IFISO

IFISO

¹ Ahos Pablo kagsorat to fag sorat.Aho in Kiristo Hisos FandiyaBarita, kawa tonyan Diyos wa kafangayofanan. Hogsorat ha hayo sas banwa Ifiso, ka mangan sadi san Kiristo Hisos, katanog yadi hanya, ha hayo kantohoyan han Diyos. ² Ham nangos fag domog kitay is Diyos, intam Ama, hanggan is Kiristo Hisos kagfon intam mahoway ha hayo fagaba, hanggan igfalokmay hayo manga fangayofan. ³ Tam fag baya han Diyos, kan Kiristo Hisos, kagfon intam, it Diyos hanggan it Ama, kawa hangyag disag hantam fagayo fag manga fagbayaon has fangayofan baliwa, kito ka san Diyos banwanan sam tongod, maskin tam insadi san Kiristo. ⁴ Gi yapdis hyabi, ka daga nodyan halig, is Diyos danwa nafili intam san Kiristo Hisos, kaarakitay tam imbali maliyaw, idwa yadi ha fabangdanan san Diyos faglagan. Maskin is Diyos galwasi intam, ⁵ hanya danwa nafatohoyan kitay is Kiristo Hisos ka fabali intam in Diyos manga anak, kawan Diyos fakasayaon hanggan kafangayofanan kitonya wan. ⁶ Tam fag fasayagdog in Diyos, kawa hanya nafalag hantam it malooy fag kahowayan sat fagalwasiyon fag Anak. ⁷ In Kiristo folot kanwatwat kagfalfas intam, kitay tonya kagfaliyam intam manga ogali dwat. Maskin kitonya wak mahalga is Diyos no galwasi intam, ⁸ kitonya kat nafalag hantam. Maskin is Diyos madonong igligaw halimbawan, ⁹ nondasog gis nanya fag masohod kat nafatalaga, hanya nafatwagdog intam it kafangayofanan madolaw kadya nafadog has taw hyabi, kat nafatonglos san Kiristo. ¹⁰ To in Diyos kafangayofanan madolaw kitay, fagayo ka san Diyos banwanan sam tongod hanggan sas baba daga fag imsadi wan san Kiristo. ¹¹ Is Diyos ka bahala has fagayo fagayo fag manga bagay kaarakitay it sadili kafangayofanan fag im-anod wan, hanggan hami manga Hodyo kantiwala, kat nafili bago, kaarakitay imbalit sadili layonan fag manga taw. ¹² Yakanga, hami ka nagona nasyag in Kiristo, fag hami kagfalag has taw in Diyos kafiyan. ¹³ Ginya madi, ham manga Hintil, kitonya yadi, ham no nadog ka toltol orongan, ka Fiya fag Barita no kinday tam nombawi, ham nasyag yadin Kiristo, hanggan is Diyos nadisag hahayo ka Maliyaw fag Falad kitot natogon. Ka Maliyaw fag Falad santam in Diyos wa tandaan kitay tam it manga taw, ¹⁴ hanggan in Diyos disag gona kagfatohoyan hantam kitay aban, tamnombawi fiya fiya, tam tomanggap fagayo in Diyos natogon bato disagon hat manga nafili, kaarakitay manga taw fasayagdog in Diyos kafiyan. ¹⁵ Yakanga, gi wangko nadog no kinday ham nogsyag in Hisos kagfon intam, hanggan no kinday ham no galwasi fagayo fag manga taw kantohoyan han Diyos, ¹⁶ ho fagaba wagbaya in Diyos aho nogdarangin kawa ha hayo. ¹⁷ Hogdarangin han Diyos, kan Kiristo Hisos kagfon intam it Diyos, hanggan intam Ama kagfon kafiyan, kitay, hanya fag domisag ha hayo manga fangayofan bago, manga fakatwawon hanggan falag ha hayo in Diyos; kaarakitay ham homilala hanya. ¹⁸ Sadi ya angko fagdaranginon kitay, hayo manga mata fangayofan fag imfoga yadi wan, kaarakitay ham lomag in Diyos yawa, ginya ham tomwa kitay is Diyos nafatawag intam ha sadik fagfanayaon matohoyanan, hanggan tomwa kitay, kafiyaon it manga madolaw fag manga kafiyan, kat natogon hat manga nafili. ¹⁹ Ham tomwa yadi kitay, in Diyos karigonan ka gibolon santam ka mangag syag hanya.Tonya yadit karigonan kadwa hat dayo domwag, ²⁰ ka nafaboyag ya in Kiristo, hanggan nafatokaw hanya san Diyos balis sihon, sat banwanan sam tongod. ²¹ Yakangas Kiristo kagsakop fagayo fag manga gorangon, fagayo ka ha manga kangayanan, fagayo ka ha manga karigonan, hanggan kasta manga fagtahinan.Bondi kati fag manga kasohodan, dapat hanggan has aban, in Kiristo kangayanan abwat man has fagayo fagayo. ²² Is Diyos kagfasakop han Kiristo kangayanan fagayo fag manga bagay, hanggan nafabali hanya ka pinagka alfoyo hat Tifonan. ²³ In Diyos Tifonan in Kiristo wa habilogan. Ka alfoyo hanggan habilogan nomsarokfonan, imhosto wan ka sawat Tifonan fagayo fagayo sadi wak dahonya.

¹ Hanggan ham manga Hintil, hyabi hayo manga fangayofan mahatayan wan, kawa ham igsway in Diyos, hanggan dwat hayo manga ogali. ² Gis nanya hyabi, ka manga ogali dwat istay is baba daga ka hayo fakatanogon, kawa ham igfasakop hasagfon kadwatan, kawa tahinan labang, kagfasognod fagayo fag manga taw kagsway in Diyos. ³ No kitay di, tam fagayo kitonya yadi hyabi, tam katanog intam bali fangayofan masayaon, no kana odintam sadili habilogan, ngatay fangayofan fakasayaon, ya tonya kantam naogali. Kito yadi ka tiba taw, tam hyabi in Diyos wa fakaisogon. ⁴ Dapat ay, kawas Diyos galwasi wa dahol dahol intam, hanyan awa intam. ⁵ Yakanga, intam manga fangayofan no mahatayan yapdi hyabi, kawa tam igsway in Diyos, hanya nafatahin intam han Kiristo, nafaboyag yadintam. In Diyos malooy fag kahowayan ka nabawi intam. ⁶ Kawa tam insadi san Kiristo Hisos, tam intahin hanya, inboyag ya, hanggan tam intokaw san Diyos banwanan sam tongod. ⁷ Is Diyos naibolon kitonya kaarakitay fagaba falag aban kitay, idwa hat dayo domwag it malooy fag kahowayan hantam, kat nafalag hantam san Kiristo Hisos. ⁸ Maskin kawa tam igsyag in Diyos, it malooy fag kahowayan kagbawi intam. Bonwantam sadili ogali kagbawi intam. Yatokitay, in Diyos wa disag hantam kitay, tam fag imbawi wan. ⁹ Bonwantam sadili ogali kagbawi intam, kaarakitay tam, nyawa faktaw, idwag fatakagdog intam sadili kafiyan. ¹⁰ Tam in Diyos wa nahalig, hanggan it nafasadi san Kiristo Hisos, kaarakitay myasa wa fiya intam manga ogali hanggan ibolon. Gi yapdis hyabi hanya danwa nafatalaga hantam tonya fag manga ibolonon. ¹¹ Kawa hayo manga magorang manga Hintil, yakanga hyabi ka manga Hodyo igngayan hayo, manga idwan toli. Dapat manga Hodyog lwang hanya ka mangan toli, kawa ta ha nabol ogbot gista manga habilogan. Ham manga Hintil, ham fag tohod no kinday ham no mabanwanan hyabi. ¹² Hyabi ham idyan sadi san Diyos-natogon-Famawi. Hyabi ham iba wa taw, idyan aktom san Israil fag layonan manga taw. Hyabi ham idwa ha tanggapon gis manga taranggapan kantohoyan kawas Diyos natogon has taw it manga bato disagon. Hyabi ham idwa ha fagfanayaon matohoyanan, idwa yadig syag in Diyos. ¹³ Hyabi, ham manga Hintil ayayo wa dahol gin Diyos, dapat ay, kati, in Kiristo kahatayan kagfaakbang hayo, kawa ham insadi sa hanya. ¹⁴ Is Kiristo kagfaamigosan intam, hami manga Hodyo, hanggan ham manga Hintil. Hanya no nadisag it sadili habilogan, no natay, ka nafabol ka faktaban ka hyabi igfasarowayan manga Hintil gis manga Hodyo, ka nafabol ka manga Hodyo hanggan Hintil bodbotangan sas isip. ¹⁵ Is Kiristo nafatolas ka Batasan Hodyo, ka ha manga togon aywan, hanggan manga bato ogaliyon, kaarakitay igfasadi sa hanya, ka dowak layonan taw, yakanga kahowayan ka bomahala hantam. ¹⁶ In Kiristo kahatayan sas nafatimbangan hayo ka nafabol ka faktaban, nafafwali yadi fagayo dowak layonan han Diyos, nafasadi intam. ¹⁷ Hyabis Kiristo inbangkad hastay hanggan natoltol has fagayo ka kahowayan Fiya fag Barita, natoltol ha hayos manga Hintil ka hyabi ayayo gin Diyos, hanggan ha hyamis manga Hodyo ka danwa akbang hanya. ¹⁸ Kawas Kiristo naagwanta mahori, tam fagayo, nyawa manga Hodyo, nyawa manga Hintil, tam pariho gakbang hantam Ama, kawat Falad sadi di kagfasyagan intam. ¹⁹ Kawa kitonya, kati ham manga Hintil, ham bonwa iba taw, bonwa manga odi famaklay, dapat ay,ham pariho intohoyan han Diyos. Ham inaktom yadi han Diyos talanahan. ²⁰ Ham yadin halig sas balay kan-ganit sas fagrigonan Fandiya-Barita, hanggan manga Fangampang, hanggan kagfaganit has fagayo fagayo kawas Kiristo Hisos. ²¹ Ka manga layonan sas balay sadik dahonya, nonsadi sa hanya insarokfonan, kaarakitay kabali in Diyos kafiyaon fag Fanimbaan-Dahol. ²² Ham manga Hintil, kawa ham insadi san Kiristo, ham kito yadi hyami, ka Maliyaw fag Falad fakaligon in Diyos oliyanan.

¹ Kawa kitonya, ahog darangin han Diyos. Ahos Pablo, in Kiristo Hisos poriso kawa ha hayo manga Hintil. ² Ham fadi wadnadog kitay is Diyos, kawa malooy it kahowayan, nafatohoyan angko to fag ibolon kaarakitay tomogbong hayo. ³ Is Diyos nafatwagdog angko it kafangayofanan kadya nafadog has taw hyabi, kangko nafwayong sas sorat haraw. ⁴ Ham nogbasa angko sorat ham domog kitay aho natwa wagdog ka madolaw fag bagay kawa han Kiristo. ⁵ To fag bagay madolaw idya nafatwagdog has manga taw hyabi, dapat kati is Diyos iglwang kitay, it Falad fag fatwagdog tonya hat maliyaw fag manga Fandiya-Barita hangan Fangampang. ⁶ To ka madolaw kadya nafatwagdog has taw hyabi kitay, kawa manga Hintil katiwala ka Fiya fag Barita, ta ha tanggapon yadi kafiyan, kito yadis manga Hodyo. Tanbali yadi manga layonan sa sadi dik habilogan sadi wak dahonya, intahin yadi han Diyos togon bato disagon kantonglos san Kiristo Hisos. ⁷ Maskin is Diyos mahoway wa dahol dahol, it karigonan nafabali angko it Fiya fag Barita fangibolon. ⁸ No kitay di, ka tiba taw kantohoyan han Diyos, bondi kitongko. Nyawa kitonya, is Diyos nafaangay kitay fag aho kagfadog has manga Hintil ka Fiya fag Barita kitay, intam fagbayaon san Kiristo idwa twa haminon. ⁹ Fadog yadi has fagayo fag manga taw no kanan Diyos kafangayofanan kadya nafatwagdog has taaw hyabi, hanggan no kinday tonya nomanod. Is Diyos ka nahalig fagayo fag manga bagay, dogay hyabi nafyalom yapdi has taw it bato ibolonon, ¹⁰ kaarakitay gi wat Tifonan hanya falag aban has manga gorangon hanggan has manga ha kangayanan san Diyos banwanan sam tongod, falag was taw it sadili manga kadonongan, bokod bokod, kadwa ha katabowanan. ¹¹ Is Diyos naibolon kitonya, kawa gi yapdis fabagowanan, tonya wat fasadan kitay, fatonglos it kafangayofanan san Kiristo Hisos kagfon intam. ¹² Maskin tam insadi san Kiristo hanggan igsyag hanya, tam idwa gadowan, idwa yadi kaya gakbang han Diyos. ¹³ Yakanga, hogfaaronganon ha hayo kitay, ham fag idwa kabalaw maskin tagfahoriyan angko kati, kawa hogtogbong hayo. Kangko fakahoriyon imbali hayo fakinabangon. ¹⁴ Kawa kitonya, hoglingkohodan wan san Diyos intam Ama atobangan. ¹⁵ Intam Ama sam tongod, kasta manga ama taw fagtoladon sas manga talanahan fagayo, nyawa san Diyos banwanan sam tongod, nyawa sas baba daga. ¹⁶ Angko fagdaranginon kitay, git kafiyan kadwa twa haminon, hanya fag farigon nangos hayo manga fangayofan kawat Falad sawa hayo. ¹⁷ Is Kiristo fag maoliyanan sa hayo manga fangayofan fagaba, kawa ham igsyag hanya, kaarakitay ham, no bilang wagdalid abasad hanya, kawas Kiristo galwasi hayo, ¹⁸ ham kito yadi ka tiba kantohoyan han Diyos, ham tomwa wagdog kitay,idwa hat dayo domwag is Diyos no galwasi hayo. ¹⁹ Ala ngay, ham fag domog kitay is Diyos galwasi hayo, nonman ham idwa mamin domog it kafiyan, kaarakitay in Diyos kafiyan fagayo, fag sawa hayo manga fangayofan, sadi wak dahonya. ²⁰ Tam fag fasayagdog in Diyos ka syagan gibolon bondi kito kantam fagsagadon, ngatay fagisipon, kawadwa hat dayo domwag fag karigonan ka gibolon santam. ²¹ Tam fag fasayagdog fagaba in Diyos, hanggan aban aban, kawat Tifonan kansadi san Kiristo Hisos kagfalag it kafiyan. Fag kityona wa ngay.

¹ Kawa kitonya, aho, kanporiso maskin ho gibolon kagfon intam it ibolon, hogfaaronganon ha hayo kitay, ham fag gogali kito ka maangay han Diyos manga nafatawag. ² Tam fag idwa ha takan, fag mahoway hanggan maagwantaon fagaba. Tam fag falag has taw kitay tam gadgalwasiyan kawa tam idwa kahodhoriyan. ³ In Diyos Falad kagfasadi intam git kahowayan kagfogong intam. Pilitan intam manga fangayofan igfadagos kitonya. ⁴ In Kiristo habilogan sadi wak dahonya sadi di, hanggan it Falad sadi di, kito yadis Diyos no nafatawag intam kaarakitay sadi di intam fagfanayaon. ⁵ Sadi di kagfon intam. Sadi di intam fagsyagon. Sadi di it kahologan tam nogfatogna. ⁶ Sadi di is Diyos kantam Ama has fagayo. Hanya abwat man has fagayo, gibolon sas fagayo, hanggan sawas fagayo. ⁷ Dapat ay, giwat kaakwaan is Kiristo nafahafod hantam fagayo, igsadig sadi, it manga fakatwawon kat nafatalaga hantam, ⁸ yakanga ka Kasoratan igfwayong kitay, Hanya no nwali ham tongod im tongod, Aywan kat manga nataban hat banwanan, Nafahafod yadit manga disagon has taw. ⁹ (Kanat kahologan hanya no nwali ham tongod, ham gayfan? It kahologan hanya bago bago hawam dagas, daga daga, has Daga Salad. ¹⁰ Ka ginyas dagas, daga daga, tonya yadi ka nwali ham tongod im tongod, has dayo ya fag banwa kaarakitay it kafiyan fag sawat nahalig fagayo fagayo.) ¹¹ Hanya ka nadisag manga fagsyaganon has taw, kawa hanya nafabali tibat manga Fandiya-Barita, tibat manga Fangampang, tibat manga Famabotong manga taw, tibat manga Fangano Tifonan hanggan it manga Famaadal. ¹² Hanya naibolon kitonya kaarakitay fayayom fagayo kantohoyan hanya hasta bato ibolonon kaarakitay falangbat Tifonan. ¹³ Ginya madi, tam fagayo kasadi nogsyag hanggan kilala in Diyos Anak, hanggan intam manga fangayofan kabali hosto kito yadin Kiristo fangayofan ka hosto wan. ¹⁴ No kitonya tam idwa kitos manga anak ka kadiya igdog has manga toltol idwa orongan. Tam idwa kitos sahayan baba dagat, taob kagfatowang towang, hanggan bagyo odi kagdiya. Ka manga taw ka kasayag taban intam has idwa orongan, idwa syagan igfaadowan intam. ¹⁵ Yatokitay intam manga bibig hampang fag sonson wa orongan kawa tam gadgalwasiyan, kaarakitay tam ka labi wa has kafiyan baliwa, sas manga ogali fagayo, kabali fiya kito yadin Kiristo ka alfoyo sat Tifonan. ¹⁶ Is Kiristo kagfasadi it habilogan sadi wak dahonya, gis manga layonan kansarokfonan kitos manga halisan. Ginya madi, fagayo fag layonan nogfatonglos it ibolonon, ka habilogan sadi wak dahonya karigon hanggan kadahol, kawa ka manga layonan gadgalwasiyan wan. ¹⁷ Santam Fon ngayan, hogfaaronganon ha hayo kitay ham fag idwa gogali domwag kito ka manga tibak Hintil, kat manga fagayfanon idwa ha kahologan, ¹⁸ tadwa yadi twagdog. Tadwan aktom han Diyos disag haboyagan maskin tadwa ha fakatwawon hanggan ista manga fangayofan maganit. ¹⁹ Tandiya has manga dwat fag kasolongan, hanggan ngadi ogbot idwa ha nahayan. Bokod bokod ista manga ogali ka fiya nangos fakayaon, igsagaya wa ogali. ²⁰ Dapat ay, idwa kitonya kantam fakatwawon kawa han Kiristo baliwa. ²¹ Tam fadi wadnadog kawa han Kiristo hanggan ha nafaadal hantam ka fakaoronganan ka san Hisos. ²² Yakanga tam fag dayo intam manga ogali dan. Fag dayo yadi intam manga ogali dan. Fag dayo yadi intam fangayofan dan, ka dwat kawag fasakop has bali fangayofan masayaon kagdaya intam. ²³ Intam manga fangayofan fag imbago wan sadi wak dahonya. ²⁴ Fag ka bago fag fangayofan kantam fagsolongon, ka fangayofan kanhalig igtolad in Diyos, kagfalag yadin Diyos kahaslongan hanggan kahalyawan, maskin giwas fakaoronganan. ²⁵ Yakanga, tam fag idwagbodbohagan. Fag sonson wa orongan intam manga hampang hantam manga fadwasay kawa tam myasa wa manga layonan san Kiristo habilogan. ²⁶ Tam nangos nom-isog, fag idwag fadasog has kasalanan. Bago dimsangday ka myanit, intam fangayofan fag imhoway ya. ²⁷ Tam fag idwa goyon in Fandaya. ²⁸ Kagnahaw hyabi fag idwag nahaw domwag, dapat fag maangay no gibolon kaarakitay lomag it sadili fangaboyagon, hanggan ha fagtogbongon has manga taw myabog. ²⁹ Nyawa ginahin tam fag idwa kampang dwat donggon. Tam fag fili intam manga hampang, fag kawa myasa wa fiya hanggan maangay gis nanya fag masohod, kaarakitay kagdog intam manga hampang ha fakinabang wan. ³⁰ Tam fag idwag farongkot in Diyos Maliyaw fag Falad, maskin hanyan Diyos tandaan santam, kagfatohoyan kitay tam in Diyos fag manga taw, gis nanya fag Sirang mahalga aban, is Diyos nogfalfas intam. ³¹ Tam fag idwag bodbotangan intam manga fakahoriyon ha sadi ha sadi. Fag idwa gidgisogan, manga kadwat iglag iba taw. Tam fag idwag haringgitan, fag idwag yod intam iba, fag idwa yadi gisip ka dwat. ³² Yatokitay, tam fag kabali mahoway hanggan maawaon ha sadi ha sadi, hanggan fag falidliyaman ha sadi ha sadi intam manga fakahoriyon, kito yadis Diyos nogfaliyam intam manga naogali dwat, kawa tam insadi san Kiristo.

¹ Kawa tam in Diyos wa manga fagalwasiyon fag manga anak, tam fag tolad hanya. ² Intam manga ogali hanggan ibolon fag falag kitay tam galwasi manga taw kito yadis Kiristo no galwasi intam, hanggan nadisag it haboyagan kawa hantam, sadik fangafiyan han Diyos, banglo hanya hanggan it fagbayaon. ³ Kawa tam manga taw kantohoyan han Diyos, ngadi gwas, tam fag idwa gwas ka dwat has ka taw baliwa. Fag idwa gogali ka mahaya, fag idwa yadi kasaya kitonya. Kitonya fag manga toltolon idwa maangay santam. ⁴ Kitonya yadi tam fag idwa kampang kadwa fiya donggon, fag idwag toltolan kadwa ha kahologan, hanggan fag idwa golit manga dwat fag hakot. Yatokitay, intam hampang fag baya in Diyos fagaba. ⁵ Tam fadi wad twa kitay ka gogali dwat has ka taw baliwa, hanggan kadwa twa kaya, hanggan kasaya kitonya, idwam aktom san Diyos hanggan san Kiristo sakop, maskin it sadili fakasayaon dwat kat fagsyagon. ⁶ Tam fag idwa gadayaan nyawa fakta fag taw kat manga katadlongan nodwa ha kahologan, maskin is Diyos kaisog has mangadwa katanog hanya kawa gogali kitonya. ⁷ Yakanga tam fag idwa gamigos ka kitonya fag manga taw. ⁸ Hyabi tam basad yapdi marom, dapat kati tam basad mayawa maskin tam insadi santam Fon. Yakanga tam fag gogali ka maangay has manga taw ka sas basad mayawa. ⁹ Maskin ka yawa kagfabohad manga ogali fiya kitos kahowayan, kahaslongan hanggan fakaoronganan. ¹⁰ Tam fag gadal no kana fag manga ogali ka maangay handtam Fon. ¹¹ Tam fag idwa kadiya has manga ogali kadwa ha kahologan, ka manga taw basad marom it manga ogali. Yatokitay, tabanan ka manga taw has mayawa, fadogan ista manga ogali kadwa fiya. ¹² Mahaya wan ngadi gwas ista manga ogali mafyaloman. ¹³ Fagayo no maladladan aban sas mayawa, imlag no kinday tonya, ngatay fiya ngatay idwan, ¹⁴ maskin ka yawa kagfalag fiya fiya. Yakanga inlwang kitay, Haw ka matoyogan, haw fag kafolaw wan, Haw fag kabangon gis kahatayan, Ginya madis Kiristo fayawa hyamo. ¹⁵ Yakanga tam fag matagahan no kinday intam ogali. Tam fag gogali kitos manga ha fakatwawon, idwa kitos manga paong paong. ¹⁶ Tam fag idwag fasigpala nyawa ginahin tam no ha bato ogaliyon, ngatay ibolonon fiya, maskin kati fag manga masohod, dwat kasta manga ogali tiba taw istay sas baba daga. ¹⁷ Tam fag idwag falamang, fag tomwa wagdog no kana kagfon intam it fasadan intam ogaliyon. ¹⁸ Tam fag idwag lango maskin tonya igfadwat odi intam manga ogali, yatokitay fag in Diyos wa Falad ka sawantam manga fangayofan sadi wak dahonya. ¹⁹ Tam fag fadoddogan ha sadi ha sadi manga fwayong gin Diyos Sorat fag manga ambahan, gintam fangambahanan hanggan manga ambahan kagfarigon intam manga fangayofan. Tam fag gambahan, igfasayagdog intam Fon santam basad fangayofan. ²⁰ Nyawa kana kantam nadalanan, tam fag baya fagaba in Diyos intam Ama, san Kiristo Hisos kagfon intam, it ngayan. ²¹ Tam fag fasodsolonan ha sadi ha sadi kagfatohoyan kitay tam iggalang in Kiristo. ²² Ham manga ina, kasta manga babay, ham fag fasakop ha hayo manga sadili indogan, kito yadi nogfasakop hasagfon intam. ²³ Maskin ka ama ka mamahalat babay, kito yadin Kiristo, hanya kagbahala hanggan igbawi it Tifonan, kan Kiristo habilogan sadi wak dahonya. ²⁴ Yakanga no kinday ka Tifonan nogfasakop han Kiristo, ista manga babay fag kitonya yadi nogfasakop fiya fiya hat manga sadili indogan. ²⁵ Ham man manga ama kasta manga indogan, ham fag galwasi hayo manga sadili babay, kito yadin Kiristo, hanya no galwasit Tifonan hanggan nadisag it haboyagan kawa ha hanya. ²⁶ Is Kiristo naibolon kitonya kaarakitay igfahalyaw it Tifonan nontabo wagfalinay tonya sas danom hanggan sat hampang, ²⁷ kaarakitay faakbang yadi hat sadili it Tifonan, maangay, fiya, idwa ha fabangdanan, kitos rotay kadwa ha tarongkoon, idwa ha firot, kafiyaon, kafiyaon. ²⁸ Manga ama fag galwasi hayo sadili manga babay, kito yadi ham no galwasi hayo sadili habilogan. Ka ama no galwasit babay, galwasi yadit sadili. ²⁹ Anod, idwa ha taw kadwat iglag it sadili habilogan. Yatokitay tam igfahwan intam sadili, hanggan gano intam manga habilogan, kito yadin Kiristo hanya no gano it Tifonan, ³⁰ kawa tam manga layonan sat habilogan. ³¹ Kito ka Kasoratan fwayong, Kawa kitonya, ka ama somaman git ama hanggan git ina, imsadi hat babay, ginya madi ka dowa imbali sadi di. ³² Sadik dahol fag fakaoronganan it fagfwayongon sas Kasoratan, kawa no kinday is Kiristo hat Tifonan. ³³ Dapat hayadintam it bato lwangon kitay, fagayo fag manga ama fag galwasi it sadili manga babay, kito yadi hanya no galwasi it sadili, hanggan fagayo fag manga ina fag magalang hat manga indogan.

¹ Ham manga anak, fag katanog hayo manga magorang fwayong, maskin tonya ka maangay, kawa ham igsyag hasagfon intam. ² Ka gona fag togon sas Batasan Hodyo, ka ha fasalamat tam no katanog, iglwang kiti, Fag magalang ham ama hanggan ham ina, ³ kaarakitay haw lomag kahowayan, hanggan im haboyagan imdogay istay is baba daga. ⁴ Ham man kasta manga magorang, fag idwag falabi ham no kabaya hayo manga anak kaarakitay ta aba idwag botang hayo naibolon. Dapat ay, fag kasahan di no kabaya kitos mangan tiwala in Kiristo hanggan fag faadal ha hayo manga anak intam Fon manga togon. ⁵ Ham, kasta manga sogowan, ham fag katanog kagfasognod hayo istay is baba daga. Fag magalang, fag katanog, hanggan fag bilang was Kiristo kagfasognod hayo. ⁶ Fag bondi gis nanya ta no mabantayan, ham no gibolon kitonya kaarakitay ta fasayagdog hayo, dapat fag sadi wak fangayofan ham no gibolon in Diyos fakasayaon, kiton Kiristo fag manga sogowan. ⁷ Ham fag idwag fahafangon no gibolon, fag kasolong wan, kitos gibolon intam Fon ibolon, bilang bonwa basta taw kagfasognod hayo. ⁸ Tam fag tohod kitay kagfon intam gomanti fiya hantam fagayo, nyawa tam ista sogowan, nyawa bonwan, intam ibolon no fiya. ⁹ Ham yadi kagfasognod manga sogowan, hayo manga ogali fag fiya yadi. Ham fag idwag fadalagdog hayo manga sogowan. Ham fag tohod kitay san Diyos banwanan sam tongod, tonya yadi kagfasognod hayo hanggan kagfasognod hayo manga sogowan. Hanyadwa ha fagihidon taw. ¹⁰ Sas katabowanan tingko sorat, kawantam Fon Karigonan idwa ha bosal, hanggan tam insadi sa hanya, tam fag farigon intam manga fangayofan. ¹¹ Solongan in Diyos disag hantam manga sangkap fanaktak fagayo, kaarakitay tam idwa makfo is Fandaya no kasaya giktam intam. ¹² Maskin bonwa taw kantam kalaban, dapat manga dwat fag karigonan kadwa malagan sas fakayawan, ka manga gorangon ka ha manga kangayanan hanggan karigonan kagbahala kati sas sakop marom. ¹³ Yakanga tam fag solong in Diyos manga sangkap fanaktak kati. Ginya madi nyawa ginahin ka dwat nogtahod intam, tam idwa gadaogan intam kalaban sangkap, hanggan nyawa tam nalaban hanggan has katabowanan, tam idwam fwali has ginanan ngadi kabayan. ¹⁴ Yakanga tam fag malindogan matagahan. Tam fag mafagyahosan ka fakaoronganan. Solongan yadi ka kahaslongan ka fanaktak sas dobdob. ¹⁵ Falapakan intam bitis kawa tam matalagan fomwayong ka Fiya fag Barita kagfaamigosan manga taw han Diyos. ¹⁶ Fag matawidan fagaba ka fanangga kawa tam igsyag in Kiristo, tonya ka fanaktak famahapsa has fagayo in Kadwatan manga famana gigang. ¹⁷ Tam solongan yadi ka sambalilo baol kawa tam inbawi, hanggan fag matawidan fagaba in Diyos Hampang ka bilang intam talibong, in Diyos Falad disag hantam. ¹⁸ Fag fagabag darangin igsagad in Diyos togbong tam nogsolong to fag manga fanaktak. Nyawa ginahin, fag in Diyos Falad kagfadonong intam igdarangin. Yakanga intam manga fangayofan fag fagaba mafolawan, fag idwag fagomon. Fag darangin fagaba kawa has fagayo fag manga taw kantohoyan han Diyos. ¹⁹ Fag darangin yadi kawa hangko kitay, aho no tomoltol has taw, is Diyos fomwayong hangko it bato fadogon has taw, kaarakitay ho tomoltol marigon hanggan fatwagdog has taw ka madolaw sas Fiya fag Barita, ka hyabi mafyaloman yapdi. ²⁰ Honbali in Diyos sogowan kaarakitay fadog has taw tonya, nyawa kati aho maporisowan. Ham fag darangin kitay, aho fag idwa kadala aho nogtoltol, maskin kitonya ka maangay. ²¹ Is Tikiko, intam fagbayaon fag fadwasay hanggan intam Fon matanogon fag sogowan, ka fadahit ha hayo no kinday angko lagan istay, kaarakitay ham tomwa aho no kinday kati. ²² Yakanga hogsogo hanya has nyamo hayo kaarakitay fadog ha hayo no kinday hami fagayo istay kati, hanggan farigon hayo manga fangayofan. ²³ Angko fagdaranginon kitay is Diyos intam Ama hanggan is Kiristo Hisos kagfon intam fag domisag ha hayo, ka tasayan, manga fangayofan malokmay, ka gadgalwasiyan hanggan igsyag ha hanya. ²⁴ Ham nangos fag domog kitay, is Diyos mahoway has fagayo fag manga taw kadwa kaoman no galwasi in Kiristo Hisos kagfon intam.