Markus

Markus

¹ Taterisi Waakena aaiserem ga Yesus Kristusem temawer, Jeiba Tane Uwa Sanbagirmanaiserem. ² Taterisi Waakena aaiserem ga enggam tawawul, Nabi Yesaya Tane Uwa Sanbagirmana jem temawer aa gemer tulisulum Taterisi Uwa Sanbagirmanaiserem jebe: "Uwa Sanbagiri enggam gunu, ’Sa sar, Ai nabala angtanes As baftana, Aamei Is jei danabaabif, jega enggalf nele Ibe Is gam dwotamif.’ ³ Angtane aasaje ona dwisgirip jenjenwena enggame, ’Nele Tuhanf sa sartabaasi, nele nornorfer isa eyebana, Jei jep ayinyefe!’ " (Maleakhi 3:1; Yesaya 40:3) ⁴ Nabi Yesaya aa gemer tulisulum jes gemerserem, jepga Yohanes Pembaptis ga fyatetya ona dwisgiribe, taterisi Uwa Sanbagirminiwer ga nasipmini enggame, "Gasa irfwe etam-etama kapka imnaiserem jewer, Uwa Sanbagiri gasa onsoba, ane aamei ga isa baptiswena. Seyafter jeiserem ga isa eyebili, jega Uwa Sanbagiri etam-etama kapka imna is gam se wirtabaipmini, gamjon Jei jam sarbistaabonyan." ⁵ Angtane ona seyafter Yudeyamana ane angtane kota Yerusalemmana ga aa ge forobuwetya Yohanes jam sarbasife. Ane angtane jeiserem etam-etama jelemana ga aane balbabitowena, jepjon ga Yohanes ga baptistababili jei, fona Yordan je. ⁶ Yohanes fene unta tifniwer eyemiliserem ga jes kamwini. Bana aa jes gwelawilirim je mese unta tifniwer ne eyebili. Ane tumilgala jemna ga matikwam ane nintrin fo onnemana. ⁷ Yohanes taterisi aaiserem ga nasipmini, "Am amnuwer Angtane sanbagirsususerem se fortya. Jei sanbagiri amniwer. Baabeta Jemna unggwandusa amniwer; ai ajam aanweteyan ane tofgol newa Jemna ajam fersobaasiyen. ⁸ Ai isa fom as baptistababili, jengga Jei Mafnana Uwa Sanbagirmanaiserem is jem se baptistababifi." ⁹ Jes galapserem Yesus ga tamna Nasaret ona Galileya ga jewer jela. Ane Yohanes Yesus ga baptistene fona Yordan je. ¹⁰ Jewer ga Yesus Jame aa galap tawetyaram fonawer, Jei winsi ga damtaswena aane bitnetinirim, ane Mafnana Uwa Sanbagirmana ga iritya junu senaya gamserem Yesusem sagabe. ¹¹ Jewer ga taterisi taman waaken-giriwer ga aane sarbili enggame, "Aameiba Tane Amna, Ai Is Ajes nesiktenerem. Aamei ini Amna gam saaser-saasertabana." ¹² Jewer ga abakferyan Mafnana Uwa Sanbagirmana Yesus ga aftafala jamer taman tetenabo. ¹³ Tampata taman tetena jeiserem jebe, Yesus ga jep nwini nunu abakfer ga empat pulu. Bawasa Yesus ga unggwasbana. Binatanga kakal-kakalaiserem nenes-nensa jebaner ge nwinbene jebe, ane malaikat Yesus ga aane batobana. ¹⁴ Raja Herodes Yohanes jame aa tebanaram, bwiyip jam gaataantefe, Yesus ga sofna ona Galileyaminip, Taterisi Waakena Uwa Sanbagirminiwer aaiserem ga nasibene. ¹⁵ Ane ga gunu, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jes jepserem mes gwetmanswel. Etam-etamawer jasa tikwe, waakenaiserem ga jes isa eyebili. Taterisi Waakena Uwa Sanbagirminiwer ga jetefener isa taabili!" ¹⁶ Jepga jes jepserem Yesus ga gwina fobogana Galileyawer. Jei Simono Anderyas, ayana osona jeiserem, jep ga domsona. Jei jala ge tobolsnenne jigalf. Jei jemna awelna jes jigals ne tawanbinenef. ¹⁷ Yesus angtane naura jeiserem ga gitmini, "Au, Am sege onsoba! Ai aamei isAs towas-towasona, aamei ga angtane nafsi ga is ge towanbili jega jei Ai As ga sene onsobana, jigala igemer ge towanbinennerem." ¹⁸ Jes jeberserem jei jalna jemna ga aa ge mirultefala, jepga Yesus ga aa ge onsobana. ¹⁹ Yesus jewer ga sofna, ane angtane naura gamjon ga domsona, Yakobuso Yohanes, ayana osona, tannawan Sebedeusmana. Jei atdusa jelemanaiserem jep ge nwini, jalna jelemanaiserem jes ge waakenulsini. ²⁰ Yesus jes jeberserem ga jenmini. Jepga jei jeta ga aa ge mirtene atdusaber angtane afweraiserem jebar. Ane jei Yesus ga aa ge onsobana. ²¹ Yesus ane angtane Jei aa jei ne tikwebaatinennerem, jei kota Kapernaum jep ga aa ge forobitye. Nunu Sabat, nunu angtane Yahudimana aa jem ge nwinbisiwefaram jama ferwenaram, Yesus ga kawetena jena angtane Yahudimana aa jep ge betwebuwefaram, ane ga towaiwulu angtane jam towas-towastababife. ²² Angtane Yesus aa jei ne sarbasinirim, jei taterisi Yesus aa jes nasbabilirim jam ne bitbitwebabili, aam temawer Yesus Jei enggam towas-towastababili angtane baabetabara galserem. Jei jam towastababiyen guru-guru Hukumu Nabi Musa aa jes tulistababilim aa jei ne towas-towastababuwenaram jei gamserem gamyan. ²³ Jes jepserem angtane bwat kapka aa jei kabwanaram ga kawetetya jena angtane Yahudimana aa jep ge betwebuwefaram jebe. Angtane jeiserem ga gwarenwena uskambar, ²⁴ "O Yesus, angtane Nasaretmana, Aamei Ibaf fortya? Aamei abe ase basIs eyeipmini? Aamke enggalf Im fortya, ai as Igam kabwaktababif? Ai amsa towaswena Aamei nansa. Aameiba Angtane ini tabalbalsusu aa jemanem folbanaram, Uwa Sanbagirminiwer Ijei jelaram." ²⁵ Yesus bwat kapka jeiserem jes uftana enggame, "Se tikwe! Jase totini angtane aaiserem jemniwer!" ²⁶ Bwat kapka aa jei kabwanaram ga egegwena jam totinyefe, ane angtane jeiserem unggwanfersus ga gin-gintene. Jei ga gwarenwena, ane angtane jeiserem jemniwer ga totintye. ²⁷ Angtane seyafter jep jeiserem jei ga aa ge bitbitwebili. Jepga jei jen jena ga aane tenaaminenne, "Aaje basa, taterisi ibirmi aaiserem nei nejesa sarbilirim? Jei baabeteme bwat kapkaiserem ga jes surbobili jam ge tobitinyefe, ane bwat kapkaiserem ga sara, ane ga totintye." ²⁸ Jepga taterisi Yesusem temawer tatarmer ga wofena ona seyafter Galileyamanaiserem. ²⁹ Jes jepserem Yesus ane angtane Jei aa jei ne tikwebaatinennerem ga aa ge tobitintye jena angtane Yahudimana aa jep ge betwebuwefaram jewer. Jepga jei ga aa ge sofobili, Yakobuso Yohanes jebar, jamere Simon ane Anderyas jem jenabo. ³⁰ Simonem munau tane jei jelem nutarap tana, tifin sarsar bwerai falbili. Jewer ga Yesus ane angtane Jei aa jei ne tikwebaatinennerem jam aa ge forobilirim Simonem jenabe, angtane Yesus ga aane towastana wini jeiserem jem temawer. ³¹ Yesus ga gwina wini jeiserem jem tarnabe, ane wini jeiserem tafnawer ga taabitena, ane wini Jei ga batobili ga irwena. Jepga tifin sarsara ga barwebili. Jewer ga wini jeiserem jei tumilgala ga kitulmini angtane jeiserem jebe. ³² Gwin seiseyeber, gwere mes kautena, angtane bwernabara unggwanfer ga aane aftabifelwetya Yesusminibe, ane angtane bwata kapka aa jei ge kayipminirim jes mese. ³³ Angtane uskambarsus aa jei ge nwinbenerem kotana jeiserem jebe, jei ga aa ge betwebili jena jeiserem jem mukanawer. ³⁴ Ane Yesus angtane unggwanfersus ga waakentababili, bwera-bwerna nenesmer jei aa jes ne domolwenaram jewer. Ane Jei bwata kapkaiserem jes mese jes surbobili. Yesus Jei bai bwat kapka jam ge nasbawefe, aam temawer bwata kapka jeiserem jei mesam ne towaswebana enggame, Yesus Jeiba Angtane waakensusu Uwa Sanbagirmana. ³⁵ Gwinibenersus, ona gemerje jam nafweyan, Yesus ga irwesa nunuwer, ga totintye jenawer, ane ga sofsa tampata taman tetenabe kota jitemwer. Jei sembayanga jep ga gwebasa. ³⁶ Simon ane Simonem saraboson mesnaiserem jebar jei Yesus ga aane terelbene. ³⁷ Jei Yesus aa galap ne damtanaram, jei ga aane bala, "Angtane unggwanfersus Ims ne terelbene." ³⁸ Jengga Yesus ga gunu, "Au, nei ganma sofwe aawer. Nei nesa sofwa taman-tamna nafsi aam gwetmanap aa je ge folbanaram jebe. Ai taterisi Uwa Sanbagirmana gamjon jewer gam Age nasibenenne. Aiba Ajem temaweram fortya." ³⁹ Ane jewer ga aa ge sofobili ona Galileya seyafter gemerserem jewer. Yesus taterisi Uwa Sanbagirmanaiserem ga nasibenenne jena angtane Yahudimana aa jep ge betwebuwefaram, ane Jei bwata kapka ga surbobili. ⁴⁰ Angtane tifin bwerna aa jemanem folbanaram Yesusminip ga jela. Jei somwan dumem nwintena, Yesus ga bala, "Uwa, afa Aamei jam Is gunurum, Aamei baabetabara ai ga asIs waakentana." ⁴¹ Yesus angtane jeiserem ga nesiktene, jepga Yesus tafna ga tetena, dukap ga tosobaaniwili, ga bala, "Ai enggam Ai gunu, sya. Se waakenswe!" ⁴² Jes jeberserem angtane jeiserem bwerna jemna ga barwebana, tifni gamjon waakenmer ga folbana. ⁴³ Ane Yesus angtane jeiserem ga baftana jam sofwefe, ititmer enggam ga bala, ⁴⁴ "Taterisi aaiserem angtane nafis-nafsiserem jebe ijam nasipmiyen. Jengga jase sofwe imaminip, jeiba angtane taterisi angtanemana Uwa Sanbagirfe aa jei gwirinfelwenaram. Jei aamei is damtanaram enggame, aamei imsam waakenswena. Jepga is eyebili Nabi Musa fwater aa gemer nasbilim: se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame, aamei bunar-bunarsusfer imsam waakenswena." ⁴⁵ Jengga angtane jeiserem ga sofwa, ane taterisi jeiserem ga nasipminenne angtane seyafter gemerserem jebe. Jei taterisi jeiserem aa jewer nasbinennerem, Yesus ga jem temawer taman-tamnap Jam kaweteyan. Jei taman sitawer nwini, tampata tamanfennaiserem ga jep nwini. Jengga angtane unggwanfer taman nafis-nafsiserem jewer ge forobuwetya, Yesus aa jep nwinirim jebe.

¹ Nunu abakferyan Yesus gamjon ga warauwa kota Kapernaum je, ane taterisi ga aane nasbinenne enggame, Yesus mes fortya, jenap nwini. ² Jepga angtane unggwanfersus ga aa ge forobitye, ga aa ge betwebili jenabe jamere erge-ergesus. Tampat jep nwinfe afa fas, mwa totiyelep ane sitawer mese angtane tampata masef ga aane terelbaabili jep fyafe. Ane Yesus Jei taterisi Uwa Sanbagirmana angtane jeiserem jep ga nasipmini. ³ Yesus taterisi jeiserem gemer nasipmini, angtane nawer-naura ga aa ge jalbili. Jei angtane muli-mulni ga aane girinyele Yesusminibe. ⁴ Jengga jei Yesusem gwetmanaber fas jam ge forobiyen, aam temawer angtane unggwanfersus. Jepga jei ga aa ge tabwili ja bolabe, Yesus aa jeber fitonom, jena teselna jem mwongfar ga aane fertebisini. Jepga angtane muli-mulni jeiserem titik touyap aa jei tantenaram ga aane gaartetya, ane newawer ga aane tebastaatyene jamer Yesusem tarnabo. Jei enggam ga sege towaswebili Yesus Jeiba baabetabaram, angtane muli-mulni jeiserem jam waakentafe. ⁵ Yesus Jei tousa enggame, "Angtane aaiserem jei As mes ne tebana ginggitfer." Jepga Yesus angtane muli-mulni jeiserem ga bala, "Am tane, etam-etama kapka imnaiserem Ai is Ames wirulbono." ⁶ Ane jes jepserem guru afweraiserem Hukumu Nabi Musa aa jes tulistababilim aa jei ne towas-towastababuwenaram afwer ga jep ge nwinbene. Guru-guru afwenefener jeiserem jei jelem inipfener enggam ga aa ge gubinenne, ⁷ "Jeje bafa Angtane aaiserem enggam ga gunu? Jei game aa jewer nasounaram, Jei Jena ga jem gaartena Uwa Sanbagiri gamserem! Angtane afa fas etam-etama kapka jei wirulfe, jengga Uwa Sanbagiriserem jetefener Jei etam-etama angtanemana gam wirulbono." ⁸ Yesus Jei Jelem inibe mesam towaswena jei aa gam ge gubilirim jelem inibe, ane Jei ga aa balbabili, "Jeje bafa aamei gam ga ima gunu ilem inibe? ⁹ Masef unggwasbiliserem ga fwersa Ai angtane muli-mulinfe jes eyebife: Afa Ai enggam As gunu, ’Etam-etama kapkaiserem imna mes wirulbono.’ afa Ai enggam As gunu, ’Se irwe, tikara imna ga is goltena, ane ga is wofena!’? ¹⁰ Ai nawersamer samfer As eyemini. Namwer aas jepserem Ai ibe isa Ajam gwerauwulmif enggame, Ai Tane Angtanemana, baabeta Amna uskambar ogiri aaiserem jebe enggalfe, angtanemana etam-etama kapka seyafter Ajem wirtabaipmife. Aamei jeiserem game isa towaswebili, Ai angtane aaiserem As waakentana." Jepga Yesus ga bala angtane muli-mulni jeiserem, ¹¹ "Ai ims bala, jas irwe, tikar imna ga is goltena, ane ga is warauwa ilem jenabe!" ¹² Angtane jeiserem ga irwena, ane jes jeberserem jei ga tikara jemna aa goltena, ga totini. Angtane unggwanfersus seyafter jep jeiserem jei ga aane gerebana, ane seyaftersus ga aa ge bitbitwebili. Ane jei Uwa Sanbagiri enggam ga aane pujitene, "Bwembwema enggalaiserem gemerje fas afa nejama domolyan!" ¹³ Jepga Yesus gamjon warauwa foboga Galileya jem eyebe. Ane angtane unggwanfersus ga aa ge forobitye Yesusminibe, ane Yesus angtane jeiserem ga towas-towastababili. ¹⁴ Jepga Yesus ga jep wofena, ane angtane pajak doini aa jei taabilirim enggalfe pemerintafe gam kitulmif, angtane jeiserem ga damtana kantorap nwini. Angtane jeiserem bosna Lewi, tane Alfeusmana. Yesus ga bala, "Aamei Ams onsoba!" Jewer ga Lewi ga irwena, Yesus ga onsobana. ¹⁵ Jepga abakferyan, Yesus ane angtane Jei aa jei ne tikwebaatinennerem jei Lewim jenap ga ge sofobili jam dwenfe. Jei aa jep dwenaram, angtane unggwanfersus ga aa ge forobitye jebar seyafter ga dwena. Afwer ga angtane nafsi pajak doini aa jei gane tebabinennerem, afwer ga angtane etam-etamabaraiserem nenes mesna. ¹⁶ Guru-guru Hukumu Nabi Musamana aa jei ne towas-towastababuwenaram jei Farisim safna, jei Yesus ga damtana, angtane pajak doini aa jei ne tebabinennerem jebar, ane angtane etam-etamabara jebar dwena. Jepga jei angtane Yesus aa jei ne tikwebaatinennerem ga tenebaabili, "Jeje bafa Yesus Jei angtane pajak doini aa jei ne tebabinennerem ane angtane etam-etamabara jebar seyafter ga dwena? Gam je kapka!" ¹⁷ Yesus taterisi jemnaiserem aa galap sarbilirim, Jei ga balbabili, "Angtane bwerayanaiserem jei jam gwiyan doktorminibe, jengga angtane bwernabara tefner jei gam gwina. Ai ke enggalf Ai fortya angtane jena enggam aa jei gam balaram, ’Maa, ai ames waakenswena, etam-etama amna fas.’ ga jes jenbebif. Jengga Ai Agalf fortya, angtane etam-etamabaraiserem jam ge tikwebif jelem etam-etamawer, ga jes jenbebif." ¹⁸ Nunu afweraiserem jeme, angtane Yohanes aa jei ne tikwebaatinennerem, ane angtane safna Farisimana, jei jam ne dwenyan enggalfe jei Uwa Sanbagiri gam ne pujitefe. Angtane afweraiserem ga aa ge jalbili Yesusminibe, ane Yesus ga aane tenebana, "Angtane Yohanes aa jei ne tikwebaatinennerem, ane angtane safna Farisimana aa jei ne tikwebaatinennerem, jei jam dwenyan enggalfe jei Uwa Sanbagiri gam ne pujitef. Jes gamserem je waakensusu. Jengga angtane Is jei ne tikwebaatinennerem, jei jes gemerserem jam ne eyebiyen. Jeiserem kapka. Angtane nafsi jei waakena gane eyebili, jeje bafa angtane Is jei ne tikwebaatinennerem, jei waakena gam jam ne eyebiyen?" ¹⁹ Yesus ga tamawolbaabili Jelem temawer, "Masara anggwana wini jep gam gularam, anggwana wini jei golfe jei jebar aa gemer ge nwinbenerem masara jeiserem jebe, angtane masara jeiserem aa jei ne onsobilirim, bunarsus jei ga sene dwena ini saaser-saasermer. Anggwana wini jei golfe jei jebar aa gemer ge nwinbenerem masarabe, angtane masara jeiserem aa jei ne onsobilirim, jei dwena jam tikweyan enggalfe Uwa Sanbagiri gam gane pujitefe. ²⁰ Jengga se fortya nunu anggwana wini jei gulaiserem, anggwana jeiserem ginanggwana jemna ga sene gaariufenne jemniwer. Jes jepserem jei ga jam ne dwenyan, aam temawer ini jemna jam ge jenbamini, ane jei sembayanga gane gwebana Uwa Sanbagiri jam pujitefe. Jes gemerserem aaiserem jegme gemer, angtane aa jei ne tikwebaatinennerem Amna, afa Ai jebaner Agma nwini aafe, jei jamer se dwenwena nunu jeber-jeber ini saaser-saasermer." ²¹ Jepga Yesus Jei seisya taterisi aaiserem ga nasipmini, jega angtane sege towaswebili, jei taterisi waakena ibirmiserem Yesus aa jes nasbilirim, jei jam ne dupdupbulyon osiri fwatermanaiserem jebar. Seisya taterisi ga aas: "Angtane afa fas jei fenbit ibirmi jam wirtayana jam gaarteyan enggalfe, jem gam motolsini bajunu fwatermana jem biti gam waakensof. Afa jei bajunu jeiserem jam se wirsonaram, fenbit ibirmi jeiserem je ga bitsosini bajunu fwatermanaiserem jewer, ane bajunu fwatermana je gam bitnetini unggwanfersus. ²² Jeiserem jes gamserem aaiserem jegme gemer: Angtane afa fas fo angguru ibirmi jam suwulntefe, kambing tifin fon fwatermanaiserem jebe, ga aam temawer fo angguru ibirmi jeiserem, ga jese gwebili kambing tifin fon jeiserem ga sene bitnetini. Jepga fo angguru jeiserem ga gam suwetini, ane kambing tifin fon jes mese ga gam kabwakswena. Wowo, gamyan. Jengga enggam, fo angguru ibirmiserem ga kambing tifin fon ga ibirmiter gane suwulntena, ga jep gane bokola." ²³ Nunu Sabateme, Yesus ane angtane Jei aa jei ne tikwebaatinennerem ga ge wofebili gandum makan nenennabe. Jei aa gemer ge wofebilirim, angtane Yesus aa jei ne tikwebaatinennerem jei gandum ga aane fulu jam tombaabife. ²⁴ Ane angtane safna Farisimana afweraiserem jei ga aane damtabili, Yesus ga aane bala, "Se damtabi! Nunu Sabateme nei awelna nejama gwebiyen, jengga angtane Imna Is jei ne tikwebaatinennerem jei ga gandums ne fulu. Jei gam aa jewer ne eyebilirim, jei awelna jem ne gwebili, Hukumu Nabi Musa aa jes tulistababilim jei ga jes ne ayebili. Jeje bafa angtane Imna Aamei Is jei ne tikwebaatinennerem etam-etama kapka jes gamserem ga aane eyebili, nunu Sabateme?" ²⁵ Yesus ga tamawolbaabili, "Aamke gemerje ijama gerabisteyan nem asal-asala Raja Daud aa jes eyebilim, jei ane jem afelen mesna tumilgala fas, wisi aa galap ne folbamilim? Aamke ijama towasweyan? ²⁶ Jei ga aa ge kabwitel Jena Uwa Sanbagirmana kota Nobwer. Jes galapserem Abyatar jei imam sanbagirsusfe jei gwena. Jei rotini Uwa Sanbagirmanaiserem Raja Daudf jei kitulbol. Jei rotini ga tumil, ane afwer ga golmil jem afelen mesna jebe. Jei game aa jewer ne eyebilim, safe Hukumu Nabi Musa aa jes tulistababilim aas galserem: Rotini Uwa Sanbagirfe jesa gulbanaram, angtane jei rotini jeiserem jam ne tumilyen; jengga rotini jeiserem ga imam tefner samfer jei gane tumili." ²⁷ Ane Yesus gamjon ga balbabili, "Uwa Sanbagiri angtane gwanan aa jes eyebalam, jes jepserem Uwa Sanbagiri ga gul, ’Nunu Sabat aaiserem Ai ga ibe is Ajes bilipmini, aamei jem awelna ijama gwebiyen. Jeke enggam, nunu Sabat igsusu angtaneminiwer, jengga igsusu ga angtane nunu Sabatminiwer.’ ²⁸ Ai Tane Angtanemana, Aiba Tuhansam, Ai baabetabara enggalf Agam bili, angtane bas gane eyebili nunu Sabateme."

¹ Jepga Yesus gamjon ga kawetena jena angtane Yahudimana aa jep ge betwebuwefaram jebe. Angtane aasaje ga jep nwini, tafna afwenefener aa jemanem terbenerem. ² Ginanggwa Yesusmana jei ga jep ge nwinbene. Jei Yesusfe kapkaiserem jes ne terelbef, jei enggam ge gubif, "Yesus Jei kapka gam eyebili!" Jega jem temawer jei Yesus ga gemer ne gerebana, angtane afa kese waakentana nunu jeiserem jeme, nunu Sabat. Afa Yesus Jei angtane jam se waakentanaram, jei enggam ga sege gubili, "Yesus Jei awelna gam gwebili nunu Sabateme, nunu nei awelna nejama gwebiyen. Je kapka." ³ Yesus ga angtane tafna aa jemanem terbenerem ga bala, "Au, sa jal, aaf ga is fina nenennaber!" ⁴ Ane Yesus ga angtane jep aa jei ge nwinbenerem ga tenebaabili, "Jei bas batabil Hukumu Nabi Musa aa jes tulistababilim jebe? Nei bas negama eyebili nunu Sabateme? Ke waakenaiserem jesma eyebili, afa kapkaiserem jesma eyebili? Ke angtane jam waakentaasif, afa jam munbof?" Jengga jei jam ge tamawolbiyen, jafner ge nwinbene. ⁵ Yesus Jei angtane unggwanfer jeiserem ga gerebaabisnenne, Jelem inipfener nasbabili. Ane ini Jeman jegme aa jenbana, aam temawer angtane jeiserem jemna duka kekelna, ane jei jam ge towaswebiyen enggame angtane jam batobalaiserem jeiba waakenam. Jepga Yesus ga bala angtane tafna aa jemanem terbenerem, "Tafna imna se nornorsosi!" Jei tafna jemna ga nornorsosini, ane tafna jemna gamjon ga waakennebana. ⁶ Angtane safna Farisimana aa ge tobitintye jena angtane Yahudimana aa jep ge betwebuwefaram jeiserem jewer. Ane jes jeberserem jei ga Herodesem safan mesnaiserem jebar ge betwebili. Jei ula ga aane tagalsini Yesus jam ne munbofe. ⁷ Jepga Yesus ane angtane Jei aa jei ne tikwebaatinennerem ga aa ge tobitintye, ga aa ge sofobili foboganabe, foboga bosna ga Galileya. Ane angtane ona Galileyamana unggwanfersus Yesus ga aane onsobana. Ane angtane ona Yudeyaminiwer jei mese jei ga aa ge jalbili Yesus jam ne onsobafe. ⁸ Ane angtane afwer kota Yerusalemwer ge jalbili, ane afwer ona Idumeyawer, ane afwer Fona Yordan jimwer, ane afwer kotana Tirus angtane jewermana, ane angtane kota Sidonmana. Jei seyafter Yesusminip ge sofobifelwetya, aam temawer jei taterisi Yesus aa jes eyebaabuwenaram jes ne sarbabuwena. ⁹ Angtane aa jei ge forobuwetyaram ga unggwanfersus, jei Yesus jam ne gwetmantaasif. Jega jem temawer Yesus ga angtane aa jei ne tikwebaatinennerem ga balbabili, "Atf sa terel! Atdusa jam isa domolaram, ga isa menetulsini Ai jep gam As juwili." Yesus Jei jes gamserem gam aa jewer balbabilirim, Jei ga enggalf balbabili, jega angtane unggwanfer jeiserem jei Yesus jam ne baftananayan. ¹⁰ Yesus angtane anesus fwater mes waakentababili bwera-bwerna nafis-nafsi jei aa jes ne domolwenaram jewer. Jega jem temawer angtane seyafter bwernabaraiserem jei jena ga aane bafsonanna enggalfe tatarfer gam gwif Yesusem gwetmanaber, Yesus jam ne entefe, bwernawer gam waakenswef. ¹¹ Ane angtane bwata kapka aa jei ge kayipmuwenaram, jei Yesus aa galap ne damtanaram jei jen jena ge janbili Yesusem tarnabe, aam temawer jei mes ge towaswebili Yesus ba baabetabara. Ane ga gam gwarenwena, "Aameiba Tane Uwa Sanbagirmanam!" ¹² Jengga Yesus ititmer ga balbabili bwata kapka jeiserem, "Angtane nafsi ijama towastababiyen Ai nansa!" ¹³ Jepga Yesus ga tauna taarenabe, ane angtane Jena aa jes balbabilirim ga jenbebili. Angtane jeiserem Yesusminibe ga aa ge forobitye. ¹⁴ Yesus angtane dua belas ga destabaabili angtane seyafter jeiserem jemniwer. Yesus angtane dua belas jeiserem ga balbabili, "Ai aamei isAs destabaabili enggalfe, aamei Abara nwinf. Ane ga enggalf Ai aamei jam isAs baftabilirim aamei gam isa sofwa, Taterisi Waakena Uwa Sanbagirmanaiserem igama nasbinennef! ¹⁵ Ane Ai baabeta ibe isAs golmini enggalfe bwata kapka jem igama surbobife." ¹⁶ Angtane dua belas jeiserem Yesus aa jes destabaabilirim, jemna bose-bosna ga aas: Simon, (jemna bosna afwer Yesus aa jes gulbanaram ga Petrus). ¹⁷ Yakobus ane osona jemna Yohanes, tannawan Sebedeusmana. (Tannawana jeiserem jemna bosna afwer aa gam ne jenmuwenaram ga Boanerges. Bosna jeiserem jem igiserem ga enggam "Tane irismana". Jei irsi aa gam gam gwenaram, jei ga gam gangge nasowena.) ¹⁸ Anderyas, Filipus, Bartolomeus, Matius, Tomas, Yakobus tane Alfeusmana, Tadeus, Simon angtane Patriot, ¹⁹ ane Yudas Iskaryot, angtane Yesus aa jei geram angtane kakalaiserem jem tafnabe. ²⁰ Yesus jepga gwina Jem jenabe. Jes jepserem angtane unggwanfersus ga aa ge forobuwetya jamere Yesus ane angtane Yesus aa jei ne tikwebaatinennerem jei dwona jam ne domolyan jam twenfe. ²¹ Angtane afweraiserem ga aa ge gubili, "Yesus Jei miriwer mes kabwakswena syefer nasouna!" Ene Yesusmana, ane Jelem osona, ane Jelem afelen mesna, jei taterisi jeiserem jam aa galap ne sarbilirim, jei ga aa ge sofobili Yesus jam ne gaariufenefe. ²² Guru-guru afweraiserem Hukumu Nabi Musa aa jes tulistababilim aa jei ne towas-towastababuwenaram, jei ga aa ge jalbili kota Yerusalemwer. Jei ga aa ge gubili, "Belsebul jei sanbaka bwat kapka seyafter gemerserem jemniwer, jei Yesusem inip nuniton." Angtane afweraiserem ga aa ge gubili, "Belsebul jei baabeta Yesusfe mes gulbana, jega jem temawer Yesus Jei samfer bwata kapkaiserem jem se surbobili." ²³ Jewer ga Yesus angtane unggwanfer jeiserem ga jenbebili, ane seisya taterisi jep ga nasipmini. Jei ga enggam nasipmini: "Jeje fomfoma bawas jei jena gam suribene? ²⁴ Angtane negara daamfennaiserem jep aa jei ge nwinbenerem, afa jei jam gangge syensyanwebilirim safna nafis-nafismer, ane safna jeiserem jei ga jena gane uskamswemini ane jei ga gangge erabana, afa ga gam jes gemerserem, gam jega negara jeiserem jei ga wasferwebili. ²⁵ Ane wini yo anggwana jelem tannabaner aa jei gangge nwinbenerem jena daamfennaiserem jebe, afa jei jena jam gane uskamsweminennerem, waakenfer jam ge nwinbeyen, wini yo anggwana ane tanna jelemana jeiserem gwela jemna gam kabwakswemini. ²⁶ Ane bawas ane bwata kapka jei aa jei ne onsobanaram, afa jei jenjen jam gangge erabanaram, jepga gangge syanwena, ane bawasa jemna baabeta fas jamere bawas jei bar. ²⁷ Angtane baabetyenaiserem jei jam gam gunurum jam kawetefe angtane baabetabaraiserem jem jenabe enggalfe apgal jigala gam komkomtababisif, jei angtane baabetabara gwanan ga jam gam tafresnenne. Jepga jei apgal jigala jemna ga gam komkomtababisini. ²⁸ Gasa sarsi! Angtane etam-etama jam gam eyebilirim, ane Uwa Sanbagiri gam imei-imeitana, afa jei jam gam tikwenaram etam-etamawer, Uwa Sanbagiri angtane jeiserem etam-etama jemna gam wirulbono. ²⁹ Jengga angtane Mafnana Uwa Sanbagirmana Jem temawer nimnafer aa jei gam nasbilirim, Uwa Sanbagiri Jei etam-etama kapka jeiserem Jam wirulboyon. Etam-etama jeiserem jeba etam-etamsam gemer gam folbana, jam barwebayan jamer abak-abaksus." ³⁰ Yesus seyafter jes gamserem gam aa jewer gunurum, Jei ga aam temawer gunu, angtane Yesus enggam aa jewer ne balaram, bawasa jei ga Yesusem inip nuniton. ³¹ Jepga Yesusem eneserem ane Jelem oson mesna ga aa ge forobitye. Jei sitawer ge fibili, angtane nafsi ga aane baftana Yesus jei gaartaabonfe mwonawer. ³² Angtane ga unggwanfersus Yesusem gwetmanap aa jei ge nwinbenerem, angtane jeiserem jei Yesus ga aane bala, "Iye ane Im oso mese jei sitawer ge fibitne, Ims ne jenbetne." ³³ Yesus ga tamawolbaabili, "Iye ane Am oso mese jeje nansa?" ³⁴ Jepga Yesus ga angtane seyafter jep aa jei ge nwinbenerem ga gerebaabisnenne, ane ga gutena, "Angtane aaiserem jei mese iye ane oso Amna. ³⁵ Angtane aa jei ne eyebilirim Uwa Sanbagiri aa gemer gam gunurum, angtane jeiserem jei ga iye mese oso Amnaiserem, bunar-bunarsusfer ga jes."

¹ Yesus angtane gamjon towas-towastababili fobogana Galileya je. Angtane aa jei ge forobuwetyaram ga unggwanfersus, angtane jeiserem unggwanfer jam ne eterbiyen. Jei jam aa ge betwebilirim jamer durga. Jega jem temawer Yesus ga juwili atdusa jep aa jei tenaram jebe, ane fonawer bastowaifer ga agasiwili. Angtane unggwanfer jeiserem jei ga foboga eyep ge fibili. ² Jepga Yesus taterisi nafis-nafsiserem jem temawer ga towas-towastababili. Taterisi jeiserem Jei aa jes nasbaipminirim jeba seisya taterisi. Jei ga enggam towas-towastababili: ³ "Sa sar! Angtane makan anggwa ga sofna twam tanes tonolf makanabe. ⁴ Jei twam tanna jam aa galap fasawolnannaram, twam tanna afweraiserem ga nelep ge janbili. Jepga junu ga aa ge forobitye, twam tanna jeiserem ga aane tombaabili jamer bar. ⁵ Ane afwer ona tunabaraiserem jep ge janbili, ona unggwanfer fas. Twam tanna jeiserem ga aa ge kokosbili tatarmer, aam temawer ona bastowaifer. ⁶ Jengga gwere kakala jam gam anggasyetyaram, twam tanna kokosa jeiserem ga gangge werenswebili, ane ga gangge serteswebili, ga gangge terbili, aam temawer tarna uskambarsus jam ge kabwiteyan onabe. ⁷ Ane twam tanna afwer ga ona tini utuboroserem ga jep ge janbili. Tini utuboro jeiserem jam gangge kokosbili jamere unggwan-gwansus, ane twam tanna jep aa je ge kokosbilirim ga matabili, jamer twam tanna kokosa jeiserem aa ge aralakswebili, jam ge taabiyen. ⁸ Jengga twam tanna afwer ga ona waakenaiserem jep ge janbili, ga aa ge kokosbili jamere aa ge unggwan-gwanswebili, ane igiserem ga aa ge taabili. Igi aa jei ge taabilirim, afwer ga 30 gemer ge taabili, ane afwer ga 60 gemer ge taabili, ane afwer jeiserem jemna 100 gemer ge taabili." ⁹ Taterisi jeiserem jem igiserem aa jes syawulsinirim twam tanem temawer jama tabanulurum, Yesus ga balbabili, "Afa aamei imwanabara, taterisi Amna As jam isa saribene, ane waakensusfer isa towaswebili." ¹⁰ Jepga Yesus Jentowai aa galap nwinirim, angtane taterisi aa jei ne sarbisinirim twam tanem temawer, ane angtane dua belas Jei aa jei ne tikwebaatinennerem, jei seyafter ga aa ge jalbili Jemnibe. Yesus ga aane bala Jei taterisi Jei aa jes nasbilirim jem igiserem jep jam towasulmife. ¹¹ Yesus ga balbabili, "Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jemna igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakenaiserem Jemna ibe is mesam kitulmini, jega enggalf aamei gam isa towaswena taterisi jeiserem jemna igiserem. Jengga angtane Ams tikwebaatiyeneiserem, Ai taterisi jem igiserem jes Agam syawulsinirim, Ai jei jem Agam towas-towastababili. ¹² Ai jes gemerserem As towas-towastababili jega: ’Angtane jeiserem bunarsusfer ga sene anggabisini, jengga jam domolyan. Jei sene sarbili, jengga jam ge towaswebiyen. Jengga angtane jeiserem jam ge irfwebiyen etam-etamawer enggalfe, Uwa Sanbagiri Jei etam-etama kapka jemna gam wirtabaipmife.’ " (Yesaya 6:9, 10) ¹³ Jepga Yesus ga balbabili jei, "Aamke seisya taterisi aaiserem jem igiserem je ke ijama sarbiyen? Afa aamei taterisi aaiserem ijama sarbiyeneye, gam jega fomfoma aamei seisya tateris nafsiserem ga isa sarbili waakenfer? ¹⁴ Taterisi jeiserem jem igiserem aa jes syawulsinirim je ga enggam: Makan anggwana twam tanna aa jei fasawolnannaram, jeiba angtane taterisi Uwa Sanbagirmana aa jei gam nasibenenewenaram. ¹⁵ Twam tanna nelep aa jei ge janbilirim, twam tanna jeiserem ga enggam: Angtane taterisi Uwa Sanbagirmana aa jei ne saribenerem, jengga bawasa tatarfer jam gam fortyaram, taterisi jeiserem jem iniwer ga gam amsonmini. ¹⁶ Twam tanna afwer aa jei ge janbilirim ona tunabaraiserem jebe, twam tanna jeiserem je ga enggam: Angtane taterisi Uwa Sanbagirmana aa jei gane sarbilirim, ane tatarfer ga gane taabili ini saaser-saasermer. ¹⁷ Jengga taterisi jeiserem jelem inibe waakenfer jam ne eganulsiyen abakfer. Jepga afa jei kabwaktala jam gane domolaram, afa jei jam gane tamtamtababili aam temawer jei taterisi Uwa Sanbagirmana mes ne taabili, jei taterisi jeiserem tatarfer ga gane dirinswebili, ane ga gangge waraubili etam-etama jelemanaiserem jebe. ¹⁸ Twam tanna afwer aa jei ge janbilirim ona tini utuboroserem jem nenennabe, twam tanna jeiserem ga enggam: Angtane taterisi Uwa Sanbagirmana aa jei ne sarbilirim, ¹⁹ jengga ini jemna jam gangge eseswebamini gwela ogiri aaiserem jem temawer, ane doim temawer. Jei ini enggam gangge folbamini apgal jigala unggwanfer ne damtabif. Jega jem temawer taterisi Uwa Sanbagirmana jei aa jes gane sarbisinirim, ga jem gane mastabili jelem inibe jamere jam ge taabiyen. ²⁰ Ane twam tanna ona waakenaiserem jep aa je ge janbilirim, twam tanna jeiserem ga angtane enggalaiserem: Angtane taterisi Uwa Sanbagirmana jeiserem aa jei gane saribenennerem waakenfer, ane jelem inip ga gane eganulsini waakenfer. Jei waakena tefner ga gane eyebili jamere waakenaiserem gangge taabili, igiserem afwer 30, afwer 60, afwer 100." ²¹ Yesus gamjon ga balbabili, "Afa aamei pelitana jam igama dowolaram gwineme, pelitana jeiserem ga fof igama gaarantena? Ke enggam burwam igama motolsini jega nafa fas jam falbiyen, afa titik gwonap igama gwaalaniwili jam syetasife? Fas, bunar-bunarsus gamyan. Jengga enggam, pelitana jeiserem ga tampata dwafennaber igama gwaalantena jega nafa unggwanfer ga gam falbili, aamei waakenfer ga igama anggasini. ²² Taterisi Uwa Sanbagirmana namwer aas jepserem aa je ge syetabaabisinirim, taterisi jeiserem angtane galap sene towaswebabifi. Ane taterisi angtane jam ne towaswebiyeneiserem, galap je ga sene gweraulmifi. ²³ Afa aamei imwanabara, taterisi Amna As jam isa saribene, ane waakensusfer isa towaswebili." ²⁴ Jepga Yesus gamjon ga balbabili, "Seyafter aamei ijesa sarbabisinirim, je ga waakenfer isa sarbabisini. Uwa Sanbagiri Jei taterisi waakenfer is nasipmini, taterisi seyafter jeiserem waakenfer ga ima sarbabili, ane Jei gamjon ga is golmini. ²⁵ Ga jem temawer, gasa sarbisi waakenfer, aamei taterisi Amna ga fomfom isa sarbili. Gasa sarbisi, aam temawer angtane aa jei sarbisinirim ini waakenaiserem jeme, ane taterisi Amna jam taayibef, angtane jeiserem jei gamjon Taterisi Waakena jem temawer gase sarbisini waakenfersus. Jengga angtane baif gwelaiserem jam sarbisife, Uwa Sanbagiri Jei se amsonbana jemniwer, jei aa jes towaswebilirim bastowaifer jeiserem." ²⁶ Yesus seisya taterisi gamjon ga jes nasbili enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi twam tanem temawer gamserem: angtane twam tanna jelem makanap jam fasawolnanala gamserem. ²⁷ Angtane jeiserem gwinem jam gam tatifi, gwinibener gam irwesa. Nunu jeber-jeber jei aa gemer gwenaram, twam tanna jeiserem gangge kokosbili, ane ga gangge unggwan-gwanswebili. Jengga angtane jeiserem jei teisyena twam tanna jeiserem fomfom gangge etamwebilirim jam ge kokosbife ane jamer aa ge unggwan-gwanswebili. ²⁸ Ona twam tanna aa jep gam fasawolnannaram, ona jeiserem twam tanna ga jener gam gwebabili jam ge kokosbife. Nabal-nabalsusu ga tarnaiserem je gangge subamitye, ane gamjon ga sofaiserem jes gam tosobaipmisini, ane alnaiserem ga gangge subamitye jamere gangge unggwan-gwanswebili. Jewer ga gangge eseberswebili, ane igiserem ga gangge taabili. ²⁹ Ane tannaiserem jam gangge berswebilirim, angtane jeiserem ga gam jela titantanna jeiserem ga gam fulu." ³⁰ Ane Yesus gamjon ga tenebaabili, "Nei bam nesa armansosini nunu Uwa Sanbagiri Jei aa jem nwinirim anggwabura seyafter gemerserem jem Sanbakfe? Nunu jeiserem ga enggam fala taterisi aaiserem jem igiserem Ajes syawulsinirim jes gamserem. ³¹ Nunu jeiserem je ga taterisi eremu tanna aas galserem ga gase fala: Angtane eremu tanna bastantouya gam goltena, ane ga gam tonola onabe. ³² Eremu tan jeiserem safe bastantowaisusu, jengga je jam aa jep gam tonolaram, ga gam kokosbili, ane ga gam etamwena tini unggwandwasfe, tirni jemna mese unggwandusa. Ane tini jeiserem jem tirnibe junu ga gola jep ga gane eyebaabili." ³³ Yesus seisya taterisi unggwanfer jes galserem Jei jes nasipmini enggalfe, taterisi Uwa Sanbagirmana jem gam towas-towastababif. Daamfenna jam gane sarbilirim, gamjon nensaiserem gam golmini. ³⁴ Yesus Jei seisya taterisi angtanefe ga jetefener towas-towastabaipmini. Jei jeber-jeber Jam gam towas-towastababilirim, Jei seisya taterisi ga jetefener gam nasipmini. Jengga Jei jentowaifer angtane Jemna aa jei ne tikwebaatinennerem jebar jam gangge wofobilirim, ane aa jep gangge nwinbenerem, jes jepserem Jei taterisi jeiserem jem igiserem ga gam nasipmini. ³⁵ Nunu dafef jeiserem, Yesus ga angtane Jei aa jei ne tikwebaatinennerem ga balbabili, "Au, nei ganma sofwe fobogana jimwer!" ³⁶ Jepga angtane unggwanfer ga aane mirtebitefala, jei ga aa ge jubiwili atdusabe Yesus aa jep nunitonom. Yesusfaner ga aa ge awelbili foboga jimwer. Afwer atdusa nafsiserem jepga jubiwili, ga aane onsobana. ³⁷ Deye sanbagiri ga aane forobatya, ane muru unggwanfer ga atap denwetya, muru ga aane bowetini atap. Atdusa jeiserem fona amkom je ge tenbitye. ³⁸ Ane Yesus ga atdusa burawer tantena bantal sagabe. Jepga angtane aa jei ne tikwebaatinennerem ga aane irtetena, ga aane bala, "Guru, jas irwe! Aamke teisyena nei amkom nefoma altili?" ³⁹ Jei ga irwena, jewer ga deye yo fobogana ga ofsobana enggame, "Sa tikwe! Jafner is fala!" Ane deye ga aane tiknebana, ane fona jafner ga fala. ⁴⁰ Jepga aa balbabili, "Aam je bafa erne game? Aamke enggam ima gunu, Ai baabeta fas?" ⁴¹ Jengga ga aa ge erebili uskambar, ane jena ga aane tenaaminenne, "Aaje nansa? Deye yo fona taterisi ga Jemna gangge saribene!"

¹ Jepga aa ge forobili foboga jimwer ona bosna Gerasa je. ² Yesus atawer jam aa galap jutetyaram, angtane bwata kapkaiserem aa jei kabwanaram ga bitis tampatawer jela, jei Yesus ga damtana. ³ Angtane jeiserem jei jentowai nwini bitisibe, ane angtane nafsi jei jam ne tafreyan ranteme. ⁴ Angtane jeber-jeber tufa yo tafna jemnaiserem ga aane faarebana ranteme, jengga rantai jeiserem jam gam deksona jamer te. Baabeta jemna unggwanfersus, baabeta angtane nafsiserem jemniwer. Angtane jei masef, jei jam tebayan enggalfe gam tikwefe. ⁵ Gwin gwer jei bitis tarnap, ane taaren tarnap jep gam wofena, ga jep gam gwenanna, ane jena jam gam targabaasnenne tonem. ⁶ - ⁸ Angtane jeiserem jei Yesus bijauwer jam aa galap damtanaram, jei ga nunggiryele Yesusminibe, jepga somwan dumem ga nwintena Yesusem danggonawer, Yesus ga sembatana. Yesus bwat kapka ga bili, "Aamei bwat kabwak, jase totinye angtane aaiserem jemniwer!" Bwat kapka jeiserem ititmer ga nasowena, "Aamei amnibe as Ibas eyeibefe, o Yesus Tane Uwa Sanbagirmana, Uwa Sanbagiri angtane aa jes ne gaartenaram tagarsusup? Bosna Uwa Sanbagirmana, ai Ims bala, Aamei ai ase Ijam tamtamtayan!" ⁹ Jepga Yesus angtane jeiserem ga tenebana, "Imna bosna nansa?" Jei ga tamawola, "Bosna amna ’Unggwanfer’, aam temawer aiba unggwanfer jemnibe." ¹⁰ Ane bwat kapka jeiserem ititmer ga bala, "Safnant, ai as Ijam surbobiyen ai ajama sofwefe ona aaiserem jewer." ¹¹ Otumu jes jepserem twena unggwanfersus ga jep naawena, tumilgals ne terelbaabili. ¹² Ane bwat kapka jeiserem Yesus ititmer ga aane bala, "Ase enggam se balbabi, ’Aamei twenminip sa gwi!’, ane ai ga asa kawetena twenminibe." ¹³ Yesus ga ula jemnaiserem jeter ga taayipmini. Ane bwat kapka jeiserem ga aa ge tobitintye, jepga twenminip ga aa ge kabwitena. Twena jeiserem ga enggammer 2.000. Twena jeiserem ga aa ge nunggirbili, ane ga aa ge janbiton obinfiwer jamer foboganabo, jepga aa ge albitini, jamer futu. ¹⁴ Jepga angtane twena aa jei ne gerebaabisnennerem, ga aa ge nunggirbili, ane taterisi ga aane nasbinenne kotanap ane taman-tamnap ona jep gemerserem. Jepga angtane ga aa ge jalbili enggalfe, aa je etamwenaram jeiserem gam ne domolf. ¹⁵ Jei ga aa ge jalbili Yesusminibe, jei angtane jeiserem ga aane damtana jep nwini. Bwata kapka gwanan unggwanfersus jem kabwana, jengga namwer jei mes waakensona. Jei fene gamjon ga mes kabwabili, ane ini ga mes waakenswebana. Ane angtane jeiserem aa jei ge forobuwetyaram, jei seyafter ga aa ge erebili, aam temawer jei enggam ge towaswebili baabeta Yesusmana ba unggwandwasusum. ¹⁶ Angtane jei jener aa jei ne domolaram jeiserem aa je etamwenaram, jepga angtane nafsiserem jep ga aane nasipmini. Angtane bwat kapkaiserem aa jei kabwanaram, ane twena unggwanfer jeiserem jem temawer ga jes ne nasbili. ¹⁷ Jepga Yesus ga aane bala, ga aane balbalwena enggalfe Yesus ona jemnaiserem Jam mirtetefalf. ¹⁸ Yesus aa gemer juswenaram atdusabe, angtane bwat kapka gwanan aa jei kabwanaram, jei Yesus ga bala, "Yesus ai Ims gam onsobaf." ¹⁹ Jengga Yesus Jei bai. Jei angtane jeiserem enggam ga bala, "Se warau ilem jenap, ane ilem afelen mesnaiserem jemnip. Tuhan seyafter is jes eyeibenerem ibe, ane Jei is fomfom gam nesiktene, jeiserem ga is nasipmini." ²⁰ Angtane jeiserem ga sofna, jepga towaiwulu jam nasbinennefe ona Sepulu Kota je, seyafter Yesus aa jes eyeibenerem jebe. Ane angtane seyafter ga aa ge bitbitwebili. ²¹ Yesus gamjon ga sofna atame jamere foboga jimwero. Ane fobogana jem eyep angtane unggwanfer ga aa ge betwebili Yesusem tarnabe. ²² Angtane bosna Yairus ga jela. Jeiba angtane sanbak jena angtane Yahudimana aa jep ge betwebuwefaram. Jei Yesus jame aa galap damtanaram, jepga jei jener ga jena Jem tof tarnabe enggalfe jei aa jes bilirim Yesusfe gam bilibef. ²³ Jepga bala, "Tane yafma amna bwernabara, amkom fom tere. Jase jal, tafna ga Is tosobuniwitye jem sagabe, jega jei gase waakenswena, gase gwena." ²⁴ Yesus angtane jeiserem jebar ga aa ge gwina. Angtane unggwanfersus ga aane onsobana, jena aane bafsosowenaram afwer taamwer, ane afwer taamwer. ²⁵ Angtane unggwanfer jeiserem jem nenennabe, wini aasaje ga bwernabara. Aawis fwa jemna jeber-jeber domolwena tahunu dua belas. ²⁶ Jei doini jemna seyafter doktorf kitulbowena, obata mese ane apgal jigala nafsi jem armantababili enggalfe jei bwernawer jem gam waakenswef. Jengga masef, jei jam waakensweyan bwernawer. Bwerna jemna jeber-jeber unggwandwaswebili. ²⁷ Jei taterisi Yesusem temawer mesam sarbili. Jei angtane unggwanfer jebar ge wofebili, ane Yesus ga gwetmanwebaasini duruwer, fene Jemna ga ensobana. ²⁸ Jei enggam gunu jelem inibe, "Ai fene Jemna tefner as ensobana, ai samfer ga as waakensona." ²⁹ Jes jeberserem aawisi ga tikwebili, jena ga enola bwerna jemna barwebilirim. ³⁰ Yesus ga towaswena, "Wa, baabeta Amna mes totinyel." Jega jem temawer Jei ga irfwena, jepga angtane unggwanfer jeiserem ga tenebaabili, "Fene Amna Ase nane ensobana?" ³¹ Angtane aa jei ne tikwebaatinennerem ga aane bala, "Aamei tousam angtane unggwanfersus nei nes jei ne baftabinennerem! Jeje bafa Aamei ga Imasef tenna, ’Fene Amna Ase nane ensobana?’ " ³² Jengga Yesus angtane jeiserem ga angbasnenne enggalfe jam damtafe, jeiserem nane eyebili. ³³ Wini jeiserem ga jam erne, ane ga egegwena, aam temawer jei mesam towaswena ga fom etamwena jem tifinibe. Jei ga jela Yesusem tarnap, ga nwintetya somwan dumeme, ga nasbaibene seyafter aa je etamwenaram jamere jei aa waakensona. ³⁴ Jepga Yesus wini jeiserem ga bili, "Am tane, aamei Ai As imes tebana waakenfer, jega jem temawer aamei gase waakenswe. Gase sofwe waakenfer." ³⁵ Jes jepserem Yesus ga gemer nasowena, angtane Yairusem jenawer aa jei ge jalbilirim, ga aa ge forobitye, Yairus ga aane bala, "Tane imna futu. Aamei Yesus gamjon ijam balyan im jenap jam gwife." ³⁶ Yesus jame aa sarbabilirim, jengga Jei jewer Jam irfweyan. Jei Yairus ga bala, "Aamei ipsam ernerem! Amse sarba, Amter is tebana." ³⁷ Jepga Yesus angtane nafsi ga balbabili, "Ai Ase ijama tikwebaatiyen. Jengga Petrus, Yakobus, ane Yohanes osona Yakobusmana, jei Ai ga Ase jei sene tikwebaatini." ³⁸ Jei jame aa galap ge forobilirim Yairusem jenabe, Yesus angtane unggwanfer jeiserem ga damtabili, jei jam ge syebuwena, jei gobweram jam ge tayebinenne. ³⁹ Yesus ga kautitun, ane ga balbabili, "Aamei ibafa syesyawena? Ane jeje bafa aamei gobweram ga imasefa tayenanna? Tane jeiserem jei jam teryen, jei nustana." ⁴⁰ Jengga jei Yesus jam ne bweraltana, aam temawer jei enggam ge towaswebili tane yafma jeiserem mes tere. Ane Yesus angtane jep aaiserem balbabili jam ge tobitinife. Jepga tane jeiserem jemna ene yo jeta, ane angtane nawer-ningna aa jei ne tikwebaatinennerem, jei seyafter Jebar ga aa ge kabwitena mwonabe, tane aa jep falitonom. ⁴¹ Jepga Yesus tane jeiserem tafna jemna ga taayibitena, ane Ibrani olem ga bili, "Talita kum," afa nem olem ga enggam, "Wai tane, Ai ims bili, jas irwe!" ⁴² Ane jes jeberserem tane jeiserem ga irwena, ga wofena. Umuru jemna tahunu dua belas. Angtane seyafter jep aaiserem jei ga aa ge bitbitwebili. ⁴³ Jengga Yesus angtane seyafter jeiserem ititmer ga balbabili enggame, "Angtane nafsi afa ijama towastayan taterisi aaiserem jem temawer." Jepga balbabili, "Tumilgal sa golbi tane aaiserem jebe."

¹ Yesus tamna jeiserem ga mirsotefala, angtane Jei aa jei ne tikwebaatinenewenaram jebaner seyafter ga aa ge sofobili tamna Jelemanaiserem jewer, jamere aa ge forobili. ² Nunu Sabateme, nunu angtane Yahudimana aa jem ge nwinbisiwefaram, Yesus ga nunu jeiserem ga jena angtane Yahudimana aa jep ge betwebuwefaram jebe ga jem kawetena. Jepga towaiwena Jam towas-towastababife. Angtane jam aa galap ne sarbaibaasinirim Jei aa jes towas-towastababilirim, angtane aa jei ge sarbisinirim jei ga taterisi jeiserem jam ne bitbitwebili. Ane enggam ga aa ge gubili, "Taterisi seyafter aaiserem Jei fwer kitulu? Tousaiserem aa jei fonggala Jemnip jeiserem? Nei enggam ne towaswena, Jei aa jes eyebilirim, jeiserem jengga Uwa Sanbagiriserem Jener gam eyebili. Yesus, Jei nansa? ³ Jei ke angtane jena aa jei eyebaabuwenaram? Jei ke tane Mariamana, Jem oson mesna ga Yakobuso Yoses, ane Yudas ane Simon? Jemna osona yafontowai aasaje nebara nwini." Angtane jeiserem gam aa jei ge gubilirim, jei Yesus jam ne sarbayan, ane jam ne tebayan, ane jep ga jei ga aane nasbana. ⁴ Jepga Yesus ga balbabili, "Afa angtane nabi Uwa Sanbagirmanaiserem jei aa jes gam nasbilirim, angtane seyafter gane sarbana. Jengga angtane nabif gwelaiserem jelem tamnabe, angtane jepmanaiserem ane jelem afelen mesna, ane ene jeta, ayana osona jemna, jei jam ne sarbayan." ⁵ Yesus Jei bwembwema masef jep Jam eyebiyen, aam temawer angtane jepmana jeiserem jei jam ne tebayan. Jengga angtane bwernabara unggwanferyan Jei ga jetefener waakentababili, Jei tafna aa galap bunulminiwilirim jem sagabe. ⁶ Yesus Jei Jam bitbitwena, aam temawer angtane taterisi Jemna jam ne taayibeyen. ⁷ - ⁹ Yesus angtane dua belas Jei aa jei ne tikwebaatinennerem ga jenbebili Jemnip ge jalbife. Yesus Jei baabeta ga golmini enggalfe, jei bwat kapkaiserem jem gane surbobif. Yesus ga balbabili, "Gasa sofwe nawer-naurem, angtane jam towas-towastababinenefe! Dum, sandal, saf isa erbili, ane fene daamfen-daamfennem isa erbili. Fon mese, tumilgal, doi ijama erbiyen! ¹⁰ Tamna seyafter gemerserem aamei jep igama fornaram, jena ga daamfennater aamei ga jep igama nwini. Nafis jenap ijama tatiyen jamer aamei jewer igama sofwa. ¹¹ Afa aamei jam igama fornaram tamnabe, ane angtane tamna jepmanaiserem is jam ne taamiyeneye, ane aamei is jam ne sarmiyeneye, aamei tamna jeiserem jewer ga jam igam ge sofwa tamna nafsiserem jewer. Jam igam ge sofnaram, tufa onabaraiserem ga jam is ge tentebaabisini, jega angtane tamna jeiserem jep aaiserem jei gam gangge towaswebili, je kapka jei aamei is jam ne sarmiyen." ¹² Angtane aa jei ne tikwebaatinennerem, jei ga aa ge sofobili. Jei angtane enggam ne towastababinenne, "Gasa tikwe etam-etamawer, waakenaiserem ga jetefener isa eyebili!" ¹³ Jei bwat kapka unggwanfer ne surbobinenne, bwat kapka angtaneminip aa jei gam nunitonom. Jei angtane bwernabara unggwanfer ga aane gwebabili minyakeme, ga aane waakentababili. ¹⁴ Raja Herodes jeiba angtane sanbakef aa jei gwenaram ona Galileya je, ane jei taterisi Yesusem temawer ga sarbili. Angtane unggwanfer jes ne nasbinenne Yesus aa jes eyebilirim waakena, ane aa jes towas-towasulminirim. Angtane afwer enggam ga gubili, "Yohanes Pembaptis mes irwa terewer, jega jem temawer Yesus bwembwem ga eyebili." ¹⁵ Jengga angtane nafsi jei enggam ge gubili, "Nabi Eliya mes warautya." Angtane afwer enggam ge gubili, "Angtane nabi mes fortya enggala nabi fwatermana galserem." ¹⁶ Jengga Raja Herodes jeiserem jam aa galap sarbilirim, jei enggam ga gunu, "Yohanes, duka ai ajes targabaasinintim, jei gamjon mes irwa." ¹⁷ - ¹⁸ Gwanan jes galapserem Herodes jei wini osonemana gam gula. Osona bosna jemna Filipus, ane wini jeiserem bosna jemna ga Herodyas. Yohanes Pembaptis Herodes ga bala, "Jeiserem kapka, aamei wini jeiserem ijewer gularam." Jega jem temawer Herodes jei angtanes baftabili Yohanes ne tebaf, ga sene daaferna, ane bwiyip ga sene gaataantena. ¹⁹ Herodyas ga Yohanes inip ga getena, ga gunu, "Yohanes jam se tere!" Jengga masef, jei kapkaiserem Yohanesfe jam eyebiyen, ²⁰ aam temawer Herodes jei Yohanes jam erebene. Jei tousa Yohanes jeiba angtane waakena, jei angtane Uwa Sanbagirmana. Herodes jei Yohanes waakenfer ga gerebana, aa gunu, "Ai bai Yohanes jam terfe." Herodesmana ini saaser-saaserfer folbana Yohanes jam sarbasife, jengga jei aa jes sarbisinirim, jei teisyena jei fwersaiserem ga jese taabili. ²¹ Umwef ga, Herodyas nele ga damtana Yohanes jewer munbofe. Nunu Herodesmana aa jep surulurum, Herodes masara eyebili. Pegawai jemna, angtane sanbak-sanbaka ginanggwamanaiserem jei mese, ane angtane sanbaka ona Galileyaminip, angtane seyafter jeiserem ga aa ge forobitye. ²² Tane yafma Herodyasmana ga jela, ane ga ginari-ginarisona. Herodes ane angtane seyafter gemerserem ini jemna saaser-saaserfena. Jepga Raja Herodes tane yafma ga bili, "Aamei ibas bili, ai as jamer is bala. Ai ibe isas golbili aamei ijes bilirim." ²³ Raja Herodes jei jena ga enggam gaarstenanna, "Apgal jigala aamei ijes bilirim, ai isas golbili ibe. Afa ona amna nenennap is balaram ai ip isa ajam gaarbife ibe, ai isas gaarbili ibe." ²⁴ Jepga tane yafma jeiserem ga gwina, ene ga tenaabili, "Ai basas bilibene?" Eneserem ga bili, "Enggam is bala, ’Abe Yohanes Pembaptisem duka, jega ai gam as towaswena enggame Yohanes mes tere.’ " ²⁵ Jei tatar-tatarmer ga aa gwina Raja Herodesminibe, ane ga bala, "Ai ims bala, abe duka Yohanes Pembaptismanaiserem as jes is golbi pirnibener." ²⁶ Raja jei ini ga jenbana uskambar, aam temawer jei gwanan jena mes gaarstenanna angtane unggwanfer jepserem jem tarnabe, ane afa jei duka Yohanes Pembaptismanaiserem jam golbiyeneye jei gase sefersona. Ane jei bai jam ayebife jei aa jes bilirim yafma jeiserem jebe. ²⁷ Ga jem temawer, jes jeberserem Herodes jei ginanggwa daamfenna ga bala, "Se gwi! Yohanesmana duka ga is gwirinyele amnibe!" Ginanggwa jeiserem ga aa gwina, Yohanesmana duka targabana bwiyibe. ²⁸ Ane duka jeiserem pirnibener ga gwirinyele, tane yafma jeiserem jepga aa golbili, ane tane yafma jei ga enef ga golbili. ²⁹ Jepga angtane Yohanes aa jei ne tikwebaatinennerem jei taterisi jeiserem aa galap ne sarbilirim, ga aa ge jalbili, Yohanesem futunu ga aane gaartena, ane ga aane girinfele, bitisip ga aane tirnunu. ³⁰ Angtane Yesus gwanan aa jes baftabilirim enggalfe Taterisi Waakena gane nasbinennef, jei gamjon ga aa ge waraubifeltye Yesusminibe. Ane jei Yesusfe ga aane nasbaibene seyafter jei aa jes ne eyebaabilirim, ane jei aa jes ne towas-towastababilirim. ³¹ Jepga angtane unggwanfersus Yesusminip ga aa ge forobuwetya. Angtane unggwanfersus aa ge forobuwetya Jemnibe, gamjon jam ge sofobuwena, jamere Yesus ane angtane Jei aa jei ne tikwebaatinennerem jei dwona jam ne domolyan jam twenfe. Jega jem temawer Yesus aa balbabili angtane aa jei ne tikwebaatinennerem, "Au enggam neya gwina taman tetenap, gwanan jep ganma nwintowai." ³² Atem ga aa ge awolbili jimwer jamer tampata tamanfennap. Tampata jeiserem jebe angtane jam nwinyen, taman teten. ³³ Angtane unggwanfer tamna seyafter gemerserem jewer jei mes ne damtabili tampata jeiserem aane mirsotefalaram. Jei mes ge towaswebili angtane aa jei ge sofobilirim, jeiba Yesus ane angtane Jei aa jei ne tikwebaatinennerem. Jega jem temawer jei tamna jemna seyafter ga aane mirsotefala, ga aa ge nunggirbifele jamere aa ge forobitne, Yesus ane angtane Jei aa jei ne tikwebaatinennerem nalef jam ge batobiyen. ³⁴ Atdusa jam bitef batuwili, jepga Yesus ga jutetya, jewer ga angtane unggwanfer ga damtabili. Yesus angtane jeiserem nesiktababili, aam temawer jei enggala dombana galserem, angtane jei aa jei gerebaabisneneleiserem fas. Jem sanbakf jei nwiniserem fas, jei gerebaabisnenefe. Jega jem temawer Yesus ga towaiwulu taterisi nafis-nafsi jam towas-towastabaipmife jebe. ³⁵ Dafef angtane Jei aa jei ne tikwebaatinennerem Yesusminip ga aa ge jalbili, ane ga aane bala, "Tampata aaiserem tamanfenna, ane ona ga jam gigitsona. ³⁶ Angtanes balbabi jei gangge sofobi. Jei tumilgala ga sene armantababili, desa-desanap ane taman-tamnap ona jep gemerserem." ³⁷ Jengga Yesus ga tamawolbaabili, "Tumilgala jebe aamei sa kitulmi!" Jei ga Yesus gane bala, "Aje fomfoma asa sofwa tumilgalfe, ane tumilgala jeiserem ga nesa kitulmini jebe? Hargana unggwandusa, 200 doini perak, ane doi nemna bastowaifer." ³⁸ Yesus ga balbabili, "Rotini imnibe fomera? Sa gwi ga isa damtabitne!" Jei ga ge gubili, ane rotini ga aane damtabitne, gamjon ga aa ge waraubitne, Yesus ga aane bala, "Rotini amnibe tafna gwiri, jigala ga naura." ³⁹ Jepga Yesus angtane aa jei ne tikwebaatinennerem jei ga balbabili, "Angtane aaiserem jesa balbabi gangge nwinbete mulumsamer, kakatar ti alna ikikini sagap." ⁴⁰ Jepga angtane ga aa ge nwinbitena, angtane jeiserem enggam ge nwinbenenne, daamfen mulumu angtane jep afa seratus afa lima pulu jep ga gemer gangge nwinbene. ⁴¹ Yesus Jei rotini tafna gwiri ane jigala naura ga tebabili, ane jewer ga taman waaken-girip ga anggaswena, ane Uwa Sanbagiri ga bala, "Ase samfer gulbana." Yesus Jei rotini ga bitabaabisini, ane ga kitulmini angtane Jei aa jei ne tikwebaatinennerem jebe enggalfe, jei gam ne syenulminenef angtane unggwanfer jeiserem jebe. Ane Jei jigala naura jes mese bitamisini angtane seyafter gemerserem jebe. ⁴² Angtane seyafter jep gemerserem ga dwena jamere unubuguf. ⁴³ Gamjon ga roti bitbiti ane jigal bitbiti ga aane dupdupbulu, burnabara ga dua belas. ⁴⁴ Anggwana rotini jep aa jei ne tombaabilirim, unggwanfer ga 5.000 anggwa. Wi tane seyafter jebar jep aa jei ne dwenaram, jam ne ertebiyen. ⁴⁵ Jes jeberserem Yesus ga balbabili angtane Jei aa jei ne tikwebaatinennerem, "Sa jusya atap, ane aa ga danabili tamna Betsaidaminip fobogana jimwer." Jewer Jei ga balbabili angtane uskambar, "Aamei jasa warau!" ⁴⁶ Ane angtane uskambar jeiserem aa galap ge waraubilirim, Yesus Jenfentowai ga tawena otumube, Uwa Sanbagirfe sembayang jam gwebabafe. ⁴⁷ Jewer ga ona safe gemer gigitswenaram, angtane aa jei ne tikwebaatinennerem atem aa jei ge sofobilirim, jei ateme foboga nenennap ge awelbinenne, jengga Yesus Jei Jenfentowai onaber fitna. ⁴⁸ Yesus Jei aa damtabili awelna jemna falam atdusa jeiserem jam ne gwebinenelebe, aam temawer nindaya uskambar. Jei masef jam ge sofobiyen, aam temawer nindaya unggwanfersus ne gwebana. Ona fom nafwela jengga gwini gemer, Yesus jemnip ga jela foboga sagap wofentena. Jei jamer sofwa, Jei safe Jam ayebaabinif. ⁴⁹ Jei Yesus jame aa galap ne damtanaram Jei fo sagap wofentena, jei enggam ga aa ge gubili, "Jeiba spoksam!" ⁵⁰ Jei seyafter Yesus mes ne damtana, ane jega jem temawer jei seyafter uskambar jam ge erebili. Jengga jes jeberserem Yesus Jei ga balbabili jei, "Sa tikwe, ipsama ernerem! Ai aare." ⁵¹ Yesus ga jusana atdusa jem sagabe, ane bwona ga aane tikwebana. Angtane aa jei ne tikwebaatinennerem jei ga aane bitbitwebili. ⁵² Jei safe mes ne damtana Yesus Jei rotini tafna gwiri aa jes bitabaabisinirim angtane 5.000 jep aa jes syenulminirim, angtane Jei aa jei ne tikwebaatinennerem jei jam ge towaswebiyen enggame Yesus samfer bwembwema gam eyebili. ⁵³ Yesus ane angtane Jei aa jei ne tikwebaatinennerem aa galap ge forobilirim foboga jimwer, ona ga Genesaret ga jep ge batobili, jepga atdusa gane daktabisini. ⁵⁴ Atawer aa ge jubitetyaram, angtane ga aa ge anggabili enggame aa jei fortyaram Jeiba Yesusam. ⁵⁵ Jepga angtane aa ge nunggirbifelwena ona jeiserem jebe, ane angtane bwernabara tikarabaner ga aane towaitabili jam ne erbiyelfe Yesusminibe. Afa angtane jeiserem enggam jam gangge sarbilirim, "Yesus Jei mes fortya tamna nemnaiserem jebe.", jei angtane bwernabara ga gane erbifeltye tampata Yesus aa jep gam nwinirim jebe. ⁵⁶ Tamna seyafter gemerserem Yesus aa jep gam wofnaram, afa tamnap, afa kotanap, afa taman nenennap, angtane jep gangge forobitye, angtane bwernabaraiserem pasarap ga gane aftabifelwena. Jep ga jei Yesus ga gane aber-aberwobana enggame, "Ai ke samfer fena Imna fwesapfener as ensobana?" Ane angtane bwernabara seyafter fene Jemna aa jei ne taamiwenaram, jei ga aa ge waakenswebili.

¹ Angtane safna Farisimana ane guru-guru Hukumu Nabi Musa jes tulistababilim aa jei ne towas-towastababuwenaram jei mese, jei ga aa ge jalbili kota Yerusalemwer enggalfe, Yesus jam ne damtaf. ² Jei angtane Yesus aa jei ne tikwebaatinennerem aane damtabili, jei aa galap dwenaram, angtane afwer jei nabala tafna jam ne wirtabaabiyen. Ane jei ga aa ge gubili, "Jeiserem ba kabwaksusu! Jei nele waakena agama nemna jam ne onsobiyen." ³ Angtane safna Farisimana jei mese anggwabura Yahudimana afwer seyafter gemerserem, jei osiri fwatermanaiserem agama jemna waakenfer ga jei ne onsobili. Agama jemna ga enggam: Angtane nalef jam twenyan, gwanan ga tafas gam wirsona, nele agama jemna jes gamserem. ⁴ Ane jei pasarawer jam gangge waraubitnerem, jei tumilgala aa jes gane armantababilirim jei gwanan ga jam gane wirtabaabili, nele agama jemna gamserem. Ane osiri nafis-nafsiserem unggwanfer, asal-asala jemna aa jei ne towas-towastababuwefaram, jes mese jei jes ne onsobuwena jeber-jeber. Ga enggam, jei pirin mese, mok, ane balangan ga jam gane wirtabaabili, nele agama jemna gamserem. ⁵ Angtane safna Farisimana ane guru-guru Hukumu Nabi Musa aa jes tulistababilim aa jei ne towas-towastababuwenaram, jei Yesus ga aane tenebana, "Jeje bafa angtane Aamei Is jei ne tikwebaatinennerem osiri asal-asala nemna aa jes towastababilim, jeiserem jei jam onsobiyen? Jengga jam twenabe tafa kabwakmer gane dwena? Game kapka." ⁶ Yesus tamawolbaabili, "Aameiba angtane akar-akarem ijeya gwenaram! Nabi Yesaya bunarsusfer enggam mesam nasbil im temawer: ’Uwa Sanbagiri enggam gunu, anggwabura aaiserem Ase aarememfener gane gaartena, jengga ini jemna bijua Amniwer. ⁷ Jei Ai As jewer ne pujitenerem, jam sege elbesini, aam temawer taterisi jei aa jes ne towas-towastababuwenaram, jei enggam ne balbabili taterisi jeiserem Amna, jengga taterisi jeiserem Amanyan, taterisi jeiserem angtanemana.’ (Yesaya 29:13) ⁸ Taterisi Uwa Sanbagiri aa jes balbabilim jeiserem ga ijama taabiyen, jengga osiri angtane fwatermanaiserem ga ijesa taabili." ⁹ Yesus gamjon ga balbabili, "Taterisi Uwa Sanbagiri aa jes balbabilim aamei baife ijesa gweyibenerem, taterisi jeiserem aamei imsa towaswebili, jengga aamei osiri fwatermana asal-asala ilemanaiserem ga ijema tefnera onsobili. ¹⁰ Nabi Musa mesam gul, ’Aamei ga waakenfer isa nwini iye yo uwa jebar.’ Ane jei gamjon aa gul, ’Tanna iye yo uwa kabwakfer aa jei gam gitminirim, tane jeiserem galap gane tamtamtana jamer futu.’ ¹¹ Jengga aamei ga enggam ima towas-towastababili, afa angtane jam gam gitminirim ene afa jeta, ’Ai bagal jigals as golmini ibe, ai apgal jigala jeiserem ai korbanf golf, Uwa Sanbagirfe ajes gulbaf.’ ¹² Afa tanna jei ene jeta jes gemerserem gam jam gam gitminirim, gam jega aamei enggam syefer ima towas-towastababili, tanna jeiserem jei apgal jigala gamjon jam golmiyen ene yo jeta jelemanaiserem jebe. ¹³ Gam jega aamei Taterisi Uwa Sanbagirmana ga ijama firulbaanuwili, ane osiri fwatermana asal-asala ilemanaiserem ga jetefener ima towas-towastababili. Ane kapka jam eyebiliserem unggwanfer jes galserem ga ijesa eyebaabili." ¹⁴ Jepga Yesus ga angtane unggwanfer jeiserem ge jenbebili Jemnip ge jalbife. Jei enggam ga balbabili, "Aamei seyafter gemerserem, Amsa sarbasi! Aaiserem ga waakenfer isa sarbisini. ¹⁵ Tumilgala afa fas angtane aa jes gane tombaabilirim, tumilgala jeiserem angtane jam kabwaktayan. Fas, jengga etam-etam kapka iniwer aa jei gam tawetyaram, jeiserem angtane ga je gam kabwaktana. (( ¹⁶ Afa aamei imwanabara, taterisi Amna As jam isa saribene, ane waakensusfer isa towaswebili.")) ¹⁷ Yesus angtane unggwanfer jeiserem gam mirtebitefala, jenap ga kawetena. Ane angtane Jei aa jei ne tikwebaatinennerem ga aane tenebana seisya tateris jeiserem jem temawer. ¹⁸ Yesus ga balbabili jei, "Aamke ijama saryan? Angtane aa jes gam tumilirim, tumilgala jeiserem angtane jam kabwaktayan. ¹⁹ Tumilgal jeiserem jeke enggam inip gam kautena; fas, jengga witifinip. Ane unu gamserem ga gam nana witifiniwer." Yesus jes gamserem gam aa jewer gunurum, Jei enggam gunu tumilgala seyafter ga waakena. ²⁰ Yesus gamjon ga balbabili, "Angtanem iniwer aa je gam tawetyaram, jeiserem angtane ga je gam kabwaktana. ²¹ Angtanem iniwer taweyalaiserem ga enggala aas galserem: ula kapka angtane gemer aa jei gam gunurum jelem inibe; angtane naura jei wi anggwayan makanap ge dorwena; jigala jam komkomulsiliserem; angtanes munbolo; maaryens gam gwebili; ²² angtane ini unggwan-giri aa jemanem gam folbanaram galgala unggwanfer jam damtabife; kapkaiserem jes gam eyebili; angtane jam gam afaf-afaftana; maaryens gwelaiserem angtanem nwenabe; ini mamar-mamara falbalaiserem; angtane nafsi nimnafener gam bala; ina jam gaartela; angtane teisyenaiserem waakenaiserem jes eyebiliserem ane kapkaiserem jes eyebiliserem. ²³ Kapka seyafter jeiserem angtanem iniwer taweyalaiserem, ane jeiserem ga angtane je gam kabwaktana." ²⁴ Yesus ona Galileya ga firsona, ane ga sofna ona kota Tirusem gwetmanap aaiserem jewer. Yesus Jei jenap nwini, ane Jei bai angtane jam ne towaswebafe. Jengga Jei masef, Jei Jam sewesiyen. ²⁵ - ²⁶ Ona jeiserem jebe, wini aasaje ga jep nwini, ona Fenisya propinsi Sirya je aa jei surulum. Jei angtane Yahudimanyan, jei Yunani olem gam nasowena. Wini jeiserem taterisi Yesusem temawer mes sarbili. Jei jame aa galap sararam enggame, Yesus mes fortya ona jeiserem jebe, jei tatarmer ga jela Yesusminibe. Jei jener ga jena Yesusem tarnabe jam sembatafe. Tane yafma jemna bwat kapka aa jei kabwilirim, jei jenap nwini. Wini jeiserem Yesus enggam ga bala, "Uwa, bwat kapka tane amnaiserem jemniwer jam Is surbili!" ²⁷ Yesus ga gunu, "Gwanan tane unu jei ge falbami. Gam jam naaweyan, tumilgala tanemana ga gwalaf gane fasawolmini." (Taterisi jeiserem jem igiserem ga enggam, Yesus Jei anggwabura Yahudimana jes batobaabili danna, angtane Yahudimanyan jei amnup.) ²⁸ Wini jeiserem ga aa tamawola, "Uwa bunar, jengga gwalna meja gwonap jei tumilgala tomna tanemana jei ne tombaipmini." ²⁹ Jepga Yesus ga aa tamawolbili, "Samfer, aamei bunarsusfer im gutena. Jega jem temawer, Ai tousa aamei As im tebana. Gase warauwa ilem jenabe, bwat kapka jeiserem taneminiwer mes gwisini." ³⁰ Wini jeiserem jenabe aa galap fornaram, tane bwernabara jeiserem jep domolswena, tikar sagap tantena. Jei jafner tanna bwerayan, bwat kapkaiserem jei mes totifele. ³¹ Yesus ga kota Tirus aa firsona, kota Sidonwer ga sofna. Jei ga ona Sepulu Kota ga jeter ayenni, ane Foboga Galileyawer gamjon ga warauwa. ³² Jepga angtane imwana mutuserem, jei jam nasowelabe ga bastowaifer gam nasowena, angtane jeiserem ga aane aftafala Yesusminibe. Ane angtane jepmana gemerserem Yesus gane bala, "Uwa, tafna Imna se tosobaaniwi angtane aaiserem jem sagabe, jam waakentafe." ³³ Jepga Yesus ga angtane imwa mutu jeiserem ga aa aftafala angtaneminiwer, jepga Yesus ga tafna naura imwa mwonap ga aa kasobantena, gamjon maka tafa bolap ga sirntena, maflamap ga batabatena. ³⁴ Yesus gamjon winsiwer anggaswena, ini ga garstaabona, aam temawer jei angtane jeiserem gam nesiktene. Ane Yesus ga bala, "Efata!" afa nem olem, "Se waakenswe!" ³⁵ Jes jeberserem angtane jeiserem ga sara, ane maflama weren-wernaiserem jeme waakenfer ga nasowena. ³⁶ Jepga Yesus ga balbabili, "Taterisi aaiserem ijama nasipmineneyen angtane nafsife!" Jengga Yesus safe gam nasbabisiwena, jei uskambarsus ga aane nasbinenne taterisi Yesus aa jes eyebilirim jem temawer. ³⁷ Jei jam ge bitbitwebili, ane ga aa ge gubili, "Taterisi jeiserem jeje fomfoma? Seyafter Jei aa jes eyebilirim, je waakensusu. Angtane imwa mutuserem jei waakenfer mes ge sarbisini. Angtane gwanan jam ge nasbaweyanaiserem, jei mes ge nasbawena!"

¹ Jes galapserem angtane uskambar aa jei ge betwebilirim, jemna tumilgala bar. Ane Yesus ga angtane aa jei ge tikwebaatinennerem ga aa jenbebili, ane ga aa balbabili, ² "Ai angtane aaiserem aa jei ge betwebilirim aafe Ajam nesiktababili, aam temawer jei Abar Aya nwinirim nunu ga nawer-ningna, ane tumilgala jemna mes ge barweipmini. ³ Ai bai jei wisimer ge waraubafe jelem jenabe, tifni nelep galap sege werenswebamini. Angtane afwer tamna jemna bijua." ⁴ Angtane aa jei ne tikwebaatinennerem Yesus ga aane tenebana, "Aa je fomfoma ona tamanfennabe angtane rotis golmife jamer unubuguf?" ⁵ Yesus ga angtane aa jei ne tikwebaatinennerem ga aa tenebaabili, "Rotini imnibe fomera?" Ane angtane aa jei ne tikwebaatinennerem ga aane tamawolbana, "Rotini amnibe tuju." ⁶ Yesus ga angtane unggwanfer jep gemerserem ga aa balbabili, "Onnap sa nwinte!" Ane Yesus ga rotini jeiserem ga aa kitultena, Uwa Sanbagiri ga bala "Ase samfer gulbana." Ane ga aa bitabaabisini, ane ga kitulmini angtane Jemna aa jei ne tikwebaatinennerem jebe enggalfe, jei gam ne syenulminenef angtane unggwanfersus jeiserem jebe. Ane jei ga aane kitulmini angtane seyafter jep gemerserem. ⁷ Angtane aa jei ne tikwebaatinennerem jegme jigala bastantouya gane gwirni, unggwanferyan. Yesus Uwa Sanbagiri ga bala, "Ase samfer gulbana." Ane Yesus ga angtane aa jei ne tikwebaatinennerem ga aa balbabili, "Jigala aaiserem jasa syentabaabi!" ⁸ Jepga aa dwena jamer unubugufsus. Angtane jep aa jei ne dwenaram unggwanfer ga enggammer 4.000. ⁹ Ane tumilgal tomna angtane aa jei ne tikwebaatinennerem ga aane dupdupbulu, burnabara ga tuju. Ane Yesus ga aa balbabili jei, "Gasa sofwe!" ¹⁰ Ane jes jeberserem Yesus ga aa juwili atdusabe, ane angtane aa jei ne tikwebaatinennerem Jebar ga aa ge sofobili ona Dalmanutaminip. ¹¹ Jepga angtane safna Farisimana afweraiserem jei Yesus gane tenebawena enggalfe jei Yesus ne unggwasbaf. Jei enggam ne bala, "Yesus, Aamei gwanan bwembwema ap se eyeipmi, jega enggalf ai agma towaswef Aamei Uwa Sanbagirminiweram jela." ¹² Yesus ini ga garstaabona, ane ga tamawolbaabili, "Aamei ijeya gwenaram namwer aa jep falaram, aamei bwembwema ibafa bili? Ai aamei is Ajam balbabili, bunar-bunarsus Ai bwembwem is Ajam golmiyen ibe." ¹³ Jepga Yesus ga mirtebitefala, atap ga juwili, ane jewer ga sofwa fobogana jimwer. ¹⁴ Angtane Yesus aa jei ne tikwebaatinennerem jei ga rotini jam ne dirinswebabili gemer ne gwirinfe. Rotini atap ga daamfenna tefner gane gwetaantena. ¹⁵ Jewer ga aa ge sofobili, Yesus ga aa balbabili, "Aayai roti tan angtane Farisimanaiserem, ane Raja Herodesmana, je kapka!" ¹⁶ Angtane aa jei ne tikwebaatinennerem jena ga aane gitminenne, "Yesus Jei nei nese roti tanem temawer balbabili, aam temawer nei rotini nemsa dirinswebili nejama gwirinyen." ¹⁷ Yesus Jei fwater towaswena angtane aa jei ne tikwebaatinennerem jena aa jes ne gitminennerem, ane Jei ga tenebaabili, "Jeje bafa aamei ga ima nasouna rotini ijama domolyanem temawer? Aamke gemerje ijama saryan? Ini imna ke mata? ¹⁸ Aamei nwenabara, jengga ijama anggayan. Aamei imwanabara, jengga aamei ijama saryan. Aamke ijama dirinswebili Ai gwanan Ajes eyebilirim? ¹⁹ Ai angtane 5.000 Agalap taayinbilirim rotini tafna gwirime, roti tomna fomera aamei ijesa dupduptababilirim?" Jei ga aane tamawolbana, "Rotini tomna burnabara dua belas." ²⁰ Yesus gamjon ba tenebaabili, "Ane Ai angtane 4.000 Agalap taayinbilirim rotini tujume, roti tomna fomera aamei ijesa dupduptababilirim?" Angtane aa jei ne tikwebaatinennerem ga aane bala, "Tomna burnabara tuju." ²¹ Yesus ga balbabili, "Namwer aamei engbar imsa sar waakenfer enggame, Ai roti tanem temawer Agalap nasowenaram, Ai Ajam nasoweyan nei rotini nejama domolyanem temawer." ²² Yesus ane angtane Jei aa jei ne tikwebaatinennerem tamna Betsaidaminibe ga aa ge forobili. Angtane afweraiserem jei ga angtane nwena kofa jes ne aftafala Yesusminip, jepga Yesus gane bala, "Tafna Imna se tosobaaniwi angtane aaiserem jem sagabe, jam waakentafe." ²³ Yesus angtane nwena kofa jeiserem tafnawer ga tebatena, ga tamna sitawer aftafala. Yesus ga nwena makem ga aa gweyimbene, gamjon tafna tosobaaniwili, ane ga aa bala, "Nwem waakenfer ke im anggasi?" ²⁴ Angtane jeiserem ga anggasini, ga tamawola, "Maa. Ai amsam anggana, jengga ai angtane enggam ai gerebaabili, tini jam wofela gamserem." ²⁵ Yesus tafna gamjon ga aa tosobaaniwili angtane jeiserem jem nwenabe, ane angtane jeiserem nwena ga aa fersonnu, jigala seyafter gemerserem ga aa gerebaabili waakenfer. ²⁶ Yesus angtane jeiserem ga aa bala, "Gamjon gase warau ilem jenap; tamna jeiserem namwer jebe ijam warauyan." ²⁷ Yesus ane angtane Jei aa jei ne tikwebaatinennerem jewer ga aa ge sofobili, ona kota Kaisareya Filipiminibe jem gwetmanabe. Nelep ga Yesus aa tenebaabili, "Angtane nafsi jeiserem ke Ase enggam ne bala, Ai nansa?" ²⁸ Angtane aa jei ne tikwebaatinennerem ga aane tamawolbana, "Angtane afwer enggam ge gubili, Aameiba Yohanes Pembaptisam. Afwer enggam ge gubili, Aameiba Eliyasam. Ane angtane nensaiserem jeime gemer ge gubili enggame, Aameiba angtane nabi gwanan aa jei naawelam, ba jesam." ²⁹ Jepga Yesus angtane aa jei ne tikwebaatinennerem ga aa tenebaabili, "Jengga aamei iner Ai As ifoma bala Ai nansa?" Petrus ga aa tamawolbana, "Aameiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif." ³⁰ Jepga Yesus angtane aa jei ne tikwebaatinennerem ga aa balbabili ol dagame, "Aamei taterisi aaiserem ijama nasbineneyen angtaneminibe." ³¹ Jepga Yesus ga towaiwulu jam towas-towastababife enggame, "Ai Tane Angtanemana, Ai tamtamtalaiserem unggwanfer As gwirinfi. Angtane sanbaka Yahudimana, ane angtane imam-imam sanbakaiserem, ane guru-guru Hukumu Nabi Musa aa jes tulistababilim aa jei ne towas-towastababuwenaram, angtane seyafter jeiserem jei Ai Asene gwebafa baife. Ane Ai ga Asene munbofo. Jengga nunu nawer-ningnaiserem Ai gamjon ga jem As irwefa terewer." ³² Taterisi jeiserem Yesus Jei waakenfer ga nasipmini, jega angtane Jei aa jei ne tikwebaatinennerem jei waakenfer gam ge sarbif. Ane Petrus Yesus ga aa tebawili, ane ga towaitana jam uftafe enggame, "Yesus Aamei taterisi kapkaiserem enggala je Ibaf nasbabili?" ³³ Yesus ga irfwena angtane aa jei ne tikwebaatinennerem jemniwer, ane Petrus ga aa bala, "Bawas, aamei jas gwisi! Aamei taterisi jeiserem angtaneminiwer im domola, Uwa Sanbagirminiweryan." ³⁴ Jepga Yesus ga jenbebili angtane aa jei ne tikwebaatinennerem, ane angtane nafsi unggwanfer jep aaiserem jes ne jam ge jalbife. Yesus ga balbabili, "Angtane afa aa jei gunurum Ams onsobafe, jei jelem temawenefener jam gweyan. Ane jei jamer gam menetwesiwena jam terfe, aam temawer jei Ai As jewer tikwebaatinirim. Ane jei Ai jamer ga As onsobana. ³⁵ Angtane afa aa jei gwenaram jelem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, ane Taterisi Waakena Uwa Sanbagirmana jem temawer, jei waakenfer gwelaiserem jamer abak-abaksus ga jei gam domola. ³⁶ Aaiserem je kapka, afa angtane galgala seyafter ogirip gamserem se taabili, jengga jei waakenfer gwelaiserem jamer abak-abaksus jam domolyan. ³⁷ Angtane apgal jigala fas afa jam gulbayan Uwa Sanbagirfe enggalfe, jem fwaina waakenfer gwelaiserem jamer abak-abaksus Jemniwer gam domolf. ³⁸ Afa aamei Ai As jam isa seferswebanaram, ane taterisi Amnaiserem jem temawer jam isa seferswenaram, Ai Tane Angtanemana, Ai jame Ajep fortyaram Alem nafabaner, ane nafa Uwamanaiserem, ane malaikata waakensususerem jes mese, Aime is gemer As seferswebabili, aamei Ai As igemera seferswebanaram."

¹ Jepga Yesus angtane aa jei ne tikwebaatinennerem ga aa balbabili, "Bunar-bunarsus aamei afwer aas ijeya finaram namwer, aamei nalef ijama teryen, aamei gwanan nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ifsa domola baabetem se fortya." ² Nunu gamjon ga enam, Yesus Jei Petrus, Yakobus, ane Yohanes ga aftabifele taaren bwalnaiserem jem bolabe. Angtane nensa fas jebe, jei jenfentowai ga jep. Jepga tifini Yesusmana nenesmer ga aa folbana jem nwenabe. ³ Ane fene Jemna ga aa ge bwenen-bwenenweibene, numuserem ga sinsinsusu. Fene gala afa fas ogiribe. ⁴ Jepga angtane nawer-ningna jeiserem jei Eliya yo Musa, nabi fwatermana, aa ge damtabili, Yesusfar ga aa ge nasbawena. ⁵ Petrus Yesus ga bala, "Guru, aaiserem samfersus, ai seyafter aare! Ai jatowai nawer-ningna asa eyebaabili aafe -- daamfenna Ip, daamfenna Musaf, ane daamfenna ga Eliyaf." ⁶ Jei teisyena jei bas nasbili, aam temawer jei uskambar jam ge erebili. ⁷ Jepga gara ga aa matabili, ane gara jeiserem jewer ga taterisi ga aane sarbili enggame, "Tane aaiserem ba Amnam, Ai Ajes nesiktenerem. Seyafter Jei aa jes nasbilirim, aamei jam isa sarbasini!" ⁸ Jepga tatarfer ga aa ge gaarabisnenne, jengga jes jepserem angtane afa fas jam ne damtayan, jengga Yesus Jenfentowai fina. ⁹ Yesus ane angtane Jei aa jei ne tikwebaatinennerem taarenawer aa galap ge irebityerem, Yesus ga aa balbabili ititmer, "Aamei aaf ijesa domolaram, angtane nafsiserem jebe ijama nasipmineneyen, jamere Ai Tane Angtanemana, Ase irwena terewer." ¹⁰ Angtane Yesus aa jei ne tikwebaatinennerem jei seyafter Yesus aa jes bilirim jeter ga aane onsobili, jengga jei jen jena ga aane taanaaminenne, "Taterisi Yesus aa jes bilirim Jei jam irwalaiserem terewer jem temawer, taterisi jeiserem jem igiserem jeje fomfoma?" ¹¹ Jepga Yesus ga aane tenebana, "Guru-guru Hukumu Nabi Musa aa jes tulistababilim aa jei ne towas-towastababuwenaram, jeje bafa jei enggam ga aa ge gubili, Nabi Eliya nabala ga jei se fortya?" ¹² Yesus enggam ga balbabili, "Bunar, Eliya jei nabala ga jei fortya enggalfe, apgal jigala seyafter gemerserem gam waakentababili. Aamei ipsama dirinswebilirim nabi fwatermana aa jes ne tulistaabilim Tane Angtanemanaiserem jem temawer. Jei enggam ne tulistababil, Tane Angtanemana Jei tamtamtalaiserem ga jes domolsa, ane angtane baif sene gwebasa. ¹³ Jengga Ai aamei isa balbabili enggame, bunar Eliya mesam fortya. Ane angtane jebe mes ne eyeibenent, kapkaiserem ini jemna aa gemer folbaminirim jam eyebife, jes gamserem nabi fwatermana jei aa gemer ne tulistababilim." ¹⁴ Yesus, Petrus, Yakobus ane Yohanes aa galap ge waraubilirim angtane aa jei ne tikwebaatinennerem afweraiserem jemnibe, jei angtane unggwanfer ga aane damtabili jep aa gemer ge betwebilirim. Ane guru-guru Hukumu Nabi Musamana aa jei ne towas-towastababuwenaram, jei angtane Yesus aa jei ne tikwebaatinennerem jebar ga aa ge doksobana. ¹⁵ Angtane uskambar jeiserem Yesus jame galap ne damtanaram, jei ga aa ge bitbitwebili, ane jei seyafter ga aa ge nunggirbuwena Yesusminibe, Yesus ga aane bala, "Gwerem." ¹⁶ Jepga Yesus angtane Jei aa jei ne tikwebaatinennerem ga tenebaabili, "Aamei jebar ibasa doksobili?" ¹⁷ Angtane daamfenna angtane uskambar jeiserem jemniwer ga tamawolbana, "Guru, tane amna aaiserem Imnip as aftawena, bwata kapkaiserem ga jei mukmuktaasini. ¹⁸ Ane bwat kapka jeiserem jam gam fortyaram, tane ga gam uktoniwili onabe, ane ga gam egegwena jamere kewa aaremawer gane denbentetya, ulbata ga jam gane egegnebana, ane tifni jemna ga kekelfer gam folbana. Ai angtane Is jei ne tikwebaatinennerem ames balbabili bwat kapkaiserem taneminiwer jam ne surbife, jengga jei masef, jam ne domolyan jam surbife." ¹⁹ Yesus ga aa tamawolbaabili, "Wa, aamei angtane namwer ijeya gwenaram, aamei Ase ijama tebayan. Aima ga ibar neya nwini jamere nunu anesus, jengga aamei gemerje Ai Ase ijama tebayan. Ai aamei isa Ajam fibabilibe nunu ga fomera enggalfe, aamei Ai As ijeba tebafe? Tane girtowai jeiserem jase aftayal Amnip!" ²⁰ Tane jeiserem Yesusfe ga aane aftabawena. Bwat kapka Yesus jam aa galap damtanaram, jei tane jeiserem ga uktoniwili, ane jei ga terterwena, ga aane irfifitene, ane aaremawer kewa ga aane denbentetya. ²¹ Yesus tane jeiserem jem jeta ga aa tenebana, "Nunu fomera tane aaiserem bwerna aa domolantam?" Jetaserem ga tamawolbana, "Bastantowaisamer galapserem ga galap domolant. ²² Bwat kapka tane jeber-jeber unggwasbawena fonap jam dantantef, afa tokwanap taptasiwif enggalfe jei gam terf. O Yesus afa Aamei baabeta Ijam domolaye ai Is ajam batomife, sya ai as nesikso, ane ga asIs batomini, tane alemanaiserem jebar." ²³ Yesus ga tane jeiserem jem jeta ga aa tamawolbana, "Wa, jeje bafa jes gamserem gam ga im gunu, afa Ai baabeta Ajam domolaye? Uwa Sanbagiri Jei samfer seyafter gam eyebili, afa angtane jei jam gane tebanaram." ²⁴ Tane jeiserem jem jeta tatarfer ga aa gwarna, "O Yesus, ai Ims tebana bastantowaifer. As batoba, jega ai Aamei uskambar Is gam as tebana!" ²⁵ Jes jepserem Yesus angtane unggwanfer jam aa galap damtabilirim, jei aa ge towaiwebilirim jam ge jalbuwefe jem gwetmanabe, Yesus ga bwat kapkaiserem ga aa uftana, enggam ga aa gutena, "Aamei bwata kapka, tane aaiserem ga aamei kabwaktana, jei jam saryan, jei jam nasoweyan. Ai aamei enggam isAs bala, se totini jemniwer! Gamjon ijam kauteyan tane aaiserem jemnibe!" ²⁶ Jepga bwat kapka jeiserem ga gwarna, tane jeiserem ga gin-gintene uskambar, ane ga mirtetefala. Tane jeiserem jei ga enggam etamwena anggwa futunu gamserem. Ane jepga angtane uskambar jeiserem ga aane balbabili, "Tane aaiserem maa, futu." ²⁷ Jengga Yesus tane jeiserem ga batobana, tafnawer ga aa tebatena jam gaartefe, ane tane jeiserem ga gaartena jener ga aa fina. ²⁸ Yesus ane angtane Jei aa jei ne tikwebaatinennerem jei jenfentowai jam aa galap ge nwinbenerem jenabo jepga aane tenebana, "Jeje bafa bwat kapka jeiserem ai ajama surbiyen?" ²⁹ Yesus ga aa tamawolbaabili, "Bwat kapka aas galserem nele nafsiserem jem jam surbiyen, jengga sembayangemfener gane surbili." ³⁰ Yesus ane angtane Jei aa jei ne tikwebaatinennerem jewer ga aa ge sofobili, ane ona Galileyastamer ga aa ge ayebinni. Ane Yesus Jei bai angtane nafsi jam ne towaswebafe enggame Jei aare, ³¹ aam temawer Jei angtane Jei aa jei ne tikwebaatinennerem jes towas-towastababif. Jei enggam balbabili, "Ai Tane Angtanemana, Ai ga Asene gera angtane sanbakminibe. Ga Asene munbofo, ane ga As tere, jengga nunu nawer-ningginfenna Ai gamjon ga As irwena terewer." ³² Angtane Yesus aa jei ne tikwebaatinennerem jei Yesusmana taterisi jeiserem jam ne towaswebiyen, jengga jei jam ge erebili jei jam ne tenebafe taterisi jeiserem jem temawer. ³³ Yesus ane angtane Jei aa jei ne tikwebaatinennerem jam aa galap ge forobilirim kota Kapernaum je, ane jei jenap aa galap ge nwinbenerem, Yesus ga angtane aa jei ne tikwebaatinennerem ga tenebaabili, "Aamei nelebe afa ibasa doksobili?" ³⁴ Jengga Yesus jam ne tamawolbayan, aam temawer jei nelebe taterisi aaiserem jem temawer ge doksobana, "Nei seyafter, nemna sanbaka ga nansa?" ³⁵ Yesus ga nwintena, ane angtane dua belas aa jei ne tikwebaatinennerem ga aa jenbebili. Yesus ga aa balbabili, "Angtane aa jei gam gunurum sanbakef jam etamwefe, jei gwanan ga angtane bastowaif gam gwena, ane angtane nafsiserem awelna ga jemnip gam gwebili." ³⁶ Jepga Yesus tane bastouya ga gaarwili, ane ga gaarantena jem nenennabe. Ane Yesus tane towai jeiserem ga jam murmurtaasini, ane angtane aa jei ne tikwebaatinennerem ga aa balbabili, ³⁷ "Angtane Ai aa jei gam tikwebaatinirim, afa jei tantouya bastouya aas galserem jam gam tebanaram aam temawer jei Ai As jewer gam tikwebaatinirim, gam jega angtane jeiserem jei Ai As mes gam tebana. Ane angtane Ai aa jei tebanaram, angtane jeiserem jei Am tefner As jam tebayan, jengga jeime Ai As Jei baftannuntum Jei mese jes gam tebana." ³⁸ Yohanes Yesus ga aa bala, "Guru, ai angtane asaje aya damtana, jei bwat kapkaiserem ga jes surbobili Im boseme. Ane ai ga aya bala, ’Safnant, jase tikwe!’, aam temawer jei nem safanyan." ³⁹ Jengga Yesus ga aa balbabili, "Safnant, aamei angtane jeiserem ijama uftayan jam tikwefe! Angtane bwembwema aa jei gam eyebilirim Am boseme, angtane jeiserem jei galap taterisi kapka Am temawer jam nasbiyen. ⁴⁰ Angtane nems nasbabiyeneiserem, angtane jeiserem ga safna nemnam. ⁴¹ Ipsama dirinswenaram! Bunar-bunarsus afa angtane aasaje fona diwiribere ibe is jei golminirim aam temawer aamei Ai As ijewer onsobanaram, jei fwaina galap se taabili Uwa Sanbagirminiwer." ⁴² Yesus gamjon ga balbabili, "Afa tuna unggwan-girsusu daran-darnaiserem jam gane tafrebaasiwilirim angtanem botonabe, ane jei ga gane firtaaniwili finibe enggalfe angtane jeiserem jem gam tamtamtafe, tamtamtala jeiserem bastouya. Jengga tamtamtala Uwa Sanbagirmanaiserem jeba unggwandwasusu tamtamtala jeiserem jemniwer. Afa angtane jei angtane namwer Ai ibirimfer As jei tebanaram, jei jam gam unggwasbanaram etam-etama jam eyebife, Uwa Sanbagiri jei tamtamtala unggwandwasus ga jese golmisi angtane jeiserem jebe. ⁴³ - ⁴⁴ Afa tafna imna etam-etama kapkaiserem jem igam eyebilirim, tafna jeiserem ga jam igam tiksosini. Waakenfer ga enggam, afa aamei taman waaken-giribe jam igam fornaram, tafna daamfennaiserem safe jebar igam forna. Jengga aaiserem je kapka, afa aamei tafna nawersamer jebar igam fornaram taman tokwagiribe, tokwana jeiserem gemer sene ertesini jamer abak-abaksus. ((Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus.)) ⁴⁵ - ⁴⁶ Afa tufa imna etam-etama kapkaiserem jem igam eyebilirim, tufa jeiserem ga jam igam tiksosini. Waakenfer ga enggam, afa aamei tufa daamfennaiserem safe jebar igam forna taman waaken-giribe. Jengga aaiserem je kapka, afa tufa nawersamer aamei is jebar ne firtaaniwiliserem taman tokwagiribe. ((Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus.)) ⁴⁷ Afa nwena imna afwenefener kabwakfer jem igam gaarasinirim, ane aamei etam-etama kapkaiserem jem ga igam eyebili, afa ga gam jes gemerserem, nwena jeiserem ga jam igam fotolsini. Waakenfer ga enggam aamei nwena daamfennaiserem jebar igam forna taman waaken-giribe. Jengga aaiserem je kapka, afa aamei nwena nawersamer is jebar ne firtaaniwiliserem taman tokwagiribe. ⁴⁸ Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus. ⁴⁹ Angtane seyafter gemerserem tokwam sene waakentababili, tumilgala garanem waakenulu gamserem. ⁵⁰ Garna ba waakenam, afa tumilgal sagap jam igam tuwulnuwilirim. Jengga afa garna jam gam etamwenaram bwekbwekswefe, angtane jei garna jeiserem gamjon jam ne eyebiyen garanfe jam falfe. Aamei ga enggala, garna waakena galserem. Aamei ga enggam isa gwena, Uwa Sanbagirfer Jebar waakenfer isa gwena. Ane aamei ga waakenfer sa gwena angtane nafsiserem jebar."

¹ Yesus ane angtane Jei aa jei ne tikwebaatinennerem tampata jeiserem ga aane mirsotefala, gamjon ona Yudeyawer ga sofwa, fona Yordan jimwer. Jepga angtane unggwanfer gamjon ga aa ge betwebili Yesusem tarnabe. Ane Jei gwanan angtane jeber-jeber aa gemer towas-towastababuwenaram, gam ga towas-towastababili. ² Jepga angtane safna Farisimana ga aa ge forobitye. Jei Yesus jam ne unggwasbaf, jega jem temawer jei Yesus ga aane tenebana, "Fuma Nabi Musa aa gam tulisulum Hukumube? Anggwana wini baife aa jei gam gwebilirim ke samfer gangge syanwena, afa fas?" ³ Yesus ga tamawolbaabili, "Musa jei is bagal tateris golmil ibe?" ⁴ Jei ga aane tamawolbana, "Musa jei ai as enggam balbabil, ’Sya, jengga gwanan nabala surta ijem ge syanwelaiserem jes igam eyebili, jepga wini ga igam bili, sya se sofwe!’ " ⁵ Yesus ga balbabili, "Musa jei aamei is jewer balbabilim enggame ’Sya, samfer wifar jam syanwefe.’ jeiserem ga aam temawer balbabil ini imna kekelna, aamei masef is jam ne towas-towastababife. ⁶ Gwanan galapserem Uwa Sanbagiri seyafter gemerserem aa galap eyebaabilim, jes galapserem Jei angtane ga naura gam eyemil, anggwana yo wini. ⁷ Jega jem temawer anggwana ga ene yo jeta ga gam mirsona, ane winabar daamfen jenaber ga gangge nwini. ⁸ Ane jepga nawersamer daamfennaber gangge tawena. Gam jega naweryan, jengga daamfenna. ⁹ Ga jem temawer Uwa Sanbagiri aa jes gam batsonaram daamfennaber gwefe, nei angtane nejama syansosiyen." ¹⁰ Jenabe aa galap ge forobilirim, angtane Yesus aa jei ne tikwebaatinennerem Yesus ga aane tenebana taterisi jeiserem jem temawer. ¹¹ Yesus ga aa balbabili, "Afa anggwana wini baif aa jei gam gwebilirim, ane wini nafsi ga gam gula, anggwana jeiserem jei etam-etama maaryenf gwelaiserem jes gam eyebili wini gwanan gulaiserem jebe. ¹² Ane wini afa anggwana baif aa jei gam gwebanaram, ane anggwana nafsi ga gam gera, wini jeiserem jei etam-etama maaryenf gwelaiserem ga jes gam eyebili." ¹³ Jepga angtane tane bastantouya ga aane aftabuwena Yesusminibe enggalfe, Yesus tafna jem dwak sagap gam bunulmunsowef, waakena Jelemanaiserem jep gam kitulmif. Jengga angtane Yesus aa jei ne tikwebaatinennerem, jei angtane tane aa jei ne aftabuwenaram Yesusminibe ga jes ne uftabili. ¹⁴ Yesus Jei angtane aa jei ne tikwebaatinennerem jam aa galap damtabilirim enggame, jei angtane tane aa jei ne aftabiyelwenaram jes ne uftabili, Yesus ga nasbabili, ane ga balbabili, "Angtane jeiserem safnant ipsama uftabilirim. Jei samfer tantantane jei gane erbiyelwe Amnibe, aam temawer angtane enggalaiserem tanna aas galserem, jei samfer se naawena Uwa Sanbagirfar, ane Uwa Sanbagiri Jei ga jem Sanbakf se gwena. ¹⁵ Sa sarbistaabon taterisi aaiserem! Tanna bastantana aas galserem jei Uwa Sanbagiriserem ga jei gane tebana, ane Uwa Sanbagiri Jei jem Sanbakf se gwena. Angtane baife aa jei gam gwenaram Uwa Sanbagiri Jei jem Sanbakf gwefe, angtane jeiserem jei jam etamweyan enggame Uwa Sanbagirem gwonap gwefe, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe." ¹⁶ Jepga Yesus tantantane jeiserem ga kituliwena, tafna dwak sagap ga tosobaipmunsowena, ane Uwa Sanbagiri ga bala, "Tane aaiserem jebe waakenaiserem jep Is kitulmini." ¹⁷ Yesus ane angtane Jei aa jei ne tikwebaatinennerem jewer jam aa ge sofobilirim, angtane aasaje ga Yesusminip ga nunggirwena, somwan dumem ga nwintena Yesusem tarnabe. Jepga angtane jeiserem Yesus ga aa tenebana, "Guru, Aamei waakena. Ai ga basas eyebili enggalfe, ai waakenfer gwelaiserem jamer abak-abaksus agam domolfe?" ¹⁸ Yesus ga angtane jeiserem ga aa tamawolbana, "Jeje bafa aamei Ai ga Asim bala enggame Ai waakena? Angtane waakena afa fas jam gweyan, jengga Uwa Sanbagiri Jenfentowai Jei waakena. ¹⁹ Uwa Sanbagiri aa jes balbabilim, seyafter jeiserem aamei imes towaswebili enggame: Aamei angtane ipsam tat. Maaryen ipsam gwebit. Jigala angtanemana ipsam komkomulsit. Angtane nensa syefer ipsam balt. Angtane ipsam afaf-afaftat. Iye yo uwa imna, taterisi jemna ga jam igam tasyipmini." ²⁰ Angtane jeiserem Yesus ga aa bala, "Guru, taterisi seyafter jeiserem ai amsam tikwebitinint, ai bastowaisamer galapserem jamer namwer aas jepserem jep mese." ²¹ Yesus angtane jeiserem ga gerebana, ane ga nesiktene jei, ane ga bala, "Taterisi umwefe ga daamfenna, aamei gemerje jeiserem ijam eyebiyen. Taterisi jeiserem ga aas: Se gwi, ane galgala imna seyafter ga is jualtababili, ane doini ga angtane galgalyenaiserem ga jep is kitulmini, ane aamei waakenfer gwelaiserem ga is domola jamer abak-abaksus. Afa jeiserem jam is eyebilirim jamer taban, aamei ga is jela Amnibe, ane Ai ga Asis tikwebaatini." ²² Jengga angtane jeiserem taterisi Yesusmana jeiserem jam aa galap saribenerem, jei ga sofwa ane ini ga jenbana, aam temawer jei enggam gunu, "Apgal jigala aman ke bastantowaifer, apgal jigala amna unggwanfersusu." ²³ Jepga Yesus angtane Jei aa jei ne tikwebaatinennerem ga gerebaabisnenne, ane ga aa balbabili, "Angtane galgalabaraiserem jei ini galgalapfener gam folbana, ini jemna Uwa Sanbagirminip jam folbayan. Afa ini angtanemana jes gemerserem gemer gam folbanaram, afa jei fas jam irfweyanaye, gam jega Uwa Sanbagiri Jei jem Sanbakfe Jam gweyan." ²⁴ Angtane Jei aa jei ne tikwebaatinennerem jei taterisi jeiserem jam aa galap ne sarbilirim, jei ga aa ge bitbitwebili. Jengga Yesus gamjon ga balbabili, "Tantantane Amna, angtane afa fas tatarmer Uwa Sanbagirfer daamfennaber jam ge gwefe, jega Uwa Sanbagiri Jei jem Sanbakf ga gam gwena. ²⁵ Bunar-bunarsus, twena unggwan-giri jei jam kaweteyan burum mwonabe. Jes gamserem aaiserem jegme gemer, angtane afa ini jemna galgalapfener aa jemanem gam folbanaram, angtane jeiserem jei Uwa Sanbagirfer daamfennaber jam ge gweyan, ane Uwa Sanbagiri Jei jem Sanbakfe Jam nwinyen." ²⁶ Jes jepserem jei taterisi jeiserem jam aa galap ne sarbilirim, jei uskambar ga aa ge bitbitwebili, ane jei jen jena ga aa taanaaminenne, "Afa ga gam jes gamserem, gam jega nan se waakentaasini?" ²⁷ Yesus ga gerebaabili, ane ga balbabili, "Angtane jen jena jam waakentaasiyen, jengga Uwa Sanbagiriserem angtane ga Jei gam waakentaasini. Uwa Sanbagiri seyafter gemerserem gam eyebili." ²⁸ Jepga Petrus Yesus ga aa bala, "Galgala seyafter amsa mirtebitefala enggalfe, ai Aamei Is agma tikwebaatif!" ²⁹ Yesus ga balbabili, "Ai bunarsus ims towas-towastababili, angtane jena aa jei gam mirultefalaram, afa aya, afa oso, afa ene, afa jeta, afa tane jemna, afa makana jemna, afa jei jeiserem seyafter aa jei gam mirtebitefalaram enggalfe, taterisi Uwa Sanbagirmana gam nasibenenefe, ³⁰ angtane jeiserem jei namwer aas jepserem fwaina se taabili uskambarsus aa jes mirtebitefalaram jemniwer. Jei gamjon ja, ane aya mese oso, ene, tane, ane makan unggwanfersus se damtabili. Ane jei kabwaktala unggwanfer mese ga sene damtabili. Ane nunu galap aa jep forsanyaram, Uwa Sanbagiri Jei angtane jeiserem jebe waakenfer gwelaiserem se golmisi jamer abak-abaksus. ³¹ Jengga angtane namwer nabal danalaiserem, angtane jeiserem afwenefener galap amnup sene bunulu. Ane angtane amunemanaiserem, afweraiserem galap ga jei sege danabifi." ³² Yesus ane angtane Jei aa jei ne tikwebaatinennerem, jei aa galap ge sofobilirim nel tawela kota Yerusalem je jep aa galap ga wofobilirim, Yesus ga jei dannasnene. Ane angtane dua belas Jei aa jei ne tikwebaatinennerem ini jemna ga aa ge jenbamini, ane ini esesfer ga aa ge folbamini. Ane angtane nafsiserem amnuwer aa jei ne onsobaabilirim jei ga aa ge erebili. Yesus angtane dua belas Jei aa jei ne tikwebaatinennerem ga aftabifele nel eyebe. Ane Jei ga towaiwulu jam towastababife Jemnibe aa je etamwebalaiserem kota Yerusalem je. ³³ Yesus ga balbabili, "Gasa sarsi! Nei ga kota Yerusalemwera tauna. Ane jes jepserem Ai Tane Angtanemana, Ai ga Asene gera angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram jemnibe. Ane jei ga ula jewer ga sene nasbili enggalfe Ai Ajam terfe. Ane Ai ga Asene gera angtane Yahudimanyanaiserem jemnibe. ³⁴ Ane jep ga jei Ai ga Asene bisobafa, ane makem ga Asene gwebafa. Ane jei Ai ga Asene safsaftana newa utuboroserem jeme, ane Ai Asene munbofo. Jengga nunu nawer-ningnabaraiserem Ai gamjon ga jem As irwefa terewer." ³⁵ Jepga Yakobus ane Yohanes, tane nauna Sebedeusmana, Yesus ga aa ge bala, "Guru, ai Is ajam ge bala, taterisi amna gwanan as jam Is taayipmini!" ³⁶ Jepga angtane nauna jeiserem Yesus ga aa tenaamini, "Aamei Amniwer Ase bas ge bilibene Ai ibe isa Ajes eyeipmife?" ³⁷ Jei ga aa ge bala, "Ai ke samfer Ibar nwinfe, afelna taasfolawer ane afelna ga gwejawer jame Ijep nwinirim Sanbakfe Raja gemerserem?" ³⁸ Yesus ga gitmini, "Aamei ijam ge towaswebiyen Ap Ase ijes ge bilibenerem. Aamke kapkaiserem ke samfer is ge gwirni, Ai gemerserem? Ane aamke samfer is ge tere, Ai gemerserem?" ³⁹ Jepga aa ge gunu, "Ai samfer." Jepga Yesus ga gitmini, "Jeiserem bunar, kapkaiserem is ge gwirfi Ai gemerserem, ane aamei is ge tere Ai gamserem. ⁴⁰ Jengga Am taasfola jei nwiniserem, ane Am gwejawer jei nwiniserem, angtane jeiserem Ai Ajam destabayan. Jeiserem gam ke baabeta Amna, jengga Uwa Sanbagirmana. Angtane jebe jei nwiniserem, Uwa Sanbagiri Jener se destabana." ⁴¹ Angtane sepulu aa jei ne tikwebaatinennerem afwer jeiserem jei aa galap ne sarbilirim angtane naura jeiserem jei aa jes ge bilirim, jei Yakobuso Yohanes ga aane nasmini. ⁴² Jega jem temawer Yesus seyafter ga dupdupbulu, ane seyafter ga balbabili, "Aamei tousa, angtane Yahudimanyana jei jam gane balaram sanbakf gwefe, jei uskamer gam eyeipmini angtane jelemanaiserem jebe. Jei angtane nafis gane baftana enggalfe, angtane nafsi gane damtana jemna baabeta unggwandusa. ⁴³ - ⁴⁴ Jengga aamei gamyan. Aamei ga enggam isa gwena: Afa angtane imniwer aa jei gunurum sanbakef jam etamwefe, jei gwanan ga angtane nafsiserem jes gam batobaabili, awelna angtane nafsiserem jeman gam gweipmini. ⁴⁵ Aas gemerserem, Ai Tane Angtanemana, Ai Ajam jelyan angtane nafsi Ai As jam ne batobafe, jengga Ai enggalf Ai fortya angtane nafsi Agam batobaabif, ane gwela Amnaiserem Agam golmif jamer Ai As tere, jega angtane unggwanfer gam aftabunnuf." ⁴⁶ Yesus ane angtane Jei aa jei ne tikwebaatinennerem jei kota Yeriko ga aa ge forobili. Jepga Yesus ane angtane Jei aa jei ne tikwebaatinennerem jam aa galap ge sofobilirim angtane unggwanfer aaiserem jebar, angtane aasaje ga nel eyep ga jep nwini. Jei nwe kofa, ane jei doif jeber-jeber aber-aberwowena. Jemna bosna ga Bartimeus, tane Timeusmana. ⁴⁷ Jei jam aa galap sararam enggame, Yesus Angtane tamna Nasaret jeiserem Jei Jam jela, jei ga towaiwulu enggam ga gwarna, "Yesus, Tane Raja Daudmana, ai ase nesikte!" ⁴⁸ Angtane afweraiserem jei ga jam ne uftana, ga aane bala "Jas tikwe!" Jengga jei gamjon ga gwarna uskambarsus, "Tane Raja Daudmana, as nesikte!" ⁴⁹ Jepga Yesus ga aa fyatena, ane angtane ga balbabili, "Imsa jenbe!" Jepga angtane nwe kofaiserem enggam ga aane bala, "Gase sar! Se irwe! Yesus Jei ims jenbene!" ⁵⁰ Jepga angtane nwe kofaiserem fene sagamanaiserem ga jasona, ane ga irwena, Yesusminip ga nunggirwena. ⁵¹ Yesus ga angtane nwe kofa jeiserem ga tenebana, "Aamei ibas bili Ai ibe is Ajes eyeibefe?" Angtane nwe kofaiserem ga tamawolbana, "Guru, ai enggam ai gunu, ai waakenfer anggasif." ⁵² Jepga Yesus ga angtane nwe kofaiserem ga bala, "Se sofwe! Nwena imna kofaiserem is mes ne waakennebal, aam temawer aamei Ai As imes tebana waakenfer." Yesus game balaram, ane jes jeberserem jei ga gaarasini, ane jei Yesus ga tikwebaatini nele jeiserem jebe.

¹ Yesus ane angtane Jei aa jei ne tikwebaatinennerem kota Yerusalem jame aa galap ne gwetmansonaram, jei tamna Betfage yo tamna Betanya jep ga aa ge forobili. Tamna jeiserem ga taarentumu bosna ga Saitun ga jem tarnap nulna. Yesus angtane naura ga bafsona, angtane Jei aa jei ne tikwebaatinennerem. ² Jei ga gitmini, "Sya, aamei sege sofwe tamna nem mukanap jeiserem jewer. Aamei tamna jeiserem jep jam is ge kawesonaram, jes jeberserem aamei keledai tanna jep ga is ge damtana, jam daktabaasiliserem. Keledai tanna jeiserem ga gemerje angtane afa jem sagap jam nwinteyan ane jeme jam wofeyan. Keledai tanna jeiserem is ge fertesini, ane ga is ge aftayala. ³ Ane angtane afa is jam taanaaminirim enggame, ’Jeje bafa aamei keledai tanna jeiserem ga im ge fertesini?’, aamei angtane jeiserem enggam is ge bala, ’Keledai tanna aaiserem Tuhane bala. Abakferyan Jei gamjon gase warautana imnibe.’ " ⁴ Angtane naura jeiserem ga aa ge sofwa, ane keledai tanna jeiserem ga aa ge damtana pintu tarnap jep ne daktabaasini nel eyebe. Jepga jei keledai tanna jeiserem ga aa ge fertesini. ⁵ Angtane jep aa jei ge fibilirim ga aane gitmini, "Aamei ibas ge eyebili? Jeje bafa aamei keledai tanna jeiserem ga im ge fertesini?" ⁶ Ane angtane naura jeiserem jei ga aa ge tamawolbaabili, "Keledai tanna aaiserem Tuhane bala. Abakferyan Jei gamjon gase warautana imnibe." Ane jepga angtane jeiserem gamjon ga jam ne gitmiyen, jafner ga aane gaaramini keledai jeiserem aa ge fertenerem. ⁷ Jepga keledai tanna jeiserem ga aa ge aftafala Yesusminibe. Ane jepga fene fen sagap jes kamwiliserem ga aa ge syetabaabili keledai jeiserem jem sagabe. Ane Yesus ga nwintena keledai tanna jeiserem jem sagabe. ⁸ Angtane unggwanfersus fene fen sagap jes kamwiliserem jelemana ga aane bunulntena nelebe. Afwer ti tirni ti alnabara makanap aa jes ne targabaabilirim jes ne bunulntena. ⁹ Angtane Yesus aa jei ne danabanaram ane amnumana, seyafter ga aa ge tetenbili: "Nei Uwa Sanbagiri ganma pujite! Uwa Sanbagiri waakena Jelemanaiserem gase gulbana Jebe, Angtane aa Jei fortyaram Tuhanem boseme! ¹⁰ Nei waakenaiserem ga nesa gulbana Raja nemnaiserem namwer aa jei fortyaram, Jei Raja Daud fwatermana jem urgunup Jeyam fortya! Nei Uwa Sanbagiri ganma pujite! Jei taman waaken-girip nwini, tamna bwalesususerem." ¹¹ Yesus Yerusalem je aa galap fornaram, ane Jei ga aa kautena Jena Uwa Sanbagirmana. Jei seyafter gerasnenne, jengga ona tatarfer gigitswena. Jega jem temawer Yesus angtane dua belas aa jei ne tikwebaatinennerem jebar ga tamna Betanyaminip aa ge sofobili. ¹² Jem gwirmer ga, Yesus ane angtane Jei aa jei ne tikwebaatinennerem Betanyaminiwer ga aa ge sofobili. Yesus ga wisi ga falbana. ¹³ Ane ara tini bijauwer ga domola, ara tini jeiserem alna unggwanfer Yesus ga nwena jeber nulabana. Jei enggam gunu ara tini aaiserem engbar ba tannabaram. Jei tini tarnap ga gwina jamere ara tini jeiserem jebe aa fortya. Jengga Jei jem tannaiserem afa jam domolyan, ara tini jeiserem ala tetena. Tini jeiserem jam teyan, aam temawer tini jeiserem aa jem taawefaram mwara jemna gemerje jep jam fiyan. ¹⁴ Yesus ga tini ara jeiserem ga bili, "Imna tannaiserem angtane nensa gamjon afa jam ne tumilyen jamer abak-abaksus!" Ane angtane Yesus aa jei ne tikwebaatinennerem jei Yesus ga aane sarbana. ¹⁵ Jepga Yesus ane angtane Jei aa jei ne tikwebaatinennerem kota Yerusalem ga aa ge forobili. Ane Yesus Jei Jena Uwa Sanbagirmanaiserem jep ga kawetena. Yesus ga angtane galgala aa jei ne jualtababuwenaram ane aa jei ne armantababilirim, ga surbobili. Mejana angtane doini aa jep ne tukartababuwenaram, Jei mejana jeiserem aa irfitababili, ane kursini angtane junu senaya aa jep ne jualtababuwenaram aa irfitababili. ¹⁶ Yesus Jei baif gwena, angtane apgal jigala Jena Uwa Sanbagirmanaiserem jep jem ne erbinennefe. ¹⁷ Jepga Yesus ga towas-towastababili enggame, "Taterisi Uwa Sanbagirmana jep ga enggam baatultel: ’Jena Amnaiserem ga enggalf angtane anggwabura seyafter gemerserem jei Abar Ajeba nasowef.’ (Yeremia 7:11) Jengga aamei jena aaiserem enggam ima eyebili, angtane komkoma jep nwinbele gamserem." ¹⁸ Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei taterisi jeiserem Yesus aa jes nasbilirim gane sarbili. Jepga jei nele terelbene Yesus jam ne munbofe. Jei Yesus jam ne munbofe, aam temawer jei Yesus ge erebili, aam temawer angtane unggwanfer jei taterisi Yesusmana saaserfer ga aa ge sarbili, ane jei Yesus gane tikwebaatini. ¹⁹ Ona jama gigitswenaram, Yesus ane angtane Jei aa jei ne tikwebaatinennerem jei kota jeiserem ga aane mirsotefala. ²⁰ Nunu jeiserem jem gwinibener, Yesus ane angtane Jei aa jei ne tikwebaatinennerem gamjon ga aa ge waraubili tini ara jeiserem aa jep finaram, jeter ga aa ge ayebinni. Ane jei tini ara jeiserem ga aane domola seyafter sasanswena jamer sakarabo. ²¹ Jepga Petrus ga sarstaabona, ane Yesus ga aa bala, "Guru, se angga! Tini ara Aamei Ijes babapsobilintim, tini ara jeiserem mes sasanswena!" ²² Yesus ga tamawolbili, "Uwa Sanbagiri jam isa tebana! ²³ Bunar-bunarsus Ai aamei isa Ajam balbabili, afa aamei taarena aaiserem jam isa balaram, ’Se irwa! Finip ina ga is taptastena!’, taterisi jeiserem se etamwena im oleme, afa ini imna isar-isarmer is jam ge folbamiyen, enggame ijama guyon, ’Ai ajes bilirim, jeiserem kese etamwena?’ Afa ini imna ise unggwan-girsusfer sege folbamini enggame jeiserem se etamwena, ane afa aamei jese towaswena enggame aamei ijes bilirim bunarsusfer se etamwena, afa ga gam jes gemerserem, je ga waakenfer ga gam etamwena. ²⁴ Jega jem temawer Ai aamei isa Ajam balbabili, seyafter gemerserem aamei jes igama balbabilirim, aamei sembayanga jam jep igama gwebanaram, aamei ilem inip ga enggam is gunu, ’Uwa Sanbagiri jeiserem mes gulbana abe.’, afa aamei Uwa Sanbagiri jes gamserem igam tebana, Uwa Sanbagiri Jei ga is gam gulbana. ²⁵ Ane aamei sembayanga jam jep igama gwebanaram, afa aamei angtane nafsi gemer igama nasbanaram ilem inibe, aamei gwanan angtane jeiserem jebar jam igangge waakenswena, taterisi jeiserem jam igangge nasbili jamere igangge borola. Jes gamserem gam isa eyebilirim, jega Uwa Sanbagiri imnaiserem taman waaken-girip aaiserem Jei etam-etama imnaiserem is ga gam wirtabaabili. (( ²⁶ Afa aamei kapkaiserem angtane nafsi ip aa jes ne eyeipminirim jes ijama borolmiyen, gam jega Uwa Sanbagiri taman waaken-giribe aa Jei nwinirim, Jei jegme etam-etama imna is jam wirtabaabiyen.))" ²⁷ Yesus ane angtane Jei aa jei ne tikwebaatinennerem jei gamjon kota Yerusalemwer ge waraubili. Jei jame aa galap ge forobilirim Yerusalem je, Yesus ga Jena Uwa Sanbagirmanaiserem jep ga wofena. Ane angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, angtane seyafter jeiserem Yesusminip ga aa ge jalbili. ²⁸ Ane jei Yesus ga aane tenebawena, "Baabeta nanmana Aamei seyafter aaiserem ga Ijem eyebili? Ane baabeta Ise nane gulbana Ibe, seyafter aaiserem jem eyebife?" ²⁹ Yesus ga aa tamawolbaabili, "Aime aamei is Ajam tenebaabili. Afa aamei Ai As jam isa tamawolbanaram, gam jega Ai aamei ga isAs towastababili Ai baabeta Ajewer domolaram, Ai seyafter aaiserem Ai Ajem eyebilirim. ³⁰ Baabeta Yohanes aa jes domolaram angtane jam baptistababife, baabeta jeiserem ke Uwa Sanbagirminiwer jela, afa angtaneminiwer jela? As imsa tamawolba!" ³¹ Angtane jeiserem jei jen jener ga aa ge doksobana. Enggam ga aa ge gubili, "Nei afa enggam nesa gunurum Uwa Sanbagirminiwer, Yesus Jei nei nes galap se balbabili enggame, ’Jeje bafa aamei Yohanes ijama tebayan?’ ³² Jengga afa nei enggam nesa gunurum angtaneminiwer, jepga angtane jei nei ga nes ne nasbabili." Jei angtane jeiserem jes ne erebaabili, aam temawer angtane uskambar enggam ge gubili, "Yohanes Pembaptis jeiba nabi Uwa Sanbagirmanam." ³³ Ga jem temawer jei Yesus enggam ga aane tamawolbana, "Ai seyafter teisyena." Jepga Yesus ga balbabili, "Gam jega Aimba aamei isa Ajam towastababiyen baabeta nanmana Aga seyafter aaiserem ga Ajem eyebili."

¹ Jepga Yesus ga towaiwulu seisya taterisi angtane jam towas-towasulmife. Jei ga gunu, "Angtane aasaje angguru makanap tonola. Jei angguru jama tonolaram jamer taban, makana jeiserem ga isinbaasnenne pagareme. Jeiserem taban, jei gamjon o mwona ga tetbili, galap anggur tanna jep jubononof enggalfe fo angguru gam eyebaabif. Taban, jei jena ga eyebili makanabe. Jepga jei angtane anggur tonol tousaiserem ga balbabili, ’Ai as sofwa negeri nafsiserem jewer, negeri jeiserem ai jebe abakef as nwini. Ai abakfer jewer ajebar nwinirim, aamei samfer anggur makana amna nomkef isa armantana, angguru jep ga isa tonola, ane jem igiserem afwer galap ap ga isa kitulbono.’ Ane angtane jeiserem jena ga sofwa negeri nafsiserem jewer, negeri jeiserem bijaususu. ² Nunu anggur jep fuluserem jam aa galap falaram, angtane makana jam jemanserem jei angtane awelna jemnip aa jei gwebilirim ga baftana enggalfe, makana jeiserem jem igiserem afwer jei gam tebabif, angtane anggur makana nomkef aa jei ne armantanaram jemniwer. ³ Jengga angtane anggur makana nomkef aa jei ne armantanaram, jei angtane aa jes baftanaram, angtane jeiserem ga aane tebana, ane angtane jeiserem ga aane safsaftana. Angtane makana nomkef aa jei ne armantanaram jei angtane jeiserem ga aane bala, ’Se dip! Gase warau, makana jem igiserem ijam gwirinyen.’ ⁴ Angtane makana jam jemanserem jei gamjon angtane awelna jemnip aa jei gwebilirim nafsi jei jon ga baftana. Jengga angtane anggur makana nomkef aa jei ne armantanaram, jei angtane jeiserem ga dukap ne safsaftana, ane ga aane imei-imeitana jamer jei aa sefersona. ⁵ Angtane makana jam jemanserem gamjon angtane awelna jemnip aa jei gwebilirim nafsi jei jon ga baftana. Jengga jei angtane makana nomkef aa jei ne armantanaram, jei angtane jeiserem jam ne munbono. Ane angtane makana jam jemanserem jei angtane nafsi ga baftabili. Ane angtane makana nomkef aa jei ne armantanaram jei kapkaiserem jep ga aane eyeipmini. Afwer jam ne safsaftana, afwer jam ne munbono. ⁶ Angtane makana jam jemanserem jemna angtane umwef ga daamfenna, angtane jeiserem ga tane jelemanaiserem aa jes nesiktenerem. Jei umwef ga tane jemna jeiserem jei ga baftana. Jei jelem inip ga enggam gunu, ’Angtane makana amna nomkef aa jei ne armantanaram, jei bunarsus tanna amna aaiserem jam ne kabwaktayan.’ ⁷ Jengga angtane anggur makana nomkef aa jei ne armantanaram, jei jena enggam ga aane gitminenne, ’Tanna aaiserem ba makana jei se tebana, jeta jame aa jep tererem. Au, nei tanna aaiserem ganma munbo, jega nei anggur makana aaiserem nei gam nesa tebana!’ ⁸ Ane tanna jeiserem ga aane tebana, ane ga aane munbono, tanna jeiserem jem futunu ga anggur makan jitefwer ne firtaaniwili." ⁹ Jepga Yesus gamjon ga balbabili, "Ai aamei is Ajam tenebaabili, angtane makana jam jemanserem jei ga base eyeipmini, angtane makan anggur nomkef aa jei ne armantanaram jebe? Bunar-bunarsus ga enggam, jei se jela angtane anggur makana nomkef aa jei ne armantanaram jemnibe, ane jei angtane jeiserem jei gase munbobili. Gamjon makana jeiserem angtane nafsiserem jep gase gaarmini. ¹⁰ Aamei bunarsusfer imsama gerabistena ayata aaiserem aa jes tulisulum Taterisi Uwa Sanbagirmanaiserem jebe enggame: ’Angtane jena aa jei ne eyebilirim, tuna jei aa jes ne taptasiwilirim, tuna jeiserem mes etamwena igsusfe. ¹¹ Tuhan Jei aaiserem ga jes eyebili, aaiserem waakensusu negma domolf!’ " (Mazmur 118:22, 23) ¹² Angtane sanbaka Yahudimana taterisi jeiserem aa jei ne sarbisinirim, jei ga aa ge gubili, "Yesus taterisi jeiserem jeba nem temaweram nasbili. Jei nei nes enggam balbabili, neiba angtane kabwaksusu galserem, angtane makana nomkef aa jei ne armantanaram jei gamserem." Jega jem temawer jei ga nele ga aane terelbene Yesus jam ne tebafe. Jengga jei angtane unggwanfer jeiserem jes ne erebaabili. Jewer ga jei ga aa ge sofobili, Yesus ga aane mirtene. ¹³ Angtane sanbaka Yahudimana jei gamjon angtane safna Farisimana afweraiserem, ane angtane Herodes aa jei ne tikwebaatinennerem ga baftabili Yesusminibe enggalfe, jei Yesus gam ne unggwasbaf tateriseme. Afa Jei taterisi nimnafer jam se nasbabilirim, jei Yesus gam ne tebaf. ¹⁴ Angtane jeiserem Yesusminip ga aa ge forobitye, ane ga aa ge gubili, "Guru, ai amsa towaswena Aamei taterisi bunarsusfer Im nasbili. Aamei angtane afa Ijam erebeyen. Aamei taterisi daamfennaiserem ga Ijeter nasipminenne angtane igsususerem jebe, ane angtane igyeneiserem jep jegme taterisi jeiserem Ijeter nasipminenne, nafis-nafismer Ijam nasipmineneyen. Aamei taterisi Uwa Sanbagiri aa jes bilirim, Aamei bunarsusfer ga jetefener Im nasipminenne angtane seyafter gemerserem jebe. Sya, gwanan asIm towastababi, Hukumu Nabi Musa aa jes tulistababilim fomfom gunu? Ke samfer pajak doini Kaisar Romamanaiserem jes gane armanulu, afa safnant? Ai pajak doini jeiserem, ke asa armantababili, afa fas?" ¹⁵ Yesus Jei angtane jeiserem mes towaswebabili, jei akar-akarem ne tenebawena. Ane Jei ga balbabili, "Jeje bafa aamei Ai ga As ima unggwasbana taterisem jam tebafe? Gwanan doi bastantouya sene gamserem Ap isa girinbeyele, Ai Agam damtaf." ¹⁶ Doini seneiserem ga aane girinbowena, ane Yesus ga tenebaabili, "Gambara yo bosna aa jei ge batabanaram doi peraka aaiserem jebe, jeje bunarsusfer nanmana?" Jei Yesus ga aane tamawolbana, "Kaisarmana, angtane sanbaksususerem Romamana." ¹⁷ Jepga Yesus ga balbabili jei, "Afa doi jemna, ane jei enggam se gunurum, ’Ap sa gerba!’, aamei doini jeiserem saf isa gerbana! Ane Uwa Sanbagirmanaiserem, jegme Uwa Sanbagirfe isa gulbana!" Jei seyafter jam ge bitbitwebili, aam temawer Yesus waakenfer tamawolbaabuwena. ¹⁸ Gamjon angtane Yahudimana afweraiserem taterisi angtane safna Sadukimana aa jei ne onsobilirim, ga aa ge jalbili Yesusminibe. Angtane safna Sadukimana jeiserem jei enggam ne towas-towastababuwena, angtane jam tereserem jei gamjon jam irweyan terewer. Jei Yesus ga aane tenebana, ¹⁹ "Guru, Nabi Musa jei hukumu aaiserem nebe enggam tulisulmil: ’Afa angtane ayanaiserem jei wini jam gam gularam, ane jei gamjon gam gam tere, ane jei tanna afa fas jam waliteyen, osona jemnaiserem jei ga saamira wini jeiserem jei gamjon ga jei gam gula, jega ayana aa jei gam tererem jem fwayenfe tanna jep gam eyebafe.’ ²⁰ Nabi Musa ga gam tulisul. Ai taterisi aaiserem Is ajama nasibef Ibe, ane ai Aamei Is ajama tenebana taterisi aaiserem jem temawer. Angtane ayen oson tetena tuju ga gemer naawena. Ayansususerem jei wini gwanan ga jei gula. Abakferyan ayana jeiserem aa tere, jei tanna fas afa jam waliteyen. ²¹ Jepga osona ayanem malam jutelawer wini jeiserem gamjon ga jei gula. Jei jegme gemer jei aa tere, jeime tanna fas afa jam waliteyen. Ane osona nawer-ningnabarf aaiserem jei jegme gemer ga etamwena. ²² Ane osona seyafter afweraiserem jeime gemer ge etamwebili, jamere umwef ga osonsususerem jegme gemer, jei umwef ga jei tere, jengga tanna fas. Umwef ga saamiran wini jeiserem ga jei tere. ²³ Ai Aamei Is ajama tenebaf, angtane terewer aa jep ge irwebuwesaram, wini jeiserem jeje nan anggwafar sege nwini? Ayen oson tetena tuju jeiserem jei seyafter gemerserem wini jeiserem mes ne gula." ²⁴ Yesus ga tamawolbili, "Imna miri kapka. Aamei teisyena Taterisi Uwa Sanbagirmana ane baabeta Jemna. ²⁵ Angtane aa jep ge irwebuwesaram terewer, anggwa mese wi jei gamjon jena jam ne detyen. Angtane seyafter enggammer se naawena malaikata gemerserem taman waaken-giribe, jena jam detyen. ²⁶ Bukunu Nabi Musa aa jes tulisulum jei jep ga enggam tulisul, angtane jam tereserem jei gamjon sege irwebisi terewer. Aamke bukunu Musamanaiserem ke gemerje ijama gerabisteyan, taterisi ti towai utuboro aa jei ertelem jem temawer? Uwa Sanbagiri aa bal, ’Aiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.’ ²⁷ Taterisi jeiserem jes gamserem gam aa jewer gulum, aamei ga jam isa towaswena enggame, Abraham, Isak, ane Yakub jemna mafnana jei gemer naawena, aam temawer Uwa Sanbagiri Jei angtane jam tereserem jem Uwa Sanbagirfe jam gweyan. Fas. Uwa Sanbagiri Jeiba angtane jam gwelaiserem ga jem Uwa Sanbagirfe se gwena. Aamei bunar-bunarsus miri kapka." ²⁸ Gamjon angtane daamfenna guru-guru Hukumu Nabi Musa aa jei tulistaabilim aa jei ne towas-towastababuwenaram jemniwer, jei ga jela. Jei angtane safna Sadukimana Yesusfar aa jei ge nasbawenaram jes sarbabisif. Jei jam aa galap sarbabisinirim, jei enggam ga gunu, "Yesus Jei waakenfer tamawolbaabuwena." Jepga jei Yesus ga tenebana, "Hukumu igsusu ga fwersa hukumu seyafter gemerserem jemniwer?" ²⁹ Yesus ga tamawolbana, "Hukumu igiserem ga aas: ’Anggwabura Israelmana, Amsa sarba! Tuhan, Uwa Sanbagiri nemnaiserem, Tuhanf ga jetefener, nafsi fas. ³⁰ Uwa Sanbagiri imnaiserem ga jetefener igam nesiktene ini ilemana seyafter gemerserem jeme, ane mafnana imna seyafter gemerserem, ane baabeta imna seyafter gemerserem.’ ³¹ Hukumu igsusu naurabaraiserem ga aas: ’Aamei angtane nafsiserem ga jam isa nesiktababili, aamei in ina gemer igama nesiktenerem.’ Hukumu nafsi fas jem igiserem unggwandusa hukumu naura aaiserem jemniwer." ³² Guru jeiserem Hukumu Nabi Musa aa jes tulistababilim aa jei towas-towastababuwenaram, jei Yesus ga bala, "Guru, Aamei bunar-bunarsus Im gunurum, Uwa Sanbagiri Jei daamfenna, Uwa Sanbagiri nafsi fas. ³³ Angtane Uwa Sanbagiri ga jam sene nesiktene, ini jemnaiserem seyafter gemerserem jeme, ane mafnana jemna seyafter gemerserem, ane baabeta jemna seyafter gemerserem. Ane angtane jei angtane nafsiserem ga jam sene nesiktababili, jei jen jena gemer gane nesiksonaram. Hukumu naura jeiserem je waakensusu. Apgal jigala jam ne gwalanela enggalfe Uwa Sanbagirfe gam gulbaf, ane apgal jigala nafis-nafsiserem Uwa Sanbagirfe jes gulbalaiserem Jena Uwa Sanbagirmanaiserem jebe, jega enggalf Uwa Sanbagiri jem gane pujitef, seyafter jeiserem ga bastowaifer waakena." ³⁴ Yesus Jei aa galap sarbanaram enggame jei waakenfer tamawola, enggam ga bala, "Aamei nele amkom ifom towaswebala, nele Uwa Sanbagiri Jei im Sanbakfe jem gwelaiserem." Jeiserem taban, angtane seyafter jep jeiserem jei ga aa ge erebili Yesus jam ne tenebafe. ³⁵ Yesus angtane aa galap towas-towastababilirim Jena Uwa Sanbagirmanaiserem jebe, Jei enggam ga tenebaabili, "Guru-guru Hukumu Nabi Musa aa jes tulistababilim aa jei ne towas-towastababuwenaram, guru jeiserem jei fomfom ge gubili, Mesias Jei asal-asal Raja Daudmana? ³⁶ Raja Daud jei jener enggam mesam gul Mesiasem temawer, Mafnana Uwa Sanbagirmanaiserem jeme: ’Uwa Sanbagiri Jei Tuhan amnaiserem enggam bal: Se nwinte Am taasfolawer, jamere Ai ginanggwa Imna As eyebaabili Im tof gwonap sege nwinbitaatiwetya.’ (Mazmur 110:1) ³⁷ Raja Daud jes gamserem gam aa jewer gulum, jei jener gul Mesias Jeiba jem Tuhansam. Gam jega jeiserem ga enggam, Mesias asal-asal Daudmanfenyan, jengga Jei mese Raja Daudtem Tuhansam." Ane angtane unggwanfer jeiserem taterisi Yesusmana aa jei ne sarbilirim, jei ini saaser-saaserfer taterisi jeiserem jam ne sarbasife. ³⁸ Yesus angtane jame aa galap towas-towastababilirim, Jei ga gunu, "Aayai, guru-guru Hukumu Nabi Musa aa jes tulistababilim aa jei ne towas-towastababuwenaram! Jei ga jam wofelabe fene bwalnaiserem ga jes gane kabwabili enggalfe angtane nafsi gam ne damtabif, ane ga gane balbabifi jei angtane sanbaka. Ini jemna saaser-saaserfer sege folbamini, afa angtane pasarap aaiserem jei bosna jemna jam sene kitulmitenaram. ³⁹ Jei kursini angtane sanbakmanaiserem jep gam ge nwinbif masarabe, ane jena angtane Yahudimana aa jep ge betwebuwefaram jebe. ⁴⁰ Jei wini saamirnaiserem jes gane afaf-afaftababili enggalfe galgala jemna gane tamserenbaipmif. Ane jei akar-akarem enggam ge gwebili, jei sembayanga gane gwebabana bubwalsusfer enggalfe angtane gam ne damtabif, ane gam ne balbabifi enggame jei angtane waakena. Uwa Sanbagiri guru jeiserem uskambar se tamtamtababisi angtane nafsiserem jemniwer." ⁴¹ Yesus ga Jena Uwa Sanbagirmanaiserem jep nwini. Kotaka doini aa jep ne bokolntowenaram Uwa Sanbagirfe jes ne kitulbof, kotak jeiserem Yesusem gwetmanap fala. Yesus Jei angtane unggwanfer gerebaabili doini kotakap aane bokolntowenaram. Angtane doini unggwanfer jeiserem, jei unggwanfer ne bokolntena. ⁴² Abakferyan saamirawi jemna galgala fasfasusu jei ga aa jela, ane jei doi naura bastantowaisusu ga natuntena. ⁴³ Yesus angtane Jei aa jei ne tikwebaatinennerem ga jenbebili, enggam ga balbabili, "Ai bunarsusfer ims balbabili, wi saamirna aaiserem jei doini uskambar bokolntena angtane nafsiserem jemniwer. ⁴⁴ Angtane nafsi seyafter jeiserem jei doini aa jes ne kitulbonorom Uwa Sanbagirfe, doini jeiserem ga tomnaiserem galgala jelemanaiserem jemniwer. Jengga saamira wini aaiserem jei safe galgalyena, jei seyafter aa jes domolaram jei ga jes gulbana, jemna seyafter aa jes domolaram enggalfe jem gwelaiserem."

¹ Yesus Jena Uwa Sanbagirmanaiserem jewer safe gemer totinyelem, angtane daamfenna Jei aa jei ne tikwebaatinennerem Yesus ga aa bala, "Guru, gwanan tuna unggwan-gwana aaiserem jese damtabi! Je waakenfer ge falbili, ane jem ja mese waakenfer ge tenbili!" ² Yesus angtane jeiserem ga bala, "Aamke jena unggwandwasusu aaiserem ke ijes gaarabili? Ton-giri daamfenna afa fas jam falnteyan ton-giri afweraiserem jem sagabe. Ton-giri je seyafter je sege kwirwebitisi, ane onnap ga sege janbisi." ³ Yesus taarenap ga sofna, taarentumu jeiserem bosna ga Saitun. Jes jepserem jep ga aa nwini, Jena Uwa Sanbagirmana ga jem jitefwer fitna. Petrus, Yakobus, Yohanes ane Anderyas jei Yesusminip ga aa ge jalbili, Yesusfar jenfentowai ga aa ge nasbawena. Jei Yesus ga aane tenebana, ⁴ "Uwa, gwanan ap se bilipmi, taterisi Ijes bilirim ga fonggalabar se etamwesa? Ane ai bagal bwembwema asa domolsa seyafter aaiserem aa gam etamwesaram?" ⁵ Jepga Yesus ga aa tamawolbaabili, "Ga samem-samem jega angtane nensa is jam ne afaf-afaftababiyen. ⁶ Angtane unggwanfer jei sege forobisenye bosna Amnaiserem jeme. Ane jei aamei ga isene afaf-afaftababisi, jei enggam jam gam gutenaram, ’Aiba Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif, aiba jesam.’ Ane jei angtane unggwanfersus sene afaftababisi. ⁷ Aamei taterisi jam isa sarbabisneneiserem angtane im gwetmanabe jam sege erabasaram. Ane aamei gamjon ula isa sarbisisi angtane im bijauwer aa jei ge nwinbenerem jei ga sege erabasa. Aamei taterisi seyafter jeiserem ijeba sarbisirim, safnant aamei ijama ereyen jeiserem jem temawer. Seyafter jeiserem se etamwesa, jengga nunu apgal jigal seyafter gemerserem jem ge barwebiliserem je gemerje jam falyan. ⁸ Anggwabura afwer jei anggwabura afweraiserem jebar sege erabasa, ane negara afwer jei negara afweraiserem jebar sege erabasa. Ogiribe aaiserem ga sege etamwebisi: Ginirdusa se gwesa ona nafis-nafsiserem jebe. Angtane wisi sege folbamisi, aam temawer tumilgal mese onnap teneserem sege asobisi. Seyafter jeiserem ga jafner towaiwelaiserem tamtamtala angtanemana jeiserem, wini tanna jam gerala jepserem, jei sigini nabal-nabalsusu jena gam gam enolaram jes galserem. ⁹ Aamei ina ga waakenfer isa gaaramisnenne, aam temawer aamei galap isene tebabisi, ane ga isene aftabifelse angtane sanbak-sanbakaiserem jem tarnabe. Angtane nafsi ga isene saftabasa, jena angtane Yahudimana aa jep ge betwebuwefaram jep. Ane aamei isene aftabifelse angtane sanbak-sanbaka afweraiserem jemnip ane raja-rajaminip enggalem temawer, aamei Ai As ijewera tikwebaatinirim. Jeiserem ga waakensusu, aam temawer jes jepserem aamei ga dwena jep isa domola taterisi Am temawer jebe ga isa nasipmini. ¹⁰ Gwanan Taterisi Waakena Uwa Sanbagirmana jamer sene nasibenenne anggwabura seyafter gemerserem aa jei ge nwinbenerem ogiri aaiserem jebe. ¹¹ Aamei is jam sene tebabisirim, ane ga isene aftabifelse angtane sanbakem tarnabe enggalfe aamei is gam ne teneba-tenebaabuwef. Jengga jei nalef is jam ne aftabifelyen, aamei ijama ereyen ijesa nasbiliserem jem temawer. Jeter isa biltena ula Uwa Sanbagiri ijes golminirim, aam temawer jeke aamei isa nasowena, jengga Mafnana Uwa Sanbagirmanaiserem Jei aamei ula ip ga is Jei se golmini aamei ijesa nasbiliserem jemnibe. ¹² Jepga isa anggasa ayana jei osona jena gam gera jam ne munbofe. Osona jei ayana gam gera, jeta tane jemna gam gera. Ane tantantane jegme ene jeta gam nasmini, ga gam dete jam ne munbobife. ¹³ Angtane seyafter gemerserem aamei isene nasbabisi kakalmer, aam temawer aamei Ai As ijewera tebanaram. Jengga angtane Ai kanaufer As jei tebanaram jamere nunu Uwa Sanbagiri aa jep bilirim jep se falsa, angtane jeiserem ga jes waakentaasisi." ¹⁴ Yesus gamjon ga balbabili, "Aamei angtane galap isa damtasa, jei Jena Uwa Sanbagirmanaiserem jep se fisa. Angtane jeiserem enggam ga sene jenbebuwena ’Kabwaksusu jei Tamtamtababiliserem’. (Aamei angtane aaiserem ijeya gerabistenaram, waakenfer isa sarbili!) Jepga angtane ona Yudeya je aa jei ge nwinbenerem, jei otumup sege nunggirbese. ¹⁵ Jes jepserem angtane jelem ja sitawer aaiserem, jei gamjon jam ge kabwiteyan jelem jenabe enggalfe, galgala jam ne kitultaabonfe mwonawer, aam temawer jei tatarfer gam ge nunggirbef. ¹⁶ Ane angtane awelna makanap gwebiliserem jegme gemer. Jei gamjon fas jam warauyan enggalfe fene jam ne kitultefe. ¹⁷ Jes jepserem jam aa jep etamwesaram, wini udanabaraiserem ane wini tanna momem taayiniserem, jei kabwaktala unggwandusa ga sene domolsa. ¹⁸ Aamei sembayanga Uwa Sanbagirfe gamjon jam isa gwebabana, jega aamei ijama nunggiryen nunu angtane jem ge wofobiyeneiserem. Nunu jeiserem ga aas: nunu gwere kabwakfer jem gam fertenerem, nunu arouwa uskambar aa jem gam nyenaram, ane deye wisimi aa jem gam falaram. ¹⁹ Sembayanga jes gemerserem ga gam isa gwebabana, aam temawer jes jepserem angtane tamtamsusu sene domolsa, gwananmana jepserem jepyan. Gwanan jepserem Uwa Sanbagiri seyafter gemerserem aa galap eyebaabilim jamer namwer aas jepserem, tamtamsusu jes galserem fas. Ane jeiserem jamer taban, gamjon jes galserem jam etamweyan jamer abak-abaksus. ²⁰ Jengga Uwa Sanbagiri mes toforolsini nunu jem tamtamuluserem. Afa Jam toforolsiyeneye, angtane seyafter gemerserem futu. Jengga Jei nunu jeiserem mes toforolsini, aam temawer jei angtane Jelemanaiserem jes nesiktababili, angtane Jei aa jes destabaabilirim enggalfe Ai As jei ne tebaf. ²¹ Jes jepserem afa angtane aamei enggam is jam sene balbabisirim, ’Se damta! Mesias, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif, Jei aare!’, afa angtane nafsi jei enggam sege gubisirim, ’Imsa damta! Jeiba jesam!’, angtane jeiserem ijama sarbabiyen! ²² Taterisi jemnaiserem ijama tebabiyen, aam temawer angtane ol kapkaiserem jei sege forobisenye, ane ga sege gubisi, ’Aiba Mesiasam.’ Ane nabi ol kapkaiserem jei sege forobisenye. Ane jei tandana ane bwembwema ga sene eyebaabisi enggalfe angtane gam ne afaf-afaftababif, jega enggalf jei gam ne tikwebitif. Ane jei angtane Uwa Sanbagiri aa jes destabaabilirim, jei ga jes ne unggwasbaabif jam afaf-afaftababif enggalfe jei taterisi ol kapkaiserem gam ne taabif. ²³ Ga jem temawer, aamei ina waakenfer isa gaaramisnenne, Ai As imsa sarbasini! Ai gwanan aamei isa mesam towas-towastababili taterisi jeiserem jem temawer, jega taterisi jeiserem nalef jam etamweyan, aamei towasmer gam isa nwini." ²⁴ Yesus gamjon ga balbabili, "Abakefyan nunu jem tamtamuluserem aa tabanwenaram, nunu jeiserem aa jep falsaram, gwere je gwin se etamwesa, jem muar mese nafa fas. ²⁵ Ane matona winsiwer ga sege janbisinye, ane winsip seyafter gemerserem ga sege gin-ginwebisi. ²⁶ Jepga angtane jei ga Ai Tane Angtanemana, ga Asene damtasa. Ai winis sinsinibaner As iresanya, nafabaner ane baabeta unggwandusaiserem jeme. ²⁷ Ane jepga Ai malaikata Amna gas baftabisi enggalfe, jei angtane Uwa Sanbagiri aa jes destabaabilirim jei ga sene dupdupbulsisi. Malaikata jeiserem jei angtane ga sene dupdupbulsisi ogiri seyafter gemerserem jewer, ane winis seyafter gemerserem jewer." ²⁸ Yesus gamjon ga balbabili, "Au, ara tini sa gaarabi, ane taterisi Amna sa sarbisi! Afa tirni ikikini, ane ese jemna jam negma domolaram, nei ga negma towaswena ossana babitsim gase fala. ²⁹ Ga gemer jes gemerserem aaiserem jegme gemer: Afa aamei taterisi Ai Ajes nasbilirim jam isa damtabisirim jam sege etamwebisirim, aamei ga isa towaswesa enggame Ai babitsim As fortya. ³⁰ Ai bunarsusfer ims towas-towastababili, angtane namwer aa jei naawenaram jei nalefe jam ge terbiyen, taterisi aaiserem seyafter gemerserem Ai Ajes nasbilirim ga sege etamwebisi. ³¹ Winsi yo ogiri aaiserem je sege barwesa, jengga taterisi Amnaiserem je jam barweyan." ³² Yesus gamjon ga balbabili, "Nunu yo jema Ai Tane Angtanemana, Ai Ajem forolaiserem, nunu jeiserem angtane jei jam ne towaswebiyen. Malaikata taman waaken-girip jeiserem, jei teisyena. Ai Tane Uwa Sanbagirmana, Ai teisyena. Jengga tousa ga Uwa Sanbagiri Jenfentowai. ³³ Jega jem temawer, aayai samem-samem, aamei ina ga jeber-jeber ga waakenfer isa gaaramisnenne! Aamei seyafter teisyena nunu Ai gamjon Ajem foryalaiserem. ³⁴ Nunu jeiserem ga enggam: Angtane bijuap jam sofwela gamserem, angtane jeiserem nalef jam sofweyan, jei gwan ga angtane awelna jemnip aa jei gane gwebilirim ga jes gam jenbebili enggalfe, awelna gam syenulmif. Jei angtane jeiserem daamfen-daamfennem gam balbabili jei aa jes ne eyebaabiliserem. Angtane pintunu jei gerebaasnennerem, angtane jeiserem bala, ’Aamei ijam tayan!’ ³⁵ Aamei mese ijama tayan, aam temawer aamei teisyena jena jemanserem fonggalabar se fortya, ke dafef, afa ke gwini nenennap, ke jema ayang giri aa jep gam gunurum, ke gwinibenersus. ³⁶ Enggam kapka, afa Ai aafer-aafer As warautnaram, ga isAs damtabitye aamei nus is tana. ³⁷ Ai is Agemer balbabilirim, Ai angtane seyafter gemerserem jep As balbabili, ’Ijama tayan! Aamei jeber-jeber waakenfer ga jam isa gaaramisnenne!’ "

¹ Nunu gamjon ga naura angtane masar Paskana ga jem sene eyebili. Masara jeiserem jeba masara bosna ga enggam, "Roti Tanyanaiserem jem Tombaabif". Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei nele ga aane terelbene Yesus basyamer jewer ne tebafe, gane munbof. ² Jengga jei enggam ge gubili, "Nei Yesus nejama tebayan masar aaiserem aa jep falaram jebe, aam temawer afa nei Yesus namwer jam nesa tebanaram jam munbofe, angtane seyafter galap sege kakalswebili, ga sege erebili." ³ Yesus aa galap nwinirim tamna Betanyam je, Jei Simonem jenap nwini. Simon jei mes waakensona tifin bwerna unggwandusa aa jei folbanaram jewer. Yesus Simonem jenap aa galap twenaram, wini aasaje ga jela Yesusminibe. Jei botola tuna pualam eyebiliserem ga jes gwirni. Botola jeiserem minyak wanginibere, minyak wangini jeiserem jemna ninsini waakensusu, jemna hargana unggwanfer. Yesus jam aa galap nwintenaram jam twenfe, wini jeiserem botola gwora ga terewulbaastena, Yesus dukap ga sukutono minyakeme. ⁴ Angtane afwer jep aaiserem jei ga aa ge uskamswebili, ane jei jena ga aane gitminenne enggame, "Jeje bafa wini aaiserem minyaka jeiserem ga suwulsnenne? ⁵ Minyaka jeiserem hargana unggwanfer ga enggam doini angtane aa jes gam orobanaram tahunu daamfenneme. Waakenfer ga enggam, jei minyaka jeiserem jam se jualtana, ane doini jeiserem angtane galgalyenaiserem jep gase kitulmini." Jepga wini jeiserem ga aane nasbili kakal oleme. ⁶ Jepga Yesus angtane jeiserem ga balbabili, "Safnant! Aamei wini aaiserem jem temawer kapkaiserem ijama nasbiyen. Jemna awelna jeiserem jei samfer eyebili Amnibe. ⁷ Angtane galgalyenaiserem jei jeber-jeber ibar ima nwinwena, aamei jeber-jeber enggam ima eyebuwena ini imna is jam gangge folbaminirim jes batobaabife, aamei jei igama batobaabili. Jengga Ai ibar abakef seyafter nejama nwinweyan. ⁸ Wini aaiserem jei Ap As mes eyeibene, jei aa jes bilirim jam eyebife. Jei minyaka mes suwulntena tifini seyafter Amnaiserem jebe enggalfe, jei Ai As jam menetaasini Ai kuburup Ajebar falinonf. ⁹ Ai bunarsus aamei is Ajam towastababili, Taterisi Waakenaiserem ogirip aa jep ne nasbinennerem, wini aaiserem jei Ap aa jes eyeibenerem, taterisi jeiserem angtane sene nasbinense enggalfe wini aaiserem gane sarbistaabonf." ¹⁰ Yudas Iskaryot, angtane daamfenna dua belas jemniwer Yesus aa jei ne tikwebaatinennerem, jei ga sofwa angtane imam-imam sanbakaiserem jemnibe enggalfe Yesus jep gam gaarmif jei ne tebafe. ¹¹ Angtane imam-imam sanbaka jeiserem jei taterisi jeiserem jam aa galap ne sarbilirim, ini jemna saaser-saasersusfer ge falipmini. Jepga jei Yudas ga aane bala, "Ai doini ip is asa gerbana." Jepga Yudas ga towaiwena dwona ga aa terelbene Yesus jep jam gaarmife. ¹² Nunu nabal-nabalsusu jemserem masara Roti Tanyana jem Tombaabif aa jem falaram, nunu jes jemserem angtane Yahudimana dombana bastantouya ga jem ne tegila, masar Paskanap jes ne tombafe. Nunu jes jemserem angtane Yesus aa jei ne tikwebaatinenewenaram jei Yesus ga aane tenebana, "Jena ga fwera Aamei Ijep gunurum, ai tumilgal Paskana Ibe Is ajeba menetabaibaasife Aamei Ijes tombaabife?" ¹³ Jep ga Yesus angtane naura ga bafsona, enggam ga gitmini, "Im ge sofwe aaure kotanap, ane aamei angtane fona aa jei disultenaram jebar ga isa dorwena. Angtane jeiserem ga jes is ge onsobana, ¹⁴ jamere jena jei aa jep kawetanaram jebo. Angtane jena jam jemanserem ga is ge bala, ’Guru ims tenebaf, mwona Amna ga fwersa tumilgala Paskamana Ajeba tombaabife, angtane Amna Ai As jei ne tikwebaatinennerem jebar?’ ¹⁵ Jepga angtane jeiserem jei mwona unggwandusa bolap jeiserem ga is destaipmini ibe. Tikar, meja, ane kursi mes menetababisini mwona jeiserem jebe. Tumilgala Paskamana nei nejesa tombaabiliserem, aamei ga jep is ge menetulsini." ¹⁶ Angtane nawana jeiserem ga aa ge sofwa kotana jeiserem jewer. Ane jep ga seyafter ga aa ge damtabili Yesus aa gemer nasmisiwenaram. Jena jeiserem jei tumilgala Paskana jep ga aa ge menetulsini. ¹⁷ Ona aa gwinswelam, Yesus mese ga aa ge forobiyel angtane dua belas Jei aa jei ne tikwebaatinenewenaram jebar. ¹⁸ Ane Jei jame aa ge nwinbetenaram jam dwenfe, Yesus ga balbabili, "Ai bunarsusfer aamei isa Ajam towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe. Angtane jeiserem ga Abar aa jei ge twenanaram." ¹⁹ Angtane Jei aa jei ne tikwebaatinennerem jes gamserem gam jam aa ge sarbilirim, ini jemna seyafter ga aa ge jenbamini, ane jepga Yesus daamfen-daamfennem ga aane tenebawena, "Angtane Ijes balaram, bunarsusfer nansa, ke ai?" ²⁰ Yesus ga aa gutena, "Angtane daamfenna aamei dua belas imniwer, angtane rotini Ajebar ge ustababitowenaram pirni daamfennaiserem jebe, angtane jeiserem jei Ai ga Ase jei se gera. ²¹ Ai Tane Angtanemana, As tere aa gemer tulisulum Taterisi Uwa Sanbagirmanaiserem jebe. Jengga galap kapka unggwandusa se etamwefa angtane Ai aa jei geraram jemnibe. Afa angtane jeiserem jam suruyonaiserem, jei samfer." ²² Jei jame aa galap dwenaram, Yesus rotini ga goltena, ane Uwa Sanbagiri ga bala, "Ase samfer gulbana." Jepga rotini jeiserem ga bitabaabisini, angtane Jei aa jei ne tikwebaatinennerem jep ga kitulmini. Yesus ga balbabili, "Gasa tebabi! Rotini aaiserem jeba tifni seyafter Amnaiserem." ²³ Jeiserem taban, Yesus ga gamjon mangkona fo angguruboro ga goltena, ane Uwa Sanbagiri ga bala, "Ase samfer gulbana." Ane angtane Jei aa jei ne tikwebaatinennerem jep ga golmini. Ane jei seyafter gemerserem fo anggur jeiserem ga aane telbili. ²⁴ Ane Yesus ga balbabili jei, "Fo anggur aaiserem jeba aawisi Amnaiserem As jei tenbenteyalaiserem Amniwer angtane unggwanfer gamserem jem temawer. Ane jega jem temawer Uwa Sanbagiri Jei taterisi ibirmi aaiserem angtanef ga jes bilipmini enggame, Jei etam-etama kapkaiserem angtanemana gam wirtabaipmini, ane Jei angtanes eyebaabili enggame angtane Jelemanfe gam ge etamwebif." ²⁵ Yesus jepga gunu, "Ai bunarsusfer ims towastababili, Ai gamjon fo anggur Ajam telbiyen, jamere gamjon ibirmiter As telbili, nunu Uwa Sanbagiri aa jep gwesaram anggwabura seyafter gemerserem jem Sanbakfe jeme." ²⁶ Jepga jei simala ga aane twolbabili taban, jei ga ge sofobili taarentumu bosna Saitun jewer. ²⁷ Jepga Yesus angtane Jei aa jei ne tikwebaatinennerem ga balbabili, "Aamei seyafter isa nunggiri Amniwer, Ai As isa mirtetefala, aam temawer Taterisi Uwa Sanbagirmanaiserem jep ga enggam baatultel: ’Ai Angtane dombana aa jei gerebaabisnennerem, Angtane jeiserem As munbono, ane dombana ga sege syensyanwebisi.’ (Zakharia 13:7) ²⁸ Jengga Ai gamjon Ajep irwenaram terewer, Ai aamei ga isAs danabaabili ona Galileyaminibe." ²⁹ Petrus jei ga gutena, "Angtane seyafter saf sege nunggirbene Imniwer, ai ajam nunggiryen." ³⁰ Jepga Yesus Petrus ga bala, "Ai bunarsus ims towastana, gwini aaiserem nalef ayanga giriserem nawerfer jei jam guteyan, aamei Ai ga Asis baanbaanwebana nawer-ningginfer." ³¹ Jengga Petrus Jei Yesus ititmer tamawolbana, "Safe gam ai Ibaner as ge tere, ai enggam ajam guyon, ai teisyena Aamei." Ane angtane Jei aa jei ne tikwebaatinennerem seyafter jeime jes gemerserem gemer ge gubitena. ³² Yesus ane angtane Jei aa jei ne tikwebaatinennerem seyafter ga aa ge sofobili tamna bosna Getsemani jewer. Ane Yesus ga balbabili, "Aamei seyafter aaf sa nwinte! Ai gwanan Uwa Sanbagirfe sembayanga Age gwebaba." ³³ Afwer jeber ge nwinbene, Yesus ga Petrus, Yakobus ane Yohanes jei ga balbabili jes aftabifelfe. Jepga Yesus Jena ga entene ini ga towaiwebana ini jam jenbafe uskambar. ³⁴ Yesus ga aa balbabili, "Ini Amna Ase uskambar jenbana, Ai Ana enggam Ai entene Ajam tere gamserem. Aamei aaf isa nwini, ane ga isa gerasnenne." ³⁵ - ³⁶ Jepga Yesus ga gwisini bastantowaifer, Jei Jener ga jena onabe. Ane Jei ga Uwa Sanbagirfe sembayanga ga enggam gwebana, "Uwa, Uwa Amna, afa samfer etam-etama aaiserem Ai bai Ajam gwirinfe. Uwa, Aamei seyafter samfer Igam eyebili. Tamtamtala uskambar aaiserem Amniwer se golsteya. Jengga Aamei Ipsam eyebilirim Ai Ajes bilirim, jengga Aamei Igemer gunurum, ga jeter Is eyebili." ³⁷ Jepga Yesus gamjon ga warautna angtane nawer-ningna jeiserem jemnibe, Jei angtane nawer-ningna jeiserem ga damtabili jei nus ge tabana. Yesus Petrus ga aa bala, "Simon, aamke nustana? Aamke imasef unggwasa ijam gerebaasnenefe jema daamfenna?" ³⁸ Yesus gamjon ga balbabili, "Aamei jam isa gaarasnenewena, ane sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijam eyebiyen. Aamei ga waakena tefner gam isa eyebili, jengga tifini seyafter imna werna." ³⁹ Yesus gamjon naurabaraiserem ga sofna, sembayanga Uwa Sanbagirfe Jam gwebabafe gwanan gemerserem. ⁴⁰ Yesus gamjon Jame aa galap warautnaram, Jei gamjon ga damtabili angtane nawer-ningna jeiserem nus ge tabana. Jei nwena masef ne unggwasbabana, nwena jemna daran-darna jam ge gaarabisife. Jei teisyena Yesusfe bas ne bilibefe. ⁴¹ Abakferyan Yesus gamjon ga aa warautnaram nawer-ningnabarfe, Jei ga aa balbabili, "Aamke nunu ke igemera tana? Maa! Jema ga mes nulayal: Ai Tane Angtanemana, Asene gera angtane etam-etamabara jem tafnabe. ⁴² Jasa irwe! Au, nei ganma gwi! Angtane Ai aa jei geraiserem, jei aare mes foryal aafe." ⁴³ Yesus ga gemer nasowena, angtane dua belas Jei aa jei ne tikwebaatinennerem, angtane daamfenna jemniwer bosna ga Yudas jei ga fortya. Angtane unggwanfer jebar aa jei ge forobityerem, jei nombeya bwalna gane erbili, ane jeime tini bwalna unggwan-gwansus jes ne erbili. Angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, angtane unggwanfer jeiserem ga jei ne baftabili Yesus jam ne tebafe. ⁴⁴ Yudas, angtane Yesus aa jei geraram, jei angtane unggwanfer jeiserem fwater balbabili enggame, "Angtane ai ajes aalumbonorom, Angtane jeiserem aamei ga jes isa tebana. Ane Jei ga isa aftafala ginanggwana ga jamer sene gerebaasnenne." ⁴⁵ Yudas jam aa galap fortyaram, jei tatarfer Yesusminip ga gwina, ane ga bala, "Guru." Jepga jei ga aalumbono olbumube. ⁴⁶ Jepga Yesus ga aane tebana, ginggitfer ga aane tebasnenne. ⁴⁷ Jengga angtane daamfenna Jem gwetmanap aa jei finaram, jei nombeya ga fotoltena, angtane awelna imam sanbagirsususerem jemnip aa jei gwebilirim ga aa ge aafwebana jam tegilfe, jengga imwana tefner targabaasini jamer te. ⁴⁸ Yesus jepga aa balbabili, "Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe? ⁴⁹ Ai nunu jeber-jeber Ai im tarnabe towas-towastababuwefa Jena Uwa Sanbagirmanaiserem jebe, jengga aamei Ai jep Ase ijama tebayan. Taterisi Uwa Sanbagirmana jebe, nabi enggam ne tulistaabil seyafter aaiserem ga jamer se etamwena." ⁵⁰ Jepga angtane seyafter Yesus aa jei ne tikwebaatinennerem, jei Yesus ga aane mirtetefala, ga aa ge nunggirbene. ⁵¹ Jepga angtane daamfenna Yesus ga jei tikwebaatini, jei ga kain tefner egwaitana tifni jena jemfener matasini. Angtane jei jam ne tebaf, ⁵² jewer ga jei kaina jeiserem soktasini, ane ilyak-ilyaksamer ga nunggiri. ⁵³ Angtane Yesus aa jei ne tebanaram, jei Yesus ga aane aftafala imam sanbagirsususerem jem jenabe. Angtane imam-imam sanbakaiserem seyafter gemerserem, ane angtane sanbaka Yahudimana, ane guru-guru Hukumu Nabi Musamana aa jei ne towas-towastababuwenaram, jei seyafter mes ge betwebili. ⁵⁴ Petrus jei Yesus amunuwer onsobananna. Jei bijautowaifer wofna, jamere imam sanbagirsususerem jem ja sitabo. Petrus jei polisini Jena Uwa Sanbagirmana aa jei ne gaarabisnenewenaram jebar ge nwinbene. Jei ga nwintena tokwa eyebe, tafna jam sarsarsofe. ⁵⁵ Angtane imam-imam sanbakaiserem ane Safna Angtane Yahudimana Sanbak-sanbaka Seyafter Gemerserem, jei angtane enggalaiserem jes ne terelbaabili, angtane taterisi nimnafer nasowelaiserem Yesusem temawer. Jei Yesus jam ne munbof. Jengga Jemna kapkaiserem daamfenna afa jam ne damtabiyen. ⁵⁶ Angtane unggwanfer taterisi ol kabwak aa jei ne balbabiwenaram nenes-nenesmer, ane daamfennaber jam falyan. ⁵⁷ Jepga angtane afwer ga aa ge irwebili, ol kapka syefer ga aane nasbabili Yesusem temawer. Jei enggam ge nasbawena, ⁵⁸ "Ai amsa sarbana Jei enggam gunu, ’Ai Jena Uwa Sanbagirmana angtane unggwanfer aa jes ne gwitiririm, As wirulsini. Ane nunu nawer-ningginfenna gamjon ga jem As gwitiri ibirmiter, angtane jam ne gwitiryen gala.’ " ⁵⁹ Taterisi angtane jeiserem jei aa jei ne nasbabilirim jes mese, taterisi jeiserem daamfennaber jam ne nasbiyen. ⁶⁰ Ane imam sanbagirsususerem jei angtanem nenennap ga irwena, ane Yesus ga tenebana, "Aamke taterisi aaiserem ke Ijam tamawolbiyen? Aamei Ibas nasbifi taterisi syefer aaiserem jem temawer?" ⁶¹ Jengga Yesus Jei ula daamfenna afa Jam bilteyan; Jei Jam tamawolbayan. Imam sanbagirsususerem gamjon ga tenebana, "Aamke Mesias, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif? Aamke Tane Uwa Sanbagirmana, Uwa Sanbagiri aa jes ne pujitenerem?" ⁶² Yesus ga tamawola, "Aiba Jesam. Ane aamei seyafter Ai As isa damtasa, Ai Tane Angtanemana, Ai Uwa Sanbagirem taasfolawer Ase nwinsi, Uwa Sanbagiri Jei baabetsusu. Ane Ai As iresanya winis sinsinibaner taman waaken-giriwer!" ⁶³ Jepga imam sanbagirsususerem jei Yesusmana taterisi jeiserem jam aa galap saribenerem, jei ga kakalswena, fene jemna ga aa taayimbetena, ane ga bitaimbaasini. Ane jei ga gutena, "Tabana ga aaf! Jei Uwa Sanbagiri mes imei-imeitana! Ai gamjon angtane nafsi ajam sarbayan. ⁶⁴ Aamei iner imsama sarbana Angtane aaiserem enggam gunu, ’Ai Uwa Sanbagirfar As ge nwini Sanbakfe.’ Jeiserem kapka angtane gam aa jei gunurum! Aamei ifomfoma gunu?" Jepga angtane seyafter jes gemerserem ga aane bala, "Yesus Jei taterisi kabwaksusu gam biltena, Jei jasa munbo, jamer futu!" ⁶⁵ Jepga angtane afweraiserem jei ga aa ge towaiwebili Yesus makem aane gwebana miribe. Ane jei nwena Jemna fenbiteme ga aane faarebana jamer mat, ane ga aane safsaftana, ane jei enggam ga aane bala, "Sya, Aamei ai asIm towastababi Aamei Is nane safsaftana!" Ane angtane Jei aa jei ne gerebaasnennerem, jei mese jeime Jes ne safsaftana. ⁶⁶ Petrus nomkef jep aa jep finaram sitawer. Ane yafonsiwiri imam sanbagirsususerem awelna jemnip aa jei gwebilirim, jei Petrusminip ga jela. ⁶⁷ Ane wini jeiserem jei Petrus ga damdamtana, Petrus jei tokwa eyep aa jep nwinirim. Ane wini jeiserem ga bala, "Petrus, aameiba Yesus Angtane tamna Nasaretmanaiserem, aameima tikwebaatinenewena." ⁶⁸ Jengga Petrus jei ga jam baanbaanwena. Jei ga gunu, "Ai Angtane aaiserem ai teisyena. Ane ajam towasweyan aamei ibas bili." Jewer Petrus pagar mwa tarnap ga gwina. ((Jes jepserem jepga abakefyan ayanga giri ga gutena.)) ⁶⁹ Wini jeiserem Petrus gamjon jama damdamtana, jei angtane aa jei ge fibilirim jem gwetmanabe ga balbabili, "Angtane aaiserem jeiba Yesusfar jeyam ge wofobuwena." ⁷⁰ Petrus gamjon ga baanbaanwena. Jepga abakefyan angtane jewer aa jei ge fibilirim, Petrus ga aane bala, "Petrus, aamei bunar-bunarsus Yesusfar ba aameima wofowena, aam temawer aamei mese aamei angtane ona Galileyamana." ⁷¹ Jes jepserem Petrus jei jena ga enggam gaarstenanna Uwa Sanbagirem tarnabe, "Angtane aamei ijesa nasbanaram, ai bunarsusfer Angtane jeiserem ai teisyena. Afa ai syefer as nasouna, Uwa Sanbagiri Jei ai ga as babapsobana!" ⁷² Ane jes jeberserem ayanga giriserem ga gutena nawerfer. Jepga Petrus taterisi ga sarbistaabona taterisi Yesus gwanan aa jes nasibenentem jebe. Jei taterisi jeiserem ga saribaastabona enggame, "Nalef ayanga giriserem nawerfer jam guteyan, aamei Ai ga Asis baanbaanwebana nawer-ningginfer." Ane jepga Petrus ini jemna ga jenbana, ane uskambarsus ga syena.

¹ Gwinibenersus angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane Safna Angtane Yahudimana Sanbak-sanbaka Seyafter Gemerserem, angtane jeiserem seyafter gemerserem tatarfer ga aa ge betwebili, ula ga aane mwangbisini Yesusfe jes ne eyebife. Jei Yesus gane taferna, ga aane aftafala, Gubernur Pilatusfe ga aane gerbana. ² Pilatus Yesus ga aa tenebana, "Aamke anggwabura Yahudimanaiserem jem Raja?" Yesus ga tamawolbana, "Ba gamam, iner imsam gutena." ³ Jepga angtane imam-imam sanbakaiserem ga aa ge gubili, Yesus Jei etam-etama kapka anesus aa jes eyebilirim. ⁴ Pilatus Yesus gamjon ga tenebana, "Aamke Ijam tamawolyan? Aamke Imes towaswel angtane aaiserem jei enggam ge gubili Aamei etam-etama kapka anesus Ijes eyebili?" ⁵ Jengga Yesus Jei taterisi Pilatusmana afa fas Jam tamawolbiyen, ane Pilatus ga jam bitbitwena. ⁶ Tahunu jeber-jeber nunu unggwandusa bosna masar Paska, Pilatus jei angtane bwiyip aa jei gam nwinirim ga jem aftabunnuwefa. Angtane unggwanfer jei aa jes gane destabanaram jam aftannufe, Pilatus ga angtane jeiserem ga jes gam aftannu. ⁷ Jes galapserem angtane aasaje bosna Barabas aa jes ne tebanaram, ane bwiyip ga aane gaataantena. Barabas jeiba angtane daamfenna angtane unggwanfer aa jei ge erabawenaram jemniwer, ane jei angtane aasaje jei ne munbono. ⁸ Nunu jes jemserem angtane uskambar ga aa ge forobitye, ane Pilatus ga aane tenebana, "Aamke samfer angtane kapkaiserem is aftannu, aamei gwanan jeber-jeber igemer eyebuwenaram?" ⁹ Jepga Pilatus ga tenebaabili, "Aamei ifoma gunu? Aike Raja anggwabura Yahudimanaiserem ip ke isa ajes aftamunnuf?" ¹⁰ Pilatus game aa jewer tenebaabilirim, jei ga aam temawer tenebaabili, jei fwater towaswena angtane imam-imam sanbakaiserem jei Yesus enggalem temawer ne gera jei Yesus jam ne uskamswebana. ¹¹ Imam-imam sanbakaiserem jei angtane seyafter gemerserem jep aa jei ge fibilirim ga enggam ne balbabinenne, "Aamei enggam isa balbabili, ’Barabas is aftannu!’ " Ane angtane seyafter gemerserem ga aa ge balbabili, "Barabas tefner sa aftannu!" ¹² Jepga Pilatus ga tenebaabili, "Afa ai Barabas as aftannurum, ai ga basas eyeibene Angtane aaiserem aamei ijesa jenbewenaram Raja anggwabura Yahudimaneme?" ¹³ Angtane seyafter gamjon ga aa ge tetenbili, "Ti salibip sa daktanswe, jamer futu!" ¹⁴ Pilatus ga tenebaabili, "Jeje bafa? Angtane aaiserem Jei kapka fwersa gam eyebili?" Jengga seyafter gamjon ga aa ge tetenbili uskambar, "Ti salibip sa daktanswe!" ¹⁵ Pilatus jei angtane unggwanfer jeiserem ini jemna gam saaser-saasertabaipmif, jega jem temawer jei Barabas ga aftamunnu jebe. Ane jei Yesus ga gaarmini jam ne safsaftafe bana utuboroserem jeme, ane jam ne daktanswef ti salibibe, jamer futu. ¹⁶ Jepga ginanggwa Gubernurmana Yesus ga aane aftafala jadusa Gubernurmanaiserem, tampata ginanggwamanaiserem jem gwetmanabe. Ane ginanggwa seyafter jep gemerserem ga aa ge betwebili Yesusem tarnabe. ¹⁷ Ane jei fene berbere sagamana Yesusfe ga aane doksobaaniwili. Fene bwalna jeiserem raja aa gala gam kamwiwenaram. Ane jei newa utuboro ga aane egwaisona topini gamserem, ane newa utuboro jeiserem ga aane gwelebatena Yesusem dukabe, topini raja aa gala gam gweltowenaram. ¹⁸ Jepga ginanggwana jei ini kabwakmer Yesus enggam ga aane bala, "Samfer, Raja anggwabura Yahudimana!" ¹⁹ Jepga jei duka Yesusmana ga aane safsafulbono komol boromemme. Ane jei maka ga aane sirbesiwena. Jepga somwan dumem ga aa ge nwinbitena, Yesus akar-akarem ga aane pujitene. ²⁰ Jei jam aa ge tabanwebilirim Yesus jam ne bisobalabe, jepjon ga jei fene bwalna berbereiserem ga aane soksobaasiwili, ane fene Jelemana gwanan aa jes ne soksobaasinirim, fene jeiserem gamjon ga aane kayimbene. Jepga Yesus ga aane aftafala kota sitawer jam ne daktanswena ti salibibe. ²¹ Yesus aa galap ne aftafalaram, nelep jes jepserem jei ga aa ge dorwebili angtane kota Kirenemanaiserem jebar. (Bosna jemna ga Simon. Jeiba uwa Aleksander ane Rufus jemnam.) Jei onnawer fortya, ane jei safe kotanabe aa gemer kautenaram, ginanggwa Simon ga aane tergenbana salibi Yesusmana jam sutunbofe. ²² Yesus ga aane aftafala jamer tamna bosna Golgota, afa bosna afwer ga enggam "Tamna Dwak Otam". ²³ Jes jepserem jei angguru mur obatabar dupdupbuluserem Yesusfe saf jes ne gulbaf, jengga Yesus Jei baif gwebil fo angguru jam telbife. ²⁴ Yesus jepga aane daktanswena ti salibibe. Ane ginanggwa jei undiana tuna bastantouya galserem ga aane jejetana enggalfe, fene Yesusmana jem gam ne syenulbof. ²⁵ Nunu jeiserem jeme, jema ga sembilan Yesus ga aane daktanswena ti salibibe. ²⁶ Salib sagabe tulisana ga jep ne baatultena. Kapkaiserem aa jes ne bilibenerem Yesusem temawer jei ga enggam jep ne tulistaabili, |scRAJA ANGGWABURA YAHUDIMANA. ²⁷ Jep ga angtane komkoma nauraiserem ga Jebar ne daktabaabunwena ti salibibe, afelna Jem taasfolawer, ane afelna ga Jem gwejawer. (( ²⁸ Jei game aa jewer ne eyebilirim, jega enggalf etamwena taterisi aa jes tulisulum Taterisi Uwa Sanbagirmanaiserem jebe gam tabanswef enggame, angtane Jei enggam gane balf, "Angtane jeiserem Jeiba kapkaiserem Jeyam eyebili.")) ²⁹ Angtane salib tarasamer aa jei ge ayebintyerem, jei Yesus ga aane imei-imeitana, duka ga aane jejetababili, enggam ga aane bala, "Yesus, Aamei enggam Im gununt, ’Ai Jena Uwa Sanbagirmana samfer As wirulsini, ane Jena jeiserem nunu nawer-ningginfenna gamjon ga jem As gwitiri ibirmiter.’ ³⁰ Sya, Ina jase ireya ti salibiwer, ane Ina jase waakentaasini!" ³¹ Angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, jeime Yesus gemer ga aane bisobana. Jei jen jena ga aane gitminenne, "Jei angtane nensa gam waakentaasini, jengga Jei Jen Jena Jam waakentaasiyen!" ³² Ane jei enggam ga aane bala, "Yesus Aamei enggam Im gunu, ’Aiba Mesiasam. Aiba Raja anggwabura Israelmanaiserem.’ Afa Aamei jes gamserem Ibunar nasowelaye, gase irya salibiwer! Jepga ai Aamei Is asa damtana, ane ga Is asa tebana." Ane angtane naura jei aa Jebar ne daktabaabunswenaram ti salibibe, jei mese Yesus ga aa ge bisobana. ³³ Jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef. ³⁴ Ane jema 3.00 jes jeberserem Yesus ga uskambar gwarna, "Eloi, Eloi, lama sabaktani?" Igi jemna ga enggam, "Uwa Sanbagiri Amna, Uwa Sanbagiri Amna, Aamei Ai As Ibaf mirtene?" ³⁵ Angtane jep aa jei ge fibilirim ga aane sarbana, jei ga aa ge gubili, "Gasa sarbasi! Yesus Jei Eliyas jenbewena." ³⁶ Angtane daamfenna jemniwer jei tatarfer ga nunggirfele, fenbiti ga goltetna. Jei fenbiti jeiserem angguru garsamaiserem jep ga osoltena, ane tini bwalnaiserem jep ga fwiretena. Ane Yesusem mif tarnap ga gwirinswena jam telbife. Ane angtane jeiserem ga gutena, "Nei ganma fya! Nejesa gerebafe Eliya kese fortya, jei jam tinswefe ti salibiwer." ³⁷ Jepga Yesus uskambar ga gwarna, ga tere. ³⁸ Ane kain unggwan-giri aa je taannurum Uwa Sanbagirem Jenabe ga aane bitnetini nenennaber, bolawer jamer gwonabo. ³⁹ Angtane sanbaka 100 ginanggwamana jebe aa jei finaram Yesusem tarnabe, jei Yesus ga sarbasini Jei jama gwarenwenaram. Ane angtane jeiserem jei Yesus ga damtana aa tererem. Ginanggwana jeiserem enggam ga gunu, "Angtane aaiserem Jeiba bunarsusfer Tane Uwa Sanbagirmanam!" ⁴⁰ Jes jepserem wini ga bijauwer ge fibili, ane ga aane gaarabili seyafter aa je etamwenaram. Wini afweraiserem wini seyafter jeiserem jemniwer bosna jemna ga aas: afwer bosna Maria Magdalena; afwer bosna Salome; ane afwer bosna Maria. Maria jei iye Yakobuso Yosesmana. Yakobus jeiba tanisam. ⁴¹ Wini seyafter jeiserem ga Yesus gwanan aa jei ne tikwebaatinennerem ona Galileya je, ane jes galapserem jei Yesus ga jei ne batobana. Ane wini nafis mesna Yesus aa jei ne onsobanaram jamer kota Yerusalemo, jei mese jei jep ge fibili. ⁴² - ⁴³ Nunu angtane Yahudimana aa jem ge menetwebisiwefaram, nunu jeiserem jeiba nunu nalef nunu Sabat jam foroyan. Nunu jeiserem jeme ona safe gemer gigitswelam, angtane bosna Yusuf jei ga jela. Jeiba Arimateyam tane, ane jeiba angtane daamfenna Safna Angtane Yahudimana Sanbak-sanbaka Seyafter Gemerserem jemniwer. Jei nunu Uwa Sanbagiri Jei aa jem nwinirim anggwabura seyafter gemerserem jem Sanbakfe ga jes fibili. Yusuf jei Gubernur Pilatusminip ga sofwa, ane ga bala, "Yesusem futunuserem ap se gerba!" Yusuf jam ereyen Pilatusminip jam foryafe, aam temawer nunu Sabat gemerje jam falyan. ⁴⁴ Pilatus jei jam bitbitwena jame aa galap sararam enggame Yesus futu, ane jei angtane sanbaka ginanggwamana ga jenbene. Jei angtane jeiserem ga tenebana, "Ke bunar Yesus ke mes tere?" ⁴⁵ Pilatus taterisi angtane sanbaka jeiserem jama saribenerem jemniwer enggame, Yesus bunarsusfer mesam tere. Jepga Pilatus jei Yusuf ga bala, Yesusem futunu jam tinswefe ti salibiwer enggalfe, tonmwa bitisibe gam gaarantef. ⁴⁶ Jes jepserem Yusuf jei kaina waakensusu ga armantana. Ane jei Yesusem futunu ti salibiwer ga tinswena, ga taferna kaina jeiserem jeme. Jepga jei Yesusem futunu ga gaarantena tonmwa bitisibe. Bitisi jeiserem angtane ga otumton jewer ne eyebili. Jepga jei tuna nafsi unggwan-girsususerem ga aane irfifitaansowena, tuna jeiserem ga tonmwa bitisi jem mwa kawetala jem ne motolsini pintunu galserem. ⁴⁷ Maria Magdalena, ane Maria Yosesem eneserem, jei nwena jeber ge folbamini, Yesus fof sene gaarantena.

¹ Nunu Sabat jama ayintyerem, Maria Magdalena, ane Maria Yakobusem eneserem, ane Salome, jei bumbunu nenes-nensa ga aane armantababili, Yesusem futunu bitisibe Jem ne gwebaf. ² Nunu jeiserem jeme, nunu nabal-nabalsusu minggunu aa jei ferwenaram jem gwinibenersus, gwere jama anggasyelam, wini seyafter jes gemerserem ga aa ge sofobili Yesusem tonmwa bitis tarnabe. ³ Wini seyafter jes gemerserem jei nel nenennap aa galap ge wofobilirim, jei jen jena ga aane taanaaminenne, "Nei nese nane se batobaabili tuna unggwan-girsusu pintunu galserem tonmwa bitisi aa jem ne motolsinirim, tuna jeiserem bitis mwonawer jei irfifitaansowefe?" ⁴ Jengga bitisi Yesusmana jame aane gwetmanulbonorom, wini jeiserem jei tuna unggwan-giri pintuf aa jes ne gaaraniwilirim bitis mwona aa jem ne motolsinirim, tuna jeiserem ga aane damtana ton pintuf jeiserem fwater ne irfifitaansowena, tonmwa bitisi ga jamer sokotini. ⁵ Jepga jei tonmwa bitisi jeiserem jep ga aa ge kabwitena. Tonmwa bitis gwonabe Yesusem futunu aa jep falitonom, taasfolawer jewerserem malaikat aasaje ga jep nwini. Wini seyafter jeiserem jei angtane jeiserem ga jam ne bitbitwebana, ane ga aa ge erebili. Angtane jeiserem fene bwalna gam kamwini, fene jeiserem sinsinsusu. ⁶ Angtane jeiserem ga balbabili, "Ipsama ernerem! Ai amsam towaswena aamei i Yesusma terelbene, Yesus angtane Nasaretmanaiserem aa jes ne salibtenentem. Jei gamjon mes irwena terewer. Jei aafe fas. Sa angga! Yesus ga aaf ne gaarantenant. ⁷ Gasa warau angtane Yesus aa jei ne tikwebaatinenewenaram jemnibe, taterisi aaiserem jep ga isa nasipmini, ane Petrusf mese. Jei enggam isa balbabili, ’Yesus Jei ims danabaabili ona Galileyawer, Jei aamei gwanan is gemer balbabilintim. Aamei ga jep isa damtatna.’ " ⁸ Wini jeiserem ga aa ge tobitintye tonmwa bitisiwer, jepga jei ga aa ge waraubili ga jamer ge nunggirbifele, aam temawer jei jam ge egegwebili, uskambarsus ge erebili. Jega jem temawer jei angtane afa jam ne towastayan. ⁹ Yesus aa galap irwenantam terewer nunu minggu jem gwinibenersus, Jei nabala ga Maria Magdalena Jena jemnip gweretal. Maria Magdalena jeiserem Yesus nalefe jam teryen, Jei bwat kapka jemniwer ga tuju gam surboibili. ¹⁰ Wini jeiserem ga aa sofwa angtane Yesus aa jei ne tikwebaatinenewenaram jemnibe, taterisi aa je etamwenaram ga nasipmini jebe. Jes galapserem angtane Yesus aa jei ne tikwebaatinenewenaram jei ga jam ge betwebili, ane ga aa ge syebuwena. ¹¹ Jei jame aa galap ge sarbilirim enggame, Yesus gamjon mes irwena terewer, ane Maria Magdalena jei Yesus mes damtana, angtane Yesus aa jei ne tikwebaatinenewenaram jei taterisi jeiserem fas jam ne taabiyen. ¹² Jep jon ga Yesus Jei Jena gamjon ga gweretana nelebe, angtane naura afweraiserem Jei aa jei ne tebanaram jemnibe. Numu Jemna nafismer folbana, numu gwanan aa jei folbanantam jewer. ¹³ Angtane naura jeiserem jei jam aa galap ge towaswenaram enggame aaiserem jeiba Yesusam, jei gamjon ga aa ge waraufaltya jelem afelen mesna aa jep ge nwinbenerem jebe. Ane jei jelem afelen mesna ga aa ge towastababili enggame, "Ai Yesus ames ge damtana." Jengga jelem afelen mesna jei taterisi jemna jeiserem jam ne taayipmiyen. ¹⁴ Umwef ga, angtane sebelas Jei aa jei ne tikwebaatinenewenaram Jena jemnip ga gweretana, jei jame aa galap dwenaram. Jei angtane sebelas jeiserem ga uftabili, aam temawer jei taterisi Yesus jam irwelaiserem terewer jam ne taabiyen. ¹⁵ Jepga Yesus angtane seyafter aa jei ne tikwebaatinennerem ga balbabili, "Gasa sofwe! Ogiri aaiserem seyafter aa gemer falaram, angtane seyafter gemerserem Taterisi Waakena ga gemer isa nasibenenne. ¹⁶ Angtane Taterisi Waakena aaiserem aa jei ne taabilirim waakenfer, ane ga sene baptistababili, angtane jeiserem ga jes se waakentababisisi. Jengga angtane afa Taterisi Waakena aaiserem waakenfer jam taabiyeneiserem, jei tamtamtala jei sene domolsa. ¹⁷ Angtane Ai As jei ne tebanaram, jei bwembwema sene eyebisi. Bosna Amnaiserem bwat kapkaiserem ga jem sene surbobisi. Jei ula nafis-nafsiserem jei jener jam ne towaswebiyeneiserem ga jes sene nasbabisi. ¹⁸ Jei awasa tafam sene tebabuwesa, ane fo racuna sene telbebisi, jengga jei jam ge terbiyen. Ane jei tafna angtane bwernabaraiserem jem sagap sene tosobaipmunsowesa, ane angtane bwernabara jeiserem jei sege waakenswebisi bwernawer." ¹⁹ Tuhan Yesus taterisi jeiserem jama nasipminirim jamer taban, Yesus onnawer ga tauna taman waaken-giribe, Uwa Sanbagiriserem Jem taasfolawer jep ga nwintena. ²⁰ Jepga angtane Yesus aa jei ne tikwebaatinennerem jei ga aa ge sofobili, ane taterisi Uwa Sanbagirmana ga aane nasbinenne ona seyafter gemerserem jebe. Ane baabeta Uwa Sanbagirmanaiserem jeme, bwembwema jem ga aane eyebaabili, jega angtane Taterisi Waakena jeiserem waakenfer gam ne taabif.