LOKAS
11 Hogsorat ha hyamo, Tiyofilo, sadik taw ha kangayanan. Aywan fag manga taw danwa nasorat kawa hantam donggon ka manga nadalanan sa hyami banwanan itfagonan. 2 Ka manga nalag to fag manga bagay gis fabagowanan hanggan nafaadal in Diyos hampang, ka nafwayong ha hyami it mata lagan, ginya hyami ofod tiba nasorat yadi kasta nafwayong. 3 Ginya madi, aho no naintaw wa fiya fiya fagayo fag mangan anod gis fabagowanan, ho naisip yadi kitay hanggan aho somorat yadi wan sadik toltolan fiya wa donggon, idwa ha labi, idwa ha korang. 4 Hogsorat ha hyamo kaarakitay haw tomwa matohoyanan kitay, kam manga donggon orongan wan-anod kitonya. 5 Hyabi, nos Hirodis ka gorangon sas sakop Hodiya, ha sadik fagalan-han-Diyos san Abiyas habanan, it ngayan is Sakariyas, in Aaron hasokfonan. In Sakariyas babay is Ilisabit gi yadin Aaron hasokfonan. 6 Ka talsawa myasa wa kitonya in Diyos wa fagbayaon, katanog it manga togon fagayo fagayo. 7 Dapat ay, hanggan wa magorang tadya ha anak maskin is Ilisabit malayos. 8 Ginya madi yabay, in Sakariyas fag habanan, no gibolon ka fagalan bato ibolonon san Diyos faglagan, tagbahala sas Fanimbaan-Dahol. 9 Gis nanya, ta no nafaaraktoman ista manga ngayan, kito kasta ogali manga fagalan, in Sakariyas ngayan kasta nabol gis sohadan, yakanga hanya ka domiya sonogon kamangyan. Yakanga gis nanya fag masohod ta nogsonog kamangyan, is Sakariyas insakbaw han Diyos basad Fanimbaan-Dahol a, 10 kat fakaaywanan fag manga taw matifonan sas sokayan, igdarangin. 11 Ginyan sadi odi ginan, in Diyos anghil sadi dagos wa nafalag han Sakariyas, sawas balis sihon baliwa fagsonogan kamangyan. 12 Is Sakariyas no nalag ka anghil, inhinol wa a, indala wa dahol dahol. 13 Dapat ka anghil nafwayong han Sakariyas kitay, Haw fag idwa kadala, Sakariyas. Is Diyos nadog wa hyamo darangin. Ham da Ilisabit omanak yapdi anak ama aban. Fag is Hwan ham no ngomayan hanya. 14 Ham bomaya wa a, hamsolong yadi waglag, hanggan fagayo fag manga taw, ta bomaya waglag hanya no bago sagaya. 15 Hanyam bali wa ha kangayanan dahol aban san Diyos faglagan. Hayo anak aban fag idwa ominom alak, nyawa kana fag fakalangoon. Gi yapdit ina basad tiyan, ka Maliyaw fag Falad danwa sa hanya sadi wak dahonya fangayofan aban. 16 Tonya hayo anak ama ka fafwali ya aban hasta fakatiwalaon fag Diyos, hasagfon has taw, kaaywanon in Israil manga hasokfonan fag manga taw. 17 Tonya hayo anak ama ka gomona man kagfon intam, hanggan ka fangayofan hanggan karigonan ka nafasyagan in Diyos fangampang is Iliyas hyabi, mamasyagan yadi hanya. Imbali wa kitonya kaarakitay hanyag faamigosan ya ka manga ama hat manga anak, hanggan fafwali ya ka mangag sway has fiya fag ogali. Ginya madi yabay, sadik tifonan taw imtalaga han Diyos. 18 Is Sakariyas nalwang has anghil kitay, Kinday ho no tomwa matohoyanan kitay ha akwa anak aban, maskin aho magorang wa dahol kati, hanggan angko babay, mi myasa wa kitonya. 19 Ka anghil nasagot, Ahos Gabriyal ka gibolon san Diyos atobangan. Is Diyos nasogo angko ha hyamo kaarakitay fomwayong hyamo kangko nafadog fiya fag barita ha hyamo kati haraw. 20 Maskin hadwa katiwala kangko fwayong hyamo, gis kati ginan haw imbali wa boyon hanggan bongkok no kandogay day nodyam anod. 21 Gis nanya yabay, no bali day is Sakariyas idyan dokson, ka manga taw mafanayan yapdi sas sokayan. Tandolaw wan no kana mayon nondogay sas basad Fanimbaan-Dahol. 22 Ginya hanya nondokson wan, fawa twa kampang has taw, igfaaman odi. Yakanga ta natwa wa kitay hanya ha lagan madolaw sas basad Fanimbaan-Dahol. 23 Nonsagaya in Sakariyas habanan taranggapan ibolon, is Sakariyas nwali wa hat balay. 24 Ginya madi yabay, fawa dogay, is Ilisabit gabosog wan. Manga limak magdanon, is Ilisabit idwa galin galin git balay. 25 Is Ilisabit nalwang, Kati yabay is Diyos bago dinawa angko, naibolon kito kaarakitay tadwa ha fagwason aban kitay, hodwa ha anak. 26 Is Ilisabit no onom wak magdanon gabosog, is Diyos nasogo ya ka anghil Gabriyal 27 has banwa Nasarit, sakop Galiliya, ha sadik dayaga, it ngayan is Mariya. Is Mariya idya nangindogan. No kitay di, is Mariya ha bato wa indoganon, is Hosi, sadik ama gin Dabid ha sokfonan, ka gorangon fag Dabid. 28 Ka anghil nondasog has oliyanan dayaga, naakbang wa a, nafasayagdog hanya kiti, Yabay yabay, is Diyos igbaya wa hyamo, sawa yadi hyamo. 29 Dapat is Mariya indolaw wa dahol dahol igdog kat nafwayong a, nangayfanan wa fiya fiya no kanat kahologan ka anghil no kampang kitonya. 30 Yakanga ka anghil nafwayong hanya, Mariya, haw fag idwa kadala, maskin haw in Diyos wa fagbayaon. 31 Haw fag talinga wan. Haw imbali gabosog hanggan omanak yadi sadik anak ama. Haw aban ngomayan hanya is Hisos. 32 Hanyam bali dahol it kangayanan hanggan ta lomwang yadi kitay kat Ama is Diyos ka ha kangayanan abwat man has fagayo fagayo. Is Diyos, kagfon intam, fatokaw yadim Anak, san Dabid it hafofowan nagtokawan fanokawan gorangon hyabi. 33 Ginya madi hanya bomahala han Hakob manga hasokfonan hanggan aban aban. Hanya nombali wa gorangon idwa ha katabowanan nogbahala. 34 Is Mariya naintaw has anghil, Kinday nom-anod tonya kawa hodyan saya ama? 35 Ka anghil nasagot, Ka Maliyaw fag Falad domokson ha hyamo a, ka Abwat-man-has-Fagayo-Fagayo it karigonan ka lomanbong ha hyamo. Yakanga kam fasagayaon fag anak aban imtohoyan han Diyos, hanggan it ngayan in Diyos wa Anak. 36 Ha awkin idwag tohod in Ilisabit im kaiban? Nyawa magorang wan, gabosog kati a, sadik anak ama aban it fagfasagayaon. Kati faonom wa fag magdanon hanya no gabosog, nyawa hyabi taglwang hanya baog. 37 Maskin nyawa kana fag madolaw idwa hagsagaya in Diyos fagsyaganon. 38 Is Mariya nasagot, Aho intam Fon sogowan. Nyawa kana kam nafwayong angko fag im-anod wan. Ginya yabay ka anghil naobon wan Mariya. 39 Ginya madis Mariya idwa dogay nadagos wan has manga moyod sakop Hoda hawas sadik banwa sinya. 40 Is Mariya nonsakbaw han Sakariyas balay, nahampang masaya wagdog han Ilisabit. 41 Is Ilisabit no nadog in Mariya hampang, ka anak san Ilisabit basad tiyan nahimot marigon. Ka Maliyaw fag Falad sawan Ilisabit basad fangayofan sadi wak dahonya, 42 ginyas Ilisabit nahampang marigon a, nalwang han Mariya, Haw bomaya wan bohondi kitos iba ina hanggan kam fagfasagayaon fag anak aban bomaya yadi. 43 Hodwa ha fangayofan kitay, kambali angko Fon it ina manabang angko. 44 Maskin aho no nadog hyamo hampang, haw no kadasog, ka anak sangko basad tiyan nabaya wan, nahimot marigon. 45 Maskin haw nasyag kitay, im-anod wan kagfon intam nafwayong ha hyamo, git anghil, haw bomaya wan. 46 Ginya madis Mariya nasagot in Ilisabit kiti, Angko fangayofan igfasayagdog kagfon intam, 47 Angko fangayofan igbaya in Diyos angko Famawi, 48 Maskin nyawa ahot sogowan odi, hanyan-awa wangko. Gis kati ginan hanggan wa aban, maskin is Diyos kadwa ha bosal 49 Naibolon sangko madolaw, fagayo fag manga taw lomwang kitay, aho ka bomaya wan. Is Diyos maliyaw wan. 50 Hanya kaawa ka manga katanog hanya gis fagayo fagayo fag manga hasokfonan taw. 51 In Diyos manga ibolon igfalag has taw it karigonan, Hanyag fasarowayan yadi ka manga ha takan. 52 Hanya nafaalin manga gorangon git kangayanan a, Nafaabwat it kangayanan ka mangadwa ha takan. 53 Nafahapsog manga fiya fag fanganon ka manga kalonos, Dapat ay, nasogo ka manga maakwa, nyawadwa ha nahwan. 54 Maskin igfaanod it togonan hantam manga magorang, Hanya natogbong in Israil manga hasokfonan, in Diyos manga sogowan, 55 Kawa tonya wat togonan han Abraham hanggan hat manga hasokfonan hanggan aban aban. 56 Is Mariya nandogayan san Ilisabit balay tolok magdanon, ginya madi nwali wan. 57 Ginya madi aban, nondasog in Ilisabit anak kasagayan fag masohod, yabay insagaya anak nga ama. 58 It manga faakbang balay hanggan kaiban, no nadog kitay kagfon intam inawa wa dahol in Ilisabit, ta nagobok wa ngap hanya, igbaya yadi wa ngap iglag. 59 Ginya madi, ta nogfatoli ka anak dararag sas fawalo fag sirang, tonya fag manga taw nafasakop yadi sinya. Ta gayfan kitay is Sakariyas nogfangayan it anak, is Sakariyas mandi, kito mandi it ama. 60 Dapat ay, it ina nalwang, Bohonwas Sakariyas, is Hwan di kat ngayan. 61 Dapat taglwang, Ngadi sadi sa hayo kaiban idwa ha ngayan kitonya. 62 Yakanga ta nafaaman odin Sakariyas it ama, ta no gintaw hanya no faktaw kat fakasayaon it anak ngayan. 63 Is Sakariyas nafaaman, nanagad soratan a, ginya nasorat kiti, It ngayan is Hwan. Fagayo indolaw wan. 64 Ginya sadi wa ginan is Sakariyas nahampang ya, nafasayagdog in Diyos. 65 Ka manga taga sinya fag banwanan, fagayo fagayo, indolaw wa dahol, yakanga igfadadahitan ha sadi ha sadi kat manga lagan, sadi wak dahonya manga banwanan sas manga moyod sakop Hodiya. 66 Fagayo ka nadog naayfan wa fiya fiya no kanat kahologan, maskin kalag wa kitay, is Diyos sinya wa fag anak, ka manga taw garintawan yadi, Kinday mayon aban to fag anak? 67 Ginya madi ka Maliyaw fag Falad sawan Sakariyas in Hwan ama, sadi wak dahonya fangayofan. Ginyas Sakariyas inbalin Diyos fangampang, nalwang kito, 68 Maskin kagfon in Israil manga hasokfonan, is Diyos, in-awa waglag hanggan nafalo nafalfas it sakop, Yakanga tam fag fasayagdog hanya. 69 Hanya nafabangkad yadi hantam sadik Famaliwa, marigon wa dahol, Hanyan Diyos sogowan is Dabid, it hasokfonan. 70 Hyabi hyabi is Diyos ha togonan hantam git manga fangampang maliyaw kitay, 71 hanya bomawi intam gintam manga kalaban Hanggan gis manga taw ka kadwat iglag intam. 72 Hanya ha togonan yadi hantam manga magorang kitay, hanya kaawa has taw. Hanya tomohod yadit fiya fag taranggapan. 73 To kan Diyos nafatohoyan fiya fiya hantam hafofowan fag ama is Abraham kitay, 74 Hanya bomawi intam gintam manga kalaban, Kaarakitay tam somyagan mamasayagdog hanya, idwa ha fakadalaon, 75 Imbali maliyaw hanggan maslong intam manga ogali sat faglagan, no kandogay day tam no boyagan yapdi. 76 Kati haw man angko anak kangko fagwason. Maskin haw gomona kagfon intam, kaarakitay igfatalagat manga bato lahawan, Yakanga ta ngomayan hyamo kitay, haw wat fangampang, ka Abwat-man-has-fagayo-fagayo-it-kangayanan. 77 Haw fomwayong hat sakop no kinday ta nombawi, No kinday it manga ogali dwat nomliyam. 78 Maskin intam Diyos maawaon wa dahol dahol, Ka mayawa ka bomawi intam kaakbang wagfayawa intam, 79 Kaarakitay igyawa ka manga basad marom yapdi, ka manga sas daga gohom kahatayan, Hanggan tomaban intam has dalan kahowayan. 80 Ka anak, is Hwan, no kadahol wan, kabali yadi marigon it fangayofan a, nabanwanan basad fakahyabogan nodyan bali ha bantog sas manga banwanan Israil.
21 Gis nanya fag manga masohod, is Sisar Agosto ka gorangon sas fagayo fag layonan daga ka banwa Roma sakop sadi wak dahonya. Is Sisar Agosto nalwang kitay fagayo fagayo fag manga taw sas sakop Roma fag falistat manga ngayan. 2 Toy ka gona fag nafalista nos Kiriniyo hyabi ka gobirnador sas Siriya. 3 Yakanga fagayo fag manga taw nwali hat magorang banwanan kaarakitay mamalista it manga ngayan. 4 Is Hosi nalahaw gis banwa Nasarit, sakop Galiliya, hawas sakop Hodiya, has banwa Bitlihim kan Dabid nakasagayan fag banwa hyabi, maskin is Hosi in Dabid hasokfonan. 5 Is Mariya, kan Hosi bato babayon, nahin yadi wan Hosi kaarakitay mamalista yadit ngayan. Is Mariya danwa gabosog gis nanya. 6 Ta no sinya yapdi, natoon wa ngap sinyat anak kasagayan. 7 Ginyas Mariya nafasagaya wa sinya, sas banwa Bitlihim, kat anak ahan, anak ya ngadi ama. Is Mariya nafasafot manga rotay hat anak dararag. Ginya madi, kawa napno wa manga taw kasta balay bato hadasogan, yakanga ta nafaigyan odi ka anak dararag sas basad fanganan manga hayopan. 8 Dayo gis nanya fag manga masohod, ha manga gano topa basad yabi sas bahalan banwa, hawas talon baliwa. 9 Ginya madi, sadi wa ginan, in Diyos anghil sadi inbangkad hasta akbang a, in Diyos masilaw wa dahol fag kayawaan nayawa sasta ligongan. Ka manga gano topa indala wa dahol dahol iglag. 10 Dapat ka anghil nalwang has taw, Ham fag idwa kadala. Fandog ngay, aho ha fwayongon ha hayo fiya fag barita a, fagayo fag manga taw imsaya wagdog. 11 Maskin kati hayo Famawi insagaya wan san Dabid banwa, kawan Diyos-natogon-Famawi, kagfon intam. 12 Ka fatohoyan hayo no sida fag anak, ham lomag tonya fag anak dararag masafotan manga rotay a, maigyanan sas basad fanganan hayopan. 13 Ginya madi, sadi wa ginan, sadik habanan anghil gin Diyos banwanan sam tongod, inbangkad has anghil gona akbang. Tagfasayagdog in Diyos kiti, 14 Fag fasayagdog in Diyos sat banwanan sam tongod, Hanggan kan Diyos fagbayaon fag manga taw istay is baba daga fag lomag yadi kahowayan. 15 Ginya madi, ka manga anghil no nwali han Diyos banwanan sam tongod, ka manga gano topa nanoltolan a, taglwang, Kalibang, tam hawas basad banwa Bitlihim. Tam mamantay ngay ka madolaw sinya kagfon intam nafadog hantam. 16 Ginya ta nalahaw madali hanya a, ta nasayak inda Mariya, da Hosi hanggan ta nalag yadi anak dararag sinya, maigyanan basad fanganan hayopan. 17 Ta no nalag di ngay, ta natoltol has taw it donggon ka anghil fwayong, kawa has nwa fag anak dararag. 18 Fagayo fag manga taw ka nadog ka manga gano topa fwayong indolaw wa dahol. 19 Dapat is Mariya fagaba wa maayfanan to fagayo kan-anod kitonya. 20 Ka manga gano topa nwali wa a, igfasayagdog in Diyos, igbaya hanya kawat donggon hanggan it manga lagan fagayo, kito kan anghil fwayong has taw. 21 Nondasog ka fawalo fag sirang git kasagayan, ta natoli ka anak dararag, hanggan nafangayan hanya is Hisos. Is Mariya nodya gabosog, ka anghil danwa nadisag it ngayan tonya. 22 Ginya madi, nondasog ka sirang gis nanya ta nogfatonglos ka ogali kan Mwisis natogon kawa has manga nafasagaya anak, hasaglinay baliwa, ka talanahan nalahaw has banwa Hirosalim. Maskin in Diyos togon iglwang, Fagayo fag anak ama it ahan, ham fakoray hasagfon intam, yakanga, ta nadiya yadi wa ka anak dararag kaarakitay fabangkad has fagalan-han-Diyos faglagan. 24 Ta nadisag yadi kasta bato disagon no kana kan Diyos togon iglwang, kitos sadik talsawa manok bilang tokmo, ngatay dowak anak salompati. 25 Gis nanya fag manga masohod ha sadik ama sas Hirosalim, it ngayan is Simyon. Kalag wa kitay hanya galwasi in Diyos maskin matanogon a, igfanaya odi kitay no ginahin nangos is Diyos nogbawi in Israil sakop. Ka Maliyaw fag Falad sawan Simyon fangayofan, 26 hanggan nafatagak hanya kitay, hadya matay ha lomag yapdin Diyos-natogon-Famawi. 27 Ka Maliyaw fag Falad nataban in Simyon has basad Fanimbaan-Dahol. Ginya madi, it manga magorang no nadiya ka anak, kawas Hisos, ha basad Fanimbaan-Dahol kaarakitay igfatonglos kan Diyos togon fagsagadon, 28 is Simyon nababa ka anak, nabaya in Diyos, nalwang kiti, 29 Haw kagfon angko, maskin angko wa mata lagan ka Famawi manga taw, Kam nafatalaga sasta faglagan fagayo, ka mamayawa has manga Hintil, Hanggan gi hanya, manga taw mamasayag dog ha hyamo sakop sas Israil. Yakanga, in-anod wan kam fwayong angko. Nyawa aho, im sogowan, gomona was taw kati, fiya was fangayofan. 33 Ka anak dararag manga magorang indolaw wagdog in Simyon fwayong kawa han Hisos. 34 Is Simyon nafasayag dog inda Hosi kitay ta bomaya wan, ginya madi nafwayong han Mariya kitay, Haw fag danwa twa kitay, to fag anak danwan talaga kaarakitay aywan fag manga taga Israil omayayo gin Diyos, dapat aywan yadi ka omakbang. Is Diyos nasogo to fag anak hastay, sadik falagon madolaw, dapat aywan ka yomod hanya. 35 Yakanga ista manga basad fangayofan imlag wa fiya fiya. Haw domog yadi aban kitay, bilang wa ha dagom matobohan sa hyamo basad fangayofan. 36 Gis nanya yadi ha sadik ina in Diyos fangampang sinyas basad Fanimbaan-Dahol, it ngayan is Ana, in Fanwil anak, in Asir hasokfonan. Is Ana magorang wa dahol. Fitok fangaraw lamang hyabi, hanya no gofodan hat indogan, 37 ginya madit indogan natay wan, yakanga hanyan balo yadi wan kati. It kagorangan walok safolo ha ofat ik fangaraw. In Ana ibolon ha odis basad Fanimbaan-Dahol, yabi sirang, igfasayagdog in Diyos. Nomtoon idwa kwan hanon kaarakitay mandarangin. 38 Gis nanya yadi, is Ana naakbang handa Hosi, nafasalamat han Diyos. Hanya natoltol yadi, kawa han Hisos baliwa, has fagayo ka manga mafanayan no ginahin is Diyos no bomawi ka banwa Hirosalim gis mahori. 39 Da Hosi da Mariya, no nafatonglos fagayo fag manga bagay ka maangay han Diyos togon has manga Hodyo, ta nwali ya ngawan hat sadili banwanan has banwa Nasarit, sakop Galiliya. 40 Ka anak kadahol wan a, inbali marigon it fangayofan hanggan madonong ya ngadi, maskin in Diyos kafiyan sawa hanya. 41 Yabay, fangaraw fangaraw, sas Fanohodan Nagsagayan, manga Hodyo nogtohod ka anghil no nasagaya ista manga balay hyabi, in Hisos manga magorang has banwa Hirosalim. 42 Is Hisos no safolo wa ha dowak fangaraw it kadogayan, hanyag tahin yadi wat manga magorang, ta no has Hirosalim kito kasta ogali nogbanwan. 43 Nonsagaya ka Fanohodan, ta nwali ya nga wan. Is Hisos in-goyan yapdi sas Hirosalim dapat it manga magorang idwa naisip kitay hanyan goyan. 44 Ta gayfan ngatay is Hisos nahoyog yapdi has iba taw, yakanga ta nafadagos yapdit lahawan sadi wak sirangan. Ta no nasayak hat manga kaiban hanggan hat manga fakilalaon, ta bago di natwa kitay, is Hisos idwa mangharaw natahin it manga magorang. 45 Ta nodwa nalag in Hisos, tanfwali ya has banwa Hirosalim kaarakitay somayak hanya. 46 Sayas fatolo fag sirang ta bago di nalag in Hisos, ya mangharaw, sadis basad Fanimbaan-Dahol, matokawan sinya maofodan yadi ka mangag faadal. Hanya matalingan has taw, ginya gintaw yadi. 47 Fagayo ka nadog in Hisos hampang tandolaw wa dahol kitay hanya madonong mangharaw, twa yadig sagot has taw. 48 Hanggan it manga magorang intaka wan, ta no nalag hanya, it inag lwang, Anak, kana mayon haw no kitonya ha hyami? Aho hanggan im ama, minyaya wa galingawan hyamo mi nogsayak hyamo. 49 Is Hisos nasagot, Kana mayon ham nogsayak angko? Ham awkin idwa natwa kitay aho fag sawangko Ama balay? 50 Dapat tadwa natwagdog in Hisos nafwayong, no kanat kahologan. 51 Is Hisos natahin ya ngawan it manga magorang a, nwali ya has banwa Nasarit, nafasakop fiya fiya hat manga magorang. It ina naayfan fiya fiya to fag manga bagay fagayo sat basad fangayofan. 52 Is Hisos kadahol wan gis nanya, madonong ya ngadi. Labi was Diyos hanggan manga taw igbaya wa dahol dahol hanya.
31 Ginya madi aban, sas fasafolo ha lima fag fangaraw, nos Tibiriyo Sisar kasta abwat fag gorangon sas manga layonan daga ka sakop Roma, is Ponsiyo Pilato ka gobirnador sas sakop Hodiya, is Hirodis kasta gorangon, no sas sakop di Galiliya, hanggan kaman it fadwasay, is Filipi, ka gorangon sas manga sakop di Itoriya hanggan Tarakoniti. Is Lisaniyas ka gorangon sas sakop di Abiliniya. 2 Gis nanya da Anas da Kayfas ka tarogbongan gorangon fag fagalan-han-Diyos. Gis nanya fag masohod is Hwan, in Sakariyas anak no maoliyanan sas basad fakahyabogan, is Diyos nafadog hanya it bato toltolon has taw. 3 Yakangas Hwan nasafong wa bali bali difay safa Hordan, igfaadal has taw. Hanyag lwang, Ham fag soyo, fag dayo yadi hayo manga ogali dwat. Ham fag fatogna hayo kaarakitay ha tandaan sas danom kagfatohoyan has taw kitay ham igsoyo, hanggan is Diyos faliyam wa fagayo hayo manga naogali dwat. 4 Kito kansorat san Isayas, in Diyos fangampang, sorat kitay, Kiti kat nafwayong kagtawag marigon marigon, gis basad fakahyabogan, Fatalagaan in Diyos bato lahawan, Fahaslongan it manga dalan fagayo. 5 Dafogan ka manga losot, Hodkodan, fadatagan ka manga moyod, manga fongso, Fahaslongan ka dalan igbarikwangan, Fasohodan fiya fiya ka manga losot garogbot garogbot. 6 Ginya madi fagayo fag manga taw lomag no kinday is Diyos nogbawi manga taw. 7 Aywan fag manga taw ka nagobok in Hwan kaarakitay mamatogna. Is Hwan iglwang has manga taw, Ham bilang odi manga abyanon no madaya. Fakta kagfatagak hayo kitay ham fag lagyo wan gin Diyos fadosaan ka kadasog aban? 8 Fag hanggan wa hayo manga bohad ogali kagfalag kitay ham igsoyo wan. Ham fag idwa kasyag kitay maskin ham in Abraham manga hasokfonan, ya fiya wan. Gwadi hogfwayong ha hayo kitay gistay fag manga bato is Diyos syagan kalig in Abraham manga hasokfonan orongan. 9 Gis kati ginan ka wasay danwan hatak sas dalid hayo, omobang fagayo fagayo fag manga fon hayo kadwa fiya it bohad a, omokas wa has basad afoy. 10 Ginya ka fakaaywanan fag manga taw gintaw in Hwan, No kitonya mangharaw, kana ka hyami bato ibolonon kaarakitay midwam sakop has fadosaan? 11 Is Hwan nasagot, Hayo balokas no dowa, disagan wa ka sadi hasadwa akwa. Ka manga ha hanon fag kitonya yadi, disagan hasadwa akwa. 12 Mangag falo igsohot ka gobirno Roma bohis indasog wan han Hwan maskin kasaya mamatogna. Ta naintaw yadi han Hwan kitay, Haw kagfaadal, kinda odi hami? 13 Is Hwan iglwang has manga fanohot bohis, Ham fag idwag sagad iglabi ka fiya hayo fagsagadon. 14 Ka manga sondalo naintaw yadin Hwan, Hami yadi, kinda odi? Hanyag lwang, Nyawa ham igsagad, fag idwag logos is taw. Fag idwag fadala nodwa orongan. Ham fag idwag manaw hayo tangdanan. 15 Gis nanya fag masohod aywan fag manga taw mafanayan odi no ginahin in Diyos-natogon-Famawi nombangkad, yakanga kat fakaaywanan naayfan kitay ngatay is Hwan kasta fagfanayaon. 16 Dapat is Hwan nafwayong has taw, No kitay di, sas danom aho nogfatogna hayo, dapat ha akwa ya kadasog aban, ka madonong man angko, hanya ka fatogna hayo sas Maliyaw fag Falad, hanggan sas afoy. Ho kaya wa manlohas it siyok lapak. 17 Hanya ha bitbit fanayang kaarakitay falayon it opa, manga ohot. Tomifon it tirigo sas basad dongdong, dapat ay, somonog wa ka manga ohot sas afoy kadwa kapsa. 18 Yakanga aywan yapdi fag manga fatagak in Hwan fagtoltolon has taw nogfadog ka Fiya fag Barita. 19 Dapat is Hwan nangabaya in Hirodis, kasta gorangon, maskin kahagaw in Filipi babay, is Hirodiyas, it tagyaw yadi. Bohondi tonya kan Hirodis naibolon dwat kan Hwan fakabayaon. 20 Yakangas Hirodis nadogang ya to kat kasalanan, hanya nafaporiso yadin Hwan. 21 Itfagonan, fagayo fagayo fag manga taw no nafatogna wan, hanggan is Hisos nafatogna yadi. Ginyas Hisos nogdarangin yapdi, ka banwa sas tongod inboklas wan. 22 Ka Maliyaw fag Falad, bilang wa salompati, nayokfo han Hisos. Ginya ha nahasnog gin Diyos banwanan sam tongod, iglwang kitay, Haw wa kangko fagalwasiyon fag Anak, hogbaya wa dahol dahol hyamo. 23 Is Hisos manga wa tolok safolok fangaraw it kagorangan bago digfaadal has taw. Ista fangayofan is Hisos in Hosi odi anak. In Hosi hafofowan gin Adan ginan kiti, 24 Bago bago is Adan bilang wan Diyos anak. Ginyan Adan anak is Sit. Ginyan Sit anak is Inos. Ginyan Inos anak is Kainan. In Kainan anak is Mahalalil. In Mahalalil anak is Harid. In Harid anak is Inok. In Inok anak is Matosalim. In Matosalim anak is Lamik. In Lamik anak is Nowi. In Nowi anak is Sim. In Sim anak is Arfaksad. In Arfaksad anak is Kainan. In Kainan anak is Sala. In Sala anak is Hibir. In Hibir anak is Pilig. In Pilig anak is Ragaw. In Ragaw anak is Sirog. In Sirog anak is Nakor. In Nakor anak is Tira. In Tira anak is Abraham. In Abraham anak is Isaak. In Isaak anak is Hakob. In Hakob anak is Hoda. In Hoda anak is Faris. In Faris anak is Isrom. In Isrom anak is Arni. In Arni anak is Admin. In Admin anak is Aminadab. In Aminadab anak is Naason. In Naason anak is Salmon. In Salmon anak is Boos. In Boos anak is Obid. In Obid anak is Hisi. In Hisi anak is Dabid. In Dabid anak is Natan. In Natan anak is Matata. In Matata anak is Mainan. In Mainan anak is Miliya. In Miliya anak is Iliyakim. In Iliyakim anak is Honan. In Honan anak is Hosi. In Hosi anak is Hoda. In Hoda anak is Simyon. In Simyon anak is Libi. In Libi anak is Matat. In Matat anak is Horin. In Horin anak is Ilyasar. In Ilyasar anak is Hoswi. In Hoswi anak is Ir. In Ir anak is Ilmodam. In Ilmodam anak is Kosam. In Kosam anak is Adi. In Adi anak is Milki. In Milki anak is Niri. In Niri anak is Saltiyal. In Saltiyal anak is Sorobabil. In Sorobabil anak is Risa. In Risa anak is Hoana. In Hoana anak is Hoda. In Hoda anak is Hosi. In Hosi anak is Simi. In Simi anak is Matatiyas. In Matatiyas anak is Maat. In Maat anak is Nagi. In Nagi anak is Isli. In Isli anak is Nahom. In Nahom anak is Amos. In Amos anak is Matatiyas. In Matatiyas anak is Hosi. In Hosi anak is Hanan. In Hanan anak is Milki. In Milki anak is Libi. In Libi anak is Matat. In Matat anak is Ili. Ginya madin Ili anak kawas Hosi. To fag is Hosi kasta fangayofan in Hisos wa ama.
41 Gis nanya ka Maliyaw fag Falad sawan Hisos fangayofan sadi wak dahonya, hanggan is Hisos nwali ya gis safa Hordan. Ka Maliyaw fag Falad nataban in Hisos has basad fakahyabogan. 2 Is Hisos no sinya wan, is Fandaya nasolay igfaloksowan hanya ofat ik safolok sirang. Is Hisos idwa ha nahwan hanon kandogay inya, yakanga kalonos wa dahol dahol. 3 Ginyas Fandayag lwang han Hisos, Haw non Diyos wa nga Anak, haw fag lwang has nwa fag bato, Fag imbali tinapay. 4 Dapat is Hisos nasagot hanya, Insorat kitay, Bohondi ka odi fanganon kagfaboyag manga taw. 5 Ginyas Fandaya nataban in Hisos has abwat, sas fakabantayan, nafalag hanya, sadi wa ginan, ka manga gorangon sakop fagayo fagayo sadik dahonya baba daga. 6 Ginyas Fandayag lwang han Hisos, Haw no ha ngangkok manimba, ho domisag ha hyamo to fag manga gorangon sakop, it manga kangayanan hanggan kafiyan fagayo, maskin to fagayo indisag wa hangko a, kati ho domisag wan nyawa faktaw kangko fakasayaon disagan. 8 Is Hisos nasagot, nalwang, Insorat kitay, Fag is Diyos kagfon hyamo kam fagsimbaon. Fag hanya lamang kam fakatanogon. 9 Ginya madis Fandaya nataban ya in Hisos has baba atop Fanimbaan-Dahol sas Hirosalim, iglwang han Hisos, Haw non Diyos wa nga Anak, fadagdagan hyamo gistay is baba atop, ham daga is baba daga, 10 maskin insorat kitay, Hanya tomogon it manga anghil kitay, ta fag omano hyamo, 11 insorat yadi kitay, Ta somambot di hyamo kaarakitay im bitis idwam-iktan has bato. 12 Dapat is Hisos nasagot, Ka Kasoratan iglwang, Haw fag idwag tikis igsolay kagfon hyamo, hyamo Diyos. 13 Is Fandaya nontabo wagsolay igfaloksowan in Hisos git manga halimbawan fagayo, naobon ya nga wan Hisos a, igfanaya nangos no ginahin fag masohod aban no somolay ya hanya. 14 Is Hisos infwali ya has sakop Galiliya a, in Diyos Maliyaw fag Falad karigonan sawa hanya. In Hisos manga toltol hanggan ibolon indahit wan sas ligongan. 15 Is Hisos nafaadal has taw sasta manga basad fanimbaan. Fagayo fag manga taw nafasayagdog hanya. 16 Ginyas Hisos nwali has banwa Nasarit hat nakadaholan fag banwa. Is Hisos nasakbaw has basad fanimbaan sas Sirang Kafahowayan kito kat ogali nogbanwan. Is Hisos nalindog kaarakitay bomasa gis Kasoratan. 17 Ta nafagamit hanya in Isayas, in Diyos fangampang kasoratan malohotan. Is Hisos naladlad ka kasoratan kansorat kito, ginya nabasa wan, 18 Kati in Diyos Maliyaw fag Falad sawangko Maskin hanya nafili wangko kaarakitay ho manoltol ka Fiya fag Barita has manga myabog. Hanya nasogo angko kaarakitay igfadog hasta manga napilit nataban kitay, ta malfas ya, Fadog yadi has manga bota kitay, ista manga mata imfoga ya, Kaarakitay fomalfas kasta fagfahoriyon. 19 Fadog yadi has taw kitay, kati fag fangaraw kagfon intam falag it kahowayan has taw. 20 Is Hisos nalohot ya ngawan ka Kasoratan, nafwali ya hasag bahala, ginya madis Hisos intokaw ya. Fagayo ka sas basad fanimbaan indolaw wagdog, ta nabantay in Hisos. 21 Ginya madis Hisos igfwayong has taw, Ka hayo donggon gis Kasoratan in-anod wa kati. 22 Fagayo nafasayagdog hanya a, tandolaw wa dahol kawa kafiyaon maskin nogtoltol. Ta garintawan, Bohonwa awkin in Hosi anak to? 23 Yakangas Hisos iglwang, Ham ngandayo somokfon to fag fwayongon, Haw kagbolong has taw, fag im sadili yap im fagbolongon. Ham lomwang yadi hangko, Ibolonan yadistay sam sadili banwanan kito ka hyami donggon kam naibolon sas banwa Kapirnaom. 24 Is Hisos igfadagos yapdig fwayong kitay, Hogfwayong ha hayo kitay orongan wan, idwa ha akwa in Diyos fangampang kabantog sat sadili banwanan. 25 Dapat hogfwayong hayo kitay, hyabi hyabi, san Iliyas fag kasohodan, nodwa nahwayan tolok fangaraw hagboknga, yakanga malonos wa dahol sadi wak dahonya banwanan, gis nanya, bonwa bohag, aywan ka manga ina balo sas Israil. 26 Dapat ay, is Diyos idwa nafalahaw in Iliyas has ina balo sas Israil, dapat ha sadik ina balo sas Saripta, sakop Sidon. 27 San Ilisiyo man fag kasohodan, no kitay di, kaaywanon fag manga taw ka ha sagit kitong sas banwanan manga Israil, dapat idwa hanfiya ngadi sadi. Kan Diyos nafafiya is Naaman lamang, gis sakop Siriya. 28 Ta no nadog in Hisos manga hampang, fagayo ka sas basad fanimbaan kaisog wa dahol. 29 Ta nanhalindogan, natawid marigon in Hisos boknga takyay ginya nataban hanya has sokayan banwa has bohid has baba dalifi kaarakitay ta fomolid hanya ha basad gobang. 30 Dapat ay, is Hisos nalahaw lamang hasta fagbokngan a, nwali wan. 31 Ginya madis Hisos hawas lwad has banwa Kapirnaom, sakop Galiliya. Sas Sirang Kafahowayan, is Hisos igfaadal has manga taw sinya. 32 Tantaka wagdog is Hisos nogfaadal is taw maskin kitos ha kangayanan no kampang, idwag hono. 33 Sinyas basad fanimbaan, ha sadik ama, labang wa kagfahoriyan hanya, igtawag marigon kitay, 34 Yabay, haw Hisos taga Nasarit, kana haw nogmawat hyami. Haw awkin hastay kaarakitay domaog wa hyami? Ho fadi wadtwa no fakta haw. Haw ka Maliyaw kanbangkad gin Diyos. 35 Dapat is Hisos nangabaya ka labang, nalwang, Ha hawa gawang gawang. Haw fag galin wa gis nyamo fag taw. Ginya madi, sasta faglagan fagayo, ka labang nafahakfo wa dagos ka ama, ginya madi nalin lamang, idwa nafabaran ka ama. 36 Fagayo fag manga taw intaka wan, ta nangarintawan ha sadi ha sadi kitay, Kana ti fag manga hampang? Ha kangayanan, marigon ya ngadi, nogfasognod ka manga labang, ta katanog yadi wa galin. 37 Ka barita kawan Hisos manga ibolon indahit ha sadik dahonya sinya fag manga banwanan. 38 Is Hisos nalahaw wa gis fanimbaan, nasakbaw han Simon balay. Gis nanya in Simon nogang ina ha sagit, kagnaw wa dahol dahol, yakanga tagfaaronganon han Hisos kitay, Haw nangos fafiyaan yap hanya. 39 Is Hisos nalindog sas ina dayo igyanan a, nasogo kitay ka hagnaw fag galin wa gi hanya. Ka ina infiya wan, dagos wanbangon, ogali man di, nanogbong was taw. 40 Araw, myanit no kasangday wan, ista manga kahilala nataban han Hisos fagayo fagayo ka ha manga sagit, bokod bokod. Is Hisos nafwalid it gamat ha sadi ha sadi, hanggan nafafiya fagayo. 41 Manga labang nalin wa gis aywan fag manga taw, igsohodan wagharokyawan kitay, Haw in Diyos wa Anak. Dapat is Hisos nangabaya ka manga labang, idwa nafaawang maskin ka manga labang kilala wa kitay is Hisos wa kan Diyos-natogon-Famawi. 42 Ginya madi, no bago marom, is Hisos nabisok has talon. Ka manga taw galingawan in Hisos. Ta no nalag ya nga hanya, taglwang, Ha hayap iglahaw gistay. 43 Dapat is Hisos iglwang has taw, Ho fag mamaadal yapdi has iba fag manga banwanan ka Fiya fag Barita han Diyos sakop baliwa. Maskin nga is Diyos nasogo angko hastay, tonya wa kangko bato ibolonon. 44 Ginyas Hisos igtoltol yapdi sas manga fanimbaan Hodyo sas sakop Hodiya.
51 Aban, kawa manga taw kaaywanon kasayag talinga in Diyos hampang, ta tifonan tifonan ya san Hisos akbang. Is Hisos malindogan sas akbang linaw Ginisarit. 2 Ginyas Hisos nalag dowak baloto sas bahalan linaw. Ka mangag fon baloto, manga fangoyang fag manga taw, indokson wan git manga basad baloto, gogas wat manga sarap. 3 Yakangas Hisos nasakbaw has basad baloto sadi a, nalwang han Simon, kagfon tonya fag baloto, No fiya di, ha faosonan yap ogbot gis bahalan im baloto. Ginya madis Hisos matokawan sas basad baloto a, igfaadal ka manga taw sas baba bintalan. 4 Araw, is Hisos nontabo wagfaadal has manga taw, nalwang han Simon, Ham fag hawas fagbokngan linaw. Ham fadagdagan hayo manga sarap ha basad linaw kaarakitay omiktan oyang. 5 Is Simon nasagot kitay, Haw kagfaadal, sadi wak yabi hanggan wa kayawa midwa ha naiktan, minyaya wan. Dapat kawa haw nalwang fag fadagdag ka manga sarap, ho fadagdag ngay. 6 Ginya ta nafaanod odi ngay, ta nafadagdag it manga sarap. Nyawa kitonya, kaaywanon wa fag manga oyang ista iktan araw, madala wamragyang kasta manga sarap it kaaywanan it iktan. 7 Yakanga ta nafaaman ha sadik baloto kaarakitay igfatogbong it manga ofod. Ginya ka sadik baloto nagobok wan da Simon. Ta nafahapno wa oyang fagayo dowak baloto, madala wamlogom ha daga danom. 8 Is Simon Pidro no nalag kitay aywan it iktan, nanlibabaan san Hisos atobangan a, nalwang, Angko Fon, ha fag ayayo yap gingko, maskin dwat angko manga ogali. 9 Is Pidro hanggan it manga ofod indolaw wan kawat iktan oyang kaaywanan wan. 10 Hanggan in Simon manga ofod sa sadik baloto, da Santyago da Hwan, in Sibidiyo manga anak, tandolaw yadi wan. Ginyas Hisos iglwang han Simon, Haw fag idwa kadala, gis kati ginan taw man kam iktanon aban. 11 Ginya madi kasta manga baloto nondagsa wan, da Pidro naobon wat manga akwa fagayo a, natahin wan Hisos. 12 Ginya madis Hisos no sawa sadik banwa, ha sadik ama ha sagit kitong, nakfos wa sadik habilogan, naakbang han Hisos. Ka ha kitong no nalag in Hisos, nanlibabaan a, nafaaronganon hanya, iglwang, Ama, haw no kasaya di, haw fadi wad somyagan igfafiya angko sagit. 13 Ginyas Hisos natawid hanya, iglwang, Ho kasaya ngay, haw fag imfiya wan. Ginya madit kitong dagos wanfiya. 14 Yakangas Hisos natogon hanya kitay, Hawag fwayong nyawa hada fag manga taw, dapat fag ha yap has fagalan-han-Diyos, fabantayan hanya im habilogan. Ginya madi ha disagan kan Mwisis natogon bato disagon bilang faorongan has taw kitay haw infiya wan. 15 Yatokitay, indahit di ngap has manga taw kawan Hisos naibolon. Yakanga ka fakaaywanan fag manga taw inbarangkadan di ngap han Hisos kaarakitay tomalinga hanya, hanggan igfafiya ista manga sagit. 16 Dapat ay, is Hisos hawas ayayo gista manga banwanan kaarakitay mandarangin sinya. 17 Dapat gis nanya fag kasohodan is Hisos nogfaadal, ha akwa manga Farisiyo hanggan ka mangag faadal in Mwisis manga togon gis fagayo fag banwa, sakop Galiliya hanggan sakop Hodiya hanggan gis Hirosalim, ta matokawan yadi sinya. In Diyos kadonongan sawan Hisos kaarakitay igfafiya ka manga ha sagit. 18 Yabay, gis nanya ha manga taw kadasog, gosong sat baba sagmak, sadik taw kadwa syagan kimot. No kitay di, tagpilit wagfasakbaw nangos hanya has basad balay kaarakitay ta fomwalid ka ha sagit han Hisos akbang. 19 Dapat ay, tadwa twag fasakbaw hanya, kawa sawas fakaaywanan fag manga taw, yakanga ta hawas baba balay. Ta nalosbong ka atop a, natonton han Hisos akbang, ka ha sagit sat baba sagmak. 20 Is Hisos no nalag kitay tagsyag marigon ha hanya, nafwayong has ama kadwa syagan kimot, Ama, hogfaliyam im manga naogali dwat. 21 Ka mangag faadal Batasan Hodyo hanggan ka manga Farisiyo nangarisipan kitay, Fakta tonya ka kampang igsway in Diyos? Bohonwa awkin is Diyos lamang ka ha kangayanan igfaliyam manga ogali dwat? 22 Dapat is Hisos nasarom ista fagisipon, yakanga nalwang has taw kiti, Kana mayon ham no nangarisipan kitonya? 23 Sida ka malpos fwayongon, ngatay, Im manga naogali dwat fag imliyam wan, ngatay Ha fag kabangon, haw fag lomahaw wan? 24 Dapat ho falag ha hayo kitay, aho Kanbali Taw, ha kangayanan igfaliyam ista manga ogali dwat istay sas baba daga. Ginyas Hisos nafwayong has idwa syagan kimot Aho wa kaglwang kitay, Haw fag kabangon wan, diyan wam sagmak, nyawa ha mwali wa kati. 25 Ka ama dagos wa nalindog sas faglagan manga taw, naanggong wat sagmak, nwali wa a, igfasayagdog ya ngadi han Diyos. 26 Ka manga taw indolaw wa dahol iglag, ta nataka wan, nafasaya ya ngadig dog in Diyos, taglwang, Madolaw wa dahol dahol kantam lagan kati. 27 Ginya madi araw, is Hisos nadokson wan gis basad balay, inlahaw wan, nalag sadik ama kagsohot bohis Roma, it ngayan is Libi, matokawan sas fanohotan bohis. Is Hisos iglwang hanya, Ha tahinan wangko. 28 Is Libi dagos wanlindog, naobon wat manga sangkap fagayo fagayo a, natahin wa hanya. 29 Ginya madis Libi nasyahod it manga fanganon aywan sat balay kawas Hisos nondasog. Manga fanohot bohis Roma aywan, hanggan ka iba taw sinya yadi igsayowan kwan handa Hisos. 30 Ka manga Farisiyo hanggan kat manga ofod kagfaadal Batasan Hodyo, gidginasan wa gidginasan wan. Taglwang han Hisos manga katogbong, Kana ham no kwan, manga ginom, igsayowan has manga fanohot bohis hanggan has manga taw ka ha ogali dwat? 31 Is Hisos nasagot has taw, Ka manga ha sagit ka kasaya has famolongan, no kadidwa ha manga sagit idwa kasaya hanya. 32 Maskin honbangkad hastay, kangko fagsayahon, bohonwa ka gayfan kitay it manga ogali fiya, dapat ka manga taw ka ha ogali dwat kangko fagsayahon kaarakitay ta somoyo wan. 33 Ginya tibag lwang han Hisos kitay, In Hwan manga katogbong fagabadwa kwan hanon kaarakitay mandarangin mahogod. Kitonya yadi ka manga Farisiyo katogbong ogali. Bati im manga katogbong kwan di hanon fagaba, hanggan ginom. 34 Is Hisos nasagot is taw, Ham awkin idwag fahwan hanon hasagfasakop hasta fangsawan fatalagaan fanganon, kagbabay no gofod yapdis taw? 35 Dapat ay, aban, ha gomamat tomaban kagbabay, gis nanya ta bago didwa kwan hanon kaarakitay mandarangin mahogod. 36 Ginyas Hisos nafahalimbawa yadi kitay, Idwa ha romagyang rotay bago, falonob has daanon. No omibolon kitonya imdwat wa ka rotay bago, hanggan ka lonob bago idwa yadi maangay has rotay daanon. 37 Idwa yadi ha taw somiblag alak bago has basad sohadan anit daanon. No omibolon kitonya ka sohadan anit imbosni wan, ka alak im-od-olanan lamang, ka sohadan anit imdwat yadi wan. 38 Yatokitay, tagsiblag bago fag alak has bago fag sohadan anit. 39 Nyawa faktaw no gayfan yapdi kitay ka gona fag alak ka fiya kainom, idya kasaya manginom ka bago, maskin iglwang ka gona fag alak fiya wan.
61 Sadi ginan, sas Sirang Kafahowayan, da Hisos igdalan sasta namay ha tirigo. In Hisos manga katogbong nabol manga haway tirigo sayok, ginya no naligis basad dalohap, ta nahwan wan. 2 Tibak Farisiyo nangabaya has taw, taglwang, Kana ham no gibolon kadwa maangay sas Batasan Hodyo maskin sawas Sirang Kafahowayan? 3 Is Hisos nasagot has taw, nalwang, Ham awkin idwa nabasa in Dabid naibolon hyabi no kalonos, hanggan wat manga ofod kalonos yadi? 4 Is Dabid nasakbaw han Diyos basad balay a, nabol ka tinapay kandisag han Diyos, ginya madi nahwan wan. Is Dabid nadisag ya ngadi hat manga ofod. Ka Batasan Hodyo iglwang kitay ka manga fagalan-han-Diyos lamang ka fiya homwan tonya fag tinapay. 5 Ginyas Hisos nalwang yadi kitay, Aho, Kanbali Taw, kagbahala has Sirang Kafahowayan. 6 Ginya, aban sa sadi yak Sirang Kafahowayan, is Hisos igsakbaw ya has basad fanimbaan a, igfaadal has taw. Sinya ha sadik ama it gamat balis sihon inrifis wan. 7 Ka mangag faadal Batasan Hodyo hanggan ka manga Farisiyo igbantay ya ngay in Hisos, ngatay fafiya ya nga araw sas basad Sirang Kafahowayan, maskin tagsayak it fabangdanan hanya. 8 Dapat is Hisos fadi wad twa ista manga fagisipon, yakanga hanya nafwayong has ama kanrifis it gamat, Ha fag hastay is fagonan. Ka ama naakbang han Hisos, nalindog ya ngadi sasta fagonan. 9 Is Hisos nafwayong has fakaaywanan kiti, Ho mangintaw hayo, sida ka maangay has Batasan Hodyo, ham gayfan, ngatay ka gibolon fiya, ngatay ka gibolon dwat sas Sirang Kafahowayan? Ngatay igbawi taw, ngatay igfahatay? 10 Is Hisos namarantayon yapdi has taw sat ligongan, bago di nahampang has ama kanrifis it gamat, nalwang, Falogdayan yap im gamat. Ka ama nafalogday ngat gamat, infiya wa dagos, ogali wan. 11 Ka mangag faadal Batasan Hodyo hanggan manga Farisiyo it mata di myasa wa bayong kawa kaisog wa dahol in Hisos. Yakanga tagtoltolan no kana kasta ibolonon hanya aban. 12 Ginya madi, gis nanya fag masohod, is Hisos hawas moyod kaarakitay mandarangin. Hanya nandarangin han Diyos sadi wak yabi hanggan wa kayawa. 13 Yakanga, no sirang wan, nafatawag it manga katogbong, ginyas Hisos nafili ka Safolo-ha-Dowa, kat nangayan it manga Fandiya-Barita. 14 To kat manga nafili, is Simon, kawan Hisos nangayan is Pidro, hanggan is Andris it fadwasay, da Santyago, da Hwan, da Filipi, da Bartolomi, 15 da Matiyo, da Tomas, in Santyago yadi sangay in Alfiyo anak, ginyan Simon yadi sangay ka goyon marigon it manga kapariho Hodyo, 16 da Hodas in Santyago anak, hanggan da Hodas Iskariyoti ka naoyon it ofod kalaban. 17 Is Hisos hanggan it manga ofod haya nga was lwad baliwa, hawas basad datag. In Hisos manga katogbong fagayo sinya yadi wan. Kaaywanan wa fag manga taw inbarangkadan wan gis sakop Hodiya hanggan gis banwa Hirosalim, ka yadi gis manga banwa Tiro hanggan banwa Sidon sas bahalan dagat. Ta fagayo nagobok in Hisos kaarakitay tomalinga hanya hanggan igfafiya ista manga sagit. 18 Is Hisos nafafiya yadi ka ha manga labang igfahoriyan hanya. 19 Maskin ha karigonan gin Hisos kagfafiya has fagayo, fagayo fag manga taw gwayan wa kasaya ngadi somapkid, ta fag somapkid wan Hisos. 20 Is Hisos nabantay hat manga katogbong a, nalwang, Nyawa ham manga myabog, ham bomaya wan maskin in Diyos sakop hayo wan. 21 Nyawa ham kalonos kati, ham bomaya wan maskin ham mapsog aban. Nyawa ham ha karongkotan kati, ham bomaya wan, maskin ham ha kasolongan aban. 22 Manga taw no kadwat iglag hayo, kawa ham galwasi angko, Kanbali Taw, ta nogsogo hayo, ta nogyod hayo, nyawa taglingo wa hayo manga ngayan, ham bomaya wan. 23 Nyawa hamlag kitonya, ham fag masolong wa dahol dahol, fag lokso ya ngadi, maskin dahol aban hayo tanggapon fasalamat san Diyos banwanan sam tongod. Ista manga hafofowan magorang naibolon yadi kitonya han Diyos manga fangampang hyabi. 24 Dapat ay, isyay wan, ka hayo lagon aban, ham ka manga maakwa, maskin ham nadog wa hayo kafiyan kati. 25 Isyay wa ka ham ka fagaba wa mahapsogan kati, Aban ham imlonos wan. Isyay wan aban, ka ham, ka fagaba wa mahasayan, Aban ham imhori wan, mangodgorawan ya ngadi. 26 Isyay wan no aba fagayo fag manga taw igfasayagdog hayo, maskin ista manga hafofowan magorang igfasayagdog yadi kitonya has manga bohagon fag fangampang hyabi. 27 Dapat, ham ka mangag talinga angko, hogfwayong ha hayo kitay, ham fakaawa hayo manga kaaway. Ham fag fiya has manga taw ka kadwat iglag hayo. 28 Ham fag kampang mahoway has mangag fadwat igdog hayo. Ham fag darangin yadi kawa has mangag fahoriyan hayo. 29 No hagtofa hayo marigon sas faringfing, fag kaman balis baliw. Ta nogbol hayo balokas ka aba-aba, disagan yadi wa ka agod kat famabasad. 30 Ham disagan has fagayo kagsagad gi hayo, no nabol hayo manga botang, ham hawag bawi. 31 Fag maangay hayo manga ogali has taw, no kinday hayo fakasayaon nangos taw no gogali ha hayo, ham fag kitonya yadi has taw. 32 Ham idwa fiya man has taw hayo ogali, no ka lamang kaawa hayo ka hayo fakaawaon. Nyawa ka ha manga ogali dwat fadi wad twa kaawa ka manga kaawa has taw. 33 Ham idwa fiya man has taw hayo ogali no ka lamang syagan igtogbong hayo ka hayo fagtogbongon. Nyawa ka ha manga ogali dwat fadi wad tomogbong has syagan igtogbong hanya. 34 Ham idwa fiya man has taw hayo ogali no hayo fagfaoyamon ka lamang syagan igbayad. Nyawa ka ha manga ogali dwat igfaodoyaman ha sadi ha sadi, ta no twa di kitay bomayad di aban. 35 Yatokitay, ham ngap fag kaawa hayo manga kaaway, fag falag has fiya. Ham fag faoyam has taw nyawa ham idwa ha faglagon ista bato bayadon. Hayo ogali no kitonya, dahol hayo tanggapon fasalamat aban, hanggan ham imbali in Diyos manga anak. Is Diyos, ka abwat man has fagayo fagayo it kangayanan, fiya it ogali has manga taw kadyapdig baya hanya, has mangag sadili odi. 36 Ham fag maawaon kito yadi hayo Ama. 37 Ham fag idwa gato fagaba hayo kapariho, ginya madis Diyos idwa yadi gato hayo. Ham fag idwag fatohoyan hayo manga iba has fadosaan, ginya madis Diyos idwa yadi fatohoyan hayo has fadosaan. Ham fag idwa ha bodbotangan ha sadi ha sadi, ginyas Diyos idwa yadig botang hayo manga ogali dwat. 38 Ham fag madisagon has taw, ginyas Diyos domisag yadi ha hayo napno wa gantangan, maaligigan ya ngadi, hanggan wa nafaambobong wan. Maskin no kinday hayo gantangan has taw, kitonya yadis Diyos no gomantang ha hayo. 39 Ginya madis Hisos nafalimbay ya ngay has manga bota baliwa, naintaw, Sadik bota syagan awkin gomamat ka sadik bota, ham gayfan? No kitonya ta pariho imdagdag has gobang, idwa aw? 40 Idwa ha katogbong ka madonong man kagfaadal hanya, dapat kagfaadal no nafwayong wa fiya fiya, ka katogbong imlobos yadi kito kagfaadal hanya. 41 Kana mayon haw nogbantay ka dihot sam fadwasay basad mata, dapat hagfabayaan ka sa hyamo sadili mata, bilang wa dahos batang? 42 Kinda araw haw no lomwang ha hyamo fadwasay, Ho nangos bomol ka dihot gi hyamo mata, dapat hadyag lag kitay ka sa hyamo mata, manghara, daho was batang. Hagfataka odi, gwadi bol yap ka daho was batang ka sa hyamo sadili mata, ha bago di lomag fiya fiya, ginya madi ha tomwa bomol ka dihot gim fadwasay mata. 43 Idwa ha fiya fag fon hayo kagbohad dwat. Idwa yadi ha dwat fag fon hayo kagbohad fiya. 44 Ka bohad kagfalag no kana fag hayo it fon. Tam idwag bol bohad igos gis fon madogi, idwa yadig fangta manga bohad obas gis hayahaya. 45 Ka taw no fiya it ogali, it fwayong fagaba yadi wa fiya, maskin it fagayfanon fagaba wa fiya. Dapat ka taw no dwat it ogali, it fwayong fagaba yadi wa dwat, maskin it fagayfanon fagaba wa dwat. No kindawasta fangayofan, kitonya yadi ka kadog. 46 Kana mayon ham no fagabag ngayan angko, Hayo wa Fon, dapat ham idwa katanog angko manga fwayong? 47 Ho homalimbawa hayo kawa has fagayo fag manga taw ka omakbang hangko, igtalinga angko manga hampang, hanggan katanog yadi. 48 Hanya kito wa sadik taw ka nahodkod abasad hanggan wa nadasog bato, bago di natorok it balay. Ginya madi, no nabaha, ka danom fadi wad nadalan hanya fag balay, dapat idwan hawig maskin abasad it hodkod. 49 Dapat ay, kagtalinga angko manga hampang, dapat idwa katanog, kito sadik taw nahalig balay idwa abasad it hodkod. Ginya madi no nabaha, ka danom no nadalan hanya fag balay, dagos wa nakfo, insarowayan lamang.
71 Ginyas Hisos nontabo wagfaadal tonya fagayo hasta fagdogan, hawas basad banwa Kapirnaom. 2 Yabay, sinya ha sadik fagtahinan sondalo taga Roma, mahoway wa dahol hat nasali sogowan ka ha sagit, kaakbang wa kahatay. 3 Ka sondalo fagtahinan no nadog kawa han Hisos, nasogo manga fagtahinan Hodyo tiba, kaarakitay fomwayong han Hisos, Fag hayap ista balay fagtahinan sondalo, fafiyaan nangos it nasali sogowan. 4 Ka manga Hodyo no nalag in Hisos, tagfahowayon wa no kampang, iglwang, To fag fagtahinan sondalo fiya wa fagtogbongon, 5 kawa hanya kaawa wa dahol intam layonan taw, manga Hodyo. Hanya yadi ka nafahalig intam fanimbaan sas Kapirnaom. 6 Ginyas Hisos naofod is taw. Ta no kaakbang wa bangan has fagtahinan sondalo balay, ka fagtahinan sondalo nasogo it manga fakilalaon kaarakitay tomagbo in Hisos, iglwang, Ham fag fwayong kiti han Hisos, Ama, hawag fayaya ngap hyamo, ho kaya wa hyamo, nyawa hadwam dasog hangko balay. 7 Aho idwa fiya hampangon ha hyamo, yakanga hodwa has nyamo. Ka fiya, haw fag lomwang yap man kitay, Ka sondalo sogowan fag imfiya wan, ginya hanya fag imfiya ngay. 8 Kawa aho sadi yadik taw kagfasakop has manga abwat fag kangayanan, dapat ay, aho ha fagsogoon yadi manga sondalo. Aho noglwang ha sadi, Ha fag hanya wan, yakanga hanyan tanog wan. Aho noglwang ha sadi ya, Haw fag hastay, hanyam bangkad wan. Aho noglwang hangko nasali sogowan, Haw fag gibolon kito, hanya omibolon wa tonya. 9 Yakangas Hisos no nadog it hampang, indolaw wan, nasayango has fakaaywanan fag manga taw ka goyan hanya, ginyag lwang, Hogfadog ha hayo, hodya ha donggon no kitay iba taw kitonya wa kagsyag angko marigon, nyawa sawan Israil manga hasokfonan. 10 Ka fagtahinan sondalo manga nasogo haraw, no nwali hasta balay, ta nalag kitay kat nasali sogowan infiya wa yabay. 11 Ngalay di aban is Hisos haya sadik banwa, banwa Nain. It manga katogbong naofod hanya hanggang ka fakaaywanan fag manga taw natahin yadi. 12 Da Hisos no kaakbang wan has sakbawan alad banwa, ta natoon nahablang ka manga manlobgob sadik ama ka natay. Kat ina danwa balo, hanggan to kasta faglobgobon, it anak ama sadi sadi. Kaaywanon ka gofod hat ina, ka manlobgob. 13 Kagfon intam no nalag ka ina balo, in-awa hanya, iglwang has ina, Haw fag idwa goraw. 14 Is Hisos naakbang a, natawid ka fwalidan natay, yakanga kagdiya intorosan yadi. Is Hisos nahampang has natay, nalwang, Bago ama, hoglwang ha hyamo, haw fag kabangon wan. 15 Ka natay haraw, intokaw ya, dagos wa nahampang. Is Hisos nafaano ya hat ina it anak bago ama. 16 Ka manga taw indala wa dahol dahol iglag, dapat igfasayagdog yapdi han Diyos, taglwang, In Diyos fangampang sadi, madonong wa dahol, inbangkad hantam. Is Diyos in-awa waglag it sakop. 17 To kan Hisos naibolon indog wa has fagayo sas sakop Hodiya hanggan sadi wak dahonya banwanan sas ligongan. 18 Is Hwan kagfatogna manga taw, it manga katogbong nabarita hanya to fagayo kan Hisos naibolon. 19 Ginyas Hwan nafili it katogbong dowa, nasogo hasagfon intam kaarakitay omintaw, Haw awkin kawan Diyos natogon kitay imbangkad hastay, ngatay mi ha fagfanayaon yapdi sadi ya. 20 In Hwan katogbong dowa, nondasog han Hisos, nalwang, Is Hwan kagfatogna manga taw itfagonan, nasogo hyami hastay kaarakitay mi omintaw hyamo ngatay haw awkin kan Diyos natogon kitay imbangkad hastay, ngatay mi ha fagfanayaon yapdi sadi ya? 21 Gis nanya yadi fag manga masohod, in Hisos nafafiya kaaywanon, ka manga inhori it sagit, hanggan ka ha manga labang kagfahoriyan hanya. Nafafoga ya aywan ka manga bota. 22 Ginya madis Hisos nafwayong has taw, Ham fag goli ya ngawan han Hwan, ham fwayongan ka hayo lagan hanggan donggon. Fag fwayong kitay, ka manga bota infoga ya ngat mata, ka manga infihong it bitis iglahaw ya, ka manga ha kitong infiya yadi wan, hanggan ka manga bongkok igdog ya, ka manga natay inboyag ya, hanggan ka Fiya fag Barita nafaadal has manga myabog yadi. 23 Ka taw kadwa gadowan igsyag angko bomaya wan. 24 In Hwan manga sogowan nonlahaw wan, is Hisos nafwayong has manga taw kawa han Hwan, iglwang, Kana mayon hyabi, ham no hawas basad fakahyabogan? Kana ka hayo fagasolopon sinya? Ham awkin kasayag lag ka bagyo nogfarayfayan igfarayfayan ka iyano? 25 Kana ham no hanya? Ngatay hayo fagasolopon sinya sadik taw myasa wa fiya it manga solong rotay? Gwadi sawas gorangon balay ka myasa wa fiya it solong rotay, kawa maakwa wa dahol, idwa ha korang. 26 Kana orongan ka hayo fagasolopon sinya? Ngatay in Diyos fangampang sadi? Ala ngay, tonya wan, hanggan hogfwayong ha hayo, ka hayo lagan sinya it kangayanan bohondi kito kan Diyos manga fangampang. 27 Maskin is Hwan kat faglwangon sas Kasoratan noglwang kitay, Fanlag ngay, hogsogo angko sogowan ka gomona hyamo. Hanya mamatalaga hyamo bato lahawan. 28 Hogfwayong ha hayo idya ha anak kansagaya git ina ka abwat man in Hwan it kangayanan, is Hwan kagfatogna manga taw. Dapat, ka ogbot man has fagayo san Diyos sakop it kangayanan, abwat man in Hwan. 29 Ka manga fanohot bohis Roma inaktom has manga taga sinya fag manga taw igfasayagdog in Diyos no nadog in Hisos fwayong. Tonya fag manga taw kan Hwan nafatogna itfagonan. 30 Dapat ka manga Farisiyo hanggan ka mangag faadal Batasan Hodyo igdayo di in Diyos fasadan has taw, idwa yadi han Hwan kaarakitay igfatogna. 31 Is Hisos nalwang has taw, Kinda odi kin angko fatoladan ka kati fag manga taw, ham gayfan? 32 Kito odis manga anak matokawan sas famahowayan, igtawag hat manga ofod anak, iglwang, Mi fadi wad nafaoni palawta, dapat ham kafang digtayok. Nyawa hami nangodgorawan, ham kafang yadi goraw. 33 Kawas Hwan, kagfatogna manga taw nonbangkad hyabi, nomtoon idwa kwan hanon kaarakitay mandarangin mahogod, idwa yadi ginom alak. Yakanga ham iglwang kitay Labang wa kagfon hanya. 34 Ginya madi, aho man, Kanbali Taw, inbangkad hastay, kwan yadi hanon hanggan ginom kitos iba taw, ginya ham iglwang, Yabay, to fag taw mahogod wa kwan a, iglango ya ngadi, koyog yadi has manga fanohot bohis Roma, hanggan has tiba taw ka ha dwat fag manga ogali. 35 Nyawa ham iglwang kitonya, in Diyos manga anak ogali kagfatohoyan kitay in Diyos kadonongan myasa wa fiya. 36 Ginya madi aban, sadik Farisiyo nataban in Hisos hat balay kaarakitay manayowan kwan. Is Hisos hawas balay Farisiyo a, masorayan dayo fanganan. 37 Sinya fag banwa ha sadik ina, manga taw twa wa kitay dwat wa dahol it ogali. Tonya fag ina nadog kitay is Hisos kwan sas balay Farisiyo, yakanga ka ina nadiya sadik sohadan, alabastoro fag bato, napno famabanglo. 38 Ka ina naakbang han Hisos dayo goyoy hat akbang bitis. Ka ina goraw a, dagos wagfayamos wan in Hisos bitis it lowa, ginya madi it famyad it bok wan, naayok ya ngadi in Hisos bitis, ginya nalidgid ya ngadi famabanglo. 39 Ka Farisiyo kagtaban in Hisos hat balay, no nalag ka ina ibolon, it fangayofan iglwang, To fag ama non Diyos wa fangampang orongan, hanya fadi wad twa no faktaw, hanggan no kindat ogali ka ina kagsapkid hanya, gwadi dwat wa dahol it ogali. 40 Is Hisos nasagot in Simon fagayfanon, nalwang, Simon, aho ha fagfwayongon hyamo. Is Simon iglwang, Haw kagfaadal, kana ara tonya? 41 Is Hisos igtoltol kiti, Ha dowak taw ha bayadan ha sadik taw. Ka sadi kat bayadan limak daan dinaryo, insadi lima dik safolok dinaryo. 42 Ta nodwa nasyagan nabayad, ka nafaoyam idwa yadi nasohot ka fagayo dowa. Da fag taw gis dowak taw ka ha bayadan kwarta ka bohondi kito ka sadi nogbaya ka nafaoyam? 43 Is Simon nasagot, Angko fangayofan kagbaya wa dahol hanya, ka dahol it halga kat bayadon. Is Hisos nalwang, Anod, tonya wa ngay. 44 Ginyas Hisos igbantay has ina a, dapat iglwang han Simon, Ha awkin iglag to fag ina? Gwadi aho nonsakbaw ha hyamo balay, hadwa nadisag angko danom fanggonaw angko bitis, dapat to fag ina nafayamos it lowa angko bitis, it famyad it bok ya ngadi. 45 Hadwa yadi naayok angko, dapat aho indasog di ngay, idwa nafagomon naayok angko bitis. 46 Hadwa yadi nalidgid langis olibo angko alfoyo, dapat hanya nalidgid famabanglo angko bitis. 47 Yakanga hogfwayong ha hyamo, maskin hanya galwasi wa dahol angko, kalag wa kitay fagayo it manga naogali dwat kaaywanon, inliyam wan. Dapat ay, no sayok ista naogali dwat kanliyam, idwa bangan igfalag kitay hanya galwasi angko. 48 Ginyas Hisos nafwayong has ina, Im manga naogali dwat fagayo inliyam wan. 49 Ginya madi ka mangag sayo in Hisos, it manga fangayofan iglwang, Kana mayon to fag ama nogfaliyam ista manga naogali dwat, fakta kin nangos tonya? 50 Dapat is Hisos nalwang has ina, Maskin haw igsyag hangko haw inbawi wan, nyawa ha mwali wan kati, im fangayofan inhoway wan.
81 Ginya madi, idya dogay aban, is Hisos nanabang has iba banwanan a, nasafong wan ka manga banwa hanggan ka manga forowan balay sas dayo banwa. Natoltol hanggan nafaadal ka Fiya fag Barita kawa han Diyos sakop baliwa. Ka Safolo-ha-Dowa nahin yadi wan Hisos. 2 Ha manga ofod yadi ina kan Hisos nafafiya it sagit hanggan nafalagyo ka manga labang. To fag manga ina kawa da Mariya taga Magdala, fitok labang kan Hisos nafalagyo ginya fag ina, 3 hanggan da Hwana, in Kosa babay. Is Kosa in Gorangon Hirodis katogbong. Da Sosana hanggan aywan yapdi ka tiba ina. To fag manga ina natogbong in Hisos hanggan hat manga katogbong kawa gista sadili manga kaakwaan. 4 Ginya madi, gi sadik banwa, gi sadik banwa, manga taw kabarangkadan wan, gakbang han Hisos. Ginyas Hisos natoltol to fag halimbawa, 5 Sadik ama fangiyab hawat namay kaarakitay mamamgas. Hanya nogfamgas, igsabod odit binhi, yakanga tibak botol indagdag has boknga dalan a, ta nalid lamang, yakanga ka manga manok nahwan wa tonya. 6 Ha akwa yadi manga botol indagdag has daga libabaw, baba odi dalifi. Tonya natobo ongay, dapat inlayong ya, maskin ka daga kamaya madali. 7 Ha manga botol yadi indagdag ha sayo manga lamnon madogi. Ka manga lamnon inlangba, nasakfaw di ka manga tanom. 8 Dapat ay, ha akwan dagdag has fiya fag daga a, natobo, nabohad, fagayo fag bolhog myasa sadik daan no nabohad. Ginyas Hisos nafwayong marigon, Ham no ha manga talinga ya ngadi, fag talinga wan. 9 In Hisos manga katogbong naintaw in Hisos no kanat kahologan it natoltol halimbawa. 10 Is Hisos nasagot, Indisag wa ha hayo kitay ham fag tomwa ka mangadyag fadogon kawa han Diyos sakop baliwa, dapat ka tiba, kawa gis manga halimbawa ta no domog kaarakitay, Nyawa ta bomantay, tadwa twaglag, Nyawa tagtalinga, tadwa yadi twagdog. 11 Is Hisos igfadagos yapdit hampang, nalwang, Kito kat kahologan ka halimbawa. Ka binhi in Diyos wa hampang. 12 Ka botol kandagdag has boknga dalan kawa ka mangag talinga, dapat is Fandaya indasog igfaliyam gista basad fangayofan kan Diyos hampang kaarakitay tadwa katiwala in Diyos, idwa yadim bawi. 13 Ka mangan dagdag sas daga libabaw baba dalifi, kagtalinga in Diyos hampang a, igtanggap wa ongay, masolong wan, no kitay di, dapat idwag dalid abasad sat fangayofan. Sadik ngalay intiwala wan, dapat no hagsolay is taw, tagdayo wa dagos. 14 Kandagdag ha sayo manga lamnon madogi, igfahalimbawa ka mangag talinga ongay, dapat ay, kat manga fagisipon fagaba hat manga kakorangan, ngatay has kaakwaan, ngatay has kasolongan baliwa, igsakfaw di in Diyos hampang, yakanga idwag bohad sasta basad fangayofan. 15 Dapat ay, kansabod sas fiya fag daga, kawa mangag talinga han Diyos hampang, gano tonya fiya fiya sasta basad fangayofan, matanogon hanggan malinay. Ta gagwanta yadi, yakangan Diyos hampang igbohad sat manga ogali. 16 Tam idwag santik salong ginyag fwalid sas daga polahan, ngatay sas daga igyanan. Yatokitay tam igsalifit ka salong sas salangan kaarakitay nyawa faktaw kagsakbaw lomag mayawa. 17 Idwa ha matagowan kadwam lag aban, idwa yadi ha mafyaloman kadwam dog, hanggan imdiya has faglagan aban. 18 Maskin ngay, ham fag matagahan no kinday ham nogtalinga. No ka ha akwa, ha tanggapon ya domwag, dapat kadwa ha akwa, nyawa hanya gayfan ha akwa wa ogbot, imbol di tonya aban. 19 Ginyan Hisos ina hanggan it manga fadwasay inbangkad han Hisos, dapat tadwa syagan gakbang hanya kawa aywan wa dahol fag manga taw. 20 Ka manga taw iglwang han Hisos, Im ina hanggan im manga fadwasay sawas sokayan kasaya hono lomag hyamo. 21 Dapat is Hisos igsagot has taw, Ka mangag talinga in Diyos hampang hanggan katanog, tonya wa kangko ina hanggan angko manga fadwasay. 22 Ginya madi aban, is Hisos hanggan it manga katogbong, nasahay has basad baloto. Is Hisos iglwang, Tam domifay wa has difay linaw. Yakanga tan-ginan wa ngay. 23 Ka baloto noglahaw wan, is Hisos intoyog wan. Ginya madi araw nabagyo dahol dahol sas baba linaw. Ka baloto kapno wa danom, yakanga ta ganong wamlogom has daga danom. 24 In Hisos manga katogbong nafolaw hanya, taglwang, Hyami Fon, hyami Fon, kalibang, tam kalogom wan ha daga danom. Is Hisos infolaw wan, nangabaya ka bagyo hanggan ka taob kagsaribwaan. Ginya madi intohas ya. Yabay inhalyaw ya ka dagat. 25 Ginyas Hisos iglwang has taw, Kana ham nodwag syag angko? Dapat ay tandolaw waglag a, tandala yadi wa dahol, ta garintawan ha sadi ha sadi kitay, Yabay, faktaw to? Twa oman igfatohas ka bagyo, manga taob, ta katanog wat manga fwayong. 26 Ginya madi araw tandagsa sas banwanan manga Girasino, sas masohod yadi sakop Galiliya. 27 Is Hisos indokson di ngay, ha natagbo hanya sadik ama gis banwa, ha manga labang kagfahoriyan hanya. Tonya fag ama dogay wan fawag solong rotay, idwa goli hat balay, sa odi sayo manga lohib fanlobgobanan taw. 28 Ka ama no nalag in Hisos, narokyaw marigon a, nanlibabaan san Hisos atobangan, iglwang, Hisos, is Diyos, ka Abwat-man-has-fagayo-fagayo, it Anak, kana haw nogmawat angko? Hogfaaronganon hyamo kitay, ha fag idwag fahoriyan angko. 29 Hanyag lwang kitonya maskin haraw is Hisos nasogo ka labang kitay fag galin wa gis nyamo fag ama. Nogbanwan ka labang mahogod wagfahoriyan ka ama, hanggan nyawa hagbantay di hanya, nyawa tagbinggas, nyawa ta gafos wa manga lobid baol, hanyag bogloy lamang tonya, ginya ka labang igfatabog hanya has basad fakahyabogan. 30 Ginyas Hisos naintaw hanya, Faktam ngayan? Maskin aywan fag manga labang kagfahoriyan tonya fag ama, hanya nasagot han Hisos, Ahos Mahabanan. 31 Ka manga labang igfaawaon han Hisos kitay, Haw fag idyag sogo hyami has fakaabasadan. 32 Gis nanya ha sadik tifonan baboy ayo ayo kwan manga lamnon sas akbang fag moyod. Ka manga labang nafaaronganon in Hisos kitay, Mi fag ha yap man has basad manga baboy nangos, yakanga is Hisos nafaangay wa ngay. 33 Ginya ka manga labang nalin gis ama, hawas basad manga baboy. Ka tifonan manga baboy dagos nanhadalandanan wa madali has lwad indahodan, has basad linaw dahol, fagayo inlimos wan. 34 Ka manga gano ista tifonan baboy no nalag ka manga baboy inlimos, ta nalagyo wan, namarita has manga basad banwa hanggan sas ligongan. 35 Ka manga taw inbarangkadan namantay no kana ka sinya. Ta nondasog han Hisos, taglag ka ama ka ha manga labang haraw. Kati matokawan san Hisos dayo bitis, ha solong rotay a, it fangayofan ogali mandi. Tandala waglag. 36 Ka manga nalag is Hisos nogfafiya ka ama natoltol has taw no kinda mayon nonfiya ka ama ka manga labang fagfahoriyon haraw. 37 Ginya madi ka manga taw gis sakop banwanan manga Girasino fagayo nanagad kitay is Hisos fag lahaw gista banwanan kawa tandala wa dahol dahol. Yakanga da Hisos nasahay ya ngawa ha basad baloto a, infwali wan. 38 No kitay di ka ama ka manga labang nagalinan haraw, garonganon wa kasaya mahin in Hisos, dapat is Hisos nafaoli yapdi, iglwang, 39 Haw fag goli yapdi, haw fag toltol yap has taw kan Diyos naibolon kafiyaon ha hyamo. Ginya ka ama nwali wa ngay, igbarita has taw sadik dahonya banwa in Hisos naibolon ha hanya kafiyaon. 40 Ginya madi, da Hisos nonfwali ya has difay linaw, ka manga taw igbaya waglag in Hisos, kawa fagayo fagayo fag manga taw igfanaya hanya. 41 Ginya madi ha sadik ama, is Hayro, kagbahala sas fanimbaan Hodyo, indasog han Hisos, nanlibabaan san Hisos atobangan, igfaaronganon kitay, nangos fag hayap it balay. 42 maskin it anak ina sadi sadi, manga safolo ha dowak fangaraw it kadogayan, kafos wa ipsaw. Is Hisos noglahaw yapdi, manga taw igdarotdotan wa hanya. 43 Ha sadik ina mahoyogan yadi has taw, safolo ha dowak fangaraw idwa kafiya no kasagit ina. It manga botang namin wan kawat bayad nogfabolong has taw, dapat idwa ha syagan igfafiya hanya. 44 Ka ina naakbang han Hisos gis ginanan, dayo goyoy, nasapkid in Hisos tobwan tobwan rotay, ginya madi dagos wanfiya it sagit ina. 45 Ginyas Hisos naintaw has taw, Fakta ka nasapkid angko? Idwa ha nabaya, yakangas Pidro nalwang, Angko Fon, maskin ka fakaaywanan igligong wa hyamo, taw igdarotdotan wan, ta natanog odi hyamo rotay. 46 Dapat is Hisos iglwang, Hogdog ha natawid angko. Hogdog hanbol wa karigonan gingko. 47 Ka ina no natwa kitay idwa syagan igfyalom it naibolon, naakbang han Hisos, nanlibabaan hat atobangan, karokog wa kadala. Sasta fagdogan fagayo, ka ina nafwayong no kana mayon no nasapkid in Hisos, hanggan no kinday nonfiya wa dagos. 48 Is Hisos iglwang hanya, Anak ina, maskin hagsyag angko, haw infiya wan. Nyawa ha goli wa kati, im fangayofan fag imhoway wan. 49 Is Hisos no kampang yapdi has ina, sadik ama inbangkad gin Hayro balay. Nafwayong han Hayro, Hyamo anak ina natay wan. Hawag falibang yapdi kagfaadal has taw. 50 Is Hisos no nadog di ngay tonya, nalwang han Hayro, Haw fag idwa kadala, haw fag syag di ngay hangko, ginyam anak imfiya ya. 51 Da Hisos nondasog hasta balay, idwa nafaofod istaw has basad balay, no bohonwa da Pidro, da Hwan, da Santyago, hanggan ka anak ina it ama hanggan ina. 52 Fagayo fag manga taw ka sas sokayan igwaraywayan wan, ta goraw wan ka anak natay. Dapat is Hisos iglwang, Ham fag idwa goraw, ka anak idwa natay, matoyogan di. 53 Dapat ta kasay odin Hisos maskin ta natwa kitay ka anak ina natay wan. 54 Dapat is Hisos natawid ka anak ina gamat, ginya nalwang, Anak, haw fag kabangon wan. 55 Ginya madi ha ipsaw ya, inbangon wa dagos. Is Hisos nalwang ya has taw kitay, Ham fahwanan fafa has anak ina. 56 It manga magorang indolaw wan dapat is Hisos natogon has taw kitay, Ham fag idwag fwayong nyawa haday ka hayo mata lagan.
91 Ginya madi sadi ya ginan is Hisos nafatifonan ka Safolo-ha-Dowa, nafalobos has taw it kadonongan hanggan kangayanan igfalagyo manga labang gis taw, hanggan igfafiya yadi ka ha manga sagit. 2 Is Hisos nafalahaw it manga katogbong kaarakitay igtoltol has taw kawa han Diyos sakop baliwa, hanggan fafiya yadi ka manga ha sagit. 3 Is Hisos natogon kitay, Ham fag idwa ha balon nyawa kana, ham noglahaw, nyawa sokod, nyawa boyog, nyawa fanganon, nyawa kwarta, nyawa hayo tobos rotay, fag idwa ha diya. 4 Nyawa siday hayo nagdasogan fag balay, ham fag sinya wak gigya ham nodyag lahaw ginya fag banwanan. 5 No sida fag foro taw nodwag fasakbaw hayo, ham no lomahaw ginya, fadagdagan ka fogis daga gi hayo manga bitis, bilang wagfaayfan ka taga sinya fag manga taw. 6 Yakanga ka manga katogbong inlahaw wan, hawas manga forowan balay sas ligongan, igtoltol ka Fiya fag Barita nyawa haday, igfafiya yadi ka manga ha sagit. 7 Gis nanya, is Hirodis ka gorangon sas sakop Galiliya no nadog fagayo kan Hisos naibolon, gadowan it fangayofan maskin tibag lwang kitay, is Hwan inboyag ya kagfatogna manga taw hyabi. 8 Tibag lwang is Iliyas inlag ya. Tibag lwang in Diyos fangampang sadi hyabi, kati inboyag ya. 9 Yakangas Hirodis iglwang, Gwadi ho nafalifong wan in Hwan liyog. Fakta fag taw is nyamo hayo fagbaritaon ka gibolon kitonya? Yakangas Hirodis gwayan wa kasaya lomag in Hisos. 10 Aban, ka manga Fandiya-Barita no nwali wan, ta natoltol han Hisos it manga naibolon fagayo. Ginyas Hisos nafasaman yapdi gis fakaaywanan, nataban ka Safolo-ha-Dowa hawas sadik banwa, banwa Bitsayda. 11 Ka fakaaywanan fag manga taw no natwa kitay hanya wan, ta ngap naoyan ya inda Hisos. Is Hisos igbaya di ngap iglag ka manga taw ta nondasog wan. Is Hisos natoltol has taw kawa han Diyos sakop baliwa a, nafafiya yadi ka ha manga fagdogon. 12 Araw, myanit no kalibaba wan, ka Safolo-ha-Dowa naakbang han Hisos, nalwang, Falahawan yap nangos has manga tifonan balay sas ligongan ka manga taw, kaarakitay ta somayak it hanon hanggan it manga toyogan. Tam istay sawas basad fakahyabogan. 13 Dapat is Hisos nalwang, Fag ham wa ka domisag fanganon has taw. Taglwang han Hisos, Tam idwa hanon nodwa limak tinapay, dowak oyang odi, mi nodwa hawas tindahan somali fanganon kaarakitay has manga taw fagayo. 14 Maskin ka manga ama sinya manga 5,000. Dapat is Hisos iglwang hat manga katogbong, Fatokawan ngakin ka manga taw malayonan, myasa limak safolo ka sadik layonan. 15 Tantanog wan, yakangan tokaw ngay fagayo. 16 Is Hisos nabol ka limak tinapay hanggan ka dowak oyang, natangdan has tongod a, nabaya han Diyos ka fanganon, nafaarogbotan, ginya nadisag hat manga katogbong kaarakitay homoray has manga taw. 17 Fagayo nahwan wa a, napsog wan. Ka manga katogbong natifon ya kasta sawad nakanan mafaarogbotan, safolo ya ha dowak boyog ka napno. 18 Ginya madi aban, is Hisos nogdarangin sadi sadi, it manga katogbong sinya yadi wan. Araw is Hisos gintaw hat manga katogbong, Fakta hono aho, manga taw noglwang? 19 Ta nasagot, Tibag lwang kitay haw is Hwan kagfatogna manga taw hyabi, intibag lwang haw is Iliyas, intibag lwang haw kan Diyos fangampang sadi hyabi inboyag ya. 20 Ginyas Hisos naintaw, No ham kaglwang, faktaw aho, ham gayfan? Is Pidro nasagot, Haw wa kan Diyos-natogon-Famawi. 21 Is Hisos natogon marigon hat manga katogbong kitay, fag idyag fwayong nyawa hada fag taw kitay hanya kan Diyos-natogon-Famawi. 22 Ginyas Hisos nafwayong kitay, Aho Kanbali Taw aywan angko fagagwantaon manga mahori aban. Ka manga fagtahinan sas banwa, hanggan ka manga fagtahinan fagalan-han-Diyos, hanggan ka mangag faadal Batasan Hodyo domayo hanggan wa fahatay angko. Dapat ay, aban, sas fatolo fag sirang ahom boyag ya. 23 Is Hisos nafwayong has fagayo, Nyawa faktaw no kasayag tahin angko, falibangan fagaba it sadili fakasayaon, fasanan it sadili fatimbangan hayo sirang sirang, ginya madi tahinan wangko. 24 Not sadili haboyagan it fagfahalgaon, tonyam liyam di, dapat ay, kadwa kwangit it haboyagan kawa hangko, it haboyagan idwam liyam. 25 Kana kat fakinabangon, ham gayfan, sadik taw no omafo sadi wak dahonya baba daga, halimbawa, dapat ay, it sadili haboyagan nomliyam di aban? Yatokitay idwa ha fakinabang. 26 Aho, Kanbali Taw, nombangkad ya aban, malagan sangko angko kafiyan, hanggan angko Ama kafiyan hanggan ka manga maliyaw fag anghil kafiyan. Gis nanya aban ho maya wagfadog ista ngayan nyawa faktaw, hanya no kayag fadog angko ngayan hanggan angko manga hampang has manga taw kati fag masohod. 27 Dog ngay, bonwa bohag, tiba taw kastay idya matay nodya lomag in Diyos sakop. 28 Ginya madi yabay, nonsagaya manga walok sirang is Hisos no natoltol kitonya, hanya nataban inda Pidro da Hwan da Santyago, hawas moyod kaarakitay mandarangin. 29 Is Hisos nogdarangin yapdi, it walong in-oman, fiya wa dahol kabantay, it rotay in-abohay wa dahol, masilaw wan. 30 Yabay ha dowak ama, da Mwisis da Iliyas, dagos wanbangkad, nangampangan han Hisos. 31 Ka gim tongod fag kafiyan kalag sanda Mwisis. Inda Mwisis da Iliyas fagtoltolon kawas Hisos lomahaw wa aban ka kaakbang wamlag sas banwa Hirosalim. 32 Da Pidro intoyog wa fiya fiya gis nanya, dapat ay, ta nonfolaw, ta nalag in Hisos kafiyan hanggan ka dowak ama ka malindogan sat akbang. 33 Ka dowak ama no kalahaw wa gin Hisos akbang, is Pidro nafwayong han Hisos, Yabay, hyami Fon, kafiyaon, tam fag istay yapdik madogayan. Mi fomalo tolok dongdongan, insadi hyamo, insadi in Mwisis, insadi in Iliyas. Ka orongan wan is Pidro idwa yadi natwa it bato lwangon. 34 Is Pidro no kampang yapdi, sadik linyabo dagos wa nalanbong is taw, yakanga tandala wa dahol dahol. 35 Gis basad linyabo ha nahampang, iglwang kiti, To angko wa Anak, angko wa nafili. Fag tonya wan ka hayo fagtalingaon. 36 Ka hasnog nontohas wan, yabay tadwa ha lagan taw no bohonwas Hisos lamang. Tadwa naawang, tadwa ha nafwayong yapdi gis nanya ista manga mata lagan nyawa haday fag taw. 37 No bago wa marom da Hisos no nwali wa has lwad, kaaywanon fag manga taw natagbo hanya. 38 Ha sadik ama sas basad fakaaywanan natawag marigon, iglwang, Haw kagfaadal, bantayan nangos angko anak ama, kawangko anak idwam dowa. 39 Labang kagfahoriyan hanya, sadi odi ginan igrokyaw. Ginya kidkisayan wan hanggan wat bibig igboraan wan, igfabaran wat sadili habilogan. Ka labang kafang wa galin gi hanya. 40 Hogfaaronganon ha hyamo manga katogbong kitay, ta nangos faalinan wa ka labang, dapat tadwa nasyagan nafaalin. 41 Is Hisos nalwang has taw, Ham kawa ka kati fag masohod fag manga taw dwat wa dahol, kawa ham idwa yadig syag angko. Ginahin ya kin nangos aho fag omofod yapdi hayo, ham gayfan? Kandogay day aho fag gagwanta yapdi hayo? Ginya nalwang has ama, Tabanan im anak hastay. 42 Ka anak no kaakbang wan Hisos, ka labang nafahakfo hanya ha baba daga, yakanga nangidkisayan ya ngawan. Is Hisos nangabaya ka labang, nafafiya ka anak, ginya nafaano ya hat ama. 43 Ka manga taw indolaw wan in Diyos dahol fag kadonongan. Fagayo fag manga taw no kadolaw yapdin Hisos manga naibolon fagayo, is Hisos nalwang hat manga katogbong, 44 Ham fag matohodan angko fwayong kitay, angko ofod im-oyon angko manga kalaban aban, fagamat has taw angko, aho Kanbali Taw. 45 Dapat tadwa natwagdog kan Hisos faglwangon maskin is Diyos idyag faangay kitay ta fag tomwagdog it kahologan, hanggan ta kadala yadi gintaw hanya. 46 Araw ogbot in Hisos manga katogbong igdaraogan no fakta sas taw ka abwat it kangayanan. 47 Is Hisos no nasarom ista manga fangayofan, nagamit sadik anak ogbot a, nafalindog sat akbang. 48 Ginyas Hisos nalwang has taw, No faktaw kagtanggap to fag anak maskin galwasi angko, aho yadi kat fagtanggapon. Kagtanggap angko, igtanggap yadi kagsogo angko. Ka ogbot man sa hayo it kangayanan, tonya ka dahol man has fagayo it kangayanan. 49 Is Hwan nafwayong in Hisos kitay, Hyami Fon, mi nalag sadik taw ka gwas hyamo ngayan nogfaalin ka labang. Mi nabando hanya maskin idwa gofod intam. 50 Dapat is Hisos iglwang kitay, Ham fag idwag bando hanya maskin kadwag laban intam, intam yadi wa kaoyon. 51 Is Hisos no kaakbang wa aban kaalin han Diyos banwanan ham tongod, hanyag tikis waglahaw has banwa Hirosalim baliwa. 52 Nafagona wa ka tiba. Tanlahaw wa ngay hawas sadik tifonan balay sas sakop Samariya, kaarakitay mamatalaga in Hisos bato hadasogan. 53 Dapat ka manga taga Samariya kafang igtanggap inda Hisos maskin tagdog it hadasogan orongan hadis Hirosalim. 54 Da Santyago da Hwan no natwa kitay ta kafang igfasakbaw in Hisos, taglwang, Hyami Fon, haw aw igfaangay di mi nogfadagdag afoy gis tongod kaarakitay tamsonog? 55 Dapat is Hisos nabaringan dit liyog, nangabayas taw, nalwang, Ham idwa twa no kinday hayo manga fangayofan. Maskin aho, Kanbali Taw, inbangkad hastay, bohonwa kitay domaog manga taw, yatokitay, ahon bangkad kaarakitay bomawi manga taw. 56 Yakanga ta nafadagos it lahawan ha sadi yak tifonan balay. 57 Ta noglahaw yapdi, ha taw ya ngag lwang han Hisos, Ho mahin yadi wa hyamo nyawa ha hadawan. 58 Dapat is Hisos nasagot hanya, Ka manga ido maisog ha oliyanan basad lohib, ka manga manok ha fogad yap man, dapat ay, aho, Kanbali Taw, idwa ha toyogan idwa ha fahowayan. 59 Is Hisos iglwang ha sadi yak taw, Ha tahinan wangko. Dapat ka taw nasagot, Angko Fon, ha faoliyan yapdingko, ho manlobgob yap angko ama. 60 Dapat is Hisos nafwayong hanya, Ha fabayaanan yapdi ka manga mahatayan, ta bahala waglobgob it sadili kapariho ka natay. Dapat kawa haw, haw fag lahaw wan, haw fag fadog has taw kawa han Diyos sakop baliwa. 61 Insadig lwang, Angko Fon, ho tomahin wa hyamo, dapat ay, ha faoliyan yapdingko, ho manogon yap angko manga iba. 62 Is Hisos iglwang, Nyawa faktaw nogtawid togda bago bago, mananom nangos, ginya haglibang yapdi hanya, idya maangay san Diyos sakop.
101 Ginya madi aban, kagfon intam nafili ya fitok safolo ha dowak manga katogbong. Is Hisos nafagona was taw ha banwanan ha banwanan, myasa dowak taw, han Hisos bato hadasogan aban. 2 Is Hisos nafwayong has taw, Kaaywanon ka aniyon kati, dapat ay, sayok di ka manga fangani. Yakanga ham fag darangin hasagfon namay kaarakitay somogo ya ka manga fangani hat namay. 3 Hogsogo hayo igbarita, ham fag lahaw wan. Yabay, aho nogsogo hayo, ham bilang wa manga anak topa, magop magop, sas fagbokngan ido maisog. 4 Ham fag idwag diya sokloban, nyawa bay-ong, nyawa lapak. Ham fag idwa kalibang igtoltolan boknga dalan, nyawa faktaw. 5 Nyawa haday fag balay ham nomdasog, fag lwang yap has taw, In Diyos kahowayan fag somakop hayo talanahan nangos. 6 Kagfon balay sinya no kasaya kahowayan, im kahowayan somakop hanya, dapat ay, nodwa kasaya kahowayan, yadwa somakop. 7 Ham fag sawa hayo nagdasogan fag balay. Ham fag sinya wak kwan, manga ginom, nyawa kana kasta nadisag, maskin ka fangibolon idwa kayag tanggap it tangdan. Ham fag idwa galin galin, ha balay ha balay. 8 Nyawa haday fag banwa hayo hadasogan, ta nogtanggap hayo, ham fakwan ista disag fanganon, nyawa kana. 9 Fafiyaan ka manga ha sagit sinya. Faglwang yadi has taw sinya fag banwa kitay, In Diyos sakop kaakbang wa has taw. 10 Dapat nyawa siday fag banwa ta nodwag tanggap hayo, ham sagayaan wa ginya, ham fag lwang, 11 Ngadi hayo lotok kantokba sa hyami yapyafa migfadagdag wan, bilang wagfaorongan kitay ham dayog dog hyami barita. Dapat ham fag twa wa kitay in Diyos sakop naakbang hayo banwanan. 12 Hogfwayong ha hayo ka manga taw sinya fag banwa it fadosa aban mahori man has fadosa manga taga banwa Sodoma hyabi. 13 Isyay wa, isyay wan, haw banwa Korasin. Isyay wa, isyay wan haw, banwa Bitsayda, maskin ka manga taga Tiro, hanggan taga Sidon, no nalag di ka hayo manga lagan madolaw, ta dan wa nasolong manga sako hyabi yapdi, hanggan natokaw sas fogis dafog, kaarakitay igfalag kitay tagsoyo wan. 14 Dapat aban, sas Sirang Fangabayan, ka fadosaan kamtohoyan ha hayo bohondi kito kamtohoyan has manga taga Tiro hanggan manga taga Sidon. 15 Haw yadi, banwa Kapirnaom, Haw aw kasayag faabwaton hyamo han Diyos banwanan sam tongod? Dapat ho fadagdag lamang hyamo hawas Daga Salad. 16 Ginyas Hisos nafwayong hat manga katogbong, Kagtalinga ha hayo, igtalinga yadingko. Kagdayo hayo, igdayo yadingko. Hanggan kagdayo angko, igdayo yadi kagsogo angko. 17 Ginya madi aban, ka Fitok-Safolo-ha-Dowa no nwali han Hisos, igbaya wa dahol dahol, taglwang, Hyami Fon, hami nogngayan hyamo ngayan, nyawa ka manga labang galin wan. 18 Is Hisos nasagot has taw, Ho nalag was Satanas no kadagdag gis banwa sam tongod, bilang wa hilat gim tongod has daga. 19 Yabay, ho nafalobos hayo angko kangayanan nyawa ham lomid manga abyanon, manga inonay, hanggan domaog intam kalaban karigonan, ham idwam kinday. 20 Nyawa kitonya, hayo fagbayaon fag bohonwa kitay kawa ham igfaalin labang, dapat kawa hayo manga ngayan insorat san Diyos banwanan sam tongod. 21 Gis nanya mandi fag masohod, ka Maliyaw fag Falad kasolongan sawan Hisos fangayofan sadi wak dahonya. Ginyas Hisos iglwang, Mama, haw kagfon im banwanan sam tongod hanggan ka daga, hogbaya hyamo maskin no hadis manga madonong, manga ha nagadalan, hadyag fatwagdog to fag manga kadonongan, dapat hagfatwagdog fiya fiya has manga taw kat fangayofan kito yadis manga anak it fakatwawon. Anod, Mama, maskin kitonya ngay kam fakasayaon. 22 Ginyas Hisos nalwang has taw, Angko Ama ka nafaano hangko fagayo fag manga kadonongan. Idwa ha kilala angko, in Diyos Anak, no bohonwa angko Ama. Idwa yadi ha kilala in Diyos angko Ama, no bohonwa aho kat Anak, hanggan no kayoday angko faangayon mamahilala has taw angko Ama. 23 Is Hisos insayangowan hat manga katogbong, ginya, idwa sasta fagdogan fakaaywanan iba taw, nalwang, Ham igbaya wan ka hayo mata lagan madolaw kati. 24 Kawa hogfwayong hayo, aywan in Diyos manga fangampang hanggan manga gorangon hyabi kasaya wa dahol lomag ka hayo lagan kati, no kitay di, dapat tadyapdi nalag hyabi. Ta kasaya nangos fag domog haraw ka hayo donggon kati, dapat tadyapdi nadog hyabi. 25 Ginya madi sadi kagfaadal Batasan Hodyo naakbang han Hisos kaarakitay igsolay hanya, iglwang, Haw kagfaadal, kana araw kangko bato ibolonon kaarakitay ho lomag haboyagan kadwa ha katabowanan? 26 Is Hisos nasagot, Kana kansorat sas Batasan Hodyo? Kana kam nabasa sinya? 27 Hanyag lwang, Haw fag galwasi in Diyos kagfon hyamo, sadi wak dahonya fangayofan, sadi wak dahonya karigonan, sadi wak dahonya isip, hanggan fag galwasi im kapariho kito yadim sadili. 28 Is Hisos iglwang has ama, Im sagot idwa nalway, fag kitonya wa kam fakatanogon, ginya hamboyag wan. 29 Kagfaadal Batasan Hodyo kafang yapdi kadaog sas toltol, yakanga naintaw ya domwag in Hisos, Fakta kangko kapariho nangos? 30 Is Hisos nafahalimbawa, nasagot, Ha sadik taw iglahaw gis banwa Hirosalim hawas lwad has banwa Hiriko. Nahablang manga tolisan boknga dalan. Ta nabol wat balokas a, nabakbak ya ngadi ka ama. Ka ama bilang wa mahatayan, ka tolisan no naobon wa hanya. 31 Natoonan araw ogbot, ha sadik fagalan-han-Diyos nadalan sinya. No nalag ka ama mafolidan, hanya nabaybay lamang sas bali karsada, igfadagos it lahawan. 32 Ginyan Libi hasokfonan sadi igdalan yadi sinya, nalag yadi ka ama mafolidan, dapat nabaybay yadi wan. 33 Ginya madi araw araw, ha sadik taga Samariya igdalan yadi sinya. Noglag ka tolisan nahablang, hanyan awa waglag. 34 Naakbang hanya a, nalidgid lana hanggan alak hat manga baran, natamong, nafasahay wa ka ama hat baba habayo, ginya nadiya hasta fandasogan fag balay, hanggan naano yadi sinya. 35 No bago wa marom hanyag bangkad dowak kwarta dinaryo, igdisag hasagfon balay. Hanya nogtogon, iglwang hasagfon balay kitay, Ha anowan to fag taw. No kayoday ka korang, ho bomayad ya hyamo, ho nogdalan ya aban, aho no goli. 36 Ginyas Hisos naintaw hasagfaadal Batasan Hodyo kitay, Faktaw sinyas tolo kagdalan hasta nadaog kagfalag kitay hanyag fapariho wan has taw ka manga tolisan nahablang, ha gayfan? 37 Kagfaadal Batasan Hodyo iglwang, Kan-awa hanya kagfalag kitay igfapariho wan. Ginyas Hisos iglwang hanya, Sogi, fag kitonya yadim ogali. 38 Da Hisos nogfadagos wat lahawan has banwa Hirosalim baliwa, indasog ha sadik forowan balay. Sadik ina, is Marta nafasakbaw inda Hisos. 39 To fag ina ha fadwasay ina, is Mariya. Is Mariya matokawan san Hisos bilog bitis a, igtalinga is Hisos nogfaadal. 40 Dapat is Marta kasaliwawa wagfatalaga fanganon. Yakanga gakbang han Hisos, iglwang, Fiya di awkin, ha gayfan, angko fadwasay nogfabayaan angko? Haw fag fwayong hanya nangos kitay, togbongan yap angko. 41 Dapat kagfon intam nasagot hanya, Marta, Marta, aywan fag manga bagay im fakasaliwawaon, 42 dapat sadi odik bagay ka orongan fagfiliyon. Is Mariya ka ha nafili ka fiya, yakanga hodwa bomol tonya gi hanya.
111 Gis nanya yadi fag manga masohod, sadi ya ginan is Hisos igdarangin. Is Hisos nontabo wagdarangin, it katogbong sadi iglwang hanya, Hyami Fon, ha fayayoman yadi hyami igdarangin, kito yadin Hwan nogfayayom it manga katogbong. 2 Ginyas Hisos iglwang, Fag kiti ham nogdarangin, faglwang, Mama, hyamo ngayan bohonwa fagswayon. Haw fag ngalay no kabali hari kagsakop has fagayo. 3 Disagan ha hyami ka fanganon ka homosto sirang sirang. 4 Haw fag faliyam hyami manga naogali dwat, Maskin migfaliyam yadi ista manga naogali dwat fagayo ha hyami. Fag idwag faakbang hyami has manga dwat kaarakitay igsolay hyami. 5 Ginyas Hisos nafwayong ya domwag, Halimbawa, insadi santam no manabang hat fakilalaon, boknga wa yabi, ginyag lwang, Ha disagan yap angko nangos tolok tinapay, 6 maskin angko fakilalaon sadi indasog a, hodwa ara ha famahanon hanya. 7 Intam fakilalaon somagot gis basad balay, Haw fag idwag folaw hyami. Matahopan wa hyami sakbawan a, mi talanahan maigyanan wa fagayo. Mahafang wa kabangon kaarakitay domisag hyamo fagsagadon. 8 Hogfwayong hayo, nyawa hanyam bangon araw, kaarakitay igdisag intam fagsagadon, bohonwa kitay ka tam it fakilalaon, dapat maskin tam igpilit wagsagad, yakanga nonbangon di ngap, domisag hantam kantam fagsagadon. 9 Yakanga hogfwayong hayo, ham fag sagad, ginya ham tomanggap hayo fagsagadon. Ham fag sayak a, ham lomag wa ka hayo fagsayahon. Ham fag sagam gi dayo balay, ginya ta fasakbaw hayo. 10 Maskin fagayo kagsagad tomanggap wa kat fagsagadon. Fagayo kagsayak, lomag wa kat fagsayahon, hanggan fagayo kagsagam gi dayo balay, ta fasakbaw wan. 11 Gwadi fakta fag ama sa hayo, it anak nogsagad oyang ka domisag hat anak abyanon odi, bonwa oyang, ham gayfan? 12 It anak nogsagad bolan, domisag awkin inonay? 13 Gwadi nyawa ham dwat fag manga taw, ham idwa twag falingo hayo manga anak, bago man ara hayo Ama sat banwanan sam tongod, ka mahoway, labi man idwag falingo hayo. Hanya domisag it Maliyaw fag Falad has mangag sagad gi hanya. 14 Ginya madi aban is Hisos nafaalin sadik labang kagfahoriyan sadik ama, idwag fahampang hanya. Ginya ka ama nahampang ya. Yakanga fagayo fag manga taw indolaw wan. 15 Dapat ka tibag lwang in Hisos kadonongan igfaalin ka manga labang, gi odin Biilsibol, ka fagtahinan manga labang. 16 Ginya madi ka tibag solay in Hisos, taglwang hanya, Falagan ha hyami sadik falagon madolaw gin Diyos banwanan sam tongod. 17 Dapat ay is Hisos nasarom di ista fagisipon, yakanga nafwayong has taw, Fagayo fag gorangon sakop imdaog di nombali dowak layonan, yakanga idwa domogay. Kitonya yadi sadik talanahan nombali dowak layonan, ginyag labanan wan, idwa yadi domogay. 18 Maskin ham iglwang is Biilsibol kagfasyagan angko igfaalin labang, no kitonya, is Satanas iglaban it sadili sakop, yakanga it sakop idwa domogay. 19 Nos Biilsibol kagfasyagan angko igfaalin labang, fakta, ham gayfan, kagfasyagan hayo manga anak igfaalin labang? Yakanga hayo manga anak mandi kagfatohoyan kitay ham gwayan wagfalamang. 20 Dapat ay, non Diyos kadonongan kagfasyagan angko igfaalin labang, it kahologan in Diyos sakop indasog wa sa hayo. 21 Sadik taw marigon nontalaga it fanlaban igbantay it sadili balay, it manga botang idwam liyam. 22 Dapat ay, ka sadi ka marigon man inya nombangkad, lomaban hanya, domaog wan, hanya homagaw lamang kat manga fanlaban manga bangkaw, manga talibong, ka ama marigon fagsyagon haraw, ginya ka ama marigon man homoray hat ofod it manga nahagaw ista botang. 23 Kadwa kaoyon angko, iglaban angko. Kadwag togbong angko igfatifon manga taw, yagfasarowayan di ngap. 24 Ka labang no nalin gis sadik taw, igswaliyan igswaliyan has daga magwang magwang, igligaw it famahowayan, dapat idwa ha lagan it oliyanan. Yakangat fangayofan iglwang, Ho kafwali ya ngawan hangko nagalinan. 25 Nonfwali ya, iglag it nagalinan malinay di, maangay wan. 26 Yakanga ka labang hanya ya ngay, igtaban fito yak labang ka dwat man hanya a, hawa basad fangayofan taw, sinya wak maoliyanan. Yakanga sas katabowanan ka taw mahori man ka gona it fangayofan. 27 Is Hisos no kampang yapdi, sadik ina gis fakaaywanan igtawag marigon a, iglwang han Hisos, Yabay, ka ina ka nadiya hyamo sat basad tiyan, hanggan nafasoso hyamo bomaya wan. 28 Dapat is Hisos nasagot, Yatokitay, ka manga taw kagtalinga hanggan katanog in Diyos hampang bondi kitonya no bomaya. 29 Ginya manga taw no kadarasogan wan, is Hisos iglwang, Ka kati fag masohod fag manga taw dwat wa dahol. Kana mayon ta no kalibang wagsayak gingko manga falagon madolaw? Gwadi hodwa ha falagon madolaw has taw no bohonwa kanlag san Honas nadalanan. 30 No kinday hyabi kan Honas nadalanan inbali falagon madolaw has taga banwa Ninibi, kitonya yadi aho, Kanbali Taw, angko dalanan aban imbali falagon madolaw has manga taw kati fag masohod. 31 Aban sas Sirang Fangabayan, ka ina gis Ihipto baliwa, kanbali gorangon hyabi, fatohoyan has fadosaan ka kati fag masohod fag manga taw, maskin hyabi, tonya fag ina inbangkad gis bali fongfongan daga kaarakitay domog in Gorangon Salomon kadonongan, dapat ay, kastay kati bohondi kiton Salomon it kadonongan. 32 Aban, sas Sirang Fangabayan, ka manga taga Ninibi fatohoyan has fadosaan ka kati fag masohod fag manga taw, maskin ka taga Ninibi nasoyo hyabi kawas Honas nafaadal has taw, dapat ay, kati yabay, kastay bohondi kiton Honas it kangayanan. 33 Idwa ha taw igsonog salong kaarakitay tomago sas daga balay, ngatay daga gantangan. Yatokitay fag sawa ngap is salangan fiya fiya nogsalifit ka salong kaarakitay manga taw nogsakbaw lomag mayawa. 34 Im mata bilang wam salong sas haboyagan. Im mata no fiya, igfayawa yadim haboyagan sadi wak dahonya. Dapat im mata no dwat, im haboyagan sadi wak dahonya inbali yadi wa marom. 35 Ha no gayfan ngatay ka mayawa ngandayo sa hyamo, ya mangharaw marom di, yakanga ham fag matagahan wan. 36 Im haboyagan sadi wak dahonya no sawas mayawa, ngadi ogbot idwa sas basad marom, im haboyagan orongan wa basad mayawa, bilang sadik salong mayawa wa dahol kagyawa hyamo. 37 Is Hisos nogtoltol yapdi, sadik Farisiyo igtaban in Hisos hat balay kaarakitay manayowan sinya. Yakangas Hisos insakbaw wan, intokaw sas bilog fanganan. 38 Ka Farisiyo indolaw waglag in Hisos maskin kwan fafa idwa nagonaw fiya fiya it gamat kito kasta magorang togon. 39 Ginya kagfon intam igfatangon has Farisiyo, iglwang, Ham manga Farisiyo, ham gogas ya ngadi ka manga baba ongot, manga baba finggan, dapat ka sas basad manga odi bafaw, kawa ham igtagagonaon, hanggan ha manga ogali dwat. 40 Ham manga odi idagdog. Bohonwa awkin ka nahalig ka sas babaw nahalig yadi ka sas basad? 41 Dapat ham fag disag yadi has manga myabog ka gi hayo basad sohadan, ginya ham imbali wa malinay sadi wak dahonya fangayofan. 42 Dapat ay, isyay wan, ham manga Farisiyo. Ham igdisag ka hayo fasafolo gis manga tanom famabanglo odi ofi, dapat ham igfasigpala di ka mahalga fag togon kitos, fag idwa ha fagihidon taw nogbolay fangabaya hanggan fag galwasi in Diyos. Fiya ham nogdisag ka hayo fasafolo madi ngap, dapat fag katanog yadi ka manga togon mahalga. 43 Isyay wan, ham manga Farisiyo, maskin no sas basad fanimbaan, ham igfahasa ka tokawan ka mangag bahala, hanggan ham gwayan wa kasayagdog manga taw nogfadaholon hayo, ham no gayayag basad banwa. 44 Isyay wan ham, ham bilang wa manga lobgoban kadwa ha tandaan, ista odi fanlidan kawa tadwa twa kitay inboyok sas basad. 45 Sadi kagfaadal ka Batasan Hodyo iglwang han Hisos, Haw kagfaadal, haw igfalafit hyami haw noglwang kitonya. 46 Is Hisos nasagot hanya, Isyay wan, ham ka mangag faadal Batasan Hodyo. Ham igfahabyatan has taw, no bilang wagfadiya manga ogali mabyat, dapat ham idwag sapkid ngadi ngap hayo timoyo kaarakitay igsafat tonya. 47 Isyay wa ham, hyabi hayo manga hafofowan magorang nafahatay in Diyos manga fangampang, kati ham igfafiyan tonya fag manga fangampang lobgoban. 48 Kawa ham gibolon kitonya, ham igfatohoyan kitay ham igfaangay hayo manga hafofowan magorang naibolon. Maskin ta nafahatay manga fangampang, ginya madi ham igfafiyan ista manga lobgoban. 49 Kawa kitonya in Diyos fakatwawon iglwang yadi, Ho somogo yapdi has taw angko manga fangampang hanggan manga Fandiya-Barita. Tiba aba ta fahatay yadi, tiba ta fahoriyan. 50 Yakanga, ka fadosa has fagayo kagfahatay manga fangampang gi yapdis fabagowanan daga imdasog has manga taw ka kati fag masohod. 51 Ka fadosaan gi yapdi ta no nafahatay in Abil hyabi, hanggan ta no nafahatay in Sakariyas sas faktaban fanonogan ista manga disag, hanggan ka balay Fanimbaan-Dahol. Anod, hogfwayong ha hayo, bonwa bohag, ka kati fag masohod fag manga taw ka somagot ista fadosaan fagayo ka naibolon kitonya. 52 Isyay wan, ham ka mangag faadal Batasan Hodyo maskin ham nabol ka sosi kagboklas ka tahop sas kadonongan. Bondi kitay ham idwag sakbaw, ham igtaktak ya ngadi ka manga kasayag sakbaw. 53 Ginya madis Hisos noglahaw ginya fag balay, ka mangag faadal Batasan Hodyo hanggan manga Farisiyo gintaw kaaywanon fag bagay, 54 kaarakitay, is Hisos no somalan di nangos no somagot has taw, ta omiktan hanya git sadili hampang, ginya somombong has manga ha kangayanan.
121 Gis nanya yadi fag masohod kaaywanan wa kaaywanan wan fag manga taw kadasog, igtarahidan ista ginanan bitis sas kaaywanan. Ginyas Hisos nafwayong yapdi hat manga katogbong kiti, Ham fag idwag sokfon ka ogali manga Farisiyo, ka bilang libadora, ka famadahol tinapay. Kawa ka manga Farisiyo ogali famalagon odistaw kitay fiya. 2 Ka manga matagowan kati fadi wadamlag aban. Fadi wamfyalom aban, imdog wan has fagayo. 3 Yakanga nyawa kana ka hayo fwayong sas basad marom, imdog di aban has basad mayawa a, ka hayo faginason sas basad lingoban imdog wa aban fiya fiya sas sokayan, sasta fanifonan. 4 Angko manga fakilalaon, hogfwayong hayo kitay ham fag idwa kadala kagfahatay habilogan taw, maskin balinya odi no kadi fagsyaganon taw. 5 Ho fomwayong hayo no fakta ka hayo fakadalaon fiya fiya, fag ka syagan igbol hayo ipsaw, ginya hanya bahala yadig fatohoyan no fakta fag manga taw ha sadik hadasogan, sinya wa kamdosa basad afoy. Hogfwayong hayo, anod, fag tonya wa ka hayo fakadalaon. 6 Idwa awkin tam nogfasali limak maya dowa odik sagat halga? Nyawa kitonya is Diyos idwag falamang ngadi sadik maya. 7 Gwadi nyawa hayo manga ogat bok sas alfoyo, is Diyos twa wa no kayoday. Ham fag idwa kadala. Gwadi ham mahalga man has kaaywanon fag manga maya. 8 Hogfwayong hayo nyawa faktaw kagbaya sas manga taw fagdogan kitay hanya angko wa sakop, aho, Kanbali Taw, bomaya yadi aban san Diyos manga anghil fagdogan kitay, tonya fag taw angko wa sakop ngay. 9 Dapat ay, kagtangkod angko sasta fagdogan manga taw, ho tomangkod yadi hanya aban san Diyos manga anghil fagdogan. 10 Nyawa faktaw ka kampang dwat donggon kawa hangko, aho Kanbali Taw, fiya digfaliyam ista hampang dwat, dapat ay, ka kampang dwat donggon kawa has Maliyaw fag Falad, tonya fag taw ista naogali kitonya idwam liyam, nyawa ginahin. 11 Ta no tomaban hayo has manga fanimbaan Hodyo aban, hanggan has faglagan manga gorangon, has manga ha kangayanan, kaarakitay omintaw hayo, ham fag idwa galibitan hayo sagot is taw, ngatay hayo bato fwayongon, 12 maskin, nomdasog gis nanya fag masohod aban, ka Maliyaw fag Falad faisip hayo no kana ka hayo sagot. 13 Ka sadik taw sinya sas fakaaywanan nafwayong han Hisos kiti, Haw kagfaadal, fwayongan angko fadwasay kitay, horayan yadingko hyami ama nafaobon ha hyami. 14 Is Hisos nasagot, Ama, fakta kagfabali angko igbahala igfafiyowan igfahorayan ha hayo dowa hayo ama faobonan hayo, ha gayfan? 15 Ginyas Hisos nafwayong has fagayo, Ham fag matagahan, ham fag idwa maingliyon, nyawa kana, maskin bohonwa kitay hayo kaakwaan no ayo kagfaboyag hayo. 16 Ginya madis Hisos igtoltol to fag halimbawa, iglwang, Ha sadik taw maakwa ha manga namay, manga iyab, aywan it ani. 17 Yakangat fangayofan iglwang kitay, Kinda odi angko halimbawan? Hada odi ara angko fwalidan angko ani? 18 Hanyag lwang kiti, Yabay, aho mangharaw omiklas kangko manga dongdong gona, ho homalig tiba, fag dahol man inya. Fag sinya wan aho no fomwalid angko manga ani hanggan angko botang fagayo. 19 Ginya madi angko sadili fangayofan bomaya wan, lomwang kitay, Nabi, kaaywanon angko manga botang kati. Aywan fag fangaraw idwa komorang angko manga fakasayaon. Yakanga ho fag mafahowayan odi, manga kwan, manga ginom, aho fag masolong odi fagaba. 20 Dapat is Diyos nafwayong hanya fag taw maakwa kitay, Paong paong haw. Araw basad yabi ho bomol wam ipsaw. Fakta nga araw ka omafo im manga botang, ha gayfan? 21 Kitonya kasta lagon aban kagtifon kaakwaan kaarakitay hat sadili, dapat no han Diyos baliwa myabog di. 22 Ginyas Hisos nafwayong hat manga katogbong, Yakanga hogfwayong hayo, ham fag idwa galibitan hayo fanganon kaarakitay ham kaboyag, ngatay hayo rotay bato solongon, 23 maskin ka haboyagan bohondi kitos fanganon no mahalga, hanggan ka habilogan bohondi kitos rotay. 24 Yabay, bantayan ka manga ahak, idwag famgas, idwa yadi gani, idwa ha halongkong, idwa yadi ha dongdong, dapat ay, nyawa kitonya, is Diyos kagfahwan di ka manga ahak. Gwadi ham bohondi kitos manga manok ik mahalga. 25 Fakta fag taw sa hayo ka syagan igfadogay it haboyagan sas baba daga, ngadi sadik tama sinyahod kawa no galibitan, ham gayfan? 26 Gwadi ham nodwa syagan gibolon to fag ogbot fag manga bagay, kana mayon ham no fagaba wa galibitan ka manga iba bagay? 27 Yabay ka manga borahan sas dayo, gwadi tonya idwag bonang, idwa yadi kalig rotay. Dapat hogfwayong hayo, nyawas Salomon igsolong it rotay ka fiya man has fagayo, sadi dik borahan fiya man inya kabantay, idwa ha matoga. 28 Is Diyos no bilang wagfasolong rotay kafiyaon kabantay has manga lamnon ka kati malangba basad talon, dapat ay, no marom, ngandayo imsonog lamang, labi man is Diyos wa ka farotay hayo. Laya ogbot yapdi ham nogsyag in Diyos. 29 Yakanga ham fag idwa galibitan igsayak hayo fanganon, ngatay inomon. 30 Maskin tonya fag manga bagay ka manga layonan taw kadyag syag in Diyos, tonya ista fagalibiton. Gwadi hayo Ama fadi wad twa kitay, korang yadi ha hayo ham nodwa ha akwa tonya fag manga bagay. 31 Ka fiya, ham fag fasakop fiya fiya han Diyos, ginya madi ham tomanggap yadi hayo manga kakorangan fagayo. 32 Angko tifonan, nyawa ham sayok, ham fag idwa kadala, maskin hayo Ama sat banwanan sam tongod igfaangay kitay ham aban fag ha akwa kangayanan sat sakop. 33 Ham fag fasali hayo manga botang, ginya fag disag it sali has manga myabog. Ham fag ha loka kadwa kadaanon a, ka sohadan hayo kaakwaan san Diyos banwanan sam tongod kadwa kamin sinya, maskin idwa ha domasog fangnahaw, idwa yadi ha tipakong domwat sinya. 34 Maskin no sidak mabotangan hayo kaakwaan, hayo fangayofan sinya yadi wak maisipan fagaba. 35 Ham fag danwa masalawidan hayo fotol, hayo salong fag danwa masonogan. 36 Ham fag tolad ka manga sogowan kagfanaya it fon no goli gis fangsawan kaarakitay dagos wa bomoklas ka tahop, hanya no kadasog igsagam. 37 Kat manga sogowan bomaya wan no mafolawan yapdi hanggan mafanayan it fon nomdasog wan. Hogfwayong hayo, bonwa bohag, ka mandi ista fon ka somolong rotay fangibolon a, fatokaw it manga sogowan sas fanganan, ginya fahwan fafa has taw. 38 It manga sogowan bomaya wan it fon noglag ta matalagaan wan, nyawa boknga yabi, nyawa kasirang wan hanya nomdasog. 39 Dapat ay, ham fag twa kitay kagfon balay no nadog kitay ha kadasog fangnahaw gis nanya fag masohod, hanya idwag fasigpala it balay, idwag fasakbaw hat basad balay. 40 Ham yadi, ham fag danwa matalagaan fagaba maskin aho, Kanbali Taw, imbangkad ya aban no ginahin fag masohod ham nodwa ha fagasolopon kitay aho kadasog gis nanya. 41 Is Pidro naintaw in Hisos kiti, To kam nafwayong halimbawa ngatay matoonan di ha hyami, ngatay has fagayo? 42 Kagfon intam nasagot, Fakta ka matanogon, hanggan madonong fag sogowan, ham gayfan? Kat fon nagtogonan kitay anowan it manga sogowan tiba, kaarakitay fahafod has taw ista fanganon no ginahin fag masohod ka fiya. 43 Tonya fag sogowan bomaya wan it fon nogtahod hanyag fadagos it fon togon kitonya. 44 Hogfwayong hayo, bohonwa bohag, it fon faano hanya it manga kaakwaan fagayo. 45 Dapat ay, halimbawa, tonya fag ista nagtogonan, not fangayofan iglwang, Angko fon inlibang yapdi, dogay di aban bago mwali. Yakanga hanyag bakbak ka tibak sogowan, manga ina, manga ama, hanggan kwan kwan odi, manga ginom, iglango ya ngadi. 46 Ginya madi ista fon mwali sas sirang kat nagtogonan fag sogowan nodwa tagak tagak, gis nanya fag masohod myanit hanya idwa twa kitay it fon kadasog. Yakangat fon fadosa wa fiya fiya, faofod hanya has mangadwa matanogon. 47 Kasta sogowan no natwa it fon faibolonon hanya, dapat idwan talaga, idwa yadin tanog, it fon aban bomakbak hanya marigon. 48 Dapat kasta sogowan nodwa natwa it fon faibolonon hanya, ginyat ibolon fiya wa fadosaon, it fon no bomakbak hanya, idwa bangan marigon maskin kawadwa natwa it fon faibolonon hanya. Kagtanggap aywan fag manga anoon, aywan yadi abat sagoton. Ta no nafabahala aywan man ha sadik taw, aywan man yadi abat sagoton. 49 Honbangkad hastay kaarakitay igdiya afoy has baba daga. Fag imtongo wa nangos. 50 Ha sadi yak tandaan kahoriyan kitos igfatogna, kangko bato fatandaan yapdi sangko, hanggan aho gwayan wa kahori tonya nodyapdin anod. 51 Aho awkin inbangkad hastay kaarakitay igdiya kahowayan hastay is baba daga, ham gayfan? Hogfwayong hayo, bohonwa kahowayan kangko taban, yatokitay igfasarowayan wa ngap manga taw. 52 Gis kati ginan no ha limak taw sa sadik talanahan, imbali dowak layonan, tolo iglaban has dowa, hanggan dowa iglaban has tolo. 53 Kat ama hanggan it anak ama iglabanan. It ina hanggan it anak ina iglabanan yadi, Kitonya yadi ka manga almanogang ina iglabanan. 54 Ginya madis Hisos nafwayong yadi has fakaaywanan fag manga taw, Ham noglag manga linyabo masding sas sangdayan myanit baliwa, ham iglwang, araw kahwayan wan, hanggan fagaba wa ngap kaanod. 55 Ginya madi, ka bagyo no gis balitangan, ham iglwang, Myanit wa dahol dahol araw. Kitonya ngay ka kaanod. 56 Ham igfataka odigdog. Ham bilang yadi wagbasa ka hayo manga faglagon sas banwa sam tongod hanggan sas baba daga, kana mayon ham nodwa twaglag ka hayo manga lagan ka madalanan kati fag masohod? 57 Ginyas Hisos iglwang, Kana mayon ham nodwa syagan igfatohoyan no kana ka fiya. 58 Halimbawa, no hagtaban hyamo has fangabaya, ka fiya ham fakafiyan mandi, ham no katabo di. Nodwa kitonya, ta ngandayo gomoyod hyamo has fangabaya, ginya ka fangabaya fagamat hyamo hasagbantay sas porisowan, ginya faporiso hyamo. 59 Hogfwayong hyamo hadwa malfas ginya aban, haw nodya nabayad hanggan wa kat kahaminan fag saga.
131 Gis nanya handasog tiba taw ka nafadahit han Hisos kitay, is Pilato, ka Gobirnador taga Roma, ha nafahatay manga Hodyo tiba, taga Galiliya, ta nogdisag yapdi manga sogbaon han Diyos. 2 Is Hisos nafwayong has taw, Ham gayfan awkin bohondi kito ka tibak taga Galiliya no ha ogali dwat tonya fag manga taw maskin ta nalag kitonya? 3 Bohonwa mawat. Dapat hogfwayong ha hayo, ham nodwag soyo, ham fagayo lomag yadi kadwatan. 4 Kitonya yadi ka safolo ha walok taw ka natay, ka balay abwat abwat sas Siloi no nakfo, natokob wa ka manga taw. Ham awkin gayfan bohondi kito ka tiba taga Hirosalim no ha ogali dwat maskin inlag kitonya? 5 Bohonwa mawat. Dapat, hogfwayong ha hayo, ham nodwag soyo, ham fagayo lomag yadi kadwatan. 6 Ginyas Hisos natoltol has taw sadik halimbawa, iglwang, Ha sadik ama ha tanom sadik fon igos sat basad iyab. Namantay ya ngay ka fon igos ngatay igbohad wan, dapat ay, hanyadwa ha lagan it bohad. 7 Yakanga nafwayong hat sogowan ka gano sinya fag iyab, Gwadi tolo wak fangaraw aho nogtibaw angko halamanan, hodya ha lagan it bohad tonya fag fon igos. Ha obangan wan. Maskin igtoplan di ka tiba. 8 Dapat ka gano sinya fag halamanan iglwang, Tam faya gobang kati fag fangaraw. Ho homodkod yapdi sat ligongan dalid, ho fomwalid famalangba sinya. 9 Nomdasog aba sa sadik fangaraw, no bomohad ngay, salamat wan, dapat nodwa bomohad gis nanya fag fangaraw aban, tam omobang wan. 10 Aban, sas Sirang Kafahowayan, is Hisos igfaadal basad fanimbaan Hodyo. 11 Ha sadik ina sinya yadi, safolo ha walok fangaraw ha sagit, bokong bokong odi, idwa syagan katadlong maskin labang kagfahoriyan hanya. 12 Is Hisos no nalag ka ina, natawag a, nalwang kiti, Ina, kati kam fagdogon infiya wan. 13 Is Hisos natawid ka ina, ginya madi ka ina intadlong wa dagos, yakangag fasayagdog in Diyos. 14 Dapat kagbahala sas fanimbaan kaisog in Hisos maskin sawas Sirang Kafahowayan is Hisos no nafafiya ka ina. Yakangag fwayong has manga taw, Gwadi onom ik sirang sa sadik simba kantohoyan kaarakitay omibolon. Fag gis nanya fag manga sirang ham no kabangkad kaarakitay igfafiya hayo manga sagit, fag idwa sas Sirang Kafahowayan. 15 Is Hisos nasagot hasagbahala, Ham ha takan wan. Bati, nyawa basad wa Sirang Kafahowayan, ham lomohas hayo baka ngatay habayo gi hayo nagsiyokan basad lamnonan kaarakitay igfainom. 16 Gwadi idwa aw fiya nogfalfas to fag ina, kan Abraham yadi hasokfonan, nyawa basad Sirang Kafahowayan, maskin safolo wa ha walok fangaraw is Satanas no bilang wa nagafos hanya. 17 In Hisos manga kalaban naya wagdog yadi, dapat ka fakaaywanan nabaya waglag in Hisos manga naibolon madolaw fagayo fagayo. 18 Ginya madis Hisos iglwang has taw, Kinday in Diyos sakop? Kinda odi ngap angko fatoladan tonya, ham gayfan? 19 Kitos sadik botol mostasa sadik taw natanom sat basad iyab. Ginya madi natobo wan, indahol, inbali wa fon hayo, manok digfogad wan sat baba sanga. 20 Sadi ya ginan is Hisos iglwang, Kinda odi ngap angko fatoladan in Diyos sakop, ham gayfan? 21 In Diyos sakop kitos famadahol tinapay ka sadik ina nafaaktom has tolok sarok harina, hanggan wandahol sadi wak dahonya. 22 Ginyas Hisos igfadagos wat lahawan, hawas Hirosalim baliwa. Is Hisos igfaadal has fagayo kat nagdalanan banwa hanggan manga forowan balay sayok sayok. 23 Ha sadik taw gintaw in Hisos, iglwang, Ama, sayok di awkin fag manga taw kambawi? Is Hisos nasagot hanya, 24 Ham fag tikis wagsakbaw has ogbot fag sakbawan. Hogfwayong ha hayo, no kitay di, kaaywanon fag manga taw ka kasaya somakbaw has ogbot fag sakbawan, dapat tadwa somyagan. 25 Aban kagfon balay no natahop wa ka sakbawan, ham kadwa nasakbaw, ham fag bayai mandis nyamo sas sokayan, igsagam wagsagam wan. Nyawa hamyayag lwang kitay, Ama, ha fasakbawan yadi hyami, hanya somagot yadi hayo, Hodwa twa ham no ginda fag manga taw, no ginda hayo banwanan. 26 Ham lomwang yadi hanya kitay, Gwadi tam igsayowan yadi wa kwan, manga ginom, itfagonan, hagfaadal ya ngadi sa hyami manga fagbokngan balay. 27 Dapat hanya omolit ya aban kitay, Hodwa kilala hayo ham no ginday fag manga taw. Ham fagayo ka gogali dwat, fag ayayo gingko. 28 Aban ham mangoraw wan hanggan hayo ngifon di mangarigitan wa sinya, ham no lomag inda Abraham da Isaak da Hakob hanggan in Diyos manga fangampang fagayo san Diyos sakop, dapat ham man im-okas has dayo. 29 Aban hamdasog gis salogan myanit baliwa, gis sangdayan myanit baliwa, hanggan gis manga balitangan, ta mangaraktoman aban sas fanganan san Diyos sakop. 30 Orongan wan ha akwa tiba ka goyan ka gomona man ka gona, hanggan ka tiba ka gona imgoyan man ka goyan. 31 Gis nanya yadi fag masohod, tibak Farisiyo inbangkad yadi sinya, iglwang han Hisos, Haw fag lahaw wa gistay maskin is Hirodis kasayag fahatay hyamo. 32 Is Hisos nasagot kiti, Ham fag fwayong han Hirodis, ka bilang sadik hayopan idwag falagon kitay homagat, fag lwang kitay, Yabay, hogfaalin yapdi manga labang kagfahoriyan manga taw, hanggan igfafiya yapdi manga taw ka ha manga sagit kati, hanggan kitonya mandi bago marom, ginya madi sat dayo aban, angko ibolon imtabo wan. 33 Dapat kati, hogfadagos yapdi angko lahawan, hanggan bago marom, hanggan sat dayo aban, maskin idwa fiya in Diyos fangampang sadi no matay nodwa sas banwa Hirosalim. 34 Ginyas Hisos iglwang kawa has banwa Hirosalim, Haw, Hirosalim, Hirosalim, haw igfahatay in Diyos manga fangampang hanggan igbintok ya ngadi kan Diyos manga nasogo ha hyamo. Kayoda wa ginan ho kasayag lohob hyamo sakop fag manga taw, kitos ina ofa noglohob it anak sat daga fakfak, dapat haw, Hirosalim, ha dayo di ngap. 35 Yakanga kati ho orongan wa fabayaan lamang im oliyanan. Hogfwayong hyamo, haw fawa lomag angko domwag, nodyam dasog gis nanya fag masohod haw no lomwang, Ka kadasog hastay san Diyos ngayan, fag bomaya wan.
141 Aban sa sadik Sirang Kafahowayan, is Hisos hawas sadik fagtahinan Farisiyo balay kaarakitay manayowan kwan sinya. In Hisos manga kasayo igtikis igbantay wa fiya fiya it manga fangimotan. 2 Yabay, ha sadik ama kabadbagaan it habilogan san Hisos dayo. 3 Yakangas Hisos naintaw has manga Farisiyo hanggan has mangag faadal Batasan Hodyo kitay, Ngatay fiya di awkin sas Batasan Hodyo nogfafiya sagit sas Sirang Kafahowayan, ngatay idwan? 4 Dapat tadwa ha naawang, yakangas Hisos natawid ka ha sagit, nafafiya hanya, ginya nafalahaw wan. 5 Ginya madis Hisos nafwayong has taw kitay, Fakta sa hayo no ha anak, ngatay baka kandagdag basad hodkodan, ham awkin idwa bomawi ginya, nyawa sawas Sirang Kafahowayan? 6 Tadwa twag sagot, tadwa ha naawang. 7 Gis nanyas Hisos iglag kitay, kasta manga nataban hasta balay igsaringgonaan it manga tokawan, igfili kasta fanokawan kasta fakilalaon fiya fiya. Yakangas Hisos nafwayong has taw to fag halimbawa. 8 Ta nogtaban hyamo hasta fangsawan, ha fag idwag fili kasta fanokawan fakilalaon. Ngandayo ta ha taban ya kasta fakilalaon fiya man hyamo. 9 Ginya kagtaban hayo fagayo dowa, homampang ha hyamo, lomwang, Fiya di awkin haw nogfatokaw to fag taw sa hyamo nagtokawan? No kitonya haw maya wan, haw ngap ara tomokaw sa odis tokawan kadwa bangan. 10 Ka fiya, ta nogtaban hyamo hasta balay, haw nogtokaw, fag sa yap man idwa bangan fag tokawan, sas hadasogan yapdi gis sokayan. Maskin kagtaban hyamo lomwang hyamo araw, Haw fag istay yadi gwadi, sangko akbang. No kitonya ta ara fadog ya hyamo ngayan has manga taw kagsabang sinya. 11 Maskin kagfadaholon it sadili, ha falibaba di hanya, hanggan kagfalibaba it sadili, hagfaabwat hanya. 12 Ginya madi hasagtaban man hanya, is Hisos iglwang kiti, Haw no ha nafatalaga fanganon, fag bohon yapdi kam manga fakilalaon, ngatay kam manga fadwasay, manga kaiban, ngatay ka manga maakwa, im faakbang balay, kam fagtabanon. Maskin ta aba somabang yadi hyamo, ta naganti yadi hyamo, ya balinya wan. 13 Dapat ha no ha nafatalaga fanganon ayo ayo, fag ha yap man is manga myabog myabog, manga rifis, manga fihong, manga bota kam fagtabanon. 14 Tadwa syagan gomanti hyamo, yakangas Diyos iglwang kitay, ka manga ha akwa in Diyos kafiyan nomboyag ya aban, ham bomaya wan, maskin is Diyos domisag ha hyamo fasalamat gis nanya. 15 Ka sadi kagsayo in Hisos sas fanganan sinya, no nadog in Hisos hampang, iglwang hanya, Kagsayo san Diyos sakop fanganan bomaya wan. 16 Dapat is Hisos iglwang, Ha sadik ama nafatalaga fanganon ayo ayo, aywan ya ngadi kat nasabang. 17 Nondasog gis nanya fag masohod, yagsogban wa gis nanya, kagfon balay nafasabang ya kat sogowan has taw kat manga nafadog itfagonan, iglwang kitay, Ham fag kabangkad wa kati, intalaga wan fagayo. 18 Dapat fagayo pariho ha fabangdanan wan. Ka bago bago iglwang, Ho ha nasali sadik iyab. Ka fiya ho bomantay yapdi tonya. Haw fag idwa kahori angko, nyawa hodwam bangkad has nyamo. 19 Ka sadi iglwang yadi, Ho ha nasali baka, lima kagtimbangan. Ka fiya ho somolay yap somingkaw tonya. Haw nangos fag idwa kahori angko nyawa hodwam bangkad has nyamo hayo. 20 Ka sadi iglwang yadi, Mi bago dintalsawa, midwa has nyamo hayo. 21 Ginya madi ka sogowan infwali ya ngawan, nafwayong hasagfon balay kitay, ka manga taw idwa kabangkad hastay, hono. Yakanga kagfon balay kahori wa dahol dahol, iglwang hat sogowan kiti, Haw fag lahaw ya madali. Fwayongan ka sayo basad manga karsada, ka sayo basad dalan ogbot basad banwa, tabanan hastay ka manga myabog, ka manga rifis, manga bota, manga fihong. 22 Ka sogowan no nwali ya domwag hasagfon balay, iglwang kiti, Angko fon, kati hontanog wan hyamo manga sogo angko, no kitay di, dapat tam idya napno. 23 Ginyat fon nafwayong ya hat sogowan, Haw fag haya ngawas basad karsada sas dayo banwa, ha fag pilit wa ka manga taw fag kabangkad hastay kaarakitay angko balay mapno. 24 Hogfwayong ha hayo, ngadi sadi kangko nasabang gona idwa ha hagaton angko nafatalaga. 25 Kaaywanon fag manga taw igtahin in Hisos. Ginyas Hisos nasayango has taw, iglwang kiti, 26 Nyawa faktaw ka gakbang angko, idwa fiya imbali angko katogbong nodwa galwasi angko bondi kito kat ama, ngatay kat ina, ngatay kat babay, ngatay kat indogan, ngatay kat manga anak, ngatay kat fwadwasay, nyawa ina, nyawa ama, ngatay hanggan wat sadili haboyagan. Fag aho kat fagalwasiyon bago bago. 27 Nyawa faktaw idwa fiyam bali angko katogbong nodwa gagwanta mahori bilang wagfasan it sadili fatimbangan hayo hanggan idwag tahin angko. 28 Halimbawa, insadi sa hayo no ha fangayofan mangalig balay abwat abwat, idwa aw tomokaw yapdi, ham gayfan, kaarakitay omisip yap it bato bayadon kaarakitay tomwa ngatay it kwarta homosto wa fatabo? 29 Ngandayo torok yapdi kat falindogon, no mangharaw idwa tomabo, fagayo ka lomag, ta fasidyowan odi hanya. 30 Taglwang, Tonya fag taw nafabago wa nahalig, dapat idwa nasyagan nafatabo. 31 Yabay, fakta fag gorangon, ham gayfan, it sondalo no safolo dik libo, ka lomaban nga ha sadik gorangon ka ha dowak safolo libo it manga sondalo, ham gayfan? Idwa aw tomokaw yap kaarakitay omisip ngatay syagan domaog it kalaban. 32 Hanya nogdog kitay idwa somyagan domaog, hanya somogo yapdit fanonson hat kalaban, ta no ayayo yapdi kaarakitay somagad kitay, ta fag taranggapan yapdi, fag idwa lomaban nangos. 33 Yakanga nyawa faktaw idwa fiya imbali angko katogbong nomlibang di hat sadili fakasayaon. 34 Tam fadi wadtwa kitay ka asin kafiyaon. Dapat ay, nonbol wat tamis, kinda odi nogfatamis ya ka asin, ham gayfan? 35 Idwa ha fakinabang nogsabog sas baba daga, idwa yadi fiya igfaaktom has manga famalangba tanom. Yakanga manga taw gokas odi tonya fag asin. Ham no ha manga talinga ya ngadi, fag talinga wan.
151 Ginya madi ka manga fanohot bohis hanggan ka manga tiba, kasta faglwangon ha manga ogali dwat, fagayo gakbang han Hisos kaarakitay tomalinga hanya. 2 Yakanga ka manga Farisiyo hanggan ka mangag faadal Batasan Hodyo gidginasan a, taglwang kiti, Long madi ngap, to fag taw igsayo has manga taw ha ogali dwat. 3 Yakangas Hisos natoltol to fag halimbawa has taw. 4 Halimbawa, insadi sa hayo no ha akwa sadik daan topa, ka sadi nomliyam wan, idwa awkin omobon yapdi ka siyam ik safolo ha siyam ik topa sas basad lamnonan, ginya igsayak kanliyam hanggan wa lomag, ham gayfan? 5 Hanya no nalag ngay ka topa kanliyam, kabaya wagsonggoy, igdiya a, goli wan. 6 Nondasog sat balay, fatawag it manga fakilalaon, it manga faakbang balay, lomwang kitay, Tam fag hastay sangko balay, fag fagayo wagbaya, maskin ho nalag ya angko topa kanliyam. 7 Hogfwayong hayo, kitonya yadi ka san Diyos banwanan sam tongod nogbaya. Labi man ta nogbayag lag ka sadik taw ka ha ogali dwat nogsoyo, has siyam ik safolo ha siyam ka gayfan kitay fiya it ogali, idwa ha fagsoyoon. 8 Sadi yak halimbawa, ngatay sadik ina no ha safolok bilog pilak, ginya madi ka sadi inliyam, kinda odi ham gayfan it halimbawan? Idwa aw somonog it salong, ginya fomaris it baba salog, somayak wa fiya fiya hanggan wa lomag tonya? 9 No nalag ya tonya fag pilak, fatawag it manga fakilalaon, manga faakbang balay, fomwayong has taw, Tam fag hastay sangko balay, fag fagayo wagbaya maskin ho nalag ya ka sadik bilog pilak kanliyam. 10 Hogfwayong ha hayo kitay, kitonya yadi in Diyos manga anghil nogbayag lag sadik taw ka ha ogali dwat nogsoyo. 11 Ginyas Hisos iglwang, Halimbawa, ha sadik ama ha anak ama dowa. 12 It anak foyo iglwang hat ama, Mama, ha disagan wa nangos hangko kati kangko fag kahorayan im botang kangko tanggapon aban. Yakangat ama nahoray hat manga anak dowa, it manga botang. 13 Tansagaya di nga korayan, kat anak foyo nafasali wa ka hanya it manga kaakwaan, ginya madi, no kayo da odik sirang, nalahaw has fakaayayowan fag banwanan, nadiya wa fagayo it kaakwaan. Nondasog wa sinya, naolan odit kwarta, idwa has fiya fag kasolongan. 14 Ginya madi, no namin wat kwarta, gis nanya fag masohod ka manga taw sinya fag banwanan inlodlonosan yadi. Yakanga ka anak foyo inhyabog wa dahol dahol. 15 Yakanga nasayak it ibolon sinya fag banwanan. Ka nafaibolon hanya nasogo hanya hat tifonan baboy maaladan, kaarakitay gano a, bomahog. 16 Maskin ka anahan kalonos wa dahol dahol, hanya kasamok wan ngadi kat bahog baboy yayos fayay, dapat fawa hagdisag hanya nyawa kana. 17 Dapat ay, ka anahan no bago di naayfan it naogali, it fangayofan iglwang, Gwadi ngadi angko ama manga sogowan hosto it fanganon, ha labi ya ngadi, dapat hogdog ho kahatay wa kalonos istay. 18 Ho goli ya nangos hangko ama hogdog, ho lomwang ha hanya, Mama, ho ha kasalanan han Diyos hanggan ha hyamo. 19 Gis kati ginan sakwag ngayan angko im anak. Aho fag bilang odim sogowan. 20 Ginya madi in-anod wan, hanyan lindog wa a, inlahaw wan, hawat ama. Ginya madi, kat ama nalag it anak ama foyo sas ayayo yapdi, danwa kaawa wa dahol dahol hanya, yakangat ama nadalandan natagbo, nafohot, naayok it anak. 21 Ginyat anak iglwang, Mama, ho ha kasalanan han Diyos hanggan ha hyamo. Gis kati sakwag ngayan angko im anak. 22 Dapat it amag lwang hat manga sogowan, Kalibang, diyan hastay ka fiya man has fagayo fag manga rotay, fabalokasan hanya. Ham fasingsingan hanya, falapakan ya ngadi. 23 Diyan hastay kantam fagfalakbogon fag anak baka, tam somogba wan, tam ara mangwan, tam kasolong wan yabay, 24 maskin tongko anak ho gayfan natay wan, dapat kati, bilang wanboyag ya. Inliyam wa haraw a, ginyan lag ya. Ta ngap nafanolodan ya ngadi kawag baya wa dahol dahol. 25 Gis nanya yadi ka ama anak ahan sawat iyab. Ginya madi araw goli mandi. No kaakbang wa has balay, hanya nadog ha manga gagong, mangag tayok. 26 Ka anak ahan natawag ha sadik sogowan, ginya naintaw hanya, Kana ka hanya intam? 27 Ka sogowan nasagot hanya kiti, Gwadi im fadwasay nwali ya. Hayo ama nafasogba intam fagfalakbogon anak baka maskin nalag yam fadwasay, boyagan di mangharaw, idwa ha sagit. 28 Kat ahan kahori wa dahol it fangayofan, dayo wagsakbaw ha basad balay. Yakangat ama nadokson, nahampang hanya mayan mayan. 29 Dapat it anak ahan igsogat it ama, iglwang, Gwadi fagaba wa katanog hyamo, aho, aywan wak fangaraw kandalan. Dapat no hadingko, hadwag disag ngadi sadik anak hambing kaarakitay migbaya, aho hanggan angko manga fakilalaon. 30 Dapat indasog di ngay kam anak ka naolan hyamo kaakwaan ha sayo manga ina kadwa fiya it ogali, ginya ha nasogba ya ngadi kantam fagfalakbogon anak baka. 31 Kat ama nasagot hanya kiti, Angko anak, gwadi tam fagaba gofodan. Angko manga botang fagayo fagayo hawa hyamo. 32 Dapat fiya tam nogbaya, kasolong wan, maskin im fadwasay, ho gayfan di natay wan, dapat bilang wanboyag ya, inliyam wa haraw a, ginya tam nalag ya kati.
161 Ginyas Hisos nafwayong sadi yak halimbawa hat manga katogbong, iglwang, Ha sadik taw maakwa nafaano it manga kaakwaan hat sogowan sadi. Ginya madi aban, tiba taw natoltol hasagfon kitay, Kam sogowan idwa gano fiya fiya im botang, anogon. 2 Yakanga hanya nafatawag kat sogowan, naintaw hanya, Kana kin angko donggon kawa ha hyamo? Falagan angko im manga sorat maskin ha sakwa gano angko manga botang aban. 3 Ka sogowan fangayofan iglwang, Kinda odi angko halimbawan? Angko fon domayo angko, fawa faano angko it manga botang. Hodwa marigon mangodkod sas iyab hogdog. Ho kaya yadi ho nogsagad igsagad odi. 4 Ala, kati, ho twa wan angko bato ibolonon. Angko fon no domayo angko gingko ibolon gano it botang, tiba tomanggap yapdingko sat manga balay. 5 Yakanga kat sogowan nafatawag, igsadig sadi ka ha manga bayadan hasagfon. Ginya naintaw kandasog bago bago, Dahoda kin im bayadan hangko fon? 6 Ka ha otang nasagot, Angko bayadan sadik daan siboran langis. Ka gano it fon botang nalwang, Dahos nwa kanfwalid sas sorat. Kalibang wan, haw fag matokawan is nwa, ha fag fwalid im ngayan, hanggan fag sorat kitay lima dik safolo siboran langis kam bayadan. 7 Ginya madi naintaw yadi ka sadi, Ka hyamo bayadan, dahoday yadi? Ka ha bayadan nasagot, Sadik daan sako tirigo. Ka gano it fon botang iglwang, Dahos nwa kanfwalid sas sorat. Ha fag fwalid im ngayan hanggan fag sorat kitay walo dik safolok sako kam bayadan. 8 Kat fon nafaanod yadi kitay kat sogowan madaya madonong yadi kalig it halimbawan. Maskin ka taga istay is baba daga madonong man in Diyos sakop no gamigosan hat manga kapariho. 9 Is Hisos igfadagos wat toltol, iglwang, Yakanga hogfwayong hayo, nyawa ham domisag hayo kaakwaan has taw istay is baba daga, kaarakitay ham ha akwa fakilalaon, nyawa hayo kaakwaan mamin wan, ha tomanggap yapdi hayo sas oliyanan kadwa ha katabowanan. 10 Ka taw no fiya no gano ka ogbot fag bagay, omano yadi fiya ka dahol fag bagay. Kagdaya has ogbot di fag bagay, igdaya man di has dahol fag bagay. 11 Ham nodwa twa gano kastay sas baba daga fag manga kaakwaan, fakta ka faano ha hayo ka orongan wa kaakwaan ham gayfan? 12 Ham nodwa twa gano kasta kaakwaan iba taw, fakta ka domisag kaakwaan orongan ha hayo sadili, ham gayfan? 13 Halimbawa, it fon no dowa, idwa ha taw ka syagan igfasohodan katanog fagayo dowa pariho. Matohoyanan ha fagfiliyon, ngatay kawili it fon sadi, ginya kadwat iglag kat fadowa, ngatay katanog fiya fiya ka sadi, dapat igfasigpala wa kat fadowa. Ham idwa syagan katanog in Diyos igsohodan has kaakwaan. 14 Manga Farisiyo ka kaingli has kwarta baliwa nayod wan Hisos no nadog it toltol kitonya. 15 Yakangas Hisos nafwayong has manga Farisiyo kiti, Ham igfalagon odi has taw kitay hayo ogali fiya, dapat is Diyos fadi wadaglag hayo manga fangayofan. Maskin ka manga taw fagfadaholon ka manga ogali kadwa fiya san Diyos faglagan. 16 In Mwisis togon hanggan in Diyos manga fangampang nasorat igdasog yadi wa han Hwan kagfatogna manga taw. Ginya wa ginan ka Fiya fag Barita indog wan kawa han Diyos sakop baliwa. Yakanga fagayo fag manga taw igpilit wa kasakbaw han Diyos sakop. 17 Dapat ay malpos man nangos ka banwa sam tongod hanggan ka daga nomliyam, halimbawa, hasagfaliyam ngadi sadik sorat it karigonan sas Batasan Hodyo. 18 Ginyas Hisos iglwang, Ka ama ka gobon it babay, ginyag babay has iba ina, yagfabayowan wa tonya. Hanggan ka ama kagbabay hasta nagobonan ina, yagfabayowan yadi. 19 Ginyas Hisos nafahalimbawa ya ngay, iglwang, Ha sadik ama, it manga rotay kawa myasa wa dahol it sali, aywan ya ngadit manga fanganon fiya, sirang sirang. 20 Ha akwa yadi sadik ama is Lasaro, myabog myabog, maigyanan odi dayo sakbawan balay maakwa. Sadi wak habilogan bangbangon wan. 21 Is Lasaro kasamok ngadi ka manga tingaw ka kadagdag gis maakwa fanganan basad nigo. Bohondi tonya, ka manga ido gakbang han Lasaro, igtimos it manga bangbang. 22 Aban is Lasaro natay wan, ginya manga anghil nataban in Lasaro, nafatokaw hanya san Abraham sayangowan. Ka ama maakwa natay yadi wa a, ta nalobgob wa hanya. 23 Tonya fag taw maakwa hawas sadik hadasogan, sinya wa ka manga natay kamdosa basad afoy. No kahori wa dahol dahol, natangdan has tongod, nalag in Abraham sas ayayo sas tongod, hanggan is Lasaro matokawan san Abraham sayangowan. 24 Ginya ka ama maakwa natawag marigon, Hyami ama Abraham, ha fakaawa wangko. Ha sogowan in Lasaro fatolsokan it tobwan timoyo ha basad danom, ginya fayamosan angko dila, kawa ho gwayan wa kahori istay basad afoy. 25 Dapat is Abraham nalwang hanya, Gwadi anak, haw fag tohod kitay myasa wa fiya im lagan haw no sas baba daga yapdi, dapat ay, kan Lasaro nadalanan mahori fagaba sinya. Kati hanya ka ha kahowayan istay, haw man ka galibitan fagaba sas fadosaan. 26 Ginya madi, labi man inya, santam fagbokngan ha sadik gobang abwat abwat, kaarakitay ka gistay idwa somyagan has nyamo hayo hanggan ka gis nyamo hayo idwa yadi somyagan hastay. 27 Yakanga ka taw maakwa nalwang, Hyami ama Abraham, no kitonya, hogfaaronganon hyamo kitay, ha sogowan nangos in Lasaro hangko ama balay, 28 maskin angko fadwasay ama lima ya sinya. Sogowan in Lasaro hanya kaarakitay igfatagak angko manga fadwasay, fag idwa hastay nangos has fadosaan ista hadasogan. 29 Dapat is Abraham igfwayong ya hanya, Gwadi in Mwisis manga togon hanggan in Diyos manga fangampang nasorat sadis taw, ta fag tomalinga wa tonya. 30 Ka ama maakwa iglwang ya, Hyami ama Abraham, korang di tonya, dapat sadik natay inboyag ya no somabang has taw, yabay ta somoyo wat manga ogali dwat. 31 Is Abraham nasagot hanya, Ta no dayog talinga in Mwisis togon hanggan in Diyos manga fangampang nasorat, nyawa sadik taw imboyag ya, tadwa yadim tiwala.
171 Ginya madis Hisos nafwayong hat manga katogbong, Tam idwa syagan igbaybay kitay idwa hagfaloksowan manga taw has ogali dwat. Dapat isyay wan kagfaloksowan kitonya. 2 Fiya man ha hanya ta no somiyok sadik bato gilingan sat boknga liyog, ginya omokas hanya ha basad dagat kaarakitay idwag fadagos igfayayom has ogali dwat ngadi sadik anak ogbot to. 3 Yakanga ham fag matagahan. Kam fadwasay no ha naibolon dwat ha hyamo, haw fakabaya hanya, ginya hanya nogsoyo, haw fag faliyam wa tonya kat naibolon. 4 Nyawa hanggan wa balis fito ginan sadik sirang, hanggan kayabi, hanya no gibolon dwat ha hyamo, dapat fito yadi ginan no omakbang ha hyamo, igsoyo, haw fag faliyam wa tonya fagayo kat naibolon dwat. 5 Ka manga Fandiya-Barita igfwayong hasagfon intam, Ha farigonan hyami, hami nogsyag ha hyamo. 6 Kagfon intam igsagot, Ham nogsyag hangko ngadi ogbot ogbot, dahos botol mostasa ogbot, haw somyagan lomwang has nwa fag fon hayo, halimbawa, Haw fag imgoyod wan gi basad daga, ha fag hawas basad dagat nomtanom. Yakanga im-anod wa kam fwayong hanya. 7 Ginyas Hisos iglwang, Halimbawa, insadi sa hayo no ha sogowan gadado, ngatay gano topa, it sogowan no mwali gis iyab, haw awkin lomwang has sogowan, Haw fag hastay, fag haw ka kwan yap, ham gayfan? 8 Yatokitay, idwa awkin haw lomwang kiti, Fatalagaan yap angko yafon, ginya tobosan im rotay. Haw fag sayapdingko akbang, haw fag lag yapdingko manga fafa, manga danom, ho no kasamok yapdi. Ginya madi haw man araw ka homwan, ho nomtabo wa kwan. 9 It sogowan no katanog di ista sogo, fag idwa gayfan kitay it fon fagabag fasalamat hanya. 10 Ham fag kitonya yadi, ham nomtanog wa fagayo, fag idwag fatakagdog is taw, ham fag lwang odi kitay, Hami it manga sogowan kadwa bangan, mi katanog odi hyami bato ibolonon. 11 Da Hisos noglahaw yapdi has Hirosalim, nadalan has fagbokngan sakop Samariya hanggan sakop Galiliya. 12 Da Hisos nondasog ha sadik forowan balay, safolok taw ka ha sagit kitong natagbo hanya. Ta natorosan sas ayayo ayayo ogbot, 13 natawag marigon, Hisos, hyami Fon, haw fakaawa hyami nangos. 14 Is Hisos no nalag ka manga ha sagit kitong, nalwang has taw, Nyawa ham iglahaw wa kati, ham falagan hayo has manga fagalan-han-Diyos. Ginya madi, ta noglahaw yapdi, kasta sagit kitong infiya wa boknga dalan. 15 Insadi no nalag kitay hanyan fiya wa mangharaw, infwali ya han Hisos, igtawag marigon, igfasayagdog in Diyos. 16 Nanlohodan han Hisos atobangan a, nabaya wa dahol hanya, maskin hanya infiya wan. To fag taw kagbaya, taga Samariya. 17 Is Hisos iglwang, Idwa awkin safolok taw kanfiya haraw, hadawa mayon ka siyam? 18 Idwa awkin hanfwali igfasayagdog in Diyos no bohonwa to fag sadik ama ka bohonwa Hodyo? 19 Is Hisos nafwayong hasagbaya, Ha fag kabangon wan, fiya di, nyawa ha goli wa kati, kawa haw nogsyag angko, haw infiya wan. 20 Sadi ginan manga Farisiyo gintaw in Hisos, Ginahin fag masohod in Diyos sakop nomlag? Is Hisos nasagot kiti, In Diyos sakop fabagowanan idwa ha hoyog manga falagon madolaw. 21 Idwa yadi ha syagan lomwang, Lag ngay, in Diyos sakop igfabago wan ngatay istay, ngatay sinya, maskin ka orongan in Diyos sakop danwastay sas manga fangayofan taw. 22 Ginyas Hisos iglwang hat manga katogbong, Nomdasog gis nanya fag masohod aban, no kitay di, ham gwayan wa kasaya lomag angko, Aho Kanbali Taw, igbahala ngadi sadik sirang, dapat ham idyapdi lomag gis nanya. 23 No ha taw igfasayagdog hayo kitay, Aho Kanbali taw sinya wan, ngatay istay wan, ham fag idwa hanya kaarakitay ham bomantay. 24 Maskin gis nanya fag sirang kamtohoyan aban, aho, Kanbali Taw, imdasog bilang wa hilat igyawa sas banwa sam tongod, gim lwad has bohid. 25 Dapat ka fiya, aho, Kanbali Taw, aho fag omagwanta yapdi aywan fag manga mahori hanggan ka kati fag manga taw domayo yadingko. 26 Aho Kanbali Taw, no kadasog aban, kitos gonaw hyabi san Nowi fag kasohodan. 27 Gis nanya hyabi, ka daga nodyan gonaw, manga taw kwan hanon, manga ginom, mangag babay, manga gindogan, mangag tomboy it anak has anahan has dayaga, hanggan was Nowi insahay hat basad sahayan baloto. Sadi wa ginan ka gonaw indasog a, tanlogom wa fagayo. 28 Kitonya yadi ista manga ogali san Lot fag kasohodan, ka manga taw kwan hanon, manga ginom, tibag balidya, tibag sali, mangag tanom, manga kalig balay. 29 Dapat ay, is Lot no nalagyo gis Sodoma, ha afoy hanggan asopri bilang wa mwayan gis tongod, tansonog wa a, inyagaw wa fagayo. 30 Aho Kanbali Taw no kabangkad aban, kitonya yadi kamlag, ka fakaaywanan fag manga taw idwa matalagaan. 31 Gis nanya fag sirang no ha taw sas sokayan balay, fag idwag sakbaw kaarakitay bomol yapdit manga botang git basad balay. Hanggan ka sas iyab fag fawa golingan has manga bagay sat ginanan. 32 Ham fag tohod in Lot babay nadalanan. 33 Nyawa faktaw not sadili odi haboyagan it fagisipon kaarakitay fadogay tonya, imliyam di. Dapat kadwa kwangit it haboyagan kawa hangko, it haboyagan domogay hanggan aban aban. 34 Hogfwayong hayo kitay ha dowak taw matoyogan sa sadik igyanan gis nanya fag yabi aban, insadi im-anggong wan, insadi imgoyan di. 35 Ha dowak ina aban igtarogbongan iglobok gis nanya fag sirang, insadi im-anggong wan, insadi imgoyan di. 36 Ha dowak ama gibolon sas iyab insadi im-anggong wan, insadi imgoyan di. 37 In Hisos manga katogbong naintaw, Haw kagfon hyami, siday tonya aban? Is Hisos nasagot, nafalimbay kiti, No siday ham iglag ka manga boyaw hagang igtifonan, ya sinya wa ka habilogan natay.
181 Ginya madis Hisos igfwayong has taw sadik halimbawa, kaarakitay igfaadal has taw kitay, ta fag fagabag darangin, fag idwa kalombay ista manga fangayofan. 2 Is Hisos iglwang, Sa sadik banwa ha sadik fangabaya kadwa kadala in Diyos, idwa yadi magalang has taw. 3 Ha akwa yadi sadik ina balo sinya fag banwa ka fagabag syag has fangabaya. Ka ina fagabag sagad kitay, Togbongan angko, fatabo hyami hampangan maskin ha akwa igfahoriyan angko. 4 No kayodak swali ka fangabaya kafang yapdig togbong ka ina balo. Dapat no dogay, it fangayofan iglwang, Nyawa ahodwa kadala in Diyos, idwa yadi gomalang nyawa hada fag taw, 5 ho tomogbong fafiyan to fag ina fakahoriyon, maskin hanya fagaba waglibang angko, homyaya waglag hanya nogswaliyan wagswaliyan nogsyag hangko. 6 Kagfon intam iglwang, Yabay, ham nadog ka dwat fag fangabaya fwayong. 7 Dapat is Diyos idwa kafang igfafiyan no ha taw igfahoriyan it manga nafili kagsagad togbong gi hanya yabi sirang. Hanya dogay aw bago digtogbong, ham gayfan? 8 Yatokitay hogfwayong hayo, is Diyos dagos wagfafiyan ista fakahoriyon. Dapat ay, aho Kanbali Taw nombangkad hastay is baba daga, aho awkin ha lagon manga taw igsyag hangko, ham gayfan? 9 Is Hisos igfwayong to sadi yak halimbawa, igfatangon has manga taw kagfadaholon it sadili, kagsyag hat sadili kafiyan, dapat igyod ka tiba taw. 10 Is Hisos iglwang, Ha dowak ama, insadi Farisiyo, insadi fanohot bohis Roma, hawas Fanimbaan-Dahol kaarakitay mandarangin. 11 Ka Farisiyo nalindog a, nogdarangin bilang odi ginas kiti, Diyos, hogbaya wa hyamo kitay ahodwa kito ka tiba taw ka mangag nahaw, mangag daya, mangag fabayowan, hodwa yadi kito kas nwa fag fanohot bohis. 12 Dowa ginan sadik simba ahodwa kwan hanon kaarakitay igdarangin. Hogdisag yadi angko fasafolo gingko lagan fagayo. 13 Dapat ay, ka fanohot bohis Roma nalindog sas bahalan bahalan Fanimbaan-Dahol, idwa yadig bantay has tongod, igfogfog it sadili dobdob, maskin karongkot it fangayofan. Ginyag lwang, Diyos, haw fag kaawangko, ho sadik taw ha ogali dwat. 14 Hogfwayong hayo kitay hanya fag taw no nwali hat balay, it fangayofan inbali fiya san Diyos faglagan, dapat ka sadi idwan. Maskin nyawa faktaw kagfaabwaton it sadili, is Diyos igfalibaba di hanya, dapat kagfalibaba it sadili, is Diyos igfaabwat hanya. 15 Tiba taw nadiya han Hisos ista manga anak garogbot kaarakitay is Hisos tomawid it manga anak. In Hisos manga katogbong, no nalag kasta taban manga anak garogbot, ta nangabaya was taw. 16 Dapat is Hisos nafaakbang it manga katogbong, iglwang, Ham hawa kabaya ka manga anak no gakbang angko, fiya di. Ham fag idwag bando tonya, maskin ka manga ha fangayofan kitos anak ka omafo in Diyos sakop. 17 Ham fag tohod kitay nyawa faktaw kat fangayofan kadwa kitos anak ogbot nogfasakop han Diyos, tonya fag taw idwam aktom san Diyos sakop. 18 Ginya sadik fagtahinan Hodyo gintaw in Hisos, kiti, Haw kagfaadal kafiyaon, kana ara angko bato ibolonon kaarakitay ho omafo haboyagan kadwa ha katabowanan? 19 Is Hisos naintaw hanya, Kana haw nogngayan angko kafiyaon? Is Diyos lamang ka kafiyaon. 20 Haw fadi wadtwa ka manga Batasan Hodyo kitay, Haw fag idwag fabayowan, haw fag idwag fahatay taw, haw fag idwag nahaw, haw fag idwag bangdan is taw, haw fag idwag falamang im ama hanggan im ina. 21 Ka ama nasagot in Hisos, No kitay di, gingko yapdi ogbot ginan, ho katanog wa tonya fagayo. 22 Is Hisos no nadog it sagot, hanyag lwang, Dapat haw ha korang yapdi sadik fakatwawon. Haw fag fasali im manga botang fagayo, ginya fahafodan has manga myabog it manga sali. Yabay no kitonya, haw ha akwa wa kaakwaan san Diyos banwanan sam tongod. Ginya madi ha fag hayastay, tahinan wangko. 23 Dapat ay ka ama inrongkot no nadog kitonya maskin hanya maakwa wa dahol a, nahwangit it kaakwaan. 24 Is Hisos nogbantay yapdi hanya, iglwang kitay, Ka maakwa fag manga taw mahorig fasakop han Diyos. 25 Malpos man ka hayopan kamilyo nogdalan has basad toho dagom has taw maakwa nogfasakop han Diyos. 26 Ka manga nadog is Hisos nogfalimbay kitonya naintaw, No kitonya mangharaw, fakta fag manga taw kambawi? 27 Is Hisos nasagot is taw, Is Diyos syagan gibolon kagsagaya fagsyaganon taw. 28 Ginyas Pidro iglwang han Hisos, Lag nga hami, mi naobon hyami manga banwanan hanggan igtahin wa hyamo. 29 Ginyas Hisos nafwayong has taw, Hogfwayong ha hayo, bonwa bohag, nyawa faktaw ka gobon yap it balay, ngatay it babay, ngatay it manga fadwasay, ngatay it manga magorang, ngatay it manga anak maskin galwasi in Diyos sakop, 30 hanya tomanggap yadi aywan ginan iglabi man kat naobon ka kati fag masohod, ginya madi, gis nanya fag masohod aban nomdasog, ha akwa yadi haboyagan kadwa ha katabowanan. 31 Is Hisos nafasaman ka Safolo-ha-Dowa gis fakaaywanan fag manga taw, ginyag lwang has taw, Yabay, tam hawam bohid has Hirosalim kati. Fagayo kan Diyos manga fangampang nasorat hyabi, kawa hangko, aho Kanbali Taw, im-anod wa sinya. 32 Ta fabahala angko has manga Hintil. Ka manga Hintil yomod angko, mahaya yadi it ibolonon hangko aban, ta tomofay ya ngadingko. 33 Ta bomakbak angko, fahatay yadi, dapat ay, homboyag ya sas fatolo fag sirang. 34 Dapat in Hisos manga katogbong idwa natwagdog it donggon. Idyan angay kitay ta fag tomwa yapdi, tadwa nasalom no kana tonya kan Hisos nafwayong. 35 Da Hisos no kaakbang has banwa Hiriko, sinya ha sadik ama bota matokawan sas bilog dalan, igsagad igsagad odi. 36 Ka ama bota no nadog kitay kaaywanon fag manga taw igdalan sat akbang, naintaw no kana ka sinya. 37 Taglwang hanya kitay, is Hisos, taga Nasarit, igdalan wan. 38 Ginya madi yabay, ka ama bota igtawag marigon, iglwang, Hisos, in Dabid hasokfonan anak, haw fakaawa wangko. 39 Ka manga taw balis fagonan fakaaywanan nangabaya hanya, idwag faawang nangos, dapat ka ama bota kadahol di ngap nogtawag, igsakitan wan, In Dabid hasokfonan, haw fakaawa wangko. 40 Yakangas Hisos intorosan sinya, ginya nafasognod has taw, iglwang, Tabanan hastay tonya fag ama. No naakbang, is Hisos gintaw hanya, 41 Kana kam fakasayaon angko togbongon ha hyamo? Hanyag lwang, Angko Fon, angko mata fag imfoga ya nangos. 42 Is Hisos nafwayong hanya, Im mata fag imfoga ya kati. Haw infiya wan maskin haw igsyag wa hangko. 43 Gis nanya yadi dagos wanfiyat mata. Yakanga ka amag tahin wan Hisos, igbaya han Diyos. Manga taw no nalag kitay infoga it mata, fagayo nafasayagdog in Diyos.
191 Ginya da Hisos igdalan has banwa Hiriko. 2 Ha akwa sinya fag banwa sadik maakwa fag fagtahinan fanohot bohis Roma, kawas Sakiyo. 3 Hanya gwayan wa kasaya lomag no faktas Hisos. Dapat, maskin hanya sadik ama libaba libaba odi, aywan fag taw igfarom hanya, hanyadwag lag in Hisos. 4 Yakanga hanya nadalandan hasta fagonan madali madali a, nafanyak has tongod fon hayo sikomoro kaarakitay lomag in Hisos, ta nogdalan sinya. 5 Is Hisos nondasog sinya sat masohod, natangdan has tongod a, iglwang han Sakiyo, Sakiyo, kalibang, haw fag dokson gis nyamo, maskin kati aho fag migya wa ham balay. 6 Yakangas Sakiyo madali odin dokson gis tongod sikomoro, igbaya wa dahol dahol igtaban in Hisos. 7 Fagayo ka nalag kitay is Hisos igtahin in Sakiyo, ta gidginasan gidginasan wan, taglwang, Is Hisos igtahin ha sadik taw ha ogali dwat, migya hat balay. 8 Ginya madi araw, is Sakiyo nafwayong hasagfon intam kiti, Angko Fon, hogfabokngan wan kangko kaakwaan. Kati yabay ho domisag wa has manga myabog it baliw. Hanggan aho no ha nadaya nyawa faktaw, no sadi kangko nadaya hanya, ho domogang ya tolo ya, yabay inbali ofat kangko fafwaliyon hanya. 9 Is Hisos iglwang han Sakiyo, Kati ka Famawi ibolon igsakop wa hastay fag talanahan kawas Sakiyo in Abraham yadi hasokfonan. 10 Maskin Aho, Kanbali Taw inbangkad hastay, kaarakitay ho somayak, bomawi ya ka mangan liyam. 11 Manga taw no matalingan yapdin Hisos, is Hisos dagos wagtoltol sadi yak halimbawa. Is Hisos natoltol to fag halimbawa maskin hanya kadasog wa has banwa Hirosalim, hanggan manga taw gasolop kitay, ngandayo is Hisos dagos wa farigon in Diyos sakop sinya. 12 Yakangas Hisos igtoltol kiti, Ha sadik ama it manga hafofowan ha kangayanan abwat, iglahaw has ayayo fag banwanan kaarakitay ta fabali hanya gorangon. Ginya aban, nombali wa gorangon, goli ya. 13 To fag ama, nodyan ginan git balay, nafatawag it manga sogowan safolo a, nafahafod myasa sadik daan piso. Nafwayong hat manga sogowan, No baliday hodya mwali, to fag kwarta ngatay ham fag sali, ginyag fasali ya domwag kaarakitay lomag tobo. 14 Dapat kat manga sakop, ka bohonwat sogowan, ka myasa wa ginya, kadwat wa dahol iglag ka kabali ista gorangon. Yakanga hanya nonlahaw wan, ta nafasonson it manga sogowan hasagbahala kaarakitay lomwang, Mi dayo kitay to fag taw fag idwam bali hyami gorangon. 15 Ginya madi aban, hanya nonbali wa gorangon, nwali ya ngawat balay, nafatawag ya nga kat manga sogowan it nagdisagan manga kwarta kaarakitay tomwa no dahoday fagayo kasta nafatobo. 16 Ka bago bago fag sogowan naakbang has gorangon, nalwang, Angko fon, hyamo nafaano angko kwarta sadik daan piso, ho nafatobo safolok daan. 17 Ka gorangon nasagot, Yabay kafiyaon, haw fiya fag sogowan, kawa haw naano fiya, nyawa ogbot fag halga, kati aho fabahala hyamo ha safolok banwa. 18 Ginya madi kat fadowa fag sogowan naakbang yadi hanya, nalwang, Angko fon, hyamo nafaano angko kwarta sadik daan piso, ho nafatobo limak daan. 19 Ka gorangon iglwang ha hanya, Ho fabahala hyamo has limak banwa. 20 Ka sadi yak sogowan naakbang has gorangon a, nalwang, Angko fon, to kam nafaano kwarta hangko sadik daan piso. Ho nasafot sas basad taong, ho natago odi. 21 Hondala digfatobo maskin haw mahigpit wan nogsohot, nyawa ka bohonwa hyamo naano, haw igbol di, ha gani wan, nyawa bohonwa ka hyamo nafamgas. 22 Kat fon iglwang, Idwa fiya fag sogowan haw. Gim sadili bibig hampang hogfatohoyan hyamo has fadosaan. Gwadi ha mangharaw danwa twa kitay aho mahigpit, haglwang kitay ahogbol ka bohonwa angko, aho gani ka bohonwa angko nafamgas. 23 No kitonya, kana mayon ha nodwa nafwalid angko kwarta sas fanifonan has famotangan? Ginya ha tobo yap man araw aho nogbol ginya, aho no nwali. 24 Ka gorangon iglwang hat manga ofod sinya, Ham bol wa gi hanya ka kwarta sadik daan piso, disagan tonya fag sogowan ka ha safolok daan. 25 Taglwang, Hyami fon, gwadi ka hanya aywan man, safolok daan piso. 26 Ka gorangon iglwang, Hogfwayong ha hayo, fagayo ka ha nafatobo wan ha tanggapon ya domwag, dapat kangko nadisag kadwa ha nafatobo, ho ngap bomawi ya ginya. 27 No ka man has mangag laban angko, kagdayo angko, fag nangos bohonwa aho kasta gorangon, tabanan hastay tonya fag manga taw, fahatayan sangko faglagan. 28 Nontabo wagtoltol kitonya, da Hisos nadagos wa has bohid has banwa Hirosalim baliwa. 29 Ta no gakbang has tifonan balay sas Bitfagi hanggan Bitanya, sas Moyod Oliboan, is Hisos nafagonat manga katogbong dowa. 30 Is Hisos igtogon kitay, Ham fag hawas masoson fag tifonan balay. Ham araw nomdasog sinya, ham dagos lomag sadik anak habayo libaba, matarabingan, idyapdi ha taw nasahay sinya. Lohasan it tarabing a, goyodan hastay. 31 No ha gintaw hayo kitay, Kana ham noglohas tonya? Ham fag lwang, Kagfon intam kasayag sahay to. 32 Yakangan Hisos nasogo hanya wan. Ta nalag nga ka anak habayo, no kinday in Hisos fwayong. 33 Ta noglohas yapdi ka anak habayo tarabing, it manga fon gintaw, Kana ham noglohas tyamo? 34 Taglwang, Kagfon intam kasayag sahay to. 35 Yakanga ta nagoyod ka habayo libaba han Hisos, ginya madi ta no nasagmak wan it manga rotay aba has baba goyoy habayo, ta nafasahay in Hisos. 36 Is Hisos noglahaw, manga taw igladlad it manga rotay san Hisos fagonan lahawan. 37 Is Hisos no kaakbang has banwa Hirosalim igloslos has lwad Moyod Oliboan, kat tifonan manga katogbong fagayo fagayo igtarawagan wa kasolong iglag, igfasayagdog han Diyos kawasta lagan in Hisos manga naibolon madolaw fagayo. 38 Taglwang kiti, Ka Gorangon ka kadasog hastay kati, san Diyos ngayan, fag bomaya wan. Fag ha kahowayan san Diyos banwanan sam tongod, hanggan fag kafiyan kamlag sam tongod im tongod. 39 Dapat ay, tibak Farisiyo ka koyog has fakaaywanan iglwang han Hisos, Haw kagfaadal, haw fag kabayam manga katogbong. 40 Is Hisos nasagot kitay, Hogfwayong ha hayo, taw nodwa omawang, matohoyanan wan ka odi manga bato ka romokyaw mamasayagdog angko. 41 Is Hisos no gakbang, kabantay has banwa Hirosalim, goraw wan. 42 Hanyag lwang, Hirosalim, haw nangos no dandi twa kati fag manga masohod, no kana fag manga bagay kagdisag kahowayan ha hyamo. Dapat kati to fag manga bagay inharom gi hyamo. 43 Maskin no ginahin aba fag manga sirang, im manga kalaban somafong wa hyamo, fasafong yadi wa alad dahol dahol, ta somaklawan wa hyamo bali bali banwa. 44 Ta homamin wa domwat hyamo aban, hanggan im manga anak basad balay dahol, ta mamin wa fahatay. Ngadi sadik bato idwa hamgoyan kagtarongbawan ha sadi ha sadi, maskin hadwa nabati in Diyos, dayo kadasog kaarakitay bomawi hyamo. 45 Is Hisos nasakbaw basad aladan Fanimbaan-Dahol a, dagos nasogo has dayo alad ka mangag balidya. 46 Nalwang has taw, Insorat san Diyos kasoratan kitay, Ngayanan angko balay, balay fandaranginan, Dapat ham nafabali angko balay, oliyanan odi manga fangnahaw. 47 Is Hisos igfaadal sirang sirang basad aladan Fanimbaan-Dahol. Ka manga fagtahinan fagalan-han-Diyos hanggan ka mangag faadal Batasan Hodyo hanggan ka manga fagtahinan sas banwa Hirosalim, igsayak wa yabay no kinday no fahatay in Hisos. 48 Dapat tadwag lag it halimbawan kaarakitay fahatay hanya, maskin fagayo fag manga taw igtalinga wa fiya fiya is Hisos nogfaadal.
201 Ginya madi aban is Hisos nogfaadal yapdi hanggan igtoltol ka Fiya fag Barita has manga taw basad aladan Fanimbaan-Dahol, ka manga fagtahinan fagalan-han-Diyos, mangag faadal Batasan Hodyo hanggan manga fagtahinan sas basad banwa naakbang hanya, 2 taglwang han Hisos, Ha fwayongan ha hyami, kanam kangayanan haw no gibolon to fag manga bagay. Fakta ka nadisag hyamo kangayanan gibolon kitonya? 3 Is Hisos nasagot has taw, Ho ngap omintaw yadi hayo, ham sagotan angko. 4 Ginday kan-ginan in Hwan kangayanan nogfatogna manga taw, ngatay gin Diyos banwanan sam tongod, ngatay gis taw? 5 Ta nanoltolan yapdi kiti, Tam no lomwang kitay giwam tongod, is Hisos lomwang ara hantam, no kitonya, kana mayon ham nodwa katiwalan Hwan hyabi? 6 Dapat tam no lomwang kitay gi odis taw, ka manga taw bomintok fahatay intam maskin ta katiwala kitay is Hwan in Diyos fangampang. 7 Yakanga ta nasagot in Hisos, Midwa twa no ginday in Hwan kangayanan. 8 Ginyas Hisos iglwang has taw, Ho balaw yadi mamwayong hayo no ginday angko kangayanan aho no gibolon to fag manga bagay. 9 Ginya madis Hisos igfabago igfahalimbawa ya has taw, iglwang kitay, Ha sadik taw nananom manga obas sat baba iyab, nafabahalat obasan hat manga fangano, ginya nalahaw has ayayo, dogay idya nwali. 10 Nondasog was famohadon, no famangtaon wan, kagfon obasan nasogo wat sogowan sadi, kaarakitay bomol ista horay hanya gis bohad obas. Dapat ay, ka manga gano obasan nabakbak di ngap kat fon sogowan, ta nafaoli wa gominan idwa ha diya. 11 Ginya kagfon obasan nasogo has manga gano obasan sadi yak sogowan, hanggan yadi tonya ta nabakbak, ta nafahayan ya ngadi hanya, nafaoli wa gominan, idwa ha diya. 12 Kagfon nasogo ya kat fatolo fag sogowan. Ta naisog di ngap hanya, hanggan wa nafabaran, ginya naokas lamang ha dayo alad. 13 Ginya kagfon obasan iglwang, Kinda odi angko halimbawan? Yabay, ho somogo angko fakaawaon fag anak, ngatay ta gomalang wa hanya. 14 Yatokitay, ka manga fangano obasan no nalag di ngap it anak, tagtoltolan kitay, To wa aba ka omafo it ama kaakwaan, kalibang, tam fahatay wa hanya, ngan aba tam wa ka omafo ka obasan. 15 Ginya ta nagoyod wa hanya has dayo obasan a, nafahatay wa sinya. Kana araw, ham gayfan kagfon obasan ibolonon hat manga fangano? 16 Kagfon hawas obasan fahatay yadi wan ka manga gano sinya, ginya faano has iba fag manga taw ka obasan. Manga taw no nadog in Hisos toltol, taglwang, Liwas, liwas, fag idwa nangos im-anod tonya. 17 Dapat is Hisos nabantay fiya fiya has manga taw, ginya nalwang, Tonya nodwam anod, kana arat kahologan kansorat sas Kasoratan noglwang kiti, Kasta fagdayoon fag bato, ka manga fangalig balay, Tonya di ngap kagfaganit ka balay sas basad solok. 18 Kamdagdag has nwas baba bato imbolang ongay, dapat ay, kamlibit sas balis daga bato, ka bato nomdagdag ha hanya, imrogrog lamang. 19 Ka mangag faadal Batasan Hodyo, hanggan manga fagtahinan fagalanhan-Diyos mabantayan madogan in Hisos natoltol halimbawa. Ta kasaya nangos gomamat hanya dagos, maskin ta nasarom kitay, kawa ngap ista manga sadili in Hisos fagfatangonon sat natoltol halimbawa, dapat ta kadala yapdi has fakaaywanan fag manga taw. 20 Yakanga tagbantay han Hisos fagaba. Ta nasogo tiba taw kaarakitay igfalagon odi kitay tagsayak ka fakaoronganan no gintaw in Hisos, ginya tagsolay di hanya, igfasalan nangos no kampang kaarakitay ta ha fagsombongon nogfagamat in Hisos, igfabahala hanya has gobirnador Roma. 21 To kasta nasogo fag manga taw igmaswag odi iglwang han Hisos, Haw kagfaadal has taw, mi twa wa kitay hyamo manga fwayong hanggan faadal igtoon wa fiya fiya. Hadwa ha fagihidon taw. Sonson wa orongan kam faadalon has taw kan Diyos fakasayaon ista manga ogaliyon. 22 Maangay awkin sas Batasan Hodyo tam nogbayad bohis han Sisar, ngatay idwan? 23 Dapat is Hisos igsarom kitay tagtikis wa nangos igfasalan hanya, yakanga hanyag lwang, 24 Falagan angko sadik kwarta mabilog. Gafo tolad hanggan ngayan kansorat is nyamo? Tagsagot, In Sisar wa nga tolad tonya. 25 Ginyas Hisos iglwang, No kitonya, kan Sisar disagan wa han Sisar, kan Diyos disagan wa han Diyos. 26 Yakanga tadwa syagan giktan in Hisos git hampang sasta fagdogan fakaaywanan. Tandolaw odi in Hisos sagot, ta kyabog it bato fwayongon, fawa ha naawang domwag. 27 Ginya madi tibak Sadosiyo kagfabohag kitay ka manga natay idwam boyag ya domwag, gakbang in Hisos. 28 Taglwang kitay, Haw kagfaadal has taw, is Mwisis nasorat it togon hantam kitay, sadik ama no ha fadwasay ama natay, dapat it babay in-goyan dit indogan, idwa ha anak, ka ama fag babay kat tagyaw kanbalo, kaarakitay no ganak, bilang mandi ka natay it ama. 29 Yabay, ha tasayan fitok ama kagdowasayan. Kasta ahan nababay. Yabay natay wadya ha anak. 30 Ka masoson it ahan nababay it tagyaw kanbalo a, natay yadi wan. 31 Kitonya yadi kat fatolo hanggan wa kat fafito, fagayo nababay wat tagyaw nonbalo. Tasayan nangolbosan, nababay ka ina, dapat fagayo natay wadwa ha anak. 32 Ginya madi no has ginanan ka ina natay yadi wan. 33 Yakanga, gafo babay tonya fag ina ta nomboyag ya aban, kawa ka fitok tasayan nababay hanya istay? 34 Is Hisos nasagot kiti, Manga ama igbabay hanggan manga ina gindogan no kati yapdi fag masohod. 35 Dapat ay, ka manga ama hanggan ina ka fiya lomag ka aban fag kasohodan, ka maangay yadim boyag ya gis kahatayan, fawag babay, gindogan gis nanya aban. 36 Fayadi wa matay domwag, kawa tambali kito yadi wa ka anghil, idwag babay idwa yadi katay. Hanggan tonya fag manga taw in Diyos wa nga anak maskin inboyag ya domwag. 37 Nyawas Mwisis wan igfaorongan wa kitay ka natay imboyag ya. Maskin is Mwisis no nalag ka fon hayo libaba gigang hyabi, gis nanya is Mwisis nangayan in Diyos kitay, In Abraham wa Diyos, in Isaak wa Diyos hanggan in Hakob wa Diyos. 38 Yabay ka manga taw boyagan lamang kan Diyos fagsakopon, bohonwa ka manga mahatayan. Fagayo ka san Diyos boyagan wa fagaba. 39 Tiba kagfaadal Batasan Hodyo iglwang han Hisos, Haw kagfaadal, kafiyaon im sagot. 40 Maskin manga taw idwag bongol gintaw ya domwag in Hisos. 41 Ginyas Hisos gintaw has taw, Kinday ta no twag lwang kitay kan Diyos-natogon-Famawi in Dabid wa hasokfonan anak? 42 Gwadi is Dabid yadi wa ka nalwang sat sorat sas manga Ambahan, Is Diyos nafwayong hasagfon angko, Haw fag matokawan yap sangko balis sihon 43 No kandogay day hodya nafasakop fiya fiya ha hyamo im manga kalaban. 44 Yabay is Dabid mandi ka nangayan in Diyos-natogon-Famawi, kagfon hanya. Kinday hanya nogfon in Dabid, not sadili odi hasokfonan anak, ham gayfan? 45 Fagayo no matalingan yapdi hanya, is Hisos igfwayong hat manga katogbong kiti, 46 Ham fag idwag sokfon ka mangag faadal Batasan Hodyo manga ogali. Ta kasayag solong manga rotay aba aba, hanggan ta gwayan wa kasayagdog manga taw nogbaya hanya ta no gayayag basad banwa. No sas basad manga fanimbaan, ta kasayag tokaw sas fanokawan ka manga ha kangayanan, hanggan ka manga fanokawan akbang hasagfon balay no sasta fanyahodan hanon aywan. 47 Bohondi tonya, taglogos wa ngap manga ina balo banwanan, hanggan ista odi famadogan is taw ta nogdarangin kadogayon. Ka fadosaan kamtohoyan has taw aban mahori man ka tiba taw.
211 Gis nanyas Hisos mabantayan has manga taw maakwa ta nogfwalid it manga disag basad haban fandisagan kwarta sas Fanimbaan-Dahol. 2 Ginyas Hisos nalag sadik ina balo myabog igfwalid yadi ka hanya, dowa odik saga. 3 Is Hisos iglwang, Hogfwayong ha hayo, bonwa bohag, to fag ina balo myabog, it disag mahalga man kasta disag ka manga maakwa. 4 Maskin ka tiba nadisag gi odista labi, dapat to fag ina balo myabog nadisag wa ka hanya sadik kayonya. 5 Gis nanya yadi tiba taw nabaya ka Fanimbaan-Dahol kawa fiya wa kabantay ka manga bato ista nahalig sinya hanggan kasta manga nadisag kanfwalid sinya, myasa wa fiya kabantay. Dapat is Hisos iglwang, 6 Nomdasog gis nanya fag masohod aban, ka hayo faglagon kati tyamo, idwa hamgoyan ngadi dowak bato igtarongbawan, fagayo imrofad lamang. 7 Yakanga ta gintaw in Hisos, Haw kagfaadal hyami, ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay to kaanod wan? 8 Is Hisos nasagot is taw, Ham fag matagahan, ham fag idwa gadayaan nyawa faktaw, maskin aywan kambangkad aban, ngomayan yadingko ngayan, lomwang kitay, hanya wa kan Diyos-natogon-Famawi. Ka manga taw lomwang yadi, Kati fag masohod kan Diyos nafatohoyan. Ham fag idwag tahin kaglwang kitonya. 9 Ham no domog aban manga barita awayan, ngatay kaid-isogan, ham fag idwa galibitan, maskin talaga wa kitonya kamlag aban, dapat bonya tonya ka katabowanan dagos. 10 Ginyas Hisos iglwang has taw, Manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. 11 Ha manga linog dahol dahol hanggan no siday no siday fag banwanan, idwa aba ha hanon hanon, hanggan ha manga fanalafod. Manga fakadalaon hanggan manga falagon madolaw imlag yadi gis banwa sam tongod. 12 Dapat bagom-anod to fag manga bagay fagayo, ta gomamat yapdi hayo hanggan fahoriyan hayo. Ta fagamat hayo hasagbahala sas manga fanimbaan hanggan sas manga porisowan. Maskin aho hayo fagalwasiyon, ta tomaban hayo has manga gorangon hanggan has manga gobirnador. 13 Gis nanya fag masohod ham mamaorongan yadi sasta fagdogan. 14 Ham fag danwag fatohoyan sa hayo manga basad fangayofan gis kati kitay, ham idwa galibitan hayo bato sagoton gis nanya aban. 15 Maskin gis nanya ho domisag ha hayo kadonongan hanggan fatohod hayo hayo bato hampangon has taw. Ngadi sadi sa hayo manga kalaban idwa syagan lomaban hanggan igfabohag hayo. 16 Ka yadi hayo manga magorang, ngatay manga fadwasay, manga kaiban, manga fakilalaon ka fagamat hayo has taw. Ta fahatay yadi tiba sa hayo. 17 Maskin aho hayo fagalwasiyon, fagayo fag manga taw kadwat iglag hayo aban. 18 Dapat ay, ngadi sadik ogat bok gi hayo alfoyo idwa hambohin. 19 Ham nodwag fagomon, ham tomanggap haboyagan orongan. 20 Dapat ham noglag manga tifonan sondalo igsafong wa ka banwa Hirosalim, ham fag twa kitay tonya fag banwa kaakbang wamdwat. 21 Gis nanya aban ka manga taw sas sakop Hodiya fag danwag lagyo has moyod. Ka manga sas basad banwa Hirosalim, faglahaw wan, hanggan ka manga sas moyod, hawa goli has banwa. 22 Maskin gis nanya fag masohod aban, ka manga sirang fadosaan kawam anod fagayo ka Kasoratan fwayong. 23 Isyay wan no ka yangadi manga gabosog hanggan ka ha manga anak ogbot, igfasoso yapdi gis nanya fag masohod aban. Maskin ka manga taw sas baba daga domog mahori wa dahol dahol gis nanya. Hanggan is Diyos omisog to fag layonan taw. 24 Tiba ista kalaban fahatay. Tiba ta pomilit tomaban has fagayo fag manga layonan banwanan. Ka manga Hintil domaog, hanggan yomod wa fiya fiya ka banwa Hirosalim, no kandogay day kaanod kitay, manga Hintil kagbahala yapdi sinya. 25 Aban ha manga falagon madolaw sas myanit, sas magdanon hanggan sas manga fanggasan. Ka manga taw sas manga layonan daga fagayo sadik baba daga imhinol wan, tamdala yadi wan kawa ka dagat nomsaribwaan, ka manga taob homatok wan. 26 Manga taw imlobay wasdala kawa ta no gisip wa gisip wan ka mahori kamlag aban istay is baba daga, maskin ka manga karigonan sas boknga fakayawan imhadhawigan wan. 27 Ginya madi yabay ta lomag wangko, aho Kanbali Taw, kadasog sas baba linyabo, ha karigonan dahol hanggan kangayanan abwat. 28 Yabay, ham, no ha lagan wa kitonya fag manga bagay igfabago, ham fag kasolong wan, ya kaakbang wa ka bomawi hayo. 29 Ginyas Hisos igfahalimbawa ya ngay, iglwang, Lag nga ka manga fon igos hanggan ka tiba fon hayo. 30 Kat manga sanga nogfalongfong wan, tam twa wa kitay kafangaraw wan. 31 Kitonya yadi ham noglag to kangko manga nafwayong kaanod wan, is Diyos kaakbang wa somakop fagayo. 32 Hogfwayong hayo kitay, bonwa bohag, to fagayo im-anod wan ka kati fag masohod fag manga taw no boyagan yapdi. 33 Ka banwa sam tongod hanggan ka daga imliyam wa aban, dapat ay, angko hampang idwam liyam, nyawa ginahin. 34 Ham fag danwa matagahan, ham fag idwa kalibang has kasolongan fagaba, has manga fakalangoon, hanggan ha hayo manga fagisipon istay is baba daga tiba, kaarakitay tonya fag Mahalga fag Sirang idwa omiktan hayo kitos bitik. 35 Maskin ka Mahalga fag Sirang tomahod has fagayo fag manga taw sadik baba daga. 36 Yakanga nyawa ginahin ham fag matalagaan wan, fag fagabag darangin, kaarakitay ham syagan imtolas to fag manga bagay fagayo kam-anod aban, ginya somayango hangko, Aho Kanbali Taw. 37 Gis nanya fag manga masohod, no sirang, is Hisos igfaadal sas basad Fanimbaan-Dahol, no yabi is Hisos sawas baba Moyod Oliboan hanggan wagfasirang. 38 Yakanga marom yapdi ka manga taw hawas Fanimbaan-Dahol kaarakitay tomalingat toltol.
221 Gis nanya ka Fanohodan Tinapay Mayangfis kaakbang wan. Tonya fag fanohodan tagngayan yadi Fanohodan Nagsagayan, ta nogtohod ka anghil no nasagaya ista balay hyabi. 2 Gis nanya ka manga fagtahinan fagalan-han-Diyos hanggan ka mangag faadal Batasan Hodyo igsayak yapdit halimbawan kaarakitay fahatay in Hisos maskin ta kadala ka fakaaywanan fag manga taw. 3 Ginyas Satanas hawan Hodas basad fangayofan. In Hodas bansagan is Iskariyoti, hanya sadi ka gis Safolo-ha-Dowa. 4 Yakangas Hodas inlahaw wan, igtoltol has manga fagtahinan fagalan-han-Diyos, hanggan has manga fagtahinan kagbahala sas Fanimbaan-Dahol, no kinday hanya no fagamat has taw in Hisos. 5 Tagbaya wan, taglwang han Hodas, Mi tomangdan wa hyamo. 6 Is Hodas nafaoyon was taw, hanggan gisip gis nanya no ginahin no somyagan fagamat has taw in Hisos nomsaman di gis fakaaywanan. 7 Aban ka sirang ta no kwan Tinapay Mayangfis indasog wan, hanggan gis nanya yadi fag sirang tagsogba ka anak topa fangafiyan, kawa hasta Yafon Fanohodan Nagsagayan. 8 Yakangas Hisos igsogo inda Pidro da Hwan, igtogon kitay, Ham fag hanya wan fatalagaan intam Yafon Fanohodan Nagsagayan. 9 Da Pidro naintaw in Hisos, Siday nangos hyamo fakasayaon mi nogfatalaga? 10 Is Hisos iglwang, Yabay, nomdasog has basad banwa, ham homablang araw sadik ama ka ha songgoy tapayan fwalidan danom. Ham tahinan wa hanya hat fagsakbawan fag balay. 11 Ham fag lwang hasagfon balay kiti, Kagfaadal has taw gintaw hyamo kitay siday angko fasakbawan famaklay fag lingoban araw, kaarakitay manayowan yadi angko manga katogbong no kwan intam Yafon Fanohodan? 12 Hanya falag ara hayo sadik lingoban dahol, matalagaan sas tongod fag salogan. Ham fag fatalaga intam Yafon sinya. 13 Da Pidro inlahaw wan hanggan ta nalag wa fagayo kito kan Hisos fwayong. Yakanga ta sinya wak nafatalaga ista Yafon Fanohodan Nagsagayan. 14 Nondasog gis nanya fag masohod ta nogyafon, is Hisos ha yadi was bilog fanganan hanggan it manga Fandiya-Barita. 15 Is Hisos igfwayong has taw, Ho danwa kasaya wa dahol kitay, tam fag manayowan yapdi kwan intam Yafon Fanohodan Nagsagayan, ho bago domog mahori. 16 Hogfwayong ha hayo hodwa yapdi homwan domwag kito, to nodyam anod san Diyos sakop banwanan. 17 Ginyas Hisos nabol fanginoman ka ha sabahan obas, nabaya in Diyos, nafagamit has taw, iglwang, Ham fag bol toy, ham fagayo fag golbosan ginom gistay fag fanginoman. 18 Hogfwayong ha hayo hodwa ominom domwag sabahan obas no baliday is Diyos nodyag sakop fagayo. 19 Ginya madis Hisos nabol tinapay, nabaya in Diyos, nafaarogbotan, ginya nadisag has taw, iglwang has taw, Toy angko habilogan kangko fagdisagon kaarakitay ha hayo. Ham fag sokfon yadi aban to fag ogali kaarakitay ham maayfanan ya angko. 20 Kitonya yadi, ta nontabo wagyafon, is Hisos nabol ka fanginoman, iglwang, To fag fanginoman ka bago fag taranggapan kan-ganit sangko folot kamwatwat kaarakitay ha hayo. 21 Dapat istay yadi wan ka kaoyon angko manga kalaban, igsayo yadi wangko. 22 Maskin aho, Kanbali Taw, kaakbang wa kalahaw, kito kan Diyos nafatohoyan, dapat ay, isyay wan kangko ofod ka kaoyon angko manga kalaban. 23 In Hisos manga katogbong garintawan ha sadi ha sadi kitay, Faktaw santam kam-oyon in Hisos kalaban? 24 Araw araw ogbot, in Hisos manga katogbong igdaraogan no faktaw kambali abwat man it kangayanan. 25 Is Hisos igfwayong has taw, Ka manga gorangon istay sas baba daga igfatakat manga sakop hanggan ka manga ha kangayanan istay kagfasayagdog it sadili has taw. 26 Dapat ham fag idwa kitonya. Ka abwat man has fagayo it kangayanan sa hayo, hanya fag fatimbang kitay hanya ka libaba man has taw it kangayanan. Ka hayo fagtahinan fag hanya ka matogbongon is taw. 27 Fakta ka abwat man is taw it kangayanan, ham gayfan? Ngatay kagtokaw odi sasta bilog fanganan, ngatay kat sogowan kagfalo igsyahod? Bohonwa awkin ka matokawan sas bilog fanganan ka abwat man it kangayanan? Dapat tam no gofodan, aho bilang odi sadik famalo yadi. 28 Ham ka naofod angko fagaba nyawa sawangko basad fakahoriyan kagsolay angko. 29 Yakanga no kinday angko Ama igfatalaga angko bato sakopon aban, kitonya yadi ahog fatalaga hayo kangayanan sangko sakop aban. 30 Tam fagaba wagsayowan kwan, manga ginom gis nanya aban hanggan ho fatokaw yadi wa hayo sas manga tokawan fanokawan gorangon aban, kaarakitay ham kabali manga fangabaya han Israil manga hasokfonan safolo ha dowak layonan. 31 Ginyas Hisos iglwang, Simon, Simon, yabay is Satanas nanagad kitay hanya fag somolay hayo kitos igfalayon fayay gis manga opa sas nigo. 32 Dapat ahog darangin wa kitay, haw fag idwag fagomon igsyag hangko. Ginya, im fangayofan nogsoyo ya, farigonan yadim manga fadwasay fangayofan. 33 Is Pidro nasagot, Angko Fon, gwadi hodwa kafang omofod hyamo kati, nyawa hanggan wamporiso hanggan wa matay. 34 Is Hisos iglwang, Yatokitay, Pidro, hogfwayong hyamo, ka tabag idyag taraok, ha tomangkod araw hangko tolo ginan kitay, hadwa kilala angko. 35 Ginya madis Hisos gintaw hat manga katogbong kiti, Aho no nasogo hayo igbarita itfagonan, ha korang awkin sa hayo, nyawa kana, nyawa ham idwa ha diya ngadi sokloban, manga sopot, idwa yadi ha diya lapak? Taglwang, Idwa ha korang. 36 Is Hisos iglwang, Dapat kati, ham no ha sokloban, ngatay sopot, ham fag diya mandi. Kadwa ha binagaw, fasaliyan wat balokas, ginya madi, saliyan sadik binagaw. 37 Maskin hogfwayong ha hayo kitay ka Kasoratan fwayong kawa hangko, fag im-anod wan. Ka Kasoratan iglwang kiti, Ta nafatimbang hanya bilang sadik taw ha kasalanan. Maskin kansorat kawa hangko kaanod wa kati. 38 In Hisos manga katogbong iglwang, Hyami Fon, yabay to wa ka dowak binagaw. Is Hisos nasagot, Hosto wa tonya. 39 Da Hisos nadokson gis lingoban sas tongod fag salogan, nalahaw ya ngawan, hawas Moyod Oliboan kito kan Hisos ogali nogbanwan, hanggan it manga katogbong natahin yadi wa hanya. 40 Ta nondasog wa sinya, is Hisos igfwayong has taw, Ham fag darangin kaarakitay idwa hagfaloksowan hayo. 41 Is Hisos nasaman yapdi ogbot it manga katogbong, manga kayos bintohan bato, ginya nalingkohodan hanggan nandarangin. 42 Is Hisos iglwang, Mama, no maangay sa hyamo, fag bol nangos gingko to fag fanginoman kahoriyan kati. Dapat nyawa hoglwang kitonya, fag hyamo wa kafangayofanan kam-anod, bohonwa kangko. 43 Ginya sadik anghil gin Diyos banwanan sam tongod inbangkad han Hisos, nafarigon hanya. 44 Dapat in Hisos fangayofan inhori wa dahol dahol, yakanga bohondi kito ka haraw nogdarangin, hanggan dit gayamon bilang dahol fag tiktik folot kantigna has baba daga. 45 Nontabo wagdarangin, is Hisos nalindog ya ngawan, infwali ya hat manga katogbong, iglag mangharaw, ta matoyogan wan, maskin inrongkot wa dahol dahol haraw. 46 Is Hisos iglwang has taw, Kana mayon ham no matoyogan? Ham fag kabangon wan, ham fag darangin wan kaarakitay idwa hagfaloksowan hayo. 47 Is Hisos no kampang yapdi, sadik habanan taw kadasog wan, igtahin in Hodas, sadik ama gis Safolo-ha-Dowa. Is Hodas gakbang in Hisos kaarakitay omayok hanya. 48 Dapat is Hisos igfwayong hanya, Hodas, haw awkin omayok angko, aho Kanbali Taw, haw no kaoyon angko manga kalaban? 49 In Hisos manga ofod katogbong no nalag ista bato ibolonon, taglwang, Hyami Fon, ngatay mi bomasing yadi was taw? 50 Ginya ka sadik katogbong nabasing ka gorangon fag fagalan sogowan a, natigbas ka balis sihon fag talinga. 51 Dapat is Hisos iglwang hat manga katogbong, Ham fag idwa kityamo, ham. Ginyas Hisos natawid ya ka sogowan talinga, yakangan somag ya. 52 Ginya madis Hisos igfwayong has fagtahinan fagalan, hanggan has manga fagtahinan igbahala sas Fanimbaan-Dahol, hanggan has manga fagtahinan sas banwa, kanbangkad yadi wan kaarakitay gomamat in Hisos, iglwang kitay, Aho awkin tolisan, ham gayfan, maskin ham masalawidan manga talibong, mabitbitan manga pinotol kaarakitay gomamat angko? 53 Aho fagaba gofod hayo sirang sirang sas Fanimbaan-Dahol, bati ham idwa gamat angko gis nanya. Dapat kati ya, basad yabi ka hayo fakasayaon hanggan ka karigonan marom kagbahala kati. 54 Ginya ta nagamat wa ngay in Hisos hanggan nataban hanya has Gorangon fag fagalan balay. No kitay di is Pidro goyan haraw in Hisos, dapat ayayo sat ginanan. 55 Ta no nafagba afoy sas basad aladan, is Pidro matodtodan sasta akbang, mafanayangan yadi. 56 Ginya sadik sogowan ina nalag in Pidro sinya, ka yawa afoy nogsakop in Pidro hanggan nabantay wa hanya fiya fiya, iglwang, To fag taw in Hisos yadi wa ofod hoglag. 57 Dapat is Pidro igtangkod yapdi, hanyag lwang, Yabay ina, hodwa kilala hanya. 58 Araw araw ogbot, sadi yak taw sinya, nalag in Pidro, iglwang, Haw yadi kat ofod sadi, ha? Dapat is Pidro nasagot, Yabay yabay ama, aho bohonwat ofod. 59 Nonsagaya manga sadik tama sinyahod, sadi yak taw igfaaronganon iglwang, Matohoyanan to fag ama it ofod sadi, maskin pariho gis sakop Galiliya. 60 Dapat is Pidro igsagot ya, Ama, hodwa natwagdog kam faglwangon. Is Pidro no kampang yapdi, ka tabag dagos wa nanaraok. 61 Ginya kagfon intam naolingan han Pidro, nabantay hanya fiya fiya. Ginya madi yabay is Pidro bago di natohod kagfon intam it fwayong kitay, Ka tabag bago tomaraok araw, haw tolo wa ginan tomangkod has taw angko. 62 Is Pidro nadokson gis basad aladan, naoraw marigon. 63 Gis nanya yadi fag masohod ka mangag bantay in Hisos igyod, igfasidyowan odi hanya, igsontok ya ngadi. 64 Ta nataklob yadin Hisos mata, ginya taglwang, Fanlag ngay boktongan fakta nga kagsontok hyamo kati? 65 Aywan yapdi ista manga hampang dwat kawa han Hisos igfasidyowan odi hanya. 66 No bago marom ka manga fagtahinan fanifonan Hodyo fagayo, ka manga fagtahinan fagalan-han-Diyos hanggan ka mangag faadal Batasan Hodyo matifonan wan. Ta nataban in Hisos has Fanoltolan Hodyo ka ha manga kangayanan. 67 Taglwang han Hisos, Fwayongan hyami, haw awkin kan Diyos-natogon-Famawi? Dapat is Hisos igsagot, Nyawa ho fomwayong hayo, ham idwa yadim tiwala. 68 Hanggan aho no mangintaw hayo, ham idwa yadi somagot. 69 Dapat ay, gis kati ginan, aho, Kanbali Taw, tomokaw san Diyos karigonan akbang, sat balis sihon. 70 Ta fagayo gintaw in Hisos, Haw wa awkin kan Diyos Anak, mangharaw? Is Hisos nasagot, Ham mandi ngap ka gwas kitonya. 71 Yakanga ta nanoltolan ha sadi ha sadi, taglwang, Kana yapdi fag sombong kantam fagfanayaon? Tam ngap nadog wa fiya fiya gi wat sadili bibig ka nafwayong.
231 Ginya madi yabay sadik kayonya tifonan inlindog a, nataban wan Hisos han Pilato. 2 Gis nanya tagfabago wagsombong han Pilato, taglwang, To fag taw mi naiktan maskin igfasognod hyami kapariho iglaban has manga ha kangayanan, igbando yadi fag idwag bayad bohis han Sisar. Igfasayagdog ya ngadi has taw kitay hanya wa hono kan Diyos-natogon-Famawi, ka sadik gorangon. 3 Ginyas Pilato gintaw in Hisos kiti, Haw awkin ka Gorangon manga Hodyo? Is Hisos nasagot, Haw wa ngap kaglwang. 4 Is Pilato igfwayong has manga fagtahinan fagalan-han-Diyos hanggan has fakaaywanan fag manga taw, Hodwa ha donggon it kasalanan to fag taw. 5 Dapat tagpilit wagsombong, taglwang, Hanya wa kagfasognod sadi wak dahonya sakop Hodiya, igfwayong has taw kitay fag lomaban ka manga ha kangayanan. Gi yapdis sakop Galiliya nogfabago igfasognod ka manga taw hanggan wandasog hastay kati. 6 Is Pilato no nadog kitay is Hisos gis Galiliya, hono, nogfabago igfasognod has manga taw, naintaw has taw ngatay is Hisos taga yadi Galiliya. 7 Yakangas Pilato no nadog kitay is Hisos giwas Gorangon Hirodis sakop fag banwanan, is Pilato nasogo in Hisos han Hirodis maskin is Hirodis sawas Hirosalim gis nanya. 8 Is Hirodis nabaya wa dahol dahol iglag in Hisos, maskin aywan it donggon ista fwayong gin Hisos. Hanya dogay wa kasaya lomag hanya. In Hirodis fakasayaon, is Hisos nangos fag omibolon sadik bagay madolaw san Hirodis faglagan. 9 Yakangas Hirodis, nyawa gintaw wa gintaw wan Hisos, is Hisos fawa nasagot ngadi sadik hampang. 10 Ka manga fagtahinan fagalan-han-Diyos hanggan ka mangag faadal Batasan Hodyo sinya yadi wan idwag fagomon igtawag marigon, igsombong kan Hisos naibolon. 11 Is Hirodis hanggan it manga sondalo nayod in Hisos hanggan nafaniring kitay hanya sadik gorangon. Ta nafasolong rotay ha kangayanan, fiya kabantay, han Hisos, ginya ta nafafwali ya han Pilato. 12 Gis nanya lamang fag sirang da Hirodis da Pilato nangamigosan yadi wan, nyawat fagonan haraw kahodhoriyan. 13 Is Pilato nafatawag ka manga fagtahinan fagalan-han-Diyos hanggan ka manga fagtahinan sas banwa Hirosalim hanggan ka fakaaywanan fag manga taw. 14 Ginyas Pilato iglwang has taw, Ham no nataban hastay to fag ama, hayo sombong hangko kitay, to fag taw kawag fasognod manga taw fag lomaban ka ha manga kangayanan. Kati yabay ho no nasaysay hanya sa hayo fagdogan, ho nadog hayo manga sombong ha hanya idwa ha fakaoronganan. 15 Is Hirodis kito yadingko idwag dog kitay hanya ha kasalanan, yakanga nafafwali ya hantam. Idwa fiya igfatohoyan hanya has kahatayan, maskin hanya idwa ha kasalanan daho wasagfahatay hanya. 16 Yakanga ho fabakbak lamang is taw hanya, ginya ho fomalfas ya. 17 Fagaba sas masohod Fanohodan Nagsagayan, is Pilato fag ha falfason ka sadik Hodyo kanporiso kaarakitay ka manga Hodyo bomaya hanya. 18 Dapat ay, ka fakaaywanan fag manga taw nanarawagan di ngap igsohodan, taglwang, Mi dayo tyamo fag taw. Fag is Barabas kantam fagfalfason. 19 Is Barabas kasta nafaporiso itfagonan, kawa hanya nafasognod ngay has taw ka nalaban has manga ha kangayanan sas banwa Hirosalim, hanggan ha nafahatay yadi taw. 20 Sadi ya ginan is Pilato nahampang has taw maskin hanya kasayag falfas in Hisos. 21 Dapat ta nanarawagan di ngap kitay, Fapakowan in Hisos, fapakowan hanya sas nafatimbangan hayo. 22 Fatolo wak olit is Pilato gintaw has manga taw, Kana mayon, kanat naibolon dwat ham gayfan? Hodwa ha lagan in Hisos fabangdanan no kitay daho wasagfahatay hanya. Yakanga ho fabakbak lamang is taw hanya, ginya ho fomalfas wan. 23 Ta ngap inbagat wan, inlabi wa ngap igtarawagan kitay, Fapakowan in Hisos sas nafatimbangan hayo. No dogay ista tawag nadaog wan Pilato fwayong. 24 Yakangas Pilato nafatohoyan kitay hanyag faangay no kinda kasta fagsagadon. 25 Nafalfas kasta fagsagadon, ka taw kanporiso maskin iglaban has manga ha kangayanan hanggan ha nafahatay taw, ginya nafabahala in Hisos has taw kaarakitay ta omibolon nyawa kana kasta fakasayaon ha hanya. 26 Ka manga sondalo nogtaban in Hisos kaarakitay igfapako hanya, ta ha nahablang sadik ama, is Simon, taga Sirini, goli has banwa git iyab. Tagpilit igtaban hanggan nafafasan hanya ka nafatimbangan hayo, balin Hisos ginanan. 27 Kaaywanon fag manga taw goyan san Hisos ginanan, ha akwa manga ina ayo goraw wa dahol maskin kaawa hanya. 28 Dapat is Hisos natakfili ginyag lwang has manga ina, Manga anak ina, taga Hirosalim, ham fag idwa goraw angko. Fag ka hayo sadili hanggan hayo sadili manga anak ka hayo fakaawaon. 29 Yabay, aban fag manga sirang ta lomwang, Fiya man mangharaw ka manga galayos, kadwa naanak, kadwa yadi ha nagfasosowan. 30 Gis nanya fag manga sirang aban, manga taw lomwang has manga fongso, Ham fag katono ha hyami, hanggan has manga moyod, Ham fag tomabon wa hyami. 31 Maskin halimbawa, ta no gibolon kito ka fon hayo no latoy yapdi, kinday aban, ista ibolonon ka hayo no tonga wan, ham gayfan? 32 Ka manga sondalo nataban yadi dowak ama ka ha kasalanan orongan kaarakitay ta fasohod yadi wan Hisos nogfahatay. 33 Ta nondasog sa sadik foyo, tagngayan Botol Alfoyo, ta nafapako in Hisos sas nafatimbangan hayo sinya. Ta nafapako yadi ka dowak ama tolisan, insadi san Hisos balis sihon, insadi sat balis wala. 34 Ginyas Hisos iglwang, Mama, haw fag faliyam ista ibolon dwat, fag idwa kahori is taw, maskin tadwa twa kasta kasalanan ta nogfapako angko. Ginya ka manga sondalo namostahan no fakta ka omafo in Hisos manga rotay. 35 Ka manga taw malindogan sas ligongan mabantayan odi in Hisos. Dapat ka manga fagtahinan gis banwa igfasidyowan odi hanya, taglwang, Hanyag bawi tiba taw, no hanya nga kan Diyos-natogon-Famawi, kan Diyos nafili, gwadi hanya fag bomawi yadit sadili habilogan. 36 Ka manga sondalo nayod yadin Hisos, gakbang hanya, igfagamit ha hanya langgaw. 37 Taglwang yadi hanya, No haw wa nga ka Gorangon manga Hodyo, gwadi bawiyan wam sadili. 38 Masoratan yadi san Hisos tongod alfoyo ista sombong sas manga fangampangan manga Girigo, manga taga Roma, manga Hibriyo, kitay, To wa ka gorangon manga Hodyo. 39 Ka sadi ka ha kasalanan, ka mapakowan yadi sinya, igmaswag odin Hisos iglwang, Bohonwa awkin haw kan Diyos-natogon-Famawi? Gwadi bawiyan hyamo sadili, bawiyan yadi hyami gistay. 40 Dapat it fadowa nangabaya hanya, nalwang, Hadwa awkin kadala in Diyos? Bati tagfadosa yadi hyamo kito hanya. 41 Tam wa ngap ka fiya fadosaon kito, kawa ganti intam manga kasalanan, dapat ay, to fag taw idwa ha naibolon dwat. 42 Ginyag lwang yadi han Hisos, Hisos, haw nangos fag tomohod yadingko haw no kabali wa hari aban. 43 Is Hisos nasagot hanya, Hogfwayong ha hyamo, tam araw mangoyogan wan has fiya fag oliyanan ka manga natay. 44 Araw, no manga boknga wa sirang, sadi wak dahonya banwanan inharom wan, hanggan wa myanit kabohid. 45 Ka kandogay inya ka myanit fawa nasalog, inliyam wan, hanggan ka fanahop rotay sas fagbokngan Fanimbaan-Dahol dagos wanragyang, namokngan wan. 46 Ginyas Hisos igtawag marigon, iglwang, Mama hogfaano ha hyamo angko falad. Hanya nalwang di nga kitonya, nafalfas wat ipsaw. 47 Ka fagtahinan sondalo no nalag to fag manga bagay, nafasayagdog in Diyos, iglwang, To fag taw orongan wadwa ha kasalanan. 48 Fagayo fag manga taw ka matifonan mabantayan sinya nalag wa fagayo no kinda kananod, tandala wan, yakanga no goli hat manga balay, tagbakbak hat manga sadili boknga dobdob. 49 In Hisos manga fakilalaon fagayo malindogan yadi sas dayo ogbot, hanggan ka manga ina ka natahin in Hisos gi yapdis sakop Galiliya sinya yadi wan. Ta fagayo nalag tonya fag manga bagay. 50 Yabay, ha sadik ama is Hosi, gis banwa Arimatiya, sadik banwa Hodyo. To fag ama it fangayofan hanggan it ogali kafiyaon. Hanya mafanayan yadi no ginahin is Diyos nogfabago it sakop. Nyawa kitay is Hosi sadi gis fanoltolan manga fagtahinan Hodyo, hanyadwa goyon is taw ista naibolon han Hisos. 52 Is Hosi hawan Pilato, nasagad in Hisos habilogan. 53 No nabol wa gis tongod fatimbangan hayo in Hisos habilogan, nasafot basad homot madamol, ginya nafaigyan sasta basad natigib dalifi, tadyapdi ha naglobgobanan taw sinya. 54 Gis nanya fag sirang, sirang Famatalaga, faginan yadi wa has Sirang Kafahowayan. 55 Ka manga ina ka natahin in Hisos gi yapdis sakop Galiliya naoyan in Hosi a, ta nalag yadi wa kat nagfwalidan in Hisos hanggan no kinday no mafwalidan sinya. 56 Ginya madi ka manga ina nwali wan, igfatalaga manga famabanglo hanggan lana. Ka Sirang Kafahowayan nondasog wan, ka manga ina nafahoway no kinday ka Batasan Hodyo fwayong.
241 Dapat ay, no marom marom yapdi sas sirang gona sa sadik simba, ka manga ina hawas lobgoban nagtigiban bato, ha diya it manga nafatalaga famabanglo. 2 Ta nondasog wan, taglag ka lohib fanahop bato inoson wan has dayo sakbawan. 3 Yakanga ta nasakbaw, dapat tadwa ha lagan in Hisos habilogan sinya. 4 Yabay, ta no nangarisipon yapdi, sadi odi ginan ta nalag dowak ama sasta akbang, it rotay di masilaw wan. 5 Maskin tandala wa dahol dahol, ka manga ina matarohongan wa fiya fiya, ista walong di matignaan wa fiya fiya has boknga daga. Ginya ka manga ama nalwang has manga ina, Kana mayon ham nogsayak ka boyagan sasta nagfwalidan natay? 6 Idwastay, hanyan boyag ya domwag. Ham fag tohod kat fwayong ha hayo ham no sayapdis sakop Galiliya. Hanya danwa nalwang kitay, 7 Ka fiya hanya, Kanbali taw, ta fag fagamat has manga taw ha kasalanan, fag impako yadi sas nafatimbangan hayo, ginya madi fag imboyag ya sas fatolo fag sirang. 8 Ginya madi ka manga ina bago di natohod in Hisos fwayong. 9 Ka manga ina no nwali gis lobgoban, ta natoltol han Hisos manga katogbong kasta lagan fagayo, natoltol has Safolo-ha-Sadi hanggan hasta ofod tiba. 10 To fag manga ina kawa da Mariya Magdalina, da Hwana hanggan da Mariya in Santyago ina. To fag manga ina, hanggan it manga ofod tibak ina, ka natoltol tonya has manga Fandiya-Barita. 11 Dapat ka manga Fandiya-Barita naayfan ka manga ina igfatoga odi, yakanga tadwa katiwala. 12 Nyawa kitonya, is Pidro inlindog wan, igdalandan, namantay wa has naglobgoban. Is Pidro natalonggaw has basad nagfwalidan, dapat idwa nga hanlag, no bohonwa ka odista nagsafotan it habilogan. Yakangas Pidro nwali wa a, nataka wa ngay kat lagan. 13 Gis nanya yadi fag sirang in Hisos katogbong dowa hawas sadik forowan balay sayok, Imaos. It kaayayowan gis Hirosalim manga safolo ha sadik liho. 14 Ta no boknga wa dalan, tagtoltolan kasta lagan fagayo madayo. 15 Ta nogtoltolan yapdi, is Hisos wan ka natahod is taw, ginya ta koyogan wan. 16 Ka dowak katogbong iglag in Hisos, dapat tadyapdi kilala hanya. 17 Is Hisos gintaw has taw, Kana ka hayo fagtoltolon boknga dalan? Ta natorosan wa a, marongkotan odi. 18 Ginyan sadi, kat ngayan is Kilyopas iglwang kiti, Haw laya ka sadi dik famaklay has Hirosalim kadya nadog ka manga bagay ka ngalay yapdin lag sinya. 19 Is Hisos naintaw, Kana fag manga bagay tonya? Ta nasagot kiti, Kawas Hisos, taga Nasarit, in Diyos fangampang sadi, nyawa gibolon, nyawa kampang, idwa ha bosal san Diyos faglagan, hanggan sasta faglagan fagayo fag manga taw. 20 Hyami yadi manga fagtahinan fagalan-han-Diyos hanggan manga fagtahinan banwa nafagamat hanya has taw kaarakitay fatohoyan has kahatayan. Ta napako yadi hanya sas nafatimbangan hayo. 21 No kitay di migsyag kitay hanya ka fomalfas ka manga taga Israil. Bohondi tonya ka hyami fagisipon. Kati madayowan nonlag kitonya, 22 hanggan mindolaw wan ka tiba hyami ofod manga ina no nabarita ha hyami. Ta marom yapdi, hono, namantay has lobgoban, 23 dapat tadwa ha lagan in Hisos habilogan sinya. Tanfwali ya, taglwang, Mi ha lagan sadik madolaw, manga anghil kaglwang kitay is Hisos boyagan. 24 Hyami manga ofod tiba ginya yadi was lobgoban, kitonya nga kasta lagan, dapat tadwa ha lagan in Hisos. 25 Ginyas Hisos iglwang has taw, Yabay yabay ham. Kana mayon ham nodwa katiwala fagayo kan Diyos manga fangampang fwayong. 26 Idwa awkin ka fiya kan Diyos-natogon-Famawi fag omagwanta to fag manga bagay fagayo bago domog it kafiyan? 27 Is Hisos nafatwagdog has taw kansorat sas manga Kasoratan fagayo kawa hat sadili. Gin Mwisis manga nasorat has taw nogfabago igfatwagdog, hanggan wa han Diyos manga fangampang nasorat. 28 Araw ta no kaakbang wa hasta hadasogan fag forowan balay. No kalag di, is Hisos igfadagos yapdit lahawan. 29 Dapat ta kwangit yapdig falahaw hanya, taglwang, Haw fag hawa hyami balay, maskin ka myanit kasangday wa a, kaharom wan. Yakangas Hisos nasakbaw wa sinya. 30 Ta nogsayowan wa kwan sas fanganan, is Hisos nabol tinapay a, nabaya han Diyos, ginya nafaarogbotan, nadisag yadi has taw. 31 Ta bago di nahilala kitay, is Hisos wa ngap mangharaw. Ginya madi is Hisos idwa hanlag domwag. 32 Ginya tagtoltolan kiti, Yabay yabay, maskin manghara kitonya wak masayagdog nogtoltol intam sas boknga dalan, hanggan igfatwagdog intam gis Kasoratan manga fwayong. 33 Ka dowak katogbong dagos wanlindog a, nwali has Hirosalim. Ta nondasog, taglag ka Safolo-ha-Sadi matifonan hanggan ista manga ofod tiba. 34 Tagtoltolan kitay, Orongan wan kagfon intam inboyag ya. Nafalag wa han Simon. 35 Ka dowak katogbong natoltol yadi has taw kat lagan sas boknga dalan, hanggan no kinday ta no nahilala in Hisos, hanya no nafaarogbotan ka tinapay. 36 Ginya ta nogtoltolan yapdi kitonya, is Hisos mandi kandasog sasta fagbokngan. Is Hisos igfwayong has taw, Fag sawa hayo ka kahowayan kati. 37 Dapat ay tanhinol wa ngap, tandala wan, ta gayfan ngan di falad ka sasta fagbokngan. 38 Yakangas Hisos igfwayong has taw, Kana ham no marongkotan odi? Kana ham no gadowan yapdi? 39 Bantayan angko manga gamat, manga bitis, aho wa ngay. Sapkidan angko, bantayan wa fiya fiya. Ka falad idwa ha botol, idwa ha faknol, dapat ham iglag kitay aho ha habilogan mandi. 40 Is Hisos nalwang di nga kitonya, nafalag has taw it manga gamat hanggan it manga bitis. 41 Sas kabayaan ngap tadya katiwala fiya fiya, ta gadowan yapdi. Yakangas Hisos gintaw has taw, Tam ha fanganon yapdi awkin is nyamo? 42 Tagdisag hanya sadik lifong oyang masogban. 43 Is Hisos nabol a, nahwan wa sasta faglagan. 44 Ginyas Hisos igfwayong has taw, Ka manga nadalanan sangko, kangko nafwayong ha hayo tam no gofodan yapdi, kitay, ka fiya, fag im-anod fagayo kansorat kawa hangko san Mwisis Togon, san Diyos manga fangampang manga famasaan, hanggan sas manga Ambahan fag famasaan. 45 Ginyas Hisos naboklas ista manga fangayofan kaarakitay ta tomwagdog ka manga Kasoratan fwayong. 46 Ginyag lwang, Kito kansorat, ka fiya, aho, in Diyos-natogon-Famawi, fag omagwanta mahori, ginya fag imboyag ya gis kahatayan sas fatolo fag sirang. 47 Ginya ka fiya, manga taw kagsyag hangko fag tomoltol has taw sas fagayo fag layonan banwanan. Fag imbarita kitay manga taw fag soyo wan, ginyat manga naogali dwat imliyam wan. Fag gis Hirosalim nogfabago igbarita. 48 Ham ka nalag angko manga nadalanan fagayo, yakanga ham fadogan yadi wan has tiba taw. 49 Yabay, ho somogo ha hayo kangko Ama nagtogonan ha hayo. Dapat ham fag idyag lahaw gis banwa Hirosalim no baliday ham idya ha natanggap karigonan fagsyaganon gin Diyos banwanan sam tongod. 50 Ginya madis Hisos nataban it manga katogbong has dayo banwa. Ta nondasog sas Bitanya, is Hisos nafaabwat it gamat has tongod, ginyag lwang has taw, Ham bomaya wan. 51 Is Hisos, nyawa kampang yapdi, igfabago wa kaabwat has tongod. 52 Kan Hisos manga katogbong nafasayagdog hanya. Ginya madi ta nwali ya nga has banwa Hirosalim, kasolong wa dahol dahol. 53 Ta fagaba wa sas basad Fanimbaan-Dahol igfasayagdog in Diyos sinya.