KOLOSAS

KOLOSAS

¹ Ahos Pablo kagsorat to fag sorat. Ahon bali in Kiristo Hisos Fandiya-Barita maskin in Diyos wa kafangayofanan kitonya. To fag sorat gi yadin Timotiyo intam fadwasay. ² Migsorat ha hayo ka mangan tohoyan han Diyos sas banwa Kolosas, ha hyami matanogon fag manga fadwasay kansadi yadi san Kiristo. Ham nangos fag domog kitay is Diyos intam Ama mahoway ha hayo fagaba, hanggan igfalokmay hayo manga fangayofan. ³ Hami nogdarangin kawa ha hayo, mi fagaba wagbaya in Diyos, kan Kiristo Hisos kagfon intam, it Ama, ⁴ maskin mi nadog kitay, ham igsyag in Kiristo Hisos, hanggan ham galwasi has fagayo fag manga taw kantohoyan han Diyos, ⁵ kawa ham ha fagfanayaon matalagaan ha hayo san Diyos banwanan sam tongod. Hyabi, ta no nafwayong ha hayo ka orongan wa Fiya fag Barita, ham nadog no kana kantam fagfanayaon. ⁶ Ka Fiya fag Barita kadahit kadayo kadayo, hanggan igfadasog yadi in Diyos kafiyan ha sadik baba daga kito yadi ka hayo lagan gi yapdis hyabi, gis nanya ham no bago di nadog kawa han Diyos malooy fag kahowayan, hanggan natwa waglag tonya sa hayo sadili nadalanan. ⁷ Is Ifapras, hyami fakawiliyon fag ofod sogowan, ka nafatwagdog ha hayo in Diyos malooy fag kahowayan. Hanyan Kiristo matanogon fag fangibolon ka hyami famarita is nyamo hayo. ⁸ Is Ifapras ka nafadog ha hyami kitay ham galwasi has manga taw, kawa ka Maliyaw fag Falad sawa hayo. ⁹ Maskin ngay, gi yapdis hyabi, mi no bago di nadog, kawa ha hayo, mi fagaba wagdarangin. Hyami fagsagadon gin Diyos kitay, ham fag tomwa matohoyanan no kana kan Diyos kafangayofanan, hanggan fag ha akwa kadonongan sa hayo manga fangayofan bago ka tomwa wagdog tonya. ¹⁰ Migdarangin yadi kitay ham nangos fag gogali kagfon intam it fakasayaon fagaba, hanggan imbalit fagbayaon. Hayo manga ogali bomohad yadi manga kafiyan bokod bokod, hanggan ham kalabi wa kilala in Diyos. ¹¹ Migdarangin yadi kitay, in Diyos kafiyaon fag karigonan fag faganit hayo manga fangayofan, kaarakitay ham idwag fagomon hanggan gagwanta yadi, nyawa kana ka hayo madalanan, ¹² kasolong yadi nogbaya intam Ama ka nafabali hayo fangayofan maangay, hanggan fiya tomanggap ka hayo afoon kan Diyos nafatalaga sat sakop kayawaan, kawa has manga taw kantohoyan hanya. ¹³ Is Diyos nabawi intam gis sakop karigonan marom, hanggan igtaban yadintam hat fagalwasiyon fag Anak sakop. ¹⁴ It Anak kagfalfas intam, hanggan igfaliyam intam manga naogali dwat. ¹⁵ Is Kiristo no mabanwanan istay is baba daga hyabi, hanya nafalag hantam no kinday is Diyos kadwa malagan. Is Kiristo in Diyos anak gona, hanggan it kangayanan abwat man has fagayo fag manga bagay kanhalig. ¹⁶ Maskin hyabi hyabi, is Diyos nafahalig in Kiristo fagayo fag manga bagay sat banwanan sam tongod, hanggan ka manga bagay istay is baba daga, ka manga malagan hanggan kadwa malagan, manga gorangon, manga fon, manga ha kangayanan kadwa malagan, is Kiristo yadi ka nahalig tonya. Is Diyos nafahalig in Kiristo fagayo, sadi wak dahonya, kaarakitay fagayo mamasayagdog yadin Kiristo. ¹⁷ Is Kiristo danwa ha akwa hyabi, nyawa ka tiba bagay fagayo idyan halig. Hanya yadi kagfaganit fagayo fagayo no kinday ka maangay. ¹⁸ Hanya ka bilang alfoyo sat Tifonan, ka bilang wat habilogan. Hanya ka nafabagot Tifonan, hanya ka gonan boyag ya gis kahatayan, yakangat kangayanan abwat man has fagayo fagayo kat nahalig. ¹⁹ Maskin in Diyos sadili kafangayofanan kitay, no kinday is Diyos, it Anak fag kitonya yadi, sadi wak dahonya. ²⁰ Yakanga, gi wat Anak, in Diyos kafangayofanan fafwali ya hat sadili, sadi wak dahonya kat nahalig. Maskin it Anak folot in-olan, hanya no natay sas nafatimbangan hayo, is Diyos igfaangay kitay fagayo kanhalig, nyawa sas baba daga, nyawa san Diyos banwanan sam tongod, fag mangafiyan wa hanya. ²¹ Hyabi tam ayayo gin Diyos, hanggan tam it manga kalaban maskin dwat intam manga fangayofan hanggan ogali. ²² Dapat kati, maskin it Anak natay, kitos manga taw no katay, is Diyos igfabali intam it manga fakilalaon, kaarakitay fadasog intam aban hat atobangan, fiya, malinay, idwa ha fabangdanan ngadi ogbot. ²³ Tam fag fadagos kaganit no katiwala ka Fiya fag Barita. Tam fag idwam hawig gintam fagfanayaon, kantam nasyag tam no nadog ka Fiya fag Barita. Ahos Pablo inbalin Diyos sogowan kaarakitay fomwayong to fag Fiya fag Barita kantam nafadog has fagayo fag manga taw, sadi wak dahonya baba daga. ²⁴ Kati yabay hogbaya wan, maskin sangko fagdogon mahori ahog fadagos in Kiristo naagwanta hyabi kadyan tabo kawa hat Tifonan, ka kitay in Kiristo habilogan. ²⁵ Ahon bali ka Tifonan sogowan is Diyos no nafatohoyan angko to fag ibolonon kaarakitay igfadog ha hayo it hampang. It nafaibolon angko kitay, aho fag fadog fiya fiya ha hayo in Diyos fagfwayongon, ²⁶ kadya nafadog nyawa haday fag manga taw gi yapdis hyabi hyabi, dapat kati is Diyos nafatwa wagdog tonya has manga taw kantohoyan hanya. ²⁷ In Diyos fasadan, hanya fatwagdog has fagayo fag manga taw to kat fagfwayongon madolaw, kadya nafadog has taw hyabi, fiya wa dahol dahol kitay, is Kiristo sawantam, yakanga tam ha fagfanayaon, kawa tam omofod yadin Diyos sat kayawaan aban. ²⁸ Kawa kitonya is Kiristo kantam fagbaritaon has fagayo fag manga taw. No baliday hyami fagsyaganon, migfili ka manga hampang matwagdog hami nogfatagak hanggan igfaadal has taw kaarakitay igfadasog fagayo, igsadig sadi han Diyos atobangan, idwa ha korang, kawan sadi san Kiristo. ²⁹ Kaarakitay fatonglos tonya angko ibolonon, ho kogodan wan, nyawa mahori, kawan Kiristo disag karigonan, kagfasyagan angko.

¹ Ho kasayag fwayong ha hayo kitay ho kogodan wan kaarakitay igtogbong hayo, hanggan in Diyos Tifonan sas banwa Laodisya, hanggan fagayo kadya nahilala angko sas iba fag Tifonan. ² Ho kogodan kito kaarakitay ista manga fangayofan imrigon hanggan gadgalwasiyan ka bilang sadik fogong. No kitonya, ta tomwa wagdog fiya fiya kan Diyos idya nafatwagdog has taw hyabi, kawa ta kilala in Kiristo. ³ Is Kiristo lamang ka nafalag intam in Diyos kadonongan hanggan it fakatwawon, ka bilang it kaakwaan ka hyabi matagowan yapdi. ⁴ Maskin ngay hogsorat ha hayo, ho kasayag fatagak hayo. Ham fag idwa gadayaan nyawa haday fag taw kagfwayong hayo manga toltol kadwa orongan, nyawa kinda wak fiya kadog. ⁵ Nyawa hodwas nyamo hayo, ho fagabag tohod hayo, yakanga angko fangayofan bilang wa gofod hayo. Hogbaya wagdog kitay ham idwa kaoman hanggan hayo manga fangayofan kaganit nogsyag in Kiristo. ⁶ Kawa tam natanggap kitay is Kiristo Hisos kagfon intam, intam fangayofan hanggan ogali fag fadagos kasadi hanya. ⁷ Intam manga fangayofan fag bilang wagdalid abasad san Kiristo fagaba. Intam manga ogali fag bilang yadintam fakaligon balay kanganit yadi hanya, hanggan fag karigon nogsyag hanya, kito kasta nafaadal hayo. Fag fagaba wagbaya in Kiristo. ⁸ Fag matagahan kitay ham idwam iktan sasta toltol kadwa ha fakinabang, igdaya ya ngadi, gi odis kadonongan taw, idwa gin Kiristo. Gi odista hafofowanan adal tonya, gi odis manga afo daga. ⁹ Ham fag idwa kadiya igdog ka kitonya fag manga toltol maskin is Kiristo nonbali taw, in Diyos fangayofan sadi wak dahonya sa yapdi hanya, ¹⁰ hanggan hayo manga haboyagan inbali hosto kawa ham insadi san Kiristo. Is Kiristo kagsakop yadi fagayo fag manga karigonan sas tongod hanggan sas baba daga. ¹¹ Kawa ham manga Hintil insadi san Kiristo, ham bilang wantoli yadi, dapat bonwa taw fag natoli, in Kiristo fag natoli, kagfalfas intam gintam bali fangayofan masayaon. ¹² Maskin tam nontogna, intam ogali gona bilang wantahin in Kiristo nonlobgob, hanggan tam intahin yadin Kiristo nonboyag ya, kawa tam igsyag in Diyos karigonan ka nafaboyag ya in Kiristo gis kahatayan. ¹³ Hyabi ham, manga Hintil, bilang mahatayan kawa dwat hayo manga ogali, hanggan ham idyag dog ka manga Batasan Hodyo. Dapat kati is Diyos nafaboyag hayo, gofodan in Kiristo. Is Diyos nafaliyam intam manga naogali dwat fagayo fagayo, ¹⁴ nadwat yadi ka kasoratan kagfatohoyan intam manga bayadon ha hanya, hanggan nafaliyam ka ogali igsohot kantam bayadon, kagfadala intam hyabi. Tonya fag kasoratan, kagfatohoyan intam bayadon han Diyos, bilang wanpako sas nafatimbangan hayo, yakangadwa ha kahologan kati. ¹⁵ Is Kiristo no natay sinya sas nafatimbangan hayo, hanya nalfas gis karigonan manga labang, manga afo daga kagbahalat sakop, ginya madis Kiristo nataban tonya fag manga labang, manga afo magafosan sasta faglagan, hanya noglahaw sasta fagonan ayo ayo, ta nogbaya hanya, kawa hanya nadaog it manga kalaban. ¹⁶ Kawa kitonya, fag idwa ha taw gato hayo has manga fanganon, ngatay inomon baliwa, has manga fagtohodon fag sirang, sas manga bangkad lati, nyawa sas sirang fahoway. ¹⁷ Hyabi, tonya fag manga bagay anino lamang manga bagay kadyan dasog hyabi, dapat ka orongan it afo, kawas Kiristo. ¹⁸ Ham fag idwa gadaogan nyawa faktaw kagfasalagwahayo maskin, hono, ha lagan madolaw, hanggan igfaaronganon hayo kitay, ham fag falibaba hayo fangayofan, ka famalagon od has taw, hanggan fag has manga anghil nogfasayagdog. a kitonya fag manga taw basta odi taw, ista fangayofan, fangayofan odi taw, tagfadaholon odista sadili. ¹⁹ Ka kitonya fag manga taw fawag syag in Kiristo, ka bilang alfoyo hat Tifonan, ka bilang wat habilogan. Is Kiristo kagbahala it habilogan sadik dahonya, kagfarigon hanggan igfasadi it habilogan, kawa ha manga halisan hanggan manga ogat. Yakanga, no kinday in Diyos fasadan, it Tifonan, ka bilang in Kiristo habilogan sadi wak dahonya, kadahol wan. ²⁰ Is Kiristo no natay, intam bali fangayofan masayaon natay yadi wan, yakanga tam nalfas gis karigonan mang labang, manga afo kagbahalat sakop. Yabay, kana mayn ham nogfadagos yapdi hayo ogali kitos manga taw kastay yapdi fag baba daga fag sakop? Kana mayon ham nogfasakop yapdi has manga togon kitos, ²¹ Fag idwag boya to fag bagay, fag idwa kwan tyamo fag fanganon, fag idwag sapkid tonya fag bagay? ²² Tonya fag manga fagliyon fag manga bagay kaliyam di no namin wan. Taw odi kagtogon hanggan igfaadal kitonya. ²³ No kadog di, kagfwayong kitonya fag manga togon, madonong nga wan, ta nogfaaronganon has taw kitay, fag fasayagdog has manga anghil. Tagfadogon odi has taw, ta noglwang kitay tadwa ha takan, hanggan ta nogtikis wagfahoriyan it sadili habilogan kaarakitay is Diyos nangos fag bomaya wastaw. Dapat tam no kasayag daog intam bali fangayofan masayaon, ka kitonya fag manga togon idwa tomogbong intam.

¹ Tam yadi inboyag ya, intahin in Kiristo. Yakanga, fag ka manga bagay san Diyos banwanan sam tongod, kantam fagayfanon fagaba. Is Kiristo matokawan sinya san Diyos balis sihon. ² Tam fag fagaba maisipan han Diyos banwanan sam tongod, idwa has manga bagay istay is baba daga. ³ Maskin intam fangayofan dan natay wa a, dapat intam bago fag haboyagan intahin in Kiristo mabotangan san Diyos. ⁴ Is Kiristo kantam haboyagan bago, hanggan hanya nomlag aban, tam koyogan yadi hanya, ha horay yadin Kiristo kafiyan. ⁵ Kawa kitonya, tam fag faliyam intam bali fangayofan masayaon kagfatohod intam has ogali dwat has ka taw baliwa, kadwa ha nahayan, ka gogali dwat wa malayon hanggan ka maingliyon wa dahol. Ka manga maingliyon kitonya igsyag lamang has kaakwaan. ⁶ Maskin manga taw gogali kitonyak dwat, is Diyos omisog has manga taw kadwa katanog hanya. ⁷ Hyabi intam manga ogali kitonya yadi, intam bali fangayofan masayaon nogsakop yapdintam. ⁸ Dapat ay kati, tam fag dayo yadi to fag manga dwat fagayo, kitos kahori has taw, kaisog, kasaya gibolon dwat has tiba taw. Intam bibig fag idwag yod has taw, hanggan tam fag idwa golit manga dwat fag hakot. ⁹ Tam fag idwag bodbohagan ha sadi ha sadi, kawa tam nadayo intam fangayofan dan ka gogali dwat, ¹⁰ hanggan tam natanggap ka bago fag fangayofan. Is Diyos ka nahalig tonyantam bago fag fangayofan, hanggan igfadagos igfabali bondi kito kat fagonan nogtolad hanya, kaarakitay tam homilala hanya fiya fiya. ¹¹ Yakanga, kati idwa ha fagihidon manga taw, nyawa manga Hintil, nyawa manga Hodyo, nyawan toli, nyawadwan, nyawa famaklay, nyawa ka manga matagowan yapdi basad moyod, nyawasta manga nasali sogowan, nyawa ka bonwasta sogowan, dapat ay, is Kiristo lamang ka mahalga, kawas Kiristo sawantam fagayo fagayo kansadi hanya. ¹² Tam kan Diyos manga fagalwasiyon hanggan it nafili kaarakitay imtohoyan ha hanya. Yakanga intam manga ogali fag falag has taw kitay tam maawaon, mahoway, idwa ha takan, magop has taw, hanggan maagwantaon. ¹³ Tam fag idwa kahodhoriyan, hanggan no ginahin tam no ha fakahoriyon ha sadi ha sadi, tam fag falidliyaman wan. No kinday kagfon intam nogfaliyam intam manga naogali dwat, tam fag kitonya yadi. ¹⁴ Ginya madi ka fiya man has fagayo, tam fag gadgalwasiyan, ka bilang wa fogong kagfahosto intam, tam no kasadi santam Fon. ¹⁵ Fag in Kiristo disag hantam kahowayan kagbahala santam manga fangayofan. Maskin ngay is Diyos igfaaronganon intam kitay, tam fag domog in Kiristo kahowayan kitonya, kaarakitay tam fagayo kabali sadi dik habilogan sadi wak dahonya. Tam fag baya yadin Diyos. ¹⁶ Ka Fiya fag Barita kawa han Kiristo, fag malangba santam manga fangayofan. Tam fag faadal hanggan igfatagak ha sadi ha sadi kantam natohodan. Tam fag baya in Diyos santam manga fangayofan tam no gambahan manga ambahan gin Diyos sorat, gis fangambahanan, hanggan tibak ambahan ka maangay has Falad Maliyaw. ¹⁷ Nyawa kana kantam hampang, ngatay fakamolon, fagayo fag san Hisos kagfon intam it ngayan, hanggan fagbaya in Diyos gin Hisos. ¹⁸ Ham kasta manga babay, ham fag fasakop ha hayo manga sadili indogan, maskin tonya wa ka maangay kawa ham in Kiristo fag manga taw. ¹⁹ Ham kasta manga indogan, fag galwasi hayo manga sadili babay, fag idwag fadaliyan hanya fagaba. ²⁰ Ham yadi manga anak, ham fag katanog hayo manga magorang fagaba, maskin tonya wa kan Diyos fagbayaon fag ogali, ham nonbalin Kiristo fag manga taw. ²¹ Ham, kasta manga magorang, fag kasahan di no kabaya hayo manga anak kaarakitay tadwam bway. ²² Ham, kasta manga sogowan, ham fag katanog kagfasognod hayo istay is baba daga, nyawa kana kasta sogo, bondi kitay kawa ta noglag hayo ibolon, yakanga ta bomaya wan, dapat fag katanog maskin ham idwa madaya, hanggan ham iggalang in Hisos intam Fon. ²³ Nyawa kana hayo ibolon, fag sadi wak dahonya hayo karigonan, fag bilang was Hisos kagfon intam kagfasognod hayo. ²⁴ Ham fag tohod kitay hayo ibolon no fiya hasagfasognod hayo istay is baba daga, is Hisos kagfon intam domisag ha hayo ka fasalamat kat nafatalaga has manga taw kagsyag hanya. Is Kiristo kagfasognod hayo orongan, ham it manga wa sogowan. ²⁵ Ka gogali dwat imdosa aban, maskin is Diyos idwa ha fagihidon taw.

¹ Ham yadi kagfasognod manga sogowan, hayo ogali fag fiya yadi ha hayo mango sogowan. Ham fag idwag daya has taw. Ham fag tohod kitay kagfon hayo sam tongod igfasognod yadi hayo. ² Tam fag idwa kayayag darangin. Tam nogdarangin tam gaf maayfanan fiya fiya, hanggan fag baya han Diyos fagaba ³ Ham fag darangin yadi kawa ha hyami kitay, mi somyagan igtoltol nangos has taw ka madolaw kan Diyos idya nafadog has taw hyabi, kawa han Kiristo. Maskin hogtoltol kawa han Kiristo, ahon poriso wan. ⁴ Yakanga ham nangos fag darangin kitay, aho fag fiya nogtoltol kaarakitay ka mangag talinga tomwa yadigdog. ⁵ Fag fiya intam ogali has mangadyan tiwala. Nyawa ginahin tam no gofod has mangadyan tiwala, ta fag tomwa kitay tam intiwala in Kiristo. ⁶ Intam manga hampang fag sonson wa fiya kadog hanggan tam fag twag sagot maangay has taw, ta no gintaw intam kaarakitay tamsaya wagdog. ⁷ Is Tikiko, hyami fakawiliyon fag fadwasay, fomwayong ha hayo fagayo kangko nadalanan. Is Tikiko sadik fangibolon matanogon, hanggan intam Fon sogowan ka gofod yadi hyami gibolon it ibolon. ⁸ Kawa kitonya, hanya kangko fagsogoon ha hayo kaarakitay farigon ya hayo manga fangayofan, nogfwayong ha hayo no kinday hami fagayo istay. ⁹ Is Onisimo omofod yadin Tikiko. Is Onisimo intam fadwasay matogbongon, gi yadis nyamo hayo. Da Tikiko da Onisimo fomwayong ha hayo fagayo ka hyami lagan istay. ¹⁰ Is Aristarko, ka maporisowan yadistay, gwas hayo, hanggan is Markos, in Barnabi insan, gwas yadi hayo. Ham nadog hyami togon kitay, ham fag magalang in Markos hanya nomdasog is nyamo hayo. ¹¹ Is Hoswi yadi, kasta fagngayanon is Hosto, gwas yadi hayo. To fag tolok ama kafiyaon nogtogbong angko. Tonya lamang ka manga Hodyo kantiwala ka gofod angko igtoltol kawa han Diyos sakop baliwa. ¹² Is Ifapras, sadi yak intiwala gis nyamo hayo, in Kiristo Hisos yadi sogowan, hanya gwas yadi hayo. Hanya fagabag darangin mahogod kawa ha hayo. In Ifapras fagdaranginon han Diyos kitay, ham fag kaganit hantam Fon, hosto no katiwala, idwa yadi gadowan nogsyag hanya, hanggan fagaba katanog in Diyos kafangayofanan. ¹³ Hogfaorongan kitay, is Ifapras mahogod gibolon kaarakitay igtogbong hayo, hanggan ka manga taga banwa Laodisya, hanggan ka manga taga banwa Hiyarapolis. ¹⁴ Is Lokas, hyami fagbayaon fag famolongan, hanggan is Dimas, gwas yadi hayo. ¹⁵ Ham fag fadog yadi hantam manga fadwasay sas banwa Laodisya, hanggan han Ninfas, hanggan han Diyos Tifonan kagtifonan sat balay kitay, mi gwas yadis taw. ¹⁶ Ham nomtabo wagbasa to fag sorat, fabasaan yadi has Tifonan sas Laodisya. Ham fag basa yadi ka sorat ka manga fadwasay sas banwa Laodisya disagon ha hayo. ¹⁷ Ham fag fwayong han Arkipo kitay, fag fadagos kat natanggap ibolonon gisagfon intam. ¹⁸ Angko sadili gamat kagsorat to fag manga hampang ha hayo, Ahos Pablo gwas hayo. Ham fag tohod kitay aho maporisowan yapdi. Ham nangos fag domog kitay, is Diyos mahoway ha hayo fagaba