Wahyu

Wahyu

¹ Bukunu aaiserem taterisi aaf aa je ge batobilirim, taterisi jeiserem ga Yesus Kristus aa jes gwerauwuluntum galap aa je ge etamwebiliserem jem temawer. Uwa Sanbagiri Yesus Kristus towastanant, jega Jei angtane awelna Uwa Sanbagirmana aa jei ne gweyibenerem Jei gam towastababif enggame, aa je ge etamwebiliserem abakefyan ga sege etamwebili. Ane jepga Kristus Jei malaikata ga baftanant Yohanesminibe enggalfe taterisi jeiserem gam bilibef jebe. ² Ane Yohanes seyafter aa jes domolantam ga nasipmini. Jei aa jes domolantam ga Uwa Sanbagirminiwer jela, ane taterisi bunarsusfer aaiserem Yesus Kristus aa jes bilibenerem. ³ Angtane taterisi aaiserem aa jei ne gerabistenaram, jemna ini waakenfer sege folbamini. Ane angtane taterisi Uwa Sanbagirminiwer aaiserem aa jei ne sarbisinirim, ane taterisi aaiserem jebe aa jes gam tulistababilirim ga gane onsobili, ini jeman jegme waakenfer gangge folbamini. Ini jemna waakenfer ga aam temawer gangge folbamini abakefyan bukunu aaiserem seyafter aaf aa jes tulistababilirim ga sege etamwebili. ⁴ - ⁵ Ga ip, tuju safna Yesus aa jei ne tebanaram propinsi Asya je. Amniwer, Yohanes. Ai sembayangs gwebana Uwa Sanbagiri, ane Mafnan Jemna, ane Yesus Kristus Jei waakena Jelemanaiserem ip is ga sege golmini, ane ini imna samfer is ga sege folbamini. Uwa Sanbagiri Jeiba namwermanaiserem, Jei gwananmanaiserem, ane gamjon se gwena abak-abaksus. Mafnana tuju Jelemanaiserem taman nwini sanbagiri Uwa Sanbagirmanaiserem ga jep ge nwinbene. Yesus Kristus Jei taterisi Uwa Sanbagirmana bunarsusfer ga jes towas-towasulmuwena. Jei ga nabal-nabalsusu ga Jei se irwena terewer, ane Jeiba Sanbagirsusum raja seyafter gemerserem ogirip aaiserem jep aa jei ge nwinbenerem. Yesus Jei nems nesiktababili, ane tere Jemnaiserem jeme Jei ga etam-etama kapka nemnaiserem ga nes jem wirtabaipmini. ⁶ Jei gamjon nei nes eyebaabili enggalfe nei safna Uwa Sanbagiri aa jei ne pujitawenaram, Uwa Jelemanaiserem, galfe negama gwef, ane enggalf Uwa Sanbagiri aa jes gam bilirim nei jeiserem negama eyebif. Au, nei Yesus ganma pujite jamer abak-abaksus. Nafa Jemna unggwanfer, ane baabeta Jemna unggwandwasusu! Amin, jes gamserem ga gamfener. ⁷ Gasa damta, Jei Jam fortya winis sinsinibaner! Angtane seyafter gemerserem ga sene damtana, angtane Jei aa jei ne abeitabanaram tumbakeme jei mese. Anggwabura seyafter gemerserem ogiri aaiserem ga sege syebisi Jem temawer. Jeiserem se etamwesa! Amin. ⁸ Tuhan Uwa Sanbagiri enggam gutena, "Ai jamer tap, Amnibe dwona afa jam falbiyen. Ai aare, ane Ai gwananmanaiserem, ane Ai jamer abak-abaksus. Amna baabeta unggwandwasusum." ⁹ Aiba Yohanesam, im afelna, aiba Yesus amsam tebana. Neiba Jemnam, Jei angtane seyafter gemerserem jem Sanbakfam gwena. Jega jem temawer angtane nafsi jei kapkaiserem nep nes jam sene eyeipminirim, jengga nei jafner nesa fina. Yesus nems batobaabili jega nei kanaufer sa fina. Ai ames nasbuwena taterisi Uwa Sanbagirmanaiserem, ane ai angtane nafisfe ames towasulmini enggame Yesus Jeiba am Tuhansam, ane jega jem temawer angtane sanbagiri nafsiserem jei ams ne tergenbana aaf nwinf naantei Patmos je. ¹⁰ Nunu Tuhanmana, Mafnana Uwa Sanbagirmana Jei ams tebana. Ane alem amnuwer ga ai sara Angtane ga nasowena uskambar, trompet ter manggen gamserem, ¹¹ ane Jei ga bala, "Aamei ijes domolaram, jeiserem ga jam is tulistabaipmini, ane bukunu jeiserem ga tuju safna Yesus aa jei ne tebanaram, ga jep is baafulmini kotana jeiserem ga enggammer: Efesus, Smirna, Pergamus, Tyatira, Sardis, Filadelfya, ane Laudikya." ¹² Ai alem duruwer ga ai irfwena, ai ajam damtaf Jei nansa abar aa Jei ge nasounaram. Jepga ai damtabili lampunu tuju emasabara titikip ge fibili. ¹³ Lampunu jeiserem nenennabe, Angtane aasaje ga jep fina, angtane galserem. Jemna bajunu bwalna gam kamwini, jamer tufabo. Ane Jem danggonawer Jei ban emas gwelawili. ¹⁴ Nabal safna Jemna ga sinsini enggala domba safna galserem, afa kapas sinsini galserem, ane nwena ga jam ne bwerebawena tokwana gamserem. ¹⁵ Tufa Jemna ga enggam tembagana galserem, tokwanap jes gam giransiwilirim, ga sofem ga gane wirtana. Ane Jemna tisna ga enggam fosasana gas tenteyal. ¹⁶ Tafna taasfolawer torbwana ga tuju ga gemer erbisini, ane aaremawer ga nombeya binbinsusu gam ergesosini jemna ula naura. Jemna mirmase ga enggam, gwer nafa gamserem, gwere bolap gamserem. ¹⁷ Ai jeiserem jame ai agalap domolaram, ai ga ai jena Jem tarnabe, angtane tere gamserem. Jengga Jemna tafna taasfolawer ga aa tosontena am sagabe, ga aa gutena, "Ipsam ernerem! Aiba Nabal danalaiserem, ane Umwefaiserem. ¹⁸ Aiba Jesam aa Jei gwenaram! Aiba Amsam ter, jengga se angga, Ai abak-abaksusfer Ai gemer Ai gwena. Baabeta uskambar ba Amnam terewer, ane Taman Tereserem. ¹⁹ Aamei ijes domolaram, seyafter jeiserem jem temawer se tulistababi, ga enggam namwer aamei ijes domolaram, ane Ai galap ibe is Ajes destabaibeleiserem. ²⁰ Taterisi aa jes syawulsinirim torbwana tuju Am tafa taasfolawer ijes damtabilirim, ane lampunu tuju emasabara aa jei ge fibilirim titikabe ga enggammer: torbwana tuju jeiserem jei ga malaikata tuju safna Ai As jei ne tebanaram, ane lampunu tuju jeiserem jei safna tuju Ai As jei ne tebanaram."

¹ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Efesus je: Taterisi aaiserem Amniweram jela, Ai torbwana tuju Ajes erebisini tafna taasfolawer, ane ga wofena tuju lampunu emasabara aaiserem jem tarnabe. ² Ai Amsam towaswena aamei ijesa eyebaabilirim, aamei awelna jeiserem i baabetfera gwebili, ane aamei imsa fina abakfer, afa angtane kapkaiserem ip is jam ne eyeipmiliserem. Ai Amsam towaswena aamei angtane kapka ijama tebabiyen. Ane angtanem temawer jena enggame aa jei ne gitminirim, ’Aiba rasulsam, Uwa Sanbagirmana.’, jengga jei rasulyan, aamei angtane jeiserem ijama tebabiyen. Aamei angtane jeiserem imesa unggwasbaabili, ane aamei ga bunar jepga imsa damtabili enggame angtane jeiserem jeiba angtane afaf-afafa. ³ Ai Amsam towaswena aamei jamer ima finaram abaka, ane taterisi Ai Ajes nasbilirim aamei ijesa taabilirim, aamei jem temawer ga is ne tamtamtababili. Jengga safe gam ini imna is jam ge jenbamiyen. ⁴ Jengga aas galserem im temawer ini Amna saaser-saaseryan: aamei gamjon As ijama nesikteyen gwanan gamserem. ⁵ Ga jem temawer, sa sarbistaabon aamei Amniwer imesa bijauswena, Ai As imsa mirtetefala. Sa tikwena etam-etama kapkaiserem jewer, ane ga isa warautna gwanan waakena ijesa eyebilintim jebe. Afa fasaye, Ai ga As jelsa imnibe, ane ga As molsiwisi lampunu imna jelem golawer. Ai jeiserem ga As eyebisi afa aamei ijama tikweyanaye etam-etama imna jeiserem jewer. ⁶ Jengga aamei aaiserem waakenfera ima eyebili: aamei angtane Nikolaus aa jei ne tikwebaatinennerem ijesa nasbabili. Ane jei aa jes ne eyebilirim, aamei jes mese jem temawer ima nasbabili. Ai mese Aime angtane jeiserem Ajes nasbabili. ⁷ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebananaram jebe! Angtane kanaufer Abar Ajeya finaram, Ai angtane jeiserem enggam As balbabisi, ’Sya, aamei sa tumil titantan tini Uwa Sanbagirem makanap aa jei finaram, ane aamei abak-abaksusfer ga isa gwena.’ " ⁸ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Smirna je: Taterisi aaiserem Amniweram jela, Aiba Nabal danalaiserem, ane Umwefaiserem. Aiba mesam tere ane gamjon ga Ai irwa. ⁹ Ai Amsam towaswena kabwaktala uskambarsus ijesa gwirnirim; aamei galgala ogiribe fas, jengga apgal jigala imna taman waaken-giribe unggwanfer! Ai Amsam towaswena angtane kabwakfer ge nasbawena im temawer. Angtane jeiserem jener ga enggam ge gubili, ’Ai angtane Yahudimana, ai Uwa Sanbagiri ajetera onsobana.’ Jengga fas; jei ga safna bawasmana. ¹⁰ Ipsama ernerem, abakefyan angtane kapkaiserem ibe ga isene eyeipmifi. Sa sarbistaabon, bawasa aamei isa unggwasbaabifi, angtane afwer imniwer aaiserem gasa katabuntefa bwiyibe; ane aamei ga kabwakfer jep isa nwinfi, nunu ga sepulu. Jengga aamei Ai As jamer isa tebasiwena, safe futunup, ane Ai ga isAs golmisi waakenfer gwelaiserem jamer abak-abaksus. ¹¹ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebananaram jebe! Angtane kanaufer Abar Ajeya finaram, jei jam ne tamtamtababiyen tere gamjon naurabaraiserem." ¹² Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Pergamus je: Taterisi aaiserem Amniweram jela, Aiba nombeya binbinsusu gam taabisini, jemna ula ga naura. ¹³ Ai Amsam towaswena aamei ijeba nwinirim, jes jepserem bawasa baabetabara jemba jeberam gwena. Aamei Ai As igemera tebasini. Aamei As ijama aftannuyon, gwanan Antipas aa galap ne munbonorom im nenennabe. Jei taterisi Amna waakenfer towas-towastababuwena, jamere nunu jei aa jem ne munbonorom kotana imnaiserem jebe, bawasa aa jep nwinirim. ¹⁴ Safe gam, im temawer ini Amna saaser-saaseryan: Angtane afwer imniwer jei ga jesene tikwebitini Bileyam fwater aa jes towas-towastababilim. Bileyam jei Balak enggam towastal anggwabura Israel gam tergenbaabil etam-etama kapka enggalaiserem jes eyebife: Tumilgala aa jes ne kitulbolom bwat kapkaiserem jebe, tumilgala jeiserem jei gane tombaabil, ane angtane jeiserem jei maaryens sene gwebil. ¹⁵ Ane angtane afweraiserem im nenennabe jei ga taterisi kapkaiserem ga jes onsobili. Taterisi kapka jeiserem ga angtane kapka bosna Nikolaus ga jeye towas-towasulmini. ¹⁶ Jega jem temawer, jasa tikwe etam-etamawer! Wa fasaye, abakferyan Ai ga imnip ga As fortya, ane angtane jeiserem nombeyeme jebar ga Asa erafa, nombeya aaremap Ajes ergewulsinirim. ¹⁷ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebananaram jebe! Angtane kanaufer Abar Ajeya finaram, Ai jep As golmisi tumilgala taman waaken-giriwer jeiserem, ane Ai gamjon jep As golmisi tuna sinsini. Tuna jeiserem bosna ibirmi jep aa gam tulisultenaram. Ane angtane nafsi jam towaswebiyen jep aa gam tulisultenaram, jengga angtane aa jei taabilirim, jei jenfentowaifener gangge towaswebili." ¹⁸ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Tyatira je: Taterisi aaiserem Ai Tane Uwa Sanbagirmana Amniweram jela. Nwena Amna ga jam ne bwerebawena tokwana gamserem, tufa Amna tembagana galserem, ga sofem ga gane wirtana. ¹⁹ Aamei ijesa eyebilirim, seyafter jeiserem Ai Amsam towaswena. Aamei waakenfer enggam ima eyebili: Aamei ina ijama nesiksonanna. Aamei ijesa bilirim jam eyebife, ga jeter ima eyebili. Aamei angtane nafsi ima batobaabili. Ane afa angtane kapkaiserem ip gane eyeipminirim, aamei kanaufer igama fina. Ai Amsam towaswena awelna imna namwer aas jepserem jei unggwanfer, gwanan jeiserem jei bastantowaifer. ²⁰ Jengga aaiserem im temawer ini Amna saaser-saaseryan: Aamei Isebel ijama gwetmanswebife, jei enggam jena aa jei bilirim, ’Aiba nabisam Uwa Sanbagirmana.’ Jengga fas. Angtane Uwa Sanbagirmana jame anesus wini jeiserem jei jam towas-towastababili. Ane jei taterisi afaf-afafaiserem ga jes nasipmini angtanefe enggame, angtane maaryen jam gane gwebili, ane tumilgala aa jes ne kitulbonorom bwat kapkaiserem jebe, tumilgala jeiserem jeime jam gane tombaabili. ²¹ Ai nunu Ames golbili jebe, etam-etamawer jei jam tikwefe, jengga jei bai gwena jam tikwefe anggwafar jena jam ge taamini. ²² Im sa sar! Ai jei As ge felse, jamere bwerna se falbisi jelem nutarnabe. Jes jepserem jei, ane angtane taterisi kapka jemnaiserem aa jei ne onsobilirim, ane maaryena aa jei ne gwebilirim, angtane jeiserem jei bwerna tamtamsusu ga sene domolsa. Ai seyafter jeiserem namwer ga As eyebili, afa jei etam-etama kabwaksusu wini jeiserem jebar aa jes ne eyebilirim jewer jam ge tikwebiyeneye. ²³ Angtane taterisi kapka jemnaiserem aa jei ne onsobilirim, ane maaryena aa jei ne gwebilirim, Ai angtane jeiserem seyafter gemerserem ga As munbobisi. Jepga safna seyafter Ai As jei ne tebananaram ga sege towaswebisi enggame, Aiba jesam Angtane sumu yo ini angtanemana Ajei towasweminirim. Ane Ai fwaina ibe ga isAs golmisi, jeber-jeber aamei igemera gwenaram. ²⁴ Jengga aamei afweraiserem Tyatira je, aamei ula kapka jeiserem ijama onsobiyen, ane aamei taterisi orolemansusu bawasmanaiserem ijama towaswebiyen. Ai enggam Ai gunu, Ai gamjon ibe taterisi isa jam daran-daranulmiyen. ²⁵ Jengga aatefener sa taabi, taterisi waakena aamei gwanan ijesa taabilintim, jeiserem ga baabetfer isa taabili jamere Ai gamjon As fortya. ²⁶ - ²⁷ Angtane kanaufer Abar Ajeya finaram, ane Ai Ajes bilirim jeiserem aa jei ne eyebilirim jamere jei gam ge terbili, Ai baabeta jebe As golmisi, baabeta Uwa Sanbagiri gwanan Ap As gemer gulbanantam. Ai baabeta As golmisi jebe, jega jei sanbakfe ga sege nwinbese, ane besi dumu sene tebasisi, ane anggwabura unggwanfer ga sene kaskasaftababisifi diwiri gam gane kaskasaftaasinirim. ²⁸ Ai torbwana gwinibenermana jebe As golmisi. ²⁹ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebananaram jebe!"

¹ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Sardis je: Taterisi aaiserem Amniweram jela, Aiba mafnana tuju Uwa Sanbagirmana ane torbwana tuju Ai Ajes erbisini. Ai Amsam towaswena aamei ijesa eyebilirim: Angtane enggam ge gubili aamei ijama gwena, jengga fas, aamei safe imsa tere! ² Ga jem temawer sa irwe, baabetfer ga As isa onsobana, jega galap aamei bastantowaifer As ijama onsobayan, ga igama tikwena Ams onsobalawer. Ai Ames domola ijesa eyebilirim, ane Uwa Sanbagiri aa jes bilirim aamei jeiserem gemerje ijama eyebiyen. ³ Ane gasa sarbistaabon, Ai gwanan isa Agam towas-towastababilintim, ane aamei gwanan ijesa sarbilintim. Ga jeter isa eyebili, ane ga isa irfwena etam-etama kapkaiserem jemniwer. Afa aamei ijama irfweyanaye, Ai ga imnibe komkom anggwana gamserem ga gam As fortya, ane aamei teisyena fonggalabara Ai ga As fortya. ⁴ Jengga im nenennabe kota Sardisminibe, angtane afwer unggwanferyan jei fene jemna waakenfer ne gerebaabisnenne, oltunu fas, afa ga enggam jei kapka jam eyebiyen. Angtane jeiserem jei ga Abar Asa wofesa fen sinsiniber, aam temawer Uwa Sanbagiri enggam gunu jei samfer Abar As ge nwini. ⁵ Angtane kanaufer Abar Ajeya finaram, jei angtane jes galserem fene sinsini aa jei ne kabwabisinirim, ane bosna jemna Ajam wirtabaipmisiyen bukunu angtane bosna aa jep tulistababilirim, angtane Uwa Sanbagirfar aa jei naawelaiserem. Ane Am Uwa Sanbagirem tarnabe, ane jem malaikata unggwanfer, Ai jep ga As gusu, ’Jei Amnaiserem.’ ⁶ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!" ⁷ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Filadelfya je: Taterisi aaiserem Amniweram jela, ini Amna tabalbalsusu, ane taterisi Amna bunar-bunarsus. Kuncini Raja Daudmana pintunu kota Yerusalem ibirmiserem jem tertesiliserem, kucini jeiserem Ayam taamini. Afa Ai jam As tertesinirim, nan angtane se matasini? Fasfasus! Ane afa Ai jam As matasinirim, nan angtane se tertesiwili? Fasfasus! ⁸ Ai amsam towaswena aamei ijesa eyebilirim. Baabeta imnaiserem unggwanferyan, jengga aamei taterisi Amnaiserem imesa tikwebitini, ane Ai As igemera tebasini waakenfer. Gasa angga, Ai mwona ibe mesam tertemisini, ane nan angtane se matasini? Fasfasus! ⁹ Jengga fomfoma safna bawasa aa jei ne tebanaram jem temawer, ane jei sege afaf-afafwebili, ane jei jener enggam ga sege gubili, ’Ai angtane Yahudimana, ai Uwa Sanbagiriter asa onsobana.’, jengga fas. Gasa sar, Ai As eyebisi enggalfe jei gam sege jalbisif imnibe, ane somwan dumem ga sege nwinbese im danggonabe. Ane jei ga sene balbabisi Ai imsa nesiktababili. ¹⁰ Aamei taterisi Amna imesma tikwebitini, ane kanaufer ima fina. Ga jem temawer Ai isAs gerebaabisnenne nunu kabwaksusu jewer. Nunu kabwaksusu jeiserem gase etamwesa ogiri seyafter gemerserem enggalfe angtane seyafter ogiribe aa jei ge nwinbenerem gam unggwasbaabif, ane Ai aamei isAs gerebaabisnenne. ¹¹ Ai babitsim ga As fortya! Taterisi waakena ileminip aaiserem ga waakenfer isa taabili, jega fwaina Ai isa Ajes golminirim, angtane nafsi jam ne amsonyan. ¹² Angtane kanaufer Abar Ajeya finaram, Ai angtane jeiserem As tonolsa jagomelna gamserem Jena Alem Uwa Sanbagirmanaiserem, ane jei jewer gamjon jam ge tobitinyen. Bosna Alem Uwa Sanbagirmana, ane bosna taman-giri Alem Uwa Sanbagirmanaiserem, jeiserem ga kota Yerusalem ibirmi, ga jesene iresanya taman waaken-giriwer, Alem Uwa Sanbagirminiwer -- Ai ga bosna naura jeiserem As tulisosa angtane jeiserem jem tifinibe. Gamjon bosna ibirmi Amna As tulisulsu jem tifinibe. ¹³ Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!" ¹⁴ Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Laudikya je: Taterisi aaiserem Amniweram jela, bosna Amna ba Aminsam. Taterisi Amna ba bunaram, ane Ai taterisi jeiserem isa Ai towas-towasulmiwena. Ai seyafter Uwa Sanbagiri aa jes eyebaabilim jem Sanbakfe Ayam nwini. ¹⁵ Ai Amsam towaswena aamei ijesa eyebilirim; aamei uskambar As ijama nasbasiyen, ane aamei uskambar As ijama nesikteyen. Aamei enggalyan fona kakala galserem afa wisimi galserem, jengga nenennap fener. Ai isa enggam Ai balbabili, aamei fo kakala galserem, afa fo wisimi galserem. ¹⁶ Jengga aamei nenennaber, sarsaryan ane wisimyen. Jega jem temawer Ai aamei isAs fasawola Alem aaremawer. ¹⁷ Aamei ga enggam ima gutena, ’Ai apgal jigala anesus, ane apgal jigala seyafter aare, ai apgal jigala amnibe dwona afa jam falbiyen.’ Jengga aamei teisyena aamei tamtamsusup ima nwini! Aamei apgal jigala fas; nwena imna kofa, ane aamei ga ilyak-ilyaka. ¹⁸ Jega jem temawer Ai ga esorola is Ai golmini enggalfe, aamei emasa Amniwer gam isa armanulu, emasa tabala, jamere bunarsusfer aamei galgala unggwanfer. Ane fen sinsini Amniwer gam isa armantababili, ane ga isa kabwabili, jega aamei ilyak-ilyakmer jewerserem, ane seferswela imna jem ga isa matabaabisini. Ane obata gam isa armanulu, ga nwenap isa batababili, jega gam igama anggasini. ¹⁹ Angtane Ajes nesiktababilirim, angtane jeiserem ga jes Agam saftabana, ane tamtamtala Agam golmini. Ga jem temawer, ga isa tikwena etam-etama imnaiserem jewer, ane waakenfer ga isa eyebili. ²⁰ Gasa sar! Ai mwa kautelap fina, ane ga As jene. Afa angtane Ai Ajei sarbanaram, ane mwona gase tertesini, Ai ga Ase kautena, jebar ga As ge dorwena. Ai jebar ga As ge twena, ane jei Abar ga As ge twena. ²¹ Angtane kanaufer Abar Ajeya finaram, jei ga As balbabili ga enggam, Ai Ajam jenyan jengga bawasa jei mes jena. Ane namwer aas jepserem Ai Uwa Amnaiserem taman nwini sanbagiri Ai Jebar ga Ajep ge nwini nawersamer. Ane angtane kanaufer Abar Ajeya finaram, jei mese Am taman nwini sanbagiri jeime ga sege nwinbetena, Abaner ga Asa nwini. ²² Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!"

¹ Jes galapserem, ai Yohanes ai gamjon ga ai anggaswena. Ai mwona taman waaken-girmana ga ai damtaswena, mwona jeiserem tertesili. Ane jepga ai taterisi gamjon ga ai sarbili, taterisi gwanan abe as gemer nasibenentem trompet ter manggen gamserem. Taterisi jeiserem ga enggam gutena, "Au, aaf se tauya! Ai ibe is ajewer destaibef galap aa jei ge etamwebiliserem." ² Jepga Mafnana Uwa Sanbagirmana tatarmer ga as tebana, ane as girinfele. Jepga ai taman waaken-giribe ga ai forna, ai taman nwini sanbagiri ga ai domola, ane Jei aa jei nontenaram jebe ga ai damtana. ³ Mirmase Jemna jam ge bwenen-bwenenweibene tuna mahala galserem. Ane mangganu numu ga ti alna ikikini tuna samrut galserem, taman nwini sanbagiri jeiserem ga jei isinbisnenne. ⁴ Taman nwini sanbagiri jam isinmisnenele jeiserem, jep ga taman nwini nenes-nensa ga enggammer dua pulu empat. Taman nwini nenes-nensa jeiserem jep ga angtane sanbaka ga enggammer ge nwinbene dua pulu empat. Angtane sanbak jeiserem jei jeber-jeber ne eyebili Uwa Sanbagiri aa gam gunurum. Jei fene sinsini gane kabwabili, ane nabalsiri emas ga dukap ge falipmunnu. ⁵ Taman nwini sanbagiri jeiserem jewer nafa teisyenem sutya, ane iris tere jegme jewener subatya. Ane taman nwini sanbagiri jeiserem jem tarnabe, amantini tuju ga gemer ge ertebuwena; amantini jeiserem jeba mafnana tuju Uwa Sanbagirmanaiserem. ⁶ Ane taman nwini sanbagiri jem tarnabe, fobogana ga jep fala, kacana galserem, tabalsusu. Taman nwini sanbagiri jem eyeibeserem, malaikata nawer-naura galserem jei ga igsusu ga jep ge nwinbene, jei seyafter nwenabarfena, duruwer ane danggonawer. ⁷ Malaikata daamfennaber galserem igsusu ga jei sokotini singgana galserem. Ane naurabaraiserem ga jei sokotini sapini giri galserem. Ane nawer-ningnabaraiserem mirmase jemna ga mirmase angtane galserem gala sokotini. Ane nawer-naurabaraiserem ga jei sokotini junu igwalna galserem aa gam ifunurum. ⁸ Malaikata nawer-naura igsusu jeiserem, jei jeber-jeber farta ga enam, ane seyafter buguf nwenabarfena, farat gwonap mese. Gwerem ane gwinem, malaikata igsusu jeiserem jei jam ge tikwebiyen simala jam ne twolabe enggame: "Tuhan Uwa Sanbagiri Jeiba tabalbalsusu, tabalbalsusu, tabalbalsusu, Jemna baabeta unggwandwasusum; Uwa Sanbagiri Jeiba gwananmanaiserem, ane namwermanaiserem, ane jamer abak-abaksusmanaiserem." ⁹ Malaikata nawer-naura igsusu jeiserem jei ga simala Jep ne twolbana. Jei enggam ga aa ge gubili aa Jei nwinirim taman nwini sanbagiriserem jebe, ane aa Jei gwenaram abak-abaksusfer, "Aameiba waakensusum, Aamei seyafter Ijes golminirim je samfer, ane Aamei nafsam." Jes galapserem simala aa galap ne twolaram, ¹⁰ angtane sanbak dua pulu empat jeiserem ga aa ge nwinbitena somwan dumeme Jem tarnabe, Jei aa jei nwinirim taman nwini sanbagiriserem jebe. Ane jepga Jei ga aane pujitene, Jei aa jei gwenaram abak-abaksusfer. Ane jepga nabalsir emas jelemanaiserem ga aane bunulntena taman nwini sanbagiri jem tarnabe, ane ga ge gubitena Uwa Sanbagirfe: ¹¹ "O Tuhan Uwa Sanbagiri nemnaiserem! Aamei seyafter gemerserem Aamei eyebaabil. Iner Im bil, ane Aamei gwanan-gwanansus seyafter Aamei eyebaabil, ane ga aa ge etamwebil. Jega jem temawer ai ga Is asa pujitene, ane ai Ims asa bala, Aameiba waakensusum, Aamba nafsam, ane baabeta seyafter Ilemanam."

¹ Ane jepga bukunu jam mugeiwulsili ga ai domola. Jei taman nwini sanbagiri jep aa jei nwinirim, bukunu jeiserem tafna Jemna taasfolawer aaiserem ga jep falntena. Bukunu jeiserem tulisana ga anesus, afwer-afwer ane afwer taamwer, ane newa ga tuju ga jem ne fwiresini. ² Ane jepga malaikata baabetabara aa jei jenjenwenaram ol dagame ga ai damtana. Jei enggam jenjenwena, "Angtane waakensusu ga fwersa, newa ga jei se fertebisini ane bukunu aaiserem ga jei se ferolsini?" ³ Jengga safe taman waaken-girip, ane safe ogirip, ane safe ogir gwonap, fasfasusu angtane waakensusu afa jam ne damtayan enggalfe, bukunu jeiserem gam ferolsif, ane igi jemnaiserem gam gerabistef. ⁴ Ane ai uskambar ga ai syena, aam temawer angtane afa fas bukunu jeiserem jam ferolsife, ane gam gerabistef igi jemnaiserem. ⁵ Angtane sanbak unggwanfer jeiserem jemniwer, daamfennaiserem jei ai ga as bala, "Ipsam syenaram! Im angga! Yesus Jei asal-asala Yehudamana, Jei sanbagiri. Jei angtane seyafter gemerserem jem Sanbakfe Jeyam nwini. Jei Jam jenyan, jengga bawasa jei mesam jena. Jei samfer newa tuju jeiserem se fertebisini, ane bukunu jeiserem se ferolsini." ⁶ Ane jepjon ai Domba Tane ga ai damtana. Jei ga taman nwini sanbagiri jeiserem ga jem tarnap fina. Ane malaikata nawer-naura galserem igsusu, ane angtane sanbak seyafter jeiserem, jei Domba Tane jeiserem ga Jes ne isinbaasnenne. Domba Tane jeiserem ga enggalem sokotini, jam ne munbolo gamserem. Jemna tanduku tuju ane nwena tuju, jeiserem ga mafnana tuju Uwa Sanbagirmana aa jes baafulurum ogiri seyafter gemerserem jebe. ⁷ Ane Domba Tane jeiserem ga aa jafsini, jepga bukunu jam mugeiwulsiliserem Jei ga aa taabili, Jei aa Jei nwintenaram taman nwini sanbagiriserem Jem tafna taasfolawer. ⁸ Jes galapserem Domba Tane bukunu jeiserem Jame aa galap taabilirim, malaikata nawer-naura igsusu jeiserem, ane angtane sanbak dua pulu empat jeiserem, jei ga aa ge nwinbitena somwan dumeme Domba Tanem tarnap. Seyafter ga aane erbisini gitar galserem, ane diwir emas nunggwana ga jamer tenbisini, ninsini waakena, seyafter jeiserem ga jes ne erbisini. Nunggwana jeiserem jeba sembayangsam angtane Uwa Sanbagirfe aa jes ne gwebaibowenaram. ⁹ Ane Jei simala ibirmi ga gane twola enggame: "Aamei bukunu jeiserem samfer Ijam goltefe, ane newa jeiserem jam Is fertebisini, aam temawer angtane nensa Is mes ne munbono, ane aawisi Imnaiserem angtane Uwa Sanbagirfe jem Imes armantabaibene. Angtane jeiserem anggwabura seyafter gemerserem, ane ula seyafter gemerserem, ane negara seyafter gemerserem ga jewer ge jalbili. ¹⁰ Aamei angtane jeiserem Imes eyebaabili enggalfe, safna Uwa Sanbagiri nemna aa jei ne pujitefe, ane jei ga sene eyebili Jei aa gam gunurum. Ane jei ogiri aaiserem sanbakfe ga jei sege nwinbese." ¹¹ Ane ai gamjon ga as anggana ai taterisi malaikatmana ane-anesus ga ai sarbaipmini, malaikata jeiserem ga unggwanfersus. Jei taman nwini sanbagiri jeiserem, ane malaikata nawer-naura igsususerem, ane angtane sanbaka, ga jes ne isinbaabisnenne jem tarnap aa jep ge fibilirim. ¹² Ane jei ga simala ga baabetfer ne twola ga enggam: "Domba Tane aa jes ne tegilsantam, ai ajesa balbabili, Jeiba Sanbaksam, galgala Jemna unggwanfer, Jei tousa unggwanfer, ane baabeta seyafter gemerserem jeba Jemnam. Ai enggam aya balbabili, ’Jeiba waakensusum, nafa Jemna uskambar.’, ane ai ga aJesa pujitene." ¹³ Ane jepga ai sarbabili seyafter Uwa Sanbagiri aa jes eyebaabilim, winsip, ane ogirip, ane ogir gwonawer, ane figirip, seyafter Uwa Sanbagiri aa jes eyebaabilirim, jei ga simala enggam ne twola: "Jei aa jei nwintenaram taman nwini sanbagiri sagabe, ane Domba Tane jeiserem, ai ajesa pujisona, ane ga aya gunu, ’Jeiba waakensusum, nafa Jemna uskambar, ane Jei baabetabara jamer abak-abaksus!’ " ¹⁴ Malaikata nawer-naura igsusu jeiserem ga aa ge gubitena, "Ngga, jeiserem ba bunaram." Ane angtane sanbaka jeiserem jepga somwan dumem ga aa ge nwinbitena, ane jei Uwa Sanbagiri ga aane pujitene.

¹ Jeiserem taban, ai ga Domba Tane jeiserem ga ai damtana. Jei newa nabal-nabalsusu daamfennaiserem ga jes fertesini, newa tuju jeiserem bukunu jam mugeiwulsili jemniwer. Jeiserem jame agalap domolaram, jepga ai malaikata daamfennaiserem malaikata nawer-naura galserem igsusu jes jepserem jemniwer, malaikata jeiserem ga ai sarbana. Jei enggam ga gutena, "Au! Sa jal!" Tisna jemna ga enggam, irsi uskambarsus gamserem. ² Ane jepga ai kudana sinsiniserem ga ai damtana, jei jam jela. Angtane kuda sagap aa jei nunnurum, jei ulums etersini, ane nabalsir emas ga aane gulbana jebe. Jei ga sofwena ogiri seyafter gemerserem jewer gangge erabaf, ane jei jam jenyan, jengga nafsi jei mes ge janbili. ³ Gamjon ga Domba Tane jeiserem Jei newa naurabaraiserem ga fertesini, ane ai malaikata nafsiserem malaikata nawer-naura igsusu jeiserem jemniwer ga ai sara. Jei enggam ga gutena, "Au! Sa jal!". ⁴ Ane jei jame aa galap gutenaram enggame, "Au!", jepga kudana afwer aaiserem aasaje ga aa jela, numu jemna berbere. Angtane kuda sagap aa jei nunnurum, jepga baabeta aa gulbana, ane nombeya unggwandusaiserem jes mese enggalfe angtane jem gangge erabawef, jamere angtane jen jena sene munmuwena. ⁵ Gamjon ga Domba Tane jeiserem Jei newa afelna nawer-ningnabaraiserem ga fertesini, ane ai malaikata nafsiserem jei jon ga ai sarbana, malaikata nawer-naura igsusu malaikata jeiserem jemniwer. Jei enggam ga gutena, "Au! Sa jal!" Ane ai ga kudana seiseyeserem ga ai damtana, jei jam jela. Angtane kuda sagap aa jei nunnurum, jei timbangans etersini tafnabe. ⁶ Ane ai apgal tisa manggen ga ai sara, tateris manggen aa jei gutenaram malaikata nawer-naura igsusu jem nenennabe. Taterisi jeiserem ga enggam, "Saitun tini ane anggur makana ijama kabwakulyon! Jengga makana afweraiserem saf isa kabwaktababili, jega tumilgala unggwanfer fas. Angtane nunu daamfenna awelna jem gam gwebili, ane awelna aa jes gam gwebilirim jem doini tumilgala bastowaifer gam armanulu." ⁷ Gamjon ga Domba Tane jeiserem Jei newa afelna nawer-naurabaraiserem ga fertesini. Ane ai malaikata nafsiserem malaikata nawer-naura igsusu malaikata jeiserem jemniwer ga ai sara. Jei ga gutena, "Au! Sa jal!" ⁸ Ane ai kudana ga ai damtana, numu jemna sona galserem, jei jam jela. Angtane kuda sagap aa jei nunnurum jemna bosna ga jam Tereserem, ane aa jei onsobanaram gwetmanabe jemna bosna ga Taman Tereserem. Angtane naura jeiserem jebe baabeta ga aane golmini enggalfe angtane unggwanfer jem munbobife. Angtane unggwanfer jei erala jes jepserem ga jep ne munbobili. Ane angtane afwer wisi aa jep bartanaram, ane bwerna nenes-nensa aa jep ne domolaram, ane jigal-jigala kakala onnemanaiserem jes mese. Angtane nawer-naura, daamfennaiserem gane munbono. ⁹ Jeiserem taban, Domba Tane jeiserem Jei newa afelna limanabaraiserem ga fertesini. Jepga taman waaken-giribe ai angtane ga ai damtabili meja emas gwonabe, angtane uwu munbobiliserem enggalem temawer jei taterisi Uwa Sanbagirmana gam towas-towastababili, ane jei angtane nafisfe mes ne towasulmini enggame Yesus Jeiba jem Tuhansam. ¹⁰ Jei ga uskambar ga aa ge tetenbuwena, "O Tuhan, Aamei baabetabara. Ini Imna tabalbalsusu, ane taterisi imna bunar-bunarsus! Nunu gamjon ga fomera Aamei ga angtane kapka ogiribe aa jei ge nwinbenerem ga Is tamtamtababili, angtane ai as jei ne munbobilirim?" ¹¹ Jepga daamfen-daamfenneme bajunu sinsini ga aane kitulmini. Ane jei enggam ga aane balbabili, "Gwanan gasa nwin abakferyan. Uwa Sanbagiri Jei mes towaswena angtane fomera jei jes ne munbobiliserem. Im afelen mesna Tuhan aa jei ne onsobanaram, jei mese jei sene munbobili aamei is gemer ne munbobilintim. Gwanan sa nwin, jamere Uwa Sanbagiri angtane unggwanfer aa gemer towaswebabilirim, jei sene munbobili." ¹² Ane ai ga Domba Tane jeiserem ga ai damtana, Jei newa afelna enamabaraiserem ga fertesini. Jepga giniri unggwandusa ga aa gwena, ane gwere ga enggam fala kain seiseye karanga galserem, ane muara enggam fala berbersusu aawisi galserem. ¹³ Mato mese jei ga winsiwer ga jam ge janbitye ogir sagabe, gatara gamserem ga gam jentya tiniwer afa deye unggwanfer jam gane gwebanaram. ¹⁴ Winsi nenennaber ga aane bitnetini, biti afwer ane afwer ga aa ge mugegeiwena jamer aa ge asona. Ane taarena seyafter gemerserem ane naantei mese, jei ga gam agatababisiwili jelem filabe. ¹⁵ Ane angtane baabetabara raja ogirmana gamserem, ane angtane sanbak aa jei ge nwinbenerem, ane angtane sanbaka ginanggwamana, ane angtane seyafter afweraiserem, angtane galgala uskambar jemanserem, ane angtane galgalyena, angtane aa jei armantanaram angtane nafsiminiwer, ane angtane jafner gwela, angtane seyafter jeiserem ga jen jena sene syasosini taaren mwonabe ane taaren ton nenennabe. ¹⁶ Ane angtane jeiserem taaren-taarena ga aane gwarenbaabili, "Asa syetabaabisi!" Ane jei tuna ga aane gwarenbaabili, "Am sagap sa jenya!" Jei ga aa ge gubitena, "Asa syetabaabisi Jei taman nwini sanbagiri jep aa Jei nontenaram Jemniwer. Ane asa syetabaabisi kakala Domba Tane jeiserem Jemniwer. ¹⁷ Nunu umwef jeiserem ga namwer fala, ane kakala Jemna amesa towasweipmini. Angtane afa kanaufer jam fiyan kakala Jemna jam waamolmife."

¹ Jeiserem taban, malaikata nawer-naura gemer ga ai damtabili. Jei ga bijuap ge fibinenne gwer anggasyelawer, ane gwer anggasyela gwejawer, ane gwer anggasyela taasfolawer, ane gwer kautalawer mese. Jei ga deye nawer-naura ga jes ne isinbaabisnenne, jega deye jei jam ne gwebayan onnawer, afa finip, afa titirnip. ² Ane jepga ai malaikata daamfenna nensaiserem ga ai damtana. Jei anggasyelawer ga jela. Jei ga apgal jigala gwirni enggalfe bwenta Uwa Sanbagirmana angtane jem mirip eyebaipminennefe. Uwa Sanbagiri aa Jei gwenaram, Jei apgal jigala jeiserem malaikatf gulbana. Malaikata jeiserem jei malaikata nawer-naura ol dagame ga aa jenbebili. Malaikata nawer-naura jeiserem jei baabeta Uwa Sanbagirminiwer mes ne domola enggalfe, ogiri yo fini gam tamtamsof deye aa jes gam afsobaanurum jeme. ³ Malaikata jeiserem ga aa gutena, "Ogiri yo fini gwanan nalefe ijama tamtamsoyan, afa ti mese, nei gwanan bwenta nepsa eyebaipminenne angtane Uwa Sanbagirmana jem miribe, Uwa Sanbagiri nemnaiserem. Nei jeiserem enggalf neya eyebili, jega angtane jeiserem jei tamtamtala fas jam ne domolyan." ⁴ Ane jepga ai asene towastana enggame, angtane aare unggwanfer ga 144.000, angtane Uwa Sanbagiri bweneta aa jep eyebaipminennerem jem miribe. Angtane jeiserem jei ga tewe dua belas Israelmana, bweneta ga jei ne tebabinenne. ⁵ Tewe dua belas jeiserem daamfen-daamfennawer ga 12.000 angtane bweneta aa jei ne taabilirim ga enggam: tewe Yehuda, 12.000 angtane bweneta ga jei ne taabili, tewe Ruben, 12.000 angtane, tewe Gad, 12.000 angtane, ⁶ tewe Asyer, 12.000 angtane, tewe Naftali, 12.000 angtane, tewe Manasye, 12.000 angtane, ⁷ tewe Simeon, 12.000 angtane, tewe Lewi, 12.000 angtane, tewe Isakar, 12.000 angtane, ⁸ tewe Sebulon, 12.000 angtane, tewe Yusuf, 12.000 angtane, tewe Benyamin, 12.000 angtane. Angtane seyafter bweneta aa jei ne taabilirim unggwanfersus ga enggammer 144.000. ⁹ Jes jepserem tabana, ai angtane unggwanfersus gamjon ga ai damtabili, jemna unggwanfer jeiserem angtane jei jam ne eterbiyen. Angtane jeiserem jei ga anggwabura seyafter gemerserem jewer ga jalbili, ane negara seyafter gemerserem, ane ula seyafter gemerserem jewer mese. Angtane unggwanfer jeiserem jeiba taman nwini sanbagiri Uwa Sanbagirmanaiserem ga jem tarnap ge fibili, ane jei ga Domba Tane jeiserem ga jem tarnap ge fibili. Jemna fene sinsini gane kabwabili, ane garam alas ne erbili. ¹⁰ Ane jepga jei seyafter ol dagame ga aa ge gubitena enggame, "Uwa Sanbagiri Jei nei nes mes waakentababisini, ane Jei gwela waakena nes mes golmini, Jei aa Jei nontenaram taman nwini sanbagiri jem sagabe, ane Domba Tane jeiserem Jei mese!" ¹¹ Malaikata seyafter jei ga taman nwini sanbagiri Uwa Sanbagirmanaiserem ga jem tere-terewer ge fibinenne, ane angtane sanbak ane malaikata nawer-naura galserem igsusu ga taman nwini sanbagiri jeiserem ga jem gwetmanap ge fibili. Malaikata jeiserem jei ga taman nwini sanbagiri danggonawer ga aa ge nwinbetena somwan dumeme, ane jepga Uwa Sanbagiri ga aane pujitene, ane enggam ga aane bala, ¹² "Ngga, jeiserem ba bunaram. Ai Uwa Sanbagiri ajesa pujitene. Nafa Jemna uskambar. Jei tousa unggwanfer. Jemnibe enggam aya gunu, ’Ase samfer golmini.’ Jeiba waakensusum. Jei baabetabara. Ngga baabeta Jemna unggwanfer, seyafter aaiserem je Uwa Sanbagirmana jamer abak-abaksus! Amin!" ¹³ Daamfenna angtane sanbak unggwanfer jeiserem jemniwer, jei ams tenebana, "Angtane fene sinsinibere aaiserem jeje fwermana, ane jeje fwer ge jalbili?" ¹⁴ Ai ga enggam ai tamawolbana, "Uwa, ai teisyena. Aamei imes towaswena." Ane jei ga as enggam bala, "Angtane aaiserem waakenfer ge forobitye kapka unggwandusaiserem ogiri aaiserem jemniwer. Jemna fene mes ne wirtabaabili, ane ga mes ge sinsinswebili Domba Tane Jeiserem Jem aawisime. ¹⁵ Jega jem temawer jei taman nwini sanbagiri Uwa Sanbagirmana Jem tarnabe ga jep ge fibili. Ane jei gwin gwer awelna Jena Uwa Sanbagirmanaiserem jep ga aane gwebili. Ane Jei taman nwini sanbagiri jem sagap aa jei nwintenaram, Jei ga angtane jeiserem Jei se isinbaabisnenne, ane Jei gase gerebaabisnenne. ¹⁶ Jei gamjon wisi yo fo botona jei jam ge falbamiyen; gwer sarsara jei gamjon jam giranbaabiyen, ¹⁷ aam temawer Domba Tane taman nwini sanbagiriserem aa jep finaram, Jei ga jem gembalaf se etamwesa. Jei jam se aftabifelse fo waaken tarnabe, fona angtane aa jei telbilirim jei jam gwelabe abaksusu. Ane Uwa Sanbagiri Jei ga nwe fona jemna seyafter gase wirtabaipmisisi jem nwenawer, ane ini jemna gamjon jam ge jenbamiyen."

¹ Domba Tane Jei newa afelna tujunubaraiserem jame aa galap fertesinirim, angtane taman waaken-giribe taterisi afa fas jam ne bilteyan abakfer ga jema nenennap. ² Ane jepga ai malaikata tuju jeiserem Uwa Sanbagirem danggonawer aa jei ge fibilirim ga ai damtabili, ane trompeta tuju ga gemer ne kitulmini jebe. ³ Ane malaikata nensa panci towai emasa aa jei girinfelerem, jei ga aa jela ane meja tarnap ga aa fina. Sembayanga angtane Uwa Sanbagirmanaiserem ane apgal jigala wili galserem anesus jep ga aane kitulbonorom malaikata jeiserem jebe. Apgal jigala wili galserem, apgal jigala jeiserem ga enggalf kitulbono, meja emas jem sagap gam dutabaabif, meja aa jei ne finaram taman nwini sanbagiri Uwa Sanbagirmana jem tarnabe. ⁴ Jepga apgal jigala wili galserem aa jei ertesinirim, apgal jigala jeiserem jem nunggwana ga aa tauna, ane sembayanga angtane Uwa Sanbagirmanaiserem jebaner ga aa ge tabwili. Jei malaikatem tafnawer ga aa ge tabwili, malaikata aa jei finaram Uwa Sanbagirem danggonawer. ⁵ Jepga malaikata jeiserem jei pancini ga aa goltena, ane tokwa uma jam bokola mejanawer, ga aa firulnuwili ogiribe. Jepga iris tisna ga aa folbana, ane irsi teisyenfer bwere-bwerewena, ane ginir ga aa etamwena. ⁶ Jepga malaikata tuju jeiserem trompeta tuju aa jei ne tebabilirim jei ga aa ge tabwebisini trompeta jewer gam fortabaabife. ⁷ Malaikata gwananaiserem jei ga trompeta jemna ga aa forola, ane jepga arou fo ton, ane tokwana aawisiber dupdupbulu jei ga tititiniber ge janbitye ogiri sagabe. Ona afwenefener ga tanna tokwame jamer fus, ane tini afwenefener ga aa ge sakamswebili, ane kakatar mese seyafter ga aa ge sakamswebili. ⁸ Ane malaikata afelnaiserem trompeta jemna ga aa forola, ane jepga apgal jigala unggwandwasusu ga aane domola, taaren namsini aa jei ertewenaram, finip ga aane tobolsiwili. Fini afwenefener ga aawisiberem fala, ⁹ jigala numu nafis-nafsiserem afwenefener ga aa ge terbili, ane atdwas afwenefener ga aa ge kabwakswebili. ¹⁰ Jepga malaikata afelna nawer-ningnaiserem trompeta jemna ga aa forola, ane torbwana unggwandusa, tokwa manggen aa jei ertewenaram winsiwer ga aa jentya. Torbwana unggwandusa jeiserem fona afwenefener ane fo mwona afwenefener ga jubobili. ¹¹ (Torbwana jeiserem jemna bosna ga "Syela".) Fona jeiserem afwenefener ga syelem fala. Ane angtane unggwanfer ga gemer barwena, aam temawer fona jeiserem jei syela. ¹² Ane malaikata afelna nawer-nauraiserem trompeta jemna ga aa forola, ane jei ga gwer ane muar ane mato afwenefener jemna nafa ga bastowaitabaipmisini. Gwer, muar, ane mato jemna biti nawer-ningna. Jengga biti ningnaiserem jemna nafa fas. Jema nawer-naura gwereme nafa fas, ane jema nawer-naura gwinem jegme nafa fas. ¹³ Jepga ai anggana, ane ai igwalna aa jei ifunonnorom winis bolap ga ai damtana. Ai ga enggam ai sarbana, jei enggam gwefala, "Tamtam, tamtam, tamtamsus angtane seyafter ogiribe aa jei ge nwinbenerem, jei malaikata nawer-ningna nensaiserem jam aa jep ne sarbabilirim. Malaikata jeiserem jei trompeta jemna gemerje jam ne fortabaabiyen."

¹ Ane malaikata afelna limanabaraiserem trompeta jemna ga aa forola, ane jepga torbwana daamfenna ga ai domola jei mes jentya winsiwer jamer ogiribo. Torbwana jeiserem jepga kuncini O Mwona girsususerem ga jep ne tetbili. ² Torbwana jeiserem jei ga O Mwona girsusu ga faalawola, ane nunggwana jewer ga aane dubatitye. Nunggwana jeiserem ga enggam ne dubatitye, nunggwana iferawer gamserem. Gwere yo winsi jei ga aa ge gwinswena, nunggwana O Mwona girsususerem jewer aa jei ne dubatityerem. ³ Ane nunggwana jeiserem jewer ga matikwama ga aa ge tobitintye, ane ga aa ge irebitye ogiribe. Matikwama jeiserem ga kakala jep ne golmini, kakala onggonggelengmana galserem angtane jem gam jerbefe. ⁴ Matikwama ga enggam ne balbabili, "Kakatar, ane ti, ane nanansi seyafter ijama kabwaktababiyen. Jengga angtane bwenta Uwa Sanbagirmanaiserem jem miribe afa fas jam baatulyon, angtane jeiserem ga jes isa kabwaktababili." ⁵ Matikwama jeiserem enggam jam ne balbabiyen angtanes munbobife, jengga jei jamfener tamtamtababif nunu abakfer ga muara lima. Sigini matikwama aa jep ne dortabaabilirim, jemna sigini ga enggala onggonggelenga is gemer gam jerbenerem. ⁶ Muara abakfer ga lima, angtane jeiserem safe jam terf gam terele, jengga masef jei jam teryen. Jei safe jam ge terbif, jengga fas jei gemer naawena. ⁷ Matikwama jeiserem jei ga enggala kudana numu galserem, kudana aa jei ge menetebabisinirim jam ge erabafe. Ane jem dukap ga nabalsiri emasa galserem gala ga aane bunulntena. Mirmase jemna ga enggam ge falipmini mirmase angtanemana galserem. ⁸ Nabal safna jemna ga enggala wi nabal safna galserem, ane ula jemna ga enggala singga ula galserem. ⁹ Jemna danggona bajunu besi namsiniserem ga jem ne matabaabisini. Jemna farat tere ga enggam kereta kuda tere unggwanfer aa jei ge nunggirbinennerem jam erafe. ¹⁰ Jemna bubwatini ane nanggal fwestamap ga enggala onggonggelengmana galserem, ane jem bubwati orolap kakala jemna aga jep, angtane jem ne tamtamtababili nunu abakfer ga muara lima. ¹¹ Matikwama jeiserem jem sanbaka jeiserem jeba malaikata O Mwona girsusu jeiserem aa jei taabilirim. Bosna jemna Ibrani olem ga jei ga Abadon; ane Yunani olem ga bosna Apolyon. (Bosna jeiserem jemna igi ga enggam, "Kabwaktababili".) ¹² Igwalna mesam gwarna tamtamtala nawer-ningnaiserem jem temawer. Angtane jei tamtamtala uskambar gwananmanaiserem mes ne domola, ane mes barwena, jengga jei tamtamtala uskambar gamjon nauraiserem sene domsona. ¹³ Jepga malaikata afelna enamabaraiserem trompeta jemna ga aa forola, ane ai jendere aa jei totintyerem meja gumu nawer-nauraiserem jewer ga ai sarbili. Meja emas jeiserem Uwa Sanbagirem tarnap ne fina. ¹⁴ Jendere jeiserem jei ga malaikata enamabaraiserem trompeta jeiserem aa jei gwirinsinirim ga jes bala, "Malaikata nawer-naura jeiserem se fertebaabisi, malaikata jeiserem jei tafrebaabisili Fona Efrat je." ¹⁵ Ane malaikata nawer-naura jeiserem ga aane aftabaabunnu. Jei ga mes ne menetababisini tahunu aaiserem, ane muara aaiserem, ane nunu aaiserem, ane jema namwer aas jeberserem enggalfe, angtane seyafter ogirip gemerserem afwenefener gam ne munbobif. Uwa Sanbagiri malaikata jeiserem ga Jeye menetababisini. ¹⁶ Ai as mes ne towastana enggame ginanggwana kudanabara jem unggwanfer enggammer 200.000.000 (afa dua ratus juta). ¹⁷ Ai kudana jeiserem ane angtane jem sagabe aa jei ge nonbaanorom ai eserem gamserem ga agam damtabili. Angtane jeiserem jemna baju besi aa jes ne kabwabilirim danggonabe numu ga berbere jam ertene, ane ibam-ibama mermaftana galserem, ane bwelkat-bwelkata belerang galserem. Kudana jeiserem jemna duka ga enggala singga duka galserem, ane jem aaremawer ga tokwa, ane nunggwana, ane beleranga ga je ge toyipmitiwetya. ¹⁸ Angtane aa jei ge nwinbenerem ogiribe, afwenefener ga aane munbobili. Apgal jigala nawer-ningnaiserem angtane aa jei ne munbobilirim ga aas: tokwa, ane nunggwan, ane belerang aa jei ge tobitiwetyaram kudana unggwanfer jeiserem jem aaremawer. ¹⁹ Kudana unggwanfer jeiserem jemna baabeta ga aaremap ane bubwatinip mese. Jemna bubwatini ga dukabara, awas duka galserem. Ane bubwatini kudamana jeiserem angtane ga jem ne tamtamtababuwena. ²⁰ Jengga angtane tomna jam ne munbobiyeneiserem kapka nawer-ningnaiserem jemniwer, jei etam-etama kapka jemnaiserem jam ne mirultefalyan. Jei bwata kapka aa jes ne taabisinirim jei jewer jam ge tikwebiyen jes ne onsobili. Ane jei apgal jigala tafam aa jes ne eyebaabilirim emasawer, ane perakawer, ane tembaganawer, ane ton, ane tini tafam kwiruluserem, apgal jigala seyafter jeiserem gemer ne egantababisini enggalfe gam ne sembatababuwef. Apgal jigala tafam kwirulu jeiserem jei jam ge anggabisiyen, ane jam ge sarbiyen, ane jam ge wofobiyen. ²¹ Ane angtane jei etam-etama kapka jelemana aas galserem jewer jei jam ge tikwebiyen: angtanes munbolo, ane faatrew-faatrew kabwakaiserem jes eyebaabili, ane maaryens gwebabili, ane komkoms gwebili.

¹ Ane jepga malaikata nensa baabetabara ga ai damtana jei taman waaken-giriwer iritya. Jei fene ga gar namsini gam kamwini jei jebaner ga iritya, ane mangganulu jei ga dukap egwaiwebana. Jemna mirmase enggalem ge falibene gwer nafa gamserem, ane tufa enggalem nulabana jagomele tokwana galserem. ² Ane jem tafnap ga buku touya jam mugeitaasili ga jes gwirinsini jam tertesili. Tufa taasfolawer jei fi sagap justena, ane tufa gwejawer je onnap justena. ³ Ane jei ga ol dagame ga aa gwarna singgana aa gemer naawewefaram. Malaikata jeiserem jame aa galap gwarnaram taban, irsi tuju ga gemer ge tamawolbili, tisana jemna ga uskambar. ⁴ Irsi tuju jeiserem ga aa ge nasbawena, ane ai enggam ga ai gunu taterisi irsi aa jes ne nasbilirim jam age tulistababi. Jengga ai taterisi taman waaken-giriwer ga ai sarbili enggam aa gutenaram, "Irsi tuju jeiserem aa jes ne nasbilirim jeiserem ga basyamer se fala, safnant aamei ijam tulistaabiyen!" ⁵ Jepga malaikata aa jei finaram tufa afwer finip jusini, ane afwer onnap jusini, jei ga tafna taasfolawer ga aa goltena winsibe, ⁶ ane bosna Uwa Sanbagirmanaiserem ge jena jem gaarstenanna; Uwa Sanbagiri aa Jei gwenaram jamer abak-abaksusu; Uwa Sanbagiri winis mese ogir, ane fi, ane jigal-jigala seyafter gemerserem aa jes eyebaabilim. Jei ga aa gutena, "Uwa Sanbagiri Jei nunu gamjon jamfener jam bilsiweyan! ⁷ Jengga nunu malaikata tujunuboro aaiserem jemna trompeta jame aa jep forolsaram, taterisi Uwa Sanbagiri angtanef gwanan jam towasulmiyeneiserem jamer abaka, taterisi jeiserem se etamwesa. Taterisi jeiserem Uwa Sanbagiri Jei gwanan mesam nasipmil angtane awelna Jemna aa jei ne gweyibelem jebe, angtane jeiserem jeba nabi-nabi Jelemanaiserem jesam." Malaikata taterisi jeiserem bosna Uwa Sanbagirmanaiserem aa jei gwenaram jamer abak-abaksus ga jem nasbili; Uwa Sanbagiri winsi aa Jei eyebalam ane seyafter winsip gemerserem, ane ogiri aa Jei eyebalam ane seyafter jep gemerserem, ane fi mese ane seyafter jep gemerserem. ⁸ Jepga taterisi jeiserem ai gwanan ajes sarbilintim taman waaken-giriwer, jei gamjon abe enggam ga as bilibene, "Se gwi, bukunu jam mugeiwulsili terewulsiliserem malaikatem tafnap ga is gaarwili. Malaikata jeiserem jei finip ane onnap justena." ⁹ Ane ai malaikata jeiserem jemnip ga ai gwina, ane ga ai bala jei ga buku touya jam mugeiwulsiliserem ap se gerba. Jei ga as bala, "Se goliwiye, ane bukunu aaiserem ga is tumili. Im aaremap ga enggam is enola nintrin fona galserem ababala ga. Jengga im witifinip ga syela is enolbili." ¹⁰ Ane ai buku touya jeiserem jam mugeiwulsiliserem ga ai gaartena jem tafnawer, ga ai tumili. Aaremap ga enggam ai enola ababala ga nintrin fona galserem, jengga ai agalap tumilirim ai enola witifinibe syela. ¹¹ Ane malaikata jepga ase bala, "Taterisi Uwa Sanbagirmana gamjon se nasbinenne, galap jam ge etamwebiliserem anggwabura unggwanfer gemerserem, ane negara unggwanfer gemerserem, ane ula unggwanfer gemerserem, ane raja unggwanfer gemerserem jem temawer."

¹ Jeiserem taban, ap tiborma ga as gulbana, tiborma jeiserem jei ga jem mwongbif. Ane jepga Uwa Sanbagiri Jei ga as bala, "Se gwi, Jena Amna ga is mwonggulbotno, ane mejana jep aaiserem jes mese. Ane angtane jepmana ga is eterbitne enggalfe aamei igam towaswef jemna unggwana fomera Ai As jei ne pujitenerem. ² Jengga ona sitawer Jena Amnaiserem ijam mwonggulboyon, aam temawer ona jes gemerserem jei ga angtane As jes tebayanaiserem ga jep ne gaarmini. Angtane jeiserem jei Kotana Waakenaiserem bosna Yerusalem ga jesene jubononno enggalfe kotana jeiserem jem kabwaktaf, nunu abakef ga enggammer muara ga empat pulu dua (afa tahunu ga tiga setenga). ³ Ai angtane naura Amnaiserem As destamisi. Angtane naura jeiserem jei taterisi Amnaiserem ga jes sege nasbisi. Jei ga fene tarkakana gam ge kamwini, aam temawer ini jemna mes ge jenbamini. Ane jei ga taterisi bunarsusfer aaiserem ga sege nasbinense aa jei etamwelaiserem nunu abakef jeiserem ga enggammer 1.260 (afa tahunu ga tiga setenga)." ⁴ Angtane naura taterisi aa jei etamwelaiserem aa jei ge nasbilirim, jei ga enggala saitun ti nawana galserem, ane enggala lampu nawan titikip aa jei ge finaram Tuhan ogirmanaiserem jem danggonawer jebe. ⁵ Angtane nafsi afa kapkaiserem jep jam eyeipmife, ga tokwana ga jewer sene sutya jem aaremawer, ane ginanggwa jemna jebe gam giranbaabisif. Gam jega angtane seyafter kapka aa jei ne eyeipminirim angtane nawan jeiserem jebe, jei ga sege terbisi. ⁶ Jei baabetabara winsi jem ge matasife, jega arouwa jam nyenyan nunu abakef taterisi Uwa Sanbagiri jei jam sene nasibenennerem. Ane jemna baabeta fo mwonap mese, jega fona jem ga gam irfulu ane aawisfe ga gam etamwena. Ane jemna baabeta mese ogiri jem saftalaiserem kabwaksususerem jebaner, aa jep gangge gunurum jem eyebife, ga gangge eyebili. ⁷ Angtane nawan jeiserem taterisi Uwa Sanbagirmana jeiserem aa jep ge nasbinennerem taban, twen kakala galserem O Mwona girsususerem jewer aa jei totintyerem jebar ga sege erbasa. Jei jam jenyan, jengga angtane nawan jeiserem jei sege jensa, ane ga sene sofsoniwisi. ⁸ Ane jem futunu ga kota giri jeiserem jem nelgir nenennap se nulasa, kotana jeiserem Tuhan jelemana aa jep ne daktanswenaram ti salibibe. Angtane jei kotana jeiserem enggam gane gitmini, jemna bosna jam syawulsiliserem ga Sodom afa Mesir. ⁹ Angtane anggwabura seyafter gemerserem, ane ula seyafter gemerserem, ane negara seyafter gemerserem, jei ga angtane futunu jeiserem jamfener sene geramisi nunu unggwanfer ga enggammer tiga setenga, ane enggame jam ge gubiyen, angtane futunu aaiserem jam sa tartaannu bitisip. ¹⁰ Angtane kapka ogiribe aa jei ge nwinbenerem, jemna ini ga saaser-saasersusfer ga sege folbamini angtane nawan jeiserem aa ge tererem. Jei ga masara sene eyebaabisi, berna jener sene syentabaabisi, aam temawer angtane nauna jeiserem taterisi Uwa Sanbagirmana aa jei ge nasbuwenaram, jei gwanan angtane unggwanfer ogiribe aa jei ge nwinbenerem unggwanfersus ge tamtamtababuwenant. ¹¹ Jengga nunu tiga setenga safe gemerserem, mafnan jem gerasiliserem Uwa Sanbagirminiwer gamjon ga jela, nabi nawan jeiserem gamjon jemnip ga kautetya. Ane jei gamjon terewer ga aa ge irwa, ga aa ge fina, ane angtane seyafter jep gemerserem nabi nawan jeiserem aa jei ne domsonaram, jei ga uskambar ga aa ge erebili. ¹² Jepga angtane nawan jeiserem taterisi ol dagam ge sarbili taman waaken-giriwer enggam aa jei jenminirim, "Au, aaf sege tauya!" Ane jepga angtane jem ol anggwan aaiserem jem nwenap aa ge tauna taman waaken-giribe, ane gara aa motsofala. ¹³ Jes jepserem giniri teisyena ga unggwanfersus gwena. Kotana jeiserem ga afwenefener mululuksosini, ane angtane unggwanfer ga 7.000 ga gemer ge terbili giniri jeiserem jeme. Ane angtane afwer jem teryeneiserem ga jam ge erebili uskambar, ane baabeta Uwa Sanbagirmanaiserem ga aane pujiwulbono, Uwa Sanbagiri aa Jei nwinirim taman waaken-giribe. ¹⁴ Ane ai igwalna ga ai sarbana, jei ga enggam gwefala, "Tamtamsususerem naura aaiserem je maa. Jengga sa angga! Tamtamsusu umwefaiserem babitsim ga sege jalbifi, igwalna gwanan aa gemer gwefalantam jeiserem se etamwena." ¹⁵ Jepga malaikata afelna tujunubaraiserem trompeta jemna ga aa forola, ane taman waaken-girip ol dagam uskambarsus aaiserem ga aa ge sarbiswena enggam aa jei ge gubitenaram, "Tuhan nemna ane Angtane Uwa Sanbagiri bunarsus aa Jes balam Jam baftanafe, Jei baabeta namwer aa ge domola, Jei Sanbakfe Jei sege nwinbene ogiri aaiserem jebe, ane Jei Sanbakfe Jei se nwini jamer abak-abaksus!" ¹⁶ Ane angtane sanbak dua pulu empat taman nwinip jemna aa jei ge nwinbenerem Uwa Sanbagirem tarnabe, jepga aa ge nwinbetena somwan dumeme, ane Uwa Sanbagiri ga aane pujitene, ¹⁷ enggam aa jei ge gubitenaram: "Tuhan, Uwa Sanbagiri, baabeta Imna ba unggwandusam, Aameiba aare, ane ba gwanan jeiserem! Ai Isa enggam aya bala, ase samfer golmini, aam temawer Aamei baabeta unggwandwasusu Imnaiserem Imes taabili, enggame ga Imes towaiwel Sanbakfe jam nwinfe ogiri aaiserem jem sagabe. ¹⁸ Ane angtane Is jam ne onsobayanaiserem jei ga fomfoma? Jei ga uskambarsus ge kakalswebili, jengga nunu namwer aas jepserem mesam fala, kakala Imna jem ne domolfe. Aamei angtane jam tereserem Is waksosini, ane angtane kapka jes Is tamtamtababisi, ane angtane waakena jam tereserem jemna fwaina waakenater jes Is golmini. Nunu aaiserem mesam fala, Aamei ga fwaina ga Is kitulmini angtane awelna Ibe Is jei ne gweyibenerem, nabi-nabi mese, ane angtane Ilemana seyafter gemerserem, ane angtane seyafter gemerserem Aamei Is jei ne tebanaram, sanbagiri ane bastantouya. Nunu aaiserem mesam fala, jega angtane kapkaiserem aa jei ne eyebilirim ogiri aaiserem jebe, Aamei ga Is wasfertababisini." ¹⁹ Jepga Jena Uwa Sanbagirmana taman waaken-giribe ga aa terewulsini, ane jep ga peti ane taterisi Uwa Sanbagirmana ga jep faliton, ga aa sokotini Jem Jenabe. Ane jep ga irsi ga aa bwere-bweretana, ane iris ter ga teisyenem folbana, ane ginir mese, ane arouwa esebere ga teisyenem nyentya.

¹ Jepga winsip ga aa ge anggabiswena bwembwema teisyena unggwandwasusu ga enggam, wini gwere aa jei kamwinirim fen manggen ga aane domolswena, ane muara ga jem tof gwonawer fala, ane jem dwak sagap ga nabalsir gamserem gam gweltena, jep ge batobili torbwana unggwanfer ga dua belas. ² Wini jeiserem ga udanabara, nunu jebe mesam fala tane jemna jewer jam gerefe, ane jei ga jam gwarenwena sigini jemna jeiserem jem temawer. ³ Winsip gamjon ga aa ge anggabiswena bwembwema teisyena ga enggam, bwili unggwandwasusu ga aane domolswena, jemna tifni berberem falbili. Jemna duka ga tuju, duka seyafter gemerserem nabalsir rajamana jes galserem ga gala gam bunulntena, ane jemna tanduku ga sepulu. ⁴ Jem bubwatim jei matona afwenefener ga winsiwer kofortababunswena, ane ogirip ga aa fasawoltetya. Bwildusa jeiserem jep fina wini jeiserem jem danggonawer aa jei sartenaram tane jewer gerefe. Bwildusa jeiserem ga enggalf fina tane jewer gaataanuf jam se surnurum. ⁵ Jepga wini jeiserem Tane ga girtowai gerna. Jei anggwabura seyafter gemerserem jem Sanbakfe ga Jei se gwena, ane dumu ga besi dum se girni. Angtane Jei jam ne sarbayanaiserem, Jei besi dum jeiserem jem gam saftabana. Bwildusa jeiserem Tane safe jam gaataanuf, jengga Tane jeiserem ga aane aamsina, ane ga aane girinfele Uwa Sanbagirminip aa Jei nwinirim Jelem taman nwini sanbagiri jebe. ⁶ Wini jeiserem jei dwisgirip ga nunggiri, tampata jeiserem jewer angtane fas. Jengga Uwa Sanbagiri Jei tampata jeiserem mes menetulbisini wini jeiserem jebe. Tampata jeiserem Uwa Sanbagiri se gweyinwena wini jeiserem nunu ga enggammer 1.260 (afa tahunu tiga setenga). ⁷ Jepga taman waaken-girip erala ga aa fala. Mikayel ane jem malaikata bwildusa jeiserem jebar ga aa ge erabana, ane bwildusa jeiserem jelem malaikatfar ge fibili, ane Mikayelfar ga aa ge erabana. ⁸ Jengga bwildusa jeiserem ga jeye kalaswena, ane bwildusa ane jem malaikata Jei gamjon Jam balbabiyen taman waaken-girip jam nwinfe. ⁹ Bwildusa jeiserem ga aa firulntetya, ga totintye. Jei ga ogirip ne firtabaabuntetya, ane malaikata seyafter jeman mesna. Jeiba awasbak gwanan-gwanansus jeiserem, ga jes jemna bosna ga bawas afa setan, jei angtane seyafter ogiriwer jam afaf-afaftababili. ¹⁰ Ane jepga taterisi ol dagame biliserem taman waaken-giriwer, ane taterisi jeiserem ga ai sarbili enggam aa jei gutenaram, "Nunu namwer aaiserem Uwa Sanbagiri Jei angtane Jelemanaiserem gam waakentababif! Namwer aas jepserem Uwa Sanbagiri Jemna baabeta jam ge sana Raja gamserem. Ane namwer aas jepserem Angtane Uwa Sanbagiri bunarsus aa Jes balam Jam baftanafe Jemna baabeta ga jam ge sana, aam temawer bwildusa jei taman waaken-giriwer ga mes ne firulntetya. Bwildusa jeiserem jei gwanan nem afelen mesna Yesus aa jei ne tebanaram, mesam kenemtababilint Uwa Sanbagirem tarnabe, gwerem ane gwinem. ¹¹ Nem afelen mesna Yesus aa jei ne tebanaram jei jam ge janbiyen, jengga bwildusa mes jena Domba Tanem aawiseme, ane taterisi bunarsusfer aaiserem Uwa Sanbagirminiwer jei aa jes ne nasbinennerem jem mese. Jei baife jam naaweyan jena jam ne detfe, jamer futu. ¹² Ga jem temawer ini imna ise saaser-saasersusfer sege folbamini, aamei taman waaken-gir ane seyafter gemerserem jep aa jei ge nwinbenerem. Jengga tamtamsusu gase etamwemini ogiri yo fini jebe, aam temawer bawasa jei mes iritya imnibe. Ane jemna kakala ga unggwandusa, aam temawer jei tousa enggame nunu jemna gamjon ga bastowaifer gam fala." ¹³ Bwildusa jeiserem jame aa galap towaswenaram enggame, jeiba ogiribe jei mes ne firulntetya, jei ga wini Tane girtowai aa jei gernaram jei ga aa surbinenne. ¹⁴ Jengga wini jeiserem jepga igwala unggwandusa jem farta naura ga jemna gane tetbili wini jeiserem jebe, jega jei jem gam ifufe tampata dwisgiribe, tamna bijuaber bwildusa kakalaiserem jemniwer. Uwa Sanbagiri wini jeiserem ga jep se gweyinwena nunu abakef ga enggammer tahunu tiga setenga. ¹⁵ Ane bwildusa jeiserem jei fona unggwanfersus aaremawer ga enggalf tawara wini jeiserem jemnibe, fona jeiserem wini jei gam gwirinfelf. ¹⁶ Jengga ogiri wini jeiserem ga jeye batobili. Ogiri jei aarema jemna aa teresona, ane jei ga fona bwildusa aaremawer aa jei totintyerem ga oye telbili. ¹⁷ Bwildusa jeiserem jei wini jeiserem ga jes nasbili uskambarsus, ane ga aa sofwa wini jemniwer, ane tane afwer wini jeiserem jemna seyafter jei ga aa surbobinenne. Tantantane jemna afwer jei taterisi Uwa Sanbagiri aa jes balbabilim jei waakenfer ne saribene, ane jei angtane nafisfe mes ne towasulmini enggame Yesus Jeiba jem Tuhansam. ¹⁸ Ane bwildusa jeiserem finip ga aa fina.

¹ Jepga twen kakala galserem ga ai domola, jei ga finiwer faanwetya. Jemna tanduku ga sepulu ga gemer ge tenibisini, ane jemna duka ga tuju. Tandukup seyafter gemerserem nabalsir rajamana jes galserem jeme gemer falibaanunnu. Ane jem dukap seyafter gemerserem jep ga bosna Uwa Sanbagiri jem imei-imeitalaiserem ga jes ne tulistababili. ² Twen kakala galserem ajes domolaram, jemna numu ga enggam falbili bibini unggwan-giri jemna numu galserem, ane jemna tufa sawegir tufa galserem, ane jemna aarema ga enggala wombata aarema galserem. Ane bwildusa jeiserem gwanan ajes domolaram, jeiba bawasam, ane jei baabeta jemna twen kakala galserem ga jep golbili, baabeta unggwandwasusu, ane jem taman nwini jes mese. ³ Twen kakalmana duka tuju jeiserem, duka daamfenna jep ga enggam falbili, bubwana tamtamsusu, jengga bubwana jeiserem mes tere. Angtane seyafter ogiri gemerserem jei ga twen kakala jeiserem jem temawer ga jam ne bitbitwebili, ane jes ne onsobili. ⁴ Angtane jei ga bwildusa jeiserem ga jes ne sembatana, aam temawer jei ga baabeta jemna twen kakala galserem jebe jeye golbili. Ane angtane jeme twen kakala galserem jes mese jes ne sembatana. Jei ga aa ge gubitena, "Twen kakala aas galserem gala afa fas! Angtane jebar jam ge erabayan!" ⁵ Twen kakala galserem jei ga baabetabara taterisi kabwaksususerem ga jes nasipmini, ane Uwa Sanbagiri ga jam imei-imeitana, ane jei jener sanbakfe gase nwini nunu ga muara empat pulu dua. ⁶ Ane jepga twen kakala galserem Uwa Sanbagiri ga aa towaitana jam babapsobafe, ane bosna Uwa Sanbagirmana, ane tampata Jei aa jep nwinirim jes mese jam babapsoimbene. Ane angtane seyafter taman waaken-giribe aa gemer ge nwinbenerem jeme jam babapsobabili. ⁷ Ane twen kakala galserem jei baabetabara angtane Uwa Sanbagirmana jebar jam ge erabaf, ane angtane Uwa Sanbagirmana ga aa ge janbili, jengga twen kakala galserem jei jam jenyan. Ane twen kakala galserem jei baabetabara anggwabura seyafter gemerserem jem sanbakfe jei se nwini, ane negara seyafter gemerserem, ane ula seyafter gemerserem ga jese nwini sanbakef. ⁸ Angtane seyafter ogiribe aa gemer ge nwinbenerem, jei ga twen kakala galserem ga jes ne pujiwulwena, ga enggam angtane seyafter bosna jam tulistabaipmiyen bukunu angtane bosna aa jep tulistababilirim, angtane Uwa Sanbagirfar aa jei naawelaiserem. Bosna jemna jam tulistabaipmiyen jebe nalef ogiri aaiserem jam etamweyan. Bukunu jeiserem jeba Domba Tanemana, aa Jei terem. ⁹ Afa aamei imwanabara, aaiserem gasa sarbi! ¹⁰ "Angtane bwiyip jam gaataantelaiserem, jei bunar sene gaataantena. Ane angtane jam ne munboloserem nombeyem tegila, jei bunar nombeyem sene tegila, futu. Jega jem temawer safna Uwa Sanbagirmana jei abakfer sene fibabili, ane kanaufer sene taabili." ¹¹ Jepga ai domola twen kakala galserem nafsi aa jei totintyerem ogiriwer. Jemna tanduku naura ga enggala domba tane tanduku galserem. Jengga bwildusa gamserem jei gam nasowena. ¹² Twen kakala aaiserem jam aa jep gam fortyaram twen kakala gwananmanaiserem jem tarnabe, jei baabeta unggwandwasusu twen kakala gwananmana jeiserem jemniwer ga gam domola. Jei baabeta jeiserem ga enggalf gam domola, jei ogiri seyafter gemerserem ane angtane ogiribe aa jei ge nwinbenerem, jei jem gam tergenbaabif twen kakala gwananaiserem jes ne pujiwulfe. Twen kakala gwananmanaiserem jemna bubwana tamtamsusu mesam terbilint. ¹³ Twen kakala afelnaiserem jeme gemer bwembwema unggwandwasusu ga jes eyebaabili enggame, angtane seyafter jep gemerserem jem nwenap, jei tokwas gitmini winsiwer jam ne iryafe ogirip. ¹⁴ Ane angtane seyafter ogiribe aa gemer ge nwinbenerem, jei gase afaf-afaftababili bwembwema aa jes eyebilirim, twen kakala gwananmanaiserem jam aa jep gam fortyaram jem tarnabe. Twen kakala afelnaiserem angtane seyafter ogiribe aa gemer ge nwinbenerem gase balbabili, jei tiborma jam gane kwirulu patunga gamserem, ane bosna twen kakala gwananaiserem jep jam golbif tiborma jam kwiruluserem jebe. Twen kakala gwananaiserem jeiba gwanan mesam targara nombeyeme tamtamsusu, jengga jei gemer gaarasini. ¹⁵ Twen kakala afelnaiserem jebe baabeta ga gulbana enggalfe, jei mafnana jem gerasiliserem jem gam forolbitef patunga jeiserem jebe, bosna aa jei domolaram twen kakala gwananmanaiserem jemniwer, ane patunga jeiserem jei gam nasowef. Ane angtane seyafter jei jam pujiwulyonoserem gase munbobili. ¹⁶ Twen kakala afelnaiserem jei angtane seyafter gemerserem, angtane bastouya ane sanbagiri, angtane galgalabara ane galgalyena, angtane aa jei armantanaram angtane nafsiminiwer ane angtane jafner gwela, ga jes tergenbaabili tandana jemna gane taayibef tafna taasfolawer afa mirip. ¹⁷ Afa angtane tandana jeiserem jem tafnap afa mirip jam domolyan, jei apgal jigala fas jam ne armanulyon, afa jam jualulyon. Tandana jeiserem jeiba bosna twen kakalmanaiserem, afa hurufu nomorem aa jes gam tulistababilirim bosna jemnaiserem jebe. ¹⁸ Angtane tousaiserem ga jam sene domola. Angtane tousaiserem aa jei ne domolaram jei samfer twen kakalmana nomora jamfener seiseyawuluserem jei gam eterbili, aam temawer nomor jeiserem jeba angtane bosesam. Nomora jeiserem ga 666.

¹ Ane jepga ai anggana, Domba Tane jeiserem aa sokotinirim Taaren Siyon kota Yerusalem je ga jep fina. Ane angtane Jebar aa jei ge fibilirim jemna unggwanfer ga enggammer 144.000, ane angtane jeiserem jem miribe tulisana bosna Domba Tanemana, ane bosna Jelem Jetamana. ² Ane jepga taterisi taman waaken-giriwer ga ai sarbili, jemna tisna ga enggam fona uskambar gam tentetyaram, ane iris kakala uskambar gamserem. Taterisi jeiserem jam sarbili ga enggam musik tisna gamserem, angtane gitara aa jei gane enentababilirim jem tisna gamserem. ³ Angtane unggwanfer ga 144.000 jeiserem jei taman nwini sanbagiri jem tarnap ge fibili, ane malaikata nawer-naura galserem igsusu jeiserem jem tarnap mese, ane angtane sanbak unggwanfer jes mese jem tarnabe. Ane angtane unggwanfer jeiserem jei simala ibirmiserem ga jes ne twola. Simala jeiserem angtane nensa afa jam ne towaswebayan, jengga angtane 144.000 jeiserem jenfentowaifener ne towaswebana, angtane jeiserem ogirip aa jei ge nwinbenerem. Uwa Sanbagiri etam-etama jemna mes wirtabaipmini enggalfe Jei ga sene onsobaf. ⁴ Angtane 144.000 jeiserem jeiba anggwa tetensam tifni jena mes ne gaaramisnennent, kapkaiserem jemnip fas; jei wifer maaryena jam ne gwebiyen. Jei Domba Tane gane onsobana, Jei aa jewer gam sofnaram. Anggwa tetenanna seyafter jeiserem jei ga angtane seyafter ogirip aa jei ge nwinbenerem ga jewer ge forobuwetya. Uwa Sanbagiri Jei anggwa tetena jeiserem etam-etama jemna mes wirtabaipmini enggalfe angtane jeiserem Jei gam onsobaf. Ane angtane jeiserem jeiba nabal-nabalsusu Uwa Sanbagirfe ane Domba Tanefe jes aane kitulmini. ⁵ Jei afaf-afafyan, ane etam-etama kapka jemnibe fas. ⁶ Jepga malaikata nensa gamjon ga ai damtana jei winis tagargarsusup ifunonno. Malaikata jeiserem jei ga Taterisi Waakena abak-abaksususerem Uwa Sanbagirmana ga jes gwirinfele angtane ogirip nwini gemerserem, ga enggam anggwabura seyafter gemerserem, ane ula seyafter gemerserem, ane negara seyafter gemerserem ga jep gwirinmifele. ⁷ Malaikata jeiserem jei ga ol dagam gutena, "Uwa Sanbagiri Jam isa erebene, ane Jemna unggwandusa ga jam isa pujiwulbowena! Jam isa pujitene, aam temawer nunu jep ga mes fal, nunu Uwa Sanbagiri Jei angtane jem waksosiliserem, angtane waakena ane kapka. Jei sa sembata winis, ogir, fi, ane fo mwona seyafter gemerserem aa jei eyebaabilim." ⁸ Malaikata gamjon naurabaraiserem, jei malaikata nabala aa jei dannaram ga jem amnup fyaswefaltya, ane ga gutena, "Babel mes ne ganamwena! Kota Babel unggwan-giriserem mes muruluktaabisini! Angtane kotana jepmanaiserem jei anggwabura seyafter gemerserem mesam gwebabili jam ge mabukswebife fo anggurume. Fo angguru jeiserem jam gane telbilirim jeiserem jem igiserem ga enggam, etam-etama kapka jam eyebili gamserem, etam-etama maaryen gwebiliserem. Jega jem temawer kotana jeiserem jamer sene muruluksosini." ⁹ Ane malaikata afelna nawer-ningnabaraiserem jei ga malaikata nauraiserem jem amnup ga fyaswefaltya, uskambarsus ga gutena ol dagame, "Uwa Sanbagiri Jei angtane enggalaiserem se tamtamtababisi: Angtane twen kakala galserem aa jei ne sembatababuwenaram, afa angtane jelem ti borom jam kwiruluserem patunga galserem aa jei ne sembatababuwenaram, afa angtane twen kakala galserem tandana jemna aa jei gam taabili miribe afa tafnap. ¹⁰ Uwa Sanbagiri Jei angtane jeiserem uskambarsus se nasbabili ane jei uskambarsus se tamtamtababili. Tamtamtala jeiserem ga enggala: Uwa Sanbagiri Jei kakala Jemna mukap se gwetaantena, ane gase suwulsini angtane kapka jeiserem jem sagabe jei ga sene telbili. Ane angtane seyafter jeiserem jei tokwagiri yo beleranga jem ga sene tamtamtababili, malaikata tabalaiserem ane Domba Tane jem nwenabe. ¹¹ Tokwa nunggwana angtane jeiserem aa jem tamtamtababilirim, tokwa nunggwana jeiserem jeber-jeber sene tawewena jamer abak-abaksus. Bwerna jemnaiserem jam tikwemiyen, gwerem ane gwinem. Angtane twen kakala galserem ane patung aa jei ne sembasonaram, afa bosna twen kakalmana aa gam tulistaabilirim jeleminibe, angtane jeiserem jei kabwaksusu ga jei sene domola jeber-jeber." ¹² Angtane Uwa Sanbagirmana jei abakfer ga jei sege fibili. Angtane jeiserem jeiba angtane taterisi Uwa Sanbagiri aa jes bilipminirim jetefner sene taayibene, ane Yesus tefner waakenfer ga sene tebana. ¹³ Jepga taterisi ga ai sarbili taman waaken-giriwer ga enggam gutena, "Taterisi aaiserem se tulisul: Angtane namwer aas jepserem awelna Tuhanmana aa jei ne gwebilirim, angtane jeiserem ini waakenfer sege folbamini jei jam tere jepserem." Mafnana Uwa Sanbagirmana enggam gutena, "Bunar! Jei sege tikwebili awelna uskambar jam gwebiliserem jewer, ane Uwa Sanbagiri Jei fwaina waakena se golmini." ¹⁴ Ane gamjon ga ai anggana, winis sinsini ga ai damtaswena aa sokotini, ane winis sinsini jeiserem jem sagabe angtane aasaje jep nontena, Tane Angtanemana galserem. Jem dukabe nabalsir emas galserem ga gala gam gweltena, ane jem tafnap nombeya binbinsusu ga gala gam gwirinsini. ¹⁵ Ane jepga malaikata nafsi aasaje ga aa totintye Uwa Sanbagirem Jenawer. Ol dagamabaner jei ga angtane winis sinsin sagabe aa jei nontenaram ga bala, "Nombeya jase jawol, ane nananisi aas jepserem ga is targabaabisini, aam temawer nunu aas jepserem ba mesam fal jam fulfe. Nananis ogiribe ba mesam ge nonswebili jewer fulf." ¹⁶ Ane jei aa jei nontenaram winis sinsin sagabe, jei nombeya ga aa jawola ogiribe, jepga nanansi ga aa fulu ogiribe. ¹⁷ Jepga malaikata nafsi gamjon ga ai damtana, jeime Jena Uwa Sanbagirmanaiserem ga jewer totintye taman waaken-giriwer. Malaikata jeiserem jeime nombeya binbinsusu gam gwirni. ¹⁸ Jeiserem taban, gamjon ga malaikata nafsi mejanawer ga jela. Jemna baabeta uskambar tokwana seyafter gemerserem jem sagabe. Malaikata aa jei totintyerem jei ol dagame malaikata nombeya binbinsusu aa jei gwirinsinirim ga jenbene, "Nombeya imnaiserem jase jawol, ane anggur titantan jeiserem makan anggur ogiribe ga is targabaabisini, aam temawer anggur tanna jeiserem mes ge nonswebili!" ¹⁹ Ane malaikata jeiserem jei ga nombeya ga aa jawola ogiribe, ane anggur tanna jeiserem nombeyem ga targabaabunuwili jelem tirniwer, jepjon ga fasawoltana o mwona unggwandusaiserem jebe, ane jep ga anggur tanna ga aane jubobinenne, gambara kakala Uwa Sanbagirmana jes gamserem. ²⁰ Anggur tanna jeiserem kota sitawer ga aane jubobinenne o mwonabe, jep ga aawis ga enggam suwena fona gamserem. Aawisi jeiserem aa jei suwenaram jemna bijauwer ga 300 kilometer, ane jemna giriwer ga amkom meter naura.

¹ Jepga winsip ga ai anggaswena, bwembwema teisyena unggwandwasusu ga ai domola. Jep ga malaikata tuju, ane malaikata jes gemerserem daamfen-daamfenneme kapkaiserem ga jei ne gwirinmiyele angtanefe. Jeiserem ga Uwa Sanbagirmana kakala umwef aa jep gosorsinirim, jepga kakala Jemna bar. ² Jepga ai apgal jigala nafsi ga ai domola aa jei sokotinirim, ga enggalem fala, fona unggwandusa kacana galserem ane ga tokwanabar ga ge dubwena. Ane jes jepserem gamjon ga ai anggaswena, angtane jam ge janbiyeneiserem ga ai damtabili, jei twen kakala galserem jei mes ne jubostena. Ane ti boroma numu jemna galserem aa jes ne kwirulurum patunga galserem, jei ti boroma jes mese mes ne jubostena. Ane angtane jeiserem jei bosna jemna nomorabaraiserem jes mese mes ne jubostena. Angtane jeiserem jei ga fona unggwandusa kacana galserem ga jem binfip ge fibuntena, ane kecapini gitar namsini jamer ne erbisini, Uwa Sanbagiri jebe aa jes kitulminirim. ³ Ane jei simala Musamanaiserem ga aane twolbana. Musa jei nabi Uwa Sanbagirmana. Ane simala jeiserem, je simala Domba Tanemanaiserem ga enggam: "Uwa Sanbagiri baabeta Imna unggwandwasusu. Seyafter Ijes eyebilirim, jeiserem unggwandusa ane waakensusu. Aamei anggwabura seyafter gemerserem ga jem Sanbaka, Aameiba waakensusu ane bunarsus. ⁴ Tuhan, Aamei Is jam erebeyeneiserem ga nansa? Baife ga nane se gwena baabeta Imna jei Is jam nasibeyenfe? Aamei Infentowai jame tabalbalsusu. Angtane anggwabura seyafter gemerserem Imnibe sege forobitye Is jewer ne pujitef, aam temawer angtane seyafter mes ge towaswebili enggame Aamei seyafter waakensusfer Im eyebili ane bunarsusfer." ⁵ Jes galapserem ai ga Jena Uwa Sanbagirmana terewulsilem aa jei finaram taman waaken-giribe ga ai domola. Jena jeiserem je gemer gane bili Tenda Jena Uwa Sanbagirmana. ⁶ Ane jepga malaikata tuju, jei Jena Uwa Sanbagirmana jeiserem jewer ga aa ge tobitintye. Ane malaikata jes gemerserem jei daamfen-daamfenneme kapkaiserem angtanef ga jei ne gwirinmiyele. Fena jemna aa jes ne kabwabilirim jei ga fen irif-irifi, nunggunyono ane ga sinsinsusu. Ane jem danggonawer ga ban emas jes ne bunulwili. ⁷ Malaikata nawer-naura galserem igsusu ga daamfenna, jei asayunu tuju ga gemer kitulmini tuju malaikatfe. Asayunu jem igiserem ga kakala Uwa Sanbagirmana, aa Jei gwenaram jamer abak-abaksus. ⁸ Ane Jena Uwa Sanbagirmanaiserem jebe nunggwana ga anesus, aa jei jelaram nafa yo baabeta Uwa Sanbagirmanaiserem jemniwer. Ane angtane afa fas jam kauteyan Jena Uwa Sanbagirmanaiserem jebe, jamere kapka tuju jeiserem malaikata tuju aa jes ne erbilirim sege barwebili.

¹ Jepga taterisi ol dagam ga ai sarbili Uwa Sanbagirem Jenawer. Taterisi jeiserem malaikata tuju ga jes balbabili enggame, "Gasa sofwe, ane asayunu tuju kakala Uwa Sanbagirmana jeiserem ogir sagap ga isa sutobaabisini ogiri gam kabwaktaf. Gasa eyebi enggam gamserem angtane fo kakal gemer gam suwulsinirim jili gol jam kabwakulf." ² Malaikata gwananaiserem jei ga aa gwina, ane asayunu jemnaiserem ogir sagap ga aa suwulsini. Jepga angtane tandana twen kakalminiwer aa jei ne damtabilirim, ane patunga aa jei ne pujitababuwenaram, jei saasiw kapka ane siginsusu ga aa ge falipmini. ³ Jepga malaikata afelnaiserem jeime asayunu jemna finip ga aa suwulntena. Ane fini ga enggam fala aawisi angtane jam tere jemna aawisi gamserem, ane apgal jigala seyafter finip aa gemer naawenaram ga aa ge terbili. ⁴ Jepga malaikata nawer-ningnabaraiserem jeime asayunu jemna ga aa suwulntena fonabe ane fo mwonap mese, ane jepga fona enggam ga aa ge falbili aawisi galserem. ⁵ Malaikata baabeta aa jemanem folbanaram fona jeiserem jebe, ai malaikata jeiserem ga ai sarbana, jei ga enggam gutena: "O Uwa Sanbagiri, Aamei tabalbalsusu, Aamei namwermanaiserem ane Aamei gwananmanaiserem. Tamtamtalaiserem Aamei Ijes golminirim jeba waakena. ⁶ Jei angtane Imna aawisi jemna mes ne sutobaipmisini, ane aawisi nabi-nabi mese jemnaiserem, ane Aamei namwer ga Ijes eyebili enggalfe jei aawisi gam ne telbebistowelam. Jeiserem jeba fwaina bunarsusferam eyeipmini jebe." ⁷ Jepga taterisi ga ai sarbili Uwa Sanbagirem mejanawer jei enggam tamawolbana, "Tuhan, Uwa Sanbagiri baabeta Imna unggwandwasusu! Tamtamtalaiserem Aamei Ijes golminirim jeba bunar ane waakena." ⁸ Jepga malaikata nawer-naurabaraiserem asayunu jeman jon gwerep ga suwulsini, ane jepga gwere ga enggam fala sarsarsus angtane jebe gangge taabisif, gwer kakala jeiserem jeme. ⁹ Gwere kakalfenna angtane ga jemfener ge taabisini, ane jei ga bosna Uwa Sanbagirmana jam ne babapsoibene, aam temawer Jei tamtamtababiliserem jes golmini. Jengga jei etam-etamawer jei jam ge tikwebiyen, ane baabeta Uwa Sanbagirmana jei jam ne pujiwulboyon. ¹⁰ Jepga malaikata limanabaraiserem asayunu jemna twen kakala galserem jem taman nwin sagabe ga aa suwulsini. Jepga twen kakala jeiserem jemna ona seyafter jep ga enggam fala gwin. Angtane jei ga maflama jelemana gane jerbebili bweram temawer, ¹¹ ane jei Uwa Sanbagiri taman waaken-girip aaiserem ga aane babapsobana, aam temawer jei bwerna aa jewer ne domolaram, ane jei saasiw aa jewer ge falipminirim. Jengga jei etam-etama kapkawer jei jam ge tikwebiyen. ¹² Jepga malaikata enamabaraiserem asayunu jemna ga suwulntena fona unggwandusa bosna Efrat je. Ane fona jeiserem ga aa safwena, jega nels geramini raja-raja jei jewer ge difabiliserem gwer anggasyela jewerserem jewer. ¹³ Jepga bwata kapkaiserem nawer-ningna ga ai damtabili, jemna numu ga enggala sajala galserem. Bwat kapka jeiserem bwildusa jem aaremawer totintye, ane twen kakala galserem jem aaremawer totintye, ane nabi ol kapkaiserem jem aaremawer totintye. ¹⁴ Jeiserem jeiba bwata kapka, ane jei bwembwema gane eyebili. Bwata kapka nawer-ningna jeiserem jei gangge sofobili, ginanggwana rajamanaiserem jam betbetulfe ogirip seyafter gemerserem jewer, aam temawer nunu unggwandusaiserem jem gam eraf Uwa Sanbagirfar, Jemna baabeta unggwandusa. ¹⁵ Jeiserem taban Yesus enggam ga gunu, "Imsa sar! Nunu Ai Ajam foryalaiserem nunu jeiserem angtane jam ne towaswebiyen, nunu komkom anggwana jam foryala jem ne towaswebiyene gamserem. Angtane nustayanaiserem, jengga fene jemna mes menetebabisini, angtane jes galserem jei ga Ams damtaf. Ai Ajep fortyaram, ini jemna waakenfersus sege folbamini, aam temawer jei ilyak-ilyakmer Amnibe jam ge jalbiyen, ane jei jam ge seferswebiyen angtane unggwanfer jem nwenabe." ¹⁶ Jepga bwata kapkaiserem ginanggwa ane raja-raja ga dupdupbulu jam ge betwebife. Ona jei aa jep ge betwebiliserem, Ibranim oleme ona jeiserem enggam gane bili, "Harmagedon". ¹⁷ Jepga malaikata tujunubaraiserem asayunu jemna winsibe ga suwulsini. Ane jei taterisi ol dagam ga sarbili taman nwini sanbagiri Uwa Sanbagirmanaiserem Jem Jenawer, enggame aa jei gutenaram, "Maa, bar!" ¹⁸ Jepga irsi ga aa bwere-bweretana, ane iris tere ga teisyenem folbana, ane jam kwanemwebawena, ane giniri unggwandwasusu ga gwena. Gwanan Uwa Sanbagiri angtane Jame aa galap eyebaabilim jamere namwer aas jepserem, ginir enggame fas jam gweyan, giniri jeiserem jeba unggwandwasusum! ¹⁹ Babel kotana unggwan-giri jeiserem, jei ga mes wogwogwena, woga ga nawer-ningna ga gangge falbili, ane kota-kota ogiri seyafter gemerserem jei ga jam ge kabwakswebili. Ane Uwa Sanbagiri Jei kota Babel unggwan-giriserem ga aa sarmistaabona, ane Jei angtane jepmana gam taatwebaabili jei fo anggur kakala Jemna gane telbif Jem mangkonawer, afa igi ga enggam angtane jepmana mes ne enolbana kakala Uwa Sanbagirmana. ²⁰ Naanteya seyafter sege asobili, ane taaren mese jeme sege asobili. ²¹ Arouwa es batu unggwandusa galserem winsiwer gane nyentya, jemna darna ga enggammer lima pulu kilogram. Winsiwer gangge janbitye angtane jem gam jubobif. Ane angtane Uwa Sanbagiri ga sene babapsobana, aam temawer jei kapkaiserem aa jes ne domolaram arouwa es batuminiwer. Arouwa es batu jeiserem Uwa Sanbagirminiwer jeba kabwaksusum.

¹ Jepga malaikata tuju asayunu aa jei ne erbilirim, daamfenna jemniwer aasaje ga jela amnibe, ane ga aa gutena, "Au, ai wini maaryen-maaryenaiserem is agam ge destaibe, jei aa gam ne tamtamuluserem. Wini jeiserem ga kotana unggwan-giriserem aa jes ne eyebalam fona unggwanfer jepserem jem gwetmanabe, wini jeiserem ga jes galserem. ² Raja-rajana ogirip aaiserem, jei ga maaryens ne gwebuwenant angtane kotana aa jep ge nwinbenerem jebar. Ane angtane ogiribe aa jei ge nwinbenerem, jei ga fo anggurem ge mabukswebuwenant. Fo angguru jeiserem jam gane telbilirim jeiserem jemna igi ga enggam, ini jemna saaserfer gangge folbamini maaryena jam ne gwebife." ³ Jepga Mafnana Uwa Sanbagirmana ga as tebana, ane malaikata jeiserem jepga dwisgirip ga as aftafala, dwisgiri jeiserem jep angtane afa jam nwinyen. Jep ga wini aasaje ga ai domola. Jei twen kakala galserem jem sagap nontena, jemna numu berbere, ane jem tifinip seyafter ga bosna kabwaksusu gane tulistaabili. Twen kakala jeiserem jemna duka ga tuju ane tanduku sepulu. ⁴ Wini jeiserem jei ga fene numu naura ga jes kamwini, numu angguru galserem ane numu berbersusu. Ane al, deyeu, inanai, ane nafis-nafsi mese, seyafter emasawer aa jes ne eyebaabilirim, ane tuna jam bwenen-bwenenwelaiserem, ane mutyara, seyafter ga jes bunulwili. Ane tafna jemnaiserem ga mok emas jes girinsini. Moka jeiserem jem aaremap ga kabwaksusu ane etam-etama kapkaiserem ga jei ge falbiton, awelna jemna maaryenf gwebiliserem. ⁵ Jem mirip ga bosna basyamer ne tulisulu. Bosna basyamer jeiserem jemna igi ga enggam: Kotana Babel unggwan-giriserem, je wini jem ene gamserem, wini maaryena aa jei ne eyebuwenaram, ane je angtane jem ene gamserem angtane etam-etam kapka seyafter gemerserem aa jei ne eyebuwenaram ogiri aaiserem jebe. ⁶ Jepga wini jeiserem ga ai domola. Jei jam mabukswena, angtane Uwa Sanbagirmana aa jes ne munbobilirim jem aawiseme, angtane aa jes ne munbobilirim ga aam temawer jei Yesus mes ne tebana. Wini jeiserem jame agalap domolaram, jepga aga ajamer bitbitwebili, aam temawer jemna etam-etama jame kabwaksusu. ⁷ Jepga malaikata jeiserem jei ai ga as tenebana, "Jeje bafa aamei wini jeiserem ga im bitbitwebili? Ai is ajam ge towasulbo taterisi jam syawulsili wini jeiserem jem temawer, ane twen kakala galserem jem temawer, jei aa jem sagap nontenaram. Twen kakala jeiserem jemna duka ga tuju ane tanduku sepulu. ⁸ Twen kakala jeiserem ijes damtanaram gwanan mesam gwel, jengga namwer jei fas jam gweyan. Jei babitsim O Mwona girsususerem jemniwer gase totintye, ane gase sofwa taman tokwagiribe jep gase taasini, fus. Angtane afweraiserem ogiribe aa jei ge nwinbenerem, bosna jemna jam tulistabaipmiyen bukunu angtane bosna aa jep tulistababilirim, angtane Uwa Sanbagirfar aa jei naawelaiserem. Bosna jemna jam tulistabaipmiyen jebe ogiri aaiserem gwanan nalefe jam eyebayana galapserem. Angtane jeiserem jei ga sege bitbitwebisi, jei twen kakala jeiserem jam aa jep ne damtasaram. Jei sege bitbitwebisi, aam temawer twen kakala jeiserem jeba gwanan mesam gwel, ane namwer jei gamjon ga jam gweyan, jengga jei gamjon se fortya. ⁹ Angtane tousaiserem ga jam sene domola ini se girni taterisi aaiserem jem temawer. Duka tuju jeiserem jeba tuju otumsam wini jeiserem aa jep nwinirim. Ane duka tuju jeiserem, gamjon jeba tuju rajasam. ¹⁰ Lima raja jemniwer jei ga mes ge terbilint, daamfenna gemer nwini sanbakfe. Ane daamfenna jei gemerje jam foroyan, jengga jei aa jep fortyaram, jei abakfer jam nwinyen sanbakfe. ¹¹ Ane twen kakala gwanan gwelaiserem, jengga jei namwer gamjon jei jam gweyan, jeiba rajana gamjon aaiserem tuju Raja gwanan jes gamserem. Ane jei ga jam sofsa taman tokwagiribe gase taasini, fus. ¹² Tanduku sepulu jeiserem ijes damtabilirim, jei ga raja sepulu. Jei sanbakfe gemerje jam ge nwinbeyen. Jengga jebe baabeta se golmisi, jega jei sanbakef gam sege nwinbese jem saaserfar twen kakala galserem jebar, abakfer ga jema daamfenna. ¹³ Angtane raja sepulu jeiserem jemna ini seyafter ga daamfennaber ge folbamini, ane jemna baabeta seyafter jei ga twen kakala galserem ga jep ne gulbana. ¹⁴ Jei ga jam ge erabaf Domba Tanefar, jengga Domba Tane jam jenyan, raja-raja jeiserem ga jei ge janbili. Jei jam jenyan, aam temawer Domba Tane Jeiba Tuhansam tuhan seyafter gemerserem jemniwer. Ane Jeiba Sanbaka Rajamanam raja seyafter gemerserem jemniwer. Ane angtane Domba Tane aa jei ne tikwebaatinennerem, jeiba angtane gwanan aa jes jenbebilirim, ane aa jes destabaabilirim awelna Jemna jei ne gweyibefe, ane jei jam ge tikwebisiyen Jei jam ne onsobawefe." ¹⁵ Jepga malaikata jeiserem ai ga as enggam bala, "Fona aamei ijes damtabilintim, wini maaryen-maaryensusu jeiserem jei aa jep nontenaram, fona jeiserem jeba angtanesam, angtane unggwanfer, ane negara unggwanfer, ane ula unggwanfer. ¹⁶ Tanduku sepulu jeiserem aamei ijes damtabilintim ane twen kakala galserem, jei wini maaryen-maaryen kakalmer ga jei sene nasbili. Jei ga apgal jigala jemna seyafter gemerserem ga sene amsonbisi, ane ga sene firultefalsa ilyak-ilyaksamer. Jei nini jemna ga sene tombaabisi, ane tokwanap ga sene giranbaabisi. ¹⁷ Jei jeiserem sene eyebisi, aam temawer Uwa Sanbagiri jei itana mes gaarmini jeiserem jam ne eyebife. Jei ga sene eyebisi Uwa Sanbagiri aa gam gunurum. Raja-raja jei baabeta jemna ga sene gulbana twen kakala jes galserem jebe, jamere Uwa Sanbagiri aa jes bilirim seyafter jeiserem se etamwesa. ¹⁸ Wini aamei ijes domolantam jeiserem, jeiba kota unggwan-girsususerem jes galserem. Jei sanbaksusu ga jes raja-raja seyafter ogiri aaiserem jebe."

¹ Jeiserem taban, jepga malaikata nafsi aasaje ga ai damtana, jei taman waaken-giriwer iretya. Jemna baabeta unggwandwasusu, ane nafa jemnaiserem jeme ogiri seyafter gemerserem ga jem naftana. ² Ane malaikata jeiserem ol dagam enggam ga aa gutena, "Kota Babel mes ne ganamwena! Babel unggwan-giri ga mes ne ganamwena! Kota Babel namwer aas jepserem ga taman nwini bwata kapkaiserem unggwanfer jep nulamini. Ane jep ga junu nafis-nafsi kapkaiserem gemer naawaiton, angtane baife aa jes ne gwebabilirim. ³ Kotana jeiserem nalef jam ne ganamweyan, negara seyafter gemerserem jei mes ge mabukswebili jelem fo anggurume. Fo angguru jeiserem jam gane telbilirim igi jemnaiserem ga enggam, etam-etama maaryen gwebili gamserem. Ane raja ogirip aaiserem jei ga maaryena angtane aa jep ge nwinbenerem ga jebar ne gwebilint. Ane angtane doif unggwanfer aa jei gam terelerem ogiribe, jei doini anesus mesam damtanant. Ini jemna unggwan-giri enggam ge folbaminint galgala unggwanfersus jem gane armantababif, angtane kotana jeiserem aa jep ge nwinbenerem jemniwer." ⁴ Jepga taterisi nafsi taman waaken-giriwer ga ai sarbili, jei enggam gutena, "Angtane am sarbalaiserem, aamei sa totinye kotana jeiserem jewer! Aamei angtane jep aa jei ge nwinbenerem, etam-etama kapka jemna ijama tikweipmitiyen, ane tamtamtalaiserem aamei ijama domolyan. ⁵ Sa totinye kotana jeiserem jewer, aam temawer angtane kotana jeiserem aa jei ge nwinbenerem, jemna etam-etama kapka jam ge saksakswebunnu jamer anesus, ane Uwa Sanbagiri Jei etam-etama jeiserem mes sarbabistaabona. ⁶ Kapkater isa eyeipmini jebe, jeime kapkaiserem gwanan ibe is mesam eyeipminint. Seyafter jei aa gemer eyebilintim, aamei jegme sa fwainulbo naurater. Mangkona jemnaiserem anggur fona kanauwaiserem ga jep isa bokola, anggur fona jemna kanauwaiserem ga naurater jei gwanan ibe is jes menetulmisinintim jemniwer, anggur fona jeiserem ga isa bokolbana. ⁷ Gwanan angtane jeiserem waakenfer ge nwinbenent, galgala jemna unggwanfersusu. Jengga namwer kapkaiserem unggwanfersus ga jes isa golmini. Angtane jeiserem jeber-jeber jelem inip enggam ga aa ge gubili, wini rajamana aa gemer gunurum: ’Aiba aafe wini rajamana galserem ga agalf nwini! Ai saamira wiyen, ane ai ajam domolyan ini ajam janbife!’ ⁸ Taterisi jeiserem jei jelem inip aa jewer ne bilirim, jega jem temawer nunu daamfenna jei tamtama ga jem sene domolsa. Ga aas ne domolsa: bweradwas, ini jam jenbala, ane wisdusa. Ane jei tokwam ga sene gwalansisi jamer fus, aam temawer Uwa Sanbagiriserem Jemna baabeta unggwandusa, tamtama jeiserem Jei gase golmisi angtane aa jei ge nwinbenerem kotana jeiserem jebe." ⁹ Raja-raja ogirip aaiserem maaryena jep aa jei ne gwebuwenaram, ini jemna saaser-saasersus galgala unggwanfer kotana jeiserem jebe. Nunggwana jame aa jep ne damtasaram kotana jeiserem jame aa jep dasaram tokwame, jei unggwanfer ga aa ge syebisi. ¹⁰ Jei bijauwer ge fibisi, aam temawer jei ga jam ge erebisi jei galap sege taabili tokwame. Jei ga enggam ge gubisi, "Nesik, kapka unggwandusa gasa etamwemisi kotana unggwan-giri aaiserem jebe! Kotana Babel baabetabara! Jema daamfenna tefner Uwa Sanbagiri aamei tamtamtalaiserem is mes golmini." ¹¹ Angtane doif unggwanfer aa jei ge terelbuwenaram ogiribe, jei kotana jeiserem jem temawer unggwanfer ne syemuwesa, aam temawer galgala jemna unggwanfer jeiserem angtane afa fas jigala jemna gamjon jei ne armanulmife. ¹² Galgala seyafter aas galserem gamjon angtane afa fas jam ne armantabaipmiyen: emas, perak, tuna mahalsusu, ane mutyara. Jei kaina sinsini irif-irifi, kain anggur numu galserem, kain berbersusu, ane kain sutera jes mese jam ne armantababiyen. Ane tini mahalsusu, jigal-jigala jewer aa jes ne kwirtabaabuwenaram tini mahalaiserem, ane gaja ol mese, tembaga, besi, ane pualam jes mese jam ne armantababiyen. ¹³ Ane angtane galgala aaiserem jam ne armantabaipmiyen: jigal-jigala asna waakenaiserem angtane jes gane tumilirim, afa jigal-jigala ninsini waakena je aa galap ne dowolaram. Ane jei jam ne armantabaipmiyen fo anggur, minyak, tepung, ane gandum. Ane jei galgala aaiserem jam ne armantabaipmiyen: sapini yo dombana, ane kudana yo keretana aa jes gane dekolaram. Ane jei jam ne armantababiyen angtane aa jes gane jualtanaram angtane nafsife awelna jei gam gwebife jes mese. ¹⁴ Angtane doif unggwanfer aa jei ge terelbuwenaram, jei angtane kota Babel jeiserem ga sene balbabisi enggame, "Jigala seyafter aamei ijesa balbabilirim jam damtabife jei fas, bar. Galgala imna mahalaiserem ane jigala ijesa balbabilirim, seyafter tatait, aamei gamjon ijama damtabiyen." ¹⁵ Angtane doif unggwanfer aa jei ge terelbuwenaram, jei galgala unggwanfer mes ne jualtababili kotana jeiserem jebe, jemna galgala unggwanfersus. Jei bijauwener sege fibisi, aam temawer jei jam sege erebisi jei galap sege taabisi tokwame. Jei unggwanfer sege syebuwesa, ¹⁶ ane ga sege gwarenbisi, "Nesik, kapka unggwandusa gasa etamwemisi kotana unggwan-giri aaiserem jebe! Angtane jepmana jei gwanan fen waakensus mes ne kabwabilint numu sinsini, numu anggur galserem, yo berbersusu, ane mes ne bunulwili jigala emasawer aa jes ne eyebaabilirim, ane tuna mahalsusu, ane mutyara mese! ¹⁷ Jengga jema daamfenna, jemna galgala seyafter jes gemerserem ga jem ge asobili!" Angtane seyafter sanbakef aa jei naawenaram atdusabe, ane angtane jep juwiliserem, ane angtane atdusap awelna aa jei ne gwebuwenaram, ane angtane nafsi pelabuhanabe awelna aa jei ne gwebilirim, jei seyafter ga bijaunefener sege fibisi. ¹⁸ Jei nunggwana jam aa jep ne damtanaram, tokwa nunggwan aa jei miltenaram kotana jeiserem jebe, jei enggam ga sege gubisi, "Kotana nensa enggalaiserem afa fas jam nulayan, kotana unggwan-giri aas galserem galgala uskambar!" ¹⁹ Jei ga sona jelem dukap ga sene tutubaabunsosa enggalfe, jeime gam gwerauwulmif ini jemna jam ge jenbamini. Ane jei ga sege syebisi, ane ga sege gwarenbuwesa enggame, "Nesik, kapka unggwandusa gase etamwemisi kotana unggwan-giri aaiserem jebe! Kotana aaiserem angtane uskambar doini unggwanfer jei ne damtana, ane jega jem temawer aimba gamam angtane galgalabaram. Jengga jema daamfenna, nemna galgala seyafter gemerserem ga aa ge asobili." ²⁰ Ane malaikata ga enggam gunu: "Aamei ijeya nwinirim taman waaken-giribe, ini imna ise saaser-saaserfer sege folbamini, aam temawer kotana jeiserem mes taasini tokwame! Wa, angtane Uwa Sanbagirmana, rasul-rasulu ane nabi-nabi, ini imna ga ise saaser-saasersusfer sege folbamini! Uwa Sanbagiri Jei angtane kotana jepmana mes tamtamsona fwayenfe, aam temawer jei kapka ibe is jewer eyeipminirim." ²¹ Jewer ga malaikata baabetabara, jei tuna unggwan-girsusu ga gaartena, ane jei finip ga aa firtaaniwili. Jei enggam ga gutena, "Kota Babel unggwan-girsususerem ba enggam sene etamwesa, aas gemerserem, tuna unggwan-girsusu fonabe gam firtaaniwilim gamserem, jepga jei gamjon jam ne domsoyan, tatarmer jamer bar! ²² Kotana jeiserem jebe angtane gamjon jam ne sarbabiyen gitar tisa, tutubarat tisa, ane trompet tisa. Ane angtane gamjon jam ne damtabiyen awelna jebe aa jei ne gwebuwenaram. Ane joka taasa jem gane wilnirim jem tisna jam ne sarmiyen. ²³ Angtane gamjon lampu nafa jam ne domsoyan kotana jeiserem jebe. Angtane gamjon masara jam ne eyebiyen, masara wi anggwa jena jem gangge tetfe. Angtane ilemanaiserem doif unggwanfer aa jei ge terelbuwenantam, angtane jeiserem jeiba angtane sanbaksam ogiribe. Ane angtane kota jeiserem jep aa jei ge nwinbenerem, jei angtane ogirip seyafter gemerserem ga mes ne afaftababili enggalfe galgal ne tebabif, ane mes ne afaftababili enggame Uwa Sanbagiri jam ne tebayan. ²⁴ Seyafter jeiserem se etamwesa, aam temawer angtane kotana Babel aa jei ge nwinbenerem jei nabi-nabi ane angtane Uwa Sanbagirmana ga jei ne munbobili, ane angtane uskambar aa jes ne munbobilirim ogiri aaiserem jebe, aawisi jeman mesna ba jebam."

¹ Jes jepserem taban, ai taterisi unggwanfersus ga ai sarbili, angtane unggwanfersus taman waaken-giriwer enggam aa jei ge gubitenaram: "Uwa Sanbagiri sa pujite! Uwa Sanbagiri nes Jei waakentababisinirim, Jei nafa uskambar, baabeta Jemna unggwandusa! ² Tamtamtala Jei aa jes golminirim jeba bunaram ane ga waakena. Uwa Sanbagiri Jei angtane kota girip jep aa jei ge nwinbenerem, Jei jebe tamtamtala mesam golmini. Kota giri jeiserem ga wini maaryen-maaryenaiserem jes galserem. Uwa Sanbagiri Jei tamtamtala jebe mesam golbili, aam temawer jei ogiri aaiserem mes kabwaktana maaryena aa jes gwebuwenaram jeme. Uwa Sanbagiri Jei tamtamtala mes golbili wini jeiserem jebe, aam temawer jei angtane awelna Uwa Sanbagirmana aa jei ne gwebilirim, jei angtane jeiserem mesam munbobili." ³ Ane angtane unggwanfersus jeiserem gamjon enggam ga aa ge gubitena ol dagame: "Uwa Sanbagiri sa pujite! Kota giri jeiserem aa je taasinirim, nunggwana jewer aa jei ne tawenaram jeber-jeber jam ne tikweyan!" ⁴ Angtane sanbak dua pulu empat jeiserem, ane malaikata nawer-naura galserem igsusu jeiserem, jei ga aa ge nwinbitena somwan dumeme, ane Uwa Sanbagiri gane pujitene, Uwa Sanbagiri aa jei nontenaram taman nwini sanbagiri jem sagabe. Jei enggam ga aa ge gubitena: "Ngga, jeiserem ba bunaram, Uwa Sanbagiri sa pujite!" ⁵ Ane jepga taman nwini sanbagiri jemniwer tateris ga ai sarbili, enggame aa jei gutenaram: "Uwa Sanbagiri nemna sa pujite, aamei seyafter awelna Uwa Sanbagirmana ijeya gwebilirim, ane angtane seyafter gemerserem sanbagiri ane bastantouya, nei Uwa Sanbagiri ga Jes neya erebene." ⁶ Jepga ai taterisi gamjon ga ai sara, taterisi angtane uskambar ga gangge nasbawet jes galserem, afa mur tere jes galserem, afa iris tere unggwanfer gamserem. Jepga ai sarbabili jei ga enggam ge gubitena: "Uwa Sanbagiri sa pujite, aam temawer Tuhan nemna Jeiba Uwa Sanbagirem, ane baabeta Jemna ga unggwandwasusu. Jei namwer Sanbakfe Jei gwena! ⁷ Au, neime ini nemna nese saaser-saaserfersusu sege folbamini, ane Jei sa pujite aam temawer baabeta Jemna unggwandusa. Nunu aaiserem je nunu Domba Tane wini jem golf, ane wini jeiserem jena mes menetulsini jam golfe. ⁸ Uwa Sanbagiri Jei fene irif-irifi sinsinsusu mes kitulbili wini jeiserem jebe enggalfe jei gam kabwabife." (Fene irif-irifi sinsinsusu jeiserem ga aas awelna waakena angtane Uwa Sanbagirmana aa jes ne eyebuwenaram.) ⁹ Jepga malaikata jeiserem jei ga as bala, "Taterisi aaiserem jas tulistaabi: Ini imna is waakenfer sege folbamini aamei ijes jenbebilirim, masara Domba Tane wini jem golfe jepserem." Malaikata jeiserem gamjon ga nasowena, "Taterisi aaiserem Uwa Sanbagirminiwer jeba bunaram." ¹⁰ Jepga malaikata jeiserem jem tarnabe ga ai nwintena somwan dumeme jei ajam sembatafe, jengga jei ga as enggam bala, "Safnant ai as ijam sembatayan! Ai as ijam sembatayan, aam temawer ai, aamei, ane angtane seyafter Yesus aa jei ne tebanaram, nei angtane nafisfe nemsa towasulmini enggame, Yesus Jeiba nem Tuhansam. Nei awelna Uwa Sanbagirmanaiserem seyafter ga nejesa gweyibene, nei Uwa Sanbagiri tefner ganma sembata!" Jei ga jes gamserem gam ga gunu, aam temawer taterisi nabi-nabi aa jes ne nasbabilirim, taterisi jeiserem jeba gemeram taterisi Yesus aa gemer towas-towastababilirim. ¹¹ Jepga ai anggaswena, taman waaken-girip jep ga ai domsona, kudana sinsini ga jep fina, ane Angtane kuda sagap ga jep nontena. Angtane enggam ge gubili Jem temawer, "Jei jeber-jeber ba bunarsusferam nasouna, ane Jei aa jes bilirim jam eyebife jeiserem Jei gam eyebuwena." Jei bunarsusfer balbabili afa angtane waakena afa kapka, ane Jei bunarsusfer ge erabana ginanggwa Jemna jebar. ¹² Nwena Jemna ga jam ne bwerebawena tokwana gamserem, ane Jem dukap nabalsir unggwanfer rajamana jes galserem ge falibaannu. Ane bosna ga jeleminip tulisulu, ane bosna jeiserem ga jenfentowai towaswebili. ¹³ Fene Jei aa jes kamwinirim je ga mesam dumunsotena aawisibe, ane bosna Jemna ba "Taterisi Uwa Sanbagirmanaiserem." ¹⁴ Ginanggwana unggwanfer taman waaken-girmana jei Angtane jeiserem ne tikwebaatini. Ginanggwana unggwanfer jeiserem ga kudana sinsini jem ge sofobili, ane fene irif-irifi sinsinsusu ga jes ne kabwabili, oltunuboryan. ¹⁵ Ane Angtane bosna Taterisi Uwa Sanbagirmana Jem aaremawer ga nombeya binbinsususerem ga jes ergetababisini. Ane negara-negara Jei baif ne gwebili Jam onsobafe, Jei negara jeiserem ga jem se targabaabinenne nombeya jeiserem jeme. Jei kakalmer Sanbakfe ga Jei se nwini, ane Jei besi dumu se tebasini. Ane Jei kakala Uwa Sanbagirmanaiserem gase destaipmini. Uwa Sanbagiri baabeta Jemna unggwandwasusu. Jei ginanggwana Uwa Sanbagirmana seyafter gemerserem se jubobinenne, angtane anggur tane jam jubobinenele gamserem. ¹⁶ Fene Jemnaiserem ane Jelem gumap bose-bosna aaiserem ga jes tulistaabili: Jeiba Sanbaka rajamanam raja seyafter gemerserem, ane Jeiba Tuhansam tuhan seyafter gemerserem. ¹⁷ Jepga malaikata aasaje ga ai damtana, jei gwer tarnap fina. Jei junu ol dagame ga aa balbabili junu seyafter aa jei ge ifubinennerem, "Au, aamei seyafter aaf isa betwena jam twenf masara unggwandusa Uwa Sanbagiri aa jes eyebilirim! ¹⁸ Au, angtane nini seyafter gasa tombaabi angtane aas galserem: rajam nini, ginanggwana sanbakaiserem jem nini, ginanggwana afwer jeiserem jem nini, angtane kudam aa jei ge sofobilirim jem nini, ane kuda nin mese. Ane gasa tombaabi angtane aa jei armantanaram angtane nafsiminiwer jem nini, ane angtane jam armantayanaiserem jem nini, angtane sanbaka, ane bastantouya nini jeman mesna!" ¹⁹ Jepga twen kakala galserem ane raja-raja ogirip aaiserem ga ai damtabili. Jei ginanggwana jemnaiserem jebaner ge betwebili enggalfe, Angtane kuda sinsini sagap aa jei nontenaram ane ginanggwana Jemnaiserem Jebar gam ge erabaf. ²⁰ Jengga twen kakala jeiserem jei ga nabi ol kapkaiserem jebaner ga aane taamini. Nabi ol kapkaiserem jei gwanan bwembwema twena kakala galserem jem tarnabe gam eyebili. Angtane bwembwema jeiserem jame aa galap ne domolaram, ga jam afaftababili, ane jei twen kakala jeiserem jeter ga aane onsobana. Twen kakala jeiserem jei tandana jemna mes kitulmini angtanefe, ane angtane jei ga patunga jemna ga jes ne sembawulwena. Jepga twen kakala jeiserem ane jem nabi ol kapkaiserem, jei ga nawersamer nwinsansamer ga aane firsoniwili tokwagiribe, tokwana aa jei ne ertewenaram belerangabaner. ²¹ Ane Angtane aa jei nontenaram kuda sagabe, Jei ginanggwana kakala seyafter gemerserem ga munbobili nombeya aaremap aa jes ergewulsinirim jeme. Ane junu seyafter gemerserem ga aa ge forobitye, ginanggwana jeiserem jem nini ga aane tombaabili jamere unu aa ge folbamini.

¹ Jeiserem taban, malaikata aasaje ga ai damtana, jei taman waaken-giriwer iretya. Jem tafnap jei kuncini O Mwona girsusumanaiserem ga jei taamisini, ane rantai ga unggwansusu jes mese. ² Jei bwildusa ga aa tamaltena, bwildusa jeiserem fwatermanam. Bwildusa jeiserem ba bawasam, afa setan. Jeiba bwata kapka seyafter gemerserem jem sanbakam. Ane malaikata jeiserem jei bwildusa jeiserem ga aa fwirna abakfer ga tahunu seribu. ³ Jepga malaikata jeiserem jei bwildusa ga tobolstena O Mwona girsususerem jebe. Ane jei O Mwona girsusu jeiserem ga motolsini, ane diri ga tosobili jega gamjon jam terewulsiyen. Malaikata ga jes eyebili, jega bwildusa jeiserem angtane aa jei ge nwinbenerem negara seyafter gemerserem jebe gamjon jam afaf-afaftababiyen, abakfer ga tahunu seribu. Seribu tahunu jeiserem aa jep barwenaram, bwildusa jeiserem ga sene aafulnsu nunu abakferyan. ⁴ Ane jepga taman nwini angtane sanbakmana ga ai damtabili, ane ai gamjon angtane sanbaka ajes damtabili, jei taman nwin sagap jep ge nonbaantena. Uwa Sanbagiri Jei baabeta jep golmini enggalfe, jei angtane ga sene teneba-tenebaabuwesa. Jei angtane kapka ga sene tamtamtababisi, ane angtane waakena jei fwaina waakenater sene golmisi. Jepga angtane fwater munbobiliserem duka jemna gane targabaipmitena, gamjon jem uwuwuserem ga ai damtabili. Jei ga aam temawer ne munbobilint jei angtane nafisfe mes ne towasulmini enggame Yesus Jeiba jem Tuhansam, ane jei taterisi Uwa Sanbagirmanaiserem jes mese jes ne nasbinennent. Angtane jeiserem jei twen kakala galserem jam ne sembawulyon, ane patunga jemna fas jam ne sembawulyon. Jei tandana twen kakalmana jeiserem mirip afa tafnap fas jei jam ne taabiyen. Jei mes irtebaabili terewer, gamjon ga waakenfer ga aa naawena, ane jei Kristusfar rajaf ga jes sege nwinbese Kristusfar jamere tahunu abakfer ga seribu. ⁵ Angtane jeiserem jeiba angtane nabal danalaiserem aa jes irtebaabiliserem terewer. (Jengga angtane afwer tereserem jei fas jam irtebaabiyen terewer jamere tahunu seribu jeiserem bar.) ⁶ Angtane futunu terewer nabala aa jei ge irwebilirim, angtane jeiserem jei ini waakenfersus sege folbamini, ane ini jemna tabala. Jei jam ne tamtamtababiyen tere gamjon naurabaraiserem. Jeiba safna angtane Uwa Sanbagiri ane Kristus aa jei ne pujisowenaram, ane Jei aa gangge gunurum jeiserem ga aane eyebili. Ane jei Kristusfar rajafe ga sege nwinbene jamere tahunu abakfer ga seribu. ⁷ Tahunu seribu jeiserem aa jep barwenaram, bawasa ga sene aftannu tampata jam fwirela jepserem jewer. ⁸ Ane jei enggalf gase totintye angtane gase afaf-afaftababili, angtane aa jei ge nwinbenerem negara-negara seyafter gemerserem ogiribe, enggalaiserem Gog ane Magog. Bawasa jei negara seyafter jeiserem jes betbetulsif enggalfe gam ge erabaf Uwa Sanbagirfar. Jemna unggwanfer ga enggam, dwis bwenna finip gemerserem. ⁹ Jei ogiri seyafter gemerserem ga sege wofebili, ane jei tamna angtane Uwa Sanbagirmana ga sene gwanwemini. Tamna jeiserem ba kotana Uwa Sanbagiri aa jes nesiksonaram. Jengga tokwana winsiwer sene iritya, ane jei jep ga sege taabisini jamer fus. ¹⁰ Jepga bawas jei aa jei afaftababuwenaram fi tokwagiribe ga sene firtaaniwili. Fi tokwagiri jeiserem jeber-jeber ne ertesiwena, ane belerang ga jep taasini. Tokwana jeiserem twen kakala galserem ane nabi ol kapkaiserem gwanan ga jes ne firsoniwili jebe. Jes jepserem jei tamtamtala ga jep ge domolwena gwin, gwer, jamer abak-abaksus. ¹¹ Jeiserem taban, jepga ai anggana, taman nwini sinsini sanbagiri ga ai domola, Uwa Sanbagiri ga jem sagap nontena. Ogiri yo winsi ga sege asona Jemniwer, ane gamjon jam ge sokotiyen. ¹² Ane angtane futunuserem ga ai damtabili bastantouya ane sanbaka, jei seyafter ga taman nwini sanbagiri jeiserem ga jem tarnap ge fibili. Buku-bukunu jepga aane tertebaabisini. Ane bukunu nensaiserem jes ne terewulsini, bukunu angtane bosna aa jep tulistababilirim, angtane seyafter Uwa Sanbagirfar aa jei naawelaiserem. Seyafter angtane aa jes ne eyebuwenaram, seyafter jeiserem mes ne tulistaabili buku-bukunu jeiserem jebe. Angtane kapkaiserem aa jei gam eyebilirim jei gam tamtamtasa, ane angtane waakenaiserem aa jei gam eyebilirim jei fwaina waakenater gam domolsa. ¹³ Angtane jam altiliserem finibe gamjon gase wemtabitne, ane angtane seyafter jam tereserem ane angtane Taman Tereserem jes mese se wemtabitne. Ane angtane seyafter jep ge fibisi. Angtane kapkaiserem aa jei gam eyebilirim jepga se tamtamtasa, ane angtane waakenaiserem aa jei gam eyebilirim jei fwaina waakenater gase domolsa. ¹⁴ Jepga jam tere ane Taman Tereserem gase firsoniwisi fi tokwagiribe. Uwa Sanbagiri Jei angtane afa fi tokwagirip jam gam firtaanuwilirim, angtane jeiserem jei gamjon jewer gam terf, tere gamjon afelna galserem. ¹⁵ Bukunu bosna angtanemana aa jep tulistababilirim, bukunu angtane seyafter Uwa Sanbagirfar aa jei naawelaiserem, afa angtane bukunu jeiserem bosna jemna jam tulisulboyono, angtane jeiserem jei ga fi tokwanap ga sene firtaaniwisi.

¹ Ane jepga winsi ibirmiyo ane ogiri ibirmi ga ai domsona. Winsi gwananmanaiserem ane ogiri gwananmanaiserem je ga aa ge asona, ane fi mese je ga mes barwena. ² Ane kotana waakensususerem ga ai domola, kapkaiserem jep fas. Kotana jeiserem jeba Yerusalem ibirmiserem, kotana jeiserem taman waaken-giriwer aa jei ne iretyaram Uwa Sanbagirminiwer. Kotana jeiserem je ga fwater menetsosili, wi siwiri gamserem fene waakena fwater gam kamwini, jei jam menetwesini anggwana jemna jewer gam gaarfe. ³ Jepga tateris ga ai sarbili taman nwini sanbagiri jeiserem jewer ol dagame aa jei gutenaram, "Namwer Uwa Sanbagiri Jei angtanefar ge nwinbene. Bunar, Jei jebar sege nwinbene, ane jei ga Jem safanef sege nwinbene. Angtane jeiserem Uwa Sanbagirfar Jelefaner gase naawena, ane angtane jeiserem Uwa Sanbagiri tefner ga sene sembatawena. ⁴ Ogiri gwananmanaiserem je bar. Namwer aas jepserem jamer abak-abaksus, angtane ini jemna jam ge jenbamiyen, angtane jam ge syebiyen, angtane uskambar jam ge syebuweyan, angtane bwera-bwerna jam ne domolyan, ane angtane jam ge terbiyen." ⁵ Jei aa jei nontenaram taman nwini sanbagiriserem jebe, Jei ga aa gutena, "Seyafter gwanan jeiserem bar. Ai namwer seyafter ibirmiter As eyebaabili!" Ane Jei ga gamjon ai ga ase bala, "Taterisi aaiserem jas tulistaabi, aam temawer taterisi aaiserem jeba bunaram, ane angtane waakenfer ga jeter sene taabili." ⁶ Ane Jei ga aa gutena, "Maa, seyafter mes tabanswel, Ai seyafter ibirmiter As eyebaabili! Ai jamer tap, Amnibe dwona afa jam falbiyen. Ai gwananmana jamer tabanabo. Afa angtane fobotona jam gam folbanaram, jei fona Amnaiserem gam telbili. Fona Amna jeiserem ga is je gam gulbana waakenfer gwelaiserem jamer abak-abaksus, ane angtane gwela jeiserem jam ne armanulyon. ⁷ Angtane kanaufer Abar Ajei ge finaram, angtane jeiserem jei seyafter jeiserem Amniwer gase domola. Ane Ai ga jem Uwa Sanbagirfe ga As gwena, ane jei Am tanef gase gwena. ⁸ Jengga angtane kapka seyafter gemerserem jei fi tokwagiribe jeiserem jep sege nwinbene. Angtane jeiserem ga enggal mesna: angtane jam ge tikwebif Yesus jam onsobafe, aam temawer angtane nafsi jei Yesus onsobalaiserem jes munbobif; angtane Yesus jam tebayanaiserem; angtane jener eyebiliserem Uwa Sanbagiri aa jes bilirim jam eyebiyenfe; angtane, angtane nafsi aa jei ne munbobuwenaram; angtane maaryen gwebiliserem; angtane faatrews eyebiliserem; angtane patunga aa jei ne sembatababuwenaram; ane angtane seyafter ol kabwak nasbiliserem. Angtane seyafter jeiserem jei jep sege nwinbene, tamna aa jei ne dannaram tokwana ga ane belerangabara. Angtane jeiserem jei tere gamjon jewer ne domolf, tere gamjon afelna galserem." ⁹ Jes jepserem, malaikata tuju jei ga asayunu tuju aa jei erbilirim, jem igi ga kapkaiserem Uwa Sanbagirminiwer, malaikata daamfenna jemniwer jeiserem jei amnip ga fortya, ane ga as bala, "Au, ai ibe is agam destaibe wini siwiriserem, wini Domba Tane jeiserem Jei jes gulaiserem." ¹⁰ Ane Mafnana Uwa Sanbagirmana ga as tebana, ane malaikata jeiserem jei ga as aftayafena taarena tagarsususerem jem bolabe. Jei kota Yerusalem, kotana waakena jeiserem abe ga as jes destayimbene, kotana jeiserem taman waaken-giriwer aa jei ne iretyaram Uwa Sanbagirminiwer. ¹¹ Kotana jeiserem nafnafsusu, aam temawer nafa Uwa Sanbagirmana jemanmer folbana. Kotana jeiserem nafa teisyenem nulamini, tuna harganabara galserem bosna baiduri pandan, tabalbala ga enggala kacana galserem. ¹² Kotana jeiserem tonem jam isinmisnenelebe jamer durga, unggwan-giri ane tagarsusu. Mwa kautela jemna dua belas, ane malaikata dua belas, ga jep ge fibili. Ane mwa kautela seyafter jes gemerserem anggwabura dua belas asal-asala Israelmana bose-bosna jemna ga jep ne tulistabaipminenne. ¹³ Mwa kautela seyafter aa gemer ge etbilirim, nawer-ningna gwer anggasyelawer, nawer-ningna gwer anggasyela gwejawer, nawer-ningna gwer anggasyela taasfolawer, ane nawer-ningna gwer kawetenalawer. ¹⁴ Tonem jam isinmisnenelebe kotana jeiserem, tuna gwansusube unggwanfer ga enggammer dua belas enggalfe jem kanaufer gane fyaf. Ane tuna dua belas jeiserem jem sagabe, rasulu dua belas Domba Tanemana jeiserem jemna bosna ga jep ne tulistabaipmini. ¹⁵ Malaikata ai aa jebar ge nasowenaram, malaikata jeiserem jei dumu emas jes tebasini gam mwongmisif. Jei kotana jeiserem jem ga mwongsof, ane mwa kautela mese, ane tuna jam isinmisneneleiserem jes mese jem gam mwongtabaabif. ¹⁶ Kotana jeiserem jei ga enggam nulna, jemna bwalna yo ane fenfenewer jei ga mwongga nawersamer nulamini. Malaikata jeiserem jei kotana ga jem mwongtena, jem mwong dumem: jemna bwalna ga 2.400 kilometer, ane jemna fenfene ga 2.400 kilometer, ane jemna tagara jemba gemeram 2.400 kilometer. ¹⁷ Malaikata jeiserem jei tuna jam aa galap mwongminirim, tuna jam isinmisnenele kotana jeiserem, jei enggam ga aa gutena, jemna tagarawer ga enggam enam pulu meter. Mwongga malaikata aa jes gwirnirim, mwongga jeiserem neime ne jeterma gwirni. ¹⁸ Tuna kotana aa jem ne isinmisnennerem, tuna jeiserem ga tuna baiduri pandanserem jem ne eyemini, ane kotana jeiserem ga emasa igsusu ga jem ne eyemini, numu tabalawer ga enggam kacana galserem. ¹⁹ Tuna kotana jeiserem aa jem kanaufer nulnaram, jei tuna harganabara numu nenes-nensa ga jep ne batababinenne. Tuna nabal-nabalsususerem gwonawer jeiserem jeba baiduri pandan, numu ti alna ikikini galserem, ane jem tabanap ga tuna nilam, numu ibam-ibama, ane jem tabanap tuna yakut, numu mombama galserem, ane jem tabanap tuna samrut, numu ti alna ikikini galserem, ²⁰ ane jem tabanap tuna baiduri sepa, numu jam boromdom tabala berbere ane sinsini, ane jem tabanap tuna delima, numu berbersusu, ane jem tabanap tuna ratna sempaka, numu bwelkat-bwelkata galserem, ane jem tabanap tuna pirus, numu ti alna ikikini galserem, ane jem tabanap tuna topas, numu bwelkat-bwelkata galserem, ane jem tabanap tuna krisopras, numu ti alna ikikini galserem, ane jem tabanap tuna laswardi, numu ibam-ibama, ane jem tabanap tuna kecubung, numu berbere galserem. ²¹ Mwa kautela dua belas jeiserem jeba dua belas mutyarasam, mwona seyafter gemerserem daamfen-daamfenneme mutyarna daamfenna ga jem gane eyebana. Kotana jeiserem nele jemna emas igsususerem ga jeman ne eyebaabili, jem tabalawer ga enggam kacana gamserem. ²² Ai Jena Uwa Sanbagirmana kotana jeiserem jebe ajam domolbayan, aam temawer Tuhan nemna, Jeiba Uwa Sanbagirem, ane baabeta Jemna unggwandwasusu, ane Jem Domba Tane mese Jes ne sembasona tampata seyafter kotana jeiserem jebe. ²³ Kotana jeiserem gwer naf ane muar naf jebe fas, aam temawer nafa seyafter Uwa Sanbagiriserem Jemanmer folbana, ane Domba Tane jeiserem lampuf ga jes. ²⁴ Anggwabura ogirip aaiserem jei ga jem nafap sege wofebisi, ane raja-raja ogirip aaiserem jep ga enggam sege gubisi, "Gwanan angtane seyafter jei ga ase enggam ne balbabilint, aiba raja sanbak-sanbakam. Jengga namwer ai enggam aya gunu, ’Aameiba Sanbagirem’." ²⁵ Mwa kautela kotana jeiserem jebe, mwona jeiserem nunu jeber-jeber jam tertebaabisilisemer sege jerwebisi. Jei jam ne matabaabisiyen gwinem kotana nafsi gwanan gamserem, aam temawer jebe gwini fas. ²⁶ Angtane aa ge jalbilirim negara unggwanfer jewer ga enggam sege gubisi, "Gwanan angtane jei ga ase enggam ne balbabilint, aiba sanbak-sanbaksam. Jengga namwer ai enggam aya gunu, Aameiba Sanbagirem." ²⁷ Kapkabaraiserem fas kotana jeiserem jep jam ge kabwiteyan, ane angtane kabwaks eyebiliserem, ane angtane ula kabwaks nasbiliserem jei mese jei jam ge kabwiteyan kotana jeiserem jebe. Jengga angtane bosna aa jeman gane tulistabaipminirim bukunu Domba Tanemana, bukunu angtane bosna aa jep tulistababilirim, angtane seyafter Uwa Sanbagirfar aa jei naawelaiserem, angtane jeiserem ga jenefener sege kabwitesa.

¹ Malaikata jeiserem jei ga fona abe ga ase destaibene, ane fona jeiserem ga angtanef gam gulbana waakenfer gwelaiserem jamer abak-abaksus. Fona jeiserem ga tabalbalsusu kacana galserem, ane fona jeiserem taman nwini sanbagiriserem Uwa Sanbagirmana ane Domba Tanemanaiserem ga jewer sutya. ² Ane kotana jeiserem jebe, fona jeiserem ga jem nenennaber tityetya. Fona jeiserem jem binfip jimwer ane aamwer tini aasa jep fina, ane igi jemna jam gam tenaram tahunu daamfenna muara jeber-jeber, jamere unggwanfer ga dua belas. Angtane titantan aa jei gane tombaabilirim, jei abak-abaksus jam gwelabe. Tini jeiserem jem alnaiserem anggwabura ogirip jem gam waakentababif bwera-bwernawer. ³ Kotana jeiserem jebe fasfasusu Uwa Sanbagiri enggam aa jes bilirim, je kapka. Taman nwini sanbagiriserem Uwa Sanbagirmana ane Domba Tanemana jeiserem kotana jeiserem ga jep nulna, ane safna Jemna ga sene pujitese. ⁴ Ane jei mirmase Jemna ga sene damtaibese, ane bosna Jemna sene tulistababisi jelem miribe. ⁵ Jebe gwini fas. Ane lampu naf ane gwer naf jei jam irfwebaabiyen, aam temawer angtane jei Tuhan nemna Uwa Sanbagiriserem Jem nafemfener sege nwinbese. Ane jei ga rajafe jei sege nwinbese jamer abak-abaksus. ⁶ Jepga malaikata jeiserem ga ase bala, "Taterisi aaiserem ba bunaram, ane angtane waakenfer ga jeter sene taabili. Ane Tuhan Jeiba Uwa Sanbagirsam, ane Jei Mafnana Jelemana nabi-nabif golmini. Ane Jei malaikata Jemna mes baftannu enggalfe, angtane awelna Uwa Sanbagirmana aa jei ne gwebilirim jei jep gangge saamisif galap aa je ge etamwebiliserem." ⁷ Jepga Yesus enggam ga gutena, "Aaiserem ga jam isa sarbisini! Ai abakferyan As fortya. Taterisi jam etamweyanaiserem bukunu aaiserem jep aa jes tulistaabilirim jebe, angtane taterisi jeiserem aa jei ne sarbilirim, ane jeter ga sene eyebili, angtane jeiserem ini jemna waakenfersus sege folbamini." ⁸ Aiba Yohanesam. Ai ames sara ane ai ames damtana, seyafter Uwa Sanbagiri as mes ge sabasini. Jeiserem ai sarbisini ane ai gerabili taban, malaikata jeiserem jei seyafter abe as mes ge saayibesnenne, ai malaikata jeiserem jem tarnap ga ai nwintena somwan dumeme, ai safe jei ajam sembataf. ⁹ Jengga jei ai ase enggam bala, "Safnant, aamei ai as ijam sembatayan, aam temawer ai, ane aamei, ane im afelen mesna jeiba nabisam, ane angtane seyafter taterisi aa jei ne sarbilirim bukunu aaiserem jebe, ane ga jeter sene eyebili, nei seyafter daamfenna. Nei seyafter awelna Uwa Sanbagirmanaiserem nejesa gwebili. Nei Uwa Sanbagiri tefner ganma sembata!" ¹⁰ Ane jei gamjon ga as bala, "Taterisi Uwa Sanbagirmanaiserem gwanan jam etamweyanaiserem bukunu aaiserem jep aa jes tulistaabilirim jebe, ijam syawulsiyen, aam temawer jemna nunu jam gwetmanswena jeiserem seyafter jewer ge etamwebife. ¹¹ Nunu gamjon fas angtane kapka gwela jem waakenulsife. Angtane kakala aaiserem saf se gwena kakalmer, angtane etam-etamabara saf se gwena etam-etamabarfe. Ane angtane waakena aaiserem saf se gwena waakenmer, ane angtane aa jei gam eyebilirim Uwa Sanbagiri aa gam ga gunurum, jei saf se gwena jes gam eyebili Uwa Sanbagiri aa gemer gam gunurum." ¹² Yesus enggam ga gutena, "Aaiserem ga jam isa sarbili! Nunu abakefyan, Ai gamjon ga Ase fortya. Ai fwaina As gwirinmifeltye angtane waakenfer gwelaiserem jebe. Ane angtane seyafter awelna aa jei ne gwebilirim jem fwaina ga As syenulmini. ¹³ Ai jamer tap, Amnibe dwona afa jam falbiyen. Aiba Nabal danalaiserem, ane Umwefaiserem. Ai gwananmana jamer tabanabo. ¹⁴ Angtane fene aa jei ne wirtabaabilirim jamer sinsinsus, ini jemna waakenfer ge folbamini. Jei titantan tini jeiserem ga jei sene tombaabili, ane jei abak-abaksusfer ga jei se naawesa, ane kotana jeiserem jep ga jei sege kabwitena mwonawer. ¹⁵ Jengga angtane kotana jeiserem jem eyewer aa jei ge nwinbenerem, angtane jeiserem ga enggala: angtane jener ne eyebiliserem Uwa Sanbagiri aa jes bilirim jam eyebiyenfe; angtane faatrews aa jei ne eyebiliserem; angtane maaryen aa jei ne gwebiliserem; angtane, angtane nafsi aa jei munbobuwenaram; angtane patunga aa jei ne sembatababuwenaram; ane angtane ol kabwak aa jei ne nasbiliserem ane kapkaiserem aa jei ne eyebilirim." ¹⁶ Jepga Yesus ga ams bala, "Aiba Yesusam. Ai malaikata Amna is Amesam baftamitne ibe, jega taterisi aaiserem Uwa Sanbagirminiwer safna Ai As jei ne tebanaram seyafter is gam nasbaipmif. Aiba Daudtem asal-asalam. Aiba torbwana nafabaram aa jei jersyetyaram gwinibener." ¹⁷ Mafnana Uwa Sanbagirmana, ane wi siwiri Domba Tane aa jes gularam, jei ga aa ge gutena, "Au!" Ane angtane seyafter gemerserem tateris aaiserem aa jei ne sarbilirim, jeme gemer sege gubitena, "Au!" Angtane fobotona aa jei gam folbanaram, jei ga saf se fortya. Ane angtane jelem inip aa jei gam gunurum, jei fona jeiserem jam telbife doiyamer, fona waakenfer jem gwelaiserem jamer abak-abaksus angtanef aa jei gam gulbanaram, angtane jes mese saf se fortya. ¹⁸ Ai Yohanesam, ai isa ititmer balbabili, taterisi gwanan jam etamweyanaiserem bukunu aaiserem jep ai ajes tulistaabilirim jebe, aamei seyafter taterisi jeiserem is jei ne saripminirim: angtane afa jei taterisi gwanan jam etamweyanaiserem jener gam tulistaabili nafismer taterisi bukunu aaiserem jemniwer, ane afa jei enggam gam gunurum taterisi jes mese jeimba taterisi Uwa Sanbagirmana, gam jega Uwa Sanbagiri Jei angtane jeiserem jep gam daranulbaasini tamtamtala Jemnaiserem jeme. ¹⁹ Afa angtane enggam gam gunurum, "Taterisi gwanan jam etamweyanaiserem bukunu aaiserem jep ai ajes tulistaabilirim jebe, taterisi jeiserem jeba bunaryan.", afa angtane game aa jei gam gunurum, gam jega Uwa Sanbagiri Jei titantan jemna gamjon se golsiwili. Tini tannabara jeiserem afa angtane aa jei ne tombaabilirim, jei abak-abaksusfer gase naawesa. Ane angtane jeiserem kota waakena ai ajes tulisonantam bukunu aaiserem jebe, jei jep jam kauteyan. ²⁰ Yesus aa gam gunurum taterisi ai ajes tulistaabilirim jeba bunaram, Jei enggam ga gunu, "Bunar, Ai abakferyan As warautna." Ane nei ga nesa gutena, "Ngga, jeiserem ba bunaram. Tuhan Yesus, se forya!" ²¹ Ai Yohanes, ai sembayanga as gwebana enggame Tuhan Yesus Kristus Jei waakena Jelemanaiserem ip ise golmini angtane seyafter safna Uwa Sanbagirmana jebe. Amin.