Filipi
11 Ga ip, aamei angtane sanbaka jemata ijeya tebabilirim, ane angtane awelna Uwa Sanbagirmana aa jei gam batoibenerem jematabe jes mese, ane angtane Uwa Sanbagirmanaiserem seyafter gemerserem aa jei ge nwinbenerem, kota Filipi je. Aamei ga seyafter Kristus Yesusfar daamfennaber ima gwena. Surta aaiserem amniwer, Paulus, kota Roma je. Timotius jegme surta aaiserem ga ajebaner ge baafulu. Jei awelna Kristus Yesusmana gam eyeibene, ai gemerserem jeime gemer. 2 Ai sembayanga as ge gwebabana Uwa Sanbagirfe Uwa nemna, ane Tuhan Yesus Kristus mese, Jei waakena Jelemanaiserem ip is ga sege golmini, ane Jei ini imna is ga sege gwebaipmini waakenfer is ga sege folbamini. 3 Ai jeber-jeber ai ims sarbabistaabonwena, ai agam gunu alem Uwa Sanbagirminibe, "Ase samfer gulbana." 4 Ai sembayanga as gwebamuwena seyafter im temawer, ai sembayanga ini saaser-saaserfer agam gwebana. 5 Ai sembayanga ini saaser-saaserfer agam gwebana, aam temawer nunu Yesus ijema tebanaram, aamei ga ijema towaiwulu as imsa batobana, Taterisi Waakena jewer nasbinennefe Yesusem temawer. Ane aamei as imsa batobana jamer nunu namwer aaiserem. 6 Uwa Sanbagiri Jei mes towaiwulu waakenaiserem ga is eyeipmini ilem inibe, ane aamei ga imsa eyebili waakenaiserem. Ane ini amna saaser-saasera, aam temawer ai bunarsusfer amsam towaswena Uwa Sanbagiri Jei is jeter se eyeipmini waakenaiserem ilem inibe, jamer nunu Yesus Kristus aa Jem warausanaram ogiri aaiserem jebe, nunu jeiserem jeme aamei bunarsusfer ga jem isa waakenswesa. 7 Bunarsusfer ba ini amna jemba waakenam, aamei seyafter im temawer. Uwa Sanbagiri awelna Jemna ap mesam gulbana, ane Jemna waakenaiserem ap mesam gulbana, jega aga agam eyebili awelna Jemna jeiserem. Ane Uwa Sanbagiri Jemba waakenaiserem Jemna is mesam golmini ibe aamei seyafter gemerserem, jega aamei ga jeber-jeber as gam isa batobana, awelna Uwa Sanbagirmana jeiserem jep ganma eyebili. Gwanan nalef ajam tebayan, ane nalef as jam ne gaataanteyan bwiyibe, ai Taterisi Waakena bunarsusfer towas-towastababili, jega angtane ga sege towaswebili Taterisi Waakena jeiserem ba bunaram, ane ginggitfer ga sene taabili. Gwanan jepserem aamei ai as imsa batobana. Ane namwer aas jepserem, ai agemer nwinirim bwiyibe, ingba as imsama batobana. Aga isa jem temawer nesiktababili. 8 Ai seyafter aamei is ai nesiktababili uskambar, Yesus Kristus aamei seyafter is gemer nesiktababilirim. Uwa Sanbagiri Jei tousa jeiserem ba bunaram. 9 Ai sembayanga enggam ai gwebana im temawer: Namwer aas jepserem ina ga jam isa nesiksonanna bastowaifer, jengga ai sembayanga is ai gwebaminirim, galap aamei ina ga ima nesiksonanna uskambar. Ane ai sembayanga ai gwebana im temawer, aamei ga ima towaswena enggame aaiserem bunarsusfer ga fwersa. Ane aamei ga waakenfer isa sarbili waakenaiserem ga fwersa, ane kapkaiserem ga fwersa. 10 Jepga aamei gam isa towaswebili waakensusu ga fwersa aamei ijesa eyebiliserem, ane gwela imnaiserem ga is sege tabalswebamini, ane aamei etam-etama ijama gwebiyen, jamer nunu Kristus se warausana. 11 Ane ini amna unggwan-giri Yesus Kristus Jei baabeta ga is kitulmini ibe, jega seyafter aamei ijesa eyebilirim jei waakensusu. Jepga angtane gwela imna isene domolmini, jei ga bosna Uwa Sanbagirmana ga sene gulbatena, ane jei Uwa Sanbagiri ga sege pujitene, enggam gane gubili, "Uwa Sanbagiri Aameiba sanbagirsusum!" 12 Am afelen mesna, ai enggam ai gunu aamei seyafter gam isa towaswena, safe gam kapkaiserem jei ap mes etamwebanant, namwer aas jepserem angtane uskambar Taterisi Waakena Yesusem temawer ga aane taabili, gwanan gamserem gamyan. 13 Ginanggwana seyafter aa jep ge fibuwenaram kompleks Kaisarmanaiserem jebe, jei ga aa ge towaswebili enggame, ai bwiyip nwini aam temawer ai taterisi ajewer nasbinennerem Kristusem temawer. Ane angtane nensaiserem aaf aa jei ge nwinbenerem kota Roma je, jeime mesam ge towaswebili ai ajam ne tamtamtana enggalem temawer ai taterisi ajewer nasbinennerem Kristusem temawer. 14 Ane jeke jetefener, angtane unggwanfer Kristus aa jei ne tebanaram, jei mes ge anggabili fomfoma Uwa Sanbagiri Jei as batobana, ai gwanan bwiyip gemer agalap nunitonom. Jega jem temawer jemna ini mes kanautabaipmini, ane ga Taterisi Uwa Sanbagirmana uskambar ne nasbinenne baabetfer, gwanan jepserem jepyan. Ane jei angtane jeiserem jam ne erebaabiyen, angtane aa jei ne bilibenerem enggame, "Taterisi Uwa Sanbagirmana ijama towastababiyen." 15 - 16 Angtane afwenefener Kristus aa jei ne tebanaram, jei Taterisi Waakena Kristusem temawer ga aane nasbinenne, aam temawer jemna ini waakena, ane jei gam eyebif waakenaiserem. Jeiba ams ne nesiktene, ane jei ga aa ge towaswebili Uwa Sanbagiri amsam destabana, ai Taterisi Waakena jeiserem waakenfer towas-towastababili, jega angtane gangge towaswebife Taterisi Waakena jeiserem ba bunaram. Angtane nensaiserem Kristus aa jei ne tebanaram, jei Taterisi Waakena Kristusem temawer ga aane nasbinenne, aam temawer jemna ini mamar-mamara abe, ane jei abar ge doksobaf aarememfener. 17 Jei Taterisi Waakena Kristusem temawer ga aane nasbinenne, aam temawer jei jen jena gane detef. Ini jemna unggwan-giryen jei waakena jem ne eyebife. Jengga jewer ne eyebif, jega ai kabwaktala uskambar gam domolf, ai bwiyip agemer nwinirim. 18 Jengga ai isa ajam towastababili, aaiserem jei igyen, afa ini angtanemana unggwan-giri waakenaiserem jem eyebife, afa unggwan-giryen waakenaiserem jem eyebife. Igsusu ga enggam, Taterisi Waakena Kristusem temawer jes nasbinennef. Ane Taterisi Waakena Kristusem temawer aa galap ne nasbinennerem, ini amna saaser-saasera. Ane ini amna jeber-jeber ase folbafa saaser-saaserfer, 19 aam temawer ai bunarsusfer towaswena enggame seyafter amnibe aa je etamwenaram, umwef gase fala waakena abe. Seyafter jeiserem se waakenswena abe, aam temawer aamei sembayanga imsa gwebana am temawer, ane aam temawer Mafnana Uwa Sanbagirmana Yesus Kristus aa Jes baafulnorom, Jei as batobana. 20 Ini amna as uskambar folbana ga jewer ai awelnawer ajam elsnenne. Jengga namwer aas jepserem ai kanaufer nasowena Kristusem temawer, gwanan gemerserem ai jeber-jeber nasowena. Ini amna unggwan-giri seyafter ajes eyebilirim jeba waakenam, afa ai gemer agalap gwenaram, afa ajep tereserem. Ane ini amna as unggwan-girem folbana enggalem temawer, angtane aa jep ge sarbilirim ai ajes nasbilirim, ane jep ga sene domola ai ajes eyebilirim, jei ga sege gubifi, "Kristus Jeiba sanbagirsusum!" 21 Ai enggam ai gunu: ai ajep gwenaram, ai ga enggalf as gwena, Kristus tefner jewer gaartef. Ane ai ajep tereserem, jeiserem waakensusu abe. 22 Bunarsusfer, afa agemer gwelaye ogiri aaiserem jebe, aba gam eyeibene awelna Kristusmana, ane angtane unggwanfer Kristus ga sene tebafa. Jega jem temawer ai teisyena fwersaiserem ga jes as destabili--jam gwef, afa jam terf. 23 Ini amna as jei ge dektebene. Ini amna unggwan-giri jam terf, ga as sofwa Kristusfar ga as ge nwini. Jeiserem waakensusu abe. 24 Jengga aa ba igsusum ibe, ai aafer as gwena ogiri aaiserem jebe, ane ga isas batobaabili. 25 Ai emai towaswena jeba igim ibe ai aafer as gwena, jega jem temawer ai emai towaswena ai aafer as gwena, ane ai isas batobaabili aamei seyafter. Ai aamei isas batobaabili enggalfe, aamei taterisi bunarsusfer aaiserem Uwa Sanbagirmana ga isa taabifi ginggitfer, taterisi jeiserem ai isa ajesa towas-towasulmiwenaram. Ane aamei Taterisi Uwa Sanbagirmana ijewera taabilirim ginggitfer, ini imna saaser-saaserfer sege folbamini. 26 Ane ai as gwena, jega ai gamjon ajep warautnaram imnibe, ini imna saaser-saaserfer is ga sege folbamini, ane aamei ga Kristus Yesusfar daamfennaber imsa gwena. 27 Am afelen mesna, sa sarsi ai ibe ajes bilipminirim aas jepserem, jeiba igsusum. Angtane Kristusmana Taterisi Waakena aa jei ne taabilirim, ga enggam gas naawena, gwela waakenaiserem jem, jei waakena tefner jeber-jeber ga sene eyebuwena. Ai enggam ai gunu, aamei ga gam isa gwena! Jepga afa ai jam as fortyaram imnibe, afa fas, ai isas sarbabisnenne aamei seyafter Taterisi Waakena ga ginggitfer ima taabili, ane aamei kanaufer ga ima fina ini daamfennaber. Ane aamei seyafter awelna uskambarsus ga isa gwebili enggalfe aamei daamfennaber igama gunurum. Aamei daamfennaber jam igama gunurum enggalfe, aamei Taterisi Uwa Sanbagirmana bunarsusfer aaiserem nei nejesa taabilirim, taterisi jeiserem angtane nafsife ga isene towas-towasulmife. 28 Ane aamei ipsama ernerem angtane baif gwelaiserem aamei Taterisi Waakena ijama towas-towasulmife. Ai seyafter jeiserem ajes sarbabisnenef im temawer. Afa aamei kanaufera isa finaram, angtane baife aa jei naawenaram aamei ijama towas-towastababife, jei bunarsusfer ga sege towaswebili enggame jei ga sene tamtamtababisi, ane aamei ga isa waakenswesa. Uwa Sanbagiri seyafter jeiserem Jener gase eyebisi. 29 Kanaufer fyela, aam temawer Uwa Sanbagiri Jei waakena Jelemanaiserem is mes golmini ibe, jega aamei Kristus ga isa gaartena. Aamei Kristus igalaba tebanaram, aamei Jei ga ima gaartena. Ane aamei kabwaktala ijeba domolaram aam temawer aamei Kristus ijewera tebanaram, jeiserem jeme aamei ga Kristus ijama gaartena. 30 Aamei awelna uskambarsus ima gwebili Taterisi Waakena jeiserem jem temawer gam towas-towastababif, ane jega jem temawer aamei kabwaktala imsa domola, ai gamserem. Aamei fwater kabwaktala amna imsa domolsant, ane aas jepserem aamei imsa sarbili kabwaktala amnibe gemerje.
21 Am afelen mesna, aamei daamfennaber ima gwena Kristusfar, ane jega jem temawer aamei kanaufer ima gwena. Kristus Jei ims nesiktababili, ane jega jem temawer ini imna is mes kanautabaipmini. Mafnana Uwa Sanbagirmana Jei ibar, ane jega jem temawer aamei ina ga ima nesiksona, ane ina ga ima batomini. 2 Seyafter jeiserem jeiba bunaram. Ga jem temawer, isa gwena daamfen iniber. Ane aamei seyafter ina ga isa nesiksona. Afa aamei isa gwena seyafter gam ga, ini amna saaser-saasersusfer se folbana. 3 Ini imna jam unggwanswebayan waakenaiserem ilefener igama eyebilirim. Ane aamei ina ijama teteyan intowai. Jengga ini imna jam isa onabertabana, ane angtane nensa jes igama kitultena ileminibe. 4 Aamei igi ina igama gunurum, ga jetefener ijama gerabisiyen. Jengga igi angtane nafsi aa gemer gam gunurum, jes mese ga isa gerabisini. 5 Aas jepserem, ai isa jam towastababinenne, jeje fomfoma Kristus Yesus Jei Jener ini ga onabertanant, ane ga iretyant ogiri aaiserem jebe, ane Jei aaf gwenant. Sa sarbisi waakenfer taterisi aaiserem, ane ini imna ga jam isa onabertabana, ane ga isa gwena Yesus gamserem. Yesus Jeiba enggamam: 6 Bunarfersus ba Yesus Jei Uwa Sanbagirem. Safe gam, Yesus Jei enggam gunu Jelem inibe, "Ai jeber-jeber Sanbakfe Ajam nwinyen, Uwa Sanbagiri galserem." 7 Fas. Jeiba ini Jeneram onabertanant, ane Jei Jener aafulnunt gwela taman waaken-giriwer. Ane Jei aa iretyant ogiri aaiserem jebe, ane ga etamwenant angtanefe. Ane ga aa gwenant jes galserem angtane awelna angtanefe aa jei ne gweibenerem. 8 Angtane Yesus ne damtana, ane jei aa ge towaswebili, Jeiba bunarsusfer ba angtanesam. Ane Jei ini gamjon Jener onabertana, ane ga sara ane ga eyebili seyafter Uwa Sanbagiri aa jes bilibenerem, jamer aa tere ti salibibe. 9 Jega jem temawer, Uwa Sanbagiri ga Yesus aa gaartena, ane ga gulbana baabeta seyafter gemerserem, angtane seyafter gemerserem jem sagabe. 10 Uwa Sanbagiri ga Yesus gaartena enggalfe, angtane seyafter gemerserem, taman waaken-girip, ane ogiri aaiserem jep, ane ogir gwonap jeiserem, jei seyafter somwan dumem ga sege nwinbese Yesusem tarnabe, 11 ga aa ge gubili, "Ba bunaram, Yesus Kristus Jeiba Tuhansam." Ane jega jem temawer Uwa Sanbagiri, Uwa nemnaiserem, Jei ga sene gaartesa. 12 Am afelen mesna ai is ajes nesiktababilirim, galateram aamei as igemera sarbanaram gwanan ibar negalaba gwenantam, jes galserem aamei as uskambar sa sarbasi namwer aas jepserem ai imniwer jam ai bijausonaram. Ane ini unggwana jeme bosna Uwa Sanbagirmana ga isa gulbatena, Uwa Sanbagiri aamei is Jei waakentababisinirim. Ane ini onaberfer, ga jes isa eyebili Uwa Sanbagiri aa jes bilirim. 13 Ga jes gemerserem ga gemer isa eyebili, aam temawer Uwa Sanbagiri Jei Jener ini imna ise unggwantabaipmisini, jega aamei ga isa gunu, "Ai ajesa eyebif, Uwa Sanbagiri aa jes bilirim." Ane Uwa Sanbagiri Jener baabeta ise golmini ibe, jega aamei ga isa eyebili Jei aa jes bilirim. 14 Seyafter aamei ijesa eyebilirim, isa eyebili ini waakenmer. Ipsama gunurum, "Jeje bafa?" Ina ijama nasmineneyen ini kapkaiserem jeme. Ane inin ijama doksoyan. 15 Ga jes gemerserem ga gemer isa eyebili, jega angtane is jam ne balbabiyen aamei kapkaiserem ijesa eyebili, ane enggalfe aamei kabwakfer ijama gweyan, jengga aamei waakenfer isa gwena angtane Uwa Sanbagirmana gamserem. Aamei ogiri aaiserem jep ima gwena, angtane kabwaksususerem jem nenennabe; jei etam-etama jeber-jeber ne eyebuwena. Jei angtane gwinemana. Aamei igemera gwenaram ini waakena jeme jem nenennabe, ane waakenaiserem ima eyebili, 16 aamei Taterisi Waakena jei ima nasbinenne waakenfer gwelaiserem jamer abak-abaksus jem temawer. Ane aamei igalaba eyebilirim jeiserem, aamei ga galater mato nafa galserem. Matona ga nafa sege folbamini winis gwin-gwinibe. Ane aamei ga nafa Taterisi Waakena Uwa Sanbagirmanaiserem jes isa golmini jebe, jega jepga sege sarbili Taterisi Waakena jeiserem, ane jei ga sene onsobili. Afa aamei ga jes gamserem ga gam isa gwena, ini amna waakenfer se folbasa im temawer, nunu Kristus aa jem warausanaram. Ai awelna am gwebilint uskambar im nenennabe, jamer baabeta amna amkom saf as mes barwebanant. Ga jem temawer ini amna jei as waakenfer se folbasa, aam temawer gwela imna waakenfer jeiserem gas gweraulmini awelna uskambar amnaiserem jam elsiyen. 17 Angtane hukumu Nabi Musa aa jes tulistaabilim aa jei ne onsobilirim, ga aas galserem gala gane eyebili: Jei kambing ne munbobili, gane giranbaabisini enggalfe Uwa Sanbagiri gam pujitef. Jes gemerserem aaf jegme gemer: Aamei Yesus imsa tebana, ga imsa eyebili Uwa Sanbagiri aa jes bilirim, ga kabwaktala imsa domola. Seyafter jeiserem ga Uwa Sanbagiri gam pujitene. Ai teisyena afa angtane ai asene munbono aam temawer ai aamei isa jewer towas-towastababuwenaram Yesusem temawer, ane angtane nensaiserem jes mese. Afa angtane ai asene munbonorom jes mese jei Uwa Sanbagiri gam pujitene, ane amna ini ase saaser-saaserfer se folbana aam temawer aamei Yesus imsa tebana. 18 Ane jes gamserem aaiserem jegme gemer, aamei safe gam kabwaktala jam isa domola, imna ini ga ise saaser-saaserfer sege folbamini am temawer. 19 Tuhan Yesus afa enggam se gunurum, amna ini unggwan-giri ai Timotius babitsim imnip as baftana. Ai jei ajewer baftaf enggalfe, jei gam waraunaf taterisi im temawer amnip gam gwirinfelf, ane jega jem temawer ini amna saaser-saasera. 20 Ai Timotius enggalf ai destabana imnip gam sofwef, aam temawer jei bunarsusfer ims nesiktababili, ane ini Timotiusmana unggwan-giri ga enggalf ims batobaabif, ini amna galaterserem. Angtane nensaiserem aaf jeiserem abar, jemna ini gamyan. 21 Jei igi jena gam gunurum, ga jetefener ga gam gerebaabisini. Jei awelna Yesus Kristusmana jei jam gerabisneneyen. 22 Aamei imsa towaswenant Timotius jeiba angtane waakensusum. Jei abar awelna seyafter ge gwebili enggalfe Taterisi Waakenaiserem jes nasbinennef. Jei ams batobana tanna gamserem, tane jei jeta ga gam batobanaram. 23 Ga jem temawer ini amna unggwan-giri enggalfe ai Timotius imnip baftafe. Ai ajep towaswenaram ap je as bai se etamwebana, ai jei tatarfer as baftana imnibe. 24 Ane ai enggam ai gunu, Tuhan Jei nele abe as dwotabana, jega ai abakferyan gam as warauwa imnibe. 25 Ai enggam ai gunu, ai namwer aas jepserem Epafroditus nelem afelna, as baftana se warauwa imnibe. Gwanan aamei Epafroditus imsa baftanant enggalfe am batobaf. Jei waakenfer as mesam batobanant. Angtane nensaiserem jei baif naawena Taterisi Waakena nejama nasbinennefe. Jengga safe gam, Epafroditus jei abar awelna uskambar ai ge gwebili enggalfe Taterisi Waakenaiserem jei jewer nasbinennef Yesusem temawer. 26 Ai Epafroditus as baftana imnibe, aam temawer jei ini jemna unggwan-giri enggalfe ibar gama dorwef. Jei gwanan bwernabara, ane jei tousa aamei imsama sarbanant jei gwanan bwernabara. Ga jem temawer, ini jemna jam jenbana. 27 Bunarsusfer jeiba bwerna uskambarsus folbana jamer amkom fom tere. Jengga Uwa Sanbagiri waakenaiserem ga aa gulbana jebe, ane ga aa waakentana. Ane Uwa Sanbagiri Jei waakenaiserem ap mese as mes gulbana. Gwanan jei bwernabara galapserem, ini amna as kabwakswebanant. Jengga afa jei jam se tererem, ini amna uskambarsus ga ase kabwakswebana. Jengga Uwa Sanbagiri Jei mes waakentana, jei jam teryen. Ane ga jem temawer ini amna uskambar as jam kabwakswebayan. 28 Ga jem temawer, ini amna unggwan-giri ai Epafroditus baftana jam waraufe ileminibe enggalfe, aamei gamjon jei ijeba damtanaram, ini imna saaser-saaserfer sege folbamini. Ane ini aman mesna ase waakenfer se folbana. 29 Epafroditus jei jemna gwela Tuhanfar daamfennaber, aamei gemerserem jeme gemer. Ga jem temawer, jam aa jep fortyaram, ga ini saaser-saasermer ne gaarnnu. Ane sa gulbate bosna jemnaiserem, ane bosna angtane nensaiserem jes mese sa kitulmite, angtane waakenaiserem aa jei ne eyebilirim Epafroditus galserem. 30 Gwanan aamei amniwer ina imsa bijausonant, as ijama batobayan. Jega jem temawer aamei Epafroditus imsa baftanant amnibe. Ane jei amkom fom tere, gwanan jei ai as galap batobanaram awelna Kristusmana jes eyebife. Ga jem temawer, waakenfer isa gaarnnu jei, ane bosna jemnaiserem ga isa gulbatena.
31 Ga umwef am afelen mesna, ini imna is saaser-saaserfer sege folbamini aam temawer aamei Tuhanfar daamfennaber ima gwena. Gwanan ai esorola is ai tulistabaipminint ibe. Ane ai ajam fiyan esorola jeiserem gamjon ibe is ajam nasipminennefe. Esorola jeiserem jeba is jei se batobaabili, jega angtane is jam ne afaf-afaftababiyen. 2 Esorola jeiserem ga aas: Aayai, inibaner isa gwena, angtane kabwaksususerem taterisi kapkaiserem aa jei ne nasbinennerem! Angtane jeiserem jei kabwakfer ga enggam ne nasipminenne, "Afa aamei is jam sene sunattababilirim, Uwa Sanbagiri ga is balbabifi ini imna is waakenfer ge folbamini, ane aamei ga angtane Uwa Sanbagirmana. Afa fas, Uwa Sanbagiri ga ise balbabili ini imna kabwakfer ge folbamini, ane aamei angtane Uwa Sanbagirmanyan." Aamei taterisi jeiserem ijama taabiyen! Jei ims afaf-afaftababili. 3 Nei bunarsusfer ba Uwa Sanbagirem angtanesam, angtane kabwaksususerem jesyan. Nei angtane Uwa Sanbagirmanam, aam temawer Mafnana Uwa Sanbagirmana Jener nems batobaabili enggalfe bosna Uwa Sanbagirmana gam gulbatef. Ane ini nemna saaser-saaserfer, ga aam temawer Kristus Yesus nep nes jes eyeipminirim. Yesus mes tere enggalfe etam-etama nemna gam wirtabaabif, ga ini nemna jep waakentabaipmisif. Ane neiba angtane Uwa Sanbagirmanam, aam temawer nei taterisi jeiserem Yesusem temawer nesa taabili. Nei enggam nejama guyon, "Afa nei jam nesa sunattwenaram, afa nei nafis-nafsi waakenfer nesa eyebili, Uwa Sanbagiri ga nese balbabifi ini nemna nes waakenfer ge folbamini." Fas! Jengga nei enggam neya gutena, "Yesus Jei mes tere enggalfe, etam-etama nemna gase wirtabaipmini. Ane jega jem temawer, Uwa Sanbagiri ga nese balbabili ini nemna nes waakenfer ge folbamini, ane neiba angtane Uwa Sanbagirmana." 4 Angtane afweraiserem ga enggam ge gubili, "Aiba angtane Yahudimanam waakena, ane ai amsa eyebili osiri seyafter gemerserem asal-asala Yahudimana aa jes ne towas-towastababilim. Jega jem temawer, Uwa Sanbagiri ga balbabili ini amna ba waakenfer ge folbamini, ane aiba angtane Jemnam." Safe gam aimba angtane Yahudisam, angtane jeiserem jes galserem, ai ajam guyon jei aa jes ne bilirim. Angtane jeiserem jei waakena gane eyebili, aime ajeter eyebili waakensusu. Waakenaiserem am temawer ga aas: 5 Gwanan amna umuru nunu delapan galapserem, ai ga asene sunattasant. Ai enggalf ai surusunt angtane Israelmana gamserem, Benyaminem teuminiwer. Ai angtane Ibranimana, ane asal-asala aman mesna seyafter gemerserem jei angtane Ibranimana. Ai hukumu seyafter Nabi Musa aa jes tulistababilim am onsobilint, aam temawer aiba angtane safna Farisimanam. 6 Ai hukumu jeiserem ajam ayebinyen. Angtane enggam jam ge gubiyen, "Paulus jei kapka gam eyebili." Ini amna unggwan-girsusu enggalfe agama amnaiserem jes onsobif. Jega jem temawer ai angtane Yesus aa jei ne tebanaram ai uskamer tamtamtababilint. 7 Ai gwanan aner gaartenant, aam temawer ai gununt seyafter jeiserem am temawer jeba igsusum. Ane ai gununt, aam temawer jeiserem ba igsusum, Uwa Sanbagiri ga gunu ini amna waakenfer folbana. Jengga namwer aas jepserem, ai bunarsusfer enggam ai towaswena seyafter jeiserem am temawer jeba igyen. Ai enggam ai towaswena, igsususerem jetefener seyafter jeiserem Kristus aa jes eyebilirim abe. 8 Seyafter jeiserem am temawer jeba igyen. Ane gam ke jetefener, ai enggam ai gunu seyafter ogiri aaiserem jebe jeba igyen, jei oltunu gemerserem. Igsususerem ga enggam, ai Kristus Yesus, Tuhan amna, ai waakenfer as damdamtaasini. Bunarfersus, Jei abe waakensusu gam eyeibene, ane jega jem temawer ai seyafter jeiserem as aftabunnu enggalfe ai Kristus tefner gam tebasif, 9 ane ai Jebar daamfennaber gam ge gwef. Ai Hukumu Nabi Musa aa jes tulistababilim ajam unggwasbiyen jam onsobife, jega Uwa Sanbagiri ga gunu ini amna waakenfer folbana. Fas. Ai Yesus ames tebana, ane jem temawer ga Uwa Sanbagiri gase gunu ini amna waakenfer folbana. Uwa Sanbagiri Jei Jener ini amna as waakentabana, aam temawer ai Kristus ames tebana. 10 Aas jepserem, ini amna unggwan-giri jetefener enggalfe Kristus jewer damdamtaasife. Ini amna unggwan-giri enggalfe Kristus ga enggam damdamtaasif, ane baabeta Kristusmana gam gaaraibef, baabeta gamjon aa jem irwesantam terewer. Ane ini amna unggwan-giri enggalfe kabwaktala jewer domolf, galater Jei gamserem--safe gam as tere, galater Jei aa gam tererem. 11 Ini amna unggwan-giri enggalfe Kristus jewer damdamtaasif enggalfe, Uwa Sanbagiri Jener as irtese terewer, Jei angtane Yesus aa jei ne tebanaram aa gam irtebaabisirim terewer. 12 Ai ajam guyon enggame aiba waakenfersus amsam gwena, Kristus galaterserem Jei aa gemer gwenaram. Fas. Jengga Kristus ai as mes destabana enggalfe ai Jei gam as damdamtaasini, ane ga as gwena Jei gamserem. Ane ai jeber-jeber ai uskambar ajewer unggwasa enggalfe ai Kristus gamjon ajewer damdamtaasif, ane waakenfersus agam gwefe Jei gamserem. 13 Am afelen mesna, ai ajam guyon alem inibe enggame, ai amsam towaswena seyafter Kristus aa gam gunurum ams towaswebafe Jelem temawer, ane fomfoma ai waakenfer gwelaiserem. Jengga ai enggam ai eyebili: seyafter gwanan ajes eyebilirim as aftabunnu, gwela amnaiserem gwananmana ajam sarbistaabonyan. Ane ai uskambar ga ai unggwasa enggalfe seyafter Kristusem temawer gam damdamtaasif, ane gam gwef Jei gamserem nunu aa jei falwilirim. 14 Galater angtane olgulup aa gemer gam nunggiririm, jei ga gam nunggiri baabeta seyafter gemerserem jamer naau daktala jeiserem jebo, angtane jeiserem jes galserem ai jeber-jeber ai uskambar unggwasa, baabeta amna seyafter gemerserem enggalfe Kristus gam damdamtaasif, ane daamfennaber jewer gam gwef Jebaner. Uwa Sanbagiri Jei as mes destabana enggalfe ai Kristus Yesusfar daamfennaber gam gwef, jega ai fwaina waakena Jemna ga as goltena. Fwaina waakena jeiserem abe aa jes gulbanaram, je ga aas: waakenfer gwelaiserem jamer abak-abaksus taman waaken-giribe. 15 Nei seyafter bunarsusfer nemsa sara gwela Yesus Jam tikwebaatiliserem jem temawer, jewer ga ini nemna nes daamfennaber sege folbamini enggalfe Kristus gam damdamtaasif. Afa angtane im nenennabe nenesmer aa jei ge gubilirim Kristus gam damdamtaasif jem temawer, afa gameye, Uwa Sanbagiri Jei angtane jeiserem se nasipmini taterisi bunarfersus jeiserem jem temawer. 16 Jengga igsusu ga enggam: nei ga jetefener sa onsobili taterisi Uwa Sanbagirmana bunarsusfer jeiserem, nei nemesa towaswena. 17 Am afelen mesna, ga gemer isa gwena ai agemer gwenaram. Gwanan nei seyafter negalaba nwinintim, aamei gwela amna imsa domolminint. Ane jega jem temawer, aam ga imsa towaswebili fomfoma gase naawena waakenfer. Sa gereba angtane im nenennap jeiserem, gwela jemna gamserem ai agemera gwenantam. 18 Gemer isa gwena galater ai agemer gwenaram, aam temawer angtane unggwanfer jei enggam ge gubili, "Aiba angtane Kristensam.", jengga gwela jemna jeiserem jei syefer. Ai uskambar aamei is amsam towas-towastababuwena angtane gwela syefer jeiserem jem temawer. Ane namwer aas jepserem ai gamjon aamei is ajam towas-towastababif, ini kabwakmer, ai gas syena. Gwela angtane jeiserem nep ne gwerauwulmini, jei bai taterisi Kristus ti salibibe Jam tereserem jem towas-towasulmife. 19 Angtane jeiserem jes galserem jei taman tokwagirip ga sege sofobili. Jei jam eyebiyen Uwa Sanbagiri aa jes bilirim jam eyebife. Jei jamer jetefener sene eyebili jelem tifniwer gam eyebif. Jei etam-etama kapkaiserem gane eyebili, ane jei jam ge seferswebiyen, jengga jen jena jam ne detena kabwakfer eyebiliserem jem temawer. Ini jemna unggwan-giri ga enggalf ga jetefener gam eyebili, ogiri aaiserem jem temawenefener. 20 Ga gemer isa gwena galater ai agemer gwenaram, aam temawer neiba angtane taman waaken-girmanam. Ane nei ini saaser-saaserem sa fina, Tuhan Yesus Kristus gamjon aa jep warausonaram taman waaken-giriwer, Jei ga nei Jei se waakentababisini. 21 Baabeta Jemna unggwandwasusu, ane jega jem temawer Jei Sanbagirf se nwinsi tagarabe seyafter gemerserem. Ane baabeta Jemna jeiserem jeme, Jei tifni nemna nes tortebaipmisisi jamer sa etamwesa tifni Jemna gamserem. Tifni nemna jei enggalfe ogiri aaiserem jep jem gwef weren-werna, ane tifni nemna jeiserem gasa tere. Jengga Jei tifni nemna nes tortebaipmisisi jamer sa etamwesa tifini seyafter Jemna gamserem, tifini seyafter waaken-waakensususerem enggalfe taman waaken-giribe jep gam gwef.
41 Am afelen mesna, ai unggwanfersus ims nesiktababili, ane ini amna unggwan-giri ga enggalf ibar seyafter gam nwinf. Imna gwela waakenfer jeiserem angtanef sa gweraulmi enggame, awelna amnaiserem im nenennabe jeba waakensusum. Aamei Yesus imsa tebana ai gamserem, ane ini amna saaser-saasersusu im temawer. Ga jem temawer, aamei Tuhanfar daamfennaber igemera gwenaram, kanaufer isa fina enggalfe, aamei gam isa eyebili seyafter ajes tulistaabilirim surta aaiserem jebe. 2 O Yodya ane Sintike, aamei nawan imna gwela daamfennaber Tuhanfar. Jega jem temawer, ai ititmer is enggam ai gitmini: daamfennaber is ge gwena, gamjon safnant ijangge doksoyan! 3 Ane Sisigus, aamei awelna abar waakenfer im gwebili. Ai is enggam ai bala, winawana jeiserem se batomi, jega gamjon jena ga sege amaisona. Gwanan jepserem jei abar awelna uskambar seyafter aya gwebilint enggalfe, Taterisi Waakena gam nasbinennef. Jei awelna abar seyafter aya gwebili, ane Kelemensfar seyafter, ane angtane nenes mesna jebar seyafter. Bose bosna jemna seyafter mes batabaipmitena Uwa Sanbagirem bukunube. Bukunu jeiserem jebe mesam batabaipmitena, bose bosna angtane seyafter waakenfer gwelaiserem jamer abak-abaksus aa jei ne damtabilirim. 4 Aamei seyafter Tuhanfar daamfennaber imsa gwena. Jega jem temawer ini imna jeber-jeber saaser-saaserfer is ga sege folbamini! Ai gamjon enggam ai gunu, ini imna is saaser-saaserfer sege folbamini! 5 Angtane nensaiserem jebar waakenfer sa gwe, ini foler-foleraiserem jeme, jega angtane seyafter ga sege towaswebili aamei jeber-jeber waakenater ima eyebuwena angtane nensaiserem jebe. Tuhan Jei babitsim gamjon se warautna. 6 Ini imna is jam ge eseswebamiyen, apgal jigala seyafter gemerserem jem temawer! Aamei kabwaktala ijeba domolaram, sembayanga jem temawer ga igama gwebana; sa bilibe ijesa bilirim Uwa Sanbagirfe! Jepga isa bala, "Ase samfer golmini.", aam temawer aamei imesa towaswena Uwa Sanbagiri Jei is batobaabili. 7 Ane aam temawer aamei sembayanga ima gwebabana, ane ga ima bala "Ase samfer golmini.", Uwa Sanbagiri Jei ini imna is eyebaipmini samfer ga is sege folbamini. Aamei ijama towasweyan jeje fomfoma Uwa Sanbagiri ini imna ga is eyebaipmini samfer ga is sege folbamini, aamei kabwaktala ijeba domolaram. Jengga Uwa Sanbagiri Jei se eyebili jeiserem, ane ini imna is jam ge esesobamiyen apgal jigala seyafter gemerserem jem temawer. Jeiserem ba bunarsusferam, aam temawer gwela imna Yesus Kristusfar daamfennaber. 8 Am afelen mesna, amna tateris gutela umwef ga aas: ini Uwa Sanbagirmana saaser-saasersusu angtane aa galap naawenaram gwela waakenaiserem jeme aas galserem: Jei angtanefe waakena tefner gane eyeipmini. Jei angtane gane nesiktababili, ane gane batobaabili. Jei taterisi waakena tefner gane nasbabili. Ini jemna tabalbalsusu. Gwela jes galserem jeber-jeber sa sarbisnenne ilem inibe, jega aamei jes gamserem ga isa gwena. Angtane jes gamserem aa jei gane naawenaram, Uwa Sanbagiri angtane jeiserem enggam bala jei waakenfer ne eyebili. 9 Jeter isa eyebili seyafter aamei ijesa towaswebilirim, ane amniwer ga isa taabili. Ga jeter isa eyebili aamei ijesa sarbilirim ai ajes bilirim, ane aamei ijesa domolaram ai ajes eyebilirim. Afa aamei seyafter jeiserem isa sarbili, ane seyafter jeiserem ga isa eyebili, Uwa Sanbagiri ini nemna waakenfer nes Jei se eyebaipminirim, Jei ibar seyafter. 10 Bunarfersus ai tousa aamei ijama tikweyan ams batobafe, jengga aamei dwona ijama domolyan enggalfe ai as ijama batobafe. Nunu gwananaiserem aa jei barwenaram, namwer aas jepserem aamei gamjon enggam ga ima gunu, "Au, nei Paulus gamjon ganma batoba.", ane aamei ai ga as ima batobana. Jega jem temawer, ini amna saaser-saasersusfer folbana, ai agemer ge gwenantam Tuhanfar daamfennaber. 11 Ai jes gamserem gam ajam nasoweyan, aam temawer ini amna unggwan-giri enggalfe, aamei as ijewera gulbaf ai ajes bilirim. Fas. Ini amna jep as jam unggwan-girswebayan, aam temawer aiba amsam towaswebilint jam enolaiserem ini waakena, amna galgala safe bastowaifer. 12 Ai tousa ga fomfoma galgala bastowaifener jem gwelaiserem. Ane ai tousa ga fomfoma galgala unggwanfer jem gwelaiserem. Bunarsusfer, ai amsam towaswebilint jem enolaiserem ini waakena, afa kabwaktalaiserem agam domola, afa kabwaktalaiserem ajam domolyana, afa wisi as gam bitena, afa unubugufer, afa galgala bastantowaifener agam damtabili, ane afa galgala unggwanfer agam damtabili. 13 Kristus Jei baabeta ap gulbana jeber-jeber, ane jega jem temawer ini amna waakenfer ga as folbana, afa waakenaiserem gas etamwena, ane afa kabwakfer jeiserem gas etamwena. 14 Safe gam, aamei waakenater imsa eyebili ai as imsa batobana, ai kabwaktala jame agalap domolaram. 15 Gwanan jepserem ai Taterisi Waakena is amsam nasipmisint ibe, jepga ai propinsi Makedonya ga ai mirsotefalsenyant. Aamei angtane Filipimana bunarsusfer tousa, ai Makedonya agalap mirsotefalantam, aamei ai ase infentowaifener ima batobana. Jemata afwer jeiserem jei as jam ne batobayan. Aamei infentowaifener apgal jigala abe as imsa gulbanant, ane apgal jigala jeiserem jem ga, aamei awelna amnaiserem ga as imsa batoibenent. 16 Ai gwanan kota Tesalonikawer agalap nwinintim, aamei as imesa batobanant, apgal jigala ap as imesa bafsobanant nawerfenna. 17 Ai apgal jigala aamei as ijesa gulbanantam abe, ai jem temawer ajam nasoweyan, aam temawer ini amna unggwan-giri enggalfe, aamei apgal jigala gamjon as ijama gulbaf abe. Fas. Jengga ini amna unggwan-giri Uwa Sanbagiri Jei waakena Jelemanaiserem is golmini, aam temawer aamei apgal jigala as imsa gulbanant. 18 Ai isas towastababili, ai amsam taabilint seyafter aamei as ijesa baafulbonontom abe, Epafroditus aa jes gwirinfelentem. Apgal jigala jeiserem anesus ai ajewer bilintim. Aga apgal jigala jeiserem ai taabilint, ane jega jem temawer ai unggwanfer gam as domola ajes bilirim. Ini Uwa Sanbagirmana saaser-saasersusu, aam temawer aamei apgal jigala jeiserem ap as imsa gulbanant. 19 Seyafter gemerserem jeba Uwa Sanbagirmanam. Ane Uwa Sanbagiri Jei is golmini ibe seyafter aamei ijesa bilirim, aam temawer aamei Kristus Yesusfar daamfennaber ga ima gwena. 20 Uwa Sanbagiri Uwa nemna, Jeiba sanbagirsusum. Nei ga bosna Jemna ganma gulbatena jamer abak-abaksus. Amin, jes gamserem ga gamfener! 21 Angtane seyafter Uwa Sanbagirmana Kristus Yesusfar daamfennaber aa jei naawenaram, aamei jes isa balbabili enggame, "Kelek, waakenfer sa nwin!" Am afelen mesna ai aaf ajebara nwinirim, jei ims ne balbabili enggame, "Kelek, waakenfer sa nwin!" 22 Angtane seyafter Uwa Sanbagirmana kotana aaiserem jep aa jei ge nwinbenerem, ane ga angtane awelna aa jei ne gwebilirim jena Kaisarmana jebe, jei mese jeime is gemer ne balbabili enggame, "Kelek, waakenfer sa nwin!" 23 Ai sembayang as gwebana Tuhan Yesus Kristus Jei waakena Jelemanaiserem ip ise golmini aamei seyafter gemerserem.