GALASYA

GALASYA

¹ Ahos Pablo kagsorat to fag sorat. Bonwa taw ka nafabali angko in Hisos Fandiya-Barita. Bonwa yadi taw ka nafasayagdog angko hastay fag ibolon, dapat is Kiristo Hisos hanggan is Diyos intam Ama, ka nafaboyag ya hanya, ka nafabali angko it Fandiya-Barita. ² To fag sorat gi yadintam manga fadwasay fagayo istay. Migsorat ha hayo fagayo san Diyos manga Tifonan sas sakop Galasya. ³ Ham nangos fag domog kitay is Diyos intam Ama hanggan is Kiristo Hisos, kagfon intam, mahoway ha hayo fagaba, hanggan igfalokmay yadi hayo manga fangayofan. ⁴ Kawa tam ha manga ogali dwat, is Kiristo Hisos nadisag it sadili haboyagan kaarakitay igbawi intam gis kadwatan kagsakop ka manga taw sas baba daga kati. In-anod kitonya maskin intam Diyos hanggan intam Ama wa kafangayofanan. ⁵ Yakanga fag han Diyos tam nogfasayagdog hanggan aban aban. Fag kitonya wa ngay. ⁶ Ho kadolaw wa dahol dahol igdog kitay, ham madalig dayo in Diyos, ka nafatawag hayo no nafalag ha hayo in Kiristo malooy fag kahowayan. Ginya kati ham igtalinga has sadi yak toltol, fiya yadi fag barita, hono. ⁷ Ka orongan idwa ha akwa Fiya fag Barita domwag, ka odi kitay tibak taw igfaadowan hayo, hanggan ta kasayag faoman ka Fiya fag Barita kawa han Kiristo. ⁸ Dapat ay, no ha mamaadal ha hayo, nodwa kito ka hyami nafaadal ha hayo Fiya fag Barita hyabi, fag is Diyos kagfadosa hanya mahori, nyawa hami halimbawa, nyawa sadik anghil gin Diyos banwanan sam tongod kagfaadal kitonya. ⁹ Mi dan wagfwayong ha hayo hanggan ho golit ya, no hagfaadal ha hayo, nodwa kito ka hayo natanggap Fiya fag Barita, fag is Diyos kagfadosa hanya mahori. ¹⁰ Aho noglwang kitonya, aho awkin kasaya kitay fag manga taw kagbaya angko, ngatay fag is Diyos kagbaya? Aho awkin kasaya kitay manga taw fag fasayagdog angko toltol, ham gayfan? No tonya di kangko fakasayaon, hodwan bali in Kiristo nasali sogowan. ¹¹ Manga fadwasay, ho nangos kasayag fatohoyan hayo kitay, kangko nafwayong Fiya fag Barita bonwa fadahitan taw. ¹² Bonwa taw ka nafadog angko ka Fiya fag Barita. Bonwa yadi taw ka nafaadal angka tonya. Is Kiristo Hisos wan ka nafatwagdog angko it Fiya fag Barita. ¹³ Ham fadi wadnadog angko manga ogali hyabi, aho no mahogod yapdig fasakop has manga ogali Hodyo. Gis nanya hyabi ho mahogod no naisog, hanggan talaga wa nafadwat in Diyos manga Tifonan, no nasyagan di. ¹⁴ Hyabi ho bondi kitongko manga kasohodan Hodyo no katanog ka manga ogali Hodyo, kawa ho gwayan wa kasaya katanog intam manga magorang togon. ¹⁵ Dapat ay, is Diyos danwa nafili angko, nyawa hodyan sagaya hyabi, ginya madi, kawa malooy it kahowayan, hanya nafatohoyan angko kitay, aho fag imbalit fangibolon. ¹⁶ Ginya madis Diyos no nafatwagdog angko no faktat Anak, kaarakitay ho manoltol has manga Hintil ka Fiya fag Barita, kawa hat Anak, hodwa naintaw gis taw no kinday tonya. ¹⁷ Hodwa yadi gis banwa Hirosalim kaarakitay manabang has manga gona man angko nonbali Fandiya Barita. Ho nadagos man has sakop Arabya, ginya aban honfwali ya has banwa Damasko. ¹⁸ Ginya madi, aban ya, nonsagaya tolok fangaraw gingkon tiwala ginan, ho bago di has Hirosalim kaarakitay manabang in Pidro. Dowa dik simba hami da Pidro no nangilhodan. ¹⁹ Hodwa nalag tibak Fandiya Barita sinya no bohonwas Santyago intam Fon fadwasay. ²⁰ Orongan wan fagayo kangko fwayong istay fag sorat. Is Diyos twa kitay hodwag bohag. ²¹ Ginya madi, aho no gis Hirosalim hyabi, aho hawas sakop Siriya hanggan sakop Silisya. ²² Gis nanya ka manga taw san Diyos manga Tifonan sas sakop Hodiya idyapdi kilala angko. ²³ Dapat ta nadog kitay, ka gisog has taw hyabi, katin tiwala wan hanggan igbarita yadi has manga taw, nyawa hyabi hanyag laban wan, kaarakitay idwa ha taw katiwala in Kiristo, nomtwa di. ²⁴ Yakanga tagfasayagdog in Diyos kawat naibolon sangko.

¹ Aban, nonsagaya safolo ya ha ofat ik fangaraw, hami da Barnabi inbangkad ya domwag has banwa Hirosalim. Mi nataban yadin Tito. ² Maskin honfwali ya sadi ya ginan has Hirosalim, is Diyos nafatwagdog angko kitay, aho fag hanya ya. Mi nanoltolan has manga fagtahinan, masamanan wa gis fakaaywanan san Diyos Tifonan. Ho nafwayong fiya fiya has manga fagtahinan ka Fiya fag Barita kangko fagfaadalon has manga banwanan Hintil, maskin ho gwayan wagfaanogon angko ibolon, gis fagonan hanggan wa kati, ta nodwag faangay angko faadalon has taw. ³ Angko ofod gis nanyas Tito. Nyawa hanya sadik Girigo, ka manga fagtahinan idwa yadi napilit igfatoli hanya. ⁴ Tadwa hara gwas hanya baliwa, nonman ha akwa manga kasaya kitonya, kagfaniring kitay tantiwala wan, igsoglatan has mangan tiwala, kaarakitay lomag no kinday tam nalfas gis ogali Hodyo, maskin tam insadi san Kiristo Hisos. Ta kasaya kitay, tam nangos fag fasakop yapdi has ogali Hodyo. ⁵ Dapat, midwa nafasakop hasta fasadan ngadi sadik ngalay, maskin mi kasaya kitay, ka Fiya fag Barita ka hayo fagtanggapon, fag idwa ha aktom kadwa orongan. ⁶ Dapat kasta ngayanon ista manga fagdogan idwa yadi nafabohag angko fwayong. No kitay di, idwa ha kana sangko no fakta fag manga taw tonya, maskin is Diyos idwa ha fagfiliyon taw. ⁷ Yatokitay, ta natwa wagdog kawas Diyos nafili angko kaarakitay manoltol has manga Hintil ka Fiya fag Barita, kito yadis Diyos nogfili in Pidro, kaarakitay manoltol has manga Hodyo ka Fiya fag Barita. ⁸ No kinday is Diyos no nafabali in Pidro it Fandiya-Barita has manga Hodyo, kitonya yadis Diyos nafabali angko it Fandiya-Barita has manga Hintil. ⁹ Da Santyago da Pidro da Hwan, kasta manga fagdogan san Diyos Tifonan, no natwa wagdog kitay is Diyos ka nafatohoyan hangko danwa malayonan angko ibolonon, ta natanggap hyami da Barnabi, mi pariho wa fangibolon. Mi nanaranggapan kitay hami has manga Hintil, taw has manga Hodyo no bomarita. ¹⁰ Ta nafwayong odi kitay, mi fag idwag fabayaan ka manga myabog fag manga Hodyo san Diyos Tifonan sas Hirosalim. Ho danwa kasayag togbong tonya fag manga taw. ¹¹ Is Pidro nonbangkad has banwa Antiyokya, sas sakop Siriya, ho nangabaya hanya sasta fagdogan, maskin matohoyanan idwa fiyat naibolon. ¹² Maskin in Santyago manga fakilalaon nodyan dasog, is Pidro igsayowan kwan has manga Hintil. Dapat, ta nonbangkad, is Pidro nafasamanon wan maskin kadala ka manga taw ka mahogod hasagfatoli baliwa. Yakangas Pidro idwag falagon kitay hanyag sayo has manga taw kadyan toli. ¹³ Tiba fag manga Hodyo kantiwala sinya nafaniring yadin Pidro, inbali madalaon. Hanggan is Barnabi inhalag yadi wa kitonya. ¹⁴ Aho no nalag fiya fiya kasta manga ogali, kawa idwa maangay has Fiya fag Barita orongan, sasta fagdogan fagayo, ho nalwang han Pidro kitay, Itfagonan, haw no sadik Hodyo gogali ka ogali Hintil, ka bonwa ogali Hodyo, kinda araw haw no pomilit ka manga Hintil kitay, ta fag omogali ka manga ogali Hodyo? ¹⁵ No kitay di, hami manga Hodyo, maskin hyami manga hafofowan Hodyo yadi. Hami bohonwa kasta faglwangon manga Hintil ka gogali dwat. ¹⁶ Nyawa kitonya, hami twa wa kitay, manga taw no nangafiyan han Diyos, bonwa kawa ta manga Hodyo ka katanog ka Batasan Hodyo, dapat kawa ta nogsyag in Kiristo Hisos. Hamig syag yadin Kiristo Hisos, kaarakitay hami mangafiyan wa han Diyos, bohonwa kitay kawa mi no katanog ka Batasan Hodyo. ¹⁷ Yakanga hami manga Hodyo, no gwayan wa kasaya mangafiyan han Diyos, kawa mi nonsadi san Kiristo, ginya nonlag kitay, mi ha ogali yapdi dwat has Batasan Hodyo baliwa, kitos manga Hintil, it kahologan awkin is Kiristo kagfasognod hyami has manga ogali dwat, ham gayfan? Balaw kitonya. ¹⁸ Aho nogfaganit ya ka Batasan Hodyo, kangko nadayo, kamlag kitay, ho ha ogali yapdi dwat, kagfatohoyan angko has kahatayan. ¹⁹ Yakanga, no hadis Batasan Hodyo baliwa, ho bilang wa mahatayan kati, maskin ka Batasan Hodyo mandi kagfatohoyan angko has kahatayan, kaarakitay ho kaboyag han Diyos wa malayon. Angko fangayofan dan intahin wa han Kiristo, hanya no natay sas nafatimbangan hayo. ²⁰ Yakanga bohonwa aho ka boyagan kati, dapat is Kiristo ka boyagan sangko. Kati angko fangayofan hanggan ogali giwan Diyos Anak, maskin hogsyag hanya. Hanya ka galwasi angko hanggan nadisag it haboyagan kaarakitay igbawi angko. ²¹ Nyawa kindawan hodwag fasigpala in Diyos malooy fag kahowayan. Maskin halimbawa, manga taw no nangafiyan han Diyos kawa no katanog ka Batasan Hodyo, in Kiristo kahatayan idwa ha kahologan.

¹ Ham fiya fiya fag manga taga Galasya. Fakta ka nafaadowan hayo?Gwadi bilang wa hayo mata lagan ham no nadog no kinday is Kiristo Hisos no natay sas nafatimbangan hayo. ² Todi angko intaw ha hayo. Ham awkin natanggap in Diyos Falad kawa ham katanog ka Batasan Hodyo, ngatay kawa ham katiwala ka hayo natalingaka Fiya fag Barita? ³ Kana ham no kabali odi idagdog? In Diyos Falad ka hayo fagsyagon bago bago, dapat kati hayo odi ogali kabali hayo fagsyagon. ⁴ Hayo manga nadalanan idwa awkin ha kahologan? Gwadi ha kahologan wan. ⁵ Kanas Diyos no nadisag ha hayo it Falad hanggan naibolon manga fatimawa, ham gayfan? Kawa ham katanog awkin ka Batasan Hodyo, ngatay kawa ham no katiwala ka hayo donggon Fiya fag Barita? ⁶ Tam fag tohod in Abraham nadalanan hyabi. Ka Kasoratan iglwang kitay, Is Abraham igsyag han Diyos, yakangas Diyos nafatohoyan kitay is Abraham nangafiyan hanya. ⁷ No kitonya, tam twa wagdog kitay ka mangag syag in Diyos kati, tonya fag manga taw kan Abraham manga hasokfonan orongan. ⁸ Ka Kasoratan nagona wa nafwayong kitay, manga Hintil aban mangafiyan yadi han Diyos ta nogsyag hanya. Yakanga sas Kasoratan tam igdog no kinday is Diyos nafwayong ka Fiya fag Barita han Abraham no nalwang, Gi hyamo hasokfonan aban fagayo fag manga layonan taw bomaya wan. ⁹ Is Abraham igsyag in Diyos. Yakangas Diyos iglwang kitay, fagayo kagsyag hanya bomaya wan, kito yadin Abraham kagbaya wan, maskin nasyagin Diyos. ¹⁰ Fagayo fag manga taw kagsyag kitay ta mangafiyan wa han Diyos,maskin ta katanog ka Batasan Hodyo, imtohoyan has fadosaan, maskin ka Kasoratan iglwang, Nyawa faktaw kadwa katiwala hanggan katanog fagayo fagayo kansorat sas Batasan Hodyo, is Diyos mamatohoyan hanya has fadosaan. ¹¹ Yabay, katwa wagdog kitay idwa ha taw nangafiyan han Diyos kawa no katanog ka Batasan Hodyo, maskin ka Kasoratan iglwang, Ka manga taw ka nangafiyan han Diyos maskin igsyag hanya, tonya lamang ka boyagan fagaba. ¹² No katanog ka Batasan Hodyo, hanggan nogsyag in Diyos, tonya fag dowak ogali idwa pariho. Kito man ka Kasoratan fwayong, Nyawa faktaw no gibolon fagayo ka Batasan Hodyo fagsagadon, ka Batasan Hodyo faboyag hanya. ¹³ Dapat ay, maskin is Kiristo natobos intam, hanyan tohoyan has fadosaan no natay sas nafatimbangan hayo, yakanga hanya nabawi intam gis fadosaan kantohoyan sas Batasan Hodyo. Kawa ka Kasoratan iglwang, Nyawa faktaw kasta nafahatay sas tongod hayo, tonyan Diyos nafatohoyan has fadosaan. ¹⁴ Is Kiristo natobos intam kitonya, kaarakitay ka kafiyan kan Diyos natogon it bato disagon han Abraham, fag imdasog yadi gin Kiristo Hisos has manga Hintil, hanggan tam tomanggap yadin Diyos Falad kat natogon bato disagon, tam nogsyag hanya. ¹⁵ Manga fadwasay, to ka sadik halimbawa tam fagaba waglag. No ha sadik taranggapan nwaya faktaw kantahin sinya, idwa mahimo nodwag fatonglos, idwa yadi mahimo igdogang has taranggapan, nyawa manga odi taw ka nanaranggapan. ¹⁶ Yabay is Diyos natogon it bato disagon han Abraham hanggan hat hasokfonan. Ka Kasoratan idwa yadi nafwayong, Hat manga hasokfonan. No manga hasokfonan, aywan kat fagwason. Dapat Ha hyamo hasokfonan, it kahologan sadi di, kawas Kiristo in Diyos fagwason in Abraham hasokfonan. ¹⁷ Kangko bato lwangon kiti, nonsagaya 430 fangaraw gin Abraham, is Diyos bago di nadisag has taw ka manga Batasan Hodyo. Dapat ka Batasan Hodyo idwag faoman in Diyos taranggapan han Abraham, idwa yadig faoman kitay is Diyos idwag fatonglos it taranggapan hanya. ¹⁸ Maskin in Diyos disag nomganit sas Batasan Hodyo, idwam ganit san Diyos bato disagon. Dapat is Diyos nadisag wa ngay it natogon han Abraham. ¹⁹ No kitonya mangharaw, kana ka Batasan Hodyo, it fakinabang, ham gayfan? Dogay in Abraham ginanan is Diyos nadisag ka Batasan Hodyo,kaarakitay igfatohoyan has taw no kana fag manga ogali ka dwat, no kandogay day in Abraham hasokfonan sadi, kan Diyos nagtogonan yadi,nodyan bangkad hastay is baba daga. Manga anghil nadisag ka Batasan Hodyo han Mwisis, ginya madi hanya ka fagalan has taw. ²⁰ Dapat ka sadi di idwag fahasa ha fagalan, hanggan is Diyos sadi di. ²¹ No kitonya mangharaw, ka Batasan Hodyo iglaban awkin in Diyos natogon manga bato disagon has taw, ham gayfan? Balaw kitonya. Halimbawa,is Diyos no nadisag has taw sadik togon ka syagan igfaboyag manga taw,fagayo fag manga taw mangafiyan wa han Diyos no katanog tonya fag togon. ²² Dapat ka Kasoratan kagfatohoyan kitay, fagayo fag manga taw, sadik baba daga, insakop has karigonan ogali dwat, kaarakitay is Diyos domisagit togon bato disagon has mangan tiwala maskin tagsyag in Kiristo Hisos. ²³ Dapat ay, hyabi hami manga Hodyo nodya twag syag in Kiristo Hisos,mi bilang wa mahofitan sas Batasan Hodyo, no kandogay day is Diyos nodyag falag hyami no kinday mi nogsyag in Kiristo Hisos. ²⁴ Yakanga ka Batasan Hodyo kagfasognod hyami, manga Hodyo, is Kiristo nodyan bangkad hastay, kaarakitay, is Kiristo nonbangkad, mi mangafiyanwa han Diyos kawa migsyag in Kiristo. ²⁵ Yabay kati fag kasohodan, manga taw fag syag in Kiristo, yakanga bonwa ka Batasan Hodyo kagfasognod hyami kati. ²⁶ Kawa ham, manga taga Galasya, igsyag yadin Kiristo, ham fagayo inbali in Diyos manga anak, hanggan isadi san Kiristo Hisos. ²⁷ Ham fagayo kantogna sa Kiristo, ginya wa ginan ham igtolad yadi hanya. ²⁸ Yakanga manga taw myasa wa kitonya no kasadi han Kiristo, nyawa Hodyo, nyawa Hintil, nyawasta sogowan, nyawa bonwasta sogowan, nwaya ama,nyawa ina, tam fagayo bilang sadi di, tam no myasa wansadi san Kiristo Hisos. ²⁹ Ham manga taga Galasya, ham non Kiristo sakop fag manga taw, ham in-aktom yadi han Abraham manga hasokfonan, ham tomanggap yadi in Diyos natogon it bato disagon.

¹ To kangko bato Iwangon. Halimbawa, ista anak ka omafo it ama faobonan aban. Dapat hanya no anak yapdi idwa labi man it ama manga sogowan, nyawa hanya ka omafo fagayo aban. ² Maskin ista anak nodyan dahol, igtalinga yapdit ama manga fangibolon ka ganot anak afoon aban, no kandogay day kat ama nafatohoyan. ³ Kitonya yadi bangan hyabi, tam nodya twagdog ka fakaoronganan gin Diyos, ka manga Afo Daga igsakop intam. ⁴ Dapat nondasog gis nanya fag masohod kan Diyos nafatohoyan, is Diyos nasogo hastay, has baba daga, it sadili Anak, ha ina taw, hanggan igfasakop has manga Batasan Hodyo, ⁵ kaarakitay igfalfas ka manga Hodyo kagfasakop has manga Batasan Hodyo, hanggan igfabali hyami in Diyos wa manga anak. ⁶ Kaarakitay igfatohoyan kitay ham yadi, manga taga Galasya, ham in Diyos manga anak, is Diyos nadisag ha hayo it Anak Maliyaw fag Falad. Tonya fag Falad kagfasyagan intam igsyag han Diyos kiti, Mama, hyami Ama. ⁷ Yakanga kati, hanggan wa ham, ham bonwa manga sogowan dapat ham in Diyos wa manga anak. Maskin ham it manga wa anak, ham yadi ka omafo fagayo kan Diyos bato disagon hat manga anak. ⁸ Hyabi, ham idya nahilala in Diyos, yakanga ham inbali sogowan manga tiba karigonan, ka bonwa manga fagsyagon orongan. ⁹ Dapat kati, ham nahilala in Diyos, ngatay fiya man aho no lomwang kitay, kati is Diyos kilala wa hayo. Yakana ham no kafwali ya has manga magomo fag manga Afo Daga, kadwa yadi ha fakinabang? Kana mayon ham no kasaya yagfasakop tonya manga bagay? ¹⁰ Ham gwayan wagfahalga manga sirang, manga magdanon, manga gis nanya fag manga masohod, hanggan manga tiba fag fangaraw. ¹¹ Ho gafalowan hayo, ho kadala ngandayo kangko nakayayan kawa ha hayo idwa ha fakinabang. ¹² Manga fadwasay, hogfaaronganon ha hayo, ham fag tolad angko kitay ahodwag fasakop kati has manga Batasan Hodyo. Aho kito ka hayo, manga taga Galasya. Hyabi ham bonwa manga sakop Batasan Hodyo. Hyabi ham idwa nafahoriyan angko. ¹³ Ham fadi wadtwa kitay, ahogfaadal hayapdi hayo gis nanya ka Fiya fag Barita sangko swali gona, kawa aho ha fagdogon gis nanya. ¹⁴ Nyawa kitonya, ham idwan dwat iglag angko, Ham idwa yadig dayo angko, nyawa angko fagdogon mahori ha hayo. Ham natanggap di ngap angko kafiyaon, bilang in Diyos anghil ka hayo tanggapon, hanggan labi man inya, bilang was Kiristo Hisos. ¹⁵ Kana mayon hayo fangayofan non-oman kati? Aho natwa wagdog kitay hyabi, ham no nasyagan di, nyawa hayo sadili mata, ham naswat ginya nadisag wangko. ¹⁶ Kati ham awkin igfabali angko hayo kalaban maskin hogfwayong hayo ka orongan? ¹⁷ Ka kasayag faoman in Diyos Fiya fag Barita gwayan wa gafalo hayo, dapat kaodikitay ta ha fagalwasiyon idwa fiya. Ta kasaya igfaayayo hayo gingko, kaarakitay has taw baliwa ham nomdiya. ¹⁸ Ka gafalo has taw idwa dwat no kitay di, no fiya ista fakasayaon, nyawa bonwa aho kas nyamo hayo. ¹⁹ Angko fakabaloon fag manga anak, no kandogay day in Kiristo fangayofan nodyan hosto sa hayo, aho sadi ya ginan igdog mahori sangko fangayofan, halimbawa, kito sina nogfasagaya anak. ²⁰ Kafiyaon nangos aho nos nyamo hayo kati, kaarakitay idwa maisog donggon angko hampang tam no kampangan masayangowan, maskin masaliwawa wa dahol angko fangayofan kawa ha hayo ²¹ To kangko intaw ha hayo, ham ka kasayag fasakop has Batasan Hodyo. Ham idwa aw nadog ka Batasan Hodyo fwayong? ²² Insorat sinya kawas Abraham ha dowak anak ama, insadi inda Abraham sogowan di kat ina, dapat insadi, kawan Abraham wa babay, kat ina, bohonwa sogowan. ²³ Inda Abraham sogowan ina no gabosog hyabi, hanggan ganak, idwa ha madolaw. Dapat in Abraham babay idwa ha anak no bohonwas Diyos ka ha natogon it bato disagon han Abraham. ²⁴ To sadik halimbawa. Ka dowak ina igfahalimbawa dowak taranggapan. Is Agar igfahalimbawa ka taranggapan kanhalig sas Moyod Sinai, hanggan in Agar manga anak nonsagaya, inngayan yadi manga sogowan. ²⁵ Is Agar kagfatohoyan ka taranggapan sas moyod Sinai, sas sakop Arabya. Hanyag tolad yadi ka kati fag Hirosalim, hanggan it manga sakop fag manga taw kanbali manga sogowan fagayo. ²⁶ Dapat ka Hirosalim sas tongod bonwa sogowan. Hanya ka bilang intam wa ina. ²⁷ Maskin kiti in Diyos sorat fwayong, Haw ka ina kadwa ganak hyabi, Haw fag kasolong wan, Haw kadwa ha nagdogan masagit nogfasagaya anak, Haw fag rokyaw masolong, kawa omanak wan. Maskin nyawat indogan igfasigpalat babay, it anak aywan man Kat babay kagtahon fagabat indogan. ²⁸ Yabay, manga fadwasay, no kinday is Diyos nadisag han Abraham in Isaak, kawat tongon domisag, kitonya yadi tam nonbali in Diyos wa manga anak. ²⁹ No kinday hyabi ka anak kansagaya kito mandis nogbanwan nangawayan han Diyos Falad disag anak, kitonya mandi kati. ³⁰ Dapat kana ka Kasoratan fwayong? Faalinan ka sogowan ina hanggan wat anak, maskin ka anak sogowan idwa mahimo omafo ka bato faobonan has anak git babay ka bonwa sogowan. ³¹ Maskin ngay manga fadwasay, tam bonwasta sogowan hasokfonan, dapat tam gis ina ka bonwa sogowan.

¹ Is Kiristo nafalfas intam kaarakitay tam bonwa manga odi sogowan. Gwadi ham fag idwa kabali sogowan domwag has manga togon ka hayo fagfasakopon hyabi. ² Kati ham fag talinga angko bato fwayongon ha hayo. Ahos Pablo kagfwayong ha hayo kitay, ham nogfatoli hayo, kaarakitay mangafiyan han Diyos, it kahologan in Kiristo naagwanta sas nafatimbangan hayo kawa ha hayo, idwa ha fakinabang. ³ Hogfatagak hayo fiya fiya, nyawa faktaw nogfatolit sadili, idwa maangay nodwa katanog ka manga togon fagayo fagayo sas Batasan Hodyo. ⁴ Ka manga taw sa hayo ka kasaya katanog ka Batasan Hodyo, kaarakitay mangafiyan han Diyos, tansaman gin Kiristo, hanggan in Diyos malooy fag kahowayan idwag dasog has taw. ⁵ Dapat kawa hami, in Diyos Falad kagfaasolop hyami, kawas Diyos mamatohoyan aban kitay, maskin migsyag in Kiristo, hami nangafiyan wa ha hanya. ⁶ Kawa tam nonsadi san Kiristo Hisos, idwa ha kinday, nyawa tam intoli, nyadwan, dapat ay, ka mahalga intam ogali fag falag kitay tam galwasi manga taw maskin tam igsyag in Kiristo. ⁷ No kitay di, hyabi, ham nogsyag in Kiristo, ham kalabi man has kafiyan baliwa. Fakta kagtoplan hayo kati, kaarakitay ham idwag fadagos has fakaoronganan. ⁸ Matohoyanan kagfaadowan hayo idwa gin Diyos ka nafatawag hayo. ⁹ Ngadi ogbot fag famadahol tinapay igfadahol sadi wak dahonya foholan harina. ¹⁰ Nyawa kitonya, angko fangayofan marigon yapdi kawa ha hayo. Maskin tam myasa wansadi santam Fon, ho twa wa kitay hayo fangayofan kito yadingko, hanggan no fakta fag taw kagfaadowan hayo, nyawa faktaw, is Diyos mamadosa hanya. ¹¹ Manga fadwasay, no kawa aho, aho no orongan igfaadal yapdi kitay fagayo fag imtoli, kana mayon ta nogfahoriyan yapdingko hanggan wa kati, ham gayfan? Aho no orongan igfaadal kitonya, kangko fagfaadalon, kawan Kiristo kahatayan sas nafatimbangan hayo, idwa nangos inbali fasingyanan has taw. ¹² No sadingko, ka mangag faadowan hayo, fag bondi kitay imtoli, fag imlosa wa nangos. ¹³ Dapat no kadi ham, angko manga fadwasay, is Diyos nafatawag hayo kaarakitay ham imbali mafalfasan fagaba, bonwa manga sogowan has Batasan Hodyo. Dapat ay, maskin tam mafalfasan, tam fag idwa gayfan kitay, fiya di nyawa tam katanog intam bali fangayofan masayaon. Yatokitay, maskin tam gadgalwasiyan, tam fag tarogbongan. ¹⁴ Kawa ka Batasan Hodyo, sadik dahonya, in-ngayan sa sadik sanglitan kitay, Haw fag galwasi im kapariho taw kito mandi haw no galwasi im sadili. ¹⁵ Dapat ham no bilang kitos manga hayopan karagatan hanggan igfadaddwatan ha sadi ha sadi, ham fag matagahan, ham mamin wa fadwat ka Tifonan. ¹⁶ Tongko fwayong ha hayo. Fag ka Maliyaw fag Falad kambali intam fagtahinan santam manga ogali. No kitonya, tam idwa katanog intam bali fangayofan masayaon. ¹⁷ Kawa ka bali fangayofan masayaon iglaban ka Maliyaw fag. Falad fakasayaon, hanggan ka Maliyaw fag Falad fakasayaon iglaban ka bali fangayofan masayaon. Iglabanan to fag dowa. No kitonya tam idwa syagan omibolon kantam fakasayaon. ¹⁸ No ka Maliyaw fag Falad kantam fagtahinan, bonwa ka Batasan Hodyo kagsakop intam. ¹⁹ Tam fadi wadaglag ka bali fangayofan masayaon manga ogali, kawa gogali dwat has ka taw, manga ogali sitam, idwa ha nahayan, ²⁰ mangag syag has iba karigonan, mangag fintas, mangag labanan, igfabarohagan, kabayong, gidgisogan, kabali masadiliyon, igfasarowayan, mangag daraogan, ²¹ manga kaid-ingliyan, manga kalango, mangag sagaya wa ngap kasolongan, ha akwa yadi tiba manga ogali kitonya. Hogfatagak hayo kito katfagonan, is Diyos idwa tomanggap hat sakop ka gogali kitonya. ²² Dapat ay, ka Maliyaw fag Falad no sawantam, kamlag santam ogali, bilang it bohad, kawa tam gadgalwasiyan, ha kasolongan, malokmay intam fangayofan, tam maagwantaon, mahoway, fiya intam ogali, maanod intam hampang, ²³ magop, igfasad yadintam sadili, nyawa kana. Idwa ha togon igbando to fag manga ogali. ²⁴ Tam ka mangan balin Kiristo Hisos fag manga taw, tam nafahatay sas nafatimbangan hayo intam sadili bali fangayofan masayaon, hanggan wat manga fakasayaon dwat. ²⁵ Ka Maliyaw fag Falad kagdisag haboyagan hantam kati, yakanga fag tonya kantam fagtalingaon hanggan fakatanogon. ²⁶ Tam fag idwa ha takan, fag idwag fasalagwa intam iba, fag idwa maingliyon.

¹ Angko Manga fadwasay, tam no twa kitay sadik taw san Diyos Tifonan ha naogali dwat, fag ka katanog ka Maliyaw fag Falad kagfatobli hanya has fiya, dapat fag mahoway no kabaya. Fag matagahan yadintam sadili ogali, kaarakitay tam idwa yadim loksowan has ogali dwat. ² Tam fag tarogbongan igdiya ka bilang ista manga fasanon. No kitonya tam katanog in Kiristo togon. ³ Nyawa faktaw no gayfan kitay hanya kasta fagbayaon, nyawa ka orongan hanya basta odi taw, igdaya odit sadili. ⁴ Tam fagayo fag gisip intam sadili ogali. No fiya intam ogali, tam igbaya wan. Tam fag idwag fatimbang intam ogali hasta ogali tiba taw, ⁵ maskin tam fagayo bahala wagdiya ka bilang intam sadili boklid. ⁶ Ka gadal in Diyos hampang fiya no homoray hasagfaadal hanya, manga bagay kat natanggap fiya gin Diyos. ⁷ Tam fag idwa gadayaan, maskin idwa ha taw syagan igdaya in Diyos. No kana kasta natanom, tonya mandi kat aniyon. ⁸ Tam nogtanom santam bali fangayofan masayaon fangiyaban, kahatayan kantam aniyon ginya. Dapat ay, tam nogtanom sas Maliyaw fag Falad fangiyaban, haboyagan kadwa ha katabowanan intam aniyon gis Maliyaw fag Falad. ⁹ Tam fag idwa yadi kabodlay no gogali fiya. Nomdasog gis nanya fag masohod aban, tam nodwam bodlay, tam ha aniyon kafiyaon. ¹⁰ Kawa kitonya, tam fag idwag fasigpala nyawa ginahin tam no ha lagan togbongon has taw, labi man hantam manga fadwasay kamtiwala. ¹¹ Ham iglag kitay dakdaholan ka manga ragit istay fag sorat, kangko gamat ka nasorat to. ¹² Ka manga kasayag pilit hayo fatoli hayo kasaya odig fatakagdog has taw kawa has manga bagay malagan. Ta kadala kitay, ta nogbarita in Kiristo kahatayan sas nafatimbangan hayo, manga Hodyo omisog hanya. ¹³ Nyawa ka mangag fatolit sadili idwa katanog ka Batasan Hodyo. Ta kasaya odig fatakagdog kitay, ham imtanog yadi to fag ogali sas baba anit, ham namtoli. ¹⁴ Dapat ay, no sadingko, in Kiristo Hisos kagfon intam it kahatayan lamang sas nafatimbangan hayo kangko fagbayaon. Maskin hanya natay sinya, ka manga oglali dwat istay is baba daga bilang odi mahatayan sangko, hanggan aho bilang yadi mahatayan no sas ogali dwat baliwa. ¹⁵ Idwa ha kana nyawa tam intoli, nyawadwan. Ka mahalga, is Diyos no nahalig intam fangayofan bago. ¹⁶ Fagayo ka kitonya yadit fangayofan hanggan ogali, hanggan fagayo kan Diyos nafili fag manga taw, fag domog kitay is Diyos kaawa hanya hanggan igfalokmay yadit fangayofan. ¹⁷ Tongko fwayongon goyan goyan. Gis kati ginan, nyawa faktaw, fag idwag fahoriyan angko domwag, maskin ka manga fakdat sangko baba anit ka bilang manga tandaan kagfatohoyan kitay, aho in Hisos nasali sogowan. ¹⁸ Angko manga fadwasay, ham nangos fag domog kitay, is Kiristo Hisos kagfon intam mahoway ha hayo fagaba. Fag kitonya wa ngay.