NAIBOLON

NAIBOLON

¹ Hogsorat ya ha hyamo Tiyofilo kati. Sangko sorat gona, ho nafwayong fagayo in Hisos manga naibolon hanggan it manga nafwayong gis bago mamwayong has taw, ² hanggan wanabwat ham tongod. Is Hisos bagon abwat ham tongod, natogon hat manga nafili Fandiya-Barita gis Maliyaw fag Falad. ³ Is Hisos, nonsagaya wagdog mahori, fagaba wagfalag it sadili habilogan hat manga Fandiya-Barita. Kawa kitonya is Hisos nafaorongan wa kitay hanyan boyag ya ngay. Nafalag has taw ofat ik safolok sirang, natoltol yadi han Diyos sakop baliwa. ⁴ Is Hisos no gofodan yapdi has taw, hanya natogon has taw kitay, Ham fag idyag lahaw gis banwa Hirosalim. Ham fanayan yapdi sinya angko Ama natogon it bato disagon ha hayo, kangko yadi faglwangon. ⁵ Kawa sas danom is Hwan nogfatogna manga taw, dapat ay, ngalay wa aban, sas Maliyaw fag Falad ham nomtogna. ⁶ Ta no gofodan yapdin Hisos, ta gintaw hanya kitay, Hyami Fon, ha aw fafwali ya nangos ha hyami kati in Israil sakop banwanan? ⁷ Kiti is Hisos nogsagot, Angko ama ka bahala no ginahin fag masohod ka kitonya fag bagay, nyawa ham idwa twa no ginahin. ⁸ Dapat ham tomanggap karigonan ka Maliyaw fag Falad nomdokson ha hayo. Ginya madi, ham bago digfaorongan angko sas banwa Hirosalim, sas sakop Hodiya sadi wak dahonya, sas sakop Samariya, hanggan wa sadik dahonya baba daga. ⁹ Is Hisos nontabo wagfwayong kitonya, hanya dagos wan-abwat has tongod, it manga ofod no mabantayan yapdi hanya. Ginyas Hisos infarom wa has basad linyabo. ¹⁰ In Hisos manga ofod no mabantayan yapdi has tongod, is Hisos no kaayayo, ha dowak ama, balokasan abohay nalindog sasta akbang. ¹¹ Tonya nalwang kitay, Ham manga taga Galiliya, kana mayon ham no mabantayan yapdi has tongod? To fag is Hisos, kan-abwat has tongod, imbangkad ya aban hastay is baba daga, kito mandi ka hayo lagan kati non-abwat ham tongod. ¹² Ginya madi ka manga Fandiya-Barita infwali ya has Hirosalim gis Moyod Oliboan, ngandayo manga sadik liho it kaayayowan gis Hirosalim. ¹³ To ka mandi da Pidro, da Hwan, da Santyago, da Andris, da Filipi, da Tomas, da Bartolomi, da Matiyo, hanggan in Santyago sangay kan Alfiyo anak, in Simon yadi sangay kagbaliwa it kapariho Hodyo, hanggan kan Santyago anak fag Hodas. Ta no nadasog hat fangigyanan sas banwa, fagayo nadagos wa nasakbaw has tongod fag salogan. ¹⁴ To fag manga ama, hanggan yadi manga ina, hanggan in Hisos manga fadwasay hanggan wat ina, is Mariya, fagaba gofodan igdarangin sinya. ¹⁵ Nonsagaya manga fihin ik sirang, ka manga fadwasay nanifonan, manga sadik daan ha dowak safolo fagayo fagayo. Ginyas Pidro nalindog sasta fag bokngan, nafwayong kiti, ¹⁶ Manga fadwasay, fag im-anod wan kanfwalid sas Kasoratan, ka Maliyaw fag Falad fwayong lan Dabid, kawa han Hodas ka nafangolo ka manga nagamat in Hisos. ¹⁷ Is Hodas danwa hyami ofod hyabi, igtogbong yadi gibolon. ¹⁸ In Hodas natanggap kwarta git naibolon dwat nasali daga. Is Hodas no nasongon, sinya wa kandagdag hanya nontobong. It tiyan inbosni wan, inbangkad yadi wat bitoha. ¹⁹ Fagayo natwa wan sa sadi wak dahonya Hirosalim. Yakanga ta noglwang, tonya fag daga, Akildama, it kahologan, Daga Folot. ²⁰ Is Pidro igfwayong ya, Maskin insorat sas Kasoratan manga Ambahan, Fag idwa ha goli taw sat baba daga, Fag idwa hagbanwanan sinya nyawa fakta fag taw. Insorat yadi, Fag iba taw man ka fadagos it ibolonon. ²¹ Kati nangos, tam fag fomili ya intam ofod sadi, kaarakitay faorongan yadit mata lagan kawas Hisos inboyag ya. ²² Ka nangos omofod intam, fag ka mandi ka danwa koyog hyami, is Hisos no gofodan hantam hyabi. Fag ka sadik taw ka nalag in Hisos is Hwan nogfatogna hanya, hanggan balin Hisos non-abwat has tongod. ²³ Ta nafili dowak ama, da Matiyas da Hosi, kasta fan-ngayanan is Barsabas, it bansagan is Hosto. ²⁴ Ginya madi ta nandarangin kiti, Hyami Fon, haw twa no kinday sasta basad fangayofan fagayo. Fatohoyanan nangos ha hyami no faktaw gis dowa ka hyamo nafili, ²⁵ kaarakitay hanyam bali Fandiya-Barita ka fadagos in Hodas ibolon kat nadayo no hawat hadasogan. ²⁶ Ginya madi ta nafaaraktoman ka dowak ngayan. In Matiyas ngayan kasta nabol. Ginya madi tonya wa kanbali ista ofod indogang has safolo ha sadik Fandiya-Barita.

¹ Nondasog ka sirang Pintikostis, ta matifonan fagayo sa sadik balay. ² Ta nadog wa madali sadik hasnog gis tongod kito was hinagoman nogfawas. Ka hasnog napno wa sinya fag balay ista fagtifonan. ³ Ta nalag sinya bilang wa manga dila afoy nayokfo has taw ha sadi ha sadi. ⁴ Ka Maliyaw fag Falad sawas fagayo sasta manga fangayofan sadi wak dahonya. Ginya madi ta kampang bokod bokod fag manga sanglitan, no kinday ka Maliyaw fag Falad igfadonong. ⁵ Ha manga Hodyo masimbaon han Diyos, gis fagayo fag manga layonan daga iba, igdogayan wa sas Hirosalim gis nanya fag manga masohod. ⁶ Ka fakaaywanan fag manga taw, no nadog tonya fag hasnog, ta nagobok wa a, nanifonan wa sinya. Tandolaw wa dahol maskin tagdog in Hisos manga katogbong kampang sat manga fangampangan fagayo. ⁷ Kawa ta kataka wagdog, maskin tadwa kamin gisip, taglwang, Bonwa awkin manga taga Galiliya tonya fagayo ka kampang? ⁸ Kana mayon ta no kampang yadi wantam manga sadili fangampangan? ⁹ Tam manga taga Partiya, manga taga Midya, manga taga Ilam, mangag banwanan sas Misopotamya, manga gis Hodiya, gis Kapadosya, gis Ponto hanggan gis Asya, ¹⁰ gis Firigya, gis Panfilya, gis Ihipto hanggan gis manga sakop Libya ka akbang has sakop Sirini, hanggan ka manga famaklay gis Roma, nyawa manga Hodyo orongan, nyawa mangan bali manga Hodyo, ¹¹ manga taga Kirita, hanggan manga taga Arabya. Nyawa kayonya, tam igdog intam wa manga fangampangan ta nogtoltol hantam kawa han Diyos manga marigon fag ibolon. ¹² Tadwa kamin gisip it donggon, hanggan dayo wa falfason garintawan ha sadi ha sadi kiti, Kana kat kahologan tonya? ¹³ Dapat ay, ka tibag fasidyowan odi, iglwang, Tyamo fag manga taw ngandayo kalango odi. ¹⁴ Dapat is Pidro, hanggan it manga ofod safolo ha sadi, nalindog. Is Pidro kampang marigon, iglwang, Ham ka mandi gis sakop Hodiya, hanggan ka mangag sabang yadi sas Hirosalim kati, ham fag talinga fiya fiya angko bato fwayongon ha hayo. ¹⁵ Mi fagayo bonwa kalango, kito ka hayo fatoga. No kito yapdi fag manga masohod, myanit yapdi kaabwat, bonya fanlangoon. ¹⁶ Yatokitay, to ngap igfaanod wa kati kan Howil, in Diyos fangampang fwayong hyabi, noglwang kitay, ¹⁷ Is Diyos danwa nalwang hyabi kitay, sas ginanan fag manga sirang, kangko ibolonon kito, Ho fahafod angko Falad has fagayo fag manga taw. Ginya hayo manga anak imbali yadi abangko manga fangampang has manga taw. Yakanga aban, is Diyos ha falagon ha hayo manga anahan manga bagay madolaw. Ka manga magorang ama sa hayo ha akwa yadi aba tagimfanon. ¹⁸ Gis nanya fag manga sirang, ho fahafod yadi angko Falad Hangko manga sogowan, nyawa ama nyawa ina. Ginya tambali yadi angko manga fangampang. ¹⁹ Aho mamalag manga falagon madolaw sas banwa sam tongod, Hanggan manga madolaw sas baba daga, Folot, afoy hanggan songaw anos dahol dahol. ²⁰ Imharom ka myanit a, Ka magdanon imbali wa dararag kitos folot, Bagom dasog kagfon intam it Sirang, Ka mahalga hanggan masilaw yadi fag Sirang. ²¹ Yabay, nyawa faktaw nogsyag in Diyos, imbawi wan. ²² Ham manga taga Israil, kati ham fag matalingan. Is Hisos, ka taga Nasarit, kan Diyos nasogo hantam. Kan Diyos manga fatimawa hanggan manga falagon madolaw kat nafaibolon in Hisos, kagfaorongan kitay hanya giwan Diyos. Tam fadi wad natwa no kinday kan Hisos manga naibolon maskin inlag wan santam fagbokngan. ²³ Dapat in Diyos wa kafangayofanan domisag hantam to fag is Hisos, hanggan is Diyos natwa wan gis hyabi hyabi kitay, tonya wat bato ibolonon. Ginya madi, to fag taw ham nafapako hanggan wa nafahatay gis manga gamat taw dwat. ²⁴ Dapat ay, is Diyos nafaboyag ya domwag hanya, nafalfas hanya gis karigonan kahatayan, maskin ka kahatayan idwa nasyagan natarabing hanya sas Daga Salad. ²⁵ Kito kan Dabid fwayong kawa han Hisos, Ho nalag in Diyos fagaba sangko akbang Hanya sawangko balis sihon, yakanga hodwa kadala. ²⁶ Kawa kitonya, angko fangayofan kasolong, angko bibig gambahan igbaya Nyawa ho matay aban, ho ha fagsyagon yapdi, ²⁷ Maskin hadwag fabayaan angko falad sas Daga Salad. Hadwag faangay kitay kam Maliyaw fag imboyok. ²⁸ Haw nafwayong angko ka manga dalan has haboyagan. Maskin haw wan kangko ofod, ho kasolong wa dahol dahol. ²⁹ Manga fadwasay, ho twa wagfatohoyan hayo kitay intam hafofowan ama, is Dabid natay wa a, inlobgob yadi wan. Istay wat lobgoban hanggan kati. ³⁰ Kawas Dabid in Diyos fangampang danwa natwa in Diyos bato disagon hanya kitay, git hasokfonan aban, hambali gorangon sadi, kito yadi hanya. ³¹ In Dabid lagan, hanggan it fakatwawon kawan Diyos-natogon-Famawi imboyag ya domwag noglwang, Hanyadwan obon sas Daga Salad. Idwan angay kitay it habilogan fag imboyok. ³² To fag is Hisos is Diyos nafaboyag ya domwag. Migfaorongan hyami mata lagan kawas Hisos inboyag ya. ³³ Hanyan abwat san Diyos balis sihon, hanggan natanggap git Ama it Ama natogon bato disagon, ka Maliyaw fag Falad. To kan Hisos nafahafod ha hyami, kito ka hayo lagan, hayo donggon kati. ³⁴ Is Dabid idwa gis tongod, dapat hanya kagfwayong kitay, Is Diyos nafwayong hasagfon angko, Haw fag matokawan sangko balis sihon, ³⁵ No kandogay day ahodya nafasakop fiya fiya ha hyamo im manga kalaban fagayo. ³⁶ Yakanga ka fiya, tam manga taga Israil, sadik kayonya, tam fag danwa twa kitay, to fag is Hisos, ka hayo nafapako sas nafatimbangan hayo, is Diyos nafabali hanya kagfon intam hanggan it natogon-Famawi hanggan Gorangon. ³⁷ Yakanga ka manga matalingan nangayfanan wan sat basad fangayofan ta no nadog kitonya. Ginya ta gintaw in Pidro hanggan ka manga Fandiya-Barita tiba, Yabay yabay, manga fadwasay, kana araw ka hyami halimbawan? ³⁸ Is Pidro igsagot, Ham fagayo fag soyo wan han Diyos, ham fag fatogna wa hayo, ham nogfasakop san Kiristo Hisos ngayan, kaarakitay hanya faliyam hayo manga ogali dwat. Ginya madi, is Diyos fahafod it Maliyaw fag Falad ha hayo. ³⁹ Maskin in Diyos natogon bato disagon hawa hayo nomdisag, hanggan ha hayo manga anak, hanggan has fagayo fag manga taw, nyawa ka manga sawas ayayo, hawas fagayo kan Diyos kagfon intam it fagtawagon. ⁴⁰ Aywan yapdin Pidro manga natoltol has taw kaarakitay faorongan hanggan nafaaronganon yadi has taw kitay, Kaarakitay ham imbawi wan, ham fag idwag tolad kito ka kati fag manga taw ka ha ogali dwat. ⁴¹ Yakanga fagayo kantiwala in Pidro manga fwayong intogna wan. Tanaywan manga tolok libo taw gis nanya lamang fag sirang. ⁴² Tagfadagos yadig talinga ka manga Fandiya-Barita adal, nangaraktoman it manga botang, igsayowan iglifongan tinapay, hanggan igdarangin fagaba. ⁴³ Kawa ka manga Fandiya-Barita gibolon aywan fag manga falagon madolaw, yakanga ka manga taw fagayo kataka ya, kadala ya. ⁴⁴ Ka mangan tiwala fagayo gofodan di. It manga botang nafaaraktoman di fagayo. ⁴⁵ Ta nafasalit manga kaakwaan, ginya madi kat sali nangorayan has taw kaarakitay idwa komorang ista fanganon. Ta nangafod, nafahosto ha sadi ha sadi. ⁴⁶ Sirang sirang tagtifonan sas Fanimbaan-Dahol, fagaba masolong, hanggan igsayowan ta no kwan hanon sasta manga balay. ⁴⁷ Ka mangan tiwala igfasayagdog in Diyos, hanggan fagayo fag manga taw kasaya waglag kasta manga ogali. Sirang sirang kagfon intam igfadogang has Tifonan sinya ka manga taw kanbawi.

¹ Sadi ginan da Pidro da Hwan hawas Fanimbaan-Dahol dayo myanit kalibaba, maskin gis nanya manga taw igdarangin fagaba sinya. ² Fagaba manga taw igboklid sadik ama kanfihong it bitis gi yapdit kasagayan. Sirang sirang tagfwalid hanya sas bilog sakbawan alad, kat ngayan, Maangay fag Sakbawan, kaarakitay hanya managad togbong gis manga taw kagsakbaw has basad Fanimbaan-Dahol. ³ Ka ama fihong, no nalag inda Pidro da Hwan, dayo kasakbaw has basad alad Fanimbaan-Dahol, hanyag sagad wan. ⁴ Yakanga ka dowa, da Pidro, nangolinganan hanya. Is Pidro iglwang kitay, Ha fag bantay hyami. ⁵ Hanya nabantay ngay, gayfan ta ngandayo ha bato nga disagon hanya. ⁶ Dapat is Pidro iglwang hanya, Hodwa ha pilak, hodwa yadi ha ginto, dapat aho ha akwa disagon iba ha hyamo, kakitay, san Kiristo Hisos ngayan, ka taga Nasarit, haw fag lomindog wa a, fag lomahaw wan. ⁷ Is Pidro nagamit ka ama fihong sat balis sihon fag gamat a, nafalindog wan. It bitis dagos wanrigon hanggan it manga halisan. ⁸ Hanya nalokso nalindog, ginya yabay igfabago waglahaw, igfatahin waglokso nogsakbaw has basad aladan Fanimbaan-Dahol. Nahin wanda Pidro a, masolong wagfasayagdog han Diyos. ⁹ Fagayo fag manga taw ka sas Fanimbaan-Dahol gis nanya iglag ka ama noglahaw igfasayagdog in Diyos. ¹⁰ Tandolaw wa dahol dahol maskin ta kilala kitay, to fag ama ka matokawan fagaba sas bilog Sakbawan Fiya Kabantay, sas alad Fanimbaan-Dahol, dapat ay, kati iglahaw, ogali mandi. ¹¹ Ka ama no matawidan yapdi inda Pidro da Hwan san Salomon bilog Famahowayan, manga taw nanhadalandanan wan nagobok no kana mayon ka sinya, maskin tandolaw wa dahol. ¹² Is Pidro no nalag ka manga taw gobok, igfwayong kiti, Manga taga Israil, kana ham no kadolaw to fag bagay? Kana mayon ham nogdoro hyami kitonya? Ham gayfan hami aw ka nafalahaw to fag ama hyami odi kadonongan, ngatay hyami odi kafiyan? ¹³ Yatokitay, intam hafofowan, it Diyos, inda Abraham da Isaak da Hakob Diyos, ka nadisag dahol man has fagayo fag kangayanan han Hisos it sogowan. Dapat ham nafagamat hanya has manga ha kangayanan. Ham nadayo hanya san Pilato atobangan, nyawas Pilato danwa ha fangayofan fomalfas hanya. ¹⁴ Ham nadayo ka Maliyaw hanggan ka Maslong, ham nasagad fag ka sadik taw famahatay taw ka malfas. ¹⁵ Ham nafahatay di ngap kagdisag haboyagan, dapat ay, is Diyos nafaboyag ya hanya. Migfaorongan hyami wa sadili mata lagan. ¹⁶ In Hisos lamang ngayan karigonan ka nafafiya to fag ama, kawa hanyag syag in Hisos. Kawa hanyag syag lamang in Hisos, hanyan fiya wa orongan kito ka hayo lagan fagayo kati. ¹⁷ Manga fadwasay, ho twa kitay ham idwa natwagdog no kanat kahologan hayo naibolon han Hisos, nyawa ham, nyawa hayo manga gorangon, idwa yadi natwa. ¹⁸ Dapat kawa ham nafahatay in Hisos, in-anod wan kan Diyos nafadog gis hyabi hyabi, git manga fangampang kawa kan Diyos-natogon-Famawi kitay, it ibolon idyam tabo hanya nodya domog mahori. ¹⁹ Yakanga ham fag soyo wa kati. Fag kafwali ya han Diyos kaarakitay hanyadwag botang sat basad fangayofan hayo manga naogali dwat, ²⁰ fahoway yadi hayo manga fangayofan fagaba. Ginya madi aban, hanya somogo yadi kat nafatohoyan Famawi hanggan Gorangon kaarakitay ha hayo, kawas Hisos. ²¹ Kati is Hisos fag sam tongod yapdi nodyan dasog gis nanya fag manga masohod, kitay ka manga bagay fagayo imbago wan kito kan Diyos nalwang lat manga maliyaw fag fangampang gi yapdis hyabi hyabi. ²² Is Mwisis danwa nalwang kitay, Is Diyos, intam Fon ka fomili yadi aban sadi gi hayo, fabali hanyat fangampang kito yadingko. Ham fag talingat manga bato fwayongon fagayo ha hayo. ²³ Is Diyos domayo git sakop hanggan domwat nyawa faktaw kadwag talinga tonya fag fangampang aban. ²⁴ Fagayo fag manga fangampang hyabi, gin Samwil ginan, hanggan fagayo ka nanarosonan nahalili hanya, nafwayong yadi kawa has manga bagay kan-anod kati fag kasohodan. ²⁵ In Diyos manga natogon gona, it manga bato disagon lat manga fangampang danwa ha hayo, hanggan ham in-aktom yadi han Diyos taranggapan gi hayo hafofowan ginan, no nafwayong han Abraham, Gi hyamo hasokfonan aban, fagayo fagayo fag manga layonan taw sadik baba daga bomaya wan. ²⁶ Yakanga ha hayo bago bago is Diyos no nafatohoyan it Sogowan, no nasogo hanya kaarakitay ham bomaya wan, hanya nogtogbong hayo domayo hayo manga ogali dwat.

¹ Da Pidro da Hwan nogtoltol yapdi has manga taw, manga fagalanhan-Diyos hanggan wasta tahinan sondalo ka mangag bantay sas Fanimbaan-Dahol hanggan wa manga Sadosiyo indasog wa sinya. ² Ta kaisog wa dahol dahol has dowak Fandiya-Barita maskin tagfwayong kitay is Hisos inboyag ya, kagfaorongan kitay ha akwa ya haboyagan sas dayo kahatayan. ³ Ta nagamat inda Pidro, ginya, kawa kayabi wan gis nanya, ta nafaporiso yapdi hanggan wansirang. ⁴ Nyawa kitonya kaaywanon ka nanalinga inda Pidro toltol intiwala han Hisos, ngandayo gamtanan manga 5,000 gis fagonan ka manga ama kantiwala. ⁵ Nonsirang wan, ka manga gorangon, ka manga fagtahinan sas banwa, hanggan ka mangag faadal Batasan Hodyo nanifonan sas Hirosalim. ⁶ Hanggan wa da Anas sinya, ka gorangon fag fagalan-han-Diyos, da Kaifas, da Hwan, da Alihandro, hanggan ka gorangon fag fagalan, it manga kaiban fagayo sinya yadi wan. ⁷ Ta nafalindog ka manga Fandiya-Barita sasta fagbokngan, ginya ta naintaw yadi handa Pidro kitay, Gindak kadonongan ham nabol tonya? Faktat ngayan ka hayo nasokfon ham no naibolon kitonya? ⁸ Ginya madis Pidro, kawa ka Falad Maliyaw sa hanya sadi wak dahonya, nasagot, Ham ka manga gorangon hanggan manga fagtahinan sas banwa, ⁹ no kadi has ama fihong, no kinday hami no natogbong hanya hanggan wanfiya, no tonya di ka hayo fagintawon hyami, ¹⁰ ham fagayo istay, hanggan fagayo fagayo taga Israil, ham fag twa kitay, in Kiristo Hisos, taga Nasarit, it ngayan karigonan, ka hayo nafapako sas nafatimbangan hayo, dapat ay, is Diyos nafaboyag ya hanya, hanya ka nafasyagan to fag taw nalindog sa hayo faglagan, orongan wanfiya. ¹¹ To fag is Hisos, Ka hayo fagdayoon fag bato, ham ka kalig balay, Hanyan bali ka bato kag-ganit has tiba sadik dahonya balay. ¹² Is Kiristo Hisos lamang kagbawi manga taw, maskin, sadik baba daga, is Diyos idwa ha nadisag has taw iba ngayan kagbawi intam. ¹³ Ka tifonan gorangon Hodyo intaka wagdog inda Pidro da Hwan maskin ta nahampang maslong has taw, labi wa ta no nadog kitay hanya basta odi taw, idwa ha nagadalan. Ta natwa wagdog kitay, maskin mangharaw inbali kitonyak madonong, kawa ta naofod in Hisos hyabi. ¹⁴ Ginya madi, ta no nalag ka taw kanfiya malindogan sanda Pidro da Hwan akbang, ta kyabog it bato lwangon gis nanya. ¹⁵ Yakanga ta nafadokson yapdi inda Pidro gis fanoltolan manga gorangon Hodyo. Ginya madi ta nangampangan yapdi. ¹⁶ Ta nangarintawan, Kinda araw intam halimbawan hanya fag manga taw, maskin fagayo fag manga taw sas Hirosalim nadog kawasta naibolon madolaw, yakanga tam idwa syagan igfabohag ista fwayong. ¹⁷ Dapat, kaarakitay to idwam barita domwag has iba taw, tam fatagak to fag manga ama kitay, ta fag idwag barita domwag to fag ngayan, nyawa haday. ¹⁸ Ginya madi ta nafasakbaw ya inda Pidro. Taglibit wa hampang, Ham hawag fwayong, hawag faadal domwag no kawa han Hisos ngayan. ¹⁹ Dapat da Pidro da Hwan nasagot, Ham wak gisip no sida ka fiya san Diyos faglagan, ngatay hami fag ha hayo no katanog, ngatay fag han Diyos. ²⁰ Idyadi wa fiya mi nodwa fadog ka hyami lagan hanggan ka hyami donggon. ²¹ Ginya ta no nabando ya domwag, marigon man ka haraw, ta nafalfas wanda Pidro. Tadwa ha lagan halimbawan fadosa tonya fag dowak ama, maskin ka fakaaywanan igfasayagdog in Diyos kawasta lagan, ²² maskin kasta nafafiya fag ama iglabi wa ofat ik safolok fangaraw it kagorangan. ²³ Ta no nafalfas wan inda Pidro da Hwan, da Pidro hawat manga fakilalaon, namwayong ka manga fagtahinan fagalan, hanggan manga fagtahinan sas banwa fwayong kitay, ta fag idwag barita domwag. ²⁴ Ta no nadog kitonya, ta gofodan sinya fagayo, igdarangin han Diyos. Taglwang, Hyami Fon, haw ka nahalig banwa, hanggan daga, hanggan dagat, hanggan fagayo fag manga bagay ka sinya. ²⁵ Haw danwa nafwayong gi yapdi hyami hafofowan ginan, gin Dabid, hyamo fangibolon, ka Maliyaw fag Falad no nafadonong hanya, noglwang kitay, Kana mayon ka manga Hintil no kaisog wa dahol dahol? Ka manga taw no gwas it bato ibolonon idwa ha kahologan? ²⁶ Ka manga gorangon sas baba daga igfatalaga wa kitay ta lomaban wan Kasta manga fagtahinan matifonan wan Kaarakitay lomaban han Diyos hanggan hat natogon-Famawi-hanggan-Gorangon. ²⁷ Maskin orongan wan da Hirodis da Pontiyo Pilato, hanggan ka manga Hintil, hanggan ka manga taga Israil sadi wak dahonya, ta nanifonan istay fag banwa, ta nalaban im Sogowan Maliyaw, is Hisos, ka hyamo nafatohoyan. ²⁸ Ta nafatonglos wa fagayo fag manga bagay ka hyamo nafwayong kitay fag im-anod wan. ²⁹ Ginya madi, hyami Fon, kati tagfadalag dog hyami. Ha nangos togbongan wa hyami, hyamo manga sogowan, kaarakitay mi bomarita ya marigon has taw hyamo hampang. ³⁰ Ha falogdayan yadim gamat kaarakitay mamafiya ka manga ha sagit. Haw fag faangay nangos mi omibolon ka manga falagon madolaw san Hisos ngayan, ka hyamo Maliyaw fag Sogowan. ³¹ Ta nontabo wagdarangin, kasta nagtifonan fag balay inhawig. Maskin ka Maliyaw fag Falad sawas taw fagayo sadi wak dahonya, inrigon yasta fangayofan idwa ha madalag barita in Diyos hampang. ³² Fagayo fagayo kantiwala, insadi it fangayofan hanggan wat isip. Nyawa faktaw, idwag sadili it manga botang, dapat nafaaraktoman di fagayo. ³³ Ka manga Fandiya-Barita ha kadonongan marigon ta nogfaorongan kitay, is Hisos intam Fon inboyag ya domwag. In Diyos malooy fag kahowayan inlag sas fagayo. ³⁴ Idwa ha taw korang it fanganon gis nanya, maskin ka maakwa nafasali ngatay it daga, ngatay it balay, ³⁵ ginya ta nadisag it sali has manga Fandiya-Barita. Ginya madi ka manga Fandiya-Barita nangorayan ha sadi ha sadi kaarakitay idwa komorang ista fanganon. ³⁶ Kitonya yadi kan Hosi naibolon. Is Hosi taga Sipri, gin Libi hasokfonan. Ka manga Fandiya-Barita nafangayan hanya is Birnabi, it kahologan, Is Matogbongon. ³⁷ Is Hosi nafasalit iyab, ginya nadisag it sali has manga Fandiya-Barita.

¹ Dapat ay, sadik talsawa, da Ananiyas, da Safira, nafasali yadi wat daga ka sadi. ² Is Ananiyas nabohin kat sali hanggan is Safira nafaangay wan. Ginya madis Ananiyas nadisag kat sawad has manga Fandiya-Barita. ³ Dapat is Pidro nafwayong han Ananiyas, Kana mayon haw nogtalinga in Satanas, kaarakitay ha bomohag has Falad Maliyaw? Kana ha nogbohin yapdi ka sali daga? ⁴ Ha nodyapdi harag fasali, bohonwa awkin hyamo yapdi ka daga? Haw no nafasali wan, ka hyamo kawa kwarta, idwa aw? Kana mayon haw no gibolon yapdi kitonya? Idwa has taw, dapat han Diyos haw nogbohag. ⁵ Is Ananiyas no nadog tonya fag hampang natay wa dagos, nakfo odi. Fagayo indala wa dahol iglag. ⁶ Ka manga anahan nalindog, nasafot ka natay, nadiya has sokayan a, nalobgob. ⁷ Manga tolok oras araw, it kadogayan, it babay inbangkad yadi, idwa ha fangayofan kitay it indogan natay wan. ⁸ Is Safira nondasog, is Pidro naintaw hanya, nalwang, Fwayongan angko, ngatay hayo natanggap it sali hayo daga dahonya wa aw? Ka ina nasagot, Dahonya ngay. ⁹ Dapat is Pidro nafwayong, Kana mayon hayo nagkasadiyan somolay kagfon intam it Falad? Fanlag ngay, ka manga taw ka nalobgob im indogan sawas sokayan, hanggan wa araw haw kasta lobgobon. ¹⁰ Is Safira dagos wa nakfo san Pidro akbang, natay yadi wan. Ginya madi ka manga anahan no nasakbaw ya, nalag kitay is Safira mahatayan. Ta nadiya yadi wan, nalobgob hanya sat indogan akbang. ¹¹ In Diyos Tifonan sadi wak kayonya indala wa dahol dahol, hanggan fagayo ka nadog to fag manga bagay indala yadi wan. ¹² Ka manga Fandiya-Barita gibolon aywan fag manga falagon madolaw sasta faglagan. Fagayo kantiwala fagaba wagtifonan san Salomon Famahowayan. ¹³ Dapat ka mangadyan tiwala kadala gaktom has mangan tiwala nyawa tagfaanod kitay fiya ista ogali. ¹⁴ Dapat ka manga ama hanggan manga ina kagsyag hasagfon intam kaaywan wa kaaywan wan. ¹⁵ Manga taw nadiya ka manga ha sagit has bilog dalan, nafwalid baba sagmak, kaarakitay is Pidro nogdalan sinya, ngadit anino fag omanino ka ha sagit. ¹⁶ Aywan kandasog gis fakadogan banwa Hirosalim. Ta nadiya ka manga ha sagit hanggan ka manga labang nafahoriyan. Infiya wa fagayo fagayo. ¹⁷ Dapat ka gorangon fag fagalan, hanggan it manga ofod sadik layonan manga Sadosiyo, kaingli wa dahol ka manga Fandiya-Barita. ¹⁸ Yakanga ta nagamat was taw, nafaporiso basad banwa. ¹⁹ Dapat basad yabi, in Diyos anghil sadi, naboklas ka fanahop porisowan, nataban ka manga Fandiya-Barita has sokayan, nalwang, ²⁰ Sogi, ham fag hawas Fanimbaan-Dahol, ham fag toltol has taw kawa has Bago fag Haboyagan. ²¹ Ginya madi yabay, tantanog wan. Dayo yapdi kayawa, ka manga Fandiya-Barita hawas basad Fanimbaan-Dahol, natoltol has taw. Dapat ka gorangon fag fagalan hanggan it manga ofod nondasog araw, has akbang porisowan, ta nafatawag ka tifonan manga fagtahinan Hodyo fagayo sasta fanoltolan. Ginya madi ta nasogo kitay, famantay ka mangan poriso fafon, tabanan hastay. ²² Dapat ka manga namantay idwa ha lagan taw sinya. Yakanga ta nwali wan. nafwayong, Idwa akwa sinya. ²³ No kitay di, kat fanahop maganitan mandi, ha bantay ya ngadi, dapat ay idwa ha taw sas basad. ²⁴ Kasta tahinan ka manga sondalo kagbantay sas Fanimbaan-Dahol, hanggan ka manga fagtahinan fagalan nangarisipon wan ta no nadog kitonya kitay, hada wa mayon ka manga Fandiya-Barita. ²⁵ Ginya madi handasog sadik taw igfwayong, Yatokitay maporisowan tonya, sawas basad Fanimbaan-Dahol, igtoltol ya nga wa ngap has taw. ²⁶ Ginya ka tahinan sondalo nafaofod it sakop tiba has Fanimbaan-Dahol. Nataban ka manga Fandiya-Barita, igfahowayon odi, maskin kadala ngandayo ka fakaaywanan bomintok hanya, hanya no mangisog has taw. ²⁷ Ta no nataban ka manga Fandiya-Barita, ta nafaatobangan hanya has fanoltolan manga Hodyo. Ka gorangon fagalan naintaw wa fiya fiya, ²⁸ igfwayong, Gwadi marigon hyami bando ha hayo kitay fag idwag toltol tonya fag taw it ngayan, dapat ham nafahaskat di ngap sadi wak dahonya Hirosalim, hanggan ham igbangdan yadi wa hyami it kahatayan. ²⁹ Dapat da Pidro, hanggan ka iba Fandiya-Barita nasagot, taglwang, Ka fiya hami imtanog yap han Diyos bago has manga taw. ³⁰ Intam manga hafofowan Diyos ka nafaboyag ya in Hisos ka hayo nafahatay, ham no nafasakbit ya ngadi hanya sas nafatimbangan hayo. ³¹ Is Diyos nataban in Hisos ham tongod, han Diyos balis sihon, nafabali hanya intam Fagtahinan hanggan Famawi kaarakitay in Israil hasokfonan somoyo wan, hanggan is Diyos faliyam wan it manga naogali dwat. ³² To fagayo fagayo hyami wa sadili mata lagan, hami hanggan ka Falad Maliyaw kan Diyos nadisag has manga katanog hanya. ³³ Dapat ka fanifonan Hodyo inhori wa dahol dahol igdog. Ta kasaya wagfahatay ka manga Fandiya-Barita. ³⁴ Dapat sadik ama Farisiyo, is Gamaliyal, kagfaadal in Mwisis togon, nalindog sasta fagbokngan fanifonan. Ta fagayo magalang fiya fiya hanya. Hanya nafwayong kitay, Fadoksonan yap ngalay to fag manga taw. ³⁵ Ginya nafwayong has taw, Manga ama taga Israil, isipan yap fiya fiya hayo bato ibolonon has nwa fag manga taw. ³⁶ Hyabi, idya dogay, is Tiyodas, inbangkad igfadaholon it sadili, nataban manga ofat ik daan ama. Dapat ta no nafahatay in Tiyodas, it manga ofod nalagyo lamang, idwa ha kahologan. ³⁷ Ginya madi, is Tiyodas no natay wan, is Hodas man, taga Galiliya, inbangkad dayog falista manga taw, hanya nataban aywan ogbot fag manga taw. Dapat is Hodas natay, hanggan it manga ofod nalagyo yadi. ³⁸ Yakanga, hogfwayong hayo kati, ham hawag mawat tonya fag manga taw, fabayaanan lamang sinya. It fakasayaon hanggan ibolonon no gi odis kapariho taw, imliyam yadi kito kas taw. ³⁹ Dapat to no gin Diyos, ham idwa syagan domaog, dapat kamlag aban ngandayo ham wa kaglaban in Diyos. Ka manga fagtahinan Hodyo nafaangay di. ⁴⁰ Ta no nafasakbaw ya ka manga Fandiya-Barita, ta nabakbak is taw, ginya tagbando kitay, Ham fag idwag fwayong domwag in Hisos ngayan has taw. Ginya madi ta nafalahaw ya. ⁴¹ Ka manga Fandiya-Barita kasolong wan noglahaw gis fanoltolan manga Hodyo maskin is Diyos nafaangay kitay ta fag gagwanta wan, nyawa manga taw igyod hanya, kawa ta galwasi in Hisos. ⁴² Sirang sirang sas Fanimbaan-Dahol, hanggan ha balay ha balay, tadwag logak igtoltol kawas Hisos kan Diyos-natogon-Famawi-hanggan-Gorangon.

¹ Gis nanya fag masohod in Hisos manga katogbong no kaaywan, ka manga Hodyo ka kampang fangampangan Girigo igsogat has manga Hodyo ka kampang it sadili sanglitan. Taglwang, Kana ham nogfabayaan ka manga ina ka balo sa hyami? Kati ham fawa koray ha hyami manga ina balo kat bato tanggapon sirang sirang. ² Yakanga ka Safolo-ha-Dowa nafatawag ka fakaaywanan fag manga katogbong, igfwayong has taw, Idwa fiya hami nogtohas igbarita in Diyos hampang kaarakitay igbahala has hanon. ³ Yakanga filiyan fitok ama gi hayo ka ha akwa ka Falad Maliyaw sat fangayofan sadi wak dahonya, fiyat ogali, madonong yadi. Ginya tam mamatohoyan tonya fag manga taw kagfahafod hanon has fagayo. ⁴ Dapat hami idwa fahoyangon igdarangin hanggan igbarita in Diyos hampang. ⁵ Fagayo nafaangay wan. Ta nafili in Istiban, ka marigon no katiwala in Diyos hanggan igfasakop has Falad Maliyaw. Ta nafili yadinda Filipi, da Forokoro, da Nikanor, da Timon, da Parminas, hanggan is Nikolas, ka taga Antiyokya, sadik Hintil ka nafasakop has fakatiwalaon Hodyo. ⁶ Ta nataban ka fitok ama has manga Fandiya-Barita. Ka manga Fandiya-Barita nandarangin hanggan nafwalid it manga gamat sasta baba alfoyo. ⁷ In Diyos hampang kaskat wan. In Hisos manga katogbong sas Hirosalim kabagat wa kaaywan, hanggan aywan fag manga fagalan-han-Diyos intiwala yadi. ⁸ In Diyos malooy fag kahowayan hanggan kadonongan sawan Istiban fangayofan sadi wak dahonya. Yakanga hanya nasyagan gibolon manga madolaw fag manga bagay hanggan manga fatimawa. ⁹ Dapat tiba taw gi sadik fanimbaan Hodyo, tagngayan Ista Nafalfas, nalaban in Istiban. Manga Hodyo gis Sirini, gis Alihandriya kagsimba sinya fag fanimbaan. Tonya hanggan manga Hodyo gis Silisya hanggan gis Asya ka nalaban in Istiban. ¹⁰ Tadwa syagan nadaog maskin in Istiban kadonongan gis Falad Maliyaw. ¹¹ Yakanga ta natangdan odi mafyaloman manga ama bohagon kaglwang kitay, Mi nadog wan hanya no kampang igsalan han Mwisis hanggan han Diyos. ¹² Maskin kitonya, tagfaisogon ka manga fagtahinan sas banwa, hanggan ka mangag faadal Batasan Hodyo kaarakitay omisog yadi in Istiban. Ginya madi ta nagamat in Istiban, nataban hanya has fanifonan Hodyo. ¹³ Taglwang, To fag ama idwag tohas igsalan kampang, iglwang ka Fanimbaan-Dahol idwa fiya, iglaban yadi ka Batasan Hodyo. ¹⁴ Mi nadog it hampang kitay, tonya fag is Hisos, taga Nasarit, fahakfo ka Fanimbaan-Dahol, hanggan faoman yadi in Mwisis manga faobonan ogali hantam. ¹⁵ Fagayo fag manga taw ka matokawan sas fanoltolan manga fagtahinan Hodyo igdoro wa fiya fiya in Istiban. Taglag it walong bilang yadi wa walong anghil.

¹ Ginya ka gorangon fag fagalan gintaw in Istiban, Ista sombong hyamo orongan wa aw? ² Is Istiban nasagot, Manga fadwasay, hanggan manga magorang, ham fag matalingan. Is Abraham intam pinagkaama no sayapdis sakop Misopotamiya, nodya nalin has banwa Haran, ka marigon hanggan kafiyaon fag Diyos nasabang hanya. ³ Nafwayong hanya kitay, Haw fag galin gim banwanan, obonan im manga kaiban. Haw fag hawangko fagfwayongon banwanan ha hyamo. ⁴ Ginya madis Abraham nalin wa ngay gis manga banwanan Kaldiyo, nabanwanan has Haran. Ginya madit ama no natay sas Haran, is Diyos nafaalin ya domwag in Abraham gis Haran, nafangolo hanya hastay fag banwanan, kantam banwanan kati. ⁵ Dapat ay, is Abraham no bago yapdi dasog, is Diyos idyag disag daga hanya, ngadi dahos basad dalohap, nyawas Diyos nafwayong hanya kitay, is Abraham hanggan it manga hasokfonan ka omafo tonya fag banwanan aban. No kitay di, is Abraham idya ha anak gis nanya. ⁶ Is Diyos nafwayong han Abraham kitay, Im hasokfonan domogayan sas iba banwanan aban. Tambali ista manga sogowan sinya, hanggan ka manga taga sinya mamahoriyan im manga hasokfonan ofat ik daan fangaraw. ⁷ Dapat is Diyos iglwang, Aho mamadosa yadi ka mangag fahoriyan im manga hasokfonan, ginya madi ta falahaw yas taw. Istay yadi fag banwanan im manga hasokfonan somimba ya hangko aban. ⁸ Is Diyos ha taranggapan han Abraham, hanggan natogon ka ogali igfatoli bilang tandaan kitay tan-aktom sas taranggapan. Yakangan Abraham anak, is Isaak nonsagaya, is Abraham natoli hanya sas fawalo fag sirang. Kitonya yadis Isaak natoli in Hakob hanggan is Hakob natoli it manga anak ama, safolo ha dowa, kanbali intam manga pinagkaama sas safolo ha dowak layonan in Israil manga hasokfonan. ⁹ Tonyantam hafofowan, intam fagngayanon tiba, in-ingli in Hosi hyabi. Ta nafasali ya ngadi hanya has taga Ihipto. Ka taga Ihipto nafabali in Hosi it sogowan. Dapat is Diyos sawa hanya, ¹⁰ nabawi hanya git lagan mahori fagayo. Is Diyos nafabali kitay is Faraon, ka gorangon sas sakop Ihipto, fag igbaya in Hosi kadonongan. Yakanga nafabali in Hosi ista tahinan sas Ihipto hanggan san Faraon sadili balay. ¹¹ Gis nanya fag manga masohod, ka manga taw sas sakop Ihipto, hanggan sas sakop Kanaan sadi wak dahonya, gwayan wan, kawa kalonos wa dahol dahol. Intam manga pinagkaama idwa yadi ha faglagon it bato hanon. ¹² Dapat ay, is Hakob no nadog kitay ha hanon sas Ihipto, nasogot manga anak hanya. ¹³ Ginya madi, sasta fadowa fag swali, is Hosi bago di nafadog hat manga fadwasay hanya no faktaw, hanggan is Faraon bago di nadog yadi is Hosi no ginda fag layonan taw. ¹⁴ Is Hosi nafatawag it ama hanggan it manga kaiban fagayo, gamtanan fitok safolo ha limak taw. ¹⁵ Ginya madis Hakob nadasog yadi has sakop Ihipto. Sinya wak natay hanggan wat manga anak, intam manga pinagkaama. ¹⁶ Ta natibo mandi ista habilogan, tiba tiba nyawasta botol odi, nadiya mandi nafaalin man has Sikim han Abraham nasali daga, it bato lobgobanan, it nasali gin Hamor manga anak. ¹⁷ Ginya madi aban, is Diyos no kaakbang wa kadisag it nagtogonan daga han Abraham hasokfonan, intam iba sas Ihipto inbali ayo ayo. ¹⁸ Ginya, no dogay, hanbali ya sadik gorangon sas Ihipto kadwa nahilala in Hosi. ¹⁹ Tonya yadi fag gorangon kagbohag ya ngadi intam manga hafofowan hyabi, hanggan igfahoriyan. Nafasognod has taw kitay, okasan ista manga anak dararag kaarakitay matay. ²⁰ Gis nanya fag masohod is Mwisis nonsagaya, taglag kafiyaon fag anak, yakangat magorang naano hanya tolok magdanon sas basad balay. ²¹ Ginya ta no nafaalin in Mwisis has sokayan, matagowan yapdi, in Faraon dayaga nalag, nasafat, naano bilang wat sadili anak. ²² Ta nafadonong in Mwisis fagayo fag kadonongan taga Ihipto. Is Mwisis inbali marigon igtoltol hanggan gibolon. ²³ Ginya madis Mwisis no ofat ik safolok fangaraw it kagorangan, kasaya manabang hat kaiban manga taga Israil. ²⁴ Is Mwisis no nalag kitay ka sadik taga Ihipto gisog ka sadik taga Israil, is Mwisis naapin ka taga Israil hanggan nafahatay ka taga Ihipto. ²⁵ In Mwisis fangayofan it manga kaiban nangos tomwa wagdog kitay, is Diyos nafili in Mwisis kaarakitay omapin is taw. Dapat tadwa twagdog. ²⁶ Nonbago marom, is Mwisis no nasabang ya, nalag ya ngay ka mandi kapariho taga Israil gawayan, gayfan lomilang is taw, nalwang, Ham myasa wa taga Israil, kana mayon ham no gawayan? ²⁷ Dapat kagdaog it ofod, natolod ogbot in Mwisis, iglwang, Faktaw ka nafabali hyamo hyami fangabaya? ²⁸ Ngatay haw kasaya ya ngay mamahatay angko, kito kam naibolon fafon ha sadik taga Ihipto? ²⁹ Is Mwisis no nadog ista hampang, hanya nalagyo dan. Nabanwanan sas sakop Madian. No madogayan sinya, it anak ama dowa. ³⁰ Ginya madi, nonsagaya ofat ik safolok fangaraw sinya, is Mwisis no ayayo gista manga banwanan, akbang has moyod Sinay, is Diyos nafalag hanya sadik anghil sas fon hayo libaba, gigang. ³¹ Is Mwisis indolaw wat lagan. Ginya, no gakbang kaarakitay bomantay fiya fiya, is Mwisis nadog kagfon intam it hasnog iglwang kitay, ³² Aho im manga hafofowan Diyos, inda Abraham, da Isaak, da Hakob Diyos. Is Mwisis karokog wa kadala, kadala wagbantay. ³³ Ginyas Diyos nafwayong hanya, Bol yap im lapak maskin im faglidan daga intohoyan han Diyos. ³⁴ Ho fadi wadag lag kitay ka taga Ihipto igdaog angko sakop. Hogdog wa kitay ta gwayanan wan. Hogdokson wan kaarakitay bomawi is taw. Kati yabay ho somogo hyamo has Ihipto. ³⁵ To fag is Mwisis kasta fakaplaon igdog, ta noglwang Fakta ka nafabali hyamo hyami fangabaya? Is Mwisis kan Diyos nasogo kaarakitay imbali ista fagtahinan hanggan famawi, hanya no nalag in Diyos anghil sas fon hayo libaba. ³⁶ Is Mwisis ka nataban ka manga taga Israil gis Ihipto, hanya no gibolon manga fatimawa hanggan falagon madolaw, ta no sas sakop Ihipto yapdi, ta no sas Dagat Dararag, hanggan ta no basad fakahyabogan ofat ik safolok fangaraw. ³⁷ To wa fag Mwisis ka nalwang han Israil manga hasokfonan, Is Diyos fatohoyan gi hayo aban sadik fangampang kito mandingko. ³⁸ To wa fag Mwisis ka sinya in Israil manga hasokfonan nontifonan basad fakahyabogan. Hanya ka kampang has anghil hyabi, ka anghil no kampang ha hanya hanggan hantam manga hafofowan sas Moyod Sinay. Hanya ka natanggap gin Diyos ka hampang kagfaboyag is taw kaarakitay igdisag hantam. ³⁹ Dapat ay, intam manga hafofowan dayo katanog in Mwisis, ta napla odig dog, fagaba gayfan has Ihipto. ⁴⁰ Taglwang han Aaron, Falowan hyami manga faglohodan malagan ka fomangolo hyami, kawas Mwisis ka nataban hyami gis Ihipto, midwa twa no kinday sinya. ⁴¹ Gis nanya, ta nahalig tolad anak baka faglohodan. Nasogba yadi manga hayopan has bilog tolad, hanggan nafanolodan wa sinya. ⁴² Yakangas Diyos nagoyoyan has taw, nafabayaan wa ta noglohod has manga fanggasan sas banwa sam tongod, kito kansorat san Diyos fangampang sorat, Ham mangan Israil hasokfonan, ham no nadogay ofat ik safolok fangaraw basad fakahyabogan, Hawangko anod awkin ham igsogba manga hayopan, hanggan igdisag manga disagon? ⁴³ Bonwa mawat, in Molok balay-rotay ka hayo nadiya hanggan in Rimfan fanggasan ka hayo faglohodan. Ka hayo nadiya kawa hayo sadili gamat nahalig manga tolad faglohodan, Yakanga ho omokas odi hayo has dayo Babilonya. ⁴⁴ Intam hafofowan nogdogayan yapdi basad fakahyabogan, ka Balay-Rotay kagfatohoyan in Diyos taranggapan has taw, sinya yadi wan. Inhalig fiya fiya kiton Diyos togon han Mwisis no nafalag hanyat fagtoladon. ⁴⁵ Ginya madis Mwisis no natay, it manga anak man ka nabahala ka Balay-Rotay, hanggan is Hosi no sasta fagonan is Diyos no nafaalin tibak layonan taw gin Diyos disagon fag banwanan, is Hosi no nataban in Israil hasokfonan hanya, tagdiya yapdi ka Balay-Rotay. Sinya yapdi ka Balay-Rotay hyabi hanggan nadasog han Dabid kasta Gorangon. ⁴⁶ Is Dabid in Diyos wa fagbayaon, hanggan hanyag sagad kitay is Diyos faangayan kitay hanya mangalig balay ka maangay han Hakob Diyos. ⁴⁷ Dapat is Salomon odi, kan Dabid anak, ka nahalig tonya fag balay. ⁴⁸ Dapat ay, is Diyos ka Abwat man has Fagayo, idwag banwanan sasta manga gamat nahalig balay, kito kan Diyos fangampang fwayong, ⁴⁹ Ka banwa sam tongod angko tokawan fanokawan gorangon, Hanggan ka daga angko yadi lidan. Kana fag balay hayo torokon domwag hangko, Siday nangos hayo falo angko famahowayan? ⁵⁰ Bonwa awkin aho ka nahalig to fag manga bagay fagayo? ⁵¹ Is Istiban igtoltol yapdi has taw, iglwang, Hayo manga fangayofan maganit wa dahol. Idwan bago hayo manga ogali. Ham kito yadi ka hayo manga hafofowan gis hyabi. Ham fagaba wagsongat ka Falad Maliyaw. ⁵² Hayo manga hafofowan nafahoriyan in Diyos manga fangampang fagayo. Ta nafahatay yadi kagfwayong kitay, is Maslong imbangkad aban, hanggan ham naoyon it manga kalaban hanggan wa nafahatay in Maslong. ⁵³ Ham fadi wad nadog in Diyos manga togon git manga anghil, dapat ham idwan tanog. ⁵⁴ Ka fanifonan Hodyo sadi wak kayonya, no nadog in Istiban toltol, nangarigitan it manga ngifon kawa ta kaisog hanya. ⁵⁵ Dapat is Istiban, kawa ka Falad Maliyaw sawa hanya sadi wak dahonya, hanya nabantay has tongod, nalag in Diyos kayawaan, nalag yadin Hisos malindogan san Diyos balis sihon. ⁵⁶ Is Istiban iglwang, Yabay yabay, hoglag in Diyos banwanan maboklasan, hanggan Kanbali Taw, malindogan san Diyos balis sihon. ⁵⁷ Dapat ka manga taw nataklob it manga talinga, dayog dog in Istiban fwayong, naringgit wan. Ginya ta natarabangan natoklos in Istiban. ⁵⁸ Ta nagoyod hanya has sokayan banwa, nabintok hanggan wa nafahatay hanya. Ka manga nadog in Istiban hampang haraw, naloslos it manga balokas, nafamataw sas anahan akbang, kawas Sawlo. ⁵⁹ Ta nogbintok yapdin Istiban, is Istiban nandarangin, nalwang, Hisos, angko Fon, ha tanggapan wangko falad kati. ⁶⁰ Ginyas Istiban nanlingkohodan natawag marigon, Angko Fon, haw nangos fag idwag botang ista naibolon dwat hangko.

¹ Is Sawlo igfaangay yadi was taw ta nogfahatay in Istiban. Gis nanya yadi fag sirang manga taw igfadagos igfahoriyan wa dahol dahol in Diyos Tifonan sas banwa Hirosalim. Ka mangan tiwala nanhalagyowanan wan gis banwa Hirosalim, hawas manga sakop Hodiya hanggan Samariya. Dapat ka manga Fandiya-Barita idwa nalagyo. ² Ka manga taw ka katanog in Diyos nalobgob in Istiban, nangodgorawan yadi. ³ Dapat ay, is Sawlo talaga wagdwat in Diyos Tifonan. Nagombalay, igsakbaw, goyod yadi ginya ka mangan tiwala, nyawa ama, nyawa ina, ginyag faporiso. ⁴ Ka mangan tiwala nonsarowayan, ta nabarita di ngap in Diyos hampang nyawa hada kandasog. ⁵ Is Filipi hawas sadik banwa sakop Samariya, nabarita has taw in Diyos-natogon-Famawi-hanggan-Gorangon. ⁶ Ka fakaaywanan no nadog it hampang, hanggan nalag it manga falagon madolaw, insadi ista fangayofan tomalinga fiya fiya. ⁷ Aywan fag manga labang nalin gis taw, igharokyawan no galin wan. Aywan yadi fag manga gafilay hanggan fihong infiya wan. ⁸ Yakanga sinya fag banwa tagbaya wa dahol. ⁹ Dapat ha sadik ama sinya, is Simon, dogay wagfataka has manga taga Samariya, iglipat maskin. Hanyag fabali kitay hanya kasta fagdogan. ¹⁰ Nyawa ka ha manga kangayanan abwat, hanggan kadwa ha manga kangayanan, fagayo igtalinga hanya. Fagayo iglwang, To fag ama kasta faglwangon in Diyos karigonan, is Marigon. ¹¹ Dogay wa gis hyabi is Simon idwag logak igfatakas taw, kawag lipat. Yakanga fagayo igtalinga wa hanya. ¹² Dapat is Filipi no nabarita kawa han Diyos sakop, hanggan kawa han Kiristo Hisos ngayan, ta katiwala yadi wan, nyawa ama, nyawa ina, hanggan intogna yadi. ¹³ Hanggan was Simon intiwala, hanggan nontogna wan, gofod in Filipi, nyawa haday. Is Simon kataka waglag in Filipi manga fagfalagon madolaw hanggan fatimawa. ¹⁴ Ka manga Fandiya-Barita sas Hirosalim no nadog kitay manga taga Samariya intiwala han Diyos hampang, ta nasogo inda Pidro da Hwan has sakop Samariya. ¹⁵ Ta no nadasog, ta nandarangin yapdi kawa has mangan tiwala sas Samariya, kaarakitay ka Falad Maliyaw fag sas taw yadi, ¹⁶ maskin idya ha akwa, nyawa faktaw, kawa san Hisos kagfon intam it ngayan lamang ta nontogna. ¹⁷ Ginya madi da Pidro da Hwan nafwalid ista manga gamat hasta baba alfoyo kaarakitay ta tomanggap ka Falad Maliyaw. ¹⁸ Is Simon no nalag kitay ka Falad Maliyaw indisag has taw ka manga Fandiya-Barita nogfwalid ista manga gamat hasta baba alfoyo, is Simon iglwang, ¹⁹ Ho manlobos yadi wan. Ho somali wa hayo kaarakitay aho nangos fag kitonya yadi hayo, igdisag ka Falad Maliyaw has taw aho nogfwalid angko gamat hasta baba alfoyo. ²⁰ Is Pidro nasagot, Im kwarta imtahin yadi hyamo imdwat. Maskin haw gayfan in Diyos disag ngandayo fagsaliyon. ²¹ Hadwa ha tanggapon tonya fag bagay. Idwa maangay sa hyamo, kawas Diyos twa kitay hyamo fangayofan dwat yapdi. ²² Haw fag soyo yap, fag darangin hasagfon intam, kaarakitay nomtwa di, hanya faliyam nangos im fagayfanon dwat. ²³ Kawa hoglag haw kaingli wa dahol, bilang magafosan sas ogali dwat. ²⁴ Is Simon iglwang, Ham fag sakop angko igdarangin hasagfon intam kaarakitay kam nafwayong angko manga dwat idwa omakbang hangko. ²⁵ Ginya da Pidro infwali ya has banwa Hirosalim nonsagaya wagbarita hanggan igfaorongan kagfon intam it hampang has fakaaywanan fag manga banwanan sas Samariya. ²⁶ Ginya madin Diyos anghil nasogo in Filipi, nalwang, Haw fag hanya wa dagos has Ihipto baliwa, has dalan has Gasa. Tonyag dalan sas fakahyabogan. ²⁷ Yakangas Filipi hanya wan. No sawas dalan is Filipi nalag sadik ama bating, taga Itiyopya, kagbahala han Kandasi manga botang fagayo, kawas Kandasi ka gorangon ina gis nanya sas sakop Itiyopya. Ka ama bago di goli gis Hirosalim, kawa nanimba ginya. ²⁸ Ka ama masahayan basad kalisa, igbasa in Isayas, in Diyos fangampang nasorat. ²⁹ Ka Falad Maliyaw nafwayong han Filipi, Ha hoyogan wan tonya fag kalisa. ³⁰ Is Filipi nadalandan wa ogbot, naakbang has ama ka masahayan, igdog ka ama igbasa in Isayas, in Diyos fangampang nasorat. Ginya madis Filipi gintaw hanya, Haw aw twa ngagdog kam fagbasaon? ³¹ Ka ama nasagot, Kinda araw aho no tomwa wagdog nodwa hagfwayong angko? Ginyag lwang han Filipi, Haw fag sahay yadi wan, fag is nwa, sangko akbang. ³² To kat fagbasaon gis nanya, No kinday ka topa idwa gawang ta nogtaban has famahatayan, Hanggan no kinday ka anak topa idwa gawang ta noglokfog hanya, Kitonya yadi hanyadwa gawang. ³³ Ta nogfahoriyan hanya, tadwag fadalan hasagtalinga hampangan, ta nafahayan odi hanya, Idwa akwa sokfon Maskin it haboyagan sas baba daga inbol di. ³⁴ Ginya madi ka ama taga Itiyopya naintaw in Filipi kitay no faktaw kan Diyos fangampang faglwangon sat nabasa, ngatay it sadili ngatay iba taw ya kat faglwangon. ³⁵ Ginyat fagbasaon, is Filipi natoltol ka Fiya fag Barita kawa han Hisos. ³⁶ Ta noglahaw yapdi tandasog sas ha danom. Ka amag lwang, Idwa aw fiya haw no mamatogna angko? ³⁷ Is Filipi nasagot, iglwang, Fiya di haw nomtiwala sadi wak dahonya fangayofan. Ka amag sagot, Ahon tiwala wan kitay is Kiristo Hisos in Diyos wa Anak. ³⁸ Ka ama nafatorosan wat kalisa a, ta dowa nadokson wan, hawas basad danom. Is Filipi nafatogna ka ama sinya. ³⁹ Ta no nalahaw gis basad danom, kagfon intam it Falad dagos wa nataban in Filipi. Ginya ka ama idwa nalag domwag in Filipi. Nafadagos wat lahawan, masolong wan. ⁴⁰ Dapat is Filipi indasog sas banwa Asoto. Ginya madi natoltol ka Fiya fag Barita kat nagdalanan banwa fagayo hanggan wandasog sas banwa Sisariya.

¹ Dapat ay is Sawlo igfadagos wagfahoriyan hanggan wagfahatay kagfon intam it manga katogbong. Yakangay hanya naakbang has gorangon fag fagalan, ² nanagad manga sorat famalag has manga fanimbaan Hodyo sas banwa Damasko, kaarakitay faangayan hanya no gomamat nyawa faktat lagan sinya, nyawa ama, nyawa ina, kagfasakop has Ogali Bago. Ginya madi tomaban tonya, magafosan, has Hirosalim. ³ Da Sawlo no kaakbang wa has banwa Damasko, sadi odi ginan nayawa masilaw gim tongod san Sawlo ligongan. ⁴ Yakangas Sawlo inlohob odi. Ginya madi nadog sadik hasnog kampang ha hanya, iglwang, Sawlo, Sawlo, kana mayon haw nogfahoriyan angko? ⁵ Is Sawlo naintaw, Faktaw haw, angko Fon? Ha nasagot hanya, Aho kawas Hisos kam fagfahoriyon. ⁶ Haw fag lindog, fag hawas basad banwa. Haw no hanya, ha bago domog kam bato ibolonon. ⁷ In Sawlo manga ofod idwa gawang gawang. Ta nadog ongay ka hasnog dapat tadwa ha lagan taw. ⁸ Is Sawlo inlindog, mafogan di ongay it mata, dapat idwag lag. Yakanga ta nagamit odi hanya has basad banwa Damasko. ⁹ Tolo wak sirang is Sawlo idwag lag, idwa ha nahwan, idwa nainom. ¹⁰ Yabay, gis nanya, in Hisos katogbong sadi sinya yadis Damasko, kawas Ananiyas. Kagfon intam no nafalag madolaw hanya, nangayan hanya, nalwang, Ananiyas. Is Ananiyas nasagot, Angko Fon, kana tonya? ¹¹ Kagfon intam nafwayong, Haw fag kalindog, haw fag hawas karsada kat ngayan, Maslong, haw intawan sinya in Hodas balay, ligawan in Sawlo, taga Tarso sinya. Katis Sawlo igdarangin wan. ¹² Ha nafalag hanya madolaw. Nalag haw igsakbaw hat oliyanan, ginyag fwalid im gamat ha hanya kaarakitay it mata lomag ya. ¹³ Dapat is Ananiyas iglwang, Angko Fon, gwadi aywan fag manga taw kagfwayong angko kitay tonya fag taw dwat it ibolon fagayo has manga taw kantohoyan ha hyamo sas Hirosalim. ¹⁴ Ginya madi hanya, hono, inbangkad yadi hastay is Damasko, madiyan it kasoratan gis manga fagtahinan fagalan, kaarakitay gomafos fagayo istay kagsyag ha hyamo. ¹⁵ Dapat ay, kagfon intam nafwayong han Ananiyas, Ha ngap fag hanya wan. Maskin hanya kangko nafili kaarakitay igfahilala angko ngayan has manga Hintil, has manga gorangon, hanggan han Israil manga hasokfonan. ¹⁶ Ho fadog hanya fagayo kat bato agwantaon aban maskin galwasi angko. ¹⁷ Ginya madi yabay, is Ananiyas hanya wa ngay. Nasakbaw basad balay, igfwalid it gamat san Sawlo, iglwang, Fadwasay Sawlo, kagfon intam, is Hisos, ka nafalag ha hyamo sas boknga dalan, haw noglahaw hastay, kagsogo angko hastay kaarakitay im mata lomag ya, hanggan ka Maliyaw fag Falad fag sawa hyamo sadi wak dahonya. ¹⁸ Dagos handagdag manga bilang siksik gin Sawlo mata. Ginya hanya nalag ya. Dagos wa nalahaw, nafatogna yadi wan. ¹⁹ Ginya madi yabay, hanya no nangwan ya hanon, inrigon wan. Is Sawlo nadogay yapdi ogbot sas Damasko, gofodan in Hisos manga katogbong sinya. ²⁰ Dagos wagfadog sas manga fanimbaan Hodyo kawa han Hisos, igfaorongan kitay hanyan Diyos wa Anak. ²¹ Fagayo intaka wagdog, taglwang, Bohonwa awkin to ka ama ka dan igfahoriyan has mangag syag han Hisos ngayan sas Hirosalim? Bonwa awkin tonya yadi kanbangkad hastay kaarakitay gomamat tonya fag manga taw, tomaban yadi magafosan has manga fagtahinan fagalan? ²² Dapat kawas Sawlo kabagat wa kafiyaon nogfaadal, ka manga Hodyo ka mabanwanan istay sas Damasko, idwa twag sagot, maskin hanya goronganan wagfatohoyan kitay, is Hisos kan Diyos nga natogon-Famawi. ²³ No dogay ogbot, ka manga Hodyo nangoyonan kitay fahatayan in Sawlo. ²⁴ Dapat is Sawlo nadog wan. Yabi sirang ta golog in Sawlo sas manga sakbawan alad banwa kaarakitay fahatay hanya. ²⁵ Dapat basad yabi it manga katogbong natonton in Sawlo basad baban dahol, has dayo alad bato. ²⁶ Ginya madis Sawlo nondasog sas Hirosalim, gwayan wa kasaya omaktom has manga katogbong sinya. Dapat ta kadala yapdi, tadwa katiwala kitay kati is Sawlo sadi yadik katogbong. ²⁷ Dapat is Barnabi nataban in Sawlo has manga Fandiya-Barita. Is Barnabi nafatwagdog has taw no kinday no sas boknga dalan, is Sawlo nalag kagfon intam, hanggan kagfon intam nahampang hanya. Nalwang yadi kitay is Sawlo no sas Damasko idwa kadala igfaoronganan kawa han Hisos. ²⁸ Ginya yabay is Sawlo gofodan has taw sas Hirosalim, idwa yadi kadalag toltol sinya sat ngayan kagfon intam. ²⁹ Hanyag fatoltolan hanggan igfabodbohagan has manga Hodyo ka kampang fangampangan Girigo. Dapat ta kasaya wagfahatay in Sawlo. ³⁰ Ka manga fadwasay natwa di ngay, ta nataban in Sawlo has lwad, has banwa Sisariya, ginya ta nafaoli mandi hanya has banwa Tarso. ³¹ Ginya madi yabay, sa sadi wak dahonya sakop Hodiya, sakop Galiliya, hanggan sakop Samariya, idwa hagfahoriyan in Diyos Tifonan. Kawa ta katanog kagfon intam it manga togon, ka mangan tiwala inrigon ya, inaywan ya, hanggan igfadagos yapdi kaayo kawa ka Maliyaw fag Falad igtogbong yadi. ³² Is Pidro noglahaw igsabang has manga fadwasay sas ligongan, indasog has lwad, igsabang has mangan tiwala sas banwa Lida. ³³ Sinyas Pidro nalag sadik ama, is Iniyas, idwa syagan kimot, walok fangaraw maigyanan odi. ³⁴ Is Pidro iglwang hanya, Iniyas, is Kiristo Hisos kagfafiya hyamo. Ha fag lindog wan, fafiyanan yap im sagmak. Hanyan lindog wa dagos. ³⁵ Fagayo ka sas banwa Lida hanggan sas banwa Saron nalag is Iniyas nonfiya, yakanga tantiwala hasagfon intam. ³⁶ Sas banwa Hopi man ha sadik ina in Hisos katogbong, is Tabita, fagaba wa gibolon fiya, igtogbong has manga myabog. In Tabita ngayan sas fangampangan Girigo, is Dorkas. ³⁷ Gis nanya fag manga masohod, is Dorkas insagit, natay wan. Ta no nafyad it habilogan, ta nafwalid sas tongod fag salogan. ³⁸ Ka banwa Lida akbang di has banwa Hopi, yakanga manga katogbong no nadog kitay is Pidro sadis Lida mangharaw, ta nasogo dowak ama fanabang hanya, iglwang, Sabangan nangos hyami, fag ngalay wan. ³⁹ Is Pidro naofod wa ka dowak ama. Nondasog sinya, ta nafasakbaw wa dagos in Pidro has tongod fag salogan. Ka manga ina balo fagayo goraw yapdi, gobok in Pidro. Ta nafalag in Pidro manga homot, manga balokas in Dorkas nahalig, hanya no boyagan yapdi. ⁴⁰ Dapat is Pidro nafadokson yap fagayo. Ginya nanlingkohodan, nandarangin. Ginya madi nasayango has natay, iglwang, Tabita, ha fakabangon wan. Ginya in Dorkas mata infoga ya. No nalag in Pidro, intokaw wan. ⁴¹ Is Pidro natawid it gamat, natogbong igfalindog. Ginya madis Pidro nafatawag ka mangan tiwala hanggan ka manga ina balo. Nafalag is taw kitay is Dorkas boyagan ya. ⁴² Indog wan ha sadik dahonya sas banwa Hopi. Yakanga aywan kantiwala hasagfon intam. ⁴³ Is Pidro nandogayan yapdi sas Hopi sat sangay Simon balay kagfafiyan anit baka fakaligon.

¹ Sas banwa Sisariya ha sadik ama, is Kornilyo, sadik fagtahinan sondalo taga Roma. It sakop habanan sondalo sadik daan gis sakop Italya. ² Is Kornilyo igsimba han Diyos hanggan katanog yadit manga togon. It manga ofod sas balay kitonya yadi. Is Kornilyo fagabag togbong has manga Hodyo myabog. Fagaba yadig darangin han Diyos. ³ Sadi ginan, dayo myanit kalibaba, is Kornilyo ha lagan madolaw, nalag fiya fiya in Diyos anghil sadi igsakbaw hat basad balay, igngayan hanya, iglwang, Kornilyo. ⁴ Is Kornilyo nadoro wa fiya fiya ka anghil kawa kadala wa dahol dahol, ginyag sagot, Kana tonya? Ka anghil iglwang, Is Diyos igdog im manga darangin hanggan iglag hyamo togbong has manga myabog, yakanga hanyag tohod hyamo. ⁵ Yabay, sogowan manga taw has banwa Hopi kati, kaarakitay tomaban hastay sadik ama, is Simon, kawasta faglwangon is Pidro. ⁶ Hanya maoliyanan sas bahalan dagat, sat sangay Simon balay kagfafiyan manga anit baka fakaligon. ⁷ Ka anghil nonlahaw, is Kornilyo natawag dowak sogowan hanggan sadik sondalo, ka katanog yadin Diyos manga togon, ka maofodan fagaba hanya. ⁸ Is Kornilyo no nafwayong hat manga sogowan it lagan fagayo, nasogo was taw has banwa Hopi. ⁹ No bago marom, in Kornilyo sogowan no kaakbang has Hopi, no kaboknga wa sirang, is Pidro nafanyak has baba balay kaarakitay mandarangin sinya. ¹⁰ Is Pidro kalonos wa dahol dahol gis nanya, dapat ta nogfatalaga yapdi fanganon, is Diyos nafalag madolaw han Pidro. ¹¹ Hanya nalag kitay, ka banwa maboklasan, hanggan bilang homot dahol katonton gis tongod, matagbongan gis ofat ik fongfongan. ¹² Fagayo fag manga hayopan sinya wan basad homot, ka mangag lahaw hanggan ka manga gilafang sas baba daga, hanggan ka manga manok kaglayog sas tongod. ¹³ Is Pidro ha donggon hasnog kaglwang kitay, Pidro, ha fag lindog wan, ha fag fahatay a, fakwan wan. ¹⁴ Is Pidro igsagot, Angko Fon, no ngayan di aho, hodwa mananog tonya. Nyawa ginahin hodya ha nahwan no kadintam fagbaybayon. ¹⁵ Ginyas Pidro nadog ya domwag ka hasnog iglwang kitay, Haw fag idwag ngayan fagbaybayon kan Diyos manga nafabali maangay. ¹⁶ Tolo ginan naolit kitonya. Ginya madi ka bilang homot in-abwat has tongod. ¹⁷ Is Pidro no garisipon yapdi no kanat kahologan it lagan, in Kornilyo manga sogowan, no natwa wan in Simon balay, naakbang has sakbawan a, ¹⁸ igtawag kitay, ngatay is Simon Pidro sinya no goli. ¹⁹ Is Pidro no garisipon garisipon yapdit manga lagan, in Diyos Falad nafwayong hanya kitay, Yabay, tolok ama igsayak hyamo. ²⁰ Ha fag dokson wan, fag idwa kafang gofod is taw, maskin aho ka nasogo tonya hastay. ²¹ Yakangas Pidro nadokson wan, iglwang has taw, Aho ka hayo fagligawon. Kana hayo bolon? ²² Tagsagot kitay, Sadik fagtahinan sondalo Roma, is Kornilyo, ka nasogo hyami hastay. Is Kornilyo fiya fag taw, katanog yadin Diyos. Sadi wak layonan manga Hodyo fagayo iggalang hanya. Sadik anghil maliyaw kagfwayong han Kornilyo, Fasonsonan manga taw han Pidro kaarakitay ham domog it fwayong. ²³ Is Pidro nafasakbaw ka manga ama, nafatoyog sinya gis nanya fag yabi. No marom marom, da Pidro natahin yadi was taw, hanggan manga fadwasay tiba gis banwa Hopi naofod yadi hanya. ²⁴ No domwag sirang, ta nadasog wan has banwa Sisariya. Da Kornilyo hanggan it manga kaiban, hanggan it manga fakilalaon fiya fiya, kat nasabang, sinya wak matifonan, mafanayan is taw. ²⁵ Da Pidro no kadasog, is Kornilyo natagbo was taw, nanlingkohodan yapdi han Pidro, iglohod hanya. ²⁶ Dapat is Pidro igfalindog hanya, iglwang, Ha fag lindog. Aho taw di kito yadi hyamo. ²⁷ Tagfadagos wagtoltolan hanggan wa ha basad balay. Is Pidro iglag taw kaaywanon matifonan sinya. ²⁸ Is Pidrog fwayong, Ham fadi wadagdog ka manga ogali Hodyo igbando, fag idwa gofod ngadig sabang has manga bonwa Hodyo. Dapat is Diyos nafatohoyan angko kitay, aho fag idwag lwang nyawa faktaw fagbaybayon. ²⁹ Yakanga ham no nafasabang angko, hodwa kafang hastay ha hayo. Kati ho kasaya domog no kana ka hayo fagsabangon angko. ³⁰ Ginya madis Kornilyo igsagot, Manga ofat ik yabi itfagonan, dayo myanit kalibaba, kito ka kati, ahog darangin istay sangko balay. Yabay, sadi wa ginan sadik ama, it solong masilaw wan, nalindog sangko atobangan, ³¹ iglwang, Kornilyo, is Diyos igdog im manga darangin, igbaya yadig lag hyamo manga natogbong. ³² Ha fasabangan in Simon Pidro sas banwa Hopi, hanya maoliyanan sat sangay Simon balay, sas gobang dagat, ka Simon kagfafiyan anit baka fakaligon. ³³ Yakanga ho nasogo wa dagos ha hyamo. Salamat, ha ngap inbangkad wa ngay. Kati mi fagayo istay wan matifonan san Diyos faglagan kaarakitay tomalinga hyamo, haw nogtoltol ha hyami kagfon intam it fwayongon. ³⁴ Ginyas Pidro igfwayong kitay, Ho bago di natwa fiya fiya kitay is Diyos idwa ha fagfiliyon taw, mangharaw. ³⁵ Ka manga katanog hanya hanggan gogali yadi fiya, maangay han Diyos nyawa ginda fag layonan taw. ³⁶ Ham nadog in Diyos natogon hampang has manga taga Israil nogfadog ka Fiya fag Barita no kinday tam noglag kahowayan nomsadi san Kiristo Hisos, hanya kagfon fagayo fagayo. ³⁷ Ham natwa wan no kana kan-anod sas sakop Hodiya sadi wak dahonya, gis Galiliya tonya no nafabago, giwan Hwan igfaadal hasagfatogna baliwa. ³⁸ Ham twa wan no kinday is Diyos nafatohoyan kitay is Hisos taga Nasarit ngay it natogon Famawi, maskin nadisag hanyat Falad Maliyaw, hanggan it kadonongan. Maskin is Diyos sawa hanya, it manga naibolon kafiyaon. Hanya, nyawa hadak nalahaw, nafafiya fagayo kan Fandaya nafahoriyan. ³⁹ Hyami wa mata lagan it manga naibolon fagayo sas fakadaholan banwanan Hodyo hanggan sas banwa Hirosalim. Ta nafapako di ngap hanya, nafasakbit sas nafatimbangan hayo. ⁴⁰ Dapat ay, sas fatolo fag sirang, is Diyos nafaboyag ya hanya, ginya nafalag hanya has taw, ⁴¹ idya has fakaaywanan, hayapdi hyami kan Diyos manga nafili gis hyabi, kaarakitay hami faorongan hyami mata lagan. Ha hyami is Hisos nogsayowan kwan, manga ginom, hanya nonboyag ya domwag. ⁴² Is Diyos natogon ha hyami kitay mi fag tomoltol hanggan fag faorongan kawas Hisos kan Diyos nafatalaga ka fangabaya has manga taw, nyawa ka manga boyagan yapdi, nyawa ka natay hyabi. ⁴³ Tonya wa kan Diyos manga fangampang faglwangon fagayo kitay, nyawa faktaw kamtiwala hanya, imliyam it manga naogali dwat, ta nogsyag in Hisos ngayan. ⁴⁴ Is Pidro idya katabo kampang, ka Maliyaw fag Falad dagos wa nadokson has fagayo kagtalinga hanya. ⁴⁵ Kan Pidro manga taban Hodyo ka danwan tiwala, indolaw wan ta no nalag ka Falad Maliyaw inlobos yadi has manga Hintil. ⁴⁶ Tagdog yadi ka manga Hintil kampang manga sanglitan madolaw, hanggan igfasayagdog han Diyos. Yakangas Pidro iglwang, ⁴⁷ Kito yadintam ka Maliyaw fag Falad inlobos yadi has taw. Fakta fag taw nangos, ham gayfan, ka bomando kaarakitay to fag manga taw idwam togna? ⁴⁸ Ginyas Pidro nalwang, Fatognaan wan to fag manga taw san Kiristo Hisos ngayan. Ginya madi taglwang kitay is Pidro nangos fag domogay yapdi sinya no kayodak yabi.

¹ Yakanga ka manga Fandiya-Barita hanggan ka manga fadwasay sas sakop Hodiya nadog kitay ha manga Hintil katiwala yadi wa han Diyos hampang. ² Ginya da Pidro no nalahaw has bohid, has Hirosalim, ka manga fadwasay ka mahogod yapdi has ogali Hodyo, nangato in Pidro. ³ Taglwang ha hanya, Kana haw no mailihodan yadi has nwa fag manga Hintil kadwan toli? Hagsayo yadi was taw ta no kwan. ⁴ Dapat is Pidro natoltol has taw gis fabagowanan kat lagan fagayo. ⁵ Is Pidro igfwayong kitay, Itfagonan, aho no sas banwa Hopi, aho ha lagan madolaw gin Diyos. Aho nogdarangin, kangko lagan bilang wa kitos sadik homot dahol, matagbongan, intonton gis tongod hangko akbang. ⁶ Ho nabantay wa fiya fiya. Hoglag sinya ha akwa wan fagayo fagayo fag manga hayopan kaglahaw, hanggan ka gilafang sas baba daga, idwa ha yod, hanggan ka manga manok kaglayog sam tongod. ⁷ Ginya madi ho nadog sadik hasnog iglwang kitay, Kalibang Pidro, fag fahatay wa a, fakwan wan. ⁸ Dapat hoglwang, Angko Fon, nyawa kindawan hodwa kasaya. Ngadi sadi ginan hodwa ha nahwan kantam manga fagbaybayon. ⁹ Ginya ho nadog ya domwag ka hasnog gim tongod iglwang kitay, Fag idwag lwang fagbaybayon kan Diyos nafabali maangay. ¹⁰ Ka bilang wa homot tolo ginan intonton. Yakangan fwali ya ham tongod. ¹¹ Gis nanya fag kasohodan fiya fiya, tolok ama kasta nasogo hangko gis banwa Sisariya indasog sangko fagoliyanan fag balay. ¹² Ka Maliyaw fag Falad nalwang hangko, Haw fag idwag fadogayon, tahinan wastaw. To fag onom ik fadwasay natahin yadi wangko. Ginya madi mi nasakbaw han Kornilyo basad balay. ¹³ Is Kornilyo nafwayong yadi ha hyami kitay, itfagonan hanya nalag in Diyos anghil sadi malindogan sat basad balay, igfwayong hanya, Haw sogowan manga taw has banwa Hopi, fasabangan in Simon Pidro. ¹⁴ Hanya fomwayong ha hyamo no kinday haw, hanggan sadi wak kayonya sam balay, nombawi. ¹⁵ Ginya madi, araw, hogfabago wa ongay igtoltol. Ka Maliyaw fag Falad dagos wa nadokson has manga taw, kito yadi nogdokson hyabi hantam. ¹⁶ Ho natohod yadi kantam Fon fwayong kitay, Sas danom is Hwan nogfatogna manga taw, dapat ay, sas Maliyaw fag Falad ham nomtogna aban. ¹⁷ Is Diyos nogdisag yadi has taw kito yadi kat nadisag hantam hyabi, tam nontiwala hantam Fon is Kiristo Hisos, faktaw aho, ham gayfan, kaarakitay bomando in Diyos ibolon? ¹⁸ Yabay, ta nadog di ngay kitonya, ta dagos wantohas gidolog in Pidro. Yabay, tagfasaya yadi wagdog han Diyos. Taglwang, No kitonya mangharaw, is Diyos igdisag has manga Hintil kitay, ta fag somoyo yadi kaarakitay imbawi wan. ¹⁹ Giwasta nafahatay in Istiban, ha mangag fahoriyan ka mangam tiwala, yakanga ta nanarowayan wan. Tiban dasog has sakop Finisya, tiba has foyo dagat Sipri, tiba has banwa Antiyokya sas sakop Siriya. Ta nabarita in Diyos hampang nyawa siday kandasog, dapat has manga Hodyo lamang. ²⁰ Ginya madi ha mangam tiwala, manga taga banwa Sirini sas foyo dagat Sipri, indasog has Antiyokya. Ta nogfaadal, ha yadis manga Girigo ka Fiya fag Barita kawa han Hisos intam Fon. ²¹ Intam Fon karigonan sawas taw. Yakanga kaaywanon wan kantiwala, igsyag hantam Fon. ²² Ginya madin Diyos Tifonan sas Hirosalim, no nadog kitonya, nasogo in Birnabi has banwa Antiyokya. ²³ Is Birnabi nondasog sinya, nabaya waglag kitay in Diyos kafiyan sawas taw. Kawas Birnabi fiya fag taw, hanggan ka Falad Maliyaw sawa hanya sadi wak dahonya, marigon yadi nogsyag hantam Fon, yakanga natogon has taw kitay, ta fag fadagos orongan hantam Fon, ta fag idwag fagomon. Ka manga taw kantiwala sinya in-aywan wan. ²⁵ Ginya madi yabay, is Birnabi hawas banwa Tarso, igsayak in Sawlo. ²⁶ No nalag in Sawlo, nafaofod hanya has banwa Antiyokya. Bog-os wa sik fangaraw ta no gofodan han Diyos Tifonan sinya, igfaadal has fakaaywanan. Sinya sas banwa Antiyokya ka manga taw no nafabago nangayan in Diyos manga katogbong, In Kiristo fag manga taw. ²⁷ Gis nanya fag masohod ha akwa yadin Diyos manga fangampang indasog gis Hirosalim has banwa Antiyokya. ²⁸ Insadi is Agabo. Kawa ka Falad Maliyaw karigonan sa hanya, hanya danwa nafatagak has taw kitay sadi wak baba daga aban imlonos. Tonya fag lonos in-anod ngay in Kalawdiyo fag kasohodan gorangon sas sakop Roma sadi wak dahonya. ²⁹ In Hisos manga katogbong nagkasadiyan ta fadiya togbong has manga fadwasay ka mabanwanan sas Hodiya no daho day kasta fagsyaganon. ³⁰ Kitonya wa nga kan-anod. Da Birnabi da Sawlo nadiya wasta manga togbong has manga fagtahinan Tifonan sas banwa Hirosalim.

¹ Gis nanya fag manga masohod, is Hirodis, ka gorangon sas sakop Hodiya, nafagamat is taw tiba san Diyos Tifonan kaarakitay fahoriyan wan. ² Hanya nafalifong in Santyago liyog, in Hwan fadwasay fag Santyago. ³ Ginya madi, is Hirodis no natwa kitay manga Hodyo igbayat naibolon, nadagos nasogo manga sondalo kaarakitay gomamat man in Pidro. Gis nanya fag masohod, ka manga Hodyo igtohod ka Fanohodan Tinapay Mayangfis. ⁴ Ta no nagamat in Pidro ta nafaporiso hanya. Ofat ik layonan sondalo igtarobosan igbantay hanya, myasa ofat sa sadik layonan. In Hirodis fangayofan fabangkad in Pidro has fakaaywanan taw kaarakitay mangampangan nonsagaya wa ka Fanohodan Nagsagayan. ⁵ Yakanga ha manga sondalo igbantay yapdin Pidro basad porisowan, dapat ay, in Diyos Tifonan dagos wagdarangin mahogod han Diyos kawa hanya. ⁶ Ginya madi, kati wa fag basad yabi kitay, nomsirang araw is Hirodis nangos fabangkad in Pidro has hampangan, is Pidro matoyogan, it gamat matarabingan tarikada has sondalo baliw baliw. Ha akwa yadi manga sondalo matanodan dayo sakbawan porisowan. ⁷ Sadi odi ginan in Diyos anghil inlag sinya, nayawa fiya fiya basad lingoban ogbot ogbot. Ka anghil natingfi in Pidro tagyangan nafafolaw hanya, ginyag lwang, Kalibang, ha fag kabangon wan. Ka manga tarikada inlohas wan gin Pidro gamat. ⁸ Ginya ka anghil iglwang, Fag fafiyowan im rotay, solongan im lapak. Ginyas Pidro intanog wan. Ka anghil nafwayong ya domwag, Fag solong wam rotay aba, ginya ha fag tahin wangko. ⁹ Is Pidro nadokson wan gis porisowan, naoyan ka anghil, dapat idya twa ngatay orongan ha anghil igfangolo hanya, gayfan hanya ngandig tagimfan. ¹⁰ Ta nontolas manga dowak layonan sondalo kagbantay sinya, tandasog has fanahop baol sas sakbawan aladan has sokayan. Ka fanahop inboklas wa kitonya, yakanga ta nadokson wan. Ta no nadalan ha sadik karsada, ka anghil inliyam wa dagos. ¹¹ Ginya madis Pidro natwa wa kitay bonwa tagimfan. Yakangag lwang, Ya mangharaw, orongan wan angko nadalanan. Is Diyos nasogot anghil kaarakitay bomawi angko gin Hirodis hanggan gis manga mahori ka manga Hodyo bato ibolonon hangko. ¹² Is Pidro no naayfan fiya fiya, hawan Mariya balay, kan Hwan ina, ka Hwan kasta fagngayanon yadi is Markos. Kaaywanon fag manga fadwasay sinya matifonan igdarangin. ¹³ Is Pidro no nataraktak sas fanahop sakbawan, sadik sogowan dayaga, is Roda, nabantay no faktaw kagtaraktak. ¹⁴ Is Roda nahilala wa kitay, is Pidro mangharaw ka kampang sinya. Kawas Rodag baya wa dahol, idya naboklas ka sakbawan, nadalandan yapdi has basad balay, iglwang kitay, Is Pidro is nwa wan, dayo balay. ¹⁵ Taglwang has dayaga, Ha ngandi kapaong. Dapat ka dayaga garonganon igfwayong, Sinya wan. Yakanga taglwang, Ngandayo in Pidro odi falad tonya. ¹⁶ Dapat is Pidro mahogod wagtaraktak yapdi sas dayo balay. Ta no naboklas wa ka sakbawan, taglag is Pidro wa ngay, yakanga tandolaw wan. ¹⁷ Dapat is Pidro igfaaman kitay, Ham ha gawang gawang. Ginya madis Pidro natoltol is taw no kinday is Diyos nafalfas hanya gis porisowan, nalwang, Fwayongan han Santyago hanggan hantam manga fadwasay tiba. Ginyas Pidro nalahaw wan, hawas iba banwanan. ¹⁸ Nonsirang, ka manga sondalo di kahodhoriyan wan. Ta garintawan kitay no hadawas Pidro? ¹⁹ Is Hirodis nafasayak it manga sondalo in Pidro, dapat tadwa ha lagan. Yakanga ta naintaw fiya fiya ka manga bantay. Ginyas Hirodis nafasognod kitay fahatayan wan ka manga bantay poriso. Ginya madis Hirodis nalahaw wan, hawas lwad has banwa Sisariya, nandogayan sinya. ²⁰ Gi yapdis fagonan, is Hirodis dogay wa kaisog has manga taga banwa Tiro, manga taga banwa Sidon. Yakanga tansadi wat fangayofan kitay ta omakbang han Hirodis kaarakitay imfafiyowan ya. Ta nahampang han Balasto kagbahala in Hirodis balay kitay, Ofodan nangos hyami han Hirodis kaarakitay mimfafiyowan ya, maskin ka manga taga Tiro hanggan taga Sidon nogbol it manga fanganon, gin Hirodis baba daga. ²¹ Nondasog ista togonan fag sirang, is Hirodis nasolong it rotay, kalag wa kitay ha kangayanan, ginya natokaw sat tokawan fanokawan gorangon a, natoltol has taw fiya wa donggon. ²² Manga taw igharokyawan wan, taglwang, Bilang wa sadik diyos ka kampang ti, bilang nangos bonwa taw. ²³ Gis nanya yadi in Diyos anghil dagos wa nafaiktan in Hirodis, maskin hanyag fahap in Diyos kangayanan. Hanya naolodan a, hanggan wa natay. ²⁴ Dapat ay, in Diyos hampang inlangba sasta manga basad fangayofan, hanggan wa naskat sadi wak dahonya banwanan. ²⁵ Nontabot ibolon sas Hirosalim, da Birnabi da Sawlo nwali wan has banwa Antiyokya. Ta nafaofod yadin Hwan, kasta fagngayanon is Markos.

¹ Gis nanya fag manga masohod ha akwa in Diyos manga fangampang hanggan mangag faadal san Diyos Tifonan sas banwa Antiyokya sas sakop Siriya. Ka mangan aktom sinya da Birnabi, da Simyon kasta fagngayanon is Nigro, da Losyo taga banwa Sirini, da Sawlo, da Manain. Da Manain da Hirodis, ka gorangon sas Hodiya, no anahan yapdi, fagaba gofodan hyabi. ² Ka Tifonan nogfasayagdog in Diyos, hanggan idwa kwan hanon kaarakitay mandarangin, ka Falad Maliyaw nafwayong has taw, Fabokodan inda Birnabi da Sawlo hangko, kaarakitay ta fatonglos ka ibolonon kangko nafatohoyan ha hanya. ³ Ginya madi, tadya nangwan hanon a, nandarangin mahogod, ginya nafwalid it manga gamat has dowak ama baba alfoyo, ginya ta nafalahaw inda Birnabi da Sawlo kaarakitay mamarita has manga taw. ⁴ Yakanga ka Falad Maliyaw igsogo inda Birnabi da Sawlo kaarakitay mamarita. Tandasog has lwad has banwa Salosya sas gobang dagat. Ginya ta nasahay baba dagat hawas foyo dagat Sipri. ⁵ Nondasog has banwa Salamina sinya, ta natoltol in Diyos hampang sas manga fanimbaan Hodyo. Is Hwan Markos ista ofod, inda Barnabi katogbong. ⁶ Ta nadagos wa nalahaw gi sadik gobang dagat has banwa Papos sas bali fongfongan daga. Ta nalag sinya sadik ama Hodyo, is Bar Hisos, ka lipatan lipatan. Hanya sadik Hodyo kagfaniring kitay hanya in Diyos fangampang. ⁷ Is Bar Hisos in Sirgiyo Pawlo ka gobirnador fakilalaon. Is Sirgiyo Pawlo sadik taw fiya it isip. Hanya nafatawag inda Birnabi da Sawlo maskin kasayagdog in Diyos hampang. ⁸ Dapat ka lipatan lipatan, is Ilimas it ngayan sas fangampangan Girigo, igbando di ka Gobirnador kaarakitay idwam tiwala. ⁹ Dapat is Sawlo, kasta nangayan yadis Pablo, kawa ka Maliyaw fag Falad sawa hanya sadi wak dahonya, igsinayan wat mata han Ilimas, ginyag lwang, ¹⁰ Haw in Fandaya odi anak. Haw iglaban ka fiya fagayo. Sonson wa dwat, madaya ya ngadim manga ibolon. Kana mayon haw no fagabag fabarikwang ka fakaoronganan kawa han Diyos? ¹¹ Lag ngay, kati araw, fadosa wa hyamo. Is Diyos fabota wa hyamo mata, dogay hadwa lomag ka yawa myanit. Is Ilimas dagos wa nadog bilang wa ha sadik linyabo masding nataklob it mata. Iglahaw gayohapan odig ligaw no faktaw ka gomamithanya. ¹² Ka Gobirnador no nalag kitay is Ilimas inbota wan, hanyan tiwala wa han Diyos, hanggan indolaw wagdog ta nogfaadal kagfon intam it barita. ¹³ Ginya madi da Pablo nasahay has baba dagat, in-ginan gis banwa Papos. Tandasog has banwa Pirgi, sakop Fanfilya. Dapat is Hwan Markos naobon is taw, nwali has Hirosalim. ¹⁴ Da Pablo da Birnabi nafadagos it lahawan hanggan wandasog has banwa Antiyokya, sakop Pisidya. Ka Sirang Kafahowayan nondasog, da Pablo nasakbaw has basad fanimbaan Hodyo, intokaw wan. ¹⁵ Ka manga Hodyo no namasa gin Mwisis manga togon hanggan gin Diyos manga fangampang sorat, ka mangag bahala sas tifonan Hodyo sas fanimbaan, iglwang handa Pablo, Manga fadwasay, ham no ha bato fwayongon has manga taw, fag fwayong wan. ¹⁶ Ginyas Pablo nalindog, nafaaman is taw kitay ta fag idya gawang. Ginya nalwang, Ham in Israil manga hasokfonan, hanggan ka manga Hintil istay kagsimba yadi han Diyos, ham fag matalingan fiya fiya. ¹⁷ Is Diyos, kantam tifonan Israil fagsimbaon, ka danwa nafili intam manga hafofowan. Ta no sayapdis sakop Ihipto is Diyos nafabali intam manga hafofowan sadik layonan taw kaaywanon. Ginya madi, maskin marigon wa dahol dahol is Diyos, hanya nafalahaw is taw gis Ihipto. ¹⁸ Nyawadwa fiya bangan ista ogali, is Diyos naagwanta naano yapdis taw ofat ik safolok fangaraw ta no basad fakahyabogan. ¹⁹ Ginya madi, is Diyos nontabo wagfadwat ka fitok layonan taw sas Kanaan, hanya nadisag man hantam manga hafofowan ista banwanan. Gi wasta nalin has Ihipto, ²⁰ hanggan ta no nwali ya has sakop Kanaan hanggan nadaog it manga kalaban, gamtanan 450 fangaraw it kadogayan. Ginya madis Diyos nadisag ka manga fangabaya has taw balin Diyos fangampang is Samwil. ²¹ Ginya madi intam manga hafofowan no nasagad gorangon gin Samwil, is Diyos nafaangay kitay fag is Sawlo, in Kis anak, in Binhamin hasokfonan, kambali ista gorangon ofat ik safolok fangaraw. ²² Is Diyos no nabol in Sawlo kangayanan, nafabali man in Dabid ista gorangon. Kiti in Diyos faorongan kawa han Dabid. Is Diyos iglwang, Hogbaya waglag in Dabid, in Hisi anak ogali. Talaga wamtanog angko manga kafangayofanan fagayo. ²³ Ginya madi, gi yadin Dabid hasokfonan, is Diyos nadisag han Israil hasokfonan kat natogon-Famawi, kawas Hisos. ²⁴ Is Hisos nodyag toltol has taw, is Hwan namarita sadik dahonya banwanan Israil kitay, ta fag somoyo wan, fag dayo ista manga ogali dwat, ginya fag fatogna wan. ²⁵ Is Hwan no kaakbang wa katabo igbarita, naintaw has taw, Faktaw aho, ham gayfan? Bonwa aho kan Diyos-natogon-Famawi, dapat ha kadasog wan ka omoyan sangko ginanan. Ho kaya ngadig lohas it famaganit lapak. ²⁶ Angko manga fadwasay, kan Abraham yadi hasokfonan, hanggan manga Hintil kagsimba han Diyos, hawantam kandiya to fag barita no kinday tam nombawi. ²⁷ Ka manga taga Hirosalim, hanggan ista manga fagtahinan, idwa natwa nadog kitay hanya wa ka Famawi. Tadwa natwa wagdog kan Diyos manga fangampang nafwayong gona, kasta fagbasaon fagayo fag Sirang Kafahowayan. Dapat taw mandi ka nafatonglos it nabasa no nafatohoyan kitay fahatayan in Hisos. ²⁸ Nyawa kasta fagsombongon idya fiya fahatayon, ta nasagad wa ngap gin Pilato kitay fahatayan wan in Hisos. ²⁹ Ta no nafatonglos wa fagayo fag manga bagay kansorat sas Kasoratan kawa han Hisos, ta nabol wat habilogan gis nafatimbangan hayo a, nafwalid basad lohib. ³⁰ Dapat ay, is Diyos nafaboyag ya domwag hanya. ³¹ Ginya madi, aywan fag manga sirang is Hisos nafalag yapdit sadili hat manga ofod ka naofod hanya itfagonan hanya noglahaw gis sakop Galiliya, hawas banwa Hirosalim. Tonya fag manga taw kagfaorongan kati has manga taga Israil. ³² Kati mistay wan kaarakitay fomwayong ha hayo ka Fiya fag Barita in Diyos natogon hantam manga hafofowan, ³³ kan Diyos nafatonglos hantam no nafaboyag ya in Hisos, kito kansorat sas fadowa fag ambahan, Haw angko wa anak, Aho im Ama. ³⁴ Kawas Diyos nafaboyag ya domwag hanya kaarakitay idwam dasog kaboyok, is Diyos iglwang kitay, Ho domisag ha hyamo ka maliyaw fag manga kafiyan Kangko nafatohoyan han Dabid. ³⁵ Nafwayong yadi sas iba fag ambahan, Hadwag faangay kitay is Maliyaw imboyok. ³⁶ Kawas Dabid nontabo wa gibolon in Diyos fakasayaon hyabi, kat manga kasohodan no boyagan yapdi, hanya natay wan, inlobgob sat manga magorang akbang, it habilogan inboyok wan. ³⁷ Dapat kan Diyos nafaboyag ya idwan boyok. ³⁸ Manga fadwasay, ham fag twagdog kitay, kati nabarita wa ha hayo kitay, giwan Hisos naagwanta, intam manga naogali dwat imliyam wan, ³⁹ hanggan gi wa hanya fagayo kagsyag hanya, intam manga naogali dwat imliyam wan, nyawa hyabi tam idwa syagan igfaliyam no katanog in Mwisis togon. ⁴⁰ Yakanga ham fag matagahan kaarakitay idwa hamlag sa hayo kito kan Diyos manga fangampang nafwayong kitay, ⁴¹ Ham ka mangag yod, lag ngay, Ham imdolaw wa aban, ham hawas fadosaan. Aho omibolon sadik madolaw fag bagay ham nostay yapdi, Nyawa kindawan ham idwa katiwala, nyawa tagtoltol wa hayo. ⁴² Da Pablo da Birnabi, no kadokson wa gis fanimbaan Hodyo, ka manga taw nafwayong kitay, Ham aban fanoltol ya to fag manga bagay sas domwag fag Sirang Kafahowayan. ⁴³ Ta nontabo wagtoltolan, aywan fag manga Hodyo orongan, hanggan manga Hintil kanbali manga Hodyo, natahin wanda Pablo da Birnabi. Da Pablo natoltol has taw nafwayong, Fag fadagos gogali ka maangay han Diyos malooy fag kahowayan. ⁴⁴ No domwag wa Sirang Kafahowayan, fagayo fag manga taw sinya fag banwa nanifonan kaarakitay domog in Diyos hampang. ⁴⁵ Dapat ka manga fagtahinan Hodyo kaingli waglag inda Pablo nogtoltol, maskin kaaywanon fag manga taw katiwala wan. Yakanga ta nafabohag wan, hanggan nafadwat igdog in Pablo. ⁴⁶ Dapat da Pablo da Birnabi nafwayong marigon, Ka fiya hami fag fomwayong yap in Diyos hampang ha hayo manga Hodyo. Dapat kawa ham nadayo in Diyos hampang, ham kagfatohoyan kitay ham idwa maangay has haboyagan idwa ha katabowanan. Gis kati ginan mi aba hawas manga Hintil no bomarita. ⁴⁷ Kito kagfon intam nogfasognod ha hyami kitay, Ho nafatohoyan hyamo bilang salong has manga Hintil Kaarakitay bomarita ka Famawi hanggan has kafongfonganan daga. ⁴⁸ Ka manga Hintil kabaya wagdog inda Pablo nafwayong, igfasayagdog kagfon intam it hampang. In Diyos manga nafatohoyan has haboyagan idwa ha katabowanan, intiwala wan. ⁴⁹ Ginya madi kagfon intam it hampang naskat wa sinya, sadi wak dahonya banwanan. ⁵⁰ Dapat ay, ka manga fagtahinan Hodyo nafasognod has manga ina masimbaon han Diyos, kasta manga fakilalaon sas banwa, hanggan ista manga fagtahinan fag manga ama kitay, ta fag fahoriyan inda Pablo da Birnabi. Ta nasogo wa ginya fag banwanan. ⁵¹ Ginya madi ka dowak ama nafadagdag ka fogis daga gista manga bitis, bilang igfalag kitay ka taga sinyag dayo in Hisos, ginya hawas banwa Ikonyo. ⁵² Dapat ay, in Hisos manga katogbong sas banwa Antiyokya, sakop Pisidya, kasolong wa dahol dahol, hanggan ka Maliyaw fag Falad sawas taw sadi wak dahonya.

¹ Kitonya yadi kasta naibolon sas banwa Ikonyo. Da Pablo da Birnabi nasakbaw has basad fanimbaan Hodyo, kafiyaon kadog ta nogbarita. Yakanga aywan fag manga Hodyo hanggan Girigo kantiwala. ² Dapat ka manga Hodyo ka dayo katiwala, nafasognod ka manga Hintil, nafadwat igdog yadi kaarakitay ta domayo ka mangam tiwala. ³ Da Pablo da Birnabi nadogay ogbot sinya, igtoltol marigon has taw kawa hantam Fon baliwa. Intam Fon nafaanod yadi kitay orongan kasta nafwayong kawa hat kahowayan. Nafasyagan yadinda Pablo da Birnabi gibolon manga falagon madolaw. ⁴ Dapat ka manga taw inbali dowak layonan sinya fag banwa. Ka sadik layonan balis manga Hodyo, ka sadi balinda Pablo. ⁵ Ginya madi ka manga Hintil, manga Hodyo tiba, hanggan ista manga fagtahinan insadi kitay, ta mamahoriyan ka manga Fandiya-Barita hanggan wa bomintok. ⁶ Dapat ka manga Fandiya-Barita nadog di ngay, ta nalibya wa dagos has banwa Listra hanggan has banwa Darbi, sas sakop Likaonya, hanggan sas manga ligongan. ⁷ Ta nafaadal yadi sinya ka Fiya fag Barita. ⁸ Gis nanya fag masohod, sadik ama sas banwa Listra idwa syagan iglahaw, kawa gis ogbot ginan danwa fihong. ⁹ Hanyag talinga is Pablo nogtoltol. Is Pablo igdoro has ama fihong, nasarom kawa hanya kasyag kitay hanyam fiya. ¹⁰ Yakangas Pablo nahampang marigon, nalwang, Ha fag lindog maslong. Ka ama nalokso, ginyag lahaw ngay. ¹¹ Ka fakaaywanan no nalag in Pablo naibolon, ta nanarawagan sas fangampangan Likaonya, iglwang, Manga diyos inbangkad hantam ha habilogan taw. ¹² Ta nafangayan in Birnabi is Siyos fag diyos, hanggan ta nafangayan yadin Pablo, is Hirmis fag diyos, maskin hanya wa kagtoltol. ¹³ In Siyos fag diyos fanimbaan balis dasogan banwa. Kasta fagalan han Siyos, no nadog kitay hanbangkad, nagoyod manga todo baka, ha ono borahan, has dasogan banwa, ista fagsogbaon fangafiyan handa Pablo nangos. ¹⁴ Dapat da Birnabi da Pablo natwa di ngay ista bato ibolonon, ta naragyang it sadili manga balokas, nadalandan hasta fagbokngan, natawag marigon, iglwang ¹⁵ Ham manga ama, fag idwa gibolon kityamo. Hami taw yadi kito hayo. Hamig faadal lamang ha hayo ka Fiya fag Barita kaarakitay ham domayo wan ka kitonya fag manga bagay, kadwa ha kahologan. Ham fag kafwali ya ka has Diyos boyagan, ka nahalig banwa, hanggan daga, hanggan dagat, hanggan fagayo ka maoliyanan sinya. ¹⁶ No hyabi di is Diyos igfabayaan fagayo fag manga layonan taw, nyawa gibolon no kana kat sadili fakasayaon. ¹⁷ Dapat nyawa kitonya, hanya danwag disag hosto kagfahilala hantam in Diyos, hanggan igfaorongan kitay hanya mahoway hantam, kawa hanya mandi kagfahwayan gim tongod, kagfabohad aywan sas fanganiyon, kagdisag manga fanganon kaarakitay igfahapsog intam, hanggan kagfasolong igdog intam manga fangayofan. ¹⁸ Nyawa kitay da Birnabi da Pablo kampang kindawan kitonya, ta ganong wadwa nasyagan nabando manga taw kaarakitay idwag sogba fangafiyan ha hanya. ¹⁹ Dapat ha manga Hodyo naoyan yadi inda Pablo gis banwa Antiyokya sas sakop Pisidya, hanggan gis banwa Ikonyo. Ta nafasognod ka manga taw hanggan nabintok in Pablo. Ginya madi yabay, ta nagoyod hanya has dayo banwa, maskin ta gayfan hanya natay wan. ²⁰ Dapat ay, in Hisos manga katogbong no nasafongan in Pablo, is Pablo dagos wanlindog ya, infwali ya, hayas basad banwa. No bago marom is Pablo naofod in Birnabi hawas banwa Darbi yabay. ²¹ Ginya madi da Pablo da Birnabi no natoltol ka Fiya fag Barita sas banwa Darbi, hanggan nafabali aywan fag manga taw in Hisos manga katogbong, tanfwali ya has banwa Listra, has banwa Ikonyo hanggan has banwa Antiyokya, sas sakop Pisidya, ²² igfarigon sinya in Hisos manga katogbong fangayofan. Igtogon yadi kitay, ta fag fadagos wa katiwala orongan, iglwang yadi kitay, Tam domog yapdi aywan fag mahori bago di masog han Diyos banwanan. ²³ Ta nafili manga fagtahinan kagbahala han Diyos manga Tifonan fagayo. Ginya yabay, nontabo wagdarangin, idwa nangwan hanon, ta nafaano ka manga Tifonan hantam Fon kasta fagsyagon. ²⁴ Ginya ta nadalan has sakop Pisidya, yakanga ta nadasog has sakop Panfilya. ²⁵ Ta no natoltol in Diyos hampang sas banwa Pirgi, ta nalahaw has lwad, has banwa Atalya. ²⁶ Ginya fag banwa ta nasahay baba dagat, infwali ya has banwa Antiyokya, sas sakop Siriya. Gistay fag Antiyokya hyabi da Pablo da Birnabi no nafabago it ibolon igbarita giwasta nafaano ginan inda Pablo hantam Fon kafiyan. Kati in-anod wan kat manga ibolon kitay intonglos wan. ²⁷ Da Pablo nondasog wan, ta nafatifon ka mangan tiwala sinya fag banwa. Ta natoltol kan Diyos naibolon fagayo ginda Pablo, hanggan no kinday is Diyos nafaangay kitay manga Hintil fiya yadi nomtiwala. ²⁸ Da Pablo nadogay nangofodan in Hisos manga katogbong sinya.

¹ Dapat ay, ha manga fihin ik taw nadasog has banwa Antiyokya, sas sakop Siriya, gis sakop Hodiya. Tagfaadal has manga fadwasay kitay, ham nodwag fatoli hayo, kito kan Mwisis togon, ham idwam bawi. ² Da Pablo da Birnabi nalaban has taw, inbali wa gagran kawa noglabanan kitonya. Yakanga ista nagkasadiyan, ta somogo inda Pablo da Birnabi hanggan manga fadwasay tiba gis Antiyokya has Hirosalim, kaarakitay mangampangan has manga Fandiya-Barita sinya, hanggan has manga fagtahinan kawa tonya wa fag bagay. ³ Ka Tifonan nasogo tonya fag manga taw, yakanga ta no nadalan has sakop Finisya hanggan sakop Samariya, ta nafadahit no kinday ka manga Hintil intiwala yadi wan. Ka manga fadwasay sinya nabaya wa dahol igdog. ⁴ Ginya da Pablo nondasog has Hirosalim, ka manga Fandiya-Barita, hanggan ka manga fagtahinan, hanggan sadi wak dahonya Tifonan nabaya wa dahol dahol igdog. Da Pablo natoltol fagayo, nyawa kana, kan Diyos naibolon ta nogbarita. ⁵ Dapat tiba Farisiyo kantiwala nafwayong yadi, Ka manga Hintil kamtiwala fag imtoli wan. Ham fag fwayong kitay ta fag imtanog wan in Mwisis togon. ⁶ Ka manga Fandiya-Barita hanggan manga fagtahinan nanoltolan yapdi, ta nangayfan yapdi to fag mahori. ⁷ Ginya madi ta noglabanan dogay las hampang, is Pidro nalindog, nalwang kitay, Manga fadwasay, tam twa wa kitay, itfagonan, is Diyos nafili angko, kaarakitay gingko bibig ka manga Hintil fag domog ka Fiya fag Barita hanggan imtiwala yadi wan. ⁸ Is Diyos kaglag santam manga basad fangayofan nafaorongan kitay, hanyag tanggap yadi ka manga Hintil, hanya no nadisag it Maliyaw fag Falad has taw, kito yadi no nadisag hantam, is manga Hodyo. ⁹ Pariho is Diyos nogbantay has manga taw hanggan hantam. Is Diyos nafalinay yadista manga fangayofan maskin tagsyag yadi han Hisos in Diyos-natogon-Famawi. ¹⁰ Ya kana mayon tam nogsolay in Diyos, ham gayfan? In Mwisis togon tiba hantam, nyawa tam, nyawantam manga magorang, tam idwa nasyagan nafaanod. Kana mayon tam nogfahoriyan tonya has manga Hintil kamtiwala? ¹¹ No kinday tam nonbawi tam nontiwala, kawa gin Hisos intam Fon malooy fag kahowayan, ta kitonya yadi nombawi. ¹² Fagayo tantohas wagtoltolan, basta odi matalingan inda Birnabi da Pablo nogtoltol in Diyos naibolon madolaw has manga Hintil ta nogbarita. ¹³ Da Pablo nontabo wagtoltol, is Santyago man ka kampang kitay, Manga fadwasay, ham fag matalingan man angko. ¹⁴ Kati yadi haraw, is Simon Pidro no natoltol no kinday is Diyos no nafatawag ka manga Hintil bago bago, kaarakitay tibak Hintil imbali yadit sakop, ¹⁵ tonyag faanod in Diyos manga fangampang fagfwayongon hyabi, noglwang kitay, ¹⁶ Ginya madi ho kafwali ya, Farigon ya in Dabid oliyanan kandwat, Ho fatobo ya, falindog ya tonya ¹⁷ Kaarakitay tiba taw lomigaw intam Fon, Kawa fagayo fag layonan taw angko yadi sakop ¹⁸ Kitonyan Diyos fwayong kagfatohoyan tonya fag manga bagay, gi yapdis hyabi. ¹⁹ Yakanga, angko fangayofan nangos, tam fag idwag fahoriyan ka manga Hintil ka kaakbang han Diyos. ²⁰ Dapat, tam fag somorat yap man has taw ka fiya, kitay, ta nangos fag idwa kwan nyawa kana fag bagay kasta nadisag has labang taw, fag idwag fabayowan, fag idwa kwan ka hayopan ka natay kantagbong, fag idwa yadi kwan folot. ²¹ Maskin gi yapdis hyabi ta fagaba wagbasa in Mwisis manga togon sas manga fanimbaan Hodyo sas Sirang Kafahowayan. It manga hampang indog yadi has fagayo fag manga banwa. ²² Yakanga ka manga Fandiya-Barita hanggan ka manga fagtahinan, hanggan ka Tifonan sadik dahonya, ista nagkasadiyan, fiya nogfili ka tibak taw kaarakitay tomahin inda Pablo da Birnabi has Antiyokya sas sakop Siriya. Ta nasogo inda Hodas, kasta faglwangon is Barsabas, hanggan da Silas. To fag manga ama ka manga fadwasay fagtahinan sas Hirosalim. ²³ Ka manga Fandiya-Barita nafadiya sorat has Antiyokya, kaglwang kitay, Hami ka manga Fandiya-Barita hanggan ka manga fagtahinan, mi gwas hayo, hyami manga fadwasay Hintil sas banwa Antiyokya, sas sakop Siriya, hanggan sas sakop Silisya. ²⁴ Mi nadog kitay ha akwa gi hyami Tifonan igfaagran hayo, dapat tonya bonwa hyami nasogo. Kasta manga nafwayong hayo, nafaadowan odi hayo. ²⁵ Yakanga hyami nagkasadiyan mi somogo ya ka tiba taw ha hayo. Ta omofod intam fagbayaon da Birnabi da Pablo, ²⁶ kadwa nahwangit it haboyagan maskin ta galwasi in Kiristo Hisos, kagfon intam. ²⁷ Yakanga migsogo nga ha hayo inda Hodas da Silas kaarakitay fatwagdog hayo ka hyami bato lwangon gistay fag sorat. ²⁸ Maskin hyami nagkasadiyan ka Maliyaw fag Falad nafatwagdog hyami kitay, mi fag idwag fahoriyan hayo no bonwa to fag manga bagay ka hyami fakasayaon orongan, ²⁹ kitay, ham fag idwa kwan nyawa kana fag manga bagay kandisag has labang taw, fag idwa kwan folot hayopan, fag idwa yadi kwan manga hayopan kantagbong. Fag idwa yadig fabayowan. Kafiyaon ham no bomaybay tonya fag manga bagay. Balinya lamang hyami sorat kati. ³⁰ Ginya madi ta nafalahaw wan inda Birnabi. Yakanga yabay, ta nondasog has banwa Antiyokya, sas sakop Siriya, ta nafatifon ka mangan tiwala. Ta nadisag has taw tonya fag sorat. ³¹ Ta no nabasa ka sorat, ka manga taga sinya inrigon yat fangayofan maskin tansaya wagdog. ³² Da Hodas da Silas in Diyos manga fangampang yadi. Aywan it nafwayong has mangam tiwala nafarigon ista manga fangayofan hanggan nafabali yadi maganit ta no katiwala. ³³ Gis nanya fag manga masohod ta nadogay yapdi ogbot sinya. Ginya madi ka manga taga Antiyokya nafaoli ya inda Hodas hasagsogo is taw. Ka manga fadwasay nadarangin kitay, fag fiya it manga lahawan nangos. ³⁴ Dapat is Silas naayfan kitay fiya hanya nomgoyan yapdi nangos sinya. ³⁵ Da Pablo da Birnabi nadogay yapdi sinya sas banwa Antiyokya. Aywan yadista manga ofod igfaadal hanggan igtoltol in Diyos hampang sinya. ³⁶ Ginya madi, aban ogbot, is Pablo iglwang han Birnabi kitay, Tam nangos fag kafwali ya, tam manabang intam manga fadwasay has fagayo fag manga banwa kantam nafaadal intam Fon hampang hyabi. Tam mamantay ya no kinday ka manga taw sinya kati. ³⁷ Is Birnabi kasaya kitay mamaofod ya nangos in Hwan, kasta fagngayanon is Hwan Markos. ³⁸ Dapat is Pablo dayo wagtaban maskin is Hwan hyabi idwa nafadagos naofod hanggan wa nafatabo ista lahawan, dapat naobon was taw, infwali wa dagos gis sakop Panfilya. ³⁹ Da Pablo da Birnabi kahodhoriyan wa gis nanya fag masohod, yakanga ta nanarowayan wan. Is Birnabi nataban in Markos, nasahay has baba dagat hawas foyo dagat Sipri. ⁴⁰ Dapat is Pablo nataban man in Silas. Ka manga fadwasay nontabo wagdarangin kitay intam Fon nangos fag ganos taw, da Pablo nalahaw wan. ⁴¹ Da Pablo hawas sakop Siriya, hanggan sakop Silisya, nafarigon sinya in Diyos manga tifonan.

¹ Da Pablo hawas banwa Darbi hanggan banwa Listra. Ya mangharaw sinya ha akwa yadin Hisos katogbong sadi, kawas Timotiyo. In Timotiyo ina intiwala yadi wan, sadik Hodyo, dapat it ama sadik Girigo. ² Fagayo ka mangan tiwala sas Listra hanggan sas Ikonyo nafaorongan kitay in Timotiyo ogali fiya. ³ Is Pablo kasayag taban in Timotiyo, yakanga ta natoli hanya maskin fagayo fag manga Hodyo sinya fag manga banwa natwa wa kitay it ama Girigo. ⁴ Nyawa siday fag banwa kanda Pablo nagsabangan, ta nafwayong has mangan tiwala ka manga Fandiya-Barita, hanggan manga fagtahinan san Diyos Tifonan sas Hirosalim it nagkasadiyan manga togon. Ta nafwayong yadi kitay fag katanog tonya fag manga togon. ⁵ Yakanga yabay, ka manga Tifonan fagayo inbali marigon ta no katiwala. Sirang sirang ha kadogang san Diyos manga Tifonan manga taw. ⁶ Da Pablo nadalan has fagbokngan manga sakop Firigya hanggan sakop Galasya maskin ka Maliyaw fag Falad idyag faangay kitay ta fag bomarita has sakop Asya. ⁷ Ta nondasog has bahalan sakop Misya, ta gayfan ta hawas sakop Bitinya, dapat in Hisos Falad idya nafaangay. ⁸ Yakanga ta natolas di sas sakop Misya, yakanga hawas lwad has banwa Toroas. ⁹ Gis nanya fag yabi, is Pablo ha lagan gin Diyos sadik bagay madolaw. Hanya ha lagan sadik ama taga sakop Masidonya malindogan, igsagad kitay, Ham nangos fag hawastay has difay, has Masidonya, togbongan hyami. ¹⁰ Yakanga nonsagaya kan Pablo lagan, mi nangalimbotangan wa dagos, maskin mi natwa kitay, is Diyos igfatawag hyami kaarakitay tomoltol ka Fiya fag Barita has sakop Masidonya. ¹¹ Gis banwa Toroas hyami sahayan nadagos has baba dagat has foyo dagat Samotrasya. No marom marom wan, mi nasahay ya baba dagat, hawas banwa Niyapolis. ¹² Ginya fag banwa mi nalahaw baba daga has banwa Filipos. Ka banwa Filipos sadik banwa dahol sas sakop Masidonya, ka mangag bahala sinya gis sakop Roma. Mi nadogay ogbot sinya. ¹³ No Sirang wa Kafahowayan, mi nalahaw has dayo banwa, ha sadik foyo sas gobang safa. Mi gayfan ngandayo sinya ka manga Hodyo nogtifonan igdarangin. Mintokaw sinya a, migtoltol has manga ina ka matifonan sinya. ¹⁴ Ka sadik ina ka sinya, kawas Lidya, taga banwa Tiyatira, iglako manga rotay masding, madamol. Is Lidyag simba han Diyos. Kagfon intam nafatwagdog sat basad fangayofan, yakangas Lidya intiwala in Pablo toltol. ¹⁵ Is Lidya hanggan wat manga ofod sas balay, nontogna wan, is Lidyag lwang ha hyami kitay, Ham noglag kitay, aho orongan wantiwala hasagfon intam, ham fag sawa hyamik migya. Naaronganon nogtaban hyami hat balay. Maskin ngay midwa nadayo. ¹⁶ Sadi ginan mi no haya ngawas fandaranginan, sadik dayaga, ista nasali sogowan, natagbo hyami. Ha labang kagbahala hanya, kagfasyagan hanyag pinto ista madalanan aban. Ka mangag fon tonya fag dayaga iglag dahol fag fakinabang ginya fag dayaga, kawa nogpinto is taw, tagtangdan hasagfon ka dayaga. ¹⁷ Ka dayaga goyan yadi goyan yadi hyami da Pablo, igtawag kiti, To fag manga taw in Diyos, ka Abwat man has Fagayo Fagayo, it manga sogowan. Tagfadog ha hayo no kinday ham nombawi. ¹⁸ Is Pablo kahori wagdog maskin sirang sirang fagaba wa kitonya. Is Pablo nasayango has dayaga, ginya nalwang has labang, Hogsogo hyamo san Kiristo Hisos ngayan, haw fag galin wan gis nyamo fag dayaga. Yabay, ka labang dagos wa nalin. ¹⁹ Dapat ay, ka mangag fon tonya fag dayaga no nalag di ngay tadwa ha fagfakinabangon ginya fag dayaga, ta natoklos, nagamat inda Pablo da Silas, nagoyod has falhang manga balay has fagbokngan banwa, nataban has manga fagtahinan sas banwa. ²⁰ Ta no nataban inda Pablo has manga gorangon taga Roma, kagtalinga hampangan, taglwang, To fag manga ama manga Hodyo kagfaagran manga taw istay fag banwa. ²¹ It fagfaadalon iglaban hantam manga ogali taga Roma. Idwa fiya tam nogtanggap, idwa fiya tam no katanog ista manga adal hantam. ²² Ka manga taw fagayo nangoyonan gisog inda Pablo. Ka mangag talinga hampangan nalanit inda Pablo manga balokas, ginya ta nafabakbak manga sondalo has taw. ²³ Ka manga sondalo nontabo wagbakbak inda Pablo, ta nafaporiso wa hanya, nafabantay fiya fiya has bantay. ²⁴ Yakanga, kagbantay nataban is taw has fakabokngan balay porisowan. Ta nabinggas yadi inda Pablo manga bitis. ²⁵ Dapat araw, no kaboknga wa yabi, da Pablo da Silas igdarangin, garambahanan yadi han Diyos. Ka tiba poriso sinya matalingan odi. ²⁶ Ginya madi sadi odi ginan, nalinog marigon, kanga kitay ka fagrigonan torok porisowan inbolang wan. Fagayo fag manga sakbawan porisowan dagos wanboklas, ista manga gafos kadina fagayo inlohas wan. ²⁷ Ka bantay nonfolaw, nalag di nga kitay ka manga sakbawan porisowan inboklas wan, hanya madali wanbangon. Nagonos wa dagos it talibong. Hanya ganong wa fahatay it sadili maskin hanya gayfan ka manga poriso nalfas wan. ²⁸ Dapat ay, is Pablo natawag marigon, Haw fag idwag tobok hyamo, mi fagayo istay di. ²⁹ Kagbantay nanagad salong a, nadalandan has basad porisowan, karokog waglingkohodan handa Pablo da Silas akbang. ³⁰ Ginya nataban inda Pablo has sokayan, iglwang kitay, Manga ama, kana kin ka fiya angko ibolonon kaarakitay ahom bawi? ³¹ Taglwang, Haw fag katiwala han Hisos kagfon intam, ginya madi haw imbawi wan, haw hanggan im talanahan. ³² Da Pablo natoltol kagfon intam it hampang has bantay hanggan has fagayo fag manga taw ka sat balay. ³³ Gis nanya yadi fag basad yabi, ka bantay nafyad inda Pablo manga baran. Ka bantay hanggan it manga ofod fagayo sas balay nafatogna wa dagos. ³⁴ Ginya madi ka bantay porisowan nataban inda Pablo hat sadili balay, nandisag hanon. Ka bantay hanggan it talanahan igbaya wa dahol maskin ta katiwala han Diyos. ³⁵ Nonbago wa marom, ka manga gorangon sas banwa nasogo manga sondalo, iglwang kitay, Falfasan wa tyamo fag dowak ama. ³⁶ Kagbantay nafadahit kitonya handa Pablo, iglwang, Ka manga gorangon sas banwa iglwang kitay, Falfasan wa hayo. Yabay ham fag lahaw wa a, fag mahoway wa hayo manga fangayofan. ³⁷ Dapat ay, is Pablog lwang has manga sondalo, Gwadi ta nafabakbak hyami sasta faglagan, nyawa tadwa nafadalan las hampangan, nyawa mi ha kasoratan kitay hami bilang wa yadi taga Roma, hanggan tagporiso wa hyami. Ginya madi mafyaloman odi ta nogfalahaw hyami kati. Idwam himo. Fag ka mandi manga gorangon ka kabangkad hastay, ka fomalfas hyami. ³⁸ Ka manga sondalo nafadahit has mangag talinga hampangan kan Pablo nafwayong. Yakanga tandala wan ta no nadog di nga kitay, da Pablo da Silas bilang wa yadi manga taga Roma. ³⁹ Yakanga ka manga gorangon banwa hanya wan, nasoyo handa Pablo. Ta nataban inda Pablo has sokayan, ginya madi nalwang yadi kitay, Ham nangos fag lahaw wa gistay fag banwa, no fiya di. ⁴⁰ Ginya madi da Pablo da Silas indokson di ngay gis porisowan, ta nadagos wa han Lidya balay. Ta no natahod manga fadwasay sinya, ta natogon has taw kitay ta fag karigon no katiwala. Ginya madi ka dowak ama nalahaw ya.

¹ Ginya madi ta no nadalan sas banwa Amfipolis hanggan banwa Apolonya, tandasog has banwa Tisalonika. Sinya fag banwa ka manga Hodyo ha fanimbaan. ² Tolok Sirang Kafahowayan, kawat ogali kitonya, is Pablo nasakbaw sinya, hanggan natoltol has taw. ³ Igfaorongan kitay ka Kasoratan danwag lwang kawan Diyos-natogon-Famawi it ibolon idyam tabo hanya nodwa omagwanta basad mahori hanggan imboyag ya, iglwang yadi, To fag is Hisos kangko fagfwayongon ha hayo, tonya wa nga kan Diyos-natogon-Famawi. ⁴ Manga fihin ik Hodyo katiwala in Pablo fwayong, gofod yadi inda Pablo da Silas, hanggan wa manga Girigo kaaywanon ka danwag simba han Diyos, hanggan manga ina ayo, kasta manga fakilalaon, gofod yabay inda Pablo. ⁵ Dapat ka manga fagtahinan Hodyo kaingli inda Pablo. Ta nafatifon ka manga ama malamangan odi basad manga karsada, nafaagran fagayo fag manga taw sas falhang manga balay, boknga banwa. Ginya idwag fasakbawon, nasakbaw wa dagos in Hason balay, igsayak inda Pablo da Silas kaarakitay falag has fakaaywanan. ⁶ Ta nodwa nalag inda Pablo sinya, ta nagoyod in Hason, hanggan ka tibak fadwasay has atobangan mangag talinga hampangan sas banwa. Ginya ta naringgit kitay, Ka manga taw kagfaagran nyawa haday kandasog, indasog yadistay. ⁷ Is Hason nafasakbaw tonya fag manga taw hat basad balay. Ta fagayo iglaban ka gorangon taga Roma manga togon, maskin taglwang ha sadi yak gorangon, hono, it ngayan is Hisos. ⁸ Ka fakaaywanan fag manga taw sas banwa hanggan ka mangag talinga hampangan galibitan it fangayofan no nadog kitonya. ⁹ Ginya madi ka manga gorangon no nafabayad ginda Hason it fangafang wan Pablo, ta nafalfas yadi inda Hason. ¹⁰ Yakanga no yabi wan, ka manga fadwasay nasogo inda Pablo da Silas has banwa Biriya. Ta nondasog sinya, ta nasakbaw has basad fanimbaan Hodyo. ¹¹ Ka manga Hodyo istay sas Biriya fiya hampangon, bondi kito ka manga taga Tisalonika. Ta kasaya wagdog is Pablo nogtoltol. Sirang sirang tagligaw ka Kasoratan kat afo, ngatay orongan in Pablo manga fwayong. ¹² Kawa kitonya, aywan fag manga Hodyo kantiwala sinya, hanggan aywan yadi fag manga Girigo, manga ama hanggan manga ina, kasta manga fakilalaon fiya fiya sas banwa Biriya. ¹³ Dapat ay, ka manga Hodyo sas banwa Tisalonika no nadog kitay da Pablo igtoltol in Diyos hampang sas Biriya yadi, ta naoyan hanya, nafasognod ka fakaaywanan fag manga taga Biriya, nafaagran is taw. ¹⁴ Ginya madi yabay, ka manga fadwasay intiwala nasogo wa dagos in Pablo has gobang dagat. Dapat da Silas da Timotiyo in-goyan yapdi sas Biriya. ¹⁵ Ka manga nafangolo in Pablo naofod wa hanya balis banwa Atinas. Ta nonfwali ya has banwa Biriya, ta nafadahit in Pablo togon handa Silas da Timotiyo kitay, ta fag idwa dogay no goyan hanya. ¹⁶ No mafanayan yapdi inda Silas da Timotiyo sas banwa Atinas, is Pablo inbalaw waglag kaaywanon fag manga tolad faglohodon sas basad banwa. ¹⁷ Yakangas Pablo igtoltol has manga Hodyo sasta basad fanimbaan, hanggan has manga Hintil kagsimba yadi han Diyos sinya. Ginya madis Pablo natoltol yadis taw sirang sirang nyawa faktaw kat lagan sas faktaban manga balay. ¹⁸ Ha akwa sinya manga Ipikoriyo hanggan manga Istoyko, mamga taw matoltolon, iglaban in Pablo. Tibag yod hanya, taglwang, Kana ngap araw to fag taw kat fwayongon hantam, igfabali hanya madonong? Ka tibag lwang, No kadog di to fag taw bokod fagfakatiwalaon it fagfaadalon. Taglwang kitonya maskin is Pablo nabarita kawa han Hisos, hanggan no kinday tam nomboyag ya aban. ¹⁹ Ta nataban in Pablo has fanoltolan, ta nogngayan Ariyopago, ginya taglwang, Mi kasaya tomwa no kana tonya fag adal bago im fagfwayongon ha hyami. ²⁰ Mi bago nadog kati kam fagfwayongon ha hyami madolaw, yakanga mi kasaya tomwa no kanat kahologan. ²¹ Maskin ta gintaw kitonya, ka manga taga banwa Atinas hanggan ka mangan aktom sinya gis iba banwanan, idwa ha fakamolon, gobok odi has manga taw, igtalinga igtalinga odi, igtoltolan nyawa kanat donggon fag manga bagay madolaw. ²² Yakangas Pablo nalindog sasta atobangan, sas fanoltolan Ariyopago, nalwang kitay, Ham manga taga Atinas, hoglag hayo manga fangayofan mahogod has iba iba fag manga fakatiwalaon. ²³ Maskin aho no gayayag basad banwa, aho nogbantay hayo manga tolad faglohodon, ho ha lagan sadik danglayan ha sorat kitay, To intohoyan ha sadik faglohodon midya kilala. Ka hayo faglohodon nyawa ham idya kilala, tonya wan kangko fagfwayongon ha hayo. ²⁴ Is Diyos wa ka nahalig sadik dahonya intam daga, hanggan fagayo fag manga bagay sinya, hanggan hanya wa kagfon ka banwa hanggan ka daga, yakanga hanyadwa maoliyanan sasta manga nahalig fanimbaan. ²⁵ Bonwa kitay ka manga taw ha fagtogbongon han Diyos, maskin hanya idwa ha korang, nyawa kana. Yatokitay, is Diyos man kagdisag haboyagan, ipsaw, hanggan fagayo fag manga bagay has taw. ²⁶ Gi di sadik taw is Diyos no nahalig fagayo fag manga layonan taw kaarakitay bomanwanan istay is baba daga. Is Diyos kagfatohoyan no ginahin ka manga layonan taw nomrigon hanggan no siday fiya fiya ista sakop banwanan. ²⁷ Is Diyos naibolon kitonya kaarakitay manga taw somayak hanya, ngandayo ta lomag hanya, ta no galingawan. Ka orongan wan is Diyos idwa ayayo gintam fagayo, ²⁸ maskin Intam haboyagan giwa hanya, hanya yadi kagfahimot intam, hanggan igdisag fangayofan. Kito yadi ka hayo mangag fasangay tiba noglwang, Tam wa nga kat manga anak. ²⁹ Kawa tam in Diyos wa manga anak, tam fag idwa gayfan is Diyos bilang odi tolad ginto, ngatay pilak, ngatay bato, tonya fagayo ista odi naayfan kitay fag kitonya, ista odi gamat nahalig. ³⁰ Dogay wa fag manga fangaraw is Diyos idwag bati kitay manga taw idwa kilala hanya, dapat kati hanyag fwayong has fagayo fag manga taw, nyawa hadat banwanan, ta fag somoyo wan, fag domayo it manga ogali dwat, ³¹ maskin is Diyos iglwang kitay, gis nanya fag sirang aban hanya mamatohoyan has taw, sadik baba daga, it fadosaan, sas fakafiyan wa fiya fiya, kawan Diyos nafili fag ama ka mamatohoyan tonya. Is Diyos nafatwagdog has fagayo kitay, tonya wan kat nafili fag ama no nafaboyag ya hanya gis kahatayan. ³² Ta no nadog kitay is Pablo gwas kawa ha haboyagan sas dayo kahatayan, tibag yod odi, dapat tibag lwang, Aban, fag sadi ya ginan haw no fomwayong hyami kawa hanya baliwa. ³³ Ginya yabay is Pablo nalahaw gis fanoltolan. ³⁴ Ha akwa yadi tibak ama natahin hanya, intiwala wan. Insadi is Diyonisyo, ka sadi gis tifonan kagbahala sas fanoltolan Ariyopago, hanggan sadik ina is Damaris, ha akwa yadi tiba.

¹ Ginya madis Pablo nalahaw wa gis banwa Atinas, hawas banwa Korinto. ² Nondasog wa sinya, hanya nalag in Akila, sadik Hodyo taga Ponto, ka ngalay yapdin dasog gis sakop Italya, hanggan wat babay, is Pirisila, kawas Kalawdyo nasogo ka manga Hodyo kitay fag galin gis banwa Roma. ³ Is Pablo hawanda Akila, ginya nadogayan sasta balay maskin ta kalig balay rotay kito yadin Pablo, yakangas Pablo naibolon yadi sinya. ⁴ Fagaba sas Sirang Kafahowayan, is Pablo igfatoltolan sas fanimbaan Hodyo, igfaaronganon has manga Hodyo hanggan manga Girigo kitay ta fag katiwala wa nangos in Hisos. ⁵ Da Silas da Timotiyo nondasog has banwa Korinto gis sakop Masidonya, is Pablo igbarita lamang hanggan igfaorongan has manga Hodyo kitay kan Diyos-natogon-Famawi hanggan Gorangon is Hisos wan. ⁶ Dapat ka manga Hodyo tiba nogsongat, igyod ya ngadin Pablo. Is Pablo igfagfag ka fogis git boknga rotay, igfatagak is taw kitay, Ham bahala wa gisip no ham wa kadwan tiwala, ham has fadosaan wan. Hodwa ha sagoton. Gis kati ho hawas manga Hintil ho no bomarita. ⁷ Ginya madis Pablo nalin wan, hawan Tisyo Hosto balay, ka sadik Hintil kagsimba in Diyos. In Tisyo balay sas dayo fanimbaan Hodyo. ⁸ Is Kirispo, kagbahala sas fanimbaan Hodyo gis nanya, intiwala hasagfon intam, hanggan wat manga ofod sas balay. Aywan fag manga taga Korinto tiba no nadog in Pablo toltol intiwala wan, hanggan intogna wan. ⁹ Ginya madi sadi ginan basad yabi, is Diyos ha nafalag madolaw han Pablo, igfwayong hanya, Ha fag idwa kadala. Fag fadagos haw nogfaadal istay, fag idwag tohas igbarita, ¹⁰ maskin aho sawa hyamo. Hadwam kinday maskin aywan kambali angko fag manga taw istay fag banwa. ¹¹ Is Pablo nadogay yapdi sadik fangaraw hagboknga sas Korinto, igfaadal has taw in Diyos hampang. ¹² Dapat ay, aban, nos Galyon wa kanbali gobirnador sas sakop Akaya, ka manga Hodyo nagkasadiyan ta gomamat in Pablo, tomaban has fangabaya. ¹³ Tagfasogbo in Pablo kitay, Is Pablo igfayayom manga taw igsimba han Diyos sa sadik halgan kadwa maangay has manga Batasan Hodyo. ¹⁴ In Pablo fangayofan homampang yap han Galyon, dapat is Galyon iglwang has taw, Ham fag toltol yap gis nyamo. No hayo sombong orongan wa kasalanan dahol, ngatay iglaban has ogali Roma, ho tomalinga wan. ¹⁵ Dapat hayo donggon nosta odi manga hampang, manga ngayan, ka odi hayo manga ogali Hodyo, ho bonwa hayo fangabaya no kitonya di. Ham fag bahala man di. ¹⁶ Is Galyon nasogo nga inda Pablo gis balay fangabaya. ¹⁷ Ginya ka manga Hodyo nagamat in Sostinis kagbahala sas fanimbaan Hodyo. Ta nabakbak hanya sas sokayan balay fangabaya, dapat is Galyon idwag bati ista naibolon. ¹⁸ Ginya madis Pablo nadogay yapdi ogbot sas banwa Korinto. Ginya no nanogon yapdi has manga fadwasay, inlahaw wan. Nondasog sas Kinkiriya sas gobang dagat, is Pablo namalokfog it bok, kawat togonan han Diyos intabo wan. Ginya nasahay has baba dagat, kaginan has sakop Siriya. Da Pirisila da Akila, talsawa, nahoyog wan Pablo. ¹⁹ Nondasog wa sas banwa Ifiso, is Pablo nafamataw inda Pirisila da Akila sinya. Ginyas Pablo hawas fanimbaan Hodyo, nafatoltolan has manga taw. ²⁰ Taglwang han Pablo, Haw nangos fag domogay yapdistay, dapat is Pablo idwag faangay is taw, ²¹ natogon odi, iglwang, Aho aba kabangkad ya non Diyos wa kafangayofanan. Ginya nalahaw ya gis Ifiso, nasahay ya ngawan has baba dagat. ²² Nondagsa sas banwa Sisariya, is Pablo nalahaw ya has banwa Hirosalim, namadog has Tifonan kantiwala sinya, ginya bago di nadagos has banwa Antiyokya sas sakop Siriya. ²³ Ginya madis Pablo nadogay yapdi ogbot sinya, ginya nalahaw ya ngay. Nasabang ha banwanan ha banwanan sas sakop Galasya hanggan Firigya, igfarigon intam Fon manga katogbong fagayo sinya. ²⁴ Yabay, ha akwa sadik ama Hodyo, is Apolos, nadasog has banwa Ifiso, it kasagayan hyabi, sas banwa Alihandiriya. Is Apolos nogtoltol fiya wa kadog, hanggan aywan yadit fakatwawon gin Diyos sorat. ²⁵ Hanya indonong ka Ogali Bago gintam Fon, mahogod hanggan maslong yadi nogfaadal kawa han Hisos, dapat kito yadin Hwan yapdi nogfaadal hasagfatogna baliwa. ²⁶ Is Apolos idwag fahoyangon igtoltol sas fanimbaan Hodyo. Da Pirisila da Akila talsawa, no nadog in Apolos toltol, ta nataban wa hanya hat balay, nafwayong wa fiya fiya ka manga bagay ka bonyan Apolos fakatwawon sas Ogali Bago gin Diyos. ²⁷ Ginya madis Apolos no kasaya domifay has sakop Akaya, ka manga fadwasay nafaangay wan. Ta nafadiya yadi sorat has manga fadwasay sinya, ta nasorat kitay, Ham fag igbaya in Apolos hanya nomdasog ha hayo. Nondasog sinya, dahol in Apolos togbong has mangam tiwala kawa in Diyos malooy fag kahowayan sawa hanya. ²⁸ Ka manga Hodyo idwa ha halimbawan lomaban in Apolos kawa fakaoronganan wan hanggan marigon nogtoltol gis Kasoratan kitay kan Diyos-natogon-Famawi is Hisos wan.

¹ Is Apolos no sayapdis banwa Korinto, is Pablo dan wa nalahaw has moyod fag dalan hanggan wandasog sas banwa Ifiso. Is Pablo nalag mangan tiwala sinya. ² Is Pablo naintaw has taw, Ham awkin natanggap ka Maliyaw fag Falad ham nontiwala? Taglwang, Idyapdi, midyapdi ha donggon kitay ha akwa Maliyaw fag Falad. ³ Is Pablo naintaw, No kitonya, kinday ham nontogna? Tagsagot, Kitos Hwan nogfatogna manga taw hyabi. ⁴ Is Pablo iglwang, Is Hwan nogfatogna manga taw kawa igfatohoyan kitay manga taw igsoyo wan. Is Hwan iglwang has manga taga Israil hyabi, Fag is Hisos ka goyan sangko ginanan ka hayo fakatiwalaon. ⁵ Ta no nadog, tantogna yadi san Hisos intam Fon ngayan. ⁶ Ginyas Pablo nogfwalid it gamat hasta baba alfoyo, ka Maliyaw fag Falad nadokson has taw, ta nahampang manga sanglitan madolaw, hanggan nafadog has taw in Diyos fagfwayongon. ⁷ Ngandayo manga safolo ha dowak ama ka natanggap ka Maliyaw fag Falad kitonya. ⁸ Tolok magdanon is Pablo fagaba has fanimbaan Hodyo, igfaaronganon ka sinya fag manga taw, idwa ha mabalaw nogfwayong ka han Diyos sakop baliwa. ⁹ Dapat ha akwa yapdig farigon it sadili fangayofan, igdayo has katiwala, igfadwat yapdig dog has fakaaywanan ka Ogali Bago. Yakangas Pablo nalin wa gis fanimbaan nogfaadal, nataban yadi ka mangan tiwala, hawan Tirano famaadalan, igfaadal sinya sirang sirang. ¹⁰ Dowak fangaraw is Pablo nogfaadal sinya, yakanga fagayo fag manga taw, nyawa Hodyo, nyawa Girigo, ka mabanwanan sas sakop Asya, nadog kagfon intam it hampang. ¹¹ Gis nanya fag manga masohod, is Diyos nafasyagan in Pablo gibolon ka bonwa faglagon fag manga madolaw. ¹² Yakanga nyawa taong ogbot ogbot, nyawa sangbaw in Pablo sangkap, ta no nadiya has manga ha sagit, tanfiya wan. Ka manga labang nalin yadi wan gis manga ha sagit. ¹³ Ha akwa sinya manga Hodyo malahawan malahawan igfaalin yadi manga labang. Tagsolay yadi golit in Hisos, kagfon intam it ngayan, nogfaalin manga labang. Ta nalwang kitay, San Hisos ngayan, kan Pablo fagfaadalon, hogsogo hayo, Ham fag galin wan gis taw. ¹⁴ In Iskiba manga anak ama fito ka tiba ka gibolon kitonya. Is Iskiba Hodyo, sadik fagtahinan fagalan-han-Diyos. ¹⁵ Dapat ay, ka labang nasagot has taw, iglwang kitay, Ho kilala in Hisos hanggan in Pablo, dapat fakta fag manga taw ham? ¹⁶ Ginya madi ka ama ka ha labang yapdi naogwan is taw, nadaog ya, nafalobas ya. Yakanga baranon ya malobasan ya ta no nalagyo ginya fag balay. ¹⁷ Ka mabanwanan sas banwa Ifiso, nyawa Hodyo, nyawa Girigo, ta nadog wa fagayo, tandala wa dahol dahol. Dapat is Hisos, kagfon intam it ngayan labi wanbantog. ¹⁸ Aywan kantiwala igsoyo, igbaya wan, taglwang, Mi gibolon yadi kitonya. ¹⁹ Gis nanya ka mangan tiwala ka ha manga botang yapdi nabangkad manga botang famasaan, nasonog sasta faglagan. Ta no nafahalga kasta nasonog fag manga botang, it halga 50,000 kwarta pilak gamtanan. ²⁰ Yakanga ka manga taw kantiwala intam Fon hampang kaayo hanggan karigon. ²¹ Ginya madis Pablo naayfan kitay hanya fag domalan nangos has sakop Masidonya hanggan sakop Akaya bago di has banwa Hirosalim aban. Is Pablog lwang, Aho no giwas Hirosalim aban, ho fag domasog wan has banwa Roma. ²² Ginya madis Pablo nafagona ka dowak katogbong da Timotiyo da Irasto has sakop Masidonya. Dapat is Pablo in-goyan yapdi ngalay sas sakop Asya. ²³ Gis nanya yadi fag manga masohod, ka manga taw sinyas Ifiso, gagran wan maskin ta kadwat igdog ka Ogali Bago gin Hisos. ²⁴ Ha sadik fandayan pilak sinya, is Dimitriyo, ka kalig manga balay garogbot garogbot, in Diyana manga oliyanan. Is Diyana sadik tolad ina ista fagsimbaon. Dahol inda Dimitriyo fagfakinabangon giwat manga nahalig. ²⁵ Is Dimitriyo nafatifon it manga sogowan hanggan ka tiba taw ka kitonya yadit fangaboyagon, nalwang kitay, Manga taw ham, ham fadi wadtwa kitay tam ha fakinabang dahol gintam manga fakaligon. ²⁶ Ham fadi wadag lag, ham fadi wadag dog to fag is Pablo, it fagfaadalon. Hanyag lwang kitay no ka odi nahalig taw faglohodon, bonwa orongan diyos. Yakanga aywan it nafatiwala hanggan nafatanog, bondi istay is banwa Ifiso, hanggan sadi wak dahonya sakop Asya. ²⁷ Mahori aban kamlag ginya fag adal, bondi kitay ta yomod intam manga fakaligon kantam fangaboyagon, intam faglohodon ina yadi, is Diyana, it oliyanan imbali idwa mahalga, hanggan nyawas Diyana, ka manga taga Asya, hanggan sadi wak baba daga faglohodon kati, aban idwa ha gomalang hanya domwag. ²⁸ Ka manga taw nadog di ngay kitonya, tanhorit manga fangayofan, ta nanarawagan kitay, Kafiyaon, kafiyaon is Diyana, kantam manga taga Ifiso faglohodon. ²⁹ Yakanga sadi wak dahonya banwa nangagran. Manga taw nagoyod inda Gayo da Aristarko, manga taga Masidonya, kan Pablo manga ofod sas lahawan, nagoyod hasta fanifonan fag balay basad banwa. ³⁰ No kitay di, nos Pablo di, kasayag falag hanya has fakaaywanan, dapat ka manga fadwasay idwag faangay. ³¹ Ka tiba fag manga gorangon sas Asya, kan Pablo fakilalaon, nasogo yadi manga sogowan, nabando marigon kitay, is Pablo fag idwa has balay fanifonan. ³² Ka fakaaywanan fag manga taw mawang wa dahol gis nanya. Ka tibat faglwangon sadik bagay, ka tiba bokod wan it faglwangon maskin ka fakaaywanan idwa twa no kana mayon ta nogtifonan igtifonan sinya. ³³ Ka tiba gayfan ka sinya is Alihandro ka fagfonan fagagraon maskin ka Hodyo nasyag hanya. Yakangas Alihandro nafaaman is taw kitay ta fag idwa gawang gawang kaarakitay hanya homampang fiya fiya has taw. ³⁴ Dapat ta no nahilala kitay, Hodyo di mangharaw is Alihandro, ta nasohodan natawag dowak oras, taglwang, Kafiyaon kafiyaon is Diyana, kantam manga taga Ifiso faglohodon. ³⁵ No dogay wa araw, ka fagtahinan banwa nabando is taw, idwa nafaawang domwag, nalwang kitay, Ham manga taga Ifiso, faktaw kadwa twa kitay ka banwa Ifiso ka gano in Diyana manga oliyanan, ham gayfan? Tam ka gano yadi ka bato mahalga kandagdag gis banwa gim tongod. ³⁶ Idwa ha fabohag to fag manga bagay gin Diyana, yakanga ham fag kahoway wan hayo manga fangayofan, ham fag idwa gadaliyan. ³⁷ Bonwa kitay ka hayo nataban fag manga taw ignahaw gin Diyana balay. Bonwa yadi kitay tagyod intam faglohodon ina, is Diyana. ³⁸ Labi was Dimitriyo hanggan it manga ofod fandayan, no ha fagsombongon ngadi haday fag taw, ka manga fangabaya tomalinga wan, hanggan ha manga gorangon. Ham fag hanya wan nogfwayong, ngadi faktaw sa hayo. ³⁹ Dapat ham no ha faglwangon ya tiba, fiya di nomtabo sa sadik hampangan ka maangay hantam ogaliyon. ⁴⁰ Ngandayo ka mangag bahala sas Roma bomangdan intam kitay, tam kagfaagran kati maskin idwa ha nagfonan hayo fagagraon, idwa yadi ha kahologan ngadi ogbot ogbot. ⁴¹ No nalwang di nga kitonya, ka fagtahinan banwa nafaoli wa ka manga taw.

¹ Ka manga taw nontabo wa gagran, is Pablo nafatawag ya in Hisos manga katogbong, nafarigon ya ista manga fangayofan. Ginya madi natogon is taw, nalahaw has sakop Masidonya. ² Nasabang ha banwa ha banwa, nafaadal ya domwag in Hisos manga katogbong. Nafadagos wat lahawan hanggan wandasog has sakop Girisya. ³ Is Pablo nadogay yapdi sinya tolok magdanon. Ginya hanya nangos somahay has baba dagat, kafwali ya has sakop Siriya. Dapat no nadog kitay ha manga Hodyo goyonan wa fahatay hanya boknga dalan, it fangayofan hanya fag kafwali ya, domalan sas sakop Masidonya no goli. ⁴ Is Sopatir in Piro anak gis banwa Biriya naofod in Pablo hanggan da Aristarko da Sigondo gis banwa Tisalonika, is Gayo gis banwa Darbi, da Timotiyo, da Tikiko da Torofimo gis sakop Asya. ⁵ Ta nagona in Pablo, nafanaya hyami sas banwa Toroas. ⁶ Nonsagaya wa ka Fanohodan Tinapay Mayangfis, hami nasahay las dagat gis banwa Filipos. Sas falima fag sirang mindagsa sas banwa Toroas. Mi nadogay yapdi sinya fitok sirang. ⁷ Ka sirang gona basad simba, hami no matifonan kaarakitay manayowan kwan, igfaarogbotan tinapay, is Pablo natoltol has taw hanggan wa boknga yabi maskin no bago marom lomahaw wan. ⁸ Aywan fag salong sas tongod fag salogan sa hyami nagtifonan. ⁹ Is Iyotiko, sadik anahan, matokawan sas baba gaha. Ginya madi, kawas Pablo igtoltol yapdi ayo ayo, is Iyotiko intongka wan, intoyog wa fiya fiya. Yakanga indagdag gis fatolo fag salogan has daga gis baba gaha. Mahatayan wan ta nogfoyot hanya. ¹⁰ Dapat is Pablo nadokson wan, nafohot hanya. Iglwang has taw, Ham fag idwa galibitan, hanya boyagan di. ¹¹ Is Pablo insakbaw ya, igfaarogbotan tinapay, igsayowan has taw, kwan wan. Ginya nafadagos yapdit toltol has taw hanggan wa kayawa, ginya madi bago di nalahaw. ¹² Ista manga fangayofan inhoway wa orongan ta no nafaoli ya ka anahan hat sadili balay boyagan di. ¹³ Ginya madi, mi nasahay baba dagat, hawas banwa Ason. In Pablo togon kitay mi fag sinya wa kagtagbo hanya maskin it fangayofan hanya lomahaw sas nakamayan sas bahalan dagat. ¹⁴ Mi no nangablangan ya sas Ason, is Pablo nasahay, ginya mi nangoyogan has banwa Mitilini. ¹⁵ Mi nalahaw ginya sas baba dagat. No bago marom mindasog sas masohod foyo dagat Kiyo. No domwag sirang mindagsa sas foyo dagat Samos. Nondasog sadi yak sirang, mindagsa sas banwa Milito. ¹⁶ Is Pablo iglwang kitay, Tam fag somagaya yapdi sas banwa Ifiso kaarakitay tam idwam libang sas sakop Asya maskin is Pablo gatangon it lahawan. It fakasayaon, no somyagan di, fag sawas Hirosalim sas sirang Pintikostis. ¹⁷ Yakangas Pablo nafatawag has Milito ka manga fagtahinan gis Tifonan sas banwa Ifiso. ¹⁸ Ta nondasog, is Pablo iglwang, Ham fadi wadtwa no kana kangko ogali aho nogdogayan sa hayo gingko bago dasog sas sakop Asya. ¹⁹ Ahodwag faabwaton angko fangayofan no gibolon intam Fon ibolon. Nyawa ho goraw wa gagwanta aywan fag mahori kagsolay angko, kawa manga Hodyo goyonan wa kaisog angko. ²⁰ Aho nogtoltol hanggan igfaadal hayo, nyawa sawasta fagdogan fagayo, nyawa ha hayo manga balay, hodwa kaya igfadog ha hayo nyawa kana fag bagay kagtogbong hayo. ²¹ Hogfwayong nyawa has manga Hodyo, nyawa has manga Girigo, kitay tam fag domayo intam manga ogali dwat, fag kafwali han Diyos, fag syag hantam Fon is Hisos. ²² Kati, kawa ka Maliyaw fag Falad kagtaban angko, ho hawas Hirosalim. Hodwa twa no kana ka madalanan sangko sinya. ²³ Nonman, nyawa haday fag banwa aho nogsabang, ka Maliyaw fag Falad igfatohoyan kitay ahom poriso aban sas Hirosalim, hanggan ta fahoriyan yadingko sinya. ²⁴ Dapat no kadi angko haboyagan idwa ha kinday sangko. Fag imtonglos di ngay angko lahawan. Fag imtabo in Hisos intam Fon disag hangko faibolonon, kawag fadog ka Fiya fag Barita, in Diyos malooy fag kahowayan. ²⁵ Aho nogfaadal ha hayo kawa han Diyos sakop baliwa, tam gofodan yapdi. Dapat gis kati ginan ho twa wa kitay ham idwa lomag domwag angko. ²⁶ Yakanga hoglwang kati bonwa aho ka hayo sogaton nyawa faktaw sa hayo no hawas kadwatan, ²⁷ maskin ho natoltol wa fiya fiya ha hayo in Diyos kafangayofanan hantam, sadik dahonya. ²⁸ Dapat ham fag matagahan hayo sadili hanggan hayo manga sakop ka Maliyaw fag Falad nafaano hayo. Ham fag gano fiya fiya in Diyos Tifonan, maskin it sadili Anak it kahatayan ka nabawi tonya. ²⁹ Ho twa wa kitay angko ginanan aban, ha akwa manga taw, bilang manga ido maisog gi sayo basad talon, idwa fadaogon domwat ka Tifonan. ³⁰ Gi yadi hayo aban hamlag manga taw kampang bohagon kaarakitay in Hisos manga katogbong imdiya wa hanya maskin kasayag fatalang manga taw, nomtwa di. ³¹ Yakanga ham fag matagahan, fag tohod kitay tolok fangaraw ho galowan wa kaawa hayo aho nogfaadal hayo, yabi sirang. ³² kati hogfaano hayo han Diyos, hanggan hat hampang kagfatohoyan it malooy fag kahowayan. Hanya ka fasyagan hayo, hanya ka twag disag ha hayo fagayo fag kafiyan kat nafatalaga has fagayo kat nafabokod hat sadili. ³³ Nyawa ginahin hodwa ha fagayfanon hayo pilak, hayo ginto, hayo manga rotay, nyawa gafo. ³⁴ Ham twa wa kitay kangko fangaboyagon, hanggan angko manga ofod fangaboyagon, gi wangko sadili nakayayan. ³⁵ Nyawa ginahin hogfalag kitay ka kito kangko nakayayan ka fiya, kaarakitay tam ha togbongon has manga magomo it habilogan. Tam fag tohod in Hisos kagfon intam it fwayong kitay, Kagdisag bomaya man kagtanggap. ³⁶ Nontabo wa kampang kitonya, is Pablo nalingkohodan, ginya ta nandarangin igsohodan. ³⁷ Fagayo ta nangoraw wan, nafohot, naayok in Pablo. ³⁸ Kasta fakarongkoton dahol kawa tagdog kitay is Pablo iglwang, Ham aba idwa lomag domwag angko. Ginya ta nafangolo in Pablo has sahayan sas baba dagat.

¹ Nontabo wagtogon is taw, mi dagos wa nalahaw baba dagat hawas foyo dagat Kos. Nonbago marom, mindasog sas foyo dagat Rodas. Ginya madi mi hawas banwa Patara. ² Sas Patara mi natahod sadi yak sahayan kagdifay has sakop Finisya, yakanga mi nasahay sinya, ginyan ginan wan. ³ Mi nadalan sas masohod foyo dagat Sipri, kabantay balis wala baliwa. Ginya madi migdagos wan hanggan wandasog has sakop Siriya. Mindagsa sas banwa Tiro maskin ta nafadokson it manga diya sinya. ⁴ Mi nasayak in Hisos manga katogbong sinya. Mi no nalag, mi nadogay sinya fitok sirang. Ka Maliyaw fag Falad nafaayfan in Hisos manga katogbong, tagbando in Pablo kitay, Fag idwa has Hirosalim. ⁵ Nonsagaya sadik simba, mi nalahaw ya ginya, nafadagos wa hyami lahawan. Fagayo, hanggan wat manga babay, manga anak, nafangolo hyami hanggan wa nadasog sas dayo banwa Tiro. Nondasog sas gobang dagat, mi fagayo nanlingkohodan a, nandarangin, hanggan nanarogonan ha sadi ha sadi. ⁶ Ginya mi nasahay ya ngawan hanggan ka manga taw ka nafangolo hyami nwali wan. ⁷ Gis banwa Tiro mi nalahaw ya has baba dagat hanggan wandasog has banwa Tolimaida. Mi sadi wak sirangan nanabang manga fadwasay sinya. ⁸ Ginya madi nonsirang mi nalahaw ya ngawan baba dagat hanggan mindagsa wan sas banwa Sisariya. Mi nigya san Filipi balay. Is Filipi sadi kagbarita, sadi yadi kasta nafili hyabi sas fito sas Hirosalim. ⁹ It manga anak dayaga ofat sonson wan Diyos manga fangampang. ¹⁰ Nonsagaya fihin ik sirang, ha akwan dasog gis Hodiya in Diyos fangampang sadi ya, it ngayan is Agabo. ¹¹ Hanya nanabang hyami, nabol in Pablo fagyahos, nagafos it sadili bitis, manga gamat, ginyag lwang, Ka Maliyaw fag Falad nafwayong kitay, Kitonya yadi ka manga Hodyo sas Hirosalim gomafos kagfon to fag fagyahos, ginya ta fagamat hanya has manga Hintil. ¹² Mi no nadog kitonya, migfwayong wagfwayong, hanggan ka taga sinya iglwang yadi han Pablo kitay, Gwadi haw fag idwa has Hirosalim. ¹³ Is Pablog lwang. Kana ham no goraw hanggan igfagomo angko fangayofan? Maskin ho galwasi in Hisos kagfon intam, ho talaga wa fagafos angko, nyawa hanggan wa matay sas Hirosalim, no tonya wat fasadan. ¹⁴ Mi nodwa nasyagan nabando, mi fawa ha naawang domwag hanya baliwa, miglwang, No kindawan kagfon intam it fasadan, fag kitonya wan. ¹⁵ Nonsagaya fihin ik sirang, mi galimbotangan wan, mi hawas Hirosalim. ¹⁶ In Hisos manga katogbong tiba gis banwa Sisariya nahin hyami, nafangolo hyami han Manason balay maskin mi sinya wak migya. Is Manason taga Sipri, dogay wantiwala han Hisos. ¹⁷ Mi nondasog sas Hirosalim, intam manga fadwasay nabaya waglag hyami. ¹⁸ No bago marom mi nanabang in Santyago. Sinya yadi ka manga fagtahinan fagayo san Diyos Tifonan. ¹⁹ Nonsagaya kampang ogbot magalang has taw, igbaya, is Pablo nafwayong igsadig sadi ka manga bagay in Diyos naibolon has manga Hintil kawas Pablo nogbarita. ²⁰ Ta no nadog kitonya, tagfasayagdog in Diyos. Dapat ta nalwang han Pablo, Fadwasay Pablo, haw fadi wadtwa no kayodawak libo fag manga Hodyo kawa mangag syag in Hisos, mahogod yapdi no katanog in Mwisis togon. ²¹ Ha akwa nafadahit has manga Hodyo istay kitay, haw igfwayong has manga Hodyo kan-aktom sas manga banwanan Hintil kitay, Ta fag domayo in Mwisis manga togon. Haw, hono, iglwang fag idwag fatoli ista manga anak, fag idwa yadi katanog ka ogali Hodyo. ²² Kinda araw intam halimbawan? Matohoyanan ta domog kitay haw indasog wastay kati. ²³ Fag kito nangos kam ibolonon. Istay ha ofat ik ama Hodyo ha taranggapan has Fanimbaan-Dahol. ²⁴ Ha tabanan wa nangos ka ofat ik ama, haw fag fadagos ka ogali igfalinay kagfatonglos intam Batasan Hodyo. Fag haw wa kagsakop ista gastos. Ginya madi ta falinay it manga alfoyo. No kitonya fagayo tomwa kitay ista fadahit ya mangharaw idwa orongan. Haw katanog yapdi ka Batasan Hodyo. ²⁵ No kadi has manga Hintil kantiwala, mi nafadiya sorat no kinday ka hyami fangayofan. Ta fag idwa kwan kasta manga nadisag has manga tolad faglohodon. Fag idwa kwan folot hayopan, hanggan ka manga hayopan kantagbong. Ta fag idwa yadig fabayowan. ²⁶ Yakanga nonbago marom, is Pablo naofod ka manga ama, nafadagos ka ogali igfalinay, hanggan nasakbaw has basad Fanimbaan-Dahol. Nafadog has taw no ginahin imtabo ta nogfatonglos ka ogali nogfalinay kito, hanggan no ginahin hanya no domisag ka manga bato disagon kagsakop ka manga ama ofat. ²⁷ No kaakbang wa kasagaya tonya fag fitok sirang, is Pablo nasakbaw has basad Fanimbaan-Dahol. Tiba Hodyo sinya, manga taga Asya, ka nalag in Pablo it fagonan, nafasognod has fakaaywanan, naogwan in Pablo, ²⁸ natawag ya ngadi kitay, Manga kapariho Hodyo, kalibang, togbongan hyami. To fag taw, nyawa haday kandasog, nogfaadal has taw, iglaban has tifonan Israil, iglaban ka Batasan Hodyo, iglaban has Fanimbaan-Dahol. Bondi tonya, hanya nataban yadi manga Girigo has basad Fanimbaan-Dahol, igsagaya wa ogali istay sas basad balay kantohoyan han Diyos. ²⁹ Taglwang kitonya maskin ta nalag is Pablo no gayayag basad banwa, ha ofod is Torofimo, sadik Hintil, taga Ifiso. Ista odi asolop kitay ngandayo tonyan Pablo ofod has basad aladan Fanimbaan-Dahol. ³⁰ Sadi wak dahonya banwa gagran. Ka manga taw igsarosonan wa kadasog, ngadi ginday, nagamat in Pablo, nagoyod hanya has dayo aladan Fanimbaan, ginya ta natahop wa madali ka sakbawan. ³¹ Ista fangayofan ta fahatay wa nangos in Pablo. Dapat ha nafadahit hasta gorangon tifonan sondalo taga Roma kitay, sadi wak dahonya Hirosalim gagran wa hono. ³² Ka gorangon sondalo nataban madali manga fagtahinan sondalo hanggan ista manga sakop sondalo. Ta nanhadalandanan hasta fag tifonan manga taw. Kagdaog in Pablo, no nalag ka manga fagtahinan sondalo, hanggan ista manga sakop kadasog, tantohas wagbakbak hanya. ³³ Ginya ka gorangon sondalo naakbang, nagamat in Pablo, nafagafos dowak kadina hanya. Ginya naintaw is taw, Fakta to fag taw? Kanat kasalanan maskin ham igdaog hanya? ³⁴ Bokod bokod ista faglwangon ta nogtarawagan, yakanga ka gorangon sondalo idwa twagdog no kana kasta fagbangdanon in Pablo kawa ta gagran wan. Yakanga ka gorangon sondalo nasogo kitay tabanan wan Pablo has basad balay sondalo. ³⁵ Nondasog sas bilog talangtang, ka manga sondalo nasafat wan Pablo maskin ka fakaaywanan fag manga taw kaisog wa dahol dahol hanya. ³⁶ Ta goyan yapdi, igtawag marigon, Fahatayan wa tyamo fag taw. ³⁷ Ta no kaakbang wa kafasakbaw in Pablo basad balay sondalo, is Pablog lwang hasta gorangon, Fiya di aw aho no homampang ha hyamo? Ka gorangon sondalo indolaw wan, nasagot, Ya mangharaw, haw madonong kampang fangampangan Girigo. ³⁸ No kitonya, haw bonwa ka taga Ihipto ka nataban 4,000 ama, has basad fakahyabogan, kaarakitay lomaban has gobirno itfagonan. ³⁹ Is Pablo nasagot, Aho sadik Hodyo kansagaya sas banwa Tarso, sakop Silisya, hanggan ta kilala wangko sinya fag banwa kanbantog. Hogsagad hyamo nangos, no fiya di, aho homampang yapdi has manga taw. ⁴⁰ Ka gorangon sondalo nafaangay wan. Yakangas Pablo nalindog sas bilog alitang bato, sas bahalan fantaw, nafaaman has manga taw. Ta nodwa gawang, is Pablo nalwang sas sanglitan Hibriyo,

¹ Manga magorang, hanggan manga fadwasay, ham fag talinga angko bato lwangon ha hayo kati, aho nogfatohoyan ha hayo angko manga ogali. ² Ka fakaaywanan no nadog kitay is Pablo kampang sas fangampangan Hibriyo, labi wa tadwa gawang. Ginyas Pablo nafadagos it toltol. ³ Aho sadik Hodyo kansagaya sas banwa Tarso, sakop Silisya, dapat aho istay sas banwa Hirosalim kandahol. Ho nangadal san Gamaliyal. Hanya mahogod wagfatonglos in Diyos manga natogon ogali kito hayo fagayo kati. ⁴ Hyabi hogfahoriyan yadi hanggan wagfahatay ka mangag fasakop to fag Ogali Bago. Ho nafagafos hanggan wa nafaporiso is taw, nyawa ina, nyawa ama. ⁵ Ka gorangon fag fagalanhan-Diyos hanggan ka tifonan manga fagtahinan Hodyo fagayo twag faorongan kitay kitonya angko ibolon hyabi. Hyabi ta nadisag angko manga sorat has manga Hodyo sas banwa Damasko, yakanga ahon bangkad hanya kaarakitay gomamat sinya ka katanog to fag Ogali Bago, tomaban magafosan tonya fag manga taw has Hirosalim kaarakitay fadosa. ⁶ Gis nanya hyabi, aho noglahaw yapdi, no kaboknga wa sirang, aho kaakbang wa kadasog has banwa Damasko. Sadi odi ginan nayawa gim tongod sangko ligongan, masilaw wa dahol dahol. ⁷ Honlohob has baba daga. Ginya ho nadog sadik hasnog ka nalwang hangko kitay, Sawlo, Sawlo, kana mayon haw nogfahoriyan angko? ⁸ Hogsagot, Faktaw haw kagfon angko? Hanyag lwang, Ahos Hisos, ka gis Nasarit, aho kam fagfahoriyon. ⁹ Yabay angko manga ofod nalag madi ngap ka yawa, dapat tadwa nadog ka hasnog it fakatignan hangko. ¹⁰ Aho naintaw yadi, Angko Fon, kana ara angko bato ibolonon? Hanyag lwang ya domwag, Haw fag lindog wa a, fag hawas basad banwa Damasko, ginya ta bago di fomwayong hyamo no kana kam ibolonon fagayo. ¹¹ Honbota wan maskin masilaw wa dahol dahol tonya fag yawa, yakanga angko manga ofod nagamit odingko has basad banwa Damasko. ¹² Ha sadik ama sas Damasko, kawas Ananiyas. Hanya orongan wa matanogon in Diyos, katanog yadintam manga Batasan Hodyo. Fagayo fag manga Hodyo ka mabanwanan sinyag galang hanya. ¹³ Is Ananiyas nanabang gingko, nalindog sangko akbang, ginyag lwang hangko, Fadwasay Sawlo, kati im mata fag iglag ya. Gis nanya yadi angko mata iglag ya, ogali wan a, ho nalag in Ananiyas. ¹⁴ Hanyag lwang ya kitay, Intam manga magorang it Diyos nafili hyamo kaarakitay haw tomwa no kana kat fasadan, haw lomag it Maliyaw fag Sogowan hanggan haw domog yadit hasnog, ¹⁵ maskin haw imbali famaorongan hanya, kaarakitay fomwayong has fagayo fag manga taw kam mata lagan, hanggan kam talinga donggon. ¹⁶ Yabay kati, kana yapdim fagfanayaon, ha gayfan? Fag kabangon, fag syag han Hisos ngayan kati, fag fatogna wa hyamo, ginyam manga naogali dwat imliyam wan. ¹⁷ Ginya madi aho nonfwali hastay has Hirosalim, aho nogdarangin sas basad Fanimbaan-Dahol, is Diyos ha nafalag hangko. ¹⁸ Ho nalag kagfon intam, hanyag lwang hangko, Kalibang, haw fag lahaw wa gistay gis Hirosalim maskin ka manga taw istay idwa tomalinga hyamo faorongan kawa hangko. ¹⁹ Hogsagot kitay, Angko Fon, ta fadi wadtwa kitay itfagonan aho kagfaporiso gis manga fanimbaan Hodyo ka mangan tiwala ha hyamo, hanggan wagfabakbak. ²⁰ Hanggan hyabi ta no nafahatay in Istiban, hyamo famaorongan sadi, aho sinya yadi, igfaangay ista ibolon, igbantay ista manga rotay ka mangag fahatay in Istiban. ²¹ Ginya madi kagfon intam nalwang hangko kitay, Haw fag lahaw wan maskin ho somogo hyamo has ayayo has manga Hintil ka bomarita. ²² Balinya yapdi ka manga taw igtalinga in Pablo toltol. Dapat ta no nadog kitay is Pablo gwas has manga Hintil baliwa, ta nanarawagan kitay, Fahatayan wa tyamo fag taw. Idwa fiya hanya nomboyag. ²³ Ta nodwag fagomon igharinggitan iglafog manga fogis daga has bagyo, igloslos it manga balokas, igdwatan odi maskin kahori wa dahol dahol ista manga fangayofan, ²⁴ ka gorangon manga sondalo nasogo kitay fasakbawan in Pablo ha basad balay sondalo, fag bakbak hanya kaarakitay igpilit igfasagot, tomwa no kana mayon ka manga Hodyo igharinggitan kitonya no kahorin Pablo. ²⁵ Dapat ta no nagafos wan Pablo, kaarakitay bomakbak hanya, is Pablo nahampang has fagtahinan sondalo, nalwang kitay, Ka ogali Roma igfaangay awkin kitay nyawa sadik taw ha kasoratan gis Roma, fiya digbakbak hanya, ham gayfan, nyawa idyan tohoyan gis hampangan? ²⁶ Ka fagtahinan sondalo nadog di nga kitonya, nadagos wa has gorangon sondalo, nalwang, Kinda odi tonya? Ya mangharaw, tonya fag taw ha kasoratan gis Roma. ²⁷ Yakanga ka gorangon sondalo hawan Pablo, naintaw hanya, Haw awkin orongan wa ha kasoratan gis Roma? Is Pablo iglwang. Ala. ²⁸ Ka gorangon sondalo nalwang, Dahol angko nabayad kaarakitay ha kasoratan gis Roma. Dapat is Pablo nalwang, Aho danwa ha kasoratan kitonya gingko kasagayan ginan. ²⁹ Ka manga haraw nangos mangintaw in Pablo, madali wa nalahaw ginya. Ka sondalo gorangon indala yadi wan kawa nafagafos in Pablo nyawa hanya ha kasoratan gis Roma. ³⁰ Ka gorangon sondalo kasaya tomwa no kana ka manga Hodyo sombong ka dwat san Pablo. Yakanga nonbago marom, ka gorangon sondalo nafahampangan ka manga fagtahinan fagalan-han-Diyos hanggan ka sadik tifonan fagtahinan Hodyo fagayo. Yabay ta no nalohas in Pablo gafos, ta nafadokson hanya hanggan nafabangkad has taw.

¹ Ginyas Pablo igbantay has taw, iglwang, Manga kaiban Hodyo, balis kati hodwa ha fagtagahon angko naibolon dwat, nyawa sawan Diyos faglagan. ² Is Ananiyas, ka gorangon fag fagalan-han-Diyos, no nadog in Pablo fwayong, nalwang has manga malindogan san Pablo akbang, Tofaan marigon in Pablo bibig. ³ Is Pablo nafwayong han Ananiyas kitay, Is Diyos ka bomakbak hyamo, kawa haw ha takan wa dahol dahol. No fiya fiya di, im fagtokawon is nyamo, haw mangabaya nangos angko no kinday ka Batasan Hodyo fwayong, dapat ay, haw igfatofa odi ngap angko, nyawa idwa maangay santam togon no kitonya. ⁴ Ka manga malindogan sinya iglwang han Pablo kitay, Haw igsalan odi kampang han Diyos gorangon fag fagalan. ⁵ Is Pablog sagot, Hodwa twa kitay tonya mangharaw ka gorangon fagalan-han-Diyos. Maskin anod, danwan sorat kitay, Fag idwa kampang salan ha hayo fagtahinan. ⁶ Dapat is Pablo no natwa kitay ha akwa manga Sadosiyo sinya hanggan manga Farisiyo, hanya nafadahol it hampang, iglwang kitay, Manga fadwasay, aho sadik Farisiyo hanggan angko manga magorang Farisiyo yadi. Maskin aho katiwala kitay ka manga natay imboyag ya domwag, tonya wa kasta fakahoriyon angko kati. ⁷ Is Pablo nontabo di ngaglwang kitonya, ka manga Farisiyo hanggan manga Sadosiyo nandaraogan. Ka tifonan manga Hodyo inbali wa dowak layonan. ⁸ Maskin ka manga Sadosiyo idwa katiwala kitay ka manga natay imboyag ya domwag, hanggan idwa hono ha manga anghil, idwa yadi ha manga falad. Dapat ka manga Farisiyo katiwala kitay manga taw imboyag ya, hanggan ha akwa manga falad, manga anghil. ⁹ Inlabi di ngap ka dowak layonan nogharinggitan. Ka mangag faadal Batasan Hodyo tiba, ka balis manga Farisiyo, nalindog nafabohag marigon, iglwang, Midwa ha lagon it naibolon dwat to fag taw. Nyawa halimbawa ha falad nahampang hanya, ngatay sadik anghil. ¹⁰ Ka manga taw no kahodhoriyan wan kawag daraogan, ka gorangon sondalo kadala ta homaragawan, ngandayo in Pablo habilogan imbokngan wan. Yakanga ka gorangon sondalo nafadokson manga sondalo, nafataban in Pablo a, nafasakbaw hanya has basad balay sondalo. ¹¹ Nonyabi wa araw, kagfon intam naakbang han Pablo, nalwang, Fag marigon im fangayofan, no kinday haw nafaorongan kawa hangko, istay sas Hirosalim, kitonya mandi im ibolonon aban sas banwa Roma. ¹² Dapat ay, nonsirang, ha manga Hodyo nanaranggapan kitay tadwa homwan yafon, idwa yadi ominom danom, ta nodya nafahatay in Pablo. ¹³ Iglabi wa ofat ik safolok ama ka nanaranggapan kitonya. ¹⁴ Ta hawas manga fagtahinan fagalan-han-Diyos hanggan has manga fagtahinan sas banwa, iglwang kitay, Midwag sway, mi nanaranggapan kitay midwa homwan yafon hami nodya nafahatay in Pablo. ¹⁵ Gwadi kati ham, hanggan ka tifonan fagtahinan manga Hodyo, sagadan gis gorangon sondalo kitay fadoksonan ya nangos in Pablo. Ham fag lwang, ham manalinga ya ngay it hampangan. Yakanga mi fahatay wa hanya boknga dalan, idya kadasog ha hayo. ¹⁶ Dapat ay, in Pablo bapa, in Pablo fadwasay ina bago ama fag anak, nadog kasta toltolan kitay ta omolog in Pablo. Yakanga nafwayong han Pablo. ¹⁷ Is Pablo nahampang ha sadik fagtahinan manga sondalo, iglwang, Ha ofodan nangos to fag bago ama has gorangon manga sondalo, maskin hanya ha bato fwayongon hanya. ¹⁸ Yakanga kagsogo manga sondalo nataban in Pablo bapa has gorangon, ginya nalwang, Ka nganporiso fag Pablo nafaofod angko to fag bago ama ha hyamo, maskin hanya hono ha bato fwayongon ha hyamo. ¹⁹ Ka gorangon sondalo nagamit ka bago ama, nafasaman gis taw, ginya naintaw hanya, Kana kam bato fwayongon hangko? ²⁰ Ka bago ama nasagot, Ha manga Hodyo nanaranggapan kitay, ta somagad gi hyamo kawa bago marom ha fadoksonan nangos in Pablo kaarakitay falag ya hanya has manga fagtahinan manga Hodyo. No kadog di ta labi man omintaw wa fiya fiya hanya. ²¹ Dapat haw fag idwa katiwala maskin iglabi wa ofat ik safolok ama ka maologan in Pablo kati. Ta nanaranggapan kitay tadwa homwan hanggan idwa yadi ominom no baliday tadya nafahatay in Pablo. Ta danwa maologan fiya fiya sas dalan kati. Hyamo odi sogo in Pablo kasta fagfanayaon. ²² Ka gorangon sondalo iglwang, Ha fag idwag fwayong nyawa haday kitay haw nafadahit angko kitonya. Yakanga hanya nafaoli wa ka bago ama. ²³ Ginya madi ka gorangon sondalo nafatawag dowak fagtahinan sondalo nalwang kitay, Ham fag fatalaga dowak daan sondalo kaglahaw baba daga, hanggan fitok safolo ka masahayan baba habayo, ginya dowa yak daan ka ha bitbit bangkaw, kaarakitay lomahaw has banwa Sisariya araw, kaakbang wa boknga yabi. ²⁴ Fag fatalaga yadin Pablo manga sahayan habayo. Ham tabanan wa hanya han Gobirnador Filis. Anowan in Pablo fiya fiya. ²⁵ Ka gorangon sondalo nafadiya yadi sorat han Gobirnador Filis, nalwang kitay, ²⁶ Ahos Kalawdiyo Lisiyas kagsorat ha hyamo, Gobirnador Filis. Kinday ham is nyamo? ²⁷ Ka manga Hodyo naiktan to fag ama hanggan ta nangos fahatay wa hanya. Ho nadog kitay hanya ha kasoratan gis Roma, yakanga ho nataban manga sondalo, hanggan nabawi hanya gis manga Hodyo. ²⁸ Maskin ho kasaya tomwa no kana kasta fagsombongon it naibolon dwat, ho nafadiya hanya has manga fagtahinan manga Hodyo itfagonan. ²⁹ Dapat ho natwa wagdog kitay kasta fagsombongon hanya, kawa ta ha fakahoriyon hasta ogali baliwa, dapat idya fiya kafahatay, idwa yadi fiya ngadi kaporiso. ³⁰ Ho no natwa kitay ka manga Hodyo nagkasadiyan ta omolog fahatay wa nangos in Pablo, ho dagos nafataban wa hanya ha hyamo. Hoglwang has mangag sombong hanya, Fag hawa hyamo, Filis, ta nogsombong aban in Pablo naibolon dwat. ³¹ Ka manga sondalo intanog wa ngay ka gorangon sondalo sogo has taw. Yakanga no yabi wan ta nataban in Pablo, hawas banwa Antipatris. ³² Domwag sirang ka manga sondalo kaglahaw baba daga nwali ya has balay sondalo sas Hirosalim. Ka mangag sahay sas habayo in-goyan di kaarakitay omofod yapdi omano in Pablo. ³³ Ta no nadasog sas banwa Sisariya, ta nataban in Pablo has Gobirnador hanggan nadisag ka sorat hanya. ³⁴ Ka gobirnador no nabasa di ngay ka sorat, naintaw in Pablo kitay, Haw ginday fag banwanan? No natwa kitay is Pablo gis sakop Silisya, ³⁵ Hanyag lwang kitay, Ho tomalinga hyamo hampangan aban ka mangag sombong hyamo nombangkad hastay. Yakanga ka gobirnador nafaoliyanan in Pablo san Hirodis nafahalig balay dahol. Ha akwa ya ngadig bantay hanya sinya.

¹ Ginya madi, nonsagaya limak sirang, ka gorangon fag fagalan-han-Diyos, is Ananiyas, hanggan tiba fag manga fagtahinan banwa gis Hirosalim, hanggan sadik fangayat, is Tirtolo, indasog has banwa Sisariya. Ta dagos wa nafadog has Gobirnador it sombong han Pablo. ² Ta no nafabangkad in Pablo, is Tirtolo nafabago wa nafadog kan Pablo naibolon dwat. Hanya nafwayong kitay, Migbaya wa hyamo, Gobirnador Filis. Dahol hyami fagfasalamaton ha hyamo maskin kawa madonong im manga sogowan, yakanga dogay midwa ha fakahoriyon istay hyami banwanan. Aywan yadi kam manga natogbong manga bagay bago, hawa hyami manga Hodyo banwanan. ³ To mi twa wa fiya fiya, nyawa ginahin, nyawa siday, aywan hyami fagbayaon gi hyamo. ⁴ Haw nangos fag talinga yap hyami sadik ngalay, idwa dogay araw mi noglibang hyamo. ⁵ Mi nalag to fag ama igfaawayan manga Hodyo, nyawa sida kandasog. Hanya sadik fagtahinan sas tifonan manga taga Nasarit. ⁶ Hanyag tikis waglaban hyami ogali sa hyami Fanimbaan-Dahol. Yakanga mi naiktan hanya. Itfagonan mi kasaya nangos bomolay fangabaya gi hanya, no kinda ka maangay ha hyami manga Batasan Hodyo, ⁷ dapat is Lisiyas, ka gorangon tifonan sondalo indasog, nahagaw hanya gi hyami. ⁸ Is Lisiyas iglwang ha hyami, fag ha hyamo mi nogsombong to fag taw. Haw no gintaw hanya, ha tomwa wan no kana ka hyami sombong ha hanya fagayo. ⁹ Fagayo fag manga Hodyo ka sinya insadi san Tirtolo, nafaanod yadit manga fwayong fagayo. ¹⁰ Ginya ka gobirnador no nafaaman kaarakitay is Pablo somagot yadi, is Pablo igfwayong han Filis kitay, Ho twa wa kitay haw dogay wa fangabaya istay sa hyami banwanan Hodyo. Yakanga hogbaya wan, nyawa idwa hagbaliwa angko, aho mandi ka kampang sa hyamo fagdogan. ¹¹ Idya safolo ha dowak sirang itfagonan, aho nondasog sas Hirosalim kaarakitay manimba sinya. Tonya haw twa wagfatohoyan haw no gintaw is taw. ¹² Nyawa ginahin tadwa ha lagan angko nafaagran is taw sa hyami Fanimbaan-Dahol, tadwa ha lagan angko nafahoriyan sa hyami manga iba fag fanimbaan, ngadi siday fag foyo basad banwa Hirosalim. ¹³ Tadwa ha lagan ista faorongan it manga fagbangdanon angko. ¹⁴ Dapat hogbaya kitay ahog simba ha hyami manga hafofowan Diyos kito ka maangay sas Ogali Bago. Hami sadik tifonan taw, taw noglwang, mi hono igfalamang. Dapat ho katiwala yadi wan fagayo fag manga bagay kansorat sas Kasoratan, nyawa ka Batasan Hodyo, nyawan Diyos manga fangampang sorat. ¹⁵ Kitonya yadi, hogsyag in Diyos kito kagsombong hanggan iglaban angko nogsyag ha hanya kitay, is Diyos faboyag ya fagayo fag manga taw aban, nyawa ka fiya it manga ogali, nyawa kadwa fiya. ¹⁶ Yakanga no baliday angko fagsyaganon, nyawa ginahin aho fag idwa ha fagtagahon kangko naibolon dwat, nyawa san Diyos faglagan, nyawa sas manga taw faglagan. ¹⁷ Kayodawak fangaraw ahodwa gis Hirosalim. Ginya, itfagonan, ahon fwali ya kaarakitay manibo ista togbong hangko manga kaiban, hanggan aho nangos mandisag yadi han Diyos. ¹⁸ Kitonya nga kangko ibolon itfagonan ta no natahod angko sas Fanimbaan-Dahol. No kitay di, mintabo wagfatonglos hyami togonan nogfalinay no kinday ka maangay sa hyami Batasan Hodyo. ¹⁹ Bago bago sayok di fag manga taw ka sinya, idwa yadi ha gagran. Ginya madi araw, ka odi manga Hodyo gis Asya inbangkad sinya. Tonya nangos ka fiya imbangkad hastay kati, ta no ha fagsogaton angko naibolon. ²⁰ Ngatay ka manga Hodyo, kastay kati, fag fwayong no kana kasta lagan dwat sangko ta no nataban angko has fanoltolan Hodyo. ²¹ Ngatay ta lomwang kitay aho nafalamang aho noglwang sasta fagdogan, Maskin hogsyag kitay ka manga natay imboyag ya, yakanga tagfahampangan angko kati. ²² Ginya madi, maskin is Filis danwa twa wagdog no kana tonya fag ogaliyon, ta nogngayan ka Ogali Bago, hanya nafaliban yapdin Pablo hampangan, nalwang, Ho bago di fatohoyan hayo hampangan, is Lisiyas nomdasog aban. ²³ Ginya nasogo yapdi hasta fagtahinan sondalo kitay, Bantayan in Pablo, dapat fag idwa mahigpit. Fag idwag bando it manga fakilalaon ta nogsabang hanggan igtogbong hanya. ²⁴ Nonsagaya fihin ik sirang, is Filis inbangkad ya, hanggan wat babay, is Dorosila, sadik ina Hodyo. Ta nafatawag in Pablo, ta kasayag dog no kinday no katiwala han Kiristo Hisos. ²⁵ Ginyas Pablo nogfadagos wagtoltol kawa has fiya fag ogali, has igfasad intam sadili, hanggan kitay ha fatohoyan has fadosaan aban, is Filis indala wagdog. Hanyag lwang, Nyawa haw lomahaw wa kati. Ho fatawag ya hyamo aban ho nodwa ha libang. ²⁶ Is Filis fagaba wagfatawag in Pablo, kampang hanya, maskin gasolop kitay ngandayos Pablo ha fagdisagon kwarta ha hanya. ²⁷ Dapat ay, nonsagaya dowak fangaraw, is Porsiyo Fisto natobos in Filis, hanggan is Filis nafabayaan yapdin Pablo basad porisowan maskin is Filis kasaya ka manga Hodyo fag baya hanya.

¹ Yakangas Fisto indasog hat bato sakopon fag banwanan. Ginya madi nonsagaya tolok sirang, hanya nalahaw gis banwa Sisariya, hawas banwa Hirosalim. ² Ka manga fagtahinan fagalan-han-Diyos hanggan manga fagtahinan Hodyo sas Hirosalim nafwayong han Fisto kat sombong in Pablo naibolon dwat. ³ Ta nanagad kitay ka gobirnador fafwali ya nangos in Pablo has Hirosalim maskin ta ha fangayofan kitay omolog hanggan fahatay hanya boknga dalan. ⁴ Is Fisto nasagot kitay, Is Pablo sadis Sisariya maporisowan a, hogdali yadi goli hanya. ⁵ Fatahinan wangko hayo manga fagtahinan. Hanya no orongan wa ha naibolon dwat, fag sinya wak fadog hayo sombong. ⁶ Is Fisto nadogay yapdi manga safolok sirang sas Hirosalim. Ginya bago di nwali has Sisariya. Nonsirang is Fisto natokaw sas fanokawan Fangabaya a, nafatawag yadi kitay, is Pablo fag imbangkad sinya. ⁷ Is Pablo nondasog di ngay ka manga Hodyo gis Hirosalim nasafong hanya. Ta nafadog it manga sombong aywan, myasa wa mahori kadog fag manga sombong han Pablo. Dapat tadwa twag faorongan kat manga fagbangdanon. ⁸ Ginya madis Pablo igfatohoyan has taw it sadili ogali, iglwang kitay, Hodwa ha naibolon dwat kitay iglaban nyawa has Batasan Hodyo, nyawa has Fanimbaan-Dahol, nyawa han Sisar, ka gorangon Roma. ⁹ Dapat ay, is Fisto kasaya kitay ka manga Hodyo fag bomaya hanya, yakanga naintaw in Pablo kitay, Haw aw kasaya tam fag hawas Hirosalim kaarakitay sinya aho no tomabo im hampangan? ¹⁰ Is Pablo igsagot, Ho istay was gorangon Roma fanokawan fangabaya. Fag istay wa ham nogfatabo. Ha twa wan hodwa ha naibolon dwat has manga Hodyo. ¹¹ Aho no ha naibolon dwat, aho no ha naibolon nyawa kana fag bagay ka fiya fadosaon kahatayan, hodwa ha lwangon. Dapat nodwa ha fakaoronganan ista sombong kawa hangko, ham idwa syagan tomaban angko has Hirosalim. Angko fakasayaon, fag hawan Sisar nogfatabo. ¹² Is Fisto naintaw it manga katogbong ka madonong twag dog ista katowidan. Ginya madi nalwang han Pablo, Kawa haw iglwang kitay, haw kasaya han Sisar ka gorangon Roma, haw hanya wan aban. ¹³ Ginya madi nonsagaya manga fihin ik sirang, is Gorangon Agripa, kan Sisar fadowa sinya fag banwanan, hanggan is Birinisi indasog sas banwa Sisariya, nasabang magalang in Fisto. ¹⁴ Ta no dogay wa ogbot sinya, is Fisto natoltol han Agripa kawa han Pablo baliwa, iglwang, Is Filis ha nafaporiso sadik ama gin Filis ginan hanggan wa hangko kati. ¹⁵ Aho no gis Hirosalim itfagonan, ka manga fagtahinan fagalan-han-Diyos hanggan ka manga fagtahinan Hodyo nanagad kitay fatohoyanan hanya has fadosaan. ¹⁶ Ho nasagot is taw kitay, ka ogali Roma idwag fadosa sadik taw, nyawa faktaw, nodya nangatohoyanan baliw baliw, kaarakitay kasta nasombong twag fatohoyan it sadili. ¹⁷ Maskin aho idwag fadogayon ta nondasog di ngay, nonsirang ho nafatawag wa dagos tonya fag taw has fanokawan fangabaya. ¹⁸ Ho gasolop kitay orongan wa ha naibolon dwat. Nonman no myasa wa sinya, tadwa ha fagsombongon orongan matohoyanan. ¹⁹ Dapat kasta fagdaraogon, kayadista fagsimbaon, hanggan ka odi sadik taw, is Hisos. Tonya fag taw natay wan hyabi, dapat ay is Pablo igfaaronganon kitay hanya hono boyagan wa kati. ²⁰ Hodwa twa no kana kangko fwayongon kawa to fag manga bagay, maskin nga ho naintaw hanya kitay ngatay fag sas Hirosalim nomtabot hampangan. ²¹ Dapat is Pablo idwag faangay, nafadog kitay hanya kasaya fag is Sisar ka gorangon Roma, ka fomwayong no kinday hat hampangan. Yakanga ho nafabantay hanya manga sondalo kaarakitay aho fatahin hanya han Sisar aban. ²² Ginyas Agripa iglwang han Fisto, Ho kasaya yadi manalinga tonya fag taw. Is Fisto nasagot, Bago marom haw domog wa hanya. ²³ Yakanga nonsirang da Agripa da Birinisi, mataka wa kalag, hanggan ka manga abwat fag fagtahinan sondalo hanggan ista fakilalaon fag manga taw sinya fag banwa, indasog hanggan nasakbaw has basad balay fanabowan hampangan. Ginyas Fisto nafatawag kitay, Tabanan in Pablo hastay. ²⁴ Ginyas Fisto iglwang, Hogfadog ha hyamo, haw, gorangon Agripa, hanggan has fagayo intam ofod istay, ka manga Hodyo nasombong angko sas Hirosalim, hanggan nyawa istay itfagonan, tagharinggitan kitay, to fag ama is Pablo, fag idwa boyagan. ²⁵ Dapat aho nogsolay gintaw, hodwa ha donggon fabangdanan hanya kaarakitay fadosa hanggan kahatayan. Dapat, kawa hanyag lwang kitay hanya kasaya has gorangon Roma, hogsogo wa hanya has Roma. ²⁶ Dapat ho gadowan maskin hodwa ha bato soraton fadiya han Sisar to fag taw it naibolon dwat. Yakanga ahog fatalinga yadi hayo, labi wa ha hyamo, Agripa, kaarakitay tam nomtabo wa gintaw hanya araw, ho ngandayo ha lagon angko bato soraton. ²⁷ No sangko, idwa fiya igfatahin han Sisar, ka gorangon Roma, sadik poriso, nodwa yadi ha fagfwayongon it naibolon dwat.

¹ Ginya madi yabay is Agripa iglwang han Pablo, Nyawa haw tomoltol kati, kinday kam bato fwayongon im sadili? Is Pablo no nafaaman it gamat, kawa galang in Agripa, dagos wa nahampang nafatohoyan it ogali. ² Nalwang kitay, Tabi tabi Agripa, hogbaya wa dahol no haw ka tomalinga no kinday aho no fabohag araw has manga Hodyo kagsombong hangko. ³ Maskin haw twa wa fiya fiya ka Hodyo manga ogali hanggan manga fakahoriyon. No fiya di, ha fag gagwantag talinga angko toltol. ⁴ Ka manga Hodyo fagayo twa wan no kinday angko ogali giyapdingko ogbot ginan sangko sadili banwanan, hanggan sas Hirosalim. ⁵ Ta fadi wadtwa angko manga ogali, hanggan ta no kasaya, ta syagan yadig faanod kitay, hyabi aho mahogod nogfasakop has mahigpit fag layonan sas manga Hodyo, ka layonan manga Farisiyo. ⁶ Ginya madi kati, tagfabali hampangan hangko kawa hogsyag han Diyos natogon bato disagon hantam manga hafofowan. ⁷ Tonya mandi ka safolo ha dowak layonan Hodyo fagsyagon maskin ngay ta mahogod wagsimba han Diyos, yabi sirang. Tabi tabi, gorangon Agripa, ginya mandi fagsyagon ka manga Hodyo fagsombongon angko. ⁸ Kana mayon ta no gayfan kitay, is Diyos idwa faboyag domwag ka manga natay, ham gayfan? ⁹ Hyabi hanggan aho, ho gayfan aho fag lomaban fiya fiya ka ngayan is Hisos, gis Nasarit. ¹⁰ Kitonya nga ngap kangko naibolon sas Hirosalim. Bondi kitay aywan fag mangan tiwala han Hisos kangko nafaporiso, kawa ka manga fagtahinan fagalan-han-Diyos igfasognod, dapat hanggan ta no nafaampo was taw fahatay, hanggan aho, aho nafaoyon yadi wan. ¹¹ Sas fagayo fag manga fanimbaan Hodyo, nyawa faktaw kangko tahodon sinya kantiwala han Hisos, hogfadosa kaarakitay pomilit homampang domayo in Hisos. Maskin ho kalabi wan no gisog has taw, ho hanggan wa naoyan nyawa siday fag banwa sas iba fag layonan daga. ¹² Yakanga tonya nangos kangko bato ibolonon aho no hawas banwa Damasko hyabi. Gis nanya ho ha diya manga kasoratan gis manga fagtahinan fagalan-han-Diyos, faangay fahoriyan ka mangan tiwala han Hisos. ¹³ Ay ay, tabi tabi, Agripa, no boknga wa sirang, hami noglahaw yapdi has Damasko, mi nalag nayawa gim tongod, bondi kitos myanit no masilaw. Nayawa masilaw wa dahol dahol sa hyami ligongan fagayo. ¹⁴ Hami fagayo inlohob has baba daga. Ginya ho nadog sadik hasnog, nahampang hangko sas fangampangan Hibriyo, nalwang kitay, Sawlo, Sawlo, kana mayon haw nogfahoriyan angko? Haw mandi kamiktan haw nogsihad ka hayo madogi kagfasognod hyamo. ¹⁵ Yakanga ho naintaw. Faktaw haw, angko Fon? Hanyag lwang, Aho is Hisos, kam fagfahoriyon. ¹⁶ Haw fag kalindog wan, maskin aho nafalag angko sadili ha hyamo kati, kaarakitay aho fatohoyan hyamo hangko faibolonon hyamo. Haw aban faorongan has taw ka hyamo lagan kati, hanggan angko bato falagon ha hyamo aban. ¹⁷ Ho bomawi hyamo gis manga Hodyo hanggan gis manga Hintil, kangko fagsogoon hyamo. ¹⁸ Aho somogo hyamo hanya fag manga taw, kaarakitay ista manga mata fangayofan lomag wan hanggan fafwali ya has mayawa gis marom, fafwali yadi han Diyos gin Satanas karigonan. Ta nogsyag angko ho faliyam ista manga ogali dwat, tam-aktom yadi hangko sakop fag manga taw kangko nafatohoyan hangko sadili. ¹⁹ Maskin kitonya, tabi tabi, Agripa, ahodwa nafasigpala angko lagan madolaw gin Diyos. ²⁰ Bago bago ho nabarita has banwa Damasko, ginya has Hirosalim. Ho nabarita yadi sadi wak dahonya Hodiya, ginya madi hanggan wa has manga Hintil. Hogfwayong has taw kitay, tam fag somoyo, tam fag kafwali ya han Diyos, fag intam manga ogali kanbago kagfaorongan kitay tam nasoyo wan. ²¹ Kawa tonya fag manga bagay ka manga Hodyo maskin naiktan angko, aho no sas Fanimbaan-Dahol. Ta fahatay wa nangos angko. ²² Dapat ay, balis kati is Diyos idwa nafabayaan angko, yakanga kati aho malindogan yapdistay, hogfaorongan to fag manga bagay has mangadwa ha kangayanan, hanggan has manga gorangon. Ahodwa ha fagfwayongon no bonwa kan Diyos manga fangampang hanggan in Mwisis fwayong kitay imlag aban, ²³ kawa kan Diyos-natogon-Famawi fag lomag mahori, ginya madi hanya fag ka gomona imboyag ya domwag kaarakitay falag kayawaan has manga Hodyo hanggan has manga Hintil. ²⁴ Is Pablo no kampang yapdi igfatohoyan it ogali, is Fisto nafwayong marigon, Pablo, haw kapaong wan. Im kadonongan iglabi wan maskin nga haw kapaong wan. ²⁵ Dapat is Pablo nasagot, Tabi tabi, Fisto, aho bonwa kapaong. Fakaoronganan wan, maanod yadi wan kangko fagfwayongon fagayo fagayo. ²⁶ Istay wa kati is Agripa, in Sisar fadowa istay fag banwanan. Hodwa fagomon homampang hanya maskin hanya twa wa tonya fag manga bagay, fagayo fagayo. Bonwas fyaloman tonya non-anod, yakanga matohoyanan hanya nadog wan. ²⁷ Tabi tabi, Agripa, haw aw katiwala wan Diyos manga fangampang fwayong hyabi? Ho twa wa kitay haw katiwala wan. ²⁸ Is Agripa nasagot han Pablo kitay, Haw nogtoltol hangko manga sadik tama sinyahod, haw ngandayo gayfan kitay, haw igfabali angko in Kiristo taw. ²⁹ Is Pablo igsagot, Nyawa ngalay, nyawa dogay aho nogtoltol, angko fagdaranginon kitay, fag bondi haw, dapat fag fagayo kagdog angko manga hampang kati, fag imbali nangos kito yadingko, dapat fag idwa nangos magafosan. ³⁰ Ginya madi ka gorangon hanggan ka gobirnador hanggan is Birinisi hanggan it manga ofod fagayo nalindog a, ³¹ nadokson wan. Kiti kasta toltolan, To fag taw idwa gibolon dwat, nyawa kana kaarakitay fatohoyan hanya has kahatayan, nyawa has porisowan. ³² Ginya madis Agripa iglwang han Fisto, Nonman to fag taw nafahasa kitay fag ka gorangon Roma ka tomalingat hampangan, fiya wamtabo no kitay di, malfas yadi wan.

¹ Nontohoyan kitay hami somahay baba dagat, hawas layonan daga Italya, ta nafabantay in Pablo hanggan ka tibak manga poriso han Holyo. Is Holyo sadik fagtahinan sas tifonan sondalo Roma, tagngayan, In Sisar tifonan. ² Mi nasahay ha sadik sahayan baba dagat ka gis banwa Adramitiyo, ka kaginan wan hawas manga fangadagsaan sas sakop Asya. Ginya yabay min-ginan wan. Is Aristarko gis banwa Tisalonika, sakop Masidonya, naofod hyami. ³ No bago marom mi natorosan sas banwa Sidon. Is Holyo mahoway han Pablo, nafaangay di nyawa manabang hat manga fakilalaon kaarakitay ta tomogbong hanya. ⁴ Ginya madi min-ginan ya ngawan ginya. Maskin ka bagyo igtagbo wa hyami, mi nabaybay has salogan myanit baliwa foyo dagat Sipri, has faroman bagyo bangan. ⁵ Ginya mi no nadalan has masohod sakop Silisya hanggan sakop Panfilya, mindagsa has Mira, sadik banwa dahol sas sakop Lisya. ⁶ Ka fagtahinan sondalo nalag sinya sadi yak sahayan igdalan gis banwa Alihandriya, hawas layonan daga Italya, yakanga nafasahay hyami sinya. ⁷ Hyami sahayan kabayan kaoson, magomo wa dahol dahol iglahaw, aywan ik sirang baba dagat. Minhori wan bagon dasog has masohod banwa Ginido. Gis masohod Ginido midwa nasyagan nadagos has fakadaholan dagat, maskin ka bagyo igtagbo wa hyami. Yakanga mi nabaybay ya ngawan, has salogan myanit baliwa foyo dagat Kirita sas faroman bagyo. Mi nadalan sas fakaogbotan danom sas masohod banwa Salmon. ⁸ Mi naagwanta wagbaybay las bahalan bahalan kaarakitay mimdasog ha sadik forowan balay kasta fagngayanon, Fiya fag dagsaan, akbang has banwa Lasya. ⁹ Kawa dogay hyami sahayan itfagonan, insagaya wa fanlahawon, madala wa kasahay has baba dagat, maskin ista tandaan insagaya wan ka sirang Fanohodan ka manga Hodyo nodwa kwan hanon. Yakangas Pablo igfatagak is taw, ¹⁰ iglwang, Manga taw ham, tam no lomahaw kati, mahori aban intam sahayan hanggan it sohad, nyawa ngap ka tam, madala wan. ¹¹ Dapat ka fagtahinan sondalo natalinga man hasagfon sahayan hanggan hasag falahaw. Idwan tiwala in Pablo fwayong. ¹² Kawadwa fiya igdogayan sinya fag fandagsaan sahayan dayo abagat, ka fakaaywanan iglwang kitay, fiya man tam no lomahaw ya, tagfahasa kitay fag masog nangos has banwa Finisi, ka sadik fandagsaan sahayan sas foyo dagat Kirita sas sangdayan myanit baliwa. Yakanga sinya fiya di nogdogayan no abagat yapdi. ¹³ Ginya madi ka bagyo nogfarayfayan ogbot gis balitangan baliwa, ta gayfan fiya wa nga nogfalahaw it sahayan has baba dagat. Yakanga ta nafasakbaw ka famondo sahayan, ta naaroyan has akbang foyo dagat Kirita. ¹⁴ Dapat idya dogay araw, sadi odi ginan, ka gorangon fag bagyo amihan indasog wan gis foyo dagat baliwa. ¹⁵ Ka bagyo nasirig dahol dahol hasta boknga sahayan baba dagat. Ka sahayan idwa syagan iglaban ka bagyo, yakanga mi kadiya odi. ¹⁶ Hami no nafafarom ha sadik foyo dagat ogbot, it ngayan Kalawda, nyawa mahori wa dahol, mi nafasahay ka baloto ogbot ogbot has basad sahayan ka dahol. ¹⁷ No sawas basad sahayan, ta nahalawid wan ka ogbot fag baloto has dahol fag sahayan, dahol yadi fag lobid. Ginya mi noglahaw ya, ta nafalibaba ka layag maskin ta kadala kitay ka sahayan ngandayo imgarod ha sayo bato, yakanga migfalimos odi. ¹⁸ Nonsirang wan, kawa ka bagyo igfatowang towang yapdi hyami sahayan, tagfabago wa gokas ka sahayan manga diya. ¹⁹ No domwag sirang, ta naokas yadi ka sahayan manga sangkap tiba. ²⁰ Kawa fagaba malinyabo, dogay midwa nalag myanit no sirang, midwa yadi nalag manga fanggasan no yabi, hanggan ka marigon fag bagyo idwa kasiwang. Yakanga mi gayfan mi fawa malfas, isyay wan. ²¹ Maskin dogay wan ka sas basad sahayan idwa ha nahwan hanon, is Pablo nalindog a, nalwang, Ham angko manga ofod, ham nangos no natalinga dingko, tam idwa nalahaw gis foyo dagat Kirita. Yato araw tam idwa kitoy basad mahori. ²² Dapat ay, angko fagfwayongon ha hayo kati kito, Fag marigon hayo manga fangayofan maskin tam fagayo idwam kinday, nonman ka sahayan imdwat wan. ²³ Maskin is Diyos kangko fagsimbaon hanggan fakatanogon nafalag hangko sadik anghil sayabi. ²⁴ Ka anghil nalwang hangko, Pablo, haw fag idwa kadala, matohoyanan haw lomindog yapdi san Sisar atobangan. Kawa haw istay yadi sas sahayan, is Diyos bomawi yadim manga ofod. ²⁵ No kitonya, tam fagayo fag marigon intam manga fangayofan. Maskin hogsyag in Diyos kitay im-anod wat fwayong. ²⁶ Dapat ay, intam sahayan imtoktok yapdi ha sadik foyo dagat. ²⁷ Safolo ha ofat ik yabi ka bagyo nogfadiya diya hyami baba dagat Adriyatiko. Ginya madi araw, no kaboknga wa yabi, ka manga fangibolon sas sahayan natwa wagdog kitay ta kaakbang has fakalibabawan. ²⁸ Ta nafasohod lobid kat kaabasadan dagat. Taglag dowak safolok dofa it kaabasadan. Mi no naoson ya ogbot, taglag safolo odi ha limak dofa. ²⁹ Kawa ta kadala wa kitay imtoktok ha sayo bato, ta nafadagdag ofat ik famondo sahayan sas ginanan. Tagdarangin wa kitay, fag imsirang wa nangos. ³⁰ Basad yapdi marom, ka manga fangibolon tiba kasaya lomihos is taw. Ta natonton ha basad danom kasta nafasahay baloto itfagonan. No kalag di, ya hono, tagfatonton di famondo sahayan sas fagonan, ya mangharaw, ta kalihos wan. ³¹ Dapat is Pablo nalwang has fagtahinan hanggan has manga sondalo, To fag manga taw no lomihos di, tam idwam bawi. ³² Yakanga ka manga sondalo nalifong ka siyok a, nafadagdag lamang kasta fagfatontonon baloto ogbot. ³³ No kasirang wan, is Pablo igfaaronganon has taw fagayo kitay, ta fakwan hanon. Nalwang kitay, Safolo ha ofat ik sirang ham idwa ha nahwan. Ham kalibang odi galibitan igfanaya no kadasog. ³⁴ Tam fakwan wan. Tam nodwa mangwan, tam ara idwa malfas. Gwadi tam idwam kinday. ³⁵ Is Pablo nalwang di nga kitonya, nabangkad tinapay, nafasalamat han Diyos sasta faglagan fagayo. Ginya nafaarogbotan ka tinapay. Yabay, igfabago kwan. ³⁶ Ka manga taw insayag lag, ta nangwan yadi. ³⁷ Hami fagayo, 276 taw. ³⁸ Mi no napsog wan, ta naokas ha basad dagat ka tirigo kaarakitay ka sahayan imhagan wan. ³⁹ No mayawa ogbot araw, ta nalag sadik foyo dagat, dapat tadwa kilala no kana fag banwanan tonya. Taglag sas bahalan ha onay ogbot. Ista fangayofan ta fadagsa sinya ka sahayan nomtwa di. ⁴⁰ Yakanga ta nabogloy ka lobid gis manga famondo, naobon wa sinya basad dagat. Ta nalohas yadi wa ka tahod gis famalahaw kagfahaslong. Ginya ta nafaabwat ya ka layag sahayan sas fagonan baliwa, kaarakitay ka bagyo domiya ka sahayan has bahalan, hanyas onay nangos. ⁴¹ Dapat ka sahayan intansak has fakalibabawan has fagonan baliwa, it baliw inlobgob, yakanga idwa kabol. Dapat ay, balis habot baliwa, kamin wa kadwat maskin ka taob myasa wa marigon nogbakbak. ⁴² Ka manga sondalo fangayofan ta fahatay lamang ka manga poriso fagayo kaarakitay idwa ha omabang, idwa malfas. ⁴³ Dapat ka fagtahinan manga sondalo kasayag bawi in Pablo. Yakanga hanya nabando ka manga sondalo kitay, fag idwag fahatay ka manga poriso. Ginya madi, hanya nalwang has manga taw ka madonong gabang, Ham fag lokso ha basad dagat. ⁴⁴ Nalwang has tiba, Fag bol tabla, manga lifong hayo gis sahayan, ginya fag sahay sinya. Yakanga hami fagayo indasog has bahalan dagat.

¹ Mi no nalfas gis basad danom, mi nalahaw has bohid. Mi bago di natwa kitay tonya fag foyo dagat it ngayan Malta. ² Ka manga taga sinya tan-awa wa dahol dahol hyami. Maskin natoyongan wa dahol dahol, magnaw ya ngadi, ta nafagba afoy, naano wa fiya fiya hyami. ³ Is Pablo igligaw ya ngadi hayo famagba. No nafagba has afoy kat lagan hayo, ha abyanon mangharaw inbangkad gis basad hayo. No kyanit afoy, nahoskos san Pablo boknga gamat, nahagat hanya. ⁴ Ka manga taga sinya no nalag ka abyanon mahoskosan san Pablo boknga gamat, tagtoltolan ha sadi ha sadi, ta gasolop kitay, To fag ama, mangharaw, ha nafahatay taw. Hanyan bawi ongay gis basad dagat, dapat ka sas tongod idwag faangay kitay hanya fag boyagan yapdi. ⁵ Dapat is Pablo nafadagdag lamang ka abyanon has basad afoy, idwa yadin kinday. ⁶ Ka manga taw igdoro in Pablo, ta gayfan hanyam baga, ngatay makfo sadi odi ginan, matay wan. Ta no dogay wa madorowan, hanggan hanyadwan kinday, ta nafaoman it fangayofan, taglwang, To ngan wa ngap sadik diyos. ⁷ Gis nanya fag masohod is Pobliyo ka fagtahinan sinya fag foyo dagat. It manga fangiyaban sinyas gobang dagat. Kawat fangayofan wa kitonya, hanya nafaoliyanan hyami sat balay manga tolok yabi. ⁸ Natoon gis nanya kitay, in Pobliyo ama maigyanan kagnaw ya, gifot ya. Ginyas Pablo namantay hanya. Nontabo wagdarangin, is Pablo nafwalid it gamat has ha sagit, ginyan fiya wan. ⁹ Kawa kitonya, ka tiba taw ka ha manga sagit igdasog wa ngay gis baliw gis baliw. Is Pablo nafafiya yadi tonya. ¹⁰ Ta nagalang hyami, yakanga aywan ista natogbong hyami. Ginya mi no kalahaw wa aban, aywan ista nadisag ha hyami, nafahosto hyami manga sangkap fagayo has lahawan. ¹¹ Ginya madi, nonsagaya tolok magdanon, mi bago din-ginan ginya. Mi nasahay sadi yak sahayan gis banwa Alihandriya, ka danwa matarosanan sas faroman bagyo, igfasagaya yapdi abagat sinya, it ngayan, Da Kastor da Polok. ¹² Ginya madi mindagsa tolok sirang sas banwa Sirakosa. ¹³ Ginya mi nadagos has baba dagat has banwa Rigyo. Nonbago marom, nabagyo ogbot gis balitangan, yakanga sas fadowa fag sirang, mindasog madali has banwa Potyoli ¹⁴ Mi nalag manga fadwasay sinya. Taglwang kitay mi nangos fag domogay yapdi sinya sadik simba. Ginya madi mindasog has banwa Roma. ¹⁵ Intam manga fadwasay sas Roma, no nadog kitay mi kaakbang wan, ta hawas fanaliyan Foro Apiyo, hanggan has Fandasogan Tolok Balay, kaarakitay tomagbo hyami. Is Pablo no nalag was taw, hanyag baya wa han Diyos, inrigon yat fangayofan. ¹⁶ Ginya mi nondasog has basad banwa Roma, ta nafaangay kitay is Pablo fag lomag it sadili fagoliyanan fag balay, dapat fagaba ha bantay di sondalo. ¹⁷ Nonsagaya tolok sirang, is Pablo nafatawag ka manga fagtahinan Hodyo kaarakitay ta manoltolan. Ta no matifonan wan, is Pablo iglwang, Angko manga kaiban Hodyo, no kitay di hodwa ha naibolon dwat iglaban intam manga iba, nyawa hantam manga ogali magorang. Dapat kapariho manga Hodyo nagamat angko sas Hirosalim. Ta nasombong has mangag bahala sas gobirno Roma. ¹⁸ Nontabo angko hampangan hyabi, no kitay di hogdog ka gis gobirno Roma fomalfas wangko, maskin hodwa ha naibolon dwat ka fiya fadosaon kahatayan. ¹⁹ Dapat ka manga Hodyo idwag faangay, yakanga, nyawa hodwa ha bato fagsombongon iglaban intam manga iba, hogpilit wagsyag has gorangon Roma. ²⁰ Kati aho magafosan kawa ha hanya, kan Israil manga hasokfonan fagfahasaon. Kawa kitonya hogsagad kitay tam fag mangampangan wan. ²¹ Ka manga Hodyo nasagot, Midwa ha natanggap sorat gis Hodiya kawa ha hyamo. Nyawa gintam manga iba kagsabang hastay, tadwa ha nafadahit kitay haw sadik taw dwat. ²² Nyawa kitonya mi kasaya domog im toltol maskin mi twa kitay nyawa siday fag banwanan manga taw igfwayong aywan fag manga bagay, igfadwat igdog tonya fag layonan taw it fakatiwalaon. ²³ Yakanga ta nafatohoyan sadik sirang kitay gis nanya aban ta manifonan. Nondasog gis nanya fag sirang, aywan kanbangkad han Pablo balay. Sadi wak sirangan is Pablo igtoltol has taw, igfaorongan kawa han Diyos sakop baliwa. No baliday in Pablo fagsyaganon, hanya nafatiwala manga taw han Hisos, nogtoltol gin Mwisis manga togon hanggan gin Diyos manga fangampang nasorat. ²⁴ Ha akwan tiwala in Pablo nafwayong, ha akwadwan tiwala. ²⁵ Yakanga tadwan sadi, ta nanarowayan lamang. Is Pablo iglwang yapdi kiti fag manga hampang, Orongan wan ka Maliyaw fag Falad fwayong gin Isayas, in Diyos fangampang, no nafwayong ha hayo manga hafofowan, ²⁶ Haw fag hawas manga taw, haw fag fwayong hanya, Nyawa ham igtalinga wagtalinga wan, ham idwa tomwagdog, Nyawa ham igbantay wagbantay wan, ham idwa lomag. ²⁷ Maskin ista manga fangayofan idwag sarom it kahologan, Tagfabongkohon wan it manga talinga, Tagfotihan wat manga mata, Maskin ta dayo wag lag, Dayo wag dog, Dayo tomwagdog, Dayo yadi kafwali hangko kaarakitay hogfafiya is taw. ²⁸ Is Pablo igdogang yat hampang, iglwang, Ham fag twa kitay to fag barita gin Diyos, no kinday tam nombawi, fadog yadi aban has manga Hintil, hanggan manga Hintil tomalinga wa fiya. ²⁹ Is Pablo nontabo wagtoltol, ka manga Hodyo nalahaw wan. Ta mahogod wagdaraogan. ³⁰ Is Pablo nabanwanan sas banwa Roma sat nagtangdanan fag balay manga dowak fangaraw. Nafasakbaw fagayo kagsabang hanya. ³¹ Nogfaadal kawa han Diyos sakop baliwa, hanggan kawa han Kiristo Hisos kagfon intam, idwas fyaloman, idwa yadi ha nabando hanya.