SANTYAGO

SANTYAGO

¹ Ahos Santyago kagsorat ha hayo. Ahon Diyos hanggan in Kiristo Hisos kagfon intam, it sogowan. Ho gwas hayo, kan Diyos manga nafili, ka nanarowayan ha sadik baba daga. ² Manga fadwasay, tam fag masolong di intam fangayofan, nyawa tam basad manga fakahoriyan bokod bokod kagsolay intam. ³ Maskin tam twa kitay tam nodwag fagomon igsyag in Diyos, tam no basad manga mahori, labi man imrigon intam fangayofan igsyag hanya. ⁴ Yakanga, tam fag danwa karigon odi, karigon odi, tam nogsyag hanggan has aban, kaarakitay intam manga fangayofan imbali hosto, idwa yadi ha korang. ⁵ Dapat, nyawa faktaw santam, nodwa ha kadonongan, sagadan gin Diyos. Ginya madis Diyos domisag hanya kadonongan, maskin is Diyos madisagon, idwa yadi somogat has taw. ⁶ Dapat, tam nogsagad wa orongan, fag syag wa fiya fiya. Fag idwa gadowan intam fangayofan, maskin ka gadowan kitos taob dagat, bagyo odi kagdiya nyawa haday. ⁷ Nyawa faktaw santam no gadowan it fangayofan, idwa twa fiya fiya it fakasayaon, fag idwag syag kitay hanya ha tanggapon gisagfon intam, nyawa kana. ⁹ Intam fadwasay ka myabog fag igbaya wan is Diyos nogfaabwat it kangayanan. ¹⁰ Hanggan intam fadwasay ka maakwa fag igbaya yadis Diyos nogfalibaba hanya, kawa ka kaakwaan imliyam wan kitos borak lamnon. ¹¹ Ka myanit no kaabwat, kawa myanit wa dahol, ka manga lamnon kalayong di. It borak karabak wan, idwa yadi fiya kabantay. Kitonya yadi, ka taw maakwa bilang yadim layong, nyawa haraw kalibang odit manga ibolon fangaboyagon. ¹² Tam nodwa kaoman, nyawa hagsolay intam, intam manga fangayofan masolong. Maskin ka kahoriyan nomtolas wan, tam no naagwanta wan, is Diyos ha fasangbaw hantam ka haboyagan idwa ha katabowanan kantam Fon togon bato disagon has manga galwasi hanya. ¹³ Nyawa faktaw no ha lagan mahori kagsolay hanya, fag idwag lwang kitay is Diyos kagfaloksowan hanya. Idwa ha syagan igfaloksowan in Diyos, hanggan is Diyos idwa yadig faloksowan nyawa faktaw. ¹⁴ Kasta sadili fangayofan masayaon kagfaloksowan has taw, igfasayagdog hanya has ogali dwat. ¹⁵ Ka bali fangayofan masayaon nogtobo, hanggan nogdalid, igbohad ogali dwat. Ginya madi ka ogali dwat nomdahol, it bohad kahatayan wan. ¹⁶ Yatokitay angko manga fagalwasiyon fag manga fadwasay, tam fag idwa gadayaan. ¹⁷ Sonson wa fiya in Diyos manga disag hantam, hanggan fagayo fag manga maangay fag bagay gi wam tongod, gin Diyos intam Ama ka nahalig ka manga bagay kagfayawa intam. Dapat hanyadwa kaoman nyawa ginahin, idwag balihid, idwa yadig farom ka yawa gintam. ¹⁸ Is Diyos nafabali intam it manga anak git fakaoronganan hampang, kawat fasadan kitonya, kaarakitay tam imbalit nafalayon gona git manga nahalig fagayo. ¹⁹ Angko manga fagalwasiyon fag manga fadwasay, tam fag matohodan wan, tam fag idwa kafang igtalinga has taw. Fag idwa kasadi ginan gidolog. Fag idwa madalig sagot dwat donggon. Fag maayfanan yap fiya fiya. ²⁰ Maskin tam no kaisog idwag togbong intam kabali fiya san Diyos faglagan. ²¹ Yakanga tam fag dayo ka manga mahaya fag ibolon. Obonan ka manga dwat fag ogali. Tam fag fasolon intam fangayofan sadi wak dahonya han Diyos nogfaanod it hampang, kantanom santam basad fangayofan. To fag hampang ka syagan igbawi intam. ²² Tam fag idwag daya intam sadili maskin tam igtalinga odin Diyos hampang, idwa katanog. ²³ Kagtalinga odi, dapat idwa katanog, kitos sadik taw ganino salamin, ²⁴ igbantay it walong, ginyag fabayaan wat sadili, idwag tohod no kinday it walong. ²⁵ Dapat ay, kagbantay fagaba fagaba ka togon hosto, kagfalfas intam, hanggan igtohod kat donggon gin Diyos hampang, igfayayom yadi hanya katanog fagaba, yabay tonya fag taw bomaya wan nyawa kanat ibolon. ²⁶ Nyawa faktaw no gayfan kitay hanya masimbaon wa dahol, dapat idwa fiyat hampang, hanyag daya yapdit sadili, idwa yadi ha kahologan nyawa masimbaon wan. ²⁷ Dapat, nos Diyos intam Amag lag, ka fiya fag masimbaon orongan, igtogbong has manga olila, hanggan manga ina balo ta no ha fakahoriyon, idwa yadi falafit hat sadili fangayofan ka kadwatan gistay is baba daga.

¹ Angko manga fadwasay, kawa tam mangam tiwala han Kiristo Hisos, kagfon intam, hanggan kagfon kayawaan, tam fag idwa ha fagihidon taw. ² Maskin, halimbawa, handasog hantam fanifonan sadik taw, singsing di bay ginto a, balokasan di maangay wan. Ginya madi sadi yak taw myabog indasog yadi, it rotay dwat dwat odi. ³ Ginya tam iglwang has fiya it rotay, Haw fag istay sas fiya fag tokawan. Ginya madi, iglwang ya has myabog, Haw fag is nyamo di malindogan, ngatay, fag matokawan is nwa, baba daga, sangko dayo bitis. ⁴ Tam no gibolon kitonya, tam ha fagihidon taw. Tam igfalamang igfili maskin idwa fiya intam fangayofan. ⁵ Angko manga fagalwasiyon fag manga fadwasay, ham fag matalingan. Is Diyos nafili ka manga myabog sas baba daga, kaarakitay imbali maakwa sas fangayofan nogsyag hanya. Ginya ka myabog ka omafo yadin Diyos sakop it natogon bato disagon has manga galwasi hanya. ⁶ Dapat ay, tam igyod ka manga myabog. Bohonwa aw ka maakwa kagfalingon tam, ham gayfan? Kigpitan intam, igdiya intam has manga fangabaya sas banwa? ⁷ Bohonwa awkin ka yadi manga maakwa kagyod ka maangay fag ngayan kan Diyos nafangayan intam? ⁸ Kafiyaon tam no gafanod ka togon gin Diyos ka hari, kito kat nafasorat kitay, Haw fag galwasim kapariho kito yadim sadili. ⁹ Dapat tam no ha fagihidon taw, tam ha ogali dwat, hanggan in Diyos togon iglwang, ka ha ogali dwat fiya wa fadosaon. ¹⁰ Nyawa faktaw no katanog in Diyos togon aywan, dapat nasway ka sadik togon, nasway wa fagayo. ¹¹ Is Diyos kaglwang kitay, Haw fag idwag fabayowan, iglwang yadi, Haw fag idwag libon taw. Dapat tam, nyawadwag fabayowan, dapat tam iglobon taw, halimbawa, tam nasway wan in Diyos togon sadik dahonya. ¹² Yakanga tam fag madahan tam no kampang, hanggan intam manga ogali fag fiya, maskin tonya yadi fag togon kagfalfas intam, omato yadintam tam nogsway tonya. ¹³ Kadwa twa kaawat ofod, ka fangabaya idwa yadi kaawa hanya. Dapat ay, ka manga maawaon idwa kadala ka fangabaya. ¹⁴ Angko manga fadwasay, kanat kahologan, ham gayfan, ka sadik taw noglwang, not hampang di, Aho orongan wantiwala han Diyos, dapat ay, idwa fiyat ogali? Ham gayfan awkin tonyam bawi wan nomtiwala kitonya? ¹⁵ Halimbawa, ka sadik fadwasay nodwa rotay, idwa yadi ha fanganon, ¹⁶ ginya madi sadi gintam lomwang kitay, Is Diyos nangos tomogbong hyamo. Fag solong wam rotay. Fakapsog wan. Hampang odi kandog, dapat ay idwa yadi ha fagdisagon kasta kakorangan. Fiya awkin no kitonya, ham gayfan? ¹⁷ Nyawa faktaw noglwang kitay, hanyan tiwala wan, dapat idwa ha fagfalagon fiya fag ogali, tonya fag taw idwa ngap intiwala. ¹⁸ Abi di man sadik taw noglwang kitay, Haglwang haw intiwala wan, dapat ahog lwang, Angko ogali ka fiya. Angko sagot kito, Ha no kasayag faorongan kitay haw intiwala, nyawadwa fiyam ogali, ho falag yadi hyamo kangko fag manga ogali fiya kagfaorongan kitay, ho katiwala wan Diyos. ¹⁹ Haw katiwala kitay is Diyos sadi di. Fiya ngay no kitonya. Dapat ay, nyawa ka manga labang idwag fabohag kitay is Diyos idwam dowa. Ta karokog yadi wa fag kadala hanya. ²⁰ Polos polos haw. Haw awkin kasaya yapdi kitay ho fatohoyan ha hyamo ka orongan? Bohag odi fag iglwang kitay ha katiwala wan nodwa fiyam ogali. ²¹ Is Diyos nalwang kitay is Abraham, intam pinagkaama, nangafiyan han Diyos kawat ibolon fiya, nodwa nahwangit han Diyos it anak, is Isaak, nyawa nadiya wa has baba danglayan. ²² Hadwa awkin twagdog kitay is Abraham katiwala wan hanggan gibolon fiya, tonya fag dowak bagay koyogan mandi. Ka nafatohoyan kitay is Abraham idwa korang no katiwala, kawat naibolon fiya. ²³ In-anod yadi wan ka kasoratan fwayong kitay, Maskin is Abraham katiwala in Diyos, yakangas Diyos igfatohoyan kitay is Abraham nangafiyan hanya. ²⁴ Sinya wa tam no lomag kawas Diyos iglwang kitay tam nangafiyan wa hanya, bohondi kitay kawa tam no katiwala, dapat tam nogfadagos yadi has ogali fiya. ²⁵ Idwa awkin kitonya yadis Rahab, sadik ina fabayowan wa dahol, dapat nafalag fiya it manga ibolon han Israil manga sogowan ka namantay mafyaloman ista banwanan? Is Rahab nafasakbaw ka manga sogowan a, natagos taw, ginya nafwayong yadi ka tiba dalan kaarakitay ta lomagyo. Yakangas Diyos iglwang kitay, is Rahab nangafiyan wa hanya. ²⁶ No kinday tam mahatayan intam falad no nalahaw gintam habilogan, kitonya yadi ka katiwala no masamanan gis fiya fag ogali.

¹ Manga fadwasay, tam fag idwa aywan ka kasaya kabali famaadal kawa tam twa kitay ka tam ka mangag faadal, mahigpit kagfon intam no omato intam, tam nogfalamang, bohondi kito ka tiba. ² Tam fagayo fagabag falamang. Dapat ay, inhosto intam ogali, nyawa faktaw, nodwa masalanon, twa yadig dahan it sadili nyawa kana. ³ Tam nogfwalid aramri ogbot ogbot basad bibig habayo kaarakitay igfalahaw, ka habayo katahin odi, nyawa haday tam nogfalahaw. ⁴ Kitonya yadi ka manga sahayan baba dagat, nyawa gorangon, hanggan marigon ka bagyo nogtolod, ka ogbot ogbot fag fangabang, daga habot sahayan, igfabalihid ka sahayan no hadawat fakasayaon kagfalahaw, ya hanya wan. ⁵ Kitonya yadintam manga bibig. Nyawa ogbot ogbot fag sangkap sas habilogan, aywan nogfatakagdog is taw. Fanlag kin, sadik igang ogbot ogbot syagan digfahayab sadik talon dahol dahol. ⁶ Ka bibig taw bilang wa afoy. Sadi wak kayonya manga ogali dwat kalafit gis bibig ha sadi wak dahonya habilogan. Ka afoy bibig intongo gis oliyanan fadosaan. Ginya madi ka bibig bilang wa afoy igfalafit ogali dwat has manga taw, ta no boyagan yapdi. ⁷ Manga taw syagan igfahagop fagayo fagayo fag manga manok, manga hayopan kaglahaw, hanggan ka gilafang, hanggan manga oyang. Korang, syagan gidfahagop. ⁸ Dapat ay, nyawa faktaw idwa ha syagan igfahagop ka bibig taw. Ka bibig taw dwat wa dahol, idwa kahoway. Bilang wa ha dalit fakatayon. ⁹ Tonya yadi fag bibig kagfasayagdog kagfon intam hanggan intam Ama. Tonya yadi fag bibig ka kampang dwat has taw kanhalig igtolad in Diyos. ¹⁰ Sadi dik bibig kagfasayagdog hanggan igfadwat igdog. Angko manga fadwasay, fag idwa ha akwa kitonya santam. ¹¹ Tam awkin gayfan ha danom matabang hanggan mayat gi sadi dik bolbogan? ¹² Idwan, manga fadwasay. Ka fon igos idwa bomohad olibo nyawa kindawan, hanggan ka fon obas idwa bomohad igos. Danom matabang idwa yadi bomolos gis bolbogan mayat. ¹³ Fakta santam ka ha kadonongan hanggan twagdog fiya fiya? Fag imlag sat fiya fag ogali, kawat kadonongan igfasolon di has taw. ¹⁴ Dapat it fangayofan no sonson wa kahori, kaingli, hanggan igsadili odi, fag idwag fatakagdog kitay hanya ha kadonongan, fag idwag fabohag ka fakaoronganan. ¹⁵ Ka kitonya fag kadonongan idwa gin Diyos, kadonongan odi sas baba daga, gis bali fangayofan masayaon, gin Fandaya. ¹⁶ Maskin no siday kasta fangayofan maingliyon hanggan igsadili odi, sonson wa gagran hanggan fagayo fag manga ogali dwat sinya yadi wan. ¹⁷ Dapat ay, ka ha kadonongan gin Diyos, bago bago maliyaw it fangayofan, mahoway, magop, hanggan idwag faagran, maawaon, dagos wa gogali fiya. Idwa ha fagihidon taw. It ogali fiya bondi kitay famalagon odis taw. Tonya wa ka fakatwawon gin Diyos. ¹⁸ Ka manga galwasi kahowayan bilang wagtanom kahowayan. Ginya madi, tonyag bohad kahaslongan.

¹ Kanat tigadan tam no fagaba kahodhoriyan, manga gagran, ham gayfan? Idwa awkin kawantam manga bali fangayofan masayaon idwa kaoman, yakangag sadili odi, iglaban hantam bali fangayofan fiya? ² Tam igfayafo wan, dapat ay, tam idwa somyagan omafo, yakanga tam kaingli wa dahol hanggan wagfahatay, no nangos imbolay di tonya gi hanya. Tam hanggan wa kaarisogan hanggan wa garogwanan. Maskin tam idwag sagad gin Diyos, tam idwag bolay intam fakasayaon. ³ Nyawa tam somagad wan, halimbawa, tam idwa yadi lomag maskin tam igfalamang nogsagad. Intam fakasayaon igsadili odi. ⁴ Tam goyon yapdin Diyos kalaban. Tam idwa aw twa kitay tam nogfabali mahalga kastay fag baba daga fag manga ogali, tam iglaban han Diyos? Maskin ngay, nyawa faktaw kagfahalga kastay is baba daga fag manga ogali, in Diyos wa kalaban. ⁵ Tam awkin gayfan kanfwalid sas Kasoratan idwa ha kahologan noglwang, Is Diyos maskin galwasi wa dahol kat disag fangayofan hantam, kabalaw no ha kagaw intam gi hanya? ⁶ Dapat marigon man in Diyos disag togbong hantam, kawa ka Kasoratan iglwang yadi, Is Diyos igtaktak ka manga ha takan, dapat igtogbong has mangag fasolon it fangayofan. ⁷ Maskin ngay, tam fag fasolon han Diyos. Tam fag laban in Fandaya, ginya madi hanya lomagyo wan. ⁸ Tam fag gakbang han Diyos, ginya madis Diyos omakbang yadintam. Tam ka ha manga naogali dwat, fag sonson wa fiya kati intam manga gamat ibolonon. Tam ka manga gadowan fagaba, fag sonson wa malinay kati intam manga fagayfanon. ⁹ Tam fag goraw wagdayo intam ogali dwat. Fag bohondi ogbot no goraw. Tam fag idwag baya. Fag karongkot wa ngap. ¹⁰ Tam fag falibaba intam fangayofan hasagfon intam, hat atobangan, ginya madi hanya farigon ya intam. ¹¹ Manga fadwasay, tam fag idwa fagabag fadwat igdog ha sadi ha sadi. Kagfadwat igdog, ngatay gato it fadwasay, igfadwat igdog hanggan gato ka Batasan Hodyo. Tam no gato ka Batasan, tam bohonwa manga katanog, tam inbali wa fangato. ¹² Sadi di ka natogon ka Batasan Hodyo, tonya yadi ka fangabaya. Hanya lamang ka ha kangayanan ngatay igbawi, ngatay igfadosa manga taw. Dapat fakta tam ka gato intam kapariho taw, ham gayfan? ¹³ Tam fag gisip fiya fiya. Tam madali odig lwang kitay, Araw, ngatay bago marom, tam hawas nwa fag banwa, tam bomanwanan sinya sadik fangaraw, tam mamalidya yadi, ginya tam lomag dahol fag kwarta. Fayag lwang kitonya. ¹⁴ Tam idwa twa no kinday tam aba no marom. Intam haboyagan bilang kito odis songaw sinyahod, nyawa tam iglag kati, araw araw idwa akwa. ¹⁵ Kito ka fiya intam bato fwayongon, Intam Fon nogfaangay, ngatay kito, ngatay kitonya intam ibolonon. ¹⁶ Dapat tam kati igbaya hanggan igfadaholon intam sadili fagsyaganon. Tam igfatakagdog. Dwat no kitonya intam ogali. ¹⁷ Tam no natwa sadik bagay fiya intam bato ibolonon, ginyadwag fatonglos tonya, ya tam ha ogali dwat.

¹ Ka manga maakwa santam fag gisip fiya fiya. Ham fag goraw wan hanggan fag ngongoy wan, kawa ham lomag mahori wa dahol aban. ² Hayo kaakwaan inboyok wan. Hayo manga rotay ka kafiyaon, losbongon losbongon odi, kawa tipakong ka kagat. ³ Hayo ginto hanggan pilak aningga odi ka kwan. Hanggan tonya fag manga aningga kagfatohoyan kitay, idwa fiya hayo ibolon. Tonya fag manga aningga ka homamin hayo manga habilogan aban, bilang ka afoy has alfotong. Ham natifon hayo kaakwaan, dapat kastay is baba daga kaakbang has katabowanan fag sirang. ⁴ Fandog ngay ka manga famalo hadwa nabayad, nafalingo odi, igtawag marigon nogsombong han Diyos ka hayo nadaya. Hanggan kam nadaya im manga fangibolon ka gani, it hasnog ta nogmanaw, kadog wan hanggan wa hasagfon intam, ka marigon man has fagayo. ⁵ Ham insolong odi hayo kaakwaan istay sas baba daga. Ham nafahapsog hayo fagaba, kitos hayopan bato sogbaon. ⁶ Ham naato hanggan wa nafahatay ka fiyat ogali, tadwa nalaban hayo. ⁷ Dapat tam, manga fadwasay, no kandogay day kagfon intam nodyan bangkad, tam fag gagwanta yapdig fanaya. Tam fag kitos gamas nogfanayat ani, gagwantag fanaya yadi ka bago bago fag mwayan hanggan ka goyan kagfalangbat manga tanom. ⁸ Tam fag gagwanta yapdi kawa kaakbang wa dahol kagfon intam no kadasog. Maskin ngay, tam fag marigon intam manga fangayofan. ⁹ Manga fadwasay, tam fag idwag sarogatan kaarakitay is Diyos idwa omato intam. Maskin ngay ka fangabaya istay, bilog wa sakbawan. ¹⁰ Manga fadwasay, fag in Diyos manga fangampang ogali kantam fagsokfonon. Aywan it manga naagwanta nogtoltol intam Fon hampang. ¹¹ Idwa awkin tam lomwang kitay masolong kadwag fagomon hanggan has katabowanan? Ham nadog wan no kinday is Hob idwa nafagomon, yakanga no has ginanan, intam Fon nadisag ya fiya fiya hanya, kawantam Fon mahoway hanggan maawaon. ¹² Dapat ka fiya man has iba, manga fadwasay, sakwag ngayan nyawa kana fag bagay sam tongod, ngatay sas baba daga, nyawa kana fag hampang tiba, kaarakitay igfaorongan intam fwayong, ginya kagfon intam idwa omato intam. Fag idwag sad wan. No ala, ya ala wan, no bohonwan, bohonwan. ¹³ No ha akwa santam ka ha fakahoriyon, hanya fag darangin wan. No ha fagbayaon, fag gambahan ya ngadi. ¹⁴ Ngatay ha kasagit santam? Tawagan ka manga fagtahinan sas Tifonan kaarakitay domarangin kawa ha hanya, lidgidan lana hanya. Fag lwang, Tam igsyag hasagfon intam, hanggan mi lomidgid lana hyamo. ¹⁵ Ka darangin igsyag hantam Fon kagfafiya hanya. Intam Fon igfarigon ya hanya, hanggan no ha naogali dwat, intam Fon faliyam yadi tonya. ¹⁶ Maskin ngay, tam fag soyo ha sadi ha sadi intam manga naogali dwat, hanggan igdarangin kawa ha sadi ha sadi, kaarakitay imfiya ya intam manga sagit. Ka taw maslong it ogali nogdarangin, fagaba im-anod it fagdaranginon. ¹⁷ Hyabi is Iliyas taw yadi kitontam. Hanya nandarangin mahogod kitay, fag idwa kwayan, ginya madi in-anod wan, idwa nahwayan balis tolok fangaraw hagboknga. ¹⁸ Is Iliyas nandarangin ya domwag kitay, Fag homwayan ya, ginya madi nahwayan ngay, ka manga tanom namodbohadan ya. ¹⁹ Angko manga fadwasay no ha taw santam kagfafwali has fakaoronganan kagtalang, ²⁰ hanya fag twa kitay, hanya nogfafwali sadik taw gis ogali kagfalamang, tonya fag taw imbawi gis kahatayan, hanggan aywan fag manga ogali dwat imliyam yadi wan.