Roma
11 Ga ip, am afelen mesna, kota Roma je. Surta aaiserem ga amniwer, Paulus. Ai awelna Yesus Kristusmana ajes gweyibene. Aiba Rasulsam, Uwa Sanbagiri Jei ams destabana enggalfe, ai Taterisi Waakena Jelemanaiserem agam nasibenenef. 2 Taterisi Waakena jeiserem, Uwa Sanbagiri Jei fwater mes nasipmil nabi-nabi Jelemanaiserem jebe, ane jei ga angtanefe ga jei ne nasipminenewel. Jei ga seyafter jeiserem ga aane tulistababil Taterisi Uwa Sanbagirmana jebe. 3 Taterisi jeiserem ga Tane Jelemanaiserem ga Jem temawer. Tane Jemna jeiserem ga Tuhan nemna Yesus Kristus. Jei jame aa galap surnuntum angtanefe, Jeiba asal-asala Raja Daudmana. 4 Jengga Mafnana Jelemanaiserem jei ga Mafnana Uwa Sanbagirmana galserem. Uwa Sanbagiri Yesus terewer jame aa galap irtestenantam, bunar-bunarsus Uwa Sanbagiri nebe nes enggam gwaarawulmini baabeta unggwandwasususerem jeme Yesus Kristus Jeiba Tane Jelemanaiserem. 5 Yesus Jei abe waakena Jelemanaiserem as mes gulbana, ane waakena Jemna jeiserem ai ga ajem temawer gwena Rasulfe, jega enggalf ai awelna Kristusmana agam gweyibef. Jei ai as enggalf destabana, ai Taterisi Waakena angtanefe agam nasipminennef ogiri seyafter gemerserem jebe, jega angtane jeiserem jei Yesus ga sene tebana, ane ga sene tikwebaatini. 6 Ane aamei mese kota Roma je ijeya nwinirim, aamei taterisi aaiserem ga jamer isa taabili, aam temawer Uwa Sanbagiri Jeime is mes destabaabili enggalfe, Yesus Kristusem angtanefe igama gwef. 7 Ai surta aaiserem ga ip tulistaipmini, aamei angtane Kristen kota Roma je ijeya nwinirim. Uwa Sanbagiri Jei ims nesiktababili, ane Jei aamei is mes destabaabili enggalfe Jelem angtanefe. Ai sembayanga as gwebabana Uwa Sanbagirfe, Uwa nemna, ane Tuhan Yesus Kristus mese, Jei waakena Jelemanaiserem ibe is ga sege golmini, ane Jei ini imna is sege gwebaipmini waakenfer is ga sege folbamini. 8 Nabal-nabalsusu ai is ajam towastababif enggalem temawer, ai Uwa Sanbagiri alemanaiserem im temawer ajes bala enggame, "O Uwa Sanbagiri, ase samfer gulbana bosna Yesus Kristusmanaiserem jeme, aam temawer angtane kota Roma je aa jei ge nwinbenerem jei Yesus mesam ne tebana. Ane angtane aa jei ge nwinbenennerem taman-tamna seyafter gemerserem ogiri aaiserem jebe, jei mesam ge towaswebili angtane Romamana jei Yesus mesam ne tebana. O Uwa Sanbagiri, ase samfer gulbana taterisi jeiserem jem temawer." 9 Uwa Sanbagiri Jei mes towaswena enggame, ai bunarsusfer ai nasowena jame agalap gutenaram enggame, "Ai aamei isa jeber-jeber agam sarbabistaabonwena, ai jeber-jeber Uwa Sanbagirfe sembayanga jam agam gwebanaram." Jeiba Uwa Sanbagirsam ai awelna Jemna gam gweyibenerem ini amna seyafter gemerserem jeme, ai Taterisi Waakena ai agalap nasbinennerem Tane Jemnaiserem Jem temawer. 10 Ai sembayanga Uwa Sanbagirfe jeber-jeber ai gwebabawena enggame, afa Jei as jase balaram, "Sya se gwi!", Jei ga nele gase dwotana. Ane abakferyan ai imnip ga as forna. 11 Ini amna ase unggwan-girsusem folbana ai ibar nejama dorwef enggalfe, ai ibe isa agam golmif apgal jigala Mafnana Uwa Sanbagirmana ap ajes gulbanaram. Apgal jigal jeiserem jei ga aamei is gase kanautababili. 12 Taterisi amna jeiserem jem igiserem ga enggam: Afa nei seyafter jasa nwinirim, nei nena ga jam nesa kanausonanna, aam temawer nei seyafter nei Yesus nemsa tebana. 13 Am afelen mesna, ai enggam ai gunu, aamei igama towaswef enggame, ai anesus ajamer mwangbisiwelabe ai safe imnip ajam sofwef. Ai Taterisi Waakena amsam nasipmini angtane nafsi ogiri aaiserem jebe, ane jega jem temawer waakenaiserem mes etamwemini jemnibe. Ane ai enggam ai gunu jemnip aa gemer etamwenaram, imnip jegme is gemer se etamwemini. Jengga nele ase jam ne isinbaabisnenewena jamer namwer aas jepserem. 14 Awelna ai ajes gwebiliserem ga aas, ai angtane seyaftersus as batobaabinenne. Ai as batobaabinenne angtane kotanap aa jei ge nwinbenerem, ane angtane kotana bijauwer aa jei ge nwinbenerem; angtane unggwanfer aa jei ge towaswenaram, ane angtane jam towasweyeneiserem jes mese. Ai seyafter as batobaabinenne. 15 Jega jem temawer, ini amna ase unggwan-girsusem folbana enggalfe, ai Taterisi Waakena ip mese is agam nasipmif, aamei Roma je ijeya nwinirim. 16 Ai ajam sefersweyan Taterisi Waakena jam nasbinenelebe, aam temawer Taterisi Waakena jeiserem jeba baabetsusum. Angtane seyafter gemerserem Taterisi Waakena aa jei ne taabilirim, Uwa Sanbagiri Jei angtane jeiserem se waakentababisini, nabal-nabalsusu ga angtane Yahudimana, ane gamjon ga angtane Yahudimanyanaiserem. 17 Taterisi Waakena nei ga nes enggam towas-towastababili, angtane Uwa Sanbagiri jam aa jep gam tebanaram, Uwa Sanbagiri Jei angtane jeiserem enggame gam balbabili, "Ini imna waakena, aam temawer aamei Ai As ijewera tebanaram." Nele nafsiserem fasfasus enggalfe, nei Uwa Sanbagirfar waakenfer Jebar nejama gwefe. Mesam tulisul Taterisi Uwa Sanbagirmana jebe ga enggam: "Angtane Uwa Sanbagiri aa jei gam tebanaram, Uwa Sanbagiri Jei enggam gam gunu, ’Angtane jeiserem jemna ini waakena.’, ane angtane jeiserem jei gwela ibirmi gam domola Uwa Sanbagirfer jam gwefe." (Habakuk 2:4) 18 Uwa Sanbagiri taman waaken-giribe Jei kakala Jemna sege saamisini angtanefe, ane Jei gase tamtamtababili angtane Uwa Sanbagiri jam ne erebeyeneiserem, ane etam-etama kapka unggwanfer jeber-jeber aa jei ne eyebuwenaram. Angtane jeiserem jei seyafter bunarsusferaiserem mes ne aftabunnu, jam ne sarbabistaabonyan, aam temawer jei etam-etama kapkaiserem jes ne eyebili. Ane jei gamjon angtane nafsiserem jes ne wartababili Uwa Sanbagiri jam tikwebaatiliwer. 19 Uwa Sanbagiri se tamtamtababili jei, aam temawer angtane jeiserem samfer ga sege towaswebili Uwa Sanbagiri Jei nansa. Jei jeiserem mesam gwerauwulmini angtane seyafter jeiserem jebe. Jengga angtane jeiserem jei seyafter waakena jeiserem mes ne aftabunnu. 20 Gwanan-gwanansus jes galapserem Uwa Sanbagiri Jei ogiri aaiserem jam aa galap eyebalam jamere namwer aas jepserem, angtane jei samfer gane damtabili Uwa Sanbagiri seyaftersus aa jes eyebaabilirim. Ane jega jem temawer jeime samfer gangge towaswebili Uwa Sanbagirem temawer jam ne damtayanaiserem. Jei ga sege towaswebili enggame, Jeiba Uwa Sanbagiri bunarsusfer aaiserem ba Jesam, ane baabeta Jemna ga jamer se folbana jamer abak-abaksus. Jega jem temawer, jei jam ge gubiyen enggame, "Ai ajama towasweyan Uwa Sanbagirem temawer." 21 Jei tousa Uwa Sanbagirem temawer, jengga jei Uwa Sanbagiri enggam jam ne balyan, "Aamei bunarsusfer ba Uwa Sanbagirsam." Ane jei enggam jam ne balyan, "Uwa Sanbagiri, ase samfer golmini." Jengga enggam, jemna duka mes ge etamwebaipmini igi fas, ane ini jemna mes ge gwin-gwinswebaipmini. 22 Jei jelem inibe enggam ge gubili, "Ai unggwanfer amesa towaswena.", jengga fas, jei seyafter jeiserem jam ne towaswebiyen. 23 Jei Uwa Sanbagiri gamjon jam ne pujiteyen, Uwa Sanbagiri nafa uskambarsus jam Jemanserem, ane abak-abaksusfer Jei aa Jei gwenaram. Jei Uwa Sanbagiri jeiserem jam ne pujiteyen, jengga jei tiborma jam ne kwirtabaabiliserem patunga galserem jam gweyanaiserem, ga jes ne pujitababili. Tiborma jam kwirtabaabiliserem jemna numu ga nafis-nafsi ga enggala: angtane numu galserem, ju numu galserem, twen numu galserem, ane matikwam numu galserem. 24 Ga jem temawer, Uwa Sanbagiri Jei angtane jeiserem ga jewer mirtebitefala, jepga seyafter kapkaiserem ini jemna unggwan-giri ga jep ge folbamini jam ne eyebife, seyafter kapka jeiserem angtane mes ne isinbaabisnenne. Etam-etama kapka jei jen jener aa jes ne eyebuwenaram jelem tifinime, jeiserem je kabwaksusu. 25 Taterisi bunarsusfer aaiserem Uwa Sanbagirem temawer jei mes ne firulniwili, jepga taterisi afaf-afafaiserem ga aane taabili. Ane jei apgal jigala Uwa Sanbagiri aa jes eyebaabilim jei jetefener ga aane pujitababili. Jengga jei Uwa Sanbagiri jam ne pujiteyen, Uwa Sanbagiri apgal jigala seyafter aa jes eyebaabilim. Uwa Sanbagiri Jeiba angtane jes ne pujiteleiserem jamer abak-abaksus! Amin. 26 Jega jem temawer, Uwa Sanbagiri Jei angtane jeiserem ga jewer mirtebitefala, ane jega jem temawer seyafter kapkaiserem ini jemna unggwan-giri jep ga aa ge folbamini jam eyebife, jei seyafter kapka jeiserem ga aane eyebili. Jei etam-etama maaryena aas galserem ga gala gane eyebili: Wini jei ini jemna gamjon jam ge folbamiyen anggwana jelemanaiserem jemnibe, jengga ini jemna jei wi boseneminipfener ge folbamini enggalfe wibosnabar gam ge gwef wi anggwa gamserem. 27 Anggwana jegme gemer, anggwa jei ini jemna gamjon jam ge folbamiyen wini jelemanaiserem jemnibe, jengga ini jemna uskambarsus ga anggwa boseneminipfener gam ge folbamini enggalfe anggwa bosenabar gam ge gwef wi anggwa gamserem. Angtane safe jam gangge seferswebili etam-etama jes galserem jem temawer, jengga angtane jeiserem jei etam-etama jes galserem jeber-jeber gane eyebuwena. Jega jem temawer jei fwaina jemna kapkaiserem sene domolsa. 28 Angtane jeiserem gamjon jam guyon jelem inibe Uwa Sanbagirem temawer, ane jei bai Uwa Sanbagiri jam ne damdamtaasife. Jega jem temawer Uwa Sanbagiri Jei angtane jeiserem ga mirtebitefala, ane jewer ga jei kapkaiserem seyafter ga aane eyebili jelem inibe aa jes ne bilirim. Ane jei ga jes ne eyebili, angtane jam ne eyebiyeneiserem. 29 Angtane jeiserem jei etam-etama kabwaksusu seyafter gemerserem ga jes ne eyebuwena. Ini jemna unggwan-girem gangge folbamini enggalfe galgala unggwanfer jam ne damtabif. Jei angtane nensa jam gane uskamswebabili jelem inibe. Jei angtane jam gane munbobili. Jei gangge erebana. Jei angtane jam gane afaf-afaftababuwena. Jei taterisi kapka tefner jeber-jeber gane bili jelem inibe angtane nafsiserem jem temawer. Jei ol kabwak taterisi basyamer gane nasipmini angtane nafsiserem jem temawer. 30 Jei syefer gangge nasbawena angtane nafsiserem jem temawer. Angtane jeiserem jei Uwa Sanbagiri baif gane gwebana. Jei angtane nafsiber jam gangge nasbawenaram, ga ol dagamer gangge nasbawena. Jei jen jena gane tetenanna. Jei etam-etama kapkaiserem ibirmi jes gane bili jam eyebife. Jei taterisi ene jetamana jam ne saripmiyen. 31 Duka jemnaiserem jei igi fas. Jei aa jes ne bilipminirim, jeiserem jei jam ne eyebiyen. Jei angtane nafsiserem jebe waakenaiserem jam ne eyeipmiyen, ane jei angtane nafsiserem jam ne nesiktababiyen. 32 Jei mes ge towaswebili enggame, Uwa Sanbagiri Jei enggam gunu, angtane etam-etama kapka jeiserem aa jei gane gwebilirim, Uwa Sanbagiri Jei angtane jeiserem se tamtamtababisi jamer futu. Safe gam, jei jeber-jeber etam-etama kapka jeiserem ga jes gane eyebuwena, ane jei angtane nafsiserem jes mese gane bala, "Aamei mese igme kapkaiserem imes eyebili. Je samfer, nei seyafter jeiserem ganma eyebi."
21 Am afelen mesna, ga enggam, angtane im nenennap afa ke fas enggam aa jei gam gutenaram, "Angtane nafsi jeiserem jei etam-etama kapkaiserem mes ne eyebili, ane Uwa Sanbagiri jei se tamtamtababili."? Jei angtane nensa afa gam jam gam balaram, gam jega nunu Uwa Sanbagiri aa jem gusurum angtane waakenayo afa kapka, angtane jeiserem angtane nensa aa jei gam balaram enggame etam-etamabara, jei jena enggam jam balyan, "Ai etam-etama kapkaiserem ajam eyebiyen.", aam temawer aamei mese, aamei seyafter etam-etama jes galserem igama eyebili. Aamei angtane nafsi jeiserem jem temawer enggam igalaba balbabilirim, "Angtane nafsi jeiserem jei etam-etama kapkaiserem mes ne eyebili, ane Uwa Sanbagiri jei se tamtamtababili.", jeiserem jeba aas galserem, aamei mese Uwa Sanbagiri is tamtamtababili, aam temawer aameime etam-etama kapkaiserem igama eyebili jei gemerserem. 2 Nei tousa enggame Uwa Sanbagiri Jei bunarsusferaiserem ga jes eyebili, Jei angtane etam-etama aa jei ne eyebunaram aa galap balbabilirim, "Aamei kapkaiserem ijesa eyebili, ane aamei tamtama jamer isa domola." 3 Am afelen mesna, aamei enggam ima gunu, "Angtane nafsiserem jei etam-etama kapkaiserem mes ne eyebili, ane Uwa Sanbagiri jei se tamtamtababili." Jengga aamei mese etam-etama kapka jeiserem ga ima eyebili. Aamke ilem inibe ke enggam ima gunu, "Kapkaiserem amnibe as jam etamwemiyen."? 4 Uwa Sanbagiri Jei waakensusu ibe is mes eyeipmini, ane Jei abakfer is mes fibabili, jega aamei nele kapkaiserem jewer gam isa irfwetna. Jei tamtamtala tatarfer ibe is Jam golmiyen etam-etama kapkaiserem ilemana jem temawer. Jengga aamke enggam im gunu ilem inibe jeiserem ke igyena? Aamei engbar afa ijama towaswebiyen, Uwa Sanbagiri Jei waakena ibe is mes eyeipmini, jega aamei ga etam-etama ilemanaiserem jewer gam isa irfwetna. 5 Jengga aamei ijama kankanauswena, ane aamei bai nele kapkaiserem jewer ijama irfwenafe. Ane Uwa Sanbagiri waakenaiserem jeber-jeber aa Jei eyebuwenaram, nunu umwef jemserem Jei angtane aa jem waksosisirim, nunu jeiserem Jei jepga kakala Jemna gase gwerauwulsu, ane aamei ga tamtamtala unggwandwasususerem ga isa domolsa nunu jeiserem jeme. 6 Uwa Sanbagiri Jei fwaina daamfen-daamfenneme gase kitulmisi angtane seyafter gemerserem jebe, awelna jena jenjen aa gemer ne gwebinennerem. 7 Angtane afweraiserem jei jeber-jeber waakena tefner gane eyebili. Jei jeiserem ga gemer gane eyebili, jega jei ga sege sarbili Uwa Sanbagiri enggam aa jes balbabilirim, "Aamei waakenaiserem ga ijesa eyebili, ane aamei Abar abakfer gam isa nwini tampata nafabaraiserem jebe." Uwa Sanbagiri Jei waakenfer gwelaiserem jamer abak-abaksus Jei angtane jeiserem jep se golmisi. 8 Ane angtane afweraiserem jei jelem temawenefener gane eyebili. Jei bai taterisi bunarsusfer aaiserem jam ne sarbisife. Jei nele kapkaiserem ga jetefener ne onsobana. Uwa Sanbagiri Jei angtane jes galserem Jei se tamtamtababisi. 9 Angtane seyafter kapkaiserem aa jei gane eyebilirim, jei ga kabwaktalaiserem ga uskambarsus gane domola, nabal-nabalsusu ga angtane Yahudimana ane gamjon angtane Yahudimanyan. 10 Jengga angtane waakena tefner aa jei gane eyebilirim, Uwa Sanbagiri Jei gase balbabili, "Aamei waakenaiserem ijesa eyebili. Aamei Abar nesa nwini tampata Alemana nafabaraiserem jebe. Ane ini imnaiserem waakenfer is ga sege folbamini." Jeiserem gase etamwesa nabal-nabalsus ga angtane Yahudimanaiserem, ane gamjon angtane Yahudimanyanaiserem, jes mese. 11 Jeiserem gase etamwesa angtane Yahudimanaiserem ane angtane Yahudimanyan jes mese, aam temawer Uwa Sanbagiri Jei mwongga daamfenna tefner gam girni angtane seyafter gemerserem jebe. 12 Angtane Yahudimanyanaiserem jei Hukumu Nabi Musa aa jes tulistababilim jei jam ne towaswebiyen, ane jei etam-etama kapkaiserem jam gane eyebili. Ane Uwa Sanbagiri Jei tamtamtala gase golmisi jebe, nunu umwef jemserem Uwa Sanbagiri angtane aa jem waksosisirim angtane waakenfer eyebiliserem ane kabwakfer eyebiliserem, jengga Uwa Sanbagiri Jei tamtamtala jep jam golmiyen Hukumu Nabi Musamana gemerserem. Angtane Yahudimana jei Hukumu Nabi Musa aa jes tulistababilim jei tousa, ane jeime etam-etama kapkaiserem jam gane eyebili. Jengga Uwa Sanbagiri Jei tamtamtala Jame aa galap golminirim jebe, Jei Hukumu Nabi Musamanaiserem jep aa gemer tulistaabilim jes gam golmini. 13 Angtane Hukumu Nabi Musa aa jes tulistababilim jei aa jei ne towaswebilirim, jengga jei Hukumu jeiserem jei waakenfer jam ne onsobiyen, Uwa Sanbagiri Jei enggam jam balbabiyen, "Ini jemna waakena." Jengga angtane Hukumu Nabi Musa aa jes tulistababilim aa jei ne towaswebilirim, ane jei Hukumu jeiserem jamer aa jei ne onsobilirim, Uwa Sanbagiri Jei angtane jeiserem ga jetefener balbabili enggame, "Ini jemna waakena." 14 - 15 Angtane Yahudimanyanaiserem jei Hukumu Nabi Musa aa jes tulistababilim jam ne towaswebiyen. Jengga jei afa jafner gane eyebilirim Hukumu jeiserem jebe aa gemer gam gunurum, nei ga enggam neya towaswena Uwa Sanbagiri Jei Hukumu Jelemanaiserem Jei Jener bokolmini jelem inibe. Nei gamjon ga enggam neya towaswena, Uwa Sanbagiri Jei Hukumu Jelemanaiserem Jei Jener bokolmini jelem inibe, aam temawer jei jelem inibe jener ge gubili, "Aas jepserem ai waakena gam eyebili, ane gamjon jes jepserem ai kapka gam eyebili." 16 Nunu Uwa Sanbagiri aa jem se gusurum angtane waakenayo afa kapka, Uwa Sanbagiri Jei angtane jeiserem jemna ini gase damtaipmisi, ane etam-etama jei aa jes ne gwebuwenaram jes mese. Ane Uwa Sanbagiri Jei Yesus mesam destabana enggam gam gufe, "Awelna imna waakena." afa "Awelna imna kapka." Ane Taterisi Waakena ai ajes nasbilirim, ga enggala taterisi jeiserem jes galserem. 17 Aamei enggam ijeya gunurum, "Aiba angtane Yahudimanam.", aamei ilem inip syefer ga enggam ima gunu, "Ai tousa Hukumu Nabi Musa aa jes tulistababilim, jega jem temawer ini Uwa Sanbagirmana amnibe gase saaser-saaserswebana." Gamjon aamei in ina syefer igama tetenanna, ga igama gutena, "Aiba tewe Uwa Sanbagiri aa jes destabaabilirim, ba jesam." 18 Aamei ilem inip ga enggam igama gunu, "Ai tousa Uwa Sanbagiri aa jes bilirim ai ajesa eyebife. Hukumu Nabi Musa aa jes tulistababilim jep ga asa towas-towasona, jega ai nele waakena jeiserem gam asa towaswebana." 19 - 20 Aamei gamjon syefer igama gutena, "Ai tousa Hukumu Nabi Musa aa jes tulistababilim, gam jega ai seyafter gemerserem ga asa towaswebabili. Ane seyafter ai ajesa balbabilirim jeiserem ba bunaram. Jega jem temawer ai ga angtane nwe kofaiserem ga ajama aftabifele. Ai angtane gwinibe aa jei ge nwinbenerem, jebe nafa ga asa golmini. Ai angtane teisyensususerem agma towas-towastababili, ane ai tantantane mese agma towas-towastababili." 21 Aamei angtane nensa igama towas-towastababili, jengga aamei taterisi jes igama towas-towasulminennerem aamei taterisi jeiserem ijama onsobiyen. Aamei angtane nensa enggam igama balbabili, "Komkoma ijama gwebiyen.", jengga aamei komkoma iner igama gwebili. 22 Aamei igama balbabili, "Aamei maaryena ijama gwebiyen.", jengga aamei maaryena iner igama gwebili. Aamei enggam igama balbabili, "Tiborma jam kwirtabaabili jeiserem, aamei tiborma jeiserem ijama pujitababiyen.", jengga aamei jena tiborma jeiserem aa jep ge falbitonom jep ga iner igama kautena, ane tiborma jeiserem ga igama komkomtababisini. 23 Aamei in ina syefer igama tetenanna, ga igama gutena, "Ai Hukumu Uwa Sanbagirmana amsama towaswebili." Jengga aamei Hukumu Jemna jeiserem ijama ayebinni. Jega jem temawer, angtane nafsi jei ga taterisi kapkaiserem ga aane nasbabili Uwa Sanbagirem temawer. 24 Tateris Uwa Sanbagirmanaiserem jep ga enggam baatultel: "Aamei kapkaiserem ga ijesa eyebili, jega jem temawer angtane Yahudimanyan jeiserem jei ga taterisi kapkaiserem Uwa Sanbagirem temawer ga aane nasbabili." 25 Aamei anggwana Yahudimana, aamei gwanan bastantouyabe galapserem, jes galapserem aamei ga is gane sunattababili, Hukumu Nabi Musa aa jes tulistababilim jep gemerserem. Afa aamei Hukumu Nabi Musa aa jes tulistababilim jam isa onsobilirim, jeba waakenam. Jengga afa aamei Hukumu Nabi Musamana jam isa ayebaabinirim, jeiserem ga aas galserem aamei ijam ne sunattababiyen. Ane aamei ga enggala angtane Uwa Sanbagirs damdamtaasiyeneiserem jes galserem. 26 Angtane Yahudimanyanaiserem jei teisyena Hukumu Nabi Musa aa jes tulistababilim, ane jei jam ne sunattababiyen. Jengga afa jei jener waakenaiserem jam gane eyebilirim aa jes tulistaabilim Hukumu Musamanaiserem jebe, gam jega Uwa Sanbagiri Jei ga angtane jeiserem gase balbabili enggame, "Jeiba angtane jam ne sunattababiliserem ba jesam. Jeiba angtane Amnam." 27 Aamei anggwana Yahudimana, aamei Hukumu Musamanaiserem imsa towaswebili ane aamei ga is gane sunattababili. Jengga afa aamei Hukumu jeiserem jam igama ayebaabinirim, angtane Yahudimanyan Hukumu jeiserem jam ne towaswebiyeneiserem, jei ga aa ge gubili, "Aamei kapkaiserem ga ijesa eyebili." Angtane Yahudimanyan jeiserem safe jam ne sunattababiyeneiserem, jengga jei Hukumu gemer gane onsobili. 28 Ga enggam, angtane Yahudimanaiserem bunarsusfer jei nansa? Gam ke angtane Yahudim anggwaburaminiwer suruluserem, ane jam ne sunattala? Wowo, jesyan. Angtane jeiserem bwenta gam domola aa jes gane domolbanaram. 29 Jengga angtane Yahudimana bunarsusferaiserem jei ga enggala: angtane Mafnana Uwa Sanbagirmana bwenta aa jep gam gulbanaram, jega enggalf angtane jeiserem jeiba Uwa Sanbagirmanam. Bwenta jeiserem jega inip, angtane jam ne domolyan. Hukumu Musa aa jes tulistaabilim bwenta inip jeiserem angtanefe jam golmiyen. Uwa Sanbagiri Jei gase gutena angtane bwenta jem inibe aa jei gam domolaram jem temawer, "Angtane jeiserem jeiba waakenam." Uwa Sanbagiri Jei gam gam gunu, jengga angtane jei jam guyon.
31 Jepga nesa tenna, "Angtane Yahudimana jei ke sege danabisini angtane Yahudimanyanaiserem jemniwer? Sunattalaiserem je ke waakena?" 2 Ngga, angtane Yahudimana jei sege danabisini angtane nafsiserem jemniwer. Gwanan-gwanansusfer ga enggam, Uwa Sanbagiri Jei taterisi Jelemanaiserem ga enggalf golmini angtane Yahudimanfe, jei taterisi jeiserem gam ne gerabisnenef. 3 Jengga angtane Yahudimana afweraiserem, jei taterisi jeiserem jam ne taabiyen. Safe gam, Uwa Sanbagiri Jei ke Jener kese eyebili Jei aa jes bilirim, afa fas? 4 Ngga, Jei se eyebili Jei aa jes bilirim. Angtane seyafter gemerserem jei safe taterisi afaf-afafaiserem jes gane nasbabili, jengga Uwa Sanbagiri Jei jeber-jeber taterisi bunarsusfer aaiserem ga jetefener gam nasbili. Taterisi Uwa Sanbagirmanaiserem jep ga enggam baatultel: "O Uwa Sanbagiri, Aamei Igalap gutenaram, angtane seyafter gemerserem jei ga Isene towaswebana enggame, Aamei taterisi bunarsusfer aaiserem ga Ijetefener nasbili. O Uwa Sanbagiri, afa angtane enggam Is jam sene balaram, ’Aamei kapkaiserem ga Ijes eyebili.’, afa angtane gam gangge gubili, Aamei ga kanaufer Is fina, ane angtane jei Is ga sene damtana enggame, Aamei waakena tefner Im eyebili." (Mazmur 51:4) 5 Jengga angtane afwer jei syefer ga enggam ge nasbananna, "Afa nei kapkaiserem jam negama eyebilirim, jeiserem ba waakenam, aam temawer nei kabwakfer nejewera eyebilirim, jeiserem ga jem gwerauwulu enggame, Uwa Sanbagiri Jei waakena tefner gam eyebili. Ane jega jem temawer, afa Uwa Sanbagiri nes jam se tamtamtababilirim nei kapkaiserem negalaba eyebilirim, gam jega Uwa Sanbagiri Jei kabwakfer gam eyebili." 6 Angtane jes galserem gam aa jei gam nasowenaram, jei syefer gam nasowena. Afa Uwa Sanbagiri Jei kabwakfer jam gam eyebilirim Jei angtane jam aa jep gam nasbabilirim, ane Jei angtane jeiserem ga gam tamtamtababili, gam jega Jei angtane ogirip aaiserem jem temawer Jam guyon enggame, "Jei waakena gane eyebili." afa "Jei kapka gane eyebili." 7 Gamjon, angtane afwer jeime syefer ga enggam gangge nasbananna, "Afa ai etam-etama kapka jam agam eyebili etam-etama aas galserem, angtane nensa jam agam afaftababili, jeiserem ba waakenam, aam temawer angtane gangge towaswebif enggame Uwa Sanbagiri Jei angtane jam afaftayan. Jei waakena tefner eyebili. Taterisi Jemnaiserem jeba bunaram. Ane jega jem temawer jei ga bosna Jemna ga sene gulbatena. Ga jem temawer, Uwa Sanbagiri Jei enggam Jei baf gunu ai angtane kapka, ane Jei ams tamtamtana?" 8 Angtane jei taterisi jeiserem afaf-afafaiserem ga jes ne nasbabili. Jeime gamjon enggame syefer gangge nasbananna, "Afa nei kapkaiserem jam nesa eyebilirim, angtane ga sege towaswebili enggame Uwa Sanbagiri aa jes eyebilirim jeba waakenam. Gam jega, au, nei kapkaiserem ganma eyebi!" Angtane afweraiserem jei syefer ga gam ge nasbawena am temawer. Jei mesam gunu, "Paulus jeime enggam gunu, ’Au, nei etam-etama kapka ganma eyebi, jega waakenaiserem gase etamwena.’ " Jengga jes gamserem jei gam aa jewer ne nasbabilirim, taterisi jemna jeiserem ba ol kabwaksam. Angtane jes galserem Uwa Sanbagiri Jei se balbabili enggame, "Aamei kapka, ane Ai isAs tamtamtababili." Afa Uwa Sanbagiri Jei gam jas eyebilirim, jeiserem ba waakenam. 9 Jepga nesa tenna, "Angtane Yahudimana jei ke sege danabisini angtane Yahudimanyanaiserem jemniwer?" Fasfasus! Ai ibe is amesam gwerauwulminint enggame, angtane seyafter gemerserem, angtane Yahudimana ane angtane Yahudimanyan, jei seyafter etam-etama kapka mes ne eyebili. 10 Taterisi Uwa Sanbagirmana jep ga enggam baatultel: "Angtane fas afa bunarsusferaiserem jam eyebiyen. 11 Angtane afa fas Uwa Sanbagiri waakenfer jam sarbasiyen, ane angtane afa fas Uwa Sanbagiri jam terelbiyen. 12 Angtane seyafter gemerserem jei jen jena mes ne bijausona Uwa Sanbagirminiwer, ane jei seyafter mes ge mumalwebili. Angtane afa fas waakenaiserem jam eyebiyen, angtane afa fasfasus! 13 Botona jemna ga enggam gam ge falipmini, bitisi angtane futunu aa jep gam falitonom, jem mwona jam motolsiyen gamserem. Taterisi afaf-afafaiserem ga maflama jemnaiserem jewer gangge toyipmitiwetya, ane taterisi kapkaiserem ga mifi jemnaiserem jewer gangge toyipmitiwetya, awasa is gemer gam jerbenerem jemna aanggesa gamserem. 14 Aarema jemna ga taterisi angtane jem babapsobalaiserem ga jem ge bugufswebamini. 15 Jei ga tatarfer gangge nunggirbifele enggalfe, angtane nafsiserem jewer gam munbof. 16 Jei tampata aa jewer gangge sofwebilirim, jei kabwaksususerem angtane nafsiserem jep ga jes gane eyeipmini. 17 Jei teisyena nele waakenfer gwefe angtane nafsiserem jebar. 18 Ane jei Uwa Sanbagiri jam ne erebeyen." 19 Nemsama towaswena enggame, angtane seyafter gemerserem Hukumu Uwa Sanbagirmana jem gwonap aa jei ge nwinbenerem, angtane jeiserem jei hukumu seyafter gemerserem ga jamer sene onsobili, hukumu seyafter Taterisi Uwa Sanbagirmana jebe aa gemer tulistababilim. Jega jem temawer, nunu umwef jemserem Uwa Sanbagiri angtane aa jem waksosisirim, angtane afa fas enggam jam guteyan, "Ai etam-etama kapka afa ajam eyebiyen." Angtane seyafter ogirip aaiserem se gweretababisi enggame, jei etam-etamabara Uwa Sanbagirem danggonawer. 20 Uwa Sanbagiri Jei enggam Jam guyon angtanem temawer, "Angtane jeiserem jei Hukumu Amnaiserem ga jes ne onsobili, ane angtane jeiserem jem temawer ini jemna waakena." Jes gamserem gamyan. Jengga nei Taterisi Uwa Sanbagirmana jam jep negama gerabistenaram, jepga negama towaswena nei etam-etama kapkaiserem nemsa eyebili. 21 Jengga namwer Uwa Sanbagiri Jei nele nes mes destabaamini, jega Jei angtane ga gam bala, "Ini imna waakena." Nabi Musa ane nabi nafsi jeime jeter ne tulistaabil nele jeiserem jem temawer. Jengga nele jeiserem jeke enggalf Hukumu Uwa Sanbagirmana tefner onsobif. 22 Uwa Sanbagiri ga enggam gunu, "Ini angtanemana waakena, jei jame Yesus Kristus aa jep gam tebanaram." Nele jeiserem jeba daamfennam angtane seyafter gemerserem jebe, enggamyan afwer jei nele aas gane onsobana, ane afwer nele jes gane onsobana. 23 Nei seyafter etam-etama kapkaiserem nemsa eyebili, ane jega jem temawer nei ne bijaufera nwini Uwa Sanbagirminiwer, ane nafa Jemnaiserem jewer. 24 Jengga Uwa Sanbagiri Jei waakena Jelemanaiserem nes mes golmini nebe, ane Jei ga gunu, "Ini imna waakena." Jei gam aa jewer gunurum, aam temawer Kristus Yesus etam-etama kapka nemnaiserem Jei nes mes wirtabaipmini. Jei game aa jewer nasbilirim, jeke enggalf fwaina nebe nes gam golmif nei nejesa eyebilirim jem temawer. Fas gamyan. 25 Uwa Sanbagiri Jei Yesus mes baftannunt enggalfe, Jei etam-etama kapka nemna gam wirtabaipmif. Angtane Yesus aa jei ne tebanaram, jemna etam-etama kapkaiserem mes wirtabaipmini aawisi Yesusmanaiserem jeme. Uwa Sanbagiri Jei Yesus mes baftannunt enggalfe, Jei angtanef gam gwerauwulmif enggame Uwa Sanbagiri Jei bunarsusferam eyebili. Gwanan jes galapserem Yesus nalefe Jam teryen ti salibibe, Uwa Sanbagiri angtanefe mes gwerauwulmil enggame Jei bunarsusfeneram eyebili: Angtane safe etam-etama kapka jei mes ne eyebili, jengga Uwa Sanbagiri Jei jafner fina, Jei angtane jeiserem jam tamtamtababiyen. 26 Ane namwer aas jepserem jep mese, Uwa Sanbagiri Jei angtanefe ga aa gwerauwulmini enggame Jei jeber-jeber bunarsusferam eyebili, aam temawer Jei Yesus mes baftannunt enggalfe Jei gam tamtamtaf angtane etam-etamabara jem temawer. Uwa Sanbagiri jewer nep nes mes gwerauwulmini enggame Jeiba waaken-waakensusum, ane ba bunaram. Ane Uwa Sanbagiri Jei angtane Yesus aa jei gam tebanaram enggam gam bala, "Aamei Abar nei mes ne waakenswena." 27 Ga jem temawer angtane afa fas jena jam gaartenanala. Ini angtanemana waakenyan, aam temawer jei jetefener ne onsobili Hukumu Uwa Sanbagirmana aa gam tulistaabilim. Fas gamyan. Jengga ini angtanemana waakena, aam temawer jei Yesus mes tebana. 28 Ai gamjon isa jeter nasipmini. Ini angtanemana waakena, aam temawer jei Yesuster tebana, enggamyan jei jeter ne onsobili Hukumu Uwa Sanbagirmana aa gam tulistaabilim. 29 - 30 Uwa Sanbagiri Jeiba daamfennam; Jeiba Uwa Sanbagiri angtane Yahudimana, ane Jeime Uwa Sanbagiri angtane Yahudimanyan. Uwa Sanbagiri Jei safna naura jeiserem ga enggam balbabili, "Ini imna waakena, aamei Yesus igalaba tebanaram." 31 Fomfoma, nei Hukumu Uwa Sanbagirmana ke nesa kiswebili, aam temawer ne Yesustera tebana? Jeiserem fasfasus! Afa nei Yesuster sa tebana, nei Hukumu Uwa Sanbagirmana waakenfer ga negama onsobili.
41 Au, nei asal-asala nemna Abraham jem temawer ganma nasowe! Jemnip je bai etamwel? 2 Uwa Sanbagiri Jei nele Jam dwotayan, jega Abraham Jebar waakenfer gam ge gwefe, aam temawer Abraham waakena gam eyebil. Afa gameye, gam jega Abraham jei jen jena gam gaartena, jei waakenaiserem aa jewer eyebilim jem temawer. Jengga jei Uwa Sanbagirem tarnabe jen jena jam gaarteyan. 3 Taterisi Uwa Sanbagirmanaiserem jep ga enggam baatultel Abrahamem temawer: "Abraham jei Uwa Sanbagiri tefner gam tebana. Jega jem temawer, Uwa Sanbagiri Jei Abraham gam bala, ’Ini imna waakena.’ " (Kejadian 15:6) 4 Afa angtane jei awelnap jam gam gwenaram, jei fwainfe doini gam tebana. Angtane jeiserem jei jelem inibe enggam jam guyon, "Doini aaiserem jeba berensam." Jengga jei jelem inip ga enggam gam gunu, "Doini aaiserem ba amnam, ai awelna ajewer gwebilirim, ga jem fwaina." 5 Jengga afa Uwa Sanbagiri Jei angtanem temawer enggam gam gunurum ini jemna waakena, jeiserem awelna jei aa jes gam gwebilirim jem fwayenyan, jeiserem je berna Uwa Sanbagirminiwer. Afa nei awelnap nejama gweyanaye enggalfe Uwa Sanbagiri Jei nei nes gam waakentababisife, jengga nei Uwa Sanbagiri tefner negama tebana, gam jega Uwa Sanbagiri Jei nei nes enggam gam balbabili ini nemna waakena, nei safe etam-etama jam negama eyebili. 6 Ane Raja Daud jegme enggammer gutel, ini angtanemana jei saaser-saaserfer gam folbana afa Uwa Sanbagiri Jei angtane jeiserem enggam jam gam balaram, ini jemna waakena. Uwa Sanbagiri Jei awelna tefner jam domolyan, awelna angtane aa jes gane eyebilirim. Raja Daud jei ga enggam tulistaabil: 7 "Ini angtanemana waakenfer gam folbana, afa Uwa Sanbagiri etam-etama kapka jemna jam gam wirulbonorom. 8 Ini angtanemana waakenfer gam folbana, aam temawer etam-etama kapka jemna Tuhan jam tulisulboyono." (Mazmur 32:1-2) 9 Raja Daud jei angtane ini saaser-saasera jemanserem ga jem temawer tulistababil. Ini saaser-saasera jeiserem jei angtane Yahudimana aa jes ne sunattababisinirim jepfeneryan, jengga angtane jam ne sunattababisiyeneiserem jep mese. Ai amsama gunu enggame, Abraham jei Uwa Sanbagiri waakenfer tebana, jega jem temawer Uwa Sanbagiri jei Abraham ga bal, "Ini imna waakena." 10 - 11 Jeiserem jei fonggalabar etamwel? Jeiserem ke Abraham nalef jam ne sunattayan, afa maa? Jeiserem jei nalef jam ne sunattayan. Abraham jei Uwa Sanbagiri ga tebana, jepga Uwa Sanbagiri jei Abraham ga bal, "Ini imna waakena." Jei jepga bwenta galserem ga aane sunattana. Jega jem temawer, Abraham jeiba asal-asala angtane seyafter gemerserem jam sunattababiyeneiserem, ane Uwa Sanbagiri aa jei ne tebanaram jes mese. Angtane jeiserem jebe Uwa Sanbagiri Jei gam balbabili, "Ini imna waakena." 12 Ane jeime asal-asala angtane aa jes ne sunattababilirim. Jeiba asal-asala jemna galserem, aam temawer jeiba mesam sunattababili, ane aam temawer jeime Abraham gemerserem jei Uwa Sanbagiri jamer ne tebana. Abraham mese jegme Uwa Sanbagiri tefner tebana jei nalefe jam ne sunattayan. 13 Uwa Sanbagiri Abraham enggam bal, "Ai ogiri aaiserem ip isAs gerbana, ane asal-asala imnaiserem jes mese." Jengga Abraham jei Hukumu Uwa Sanbagirmana jam onsobiyen enggalfe, jei jam domolfe Uwa Sanbagiri aa jes bilibenerem. Abraham jei Uwa Sanbagiri tefner tebal, jepga Uwa Sanbagiri Jei Abraham ga bal, "Ini imna waakena." Abraham jes taabil Uwa Sanbagiri aa jes bilibenerem, aam temawer jei Uwa Sanbagiri waakenfer tebal. 14 Afa Uwa Sanbagiri Jei apgal jigala aa jes bilipmilim jam se golminirim, angtane Hukumu Uwa Sanbagirmana aa jei ne onsobilirim jebe, gam jega nei Uwa Sanbagiri Jei ne bafa tebana? Gam jega Uwa Sanbagiri Abrahamfe aa jes bilibenerem, jei jemna igi fas. 15 Jeje bafa jemna igi fas? Jeiserem ga aam temawer fasfasus, angtane Hukumu Uwa Sanbagirmana seyafter gemerserem afa jam onsobiyen. Ane Uwa Sanbagiri jei angtane seyafter gemerserem Hukumu aa jei ne ayebilirim, ga jes nasbabili. Afa Hukumu Uwa Sanbagirmana jeiserem fasaye, gam jega angtane jei teisyena Hukumu jeiserem jam ne ayebife. 16 Gamjon ga enggam, nei taterisi Uwa Sanbagiri aa jes bilim jeiserem negalaba taabilirim, jepga nei ga nesa domola jei aa jes bilim. Uwa Sanbagiri Jei nebe waakena tefner nes mes eyeipmini, ane waakena Jelemanaiserem nep ga nes golmini. Jega jem temawer, asal-asala Abrahammana seyafter gemerserem, jei bunarsusfer ga sene domolsa Uwa Sanbagiri aa jes bilim. Angtane seyafter jeiserem ga safna naura; angtane afwer jei Hukumu Musamana aa jei ne domolaram, ane angtane afwer jei Uwa Sanbagiri aa jei ne tebanaram, Abraham jei Uwa Sanbagiri aa gam tebalam jes gamserem. Jeiba asal-asala nemnam nei seyafter gemerserem. 17 Taterisi Uwa Sanbagirmanaiserem jep ga enggam baatultel, "Anggwabura unggwanfer gemerserem jei aamei ga isene bala, ’Abraham, aameiba uwa amnam.’ " Gam jega Abraham nem uwaf ga jei gwena Uwa Sanbagirem nwenabe. Aaiserem ba Uwa Sanbagirsam Abraham aa jes tebalam. Jeiba Jesam angtane terewer aa jei gam irtenerem, ane Jei jamfener gam gutena, apgal jigala ga gam etamwena. 18 Nele jes galapserem, Abraham jei jafner fyal gam domolf Uwa Sanbagiri aa jes bilibenerem, aam temawer nele nafsi fas jei gam etamwefe Uwa Sanbagiri aa jes bilibenerem. Abraham ga gul, "Uwa Sanbagiri aa jes bilirim, galap ga jese etamwena." Jega jem temawer anggwabura unggwanfer gemerserem Abraham ga enggam gane bala, "Aameiba uwa amnam." Uwa Sanbagiri Jei fwater Abraham mesam bal, "Asal-asala imna jamer unggwanfersus." 19 Abraham umuru jemna ga amkom 100 tahun. Baabeta jemna amkom fom barwebala, angtane fom tere gamserem. Ane Sara mese mes bakswena, ane mes ne fwaibil. Abraham jei ga ula jeiserem ga jes bil jelem inibe, jengga jei Uwa Sanbagirter tebal, ane kanaufer fyal. 20 Jei Uwa Sanbagiri jamer tebasil, ane ini jemna jam jenbayan taterisi Uwa Sanbagiri jep aa jes bilibenerem jem temawer. Itana jemnaiserem Uwa Sanbagiri ga jem tebasil ginggitfer, ane jei ga Uwa Sanbagiri tefner pujitel. 21 Ane jei mes towaswel enggame, baabeta Uwa Sanbagirmanaiserem se eyebili jep aa jes bilibenerem. 22 Uwa Sanbagiri Jei Abraham gam bal ini jemna waakena, aam temawer Abraham jei Uwa Sanbagiri tefner tebal. 23 Taterisi jeiserem, "Jei Abraham gam bal ini jemna waakena.", jeiserem gam ke Abrahamfener tulisulbol. 24 Wowo, jengga nep mese. Nei mese nei Uwa Sanbagiri nejeya tebanaram, Uwa Sanbagiri Tuhan Yesus nemna aa jei irtestenantam terewer. Ane Uwa Sanbagiri Jei nei nese balbabili enggame, "Ini imna waakena." 25 Yesus Jei mes ne gaar enggalfe, jewer gam ne munbof etam-etama nemnaiserem jem temawer. Jepga Uwa Sanbagiri Jei Yesus gamjon ga irtestenant, jega Jei enggam ga nes balbabili, "Ini imna waakena."
51 Uwa Sanbagiri Jei nem temawer mesam gunu enggame ini nemna waakena, aam temawer nei Uwa Sanbagiri nemsa tebana. Ane nei Uwa Sanbagirfar daamfennaber nesa gwena, aam temawer Tuhan nemna Yesus Kristus Jei mes tere nem temawer. 2 Nei Jei nemsa tebana, ane Jei ga eyebili jega nei samfer jeber-jeber nejewera towaswebif enggame Uwa Sanbagiri Jei waakena Jelemanaiserem nep nes mes golmini, ane waakena jeiserem nei ga nemsa taabili. Ane ini nemna bunarfersus saaser-saasera, aam temawer nei nemsa towaswebili galap Uwa Sanbagirfar nesa nwini nafa Jemnaiserem jebe, ane nei ga jes nesa fibili. 3 Ini neman jegme nese saaser-saaserfer gangge folbamini nei tamtamtala jam jep negama domolaram. Afa nei tamtamtala jam negama domolaram, nei ga negama towaswena enggame galap nei kanaufer nesa fina. 4 Afa nei kanaufer jam negama finaram tamtamtala jeiserem, gam jega nei ga negama towaswena nei Uwa Sanbagiri waakenfersus nesa tebana. Ane nei nunu jeiserem ga nemsa fiyibene, nunu nei nejeba nwinfe nafa Uwa Sanbagirmanaiserem jebe. 5 Nei ke nunu jeiserem nei jetefenera fiyibene, jengga nesa domolsa nunu jeiserem. Nunu jeiserem nesa domolsa, aam temawer Uwa Sanbagiri Jei Mafnana Jemnaiserem nes mes golmini, ane Mafnana Uwa Sanbagirmanaiserem Jei nebe nese gweraulmini enggame, Uwa Sanbagiri Jei nes nesiktababili unggwanfersus. 6 Ane ga enggam, nunu Uwa Sanbagiri Jena aa jes bilim, ane nei baabetyansusu jepserem, Kristus Jei etam-etama nemnaiserem jem temawer tere. 7 Daran-daransusu angtane jam terfe angtane nafsiserem jem temawer, safe angtane jeiserem jei bunarsusfer gam eyebili. Jengga angtane engbar afa ke enggam ke gam gunu, "Samfer, ai as tere angtane waakenaiserem jep." 8 Jengga Uwa Sanbagiri Jei nes mes ge saamisini enggame, Jei bunar-bunarsus nems nesiktababili. Jei jeiserem ga enggalap ge sana, nei etam-etamabar gemer negalaba gwenaram, Kristus Jei nem temawer ga tere. 9 Uwa Sanbagiri Jeiba mesam gunu enggame ini nemna waakena, aam temawer Yesus Jei mes tere ti salibibe. Ane jega jem temawer nei bunarsusfer nemsa towaswena enggame Kristus Jei nes waakentababisini, ane kakala Uwa Sanbagirmanaiserem nejama domolbayan. 10 Gwanan nei Uwa Sanbagirem ginanggwa. Jengga Tane Jemna jam aa galap tererem nem temawer, jewer jon ga nei ga nei etamwena Jem afelenfe. Afa ga gam jes gemerserem, gam jega nei nemsa towaswebili bunar-bunarsus enggame, Tane Jemna mes irwena, ane Jei seyafter nebar neya gwena. Ane Uwa Sanbagiri Jei nes batobaabili. 11 Ane aas mese, ini nemna nes saaser-saasersusfer ge folbamini nei Uwa Sanbagiri nejewera damdamtaasinirim, aam temawer Tuhan nemna Yesus Kristus Jei mes eyebili jega Uwa Sanbagiri nes gam balbabif enggam, "Aameiba Am afelen mesna." 12 Ga jem temawer, angtane daamfenna aaiserem, jemna bosna Adam, jei ga kapkaiserem ga jei eyebil. Jega jem temawer angtane seyafter gemerserem ogiri aaiserem jebe, jei ga etam-etama kapka ga aane domola. Adam jei mes ter, aam temawer jei kapkaiserem aa jewer eyebilim. Gwanan gamserem namwer jeme gemer, angtane seyafter jei sege terbili aam temawer angtane seyafter etam-etama kapka aa jewer ne eyebilirim. 13 Angtane jei etam-etama kapkaiserem jei mes ne eyebil ogiri aaiserem jebe, safe jes galapserem Uwa Sanbagiri Jei Hukumu Nabi Musafe nalef Jam gulbayan. Angtane jeiserem jei etam-etama kapka aa galap ne eyebilim, etam-etama kapka jemna jeiserem jam ne eterbaipmiyen, aam temawer jes galapserem Hukumu galap jam ne tulistaabiyen. 14 Angtane seyafter mes ge terbil, Adam aa galap gwelam jamer Nabi Musa aa galap gwelam jep mese. Jei seyafter ga aa ge terbil, jei safe Adam aa gam eyebilim jei safe gam fas jam ne eyebiyen. Adam jei Taterisi Uwa Sanbagirmana waakenfer jam onsoibeyen. Adam jei ga gambarna galserem ga gala angtane galap aa jei foryalaiserem, Angtane jeiserem ga Kristus. 15 Jengga angtane nauna aaiserem, jemna taterisi daamfen numyon. Angtane seyafter ga aa ge terbili, aam temawer angtane daamfenna jeiserem bosna Adam jei kapkaiserem aa jewer eyebilim. Jengga Uwa Sanbagiri Jei waakena Jelemanaiserem nep nes mes golmini, ane Jei nele ga aa dwotana, ane ga aa gunu nei waakena. Jei gam aa eyebil jes galapserem, Angtane daamfenna bosna Yesus Kristus Jei nem temawer aa galap terem. 16 Aa je etamwenaram aam temawer Uwa Sanbagiri Jei waakenaiserem nep nes jewer eyeipminirim, jeiserem daamfen numyon gwanan aa je etamwenaram aam temawer angtane daamfenna bosna Adam jei etam-etama kapkaiserem aa eyebilim. Adam jei kapkaiserem aa galap eyebilim, Uwa Sanbagiri ga gul, "Ai angtane seyafter gemerserem As tamtamtababisi." Jengga Uwa Sanbagiri Jei waakenaiserem nep ga nes mes golmini, jeiserem ga enggam Jei etam-etama nemna seyafter nes mes wirtabaipmini. Ane Jei ga nele nep nes mes dwotamini, ane nele jeiserem jem temawer ga enggam gunu, "Aamei waakena." 17 Aaiserem jei bunar enggame angtane seyafter jei jamer sege terbili, aam temawer angtane daamfenna bosna Adam jei kapkaiserem aa jewer eyebilim. Jengga Uwa Sanbagiri Jei waakena Jelemanaiserem nep nes mes golmini, ane aam temawer Angtane daamfenna bosna Yesus Kristus Jei aa jewer terem, Uwa Sanbagiri ga gunu enggame, "Ini imna waakena." Ane nei Jei nejeya tebanaram, nei ga Jem baabetem nesa gwena. 18 Gam jega Uwa Sanbagiri Jei angtane seyafter ga balbabili enggame, "Aamei kapkaiserem imsa eyebili.", aam temawer angtane daamfenna bosna Adam jei kapkaiserem aa jewer eyebilim. Jeme gemer Uwa Sanbagiri Jei angtane seyafter ga balbabili, "Ini imna waakena.", aam temawer Angtane daamfennaiserem Jei waakenaiserem aa jewer eyebilirim. Ane Jei ga waakenfer gwelaiserem jamer abak-abaksus Jei jep ga golmini. 19 Ane angtane jei ga aa ge etamwebili angtane etam-etamabaraiserem, aam temawer angtane daamfenna bosna Adam, jei taterisi Uwa Sanbagirmana waakenfer jam saribeyen. Jes gemerserem aaiserem jegme gemer, Uwa Sanbagiri Jeime aamei is gemer balbabili, "Ini imna waakena.", aam temawer angtane daamfenna bosna Yesus, Jei taterisi Uwa Sanbagirmana waakenfer saribene. 20 Uwa Sanbagiri Jei ga Hukumu Jelemanaiserem Nabi Musaf gulbal, ane Musa jei Hukumu jeiserem angtanef jei golmil. Jei Hukumu jeiserem ga enggalf golmil, jega angtane waakenfer gangge towaswebif jei etam-etama kapka anesusfer ga gane eyebil, ane jei enggam ga towaswebil jei Hukumu jeiserem jeber-jeber ne ayebuwena. Angtane jeiserem jei etam-etama kapkaiserem uskambar jame aa galap ne eyebilim, Uwa Sanbagiri Jei waakena Jelemanaiserem uskambar ga kitulmil jebe. 21 Gwanan galapserem etam-etama kapkaiserem jei angtanem sanbakf nwin, jega angtane seyafter ga sege terbili. Jengga namwer aas jepserem waakenaiserem Uwa Sanbagirmana jei ga angtanem sanbakf nwini, ane Jei enggam gunu, "Ini imna waakena, aam temawer Tuhan Yesus Kristus Jei waakena gam eyebili." Jega jem temawer Jei gwela yo baabeta ga nes mes golmini, jega nei abak-abaksusfer gam nesa gwena waakenfer.
61 Uwa Sanbagiri Jei waakena Jelemanaiserem nebe nes unggwanfer golmini. Gam jega ibas sarbisnenne ilem inibe? Ke samfer nei jeber-jeber etam-etama kapka nesa eyebuwena, jega Uwa Sanbagiri Jei jeber-jeber waakena Jelemanaiserem uskambar nes gase golmini? 2 Wowo, gamyan! Nei nemsa tere Kristusfar, ane nei nemsa mirulu etam-etama kapkaiserem. Jega jem temawer, afa nei jeber-jeber etam-etama kapka jam nesa eyebilirim, jeiserem je kapka. 3 Bunar-bunarsus aamei imsa towaswena enggame, aamei igalaba baptiswenaram Kristusem boseme, aamei Jebar daamfennaber igangge nwini, ane Jebar igangge tere. 4 Ga enggam, angtane nei jam nes galap ne baptistababilirim, baptisana jeiserem jeme nei ga Kristusfar seyafter ga jem negama tere, ane nes gane tatarbaabunurum Kristusfar. Nei gam neya eyebilirim jega nei ga nesa gwena ibirmi. Aaiserem Kristusminip aa gam etamwelaram jes galserem, Uwa Sanbagiri Jei aa galap irtestenantam terewer, baabeta unggwandusa Jemnaiserem jeme. 5 Afa nei Jebar daamfennaber Jei aa galap tererem, gam jega nei bunarsusfer Jebar daamfennaber nei nejeba irwesaram terewer Jei gemerserem. 6 - 7 Angtane jam gam tererem, etam-etama kapka jemnaiserem gamjon jem sanbakefe jam nwinyen. Jes gemerserem nei enggam neya towaswebili, nei Kristusfar nemsa tere, ane etam-etama kapka nemnaiserem jei mes tere Kristusfar ti salibibe. Tere Yesusmanaiserem jeme, baabeta etam-etama jem mesam borola, jega etam-etama kapka jeiserem nem sanbakfe jam nwinyen. 8 Nei nemsa tere Kristusfar. Gam jega nei waakenfer neya tebana enggame, nei nesa nwinsi Jebar. 9 Nei nemsa towaswena enggame Kristus Jeiba mesam irwenant terewer, ane gamjon Jei Jam teryen, ane tere gamjon baabeta fas Jemnibe. 10 Jei daamfenfener ter, ane Jei aa galap terem, Jei mes borolsinint baabeta etam-etama kapka jeiserem. Ane Jei namwer aa jep gwenaram, Jei ga awelna Uwa Sanbagirmana gam eyeibene. 11 Ane jes gemerserem, aamei iner isa sarbili enggame, aameiba imsama tere, ane etam-etama kapkaiserem jei baabeta fas imnibe. Gasa gwe, awelna Uwa Sanbagirmana jes gweyibefe, Kristus Yesusfar daamfennaber isa gwena. 12 Jes gamserem gamba waakenam, jengga aayai, etam-etama kapkaiserem im sanbakfe galap se nwini im tifinibe, tifni jam tereserem. Ane ini imna unggwan-giri is jep ge folbaminirim etam-etama kapkaiserem jam eyebife, seyafter jeiserem ijama eyebiyen. 13 Jengga tafa mese, tof, nwe imnaiserem, ane tifin safna afweraiserem, aayai, jei etam-etama kapka jep ne gwebit. Jengga enggam angtane gwanan tere gamserem ane gamjon gam irwena, aamei ga ina isa tete Uwa Sanbagiri Jebe, jega tafa mese, tof, nwe, ane tifin safna afweraiserem ga waakenaiserem jetefener sene eyebili Uwa Sanbagirfe. 14 Gam jega enggam, etam-etama kapkaiserem jei im sanbakefyan, aam temawer aamei gamjon ijama gweyan Hukumu aa gam towas-towastababilirim. Namwer Uwa Sanbagiri Jei im Sanbakef nwini, ane Jei waakena Jelemanaiserem jeber-jeber ip golmuwena. 15 Namwer aamei ibasa sarbisnenne ilem inibe? Nei gamjon nejama gweyan Hukumu jes nes gam towas-towastababilirim. Nei Uwa Sanbagirfar nesa gwena Jei nem Sanbaka, ane Jei waakena Jelemanaiserem nep nes mes golmini. Nei etam-etama kapka ke jeber-jeber nesa eyebuwena? Wowo, gamyan! 16 Aameiba imsama towaswena, afa aamei enggam igama gunurum, "Ai awelna imna isas eyeibene, ane asa eyebili awelna seyafter ijes bilirim.", jepga aamei jeber-jeber ga igama eyebili ilem sanbaka is jes gam bilipminirim. Afa etam-etama kapkaiserem jei im sanbakef gam nwinirim, aamei igama tere. Afa Uwa Sanbagiri Jei im Sanbakef gam nwinirim, ane aamei igama eyebili seyafter Jes gam bilirim, jepga Jei enggam ga gam gunu, "Ini imna waakena." 17 Jengga au, nei Uwa Sanbagirfe, "Ase samfer gulbana." ganma bilibe, aam temawer gwanan galapserem etama-etama kapka je im sanbakef nwinint, jengga namwer aas jepserem Uwa Sanbagiri Jei Taterisi Jemna is mes golmini. Ane aamei bunarsusfer Taterisi jeiserem ga imsa onsobili. 18 Gwanan jepserem etam-etama kapkaiserem je im sanbakef nwinint, jengga namwer Uwa Sanbagiri Jei is mes aftabunnu etam-etama kapkaiserem jewer, ane Jei im Sanbakef nwini, jega aamei ga waakena ga isa eyebili Jei aa jes bilirim. 19 Ai surta aaiserem ai tulistababili kata-kata waakenfer aaiserem jeme enggalfe aamei waakenfer igama sarbif, aam temawer imna ini gemerje, jei weren-werna. Gwanan jes galapserem aamei etam-etama kapkaiserem ima eyebunant tafam, tofem, nwem, ane aaremem, ane aamei waakenfer ijama gweyan. Jengga namwer aas jepserem, imna tafa, tof, nwe, ane aarem ga waakenaiserem aam ga jetefener isa eyebili, ane waakenfer isa gwena. 20 Gwanan etam-etama kapkaiserem im sanbakef aa galap nwinintim, aamei bunarsusfer ijama eyebiyen, Uwa Sanbagiri aa jes bilirim. 21 Etam-etama kapka jeiserem igalaba eyebilintim, waakenaiserem ke mes etamwena? Wowo! Ane namwer aamei ijama sefersona, etam-etama kapka gwananmanaiserem jem temawer. Angtane etam-etama kapka galserem aa jei gam eyebilirim, jei ga jei gam tere. 22 Jengga namwer Uwa Sanbagiri Jei aamei is mes aftabunnu etam-etama kapkaiserem jewer, ane Jei im Sanbakef nwini. Waakenaiserem aa je etamwenaram ga enggam, aamei isa eyebili Uwa Sanbagiri aa jes bilirim, ane aamei ga isa domola waakenfer gwelaiserem jamer abak-abaksus. 23 Etam-etama kapkaiserem jem fwaina ga ter. Jengga Uwa Sanbagiri Jei nes golmini waakenfer gwelaiserem jamer abak-abaksus, ane jeiserem nei nejama armanulyon. Jei ga jeiserem Jei nese jafner golmini, aam temawer nei Yesus Kristus Tuhan nemnaiserem nejewera tebanaram.
71 Am afelen mesna, aamei imsa towaswebili hukumem temawer. Bunar, ai namwer ajes tulistababilirim, aamei imsa towaswebili. Hukumu jei baabetabara angtane gemer jep gam gwenaram. Jengga angtane jam gam tererem, hukumu je baabeta fas angtane jeiserem jemnibe. 2 Ai enggamfener ai gunu, hukumu wi anggwa je gamserem. Wini aasaje anggwafar jena jam gangge teterem, ane anaiserem jam teryen, jei anggwana nafsi jam geryan. Jengga anaiserem jam gam tererem, jei gamjon jam onsobiyen hukumu wi anggwa jeiserem, anggwana gwananaiserem jebar. Jei samfer anggwana nafsi gam gera. 3 Jengga anaiserem gemer gam nwinirim, afa jei anggwana nafsi gamjon jam gam geraram, nei negama bili jei maaryens gwebili. Jengga anaiserem jam gam tererem, jei ga gam ferwetini. Afa jei anggwana nafsi gam geraram, jei maaryena jam gwebiyen. 4 Afa jes gamserem am afelen mesna, Hukumu Nabi Musa aa jes tulistababilim ga enggala anggwana imna je galserem. Jengga aamei imsama tere Kristusfar, jega jem temawer Hukumu jei gamjon baabeta imnip fas. Namwer aamei imsa etamwena Kristusmanfe, aa Jei irwenantam terewer. Ane aamei samfer Jebar isa gwena, ane waakena isa gwebili jega ini Uwa Sanbagirmana saaser-saaserfer gase folbana. 5 Nei gwanan ini nemna kapkaiserem jesma onsobaabili, Hukumu aa jes bilirim, "Enggam ijama eyebiyen." Jega jem temawer ini nemna unggwan-giri kapkaiserem jes eyebife, ane nei etam-etama kapkaiserem unggwanfer ga nejesa eyebili. Jega jem temawer, nei nemsa tere. 6 Namwer Hukumu jam nwinyen nem sanbakfe, aam temawer nei nemsa tere Kristusfar, ane nei nes mes aftabunnu Hukumminiwer. Ane Mafnana Uwa Sanbagirmanaiserem Jei baabeta nes mes golmini, ane nei nele ibirmi nemsa damtana awelna Uwa Sanbagirmanaiserem nejama gweyibefe. Nei gamjon nejama onsobiyen Hukumu gwananmana aa jes ne tulistababilim. 7 Afa ga gam jes gamserem, nei ga bas nesa bili nelem inibe? Hukumu jei ke kapka? Fasfasus! Jengga enggam, Hukumu jei ams towas-towastana etam-etama kapkaiserem jem temawer. Hukumu ga enggam gunu, "Apgal jigala angtane nafsimana, ipsama bilt ilem inibe." Jengga enggam, aiba uskambara bili alem inibe. Afa Hukumu gam as jam towas-towastayana, ai ajam towasweyan enggame jigala angtane nafsimana ai alem inibe jes agam bilirim, jeiserem jei ga etam-etama kapkaiserem jes ajam eyebili. 8 Hukumu as galap towas-towastanaram, jigala angtane nafsimana ai jes agam bilirim inibe, etam-etama je baabetabara, jamere ini amna jewer jon unggwanfersus as gam folbana enggalfe, jigala unggwanfer jewer gam damtabif. Afa Hukumu fas, etam-etama kapkaiserem je baabeta fas. 9 Gwanan jes jepserem ai Hukumu ajam towaswebiyen, ane ai waakenfer ai gwenant, daran-darna fas. Jengga nunu Hukumu ai as galap towas-towastanantam, ai ga jep ai towaswena enggame, etam-etama amna jei kapka. Jega jem temawer, ai ajam tere gamserem. 10 Hukumu jeiserem aane golmil angtanefe, jega angtane waakenfer gam naawef. Jengga Hukumu jeiserem je abe as ters gulbanant. 11 Etam-etama kapka je baabetabara, Hukumu ase galap towas-towastanaram etam-etama kapka jem temawer. Etam-etama ams afaftana, ane ai etam-etama kapka unggwanfer ajes eyebif. Ane jega jem temawer ai ga ajam tere gamserem. 12 Nei enggam neya towaswena, Hukumu Nabi Musa aa jes tulistababilim seyafter jeiserem je Uwa Sanbagirminiwer. Ane daamfen-daamfennem jeime Uwa Sanbagirminiwer, ane jeiserem je bunar, ane je waakena. 13 Enggame, Hukumu waakena jeiserem je ke ai as jam se munbono? Fas! Jengga Hukumu jeiserem enggam gunu, "Etam-etama jeiserem ijam eyebiyen." Jengga ai etam-etama kapka jeiserem ajam eyebif, jepga etam-etama kapka jeiserem ga ai eyebili, ane jepga ai tere. Jega jem temawer, etam-etama kapka jeiserem gamjon jam sowesiyen, ane ai jepga ai towaswena enggame, etam-etama jeiserem jeba kapkam. Hukumu je ai as enggam towas-towastana, etam-etama kapka je bunarsusfer ba kabwaksusum. 14 Nei nemsa towaswena enggame Hukumu jeba waakenam, aam temawer Mafnana Uwa Sanbagirmanaiserem Hukumu jeiserem nep ga nes Jei golmil. Jengga ai angtane kapka, ai angtane ogirmana. Etam-etama kapka je am sanbakf nwini. 15 Ai teisyena ai ajes eyebilirim jem temawer. Ai jam ajes eyebiliserem, jeiserem ai ajam eyebiyen. Ane ai bunarsusfer baife jes agam gwebilirim jam eyebiyenfe, jeiserem ai ga jes agam eyebili. 16 Ai kapkaiserem jam agalap eyebilirim ai baife jes agam gwebilirim jam eyebiyenfe, ai enggam ai gwerauwulu alem inibe ai tousa enggame Hukumu jeiserem ba waakenam. 17 Ai enggam ai towaswena, etam-etama kapka jeiserem gam ke ai antowai eyebuwena. Jengga etam-etama kapka am inip aaiserem ga jei gam eyebili. Ini kapka amnaiserem ga as jei gam bala enggalfe etam-etama kapka jeiserem ajam eyebife, ane ai jeiserem ga agam eyebili. 18 Ai enggam ai towaswena waakena fas alem inibe. Ini amna jei kapka. Ai waakenaiserem ajes eyebif, jengga gam ai ajam eyebiyen. 19 Ai jam ajes eyebif waakena jeiserem, jengga ai jei ajam eyebiyen. Ane ai kapka baife jes agam gwebilirim jam eyebife, ga jes agam eyebili. 20 Afa ai jam agam eyebilirim, ai baif jes agam gwebilirim jam eyebiyenfe, gam jega jeke aner agam eyebili. Fas. Jengga etam-etama kapka am inip aaiserem ga je gam eyebili. 21 Gam jega ai enggam ga ai towaswena am inip aa gam etamwenaram; ai waakena jam jep agam eyebilirim, kapka jeiserem je nele ga as gam isinbaabisini. 22 Ai bunarsusfer enggam ai towaswena, ai Hukumu Uwa Sanbagirmanaiserem jes as nesikulu. 23 Jengga ai enggam ai towaswena nafsi am tifni seyafter jep aa gam etamwenaram. Ga enggam, etam-etama kapka jeiserem seyafter am tifinip nwini, ane je Hukumu Uwa Sanbagirmanaiserem ai ajes nesikulurum ga jebar ge doksona. Ane kapka jeiserem je am sanbakef nwini. 24 - 25 Ai gamjon ai gunu, ai aner Hukumu Uwa Sanbagirmana jes as nesikulu, ane jeiserem ai jes onsobif. Jengga etam-etama kapkaiserem je am inip nuniton. Etam-etama kapkaiserem je am sanbakef nwini, ane ai ter nels onsobana. Wa, ai kabwaksusu gam enola! Ai as nane se waakentaasini ter nele jeiserem jewer? Ai bunarsusfer Uwa Sanbagiri as bala, "Ase samfer gulbana.", aam temawer Jei Tuhan nemna Yesus Kristus mes baftatnant, ane Jei ai as mes waakentababisini.
81 Yesus Kristus Jei mes tere etam-etama kapka nemnaiserem jem temawer. Jega jem temawer nei daamfennaber nejeya nwinirim Jebar, nei fwaina nejama domolyan etam-etama kapka nemnaiserem jem temawer. 2 Nei gwanan galapserem negalaba nwinintim, etam-etama kapkaiserem jei nem sanbakef nwinint, ane jem fwainaiserem ga ter. Jengga nei Yesus Kristusfar daamfennaber neya gwena, ane Jei nei nes mes aftabunnu etam-etamawer. Ane Jei gwela yo baabeta Mafnana Uwa Sanbagirmanaiserem nes mes tetmini, jega etam-etama gamjon jam nwinyen nem sanbakfe. 3 Nei etam-etama kapka negalaba eyebilirim, jes jepserem baabeta Hukumumanaiserem bar. Gam jega Hukumu je nejam batobaabiyen. Jengga Uwa Sanbagiri ga aas eyebili, hukumu je jam eyebiyeneiserem. Jei Tane Jelemanater baftatnant, tifni nemna galaterserem. Jei aaf fortya tifni nemna gamserem, tifni nemna etam-etama kapka gam eyebili. Ane Jei etam-etama kapka nemnaiserem seyafter nes mes wirtabaipmisini. Ane Uwa Sanbagiri Jei aa taabili fwaina etam-etama nemnaiserem. 4 Uwa Sanbagiri Jei fwaina nemna gam taabili, jega nei ga bunarsusfer ga nesa eyebili. Hukumu aa gemer gunurum, nei bunarsusfer nesa eyebili. Nei nesa gwena, ane bunarsusfer nesa eyebili baabeta Mafnana Uwa Sanbagirmanaiserem jeme. Nei nejama gweyan ini kapka nemnaiserem jem baabeteme. 5 - 6 Angtane aa jei gam naawenaram ini kapkaiserem jelemana jam onsobaabife, jei ga jetefenersus gane eyebili ini jelemana unggwan-giri aa jep gangge folbaminirim jam eyebife. Angtane jeiserem sege terbili. Jengga angtane aa jei naawenaram, Mafnana Uwa Sanbagirmana aa jes bilirim jetefener aa jei ne eyebilirim, ini jemna ga unggwan-giri ge folbamini Mafnana Uwa Sanbagirmana aa jes bilirim jetefener ne eyebife. Angtane jeiserem se naawena waakenfer, ane ini jemna samfer ga sege folbamini. 7 Afa angtane aa jei gam gunurum jelem inibe etam-etama kapkaiserem jetefener eyebif, jei Uwa Sanbagirem ginanggwaf gam gwena. Jei Hukumu Uwa Sanbagirmana jei jam onsobiyen, ane gwanan galapserem galap mese jei hukumu jeiserem jam onsobiyen. 8 Ini Uwa Sanbagirmana jei saaser-saaserfer jam folbayan, angtane aa jei gam gwenaram etam-etama kapkaiserem jelem inip aaiserem jetefener eyebuwefe. 9 Jengga aamei, aamei enggam ijama gweyan ini kapka ilemanaiserem jes onsobaabife. Jengga aamei ga enggam ima gwena, Mafnana Uwa Sanbagirmanaiserem jetefener isa onsobili, aam temawer Mafnana Jei ilem inip nuniton. Afa angtane Mafnana Kristusmanaiserem jam domolyanaye, angtane jeiserem jei Kristusmanyan. 10 Aamei etam-etama kapkaiserem imsa eyebili, ane jem fwaina im tifinip aaiserem jei ga ter. Jengga namwer Kristus Jei ilem inip nuniton, ane Uwa Sanbagiri aa gunu aamei waakena, aam temawer Kristus jei ilem inip nuniton. Gwela yo baabeta Uwa Sanbagirmana je seyafter ibar, aam temawer Uwa Sanbagiri enggam gunu, aamei waakena. 11 Tifni imna sege terbili, jengga Mafnana Uwa Sanbagirmanaiserem Jei im inip nuniton. Uwa Sanbagiri jeiserem Jeiba Kristus Jeyam irtestenant terewer. Ane jes gemerserem aaiserem jegme gemer, Uwa Sanbagiri Jei gwela yo baabeta is golmini im tifinibe, Mafnana Jelemanaiserem jeme. 12 Gam jega ga enggam am afelen mesna, nei nesa gwena Mafnana Uwa Sanbagirmanaiserem aa gam gunurum. Nei nejama gweyan ini nemna unggwan-giri kapkaiserem jam eyebife. 13 Ga jem temawer, afa aamei jam isa gwenaram ini imna unggwan-giri kapkaiserem jam eyebife jes igma onsobilirim, aamei ga isa tere. Jengga aamei Mafnana jam isa onsobilirim, Mafnana jeiserem aamei ga is batobaabili etam-etama kapka ilem inip aaiserem jes munbobife. Ane aamei Mafnana Jemnaiserem jam isa onsobilirim, aamei abak-abaksusfer ga isa gwena. 14 Angtane Mafnana Uwa Sanbagirmana aa jei ne onsobilirim, jeiba tantantane Uwa Sanbagirmanam. 15 Aamei namwer ijama gweyan enggalfe, etam-etama kapka je ini sanbakef jam nwinfe. Ane namwer ijama ereyen. Uwa Sanbagiri Jei Mafnana Jelemanaiserem is mes golmini. Ane Jei ga is balbabili ilem temawer enggame, aamei tantantane Uwa Sanbagiriserem Jemna. Ane Mafnana jeiserem aamei is batobaabili, jega aamei Uwa Sanbagiri gam isa jenbene enggame, "Uwa, Uwa amna!" 16 Mafnana Uwa Sanbagirmanaiserem nems towas-towastababili nem inip enggame, nei bunarsus tantantane Uwa Sanbagirmana. 17 Neiba tantantane Jelemana, ane jega jem temawer nei nesa taabili seyafter Uwa Sanbagiri Jei aa jes bilirim jam golmife angtane Jelemanfe. Jei ga aa gunu, "Seyafter aaiserem Ai As gulbana Tane Amnaiserem Yesus Kristus." Jengga gwanan nei tamtamtalaiserem jes nesa domola, Kristus tamtamtala gwanan aa gemer domolantam. Jeiserem taban, nei Jebar ga nesa nwini Jelem nafdusabe. 18 Ane ai ga enggam ai towaswena, nei namwer ini nemna nes bastantowaifer ge jenbamini, aam temawer nei tamtamtalaiserem ga nei jesa domola namwer aas jepserem. Jengga ai gamjon enggam ai towaswena, nei galap ini saaser-saaserserem nesa damtabisi, aam temawer nei nafa Uwa Sanbagirmanaiserem jep nesa gwesa. 19 Seyafter Uwa Sanbagiri aa jes eyebaabilim, seyafter jeiserem jei bunarsusfer nunu ibirmi jeiserem ga jes ne fibili. Jes jepserem, nei tantantane Uwa Sanbagirmanaiserem, nei ga nesene damtabisi nafa Uwa Sanbagirmanaiserem jebe. 20 Jengga namwer aas jepserem, seyafter Uwa Sanbagiri aa jes eyebaabilim, jeiserem je nunu jeber-jeber ga jamer ge kabwakswebuwena. Seyafter Uwa Sanbagiri aa jes eyebaabilim, jeiserem gam ke jener ge gubil. Jengga Uwa Sanbagiri Jei ogiri aaiserem seyafter Jei Jener saftal, aam temawer Adam jei etam-etama kapka aa jewer eyebilim. Namwer aas jepserem, seyafter jeiserem jei enggalf ge fibili nunu Uwa Sanbagiri Jei seyafter aa jem waakentababisiliserem. 21 Namwer aas jepserem, seyafter Uwa Sanbagiri aa jes eyebaabilim, jeiserem jei nunu jeber-jeber ga jamer ge kabwakswebuwena. Jengga Uwa Sanbagiri Jei Jener se eyebaabisi jega seyafter jeiserem je gamjon jam ge kabwakswebiyen. Nunu jes jepserem tantantane Uwa Sanbagirmana gemerserem jei waakenfer aa jep naawesaram, seyafter gemerserem je ibirimfer sege falbisi, ane jeme waakenfer se naawesa. 22 Nei nemsa towaswena enggame, gwanan-gwanansus galapserem jamer namwer aas jepserem, seyafter Uwa Sanbagiri aa jes eyebaabilim jei jena siginfer ne ensona ane ga aa ge aanggelerwebili. Jei enggam gangge aanggelerwebili, wini jena aa gemer enolaram jam sartefe. 23 Ane nei Mafnana Uwa Sanbagirmana nemsa taabili, ane jega jem temawer nei ga neya towaswena enggame nei waakenaiserem Uwa Sanbagirminiwer nesa taabisi. Ane nei mese nesa aanggelerwena nelem inibe, nei ga nunu nesa fibili, nunu Uwa Sanbagiri Jei nei jem nes jem gweretababiliserem enggame neiba tantantane Jelemana, ane Jei tifni nemna seyafter aaiserem nes jem se ibirim taabaipmisi. 24 Uwa Sanbagiri Jei nes mes waakentababisini, ane nei nunu Uwa Sanbagiri nes jem gweretababiliserem Jelem tantantanefe, nei ga nunu jeiserem ga nejesa fibili. Afa nunu jeiserem mes falaye, gam jega nei gamjon nunu jeiserem nejama fibiyen. Aamei imsa towaswena enggame, afa angtane jei apgal jigala aa jes gam bilirim jam taabife, afa apgal jigala jeiserem jam gam taabilirim, jei gamjon jam fiyan. 25 Jengga nem temawer jei, nunu waakena jeiserem jei gemerje jam falyan. Ane nei nunu jeiserem nei gemera fibili. Nei nunu jeiserem ga kanaufera nesa fibili. 26 Nei baabeta fas. Jengga Mafnana Uwa Sanbagirmanaiserem jei nes mes batobaabili. Nei nejama towasweyan nei Uwa Sanbagirfe sembayanga fomfom nesa gwebabana. Nei taterisi sembayanga nejama gwebalaiserem nei teisyena, nei nelem inibe nei jafnera aanggelerwena, ane Mafnana Uwa Sanbagirmanaiserem Jei ga nes batobaabili, ane Jei sembayanga Uwa Sanbagirf gwebabana nem temawer. 27 Uwa Sanbagiri Jei ini angtanemanaiserem gam damtaipmini, ane Jeime Mafnana Jelemanaiserem ini Jemna tousa. Mafnana Jei sembayanga Uwa Sanbagirf gwebabana nem temawer. Jei sembayanga ga enggammer gam gwebana, Uwa Sanbagiri Jena aa gemer gam gunurum. 28 Ane nei enggam neya towaswena seyafter aa je etamwenaram, Uwa Sanbagiri Jei ga enggalf eyebaabili waakenfer gam ge etamwebif. Jei angtane Jei aa jei ne nesiktenerem ga jep eyeipmini. Angtane jeiserem ga Jei aa jes jenbebilirim Jena aa gemer gunurum. 29 Angtane jeiserem Uwa Sanbagiri aa jes destabaabilim, Jeime aa balbabili enggame jei Tane Jelemana galserem ga galf se naawena. Jei gamjon enggam ga balbabili, "Tane Amnaiserem Jei tane ayan-ayansusfe Jei se naawena tantantane nafsiserem jem nenennabe." 30 Gam jega angtane Uwa Sanbagiri gwanan aa jes destabaabilim, Jei gamjon ga jenbebili. Angtane aa jes jenbilirim, Jei angtane jeiserem ga aa balbabili, angtane jeiserem jei waakena. Ane angtane Jei waakenem aa jes balbabilirim, angtane jeiserem jei Jelem nafap ga jei sege nwinbene. 31 Nei namwer ga bas nesa bili nelem inibe seyafter jeiserem jem temawer? Uwa Sanbagiri aa Jei gwenaram, Jei nebe seyafter gemerserem nes waakena gam eyeipmini. Afa angtane nensa jei nebar jam erafe, nei ga kanaufer sa fina. 32 Uwa Sanbagiri Jei nei nes uskambar nesiktababili jamer Jei Tane Jelemanaiserem ga nes gaarmini nebe, nei seyafter gemerserem. Jei ga Tane jeiserem ga aa baftannunt, ane Jei ga mes terent nem temawer. Afa ga gam jes gamserem, gam jega Uwa Sanbagiri Jei bunarsusfer seyafter nebe nes kitulmini. 33 Nei nes nanse balbabili enggame, "Aamei angtane kapka."? Neiba angtane Uwa Sanbagiri aa jes destabaabilim neiba jesam. Angtane nafsi jei nes jam ne balbabiyen enggame, "Aamei angtane kapka." Uwa Sanbagiri Jei nei nes Jener balbabili enggame nei angtane waakena. 34 Nei nes nane se balbabili enggame, nei angtane kapka, ane nei fwainaiserem etam-etama kapkaiserem jem temawer sa domola? Angtane afa fas gam nes jam balbabiyen. Yesus Kristus Jei mes ter etam-etama kapka nemnaiserem jem temawer. Ane gamjon, Jei mes irwenant terewer, ane namwer Jei Uwa Sanbagirem taasfolawer nwini. Ane Jei sembayanga Uwa Sanbagirf gwebabana nem temawer. 35 Kristusmana nesiktele nem temawer aaiserem, jei nane se targabana? Afa ini nemna nes jam sege jenbaminirim, afa nei kabwaktala jam negama domolaram, jeiserem jem temawer ke Kristusmana nesiktele nem temawer aaiserem ke jem gam targabana? Afa angtane jei kapkaiserem nebe nes jam gam eyeipminirim, afa nei tumilgala fas, afa fene fas, seyafter jeiserem jem temawer ke Kristusmana nesiktele nem temawer aaiserem ke jem gam targabana? Afa apgal jigala kakalaiserem, afa angtane nebar jam negama ernaram, jeiserem jem temawer ke Kristusmana nesiktele nem temawer aaiserem ke jem gam targabana? Fasfasus! 36 Taterisi Uwa Sanbagirmanaiserem jep ga enggam baatultel: "Ai ga enggam asa gwena, angtane Ilemana jei aa gemer naawenaram. Jega jem temawer angtane nafsiserem jei jeber-jeber kapkaiserem abe as gane eyeipmini, ane ai ga agma tere. Angtane jei ap as jes gane eyeipminirim, jei ga enggala dombafe aa galater gane eyeipminirim. Ga gemer ne munbobili." (Mazmur 44:22) 37 Kapka seyafter jeiserem jem ke nesiktele Kristusmana nem temawer aaiserem ke jem gam targabana? Wowo! Nei kabwaktala jeiserem galap jam jep negama domolaram, Yesus nei nes Jei gam nesiktababilirim, Jei ga nes gam batobaabili, ane nei ga jeber-jeber kanaufer negama fina. 38 Ai bunarsusfer enggam ai towaswena, fasfasus nesiktele Kristusmana nem temawer aaiserem je afa jam targabaasiyen. Afa nei jam negama tererem, afa nei gemer negama gwena, Kristus Jei jeber-jeber nes gam nesiktababili. Malaikata, afa bwat kapka, afa baabeta nafsiserem jes mese, jei nesiktele Kristusmanaiserem jam ne targabaasiyen. Namwer aa je etamwenaram, ane gamjon galap aa jei se etamwelaiserem, seyafter jeiserem nesiktele Kristusmanaiserem jem jam ne targabaasiyen. 39 Apgal jigala winsip aaiserem, ane apgal jigala ogirip aaiserem jes mese, jei nesiktele Kristusmana jam ne targabaasiyen. Seyafter Uwa Sanbagiri aa jes eyebaabilim, jeiserem afa fasfasus jei nesiktele Uwa Sanbagirmana jam ne targabaasiyen. Nesiktele aaiserem jei ga enggam gwerauwulu, Jei Tane Jemna nebe nes galap gaarminintim, Tuhan nemna Yesus Kristus.
91 Ai ajes nasbilirim ai bunarsusfer ai nasbili, aam temawer ai Kristusmana, ane ai ajam afafweyan. Mafnana Uwa Sanbagirmana Jeime as towastana alem inibe enggame, ai bunarsusfer ai nasowena. 2 Ini amna as unggwanfersus jenbawena, anggwabura amna Israel jem temawer. 3 Ai unggwanfersus enggam ai gunu alem inibe, jega anggwabura Israelmana jei Yesus ga sene tebasa. Jepga Uwa Sanbagiri gase waakentababisisi. Jei am afelen mesna, anggwabura amnaiserem jewer. Ai safe Kristus jam as mirtetefala, ane babapsobala Uwa Sanbagirmana as tenbene, ai samfer jeiserem as eyebili, jega Uwa Sanbagiri anggwabura jeiserem gase waakentababisisi. 4 Gwanan jes jepserem, Uwa Sanbagiri anggwabura Israelmana mesam destabaabil enggame anggwabura Jelemana. Jei aa gul anggwabura jeiserem jem temawer jei ga tantantane Jemna. Uwa Sanbagiri Jei jebar ge nwinbel, ane baabeta Jemna ga aa ge saamil. Jei taterisi igsusu jep aa jes bilipmilim, ane Jei Hukumu jep ga golmil. Ane Jei jep ga towastababil Jei jam pujitele gamserem, ane Jei aa gul jem se batobaabili. 5 Asal-asal jemna ba Abraham ane nafis-nafsi, ane anggwabura jeiserem Kristus ga jewer surnu. Kristus Jei seyafter Sanbakef nwini. Nei bosna Uwa Sanbagirmana nesa pujiwulbono abak-abaksusfer! Amin. 6 Jengga ai enggam ajam guyon, Taterisi Uwa Sanbagirmanaiserem anggwabura Israelem temawer aa jes bilim, jei gemerje fas etamwena. Ai gam ajam guyon. Jengga enggam, angtane anggwabura Israel seyafter gemerserem jei gam ke bunarsusfer angtane Israelmanfenna. Wowo. 7 Ane gamjon ga enggam, asal-asala Abraham gemerserem jei gam ke bunarsusfer tantantane Abrahammanfenna. Uwa Sanbagiri Jei Abraham mes bal, tane nawan jelemana Ismael ane Isak jem temawer, "Isak tane imnaiserem, ane asal-asala jemna gemerserem, Ai enggam Ai gunu jei bunarsusfer asal-asala imna, ane jam Ajes kitulstef aaiserem Alem angtanefe." 8 Jemna igi ga enggam, Uwa Sanbagiri Jei enggam Jam guyon seyafter asal-asala Abrahammanaiserem enggame, "Jei angtane Alemana, jei bunarsusfer asal-asala Abrahammana." Jengga Tateris Uwa Sanbagiri aa jes nasbilim, angtane taterisi jeiserem aa jei ne taabilirim, jei ga jetefener asal-asala Abrahammana bunarsusfer ga jes. Jeiba angtane Uwa Sanbagirmanam. 9 Uwa Sanbagiri Jei Abraham ga enggam bal, "Nunu Aner isa jep mwanggibenerem, Ai gamjon ga As waraulfaltya, ane wini imna Sara jei tane girtowai gase damtana." 10 Ane gam ke tane nauna Abrahammanaiserem Ismaelo Isak gam ke jem temawenefener. Ribka jei tane naura gam tosona, Esau yo Yakub, ane jemna jeta jei daamfenna, Isak asal-asala nemnaiserem. 11 - 12 Ane Ribkam temawer, jei tane naura jeiserem galap jes tosolaiserem, Uwa Sanbagiri Ribka ga enggam bil, "Osonaiserem jei ayanem sanbakef se nwini." Uwa Sanbagiri Jei taterisi jeiserem ga jes bil nalefe tane nauna jeiserem jam tosoyan, ane jei nalefe waakena afa kapka jam eyebiyen. Jeiserem ga enggalf etamwel, jega samfer Uwa Sanbagiri Jei nes gase towas-towastababili enggame Uwa Sanbagiri Jei se gaartena angtane Jen aa jes balaram jem gaartefe. Jei angtane jam gaarteyan enggalem temawer angtane jeiserem jei waakena aa jes gam eyebilirim, afa kapka aa jes gam eyebilirim. 13 Taterisi Uwa Sanbagirmanaiserem jep ga enggam tulisul, "Ai Yakubs As nesiktene, jengga Esau jei fas." 14 Gam jega nei ga fomfom nesa gunu jeiserem jem temawer? Nei ke enggam nesa gunu, Uwa Sanbagiri Jei bunarsusfer Jam eyebiyen? Fas! Jei seyaftersus bunarsusfer eyebili. 15 Uwa Sanbagiri Jei Nabi Musas bal, "Ai angtane As nesiktene angtane Ai Aner Ajes balaram jam nesiktefe, ane Ai angtane As batobana angtane Ai Aner Ajes balaram jam batobafe." 16 Gam jega Uwa Sanbagiri Jei angtanefe waakena Jam eyeibeyen aam temawer angtane jeiserem jei jener aa gemer gam gunurum, afa enggam angtane jeiserem jei waakenfer aa jewer gam eyebilirim. Wowo, gamyan. Uwa Sanbagiri Jei angtanefe waakenaiserem gam eyeibene, aam temawer Jei Jeneram gunu jam eyebife. 17 Uwa Sanbagiri Jei Raja Mesir ga enggam bal Taterisi Jelemanaiserem jebe: "Ai aamei is Ai gaartena enggalfe aamei rajaf igam nwinf. Ai kabwaktalaiserem jam isAs eyeipminirim im nenennabe, angtane seyafter baabeta Amna ga Asene domolbana. Ane angtane ogirip seyafter gemerserem ga sene towaswebili, ane bosna Amnaiserem jem temawer ga sege nasbawena." Jepga Uwa Sanbagiri Jei raja jeiserem ini jemna kekeletabasil, ane jei angtane Israelmana jam balbabiyen jam totyefe. 18 Gam jega Uwa Sanbagiri Jei angtane gase nesiktene Jei Jener aa jes balaram jam nesiktefe, ane Uwa Sanbagiri Jei ini angtanemana se kekeletabaipmisini angtane Jei Jener aa jes balaram ini jam kekeletabasife. 19 Jengga aamei ga as im tenebana, "Afa jeiserem bunare, ane angtane Uwa Sanbagiri Jei aa jes mwangbisinirim jei afa jam kwirulsiyen, jeje bafa Uwa Sanbagiri Jei fwaina kapka ga aa golmini angtane kapkaiserem aa jei ne eyebilirim jebe?" 20 Jengga ai enggam ai tamawola, aamei angtane tefner. Bunarsusfer aamei Uwa Sanbagiri gam ijam teneyan. Pot bungana jeke angtane aa jei gam eyebilirim jei ke gam tenebana enggame, "Jeje bafa aamei ai enggam ga as im eyebili?" 21 Nei nemsa towaswena enggame, angtane aasaje pot bungana onnawer gam eyebili. Jei ona aa jes gam murmurulurum, ona jeiserem gam waksosini. Jei afwer ga pot bungana waaken-waakensususerem ga galf gam eyebili nudwasfe. Ane afwer jei ga pot bungana bastantowaifer waakenaiserem ga galf gam eyebili nunu jeber-jeberfe. Ane jei samfer jei jener biliserem. 22 Ane nei gamjon nemsa towaswena enggame, aaiserem jeme bunar Uwa Sanbagiri aa jes eyebilirim. Jei safe kakala Jemna ane baabeta Jemna saf jam gwerauwulf, jengga Jei abakfer fina angtane kapkaiserem aa jei ne gwebanaram jamer Jei aa kakalswena, angtane Jei jam jes kabwaktababiliserem. 23 Jei abakfer fina angtane kapka jeiserem, aam temawer Jei angtane nafsiserem ga jem temawer sarsnenne, angtane Jemna nesiktele Jam jep golmiliserem. Angtane jeiserem jeiba jesam Jemna nafdusa jam jep gwerauwulmiliserem, angtane Jei fwater aa jes kitulstelam enggalfe Jemna nafdusa gam ne taayibef. 24 Ga enggam, neiba angtane Jei aa jes kitulstelam, anggwabura Yahudimana jemniwer ane anggwabura Yahudimanyanaiserem jemniwer. 25 Uwa Sanbagiri mesam gul bukunu Nabi Hosea jebe enggame: "Angtane Amanyanaiserem jem temawer, Ai Agam balbabili, ’Angtane jeiserem jei Amna.’ Ane angtane Ai Ajes nesikteyeneiserem, Ai Agam balbabili, ’Angtane aaiserem jeiba Ajesam nesiktababili.’ " (Hosea 2:23) 26 Ane gamjon, "Tampata Ai aamei isa Ajep balbabilirim, ’Aamei angtane Amanyan.’, tampata jeiserem Ai aamei ga isa jeber As balbabisi enggame, ’Aameiba tantantane Amna, ane Aiba Uwa Sanbagiri aa jei gwenaram.’ " (Hosea 1:10) 27 Ane Nabi Yesaya jei uskambarsus ga gutena anggwabura Israelmanaiserem jem temawer: "Angtane Israelmana safe unggwanfer sege unggwanswebili, uskambar enggam fi dwisi gemerserem, Tuhan Jei safna bastantouya tefner se waakentababisisi jemniwer. 28 Ane Tuhan Jei angtane aa jep tamtamtababisirim ogiri seyafter aaiserem jebe, Jei se tamtamtababisi tatarfer ane baabeta Jelemanaiserem jeme." (Yesaya 10:22-23) 29 Ga enggam Yesaya gwanan aa gam gulum: "Afa Tuhan, baabeta Jemnaiserem jeme Jei angtane seyafter fwater jam gam tamtamtababilim, gam jega namwer tamna nemna je taman teten, kotana Sodomo Gomora jes gamserem. Jengga Jei safna bastantouya gam nesiksona, ane ga nes waakentababisini." (Yesaya 1:9) 30 Igi jame ajes tulisulurum ga enggam: Angtane Yahudimanyanaiserem jei enggam jam ne terelbiyen jam sarbife Uwa Sanbagiri aa jes bilirim, "Aamei angtane waakena." Jengga jei Uwa Sanbagiri Jei tefner ne tebasini, ane Jei ga aa gunu, "Aamei waakena." 31 Jengga angtane Israelmana Hukumu jei ne onsobili, jega Uwa Sanbagiri samfer se balbabili "Aamei waakena". Jengga masef, Uwa Sanbagiri Jei gam Jam guyon. 32 Jeje bafa Uwa Sanbagiri Jei gam Jam balbabiyen? Jei Jam balbabiyen game, aam temawer jei Hukumu sene onsobili jega jewer gam ge sarbife Uwa Sanbagiri aa jes balbabilirim enggame, "Aamei waakena". Jei Kristus jam ne tebayan. Jepga jei enggam ga aa ge janbiton, angtane aas galserem jei ton-giri nelep aa jei falaram jep aa gam ge dargaswebilirim, ane ga aa ge janbiton. 33 Taterisi Uwa Sanbagirmanaiserem jep ga enggam baatultel ton-giri jeiserem jem temawer: "Sa domol, Ai ton-giri ga Kota Siyon ga Ajep gaarantena. Angtane jei ton-giri jeiserem jebe sege dargaswebisi, ane ga sege janbiton. Jengga angtane Jei aa jei ne tebanaram, jemna ini jam ge jenbamiyen." (Yesaya 8:14)
101 Am afelen mesna, ai enggam ai gunu anggwabura Israel jei Kristus ne tebaf, ane Uwa Sanbagiri Jei gase waakentababisini. Ane ai jeber-jeber sembayanga Uwa Sanbagirfe ai gwebabana jem temawer. 2 Ai bunar as gutena jem temawer enggame, jeiba bunarsusfer nele Uwa Sanbagirmanaiserem jes ne onsobafam. Jengga jei nele bunarsusfer jeiserem Uwa Sanbagiri aa jes destabanaram, jei nele jeiserem jam ne onsobayan. 3 Jei nele jeiserem bunarsusfer fas jam ne towaswebayan, jega Uwa Sanbagiri Jei gam balbabife enggame, "Angtane jeiserem ini jemna waakena." Jei enggam ge gubili, "Taterisi Nabi Musamanaiserem jes nesa onsobili jamere Uwa Sanbagiri Jei se gunu, ’Ini imna waakena.’ " 4 Kristus Jei mes tabanulsini Hukumu Nabi Musa aa jes tulistababilim. Angtane seyafter Jei aa jei ne tebanaram, Uwa Sanbagiri gam gunu angtane jeiserem jem temawer, "Ini jemna waakena." 5 Nabi Musa jei Hukumu Uwa Sanbagirmanaiserem jem temawer mes tulisul, ane jeime aa tulisul Uwa Sanbagiri enggam guluserem angtanem temawer, "Ini jemna waakena." Jei enggam tulisul, "Afa angtane Hukumu seyafter aa jei onsobilirim, angtane jeiserem jei waakenfer se gwena." 6 Jengga aaiserem jeme aa tulisul Taterisi Uwa Sanbagirmanaiserem jebe, angtane Jei aa jei gam tebanaram, Uwa Sanbagiri Jei gam gunu angtane jeiserem jem temawer, "Ini jemna waakena." Taterisi jeiserem jem temawer, in ina ijam tenebayan enggame, "Nane se tauna taman waaken-giribe, ane Taterisi Uwa Sanbagirmana ga sege iritya? (Igi jemnaiserem ga enggam, Kristus jei ge ireyaf.)" 7 Ane enggam jon ijam teneyan, "Nane se irna tampata angtane futunu jepserem, ane Taterisi Uwa Sanbagirmana ga sege tawetya? (Igi jemnaiserem ga enggam, Kristusfar gamjon ga sege tawetya.)" 8 Jengga enggam mes tulisul: "Taterisi Uwa Sanbagirmana jei im gwetmanap fala. Jei im inip nuniton, ane im aaremap fala." (Ulangan 30:14) Taterisi jeiserem enggame, Kristus jam tebalaiserem jem temawer, ane taterisi jeiserem nejesa nasipmini angtane nafisfe. 9 Ga enggam, afa aamei enggam jam is tebanaram Kristus Jei mes terent, ane Uwa Sanbagiri Jeiba Jei mes irtestenant terewer, ane is gunu aarememe, "Yesus Jeiba Tuhansam.", jepga Uwa Sanbagiri ga is waakentaasini. 10 Je ga enggam, nei Kristus jam negama tebanaram nelem inibe, jepga Uwa Sanbagiri ga gam gunu, "Aamei waakena." Ane nei enggam janma gutenaram nei Kristus sa tebana, jepga Uwa Sanbagiri Jei ga nes gam waakentababisini. 11 Taterisi Uwa Sanbagirmana je enggam gunu, "Angtane Jei aa jei ne tebanaram, jemna ini jei jam ge jenbamiyen." 12 Anggwabura Yahudimana ane anggwabura seyafter Yahudimanyan, jei Kristusem nwenabe nafis-nafisyen. Tuhan Jeiba daamfennam, Yesus Kristus aa Jei nwinirim Sanbakfe angtane seyafter gemerserem, Jei aa golmini gwela yo baabeta angtanefe aa jei jelaram Jemnibe. 13 Gamjon Taterisi Uwa Sanbagirmana jep ga enggam tulisul, "Angtane seyafter bosna Tuhanmana aa jei ne jenibenerem, angtane jeiserem Tuhan se waakentababisini." 14 - 15 Jengga fomfoma angtane Tuhanmana bosna jam jenibefe, jega Tuhan jei gam waakentababisife? Gwanan ga enggam, Uwa Sanbagiri Jei angtanes gam baftabili, taterisi Jemna jei ne nasibefe. Jepga taterisi jeiserem aa jep gane nasbilirim, angtane nafsi ga taterisi jeiserem gane sarbisini. Angtane taterisi jeiserem jam gane sarbilirim, jei taterisi jeiserem ga gane taabili, ane enggam ga gangge gubili, "Tuhan, as waakentababisi!" Taterisi Uwa Sanbagirmanaiserem jep ga enggam baatultel: "Ini amna saaser-saaserfersus ge folbamini, angtane Taterisi Waakenaiserem jam aa jep ne gwirinyelerem, am tamnap jam sege forobityerem." (Yesaya 52:7) 16 Jengga angtane Israelmana seyafteryan Taterisi Waakenaiserem aa jei ne sarbilirim, ga aane taabili. Nabi Yesaya enggam tulisul: "Tuhan, taterisi ai ajesa nasbilirim, nane se taabili?" (Yesaya 53:1) 17 Gam jega, angtane taterisi Kristusmana jam gane nasbilirim, angtane nafsi ga gane sarbili, ane taterisi jeiserem ga gane taabili. 18 Jengga ai ajam tenna, angtane Israelmana jei ke jam ne sarbiyen Taterisi Waakenaiserem? Jeiba mesam ge sarbili. Taterisi Uwa Sanbagirmanaiserem jep ga enggam baatultel: "Angtane Taterisi Waakenaiserem aane nasbinenne ogiri seyafter jes gemerserem. Taterisi jemna mes ne nasipminenne tampata seyafter jes gemerserem." (Mazmur 19:4) 19 Jengga ai gamjon tenna, angtane Israelmana jei ke jam ne towaswebiyen taterisi jeiserem? Nabi Musa jei gwanan-gwanansus enggam tulisul: "Ai angtane As destabaabili, angtane jeiserem anggwabura imnaiserem jewermanyan, ane ga jem temawer aamei ga isa uskamswebabili. Angtane Ai As jei ne towaswebayanaiserem, jei ga Ai As destabaabili, ane ga jem temawer aamei ga isa nasbabili." (Ulangan 32:21) 20 Ane Nabi Yesaya jei gamjon jam ereyen jam nasbabife Uwa Sanbagiri aa jes balbaipminirim enggame: "Angtane Ai As jei ne terelbiyeneiserem, jengga jei As mes ne damtana. Angtane Am temawer aa jei ne tenebayanaiserem, jengga Ai Ana Ames gweretana jemnibe." (Yesaya 65:1) 21 Jengga Israelem temawer Jei aa gul: "Nunu jeber-jeber Ai tafna Amna Ai gweyipmiwena, ane Ai jenbebiwena. Jengga ini jemna kekelna, ane jei Ai As jam ne sarbayan." (Yesaya 65:2)
111 Jepga ai tenna, Uwa Sanbagiri Jei ke mes gutena enggame angtane Israelem temawer, "Angtane jeiserem jei Amanyan."? Fas, Uwa Sanbagiri Jei gam Jam guyon. Ana jegme angtane Israelsam. Aiba asal-asala Abrahammana, tewe Benyaminminiwer. 2 Uwa Sanbagiri Jei Jam guyon angtane Israelmanaiserem jem temawer enggame, "Jei Amanyan." Angtane Israelmana jeiba angtane Uwa Sanbagiri gwanan aa jes destabaabilim. Sa sarbistaabon Taterisi Uwa Sanbagirmana Eliyam temawer. Eliya jei Uwa Sanbagiri jeber-jeber balwel angtane Israelmana jem temawer, ane etam-etama kapka jei aa jes ne eyebilim jem temawer. 3 Eliya aa gul, "Tuhan, angtane jei nabi-nabi Imna mes ne munbobili. Ane jei tampata mes ne kwirtabaipmisini, tampata ai sembayanga Ibe Is ajeba gwebabawenaram. Jengga ai anfentowai gwena, ane ai mese safe ase jam ne munbof." 4 Aamke imsa dirinswebili Uwa Sanbagiri aa gam tamawolam? Jei aa gul, "Angtane Amna 7.000, angtane jeiserem jei Ai As jei ne tikwebaatini. Jei sembayanga jam ne gwebabayan tiborma jam kwirulu Baalmanaiserem." 5 Gwanan jes gamserem aaiserem jengba gamam, namwer aas jepserem Uwa Sanbagiri Jei angtane safna bastantouya mesam destabaabili. Jei waakena Jelemanaiserem jep mesam golmini, ane Jei ga aa gunu, "Angtane jeiserem jei Amna." 6 Jei ga enggalem temawer destabaabili, Jei waakena Jelemanaiserem jep jewer golmif. Jei jam destabaabiyen enggalem temawer angtane jeiserem jei waakenfer aa jewer ne eyebilirim. Afa jei waakenfer aa jewer ne eyebilirim jem temawer gam destabaabilirim, gam jega Jei waakena Jelemanaiserem jep Jam golmiyen. 7 Gam jega enggam ga as gunu, angtane Israelmana jei jam ne domolyan jei aa jes ne terelbilim. Jei ga aas ne terelbil, Uwa Sanbagiri Jei enggam gam balbabif, "Ini imna waakena." Jengga angtane safna bastantouya Uwa Sanbagiri aa jes destabaabilim, jengga jenefener ne domol. Ane angtane tomna unggwanfer afwer jeiserem, ini jemna jam ge kekelesweipmil. 8 Taterisi Uwa Sanbagirmanaiserem jem temawer jep ga enggam baatultel: "Uwa Sanbagiri aa eyebili, jega angtane jeiserem taterisi Jemna jei waakenfer jam ne sarbiyen. Jei nweme jam ge anggabiyen, ane imwam jam ge sarbiyen, jamer namwer aas jepserem." (Yesaya 29:10) 9 Ane Raja Daud aa gunu angtane Israelmanaiserem jem temawer: "Ai sembayanga enggam ai gwebana, masara seyafter jei aa jes ne eyebaabuwenaram sege etamweipmini jerata gamserem jena jei tebabife. Ane ga sege janbiton o mwonap jam janona gamserem, ane fwaina jemnaiserem jei ga kapka. 10 Gwini nwena jemna se matabaipmini, jega enggalf jei jam ge anggabiyen. Jei daran-darna sene tingginbili, jamere duruwer sege faangenwebili jamer abak-abaksus." (Mazmur 69:22-23) 11 Ai gamjon ajam tenna, angtane Israelmana jei jam gangge janbilirim, gamjon ke gangge irwebili? Ngga, jei bunarsusfer gamjon gangge irwebili, ane taterisi Uwa Sanbagirmana ga gane saribaasini. Jengga fwater galapserem jei Taterisi Uwa Sanbagirmana jam ne sarbiyene, Uwa Sanbagiri Jei gase towaiwulu anggwabura nafsi jam waakentababisife. Angtane Israelmana jei jam sene damtabilirim, ini jemna ga sege uskamswebamini. 12 Angtane Israelmana jei etam-etama kapkaiserem jam gane eyebilirim enggame, jei Kristus jam ne tebayan. Jega jem temawer angtane nafsiserem jei ga waakena Uwa Sanbagirmanaiserem ga gane taabili. Angtane Israelmana galap jei seyafter aa jep ge waraubisirim Uwa Sanbagirminibe, angtane ogirip seyafter gemerserem jei ga waakena Uwa Sanbagirmanaiserem bunarsusfer ga sene taabisi unggwanfer. 13 Ai namwer is ajam nasipmif ibe, aamei angtane Yahudimanyan. Aiba Rasulsam Uwa Sanbagiri aa jes destabanaram enggalfe, ai angtane Yahudimanyanaiserem jei agam towas-towastababif. Ane ai gunu awelna amnaiserem je igsusu. 14 Ai engbar samfer as eyebili, jega anggwabura amnaiserem jei Yesus gam ne tebaf, aamei gamserem. Jepga Uwa Sanbagiri Jei anggwabura amnaiserem Israel gase waakentababisini. 15 Jei gwanan galapserem Yesus jam ne tebayan, jes galapserem Uwa Sanbagiri Jei nele ga gaarmini anggwabura nafsiserem jebe, ane ini jemna Uwa Sanbagirem gwetmanap ga sege folbamini. Ane angtane Yahudimana galap Yesus aa jep ne tebanaram, jeime gwela ibirmi ga sene domolsa. 16 Ga enggam, tumilgala afa daamfen woga Uwa Sanbagirfe jam gane gulbanaram, gam jega tumilgala seyafter jes gemerserem Jep ga gane gulbana. Tisakara Uwa Sanbagirfe jam gane gulbanaram, gam jega tini tirniserem jes mese seyafter Jep gane gulbana. Jes gemerserem gamjon aaiserem jegme gemer angtane Yahudimana jem temawer, afa Abraham, ane asal-asala nemna fwatermanaiserem jei Uwa Sanbagirmana, gam jega tane mesna namwer aaiserem, jes mese Uwa Sanbagirmana. 17 Angtane ti tirni jam gane targabaabisinirim tini Yahudiminiwer, jepga aamei angtane Yahudimanyanaiserem ti tirni nafsi gamserem, jep gane gurtenaram tini Yahudiminibe. Ane aamei jegme nata waakena igama domola tisakara jeiserem jemniwer. 18 Jega jem temawer aamei ina ijama tetenanayan ti tirni aa jes ne targabaabisinirim jem sagabe. Aas sa sarbistaabon, tini tirniserem tumilgala jam gulbayan tisakara jeiserem jebe. Jengga enggam, tisakara jeiserem jei tumilgala ga je gam golmini tini tirniserem jebe. 19 Aamei ga enggam ima gunu, "Angtane jei ti tirni afwer jam sene targabaabisini, jega samfer ai jem urgunup ga sene gurtena." 20 Ngga, jeiserem bunar. Jei sene targabaabisini, aam temawer jei Uwa Sanbagiri jam ne tebayan. Ane aamei ga jeber isa nwini, aam temawer aamei Uwa Sanbagiri imsa tebana. Jengga in ina ipsama tetenaram jeiserem jem temawer. Sa erebe Uwa Sanbagiri, ane bai se etamwena imnibe. 21 Afa Uwa Sanbagiri Jei tirni igsusu Yahudiminiwer jam se targabaabisinirim, Jeime samfer tirni afweraiserem se targabaabisini, afa aamei Uwa Sanbagiri ijama tebayana. 22 Gamjon ijama dirinsweyan enggame, Uwa Sanbagiri Jei angtanefe waakenaiserem gam golmini, ane Jeime angtanefe tamtamtalaiserem gam golmini. Jei tamtamtala gam golmini angtane Jei aa jei ne tebayanaiserem, jengga Jei waakenaiserem is gam golmini aamei angtane Yahudimanyan ibe, aamei Jei gemer ijeya tebasinirim. Afa aamei Jei ijama tebayana, galap Jei is targabaabisini tiniwer. 23 Ane angtane Yahudimanaiserem jem temawer, afa jei gamjon Uwa Sanbagiri jam sene tebanaram, Uwa Sanbagiri Jei gamjon gase tonoltena tini jeiserem jebe. Uwa Sanbagiri Jei baabetabara gamjon jam tonoltefe. 24 Aamei angtane Yahudimanyan, aamei ga sibir tirni gamserem. Angtane gam fortya sibir tirni jeiserem ga gam targasini, gamjon ga gam gurtena eremu tinibe, ane jep ga gam kokosa. Angtane Yahudimana jei ga eremu tini gamserem. Afa Uwa Sanbagiri Jei eremu tirni jeiserem jam gam tagalsinirim, galap Uwa Sanbagiri Jei gamjon Jam gam gurtenaram eremu tinibe. Jei tatarmersus ga gam kokosa sibir tirniminiwer. 25 Am afelen mesna, ai taterisi isa ajam towas-towasulmif, taterisi bunarsusfer aaiserem Uwa Sanbagiri gwanan ibe is jam towasulmiyeneiserem jamer abaka. Taterisi aaiserem aamei ga is jei se batobaabili, jega aamei in ina ijama tetenanayan, ane jega enggam ijama guyon, "Ai towasusu." Taterisi jeiserem ga enggam, ini angtane Israelmana abakfer jam ge kekelesweipmiyen. Ini jemna sege kekelesweipmini jamere angtane Yahudimanyan Uwa Sanbagiri unggwanfer aa jep mwangbabilirim, mwangga jeiserem jep se fitna. 26 Mwangga jeiserem jep jase fitnaram, Uwa Sanbagiri Jei angtane Israelmana seyafter gase waakentababisini. Taterisi Uwa Sanbagirmana jep ga enggam baatultel: "Mesias angtane aa Jei waakentababisiliserem Jei se jela Siyonwer. Jei se eyebili jega asal-asala Yakubmana etam-etama kapkaiserem gamjon jam ne eyebiyen. 27 Ai taterisi Ajes bilipminirim, taterisi jeiserem jebar Amsama bili enggame, jei Abar Asa gwesa jamer abak-abaksus, Ai etam-etama kapka jemna jam Ajep wirtabaipmisinirim." (Yesaya 59:20-21; Yeremia 31:33-34) 28 Angtane Yahudimanaiserem jei Uwa Sanbagirem ginanggwasam, aam temawer jei Taterisi Waakenaiserem fas jam ne taabiyen, jengga aamei imsa taabili jeiserem. Jengga Uwa Sanbagiri Jei angtane Yahudimana gemer nesiktababili, aam temawer jeiba angtane Jena gwanan aa jes destabaabilim, ane aam temawer mese Jei mesam ge nasbawel Abrahamfar, ane Isakfar, ane Yakubfar. 29 Uwa Sanbagiri Jei gamjon jam surbobiyen angtane gwanan Jena aa jes destabaabilim, ane Jei gamjon jam amsonmiyen waakenaiserem Jei aa jes golminirim. 30 Aamei mese, aamei angtane Yahudimanyan, gwanan aamei Uwa Sanbagiri waakenfer ijama onsobayan. Jengga namwer Uwa Sanbagiri Jei ims nesiktababili, aam temawer angtane Yahudimana jei Uwa Sanbagiri gwanan jam ne tebayan. 31 Aaiserem jeba jes gamserem, namwer angtane Yahudimana jei Uwa Sanbagiri waakenfer jam ne onsobayan, jengga galap Uwa Sanbagiri Jei nesiktele jam is golmisirim ibe, Jeime gamjon gase golmisi nesiktele Jelemanaiserem angtane Yahudimanaiserem jebe. 32 Uwa Sanbagiri mesam gunu enggame, angtane seyafter, angtane Yahudimana ane angtane Yahudimanyan jes mese, seyafter Taterisi Jemnaiserem jam ne onsobiyen, jega Jei samfer nesiktele Jemnaiserem gase golmisi angtane seyafter gemerserem jebe. 33 Uwa Sanbagiri nemna Jei unggwan-girsusu! Jei towasusu, Jei tousa seyafter gemerserem. Nei teisyena Jei seyafter aa gam mwangbisinirim. Ane nei teisyena awelna Jemna aa jes gwebilirim. 34 Taterisi Uwa Sanbagirmana jep ga enggam baatultel: "Nane towaswena Tuhan Jei bas bili Jelem inibe? Nane se towastana Tuhan Jei bas eyebifi? 35 Gwanan nane gulbanant Tuhanfe, jega gamjon gase waraulbono jelefe? Angtane afa fasfasus jes gamserem gam jam ne eyebiyen." 36 Tuhan Jei seyafter eyebaabil, seyafter ga baabeta Jemnaiserem ga jem naawena. Ane seyafter jei Jelemanfenna. Ai sembayanga ai gwebana enggalfe, angtane seyafter Uwa Sanbagiri gan pujitef jamere abak-abaksus! Amin. (Yesaya 40:13-14; Ayub 41:11)
121 Am afelen mesna, Uwa Sanbagiri Jei nei nes uskambar nesiktababili. Ga jem temawer, ai aamei isa ititmer balbabili enggame, tifni seyafter ijema gwenaram ina ga jam isa tete Uwa Sanbagirfe, domba tane jam munbolo gamserem ane Uwa Sanbagirfe ga gane gerbana. Tifni imna seyafter jes gamserem ga jam isa kitulbono Uwa Sanbagirfefener, jega ini Jemna saaser-saaserfer ga gam folbana. Afa aamei awelna Uwa Sanbagirmana jam igama gweyibenerem ga jes gemerserem, awelna ga gemer igama gwebili bunarsusfer. 2 Ijama onsobaabiyen angtane kapka ogirip aaiserem jebe. Jengga aamei Uwa Sanbagiri Jes isa bala, ane Jei ga is kitulmini miri yo ini ibirmi. Jepga aamei isa towaswena Uwa Sanbagiri Jei ip is jes gam bilipminirim aamei ijesa eyebife. Jei ga enggam gunu, aamei igama towaswebif waakenaiserem ga fwersa, jega ini Jemna saaser-saaserfer gase folbana, jega aamei waakenfer ga isa gwena. 3 Uwa Sanbagiri Jei waakena Jelemanaiserem ga ap gulbana, ane jega jem temawer ai ga aamei seyafter isa jewer esoroltababili enggame, ina enggam ijama gitmiyen, "Ai unggwan-gwana angtane seyafter gemerserem jemniwer." Jengga aamei ina ga jam isa onabersona. Ane aamei taterisi aaiserem ga isa sarbili ilem inibe, aamei fwersaiserem iner infentowai ga jes isa eyebili baabeta Uwa Sanbagirmanaiserem jeme, aam temawer aamei Yesus imsa tebana. 4 Neiba tafa, tof, nwe, ane aarem galabaram, jengga tifni nemna daamfenna. Ane tafa, tof, nwe, ane aarem, jemna awelna nafis-nafsi. 5 Jes gamserem aaiserem jegme gemer, nei angtane Kristus nejeya tebanaram safe unggwanfer, jengga nei seyafter tifni daamfennam, aam temawer nei Yesus nemsa tebana, ane nei Jebar daamfennaber gwena. Nei seyafter nesa dupdupwesini tifni daamfenna, tifni Kristusmanaiserem jebe. 6 Au, awelna nemna ganma gwebi, baabeta nafis-nafsi Uwa Sanbagiri nep nes jes kitulminirim jeme, ane waakena Jelemanaiserem Jei nep nes jes kitulminirim jeme. Afa Uwa Sanbagiri Jei baabeta ibe is jam gam gulbanaram enggalfe taterisi Jei aa jes gam gulbanaram jem gam nasbinennef, sya, aamei taterisi ga jam igam nasbili iner gemer igam taabilirim Uwa Sanbagirminiwer. 7 Afa Uwa Sanbagiri Jei baabeta ibe is jam gam gulbanaram enggalfe angtane nafsi jem batobaabif, sya, aamei angtane nafsi ga jam igam batobaabili. Afa Uwa Sanbagiri Jei baabeta ibe is jam gam gulbanaram enggalfe angtane nafsi jem towas-towastababif, sya, aamei angtane nafsi ga jam igam towas-towastababili. 8 Afa Uwa Sanbagiri Jei baabeta ibe is jam gam gulbanaram enggalfe angtane nafsi jemna ini gam kanautabaipmif, sya, aamei angtane nafsi ini jemna ga jam igam kanautabaipmini. Afa aamei apgal jigala angtane nafisef jam igam gularam, jem fwaina ijam bilipmiyen. Afa aamei jematem sanbakf igam gwenaram, aamei awelna ga jeber-jeber igam gwebuwena. Afa aamei angtane im sarabosna jam igam batobanaram, aamei ga ini saaser-saasermer igam batobana. 9 Enggamfener ijama guyon, "Ai ims nesiktene." Jengga angtane bunarsusfer igama nesiktababili, seiseyam ijama gweyan. Gasa irfwena kapkaiserem jewer, ane jeber-jeber waakenaiserem ga isa eyebuwena. 10 Aamei in ina jam isa nesiksonanna enggam gamserem, ayana jei oson mesna aa gemer gane nesiktababilirim. Gwan ga aamei igama gunu angtane nafsiserem jem temawer, jei waakena. 11 Gamjon ijama kwaalaamitsweyan, jengga awelna baabetfer isa gwebili. Se gwebi awelna Tuhanmana ini saaser-saasermer. 12 Ini imna saaser-saaserfer sege folbamini, aam temawer aamei igemera fibili Uwa Sanbagiri igalaba tebanaram. Angtane nafsi afa jei kapkaiserem ibe is jam gam ne eyeipminirim, aamei ini kanaufer igama fina, ane sembayanga jeber-jeber isa gwebabuwena. 13 Afa angtane Kristen jei tumilgal afa fene fas, aamei jep isa kitulmini. Angtane afa jam gam wofenaram, ga gam fortyaram im jenabe, ga igama tebabili ilem jenabe. 14 Sembayanga Uwa Sanbagirf igama gwebabana, jega Jei waakena Jelemanaiserem ga gam golmini angtane ip kapkaiserem is jei gane eyeipminirim. Enggam Uwa Sanbagiri ijama balyan, "Aamei kapkaiserem jes Is golmini jebe." Jengga enggam igama gunu, "Waakena Ilemanaiserem ga jes Is golmini jebe." 15 Angtane ini saaser-saaserfer aa jemanem gangge folbaminirim, ini iman mesna jebar ga is saaser-saaserfer gangge folbamini. Angtane jam gangge syebuwenaram, aamei jebar seyafter isa syawena. 16 Im afelen mesna ane angtane nafsi mese, jei nawersamer waakenaiserem jes isa eyeipmini jebe. Angtane naura jeiserem jebe, nafis-nafismer ijama eyeipmiyen. In ina tefner ijama teteyan, jengga isa gwebili awelna igsususerem galyan. In ina ijama gitmiyen enggame, "Ai tousa seyafter." 17 Angtane afa kapkaiserem ise jam sene eyeipminirim ibe, aamei safnant, kapkaiserem ijama fwayenulmiyen jebe. Jengga angtane seyafter aa jes gane bilirim waakeneme, aamei ga jes isa eyeipmini jebe. 18 Waakenfer isa gwena angtane nafsiserem jebar, afa enggam igama gunurum, "Aaiserem samfer, ai jebar waakenfer agma gwef.", ane aamei baabeta ga isa domola jeiserem jem temawer. 19 Am afelen mesna, fwaina kapkaiserem ijama golmiyen angtane kapka is jei ne eyeipminirim ibe. Jengga aamei Uwa Sanbagiriserem Jes is bala, "Uwa Sanbagiri Aamei angtane jeiserem jam Is tamtamtababili." Taterisi Uwa Sanbagirmanaiserem jep ga enggam baatultel: "Ai Aner As golmisi fwaina kapkaiserem, Ai As tamtamtababisi angtane kapka aa jei ne eyebilirim." (Ulangan 32:35) 20 Jeiserem ipsama eyebilirim, jengga aas isa eyebili Taterisi Uwa Sanbagirmana jep aa gam tulisulum: "Afa ginanggwana imna wisi jam gam folbanaram, aamei ga tumilgala jebe jam isa gulbana. Afa jei fo botona jam gam folbanaram, aamei ga fona jam isa gulbana jam telbife. Ga enggam, afa aamei jes gamserem gam jam igama waakenfer eyebilirim, gam jega aamei jes igama gwebana jei ga gam seferswena." (Amsal 25:21-22) 21 Afa angtane jei kapka ip is jam gane eyeipminirim, fwaina kapka ijama golmiyen, aam temawer aamei isa kalaswena. Jengga aamei isa menangswena, afa aamei waakenaiserem jem isa fwainulminirim.
131 Angtane seyafter ga waakenfer sene sarbabili pegawai pemerinta nem sanbakef aa jei ge nwinbenerem, aam temawer Uwa Sanbagiri Jenfentowai golmini baabeta Jemnaiserem jebe. Angtane sanbakef aa jei ge nwinbenerem, jeiba Uwa Sanbagiriserem Jeyam destabaabili. 2 Angtane taterisi pegawai pemerinta nem sanbakef aa jei ge nwinbenerem, taterisi jemna aa jei gam ayeipminirim, angtane jeiserem jemba angtane Uwa Sanbagiri aa jes destabaabilirim taterisi jemna gam ayeipmini. Angtane gala aa jei gane eyebilirim, jei ga tamtamtala ga sene domola. 3 Angtane waakenaiserem aa jei gane eyebilirim, jei pegawai pemerinta sanbakef aa jei ge nwinbenerem jam ne erebaabiyen. Jengga angtane kapkaiserem aa jei gane eyebilirim, jei ga pegawai pemerinta ga jei gane erebaabili. Waakenaiserem ga jetefener isa eyebili, jega aamei pegawai pemerinta ijama erebaabiyen, jengga jei waakenaiserem im temawer ga is gane bilipmini. 4 Uwa Sanbagiri Jei aa destabaabili pegawai pemerinta seyafter, jega jei awelna Jemna jei gane gweyibef, ane aamei waakenfer ga isa gwena. Jengga aamei afa kapka jam isa eyebilirim, aamei ga pegawai pemerinta ga isa erebaabili, aam temawer jei baabetabara tamtamtala ip is jam ne golmife, ane jeime aamei isene tamtamtababili. Jei awelna Uwa Sanbagirmana gane gweyibene, ane jei tamtamtala gane golmini angtane kapkaiserem aa jei gam eyebilirim. Jei tamtamtala aa golmini, ane jeiserem ga jem gwerauwulu enggame, angtane kapkaiserem aa jei ne eyebilirim, Uwa Sanbagiri Jei angtane jeiserem se nasbabili. 5 Ga jem temawer aamei ga pegawai pemerinta sanbakef aa jei ge nwinbenerem waakenfer isa sarbabili, aam temawer aamei imsa towaswena ilem inibe afa aamei jei imsa sarbabili jeba waakenam, ane aam temawer aamei imsa towaswena Uwa Sanbagiri Jei is tamtamtababisi afa aamei kapkaiserem jam isa eyebilirim. 6 Ane pajak doini pemerintaf jam isa gaarmini, aam temawer aamei imsa towaswena ilem inibe jeiserem jeba bunaram. Pajak doini jam isa gaarmini, jega pegawai pemerinta jei awelna Uwa Sanbagirmana waakenfer ga sene gwebuwena jeber-jeber. 7 Isa waraulmini seyafter, afa aamei angtane nafsi utanga jep imsa gwebiliye. Ga enggam, pajaka seyafter jes gemerserem ga isa gaarmini. Ane ga isa golmini hormata pegawai pemerintafe. 8 Utanga angtane nafsiminip ijama gwebiyen, jengga utanga jetefener igam gwebili enggame, in ina jam nesiksonanalaiserem. Angtane afa jei angtane nafsi aa jei gam nesiktenerem, jei Hukumu Nabi Musa aa jes tulistababilim, Hukumu jeiserem jei mes gam taabili, ane ga jes gam onsobili. 9 Hukumu aaiserem ga Nabi Musa aa jes tulisulum: "Maaryena ijama gwebiyen. Angtane nafsi ijama munbobiyen. Apgal jigala ijama komkomulsiyen. Apgal jigala angtane nafsimana ipsama bilt ilem inibe." Taterisi seyafter jeiserem ane afweraiserem jes mese, seyafter jes gemerserem jeba daamfennaberam enggame: "Angtane nafsi ga jam isa nesiktababili, aamei in ina gemer igam nesiktenerem." 10 Afa aamei angtane nafsi jam isa nesiktababilirim, aamei kapka jep ijama eyeipmiyen. Aamei angtane nafsi jam jep igama nesiktababilirim, jes jepserem aamei Hukumu Nabi Musamanaiserem seyafter ga ima onsobili. 11 Seyafter waakena jeiserem gase eyebi, aam temawer aamei imsa towaswena enggame, nunu jeiserem jei jam gwetmanswena. Mwangbisili jep ga mes fyal aamei nunuwer ijama irwefe. Nunu nei gwanan Yesus nejama tebanantam, jes jepserem Nunu Uwa Sanbagiri Jei nes jem waakentababisiliserem je ga gwetmanyan. Jengga namwer nunu jeiserem ga mes gwetmanswesini. 12 Gwini ga amkom gase ayintye, ane ona ga babitsim gase nafwena. Nei ga jam nesa tikwena etam-etama kapkaiserem nei nejesa eyebuwenaram jewer, aas galserem angtane kapka gwinem aa jes ne eyebuwenaram. Jengga nei nafap nejeya nwinirim, nejama eyebife jeiserem nei galap nes je batobaabife bawasfar nejeba ernaram. 13 Au, nei ganma gwe angtane aas galserem, angtane nafap aa gam naawenaram. Masara enggalfe ijama eyebiyen ijewera mabukswef, ane etam-etama kapkaiserem jewer gam eyebaabif. Maaryena ijama gwebiyen, ane ilyak-ilyakmer ijama wofeyan. Ijama erayan, ane angtane nafsi ijama uskamswebabiyen. 14 Jengga nei fene negama kabwabili gamserem, nei Tuhan Yesus Kristus aa jes eyebilirim, jeiserem nei ga gemer nesa kabwana fene jes gemerserem. Ane ipsama gunurum ilem inibe enggame ini kapka imnaiserem je ga ims tergenbaabif aamei kapkaiserem jewer igama eyebif.
141 Angtane Uwa Sanbagiri bastowaifer aa jei ne tebanaram, aamei angtane jeiserem ga waakenfer isa tebabili, ane jebar ijama doksoyan, jei aa jes ne eyebilirim jem temawer. 2 Angtane afwer Uwa Sanbagiri aa jei ne tebanaram jei enggam ne balbabili, jei samfer gane tombaabili tumilgala seyafter gemerserem. Jengga afwer Uwa Sanbagiri bastowaifer aa jei ne tebanaram jei enggam ne balbabili, waakenfer nana tefner gane tombaabili, matau nini jei safnant. 3 Angtane tumilgala seyafter aa jei gane tombaabilirim, jei jam ge nasbaweyan taterisi kapkaiserem angtane tumilgala seyafter aa jei ne tombaabiyeneiserem jem temawer. Angtane tumilgala seyafter aa jei ne tombaabiyeneiserem, jei enggam jam ne balbabiyen angtane tumilgala seyafter gane tombaabili, "Aamei kapkaiserem ga ijesa eyebili." Jei ga gam jam ge gubiyen, aam temawer Uwa Sanbagiri Jei angtane jeiserem mes tebabili. 4 Aamei ijama balbabiyen enggame, angtane awelna angtane nafsimanaiserem aa jei gam gweyibenerem, jei waakena gam gwebili afa jei kapka gam gwebili. Angtane jeiserem jelem sanbakaiserem ga jei gam gunu enggame, afa jei waakenfer gwebili afa jei kabwakfer gwebili. Ane angtane jeiserem jei waakenfer gase gwebisi, aam temawer Tuhan jei se batobana jega jei waakenfer gase gwebili. 5 Angtane afweraiserem jei enggam ge gubili jelem inibe, nunu daamfenna je igsusu nunu afweraiserem jemniwer enggalfe Uwa Sanbagiri jem pujitef. Angtane afwer jei enggam ge gubili jelem inibe, nunu seyafter gemerserem je nafis-nafisyen enggalfe Uwa Sanbagiri jem pujitef. Jengga angtane seyafter gemerserem jei taterisi jeiserem jem temawer ga aa sene sarbili jelem inibe, ane jei jen jener sene mwangbili. 6 Angtane enggam aa jei gangge gubilirim nunu daamfenna je igsusu nunu nafsiserem jemniwer, jei gam aa jewer gangge gubilirim, jega ini Tuhanmanaiserem ga saaser-saaserfer gam folbana. Angtane tumilgala seyafter aa jei gane tombaabilirim, jei gam aa jewer gane eyebilirim, jega ini Tuhanmanaiserem saaser-saaserfer ga gam folbana, ane jei Uwa Sanbagiri enggam ga gane bala, "Ase samfer golmini." Ane gamjon ga enggam, angtane tumilgala seyafter aa jei ne tombaabiyeneiserem, jei tumilgala afweraiserem jam ne tombaabiyene, jega ini Tuhanmanaiserem ga saaser-saaserfer gam folbana, ane jeime Uwa Sanbagirfe ga gangge gubili, "Ase samfer golmini." 7 Nei nejama gweyan enggalfefener ini nemna saaser-saaserfer nes gangge folbamif, ane nei nejama teryen enggalfefener ini nemna saaser-saaserfer nes gangge folbamif. 8 Nei enggalf neya gwena, jega ini Tuhanmanaiserem saaser-saaserfer gam folbaf, ane galap nei jem negama tererem, nei ga ini Tuhanmana ga negama gwebabana saaser-saaserfer gam folbafe. Gam jega ga enggam, afa nei jam negama gwenaram afa tererem, neiba Tuhanmanam. 9 Neiba Tuhanmanam, aam temawer Kristus Jei mes terent, ane gamjon mes irwenant terewer, jega Jeiba Tuhan nemnam, nei negalaba nwinirim ane nejam negama tererem. 10 Jeje bafa angtane afwer im nenennabe enggam ga aa ge gubili angtane Kristen nafsi jem temawer, "Aamei kapka gam eyebili."? Ane jeje bafa angtane afwer im nenennabe kabwakfer ga aa ge nasbawena angtane Kristen nafsi jem temawer? Nei seyafter nesa fisa Uwa Sanbagiri jem nwenabe, ane Jei nei ga nes balbabisi enggame, nei waakenfera eyebili, afa kabwakfera eyebili. 11 Taterisi Uwa Sanbagirmana jep ga enggam baatultel: "Tuhan Jei enggam gunu, ’Aiba Ayam gwena, ane bunarsusfer jes gemerserem, angtane seyafter somwan dumem sege nwinbitasa Am tarnabe.’, ane angtane seyafter ga sege gubisi enggame, ’Aameiba Uwa Sanbagirsam.’ " (Yesaya 45:23) 12 Jega jem temawer nei seyafter daamfen-daamfenneme ga nesa taawolbaabisi taterisi seyafter nemnaiserem Uwa Sanbagiri Jem tarnabe. 13 Nei nena nejama gitmineneyen enggame, "Aamei ikapkakma eyebili." Jengga nei nena enggam nesa gitmini, "Ai apgal jigala afa ajama eyebiyen, jega am afelen mesna jei etam-etama kapka galap ga sene eyebili." 14 Bunarsus ai enggam ai towaswena, ai Tuhan Yesusmana. Ane jega jem temawer, ga enggam, apgal jigala afa fas kapka jam falyan jentowai. Jengga angtane afa apgal jigala jeiserem enggam gane bilirim kapka, gam jega apgal jigala jeiserem jei ga kabwakfe ga gam etamwena angtane jeiserem jemnibe. 15 Aamei tumilgala nafsi afa jam igam tombaabilirim, ane jega jem temawer im afelna ini jemna kabwakfer folbana ijesa tombaabilirim jem temawer, gam jega fas aamei ijam eyebiyen enggame angtane jes gamserem jei angtane nafsiserem aa gam ne nesiktababilirim. Aamei tumilgala nafsi jam jep igam tombaabilirim, aamei im afelen mesna safnant ijam tergenbayan enggalfe jei etam-etama kapka jem gam eyebif, ane jei jen jena gam bijautaf Uwa Sanbagirminiwer. Jeiserem ipsam eyebilirim, aam temawer Kristus Jei angtane jeiserem jem temawer mesam terent. 16 Apgal jigala afa ijam eyebiyen aamei enggam jes igam bilirim waakena, jengga angtane nafsiserem jei enggam gane bili kapka. 17 Uwa Sanbagiri aa Jei gwenaram nem Sanbakfe, jem igiserem jeke tumilgala yo fos telbili jem temawenefeneryan. Jengga Uwa Sanbagiri aa Jei gwenaram nem Sanbakfe, jem igiserem ga enggam, nesa eyebili Uwa Sanbagiri aa gam gunurum, ane ini nemna ga samfer nes ga sege folbamini. Ane Mafnana Uwa Sanbagirmana Jei ini nemna ga nes gwebaipmini nes jam ge saaser-saaserswebaipmife. 18 Ane angtane awelna Kristusmono aa jei gam gweyibenerem, jei gam aa jewer gam eyebilirim jega ini Uwa Sanbagirmana ga jem gam saaser-saasertabana, ane angtane nafsi jei ga enggam ga gangge gubili, "Angtane jeiserem jei waakena." 19 Ga jem temawer, nei jeber-jeber ganma eyebuwe enggame, nei angtane nafsi jam nesa batobaabuwena jei waakenfer gam sege nwinbene, angtane seyafter gemerserem jebar. Ane nei angtane jam nesa batobaabuwena, jega jei Uwa Sanbagiri kanaufer gane tebasif. 20 Safnant, awelna Uwa Sanbagirmana ijama kabwakulboyon angtanem nenennabe, tumilgala aamei ijesa tombaabilirim jem temawer. Tumilgala seyafter gemerserem jei samfer angtane jam tombaabife, jengga aamei apgal jigala jes igam tumilirim ilem afelnem tarnabe tumilgala jei jam tumilyeneiserem, ane ilem afelna jei ini ga gam folbana tumilgala jeiserem jam tumilfe, gam jega aamei jes igam gwebana jei etam-etams eyebife. 21 Jengga waakenfer ga enggam, aamei matau nini ijama tumilyen ilem afelnem tarnabe matauwa jei jam tumilyeneiserem, ane anggur fona ijama telbiyen, afa nafis-nafsi ijama eyebiyen ilem afelen mesna jem tarnabe jei jam ne eyebiyeneiserem. Seyafter jeiserem ijama eyebiyen, afa im afelna jei gam gwebanaram etam-etama jes eyebife. 22 Jeiserem jem temawer ijesa taabilirim, jeiserem ga infentowai isa eganulsini, ane ga Uwa Sanbagiri tefner isa towastana. Ini angtanemana waakenfer gam folbana jei aa jep gam eyebilirim jeiserem jei mes towaswebili jeba bunaram, ane jei jam guyon enggame, "Ai syefer am eyebili." 23 Jengga angtane ini naura jemanserem isar-isarmer aa jeman gam folbanaram, tumilgala jei jam tumilyeneiserem jem temawer, afa jei tumilgala jeiserem jam tumilf afa jam tumilyen. Afa jei tumilgala jeiserem gamjon jam gam tumilirim, angtane jes galserem Uwa Sanbagiri enggam gam bala, "Aamei kapkaiserem ijes eyebili." Uwa Sanbagiri Jei ga gam gunu, aam temawer angtane jeiserem gam aa jewer gam eyebilirim, jei enggam gwerauwulu jei Uwa Sanbagiri jam tebayan jem temawer. Ane afa nei seyafter janma eyebaabilirim, ane nemna ini naura enggame afa nei nejesa eyebiliserem jei waakena afa kapka, ane nei Uwa Sanbagiri nejama tebayan, gam jega jeiserem nei nejesa eyebilirim je ga etam-etama kapkaiserem.
151 Nei kanaufer nejeya finaram Uwa Sanbagiri nejeya tebanaram, nei angtane baabetyenaiserem ga jes nesa batobaabili, jei enggala, angtane nele waakena jam towaswebayana gamserem. Jengga nei nejama eyebiyen nei nener jes negama bilirim jam eyebife. 2 Jengga nei seyafter waakenater nesa eyeipmini angtane nafisfe, jega ini jemna ga sege saaser-saasersweipmini. Nei ga jes gemerserem ga gemer nesa eyeipmini, jega jei kanaufer ga sege fibili Uwa Sanbagiri jam ne tebalabe. 3 Kristus sa sarbastaabon, Jei Jam eyebiyen Jei Jener aa jes bilirim jam eyebife. Jengga Jei enggam eyebili, taterisi Uwa Sanbagirmanaiserem jep aa gemer tulisulum Jem temawer: "Taterisi kapkaiserem angtane Ibe Is jes ne nasipminirim, taterisi kapka jeiserem ga Ai gwirni." (Mazmur 69:9) 4 Ane aaiserem gasa sarbistaabon, seyafter aa jes ne tulistaabilim Taterisi Uwa Sanbagirmanaiserem jebe, taterisi jeiserem ga enggalf ne tulistababil nei nes gane towas-towastababif. Jei ga aane tulistababil enggalfe nei afa kanaufer jam nesa finaram abakfer, ane afa nei Taterisi Uwa Sanbagirmana jam nesa gerabistenaram, jeiserem ga nes batobaabili nei negama towaswef enggame Uwa Sanbagiri Jei nebe nes waakena gam eyeipmini. 5 Ai sembayanga as gwebabana Uwa Sanbagirfe Jei aa jes eyebilirim, jega nei abakfer ga nesa fina kanaufer. Jei ini nemna nes jeber-jeber kanautabaipmuwena. Ai sembayanga ga enggam ai gwebana, jega Jei aamei is gase batobaabili enggalfe aamei daamfen iniber gam isa gwena, Kristus Yesus Jei aa gemer gwenaram. 6 Aamei seyafter daamfen iniber jam isa gwenaram, jega aamei seyafter daamfennaber Uwa Sanbagiri gam isa pujitene, Uwa Tuhan nemnaiserem Yesus Kristus. 7 Ga enggam, aamei in ina ga waakenfer isa taaminenne, Yesus Kristus Jei nei nes gemer tebabilirim. Jeiserem ga jam isa eyebili, jega angtane Uwa Sanbagiri ga sene pujitene. 8 Sa sarbistaabon, ai gwanan aamei isa mesam towastababilint enggame, Kristus Jei mesam fortyant enggalfe angtane Yahudimanaiserem gam batobaabif, ane angtanef gangge saamisif enggame, Uwa Sanbagiri Jei aa jes bilipmilim jeiserem ga mes eyebili. Ga enggam, Uwa Sanbagiri aa jes bilipmilim asal-asala nemnaiserem jebe, Kristus ga jes eyebilint. 9 Jei jeiserem aa jewer eyebilirim, jepga angtane Yahudimanyanaiserem jei Uwa Sanbagiri ga sene pujitene, aam temawer Jei jems nesiktababili. Taterisi Uwa Sanbagirmanaiserem jep ga enggam baatultel: "Jepga ai Aamei Isas bala enggame, ’Ase Samfer gulbana’, angtane Yahudimanyanaiserem jem nenennabe. Ai Aamei Isas pujitene, afa ai simala jam ajep twolaram." (Mazmur 18:49) 10 Ane gamjon ga enggam tulisul: "Aamei anggwabura Yahudimanyanaiserem, ini imna ga is saaser-saaserfer sege folbamini anggwabura Yahudimanaiserem jebaner, angtane Uwa Sanbagiri Jei aa jes destabaabilirim." (Ulangan 32:43) 11 Ane gamjon ga enggam baatultel: "Angtane Yahudimanyan seyafter gemerserem, ga Tuhan sa pujite! Ane angtane seyafter gemerserem jeime Jeter sene pujitene!" (Mazmur 117:1) 12 Ane aaiserem je ga Nabi Yesaya aa jes bilim enggame: "Angtane asal-asala Isaiminiwer aaiserem, Jei ga angtanef se surnu. Ane Uwa Sanbagiri Jei gase destabana enggalfe, Jei Sanbakef gam nwinf angtane Yahudimanyanaiserem jemnibe. Ane angtane unggwanfer jemna ini kanaufer ga sege folbamini Jem temawer, jei abakfer aa jep ge fibilirim." (Yesaya 11:10) 13 Ai sembayanga enggam ai gwebana, Uwa Sanbagiri ijewer batobaabilirim aamei abakfer igalaba finaram, Uwa Sanbagiri gase eyebili jega ini imna saaser-saasersusfer is ga sege folbamini. Ane ai sembayanga enggam ai gwebana, jega ini imna samfer is ga sege folbamini, aamei Jei gemer igalaba tebasinirim. Jeiserem Jei gase eyebisi baabeta Mafnana Uwa Sanbagirmanaiserem jeme, ane Jei ga ims batobaabisi aamei Jei abakfer igalaba finaram. 14 Am afelen mesna, ai bunarsusfer amsam towaswena enggame aameiba waakensusum. Aamei imsa towaswebili seyafter ijesa eyebiliserem, ane aamei ga ina ga isa esorolsonanna. 15 Jengga ai ajam ereyen surta aaiserem ajam tulisulfe Uwa Sanbagirs tebalaiserem jem temawer, ane nafis-nafsi mesna jem temawer, jega ini imna waakenfer is gam sege folbamini. Ai surta aaiserem enggalf ai tulisulu, jega aamei ijesa towaswebilirim waakena jam eyebife, seyafter jeiserem gam isa sarbistaabona. Ane ai surta aaiserem enggalf ai tulisulu, aam temawer Uwa Sanbagiri Jei waakena Jelemanaiserem abe as mes gulbana, jega ai awelna Jemnaiserem as gweyibene. 16 Jei ai as enggam bala, "Awelna jeiserem se eyebi, awelna Kristus Yesusmana se eyebi angtane Yahudimanyan jem nenennabe." Ai awelna ai eyebili awelna imammana gamserem. Ai Taterisi Waakena Uwa Sanbagirminiwer jep ai nasipmini, jega Uwa Sanbagiri angtane Yahudimanyan jei mese gase tebabili. Mafnana Uwa Sanbagirmanaiserem Jeiba jeyam kitulbono Uwa Sanbagirfe. 17 Ai ga enggam, ini amna saaser-saasera aam temawer awelna ai ajes eyebilirim, ai Uwa Sanbagirf eyeibene. Ini amna ga as jem saaser-saaserswebana, aam temawer aiba Kristus Yesusem angtanesam. 18 Ai ajam ereyen jam nasowefe, jengga ai ajetefener nasbili ai ajes eyebilirim Kristusem baabeteme. Kristus enggalf eyebili jega ai angtane Yahudimanyanaiserem gam as jenbebili Uwa Sanbagiri jam ne onsobafe. 19 Ai taterisi ai nasbabili, ane bwembwema ane bwembwema teisyena mese ga jes ai eyebaabili baabeta Mafnana Uwa Sanbagirmanaiserem jeme. Ane ai Kotana Yerusalemwer agalap sofwenaram jamere ona Ilirikuminibo, tampata seyafter jeiserem jebe ai am tabanulu jam nasbinennefe Taterisi Waakena Kristusem temawer. 20 Ai bunarsusfer enggam ai gunu ini amna unggwan-giri as enggalf folbana Taterisi Waakena ajam nasbinennef, tampata angtane jei bosna Kristusmono gemerje jam ne saribeyeneiserem jebe. Awelna angtane nafsi gwanan tawawulserem, ai baif gwena awelna jeiserem ai antowai aatfenulfe. 21 Jengga Taterisi Uwa Sanbagirmanaiserem jep ga enggam baatultel: "Angtane taterisi Yesusem temawer jem towastababiyeneiserem, jei ga sene domola. Ane angtane jam ne sarbiyeneiserem, jei ga sege towaswebili." (Yesaya 52:15) 22 Nele amna anesus as jam ne matabaasiwelabe, jega jem temawer ai imnip ajam foroyan kota Romaminibe, aam temawer ai awelna unggwanfersus gwebili. 23 Jengga namwer tampata fas ai awelna ajep eyebife ona aaiserem jebe, jega jem temawer ai ajam sofwef imnibe, kota Roma je. Tahunu anesus aa jei ge barwebuwenaram, ini amna as unggwan-girsusfer folbana enggalfe ibar negama dorwef. 24 Ai nejama dorwef ibar ai ajep sofwaram negeri Espanyolwer. Ai ga as tikwena Roma je, ane ibar gasa nwini muara unggwanferyan, ane ini nemna ga nes saaser-saaserfer sege folbamini. Ane ai enggam ai gunu as jam isa batobana Espanyolwer gam sofwef. 25 Jengga namwer aas jepserem ai gwanan Yerusalemwer sofna enggalfe, ai dois girinmifele angtane Kristenfe aa jei ge nwinbenerem kota Yerusalem je. 26 Safna Yesus aa jei ne tebanaram propinsi Makedonya je ane propinsi Akaya je, jei ga enggam ge gubili, "Aaiserem ba waakena amnibe doini ajama baftabif angtane Kristen galgalyenaiserem gam batobaabif Yerusalem je." 27 Angtane jep aaiserem jemna ini saaserfer ge folbamini enggalfe jei doini jeiserem gam ne baftabif, jengga jeiserem ga bunarsusfer jei ga fwaina tefner. Afa angtane Yahudimanyan jei Taterisi Uwa Sanbagirmanaiserem ane waakena afweraiserem ga gane taabili angtane Yahudimanaiserem jemniwer, gam jega je samfer afa jei jam ne fwainulmife angtane Yahudimana doime, ane apgal jigal enggalfe nunu jeber-jeber jes ne erbuwef. 28 Afa ai awelna aaiserem waakenfer jam ajep tabanulurum enggalfe, doini aa jes ne dupduptonorom jam gaarmife, jepga wofera amnaiserem negara Espanyolwer ga as towaiwulu. Jengga ai gwanan ibar nesa dorwena. 29 Ai afa imnip jam as gwinaram, ai enggam ai towaswena Kristus gase eyebili, jega ai imnip ga as gwirinwena waakenaiserem seyafter Jei nep nes jes golminirim. 30 Am afelen mesna, nei Tuhan Yesus Kristus nemsa tebana, ane Mafnana Uwa Sanbagirmanaiserem Jei nesiktele Jemnaiserem nebe nes mes golmini. Jega jem temawer ai aamei isa ititmer balbabili, jega aamei as gam isa batobana bawasfar agam ge eraf, sembayanga imnaiserem Uwa Sanbagirfe am temawer ijesa gwebabanaram jeme. 31 Sembayang sa gweba, jega angtane Yesus jam ne tebayanaiserem ona Yudeyaminibe, jei kapkaiserem abe as jam ne eyeibeyen. Ane sembayanga ga jam isa gwebana, jega angtane Uwa Sanbagirmana Yerusalem je, jei ini waakena tefner ga sene damtabili ai jei ajep batobaabilirim. 32 Ane jeiserem taban, afa Uwa Sanbagiri Jei abe nele as jam se dwotabanaram, ai imnip ga as forna ini saaser-saasermer. Samfer, nei ini nemna nena ga jam nesa kanausonanna. 33 Ai sembayanga enggam ai gwebana, jega Uwa Sanbagiri Jei nele ga as dwotabana, ane ini nemna samfer nes ga sege folbamini. Ane ai sembayanga ai gwebabana Uwa Sanbagirfe, jega Jei aamei seyafter is gase batobaabili. Amin.
161 Ai isa enggam ai towastababili, nem afelna bosna Febe, jeiba wini waakena. Jei safna Yesus aa jei ne tebanaram kota Kengkereya je, jei ga jes batobaabili. 2 Aamei jei ga jam isa taabili, aam temawer jeime Tuhanem angtanesam. Jei ga jam isa taabili, angtane Uwa Sanbagirmana gamserem jena aa gemer gane taaminennerem. Ane aamei jei ga jam isa batobili jei aa jes bilirim, aam temawer jei angtane unggwanfer mes batobaabili, jem ai mese. 3 Aamei Priskila yo anggwana jemna bosna Akwila taterisi amniwer aaiserem jes isa bilipmini enggame, "Kelek, waakenfer sege gwe!" Jei awelna Kristus Yesusmana abar seyaftera aya gwebili. 4 Jei amkom fom ge tere, aam temawer ai as jewer ge batobanaram. Ai jei enggam ai gitmini, "Ase samfer ge gulbana." Ane jeke enggam am tefner, jengga safna Yesus aa jei ne tebanaram seyafter anggwabura Yahudimanyanaiserem jes mese enggam ge gubili, "Ase samfer golmini." 5 Ane safna Yesus aa jei ne tebanaram ane aa jei ge betwebilirim Akwila yo Priskila jem jenabe, aamei taterisi amniwer aaiserem jes isa bilipmini enggame, "Kelek, waakenfer sa gwe!" Aamei Epenetus am afelna ai ajes nesiktenerem, jeime taterisi amniwer aaiserem ga isa bilibene enggame, "Kelek, waakenfer se gwe!" Jeiba angtane nabalsusu Kristus aa jei tebanaram propinsi Asya je. 6 Aamei Maria mese taterisi amniwer aaiserem ga enggam isa biliybili, "Kelek, waakenfer se gwe!" Jei awelna ip is uskambar gweyipmini. 7 Aamei Andronikus ane Yuniyas taterisi amniwer aaiserem jegme gemer isa gitmini enggame, "Kelek, waakenfer sege gwe!" Jeiba am afelen naunam, abar aa jeya nwinintim bwiyibe. Jei Kristus gwanan jei ge tebanant, jes galapserem ai Kristus nalefe ajam tebayan. Rasul-rasulu jei mes ne damdamsosini. 8 Aamei Ampliyatus mese jeime taterisi amniwer aaiserem ga gemer isa bilibene enggame, "Kelek, waakenfer se gwe!" Ai jei ajam nesiktene, ane ai jebar Tuhanfar ai daamfennaber ai ge gwena. 9 Aamei taterisi amnaiserem Urbanusfe jegme gemer isa bilibene enggame, "Kelek, waakenfer se gwe!" Jei awelna Kristusmana nebar nei seyaftera gwebili. Ane Estakis am afelna ai ajes nesiktenerem, aamei taterisi amniwer aaiserem jegme gemer isa bilibene enggame, "Kelek, waakenfer se gwe!" 10 Ane Apeles jegme gemer isa bala enggame, "Kelek, waakenfer se gwe!" Jei safe gam ne unggwasbana, jengga jei Kristusminibe kanaufer fina. Aamei angtane Aristobulusem jenap aa jei ge nwinbenerem, ga jes isa balbabili enggame, "Kelek, waakenfer sa gwe!" 11 Aamei Herodyon am afelna jes mese jeime gemer isa bala enggame, "Kelek, waakenfer se gwe!" Aamei angtane Narkisusem jenap aa jei ge nwinbenerem, ane Tuhanfar daamfennaber aa jei naawenaram, ga jes mese jeime gemer isa balbabili enggame, "Kelek, waakenfer sa gwe!" 12 Aamei Trifena yo Trifosa jeime gemer isa gitmini enggame, "Kelek, waakenfer sege gwe!" Wini naura jeiserem jei awelna Tuhanmana uskambarsus ge gweyibene. Ane Persis am afelna ai ajes nesikulurum, aamei jeime gemer isa bili enggame, "Kelek, waakenfer se gwe!" Wini jes mese jeiba Tuhanmanam, ane jei awelna Tuhanmana uskambarsus gweyibene. 13 Aamei Rufus angtane Tuhan aa jes destabanaram, jeime gemer isa bala enggame, "Kelek, waakenfer se gwe!" Ane iye jemna jegme gemer jam isa bili enggame, "Kelek, waakenfer se gwe!" Jei enggam gwena iye amna gamserem. 14 Asinkritus, Felegon, Hermes, Patrobas, Hermas, ane angtane Kristen afweraiserem jebar aa jei ge nwinbenerem, aamei angtane seyafter jeiserem jeime gemer isa balbabili enggame, "Kelek, waakenfer sa gwe!" 15 Filologus ane Yulya, Nereus ane oso jemna ga yafontowai Olimpas mese, angtane Uwa Sanbagirmana seyafter gemerserem jebar aa jei ge nwinbenerem, aamei seyafter jeiserem jeime gemer isa balbabili enggame, "Kelek, waakenfer sa gwe!" 16 Aamei ijeba betwenaram, aamei tafna ga jam isa tenanna enggalfe, aamei igama gwerauwulf aamei in ina ba ijama nesiksonanna. Jemat-jemata Kristusmana aafe jei is enggam ne balbabili, "Kelek, waakenfer sa gwe!" 17 Am afelen mesna, ai isa enggam ai balbabili ititmer, angtane kapka taterisi kapka ip is jei ne nasipminirim jega safna Kristusmana gam syensyanwef, ane enggam ge gubili jega angtane Kristen ga sege tikwebili Uwa Sanbagiri jes tebafe, angtane jes galserem waakenfer isa gerebaabisnenne. Jei syefer ge nasbawena taterisi gwanan ai isa jesa nasipminintim jem temawer. Angtane kapka jes galserem im nenennabe, aamei ga jemniwer ina jam isa bijausona. 18 Angtane gam aa jei gam eyebilirim, jeke awelna Kristus Tuhan nemnaiserem ga Jeman gam gweyibene. Jengga ini jelemana aa gemer gangge folbaminirim, ga gemer gane gwebili. Jei angtanes ne afaf-afaftababili, angtane teisyenaiserem etam-etama kapka jeiserem jes ne gwebiyeneiserem. Jei taterisi afaf-afafaiserem angtane jeiserem ga jem malin-malintababili. 19 Angtane seyafter is mes ne sarbabili enggame, aamei kanaufera fina, ane aamei Taterisi Waakena jeber-jeber igemera taabisiwena. Ane taterisi jeiserem amna ini ga saaser-saasersus as gam folbana im temawer. Ai enggam ai gunu, aamei waakenaiserem ga jam isa towaswebili, ane ga jetefener isa eyebili, jengga kapkaiserem ijama terelbiyen ane jeiserem ijama eyebiyen. 20 Ane Uwa Sanbagiri ini waakena nes Jei gaarminirim, Jei ga baabeta bawasmana gase wasferulsini im tof gwonabe. Ai sembayanga as gwebana, Tuhan nemna Yesus Kristus Jei waakena Jelemanaiserem ip ise golmini aamei seyafter gemerserem. 21 Timotius jei aamei is enggam balbabili, "Kelek, waakenfer sa gwe!" Jei awelna abar seyafter ai ge gwebili. Ane am afelen mesna, Lukius, Yason ane Sosipater jegme gemer jei ims ne balbabili enggame, "Kelek, waakenfer sa gwe!" 22 Surta aaiserem Paulus jei jafner nasowena, ane ai, bosna amna Tertius, ai surta aaiserem ai tulistaabili. Ane ai enggam ai gunu, "Kelek, waakenfer sa gwe!" 23 Gayus jegme gemer, jei aamei is enggam balbabili, "Kelek, waakenfer sa gwe!" Ai jena Gayusmanaiserem ai ga ajep nwini, ane jemata aafmanaiserem jei jena Gayusmanaiserem jep betwewena. Erastus, angtane doini aa jei gam gerebaabisnennerem kotana aaiserem jebe, jei aamei is enggam balbabili, "Kelek, waakenfer sa gwe!" Ane nem afelna bosna Kwartus jegme gemer, jei aamei is gemer balbabili enggame, "Kelek, waakenfer sa gwe!" (( 24 Ai sembayanga as gwebana, Tuhan nemna Yesus Kristus Jei waakena Jelemanaiserem ip ise golmini aamei seyafter gemerserem.)) 25 Au, nei Uwa Sanbagiri ganma pujite! Jei samfer baabeta ip ga is golmini, jega aamei kanaufer gam isa fina, ane Yesus ga jamer isa tebasini. Aamei Yesus ga imsa tebana, jes galapserem ai Taterisi Waakena ibe isa agalap nasipminintim. Taterisi jeiserem ga Yesus Kristusem temawer. Taterisi jeiserem jeiba taterisi bunarsusfer Uwa Sanbagiri ibe is jes syawulmisilim tahunu unggwanfersus gwanan galapserem, jengga namwer aas jepserem Uwa Sanbagiri mes gwerauwulu taterisi jeiserem nemnibe. 26 Tulisana nabi-nabimanaiserem jei ga taterisi jeiserem ga jei ne gwerauwulu nemnibe. Nunu aas jepserem taterisi jeiserem je angtane negara seyafter gemerserem jep sene nasipminenne. Uwa Sanbagiri aa Jei gwenaram abak-abaksusfer, ga Jei am gunu, jega angtane Jei ga sene tebana, ane Jei ga sene onsobana. 27 Au, nei Uwa Sanbagiri ganma pujite! Uwa Sanbagiri jeiserem, Jeiba daamfen-daamfensusum. Jeiba seyafter Jeyam towaswebabili. Nei ga Uwa Sanbagiri gasa pujitene abak-abaksusfer, aam temawer Yesus nebe aa jes eyeipminirim. Amin.