HIBRIYO

HIBRIYO

¹ Hyabi hyabi is Diyos ha manga fagalan fangampang no kampang hantam manga hafofowan. Idwa myasa gis nanya, nomtoon nomtoon di. Bokod bokod yadi in Diyos nafaibolon hat manga fangampang. ² Dapat kati, sas ginanan fag manga sirang, maskin in Diyos wa kafangayofanan kitonya, kawat Anak in Diyos wa fagalan no kampang hantam. Hyabi is Diyos nafasognod it Anak ka naibolon, nahalig intam daga hanggan banwa sadi wak dahonya, nafatohoyan yadi kitay it Anak kagfon fagayo. ³ No kindas Diyos, kitonya yadit Anak, yakangat Anak ka bilang wagfasalog in Diyos kayawaan istay is baba daga. It Anak hampang karigonan ka gano yapdi sadik dahonya fagayo fagayo kan Diyos nahalig. Ginya madi in Diyos Anak natokaw sat balis sihon, ka marigon man has fagayo, nontabo waglinay intam manga naogali dwat, kawat kafangayofanan wa kitay hanya fag imbali intam fangafiyan. ⁴ Is Diyos nafangayan it Anak ngayan fiya man has manga anghil, yakangat Anak kangayanan labi wa fiya man. ⁵ Kawa kitonya, nyawa ginahin is Diyos idwa ha nafwayong nyawa haday fag anghil kitay, Haw angko Anak, Kati ahon bali hyamo Ama. Idwa yadi nafwayong kawa hat manga anghil, Ahom balit Ama Hanggan hanyam bali angko Anak. ⁶ Ginya madis Diyos no kaakbang wa somogot Anak ahan hastay has baba daga, hanya nalwang, Ka manga anghil fagayo fag fasayagdog yadi hat Anak. ⁷ Kawa hat manga anghil, is Diyos nalwang yadi, Nafabalit manga anghil manga bagyo, Hanggan nafabalit manga fangibolon manga afoy gigang. ⁸ Dapat kawa hat Anak nafwayong, Haw Diyos, haw wa kagtokaw sas tokawan fanokawan gorangon hanggan aban aban. Haw ka hari kagbahala maslong. ⁹ Haw ka hari kagbaya waglag ta no ha ogali fiya, Dapat haw kadwat iglag ka gogali dwat. Yakangas Diyos, hyamo wa Diyos nafili hyamo, Hanggan nafabaya wa dahol igdog hyamo basad fangayofan, Bohondi kito kam manga ofod. ¹⁰ Is Diyos nafwayong yadi hat Anak, Haw ka Hari, haw ka nahalig sadi wak dahonya daga, Hyamo yadi gamat ka nahalig sadik dahonya banwa sam tongod. ¹¹ Tonya fagayo imliyam wan, dapat haw kamgoyan hanggan has aban aban. Fagayo kam nahalig imdaanon aban, kitos manga fagsolongon. ¹² Haw aban fomolhot tonya kitos sadik rotay. Ka daga hanggan banwa aban imtobos wan, Dapat ka Haw, Haw wan, haw idwa twa kagorang. ¹³ Nyawa ginahin is Diyos idwa ha nafwayong nyawa haday fag anghil kitay, Haw fag tokaw wan sangko akbang, sangko balis sihon, Aho nodya nadaog fiya fiya im manga kalaban hanggan nafasakop ha hyamo. ¹⁴ No kitonya mangharaw, kana ka manga anghil, ham gayfan? Gwadi ka manga anghil manga falad lamang, in Diyos manga fangibolon, it manga sogowan, kaarakitay igtogbong has manga taw kambawi.

¹ Orongan wan ka manga anghil nafwayong manga togon hyabi. Hyabi hyabi no ha nasway tonya fag togon, ngatay nalaban, ha akwa wa fadosaan hosto in-anod has taw. Yakanga labi man tam fag bilang wa matawidan fiya fiya kantam donggon hampang manga fakaoronganan kati, kaarakitay tam idwa tomalang ginya. ³ Tam labi man idwa twa bomaybay fadosaan tam nogfasigpala di to fag kafiyaon fag Famawi. Kagfon intam ka nagona nafwayong has taw kawa to fag Famawi, hanggan ka mangag talinga hanya hyabi kagfaorongan hantam kitay tonya maanod wan. ⁴ Is Diyos nafaorongan yadi tonya fag kafiyaon fag Famawi kawat manga nafalag hanggan manga nafatimawa madolaw bokod bokod. Ginya madi, ka Maliyaw fag Falad ha nadisag, nafahafodan has taw no kindat kafangayofanan. To fag manga disag igfaorongan yadi kitay tonya fag Famawi kafiyaon. ⁵ Is Diyos idwa nafabahala hat manga anghil it bato haligon daga, ka aban fag daga ka hyami fagfwayongon. ⁶ Yatokitay, kiti kantohoyan sa sadik layonan Kasoratan, Diyos, kana mayon haw nogtohod manga taw, kanat kahologan ha hyamo? Kanat kahologan yadi ha hyamo ista anak maskin haw gano hanya? ⁷ Sadik ngalay haw nafalibaba man hanya han Diyos manga anghil, Ginya madi haw nadisag hanya ka kangayanan abwat, ka maangay has hari. ⁸ Fagayo fagayo fag manga bagay fasakop hat karigonan. Is Diyos no nafasakop fagayo fag manga bagay hat karigonan, idwa ha bagay idwa nafasakop ha hanya. Dapat ay, kati fag masohod, tam idya nalag kitay fagayo fag manga bagay nafasakop ha hanya. ⁹ Dapat kati intam fangayofan iglag in Hisos, ka naagwanta mahori fag kahatayan hyabi. Ginya madis Diyos nadisag ha hanya ka dahol fag kangayanan, nyawa sadik ngalay hyabi, is Diyos nafalibaba yapdi has manga anghil in Hisos kangayanan. Maskin malooy in Diyos kahowayan hantam, hanya nafaangay kitay is Hisos fag matay kaarakitay hantam fagayo. ¹⁰ Is Diyos ka nahalig hanggan gano fagayo fag manga bagay, nafabalit Anak hosto wan, kawat manga naagwanta, maskin hanya kagtaban han Diyos kayawaan aywan fag manga taw kanbali in Diyos manga anak. Is Diyos igfaad-angayan nogfabali it Anak hosto kitonya, maskin is Hisos kagtaban aywan fag manga taw kaarakitay imbawi. ¹¹ In Hisos Ama hanggan tam, kan Hisos nafabokod han Diyos, intam Ama, tonya yadi, sadi di, ka yadin Hisos Ama. Yakangas Hisos idwa kayag ngayan intam it manga fadwasay. ¹² Hanyag fwayong han Diyos kiti, Ho fomwayong hangko manga fadwasay im manga naibolon. Ho mangambahan igfasayagdog hyamo sas basad fakaaywanan matifonan. ¹³ Is Hisos nalwang yadi, Ho somyag in Diyos, nafwayong ya, Aho hanggan in Diyos disag hangko manga anak, hami istay wan. ¹⁴ Kawat faglwangon manga anak, kawa taw, is Hisos inbali yadi taw, kito yadis taw, ha manga faknol, ha folot yadi. Maskin inbali ha habilogan taw, kaarakitay hanya no matay syagan igdaog in Fandaya, ka hyabi ha karigonan has kahatayan. ¹⁵ Kawa kitonya is Hisos nafalfas manga taw gis fakadalaon kahatayan. Hyabi sadik kaban ya, manga taw kadala kahatayan, bilang magafosan sinya, dapat is Hisos nafalfas wan. ¹⁶ Gwadi bohonwan Diyos manga anghil kat manga fagtogbongon, kawan Abraham manga hasokfonan kat fagtogbongon. ¹⁷ Yakangas Hisos nadog yadit manga fadwasay fagdogon fagayo, kaarakitay imbali sadik Gorangon fag Fagalan-han-Diyos, maawaon hanggan idwag fabayaan manga taw. Hanya gibolon yadi han Diyos, igdisag yadi ka fagdisagon kaarakitay ista manga ogali dwat imliyam wan. ¹⁸ Kawas Hisos ha naagwanta intam manga mahori, hanggan nadog yadi is Satanas no nasolay igfaloksowan hanya, yakanga kati hanya syagan igtogbong yadi has manga taw is Satanas nogfaloksowan kati.

¹ Angko manga fadwasay kantiwala, kan Diyos manga nafatawag, ka manga gofodan yadi hyami, tam fag tohod fagaba in Hisos. Is Hisos kan Diyos Fandiya Barita gona, hanggan intam Gorangon fag Fagalan-han-Diyos hantam ka mangag syag in Diyos. ² No kinday is Mwisis no matanogon san Diyos fag layonan hyabi, kitonya yadis Hisos no matanogon in Diyos, ka nafili hanya hat bato ibolonon. ³ Ka taw ka kalig balay bohondi kito kat nahalig balay. Kitonya yadi tam nogfasayagdog in Hisos, bohondi kiton Mwisis. ⁴ Fagayo fag balay ha taw nahalig, dapat is Diyos ka nahalig fagayo fagayo fag manga bagay. ⁵ Is Mwisis, no kitay di, matanogon ngay san Diyos fag layonan. Dapat is Mwisis matanogon maskin hanya sogowan lamang, kaarakitay igfaorongan ka manga bagay kamlag aban. ⁶ Dapat ay, is Kiristo bohondi kitay no matanogon kiton Mwisis, hanya matanogon maskin hanya in Diyos wa Anak, kagbahala han Diyos fag layonan. Tam in Diyos yadi wa sadili fag layonan, tam no mahogod igsyag hanya, hanggan idwa kayag fadog has taw. ⁷ Yakanga kito kan Diyos Maliyaw fag Falad nafwayong, Kati fag sirang ham no domog in Diyos hasnog, ⁸ Ham fag idwag faganiton hayo manga fangayofan kito ka hayo manga magorang hyabi no nalaban in Diyos, hanggan gis nanya ta nasolay in Diyos ta no sas basad fakahyabogan. ⁹ Is Diys iglwang, Ta fadi wadnalag kangko manga naibolon ofat ik safolok fangaraw it kadogayan. Nyawa kitonya hayo manga magorang nafahoriyan angko hanggan nasolay angko sinya. ¹⁰ Yakanga hon-isog waglag ka manga taw gis nanya fag masohod, Hoglwang, Ta kafang fagaba katanog angko manga togon. ¹¹ Yakanga hon-isog is taw, ho nafatohoyan tonya fag manga taw has mahori, Ho nalwang, Nyawa kindawan tadwa domasog hangko bato disagon kafahowayan. ¹² Angko manga fadwasay, tam fag matagahan, ngadi sadi santam fag idwa ha fangayofan dwat kagfaliyam intam fakatiwalaon, hanggan fadayo intam gin Diyos ka boyagan fag Diyos. ¹³ Yatokitay, tam fag fatodtohodan ha sadi ha sadi, sirang sirang, ka gin Diyos baliwa, no ha faglwangon yapdi hantam, Kati fag sirang, kaarakitay nyawa faktaw santam fag idwa gadayaan gis manga ogali dwat hanggan nyawa faktaw santam, fag idwag faganiton it fangayofan. ¹⁴ Maskin tam fagayo in Kiristo wa ofod, tam nodwa gadowan igfadagos igsyag hanya, hanggan aban aban. ¹⁵ Kawa ka Kasoratan iglwang kito, Kati wa fag sirang ham no domog in Diyos hasnog, Fag idwag faganiton hayo manga fangayofan, kito ka hayo manga magorang naogali hyabi, ta no nalaban in Diyos. ¹⁶ Fakta fag manga taw ka nalaban in Diyos, ham gayfan, nyawa ta nadog it hasnog? Bohonwa awkin kayadin Mwisis fagtabanon fagayo gis Ihipto? ¹⁷ Fakta fag manga taw ham gayfan, kan Diyos fakaisogon sas ofat ik safolok fangaraw? Bohonwa awkin ka manga ha ogali dwat, ka manga natay sas basad fakahyabogan, kan Diyos fakaisogon? ¹⁸ Fakta kin hamagdog fag manga taw kan Diyos nafatohoyan has mahori, no nalwang, Nyawa kindawan tadwa domasog hangko bato disagon kafahowayan? Bohonwa awkin ka mangag sway ha hanya, ham gayfan? ¹⁹ Yakanga tam twa wa kitay tadwa nasyagan nadasog han Diyos togonan bato disagon fag daga, kawa tadwa katiwala in Diyos manga fwayong.

¹ Kan Diyos togon it bato disagon hantam ha fakinabang yapdi hantam. Tam syagan domasog hat bato disagon kafahowayan. Dapat tam fag danwa kahawag kitay, ngandayo tiba santam ngan idwa domasog hanya. ² Maskin ngay tam kito yadistaw hyabi, tam nadog yadi kati ka Fiya fag Barita. Intam manga magorang, nyawa nadog hyabi, tadwa ha nafakinabang kat donggon barita, maskin tadwan tiwala tonya. ³ Tam ka mangan tiwala ka domasog han Diyos bato disagon kafahowayan, kito kat nafwayong, Maskin hon-isog, ho nafatohoyan tonya fag manga taw has mahori, Ho nalwang, Nyawa kindawan tadwa domasog hangko bato disagon kafahowayan. Is Diyos nalwang kitonya nyawan tabo in Diyos ibolon no kalig ka daga hyabi. ⁴ Maskin sadik layonan sas Kasoratan iglwang, kawa has fafito fag sirang, Ginya madi, not fafito fag sirang, is Diyos nafahoway git ibolon fagayo. ⁵ Ginya ka Kasoratan nafwayong ya domwag, Nyawa kindawan tadwa domasog hangko bato disagon kafahowayan. ⁶ Ka manga nagona nadog ka Fiya fag Barita hyabi, idwa nasyagan nadasog han Diyos bato disagon kafahowayan, maskin ta nasway in Diyos. Dapat ka orongan wan, ha akwa domasog aban han Diyos bato disagon kafahowayan. ⁷ Yakanga, sadi ya ginan is Diyos nafwayong sadik sirang, nalwang, Kati wa fag sirang. Aywan fag fangaraw kantolas gis hyabi is Diyos no nafwayong san Dabid ambahan, kawa tonya fag kati wa fag sirang, naolit ya, Kati wa fag sirang ham no domog in Diyos hasnog, Fag idwag faganiton hayo manga fangayofan. ⁸ No nangos is Hoswi nataban manga taw has kafahowayan hosto, is Diyos fawa ha fagfwayongon domwag sadi yak sirang kafahowayan. ⁹ It kahologan ha akwa yapdi kafahowayan, nomtabo gibolon insawad matalagaan has mangag syag in Diyos. ¹⁰ Maskin nyawa faktaw ka domasog han Diyos bato disagon kafahowayan, mamahoway yadi git fagibolonan, kito yadin Diyos, nonsagaya kalig ka daga hanggan banwa, nafahoway wan. ¹¹ Yakanga tam fag idwag fagomon kaarakitay tam somyagan domasog han Diyos bato disagon kafahowayan. Yakanga nyawa faktaw santam fag idwag sway in Diyos, kito kantam manga magorang hyabi, maskin tadwa katiwala hanya. ¹² Maskin in Diyos hampang boyagan hanggan marigon, matayom man ka baladaw kat tayom dowa. Igtigbas, igfabokngan fangayofan taw it isip, bilang yadi wagfisang botol ha otok, twa diglag ista fangayofan hanggan ista fagwason fagayo. ¹³ Kawa kitonya, tam idwa syagan igfyalom in Diyos. Fagayo fag manga bagay malagan wa fiya fiya, bilang wa malatagan san Diyos fag lagan. Hanya kagsolay intam fiya fiya. ¹⁴ Maskin tam ha Gorangon fag Fagalan-han-Diyos kafiyaon, ka natolas ka manga banwa ham tongod, hanggan nadasog han Diyos atobangan, ka mandis Hisos, in Diyos wa Anak, yakanga tam fag idwa kaoman no katiwala ha hanya. ¹⁵ To intam Gorangon fag Fagalan-han-Diyos natwa wan intam manga kalombayan kawa ha nagdalanan yadi wan is Satanas nogfaloksowan hanya, kito yadintam, dapat is Hisos idwa ha ogali dwat. ¹⁶ Yakanga tam fag marigon nogsyag ha hanya, tam no omakbang han Diyos kaawaan fag tokawan fanokawan gorangon, kaarakitay hanyam awa intam hanggan tomogbong gis nanya is Satanas nogfaloksowan intam.

¹ Hyabi is Diyos kagfili fagayo fag Gorangon fag Fagalan-han-Diyos gis fakaaywanan taw, kaarakitay fatonglos it ibolonon igfagalan han Diyos, kawag watwat ka folot hayopan kagfaliyam manga ogali dwat. ² Ka taw di fag Gorangon fag Fagalan-han-Diyos kito yadis taw ik magomo, yakanga igfahowayon wan has manga taw kadwa ha fakatwawon hanggan ka mangag falamang. ³ Maskin hanya magomo yadit fangayofan kito yadi ka iba taw, hanya fag watwat folot hayopan kaarakitay igfaliyam it sadili naogali dwat, bohondi kastaw. ⁴ Nyawa faktaw idwa fiya imbali ha kangayanan Gorangon fag Fagalan-han-Diyos no ha odit sadili fakasayaon. Is Diyos kagfabali hanya ha kangayanan kito yadin Diyos no nafabali in Aaron ha kangayanan hyabi. ⁵ Kitonya yadi, bohonwas Kiristo kagfaabwat it sadili kaarakitay kabali Gorangon fag Fagalan-han-Diyos, dapat is Diyos kagfaabwat hanya no nalwang, Haw angko Anak, Aho hyamo Ama. ⁶ Is Diyos nafwayong yadi sas iba layonan sas Kasoratan, Haw sadik fagalan-han-Diyos hanggan aban aban, Kito yadin Milkisidik fag fagalan -han-Diyos. ⁷ Is Hisos nostay yapdi sas baba daga hyabi, hanya nandarangin nogdyang igrokyaw, igfaawaon in Diyos ka syagan bomawi hanya gis kahatayan. Maskin is Hisos nafasolon fiya fiya it fangayofan, is Diyos nanalinga hanya. ⁸ Nyawas Hisos in Diyos wa Anak, hanya naagwanta yadi basad mahori, yakanga natwa wagdog no kanat kahologan no katanog it Ama. ⁹ Ginya madi, nontohoyan kitay is Hisos hosto wan has fagayo, hanyan bali wa Famawi hanggan aban aban has manga katanog hanya. ¹⁰ Hanggan was Diyos nafadog has fagayo fag manga taw kitay, is Hisos inbali Gorangon fag fagalan-han-Diyos kito yadin Milkisidik fag fagalan. ¹¹ Kati bokod wan angko bato fwayongon. No kitay di aywan hyami bato fwayongon hanya baliwa, dapat ay, ham mahori wa fwayongon, maskin ham igfabongkohon hayo. ¹² No kandogay wa ti, no kitay di, ham fiya wambali mangag faadal has tiba taw, dapat hanggan wa kati ham bato yapdi faadalon ngap ka fabagowanan fagadalon gin Diyos hampang. Ka fiya, no kitay di ha hayo, ka maganit fag fanganon, dapat hanggan kati hayo fakasayaon afo yapdi soso. ¹³ Kat fanganon, no afo yapdi soso, tonya bilang yapdi manga anak dararag, idya twagdog no kinday tam nombali fiya san Diyos faglagan. ¹⁴ Dapat ka maganit fag fanganon kawa has manga dahol taw, ka mangan yayom wan, ka twagdog has fiya hanggan has dwat.

¹ Gwadi fag bohondi ka manga fabagowanan fagadalon kawa han Kiristo kantam fagadalon yapdi, fag ka mandi manga adalon kagfatwagdog intam fiya fiya. Fag bohondi intam dan wa fagadalon itfagonan kantam fagoliton fagaba, kito wasagdayo ka manga ogali kadwa fiya san Diyos fag lagan, hanggan fag katiwala hanya, ² kitos manga faadalon hasagfatogna baliwa, mangag fasalangday gamat has taw, kawa ka manga natay imboyag ya, hanggan kawa ha fadosaan idwa ha katabowanan. ³ Yatokitay, tam fag fadagos yapdi intam adalon. Non Diyos wa kafangayofanan, mi omibolon tonya. ⁴ Maskin kinda araw nogfasoyo han Diyos hanggan nogfafwali ya nangos ka manga nadayo ya, ham gayfan? No kitay di, ta natwa wagdog hyabi, ta fadi wadnadog in Diyos manga disag gim tongod, tan-aktom yadi wan has manga natanggap ka Maliyaw fag Falad. ⁵ Ta nadog yadi wa fiya fiya in Diyos hampang kafiyan, hanggan ta nalag manga karigonan madolaw, ka bago dimlag fiya fiya aban. ⁶ Ta no nadog wa fagayo, dapat ta nafalfas ya, fawa syagan igsoyo domwag, kawa bilang wagfapako ya in Diyos Anak sas nafatimbangan hayo, hanggan tagfahayan yagdog hanya. ⁷ Nonsiwang ka mwayan kafiyaon, ka daga kagfatobo manga tanom kasta fagfakinabangon ka giyab sinya, tonya fag daga domog kafiyan gin Diyos. ⁸ Dapat, no manga odi lamnon dogiyan kagtobo sinya fag daga, tonyadwa ha fakinabang. Is Diyos ngandayo nga domwat aban tonya fag daga, ginya madi, sas katabowanan, somonog lamang tonya. ⁹ Angko manga fagalwasiyon, nyawa migfwayong kitonya, mi twa wa kitay kafiyaon hayo manga fangayofan. Ham twa no kana ka fiya ha hayo, hanggan igtogbong hayo kaarakitay is Diyos bomawi hayo. ¹⁰ Is Diyos kafiyaon nogbahala intam. Is Diyos igtohod di hayo naibolon, kawa ham igtogbong manga kapariho intiwala, kagfalag kitay ham galwasi in Diyos. ¹¹ Angko fakasayaon orongan kitay, tam fagayo fagayo fag dagos wa kogodan hanggan has katabowanan, kaarakitay tam tomanggap intam manga fagfanayaon. ¹² Yakanga tam fag idwa kabali mafang. Tam fag tolad ka manga maagwantaon igsyag in Diyos, ginya madi igtanggap in Diyos togonan bato disagon. ¹³ Is Diyos no nafwayong han Abraham it bato disagon hanya, naolit it sadili ngayan kaarakitay igfarigon it taranggapan, maskin idwa ha dahol man in Diyos ngayan kaarakitay igfarigon. ¹⁴ Is Diyos nalwang, Angko disagon ha hyamo, intam togonan, ho faanod wa fiya fiya, ho faaywan yadi hyamo hasokfonan. ¹⁵ Is Abraham idwag fagomon gagwantag fanaya kan Diyos natogon ha hanya, ginya natanggap wa tonya. ¹⁶ Manga taw gwas sadik ngayan abwat man hanya it kangayanan, ginya madi no nafarigon it fwayong kitonya, imtabo wa balinya. ¹⁷ Kitonya yadi, is Diyos igfaanod igfarigon it togonan bato disagon no gwas it ngayan, kaarakitay igfatwagdog has manga taw ka tomanggap it bato disagon kitay, it fangayofan idwa kaoman. ¹⁸ Is Diyos idwag dowa ginan nogfwayong, hanggan idwa yadig bohag tonya fag dowak bagay. Ka sadik bagay, kawat togonan bato disagon hanggan ka fadowa fag bagay, kawag faanod no gwas it ngayan. Yakanga tam ka nalagyo han Diyos, intam wa logawan, intam fangayofan idwa kaoman nogsyag tonyat manga natogonan bato disagon hantam. ¹⁹ Tam nogsyag kitonya, bilang wa ha gawid lobid santam fangayofan, kito ka sahayan sas baba dagat, ka ha lobid famatorosan, ha sayangan maganit, hanggan idwam bogloy. Tonya fag lobid igdasog hanggan wa ha sadik lingoban has basad fanahop rotay sas Fanimbaan-Dahol san Diyos banwanan sam tongod. Ka lobid ginya no masayangan, sas nafabokod ya domwag fag lingoban, ²⁰ kan Hisos nagsakbawan, nagona wantam nasakbaw, kawa hantam. Is Hisos sadik Gorangon fag Fagalan-han-Diyos sinya, hanggan wa has aban aban, kito yadin Milkisidik fag Fagalan-han-Diyos.

¹ To fag is Milkisidik hyabi ista gorangon sas banwa Salim, in Diyos ka abwat man has fagayo fagayo, it fagalan yadi. Is Milkisidik natagbo in Abraham is Abraham no kaoli wan nontabo waglaban has manga gorangon. Is Milkisidik nafwayong hanya, Haw lomag im fagbayaon gin Diyos. ² Is Abraham nadisag han Milkisidik kat fasafolo git nadaog gis awayan. Bago bago in Milkisidik ngayan it kahologan, santam sanglitan, Kafiyaon fag gorangon nogbahala. Hanya ista gorangon yadi sas Salim a, santam sanglitan, it kahologan, hanya ka gorangon kagfon kahowayan. ³ Idwan sorat no faktan Milkisidik ama hanggan ina, hanggan no faktat hafofowanan. It kasagayan hanggan kahatayan idwa yadin sorat. Kito yadin Diyos Anak, hanya sadik fagalan-han-Diyos. Bohondi kitay gis nanya odi fag masohod, hanggan has aban aban. ⁴ Fandog ngay in Milkisidik kangayanan abwat. Is Abraham nadisag hanya ka fasafolo it nadaog gis awayan. Hanggan is Abraham haraw, no kitay di, sadi yadi wak ha kangayanan bilang wantam pinagkaama. ⁵ In Mwisis togon igfatohoyan kitay kantalaga manga fagalan-han-Diyos gin Libi hasokfonan ka tomanggap manga fasafolo gis manga taga Israil. No kalwang ta nogtanggap tonya gi mandit manga fadwasay nyawa myasa wan Abraham manga hasokfonan. ⁶ No kitay di, to fag is Milkisidik bohonwan Abraham hasokfonan, dapat natanggap yadi gin Abraham it fasafolo. Is Milkisidik nadogang yat manga hampang fiya han Abraham kan Diyos nafwayong it togonan bato disagon. ⁷ Tam idwa gadowan kitay ka kampang fiya, igfasayagdog has taw, it kangayanan abwat man kat fakampangon fiya. ⁸ In Libi hasokfonan, kagtanggap it fasafolo gis taw, katay di, dapat intohoyan sas kasoratan kitay is Milkisidik boyagan. ⁹ Yakanga tam twa waglwang, no kitay di, nyawas Libi kagtanggap it fasafolo gis taw, nadisag yadit fasafolo han Milkisidik gin Abraham. ¹⁰ No kalwang, is Libi bilang gofod yadin Abraham is Milkisidik no natagbo hanya, kawas Libi in Abraham fofo madayo. ¹¹ Ka manga fagalan-han-Diyos gin Libi hasokfonan ka nafwayong in Diyos manga togon has manga taga Israil. No nangos hosto wan ka gin Libi hasokfonan fag manga fagalan-han-Diyos it ibolon, kaarakitay igfabali hosto ista manga ogali, fag fawa ha iba fag fagalan kiton Milkisidik kadwa kiton Aaron. ¹² Nogfaoman ka ogali fagalan-han-Diyos, fag im-oman yadi wa ka togon. ¹³ Kawantam Fon kantam faglwangon istay ka gis iba hasokfonan, idwa gin Libi hasokfonan. Hyabi idwa hanbali iba fag fagalan-han-Diyos, ngadi sadi, ginya fag hasokfonan. ¹⁴ Fagayo twa kitay kagfon intam gin Hoda hasokfonan. Is Mwisis idwa naowas in Hoda ngayan nogfwayong hasagfagalan baliwa han Diyos. ¹⁵ Ti labi man tam twa wagdog kawa ha akwa ya sadik fagalan-han-Diyos kiton Milkisidik. ¹⁶ Bohonwa ka gis ogali togon kagfabali tonya fag fagalan, bohonwa kawa ginya fag hasokfonan ka taw, dapat kawa gis karigonan haboyagan kadwa ha katabowanan, hanya nonbali fagalan-han-Diyos. ¹⁷ Maskin ka Kasoratan iglwang kawa hanya kiti, Haw ka fagalan-han-Diyos hanggan has aban aban, Kito yadin Milkisidik fag fagalan. ¹⁸ No kitonya, ka togon gona in-oman wan maskin malombay, korang di, idwa yadi nasyagan igfafiya. ¹⁹ Maskin ka manga togon has manga taw idwa nasyagan nafahosto ista manga ogali, dapat ay, kantam natanggap fagsyagon bohondi kitonyak fiya, tonya fag fagsyagon kagfaakbang intam han Diyos. ²⁰ Hanggan is Diyos nahampang marigon no nafabali ka bago fag fagalan-han-Diyos, dapat nogfabali iba taw fagalan, is Diyos idwa nahampang marigon. ²¹ Dapat is Diyos nahampang marigon no nafabali in Hisos intam fagalan, kito ka Kasoratan iglwang, Kagfon fagayo nahampang marigon, Idwa yadig dowa ginan it naisip noglwang, Haw wa ka fagalan hanggan has aban aban. ²² Kawas Hisos inbali fagalan-han-Diyos kitonya kagfatohoyan kitay, it bago fag taranggapan hantam im-anod wan. Tonya ka fiya man ka gona fag taranggapan. ²³ Sadi yak bagay kagfabokod ka dowak fagalan. Gis hyabi hyabi ta fagaba wagtobos ka fagalan no natay wan, kawadwa syagan igfadagos it bato ibolonon. ²⁴ Dapat is Hisos boyagan nyawa ginahin, idwa ha fagalan tomobos hanya. ²⁵ Kawa kitonya, maskin is Hisos boyagan hanggan aban aban kaarakitay igfagalan manga taw han Diyos, hanya bon lamang, hanya syagan digbawi hanggan has aban aban, fagayo ka gakbang han Diyos, nogdalan lan Hisos. ²⁶ No kitonya, is Hisos ka Gorangon Fagalan maangay hantam. Hanya ka syagan igfahosto intam manga kakorangan. Is Hisos maliyaw, idwa ha ogali dwat, idwa ha fabangdanan gi hanya. Hanya idwa kitos taw kitay ha ogali dwat. Kati hanyan abwat, abwat man kantam faglagon fag banwa. ²⁷ Is Hisos idwa kito ka tibak gorangon fag fagalan ka fiya igdisag manga nawatwat folot hayopan sirang sirang, bago bago kawat sadili naogali dwat, ginya madi kawasta manga naogali dwat iba taw. Dapat is Hisos sadi di ginan nawatwat it sadili folot, no nadisag it sadili habilogan. ²⁸ Ta no ha nafili manga gorangon fag fagalan hat ibolonon, ka maangay san Mwisis togon hyabi, tonya ha kagomowan di. Dapat ay, kanbali gorangon fag fagalan in Mwisis odi ginanan igtogon, is Diyos no nahampang marigon, kawan Diyos Anak wan. Hanyadwa ha kagomowan, inbali hosto hanggan aban aban.

¹ To ka orongan hyami fagfwayongon, tam ha akwa sadik gorangon fag fagalan-han-Diyos kitonya, matokawan santam Hari akbang, sat balis sihon kagbahala sas banwa sam tongod. Tonya fag Gorangon it kangayanan abwat man has fagayo fagayo. ² Intam fagalan gibolon sinya sas nafabokod ya domwag fag lingoban orongan, sas basad Balay Rotay kantam Fon nafatobo, bohonwa taw ka nafatobo. ³ Fagayo fag gorangon fag fagalan ka bahalag disag manga fagdisagon han Diyos, hanggan igwatwat folot hayopan. Yakanga intam gorangon fag fagalan fag ha akwa yadi disagon. ⁴ Is Hisos nostay is baba daga, idya fiyam bali fagalan-han-Diyos maskin ha akwa wa manga fagalan kagdisag manga disagon gis nanya kito kasta togon. ⁵ Ka manga fagalan-han-Diyos istay it ibolon bilang tolad, igfahalimbawa di ka san Diyos banwanan sam tongod. Kiton Mwisis no kaakbang wa fatobo ka Balay Rotay, is Diyos mahogod wagtogon hanya kiti, Haligan wa fagayo fagayo fag manga bagay kito kangko nafalag hyamo tolad sas baba moyod. ⁶ Yakanga kawas Hisos kagfagalan sas sadik taranggapan fiya man ka gona, kawan ganit sas mahalga man fag manga bagay kan Diyos togon bato disagon, in Hisos bato ibolonon labi wa fiya man has ibolonon kantohoyan hyabi has iba fag fagalan-han-Diyos. ⁷ No nangos ka taranggapan gona idwa ha korang, fawa ha toboson domwag sadi yak taranggapan. ⁸ Dapat is Diyos nalag kitay it sakop fag manga taw ha korang yapdi, idya hosto it ogali, yakangas Diyos nafwayong ya domwag, Aho ha togonon yapdi taranggapan bago han Israil, No ginahin aban fag masohod, Hanggan han Hoda hasokfonan yadi. ⁹ Idwa kito kangko natogon hyabi hasta manga magorang hafofowan, Aho no nagamit nataban is taw gis Ihipto. Tadwa nafatonglos angko togonan hyabi. Yakanga aho nafabayaan was taw. ¹⁰ To kambali angko togonan bago han Israil manga hasokfonan. Nomdasog gis nanya fag masohod aban, Ho bilang wa tomanom angko manga togon sasta basad fangayofan, Ho tomagis tonya sasta basad isip. Ahom bali ista Diyos, tambali wangko sakop fag manga taw. ¹¹ Nyawadwa ha fomwayong hat manga kaiban, Ngatay hat fadwasay, Haw fag homilala intam Fon Maskin ta fagayo homilala wangko, Nyawa kadwa ha manga kangayanan, hanggan ka ha akwa kangayanan abwat. ¹² Maskin ho faliyam wan ista manga naogali dwat, Hodwa tomohod domwag kasta manga naibolon kadwa fiya. ¹³ Is Diyos no gwas sadik togonan bago, nafabali idwa ha kahologan ka togonan gona. Nyawa kana fag togonan nodwa ha kahologan, ta fawag tohod ka gona, kaliyam wan.

¹ Ka gona fag taranggapan madi ngap ha manga ogaliyon nogsimba. Ha balay yadi fanimbaan istay is baba daga. ² Ta nahalig sadik balay rotay, ha dowak lingoban. Kas dasogan fag salogan ta nogngayan, Nafabokod fag lingoban. Sinya ha salong sas tongod salangan, ha dinolang hanggan tinapay ista disag han Diyos, mafwalidan basad dinolang. ³ Kat fadowa fag lingoban sas dayo fanahop rotay, ta nogngayan, Nafabokod man ka sadik lingoban. ⁴ Sinya ha fanonogan famabanglo, hanggan haban taranggapan. Fagayo dowa ta nafababaw ginto. Sas basad haban ta ha nafasawad in Diyos nafatimawa fanganon mana hyabi, ista fagtohodon mafwalidan basad sohadan ginto. Ha akwa yadi in Aaron sokod ka faginan wa bomorak, igsigangat wan, hanggan ka manga bato dalafi ka ha sorat manga togon. ⁵ Ka sas baba haban ka famwalidan folot, it ngayan, Tokawan Kaawaan. Sas tongod tokawan kaawaan ha dowak kirobin, kagfahilala kitay is Diyos sinya wan. Ka manga kirobin manga fakfak iglanbong ka Tokawan Kaawaan. Dapat no kati di, midya fomwayong igsadig sadi ha hayo it manga kahologan. ⁶ Kitonya wat kafiyan sasta basad fanimbaan rotay. Sirang sirang ka manga fagalan-han-Diyos igsakbaw ka balis dasogan fag salogan kaarakitay fatonglos it bato ibolonon. ⁷ Dapat ay, ka gorangon fag fagalan lamang kagsakbaw sas fadowa fag salogan, sadi di ginan sa sadik fangaraw. Idwag sakbaw sinya nodwa ha diya folot it disag han Diyos, kawa hat manga naogali dwat, hanggan yadi ka manga taw naogali dwat, igsakop yadi ista naibolon nyawa tadwa natwa kitay dwat. ⁸ No sadi yapdi kagsakbaw sinya sadi di ginan sadik fangaraw, ka Maliyaw fag Falad igfatwagdog hantam fiya fiya kitay, idya kalwang maboklasan ka lingoban ka nafabokod man ka sadi, no ha akwa yapdi ka balis dasogan fag salogan. ⁹ Tonya fag balis dasogan fag salogan igfahalimbawa yapdi ka kati fag manga masohod it fagfwayongon. Kasta manga nadisag hanggan nawatwat folot hayopan sinya han Diyos idwa syagan igfabali hosto ista manga fangayofan ka mangag simba sinya. ¹⁰ Kasta manga naibolon sinya ha odis manga fanganon, manga inomon, manga ogali bokod bokod hasagfalinay baliwa. To fagayo manga bato ibolonon sas faglagan kasta ogaliyon no kandogay day is Diyos nodyag faoman fagayo fag manga bagay. ¹¹ Dapat ay, is Kiristo indasog wan. Is Kiristo ka gorangon fag fagalanhan-Diyos kagfatonglos fiya man has manga bagay gona. Is Kiristo ka fagalan sas fanimbaan ka dahol man it kangayanan, idwa hagkitonyak fiya. Bohonwa taw ka nahalig tonya fag fanimbaan, bohonwa gistay is baba daga fag manga bagay. ¹² Sadi di ginan is Kiristo no nasakbaw sas nafabokod man ka sadik lingoban, yakanga fiya wan. Bohonwa manga folot hambing, manga folot anak baka aman, kat nadiya disagon, dapat it sadili wa folot. Yakanga intohoyan kitay intam manga naogali dwat inliyam hanggan has aban aban. ¹³ San Mwisis togon faglagan, ka manga taw no ha dwat, bilang fagliyon, imbali fiya ta nogfafarisikan ka folot manga hambing, manga todo baka, hanggan manga fogis gis domayaga baka kan-irog. ¹⁴ Dapat in Kiristo folot bondi basta fag folot. Gin Diyos Falad, kadwa ha katabowanan, is Kiristo nadisag it sadili, kafiyaon, idwa ha dwat ngadi ogbot ogbot, it disag han Diyos. In Kiristo folot kagfaangay intam manga fangayofan hanggan isip, kaarakitay tam domayo intam manga ogali kadwa ha kahologan, tam omibolon yadi ka boyagan fag Diyos it ibolon. ¹⁵ Yakangas Kiristo ka fagalan sas bago fag taranggapan, kawat kahatayan kagfaliyam intam manga ogali dwat kantam naibolon tam nogfasakop yapdi ka gona fag taranggapan. Kawa kitonya, in Diyos manga nafatawag fag manga taw tomanggap in Diyos manga bato disagon fagayo, kadwa ha katabowanan. ¹⁶ No ha Kasoratan kagfatohoyan no hada aban ista manga sangkap, manga daga, fag imtohoyan kitay ka nahalig kasoratan natay wan. ¹⁷ Idya mangorayan, kagfon no boyagan yapdi. No bay natay wan, ta bago di mangorayan wan. ¹⁸ Kawa kitonya, nyawa ka taranggapan gona idya katohoyan nodya ha folot gis hayopan kandisag. ¹⁹ Is Mwisis nafwayong has manga taw in Diyos natogon manga bato ogaliyon fagayo. Ginya madi, nabol manga folot anak baka aman, folot hambing, ha aktom danom, natogna sinya dararag fag olad topa, hanggan sadik falongfong isopo, ginya nafafarisikan ka togon Kasoratan hanggan ha sayo manga taw fagayo. ²⁰ Dayog fafarisikan, is Mwisis kampang yadi, iglwang, To fag folot kagfaganit in Diyos disag taranggapan ha hayo, hanggan nalwang, ham fag katanog it togon ha hayo. ²¹ Kitonya yadis Mwisis nafafarisikan has Balay Rotay, hanggan kasta manga sangkap fagayo sas fanimbaan. ²² No gin Mwisis togon, fagayo wa bangan fag manga bagay inlinay sas folot. Idwa yadi ha faliyam ogali dwat nodwa ha folot in-olan. ²³ Yakanga ka manga sangkap istay is baba daga fag fanimbaan, kagtolad ka manga sangkap san Diyos banwanan sam tongod, fag imlinay gis manga nafafarisikan folot hayopan kitonya. Dapat ay, fag bohondi kito ka folot hayopan kamdisag kaarakitay igfaangay ka manga sangkap san Diyos banwanan fag fanimbaan. ²⁴ Maskin is Kiristo idwa nasakbaw ha sadik lingoban ka nafabokod man ka sadi, ista nahalig kagtolad lamang ka orongan, dapat ay, nadagos wa nasakbaw han Diyos banwanan sam tongod, hanggan kati sawan Diyos atobangan, igfagalan intam sinya. ²⁵ Fangaraw fangaraw ka manga gorangon fag fagalan Hodyo igsakbaw has basad lingoban ka nafabokod man ha sadi, ha diya folot hayopan. Dapat is Kiristo sadi di ginan no nasakbaw, kaarakitay igdisag it sadili, intam fangafiyan han Diyos, tonya hosto wan. ²⁶ Tonya fag sadi di ginan nodya hosto, is Kiristo nangos fag fagaba wa katay gi yapdis hyabi, ka daga non-ganit. Dapat kati, no kaakbang wa has katabowanan fag manga masohod, sadi di ginan is Kiristo nonlag istay is baba daga, kaarakitay domaog manga ogali dwat kawat nadisag it sadili habilogan, bilang fangafiyan han Diyos. ²⁷ Kawan tohoyan has manga taw, ta fag matay sadi di ginan, ginya madi ha fatohoyan it hadasogan, ²⁸ kitonya yadi is Kiristo sadi di ginan nadisag it sadili habilogan, intam wa fangafiyan han Diyos, maskin hanya naagwanta nadiya intam manga ogali dwat. Hanya nombangkad ya aban, fawa fangafiyan domwag no kadi has ogali dwat baliwa, mangahot odi ka mangag fanaya hanya.

¹ No kitay di, in Mwisis togon bilang yapdi marom nogfaayfan ka manga kafiyaon fag manga bagay kam-anod aban, bilang odi tolad, idwa kalag fiya fiya yapdi. Ka togon gin Mwisis, ka ha manga nawatwat folot hayopan fangaraw fangaraw, idya syagan igfabali hosto ka manga fangayofan taw ka gakbang han Diyos. ² Ka gakbang han Diyos hyabi, it manga naogali dwat no nangos intabo wa balinya, it manga fangayofan nonbali hosto ta nogwatwat manga folot hayopan kitonya, ta fawa ha fagayfanon domwag it manga ogali dwat, ta fawag watwat domwag folot hayopan. ³ Dapat kagwatwat folot hayopan kitonya, kasta fagdiyaon fangaraw fangaraw di, igfatohod ya domwag ka manga taw it manga naogali dwat, ⁴ maskin no kadi folot manga todo baka, manga hambing, idwa syagan igbol manga ogali dwat. ⁵ Maskin kitonya, is Kiristo no kadokson has baba daga, nalwang han Diyos kitay, Kam fakasayaon bohonwa kitay manga disagon hanggan manga nawatwat folot hayopan. Dapat kam nafatalaga hangko, kawangko habilogan kangko bato disagon. ⁶ Hadwag baya ka mangan disag kansonog, hanggan ka manga nawatwat folot hayopan kaarakitay has manga ogali dwat. ⁷ Yakanga hoglwang, Diyos, hostay di kaarakitay homtanog im fagfwayongon angko, Kito kansorat sas Kasoratan kawa hangko. ⁸ Is Kiristo nalwang bago bago, Hadwa kasaya, idwa yadig baya ka manga nawatwat folot hayopan hanggan manga disagon, nyawa ka manga disag kansonog, hanggan ka mangan disag has ogali dwat baliwa, nyawan Diyos togon han Mwisis iglwang fag disag kitonya. ⁹ Ginya nalwang, Diyos, hostay di, homtanog im fwayongon angko. Is Diyos nadayo ka gona fag nadisag hayopan, nabalyo man fag kawas Kiristo kamdisag. ¹⁰ Is Kiristo Hisos intanog in Diyos fwayong, nadisag it sadili habilogan, kawat folot inwatwat sadi di ginan, yakanga hosto wa tonya. Kawa naibolon kitonya, is Kiristo Hisos kagfaangay intam hanggan igfabokod intam han Diyos. ¹¹ Fagayo fag fagalan-han-Diyos malindogan gibolon sirang sirang, igdisag kitonya, kitonya mandi fag mangag watwat folot hayopan. Dapat tonya fag manga disagon idya syagan igbol manga ogali dwat. ¹² Dapat is Kiristo nondisag wan, kawat folot inwatwat sadi di ginan, hosto wan kawa has manga ogali dwat hanggan aban aban. Ginya madi, is Kiristo natokaw wan san Diyos akbang, sat balis sihon. ¹³ Kati is Kiristo dan wa mafanayan sinya, is Diyos nodya nadaog in Kiristo manga kalaban, ginyag fasakop ha hanya. ¹⁴ Kawa kitonya nyawa sadi ginan lamang nadisag, is Kiristo nafabali hosto, hanggan aban aban, it fagfaangayon fag manga taw, kat nafatohoyan han Diyos ibolon. ¹⁵ Ka Maliyaw fag Falad igfaorongan yadi hantam kawa hanya baliwa. Nalwang bago bago, ¹⁶ Kagfon intam iglwang, Tombali angko taranggapan has taw nomdasog gis nanya fag masohod. Ho tomagis angko manga togon sasta basad isip, Ho bilang wa tomanom tonya sasta manga fangayofan. ¹⁷ Ginya madi hanya yadi ka nalwang, Hodwa tomohod domwag ista manga naogali dwat, hanggan ista manga naibolon kadwa fiya. ¹⁸ Maskin ista manga naogali dwat inliyam wan, fawa ha disagon ya domwag kawa has ogali dwat baliwa. ¹⁹ Yakanga angko manga fadwasay, kati tam fawa ha fakadalaon igsakbaw has basad lingoban ka nafabokod man kat sadi, maskin is Hisos natay, ²⁰ nafatalaga yadi hantam sadik dalan bago, hanggan boyagan, hanggan igsagaya has dayo fanahop rotay. Ka orongan, kawan Hisos wa habilogan ka nafatalaga dalan. ²¹ Tam ha sadik Gorangon fag fagalan-han-Diyos kagbahala han Diyos fag layonan fag manga taw. ²² Yakanga intam fangayofan nodwa ha fagisipon intam naogali dwat hyabi, maskin tam nasoyo wan, ginyan angay wantam fangayofan, kito yadi kantam habilogan no naogas sas maliyaw fag danom halimbawa, ginya madi intam fangayofan no hosto, hanggan tam nogsyag orongan han Diyos, tam fag gakbang hanya. ²³ Tam fag idwa kaoman intam fagsyagon, fag idwa yadi gadowan maskin is Diyos idwag bohag nyawa ginahin, hanggan hanya ka nafwayong hantam it bato disagon. ²⁴ Tam fag idwag fagomon igfatodtohodan ha sadi ha sadi kitay, tam fag gamigosan hanggan fag gibolon fiya. ²⁵ Tam fag fagaba kabangkad igtifonan, fag idwa kito ka tiba kagfasigpala, idwa kabangkad. Yatokitay, fag farigon ha sadi ha sadi, labi man kati tam igdog kaakbang wantam Fon hadasogan fag Sirang. ²⁶ Taw no natwa wagdog hanggan natanggap ka fakaoronganan, dapat igfadagos yapdi has ogali dwat, fawa ha fawatwat domwag folot kawag faliyam it manga naogali dwat. ²⁷ Fawa hamsawad kaawaan. Kamsawad sat basad fangayofan, ka odi kadala wa dahol dahol, igfanaya odi ka Sirang Fangabayan hanggan mahori wa dahol fag afoy ka somonog in Diyos manga kalaban. ²⁸ Hyabi, no dowak taw, ngatay tolo kagfaorongan kitay sadik Hodyo nalaban in Mwisis togon, ta fawa kaawa tonya, tagfahatay wa dagos. ²⁹ Yatokitay, mahigpit man kat fadosa ka maangay has taw kagyod in Diyos Anak, labi man nodwag fahalga it folot kagfaganit taranggapan kagfahalyaw it fangayofan, hanggan igyod ka maawaon fag Maliyaw fag Falad. ³⁰ Tam kilala kaglwang kito, Aho wa ka ganti, aho wa kagfadosa. Hanya yadi kaglwang, Intam Fon fatohoyan kat sakop fag manga taw hat hadasogan. ³¹ Madala wagdog ka boyagan fag Diyos nogfatohoyan hat hadasogan ka manga taw ka gogali dwat, nyawa natanggap hyabi ka fakaoronganan. ³² Ham fag tohod no kinday ham no natwa wagdog in Diyos kafiyan, ginya madi aban ham ha manga nadalanan mahori wa dahol dahol, dapat ham naagwanta wa a, idwan balaw. ³³ Nomtoon ta nayod hayo hanggan nafahoriyan sas fakaaywanan faglagan. Nomtoon ham indamay yadi wan hayo manga ofod, ta no nafahoriyan has taw kitonya. ³⁴ Ham indamay yadi wan poriso. Ham idwan hori is taw madi ngap, nyawa ta nahagaw hayo manga botang, maskin ham twa kitay ka kaakwaan ka mafanayan hayo aban, fiya man ka kati fag kaakwaan, hanggan dogay man imdwat. ³⁵ Yakanga tam fag idwa kagomo nogsyag in Diyos, maskin tam nogsyag, dahol intam tanggapon fasalamat aban. ³⁶ Ka fiya tam fag gagwanta kaarakitay tam imtanog in Diyos kafangayofanan, hanggan tomanggap it togonan bato disagon. ³⁷ Maskin, Ngalay di, idwa domogay, Kambangkad aban kadasog wan. ³⁸ Angko matanogon fag fangibolon fagaba boyagan nogsyag angko, Dapat hanya no domayo angko, hodwag baya hanya. ³⁹ Dapat tam idwan aktom ka mangag dayo, ka manga has kadwatan. Tam in-aktom has mangag syag in Diyos, yakanga tam imbawi.

¹ Tam nogsyag in Diyos, tam twa matohoyanan kitay intam manga fakasyagon imlag wa aban, tam twa yadi kitay ka manga bagay kadwa malagan, orongan yadi wan. ² Ka manga taw hyabi nogsyag in Diyos, is Diyos igbaya wan. ³ Kawa tam nogsyag in Diyos, tam natwa wagdog kitay kawat hampang ka nahalig intam daga, hanggan tam natwa yadi wagdog kawa ka manga bagay ka malagan kati, inhalig gis idwa hara ha akwa. ⁴ Kawas Abil igsyag in Diyos, in Abil nawatwat folot hayopan, fangafiyan han Diyos, fiya man kan Kain nadisag manga hanon. Kawa kitonya, is Diyos no natanggap in Abil disag, intohoyan kitay is Abil maangay han Diyos faglagan. Nyawas Abil natay wan, bilang yapdi kampang hantam kawa hanya nogsyag in Diyos. ⁵ Kawas Inok igsyag in Diyos, hanyadwa natay, indiya odi has fadowa fag haboyagan. Ka Kasoratan iglwang, Tadwa nalag in Inok kawas Diyos nafaalin hanya, nalwang yadi kitay, Is Inok danwan balin Diyos fagbayaon nyawas Diyos idyapdi naahot hanya. ⁶ Is Diyos idwag baya kadwag syag hanya. Maskin nyawa faktaw ka omakbang han Diyos, fag katiwala kitay ha akwa wa Diyos, hanggan fag katiwala kitay hanyag disag yadi fiya has manga taw ka gakbang hanya. ⁷ Kawas Nowi igsyag in Diyos, hanya natalinga in Diyos fatagak, kawa has manga bagay kadyan anod. Is Nowi nahalig sadik sahayan baba dagat kaarakitay hanya, hanggan it talanahan imbawi. Maskin is Nowi igsyag in Diyos, manga taw sadi wak baba daga intohoyan has fadosaan. Is Nowi ha akwa yadi wan in Diyos kafiyan kawa nogsyag hanya. ⁸ Kawas Abraham igsyag in Diyos, hanyan tanog in Diyos, is Diyos no nasogo hanya ha sadik daga in Diyos nafatohoyan bato disagon hanya. Is Abraham nalahaw wan, nyawadwa twa no hadat hadasogan. ⁹ Kawas Abraham igsyag in Diyos, hanya nabanwanan, bilang odi sadik famaklay, san Diyos nafatohoyan bato disagon fag daga. It manga balay, balay odi rotay, kito yadinda Isaak da Hakob, pariho it manga natanggap in Diyos togonan bato disagon. ¹⁰ It balay kitonya odi no bali day is Abraham igfanaya yapdi sadik banwa fiya, ka ha faganitan, kadwa kahawig. Is Diyos ka naisip kitay fag kitonya ista fagfanayaon bago fag banwa, hanggan hanya yadi ka nahalig. ¹¹ Kawas Sara igsyag yadin Diyos, nyawa hanyan sagaya was fanganahon, is Diyos nafaangay kitay, ha aba omanak di, maskin is Sara natwa kitay is Diyos idwag bohag. ¹² Yakanga gi sadik taw, kawat kagorangan kaakbang wa has kahatayan baliwa, ginya wa kanginan sadik hasokfonan kanbali kayo was fanggasan sas banwa sam tongod, hanggan kayo was onay sas gobang dagat. ¹³ Tonya fag manga taw fagayo igsyag yapdin Diyos hanggan wa ta natay, nyawa tadya natanggap in Diyos togonan bato disagon. Dapat ta bilang wa nabantay, insaya waglag gis ayayo. To fag manga taw bilang wa nafwayong kitay, ta kito odis manga famaklay istay sas baba daga, giwas iba banwanan. ¹⁴ Ta noglwang kitonya, intohoyan kitay tagsayak yapdit sadili banwanan. ¹⁵ Ta nangos no kawili yapdista nagalinan fag banwanan, ta syagan di nangos kafwali ya sinya. ¹⁶ Dapat kasta fakasayaon sadik banwanan fiya man sinya, kawa sam tongod. Yakangas Diyos idwa kaya kabali ista Diyos, kawa hanya ha nafatalaga wan sadik banwa ista banwanan. ¹⁷ Is Diyos no nasolay in Abraham, kawas Abraham igsyag in Diyos, is Abraham nadisag hanya in Isaak, bilang wa kitos sogbaon hayopan. Nyawas Abraham nadog in Diyos togonan bato disagon hanya, hanggan nadog in Diyos, hanya no nalwang kitay, gin Isaak kambali hyamo hasokfonan, is Abraham idwa kwangit igdisag han Diyos it anak nyawadwam dowa. ¹⁹ Is Abraham natwa wagdog fiya fiya kitay, is Diyos syagan faboyag ya manga taw. Hanggan, no kalwang, is Isaak bilang wa nwali han Abraham gis kahatayan. ²⁰ Maskin is Isaak igsyag in Diyos, is Isaak nafatohoyan handa Hakob da Isaw kat tanggapon fiya aban. ²¹ Kawas Hakob igsyag in Diyos, hanya no kaakbang wa matay, nafatohoyan han Hosi manga anak dowa, kat tanggapon fiya aban. Natawid sat fon sokod a, matarahongan, nafasayagdog in Diyos. ²² Kawas Hosi igsyag in Diyos, hanya no kaakbang wa matay, nalwang kitay in Israil manga hasokfonan mwali ya gis Ihipto aban, natogon kitay, diyan yat manga botol. ²³ Kawan Mwisis manga magorang igsyag in Diyos, tadwa kadalag laban ka gorangon batasan. Ta no nalag kitay ka anak dararag kafiyaon, tolok magdanon ta nafalogaw ka anak basad balay. ²⁴ Kawas Mwisis igsyag in Diyos, hanya no dahol wan, nadayo kitay, ta fag idwa lomwang hanya in Faraon dayaga faganoon anak. ²⁵ Non Mwisis di fangayofan, fiya man hanya nomaktom han Diyos fag manga taw kagdog mahori, has homoyog manga taw ka ha kasolongan, ka ngalay di kaliyam kawa gis ogali dwat. ²⁶ Maskin san Mwisis basad fangayofan, bilang wa mata lagan it manga tanggapon fiya aban, yakanga hanya natikis wa omagwanta ka mahori, kawa galwasi in Diyos-natogon-Famawi. It kafangayofanan wan tonya fiya man has manga kaakwaan Ihipto. ²⁷ Kawas Mwisis igsyag in Diyos nasyagan di naobon ka Ihipto, idwa kadala ka gorangon nyawa kaisog. Kawa bilang waglag ka Diyos kadwa kalag, it fangayofan marigon wan. ²⁸ Kawas Mwisis igsyag kitonya, nasyagan igfabago ka Fanohodan Nagsagayan, nafasognod kitay manga taw fag lidgid folot sas boknga sakbawan balay, kaarakitay ka anghil kagfadosa idwag fahatay in Israil manga hasokfonan it manga anak ahan. ²⁹ Kawan Israil manga hasokfonan igsyag in Diyos, ta nasyagan nadifay ka Dagat Dararag. Ka dagat infalhang has boknga, yakanga ta nadifay sas baba daga mamaya. Dapat ka manga taga Ihipto no kasaya omoyan is taw, ka danom dagat nasafong ka manga sondalo taga Ihipto, yakanga dagat natabon was taw. ³⁰ Kawan Israil manga hasokfonan igsyag in Diyos, ka alad bato sas banwa Hiriko inbodbolangan lamang, ta nontabo wagsafong ka banwa Hiriko fitok sirang. ³¹ Kawas Rahab, sadik ina fabayowan wa dahol, igsyag yadin Diyos, yakanga idwa kafang igfasakbaw in Hoswi manga sogowan, ginyas Rahab idwan sakop has dwat, kito kat manga ofod ka dayo igfasakop in Diyos. ³² Aho awkin igfadagos yapdi? Dogay araw ho no tomoltol ha hayo, ho no fagayo wa fomwayong, kawa handa Gidyon, da Barak, da Samson, da Hipti, da Dabid, da Samwil, hanggan in Diyos manga fangampang. ³³ Kawa tagsyag in Diyos, tiba syagan di nadaog ka manga gorangon sakop. Kafiyaon tiba no nabahala has taw kafiyaon, ta natanggap in Diyos togonan bato disagon. Ta nogsyag in Diyos, tiba nalag kitay, ka manga bibig liyon in-gom lamang. ³⁴ Tiba nasyagan di nafahapsa afoy dahol dahol. Tibadwan sakop ista talibong. Tiba magomo ongay, dapat is Diyos igdisag karigonan kaarakitay imbali marigon sas awayan. Tiba nasyagan di nafafwali manga habanan sondalo ka gis ayayo fag banwanan. ³⁵ Kawa tagsyag in Diyos, manga ina naofod yat manga kaiban ka natay dapat inboyag ya. Tibadwa kasaya kalfas gis basad porisowan, maskin tagfili fag nangos matay wan sas basad mahori, kaarakitay imboyag ya has fiya fag haboyagan. ³⁶ Tiba ta nayod, tiba ta nabakbak, tiba ta naporiso magafosan kadina. ³⁷ Tiba ta nabintok bato, tiba ta nalagadi has fagbokngan habilogan, tiba ta nabasing talibong nogfahatay. Tibat manga rotay manga odi anit topa, manga anit hambing. Tiban bali myabog wa dahol, manga taw nafahoriyan fiya fiya hanya, mahigpit ngawan. ³⁸ Bilang odista fagdayoon, dapat ay, to fag manga taw fiya man ka tiba taw istay is baba daga. Tiba malahawan odi ha sayo basad fakahyabogan, hanggan wa ha basad moyod, matagowan, nalogaw wa ha sayo daga lohib bato, hanggan basad loong. ³⁹ Kawa tagsyag in Diyos, ta nafaobon hantam sadik faorongan kagfatohod intam fagaba. Dapat in Diyos togonan bato disagon idyan anod gis nanya fag masohod hyabi. ⁴⁰ Kawas Diyos ha fangayofan fiya man hantam, kitay tam fag im-aktom yadi has taw in Diyos togonan bato disagon nom-anod.

¹ To fag manga taw aywan, ka nasyag in Diyos hyabi, bilang wa maligongan wantam. Fagayo igfaorongan hantam kitay, kafiyaon it fagsyagon. Yakanga tam fag gobon fagayo fag manga bagay kagtaktak intam, hanggan ka ogali dwat ka fagabag lafit intam. Ginya madi tam fag idwag fagomon igfadagos igdalandan hantam bato lahawan hantam fagonan. ² Intam mata fangayofan nogbantay, fag fagaba matoonan han Hisos lamang. Kawas Hisos kagfabago tam nogsyag ha hanya, hanya mandi kagfahosto. Kawas Hisos natwa kitay ha kasolongan mafanayan ha hanya, hanya naagwanta wan it kahatayan sas nafatimbangan hayo, idwa yadi naya natay. Kati is Hisos natokaw san Diyos akbang, sat tokawan fanokawan gorangon balis sihon. ³ Tam fag maisipan fagaba no kinday is Hisos naagwanta manga taw, ha ogali dwat, no kadwat iglag hanya hanggan nalaban hanya, kaarakitay tam idwam lombay, idwa yadim gomo intam manga fangayofan. ⁴ Tam noglaban has ogali dwat, idya han-olan intam folot. ⁵ Tam awkin idwag tohod in Diyos adal hantam kawa tam it manga anak? It manga hampang igfarigon intam manga fangayofan. Angko anak, ha fag idwa gayfan kitay, kanantam Fon no gato hyamo? Im fangayofan fag idwam gomo, nyawa kabaya hyamo. ⁶ Maskin intam Fon no galwasi manga taw mangabaya wan, Igbakbak yadi fagayo kanbali it manga anak orongan. ⁷ Tam fag gagwanta fagayo kitontam Ama no kabaya intam, maskin to kagfalag kitay tam in Diyos wa manga anak. Fakta fag anak, ham gayfan, it ama idwa kabaya? ⁸ Nodwa ha kabaya intam, kitontam ogali kabaya intam manga anak, it kahologan, tam bohonwa orongan it sadili anak, gi odis famabayowanan. ⁹ Sadi ya kitay, tam ha manga ama taw ka kabaya intam, yakanga tam magalang hanya. Idwa awkin labi man maangay tam nogtalinga hanggan igfasakop han Diyos intam Ama, kaarakitay tam imboyag, kawantam fangayofan bago giwan Diyos no kaginan? ¹⁰ Intam manga magorang no kabaya intam, sadik ngalay lamang no kinday kasta fangayofan fiya. Dapat is Diyos kabaya intam hantam kafiyan, kaarakitay tam kabali maangay kito yadi hanya. ¹¹ No kandogay day no ha kabaya yapdintam, tam kadwat wagdog, tam kahori odi. Dapat ay, nonsagaya gis nanya, tam no natalinga ista habaya intam, tam ha kahowayan gintam ogali kanbali fiya. ¹² Yakanga, nogfahalimbawa, tam fag idwa kalibang odi masandigan, ngatay mafolidan odi, gwadi fag farigon intam habilogan. ¹³ Tam fag lahaw has fiya fag ogali fag dalan kaarakitay imrigon intam bitis, hanggan tam idwa kitos fihong, nogfahalimbawa. ¹⁴ Tam fag fagaba gamigosan hantam manga kapariho. Fag kabali maliyaw intam manga fangayofan, maskin tam idwa lomag kagfon intam, intam fangayofan nodwa kitonya. ¹⁵ Tam fag matagahan kitay nyawa faktaw fag idwa domayo in Diyos malooy fag kahowayan. Tam fag faliyam wan ka manga dwat fag fagayfanon santam fangayofan gis hyabi, hawa golit igfalafit has iba taw hanggan igfaagran. ¹⁶ Fag matagahan kitay fag idwa hagfabayowan nyawa faktaw santam, hanggan fag idwa yadi gayfan kitay ka manga bagay sas bago fag fangayofan idwa ha kahologan. Fag idwa kiton Isaw ka nafabalyo it bato tanggapon git ama, kawa hanya ista anak ahan, nafabalyo sadi dik finggan fanganon. ¹⁷ Ginya madi aban, nasagad kitay it ama fag domisag hanya it togon faobonon, ka maangay hat anak ahan. Dapat it ama idwa nasyagan nafafwalit hampang, kaarakitay igdisag han Isaw it fagsagadon, maskin idwa nasyagan nafaoman in Isaw naibolon, nyawas Isaw hanggan wa goraw wa kasaya tomanggap tonya fag togon faobonon. ¹⁸ Tam no gakbang han Diyos, tam idwa kitos manga taga Israil ka naakbang ha sadik moyod malagan. Tonya fag moyod, moyod Sinay, ha gigang afoy, masafongan marom, ha bagyo yadi marigon, ¹⁹ ha hasnog bodyong sinya, ha kampang yadi. Ka manga taw no nadog tonya fag hasnog, tagsagad fag katohas wan, maskin ²⁰ tadwa gagwanta tonya fag togon kaglwang, Nyawa faktaw, nyawa hayopan, ka somapkid tonya fag moyod, ta bomintok bato hanggan wa fahatay. ²¹ Ta gafalad waglag kasta nabantay, yakanga hanggan is Mwisis nalwang yadi, Kadala waglag, ho karokog wan. ²² Dapat tam no gakbang han Diyos, tam gakbang has Moyod Siyon, han Diyos boyagan it banwa, ka Hirosalim sam tongod. Hadwa homamin tomap ka manga anghil matifonan sinya. ²³ Tam gakbang han Diyos manga anak ahan ka masolong igtifonan, kat manga ngayan insorat sam tongod. Tam gakbang han Diyos ka mamatohoyan has fagayo fag manga taw it tanggapon. Tam gakbang yadi hasta manga falad taw fiya, kanbali hosto. ²⁴ Tam gakbang han Hisos kawag fagalan sas taranggapan bago, hanggan tam gakbang hat folot kan-olan, ka fiya man kan Abil folot it kahologan. ²⁵ Yakanga tam fag matagahan, fag talinga hasagtoltol hantam. Kagdayo igtalinga, no hagtoltol hanya istay sas baba daga, idwa bomaybay fadosaan. Kinda ara tam, tam no dayog talinga kagtoltol, igfatagak intam gim tongod. ²⁶ Maskin is Diyos nahampang hyabi, gis nanya ka daga inhawig. Dapat is Diyos natogon kati, Sadi ya ginan aban ho fahawig ya, bohondi ka daga hanggan wa banwa aban. ²⁷ Noglwang Sadi ya ginan, katwa wagdog kitay domwat kat manga nahalig bagay gona kanhawig, kaarakitay ka tomobos tonya kadwa kahawig, tonya wa ka domogay hanggan aban aban. ²⁸ Yakanga tam fag fasalamat han Diyos kawan Diyos sakop banwanan kantam fagtanggapon idwa kahawig. Tam fag fasayagdog han Diyos no kinday ka maangay ha hanya, magalang hanggan kadala yadig sway, ²⁹ kawantam Diyos kitos afoy ik marigon, kamin famagba fagayo.

¹ Maskin tam manga fadwasay san Kiristo, tam fag fadagos gamigosan. ² Tam fag idwa kafang igfasakbaw manga famaklay gis iba banwanan. Tiba kitonya wan, idwa nahafang nafasakbaw, yakanga tiba ginan, manga anghil kat nafasakbaw, nyawa tadwa nahilala. ³ Tam fag tarogbongan ista fakahoriyon ta nonporiso hanggan tam fag bilang yadi basad porisowan. Tam fag bilang kito kasta nafahoriyan, maskin tam idwa twa ngatay tam domog yadi kitonya aban. ⁴ Tam fagayo fag tomwa kitay kafiyaon ka ogali igtalsawa. Fagayo fag talsawa fag kawidwiliyan maskin is Diyos mamadosa ka mangag fabayowan. ⁵ Fag bohondi kwarta kantam fagisipon fagaba. Tam fag baya wan nyawa kana ka santam. Maskin is Diyos iglwang, Hodwa omobon hyamo, hodwa yadi fabayaan. ⁶ Yakanga tam idwa gadowan noglwang, Intam Fon kagtogbong angko, hodwa ha fakadalaon. Hodwa ha fagayfanon, nyawa kana kasta ibolonon hangko. ⁷ Tam fag tohod ka mangag bahala intam, kagtoltol in Diyos hampang hantam. Tam fag maisipan no kinday it ogali no boyagan yapdi, nyawa hanggan wa natay. Tam fag tolad hanya nogsyag in Diyos. ⁸ No kinday is Kiristo Hisos hyabi, kitonya mandi kati, nyawa aban, idwa yadim oman. ⁹ Fag idwa kadiya igdog ista manga madolaw fag adal bokod bokod. In Diyos malooy fag kahowayan kagfarigon intam manga fangayofan, bohonwa manga togon hasagfabaybay fanganon baliwa. Ka mangadwag sapkid fagliyon, idwa yadi farigon it fangayofan ginya. ¹⁰ No kitay di, tam ha sadik fanogban, dapat ka manga fagalan-han-Diyos sas fanimbaan Hodyo idwa fiya no somayo intam sinya, maskin ka yapdi folot hayopan it fagsyagon. ¹¹ Ka gorangon fag fagalan-han-Diyos sas fanimbaan Hodyo igdiya folot manga hayopan has basad lingoban, ka nafabokod man ka sadi, kaarakitay igdisag ka folot hayopan kanwatwat kawa has manga ogali dwat, dapat ka hayopan it habilogan tagsonog sas dayo banwa. ¹² Is Hisos kitonya yadi no natay, sas dayo alad banwa, kaarakitay igfabali intam manga fangayofan maangay, kawa sat folot. ¹³ Yakanga tam fag imbangkad yadi hanya sas dayo alad banwa. Tam fag omagwanta yadi kat donggon mahaya. ¹⁴ Maskin intam banwanan orongan, kadwam liyam, bohonwa kastay is baba daga. Intam fagsayahon fag banwanan, ka sam tongod fag banwanan kamlag aban. ¹⁵ Yakanga tam fag fagabag fasayagdog in Diyos, kawa han Hisos. Tam nogfasayagdog in Diyos kitonya, bilang intam wa disagon hanya. Tam igfasayagdog hanya kawa tam igbayat ngayan. ¹⁶ Tam fag idwag fagomon gogali fiya, hanggan igtogbong has tiba taw, maskin tonya yadi ka manga disagon kan Diyos fagbayaon, ka fiya man has sogbaon hayopan hyabi. ¹⁷ Tam fag fasakop has mangag bahala intam. Fag katanog it fwayong. Ta bahala wa gano intam, hanggan ta aba somagot in Diyos it naibolon kawa hanya baliwa. Tam no katanog it fwayong, ta bomaya wan, kawam tonglos it bato ibolonon. Tam nodwam tanog, tamhori wan, hanggan tam idwa yadi ha fakinabang. ¹⁸ Ham fag darangin kawa ha hyami. Midwa kayag fwayong hayo kitay, midwa ha fagisipon hyami naibolon kadwa fiya. Hyami fakasayaon hyami ogali fag maangay nyawa ginahin. ¹⁹ Ahog sagad hayo darangin kitay, aho nangos fag ngalay di mwali ha hayo. ²⁰ Ka kahowayan giwan Diyos no kaginan. Hanggan hanya ka nafaboyag ya kagfon intam, is Hisos. Is Hisos kanbali dahol man has fagayo fag fangano taw kito ka gano topa, kawat folot kagfaganit ka taranggapan kadwa ha katabowanan. ²¹ Is Diyos nangos fag domisag ha hayo ka korang sa hayo, kaarakitay ham syagan gibolon it fakasayaon. Is Diyos nangos fag gibolon santam basad fangayofan ka maangay sa hanya, gin Kiristo Hisos. Tam fag fasayagdog in Kiristo nyawa ginahin. Fadi wan, fag kitonya wa ngay. ²² Angko manga fadwasay, angko fagsagadon, ham fag idwa kahorig dog angko manga adal istay fag sorat, maskin agod di. ²³ Ho kasaya nangos ham fag twa kitay, ta nafalfas in Timotiyo, intam fadwasay, gis porisowan. No ngalay dimbangkad hastay, ho tomaban yadi hanya, ho nombangkad has nyamo hayo. ²⁴ Ham fag fwayong has mangag bahala ha hayo, hanggan hantam manga fadwasay fagayo kitay, mi gwas hayo fagayo. Intam manga fadwasay sas sakop Italya gwas yadi hayo. ²⁵ In Diyos malooy fag kahowayan fag fagaba wa sa hayo fagayo.