1 PIDRO
11 Ahos Pidro, in Kiristo Hisos Fandiya Barita kagsorat. Hogsorat ha hayo kan Diyos, intam Ama manga nafili, dapat naskat ha sayo manga taw, igbanwanan sas manga sakop Ponto, Galasya, Kapadosya, Asya, hanggan Bitinya. 2 Hanya ka nafili intam kawa danwat kafangayofanan gi yapdis hyabi hyabi, kaarakitay it Maliyaw fag Falad fahaliyaw intam fangayofan. Ginya madi tam imbali matanogon han Kiristo Hisos, hanggan it karigonan folot indisag wa hantam. Ham nangos fag domog kitay is Diyos mahoway wa dahol ha hayo, hanggan igfalokmay fiya fiya hayo manga fangayofan. 3 Tam fag fasayagdog in Kiristo Hisos, kagfon intam, it Ama hanggan it Diyos. Hanyan awa wa dahol intam, yakanga nadisag hantam ka bago fag haboyagan no nafaboyag ya in Kiristo Hisos gis kahatayan, hanggan nafatohoyan intam ka fagsyagon boyagan. 4 Yakanga tam igsyag kitay tam ha tanggapon fiya, kadwa kadwat, kadwam liyam, danwa nafatalaga hantam san Diyos banwanan sam tongod. 5 Maskin tam igsyag in Diyos, it karigonan ka gano intam hanggan bomawi intam gis nanya aban, sas katabowanan, is Diyos nogfalag no kinday it ibolonon nogbawi manga taw. 6 Yakanga tam fag kasolong to fag manga bagay, nyawa kitay sadik ngalay tam igdog manga mahori bokod bokod kagsolay intam. 7 To fag manga mahori kagsolay intam ha kahologan wan, maskin igfalag kitay tam orongan wagsyag in Diyos. Ka ginto kadwat di, nyawa tagfadalan sas afoy kaarakitay bomol ka mangan aktom kadwa fiya. Dapat nomlag kitay tam orongan wagsyag in Diyos, tonya bondi kitos gintok mahalga, maskin ta mamasayagdog intam, domisag yadi kafiyan hanggan kangayanan hantam is Kiristo Hisos nomlag ya aban. 8 Nyawa ham idwa nalag in Hisos hyabi, ham galwasi hanya. Hanggan nyawa tam idwag lag hanya kati, tam igsyag yapdi hanya. Yakanga tam kasolong wa dahol dahol, tam idwa ha fatoladan intam kasolongan kati, 9 maskin tam kabawi wan, kawa tam igsyag han Kiristo Hisos. 10 In Diyos manga fangampang ka nagona wa nafwayong kitay, is Diyos mamalag hantam it malooy fag kahowayan. Ta mahogod wa gisip hyabi, hanggan igsayak no kinday manga taw nombawi aban. 11 Hyabi hyabi in Kiristo Falad sawan Diyos manga fangampang basad fangayofan, hanggan ka manga fangampang naisip fiya fiya no faktaw, hanggan no ginahin it Falad fagwason nogfatohoyan kitay, is Kiristo aban omagwanta mahori, ginya madi manga kafiyan imlag yadi wan. 12 Is Diyos nafatwagdog it manga fangampang hyabi kitay, ka fakinabang fiya fiya git ibolon hawas taw aban, hantam, idwa hat sadili fakinabang. Kati ka manga nadiya ka Fiya fag Barita gis Maliyaw fag Falad, kan Diyos nasogo hantam git banwanan sam tongod, ka nafwayong hantam no kana tonya fag fakinabang. Ka manga anghil gwayan wa kasaya lomag yadi to fag manga bagay. 13 Maskin ngay, tam fag danwa matagahan, fag idwag fasigpala. Intam fagsyagon fag ka lamang ka malooy fag kahowayan kan Kiristo Hisos disagon hantam, hanya nombangkad aban. 14 Tam fag katanog in Diyos. Tam fag idwa katanog intam bali fangayofan masayaon kito kantam ogali hyabi, tam nodya nadog ka Fiya fag Barita. 15 Yatokitay, kawas Diyos maliyaw ka nafili intam, intam fangayofan fag maliyaw yadi, sadi wak dahonya. 16 Fag tohod kitay, in Diyos sorat iglwang, Maskin aho maliyaw, ham fag maliyaw yadi. 17 Tam igngayan in Diyos intam Ama, tam nogdarangin hanya. Dapat ay, is Diyos idwa ha fagihidon taw, igfaparidrihowan di nogsolay intam manga ogali. Yakanga, tam no baliday boyagan yapdistay sas baba daga, tam fag katanog hanya. 18 Maskin tam twa kitay, bohonwa manga bagay ka kadwat, kitos manga pilak, manga ginto, ka nafalfas intam gintam manga ogali kadwa ha kahologan, kantam natanggap gintam manga hafofowan, 19 dapat ay, is Kiristo no natay, intam fangafiyan, kitos sadik anak topa kafiyaon, idwa ha dwat, it folot ka mahalga wa dahol ka nafalfas intam. 20 Is Diyos nodyapdi nahalig daga, danwa nafatalaga in Hisos hanya baliwa. Ginya madi kati, sas ginanan fag manga sirang, is Diyos nafalag hanya kaarakitay hantam. 21 Kawa gin Hisos tam igsyag han Diyos ka nafaboyag hanya gis kahatayan hanggan nadisag hanya kangayanan abwat man has fagayo. Yakanga gin Hisos tam intiwala hanggan igsyag han Diyos. 22 Kati intam manga fangayofan inlinay wan kawa tam katanog ka fakaoronganan, hanggan tam gadgalwasiyan orongan. Tam fag mahogod no gadgalwasiyan, bonwa yadi famalagon odi. 23 Tam insagaya ya domwag. Kati intam Ama bago is Diyos kadwa katay, bonwa kantam ama taw ka katay. In Diyos hampang boyagan, kadwa kaliyam, ka nafabali intam in Diyos wa manga anak. 24 Kito kansorat sas Kasoratan kitay, Fagayo fag manga taw kitos lamnon, It manga kafiyan fagayo kito odis borak lamnon. Ka lamnon kalayong, it manga borak kafangta di. 25 Dapat ay, intam Fon hampang igdogayan hanggan aban aban. To fag hampang ka manga Fandiya Barita nagfwayongan hantam.
21 Yakanga kati tam fag dayo fagayo ka manga dwat fag ogali, kitos mangag balibad, mangag falagon odi ogali fiya, manga kaid-ingliyan, mangag fadaddwatan igdog. 2 Fag kitos anak dararag no kasamok it soso, tam no kasamok in Diyos hampang, kagfarigon intam fangayofan bago, kaarakitay tam karigon nomtiwala, hanggan tam imbawi wan. 3 Maskin kito kansorat san Diyos Kasoratan, Tam fadi wadnadog kitay kagfon intam mahoway wa dahol dahol. 4 Yakanga tam fag gakbang hantam Fon ka bilang bato boyagan, kasta nadayo, dapat kan Diyos nafili, mahalga yadi sa hanya. 5 Tam fag gakbang hanya kawa tam bilang yadi manga bato boyagan. Fag is Diyos kagfatarongbawan intam sat fakaligon Fanimbaan-Dahol gis manga fangayofan bago. Sinya tam imbali sadik layonan maliyaw fag manga fagalan kagdisag han Diyos, gin Kiristo Hisos, it manga fagbayaon gis manga fangayofan bago. 6 Maskin ka Kasoratan iglwang, Fanlag ngay, hogfatobo sas Siyon, Sadik bato, angko nafili hanggan mahalga, Infwalid sas basad solok igfarigon ka tiba. Nyawa faktaw kagsyag hanya, idwam balaw, nyawa ginahin. 7 Yakanga tonya fag bato mahalga wa dahol hantam kagsyag hanya. Dapat no kadi has mangadwag syag, im-anod wa kito ka sas Kasoratan, Ka kalig balay fagdayoon fag bato, Tonya di ngap kanbali igfarigon ka tiba. 8 Hanggan Manga taw katahid odi sinya fag bato, Ta makfo yadi sas bato famarigon. Tantahid wan maskin tadwa katanog in Diyos hampang, ginya tonya kan Diyos nafatohoyan hanya fag manga taw. 9 Dapat tam kan Diyos nafili fag hasokfonan, manga fagalan hantam hari, sadik maliyaw fag layonan, in Diyos sadili fag manga taw, kagfalag has taw in Diyos manga naibolon kafiyaon, no nafatawag intam gis basad marom, hawat kafiyaon fag kayawaan. 10 Hyabi hyabi tam bohonwan Diyos layonan fag manga taw, dapat kati tam inbalit nafili fag layonan. Hyabi tam idya nadog kitay is Diyos maawaon, dapat kati tam nadog kitay tam it fakaawaon wan. 11 Angko manga fakilalaon, kawa tam bilang manga famaklay kagsabang odistay is baba daga, hogfaaronganon kitay, tam fag idwa goyon ka bali fangayofan masayaon gistay is baba daga, kawag laban has fangayofan bago. 12 Intam manga ogali fag fiya sas faglagan manga taw kadwam tiwala. Nyawa tagbangdan intam kati, ta noglag kitay intam ogali fiya, mangharaw, ta mamasayagdog han Diyos aban, gis nanya fag sirang hanya nombangkad. 13 Maskin tam galwasi kagfon intam, tam fag fasakop has fagayo ka ha kangayanan sas baba daga, hanggan has gorangon sas Roma ka nasakop fagayo fagayo fag banwanan. 14 Tam fag fasakop yadi hat manga nahalig gobirnador, kat nasogo hantam, kaarakitay igfadosa has manga gibolon dwat, hanggan igfasayagdog ka manga gibolon fiya. 15 Maskin in Diyos fakasayaon fag kantam fiya fag ogali kagfatwag lag has taw kitay, bohag odi ista fwayong kadwa ha fakatwawon nogfalamang kampang. 16 Tam fag gogali kitos mafalfasan gis Batasan, dapat kawa no mafalfasan, tam fag idwa gayfan kitay, fiya di no gibolon dwat. Yatokitay, intam manga ogali fag kito kan Diyos manga sogowan fag ogali. 17 Tam fag magalang has fagayo fag manga taw, fag galwasi yadintam manga fadwasay san Kiristo. Fag katanog in Diyos, hanggan tam fag magalang has gorangon sas Roma. 18 Ham, ista manga nasali sogowan, fag magalang, fag fasolon yadi ha hayo manga fagoliyanan, nyawa mahoway, nyawa maisog. 19 Maskin is Diyos igbaya wan tam nogtohod kitay, hanya gofod intam, yakanga tam gagwanta ta nogfadosa intam nyawa tam idwa ha kasalanan. 20 Tagfasayagdog awkin ka ha kasalanan no gagwanta di ta nogbakbak hanya, ham gayfan? Idwan. Dapat tam no gagwanta yapdi ta nogfahoriyan intam, kawa tam gibolon has fiya, is Diyos igbaya wan. 21 Maskin tam in Diyos nafili, intam tanggapon it baliw, fag gagwanta nyawa basad mahori. Is Kiristo naagwanta basad mahori kawa hantam, yakanga tam fag tolad yadi hanya. 22 Is Kiristo idwa ha ogali dwat, idwa yadi nabalibad nyawa ginahin. 23 Nyawa ta nayod hanya, is Kiristo idwa naganti ngadi sas hampang. Nyawa tagfahoriyan hanya, hanyadwa nafadalagdog is taw. Is Kiristo nasyag odi han Diyos ka maslong nogfatohoyan ista fadosaan. 24 Is Kiristo natay sas nafatimbangan hayo, nadiya wantam manga ogali dwat fagayo sat habilogan, kaarakitay intam fangayofan matay has ogali dwat baliwa, dapat imboyag has ogali fiya. In Kiristo manga baran ka nafafiya intam. 25 Maskin hyabi tam lamang lamang odi, bilang manga topa matalangan. Dapat ay kati, tam infwali ya has gano topa hanggan hasag bahala intam.
31 Kitonya yadi ham, manga ina, fag fasakop ha hayo manga sadili indogan. Hayo indogan tiba nodyan tiwala in Diyos hampang, fag hayo fiya fag ogali ka fatiwala has taw. 2 Ta fag lomag kitay hayo ogali maangay hanggan ham magalang wan. Yakanga nyawa ham idwag toltol aywan. 3 Fag bonwa manga dayag malagan kagfalag hayo kafiyan, kitos madolaw fag nasorod bok, manga ono ayo ayo, ngatay manga rotay araw araw igtobos. 4 Hayo kafiyan fag imlag sas magop hanggan mahoway fag ogali kamlag gi hayo fangayofan. Ka fangayofan kitonya balaw kadaanon hanggan mahalga wa dahol san Diyos faglagan. 5 Hyabi hyabi, ka manga ina kantiwala hanggan nasyag in Diyos, kitonyat manga dayag. Ta nafasakop hat manga sadili indogan. 6 Halimbawa, is Sara intanog in Abraham, nangayan yadi hanya it fagtahinan. Ham imaktom yadin Sara manga hasokfonan ina, hayo ibolon no fiya, hanggan ham nodwa ha fakahawagon nyawa kana. 7 Tam yadi manga ama, tam fag gano yadi intam manga babay fiya fiya, maskin tam twagdog kitay ka ina idwa kitos ama ik marigon. Tam fag magalang yadi hantam manga babay, maskin tam talsawa myasa wa kitonya nogtanggap in Diyos disag hantam haboyagan. Tam no gofodan fiya kitonya, idwa hagtaktak intam darangin. 8 Angko togon ka goyan goyan kitay, tam fag kasadi. Tam fag myasa wa mahoway no gofodan. Tam fag gadgalwasiyan ha sadi ha sadi, kitos tasayan. Tam fag maawaon hanggan igfasolon di istaw. 9 Nyawa ta naibolon dwat hantam, tam fag idwa ganti dwat. Nyawa tagyod intam, tam fag idwag faganti hampang has taw kitonya. Yatokitay, tam ngap fag darangin kitay tonya fag taw fag lomag it fagbayaon, kawas Diyos nafili intam kaarakitay tam tomanggap yadi manga fagbayaon. 10 Kito kansorat, Ka kasaya fagaba boyagan hanggan kasolong, Fag idwag salan kampang has iba taw, fag idwa yadig balibad. 11 Fag dayo ka manga ogali dwat, Fag katanog ka fiya. Fag sadi wak fangayofan igfayayom hanya has kahowayan. 12 Maskin kagfon intam igbantay fagaba ka gogali maslong, Igtalinga yadi ta nogdarangin, Dapat hanya magoyoyan has manga taw ka gogali dwat. 13 Fakta kagfahoriyan intam, ham gayfan, nontam ogali sonson wa fiya? Idwa akwa nangos. 14 Dapat ay, nyawa kitay halimbawa, tagfahoriyan intam maskin tam gibolon fiya, tam ha fagbayaon yapdi. Nyawa tagfadalagdog intam, tam fag idwa kadala. Fag idwa yadi galibitan intam fangayofan. 15 Dapat tam fag magalang wa dahol han Kiristo santam basad fangayofan, kawa hanya kagfon intam. Nyawa faktaw ka omintaw intam kawa hantam fagsyagon, no kanat kahologan, tam fag matalagaan intam sagot, nyawa ginahin. 16 Dapat tam nogsagot fag mahoway mahoway, magalang yadi has taw. Tam fag idwa ha fakahawagon kantam naogali dwat, kaarakitay kagyod hanggan igfadwat igdog intam maya wan, ta noglag intam ogali fiya, kawa tam insadi san Kiristo. 17 Fiya man ta nogfahoriyan intam, non Diyos wa fasadan kitonya, maskin intam ogali fiya, has igfadosa intam kawa tam naibolon dwat. 18 Kawas Kiristo natay sadi di ginan, kawa hantam manga ogali dwat, ya hosto wan. Ka maslong it ogali natay kaarakitay has manga taw ka ha manga ogali dwat, kaarakitay tomaban intam han Diyos. Manga taw nafahatay in Hisos habilogan taw, dapat is Diyos nafaboyag ya hanya, ha habilogan maangay sas Maliyaw fag Falad. 19 No ha habilogan bago, is Hisos nadokson has manga falad maporisowan hanggan nafaadal sinya. 20 Tonyasta manga falad ka dayo katiwala han Diyos hyabi, is Diyos no dogay wagfanaya, sa yapdin Nowi fag kasohodan, is Nowi no kalig yapdi baloto. Sayok fag manga taw kanbawi gis gonaw danom dagat sinyas basad baloto, walo odi. 21 Ka danom igfahalimbawa no kinday kati tam nontogna. Tam nontogna basad danom, bohonwa kitay tam igbol owing habilogan, tam igfatohoyan intam sadili han Diyos, idwa ha fakahawagon kantam naogali dwat. Tam nontogna kitonya, tam inbawi wan kawas Kiristo Hisos inboyag ya. 22 Ginya madi hanya nasakbaw han Diyos banwanan sam tongod. Kati sawan Diyos balis sihon. Ka manga anghil, hanggan ka manga ha kangayanan hanggan ka ha karigonan nafasakop ha hanya.
41 Kawa tam iglag kitay is Kiristo naagwanta mahori sat habilogan, tam fag handa wa omagwanta yadi, maskin ka naagwanta mahori sat habilogan, idwa kasaya ogali dwat. 2 No kitonya, tam nostay yapdis baba daga, tam omogali in Diyos fakasayaon, bohonwa kantam bali fangayofan masayaon fag ogali. 3 Maskin dogay wa hyabi tam no naogali kantam kaidagdogan kitos manga idya kilala in Diyos. Fiya wa kati. Intam manga ogali hyabi idagdog odi, kitos manga igfahayan, goyon ka bali fangayofan masayaon, mangag lango, iglabi wa kasolongan, mahabanan ginom, goyonan has dwat, hanggan kagsagaya wa ogali noglohod has manga bohonwa orongan diyos. 4 Kati ta kadolaw wantam, no kana mayon tam nodwa kaaktom has taw ta no gogali yapdi kitonya, idwag dahan, yakanga tagfadwat igdog intam. 5 Dapat ta bahala wagsagot han Diyos aban, ka talaga wa fatohoyan it fadosaan has manga boyagan yapdi, hanggan has manga natay. 6 Maskin kitonya, ka Fiya fag Barita inbarita yadi wan has manga natay, kaarakitay tamboyag yadi san Diyos akbang aban, nyawa ka kahatayan natahod it manga habilogan, kito kantohoyan has fagayo fag manga taw. 7 Ka katabowanan fagayo fag manga bagay kaakbang wan. Yakanga tam fag matagahan, fag idwag falabi intam sadili fakasayaon, kaarakitay tam syagan igdarangin fiya fiya. 8 Ka labi man has fagayo, tam fag gadgalwasiyan fiya fiya, maskin tam no gadgalwasiyan, idwa mahori igfaliyam fagaba manga ogali dwat ha sadi ha sadi. 9 Tam fag idwa kafang igfasakbaw intam manga fadwasay hantam manga balay. 10 Tam fagayo ha natanggap fagsyaganon bokod bokod gin Diyos. Tam faanodan wa tonya, kaarakitay fagayo ha fakinabang maskin tam igfatonglos fiya fiya kan Diyos nafaano hantam fagsyaganon ha sadi ha sadi. 11 Tam awkin ka manga fanoltol? Fag in Diyos hampang kantam fagtoltolon has taw. Tam awkin ka mangag togbong is taw? Tam fag syag in Diyos disag karigonan. Nyawa kana fag bagay fag in Diyos kafiyan kamlag gin Kiristo Hisos. Sawa hanya ka kafiyan hanggan karigonan hanggan aban aban. Fag kitonya wa ngay. 12 Angko manga fakilalaon, tam fag idwa kadolaw ka manga mahori kagsolay intam. Tam fag idwa gayfan kantam bohondi kito ka tiba ista kahoriyan. 13 Yatokitay, tam fag masolong maskin tam igdog yadin Kiristo kahoriyan it baliw, ginya tam kasolong wa dahol dahol is Kiristo nombangkad ya, it kafiyan malagan sa hanya. 14 Ta nogfasidyowan intam maskin tam galwasi in Kiristo, tam fag kasolong wan. It kahologan in Diyos Falad kafiyaon kasadi santam. 15 Nyawa tam igdog mahori, fag bohonwa kitay tam ha nafahatay taw, ngatay tam ignahaw, ngatay ha kasalanan, ngatay tam mamawaton is taw. 16 Dapat ay, tam fag idwa kaya tam nogdog mahori kawa tam in-ngayan in Kiristo sakop fag manga taw. Yatokitay, tam fag fasalamat han Diyos maskin tam in-ngayan in Kiristo wa sakop. 17 Kati wa fag masohod is Diyos fabago nogfatohoyan is taw it hadasogan, hanggan bago bago kayapdin Diyos manga nafili, ginya has iba taw. No giwantam nogfabago, kinda ara to it katabowanan no has manga idwa katanog in Diyos Fiya fag Barita, ham gayfan? 18 Kito kansorat sas Kasoratan, Ka manga maslong no ganong wansakop basad fadosaan, Kinda araw ka mangadwan tiwala han Diyos, ka manga ha ogali dwat, ham gayfan? 19 Yakanga ka manga gagwanta basad mahori kawan Diyos fasadan kitonya, fag gogali yapdi fiya, hanggan fag faano intam sadili ha hanya ka nahalig intam, hanya ka fiya fag fagsyagon.
51 Kati ka mandi has manga fagtahinan kagbahala ha hayo kangko fagfwayongon. Aho sadik fagtahinan kito yadi hayo. Hyabi ho nalag in Kiristo kahoriyan, hanggan ahog syag yadi kitay, aho ha kahorayan in Kiristo kafiyan, tonya nomlag aban. 2 Hogfaaronganon hantam kitay, tam anowan kan Diyos nafaano intam it Tifonan taw, bilang tifonan topa. Fag igbaya wa gano in Diyos Tifonan kiton Diyos fakasayaon, bohonwa kitay napilitan odi. Bohonwa yadi kitay tam kasaya intam odi sadili fakinabang, kitos kwarta, dapat kawa tam kasaya wagtogbong. 3 Tam fag idwag fabali kitay tam bilang wasta dahol hantam sakop, dapat ka odi kitay tam intam Tifonan fagtoladon. 4 Intam fagtahinan fag fangano topa nombangkad aban, tam tomanggap ka kafiyaon fag sangbaw ka masinay fagaba. 5 Ham ka manga bago, ham fag fasakop has manga fagtahinan. Tam fagayo fagayo fag fasolon intam fangayofan, tam nogtogbong ha sadi ha sadi, kito kansorat, Is Diyos iglaban ka manga ha takan, dapat igdisag it malooy fag kahowayan has mangag fasolon it fangayofan. 6 Yakanga, tam fag fadaga baliwa intam fangayofan han Diyos, ka marigon. Ginya madis Diyos kagfaabwat intam no ginahin fag masohod ka fiya. 7 Tam fag fadiya han Diyos intam manga fagalibiton fagayo maskin hanya gano intam. 8 Tam fag matagahan, fag bantay ka manga fangwan fagaba, maskin is Fandaya intam kalaban, igngwa kitos liyon, igtorang mayan mayan, igdama odig ligaw it iktanon taw. 9 Tam fag marigon igsyag han Diyos. Labanan yadin Fandaya maskin tam twa kitay bohondi tam ka gagwanta basad mahori kito, hanggan yadintam manga fadwasay sadik baba daga igdog yadi mahori kitonya. 10 Tam nontabo wagdog mahori sadik ngalay istay is baba daga, is Diyos kagfon fagayo fag kafiyan, kagtaban yadintam, kawa tam insadi san Kiristo, kaarakitay omafo yadit kayawaan, kadwam liyam. Hanya fabali intam maganit, marigon hanggan falindog intam sas fagrigonan kadwa kahawig. 11 Sawan Diyos ka karigonan hanggan aban aban. Fag kitonya wa ngay. 12 Is Silbano ka natogbong angko igsorat ha hayo to fag sorat sayok. Hanyantam fadwasay matanogon. Ho twa kitay hanya mamarigon hayo manga fangayofan hanggan faorongan kitay, to fagayo kangko nasorat, in Diyos malooy fag kahowayan orongan. Yakanga tam fag kaganit sinya. 13 In Diyos Tifonan sas Babilonya, kan Diyos nafili kito yadintam, gwas hayo. Hanggan is Markos, angko nafatiwala, bilang angko anak, gwas yadi hayo. 14 Kawa tam igdowasayan san Kiristo, tam fag igbadbayaan tam nogladlagan. Ham fagayo kansadi san Kiristo fag nangos domog kitay hanya kagfalokmay hayo manga fangayofan.