1 HWAN

¹ Ka hyami fagsoraton ha hayo kawa hanya ka danwa ha akwa, gi yapdis fabagowanan, ka Hampang kagdisag haboyagan. Mi nadog hanya, hyami mata nalag yadi, mi nabantay hanya, hanggan hyami gamat nasapkid yadi hanya. ² Tonya fag haboyagan indasog hastay a, hyami wa mata lagan. Yakanga migfaorongan ha hayo. Migfwayong ha hayo kitay, tonya wa fag haboyagan kadwa ha katabowanan, gi yapdis hyabi danwa sat Ama, ginya nafalag yadi ha hyami. ³ Migfwayong ha hayo hyami lagan hanggan wa hyami donggon kaarakitay ham gamigosan ha hyami. Ginya ham im-aktom kito yadi hyami kansadi sa hanya, gamigosan hantam Ama hanggan hat Anak is Kiristo Hisos. ⁴ Migsorat ha hayo kito, kaarakitay intam kasolongan idwa ha korang. ⁵ Ka hyami donggon barita git Anak migfadog yadi ha hayo kitay, is Diyos ka yawa, idwa yadi ha marom sa hanya ngadi ogbot. ⁶ Tam noglwang kitay tam kasadi gamigosan han Diyos, dapat tam gogali yapdi ka manga ogali gis sakop marom, tam igbalibad odi, idwa gogali ka fakaoronganan. ⁷ Dapat ay, tam no gogali ka sakop yawa fag ogali, no kinday is Diyos sas yawa yadi, tam kasadi gamigosan ha sadi ha sadi, hanggan in Hisos, in Diyos Anak folot, igfalinay intam manga ogali dwat fagayo gintam basad fangayofan. ⁸ Tam noglwang kitay tam idwa ha ogali dwat, tam igdaya odi intam sadili, hanggan idwa ha akwa santam ka fakaoronganan. ⁹ Dapat, tam nogbaya han Diyos intam manga naogali dwat, hanyag faliyam tonya gintam, hanggan igfalinay gintam fangayofan fagayo fag kadwatan, maskin is Diyos maslong hanggan igfaanod it fwayong. ¹⁰ Tam noglwang tam idwa ha naogali dwat, tam bilang nafabali kitay, is Diyos bohagon, hanggan it hampang idwa santam.

¹ Angko manga anak, hogsorat ha hayo kaarakitay ham idwa omogali dwat. Dapat ay, nyawa faktaw, no gibolon dwat, tam ha fagalan hantam Ama, kawas Kiristo Hisos ka maslong. ² Is Kiristo intam fangafiyan han Diyos kaarakitay igfaliyam intam manga naogali dwat, hanggan bohondi kitay hantam naogali dwat, hayadi was fagayo fag manga taw sadik baba daga. ³ Ginya madi tam twa matohoyanan kitay tam kilala hanya tam no katanog it manga togon hantam. ⁴ Bohagon odi kaglwang kitay hanya kilala yadin Diyos, dapat idwa katanog it manga togon. Ka fakaoronganan idwa sa hanya. ⁵ Tam nomtanog ngat manga togon, tam orongan wa hosto no galwasi han Diyos hanggan tam twa kitay tam insadi hanya. ⁶ Nyawa faktaw kaglwang kitay hanya kasadi fagaba san Diyos, it ogali fag kito yadi kan Kiristo Hisos ogali. ⁷ Angko manga fakilalaon, bohonwa sadik togon bago kangko fagsoraton ha hayo. Ho golit ka mandi dan hayo donggon fag togon ham no bagon tiwala. Ka mandi hayo fag donggon hyabi fag barita. ⁸ Nonman bilang sadik togon yadi bago kangko fagsoraton ha hayo, kawa tonya fag togon inorongan san Kiristo ogali, hanggan inlag yadi sa hayo manga ogali, kawa ka yawa orongan igyawa, hanggan ka marom iglagyo yadi wan. ⁹ Kaglwang kitay hanya sas basad mayawa, dapat kadwat iglag it fadwasay, tonya sa yapdis basad marom. ¹⁰ Ka galwasit fadwasay, sawas basad mayawa, idwa hagfatahid hanya has ogali dwat. ¹¹ Dapat ay, ka kadwat iglag it fadwasay, sa yapdis basad marom a, bilang waglahaw basad marom, idwa natwa it hadasogan maskin ka marom igfabota wa hanya. ¹² Hogsorat ha hayo, manga anak, Kawa hayo manga naogali dwat inliyam wan maskin ham galwasi in Hisos. ¹³ Hogsorat ha hayo manga bokngan ama, Maskin ham kilala wa hanya ka danwa ha akwa gi yapdis fabagowanan. Hogsorat ha hayo manga ama bago, Maskin ham nadaog in Fandaya. ¹⁴ Ho nasorat ha hayo, manga anak, Maskin ham kilala intam Ama. Ho nasorat ha hayo, manga bokngan ama, Maskin ham kilala wa hanya ka danwa ha akwa gis fabagowanan. Ho nasorat ha hayo, manga bago ama, Maskin hayo manga fangayofan marigon, In Diyos hampang fagaba sa hayo basad fangayofan Hanggan ham nadaog in Fandaya. ¹⁵ Tam fag idwa galwasi ka manga ogali hanggan ka manga bagay ka gi odistay is baba daga. Ka galwasi ka manga bagay gi odistay is baba daga, idwa galwasi intam Ama. ¹⁶ Maskin fagayo fag manga ogali istay is baba daga kitos mangag fasakop has bali fangayofan masayaon, ka maingliyon, hanggan ka ha takan kawa maakwa, tonya fag manga ogali idwa gintam Ama, nodwa kitay gi odistay is baba daga. ¹⁷ Kastay is baba daga fag manga ogali hanggan wat manga fakasayaon fagayo, mamin di aban, dapat ka katanog in Diyos fasadan idwam liyam hanggan aban aban. ¹⁸ Angko manga anak, kati wa fag masohod kaakbang wan ka katabowanan. Ham nadog kitay ha madaya fag Kiristo imbangkad aban. Ka orongan, aywan fag manga madaya fag Kiristo inbangkad wan. Yakanga tam twa wa kitay kaakbang wa ngay ka katabowanan fag kasohodan. ¹⁹ Nyawa to fag manga madaya fag Kiristo danwantam manga ofod hyabi, tadwa orongan insadi santam. No orongan insadi santam, ya nangos fagaba gofod yapdintam. Ta naobon wantam tifonan kaarakitay imlag matohoyanan kitay, ta fagayo idwa orongan insadi santam. ²⁰ Dapat ay, ham ka natanggap ka Maliyaw fag Falad, yakanga ham fagayo twagdog. ²¹ Yakanga hogsorat ha hayo, bohonwa kitay ka ham idwa natwa ka fakaoronganan, dapat kawa ham natwa wan hanggan ham twa kitay ka fakaoronganan idwag bohag. ²² Fakta ka bohagon, ham gayfan? Ka bohagon ka mangag tangkod kitay is Hisos bohonwa ka Kiristo. To wan ka madaya fag Kiristo, ka kafang homilala in Diyos intam Ama hanggan it Anak. ²³ Ka kafang homilala it Anak, it Ama idwa yadi sa hanya. Dapat ay, nyawa faktaw kagbaya in Diyos Anak, it Ama sa yadi wa hanya. ²⁴ Ham fag fagaba matohodan sa hayo manga fangayofan ka hayo donggon gis bago katiwala ginan. Tam no matohodan ngay santam manga fangayofan kantam donggon gi yapdis bago bago, tam fagaba kasadi han Diyos Anak hanggan hat Ama. ²⁵ Hanggan in Kiristo natogon bato disagon hantam, kawa ka haboyagan idwa ha katabowanan. ²⁶ Maskin hogsorat ha hayo kati, ha akwa kasayag fatalang hayo. ²⁷ Dapat ay, sawa hayo in Kiristo disag, ka Maliyaw fag Falad, nyawadwa ha iba taw igfaadal hayo, ka Maliyaw fag Falad kagfwayong ha hayo fagayo fag bagay, hanggan it fwayong orongan wan, idwag bohag. Yakanga tam fag fagaba kasadi has Falad Maliyaw kito kat fwayong hantam. ²⁸ Maskin ngay, angko manga anak, tam fag fagaba kasadi san Kiristo, kaarakitay hanya nombangkad ya, tam idwa ha fagadowanon, yakanga tam idwa kaya homablang hanya. ²⁹ Tam twa wa kitay is Kiristo maslong, yakanga tam homilala ka mangan bali it manga anak, tam noglag ista ogali sonson yadi wa maslong.

¹ Yabay, kafiyaon kafiyaon intam Ama no galwasi intam, kawag ngayan intam in Diyos wa manga anak. Tam it manga anak wa ngay. Ka manga taga istay is baba daga fag manga taw idwa kilala in Diyos, yakanga idwa yadi kilala intam, it manga anak. ² Angko manga fakilalaon, is Diyos nafabali intam it manga wa anak kati, dapat tam idya twa no kinday tam aban. Nyawa kitonya, tam twa wa kitay, no ginahin aban is Kiristo nomlag ya, tam imbali kito yadi hanya, maskin tam lomag hanya fiya fiya. ³ Fagayo fag manga taw kagsyag kitonya, igfahaliyaw it fangayofan kito yadin Kiristo fangayofan ka maliyaw wa malayon. ⁴ Fagayo ka gogali dwat iglaban yadi han Diyos manga togon. Kawa kaglaban han Diyos manga togon, tonya wa ka gogali dwat. ⁵ Dapat tam twa kitay is Kiristo inbangkad hastay kaarakitay bomol manga ogali dwat fagayo. Idwa ha bali fangayofan dwat sa hanya. ⁶ Ka fagaba wa kasadi sa hanya, idwag fadagos gogali dwat. Nyawa fakta kagfadagos gogali dwat, idya nalag in Kiristo hanggan idya kilala hanya. ⁷ Angko manga anak, tam fag idwa gadayaan nyawa faktaw. Nyawa faktaw it manga ogali no maslong, maslong it fangayofan kito yadin Kiristo fangayofan. ⁸ Kagfadagos gogali dwat, in Fandaya sakop, maskin gi yapdis fabagowanan, is Fandaya danwa gogali dwat. Ginya madi yabay, in Diyos Anak inbangkad wa hastay kaarakitay igfadwat in Fandaya manga ibolon. ⁹ In Diyos manga anak idwag fadagos gogali dwat maskin in Diyos fangayofan sawa hanya. Hanyadwa syagan igfadagos has ogali dwat maskin hanya in Diyos wa anak. ¹⁰ To kagfatohoyan kitay no fakta fag manga taw in Diyos manga anak hanggan no fakta fag manga taw in Fandaya manga anak. Nyawa faktaw kadwag fadagos gogali maslong, hanggan idwa galwasit fadwasay, bohonwan Diyos anak. ¹¹ To kantam donggon togon gis fabagowanan yapdi kitay, tam fag gadgalwasiyan. ¹² Tam fag idwa kiton Kain. Tonyan Kadwatan anak hanggan nafahatay it fadwasay. Kana mayon no nafahatay hanya, ham gayfan? Maskin in Kain manga ibolon dwat, dapat it fadwasay manga ibolon maslong. ¹³ Maskin ngay, manga fadwasay, tam fag idwa kadolaw kastay is baba daga fag manga taw no kadwat iglag intam. ¹⁴ Tam twa wa kitay tam nalin wan gis sakop kahatayan hawas sakop haboyagan, maskin tam galwasi intam manga fadwasay. Kadwa galwasi it fadwasay sa yapdis sakop kahatayan. ¹⁵ Ka kadwat iglag it fadwasay, it fangayofan pariho has igfahatay taw. Tam fadi wadtwa kagfahatay taw idwa ha akwa haboyagan kadwa ha katabowanan. ¹⁶ Kawas Kiristo nadisag it haboyagan kawa hantam kafiyan kagfalag hantam no kanat kahologan no galwasi orongan. Tam fag kitonya yadi, igdisag intam haboyagan kawa hantam manga fadwasay. ¹⁷ Nyawa faktaw ka ha akwa ogbot, dapat natwa kitay it fadwasay ha kakorangan, ginyadwa kaawa hanya, kinday tonya fag taw, ham gayfan? Hanyadwa twag lwang kitay hanya galwasi fagaba in Diyos. ¹⁸ Angko manga anak, fag bohondi intam bibig fwayong kitay tam galwasi manga taw, fag hanggan wantam ibolon kagfatohoyan kitay tam orongan wa galwasi manga taw. ¹⁹ Tam no gogali kitonya, tam tomwa fiya fiya kitay tam sas sakop fakaoronganan, hanggan no san Diyos atobangan, tam idwa ha fakahawagon, ²⁰ nyawa intam sadili fangayofan nogsogat intam nomtoon, tam fag tohod kitay is Diyos madonong man intam fangayofan, kawas Diyos twa wa fagayo fag manga bagay. ²¹ Angko manga fakilalaon, intam manga fangayofan nodwag sogat intam, tam idwa gadowan omakbang han Diyos, ²² hanggan tomanggap nyawa kanantam sagadon maskin tam katanog it manga togon hanggan intam manga ogali maangay san Diyos faglagan. ²³ In Diyos togon hantam kitay tam fag syag hat Anak, kawas Kiristo Hisos, hanggan fag gadgalwasiyan, kito kat fwayong. ²⁴ Ka katanog fagaba in Diyos manga togon fagaba wa kasadi san Diyos, hanggan is Diyos kasadi sa hanya. In Diyos disag hantam it Falad kagfatohoyan hantam kitay is Diyos kasadi santam.

¹ Angko manga fakilalaon, tam fag idwa katiwala madali fagayo kaglwang kitay ka Maliyaw fag Falad sa hanya. Ka fiya, solayan yap kaarakitay tomwa ngatay gin Diyos ka falad sas taw. Maskin aywan ka manga bohagon fag fangampang kagbarita sas baba daga. ² Nyawa fakta fag taw kagfaanod kitay is Hisos ka Kiristo hanggan kawa hanyan bali taw, ka Falad sa hanya orongan gin Diyos. ³ Dapat kadwag faanod kitonya, kawa han Hisos, ka falad sas taw idwa gin Diyos. Ka madaya fag Kiristo fag falad ka sa hanya. Ham dan wa nadog ka madaya fag Kiristo falad imbangkad aban. It falad istay sas baba daga kati. ⁴ Manga anak, tam kasadi han Diyos. Tam nadaog ka manga bohagon fag manga fangampang, maskin is Diyos ka santam marigon man has madaya fag Kiristo ka sas manga taw ka kasadi istay is baba daga fag falad. ⁵ Ka manga bohagon fag manga fangampang kasadi istay is baba daga, yakanga ka lamang istay is baba daga fag manga bagay it fagfwayongon, hanggan ka taga istay is baba daga fag manga taw igtalinga. ⁶ Dapat tam kasadi san Diyos. Nyawa faktaw no kilala in Diyos, igtalinga intam. Dapat nyawa faktaw kadwa kasadi san Diyos, idwag talinga intam. Kitonya tam no tomwa waglag ngatay ka Falad fakaoronganan sawasta basad fangayofan, ngatay ka falad bohagon. ⁷ Angko manga fakilalaon, tam fag gadgalwasiyan maskin gin Diyos ka ogali galwasi has manga taw. Fagayo ka galwasi manga taw, in Diyos wa manga anak, kilala yadin Diyos. ⁸ Kadwa galwasi manga taw idwa kilala in Diyos, maskin in Diyos ogali fagaba wa galwasi manga taw. ⁹ Kalag wa kitay is Diyos galwasi intam kawa nasogot Anak sadi sadi hastay has baba daga, kaarakitay tam imboyag gi hanya. ¹⁰ To it kahologan no orongan wa galwasi, bohonwa kitay tam galwasi han Diyos, dapat ay, is Diyos ka galwasi intam hanggan wa nasogot anak kaarakitay imbali intam fangafiyan, kagfaliyam intam manga naogali dwat. ¹¹ Angko manga fakilalaon, kawa kafiyaon is Diyos no galwasi intam, tam fag gadgalwasiyan. ¹² Nyawa ginahin idwa ha taw nalag in Diyos, dapat, tam no gadgalwasiyan, is Diyos kasadi santam, hanggan it ogali ka galwasi manga taw inhosto santam. ¹³ Tam talastas kitay tam kasadi san Diyos, hanggan hanya kasadi santam maskin hanya nadisag hantam it Falad. ¹⁴ Hyami wa mata lagan kitay intam Ama nasogot Anak kaarakitay mamawi manga taw sadik baba daga, yakanga migfaorongan tonya has taw. ¹⁵ Kagfaanod kitay is Hisos in Diyos wa Anak, fagaba kasadi san Diyos hanggan is Diyos fagaba kasadi sa hanya. ¹⁶ Tam igdog hanggan katiwala kitay is Diyos galwasi intam. In Diyos ogali fagaba wa galwasi manga taw. Kagfadagos galwasi iba taw, tonya ka fagaba kasadi san Diyos, hanggan is Diyos fagaba kasadi sa hanya. ¹⁷ Nonhosto santam ka fangayofan ka galwasi, tam idwa ha fakahawagon sas Sirang Fangabayan aban. Kawa, no kinday is Kiristo istay is baba daga, tam kitonya yadi. ¹⁸ Tam no gadgalwasiyan idwa ha aktom kadala, dapat ay, no galwasi hosto kagfaliyam kadala fagayo. Ka kadala yapdi, ka fangayofan galwasi idyan hosto sa hanya, maskin kadala yapdi ka fadosaan. ¹⁹ Tam galwasi han Diyos hanggan has manga taw maskin is Diyos nagona wa galwasi intam. ²⁰ Kaglwang aho galwasi han Diyos, dapat kadwat iglag it fadwasay, igbohag odi. Nodya twa galwasi kat faglagon fadwasay haraw, labi man idwa twa galwasi han Diyos, taw nodwag lag hanya. ²¹ Is Diyos natogon hantam kito, ka galwasi han Diyos, fag galwasi yadit fadwasay.

¹ Fagayo ka katiwala kitay is Hisos ka Kiristo, in Diyos wa manga anak. Nyawa faktaw no galwasi manga taw, galwasi yadi ista manga anak. ² Yakanga tam twa kitay tam no galwasi han Diyos hanggan katanog it manga togon, tam galwasi yadit manga anak. ³ Maskin tam no galwasi han Diyos, it kahologan tam katanog it manga togon. It manga togon idwa yadi mahori katanog, ⁴ maskin in Diyos manga anak fagayo syagan digdaog ka manga ogali dwat istay sas baba daga. Kawa tam igsyag in Diyos kagfarigon intam, yakanga tam igdaog ka manga ogali dwat. ⁵ Faktaw ka syagan igdaog ka manga ogali dwat istay is baba daga, ham gayfan? Ka lamang katiwala kitay is Hisos in Diyos wa Anak ka syagan igdaog. ⁶ To fag is Kiristo Hisos kandasog istay is baba daga, intogna sas danom a, in-olan yadit folot. Ka Maliyaw fag Falad kagfaorongan tonya kawa tonya fag Falad ka fakaoronganan. ⁷ Tolo kagfaorongan. ⁸ Ka Maliyaw fag Falad, ka danom, hanggan ka folot kagfaorongan. Nyawa tolo, pariho it faglwangon. ⁹ Tam igfaanod intam kapariho taw it faorongan, dapat ay bohondi kitos taw is Diyos nogfaorongan. Is Diyos nafaorongan kawa hat Anak. ¹⁰ Nyawa faktaw kagsyag han Diyos Anak twa sat basad fangayofan kitay, in Diyos faorongan maanod wan. Kadwag faanod han Diyos faorongan, bilang iglwang is Diyos bohagon, maskin ka taw idwa katiwala in Diyos faorongan kawa hat Anak. ¹¹ Kiti is Diyos no nafaorongan kitay, hanya nadisag hantam ka haboyagan idwa ha katabowanan, hanggan tonya fag haboyagan sawat Anak. ¹² In Diyos Anak nonsadi santam, tam ha akwa ka haboyagan idwa ha katabowanan. Dapat ay, it Anak nodwan sadi santam, tam idwa ha akwa tonya fag haboyagan. ¹³ Hogsorat ha hayo kagsyag in Diyos Anak kaarakitay ham tomwa matohoyanan kitay, ham ha akwa wan haboyagan kadwa ha katabowanan. ¹⁴ Tam idwa ha fagadowanon tam nogsagad, nyawa kana fag bagay ka maangay han Diyos, kawa tam twa kitay hanyag talinga intam. ¹⁵ Hanggan tam no twa kitay hanya fagabag talinga hantam, tam twa yadi kitay tam tomanggap intam fagsagadon. ¹⁶ Nyawa fakta kaglag it fadwasay gogali dwat, bohonwa ka dwat kagdagos has kahatayan, daranginan han Diyos tonya fag fadwasay. Ginya madi is Diyos domisag haboyagan has naogali dwat haraw. To kawa has taw kat naogali dwat idyapdig dagos has kahatayan. Dapat ha akwa ogali dwat kagdagos has kahatayan. Ahodwag lwang kitay, fag darangin kawa has taw ka ha naogali dwat kitonya. ¹⁷ Fagayo fag ogali dwat kasalanan wan. Kakitay ha akwa manga ogali dwat kadyag dagos has kahatayan. ¹⁸ Tam twa kitay kanbalin Diyos manga anak idwag fadagos fagaba has ogali dwat, kawan Diyos Anak gano tonya fag manga taw, yakangas Fandaya idwa syagan manmawat hanya. ¹⁹ Tam talastas kitay, tam in Diyos wa sakop hanggan is Fandaya kagfasognod ka manga taga istay is baba daga. ²⁰ Tam twa wan kitay, in Diyos Anak inbangkad wan hastay a, nadisag yadi hantam kadonongan kaarakitay tam homilala ka orongan fag Diyos. Hanggan tam insadi han Diyos orongan kawa tam insadi hat Anak is Kiristo Hisos. Hanya ka orongan fag Diyos hanggan to ka haboyagan idwa ha katabowanan. ²¹ Angko manga anak, fag idwa kadiya has iba fag fagsyagon.