1 KORINTO

1 KORINTO

¹ Ahos Pablo in Diyos nafatawag kaarakitay imbali in Kiristo Hisos Fandiya-Barita. To fag sorat gi hyami da Sostinis intam fadwasay. ² Migsorat ha hayo, han Diyos Tifonan sas banwa Korinto, ha hayo kantohoyan han Kiristo Hisos, kan Diyos manga nafatawag kaarakitay kabali it sakop, kito yadis fagayo fag manga taw, nyawa siday fag banwanan, ta nogsyag han Kiristo Hisos kagfon intam, kasta Fon hanggan wantam. ³ Ham nangos fag domog kitay, is Diyos intam Ama, hanggan is Kiristo Hisos intam Fon mahoway ha hayo fagaba, hanggan igfalokmay hayo manga fangayofan. ⁴ Ho fagaba wagbaya han Diyos kawa ha hayo, maskin hanyag disag it malooy fag kahowayan ha hayo gin Kiristo Hisos. ⁵ Yakanga, kawa ham insadi ha hanya, ham bohondi kito ka hyabi sas fagayo, ham inbali madonong hanggan twag toltol fiya fiya. ⁶ Kawa hyami nafaorongan ha hayo, kawa han Kiristo, in-anod yadi wan sa hayo manga ogali, ⁷ yakanga idwa ha korang in Diyos disag ha hayo manga fangayofan bago, no kandogay day tam no mafanayan yapdi kagfon intam, is Kiristo Hisos, nomlag aban. ⁸ Is Diyos kagfarigon intam manga fangayofan hanggan wa has katabowanan, kaarakitay idwa ha fakabayaon intam ogali gis nanya fag sirang aban kagfon intam, is Kiristo Hisos nombangkad. ⁹ Is Diyos idwa bohagon ka nafatawag intam kaarakitay tam imsadi hat Anak, is Kiristo Hisos intam Fon. ¹⁰ Angko manga fadwasay, hogfaaronganon ha hayo san Kiristo Hisos, kagfon intam, it ngayan, kitay, ham fag kasadi sa hayo manga hampang, hanggan fangayofan hanggan bato ibolonon kaarakitay ham idwag daraogan. ¹¹ Maskin in Kolowi manga iba nafwayong hangko kitay ham, hono, manga fadwasay, ham gagran. ¹² Kangko fagfwayongon, insadi, hono, iglwang, Aho han Pablo, insadig lwang, Aho han Apolos. Intibag lwang, Aho han Pidro, tibag lwang, Aho han Kiristo. ¹³ Is Kiristo awkin inhorayan, ham gayfan? Aho awkin kanpako sas nafatimbangan hayo kawa ha hayo? Ta nafatogna awkin hayo sangko ngayan, is Pablo? ¹⁴ Hogbaya han Diyos kitay hodwa ha nafatogna is nyamo hayo, no bohonwa da Kirispo da Gayo. ¹⁵ Yakanga manga taw idwa twag fwayongon kitay tantogna sangko ngayan. ¹⁶ Ho bago di natohod kitay aho, mangharaw, ha akwa ya nafatogna, da Istifanas talanahan. Nonsagaya di tonya, hodwa ha natohod kitay, aho ha nafatogna yas nyamo hayo. ¹⁷ Dapat ay, is Kiristo idwa nasogo angko kaarakitay fagaba mamatogna has taw. Is Kiristo nasogo angko kaarakitay manoltol ka Fiya fag Barita, bohonwa kitay sas fakyason fag hampang gis kadonongan istay is baba daga, dapat sas hampang ka malpos kadog, kaarakitay in Kiristo kahatayan karigonan idwam bohin, it kahatayan sas nafatimbangan hayo. ¹⁸ Ka manga taw kagdagos has kadwatan nogdog kawa han Kiristo kahatayan sas nafatimbangan hayo, taglwang tonya habongolan odi. Dapat santam, ka manga dagos wambawi, tam nogdog kawa han Kiristo kahatayan, to wa kan Diyos kadonongan. ¹⁹ Maskin insorat kitay, Ho domwat ka manga kadonongan manga taw, Hogfabali idwa ha kahologan kasta fakatwawon. ²⁰ Da ngap ka manga ha kadonongan? Da ngap kagfaadal Batasan Hodyo? Da ngap ka madonong igfabarohagan istay is baba daga, ham gayfan? Is Diyos igfabali kapaongan odi ka kadonongan istay is baba daga. ²¹ Maskin in Diyos wa kadonongan ka nafabali kitay manga taw idwa syagan homilala hanya, no kadi kadonongan gistay is baba daga. Dapat ay, is Diyos nafaangay kitay, tam nogtoltol ka Fiya fag Barita, hanya ka bomawi manga taw kagsyag ha hanya, nyawa kastay is baba daga fag manga taw iglwang tonya fag barita habongolan odi. ²² Ka manga Hodyo igsagad fag hamlag sadik falagon madolaw kaarakitay ha faorongan. Ka manga Girigo, it fagsayahon, kadonongan odistay is baba daga. ²³ Dapat kantam fagbaritaon kawas Kiristo kanpako sas nafatimbangan hayo, ka manga Hodyo fasingyanan, hanggan ka manga Hintil faglwangon, habongolan odi. ²⁴ Dapat, no kawan Diyos manga nafatawag fag manga taw, nyawa Hodyo, nyawa Girigo, is Kiristo wa kan Diyos karigonan hanggan it kadonongan. ²⁵ Hogfahasayan odi hayo, maskin, tam no lomwang, is Diyos nahalig it habongolan, ya tonya fag bilang habongolan, kadonongan wan, bohondi kito ka kadonongan taw. Tam no gayfan is Diyos magomo nomtoon, gis nanyas Diyos marigon man has fagayo fagayo fag manga taw. ²⁶ Angko manga fadwasay, tam fag tohod no kinday tam is Diyos no nafatawag intam. Sayok di santam ka manga madonong hanggan ka ha manga magorang kanbantog. ²⁷ Dapat is Diyos nafili ka mangadwa madonong istay is baba daga, kaarakitay igfahaya ka manga madonong, hanggan ka manga magomo sasta faglagan, kaarakitay igfahaya ka manga marigon. ²⁸ Is Diyos nafili yadi kasta manga fagyodon, kadwa bangan mahalga no kalag di, idwa ha kahologan istay is baba daga, no taw dik lomwang, kaarakitay igfabali idwa mahalga kasta faglwangon manga gorangon sas baba daga, ²⁹ kaarakitay nyawa fakta fag taw, idwag fatakagdog san Diyos faglagan it sadili fagsyaganon. ³⁰ Maskin giwa ngap in Diyos intam haboyagan kansadi san Kiristo Hisos. Hanya kan Diyos nafabali intam kadonongan, intam kahaslongan, intam fangafiyan, hanggan intam Famawi. ³¹ Yakanga kito ka Kasoratan fwayong, Taw no kasayag fatakagdog has taw, fag kagfon intam kat fagfasayaon igdog.

¹ Angko manga fadwasay, hyabi aho no gis nyamo hayo, ho natoltol ha hayo in Diyos kafangayofanan kadya nafadog has taw hyabi. Dapat angko hampang bonwa famasayaon igdog, bohonwa yadi abwat fag kadonongan. ² Ho danwa ha fangayofan kitay, hodwa ha fagfwayongon ha hayo no bohonwas Kiristo Hisos, hanggan kawa hanyan pako sas nafatimbangan hayo. ³ Aho no sawa hayo atobangan, aho magomo, kadala wa dahol, karokog ya ngadi. ⁴ Aho no natoltol hanggan nafaadal hayo, hodwa nahampang masaya wagdog fag manga hampang hanggan madonong. Dapat ho natoltol ha hayo san Diyos Falad falagon hanggan it kadonongan, ⁵ kaarakitay in Diyos kadonongan ka hayo fagsyagon, bohonwa kadonongan odi taw. ⁶ Dapat ka orongan, tam igfaadal kadonongan has manga in-ganit sas bago fag fangayofan, dapat bohonwa ka kadonongan taw, bohonwa yadi ka manga gorangon kadonongan istay is baba daga kati, kawa tonya kaliyam di. ⁷ Kangko fagfwayongon kawan Diyos kadonongan kadya nafadog has taw hyabi. Nyawa ka daga idyan halig, in Diyos kafangayofanan kitay, to fag kadonongan imbali hantam kafiyan. ⁸ Ngadi sadik gorangon kagbahala kati fag manga masohod idwa ha natwa nadog. Ta nangos no natwa wagdog in Diyos kafangayofanan, ya nangos tadwa nafapako sas nafatimbangan hayo kagfon intam, kagfon yadi kafiyan. ⁹ Dapat ay, kito ka Kasoratan fwayong, Ka kafiyan kadya ha taw nalag, idya ha taw nadog, Idya ha taw naisip, Tonya fag kafiyan kan Diyos nafatalaga has manga galwasi ha hanya. ¹⁰ Is Diyos nafatwagdog hantam to fag manga bagay git Falad. In Diyos Falad kagsayak fagayo fag manga bagay, hanggan wa ka abasad wa dahol dahol kan Diyos kafangayofanan. ¹¹ Ista sadili falad lamang ka twagdog kasta naisip. Kitonya yadin Diyos Falad lamang ka twagdog kan Diyos manga naisip. ¹² Yabay kantam natanggap bohonwa ka falad gistay is baba daga, dapat in Diyos Falad, kaarakitay tam tomwa wagdog in Diyos kahowayan manga disag hantam. ¹³ In Diyos Falad ka nafadonong hyami to fag manga bagay, ka hyami fagfwayongon, bohonwa kadonongan taw ka nafadonong hyami. Yakanga migfatwagdog has manga taw, in Diyos Falad manga disag hantam, manga taw ka ha akwa in Diyos Falad santam manga fangayofan. ¹⁴ Maskin nyawa faktaw kadya ha akwa in Diyos Falad, kafang yapdig tanggap it manga disag. No sas taw, tonya bilang odi habongolan, hanyadya twagdog, maskin, ka ha akwa in Diyos Falad lamang ka tomwa wagdog tonya fag manga bagay. ¹⁵ Nyawa fakta fag taw no ha akwa in Diyos Falad, tomwa wagdog fagayo fag manga bagay ngatay ha fakinabang, ngatay idwa ha akwa. Dapat ka manga taw kadwa ha akwa in Diyos Falad idwa tomwa wagdog tonya fag taw it kafiyan. ¹⁶ Kito kanfwalid sas Kasoratan, Fakta ka tomwa intam Fon fangayofan, ham gayfan? Fakta ka syagan faadal hanya? Dapat ay, in Kiristo fangayofan sawantam.

¹ Angko manga fadwasay, nyawa kitonya, hodwa nasyagan nahampang ha hayo kito ka has taw kagfasakop han Diyos Falad. Aho no nahampang ha hayo, bilang has manga goyon yapdi ka bali fangayofan masayaon, kito yapdi ka manga anak dararag, no has katiwala han Kiristo baliwa. ² Ho nafahwan ha hayo gatas, kawa bohon yapdi maganit fag fanganon, maskin ham idyapdi syagan kwan. Hanggan wa kati ham idyapdi syagan. ³ Maskin ham kasaya has bali fangayofan masayaon yapdi. Ham ha akwa yapdi manga kaid-ingliyan, mangag daraogan. Tonya kagfahilala kitay ham kito mandi ka nogbanwan intam manga ogali istay is baba daga. Ham gogali yapdi ka hayo bali fangayofan masayaon. ⁴ Insadi noglwang, Aho han Pablo, insadi noglwang, Aho han Apolos, tonya kagfalag kitay ham gogali yapdi kito ka nogbanwan intam ogali istay is baba daga. ⁵ Maskin faktaw is Apolos? Faktaw is Pablo, ham gayfan? Hami in Diyos odi manga fangibolon kat manga nafafalo, ka nataban hayo hasagsyag han Kiristo. Mi pariho wan naibolon intam Fon nadisag faibolonon ha hyami. ⁶ Aho ka natanom. Is Apolos kagdamog, dapat is Diyos kagfatobo hanggan igfalangba. ⁷ Bohonwa kagtanom, bohonwa yadi kagdamog ka mahalga, dapat is Diyos ka mahalga kagfatobo hanggan igfalangba. ⁸ Kagtanom hanggan kagdamog fagayo fangibolon odi a, fagayo myasa wa ha tanggapon git nakayayan. ⁹ Hami pariho in Diyos wa ofod fangibolon. Ham in Diyos wa iyab. Ham in Diyos yadi wa fakaligon balay. ¹⁰ Kawas Diyos nadisag angko it malooy fag kahowayan, aho ka nafwalid fatokawan balay basad daga, kito sadik madonong kalig balay. Iba taw kagfadagos igfabilog ka balay. Dapat nyawa fakta fag taw ka kalig balay, fag idwag fahalbason, ¹¹ kawa fawa ha iba fatokawan balay igsak sinya, no bohonwa kan Diyos nafwalid wan, kawas Kiristo Hisos. ¹² Ha akwag fadagos kalig balay, ginto, pilak hanggan bato maganit, sinya fag baba fatokawan, hanggan ha akwa yadi kalig balay sonson wa manga hayo, manga fon fayay, hanggan kasta manga nagafasan odi. ¹³ Nomdasog ka sirang igsolay, imlag wan intam naibolon, igsadig sadi no kinday. Maskin gis nanya fag sirang, afoy ka somolay, hanggan igfatohoyan no kinday ka orongan intam ibolon ha sadi ha sadi. ¹⁴ Nyawa gafo nahalig balay sas baba fatokawan nodwa mayab, ka nahalig ha tanggapon fasalamat. ¹⁵ Dapat ay, nomsonong di ka balay, ka nahalig fawa ha tanggapon ngadi kana. Nyawa kitonya, hanyam bawi di, no kitay di, dapat ay, idwa ha taktak taktak. ¹⁶ Tam awkin idya natwa kitay tam in Diyos wa fanimbaan, hanggan in Diyos Falad sawantam no maoliyanan? ¹⁷ Is Diyos ka domwat nyawa faktaw kagfadwat it fanimbaan. Maskin in Diyos fanimbaan intohoyan hanya, hanggan tonya fag fanimbaan kawa tam. ¹⁸ Nyawa fakta fag taw fag idwag daya it sadili. Hanya no gayfan kitay hanya madonong ka gistay is baba daga fag kadonongan, hanya fag tomwa kitay hanya bilang odi paong paong kaarakitay orongan imbali madonong. ¹⁹ Maskin nos Diyos kaglag, ka kadonongan istay is baba daga, kapaongan odi. Maskin insorat kiti, Is Diyos giktan ka manga madonong git sadili kadayaan. ²⁰ Kitonya yadi, Intam Fon twa wa kitay ka manga madonong fag manga taw it naisip idwa ha kahologan. ²¹ Yakanga nyawa fakta fag taw fag idwag fatakagdog ka sadik taw it naibolon. Fagayo hayo wan. ²² Nyawas Pablo, nyawas Apolos, nyawas Pidro, nyawa to fag daga, nyawa haboyagan, nyawa kahatayan, nyawa ka kati fag manga masohod, nyawa ka has aban, to fagayo hayo wan, ²³ hanggan ham sawan Kiristo hanggan is Kiristo sa yadi wan Diyos.

¹ Ka fiya fag kito ka hayo fagisipon kawa ha hyami kitay, hami in Kiristo manga fangibolon kat nafaano in Diyos manga madolaw fag bagay kadya nafadog has taw hyabi. ² Kasta fon no ha nafaano hat fangibolon, it fangibolon fag gano fiya fiya tonya. ³ Idwa ha kana sangko nyawa ham somolay angko ibolon, nyawa fakta fag fanalinga hampangan ka somolay. Nyawa aho, ahodwa yadi somolay angko sadili ibolon. ⁴ Hodwa ha fagtagahon sangko basad fangayofan. Dapat ay, nyawa hoglwang kitonya, bohonwa kitay ahodwa ha ogali dwat. Intam Fon ka somolay angko ogali. ⁵ Tam fag idya ha faglwangon ngatay fiya, ngatay dwat, ista ogali, intam Fon nodyam bangkad. Aban, intam Fon bago falag ka bilang yapdi matagowan basad marom, hanggan falag yadi wa aban, igsadig sadi, ka manga fakasayaon taw kadyan dog yapdi. Gis nanya fag masohod aban, is Diyos mamasayagdog no kinda ka fiya hantam igsadig sadi. ⁶ Angko manga fadwasay, hami da Apolos kangko nafabali halimbawa kawa ha hayo manga fakinabang, kaarakitay ham tomohod kasta togon it kahologan noglwang, Fag idwag sagaya kansorat sas Kasoratan. Fag idwag fadaholon ka sadik taw, ginyag yod ka tiba. ⁷ Kinda ham no fiya man ka tiba, ham gayfan? Gwadi bohonwa awkin in Diyos wa disag ha hayo fagayo fag kadonongan ka sa hayo? No kitonya, kana mayon ham nogfataka yapdig dog, bilang wadwan disag ha hayo? ⁸ Ham mangharaw hosto wan kati, ham gayfan. Ham maakwa wan. Ham mangharaw inbali manga gorangon, ham fawa nafaofod hyami. Kafiyaon nangos ham nonbali manga gorangon orongan, kaarakitay hami yadi fag imbali gorangon, hayo yadi manga ofod. ⁹ Maskin no aho di kaglag, is Diyos igfalag hyami has taw, hami manga Fandiya-Barita, sas ginanan ginanan odi, idwa kitos taw ik fiya, kitos manga taw kantohoyan has kahatayan, ista odi fagdoroon istay is baba daga, manga anghil hanggan manga taw fagdoroon. ¹⁰ Kawa hami galwasi in Kiristo, manga taw gayfan hami paong paong odi, dapat anod, ham madonong wan, kawa han Kiristo baliwa. Hami magomo, ham ka manga marigon. Ham kasta fagfasayaon igdog, hami kasta fagyodon. ¹¹ Hanggan wa kati fag masohod, mi kalonos ya, kainom ya, ka odi kitay idwa malobasan. Ta hanggan wagbakbak hyami, midwa yadi ha oliyanan. ¹² Hami gibolon hanggan wa kagayamonan kaarakitay hami ha fangaboyagon yadi. Migdarangin kawa has mangag yod hyami. Mi gagwanta odi ta nogfahoriyan hyami. ¹³ Ta nogyod hyami, migsagot is taw mayan mayan odi. Hanggan wa kati, ta noglag hyami, hami bilang odi manga boga okason, kawa hami idwa kitos taw ik fiya sadi wak dahonya baba daga. ¹⁴ Bohonwa kitay ahog tikis wagfahaya hayo, aho nogsorat kito, dapat kaarakitay igfaadal hayo, kawa ham bilang wangko manga fagalwasiyon fag manga anak. ¹⁵ Nyawa kayodak libo ka gano hayo, idwa ayo ka hayo pinagkaama. Ahon bali kwinta wa hayo ama ham nogsyag in Kiristo Hisos, kawa aho ka natoltol ha hayo ka Fiya fag Barita. ¹⁶ Yakanga hogfaaronganon ha hayo kitay, fag aho ka hayo fagtoladon. ¹⁷ Kawa kitonya, hogsogo has nyamo hayo in Timotiyo, angko fagalwasiyon hanggan matanogon fag anak santam Fon. Hanya kagfaayfan hayo kangko manga ogali sangko haboyagan kansadi san Kiristo Hisos, manga ogali kangko fagfaadalon sas manga Tifonan fagayo, nyawa siday. ¹⁸ Ha akwa sa hayo tibag fatakag dog maskin ta gayfan hodwam bangkad has nyamo hayo. ¹⁹ Dapat ay, nontam Fon wa kafangayofanan, hombangkad ya ngalay has nyamo aban. Ho bomantay ngatay syagan gibolon ngay ta no kampang kitonya ayo ayo. ²⁰ Maskin in Diyos sakop kafiyan bohondi baba odi bibig, fag hanggan wat kadonongan kamlag sat ogali. ²¹ Kana nangos ka hayo fakasayaon aho nombangkad has nyamo hayo, ngatay aho fag ha famakbak, ngatay fag imlag kitay ho galwasi hayo hanggan mahoway di angko fangayofan?

¹ Bohonwa bohag, aho ha donggon barita kitay, insadi sa hayo dwat wa dahol it naogali, kawa hanggan dit ama babay, igtaban wan. Gwadi manga taw nyawa idyapdi katiwala in Diyos idyadi wa ha kitonyak fabayowan. ² Ham ha takan ya ngadi. Gwadi ham fag twa kaya, fag karongkot wan. Ham fag domayo gi hayo Tifonan ka gogali kitonya. ³ Nyawa ahodwas nyamo hayo, angko fangayofan gofod yadi hayo, yakanga ho bilang dis nyamo hayo. Kawa kitonya, san Hisos intam Fon ngayan, ho nafatohoyan it fadosaan ka gogali kitonya. ⁴ Ham fag matifonan, hanggan angko fangayofan gofod yadi hayo, ginya san Hisos intam Fon karigonan, ⁵ ham faanowan yap han Satanas tonya fag taw, kaarakitay it habilogan imhori, ginya madi, it falad ngan aram bawi gis nanya fag sirang is Hisos kagfon intam nombangkad ya. ⁶ Idwa fiya ham nogfataka. Ham awkin idwa twa kitay, nyawa ogbot di fag famadahol tinapay, igfalafit sadi wak dahonya longgong tinapay? ⁷ Ham fag danwag bol ka daanon fag famadahol tinapay, kawa ogali dwat, kaarakitay ham imbali kitos sadik longgong tinapay bago, kadwa ha aktom famadahol. Ka orongan kitonya wa tam, maskin is Kiristo kantam fangafiyan Anak Topa indisag wan, kito kasta nasogba topa ta nogtohod ka Fanohodan Nagsagayan hyabi. ⁸ Yakanga kati tam fag manohodan ya ngay, dapat bohonwa kitay ha tinapay ka ha aktom famadahol daanon, ka dwat fag ogali hanggan ibolon, dapat kawa ha tinapay kagfahalimbawa ka fangayofan malinay hanggan orongan, idwa ha aktom famadahol kagfalafit kadwatan. ⁹ Hoglwang sangko sorat gona kitay, ham fag idwa gamigosan has mangag fabayowan. ¹⁰ Kangko fagfwayongon bohonwa ka mangadwan tiwala fag manga taw kagfabayowan, manga masayaon, mangag nahaw, ka manga ha fagsyagon iba karigonan, maskin tam nostay yapdis baba daga, tam idwa syagan kabokod is taw kadyan tiwala ka gogali kitonya. ¹¹ Dapat kangko fagfwayongon, tam fag idwa gamigosan has manga taw kaglwang, Ala, hontiwala wan Kiristo, dapat hanya igfabayowan yapdi, masayaon, ngatay ka manga iba karigonan it fagsyagon, ngatay igfadwat igdog ka sadi, ngatay iglango, ngatay ignahaw. Ngadig sayowan, tam fag idwag sayowan kwan ka kitonya fag taw. ¹² Hodwa ha bahala gato kadyan tiwala han Kiristo. Is Diyos ka bahala gato has taw. Bohonwa awkin tam ka bahala gato ka san Diyos Tifonan fag manga taw, ham gayfan? Kiton Diyos sorat iglwang, Ham fag dayo gi hayo Tifonan ka hayo ofod ka gogali dwat.

¹ Nomtoon insadi sa hayo kahori ha sadik fadwasay kantiwala. Ham awkin idwa kaya domiya tonya has idwan tiwala kagtalinga hampangan? Gwadi fag ha mandis manga taw kantohoyan han Diyos nogdiya hayo hampangan. ² Ham awkin idwa natwa kitay, ka manga taw kantohoyan han Diyos kambali aban manga fangabaya kastay is baba daga fag manga taw? No tam kambali fangabaya kastay is baba daga fag manga taw aban, tam idwa awkin somyagan igfatabo hampangan kati, no ogbot di fag manga bagay? ³ Ham awkin idwa twa kitay tam kambali fangabaya has manga anghil aban? Labi man tam somyagan fatabo ka mangastay is baba daga fag manga hampangan. ⁴ Yakanga, ham no ha manga hampangan, kana mayon ham nogdiya yapdis manga taw kadyan tiwala, kadwa ha kwinta san Diyos Tifonan? ⁵ Ham awkin idwa twa kayas taw? Sa hayo Tifonan idwa aw ha akwa ngadi sadi ka madonong igfatabo hampangan manga fadwasay pariho intiwala? ⁶ Dapat ay, ham no pariho intiwala kahodhoriyan, fadwasay gayat has fadwasay, saya ngadista faglagan mangadwam tiwala. ⁷ Kawa ham tiba gadgayatan ka sadik bagay kagfadwat hayo Tifonan. Gwadi fiya man tam no gagwanta di no hagfahoriyan intam, nyawa tagdaya intam. ⁸ Dapat ay, ham mandi kagfahoriyan hayo manga iba. Ham igdaya yadi, hanggan ka hayo fagdayaon ka mandi hayo manga fadwasay. ⁹ Ham awkin idwa twa kitay ka ha manga ogali dwat idwam ofod san Diyos sakop? Ham fag idwa gadayaan hayo sadili. Ka gogali dwat has ka taw, ka mangag syag has iba karigonan, ka mangag fabayowan, ka bilang wa talsawa kapariho ama, ngatay kapariho ina, ¹⁰ ka manga fangnahaw, ka manga masayaon, ka mangag lango, ka mangag fadwat igdog, hanggan ka mangag daya, ka kitonya fag manga taw idwam ofod san Diyos sakop. ¹¹ Hyabi ongay, tiba santam kitonya yadi, dapat ay, kati, san Kiristo Hisos, kagfon intam, sat ngayan karigonan, hanggan san Diyos Falad, tam inbali malinay, intohoyan han Diyos hanggan nangafiyan wa hanya. ¹² Ha akwa taw kaglwang, Fiya di aho no gibolon nyawa kana. Ala, no kitay di, dapat tibak ogali idwag togbong. Aho syagan yadig fwayong, Fiya di aho no gibolon nyawa kana, dapat ho dayo igfasakop nyawa haday fag ogali karigonan. ¹³ Ka tibag lwang, Ka fanganon ka odi kitay has basad tiyan, hanggan ka tiyan intalaga has fanganon. No kitay di orongan tonya. Dapat is Diyos pariho domwat fagayo dowa aban. Intam habilogan idwan talaga hasagfabayowan baliwa, dapat intalaga hasagfon intam, hanggan intam Fon intalaga hantam habilogan. ¹⁴ Is Diyos nafaboyag ya intam Fon habilogan, hanggan it karigonan yadi ka faboyag ya intam manga habilogan aban. ¹⁵ Ham awkin idwa twa kitay tam manga layonan san Kiristo habilogan? Aho awkin bomol nangos in Kiristo habilogan manga layonan, ginyag fabali tonya manga layonan sas habilogan ina famabayowan? Nyawa ginahin, bohonwa aho ka omibolon kitonya. ¹⁶ Ham awkin idwa twa ka gofod kitonya fag ina kasadi sinya fag ina hat habilogan? Maskin in Diyos kasoratan iglwang, Tonya fag dowa imbali sadi di. ¹⁷ Dapat ay ka kasadi hantam Fon, it fangayofan kasadi yadi hantam Fon fangayofan. ¹⁸ Tam fag idwa gogali dwat has ka taw. Nyawa kana kasta ogali dwat tiba, idwa hasta sadili habilogan nogfahoriyan, dapat nogfabayowan hayadi wat sadili habilogan nogfahoriyan. ¹⁹ Tam awkin idwa twa kitay, intam habilogan ka Maliyaw fag Falad fanimbaan? Hanya kantam natanggap gin Diyos hanggan hanya maoliyanan santam habilogan? Bohonwa kitay tam kagfon intam sadili habilogan. ²⁰ Is Diyos nasali intam, nabayad wan. Yakanga intam habilogan ogali fag falag in Diyos kafiyan.

¹ Kati yabay ho somagot ka hayo nasorat hangko fag manga bagay. Fiya madi ngap ka ama nodwa gakbang has ina. ² Dapat kaarakitay idwa hagfabayowan, fiya no kafod sadili babay, sadili indogan. ³ Ka talsawa fag gogali ka maangay ha sadi ha sadi. ⁴ Maskin bohondi ka ina, dapat it indogan kagbahala hat babay habilogan, hanggan bohondi ka ama, dapat it babay kagbahala hat indogan habilogan. ⁵ Ham fag idwa kwangit hayo habilogan ha sadi ha sadi, no bohonwa hayo togonan kitay, gis nanya fag masohod ham manaramanan yapdi kaarakitay mandarangin. Nomsagaya gis nanya, ham fag gofodan ya, no kinda mandi katfagonan ham no gofodan, kaarakitay is Fandaya idwag faloksowan hayo has dwat maskin ham idwa gagwanta hayo sadili. ⁶ Bohonwa kitay hoglwang fagayo fag ha babay, fag ha indogan, dapat fiya di no ha akwa wan. ⁷ No aho di kaglwang, fiya nangos fagayo no kito yadingko. Dapat is Diyos kagfahafod it disag hantam igsadig sadi, idwa myasa kitonya. ⁸ Angko fagfwayongon has mangadya ha indogan, idya ha babay, hanggan has manga ina balo kitay, fiya nangos ta no kito yadingko, ahodwam dowa, hodwa ha babay. ⁹ Dapat ta nodwa gagwantat sadili, ta fag ha babay di, fag ha indogan di, fiya man nodwa kanbang fagaba. ¹⁰ Angko togon has manga talsawa, no kitay di, bohonwa aho kagfon kampang kitonya, kagfon intam kagfwayong, ka ina fag idwa gobon it indogan. ¹¹ Dapat, ka ina no omobon it indogan, fag idwa somayak tiba ama domwag, no bonwa kitay goli ya hat sadili indogan. Ka ama fag idwa yadi gobon it babay. ¹² Aho noglwang ha hayo tiba, bohonwantam Fon kagfon kampang kitonya, aho odi, hoglwang kitay, sadik ama kantiwala no ha babay kadyan tiwala, dapat kawilit indogan, ka ama fag idwa gobon. ¹³ Kitonya yadi, no ha sadik ina kantiwala, dapat it indogan idyan tiwala, it indogan no kawili yapdi hanya, ka ina fag idyadi wa gobon. ¹⁴ Maskin kawat babay kantiwala intohoyan han Diyos, kalafit yadi wat indogan nyawa idyan tiwala. Hanggan kawat indogan kantiwala intohoyan han Diyos, kalafit yadi wat babay, nyawa idyan tiwala. Nodwa kitonya, ista manga anak idwa fiya san Diyos faglagan. Dapat ka orongan, ista manga anak ka maangay wan san Diyos faglagan. ¹⁵ Ka indogan, ngatay babay kadyan tiwala no kasaya wa gobon, nyawa omobon wan. Kadyan tiwala no naobon wa kitonya, ka indogan ngatay babay kantiwala, idwa ha fagayfanon, maskin in Diyos wa fangayofan kitay, tam fag gogali ka mahoway. ¹⁶ Dapat ay, ham manga ina kantiwala, ngandayo is Diyos bomawi hayo manga indogan kawa ham it fakabotongon. Hanggan ham manga ama kantiwala, ngandayo is Diyos bomawi yadi hayo manga babay, kawa ham it fakabotongon yadi. ¹⁷ No kinda mandi hyabi intam Fon nadisag hantam, hanya no nafatawag intam, tam fag kitonya mandi. Kitonya wan angko togon has fagayo fag manga Tifonan. ¹⁸ Ka sadik taw no danwa toli is Diyos no nafatawag hanya, fag idwa kasayag faoman tonya. No danwadya toli, fag idwam toli. ¹⁹ Idwa ha kinday nyawa toli, nyawadwan, dapat, ka fiya, fag katanog in Diyos manga togon. ²⁰ No kinda mandi ka nogbanwan is Diyos no nafatawag intam, tam fagayo fag kitonya mandi. ²¹ Is Diyos no nafatawag hyamo, haw awkin danwan bali ista nasali sogowan, haw fag idwa gisip tonya. Dapat hyamo fon nogfaangay digfalahaw hyamo, haw fag galin wa gi hanya. ²² Maskin intam Fon nogfatimbang ka danwasta nasali sogowan fag manga taw, hanya kabali bilang wad bohonwasta nasali sogowan sat faglagan kagfon intam. Kitonya yadis Kiristo nogfatimbang ka bohonwasta nasali sogowan, tambali yadin Kiristo wa sogowan kawas Diyos nasali. ²³ Is Diyos nabayad wan, nasali yadintam. Tam fag idwa kabali ista nasali sogowan odi manga taw. ²⁴ Yakanga manga fadwasay, nyawa kinday tam nogbanwanan, is Diyos no nafatawag intam, tam fag kitonya mandi no gofodan in Diyos. ²⁵ No kadi has manga idwa ha indogan, idwa ha babay, hodwa ha fagtogonon ha hayo gintam Fon. Dapat, kawa kagfon intam in-awa angko, honbali yadi sadik matanogon hanya. Yakanga ho fadog yadi ha hayo angko sadili fangayofan. ²⁶ No kito wa kati fag mahori fag kasohodan, no aho di kagdog, no kinday hayo lagan kati, fag idwag faoman. ²⁷ Haw awkin ha babay? Fag idwa kasaya gobon. Hadwa aw ha babay? Fag idwa garonganon igligaw. ²⁸ Bohonwa kitay haw no bomabay, haw naibolon dwat, hanggan sadik dayaga no omindogan, fiya di. Dapat ham no ha babay, ngatay indogan, ham lomag manga mahori kati istay is baba daga. Kangko fakasayaon ham bomaybay tonya fag manga mahori. ²⁹ Angko manga fadwasay, to kangko bato lwangon, sayok di intam sawad fangaraw kantohoyan hantam. Yakanga gis kati ginan ka ha babay, it babay fag idyapdig falibang it indogan, hanya no gibolon intam Fon ibolon. ³⁰ Ka manga karongkot, fag idwa kalibang goraw, ka manga kasolong fag idwa kalibang kasolong. Ka mangag sali fag idwa kalibang igsali. ³¹ Hanggan ka mangag fasadsaliyan yapdi istay is baba daga, fag idwa kalibang hanya baliwa. Maskin to fag daga hanggan fagayo fag manga ogali istay imliyam wa aban. ³² Nangos angko fakasayaon, ham fag idwa ha fagayfanon istay. Ka ama kadwa ha babay, nontam Fon ibolon it fagalibiton, intam Fon bomaya wa hanya. ³³ Dapat ay, ka ama ka ha babay, ka manga bagay istay is baba daga it fagalibiton kaarakitay it babay bomaya hanya. ³⁴ Kawa kitonya igfabokngan dit fagayfanon. Kitonya yadi ka ina kadwa ha indogan, ka manga bagay hantam Fon kat fagalibiton maskin kasayag fatohoyan it habilogan hanggan fangayofan hantam Fon ibolon. Dapat ka ina ka ha indogan, ka manga bagay istay is baba daga it fagalibiton maskin kasaya kitay, it indogan fag bomaya hanya. ³⁵ Maskin hoglwang kitonya, ho kasayag togbong hayo, bohonwa kitay igfahoriyan hayo. Ho kasaya nangos igtaban hayo has maangay fag ogali, kaarakitay ham somyagan omibolon mahogod intam Fon ibolon, maskin idwa hagfalibang hayo. ³⁶ No kadi ha manga togonan kadwan tonglos, ka anahan no gayfan bomohag hat fagalwasiyon, hanggan nodwa kaagwanta sat sadili, maskin gwayan wa kasaya hanya fag ina, ka fiya, tam fag fadagos wa tonya fag dowa, maskin danwat togonan, idwa ha dwat no kitonya. ³⁷ Dapat fagayo dowa, not fangayofan idwa bomabay, idwa omindogan, kafiyaon no kitonya, no matohoyanan wat sadili fangayofan, bohon wasta napilit, no gagwanta di nga ngap it sadili. ³⁸ Kadwag faaywanon hampang, fiya madi ngap kagbabay hat togonan, dapat fiya man inya, ta no pariho gagwantat sadili, idwag babay, idwa yadi gindogan. ³⁹ Ka ina ka ha indogan fag bilang wa salawid loka hat indogan, it indogan no boyagan yapdi. No kawa kitay it indogan natay wan, fiya di nyawa lomigaw iba ama, nyawa faktat fakasayaon, dapat ay, fag hamandis mangam tiwala. ⁴⁰ Dapat nongko di fangayofan, nodwa lomigaw yap it indogan, hanya labi wa bomaya, hanggan no aho di kagdog, in Diyos Falad sa yadi wangko.

¹ Kati ho fomwayong ha hayo no kadi has manga fanganon indisag has labang taw. Tam twa wa kitay, kito ka tiba noglwang, Tam fagayo madonong wan. Ka kitonya fag kadonongan igfadaholon odit sadili, dapat ay ka galwasi manga taw igfarigon ka tiba. ² Nyawa fak taw no gayfan kitay hanya madonong, hanya idyapdi twa fiya fiya nyawa kana fag bagay. ³ Dapat ka galwasi in Diyos, in Diyos wa fakilalaon. ⁴ Yabay, no kadi has fanganon kandisag has labang taw, tam twa wa kitay ka manga labang taw idwa ha kahologan, hanggan is Diyos lamang ka sadi dik fagsyagon orongan. ⁵ Nyawa kitay ta ha faglwangon manga fagsyagon tiba, ngatay sam tongod, ngatay istay is baba daga, hanggan aywan ista fagngayanon manga fagsyagon fag manga afo. ⁶ Dapat no kadi hantam, tam twa, is Diyos sadi lamang, kawantam Ama ka nahalig fagayo fag manga bagay hanggan intam haboyagan intohoyan ha hanya. Sadi di kagfon intam, is Kiristo Hisos, in Diyos wa katogbong no nahalig fagayo fag manga bagay, hanggan igdisag intam ipsaw. ⁷ Dapat tadya fagayo natwa kitonya. Tibag tohod yapdi ta nogfiya labang taw, yakanga hanggan wa kati ta no kwan kitonya fag fanganon, ha fagtagahon yapdi kitay, idwa fiya kat naibolon. ⁸ Bohonwa ka fanganon kagfabali intam fiya san Diyos faglagan. Nyawa tam idwa homwan, intam fangayofan bonwa kitay dwat man, tam no kwan idwa yadim bali fiya man. ⁹ Dapat ay, tam fag matagahan, nyawa halimbawa, fiya di tam no kwan tonya fag fanganon, tam fag idwag falag has dwat ka iba taw ka gadowan yapdit fangayofan. ¹⁰ Halimbawa, no tam ka marigon katiwala imsakop sasta famiyan, homwan yadi, ginya ka magomo yapdi no katiwala lomag kitay tam kwan yadi wa sinya, hanyadwa awkin imlombay wa dagos, ham gayfan, homwan yadi wan kandisag has labang taw? ¹¹ Maskin tam no kwan, kawa tam twa kitay ka manga labang taw idwa ha kahologan, tam igfadwat intam fadwasay fangayofan, ka magomo yapdi. Is Kiristo natay wan kaarakitay igbawi intam fadwasay, yakanga tam fag idwag falombay intam fadwasay fangayofan. ¹² No kitonya, tam ha kasalanan wan han Kiristo kawa tam ha kasalanan hantam fadwasay hanggan igfalombay it fangayofan, tam nafaadowan di ngap hanya. ¹³ No aho di ka hayo faglagon, no fanganon kagfalombay angko fadwasay fangayofan, hodwa homwan domwag tagoban, kaarakitay bohonwa ahot fasingyanan, angko fadwasay no has ogali dwat.

¹ No kitay di aho fawa ha fagintawon domwag gis iba taw. Aho wa sadik Fandiya-Barita. Aho sadi ka nalag yadin Hisos intam Fon. Gwadi ham wa kat manga bohad kawa aho no gibolon intam Fon ibolon. ² Nyawa ka tiba taw igfabohag kitay, aho bohonwa Fandiya-Barita, dapat ham idwag fabohag. Ham wa kagfaorongan kitay aho kagfon intam it Fandiya-Barita. ³ Aho no somagot has mangag solay angko, ho lomwang kiti, ⁴ No kitay di, hami manga Fandiya-Barita no somagad fanganon, ngatay inomon gin Diyos Tifonan, fiya di. ⁵ Fiya yadi nyawa mi tomaban hyami manga babay kito yadinda Pidro hanggan tiba Fandiya-Barita hanggan intam Fon manga fadwasay, ta nafaofod yadit manga babay. ⁶ Hami lamang da Barnabi awkin ka nangos fag iglag hyami sadili fanganon, ham gayfan? ⁷ Fakta fag sondalo kat sadili wa fanangdanon no gibolon, ham gayfan? Fakta fag taw kagtahom obas kadwa ha fakinabang it bohad? Fakta fag gano manga topa, manga hambing, kadwa ha fakinabang ginya, ngadig toris it afo soso, ham gayfan? ⁸ Kangko fagfwayongon bohondi kitay gis manga ogali taw. Kitonya yadi ka Batasan Hodyo fwayong. ⁹ In Mwisis togon iglwang yadi, Haw fag idwag bangkas ka oyong baka no dayog giling. Ka baka awkin kan Diyos fagisipon orongan, ham gayfan? ¹⁰ Bohonwan. Kawa ngap tam is manga taw kan Diyos fagfwayongon. Kawa ka gadado hanggan kaggiling fag ha fagsyagon kitay hanya ha kahorayan kasta naani. ¹¹ Hami ka nananom ha hayo manga kafiyan has fangayofan bago baliwa, mahori wa dahol awkin ha hayo, hami no ha tanggapon gi hayo manga bagay malagan? ¹² Ka tiba taw igsagad yap madi ngap, bago man no hami, labi man nyawa mi managad yadi hayo. Nyawa kitonya, midwa nanagad hayo. Mi gagwanta wa fagayo kaarakitay ham idwa ha fabangdanan hyami ogali. Yakanga midwam bali hayo fasingyanan ham nodwa kasaya ka Fiya fag Barita kawa han Kiristo. ¹³ Ham awkin idwa natwa kitay tagdisag di fanganon gis Fanimbaan-Dahol has manga gibolon sinya, hanggan tagdisag yadi kahorayan gista manga nasogba has mangag togbong sas fanogban? ¹⁴ Kitonya yadi kagfon intam natogon kitay, ka mangag toltol ka Fiya fag Barita, fag lomag yadi it fangaboyagon ginya. ¹⁵ Dapat hodwag faanod igsagad nyawa ginahin, nyawa hoglwang kitay maangay no kitonya. Hodwa yadig sorat ha hayo kitay ham disagan hayo togbong angko. Ngawa hanggan ho matay lonos, ho kasayag baya yapdi angko ogali kitay hodwa nanagad. ¹⁶ Aho bohonwa kitay igfadaholon angko, aho nogtoltol ka Fiya fag Barita kati. Tonyantam Fon nafatohoyan angko bato ibolonon. Isyay wan, aho nodwa bomarita. ¹⁷ Aho nogbarita nongko di sadili fangayofan, aho ha fagsyagon ta tomangdan arangko. Dapat ahog faanod odi ka ibolonon kantohoyan hangko. ¹⁸ Kana arangko tanggapon, ham gayfan? Angko tanggapon kiti lamang, ahog faadal ka Fiya fag Barita, idwa ha fagtanggapon tangdanan, nyawa fiya di aho nogsagad madi ngap ka fiya hangko. ¹⁹ Aho bohonwasta nasali sogowan, dapat aho natikis wagfabali angko ista sogowan has fagayo, kaarakitay aywan man angko tabanon hasamtiwala. ²⁰ Aho no gofodan has manga Hodyo, hogfaangay yadista ogali Hodyo, kaarakitay ho fatiwala hanya. Nyawa aho bohonwa sakop Batasan Hodyo kati, aho no gofod ka kitonya fag manga taw, hogfasakop yadi has Batasan Hodyo kaarakitay ho fatiwala hanya. ²¹ Ginya madi, aho no sawas manga bohonwa Hodyo, kadwag fasakop has Batasan Hodyo, ho bilang yadi bohonwa Hodyo, idwag fasakop has Batasan Hodyo, kaarakitay ho fatiwala yadi ka bohonwa Hodyo. Bohonwa kitay hodwa katanog in Diyos togon, aho ngap igfasakop yadin Kiristo togon. ²² Aho no gofod yadi has manga magomo, ahog faangay yadi. Hogfaangay di yadi has taw fagayo kaarakitay, nyawa kindawan, ngadi tiba, fag imbawi wan. ²³ Ho gibolon to fag manga bagay fagayo fagayo kawa has Fiya fag Barita, kaarakitay aho ha kahorayan yadi git kafiyan. ²⁴ Tam twa wa kitay ta nogsaringgonaan, sadi lamang ka ha tanggapon fasalamat, nyawa fagayo pariho igdalandan. Yakanga tam fag marigon nogdalandan kaarakitay tam ha tanggapon fasalamat. ²⁵ Fagayo kagfayayom igsaringgonaan idwag falabi it habilogan fakasayaon nyawa kana, maskin kasaya tomanggap sangbaw ka ngalay kadwat. Dapat kantam fakasayaon fag sangbaw kawadwa kadwat. ²⁶ Yabay, ahog dalandan ha sadik hadasogan matohoyanan, aho bohonwa kitay bilang odig sontok has bagyo, idwa ha iktanon. ²⁷ Hogfarigon angko habilogan fagaba a, hodwag falabi angko fakasayaon nyawa kana kaarakitay aho nomsagaya wagtoltol has tibak taw, bohonwa aho kadwa ha tanggapon.

¹ Angko manga fadwasay, ho kasaya nangos ham fag twagdog ka hyabi intam manga hafofowan nadalanan. Ta noglahaw yapdi, ka linyabo nalanbong sasta tongod fagayo, hanggan ta fagayo nadifay ka Dagat Dararag. ² Kawa kitonya, ta fagayo bilang wantogna sas linyabo hanggan dagat san Mwisis arofodan. ³ Ta fagayo wa nahwan ka sadik fanganon madolaw. ⁴ Fagayo nainom yadi sadik inomon madolaw ka nabolos gis madolaw fag bato, ka fagaba naofod is taw. Tonya fag bato madolaw kawas Kiristo. ⁵ Nyawa kitonya aywan sas taw bohonwan Diyos fagbayaon, yakanga aywan natay ta no basad yapdi fakahyabogan. ⁶ Kasta manga nadalanan fagayo igfatohod intam kitay, tam fag idwa kasaya ka manga ogali dwat, kito kasta fakasayaon hyabi. ⁷ Tam fag idwa ha fagsyagon iba karigonan, kito kan Mwisis manga kahoyog tiba hyabi. Kito kansorat, Ka manga taw natokaw kaarakitay homwan, manga ominom, ginya ta nalindog a, natayok yadi. ⁸ Tam fag idwa gogali dwat has ka taw, kito kasta naibolon tiba hyabi, yakanga sadi dik sirang 23,000 ka natay. ⁹ Tam fag idwag solay intam Fon kito kasta naibolon tiba hyabi, yakanga manga abyanon nadaog ka manga taw. ¹⁰ Tam fag idwag sogat in Diyos kito kan Mwisis nataban manga taw tiba hyabi, yakanga kan Diyos anghil, kawas Fadosa, nafadosa was taw. ¹¹ Tonyan anod hyabi has taw. To kawa famatagak has tiba. Insorat yadi kaarakitay igfatohod intam, ka manga taw ka natahod ka katabowanan fag manga sirang kati. ¹² Yakanga, nyawa faktaw ka gayfan hanya marigon hantam Fon, fag matagahan kitay fag idwam lombay yat fangayofan. ¹³ Tam idya ha donggon mahori igsolay intam, kaglabi man ista donggon mahori tiba taw. Is Diyos idwag fabayaan intam. Hanyadwag faangay kitay ka mahori kagsolay intam iglabi intam fagsyaganon. Yatokitay, kagsolay intam nomdasog, is Diyos domisag ya halimbawan kaarakitay tam omagwanta wan. ¹⁴ Yakanga angko manga fakilalaon, fag idwag syag has iba karigonan. ¹⁵ Hogfwayong ha hayo kitonya, kawa ham ha fangayofan wan. Ham wa kagfatohoyan ngatay fiya, ngatay idwa fiya angko fwayong. ¹⁶ Idwa awkin tam no ginom gintam Fon ongot fanginoman kantam fagbayaon, tam ha kahorayan yadi in Kiristo folot? Idwa awkin tam no kwan tinapay kantam nafaarogbotan, tam ha kahorayan yadi gin Kiristo habilogan? ¹⁷ Yakanga maskin ka tinapay sadi di, tam bilang di sadik habilogan nyawa kitay tam aywan, maskin gi sadi dik bilog tinapay tam ha kahorayan ginya. ¹⁸ Fandog ngay, tam fag tohod ka manga taga Israil ogali hyabi. Idwa awkin ka kwan ista nadisag sinogba han Diyos kasadi han Diyos, ham gayfan? ¹⁹ Kana arat kahologan kangko nafwayong? Ka manga iba karigonan ha kahologan awkin, ngatay kasta disag fanganon hanya baliwa? ²⁰ Idwa ha kahologan. Kangko fagfwayongon ka mangadyan tiwala igdisag it famiya has manga labang taw, idwa han Diyos. Hodwa kasaya kitay tam kasadi has manga labang taw. ²¹ Tam no ginom wan gintam Fon ongot fanginoman, tam idwa syagan ominom gis fanginoman labang taw. Tam no manayowan hantam Fon, tam idwa syagan manayowan yadi has manga labang taw. ²² Tam awkin kasayag fadwat iglag intam Fon, ham gayfan? Tam awkin gayfan tam marigon man hanya? ²³ Ha akwa taw kaglwang, Fiya di aho no gibolon nyawa kana. Ala, no kitay di, dapat idwa fagayo igtogbong. Ginya sadi ya ka omolit, Fiya di aho no gibolon nyawa kana. Anod, dapat bohonwa fagayo kagfarigon intam iba. ²⁴ Fag ka fiya has iba taw kantam fagisipon, fag bohonwa kantam sadili fakinabang. ²⁵ Nyawa kana kantam nasali gis fanaliyan tagoban, tam fag danwa kwan. Hawa gintaw gintaw maskin intam fangayofan ha fagtagahon. ²⁶ Kawa ka Kasoratan iglwang, Kagfon intam ka gafo intam daga hanggan fagayo ka sinya. ²⁷ Intam fakilalaon sadi, kadwam tiwala no nataban intam, tam nonsaya wagdog, nyawa kanat nadisag hantam, tam fag kwan wan, tam hawa gintaw gintaw maskin tam ha fagtagahon. ²⁸ Dapat no ha nafwayong intam, To ista famiya labang taw, maskin tonya fag taw kantam fagayfanon, tam hawa kwan. ²⁹ Kangko faglwangon, bohonwa kitay tam ka ha fagtagahon, tam fag idwa kwan kaarakitay ka nafwayong idwa ha fagtagahon. Ka tiba nogtadlongan kiti, Kana mayon no iba taw angko fagisipon fagaba? Gwadi ho kasamok wan. ³⁰ Kana mayon ta nogsogat angko, aho no nafasalamat yadi han Diyos kangko nahwan? ³¹ Angko sagot kiti, Nyawantam nahwan, nyawa hanggan intam nainom, nyawa kana kantam ibolon, fag sonson wa fiya, kaarakitay in Diyos kafiyan imlag. ³² Fag bohonwa tam kasta faglagon igtaban manga taw has dwat, nyawa manga Hodyo, nyawa manga Girigo, nyawa hanggan has mangan aktom san Diyos tifonan. ³³ No kadi aho, no bali day angko fagsyaganon, hodwag fagomon omogali fagayo has fiya sasta faglagan fagayo. Fag bonwangko sadili fakinabang kangko fagsayahon, dapat fag hanggan ka tiba taw fag ha fakinabang gingko ogali, kaarakitay tambawi yadi.

¹ Ham fag tolad angko ogali no kinday aho nogtolad yadin Kiristo ogali. ² Hogbaya hayo kawa ham igtohod angko fagaba, hanggan ham katanog ka manga ogali kangko natogon ha hayo. ³ Dapat ay, angko fakasayaon ham fag twagdog kitay is Kiristo igsakop fagayo fag manga ama, bilang wasta alfoyo, ginya ka manga ama ka bilang wat babay alfoyo, hanggan is Diyos in Kiristo alfoyo. ⁴ Ka ama no ha sambalilo, ngatay taong nogdarangin, hanggan igtoltol in Diyos hampang, bilang mahaya wa kalag, idwa magalang han Kiristo, ka bilang wat alfoyo. ⁵ Ka ina nodwa ha taong nogdarangin, ngatay nogtoltol in Diyos hampang, mahaya wa kalag, idwa magalang hat indogan ka bilang wat alfoyo, bilang sadik ina malitis it alfoyo tam nogfahalimbawa. ⁶ Ka ina no kafang wagtaong, fag dan wa falinayan wat alfoyo. Dapat kawa ka ina kaya no malitis, ngatay malinay it alfoyo, ka fiya, fag ha taong. ⁷ Idwa maangay ka ama nogtaong, kawa hanyag tolad in Diyos, hanggan igfalag in Diyos kafiyan, dapat ka inag falag ka ama kafiyan, ⁸ maskin hyabi ka ina gis ama kan-ginan, bohonwa ka ama ka gis ina. ⁹ Is Diyos idwa nahalig ama kaarakitay omofod has ina, dapat nahalig ina omofod has ama. ¹⁰ Fiya has manga anghil ka ina nogtaong, kagfalag kitay hanyag fasakop hat indogan. ¹¹ Nyawa kitonya, intam Fon kafangayofanan kitay, ka ina fag ha ofod ama, hanggan ka ama fag ha ofod ina. ¹² Nyawa bago bago ka ina gis ama, kati ina man ka ganak ama, hanggan fagayo giwan Diyos. ¹³ Ham wa kagfatohoyan ngatay fiya, ngatay dwat, ka ina nogdarangin han Diyos sas fanimbaan nyawadwa ha taong. Maangay di awkin ham gayfan? ¹⁴ Idwa awkin intam ogali yadi kagfayayom intam kitay, mahaya wa kalag ka ama no abat bok? ¹⁵ Dapat no has ina baliwa it bok no aba, ya fiya kabantay. Dandi aba no manga ina ka ha bok, kwinta wat taong maskin ha bok kayonya. ¹⁶ Dapat no ha akwa yapdi kasayag fabohag angko hanya baliwa, hodwa ha lwangon domwag no bohonwa kitay hyami ogali kitonya wan mi nogsimba, hanggan in Diyos manga Tifonan iba kitonya yadi. ¹⁷ Katingko fagfwayongon ha hayo, ahodwag fasayagdog hayo. Idwa has fiya ham nogtifonan, ha odis manga dwat. ¹⁸ Bago bago kangko donggon sa hayo, ham nogtifonan, hayo fangayofan idwa pariho. Ho katiwala wa bangan kitay anod wa tonya, ¹⁹ maskin inbali kitonya, idwa pariho hayo fangayofan kaarakitay imlag no fakta ka manga orongan imtiwala. ²⁰ Dapat ay, kangko faglwangon, ham nogtifonan, bohonwan Hisos Yafon ka hayo nahwan. ²¹ Maskin ham gona wa kwan hayo diya hanon, yakanga tiba kalonos, tiba kalango. ²² Ham awkin idwa ha sadili balay? Gwadi fag sinya wan no kwan manga ginom. Ham awkin igyod in Diyos Tifonan hanggan igfahaya ka manga myabog? Kana araw angko fwayongon ha hayo? Ngatay hogfasayagdog hayo, ham gayfan? Idwan. Ho fawa mamasayagdog hayo. ²³ Kito kangko donggon togon gisagfon intam, kangko nafadog ha hayo. Gis nanya fag yabi hyabi, in Hisos ofod no naoyon in Hisos kalaban, is Hisos kagfon intam nabol tinapay, ²⁴ nabaya in Diyos, nafaarogbotan, ginyag lwang, Toy angko habilogan kangko fagdisagon kaarakitay ha hayo. Ham fag sokfon yadi aban kito fag ogali kaarakitay ham omayfan fagaba angko. ²⁵ Kitonya yadi ta nontabo wagyafon, is Hisos nabol ka fanginoman, iglwang, To fag fanginoman ka bago fag taranggapan sangko folot. No kayoday ginan ham no ginom kito, ham fag sokfon to fag ogali kaarakitay ham omayfan ya angko. ²⁶ Yabay, no kandogay day kagfon intam nodyam bangkad ya, nyawa ginahin tam no kwan kito ka tinapay, hanggan ginom kito gis fanginoman, tam igfaayfan ya has taw intam Fon kahatayan. ²⁷ Yakanga nyawa faktaw ka homwan ka tinapay hanggan ominom gisagfon intam it fanginoman, kadya fiya ominom, ha kasalanan, igsway yapdi hantam Fon habilogan hanggan it folot. ²⁸ Yakanga ka fiya, tam fag maisipan yapdintam sadili, tam bago di homwan ka tinapay hanggan ominom ginya fag fanginoman. ²⁹ Maskin nyawa faktaw kadwag fahalga intam Fon habilogan, dapat kwan hanggan ginom it yafon, tonya fag taw kagfatohoyan it sadili has kahoriyan gin Diyos. ³⁰ Maskin tonya wat fagfonan aywan sa hayo magomo, masagiton hanggan tiba natay wan. ³¹ Tam fag gisip yapdi fiya fiya intam sadili fangayofan, tam bago mangwan, ginya madi intam Fon idwa somolay hanggan mangabaya intam. ³² Dapat intam Fon no kabaya intam, igfasoyo odi intam ha hanya, kaarakitay tam idwam sakop has fadosaan manga taw kadwa katiwala. ³³ Angko manga fadwasay, ham no matifonan kaarakitay mangwan, ham fanayan yapdi hayo iba fagayo. ³⁴ No ha kalonos sa hayo, fag danwa nangwan yap gis balay, kaarakitay idwam bali kitay ham nogtifonan matohoyanan kitay is Diyos mangabaya hayo. No kadi has manga iba bagay, ho fafiyan wa tonya ho nomdasog is nyamo aban.

¹ Manga fadwasay, kati kangko fagfwayongon ha hayo kawa has Maliyaw fag Falad manga disagon, kaarakitay ham tomwa wagdog. ² Hyabi hyabi ham nodyapdin tiwala in Diyos, ham fadi wadtwa kitay, nyawa kana fag karigonan, manga boyon odi, ka hayo manga fagsyagon. ³ Yakanga hogfatohoyan hayo kitay nyawa faktaw non Diyos Falad kagfadonong hanya, idwa somyagan igsabayon in Hisos, nyawa ginahin. Hanggan idwa yadi ha somyagan iglwang, nyawa faktaw kitay, Is Hisos kagfon angko, no bohonwa ka Maliyaw fag Falad it fagtahinan sat fangayofan. ⁴ Bokod bokod it manga disag, dapat sadi di ka Maliyaw fag Falad kagdisag tonya. ⁵ Bokod bokod ista halimbawan ta no gibolon intam Fon ibolon, dapat ay, kagfon intam sadi di kagfasognod fagayo. ⁶ Bokod bokod kasta bato ibolonon, dapat sadi di is Diyos, sayadis fagayo fag manga taw ka gibolon it ibolon. ⁷ In Diyos disag ha sadi ha sadi kagfatohoyan kitay ka Maliyaw fag Falad sawas taw, kaarakitay farigon has fagayo. ⁸ Ka Maliyaw fag Falad disag ha sadi ha fagsyaganon igtoltol in Diyos manga togon, ginya yadi fag Falad ka sadi ha fagsyaganon igfatwagdog fiya fiya in Diyos manga togon. ⁹ Tonya yadi fag sadi dik Falad kagdisag has iba kitay, marigon man has fagayo nogsyag han Diyos. Ka tiba taw ha kadonongan igfafiya ka manga ha sagit. ¹⁰ Ha sadi yak fagsyaganon, igfatimawa, bohonwag falipatan. Ha yadis tibat disag kitay, kabali in Diyos fangampang. Kandisag has tiba taw, ta homilala ka manga falad, ngatay gin Diyos, ngatay idwan. Tiba natwa wa kampang manga fangampangan madolaw. Ginya tiba twag fatwagdog tonya fag sanglitan kaarakitay manga taw tomwa wagdog. ¹¹ Dapat sadi dik Falad ka gibolon tonya fagayo no kinday kat fakasayaon, igfahafod has taw bokod bokod it manga disag. ¹² No kinday ka habilogan no sadi di, dapat aywan fag manga layonan, hanggan nyawa aywan fag layonan, ka habilogan sadi di, kitonya yadis Kiristo. ¹³ Tam fagayo, nyawa Hodyo, nyawa Girigo, nyawasta nasali sogowan, nyawa bohonwan, tam fagayo intogna sa sadi dik Falad, kaarakitay imbali tonya fag sadi dik habilogan. Sadi dik Falad kan Diyos bilang wa nafainom hantam fagayo. ¹⁴ Aywan fag manga layonan, bohondi sadi, ka sadi wak dahonya habilogan taw. ¹⁵ Halimbawa ka bitis nogfayodon odi hanya, iglwang, Aho bohonwa gamat, yakanga ahodwan sakop sas habilogan sadi wak dahonya, kaglwang kitonya, bohonwa awkin sadik layonan sas habilogan sadi wak dahonya, ham gayfan? ¹⁶ Halimbawa yadi, ka talinga bohonwa awkin sadik layonan sas habilogan, kawag lwang, Aho bohonwa mata, yakanga aho bohonwa sadik layonan sas habilogan sadi wak dahonya? ¹⁷ Ka habilogan no fagayo wa mata, kinday ara no tomwa domog, ham gayfan? Ka habilogan no fagayo wa talinga, kinday araw no tomwa omayok? ¹⁸ Dapat is Diyos ka nafwalid ka manga layonan santam manga habilogan sadi wak dahonya, no siday hanya naayfan fiya. ¹⁹ No sadi yapdik layonan, idya kalwang kitay habilogan wa tonya. ²⁰ Dapat ka orongan, aywan fag layonan, dapat ka habilogan sadi wak dahonya, sadi di. ²¹ Yakanga ka mata idwa tomwag lwang has gamat, Hodwa kasaya hyamo, nyawa alfoyo has bitis, idwa yadi tomwag lwang, Hodwa kasaya hyamo. ²² Yatokitay, ka manga layonan santam manga habilogan ka bonwa bangan intam fagtagondaon, tonya wa ngap ka mahalga man. ²³ Ka manga layonan santam habilogan sadi wak dahonya, tam kayag falag, ya mangharaw, labi man tam no gano a, ka manga layonan santam habilogan sadi wak dahonya, kadwa fiya kabantay, dapat labi wa ngap tam igfabali fiya. ²⁴ No kawa danwa fiya kabantay, nyawa tam idwag fafiya domwag. Is Diyos no nahalig intam habilogan, dan wa fiya, hanggan tikis wa nadisag dahol man fag kangayanan has manga layonan habilogan tiba, ka sas taw idwa bangan fagtagondaon, ²⁵ kaarakitay idwa ha akwa fakaingliyon. Yatokitay, fagayo igtarogbongan odi. ²⁶ Ka sadik layonan habilogan no ha masagit, fagayo fag layonan karongkot yadi. Kitonya yadi ka sadik layonan no nadog fiya, fagayo kasolong wan. ²⁷ Tam fagayo in Kiristo wa habilogan sadi wak dahonya, hanggan igsadig sadi in Kiristo wa manga layonan sat habilogan. ²⁸ Kan Diyos nafwalid gona sat Tifonan ka manga Fandiya-Barita. It fadowa kat manga Fangampang. Kat fatolo kawa mangag faadal. Ginyas Diyos nafwalid yadi sat Tifonan, ka manga twa gibolon ka manga madolaw, ka manga madonong igfafiya ka manga ha sagit, ka mahogod wagtogbong, ka manga madonong igbahala has Tifonan, ka madonong yadi kampang sas manga sanglitan madolaw. ²⁹ Fagayo awkin manga Fandiya-Barita, manga Fangampang, mangag faadal? Fagayo awkin twag falag manga madolaw? ³⁰ Fagayo awkin madonong igfafiya ka manga ha sagit? Fagayo awkin twa kampang manga sanglitan madolaw, ngatay igfatwagdog tonya fag manga sanglitan, ham gayfan? ³¹ Dapat tam fag gwayan wa kasaya ka manga disag has fangayofan ka fiya man ka tiba. Kati ho fomwayong ha hayo ka halimbawan ka maangay man has fagayo fagayo.

¹ Nyawa halimbawa, aho madonong wa kampang manga fangampangan taw hanggan manga fangampangan anghil, dapat ay, aho nodwa galwasi has manga taw, aho bilang odi agong ganingalan, ngatay dowak agong ta nogfalidlintogan, maisngil wan. ² Nyawa aho in Diyos wa fangampang, hanggan natwa wagdog ka fagayo kan Diyos idya nafadog has taw, hanggan madonong has fagayo, nyawa ho syagan igfaalin manga moyod, halimbawa, kawa marigon nogsyag han Diyos, dapat aho nodwa galwasi manga taw, ahodwa ha kahologan. ³ Nyawa ho domisag angko botang fagayo has taw, nyawa nangos hanggan ta no somogba angko habilogan, hogfaangay wan, dapat aho nodyadi wa galwasi is taw, idwa ha fakinabang sangko. ⁴ Ka orongan galwasi in Diyos hanggan has manga taw, maagwantaon, mahoway, idwa maingliyon, ⁵ idwa ha takan, idwag fasalagwa, idwa masongat, idwag sadili it fangayofan, idwa kaplagdog, idwag botang ista manga naibolon dwat ha hanya. ⁶ Ka orongan galwasi idwa kasayag dog ista manga naibolon kadwa fiya, dapat kasaya wa dahol igdog ka fakaoronganan. ⁷ Ka galwasi idwag fagomon, kasyag has fiya hanggan ha fagfanayaon yadi fiya, idwa kayaya gagwanta, nyawa kana. ⁸ Aban fawa ha akwa kan Diyos manga fangampang, idwa ha taw homampang manga sanglitan madolaw, ka kadonongan imtabo wa balinya, dapat kawa galwasi idwa ha katabowanan. ⁹ Intam fakatwawon idya hosto, korang yapdi tam nogtoltol in Diyos hampang, ¹⁰ dapat ay, ka hosto nomdasog, kadya hosto imliyam wan. ¹¹ Hyabi, aho no anak yapdi, angko hampang idwa kito ka kati, angko fangayofan hanggan katadlongan kito odis manga anak. Kati aho dahol yadi wa taw a, ho nadayo ka ogali manga anak. ¹² Balis kati tam idyag lag fiya fiya, bilang odi basad anino salamin, dapat ka gis nanya fag sirang nomdasog aban, tam manladlagan masayangowan. Kati hodwa bangan madonong, dapat nomdasog gis nanya fag sirang aban, ho tomwa wa fiya fiya, kito yadis Diyos no kilala angko fiya fiya kati. ¹³ Istay yapdi to fagayo tolok bagay fiya, katiwala, hanggan igsyag, hanggan galwasi, dapat ay, ka galwasi ka orongan matohoyanan fiya man sinyas tolok bagay.

¹ Yakanga ka mahalga man has fagayo, tam fag gadgalwasiyan. Dapat tam fag kasaya yadi manga disag has fangayofan, labi wan ka fakatwawon igtoltol in Diyos hampang. ² Ka kampang sas sanglitan madolaw, hawan Diyos no kampang, idwa has taw, maskin idwa ha taw natwa wagdog, nyawan Diyos Falad igtogbong hanya igtoltol manga madolaw fag manga bagay kadya nafadog has taw. ³ Dapat ay, kagtoltol in Diyos hampang, igtoltol has manga taw kaarakitay imlangba hanggan imrigon ista manga fangayofan, tamlibang yadi no ha fakahoriyon. ⁴ Ka kampang sas sanglitan madolaw, it sadili fangayofan bago kat fagfarigonon. Dapat ay, kagtoltol in Diyos hampang, in Diyos Tifonan sadi wak dahonya it fagfarigonon. ⁵ Angko fakasayaon nangos, ham fag fagayo wa tomwa kampang sas sanglitan madolaw, no kitay di, dapat kangko fakasayaon bohondi kitonya, ham fag madonong igtoltol in Diyos hampang. Nogtoltol in Diyos hampang, fiya man has kampang sas sanglitan madolaw, no bohonwa kitay hagfatwagdog has taw it nafwayong, kaarakitay igfarigon in Diyos tifonan. ⁶ Yakanga angko manga fadwasay, aho nombangkad has nyamo hayo, aho no kampang sas manga sanglitan madolaw, ham idwa ha kinabang gingko, aho nodwag fwayong ha hayo in Diyos manga nafatohoyan angko, ngatay manga kadonongan gin Diyos, ngatay igtoltol in Diyos hampang, ngatay igfaadal hayo. ⁷ Kitonya yadi kasta manga famaoni kadwa ha fangayofan, kitos manga palawta, manga gitara, kinda ta no tomwa wagdog it hasnog nodwa ha fakaatowan, ham gayfan? ⁸ Kinday yadi ka manga sondalo nogfatalaga has labanan nodwa ha fakaatowan ta nogfaoni bodyong? ⁹ Kitonya yadi, kinday araw ta no tomwa wagdog it kahologan tam no homampang sas madolaw fag sanglitan, ka bohonwasta fakatwawon igdog, ham gayfan? Tam bilang odi kampang has bagyo. ¹⁰ Aywan fag manga fangampangan bokod bokod istay sas baba daga, ha kahologan fagayo fagayo. ¹¹ Dapat aho nodwa twagdog no ha kampang it sanglitan, mi bilang dowak famaklay, idwa twa kampangan. ¹² Yakanga kawa ham kasaya wa dahol ka Maliyaw fag Falad manga disag, no baliday hayo fagsyaganon, fag mahogod has manga disag kagfarigon in Diyos Tifonan. ¹³ Kawa kitonya, ka kampang sas madolaw fag sanglitan, fag darangin yadi kitay hanya tomanggap kadonongan igfatwagdog tonya. ¹⁴ Aho nogdarangin sas sanglitan madolaw, angko falad kagdarangin, dapat angko isip idwa hanya baliwa. ¹⁵ Kana nangos ka fiya, ham gayfan? Aho nogdarangin bohondingko falad ka mandarangin, ho omisip yadi angko bato daranginon. Aho no gambahan, angko falad ka mamasayagdog han Diyos, dapat aho omisip yadit kahologan angko bato ambahanon. ¹⁶ Tam nogbaya han Diyos gintam falad lamang, kinday tiba taw no tomwa waglwang, Anod, fag kitonya wa ngay, ka manga taw nodwa natwa wagdog intam manga hampang? ¹⁷ Matohoyanan kafiyaon tam nogbaya han Diyos, dapat idwag farigon ista fangayofan bago, iba taw, ta nodwa natwagdog. ¹⁸ Hogbaya han Diyos kitay aho bohondi kito hayo fagayo no madonong kampang manga sanglitan madolaw. ¹⁹ Dapat, in Diyos Tifonan no matifonan, aho no kampang nga odi manga limak hampang kasta fakatwawon igdog, igfarigon yadi has tiba, tonya fiya man kadog sangko, has manga hampang ayo ayo, ta nodwa natwa wagdog. ²⁰ Angko manga fadwasay, intam isip fag bondi kitos manga anak. Tam no gisip, fag kito yadi was dahol taw. Dapat no hadis dwat baliwa, tam fag kito odis manga anak ogbot yapdi. ²¹ Ka Kasoratan iglwang, Kagfon intam iglwang, Sas manga sanglitan madolaw Hanggan manga famaklay bibig, Aho no homampang hastay fag manga taw, Dapat nyawa kitonya, tadwa tomalinga angko. ²² No kitonya, ka disag fakatwawon kampang sas manga sanglitan madolaw, sadik falagon has manga idyam tiwala, idwa has manga danwan tiwala, dapat ka fakatwawon igtoltol in Diyos hampang idwa has mangadyam tiwala hadis mangam tiwala it fakinabang. ²³ In Diyos Tifonan no matifonan, tam fagayo no kampang sas manga sanglitan madolaw, ginya no handasog manga taw idwa ha natanggap fakatwawon kitonya, ngatay idyan tiwala, ta lomwang, tam ngandayo kapaong di. ²⁴ Dapat ay, fagayo nogtoltol in Diyos hampang, ginya madi ha taw indasog sinya, idyan tiwala, ngatay idya ha natanggap fakatwawon kitonya, hanya tomwa wagdog kitay hanya ha ogali dwat, faisip hanya fiya fiya, ²⁵ tomwa yadi ka manga mafyaloman yapdi sat basad fangayofan. Yakanga hanya manlibabaan mamasayagdog in Diyos, dagos wa lomwang, Is Diyos matohoyanan sawa hayo fagbokngan. ²⁶ Angko manga fadwasay, kana ham gayfan kangko nafwayong tonya fagayo it kahologan? Tam nogtifonan ha akwa mangambahan, ha akwa yadi mamaadal, ha akwa manoltol in Diyos kafangayofanan, ha akwa yadi mangampang sas sanglitan madolaw, ngatay mamatwagdog it nafwayong. Fagayo fag manga bagay fag im-anod kaarakitay imrigon in Diyos Tifonan. ²⁷ No ha mangampang sas sanglitan madolaw, fiya wan, ngadi dowa ngatay tolo, golbosan. Fag ha akwa yadi kagfatwagdog has manga taw ista nafwayong. ²⁸ Dapat nodwa hagfatwagdog, ka twa kampang sas sanglitan madolaw fag mainokan odi, fag maisipan odit sadili, hanggan igdarangin han Diyos. ²⁹ Fag manga dowa ngatay tolok taw ka manoltol ka natanggap fagsyaganon igtoltol in Diyos hampang. Ka tiba fag gisip fiya fiya kat manga natoltol. ³⁰ Is Diyos no nafatwagdog sadik bagay ha sadik taw ka matokawan yapdi sinya, ka kampang gona fag tohas yap. ³¹ Gwadi tam fagayo, fiya di tam no manoltol igsadig sadi in Diyos hampang, kaarakitay fagayo imdonong, imrigon yadi intam manga fangayofan. ³² Ka manga natanggap kito kat fagsyaganon, fag gagwanta igfanaya ka sadi nodyan tabo, ³³ maskin is Diyos idwag faagran intam, dapat igfaad-angayan wantam. Ka fiya san Diyos manga Tifonan, tam no matifonan yapdi, ³⁴ ka manga ina fag idyapdi gawang. Maskin idyapdig faangay has manga ina no kampang, tam nogtifonan yapdi. Kito ka fiya, ta fag matalingan yap kito kan Diyos togon fwayong. ³⁵ Ka manga ina no kasaya tomwa araw, fag gintaw it indogan, fag sayas balay. Maskin mahaya wa kadog ka ina no kampang in Diyos Tifonan no matifonan. ³⁶ Ngatay ham gayfan giwa hayo in Diyos hampang non-ginan? Ngatay ham lamang ka ha natanggap kitonya? ³⁷ Nyawa faktaw no gayfan is Diyos nafatwagdog hanya sadik bagay, ngatay hanya ha natanggap fagsyaganon, hanya fag tomwa wagdog kitay, kawantam Fon togon kangko fagsoraton ha hayo. ³⁸ Nyawa faktaw kadwa kasayag talinga angko togon, ham fag idwa yadig talinga hanya. ³⁹ Yakanga angko manga fadwasay, tam fag kasayag toltol in Diyos hampang, dapat fag idwa yadig bando ta no kampang sas sanglitan madolaw. ⁴⁰ Fag ka lamang fiya hanggan maangay intam ogaliyon has fagayo.

¹ Angko manga fadwasay, yabay kati hogfatohod ya hayo kangko fagtoltolon ha hayo Fiya fag Barita, ka hayo natanggap kanbali hayo fag ganitan has katiwala baliwa. ² Is Diyos kagbawi hayo gi wangko nafadog hampang ha hayo, ham nodwag fasigpala ka hayo donggon, no bohonwa kitay idwa ha kahologan ham nontiwala. ³ Maskin kangko donggon ka mahalga man has fagayo, kangko nafwayong ha hayo, kawas Kiristo natay kawantam manga ogali dwat, kito kansorat sas Kasoratan. ⁴ Ginyan lobgob wan, hanggan inboyag ya sas fatolo fag sirang, kito kansorat, ⁵ hanggan nafalag han Pidro, ginya has Safolo ha Dowak ama. ⁶ Ginya madi hanya nafalag it sadili ha mandis manga fadwasay iglabi 500 ka matifonan sinya. Nyawa kitay tonya tiba natay wan, ka fakaaywanan boyagan yapdi hanggan wa kati. ⁷ Ginya nafalag yadit sadili han Santyago, ginya bago di has fagayo fag manga Fandiya-Barita, ta no matifonan. ⁸ Ginya madi, no dogay, is Hisos nafalag yadi hangko, nyawa aho bilang wa anak kansagaya bohonwa sat kasagayan, bilang odin loskos. ⁹ Ahodwa kitos iba Fandiya-Barita ik fiya. Idwa maangay ta nogngayan angko sadik Fandiya-Barita, maskin hyabi aho nafahoriyan in Diyos Tifonan. ¹⁰ Dapat kawan Diyos malooy fag kahowayan sawangko, ahonbali kito ka kati. It disag malooy fag kahowayan hangko idwa yadin bali idwa ha kahologan. Aho bohondi kito ka tibak Fandiya-Barita no kogodan igbarita. To kawan Diyos malooy fag kahowayan sawangko, bohonwangko sadili fagsyaganon. ¹¹ Yakanga nyawa aho, nyawa ka tiba kagbarita, kitonya yadi ka hyami fagfaadalon, tonya yadi ka hayo fakatiwalaon. ¹² Yabay, hami nogfaadal kitay is Kiristo inboyag ya, kana mayon tiba sa hayo noglwang ka manga natay idwam boyag ya aban? ¹³ Halimbawa ka natay no orongan wadwa abam boyag ya, is Kiristo idwa yadin boyag ya. ¹⁴ Is Kiristo nodwan boyag ya, hyami fagfaadalon has taw idwa ha kahologan, idwa yadi ha kahologan ham nomtiwala. ¹⁵ No kitonya, hami in Diyos odi manga saksi bohagon, maskin migfaorongan kitay is Diyos nafaboyag ya in Kiristo, kadwa orongan, ka manga natay nangos nodwam boyag ya domwag. ¹⁶ Ka manga natay nodwam boyag ya, is Kiristo fawan boyag ya domwag. ¹⁷ Is Kiristo nodyan boyag ya, idwa ha kahologan tam no katiwala, hanggan tam idyan bawi gintam manga ogali dwat. ¹⁸ Yabay, is Kiristo nodwan boyag ya, fagayo ka natay gona, kansadi han Kiristo, hawas kadwatan. ¹⁹ Intam fagsyagon no ka odistay lamang fag baba daga fag haboyagan, isyay wan, tam ista fakaawaon, bohondi kito ka tiba. ²⁰ Dapat ay, ka orongan wan, is Kiristo inboyag ya, ka bilang bohad gona gis manga natay, kagfatohoyan kitay ha akwa yadi aban. ²¹ Maskin no kinday gi sadik taw ha kahatayan, kitonya yadi gi sadik taw ha haboyagan sas dayo kahatayan. ²² Maskin no kinday fagayo fag manga taw matay, kawa fagayo insadi san Adan hasokfonan, kitonya yadi, fagayo imboyag ya nonsadi san Kiristo. ²³ Dapat ay, fagayo imboyag ya no ginahin fag masohod is Diyos nogfatohoyan. Bago bago is Kiristo ka gona man has fagayo, ginya madi ka dan wansadi san Kiristo, imboyag ya gis nanya fag masohod is Kiristo nombangkad ya. ²⁴ Ginya madi, ka katobowanan nomdasog, is Kiristo nomtabo wagdaog fagayo fagayo kagsakop manga taw, hanggan kagbahala hanggan ka karigonan fagayo istay is baba daga, hanya fasakop fagayo fagayo han Diyos, intam Ama, kambali hari has fagayo fagayo. ²⁵ Maskin fag is Kiristo yapdi kaghari, is Diyos nodyapdi nadaog it manga kalaban hanggan nodya nafasakop fiya fiya fagayo fagayo han Kiristo. ²⁶ Ka kahatayan ka goyan goyan fag kalaban kamdaog hanggan imliyam wan, ²⁷ kito kansorat sas Kasoratan, Is Diyos igfasakop fagayo fagayo fag manga bagay ha hanya. Dapat ay, noglwang kitay fagayo fagayo fag manga bagay, kadog wa kitay is Diyos idyapdin sakop sinya kawa hanya kagfasakop fagayo fag manga bagay han Kiristo karigonan. ²⁸ Ginya madi fagayo no nafasakop wa han Kiristo, hanya, in Diyos wa Anak, ka fasakop han Diyos karigonan, ka nafasakop fagayo fag manga bagay han Kiristo, kaarakitay is Diyos wa kagfon wa fiya fiya fagayo fagayo. ²⁹ Ka manga natay nodwam boyag ya, kanat kahologan ta nogfatogna kawa has manga natay? No orongan wan ka manga natay nodwam boyag ya, kana mayon nogfatogna yapdi kawa hanya, ham gayfan? ³⁰ Hanggan aho yadi, kana aho noglaban yapdi ka madala sirang sirang? ³¹ Angko manga fadwasay, sirang sirang hodwa twa ngatay ho matay wa araw. Hoglwang kitonya kawa hogfasayagdog hayo, kawa tam insadi san Kiristo Hisos, kagfon intam. ³² Kanat fakinabang hangko, ham gayfan, aho no taw lamang kadwam boyag ya, aho nonsayango has manga maisog fag kalaban istay sas banwa Ifiso? Ka manga natay nodwam boyag ya, fiya man aho nogfaangay ista fwayong kitay, Tam fag kasolong yap kwan, manga ginom odi, No marom tam ngan wa matay. ³³ Tam fag idwa gadayaan, Intam manga ofod no dwat, intam manga ogali imbali yadi dwat. ³⁴ Tam fag ha fangayofan wan. Fag domayo ka ogali dwat. Tiba sa hayo igfalamang yapdi, idya kilala no kinday is Diyos orongan. Hoglwang kitonya kaarakitay igfahaya hayo tiba. ³⁵ Ngatay ha gintaw kitay, Kinday ka manga natay nomboyag ya domwag? Kindat habilogan gis nanya? ³⁶ Paong paong ka gintaw kitonya. Kantam natanom binhi nodyan boyok, idwa ha tomobo bago. ³⁷ Binhi yapdi kantam natanom, ngatay bolhog tirigo, ngatay tiba fag binhi, bohonya kitay dahol it fon. ³⁸ Is Diyos kagdisag habilogan hanya fag binhi no kinday kat nafatalaga, has manga binhi it habilogan bokod bokod no kinday nomlangba. ³⁹ Kanhalig hayopan boyagan idwa myasa kitonyat anit. Ka taw bokod it anit, bokod yadi ka anit hayopan. Bokod ka manok, ha olad, bokod ka oyang it anit. ⁴⁰ Ha akwa yadi manga habilogan ka sas banwa sam tongod, ha akwa yadi manga habilogan istay sas baba daga. Ka habilogan sas baba daga bokod it kafiyan has kafiyan manga habilogan sam tongod. ⁴¹ Ka yawa myanit bokod, bokod yadi ka yawa magdanon. Ka yawa fanggasan bokod, kawa sadik fanggasan idwa kito ka sadik fanggasan it kafiyan. ⁴² Kitonya yadi ka manga taw nomboyag ya domwag. Ka habilogan kanlobgob kaboyok wan, dapat ka habilogan kamboyag ya ginya, idwam boyok nyawa ginahin. ⁴³ Nonlobgob wan, idwa fiya kalag, fawa homimot, dapat nomboyag ya, fiya kabantay a, marigon mandi. ⁴⁴ Ka habilogan kanlobgob ka sas baba daga fag habilogan, kamboyag ya ka man has banwa sam tongod fag habilogan. No kinday ha akwa habilogan istay sas baba daga, kitonya yadi ha habilogan mandi sam tongod. ⁴⁵ Kito kansorat sas Kasoratan, Is Adan ka gona fag taw inhalig boyagan istay is baba daga, dapat ay, ka goyan fag Adan inbali Falad kagfaboyag manga taw. ⁴⁶ Dapat bohonwa ka sam tongod ka nagona, ka yapdi ka sas baba daga bago bago, bago di aban ka sam tongod. ⁴⁷ Ka Adan gona gistay is baba daga maskin nahalig gis lotok daga. Kat fadowa fag Adan kawa gim tongod. ⁴⁸ Ka sas baba daga fag manga taw igtolad kanhalig gis lotok daga. Ka manga taga man di gim tongod fag manga taw igtolad ka taw gim tongod. ⁴⁹ No kinday tam nogtolad kanhalig gis lotok daga istay, kitonya yadi aban, tam tomolad yadi aban ka gim tongod. ⁵⁰ Manga fadwasay, angko bato lwangon kito, intam manga habilogan, ka ha folot hanggan faknol, idwa tomahin han Diyos sakop banwanan. Bohonwa ka habilogan kamboyok ka omafo ka habilogan kadwam boyok. ⁵¹ Fandog ngay, ho fomwayong hayo sadik bagay madolaw, ka ham idya nadog. Tam idwa fagayo matay, dapat tam fagayo imbago wan, ⁵² somohod wa ka hasnog bodyong goyan goyan. Madali wa dahol dahol, idwam foga mata, ka bodyong homasnog, ka natay gona imbangon ya, fawa matay domwag yabay. Intam habilogan fagayo imbago wan. ⁵³ Maskin to fag habilogan ka kaboyok di, fag tomobos wa kadwa kaboyok hanggan ka katay fag tomobos yadi kadwa katay. ⁵⁴ Ka kaboyok nonbalyo wan kadwa kaboyok, hanggan ka katay inbalyo wan kadwa katay, gis nanyam anod kansorat sas Kasoratan kitay, Inlag wa kitay ka kahatayan indaog wa fiya fiya. ⁵⁵ Haw, kahatayan, siday haw nogdaog kati? Siday, kahatayan, im dalit kati? ⁵⁶ Ka dalit kahatayan kawa manga ogali dwat, hanggan ka karigonan ogali dwat gis Batasan Hodyo. ⁵⁷ Dapat ay, tam igbaya han Diyos kagdisag intam it haboyagan, gin Kiristo Hisos, kagfon intam, kaarakitay tam domaog ka kahatayan. ⁵⁸ Yakanga angko manga fadwasay, kawa kitonya, tam fag marigon, fag idwa gadowan, fag mahogod yadi no gibolon intam Fon ibolon, kawa tam twa kitay tam idwag faanogon intam nakayayan.

¹ Yabay, kawa has manga togbong hantam manga fadwasay sas sakop Hodiya. Ham fag kitonya yadi ngap kangko nafwayong has manga Tifonan sas sakop Galasya. ² Sas sirang gona sa sadik simba, ham fagayo, igsadig sadi, fag fabokod fagaba hayo bato disagon, no dahoday hayo bolay kwarta gis nanya fag masohod. Fag matifonan wa tonya, kaarakitay aho nomdasog is nyamo hayo, tam fawa ha fagtoltolon hanya baliwa. ³ Aho nomdasog is nyamo hayo, ho domisag sorat ha hayo manga nafili fag manga taw ka domiya has Hirosalim hayo disag. ⁴ No fiya kitay, aho fag hanya yadi has Hirosalim, ho tomaban hayo manga nafili fag manga taw. ⁵ Ho domagos has nyamo hayo, aho no giwas sakop Masidonya, kawa ho kasaya yapdi domalan sinya. ⁶ Ho domogay yapdi ogbot is nyamo hayo, balis faginan ka fangaraw, kaarakitay ham farigon angko fangayofan, aho nomlahaw ya domwag, no hada angko bato hadasogan. ⁷ Angko fangayofan, aho fag domogay yapdi ogbot is nyamo hayo aban. Hodwa kasayag dalan lamang is nyamo, kagfon intam nogfaangay. ⁸ Dapat angko fangayofan ho domogay yapdistay sas banwa Ifiso balis sirang Pintikostis, ⁹ kawa aywan kagtalinga fagabastay, nyawa aywan yadi kagfadwat igdog. ¹⁰ Is Timotiyo nombangkad is nyamo hayo, ham fag maofod hanya fiya fiya, kaarakitay it fangayofan idwa kabalaw. Is Timotiyo intam Fon fangibolon yadi kitongko. ¹¹ Ham fag idwag yod hanya. Ham ngap togbongan hanya kaarakitay masolong wat fangayofan no mwali hastay, maskin hami, aho hanggan intam manga fadwasay, mafanayan yadi hanya. ¹² Nontam man fadwasay, is Apolos, ho nafaaronganon kitay hanya fag gofodan yadi intam manga fadwasay kati manabang has nyamo hayo, dapat, is Apolos idyam bangkad is nyamo kati. Hanya aban manabang, nodwa ha fakalibangon. ¹³ Tam fag matagahan, tam fag idwa gadowan nogsyag in Diyos. Fag maisog intam fangayofan, fag maganit han Diyos. ¹⁴ Nyawa kana kantam ibolonon, fag gibolon fagayo maskin tam galwasi in Diyos hanggan has manga taw. ¹⁵ Angko manga fadwasay, ham twa kitay in Istifanas talanahan ka bago bago intiwala sas sakop Ikaya. Talanahan nafatohoyan it sadili kitay hanya ka tomogbong fagaba ka manga taw kantohoyan han Diyos. ¹⁶ Hogfaaronganon ha hayo, manga fadwasay, ham fag fasakop yapdi ka kito yadinda Istifanas, hanggan it manga ofod kadwag fagomon gogali fiya. ¹⁷ Hogbaya waglag inda Istifanas, da Fortonato da Akaiko nondasog hastay, nyawa ham idwa nasyagan igsabang angko. ¹⁸ Tonya fag tolok ama ka nafarigon yangko fangayofan no kinday ta nogfarigon yadi hayo. Ham fag baya wan ka kitonya fag manga taw. ¹⁹ In Diyos manga Tifonan sas sakop Asya gwas hayo. Da Akila da Pirisila hanggan intam manga fadwasay, kagtifonan sat balay, gwas yadi hayo santam Fon ngayan. ²⁰ Intam manga fadwasay fagayo fagayo istay gwas yadi hayo. Tam nogladlagan, tam fag badbayaan yadi, kawa tam manga dowasay san Kiristo. ²¹ Ahos Pablo, angko sadili gamat kagsorat ha hayo, kinday ham sinya? ²² Kadwa galwasi intam Fon, fag is Diyos ka mamatohoyan has kadwatan. Marana Ta. It kahologan santam sanglitan, bilang igdarangin, Haw kagfon hyami, fag kabangkad wa ngay. ²³ Ham nangos fag domog kitay is Hisos, kagfon intam, mahoway ha hayo fagaba. ²⁴ Ho galwasi hayo fagayo fagayo san Kiristo Hisos ngayan.