2 TIMOTIYO

¹ Ahos Pablo kagsorat to fag sorat. Ahon bali in Kiristo Hisos Fandiya Barita, maskin tonyan Diyos wa kafangayofanan kaarakitay ho fadog has taw kawas Diyos ha bato disagon hantam, ka haboyagan kansadi san Kiristo Hisos. ² Hogsorat ha hyamo, Timotiyo, angko fagalwasiyon fag anak. Haw nangos fag domog kitay is Diyos intam Ama, hanggan is Kiristo Hisos, kagfon intam, mahoway ha hyamo, kaawa, hanggan igfalokmay im fangayofan. ³ Hodwa ha fakayaon ho no gibolon in Diyos ibolon, kito yadingko manga hafofowan, hanggan aho no gwas hyamo ngayan, yabi sirang, aho nogdarangin, hogbaya in Diyos. ⁴ Aho nogtohod kawa haw goraw hyabi, ho gwayan wa kasaya lomag hyamo, kaarakitay ho bomaya wa dahol. ⁵ Ho fagaba wagtohod kawa haw orongan igsyag han Diyos. Bago bago is Loyda im fofo kagsyag hanya, ginya madim ina, is Yonisi, hanggan wa kati ho twa matohoyanan kitay haw igsyag yadi hanya. ⁶ Kawa kitonya hogfatohod hyamo kitay, haw fag marigon nogfadagos in Diyos disag fagsyaganon ha hyamo hyabi, aho no natawid im baba alfoyo. ⁷ Maskin in Diyos disag hantam bonwa ka fangayofan madalaon, dapat ka fangayofan marigon, ka galwasi manga taw hanggan twag fasad intam sadili fakasayaon. ⁸ Haw fag idwa kaya igfaorongan has taw kawa hantam Fon. Fag idwa yadi kayag lwang kitay haw kilala wangko kanporiso kawa ha hanya. Yatokitay, fag syag in Diyos karigonan kaarakitay haw omagwanta yadi no ha mahori, haw nogtoltol ka Fiya fag Barita. ⁹ Is Diyos ka nabawi intam kaarakitay tam imbalit sakop. Bonwantam sadili ibolon ka nabawi intam, dapat kawan Diyos kafangayofanan mahoway. Hyabi hyabi, nyawa idya ha fabagowanan nyawa kana, in Diyos malooy fag kahowayan danwan talaga hantam, kawa tam imsadi san Kiristo Hisos. ¹⁰ Dapat ay, is Kiristo Hisos, intam Famawi, nonbangkad has baba daga, to fag kahowayan bago dinlag. Hanya nadaog ka kahatayan, nafalag yadi ka haboyagan orongan, kadwa ha katabowanan, git Fiya fag Barita. ¹¹ Is Diyos nafabali wangko it Fandiya-Barita hanggan famaadal kaarakitay igfadog has taw to fag Fiya fag Barita. ¹² Maskin nga tagfahoriyan angko kati, kawa ho nogfadog ka Fiya fag Barita. Nyawa kitonya, hodwa ha fakayaon, maskin ho kilala fiya fiya angko fagsyagon. Ho twa matohoyanan kitay, hanggan has ginanan sirang, hanya omano fiya fiya kangko nafaano ha hanya. ¹³ Fag kangko nafwayong kam fagtoladon, maskin sonson wa fakaoronganan tonya. Haw fag fadagos igsyag in Diyos, hanggan galwasi manga taw, kito kantam ogaliyon kawa tam nonsadi san Kiristo Hisos. ¹⁴ Sas Maliyaw fag Falad togbong kagbanwanan santam, hagfalamang ka fakaoronganan kat natogon ha hyamo. ¹⁵ Ha fadi wadtwa kitay fagayo fag manga taga Asya nafabayaan wangko, hanggan da Figilo da Hirmoginis naobon yadingko. ¹⁶ Dapat is Diyos wa ka tomogbong nangos inda Onisforo talanahan, kawa aywan ginan tagfarigon angko. Hanyadwa naya has taw nyawa honporiso. ¹⁷ Yatokitay, is Onisiforo nondasog sas Roma, idwag fahoyangon igligaw angko, hanggan wa nalag angko oliyanan. ¹⁸ Ha twa wa fiya fiya no kinday is Onisiforo no natogbong angko fagaba sas banwa Ifiso. Intam Fon nombangkad ya aban im-awa nangos hanya.

¹ Dapat ay, haw, Timotiyo, angko anak, fag marigon im fangayofan. Maskin haw insadi san Kiristo Hisos, it malooy fag kahowayan tomogbong hyamo. ² Haw fag faadal has manga matanogon fag manga taw kam donggon gingko sas basad fakaaywanan, kaarakitay tonya man fag manga taw ka mamaadal has tiba. ³ Kawa haw in Kiristo Hisos fiya fag sondalo, fag gagwanta nyawa ha mahori. ⁴ Kagsondalo no kasaya kitay kagsogo hanya bomaya wan, idwag falibang it ibolon has manga iba bagay. ⁵ Kagsaringgonaan, nodwag fayayom hanya kito kasta fwayong, idwa ha tanggapon, maskin idwa gomonam dasog has hadasogan. ⁶ Ka nangogodan gamas, tonya mandi ka fiya tomanggap bago bago it kahorayan gis ani. ⁷ Ha fag gayfan fiya fiya angko fwayong hyamo, ginya madis Diyos igfatwag dog hyamo tonya fagayo. ⁸ Haw fag tohod in Kiristo Hisos kawa hanya gin Dabid hasokfonan hanggan inboyag ya domwag gis kahatayan, kangko fagtoltolon Fiya fag Barita. ⁹ To kat tigadan yadi no kana mayon ta no nafahoriyan angko hanggan wa nagafos, kito wa sadik taw ha kasalanan. Dapat ay, hadwa twa gafoson in Diyos hampang. ¹⁰ Yakanga ho gagwanta wa fagayo fagayo fag manga bagay kawa han Diyos manga nafili, kaarakitay is Kiristo Hisos imbali ista Famawi hanggan domisag has taw it kafiyan kadwa ha katabowanan. ¹¹ Fandog ngay, ti wa kasta faglwangon kawag farigon intam, Tam nonhoyog han Kiristo Hisos kahatayan, Matohoyanan tam omofod yadi wa hanya aban, boyagan. ¹² Tam nodwag fagomon istay is baba daga, Tam tomogbong yadi aban in Kiristo hanya nogbahala has taw. Tam nogtangkod in Kiristo sas fagdogan manga taw, Is Kiristo aban tomangkod yadintam. ¹³ Nyawa tam idwa maafanodon, is Kiristo maafanodon fagaba, Hanyadwa twag tangkod it sadili. ¹⁴ Haw fag fatohod is taw to fag manga bagay. San Diyos ngayan, haw fag togon is taw kitay, ta fag idwag labanan no kadidwa ha kahologan fag manga hampang. Idwa ha fakinabang noglabanan kitonya, yatokitay igdiya di ngap has kadwatan ka mangag talinga. ¹⁵ No baliday im fagsyaganon, haw fag kabali maangay san Diyos faglagan, sadik fangibolon kadwa ha fakayaon, maslong yadi nogfaadal ka orongan wa Fiya fag Barita. ¹⁶ Haw fag idwa kalibang has manga toltol kadwa maangay, kadwa ha kahologan, kawa kagfadahit kitonya labi wa kaayayo wa ngap gin Diyos. ¹⁷ Ka kitonya fag manga taw it fagfaadalon bilang wa kitos sadik bangbang igsablay wa labay, kaskat sadik habilogan. Dowak ama ka kitonya da Himiniyo da Filito. ¹⁸ Tanayayo gis fakaoronganan hanggan nafaadowan ka mangan tiwala tiba. Taglwang kitay kati intolas wa ka manga taw no kaboyag gis kahatayan. ¹⁹ Dapat ay, in Diyos nahalig fagrigonan intam fagsyagon bilang bato maganit. Kantigib yadi sinyag lwang kiti, Kagfon intam fadi wadkilala no fakta fag manga taw it sakop, iglwang yadi kitay, Fagayo kagsyag hantam Fon it ngayan, fag domayo ka dwat. ²⁰ Nyawa ka balay fiya wa kabantay, bohonwa fagayo ginto ngatay pilak ista botang sinya. Ha akwa di manga taya, manga anglit. No kawa manga sohadan ginto, manga pilak, ha toon kagfon nogbangkad no ha sohadon sinya. Dapat ay, no kadista manga taya manga anglit, sirang sirang nyawa faktaw, nyawa kanat fwalidon sinya. ²¹ Nyawa faktaw santam ka kaayayo gis manga ogali dwat, kito yadi was botang ginto hanggan pilak ha fakinabang, fagaba intalaga hasagfon intam, intalaga has ibolon fiya. ²² Yakanga haw fag dayo ka fakasolongon anahan kadwa fiya. Yatokitay, no baliday im fagsyaganon, haw fag kabali fiya, hanggan matanogon. Fag galwasi has iba taw, fag mahoway, kito yadis taw ka fiya it manga fangayofan, kagsyag yadi intam Fon togbong. ²³ Haw fag idwag talinga ka mangag labanan, kadwa ha kahologan, gawayan odit katabowanan. ²⁴ Ka fiya, in Diyos fangibolon fag idwag daraogan. Yatokitay, fag mahoway has fagayo fag manga taw, madonong igfaadal, maagwantaon yadi. ²⁵ Fag kampang mayan mayan no kabaya ka mangag laban hanya, nogfatohod is taw has fiya. No kitonya no kabaya, is Diyos ngandayo tomogbong is taw igsoyo, tomwa yadi ka fakaoronganan. ²⁶ Ginya madi, ista fangayofan ngandayo malfas ya aban, nyawas Fandaya naiktan sat siyok itfagonan, nasakop hanya.

¹ Hogfatohod hyamo kitay, no sas ginanan sirang aban, tam domog mahori. ² Manga taw imbali wagsadili odi, it fagwason fagaba has kwarta wan, ha takan ya, mafasalagwaon ya, masabayonon ya ngadi. Tambali fanway ya has magorang, idwa gisip kitay tagtogbong hyabi hanya, idwa magalang han Diyos. ³ Bohondi kitonyak dwat, idwa twa kaawa, idwa twag fasolon, kaplaon, idagdog wa dahol dahol ngadi kana kamlag, igfabohondi kas taw. Dayo ya ngadi has fiya. ⁴ Labi man inya, im-oyon has manga taw kaglaban it ofod, igfalabi wat fangayofan, ha takan ya ngadi, bohonwas Diyos ista fakasolongon, ha odis manga dwat fag halibangan it fakasolongon. ⁵ No kadog di to fag manga taw katiwala in Diyos, dapat ay, hadwa lagon in Diyos karigonan sat manga ogali. Haw fag idwa gamigosan ka kitonya fag manga taw. ⁶ To fag manga taw tiba igsakbaw hasta manga balay, igfaadowan manga ina, hanggan wamdiya ista manga fangayofan, no dogay. To fag manga ina aywan it fagayfanon it manga ogali dwat hyabi, hanggan wa kati, aywan it manga fakasayaon dwat. ⁷ To fag manga ina kasaya yadi wa tomwa has fiya, dapat ay, nyawa ginahin tadwa twagdog ka fakaoronganan. ⁸ Tonya fag manga ama iglaban has fakaoronganan, kito yadinda Hanis da Hambris ka nalaban in Mwisis hyabi. Tadwa ha fagayfanon has fiya. Yakanga manga taw natwa waglag kitay tadwa katiwala orongan. ⁹ Dapat ay, ista ogali dwat ha katabowanan di aban, maskin fagayo fadi wad tomwagdog kitay ista ogali kaidagdogan odi, kito yadi kanda Hanis da Hambris hyabi. ¹⁰ Dapat ay, haw idwa kitonya, haw intanog angko adal ha hyamo. Haw nasokfon yadingko ogali hanggan angko fasadan. Haw fadi wad nalag aho nogsyag in Diyos, hanggan no gagwanta mahori, hanggan no galwasi has taw. Haw nalag kitay hodwag fagomon ¹¹ ta no nafahoriyan angko sas manga banwa Antiyokiya, Ikonyo hanggan Listra. Mahori wa dahol gis nanya hyabi. Dapat ay, kagfon intam nabawi angko ginya fag manga mahori fagayo. ¹² Ta fahoriyan intam fagayo ka kasaya gogali fiya kawa tam no katanog in Kiristo. ¹³ Ka dwat fag manga taw labi man imdwat, ka manga bohagon igfaadal igfadagos wagdaya iba taw, ginya madi tonya yadi aban ka adayaan. ¹⁴ Dapat ay, haw fag idwag dayo ka manga fakaoronganan kam naadal, kam fagsyagon marigon, kawa haw kilala fiya fiya ka manga nafaadal to ha hyamo. ¹⁵ Gis ogbot ginan haw fadi wadtwa kitay ka maliyaw fag Kasoratan kagfadonong intam kaarakitay tam imbawi, kawa tam nogsyag han Kiristo Hisos. ¹⁶ Is Diyos ka nafasorat ka Kasoratan fagayo. To fagayo ha kahologan nogfaadal ka fakaoronganan, nogfabohag kadwa orongan fag adal, nogfahaslong ka ogali barikwang hanggan igtaban has fiya fag ogali. ¹⁷ In Diyos fangibolon no katanog ka Kasoratan, imbali hostot ogali, imyayom has fiya fag ibolon fagayo.

¹ San Diyos hanggan san Kiristo Hisos ngayan, ka mamatohoyan has manga boyagan hanggan has manga natay ista hadasogan aban, kawa hanyam bangkad ya hastay, hanggan mamahala has fagayo, hogtogon ha hyamo marigon kitay, ² haw fag faadal in Diyos hampang, fag idwa ha toon, ngadi ginahin, nyawa mahori, nyawadwan. Fag fatohod hasag talinga hyamo, fag fahaslong ista ogali, fag maagwantaon nogfarigon ista manga fangayofan, fag idwag fagomon igfaadal has taw. ³ Maskin no ginahin fag masohod aban, ta fawa tomalinga has adal fiya, yatokitay ka odista sadili fakasayaon igdog kasta fagtalingaon aban. Ka mangag faadal kitonya kasta fagligawon aban. ⁴ Igfabongkohon wan no hadis fakaoronganan fag adal, dapat tomalinga wan no ka manga toltol magorang. ⁵ Yakanga nyawa ginahin haw fag matagahan. Ha fag gagwanta ka manga kahoriyan kamdasog ha hyamo aban kawa haw nogbarita. Kawa haw in Diyos yadi fangibolon, ha fadagosan wan im bato ibolonon. ⁶ Hogdog ho kaakbang wamdisag hasagfon intam. Kati hogdog ho katolas wa gistay fag haboyagan. ⁷ Hodwa nafagomon igdalandan kitos igsaringgonaan. Kati hontabo wagdalandan. Hontanog angko fakatiwalaon. ⁸ Ho tomanggap wa aban ka sangbaw kahaslongan, hawas nadaog igdalandan. Kagfon intam, ka maslong fag fangabaya, kagfasangbaw angko tonya fag sangbaw gis nanya fag sirang. Bohondi aho kat fagfasangbawon, dapat fagayo ka mafanayan intam Fon kabangkadan, kawa galwasi hanya, ta tomanggap yadit manga sangbaw gis nanya. ⁹ Ha no somyagan ya ngadi, ha fag ngalay wambangkad hastay, ¹⁰ kawas Dimas naobon wangko, hawas banwa Tisalonika maskin it fakasayaon ka manga ogali istay is baba daga. Is Kirisinti hawas sakop Galasya, is Tito hawas Dalmasya. ¹¹ Is Lokas lamang kangko ofod. Ha sayahan in Markos, tabanan hastay angko, maskin hanya tomogbong fiya fiya angko ibolon. ¹² Ho nasogo in Tikiko has banwa Ifiso. ¹³ Haw no kabangkad hastay, diyan angko balokas kantagtag sanda Karpo balay sas banwa Toroas. Diyan yadi hastay angko manga famasaan, labi wa kansorat sas anit hayopan. ¹⁴ Is Alihandro, kagfanday tanso, naibolon dwat wa dahol hangko. Kagfon intam bahalag fadosa hanya. ¹⁵ Haw fag matagahan tonya fag ama, kawa maisog wa dahol dahol, gwayan waglaban intam fagbaritaon. ¹⁶ Itfagonan idwa ha naofod angko aho nonbangkad hasagtabo hampangan. Ta nafabayaan wangko sadi sadi. Is Diyos nangos fag idwa somogat is taw. ¹⁷ Dapat kagfon intam ka naofod angko, nafarigon wangko fangayofan, yakanga ho nafadog fiya fiya it hampang has manga Hintil fagayo. Hanya nabawi yadingko, bilang gis basad bibig liyon. ¹⁸ Kagfon intam bomawi yadingko aban gis fagayo fag kadwatan, tomaban yadingko hat sakop banwanan sam tongod. Nyawa ginahin, tam nangos fag fasayagdog hanya. Fag kitonya wa ngay. ¹⁹ Fag lwang has talsawa da Pirisila da Akila kitay, ho gwas hanya, hanggan han Onisiforo talanahan. ²⁰ Is Irasto in-goyan sas banwa Korinto. Ho naobon in Torofimo sas banwa Milito maskin hanya ha sagit. ²¹ Fag idya nangos abagat haw nombangkad hastay. Da Iyobolo da Podinti, da Lino, da Kalawdiya hanggan intam manga fadwasay tiba fagayo gwas hyamo. ²² Kagfon intam fag sawam fangayofan fagaba. Ham nangos fag domog kitay is Diyos mahoway ha hayo fagayo.