2 PIDRO

¹ Ahos Simon Pidro kagsorat ha hayo. Ahon Kiristo Hisos sogowan hanggan it Fandiya Barita. Hogsorat ha hayo, ka kito yadi hyami, in Kiristo Hisos, intam Diyos hanggan Famawi nagdisagan fagsyagon, kawa hanya maslong it ogali. ² Kawa ham kilala in Diyos hanggan in Hisos kagfon intam, ham nangos fag domog kitay hanya mahoway wa dahol ha hayo, hanggan igfalokmay fiya fiya hayo manga fangayofan. ³ In Diyos karigonan nadisag hantam fagayo fag manga bagay kagfasyagan intam gogali has fiya, ka maangay han Diyos. Nadisag hantam kitonya, kawa tam kilala fiya fiya hanya ka nafatawag intam, kaarakitay tam ha horay yadi git kangayanan hanggan kafiyan. ⁴ Kawa kitonya, is Diyos natogon it manga bato disagon hantam manga bagay kafiyaon, mahalga yadi, kaarakitay tam somyagan igbaybay ka kadwatan gis fangayofan masayaon istay is baba daga, kaarakitay tam myasa wa ha natanggap yadi in Diyos kafiyan. ⁵ Kawa kitonya, maskin tam intiwala, tam fag mahogod wagsayak ka fiya fag ogali. Ginya madi, fag kabali madonong yadi. ⁶ Ginya tam fag idwag falabi intam sadili fakasayaon, hanggan tam fag idwag fagomon nyawa mahori. Ginyantam fangayofan fag kabali maliyaw kito yadin Diyos. ⁷ Ginya madi, tam fag galibitan hantam fadwasay no ha mahori, hanggan fag gadgalwasiyan yadi. ⁸ Tonya fag manga ogali fagayo, no matohoyanan santam, hanggan kalabi man inya, intam haboyagan ha kahologan hanggan ha fakinabang, hanggan tam homilala wa fiya fiya in Kiristo Hisos kagfon intam. ⁹ Nyawa faktaw nodwa ha akwa tonya fag manga ogali, bilang wa marom it mata fangayofan hanggan hanyadwag tohod kitay is Hisos nafaliyam it manga naogali dwat. ¹⁰ Yakanga manga fadwasay, fag intam fiya fag manga ogali kagfalag kitay, tam in Diyos nafili hanggan nafatawag. No kitonyantam manga ogali, tam idwam tahid. ¹¹ Ginya madi, ta madali wagfasakbaw intam aban han Hisos intam Famawi, kagfon intam, hat sakop banwanan, kadwam liyam hanggan aban aban. ¹² Yakanga, hogfatohod yapdi fagaba ha hayo hanya baliwa, nyawa ham madonong wan, hanggan idwa kaoman gi hayo donggon fakaoronganan. ¹³ Ho gayfan fiya aho nogfatohod hayo hanya baliwa aho no boyagan yapdi. ¹⁴ Aho twa kitay ho kaakbang wa omobon toy angko habilogan istay is baba daga, kawas Kiristo Hisos kagfon intam nafaisip angko kitay kitonya. ¹⁵ Kati aho homogodan yapdi omibolon, kaarakitay ham fagaba tomohod to fag manga bagay, nyawa aho malin wan gistay is baba daga. ¹⁶ Mi noglwang kitay is Kiristo Hisos kagfon intam nombangkad aban, malagan kitay marigon wa dahol dahol, bohonwa kitay manga odi lisbay taw, taw odi ka naisip. Dapat ay, hyami wa mata lagan hyabi in Hisos kangayanan madolaw wa dahol dahol. ¹⁷ Is Diyos intam Ama nafasayagdog in Hisos, hanggan nafatohoyan it kafiyan no nahampang gis kafiyaon fag kayawaan, nalwang kitay, To kangko fagalwasiyon fag Anak, ahog baya hanya. ¹⁸ Hami sinya yadi, gofod in Hisos gis nanya, sas baba moyod maliyaw. Mi nadog tonya ka nahampang gin Diyos banwanan sam tongod. ¹⁹ Yakanga hami labi man inrigon no katiwala han Diyos manga fangampang natoltol. Fiya ham no tomalinga yadi tonya fag manga toltol maskin bilang sadik salong basad marom kagfayawa hantam no baliday intam Fon Sirang nodyag fayawa istay, hanggan no baliday ka faramnag idyag yawa intam manga basad fangayofan. ²⁰ Dapat bago bago, tam fag tohod kitay, nyawa faktaw, not sadili fagsyaganon, idwa twa fatohoyan it kahologan in Diyos manga fangampang danwa nafwayong, ka has aban fag manga bagay. ²¹ Maskin in Diyos manga fangampang no danwa nafwayong kitonya, bohonwa odi kitay ista kafangayofanan, dapat kawa gin Diyos hanggan ka Maliyaw fag Falad ka nafadonong kasta bato fwayongon.

¹ Dapat ay, hyabi ha akwa yadi manga bohagon fag fangampang san Diyos layonan fag manga taw. Kitonya man di aban, ha akwa yadi santam manga bohagon fag famaadal. Ta fomwayong hantam it manga adal kagfadwat odig dog kantam fakatiwalaon. Ta domayo kagfon intam ka nabayad kaarakitay tambawi wan, yakanga sadi odi ginan ista fadosaan imdasog wan. ² Aywan kamsayagdog aban, somokfon yadi ista manga ogali dwat. Kawa kitonya, manga taw aban fadwat igdog ka fakaoronganan Ogali Bago. ³ Ka bohagon fag manga fangampang toltol bilang wa fakiyason nogfaadowan intam, kawa ta kasayag falingo intam, bomolay intam kaakwaan. Dogay hyabi ka Fangabaya nafatohoyan ista fadosaan, hanggan kagfadosa has taw idwa yadig toyog. ⁴ Is Diyos idwan awa it manga anghil ka naogali dwat, dapat nafaporiso wan sas oliyanan fadosaan sas basad ohang marom, kaarakitay sinya wa kagfanaya magafosan sas basad marom, hanggan ka Sirang Fangabayan nomdasog wan. ⁵ Is Diyos idwan awa ka manga taw sas baba daga hyabi hyabi no nafagonaw wan sadi wak dahonya, kawasta ogali sonson wa dwat. Dapat is Diyos nabawi in Nowi, kagtoltol kawa has kahaslongan, hanggan it ofod fito. ⁶ Is Diyos nafatohoyan has fadosaan ka manga banwa Sodoma hanggan Gomora, yakanga nafayagaw wan, kaarakitay igfaisip yap ka tiba taw no kanat lagon aban no dwat ista ogali. ⁷ Dapat ay, is Diyos nabawi in Lot, ka fiyat ogali hanggan kahori wa dahol ista manga ogali dwat has ka taw. ⁸ Tonya fag is Lot, kawat ogali fiya, kahori wa dahol it fangayofan nogbanwanan sinya, kawa sirang sirang hanyag lag hanggan igdog ka manga dwat fag taw ogali mahaya. ⁹ Yakanga kagfon intam twa wagbawi gis manga mahori, kagsolay intam, ka manga katanog hanya, twa yadig fadosa sadik kaban ya ka manga dwat it ogali hanggan wamdasog sas Sirang Fangabayan. ¹⁰ Labi man fadosa ka manga goyon it bali fangayofan masayaon has hayan baliwa, kagdayog fasakop has ha kangayanan. Maisog ya, ha takan ya, idwag galang, igsalan ya ngadi kampang kawa has manga gis tongod. ¹¹ Nyawa ka manga anghil, ka marigon man has taw, hanggan idwa ha bosal, idyadi wa kampang kitonya, idwag fadog hasagfon intam, kito ka haraw ta nogsombong kasta manga naibolon. ¹² Dapat ay, to fag manga taw bilang wa hayopan myala, kadwa ha boot, fiya wa bato iktanon hanggan fahatayon. Tagfadwat digdog no kawa has manga bagay tadwa ha fakatwawon. Yakanga kito odis hayopan myala, fiya wa fahatayon. ¹³ Tonya wa kat ganti kasta naibolon dwat has taw. Tagfadagos it dwat fag kasolongan nyawa basad wa sirang, kaarakitay im-anod it habilogan fakasayaon. Hayan wa lagon ta nogsayo hayo, tagbaya yapdit manga ogali kitay tagdaya hayo. ¹⁴ Ka manga bohagon fag fangampang idwa ha fagsayahon iba fag halibangan, ha odista babay. Idwa twa taboon has ogali dwat. Tagtaban has kasolongan ka manga magomo it fangayofan. Inyayom wa masayaon. Intohoyan han Diyos fadosaan. ¹⁵ Ta natalang wat dalan bato ogaliyon. Ta natolad in Balaam in Bosor anak, ka kasaya tangdan nogdaya has taw. ¹⁶ Yakanga in Balaam hayopan asno nahampang wa hanya, bilang wa taw, kaarakitay kabaya in Balaam nogfalamang kampang. Yakanga, ka fangampang bato ibolonon kaidagdogan idwan tonglos. ¹⁷ To fag manga fangampang bohagon bilang wa bolbogan inlanggang, bilang yadi manga linyabo, marigon fag bagyo igfafayag odi. Kan Diyos nafatohoyan hanya madala wa fag oliyanan, hawa basad basad marom. ¹⁸ Myasa wa madonong kampang no kitay di, dapat ay, idwa ha kahologan kat manga fagfwayongon. Manga fakasayaon dwat has habilogan baliwa kwinta wat sangkap fafwali ya manga taw hat manga ogali dwat hyabi, ta no kabayan odi naobon tonya. ¹⁹ To fag manga fangampang bohagon sogowan wa ogali dwat. Nyawa tagfasayagdog has manga taw kitay, tam bohonwa sogowan nyawa haday, idwa ha bawal nyawa kana, dapat ay, nyawa kana kagdaog intam, tam sogowan wa sinya, ya sogowan has dwat ka kitonya. ²⁰ Ka manga taw ka kilala in Kiristo Hisos, kagfon intam hanggan intam Famawi, nalfas gis kadwatan istay is baba daga. Dapat ta no kafwali ya hat ogali dwat hyabi, hanggan fadagos kalabi wa has dwat, it lagon aban, bohondi kitonyak mahori nodya kilala intam Fon. ²¹ Balay balay hanya nodya natwa ka maslong fag ogali. Maskin mahori man ta no natwa wagdog ka fiya fag togon, ginya madi nadayo ya. ²² No kitonya maangay wa fiya fiya ha hanya ka fwayongon kitay, Ka ido ogali, Ya kwan yat soha, Hanggan ka baboy, nyawa tam fomyagos, Kafwali ya has basad danawan.

¹ Angko manga fakilalaon, tongko fadowa fag sorat ha hayo. Sas fagayo fag dowak sorat hogtikis wagfafolaw hayo isip, ² nogfatohod hayo in Diyos manga maliyaw fag fangampang fwayong hyabi, hanggan intam Famawi kagfon intam it togon hantam kat Fandiya-Barita nafadog ha hayo. ³ Bago bago, fiya tam no tomwa kitay, sas ginanan fag manga sirang, ka mangag fasakop hat bali fangayofan masayaon, aba lomibak intam. ⁴ Ta lomwang aban, Idwa awkin is Kiristo igtogon kitay hanyam bangkad ya? Kati hadawa ham iglag? Intam manga magorang natay wan, dogay wa hyabi yapdi, dapat gi yapdis kabali daga, hanggan wa kati, fagayo fag manga bagay idwan oman. ⁵ Tag tikis wadwag bati ka fakaoronganan kitay, hyabi hyabi is Diyos nahampang lamang no nahalig intam daga hanggan banwa. Gis basad danom is Diyos no nafabago ka daga hanggan ha akwa yapdi danom igfodfoyowan sas fagbokngan daga. ⁶ Gi mandis danom hyabi hyabi no nafagonaw hanggan nafadwat ka daga sadi wak dahonya. ⁷ Dapat in Diyos hampang karigonan yadi kagfadogay intam daga hanggan banwa kati, kaarakitay im-irog hanggan imyagaw wa aban sas afoy, ka Sirang Fangabayan nomdasog, hanggan ka manga dwat fag taw nomdosa. ⁸ Dapat, angko manga fakilalaon, tam fag idwa kaliyam. Tam fag tohod kitay intam Fon noglag, sadik sirang bilang wa 1,000 fangaraw, hanggan 1,000 fangaraw bilang odi sadik sirang, intam Fon nogfahalimbawa. ⁹ Bohonwa kitay kagfon intam igfasigpalat togon, kito kasta isip tiba taw. Hanya gagwanta wagfanaya maskin idwa kasaya ngadi sadik taw fag has kadwatan. Not fasadan di, tam fagayo fagayo fag somoyo wan. ¹⁰ Dapat ay aban, ka Sirang mahalga hasagfon intam imdasog, kitos fangnahaw. Gis nanya ka banwam liyam wa madali nograbog dahol dahol. Ka manga myanit, magdanon hanggan fanggasan imtonaw sas myanit. Fagayo sas baba daga hanggan ka daga imsonog yadi wan. ¹¹ Kawa to fag manga bagay fagayo imliyam yadi aba kitonya, kinday nangos ka fiya intam manga ogali kati, ham gayfan? Tam no mafanayan yapdin Diyos Sirang, tam fag imtohoyan hanya, hanggan fag gogali ka maangay. ¹² No baliday intam fagsyaganon, fag fadali wan tonya fag Sirang mahalga. Gis nanya fag sirang ka banwam sonog wa fiya fiya hanggan ka manga bagay sinya fagayo imsakop yadi wamtonaw wan. ¹³ Dapat ay, tam ha fagfanayaon ya sadik banwa bago, hanggan sadik daga bago, kahaslongan lamang ka ogali sinya, kawas Diyos natogon kitonya. ¹⁴ Maskin ngay, angko manga fakilalaon, no kandogay day tam no mafanayan yapdi to fag manga bagay, tam fag gogali ka mahoway, maangay hanggan manga taw fag idwa ha fagoliton intam. ¹⁵ Tam fag tohod kitay kagfon intam gagwanta yapdig fanaya kaarakitay tam ngandayo imbawi yapdi. Tonya yadi kantam fadwasay Pablo faglwangon. Kawas Diyos nadisag it kadonongan han Pablo, ¹⁶ kitos Pablo nogfatohod hantam hastay fag manga bagay sat sorat fagayo. Ha manga mahori katwagdog san Pablo manga sorat. Ka manga magomot fangayofan, hanggan kadwa twagdog in Pablo bato lwangon, igfalamang it kahologan nomtoon. Kitonya yadi ta nodwa twagdog tibak layonan gin Diyos Kasoratan, yakanga kadiya has kadwatan. ¹⁷ Dapat ay, ham, angko manga fakilalaon, ho danwa nafatagak hayo. Ka manga taw kadwa maslong it bato ibolonon fag idwag faadowan intam, yakanga tam idwa kadiya gintam fagsyagon maganit. ¹⁸ Yatokitay, tam fag bondi kito kat fagonan no kilala in Kiristo Hisos, intam Famawi, kagfon intam, hanggan fag kalabi wa hat kahowayan. Tam fag fasayagdog it kafiyan kati, hanggan aban aban. Fag kitonya wa ngay.