Matius

Matius

¹ Daftara aaiserem ga asal-asala Yesus Kristusmana. Jei tane Raja Daudmana, ane Raja Daud jei tane Abrahammana. ² - ⁶ (6a) Uwa Abraham aa galap gwelam jamere Raja Daud jon aa galap gwelam bosna asal-asala Yesus Kristusmana jes galapserem galap aa jei naawelam bose bosna jemna ga aas: Abraham jei Isakem jeta. Isak jei Yakubem jeta. Yakub jei Yehudam jeta, ane ayana osona jeman mesna. Yehuda jei Peres ane Sera jem jeta. (Ene jemna bosna Tamar.) Peres jei Hesronem jeta. Hesron jei Ramem jeta. Ram jei Aminadabem jeta. Aminadab jei Nahasonem jeta. Nahason jei Salmonem jeta. Salmon jei Boasem jeta. (Ene jemna bosna Rahab.) Boas jei Obetem jeta. Ene jemna bosna Rut. Obet jei Isaim jeta. Isai jei Raja Daudtem jeta. (6b)- ¹¹ Raja Daud aa galap gwelam jamere anggwabura Israelmana aane aftabifel ona Babilonwer, asal-asala Yesus Kristusmana jes galapserem galap aa jei naawelam bose bosna jemna ga aas: Raja Daud jei Salomom jeta. Ene jemna gwanan jei wini Uryamana. Salomo jei Rehabeyamem jeta. Rehabeyam jei Abyam jeta. Abya jei Asam jeta. Asa jei Yosafatem jeta. Yosafat jei Yorammem jeta. Yoram jei Usyam jeta. Usya jei Yotamem jeta. Yotam jei Ahasem jeta. Ahas jei Hiskyam jeta. Hiskya jei Manasyem jeta. Manasye jei Amonem jeta. Amon jei Yosyam jeta. Yosya jei Yekonyam jeta, ane ayana osona jeman mesna. ¹² - ¹⁶ Anggwabura Israelmana aa galap ne aftabunnulum ona Babilon je jamere Yesus aa surnu, asal-asala Yesus Kristusmana jes galapserem galap aa jei naawelam bose bosna jemna ga aas: Yekonya jei Seyaltyelem jeta. Seyaltyel jei Serubabelem jeta. Serubabel jei Abihutem jeta. Abihut jei Elyakimem jeta. Elyakim jei Asurem jeta. Asur jei Sadokem jeta. Sadok jei Akimem jeta. Akim jei Elyutem jeta. Elyut jei Eleyasarem jeta. Eleyasar jei Matanem jeta. Matan jei Yakubem jeta. Yakub jei Yusufem jeta. Yusuf jei anggwana Mariamanaiserem. Mariaminiwer ga Yesus se surnu, Jei ga Kristusem aa jes ne jenbewenaram. Bosna jeiserem jem igiserem ga enggam: Jeiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif. ¹⁷ Jewer ga Uwa Abraham jamere Raja Daud, asal-asala empat belas. Raja Daud jamere anggwabura Israelmana aane aftabifel ona Babilonwer, asal-asala empat belas. Saf gemer ne aftabunnulum ona Babilon je jamere Kristus aa surnu, asal-asala empat belas. ¹⁸ Taterisi Yesus Kristus aa gam surnuntum ga enggam: Eneserem Maria ba mesam gununt Yusuf gaarfe, jengga jei gemerje nawersamer jam ge tayan. Jafner ge gowena, jengga Maria jei Mafnana Uwa Sanbagirmanaiserem ga jei udarbarulsini. ¹⁹ Yusuf, anggwana Maria aa jes balam jam gaarfe, jei jeber-jeber waakenater eyebuwena. Yusuf jei bai Maria jam afolnannafe angtanem nwenabe. Jei saf ga enggam gunu Maria jam aafulnuf basyamer. ²⁰ Yusuf jeiserem jam aa galap mwangbisinirim, malaikata Tuhanmana ga fortya esereme, Yusuf enggam ga bala, "Yusuf, Raja Daudtem asal-asala, ipsam ernerem Maria se gol wife. Tane Maria aa jes tingginaram, Tane jeiserem Mafnana Uwa Sanbagirmanaiserem ga Jei gaarbili. ²¹ Jei tanna girtowai se gerna. Aamei Tane jeiserem bosna ga enggam is jenbene Yesus, aam temawer Jei angtane Jelemana Jei se waakentababisini etam-etamawer." ²² Seyafter jeiserem ga enggalf etamwena, jega Tuhan aa jes bilim nabi aa jes tulisulum, jeiserem gam tabanulf. Nabi jeiserem ga enggam tulisul: ²³ "Yafonsiwiri aasaje tanna se tingginsa, ane Tane jeiserem se geresa, girtowai tane. Tane jeiserem ga enggam sene jenbese, Imanwel." (Yahudi olem jem igiserem ga enggam, "Uwa Sanbagiri Jei nebar neya gwena.") (Yesaya 7:14) ²⁴ Yusuf nunuwer jam aa galap irwenaram, jei ga eyebili malaikata Tuhanmana jei aa gemer balaram. Yusuf Maria ga afolfaltya jenabe. ²⁵ Jengga jei jam ne batsoyan, jamere Tane jeiserem aa surnu, Tane jeiserem ga girtowai, ane Yusuf ga jenibene bosna Yesus.

¹ Yesus aa galap surnurum tamna Betlehem je, ona Yudeya, jes galapserem ga Raja Herodese nwin Rajafe. Jes galapserem angtane matona aa jei ne ajarwebabuwenaram, jei ga aa ge forobitye kota Yerusalem je ona gwer anggasyelawer. ² Angtane jeiserem jei ga aa ge taanaabisnenne, "Tane namwer aa Jei surnurum Raja anggwabura Yahudimana Jei fofa? Ai seyafter matona Jemna amsama damtana winsi gwer anggasyelawer, ane ai aaf ga enggalf aya fortya Jei agma pujitef." ³ Raja Herodes jei ula jeiserem jame aa galap sarbilirim, jei ga erne, ane jem inibe taterisi jeiserem waakenfer jam taabiyen; ane seyafter anggwabura Yerusalemmana jegme gemer ge etamwebili. ⁴ Ane Raja Herodes ga angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram ga jenbebili. Jepga Raja Herodes ga tenebaabili, "Mesias fof surnu, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif?" ⁵ Jei aa ge tamawolbili, "Tamna Betlehem ona Yudeya je ga jep surnu, aam temawer nabi ga enggam tulistaabil: ⁶ ’Aamei angtane Betlehemmana ona Yehuda je, tamna imnaiserem sanbagirsusu tamna afweraiserem jemniwer. Asal-asal imnaiserem Jei galap ga Jei se nwini Sanbakfe, Jei angtane Israel, angtane Uwa Sanbagirmana jeiserem, Jei waakenfer jei se gerebaabisnenne.’ " (Mikha 5:2) ⁷ Jewer ga Raja Herodes angtane jeiserem matona aa jei ne ajarwebabuwenaram jebar basyamer ga aa ge nasbawena. Ane jei ga tenebaabili, "Aamei matona jeiserem nabal-nabalsusu ifofa damtana?" ⁸ Gamjon ga balbabili enggame, "Sa sofwe Betlehemwer, Tanna jeiserem waakenfer ga isa terelbene. Ane Jei Jam isa damtanaram, agme tatarfer ga ase isa towastana, jega aime gam as sofwa, Jei Jam pujitefe." ⁹ - ¹⁰ Jei taterisi rajamanaiserem jam aa galap ne saribenerem, jewer ga aa ge sofobili. Jei matona ga aane damtana, matona gwanan jei aa jes ne onsobanantam winsi gwer anggasyelawer, jei aa jem towasfar ge wofebilirim. Ini jemna saaser-saasersusfer ge folbamini, jei matona jeiserem jam aa galap ne damtanaram. Matona jeiserem je danna, ga jes ne onsobana. Matona jeiserem ga jeber fyatena jena Tanna jepserem aa jep nwinirim jem mwongfar. ¹¹ Ga ge kabwitena jena jeiserem jebe, Tanna jeiserem ene Maria jebaner ga aane domsona. Jei somwan dumem ga aa ge nwinbitena, ane Tane jeiserem ga aane pujitene. Angtane jeiserem funa jemna ga aane tosobaabisini, ane jigala emas, kemenyan, ane mur ga aane kitulbono. ¹² Ane Uwa Sanbagiri ga towastababili esereme, "Aamei gamjon ijama warauyan Raja Herodesminibe." Jepga jei nele nensaiserem gamjon ga jewer ge sofobili jam ge waraubife jelem onabe. ¹³ Angtane jeiserem matona aa jei ne ajarwebabuwenaram jame aa galap ge sofobilirim; malaikata Tuhanmana jei Yusufminip ga fortya esereme, ga bala, "Gase irwe, Tanna enebaner ga is afsofala, ga iste nunggiri negeri Mesirwer! Aamei is nunggiri, aam temawer Raja Herodes jei ginanggwana mes balbabili, ’Tanna jeiserem jes terelbef, nombeyem gam tegilf!’ Mesirwer ga jep iste nwini, jamere ai isas towaswena ga iste waraufaltya." ¹⁴ Jepga Yusuf ga irwena, ane Tanna enebaner ga afsofala, gwini jeiserem jemer, ane ga aakte sewesfele jamer Mesiro. ¹⁵ Jeber ga aa ge nwinbene jamere Raja Herodes aa tere. Taterisi aaiserem ga enggalf etamwena, jega Tuhan aa jes nasibelem taterisi nabimanaiserem jeme gam tabanwef: "Ai Tane Amna As jenbene Mesirwer." (Hosea 11:1) ¹⁶ Raja Herodes jame aa galap towaswenaram, angtane matona aa jei ne ajarwebabuwenaram jei jam ne afaftana, Raja Herodes ga aa kakalswena uskambar. Tahunu naura mes ne barwena, angtane matona aa jei ne ajarwebabuwenaram jei gwanan matos ne damtana. Jega jem temawer Raja Herodes ginanggwa jemna ga aa balbabili, "Sa sofwe tamna Betlehemwer, ane ona jep gemerserem. Tantantane girtowai seyafter gemerserem, afa umuru tahun naura jebe jam folbayan, isa targabaabili!" Raja Herodes jei jes gamserem gam ga gunu enggalfe Yesus gam tegilf. ¹⁷ Seyafter jes gemerserem mes etamwena, jega Nabi Yeremia aa jes nasbilim ga mes tabanwena: ¹⁸ "Jewer ga taterisi ga aa ge sarbiwili tamna Ramawer, ga aa ge syebuwena ane syebinenne. Rahel ga tane mesna ga aa syebabuwena. Jei jam ne ofolyan, aam temawer tane jemna jam ne erbifele." (Yeremia 31:15) ¹⁹ Raja Herodes jame aa terem, malaikata Tuhanmanaiserem eserem ga aa fortya Yusufminibe Mesir je, Yusuf ga bala, ²⁰ "Se irwe, Tanna jeiserem enebaner is taamini, ane ga iste warauwa ona Israelminip! Angtane Tane aaiserem aa jei tegilaiserem jei mes tere." ²¹ Yusuf ga irwa, Tane enebaner ga aa taamini, ga aakte warauwa ona Israelwer. ²² Jepga Yusuf enggam ga sara, tane Raja Herodesmanaiserem jei rajafe jei nwini ona Yudeya je, Raja Herodesem dwonap jei gwef. Raja ibirmi jeiserem bosna jemna ga Raja Arkelaus. Yusuf taterisi jeiserem jam aa galap sarbilirim, jei ga erne jep nwinfe. Jepga Uwa Sanbagiri Jei Yusuf ga eser-esertene enggam ga bala, "Se gwi ona Galileyawer!" ²³ Ga aakte gwina Galileyaminiwer, jepga tamna bosna Nasaret jep ga aa ge nwinbene. Jepga taterisi nabi fwatermanaiserem enggam aa jes ne nasbilim Tanna jem temawer, taterisi jeiserem ga tabanwena: "Ga Jes ne jenbewena angtane Nasaret."

¹ Gwanan jepserem Yohanes Pembaptis ga jela, ga nasbili dwisgirip ona Yudeyaminibe. ² Ane ga jenjenwena, "Gasa tikwe etam-etamawer, ga waakenaiserem ga jes isa eyebili, aam temawer nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga mes gwetmanswel." ³ Yohanes ba aasam angtane Nabi Yesaya aa jes tulistelem taterisi aaiserem jeme: "Angtane aasaje ona dwisgirip jenjenwena enggame, ’Nele Tuhanf sa sartabaasi, nele nornorfer isa eyebana, Jei jep ayinyefe!’ " (Yesaya 40:3-5) ⁴ Yohanes fene unta safnawer eyemiliserem ga jes kamwini. Ban jei aa jes gwelawilirim je unta tifniwer ne eyebili. Ane tumilgala jemna ga matikwam ane nintrin onnemana. ⁵ Angtane kota Yerusalemmana ane angtane ona seyafter Yudeyamana, ane angtane ona seyafter fona Yordan jebe, angtane seyafter jeiserem ga aa ge forobuwetya Yohanes jam sarbasife. ⁶ Jepga angtane jeiserem etam-etama jelemana ga aane balbabitowena, jep ga Yohanes ga baptistababili jei, fona Yordan je. ⁷ Jengga Yohanes angtane safna Farisimana unggwanfer ane angtane safna Sadukimana jame aa galap damtabilirim, agalap ge forobuwetyaram jemnibe enggalfe jam baptiswef, Yohanes jepga aa balbabili, "Aamei awas ufwai gemerserem! Aamei angtane ima afaf-afaftababili, ga etam-etama imna anesus. Aamei syefer enggam ima gunu ilem inibe, ’Ai afa ajam baptistene, Uwa Sanbagiri Jei ajam tamtamtababiyen.’ ⁸ Waakenfer isa eyebili, jega angtane ga sege towaswebili aamei etam-etama kapka jewer imesa irfwena. ⁹ Aamei ga Abrahamem asal-asala, jengga enggam ipsama gunurum ilem inibe, ’Aiba Abrahamem asal-asala, jega jem temawer Uwa Sanbagiri Jei ai as jam tamtamtababiyen.’ Ai ims balbabili, aamei etam-etamawer jam isa irfwena. Uwa Sanbagiri aamei samfer is fasawolwili, ane Jei asal-asala Abrahammana tuna aaiserem jewer samfer se eyebaabili. ¹⁰ Denggana ga mes menetulsini tini sakarabaner jem bulunfe, ane tini seyafter gemerserem waakenfer jam teyanaiserem, ga jese bulnu, ane gase fasawolwili tokwanabe. Jes galserem, Uwa Sanbagiri Jeime mes menetulmisini angtane kapka aa jei ne eyebilirim jam tamtamtababife, ga taman tokwagirip se fasawolwili. ¹¹ Ai angtane etam-etamawer aa jei ge tikwebilirim, waakenaiserem aa jei ne eyebilirim ai fom ga ajes baptistababili. Jengga am amnuwer Angtane sanbaksususerem se fortya. Jei sanbagiri amniwer. Baabeta Jemna unggwandusa amniwer; tofgol Jemna ajam eterbeyen. Jei Mafnana Uwa Sanbagirmanaiserem aamei ga is Jem se baptistababifi, ane etam-etama imna Jei ga ti tokwana galserem ga gam sege taabisini jamer fus. ¹² Jei angtane waakenaiserem ane angtane kapkaiserem Jei se waksosini, makan anggwa gamserem jei gandumu aa ga gam waakentababilirim, jei gandum tifin ane gandum tan ga jes gam waksosini. Gandum tanna se bokolntena ja towai jemna galgala jep bunuluserem; jengga gandum tifiniserem ga jase dutabaabisini, tokwana enggalaiserem jam ne kofneuyanaiserem jebe." ¹³ Jewer ga Yesus Yohanesminip ga jela, ona Galileyaminiwer jamer fona Yordan jebo, Yesus ga bala, "Yohanes aamei Ams baptiste." ¹⁴ Jengga Yohanes bai, enggam ga bala, "Wowo, Aamei bunarsusfer ai ase Aamei Is baptistene. Jeje bafa Aamei amnip ga Im jela?" ¹⁵ Yesus ga bala, "Safnant. Nei seyafter Uwa Sanbagiri aa jes bilirim, nei ga nejesa eyebili." Jepga Yohanes Yesus ga baptistene. ¹⁶ Yesus jam baptistelebe jam aa galap tabanwenaram, Jei fonawer ga tautya. Jewer ga winsi aane bitnetini, ane Jei Mafnana Uwa Sanbagirmana ga domola aa iretyaram junu senaya gamserem Jem sagabe. ¹⁷ Jewer ga taterisi taman waaken-giriwer ga aane sarbili, enggam aa jei gutenaram, "Tane aaiserem ba Amnam, Ai Ajes nesiktenerem. Jei ini Amna gam saaser-saasertabana."

¹ Jewer ga Mafnana Uwa Sanbagirmana Yesus ga danabana taman dwisgir tetenaiserem jewer enggalfe bawasa Yesus gam unggwasbaf. ² Yesus Jei Jam twenyan nunu empat pulu, gwini empat pulu, jepga Jei wisi ga folbana. ³ Bawasa Yesusem tarnap ga fortya, ane ga bala, "Afa Aamei Tane Uwa Sanbagirmanaye, tuna aaiserem jese balbabi tumilgalfe gangge etamwebi." ⁴ Yesus ga tamawolbana, "Taterisi Uwa Sanbagirmanaiserem jep ga enggam baatultel: ’Angtane tumilgalem fener jam gweyan, jengga jei samfer gam gwena ula seyafter Uwa Sanbagiri aa jes gam balbabitowenaram jeme.’ " (Ulangan 8:3) ⁵ Jeiserem taban, jepga bawasa Yesus gamjon ga aftafala jamere kotana waakensus aaiserem bosna Yerusalem jebo, ane ga gaaranswena Jena Uwa Sanbagirmanaiserem tampata tagarsususerem jebe. ⁶ Bawasa Yesus ga bala, "Afa Aamei Tane Uwa Sanbagirmanaye, se janon, aam temawer Taterisi Uwa Sanbagirmana jep ga enggam baatultel: ’Uwa Sanbagiri malaikata Jemna se balbabili Im temawer, jei ga Isene tebaniwili tafame, jega tufa Imna Is jam ne denbeteyan tunabe.’ " (Mazmur 91:11-12) ⁷ Yesus Jei enggam ga tamawolbana, "Taterisi Uwa Sanbagirmanaiserem jep jegme enggam baatultel: ’Angtane jei Uwa Sanbagiri jam unggwasbayan!’ " (Ulangan 6:16) ⁸ Jepga bawasa gamjon Yesus ga aftafala jamere taarena bubwalsususerem jebo. Taarena jeiserem jem sagabe bawasa Yesus ga bala, "Gase anggasi! Angtane ogirip seyafter gemerserem, baabeta jeman mesna, ane galgala jemna, gas damtabi seyafter ba waakensusum!" ⁹ Bawasa gamjon ga bala, "Afa Aamei somwan dumem jam Is nwinirim ams Is pujitene, seyafter aaiserem ai ga Isas kitulbono Ibe." ¹⁰ Yesus enggam ga tamawolbana, "Bawas, Amniwer se gwisi! Taterisi Uwa Sanbagirmanaiserem jep ga enggam baatultel: ’Angtane Uwa Sanbagiri tefner gam pujitene! Ane Uwa Sanbagiri aa jes bilirim ga jetefener igam eyebili!’ (Ulangan 6:13) Ga jem temawer, Ai aamei is Ajam pujiteyen." ¹¹ Jes jepserem jepga bawasa Yesus ga mirtetefala, ane malaikata ga aa ge forobitye, Yesus jam ne batobafe. ¹² Yesus Jame aa galap sararam enggame Yohanes mes ne tebanant, ane bwiyip mes ne gaataantenant, Yesus ga gwina ona Galileyawer. ¹³ Jep tamna Nasaret aa mirsotefala, Jei kota Kapernaum je jep nwini, fona Galileya jem eyebe. Kapernaum je ona Sebulon ane ona Naftali ga jep nulna. ¹⁴ Yesus Jame aa galap sofwaram jewer, jepga taterisi Nabi Yesaya aa jes nasbilim ga tabanwena: ¹⁵ "Angtane aa jei ge nwinbenerem ona Sebulon ane ona Naftali jebe, angtane aa jei ge nwinbenerem foboga eyebe, angtane aa jei ge nwinbenennerem fona Yordan jimwer, ane angtane aa jei ge nwinbenerem ona Galileya je, ona angtane Yahudimanyanaiserem, ¹⁶ angtane seyafter gemerserem gwinip aa jei ge nwinbenerem, jei nafa unggwan-giri mes ne domola. Angtane jeiserem aa jei ge nwinbenerem tampata gwin-gwini termanaiserem, Tuhan mes fortya jemnibe enggalfe jei nafap gam ge nwinbef." (Yesaya 9:1-2) ¹⁷ Jes galapserem Yesus taterisi ga towaiwulu Jam nasbinennefe enggame, "Gasa tikwe etam-etamawer, waakenaiserem ga jetefener isa eyebili, aam temawer nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem mes gwetmanswel." ¹⁸ Yesus aa galap wofnaram foboga Galileya gwetmanabe, Jei angtane naura ga domsona, Simon (bosna nafsi Petrus) ane Simonem osonaiserem Anderyas. Jei jalas ge tobolsnenne jigalf. Awelna jemna jigals ne tawanbinenef. ¹⁹ Jes jepserem jepga Yesus ga gitmini, "Au, aamei Am sege onsoba! Ai aamei isAs towas-towasona angtanes towanbife, jega aamei ga angtane nafsi gam is ge towanbili jigala igemer ge towanbinennerem. Angtane jeiserem jei Ai As ga sene tikwebaatini." ²⁰ Jes jeberserem jei jalna jemna ga aa ge mirultefala, jepga jei Yesus ga aa ge onsobana. ²¹ Yesus Jei nele jeiserem jeter ga sofna, jamere gamjon angtane nafsi naura gam domsona, Yakobuso Yohanes, ayana osona, tannawan Sebedeusmana. Jei jelem jetabar atdwas sagap ge nonbaantena, jalas ne waakenulsini. Yesus ga aa jenmuwili. ²² Jes jeberserem atdusa yo jeta ga aa ge mirsotefala, Yesus ga aa ge onsobana. ²³ Yesus ga wofena ona Galileya seyafter gemerserem jebe, angtane ga towastababinenne jena angtane Yahudimana aa jep ge betwebuwefaram jebe. Ane Jei Taterisi Waakena ga nasbinenne, taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer. Ane Jei angtane bwernabaraiserem seyafter aa waakentababinenne, ane angtane muli-mulniserem jes mese. ²⁴ Jepga taterisi seyafter Yesus aa jes eyebilirim ga aane nasbinenne propinsi Sirya seyafter gemerserem jebe. Jepga angtane bwerna nafis-nafsiserem aa jei ge folbaminirim, ane tifni sigin-ginsususerem, seyafter ga aane aftabifelwena Yesusminibe. Jei ga enggala angtane aas galserem: angtane bwat kapka jam gam kabwatyaram, angtane jam tersiuneneleiserem, angtane muli-mulni mesna. Yesus Jei angtane jeiserem seyafter ga waakentababili. ²⁵ Jes galapserem angtane unggwanfersus Yesus ga aane tikwebaatini. Angtane jeiserem afwer ona Galileyaminiwer ge jalbili, ane afwer ona Sepulu kotawer ge jalbili, ane kota Yerusalemwer, ane ona Yudeyawer, ane fona Yordan jimwer afwer jewer ge awelbitye.

¹ Yesus angtane unggwanfer jame aa galap damtabilirim, Jei ga tauna otumube, Jei jama nwintenaram. Angtane Jei aa jei ne tikwebaatinennerem Jem tarnap ga aa ge betwebili, ² ane Yesus ga towaiwulu jei jam towas-towastababife. ³ Yesus ga enggam towas-towastababili: "Ini angtanemana waakenfer sege folbamini, afa jei jam sege towaswebilirim enggame, jei baabeta fas jem eyebiliserem Uwa Sanbagiri aa jes bilirim; aam temawer Uwa Sanbagiri Jei angtane jeiserem jem Sanbakfe mes nwini. ⁴ Ini angtanemana waakenfer sege folbamini, afa jei unggwanfer ga sene syebili jelem etam-etama kapkaiserem jem temawer; aam temawer Uwa Sanbagiri Jei angtane jeiserem gase kanautabaipmini. ⁵ Ini angtanemana waakenfer sege folbamini, afa ini jemna ga sene onabertabana; aam temawer Uwa Sanbagiri Jei angtane jeiserem jep se golmisi seyafter Uwa Sanbagiri aa jes bilirim. ⁶ Ini angtanemana waakenfer sege folbamini, afa ini jemna unggwan-girsusfer ga sege folbamini jam ne towaswebifener, ane jam ne eyebifener, Uwa Sanbagiri aa jes bilirim; aam temawer Uwa Sanbagiri Jei angtane jeiserem se batobaabisi jeiserem ga sene eyebili. ⁷ Ini angtanemana waakenfer sege folbamini, afa jei angtane nafsi ga sene nesiktababili; aam temawer Uwa Sanbagiri angtane jeiserem gase nesiktababisi. ⁸ Ini angtanemana waakenfer sege folbamini, afa jei Uwa Sanbagiri tefner ga sene onsobafa; aam temawer jei Uwa Sanbagirfer Jebar seyafter. ⁹ Ini angtanemana waakenfer sege folbamini, afa jei se gwebabili jega ginanggwana jei ga sege waakenswebili; aam temawer Uwa Sanbagiri gas balbabisi, ’Aamei tane Amna.’ ¹⁰ Ini angtanemana waakenfer sege folbamini, afa angtane nafsi ga sene tamtamtababili, jei aa jep ne eyebilirim seyafter Uwa Sanbagiri aa jes bilirim; aam temawer Uwa Sanbagiri Jei angtane jeiserem jem Sanbakfe mes nwini. ¹¹ Ini imna waakenfer sege folbamini, afa angtane ula kapka ip nasipmiliserem, ane ims tamtamtababili, ane angtane nafsi afaf-afaftababili aamei kapka gama eyebili aam temawer aamei iAmsa onsobana. ¹² Angtane ga gam ne eyeipmil nabi fwatermanaiserem Uwa Sanbagirmana jebe. Ini imna ga is saaser-saaserfer sege folbamini, aam temawer Uwa Sanbagiri fwaina imna unggwandusa is mes menetabaipmisini taman waaken-giribe." ¹³ Yesus gamjon ga balbabili, "Aamei garna galserem anggwabura seyafter ogirip aa gemer nwinirim jemnibe. Garna je tumilgala je gam waakenulu. Garna jes gemerserem aamei jegme gemer, aamei angtane Ai As ijeya tikwebaatinennerem. Aamei angtane waakenfer igama waakentababili. Afa garna jam gam etamwenaram jam bwekbwekswefe, angtane jei garna jeiserem gamjon jam ne eyebiyen garanfe jam falfe. Garna jeiserem je gam kabwakswena, garna jeiserem angtane matau sagap jam ne tuwulnteyan, jengga onnap gane tuwulsini, angtane jem sagap ga gangge wofobana. ¹⁴ Aamei ga nafa galserem anggwabura ogirip seyafter gemerserem jemnibe. Kotana taaren sagap aa jei gam nulnaram, kotana jeiserem je jam ne sewesiyen. ¹⁵ Jes gemerserem aaiserem jegme gemer, afa angtane pelitana aa jei gam dutanaram, jei pelitana jeiserem burwa gwonap jam gaataaniwiyen. Je fasfasus. Jengga angtane jeiserem pelitana tampata dwafennaber ga gam gaarantena, nafa gam folbafe, jega angtane seyafter jenap jep aaiserem nafa ga gane domola. ¹⁶ Jes gemerserem nafa iman jegme gemer, seyafter aamei jes igam eyebilirim ga waakenater igma eyebili, jega angtane jei seyafter jeiserem ga sene domola. Ane angtane jam aa jep ne domolaram waakena aamei ijesa eyebilirim, jei Uwa imna taman waaken-girip jeiserem ga sene pujitene." tulistaabilim jem temawer. ¹⁷ Yesus gamjon ga balbabili, "Aamei ilem inip ipsama gunurum, Ai enggalf fortya jega Ai Hukumu Nabi Musa aa jes tulistababilim, ane taterisi nabi-nabi seyafter aa jes ne tulistababilim Ajam borolf. Ai galfe Ajam foroyan taterisi jeiserem jam borolfe, jengga enggalf Ai fortya nabi aa jes bilim seyafter jam tabanulfe. ¹⁸ Sa sarbistaabon! Winsi yo ogiri aa gemer nulnaram, hurufu ane garistowai bastantouyaserem daamfenna Hukumu Nabi Musamana aa jes tulistaabilim jei afa jam wirulsiyen, jamer seyafter Uwa Sanbagiri aa jes bilirim se etamwesa. ¹⁹ Jega jem temawer, angtane afa jei Uwa Sanbagiri aa jes balbabilirim daamfenna bastouyaserem jam tikwebitiyene, ane jei ga angtane nafsi enggam gam towastababili, ’Ipsama tikwebitinirim!’, afa ga gam jes gemerserem, gam jega Uwa Sanbagiri Jei angtane jes galserem se basantowaitaasisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe. Jes galserem, angtane afa jei jam gam tikwebitinirim Uwa Sanbagiri aa jes balbabilirim, ane jei ga angtane nafsi enggam gam towas-towastababili, ’Aamei Uwa Sanbagiri aa jes balbabilirim sa tikwebaati!’, afa ga gam jes gemerserem, angtane jeiserem jeiba igsusum nunu Uwa Sanbagiri aa jem se nwinirim anggwabura seyafter gemerserem jem Sanbakfe. ²⁰ Ai ims towastababili, aamei Uwa Sanbagiri aa jes balbabilirim jetefener isa tikwebitini, jega Uwa Sanbagiri im Sanbakfe gase nwini. Guru-guru Hukumu Nabi Musamana aa jei ne towas-towastababuwenaram ane angtane safna Farisimana, jei Uwa Sanbagiri aa jes balbabilirim bastantowaifer ne tikwebitini, jengga aamei seyafter Uwa Sanbagiri aa jes balbabilirim jam tikwebitife, ga unggwanfersus isa tikwebitini!" ²¹ Yesus gamjon ga balbabili, "Aamei imsa sarbabili nem asal-asala Nabi Musa aa gam towas-towastababilim enggame, ’Aamei angtane nafsiserem ijama munbobiyen! Afa angtane nafsi aa jei gam munbonorom, jei ga gane aftafala angtane sanbagirminibe, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe.’ ²² Jengga Ai namwer Ai ims towas-towastababili: afa angtane jei angtane nafsi jam gam nasbanaram, jei ga gane aftafala angtane sanbagirminibe, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe. Angtane afa angtane nafsi enggam aa jei gam balaram, ’Aamei dwak tetena!’, angtane gam aa jei gunurum, angtane jes galserem jam gane aftafala Safna Angtane Yahudimana Sanbak-sanbaka Seyafter Gemerserem jem danggonawer. Ane angtane angtane nafsi aa jei gam balaram enggame, ’Aamei jafner ibas ge feyafena.’, angtane gam is jei gam balaram, angtane jeiserem Uwa Sanbagiri gase bala, ’Se gwi taman tokwagirip!’ ²³ Ga jem temawer afa aamei galgala Uwa Sanbagirf gulbalaiserem Jelem mejanabe Jena Uwa Sanbagirmanaiserem jebe, ane aamei ga igam saarstaabona im afelna jei ims nasbana, ²⁴ galgala jeiserem Uwa Sanbagirf gulbalaiserem gase mirtebitefal, mejana Uwa Sanbagirmana jem danggonawer. Ane ga is gwina ilem afelenminibe, ane jebar ga is ge borola! Ane gamjon ga is warautna, galgala Uwa Sanbagirf gulbalaiserem ga is gulbana. ²⁵ Afa angtane enggam is jam gam balaram, ’Aamei kapka gam eyebili.’, ane aamei ga is gam aftafaltya angtane sanbagirminibe, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe, tatarmer jebar ga is ge borola, abaktowaifer jebarserem. Neleber isa waakenulsini, nalef ijama foroyan mwona angtane sanbagirmanaiserem jebe. Afa aamei taterisi jeiserem ijam ge borolyanaye nelebe, aamei angtane sanbagirmana jem tarnabe jep jam igam fortyaram, angtane aamei is jei gam balaram enggame, ’Aamei kapka gam eyebili.’ angtane jeiserem aamei ga is jese gera angtane sanbagiri jemnibe. Angtane sanbagiri jeiserem jei aamei ga is jei se gera polisiminibe, ane aamei bwiyip ga isene gaataantena. ²⁶ Ai bunarsus ims towastababili, aamei jeber is nuniton jamer aamei doini seyafter angtane sanbaka jeiserem aa jes mwangbanaram, doini jeiserem ga jam is gera." ²⁷ Yesus gamjon ga balbabili, "Aamei imsa sarbabili Nabi Musa aa gam towas-towastababilim enggame, ’Aamei maaryena ijama gwebiyen!’ ²⁸ Jengga Ai namwer Ai ims towas-towastababili: afa anggwana wini nafsi jam gam domolaram, ane jei jam taabif, jei etam-etama maaryen gwelaiserem mes gam gwebili jelem inibe. ²⁹ Afa nwena imna taasfolawer kabwakfer jem igam gaarasinirim, ane aamei etam-etama kapkaiserem jem ga igam eyebili, afa ga gam jes gemerserem, nwena jeiserem ga jam igam fotolsini, ane ga igam tobolsiwili. Nwena imna daamfenna jam tobolsiwiliserem jeiserem kapka, jengga kabwaksususerem ga enggam afa Uwa Sanbagiri Jei tifini seyafter imnaiserem taman tokwagirip is jam gam taptasiwilirim. ³⁰ Afa tafna imna taasfolawer kapkaiserem jem igam eyebilirim, ane aamei etam-etama kapkaiserem jem ga igam eyebili, afa ga gam jes gemerserem, tafna jeiserem ga jam is tiksosini, ane ga jam is topsosiwili. Jei game kapka tafna imna daamfenna jam firsoniwiliserem, jengga aaiserem jei kabwaksusu Uwa Sanbagiri Jei tifini seyafter imnaiserem Jei taman tokwagirip gam firtaaniwili." ³¹ Yesus gamjon ga balbabili, "Nabi Musa gamjon aa gam towas-towastalam, ’Anggwana wini baife aa jei gam gwebilirim, gwanan surta jem syanwelaiserem jes gam tulisulu, ga wif ga gam golbili.’ ³² Jengga Ai namwer Ai ims towas-towastababili: afa anggwana wini baif aa jei gam gwebilirim, ane wini jeiserem jei etam-etama maaryenf gwelaiserem jam eyebiyen, afa ga gam jes gemerserem, anggwana wini jemnaiserem jei jes gam taatwebili etam-etam maaryenf gwelaiserem jes eyebife, afa wini jeiserem anggwana gamjon jam gaarf. Ane anggwana ibirmiserem, jei mese etam-etama kapka maaryenf gwelaiserem ga jes gam eyebili." ³³ Yesus gamjon ga balbabili, "Aamei gamjon imsa sarbabili nem asal-asala Nabi Musa aa gam towas-towastababilim enggame, ’Aamei ijesa bilirim, aamei bunarsusfer jeiserem ga isa eyebili. Afa aamei ina igemera testenannaram Tuhanminibe, aamei ina jewera testenannaram jeiserem ga jam isa eyebili.’ ³⁴ Jengga Ai namwer Ai ims towas-towastababili: aamei ina ijama testenanayan! Ina taman waaken-girem boseme ijama testenanayan, aam temawer taman waaken-girip je Uwa Sanbagiri Sanbakfe jep nwini. ³⁵ Ina ogir bosem ijama testenanayan, aam temawer ogiri jei tufa Uwa Sanbagirmana jep tosontena. Ina kota Yerusalem jem boseme ijama testenanayan, aam temawer Yerusalem jei kotana Raja sanbagiriserem jemna. ³⁶ Ane duka imnaiserem jem boseme ina ijama testenanayan, enggalem temawer Uwa Sanbagiri jenfentowai gam eyebili nabal safna imna sinsini afa seiseye. Aamei jeiserem ijama eyebiyen. ³⁷ Jafner ga enggam isa gutena, ’Sya.’ afa ’Fas.’ Afa aamei gamjon jam isa gutenaram, gam jega taterisi jeiserem ga bawasminiwer se jela." ³⁸ Yesus gamjon ga balbabili, "Aamei imsa sarbabili Nabi Musa aa gam towas-towastababilim enggame, ’Afa angtane jei angtane nafsimana nwes gam kabwaksobana, nwena jeman mesna jeime jamigam kabwaksobana. Ane afa angtane jei angtane nafsimana ula jam gam mulbosinirim, ula jeman mesna jeime jamigam mulbosini.’ ³⁹ Jengga Ai namwer ims towas-towastababili: afa angtane ibe kabwakfer is jam gam eyeibenerem, aamei ijam fwayenulboyon jebe. Afa angtane is jam gam saftanaram olbumu taasfolawer jebe, safnant, aamei ijam fwayenulboyon, jengga olbumu gwejawer mese ga igam aisobaannu, gamjon jewer ga is gam sofsobana. ⁴⁰ Afa angtane is jam gam aftafalaram angtane sanbagirminibe, angtane aa jei gam balaram angtane afa waakenfer eyebiliserem afa kabwakfer eyebiliserem enggalfe, fene imnaiserem orolemana jewer gam taamif, aamei fene jeiserem ga igam terbene, ane fene sagamana jeiserem jes mese jeime igam terbene. ⁴¹ Afa ginanggwa afa angtane sanbak jei is gam balaram enggame, ’Aamei galgala amna se erbifel nafis tamnap bijaufer kilometer ga daamfenna!’, galgala jemna ga is erbifele tamna jeiserem jebo, ane tamna bijuap jeiserem jep mese. ⁴² Afa angtane apgal jigala is jam gam bilibenerem imniwer, ga igam golmini jeiserem jebe! Ane aamei angtane galgala imniwer nomkef aa jei bilirim, jei enggam ijam balyan, ’Wowo.’ " ⁴³ Yesus gamjon ga balbabili, "Aamei imsa sarbabili angtane aa gam towas-towastababilim enggame, ’Ilem afelen mesna jam isa nesiktababili; ginanggwa ilemana kakalmer ga jam isa nasbili!’ ⁴⁴ Jengga namwer Ai ims towas-towastababili: ginanggwana ilemanaiserem ga jam isa nesiktababili! Angtane aamei is jei ne tamtamtababiwenaram, aamei sembayanga ga jam isa gwebamini angtane jeiserem jem temawer. ⁴⁵ Jes gamserem ga gemer isa eyebili, jega aamei gam isa etamwesa Uwa Sanbagiri gamserem, Uwa imna taman waaken-girip aa Jei nwinirim. Jei gwere ga enggalf eyebal, nafa jemna gase ertesini angtane kapkaiserem ane angtane waakenaiserem jem sagabe. Jei arouwa angtanefe mes gaarmiswena, angtane waakenaiserem jep ane angtane kapkaiserem jes mese. ⁴⁶ Uwa Sanbagiri Jei fwaina waakena ibe is Jam golmiyen, afa aamei angtane is jei gane nesiktenennerem aamei jetefener igam nesiktababilirim. Angtane pajak doini aa jei gane tebabinennerem jeiserem pemerintafe ga gane kitulmini, angtane jeiserem jeime ga aane nesiktababili, angtane jei aa jei ne nesiktababilirim. Aamei angtane seyafter gemerserem ga jam isa nesiktababili. ⁴⁷ Afa aamei ilem afelen banfener is ge nasowena, aamei waakenfersus ijama eyebiyen. Angtane Uwa Sanbagiri Jem teisyenaiserem jei ga gemer gam eyebili! ⁴⁸ Aamei angtane seyafter ga jam isa nesiktababili, Uwa Sanbagiri taman waaken-girip Jei angtane seyafter aa gemer gam nesiktababilirim."

¹ Yesus gamjon ga balbabili, "Aamei waakenfer isa gaarabisnenne aamei waakena ijesa eyebilirim. Aamei waakenfer isa eyebili, aam temawer aamei Uwa Sanbagiri gama pujitene, jeke enggalem temawer angtane is gane gerebaf, ane aamei is gane balbabif enggame aamei waakena. Afa aamei waakenfer isa eyebili enggalfefener angtane jewer is gane gerebaf, Uwa imna taman waaken-girip aaiserem Jei fwaina ip is Jam golmiyen. ² Aamei galgala ijeba kitulminirim angtane galgalyenaiserem jebe, aamei galgala jep ijama kitulmiyen jega enggalf angtane jei is gam ne balbabif aamei waakena. Angtane akar-akarem aa jei naawenaram jei gam eyebif, jena angtane Yahudimana aa jep ge betwebuwefaram jebe ane nelep mese, jega enggalf angtane gam ne balbabife enggame jei waakena. Ai bunarsus ims towas-towastababili, Uwa Sanbagiri Jei angtane jes galserem Jei jem fwaina Jam kitulmiyen. ³ Aamei galgala ijeba kitulminirim angtane galgalyenaiserem jebe, aamei ga kukmer isa kitulmini jega angtane nafsi jam ge towaswebiyen, im afelen mesnaiserem jes mese jam ge towaswebiyen. ⁴ Jengga jeiserem ga intowaifener igama eyebili. Uwa imna Jei tousa seyafter aamei intowai jes igama eyebilirim, ane Jei fwaina ip gase golmisi." ⁵ Yesus gamjon ga balbabili, "Aamei sembayanga jam igama gwebanaram, aamei angtane akar-akarem aa jei gam naawenaram jes gamserem gam ijama etamweyan. Ini jemna ga saaser-saaserfer gangge folbamini afa jei sembayanga jam gane gwebanaram jei aa jep gangge fibilirim jena angtane Yahudimana aa jep ge betwebuwefaram jebe, ane nele unggwan-giribe ga jep gangge fibili, jega angtane nafsiserem gam ne damtabif. Ai bunarsus ims towas-towastababili, jem fwaina jei mes ne domola. Uwa Sanbagiri Jei angtane jes galserem jem fwaina Jam kitulmiyen. ⁶ Aamei sembayanga jam igama gwebanaram, ga isa kautena mwona angtaneyanaiserem jebe, ane pintunu ga isa matasiwitye, jega angtane is jam ne damtabiyen. Jepga sembayanga ga isa gwebana Uwa imnaiserem Jebe, angtane jam ne damtayanaiserem. Uwa imna Jei tousa aamei seyafter intowai ijesa eyebilirim, ane Jei fwaina ip ga is golmisi. ⁷ Aamei sembayanga jam igama gwebanaram, aamei aarememfener ijama nasoweyan, angtane Uwa Sanbagiri jam tebayana jei galserem. Jei enggam ge gubili jelem inibe, ’Afa ai abakfer asa nasowena, Uwa Sanbagiri Jei as gase sarbabili.’ ⁸ Aamei sembayanga ijama gwebamiyen angtane jes galserem. Uwa Sanbagiri, Uwa imnaiserem, Jei mes towaswena galgala aamei ijesa bilirim, gwanan nalefe aamei ijama balbabiyen. ⁹ Aamei sembayanga enggam isa gwebana: ’Uwa Sanbagiri, Uwa nemna, taman waaken-giribe, ai bunarsusfer Is enggam aya bala, angtane bosna Imnaiserem ga Isene gulbatena. ¹⁰ Aamei abakefyan anggwabura seyafter gemerserem jem Sanbakfe ga Is gwena. Angtane seyafter ogirip aaiserem ga jes ne eyebaabili Aamei Ijes bilirim, malaikata taman waaken-girip gamserem jei jes ne eyebili Aamei Ijes bilirim. ¹¹ Aamei nunu jeber-jeber tumilgala ap Is kitulmuwena. ¹² Etam-etama kapka amna seyafter gemerserem ga Is wirtabaabili, gamjon jeiserem Ijam sarbistaabonyan, jes gemerserem aime gemer, ai agma borolminirim kapkaiserem angtane abe aa jes ne eyeipminirim, gamjon ajama sarbistaabonyan. ¹³ As Ijam aftabifelyen unggwasbala kapkaiserem jebe, as aftabifel bawasminiwer.’ ((Aamei ba Rajasam, ane Aamei baabetabara enggalfe jeiserem Ijem eyebif angtane aa jes gane bilirim, ane Aameiba nafabaram, jamer abak-abaksus. Amin.)) ¹⁴ Afa aamei jam isa borolminirim kapkaiserem angtane nafsi ip aa jes ne eyeipminirim, Uwa imna taman waaken-girip aa Jei nwinirim, Jei etam-etama imna is wirtabaipmini, gamjon jeiserem Jam sarbistaabonyan. ¹⁵ Jengga afa aamei kapkaiserem angtane nafsi ip aa jes ne eyeipminirim jeiserem ijama borolmiyen, gam jega Uwa Sanbagiri taman waaken-girip aa Jei nwinirim, Jei jegme etam-etama imna is Jam wirtabaipmiyen, gamjon Jei Jam dirinswebabiyen." ¹⁶ Yesus gamjon ga balbabili, "Aamei ijama twenyanaiserem enggalfe aamei Uwa Sanbagiri igama pujitef, aamei ijama eyebiyen angtane akar-akarem aa jei naawenaram game. Jei jafner gangge wofobana enggame mirmase jemna ga wisi gamserem ga gam gangge folbamini gane gwebabili, jega enggalf angtane ga sege towaswebili jei jam dwenyan, ane ga enggalf angtane jam gane balbabif jeiba angtane waakenam. Ai bunarsus ims towas-towastababili, angtane jeiserem fwaina jelemana jei mes ne domolbana, Uwa Sanbagiri Jei angtane jes galserem fwaina jelemana Jam kitulmiyen. ¹⁷ Aamei ijama twenyanaiserem enggalfe aamei Uwa Sanbagiri igama pujitef, mirmase jam isa wirtabaabili, gamjon nabal safa mese isa tentebaabili, angtane afweraiserem aa gemer gane eyebilirim, ¹⁸ jega angtane nafsi jei jam ge towaswebiyen aamei ijama twenyan. Uwa Sanbagiri, Uwa imna, angtane jam ne damtayanaiserem, Jei Jenefener gam towaswena aamei ijama twenyan. Uwa imna Jei tousa seyafter aamei intowai ijesa eyebilirim, ane Jei fwaina ip se golmisi." ¹⁹ Yesus gamjon ga balbabili, "Aamei iner galgala waakenaiserem hargana unggwanfer ipsama kitulnonnorom ogiribe, aam temawer bingini sene tombaabili, ane besi sargwet-sargweta, ane angtane komkoma jena ga imna gam terewulu ane ga gam kautena, galgala imna ga gam komkomtababisini. ²⁰ Saf ga enggam aamei jeber-jeber waakenaiserem ga isa eyebuwena, ane Uwa Sanbagiri Jei fwaina imna waakenaiserem taman waaken-girip aaiserem ga is kitulboso. Taman waaken-giri jeiserem jebe bingini galgala jam tombaabiyen, besini je sargwet-sargwetyan, ane angtane komkoma jei jena jam terewulyon, jam kauteyan, galgala jam komkomtababisiyen. ²¹ Igsususerem imna is jep gangge falipminirim, ini imna ga is jeber gam ge folbamini." ²² Yesus gamjon ga balbabili, "Nwena imna ga lampunu galserem tifini imna seyafter gemerserem jebe. Afa nwena imna nafabara, tifni imna seyafter gemerserem ga is gam ge nafabarswebamini. Jes gamserem aaiserem jegme gemer, afa aamei angtane nafsi jam igama batobaabili, aamei waakenaiserem ga jes igama eyebili, gam jega aamei nafaber ga igama gwena. ²³ Jengga afa nwena imna is jam gane kabwakswebaminirim, tifni imna seyafter gemerserem ga isege gwinibersweipmini. Jes gamserem aaiserem jegme gemer, afa aamei in ina tefner jam igama batominirim, aamei kapkaiserem ga jes igama eyebili, gam jega aamei ga enggam isa gwena gwinip gwela gamserem. Afa aamei gwinip isa gwena, gwini jeiserem bunarsus je gwin-gwinsusu." ²⁴ Yesus gamjon ga balbabili, "Angtane awelna angtanefe aa jei gweyibenerem angtane sanbaka jemna naweryan, aam temawer angtane jeiserem awelna aa jei gam gwebilirim, afa angtane sanbaka jemna naura, jei jelem sanbaka afelnaiserem ga gam uskamswebana, ane afelnaiserem jei unggwanfer ga jes gam nesiktene. Jei waakenfer gangge nwini angtane sanbaka afelnaiserem jebar, ane jei waakenfer jam ge nwinyen afelnaiserem jeiserem jebar. Jes gemerserem aaiserem jegme gemer, angtane afa enggam jam gam gunurum, ’Ai awelna Uwa Sanbagirmana tefner as gweyibene.’, ane jei gamjon ga gunu, ’Ai awelna doifener as gwebili.’, bunarsus angtane jeiserem jei nawersamer jam eyemiyen. ²⁵ Ga jem temawer Ai ims towas-towastababili: ini imna is basangge eseswebaminirim tumilgalayo ane fo telbili jem gwelaiserem! Ini imna is basangge eseswebaminirim fenem temawer tifinmana! Tumilgal ane fen mese igi jemna ga bastouya. Uwa Sanbagiri Jei mafnanayo ane tifini seyafter is mesam tetmini; mafnana yo tifni igi jemna ga unggwandwasusu. Afa Uwa Sanbagiri Jei mafnana yo tifni ip is jam tetmiliye, gam jega Jei bunarsusfer tumilgal mese fen is kitulmini ibe. ²⁶ Sa damtabi junu aa jei ge ifubinennerem! Jei twam tanna jam ne tonolyan, jei nanna jam ne tasoyan, jei tumilgala jam ne bunulnteyan titikibe. Junu bastantouya, jei igyen, jengga Uwa imna taman waaken-girip Jei tumilgala jep kitulmini. Aamei unggwan-gwana, aamei igisusu juminiwer. Uwa Sanbagiri bunarsusfer ims taayinbaabili. ²⁷ Angtane ini jam eseswebalaiserem, jei gam aa jewer eseswebanaram, jei gwela jelemanaiserem jei fas jener jam bwalewulyon nunu daamfenna jeme. ²⁸ Ini imna is basangge eseswebaminirim fenem temawer! Bunga es onnap jener aa jei gane kokosaram sa damdamtababisi! Je awelnap jam naaweyan, je fene jam ne eyebaabiyen. ²⁹ Raja Salomo, angtane sanbagiri fwatermana, jei angtane igiserem, doini jemna ga anesus, ane fene jemna ga waakensusu. Jengga Ai ims towas-towastababili, bunga ese je waakensusu fene Raja Salomomanaiserem jewer. ³⁰ Sasfan je igyen, nei namwer neya domola, jengga abakferyan je tokwanap gam fasawola. Safe gam, Uwa Sanbagiri ga sasfana waakenfersus eyebaabili. Afa ga gam, safe aamei Uwa Sanbagiri bastantowaifer isa tebana, Uwa Sanbagiri Jei aamei is gase gerebaabisnenne waakenfer, fene ip gase kitulmini. ³¹ Ini imna is basangge eseswebaminirim aamei jes tumiliserem, jes telbiliserem, ane jes kamwiliserem jes mese! ³² Angtane Uwa Sanbagiri jam ne tebayanaiserem ini ga jemanem ge eseswebamini tumilgalem temawer, ane fo telbilem temawer, ane fenem temawer mese. Uwa imna taman waaken-girip Jei tousa aamei seyafter jeiserem ijesa bilirim. ³³ Jengga gwanan-gwanansus aamei aaiserem ga isa terelbi uskambar, fomfoma aamei Uwa Sanbagirem gwonap nwinfe. Ane aamei sa terelbi uskambar, Uwa Sanbagiri aa jes bilirim aamei ijesa eyebife. Aamei seyafter jeiserem jam isa terelbili, ane Uwa Sanbagiri Jei is gase kitulmini aamei ijesa bilirim. ³⁴ Ga jem temawer, ini imna is basangge eseswebaminirim nunu gwirmer aaiserem, aam temawer gwirmer jeme nensa eseswebala. Namwermanaiserem jetefener isa sarbisnenne."

¹ Yesus gamjon ga balbabili, "Aamei angtane nafsi syefer jebe ipsama donolnmunurum, jega Uwa Sanbagiri Jei aamei is Jam donolnmunuyon. ² Uwa Sanbagiri Jei ip is gam donolnmunurum, aamei angtane nafsi gemer igama donolnbaannu. Ane mwongga aamei jes igama gwirnirim angtane nafsife, Uwa Sanbagiri jegme mwongga jeiserem ga is jeter gam gwirinmini ibe. ³ Ipsama donolnbaannurum ilem afelenfe etam-etama jemna enggala ti utunu galserem jem nwenabe. Jeke gam. Aamei ga is domola etam-etama imna enggala tini unggwandusa galserem, nwena imna ga is jem motolbaasini. ⁴ Aamei ga fomfom igam bala ilem afelna, ’Au, ai ti utunu jeiserem gama ge gosorsiwi nwena imnaiserem jewer.’, jengga ilem nwenabe tini unggwandusa galserem aamei jeiserem ijam gosorsiwiyen? ⁵ Aameiba angtane akar-akarem ijei gwenaram! Gwanan tini unggwandusa jeiserem jes is gosorsiwili nwena imna is jei motolbaasinirim. Jepga aamei waakenfer gam is anggasini enggalfe, aamei ti utunu ilem afelnem nwenawer gam is gosorsiwili." ⁶ ((Jepga Yesus Jei seisya taterisi ga jes bilipmini, angtane Taterisi Uwa Sanbagirmana jam ne sarbiyeneiserem jem temawer. Jei gunu,)) "Apgal jigala waakenaiserem Uwa Sanbagirmana ipsama kitulminirim gwalafe, aam temawer gwalna jeiserem ga sege irfwebitne, inater ga is sene dwortabaabili. Inanaiya imna waakensususerem ijama taptasiyen twen danggonawer, aam temawer twena inanai jeiserem sagap gam jubononno." ⁷ Yesus gamjon ga balbabili, "Uwa Sanbagirminiwer ga jamer isa balwena, ane Jei ga is golmini ibe. Jeber-jeber aamei isa terelbaabiwena Uwa Sanbagirminiwer, Uwa Sanbagiri ga is eyeipmini jega ijesa terelbuwenaram jeiserem ga isa domolfa. Jeber-jeber aamei pintunu ga jam igama enentene Uwa Sanbagirem mwa tarnabe, Uwa Sanbagiri Jei pintunu ga is gam tertemisiwitye. ⁸ Angtane apgal jigala aa jei gam bilirim Uwa Sanbagirminiwer, jei gam domola apgal jigala aa jes gam bilirim. Angtane aa jei gam terelbilirim Uwa Sanbagirminiwer, jei gam domola jei aa jes gam terelbilirim. Angtane pintunu aa jei gam enentenerem, Uwa Sanbagirem mwonabe Jei pintunu gam terterbaasiwitye jebe. ⁹ Tanna tumilgala jetaminiwer aa galap gam aberwebilirim, jeta jemna jei tuna jam gerbayan. ¹⁰ Tanna jigals gam aberwebili, jeta jei awas ufwai nini jam gulbayan. ¹¹ Aamei angtane awelna kabwakfer jemanserem, jengga aamei tousa apgal jigala tane imnaiserem jep ga waakenater igama kitulmini. Uwa Sanbagiri, Uwa imna taman waaken-girip aa Jei nwinirim, Jei waakensusu imniwer! Jei waakenaiserem se kitulmini angtane aa jei gane bilirim Jemniwer." ¹² Yesus gamjon ga balbabili, "Aamei ga isa eyebili angtane nafsife, jes galserem aamei igemera bilirim ilem inibe, angtane nafsi jei ip sene eyeipmifi ibe. Nabi Musa ane nabi-nabi nafsiserem jes mese, jeime gemer ne towas-towastababil." ¹³ Yesus gamjon ga balbabili, "Sa kaute taman waaken-girip mwona olosawer, aam temawer mwona ferneyo, ane nele unggwan-giri, je taman tokwagirmana; angtane unggwanfer gangge wofobana nele jeiserem jebe. ¹⁴ Mwona tamna waakenfer gwelaiserem jamer abak-abaksus je bastantouya, ane nele je olosa; angtane bastantowaifer mwona jeiserem ga jei sene damtana." ¹⁵ Yesus gamjon ga balbabili, "Aayai, aamei angtane akar-akarem nabife aa jei naawenaram ga jam isa gerebaabisnenne! Aamei angtane jeiserem jame igalaba damtabilirim, aamei ga ima gunu angtane jeiserem jei dombana galserem; jengga jemna ini enggala, twen kakala galserem. ¹⁶ Aamei angtane jeiserem isa towaswebili jei jam eyebiliserem jewer. Titantan ababala je jam kokosyan gimminiwer afa serwenminiwer. ¹⁷ Tini afa waakena, tini jemna tanna waakena. Tini afa kapka, jemna tanna kapka. ¹⁸ Tini afa waakena, tanna jemna kabwakfer je jam teyan. Tini afa kapka, tanna waakenfer jam teyan. ¹⁹ Tini seyafter gemerserem waakenfer jam teyanaiserem, ga jese bulnu, ane gase fasawolwili tokwanabe. ²⁰ Jewer ga nabi ol kapkaiserem ga sege afaf-afafwebili, enggam aa jei gangge gubitenaram, ’Uwa Sanbagiri Jei ams baftabitne.’ Aamei angtane jeiserem ga jamer igama towaswebabili jei aa jes gane eyebilirim jeme." ²¹ Yesus gamjon ga balbabili, "Angtane seyafter Ai As jei gane jenbenerem enggame, ’Tuhan, Tuhan!’, angtane seyafter jeiserem jemniwer jei afwenefener sege kabwitena taman waaken-giribe, tamna abakfer gwelaiserem. Angtane aa jei ne eyebilirim Uwa Amna taman waaken-giribe aa jes bilirim, angtane jeiserem jenefener se naawena Uwa Sanbagirem gwonabe, ane Jei jem Sanbakfe gase nwini. ²² Uwa Sanbagiri Jei Jam aa jep se donolnmunsurum anggwabura seyafter gemerserem jebe, angtane unggwanfer jei enggam ga Asene jenbewesa, ’Tuhan, Tuhan! Ai amesam balbabili angtane nafsi Im boseme, Aamei Ijes bilirim jem temawer. Ai bwat kapkaiserem ames surbili Im boseme, ane ai bwembwema unggwanfer ames eyebaabili!’ ²³ Jepga As gusu, ’Ai gwanan isa Ajam damtabiyen. Jasa gwisi Amniwer, aamei kapkaiserem ijeya eyebuwenaram!’ " ²⁴ Yesus gamjon ga balbabili, "Ga jem temawer, angtane seyafter gemerserem taterisi Amna aa jei ne sarbilirim, ane seyafter aane onsobili, jei angtane tousa galserem. Angtane tousaiserem jei jena kekelefer gwitiri; jei temne unggwanfer tonola o kekelnabe. ²⁵ Arou giri aa galap nyentyaram, ane fona jeime aa galap tinirim, ane nindai mese nindaya uskambar ga ja tarnap ne forobatya. Jengga jena jeiserem jei jam maltiyen, aam temawer angtane jeiserem jei temne unggwanfer tonola o kekelnabe. ²⁶ Jengga angtane jeber-jeber Taterisi Amna aa jei gam sarbilirim, jengga jei jam onsobiyen, jei angtane dwak tetena galserem. Angtane dwak tetenaiserem jei jemna jena kekelyan; tini ninsi doibisnamsiniserem jagomelef ga jes gam tonola dwisibe. ²⁷ Arou giri aa galap gam nyentyaram, fona galap gam tinirim, ane nindai mese uskambar jame aa galap gane gwebanaram ja tarnabe, jena jeiserem ga gam maltini, fona ga gam gwirinfele jamer tatait." galserem. ²⁸ Yesus Jei jame aa galap tabanulminirim seyafter aa jes towas-towasulminirim, angtane unggwanfer jepmanaiserem ga jam ge bitbitwebili, ²⁹ aam temawer Yesus Jei enggam towas-towastababili angtane baabetabara galserem. Jei Jam towastababiyen guru-guru Hukumu Nabi Musa aa jes tulistababilim aa jei ne towas-towastababuwenaram jei gamserem gamyan.

¹ Yesus aa galap iretyaram otum bolawer, angtane anesus jei Yesus ga aane onsobana. ² Angtane tifin bwernabaraiserem jei Yesusminip ga jela, ane somwan dumem ga nwintena jei Yesus ga sembatana. Ane angtane jeiserem Yesus ga bala, "Uwa, afa jam Is gunurum, Aamei baabetabara ams Is waakentana." ³ Jewer ga Yesus tafna ga tetena, ane ga tosobaantena angtane tifin bwernabara jeiserem jem sagabe. Ane Yesus ga bala, "Sya, se waakenswe!" Jes jeberserem tifin bwerna jemna ga waakenswena. ⁴ Jepga Yesus Jei enggam ga gunu, "Aamei ijam nasbineneyen taterisi aaiserem angtane nafis-nafsiserem jemnibe! Jengga jase sofwe imamminip, jeiba angtane taterisi angtanemana Uwa Sanbagirfe aa jei gwirinfelwenaram. Jei aamei is damtanaram enggame aamei imsam waakenswena. Jepga is eyebili Nabi Musa fwater aa gemer nasbilim: enggame se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame, aamei bunar-bunarsusfer imsam waakenswena." ⁵ Yesus aa galap kautenaram kota Kapernaum je, angtane sanbaka 100 ginanggwamana jei Yesusminip ga jela. Jeiba angtane Romamana, jei angtane Yahudimanyan. ⁶ Jei Yesus ga bala, "Uwa, ams batoba! Tane taini amna jei jenap tatna, jei jam irweyan. Jei bwerna uskambarsus folbana, jemna tifni sigin-ginsusu." ⁷ Yesus ga bala, "Ai im jenap As gwina, Ai tane taini imnaiserem ga As waakentana." ⁸ Angtane sanbaka 100 ginanggwamana jeiserem ga tamawolbana, "Wowo Uwa, Aamei sanbagiri, ai angtane Yahudimanyan ai bastantouya, jega jem temawer Aamei jena amnaiserem jep Ijam foroyan. Baabeta Imna unggwandwasusu, ane ai tousa afa Aamei jafner Is gunurum enggame, ’Se waakenswe!’, tane taini amna jeiserem gase waakenswena. ⁹ Ga enggam, ai am sanbakaiserem ai ga ajem gwonap gwena, ane ginanggwana afweraiserem jei am gwonap naawena. Ai ginanggwana afa enggam jam agam balaram, ’Se sofwe!’, ane jei ga gam sofna. Ai angtane nafsi enggam jam agam balaram, ’Jas jal!’, ane jei gam jela. Ane ai tane taini alemana enggam as balaram, ’Se eyebi!’, ane jei ga gam eyebili. Aamei jeime galater, seyafter gemerserem Aamei gemer Igam gunurum, ga gemer gam etamwena." ¹⁰ Yesus Jei jame aa galap sarbilirim taterisi jeiserem, Jei ga bitbitwena. Yesus jepga balbabili angtane Jei aa jei ne onsobanaram, "Ai bunarsusfer ims towas-towastababili, angtane negeri Israelmana seyafter gemerserem jemniwer, Ai angtane afa gemerje ini jemna tabalaiserem afa Ajam damtamiyen angtane aas galserem, jei Ai As ginggitfer tebana. ¹¹ Ai ims towas-towastababili, angtane Yahudimanyanaiserem jei unggwanfersus galap sege forobitye bijauwer, ona gwer tauyalawer jamer gwer irenalawer mese. Jei Abraham, Isak ane Yakub jebaner jepga seyafter gase dwena nunu Uwa Sanbagiri Jei aa jem se nwinirim anggwabura seyafter gemerserem jem Sanbakfe. ¹² Uwa Sanbagiri Jei taman waaken-girs menetaamisini angtane Yahudimanfe. Safe gam, malaikata Uwa Sanbagirmanaiserem jei sene taptababisiwili taman gwin-gwinsusube. Tamna jeiserem jebe, angtane jep ga sege syebinense, ga sene enolsa siginsusu, ane ini jemna uskambar ga sege jenbamisi." ¹³ Jewer ga Yesus angtane sanbaka 100 ginanggwamana jeiserem ga bala, "Se sofwe jenap! Aamei ijes taabilirim, jeiserem se etamwena." Jes jeberserem tane taini jemna ga waakenswena. ¹⁴ Yesus aa galap fortyaram Petrusem jenabe, Jei Petrusem munau tane ga domola, jei jelem nutarap tana, tifin sarsar bwerai falbili. ¹⁵ Yesus tafnawer ga taabitena, jepga tifin sarsara jeiserem ga barwebili. Wini jeiserem ga irwa, ane tumilgala ga gulbana Yesusfe. ¹⁶ Ona aa galap towaiwenaram jam gigitswefe, angtane bwata kapkaiserem aa jei ge kayipminirim ga aane aftabifelwetya Yesusminibe. Yesus Jei bwat kapka olemfener ga balbabili jam ge tobitinyefe, ane angtane bwernabara seyafter gemerserem ga waakentababili. ¹⁷ Yesus Jei angtane jeiserem aa galap waakentababilirim, jes jepserem taterisi Nabi Yesaya aa jes nasbilim ga tabanwena: "Jei bwerna nemna seyafter gemerserem ga wirtabaabisini." (Yesaya 53:4) ¹⁸ Yesus Jei angtane uskambar aa galap damtabilirim Jem gwetmanabe, Jei ga balbabili angtane Jei aa jei ne tikwebaatinennerem, "Au, nei ganma sofwe fobogana jimwer!" ¹⁹ Jewer ga guru daamfenna Hukumu Nabi Musa aa jes tulistababilim aa jei towas-towastababuwenaram ga fortya Jemnibe, ga bala, "Guru, ai Ims onsobaf Ijewer sofwaram." ²⁰ Yesus ga tamawolbana, "Serigala jei gwalna onnemana gemerserem, je o mwonabara, ane junu je golabara. Jengga Ai Tane Angtanemana, jena Amna fas, Amna taman nutara fas." ²¹ Angtane nafsi Jei aa jei ne tikwebaatinennerem ga bala, "Uwa, ai gwanan ajam sofwa, uwa amna aa jep tererem ane as tirnnu, jepga ai Isas tikwebaatini." ²² Jengga Yesus ga tamawolbana, "Namwer Ams tikwebaati! Angtane Ai baife As jei ne gwebanaram jam onsobafe, jei angtane futunuserem ga jei sene tatarbaabunnu." ²³ Jewer ga Yesus ga juwili atdusabe, ane angtane aa jei ne tikwebaatinennerem jei mese ga aa ge jubiwili. ²⁴ Aafer-aafer deye sanbagiri ga aane forobatya foboganabe, ane muru unggwanfer ga atap botabinsowetya. Jengga Yesus ga nustana. ²⁵ Jepga angtane aa jei ne tikwebaatinennerem ga aa ge taabuntini Yesusminibe, ane jei Yesus ga aane irtetena, ga aane bala, "Uwa, Aamei as tebabi seyafter! Nei nesa altil!" ²⁶ Yesus ga balbabili, "Aam je bafa erne game? Aamei Ai Ase bastantowaifer ima tebana." Jepga Jei ga irwena, jewer ga deye yo fobogana ga ofsobana, ane deye ga aane tikwebana, ane foboga jafner fala. ²⁷ Angtane jeiserem jei ga aa ge bitbitwebili, ane jei jena ga aane taanaaminenne enggame, "Angtane aaiserem bunarsusfer jei nansa? Deye yo muru taterisi ga Jemna gangge saribene!" ²⁸ Jewer aa galap fortyaram foboga jimwer, ona bosna Gadara, jewer ga angtane naura bwata kapkaiserem aa jei kamwinirim tonmwa bitisiwer ge jela Yesusminibe. Angtane naura jeiserem jei jam ge uskamswena. Angtane nafsiserem jei jam ge erebili, jewer jam ge wofobiyen. ²⁹ Angtane naura jeiserem jei ititmer ga aa ge gwarenwena, "Aamei Ibas eyebifi amnibe, Tane Uwa Sanbagirmana? Nunu Uwa Sanbagiri aa jep tamtamtababilirim jep gemerje fas fortya. Aam je bafa ga asIs tamtamsona namwer?" ³⁰ Jes jepserem jebe bijautouyan, twena anesus jei tumilgala ga jep ne terelbaabili jam tombaabife. ³¹ Ane bwat kapkaiserem Yesus ititmer ga aane bala, "Afa Aamei as jam Is surbobilirim angtane nauna aaiserem jemniwer, gamjon ga as enggam Is balbabili, ’Sa kaute twena unggwanfer aaiserem jemnip!’, ane aga asa kawetena twenminibe." ³² Yesus ga balbabili, "Sa gwi!" Ane bwat kapka jeiserem ga aa ge tobitintye, ane twenminip ga aa ge kabwitena. Twena seyafter jeiserem ga aa ge nunggirbili, ane ga aa ge janbiton obititiriwer jamer foboganabo, jepga aa ge albitini. ³³ Jepga angtane twena aa jei ne gerebaabisnennerem, ga aa ge nunggirbili kotanap, ane taterisi seyafter jeiserem ga aane nasbinenne. Ane ga jes ne nasbili aa je etamwenaram angtane naura bwat kapka aa jei kamwinirim jem temawer. ³⁴ Angtane seyafter kotana jeiserem Yesusminip ga aa ge sofobili. Ane jei Yesus aa galap ne damtanaram, jes jepserem gane bala, ane gane balbalwena enggalfe Yesus ona jemnaiserem Jam mirtetefalf.

¹ Yesus ga juwili atdusabe, ane Jei foboga jimwer ga aweltya, ane Jei gamjon ga warautna Jelem tamnabe. ² Ane jes galapserem angtane ga aa ge jalbili, angtane muli-mulni ga tikarabaner ne girinyele. Yesus Jei tousa enggame, "Angtane aaiserem jei As mes ne tebana ginggitfer." Jepga Yesus angtane muli-mulni jeiserem ga bala, "Am tane, ini imna saaser-saaserfer ise folbana! Etam-etama kapka imnaiserem Ai is Ames wirulbono." ³ Jepga guru afweraiserem Hukumu Nabi Musa aa jes tulistababilim jei aa jei towas-towastababuwenaram, jei jelem iniber enggam ge gubili, "Angtane aaiserem Jei game aa jewer nasounaram, Jei Jena Jam gaartena Uwa Sanbagiri gamserem!" ⁴ Yesus ba mesam towaswena jei aa gam ge gubilirim jelem inibe, ane Jei ga aa balbabili, "Gam je bafa aamei kapkaiserem ga ima nasbili ilem inibe? ⁵ Masef unggwasbiliserem ga fwersa Ai angtane muli-mulinfe jes eyeibefe: afa Ai enggam jam As gunurum, ’Etam-etama kapkaiserem imna is Ames wirulbono.’ afa Ai enggam jam As gunurum, ’Se irwe, ga is wofena!’? ⁶ Ai nawersamer samfer As eyemini. Namwer aas jepserem Ai ibe isa Ajam gwaarawulmif enggame, Ai Tane Angtanemana, baabeta Amna uskambar ogiri aaiserem jebe enggalfe, angtanemana etam-etama kapka seyafter gemerserem Ajem wirtabaipmif. Aamei jeiserem gam ga isa towaswebili, Ai angtane aaiserem ga As waakentana." Jepga Yesus Jei angtane muli-mulni jeiserem ga bala, "Jas irwe, tikar imna ga is goltena, ane ga is warauwa ilem jenabe!" ⁷ Ane angtane jeiserem ga irwena, ga warauwa jelem jenabe. ⁸ Angtane uskambar jei aa galap ne domolaram jeiserem aa jei etamwenaram, seyafter ga aa ge erebili, ane Uwa Sanbagiri ga aane pujitene, aam temawer Uwa Sanbagiri Jei baabeta unggwandusa mes golmini angtanefe. ⁹ Jepga Yesus ga tamna jeiserem ga mirsotefala, ane Jei aa gemer wofenaram, Jei ga angtanes damtana, bosna jemna Matius. Jei angtane pajak doini aa jei gam tebabilirim enggalfe pemerintafe gam kitulmif, jei kantorap nwini. Ane Yesus jep ga bala, "Aamei Ams onsoba!" Jewer ga Matius ga irwena, ane Yesus ga onsobana. ¹⁰ Jepga abakferyan, Yesus ane angtane Jei aa jei ne tikwebaatinennerem jes mese jei Matiusem jenap ga dwena. Jei jep aa galap dwenaram, jepga angtane unggwanfer ga aa ge forobitye jebar seyafter gam dwenfe, afwer ga angtane pajak doini aa jei gane tebabinennerem jes, ane afwer ga angtane etam-etamabaraiserem nenes mesna jes mese. ¹¹ Angtane safna Farisimana aa galap damtanaram Yesus angtane jeiserem jebar gane dwena, jei ga angtane Yesus aa jei ne tikwebaatinennerem ga aane tenebaabiwena enggame, "Jeje bafa Guru imna angtane pajak doini aa jei gane tebabinennerem ane angtane etam-etamabara jebar seyafter ga dwena? Gam je kapka!" ¹² Yesus taterisi jemnaiserem aa galap saripminirim, Jei ga balbabili, "Angtane bwerayanaiserem jei jam gwiyan doktorminibe, jengga angtane bwernabara tefner jei ga gam gwina. ¹³ Sa gwi, ga isa gerabistena ayata Uwa Sanbagirmanaiserem: ’Ai tumilgala Abe jam gulbalaiserem enggalfe etam-etama jem borolfe, Ai bai. Jengga Ai angtane ga As terelbaabili, jei angtane nafsi ga jes gane nesiktababili.’ (Hosea 6:6) Ai ke enggalf Ai fortya angtane jena enggam aa jei gane gitminirim, ’Maa, ai ames waakenswena, etam-etama amna fas.’, gam ke jes jenbebif. Jengga Ai enggalf Ai fortya, angtane etam-etamabaraiserem jei jam ge tikwebif jelem etam-etamawer, ga jes jenbebif." ¹⁴ Jewer ga angtane Yohanes Pembaptis aa jei ne tikwebaatinennerem ga aa ge forobitye Yesusminibe, jepga Yesus ga aane tenebana, "Ai, ane angtane safna Farisimana aa jei ne tikwebaabitinennerem ga galap-galap ajama twenyan enggalfe ai Uwa Sanbagiri agma pujitef, ane sembayanga agma gwebana. Jes gamserem je waakensusu. Jengga angtane Is jei ne tikwebaatinennerem, jei jes gemerserem jam ne eyebiyen. Jeiserem kapka. Angtane nafsi jei waakena gane eyebili, jeje bafa angtane Is jei ne tikwebaatinennerem, jei waakena gam jam ne eyebiyen?" ¹⁵ Yesus ga tamawolbaabili Jelem temawer, "Masar anggwana wini aa jep gam gularam, anggwana wini jam jei golfe jei jebar aa gemer ge nwinbenerem masara jeiserem jebe, angtane masara jeiserem aa jei gane onsobilirim, bunarsus jei jam ge syebiyen. Jei jamer gane dwena ini saaser-saasermer. Jengga se fortya nunu anggwana wini jam jei gulaiserem, anggwana jeiserem ginanggwana jemna ga sene gaariufenne jemniwer. Jes jepserem jei jam ne dwenyan, aam temawer ini jemna jam sege jenbamini, ane jei sembayanga gane gwebana Uwa Sanbagiri gam ne pujitefe. Jes gemerserem aaiserem jegme gemer, angtane aa jei ne tikwebaatinennerem Amna, afa Ai jebaner Agma nwini aafe, jei jamer gam dwenwena nunu jeber-jeber ini saaser-saasermer." ¹⁶ Jepga Yesus Jei seisya taterisi aaiserem ga nasipmini, jega angtane ga sege towaswebili, jei taterisi waakena ibirmiserem Yesus aa jes nasbilirim, ane osiri fwatermanaiserem jebar jei jam ne dupdupbulyon. Seisya taterisi ga aas: "Angtane afa fas jei fenbit ibirmi jam wirtayana jam gaarteyan enggalfe, jem gam motolsini bajunu fwatermana jem biti gam waakensof. Jei bajunu jeiserem aa galap gam wirsonaram, fenbit ibirmi jeiserem ga gam kofratini bajunu fwatermanaiserem jewer, ane bajunu fwatermana je gam bitnetini unggwanfersus. ¹⁷ Jeiserem jes gamserem aaiserem jegme gemer: Angtane afa fas fo angguru ibirmi jam suwulntefe kambing tifin fon fwatermanaiserem jebe, ga aam temawer fo angguru ibirmi jeiserem ga jese gwebili kambing tifin fon jeiserem ga sene bitnetini. Jepga fo angguru gase suwetini, ane kambing tifin fon gase kabwakswena. Wowo, gamyan! Jengga enggam, fo angguru ibirmiserem ga kambing tifin fon ga ibirmiter gane suwulntena, ga jep gane bokola, gam jega nawersamer waakena." ¹⁸ Yesus aa gemer nasounaram, angtane sanbak jena angtane Yahudimana aa jep ge betwebuwefaram Yesusminip jela. Jepga somwan dumem ga nwintena Jem tof tarnabe, ga bala, "Tane yafma amna bwernabara, jei mes tere. Jase jal, tafna ga Is tosobuniwitye jem sagap, gamjon gase gwena." ¹⁹ Yesus ga irwena, ga aa ge sofwa angtane jeiserem jebar, ane angtane Jei aa jei ne tikwebaatinennerem jes mese. ²⁰ Jes jepserem, wini aawis fwa jemna jeber-jeber forowena tahunu dua belas, Yesus ga gwetmanwebaasini duruwer, fen fwesawer ga enolwili. ²¹ Wini jeiserem enggam ga gunu jelem inibe, "Fene Jemna tefner afa as ensobana, ai samfer ga as waakensona." ²² Yesus ga irfwena, Jei wini jeiserem ga jes domola. Yesus jepga wini jeiserem ga bili, "Am tane, ini imna ise saaserfer falbili. Aamei Ai As imes tebana waakenfer, jega jem temawer aamei gase waakenswe, bwerna imnaiserem bar." Jes jeberserem bwerna jemna bar, aawisi ga tikwebili. ²³ Yesus aa galap fornaram jena angtane sanbak jena angtane Yahudimana aa jep ge betwebuwefaram, Jei ga jep ga anggabiswena angtane musiki aa jei ne eyebilirim, ane angtane tetene unggwanfer ane ga aa ge syebinenne. ²⁴ Yesus ga gunu, "Aamei sa totini aawer! Tane jeiserem jei jam teryen, jei nustana." Jengga jei Yesus jam ne bweraltana, aam temawer jei enggam ge towaswebili tane jeiserem mes tere. ²⁵ Angtane ga aa ge tobitintye, Yesus ga kautena mwonabe tane aa jep falitonom. Jepga Yesus tane jeiserem tafna jemna ga taayibitena, ane tane jeiserem ga irwena. ²⁶ Angtane taterisi jeiserem ga towastababili ona jep gemerserem. ²⁷ Jepga Yesus jewer ga mirsotefala, nele nenennap angtane naura nwe kofa jei Yesus ga aa ge onsobana, ane ga aa ge gwarenbana, "Tane Raja Daudmana, as nesikso!" ²⁸ Yesus ga kautena jenabe, angtane naura nwe kofa jeiserem ga aa ge jela Yesusminibe. Yesus ga tenaamini, "Aamke As waakenfer ge tebana? Aamke tousa Ai samfer isAs waakensona?" Ga ge tamawolbana, "Ai tousa, Tuhan!" ²⁹ Jepga Yesus tafna ga tosomuniwili jem nwenabe, ga gitmini, "Aamei Ai As waakenfer im ge tebana, aam ga waakenfer ga is ge anggasini." ³⁰ Jepga sege anggasini. Yesus ga gitmini uskambar, "Angtane nafsi ijam ge towastababiyen!" ³¹ Jengga aa ge sofwa, ga aa ge towastababili angtane seyafter Yesusem temawer ona jep gemerserem. ³² Jes jepserem aa galap ge sofobilirim, angtane bwat kapkaiserem aa jei kabwanaram Yesusminip ga aane aftafala. Jei jam nasoweyan, aam temawer bwat kapkaiserem jemnip nuniton. ³³ Yesus bwat kapka jeiserem ga surbobili, ane jes jeberserem angtane jeiserem ga nasowena. Ane angtane unggwanfer jeiserem jei ga aa ge bitbitwebili, ga aa ge gubili, "Ai bwembwema enggalaiserem afa gemerje ajama domolyan Israelminibe." ³⁴ Jengga angtane safna Farisimana ga aa ge gubili, "Bwat kapka seyafter gemerserem jem sanbaka ga bawas, ane jei baabeta Yesusfe ga jei gulbana, jega jem temawer Yesus ga bwat kapka jeiserem ga jem surbili." ³⁵ Yesus ga gemer wofowena kotana seyafter gemerserem, ane tamna seyafter gemerserem. Jei angtanes towas-towastababili, jena angtane Yahudimana aa jep ge betwebuwefaram jebe. Jei Taterisi Waakena gam nasbinennef nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer. Jei angtane bwernabara ga waakentababili, ane angtane tifin werna jes mese. ³⁶ Jame aa galap damtabilirim angtane unggwanfer Jei aa jei ne onsobanaram, Jei angtane jeiserem ga nesiktababili, aam temawer angtane jeiserem ga jam ge werenswebili, awelna falam-falamsus. Jei enggala dombana galserem, angtane jei aa jei gerebaasneneleiserem fas. Jem sanbakf jei nwiniserem fas, jei gerebaabisnenefe. ³⁷ Yesus ga angtane Jei aa jei ne tikwebaatinennerem ga balbabili, "Angtane unggwanfersus taterisi Amna jei ne fibilirim. Angtane jeiserem jeiba enggala nananis nuna galserem angtane jes ne fulfe. Nananis nuna jeiserem unggwanfer, jengga angtane nanansi jeiserem aa jei ne fulfe jei bastantowaifer. Jes gemerserem angtane taterisi Amna aa jei ne towastababilirim jei ga bastantowaifefener. ³⁸ Aamei sembayanga uskambar isa gwebabana Tuhanfe, jega Jei angtane unggwanfer gase baftabili enggalfe taterisi Amna jei ne nasibenenef."

¹ Yesus angtane dua belas Jei aa jei ne tikwebaatinennerem ga jenbebili Jemnibe. Ane jep baabeta ga golmini enggalfe, bwat kapkaiserem jem surbif, ane angtane bwernabara ane tifin werna jeiserem seyafter ga waakentababili. ² Bosna angtane dua belas jeiserem Yesus aa jes baftabilirim rasulf gwefe ga enggam: nomor daamfenna, Simon (bosna nafsi Petrus) ane osona jemna Anderyas; Yakobus ane osona jemna Yohanes, tannawan Sebedeusmana; ³ Filipuso Bartolomeus; Tomas, ane Matius, jeiba angtane pajak doini aa jei gam tebabilirim jei doini jeiserem pemerintafe ga gam kitulmini; Yakobus tane Alfeusmana, yo Tadeus; ⁴ Simon angtane Patriot, ane Yudas Iskaryot angtane Yesus aa jei geram angtane kakalaiserem jemnibe. ⁵ Yesus angtane dua belas jeiserem ga baftabili, ane enggam ga balbabili, "Ipsama sofwaram ona angtane Yahudimanyanaiserem jebe, ane aamei ijama sofweyan kotana angtane Samaryamana jewerserem! ⁶ Jengga sa sofwe angtane Israelminip, jei Uwa Sanbagiri jam ne bijautana, dombana jam mumalwela gamserem. ⁷ Sa sofwe, enggam ga isa towas-towastababili, ’Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga mes gwetmanswel.’ ⁸ Angtane bwernabara isa waakentababili, angtane futu isa nwesantababili. Angtane tifin bwernabaraiserem isa wirtabaabili, ane bwata kapkaiserem ga isa surbobili. Aamei unggwanfer imsa tebabili Uwa Sanbagirminiwer. Uwa Sanbagiri is jes kitulminirim ibe, seyafter jeiserem aamei ijama armanulyon. Gam jega sa kitulmi angtane nafisfe, gamfener. ⁹ Doi emas, afa doi perak, afa doi tembaga ijama erbiyen! ¹⁰ Funa ijama erbiyen! Fene naura jes mese sandal, ane dum mese ijama erbiyen! Angtane awelnap aa jei gam gweyibenerem, jei tumilgala gam tebabili fwainfe, ane seyafter jei aa jes gam balbabilirim, angtane jei aa jes gam batobaabilirim jemniwer. ¹¹ Aamei ijeba fornaram kota afa taman, isa terelbene aamei is jei ne tebabilirim, jebar ga isa nwini jamer aamei gamjon isa sofna jewer. ¹² Ijeba kautenaram jenabe, ga enggam isa gunu, ’Uwa Sanbagiri Jei ims waakentababisini.’ ¹³ Angtane jenap jeiserem aamei is jam sene tebabilirim, aamei ga enggam isa gunu jebe, ’Uwa Sanbagiri Jei ims waakentababisini.’ Angtane jenap jeiserem jei is jam ne tebabiyeneiserem, je safnant, Uwa Sanbagiri Jei angtane jeiserem Jei Jam waakentababiyen. ¹⁴ Afa aamei is jam ne tebabiyeneye, ane aamei is jam ne sarbabiyen, aamei ja mese ane tamna jeiserem jes mese ga isa mirtebitefala. Ane tufa onabaraiserem ga jam isa tentebaabisini enggalfe, angtane tamna jeiserem jep aaiserem jei gam gangge towaswebili enggame jei kapkaiserem ga jes ne eyebili. ¹⁵ Ai bunarsus ims towas-towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane jeiserem uskambarsus jase tamtamtababisi angtane kota Sodom ane kota Gomora jemniwer." domola. ¹⁶ Yesus gamjon ga balbabili, "Sa saar, Ai imter baftabili ginanggwaminip, ayang tanna gamserem matin somolem nenennabe. Ginanggwana imna ga enggala awas ufwaya galserem, ini jemna kakal-kakalsusu. Ga samem-samem angtane afa is galap sene afaf-afaftababili, jengga aamei kapka ijama eyebiyen angtanefe. ¹⁷ Aayai, angtane kakala jeiserem galap isene tebabili, ga isene aftabifele angtane sanbakaiserem jemnibe. Angtane nafsi isene saftabana ban utuboroserem jeme, jena angtane Yahudimana aa jep ge betwebuwefaram jebe. ¹⁸ Aamei isene aftabifele angtane sanbak-sanbaka ane raja jemnibe, enggalem temawer aamei Ams ima tikwebaatini. Jeiserem ga waakensusu, aam temawer jeiserem ba dwona aamei Am temawer isa nasipmitne jebe, ane angtane Yahudimanyanaiserem jes mese. ¹⁹ Ane is jep ne tebabilirim, aamei safnant ijama ereyen ijesa nasbiliserem jem temawer, ane fomfoma isa nasowena. Jes jepserem aamei angtane sanbak jem tarnabe ijeba finaram, Uwa Sanbagiri Jei is golmini ula seyafter igemera balbabiwenaram. ²⁰ Gam ke aamei isa nasowena, jengga Mafnana Uwa imnaiserem ga Jei se nasowena im aaremabe. ²¹ Jepga isa anggana, ayana jem osona jener gam gera jam ne munbofe. Osona jeme ayana gam gera, jeta tanem gam gera, ane tantantane jegme ene jeta gane nasmini ga gane dete jam ne munbif. ²² Angtane seyafter gemerserem isene nasbabili kakalmer, aam temawer aamei Ai As ijewera tebanaram. Jengga aamei waakenfer Ai ijeya tebanaram, jamere se tabanwesini Uwa Sanbagiri aa jes bilirim, aamei abakef gwelaiserem ga isa domola. ²³ Afa angtane kapkaiserem ip is jam sene eyeipminirim tamna daamfennaiserem jebe, aamei jewer ga isa nunggiri tamna nafsiserem jebe! Ai bunarsus ims towas-towastababili, Ai Tane Angtanemana Ai Ajep jelaram, awelna imna kotana seyafter Israel je jam tabanweyan. ²⁴ Angtane kursus aa jei gam onsobilirim, jei sanbakyan guruminiwer. Angtane awelna angtanefe aa jei gam gweyibenerem, jei sanbakyan duka jelemanaiserem jemniwer. ²⁵ Samfer angtane aa jei ne tikwebaatinirim, jei ga galater guru jelemana galserem, ane angtane awelna angtanefe afa dwakf se gwena. Ai im Sanbaka, afa Ai As jam sene jenbenerem bwata kapkaiserem jem sanbakfe, afa bosna nafsi Belsebul, angtane jeime bosna kabwaksusu ip isene kitulmini." ²⁶ Yesus gamjon ga balbabili, "Ginanggwana ipsama erebaabilirim! Seyafter basyamer jam eyebiliserem ane basyamer nasoulaiserem, seyafter jeiserem angtane ga sene towaswebisi. Awelna ginanggwamana, ane awelna angtane waakenmana, seyafter jeiserem ga sene towaswebisi. ²⁷ Seyafter Ai ims towas-towastababili basyamer, aamei ga angtane seyafter gemerserem taterisi jeiserem jebe ga isa nasipminenne. Imwatanaber nastobanuwiliserem, seyafter jeiserem isa nasbinenne angtane seyafter gemerserem jem jenabe. ²⁸ Angtane safnant ijama erebaabiyen. Angtane tifni imna tefner is jei ne munbobiliserem, jei uwu imna fas is jam ne munboipmiyen. Jengga Uwa Sanbagiri isa erebene, Jei tifini seyafter imna samfer se munboipmisi, ane ga uwu imna gase giranbaabisisi taman tokwagiribe. ²⁹ Junu naura bastantowai nauna armansona hargana doini bastantouya. Afa Uwa imnaiserem Jam guyono, junu daamfenna bastantouya jam jenyan onabe, jam teryen. ³⁰ Uwa Sanbagiri Jei is nesiktababili unggwanfer, Jei nabal safna im dukabe Jei seyafter mesam eterbaabili. ³¹ Ga jem temawer, ipsama ernerem! Uwa Sanbagiri Jei uskambarsus imse gerebaabisnenne junu bastantouya unggwanfer jeiserem jemniwer." ³² Yesus gamjon ga balbabili, "Angtane afa enggam aa jei gunurum angtanem tarnabe, ’Yesus Jei am Sanbaka.’, Ai Uwa Amna taman waaken-giribe enggam As bala, ’Angtane aaiserem jeiba Amnam.’ ³³ Angtane afa enggam aa jei gunurum angtanem tarnabe, ’Yesus Jei am sanbakyan.’, Ai Uwa Amna taman waaken-giribe enggam As bala, ’Angtane aaiserem jei Amanyan.’ " ³⁴ Yesus gamjon ga balbabili, "Aamei ilem inibe ipsama gunurum, ’Yesus Jei enggalf fortya ogiribe, angtane waakenfer gam naawef, jei jam ge erabayan.’ Fas, gamyan. Ai ga enggalf Ai fortya angtane Agam waksosif. Angtane nafsi jei Am sene tebana waakenfer, angtane nafsi jei Ai As jam ne tebayan waakenfer. Jepga sege erabasa. ³⁵ Ai enggalf Ai fortya, tane girtowaiserem jei jetabar gangge erna, tane yafontowaiserem jei eneber gangge erna, ane ginautouya jei ginaudusaiserem jei jebar gangge erna. ³⁶ Ginanggwa angtanemana jeiba jelem afelen mesna. ³⁷ Angtane ene jeta unggwanfer aa jei gam nesiksonaram, ane Ai bastantowaifer As jei gam nesiktenerem, angtane gala jei waakenyan Ams tikwebaatife. Angtane tane jelemana unggwanfer aa jei gam nesiktababilirim, ane Ai bastantowaifer As jei gam nesiktenerem, angtane gala jei waakenyan Ams tikwebaatife. ³⁸ Angtane Ai As jam tikwebaatife, angtane jeiserem jei gase menetwesini enggalfe, tamtama gam domolf jamer jei sene munbono, aam temawer jei Ams tikwebaatini. ³⁹ Angtane afa jei jelem temawenefener gam gwena, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei waakenfer gwelaiserem jamer abak-abaksus ga jei gam domola." ⁴⁰ Yesus gamjon ga balbabili, "Angtane aamei is jei kitulwilirim, jei Ams gaarwili. Angtane Ai aa jei ne gaarwilirim, jei ga Uwa Amna jes gaarwili, Jei As Jei baftatnantam. ⁴¹ Angtane nabi aa jei gaarwilirim aam temawer jeiba nabisam, jei fwaina nabimana se taabili. Angtane, angtane waakena aa jei ne gaarwilirim aam temawer jei angtane waakena, jei fwaina angtane waakenmana se taabili. ⁴² Afa angtane fo wisim diwiribere jem gam gulbanaram angtane bastantowaife aam temawer jei Ams tikwebaatini, bunarsus Ai ims towastababili, jei fwaina galap se taabili Uwa Sanbagirminiwer."

¹ Yesus Jei angtane dua belas Jei aa jei ne tikwebaatinennerem jame aa galap tabantababilirim jam towas-towastababiliwer, Jei tampata jeiserem ga mirultefala. Jei jewer ga gwina taman-tamna gwetmanabe enggalfe Jei angtanes towas-towastababinenef, ane Taterisi Uwa Sanbagirmanaiserem gam nasibenenef. ² Yohanes Pembaptis jei bwiyip nwini, ane jei jewer ga sara awelna Kristusmanaiserem jem temawer. Jepga jei angtane jei aa jei ne tikwebaatinennerem ga balbabili, "Sa sofwe Yesusminip, ane enggam ga isa tenebana, ³ ’Aamke Angtane Uwa Sanbagiri aa Jes balam Jam foryafe, Aamke Jes? Afa ai angtane nafsiserem ke jes asa fibana?’ " ⁴ Yesus ga tamawolbaabili, "Sa warau Yohanesminip, ane aamei ijesa sarbisinirim Am temawer, ane ijesa domolaram, seyafter jeiserem ga isa nasibene Yohanesfe. ⁵ Angtane nwe kofaiserem jei ga aa ge anggabisini. Angtane muli-mulniserem jei ga aa ge wofebili. Angtane tifin bwerna aa jei ge folbaminirim, jei ga aa ge ferwebitini. Angtane imwa mutu ga aa ge sarbili. Angtane futunuserem jei gamjon ga aa ge fersobuntyo terewer. Ane Taterisi Waakena Uwa Sanbagirmanaiserem ga aane nasipminenne angtane galgalyenaiserem jebe. ⁶ Angtane Ai As jei gam damtanaram Ai Ajes eyebilirim, ane jei As gemer tebana, ini jemna waakenfer gam folbana." ⁷ Angtane Yohanes aa jei ne tikwebaatinennerem aa galap ge sofobilirim, Yesus jepga towaiwena enggam jam nasowefe angtane unggwanfer jepserem Yohanesem temawer, "Aamei ibafa sofna taman dwisgiribe, aamei ibsa domolfa? Ke kakatar nindaya aa jes gin-gintababilirim, aamke ijesa damtabif? ⁸ Afa fas, aamei ga ibafa sofna, ibsa domolfa? Ke angtane fene waakena rajamana galserem aa jei kabwabilirim, aamke ijesa damtaf? Fas, angtane fene waakensusaiserem aa jei ne kabwabilirim, jeke dwisgirip ge nwinbene, jengga jei rajam jenap ge nwinbene. ⁹ Gam jega, aamei taman dwisgiribe ga ibafa sofna, ga ibsa domolfa? Aamke angtane nabi sa damtaf? Bunar. Ai ims towastababili, aamei nabi jewer imsa damtana, ane nabi jeiserem jei sanbagirsusu nabi seyafter afweraiserem jemniwer. ¹⁰ Taterisi Uwa Sanbagirmana jep ga enggam baatultel Yohanesem temawer: ’Angtane aaiserem nabala ga Ajes baftana, jei nele Imna sartabaasini.’ (Maleakhi 3:1) ¹¹ Ai bunarsusfer ims towastababili, angtane aa jei gangge surubilirim ogiribe, angtane afa fas unggwan-giri Yohanesminiwer. Jengga nunu Uwa Sanbagiri Jei aa jep gwenaram anggwabura seyafter gemerserem jem Sanbakfe, nunu jeiserem angtane Ai gemer As jei gam tebanaram, jei safe angtane bastouya, angtane jeiserem jei unggwan-girsusu Yohanesminiwer. ¹² Nunu Yohanes Pembaptis aa galap towaiwulum taterisi jam nasbinennefe jamer aas jepserem, Uwa Sanbagiri Jei baabetfer eyebili, jega Jei anggwabura seyafter gemerserem jem Sanbakfe Jener gase nwini. Ane angtane awelna kakalmer gwebiliserem, jega Uwa Sanbagiri Jei Sanbakfe Jener se nwini. ¹³ Bukunu Nabi Musa aa jes tulistababilim jebe, jei nunu Uwa Sanbagiri Jei aa jem nwinirim anggwabura seyafter gemerserem jem Sanbakfe ga jem temawer tulistaabil. Nabi seyafter gemerserem jei mese ga aane tulistababil nunu jeiserem jem temawer. Jes jepserem jame tabanswelam, Yohanes ga fortya. ¹⁴ Nabi fwatermanaiserem ga enggam bil, ’Nabi Eliya gamjon se warautna.’ Aamke taterisi aaiserem ke isa taabifi: Yohanes jeiba Eliyasam, jeiba angtane nabi fwatermana aa jes balam ba jesam. ¹⁵ Afa aamei imwanabara, taterisi Amna As jam isa saribene, ane waakensusfer isa towaswebili." ¹⁶ Jewer ga Yesus Jei taterisi aaiserem jem igiserem aa jes syawulsinirim ga bili Yohanes ane Yesus Jelem temawer. Jei enggam bili: "Ai aamei isa Ajam towastababili, aamei ijeya gwenaram namwer aa jep falaram, aamei tantantane galserem lapanganap aa jei gangge nwinbenerem olgulube. Safna daamfenna jei safna afweraiserem ga enggam gane balbabili: ¹⁷ ’Ai uru ip enentabaipmini, jengga aamei baif ima gwena ijama tesarabife. Ai olgulup aya gwena angtane futunu jam girinfele gamserem, ai ga ajesa atalbaabisini, jengga aamei ijama syaweyan.’ Tantantane jes galserem, aamei namwer ijeya gwenaram, aamei angtane Uwa Sanbagiri aa jes baftabilirim, jei baif ima gwebabili jam sarbabife. ¹⁸ Yohanes jei jam aa galap jelaram, jei afa tumilgal enggalf jam tumilyen jei Uwa Sanbagirfe sembayanga gam gwebabafe. Ane jei fo angguru jam telbiyen. Ane angtane enggam ga aa ge gubili, ’Yohanes jei bwata kapkaiserem ga jei kabwana!’ ¹⁹ Ane aas jepserem, Ai Tane Angtanemana Ai jam As jelaram, ane Ai tumilgala seyafter ga As tombaabili, ane fo anggur mese ga As telbebili. Ane angtane Am temawer ga enggam ge gubili, ’Yesus Jei kapka gam eyebili. Jei twentwen faarensusu, fo anggur faarensusu. Angtane pajak doini aa jei gane tebabinennerem jei ga Jem afelna, ane angtane afwer etam-etamabaraiserem jei ga Jem afelna.’ Angtane Yohanes baife aa jei ne gwebanaram, ane jei Ai mese As baif ne gwebana. Jengga angtane aa jei ne tikwebaatinennerem Uwa Sanbagiri aa jes bilirim, jei tousa Uwa Sanbagiri aa jes eyebilirim seyafter waakensusu." ²⁰ Jewer Yesus ga balbabili, angtane kotana nawer-ningna jep aa jei ge nwinbenerem, Korasim, Betsaida, yo Kapernaum, angtane jeiserem jei kapka. Kotana jeiserem jebe, Yesus bwembwema jep jam gam eyebilirim Uwa Sanbagiri Jener aa jes gam eyebilirim. Jengga angtane kotana jeiserem etam-etamawer jam ge tikwebiyen, jei waakenaiserem jam ne eyebiyen. ²¹ Yesus kakalmer balbabili, "Aamei ijeya nwinirim Korasimwer ane Betsaidawer, galap kabwaksusu unggwandusaiserem gase etamwemini ibe. Ai bwembwema Ames eyebili im kotanabe, jengga aamei etam-etamawer ijama tikweyan." Ane Yesus ga enggam syesyawulu, "Bwembwema Ai jes Agam eyebilirim im kotanabe, afa Ai fwater bwembwema jeiserem jep jam Agam eyebilim kotana Tirus ane Sidon je, afa ga gam jes gemerserem, gam jega angtane jepmanaiserem ga aa ge tikwebil etam-etama jelemanaiserem jewer, jei ga waakenaiserem ga jes ne eyebil. Ane jei ga jam ge nwinbene fene ga enggala gane kabwabil, niw fene galserem, ane sona ga jelem dukap ne bunulnswel, jega angtane nafsi ga sege towaswebili jeiba mesam ge tikwebili etam-etamawer." ²² Ane Yesus gamjon ga balbabili, "Ai ims towas-towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane kota Tirusmana yo kota Sidonmana Jei bastowaifer se tamtamtababisi imniwer. ²³ Aamei angtane kota Kapernaummana, aamke enggame ima gunu, ’Ai ana jama sa tetena jamere taman waaken-giribo.’? Gamyan! Uwa Sanbagiri aamei is fasawolwisi taman tokwagiribe!" Ane Yesus gamjon ga enggam syesyawulu, "Bwembwema Ai jes Agam eyebilirim im kotanabe, afa Ai fwater bwembwema jeiserem jep jam Agam eyebilim kotana Sodom je, afa ga gam jes gemerserem, gam jega angtane Sodomminip aaiserem jei namwer samfer gam naawena, Uwa Sanbagiri kotana jeiserem Jam wasfersoyan." ²⁴ Ane Yesus gamjon ga balbabili, "Ai ims towas-towastababili, nunu umwef jemserem Uwa Sanbagiri angtane seyafter gemerserem aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane kota Sodommana Jei bastowaifer se tamtamtababisi imniwer." ²⁵ Gwanan jes jepserem Yesus Jei sembayanga ga enggam gwebana, "O Uwa Amna, Aamei Sanbakfe Aamei nwini winsi aaiserem ane ogiri aaiserem jebe. Ai enggam Is Ai bala Ase samfer gulbana, aam temawer seyafter jeiserem Ai Ajes towas-towastababilirim, Aamei seyafter jeiserem Imes syawulsini angtane enggalaiserem jemniwer, angtane jener enggam aa jei gam gunurum, ’Aiba angtane tousaiserem, aiba jesam.’ Jengga Aamei angtane ini jena aa jei gam onabertanaram, Aamei seyafter jeiserem ga jep Is ge saamisini. ²⁶ Bunar Uwa, Ai enggam Is Ai bala Ase samfer gulbana, aam temawer Aamei jeiserem ba Ineram bili, ane ini Imna ga Is jem temawer saaser-saaserswebana." ²⁷ Ane Yesus angtane unggwanfer jep aaiserem ga balbabili, "Uwa Amna Jei tousaiserem seyafter As mesam kitulbono Abe. Angtane afa fas Ai As jam ne towaswebayan, jengga Uwa As Jentowai towaswebana. Ane angtane afa fas Uwa jam ne towaswebayan, jengga Ai Antowaifener towaswebana, ane angtane Ai Ajes destabaabilirim, ga jenefener ge towaswebili. ²⁸ Au Amnip sa jal! Ams isa tebana, aamei seyafter ijeya weren-werenswenaram, ane aamei seyafter awelna unggwanfer aaiserem! Ai aamei isAs waakentababili, ane Ai ibe jafner gwelaiserem ga isAs golmini. ²⁹ Ams isa tikwebaati, jasa towas-towaswesi Amniwer! Ane enggam ga isa gunu, ’Yesus, Jeiba Tuhan amnam.’ Ai ini Amna As foler-folerem folbana, ane witifini Amna As toforem nulabana, ane aamei ina ga waakenfer isa ensona, aam temawer Ai etam-etama imna isAs wirtabaipmini, ane gwela waakena jamer abak-abaksususerem ga isAs golmini ibe. ³⁰ Seyafter Ai isa Ajes golminirim daran-daranyan, je waakena. Ane Ai baabeta is gam As golmini."

¹ Gwanan jes jepserem, nunu Sabateme, Yesus ane angtane Jei aa jei ne tikwebaatinennerem ga aa ge wofebili gandum makan nenennabe. Angtane aa jei ne tikwebaatinennerem wisi ga aa ge folbamini, jei ga aane towaiwulu gandumu ga aane fulu, ane ga aane tombaabili. ² Angtane safna Farisimana jei jame aa galap ne damtabilirim jei Yesus ga aane bala, "Se damtabi! Nunu Sabateme nei awelna nejama gwebiyen, jengga angtane Imna Is jei ne tikwebaatinennerem jei ga gandumu jem ne fulu. Jei gam aa jewer ne eyebilirim, jei awelna jem ne gwebili, Hukumu Nabi Musa aa jes tulistababilim ga jes ne ayebili. Jeje bafa angtane Imna Aamei Is jei ne tikwebaatinennerem etam-etama kapka jes galserem ga aane eyebili, nunu Sabateme?" ³ Yesus ga tamawolbaabili, "Aamke gemerje ijama gerabisteyan nem asal-asala Raja Daud aa jes eyebilim, jei ane jem afelen mesna wisi aa galap ge folbamilim? Aamke ijama towasweyan? ⁴ Jei ga aa ge kabwitel Jena Uwa Sanbagirmanaiserem kota Nobwer. Ane Imam jepmanaiserem, jei rotini Uwa Sanbagirmanaiserem Raja Daudfe ga aane kitulbol. Jei rotini jeiserem ga tombaabil, ane afwer ga kitulmil jelem afelen mesnaiserem jebe. Jei game aa jewer ne eyebilim, safe Hukumu Nabi Musa aa jes tulistaabilim ga aas galserem: Rotini Uwa Sanbagirfe aa jes gane gulbanaram, angtane jei rotini jeiserem jam ne tumilyen, jengga imamnefener jei rotini jeiserem ga jei gane tumili. ⁵ Aamke imsa gerabistena Hukumu Nabi Musa aa jes tulistaabilim? Jei jep ga enggam tulisul: Nunu Sabateme imam-imam jei Jena Uwa Sanbagirmanaiserem jep awelna aa jei ne gweyibilirim, jei jam ge nwinbesiyen, jengga jeiserem je etam-etamyan. Jega jem temawer angtane Ai Ajei ne tikwebaatinennerem etam-etama kapkaiserem jem ne eyebiyen, gandumu jame aa galap ne fulum nunu Sabateme. ⁶ Ai ims towastababili, namwer aas jepserem Ai aare, ane Aiba unggwan-girsusum Jena Uwa Sanbagirmana jemniwer. ⁷ Taterisi Uwa Sanbagirmana jep ga enggam baatultel: ’Ai tumilgala Abe jam gulbalaiserem enggalfe etam-etama jem borolfe, Ai bai. Jengga Ai angtane ga As terelbaabili, jei angtane nafsi aa jes gane nesiktababilirim.’ (Hosea 6:6) Taterisi jeiserem jem igiserem aamei teisyena. Ga jem temawer aamei enggam ima gunu, ’Angtane jepmanaiserem jei etam-etamabara.’ Jengga jei kapka jam ne eyebaabiyen. ⁸ Ai Tane Angtanemana, Aiba Tuhansam, ane Ai baabetabara enggalf Agam bili, angtane bas gane eyebili nunu Sabateme, nunu angtane Yahudimana aa jem ge nwinbisiwefaram." ⁹ Yesus tamna aa jep nasounaram ga jes mirsona, jewer ga kawetena jena afelna angtane Yahudimana aa jep ge betwebuwefaram jebe. ¹⁰ Angtane tafna afwer aaiserem aa jemanem terbenerem ga jep nuniton. Ginanggwana Yesusmana jei Yesusfe kapkaiserem jes ne terelbef, jega enggalf jei gam ge gubife, "Yesus Jei kapka gam eyebili!" Jega jem temawer jei Yesus ga aane tenebana, "Angtane ke samfer angtane nunu Sabateme ke gane waakentana?" ¹¹ Yesus ga tamawolbili, "Angtane dombanabaraiserem, afa domba jemna o mwonap jam gam jantonom nunu aa jem ge nwinbisiwefaram jeme, angtane jeiserem jei ga dombana jeiserem ga gam geserstena o mwonawer. ¹² Dombana hargana doini unggwanfer fas, jengga hargana angtanemana je unggwanfersus. Ga jem temawer, angtane jei samfer angtane nunu Sabateme gam waakentana, ane jei Hukumu Nabi Musa aa jes tulistababilim jam ayebiyen." ¹³ Jepga Yesus ga angtane tafna afwenefener aa jemanem terbenerem ga bala, "Tafna imna se nornorsosi!" Jei tafna jemna ga nornorsosini, ane tafna gamjon ga aane waakennebana, tafna afwer gemerserem. ¹⁴ Jengga angtane safna Farisimana aa ge tobitintye jena angtane Yahudimana aa jep ge betwebuwefaram jeiserem jewer. Ane jei angtane nensaiserem jebar ula ga aane tagalsini basyamer Yesus jam ne tebafe. Ane jei nele enggalf ne terelbene Yesus jewer gam ne munbof. ¹⁵ Yesus Jei mes towaswena angtane safna Farisimana jei aa jes ne mwangbisinirim jei jes ne eyebife. Jega jem temawer Jei tamna jewer ga mirsona. Angtane unggwanfersus ga aane onsobana, ane Jei angtane bwernabaraiserem seyafter ga waakentababili. ¹⁶ Ane Jei ititmer enggam ga balbabili, "Angtane nafsi ijama towastababiyen Ai Ajes eyebilirim jem temawer." ¹⁷ Seyafter jes gemerserem ga etamwena enggalfe, Uwa Sanbagiri aa jes bilim Nabi Yesaya aa jes tulisulum gase tabanwena: ¹⁸ "Angtane Ajes destabanaram ga aare, Angtane aaiserem ga Ai Ajes nesiktenerem, Jei ga gemer eyebili seyafter Ai Agemer gunurum, ini Amna As saaser-saaserfer folbana Jem temawer. Mafnana Amnaiserem ga As gulbana Jebe, ane taterisi bunarsus Ai Ajes bilirim, taterisi jeiserem Jei anggwabura seyafter gemerserem jep gase nasipminenne. ¹⁹ Jei kakalem Jam nasoweyan angtaneminibe, ane Jei ol dagame Jam nasoweyan. Angtane jei taterisi jeiserem jam ne sarbiyen Jemna taterisi nelep aa jes nasbifelerem. ²⁰ Ini Jemna folera angtane ini weren-wernaiserem jem temawer, ane ini Jemna folera angtane Ai bastowaifer As jei ne tebanaram. Jei enggal se eyebili, jamere angtane ga sene eyebili seyafter Uwa Sanbagiri Jei aa jes bilirim. ²¹ Anggwabura seyafter gemerserem jei waakenfer ga sene tebana." (Yesaya 42:1-4) ²² Jewer ga angtane bwat kapkaiserem aa jei kabwanaram Yesusminip ga aane aftafala. Jemna nwena ga kofa, ane jei jam nasoweyan, aam temawer bwat kapkaiserem jemnip nuniton. Yesus angtane jeiserem ga waakentana, ane jei ga nasowena, ane ga gaarasnenne. ²³ Angtane seyafter jep ga aa ge bitbitwebili, ane ga aa ge nasbawena enggame, "Angtane aaiserem ke Tane Raja Daudmana, Angtane Uwa Sanbagiri bunarsus aa jes balam galap jam foryafe?" ²⁴ Angtane safna Farisimana jei jame aa galap ge sarbilirim, ga ge gubili, "Belsebul jei sanbaka bwat kapka seyafter gemerserem jemniwer, ane jei baabeta Yesusfe ga jei gulbana. Jega jem temawer Yesus Jei ga bwat kapka jemfener surbobili." ²⁵ Yesus Jei itana jemna mes towaswebaipmini, ane ga balbabili, "Angtane negara daamfennaiserem aa jei ge nwinbenerem, afa jei jam gangge syensyanwebilirim safna nafis-nafismer, afa safna jeiserem jei ga jena gane uskamswemini ane jei ga gangge erabana, negara jeiserem ga gane kabwaknowa. Ane ga enggam, afa angtane kotana daamfenna jep aa jei gangge nwinbenerem, afa wini yo anggwana jelem tannabaner aa jei gangge nwinbenerem jena daamfennaiserem jebe, afa jei jena jam gane uskamsweminennerem, waakenfer jam ge nwinbeyen, angtane jeiserem gwela jemna ga gam kabwakswemini. ²⁶ Afa bawas je bwata kapka gam suribene, jepga jei jen jena gam bitsona, ane baabeta jemna fas, ane taman-giri bawasmana ga gam kabwakswena. ²⁷ Afa Ai bwat kapka jam As surbobilirim Belsebulem baabeteme, afa ga gam jes gamserem, baabeta ga nanmana angtane aamei is jei ne onsobaabilirim, bwat kapka ga jem sene surbobili? Jei tousa jei bwat kapka fas jam ne surbobiyen Belsebulem baabeteme. Ga jem temawer, jemba mesam ge towaswebili enggame, Ai bwat kapka Ajam surbobiyen Belsebulem baabeteme. Aamei is jei ne tikwebaatinennerem jei game aa jewer ge gubilirim, jei jena mes ne gweraasona aamei syefer ga ima nasowena Am temawer. ²⁸ Jengga Ai bwat kapka ga Mafnana Uwa Sanbagirmana Jem baabetem ga Ajem surbobili. Ga jem temawer aamei imsa towaswena nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem mes fortya imnibe. ²⁹ Angtane baabetyenaiserem jei jam gam gunurum jam kawetefe angtane baabetabaraiserem jem jenabe enggalfe apgal jigala gam komkomtababisif, jei angtane baabetabara gwanan ga jam gam tafresnenne. Jepga jei apgal jigala jemna ga gam komkomtababisini. ³⁰ Afa angtane As jam ne tikwebaatiyen, angtane jeiserem jei ginanggwana Amna. Angtane afa Ai As jam batobayanaye angtane nensa jam dupdupbulf Amnibe, angtane jeiserem jei ga enggalf gam eyebili angtane Amniwer gam ge nunggirbef. ³¹ Ga jem temawer, Ai ims towastababili, angtane etam-etama jam gam eyebilirim, ane Uwa Sanbagirem temawer syefer aa jei gam nasowenaram, afa jei jam gam tikwenaram etam-etamawer, Uwa Sanbagiri Jei angtane jeiserem etam-etama jemna seyafter gemerserem gam wirulbono. Jengga angtane Mafnana Uwa Sanbagirmana Jem temawer nimnafer aa jei gam nasbilirim, Uwa Sanbagiri Jei etam-etama jemna jeiserem jam wirulboyon. ³² Taterisi kapka angtane jes gane nasbilirim Am temawer Ai Tane Angtanemana, Uwa Sanbagiri etam-etama jeiserem gam wirtabaipmisini. Jengga angtane Mafnana Uwa Sanbagirmana Jem temawer syefer aa jei gam nasbilirim, Uwa Sanbagiri Jei etam-etama jemna jeiserem Jam wirulboyon, aas jepserem ane gamjon aa jep se falsaram Jei Jam wirulyon." ³³ Yesus gamjon ga balbabili, "Tini afa waakena jemna igi waakena; tini afa kapka jemna igi kapka. Tini ga igiwer igam domola, ga igam gunu aaga je ti. ³⁴ Aamei awas ufwai gemerserem: ini imna kapka, aamei im aaremawer ula waakena afa ijama bilteyan. Jes igma biltenaram aaremawer, jeiserem ga iniwer gam tawetya. ³⁵ Angtane waakena jei taterisi waakenaiserem ga jes gam nasbabili, aam temawer ini jemna buguf waakenaiserem jeme. Angtane kapkaiserem jei taterisi kapkaiserem ga jes gam nasbabili, aam temawer ini jemna buguf kapkaiserem jeme. ³⁶ Ai im towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem jes mese, nunu jes jepserem Uwa Sanbagiri angtane seyafter gase tenebaabuwesa enggame, ’Aam je bafa ula kapka ga ima nasbabili?’ Ane angtane ga sene tamawolbawesa. ³⁷ Afa imna ula waakena, Jei ijam tamtamtayan; afa imna ula kapka, Jei is tamtamtasa." ³⁸ Jewer ga angtane safna Farisimana afweraiserem ane guru-guru afweraiserem Hukumu Nabi Musa aa jes tulistababilim, jei Yesus ga aane bala, "Guru, ai enggam aya gunu bwembwem asa domolf Ijes eyebilirim, ai gemer asa towaswena Uwa Sanbagiri Jei Ims baftana." ³⁹ Yesus ga tamawolbaabili, "Aamei ijeya gwenaram namwer aa jep falaram, aamei angtane kabwaksusu, Uwa Sanbagirminiwer imesa nunggirbabili bijua. Aamei As ima bala Ai bwembwems eyebif, jengga Ai Ajam eyebiyen. Aamei bwembwema daamfenna tefner isa domola, bwembwema fwater aa je etamwelam Nabi Yunusminiwer. ⁴⁰ Yunus jei nunu nawer-ningna ane gwini nawer-ningna jigala unggwandusa jem uftonap. Jes galserem Ai Tane Angtanemana, Ai tonmwa bitis mwonabe ga Ase faliton nunu nawer-ningna ane gwini nawer-ningna. ⁴¹ Gwanan-gwanansus gamjon jepserem, angtane kota Niniwe je aa jei ge nwinbelem, jei aa galap ne sarbilim taterisi Nabi Yunus aa jes nasbilim, angtane Niniwemana ga ge tikwebil etam-etamawer, jei ga waakenaiserem ga jes ne eyebil. Ane namwer aas jepserem Ai aare, Aiba igsusum Nabi Yunusminiwer. Jengga aamei namwer ijeya gwenaram, aamei taterisi Amna imsa sarbili, jengga aamei etam-etamawer ijama tikweyan. Jega jem temawer nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, angtane kota Niniwemana jei terewer ga sege irwebisi ibaner, aamei ga isene balbabisi, ’Aameiba angtane etam-etamabaram, etam-etama kapka imnaiserem je unggwanfersus.’ ⁴² Fwater-fwatersus wini sanbakfe aa jei nwinim negeri Selatanminiwer, jei ga enggalf sofna bijaususube, taterisi Raja Salomomanaiserem gam sarbif. Taterisi jemna waakensusu, jei seyafter towaswel. Wi sanbaka jeiserem jei taterisi Raja Salomomana ga sarbil, ane ga onsobil. Ane namwer aas jepserem Ai aare, Aiba igsusum Raja Salomominiwer. Jengga aamei namwer ijeya gwenaram, aamei taterisi Amna ijama onsobiyen. Jega jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, wi sanbaka jeiserem terewer gase irwesa ibaner, aamei ga is balbabisi, ’Aameiba angtane etam-etamabaram, etam-etama kapka imnaiserem je unggwanfersus.’ " ⁴³ Yesus seisya taterisi ga jes nasbabili enggame: "Bwat kapka angtane jame aa galap mirtetefalaram, bwat kapka jeiserem ga wofena ona serteraiserem jebe enggalfe, tampata jep nwiniserem ga jes terelbili, jengga jei masef tampata fas jam domolyan. ⁴⁴ Ga jem temawer jei ga gutena, ’Ai gamjon jam age warau jena gwanan ai ajes miruluntum jebe.’ Jei jame aa galap fornaram jena jeiserem jebe, jei jena jeiserem ga domola, jena jeiserem ja teten, ga waakensusu, oltunu fas. ⁴⁵ Jepga jei ga sofna, bwat kapka ga tuju afweraiserem jes kitulnonofe, ane ga aftabifeltye. Bwat kapka afwer jeiserem, jei kakalsusu jemniwer. Ane jepga jei seyafter ga aa ge kabwitena angtane jeiserem jem inibe, ane jep ga aa ge nwinbene. Angtane jeiserem gwela jemnaiserem gwanan jes jepserem je kapka, jengga gamjon aas jepserem gwela jemnaiserem je kabwak-kabwaksusu. Jeiserem ga is etamwemini ibe, aamei angtane etam-etamabara ijeya gwenaram namwer aa jep falaram. Etam-etama kapka imnaiserem je unggwanfersus." ⁴⁶ Yesus aa gemer nasounaram angtane unggwanfer jeiserem, Yesusem eneserem ane Jelem oson mesna sitawer ge fibitne, Yesusfar ge nasbawef. ⁴⁷ Angtane daamfenna ga Yesus bala, "Iye ane oso Imna mesna jei sitawer ge fibitne, jei Ibara nasowef." ⁴⁸ Yesus angtane jeiserem ga bala, "Iye Amna jei nansa? Ane oso Amna jei nansa?" ⁴⁹ Jepga Yesus ga destabaabili angtane Jei aa jei ne tikwebaatinennerem, ane ga balbabili, "Angtane aaiserem jes mese jei iye ane oso Amna. ⁵⁰ Angtane aa jei gam eyebilirim Uwa Amna taman waaken-giribe aa gam gunurum, angtane jeiserem jei ga iye mese oso Amnaiserem, bunar-bunarsusfer ga jes."

¹ Nunu jes jeterserem Yesus Jei jena ga mirultefala, jepga foboga binfip ga nwintetna. ² Jepga angtane unggwanfersus ga aa ge forobitye, jam eterbiyen. Jega jem temawer Yesus ga juswena atdusabe, Jei jep ga nontena. Ane angtane unggwanfer jeiserem jei fo eyep ge fibili. ³ Ane jepga Jei seisya taterisi unggwanfer ga nasbabili. Jei aa galap nasbabilirim, Yesus ga balbabili: "Angtane makan anggwana jam gam sofnaram enggalfe twam tanna gam tonolf makanabe. ⁴ Jei twam tanna jam aa galap gam fasawolnannaram, twam tanna afweraiserem ga nelep gangge janbili. Jepga junu ga gangge forobitye, ane twam tanna jeiserem ga gane tombaabili jamer bar. ⁵ Ane afwer ga ona tunabaraiserem ga jep gangge janbili, jep ona unggwanfer fas. Twam tanna jeiserem ga gangge kokosbili tatarmer, aam temawer ona bastowaifer. ⁶ Jengga gwer kakala jam gam anggasyetyaram, twam tanna kokosa jeiserem ga gangge werenswebili, ane ga gangge sasanswebili, ga gangge terbili, aam temawer tarna uskambarsus jam ge kabwiteyan onabe. ⁷ Ane twam tanna afwer ga ona tini utuboroserem ga jep gangge janbili. Tini utuboro jeiserem jam gangge kokosbilirim jamere unggwan-gwansus, ane twam tanna jep aa jei gangge kokosbilirim ga gam matabili, jamer twam tanna kokosa jeiserem ga gangge aralakswebili. ⁸ Ane twam tanna afwer ga ona waakenaiserem jep gangge janbili, ga aa ge kokosbili jamere aa ge unggwan-gwanswebili, ane igiserem ga aa ge taabili. Igi aa jei ge taabilirim afwer ga 100 gemer ge taabili, afwer ga 60 gemer ge taabili, ane afwer jeiserem jemna 30 gemer ge taabili." ⁹ Seisya taterisi jeiserem jama tabanulurum, Yesus ga gunu, "Afa aamei imwanabara, taterisi Amna As jam isa saribene, ane waakensusfer isa towaswebili." ¹⁰ Angtane Yesus aa jei ne tikwebaatinennerem ga ge jalbili Yesusminibe, ga aane tenebana, "Aam je bafa angtanefe seisya tateris tefner Im nasipmini?" ¹¹ Yesus ga tamawolbaabili, "Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jemna igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakena Jelemanaiserem ibe is mesam kitulmini, jega enggalf aamei taterisi jeiserem jem igiserem gam isa towaswena. Jengga angtane afwer jeiserem Uwa Sanbagiri taterisi jeiserem jem igiserem Jei jam ge saamisiyen. ¹² Angtane taterisi Amna aa jei sarbisinirim ini waakenaiserem jeme, ane taterisi Amna gase taabili, angtane jeiserem jei gamjon Taterisi Waakena jem temawer gase sarbisini waakenfersus, jega jei unggwanfersus gase sarbisini. Jengga angtane baif gwelaiserem jam sarbisife, Uwa Sanbagiri Jei se amsonbana jemniwer, jei aa jes towaswebilirim bastowaifer jeiserem. ¹³ Ai seisya taterisi Ajetefener nasipmini angtane unggwanfer jebe, aam temawer jei safe jam gangge anggabisini, jengga jei jam ne domolyan. Jei safe jam gane sarbili, jengga jei jam ne sarbiyen, ane jei waakenfer jam ne towaswebiyen. ¹⁴ Angtane aaiserem jemnip aa jei etamwenaram, jeiserem ga Nabi Yesaya aa jes nasbilim jam etamwefe ga jei tabanwena. Nabi Yesaya enggam gul: ’Uwa Sanbagiri ga balbabili: Aamei iner isa sarbisini jamer abaksusu, jengga aamei ijama towaswebiyen. Aamei iner isa anggasini jamer abaksusu, jengga aamei ijama towaswebiyen. ¹⁵ Angtane jeiserem ini jemna ga kubanem ge folbamini; imwana jemna mat, jei bai jam sarfe; nwena jemna kof, jei bai jam anggafe. Afa jei nwena jam motsosiyene, jei gam domola; afa jei imwana jam motsosiyene, jei gam sara; afa ini jemna kubanyana, jei gam towaswena. Ane jei ga gam ge waraubitne Amnibe, ane Ai ga angtane jeiserem Agam waakentababili.’ (Yesaya 6:9-10) ¹⁶ Ini imna is waakenfer sege folbamini, aam temawer aamei waakenfer imsa anggasini, aamei waakenfer imsa sarsini, ane aamei waakenfer imsa towaswena. ¹⁷ Ai bunarsus ims towas-towastababili, nabi fwatermanaiserem ane ga angtane aa jei ne eyebilim Uwa Sanbagiri aa gemer gam gunurum, jei uskambar ga aa ge gubil enggalfe jeiserem jam ne domolf aamei namwer ijesa domolaram, jengga jei fas jam ne domolyan. Ane jei jam ne sarbisif aamei namwer ijesa sarbilirim, jengga jei fas jam ne sarbisiyen." ¹⁸ Yesus gamjon ga balbabili, "Imsa sarsi! Seisya taterisi twam tan manggen tonolaiserem, jem igiserem ga enggam. ¹⁹ Angtane aa jei gam sarbilirim taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer, jengga jei taterisi jeiserem waakenfer jam sarbiyen, angtane jeiserem jei ga enggala, twam tanna aa je ge janbilirim nelebe ga jes galserem. Bawasa ga aa jela, ane taterisi jei aa jes sarbilirim ga amsonbana jem iniwer. ²⁰ Twam tanna aa je ge janbilirim ona tunabaraiserem jebe, jeiserem ga enggam: Angtane taterisi Uwa Sanbagirmana aa jei gam sarbilirim, ane tatarfer ga gam taabili ini saaser-saasereme. ²¹ Jengga taterisi jeiserem jelem inibe waakenfer jam eganulsiyen, jei namwenefener gam tebana. Jepga afa jei kabwaktala jam gam domolaram, afa jei ga aane tamtamtababili aam temawer jei taterisi Uwa Sanbagirmana mes ne taabili, jei taterisi jeiserem tatarfer ga gam dirinswebili, ane jei gamjon ga gangge waraubili etam-etama jelemanaiserem jebe. ²² Twam tanna aa jei gangge janbilirim ona tini utuboroserem jem nenennabe, twam tanna jeiserem ga enggam: Angtane taterisi Uwa Sanbagirmana aa jei gam sarbilirim, jengga ini jemna jam gam eseswebanaram gwela ogiri aaiserem jem temawer, ane doim temawer. Jei ini enggam gam folbana, apgal jigala unggwanfer gam damtabif. Jega jem temawer taterisi Uwa Sanbagirmanaiserem jei aa jes gam sarbisinirim ga jem gam mastabili jelem inibe, jamere jei taterisi jeiserem jam taabiyen. ²³ Ane twam tanna aa jei gangge janbilirim ona waakenabe, je ga angtane enggalaiserem: Angtane taterisi Uwa Sanbagirmana waakenfer aa jei gam saribenerem, ane jelem inip waakenfer ga gam eganulsini. Jei waakena tefner ga gam eyebili jamere waakenaiserem jam gam taabili, igiserem afwer ga 100, afwer 60, afwer 30." ²⁴ Yesus seisya tateris nafsiserem ga nasbabili angtane unggwanfer jem tarnabe enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem twam tanem temawer gamserem: Makan anggwana gandum tanna jelem makanap jam tonola gamserem. ²⁵ Ona aa gitgitswelam, angtane seyafter ga jam ge tabal, makan anggwana jeiserem jemna ginanggwana ga foryal. Jei sasfan tanna ga tonola gandum tanna jem sagabe, ane ga sofna. ²⁶ Gandum tanna jame aa galap ge kokosbilirim, ane tanna jame aa galap ge taabilirim, jepga aa ge anggabili sasfanayo gandumu. ²⁷ Ane angtane awelna makan anggwamana aa jei ne gweyibenerem, jei ga aa ge jalbili makan anggwaminibe, ane ga aane bala, ’Uwa, ai aya gunu aameiba gandum tanna i waakena gam tonola makanabe. Jengga sasfana je fwer ge jalbili?’ ²⁸ Makan anggwana jeiserem ga gam tamawolbaabili, ’Jeiserem ginanggwam tafam ne eyebaabili.’ Jepga angtane awelna jemna aa jei ne gweyibenerem gamjon gane tenebana, ’Uwa, aamke baiyan ai ajama gwina makanap, ane sasfana ga asa mulsini?’ ²⁹ Jei ga gutena, ’Wowo. Afa aamei sasfana jam isa mulsini, gam jega gandum mese isa mulsini. ³⁰ Safnant. Gwanan je ge fibi jamer tanna sege taabili. Galap ai angtane aa jei ne fulurum as balbabili, gwanan sasfan isa dupdupbulu, ane ga isa fwirna, ga isa gwalansini. Jewer jon ga gandumu ga isa dupdupbulu, ane ga isa gwetaantena makan jenap.’ " ³¹ Yesus seisya tateris gamjon ga nasbabili, jega angtane waakenfer gam sege sarbili enggame, angtane Uwa Sanbagirem gwonap aa jei naawelaiserem ba sege etamwebili unggwanfersus. Yesus ga enggam nasipmini angtane unggwanfer jem tarnabe: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem eremu tanem temawer gamserem: Angtane eremu tanna bastantouya gam goltena, ane jelem makanap ga gam tonola. ³² Eremu tanna jeiserem safe bastantowaisus, jengga jam gam kokosaram, ane jam gam unggwanswenaram, jeba unggwandwasusu. Ane ga gam etamwena tini unggwandwasfe, jega tini jeiserem jem tirnibe junu ga gola jep ga gane eyebaabili." ³³ Yesus Jei seisya taterisi gamjon nensaiserem ga nasbili angtane unggwanfer jem tarnabe enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem roti tanem temawer gamserem: Wini roti tan bastantowaifer aa galap tetelam, ane tepungu unggwanfer ga enggammer empat pulu liter waakenfer jebaner ga dupdupbulu. Roti tanna bastowaifer jeiserem tepungu unggwanfer ga je gam gwebili jam taweyafe, jepga rotife ga gam etamwena." ³⁴ Yesus Jei seisya taterisi angtanef ga jes towas-towasulmini. Jei jeber-jeber Jam gam towas-towastababilirim, Jei ga seisya tateris tefner gam nasbabili. ³⁵ Yesus Jei jes gemerserem ga gam towas-towastababili, jega nabi aa jes nasbilim gase tabanwena: "Ai seisya taterisi Ajebara nasbabif; Ai tateris Ajam nasbif, taterisi Ajes syawulsilim ogiri gwanan aa galap eyebalam." (Mazmur 78:2) ³⁶ Jepga Yesus angtane uskambar jeiserem ga mirtebitefala, jenap ga kautena. Angtane Jei aa jei ne tikwebaatinennerem ga aa ge forobitye Jemnibe, ane ga aane bala, "As nasipmi seisya taterisi sasfana makanabaraiserem jem igiserem jem temawer." ³⁷ Yesus ga tamawolbaabili, "Angtane gandum tanna waakena aa jei gam tonolaram, jei Tane Angtanemana. ³⁸ Makana jeiserem, je ga ogir. Gandum tanna waakena jeiserem je ga angtane Uwa Sanbagiri aa jes gam bilirim jeiserem aa jei gam eyebilirim. Ane sasfana jeiserem, je ga angtane aa jes gam eyebilirim bawas aa jes gam bilirim jam eyebife. ³⁹ Ginanggwa sasfana aa jei ne tonolaram jei ga bawas. Nunu gandumu aa jep ne targabaabisinirim, je ga nunu ogiri umwef jepserem ga jes. Angtane aa jei ne fulurum jei ga malaikat. ⁴⁰ Nunu ogiri aaiserem jem umwef jepserem jei ga enggam se falsa, sasfana jeiserem aa gemer gane gerentababisinirim, ane ga gane giranbaabisini tokwanabe ga gemer. ⁴¹ Ai Tane Angtanemana Ai ga malaikata Amna ga As balbabisi, ’Sa sofwe angtaneminip, angtane nafsi aa jes ne balbabilirim etam-etama kapka jes eyebif. Angtane kapka jeiserem ga isa dupdupbulu angtaneminiwer, angtane Uwa Sanbagirem gwonap aa jei naawenaram, Uwa Sanbagiri ga jem Sanbakf se nwini. Ane angtane etam-etamabaraiserem jegme isa dupdupbulu!’ ⁴² Malaikata jeiserem jei angtane jeiserem ga sene fasawolwili taman tokwagiribe. Jep ga angtane ga sege syebinense, ga sene enolsa siginsusu, ane ini jemna uskambar ga jam sege jenbamisi. ⁴³ Ane angtane Uwa Sanbagiri aa jes bilirim aa jei ne eyebilirim, jemna nafa enggam ga sege folbamini gwere galserem, ogiri ibirmi Uwa Sanbagiri Jelemanaiserem jebe. Afa aamei imwanabaraye, taterisi Amna aaiserem ga As jam isa saribene, ane waakenfersus ga isa towaswebili." ⁴⁴ Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem gamserem: Angtane jei galgala waakenaiserem, hargana uskambar ga makanap sitabaabisini. Jepga angtane jeiserem ga ter. Jepga angtane nafsi galgala waakenaiserem jep ga damtabili, gamjon aa matabaabistena, ini jemna saaser-saasersus. Jepga galgala jemna ga seyafter ga jualtababili, jega makana jeiserem ga armantal." ⁴⁵ Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem mutyaram temawer gamserem: Angtane tokonabaraiserem, jei mutyara waakena gam terelbaabili. Mutyara jeba inanaisam jemna hargana doini unggwanfer. ⁴⁶ Jei mutyarna waakensususerem jame aa galap domolaram, mutyarna jeiserem ga unggwan-giri, ane jemna hargana unggwanfer, jei tatarfer galgala jemna seyafter ga jualtababili, ane mutyarna jeiserem ga armantal." ⁴⁷ Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem jalam temawer gamserem: Angtane jigala aa jei gane tawanbinennerem, jei jalna unggwandusa ga jam gane daktabisini foboganabe, jigala nafis-nafsiserem ga aane damtabili. ⁴⁸ Jalna jame aa galap tenbityerem, angtane jeiserem jei jalna ga aane goltena, tufawer ga aane gwirinfele. Ane ga aa ge nwinbetena, jigala ga aane syentabaabisini. Waakenaiserem jei burnap ne bokolntena, ane kapkaiserem jei tokwanap ga aane giranbaabisini jamer fus. ⁴⁹ Jeiserem je ga nunu ogiri aaiserem jam umwef jepserem ga jes gamserem. Malaikata ga sege forobitye, ane jei angtane etam-etamabaraiserem ane angtane Uwa Sanbagiri Jei aa jes bilirim ga sene waksosini. ⁵⁰ Angtane etam-etamabaraiserem ga sene fasawolwisi taman tokwagiribe. Jep ga angtane ga sege syebinense, ane ga sene enolsa siginsusu, ane ini jemna ga uskambar sege jenbamisi." ⁵¹ Yesus ga tenebaabili, "Aamke taterisi Amnaiserem seyafter ke imsa towaswebili?" Jei aa ge tamawolbili, "Maa." ⁵² Yesus ga balbabili, "Afa ga gam, gam jega guru-guru afweraiserem Hukumu Nabi Musa aa jes tulistababilim, jeiserem aa jei ne towas-towastababuwenaram, jei namwer Ai As jam sene tebanaram, ane jega jem temawer jei Uwa Sanbagirem gwonap gase naawena, ane Uwa Sanbagiri Jei ga jem Sanbakf nwini. Guru-guru jeiserem jei ga angtane aas galserem ga gala: angtane galgala fwatermanaiserem ane galgala ibirmiserem aa jei gam gwaasaasinirim galgal jenawer. Guru-guru jeiserem taterisi fwatermana Uwa Sanbagiri aa jes gam bilirim jei tousa. Ane jeime taterisi ibirmi Amnaiserem jes mese ga waakenfer ne towaswebili." ⁵³ Yesus Jei seisya taterisi aa galap tabanulurum jam nasipmiliwer, Jei tamna jeiserem ga mirsotefala. ⁵⁴ Jei ga warauwa Jelem tamnabe. Jepga angtane ga towas-towastababili jena angtane Yahudimana aa jep ge betwebuwefaram jebe. Ane angtane ga jam ge bitbitwebili jei taterisi Jemna jame aa galap ne saribenerem, ane ga aa ge gubili, "Angtane aaiserem Jei tousaiserem jeiserem fwer domola? Ane Jei baabeta ga fwer domola bwembwema jem gam eyebife? Nei enggam neya towaswena, Jei aa jes eyebilirim, jeiserem jengga Uwa Sanbagiri Jener gam eyebili. ⁵⁵ Yesus Jei ke angtane jena aa jei eyebaabuwenaram jem tane? Ene Jemna jei ke bosna Maria, osona Jemna jei ke bosna Yakobus, Yusuf, Simon, ane Yudas? ⁵⁶ Jemna osona yafontowai jei nebar ne seyaftera nwini. Nei teisyena Jei fwer taabili seyafter aaiserem." ⁵⁷ Jei Yesus jam ne sarbayan, ane jam ne tebayan, ane jepga jei ga aane nasbana. Jepga Yesus ga balbabili, "Afa angtane nabi Uwa Sanbagirmanaiserem jei jam gam nasbili, angtane seyafter ga jes gane sarbasini. Jengga angtane nabif gwelaiserem jelem tamnabe, ene jeta, ayana yo osona jemna, jei jam ne sarbayan." ⁵⁸ Angtane jei taterisi Yesusmanaiserem jei jam ne taabiyen, jega jem temawer Yesus Jei bwembwema tamna jeiserem jep Jam eyebiyen.

¹ Jes jepserem Raja Herodes jei angtane sanbakef nwini ona Galileya je. Herodes jei taterisi Yesusem temawer jame aa galap sarbilirim, ² jei angtane awelna jemna aa jei ne gweyibenerem enggam ga gubili, "Yesus Jei bunar-bunarsus ba Yohanes Pembaptisam aa jei irwenaram terewer! Jega jem temawer Jei ga bwembwema samfer eyebili." ³ - ⁵ Muara gwanan galapserem Herodes jei wini osonemana gam gula. Osona jemna bosna ga Filipus, ane wini jeiserem jemna bosna ga Herodyas. Yohanes Pembaptis jei Herodes ga bala, "Jeiserem kapka, aamei wini jeiserem ijewer gularam." Jega jem temawer Herodes jei angtane ga baftabili enggalfe Yohanes gam ne tebaf, ane ga sene taferna, ane bwiyip ga sene gaataantena. Herodes jei Yohanes jam munbof, jengga jei angtane Yahudimanaiserem ga jes erebaabili, aam temawer angtane jei enggam ga aa ge gubili, "Yohanes jeiba nabisam." ⁶ Nunu masara Herodes aa jem surulum, tane yafontowaya Herodyasmanaiserem ga jela. Ane jei jep ga tesarabili angtane masarap aa jei ge forobityerem jem tarnabe. Jega jem temawer ini Herodesmana gam saaser-saasersusfer gam folbafe. ⁷ Jei tane yafma jeiserem ga jes bili enggame, "Aamei is amsam golstenna, aamei apgal jigala jes igam bilirim jam taabife, ai apgal jigala jeiserem is agam golbili." ⁸ Eneserem jei ga yafmaiserem ga jei bili. Ane yafmaiserem jei ga ula enemana ga onsoibili, ane jei Herodes ga bala, "Abe duka Yohanes Pembaptismanaiserem jes is golbili pirnibener!" ⁹ Raja ula jeiserem aa galap sarbilirim, ini jemna ga jenbana, aam temawer jei gwanan jena mes gaarstenanna angtane unggwanfer jepserem jem tarnabe, ane afa jei ula yafmemana jam onsobiyeneye jei gase sefersona. Jega jem temawer jei ginanggwana jemna ga balbabili, "Aamei tane yafma aaiserem jei aa jes bilirim, jeiserem gasa eyebi! ¹⁰ Aamei duka Yohanesmanaiserem ga jam isa targabaasini!" Ane jei duka Yohanesmana ga aane targabana bwiyibe. ¹¹ Ane duka jeiserem ga pirnibener ga aane gwirinwena, tane yafma jeiserem jepga aane golbili. Ane tane yafma jei ga gwirinfele jelem eneminibe. ¹² Jepga angtane Yohanes aa jei ne tikwebaatinennerem ga aa ge jalbili, Yohanesem futunu ga aane gaartena, ane ga aane girinfele jam tirnnufe tonmwa bitisibe. Jewer ga aa ge sofobili, ane Yesus ga aane towastana. ¹³ Yesus Jei taterisi jeiserem jame aa galap sarbilirim aa jei etamwenaram, Jei tamna jeiserem ga mirsotefala atdusame, ga gwina taman tetenabe. Angtane uskambar ga ge sarbili Yesus mes gwina, jei tamna jemna ga aane mirsotefala, ane Yesus ga aane onsobana tufawer. ¹⁴ Atdusa Yesusmana jam aa galap batuwilirim, jepga Yesus ga jutetya, jewer ga angtane unggwanfer ga damtabili. Yesus angtane jeiserem ga nesiktababili, ane angtane bwernabara jepmana ga waakentababili. ¹⁵ Ona jame aa dafwenaram, angtane Yesus aa jei ne tikwebaatinennerem jei Yesusminip ga aa ge jalbili, ane ga aane bala, "Tampata aaiserem tamanfenna, ane ona jama towaiwenaram jam gitgitswefe. Angtanes balbabi jei gangge sofobi, jei tumilgala ga sene armantababili tamnabe." ¹⁶ Yesus ga balbabili, "Jei safnant. Jei jam ge sofwebiyen. Tumilgala jebe aamei sa kitulmi!" ¹⁷ Jei Yesus ga aane bala, "Amnibe aafe rotini tafna gwiri ane jigala ga naura, ga jenefener ge falbili." ¹⁸ Yesus ga balbabili, "Au, sa erbiyel Amnip!" ¹⁹ Jepga Jei angtane unggwanfer jeiserem ga balbabili, "Sa nwinte kakatar sagap!" Yesus Jei rotini tafna gwiri ane jigala naura jeiserem ga tebabili, ane jewer ga taman waaken-girip ga anggaswena, ane Uwa Sanbagiri ga bala, "Ase samfer gulbana." Jepga Yesus Jei rotini ga bitabaabisini, ane ga kitulmini angtane aa jei ne tikwebaatinennerem jebe. Jewer ga gamjon ga aane kitulmini angtane unggwanfer jeiserem jebe. ²⁰ Angtane seyafter jep gemerserem ga dwena jamere unubuguf. Gamjon ga tomna bitbitiserem ga aane dupdupbulu, burnabara ga dua belas. ²¹ Anggwana jep aa jei ne dwenaram unggwanfer ga 5.000 anggwa. Wi tane seyafter jebar jep aa jei ne dwenaram, jam ne ertebiyen. ²² Jepga Yesus ga balbabili angtane Jei aa jei ne tikwebaatinennerem, "Sa jusya atdusap, ane ga is danna fobogana jimwer!" Jepga Jei ga balbabili angtane uskambar, "Aamei jasa warau!" ²³ Angtane uskambar aa galap ge sofobilirim, Yesus ga tawena otumube, Uwa Sanbagirfe sembayanga jam gwebabafe. Gwini mes fortya, Yesus Jei Jener Jei otumup, ²⁴ jengga atdwas angtane aa jei ne tikwebaatinennerem je maa, mes bijauswena onnawer. Muru unggwansusu anesus atdusa jeiserem ga irfifulu, aam temawer nindaya unggwanfersus ne gwebana. ²⁵ Ona fom nafwela jengga gwini gemer, Yesus jemnip ga jela. Jei foboga sagap wofentena. ²⁶ Angtane Jei aa jei ne tikwebaatinennerem jei Yesus aa galap ne damtanaram Jei fo sagap wofentena, jei uskambar ga aa ge erebili. Jei enggam ge gubili, "Jeiba spoksam!" Jei ga aa ge erebili, ane ga aa ge gwarenbuwena. ²⁷ Jengga jes jeberserem Yesus ga balbabili, "Sa tikwe, ipsama ernerem! Ai aare." ²⁸ Petrus ga tamawolbana, "Tuhan, afa Aamei bunarsus Yesuse, as Im bal fo sagstamer gama ge gwi jamer Imnibo." ²⁹ Yesus ga bala, "Au!" Jewer ga Petrus atdusawer ga jutena, ane fo sagstamer Yesusminip ga gwina. ³⁰ Jengga nindai uskambar aa galap domsonaram, jei ga erne, ga towaiwena fonap altife, ane ga gwaren-gwarenwena, "Tuhan, as teba waakenfer!" ³¹ Yesus ga tatarfer tafna Petrusmana ga taayimbene, ane ga dektetena. Yesus ga bala, "Aamei Asi bastowaifer im tebana. Aam je bafa baabeta Amna unggwandusaiserem ijam taabiyen?" ³² Jei aa galap ge juswenaram atdusabe, nindaya ga aane tiknebana. ³³ Jewer ga angtane atap aa jei ge nwinbetenaram, jei Yesus ga aane pujitene. Jei enggam ne bala, "Bunar-bunarsus Aamei Tane Uwa Sanbagirmana." ³⁴ Yesus ane angtane Jei aa jei ne tikwebaatinennerem aa galap ge forobilirim foboga jimwer, ona ga Genesaret ga jep ge batobili. ³⁵ Angtane jepmanaiserem ga aa ge anggabili enggame aa jei fortyaram Jeiba Yesusam. Ane jei angtane ona jepmana seyafter gemerserem ga aane towas-towasulmini. Jepga angtane bwernabara seyafter gemerserem Yesusminip ga aane aftabifelwetya. ³⁶ Jepga Yesus ga aane balbalwena enggame, "Ai ke samfer fene Imna fwesapfener asa ensobana?" Ane angtane bwernabara seyafter fene Jemna aa jei ne taayimbowenaram, jei ga aa ge waakenswebili.

¹ Jepga angtane safna Farisimana afwenefener ane guru-guru Hukumu Nabi Musa aa jes tulistababilim aa jei ne towas-towastababuwenaram jei mese, jei Yesusminip ga aa ge jalbili kota Yerusalemwer, ga aane tenebana, ² "Jeje bafa angtane Aamei Is jei ne tikwebaatinennerem, osiri asal-asala nemna aa jes ne towastababilim jeiserem jei jam naaweyan? Jemna tafna jam ne wirtabaabiyen gwanan jam twenabe!" ³ Yesus ga tamawola, "Jeje bafa aamei Uwa Sanbagiri aa jes balbabilirim ijama onsobaabiyen, jengga osiri asal-asal ilemanaiserem ga jes isa onsobili? ⁴ Uwa Sanbagiri aa gul, ’Aamei ga waakenfer isa nwini iye yo uwa jebar.’ Ane Jei gamjon aa gul, ’Tanna iye yo uwa kabwakfer aa jei gam gitminirim, tane jeiserem ga sene tamtamtana jamer futu.’ ⁵ Jengga aamei syefer ga enggam ima towas-towastababili: Angtane afa ene afa jeta jam gam gitminirim enggame, ’Apgal jigala ip is ajes golmiliserem ibe, ai apgal jigala jeiserem ames gulbana Uwa Sanbagirfe.’, ⁶ afa angtane jes gemerserem gam gitmini, aamei syefer gane towas-towastababili enggame, angtane jeiserem jei safnant ene yo jeta gamjon jam teteyan. Aamei gam ijewera towas-towastababilirim, aamei osiri fwatermana asal-asala ilemanaiserem ga jetefener ima towas-towastababili, ane Taterisi Uwa Sanbagirmana ga ijama firulbaanuwili. ⁷ Aameiba angtane akar-akarem ijeya gwenaram! Nabi Yesaya bunarsusfer enggam mesam nasbil im temawer: ⁸ ’Uwa Sanbagiri Jei enggam gunu, anggwabura aaiserem Ase aarememfener gane gaartena, jengga ini jemna bijua Amniwer. ⁹ Jei Ai As jewer ne pujitenerem, jam sege elbesini, aam temawer taterisi jei aa jes ne towas-towastababuwenaram, jei enggam ne balbabili taterisi jeiserem ga Amna, jengga taterisi jeiserem Amanyan, taterisi jeiserem jei angtanemana.’ " (Yesaya 29:13) ¹⁰ Jepga Yesus ga angtane unggwanfer jeiserem ga jenbebili Jemnip ge jalbife. Jei enggam ga balbabili, "As imsa sarbasi, waakenfer ga isa sarbisini! ¹¹ Tumilgala angtane aa jes gane tumilirim, jeiserem jeme je angtane jam kabwaktayan. Fas, jengga ula kapka aaremawer totinyeleiserem, angtane ga jei gam kabwaktana." ¹² Jewer ga angtane Jei aa jei ne tikwebaatinennerem ga aa ge jalbili Jemnibe, ane ga aane tenebana, "Aamke tousa Aamei Ijes bilirim, taterisi jeiserem jeme ini angtane safna Farisimana je enggam ge folbamini Aamei Is jam ne nasbala gamserem?" ¹³ Yesus ga tamawolbaabili, "Nanansi seyafter Uwa Amna taman waaken-girip jam tonolyenaiserem, galap gase mulstesa tisakarabaner. ¹⁴ Angtane safna Farisimana, jei safnant ijama sarbabiyen! Jei angtane nwe kofa gemerserem. Afa angtane nwe kofa jei angtane nwe kofa nafsi jam gam tebasfelerem, nawersamer ga gangge janton o mwonabe." ¹⁵ Petrus ga gunu, "Seisya taterisi jeiserem jem igiserem as nasipmi." ¹⁶ Yesus ga balbabili, "Aamke gemerje ijama saryan? ¹⁷ Aamei imsa towaswebili, tumilgala angtane aa jes gam tumilirim, tumilgala jeiserem ga witifinip gam kawetena, ane unu gamserem ga gam nana witifiniwer. ¹⁸ Jengga ula kapka aaremawer totinyeleiserem ga iniwer gam tawetya, jeiserem angtane ga jei gam kabwaktana. ¹⁹ Angtanem iniwer taweyalaiserem ga enggala aas galserem: ula kapka angtane gemer aa jei gam gunurum jelem inibe; angtanes munbof; maaryens gam gwebili; angtane naura jei wini anggwayanaiserem jebar makanap gangge dorwena; apgal jigala jam komkomulsiliserem; angtane aa jei gam afaf-afaftababilirim angtane nafsi jem temawer; syefer nasowelaiserem angtane nafsi jem temawer. ²⁰ Jeiserem angtane je gane kabwaktana; jengga gam ke tafa kabwakmer twenaiserem. Wowo, jeme angtane jam kabwaktayan." ²¹ Yesus ane angtane Jei aa jei ne tikwebaatinennerem tamna jeiserem ga aane mirsotefala, ane ga aa ge sofobili ona kota Tirus ane Sidon jem gwetmanabe. ²² Kanan wini jep aa jei nwinirim ona jeiserem jebe, jei Yesusminip ga aa jela, ane ga gwarna, "Uwa, Tane Raja Daudmana, as nesikul! Tane yafma amna bwat kapka aa jei kabwilirim, jei bwerasusu." ²³ Yesus Jei ula daamfenna afa Jam tamawolbiyen. Ane angtane Jei aa jei ne tikwebaatinennerem ga aa ge jalbili Jemnibe, jei ga Yesus ga aane balbalwena enggame, "Aamei wini aaiserem se bil jam ge sofwe. Jei ga as onsobaabili, jei gemer gwaren-gwarenwena!" ²⁴ Yesus ga tamawolbaabili, "Uwa Sanbagiri Ams baftana angtane Israelmanaiserem jem temawenefener, jeke angtane Israelmanyan. Angtane Israelmana jei Uwa Sanbagiri mes ne bijautana, dombana jam mumalwela gamserem." ²⁵ Jepga wini jeiserem ga jela Yesusminibe, somwan dumem ga nwintena jam sembataf, ane ga bala, "Uwa, as batobi!" ²⁶ Yesus ga tamawola, "Gwanan tane unu jei ge folbami. Gam jam naaweyan, tumilgala tanemana ga gwalaf gane fasawolmini." (Taterisi jeiserem jem igiserem ga enggam, Yesus Jei nabala angtane Israelmanaiserem ga jes batobaabili, angtane Israelmanyanaiserem jei ga amnup.) ²⁷ Wini jeiserem ga tamawola, "Uwa bunar, jengga tumilgala tomna uwamana aa je ge janbityerem mejanawer, gwalna tumilgala jeiserem ga jes ne tombaabili." ²⁸ Jepga Yesus ga tamawola, "Wi, aamei uskambar As im tebana. Aamei ijes bilirim, mes etamwena." Ane jes jeberserem tane yafma jemna ga mes waakenswebili. ²⁹ Yesus ona jeiserem ga mirsotefala, Fobogana Galileya jem eistamer ga gwina. Ga tauna otumube, jep ga nwini. ³⁰ Angtane unggwanfersus ga aa ge forobitye Jemnibe, gane aftabiyele angtane jam wofeyana, angtane nwe kofa, angtane muli-mulniserem, angtane jam nasouyanaiserem, ane angtane unggwanfersus bwernabara nafis-nafsiserem aa jemanem ge folbaminirim jes mese. Jei angtane jeiserem gane bunulntena Yesusem tarnabe, ane Yesus seyafter ga waakentababili. ³¹ Angtane ga aa ge bitbitwebili jame aa galap ne damtabilirim angtane gwanan jam ge nasbaweyanaiserem, jei mes ge nasbawena; angtane muli-mulni, jei mes ge waakenswebili; angtane wofeyana, jei mes ge wofebili; angtane nwe kofa, jei mes ge anggabisini. Ane jei ga Uwa Sanbagiri Israelmana ga aane pujitene. ³² Jepga Yesus ga angtane Jei aa jei ne tikwebaatinennerem ga aa jenbebili Jemnip jam ge jalbife. Ane ga balbabili, "Ini Amna uskambar nesiktababili angtane aaiserem aa jei ge betwebilirim, aam temawer jei Abar Aya nwinirim nunu ga nawer-ningna, ane jemna tumilgala ga bar. Ajam balbabiyen jei wismer ge sofobife, tifni nelep galap sege werenswebamini." ³³ Angtane aa jei ne tikwebaatinennerem Yesus ga aane tenebana, "Ga fomfom nei tumilgala ga nesa terelbili ona tamanfennabe, jega angtane unu ga sege bugufswebamini?" ³⁴ Yesus ga tenebaabili, "Rotini imnibe fomera?" Ane angtane Jei aa jei ne tikwebaatinennerem ga aane tamawolbana, "Rotini amnibe tuju, ane jigala bastantowaifer ane bastantouya." ³⁵ Yesus ga angtane unggwanfer jep gemerserem ga aa balbabili, "Onnap sa nwinte!" ³⁶ Ane Yesus ga tuju rotini jeiserem, jigal mese ga aa tebabili, ane Uwa Sanbagiri ga bala, "Ase samfer gulbana." Ane ga aa bitabaabisini, ane ga kitulmini angtane Jei aa jei ne tikwebaatinennerem jebe. Jewer ga gamjon ga aane kitulmini angtane unggwanfer jeiserem jebe. ³⁷ Jepga seyafter ga aa dwena jamer unubugufsus. Ane angtane Yesus aa jei ne tikwebaatinennerem gamjon ga tomna bitbiti ga aane dupdupbulu, burnabara ga tuju. ³⁸ Anggwana rotini jep aa jei ne tombaabilirim unggwanfer ga enggammer 4.000 anggwa. Wi tane mese aa jei ne dwenaram jam ne erterbiyen. ³⁹ Yesus ga aa balbabili, "Gasa sofwe!" Ane Yesus ga aa juwili atdusabe, ga sofwa tamna Magadanwer.

¹ Angtane safna Farisimana ane angtane safna Sadukimana ga aa ge forobitye Yesusminip, jei Yesus gane tenebawena enggalfe jei Yesus ne unggwasbaf. Jega jem temawer jei enggam ga aane bala, "Yesus, Aamei gwanan bwembwem ap se eyeipmi, jega enggalf ai agma towaswef Aameiba Uwa Sanbagirminiweram jela." ² Yesus ga tamawolbaabili, (("Jame igalaba domolaram winsi berbere ona safe aa gemer gitgitswenaram, aam ga iya gunu, ’Gwirmer nindai mese arou fas.’ ³ Ane gwinibenersus igalaba domolaram gwer anggasyelawer berbere yo omyana winsip seiseye, aam ga iya gunu, ’Namwer arouwa se nyentya.’ Afa aamei winsi jam igama damtanaram, aamei ga igama towaswena enggame arouwa se nyentya, afa gwer sarsar se jere. Jengga Uwa Sanbagiri namwer aa jes eyebilirim, jeiserem aamei waakenfer ijama towaswebabiyen.)) ⁴ Aamei ijeya gwenaram namwer aa jep falaram, aamei angtane kabwaksusu, aamei imsa nunggiri Uwa Sanbagirminiwer. Aamei Asi imsa bala Ai bwembwems eyebif, jengga Ai Ajam eyebiyen. Aamei bwembwem daamfenna tefner isa domola, bwembwema fwater aa jei etamwelam Nabi Yunusminiwer." Jepga Yesus angtane jeiserem ga mirtebitefala, ane ga sofwa. ⁵ Yesus ane angtane Jei aa jei ne tikwebaatinennerem foboga jimwer ga ge sofobili, jengga angtane Jei aa jei ne tikwebaatinennerem jei ga rotini jam ne dirinswebabili gemer ne erbife. ⁶ Yesus ga balbabili, "Aayai roti tan angtane safna Farisimana ane angtane safna Sadukimana, je kapka!" ⁷ Angtane Jei aa jei ne tikwebaatinennerem enggam jena ga aane gitminenne, "Yesus Jei nei nese roti tanem temawer balbabili, aam temawer nei rotini nemsa dirinswebabili, nejama erbiyen." ⁸ Yesus Jei fwater towaswena angtane Jei aa jei ne tikwebaatinennerem jena aa jes ne gitminennerem, jepga tenebaabili, "Jeje bafa aamei ga ima nasouna rotini ijama domolyanem temawer? Aamei Ai Ase bastowaifer ima tebana! ⁹ Aamei gemerje ijama saryan. Aamke ijama dirinswebili ai angtane 5.000 Agalap taayinbilirim rotini tafna gwirime? Aamei roti tomna ga burnabara ga fomera ijesa dupduptababilirim? ¹⁰ Aamke ijama dirinswebili Ai angtane 4.000 Agalap taayinbilirim rotini tujume? Roti tomna ga burnabara fomera ijesa dupduptababilirim? ¹¹ Jeje bafa aamei gemerje ijama saryan, Ai rotim temawer Ajam nasoweyan? Jengga Ai gamjon ims balbabili, aayai roti tan angtane safna Farisimana ane angtane safna Sadukimana, je kapka!" ¹² Jewer ga jei mes ne sarbili, Yesus Jei Jam guyon, "Aayai roti tan aa jes ne eyebilirim rotife." Jengga Jei ga enggam gunu, "Aayai seyafter angtane safna Farisimana ane angtane safna Sadukimana ibe ijes ne towas-towastabaipminirim!" ¹³ Yesus ane angtane Jei aa jei ne tikwebaatinennerem jewer ga aa ge sofobili, ona kota Kaisareya Filipi jem gwetmanabe. Jewer ga Yesus angtane Jei aa jei ne tikwebaatinennerem ga aa tenebaabili, "Angtane nafsi ke Ase enggam ne balwena Ai Tane Angtanemana, Ai nansa?" ¹⁴ Angtane Jei aa jei ne tikwebaatinennerem ga aane tamawolbana, "Angtane afwer jei enggam ge gubili, Aameiba Yohanes Pembaptisam. Afwer ga enggam ge gubili, Aameiba Nabi Eliyasam. Ane angtane nensaiserem jeime gemer ge gubili Aameiba Nabi Yeremiasam, afa nabi afweraiserem gwanan aa jei naawelam, ba jesam." ¹⁵ Jepga Yesus angtane Jei aa jei ne tikwebaatinennerem ga tenebaabili, "Jengga aamei iner Ai As ifoma bala Ai nansa?" ¹⁶ Simon Petrus ga tamawolbana, "Aameiba Angtane Uwa Sanbagiri Jei bunarsus aa Jes balaram Jam baftafe. Uwa Sanbagiri aa Jei gwenaram, Aameiba Tane Jemnam." ¹⁷ Yesus ga tamawolbana, "Ini imna saaser-saasersusu Simon tane Yonammana, aam temawer ula waakena jeiserem aamei ijes nasbilirim angtane nafsi is jam ne gulbayan, jengga Uwa Sanbagiri Amna taman waaken-girip aa Jei nwinirim is Jei se gulbana. ¹⁸ Ai ims towastana, Ai bosna Petrus ga Ai ip gulbana. Bosna jeiserem jem igiserem ga enggam, ’Ton-gir’. Ai bosna jeiserem Ai ip jenibene, aam temawer aamei ga ton-giri galserem. Aam ga gala, aam temawer aamei Ai As imes tebana baabetfer. Aamba angtane ijei dannaram Ams tebafe baabetfer, ga jes galserem ton-giri jei kekelesusu. Ai angtane nensaiserem Ai As kitulnonno Ai As jei ne tebanaram, aamei Ai Asi gemer tebanaram. Ai angtane unggwanfer jeiserem ga As gwebabili safna daamfenna jebar ga sege dubwebisini, safna Amnaiserem. Bawasa jei fas jam borolyan safna Amna jeiserem Ai As jei ne tebanaram. ¹⁹ Ai kuncini ip terbene. Kuncini jeiserem pintu nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem is tertesini ane is matasini. Afa aamei enggam is gunu ogiribe, ’Game ijama eyebiyen.’, Uwa Sanbagiri Jei gemer se bili taman waaken-giribe, ’Game ijama eyebiyen.’ Ane afa aamei enggam is gunu ogiribe, ’Sya, samfer aamei gemer isa eyebili.’, Uwa Sanbagiri gemer se bili taman waaken-giribe, ’Sya, samfer aamei gemer isa eyebili.’ " ²⁰ Jepga Yesus angtane Jei aa jei ne tikwebaatinennerem ga balbabili ol dagame, "Aamei angtane nafsi jebe ijama nasbineneyen enggame, Aiba Angtane Uwa Sanbagiri bunarsusfer aa Jes balaram Jam baftafe, ba jesam." ²¹ Jam towaiwulu jepserem, Yesus ga towaiwulu waakenfer jam nasipmife jega angtane Jei aa jei ne tikwebaatinennerem jei waakenfer gam ne sarbif. Jei enggam gunu, "Ai bunarsus kota Yerusalemminip As sofwa. Jewer ga angtane sanbaka Yahudimana, ane angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, jei tamtamtalaiserem unggwanfer ga Asene gulbafa, ane Ai ga Asene munbofo. Jengga nunu nawer-ningnaiserem Ai gamjon ga jem As irwefa terewer." ²² Petrus Yesus ga aa tebawili, ane ga towaitana Yesus jam uftafe enggame, "Tuhan ai enggam ai gunu, Uwa Sanbagiri Jei kapka jeiserem Imniwer Is jam se bijauwulbono! Ai bai jeiserem Imnip Is jam etamwebafe!" ²³ Yesus ga irfwena, ane Petrus ga aa bala, "Bawas, aamei jas gwisi! Aamei Ai Asis unggwasbana jega Ai Ajam eyebiyen Uwa Sanbagiri aa jes bilirim. Aamei taterisi aaiserem angtaneminiwer im domola, Uwa Sanbagirminiweryan." ²⁴ Jewer ga Yesus angtane Jei aa jei ne tikwebaatinennerem ga balbabili, "Angtane afa aa jei gam gunurum Ams onsobafe, jei jelem temawenefener jam gweyan. Ane jei jamer gam menetwesiwena jam terfe aam temawer jei Ai As jewer gam tikwebaatinirim. Ane jei Ai jamer ga As gam onsobana. ²⁵ Angtane afa aa jei gam gwenaram jelem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei waakenfer gwelaiserem jamer abak-abaksus ga jei gam domola. ²⁶ Aaiserem je kapka, afa angtane galgala seyafter ogirip gamserem se taabili, jengga jei waakenfer gwelaiserem jamer abak-abaksus jam domolyan. Angtane apgal jigala afa fas Uwa Sanbagirfe jam gulbayan enggalfe, jem fwaina waakenfer gwelaiserem jamer abak-abaksus Jemniwer gam domolf. ²⁷ Taterisi jeiserem ba bunaram, aam temawer Ai Tane Angtanemana, galap Ai gamjon As waraunsu malaikata Amnaiserem jebar, ane Ai ga As ertene baabeta Uwa Sanbagirmanaiserem jeme. Jepga Uwa Sanbagiri angtane waakenaiserem aa jei ne eyebilirim Jei fwaina waakenaiserem se golmini. Ane Uwa Sanbagiri angtane kapkaiserem aa jei ne eyebilirim Jei fwaina kapkaiserem jese golmini. ²⁸ Ai bunarsus ims towas-towastababili, aamei afwer aas ijeya finaram namwer, aamei nalef ijama teryen, aamei gwanan isa damtana Tane Angtanemana se fortyaram Rajafe."

¹ Nunu gamjon ga enam, Yesus Jei ga Petrus, ane Yakobuso Yohanes ayana yo osona, ga aftabifele taaren bwalnaiserem jem bolabe. Angtane nensa fas jebe. ² Jepga tifini Yesusmana nenesmer ga aa folbana jem nwenabe. Mirmase Jemna ga aa ge erteibene gwer nafa gamserem, ane fene Jemna ga aa ge sinsinsweibene iris nafa galserem. ³ Jewer ga Musa yo Eliya, nabi fwatermana ga taman waaken-giriwer ge fortya, Yesusfar ga aa ge nasbawena. ⁴ Petrus jei Yesus ga bala, "Tuhan, aaiserem samfersus, ai seyafter aare! Afa Aamei asIs bala, ai jatowai nawer-ningna ga as eyebaabili aafe -- daamfenna je Ip, daamfenna je Musaf, ane daamfenna je ga Eliyaf." ⁵ Petrus aa gemer nasounaram, gara nafsususerem ga iritya, ga matabili. Ane gara jeiserem jewer ga taterisi ga aane sarbili, enggam aa jei gutenaram, "Tane aaiserem ba Amnam, Ai Ajes nesiktenerem. Jei ini Amna gam saaser-saasertabana. Seyafter Jei aa jes nasbilirim, aamei jam isa sarbasini!" ⁶ Angtane Yesus aa jei ne tikwebaatinennerem taterisi jeiserem aa galap ne sarbilirim, jei jener ga aa ge janbili mirmase jemna onnap, aam temawer jei jam ge erebili. ⁷ Jengga Yesus ga jela, ga entebaabitena, ane ga balbabili, "Jasa irwe! Ipsama ernerem!" ⁸ Jame aa galap ge anggabilirim, jei afa jam ne damtayan, jengga Yesus Jenfentowai fina jebe. ⁹ Yesus ane angtane Jei aa jei ne tikwebaatinennerem taarenawer jame aa galap ge irebityerem, Yesus ga balbabili ititmer, "Ijama nasipmineneyen angtane nafsife, gwanan ijesa damtabilirim, jamere Ai Tane Angtanemana, Ase fersontyo terewer!" ¹⁰ Jepga angtane aa jei ne tikwebaatinennerem jei Yesus ga aane tenebana, "Guru-guru Hukumu Nabi Musa aa jes tulistababilim jei aa jei ne towas-towastababuwenaram, jeje bafa jei enggam ga aa ge gubili Nabi Eliya nabala ga jei se fortya?" ¹¹ Yesus ga tamawolbaabili, "Bunar, Eliya jei nabala ga jei fortya enggalfe, apgal jigala seyafter gemerserem gam waakentababili. ¹² Jengga Ai aamei ga isAs balbabili enggame, Eliya bunarsus mesam fortya. Angtane jei jam ge towaswebiyen enggame, angtane jeiserem jeiba Eliyasam, ane angtane jebe mes ne eyeibenent, kapkaiserem ini jemna aa gemer ge folbaminirim jam eyebife. Angtane Ap gemer ga Asene eyeibefe, Ai Tane Angtanemanfe." ¹³ Jewer ga angtane Jei aa jei ne tikwebaatinennerem ga aane sarbili Yesus Yohanes Pembaptisem temawer ga nasbili. ¹⁴ Yesus ane angtane Jei aa jei ne tikwebaatinennerem jame aa galap ge forobityerem angtane unggwanfer jepserem jemnibe, anggwana aasaje Yesusminip ga jela, ane somwan ga dumem ga nwintena Jemnibe. ¹⁵ Jei ga gunu, "Uwa, tane aman se nesikte! Jei tane aa jei tersiunennerem; jei bwerasusu. Jei galap-galap tokwanap afa fonap gam janton. ¹⁶ Ai tanes aftafala angtane Is jei ne tikwebaatinennerem jemnibe, jengga jei tane jeiserem jam ne waakentayan." ¹⁷ Yesus tamawolbaabili, "Aamei angtane namwer ijeya gwenaram, aamei Ase ijama tebayan, ane etam-etama imna anesus. Aima ga ibar neya nwini jamere nunu anesus, jengga aamei gemerje Ai Ase ijama tebayan. Ai aamei isa Ajam fibabilibe nunu ga fomera enggalfe aamei Ai As ijeba tebafe? Tane girtowai jeiserem jese aftayal aafre Amnip!" ¹⁸ Yesus Jei bwat kapka jeiserem ga surbili tane bwernabaraiserem jemniwer. Bwat kapka jeiserem ga mirtetefala, ane tane jes jeberserem ga mes waakenswena. ¹⁹ Jewer ga angtane Jei aa jei ne tikwebaatinennerem jentowai Yesusminip ga aa ge jalbili, ane ga aane tenebana, "Jeje bafa bwat kapka jeiserem ai ajama surbiyen?" ²⁰ Yesus ga tamawolbaabili, "Aamei unggwanfer As ijama tebayan, jega jem temawer aamei bwat kapka jeiserem ijama surbiyen. Ai bunarsus ims towastababili, afa aamei As bastantowaifer isa tebana, nana tan bastantowaisusu gemerserem, aamei samfer taarena igma bala enggame, ’Se gwisi jewer!’, ane taarena jeiserem ga gam gwisini. Afa aamei Ai As waakenfer igma tebana, aamei jigala jeiserem seyafter ga igama eyebili." (( ²¹ Bwat kapka aas galserem nele nafsi jeme ijama surbiyen, jengga sembayangemfener igama surbili, ane afa aamei tumilgala ijama tumilyen enggalfe aamei Uwa Sanbagiri igama pujitef.)) ²² Yesus ane angtane Jei aa jei ne tikwebaatinennerem jame aa galap ge betwebilirim ona Galileya je, Yesus ga balbabili, "Babitsim Ai Tane Angtanemana, Ai ga Asene gera angtane sanbakminibe. ²³ Ga Asene munbofo, jengga nunu nawer-ningna gamjon ga Ai ga As irwefa." Jewer ga angtane Jei aa jei ne tikwebaatinennerem ini jemna ga aa ge jenbamini. ²⁴ Yesus ane angtane Jei aa jei ne tikwebaatinennerem jame aa galap ge forobilirim kota Kapernaum je, angtane pajak doini Jena Uwa Sanbagirmanaiserem aa jei gane tebabinennerem ga fortya Petrusminibe. Ane jei Petrus ga aane tenebana, "Pajak doi Jena Uwa Sanbagirmana aa jes ne tebabilirim, Guru imna doini jeiserem Jei kese armanulu, afa fas?" ²⁵ Petrus ga tamawolbaabili, "Jei se armanulu." Petrus aa galap fortyaram jenabe, nalef Petrus jam nasoweyan pajak doim temawer Yesus Jei Petrus ga bala, "Simon Ams towasta, pajak doini aa jes ne tebabinennerem rajafe ogiri aaiserem jebe, pajak doini jeiserem nane armanulu -- anggwabura negara jeiserem jep aa jei ge surubilirim, afa anggwabura nafsi?" ²⁶ Petrus ga tamawolbana, "Anggwabura nafsi." Yesus ga gunu, "Afa ga gam, anggwabura aaf aa jei ge nwinbenerem jei jam ne armanulyon. ²⁷ Jes gemerserem aaiserem jegme gemer, doini aa jes ne tebabinennerem Jena Uwa Amnaiserem jebe, Ai doini jeiserem safnant, Ajam armanulyon. Jengga afa nei nejama gaarmiyene doini aa jei ne tebabinennerem jebe, angtane jemna ini ga kabwakfer sege folbamini. Jega jem temawer, nesa armanulu. Se gwi foboganap, gumarna ga is girinstowetna, jigala jep ga is gaartetna. Jigala nabala ijes tebanaram, jemna aarma ga is terelsobana, jem aarmap aamei doini jep ga is damtana. Doini jeiserem jei samfer nei nawersamer pajak doini jeiserem ga nes ne armanulu. Doini jeiserem ga is geserstena, ga is gaarmini angtane pajak doini Jena Uwa Sanbagirmana aa jei ne tebabinennerem jebe."

¹ Jes jepserem angtane Yesus aa jei ne tikwebaatinennerem jei Yesusminip ga aa ge jalbili, ane ga aane tenebana, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jes jepserem am nenennabe sanbaksusu ga nansa?" ² Jepga Yesus tane bastouya ga jenbene, ane tafnawer ga tebana jem nenennap ga gaarantena jep ga fina. ³ Ane Yesus ga aa balbabili, "Ai bunarsus ims towas-towastababili, sa tikwe aamei enggam ijewera gunurum, ’Ai sanbakf aya gwef.’ ane tane gemerserem gam ga isa etamwena. Afa aamei ijama etamweyanaye tane gamserem, gam jega aamei fas ijama etamweyan angtane Uwa Sanbagirem gwonap nwinfe, nunu Uwa Sanbagiri aa jem gwesaram anggwabura seyafter gemerserem jem Sanbakfe. ⁴ Angtane afa jena aa jei onabertanaram tane towai aaiserem jei galserem, angtane jeiserem jei ga sanbakfe jei gam gwena, nunu Uwa Sanbagiri Jei aa jem gwesaram anggwabura seyafter gemerserem jem Sanbakfe. ⁵ Ane angtane Ai aa jei gam tikwebaatinirim, afa jei tantouya bastouya aas galserem jam gam tebanaram aam temawer jei Ai As jewer gam tikwebaatinirim, gam jega angtane jeiserem jei Ai As mes gam tebana." ⁶ Yesus gamjon ga balbabili, "Afa tuna unggwan-girsusu daran-darnaiserem jam gane tafrebaasiwilirim angtanem botonabe, ane jei ga gane firtaaniwili finibe enggalfe angtane jeiserem jem gam tamtamtafe, tamtamtala jeiserem bastouya. Jengga tamtamtala Uwa Sanbagirmanaiserem jeba unggwandwasusu tamtamtala jeiserem jemniwer. Afa angtane kapka, jei angtane Ai ibirimfer As jei tebanaram, angtane jeiserem jei jam gam unggwasbanaram etam-etama jam eyebife, Uwa Sanbagiri Jei tamtamtala unggwandwasusu ga jese golmisi angtane kapka jeiserem jebe. ⁷ Kabwaksusu se etamwemisi angtane aa jei ge nwinbenerem ogiribe, aam temawer angtane, angtane nafsi gam sene unggwasbaabili, jega jei gam ge tikwebife Ai As jam ne tebalawer. Unggwasbala jeiserem jeber-jeber se etamwowena. Jengga kabwaksususerem gam etamwebana angtane, angtane nafsi aa jei gam taatwebanaram etam-etamam kapka jam eyebife. ⁸ Afa tafna yo tufa imnaiserem jeme kapkaiserem jem jam igam eyebilirim, tafna afa tufa jeiserem jam igam tiksosini, ga igam firsoniwili! Waakenfer ga enggam, afa aamei taman waaken-giribe jam igam fornaram Uwa Sanbagirfar gwefe tafa afa tof daamfennaiserem ga jebanefener igam forna. Jengga aaiserem je kapka, tafna nawersamer ane tufa nawersamer aamei is jebar firtaaniwiliserem taman tokwagiribe, tokwana aa jei ne ertesiwenaram jamer abak-abaksus. ⁹ Afa nwena imna afwenefener kabwakfer jem igam gaarasinirim, ane aamei etam-etama kapkaiserem jem ga igam eyebili, afa ga gam jes gemerserem, nwena jeiserem ga jam igam fotolsini, ane ga igam tobolsiwili. Waakenfer ga enggam afa aamei nwena daamfennaiserem jebanefener waakenfer igam gwena jamer abak-abaksus. Jengga aaiserem je kapka, afa aamei nwena nawersamer is jebar ne firtaaniwiliserem taman tokwagiribe." ¹⁰ Yesus gamjon ga balbabili, "Afa tanna Ai As jei gam tebanaram, aamei enggam ipsama balaram jei igyen. Ai ims towastababili malaikata jemna jei Uwa Amnaiserem Jebar jeber-jeber naawewena taman waaken-giribe. (( ¹¹ Ai Tane Angtanemana, Ai ogiri aaiserem jebe enggalf Ai fortya angtane Uwa Sanbagirminiwer jena aa jei ne bijausonaram, Ai angtane jeiserem Agam waakentababisif.)) ¹² Ini imna ga is fomfom ge folbamini? Afa angtane aasaje dombana jemna 100 gemer gam naawebanaram, ane dombana daamfenna ga gam sofna bijuaber jamer tatait, angtane jeiserem bas gam eyebili? Bunar, jei dombana 99 afweraiserem gam firtebitefala otumube, ane ga gam sofna dombana daamfenna aa jei gam sofnaram bijuaber ga jes gam terelbene. ¹³ Ai bunarsus ims towastababili, jei dombana daamfenna jeiserem aa galap damtanaram, ini jemna saaser-saaserfer uskambarsus gam folbana dombana daamfenna jei aa jes gam tebanaram, dombana 99 jam sofweyanaiserem jemniwer. ¹⁴ Jes gemerserem Uwa imna aa Jei nwinirim taman waaken-giribe, Jeime bai tane daamfenna Ai As jei gam tebanaram jam waakentaasiyen." ¹⁵ Yesus gamjon ga balbabili, "Afa ilem afelna kapkaiserem ip is jam gam eyeibenerem ibe, se gwi jemnibe. Ane ga is bala taterisi kapka jeiserem jebar ijam ge nasbife, kukmer ga is ge nasbili. Afa jei taterisi imna jam ijas saribenerem, aamei ilem afelnaiserem jebar gamjon waakenfer ga is ge gwena. ¹⁶ Afa jei taterisi imna is jam saribeyeneye, angtane nafsi daamfenna afa naura jes igam afsona, jemnip ga igama sofwa, aam temawer Taterisi Uwa Sanbagirmana jep ga enggam baatultel: ’Angtane naura afa nawer-ningna jei jam gangge gubilirim enggame, angtane jeiserem jeiba bunaram eyebili kapka.’ (Ulangan 19:15) ¹⁷ Afa angtane jeiserem jei angtane jes igam afsonaram taterisi jeman jegme jam saripmiyeneye, taterisi jeiserem ga is bilipmini safna Yesus aa jei ne tebanaram jebe. Afa jei taterisi angtane safna Yesus aa jei ne tebanaram jeman mesna jam saripmiyeneye, angtane jeiserem enggammer isa bala, jei Uwa Sanbagiri jam tebayan, ane angtane jeiserem jei angtane kabwaksususerem jes galserem, angtane pajak doini aa jei ne tebabinenewenaram jes galserem." ¹⁸ Yesus gamjon ga balbabili, "Ai bunarsus aamei isa seyafter towas-towastababili: Afa aamei ogiribe enggam ijesa bilirim, ’Safnant, ijama eyebiyen!’, Uwa Sanbagiri taman waaken-giribe Jeime gemer jeiserem se bili enggame, ’Safnant ijama eyebiyen.’ Ane afa aamei ogiribe enggam ijes bilirim, ’Sya, samfer aamei isa eyebili.’, Uwa Sanbagiri taman waaken-giribe Jeime gemer jeiserem se bili, ’Sya, samfer aamei isa eyebili.’ ¹⁹ Ai gamjon aaiserem isa Ajes towas-towasulmini: Angtane afa naura imniwer ogiri aaiserem jebe apgal jigala aa jes gangge bilirim daamfennaber, ane jei sembayangem daamfennaber ga gangge bili Uwa Sanbagirminiwer, Uwa Amna taman waaken-giribe Jei apgal jigala jeiserem gam golmini, ²⁰ aam temawer angtane naura afa nawer-ningna aa jep gangge betwebilirim aam temawer jei Ai As jewer ne onsobana, Ai mese jebar." ²¹ Jewer ga Petrus ga jela Yesusminibe, ane ga tenebana, "Tuhan, afa angtane kapkaiserem unggwanfersus ap as jam gam eyeibenerem, fomera ai kapka jeiserem ajam borolbafe? Ke jamer tuju kali?" ²² Yesus ga tamawolbana, "Wowo, tuju kaliyan, jengga tuju pulu kali tuju, afa jeber-jeber. ²³ Ai jes gamserem gam Ajewer gunurum, Ai ga aam temawer Ai gunu, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggala seisya taterisi aaiserem jes galserem: Angtane awelna rajaminip aa jei ne gwebilirim, raja jei angtane jeiserem ga jenbebili. Jei gwanan doini nomkef ne tebabili rajaminiwer, bons eyebif. Raja jeiserem jei buku bona ga ferolnu enggalfe angtane awelna jemna aa jei ne gwebilirim jei doini gwanan aa jes ne tebabilirim gamjon rajaf gane wartabaf. ²⁴ Jame aa galap towaiwulurum buku bona jeiserem jam gerabistefe, angtane daamfenna awelna jemna aa jei gwebilirim jei ga aane aftayala jemnibe. Angtane jeiserem jei gwanan doini unggwanfersus nomkef mes tebabili rajaminiwer. Doini jeiserem ga enggammer, doini angtane awelna tahunu daamfenna aa jei gam gwebilirim jei aa gemer gam tebanaram. ²⁵ Angtane jeiserem jei doini unggwanfersus nomkef aa jes tebanaram, jei doini jeiserem fas jam waratabayan. Jega jem temawer raja jeiserem jei angtane ga balbabili enggame, ’Angtane aaiserem jam sa jualtana, wi tane mese jemnaiserem jebaner, jega jei seyafter angtane nafsiminip awelna jep ga sene gwebili.’ Ane raja ga angtane nafsi ga baftana enggalfe angtane jeiserem galgala jemna gam jualtababif. Raja jei doini seyafter jeiserem jes tebaf, bona jemna gam barwebaf. ²⁶ Angtane jeiserem awelna rajaminip aa jei gwebilirim, jei somwan dumem ga nwintena raja jeiserem jem tarnabe, enggam ga balwena, ’Gwanan se fya! Ai doini seyafter isas waratabana.’ ²⁷ Raja angtane jeiserem ga nesiktene, ane bona jemna ga borolbana, ane ga aftannu. ²⁸ Jepga angtane jeiserem ga totintye, ane jelem afelna awelna rajaminip aa jebar ne gweyibuwenaram ga damtana. Jelem afelna jeiserem jei gwanan doini bastantowaifer nomkef tebana angtane jeiserem jemniwer. Angtane raja bona aa jemna gam borolbanaram, jei jelem afelna jeiserem ga tebana botonabe, ane ga bala, ’Doini bastantowaifer aamei amniwer nomkef ijes tebanaram, doini jeiserem gamjon as jas wartaba abe!’ ²⁹ Jelem afelna jeiserem awelna rajaminip aa jebar ne gweibenerem, jei somwan dumem nwintena, enggam ga balwena, ’Gwanan se fya! Ai doini seyafter isas waratabana.’ ³⁰ Jepga angtane raja bona gwanan aa jemna gam borolbanaram, jei enggam ga bala, ’Wowo.’ Ane jei jelem afelna jeiserem bwiyibe aa gaataantena jamere doini jeiserem gamjon aa waratabana. ³¹ Jelem afelen mesna unggwanfer afweraiserem awelna rajaminip aa jebar ne gwebuwenaram, jei jelem afelna jeiserem jame aa galap ne damtanaram jemnip aa jei etamwebanaram, ini jemna ga aa ge jenbamini. Jei rajaminip ga aa ge sofobili, seyafter aa jei etamwenaram ga aane nasibene. ³² Jepga raja angtane jeiserem bona gwanan aa jemna gam borolbanaram ga bala, ’Aamei angtane kabwaksusu! Aamei as im bala bona imna is ajam borolbafe, ane ai bona imna ga is ai borolbana. ³³ Ai aamei isa mesam nesiktene, bona imna isa ai borolbana. Aamei jegme angtane nafsiserem jam igam nesiktababili. Aamei bona angtane nafsimana ijam borolbayan, aam temawer aamei ga angtane kabwaksusu.’ ³⁴ Raja jeiserem ga uskambarsus kakalswena, ane jei angtane jeiserem ga surbono, bwiyip ga gaataantena jam ne tamtamtafe jamere doini jemna uskambar seyafter gemerserem aa waratabana." ³⁵ Yesus taterisi jeiserem aa galap tabanulurum jam nasbilibe, Jei enggam ga balbabili, "Uwa Sanbagiri taman waaken-giribe Jeime is gemer se eyeipmini ibe daamfen-daamfenneme, afa aamei etam-etama kapkaiserem ilem afelna ibe ijes gam eyeibenerem aamei fas ijam borolbayanaye ilem inibe."

¹ Yesus aa galap tabanulurum seyafter aa jes towas-towasulminirim, Jei ona Galileya ga mirsotefala, gamjon ga ona Yudeyaminip ga sofwa, fona Yordan jimwer. ² Ane angtane uskambar Yesus ga aane onsobana, ane Yesus Jei angtane bwernabara jep ga waakentababili. ³ Jepga angtane safna Farisimana afweraiserem ga aa ge jalbili Jemnibe enggalfe, jei Yesus jam ne unggwasbaf. Jega jem temawer jei Yesus ga aane tenebana, "Fuma Nabi Musa jei aa gam tulisulum Hukumube? Anggwana wini baife aa jei gam gwebilirim ke samfer gangge syanwena, afa fas?" ⁴ Yesus ga tamawolbaabili, "Aamke Taterisi Uwa Sanbagirmana ke gemerje ijama gerabisteyan, ayata jep aa gam baatultelam ga enggam: ’Gwanan galapserem Uwa Sanbagiri Jei angtane naura gam eyemil, anggwana yo wini.’ (Kejadian 1:27) ⁵ Ane Uwa Sanbagiri ga gul: ’Ga jem temawer anggwana ga ene yo jeta ga gam mirsona, ane winabar daamfen jenaber ga gangge nwini. Ane jepga nawersamer daamfennaber ga gangge tawena.’ (Kejadian 2:24) ⁶ Gam jega jei tifni naweryan, jengga daamfenna. Ga jem temawer Uwa Sanbagiri Jei wini yo anggwana aa jes gam batsonaram jei ga tifni daamfenna, angtane jei wini yo anggwana jeiserem jam ne syansosiyen." ⁷ Jei gamjon aane tenebana, "Afa ga gam, Nabi Musa jei ula enggame baf tulisul, anggwana wini aa jei gam bilirim jebar jam ge syanwefe, anggwana jeiserem jei gwanan surta syanwels gam eyebili?" ⁸ Yesus ga tamawolbaabili, "Nabi Musa jei enggam gul, sya jei safnant wini jelemanaiserem jebar ge nwinfe, aam temawer ini imna kekelna, aamei taterisi Uwa Sanbagirmana ijama taabiyen. Jengga gwanan-gwanansus jes jepserem je gamyan. ⁹ Ai ims towastababili, afa anggwana jei wini baif aa jei gam gwebilirim, ane wini jeiserem jei etam-etama kapka maaryenf gwelaiserem jei jam eyebiyen, afa anggwana jeiserem jei gamjon wini nafsi ga gam gula, afa ga gam jes gemerserem, gam jega jei etam-etama unggwandwasususerem ga jes gam eyebili, jei maaryens gam eyebili." ¹⁰ Angtane Jei aa jei ne tikwebaatinennerem ga aane bala Jebe, "Afa ga gam wini yo anggwana jem temawer, gam jega samfer afa anggwana yo wini jena jam ge tetyen." ¹¹ Yesus ga tamawolbaabili, "Angtane seyafter taterisi aaiserem jam ne taabiyen, jengga angtane enggal tefner, angtane Uwa Sanbagiri aa jes balbabilirim, jei safnant wini jam ne ketebaabiyen. ¹² Anggwana afweraiserem jei wini jam ne ketebaabiyen, aam temawer jei gemer gam surnu jei wifar jam ge tabayan. Anggwana afweraiserem jei wini jam ne ketebaabiyen, aam temawer angtane nafsi ga gemer gane eyebana jega jei wifar jam ge tabayan. Ane anggwana afweraiserem jei wini jam ne ketebaabiyen enggalfe, jei Uwa Sanbagirem gwonap gam gwefe, ane Uwa Sanbagiri Jei jem Sanbakf gam gwena. Angtane aasaje jam gam gunurum taterisi wini yo anggwana jena jam ge tetem temawer, taterisi jeiserem jam taabife, jei taterisi jeiserem saf gam taabili." ¹³ Jepga angtane jei tane basantantana Yesusminip ga aane aftabuwena enggalfe, Yesus tafna Jelemanaiserem jem dwak sagap gam tosoniwife, ane Yesus ga sembayanga gam gwebamif tane jeiserem jem temawer. Jengga angtane Yesus aa jei ne tikwebaatinennerem jei angtane tane aa jei ne aftabuwenaram Yesusminibe ga aane uftabili. ¹⁴ Jega jem temawer Yesus ga balbabili, "Tantantane jei samfer jei ge jalbili Amnibe. Ipsama uftabilirim, aam temawer angtane enggalaiserem tanna aas galserem, jei samfer se naawena Uwa Sanbagirfar, ane Uwa Sanbagiri Jei ga jem Sanbakf se gwena." ¹⁵ Jepga Yesus tafna Jelemanaiserem tantantane jeiserem jem dwak sagap ga bunulniwili, ga mirtebitefala. ¹⁶ Angtane aasaje ga jela Yesusminibe, ane ga tenebana, "Guru, ai waakenaiserem ga basas eyebili enggalfe, ai waakenfer gwelaiserem jamer abak-abaksus agam domolfe?" ¹⁷ Yesus ga tamalwolbana, "Jeje bafa aam ga Asim tenebana waakenfer eyebiliserem jem temawer? Jengga waakenaiserem ga daamfenna tefner, jeiserem ga Uwa Sanbagiri. Jengga afa aamei enggam is gunurum, ’Ai waakenfer gwelaiserem jamer abak-abaksus agam domolf.’, seyafter Uwa Sanbagiri aa jes bilim, ga jes is onsobili!" ¹⁸ Angtane jeiserem jei Yesus ga tenebana, "Ijes bilirim ga fwersa?" Yesus ga tamawolbana, "Aamei angtane ipsam tat. Maaryena ipsam gwebit. Apgal jigala angtanemana ipsam komkomulsit. Angtane nensa syefer ipsam balt. ¹⁹ Iye yo uwa imna, taterisi jemna ga jamer igam tasyipmini. Angtane nafsiserem ga jam is nesiktababili, in ina gemer igam nesiktenerem." ²⁰ Tansi jeiserem ga gunu, "Taterisi seyafter jeiserem ai amsam tikwebitinint. Ga fwersa ajam eyebiyene?" ²¹ Yesus ga tamawolbana, "Afa aamei angtane waakenf gwefe, gase gwi, ane galgala imna seyafter ga jam is jualtababili, ane doini ga angtane galgalyenaiserem ga jep is kitulmini, ane aamei waakenfer gwelaiserem ga is domola jamer abak-abaksus. Afa jeiserem jam is eyebilirim jamer taban, aamei ga is jela Amnibe, ane Ai ga Asis tikwebaatini." ²² Tansi jeiserem taterisi Yesusmana jeiserem jam aa galap saribenerem, jei ga sofwa ane ini jemna ga jenbana, aam temawer jei ga gunu, "Apgal jigala amnaiserem gam ke bastantowaifer, apgal jigala amna unggwanfersusu." ²³ Yesus ga angtane Jei aa jei ne tikwebaatinennerem ga balbabili, "Ai bunarsus ims balbabili, angtane galgalabaraiserem jei ini galgalapfener gam folbana, ini jemna Uwa Sanbagirminip jam folbayan. Afa ini angtanemana jes gemerserem gemer gam folbanaram, afa jei fas jam irfweyanaye ini kapka jeiserem jewer, gam jega Uwa Sanbagiri Jei jem Sanbakfe Jam gweyan. ²⁴ Jengga gamjon Ai ims balbabili, bunar-bunarsus twena unggwan-giri jei jam kaweteyan burum mwonabe. Jes gamserem aaiserem jegme gemer, angtane afa ini jemna galgalapfener aa jemanem gam folbanaram, angtane jeiserem jei Uwa Sanbagirfer daamfennaber jam ge gweyan, ane Uwa Sanbagiri Jei jem Sanbakfe Jam nwinyen." ²⁵ Angtane Jei aa jei ne tikwebaatinennerem taterisi jeiserem jam aa galap ne sarbilirim, jei uskambar ga aa ge bitbitwebili, ga aane tenebana, "Afa ga gam jes gamserem, gam jega nan se waakentaasini?" ²⁶ Yesus angtane Jei aa jei ne tikwebaatinennerem ga gerebaabili, ane ga gutena, "Angtane jen jena jam waakentaasiyen, jengga Uwa Sanbagiri seyafter gemerserem jei gam eyebili." ²⁷ Jepga Petrus jei Yesus ga bala, "Ai seyafter ajesa damtabilirim amsa mirtebitefala enggalfe, ai Aamei Is agma tikwebaatif. Uwa Sanbagiri Jei as bas golmifi?" ²⁸ Yesus ga balbabili, "Ai bunarsus ims towas-towastababili, ogiri ibirmi aa jep etamwenaram, Ai Tane Angtanemana, galap Ai Ajep nontesaram kursini rajamanaiserem jebe. Jes jepserem Ai ga As nwini angtane seyafter gamserem jem Sanbakfe. Ane aamei angtane Ams tikwebaatiliserem, aamei ga isa nontesa kursini rajamana dua belas jebe. Jes jepserem aamei isa nwini tewe Israelmana dua belas jeiserem jem sanbakfe. ²⁹ Ane angtane seyafter gemerserem ja, afa ayana, afa osona, afa ene, afa jeta, afa tane, afa makan, afa jei jeiserem jam gam mirtebitefalaram aam temawer jei Ai As jewer gane onsobanaram, angtane jes galserem jemna fwaina 100 kali ga gemer gam damtabili gwanan aa jes gam damtabilirim jewer, ane nunu gamjon jepserem jei gwela waakena jamer abak-abaksus gase domola. ³⁰ Jengga angtane unggwanfer namwer nabal danalaiserem, angtane jeiserem galap amnup sene bunulu. Ane angtane unggwanfer namwer amunemanaiserem, galap ga jei sege danabifi."

¹ Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem gamserem: Angtane anggur makanabaraiserem jei gwinibenersus sofsa, jei angtanef terelse awelna jep jei gwebif jem anggur makanap. ² Jei angtane ga balbabili enggame, ’Aamke samfer ai doi perak daamfenna isas kitulmini afa aamei nunu daamfenna awelna jem gwelaiserem?’ Angtane jei ga aa ge gubili, ’Sya.’ Ane jei ga balbabili, ’Sa gwi anggur makanap!’ ³ Gwer anggasyelawer angtane makanabaraiserem jei gamjon ga sofwa, ane jei angtane pasarap ga damtabili jei jafner ge fibili, awelna jemna fas. ⁴ Jei ga balbabili, ’Sa gwi, awelna aawer ga isa gwebitne am anggur makanabe! Ai doini isas kitulmini waakenfer.’ ⁵ Jepga jei ga aa ge sofobili. Gwere bolap ane gwere mes afafwena jei gamjon ga eyebili gwanan gamserem. ⁶ Ona jame aa gigitsonaram, jei gamjon ga sofwa, ane angtane nafsiserem ga damtabili jafner ge fibili. Jei angtane jeiserem ga tenebaabili, ’Jeje bafa aamei gwinibener ijetera fisaram jamer ona gigit? Aamke awelna ke fas?’ ⁷ Jei ga aa ge tamawolbili, ’Angtane awelna ap as jam ne golmiyen.’ Jei ga balbabili, ’Aamei mese sa gwi, awelna aawer ga isa gwebitne am anggur makanabe!’ ⁸ Gwinem angtane anggur makanabaraiserem jei angtane awelna aa jei ne gweyibenerem jem sanbaka ga bala, ’Angtane awelnap gwelaiserem jam se jenbebi, ane doini jemna ga is kitulmini! Gwanan ga angtane amnup foryalaiserem ga jemniwer is towaiwulu, ane angtane nabal danalaiserem doini jemna ga amnup is kitulmini!’ ⁹ Angtane amnup jelaiserem jei ge jalbili, ane angtane jeiserem perak doini daamfen-daamfenneme ga aane tebabili. ¹⁰ Jepga angtane nabal danalaiserem jei aa galap ge forobityerem, jei jelem iniber ga aa ge gubili, ’Perak doini amna daamfenyan, amna ane as tebanaram.’ Jengga jeime perak doini daamfen-daamfenneme ga aane tebabili. ¹¹ Jemna gajini jeiserem aa galap ne tebananaram, jei angtane anggur makana jemanserem ga aane nasbasnenne. ¹² Jei ga aa ge gubili, ’Angtane amnup foryalaiserem awelna jemna jema daamfenna tefner. Jengga ai nabal danalaiserem ai jema unggwanfer awelnap ajeya gwebilirim, gwinibener jeterserem jamer ona gigit. Ai awelna gwer kakalsusube ajeya gwebilirim. Jengga aamei doini ga as armanaber im kitulminirim, jemna gemerserem aman jegme gemer.’ ¹³ Angtane anggur makana jemanserem jei angtane daamfenna nabal danalaiserem ga tamawolbana, ’Am afelna, ai kapka afa is ajam eyeibeyen. Aamei imsam gunu enggame, aamei doi perak daamfenna samfer is taabili afa aamei awelnap jam is gwenaram nunu daamfennaiserem jeme. ¹⁴ Doini imna se teba, ane ga is sofwa! Ai angtane amnup foryalaiserem jemna gemerserem ip jegme agemer kitulmini. ¹⁵ Ai as eyebili ini amna gamserem doini amnaiserem. Aamke as ijama nasbana ga aam temawer ai doini unggwanfer angtane nafsife ajewer kitulminirim?’ " ¹⁶ Ane Yesus umwef enggam ga balbabili, "Angtane amnumanaiserem ga jei sege danabili, ane angtane nabal danalaiserem jei gamjon amnuwer." ¹⁷ Yesus ane angtane Jei aa jei ne tikwebaatinennerem aa galap ge wofobilirim nel tawela kota Yerusalemwer, Jei angtane dua belas jeiserem ga aftabifele nel eyebe, ane ga balbabili, ¹⁸ "Gasa sarsi! Nei gane kota Yerusalemwera tauna. Ane jewer Ai Tane Angtanemana, Ai ga Asene gera angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwefaram jemnibe. Ane jei ga ula Am temawer jewer ga sene nasbili enggalfe Ai Ajam terfe. ¹⁹ Ane Ai ga Asene gera angtane Yahudimanyanaiserem jemnibe. Jei ga Asene bisobafa, ane ga Asene safsaftana newa utuboroserem jeme, ane Ai Asene munbofo ti salibibe. Jengga nunu nawer-ningnabaraiserem Ai gamjon ga jem As irwefa terewer." ²⁰ Jepga wini Sebedeusmana jei jelem tannawanfar Yesusminip ga aa ge jalbili. Ane jei somwan dumem ga nwintena Yesusem tarnabe enggalfe jei apgal jigala Yesusminiwer gam bilf. ²¹ Yesus ga tenaabili, "Aamei Amniwer As ibas bilibene?" Jei ga bala, "Tannawan amna aaiserem ke samfer Ibar ge nwinfe, afelna taasfolawer ane afelna ga gwejawer Aamei jame Ijep nwinirim anggwabura seyafter gemerserem jem Sanbakfe?" ²² Yesus ga balbabili, "Aamei teisyena Abe As ijesa bilibenerem. Aamke kapkaiserem ke samfer is ge gwirni, Ai gemerserem?" Jepga aa ge gunu, "Ai samfer." ²³ Jepga Yesus ga gitmini, "Jeiserem bunar kapkaiserem is ge gwirni Ai gemerserem. Jengga Am taasfola jei nwiniserem, ane Am gwejawer jei nwiniserem, angtane jeiserem Ai Ajam destabayan. Jeiserem gam ke baabeta Amna, jengga Uwa Sanbagirmana. Angtane jep aa jei ge nwiniserem, Uwa Amna Jener se destamini." ²⁴ Angtane sepulu aa jei ne tikwebaatinennerem afwer jeiserem jei aa galap ne sarbilirim angtane naura jeiserem jei aa jes ge bilirim, jei angtane naura ayana yo osona jeiserem ga aane nasmini. ²⁵ Jepga Yesus seyafter ga dupdupbulu, ane ga balbabili, "Aamei tousa, angtane aa jei ge nwinbenerem angtane Yahudimanyanaiserem jem sanbakfe, jei uskamer gam eyeipmini angtane jelemanaiserem jebe. Jei angtane nafis gane baftana enggalfe, angtane nafsi gane damtana jemna baabeta unggwandusa. ²⁶ - ²⁷ Jengga aamei gamyan. Aamei ga enggam isa gwena: Afa angtane imniwer aa jei gam gunurum sanbakef jam gwefe, jei gwanan ga angtane nafsiserem jes gam batobaabili, ane awelna angtane nafsiserem jeman gam eyeipmini. ²⁸ Jei enggam gam gwena Ai gamserem. Ai Tane Angtanemana, Ai Ajam jelyan angtane nafsi Ai As jam ne batobafe, jengga Ai enggalf Ai fortya angtane nafsi Agam batobaabif, ane gwela Amnaiserem Agam golmif jamer Ai As tere enggalfe angtane unggwanfer gam aftabunnuf." ²⁹ Yesus ane angtane Jei aa jei ne tikwebaatinennerem kota Yeriko aa galap ne mirsotefalaram, angtane anesus ga aane onsobaabili. ³⁰ Angtane nawan nwe kofa nel eyebe ga jep ge nwini. Jei jame aa galap ge sararam Yesus gase ayinyel, jei ga aa ge gwarenbana enggame, "Uwa, Tane Raja Daudmana, as nesikso!" ³¹ Angtane unggwanfer jeiserem jei ga aane ofsona, ga aane gitmini, "Ja sege tikwe!" Jengga gamjon unggwanfer ga aa ge gwarna, "Uwa, Tane Raja Daudmana, as nesikso!" ³² Jepga Yesus ga aa fyatena, ane ga jenmini. Ane ga taanaamini, "Aamei ibas ge bili Ai ibe isa Ajes eyeipmiliserem?" ³³ Ga aa ge tamawolbana, "Uwa, ai ajam ge anggasif!" ³⁴ Yesus Jei angtane jeiserem ga nesiksona, ane tafna ga tosomuniwili jem nwenabe. Ane jes jeberserem jei waakenfer ga aa ge anggasini, ane Yesus ga aa ge onsobana.

¹ Yesus ane angtane Jei aa jei ne tikwebaatinennerem kota Yerusalem jame aa galap ne gwetmansonaram, jei tamna Betfagewer ge forna. Tamna jeiserem ga taarentumu bosna Saitun ga jem tarnap nulna. Yesus ga angtane naura ga bafsona, Jei aa jei ne tikwebaatinennerem. ² Jei ga gitmini enggame, "Sege sofwe tamna nem mukanap jeiserem, ga jes jeberserem keledai tannabara jam daktamisneneleiserem ga jep is ge domsona. Keledai jeiserem ga is ge fersosini, ane ga is ge afsoyala Amnibe. ³ Ane angtane afa is jam sene gitminirim enggame, ’Aamei ibas ge eyebili?’, aam ga enggam is ge bala, ’Tuhane gunu.’, ane angtane jeiserem jes jeberserem keledai jafner gase afsunnu." ⁴ Seyafter jeiserem ga mes etamwena, jega nabi aa jes bilim ga mes tabanwena: ⁵ "Angtane Yahudimana kota Siyonminip, bosna afwer ga Yerusalem, isa towas-towastababili: ’Gasa damta, Rajana imnaiserem Jei mes foryal imnibe. Ini Jemna tofora, ane Jei keledaiyem warautna Jei keledai tannaiserem ga jem wofena.’ " (Zakharia 9:9) ⁶ Jes galapserem angtane naura aa jei ge tikwebaatinennerem jei tamnap ga aa ge sofna, ane ga aa ge eyebili Yesus aa gemer gitminirim. ⁷ Jei keledai tannabaner ga aa ge afsofala. Ane jepga fene fen sagap kamwiliserem ga aa ge soksosini, ga aa ge syeteswena keledai jeiserem jem sagabe. Ane Yesus ga jusona, ga nwintena keledai sagabe. ⁸ Angtane unggwanfer fene fen sagap jes kamwiliserem jelemana ga aane bunulntena nelebe. Afwer tini tirniserem jes ne targabaasini, nelep ga aane bunulntena. ⁹ Angtane unggwanfer Yesus aa jei ne danabanaram ane amnumana, jei seyafter ga ge gwarenbili: "Nei Tane Raja Daudmanaiserem ganma pujite! Uwa Sanbagiri waakena Jelemanaiserem gase gulbana Jebe, Angtane aa jei fortyaram Tuhanem boseme! Nei Uwa Sanbagiri ganma pujite! Jei taman waaken-girip nwini, tamna bwalesususerem." ¹⁰ Yesus Jame aa galap kautenaram Yerusalem je, angtane seyafter jepga aa ge tetenbuwena. Ane jei jena gane tenaaminenne, "Jei nansa?" ¹¹ Angtane unggwanfer afwer jena ga aane tamawolminenne enggame, "Jei Nabi Yesus, Jei tamna Nasaret, ona Galileyawer ga jewer jela." ¹² Yesus Jena Uwa Sanbagirmanaiserem jep ga kawetena. Ane Jei ga angtane galgala aa jei ne jualtababuwenaram ane angtane aa jei ne armantababilirim, seyafter jeiserem ga surbobili. Mejana angtane doini aa jei ne tukartababuwenaram, Jei mejana jeiserem ga aa irfitababili, ane taman nwini angtane ju senaya aa jep ne jualtababuwenaram jes mese ga aa irfitababili. ¹³ Jepga Yesus ga balbabili, "Taterisi Uwa Sanbagirmana jep ga enggam baatultel: ’Jena Amnaiserem ga enggalf angtane jei Abar Ajeba nasowef.’ (Yesaya 56:7) Jengga aamei jena aaiserem enggam ima eyebili, angtane komkoma jep ge nwinbele gamserem." ¹⁴ Angtane nwe kofa ane angtane muli-mulni Yesusminip ga aa ge jalbili Jena Uwa Sanbagirminibe, ga Yesus jam waakentababili. ¹⁵ Jengga angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei bwembwema waakena aa galap ne domolaram Yesus aa jes eyebilirim, jei ga aane nasbana. Jes mese jame aa galap ge sarbilirim tantantane Jena Uwa Sanbagirminibe ga aa ge gwarenbiton, "Tane Raja Daudmanaiserem ga ajesa pujitene!", jei ga aane nasbana. ¹⁶ Jei Yesus ne bala, "Aamei tane Imes sarbabili. Jeje bafa Aamei Ijam balbabiyen enggame jei jam ge tikwebi?" Yesus ga tamawola, "Bunar, Ai sarbabili. Aamei tousa Taterisi Uwa Sanbagirmana aa jes tulisulum enggame: ’O Uwa Sanbagiri, Aamei Is mesam towas-towastababili tantantane ane tane bastantansususerem, jega jei Aamei waakenfer Is gane pujitene.’ " (Mazmur 8:2) ¹⁷ Jepga Yesus angtane ga firtebitefala, jewer ga totifele kota Yerusalem je, ane ga sofwa tamna Betanyaminibe. Jewer ga nustana. ¹⁸ Gwirmerem gwinibenersus, Yesus Jame aa galap warautnaram kota Yerusalem je, Jei wisi ga folbana. ¹⁹ Jei ga ara tini nel eyep ga domola. Jewer ga gwina ti tarnawer, ane ara tini jeiserem ala tetena gam domola, jemna igi fas. Jepga Yesus Jei ara tini jeiserem enggam ga bili, "Aamei gamjon ijam teyan!" Tini jeiserem jes jeberserem ga sasanswena. ²⁰ Angtane Jei aa jei ne tikwebaatinennerem jei ara tini jeiserem jame aa galap ne domolaram, jei ga jam ge bitbitwebili, ane ga aane tenebana "Fomfoma ara tini jeiserem jei tatarmer ga sasanswena?" ²¹ Yesus ga tamawolbaabili, "Bunar-bunarsus Ai ims towastababili, afa aamei Uwa Sanbagiri waakenfer isa tebana, isar-isaryamer, igme isa eyebili Ai gemerserem ara tini Agemer eyebilirim. Jetefeneryan, igme taaren aaiserem samfer ga isa bala, ’Se gwisi! Finip ina ga is taptastena!’, ane jeiserem gase etamwena. ²² Afa aamei Uwa Sanbagiri jam isa tebanaram ane sembayanga jam isa gwebanaram, aamei ijesa bilirim jeiserem ga isa domola." ²³ Yesus ga warautna Jena Uwa Sanbagirmanaiserem jebe, ane jei angtane jame aa galap towas-towastababilirim, angtane imam-imam sanbakaiserem ane angtane sanbaka Yahudimana Jemnip ga aa ge jalbili, ane ga aane tenebana, "Baabeta nanmana Aamei seyafter aaiserem ga Ijem eyebili? Ane baabeta Ibe Ise nane gulbana, seyafter aaiserem jem eyebife?" ²⁴ Yesus ga tamawolbaabili, "Ai gamjon ims tenebaabili. Afa aamei Ai As jam isa tamawolbanaram, Aime aamei isAs towastababili baabeta ga nanmana Ai seyafter aaiserem Ajem eyebilirim. ²⁵ Baabeta Yohanes aa jes domolaram angtane jam baptistababife, jei fwer jela? Baabeta jeiserem ke Uwa Sanbagirminiwer, afa angtaneminiwer jela?" Angtane jeiserem jei jenjen ga aa ge doksobana. Jei enggam ga aa ge gubili, "Nei afa enggam nesa gunurum Uwa Sanbagirminiwer, Yesus Jei nei nes galap se balbabili enggame, ’Jeje bafa aamei Yohanes ijama tebayan?’ ²⁶ Jengga afa nei enggam nesa gunurum angtaneminiwer, nei angtane sa erebaabili, aam temawer jei seyafter ga sege gubili, ’Yohanes jeiba nabisam.’ " ²⁷ Ga jem temawer jei Yesus ga aane tamawolbana, "Ai seyafter teisyena." Jepga Yesus ga balbabili, "Gam jega Aimba aamei isa Ajam towastababiyen baabeta nanmana Aga seyafter aaiserem ga Ajem eyebili." ²⁸ Jepga Yesus gamjon ga balbabili, "Aamei ifoma gunu ilem inibe taterisi aaiserem jem temawer? Uwa daamfenna jemna tanna ga naura, girtowai nawan. Uwa jeiserem jei tanna ayanaiserem jemnip ga sofwa, ane ga bala, ’Aamei se sofwe anggur makanap, awelnap ga is gwena namwer!’ ²⁹ Tanna jeiserem ga tamawolbana, ’Ai bai.’ Jengga ini jemna ga waraubatna, ane jei anggur makanap ga sofwa. ³⁰ Jepga uwa jeiserem ga sofwa tane afelnaiserem jemnibe, ane jeime gemer ga gutena gwanan gemerserem. Tane afelnaiserem jei ga tamawolbana, ’Samfer uwa.’ Jengga jei jam sofweyan. ³¹ Tannawan jeiserem jemniwer, taterisi jetamana ga nane onsoibene?" Yesus ga aane tamawolbana, "Ayanaiserem ga jes." Jepga Yesus gamjon ga balbabili, "Ai bunarsus ims towas-towastababili, angtane pajak doini aa jei gane tebabinennerem ane wini maaryen-maaryenaiserem, jei nabala Uwa Sanbagirem gwonap gwena, Uwa Sanbagiri Jei angtane jeiserem jem Sanbakf nwini, ane aamei amnup. ³² Ula jeiserem ba bunaram, aam temawer Yohanes Pembaptis mes jela, ane jes ga is destabaamini ibe nele Uwa Sanbagirmana waakenfer gwelaiserem. Aamei Yohanes ijama tebayan, jengga angtane pajak doini aa jei gane tebabinennerem ane wini maaryen-maaryena jei ne tebana. Safe aamei seyafter imsa domola, jengga aamei ini gamjon is jam ge waraipmiyen, ane aamei Yohanes ijama tebayan." ³³ Yesus gamjon ga balbabili, "Seisya taterisi nafsi sa sarbi! Angtane ona jam jemanserem jei angguru makanap tonola. Jei angguru jama tonolaram jamer taban, makana jeiserem ga isinbaasnenne ton pagarem. Jeiserem taban, jei gamjon o mwona ga terbili, galap anggur tanna jep gam jubobinenef enggalfe fo angguru gam eyebaabif. Taban, jei jena ga eyebili makanabe enggalfe jei makana jewer gam gerabaasnenefe. Jepga jei angtane anggur tonol tousaiserem enggam ga balbabili, ’Ai as sofwa negeri nafsiserem jewer, negeri jeiserem ai jebe abakef as nwini. Ai abakfer jewer ajebar nwinirim, aamei samfer anggur makana amna nomkef isa armantana, angguru jep ga isa tonola, ane jem igiserem afwer galap ap ga as isa kitulbono.’ Ane jena ga sofwa negeri nafsiserem jewer, negeri jeiserem bijaususu. ³⁴ Nunu anggur jep fuluserem jam aa galap fortyaram, angtane makana jam jemanserem jei angtane awelna jemnip aa jei ne gwebilirim jei ge baftabili enggalfe, anggur afwer jemnaiserem gam tebabif angtane anggur makana nomkef aa jei ne armantanaram jemniwer. ³⁵ Jengga angtane anggur makana nomkef aa jei ne armantanaram, jei angtane aa jes baftabilirim gane tebabili; daamfennaiserem ga jam ne safsaftana, gamjon afelnaiserem jei ga jam ne munbono, nafsi jei tonem ne erafala. ³⁶ Jepga angtane makana jam jemanserem gamjon angtane awelna jemnip aa jei ne gwebilirim nafsi ga baftabili, gamjon ga unggwanfer ga baftabuwili gwanan gamserem jemniwer. Angtane makana nomkef aa jei ne armantanaram, jei gwanan gemerserem jep jegme gemer ne eyeipmini. ³⁷ Umwef ga, angtane makana jam jemanserem jei tane jelemana gam baftana. Jei ga gunu, ’Angtane makana amna nomkef aa jei ne armantanaram, jei bunarsus tanna amna aaiserem jam ne kabwaktayan.’ ³⁸ Jengga angtane anggur makana nomkef aa jei ne armantanaram, jei tane jeiserem jam aa galap ne damtanaram, jena enggam ga aane gitminenne, ’Tanna aaiserem ba makana jei se tebana jeta jam aa jep tererem. Au, nei tanna aaiserem ganma munbo, jega nei anggur makana aaiserem nei gam nesa tebabili!’ ³⁹ Ane jei tanna jeiserem ga aane tebana, ane ga aane taptasiwili anggur makan jitefwer, jep ga aane munbono." ⁴⁰ Yesus Jei angtanes tenebaabili, "Angtane makana jam jemanserem aa galap warautnaram, jei bas eyeipmini angtane makana jemna aa jei ne armantanaram jebe?" ⁴¹ Gane tamawolbana, "Bunarsus angtane makana jam jemanserem angtane kabwaksusu jeiserem se munbobili. Ane jei ga angtane nensa gase terelbaabili enggalfe, makana jemna nomkef gane armantaf. Angtane jeiserem jei angguru gase kitulbono angtane makana jam jemanserem jebe, nunu jame aa jep falsaram anggur jem fuluserem." ⁴² Yesus ga bala, "Bunarsus, aamei imes gerabistena ayata aaiserem jep aa jes tulisulum Taterisi Uwa Sanbagirmanaiserem jebe: ’Angtane jena aa jei ne eyebilirim, tuna jei aa jes ne taptasiwilirim, tuna jeiserem mes etamwena igsusufe. Tuhan Jei aaiserem ga jes eyebili, aaiserem waakensusu negama domolf!’ (Mazmur 118:22-23) ⁴³ Uwa Sanbagiri ga gam gul. Jega jem temawer Ai ims towas-towastababili, Uwa Sanbagiri Jei im Sanbakfe Jam nwinyen, nunu Uwa Sanbagiri aa jem gwesaram Sanbakfe angtane aa jei ne eyebaabilirim seyafter Uwa Sanbagiri aa jes balbabilirim. (( ⁴⁴ Angtane aa jei jenaram tuna jeiserem jem sagabe, jei se wasferswena. Ane tuna jeiserem afa angtanem sagap jam se jentyaram, tuna jeiserem jei ga angtane jeiserem gase jubono, jamere sonf se etamwena.))" ⁴⁵ Angtane imam-imam sanbakaiserem ane angtane safna Farisimana seisya taterisi Yesusmana aa galap ne sarbilirim, jei ga aa ge towaswebili Yesus Jei jelem temawer nasowena. ⁴⁶ Jega jem temawer jei ga nels ne terelbene Yesus jam ne tebaf, jengga masef aam temawer jei angtane unggwanfer jes ne erebaabili, aam temawer jei galap sege gubili enggame, "Yesus Jeiba nabisam."

¹ Yesus Jei seisya taterisi angtanef gamjon ga nasipmini. ² Jei enggam ga nasipmini, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem rajam temawer gamserem: Raja jei masara aa gemer gam eyebilirim enggalfe tane jemna wini jewer gam golf. ³ Jei angtane awelna jemna aa jei ne gwebilirim ga baftabili enggalfe, angtane aa jes balbabilirim masara jam ne onsobife, angtane jeiserem gam jenbebif. Jengga angtane aa jes ne jenbebilirim, jei bai jam ge jalbife. ⁴ Jepga raja jei gamjon angtane awelna jemnip aa jei ne gwebilirim nafsi ga baftabili. Raja jeiserem ga balbabili, ’Aamei angtane jam jes jenbebiliserem ga jam isa towastababili tumilgala amna ames menetababisini. Sapini amna, ane sapini bastantouyaserem waakensusu ames targabaabili. Seyafter taban. Au, masarap sa jal!’ ⁵ Jengga angtane jam jenbebiliserem jei jam ge sarbiyen. Jei daamfen-daamfennem ga aa ge sofobuwena, daamfenna jei jelem makanap gam sofwa, ane afwer jelem tokonap gam sofwa. ⁶ Angtane seyafter afweraiserem aa jes jenbebilirim, jei angtane rajamana awelna aa jei ne gwebilirim ga aane tebabili, ane gane saftabana, jep ga aane munbobili, jamer futu. ⁷ Raja jei jame aa galap sararam enggame, ’Angtane awelna amnip aa jei ne gwebilirim jei mes ne munbobili.’ raja jeiserem ga kakalswena. Jei ginanggwana jelemana ga baftabili enggalfe angtane aa jei ne munbobilirim jeiserem gam ne munbobif, ane kotana jemnaiserem jei tokwam gam ne naasif. ⁸ Jepga raja gamjon angtane awelna jemnip aa jei ne gwebilirim ga jenbebili, ane ga balbabili, ’Masara aaiserem ga ames menetulsini, jengga angtane nabala ai ajes jenbebilirim jei bai jam ge jalbife am masarabe. Ai ga jem temawer amsam towaswena enggame jei angtane kapka, ane ai enggam ai gunu, jei fas jei jam ge forobiyen masara amnaiserem jebe. ⁹ Sa sofwe nelep angtane unggwanfer aa jep ge betwebisnennerem, ane angtane seyafter jepmanaiserem jewer aaf ga isa aftabiyele!’ ¹⁰ Jewer ga angtane awelna jep aa jei ne gwebilirim ga aa ge sofobili nelebe, ane angtane seyafter jepmanaiserem ga aa ge betwebili, angtane waakena ane angtane kapkaiserem jes mese. Ane jena rajamanaiserem jei angtane syewal anggwanaiserem ga jem erguwe. ¹¹ Raja jei jame aa galap kautenaram syewal anggwana jeiserem jam damtabife, jei angtane ga daamfenna gam damtana, jei fene masarmanaiserem jam kamwiyen. ¹² Raja jei angtane jeiserem ga tenebana, ’Am afelna, fene imna jeiserem je masarmanyan. Aamei ifom kautetya jena aaiserem jebe?’ Angtane jeiserem jei taterisi bastowaifer jam bilteyan. ¹³ Jepga raja jei angtane awelna jemnip aa jei ne gwebilirim ga balbabili, ’Sya, angtane aaiserem gasa tafre, tafa mese tof jemnaiserem ga jam isa tafreibene, ane sitawer ga isa firtaaniwili tamna gwin-gwinsususerem jebe! Tamna jeiserem jebe, angtane ga sege syebinense, ane ga sene enolsa siginsusu, ini jemna ga uskambar jam sege jenbamisi.’ " ¹⁴ Seisya taterisi wini jem gulaiserem ga jem temawer, taterisi jeiserem aa galap tabanulminirim jam nasipmilibe, Yesus umwef enggam ga balbabili, "Uwa Sanbagiri Jei angtane unggwanfer jenbebili enggalfe Jei Jener gam gwef jem Sanbakfe, jengga angtane bastantowaifer ga Jei ne tebana." ¹⁵ Jepga angtane safna Farisimana ga aa ge sofobili gam betwefe, ane jei ga aane mwangbisini Yesus jam ne unggwasbaf tateriseme enggalfe jei Yesus jam ne tebaf. Afa Yesus Jei taterisi syefer jam se nasbabilirim, jei Yesus jep ga sene tebana. ¹⁶ Angtane safna Farisimana jei angtane jei aa jei ne tikwebaatinennerem, ane safna Raja Herodesmana afwenefener, ga jes ne baftabiwili Yesusminibe. Jei enggam ga aa ge gubili, "Guru, ai amsa towaswena Aamei taterisi bunarsusfer Im nasbili. Aamei bunarsusfer taterisi Uwa Sanbagirmanaiserem ga jetefener nasipminenne enggalfe, angtane gam ne towaswebif Uwa Sanbagiri aa jes balbabilirim jam ne eyebife. Aamei angtane afa Ijam erebeyen. Aamei taterisi daamfennaiserem ga Ijeter nasipminenne angtane igsususerem jebe, ane angtane igyeneiserem jep jegme taterisi jeiserem Ijeter nasipminenne, nafis-nafismer Ijam nasipmineneyen. ¹⁷ Jewer ga gwanan asIm towastababi Aamei Ijes bilirim. Hukumu Nabi Musa aa jes tulistababilim fomfom gunu jebe? Ke samfer pajak doini Kaisar Romamanaiserem jes gane armanulu, afa safnant?" ¹⁸ Jengga Yesus Jei mes towaswena enggame, "Jei Abe kapkaiserem ga As jes ne eyeibef. Afa Ai enggam jam As gunurum, ’Jamer isa armanulu.’, gam jega angtane Yahudimana jei Ai As galap sene nasbana. Jengga afa Ai enggam jam As gutenaram, ’Safnant.’, gam jega angtane sanbak pemerintamana jei As galap sene nasbana." Ga jem temawer Yesus enggam ga gunu, "Aameiba angtane akar-akarem ijeya gwenaram! Jeje bafa aamei Ai ga As ima unggwasbana tateriseme enggalfe Ai As jam ne tebafe? ¹⁹ Aamei doi perak Ap As imsa sabasi! Ai doi perak jeiserem Ajam damtaf, aamei pajaka ijema armanuluserem." Doi perak jeiserem ga aane girinbowena, ²⁰ ane Yesus ga tenebaabili, "Gambara yo bosna aa jei ge batobanaram doi peraka aaiserem jebe, jeje bunarsusfer nanmana?" ²¹ Jei Yesus ga aane tamawolbana, "Kaisarmana, angtane sanbaksususerem Romamana." Jepga Yesus ga balbabili, "Afa ga gam jes gemerserem, afa doi jemna, ane jei enggam se gunurum, ’Ap, sa gerba!’, aamei doini jeiserem saf isa gerbana! Ane Uwa Sanbagirmanaiserem, jegme Uwa Sanbagirfe isa gulbana!" ²² Angtane jeiserem taterisi Yesusmana jeiserem jame aa galap ne sarbilirim, jei ga aa ge bitbitwebili aam temawer Yesus Jei waakenfer aa jewer tamawolbaabilirim. Ane jei ga ge sofobili, Yesus ga aane mirtetefala. ²³ Nunu jes jepserem angtane Yahudimana afweraiserem taterisi angtane safna Sadukimana aa jei ne onsobilirim, jei ga aa ge jalbili Yesusminibe. Angtane safna Sadukimana jeiserem jei ga enggam ne towas-towastababuwena, angtane jam tereserem jei gamjon fas jam irweyan terewer. ²⁴ Ini jemna kapka Yesusem temawer, ane jega jem temawer jei Yesus ga jam ne tenebaf, taterisi Yesus Jam tamawolbiyeneiserem jem temawer. Jei Yesus ga enggam ne tenebana, "Guru, Nabi Musa jei as enggam nasipmil, ’Anggwana afa jam gam tererem, ane jemna tanna fas, osona jemnaiserem jei ga saamira wini jeiserem jei gamjon ga jei gam gula, jega ayana aa jei gam tererem jem fwayenfe tanna jep gam eyebafe.’ Nabi Musa ga gam tulisul. ²⁵ Taterisi jeiserem jem temawer ai taterisi aaiserem Is ajama nasibef Ibe, ane ai Aamei Is ajama tenebaf taterisi aaiserem jem temawer. Angtane ayen oson tetena tuju ga gemer naawena am nenennabe. Ayansususerem jei gwanan wini ga jei gula. Abakefyan jei gam tere, jei tanna fas. Jega jem temawer osona jemnaiserem jei ga gam gula saamira wini jeiserem. ²⁶ Ane osona naurabarf aaiserem jeime aa tere, tanna fas. Osona nawer-ningnabarf aaiserem jamer umwefe tujunuborfe aaiserem seyafter gemer ge etamwebili. ²⁷ Umwef ga saamira wini jeiserem ga jei tere. ²⁸ Ai Aamei Is ajama tenebaf, angtane terewer aa jep ge irwebilirim, wini jeiserem jeje nan anggwafar sege nwini? Ayen oson tetena tuju jeiserem jei seyafter gemerserem wini jeiserem mes ne gula." ²⁹ Yesus ga tamawolbaabili, "Miri imnaiserem je kapka, aam temawer aamei teisyena Taterisi Uwa Sanbagirmana ane baabeta Uwa Sanbagirmana. ³⁰ Angtane terewer aa jep ge irwebuwesaram, anggwa mese wi jei gamjon jena jam ne detyen. Angtane seyafter enggammer se naawena malaikata gemerserem taman waaken-giribe, jena jam ne detyen. ³¹ Aamke gemerje ijama gerabisteyan Uwa Sanbagiri aa jes bilipmilim, angtane jam terewer irwalaiserem jem temawer? Uwa Sanbagiri Jei ga enggam gul: ³² ’Aiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.’ (Keluaran 3:6) Taterisi jeiserem jes gamserem gam aa jewer gulum, aamei ga jam isa towaswena enggame, Abraham, Isak, ane Yakub jemna mafnana jei gemer naawena, aam temawer Uwa Sanbagiri Jei angtane jam tereserem jem Uwa Sanbagirfe jam gweyan. Fas. Uwa Sanbagiri Jeiba angtane jam gwelaiserem ga jem Uwa Sanbagirfe se gwena." ³³ Angtane unggwanfer jeiserem jame aa galap ge sarbilirim Yesus aa jes towasulminirim, jei ga aa ge bitbitwebili aam temawer Yesus Jei waakenfer aa jewer tamawolbaabiwenaram. ³⁴ Angtane safna Farisimana jei jame aa galap ge sarbilirim Yesus aa jes nasipminirim angtane Sadukimanfe, ane angtane safna Sadukimana jei gamjon taterisi jam ne bilteyan, jepga angtane safna Farisimana ga aa ge betwebili. ³⁵ Angtane daamfenna, guru-guru Hukumu Nabi Musamana aa jei ne towas-towastababuwenaram, jei Yesus jam unggwasbaf jei jam teneba-tenebawef enggalfe, jei jam towaswef afa Yesus Jei waakenfer kese tamawolbana, afa fas. ³⁶ Jei Yesus enggam ga tenebana, "Guru, hukumu seyafter gemerserem, igsususerem bunarsusfer ga fwersa?" ³⁷ Yesus ga tamawolbana, "Uwa Sanbagiri imnaiserem ga jetefener igam nesiktene ini ilemana seyafter gemerserem jeme, ane mafnana imna seyafter gemerserem, ane baabeta imna seyafter gemerserem. ³⁸ Hukumu jeiserem ga gwananmana, ane jeiserem ga igsusu. ³⁹ Hukumu igsusu naurabaraiserem ga enggala hukumu gwananmana galserem. Hukumu naurabaraiserem ga aas: ’Aamei angtane nafsiserem ga jam igam nesiktababili, aamei in ina gemer igam nesiktenerem.’ ⁴⁰ Hukumu igsusu naura jeiserem jeba dutumiriti galserem, ane hukumu seyafter Nabi Musamana ane nabi-nabi nafsimanaiserem, jei jem sagap gam ge falbuntef." ⁴¹ Angtane safna Farisimana ga gemer ge betwebili, Yesus ga tenebaabili, ⁴² "Aamei Ai As imsa towasta, aamei ifoma gunu ilem inibe Angtane Uwa Sanbagiri bunarsus aa Jes balam Jam baftanafe jem temawer? Jei tane nanmana?" Jei ga aa ge tamawolbili, "Jei asal-asala Raja Daudmana." ⁴³ Yesus ga tenebaabili, "Raja Daud Angtane Uwa Sanbagiri bunarsus aa Jes balam Jam baftanafe jei enggam bal, ’Tuhan amna.’ Jeiserem je fomfoma? Raja Daud ga enggam nasowel, Mafnana Uwa Sanbagirmanaiserem jeme: ⁴⁴ ’Uwa Sanbagiri Jei Tuhan amnaiserem enggam bal: Se nwinte Am taasfolawer, jamere Ai ginanggwana Imna As eyebaabili Im tof gwonap sege nwinbitaatiwetya!’ " (Mazmur 110:1) ⁴⁵ Yesus angtane safna Farisimana gamjon enggam ga balbabili, "Raja Daud jei jes gamserem game aa jewer gulum, jei jener gul Angtane Uwa Sanbagiri aa Jes balam Jam baftanafe Jeiba jem Tuhansam. Gam jega jeiserem ga enggam, Angtane jeiserem Jei asal-asala Raja Daudmanfenyan, jengga Jei mese Raja Daudtem Tuhansam." ⁴⁶ Angtane seyafter Yesus afa jam tamawolbayan. Nunu jes galapserem jem ga aa ge towaiwebili, angtane seyafter ga aa ge erebili Yesus jam ne tenebafe.

¹ Jepga Yesus angtane unggwanfer, ane angtane Jei aa jei ne tikwebaatinennerem enggam ga balbabili, ² "Guru-guru Hukumu Nabi Musamana aa jei ne towas-towastababuwenaram, ane angtane safna Farisiman mesna, jeiba baabetabaram Hukumu Nabi Musamana jem towas-towasulmife. ³ Jega jem temawer aamei jei ibe aa jes ne bilipminirim, seyafter jeiserem aamei gemer isa sarbili ane ga isa eyebili. Jengga jei aa jes ne eyebilirim, aamei jeiserem ijama eyebiyen, aam temawer jei jener jam tawawulyon jei aa jes ne towas-towastababilirim. ⁴ Jei hukumu ga daran-daransusuter ne golmini angtanefe, jengga jei angtane jam batobaabiyen, jega angtane hukumu jeiserem jei jam ne onsobif. ⁵ Seyafter jei aa jes ne eyebaabilirim, jei ga jes ne eyebaabili angtane nafsiserem jewer gam ne damtabif. Jei ayata Taterisi Uwa Sanbagirmana kertas fenfenep ne tulistaabili, ga jem mirip fwireswena, ane tafnap fwiretena. Ane jei fene anggasaiserem jem bwalewulsif. ⁶ Jei kursini angtane sanbakmanaiserem jep gam ge nonbaantef masarabe, ane jena angtane Yahudimana aa jep ge betwebuwefaram jebe. ⁷ Ini jemna saaser-saaserfer sege folbamini, afa angtane pasarap aaiserem jei bosna jemna jam sene kitulmitenaram, ane ga sene balbabili, ’Gwinibener Guru.’ ⁸ Jengga angtane jei gurum is jam ne jenbebiyen, aam temawer aamei seyafter aya oso, ane Guru imna ga daamfenna. ⁹ Aamei angtane ogirip ijeya gwenaram, angtane aamei enggam is jam ne jenbebiyen ’Uwa’, aam temawer Uwa imna ga daamfenna taman waaken-girip aaiserem. ¹⁰ Ane angtane jei is jam ne jenbebiyen enggame ’Angtane Sanbak’, aam temawer imna Sanbaka daamfenna tefner. Jeiba Angtane Uwa Sanbagiri Jei bunarsusfer aa Jes balam Jam baftanafe ga Jes. ¹¹ Angtane sanbagiri aa jei nwinirim im nenennabe, gwanan ga ims gam batobaabili. ¹² Angtane jena jam gaartelaiserem, Uwa Sanbagiri Jei angtane jeiserem jam gam onabertana. Ane angtane jena jam onabertalaiserem, Uwa Sanbagiri Jei angtane jeiserem ga gam gaartena." ¹³ Yesus gamjon ga balbabili, "Aamei guru-guru Hukumu Nabi Musamana ijeya towas-towastababuwenaram ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei iner Uwa Sanbagiri ijama onsobayan, ane Uwa Sanbagiri Jei im Sanbakfe jam nwinyen. Aamei taterisi Uwa Sanbagirmana kabwakfer ima towas-towastababili. Jega jem temawer aamei angtane Uwa Sanbagiri aa jei ne onsobalaiserem, aamei angtane jeiserem ga ijama uftabili, ane jei Uwa Sanbagiri jam ne onsobayan, ane Uwa Sanbagiri Jeime jem Sanbakfe jam nwinyen. (( ¹⁴ Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aamei angtane akar-akarem ijeya gwenaram! Aamei wini saamirnaiserem jes igma afaf-afaftababili enggalfe galgala jemna igma tamserenbaipmif. Ane aamei akar-akarem ga enggam ima gwebabili, aamei sembayanga ga bwalesusfer ima gwebana enggalfe angtane is gane damtabif, ane is gane balbabife enggame aamei angtane waakena. Jega jem temawer, Uwa Sanbagiri Jei unggwanfersus ga imse tamtamtababisi angtane nafsiserem jemniwer.)) ¹⁵ Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei ogiri seyafter gemerserem aamei ga jep ima terelbene enggalfe, angtane daamfenna tefner jewer igma damtaf. Ane angtane daamfenna jeiserem ga isa malin-malintene enggalfe taterisi imnaiserem ijesa nasbilirim, jei taterisi jeiserem gam taabif. Jengga angtane jeiserem taterisi imna jam is galap onsoipminirim, aamei gamjon ga ima nasbili, jega etam-etama jemnaiserem uskambarsus imniwer. Aamei seyafter ga isa sofsa taman tokwagiribe! ¹⁶ Aamei angtane nwe kofa, jengga aamei angtane nafsiserem ga is jei ne tebabisfele. Galap kapka unggwandusa is etamwemisi ibe! Aamei angtane kabwakfer enggam ima towas-towastababili: ’Afa angtane jei jena Jena Uwa Sanbagirmanaiserem bosem gam gaarstenannaram, jei safnant jam eyebiyen. Jengga afa angtane jei jena emas bosem jem jam gam gaarstenannaram, Jena Uwa Sanbagirmanaiserem jebe, jei samfer saf gam eyebili.’ ¹⁷ Aamei angtane miremfener gwelaiserem, ane nwe kofa! Aamke teisyena Jena Uwa Sanbagirmana jeba igsusu ba jesam emasminiwer? Emasa Uwa Sanbagirem Jenap jep jam falinonyan, jei igyene. Jengga Uwa Sanbagirem Jenap aa gam falitonom, jeiserem ba mesam ne gulbanant Uwa Sanbagirfe, ane jega jem temawer jeiserem jeba igsusum. ¹⁸ Aamei gamjon angtane kabwakfer enggam ima towas-towasulmini: ’Afa angtane jei jena mejam bosem jem jam gam gaarstenannaram, Jena Uwa Sanbagirmanaiserem jebe, jei safnant jam eyebiyen. Jengga afa angtane jei jena berna meja sagap aaiserem jem bosem gam gaarstenannaram, jei samfer saf gam eyebili.’ ¹⁹ Aamei angtane nwe kofa! Aamke teisyena mejana Jena Uwa Sanbagirminip aaiserem, jeba igsusu ba jesam berna meja sagap aaiserem jemniwer? Berna jam bunulteyanaiserem mejana Uwa Sanbagirmanaiserem jem sagabe, berna jeiserem jei igyene. Jengga mejana Uwa Sanbagirmanaiserem jem sagap aaiserem mesam gulbanant Uwa Sanbagirfe, ane jega jem temawer jeba igsusum. ²⁰ Ga jem temawer, angtane afa jei jena meja bosem jem jam gam gaarstenannaram, Jena Uwa Sanbagirmanaiserem jebe, jei mejana jeiserem jetefner jem jena jam gaarstenanayan, jengga jei jena gam gaarstenanna berna meja sagap aaiserem jem boseme. ²¹ Gamjon angtane afa jei jena Jena Uwa Sanbagirmanaiserem jem bosem gam gaarstenannaram, jei Jena Uwa Sanbagirmana tefner jena jem bosem jam gaarstenanayan, jengga jei jena gam gaarstenanna Uwa Sanbagiri aa Jei nwinirim jena jeiserem jebe Jem boseme. ²² Gamjon angtane afa jei jena taman waaken-girem bosem jena jem jam gam gaarstenannaram, jegme gam gaarstenanna taman nwini sanbagiri Uwa Sanbagirmana jem boseme, ane jei jena gam gaarstenanna Uwa Sanbagiri aa Jei nwinirim taman nwini sanbagiri sagabe Jem boseme. ²³ Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei Hukumu Nabi Musa aa jes tulistababilim Hukumu jeiserem ima onsobili waakenfer. Ane safe Hukumu Nabi Musamana jam guyon, aamei bumbunu ijeya damtabilirim, bumbunu jeiserem ga ima syentabaabili, ane afwer Uwa Sanbagirf ga ima kitulbono. Jengga aamei hukumu igsususerem Uwa Sanbagiri aa jes bilim, hukumu jeiserem aamei ijama onsobiyen. Hukumu igsusu jeiserem ga aas: Angtane nafsiserem jebar ga waakenfer igma gwena. Angtane ga jam igma nesiktababili. Ane jeber-jeber waakenfer isa eyebili aamei ina ijesa bilirim jam eyebife. Igsusu jeiserem gasa onsobi, ane hukumu afweraiserem jes mese ga isa onsobili. ²⁴ Aamei angtane nwe kofa, jengga aamei angtane nafsiserem ga is jei ne tebabisfele! Aamei hukumu igyeneiserem waakenfer ga ijesa onsobili, jengga aamei ijama onsobiyen hukumu igsusu Uwa Sanbagiri aa jes balbabilirim. ²⁵ Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei osiri asal-asalmana waakenfer ga ima onsobili, jengga ini imna kapka: Aamei galgala angtane nafsimanaiserem jes komkomtababisif. Ane aamei ilem temawenefener ima gwena, angtane nafsiserem jem temawer fas. Aamei numu daamfenna diwir mese ane pirin galserem, duruwerfener gane wirulu, jengga aaremap jei oltunuboro. ²⁶ Aamei angtane safna Farisimana, nwena imna kofa! Gwanan diwiri yo pirni aaremawer jam isa wirtabaabili jamer waaken-waakensus, ane duruwer mese gase ge waakenswebili. ²⁷ Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei ga enggala bitis jena tonem aa jes gane eyebilirim, ane cat sinsiniserem jem ga gane gwebili. Aamei ga gala bitis jena jes galserem: sitawer jei igma domola waakena, jengga aaremap jei mes tenbitye angtane futunuserem aalna jemnaiserem jeme, ane seyafter butu gemerserem jeme. ²⁸ Aamei ga gam jes gamserem, afa angtane aamei is jam gane damtanaram tifinibe, jei aamei ga is gane bala aamei waakena. Jengga aamei akar-akarem igma gwena, ini imna bugufsus kapkaiserem jeme." ²⁹ Yesus gamjon ga balbabili, "Aamei guru-guru Hukumu Nabi Musamana ijeya towas-towastababuwenaram, ane angtane safna Farisimana, galap kapka unggwandusa is etamwemisi ibe! Aameiba angtane akar-akarem ijeya gwenaram! Aamei bitis jena waakensusu yo unggwandwasusu ga ima eyeipmini toneme nabi fwatermanaiserem jebe. Ane angtane fwater waakenfer aa jei naawelam, aamei bitis jena jemna ima mwertabaipmini. ³⁰ Aamei ga enggam ima balbabili, ’Asal-asala nemna jei gwanan aa galap naawelam ogiri aaiserem jebe, gwanan jes galapserem jei nabi-nabi gam ne munbobilim. Jeiserem kapka. Jengga nei gamyan. Nei ga enggam neya gunu, afa nei gwanan jes galapserem janma gwelam, nei nabi-nabi fasfasus nejama munbobiyen.’ ³¹ Aamei ina ga ima gitmini enggame, ’Nei tane asal-asalmana angtane nabi-nabi aa jei ne munbobilim.’ Bunarsus aamei ga kabwaksusu, asal-asala imna angtane nabi-nabi aa jei ne munbobilim jei gamserem. ³² Ga jem temawer sya, aamei sa tabanul kapkaiserem im asal-asala aa jes towaiwulum! ³³ Aamei awasa gemerserem, aamei awas ufwai tanna gemerserem! Aamei Uwa Sanbagirminiwer ijama nunggiryen, Jei aamei is surbobisi taman tokwagiribe. ³⁴ Jega jem temawer Ai ims towas-towastababili: Ai nabi ibirmi isAs baftaipmisi ibe, ane angtane aa jei towastababilirim Uwa Sanbagiri aa jes bilirim jes mese, ane guru mese As baftaipmisi ibe. Afwer jam isa munbobisi ti salibibe, ane afwer aamei bana utuboroserem gam jem isa saftabasa jena angtane Yahudimana aa jep ge betwebuwefaram jep. Ane afa jei jam sege nunggirbenerem kotana nafsiserem jebe, aamei amnuber isa surbobisi. ³⁵ Jega jem temawer ga, Uwa Sanbagiri ga is tamtamtababisi, aam temawer angtane waakena seyafter gwanan aa jes ne munbobilim: Habel aa galap ne munbolom jes jepserem ga jep towaiwel, Habel jei afa jam kabwakulyon, maga gemer ne munbobuwel, jamere umwef ga Sakarya, tane Berekyamana, aamei umwef ga iner ijesa munbono. Aamei Sakarya imsa munbono sitawer Jena Uwa Sanbagirmana, awer meja Uwa Sanbagirmana ga jem nenennap imsa munbono. ³⁶ Ai bunarsus ims towas-towastababili, aamei ijeya gwenaram namwer aas jep falaram, Uwa Sanbagiri ga is tamtamtababisi angtane waakena seyafter ijewera munbobilim." ³⁷ Yesus gamjon ga balbabili, "Aamei angtane kota Yerusalemwer ijeya nwinirim! Ini Amna kabwakfer folbana, aam temawer aameiba angtane nabi aameima munbobuwena, ane aameiba angtane Uwa Sanbagiri aa jes baftabilirim, angtane jeiserem aamei ma munbobuwena toneme. Ai jeber-jeber Ai gunu Alem inibe Ai isa jam dupdupbulsif daamfennaber Amnibe, ayang tanna jemna gemerserem. Ayang ga eneserem jei tane jelemana ga gam dupdupbulsini jelem farat gwonabe, jengga aamei bai jam betwefe Amnibe. ³⁸ Ga jem temawer, Uwa Sanbagiri Jei im nenennabe fas Jam nwinyen, ane kotana imnaiserem ga kabwakswemisi. ³⁹ Ai ims towas-towastababili, aamei gamjon Ase ijama damtayan jamere Ai gamjon As forsanyaram. Jes jepserem aamei ga isa gutesa, ’Uwa Sanbagiri Jei waakena Jelemanaiserem ga Jei se gulbana, Angtane aa Jei fortyaram Tuhanem boseme!’ "

¹ Yesus Jei Jena Uwa Sanbagirmanaiserem jebe safe gemer totintyerem, angtane Jei aa jei ne tikwebaatinennerem ga aa ge jalbili Jemnibe, ane Jena Uwa Sanbagirmana ga aane destaibene, ane jei enggam ga aa ge gubili, "Jena Uwa Sanbagirmanaiserem je waakensusu." ² Yesus ga balbabili, "Aamke seyafter ke aas ima gaarabili? Ai bunarsus ims towas-towastababili, ton-giri daamfenna je afa fas jam falnteyan ton-giri afweraiserem jem sagabe. Ton-giri je seyafter je sege kwirwebitisi, ane onnap ga sege janbisi." ³ Yesus ga gemer nwini taarentumu bosna ga Saitun jebe, angtane Jei aa jei ne tikwebaatinennerem jei jentowai ga aa ge jalbili Jemnibe. Ane ga aane tenebana, "Uwa gwanan ap se bilipmi, Aamei Ijes bilirim, ga fonggalabar se etamwesa? Ane ai bagal bwembwems asa domolsa, jega ai ga asa towaswebili nunu ga mes fal, nunu Aamei gamjon Ijem waraunuluserem, ane nunu umwef jepserem?" ⁴ Yesus ga tamawolbaabili, "Aayai, ga samem-samem jega angtane nensa is jam ne afaf-afaftababiyen. ⁵ Angtane unggwanfer jei sege forobisenye bosna Amanaiserem jeme, aamei ga isene afaf-afaftababisi, jei enggam jam gam gutenaram, ’Aiba Mesiasam, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif, aiba jesam.’ Ane jei angtane unggwanfersus ga sene afaf-afaftababisi. ⁶ Ane aamei jam isa sarbabisneneiserem angtane im gwetmanabe jam sege erabasaram. Ane aamei gamjon ula ga isa sarbisi angtane im bijauwer aa jei ge nwinbenerem jei ga sege erabasa. Jengga aamei taterisi jeiserem safe gam isa sarbabisisi, ini imna is jam ge erebaamiyen. Seyafter jeiserem jei se etamwesa, jengga nunu umwef ogiri aaiserem jemna je gemerje jam folbayan. ⁷ Negara afwer jei negara afweraiserem jebar sege erabasa, ane anggwabura afwer jei anggwabura afweraiserem jebar sege erabasa. Angtane wisi uskambarsus jepga sege folbamisi, aam temawer tumilgala onnap teneserem seyafter ga sege barwebisi. Ane ginirdusa gase gwesa ona nafis-nafsi seyafter gemerserem ogiri aaiserem jebe. ⁸ Seyafter jeiserem ga jafner towaiwelaiserem tamtamtala angtanemana jeiserem, ga enggala wini tanna jam gerala gamserem jei sigini nabal-nabalsusu jena aa gemer gam enolaram. ⁹ Jes jepserem angtane seyafter gemerserem aamei kakalmer ga isene nasbabisi, aam temawer aamei Ai As ijewera tebanaram. Ginanggwana imnaiserem jei ga isene tebabisi, ane angtane nafsiserem jemnip ga isene kitulsu. Jei aamei ga isene safsaftababisi, ane ga isene munbobisi. ¹⁰ Jes jepserem angtane anesus Ai aa jei ne tebanaram, jei Ai Asene aftansu. Ane angtane jeiserem jelem afelen mesna jei jena kakalmer ga sene nasmisi, ane jebar jena ga sene detse angtane nafsiserem jemnibe enggalfe gam munbobif. ¹¹ Ane angtane akar-akarem gwelaiserem nabife unggwanfer ga sege forobisenye, ane enggam ga sege gubisi, ’Ai Uwa Sanbagiri Jei amsam baftabitne.’, jengga bunarsusfer Uwa Sanbagiri angtane jeiserem Jam baftabiyen. Ane jei angtane unggwanfer ga sene afaf-afaftababisi. ¹² Angtane gwanan galapserem jei kabwakfer naawena, jengga Ai seyafter Ajes nasbilirim jeiserem jei aa jep etamwesaram, angtane unggwanfer kabwakfersus gase naawesa. Ane jega jem temawer angtane unggwanfersus jei angtane nafsi jam ne nesiktababiyen. ¹³ Jengga angtane Ai kanaufer As jei ne tebanaram jamere nunu Uwa Sanbagiri aa jep bilirim jep se falsa, angtane jeiserem jei abakef gwelaiserem ga sene domolsa. ¹⁴ Angtane Ai Ajes baftabilirim, jei seyafter ga sege sofobisi, jamere ogiri aaiserem fwesa aa jep folbanaram jebo, ane angtane enggam ga sene balbabisi, ’Au, aamei Uwa Sanbagirem angtanef sa etamwe!’ Aamei angtane seyafter gemerserem jam ijeba towas-towastababinennerem jamer taban, Ai gamjon ga As waraunsu ogiri aaiserem jebe." ¹⁵ Yesus gamjon ga balbabili seyafter aa jei ge etamwebiliserem jem temawer, nalef Jei Jam foroyan. Jei enggam ga balbabili: "Angtane galap isa domolsa, jeiserem ga Nabi Daniel aa jes nasbilim. Jei Jena Uwa Sanbagirmanaiserem ga jep se fisa, angtane enggam ga sene jenbebuwena ’Kabwaksusu jei tamtamtababiliserem’. " (Aamei angtane aaiserem ijeya gerabistenaram, waakenfer isa sarbili!) ¹⁶ Yesus gamjon ga balbabili, "Jes jepserem angtane ona Yudeya je aa jei ge nwinbenerem, jei otumup sege nunggirbese. ¹⁷ Angtane jelem ja sitawer aaiserem, jei gamjon jam ge kabwiteyan jelem jenabe enggalfe galgala gam ne kitultaabonfe mwonawer. ¹⁸ Ane angtane awelna makanap gwebiliserem jegme gemer. Jei gamjon fas jam warauyan enggalfe fene jam ne kitultefe. ¹⁹ Jes jepserem jam aa jep etamwesaram, wini udanabaraiserem ane wini tanna momem taayiniserem, jei kabwaktala unggwandusa ga sene domolsa. ²⁰ Aamei sembayanga Uwa Sanbagirfe gamjon jam isa gwebabana, jega aamei ijama nunggiryen nunu Sabateme, afa nunu angtane jem ge wofobiyeneiserem. Nunu jeiserem ga aas: nunu gwere kabwakfer jem gam fertenerem, nunu arouwa uskambar aa jem gam nyenaram, ane deye wisimi aa jem gan gwebanaram. ²¹ Sembayanga ga jam isa gwebabana, aam temawer jes jepserem angtane tamtamsusu sene domolsa, gwanan jepserem jepyan. Gwanan jes galapserem Uwa Sanbagiri ogir aaiserem aa galap eyebalam, jamer namwer aas jepserem, tamtamsusu jes galserem je fas. Ane jeiserem jamer taban, gamjon jes galserem jam etamweyan jamer abak-abaksus. ²² Jengga Uwa Sanbagiri mes toforolsini nunu jem tamtamuluserem. Afa Jam toforolsiyeneye, angtane seyafter gemerserem futu. Jei nunu jeiserem ga mes toforolsini, aam temawer Jei angtane Jelemanaiserem jes nesiktababili, angtane Jei aa jes destabaabilirim enggalfe Ai As jei ne tebafe. ²³ Jes jepserem afa angtane aamei enggam is jam sene balbabisirim, ’Sa damta! Mesias, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif, Jei aare!’, afa angtane nafsi jei enggam jam sege gubisirim, ’Jeiba jesam!’, angtane jeiserem ijama sarbabiyen! ²⁴ Taterisi jemnaiserem ijama tebabiyen, aam temawer angtane ol kapkaiserem jei sege forobisenye, ane ga sege gubisi enggame, ’Aiba Mesiasam.’ Ane angtane akar-akarem nabif gwelaiserem jei mese ga sege forobisenye. Ane jei bwembwema teisyena ane bwembwema unggwandwasususerem ga sene eyebaabisi enggalfe angtane jem gam ne afaf-afaftababife, jega enggalf jei gam ne tikwebitif. Ane jei angtane Uwa Sanbagiri aa jes destabaabilirim, jei ga jes ne unggwasbaabif jam afaf-afaftababife. ²⁵ Ai As imsa sarbasi! Ai gwanan aamei isa mesam towas-towastababili, gwanan taterisi jeiserem nalefe jam falyan. ²⁶ Afa angtane jei enggam jam sege gubisirim, ’Sa damta! Jeiba jesam, taman tetenabe.’, aamei safnant jewer ipsama gwinaram! Afa angtane jei enggam jam sege gubisirim, ’Jei aare, mwonap.’, aamei angtane jeiserem safnant ijama sarbayan! ²⁷ Ai Tane Angtanemana, Ai Ase forosanya irsi jam bwertala gemerserem, winsi afwer jamer afwero. Angtane seyafter gemerserem jei Ai Asene damtasa. ²⁸ Jes galserem kwimala bunarsus gangge forobitye, jigala jam tereserem jebe. Seyafter Ai Ajes bilirim jeiserem ba bunarsus se etamwesa." ²⁹ Yesus gamjon ga balbabili, "Abakefyan nunu jem tamtamuluserem aa tabanwenaram, gwere je gwif se etamwesa, jem muar mese nafa fas. Ane matona winsiwer ga sege janbisinye, ane winsip seyafter gemerserem ga sege gin-ginwebisi. ³⁰ Jes jepserem bwembwema Tane Angtanemana, bwembwema Amna, jepga se gwereusa winsibe. Bwembwema Amna jeiserem jam aa jep gwereusaram, anggwabura ogiri seyafter jep gemerserem jei ga sege syebisi. Angtane jei Ai Tane Angtanemana, ga Asene damtasa. Ai winis sinsinibaner As iresanya. Baabeta Amna unggwandusa, ane nafa Amna unggwanfer. ³¹ Trompet unggwandusa ga sene forolsa, ane Ai malaikata Amna gas baftabisi, ogiri seyafter gemerserem jewer ga sege sofobisi. Ane malaikata jeiserem angtane Uwa Sanbagiri aa jes destabaabilirim, angtane jeiserem ga sene dupdupbulsisi ogiri seyafter gemerserem jewer." ³² Yesus gamjon ga balbabili, "Au, ara ti sa gaarabi, ane taterisi Amna sa sarbisi! Afa tirni ikikini, ane ese jemna jam negma domolaram, nei ga negma towaswena ossana babitsim gase fala. ³³ Ga gemer jes gemerserem aaiserem jegme gemer: Afa aamei taterisi Ai Ajes nasbilirim jam isa damtabisirim jam sege etamwebisirim, aamei ga isa towaswesa enggame Ai babitsim ga As fortya. ³⁴ Ai bunarsusfer ims towas-towastababili, angtane namwer aa jei naawenaram jei nalefe jam ge terbiyen, taterisi aaiserem seyafter gemerserem Ai Ajes nasbilirim ga sege etamwebisi. ³⁵ Winsi yo ogiri aaiserem je sege barwesa, jengga taterisi Amnaiserem je jam barweyan." ³⁶ Yesus gamjon ga balbabili, "Nunu yo jema Ai Tane Angtanemana, Ai Ajem forolaiserem, nunu jeiserem angtane jei jam ne towaswebiyen. Malaikata taman waaken-girip jeiserem, jei teisyena. Ai Tane Uwa Sanbagirmana, Ai teisyena. Jengga tousa ga Uwa Sanbagiri Jenfentowai. ³⁷ Nunu Ai Tane Angtanemana, Ai gamjon Jam Ajep forosanyaram ogiri aaiserem jebe, angtane jes jepserem enggam se naawesa, angtane fwatermana gamserem jei aa gemer naawelam, nunu Nabi Nuhmana jepserem. ³⁸ Fanamona nalef jam falyan, angtane aa jei naawelam jebe ga jafner naawel, tumilgal mese fo ga jetefer ne tumilwel, ane wini yo anggwana jena ga aane detwel, jamer nunu Nabi Nuh atdusap aa ge kabwitel. ³⁹ Jei teisyena afa galap bai se etamwena, jamere fanamona ga til, angtane jepmanaiserem seyafter ga aa ge albitil. Jes gemerserem aaiserem jegme gemer: Angtane ga sege bitbitwebisi nunu Ai Tane Angtanemana, gamjon Ajep forosanyaram. ⁴⁰ Nunu jes jepserem anggwa nauna awelna ga makanap sege gwebisi, malaikata Amna jei anggwa naura jeiserem afelna tefner sene gaartesa, ane afelnaiserem jei jeber se mirtetefalsa. ⁴¹ Ane wini naura tesa sege wilisi, wini naura jeiserem malaikata Amna afelna tefner se goltesa, ane afelna ga jeber se mirultefalsa. ⁴² Ga jem temawer, aamei ina jeber-jeber waakenfer isa gaaramisnenewena! Aamei teisyena nunu Ai Tuhan imna, Ai gamjon Ajem foryalaiserem. ⁴³ Aaiserem jasa sarbi: Afa angtane jena jam jemanserem jei jam gam towaswenaram enggame, angtane komkoma fonggalabar gwinem gase fortya, jei jam tayan, ane angtane komkoma masef ga gam unggwasa jenap jam kawetefe. ⁴⁴ Ga jem temawer, aamei mese ga jam isa menetwesiwena, aam temawer aamei jema ijama towaswemiyen, jema Ai Tane Angtanemana Ai Ajep foryalaiserem." ⁴⁵ Yesus gamjon ga balbabili, "Angtane awelna nafsiminip waakenfer aa jei gam gwebilirim ane jei gam towaswena, jei ga fom gam eyebili? Angtane jeiserem jei ga aas gamserem ga gemer gam eyebili: Angtane sanbaka jemna jei awelna aa jeman gam gweyibenerem, angtane sanbaka jeiserem jei jam aa jep gam sofnaram, jei angtane awelna waakenfer aa jei gam gwebilirim angtane afweraiserem jemniwer, angtane jeiserem ga gam gaartena enggalfe jei dwakfe gam nwinf jelem afelen mesna afweraiserem jemniwer. Angtane dwakfe aa jei gam nwinirim jeiserem, jei tumilgala angtanemana afweraiserem nunu jeber-jeber gam golmini. ⁴⁶ Ini jemna saaser-saaserfer gam folbana, angtane sanbaka jemna jam gam warautnaram, ane angtane sanbaka jeiserem jei gamjon gam damtana angtane dwakfe aa jei gam nwinirim jeiserem, jei aa jes gam bilibenerem ga jes gam eyebili. ⁴⁷ Ai bunarsusfer ims towas-towastababili, angtane sanbak jeiserem jei angtane jeiserem awelna waakenfer aa jei gwebilirim gamjon ga jes gam gaartena enggalfe, jei dwakfe gam nwinf angtane sanbaka jemna seyafter aa jes gam damtabilirim, apgal jigala jeiserem jei gam gerebaabisnenef. ⁴⁸ Jengga angtane awelna nafsiminip kabwakfer aa jei gam gwebilirim, ane jam towasweyan, jei enggam ga gam eyebili: Jei jelem inibe kapka enggam gam gunurum, ’Angtane sanbak amna jei gemerje abaka jei gamjon gase warautna.’ ⁴⁹ Ane jei angtane awelna jep aa jei gane gwebilirim afwer jei ga gam towaitababili jam safsaftababife. Ane jei ga gam dwena ane fo mwalswel-mwalswelaiserem ga gane telbili angtane mabukaiserem jebar. ⁵⁰ Angtane jeiserem nunu yo jema jam towaswemiyen, angtane sanbaka jelemana jei gamjon jem waraunalaiserem. Ane jei gamjon waraunala jepserem, ⁵¹ jei angtane kabwakfer aa jei gam gwebilirim jeiserem ga gam safsaftana jamere tamtamsus, ane ga baftana taman angtane Uwa Sanbagiri akar-akarem aa jei ne tebanaram jebe. Tamna jeiserem jebe, angtane jep ga sege syebinense, ga sene enolsa siginsusu, ini jemna uskambar ga sege jenbamisi."

¹ Yesus gamjon ga balbabili, "Jes jepserem, nunu Uwa Sanbagiri Jei aa jem gwenaram anggwabura seyafter gemerserem jem Sanbakfe, nunu jeiserem ga enggam se fala taterisi aaiserem gamserem: Tane yafma sepulu jei pelitana ga aane tebabili, ane ga aa ge sofobili enggalfe anggwana wini jam gulaiserem jebar jewer gam ge dorwebif. ² Tane yafma tafna gwiri jeiserem jei teisyena, ane tane yafma tafna gwiri afwer jei tousa. ³ Tane yafma teisyenaiserem jei pelitana ga aane tebabili, jengga jei minyaka jam ne tebabiyen. ⁴ Tane yafma tousaiserem jei minyaka botolabara afwer ga gemer ge falipmini, ane pelitana jemna ga gemer ge taayipmini. ⁵ Anggwana wini jam gulaiserem jei abaka jam foroyan, jega jem temawer tane yafma jeiserem jei nunu ga aa ge folbamini, ane jei nunu ga aa ge tabana. ⁶ Gwini nenennap angtane jeiserem ga jene ol dagame, ’Anggwana wini jam jei gulaiserem gas foryal! Au, nei jebar ganma dorwe!’ ⁷ Tane yafma jeiserem seyafter ga aa ge irwebili, ane pelitana eseserem ga aane tofortababisini enggalfe waakenfer gam ge ertebif. ⁸ Tane yafma teisyenaiserem jei ga tane yafma tousaiserem ga aane balbabili, ’Minyaka imna bastowaifer ap abasa jesulmi; pelitana amna amkom ga ase ge kofweipmini.’ ⁹ Tane yafma tousaiserem jei ga aane tamawolbaabili, ’Wowo! Minyaka amna aaiserem unggwanferyan, jam waksofe. Jasa gwi tokonap, minyaka jep ga isa armantababitne ilefe!’ ¹⁰ Jepga tane yafma teisyenaiserem jei ga aa ge gubili minyakfe. Jei safe aa gemer ge gubilirim, anggwana wini jei gulaiserem jei ga aa fortya jebe. Tane yafma aa jei ge menetwebisinirim, jei masarap seyafter ga aa ge kabwitena anggwana wini jam jei gulaiserem jebaner. Ane mwona ga aane matasini. ¹¹ Tane yafma teisyenaiserem minyakfe aa jei ge sofobilirim jei jep ga ge forobitye masar tarnabe, ane ga aa ge jenbuwena, ’Uwa, uwa! Abe mwas tertemisiwiye!’ ¹² Jengga anggwana wini jam jei gulaiserem, jei ga tamawolbaabili, ’Ai bunar-bunarsus ai aamei isa ajam damdamtababisiyen.’ " ¹³ Ane Yesus ga taterisi aaiserem umwef ga nasbili enggame, "Aamei ina ga waakenfer isa gaaramisnenne, aam temawer aamei teisyena nunu yo jema Ai gamjon Ajem foryalaiserem." ¹⁴ Yesus gamjon ga balbabili, "Jes jepserem nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam se fala taterisi aaiserem gamserem: Angtane sanbak jei jam sofwef, ona nafsi ane bijuap. Jei angtane awelna jemnip aa jei ne gwebilirim ga jenbebili. Jei doini jemna ga kitulmini jebe enggalfe doini jeiserem gam unggwan-girtaasif. ¹⁵ Jei doini ga kitulmini daamfen-daamfenneme, jener aa gemer towaswenaram jes gemerserem. Angtane daamfenfe jei doi emasa 5.000 ga gemer kitulbono, angtane afelna doi emasa 2.000 ga gemer kitulbono, ane angtane afelna jei doi emasa 1.000 ga gemer kitulbono. Jepga jei ga sofwa. ¹⁶ Angtane doi emasa 5.000 aa jei tebabilirim, jei tatarfer ga sofwa, jei doini jemna gamjon ga unggwan-girswebana doi emasa 5.000 jeiserem. ¹⁷ Angtane doi emasa 2.000 aa jei tebabilirim jeime gemer, jei doini jemna gamjon ga unggwan-girswebana doi emas 2.000 jeiserem. ¹⁸ Jengga angtane doi emasa 1.000 aa jei tebabilirim, jei ga sofwa ane o mwona ga terbili, ane doini jelem sanbaka aa jes gerbanaram, doini jeiserem jepga sitasini. ¹⁹ Nunu unggwanfer aa barwebanaram, angtane nawer-ningna jeiserem jem sanbaka gamjon ga warautna, ane doini jeiserem jem temawer enggam ga tenebaabili, ’Aamei doini jeiserem jeme ibasa eyebili?’ ²⁰ Angtane doi emasa 5.000 aa jei tebabilirim jei ga jela, ane jei ga doi emasa 10.000 ga kitulbono. Jei enggam ga bala, ’Uwa, aamei doi emasa 5.000 gwanan as ijes kitulbonont abe. Ai doini jeiserem gamjon ames unggwan-girtaasinint doi emasa 5.000 jeiserem.’ ²¹ Jelem sanbak jemna ga bala, ’Samfersus, aamei angtane waakena, aamei awelna amna i waakenfer im gwebili! Aamei awelna bastantouya ai is ajes gulbanantam, aamei awelna jeiserem waakenfer im eyebili. Jega jem temawer ai awelna gamjon anesus ip isas gulbana. Au, se jal am masarap, ini imna abar ga is saaser-saaserfer se folbana!’ ²² Jepga angtane doi emasa 2.000 aa jei tebabilirim, jei mese ga jela. Jei jon ga gunu, ’Uwa, aamei ap gwanan doi emasa 2.000 as igam kitulbonont. Se damta! Ai gamjon ames unggwan-girtaasinint doi emasa 2.000 jeiserem.’ ²³ Jelem sanbaka ga bala, ’Samfersus, aamei angtane waakena, aamei awelna imna waakenfer im gwebili! Aamei awelna bastantouya ai is ajes gulbanantam, aamei awelna jeiserem waakenfer im eyebili. Jega jem temawer ai awelna gamjon anesus ip isas gulbana. Au, se jal am masarap ini imna abar ga is saaser-saaserfer se folbana!’ ²⁴ Jepga angtane doi emasa 1.000 aa jei tebabilirim umwefe jei jon ga jela. Jei ga gunu, ’Uwa, ai tousa aamei angtane ititmer igam balbabili. Aamei titanna nuna ijes fulurum, ti tanna jeiserem je aamei tonolyan. Ane aamei nananisi jep ijam fasawolnanayan, nananisi jeiserem ijes gulnannaram. ²⁵ Ai ga aamei isa jem temawer erebene. Ai sofna, doini imna ga o mwonap ai sitasini. Doini imna ga aare se damta! Ai doini imna gamjon isa ajam gerbana.’ ²⁶ Jelem sanbaka ga bala, ’Aamei angtane kapka ane kwaalaamiti! Aamei ai as enggam im bala, ai titanna nuna ajam tonolyenaiserem, titanna jeiserem ajep fulnonno. Ane ai nananisi ajam fasawolyanaiserem, nananisi jeiserem ga ajes gulnanna. ²⁷ Afa ga gam aamei ai as igam balaye, jeje bafa aamei doini amna jeiserem ga ijam gaataanteyan banggabe enggalfe, nunu ai jema gam warautnaram ai doini jeiserem seyafter bunganabaner ga agam tebabili?’ ²⁸ Angtane sanbaka jeiserem gamjon angtane nafsi ga balbabili, ’Doi emasa 1.000 jemniwer sa amsonba, ane doini jeiserem ga isa kitulbono angtane doi emasa 10.000 aa jei tebabilirim jebe. ²⁹ Angtane waakenfer aa jei gane eyebilirim jei aa jes gane damtababilirim jeme, Uwa Sanbagiri Jei gamjon ga gam kitulmini jega unggwanfersus ga gane damtabili. Angtane bastowaifer aa jei gane damtabilirim, afa jei kabwakfer gane gwebili jeiserem jeme, Uwa Sanbagiri Jei bastowaifer jeiserem jei aa jei ne domolaram ga gam amsonbana jemniwer.’ ³⁰ Angtane sanbaka jemnaiserem jei angtane nafsi ga balbabili, ’Sya, angtane jeiserem awelna kabwakfer aa jei gwebilirim, sitawer sa firtaaniwi tamna gwin-gwinsusube. Tamna jeiserem jebe, angtane ga sege syebinense, ane ga sene enolsa siginsusu, ini jemna uskambar ga jam sege jenbamisi.’ " ³¹ Yesus gamjon ga balbabili, "Ai Tane Angtanemana, Ai gamjon As waraunsu, malaikata seyafter jeiserem jebaner, ane baabeta unggwandusa jeiserem jeme. Jes jepserem Ai ga As gwesa Sanbakfe, ane Ai ga As nwinsi kursini rajamanaiserem jem sagabe. ³² Ai malaikata Amna As baftabisi angtane ogiri seyafter gemerserem ga sene dupdupbulsu Am danggonawer. Ai Aner ga As waksosisi angtane waakenfer eyebiliserem ane angtane kabwakfer eyebiliserem. Ai angtane enggam As waksosi, gembalna dombana yo kambingi aa gemer gam waksosinirim. ³³ Angtane ga dombana galserem, jei ga angtane aa jes gane eyebilirim Uwa Sanbagiri Jei aa jes gam bilirim. Ai angtane jeiserem ga As dupdupbulsisi Am taasfolawer. Angtane kambingi galserem, jei ga angtane jei jam ne eyebiyeneiserem Uwa Sanbagiri aa jes gam bilirim jam eyebife. Ai angtane jeiserem ga As dupdupbulsisi Am gwejawer. ³⁴ Jepga Ai jem Rajaf ga As gwesa, ane angtane Am taasfolawer aa jei ge nwinbenerem ga As balbabisi enggame, ’Uwa Sanbagiri Uwa Amna, Jemna waakenaiserem Jei is mes golmini ibe. Ai Ajam gwena im Sanbakfe. Au, aamei mawaf isa nwini Am tarnabe! Gwanan ogiri aa galap etamwelam, Uwa Sanbagiri Jei im temawer ga enggam gul, Ai im Sanbakf As nwini, aamei ga Am gwonap isa gwena. ³⁵ Ai wisi As galap folbanantam, aamei tumilgala Abe imsa gulbanant. Ai fobotona As galap folbanantam, aamei fona Abe imsa gulbanant. Aamei safe Ai As ijama towaswebayan, aamei Ai As imsa bala Ai im jenap kautefe. ³⁶ Ai fene fas, aamei fene As imsa terbenent. Ai bwernabara, aamei Ai imsa egantaasinint. Ai bwiyip Agalap nwinintim, aamei Amnip imsa jelant.’ ³⁷ Jepga angtane aa jei ne eyebilirim Uwa Sanbagiri aa jes bilirim, jei ga Asene tenebasa, ’Tuhan, ai Aamei Isa fonggalabara damtanant wisi Is galap folbanantam, ane ai tumilgala ga Is aya gulbanant? Afa fobotona Is galap folbanantam, ai fona Ip ga Is aya gulbanant? ³⁸ Fonggalabara ai Aamei Isa ajama towaswebayan, ane ai ga Aamei ga Is aya balant Aamei am jenap kautefe? Afa Aamei fene fas, ai fen Ibe Is aya terbenent? ³⁹ Ai Aamei Isa fonggalabara damtanant Aamei bwerna Is galap folbanantam, ane ai ga Aamei Is aya egantaasinint? Afa Aamei bwiyip Is galap ne gaataantenantam, ane ai ga aya jelant Imnibe?’ ⁴⁰ Jewer ga Ai, Aiba Rajasam, jepga Ai aamei ga isAs tamawolbaabisi, ’Ai bunarsus ims towas-towastababili, angtane sanbakyanaiserem aa jei ne eyebilirim Uwa Sanbagiri aa jes bilirim, jeiba aya oso Amna gamserem. Afa aamei angtane jeiserem jam isa batobaabilirim, gam jega aamei As imsa batobana.’ ⁴¹ Jepga Ai As balbabisi angtane Am gwejawer aa jei ge nwinbeserem, ’Aamei Uwa Sanbagirmana tamtamsususerem isa domola, jasa gwisi Amniwer! Aamei taman tokwagirip sa gwi, tokwana jei jam ne kofneuyanaiserem! Tamna jeiserem Uwa Sanbagiri bawasfe mes menetsobasini, ane bwata kapka bawasmanaiserem jes mese. ⁴² Ai wisi As galap folbanantam, aamei tumilgala Ap As ijama gulbayan. Ai fobotona As galap folbanantam, aamei fona As ijama gulbayan. ⁴³ Aamei Ai As ijama towaswebayan, aamei Ai As ijama balyan jam kautefe im jenabe. Ai fene fas, jengga aamei fene As ijama terbeyen. Ai bwerna As galap folbanantam, ane bwiyip Asene gaataantenant, aamei Ai As ijama egantaasiyen?’ ⁴⁴ Jepga angtane jam eyebiyeneiserem Uwa Sanbagiri aa jes bilirim jam eyebife, Ai angtane jeiserem jei Ai ga Asene tenebasa, ’Tuhan, ai Aamei Isa fonggalabara damtanant wisi Is galap folbanantam, afa foboto, afa Aamei Is ajama towaswebayan? Afa Aamei fene fas, afa Aamei bwernabara, afa Aamei bwiyip Igalap nwinintim, ai fas Is ajama egantaasiyen?’ ⁴⁵ Jewer ga Ai Aiba Rajasam, jepga Ai aamei isAs tamawolbaabisi, ’Ai bunarsus ims towastababili, angtane sanbakyanaiserem aa jei ne eyebilirim Uwa Sanbagiri aa jes bilirim, jeiba aya oso Amna gamserem. Afa aamei angtane jeiserem ijama batobaabiyen, gam jega Ai mese As ijama batobayan.’ " ⁴⁶ Yesus umwef ga gunu, "Angtane jeiserem jam eyebiyeneiserem Uwa Sanbagiri aa jes bilirim jam eyebife, jei sene tamtamtababisi jamer abak-abaksus. Jengga angtane jeiserem aa jei ne eyebilirim Uwa Sanbagiri aa jes bilirim, jei gwela waakena jamer abak-abaksus ga sene domolsa."

¹ Yesus aa galap tabanulurum taterisi seyafter jeiserem aa jes towas-towasulminirim, Jei angtane Jei aa jei ne tikwebaatinennerem ga balbabili, ² "Aamei tousa nunu gamjon ga naura masar Paskana gase fala. Ai Tane Angtanemana, Asene gerfa angtaneminibe, ane jei ga Asene munbofo ti salibibe." ³ Jes jepserem angtane imam-imam sanbakaiserem ane angtane sanbaka Yahudimana, ga aa ge betwebili jena unggwandusa Kayafasmanaiserem jebe. Jeiba imam sanbagirsususerem. ⁴ Jei ula jewer ne tagalsif Yesus basyamer jewer ne tebafe, ane gam ne munbof. ⁵ Jengga enggam ga aa ge gubili, "Masara aaiserem jepyan, aam temawer afa nei Yesus namwer Jam nesa tebanaram jam munbofe, angtane seyafter ga sege kakalswebili, ane ga sege erebili." ⁶ Yesus aa galap nwinirim tamna Betanyaminibe, Jei Simonem jenap nwini. Simon jei mes waakenswena tifin bwerna unggwandusa aa jei folbanaram jewer. ⁷ Yesus Jei Simonem jenap aa galap twenaram, wini aasaje ga jela Yesusminibe. Jei botola tuna pualamawer eyebiliserem ga jes gwirni. Botolap aa jei falitonom minyaka jemna ninsini ga waakensusu, jemna hargana unggwanfer. Wini jeiserem jei Yesus dukap ga sukutono minyaka jeiserem jeme. ⁸ Angtane Yesus aa jei ne tikwebaatinennerem jei ga aane domola wini jeiserem aa jes eyebilirim, ane ga aane nasbili, ane ga aa ge gubili, "Enggam je kapka minyaka jam suwulsiriserem. ⁹ Minyaka jeiserem jemna hargana uskambarsus. Waakena jengga enggam, jei minyaka jeiserem gam jualtana, ane doini jeiserem ga angtane galgalyenaiserem ga jep gam kitulmini." ¹⁰ Yesus Jei ini jemna mes towaswebaipmini jei aa gam ge gubilirim, ane Jei enggam ga balbabili, "Aamei wini aaiserem jem temawer kapkaiserem ijama nasbiyen. Jemna awelna jeiserem jei samfer eyebili Amnibe. ¹¹ Angtane galgalyenaiserem jei jeber-jeber ibar ima nwinwena, jengga Ai ibar abakef seyafter nejama nwinweyan. ¹² Minyaka jame aa galap suwulntenaram Am tifinibe, jei ga Ams menetaasini Ai tonmwa bitis jafner Agam falinonf. ¹³ Ai bunarsus ims towas-towastababili, Taterisi Waakenaiserem ogirip aa jep ne nasbinennerem, wini aaiserem jei Ap aa jes eyeibenerem, taterisi jeiserem angtane sene nasbinense enggalfe wini aaiserem gane sarbistaabonf." ¹⁴ Jes jepserem angtane dua belas Yesus aa jei ne tikwebaatinennerem, angtane aasaje daamfenna jemniwer, bosna jemna ga Yudas Iskaryot, jei ga sofwa angtane imam-imam sanbakaiserem jemnibe, ¹⁵ ane ga tenebaabili, "Afa ai Yesus ip jam isas gaarminirim, aamei as bas isa gulbana abe?" Ane doini tiga pulu perak ga aane eterbili jemnibe, ane doini tiga pulu perak jeiserem ga aane kitulbono Yudasfe. ¹⁶ Jes jepserem Yudas jei ga towaiwena dwona ga aa terelbili enggalfe jei Yesus jep jam gaarmife. ¹⁷ Nunu nabal-nabalsusu jemserem masara Roti Tanyana jem Tombaabif aa jem falaram, nunu jes jemserem angtane Yesus aa jei ne tikwebaatinennerem jei Yesusminip ga aa ge jalbili, ane ga aane tenebana, "Jena ga fwersa Aamei Ijep gunurum, ai tumilgala Paskamana Ibe Is ajeba menetabaibaasife Aamei Ijes tombaabiliserem?" ¹⁸ Yesus ga tamawolbaabili, "Kota Yerusalemwer sa sofwe, ane anggwana daamfenna nem tousaiserem jebar ga isa nasowetna. Ga enggam isa bala, ’Guru ga enggam gunu, Ai Ajep tereserem mes gwetmanswena. Ai ane angtane Amna As jei ne tikwebaatinennerem, Ai Paskana jebar sa gwebili im jenabe.’ " ¹⁹ Jepga angtane aa jei ne tikwebaatinennerem ga aane eyebili Yesus aa gemer bilipminirim, ane jei tumilgala Paskamanaiserem ga aane menetulsini. ²⁰ Ona aa gwinswelam, Yesus ane angtane dua belas Jei aa jei ne tikwebaatinennerem ga aa ge nwinbetena jam dwenfe. ²¹ Jei aa gemer dwenaram, Yesus jepga balbabili, "Ai bunarsusfer aamei isa Ajam towas-towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe." ²² Angtane Jei aa jei ne tikwebaatinennerem jei taterisi jeiserem jame aa galap ne sarbilirim, ini jemna unggwanfersus ga aa ge jenbamini. Ane jepga Yesus daamfen-daamfennem ga aane tenebawena, "Tuhan, Aamei angtane Ijes balaram, bunarsusfer ga nansa, ke ai?" ²³ Yesus ga tamawolbaabili, "Angtane rotini Ajebar ge ustababitowenaram mangkonabe, angtane jeiserem jei Ai ga As jei se gera ginanggwam tafnabe. ²⁴ Ai Tane Angtanemana, As tere aa gemer tulisulum Taterisi Uwa Sanbagirmanaiserem jebe. Jengga galap kapka unggwandusa se etamwebafa angtane Ai aa jei geraram jemnibe. Afa angtane jeiserem jam suruyonaiserem, jei samfer." ²⁵ Jepga Yudas, angtane Yesus jei geraiserem, ga gunu, "Nansa, ke ai Guru, Aamei Ijes balaram?" Yesus ga tamawolbana, "Bunar, ba aameisam." ²⁶ Jei jame aa galap dwenaram, Yesus Jei rotini ga goltena, ane Uwa Sanbagiri ga bala, "Ase samfer gulbana." Jepga Jei rotini jeiserem ga bitabaabisini, angtane Jei aa jei ne tikwebaatinennerem jep ga kitulmini. Jei ga balbabili, "Gasa tebabi, ga isa tombaabili! Rotini aaiserem jeba tifini seyafter Amnaiserem." ²⁷ Jepga Yesus mangkona fo angguruboro ga goltena, ane Uwa Sanbagiri ga bala, "Ase samfer gulbana." Ane angtane Jei aa jei ne tikwebaatinennerem jep ga golmini, ane ga balbabili, "Aamei seyafter, fo angguru aaiserem sa telbi! ²⁸ Fo angguru aaiserem jeba aawisi Amnaiserem As jei tenbenteyalaiserem Amniwer angtane unggwanfer gamserem jem temawer, jega Uwa Sanbagiri Jei etam-etama kapka angtanemanaiserem gam wirtabaabili, gamjon jeiserem Jam sarbistaabonyan. Ane jega jem temawer Uwa Sanbagiri Jei taterisi ibirmi enggam gam bilipmini angtanefe, angtane Jei ga gam eyebaabili angtane Jelemanfe. ²⁹ Ai ims towas-towastababili, Ai gamjon fo angguru Ajam telbiyen, jamere Ai gamjon ibar ibirmiter nesa telbili, nunu Uwa Amna Jei aa jep gwesaram anggwabura seyafter gemerserem jem Sanbakfe jeme." ³⁰ Jepga jei simala ga aane twolbabili taban, jei ga aa ge sofobili taarentumu bosna Saitun jewer. ³¹ Jepga Yesus angtane Jei aa jei ne tikwebaatinennerem ga balbabili, "Gwini aaiserem aamei seyafter isa nunggiri Amniwer, Ai As isa mirtetefala, aam temawer Taterisi Uwa Sanbagirmanaiserem jep ga enggam baatultel: ’Ai Angtane dombana aa jei gerebaabisnennerem, Angtane jeiserem As munboso, ane dombana jep ga sege syensyanwebisi.’ (Zakharia 13:7) ³² Game saf, Ai gamjon Ajep irwenaram terewer, Ai aamei ga isAs danabaabili ona Galileyaminibe." ³³ Petrus ga gunu, "Angtane seyafter saf sege nunggirbene Imniwer, jengga ai ajam nunggiryen." ³⁴ Jepga Yesus Petrus ga bala, "Ai bunarsus ims towastana, gwini aaiserem nalef ayanga giriserem jam guteyan, aamei Ai ga Asis baanbaanwebana nawer-ningginfer." ³⁵ Jengga Petrus jei Yesus enggam tamawolbana, "Ai safe Ibaner jam nes ne tere, ai enggam ajam guyon, ai Aamei teisyena." Ane angtane afwer Jei aa jei ne tikwebaatinennerem, jeime seyafter jes gemerserem ga gemer ge gubitena. ³⁶ Jepga Yesus ga aa ge sofobili tamna bosna Getsemani je, angtane Jei aa jei ne tikwebaatinennerem jebaner. Jei ga aa balbabili, "Aamei aaf sa nwinte! Ai Ajam gwina aaure, sembayangs gwebaf." ³⁷ Jei Petrus ane tannawan Sebedeusmana ga balbabili, "Aamei Amsa onsoba." Ane angtane nawer-ningna jeiserem ga gemer aftabifele. Jepga Yesus Jena ga entene ini ga towaiwebana ini jam jenbafe, ane ini Jemna ga kabwaksobana. ³⁸ Yesus jepga aa balbabili, "Ini Amna As uskambar jenbana, Ai Ajam tere gamserem. Aamei aaf sa fya, ane aamei Abar jamer nesa gerasnenne!" ³⁹ Yesus ga gwisini bastantowaifer, Jei Jener ga jena onabe, mirmase Jemna o sagap ge falibene. Jei sembayanga Uwa Sanbagirfe ga enggam gwebabana, "Uwa Amna, afa samfer, tamtamtala uskambar aaiserem Amniwer se golteya. Ai bai tamtamtala aaiserem jam gwirinfe! Jengga Aamei Ipsam eyebilirim Ai Ajes bilirim, jengga Aamei Igemer gunurum, ga jeter Is eyebili." ⁴⁰ Jepga Yesus gamjon ga warautna angtane nawer-ningna Jei aa jei ne tikwebaatinennerem jemnibe, ane ga damtabili jei nus ge tabana. Yesus Petrus ga aa bala, "Aamke imasef unggwasa Abar ijam gerebaasnenefe jema daamfenna? ⁴¹ Aamei jam isa gaarasnenewena, ane sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijama eyebiyen. Aamei ga waakena tefner gam isa eyebif, jengga tifini seyafter imna werna." ⁴² Yesus gamjon nawerfer ga sofna, sembayanga Uwa Sanbagirfe ga enggam gwebabana, "Uwa Amna, seyafter Aamei Ijeter bilirim, se etamwena. Afa tamtamtala uskambar aaiserem Aamei bijaufer Ijam golteyan Amniwer, jengga Ai seyafter gwirinfe, sya Ai Ase gwirni." ⁴³ Yesus gamjon Jame aa galap warautnaram, Jei gamjon ga damtabili angtane nawer-ningna jeiserem nus ge tabana. Jei nwena masef ne unggwasbaabili, nwena jemna daran-darna jam ge gaarabisife. ⁴⁴ Jepga Yesus gamjon ga mirtebitefala, ane ga sofna, sembayanga nawer-ningginfer gam gwebabaf Uwa Sanbagirfe, sembayanga gwanan aa gemer gwebabanaram, gamjon jegme gemer gwebabana. ⁴⁵ Jepga aa warautna angtane Jei aa jei ne tikwebaatinennerem jemnibe, ga balbabili, "Aamke nunu ke igemera tana? Sa damta! Jema ga sen fyal: Ai Tane Angtanemana, Asene gera angtane etam-etamabara jem tafnabe. ⁴⁶ Jasa irwe! Au, nei ganma gwi! Angtane Ai aa jei geraiserem, jei aare mes foryal aafe." ⁴⁷ Yesus ga gemer nasowena, angtane dua belas Jei aa jei ne tikwebaatinennerem, angtane daamfenna jemniwer bosna Yudas jei ga fortya. Angtane unggwanfer jebar aa jei ge forobityerem, jei nombeya bwalna gane erbili, ane jei tini bwalna unggwan-gwansus jes mese jes ne erbili. Angtane imam-imam sanbakaiserem ane angtane sanbaka Yahudimana, angtane unggwanfer jeiserem ga jei ne baftabili. ⁴⁸ Yudas, angtane Yesus aa jei geraram, jei angtane unggwanfer jeiserem fwater balbabili enggame, "Angtane ai ajes aalumbonorom, Angtane jeiserem aamei ga jes isa tebana!" ⁴⁹ Yudas aa galap fortyaram, jei tatarfer Yesusminip ga gwina, ga bala, "Gwinem, Guru." Jepga jei Yesus ga aalumbono olbumube. ⁵⁰ Yesus ga tamawola, "Am afelna, aamei tatarfer se eyebi, aamei ijewer jelaram jam eyebif!" Jepga angtane nafsi jei ga aa ge jalbili, Yesus ga aane tebana ginggitfer ga aane tebasnenne. ⁵¹ Angtane daamfenna Yesus aa jei ne tikwebaatinennerem Yesusfar jep aaiserem, jei nombeya ga fotoltena, ane ga aa ge aafwebana angtane awelna imam sanbagirsususerem jemnip aa jei gwebilirim jam tegilfe, jengga imwana tefner targabaasini jamer te. ⁵² Yesus jepga bala, "Nombe imna gamjon se kaawulnte jelem golap! Angtane seyafter nombeyem aa jei gangge erabanaram, jei nombeyabaner sege terbili. ⁵³ Aamke teisyena? Aamei Ai ke As enggam im bala, Ai Uwa Sanbagiri Ajam balyan Ams batobafe? Aamke teisyena afa Ai Uwa Amna As bala, Jei tatarmer As batobana, ane Jei malaikata uskambarsus se baftabili Ai Ajei ne gerebaasnenef? Jengga Ai Ajam balyan. ⁵⁴ Taterisi Uwa Sanbagirmana jep ga enggam baatultel, namwer aa je etamwenaram, se etamwena. Afa Uwa Sanbagiri malaikata jam se baftabunnurum Ams ne gerebaasnenef, gam jega Taterisi Uwa Sanbagirmana aa jes tulistaabilim, jei jam tabanweyan." ⁵⁵ Jes jepserem Yesus ga angtane unggwanfer jeiserem ga balbabili, "Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe? Ai nunu jeber-jeber aamei is Ai towas-towastababuwenantam, Jena Uwa Sanbagirmanaiserem jebe, jengga aamei Ai jep Ase ijama tebayan. ⁵⁶ Jengga seyafter aaiserem mes etamwena, jega nabi aa jes ne tulistaabilim Am temawer gam se tabanwena." Jepga angtane seyafter aa jei ne tikwebaatinennerem Yesus ga aane mirtetefala, ga aa ge nunggirbili. ⁵⁷ Angtane Yesus aa jei ne tebanaram, jei Yesus ga aane aftafala jena Kayafasmanaiserem jebe. Kayafas jeiba imam sanbagirsususerem. Guru-guru Hukumu Nabi Musamana aa jei ne towas-towastababuwenaram ane angtane sanbaka Yahudimana, jei seyafter jena jeiserem jep mes ge betwebili. ⁵⁸ Petrus jei Yesus amunuwer onsobananna. Jei bijautowaifer wofna, jamere Imam Sanbagirsususerem jem ja sitabo. Jewer ga Petrus ga kautena sita jeiserem jebe, ane jep ga aa ge nwinbene angtane Polisi Jena Uwa Sanbagirmana jebar. Jei jam towaswef seyafter jeiserem fomfom se tabanwena. ⁵⁹ Angtane imam-imam sanbakaiserem ane Angtane Yahudimana Sanbak-sanbaka seyafter gemerserem, jei angtane enggalaiserem ga jes ne terelbaabili, angtane syefer nasowelaiserem Yesusem temawer enggalfe jei enggam gam ne balbabif Yesus Jei kapka gam eyebili, ane jega jem temawer jei Yesus ga jam ne munbof. ⁶⁰ Jengga Jemna kapkaiserem daamfenna afa jam ne domolbayan. Angtane unggwanfer taterisi afaf-afafaiserem ga aane balbabitounaram nenes-nenesmer, jengga daamfennaber jam falyan. Umwef ga angtane naura ga aa ge jela danggonawer. ⁶¹ Jei enggam ga aa ge gunu Yesusem temawer, "Angtane aaiserem Jei enggam gunu, ’Ai Jena Uwa Sanbagirmana samfer As wirulsini, ane nunu ga nawer-ningginfenna Ai ibirmi gamjon ga As gwitiri.’ " ⁶² Jepga imam sanbagirsususerem ga irwena, ane Yesus ga bala, "Aamke taterisi aaiserem ke Ijam tamawolbiyen? Aamei Ibas nasbifi taterisi kapka aaiserem jem temawer?" ⁶³ Jengga Yesus Jei jafner fina, Jam nasoweyan. Imam sanbagirsususerem Yesus ga bala, "Ai Ims bala Aamei bunarsusfer Is nasowena Uwa Sanbagiri aa Jei gwenaram, Jem danggonabe! As balbabi, Aamke Tane Uwa Sanbagirmana, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif?" ⁶⁴ Yesus ga tamawola, "Bunar, Aiba Jesam, iner imsam gutena. Jengga aamei angtane seyafter gemerserem Ai isa Ajam towastababili: Abakefyan aamei Ai As isa damtasa, Ai Tane Angtanemana. Ai Uwa Sanbagirem taasfolawer Ase nwinsi, Uwa Sanbagiri Jei baabetsusu. Ane Ai As iresanya winsi sinsinibaner taman waaken-giriwer!" ⁶⁵ Imama Sanbagirsususerem jei Yesusmana taterisi jeiserem jame aa galap saribenerem, jei ga kakalswena, fene sagamanaiserem ga taayimbetena, ane ga bitaimbaasini. Ane jei enggam ga gunu, "Jei Uwa Sanbagiri syefer baltena! Nei gamjon angtane nafsiserem nejama sarbayan. Aamei seyafter iner imsama sarbana Jei enggam gunu, ’Ai Uwa Sanbagirfar As ge nwini Sanbakfe.’ ⁶⁶ Jewer aamei ifomfoma gunu?" Ane Safna Angtane Yahudimana Sanbak-sanbaka Seyafter Gemerserem jeiserem ga aa ge tamawolbili, "Jei syefer baltena, gam jega Jei jesa munbo!" ⁶⁷ Jepga angtane afweraiserem jei Yesus makem ga aane gwebana miribe, ane gane tumbu-tumbutono tafa murmureme. Ane angtane afwer tafa felfelem ne safsaftana, ⁶⁸ ane jei ga aa ge gubili, "Afa Aamei bunarsus Angtane Uwa Sanbagiri aa Jes balam Jam baftannufe, afa Aamei Jese, sya Aamei amse towastababi Aamei Is nane safsaftana!" ⁶⁹ Petrus sitawer aa gemer nwinirim, yafonsiwiri awelna angtanefe aa jei gweyibenerem jemnip ga jela, ane ga bala, "Aamei mese Yesus, Angtane ona Galileyamana jeiserem, ba aamei ma tikwebaatinenne." ⁷⁰ Jengga Petrus jei ga jam baanbaanwena angtane unggwanfer jeiserem jem danggonawer. Jei ga gunu, "Ai ajam towasweyan aamei ibas bili." ⁷¹ Jepga jei mwa sitawer ga gwina. Yafonsiwiri nafsi awelna angtanefe aa jei gweyibenerem Petrus ga damtana, ane jei angtane jep aa jei ge fibilirim jei angtane jeiserem ga balbabili, "Angtane aaiserem jeiba Yesusfar aa jei ge wofobuwenaram, Yesus angtane tamna Nasaretmana jeiserem." ⁷² Petrus gamjon Yesus ga baanbaanwebana. Jei ga gunu, "Ai bunarsus nasowena Uwa Sanbagirem danggonabe: Ai Angtane aaiserem ai teisyena!" ⁷³ Jepga abakefyan, angtane jewer aa jei ge fibilirim Petrusminip ga aa ge sofobili, ga aa ge gubili, "Bunarsus, aamei angtane Yesus iJeya tikwebaatinennerem, aameiba jesam. Ai towaswena, taterisi gulu imnaiserem isa amsa towasweibene." ⁷⁴ Jepga Petrus jei ga towaiwena jena jam gaarstenanafe Uwa Sanbagirminibe enggame, "Ai Angtane jeiserem ai teisyena! Afa ai syefer as nasowena, Uwa Sanbagiri Jei ai ga as tamtamtana!" Jes jeberserem ayanga giriserem ga gutena. ⁷⁵ Ane taterisi Yesus gwanan aa jes nasibenentem, Petrus jei taterisi jeiserem ga saribaastabona enggame, "Nalef ayanga giriserem jam guteyan, aamei Ai ga Asis baanbaanwebana nawer-ningginfer." Ane Petrus ga totintye, ane uskambarsus jep ga syena.

¹ Gwinibenersus angtane imam-imam sanbakaiserem seyafter gemerserem, ane angtane sanbaka Yahudimana, jei ula ga aane tagalbaasini Yesus jam ne munbofe. ² Jei Yesus gane taferna, ane ga aane aftafala, Pilatusfe ga aane gerbana. Pilatus jeiba Gubernur pemerinta Romamanaiserem ba jesam. ³ Yudas, angtane Yesus aa jei geraram, jei jame aa galap angganaram angtane jei Yesus jam ne munbof, jei ga gunu jelem inibe, "Ai Yesus enggam je abaf gwebana?" Ane jei doini tiga pulu perak gamjon ga wartabaipmini angtane imam-imam sanbakaiserem ane angtane sanbaka Yahudimana jebe. ⁴ Jei angtane jeiserem ga balbabili, "Ai etam-etama kapkaiserem ames eyebilint. Angtane olyanaiserem ai isa ajewer destabaaminintim ibe. Ane namwer aamei Jei ga ijama munbof." Angtane sanbaka jeiserem jei ga aa ge tamawolbili, "Kabwaktala jeiserem jeke amna. Jeiserem aamei infentowai im eyebilint!" ⁵ Yudas jei doini jeiserem titikip ga taptabisiwili Uwa Sanbagirem Jenabe, ane ga mirtebitefala. Jepga aa gwina, jena ga taferna botonabe, ane jena ga daktanswena, jamer futu. ⁶ Angtane imam-imam sanbakaiserem jei doini jeiserem ga aane kitultena, ane ga aa ge gubili, "Doini aaiserem je aawis doi, doini aa jei armantanaram angtane jem munbof. Hukumu nemna Nabi Musa aa jes tulistababilim jep aa gemer batonaram, nei doini aaiserem nejama katanteyan doi funabe Jena Uwa Sanbagirmanaiserem jebe." ⁷ Jei jenjen ga aa ge nasbawena jamer jei daamfennaber ga aane bili, jepga jei ona ga aane armantana, ona jeiserem jei ona pirni aa jep ne eyebaabuwenaram. Jei ona jeiserem ga aane armantana enggalfe angtane Yahudimanyanaiserem jep gane tirnnuf. ⁸ Jega jem temawer jamer nunu aas jepserem ona jeiserem ga enggam ne jenbewena, "Ona aawisibere". ⁹ Jepga Taterisi Nabi Yeremia aa jes nasbilim ga mes tabanwena: "Tuhan abe aa jes bilibenerem enggame, ’Jei doini tiga pulu perak ga sene tebana, doini anggwabura Israelmana daamfennaber enggam aa jes ne balaram jei Angtane jeiserem Jem ne armantaf. ¹⁰ Ane doini jeiserem jeme, jei ona angtane pirni aa jei ne eyebaabuwenaram ga jem ne armantana.’ " (Zakharia 11:12-13) ¹¹ Yesus Jei Gubernur Pilatusem danggonawer fina. Gubernur jei Yesus ga tenebana, "Aamke anggwabura Yahudimanaiserem jem Raja?" Yesus ga tamawolbana, "Ba gamam, iner imsam gutena." ¹² Angtane imam-imam sanbakaiserem ane angtane sanbaka Yahudimana ga aa ge gubili, Yesus Jei etam-etama kapka anesus gam eyebaabili. Yesus etam-etama safe Jam eyebiyen, jengga Jei taterisi jeiserem afa fas jam tamawolbiyen. ¹³ Jepga Pilatus Yesus ga tenebana, "Aamke Ijam saryan seyafter kapkaiserem Im temawer Is jes ne balbaibenerem?" ¹⁴ Jengga Yesus Jei ula daamfenna afa fas Jam tamawolbiyen. Jega jem temawer Gubernur jei unggwanfer ga aa bitbitwena. ¹⁵ Tahunu jeber-jeber nunu unggwandusa bosna masar Paska, Gubernur jei angtane bwiyip aa jei gam nwinirim ga jem aftabunnuwefa. Angtane unggwanfer jei aa jes gane destabanaram angtane jam aftannufe, Gubernur ga angtane jeiserem ga jes gam aftannu. ¹⁶ Jes jepserem angtane bosna Barabas aa jes ne tebanaram, bwiyip ga aane gaataantena. Angtane uskambar jepmana Barabas mes ne towaswebana. ¹⁷ Jega jem temawer angtane unggwanfer aa galap ge betwebilirim, Gubernur Pilatus ga aa tenebaabili, "Aamei inansa bala ai isa ajes aftamunnufe ibe? Ke Barabas, afa Yesus aa jes ne jenbewenaram Mesiaseme?" ¹⁸ Pilatus jes gamserem game jama gunurum, aam temawer jei tousa angtane imam-imam sanbakaiserem Yesus aa jei ne geraram, jei jelem inibe ga jam ge uskamswebili Yesusem temawer. ¹⁹ Jes jepserem Pilatus ga mwonap nwini, mwona angtane sanbaka angtane nafsi aa jep gam teneba-tenebawenaram enggalfe, jei gam balf afa angtane waakenfer gam eyebili afa kabwakfer gam eyebili. Wini Pilatusmana taterisi aaiserem Pilatusfe ga enggam baafulbono mwona jei aa jep nwinirim jebe, "Aamei ijam guyon Angtane olyana jeiserem Jei jam munbofe, aam temawer ai namwer esere ames tasa Jem temawer, ane ini amna jeme as kabwaksusfer falbili." ²⁰ Jengga angtane imam-imam sanbakaiserem ane angtane sanbaka Yahudimana, jei ga angtane unggwanfer jeiserem enggalf ga gemer ne malin-malintababili jei Pilatus gane balfe enggame, "Barabas tefner se aftannu! Yesus ga is gera, jam munbofe!" ²¹ Jewer ga Gubernur angtane unggwanfer jeiserem gamjon ga tenebaabili, "Angtane naura aaiserem, aamei inansa bala, ai ip isa ajes aftamunnufe?" Ane jei ga aa ge tamawolbili, "Barabas!" ²² Pilatus ga tenebaabili, "Afa ga gam jes gamserem, ai ga basas eyeibene Yesusfe aa jes ne jenbewenaram Mesiaseme?" Jei seyafter ga aa ge tamawolbili, "Ti salibip sa daktanswe, jamer futu!" ²³ Pilatus ga tenebaabili, "Jeje bafa? Angtane aaiserem Jei kapka fwersa gam eyebili?" Jengga jei seyafter gamjon uskambar ga aa ge tetenbili, "Ti salibip sa daktanswe, jamer futu!" ²⁴ Pilatus aa galap towaswenaram game, "Ai gamjon ajam eyebiyen.", ane angtane jeiserem ga damtabili jei jam ge erabaf, jei fona ga goltena. Ane jei tafna ga wirsona angtane unggwanfer jeiserem jem nwenabe, jega angtane gam ge towaswebif enggame jei Yesus jam balyan Jam terfe. Jei ga gunu, "Etam-etama kapkaiserem jei imna. Angtane aaiserem Jemna aawisi ga im tafnap. Tafna amnaiserem ames wirsona, aawisi Jemna am tafnap fas." ²⁵ Angtane uskambar seyafter gemerserem ga aa ge tamawolbili, "Sya samfer, aawisi Jemnaiserem ga am tafnap, ane tane asal-asala amnaiserem jem tafnap mese." ²⁶ Jepga Pilatus jei Barabas ga aftamunnu angtane jeiserem jebe. Ane jei angtane ga balbabili Yesus jam ne safsaftafe newa utuboroserem jeme, ane ga gaarmini Jam ne daktanswef ti salibibe, jamer futu. ²⁷ Jepga ginanggwana Gubernurmanaiserem jei Yesus ga aane aftafala jadusa Gubernurmanaiserem, tampata ginanggwamanaiserem jem gwetmanabe. Ane ginanggwana seyafter jep gemerserem ga aa ge betwebili Yesusem tarnabe. ²⁸ Jei fene Yesusmana ga aane soksobaasini, ane fene bwalna berbere ga aane doksobaaniwili, fene raja aa galater gam kamwinirim. ²⁹ Jepga jei newa utuboro ga aane egwaisona topini gamserem, ane newa utuboro jeiserem ga aane gwelabatena Yesusem dukabe, topini raja aa galater gam gweltenaram. Jei komol boroma galserem ga aane gulbana, ga tafna taasfolawer gwirni, raja galater gam gwirinsinirim. Ane jei somwan dumem ga aa ge nwinbetena Yesusem danggonawer, ane ga aane bisobana. Jei ga enggam ne bisobana, "Samfer, Raja anggwabura Yahudimana!" ³⁰ Jei maka ga aane sirbesiwena. Ane daamfen-daamfennem komol boroma jeiserem ga aane erak-eraktana, Yesus jem ga aane safsaftana dukabe. ³¹ Jei jam aa ge tabanwebilirim Yesus jam ne bisobalabe, jepjon ga fene bwalna jeiserem ga aane soksobaasiwili, ane fene Jelemana gwanan aa jes ne soksobaasinirim, fene jeiserem gamjon ga aane kayimbene. Jepga Yesus ga aane aftafala kota sitawer jam ne daktanswef ti salibibe. ³² Nel nenennabe jei ga aa ge dorwebili angtane kota Kirenemanaiserem jebar, bosna jemna ga Simon. Jei angtane jeiserem ga aane tergenbana salibi Yesusmana gam sutunbofe. ³³ Ane ga aa ge forobili taman bosna Golgota je, jemna igi Ibrani olem ga enggam, "Taman Dwak Otam". ³⁴ Jes jepserem Yesusfe fo angguru obat syelabar dupdupbuluserem Yesusfe saf jes ne gulbafe. Jengga Yesus Jei jafner bwerawultena, Jei bai Jam telbife. ³⁵ Jepga jei Yesus jam ne daktanswena ti salibibe. Aa galap ne tabantanaram, jepga ginanggwana jei undiana tuna bastantouya galserem ga aane jejetana enggalfe, fene Yesusmana jem gam ne syenulbof. ³⁶ Jepga jei ga aa ge nwinbetena enggalfe, jei gam gerebaasnenef. ³⁷ Yesusem dwak bolap tulisana ga aane fwirebaaiswena tinibe, jei jep aa jes ne tulisulurum kapkaiserem jei aa jes ne bilibenerem Yesusem temawer. Jei ga enggam ne tulisulu: |scAI YESUSAM, RAJA ANGGWABURA YAHUDIMANAM. ³⁸ Angtane komkoma nauraiserem ga Jebar ne daktabaabunswena ti salibibe, afelna Jem taasfolawer, ane afelna ga Jem gwejawer. ³⁹ Angtane ti salib tarasamer aa jei ge ayebintyerem, jei Yesus ga aane imei-imeitana, duka ga aane jejetababili, enggam ga aane bala, ⁴⁰ "Yesus, Aamei enggam Im gununt, ’Ai Jena Uwa Sanbagirmana samfer As wirulsini, ane jena jeiserem nunu nawer-ningginfenna gamjon ga As gwitiri ibirmiter.’ In Ina Jam se waakentaasini! Afa Aamei bunarsusfer Tane Uwa Sanbagirmanaye, Jas ireya ti salibiwer!" ⁴¹ Jes galserem angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, jes mese Yesus ga aane bisobana. ⁴² Jei Yesusem temawer enggam ga aa ge gubili, "Jei angtane nensa gam waakentaasini, jengga Jei Jen Jena Jam waakentaasiyen! Jei ke Raja anggwabura Israelmana? Afa Jei Jam se iretyaram ti salibiwer, nei Jei waakenfer ga nesa tebana. ⁴³ Jei enggam gunu, ’Ai Uwa Sanbagiri Am tebana waakenfer. Ai Tane Uwa Sanbagirmana.’ Sya, ganma gereba Uwa Sanbagiri Jei namwer kese waakentaasini." ⁴⁴ Ane angtane komkom nauna Jei aa jebar ne daktabunswenaram ti salibibe, jeime gemer ge bisobana, angtane nafsi Jei aa gemer ne bisobanaram. ⁴⁵ Jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef. ⁴⁶ Ane jema engbar jema ga 3.00, Yesus Jei uskambar ga gwarna Ibrani oleme, "Eli, Eli, lama sabaktani!" Igi jemna ga enggam, "Uwa Sanbagiri Amna, Uwa Sanbagiri Amna, Aamei Ai As Ibaf mirtetefala?" ⁴⁷ Angtane jep aa jei ge fibilirim ga aane sarbana, ane ga aa ge gubili, "Yesus Jei Eliya nabi fwatermanaiserem, ga jes jenbene Jam batobaf." ⁴⁸ Angtane daamfenna jemniwer jei tatarfer ga nunggirfele, jei fenbit fona jem soromolaiserem ga goltena. Jei fenbiti jeiserem fo angguru garsamaiserem jep ga osoltena, ane tini bwalnaiserem jep ga fwiretena. Ane Yesusem mif tarnap ga gwirinswena jam telbife. ⁴⁹ Jengga angtane nafsi ga aa ge gubili, "Nei ganma fya! Nejesa gerebafe Eliya kese fortya, Yesus kese waakentaasini." ⁵⁰ Yesus gamjon uskambarsus ga gwarna, jepga Jei mafnana Jelemana Jei Jener bili, "Se totini Amniwer!" Ane Jei ga tere. ⁵¹ Jes jepserem kain unggwan-giri aa je taannurum Uwa Sanbagirem Jenabe ga ne bitnetini nenennaber, bolawer jamer gwonabo. Ane ogiri ga gin-ginwena, ton-gir ga aane bitwetini. ⁵² Tonmwa bitis seyafter ga aa ge gwawebitini, ane angtane Uwa Sanbagirmana anesus aa jei ge terbilim gamjon ga nwesantababili. ⁵³ Jei ga aa ge tobitintye bitis mwonawer. Yesus Jei jame aa galap irwelam terewer, jei kota Yerusalem kotana Waakensusu jeiserem jep ga aa ge kabwitena, ane jep ga angtane unggwanfer ga aane damtabili. ⁵⁴ Angtane sanbaka 100 ginanggwamana ane ginanggwana afweraiserem Yesus aa jei ne gerabisnennerem, jei seyafter uskambarsus ga aa ge erebili giniri aa galap ne domolaram, ane seyafter aa je etamwenaram. Jei ga aa ge gubili, "Bunarsus, Angtane aaiserem Jeiba Tane Uwa Sanbagirmanam!" ⁵⁵ Jes jepserem wini unggwanfer ga bijauwer ge fibili, ane ga aane gaarabili seyafter aa jei etamwenaram. Wini jeiserem jei Yesus ne tikwebaatinenne ona Galileyawer, gam ne batobaf. ⁵⁶ Wini afweraiserem wini seyafter jeiserem jemniwer, bosna jemna ga aas: afwer bosna Maria Magdalena; ane afwer bosna Maria, iye Yakobus ane Yusufmana; ane afwer jei wini Sebedeusmana. ⁵⁷ Ona aa jem gigitswelam gwini jeiserem jeme, angtane galgalabaraiserem jei ga jem fortya. Bosna jemna Yusuf, jei tamna Arimateya tane. Ane jei mese angtane Yesus aa jei ne tikwebaatinennerem. ⁵⁸ Jei Pilatusminip ga sofwa, ane Yesusem futunu ga bala, jam tinswefe ti salibiwer. Jei futunu Jemnaiserem jam gaarantef tonmwa bitisibe. Pilatus jei ginanggwana ga balbabili jei Yesusem futunu Yusufe ga aane gerbana. ⁵⁹ Yusuf ga Yesusem futunu ti salibiwer ga tinswena, ane ga aane taferna kain waakena ibirmiserem jeme. ⁶⁰ Yusuf tonmwa bitis ibirmi jener aa jes domolaram, tonmwa bitisi jeiserem ga otumton jewer ne eyebili. Jei Yesusem futunu ga jep gaarantena. Jepga jei tuna nafsi unggwan-giri ga aane irfifitaansowena, jei ga tonmwa bitis jem ne motolsini, ane ga sofwa. ⁶¹ Maria Magdalena ane Maria nafsi jep ge nwini, tonmwa bitis danggonawer. ⁶² Nunu jem gwirmer aaiserem, nunu Sabat, angtane imam-imam sanbakaiserem ane angtane safna Farisimana, jei Pilatusminip ga aa ge sofobili. ⁶³ Ane ga aa ge gubitena, "Uwa, ai mese ba aa gemer ma sarbistaabonwena, Angtane afaf-afafa jeiserem Jei gemer gwanan aa galap gwenantam, Jei mesam gununt enggame, ’Ai nunu nawer-ningnabaraiserem Ai gamjon ga jem As irwefa terewer.’ ⁶⁴ Ga jem temawer, angtane ga jam is balbabili tonmwa bitis jei ne gaarabisnenefe waakenfer, jamere nunu nawer-ningnaiserem se ferwena. Afa fas bitisi jeiserem jam ne gaarabisneneyen, angtane Jei aa jei ne tikwebaatinennerem Jem futunu galap ga sene komkomtaasini, ane ga sege gubili angtaneminibe, ’Jei fwater irwena terewer.’ Ol kabwak umwefsus aaiserem jei kabwaksusu gwanan jeiserem jemniwer." ⁶⁵ Pilatus ga tamawolbaabili, "Sya, ginanggwa amnaiserem jesa kitulifene enggalfe, jei tonmwa bitis jeiserem jei ga sene gaarabisnenef. Sa gwi waakenfer gam isa matabaabisini bitis mwona jeiserem." ⁶⁶ Jepga angtane sanbaka imammana, ane angtane safna Farisimana, aa ge sofobili, ane tonmwa bitis gane motolsini newa natabaraiserem jeme, ane tandana Pilatusmana ga gam. Jei ginanggwana Pilatusmana ga aane balbabili, "Aamei ga aafer isa fina."

¹ Nunu Sabat taban, gwinibenersus gwere safe aa gemer anggasyelam, nunu ga Minggu, Maria Magdalena, ane Maria nafsiserem jes mese, jei ga aa ge sofobisi tonmwa bitisi jeiserem jewer gam ge domolf. ² Aafer-aafer giniri uskambar ga gwesa. Malaikata Tuhanmana taman waaken-giriwer ga iresanya, ane tuna unggwan-giri tonmwa bitis mwonawer ga irfifitaansowena, ane tuna jeiserem jem sagap ga nontena. ³ Malaikata jeiserem mirmase jemna ga jam ge bwere-bwereweibene iris nafa galserem, ane fene jemna sinsinsusu. ⁴ Angtane tonmwa bitis aa jei ne gaarabisnennerem ga aa ge erebili, jamer aa ge egegwebili, ane jei ga aa ge janbili angtane jam tertere gamserem. ⁵ Malaikata jeiserem jei winauna jeiserem ga gitmini enggame, "Ipsam ge ernerem! Ai tousa aamei Yesus aa jes ne daktanswenantam ti salibibe ga ijes ge terelbene. ⁶ Jei aafe fas. Jei gamjon mes irwena terewer, gwanan aa gemer gununtum. Au, ga sege domol! Tampata Jei aa jep ne gaarantenantam ga aare! ⁷ Namwer aas jepserem tatarfer ga sege sofwe! Angtane Yesus aa jei ne tikwebaatinennerem ga is ge towastababili enggame: ’Yesus Jei gamjon mes irwena terewer, ane Jei ims danabaabili ona Galileyawer. Aamei ga jep isa damtatna.’ Ai isa ames towaswena." ⁸ Jepga wini jeiserem tatarfer tonmwa bitisi jeiserem ga aa ge mirultefala. Jei jam ge erne, jengga ini jemna saaser-saasersusfer nulamini. Jei ga aa ge nunggiri enggalfe ula jeiserem gam ge towasulmif angtane Yesus aa jei ne tikwebaatinennerem jebe. ⁹ Aafer-aafer Yesus Jei winauna jeiserem jebar ga aa ge dorwebili, ane winauna jeiserem Jei enggam ga gitmini, "Gwinibener." Jepga jei ga aa ge agasiwitye Jem gwetmanaber, ane tufa Jemna ga aa ge taayimbene, ane ga aa ge pujitene. ¹⁰ Yesus ga gitmini, "Ipsam ge ernerem! Sege sofwe, Am afelen mesna ga is ge towastababili, jei ga Galileyawer ga sege sofobili. Jewer Ai ga Asene damtatna." ¹¹ Wini jeiserem jei safe gemer ge sofobilirim, angtane tonmwa bitis aa jei ne gaarabisnennerem afwer ga aa ge waraubili kotanabe. Ane jei seyafter aa je etamwenaram, ga aane nasipmini angtane imam-imam sanbakaiserem jebe. ¹² Angtane sanbaka imammana ga aa ge betwebili angtane sanbaka Yahudimanaiserem jebar enggalfe jei ula jewer ne tagalsif. Ula jei aa jes ne tagalsinirim ga aas: Jei doini unggwanfer ga aane gaarmini angtane tonmwa bitis aa jei ne gaarabisnennerem jebe, ¹³ ane ga aa ge gubili, "Aamei enggammer isa gunu, ’Angtane Yesus aa jei ne tikwebaatinennerem jei gwinem ge forobitye, ane Yesusem futunu ga aane komkomtaasini, jes galapserem ai ga ajama tana.’ ¹⁴ Ane Gubernur afa taterisi jeiserem jase sarbilirim, ai ga asa malin-malintene, jega aamei kabwaktala ijama domolyan." ¹⁵ Jepga angtane tonmwa bitis aa jei ne gaarabisnennerem doini jeiserem ga aane tebana, ane ga aane eyebili aa gemer ne nasbabisiwenaram. Jega jem temawer taterisi jeiserem gemer fala angtane Yahudiminibe, jamer nunu namwer aaiserem jep mese. ¹⁶ Jepga sebelas angtane Yesus aa jei ne tikwebaatinennerem ga aa ge sofobili otumu Galileyaminibe, Yesus aa gemer balbabilirim. ¹⁷ Yesus jame aa galap ne damtanaram, jei ga aane pujitene, jengga afwer jei teisyena enggame Jeiba Yesusam. ¹⁸ Jepga Yesus ga jela jem gwetmanabe, ane ga balbabili, "Uwa Sanbagiri Jei baabeta Jemna seyafter As mes gulbana Abe, taman waaken-girip ane ogiri aaiserem jebe. ¹⁹ Jega jem temawer gasa sofwe, anggwabura seyafter aa gemer ge nwinbenerem ogiri seyafter aaiserem jebe, ane ga isa towas-towastababili enggalfe, jei Ai As ga sene tikwebaatini. Angtane jeiserem ga isa baptistababili, bosna Uwamana, ane bosna Tanemana, ane bosna Mafnana Uwa Sanbagirmanaiserem jes mese. ²⁰ Ga isa towas-towastababili enggalfe, jei jewer ne eyebif seyafter Ai Ajes nasbabilirim. Sa sarbistaabon! Ai jeber-jeber ibar seyafter nesa gwena jamere ogiri aaiserem se tabanwena."