1 TIMOTIYO

¹ Ahos Pablo kagsorat to fag sorat. Aho in Kiristo Hisos Fandiya Barita maskin tonyan Diyos, intam Famawi, hanggan in Kiristo Hisos, intam fagsyagon, fasognod. ² Hogsorat ha hyamo, Timotiyo. Haw bilang wangko anak orongan, kawa ho nafatiwala hyamo han Kiristo. Haw nangos fag domog kitay is Diyos intam Ama, hanggan is Kiristo Hisos kagfon intam, mahoway ha hyamo, kaawa hyamo, hanggan igfalokmay hyamo fangayofan fagaba. ³ Kito kangko nafwayong itfagonan, aho no kalahaw has sakop Masidonya, haw nangos fag is nyamo yapdis banwa Ifiso, kaarakitay bomando ka manga taw kagfaadal ka bonwa fakaoronganan. ⁴ Ha fag bando has taw, fag idwag falibang tonya fag manga taw has manga lisbay, hanggan ista fatoga manga listahan hasokfonan kadwa taw haminon. To fag manga bagay igfatoga odis taw, idwa yadi syagan igtogbong is taw igfatonglos in Diyos halimbawan, maskin tadwag syag in Diyos. ⁵ Hogtogon hyamo kito kaarakitay haw fatohod has taw kitay, kawasta manga fangayofan inbali maangay, idwa yadi ha fakayaon domwag it naogali dwat hyabi, maskin nasoyo wan, hanggan igsyag orongan han Diyos, yakanga ta fag galwasi manga taw hanggan in Diyos. ⁶ Tiba taw natalang odi, igdaraogan kadwa ha kahologan. ⁷ Ta kasaya nangos ta fag imbali mangag faadal manga togon, nyawa tadwa natwagdog it fwayong. Ta nogfaadal, no kadog di, bilang wasta mata lagan, dapat tadwa twagdog it sadili fagfaadalon. ⁸ Dapat ay, tam twa wa kitay ka Batasan Hodyo kafiyaon, no fiya nogfwayong. ⁹ Tam twa wa kitay ka batasan idwag fatoon has fiya fag manga taw, dapat igfatoon kawa has mangag dayo manga togon, dayog fasakop, ka mangadwa katiwala han Diyos, ka gogali dwat, ka mangag fadwat igdog han Diyos, idwa kasayam bali fiya, ka mangag libon taw, nyawat ama, nyawat ina. ¹⁰ In Diyos togon igfatoon has manga gogali dwat has ka taw, has manga ama nogfabayowan has manga kapariho ama, has mangag pilit wagtaban manga taw, has manga bohagon, has mangag balibad nogfaorongan, hanggan nyawa hada fag taw kaglaban ka adal orongan. ¹¹ Ka adal orongan kawa ka Fiya fag Barita gis kafiyaon fag Diyos. Hanya ka nafabahala hangko it Fiya fag Barita kaarakitay hogfadog yadis taw. ¹² Hogbaya in Kiristo Hisos kagfon intam, hanggan igdisag karigonan angko kaarakitay ho bomarita wan. Maskin hanya ka naayfan kitay, maangay aho no kabali Fandiya Barita, yakanga nafili yadingko, kaarakitay hombali it fangibolon, ¹³ nyawa hyabi ho kampang igsway hanya, hanggan ho nafahoriyan hanggan naisog has taw. Dapat ay, is Diyos in-awa angko maskin aho nodya katiwala hanya hyabi, hodwa natwa kitay angko ibolon ngatay fiya, ngatay dwat. ¹⁴ Kagfon intam nadisag hangko mahogod it malooy fag kahowayan. Tonya fag kahowayan ka nafatiwala angko hanggan nafaalwasi angko han Diyos, hanggan has manga taw, kiton tam fagayo, kansadi san Kiristo Hisos. ¹⁵ Fandog ngay, fiya fagayo fag manga taw nogfaanod hanggan katiwala kitay, is Kiristo Hisos inbangkad wa hastay is baba daga, kaarakitay bomawi manga taw ka ha ogali dwat. Hanggan angko ogali ka dwat man has fagayo. ¹⁶ Dapat ay, is Diyos in-awangko, kaarakitay gi wangko nadalanan, is Kiristo Hisos falag has taw no kinday hanya maagwantaon wa dahol. Aho bilang sadik fagtoladon has mangag syag in Kiristo Hisos, kat manga fagdisagan ka haboyagan kadwa ha katabowanan. ¹⁷ Yabay, tam fag fasayagdog hanggan igfadaholon fagaba ka sadi dik Diyos, kadwa katay, kadwa kalag, kaghari hanggan aban aban. Fag kitonya wa ngay. ¹⁸ Timotiyo, angko anak, hogtogon ha hyamo to fag manga bagay, ka kito yadi kasta nagona nafwayong kawa ha hyamo hyabi. Tonya fiya wam fanlaban has dwat. ¹⁹ Haw fag syag yadi marigon han Kiristo, hanggan fag idwa ha fakayaon kam naogali dwat hyabi, maskin ha nasoyo wan. Ha akwa manga taw dayo igsoyo, nyawat fangayofan igfatohod it naogali dwat. Yakanga ta fawag syag in Diyos kati, bilang kitos sahayan baba dagat kantoktok ha sayo bato. ²⁰ Da Himinyo da Alihandro in-aktom yadi sinya. Ho nadisag wa tonya fag dowak taw han Satanas, kaarakitay ta tomwa kitay, ta fag idwa kampang igsway han Diyos.

¹ Bago bago, angko fagfaaronganonon ha hayo kitay, tam fadogan han Diyos intam manga fagsagadon, intam daranginon, intam fwayongon hanggan intam fagbayaon, kawa has fagayo fag manga taw. ² Kitonya yadi, tam fag darangin kawa has manga Gorangon, ka manga ha kangayanan fagayo, kaarakitay tam idwa ha mahori, mahoway di santam ligongan, intam ogali maangay yadi han Diyos, hanggan has manga taw. ³ No kitonya, fiya hanggan maangay san Diyos intam Famawi faglagan, ⁴ maskin, non Diyos di fangayofan, fag fagayo wambawi hanggan tomwa wa fiya fiya ka fakaoronganan. ⁵ Maskin is Diyos sadi di, hanggan sadi di ka fagalan han Diyos, hanggan has manga taw, kawa ka taw, is Kiristo Hisos. ⁶ Hanya nadisag it haboyagan sadik fangafiyan kaarakitay tomobos has fagayo, yakanga gis nanya fag masohod kan Diyos nafatohoyan, is Kiristo Hisos nafalag kitay is Diyos kasayag bawi fagayo fag manga taw. ⁷ Yakangas Diyos nafili angko sadik Fandiya Barita ka manoltol hanggan igfaadal has manga Hintil kitay, to wa fakaoronganan wan, kaarakitay ta somyag in Diyos. Orongan wan, bohonwa bohag, angko nafwayong hyamo. ⁸ Angko fakasayaon, nyawa siday tam nogtifonan, fag manga ama kagdarangin, maangay it manga fangayofan, idwa ha fagbotangon, idwa ha fakahoriyon has taw. ⁹ Ka manga ina yadi, it manga rotay hanggan bok fag sadis fakafiyan. Kat fagsolongon dayag fag bohonwa manga ono bolawan, manga sangbaw siwayang dahol dahol, ngatay it rotay araw araw wagtobos. ¹⁰ Dapat ka bilang wat dayag, fag ha fiya fag ogali ka maangay has mangam tiwala han Diyos. ¹¹ Ka manga ina fag idya gawang gawang ta nogtoltol yapdi, fag fasakop fiya fiya. ¹² Hodyag faangay kitay ka manga ina mamaadal, ngatay mamahala has manga ama. Ka fiya, ka manga ina fag matalingan yap. ¹³ Tam fag tohod kawas Adan gona man inhalig bago dis Iba. ¹⁴ Bohonwas Adan, dapat is Iba ka nadaya hanggan nasway in Diyos togon. ¹⁵ Dapat ay, ka inam bawi kawa nogfasagaya anak dararag, nodwa ha takan, ta nogsyag in Diyos, galwasi has manga taw, hanggan it fangayofan no maliyaw.

¹ Taglwang kitay, ka kasayam bali fangano Tifonan danwa fiya it fakasayaon. Anod wa tonya. ² Yakanga manga taw fag idwa ha fagoliton ka fangano Tifonan. It babay fag sadi di, idwag falabi it sadili fakasayaon, madahan, magalang, mafasakbawon famaklay, fiya yadi nogfaadal has taw. ³ Fag idwag lango, idwa yadi maisog, dapat fag mahoway, idwag faagran has manga taw, fag idwa fagaba maowasan has kwarta baliwa. ⁴ Hanya fag gano wa fiya fiya it sadili talanahan, hanggan it manga anak fag magalang hanggan katanog hanya. ⁵ Kinday sadik taw no omano in Diyos tifonan, ham gayfan, nodwa syagan gano it sadili talanahan. ⁶ Fag kawa dogay wantiwala ka kabali fangano in Diyos Tifonan. No ngalay yapdi, ngandayo imbali ha takan, ginya madi ka fadosaan kamtohoyan hanya, kito yadi kantohoyan han Fandaya. ⁷ Kadya manga maaktoman san Diyos Tifonan, ta fag idwa ha faglwangon ka gano in Diyos Tifonan. No kitonya tadwag fadwat igdog hanggan is Fandaya idwa omiktan hanya sat siyok. ⁸ Ka fiya, ka mangag togbong san Diyos Tifonan fag ka magalang, idwag maswag no kampang has taw, idwa kalawis has fakalangoon, idwa maingliyon has kwarta. ⁹ Fag kawa dan intiwala orongan hantam madolaw fag fakatiwalaon, ka nafatwagdog lamang has mangan tiwala, ka mangadwa ha fakahawagon it naogali dwat hyabi. ¹⁰ Tam fag bantay yapdit ogali, tam noglag fiya ngay, tam bago di domisag it bato ibolonon. ¹¹ Kat manga babay fag fiya yadit ogali, idwa mafadwaton igdog, idwag falabit sadili fakasayaon, nyawa kanat ibolon myasa wa fiya. ¹² Kagtogbong san Diyos Tifonan, it babay fag sadi di, gano yadi fiya fiya it sadili talanahan, syagan yadig fatanog it manga anak. ¹³ Fagayo fag manga taw gomalang has gibolon han Diyos Tifonan hanya nogfadagos fiya it bato ibolonon. Marigon yadista fangayofan igfadog no kinday tam nogsyag in Diyos kawa tam no kasadi san Kiristo Hisos. ¹⁴ Hogsorat to fag manga togon ha hyamo, hanggan ho gwayan wa kasaya kitay tam fag ngalay wa manladlagan aban. ¹⁵ Dapat, halimbawa, aho nodyam dasog is nyamo madali, to fag sorat ka fatwagdog hyamo kan Diyos boyagan it talanahan ogaliyon fiya. San Diyos Tifonan, no fiya ista manga ogali ka bilang wa torok famaganit has fakaoronganan. ¹⁶ Ka manga fakaoronganan kantam fakatiwalaon madolaw wa dahol dahol kitay, Hanyan lag hastay nonbali taw, It Maliyaw fag Falad nafaorongan yadi hanya, Ka manga anghil nalag hanya, Ta nabarita yadi hanya sadik baba daga. Sas fagayo fag banwanan, ha akwan tiwala hanya, Ginya madis Diyos natanggap ya hanya ham tongod.

¹ Katwa wagdog fiya fiya ka Maliyaw fag Falad fwayong kitay has ginanan sirang tiba domayot fakatiwalaon. Tamtanog manga falad madaya hanggan manga adal yadi gis manga labang. ² Ha akwa aban mangag faadal bohagon, kat manga fangayofan ha tandaan kitay tonyan Fandaya manga nasali sogowan. Ta bomando kitay, ³ fag idwag talsawa. Ta bomando yadi tibak fanganon kan Diyos nahalig hanggan nafatalaga kitay, ka mangan tiwala, ka natwa wan ka fakaoronganan, fag baya in Diyos ta no kwan. ⁴ Fagayo kan Diyos nahalig fiya, yakanga tam idwa ha fagdayoon fag fanganon, dapat tam fag baya in Diyos nogtanggap ka fanganon, ⁵ maskin in Diyos hampang hanggan intam darangin kagfatohoyan kitay bohonwa fagliyon tonya. ⁶ Haw nogfaadal to fag manga togon hantam manga fadwasay, haw in Kiristo Hisos fiya fag fangibolon. No kandogay day haw nogfaadal yapdi intam fakatiwalaon, hanggan kawa adal orongan kam fakatanogon, im sadili fangayofan imrigon yadi. ⁷ Fag idwag falibang hyamo has manga toltol magorang kadwa ha kahologan. Yatokitay, haw fag fayayom hyamo has fiya. ⁸ Ha fakinabang ongay tam nogfayayom igfarigon intam habilogan. Dapat ay, bohondi kitonyak fiya ka fakinabang nogfayayom intam fangayofan has fiya, maskin is Diyos ha togon it bato disagon, bohondi ti fag haboyagan, hanggan ka haboyagan has aban. ⁹ Fiya fagayo fag manga taw nogfaanod hanggan katiwala tonya. ¹⁰ Kawa kitonya tam idwag fagomon gibolon mahogod maskin tam igsyag in Diyos ka boyagan, intam Famawi fagayo, labi man ka mangan tiwala hanya. ¹¹ Haw fag faadal to fag manga togon hantam manga fadwasay. ¹² Kawa haw anahan yapdi, ta fag idwa ha fagoliton hyamo kitay, ha anahan ya ngadi. Yatokitay, haw fag kabali ka mangan tiwala fagtoladon, no kinda no galwasi manga taw, nogsyag in Diyos, hanggan no kabali maliyaw, sas hampang hanggan sas ogali. ¹³ No baliday ho nodyam dasog is nyamo, haw fag fagabag basa has fakaaywanan in Diyos sorat. Fag toltol yadi, hanggan igfaadal tonya. ¹⁴ Haw fag idwag fabayaan in Diyos disag fagsyaganon ha hyamo, fag faanod kasta nagona nafwayong kawa hyamo hyabi, ka manga fagtahinan sas Tifonan no natawid im baba alfoyo. ¹⁵ Ha fag fayayom wam sadili tonya fag manga ibolon, fatonglosan wan, kaarakitay fagayo lomag no kinday haw kabagat has fiya. ¹⁶ Im ogali fag maangay hanggan fag fiya haw nogfaadal has taw. Fag idwag fagomon, ginya madi haw, hanggan ka mangag talinga hyamo imbawi yadi.

¹ Haw fag idwa kampang dwat donggon has manga ama ka magorang man hyamo haw no kabaya, haw fag kampang odi mayan mayan hanya, fag bilang wam ama. Ka manga anahan fag bilang wam fadwasay. ² Ka manga ina ka magorang man hyamo, fag bilang wam ina. Fag fiya yadim ogali has manga dayaga, fag bilang wam manga fadwasay ina. ³ Fag idwa gaway ka manga ina balo kadwa ha fagsyagon iba taw. Yatokitay, fag togbong wan. ⁴ Ka maangay hantam kamtiwala, ka ina balo no ha anak, ngatay ha manga fofo, fag tonya ka omanot magorang, bilang wat nafasalamatan hat ina, maskin naanot manga anak hyabi. Is Diyos igbaya wan no kitonya. ⁵ Ka orongan wa ina balo fiya fiya, sadi odi sat balay, idwa ha ofod ofod, hanggan is Diyos lamang it fagsyagon. Yakanga hanya fagabag darangin, igsagad togbong gin Diyos, yabi sirang. ⁶ Dapat ay, ka ina balo no lamang lamang it ogali, bilang wa natay it fangayofan, nyawa boyagan yapdit habilogan. ⁷ Ha fag fadog has manga ina balo to fag manga togon, kaarakitay iba taw idwa ha fabangdanan ha hanya. ⁸ Nyawa faktaw nodwa ganot manga kaiban, labi man it manga sadili talanahan, nadayo wat fakatiwalaon, bohondi kito ka mangadwan tiwala fag dwat it ogali. ⁹ Ka kito fag manga ina balo lamang ka fagfaaktomon hantam bato togbongon. Fag ka mandi manga ina balo kaglabi onom ik safolok fangaraw it kadogayan, kantam fagtogbongon. Fag kawat indogan sadi odi hyabi. ¹⁰ Fagayo iglwang fiyat ogali. Nafadahol wa fiya fiyat manga anak. No marigon yapdi hyabi, mafasakbawon manga famaklay, matogbongon hyabi has manga taw kantohoyan han Diyos, hanggan has manga ha fakahoriyon, intohoyan has fiya fag ibolon. ¹¹ Haw fag idwag faaktom santam bato togbongon ka manga ina balo kadya magorang. Ngandayo idwa omagwanta idwa omindogan, ginya madi ngandayo fabayaan in Kiristo ibolon. ¹² Ginyadwa faanod it togonan in Kiristo ibolon. ¹³ Imyayom wa kafang, kalibang odi gombalay gombalay. Ginya madi bondi tonya ka dwat, imbali mafadahiton, mamawaton is taw, idwa fiya it manga hampang. ¹⁴ Yakanga, no sa dingko, tam faindogan ya domwag, ngandayo omanak yapdi, yakanga omano yadit talanahan manga botang kaarakitay intam manga kalaban idwa ha faglwangon kitay idwa fiya intam ogali. ¹⁵ Maskin hoglwang kitonya, tiba balo indiya han Satanas fag ogali. ¹⁶ Ka fiya ka manga ina kamtiwala fag ganot manga kaiban ina ka balo, fag bohon yap ka Tifonan kagtogbong, kaarakitay ka manga Tifonan tomogbong kawadwa ha manga kaiban, idwa ha fagsyagon iba taw. ¹⁷ Ham fag dogang ya domwag hayo disagon has manga fagtahinan ka gano fiya ka Tifonan, labi wa ka manga mahogod igtoltol hanggan igfaadal in Diyos hampang. ¹⁸ In Diyos sorat iglwang, Ha fag idwag fasolong bangkas ka oyong baka no balidag lid yapdi tirigo. Insorat yadi, Maangay ka gibolon no ha tangdan yadi. ¹⁹ Haw fag idwag talinga ta nogsombong ka sadik fagtahinan naibolon, nodya manga dowak taw, ngatay tolo ka nalag. ²⁰ Fag sawasta fagdogan fagayo, haw no kabaya ka dayo kaoman it ogali dwat, kaarakitay tiba imdala yadi wagdog. ²¹ San Diyos, hanggan san Kiristo Hisos, hanggan sat manga anghil fagdogan, hogfwayong hyamo kitay, ha fag katanog to fag manga togon. Ha fag idwag fatoga ista naibolon dwat, fag idwa yadi ha fagihidon taw. ²² Fag idyag sadi ginan nogtawid hasta baba alfoyo kaarakitay igfalobos hanya ka kangayanan fagtahinan. Haw fag idwa kaaktom hasta ogali dwat. Hyamo fangayofan fag fagaba maliyaw. ²³ Fag bohondi danom im faginomon. Ha fag ginom yadi ogbot fag alak. To tomogbong yadi hyamo haw nogdog masoha, mamarigon yadi hyamo, kawa haw no fagaba kasagit tiyan. ²⁴ Ha akwa manga taw malagan wa fiya fiya it manga ogali dwat, nyawa idyapdin dasog has fangabaya. Dapat ay tiba taw it ogali dwat aban ya bagom lag. ²⁵ Kitonya yadi, ha manga ibolon fiya ka madalim lag, dapat ay nodyan lag madali, idwa yadi aban imfyalom, imlag di.

¹ Kasta manga nasali sogowan, kagfasakop hat manga fagoliyanan, fag magalang yadi hanya, kaarakitay tadwa ha lwangon hanya, idwa yadig fadwat igdog in Diyos hanggan intam fagfaadalon. ² Kasta fagoliyanan nomtiwala, it manga nasali sogowan fag idwa gayfan kitay, Mi pariho wa fadwasay santam Fon, nyawa hodwa bangan gibolon. Fag idwa yadig sway it fagoliyanan. Yatokitay, fag kabagat wa kabali fiya no gibolon, maskin ista fagtogbongon intam fagalwasiyon kagsyag yadin Kiristo. ³ nyawa faktaw nogfaadal, nodwa kito kangko fwayong istay, nodwa yadi kiton Kiristo Hisos, kagfon intam togon orongan, hanggan nodwa has manga adal has kabali fiya intam ogali, ⁴ hanyag fataka odig dog, idwa ngap ha fakatwawon. It fangayofan bilang wa ha sagit. Igfabarohagan yaglabanan ya has hampang, igbangkad odi kaid-ingliyan, gidgisogan, igfadwat igdog is taw, igfatodtogaan wan. ⁵ Ka kasayag daraogan has manga taw kitonya, idwa maslong it isip, tadwa twa ka fakaoronganan. Kasta fangayofan, ta fag kabali maakwa maskin igsimba. ⁶ Ka orongan, dahol ka fakinabang tam nogsimba, nogfasakop orongan in Diyos, hanggan igbaya no daho da kantam lagan. ⁷ Kawa hyabi, tam no bago sagaya, tam idwa ha diya diya, nyawa kana istay is baba daga, hanggan tam aba no malin gistay, tam fawa ha diya diya mandi. ⁸ Yakanga tam fag baya wan tam no ha hanon hanggan rotay. ⁹ Ka kasaya kabali maakwa wa dahol dahol lomag tokso, kawa aywan fag fakasayaon dwat kadwa ha kahologan giktan hanya, hanggan goyod hanya has kadwatan. ¹⁰ Maskin ka gwas fagaba has kwarta ha bilang wa dalid sat basad fangayofan, kagfatobo fagayo fag dwat fag ogali. Tiba taw kawa gwas wa gwas wan kitay, it kwarta fag aywan nangos, in-ayayo git fakatiwalaon. Ginya madi, no dogay, bago di nadog it kahoriyan, it fangayofan bilang wa hagtobok hanya. ¹¹ Dapat haw, haw in Diyos fangibolon, fag baybay tonya fag manga bagay fagayo. Im fangayofan fag matoonan has fiya fag ogali, ka maslong. Fag imtohoyan han Diyos, matanogon, galwasi has tiba taw, idwag fagomon, hanggan mahoway. ¹² No baliday im fagsyaganon, fag mahogod kitosag dalandan maskin ha tanggapon, ka haboyagan kadwa ha katabowanan, kawa nogsyag in Diyos.Is Diyos nafatawag hyamo hastay fag ibolon hyabi, haw no nafaorongan hanya sas basad fakaaywanan fag manga taw ka nadog hyamo. ¹³ San Diyos faglagan, kagfaboyag fagayo fag manga bagay, hanggan san Kiristo Hisos faglagan, ka nafaorongan it fagsyagon no san Ponsiyo Pilato fagdogan, hogtogon hyamo kitay, ¹⁴ is Kiristo Hisos kagfon intam nodyan dasog, haw fag fadagos angko manga togon to ha hyamo. Fag fatonglos fiya fiya hanggan fag idwag fasigpala. ¹⁵ Nomdasog gis nanya fag masohod, is Diyos mamalag ya in Kiristo Hisos. Is Diyos ka kafiyaon, sadi di kaghari, it kangayanan abwat man has fagayo fag manga gorangon. Hanya sadi di kagfon has fagayo fag manga fon. ¹⁶ Hanya lamang kadwa katay, igbanwanan sas basad yawa, idwa ha taw somompong hanya. Idwa ha nalag hanya hyabi, idwa yadi ha syagan lomag hanya kati. Tam fag fadaholon hanya, fag faanod yadi kitay it karigonan idwa ha katabowanan. Fag kitonya wa ngay. ¹⁷ Fag fatagak has manga maakwa istay is baba daga kitay, ta fag idwag faabwaton it sadili. Ta fag idwa yadig syag has kaakwaan ka ha kahaminan di, dapat ta fag syag han Diyos ka madisagon, kagdisag hantam fagayo fag manga bagay kaarakitay tam bomaya wan. ¹⁸ Fag fwayong has manga maakwa kitay, ta fag gibolon has fiya fag kabali yadi maakwa sas fiya fag ogali. Ta fag idwa mahwangiton, fag matogbongon hat kapariho. ¹⁹ No kitonya, ta tomifon yadi kaakwaan has aban kagfatohoyan kitay ta tomanggap yadi ka orongan fag haboyagan. ²⁰ Timotiyo, haw fagano fiya fiya ka nafaano ha hyamo. Fag idwa gwas ka manga toltol kadwa fiya kadog han Diyos, hanggan ka manga katadlongan ka tiba taw noglwang gin Diyos kadonongan, dapat ay, idwa ngap gi hanya. ²¹ Ka mangag lwang kitay ta ha kadonongan kitonya, natalang di ngap gintam fakatiwalaon. Haw nangos fag domog kitay is Diyos mahoway ha hyamo.