2 TISALONIKA

¹ Ahos Pablo kagsorat ha hayo, hanggan to fag sorat gi yadinda Silas Da Timotiyo. Migsorat ha hayo ka san Diyos Tifonan sas banwa Tisalonika, ha hayo kantohoyan han Diyos intam Ama, hanggan han Kiristo Hisos kagfon intam. ² Ham nangos fag domog kitay, is Diyos intam Ama hanggan is Kiristo Hisos kagfon intam mahoway ha hayo fagaba, hanggan igfalokmay yadi hayo manga fangayofan. ³ Hyami manga fadwasay, mi fagbaya in Diyos kawa ha hayo, nyawa ginahin. Maangay mi nogbaya kitonya kawa hayo fangayofan kalangba wan hasagsyag in Kiristo baliwa, hanggan ham kalabi wan no gadgalwasiyan. ⁴ Kawa kitonya migfasayagdog hayo manga ogali mi nogfadog han Diyos manga Tifonan iba kitay, ham idwag fagomon igsyag in Kiristo, hanggan ham gagwanta nyawa tagfahoriyan hayo hanggan aywan hayo fagdogon mahori. ⁵ Kawa ham idwag fagomon igfalag kitay is Diyos nogfatohoyan intam fagtanggapon, fakafiyan wan. Yakangas Diyos lomwang ham maangay wam-aktom hat sakop, maskin ham gagwanta mahori kati. ⁶ Is Diyos gomanti no kinday ka fiya. Hanya fahoriyan aban has manga taw kagfahoriyan hayo kati. ⁷ Hanya fahoway yadi hayo, ham kagdog mahori kati, hanggan fahoway yadi hyami. Is Diyos gomanti kitonya, is Hisos kagfon intam nomlag, no kabangkad gin Diyos banwanan sam tongod, ha hoyog yadit manga anghil ka syagan gibolon marigon. ⁸ Hanya nombangkad aban sas fagbokngan afoy gigang. Hanya mamadosa ka kafang kilala in Diyos hanggan kafang katanog ka Fiya fag Barita kawa han Hisos kagfon intam. ⁹ Kasta fadosaan aban idwa ha katabowanan fag kadwatan, saman yadi aban gisagfon intam. Tadwa yadi lomag it karigonan kafiyan. ¹⁰ Tonya fag fadosaan im-anod wan gis nanya fag Sirang mahalga, intam Fon nombangkad kaarakitay ka manga taw kantohoyan han Diyos mamasayagdog in Hisos, hanggan fagayo kantiwala gomalang yadi hanya gis nanya. Maskin ham intiwala ka hyami natoltol barita ha hayo, ham yadi im-aktom sinya fag manga taw ka mamasayagdog kagfon intam. ¹¹ Kawa kitonya, hami fagabag darangin kawa ha hayo. Hyami fagdaranginon han Diyos kitay, kawa hanya marigon, hanya fatonglos hayo manga fakasayaon fagayo has kafiyan baliwa, hanggan fatabo hayo manga ibolonon fagayo ka hayo manga bato ibolonon kawa ham igsyag hanya. ¹² Intam manga ogali hanggan ibolon no kitonya, tam igfasayagdog in Hisos kagfon intam, hanggan hanya mamasayagdog yadintam. Imbali kitonya kawantam Diyos hanggan is Kiristo Hisos kagfon intam mahoway wa dahol dahol hantam.

¹ Manga fadwasay, tam mafanayan odi no ginahin is Kiristo Hisos kagfon intam nombangkad hastay hanggan tam nomtifon yadi ha hanya. Dapat ay, hogfaaronganon ha hayo kitay, ² ham fag idwa gadowan hayo manga fangayofan. Fag idwa yadi kabalaw ham nogdog barita kitay, intam Fon kabangkadan fag Sirang, hono, indasog wan. Ngatay manga taw gayfan kitay, hami ka nalwang kitonya hami, no nafwayong in Diyos Falad bato lwangon, ngatay no natoltol in Diyos hampang, ngatay mi no nasorat has taw. ³ Nyawa kindawan tam fag idwa gadayaan nyawa faktaw, kawa tam twa matohoyanan kitay tonya fag Sirang mahalga idyam dasog manga taw nodyag tangkod hanggan iglaban fiya fiya in Diyos, ka goyan fag labanan, hanggan is Fanway kantohoyan has fadosaan nodyan lag. ⁴ Gis nanya aban is Fanway ha habilogan taw, hanggan lomaban hasta manga fagsyagon, ista manga fagsimbaon fagayo, hanggan igfaabwat yadit sadili kangayanan, abwat man has fagayo. Hanya somakbaw hanggan tomokaw ya ngadi san Diyos basad Fanimbaan-Dahol, lomwang kitay hanya wa ka Diyos. ⁵ Ham awkin idwag tohod kitay, ho danwa nafwayong ha hayo tonya fagayo, aho no sayapdi hayo? ⁶ Balis kati ha akwa yapdig taktak in Fanway. Ham twa wan no kana tonya. No ginahin fag masohod aban is Fanway imlag wan. ⁷ Is Fanway danwag faibolon ka madolaw fag kadwatan kati istay is baba daga, dapat kangko faglwangon idyam anod is Diyos nodyag bol kagtaktak in Fanway. ⁸ Ginya madi is Fanway imlag wan, dapat ay, is Hisos kagfon intam nombangkad, it ipsaw fahatay in Fanway, hanggan ka masilaw sat atobangan domwat yadi hanya. ⁹ Aban is Satanas domisag it karigonan han Fanway. Is Fanway nombangkad, hanya fatimawa fagayo hanggan omibolon yadi manga falagon madolaw, dapat igfalingo odis taw. ¹⁰ In Fanway ogali dwat wa dahol maskin fagayo digfalingo ka manga taw ka has kadwatan, maskin tadwa kasayagdog, idwa yadig fahalga ka fakaoronganan kaarakitay tambawi. ¹¹ Yakangas Diyos igsogo has taw ka karigonan kagfalingo is taw kaarakitay igdaya has taw, yakanga ta katiwala kadwa orongan. ¹² Maskin kitonya fagayo kadwa katiwala ka fakaoronganan, dapat kawili manga ogali dwat, tonya fag manga taw fagayo imtohoyan has fadosaan. ¹³ Manga fadwasay, hami fag fagabag baya in Diyos kawa ha hayo. Ham in Diyos fagalwasiyon, maskin ham in Diyos nafili gona sinya, kaarakitay ham imbawi hanggan it Falad karigonan fabali hayo manga taw kantohoyan han Diyos, kawa ham igsyag has fakaoronganan. ¹⁴ Mi no natoltol ha hayo ka Fiya fag Barita hyabi, is Diyos nafatawag hayo kaarakitay ham imtohoyan hanya. Hanya nafatawag hayo kaarakitay ham domog yadi in Kiristo Hisos kagfon intam, it kafiyan. ¹⁵ Yakanga, manga fadwasay, fag idwag fagomon, hanggan fag karigon no katiwala ka hyami nafaadal ha hayo manga fakaoronganan, mi no natoltol ha hayo hanggan nasorat. ¹⁶ Is Kiristo Hisos kagfon intam, hanggan is Diyos intam Ama ka galwasi wa dahol intam, mahoway yadi hantam, hanggan igfarigon intam manga fangayofan, hanggan igfatohoyan intam fagfanayaon. ¹⁷ Hanya fag farigon hanggan igfaganit yapdi intam manga fangayofan, kaarakitay intam manga ogali hanggan hampang fagaba maangay.

¹ Manga fadwasay, kati katabowan angko sorat ha hayo. Ham nangos fag fadagos igdarangin kawa ha hyami kitay, in Diyos hampang madali wa maskat, hanggan aywan ka mamasayagdog kagfon intam, kito ka hayo. ² Ham fag darangin yadi kitay ka manga dwat wa dahol fag manga taw idwa nangos domaog hyami, maskin idya fagayo intiwala hasagfon intam. ³ Dapat kagfon intam idwag fabayaan intam. Hanya farigon intam manga fangayofan, idwa yadig faangay kitay ka dwat domaog intam. ⁴ Kagfon intam kagfarigon hyami manga fangayofan kawa ha hayo, mi twa kitay ham katanog hyami fwayong ha hayo, hanggan ham igfadagos hayo ogali kitonya. ⁵ Kagfon intam nangos falangba hayo manga fangayofan kaarakitay ham labi man domog kitay is Diyos galwasi hayo, hanggan is Kiristo kagtogbong hayo gagwanta mahori, kito yadi hanya no naagwanta. ⁶ Manga fadwasay, maskin hami in Kiristo Hisos, kagfon intam, it manga sogowan, migfwayong ha hayo kitay, ham fag idwa maofod has manga taw ka mafang, kadwa katanog hyami manga togon has taw. ⁷ Ham fadi wadtwa kitay ka hyami ogali ka maangay yadi hayo fagtoladon. Hami idwa kafang gibolon, hami nos nyamo hayo hyabi. ⁸ Nyawa ginday fag taw, midwa natanggap fanganon mi nodwa nabayad. Yatokitay, mi gibolon hanggan wa kagayamonan, yabi sirang, kaarakitay ham idwa ha gastoson kawa ha hyami. ⁹ Bonwa kitay idwa fiya mi nogsyag hayo togbong, migtikis wa gibolon kitonya kaarakitay igfalag ha hayo fiya fagtoladon. ¹⁰ Mi no sayapdi hayo, to ka hyami togon ha hayo kitay, Fag idwag fahwan hanon nyawa fakta fag taw ka kafang gibolon. ¹¹ Migfwayong kitonya kawa mi ha donggon kitay is nyamo hono hayo, ha akwa manga taw mafang gibolon, fagabag mawat hasta ibolon tiba taw. ¹² Maskin hami in Kiristo Hisos, kagfon intam, it manga sogowan, migtogon hanggan igfaaronganon hanya fag manga taw mafang kitay, ista manga ogali fag maangay, hanggan ta fag gibolon wan kaarakitay lomag it sadili fangaboyagon. ¹³ Dapat ham, angko manga fakilalaon tiba, ham fag idwag fagomon gogali ka maangay. ¹⁴ Ngatay ha akwa taw sinya kadwa katanog hyami togon ha hayo istay fag sorat. Ham no danwa twa kitay tonya fag taw mafang, fag idwa maofod hanya kaarakitay hanya maya wan. ¹⁵ Dapat fag idwag fatimbang hanya intam kalaban, fag faadal hanya kitos fadwasay. ¹⁶ Nyawa kana ka hayo madalanan, kagfon yadi kahowayan kagfalokmay hayo manga fangayofan fagaba. Hanya fag sawa hayo fagayo. ¹⁷ Angko sadili gamat kagrirok to. Ahos Pablo ka gwas hayo. Kiti aho nogsorat angko ngayan sas katabowanan sangko fagfadiyaon sorat fagayo. ¹⁸ Ham nangos fag domog kitay kagfon intam, is Kiristo Hisos, fagaba mahoway ha hayo fagayo.