Titus

Titus

¹ - ⁴ Ga ip, Titus, naantei Kretawer. Aamei bunarsusfer tane amna galserem, ga jem temawer nei nawersamer Yesus nei mes ne tebana. Ai sembayanga as gwebabana Uwa Sanbagirfe, Uwa nemna, ane Kristus Yesus Jei nei nes Jei waakensosinirim, jega Jei nawersamer waakena Jelemanaiserem ip is ga sege gulbana ibe, ane ini imna is sege gwebabana waakenfer is jam folbafe. Surta aaiserem amniwer, Paulus. Ai awelna Uwa Sanbagirf gweyibene, aiba rasulsam ase Yesus Kristus se baftana. Uwa Sanbagiri Jei angtane mes destabaabili, jega jei Yesus ga sene tebana. Ane Uwa Sanbagiri Jei ams destabana enggalfe, ai angtane jeiserem ai jei agam towas-towastababif, jamere jei Yesus waakenfer sene tebana. Ane Jei ams destabana enggalfe, ai taterisi bunarsusfer aaiserem ai ajes towas-towasulmif, jamere angtane bunarsusfer sege towaswebili Uwa Sanbagiri aa gam gunurum enggame angtane jei fomfom se naawena. Ai awelna Uwa Sanbagirmanaiserem ajes gwebili, jega angtane Yesus aa jei ne tebanaram jei enggam ga sege gubili, "Ai enggam aya gunu ai tousa ai waakenfer gwelaiserem jamer abak-abaksus ajama domolf." Uwa Sanbagiri ogiri nalefe Jam eyebayan, Jei enggam mesam gul, "Afa angtane Tane Amna aa jei ne tebanaram, Ai waakenfer gwelaiserem jamer abak-abaksus ga As golmini jebe." Uwa Sanbagiri Jei jes gamserem gam aa jewer gulum je bunarsus, Jam afafweyan. Uwa Sanbagiri Jeiba nei nes waakentababisini, ane Jei taterisi Jemna se golmini angtane awelna Jemna aa jei ne gweyibenerem jebe. Jei taterisi Jemna ap gulbana enggalfe, ai taterisi Jemna jeiserem angtanef agam nasipminennef. Ane Uwa Sanbagiri Jei nunu Jener se destabili, nunu angtane taterisi Jemna jam ne saribeleiserem. ⁵ Titus, ai aamei isa naantei Kreta je firtenent, jega aamei enggam gam is eyebili: Jam ge tabanwebiyeneiserem jeiserem gam is tabantababili. Ane enggalf mese taman-tamna seyafter gemerserem aamei angtane sanbaka jemata jei ne tebabineneleiserem jei igam destabaabinenef. ⁶ Ai ajes balaram ibe, jes isa sarbi! Angtane sanbak aamei ijes destabaabilirim gwela jemna ga enggam sege folbamini: Angtane nafsi jei jam balyan, "Angtane sanbak jeiserem kapka gam eyebili." Jemna wini ga daamfenna tefner. Tantantane jemna jei Yesus mes gane tebana. Ane angtane nafsi jam guyon, "Tane jemna imweyena, jeta jelemana jam sarbayan." ⁷ Angtane sanbaka jemata aa jei gam taabilirim, jei awelna Uwa Sanbagirmana gam gwebili. Jega jem temawer jei ga enggammer gam gwena angtane aas galserem: Angtane nafsi jei jam balyan, "Angtane sanbak jeiserem kapka gam eyebili." Jengga jei ga enggam aas gemerserem: Jei jena jam gaarteyan. Jei tatarmer jei jam kakalsweyan. Fo angguru unggwanfer jei jam telbiyen. Angtane nafsiber jam ge erayan. Jei angtane enggalyan, angtane doini unggwanfer aa jei gam tebabilirim jelefefener. ⁸ Jengga jei enggam gam eyebili: Angtane aa jei gam wofnaram jem jenap foryafe baife jam gwebayan. Jei waakena tefner gam eyeipmuwena angtanefe. Jei jen jena waakenfer gam gerebaasnenne, jega jei etam-etama kapkaiserem jam eyebiyen. Jei waakenater gam eyebili. Jei jelem inip ga Uwa Sanbagiri tefner onsobaf. ⁹ Angtane sanbaka jemata aa jei gam taabilirim, jei ga aas gemerserem ga gemer gam gwena: Taterisi Uwa Sanbagirmana Yesusem temawer, taterisi jeiserem ga ginggitfer gam taabili. Taterisi jeiserem nei nejes ne towas-towastabaipminirim jebe, ga jetefener gam taabili, taterisi nafsi jam taabiyen. Jei taterisi Yesusem temawer jeiserem gam taayibene, jega enggalf jei angtane nafsi ga gam towas-towastababili taterisi Yesusmanaiserem jeme. Ane jei ini angtanemana ga gam kanautabaipmini, jega jei taterisi Yesusmana jeiserem ga gane onsobili. Angtane afwenefener jei enggam ne towas-towastababili, "Taterisi Yesusmana jeiserem kapka, ipsama onsobilirim." Jengga angtane sanbaka jemata aa jei gam taabilirim jei taterisi Yesusem temawer jam gam taayibene, jega enggalf jei angtane kabwakfer aa jei ne towas-towastababilirim jei gam towas-towastababif, jamere angtane jeiserem jei gangge towaswebili enggame, "Aiba kabwakfer ma towas-towastababili." ¹⁰ Titus, aamei is tabantababili jeiserem jam ge tabanwebiyeneiserem naantei Kreta je, aam temawer angtane Kristen unggwanfer naantei Kretaminibe jei taterisi Yesusmana unggwanfer jam ne taayibeyen, jengga jei taterisi nafsiserem ga jetefener ne taabili. Jei angtane nafsi aa jes bilirim, jei bai jam sarbife. Jei ol kabwak ne nasbabinenne, ane jei angtane nafsiserem jes ne afaf-afaftababili. Angtane unggwanfer kapka jeiserem aa jei ne eyebuwenaram, jeiba angtane Yahudimana Yesus aa jei ne tebanaram ba jesam. ¹¹ Titus, aamei angtane kapka aa jei ne eyebaabuwenaram, angtane jeiserem ga jam is uftabili taterisi kapka aa jes ne towas-towastababilirim jewer. Angtane jeiserem jei ga aatefener ne towas-towastababili doi tefner terelbef. Angtane doi tefner aa jei gam terelbenerem, angtane jeiserem jei kapkaiserem ga jes gam eyebili. Angtane jeiserem taterisi kapka aa galap ne towas-towastabaipminirim, anggwa mese wi tane anesus jei ga aa ge tikwebili taterisi waakena Yesusmanaiserem jes onsobiliwer. ¹² Angtane sanbak fwatermanaiserem guruf aa jei gwenaram, guru jeiserem jeimba naantei Kretaman tewem, jei jener enggame mesam gununt, "Angtane naantei Kretaminip aa jei ge nwinbenerem jei unggwanfer jena jam ne afaf-afafsona. Jei angtane kapka. Jei awelna jam ne gwebiyen, jengga unggwanfer ga twentwene falmini." ¹³ Guru sanbak jeiserem jei aa jes bilirim jeba bunaram. Jega jem temawer Titus, aamei angtane Kristen jeiserem taterisi kapka aa jei ne tikwebitinirim ga uskambar is uftabili, jega jei bunarsusfer ga sege towaswebili jei kapka gane tikwebitini. Aamei ga gam is eyebili, jega angtane Kristen taterisi kapka aa jei ne tikwebitinirim jei taterisi Yesusmana ginggitfer ga sene taabili. ¹⁴ Aamei jei waakenfer is towas-towastababili, jega taterisi kapka angtane Yahudimana aa jes ne nasbinennerem, angtane safnant taterisi jeiserem gamjon jam ne taabife. Ane angtane taterisi bunarsusfer aaiserem baif aa jei ne gwebilirim, jei taterisi jeiserem jei jam saryan jemniwer. ¹⁵ Angtane waakena tefner aa jei ne eyebilirim, jei enggam gangge gubili, "Jigala seyafter waakenam." Jengga angtane kapkaiserem aa jei ne eyebilirim, ane Yesus jam ne tebayanaiserem, jei enggam gangge gubili, "Jigala seyafter waakenyan." Jei jes gamserem gam aa jewer ge gubilirim, ga aam temawer ge gubili ini jemna kapka, ane jei teisyena waakenfer jes ne eyebiliserem, ane kabwakfer jes ne eyebiliserem. ¹⁶ Jei ga enggam gangge gubili, "Ai Uwa Sanbagiri amsama towaswebana." Jengga jei etam-etama kapkaiserem jes gane eyebili. Jei Uwa Sanbagiri jam ne sarbayan. Jei waakenaiserem fasfasus jam ne eyebiyen. Ane Uwa Sanbagiri Jei bai angtane aa jes ne eyebilirim Uwa Sanbagiri baife aa jes gwebilirim. Gam jega nei nesa towaswena angtane jeiserem jei teisyena Uwa Sanbagiri.

¹ Titus, ai enggam ai gunu, aamei angtane Yesus aa jei ne tebanaram jam is towas-towastababili, taterisi waakena numu daamfenna jeme, taterisi bunarsusfer galserem. ² Titus esorola anggwabakbakfe ga enggam is golmini: Jei fo anggur unggwanfer jam ne telbebiyen. Jei waakenfer gwelaiserem jam sene towaswebili, jega angtane nafsi jei gam sene balbabili enggame, jei angtane waakena. Jei jena jenater sene gaaramisnenne waakenfer, jega jei etam-etama kapkaiserem jam ne eyebiyen. Jei taterisi bunarsusfer jei aa jes ne tikwebitinirim, taterisi jeiserem ga jeter sene taabili ginggitfer. Jei angtane nafsi jam sene nesiktababili. Afa angtane nafsi jei ol kabwak taterisi jam sene nasipminirim jematfe, jei ga kanaufer sege fibili taterisi jeiserem safnant jam ne tikwebitiyen. ³ Titus, aamei esorola wibakbakfe ga enggam is golmini: Wibak enggam aa jei gangge gubilirim, "Ai angtane Kristen.", jei ga waakenater gane eyebili. Jei taterisi kapka angtane nafsiserem jem temawer jam ne nasipmiyen. Jei fo anggur unggwanfer jeber-jeber jam ne telbebuweyan. Jei taterisi waakenater gane towas-towastabaipmini, ⁴ jega wini siwiriserem jam baksweyanaiserem jeime gam sege towaswebili anggwana jelemana jam nesiktefe, ane tane jeleman mesna. ⁵ Ane wini jam baksweyanaiserem jei jena jenater ga sene gaaramisnenne waakenfer, ini jemna tabalmer gangge folbamini. Awelna jenap waakenfer gam gwebili, ane anggwana jelemana waakenfer gane sarbabili ane gane eyebili anggwana jelemana aa jes gam bilipminirim, kabwakfer jam tamawolbayan. Wini jam baksweyanaiserem jei jeiserem sene eyebili, jega enggalf angtane nafsi jei kapkaiserem taterisi Uwa Sanbagirmana jem temawer jam ne nasbiyen. ⁶ Titus, aamei gamjon esorola aaiserem ga anggwana tansiserem ga jep is golmini. Aamei unggwanfer is balbabili, jega jei jen jenater waakenfer ga sene gaaramisnenne etam-etama seyafter gemerserem jem temawer. ⁷ Ane aamei Titus, aamei intowaifener jeber-jeber waakena is eyebili, nele waakenaiserem jeter is garmuwena, jega angtane nafsi jei gam sege towaswebili jei jes ne eyebiliserem. Aamei angtane jam is towas-towastababili aam temawer Uwa Sanbagiri Jei ims bala, "Titus, aamei angtane jam is towas-towastababili." Enggam ipsam gunurum, "Ai angtane enggalf ai towas-towastababili ai fwaina agam domolf." Aamei angtane jam is towas-towastababilirim, ga waakenfer is towas-towastababili, ini imna ga is jeber folbana angtane jam towas-towastababif. ⁸ Aamei angtane jam jep igam towas-towastababilirim, jes jepserem taterisi ga waakenfer igam nasbabili tousaiserem jeme, jega angtane nafsi jei aamei enggam jam ge gubiyen im temawer, "Aamei taterisi kapka gam towas-towastababili." Seyafter jeiserem enggalf is eyebili, jega ginanggwa nemna jei gam sege seferswebili aam temawer jei kapkaiserem nem temawer jam ne nasbiyen. ⁹ Titus, aamei gamjon esorola aaiserem angtane aa jes gane armantababilirim ga jep is golmini. Aamei unggwanfer is balbabili, jei angtane sanbaka jemnater gane sarbana waakenfer seyafter gemerserem ga enggam: Jei awelna angtane sanbaka jemnaiserem aa jes gam bilirim, waakenfer gane gweyibene, jega angtane sanbak jemnaiserem ini jemna saaser-saaserfer ga gam folbana. Ane angtane sanbak jemna jes gam bilirim, jei baife jam gwebiyen. ¹⁰ Jei galgala jelem sanbakmana jei jam komkomulsiyen. Jengga enggam jei awelna jelem sanbakmana waakenfer gam gweyibene jeber-jeber, jega jelem sanbaka enggam ga gam bala, "Ai tousa angtane jeiserem awelna amna as waakenfer gweyibene." Angtane aa jes gane armantababilirim angtane nafsiminiwer jei seyafter jes gemerserem ga gemer gane eyebili, jega enggalf angtane nafsi jei gam gane damtabili, ane enggam ga gane balbabili jei awelna waakenfer ne eyebili. Ane angtane nafsi jeiserem jei ga sege towaswebili taterisi Uwa Sanbagirem temawer jeba waakensusum, Uwa Sanbagiri nei nes Jei waakentababisinirim. ¹¹ Titus, aamei angtane Yesus aa jei ne tebanaram is towas-towastababili taterisi waakena numu daamfenna jeme, taterisi bunarsusfer galserem. Jei seyafter ai ajes bilirim jei ga jeter sene tikwebitini, aam temawer Uwa Sanbagiri Jei angtane seyafter nesiktababili. Jega jem temawer Jei Yesus ga baftannununt ogiribe, jega enggalf Jei angtane seyafter gemerserem gam waakentababisif. ¹² Uwa Sanbagiri Jei nems nesiktababili, ane Jei nems towas-towastababili enggame, "Ai baif Ajes gwebilirim aamei ijesa eyebuwenaram, jeiserem jewer jam sa tikwe jam eyebife! Ane jeiserem aamei ijesa eyebuwenaram aamei ijesa towaswebilirim enggame kapka, jeiserem ijama eyebiyen." Uwa Sanbagiri Jei nems nesiktababili, ane Jeime aas mese nep nes aas towas-towastabaipmini, "Aamei ina inater isa gaaramisnenne waakenfer, jega aamei etam-etama kapkaiserem ijama eyebiyen. Bunarsus isa eyebili. Aamei isa eyebili Ai Ajes bilirim jam eyebife ogiri aaiserem jebe. Aamei ga jes isa eyebili." ¹³ Nei seyafter jeiserem nesa eyebili, aam temawer nei seyafter ne Yesus Kristus sa fibana Jei gamjon se warautna nafabaner. Jeiba Uwa Sanbagiri unggwan-giriserem nei nes Jei se waakentababisini. Nunu Yesus jem waraunalaiserem nei nejesa towaswebilirim nunu jeiserem aa jep falaram, nunu jeiserem jeme ini nemna nese saaser-saasersusfer sege folbamini. ¹⁴ Yesus Kristus Jei Jena mesam gerant Jam terfe nem etam-etamem temawer, jega enggalf nei bai etam-etama kapkaiserem nejama eyebife, ane ini nemna nes gam ge tabalbalsweipmif. Angtane ini aa jemanem ge tabalbalswebaminirim, jei Uwa Sanbagirem angtanef naawena, ane jei ga jam sege menetwebisini seyafter gemerserem waakenfer jam ne eyebife. ¹⁵ Titus seyafter jeiserem se towasulmi, se balbabi angtane bas sene eyebili, ane se balbabi jei taterisi ai ajes towas-towasulminirim baife jam ne gwebiyen. Seyafter jeiserem se towasulmi baabeteme. Angtane aamei enggame is jam ne balyan aamei igyen.

¹ Titus, aamei angtane Yesus aa jei ne tebanaram jam is towas-towastababili. Jei aaiserem jam ne dirinswebiyen: Angtane jei angtane pemerintamana sanbakfe aa jei naawenaram, taterisi jemna seyafter ga waakenfer sene sarbaipmini. Ane angtane pemerintana jep aa jes ne golminirim, jei seyafter jeiserem ga jam sene eyebili. Ane angtane sanbak jemnaiserem aa jes gam bilirim, jei seyafter jeiserem ga jamer gane eyebili. Jei jam sege menetwebisini waakenaiserem seyafter gam eyebif. ² Titus, aamei jei enggam is balbabili, jei angtane nafsi nimnafer jam ne balbabiyen. Jei angtane nafsiserem jebar aarememfener jam ge doksobayan. Jei waakenfer se naawena angtanefar, ane ini jemna foler-folermer sege folbamini angtane seyafter jemnibe. ³ Titus, aamei jes gamserem angtane Kristen ga gemer is towas-towastababili. Jei seyafter jeiserem jam ne dirinswebiyen, aam temawer gwanan galapserem nei ga enggala angtane Yesus jam tebayanaiserem jes galserem. Gwanan galapserem nei mese, nei Yesus nejama tebayan, ane nei teisyena. Nei angtane nafsi nejama sarbayan, jei aa jes ne bilirim nei nejama eyebiyen. Ane angtane nafsi nes jei ne afaf-afaftababili. Ini nemna nes jam ge tikwebaamiyen nenes-nensa kapkaiserem jes eyebife, jega enggalf ini nemna nes gam ge saaser-saaserswebamif. Nei etam-etama kapka unggwanfer ga gemer neya eyebuwena. Apgal jigala angtane nafsi aa jes ne damtabilirim, nei apgal jigala jeiserem nejesa tebabif. Angtane nafsi jei nems ne nasbabili kakalmer, ane nei angtane nafsiserem nei jesa nasbabili kakalmer. ⁴ Nei safe kapka jeiserem nemsa eyebili, Uwa Sanbagiri nei nes Jei waakentababisinirim. Jei ini Jemna waakenaiserem nebe nes mes ge saamisinint, ane Jei angtane seyafter nesiktababili. ⁵ Uwa Sanbagiri Jei nei nes jewer waakentababisinintim, jeke enggalem temawer nei waakena tefner nejewera eyebaabuwenaram, jengga aam temawer Jei nei nes Jener nesiktababili. Jes gamserem nunggunu ina gam igam wirtanaram tifni jamer sar, Mafnana Uwa Sanbagirmanaiserem etam-etama nemna kapkaiserem ga nes gemer wirtabaipmini jes gemerserem, jamer ini nemna tabalbalsusfer nesege folbamini. Ane Mafnana Uwa Sanbagirmanaiserem nei ga nes Jei se gwebabili, jega nei Uwa Sanbagiri tefner ga nesa onsobana. Jei etam-etama nemna seyafter gemerserem nes galap wirtabaipminirim, jes galapserem Jei ibirimfer suruluserem nep ga nes golmini, ane nei ibirimfer gwelaiserem gwela jeiserem ga nes towaiwemini. Jeiserem jam aa galap etamwenaram, Uwa Sanbagiri Jei nei ga nes galap waakentababisini. ⁶ Yesus Kristus nei nes Jei waakentababisinirim, Jei mes terent enggalfe etam-etama nemna nes gam wirtabaipmif. Uwa Sanbagiri Jei Mafnana Jelemanaiserem nep nes mes golmini, aam temawer ini Jemna waakensusu aa jewer folbanaram. ⁷ Ane jega jem temawer Jei Mafnana Jemna nep nes mes golmini enggalfe, waakena Uwa Sanbagirmana seyafter gemerserem negama domolf. Ane enggalf mese nei negama towaswef nei waakenfer gwelaiserem jamer abak-abaksus nesa domolsa. Waakenfer gwela jeiserem Uwa Sanbagiri mesam bili nep golmife. Ane nei tousa nei gwela jeiserem jamer abak-abaksus nesa domolsa, aam temawer Uwa Sanbagiri ga nes enggam balbabili, "Ai etam-etama imna kapkaiserem isa Ames wirtabaabili." ⁸ Taterisi jeiserem ai ajes bilirim jeba bunaram. Jega jem temawer ai enggam ai gunu, Titus aamei taterisi jeiserem baabetfer is nasbili, jega enggalf angtane Uwa Sanbagiri aa jei ne tebanaram, bunar-bunarsusfer waakenaiserem jeter ga sene eyeipmini angtanefe. Taterisi jeiserem jeba waakenam, ane angtane seyafter samfer gam batobaabili. ⁹ Angtane taterisi ol kabwak aa jep gane nasbilirim daftar bwalesusu bosna asal-asalmanaiserem jem temawer, aamei taterisi ol kabwak jeiserem ijama nasbabiyen angtane jeiserem jebar. Ane angtane aa jep gangge doksobanaram taterisi ol kabwak Hukumu Nabi Musa aa jes tulistababilim jem temawer, aamei taterisi jeiserem jes mese ijama nasbiyen jebar. Ipsama nasbabilirim taterisi ol kabwak jeiserem, aam temawer seyafter jeiserem angtane jam ne batobaabiyen, je waakenyan. ¹⁰ Afa angtane taterisi nafsi aa jei gam nasbilirim taterisi nafsiserem Taterisi Waakenaiserem jewer, ane angtane Yesus aa jei ne tebanaram jei ga gangge syensyanwebili, aamei angtane jes galserem ga jam igam uftana taterisi kapka aa jes gam nasbilirim jewer. Afa jei jam tikweyan, gamjon igam uftana. Afa jei gemerje jam tikweyanaye, aamei gamjon jei igam bala enggame, "Aamei gamjon Taterisi Uwa Sanbagirmanaiserem ijam nasipmiyen angtanefe." ¹¹ Aamei jes is eyebili, aam temawer aamei tousa angtane jes galserem aa jei ne eyebilirim, jei mes ge irfwebili taterisi bunarsusfer aaiserem jewer, ane jei jeber-jeber etam-etama kapkaiserem ga jes ne eyebuwena. Jeiba tousam jei kapkaiserem ga jes ne eyebili, jengga jei jam ge tikwebiyen jeiserem jam eyebiliwer. Ga jem temawer Titus, aamei angtane taterisi nafsi aa jei gane nasbilirim, jei jam is balbabili jei angtane Yesus aa jei ne tebanaram gamjon jam ne towas-towastababiyen. ¹² Ai Artemas afa Tikikus, afelna jam as baftanaram imnibe, aamei amnip ga tatarfer ga is jela kota Nikopolis je, aam temawer ai enggam ai gunu ai jep nwinf arouwa uskambar jam se nyanwenaram ona wisimsimsusu jam aa jep falaram. Afa arouwa yo deye ja sene towainebanaram, ai ajam wofeyan. ¹³ Titus, aamei Senaso Apolos jam is batomini, jei jam sege sofnaram. Senas jeiba angtane hukum pemerintamana bunarsusfer aa jei towaswebilirim. Seyafter jam is eyebili, jega galgala seyafter jei aa jes ge balbabilirim jam damtabife gam sege damtabili. ¹⁴ Angtane Kristen nemnaiserem jebe ula ga waakenater is towas-towastabaipmini enggame: "Aamei awelna waakena tefner isa eyeipmini, angtane apgal jigala aa jei ge balbabilirim jam damtabife." Titus jeiserem is towas-towasulmini, jega angtane Kristen jei jam ge kwaalaamitswebiyen. ¹⁵ Angtane seyafter ai jebarserem jei is enggam ne balbabili, "Kelek, waakenfer sa nwin!" Aamei angtane jepmanaiserem nei nes jei ne nesiktababilirim, angtane taterisi Uwa Sanbagirmana aa jei ne taayibenerem nei gamserem, aamei angtane seyafter jeiserem ga enggam is balbabili, "Paulus ane jelem afelen mesna jei is enggam ne balbabili, ’Kelek, waakenfer sa nwin!’ " Ai sembayanga as gwebana Tuhan Yesus Kristus Jei waakena Jelemanaiserem ip is gase golmini aamei seyafter gemerserem.