag dog gis awayan hanggan manga barita awayan dahol dahol. Dapat ay, ham fag idwa galibitan. Talaga wa kitonya kamlag aban, dapat bonya tonya ka katabowanan. ⁷ Maskin aban ka manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. No siday no siday aban, idwa ha hanon hanon, ka daga lominog yadi. ⁸ Dapat to fagayo kat fabagowanan lamang kahoriyan. ⁹ Gis nanya aban, maskin aho hayo fagalwasiyon, fagayo fag manga taw kadwat iglag hayo. Ta fagamat hayo has manga taw kaarakitay fahoriyan hanggan fahatay hayo. ¹⁰ Aywan ka domayo git fakatiwalaon, omisog yadi ha sadi ha sadi. Tibak taw, nyawat fakilalaon, omoyon it kalaban aban. ¹¹ Aywan aban fag bohagon fag manga fangampang imbangkad, aywan kat fatalangon. ¹² Ka manga dwat fag ogali im-aywan sadik baba daga, yakanga ista fangayofan aywan imlombay no galwasi in Diyos. ¹³ Dapat ay, kadwag fagomon hanggan has katabowanan, ya hanya wa kambawi. ¹⁴ Ka Fiya fag Barita kawa han Diyos sakop imbarita yapdi ha sadik dahonya baba daga, kaarakitay fagayo fag manga layonan taw domog wan. Ginya madi yabay, bago di ka katabowanan fagayo. ¹⁵ Aban ham lomag kitay, igsagaya wa ogali fag dwat im-anod wan, idwa ha fag kitonyan, kan fangampang Danyal fagwason hyabi. Tonya mafwalidan aban sas lingoban kanbokod han Diyos. Kagbasa fag tomwa wagdog tonya. ¹⁶ Nom-anod aban, ka manga taw sas sakop Hodiya, fag dan waglagyo has moyod. ¹⁷ Ka sas sokayan balay fag idwam libang igbol yapdit botang git basad balay. ¹⁸ Ka sas iyab fag fawa goli kaarakitay bomol it rotay. ¹⁹ Isyay wan, no kaya ngadi manga gabosog hanggan ka ha manga anak ogbot igfasoso yapdi, gis nanya fag masohod aban. ²⁰ Ham fag darangin kitay ham noglagyo, fag idwa tomoon dayo abagat, ngatay has Sirang Kafahowayan. ²¹ Maskin gis nanya fag masohod aban, ka manga taw domog mahori wa dahol dahol, tadya ha nagdogan kitonya fag mahori, gi yapdis hyabi ka daga nonhalig balis kati, hanggan idwa yadi domog mahori man inya aban. ²² Nodwa ngalay imtohas tonya fag mahori, idwa hamsawad manga taw, ngadi sadi. Dapat ay, maskin is Diyos kaawa it manga nafili fag manga taw, hanya ngalay digfatohas tonya fag mahori. ²³ Aban no ha akwag fwayong ha hayo kitay, Istay wan kan Diyos-natogon-Famawi, ngatay sinya wan, ham fag idwa katiwala. ²⁴ Maskin aban ha akwa mangag faniring in Diyos-natogon-Famawi. Ha akwa yadi manga bohagon fag fangampang imbangkad. Ta mamalag aban manga madolaw fag manga falagon hanggan manga fatimawa, kaarakitay fatalang in Diyos manga nafili, no somyagan di. ²⁵ Yabay, ho danwa nafadog hayo. ²⁶ Yakanga ta nogfwayong ha hayo, Sawas dayo basad talon. Ham fag idwa hanya. Ta noglwang, Sinya wan basad balay, ham fag idwa katiwala. ²⁷ Maskin aho, Kanbali Taw, malagan wa fiya fiya no kadasog aban, kito was hilat malagan no kilat gis salogan myanit baliwa hanggan wa has sangdayan myanit baliwa. ²⁸ No siday ham iglag ka manga boyaw hagang igtifonan, ya sinya wa ka habilogan natay. ²⁹ Tonya fag manga kahoriyan nomtolas wan, Ka myanit dagos wamharom hanggan ka magdanon idwa yomawa. Ka manga fanggasan imdagdag yadi gis banwa sam tongod, hanggan ka manga karigonan sam tongod, sas boknga fakayawan, imhadhawigan wan. ³⁰ Ginya madi, Aho Kanbali Taw, angko falagon madolaw imlag sam tongod is banwa a, fagayo fag manga layonan taw omoraw wan. Ta lomag angko, Kanbali Taw, kadasog sas baba linyabo, ha karigonan dahol, hanggan kangayanan abwat. ³¹ Ta fahasnog ka dahol fag bodyong. Ginya aho, Kanbali Taw, somogo angko manga anghil has ofat ik fongfongan daga, fatifon angko manga nafili fag manga taw gis fagayo fag manga banwanan. ³² Ham fag twagdog ka adal kawa gis fon igos. Nogsalingsing, igsofot wan, tam twa kitay ka fangaraw kaakbang wan. ³³ Kitonya yadi, ham noglag to, kangko manga nafwayong kaanod wan, ham tomwa kitay aho, Kanbali Taw, kaakbang wa kadasog, sawas sakbawan alad. ³⁴ Hogfwayong hayo, bonwa bohag, to fagayo im-anod wan ka kati fag masohod fag manga taw no boyagan yapdi fagayo. ³⁵ Ka banwa sam tongod hanggan ka daga imliyam wa aban, dapat ay, angko hampang idwam liyam nyawa ginahin wan. ³⁶ Dapat idwa ha taw twa no ginahin fag sirang, no kinday ka myanit gis nanya tonya nom-anod. Nyawa ka manga anghil ka san Diyos banwanan sam tongod, nyawa aho in Diyos Anak, no bohonwas Diyos angko Ama, idwa ha twa no ginahin. ³⁷ Aho, Kanbali Taw, no kadasog aban, kitos gonaw hyabi san Nowi fag kasohodan. ³⁸ Gis nanya hyabi, ka daga nodyan gonaw, manga taw kwan hanon, manga ginom, mangag babay hanggan gindogan, mangag tomboy it anak has anahan has dayaga, hanggan was Nowi insahay hat basad sahayan baloto. ³⁹ Sadi wa ginan ka gonaw indasog, tadwa tagak tagak, yakanga fagayo inlimos wan. Kitonya yadi kamlag aban, aho Kanbali Taw nomdasog. ⁴⁰ Gis nanya fag masohod aban, ha dowak ama gibolon sas iyab, insadi tomaban wan, insadi imgoyan di. ⁴¹ Ha dowak ina aban igtarogbongan iglobok, insadi tomaban, insadi imgoyan di. ⁴² Yakanga ham fag matagahan, maskin ham idwa twa no ginahin fag sirang kagfon hayo nomdasog. ⁴³ Dapat ham fag twa kitay kagfon balay no dandi twa no ginahin fag masohod basad yabi ka fangnahaw nomdasog, hanya danwa maologan, idwag fasakbaw ka fangnahaw hat balay. ⁴⁴ Yakanga ham fag fagaba matalagaan maskin aho, Kanbali Taw, kadasog gis nanya aban ham nodwa gisip kitay aho kaakbang wan. ⁴⁵ Faktaw ka matanogon hanggan madonong fag sogowan, ham gayfan? Kat fon nagtogonan kitay anowan it manga sogowan tiba, kaarakitay fahafod has taw ista fanganon no ginahin fag masohod ka fiya. ⁴⁶ Tonya fag sogowan bomaya wan it fon nogtahod hanyag fadagos it fon togon kitonya. ⁴⁷ Hogfwayong hayo, bonwa bohag, it fon faano hanya it manga kaakwaan fagayo. ⁴⁸ Dapat tonya fag ista nagtogonan nodwa fiya, it fangayofan iglwang, Angko fon imlibang yapdi, dogay di aban bago mwali. ⁴⁹ Yakanga tonya kasta nagtogonan igbakbak kat kapariho sogowan, igsayowan has manga kalango yadi, no manga kwan manga ginom. ⁵⁰ Yakanga ista fon mwali sas sirang kat nagtogonan fag sogowan nodwa tagak tagak, gis nanya fag masohod myanit, hanyadwa twa kitay it fon kadasog. ⁵¹ Yabay, tonya fag sogowan it fon no natahod kitonya, mahori wa dahol dahol nogfadosa hanya, faofod yadi hanya has manga taw kagfalagon odi is taw kitay fiya. Ka manga sinya fag manga taw omoraw, hanggan wasta ngifon di mangarigitan wan.

¹ Kito nangos in Diyos banwanan fag sakop nogfahalimbawa. Ha safolok dayaga inlahaw kaarakitay tomagbo ka ama mamabay it fakilalaon. Ta fagayo ha diya ilawan, kafod wan. ² Yakanga ka lima fiya it fangayofan, dapat ka lima korang no naisip. ³ Ka korang no naisip ha diya ilawan ongay, dapat tadwa ha diya ista fandogang langis no mamin araw. ⁴ Dapat ay, ka manga fiya it fangayofan ha diya kat fandogang langis hat manga ilawan. ⁵ Ka bomabay inabala, yakanga ka manga dayaga fagayo katongka wa a, intoyog wan. ⁶ Dapat ka bomabay nondasog araw, boknga yabi, ha narokyaw, Tya wan ka ama bomabay, ham fag tagbo hanya. ⁷ Ka safolok dayaga dagos wanbangon, nasogi yat manga ilawan. ⁸ Ka manga korang no naisip iglwang has manga fiya it fangayofan, Disagan ha hyami hayo langis ngadi ogbot, hyami ilawan kapsa wan. ⁹ Dapat ay, ka manga fiya it fangayofan iglwang, Ngandayo idwa homosto ara hantam fagayo. Fiya man ham no hayapdis mangag fasali langis, saliyan ya ka hayo. ¹⁰ Yakanga ka limak dayaga ka korang no naisip, inlahaw wan. Ta nonlibang yapdig sali, ka ama mamabay indasog wan. Ka limak dayaga ka danwan talaga natahin wa ka ama kababay, nasakbaw basad balay fanganan. Natahop wa ka sakbawan. ¹¹ Araw araw ogbot, ka limak dayaga, ka korang no naisip, indasog yadi wan. Tagtawag, Hyami fon, hyami fon, ha fasakbawan yadi wa hyami. ¹² Dapat ay, ka ama mamabay iglwang, Bonwa bohag, hodwa kilala hayo, yakanga idwa nafasakbaw is taw. ¹³ Ham fag danwa matagahan maskin ham idwa twa no ginahin fag sirang ngatay no ginahin fag masohod ka myanit aho nombangkad. ¹⁴ Kito in Diyos banwanan fag sakop nogfahalimbawa. Sadik taw kalahaw has ayayo fag banwanan, yakanga nafatawag it manga sogowan hanggan nafaano has taw it manga kaakwaan. ¹⁵ Nafahafod has taw it kwarta no dahoday kasta fagsyaganon botangon. Ha sadik sogowan it nafaano 5,000 piso, ha sadik sogowan it nafaano 2,000 piso, ha sadi yak sogowan it nafaano 1,000 piso. Ginya madi hanyan lahaw wan. ¹⁶ Ka natanggap 5,000 piso dagos wa namalidya tonya. It nabolay fakinabang 5,000 piso yadi. ¹⁷ Kitonya yadi ka natanggap 2,000 piso, nafakinabang yadi 2,000 piso. ¹⁸ Dapat ka natangap 1,000 piso nahodkod a, natago ha basad daga kat fon kwarta. ¹⁹ Ginya madi no dogay wa aban, kasta fon nwali hat manga sogowan, naintaw has taw kat nafaano kwarta. ²⁰ Ka natanggap 5,000 piso naakbang hasagfon hanya, iglwang, Angko fon to wa kam disag angko bago bago 5,000 piso. To yadi wa kangko nafakinabang lima yadik libo. ²¹ Kagfon hanyag lwang, Yabay, kafiyaon. Haw wa ka fiya hanggan mafaanodon fag sogowan. Maskin haw naano fiya ka ogbot fag halga, ho faano ya ha hyamo dahol fag halga. Haw fag kito yadingko no kasolong igbaya. ²² Ka natanggap 2,000 piso naakbang yadi hasagfon hanya, iglwang, Angko fon, to wa kam nafaano angko bago bago 2,000 piso, to kangko nafakinabang yadi, 2,000. ²³ Kagfon hanyag lwang, Yabay, kafiyaon, haw wa ka fiya hanggan matanogon fag sogowan. Maskin haw naano fiya ka ogbot fag halga, ho faano ya ha hyamo dahol fag halga. Haw fag kito yadingko no kasolong igbaya. ²⁴ Ginya madi ka natanggap 1,000 pisos naakbang hasagfon hanya, iglwang, Angko fon, ho twa wa kitay haw mahigpit wa nogsohot. Haw igbol ka bohonwa hyamo tanom. Haw gani yadi ka bohonwa hyamo nafamgas. ²⁵ Maskin ho kadala hyamo, ho natago di has basad daga im kwarta. Toy di ka 1,000 hyamo kwarta. ²⁶ Dapat it fon iglwang, Haw idwa fiya, mafang fag sogowan haw. Haw danwa twa, mangharaw, kitay hogbol ka bohonwa angko tanom, ho gani yadi ka bohonwa angko nafamgas. ²⁷ No kitonya, kana mayon haw nodwa nafwalid angko kwarta sas fanifonan has famotangan? Ginya ha tobo yap man araw aho nogbol ginya, aho no nwali. ²⁸ Ginya madi nalwang hat sogowan tiba, Ham bol wa gi hanya ka 1,000 piso, disagan ka ha 10,000. ²⁹ Maskin ka ha akwa nafatobo, ho domogang ya, yakanga im-aywan. Dapat kadwa ha akwa, nyawa sayok kangko disag, ho bomawi ya gi hanya. ³⁰ Ham okasan wan has basad marom sas sokayan tonya fag sogowan kadwa ha fakinabang. Sinya manga taw omoraw wan, hanggan wasta ngifon di mangarigitan wan. ³¹ Aho Kanbali Taw nombangkad aban, angko kafiyan malagan sangko, hanggan manga anghil fagayo omofod yadi wangko. Ginya ho tomokaw sangko tokawan fanokawan gorangon kafiyaon. ³² Gis nanya fag masohod yadi aban, fagayo fag manga layonan taw manifonan sangko atobangan. Aho fabali dowak layonan ka manga taw, kitos gano topa nogfalayon ka manga hambing gis manga topa. ³³ Ho fatifon sangko balis sihon kawa manga topa, ka balis wala kawa manga hambing. ³⁴ Aho ka gorangon fomwayong has tifonan ka sas balis sihon, Ham fag hastay, ham kangko Ama faglwangon kitay ham bomaya wan. Ham fag omafo angko sakop banwanan kawan talaga ha hayo gi yapdis bagon halig ka daga. ³⁵ Maskin ahon lonos, dapat ham nafahwan angko. Hon-inom yadi, dapat ham nafainom angko. Aho sadik famaklay, dapat ham nafasakbaw angko. ³⁶ Hodwa ha solong rotay, dapat ham nafarotay angko. Honsagit, dapat ham nasabang angko. Ahonporiso, dapat ay, ham nabantay angko. ³⁷ Ginya madi ka manga fiya fag manga taw tomangkod aban, lomwang, Hyami Fon, ginahin mi no nalag hyamo kalonos hanggan nafahwan, ngatay kainom ginya nafainom? ³⁸ Ginahin mi no nafasakbaw hyamo haw nonbali sadik famaklay, ngatay nafarotay hyamo haw nodwa ha solong rotay? ³⁹ Ginahin mi no nalag hyamo ha sagit, ngatay basad porisowan, ginya nanabang hyamo? ⁴⁰ Aho ka Gorangon somagot, Hogfwayong ha hayo, bohonwa bohag, no ginahin kawa ham natogbong angko manga fadwasay to, nyawa tadwa bangan mahalga sas taw, aho yadi wa ka hayo natogbong. ⁴¹ Ginya madi hanya lomwang yadi ka balis wala, Ham fag ayayo gingko, ham kan Diyos nafatohoyan has fadosaan. Ham fag hawas basad afoy kadwa kapsa kantalaga han Fandaya, hanggan it sakop fag manga labang. ⁴² Maskin ahon lonos, dapat ham idwa nafahwan angko, ahon inom, dapat ham idwa nafainom angko. ⁴³ Ahon bali sadik famaklay, dapat ay ham idwa nafasakbaw angko. Hodwa ha solong rotay, ham idwa yadi nafarotay angko. Aho ha sagit hanggan inporiso, dapat ham idwa nabantay angko. ⁴⁴ Ginya ta tomangkod yadi kito aban, Hyami Fon, ginahin hami no nalag hyamo inlonos, in-inom, inbali famaklay, idwa ha solong rotay, ngatay insagit, ngatay maporisowan, hami nodwa natogbong hyamo? ⁴⁵ Ginya madi, aho ka Gorangon fomwayong has taw, Hogfwayong ha hayo, bohonwa bohag, no ginahin ham no kafang wagtogbong to, kadwa bangan mahalga has taw, kawa aho ka hayo fakafangon fagtogbongon. ⁴⁶ Tonya fag manga taw hawas basad fadosaan kadwa kapsa, dapat ay, ka fiya fag manga taw hawas haboyagan kadwa yadi ha katabowanan hanggan aban aban.

¹ Araw is Hisos nontabo wagfaadal tonya fagayo, nalwang hat manga katogbong kiti, ² Ham twa wan kitay dowa odik sirang aban Fanohodan Nagsagayan tam nogtohod ka anghil nogsagaya ista manga balay hyabi, ta fagamat angko, aho Kanbali Taw, kaarakitay hompako wan sas nafatimbangan hayo. ³ Gis nanya yadi fag masohod, is Hisos nogfwayong kitonya, ka manga fagtahinan fagalan-han-Diyos, hanggan ka manga fagtahinan sas banwa nanifonan san Kaifas balay dahol, kawas Kaifas ka gorangon fag fagalan gis nanya. ⁴ Ta nanoltolan kitay ta fag gomamat mafyaloman in Hisos, ginya fahatay hanya. ⁵ Dapat, Fag idwa hono sas Fanohodan, ngandayo manga taw mangagran wan. ⁶ Ginya madi araw, da Hisos sawas Bitanya san Simon balay, ka Simon ka ha sagit kitong hyabi. ⁷ Ta no kwan yapdi sinya, sadik ina naakbang in Hisos, ha diya sohadan alabastoro fag bato, napno famabanglo, dahol it sali. Is Hisos no sas bilog fanganan, ka ina nabohos ka famabanglo han Hisos boknga alfoyo. ⁸ Dapat in Hisos manga katogbong no nalag, ta kahori has ina, taglwang, Anogon di famabanglo. ⁹ Balay balay haw no nafasali yap man tonya, dahol araw it sali, ginya fiya man ha no nadisag it sali has manga myabog. ¹⁰ Dapat is Hisos fadi wad natwagdog ta noglwang kitonya. Yakangag lwang has taw, Kana ham no kabaya ka ina? Kafiyaon to kat naibolon hangko. ¹¹ Maskin ka manga myabog idwa ha fagalinan gi hayo akbang, dapat ahodwa fagaba maofodan hayo aban. ¹² Ka ina no nabohos famabanglo hangko igfatalaga wangko has lobgoban. ¹³ Hogfwayong hayo, bonwa bohag, nyawa siday, sadik baba daga, ta no tomoltol ka Fiya fag Barita aban, ta fagaba wa aba omowas to fag ina it naibolon, yakanga tomohod hanya fagaba. ¹⁴ Ginya madi insadi gis Safolo ha Dowa, is Hodas Iskariyoti, nanabang has manga fagtahinan fagalan-han-Diyos. ¹⁵ Is Hodas naintaw, Kana ara hayo disagon angko aho no fagamat ha hayo in Hisos? Yakanga ta dagos wa nabangkad it kwarta tolok safolo kwarta pilak, nadisag han Hodas it tangdan. ¹⁶ Yabay, ginya wa ginan is Hodas gisip no ginahin no somyagan wagfagamat has taw in Hisos. ¹⁷ Ginya madi ka sirang gona sas Fanohodan Tinapay Mayangfis nondasog wan, in Hisos manga katogbong hawan Hisos, naintaw kitay, Sida nangos araw hyamo fakasayaon hami nogfatalaga intam Yafon Fanohodan Nagsagayan? ¹⁸ Is Hisos nasagot, Ham fag hawas basad banwa, ham fag hawa sadik taw, ham fag lwang kitay, Ka Famaadal igtogon hyami kitay, hami fag lwang kiti, Hogdog ho kaakbang wan. Aho hanggan angko manga katogbong hawa hyamo balay no mangwan ka Yafon Fanohodan Nagsagayan. ¹⁹ Ka manga katogbong intanog in Hisos sogo. Yakanga ta nafatalaga wan ista Yafon Fanohodan. ²⁰ Ginya madi araw, no kayabi wan, is Hisos hanggan it manga katogbong safolo ha dowa, sawas bilog fanganan sinya. ²¹ Ta no kwan yapdi, is Hisos iglwang, Hogfwayong ha hayo, bohonwa bohag, insadi sa hayo kaoyon angko manga kalaban. ²² Ka manga katogbong inrongkot wagdog, igsadig sadi gintaw han Hisos, Hyami Fon, aho awkin kam faglwangon? ²³ Is Hisos nasagot, Ka hara nafasohod angko natognat tinapay has basad mangkok, tonya kangko ofod kam-oyon angko manga kalaban. ²⁴ Aho Kanbali Taw kaakbang wa kalahaw kito kansorat hyabi, kawa angko dalanon, dapat isyay wan angko ofod ka goyon angko manga kalaban. Fiya man hara hanya nodwan sagaya git ina hyabi. ²⁵ Is Hodas, in Hisos ofod ka goyon in Hisos kalaban naintaw yadi, Haw kagfaadal, aho awkin kam faglwangon? Is Hisos nasagot, Haw wa kaglwang. ²⁶ Ta no kwan yapdi, is Hisos nabol tinapay, nabaya in Diyos, nafaarogbotan, ginya nadisag hat manga katogbong. Is Hisos iglwang, Ham fag bol toy, fakwan wan. Toy angko wa habilogan. ²⁷ Ginyas Hisos nabol ka fanginoman ha sabahan obas, nabaya in Diyos, nafagamit is taw, iglwang, Ham fagayo fag ginom toy. ²⁸ Maskin toy angko wa folot kagfaganit intam taranggapan, angko folot kamwatwat kawa has kaaywanon fag manga taw kaarakitay ista manga ogali dwat imliyam wan. ²⁹ Hogfwayong ha hayo, hodwa ominom domwag ka sabahan obas, nodwa aban ya, sawangko Ama sakop fag banwanan, tam no manayowan ya domwag ominom ka bago fag sabahan obas. ³⁰ Ginya madi ta no nangambahan sadik ambahan, tanlahaw wa a, hawas baba Moyod Oliboan. ³¹ Ginyas Hisos iglwang hat manga katogbong, Araw basad yabi ham fagayo omobon wangko, kito kansorat sas Kasoratan, Ho fahatay ka fangano, ginya madi it anoon fag manga topa manarowayan wan. ³² Dapat ay, aban, aho nomboyag ya domwag, ho gomona wa hayo has sakop Galiliya. ³³ Is Pidro nalwang marigon han Hisos, Nyawa ta fagayo omobon hyamo araw, hodwa omobon hyamo, nyawa ginahin. ³⁴ Is Hisos nalwang han Pidro, Yatokitay, lag nga araw, araw basad yabi, ka tabag nodyag taraok, tolo ginan haw tomangkod angko has taw. ³⁵ Dapat is Pidro marigon wagfwayong, Nyawa ta hanggan wa fahatay intam dowa, hodwa tomangkod hyamo has taw. Ka tibak manga katogbong iglwang yadi kitonya. ³⁶ Ginyas Hisos naofod it manga katogbong hawas sadik foyo, taglwang Gitsimani. Is Hisos iglwang hat manga katogbong, Ham fag matokawan yap istay, ho mandarangin has nwas dayo ogbot. ³⁷ Ginyas Hisos nataban in Pidro hanggan in Sibidiyo manga anak dowa. In Hisos fangayofan igfabago wagdog marongkot galibitan wan. ³⁸ Is Hisos nafwayong handa Pidro, Angko karongkotan bilang wa kodkod sangko basad fangayofan. Hogdog angko kahoriyan ho bilang wa kahatay wan. Ham fag mafanayan yapdingko istay matagahan, gofod angko. ³⁹ Is Hisos nonsaman ogbot gis taw, nanlohoban wan a, nandarangin, iglwang, Mama, no somyagan di, fatolasan wa gingko to fag fanginoman kahoriyan kati. Nyawa hoglwang kitonya, fag hyamo kafangayofanan kam-anod, bohonwa angko. ⁴⁰ Is Hisos nonfwali ya hat katogbong tolo, nalag kitay ta matoyogan wan. Nafwayong han Pidro, Ham awkin idwa gagwanta gofod angko matagahan mangharaw, ngadi sadik tama sinyahod? ⁴¹ Ham fag matagahan, fag darangin wan kaarakitay idwa hagfaloksowan hayo. Ka fangayofan orongan wa kasaya has fiya, dapat ka habilogan malombay. ⁴² Fadowa ginan is Hisos nasaman ya gis taw a, nandarangin, iglwang kito, Mama to fag ongot nodwam tolas gingko, ho nodya ginom gistay, im kafangayofanan fag im-anod wan. ⁴³ Sadi ya ginan is Hisos infwali ya hat manga ofod, ya mangharaw, ta matoyogan ya ngawan, maskin matapyaton wan ista mata. ⁴⁴ Yakangas Hisos naobon yas taw, fatolo wa ginan nandarangin, kitonya mandi ka haraw it fwayong. ⁴⁵ Ginyas Hisos infwali ya hat manga katogbong, nafwayong handa Pidro, Ham awkin matoyogan yapdi, mafahowayan odi? Yabay, kati wan, ka yadi angko ofod ka goyon angko kalaban, fagamat angko, aho Kanbali Taw, has manga taw dwat. ⁴⁶ Ham ha kalibang, fakabangon, wan, tya wan, kangko ofod ka goyon has taw. ⁴⁷ Is Hisos no kampang yapdi, is Hodas, ka sadi gis Safolo-ha-Dowa, indasog wan. Ha taban kaaywanon kaaywanon fag manga taw, masalawidan manga talibong, mabitbitan manga pinotol. Ka manga fagtahinan fagalan-han-Diyos hanggan manga fagtahinan sas banwa ka nasogo tonya fag manga taw. ⁴⁸ Ta nodyan dasog sinya, kanoyon has taw danwa nafatohoyan kitay, No siday kangko ayohon fag ama, tonya wan kantam iktanon. Gamatan wa dagos. ⁴⁹ Yakangas Hodas naakbang in Hisos, nahampang mahoway, iglwang, Haw kagfaadal has taw, midwa fakayabiyon, midwa ha diya. Ginya madi naayok in Hisos faringfing. ⁵⁰ Is Hisos nalwang hanya, Ama, fadagosan wan im bato ibolonon. Ginya ka manga taw naakbang in Hisos, natoklos hanggan nagamat hanya. ⁵¹ In Hisos ofod sadi nagonos it talibong a, nabasing ka gorangon fag fagalan sogowan, natigbas it talinga. ⁵² Is Hisos iglwang hat ofod, Halobanan ya im talibong. Kagbasing talibong, talibong mandi it hatayon. ⁵³ Hadwa awkin twa kitay ho syagan digsagad togbong gingko Ama? Ho no somagad wan, hanya somogo yadi wa dagos hangko, nyawa bohondi safolo ha dowak habanan anghil. ⁵⁴ Dapat ay, no kitonya, kinday ka manga Kasoratan fwayong nom-anod, noglwang kitay kangko fakahoriyon fag imlag wan? ⁵⁵ Ginya madis Hisos nahampang has fakaaywanan fag manga taw, iglwang, Aho awkin tolisan, ham gayfan, maskin ham masalawidan manga talibong, mabitbitan manga pinotol famogfog, kaarakitay gomamat angko? Sirang sirang hogfaadal basad Fanimbaan-Dahol, bati ham idwa gamat angko gis nanya. ⁵⁶ Dapat to fagayo in-anod wan kaarakitay imtonglos ka manga fangampang nasorat. Ginya madi in Hisos manga katogbong fagayo naobon in Hisos idwam dowa, nalagyo wa dan. ⁵⁷ Ginya ka manga nagamat in Hisos nataban hanya han Kaifas balay. Gis nanya is Kaifas ka gorangon fag fagalan-han-Diyos. Ka mangag faadal Batasan Hodyo hanggan manga fagtahinan sas banwa matifonan sinya. ⁵⁸ No kitay di, is Pidro goyan in Hisos, dapat ayayo sat ginanan. Nondasog has gorangon fag fagalan balay, is Pidro nasakbaw has basad alad, natokaw maofodan yadi has mangag bantay maskin kasaya lomag no kinda kasta ibolonon araw han Hisos. ⁵⁹ Ka manga fagtahinan fagalan, hanggan ka tifonan manga fagtahinan Hodyo fagayo, igsayak manga taw ka bomangdan in Hisos ibolon kaarakitay somyagan igfatohoyan hanya has kahatayan. ⁶⁰ Dapat tadwa ha lagan ista fagbohagon, nyawa kaaywanon fag manga taw inbangkad igbangdan kawa han Hisos. No dogay araw ha dowak taw inbangkad ⁶¹ kaglwang, To fag taw nafwayong, Ho syagan domwat in Diyos Fanimbaan-Dahol, hanggan fatobo ya tolo lamang ik sirang. ⁶² Ginya yabay ka gorangon fag fagalan nalindog, naintaw han Hisos, Ha awkin idwa somagot? Kana tonya kasta sombong kawa ha hyamo? ⁶³ Dapat is Hisos idwa naawang. Ginya madi ka gorangon fag fagalan nafwayong hanya, Hogfwayong ha hyamo, ha fwayongan ha hyami, ka boyagan fag Diyos madogan, no haw wa ngay in Diyos-natogon-Famawi, ka Kadasog fag Gorangon, in Diyos wa Anak. ⁶⁴ Is Hisos nasagot, Haw wa ngap kaglwang. Dapat hogfwayong ha hayo kitay, Gis kati ginan ham lomag angko, Aho kanbali Taw, matokawan sat akbang, kadwa ha bosal, sawat balis sihon. Ham lomag yadi wangko aho no kadasog aban, sas baba linyabo gin Diyos banwanan sam tongod. ⁶⁵ Ginya madi ka gorangon fag fagalan naragyang it solong rotay, nalwang, No kampang kiti, igsway in Diyos. Kana mayon tam nogsayak yapdista sombong tiba taw, ham ngap fadi wad nadog kati, gi wa ngap it sadili bibig igsway wa orongan in Diyos. ⁶⁶ Kinday hayo fatohoyan ka fiya kawa hanya? Tagsagot kitay, Ka fiya, hanya fag matay wan. ⁶⁷ Ginya ta natofay in Hisos mata hanggan nasontok hanya. Tiba natofa yadi hanya marigon. ⁶⁸ Ginya tagmaswag kiti, Haw, kan Diyos-natogon-Famawi, sogi, ha boktongan fakta kagsontok hyamo? ⁶⁹ Gis nanya fag masohod is Pidro matokawan basad aladan. Sadik sogowan ina naakbang hanya, iglwang, Gwadi haw gofod yadin Hisos, taga Galiliya, idwa aw? ⁷⁰ Dapat is Pidro natangkod sasta fagdogan fagayo, nalwang, Hodwa natwagdog im faglwangon. ⁷¹ Is Pidro igfatawas wan, hawas bilog sakbawan alad. Sadi yak sogowan ina nalag in Pidro sinya, yakanga nafwayong has taw, To fag ama gofod yadin Hisos ka taga Nasarit. ⁷² Is Pidro natangkod ya domwag, nalwang, Hogtangkod wa marigon, hodwa kilala tonya fag taw. ⁷³ Araw araw ogbot, ka manga taw sinya naakbang in Pidro, taglwang hanya, Yabay, haw it ofod yadi wa sadi, matohoyanan wan. Mi twa wagdog haw no kampang. ⁷⁴ Is Pidro natangkod marigon, iglwang, Nyawa ho matay wan, orongan wan hodwa kilala tonya fag taw. Ginya madi ka tabag dagos wa nanaraok. ⁷⁵ Is Pidro bago di natohod in Hisos fwayong kitay, Ka tabag nodyag taraok araw, tolo ginan haw tomangkod has taw angko. Ginya madis Pidro nadokson wan, naoraw marigon.

¹ Araw, no dayo kasirang, fagayo fag manga fagtahinan fagalan hanggan fagtahinan banwa igtoltolan no kinday no fahatay in Hisos. ² Ta no nagafos hanya, ta nataban hanya han Pilato ka gobirnador Roma. ³ Yabay is Hodas, ka naoyon in Hisos manga kalaban, no nalag kitay ta nafatohoyan in Hisos has kahatayan, hanya nafanisi wan, igfwali ya nangos has manga fagtahinan fagalan hanggan fagtahinan banwa ka tolok safolo kwarta pilak. ⁴ Is Hodas iglwang, Aho ha kasalanan wan, maskin kangko ofod, kangko nafaoyon ha hayo, idwa ha kasalanan. Ka manga fagtahinan nasagot, Midwa ha mawat, ha bahala wan. ⁵ Is Hodas naokas odi has basad Fanimbaan-Dahol ka kwarta pilak, yakangan lahaw wan, natagbong wa hanya. ⁶ Dapat ka manga fagtahinan fagalan nafoyot ka kwarta pilak. Taglwang, Idwa maangay sas Batasan Hodyo tam nogfaaktom to fag kwarta has basad sohadan kwarta sas Fanimbaan-Dahol, maskin to bayad wa habilogan taw. ⁷ Yakanga ta nanoltohan. Insadi ista manga fangayofan kitay ta somali ka daga fandagan tonya fag kwarta, kaarakitay, no ha famaklay matay, ta lomobgob wa sinya. ⁸ Yakanga hanggan wa kati, tagngayan tonya fag daga fandagan, Daga Folot. ⁹ Maskin kitonya, in fangampang Hirimiyas fwayong in-anod wan noglwang, Ta nabol ka tolok safolok kwarta pilak, dahonya wan ka manga taga Israil no nafahalga hanya, ¹⁰ ginya ta nasali ka daga fanganglitan, kito kan Diyos nafwayong angko. ¹¹ Ta nafaatobangan in Hisos han Pilato ka gobirnador Roma. Ka gobirnador naintaw in Hisos kiti, Haw awkin ka gorangon manga Hodyo? Is Hisos igfwayong, Haw wa ngap kaglwang. ¹² Dapat ka manga fagtahinan fagalan hanggan manga fagtahinan banwa nogsombong ha hanya, is Hisos idwa ha fagawangon. ¹³ Yakangas Pilato nafwayong hanya, Hadwa awkin igdog ta nogsombong aywan ha hyamo? ¹⁴ Dapat is Hisos idwa yapdi ha fagawangon, ngadi ista sombong sadi, yakanga ka gobirnador kataka wan. ¹⁵ Ka manga Hodyo nogtohod ka Fanohodan Nagsagayan, ka gobirnador Roma ha ogali igfalfas sadik Hodyo kanporiso, no fakta ka manga Hodyo fakasayaon falfason. ¹⁶ Gis nanya ha akwa sadi kanporiso kasta fakilalaon fiya fiya, kawas Hisos Barabas. ¹⁷ Yakanga ka manga taw no nanifonan, is Pilato naintaw is taw, Faktaw ka hayo fakasayaon falfason, ngatay is Hisos Barabas, ngatay is Hisos kasta faglwangon in Diyos-natogon-Famawi, ka Kadasog fag Gorangon? ¹⁸ Maskin is Pilato natwa wa kitay ta kaingli odin Hisos, yakanga ta nataban hanya. ¹⁹ Bohondi tonya, is Pilato no matokawan yapdi sas fanokawan fangabaya, it babay nasogo sadik taw han Pilato. Kat babay iglwang kitay, Haw fag idwag mawat tonya fag taw kadwa ha kasalanan, maskin sayabi ho kadala wagdog angko tagimfan kawa ha hanya. ²⁰ Ka manga fagtahinan fagalan-han-Diyos hanggan manga fagtahinan banwa nafasognod has manga taw kitay ta fag somagad gin Pilato fag is Barabas kasta fagfalfason, dapat fahatayan in Hisos. ²¹ Sadi ya ginan ka gobirnador naintaw is taw, Faktaw sas dowa ka hayo fakasayaon angko falfason? Taglwang, Fag is Barabas kantam fagfalfason. ²² Is Pilato iglwang is taw, No kitonya, kana araw angko ibolonon han Hisos, kasta faglwangon in Diyos-natogon-Famawi? Ta fagayo nasagot, Fapakowan hanya sas nafatimbangan hayo. ²³ Ginyas Pilato naintaw is taw, Kana mayon, kana kat naibolon dwat? Dapat ta labi wa nanarawagan marigon, Fapakowan hanya sas nafatimbangan hayo. ²⁴ Is Pilato no natwa kitay hanyadwa ha halimbawan, ngandayo ka manga taw labi man no mangawangan, nafabol danom gis taw, nagonaw it gamat sasta faglagan, nalwang, Bohonwa aho ka managot nyawa ham fahatay to fag taw. Ham bahala wan. ²⁵ Ka manga taw nasagot, Hami hanggan wa hyami manga anak ka bahala somagot it kahatayan. ²⁶ Yakangas Pilato nafalfas in Barabas, dapat no nafabakbak in Hisos, nafabahala was taw kaarakitay ta fapako hanya sas nafatimbangan hayo. ²⁷ Ginya madi ka gobirnador fag manga sondalo nataban in Hisos has basad gobirnador balay dahol. Ginya ta nafatifon sadi wak habanan sondalo san Hisos dayo. ²⁸ Ka manga sondalo naloslos in Hisos rotay, ginya ta nafasolong hanya sadik balokas aba aba, dararag. ²⁹ Ta nahoskos lamnon madogi a, nafasangbaw tonya in Hisos boknga alfoyo. Ta nafabitbit sadik pinotol bagahay sat gamat balis sihon. Ginya tagsway odig lingkohodan, iglwang, Anod, kafiyaon mangharaw ka gorangon manga Hodyo. ³⁰ Ta natofay hanya, hanggan nabol ka bagahay, nabakbak in Hisos alfoyo. ³¹ Ginya madi ta nonsagaya wagyod hanya, ta naloslos ka balokas aba aba, nafasolong ya in Hisos sadili rotay, hanggan nataban wa hanya has dayo kaarakitay pomako wan sas nafatimbangan hayo. ³² Araw araw ta noglahaw gis basad banwa, ta nahablang sadik ama, is Simon, taga Sirini. Ka manga sondalo napilit wa nafafasan hanya ka nafatimbangan hayo kasta fag fapakowan araw in Hisos. ³³ Ta nondasog sa sadik foyo tagngayan Golgota, it kahologan Botol Alfoyo, ³⁴ ka manga sondalo nafagamit han Hisos langgaw ha aktom mayat. Dapat is Hisos no nandog nainom, nadayo di. ³⁵ Manga sondalo napako wan in Hisos sas nafatimbangan hayo, ginya tagpostahan it manga rotay, nangafodan wan. ³⁶ Ginya madi tantokaw wan kaarakitay igbantay hanya. ³⁷ Masoratan sas hayo san Hisos tongod alfoyo ista sombong kitay, Tos Hisos ka Gorangon manga Hodyo. ³⁸ Gis nanya yadi ta nafapako dowak tolisan, insadi san Hisos balis sihon, insadi sat balis wala. ³⁹ Manga taw kagdalan sinya igmaswag, igyod, mabaringan di ista alfoyo, ⁴⁰ taglwang, Anod, haw ka domwat nangos ka Fanimbaan-Dahol, ginya fatobo ya tolo lamang ik sirang, kati bawiyan hyamo sadili. No haw wa ngay kan Diyos Anak, fag dokson wan gis nyamos nafatimbangan hayo. ⁴¹ Kitonya yadi ka manga fagtahinan fagalan, ka mangag faadal Batasan Hodyo, hanggan ka manga fagtahinan banwa iglibak in Hisos, tagfwadfwayongan, ⁴² Bati hanya nabawi ongay ka tiba taw, dapat not sadili wa habilogan idyadi wa syagan igbawi. Gwadi tyamo, hono, ka Gorangon manga Israil. Hanya no domokson nga kati gis nwa fag nafatimbangan hayo, mimtiwala wa hanya. ⁴³ Gwadi hanyag syag in Diyos, iglwang yadi kitay hanya in Diyos wa Anak. Tam lomag wa araw ngatay is Diyos bomawi hanya no orongan galwasi hanya. ⁴⁴ Kitonya yadi ka manga tolisan kanpako sat akbang nogyod in Hisos. ⁴⁵ Ginya madi yabay, gis boknga sirang balis myanit kabohid wan, inharom sadi wak dahonya banwanan. ⁴⁶ Myanit no kabohid wan, is Hisos natawag marigon, sas fangampangan Aramaik, Ili, Ili, lama sabaktani? It kahologan, Angko Diyos, angko Diyos, kana mayon haw nogfabayaan angko. ⁴⁷ Tiba taw ka sinya malindogan no nadog kitay is Hisos igtawag kitonya, taglwang, Mayon igtawag in Iliyas. ⁴⁸ Ka sadik taw dagos wa nandalandan nabol famasopsop, natogna has langgaw maiglis, nasongkit sas tobwan bagahay ginya nafasopsop in Hisos. ⁴⁹ Dapat tibag lwang, Faya, tam bomantay yap, ngatay is Iliyas imbangkad araw kaarakitay mamawi hanya. ⁵⁰ Is Hisos natawag ya domwag marigon, ginya nafalfas wat ipsaw. ⁵¹ Ginya yabay ka fanahop rotay sas fagbokngan Fanimbaan-Dahol dagos wanragyang, gis tongod has daga baliwa, namokngan wan. Ka daga inhawig wan, ka manga bato in-gifak lamang. ⁵² Ka manga lobgoban inboklas, hanggan aywan fag manga taw ka natay, ka danwan tohoyan han Diyos, inboyag ya. ⁵³ Ginyas Hisos nonboyag ya, ta nadokson gis lobgoban, nasakbaw has basad Hirosalim, ka banwa kantohoyan han Diyos. Kaaywanon fag manga taw nalag yadi sinya ka mangan boyag ya. ⁵⁴ Ka fagtahinan sondalo, hanggan it manga ofod kagbantay in Hisos, inhinol wa dahol dahol ta no nadog nalinog hanggan nalag fagayo kananod sinya. Taglwang, To orongan wan Diyos Anak. ⁵⁵ Aywan fag manga ina sinya yadi mabantayan gis ayayo. Gi yapdis sakop Galiliya to fag manga ina nogtahin in Hisos hanggan igtogbong hanya. ⁵⁶ Tonya fag ina tiba kawa da Mariya Magdalina, da Mariya inda Santyago da Hosi ina, hanggan in Sibidiyo babay. ⁵⁷ Araw, myanit no kasangday wan, sadik ama maakwa, is Hosi gis banwa Arimatiya, indasog wan. Is Hosi in Hisos yadi katogbong sadi. ⁵⁸ Hanya hawan Pilato nasagad in Hisos habilogan. Is Pilato nafasognod it manga sakop kitay disagan han Hosi in Hisos habilogan. ⁵⁹ Yakangas Hosi nabol in Hisos habilogan a, nasafot basad bago fag rotay madamol. ⁶⁰ Is Hosi nafaigyan in Hisos habilogan san Hosi sadili nafatalaga lohib lobgoban, ngalay yapdi no natigib ka bato. Ginya madi is Hosi nafabalolang sadik bato dahol dahol it fanahop sas sakbawan lohib, ginyan lahaw wan. ⁶¹ Da Mariya Magdalina, hanggan sadi yak Mariya, sinya yadi matokawan sas masohod lobgoban. ⁶² Nonbago marom, nonsagaya ka sirang famatalagaon, ka manga fagtahinan fagalan-han-Diyos hanggan manga Farisiyo, ta fagayo nangofodan han Pilato. ⁶³ Taglwang, Ama, migtohod kitay tonya fag bohagon no boyagan yapdi igfatakagdog, iglwang kitay, nonsagaya tolok sirang, hanyam boyag ya. ⁶⁴ Yakanga, balis tolok sirang, fag hagbantay nangos fiya fiya ka lobgoban, ngandayo it manga katogbong imbangkad hanya, bomol it habilogan, ginya fadahit has taw kitay hanyan boyag ya. No kitonya ka bohag goyan imbali dwat man ka gona. ⁶⁵ Is Pilato iglwang, Sogi, ham tabanan manga sondalo, fabantayan fiya fiya sas lobgoban. ⁶⁶ Yakanga tanlahaw wan, nafaganit ka tahop lohib, nafwalid tandaan sas boknga sakbawan fanahop bato, hanggan nafabantay ka lobgoban has manga sondalo, kaarakitay fatohoyan idwa ha taw tomanog tonya.

¹ Nonsagaya wan ka Sirang Kafahowayan, da Mariya taga Magdala hanggan sadi yak Mariya, hawan Hisos lobgoban kaarakitay ta manibaw, dayo kayawa sas sirang gona sa sadik simba. ² Yabay sadi odi ginan nalinog marigon. In Diyos anghil sadi nadokson gin Diyos banwanan sam tongod, nafabalolang ka bato fanahop, ginya madi natokaw wa sinya baba fanahop bato. ³ Ka anghil mata masilaw kitos hilat, it rotay abohay yadi kito was gafas. ⁴ Ka manga bantay sondalo karokog wa a, inlobay wa kadala no nalag ka anghil. ⁵ Dapat ka anghil nafwayong has manga ina, Ham fag idwa kadala, ho twa kitay ham igsayak in Hisos kanpako sas nafatimbangan hayo itfagonan. ⁶ Hanyadwastay, hanyan boyag ya kito kat fwayong itfagonan. Ham fag hastay, bantayan kasta nagfwalidan hanya is nwa basad lohib. ⁷ Ginya ham fag hanya wan, fag fwayong hat manga katogbong kitay hanyan boyag ya, gomona wa hayo has sakop Galiliya. Ham lomag wa hanya sinya. Yabay ham fag tohod angko fwayong ha hayo. ⁸ Ginya madi da Mariya inlahaw wa madali gis lobgoban. Ista manga fangayofan sayo kadala sayo kasolong wa dahol igdog. Yakanga tagdalandan wan han Hisos manga katogbong kaarakitay fomwayong kat lagan. ⁹ Dapat is Hisos natagbo inda Mariya, nahampang mahoway. Ka manga ina naakbang in Hisos, natahos it bitis, nanlibabaan hat atobangan. ¹⁰ Is Hisos nafwayong has taw, Ham fag idwa kadala. Ham fag hanya wan, fwayongan hangko manga fadwasay kitay ta fag hawas Galiliya, yakanga ta lomag angko sinya. ¹¹ Ka manga ina noglahaw wan, yabay tibak sondalo kagbantay sas lobgoban hawas basad banwa, nafwayong has manga fagtahinan fagalan fagayo kat lagan sinya sas lohib lobgoban. ¹² Ka manga fagalan nanifonan, ginya madi, nontabo wagtoltolan has manga fagtahinan banwa, ta natangdan dahol has manga sondalo. ¹³ Ta natogon ka manga sondalo fag kiti ham nogfwayong is taw, ham fag lwang kitay, Sayabi, mi no matoyogan wan, it manga katogbong inbangkad has lohib lobgoban, naanggong wan it habilogan. ¹⁴ Ta nafwayong yadi, Ham fag idwa galibitan, nyawa ka gobirnador domog kitonya, mi bahala wa hanya, ham idwam iktan. ¹⁵ Yakanga ka manga bantay sondalo natanggap wat tangdan, nafadahit yadi has taw kitonya. Hanggan wa balis kati tonya yapdi ka manga Hodyo fagfadahiton has taw. ¹⁶ Ginya madi ka safolo ha sadik katogbong hawas Galiliya han Hisos nagfwayongan fag moyod itfagonan. ¹⁷ Ta no nalag in Hisos ta nanlibabaan hat atobangan, dapat tiba gadowan yapdi. ¹⁸ Is Hisos naakbang has taw, iglwang, Fagayo fag kangayanan san Diyos banwanan sam tongod hanggan sas baba daga indisag wa hangko. ¹⁹ Yakanga ham fag lahaw wan, ham fakalig angko manga katogbong sas fagayo fag manga layonan daga. Ham fag fatogna ka manga taw, sangko Ama ngayan, hanggan sat Anak ngayan, hanggan sat Maliyaw fag Falad ngayan. ²⁰ Faadalan yadi tonya fag manga taw imtanog fagayo kangko natogon ha hayo. Yabay, fanlag nga aban, no bali da ha daga yapdi, ho omofod wa fagaba hayo.