1 TISALONIKA

¹ Ahos Pablo kagsorat ha hayo, hanggan to fag sorat gi yadinda Silas da Timotiyo. Migsorat ha hayo fagayo ka san Diyos Tifonan sas banwa Tisalonika, ha hayo kantohoyan han Diyos intam Ama, hanggan han Kiristo Hisos kagfon intam. Ham nangos fag domog kitay is Diyos mahoway ha hayo, hanggan igfalokmay yadi hayo manga fangayofan fagaba. ² Mi fagabag baya in Diyos kawa ha hayo hanggan nyawa ginahin hami nogdarangin, ³ migfasalamat hantam Diyos hanggan intam Ama kawa migtohod kitay, maskin ham igsyag in Hisos, hayo ogali inbali fiya, hanggan maskin ham galwasi hanya, ham gibolon mahogod in Kiristo Hisos ibolon, ham gagwanta yadi, kawa hayo fakasyagon is Kiristo Hisos kagfon intam. ⁴ Hyami manga fadwasay, mi twa kitay is Diyos ka galwasi hayo, nafili yadi hayo. ⁵ Kawa hami no natoltol ha hayo ka Fiya fag Barita, ham bondi kitay nadog hyami hampang, ham nalag yadi ka Maliyaw fag Falad manga naibolon madolaw. Hami nafalag yadi ha hayo kitay, midwa gadowan nogtoltol ha hayo, mi twa kitay in Diyos Fiya fag Barita fakaoronganan wan. Tam hyabi no gofodan is nyamo hayo, ham fadi wadnalag hyami manga ogali. Ka hayo lagan igtogbong yadi hayo. ⁶ Ham natolad hyami ogali hanggan kagfon intam. Ham no natanggap ka Fiya fag Barita, nyawa aywan hayo donggon mahori, ka Maliyaw fag Falad nafasolong igdog hayo. ⁷ Yakanga fagayo kantiwala sas sakop Masidonya hanggan sakop Akaya nalag sadik fagtoladon fiya gi hayo manga ogali. ⁸ Bondi sinya sas manga sakop Masidonya hanggan Akaya, ta no nadog gi hayo ka toltol kawa hantam Fon, indog yadi sas manga banwanan fagayo, kawa ham intiwala in Diyos, kakitay, nyawa bonwa hami kagbarita kati, gi wa hayo, ta nogdog. ⁹ Tonya fag manga taw fagayo igtoltolan kitay ham natanggap hyami kafiyaon mi no gi hayo banwanan, hanggan ham nadayo hayo manga fagsyagon gona, kaarakitay igsyag in Diyos, ka boyagan hanggan orongan fag Diyos, hanggan gibolon yadit ibolon, ¹⁰ hanggan igfanaya yadit Anak kabangkadan aban gin Diyos banwanan sam tongod, kawas Hisos, kan Diyos nafaboyag ya gis kahatayan. Is Hisos ka bomawi intam aban, is Diyos nogfadosa manga taw kawa hanya omisog ka manga gogali dwat.

¹ Hyami manga fadwasay, ham fadi wadtwa kitay, hami nonbangkad has nyamo hayo hyabi, bonwa kitay idwa ha kahologan. ² Ham twa wa kitay mi nodyan dasog ha hayo sas banwa Tisalonika, ta nafahoriyan hanggan nafasidyowan odi hyami sas banwa Filipos. Nyawa aywan kaglaban hyami toltol, is Diyos nafarigon hyami fangayofan, kaarakitay midwa kadalag toltol ha hayo ka Fiya fag Barita gin Diyos. ³ Hyami fagfaaronganonon ha hayo hyabi, midwag fataglowan hayo, bonwa yadi kitay mi ha fakasayaon kadwa fiya, midwa yadig falingo manga taw. ⁴ Yatokitay ngap, no kinday in Diyos fakasayaon, kitonya mi nogtoltol has taw, kawa hami in Diyos nagfatohoyanan kitay, hami ka bahala manoltol ka Fiya fag Barita. Midwa kasaya kitay, fag manga taw kagbaya hyami. Hyami fakasayaon fag is Diyos, kaglag hyami manga basad fangayofan, fag hanya kagbaya waglag hyami ibolon. ⁵ Ham fadi wadtwa hami nonbangkad has nyamo hayo, midwa kampang igmanwali ha hayo, idwa yadi myasa wa masayagdog maskin ha bato sagadon. Is Diyos iglag ka sa hyami basad fangayofan. ⁶ Midwag fahasa kitay nyawa ham, nyawa faktaw mamasayagdog hyami, ⁷ nyawa, no kitay di, kawa hami in Kiristo manga Fandiya-Barita, idwa ha dwat mi no gasolop hayo togbong. Dapat ay, mi nos nyamo hayo hyabi, mi gafalo waglag hayo, kito was ina no gano it anak dararag. ⁸ Maskin mi galwasi hayo, bondi ka Fiya fag Barita ka hyami nahoray ha hayo, midwa yadi nahwangit hyami sadili haboyagan kaarakitay igtogbong hayo. ⁹ Manga fadwasay, ham fadi wadag tohod kitay, hami nangibolon hanggan wa kagayamonan yabi sirang, kaarakitay ham, nyawa faktaw, idwam hori hyami fanganon, hami nogtoltol ha hayo ka Fiya fag Barita gin Diyos. ¹⁰ Ham twa wagfaorongan kitay hyami ogali ha hayo, ka mangan tiwala sonson wa fiya, maangay, hanggan ham idwa ha fabangdanan hyami. Is Diyos twa yadig faorongan kitonya. ¹¹ Ham nalag kitay hami bilang wa hayo ama fagayo. ¹² Mi gofod hayo, migfarigon hayo manga fangayofan, migfaaronganon hayo kitay, hayo manga ogali fag maangay han Diyos kagfatawag hayo, kaarakitay ham imaktom hat sakop kafiyan. ¹³ Hyabi hami no natoltol ha hayo in Diyos hampang, ham nanalinga hanggan natanggap kitay ka hyami toltol bonwasta fadahit, dapat giwan Diyos ka gibolon sa hayos mangam tiwala. Tonya ka sadi yak bagay ka hyami fagbayaon han Diyos. ¹⁴ Manga fadwasay, ka hayo nadalanan kito yadi kan Diyos manga Tifonan sas sakop Hodiya, ka manga taw kansadi san Kiristo Hisos, ista nadalanan sinya. Hayo manga kapariho nafahoriyan hayo, kito yadi ka manga Hodyo no nafahoriyan ka mangan tiwala sas sakop Hodiya. ¹⁵ Hyabi hyabi, manga Hodyo nafahatay in Diyos manga fangampang, ginya ta nafahatay yadin Hisos kagfon intam, hanggan wa kati tagfahoriyan hyami. Is Diyos kahori wa dahol tonya fag manga taw, ta gaway yadi manga taw fagayo. ¹⁶ Mi nogtoltol ka Fiya fag Barita has manga Hintil kaarakitay manga Hintil imbawi yadi wan, ta kasayag balag hyami. Kawa mang kasalanan Hodyo gi yapdis hyabi iglabi wan, yakanga kati is Diyos idwa hat dayo domwag fag kaisog ka manga Hodyo. ¹⁷ Manga fadwasay, kati angko bato lwangon kitay hami no nalin gi hayo hyabi, mi galwad wa dahol hayo, mi kasaya wa dahol manabang hayo. Nyawa tam nanarowayan, tam bilang digladlagan. ¹⁸ Itfagonan no kitay di, ho kalahaw wa kalahaw has nyamo hayo, dapat hodwan lahaw, kawas Satanas nataktak hyami. ¹⁹ Ho kasayag sabang hayo maskin ham kito ka tiba, ham yadi hyami fagasalopon, hyami fakasolongon, hyami falagon kitay, mi nafadagos hyami ibolon. Ham hyami famasayagdog san Hisos kagfon intam it faglagan, hanya nombangkad ya aban. ²⁰ Anod, ham ka hyami famalagon kitay, hyami ibolon fiya, hanggan ham ka hyami fakasolongon.

¹ Ginya madi midwa gagwanta hami nodwag sabang hayo, yakanga mi gayfan hami da Silas fag imgoyan sas banwa Atinas, ² dapat mi nasogo ha hayo in Timotiyo, intam fadwasay, ka gofod yadi hyami gibolon in Diyos ibolon, hami nogtoltol ka Fiya fag Barita kawa han Kiristo. Mi nasogo hanya kaarakitay mamarigon hayo manga fangayofan ham nogsyag hasagfon intam, ³ kaarakitay ngadi sadi sa hayo fag idwam bway kawa tagfahoriyan hayo. Ham fadi wadtwa kitay in Diyos kafangayofanan hantam idwag fabaybay fagayo ginan ta nogfahoriyan intam. ⁴ Kawa hami no gofod yapdi hayo hyabi, mi danwa nafatagak hayo kitay, tam domog mahori, hanggan ham fadi wadnalag kitay tonyan anod wan, ta nafahoriyan intam. ⁵ Maskin ngay, ahos Pablo, hodwa gagwanta ho nodwag sogo in Timotiyo has nyamo hayo. Yakanga ho nasogo hanya kaarakitay mi tomwa ngatay ham marigon yapdi nogsyag hantam Fon. Ho kadala kitay is Fanlaban ngatay nafaadowan hayo. No kitonya mi gwayan wagfaanogon hyami nakayayan is nyamo hayo hyabi. ⁶ Dapat ay, kati is Timotiyo nwali wan a, nafadahit ha hyami kafiyaon fag barita kitay, ham igsyag yapdin Diyos hanggan ham gadgalwasiyan yadi. Nafwayong yadi ha hyami kitay, ham fagaba wa maowasan, igbaya hyami, hanggan ham galwad hyami kito yadi hyami, mi no galwad hayo. ⁷ Yakanga, manga fadwasay, nyawa mi sawas basad fakahoriyan kati, hyami fangayofan inrigon ya kawa ha hayo, kawa ham marigon nogsyag in Kiristo, ⁸ hanggan minsaya yagdog kawa hayo manga haboyagan kansadi hasagfon intam, karigon sinya. ⁹ Kati idwa hat dayo domwag mi nogbaya intam Diyos kawa ha hayo. ¹⁰ Yabi sirang migdarangin mahogod kitay, hami nangos fag lomag ya hayo hanggan tomogbong hayo, kaarakitay idwa ha korang ham nogsyag in Kiristo. ¹¹ Hyami fagdaranginon kitay, intam Diyos hanggan Ama, hanggan is Hisos kagfon intam ka falag hyami halimbawan kaarakitay hami manabang has nyamo hayo. ¹² Kagfon intam fag fabali yadi hayo kalabi man no gadgalwasiyan ha sadi ha sadi, hanggan has fagayo fag manga taw, kito yadi hyami mi no galwasi hayo. ¹³ Farigon nangos hayo manga fangayofan, kaarakitay, is Hisos kagfon intam nombangkad ya aban, koyogan yadi hanya ka manga taw kantohoyan ha hanya, imlag kitay, ham maliyaw hanggan hosto santam Diyos hanggan Ama atobangan gis nanya.

¹ Manga fadwasay, sas katabowanan tingko sorat, mi nafwayong ha hayo hyabi no kana fag manga ogali ka maangay, kaarakitay is Diyos igbaya intam, hanggan mi nadog kitay kitonya nga ngap ka hayo ogali. Kati, kawa hami in Hisos kagfon intam, it nasogo, migfaaronganon ha hayo mahogod kitay, fag bondi kitonyak fiya hayo manga ogali. ² Kawa ham fadi wadtwa kitay ka hyami fwayong ha hayo, in Hisos intam wa Fon togon. ³ In Diyos fakasayaon intam fangayofan fag maliyaw, hanggan tam fag domayo fagayo fag dwat fag kasolongan has ka taw baliwa. ⁴ Ka manga ama fagayo fag gofod maangay it sadili manga babay. It ogali hat babay fag fiya san Diyos faglagan, hanggan sas taw faglagan, ⁵ bohonwa kitay kasaya odi ina, kitos manga Hintil kadwa kilala in Diyos. ⁶ Nyawa fakta fag ama fag idwa ha kasalanan hasta babay baliwa. Fag idwag dayat fadwasay kantiwala sinya, fag idwag fabalaw ista fangayofan. Mi nafwayong ha hayo hyabi yapdi, mi danwa nafatagak hayo marigon kitay, kagfon intam mamadosa ka gibolon kitonya fag dwat. ⁷ Is Diyos nafatawag intam hanya, kaarakitay intam manga ogali fag kabali maliyaw has manga ina has manga ama baliwa, idwa has manga ogali dwat has ka taw. ⁸ Yakanga nyawa faktaw ka kafang igfasakop tonya fag togon, bonwa taw kat fagdayoon, dapat is Diyos kat fagdayoon kagdisag it Maliyaw fag Falad hantam. ⁹ No kitay di nyawa hodwag fatohod hayo no kadi has galwasi intam manga kapariho intiwala baliwa, kawas Diyos kagfaadal hayo no kinday ka maangay tam no gadgalwasiyan. ¹⁰ Kitonya wa ngay ka hayo naogali has manga fadwasay fagayo sas sakop Masidonya sadi wak dahonya. Nyawa kitonya, manga fadwasay, migfaaronganon ha hayo kitay, ham fag kalabi man no galwasi has manga kapariho intiwala. ¹¹ No bali day hayo fagsyaganon, ham fag idwag faagran has taw, fag idwa mamawaton, fag sayak hayo sadili fangaboyagon kito ka hyami fwayong ha hayo hyabi. ¹² Hayo ogali no kitonya, ka mangadyan tiwala gomalang hayo, hanggan ham idwag syag has iba taw hayo fangaboyagon. ¹³ Hyami manga fadwasay, kati bokod wan angko fagfwayongon, mi kasayag fatohoyan ha hayo no kinday orongan ka manga natay, kaarakitay ham idwam rongkot kito ka manga taw kadwa ha fagfanayaon aban. ¹⁴ Tam katiwala kitay is Hisos natay, ginyan boyag ya. Kitonya yadi ka manga danwan tiwala han Hisos ta no natay, is Diyos fatahin yadi han Hisos aban. ¹⁵ Kati hyami faadalon ha hayo, ka mandi kagfon intam, it nafaadal kitay, tam, ka manga boyagan yapdi gis nanya kagfon intam no kabangkad aban, idwa gomona has manga taw ka natay. ¹⁶ Gis nanya aban, ha fasognod marigon, ka fagtahinan anghil homampang yadi, ha omoni in Diyos bodyong, ginya madi kagfon intam mandi ka domokson gin Diyos banwanan sam tongod. Bago bago ka manga danwan tiwala in Kiristo ta no natay, tonyam bangon ya aban, boyagan, ¹⁷ ginya madi ka tam, ka boyagan yapdi gis nanya, tam im-anggong yadi koyogan has taw, ha sayo manga linyabo, kaarakitay tomagbo kagfon intam sam tongod. Ginya madi tam omofod hanya hanggan aban aban. ¹⁸ Yakanga fag fatohod hantam iba tonya fag manga hampang, kaarakitay igfarigon ha sadi ha sadi.

¹ Manga fadwasay, nyawa hodwa manorat ha hayo no ginahin fag masohod to kangko manga naowas nom-anod aban, ² maskin tam fadi wadtwa kitay intam Fon kabangkadan fag Sirang no kadasog, idwa ha fatagak intam, kito yadis fangnahaw basad yabi idwag fatagak. ³ Aban, manga taw noglwang, Ogali wa kati, tam idwa ha fakadalaon, yatokitay gis nanya aban, sadi odi ginan, ka kahoriyan imdasog has taw, kitos ina kadwa twa no ginahin hanya no domog masagit kawa kasagayat anak, hanggan manga taw idwa yadi twag baybay tonya fag kahoriyan. ⁴ Dapat ay, tam, manga fadwasay, tam idwa basad marom, yakanga tonya fag Sirang nomdasog aban, tam idwam hinol kitos fangnahaw nogfahinol intam. ⁵ Maskin tam fagayo sakop mayawa, basad sirang. Tam bonwa sakop marom basad yabi. ⁶ Yakanga tam fag idwa matoyogan kito ka tiba, tam fag mafolawan fagaba, idwa kalango. ⁷ Fagaba yabi taw nogtoyog, fagaba yabi ta no kalango. ⁸ Dapat tam ka sakop sirang. Tam fag gisip fiya fagaba, fag idwa kitos kalango. Tam fag syag in Diyos hanggan galwasi hanya, ginya tam bilang wa ha fanaktak famana hantam dobdob, hanggan kawa tam ha fagfanayaon matohoyanan kitay, is Diyos bomawi intam, ka bilang intam solong sambalilo baol, fanaktak sas alfoyo. ⁹ Is Diyos idwa nafili intam kaarakitay tam domog it kaisogan aban basad fadosaan, dapat hanya nafili intam kaarakitay is Kiristo Hisos kagfon intam bomawi intam. ¹⁰ Is Hisos natay kawa hantam kaarakitay, nyawa tam boyagan yapdi, hanya nombangkad ya, nyawa tam nagona wa natay, tam maofodan yadi hanya aban, boyagan. ¹¹ Yakanga ham fag fadagos igfarigon ha sadi ha sadi hanggan igtarogbongan, kito ka hayo ogali kati. ¹² Manga fadwasay, migfaaronganon ha hayo kitay ham fag galang in Diyos manga fangibolon is nyamo hayo, kito ka maangay. Ham fag galang ha hayo manga fagtahinan kagfaadal hayo has manga ogali ka maangay han Kiristo fag manga taw. ¹³ Ham fag galang hanggan gamigosan yadi ha hanya kawa ta nogfarigon hayo manga fangayofan. Ham fag gamigosan ha sadi ha sadi. ¹⁴ Manga fadwasay, migfaaronganon ha hayo kitay ham fag fwayong has manga mafang kitay, ta fag idwa kafang gibolon. Fag farigon ista manga fangayofan ka manga madalaon. Togbongan ka manga magomo. Ham fag idwag sagot mahori donggon nyawa haday fag taw. ¹⁵ Nyawa faktaw santam fag idwa ganti dwat, taw no nafahoriyan intam. Nyawa ginahin tam fag kasaya gogali ka mahoway has fagayo fag manga taw. ¹⁶ Tam fag kasolong fagaba, ¹⁷ fag fagabag darangin, ¹⁸ hanggan fag baya in Diyos nyawa kana kantam nadalanan. Ka kitonya fag manga ogali kan Diyos fakasayaon santam, kawa tam insadi san Kiristo Hisos. ¹⁹ Fag idwag toplan ka Maliyaw fag Falad ibolon. ²⁰ Tam fag idwag yod ista toltol ta noglwang kitay it toltol gis Falad Maliyaw. ²¹ Solayan fagayo fag manga bagay, fag katanog ka fiya, ²² fag domayo fagayo fag ogali kadwa maangay. ²³ Angko fagdaranginon kitay, fag is Diyos mandi kagdisag kahowayan, ka fabali intam manga fangayofan maliyaw, hanggan omano intam fangayofan, isip hanggan habilogan, kaarakitay tadwa ha fabangdanan intam, is Kiristo Hisos kagfon intam nombangkad ya hastay aban. ²⁴ Kagfatawag intam ha hanya idwa bohagon, yakanga hanyag fatonglos it togon hantam. ²⁵ Manga fadwasay, ham fag darangin yadi kawa ha hyami. ²⁶ Tam fag badbayaan ha sadi ha sadi tam nogladlagan, kawa tam tasayan wan san Kiristo. ²⁷ Hogfaaronganon ha hayo, kawa kagfon intam kagfasognod hyami, ham fag basa to fag sorat has fagayo kantiwala in Kiristo is nyamo hayo. ²⁸ Ham nangos fag domog kitay, is Kiristo Hisos kagfon intam mahoway ha hayo fagaba.