2 KORINTO

¹ Mi da Timotiyo, intam fadwasay, kagsorat ha hayo, in Diyos Tifonan sas banwa Korinto, kalafit yadi has fagayo kantohoyan han Diyos sas sakop Akaya. Ahos Pablo in Kiristo Hisos Fandiya-Barita kawan Diyos wa kafangayofanan fag kitonya. ² Ham nangos fag domog kitay is Diyos, intam Ama, hanggan is Kiristo Hisos, intam Fon, mahoway ha hayo fagaba, hanggan igfalokmay yadi hayo manga fangayofan. ³ Tam fag fasayagdog in Diyos, in Kiristo Hisos intam Fon it Ama, kantam yadi Ama maawaon, kawas Diyos ka fagabag farigon intam manga fangayofan. ⁴ Tam no ha lagan manga mahori, hanyag farigon intam manga fangayofan, kaarakitay tam man ka syagan igfarigon iba taw, ta no ha mahori, gi wantam nadalanan is Diyos no nafarigon intam. ⁵ No kinday mi fagabag dog mahori, kawa minsadi san Kiristo, kitonya yadi, is Kiristo fagabag farigon hyami. ⁶ Mi no galabawan, mi galabawan ongay kaarakitay ham imrigon gis basad mahori, hanggan imbawi yadi. Hami nomrigon ya, nalafit yadi ha hayo, ham imrigon yadi wan, is Diyos nogfarigon hayo, kaarakitay ham omagwanta hayo manga donggon fakahoriyon, kito yadi hyami. ⁷ Maskin ngay migsyag marigon ha hayo, maskin mi twa yadi kitay, ham no ha horay sas mahori, kito yadi hyami, is Diyos mamarigon hayo, kito yadis Diyos nogfarigon hyami. ⁸ Angko manga fadwasay, migfadog ha hayo hyami nadalanan mahori sas sakop Asya. Yabay, hyami nadalanan sinya orongan wa mahori wa dahol dahol. Mi gayfan mi fawam tolas. ⁹ Mi gayfan wa kitay gis nanya mintohoyan has kahatayan. Inbali kitonya kaarakitay midwag syag hyami sadili karigonan, dapat migsyag han Diyos kagfaboyag ya gis kahatayan ka manga natay. ¹⁰ No kadog di gis nanya, is Diyos nabawi hyami gis kahatayan, hanggan kati igfadagos yapdig bawi hyami. Hanya wa hyami fagsyagon fagaba ka bomawi yapdi hyami aban, ¹¹ kawa ham igtogbong yadi hyami, ham nogdarangin. Ginya madi aywan ka bomaya han Diyos kawat malooy fag kahowayan ha hyami. ¹² Miglwang kitonya kawa hyami fagbayaon sa hyami sadili fangayofan, mi twa kitay fiya hyami naogali has fagayo fag manga taw, hanggan labi wa ha hayo, idwa yadi ha fagfyalomon maskin hyami ogali giwan Diyos, gin Diyos malooy fag kahowayan, idwa gis kadonongan taw. ¹³ To fag manga hampang ka hayo fagbasaon kati, ham twa wagdog, hanggan idwa ha kahologan matagowan. Balis kati ham natwa wagdog bangan hyami ogali, dapat angko fakasayaon kitay, ¹⁴ aban, ka Sirang ka mahalga han Hisos, kagfon intam, nomdasog, ham homilala fiya fiya hyami, ginya madi tam pariho igbadbayaan ha sadi ha sadi sasta fagdogan. ¹⁵ Kawa hogsyag kitonya, ho naayfan ho has nyamo yapdi hayo kaarakitay ham bomaya waglag hyami dowa ginan. ¹⁶ Ho naayfan ho domalan yap has nyamo, ho bago has sakop Masidonya, ginya ho domalan ya domwag no goli, ginya ham nangos tomogbong yadingko ho no kalahaw has Hodiya. ¹⁷ Kati aho nodwa nafatonglos kitonya, ham awkin lomwang ahog faoman fagaba angko fwayong? Angko fangayofan awkin goman goman, kito kastay is baba daga fag manga taw ka katig lwang, ala, dapat ay, araw araw, lomwang idwan? ¹⁸ No kinday is Diyos idwag balibad, hyami hampang ha hayo idwa yadig balibad. Mi noglwang kati ala, midwa ara lomwang idwan. ¹⁹ Ka hyami da Silbano da Timotiyo fagbaritaon, kan Diyos Anak, is Kiristo Hisos, bohonwa kitay ala, hanggan idwan. Is Hisos in Diyos wa ala fagaba. ²⁰ Maskin kawa hanya kagfatonglos in Diyos natogon bato disagon fagayo. Kawa gin Hisos tam syagan igsagot, Anod, fag kitonya wa ngay, nogfasayagdog han Diyos. ²¹ Is Diyos kagfarigon hyami hanggan hayo san Kiristo. Hanya yadi ka nafili hyami hastay fag ibolon. ²² Is Diyos ka nafwalid it tandaan sa hyami basad fangayofan, nadisag yadit Maliyaw fag Falad ha hyami, kwinta wagfatohoyan kitay hanya fatonglos it manga togon bato disagon tiba. ²³ Is Diyos ka twag lag angko fangayofan kitay ahodyapdin bangkad gis nyamo hayo hyabi, maskin hodwa kasayag fahoriyan hayo. ²⁴ Bohonwa kitay mi kasaya yapdi fag hami ka hayo fakatanogon ham no katiwala in Diyos, maskin ham marigon nogsyag in Diyos is nyamo hayo. Mi kasaya odig togbong, kaarakitay ham masolong no gogali ka maangay han Kiristo.

¹ Yakanga angko fangayofan hodya lomahaw has nyamo hayo hyabi, kaarakitay hodwag farongkot domwag hayo. ² Maskin aho nogfarongkot hayo, fakta ara ka falibang angko, ham gayfan? Idwa akwa, aho no sadi ya ginan igfarongkot hayo. ³ Yakanga ho nasorat tonya fag sorat ha hayo, kaarakitay aho nombangkad ya aban has nyamo hayo, ham idwag farongkot angko, maskin ham ka fiya nangos angko fagbayaon. Aho twa kitay aho nogbaya, ham igbaya yadi wan. ⁴ Aho nogsorat ha hayo itfagonan, angko fangayofan inhori wa dahol dahol, angko lowa igtariktihan wan, baliday aho nogsorat yapdi ha hayo. Bohonwa kitay ho kasayag farongkot hayo, dapat ho kasayag fatwagdog hayo kitay, ho galwasi wa dahol dahol hayo. ⁵ Hanya no ha nafahoriyan manga iba taw, bohonwa aho kat nafahoriyan. Ham ganong wa fagayo fagayo kanhori, dapat idwa fiya aho nogfalabiyon angko hampang. ⁶ Dapat aywan sa hayo nangabaya hanya, hayo habaya hosto wa a, fiya wan. ⁷ Kati ham faliyaman wan it naogali dwat. Ham fag fasaya yagdog hanya, kaarakitay idwa dagos imlombay. ⁸ Kati ahog faaronganon ha hayo kitay ham fag falag hanya fiya, ham ogali mandi mahoway ha hanya. ⁹ Maskin ngay ho nasorat ha hayo, ho kasaya tomwa ngatay ham katanog fiya fiya angko manga togon fagayo ha hayo. ¹⁰ Nyawa faktaw ham nogfaliyam it naogali dwat, ahog faangay yadi. Aho nangos nogfaliyam ista naogali dwat, kawa ha hayo fakinabang aho nogfaliyam tonya, bilang san Kiristo faglagan. ¹¹ Fiya no kitonya kaarakitay is Satanas idwag daog intam. Tam fadi wad twa it fakasayaon. ¹² Aho no hawas banwa Toroas kaarakitay manoltol ka Fiya fag Barita kawa han Kiristo, kagfon intam, ista manga fangayofan danwa nafatalaga. Aywan kagtalinga fagaba. ¹³ Dapat angko fangayofan idwa kahoway kawa ahodwa nalag intam fadwasay is Tito. Idwa ha natagbo angko. Yakanga aho natogon di ngay, ho nadagos wa has sakop Masidonya. ¹⁴ Dapat ay, tam igbaya in Diyos. Is Kiristo fagabag daog it manga kalaban, bilang waglahaw sasta fagonan ayo ayo, ta nogbaya hanya. Is Diyos fagabag faofod intam han Kiristo, tam kansadi ha hanya, ta nogbaya hanya kitonya. ¹⁵ Giwantam is Diyos nogfahaskat ka Fiya fag Barita kawa han Kiristo, ka bilang wa banglo wa dahol dahol, ka mangan bawi gayok banglo, hanggan ka mangadwan bawi gayok yadi. ¹⁶ No kadi has manga taw ka hawas fadosaan, bilang baw kagfatohod has kahatayan baliwa, dapat no has mangan bawi, to sadik banglo igfatohod has haboyagan. Fakta ka syagan igfaanod kitonya fag ibolonon, ham gayfan? ¹⁷ Hamidwa kito ka tiba ka bilang odi famalidya in Diyos hampang. Yatokitay, sonson wa maanod hyami hampang maskin gin Diyos hyami fwayong, hanggan hami nogtoltol has taw, san Diyos yadi faglagan, kawa hami insadi san Kiristo.

¹ Ham awkin gayfan hami bilang wagfadaholon ya hyami sadili? Hami awkin kito yadis iba taw kitay, fag ha sorat gis taw kagfatohoyan ngatay fiya hyami ogali mi nogsabang hayo, ngatay mi noglahaw gi hayo? ² Ham wa ngay ka bilang sorat kagfatohoyan kitay hyami ogali fiya. Ham bilang wansorat sa hyami fangayofan, fagayo kilala wan, hanggan bilang wagbasa. ³ Ham wan Kiristo sorat kalag wa fiya fiya, ka hyami fagfalagon has taw, kawan Diyos boyagan it Falad ka fanorat sas fangayofan taw, bohonwa ka famahasding sas manga bato dalafi. ⁴ Mi twag fwayong kitonya kawa mi nogsyag in Diyos gin Kiristo. ⁵ No hyami di sadili, midwa ha fagsyaganon, hyami fagsyaganon fagayo in Diyos wa disag. ⁶ In Diyos kafangayofanan kitay, hami fag tomanggap fagsyaganon kaarakitay imbalit manga fangibolon sat taranggapan bago. To fag taranggapan bohonwa sas togon masoratan it nakatabowanan, dapat sas fangayofan bago. Maskin ka togon masoratan igfatohoyan has kahatayan, dapat in Diyos Falad igdisag haboyagan. ⁷ Hyabi hyabi, is Diyos no nafatohoyan it manga togon kantigib sas bato dalafi, manga togon kagfatohoyan has kahatayan ka mangag sway, in Diyos kasinayan inlag wan, inlafit yadi han Mwisis walong, yakanga araw in Israil manga hasokfonan idyadi wagsompong in Mwisis walong, nyawa kitay kasagaya wan Diyos kasinayan sinya. Ka gibolon taranggapan kan-ganit sas togon sorat kagfatohoyan has kahatayan, no ha hoyog masinay, ⁸ idwa awkin labi man inya in Diyos kasinayan it Falad nondisag hantam, ham gayfan? ⁹ Ka taranggapan kagfatohoyan has fadosaan, no ha hoyog masinay, labi man inyak masinay ka togonan kagfatohoyan kitay, tam nangafiyan han Diyos. ¹⁰ Kawa kitonya, tam iglwang wa ongay, ka gona fag kasinayan insagaya wan, kawa labi man inyak masinay ka natobos ka gona. ¹¹ Ka taranggapan kansagaya no ha kasinayan hyabi, labi man inyak fiya ka kasinayan sas taranggapan kadwa ha katabowanan. ¹² Kawa tam ha fagsyagon kitonya, tam idwa ha fakadalaon. ¹³ Tam idwa kiton Mwisis ka nataklob it mata kaarakitay manga taga Israil idwa lomag kitay tonya fag kasinayan kasagaya di. ¹⁴ Dapat ka manga taga Israil in-ganit it manga fangayofan hanggan wa kati, maskin tonya fag taklob mata idyan bol gista manga fangayofan ta nogbasa ka Batasan Hodyo. San Kiristo lamang tonya fag taklob fangayofan nombol. ¹⁵ Anod, hanggan wa kati, nyawa ginahin ta nogbasa yapdin Mwisis manga togon, ha taklob yapdi sat basad fangayofan. ¹⁶ Dapat ay, kito yadi kansorat kawa han Mwisis, hanya nogsayango han Diyos, imbol wa ka taklob. ¹⁷ Intam faggwason istay kagfon intam, kawan Diyos Falad. Hanggan no siday in Diyos Falad nogbanwanan, sinya ka manga taw mafalfasan. ¹⁸ Kati ka taklob santam manga walong inbol wan. Tam fagayo kabali silaw gin Diyos kasinayan, kagfabago intam fangayofan kaarakitay labi man inyak masinay hanggan wa tam imbali kito yadi hanyak fiya. Intam Fon, ka Maliyaw fag Falad, kagfadagos tonya fag ibolon santam.

¹ Yakanga, marigon yapdi angko fangayofan, kawas Diyos nafili angko kaarakitay hastay fag ibolonon, maskin hanya maawaon. ² Ho nadayo wan ka manga ogali mafyaloman hanggan mahaya wa kalag. Hodwag daya, idwa yadig fabarikwang in Diyos hampang. Yatokitay, malagan wa ngap ka fakaoronganan kangko fagtoltolon. Yakanga tadwa ha lwangon angko, nyawa faktaw, hanggan is Diyos twa yadi wan. ³ Ka hyami fagtoltolon fag Fiya fag Barita, no bilang yapdi matakloban has taw, kawa tonya fag manga taw intohoyan yapdi has fadosaan. ⁴ Tadwa katiwala maskin kastay is baba daga fag diyos nafabota ista mata fangayofan. Nafabota wan kaarakitay tadwa lomag ka yawa gis Fiya fag Barita kawan Kiristo kasinayan, kagfalag intam no kindas Diyos. ⁵ Kangko fagtoltolon, bohonwa angko sadili, dapat is Kiristo Hisos kantam Fon, tonya lamang. Kawa han Hisos ahon bali hayo wa sogowan. ⁶ Maskin is Diyos ka nalwang, hyabi hyabi, Fag ha mayawa gis basad marom, hanya yadi kagfayawa santam manga fangayofan kaarakitay tam homilala in Diyos kasinayan ka kalag san Kiristo mata. ⁷ Dapat hami kito odis anglit fag sohadan kaakwaan, inhalig odi gis daga, kaarakitay imlag wa fiya fiya kitay, ka madolaw wa dahol fag karigonan giwan Diyos, idwa gi hyami sadili. ⁸ Gis baliw gis baliw taglibit hampang hyami, dapat midwa kadala. Nomtoon mi gadowan wa ongay, dapat ay, midwan liyam hyami fagsyagon. ⁹ No kitay di tagfahoriyan wa hyami, dapat ay, ha akwa yapdi kaawa hyami. Ta bilang wagfahakfo hyami, dapat midwa nakfo no nangos fagfahakfoon di. ¹⁰ Ho bilang wa madiyan sangko habilogan in Hisos kahatayan, kaarakitay it haboyagan imlag yadi gingko habilogan. ¹¹ Hami, nyawa boyagan yapdi, bilang wantohoyan fagaba has kahatayan, kawa han Hisos, kaarakitay in Hisos haboyagan imlag sa hyami manga habilogan ka katay. ¹² Yakanga aho no kaakbang wa kaakbang wa has kahatayan, ham man ka ha haboyagan has aban aban. ¹³ Dapat insorat sas Kasoratan kitay, Ho ha fakatiwalaon wan, yakanga hogfwayong wan. Ho katiwala yadi kitonya, yakanga hogfwayong yadi wan, ¹⁴ kawa ho twa wa kitay is Diyos ka nafaboyag ya in Hisos kagfon intam, hanya yadi ka faboyag yangko, koyogan in Hisos, ginya tomaban hayo hanggan angko hat akbang. ¹⁵ Hawa hayo fakinabang kangko naagwanta fagayo, kaarakitay no kaayo in Diyos malooy fag kahowayan fakalafiton, kaayo yadi kagbaya in Diyos, hanggan igfalag it kafiyan. ¹⁶ Yakanga kati angko fangayofan idwa kagomo. Nyawa angko habilogan gis daga kagomo, angko fangayofan bago dagos wa karigon, sirang sirang. ¹⁷ Kangko manga nadalanan mahori kati, bilang ogbot odi, ngalay odi katolas. Dapat it bohad kafiyan dahol, kadwa ha katabowanan, idwa ha kitonyak fiya, ¹⁸ kawa hyami mata fangayofan fagaba matoonan has manga bagay kadwa malagan, idwa has manga bagay malagan. Ka manga bagay malagan ha katabowanan di, dapat kadwa malagan idwa ha katabowanan, nyawa ginahin.

¹ Intam manga oliyanan habilogan sas baba daga, bilang odi balay rotay kamfolhot aban. Dapat tam twa wa kitay balay man maganit, kan Diyos nafatalaga hantam sat banwanan sam tongod, ka balay kadwa ha nahalig gamat taw, idwa yadim dwat hanggan aban aban. ² Intam oliyanan no toy yapdi intam habilogan, tam galibitan wa kasaya tonya fag oliyanan sam tongod, ³ kaarakitay tam no ha nasolong wa tonya fag habilogan bago, ta fawa lomag intam idwa ha solong. ⁴ No kandogay day tam no maoliyanan basad balay rotay yapdi, tam kahori yapdi, galibitan wan. Bohonwa kitay tam kasaya ka habilogan istay is baba daga fag imliyam wan, tam galibitan wa kasaya tam tomobos wan, fag ka man habilogan bago, kaarakitay ka haboyagan tomobos ka habilogan ka katay. ⁵ Is Diyos ka nafatalaga intam kaarakitay imbago kitonya, nadisag yadi hantam it Maliyaw fag Falad kat nafagona nadisag kagfasyag intam kitay, aban, tam ha akwa yapdi tanggapon. ⁶ Yakanga angko fangayofan fagaba marigon. Ho twa wa kitay no kandogay day intam oliyanan no to yapdi fag manga habilogan, tam idya maoliyanan santam Fon akbang. ⁷ Maskin nga angko ogali kito ka kati, kawas Diyos kangko fagsyagon, bonwa ka manga bagay malagan kangko fagisipon fagaba. ⁸ Kawa kitonya, marigon wa dahol angko fangayofan. No aho di kagdog, fiya man nangos no omobon toy angko habilogan, kaarakitay hawantam Fon. ⁹ Yakanga kangko fakasayaon nangos, nyawa ahostay yapdis baba daga, nyawa aban ho no hawangko oliyanan sam tongod, angko fangayofan hanggan ogali fag in Diyos wa fagbayaon. ¹⁰ Maskin tam igsadig sadi aban lomindog san Kiristo fanokawan fangabayan kaarakitay tam tomanggap ka maangay hantam naogali, ngatay fiya, ngatay dwat, tam nostay yapdis baba daga. ¹¹ Maskin ho twa wa kitay tam fag katanog kagfon intam, no baliday angko fagsyaganon, hodwag fagomon igfaaronganon has taw kitonya. Is Diyos twa angko fangayofan, hanggan ham nangos kilala yadingko fiya fiya. ¹² Bohonwa kitay ahog fadaholon angko sadili, nyawa ahog lwang kitonya. Ka odi kitay ahog fadog hayo kaarakitay ham syagan igfasayagdog angko ogali has taw. Ginya madi ham syagan somagot has taw, kasta fagbayaon ka odit mata lagan, bohonwa ka iba taw it fangayofan orongan. ¹³ Nyawa kitay aho bilang wadwa ha fangayofan nomtoon, kawa han Diyos kangko fagisipon. Dapat aho fadi wad ha fangayofan, hanggan hawa hayo it fakinabang. ¹⁴ Kawas Kiristo galwasi angko kagpilit angko ogali. Ho twa wa kitay sadik taw natay kaarakitay has fagayo, yakanga fagayo, ista manga fangayofan bilang yadi wa natay. ¹⁵ Is Kiristo natay kawa has fagayo, kaarakitay ka boyagan kati, it haboyagan sadi wak dahonya, fag idwag sadili odi, dapat fag imtohoyan han Kiristo, ka natay, ginyan boyag ya. ¹⁶ Yakanga gis kati ginan, hyami fagbantayon bohonwasta habilogan, nyawa faktaw. Hyami fangayofan no kitonya han Kiristo hyabi, kati fawa kitonya. ¹⁷ Yakanga kati, nyawa faktaw, nonsadi san Kiristo, hanya sadik bagon halig. It fangayofan dan inliyam wan, hanyan bago wan. ¹⁸ Is Diyos ka gibolon tonya. Giwan Kiristo naagwanta, is Diyos nafaamigos angko ha hanya, ginya nafili yadingko kaarakitay aho faamigos yadi iba taw han Diyos, ¹⁹ aho nogfatwagdog has taw kitay, is Diyos sawan Kiristo kaarakitay faamigosan ya ha hanya fagayo fag manga taw, idwa nangos igbotang ista manga naogali dwat. Is Diyos nafaano yadi hangko to fag barita no kinday manga taw nom-amigos ha hanya. ²⁰ Yakanga aho in Kiristo wa nasogo. Is Diyos kagfaaronganon ha hayo gi hyami bibig hampang. Yakanga, san Kiristo ngayan, hogfaaronganon hayo kitay, ham fag danwan amigosan han Diyos. ²¹ Kawa hantam is Diyos nafabali in Kiristo bilang wa ha kasalanan hyabi, nyawas Kiristo idwa ha ogali dwat, kaarakitay tam nomsadi ha hanya, tam mangafiyan wa han Diyos.

¹ Kawa hami in Diyos wa manga katogbong fangibolon, migfaaronganon ya ha hayo kitay ham fag idwag fasigpala in Diyos malooy fag kahowayan hantam. ² Maskin is Diyos iglwang, No ginahin ka maangay, ho natalinga hyamo, Sas Sirang Famawiyon, ho natogbong hyamo. Fandog ngay, kati wan ka maangay fag kasohodan, kati wan ka Sirang Famawiyon. ³ Hogtikis wagbaybay nyawa kana kadwa fiya, kaarakitay tadwa ha fabangdanan gingko. ⁴ Yatokitay sangko manga ogali fagayo fagayo, hogfatwagdog has taw kitay ahon Diyos wa fangibolon. Ho maagwantaon wan nyawa basad mahori, nyawa ta kaisog angko, nyawa ho galibitan wan. ⁵ Nyawa ta nabakbak angko hanggan nafaporiso, nyawa ha gagran, nyawa ho gibolon mabyat, nyawadwag toyog, nyawadwa ha fanganon nomtoon, hodwag fagomon. ⁶ Kawa angko ogali maangay kagfatwagdog has taw kitay ahon Diyos wa fangibolon, hanggan ha fakatwawon, maagwantaon, mahoway yadi kawa ka Maliyaw fag Falad sawangko, hanggan ho orongan wa galwasi manga taw. ⁷ Kawa fakaoronganan kangko fagtoltolon, hanggan in Diyos karigonan. Ka fakafiyan kangko fanlaban hanggan angko fanaktak. ⁸ Ho ha nadalanan wa fagayo, nyawa tagbaya angko, nyawa tagfadwat igdog, nyawa tagyod tiba ginan, nyawa tagfasayagdog. Fakaoronganan wan kangko nafwayong, dapat taglwang yapdi kitay aho bohagon. ⁹ Tagfaiba tawon angko, dapat ta kilala di, ho kahatay wa tiba ginan, dapat boyagan yapdi aho. Nyawa tagfadosa wangko, tadwag fahatay. ¹⁰ Ho karongkot ongay, dapat fagaba kasolong, myabog, dapat hogfaakwa has aywan fag manga taw. Hodwa akwa akwa no kalag di, dapat ay, fagayo fag manga bagay angko wan. ¹¹ Angko manga fakilalaon sas Korinto, hodwa ha nafyalom ha hayo angko manga hampang. No kana sangko basad fangayofan, tonya wa kangko fagfwayongon ha hayo. ¹² No aho di, ho galwasi wa dahol dahol hayo, dapat ham idwa bangan mahoway hangko. ¹³ Ho bilang wa hayo ama, aho no kampang ha hayo, yakanga hayo fangayofan fag mahoway yadi hangko, kito yadi aho no mahoway ha hayo. ¹⁴ Tam fag idwa kasadi has mangadwan tiwala. Ka maslong hanggan barikwang syagan awkin gofodan, ham gayfan? Ngatay ka mayawa hanggan ka marom syagan kasadi? ¹⁵ Da Kiristo da Bilyal syagan awkin gamigosan? Kinday kantiwala hanggan kadwan tiwala nombali maamigosan? ¹⁶ Kinda araw ka manga tolad faglohodon nomaktom han Diyos fanimbaan, ham gayfan? Kawa tam wa kan Diyos boyagan it fanimbaan. Maskin hanya yadi kagfwayong, Homsadi sas taw hanggan domogayan sasta akbang. Aho aban it Diyos wan, tambali yadi wangko manga taw. ¹⁷ Is Diyos iglwang yadi, Yakanga ham fag ayayo gis iba taw, Ham fag idwag sapkid ka manga ogali dwat, Ginya ho tomanggap yadi hayo. ¹⁸ Intam Fon, kadwa ha bosal, iglwang, Ahom bali hayo ama a, Ham imbali yadi wangko manga anak.

¹ Angko manga fakilalaon, kawas Diyos natogon to fag manga bagay hantam, gwadi tam fag domayo fagayo fag manga ogali dwat sas fangayofan hanggan sas habilogan. Tam fag fagaba katanog in Diyos, hanggan fag fatohoyan ha hanya intam sadili, sadi wak dahonya. ² Ngadi kabayan ogbot, ham fag galwasi yap man hyami. Nyawa ginahin midwa ha nabangdan hayo. Midwa ha nafahoriyan hayo. Midwa ha nabolay gi hayo. ³ Nyawa hoglwang kitonya, bohonwa kitay hogsogat hayo. Kitongko fwayong fagaba ha hayo, ho galwasi wa dahol dahol hayo. Yakanga, nyawa has haboyagan, nyawa hawas kahatayan, tam fag mangofodan nangos. ⁴ Ho katiwala wa orongan hayo. Hogbaya wa dahol hayo. No has baliw, nyawa hyami fakahoriyon kaaywanon, angko fangayofan kasolong wa dahol. ⁵ Hami nondasog has sakop Masidonya, midwa kahoway, fagayo ka mahori ka hyami nadalanan. Gis baliw, gis baliw, taglaban hyami, mi kadala yadi wa dahol dahol. ⁶ Dapat ay, is Diyos idwag fabayaan ka manga ha fakahoriyon, kawas Tito nonbangkad wan, angko fangayofan inhoway ya. ⁷ Bohondi kitay aho no nalag in Tito, ka nafahoway angko fangayofan, dapat kawa ham, hono, naano yadi hanya fiya fiya. Is Tito nafwayong kitay ham galwasi angko, ham inrongkot wan, hanggan gafalowan yadi wangko, no kitay di. Yakanga kati ho labi wansayagdog in Tito toltol. ⁸ Nyawa angko sorat nafarongkot hayo, hodwag fanisi kitay ho nasorat kitonya. Ho twa wa kitay tonya angko sorat nafarongkot hayo fangayofan sadik ngalay, yakanga honbalaw yadi wan. ⁹ Dapat ay, kati hogbaya wan, bohonwa kitay kawa ho nafarongkot hayo, dapat kawa hayo karongkotan nataban hayo hasagsoyo wa a, ham nadayo wa hayo ogali dwat. Kitonya fag karongkotan giwan Diyos, yakanga midwa nafadwatan hayo fangayofan. ¹⁰ Maskin nos Diyos kagfarongkot intam fangayofan, igfaisip odi kaarakitay tam somoyo, imbago yadi intam fangayofan kaarakitay tam imbawi. Dapat ka karongkotan gistay is baba daga, has kahatayan di it hadasogan. ¹¹ Fanlag ngay, ham fag gisip. Tonya fag karongkotan gin Diyos no kanat nabohad sa hayo manga ogali. Ham inbali mahogod has fakafiyan, ham kasayag fatohoyan kitay ham idwa ha ogali dwat kati tonya fag manga bagay, ham kahori ya, kadala ya, galwad yadingko. Ham kasaya mangabaya ka naogali dwat. Hayo manga halimbawan fagayo igfatohoyan kitay, ham idwa naoyon ka kitonya fag manga bagay. ¹² Is Diyos twa wan kangko sorat ha hayo bohonwa kitay kawa has naogali dwat, bohonwa yadi kitay kawa hat nafahoriyan, dapat kaarakitay ham tomwa wa fiya fiya, san Diyos faglagan kitay, ham mahogod yapdi no katiwalangko. ¹³ Yakanga ka hayo naibolon nafarigon wa dahol angko fangayofan. Minsaya wagdog yadi, maskin is Tito no nanabang gi hayo, ham nafasayagdog hanya. ¹⁴ Hodwa naya yadi, kawa ho no nafasayagdog in Tito hayo manga ogali, itfagonan, no kinday sonson wa orongan hyami fwayong fagayo ha hayo. Kitonya yadis Tito nalag kitay, hyami famasayagdog hanya, ka hayo ogali fiya, orongan yadi wan. ¹⁵ Ya labi man is Tito no galwasi hayo hanya no gisip yapdi kitay, ham mangharaw matanogon, magalang wa dahol no natanggap hanya. ¹⁶ Yakanga ho kasolong yadi wagdog kitay hodwa ha fakahoriyon hayo ogali kati.

¹ Angko manga fadwasay, ho kasayag fadog ha hayo no kinday in Diyos malooy fag kahowayan indisag hat manga Tifonan sas sakop Masidonya. ² Tanhyabog wa dahol dahol a, sadi wak solay mahori has taw, dapat ay, tadwag fagomon kasolong igdisag, mahogod ya ngadi, nyawa tanhyabog wa dahol. ³ Kawat sadili fangayofan ta nadisag bohondi kitay no dahoday odi ogbot, dapat ay, ta nafalabi ya ngadit disag. ⁴ Tadwa nafagomon igfaaronganon hangko kitay, ta fag domisag yadi hantam manga fadwasay sas Hodiya. ⁵ Kasta disag igsagaya wangko fagasolopon. Bago bago ta nadisag yapdit sadili hasagfon intam, ginya madi bago di ha hyami, kawan Diyos wa kafangayofanan kitonya. ⁶ Ya kawas Tito ka nafwayong bago bago ha hayo hasagdisag baliwa, yakanga ho nafaaronganon in Tito kitay, fag hanya ka tomogbong yadi hayo, kaarakitay ham igfaanod wa fiya fiya igdisag yadi togbong has manga taw sas Hodiya. ⁷ Yabay, ham kafiyaon nomtiwala, kafiyaon nogtoltol, madonong yadi wa dahol. Ham maibolon wan, hanggan ham galwasi wa dahol hyami. Kati, ham fag kafiyaon yadi hasagdisag baliwa. ⁸ Bohonwa kitay aho kagfasognod hayo, ka odi kitay hogfadog hayo, kawa tibak taw kasolong igdisag, kaarakitay imlag kawa ham orongan wa galwasi yadis taw. ⁹ Tam fadi wad twaglag in Kiristo Hisos, kagfon intam, it malooy fag kahowayan. Nyawa hanya maakwa wa dahol dahol, hanya natikis wanbali myabog kaarakitay falobos hantam it kaakwaan. ¹⁰ Kitingko fwayong kawa hasagdisag baliwa. Hyabi fag fangaraw ham ka naowas gona gona, hanggan nafabago yadig togbong. ¹¹ Kati ham fag fadagos wa tonya. Ham mahogod wa nogfabago hanggan wa kati ham fag mahogod mandig fatabo. Ham fag disag no dahoday hayo fagsyaganon. ¹² Maskin ham no kasayag disag, is Diyos tomanggap no dahoday hayo fagsyaganon igdisag. Dapat ay, is Diyos idwag manaw, ham nodwa nasyagan igdisag dahol. ¹³ Bohonwa kitay angko fangayofan kasta disag nyawa ogbot, dapat ka hayo fag dahol man. Fag fakafiyan wan. ¹⁴ Ham kati ha akwa wan. Gwadi ham fag togbong yadi has manga myabog. No aba ham man kadwa ha akwa, ta aba tomogbong yadi hayo. Yakanga no kitonya, ham pariho igtarogbongan ha sadi ha sadi. ¹⁵ Ginya madi im-anod yadi kansorat sas Kasoratan kitay, Kagtifon aywan, idwa ha labi, Kagtifon sayok idwa yadi komorang. ¹⁶ Hogbaya han Diyos kawas Tito galibitan wa ha hayo kafiyan, kito yadingko no galibitan hayo. ¹⁷ Hogfwayong han Tito kitay, sabangan nangos hayo, dapat is Tito danwa ha fangayofan kitonya, nyawa hodya naowas. ¹⁸ Ho nafaofod yadi han Tito intam fadwasay ka dan wasta fakilalaon sas fagayo fag Tifonan, kawa nogtoltol ka Fiya fag Barita. ¹⁹ Bohondi kitay tonya, dapat ka manga Tifonan nafili yadi hanya kaarakitay omofod hyami hami noglahaw, tomogbong yadi hyami igbahala hasta manga disag. Ka kitonya fag ibolonon, igtogbong has taw, igfasayagdog intam Fon, igfalag yadi kitay aho gwayan wa kasaya yadig togbong hayo. ²⁰ Mi matagahan fiya fiya kaarakitay tadwa ha lwangon hyami, nyawa faktaw, kawa hami wa kagbahala toy, ista disag gorangon. ²¹ No baliday hyami fagsyaganon, migfatonglos fiya fiya to fag ibolonon, bohondi kitay maangay santam Fon faglagan, dapat maangay yadi sas taw faglagan. ²² Yakanga hami nafaofod has taw intam fadwasay sadi ya. Mi danwa nalag fagaba kitay, kafiyaon hanya nogtogbong. Kati hanya labi man fiya no matogbongon kawa katiwala wa fiya fiya hayo. ²³ Kawa han Tito, is Tito kawangko ofod igtogbong yadingko ibolon. Kawan Tito manga ofod, ka manga Tifonan ka nasogo intam manga fadwasay has taw, kawa manga matanogon fiya fiya han Kiristo. ²⁴ Yakanga ham falagan wa kitay ham orongan wa galwasi tonyantam manga fadwasay, kaarakitay ka manga Tifonan idwa lomwang kitay hami igbohag di noglwang kitay ham mahoway wa dahol.

¹ Nyawa hodwa somorat domwag ha hayo, no kadi hasagtogbong baliwa has manga fadwasay, ² maskin ho twa wa kitay ham talaga wa tomogbong. Ho nafasayagdog has manga taga Masidonya kitay ham matogbongon wa dahol. Itfagonan yapdi fag fangaraw, hoglwang kitay, ham manga taga Akaya dan wa kasayag togbong. Kawa ham kasayag togbong, aywan taga Masidonya kan-abay wagdog, igdisag yadi. ³ Yakanga aho nafagona intam manga fadwasay has nyamo hayo, kaarakitay hodwa maya aban, kawa ho nafasayagdog is taw kitay, ham matogbongon, kaarakitay ham mamatalaga hayo togbong kito kangko nafwayong. ⁴ Aho ongay maya wan, dapat ham labi man maya wan, no ha tomahin angko taga Masidonya, ta noglag kitay ham idya nafatalaga, mangharaw, hayo bato disagon has taw. ⁵ Yakanga ho nafaaronganon hantam manga fadwasay kitay, ta nangos fag gomona wangko has Korinto kaarakitay ka hayo natogon kitay ham tomogbong, fag matohoyanan intalaga wan. No kitonya, imlag wa kitay ham igdisag, bohonwa kitay sas pilitan, giwas sadili fangayofan. ⁶ Fanlag ngay, ham fag tohod, kagtanom sayok, gani yadi sayok. Kagtanom aywan, aywan yadit aniyon. ⁷ Tam fag kafod igfatohoyan kantam bato disagon, ginya disagan wa tonya, idwa mabyat sas fangayofan, bohonwa kitay napilitan. Maskin is Diyos galwasi kagdisag masolong. ⁸ Is Diyos syagan igfaaywan hayo manga kaakwaan fagayo, iglabi hayo sadili fakasayaon, kaarakitay ham syagan igtogbong has fagayo fag ibolon fiya, kawa idwa korang ka hayo sadili. ⁹ Kito ka Kasoratan iglwang, Hanyag fahafod fagaba has taw, Madisagon has manga myabog, Ta tomohod it kahowayan hanggan has aban aban. ¹⁰ Is Diyos kagdisag binhi ista bato tanomon, hanggan ka tinapay ista fanganon, hanya yadi kagdisag ha hayo binhi hanggan igfatobo hanggan igfalangba tonya, kaarakitay hayo kahowayan ham nogdisag has taw bomohad aywan. ¹¹ Is Diyos faaywan hayo kaakwaan fagayo, kaarakitay ham labi man syagan igtogbong has fakaaywanan fagaba. Yakanga aywan ka bomaya han Diyos, kawa hayo togbong aho domiya has taw. ¹² To hayo togbong hantam manga fadwasay, bohondi kitay tomogbong kasta kakorangan, dapat ginya wa ginan aywan ka bomaya han Diyos. ¹³ Kawa ham idwa kwangit igdisag kagfalag has taw kitay, ham katanog wa orongan in Kiristo Fiya fag Barita. Kawa kitonya, ham mamalag in Diyos kafiyan. ¹⁴ Ta lomag kitay is Diyos mahoway wa dahol ha hayo, hanggan ta fagaba wa aban domarangin yadi ha hayo kawa ta galwasi hayo. ¹⁵ Dapat ay, tam igbaya wa dahol han Diyos, kawat disag hantam idwa ha somohod, no taw di.

¹ Maskin is Kiristo mahoway hanggan idwag fadaholon it sadili, ho ha fagfadogon ha hayo. Ka tibag lwang, ahos Pablo, nos fagdogan wan mahoway, dapat nodyapdis fagdogan, no kadog di, maisog wan. ² Hogsagad gi hayo, ham fag idwag pilit angko homampang mahori ha hayo, kito ka tiba kaglwang kitay, aho goyon ka bali fangayofan masayaon. ³ No kalag di, aho basta odi taw, dapat ay aho noglaban, idwa kito kastay fag baba daga fag manga taw noglaban. ⁴ Angko fanlaban bohonwa ka gistay baba daga fag manga fanlaban. Angko fanlaban karigonan giwan Diyos, syagan yadig fahakfo ka bilang manga fanaktak alad bato. Hogdaog ka manga idwa orongan fag katadlongan. ⁵ Ho bilang wagtastas yadi fagayo fag manga toltol kagfaabwaton it sadili, kagtoplan manga taw kaarakitay tadwa homilala in Diyos. Ho gahot yadi fagayo fag manga isip kaarakitay katanog in Kiristo. ⁶ Ginya madi ham fagayo no katanog wa fiya fiya, ho talaga wa mamadosa fagayo kagsway yapdi han Diyos. ⁷ Ayfanan ka hayo lagan ista ogali. Nyawa fakta fag taw no gayfan hanyan sadi han Kiristo, hanya fag tomohod kitay aho kitonya yadi, honsadi han Kiristo. ⁸ Nyawa aho bilang wagfadaholon angko kangayanan, hodwa yadi kaya kan Diyos disag angko kangayanan, kaarakitay igfarigon hayo fangayofan, bohonwa kitay has kadwatan. ⁹ Ham fag idwa gisip kitay hogfadalagdog hayo aho nogsorat. ¹⁰ Intibag lwang, Sa odit manga sorat no maisog donggon, no sawas fagdogan, idwa syagan ngap kabaya. ¹¹ Ka manga taw kaglwang kitonya, ta fag tomwa kitay no kana kangko nasorat kati, aho no ayayo gi hayo, tonya mandi kangko ibolonon, nyawa aba sa hayo fagdogan. ¹² Hodwa ha fagfasalagwaon has tiba taw ka fagaba gayfan hanya bohondi kitos taw ik fiya. Nyawa ta gayfan kitay hanya madonong man is taw, tam nalag wa kitay tadwa yadi ngap ha fakatwawon igdog. ¹³ Dapat kangko fagfadaholon lamang, kawan Diyos natogon ha hyami, ka hyami bato ibolonon, kasakop yadi hayo hami nogfaadal ha hayo. ¹⁴ Hodwag fasagaya tonya maskin ham insakop yadi han Diyos natogon ibolonon ha hyami, aho ka gonan bangkad gis nyamo hayo, nadiya ka Fiya fag Barita, kawa han Kiristo. ¹⁵ Ahodwag falabi aho nogbaya, maskin bohonwa iba taw nakayayan kangko fagbayaon, ka mandingko sadili nakayayan. Hogsyag wa kitay ham imrigon ham no katiwala in Diyos, ginya madi angko ibolon sa hayo, imdahit yadi wan ha sayo taw taw, dapat idwa somagaya in Diyos nagtogonan ha hyami. ¹⁶ Ginya madi, fiya aho no manoltol ka Fiya fag Barita sa yapdi hayo ligongan. No kitonya bohonwa kastaw fag nakayayan kangko fagbayaon. ¹⁷ Kito ka Kasoratan fwayong, Nyawa fakta fag taw ka kasayag fadaholon, fag bohonwat sadili it fagfadaholon, fag hasagfon intam. ¹⁸ Intam Fon nogbaya intam ibolon ka mahalga, bohonwa kitay tam nogbaya intam sadili.

¹ Ham fag idya kahori angko, hogfahalimbawa odi. ² Aho kabayong hayo, bilang yadi was Diyos no kabayong, kawa ham bilang sadik dayaga kadya ha ofod iba anahan hyabi, aho no nafaindogan hayo ha sadik ama, han Kiristo. ³ Dapat ho gayfan wa gayfan wan, no kinday ka abyanon nafaadowan in Iba hyabi, ho kadala kitay ha faadowan hayo, ginya ham aban ngandayo idwa kito fag kawili hanggan orongan igsyag in Kiristo. ⁴ Maskin ham mahogod wagtalinga ngadi faktaw kandasog igtoltol ka tiba fag Hisos, bohonwa kangko fagtoltolon fag Hisos. Ham igtanggap yadi tiba falad hanggan toltol, bohonwa kangko fagfwayongon ha hayo. ⁵ Dapat ay, ngadi aho, aho bohondi kitonya fag manga kafiyaon fag @Fandiya Barita, no aho di kagdog. Hogmanwali odi. ⁶ Anod, ngandayo idwa masaya kadog aho nogtoltol, dapat ay, idwa ha akwa madonong man angko. Ho fagaba igfatohod hayo kitonya, nyawa ginahin. ⁷ Aho no natoltol ka Fiya fag Barita ha hayo, hodya nanagad tangdanan gi hayo, nyawa kana. Ham yapdi kangko fagisipon, idyapdi hangko sadili. Ham awkin lomwang to kangko kasalanan? ⁸ Aho no gibolon has nyamo hayo, iba fag Tifonan ka nadisag angko fangaboyagon kaarakitay tomogbong hayo. Aho bilang awkin nalogos is taw, ham gayfan? ⁹ Aho nodwa akwa is nyamo hayo, hodwa nanagad ngadi kana ogbot gi hayo, maskin intam manga fadwasay gis Masidonya nafadiya yadi togbong hangko. Gi yapdis fagonan, ho danwa gisip ho fag idwag fahoriyan hayo igsagad igsagad, nyawa kana. Hanggan aban, kitonya yadingko ogali. ¹⁰ Maskin no kinday in Kiristo fakaoronganan sawangko basad fangayofan, hogfatohoyan kitay hanggan wa aban, nyawa siday is nyamo sas Akaya, angko ogali kitonya wan. ¹¹ Kana mayon, ham gayfan, angko ogali no kitonya? Ham gayfan awkin ahodwa galwasi hayo? Is Diyos fadi wadtwa. Yatokitay, ho galwasi wa dahol dahol hayo. ¹² Dapat hogfadagos kitonya angko ogaliyon, kaarakitay tadwa ha lwangon kaglwang kitay, ta kito yadi hyami nogbarita. ¹³ Tonya bohonwa orongan manga Fandiya-Barita, ka odi kitay igdaya, igfaniring odi in Kiristo manga Fandiya-Barita. ¹⁴ Tam fag idwa katakagdog, maskin nyawas Satanas syagan yadig faniring sadik anghil gis kayawaan nomtoon, nogfasayagdog intam. ¹⁵ Yakanga bohonwa fakatakaon igdog in Satanas manga fangibolon nogfaniring yadi manga fangibolon has kafiyan. It hadasogan aban ka maangay lamang hat manga ogali. ¹⁶ Ho golit wa kati, ham fag idwa gayfan ho kakot odi hayo. Dapat ham no gayfan kitay ngatay ho kakot di hayo, hogfaangay yadi kaarakitay ho syagan igfadaholon kitos sadik mahakot. ¹⁷ Kangko fagfwayongon idwa gintam Fon, bilang odi sadik mahakot nogfadaholon. ¹⁸ Kawa aywan kagfadaholon kawa has manga bagay istay is baba daga, hanggan ahog fadaholon yadi angko manga nadalanan. ¹⁹ Maskin ham madonong nga wan, ham gagwantag talinga ka manga korang it isip. ²⁰ Ham gagwanta nyawa tagfabali hayo ista nasali sogowan, iglogos, igdaog hayo, bilang odigyod hayo, igtofa hayo. ²¹ Ho kaya wa dahol igfadog hayo kitay, hodwa gogali kitonya. Ta no syagan igfadaholon it sadili, aho syagan yadig fadaholon angko. Ho kakot odi ka orongan. ²² Ta awkin manga Hibriyo, mangharaw? Aho Hibriyo yadi. Taga Israil awkin tonya? Aho taga Israil yadi. In Abraham yadi awkin manga hasokfonan tonya? Ahot kaiban yadi wan. ²³ Ta awkin in Kiristo manga fangibolon? Hogtikis wagmanwali odi, dapat aho in Kiristo fangibolon fiya man tonya fag manga taw. Angko nakayayan labi man is taw. Kayodawa ginan ahon poriso, ta nabakbak angko, nafahoriyan hanggan ho kaakbang wa katay. ²⁴ Lima ginan ka manga Hodyo nabakbak angko, myasa tolok safolo ha siyam ik tigna. ²⁵ Tolo ginan ka manga taga Roma nabakbak angko. Sadi ginan manga taw nabintok angko. Tolo ginan aho ha nadalanan angko nagsahayan baba dagat indwat wan. Hanggan sadi ginan aho maalohayagan odi baba linaw dagat, sadi wak sirangan hanggan wandasog kayawa. ²⁶ Kawa ho fagaba wa malahawan, ho ha nadalanan fagayo fag manga fakadalaon, las manga safa, las manga tolisan, las manga kapariho Hodyo, hanggan manga Hintil, manga madala sayo manga basad banwa, sayo basad fakahyabogan, sas dagat hanggan gis manga bonwa manga fadwasay orongan. ²⁷ Honyaya wa gibolon, hanggan naagwanta mahori fagaba, fagaba mafolawan no yabi, malonos ya, mainom ya, fagabadwa hanon. Nomtoon ho kagnaw wan, dapat ngadi balokas idwa akwa. ²⁸ Bohondi tonya fagayo, yabi sirang, ho gayfan wa gayfan wan in Diyos manga Tifonan. ²⁹ No ha kagomo, ho karongkot yadi, no ha akwa yadi naogali dwat, angko fangayofan karongkot yadi wa dahol. ³⁰ Dapat ay, aho nangos no manfatakan di, angko fagfatakaon kitay, ho ngap magomo di. ³¹ Is Diyos, in Hisos, kagfon intam, it Ama, kantam fagfasayaon igdog nyawa ginahin, hanya twa wa kitay ahodwag bohag. ³² Hyabi aho no sas banwa Damasko yapdi, ka gobirnador, in Gorangon Aritas sakop, nafabantay manga taw sas sakbawan alad banwa kaarakitay faiktan angko. ³³ Dapat ay, intam manga fadwasay hantam Fon natonton angko sas basad baban dahol dahol, gis tongod, has dayo alad, ginya ho nalagyo wan, nalfas wan.

¹ Nyawadwa fiya no kitonya, aho fag fadaholon yapdingko nadalanan. Kangko fagfwayongon, intam Fon nafalag, hanggan nafatwagdog angko manga bagay madolaw. ² Ho ha fakilalaon sadik kamtiwala kandiya has fatolo ya fag banwa, tongod ya fanggasan. Safolo ha ofat ik fangaraw kantolas gis nanya. Hodwa yadi twa matohoyanan ngatay it habilogan ginya, ngatay it falad lamang. Is Diyos ka twa. ³ Ho golit kitay hanyan diya has fiya fag oliyanan ka manga natay. Dapat ho golit kitay hodwa yadi twa ngatay it habilogan ginya, ngatay it falad odi. Is Diyos ka twa. ⁴ Ka nalag tonya idwa syagan igfwayong it manga donggon sinya, idwa yadi fiya omowas kitonya. ⁵ Ho mamadaholon tonya fag taw, dapat ay hodwag fadaholon nongko di sadili, no bohonwa kitay kawa aho magomo. ⁶ Dapat ay, aho bohonwa kitay kakot aho nogfadaholon angko, maskin kangko fagfwayongon orongan yadi wan. Dapat ay, hogtikis idwag fadaholon angko has taw, kaarakitay tadwa ha fagayfanon hangko baliwa kaglabi ista lagan angko ogali, hanggan ista donggon angko hampang. ⁷ Dapat, kaarakitay hodwag fadaholon angko has taw, kawan Diyos nafatwagdog hangko madolaw wa dahol dahol, is Diyos nafaangay kitay, aho fag ha akwa fagdogon, ka bilang wa ongon dogi, mahori sangko habilogan. Tonya kwinta wan Satanas famakbak angko kaarakitay hodwa ha takan. ⁸ Tolo wa ginan aho nadarangin hantam Fon, fag nangos imbol wa tonya fag bilang wa dogi. ⁹ Dapat kito kat sagot angko, Angko malooy fag kahowayan hosto ha hyamo. Haw no magomo di, angko karigonan labi man imlag wa sa hyamo ogali. Yakanga ho kasolong wa dahol igfatakagdog kitay, aho magomo di, kaarakitay in Kiristo karigonan mamarigon angko. ¹⁰ Idwa ha kinday sangko, nyawa aho magomo, nyawa tagdaog angko, nyawa mahori nomtoon angko nadalanan, nyawa tagtikis wagfahoriyan, hodwag fagomon gagwanta, kawa aho galwasi in Kiristo. No ginahin aho magomo, gis nanya ahom rigon. ¹¹ Ahon bali mahakot, dapat ay, ham kagpilit angko igmanwali. Fag ham nangos ka mamasayagdog angko, kitay aho fiya. Nyawa aho bilang wadwa ha kahologan, aho bohondi kitonya fag manga kafiyaon fag Fandiya-Barita. ¹² Hodwa nafagomon igfaorongan ha hayo, gingko manga naibolon falagon madolaw hanggan tiba fag manga bagay ka bohonwa fakatwawon kitay, aho in Diyos Fandiya-Barita orongan. ¹³ Kana ka mahori man sa hayo, idwa kitos iba Tifonan, ham gayfan? Idwa akwa gwadi, no bohonwa kitay hodwa ha nasagad gi hayo nyawa odi kana. No tonya kangko naogali dwat ha hayo, ham nangos fag idwag botang tonya. ¹⁴ Fatolo wa ginan aban, aho no manabang hayo, dapat hodwa mamahoriyan hayo. Ham wan kangko fakasayaon, bohonwa ka hayo manga botang. Ka magorang bahalag tifon it manga anak bato famayadon, bohonwa ka manga anak ka bahalag tifon it manga magorang bato famayadon. ¹⁵ Ho kasolong omagwanta fagayo, hanggan domisag angko karigonan ha hayo fakinabang. Nyawa aho galwasi wa dahol dahol hayo, ham idwag fatimbang angko galwasi. ¹⁶ Ham fadi wad twa kitay hodwa ha nafahoriyan nyawa faktaw sa hayo. Dapat ka tibag lwang aho fanlogos a, madaya ya ngadi ha hayo. ¹⁷ Kana mayon ta noglwang kitonya? Aho no nasogo manga taw has nyamo hayo, aho awkin nanagad togbong maskin ham mahoway? ¹⁸ Aho ka nafaaronganon han Tito kitay, fag has nyamo hayo nangos. Ho nafaofod yadi hanya intam fadwasay sadi. Is Tito aw nanagad gi hayo? Idwa awkin hyami fangayofan pariho? Hyami ogali myasa wa kitonya. ¹⁹ Ham awkin gayfan ho gapin angko sadili ogali? Idwan. Aho kampang han Diyos fagdogan no kinday in Kiristo fakasayaon. Angko manga fagalwasiyon, ho gibolon wa fagayo kaarakitay ham imrigon han Diyos. ²⁰ Ho karokog wa kadala aho nombangkad has nyamo hayo, ho ngandayo ha lagon sa hayo ogali manga bagay kadwa maangay sangko. Ginya madi, ham yadi ka lomag manga ogali gingko kadwa maangay ha hayo. Ho ngan lomag ham igdaraogan, manga kaid-ingliyan, gidgisogan. Ham ngandayo kwadkwangitan, igfadaddwatan igdog ha sadi ha sadi, ha faglibakon di has tiba taw, manga ha takan, igfaagran has tiba taw. ²¹ Ho kadala kitay aho nomdasog ya has nyamo hayo domwag, angko Diyos ngandayo igfahaya angko sa hayo faglagan. No kitonya ho omoraw wan, maskin aywan ka gogali dwat hyabi, hanggan nafabayowan, hayapdis dwat fag kasolong, tadya nasoyo, idya nadayo it manga ogali dwat.

¹ Kati aban it fatolo wa ginan aho no manabang has nyamo hayo. Ka Kasoratan iglwang, Nyawa kana fag sombong, ngatay fag dowa, ngatay tolo ka nalag. ² Kati aho nostay yapdis ayayo, ho golit kangko nafwayong it fadowa fag swali, aho no gis nyamo hayo. Kangko nafwayong has manga gogali dwat, hanggan has fagayo, ho mangabaya hayo fiya fiya, ho fawag fahowayon aban. ³ Ho mangabaya hayo kitonya kaarakitay ham tomwa kitay, is Kiristo ka kabaya hayo, nyawa angko odi bibig kagfwayong. Is Kiristo idwa magomo ha hayo baliwa. Yatokitay hanyag falag wa ngap it karigonan ha hayo. ⁴ Hanya nyawa magomo hyabi, ta no nafapako hanya sas nafatimbangan hayo, kati boyagan wan gin Diyos karigonan. Kawa ahonsadi han Kiristo kahoriyan, aho magomo yadi, dapat kati, aho boyagan yadi gin Diyos karigonan kiton Kiristo, kaarakitay mamaadal hayo. ⁵ Ham fag gisip fiya fiya hayo sadili, ngatay hayo manga ogali maangay has mangam tiwala, ngatay idwan. Ham awkin idyag dog sa hayo sadili kitay, is Kiristo Hisos sawa hayo, no bohonwa kitay ham kat nadayo. ⁶ Hogsyag kitay ham tomwa wa kitay, aho bonwat-nadayo. ⁷ Hogdarangin han Diyos kitay, ham nangos fag idwa gogali has dwat. Bohonwa kitay maskin aho kasaya fag imlag kitay hodwa nadaogan, dapat kaarakitay ham omogali has fiya, nyawa halimbawa, no kadog di, ho bilang wa nadaogan. ⁸ Maskin idwa fiya aho noglaban ka fakaoronganan no bohonwa kitay hogfaanod odi. ⁹ Ham nangos fag karigon, ginya madi, nyawa angko habilogan kagomo, ho kasolong yapdi. Yakanga hogdarangin yadi kitay hayo manga ogali fag nangos imhosto wa fiya fiya. ¹⁰ No baliday aho nodyapdis nyamo, hogsorat ha hayo to fag manga bagay, kaarakitay aho nomdasog is nyamo hayo, aho fawa ha fakampangon mahori ha hayo gintam Fon nadisag hangko karigonan. Is Diyos nadisag hangko to fag karigonan kaarakitay manogbong hayo, bohonwa hasagfadwat baliwa. ¹¹ Angko manga fadwasay, hogtogon ha hayo. Balistay lamang angko sorat kati. No baliday hayo fagsyaganon, ham fag mahogod, kaarakitay hayo manga ogali imbali hosto. Ham fag katanog angko manga togon ha hayo. Ham fag kasadi, fag mahoway yadi ha sadi ha sadi. No kitonya, is Diyos, ka mahoway hanggan galwasi hayo, sawa hayo. ¹² Tam fag badbayaan ha sadi ha sadi tam nogladlagan. Intam manga fadwasay fagayo sas manga Tifonan gwas yadi hayo. ¹³ Ham nangos fag domog kitay, is Kiristo Hisos, kagfon intam, mahoway ha hayo, is Diyos galwasi hayo, hanggan ka Maliyaw fag Falad kasadi ha hayo fagayo fagayo.