12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

Lukas

1

1 Ai taterisi aaiserem ai ip tulisulbono, Teofilus, angtane waakensusu. Angtane unggwanfer mesam ge unggwasbilint taterisi waakenfer jam ne tulisulfe, taterisi nei seyafter bunarsusfer nejesa towaswebilirim aa jei etamwenantam Yesusem temawer nem nenennabe. 2 Angtane gwanan nabala aa jei ne domolaram jelem nweme, seyafter Yesus aa jes eyebilirim, jei taterisi jeiserem Yesusem temawer angtanefe ga jes ne nasipmini. Ane jei Taterisi Waakena nep nes mes ne nasipminenne. Ane angtane unggwanfer jei taterisi jeiserem ga jes ne bilint jam tulistaabife. 3 Jes gamserem ai taterisi seyafter jeiserem ai amesam terelbilint, towaiwuluwer jamer tabanabo. Ane ai enggam ai gunu, jeba waakenam afa ai taterisi seyafter jeiserem isa jam as tulisulminirim ibe, daamfen-daamfenneme. 4 Ai taterisi jeiserem ai enggalf tulisulu aamei gam isa towaswena enggame, taterisi bunarsusfer aaiserem gwanan ibe is jes ne towas-towasulminirim, seyafter jeiserem jeba bunaram. 5 Gwanan Herodes aa galap gwenantam Rajafe ona Yudeya je, imam bosna ga Sakarya ga jep nwinint. Jei imam safna Abyamanaiserem ga jep kauna. Wini jemna bosna ga Elisabet; asal-asala jemnaiserem jes mese jeiba imamsam. 6 Sakarya ane Elisabet jei nawersamer waakenfer ge gwena Uwa Sanbagirem nwenabe. Jei hukumu Tuhanmana ane seyafter Tuhan aa jes bilirim, jei seyafter jeiserem waakenfer ga aa ge sarbili ane ga ge eyebili. 7 Jengga tane jemna fas, aam temawer Elisabetmana tane gola je mes ne matnebili, ane jei nawersamer baknauna. 8 Nunu nensa jeme, nunu safna Abyamanaiserem awelna aa galap ne gwebilirim Jena Uwa Sanbagirmana jebe, Sakarya jei awelna imamfe ga gwebili Uwa Sanbagirem tarnabe. 9 Jei aa jes ne eyebilirim jes galserem jeber-jeber sene eyebili ton towaiyeme bosna ga undian. Ane Sakarya ga aane destabana jei ton touya jeiserem jame aa galap ne gin-gintababilirim, ane Sakaryasmana ga jenbana. Jei ga aane destabana enggalfe, jei mwona waakenaiserem Uwa Sanbagirmana jep kautef, ane wili galserem ga aa gwalansini. 10 Jema jei awelna wili galserem jep gwalansif aa galap ne fityaram, Sakarya ga kawetena mwona jeiserem jebe, ane angtane uskambar sitawer aa jei ge betwebilirim sembayanga ga aane gwebana. 11 Gwanan jes galapserem malaikata Tuhanmana jena ga gweretal Sakaryaminibe, jei taasfolawer fina mejana wili galserem aa jep ne giranbaabisiwenaram jebe. 12 Sakarya jei malaikata aa galap damtanaram, jei ga aa bitbitwena, ane ga erne. 13 Jengga malaikata jeiserem ga bala, "Sakarya, ipsam ernerem! Uwa Sanbagiri sembayanga imna is mesam sarbabanant. Wini imna Elisabet jei se gerefa tane girtowai, ane tane jeiserem jemna bosna ga enggam is jenibene Yohanes. 14 Ini imna ga saaser-saasera, ini imna bunarsus saaser-saaserfersus se folbafa jem temawer. Ane angtane uskambar jei ini saaser-saaserfer sege folbamifi, tane jeiserem jame aa jep surnurum. 15 Uwa Sanbagiri Jei tane jeiserem awelna igsusu ga jep se gulbafa. Jei fo angguru afa fona aa jem ge mwalswebiwenaram jei fas jam telbiyen. Ene jemna udanabara galapserem, tane jeiserem jei se bugufswena Mafnana Uwa Sanbagirmanaiserem jeme. 16 Jei ga anggwabura Israel uskambar gase gwebabili, jega jei ga sege irfwebisi Tuhanminibe, Uwa Sanbagiri jemanserem. 17 Yohanes jei jese danna Tuhanfe, ane jei gase domola mafnana ane baabeta Nabi Eliya gamserem. Jei gas gwebabili uwa mese tane, jei gamjon waakenfer gase naawena daamfennaber. Jei gas gwebabili angtane jam eyebiyeneiserem Uwa Sanbagiri aa jes gam bilirim, jei ga sege irfwebisi nele ini bunarsusfer aa gam gunurum jebe. Jei angtane gas menetababisisi Tuhanfe." 18 Sakarya ga malaikata jeiserem ga aa tenebana, "Ai fomfom as towaswena taterisi aaiserem jeba bunaram? Ai ames bakswena, ane wini aman mesna jei mes bakswena." 19 Malaikata jeiserem ga aa tamawolbana, "Aiba Gabriyelsam. Ai Uwa Sanbagirem tarnap ayam fina. Jei ai aJeyam baftana ibar gam nasowef, ane ai isas nasibene taterisi waakena aaiserem. 20 Ams se sarba! Taterisi amna ai ajes bilirim, jeiserem se etamwefa nunu jam ajep folbanaram. Aamei as ijam tebayanaye, jega jem temawer aamei ijam domolyan jam nasowefe. Aamei mukmukf is etamwena jamere ai ajes bilirim jeiserem se etamwefa." 21 Nomkef jes jepserem angtane ga Sakarya ga aane fibana, ane jei ga aa ge bitbitwebili, ga ge gubili, "Jeje bafa Sakarya jei abakef mwona waakenaiserem Uwa Sanbagirmana jebe?" 22 Jame aa galap totintyerem, Sakarya jei jam nasoweyan jemnibe. Jei tafamfener atalbisini, jengga jei mukmukmer fina. Angtane ga aa ge towaswebili enggame, jeiba taterisi Uwa Sanbagirminiwer mesam domola, mwona waakenaiserem Uwa Sanbagirmana jebe. 23 Jame aa galap tabanwebanaram awelna jemna Uwa Sanbagirem Jenabe, Sakarya ga aa warautna jelem jenabe. 24 Jepga abakefyan jewer ga, wini jemna Elisabet ga udanabarswena. Ane jepga jei jenap fener ga nwinwena abaka ga enggammer muara ga tafna gwiri. 25 Jei ga gunu, "Tuhan Jei waakenfer eyebili amnibe. Angtane jei ai as mes ne imei-imeiwulu, aam temawer ai tane fas. Jengga Uwa Sanbagiri Jei as mes wirulbisini imei-imeiya amna." 26 Elisabet jei tanna jamer tingnabe muara ga enam, ane jepga Uwa Sanbagiri ga malaikata bosna Gabriyel ga aa baftana jam gwife tamna Nasaretwer, ona Galileya je. 27 Uwa Sanbagiri Gabriyel ga baftana yafonsiwir, bosna jemna Maria. Jeiba mesam gununt anggwa bosna Yusuf jam gaarfe. Yusuf jei ga asal-asala Raja Daudmana. 28 Malaikata jeiserem ga fortya Mariaminibe, ane ga bili, "Ini imna is saaser-saaserfer se falbili! Tuhan Jeiba ibaneram. Jei waakena Jelemanaiserem is mes golbili ibe." 29 Maria taterisi malaikatmana aa galap sarbilirim, ini jemna kabwakfer ga falbili. Jei jelem inip ga gunu, "Taterisi aaiserem ga fomfoma?" 30 Jengga malaikata Maria ga bili, "Ipsama ernerem Maria, aam temawer Uwa Sanbagiri Jei waakena Jelemanaiserem is mes golbili ibe. 31 Ams se sarba! Aamei is udanabarswefa, ane ga is gerefa tanna girtowai. Ane aamei bosna Jemna ga enggam is jenibene Yesus. 32 Jei gase etamwena Sanbagirfe, ane Uwa Sanbagiri angtane aa jes ne gaartenaram tagarsusube, Jei Tane jeiserem gase jenbene Tane Jelemanfe. Tuhan, Uwa Sanbagiri nemna, Jei Yesus gase etamtaasisi rajafe, Raja Daud galserem, asal-asala Jemna. 33 Jepga Yesus Jei gase etamwesa rajafe anggwabura Israel jamer abak-abaksus. Nunu Jei aa jep gwenaram anggwabura seyafter gemerserem jem Sanbakfe, nunu jeiserem jam barwebayan." 34 Maria jei malaikata jeiserem ga tenebana, "Taterisi aaiserem ga fomfom se etamwena? Ai gemerje anggwafar ajam ge tayan." 35 Malaikata jeiserem ga aa tamawolbili, "Mafnana Uwa Sanbagirmana se iretya imnibe, ane Uwa Sanbagiri angtane aa jes ne gaartenaram tagarsusube, baabeta Jemna ga is motolfa. Jega jem temawer Tane jeiserem jam se surnurum, ga sene bala Jei waakensususerem, ane ga sene jenbene Tane Uwa Sanbagirmana. 36 Se sarbistaabon Elisabet, ilem afelna jeiserem. Angtane jei enggam ge gubili jei tane jam gereyan, jengga jei safe baka jei mesam udanabarswenant muara ga enam. 37 Uwa Sanbagiri Jei seyafter aa jes gam bilirim, jeba gam etamwena." 38 Maria ga tamawolbana, "Ai awelna Uwa Sanbagirfe ayam gwebene. Aamei ijes bilirim amnibe, seyafter jeiserem se etamwena." Jepga malaikata jeiserem Maria ga mirultefala. 39 Abakefyan Maria galgala jemna ga menetababisini, ane tatarfer ga sofwa tamnabe ona Yudeya je, ona otumuboro. 40 Jei Sakaryam jenap kawetena, salamma ga aa golbili Elisabetfe. 41 Elisabet jam bitef sarbili salamma Mariamana, Elisabet tanna aa jes tingnaram ga aa gin-ginwena. Ane Elisabet Mafnana Uwa Sanbagirmana jamer bugufswebili. 42 Ane jei uskambar ga nasowena enggame, "Uwa Sanbagiri Jei waakenaiserem Jemna is mes golbili uskambar ibe, ane ini imna waakenfer is gase falbili. Waakenaiserem uskambar Jei Jam golbiyen wini nafsiserem jebe! Ane Uwa Sanbagiri waakena Jelemanaiserem jese gulbana Tane jeiserem ijep gernaram. 43 Ai ajam bitbitwebili, aam temawer waakenaiserem amnip mes etamwena, iye Tuhan amnaiserem jei amnip jela. 44 Ai ims towasulu, ai salamma imna jam bitef sarbili, tane amna ajes tingnaram jemna ini saaser-saaserfer folbana, ane jei ga aa gin-ginwena. 45 Ini imna ga is waakenfer se falbili, aam temawer aamei enggam imes taabili waakenfer, taterisi Tuhan aa jes bilirim jam etamwefe." 46 Maria ga gutena: "Ini amna Tuhan gam pujitene! Ai enggam ai bala, Tuhan Jei sanbaka! 47 Ini amna ga as saaser-saaserfer falbili, aam temawer Uwa Sanbagiri as mes waakenulsini. 48 - 49 Ai safe sanbakyan, Uwa Sanbagiri Jei ai ase waakenfer gaarabisnenne, ane ai awelna Jemna ai gweyibene. Uwa Sanbagiri Jeiba baabetabaram, ane Jei ap as unggwandusa gam eyebili. Ga jem temawer, namwer aa jei tawawenaram, anggwabura seyafter ga enggam sege gubili, Uwa Sanbagiri Jei waakenaiserem Jemna ap as mes golbili. Bosna Jemna ba waakensusum. 50 Uwa Sanbagiri Jei angtanes nesiktababili, ane ga batobaabili, angtane ini uskambar Uwa Sanbagirminibe aa jei ge folbaminirim, malam jutelap ane jem malam jutelap seyafter jes gemerserem. 51 Uwa Sanbagiri Jei baabetabara, ane Jei angtane jena aa jei ne tetenannaram, Jei ga aa ge irwalwebili. 52 Angtane sanbaka baabeta unggwanfer aa jei ne domolaram, Uwa Sanbagiri Jei baabeta jemna gas taayipmini, jengga angtane sanbakyan, ini aa jei ne onabertanaram, Jei gase kitultena. 53 Uwa Sanbagiri Jei unggwanfer waakena seyafter gemerserem se kitulmini angtane galgalyenaiserem jebe, jengga Jei angtane galgalabaraiserem se surbobili galgalyanmer. 54 - 55 Gwanan-gwanansus Uwa Sanbagiri ga asal-asala nemnaiserem ga jes balbabil, ’Ai Abraham ane jem ausan mesnaiserem Ai As nesiktababili, ga As batobaabili, jamer abak-abaksus.’ Uwa Sanbagiri ga sarstaabonsant Jei aa jes bilipmisintim, ane Jei ga nes mes batobaabili." 56 Maria jei Elisabetfar ge nwini jamere muara ga nawer-ningna, ane jepga jei gamjon ga warautna jelem jenabe. 57 Ga forobitye nunu Elisabetfe tane jewer geref, jei girtowai tanes gerna. 58 Angtane aa jei ge nwinbenerem Elisabetem gwetmanabe, ane jem teu mesna ga aane sarbili Tuhan Jei Jemna nesikteleiserem unggwanfer mes golbili Elisabetfe, ane ini jemna jebar saaser-saaserfer ga aa ge folbamini. 59 Tantowai jeiserem umuru ga enggammer nunu delapan, jei ga aa ge jalbili enggalfe tane jeiserem jam ne sunattaf. Jei enggam ge gubili, tane jeiserem enggam ne jenbef Sakarya, jetamana bosna gamserem. 60 Jengga ene jemnaiserem ga gunu, "Wowo, gamyan! Jei bosna enggam sa jenibene Yohanes." 61 Jei ga aane bili, "Elisabet, enggame im tewe bosna gam afa jam folbayan." 62 Jepga angtane jei Sakarya tafamfener ga aane atalbisini enggalfe jei gam towaswef tane jeiserem jemna bosna ga fomfom sa jenibene. 63 Sakarya jei kertasa ga aa bili, ane enggam ga tulisulbono, "Bosna jemna ga Yohanes." Angtane seyafter ga aa ge bitbitwebili! 64 Jes jeberserem Sakarya jei gamjon jep ga nasowena, ane Uwa Sanbagiri ga pujitene. 65 Angtane seyafter aa jei ge nwinbenerem jem gwetmanabe ga aa ge bitbitwebili, ane taterisi jeiserem ga aane nasbinenne ona seyafter gemerserem otumube ona Yudeya je. 66 Angtane seyafter taterisi jeiserem aa jei ne sarbilirim enggam ga aa ge gubili unggwanfer jelem inibe, "Tane aaiserem baf se etamwena?" Jei ga enggam ge towaswebili baabeta Tuhanmana ba jemnibam. 67 Sakarya, Yohanesem jeta, jei Mafnana Uwa Sanbagirmanaiserem Jeme mes bugufswebana, ane jei taterisi Uwa Sanbagirmana ga aa nasibenenne. Taterisi aaiserem Angtane nei jei waakentababilirim jem temawer ga enggam: 68 "Au, nei Tuhan, Uwa Sanbagiri anggwabura Israelmanaiserem nei waakenfer ganma pujite, aam temawer Uwa Sanbagiri Jei mesam jela enggalfe angtane Jelemanaiserem gam batobaabif, ane jei gam aftabunnuf. 69 Uwa Sanbagiri nebe nese gaarmini Angtane baabetsusu, ane Jei nei nes gam se waakentababisini. Angtane jeiserem jei asal-asala Raja Daudmana. 70 Gwanan-gwanansus jepserem Uwa Sanbagiri ga nasowel nemnibe. Jei taterisi Jelemanaiserem ga nabi ini tabalbalaiserem ga jep kitulmil. 71 Jei enggam gul, ’Ai isAs waakentababisi ginanggwana imnaiserem jemniwer, ane baabetawer angtane is jei ne nasbabilirim kakalmer.’ 72 Uwa Sanbagiri enggam gul asal-asala nemnaiserem jemnibe, ’Ai isAs nesiktababisi, ane Ai As sarbistaabonsa taterisi Ai ibe isa Ajes bilipminirim.’ 73 Uwa Sanbagiri Jei Abraham, asal-asala nemna, ga jes gaarstenanal taterisi jebe aa jes bilibelem. 74 Jei enggam bunar-bunarsusferam bal, Jei waakenfer nei nes tebabili baabeta ginanggwana nemnaiserem jemniwer, jega ini nemna nejam ge erebaamiyen nei Uwa Sanbagiri neJeba tikwebaatinennerem, 75 ane jega nei nejama eyebiyen, Uwa Sanbagiri aa jes bilirim, ’Enggam ijama eyebiyen.’ Ane Uwa Sanbagiri aa jes bilirim jam eyebife, nei ga jes nesa eyebili jamere nei nesa tere." 76 Ane Sakarya jem tane Yohanesem temawer ga enggam gunu: "Uwa Sanbagiri angtane aa jes ne gaartenaram tagarsusube, Jei aamei is gase jenbese nabi Jelemanfe. Aamei ise danna Tuhanminibe, aamei nele Tuhanmana ise sartasini. 77 Aamei angtane Jemnaiserem jep ga is nasipmini, Uwa Sanbagiri Jei etam-etama kapka jemna gase wirtabaipmini, ane ga jem temawer Jei angtane gase waakentababisini." 78 Ane Sakarya gamjon ga gunu, "Uwa Sanbagiri nemna, Jei nems nesiktababili, ini Jemna waakensusu, ane ga jem temawer Uwa Sanbagiri Jei Angtane taman waaken-giriwer nei nes Jei waakentababiliserem gase baftatna. Jei enggam gwere jam tauweyela gamserem. 79 Angtane jeiserem nafa se golmini angtane seyafter gemerserem aa jei naawenaram gwinibe, ane tere aa jei ne erebilirim. Ane Jei nei nes gas aftabifele nele samfer aa jei folbanaram." 80 Sakaryamana tane jeiserem ga aa unggwan-girswebana, ane mafnana jeman mesna ga baabetswebana. Jei taman dwisgirip nwini, jamere nunu Uwa Sanbagiri awelna aa jep bilibenerem jam towaiwulfe anggwabura Israelem tarnabe.

2

1 Nunu jes jepserem, angtane bosna Kaisar Agustus, jei ga jei nwini sanbakfe anggwabura seyafter aa jei naawenaram, negeri seyafter pemerinta Roma mes tebabili. Ane jei ula ga enggam baafulu, anggwabura seyafter aa jei naawenaram negeri seyafter jeiserem jebe, jei bosna jam baatulnonof, ane angtanes eterbif sensusup. 2 Sensus aaiserem ga gwanansus aa jes ne baatulnonolom, Kirenius aa galap gwenaram Gubernurfe, propinsi Siryaminibe. 3 Jepga angtane seyafter ga aa ge sofobili jelem tamnap, bosna gam baatulnonof. 4 Ga jem temawer Yusuf ga sofwa tamna Nasaret ona Galileya je, jamere tamna Betlehemminiwer ona Yudeya je. Betlehem jei tamna Yusufmana, aam temawer asal-asala jemna, jemna bosna Raja Daud, jep surul. 5 Yusuf ga aa ge sofna Mariafar, bosna gam batsotef. Maria ba mesam gununt Yusuf gaarfe. Jei udanabara, 6 ane jei Betlehemminip aa gemer ge nwinirim, ga forobitye nunu Mariafe Tanna jewer geref. 7 Jei girtowai Tanes gerna, usaber tane. Tane jeiserem ga taferna fene bubwalna jeme. Jepjon ga aa gaarantena ofo tumilgala tampa aa jep ne bunulmintonaram, aam temawer jei jena jam ge domolyan jep nwinfe, jena angtane aa jep ge forobuwetyaram. 8 Gwini jeiserem angtane afweraiserem dombana aa jei ne gerebaabisnennerem, jei domba jelemana ga aane gerebaabisnenne ona kakatarabe, tamna Betlehem jem gwetmanabe. 9 Malaikata Tuhanmana jena ga gweretana jemnibe, ane nafa Tuhanmana ga aa jertye jem eyebe. Jepga jei uskambar ga aa ge erebili. 10 Jengga malaikata jeiserem ga enggam balbabili, "Ipsama ernerem, aam temawer ai ajewer jela taterisi waakena gam gwirinmiyele ibe. Angtane seyafter gemerserem ini jemna saaser-saaserfer ga sege folbamini taterisi aaiserem jem temawer. 11 Gwini aaiserem ga jem surnu, tamna Raja Daudmana, Angtane iJei gam waakentaasinirim. Jeiba Kristusam, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif! Jeiba Tuhansam! 12 Aam ga enggam isa towaswena taterisi amna ba bunaram: aamei isa damtana Tantowai fene bubwalnem tafresili, ane Jei ga gerantena ofo tumilgalem tampatabe." 13 Aafer-aafer jena ga aane gweresona malaikata uskambar aa jei ge forobityerem taman waaken-giriwer, malaikata gwanan aa jei danatyaram jebar. Jei Uwa Sanbagiri ga aane pujitene, ane ga aane bala: 14 "Au, nei Uwa Sanbagiri nei ganma pujite uskambar; Uwa Sanbagiri Jei waakensusu; Jei taman tagarap nwini. Ane ogiri aaiserem angtane Uwa Sanbagiri aa jes nesiktababilirim, jemna ini waakenfer ga sege folbamifi." 15 Malaikata jeiserem aa galap ne mirtebitefalam jei, ane aa galap ge waraubilirim taman waaken-giribe, angtane dombana aa jei ne gerebaabisnennerem jei jena ga aane gitminenne, "Au, nei ganma sofwe tamna Betlehemwer. Ane nesa domola jep aa jei etamwenaram, Tuhan nebe nes jes bilipminirim." 16 Jei tatarfer ga aa ge sofobili, ane ga aa ge dorwebili Maria yo Yusuf jebar, ane Tantowai jeiserem aa jes gerantenaram ofo tumilgalem tampatabe. 17 Angtane dombana aa jei ne gerebaabisnennerem jei Tantowai jeiserem jame aa galap ne damtanaram, jei ga aane nasipmini angtanefe, taterisi malaikata aa jes bilipminirim Tane jeiserem jem temawer. 18 Angtane seyafter aa jei ne sarbisinirim taterisi angtane dombana aa jei ne gerebaabisnennerem jei aa jes ne nasbilirim, jei ga aa ge bitbitwebili. 19 Jengga Maria jei taterisi seyafter gemerserem ga waakenulsini jelem inibe. 20 Angtane dombana aa jei ne gerebaabisnennerem aa gemer ge waraubilirim ona kakatarabe, jei Uwa Sanbagiri ga aane pujitefele, seyafter aa jes ne sarbilirim, ane aa jes ne domolaram jem temawer. Seyafter gemerserem bunarsusfer jes gamserem malaikata gwanan aa gemer balbabilirim. 21 Jemna umuru nunu delapan jebe aa folbalam, Tane jeiserem ga aane sunattana. Ane jei ga aane bosetana Yesus, bosna malaikata aa jes ne bilibenerem, ene Jemna nalef jam udanabarsweyan. 22 - 24 Hukumu Nabi Musa aa jes tulistababilim ga enggam: Wini tane aa jes gam gernaram, jei Jena Uwa Sanbagirmana jebe jam kaweteyan. Jei jam gam fina nunu abakfer ga empat pulu, jepga Uwa Sanbagirem Jenap ga gam kawetena. Ane jep ga senai junu naura, afa jomor tanna naura Uwa Sanbagirfe gam gane giranbaibaasini. Nunu Maria junu jeiserem jem giranbaabisife jame aa galap falaram, Maria yo Yusuf jei ga Jena Uwa Sanbagirmana kota Yerusalemwer ga ge sofna enggalfe, junu jeiserem jewer gangge giranbaibaasif Uwa Sanbagirfe. Ane jei ga Yesus jewer ne aftawena enggalfe jei Uwa Sanbagiri jewer gane balf, "Tane aaiserem ba Imnam." Ba jeweram hukumu Tuhan aa jes bilim ga enggam ge baatultel: "Seyafter usaber tane, afa ga jei girtowai tane, aamei ga tane jeiserem Tuhanminip jam is ge aftawena, ane ga is ge bala, ’Tane aaiserem ba Imnam.’ " 25 Gwanan jes galapserem, angtane bosna ga Simeon kota Yerusalem je aa jei nwinirim. Jei angtane waaken, jei seyafter Uwa Sanbagiri aa jes bilirim waakenfer sarbili ane ga eyebili. Jei ga fina Angtane Uwa Sanbagiri bunarsus aa Jes balam Jam baftanafe enggalfe, anggwabura Israel gam waakentababisif. Mafnana Uwa Sanbagirmana Jei Simeonfaner. 26 Mafnana Uwa Sanbagirmana mes towastana jei, "Aamei nalef ijam teryen, gwanan aamei Angtane Uwa Sanbagiri bunarsus aa Jes balam Jam baftanafe, ifas damtana ilem nweme." 27 Mafnana Uwa Sanbagirmana Jei Simeon ga aftafala Jena Uwa Sanbagirmanaiserem jebe, ane ga kawetena. Gwanan jes galapserem, Yusufo Maria Yesus ga aa ge girinyele, ane ga aa ge gaataantena Jena Uwa Sanbagirmanaiserem jebe, jei Yesusfe jewer ge eyeibef, Hukumu Nabi Musa aa gam tulistaabilim. 28 Ane Simeon ga Tane jeiserem ga aa gaarwili tafame, ane jei Uwa Sanbagiri ga pujitene, ane ga bala: 29 "Namwer aas jepserem Tuhan, Aamei as Ijes bilibenentem mes etamwena. Namwer ini amna waakenfer ga as mes folbana, ane ai samfer as tere. 30 Nwena alemanaiserem jeme, ai Angtane jeiserem ames damtana, Jei angtane Imna aa jei waakentababisiliserem. 31 Angtane jeiserem Aamei Imes destabana, jega Jei anggwabura seyafter gemerserem gase batobaabili. 32 Angtane jeiserem Jeiba nafsam, jega anggwabura nafsiserem jei ga sege towaswebisi nele Imna. Ane Jei anggwabura Israelmana, angtane Imna, Jei gase kitultesa." 33 Tane jeiserem jem ene jeta ga aa ge bitbitwena, Simeon aa jes nasbilirim Tanna jeiserem jem temawer. 34 Simeon jei ga aa gitmini, "Uwa Sanbagiri waakenaiserem Jelemana ga is golmini." Ane Simeon jei Maria Tane jeiserem Jem ene ga bili, "Tane aaiserem Uwa Sanbagiri mesam destabana. Jei ogiri aaiserem jebe mesam fortya, ane jega jem temawer anggwabura Israelmana unggwanfer gase tamtamtababisi, ane anggwabura Israelmana unggwanfer afweraiserem Jam se waakentababisisi. Tane aaiserem Jeiba bweneta Uwa Sanbagirmana, jengga angtane unggwanfer jei taterisi kabwakfer ga sene nasbisi Jem temawer. 35 Jega jem temawer angtane ga sege towaswebisi, angtane unggwanfer jeiserem jelem inip aa jes ne bilirim. Ane ini imna se janbisi uskambar, jes galserem ini nombeyem gam is tegil." 36 Jep mese wini jep aa jei nwinirim, bosna jemna Hana. Jei tane Fanwelmana, asal-asala Asyermana. Jeiba nabisam, ane jei mes bakswena. Gwanan jepserem jei yafonsiwir, jei anggwana mes ne gula, ane ga jebar ge nwini tuju tahun. 37 Ane anggwana jemna jeiserem ga tere, ane jepga Hana ga gwena saamirawife jamere tahunu jemna delapan pulu empat, jei baksusu. Jei jeber-jeber Jena Uwa Sanbagirmana jep nwinwena. Gwinem ane gwerem jei Uwa Sanbagiri gam pujitene. Jei sembayanga gam gwebabana Uwa Sanbagirfe, ane nunu afweraiserem jei jam twenyan enggalfe Uwa Sanbagiri gam pujitefe. 38 Simon safe aa gemer tikwenaram nasoulawer, Hana ga jela jem gwetmanabe, ane jei ga Uwa Sanbagiri ga bala, "Asi samfer golbili". Jei jamer ga nasipmini Tane jeiserem jem temawer, angtane unggwanfer kota Yerusalemwer aa jei ge nwinbenennerem. Jei ga aa ge fibili, nunu Uwa Sanbagiri jei aa jem waakentababisiliserem. 39 Yusuf ane Maria ga aa ge tabanulu jam eyebilibe taterisi seyafter hukumu Tuhanmana aa jes bilim, jei ga aa ge waraubili jelem tamnap Nasaretwer ona Galileya je. 40 Tane jeiserem ga aa unggwan-girswena, ane ga aa baabetabarswena. Jei buguf tousaiserem jeme, ane Uwa Sanbagiri Jei waakena Jelemanaiserem se gulbana Jebe. 41 Tahunu jeber-jeber Yesusem ene jeta ga aa ge sofwena kota Yerusalemwer, masar Paskana gam gwebif. 42 Ane jepga Yesusmana umuru ga dua belas tahun, jei ga aa ge sofobili masarabe Yerusalem je, gwanan tahunu jeber-jeber gamserem. 43 Masara jeiserem aa barwenaram, jei Yerusalem ga aa ge firtetefala, jam ge waraubif jelem tamnabe, jengga Yesus Jei jeber nwini Yerusalem je. Ene jeta Jemna jam ge towasweyan enggame Yesus Jeiba Jam sofweyan. 44 Jei enggam ge gunu, Yesus angtane aa jei ge wofebilirim ba jebaram. Jei ga aa ge wofebili nunu ga daamfenna, jepga Yesus ga aa ge terelbene jem afelen mesna jem nenennabe, ane angtane afweraiserem jem tarnabe, 45 jengga jei Yesus jam ge damtayan. Jega jem temawer jei ga aa ge warauwa Yerusalemwer enggalfe Yesus jep gangge terelbef. 46 Nunu nawer-ningna jepserem Yesus ga aa ge damtana Jena Uwa Sanbagirmanaiserem jebe, Jei guru Yahudimanabar ge nwinbene. Jei gurus sarbabisini, ane Jei gurus teneba-tenebaabuwena. 47 Angtane seyafter ula Jemna aa jei ne saribaasinirim ga aa ge bitbitwebili, Jei guru aa jes nasbilirim waakenfer sarbili, ane Jei waakenfer tamawolbaabuwena. 48 Ene yo jeta aa galap ge damtanaram, jei mese aa ge bitbitwena. Ane ene Jemna ga gunu, "Am Tane, jeje bafa Aamei enggam gas Im eyeipmini abe? Im uwa ane ai, ini amna as jam ge esesweipmini Isa galap ge terelbenerem." 49 Yesus ga tamawolmini, "Jeje bafa aam ga Asim ge terelbene tampata nensaiserem jebe? Aamke ijangge towasweyan enggame, Ai jebas nwini Uwa Amnaiserem Jem jenabe." 50 Jengga jei jam ge saribeyen Yesus aa jes bilirim jemnibe. 51 Jepga Yesus ga jebaner ga aa ge waraubili tamna Nasaretwer, ane Jei ga aa sarbimini taterisi jemna aa jes ne bilirim. Taterisi seyafter jeiserem eneserem jelem inip ga aa waakenulsini. 52 Ane Yesus gamjon ga unggwan-girswena, ane tousaiserem Jemna gamjon unggwandwaswebana. Ane Uwa Sanbagiri ane angtane nafsiserem jes mese, jei Yesus jam ne nesiktene, gamjon unggwanfersus ga aane nesiktene.

3

1 Jepga Uwa Sanbagiri ula Jelemana Yohanesfe ga gulbana, tane Sebedeusmana. Yohanes jei dwisgirip nwini. Jes galapserem Kaisar Tiberyus jei mes nwini sanbakf anggwabura seyafter aa jei naawenaram negeri seyafter pemerinta Roma mes tebabili, tahunu abakfer ga enggammer lima belas. Angtane jem gwonabe sanbakfe aa jei naawenaram jei ga aas: Pontius Pilatus ba Gubernursam ona Yudeya je. Herodes jeiba sanbakam ona Galileya je. Filipus, aya Herodesmana, jeiba sanbakam ona Itureya yo Trakonitis je. Ane Lisanyas jeiba sanbakam ona Abilene je. 2 Imam sanbagirsususerem ga naura, bosna jemna ga Hanaso Kayafas. Jes jepserem Yohanes tane Sakaryamana aa galap nwinirim ona dwisgiribe, Uwa Sanbagiri ula Jemna ga gulbana Yohanesfe. Ane Uwa Sanbagiri Yohanes baftana enggalfe taterisi Jemna gam nasbinennef. 3 Jega jem temawer Yohanes ga sofwa ona seyafter Fona Yordan je. Jei taterisi Uwa Sanbagirmana ga nasipmini enggame: "Gasa irfwe etam-etama kapka imnaiserem jewer, Uwa Sanbagiri gasa onsoba, ane aamei ga isa baptiswena. Seyafter jeiserem ga isa eyebili, jega Uwa Sanbagiri etam-etama kapka imna is gam se wirtabaipmini, gamjon jeiserem Jei Jam sarbistaabonyan." 4 Ba enggamam Nabi Yesaya aa jes tulistaabilim Yohanesem temawer, bukunu Nabi Yesayamanaiserem jebe: "Angtane aasaje ona dwisgirip jenjenwena enggame, ’Nele Tuhanfe sa sartabaasi; nele nornorfer isa eyebana, Jei jep ayinyefe! 5 Usunu seyafter jepserem ona gase geresa, otum mese taaren-taarena gemerserem seyafter gase aarektababisi. Nele kaarker-kaakeraiserem gase nornortaasisi, nele tausir-tausiriserem gase aarektababisi. 6 Anggwabura seyafter gemerserem ogiri aaiserem jebe, jei ga sege anggabisi Uwa Sanbagiri Jei angtanes gase waakentababisi.’ " (Yesaya 40:3-5) 7 Angtane uskambar ga aa ge forobitye Yohanesminibe enggalfe gam baptistababif. Yohanes ga jei balbabili enggame, "Aamei angtane kakal-kakala enggala awas ufwai galserem, ane aamei angtane ga ima afaf-afaftababili. Etam-etama kapka imna anesus! Aamei syefer ga enggam ima gunu ilem inibe, ’Afa ai jam as baptiswenaram, Uwa Sanbagiri Jei ajam tamtamtayan.’ Jengga ai enggam isas balbabili, afa angtane jei jam irfweyanaiserem etam-etama jelemanaiserem jewer, Uwa Sanbagiri Jei angtane jeiserem gase tamtamtana. 8 Waakenfer isa eyebili, jega angtane ga sege towaswebili enggame, aamei etam-etama kapkaiserem jewer imesa irfwena. Aamei ga Abrahamem asal-asala, jengga ipsama towaiwulurum enggam gutefe ilem inibe, ’Aiba Abrahamem asal-asalam, jega jem temawer Uwa Sanbagiri Jei ai as jam tamtamtababiyen.’ Ai ims balbabili enggame, aamei etam-etamawer ga jam isa irfwena. Uwa Sanbagiri Jei aamei samfer is fasawolwili, ane Jei asal-asala Abrahammana tuna aaiserem jewer samfer se eyebaabili. 9 Denggana ga mes menetulsini tini sakarabaner gam bulunfe, ane tini seyafter gemerserem waakenfer jam teyanaiserem jes mese gase bulnu, ane gase fasawolwili tokwanabe. Jes galserem Uwa Sanbagiri Jeime mes menetulmisini angtane kapkaiserem aa jei ne eyebuwenaram jem tamtamtababife, ga tokwagirip gase fasawolwisi." 10 Angtane jeiserem Yohanes ga aane tenebana, "Afa ga jes gemerserem, Uwa Sanbagiri Jei nes bas bilipmini nejama eyebife?" 11 Yohanes ga tamawolbaabili, "Angtane fene naura jemanserem, ga jamigam syansona angtane fenyanaiserem jebar. Ane angtane tumilgalabaraiserem, ga jamigam syenulu angtane tumilgalyanaiserem jebar." 12 Angtane afweraiserem pajak doini aa jei gane tebabinennerem jei doini jeiserem pemerintafe ga gane kitulmini, jei mese ga aa ge forobitye Yohanesminibe enggalfe jam baptistababif. Jei ga aane tenebana, "Guru, Uwa Sanbagiri Jei abe bas bilipmini ajama eyebife?" 13 Yohanes ga tamawolbaabili, "Doini pemerinta aa jeber gam mwangbanaram angtaneminiwer, ga jeber isa tebabiwena. Angtane ijama afaf-afaftababiyen, ane doini jemniwer uskambar ijama tebabiyen." 14 Jepga ginanggwana afweraiserem jei mese ga aane tenebana, "Ane ai, Uwa Sanbagiri Jei abe as bas bilipmini ajama eyebife?" Yohanes ga tamawolbaabili, "Doini angtanemana kakalmer ipsama tebabuwenaram. Ane ipsama afaf-afaftababuwenaram angtane nafsiserem jem temawer, jega jei ga sene tamtamtababili. Se gute, ’Ini amna as saaser-saaserfer folbana gajini amnaiserem jebe.’ " 15 Angtane uskambar jeiserem enggam ge gubili, igiserem ga babitsim gase etamwena. Ane angtane ga aa ge towaiwebili enggam jam ge gubife jelem inibe, "Yohanes ke aas, jei ke Angtane Uwa Sanbagiri bunarsusfer aa Jes balam Jam baftanafe, ke jes?" 16 Jega jem temawer Yohanes ga balbabili, "Ai isa fom as baptistababili. Jengga Angtane sanbaksususerem amniwer Jei se fortya. Baabeta Jemna unggwandusa amniwer; tofgol newa Jemna ajam fersobaasiyen. Jei Mafnana Uwa Sanbagirmanaiserem aamei ga is Jem se baptistababifi, ane etam-etama imna Jei ga ti tokwana galserem ga gam sege taabisini jamer fus. 17 Jei angtane waakenaiserem ane angtane kapkaiserem Jei se waksosisi, makan anggwana gamserem jei gandumu aa gemer gam waakentababilirim; jei gandum tifin ane gandum tan ga jes gam waksosini. Jei gandum tanna se bokolntena ja towai jemna galgala jep bunuluserem; jengga gandum tifiniserem ga jese dutabaabisini, tokwana enggalaiserem jam ne kofneuyanaiserem jebe." 18 Yohanes ga angtane esoroltababili taterisi nenes-neneseme uskambar, ane jei Taterisi Waakena gam nasbili jemnibe. 19 Yohanes Gubernur Herodes ga aa uftana, jei Herodyas aa jewer gularam, wina ayanemana, ane ayana jei jam teryen. Ane Yohanes ga uftana jem temawer etam-etama kapkaiserem seyafter nensaiserem aa jes eyebilirim. 20 Jepga Herodes etam-etama kabwaksususerem ga eyebili: jei angtane ga baftabili Yohanes tebafe, ane jei Yohanes bwiyip ga gaataantena. 21 Yohanes angtane seyafter jep aaiserem gwanan aa galap baptistababilirim, jei Yesus mese ga aa baptistene. Yesus sembayanga aa galap gwebanaram, winsi ga aane bitnetini, 22 ane Mafnana Uwa Sanbagirmana ga iritya Jem sagabe, tifini ga junu senaya gamserem. Ane taterisi taman waaken-giriwer ga aane sarbili enggame, "Aameiba Tane Amnam, Ai Is Ajes nesiktenerem. Aamei ini Amna gam saaser-saasertabana." 23 Yesus awelna Jemna aa galap towaiwulurum, Jemna umuru ke enggam folbana tahunu tiga pulu. Angtane jener aa gam mwangbisinirim Jei tane Yusufmana, Yusuf jei tane Elimana, 24 Eli jei tane Matatmana, Matat jei tane Lewimana, Lewi jei tane Malkimana, Malki jei tane Yanaimana, Yanai jei tane Yusufmana, 25 Yusuf jei tane Matikamana, Matika jei tane Amosmana, Amos jei tane Nahummana, Nahum jei tane Heslimana, Hesli jei tane Nagaimana, 26 Nagai jei tane Matmana, Mat jei tane Matikamana, Matika jei tane Simeimana, Simei jei tane Yosekmana, Yosek jei tane Yodamana, 27 Yoda jei tane Yohananmana, Yohanan jei tane Resamana, Resa jei tane Serubabelmana, Serubabel jei tane Seyaltyelmana, Seyaltyel jei tane Nerimana, 28 Neri jei tane Malkimana, Malki jei tane Adimana, Adi jei tane Kosammana, Kosam jei tane Elmadammana, Elmadam jei tane Ermana, 29 Er jei tane Yesuamana, Yesua jei tane Eliyesermana, Eliyeser jei tane Yorimmana, Yorim jei tane Matatmana, Matat jei tane Lewimana, 30 Lewi jei tane Simeonmana, Simeon jei tane Yehudamana, Yehuda jei tane Yusufmana, Yusuf jei tane Yonammana, Yonam jei tane Elyakimmana, 31 Elyakim jei tane Meleyamana, Meleya jei tane Minamana, Mina jei tane Matatamana, Matata jei tane Natanmana, Natan jei tane Daudmana, 32 Daud jei tane Isaimana, Isai jei tane Obetmana, Obet jei tane Boasmana, Boas jei tane Salmonmana, Salmon jei tane Nahasonmana, 33 Nahason jei tane Aminadabmana, Aminadab jei tane Adminmana, Admin jei tane Arnimana, Arni jei tane Hesronmana, Hesron jei tane Peresmana, Peres jei tane Yehudamana, 34 Yehuda jei tane Yakubmana, Yakub jei tane Isakmana, Isak jei tane Abrahammana, Abraham jei tane Teramana, Tera jei tane Nahormana, 35 Nahor jei tane Serugmana, Serug jei tane Rehumana, Rehu jei tane Pelegmana, Peleg jei tane Ebermana, Eber jei tane Salmonmana, 36 Salmon jei tane Kenanmana, Kenan jei tane Arpaksadmana, Arpaksad jei tane Semmana, Sem jei tane Nuhmana, Nuh jei tane Lamekmana, 37 Lamak jei tane Metusalamana, Metusala jei tane Henokmana, Henok jei tane Yaretmana, Yaret jei tane Mahalaleyelmana, Mahalaleyel jei tane Kenanmana, 38 Kenan jei tane Enosmana, Enos jei tane Setmana, Set jei tane Adammana, ane Uwa Sanbagiri Jei Adam ga Jei eyebal.

4

1 Yesus aa galap warautnaram fona Yordanwer, Jei buguf Mafnana Uwa Sanbagirmanaiserem Jeme. Mafnana Uwa Sanbagirmana Jei Yesus danabana jamer taman dwisgir tetenaiserem jebo. 2 Jebe bawasa Yesus ga unggwasbana nunu abaka ga enggammer empat pulu. Nunu jes gemerserem, Jei apgal jigala afa Jam tumilyen, jega nunu jeiserem aa barwebanaram, Jei wisi ga folbana. 3 Bawasa ga Yesus enggam bala, "Afa Aamei Tane Uwa Sanbagirmanaye, tuna aaiserem jese balbabi tumilgalfe gangge etamwebi." 4 Yesus ga tamawolbana, "Taterisi Uwa Sanbagirmanaiserem jep ga enggam baatultel: ’Angtane tumilgalem fener jam gweyan.’ " (Ulangan 8:3) 5 Ane jepga bawasa Yesus ga aftafala tampata tagarabe, ane tatarfer nwena gam nwe tuksolam galserem, bawasa ga Yesus ga gam saasini tamna seyafter ogiri jeiserem jebe. 6 Ane jei ga Yesus ga enggam bala, "Uwa Sanbagiri seyaftersus aaiserem abe as mesam kitulbono, ane ai ga as gulbana angtane ana jes destabanaram jebe. Baabeta angtane sanbaka seyafter ogiribe aa jei ge nwinbenerem, ane apgal jigala angtane sanbakmana, seyafter jeiserem ai Is gam as kitulbono Ibe. 7 Afa Aamei somwan dumem nwini, ams Is pujitene, ai seyafter aaiserem Ibas kitulbono." 8 Yesus ga tamawolbana, "Taterisi Uwa Sanbagirmanaiserem jep ga enggam baatultel: ’Angtane jei Uwa Sanbagiri tefner gam pujitene! Ane Uwa Sanbagiri aa jes bilirim, ga jetefener igam eyebili!’ (Ulangan 6:13) Ga jem temawer Ai is Ajam pujiteyen." 9 Jepga bawasa Yesus ga aftafala jamere kota Yerusalemo, ane ga gaaranswena Jena Uwa Sanbagirmanaiserem tampata tagarsususerem jebe. Ane Jemnip ga gutena, "Afa Aamei Tane Uwa Sanbagirmana, se janon aawer, 10 aam temawer Taterisi Uwa Sanbagirmana jep ga enggam baatultel: ’Uwa Sanbagiri malaikata Jemna se balbabili Im temawer, Is jei ne gerebaasnenefe waakenfer.’ (Mazmur 91:11) 11 Ane gamjon jep enggam baatultel: ’Malaikata ga Isene tebaniwili tafame, jega tufa Imna Ijam juteyan tunabe.’ " (Mazmur 91:12) 12 Yesus jei bawasa ga tamawolbana, "Taterisi Uwa Sanbagirmana jep ga enggam baatultel: ’Angtane jei Uwa Sanbagiri jam unggwasbayan!’ " (Ulangan 6:16) 13 Bawasa Yesus aa galap tabantanaram Jam unggwasbalawer nenes-nensa seyafteraiserem, jei Yesus ga mirtetefala, jamer nunu gamjon nensaiserem ga jem waraufaltya. 14 Ane jewer ga Yesus ga warautna ona Galileya je, ane baabeta Mafnana Uwa Sanbagirmanaiserem Jei Jebaner. Taterisi seyafter Jelem temawer ga aane gwirinbenenne ona seyafter jep gemerserem. 15 Jei towas-towastababili jena angtane Yahudimana aa jep ge betwebuwefaram jebe, ane angtane seyafter ga aane balbabili taterisi waakena Yesusem temawer. 16 Yesus ga sofwa tamna Nasaretwer, tamna Jei aa jep unggwan-girswenaram. Gwanan gemerserem ga gemer, nunu Sabat, Yesus ga gwina jena angtane Yahudimana aa jep ge betwebuwefaram jeiserem jebe. Ane Jei ga irwa, Taterisi Uwa Sanbagirmana Jam gerabistefe. 17 Ane bukunu Nabi Yesaya aa jes tulistaabilim, ga aane gulbana Yesusfe. Jei bukunu fwiresili jeiserem ga ferolsini, ane ga domola ayata enggam aa jep tulistaabilim: 18 "Uwa Sanbagiri As mes destabana, Ai Taterisi Waakena aaiserem gam nasbinennef angtane galgalyenaiserem jebe. Ane Jei Mafnana As mes baafulbono, ane Mafnana jeiserem Jei Abaner. Jei Ams baftana, jega Ai angtane gam As towas-towastababili enggame: angtane aa jes ne tebabilirim, ga sene aftabunsu; angtane nwe kofa, ga sege anggabisisi; ane angtane aa jei gam naawenaram angtane nensaiserem baabeta jemnaiserem jem gwonawer, jei ga sene aftabunsu. 19 Ane Ai gam towastababif enggame nunu Uwa Sanbagiri jem foryalaiserem angtane Jelemana gam waakentababisife mes foryal." (Yesaya 61:1-2) 20 Yesus bukunu jeiserem gamjon ga egwaiwulsini, ane gamjon ga gulbana angtane awelna jep aa jei gwebilirim jebe. Ane gamjon ga nwintena enggalfe angtane gam towas-towastababif. Angtane seyafter aa jei ge nwinbenerem jena jeiserem jebe, jei Yesus ga aane gerebana. 21 Ane Jei ga aa balbabili, "Taterisi Uwa Sanbagirmanaiserem Nabi Yesaya aa jes tulistaabilim, namwer aaiserem bunarsus mes etamwena, aamei igalaba sarbilirim." 22 Angtane seyafter jeiserem waakenfer ge nasbawena Yesusem temawer, ane ga aane bitbitwebili ula waakenaiserem Jei aa jes nasbilirim. Jei nabi galserem gam nasowena. Ga aane balbabili, "Angtane aaiserem maga tane Yusufmana! Jeje fomfoma enggam gase nasouna?" 23 Yesus ga balbabili, "Ai bunarsus tousa aamei ga taterisi aaiserem ga aamei As isa bala: ’Doktor in inater is waakentana.’ Jemna igiserem ga enggam, afa Aamei bunarsusfer nabiye, se eyebi gamjon Ilem tamnap, seyafter jeiserem ajesa sarbilintim Ijes eyebilintim kota Kapernaum je." 24 Yesus gamjon ga balbabili, "Ai bunarsus ims towas-towastababili, nabi afa fas jam ne tebayan tamna jelemanaiserem jebe. 25 Amsa sarbasi! Angtane jei Nabi Eliya jam tebayan jelem onabe, ona jeiserem bosna Israel. Gwanan Nabi Eliya aa galap gwelam ogiri aaiserem jebe, arouwa jam nyenyan abaka enggammer tahunu ga tiga setenga. Angtane uskambar ona Israel jebe seyafter gemerserem, jei ga aa ge terbil aam temawer tumilgala fas. Jes galapserem saamirawi unggwanfer ona ga jep. 26 Safe gam, Uwa Sanbagiri Jei Eliya Jam baftayan saamira wini daamfennaiserem ona Israel jemnip, jengga Jei Eliya gam baftal saamira wiminip tamna Sarfat, ona nafsi Israelminibe, bosna ona Sidon je. 27 Ane jes galserem angtane jei Nabi Elisa jam tebayan jelem onabe, ona jeiserem bosna Israel. Gwanan Nabi Elisa aa galap gwelam ogiri aaiserem jebe, angtane uskambar ona Israel je, ga bwerna unggwandusa gane domola tifinibe. Safe gam, Elisa angtane daamfenna ona jep, jei jam waakensweyan. Jengga jei angtane bosna Naman tefner, ona nafsi jep, bosna Sirya je, jei waakensona." 28 Angtane seyafter aa jei ge nwinbenerem jena angtane Yahudimana aa jep ge betwebuwefaram jebe, jei ula Yesusmanaiserem aa galap ne sarbilirim, jei ga aa ge kakalswebili. 29 Jei Yesus jam ne munbof, ga aa ge irwebili, ane Yesus ga aane baftafala tamna sitawer. Ane Yesus gane aftafala otum bolabe, otumu tamna jep nulnaram. Jei enggam ge gubili Yesus ma dantante ona usunuwer. 30 Jengga Yesus Jei angtane nenennap wofena, ga sofwa. 31 Jepga Yesus ga jutetya kota Kapernaum, ona Galileya je. Nunu Sabateme, nunu angtane Yahudimana aa jem ge nwinbisiwefaram, Yesus ga angtanes towas-towastababili. 32 Yesus aa galap towas-towastababilirim, angtane seyafter jeiserem ga jam ge bitbitwebili, aam temawer Yesus Jei enggam towas-towastababili angtane baabetabara galserem. 33 Jena angtane Yahudimana aa jep ge betwebuwefaram, angtane aasaje ga jep nwini bwat kapkaiserem aa jei kabwanaram. Jei ga jam gwarenwena uskambar, 34 "O Yesus angtane Nasaretmana, Aamei Ibaf fortya? Aamei abe ase basIs eyeipmini? Aamke enggalf Im fortya ai as Igam kabwaktababif? Ai amsa towaswena Aamei nansa. Aamei Angtane ini tabalbalsusu aa jemanem folbanaram, Uwa Sanbagirminiwer Ijei jelaram." 35 Yesus bwat kapka jeiserem enggam jes uftana, "Se tikwe! Jase totini angtane aaiserem jemniwer!" Jes jepserem bwata kapka angtane jeiserem ga baftana jamer titikip ga jena, angtane seyafter jeiserem jem danggonawer. Ane ga totintye, apgal jigala afa jam eyebiyen angtane jeiserem jemnibe. 36 Angtane seyafter jep jeiserem jei ga aa ge bitbitwebili, jepga jena aane gitminenne, "Jemna ula ga fomfoma? Angtane aaiserem Jem baabetem bwat kapkaiserem ga jamfener surbili jam totinyefe, ane bwat kapka jeiserem ga aa ge sarbili, ane ga aa ge tobitintye!" 37 Ane taterisi Yesusem temawer ga aane gwirinbenenne ona seyafter jep gemerserem. 38 Yesus ga jena angtane Yahudimana aa jep ge betwebuwefaram jeiserem ga mirultefala, ga sofwa Simonem jenabe. Simonem munau tane jei bwernabara, tifin sarsar uskambar bwerai falbili. Ga aane bala Yesus jam waakenulfe. 39 Yesus ga gwina, ga fyatetna wini jeiserem jem tarnabe, ane tifin sarsara jeiserem ga suribili. Jepga tifin sarsara jemna ga barwebili. Wini jeiserem tatarfer ga irwena, ane tumilgala ga kitulmini angtane jeiserem jebe. 40 Ane gwere ga jam kawetenaf gwena, angtane bwerna nafis-nafsiserem ga aane aftabifelwetya Yesusminibe. Yesus tafna daamfen-daamfenneme ga tosoniwili angtane seyafter jeiserem jem sagabe, seyafter ga aa ge waakenswebili. 41 Bwat kapkaiserem jes mese ga aa ge tobitintye angtane unggwanfer jeiserem jemniwer. Jame aa galap ge tobitintyerem, jei ga aa ge gwarenbuwena, "Aamei Tane Uwa Sanbagirmana!" Jengga Yesus ga uftabili, "Aamei ipsama nasowenaram!" Yesus jes gemerserem gam ga uftabili, aam temawer bwat kapka jeiserem jei mes ge towaswebili Yesus Jeiba Kristus, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. 42 Gwinibenersus, Yesus Jei tamna jeiserem ga mirtetefalsa, ane ga sofsa ona taman tetenabe. Angtane Yesus ga aane terelbene. Jei Yesus jame aa galap ne damtanaram, jei enggam ge gubili, "Yesus as Ijam mirtebitefalyan." 43 Jengga Yesus ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Taterisi Waakena nunu jeiserem jem temawer ga As nasipminenne, taman-tamna nensaiserem seyafter gemerserem jes mese. Ga jem temawer Uwa Sanbagiri As baftannu ogiri aaiserem jebe." 44 Ane Yesus gamjon ga nasipmini jena angtane Yahudimana aa jep ge betwebuwefaram, ona Yudeya seyafter gemerserem jebe.

5

1 Nunu daamfenna jeme, Yesus Jei fobogana Genesaret ga jem eyep fina, ane angtane unggwanfer jena ga aane bafsona jamere Yesusem tarnabo enggalfe Taterisi Uwa Sanbagirmana gam ne sarbisif. 2 Jei atdwas naura ga foboga eyep domsona. Angtane jigal aa jei ne terelbaabilirim jei atdwas nauna jeiserem ga aane mirsotefala, ane jei jalna jelemanaiserem ga jes ne wirtabaabili. 3 Yesus ga juwili atdusa daamfennaiserem jebe, atdusa jeiserem ga Simonmana. Jei Simon ga bala, "Atdwas aaiserem jase baafulwi, bijautowaifer tufawer." Jepga Yesus ga nwintena atdusa jeiserem jebe, ane angtane unggwanfer ga towas-towastababili. 4 Jame aa galap tabanulurum jam towas-towastababilibe, Jei ga Simon ga bala, "Enggam se gwebisowe fobogana giriwer. Jalna imna jep ga isa aftabaabuntetna enggalfe jigala jep ga sege tarbitini." 5 Simon ga tamawolbana, "Uwa, ai awelna gwineme uskambar masef aya gwebisi, jigala afa jam ge tarbitiyen! Jengga aam temawer ase Aamei bala, sya, ai jalna gamjon ga ajam aftabuntena." 6 Ane jeiserem ga aane eyebili. Jei jigala uskambarsus ga aane damtabili, jamere jalna jelemana ga aa towaiwemini jam ne bitfarwefe. 7 Jega jem temawer jei jelem afelen mesna awelna seyafter aa jebar ne gwebiwenaram atdusa afelnaiserem jewer, jei tafamfener ga aane jenbebuwili jam ge jalbif enggalfe jei gam ne batobaabif. Ane jelem afelen mesna jeiserem ga aa ge jalbili, ane jei seyafter atdwas nawana jeiserem ga aane boksona jigaleme, jamer fata. Atdwas nauna jeiserem ga aa ge towaiwena jam ge nwintefe. 8 Simon jame aa galap domolaram jeiserem, jei ga nwintena somwan dumeme Yesusem danggonawer, ane ga gutena, "Ai ajase mirtetefal, Tuhan! Ai angtane etam-etamabara." 9 Simon ane angtane seyafter jebaner atdusa jeiserem ga aa ge bitbitwebili, jigala uskambarsus aa galap ne damtabilirim jei aa jes ne towanbilirim. 10 Angtane awelna aa jebar ne gwebilirim, Yakobus ane Yohanes, tannawan Sebedeusmana, jei mese jeime aa ge bitbitwena. Yesus Jei Simon ga bala, "Ipsam ernerem! Aamei ga namwer is towaiwena enggalfe, aamei angtanes towanbife jega jei Ai As gam sene onsobana, jigala igemer towanbinennerem." 11 Simon ane jelem afelen mesna jebar, atdwas jeiserem ga aane deksostena tufabe, jepga jei seyafter ga aane mirtebitefala, ane Yesus ga aane onsobana. 12 Yesus aa galap nwinirim kotana daamfennaiserem jebe, jep ga angtane tifin bwernabaraiserem ga fortya; jemna tifini ga jamer mat bubwame. Yesus jame aa galap damtanaram, jei jener ga nwintena somwan dumeme, ane jei Yesus ga balbalwena enggame, "Uwa, afa Aamei jam Is gunurum, Aamei baabetabara ams Is waakentana!" 13 Jewer ga Yesus Jei tafna ga tetena, ane ga tosobaantena angtane tifni bwernabara jeiserem jem sagabe. Ane Yesus ga bala, "Sya, se waakenswe!" Jes jeberserem tifin bwerna jemna ga waakenswebana. 14 Yesus Jei angtane jeiserem ititmer ga bala, "Aamei ijam nasbineneyen taterisi aaiserem angtane nensaiserem jebe! Jengga jase sofwe imamminip, jeiba angtane taterisi angtanemana Uwa Sanbagirfe aa jei gwirinbefelwenaram. Jei aamei jam is damtanaram enggame aamei imsam waakenswena. Jepga is eyebili Nabi Musa fwater aa gemer nasbilim: se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame aamei bunar-bunarsusfer imsam waakenswena." 15 Jengga taterisi Yesusem temawer aaiserem, ga aane nasbinenne jamer bijau-bijausus. Angtane unggwanfer ga aa ge forobitye Jemnibe enggalfe jei gane sarbif, ane enggalf jam waakentababif mese bwerna jelemanaiserem jewer. 16 Jengga Yesus Jei jeber-jeber sofwena tampata tamanfennaiserem jebe, ane Jei jep ga sembayanga ga gam gwebana. 17 Nunu daamfenna jeme Yesus Jei angtane aa galap towas-towastababilirim, angtane safna Farisimana afwer, ane guru-guru Hukumu Nabi Musa aa jes tulistababilim, ga jep ge nwinbene. Jei kota Yerusalemwer ge jalbili, ane ona Yudeyawer, ane tamna jeber-jeber ona Galileya je ga jewer ge jalbili. Baabeta Tuhanmanaiserem jei Yesusminip, ane jem temawer Jei angtane bwernabaraiserem jem gam waakentababili. 18 Jes galapserem angtane ga aa ge jalbili angtane muli-mulni ga aane girinyele, ga tikarap tantena. Jei angtane jeiserem jam girinfelf jenabe, jega gam gaarantefe Yesusem tarnabe. 19 Jengga angtane jebe uskambarsus, jei jam ne katanteyan. Jega jem temawer jei ga aane tauna ja bolabe. Jena jeiserem aareka, ane bolawer ga tonem ne eyebili. Angtane ga tuna jeiserem ga aane kwirulsini, ane angtane muli-mulni jeiserem ga jelem titik touyap tantena jebaner ga aane katantetya Yesusem tarnabe, angtane uskambar jeiserem jem nenennabe. 20 Yesus Jei tousa enggame, "Angtane aaiserem jei As mes ne tebana ginggitfer." Jepga Yesus angtane muli-mulni jeiserem ga bala, "Am tane, etam-etama kapka imnaiserem Ai is Ames wirulbono." 21 Guru-guru Hukumu Nabi Musa aa jes tulistababilim, ane angtane safna Farisimana ga aa ge towaiwebili jen jena jam ge gubitefe jelem inibe, "Ai nansa Angtane aaiserem aa Jei nasounaram Jena aa Jei gaartenaram Uwa Sanbagiri gamserem game? Angtane afa fas etam-etama kapka jei wirulfe, jengga Uwa Sanbagiri Jentowaifener Jei etam-etama angtanemana gam wirulbono!" 22 Yesus ba mesam towaswena jei aa gam ge gubilirim jelem inibe, ane Jei ga aa balbabili, "Jeje bafa aamei gam ga ima gunu ilem inibe? 23 Masef unggwasbiliserem ga fwersa Ai angtane muli-mulinfe jes eyeibefe: afa Ai enggam jam As gunurum, ’Etam-etama kapkaiserem imna is Ames wirulbono.’ afa Ai enggam jam As gunurum, ’Se irwe, ga is wofena!’? 24 Ai nawersamer samfer As eyemini. Namwer aas jepserem Ai ibe isa Ajam gwerauwulmif enggame Ai Tane Angtanemana, baabeta Amna uskambar ogiri aaiserem jebe enggalfe, angtanemana etam-etama kapka seyafter Ajem wirtabaipmife. Jega aamei jeiserem gam isa towaswebili, Ai angtane aaiserem As waakentana." Jepga Yesus ga bala angtane muli-mulni jeiserem, "Ai ims bala, jas irwe, tikar imna ga is tetena, ane ga is warauwa ilem jenabe!" 25 Ane jes jeberserem angtane jeiserem ga irwena, angtane seyafter jeiserem jem tarnabe, ane tikar ga tetena gwanan aa jep tanaram, ane ga warauwa jelem jenabe Uwa Sanbagiri ga pujitene. 26 Seyaftersus ga aa ge bitbitwebili, ane Uwa Sanbagiri gane pujitene. Ane ini ereleber, ga aa ge gubili, "Nei bwembwema waakensusu nei jesa domolaram nunu namwer aaiserem!" 27 Jeiserem taban, Yesus ga totintye, ane angtane ga damtana, bosna ga Lewi. Jeiba angtane pajak doini aa jei gam tebabilirim enggalfe pemerintafe gam kitulmini; jei ga jelem kantorap nwini. Yesus jei ga aa bala, "Aamei Ams onsoba!" 28 Lewi ga irwena, ane seyafter jeiserem ga mirtebitefala, ane Yesus ga onsobana. 29 Jepga Lewi ga masara unggwandusa ga eyebili jelem jenabe, Yesusfe. Angtane pajak doini aa jei gane tebabinennerem jeme uskambar, ane angtane nenes-nensaiserem jei seyafter Jebaner ne dwena. 30 Jengga angtane safna Farisimana afweraiserem, ane guru taterisi Farisimana aa jei ne towas-towastababuwenaram, jei angtane Yesus aa Jei ne tikwebaatinennerem ga aane balbabili ini kabwakeme, "Jeje bafa aamei seyafter jebaner ga ima twena, ane fona ga ima telbebili, angtane pajak doini aa jei gane tebabinennerem ane angtane etam-etamabara? Gam je kapka!" 31 Yesus ga tamawolbaabili, "Angtane bwerayanaiserem jei jam gwiyan doktorminibe, jengga angtane bwernabara tefner jei ga gam gwina. 32 Ai ke enggalf Ai fortya angtane jena enggam aa jei gane gitminirim, ’Maa, ames waakenswena, etam-etama amna fas.’ gam ke jes jenbebif. Jengga Ai enggalf Ai fortya, angtane etam-etamabaraiserem jei jam ge tikwebif jelem etam-etamawer, ga jes jenbebif, jega jei etam-etama jelemanaiserem jewer ga jam ge tikwebif, ane jei ga As ne onsobana." 33 Angtane Yesus ga aane bala, "Angtane Yohanes aa jei ne tikwebaatinennerem, ane angtane safna Farisimana aa jei ne tikwebaatinennerem ga galap-galap jam ne dwenyan enggalfe Uwa Sanbagiri gam gane pujitefe, ane jei sembayanga gane gwebana. Jes gamserem je waakensusu. Jengga angtane Is jei ne tikwebaatinennerem ga jam ne dwena, ane fona ga aane telbebili, nunu jeber-jeber gemerserem. Jeiserem kapka. Angtane nafsi jei waakena gane eyebili, jeje bafa angtane Is jei ne tikwebaatinennerem, jei waakena gam jam ne eyebiyen?" 34 Yesus ga tamawolbaabili Jelem temawer, "Masar anggwana wini jep gam gularam, anggwana wini jei golfe jei jebar aa gemer ge nwinbenerem masara jeiserem jebe, angtane masara jeiserem aa jei ne onsobilirim, bunarsus jei ga sene dwena ini saaser-saasermer. 35 Jengga se fortya nunu anggwana wini jei gulaiserem, anggwana jeiserem ginanggwana jemna ga sene gaariufenne jemniwer. Jes jepserem jei ga jam ne dwenyan, aam temawer ini jemna jam ge jenbamini, ane jei sembayanga gane gwebana Uwa Sanbagiri jam pujitefe. Jes gemerserem aaiserem jegme gemer, angtane aa jei ne tikwebaatinennerem Amna, afa Ai jebaner Agma nwini aafe, jei jamer dwenwena nunu jeber-jeber ini saaser-saasermer." 36 Jepga Yesus ga jebe seisya taterisi aaiserem ga nasipmini, jega angtane sege towaswebili jei taterisi waakena ibirmiserem Yesus aa jes nasbilirim, jei jam ne dupdupbulyon osiri fwatermanaiserem jebar, taterisi angtane safna Farisimana ane guru aa jes ne nasbilirim. Seisya taterisi ga aas: "Angtane afa fas jei bajunu ibirmi jam bitultefe enggalf, bajunu fwatermana jem waakensof. Afa ga gam, bajunu ibirmi jeiserem jam gam bitsosinirim. Ane sofbiti ibirmi jeiserem jei numu daamfenyan, bajunu fwatermanaiserem jebar. 37 Ga jes gamserem aaiserem jegme gemer: Angtane afa fas fo angguru ibirmi jam suwulntefe, kambing tifin fon fwatermanaiserem jebe. Ga aam temawer fo angguru ibirmi jeiserem ga jese gwebili kambing tifin fon jeiserem ga sene bitnetini, fo angguru gase suwetini, ane kambing tifin fon jeiserem gase kabwakswena. 38 Wowo, gamyan! Jengga enggam, fo angguru ibirmi ga kambing tifin fon ga ibirmiter gane suwulntena, ga jep gane bokola. 39 Jes gemerserem aaiserem jegme gemer, angtane fo angguru fwatermana aa jei telbilirim, jei bai fo angguru ibirmiserem jam telbife. Jes galserem, angtane osiri fwatermanaiserem aa jei ne onsobilirim, jei bai tatarfer taterisi ibirmi Amnaiserem jam ne onsobife."

6

1 Nunu Sabateme, nunu angtane Yahudimana aa jem ge nwinbisiwefaram, awelna jam ne gwebiyen, Yesus ane angtane Jei aa jei ne tikwebaatinennerem ga aa ge wofebili gandum makan nenennabe. Angtane aa jei ne tikwebaatinennerem wisi ga aa ge folbamini, ane jei gandumu ga aane fulu, gandumu jeiserem tafam ga aane tilbebili, tifini ga aa ge janbili, ane igiserem ga aane tombaabili. 2 Angtane safna Farisimana afweraiserem ga aane damtabili, ane ga aane tenebaabili, "Nunu Sabateme nei awelna nejama gwebiyen, jengga aamei gandumu ga ijema fulu. Aamei gam ijewera eyebilirim, aamei awelna ga ijema gwebili, Hukumu Nabi Musa aa jes tulistababilim ga jes ima ayebili. Jeje bafa aamei etam-etama kapka jes gamserem ga ima eyebili, nunu Sabateme?" 3 Yesus ga tamawolbaabili, "Aamke gemerje ijama gerabisteyan nem asal-asala Raja Daud aa jes eyebilim, jei ane jem afelen mesna wisi aa galap ge folbamilim? Aamke ijama towasweyan? 4 Jei ga aa ge kabwitel Jena Uwa Sanbagirmanaiserem kota Nobwer. Ane Imam jepmanaiserem, jei rotini Uwa Sanbagirmanaiserem Raja Daudfe ga kitulbol. Jei rotini jeiserem ga tombaabil, ane afwer ga kitulmil jelem afelen mesnaiserem jebe. Jei game aa jewer ne eyebilim, safe Hukumu Nabi Musa aa jes tulistababilim ga aas galserem: Rotini Uwa Sanbagirfe aa jes gane gulbanaram, angtanna jei rotini jeiserem jam ne tumilyen; jengga imam-imamnefener jei rotini jeiserem ga jei gane tumili." 5 Jepga Yesus ga gutena, "Ai Tane Angtanemana, Aiba Tuhansam, ane Ai baabetabara enggalf Agam bili, angtane bas gane eyebili nunu Sabateme." 6 Nunu Sabat nensaiserem jeme, Yesus ga jem kautena jena angtane Yahudimana aa jep ge betwebuwefaram jebe; Jei angtanes towas-towastababili. Jes jepserem angtane tafna taasfolawer aa jemanem terbenerem, jei ga jep nuniton. 7 Guru-guru Hukumu Nabi Musamana aa jei ne towas-towastababuwenaram, ane angtane safna Farisimana, Jei Yesusfe kapkaiserem jes ne terelibef, jega enggalf jei enggam jam ge gubife, "Yesus Jei kapka gam eyebili!" Jega jem temawer jei Yesus ga gemer ne gerebana, angtane afa kese waakentana nunu Sabateme. Afa Yesus Jei angtane jam se waakentanaram, jei enggam ga sege gubili, "Yesus Jei awelna gam gwebili nunu Sabateme, nunu nei awelna nejama gwebiyeneiserem jeme. Je kapka." 8 Jengga Yesus Jei ini jemna mes towaswebaipmini. Ane Jei angtanna tafna aa jemanem terbenerem ga bala, "Jas irwe, aaf se fya mukanawer!" Angtane jeiserem ga irwena, ane jep ga aa fina. 9 Jepga Yesus ga balbabili angtane jep jeiserem, "Ai ims tenebaabili, jei bas batabil Hukumu Nabi Musa aa jes tulistababilim jebe? Nei ga bas negama eyebili nunu Sabateme? Ke waakenaiserem jesma eyebili, afa kapkaiserem? Ke angtane jam waakentaasif, afa jam munbof?" 10 Yesus ga gerebaabisnenne jei seyafter gemerserem, ane angtane jeiserem ga bala, "Tafna imna se nornorsosi!" Angtane jeiserem tafna ga nornorsosini, ane tafna gamjon ga aane waakennebana. 11 Jengga guru-guru Hukumu Nabi Musamana aa jei ne towas-towastababuwenaram, ane angtane safna Farisimana jeiserem ga uskambar ge kakalswebili, ane jei ga aa ge towaiwebili jam ge nasbawefe kapkaiserem Yesusfe jes ne eyebiliserem jem temawer. 12 Nunu nensa jeme, Yesus ga jem tauna otumube, sembayanga gam gwebaf. Jepga Jei sembayanga ga gwebabana Uwa Sanbagirfe, gwin bwalna jeiserem jeme. 13 Ane ona jame aa nafwenaram, Jei angtane Jei aa jei ne tikwebaatinennerem ga jenbebili Jemnip jam ge jalbife. Ane Jei angtane dua belas jemniwer jeiserem ga destabaabili. Jei angtane dua belas jeiserem ga bosetababili enggame, "Rasul". Kata "Rasul" igi ga enggam, "Angtane aa jes baftabilirim". Angtane dua belas jeiserem ga aas: 14 Simon (bosna jemna afelna Yesus aa jes gulbanaram ga Petrus) ane osona jemna Anderyas; Yakobus ane Yohanes; Filipus ane Bartolomeus; 15 Matius ane Tomas; Yakobus tane Alfeusmana, ane Simon (aa jes ne jenbewenaram Patrioteme); 16 Yudas tane Yakobusmana, ane Yudas Iskaryot angtane Yesus aa jei geram ginanggwaminibe. 17 Yesus ga iretya otumu jeiserem jewer, angtane aa jes baftabilirim jebaner. Jei ga aa ge fibili ona aarekabe, angtane uskambar Jei aa jei ne tikwebaatinennerem jebaner. Angtane uskambarsus ga ge forobitye jewerman-jewermana ona Yudeya je jes gemerserem, ane kota Yerusalemwer, ane kotana Tirus ane Sidonwer ga nawersamer fi eyep nulna. 18 Jei enggalf ge jalbili Yesus gane sarbasif, ane enggalf gam waakentababif jei bwera-bwerna jelemanaiserem jewer. Angtane bwat kapkaiserem aa jes kabwabilirim, jei mese ga aa ge jalbili, ane ga waakentababili. 19 Angtane seyafter ga aa ge unggwasbili Yesus entefe, aam temawer baabeta Jeleminiwer aa jei tubatityerem, ane jeme ga seyafter waakentababili. 20 Yesus ga gerebaabili Jei aa jei ne tikwebaatinennerem, ane ga balbabili: "Aamei angtane galgalyenaiserem, ini imna is waakenfer sege folbamini, aam temawer Uwa Sanbagiri Jei aamei waakenfer is gerebaabisnenne, Uwa Sanbagiri Jei im Sanbakf nwini. 21 Aamei angtane namwer wisi is jei ge folbaminirim, ini imna is waakenfer sege folbamisi, aam temawer Uwa Sanbagiri Jei is tainbisi, jamer buguf. Aamei angtane namwer ijeya syesyawenaram, ini imna is waakenfer sege folbamisi, aam temawer aamei galap ga isa bweralwesa. 22 - 23 Gwanan aa jep falam, angtane jei kapkaiserem ga jes ne eyeipmil nabi Uwa Sanbagirmanaiserem jebe. Namwer aam ga Ai Tane Angtanemana, As isa tikwebaatini. Jega jem temawer, angtane gwanan aa jei ge nwinbelem jem asal-asala, jei kabwaksusu is galap sene eyeipmisi, jes gala gam eyebilim nabife. Angtane ga nabis ne nasbabil kakalmer, jei nabi baif ne gwebabil, jei ula kapka jep jes ne nasipmil, ane jei ga ge gubil nabi jei kabwaksusu. Jes jepserem kapka jeiserem ga is etamwemisi, imna ini saaser-saasersus is ga sege folbamisi. Ini imna is jam ge saaser-saaserswebamisi, ane saaser-saaserfe ga isa fostafowesa, aam temawer Uwa Sanbagiri fwaina imna unggwandusa is mes menetabaipmisini taman waaken-giribe. 24 Jengga aamei angtane galgalabara namwer ijeya gwenaram, galap kapka unggwandusa is etamwemisi ibe; aam temawer aamei imsa domolsant gwelaiserem imna ini saaser-saaserfer is jei gwebaipminirim. 25 Aamei angtane namwer ijeya twenaram jamer buguf, galap kapka unggwandusa is etamwemisi ibe; galap aamei wisi ga is sege folbamisi. Aamei angtane namwer ijeya bweral-bweralwenaram, galap kapka unggwandusa is etamwemisi ibe; ga enggam galap imna ini is sege jenbamisi uskambarsus, ane ga isa syesyawesa. 26 Gwanan aa jep falam, angtane jei ula waakena jes ne nasipmil nabi ula kapkaiserem jem temawer. Jes galserem, angtane gwanan aa jei ge nwinbelem jem asal-asala, jei seyafter afa ula waakena is sene nasipmini im temawer, galap kapka unggwandusa is etamwemisi ibe." 27 Yesus Jei gamjon ga balbabili, "Jengga aamei namwer Ai As ijeya sarbasinirim, Ai aaiserem isa jes nasipmiwenaram: Ginanggwana ilemana ga jam isa nesiktababili, ane waakenater ga igama eyeipmini angtane aamei kakalmer is jei gane nasbabilirim kakalmer. 28 Angtane safe is jei gane babapsobanaram, aamei ga Uwa Sanbagirfe sembayanga ga isa gwebabana, jega Jei waakenaiserem ga gam golmini jebe. Ane aamei sembayanga ga isa gwebabana angtane kapkaiserem ibe is jei gane eyeibenerem. 29 Afa angtane is jam gam saftanaram olbumu afwer aaiserem jebe, safnant, aamei ijam fwayenulboyon, jengga olbumu afweraiserem jes mese is saf gam sofsobana. Afa fene sagamana is jam gam amserentabanaram, safnant, fene orolemana ilemana jegme igam tetmini. 30 Afa angtane apgal jigala is jam gane bilipminirim imniwer, ga igama golmini jeiserem jebe; ane apgal jigala ilemansusu is jam gane tamserenibenerem, gamjon ijama bilyen jam warauwulfe. 31 Aamei ga isa eyebili angtane nafisfe, jes galserem aamei igemera bilirim ilem inibe, angtane nafsi jei sene eyeipmifi ibe. 32 Angtane etam-etamabaraiserem jei gane nesiktababili angtane jei aa jei ne nesiktababilirim, jengga jem ginanggwa jam nesiktababiyen. Jengga aamei angtane is jei ne nesiktenennerem, jetefener ijama nesiktababiyen. Afa gameye, Uwa Sanbagiri Jei fwaina waakena ibe is Jam gulbayan. Angtane seyafter gemerserem ga jam is nesiktababili. 33 Angtane etam-etamabaraiserem jei waakenfer gemer sa eyeipmini, angtane waakenfer jebe aa jei ne eyeipminirim, ane jei waakenfer jam eyeipmiyen jem ginanggwa jebe. Jengga aamei angtane waakena is jei ne eyeipminirim, jemnipfener waakenfer ijama eyeipmiyen. Afa gameye, Uwa Sanbagiri Jei fwaina waakena is jam golmiyen ibe. Aamei angtane seyafter gemerserem waakena jebe gemer isa eyeipmini. 34 Angtane etam-etamabaraiserem jei apgal jigala gam ne golmini nomkefe angtane etam-etamabaraiserem, ane ga gam balbabili gamjon jam warauwulbofe. Jengga aamei apgal jigala nomkefe ijeba gulbanaram angtanefe, aamei ijama gulbayan angtane jepfener jei gamjon apgal jigal fwaina ibe is jam warauwulbofe. Afa aamei enggalf gulbana, jega angtane jei fwaina ibe is jam warauwulbofe, afa ga gam jes gemerserem, Uwa Sanbagiri Jei fwaina waakena Jam gulbayan ibe. 35 Wowo, jeke gam! Ginanggwana ilemanaiserem ga jam isa nesiktababili, ane ga waakenaiserem ga jes igama eyeipmini jebe. Aamei ga nomkef isa golmini, ane enggam ipsama gunurum, gamjon jam warauwulbofe. Ane afa aamei gam isa eyebilirim, aamei ga isa eyebili Uwa Sanbagiri galserem, ane Uwa Sanbagiri Jei fwaina ga unggwandusa ip ga is golmisi. Uwa Sanbagiri Jei aas galserem: safe angtane kakalaiserem jei enggam jam ge gubiyen, ’Ase samfer golmini.’, Jei angtane jeiserem gam batobaabili. 36 Aamei ga angtane seyafter isa nesiktababili ane ga isa batobaabili, Uwa imna gamserem angtane seyafter nesiktababili ane ga batobaabili." 37 Yesus Jei gamjon ga balbabili, "Aamei angtane nafsi aa jes eyebilirim, ipsam donolnbaanut, jega Uwa Sanbagiri Jeime imnip Jam donolnnuyon! Ipsama gunurum angtane nafsi jei etam-etamabara, ga sene tamtamtababili, ane Uwa Sanbagiri Jei aamei ijam tamtamtababiyen! Etam-etama angtane nafsimana ga is borolmini, ane Uwa Sanbagiri Jei etam-etama imnaiserem gase wirtabaabili. 38 Sa golmi angtane nafsiserem jebe, ane Uwa Sanbagiri is gase golmini ibe. Uwa Sanbagiri Jei ga ibe uskambarsus ga is enggam se golmini aas gamserem, twiri unggwandusa burwana gam igama gwetaasit, jamer gam tenbitye, aam temawer mwongga aamei ijesa gwirinminirim angtane nafsiserem jebe, Uwa Sanbagiri jegme mwongga jeiserem ga is jeter gam gwirinmini ibe." 39 Ane Yesus ga jebe seisya taterisi aaiserem ga nasipmini: "Angtane nwe kofa jei angtane nwe kofa nafsi jam tebasfelyen. Afa jei jam gam tebasfelerem, nawersamer ga gangge janton o mwonabe. 40 Angtane kursus aa jei gam onsobilirim, jei sanbakyan guruminiwer. Jengga angtane jeiserem jei kursusuwer jam gam tabanwenaram, ane gam towaswena seyafter, jei ga enggalater guru jelemana galserem. 41 Ipsama donolnbaanurum ilem afelenfe etam-etama jemna enggala ti utunu galserem jem nwenabe. Jeke gam. Aamei ga is domola etam-etama imna enggala tini unggwandusa galserem, nwena imna ga is jem gam motolbaasini. 42 Aamei ga fomfom igam bala ilem afelna, ’Am afelna, ai ti utunu jeiserem gama ge gosorsiwi nwena imnaiserem jewer.’, jengga ilem nwenabe tini unggwandusa galserem, aamei ga ijam domolyan? Aameiba angtane akar-akarem ijei gwenaram! Gwanan tini unggwandusa jeiserem jes is gosorsiwili nwena imna is jei motolbaasinirim! Jepga aamei waakenfer gam is anggasini enggalfe, aamei ti utunu ilem afelnem nwenawer gam gosorbaasife." 43 Yesus Jei gamjon ga balbabili, "Tini afa waakena, igi jemna kabwakfer je jam teyan. Ane ga gam tini afa kapka, je jam teyan igi jemna waakenfer. 44 Tini seyafter gemerserem ga tannawer gane domola. Angtane gwili jam targayan gimminiwer, ane jei yapkana jam targayan serwenminiwer. 45 Angtane waakena jei taterisi waakenaiserem ga jes gam nasbili, aam temawer ini jemna buguf waakenaiserem jeme. Angtane kapkaiserem jei taterisi kapkaiserem ga jes gam nasbili, aam temawer ini jemna buguf kapkaiserem jeme. Jeba bunaram, aam temawer jes igama biltenaram aaremawer, jeiserem ga iniwer gam tawetya." 46 Yesus Jei gamjon ga balbabili, "Jeje bafa aamei ga Ai As ima jenbenenne, ’Tuhan, Tuhan!’, jengga ijama eyebiyen Ai isa jes bilipminirim ibe? 47 Angtane aa jei gam jelaram Amnibe, ane taterisi Amna gam sarbili, ane gam eyebili Ai jes Agam bilirim, Ai angtane jes galserem Ai isa gemer saamisinirim ibe. 48 Jei ga enggala: Angtane jena aa jei gam eyebilirim, ane ona gulufer ga gam terbebili, ane dutumiriti ga gam tonola tunabe. Fona unggwandusa jam gam tinirim, fona ga gam tentye jena jeiserem jebe, jengga jena jeiserem jei jam ginulyon jam maltife, aam temawer angtane jeiserem jei jena jeiserem waakenfer mesam eyebili. 49 Jengga angtane taterisi Amna As jei gam saribenerem, ane ga jam eyebiyen Ai Ajes bilirim, jei ga enggala: Angtane jena aa jei gam eyebilirim dutumirityamer. Fona unggwandusa jam gam tinirim, ga gam tentye jena jeiserem jebe, ane tatarfer ga gam maltini, ane fona ga gam gwirinfele jamer tatait."

7

1 Yesus Jei taterisi seyafter jeiserem Jame aa galap tabanulurum Jam nasipmilibe angtane jeiserem jebe, Jei ga sofwa kota Kapernaumwer. 2 Jes jepserem angtane sanbaka 100 ginanggwamana, angtane awelna jemna aa jei gweyibenerem jei aa jes nesiktenerem, angtane jeiserem jei bwerna ga folbana tamtamsusu, ane jei amkom fom tere. 3 Angtane sanbaka 100 ginanggwamana jeiserem, jei jame aa galap sararam Yesusem temawer, jei anggwabak angtane Yahudimana afweraiserem ga baftabili, ga aa ge sofobili Yesusminibe enggalfe gam ne balf, jega Yesus gam jalf ane angtane jeiserem gase waakentana. 4 Ane ga aa ge forobitye Yesusminibe, anggwabak jeiserem jei Yesus ga aane bala itana seyafter jeme enggalfe, Jei angtane sanbaka 100 ginanggwamana jeiserem gam batobaf. Anggwabak angtane Yahudimana jeiserem jei Yesus enggam ga aane bala, "Angtane sanbaka 100 ginanggwamana jeiserem jeiba angtane waakensusum. Aamei samfer jes Is batobawena, 5 aam temawer jei anggwabura nemna gam nesiktababili, ane jei jena nemna nei nejeba betwebuwefaram jena jeiserem nes mesam eyeipmini nebe." 6 Ane Yesus Jei seyafter jebaner ga aa ge sofobili. Yesus Jei jena jeiserem jebe amkom fom forola, angtane sanbaka 100 ginanggwamana jeiserem jei jelem afelen mesna ga baftabili enggalfe Yesus gam balf enggame, "Tuhan, Aamei safnant Ijam gwiyan am jenabe. Aamei sanbagiri, ai angtane Yahudimanyan bastantouya, jega jem temawer Aamei jena amnaiserem jep Ijam foroyan. 7 Ai bunarsusfer angtane bastouya, jega jem temawer ai aner ajam jelyan Imnibe. Jengga baabeta Imna anesus, ane ai tousa afa Aamei jafner Is gunurum enggame, ’Se waakenswe!’, angtane jeiserem awelna amna as jei gweyibenerem jei gase waakenswena. 8 Ga enggam, ai am sanbakaiserem ai ga ajem gwonap gwena, ane ginanggwana afweraiserem jei am gwonap naawena. Ai ginanggwa afa jam agam balaram, ’Se sofwe!’, ane jei ga gam sofna. Ai ginanggwa nafsi enggam jam agam balaram, ’Jas jal!’, ane jei gam jela. Ai angtane awelna amna as jei gweyibenerem enggam as balaram, ’Se eyebi!’, ane jei ga gam eyebili. Aamei jeime galater, seyafter gemerserem Aamei gemer Igam gunurum, ga gemer gam etamwena." 9 Yesus Jei jame aa galap sarbilirim taterisi jeiserem, Jei ga bitbitwena. Jei ga irfwena, ane ga balbabili angtane uskambar Jei aa jei ne onsobanaram, "Ai ims towas-towastababili, angtane negeri Israelmana seyafter gemerserem jemniwer, Ai angtane afa gemerje ini jemna Ams tebalaiserem afa Ajam damtamiyen angtane aas galserem, jei Ai As ginggitfer tebana." 10 Jepga angtane jei aa jes baftabilirim ga aa ge waraubili angtane sanbaka 100 ginanggwamana jeiserem jem jenabe, ga aane damtana angtane jeiserem awelna jemna aa jei gweyibenerem ga mes waakenswena. 11 Jewer ga abakefyan Yesus ga sofwa tamna Nainwer. Jei aa jei ne tikwebaatinennerem, ane angtane unggwanfer ga Jebaner ge sofobili. 12 Yesus Jame aa galap fornaram pagar mwa gwetmanabe tamna jeiserem jebe, angtane jepmanaiserem jei ga angtane futunu ga aane girinfele tamna jeiserem jem sitawer. Angtane aa jei tererem ga tanis, ane ene jemnaiserem jei saamirawi. Ane wini jeiserem tane jemna daamfensusu. Angtane ga unggwanfer tamna jeiserem jewer, saamira wi jeiserem aa jei ne tikwebitinirim. 13 Tuhan wini jeiserem jame aa galap domolaram, Jei ga jam nesikulu, ane ga bili, "Iye, ipsam syenaram!" 14 Jepga Yesus ga petini jeiserem ga gwetmanwebisini, ane petini jeiserem ga enoltena, ane angtane angtane futunu aa jei ne girinfelerem ga aa ge fibitena. Yesus ga tansi jeiserem ga bala, "Is Ai bala, aamei jase irwe!" 15 Tanisi jeiserem aa jei tererem, jei ga irwena, ga nwini, ane jep ga towaiwena jam nasowefe. Ane Yesus tansi jeiserem ga aa gaarbili jelem enefe. 16 Angtane seyafter ga aa ge bitbitwebili, ane ga aa ge towaiwebili Uwa Sanbagiri jam pujitawefe. Jei ga aa ge gubili, "Angtane nabi sanbagiri ga mes foryal nem nenennabe! Uwa Sanbagiri mesam fortya enggalfe, angtane Jelemana gwela jemnaiserem gam waakentabaipmif." 17 Taterisi aaiserem Yesusem temawer ga aane sarbinenne tamna seyafter gemerserem ona Yudeya je, ane ona jep gemerserem. 18 Yohanes aa jei ne tikwebaatinennerem, jei Yohanesf ga aane nasbaibene taterisi Yesusmana seyafter gemerserem, ane bwembwema aa jei ge etamwebilirim jem temawer jes mese. Ane Yohanes angtane naura jei aa jei ne tikwebaatinennerem ga jenmini, 19 ane ga aa bafsona jei ga aa ge sofna Tuhanminibe enggalfe jei gam ge tenebaf, "Aamke Angtane Uwa Sanbagiri aa Jes balam Jam foryafe, Aamke jes? Afa ai angtane nafsiserem ke jes asa fibana?" 20 Angtane naura jeiserem Yesusminip ga aa ge sofwa, ane ga aa ge tenebana, "Yohanes Pembaptis jei ams bafsotna Imnip enggalfe ai Aamei Is agam ge tenebaf, ’Aamke Angtane Uwa Sanbagiri aa Jes balam Jam foryafe, Aamke jes? Afa ai angtane nafsiserem ke jes asa fibana?’ " 21 Jes galapserem, Yesus angtane uskambar ga jem waakentababili: Angtane afwer jei bwerna nafis-nafisem ge folbamini, ane afwer ga angtane bwat kapka aa jei ge kayipminirim. Ane Jei angtane uskambar nwena kofaiserem nwena jemna ga waakentabaipmini, jei ga aa ge anggabisini. 22 Ane Yesus ga angtane naura jeiserem Yohanes aa jei ne tikwebaatinennerem ga tamawolmini, "Ga sege warau Yohanesminip, ane aamei ijesa domolaram, ane ijesa sarbisinirim Am temawer, seyafter jeiserem ga isa nasibene Yohanesfe. Angtane nwe kofaiserem jei ga aa ge anggabisini. Angtane muli-mulniserem jei ga aa ge wofebili. Angtane tifin bwerna aa jei ge folbaminirim, jei ga aa ge ferwebitini. Angtane imwa mutuserem ga aa ge sarbili. Angtane futunuserem jei gamjon ga aa ge fersobuntyo terewer. Ane Taterisi Waakena Uwa Sanbagirmana ga aane nasipminenne angtane galgalyenaiserem jebe. 23 Angtane Ai As jei damtanaram Ai Ajes gam eyebilirim, ane jei As gemer gam tebana, ini jemna waakenfer gam folbana." 24 Angtane nauna Yohanes aa jes bafsonaram jeiserem jame aa galap ge sofnaram, Yesus jep ga towaiwena enggam jam nasowefe angtane unggwanfer jepserem Yohanesem temawer: "Aamei ibafa sofna taman dwisgiribe, aamei ibasa domolfa? Ke kakatar nindaya aa jes gin-gintababilirim, aamke ijesa damtabif? 25 Afa fas, aamei ga ibafa sofna, ibasa domolfa? Ke angtane fene waakena rajamana galserem aa jei kabwabilirim, aamke ijesa damtaf? Fas, angtane fene waakensusaiserem aa jei ne kabwabilirim, ane aa jei gwenaram galgala uskambar jemanserem, jei dwisgirip ge nwinbene, jengga jei rajam jenap ge nwinbene. 26 Gam jega, aamei taman dwisgiribe ga ibafa sofna, ga ibasa domolfa? Aamke angtane nabi sa damtaf? Bunar. Ai ims towastababili, aamei nabi jewer imsa damtana, ane nabi jeiserem jei sanbagirsusu nabi seyafter afweraiserem jemniwer. 27 Taterisi Uwa Sanbagirmana jep ga enggam baatultel Yohanesem temawer: ’Angtane aaiserem nabala ga Ai Ajes baftana Ims danabafe, jei nele Imna ga Is jei se sartabaasini.’ (Maleakhi 3:1) 28 Ai ims towastababili, angtane aa jei gangge surubilirim ogiribe, angtane afa fas unggwan-giri Yohanesminiwer. Jengga nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem jeme angtane Ai gemer As jei gam tebanaram, safe jei angtane bastouya, angtane jeiserem jei unggwan-girsusu Yohanesminiwer." 29 Angtane seyafter, ane angtane pajak doini aa jei gane tebabinennerem jes mese, taterisi Yesusmana jam aa galap ne saribenerem, jei ga aa ge gubili "Nele Uwa Sanbagirmana jeba bunaram." Taterisi Yohanes fwater gwanan aa jes nasbinennerem, angtane seyafter jeiserem, jei taterisi jeiserem jam aa galap ne sarbilirim, jei taterisi jeiserem ga aane taabili, ane Yohanes ga baptistababili. 30 Jengga angtane safna Farisimana, ane guru-guru Hukumu Nabi Musamana aa jei ne towas-towastababuwenaram, jei taterisi Uwa Sanbagiri aa jes mwangbisilim jam aa galap ne saribenerem gwela jelemanaiserem jem temawer, jei Uwa Sanbagiri aa jes mwangbisilim jeiserem baif ga aane gwebili jam ne taabife. Ane jei baif ga naawena Yohanes jei jam baptistababife. 31 Jepga Yesus Jei gamjon ga nasowena, "Ai aamei isa Ajam towastababili, angtane Yahudimana aa jei naawenaram namwer aa jep falaram, jei ga enggala: 32 tantantane galserem lapanganap aa jei gangge nwinbenerem. Safna daamfenna jei safna afweraiserem ga enggam gane balbabili: ’Ai uru ip enentabaipmini, jengga aamei baif ima gwena ijama tesarabife. Ai olgulup aya gwena angtane futunu jam girinfele gamserem, ai ga ajesa atalbaabisini, jengga aamei ijama syaweyan.’ Tantantane jes galserem, angtane Yahudimana namwer aa jei naawenaram, jei angtane Uwa Sanbagiri aa jes baftabilirim, jei baif ne gwebabili jam sarbabife. 33 Yohanes Pembaptis jei jam gam jelaram, ane jei afa tumilgal enggalf jam tumilyen jei Uwa Sanbagirfe sembayanga gam gwebaf. Ane jei fo angguru jam telbiyen. Ane aamei enggam igama balbabili, ’Yohanes jei bwata kapkaiserem ga jei kabwana!’ 34 Ane aas jepserem, Ai Tane Angtanemana Ai jam As jelaram, ane Ai tumilgala ga As tumili ane fo anggur mese ga As telbebili. Ane aamei Ai ga As enggam ima bala, ’Yesus Jei kapka gam eyebili. Jei twentwen faarensusu, fo anggur faarensusu. Angtane pajak doini aa jei gane tebabinennerem jei ga Jem afelna, ane angtane etam-etamabaraiserem jei ga Jem afelna.’ Aamei Yohanes ibaifa gwebanant, ane aamei jegme Ai mese baife Asi gemera gwebana." 35 Jengga angtane aa jei ne tikwebaatinennerem Uwa Sanbagiri aa jes bilirim, angtane nafsi jei gwela jemna jam aa jep ne domolminirim, jei enggam ga sege gubili, "Uwa Sanbagiri aa jes eyebilirim, seyafter jeiserem ba waakensusum." 36 Angtane safna Farisimanaiserem, jemna bosna ga Simon, jei Yesus bala jebar ge twenf jem jenabe. Yesus ga gwina jem jenabe, ane ga nwintena jam twenfe. 37 Wini aasaje ga jep nwini, kotana jeiserem jebe, etam-etamabara jep aa jei gwenaram. Jei jame aa galap sararam enggame Yesus Jam twena jena angtane safna Farisimana jeiserem jebe, jei ga aa jela Yesusminibe. Jei botola tuna pualam eyebiliserem ga jes gwirni. Minyaka botola jeiserem jep aa jei falitonom, jemna ninsini waakensusu, jemna hargana unggwanfer. 38 Jei Yesusem duruwer fina, Jem tof gwetmanap. Ane jei ga syena, Yesusmana tufa ga titinsobana nwefome. Ane tufa Yesusmana gamjon ga wirsobana jelem nabal safame jamer serter, ane tufa ga aalumbene, ane minyaka jeiserem ga suwulntena Jem tufabe. 39 Angtane safna Farisimana Yesus aa jei balaram jem jenap jam twenfe, wini jeiserem aa jes eyebilirim aa galap domolaram, jei ga aa gunu jelem inibe, "Yesus Jei nabiyen, aam temawer Jei teisyena jei nansa wini jeiserem Jei aa jei tebanaram, ane ga enggam wini jeiserem jei etam-etamap gwena." 40 Ane Yesus Jei angtane safna Farisimana jeiserem ga balbabili, "Simon ula aare Ai isa Ajes nasibef ibe." Simon ga tamawolbana, "Sya Guru, jase bilte!" 41 Yesus ga gutena, "Angtane aasaje ga naura doini aa jei ge tebabilirim nomkefe, angtane doini nomkef aa jei kitulmuwenaram jemniwer. Angtane daamfenna jei doini nomkef ga enggammer tebana, angtane nunu lima ratus jei awelna aa gemer gwebuwenaram, doini ga gemer. Angtane afelnaiserem jei doini nomkef ga enggammer gam tebana, angtane nunu lima pulu jei awelna aa gemer gam gwebuwenaram, doini ga gemer. 42 Angtane nawersamer jeiserem jei doini fas, doini jeiserem jei nomkef aa jei ge taabilirim gamjon jam ge warautabaibefe fwayenfe. Jepga angtane doini nomkef aa jei kitulminirim, bona jemna jeiserem ga borolmini. Simon, Ai ims tenebana, angtane naura jeiserem jemniwer, uskambar ga nane nesiktene angtane jeiserem bona jemna aa jei borolminirim?" 43 Simon ga tamawolbana, "Ai enggam ai gunu angtane doini nomkefe unggwanfer aa jei gam tebanaram, ga jeman gam borolbana." Yesus ga bala, "Aamei igam gutenaram bunar." 44 Ane Yesus ga irfwena wini jeiserem jemniwer, ane Yesus Jei Simon ga bala, "Aamke ijam domolyan wini aaiserem aa jes eyebilirim? Ai im jenap Ai kawetetyaram, aamei fona Ap As ijam gulbayan enggalfe tufa Amna Ajem wirsofe. Jengga wini aaiserem jei tufa Amna As mes wirsobana jem nwefome, ane gamjon ga sertersona jelem nabal safame. 45 Aamei tafna Abar nejam ne teyan, jengga Ai jam Agalap fortyaram jamer namwer aas jepserem, wini aaiserem jei jam tikweyan tufa Amna As gemer aalumbowena. 46 Aamei minyaka fas ijam suwulniwiyen Am dukabe, jengga wini aaiserem jei minyak ninsini waakensususerem jei mes suwulntena tufa Amnaiserem jebe. 47 Jega jem temawer Ai ims towastana, wini aaiserem jei Ams nesiktene unggwanfer, ane jei Ai As jewer nesiktenerem jei ga jem gwerauwulu etam-etama kapka jemna unggwanfer jeiserem ga Ames wirulbisini. Afa angtane Ai bastowaifer As jei gam nesiktenerem, jeiserem ga jem gam gwerauwulu jei jelem inibe ga enggam gam gunu etam-etama amna ga bastowaifer." 48 Ane Yesus Jei wini jeiserem ga bili, "Ai etam-etama kapka imnaiserem Ai is Ames wirulbili." 49 Angtane nensaiserem aa jei ge nwinbenerem mejanabe Yesusfar seyafter aa jei ne dwenaram, jei ga aa ge gubili jelem inibe, "Angtane aaiserem jei nansa, jei ga etam-etama kapka ga wirulbisini?" 50 Yesus wini jeiserem ga bili, "Aamei Ai As im tebana, jega jem temawer Uwa Sanbagiri ga is mes waakenulsini. Gas sofwe, waakenfer!"

8

1 Abakefyan Yesus jewer ga sofna kota-kotanabe ane taman-tamnap enggalfe, Taterisi Waakena gam nasbinennef nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer. Angtane dua belas Jei aa jei ne tikwebaatinennerem, 2 ane wini afweraiserem ga seyafter Yesusfaner ge sofobili. Yesus bwat kapkaiserem mes surbobili wini jeiserem jemniwer, ane bwernawer ga mes ge waakenswebili. Jei ga aas: Maria aa jes ne jenbiwenaram Magdalename, bwat kapkaiserem ga tuju gemer surboibili jemniwer; 3 ane Yohana, wini Kusamana -- Kusa jeiba sanbakfe jeyam nwini angtane awelna Herodesem jenap aa jei ne gwebilirim; ane Susana; ane wini unggwanfer afweraiserem jes mese. Wini jeiserem, doini jelemanaiserem jeme, jei Yesus ane angtane Jei aa jei ne tikwebaatinennerem jes mese ga jem ne batobaabili. 4 Angtane unggwanfer ga aa ge forobuwetya Yesusminibe kota-kotana unggwanfer jewer. Angtane unggwanfer jame aa galap ge betwebilirim, Yesus Jei seisya taterisi aaiserem ga nasipmini: 5 "Angtane makan anggwana jam gam sofnaram enggalfe twam tanna gam tonolf makanabe. Jei twam tanna jame aa galap gam fasawolnannaram, twam tanna afweraiserem ga nelep gangge janbili. Jepga angtane ga aane jubobinenne, ane junu twam tanna jeiserem ga gane tombaabili jamer bar. 6 Ane afwer ga ona tunabaraiserem ga jep gangge janbili. Twam tanna jeiserem jame aa galap ge kokosbilirim, kokosa jeiserem ga aa ge werenswebili, aam temawer ona jeiserem foyena. 7 Ane twam tanna afwer ga ona tini utuboroserem ga jep gangge janbili. Tini utuboroserem ga aa ge kokosbili, twam tanefaner ga aa ge kokosbili, ane twam tanna kokosa jeiserem ga matabili, ane ga aa ge aralakswebili jamer futu. 8 Jengga afwer ga ona waakenaiserem ga jep ge janbili, ane ga aa ge kokosbili jamere aa ge unggwanswebili, jamere igi jemna 100 ga gemer ge taabili." Taterisi jeiserem jame aa galap tabanulurum Jam nasbilibe, Yesus gamjon ititmer ga balbabili, "Afa aamei imwanabaraye, taterisi Amna aaiserem ga As jam isa saribene, ane waakensusfer ga isa towaswebili." 9 Angtane Yesus aa jei ne tikwebaatinennerem Yesus ga aane tenebana enggame, "Seisya taterisi jeiserem, igi jemna ga basa?" 10 Yesus ga tamawolbaabili, "Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jem igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakena Jelemanaiserem ibe is mesam kitulmini, jega enggalf aamei taterisi jeiserem jemna igiserem gam isa towaswebili. Jengga angtane Ams tikwebaatiyeneiserem, Ai seisya taterisi Ai jem Agam towas-towastababili. Ai ga jes gemerserem ga Agam towas-towastababili enggalfe, jei safe jam gangge anggabisini, jengga jei jam ne domolyan. Jei safe jam gane sarbili, jengga jei waakenfer jam ne towaswebiyen." 11 Yesus Jei gamjon ga balbabili, "Seisya taterisi jeiserem igi jemna ga aas: Twam tanna jeiserem ga taterisi Uwa Sanbagirmana. 12 Twam tanna aa jei ge janbilirim nelebe, jeiserem ga angtane taterisi Uwa Sanbagirmana aa jei ne sarbilirim; jengga bawasa jama fortyaram, ane taterisi jeiserem ga amsonmini jem iniwer, jega jei Uwa Sanbagiri fas jam ne tebayan, ane Uwa Sanbagiri Jei angtane jeiserem Jam waakentababisiyen. 13 Twam tanna aa jei ge janbilirim ona tunabaraiserem jebe, twam tanna jeiserem ga angtanna enggalaiserem: Angtane gwanan jame aa galap ne sarbilirim taterisi jeiserem, jei ga gane taabili ini saaser-saaseremer. Jengga taterisi jeiserem ga fas jam ge tarnabarswebiyen jem inibe. Jei namwenefener gane taabili, ane unggwasbala kapkaiserem jame aa jep gam fortyaram, jei ga gane mirtebitefala. 14 Twam tanna aa jei ge janbilirim ona tini utuboroserem jebe, twam tanna jeiserem ga angtane enggalaiserem: Angtane taterisi jeiserem gane sarbili. Jengga jei ini ga jam gangge eseswebamini jelem gwelem temawer, dois damtabif, ane ini unggwan-giri enggalf jei jam ne eyebif jega ini jemna saaser-saaserfer gam ge folbamif. Jega jem temawer jei taterisi Uwa Sanbagirmana ginggitfer jam ne taabiyen, ane jei waakenfer jam naaweyan. 15 Jengga twam tanna aa jei ge janbilirim ona waakenaiserem jebe, twam tanna jeiserem ga angtane enggalaiserem: Angtane taterisi Uwa Sanbagirmana aa jei gane saribenerem, ini bunarsusfer waakenaiserem jeme. Ane jei safe kabwaktala jam gane domola, jengga jei taterisi Uwa Sanbagirmana ginggitfer gane taabili, ane waakenfer ga gam naawena, ane ga gane eyebili Uwa Sanbagiri Jei aa jes gam bilirim jam eyebife." 16 Yesus gamjon ga balbabili, "Angtane pelitana aa jei gam dutanaram, jei pelitana jam matasiyen burwame, afa nutar gwonap jam gaaraniwiyen. Jei fasfasus. Jengga angtanna jeiserem pelitana tampata dwafennaber gam gaarantena, jega angtane jenap aa jei gam kawetetyaram jei nafa ga gam domola. 17 Taterisi Uwa Sanbagirmana namwer aas jepserem aa jes syetabaabisinirim, taterisi jeiserem angtane galap ga je sene towaswebifi. Ane taterisi angtane jam ne towaswebiyeneiserem, galap ga sene gweraulmifi. 18 Ga jem temawer gasa sarbisi waakenfer, aamei taterisi Amna ga fomfom isa sarbili. Gasa sarbisi, aam temawer angtane aa jei gane sarbisinirim ini waakenaiserem jeme, ane taterisi Amna jam taayibef, angtane jeiserem jei gamjon Taterisi Waakena jem temawer gase sarbisini waakenfersus. Jengga angtane baif gwelaiserem jam sarbisife, Uwa Sanbagiri Jei taterisi bastowaifer jei aa jes towaswebilirim se amsonbana jemniwer." 19 Yesusem eneserem ane Jelem oson mesna ga aa ge forobitye Yesus ne damtafe, jengga jei ga jam ge forobiyen Jemnibe, aam temawer angtane unggwanfersus. 20 Ane angtane aasaje ga Yesus ga bala, "Iye mese oso Imnaiserem sitap ge fibitne, jei Ibara dorwef." 21 Yesus ga tamawolbaabili, "Angtane Taterisi Uwa Sanbagirmana aa jei ne sarbilirim, ane aa jei ne eyebilirim Uwa Amnaiserem Jei aa gemer gam gunurum, angtane jeiserem jei ga iye ane oso Amnaiserem, bunar-bunarsusfer ga jes." 22 Nunu daamfenna jeme, Yesus angtane Jemna aa jei ne tikwebaatinennerem ga balbabili, "Au, nei ganma sofwe fobogana jimwer!" Jepga jei atdusap ga aa ge jubuwili, ane ga aa ge sofobili. 23 Jei aa galap ge sofobilirim, Yesus ga Jam tana. Deye sanbagiri ane arouwa ga aane forobatya foboganabe, ane atdusa jeiserem ga towaiwena fona jam bakwebife. Jes jepserem jei ga amkom fom ge albitili. 24 Jepga angtane Jei aa jei ne tikwebaatinennerem jei ga aa ge taabuntini Yesusminibe, ga aane irtetena. Jei ga aane bala, "Uwa, Uwa, nei nesa altil!" Yesus ga irwena, ane deye yo muru unggwanfer jeiserem ga ofsobana enggame, "Se tikwe! Jafner is fala!" Ane deye aane tiknebana, ane fobogana jeiserem ga fala jamer aarek-aareksus. 25 Yesus angtane Jei aa jei ne tikwebaatinennerem ga balbabili, "Jeje bafa aamei ga As ijama tebayan?" Jei ga aa ge erebili, ane ga aa ge bitbitwebili. Ane jei jena ga aane tenaaminenne, "Aaje nansa, deye yo fona aa jei ofsonaram jam ge tikwefe, ane deye yo muru taterisi ga Jemna gangge saribene?" 26 Jepga Yesus ane angtane Jei aa jei ne tikwebaatinennerem jei ga aa ge batobili ona Gerasa je, foboga jimwer ona Galileyawer. 27 - 29 Angtane bwat kapka aa jei kabwanaram jei ga jep nwini. Angtane jeiserem jei gwanan kotanap nwini, jengga jei abaksusu jenap jam nwinyen. Jei jentowai tonmwa bitis mwonap nwini, ane jei fene jam kamwiyen. Bwat kapka angtanna jeiserem ga enggam gwebawena gam tebana, gamjon bastowaifer gam aftannu, ane abakferyan gamjon gam tebana. Angtane safe waakenfer gane gerebaasnenne, ane tafna yo tufa jemna safe jam gane faarebana ranteme, jei rantena jeiserem gam tiksosini, ane bwat kapka ga gam aftafala taman dwisgiribe. Yesus atdusawer aa galap jutenaram onabe, angtane jeiserem jei ga jela Yesusminibe. Angtane jeiserem Yesus jame aa galap damtanaram, jei ga aa gwarna uskambar, ga jena Yesusem tufabe. Yesus bwat kapka jeiserem ga bili jemniwer jam totinyefe. Ane angtane jeiserem ititmer ga nasowena, "Aamei Ibas eyebifi amnibe, o Yesus, Tane Uwa Sanbagirmana, Uwa Sanbagiri angtane aa jes ne gaartenaram tagarsusube? Ai Isa enggam ai bala as Ijam tamtamtayan!" 30 Yesus Jei angtane jeiserem ga tenebana, "Imna bosna nansa?" Angtane jeiserem ga tamawolbana, "Bosna amna ’Unggwanfer.’ " Jei gam aa jewer gunurum, aam temawer bwat kapka ga unggwanfer ge kayibene jemnibe. 31 Bwat kapka jeiserem Yesus ititmer ga aane bala, "Safnant as Ijam surbobiyen O Mwona girsususerem jep irefe." 32 Otumu jes jepserem twena unggwanfersus ga jep naawena, tumilgals ne terelbaabili. Bwat kapka jeiserem jei Yesus ititmer ga aane bala jei jam ge kabwitef twena jeiserem jemnibe, ane Yesus ga gunu, "Sya." 33 Ane bwat kapka jeiserem ga aa ge tobitintye angtane jeiserem jemniwer, jepga twenminip ga aa ge kabwitena. Ane twena jeiserem ga aa ge nunggirbili, ga aa ge janbiton obinfiwer jamer foboganabo, jepga aa ge albitini. 34 Angtane twena jeiserem aa jei ne gerebaabisnennerem jei aa galap domolaram jep aa jei etamwenaram, jei ga aa ge nunggirbili, ane taterisi jeiserem ga aane nasbinenne kotanap ane taman-tamnap ona jep gemerserem. 35 Ane angtane ga aa ge sofobuwena enggalfe aa je etamwenaram gam ne domolf. Jei Yesusminip ga aa ge jalbili, ane jep ga jei angtane jeiserem ga aane damtana. Bwat kapka jeiserem jei angtane jeiserem mes aftannu, ane angtane jeiserem ga Yesusem tof gwetmanap nwini. Jei fene gamjon ga mes kabwabili, ane ini jemna ga mes waakenswebana. Angtane aa jei ge forobityerem jei seyafter ga aa ge erebili. 36 Jei aa jei ne domolaram jeiserem aa je etamwenaram, jei ga angtane aa jei ge forobityerem jep ga jei ne nasipmini enggalem temawer, angtane bwat kapka aa jei kabwanaram jei jame fomfoms waakenswena. 37 Jepga angtane seyafter ona Gerasa je, jei Yesus ga aane bala enggalfe Yesus ona jemnaiserem Jam mirtetefalf, aam temawer jei seyafter ga jam ge erebili uskambar. Ane Yesus ga juwili atdusabe, ane gamjon ga aa ge sofobili. 38 Angtane bwat kapka aa jes aftannurum jei Yesus ga bala, "Ai ke samfer Isas tikwebaabitini?" Jengga Yesus ga bala, 39 "Safnant. Aamei jase warau ilem jenap, ane ga is nasbinenne Uwa Sanbagiri is jes eyeibenerem ibe!" Ane angtane jeiserem ga sofna, ane ga nasbinennefe kotana seyafter gemerserem jebe, seyafter Yesus aa jes eyeibenerem jebe. 40 Yesus aa galap warautnaram fobogana jimwer, angtane unggwanfer jei ini saaser-saasermer Yesus ga Jem ne tebana, aam temawer jei ga jes ne fibawena. 41 Jes galapserem angtane aasaje ga jela, bosna jemna ga Yairus. Jeiba angtane sanbaksam jena angtane Yahudimana aa jep ge betwebuwefaram. Jei jener jena Yesusem tufabe, ane Yesus ga bala enggalfe Yesus gam jalf jem jenabe, 42 aam temawer tane yafma jemna ga amkom fom tere. Tane jemna jeiserem ga daamfen-daamfensusu, umuru jemna ga tahunu dua belas. Yesus aa gemer sofnaram Yairusem jenabe, angtane unggwanfer Yesus ga aane baftananna afwer taamwer, ane afwer taamwer. 43 Jes jepserem wini aasaje ga bwernabara. Aawis fwa jemna jeber-jeber domolwena tahunu dua belas, jengga angtane afa fas wini jeiserem jei jam waakenulyon. Doini jemna bar, aam temawer jei doini jemna seyafter mesam kitulbono doktorfe enggalfe jei jem waakenulf, jengga aawisi gemerje. 44 Wini jeiserem Yesus ga gwetmanwebaasini duruwer, fen fwesawer ga entewili. Aawisi jes jeberserem ga tikwebili. 45 Yesus ga tenebaabili, "Ai As nane entene?" Angtane seyafter ga jam ge baanbaanwebili. Ane Petrus ga gutena, "Uwa, angtane aare unggwanfersus Im tarnabe, angtane anesus jei Ims ne enentene, aam temawer jei Is jam ne baftananna!" 46 Jengga Yesus ga gutena, "Angtane aare Ai aa jei entenerem. Ai tousa aam temawer baabeta aa jei totintyerem Amniwer." 47 Jepga wini jeiserem ga towaswena enggame, je aa jes eyebilirim jeiserem ba mesam ne towaswebili. Ane jei ga aa jela ga jam egegwena, ane jei jener jena Yesusem tufabe. Jes jepserem wini jeiserem ga nasowena, angtane seyafter jeiserem jem danggonawer, jeje bafa jei Yesus ga entene, ane jei Yesus jame aa galap entenerem, aawisi jemna tatarfer ga tikwebili. 48 Jepga Yesus wini jeiserem ga bili, "Am tane, aamei Ai As imes tebana waakenfer, jega jem temawer aamei gase waakenswe. Gase sofwe waakenfer." 49 Jepga Yesus ga gemer nasowena, angtane aasaje ga jela aa jes ne baftanaram Yairusem jenawer. Jei Yairus ga bala, "Tane yafma imnaiserem futu. Safnant, aamei Guru gamjon ijam balyan im jenap jam gwife." 50 Jengga Yesus jeiserem aa galap sarbilirim, jei Yairus ga bala, "Aamei ipsam ernerem; Amter is tebana, ane tane imna jeiserem gase waakenswena." 51 Jame aa galap ge forobilirim Yairusem jenabe, Yesus angtane afa jam balyan jei Jebar ge kawetefe, jengga Petrus tefner, Yohanes, Yakobus, ane tane jeiserem jem ene yo jeta ga Jebanefener ge kabwitena. 52 Angtane seyafter ga jam ge syebuwena, ane ini ga jam ge jenbamini, tane aa jei tererem jem temawer. Jengga Yesus ga gutena, "Ipsama syawenaram! Tanna jeiserem jei fas jam teryen, jei jafner tanna!" 53 Jei Yesus ga aane bweraltana, aam temawer jei enggam ge towaswebili tane yafma jeiserem mes tere. 54 Jengga Yesus tanna jeiserem jemna tafna ga taayimbili, ane ga bili, "Tane, jase irwe!" 55 Mafnana tane jeiserem jemna gamjon ga warautna tane jeiserem jemnibe, ane jes jeberserem jei ga irwena. Ane Yesus ga balbabili jei tumilgal sa golbi tane jeiserem jebe. 56 Tane jeiserem jem ene yo jeta ga jam ge bitbitwena, jengga Yesus ga gitmini, "Safnant, aamei aa je etamwenaram angtanefe ijama ge nasipmiyen."

9

1 Yesus ga angtane dua belas Jei aa jei ne tikwebaatinennerem ga jenbebili, ane baabeta ga golmini jebe enggalfe bwat kapka jem gam surbobif, ane bwerna nafis-nafisem jem gam waakentababif. 2 Ane Jei ga aa baftabili, jei ga aa ge sofobili enggalfe, taterisi gam ne nasbinennef Uwa Sanbagirem temawer enggame, "Uwa Sanbagiri Jei mes gwena anggwabura seyafter gemerserem jem Sanbakfe." Ane Jei ga enggalf baftabili, angtane bwernabaraiserem jei gam waakentababif. 3 Yesus ga balbabili, "Aamei ijeba sofwaram, apgal jigala safnant afa ijama erbiyen. Dumu safnant ijama erbiyen, ane funa ijama erbiyen, ane tumilgala ijama erbiyen, ane doini ijama erbiyen, ane fene naura ijama eteryen. 4 Angtane tamnabe aamei jam is jep ne tebabilirim, aamei ga jena jemna jeiserem ga jeber isa nwini jamere aamei tamna jeiserem isa mirsotefala. 5 Afa angtane aamei jep is jam ne tebabiyeneye, aamei kotana jeiserem ga jam isa mirsotefala, ane tufa onabaraiserem ga jam isa tentebaabisini, jega angtane tamna jeiserem jep aaiserem jei gam sege towaswebili enggame, jei etam-etama kapkaiserem ga jes ne eyebili." 6 Jewer ga angtane Yesus aa jei ne tikwebaatinennerem ga aa ge sofobili, ane ga aa ge wofebili taman-tamna gemerserem enggalfe Taterisi Waakena jeiserem gam ne nasbinennef, ane enggalf angtane bwernabara gam ne waakentababinenef ona seyafter jep gemerserem. 7 Herodes, angtane sanbak ona Galileya je, jei ga sarbabili seyafter jeiserem Yesus aa jes eyebaabilirim. Ane jei teisyena jei bas bilfi Yesusem temawer, aam temawer angtane afwer jei ga aa ge gubitena enggame, Yohanes Pembaptis jei gamjon mes irwena terewer. 8 Angtane nafsi jei ga gemer ge gubitena enggame, Nabi Eliya jei gamjon mes foryal. Afwer ga aa ge gubitena enggame, angtane nabi afwer fwatermanaiserem jei gamjon mesam warautna terewer. 9 Jengga Herodes ga gutena, "Aiba angtane amsam baftabili enggalfe Yohanesmana duka gam targabafe. Jengga angtane aaiserem Jei nansa? Ai taterisi unggwanfer ames am sarbabili Jem temawer." Ane Herodes ga unggwasa Yesus Jam damtafe. 10 Angtane Yesus aa jes baftabilirim gamjon ga aa ge waraubitne, ane Yesusfe ga aane nasbaibene jei seyafter aa jes ne eyebaabilirim. Yesus ga angtane aa jes baftabilirim ga aftabifele, ane Jei jenfentowai jebaner ga aa ge sofobili tamna Betsaida je. 11 Angtane unggwanfersus jame aa galap ge sarbilirim enggame, Yesus Jei Betsaidawer ge sofobili, jei mese ga aa ge sofobili Yesus jam terelbefe. Yesus Jei seyafter ga tebabili, ane ga nasipmini nunu Uwa Sanbagirem temawer enggame, "Uwa Sanbagiri Jei ga gam se gwena anggwabura seyafter gemerserem jem Sanbakfe." Ane Jei angtane bwernabara ga waakentababili angtane unggwanfersus jeiserem jemniwer. 12 Ona jewer gigitswef, angtane dua belas Yesus aa jes baftabilirim ga aa ge jalbili Yesusminibe, ane ga aane bala, "Tampata aaiserem tamanfenna. Angtane unggwanfersus aaiserem waakenfer jase balbabi jei gangge sofobi, desa-desanap ane taman-tamnap ona jep gemerserem, jega jei tumilgala jep ga sene terelbaabili, ane jena nunu jep taf mese." 13 Jengga Yesus ga balbabili, "Tumilgala jebe aamei sa kitulmi." Jei ga aane tamawolbana, "Rotini aman tafna gwiri tefner, ane jigala ga nawerfenna. Kakman ai ajama sofwef enggalfe tumilgala gam armantababif angtane seyafter aaiserem jebe?" 14 (Angtane jep ga unggwanfersus. Anggwana jep aa jei ge betwebilirim unggwanfer ga enggammer 5.000 anggwa. Wi tane seyafter jebar jep aa jei ge betwebilirim jam ne ertebiyen.) Jepga Yesus angtane Jei aa jei ne tikwebaatinennerem ga balbabili, "Angtane aaiserem jasa balbabi gangge nwinbete safna daamfen-daamfenneme, angtane aa jei ge nwinbenerem jei ga engbar ke enggammera lima pulu aa jei ge mulumwebisinirim jeber-jeber." 15 Angtane Yesus aa jei ne tikwebaatinennerem jei ga aane eyebili Yesus aa gemer balbabilirim, ane angtane seyafter ga aa ge nwinbitena. 16 Ane Yesus ga rotini tafna gwiri ane jigala naura jeiserem ga tebabili, ane jewer ga taman waaken-girip ga anggaswena, ane Uwa Sanbagiri ga bala, "Ase samfer gulbana." Ane Jei rotini yo jigala jeiserem ga bitabaabisini, ane ga kitulmini angtane Jei aa jei ne tikwebaatinennerem jebe enggalfe, jei gam ne syenulminenef angtane unggwanfersus jeiserem jebe. 17 Jei seyafter jep gemerserem ga dwena jamere unubuguf. Ane angtane Yesus aa jei ne tikwebaatinennerem, tumilgal tomna bitbitiserem ga aane dupdupbulu, burnabara ga dua belas. 18 Nunu nensa jeme, Yesus sembayanga aa galap gwebanaram Jenfentowai, angtane Jemna Jei aa jei ne tikwebaatinennerem ga aa ge forobitye Jemnibe. Yesus ga tenebaabili, "Angtane nafsi jeiserem ke Ase enggam ne bala, Ai nansa?" 19 Jei ga aane tamawolbana, "Angtane afwer ga enggam ge gubili Aameiba Yohanes Pembaptisam. Ane afwer ga enggam ge gubili Aameiba Eliyasam. Ane angtane nensaiserem jeime gemer ge gubili enggame, Aameiba angtane nabi afwer fwatermanaiserem aa jei irwelam terewer, Aameiba angtane jeiserem ba jesam." 20 Yesus ga tenebaabili, "Jengga aamei iner Ai As ifoma bala Ai nansa?" Petrus ga tamawolbana, "Aameiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif." 21 Ane Yesus angtane Jei aa jei ne tikwebaatinennerem ga balbabili, "Aamei taterisi jeiserem ijama nasbineneyen angtane nafsiserem jebe." 22 Yesus gamjon ga gutena, "Ai Tane Angtanemana, Ai tamtamtalaiserem unggwanfer As gwirinfi. Ane angtane sanbaka Yahudimana, ane angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, jei Ai Asene gwebafa baife. Ane Ai ga Asene munbofo. Jengga nunu nawer-ningnaiserem Ai gamjon ga jem As irwefa terewer." 23 Jepga Yesus ga balbabili angtane seyafter jep jeiserem, "Angtane afa aa jei gam gunurum Ams onsobafe, jei jelem temawenefener jam gweyan. Ane nunu jeber-jeber jei jamer gam menetwesiwena jam terfe aam temawer jei Ai As jewer tikwebaatinirim. Ane jei Ai jamer ga As onsobana. 24 Angtane afa aa jei gwenaram jelem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei waakenfer gwelaiserem jamer abak-abaksus ga jei gam domola. 25 Aaiserem je kapka, afa angtane galgala seyafter ogirip gemerserem se tebabili, jengga jei waakenfer gwelaiserem jamer abak-abaksus jam domolyan. 26 Afa angtane Ai As jei seferswebanaram, ane taterisi Amnaiserem jem temawer aa jei gam seferswebanaram, Ai Tane Angtanemana, Ai jam Ajep fortyaram Alem nafabaner, ane nafa Uwamanaiserem, ane malaikata waakensususerem jes mese, Aime angtane jeiserem gemer As seferswena, jei Ai As gemer ne seferswebanaram. 27 Ai bunarsusfer ims towas-towastababili, aamei afwer aas ijeya finaram namwer, aamei nalef ijama teryen, aamei gwanan nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ifsa domola." 28 Yesus ga tabanulu taterisi jeiserem jam towas-towastababiliwer, ane nunu gamjon ga delapan, Yesus Jei Petrus, Yohanes, ane Yakobus ga aftabifele taarenabe, ane taaren bolap ga aa ge tabwili enggalfe sembayanga gam ne gwebaf. 29 Jes jepserem Yesus sembayanga ga gemer gwebana jam tabantayan, mirmase Jemna nenesmer ga aa ge falibene, ane fene Jemna ga aa ge sinsinsweibene iris nafa galserem. 30 - 31 Aafer-aafer nabi naura, jemna bosna ga Musa yo Eliya, ga aa ge fortya nafa taman waaken-girmanaiserem jeme, ane jei Yesusfar ga aa ge nasbawena. Jei Yesusfar ga aane nasbili Yesus Jam terem temawer kota Yerusalem je. Tere Yesusmana Uwa Sanbagiri aa jes mwangbisilim, abakefyan gase tabanwena. 32 Jes galapserem Petrus ane jelem afelen naunaiserem jei nus ge tabana. Jengga jei nunuwer aa galap ge irwebilirim, jei Yesus ga aane damtana, Yesus Jei Jam bwenen-bwenenwena, ane angtane naura jeiserem ga Jebaner ge fibili. 33 Jes jepserem angtane naura jeiserem jei Yesus jam aa ge mirtetefalaram, Petrus Yesus ga bala, "Uwa, aaiserem samfersus, ai seyafter aare! Ai jatowai nawer-ningna asa eyebaabili aafe -- daamfenna je Ip, daamfenna je Musaf, ane daamfenna je ga Eliyaf." (Petrus jei jam towasweyan jei aa jes biltenaram.) 34 Jes jepserem Petrus aa gemer nasounaram, gara ga iretya, ane ga matabili. Ane jei gara jame aa galap mastabilirim jei ga aa ge erebili. 35 Ane gara jeiserem jewer ga taterisi ga aane sarbili, enggam aa jei gutenaram, "Tane aaiserem ba Amnam, Ai Ajes destabanaram. Seyafter Jei aa jes nasbilirim, aamei jam isa sarbasini!" 36 Taterisi jeiserem jam bitef tikwena, jes jepserem jei Yesus tefner ga aane damtana. Angtane Yesus aa jei ne tikwebaatinennerem jei ga jafner ne eganulsini seyafter jeiserem, ane jes jepserem angtane afa fas jam ne towastayan jei aa jes ne damtabilirim jem temawer. 37 Jem gwirmer ga, Yesus ane angtane nawer-ningna Jei aa jei ne tikwebaatinennerem jei seyafter ga aa ge irebitye taarena jeiserem jewer, ane angtane unggwanfersus ga aa ge jalbili Yesusminibe. 38 Angtane unggwanfersus jeiserem aa jei ge jalbilirim jem nenennabe, anggwana aasaje ga ititmer ga nasowena, "Guru, ai Aamei Isa uskambarsus bala, Aamei tane girtowai amnaiserem jes batoba. Tane amnaiserem jei ga daamfenesusu! 39 Bwat kapka jam gam tebanaram jei, ane jei aafer-aafer ga gam gwaren-gwarenwena unggwanfer. Ga jam gam terterwena jamere kewa aaremawer gam tenbentetya. Bwat kapka jeiserem jei tane amna gemer tamtamtana uskambar, ane jei bai jemniwer jam totinyefe! 40 Ai angtane Is jei ne tikwebaatinennerem ai uskambar amesam balbabili enggalfe, bwat kapka jeiserem jam ne surbife, jengga jei masef, jam ne domolyan jam surbife." 41 Yesus ga tamawolbaabili, "Aamei angtane namwer ijeya gwenaram, aamei Ai As ijama tebayan, ane etam-etama imna anesus. Aima ga ibar neya nwini jamere nunu anesus, jengga aamei gemerje Ai As ijama tebayan. Ai aamei isa Ajam fibabilibe nunu ga fomera enggalfe, aamei Ai As ijeba tebafe?" Jepga Yesus Jei uwa jeiserem ga bala, "Tane imna jeiserem jase aftayal aafre." 42 Tane jeiserem jei aa gemer jelaram Yesusminibe, bwat kapka jeiserem ga uktoniwili, ane ga terterwena. Jengga Yesus ga bwat kapka jeiserem ga ofola, tane jeiserem ga waakenswena, ane tane jeiserem gamjon ga wartabana jetaserem jebe. 43 Ane angtane seyafter jeiserem jei baabeta Uwa Sanbagirmana uskambar jeiserem jame aa galap ne domolbanaram, jei ga aa ge bitbitwebili. 44 "Taterisi Amnaiserem ga waakenfer isa sarbabisini: Abakefyan Ai ga Asene gerfa angtane sanbakminibe, ga Asene munbofo." 45 Jengga angtane Yesus aa jei ne tikwebaatinennerem jei taterisi Yesus aa jes nasbilirim, taterisi jeiserem jei waakenfer jam ne sarbisiyen. Taterisi jeiserem ga jam syawulmisini angtane Jei aa jei ne tikwebaatinennerem jemniwer, ane jega jem temawer jei waakenfer jam ge sarbiyen. Ane jei jam ge erebili jei jam ne tenebafe taterisi jeiserem jem temawer. 46 Angtane Yesus aa jei ne tikwebaatinennerem jei jenjen ga aa ge doksobana, jei enggam ge nasbawena, "Nei seyafter gemerserem, sanbaksusu ga nansa?" 47 Yesus Jei tousa jei aa gam ge gubilirim jelem inibe. Jega jem temawer Yesus ga tane bastouyaserem ga gaarwili, ane Jei tane jeiserem ga gaarantena Jelem tarnabe, ane tane jeiserem jep ga fina. 48 Jepga angtane Jei aa jei ne tikwebaatinennerem ga balbabili, "Angtane Ai aa jei gam tikwebaatinennerem, afa jei tantouya bastouya aas galserem jam gam tebanaram aam temawer jei Ai As jewer gam tikwebaatinirim, gam jega angtane jeiserem jeime Ai As mes gam tebana. Ane angtane Ai As jei gam tebanaram, jei Am tefner As jam tebayan, jengga jeime Ai As Jei baftannuntum Jei mese Jes gam tebana. Bunarsusfer ga enggam, angtane im nenennabe ini aa jei gam onabertanaram enggalfe angtane bastantouya gam batobaf, angtane jeiserem jei ga sanbaka Uwa Sanbagirem nwenabe." 49 Yohanes ga gutena, "Uwa, ai angtane asaje aya damtana, jei bwat kapkaiserem ga jes surbobili Im boseme, ane ai ga aya bala, ’Safnant, jase tikwe!’, aam temawer jei nem safanyan." 50 Jengga Yesus ga balbabili, "Safnant, aamei angtane jeiserem ijama uftayan jam tikwefe, aam temawer angtane aamei is jam ne nasbabiyeneiserem, angtane jeiserem jei ga safna imna." 51 Nunu ga gwetmanswebana Yesus Jam tawefe taman waaken-giribe, ane Jei enggam ga aa gunu, "Ai bunarsusfer As sofwa Yerusalemwer." Ane jepga Jei ga sofwa. 52 Ane Jei angtane ga baftabili Jei aa jei ne danabafe. Angtane jeiserem aa jes baftabilirim jei ga aa ge sofobili, ane jei ga aa ge forobili tamna aasaje jebe ona Samarya je enggalfe jei Yesusfe ja mese tumilgal gam menetababisif. 53 Jengga angtane tamna jeiserem jep aa jei ge nwinbenerem, jei Yesus baif ne gwebana jam ne tebafe, aam temawer Jei bunarsusfer kota Yerusalemwer sofwefe. 54 Angtane naura Yesus aa jei ne tikwebaatinennerem bosna jemna ga Yakobus ane Yohanes, jei taterisi jeiserem jem temawer jame aa galap ge towaswenaram, jei ga aa ge gutena, "Tuhan, Aamke baif ke Ijam gweyan, ai tokwana gam agma gitmif jam iryafe taman waaken-giriwer enggalfe angtane aaiserem gam giranbaabisif?" 55 Yesus ga irfwena, ane ititmer ga uftabili. 56 Ane Jei ga aa ge sofobili tamna nensaiserem jewer. 57 Yesus ane angtane Jei aa jei ne tikwebaatinennerem ga gemer ge sofobili nelebe, angtane aasaje ga Yesus ga bala, "Ai Ims onsobaf Aamei Ijewer sofnaram." 58 Yesus ga tamawolbana, "Serigala, gwalna onnemana gemerserem, jei o mwonabara, ane junu je golabara. Jengga Ai Tane Angtanemana, jena Amna fas, Ai taman nutara fas. Afa aamei Ai As jam is onsobanaram, aamei mese susana jeiserem jeter is domola." 59 Ane Yesus ga angtane nafsiserem ga bala, "Am se onsoba." Jengga angtane jeiserem ga enggam gutena, "Uwa, ai gwanan ajam warauwa, uwa amna ajam tirnnuf." 60 Jengga Yesus angtane jeiserem ga tamawolbana, "Angtane Ai baife As jei ne gwebanaram jam onsobafe, jei angtane futunuserem ga jei sene tatarbaabunnu. Jengga aamei jase sofwe, ane ga is nasibenenne nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer." 61 Angtane nensa jei jon ga gutena, "Uwa, ai Ims onsobaf. Jengga ai gwanan ajam warauwa enggalf, uwa mese, aya, oso, ane wini amna umwef agam damtabif." 62 Yesus ga tamawolbana, "Angtane awelna aa jei gam towaiwulurum jam gwebife jem makanabe, ane jei ga gam irfwena duruwer, angtane jes galserem jei jam etamweyan angtane Uwa Sanbagiri Jem gwonap nwinfe, nunu Uwa Sanbagiri aa jep gwenaram anggwabura seyafter gemerserem jem Sanbakfe."

10

1 Jeiserem taban, Tuhan angtane tuju pulu dua Jei aa jei ne tikwebaatinennerem ga destabaabili. Ane Yesus ga angtane jeiserem ga baftabili nawer-naurem enggalfe jei gam ne danabaasif, kotana gemerserem ane tampata Jei aa jep wofefe. 2 Jei ga enggam balbabili, "Angtane unggwanfersus taterisi Amna jei ne fibilirim. Angtane jeiserem jeiba enggalam nananis nuna galserem angtane jes ne fulfe. Nananis nuna jeiserem unggwanfer, jengga angtane nanansi jeiserem jam aa jei ne fulfe jei bastantowaifer. Jes gemerserem angtane taterisi Amna aa jei ne towas-towastababilirim jei ga bastantowaifefener. Aamei sembayanga uskambar isa gwebabana Tuhanfe, jega Jei angtane unggwanfer gase baftabili enggalfe taterisi Amna jei ne nasibenenef. 3 Gasa sofwe! Ai imter baftabili ayanga tanna gamserem matin somolem nenennabe. 4 Jam isa sofwaram, safnant dompeta afa ijama erbiyen, ane funa ijama erbiyen, ane sandal afwer mese ijama erbiyen. Safnant ijama tikweyan nel nenennabe enggalfe angtanefar gam nasowefe. 5 Aamei jam is ge kawetanaram jenabe, gwanan ga enggam is ge gutena, ’Uwa Sanbagiri Jei is eyeipmini, jega ini imna waakenfer is ga sege folbamini, angtane aa jei ge nwinbenerem jena aaiserem jebe.’ 6 Afa angtane jep aa jei gam nwinirim jei aamei waakenfer jam is gam taaminirim, taterisi imna jeiserem ga jemniber se fala. Afa angtane jei bai se gwenanaram, taterisi imna jeiserem gamjon ga is ge dekolsiwili angtane jeiserem jemniwer. 7 Jena ga daamfennater aamei ga jeber is ge nwini. Afa tumilgala is jam sene kitulminirim ibe, tumilgala jeiserem ga jam is ge tebabili, aam temawer angtane awelna angtane nafsimana aa jei gam gweyibenerem jei fwainaiserem ga jener gam taabili. Jena jam jep igangge nwinirim, jena jeiserem safnant jewer ijam ge gwisiyen jena nafsiserem jebe. 8 Aamei tamna nafsi jep jam is ge fornaram, ane jep ga aamei isene taamini waakenfer, tumilgala is jam sene kitulminirim ibe, ga jamer is ge tombaabili. 9 Angtane bwernabara ga is ge waakentababili tamna jeiserem jebe. Ane angtane jepmana jeiserem aamei taterisi aaiserem jep ga jam is ge nasipmini, ’Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga mes gwetmanswel imnibe.’ 10 Jengga aamei tamna nafsi jep jam is ge fornaram, ane tamna jeiserem angtane jemnaiserem is jam ne taamiyeneye aamei, jewer ga is ge sofna nelgiribe, ane ga is ge gutena, 11 ’Tamna imnaiserem jem sona aa jei ge batobilirim tufa amnaiserem jebe, ai ga as ge wirtabaabisini enggalfe, aamei gam isa towaswena enggame aamei ai baife as ijewera gweminirim, aamei jes gamserem gam as ijewera gweminirim, aamei kapkaiserem ga ijesa eyebili. Jengga aaiserem gasa towaswebi enggame: Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe ga mes gwetmanswel.’ " 12 Yesus gamjon ga balbabili, "Ai ims towas-towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri angtane kota Sodommana Jei bastantowaifer gase tamtamtababisi. Ane angtane aamei baife is jei ne gwebabilirim jam tebabife tamna jemnaiserem jebe, Uwa Sanbagiri angtane jeiserem uskambarsus gase tamtamtababisi!" 13 Yesus Jei gamjon ga balbabili, "Aamei ijeya nwinirim Korasimwer ane Betsaidawer, galap kabwaksusu unggwandusaiserem ga is etamwemisi ibe. Ai bwembwema Ames eyebili im kotanabe, jengga aamei etam-etamawer ijama tikweyan." Ane Yesus ga enggam syesyawulu, "Bwembwema Ai jes Agam eyebilirim im kotanabe, afa Ai fwater bwembwema jeiserem jep jam Agam eyebilim kotana Tirus ane kotana Sidon je, afa ga gam jes gamserem, gam jega angtane jepmanaiserem ga aa ge tikwebil etam-etama jelemanaiserem jewer, jei ga waakenaiserem ga jes ne eyebil. Ane jei ga jam ge nwinbene fene ga enggala gane kabwabil, niw fene galserem, ane sona ga jelem dukap ne bunulnswel, jega enggalf angtane nafsi ga sege towaswebili jei etam-etamawer ba mesam ge tikwebili. 14 Nunu umwef jemserem Uwa Sanbagiri angtane seyafter aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane kota Tirusmana yo kota Sidonmana Jei bastowaifer se tamtamtababisi imniwer." 15 Ane Yesus gamjon ga balbabili, "Aamei angtane kota Kapernaummana, aamke enggam ima gunu, ’Ai ana jama sa tetena jamere taman waaken-giribo.’? Gamyan! Uwa Sanbagiri Jei aamei is fasawolwisi taman tokwagiribe!" 16 Ane Yesus ga balbabili angtane Jemna Jei aa jei ne tikwebaatinennerem, "Angtane aamei is jei ne sarbabilirim, angtane jeiserem jei Aime Asene sarbana. Angtane aamei baife is jei ne gwebabilirim, angtane jeiserem jei Ai As baif sene gwebana. Ane angtane Ai baife As jei ne gwebanaram, angtane jeiserem jei Uwa Sanbagiri baif sene gwebana, Ai As Jei baftannuntum." 17 Angtane tuju pulu dua aa jei ne tikwebaatinennerem Yesus aa jes baftabilirim, gamjon ga aa ge waraubili ini saaser-saasermer. Jei ga aa ge gubili, "Tuhan ai uskambar aya eyebili, ane bwat kapkaiserem jes mese jei amter ne sarbabili, ai jam agalaba nasounaram Im boseme!" 18 Yesus ga tamawolbaabili, "Ai bawasa Amsam damtal taman waaken-giriwer tatarmersus jentya, irsi gamserem. 19 Ai baabeta isa mesam golmini ibe, jega aamei awas ufwai galserem ga igama jubistena, ane onggonggeleng mese. Ane baabeta Ai isa Ajes golminirim, baabeta jeiserem unggwandusa baabeta bawasmanaiserem jewer, ane seyafter afa fas is jam ne tamtamtababiyen. 20 Safe gam jes gamserem, ini saaser-saaserfer is basangge folbaminirim aam temawer bwat kapkaiserem imter ne sarbabili. Jengga waakena ga enggam, aamei ini is saaser-saaserfer sege folbamini, aam temawer bosna imna is mes tulistabaipmini bukunube, bukunu angtane waakenfer gwelaiserem jamer abak-abaksus jebe, taman waaken-giribe." 21 Gwanan jes jepserem ini Yesusmana ga saaser-saasersusfer folbana, aam temawer Mafnana Uwa Sanbagirmana mesam bugufswebana. Yesus Jei Uwa Sanbagiri ga bala, "Uwa, Aamei Sanbakfe Aamei nwini winsi aaiserem ane ogiri aaiserem jebe. Ai Is enggam Ai bala ’Ase samfer gulbana.’, aam temawer seyafter jeiserem Ai Ajes towas-towastababilirim, Aamei seyafter jeiserem Imes syawulsini angtane enggalaiserem jemniwer, angtane jener enggam aa jei gam gunurum, ’Aiba angtane tousaiserem, aiba jesam.’ Jengga Aamei angtane ini jena aa jei gam onabertanaram, Aamei seyafter jeiserem ga Ijep ge saamisini. Bunar Uwa, Ai Is enggam Ai bala ’Ase samfer gulbana.’, aam temawer Aamei jeiserem ba Ineram bili, ane ini Imna ga Is jem temawer saaser-saaserswebana." 22 Ane Yesus angtane unggwanfer jep aaiserem ga balbabili, "Uwa Amna Jei tousaiserem seyafter As mesam kitulbono Abe. Angtane afa fas Ai As jam ne towaswebayan, jengga Uwa As Jentowai towaswebana. Ane angtane afa fas Uwa jam ne towaswebayan, jengga Ai Antowai towaswebana, ane angtane Ai Ajes destabaabilirim, ga jenefener ge towaswebili." 23 Yesus ga irfwena, ane angtane Jei aa jei ne tikwebaatinennerem jei jetefener ga balbabili, "Ini imna is waakenfer sege folbamini, aam temawer aamei imsa domola bwembwema namwer ijesa domolaram. 24 Ai ims towas-towastababili, nabi-nabi ane raja-raja fwatermanaiserem jei uskambar ga aa ge gubil enggalfe jeiserem jam ne domolf aamei namwer ijesa domolaram, jengga jei fas jam ne domolyan. Ane jei ga jam ne sarbisif aamei namwer ijesa sarbisinirim, jengga jei fas jam ne sarbisiyen." 25 Jes jepserem guru Hukumu Nabi Musa aa jes tulistababilim aa jei towas-towastababuwenaram, jei ga jep fina enggalfe jei Yesus gam unggwasbaf jam tenebawefe, afa Yesus Jei waakenfer kese tamawolbana, afa fas. Jei Yesus ga enggam tenebana, "Guru, ai ga basas eyebili enggalfe, ai waakenfer gwelaiserem jamer abak-abaksus agam domolfe?" 26 Yesus ga tamawolbana, "Nabi Musa jei bas tulisul Taterisi Uwa Sanbagirmana jeiserem jebe? Aamei taterisi jeiserem ifomfom towaswebili?" 27 Angtane jeiserem Yesus ga tamawolbana, "Uwa Sanbagiri imnaiserem ga jetefener igam nesiktene ini ilemana seyafter gemerserem jeme, ane mafnana imna seyafter gemerserem, ane baabeta imna seyafter gemerserem. Ane angtane nafsiserem ga jam igam nesiktababili, aamei in ina gemer igam nesiktenerem." 28 Yesus ga bala, "Aamei jes igam gutenaram jeiserem bunar. Ga jeiserem jeter is eyebili, ane aamei waakenfer gwelaiserem jamer abak-abaksus ga is domola." 29 Jengga angtane jeiserem ga gunu jelem inibe, "Ai bai angtane nafsi enggam as jam ne towaswebafe, ai angtane nafsi ajam nesiktababiyen, taterisi Nabi Musa jep aa gemer tulisulum." Jewer ga jei Yesus gamjon ga tenebana, "Angtane nafsiserem ga fwersa ai ajes nesiktababife?" 30 Yesus ga enggam tamawolbana, jega jei gas towaswena jam jes nesiktababiliserem: "Angtane Yahudimana aasaje ga iretya kota Yerusalemwer jamere kota Yerikoyo. Nel nenennabe, angtane komkomaiserem jei angtane Yahudimana jeiserem ga aane tebana. Jei fen mese apgal jigala seyafter jelemanaiserem ga aane komkomtabaibaasini. Ga aane safsaftana jamer tamtamsus. Ane neleber ga aane mirtetefala, angtane jeiserem ga amkom fom tere. 31 Ane jes jepserem imam aasaje ga jep wofna nele jeiserem jebe. Jei angtane Yahudimana jeiserem jam aa galap damtanaram, jei ga jamfener ayebaanni nel eyewer. 32 Angtane Yahudimana nafsiserem tewe Lewimana, jei mese nele jeiserem ga jep wofna. Ane ga jela tampata angtane jeiserem aa jep falaram, ane ga damtana, jeime jamfener ga ayebaanni nel eyewer. 33 Jengga angtane ona Samaryamana ga sofwa nele jeiserem jebe, ane ga jela tampata angtane jeiserem jei aa jep falaram. (Bunar-bunarsus jes galapserem ga angtane Yahudimana ane angtane Samaryamana jei ga jena jam ne uskamswemuwena.) Jengga angtane Samaryamana jei angtane jeiserem jame aa galap damtanaram, ini ga folbana angtane jeiserem jam batobafe, aam temawer jei ga jam nesiktene. 34 Ane jei angtane Yahudimana jeiserem ga gwetmantaasini, ane bubwana ga wirtabaibene fo anggurume, ane ga gwebana minyakeme. Jewer ga bubwana jeiserem ga tafrebaibene fenbiteme jamere taban. Jei angtane jeiserem ga gaaranswena keledai jelemanaiserem jebe, ane ga aftafala jamere jena menetulsili angtane nafis tamnawer jelaiserem jei nomkef jep talaiserem jebo, ane ga aane waakentana. 35 Jem gwirmer ga, jei doi perak naura ga terbene angtane jena jeiserem aa jei taabilirim jebe. Ane ga bala, ’Angtane aaiserem gase waakenta! Ane afa aamei doini nafsi jam is tambawulurum, ai ajep warautnaram aafe, doini ga isas gerbana fwayenfe.’ " 36 Jepga Yesus taterisi jeiserem ga tabanulu, Jei guru jeiserem ga tenebana, "Angtane nawer-ningna jeiserem jemniwer, ga fwersaiserem angtane komkoma jei aa jes ne safsaftanaram, jei aa jei nesiktenerem?" 37 Ga tamawola, "Angtane aa jes ne safsaftanaram, jei aa jei batobanaram, angtane jeiserem ga jes." Yesus ga bala, "Afa ga gam jes gemerserem, gase sofwe, ane ga is eyebili jes gemerserem!" 38 Jewer ga Yesus ane Jei aa jei ne tikwebaatinennerem ga aa ge sofobili, ane ga aa ge forobili tamnabe. Jes jepserem wini bosna ga Marta, jei Yesus ga tebana jem jenabe. 39 Marta jelem osona jemna bosna ga Maria. Maria jei Yeusuem gwetmanap nwini; Maria jei taterisi Yesus aa jes nasbabilirim jei ga jes sarbabisini. 40 Jengga Marta ini jemna jam janbili, ane ga bili jelem inibe, "Awelna amna jenap anesus, ai tumilgala anesusu ajes eyebaabili antowai." Jewer ga jei Yesusminibe ga jela, ane ga bala, "Tuhan, Aamke as Ijam domolyan ini amna as jam janbili? Oso amna jei ai as jam batobiyen, ai ga awelnabe antowai gwena. Jei jase bil jei ai as gangge batobi!" 41 Yesus ga tamawolbili, "Marta, Marta, ini imna ke is jam janbili? Aamei enggam im gwena, jes igam taabitetna, gamjon jes igam taabitetna. 42 Jengga igsusu ga daamfenna. Maria igsusu jeiserem mes sarbisini, angtane nafsi jam ne amsonbiyen jemniwer."

11

1 Nunu nafsi jeme, Yesus Jei sembayanga ga Jem gwebana tampata nafsiserem jebe. Sembayanga aa galap tabantanaram Jam gwebalabe, angtane Jei aa jei ne tikwebaatinennerem daamfennaiserem ga bala, "Tuhan, ajon se towas-towastababi sembayangs gwebafe, Yohanes angtane jei aa jei ne tikwebaatinennerem aa gemer towas-towastababilirim sembayangs gwebafe." 2 Jepga Yesus ga balbabili, "Aamei sembayang jam isa gwebanaram, ga enggam isa gwebana, ’Uwa, ai bunarsusfer Is enggam aya bala, angtane bosna Imnaiserem ga Isene gulbatena. Aamei abakefyan anggwabura seyafter gemerserem jem Sanbakfe ga Is gwena. 3 Aamei nunu jeber-jeber tumilgala ap Is kitulmuwena. 4 Etam-etama kapka amna seyafter gemerserem ga Is wirtabaabili, gamjon jeiserem Ijam sarbistaabonyan, aam temawer ai kapkaiserem angtane abe aa jes ne eyeipminirim, jeiserem ai ajama borolmini, gamjon ajama sarbistaabonyan. Ase Ijam aftabifelyen unggwasbala kapkaiserem jebe.’ " 5 Jepga Yesus ga Jei aa jei ne tikwebaatinennerem ga balbabili, "Aamei taterisi aaiserem jafner isa sarbisnenne ilem inibe: Afa ga enggam, angtane imniwer jam gam gwinaram jelem afelnem jenabe gwini nenennap, ane jelem afelna jeiserem enggam gam bala, ’Am afelna, rotini nawer-ningna abas kitulbo nomkef. 6 Am sarabosom aa jei sofwetyaram, namwer se foryal am jenabe, ane ai tumilgala fas jei ajem taayinfe!’ 7 Ane aamei ilem inibe aaiserem ga jafner isa sarbisnenne, afa jelem afelna jem jenap enggam gam tamawolbanaram, ’Safnant, jas warau! Aamei ibas forobitye amnibe? Pintunu ames matasini, ane ai tane amnaiserem jes mese ai jebar ajama tanna. Ai ajam irweyan ane apgal jigala fas is ajam gulbayan ibe.’ " 8 Yesus gamjon ga balbabili, "Ane jewer ga fomfoma? Ai enggam Ai gunu, angtane jeiserem safe jem afelna, jei bai jam irwefe ane tumilgala jam gulbafe jebe. Jengga afa angtane jeiserem jam sefersweyan enggalfe jei jam aberwebafe, gam jega jelem afelna ga gam irwena, ane ga gam gulbana jebe apgal jigala jes gam aberweibenerem jelem afelna jeiserem jemniwer. 9 Ga jem temawer, Ai aamei isa enggam Ai balbabili, Uwa Sanbagirminiwer ga jamer isa balwena, ane Jei ga is golmini ibe. Uwa Sanbagirminiwer ga jamer isa terelbili, ane Jei ga is eyeipmini jega aamei ijesa terelbuwenaram jeiserem ga isa domola. Pintunu Uwa Sanbagirmana ga jamer isa enentabaiwena, ane Uwa Sanbagiri Jei pintunu ip ga is gam tertemisiwitye. 10 Angtane apgal jigala aa jei gam bilirim Uwa Sanbagirminiwer, jei gam domola aa jes gam bilirim. Angtane aa jei gam terelbilirim Uwa Sanbagirminiwer, jei gam domola jei aa jes gam terelbilirim. Angtane pintunu aa jei gam enentenerem, Uwa Sanbagiri Jei pintunu gam terterbaasiwitye jebe. 11 Aamei uwaf ijeya gwenaram, afa tane imna jigala jam gam aberwebilirim, aamke awas igama gulbana? 12 Afa ayang sui gam aberwebili, aamke onggonggelengs igama gulbana? 13 Aamei angtane awelna kabwakfer jemanserem, jengga aamei tousa apgal jigala tane imnaiserem jep ga waakenater igama kitulmini. Uwa Sanbagiri, Uwa imna taman waaken-girip aa Jei nwinirim, Jei waakensusu imniwer; Jei Mafnana Jelemana gam golmini, angtane Jei aa jei gane balaram." 14 Nunu nafsi jeme, Yesus Jei bwat kapka ga jem surbili angtaneminiwer, bwat kapka jam nasouyanaiserem. Bwat kapka jeiserem jame aa galap totintyerem, angtane jeiserem ga towaiwena jam nasowefe. Angtane unggwanfer jep ga aa ge bitbitwebili. 15 Jengga angtane unggwanfer jeiserem afwenefener ga enggam ge gubili, "Belsebul jei sanbaka bwat kapka seyafter gemerserem jemniwer, ane jei baabeta Yesusfe ga jei gulbana, jega jem temawer Yesus ga bwat kapka jeiserem ga jem surbobili." 16 Angtane nensa afweraiserem jei baabeta Yesusmana jam ne unggwasibef. Jega jem temawer, jei Yesus enggam ga aane bala, "Aamei bwembwem ap se eyeipmi enggalfe, ai agma towaswef Aameiba Uwa Sanbagirminiweram jela." 17 Yesus Jei itana jemna mes towaswebaipmini, ane ga balbabili, "Angtane negara daamfennaiserem jep aa jei ge nwinbenerem, afa jei jam gangge syensyanwebilirim safna nafis-nafismer, ane safna jeiserem jei ga jena gane uskamswemini ane jei ga gangge erabana, negara jeiserem ga gam kabwaknowa. Ane angtane jena daamfennaber aa jei gangge nwinbenerem, afa jei seyafter jam gangge wokwakwebilirim ane jei ga gangge erabana, angtane jena jeiserem jep aa jei gangge nwinbenerem ga gangge kabwakswebili. 18 Taman-giri bawasmanaiserem ga gemer jes gemerserem. Afa safna daamfenna jei jam gangge erabanaram safna afweraiserem jebar bawasem tamnabe, taman-giri bawasmana jeiserem ga gane kabwaknowa. Aamei enggam ima gunu ilem inibe, Belsebul jei baabeta jemna Ap mes gulbana enggalfe, Ai bwat kapka jem Agam surbobif. Afa ga gam, Belsebul jei safna afweraiserem bawasem tamnabe ga jebar gangge erabana. 19 Afa Ai bwat kapka jam As surbobilirim Belsebulem baabeteme, afa ga gam jes gamserem, baabeta ga nanmana angtane aamei is jei ne onsobaabilirim, bwat kapka ga jem sene surbobili? Jei tousa jei bwat kapka fas jam ne surbobiyen Belsebulem baabeteme. Ga jem temawer, jeimba mesam ge towaswebili enggame, Ai bwat kapka Ajam surbobiyen Belsebulem baabeteme. Aamei is jei ne tikwebaatinennerem jei game aa jewer ge gubilirim, jei jena ga mes ne gweraasona aamei syefer ga ima nasowena Am temawer. 20 Jengga Ai bwat kapka ga baabeta Uwa Sanbagirmanaiserem ga Ajem surbobili. Ga jem temawer aamei imsa towaswena nunu Uwa Sanbagiri Jei aa jem nwinirim anggwabura seyafter gemerserem jem Sanbakfe mes fortya imnibe. 21 Angtane baabetabara jei jena jelemana jam gam gaarabisnennerem ulumu yo ginna jeme enggalfe, apgal jigala jelem jenap aaiserem jam ne erbifelyen, waakenfer jeber gangge falbili. Jei ga enggam gam gunu, ’Ai ulumu ginnabara gam etersini, jega jem temawer ai waakenfer ga ai nwini.’ 22 Jengga angtane baabetabarsususerem jei jam gam fortyaram, jei angtane jena ulumu yo ginna jem aa jei gam gaarabisnennerem jebar ga gangge erna, ane angtane jeiserem jei jam gam tafernaram. Ane angtane baabetabarsususerem jei ulumu yo ginna jena aa jem gam gaarabisnennerem jeiserem ga gam amserentabana. Ane jei apgal jigala seyaftersus jena jeiserem jebe ga gam komkomtababisini, ane ga gam syentabaibene. Bawasa ga enggala, angtane baabetabara jena jelemana aa jei gam gaarabisnennerem jes galserem. Ane Ai ga enggala, angtane baabetabarsusu jeiserem jes galserem. 23 Afa angtane As jam ne tikwebaatiyeneiserem, angtane jeiserem jei ginanggwana Amna. Angtane afa Ai As jam ne batobayanaye enggalfe angtane nensa Amnip gam jam betbetulfe, angtane jeiserem jei ga enggalf gane eyebili angtane Amniwer gam ge nunggirbef." 24 Yesus Jei gamjon ga balbabili, "Bwat kapka angtane jame aa galap mirtetefalaram, bwat kapka jeiserem ga wofena ona serteraiserem jebe enggalfe tampata jep nwiniserem ga jes terelbili, jengga jei masef, tampata fas jam domolyan. Ga jem temawer, jei ga gutena, ’Ai gamjon jam age warau jena gwanan ai ajes miruluntum jebe.’ 25 Jei jame aa galap fornaram jena jeiserem jebe, jei jena jeiserem ga domola, jena jeiserem waakensusu, oltunu fas. 26 Jepga jei ga sofna, bwat kapka ga tuju afweraiserem jes kitulnonofe, ane ga aftabifeltye. Bwat kapka afwer jeiserem jei kakalsusu jemniwer. Ane jepga jei seyafter ga aa ge kabwitena angtane jeiserem jem inibe, ane jep ga aa ge nwinbene. Angtane jeiserem gwela jemnaiserem gwanan jes jepserem je kapka, jengga gamjon aas jepserem gwela jemnaiserem je kabwak-kabwaksusu." 27 Yesus ga gemer nasowena, angtane unggwanfer jeiserem jem nenennabe, wini aasaje Yesus uskambar ga bala, "Wini Aamei Is jei geresantam, ane momem Aamei Is jei tainwesantam, ini jemna waakenfer falbili!" 28 Jengga Yesus ga tamawola, "Bunar, jengga angtane taterisi Uwa Sanbagirmana aa jei ne saribenerem, ane ga gam eyeibene, angtane jeiserem ini jemna waakensusfer ga jemanem sege folbamini." 29 Jepga angtane unggwanfersus gamjon ga aa ge betwebili Yesusem gwetmanabe, ane Yesus ga gutena, "Aamei ijeya gwenaram namwer aa jep falaram, aamei angtane kabwaksusu. Aamei taterisi Amna As ijama onsoibeyen, ane aamei etam-etamawer ijama tikweyan. Aamei As enggam ima bala Ai bwembwems eyebif, jengga Ai Ajam eyebiyen. Aamei bwembwema daamfenna tefner isa domola, bwembwema fwater aa jei etamwelam Nabi Yunusminiwer. 30 Jeiserem aa jei etamwebalam Nabi Yunusfe, bwembwema jeiserem mesam etamwel enggalfe, angtane kota Niniwe je aa jei ge nwinbelem jei gam ge towaswebif Uwa Sanbagiri Jei Nabi Yunus mes baftal. Jes gamserem bwembwema Ap jegme se etamwebafa enggalfe aamei namwer ijeya gwenaram aamei igama towaswef enggame Uwa Sanbagiri Jei Amsam baftannunt. 31 Fwater-fwatersus wini sanbakfe aa jei nwinim negeri Selatanminiwer, jei ga enggalf sofna bijaususube taterisi Raja Salomomanaiserem jeiserem gam sarbif. Taterisi jemna waakensusu, jei seyafter towaswel. Wi sanbaka jeiserem jei taterisi Raja Salomomana ga sarbil ane ga onsobil. Ane namwer aas jepserem Ai aare, Aiba igsusum Raja Salomominiwer. Jengga aamei namwer ijeya gwenaram, aamei taterisi Amna ijama onsobiyen. Jega jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme wi sanbaka jeiserem terewer ibaner ga isa irwesa, ane aamei ga is balbabisi, ’Aameiba angtane etam-etamabaram, etam-etama kapka imnaiserem je unggwanfersus.’ 32 Gwanan-gwanansus gamjon jepserem, angtane kota Niniwe je aa jei ge nwinbelem, jei aa galap ne sarbilim taterisi Nabi Yunus aa jes nasbilim, angtane Niniwemana ga aa ge tikwebil etam-etamawer, jei ga waakenaiserem ga jes ne eyebil. Ane namwer aas jepserem Ai aare, Aiba igsusum Nabi Yunusminiwer. Jengga aamei namwer ijeya gwenaram, aamei taterisi Amna imsa sarbili, jengga aamei etam-etamawer ijama tikweyan. Jega jem temawer nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme angtane kota Niniwemana jei terewer ga sege irwebisi ibaner, aamei ga isene balbabisi, ’Aameiba angtane etam-etamabaram, etam-etama kapka imnaiserem je unggwanfersus.’ " 33 Yesus Jei gamjon ga balbabili, "Angtane pelitana aa jei gam dutanaram, jei pelitana jeiserem jam syetasiyen, afa jei burwa gwonap jam gaataaniwiyen. Jengga angtane pelitana aa jam gam dutanaram, jei pelitana jeiserem tampata dwafennaber ga gam gaarantena nafa gam folbafe, jega angtane jenap aa jei gangge kabwitenaram jei nafa ga gane domola. 34 Nwena imna ga lampunu galserem tifini imna seyafter gemerserem jebe. Afa nwena imna nafabara, tifni imna seyafter gemerserem ga is gam ge nafabarswebamini. Jes gamserem aaiserem jegme gemer, afa aamei taterisi Uwa Sanbagirmana jam isa taabilirim, ane taterisi jeiserem ga isa onsobili, gam jega aamei nafaber ga isa gwena. Jengga afa nwena imna is jam sege kabwakswebaminirim, tifni imna seyafter gemerserem ga isege gwinibersweipmini. Jes gamserem aaiserem jegme gemer, afa aamei taterisi Uwa Sanbagirmana ijama taabiyen, ane ijama onsobiyen, aamei gwiniber ga isa gwena. 35 Ga jem temawer, ga seger-segermer aamei in ina waakenfer isa gaaramisnenne, jega enggalf aamei nafaber gam isa gwena, ane aamei ijama gweyan gwinibe. 36 Afa aamei taterisi Uwa Sanbagirmana seyafter jam isa taabilirim, ane ga isa onsobili, ane aamei taterisi nafsi bastowaifer ijama taabiyen, gam jega aamei nafaber ga isa gwena. Nafap gwela jes gamserem, lampu nafa gamserem imnibe." 37 Yesus Jame aa galap tabanwenaram jam nasowelabe, angtane safna Farisimana Yesus ga bala Jam twenfe jem jenabe. Jepga Yesus ga kautena jem jenabe enggalfe gam twenf. 38 Angtane safna Farisimana osiri agama jemna ga enggam, angtane jam twenfe gwanan ga tafas gam wirsona, jengga Yesus Jei tafna Jam wirsoyan Jei nalef Jam twenyan. Angtane safna Farisimana jeiserem jame aa galap damtanaram Yesus Jei tafna Jam wirsoyan, jei ga bitbitwena. 39 Ga jem temawer Tuhan Yesus angtane safna Farisimana jeiserem ga bala, "Bunarsus aamei angtane safna Farisimana, aamei numu daamfenna diwir mese ane pirin galserem, duruwerfener gane wirulu, jengga aaremap je oltunuboro. Aamei osiri imnaiserem waakenfer igama onsobili enggame, aamei tafna ga jam igama wirtabaabili, jengga ini imna is uskamer gangge folbamini, ane ini imna kapkaiserem buguf imnibe. 40 Aamei angtane teisyena! Aamke ijama towasweyan enggame Uwa Sanbagiri Jei tafna yo tifni imna sagap aaiserem Jei is mesam eyebaipmini, ane Jei mese Jeimba ini imna ane tifni imna orolap aaiserem Jei is mes eyebaipmini? 41 Diwiri yo pirni imna jeiserem jep aa jei ge falbitonom, jeiserem angtane galgalyenaiserem jep isa kitulmini, jega jes gemerserem ini imna is ga sege waakenswebamini. 42 Aamei angtane safna Farisimana, galap kapka unggwandusa is etamwemisi ibe! Aamei Hukumu Nabi Musa aa jes tulistababilim, Hukumu jeiserem ga ima onsobili. Ane safe Hukumu Nabi Musamana jam guyon, aamei bumbunu ijeya damtabilirim, bumbunu jeiserem ga ima syentabaabili, ane afwer Uwa Sanbagirf ga ima kitulbono. Jengga aamei kabwaksususerem ga ijesa eyeipmini angtane nafsiserem jebe, ane aamei Uwa Sanbagiri ijama nesikteyen. Kabwakfer eyebiyeneiserem angtane nafsiserem jebe, ane Uwa Sanbagiri ga jam igama nesiktene, jeiserem ga igsusu aamei ijesa eyebife, ane bumbunu jeiserem afwer ga isa kitulbono Uwa Sanbagirfe. 43 Aamei angtane safna Farisimana galap kapka unggwandusa is etamwemisi ibe! Aamei in ina igama tetena. Ini imna kapka ga enggam, ini imna unggwan-giri ga is enggalf ge folbamini, aamei kursini angtane sanbakmanaiserem jep igama nwinfe, jena angtane Yahudimana aa jep betwebuwefaram jebe. Ane ini imna saaser-saasera ga enggalf is gangge folbamini angtane pasarap aa jei gangge wofobilirim, jei enggam isa gane balbabife, ’Gwinibener angtane sanbak.’ 44 Galap kapka unggwandusa is etamwemisi ibe! Aamei ga enggala bitisi jam syawulsili galserem. Angtane aa jei gangge wofebilirim bitisi jam syawulsiliserem jem sagabe, jei jam ge towaswebiyen jei bitisip ge wofobili. Jes gemerserem aaiserem jegme gemer, aamei taterisi kapka ijesa eyebilirim ga ijama syawulsini, ane angtane jam ge towaswebiyen enggame aameiba angtane kapkam." 45 Guru daamfenna Hukumu Nabi Musa aa jes tulistababilim aa jei towas-towastababuwenaram, jei Yesus ga bala, "Guru, Aamei jes Igam nasounaram, Aamei ai mese as Igemer imei-imeitababili." 46 Yesus ga tamawolbana, "Aamei guru-guru Hukumu Nabi Musamana ijeya towas-towastababuwenaram, galap kapka unggwandusa is etamwemisi ibe! Aamei Hukumu Nabi Musamana ima nasipmuwena angtanefe, ane aamei taterisi angtanemana jes mese ga ima nasipmuwena. Aamei ga enggam ima nasipmuwena, angtane ga nawersamer sene tikwemitini, jengga angtane masef ne unggwasbili seyafter jeiserem jam tikwebitife. Ane aamei iner bastowaifer fas ijama batobaabiyen, jega angtane seyafter jeiserem ga sene tikwebitini aamei ijesa bilirim. 47 Galap kapka unggwandusa is etamwemisi ibe! Asal-asala ilemana jei nabi fwatermana mesam munbobil. Ane namwer aamei bitis jena waakensusu yo unggwandwasusu ga ima eyebaipmini toneme, bitisi nabi jeiserem jem tarnabe. 48 Aamei ijewera eyebilirim, aamei iner ima balbabili enggame, ’Asal-asala nemna aa jes ne eyebilim jei waakena.’ Asal-asala imna jei nabi fwatermana jam ne sarbabiyen, ane ga aane munbobil. Aamei asal-asala imna galserem; aamei bitis jena waakena ga ima eyebili, jengga aamei mese nabi fwatermana aa jes ne bilim, jeiserem aamei ijama sarbabiyen. 49 Jega jem temawer, Uwa Sanbagiri seyafter aa jes towaswebabilirim, Jei ga enggam gunu, ’Ai nabi ibirmi ane rasulu mese As baftabisi jemnibe. Afwer ga sene munbobisi, ane afwer ga sene tamtamtababisi.’ 50 Ga jem temawer Uwa Sanbagiri Jei angtane namwer aa jei naawenaram se tamtamtababisi, nabi seyafter gwanan aa jewer ne munbobilim jem temawer, Uwa Sanbagiri ogiri aaiserem jam aa galap eyebalam, 51 Habel aa galap ne munbolom jes jepserem ga jep towaiwel, maga gemer ne munbobuwel, jamere umwef Sakarya aa galap ne munbolom jebo. Sakarya jei jep ne munbol sitawer Jena Uwa Sanbagirmana, aawer ga mejana Uwa Sanbagirmanaiserem ga jem nenennap ne munbol. Ai bunarsusfer ims towas-towastababili, aamei ijeya gwenaram namwer aa jep falaram, Uwa Sanbagiri ga is tamtamtababisi, nabi seyafter aa jei ne munbobilim jem temawer. 52 Aamei guru-guru Hukumu Nabi Musamana ijeya towas-towastababuwenaram, galap kapka unggwandusa is etamwemisi ibe! Aamei taterisi Uwa Sanbagirmana kabwakfer ima towas-towastababili, ane jega jem temawer ini angtanemana ijeya sarbaipminirim, ini jemna jam ferwetiyeneiserem enggalfe taterisi Uwa Sanbagirmana waakenfer jewer gam sarbif. Aamei taterisi Uwa Sanbagirmana iner ijama taabiyen, ane angtane aa jei gam gunurum jei taterisi Uwa Sanbagirmana jam ne taabife, aamei angtane jeiserem ga ijama uftabili, ane jei taterisi Uwa Sanbagirmana jam ne taabiyen." 53 Yesus tampata jeiserem aa galap mirultefalaram, guru-guru Hukumu Nabi Musamana aa jei ne towas-towastababuwenaram, ane angtane safna Farisimanaiserem jes mese, jei Yesus uskambar ga aane nasbana. Ane jes jepserem jei ga aa towaiwena Yesus uskambar ne teneba-tenebawena taterisi nenes-nensaiserem jem temawer, 54 enggalfe jei Yesus jam ne unggwasbaf. Afa Yesus taterisi syefer jam se nasbabilirim, angtane jeiserem enggam ga sege gubili, "Yesus Jei kapka."

12

1 Jes galapserem angtane unggwanfersusu ga aa ge betwebili, ane jena ga jam ne bafsonanna jamer jei ga jena tufap ne juminenne. Yesus gwan ga angtane Jemna aa jei ne tikwebaatinennerem ga jes balbabili, "Aayai, aamei gwela angtane safna Farisimanaiserem je safnant ijama onsoipmiyen. Angtane safna Farisimana ga angtane akar-akarem aa jei naawenaram. Jei taterisi aa jes gane nasbabilirim, angtane taterisi jeiserem enggam gane balbabili, taterisi jeiserem ba waakenam. Jengga ini jemna kapka, jei kapkaiserem jes gane eyebili. Jewer ga aamei taterisi jemna seger-segermer isa sarbaipmisini, jega aamei kapkaiserem ijama eyebiyen. 2 Angtane akar-akarem aa jei naawenaram, seyafter basyamer jam eyebiliserem ane basyamer nasoulaiserem, seyafter jeiserem angtane ga sene towaswebisi. 3 Ga jem temawer, aamei ijesa bilirim gwineme, jeiserem ga sene sarbisi gwereme. Ane aamei ijesa nastebunnurum angtanem imwanabe mwona jam matasiliserem jebe, taterisi jeiserem ga sene nasbinense angtane unggwanfer jem tarnabe." 4 Yesus Jei gamjon ga balbabili, "Am afelen mesna, Ai ims balbabili, angtane safnant ijama erebaabiyen. Angtane tifni imna tefner is jei gane munbobiliserem, jengga jei uwu imna fas is jam ne munboipmiyen. 5 Ai isa As ge saamisini ibe, aamei ijesa erebiliserem. Aamei Uwa Sanbagiri tefner isa erebene, aam temawer Jei tifni imna samfer jes se munbobili, ane Jei baabetabara uwu imna is firtabaipmuniwili taman tokwagiribe. Bunar, Ai ims balbabili, aamei ga Uwa Sanbagiri tefner isa erebene. 6 Junu tafna gwiri bastantowaisusu sene jualtababili hargana ga enggam doini naura bastowaisususerem. Safe gam jes gamserem, junu safe daamfenna Uwa Sanbagiri Jei junu jeiserem jam dirinswebayan. 7 Jengga jetefeneryan, Uwa Sanbagiri Jei nabal safna im dukabe, Jei seyafter mesam eterbaabili. Ga jem temawer, safnant aamei angtane ijama erebaabiyen. Uwa Sanbagiri Jei uskambarsus imse gerebaabisnenne, junu bastantouya unggwanfer jeiserem jemniwer." 8 Yesus Jei gamjon ga balbabili enggame, "Ai ims balbabili, angtane afa enggam aa jei gam gunurum angtanem tarnabe, ’Yesus Jei am Sanbaka.’, Ai As bala malaikata Uwa Sanbagirmanaiserem jem tarnabe, ’Angtane aaiserem jeiba Amnam.’ 9 Angtane afa enggam aa jei gam gunurum angtanem tarnabe, ’Yesus Jei am sanbakyan.’, Ai malaikata Uwa Sanbagirmana jem tarnabe enggam As bala, ’Angtane aaiserem jei Amanyan.’ 10 Taterisi kapka angtane aa jes gane nasbabilirim Am temawer, Ai Tane Angtanemana, Uwa Sanbagiri Jei etam-etama jeiserem gam wirtabaipmisini. Jengga angtane Mafnana Uwa Sanbagirmana Jem temawer nimnafer aa jei gam nasbilirim, Uwa Sanbagiri Jei etam-etama jeiserem Jam wirulboyon. 11 Afa aamei is jam sene aftabifelerem jena angtane Yahudimana aa jep ge betwebuwefaram jebe, afa angtane sanbakem tarnap enggalfe aamei is gam ne tenebaabuwefe, aamei safnant ijama ereyen ijesa nasbiliserem jem temawer. Ane aamei ijama ereyen enggalem temawer, ’Ai fomfom as tamawolbana, angtane ai as jei ne tenebaabuwenaram.’ 12 Aamei ijama ereyen, aam temawer jes jepserem aamei ijesa nasbiliserem, Mafnana Uwa Sanbagirmanaiserem Jei ula jeiserem ga is Jener se towas-towasulmini." 13 Angtane unggwanfer jeiserem jemniwer, angtane daamfenna aasaje Yesus ga bala, "Guru, uwa amna mes tere, galgala jemna mes mirtebitefala. Aamei aya amnaiserem jes bal jei galgala jeiserem gangge syentabaabi, ap ga as afwer se kitulbono." 14 Yesus ga tamawolbana, "Am afelna, Ai As nane destabana im sanbakf nwinf enggalfe, afa galgala imna jeiserem gam syenulmif?" 15 Jewer ga Yesus angtane seyafter jep aaiserem ga balbabili, "Aayai! Aamei ina ga jam isa gaaramisnenne, jega ini imna is jam ge folbamiyen galgalminipfener, ane jam taabifefeneryan, aam temawer gwela waakena angtanemanaiserem fas jam teyan galgalminiwer, safe galgala jemna unggwanfer." 16 Jepga Yesus seisya taterisi aaiserem ga nasbili, "Angtane aasaje galgalabara. Angtane jeiserem ona jemna nananisi ga uskambarsus. 17 Angtane galgalabara jeiserem ga gunu jelem inibe, ’Tampata gamjon ga fas enggalfe, ona amnaiserem jemna nananisi ai ajep waakentababisife. Gamjon ga fomfom as eyebili?’ 18 Ane jei gamjon jener ga gunu, ’Ai enggam as eyebili. Gudanga amanaiserem ga jam as kwirtabaabisini, ane gamjon ga as eyebaabili, unggwandwasfer. Jepga nananisi amna seyaftersus ga as waakentababisini, ane galgala amna afweraiserem jes mese. 19 Jeiserem taban, ai aner an ana ga as bala, apgal jigala amna jame ase uskambarsus ge falibene, ane apgal jigala jeiserem fas jam ge barwebiyen jamer tahunu ane-anesus. Ai namwer jafner as gwesini, ane ga as twenwena masara gamserem, ane as domola gwela saaser-saasera.’ 20 Jengga Uwa Sanbagiri Jei angtane galgalabara jeiserem ga bala, ’Wai, aamei angtane teisyena! Gwini namwer aaiserem aamei jemer is tere. Ane ga nane se domola apgal jigala seyafter jeiserem aamei ilefefener ijes menetababisinirim?’ " 21 Taterisi jeiserem taban, Yesus ga balbabili, "Jeiserem ga jese etamwemini angtane seyafter gemerserem aa jei gam unggwasaram galgalabar gwefe enggalfe tifni jelemanaiserem jem temawenefener, jengga jei fas jam unggwasyan igsususerem Uwa Sanbagirem nwenabe." 22 Jepga Yesus ga Jei aa jei ne tikwebaatinennerem ga balbabili, "Ga jem temawer, ini imna is basangge eseswebaminirim tumilgala ijesa tumiliserem jem temawer jem gwefe! Ini is basangge eseswebaminirim fenem temawer tifinmana! Tumilgala ane fen igi jemna ga bastouya. 23 Uwa Sanbagiri Jei mafnana yo tifni is mesam tetmini; mafnana yo tifni igi jemna ga unggwandwasusu. Afa Uwa Sanbagiri Jei mafnana yo tifni ip is jam tetmiliye, gam jega Jei bunarsusfer tumilgal mese fen is kitulmini ibe. 24 Ju fiwar sa damdamtaasi waakenfer! Jei twam tanna jam tonolyan, jei nanna jam tasoyan, jei tumilgala titiki fas. Jei bastouya, jei igyen, jengga Uwa Sanbagiri Jei tumilgala junu jeiserem jep mes kitulmini. Aamei unggwan-gwana, aamei igsusu juminiwer; Uwa Sanbagiri Jei bunarsusfer ise tainbili. 25 Angtane ini jam eseswebalaiserem, jei gam aa jewer eseswebanaram, jei gwela jelemanaiserem jei fas jener jam bwalewulyon nunu daamfenna jeme. 26 Afa aamei gwela ilemana fas ijama bwaletababiyeneye nunu daamfennaiserem jeme, jeje bafa aamei ga ini isege eseswebamini tumilgala yo fene jem temawer? 27 Bunga es sa damdamtababisi! Jei jener gam gane kokosa, jengga jei awelnap jam naaweyan, jei fene jam ne eyebaabiyen. Raja Salomo, angtane sanbagiri fwatermana, jei angtane igiserem, doini jemna ga anesus, ane fene jemna ga waakensusu. Jengga Ai ims towas-towastababili, bunga ese waakensususerem fene Raja Salomomanaiserem jemniwer. 28 Sasfan je igyen, nei namwer neya domola, jengga abakferyan je tokwanap gam fasawola. Safe gam, Uwa Sanbagiri sasfana waakenfersus eyebaabili. Afa ga gam, Uwa Sanbagiri Jei aamei is gase gerebaabisnenne waakenfer, fene ip gase kitulmini. Fomfoma game, aamei Uwa Sanbagiri bastantowaifefener ima tebana! 29 Ini imna safnant jeber-jeber is jam ge jenbamiyen tumilgala aamei ijesa tumiliserem jem temawer. Aamei ini imna is jam ge eseswebamiyen seyafter jeiserem jem temawer. 30 Angtane Uwa Sanbagiri jam tebayanaiserem, ini jemanem ge eseswebamini seyafter jeiserem jem temawer. Uwa imna Jei tousa enggame aamei seyafter jeiserem ijesa bilirim. 31 Jengga aamei aaiserem ga uskambar isa terelbili, fomfoma aamei Uwa Sanbagirem gwonap ijama nwinfe, jega Uwa Sanbagiri im Sanbakfe gam nwinf. Jepga Uwa Sanbagiri Jei aamei ijesa balbabilirim ga is kitulmini ibe." 32 Yesus Jei angtane Jei aa jei ne tikwebaatinennerem ga jes towas-towastababili enggame, "Aamei safe angtane unggwanferyan, aamei ipsama ernerem, aam temawer Uwa imna Jei ini saaser-saasera waakenaiserem is jam golmife ibe. Aamei Uwa Sanbagirem gwonap isa gwena, Uwa Sanbagiri Jei im Sanbakf gwena. 33 Jigal-jigala imna ga jam isa jualtababili, ane doini jeiserem ga angtane galgalyenaiserem ga jep isa kitulmini. Aamei jeber-jeber ga jes isa eyebili waakenaiserem jes galserem, ane Uwa Sanbagiri Jei fwaina imna waakenaiserem taman waaken-girip is gas dupdupbulmini. Apgal jigala taman waaken-girip jeiserem fas jam ge barwebiyen. Angtane komkoma jam gwetmanwebayan, ane bingini galgala jam ne tombaabiyen. 34 Aamei waakensusu jes gemerserem ga gemer isa eyebili, aam temawer igsususerem imna is jep gangge falipminirim, ini imna ga is jep gam ge folbamini." 35 Yesus Jei gamjon ga balbabili, "Aamei ga jam isa menetababisiwena. Fene awelna jebar gwelaiserem jam isa kabwabuwena, ane lampunu imna ga is gemer sege erteipmisini. 36 Aamei ga gemer isa eyebili angtane awelna angtanefe aa jei ne gweyibenerem jei gemerserem, angtane aa jei ne fibanaram angtane sanbaka jelemana jase warautnaram masar tarnawer. Angtane sanbaka jemna jame aa galap fortyaram, jei pintunu ga enentene, jei pintunu tatarfer ga gane tertesiwitye. 37 Afa angtane sanbaka jem jenap jam gam fortyaram, ane angtane awelna jemna aa jei ne gweyibenerem ga gam damtabili jei jam ge tabayan, jengga jei gemer gam ge gaarabisini, angtane awelna aa jei ne gwebilirim ini jemna ga aa ge saaser-saaserswebamini. Ai bunarsusfer ims towas-towastababili, angtane sanbaka jemna jeiserem jei ga fene awelnap jebar gwelaiserem ga kabwabili, ane jei ga gam balbabili jam nwintef enggalf gam twenfe, ane tumilgala ga kitulmini angtane awelna jemna aa jei ne gweyibenerem jebe. 38 Angtane sanbaka jeiserem jei safe gwini nenennap gam fortya, afa jei angtane awelna jemna aa jei ne gweyibenerem ga jam gam damtabilirim jei mes ge menetwebisini, angtane awelna aa jei ne gweyibenerem ini jemna ga aa ge saaser-saaserswebamini. 39 Jengga aaiserem gasa sarbi: Afa angtane jena jam jemanserem jei jam gam towaswenaram enggame, jema ga enggammer angtane komkoma gase fortya, jei jena jelemana ga gam gaarabisnenne, jega angtane komkoma masef ga gam unggwasa jenap jam kawetefe. 40 Ga jem temawer, aamei mese aamei ga jam isa menetwesiwena, aam temawer aamei jema ijama towaswemiyen, jema Ai Tane Angtanemana Ai Ajep fortyaram." 41 Petrus Yesus ga tenebana, "Tuhan, Aamei seisya taterisi jeiserem ke apfener nasipmini, afa angtane seyafter gemerserem jep mese?" 42 Yesus ga tamawolbana, "Angtane awelna nafsiminip waakenfer aa jei gam gwebilirim ane jei gam towaswena, jei ga fom gam eyebili? Angtane jeiserem jei ga aas gamserem ga gemer gam eyebili: Angtane sanbaka jemnaiserem jei awelna aa jeman gam gweyibenerem, angtane sanbaka jeiserem jei jam aa jep gam sofnaram, jei angtane awelna waakenfer aa jei gam gwebilirim angtane afweraiserem jemniwer, angtane jeiserem ga gam gaartena enggalfe jei dwakfe gam nwinf, jelem afelen mesna afweraiserem jemniwer. Angtane dwakfe aa jei gam nwinirim jeiserem, jei tumilgala angtanemana afweraiserem nunu jeber-jeber gam golmini. 43 Ini jemna waakenfer gam folbana, angtane sanbaka jemna jam gam warautnaram, ane jei gamjon gam damtana angtane dwakfe aa jei gam nwinirim jeiserem, jei aa jes gam bilibenerem ga jes gam eyebili. 44 Ai bunarsusfer ims towas-towastababili, angtane sanbaka jeiserem jei angtane ga jes gam gaartena gamjon, jega jei dwakfe gam nwinf enggalfe, angtane sanbaka jemna seyafter aa jes gam damtabilirim, apgal jigala jeiserem jei gam gerebaabisnenef. 45 Jengga aaiserem ga ilem iniber isa sarbisnenne jafner: Angtane dwakfe aa jei gam nwinirim jeiserem, afa jelem inip kapka enggam gam gunurum, ’Angtane sanbak amna jei gemerje abaka jei gamjon gase warautna.’ Ane jei angtane awelna aa jei ne gwebilirim afwer jei gase towaitababili jam safsaftababife, wi mese anggwa. Ane jei tumilgala unggwanfer gase tombaabili, ane fo anggur se telbebili jamere jei se mabukswena. 46 Angtane dwakfe aa jei gam nwinirim jeiserem nunu yo jema jam towaswemiyen, angtane sanbaka jelemana jei gamjon jem waraunalaiserem. Ane gamjon waraunala jepserem, jei angtane dwakfe aa jei gam nwinirim jeiserem gase safsaftana jamere tamtamsus, ane ga baftana taman angtane Uwa Sanbagiri jam tebayanaiserem ga jep. 47 Angtane awelna aa jei gam gwebilirim angtane sanbakaiserem jemnibe, afa jei jam gam towaswebilirim angtane sanbaka jemna jeiserem jei aa jes gam bilirim, jengga jei jam menetulsiyen ane fas jam eyebiyen angtane sanbaka jelemana aa jes gam bilirim, angtane jes galserem jei uskambarsus gane safsaftana. 48 Jengga angtane aas galserem jei bastowaifer ga sene safsaftana: angtane jam towaswebiyeneiserem angtane sanbaka jelemana aa jes gam bilirim, ane jei syefer gam eyebili. Afa Uwa Sanbagiri Jei angtanefe apgal jigala bastowaifer gam gulbanaram, angtane jeiserem jei awelna Uwa Sanbagirmana gase gweyibene. Ane afa Uwa Sanbagiri Jei angtanefe apgal jigala unggwanfersus gam gulbanaram, angtane jeiserem jeime awelna Uwa Sanbagirmana unggwanfersus gam gweyibene." 49 Yesus Jei gamjon ga balbabili, "Ai enggalf Ai fortya, tokwana Agam suranf ogiri aaiserem jebe. Ai Alem inip enggam Ai gunu afa tokwana jeiserem jam sene ertenerem! 50 Ai tamtamtala uskambarsus galap ga As domola. Jeiserem nalefe gwanan jam tabanwebiyen, ini Amna As jam siginswebana. 51 Aamei ilem inibe enggam ipsama gunurum, ’Yesus Jei enggalf fortya ogiribe, angtane waakenfer gam naawef, jei jam ge erabayan.’ Fas, gamyan. Ai ims towas-towastababili, Ai ga enggalf Ai fortya angtane Agam waksosif. Angtane afweraiserem jei Amsene tebana waakenfer, ane angtane nafsiserem jei Ai As jam ne tebayan waakenfer. Jega jem temawer angtane waakenfer Ai As jei ne tebalaiserem, ane angtane Ai As jei ne tebayanaiserem jei ga sege erabasa Am tikwebaatilem temawer. 52 Namwers towaiwena, angtane tafna gwiri jena daamfennaber aa jei gangge nwinbenerem, anggwa mese wi tane, jei jenjen ga gangge erabana, nawer-ningna jei nauraiserem jebar gangge erabana. 53 Uwa jei tane girtowai jelemanaiserem jei jebar gangge erna, ane tane girtowaiserem jei jetabar gangge erna. Iye jei tane yafontowai jelemanaiserem jei jebar gangge erna, ane tane yafontowaiserem jei eneber gangge erna. Ginaudusa jei ginautouyabar jei jebar gangge erna, ane ginautouya jei ginaudusaiserem jei jebar gangge erna." 54 Yesus angtane unggwanfer ga balbabili, "Aamei omyana jame igalaba domsobanaram gwer kautalawer, aamei jes jeberserem ga enggam ima gunu, ’Arouwa se nyentya.’ Ane bunarsus arouwa se nyentya. 55 Ane nindaya sarsara jame igalaba ensobanaram gwer anggasyela taasfolawer jewer jam gane gwebana, aamei ga enggam ima gunu, ’Gwere sarsarsusu se jere.’ Ane bunarsus gwere sarsarsusu. 56 Aameiba angtane akar-akarem ijeya gwenaram! Afa aamei winsi jam igama damtanaram, aamei ga igama towaswena enggame arouwa se nyentya, afa gwere sarsar se jere. Afa ga gam jes gamserem, jeje bafa bwembwema namwermanaiserem Uwa Sanbagiri aa jes eyebilirim, aamei ga fas ijama sarbabistaabonyan?" 57 Yesus Jei gamjon ga balbabili, "Jeje bafa aamei infentowai bai ijama bilyen ilem inibe bunarsusfer jes eyebiliserem ga fwersa? Waakena jam eyebiliserem ga aas: 58 Afa angtane enggam jam is gam balaram, ’Aamei kapka gam eyebili.’, ane jei aamei ga is aftafaltya angtane sanbagirminibe, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe, jega enggalf taterisi jeiserem gam borolf angtane jeiserem jebar, afa ga gam jes gemerserem, aamei nomkef nel nenennap ijep ge sofnaram, taterisi jeiserem ga jep is ge borola. Afa taterisi jeiserem fas ijam ge borolyanaye, angtane aamei is jei balaram, ’Aamei kapka gam eyebili.’, angtane jeiserem aamei ga is jei se gera angtane sanbagiriserem jemnibe. Angtane sanbagiri jeiserem jei aamei ga is jei se gera polisiminibe, ane aamei bwiyip ga isene gaataantena. 59 Ai ims towas-towastababili, aamei jeber is nuniton jamer aamei doini seyafter angtane sanbaka jeiserem aa jes mwangbanaram, doini jeiserem ga jam is gera."

13

1 Jes jepserem angtane afweraiserem Yesusfe enggam ga aas ne nasibene, "Angtane Galileyamana afweraiserem jei apgal jigala Uwa Sanbagirfe aa galap ne kitulbonontom, jes galapserem Gubernur Pilatus jei angtane jeiserem ga munbobilint." 2 Yesus ga balbabili, "Ilem inip enggam ipsama gunurum, ’Angtane Galileyamana jeiserem jes gamserem aa gemer ne munbobilintim, aam temawer angtane Galileyamana jeiserem etam-etama jemna unggwanfersus angtane Galileyamana seyafter afweraiserem jemniwer.’ 3 Fas, gamyan! Etam-etama jemna unggwanferyan angtane nafsiserem jemniwer. Jengga Ai ims towas-towastababili, afa aamei ijama irfweyanaye etam-etama imnaiserem jewer, aamei seyafter aafer-aafer ga isa tere angtane jeiserem jes gemerserem. 4 Jes gemerserem aaiserem jegme gemer, angtane delapan belas jena bubwaldusa aa galap ne eyebilintim enggalfe kota Siloam jewer gam gerebaasnenef, jena bubwaldusa jeiserem angtane delapan belas jeiserem jem sagap ga jenant, ane angtane jeiserem ga jubobili, jamer futu. Aamei ilem inip enggam ipsama gunurum, ’Angtane jeiserem aa jei ge terbilirim, etam-etama jemna unggwanfer etam-etama angtane seyafter afweraiserem jemniwer aa jei ge nwinbenerem kota Yerusalem je.’ 5 Fas, gamyan! Jengga Ai ims towas-towastababili, afa aamei ijama irfweyanaye etam-etama imnaiserem jewer, aamei seyafter aafer-aafer ga isa tere angtane jeiserem jes gemerserem." 6 Jewer ga Yesus seisya taterisi aaiserem ga nasbili: "Angtane aasaje jelem anggur makanabe ara tini aasaje ga jep fina. Jei makanap jeber-jeber sofwena, ara tanna masef terelbaabili. 7 Ga jem temawer jei angtane makana jemnaiserem awelna jep aa jei gwebilirim ga bala, ’Aiba tahunu nawer-ningna ai ajam forowelabe ara tini aaiserem ai jem igiserem ga ajes terelbaabuwena, jengga fas igi tini aaiserem afa ajam domolyan. Ja se balansi! Jei baf se fina aafe? Tini nensa tannabaraiserem samfer aaf ga jes is tonola.’ 8 Angtane awelna makanap aa jei gwebilirim ga tamawola, ’Uwa safnant, gwanan jege ten tahunu aaiserem jeme. Ai samfer tini aaiserem as gweyini. 9 Jei kese tena tahunu gamjon jitefweraiserem jeme. Jengga afa jei fas jam teyanaye tahunu jitefweraiserem jeme, sya aamei safis bili jam balansife.’ " 10 Nunu Sabat afweraiserem jeme, Yesus Jei angtane ga jem towas-towastababili jena afelna angtane Yahudimana aa jep ge betwebuwefaram jebe. 11 Jes jepserem wini aasaje ga jep nwini. Bwat kapka mes kautena wini jeiserem jemnibe, ane jega jem temawer jei bwernabara. Wini jeiserem jei bwerna jamer falbilibe tahunu ga delapan belas. Jega jem temawer jei aanwesirmer gam wofena, ane jei nornorfer masef jam fyafe. 12 Yesus wini jeiserem jam aa galap domolaram, Jei wini jeiserem ga jenbiwili Jemnibe, ane ga bili wini jeiserem, "Iye, aamei imes ferwetini bwernawer!" 13 Jepga Yesus ga tafna tosoniwili wini jeiserem jem sagabe, ane jes jeberserem wini jeiserem nornorfer ga fina, ane Uwa Sanbagiri ga pujitene. 14 Jena angtane Yahudimana aa jep ge betwebuwefaram, angtane sanbaka jena jeiserem jei Yesus ga aa nasbana, aam temawer Yesus Jei wini aa jewer waakenulurum nunu Sabateme. Angtane sanbaka jeiserem angtane jep aa jei ge nwinbenerem ga balbabili enggame, "Nunu enam ga aare enggalfe angtane awelnap jem gwef. Nunu enam jeiserem aamei ga jem igama jela enggalfe, aamei bwernawer is jem gam ne waakentababife, jengga nunu nei nejama nwinsiwefaram jeme, safnant ijama jelyan!" 15 Tuhan Yesus angtane jeiserem ga tamawolbana, "Aameiba angtane akar-akarem ijeya gwenaram! Aamei nunu nei nejama nwinsiwefaram, aamei nunu jeiserem jem ga enggam igama eyebili, aamei sapi afa keledai imna enggam igama batobaabili, aamei jam igama fertebaabisinirim kandangawer, ane ga igama aftabifele sitawer enggalfe fona gane telbebif. 16 Afa aamei jes gemerserem igama eyebiliye nunu nei nejama nwinsiwefaram jeme, Ai aamei isa Ajam tenebaabili wini aaiserem jem temawer. Jeiba asal-asala Abrahammanam, ane bawas jei wini aaiserem mes taabili bwerame, abaka ga enggammer tahunu delapan belas. Ke enggam wini aaiserem jei safnant jam batobiyen jam waakenulfe nunu nei nejama nwinsiwefaram jeme?" 17 Yesus Jei gam aa jewer balbabilirim, angtane Yesus aa jei ne uskamswebanaram jei ga aa ge seferswebili. Jengga angtane seyafter afweraiserem ini jemna saaser-saaserfer ge folbamini seyafter waakensususerem Yesus aa jes eyebilirim jeiserem jame aa galap ne domolaram. 18 Jepga Yesus gamjon ga tenebaabili, "Ai fomfom As armansosini nunu Uwa Sanbagiri Jei aa jem nwinirim anggwabura seyafter gemerserem jem Sanbakfe? Ai seisya taterisi nunu jeiserem jem temawer Ai isa gam Age nasipmi, jega aamei waakenfer gam isa sarbili enggame angtane Uwa Sanbagirem gwonap aa jei naawelaiserem ba sege etamwebili unggwanfersus. 19 Nunu jeiserem ga enggam fala taterisi aaiserem eremu tanem temawer gamserem: Angtane eremu tanna bastantouya gam goltena, ane jelem makanap ga gam tonola. Eremu tan bastantouya jeiserem ga gangge kokosbili, ane ga gam etamwena tini unggwandwasfe. Tini jeiserem jem tirnibe junu ga gola jep ga gane eyebaabili." 20 Yesus gamjon ga balbabili, "Ai taterisi gamjon isa Ajes nasipmif ibe, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer, jega aamei waakenfer gam isa sarbili enggame, galap angtane taman-tamna unggwanfersus aaiserem jei Uwa Sanbagirem gwonap gase naawesa. 21 Nunu jeiserem ga enggam se fala taterisi aaiserem roti tanem temawer gamserem: Wini roti tan bastantowaifer aa galap tetelam, ane tepungu unggwanfer ga enggammer empat pulu liter waakenfer jebaner gam dupdupbulu, roti tanna bastowaifer jeiserem tepungu unggwanfer ga je gam gwebili jam taweyafe, jepga rotif ga gam etamwena." 22 Yesus Jei Jame aa galap sofnaram Yerusalemwer, Jei ga kota-kotasamer sofna ane taman-tamnap mese, angtane jep ga aa towas-towastababinenne. 23 Angtane aasaje ga Yesus ga tenebana, "Uwa, angtane jes waakentababisiliserem ke bastantowaifer?" 24 Yesus ga tamawolbaabili, "Jam isa unggwasa uskambar pintunu olosaiserem jep kautefe. Ai ga isa gam towas-towastababili jes gamserem, aam temawer angtane anesus aa jei ge unggwasbilirim pintunu olosaiserem jep kautefe, jengga jei fas jam ge kabwiteyan. 25 Angtane jena jam jemanserem jam aa jep gam irwenaram, ane pintunu ga gam matasini, aamei ga sitawener igama fina, ane pintunu ga igama enentewili jamer igama jenbene, ’Uwa, pintunu as tertemisiwiye abe!’ Jengga Jei enggam ga gam tamawola, ’Ai teisyena aamei fwermana.’ 26 Jepga aamei ga igama bala, ’Aiba nemsama twena Ibar; ane Aameiba angtane Imsam towas-towastababili tamna amnaiserem jebe.’ 27 Jengga Jei gamjon ga is gam balbabili, ’Ai teisyena aamei fwermana. Jasa gwisi Amniwer, aamei etam-etama kapka aameiya eyebuwena!’ 28 Aamei Abraham mese Isak, Yakub, ane nabi seyafter gemerserem ga isa damtabisi taman waaken-girip aa jei ge nwinbenerem ini saaser-saasereme. Jengga aamei ijama kaweteyan jei aa jei ge nwinbenerem jebe, ane jepga aamei ga isa syenansa, ane ini imna siginsusfer ga isa entebisi, ane ini imna uskambar ga isege jenbamisi. 29 Angtane ga sege forobuwetya ogiri seyafter gemerserem jewer, ane jei ga sege nwinbese seyafter Uwa Sanbagirfar taman waaken-giribe. Ane jei mese ini jemanme ga sege saaser-saaserswebamisi. 30 Bunar-bunarsus jes jepserem angtane enggam aa jes ne balbabilirim bastantana jei ga sege danabisi, ane angtane enggam aa jes ne balbabilirim sanbaka jei amnuwer sege fibili." 31 Jes galapserem, angtane safna Farisimana afwer ga aa ge jalbili Yesusminibe, ane Yesus ga aane bala, "Ona aaiserem Jase mirtetefal, ane ga Is sofwa ona nensaiserem jewer, aam temawer Raja Herodes jei Ims munbof." 32 Yesus ga tamawolbaabili, "Jasa sofwe Herodesminip, angtane afaf-afafaiserem. Ane ga isa bala Ai enggam Ai gunu, ’Ai nunu abakferyan, Ai bwata kapkaiserem Ajes surbobif, ane angtane bwernabaraiserem Ajes waakentababif. Jeiserem taban, Ai awelna Alemana ga jem As borolsini.’ Herodes ga jes gamserem ga gam isa towastana. 33 Ai awelna Ajam gwebif nunu namwer aaiserem, ane gwirmer mese jem. Ane Aime jamer As sofwa Yerusalemwer, aam temawer bunarsus nabi jei jam ne munboyon tamna nafsiserem jebe, jengga Yerusalemwer ga jep sene munbono." 34 Yesus Jei gamjon ga balbabili, "Aamei angtane kota Yerusalem ijeya nwinbenerem! Ini Amna kabwakfer folbana, aam temawer aameiba angtane nabi aameima munbobuwena, ane aameiba angtane Uwa Sanbagiri aa jes baftabilirim, angtane jeiserem aameima munbobuwena toneme. Ini Amna unggwan-girfer ga As enggam folbana, Ai isa jam dupdupbulsif Alem tarnap, ayang ga eneserem jei tanna jelemana aa gemer gam dupdupbulsinirim jelem farat gwonabe. Jengga aamei Amnip bai ijama betwefe. 35 Ga jem temawer, Uwa Sanbagiri Jei im nenennabe fas Jam nwinyen, ane kotana imnaiserem ga is kabwakswemisi. Ai ims towas-towastababili, aamei gamjon Ase ijama damtayan jamere Ai gamjon As forsanya. Jes jepserem aamei ga isa gutesa enggame, ’Uwa Sanbagiri Jei waakena Jelemanaiserem ga Jei se gulbana, Angtane aa Jei fortyaram Tuhanem boseme!’ "

14

1 Nunu Sabat afwer jes galapserem Yesus ga sofwa Jam twenfe jena angtane sanbaka Farisimanaiserem jebe. Jes jepserem angtane Yesus samem-samem ga aane gerebana ini uskamer. 2 Ane angtane tifni seyafter aa jemanem fanabanaram jei Yesusminip ga jela. 3 Ane Yesus ga guru-guru Hukumu Nabi Musamana aa jei ne towas-towastababilirim, ane angtane safna Farisimana jep aa jei ge nwinbenerem ga tenebaabili, "Nabi Musa jei bas bil? Angtane ke samfer angtane bwernabara nunu Sabateme ke gane waakentana, afa fas?" 4 Jei seyafter Yesus jam ne tamawolbayan. Ane Yesus Jei angtane bwernabara jeiserem ga tebana, ane angtane jeiserem ga waakentana, ane ga bala jam sofwefe. 5 Jepga Yesus angtane ga balbabili, "Afa tane imna, afa sapi imna jam gam jantonom periginibe nunu nei nejama nwinsiwefaram, aamei bunarsus tane imna afa sapini imna tatarfer ga igma gaasaarstena periginiwer, nunu jeiserem safe nunu nei nejama nwinsiwefaram, awelna nejama gwebiyeneiserem jeme." 6 Jengga angtane afa fas jei jam ge tamawolbiyen taterisi jeiserem jem temawer. 7 Yesus syewal anggwana afweraiserem ga damtabili enggam jei ne eyebife, jei kursini waakenaiserem jep ge nwinbentef. Ga jem temawer Yesus seisya tateris aaiserem ga nasipmini jebe, angtane seyafter jep aa jei ge nwinbenerem. 8 "Afa angtane nafsi aamei is jam gam balaram enggalfe masara gam onsobif, aamei safnant kursini waakenaiserem jep ipsam nwintet, aam temawer aamei teisyena afa angtane masara jam aa jei gam eyebilirim, jei angtane sanbaka imniwer jei mese galap gam balbabit masara jeiserem jam onsobife. 9 Jepga angtane sanbaka jeiserem jam aa jep gam fortyaram, angtane masar aa jei gam eyebilirim jei ga gam jela imnibe, ane aamei ga is gam bala, ’Aamei jas gwisi, kursini imnaiserem jas tetbe angtane sanbakaiserem jebe.’ Ane aamei ga igam seferswena, ane ga igam nwintena titikibe. 10 Ga jem temawer, afa aamei angtane nafsi is jam gam balaram masara jam onsobife, aamei titikiber igama nwintena, jega angtane masara aa jei gam eyebilirim jam gam fortyaram, jei ga is gam bala, ’Am afelna, au, aaf se nwinseya kursini waakena aaiserem jep.’ Jewer ga syewal anggwana seyafter afweraiserem jei ga is gane damtana angtane masara aa jei gam eyebilirim jei aamei is jep gam gaartenaram. 11 Angtane jena aa jei gam gaartenaram, Uwa Sanbagiri Jei angtane jeiserem jam gam onabertana. Ane angtane jena aa jei gam onabertanaram, Uwa Sanbagiri Jei angtane jeiserem ga gam gaartena." 12 Ane Yesus ga angtane masara jeiserem aa jei eyebilirim ga bala, "Afa aamei masars eyebife ilem jenabe gwerem afa gwinem, aamei safnant ilem sarabosna tefner ipsam balbabit jam jalfe. Ane aya mese oso ilemana tefner ipsam balbabit jam jalfe. Ane ilem afelen mesna tefner ipsam balbabit jam jalfe. Ane angtane galgala unggwanfer jemanserem aa jei ge nwinbenerem im gwetmanabe, angtane jeiserem jetefener ipsam balbabit jam jalfe. Angtane seyafter jeiserem jetefener ipsam balbabit jam jalfe, aam temawer jei gamjon aamei is jam gam balaram masars onsobife jem jenabe, ane jeiserem jeme aamei igam domola fwaina aamei jes igam eyebilirim. 13 Jengga afa aamei masars eyebif, angtane galgalyenaiserem, ane angtane muli-mulniserem, ane angtane jam wofeyana, ane angtane nwe kofaiserem ga jes igam balbabili jam jalfe, 14 ane ini imna ga is saaser-saaserfer gam folbana. Angtane jeiserem aamei jewer igam taayinbilirim jei safe fwaina is jam ne gulbayan ibe, fwaina imnaiserem ga ise Uwa Sanbagiriserem ga is Jei gam gulbana ibe, angtane Uwa Sanbagirem nwenabe waakenfer aa jei naawenaram jei aa jep ge irwebisirim terewer." 15 Jes jepserem angtane daamfenna Yesusfar seyafter aa jei ne dwenaram, angtane jeiserem taterisi Yesusmana aa galap saribenerem, jei ga enggam gutena, "Angtane Uwa Sanbagirfar aa jei ne dwensaram, nunu Uwa Sanbagiri aa jep gwesaram anggwabura seyafter gemerserem jem Sanbakfe, ini jemna saaser-saaserfer sege folbamisi." 16 Yesus Jei angtane jeiserem ga bala, "Angtane aasaje ga gunu, ’Ai masara unggwandwasusu gam eyebif.’ Ane jei angtane unggwanfer ga gam balbabili masara jeiserem jam ne onsobife. 17 Ane nunu aa jep falaram masara jeiserem jem tawawulfe, angtane masara jam aa jei gam eyebilirim jei angtane awelna jemna aa jei gweyibenerem ga gam baftana enggalfe, angtane aa jes gam balbabilirim masara jam onsobife, angtane jeiserem gam jenbebif, ane ga gam balbabili, ’Au, sa jal! Tumilgala seyafter ames menetababisini.’ 18 Jengga jei seyafter gemerserem, jei baif gam naawena masara jeiserem jam onsobife, ane angtane daamfen-daamfenneme ga aa ge gubili, ’Ai ajama gwiyan.’ Angtane aasaje ga nabal-nabalsusu angtane awelna angtanefe aa jei gweyibenerem jeiserem ga bala, ’Ai ona namwer as armantal, ane ai ajam sofwef ona jeiserem ajes damtaf. Angtane sanbaka imna enggam is bala, Ai isa maf gwebene, ai ajam gwiyan masarabe.’ 19 Angtane nafsi aa jes balaram masaras onsobife jei jon ga bala, ’Ai sapini sepulu namwer as armantababil enggalfe awelna makanap jeme gam gwebif. Ane ai namwer sapini jeiserem ai ajes unggwasbaabif. Angtane sanbaka imna enggam is bala, Ai isa maf gulbana, ai ajam gwiyan masarabe.’ 20 Gamjon angtane nafsi aa jes balaram masaras onsobife jei jon ga gutena, ’Ai wini namwer as gol. Ga jem temawer ai ajam gwiyan masarabe.’ 21 Angtane awelna angtanefe aa jei gweyibenerem jei ga warauwa sanbaka jelemanaiserem jemnibe, ane taterisi seyafter jeiserem ga nasbaibene jelem sanbakfe. Angtane sanbaka jemna jeiserem masara aa jei eyebilirim ga kakalswena. Ane jei angtane awelna jemna aa jei gweyibenerem ga bala, ’Jase sofwe tatarfer pasarap ane nele seyafter gemerserem jebe. Angtane galgalyena, angtane muli-mulniserem, angtane nwe kofaiserem, ane angtane jam wofeyanaiserem, angtane seyafter jeiserem ga is aftabiyele aafe.’ 22 Angtane awelna angtanefe aa jei gweyibenerem ga sofwa, ane ga eyebili seyafter sanbaka jemna aa gemer gunurum, ane gamjon ga warauwa sanbaka jelemanaiserem jemnibe. Ane jei sanbaka jelemanaiserem ga bala, ’Uwa, aamei seyafter ijes bilirim, ai ames eyebili. Jengga jena imna gemerje jam ergeuyen.’ 23 Ane angtane sanbaka jeiserem angtane awelna jemna aa jei gweyibenerem gamjon ga bala, ’Jase sofwe fona jimwer ane makan jenap mese! Angtane seyafter jep aaiserem ga is tergenbaabili, jega jena amna aaiserem gase erguwe angtaneme. 24 Ai ims towastana, angtane ai nabala ai ajes balbabilirim masara jei ne onsobife, angtane seyafter jeiserem jei tumilgala amna fas jam ne tombaabiyen.’ " 25 Angtane unggwanfersus Yesusfar ga aa ge sofobili. Yesus ga irfwena, ane angtane unggwanfer jeiserem ga balbabili, 26 "Afa angtane Amnip aa jei gam jelaram Ams onsobafe, jengga jei ene yo jeta jemna, ane wi tane jemna, ane aya oso jemna, ane gwela jelemana unggwanfer jes gam nesiktababilirim, ane Ai As bastowaifer gam nesiktene, afa ga gam jes gemerserem, angtane jes galserem jei jam etamweyan Ams onsobafe. 27 Angtane Amnip aa jei gam jelaram Ams onsobafe, angtane jeiserem jei ga jamer gam menetwesini enggalfe, tamtama gam domolf jamer jei gane munbono aam temawer jei Ai As jewer gam onsobanaram. 28 Afa angtane im nenennap aaiserem jei jam gam gunurum enggame, ’Ai jena unggwandwasususerem ajes eyebif.’, jei gwanan-gwanansus ga jam gam nwintena enggalfe doini gam eterbef unggwanfer ga fomera, jega jei ga gam towaswena afa doini samfer enggalfe jena jeiserem jem tabanulfe jam eyebilibe. 29 Afa jei jam nwinteyanaye doini jam eterbefe, jei dutumiriti jam gam tonolaram, ane jei iltini ga gam syona titiki jep eyemife jamer taban, ane doini ga gam barwebana tini jem armantababife, afa ga gam jes gamserem, gam jega jei jena jeiserem jam tabannulyon. Ane angtane seyafter aa jei gane damtanaram enggame jei jena jeiserem jam tabanulyon, jei angtane jeiserem ga gane bisobana, 30 enggam ga gane bala, ’Wa, angtane jeiserem jeke baabeta ke fas jena jeiserem jem tabanulsife?’ 31 Afa raja jei ginanggwana jemna 20.000 jei jam gangge sofobilirim enggalfe jei gam ge erabaf raja nafsiserem jebar, raja nafsiserem ginanggwana jemna 10.000 tefner, raja nafsi jeiserem jei ga bas gam eyebili? Raja 10.000 ginanggwana jemanserem jei gwanan-gwanansus ga jam gam nwintena enggalfe jen jena gam tenebaf, ’Ginanggwana amnaiserem baabeta jemna ke unggwanfer enggalfe, ai ginanggwana rajamana 20.000 jeiserem jebar agma eraf?’ 32 Afa fasaye, raja 20.000 ginanggwa jemanserem jei bijaususfer gangge wofebili, raja 10.000 ginanggwana jemanserem jei angtane ga gam baftabili enggalfe raja nawan jeiserem gam ge waakenswef." 33 Yesus umwef ga balbabili, "Jes gemerserem aaiserem jegme gemer, afa angtane jei Ams onsobafe, jei jena gwanan-gwanansus jelem inip ga enggam gam gunu, ’Apgal jigala ai jes agam damtabilirim, ai seyafter jeiserem samfer agam aftabunnu enggalfe ai Yesus agam onsobaf.’ " 34 Yesus Jei gamjon ga balbabili, "Garna ba waakenam, jengga afa garna jam gam etamwenaram jam bwekbwekswefe, angtane jei garna jeiserem gamjon jam ne eyebiyen garanfe jam falfe. 35 Garna jeiserem kapka, garna jes galserem angtane jei baif gane gwebili, jei jafner ga gane firulniwili. Afa aamei imwanabara, taterisi Amna As jam isa saribene, ane waakensusfer ga isa towaswebili!"

15

1 Nunu nafsi jeme angtane pajak doini aa jei gane tebabinennerem, jei doini jeiserem pemerintafe ga gane kitulmini, ane angtane etam-etamabara afweraiserem jei Yesusminibe ga aa ge forobuwetya enggalfe Yesus gane sarbasif. 2 Ane angtane safna Farisimana ane guru-guru Hukumu Nabi Musamana aa jei ne towas-towastababuwenaram, jei Yesusem temawer ga aa ge gubili ini kabwakeme. Jei ga enggam ne bala, "Angtane aaiserem Jei angtane etam-etamabara gam tebabili, ane Jei jebar seyafter ne dwena. Jeiserem kapka!" 3 Angtane jeiserem gam aa jewer ge gubilirim, Yesus ga jem temawer seisya taterisi jepga nasipmini. Seisya tateris jeiserem ga aas: 4 "Afa angtane imniwer dombana jemna 100, ane daamfenna ga gam sofna bijuaber jamer tatait, angtane jeiserem ga bas gam eyebili? Bunar-bunarsus jei dombana 99 afweraiserem jam gam firtebitefala tampata jelemana kakatarabaraiserem jebe, ane ga gam sofna dombana daamfenna aa jei gam sofnaram bijuaber ga jes gam terelbene, jamere dombana jeiserem gam damtana. 5 Jei dombana jeiserem jam aa jep gam damtanaram, ini jemna ba gam saaser-saaserswebana. Ane jei dombana jeiserem ga gam tinggina malmabe, 6 ane ga gam girinfeltye jamere jenabo gangge fortya. Jewer ga jei jelem afelen mesna ane angtane jena jem gwetmanfer aaiserem angtane jepmana ga gam jenbebili, ane ga gam balbabili, ’Dombana amna aa jei sofnaram bijuabe ai ames damtana! Ini amna as saaser-saasersusfer folbana! Au, nei ini seyafter nes gangge saaser-saaserswebami, ane masara ga nesa eyebili!’ " 7 Ane Yesus gamjon aaiserem ga nasipmini, "Ane jes gemerserem aaiserem jegme gemer. Ai ims towas-towastababili, Uwa Sanbagiri ane malaikata taman waaken-giribe ini jemna saaser-saasersusfer gangge folbamini angtane daamfenna jei jam gam tikwenaram etam-etamawer, angtane 99 afweraiserem jemniwer jei aa jei ge gubilirim enggame, ’Ai etam-etama fas, ai safnant ai ajama tikweyan etam-etamawer.’ " 8 Yesus Jei gamjon ga balbabili, "Afa enggam wini aasaje doini jemna sepulu perak, ane daamfenna ga gam anggabisini, wini jeiserem ga bas gam eyebili? Jei pelitana ga gam dutana, ane jena ga gam gwisirni, ane doi perak daamfenna jeiserem aa jes gam anggabisinirim samem-samem ga gam terelbili jamere doini jeiserem gamjon gam domola. 9 Jei doini jeiserem jam aa jep gam domolaram, jei jelem afelen mesna, ane angtane jena jem gwetmanfer aaiserem angtane jepmana ga gam jenbebili, ane ga gam balbabili, ’Doini amna ajes anggabasinirim ai ames domola. Ini amna as saaser-saasersusfer falbili! Au, nei ini seyafter nes gangge saaser-saaserswebami, ane masara ga nesa eyebili!’ " 10 Ane Yesus gamjon taterisi aaiserem ga nasipmini, "Ane jes gemerserem aaiserem jegme gemer. Ai ims towas-towastababili, malaikata Uwa Sanbagirmanaiserem ini jeman jegme gemer gangge saaser-saaserswebamini, afa angtane daamfenna jei jam gam tikwenaram etam-etamawer." 11 Yesus Jei gamjon ga balbabili, "Angtane aasaje tanna jemna girtowai naura. 12 Osonaiserem jei jeta ga bala, ’Uwa, aamei jam is tererem, ai alem ayafar galgala seyafter imnaiserem ai ga as ge waksosini. Amnaiserem ajas kitulbo namwener.’ Ane jetaserem jei galgala jelemana jeiserem ga waksomini tannawan jelemana jeiserem jebe. 13 Nunu abakefyan tanna osonaiserem galgala jelemana jeiserem ga jualtababili, ane ga sofna negeri bijauwabe. Jep ga jei doini jelemana ga bartana gwela kapkaiserem jeme. 14 Doini jemna seyaftersus aa galap bartanaram, wisi unggwandusa ga etamwena negeri jeiserem jebe, angtane negeri jeiserem seyafter amkom fom ge terbili. Ane tanna jeiserem apgal jigala fas afa jam domolyan. 15 Ane tanna jeiserem ga sofna angtane negeri jeiserem jepmanaiserem jemnibe, jega enggalf awelna jemnip gam gwebif. Angtane jeiserem jei tanna jeiserem ga baftana makanabe, twena gam gerebaabisnenef. 16 Jei wisi uskambarsus jame aa galap folbanaram, jei ini ga folbana tumilgal tomna twenmana jeiserem gam tombaabif, jengga angtane afa fas tumilgala jep jam ne gulbayan. 17 Umwef ga, jei ini waakena gamjon ga damtana, ane jes jepserem jei enggam ga gunu, ’Ai kapka gam eyebili ane kabwaktala amna uskambar.’ Ane jei ga sarstaabona, ’Angtane awelna uwaminip aa jei ne gwebilirim tumilgala jemna ga anesus, jengga ai aafe amkom afom tere wisefe! 18 Waakenfer ai jam age sofwe namwer, uwaminip as warauwa. Ane uwa ga as bala: Uwa, ai etam-etama anesus ames eyebili, Uwa Sanbagirminip ane imnip mese. 19 Ga jem temawer ai gamjon as jam ne balyan im taneme. Ai ga ase enggam isa bala ai awelna imna gam gweyibef, angtane afweraiserem awelna imna aa jei ne gweyibenerem jes galserem.’ 20 Ane jei ga sofna, gamjon ga warauwa jetaserem jemnibe. Jenawer ga bijaususu, jetaserem jei tane jeiserem fwater damtana. Jetaserem jei tanna jeiserem unggwanfersus ga nesiktene, ane ga nunggirwena taneminibe enggalfe jei jewer gangge dorwef. Ane jei tafna ga taayibene, ane ga bala, ’Isamfer fortya.’ 21 Tanna jelemana jeiserem jeta ga bala, ’Uwa, ai etam-etama anesus ames eyebili, Uwa Sanbagirminip ane imnip mese. Ga jem temawer ai gamjon as jam ne balyan im taneme.’ 22 Jengga jelem jeta jeiserem angtane awelna jemna aa jei ne gweyibenerem jei ga jenbebili, ane ga balbabili, ’Tatar! Fene waakensusuter fen sagap kamwiliserem isa tetena, ane ga isa kaiyimbene jebe! Cincingi ga isa gerebaawili tafnabe, ane sepatunu ga isa kaiyimbene tufabe! 23 Seyafter jeiserem jame aa jep tabanulurum, sapi tanna telebere ga isa gaartena, ane ga isa tegila, jega nei jes nesa tombana, ane masara ga nesa eyebili! 24 Seyafter jeiserem isa eyebili, aam temawer tane amnaiserem jei jam tere gamserem ga gam sofwel, jengga namwer jei gamjon mes waraufaltya terewer. Jei mesam sofwant bijuabe, jengga namwer gamjon nemsa damtana.’ Ane jei masara ga aane towaiwulu. 25 Tanna osonaiserem jei aa galap fortyaram, jes jepserem tanna ayanaiserem jei awelna ga makanap gwebili. Awelna taban, jei gamjon ga warauwa jamer ja gwetmanabo. Jei ga uru yo gitar tisna jep ga sarbabili, ane aa jes ne tesarabilirim jem tisan mesna ga sarbabili. 26 Jei tane taini afwer aaiserem ga jenbene, ane ga tenebana, ’Uru yo gitar tisna jenap aaiserem jeje bafa?’ 27 Tane taini jeiserem ga tamawolbana, ’Im oso mes waraufaltya! Ane uwa imnaiserem ga ase jei balbabili sapi tanna telebereiserem jes tegilfe, aam temawer uwa jei tanna gamjon mes damtana tifni waakenmer.’ 28 Tanna ayanaiserem ga kakalswena. Ga jem temawer jei bai jenabe jam kawetefe. Ane jetaserem ga totintye, ane ga malin-malintene jam kawetefe. 29 Jengga jei jetaserem ga bala, ’Uwa, aike namwer awelna imna uskambar isa jamer gweyibowelabe tahunu ane-anesus? Ai fasfasus aamei awelna as jes igam bilibenerem abe, ai isa jam saribaasiyen. Ai seyafter jes igam bilirim, ai agam eyebili. Jengga Uwa, aamei gemerje ayang tefner abe as ijam gerbayan enggalfe, ai masara ajam eyebif alem afelen mesnaiserem jebar! 30 Jengga tane imna jeiserem, jei galgala imna is jei barbarulbono wini maaryen-maaryenaiserem jebar! Ane jei jame aa galap warautnaram imnibe, aamei ga sapi tanna telebereiserem ga im gerbana jebe!’ 31 Jetaserem ga tamawolbana, ’Am tane, aamei nunu jeber-jeber aamei abar nei seyafter nes nwinwena. Galgala amna seyafter aaiserem jeba imnam. 32 Jengga nei ga masars nesa eyebili, ane ini nemna ga nese saaser-saaserfer sege folbamini, aam temawer im oso jeiserem jei jam tere gamserem ga gam sofwel, jengga namwer jei gamjon mes waraufaltya terewer. Jei gwanan mesam sofwant bijuaber, jengga namwer nei nemsa damtana.’ "

16

1 Yesus Jei angtane Jei aa jei ne tikwebaatinennerem ga balbabili, "Angtane aasaje galgala jemna anesus, jemna angtane pegawai ga daamfenna, doini aa jei gam gerbaasnennerem. Angtane galgalabara jeiserem jei taterisi enggam ga sarbili angtane nafsiserem jemniwer, pegawai doini aa jei gam gerebaasnennerem jeiserem, jei doini jelem sanbakmana waakenfer jam gerebaasneneyen, doini anesus syefer ga mes gam barwena. 2 Ane jei pegawai doimana jeiserem ga jenbene, ane ga bala, ’Ai abas sarbili im temawer? Aamei namwer amse towasta seyafter awelna imnaiserem jem temawer, doini amna igalap gerebaibesnennerem, aam temawer aamei gamjon ijam gweyan am pegawaife.’ 3 Ane pegawai doimana jeiserem jei ga gutena jelem inibe, ’Ai namwer ga basas eyebili? Sanbaka amna jei ai as jam se balaram jam tikwefe awelna jemnaiserem jewer. Ai baabeta fas afa awelna amna as enggam se folbanaram omwa tefner tetbebif. Afa doif aber-aberwef, ai ajam seferswena.’ 4 Jepga aafer-aafer jei gamjon ga gutena, ’Ai ames towaswel namwer ai ajes eyebiliserem, ai gwanan nalef ajam tikweyan awelnawer. Ai enggam as eyebili, ai waakenfer as eyebili angtanefe, jega am afelen mesna jei ga sege etamwebili unggwanfer. Ane ai awelnawer galap jam as tikwenaram, jei ai ga asene tebana jem jenabe.’ 5 Pegawai doimana jeiserem jei gam aa jewer gam gunurum, jei enggam ga eyebili. Jei angtane ga jenbebili, angtane seyafter galgala aa jei ne bontababilirim jelem sanbakminibe. Jei angtane nabal danalaiserem ga tenebana, ’Bona imna ga fomera sanbaka amnaiserem jemnibe?’ 6 Angtane jeiserem ga tamawola, ’Minyak goreng, 100 liter.’ Pegawai jeiserem ga bala, ’Bon imna ga aare. Gase nwinte, ane tatarfer ga is tulistababili afwenefener unggwanfer ga enggammer 50 liter!’ 7 Ane pegawai jeiserem angtane afelnaiserem ga bala, ’Bona imna ga fomera?’ Angtane jeiserem ga tamawola, ’Baras, 1.000 sak.’ Pegawai doimana jeiserem angtane jeiserem ga bala, ’Bona imna ga aare. Gase tulistababi enggammer 800 sak!’ 8 Bunarsusfer pegawai doimana jeiserem jei doini sanbaka jelemana ga syefer gerebaasnenne. Safe gam, sanbaka jelemana ga bala jeiba angtane tousaiserem, aam temawer jei gwela jam menetulsini, gwela jemna jam se fortyaram ogiri aaiserem jebe. Jei angtane nafsiserem ga jese batobaabili, jega angtane jeiserem jei gam sene batobana, jei awelna jam domolyana jepserem." Yesus seisya taterisi jeiserem jam nasbilibe jama tabanulurum, ane Yesus Jei angtane Jei aa jei ne tikwebaatinenewenaram ga balbabili enggame: "Angtane gwela ogirmana aa jei ne onsobilirim, jeiba angtane tousaiserem aam temawer jei waakenfer ge menetwebisini enggalfe, gwela jemnaiserem jei galap jes ne domolfe ogiri aaiserem jebe. Jengga angtane Uwa Sanbagirem nafap aa jei naawenaram, jeiba angtane teisyenaiserem, aam temawer jei waakenaiserem bastantowaifer ne eyebili enggalfe, jei jam ge menetwebisife gwela jei galap jes ne domolaiserem Uwa Sanbagirfar taman waaken-giribe jamer abak-abaksus. 9 Ai ims towas-towastababili, apgal jigala ogirmanaiserem aamei ijesa damtabilirim, seyafter jeiserem jeme aamei angtane galgalyenaiserem ga jam isa batobaabili. Ane aamei jam ijeba tererem, ane galgala ogirmanaiserem gamjon ijama damtabiyen, Uwa Sanbagiri Jei ims tebabili waakenfer taman waaken-giribe. Aamei jep waakenfer ga isa gwena jamer abak-abaksus. 10 Angtane apgal jigala bastantowaifer waakenfer aa jei gam gerebaabisnennerem, angtane jeiserem jei samfer gamjon ga sene bala apgal jigala unggwanfer waakenfer jam gerebaabisnenefe. Ane angtane apgal jigala bastowaifer waakenfer jam gerebaabisneneyeneiserem, angtane jeiserem jeime apgal jigala unggwanfer waakenfer jam gerebaabisneneyen. 11 Ga jem temawer, galgala ogiri aaiserem jem temawer aamei enggam is jam gane balbabilirim jam gerebaabisnenefe, afa aamei galgala jeiserem waakenfer fas ijama gerebaabisneneyen, gam jega apgal jigala taman waaken-girmanaiserem ibe is jam ne kitulmiyen. 12 Ane afa aamei galgala angtane nafsimanaiserem galgala jeiserem waakenfer ijama gerebaabisneneyeneye, Uwa Sanbagiri Jei apgal jigala taman waaken-girmanaiserem ibe is jam kitulmiyen. 13 Angtane awelna angtanefe aa jei gweyibenerem jelem sanbaka ga naweryan, aam temawer angtane jeiserem awelna aa jei gam gwebilirim, afa sanbaka jemna naura, jei jelem sanbaka afelnaiserem ga gam uskamswebana, ane afelnaiserem jei unggwanfer ga jes gam nesiktene. Jei waakenfer gangge nwini sanbaka afelnaiserem jebar, ane jei waakenfer jam ge nwinyen sanbaka afelnaiserem jebar. Jes gemerserem aaiserem jegme gemer, angtane afa enggam jam gam gunurum, ’Ai awelna Uwa Sanbagirmana tefner as eyebili.’, ane jei gamjon enggam jam gam gunurum, ’Ai awelna doifener as eyebili.’, bunarsusfer angtane jeiserem jei nawersamer jam eyemiyen." 14 Angtane safna Farisimana jei seyafter jeiserem Yesus aa jes nasbilirim ga jes ne sarbisini. Ane jei Yesus ga aane bisobana, aam temawer jei dois ne nesiktababili. 15 Yesus angtane jeiserem ga balbabili, "Ini imna is saaser-saaserfer sege folbamini, afa angtane nafsi jei aamei is jam gane damtabilirim aamei angtanefe waakenaiserem igalaba eyeipminirim, ane jei aamei ga is gane balbabili, ’Aamei angtane waakena.’ Jengga Uwa Sanbagiri Jei ini imna is mes gam towaswebaipmini, ini imna kapka. Aameiba angtane akar-akarem ijeya gwenaram, enggam aa jes gane balbabilirim waakeneme, jengga Uwa Sanbagiri Jei is enggam gam balbabili aameiba kabwaksusum." 16 Yesus Jei gamjon ga balbabili, "Yohanes Pembaptis nalefe jam foroyan, Hukumu Nabi Musa aa jes tulistababilim, ane taterisi nabi-nabi seyafter aa jes ne tulistababilim, gwanan jes jepserem taterisi seyafter jeiserem ga igsusu enggalfe angtane jam ne onsobife. Jengga Yohanes Pembaptis jei jam aa galap fortyantam, Taterisi Waakena ga aane towaiwulu jam ne nasbinennefe. Taterisi Waakena jeiserem ga aas ne nasbinenne, taterisi nunu Uwa Sanbagiri Jem gwelaiserem anggwabura seyafter gemerserem jem Sanbakfe ga jem temawer. Ane angtane Taterisi Waakena jeiserem aa jei ne tebabilirim, ini jemna ga aa ge folbamini jam ge unggwasbif enggalfe Uwa Sanbagiri jem Sanbakfe gam gwef. 17 Winsi yo ogiri jei jam barweyan. Ane Hukumu Nabi Musa aa jes tulistababilim jes mese jam barweyan. Seyafter Nabi Musa aa jes tulistababilim jeiserem ga igsusu; hurufu afa garistowai daamfenna afa jam wirulsiyen." 18 Yesus Jei gamjon ga balbabili, "Anggwana wini baif aa jei gam gwebilirim, ane wini nafsi ga gam gula, anggwana jeiserem jei etam-etama maaryenf gwelaiserem ga jes gam eyebili. Ane wini jeiserem baif aa jes gam gwebilirim, afa anggwana jei wini jeiserem jam gam gularam, anggwana jeiserem jeime etam-etama maaryenf gwelaiserem ga jes gam eyebili." 19 Yesus Jei gamjon ga balbabili, "Angtane aasaje galgala jemna unggwanfersus. Fene jemna waaken-waakensusu, hargana ga unggwanfer. Ane nunu jeber-jeber jei tumilgala masar manggen gam tombaabili ini saaser-saasermer. 20 Jem pagar mwa gwetmanabe angtane galgalyena aasaje ga jep gam nwini. Bosna jemna ga Lasarus. Tifni jemna ga bubwa tetena. 21 Ini jemna unggwan-girfer gam folbana enggalfe, jei tumilgal tomna angtane galgalabaraiserem jemna jam tombaabife. Tifni jemna weren-werensusem folbana, ane gwalna ga aa ge jalbili, bubwana jemnaiserem ga aane bwere-bweretabaibene. 22 Angtane galgalyena jeiserem ga tere, ane malaikata ga aane girinfele tampata waakensususerem jebe, Abrahamem gwetmanap taman waaken-giribe. Jepga angtane galgalabara jeiserem jei mese ga tere, ane ga aane tirnnu. 23 Ane jei taman tokwagiribe tamtamtala unggwanfersus ga domola, ane tifni jemna seyafter sigin-siginsusu. Ane jei ga anggaswena bolabe, ane Abraham ga damtaswena bijaususube, ane Lasarus jei Abrahamem gwetmanap nwini. 24 Angtane galgalabara jeiserem ga gutena, ’Uwa Abraham! Ai ase nesikte! Ai tamtamtala unggwanfersus ai domola tokwagiri aaiserem jebe. Jega jem temawer, Lasarus se bal, tafa bola gangge ustate fonabe, ane gase jela, maflama amna as gangge titintebe.’ 25 Jengga Abraham ga tamawolbana, ’Am tane, se sarstaabon aamei gwanan igalap gwenantam seyafter waakenaiserem imsam domolant, jengga Lasarus jei kapkaiserem jes domolwenant. Namwer jei aafe ini saaser-saaserfer se nwini, ane aamei ga tamtamtala unggwanfer jeiserem ga is domola. 26 Ane jetefeneryan, aamei ijep nwinirim ane ai ajeba nwinirim aafe, nem nenennabe omwana unggwandwasusem fala. Omwana jeiserem ba mesam eyebil enggalfe, angtane aafmanaiserem aa jei gam gunurum jam gwife jewer, ga masef gam unggwasa jam gwife. Ane angtane jepmanaiserem jei masef gam unggwasa aawer jalfe.’ 27 Angtane galgalabara jeiserem ga bala, ’Afa ga gam jes gamserem, Uwa, ai isa unggwanfersus bala, aamei Lasarus se bafta uwa amnaiserem jem jenap. 28 Aya mese oso amna tafna gwiri ga jep ge nwinbene. Lasarus se bafta jei gangge towastababi tamtamtala aafe unggwanfersus. Jei gangge towastababi jei enggam jam naaweyan ai agam gwenantam ogiribe, jega jei ga sege towaswebili jei jam tere jepserem jei jam ge jalbiyen taman tamtamtala aaiserem jebe.’ 29 Abraham ga tamawolbana, ’Aya mese oso imnaiserem jei buku Nabi Musa ane nabi-nabi afweraiserem jei aa jes ne tulistababilim jei mes ne damtabili. Jei bukunu jeiserem jam sene gerebaabistena, ane jem igiserem ga sene onsobili, jei etam-etamawer ga gangge tikwebili.’ 30 Jengga angtane galgalabara jeiserem ga tamawolbana, ’Wowo Uwa Abraham! Jei taterisi bukunup aa jes ne tulistababilim jei jam ne sarbiyen. Jengga angtane afa jam tereserem jei jam se irwenaram terewer, ane gase sofwa jemnibe, jei ga sege sarbili, ane ga sege tikwebili etam-etama jelemanaiserem jewer.’ 31 Jengga Abraham ga bala, ’Afa jei taterisi Nabi Musamana jam ne saribeyeneye, ane nabi-nabi afweraiserem jeman mesna jam ne saripmiyeneye, gam jega angtane safe terewer irwela, jei angtane jeiserem je jam ne sarbayan, ane jam ge tikwebiyen etam-etama jelemanaiserem jewer.’ "

17

1 Yesus angtane Jei aa jei ne tikwebaatinennerem ga balbabili, "Angtane bunarsusfer unggwasbala ba gane domola etam-etama kapka jam eyebife. Jengga angtane, jei angtane nafsi jam aa jei gam unggwasbaabilirim kapkaiserem jam eyebife, angtane jeiserem aa jei gam unggwasbaabilirim jei tamtamtala unggwandwasusu galap se domolsa. 2 Afa tuna unggwan-girsusu daran-darnaiserem jam gane tafrebaasiwilirim jem botonabe, ane jei ga gane firtaaniwili finibe enggalfe angtane jeiserem jem gam tamtamtafe, tamtamtala jeiserem bastouya. Jengga tamtamtala Uwa Sanbagirmanaiserem jei unggwandwasusu tamtamtala jeiserem jemniwer. Afa angtane jei angtane Ai ibirimfer As jei tebanaram, angtane jeiserem jei jam gam unggwasbanaram etam-etama kapka jam eyebife, Uwa Sanbagiri Jei tamtamtala unggwandwasus gase gulbasa angtane jeiserem jebe. 3 Jeiserem ga jem temawer, in ina ga waakenfer isa gaaramisnenne, jega aamei angtane nafsiserem ijam unggwasbaabiyen." 4 Afa jei etam-etama kapka tuju kali imnip jam gam eyebaabilirim nunu daamfennaiserem jeme, ane jei imnibe jeber-jeber ga gam jalwena, ane ga gam gutena, ’Ini amna ajam jenbana ai etam-etama kapkaiserem ames eyebili imnibe.’, afa ga gam jes gemerserem, aamei ga etam-etama jemna jeiserem ga jam igam borolbana jeber-jeber." 5 Rasulu jeiserem Tuhan Yesus ga aane bala, "Tuhan, ini amna as baabetabartabaipmi, jega ai Uwa Sanbagiri ginggitfer gam asa tebana." 6 Tuhan Yesus ga tamawolbaabili, "Afa aamei Uwa Sanbagiri bastowaifefener isa tebana, nana tan bastantowaisusu gemerserem, aamei samfer tini unggwandusa aaiserem isa bili, ’Aamei jase malti, ane ina finip ga is guru!’ Ane tini jeiserem ga is gam sarbana, ane jes ga gam maltini, finip jena ga gam guru." 7 Yesus Jei seisya taterisi aaiserem ga jes nasipmini: "Taterisi aaiserem ga ilem iniber jafner isa bilsini: Afa angtane imniwer jei angtane nafsiserem jam gam damtanaram enggalfe awelna jemnip gam gwebif, afa makanap gam gwena, afa dombas gam gerebaabisnenne, angtane jeiserem jei aa galap gam warautnaram jenabe, angtane sanbaka jemna ke enggam gam bala, ’Au, tatarfer gas twen!’? 8 Bunarsus fas, gamyan! Jengga sanbaka jemna jei enggam gam bala, ’Tumilgala ap as menetabaibesi! Fene ga is kabwabili, fene awelna jenap ijebar gwebuwenaram. Ane aamei ai ga as is batobana ai ajep twenaram. Afa ai jam as twenaram jamer taban, aamei jon ga is twena.’ 9 Angtane awelna nafsimana aa jei gam gwebilirim, jei jame aa galap eyebilirim sanbaka jemnaiserem aa jes gam bilibenerem jam eyebife, sanbaka jemna jei jam balyan enggame, ’Ase samfer gulbana.’ Wowo, gamyan. 10 Taterisi jeiserem jem igiserem ga aas: Afa aamei jam igama eyebilirim seyafter is jes gane bilipminirim ibe, in ina ijama tetenanayan jeiserem jem temawer. Jengga aamei ga enggam igama gunu, ’Aingga awelna angtane nafsiserem ai ajemna tefner aya gwebili. Aingga awelna alem sanbakmana tefner agma gweyibene jei aa jes gam bilirim jam eyebife.’ " 11 Yesus aa galap sofnaram kota Yerusalemwer, Jei ga ayenni ona Samarya yo ona Galileya jem nenennabe. 12 Jei jame aa galap fornaram tamnabe, angtane sepulu tifin bwernabara ga aa ge jalbili Yesus ne damtafe. Jei bijauwener ge fibitne, 13 ane ga aa ge gwarenbili, "Yesus! Uwa! As nesiktababi!" 14 Yesus Jei angtane jeiserem jame aa galap damtabilirim, Yesus ga balbabili, "Sya, Ai isa Ajam waakentababili. Imamminip sa sofwe. Ane jei ga isa balbabili tifni imna ga isene damdamtabaipmini." Nomkefe aa jebar ge sofobilirim imamminibe, jemna tifin bwerna ga aa ge waakensweipmini. 15 Angtane daamfenna jemniwer aaiserem, jei jen jena ga damtana, "Wa aiba amsam waakenswel!" Jepga jei gamjon ga warautna Yesusminibe, ane Uwa Sanbagiri ga pujitene, uskambar ga gowena. 16 Ane jei jener ga jena Yesusem tufabe, ane ga bala, "O Yesus ase samfer gulbana. Ai ames waakenswel!" Angtane jeiserem jei angtane Samaryamana, jei angtane Yahudimanyan. 17 Ane Yesus ga gutena, "Gam ke angtane sepulu ga Agam waakentababili? Angtane sembilan afweraiserem jei ga fwera? 18 Jeje bafa angtane Yahudimanyan aaiserem ga jenfentowai warautya, ane Uwa Sanbagiri ga bala, ’Asi samfer gulbana?’ " 19 Ane Yesus ga angtane jeiserem ga bala, "Gase irwe, ane ga is sofna. Aamei Ai waakenfer As imes tebana, jega jem temawer aamei gase waakenswe." 20 Angtane safna Farisimana afwenefener Yesus ga aane tenebana, "Uwa Sanbagiri Jei fonggalabar se towaiwena anggwabura seyafter gemerserem jem Sanbakfe Jam gwefe?" Yesus ga tamawolbaabili, "Nunu Uwa Sanbagiri Jei aa jep gwenaram anggwabura seyafter gemerserem jem Sanbakfe, angtane jei waakenfer jam ge sarbiyen enggame nunu jeiserem mesam fortya. 21 Angtane jei enggam jam ge gubiyen, ’Au, gasa damta, aaiserem ga Jei!’ afa ’Jei aaroi!’, aam temawer Uwa Sanbagiri mes towaiwena im nenennabe Sanbakfe Jam gwefe." 22 Jepga Yesus angtane Jei aa jei ne tikwebaatinennerem ga balbabili, "Nunu jam se falaram, ini imna unggwanfer ga isege folbamini nunu daamfenna jeiserem ijama domolfe nunu afweraiserem jemniwer, nunu Ai Tane Angtanemana Ai Ajem foryalaiserem. Jengga jes jepserem aamei fas As ijama damtayan. 23 Angtane aamei ga isene balbabisi, ’Jei aaure!’ afa ’Jei aafre!’ Jengga safnant, aamei angtane jeiserem ijama onsobaabiyen, 24 aam temawer Ai Tane Angtanemana, Ai gamjon aafer-aafer Ajep forsanyaram ogiri aaiserem jebe. Ane jes jepserem angtane seyafter ga sege towaswebisi Ai Amsam fortya, angtane iris nafa jam damtala gamserem. Angtane seyafter jei samfer iris nafa gane domola jam bwertalabe winsi fwesawer jamere winsi afwer fwesabo. 25 Jengga Ai nalef Ajam foroyan, Ai Tane Angtanemana, Ai gwanan tamtamtalaiserem unggwanfer As gwirni. Ane angtane namwer aas jepserem aa jei naawenaram jei Ai As baif sene gwebana. 26 Nunu Ai Tane Angtanemana, Ai gamjon Jam Ajep forsanyaram ogiri aaiserem jebe, angtane jes jepserem jei enggam se naawesa, angtane fwatermana gamserem jei aa gemer naawelam, nunu Nabi Nuh aa galap gwelam jes gamserem. 27 Angtane jes galapserem ga jafner naawel, tumilgal mese fo ga jetefer ne dumilwel, ane wini yo anggwana jena ga aane detwel, jamer nunu Nabi Nuh atdusap aa ge kabwitel. Ane jepga fona ga til, angtane seyafter jepmanaiserem ga aa ge albitil. 28 Nunu Ai gamjon jam Ajep forsanyaram, angtane jes jepserem jei enggam se naawesa, angtane fwatermana gamserem jei aa gemer naawelam, nunu Lot aa galap gwelam jes gamserem. Angtane gwanan jes galapserem jafner naawel, ga aane dwenwel, ane galgala ga aane jualtababuwel, afwer jei jam ne armantababuwel, makan gane gwebana, ane jena gane eyebili. 29 Jengga nunu Lot kota Sodom aa jem mirsotefalam, nunu jes jemerserem Uwa Sanbagiri ga tokwana yo beleranga ga jem bafsunnul winsiwer, arouwa galserem. Ane angtane seyafter jepmanaiserem ga aa ge taabisil, jamer fus. 30 Jes gemerserem nunu Ai gamjon Ajep forsanyaram, angtane aafer-aafer ga sege wasferwebisi. 31 Nunu jes jepserem jeme, angtane jelem ja sitawer aaiserem, jei gamjon jam ge kabwiteyan jelem jenabe enggalfe galgala gam kitultaabonfe mwonawer. Ane angtane makanap gwelaiserem jegme gemer. Jei gamjon fas jam warauyan enggalfe galgala gam ne kitultaabonf jenawer. 32 Gasa sarbistaabon ga bai etamwel wini Lotmanaiserem jemnibe! Ini jemna jam janbil galgala jelemana aa jes mirtebitefalam jem temawer, ane jei ga irfwel kotana jeiserem jes domsofe, ane jei ga ter. 33 Angtane afa aa jei gwenaram jelem galgalem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei ga waakenfer gwelaiserem jamer abak-abaksus ga jei gam domola. 34 Ai ims towas-towastababili, gwini jeiserem Ai Ajep forsanyaram, angtane naura mwona daamfennaiserem jep aa jei gangge tanaram, malaikata Amna angtane naura jeiserem jei afelna tefner ga gane gaartesa, ane afelnaiserem jei jeber gane mirtetefalsa. 35 Ane wini naura tumilgala aa jei gangge eyebilirim, wini naura jeiserem malaikata Amna jei afelna tefner gane goltesa, ane afelna ga jeber gane mirultefalsa. (( 36 Anggwa nauna makanap aa jei gangge gwenaram, jegme gemer.))" 37 Angtane Yesus aa jei ne tikwebaatinennerem jei Yesus ga aane tenebana, "Tuhan, jeiserem ga fwer se etamwena?" Yesus ga tamawolbaabili, "Bunar-bunarsus aamei Ai As isa damtasa Ai gamjon Ajep forsanyaram, jes gamserem junu unggwan-gwansusu bunar-bunarsus jei matau futunu gemer gam domolaram onabe, ane jep ga gangge betwebili."

18

1 Jepga Yesus Jei seisya taterisi ga nasbili enggalfe angtane Jei aa jei ne tikwebaatinennerem gam towas-towastababif, jei sembayanga jeber-jeber ga sene gwebabuwena, jei sembayanga gwebalawer jam ge tikwebiyen. Ane jei bunarsusfer ga sege towaswebili enggame, "Uwa Sanbagiri Jei sembayanga nemna nes gase sarbaipmini." 2 Yesus ga balbabili, "Kotana aasaje jebe, angtane sanbaka aasaje ga jep nwini. Jeiba angtane aa jei gam balaram angtane afa waakenfer eyebiliserem afa kabwakfer eyebiliserem. Jei jam eyebiyen Uwa Sanbagiri aa jes bilirim. Ane ini jemna kekelna, jei angtane kabwaktala aa jei ne damtabilirim, angtane jeiserem jei jam batobaabiyen. 3 Kotana jeiserem jebe, saamira wini aasaje ga jep nwini. Saamira wini jeiserem jei angtane sanbaka jeiserem jemnibe jeber-jeber forowetya, ane ga gam bala, ’Gwanan as batobi! Ginanggwana amnaiserem jei kapkaiserem as mes eyebili abe. Aamei ga is bala, jega jei kapka aa jes eyebilirim abe, ai jeiserem gam ge borol ginanggwana jeiserem jebar.’ 4 Jamer abak-abaksus angtane sanbaka jeiserem jei bai saamira wini jeiserem jes batobife. Jengga umwef ga jei jelem inibe ga gunu, ’Bunarsus, ai ajam eyebiyen Uwa Sanbagiri aa jes bilirim, ane ai kabwaktala angtanemana ai ajam batobaipmiyen. 5 Jengga saamira wini aaiserem jei jeber-jeber forowetya amnibe, ane susana ap ga as gam eyeibene. Ga jem temawer ai waakena as eyebili wini jeiserem jebe, ane kabwaktala jemna jam age borolmi saamira wini yo ginanggwana jeiserem jemna. Afa fasaye, jei jeber-jeber galap se forowetya amnibe, ane jei ga ai ase werentaasini.’ " 6 Ane Tuhan Yesus ga balbabili, "Gasa sarsi waakenfer, angtane sanbaka kapka jeiserem jei aa jes biltenaram! Jei saamira wini jeiserem jes batobili. 7 Afa ga gam, Uwa Sanbagiri Jei angtane bunarsusfer gase batobaabili, angtane Jei aa jei ne tebanaram waakenfer, ane sembayanga ga gane gwebabuwena gwin gwer jega Uwa Sanbagiri Jei angtane gase batobaabili kabwaktala jei aa jes gane domolaram jewer. Ane Jei abakfer Jam fiyan angtane Jelemanaiserem jes batobaabife. 8 Ai ims towas-towastababili, Uwa Sanbagiri Jei angtane Jelemanaiserem sembayanga jemna gam sarbaipmini, ane Jei angtane jeiserem tatarfer ga gam batobaabili. Safe gam, Ai Tane Angtanemana, Ai gamjon jam As forsanyaram ogiri aaiserem jebe, Ai ke angtane enggalaiserem ga As damtabisi, angtane Ai aa jei ne tebanaram, ane jei ga sembayanga gane gwebabili?" 9 Yesus Jei taterisi gamjon ga nasipmini. Yesus taterisi aaiserem ga nasipmini angtane jena aa jei ne tetenannaram jebe, ane jena enggam aa jei gane gitminirim, "Ai etam-etama fas. Angtane nafsiserem jei seyafter etam-etamabara." 10 Yesus ga taterisi aas nasbili: "Angtane naura jei ga aa ge teyafna Uwa Sanbagirem Jenap enggalfe sembayanga gangge gwebaf. Daamfennaiserem jei angtane safna Farisimana, ane afelnaiserem jei angtane pajak doini aa jei tebabinennerem ga jes. 11 Angtane safna Farisimana jeiserem ga fyatena, ane sembayanga ga gwebana jelem temawer enggame, ’O Uwa Sanbagiri, ai Isa enggam ai bala, asi samfer gulbana, aam temawer ai angtane nafsi gamserem ai gamyan. Ai kapkaiserem ajam eyebiyen. Ai galgala ajam komkomtababisiyen. Ai maaryena fas ajam gwebiyen. Ai Isa enggam ai bala asi samfer gulbana, aam temawer ai enggalyan angtane pajak doini aa jei tebabinennerem aaiserem aaf aa jei finaram jei galserem. 12 Ai ga waakenaiserem ga jetefener ai eyebili. Ai minggunu daamfenna jeme, nunu ga naura ai ajam twenyan enggalfe ai Isa agam pujitef. Ane seyafter ajes domolaram, ai afwer ga jes agam kitulbono Ibe.’ 13 Jengga angtane pajak doini aa jei tebabinennerem jei bijaususuber fina, duka jemna ga jam nortantena, jei jam anggasweyan taman waaken-giriwer. Ane jei ga gutena, ’O Uwa Sanbagiri, ai angtane etam-etamabara. As nesikte, etam-etama amnaiserem as jam Is wirulbaasini!’ " 14 Ane Yesus gamjon ga balbabili, "Ai ims towas-towastababili, angtane pajak doini aa jei tebabinennerem jeiserem, Uwa Sanbagiri Jei etam-etama jemna ga aa wirulbaasini, ane jei jame aa galap warautnaram jem jenabe, jei Uwa Sanbagirfar mes ge waakenswena. Jengga angtane safna Farisimana jeiserem jei Uwa Sanbagirfar jam ge waakensweyan, aam temawer angtane seyafter gemerserem jena aa jei gam gaartenaram, Uwa Sanbagiri Jei angtane jeiserem ga gam onabertana. Ane angtane jena aa jei gam onabertanaram, Uwa Sanbagiri Jei angtane jeiserem ga gam gaartena." 15 Angtane tanna bastantanaiserem ga aane aftabuwena Yesusminibe enggalfe, Yesus tafna jem dwak sagap gam tosoniwif. Ane angtane Yesus aa jei ne tikwebaatinennerem, jei angtane tanna aa jei ne aftabuwenaram jei ga aane damtabili, ane jei angtane jeiserem ga aane uftabili. 16 Jengga Yesus tanna jeiserem ga jenbebili, ane ga balbabili, "Tantantane jeiserem jei samfer ge jalbili Amnibe. Ipsama uftabilirim, aam temawer angtane enggalaiserem tanna aas galserem, jei samfer se naawena Uwa Sanbagirfar, ane Uwa Sanbagiri Jei ga jem Sanbakf se gwena. 17 Ai bunarsusfer ims towas-towastababili, tanna bastouya jei Uwa Sanbagiriserem jes ne tebana, Uwa Sanbagiri Jei jem Sanbakf se gwena. Angtane baife aa jei gam gwenaram Uwa Sanbagiri Jei jem Sanbakf gwefe, angtane jeiserem jei jam etamweyan angtane Uwa Sanbagirem gwonap gwefe, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe." 18 Angtane sanbaka Yahudimanaiserem jei Yesus ga tenebana enggame, "Guru, Aamei waakena. Ai ga basas eyebili enggalfe ai waakenfer gwelaiserem jamer abak-abaksus agam domolfe?" 19 Yesus ga tamawolbana, "Jeje bafa aamei Ai ga Asim bala enggame Ai waakena? Angtane waakena afa fas jam gweyan, jengga Uwa Sanbagiri Jenfentowai Jei waakena. 20 Uwa Sanbagiri aa jes balbabilim, aamei seyafter jeiserem imes towaswebili: Maaryena ipsam gwebit. Angtane ipsam tat. Jigala angtanemana ipsam komkomulsit. Angtane nensa syefer ipsam balt. Iye yo uwa imna, taterisi jemna ga jamer igam tasyipmini." 21 Angtane jeiserem ga gunu, "Taterisi seyafter jeiserem ai amsam tikwebitinint, ai bastowaisamer galapserem jamer namwer aas jepserem jep mese." 22 Yesus jeiserem Jame aa galap saribenerem, Yesus angtane jeiserem ga bala, "Taterisi umwefe ga daamfenna, aamei gemerje jeiserem ijam eyebiyen. Taterisi jeiserem ga aas: Galgala imna seyafter ga jam is jualtababili, ane doini ga angtane galgalyenaiserem ga jep is kitulmini, ane aamei waakenfer gwelaiserem ga is domola jamer abak-abaksus. Afa jeiserem jam is eyebilirim jamer taban, aamei ga is jela Amnibe, ane Ai ga Asis tikwebaatini." 23 Jengga angtane jeiserem taterisi Yesusmana jeiserem jam aa galap saribenerem, ini jemna ga jenbana aam temawer galgala jemna ane-anesus. 24 Yesus jei angtane jeiserem ini jemna mesam towaswebabana, angtane jeiserem ini ga jam jenbana. Yesus ga jem temawer ga gunu, "Angtane galgalabaraiserem jei ini galgalapfener gam folbana, ini jemna Uwa Sanbagirminip jam folbayan. Afa ini angtanemana jes gemerserem gemer gam folbanaram, afa jei fas jam irfwebayanaye, gam jega Uwa Sanbagiri Jei jem Sanbakfe Jam gweyan. 25 Bunar-bunarsus, twena unggwandusa jei jam kaweteyan burum mwonabe. Jes gamserem aaiserem jegme gemer, angtane afa ini jemna galgalapfener gam folbanaram, angtane jeiserem jei Uwa Sanbagirfar daamfennaber jam ge gweyan, ane Uwa Sanbagiri Jei jem Sanbakfe Jam nwinyen." 26 Angtane Yesus aa jei ne sarbasinirim, jei Yesus ga aane tenebana, "Afa ga gam jes gamserem, gam jega nan se waakentaasini?" 27 Yesus ga tamawolbaabili, "Angtane jei jen jena jam waakentaasiyen, jengga Uwa Sanbagiri Jei angtane jei gam waakentaasini." 28 Petrus jei Yesus ga bala, "Ai seyafter ajesa damtabilirim amsa mirtebitefala enggalfe ai Aamei Is agma tikwebaatif!" 29 Yesus ga balbabili, "Ai bunarsus ims towas-towastababili, angtane jena aa jei gam mirultefalaram, afa wi tane, afa aya oso, afa ene jeta enggalfe awelna Uwa Sanbagirmana gam gwebif, ane enggalf Uwa Sanbagiri Jei jem Sanbakfe gam gwef, 30 angtane jeiserem jei namwer aas jepserem fwaina se taabili uskambarsus seyafter aa jes mirtebitefalaram jemniwer. Ane nunu galap aa jep forsanyaram, Ai Ajep warautnaram, Uwa Sanbagiri Jei angtane jeiserem waakenfer gwelaiserem se gulbasa jebe, jamer abak-abaksus." 31 Yesus Jei angtane dua belas Jei aa jei ne tikwebaatinennerem jentowaifener ga aa betbetulsini, ane ga balbabili, "Gasa sarsi! Nei kota Yerusalemwera gane tauna. Nabi fwatermana gwanan aa jei naawelam, jei ga enggam ne tulistababil Am temawer: Angtane jei kapkaiserem Ap Asene eyeibene, Aiba Tane Angtanemana. Seyafter jei aa jes ne tulistababilim, namwer ga sege etamwebili Amnibe. 32 Ai ga Asene gerfa angtane Yahudimanyanaiserem jemnibe. Jei Ai ga Asene bisobafa, ane jei Ai ga Asene imei-imeitafa, ane makem ga Asene gwebafa. 33 Ane jei Ai ga Asene safsaftana newa utuboroserem jeme, ane Ai ga Asene munbofo. Jengga nunu nawer-ningnabaraiserem, Ai gamjon ga jem As irwefa terewer." 34 Taterisi Yesus aa jes nasbabilirim, taterisi seyafter jeiserem angtane Yesus aa jei ne tikwebaatinennerem jei jam ne sarbiyen. Taterisi jeiserem ga jam syawulmisini jemniwer. Jei fas jam ge towaswebiyen Yesus Jei bas nasipmini jebe. 35 Yesus aa galap fortyaram kota Yeriko gwetmanabe, angtane aasaje nel eyep ga jep nwini. Jei nwe kofa, ane jei doif jeber-jeber aber-aberwowena. 36 Jei angtane unggwanfer aa jei ge ayebintyerem aa galap sarbabilirim, jei ga tenebaabili, "Aaje basa?" 37 Angtane aa jei ge ayebintyerem jei ga aane bala, "Yesus, Angtane tamna Nasaretmana jeiserem, Jei Jam ayinyef." 38 Ane angtane nwe kofa jeiserem ga gwarna, "Yesus, Tane Raja Daudmana, Aameiba Angtane Uwa Sanbagiri aa jes destabanaram! Ai ase nesikte!" 39 Angtane aa jei ge danabilirim, jei angtane nwe kofa jeiserem ga aane uftana, ane ga aane bala, "Jas tikwe!" Jengga jei gamjon ga gwarna uskambarsus, "Yesus, Tane Raja Daudmana, Aameiba Angtane Uwa Sanbagiri aa jes destabanaram! Ai ase nesikte!" 40 Jepga Yesus ga fyatena, ane angtane ga balbabili, "Angtane nwe kofa jeiserem jesa girinyel Amnip." Angtane nwe kofa jeiserem aa galap fortyaram Yesusminibe, Yesus ga tenebana, 41 "Aamei ibas bili Ai ibe is Ajes eyeibefe?" Angtane nwe kofa jeiserem ga tamawolbana, "Uwa, ai enggam ai gunu, ai waakenfer anggasif." 42 Jepga Yesus angtane nwe kofaiserem ga bala, "Gase gaarasi! Aamei Ai waakenfer As imes tebana, jega jem temawer aamei gase waakenswe." 43 Jes jeberserem jei ga gaarasini, ane jei Yesus ga tikwebaatini, ane Uwa Sanbagiri ga pujitene. Ane angtane uskambar jeiserem jei taterisi jeiserem jame aa galap ne domolaram, jei seyafter Uwa Sanbagiri ga aane pujitene.

19

1 Yesus ga forna kota Yeriko je, ane Jei kotana jeiserem jep jamer ga sofna. 2 Kotana jeiserem jebe angtane aasaje ga jep nwini, bosna jemna ga Sakeus. Jei angtane sanbak angtane pajak doini aa jei gane tebabinennerem ane pemerintafe ga gane kitulmini, ane galgala jemna anesus. 3 Angtane uskambarsus jei Yesusfar ga aa ge sofobili. Sakeus jei jam towaswef Yesus ga fwersa angtane uskambar aa jei ge sofobilirim jebar. Jei masef Yesus jam damtayan, aam temawer jei angtane tofora. 4 Jega jem temawer jei ga nunggiri angtane uskambar jeiserem jem mukanawer. Ane Sakeus tinip ga tauna, jega jei Yesus jewer gam damtaf, Jei Jam aa jep ge ayebintyerem tini jeiserem jem gwetmanabe. 5 Yesus Jei Jame aa galap fortyaram tini jeiserem jebe, Jei ga anggaswena, ane Sakeus ga damtaswena. Ane Yesus ga balswena, "Sakeus, tatar jase ireya! Ai namwer im jenap Ajam forof, ane Ai ibar ge nwinf." 6 Sakeus jei tatarmer ga iretya, ane Yesus ga tebana ini saaser-saasersusmer, ane jei nawersamer ga aa ge gwina Sakeusem jenabe. 7 Angtane seyafter jeiserem jei Yesus gam jam aane damtanaram enggame Yesus jei Sakeusem jenap sofwef. Jei jelem inip uskamer enggam ga aa ge gubili, "Yesus Jei angtane syewal anggwana gamserem gam gwina angtane etam-etamabaraiserem jem jenabe! Jeiserem je kapka!" 8 Jepga Sakeusem jenabe, Sakeus ga fyatena angtane uskambar jeiserem jem mukanabe, ane Yesus ga bala, "Tuhan, ai amse sarbasi! Ai etam-etamawer as irfwena. Ai galgala amna nenennaber as waksosini, ane afwer ga angtane galgalyenaiserem jep as kitulmini. Ane angtane ai ajes afaftababuwenantam doini jemna agam tamserenbaipmuwenantam, ai doini jemna gamjon as warautabaipmini jebe, nawer-nawermer." 9 Ane Yesus ga gutena, "Nunu aaiserem jeme, aamei ane wi tane imna seyafter gemerserem, Uwa Sanbagiri etam-etama imna seyafter is mes wirtabaipmini, ane gwela ibirmi is mes golmini ibe. Ai waakena Amnaiserem ibe is Amesam golmini, aam temawer aameiba asal-asala Abrahammanam, 10 ane Ai Tane Angtanemana, Ai ogiri aaiserem jebe enggalf Ai fortya angtane aamei galserem Uwa Sanbagirminiwer jena aa jei ne bijausonaram Ai Ajes terelbaabif, Ai angtane jeiserem Ai ga Ajes waakentababisif." 11 Angtane jei Yesus ga gemer ne sarbasini waakenfer, Yesus jei gamjon ga nasowena enggame, Jei seisya taterisi ga jes nasbili. Jes jepserem angtane syefer enggam ga aa ge gubili, "Yesus namwer kota Yerusalem gas gwetmansol. Jei Yerusalemwer Jam se fornaram, jes jemerserem Uwa Sanbagiri Jei ginanggwana nemna gase surbobili, ane Jei gase towaiwena nem Sanbakfe jam gwefe ogiri aaiserem jebe." Angtane jes gamserem gam aa jewer ge gubilirim, jei syefer ge gubili, aam temawer Uwa Sanbagiri Jei gam Jam guyon jes gamserem gam Jam eyebife. Nunu Uwa Sanbagiri aa jep gwefe anggwabura seyafter gemerserem jem Sanbakfe, angtane nunu jeiserem jei jam ne domolyan nwena jelemanaiserem jeme. Ga jem temawer Yesus seisya taterisi ga jes nasbili enggame: 12 "Angtane aasaje sanbakf nwini negeri jelemanaiserem jebe. Jei negeri jemna ga mirsotefala, ane negeri bijausususerem jewer ga sofna enggalfe, raja sanbaksusu negeri seyafter aa jei tebabilirim jei baabeta gam gulbaf jebe, jega enggalf angtane sanbaka jeiserem jei rajaf gam etamwef negeri jelemanaiserem jebe. Afa jei baabeta jam se taabilirim raja sanbaksususerem jemniwer, jei gamjon gase warauwa negeri jelemanaiserem jebe. 13 Jei nalefe jam sofweyan, jei gwanan angtane sepulu ga gemer jenbebili, angtane awelna jemnip aa jei ne gweyibuwenaram. Jei doi emasa daamfen-daamfennem ga kitulmini jebe. Doi emasa daamfenna, jei ga gaji doi muara nawer-ningginmana gamserem. Ane angtane sanbaka jeiserem ga balbabili, ’Galgala ga doini aaiserem ga jem isa armantababili, galgala jeiserem gamjon ga jam isa jualtababili enggalfe, doini ai isa ajes kitulminirim, doini jeiserem ga isa unggwantababisini. Aaiserem ga enggammer isa eyebili jamere ai gamjon as warautna.’ 14 Jengga angtane afwer negeri jeiserem jep aa jei ge nwinbenerem jei angtane sanbaka jeiserem kakalmer ga aane nasbana. Ane angtane sanbaka jei aa galap sofnaram, angtane aa jei ne nasbanaram jei angtane ga aane baftabili enggalfe, raja sanbaksususerem negeri seyafter aa jei gam tebabilirim, raja jeiserem jewer gam ne balf enggame, ’Ai baifa gwena angtane sanbak aaiserem jei am rajaf gwefe.’ 15 Jengga angtane sanbaka jeiserem jei baabeta ga taabili raja sanbaksususerem jemniwer, jega jei rajafe jei jon gam gwefe negeri jelemanaiserem jebe. Ane jei gamjon ga warauwa negeri jelemanaiserem jebe. Ane jei jame aa galap fornaram, jei angtane awelna jemnip aa jei ne gweyibenerem doini aa jep kitulminintim, angtane jeiserem ga jenbebili enggalfe, jei gam towaswef doini aa jes ne tebabilirim jei aa jes ne unggwantababilirim unggwanfer ga fomera. 16 Angtane awelna jemnip aa jei ne gweyibenerem nabal danalaiserem jei ga jela rajaminibe, ane ga bala, ’Uwa, doi emasa daamfenna aamei gwanan ap as ijes gulbanantam, doini jeiserem ames unggwan-girtaasini jamere doi emasa jeiserem gamjon sepulufe ga etamwena.’ 17 Raja jeiserem ga bala, ’Samfersus, aamei awelna amna i waakenfer im gwebili. Aamei awelna bastantanaiserem waakenfer imes gwebili. Jega jem temawer ai isas destabana aamei angtane sanbakf is nwini, kotana sepulu aamei ga jes is tebabili.’ 18 Angtane awelna jemnip aa jei ne gweyibenerem afelnaiserem jei jon ga jela, ane ga bala, ’Uwa, doi emasa daamfenna aamei ap as ijes gulbanantam, doini jeiserem ga ames unggwantaasini jamere doi emasa tafna gwiri.’ 19 Raja jeiserem ga bala, ’Aamei mese angtane sanbakf is nwini, kotana tafna gwiri ga gemer is tebabili.’ 20 Angtane awelna jemnip aa jei gweyibenerem nafsiserem jei jon ga jela, ane raja jeiserem ga bala, ’Uwa, doi emasa imna daamfennaiserem aare; ai fenbitem ai fwirna, ane ga ai syawulsini, jega doi emasa aaiserem ai ajam anggabisili gala. 21 Ai aamei isa jam erebene, aam temawer aamei angtane kakala. Aamei angtane nafsi doini aa jes ne unggwantaasinirim, doini jeiserem aamei ga im tebabili. Ane aamei nananisi aamei ijam tonolyenaiserem, nananisi jeiserem ga ijes tebabili.’ 22 Raja jeiserem jei angtane jeiserem ga bala, ’Aamei awelna amna kabwakfer im gwebili! Aamei ai asi gemer balaram ai taterisi imna jeiserem ai isa jeter as onsoibene, ai isas tamtamtana. Aamei tousa ai angtane kakala. Ai angtane nafsi doini aa jes ne unggwantaasinirim, doini jeiserem ai ga as tebabili. Ane ai nananisi ai ajam tonolyenaiserem, nananisi jeiserem ga as tebabili. 23 Afa ga gam, jeje bafa aamei doini jeiserem fas ijam gwetaanteyan banggabe enggalfe, nunu ai jema gam warautnaram ai doini jeiserem seyafter bunganabaner ga agam tebabili?’ 24 Ane raja jeiserem jei angtane jep aa jei ge fibilirim ga balbabili, ’Doi emasa daamfenna jeiserem jemniwer sa amsonba, ane doini jeiserem ga isa kitulbono angtane doi emasa sepulu aa jei tebabilirim jebe.’ 25 Jengga angtane jeiserem ga aa ge gubili, ’Uwa jei doi emas sepulu mesam damtana!’ 26 Raja jeiserem ga tamawola, ’Ai ims towas-towastababili, angtane waakenfer aa jei gane eyebilirim jei aa jes gane damtabilirim jeme, Uwa Sanbagiri Jei angtane jeiserem gamjon ga gam kitulmini unggwanfersus. Jengga angtane bastowaifer aa jei gane damtabilirim, afa jei kabwakfer gane gwebili jeiserem jeme, Uwa Sanbagiri Jei bastowaifer jeiserem jei aa jei ne domolaram ga gam amsonbana jemniwer. 27 Ane angtane baife aa jei gam naawenaram ai jem rajaf gwefe, jeiba ginanggwa amnam. Angtane jeiserem aaf gasa aftabiyel, ane ga isa munbobili am tarnabe.’ " 28 Yesus Jei jeiserem Jame aa galap tabanulurum Jam nasbilibe, Jei nabala ga Jei danna, kota Yerusalemwer ga teyafna. 29 Jei tamna Betfage yo Betanya Jame aa galap gwetmansonaram, taarentumu bosna ga Saitun aa jep nulnaram, Yesus Jei angtane naura ga bafsona, angtane Jei aa jei ne tikwebaatinennerem. 30 Yesus ga gitmini, "Ga sege sofwe tamna nem mukanap jeiserem jebe! Aamei tamna jeiserem jep jam is ge kawesonaram, aamei keledai tanna jep ga is ge damtana, jam daktabaasiliserem. Keledai tanna jeiserem ga gemerje angtane afa jem sagap jam nwinteyan ane jeme jam wofeyan. Keledai tanna jeiserem ga is ge fertesini, ane ga is ge aftayala aafe. 31 Afa angtane aamei is jam sene taanaaminirim enggame, ’Jeje bafa aamei keledai tanna jeiserem ga im ge fertesini?’, aamei angtane jeiserem ga enggam is ge bala, ’Keledai tanna aaiserem Tuhane bala.’ " 32 Angtane naura jeiserem jei ga aa ge sofwa. Ane jei ga aa ge domola seyafter jes gemerserem Yesus aa gemer gitminirim. 33 Jei keledai tanna jeiserem aa galap ge fertesinirim, angtane keledai tanna jam jemanserem jei angtane naura jeiserem ga gitmini, "Jeje bafa aamei keledai tanna jeiserem ga im ge fertesini?" 34 Jei angtane jeiserem ga aa ge tamawolbana, "Keledai tanna aaiserem Tuhan gam gunu." 35 Ane jei keledai tanna jeiserem ga aa ge aftafala Yesusminibe. Ane jepga fene fen sagap kamwiliserem jemna ga aane tosobaanswena keledai jeiserem jem sagabe. Ane Yesus ga aane batobana keledai jeiserem jem sagap ga jusona. 36 Yesus Jei Jame aa galap sofnaram keledai tanna jeiserem jeme, angtane fene fen sagap kamwiliserem jelemana ga aane bunulntena nelebe. Jei fene fen sagap kamwiliserem ga enggalf ne bunulntena nelebe, angtane afweraiserem jei gangge towaswebif enggame, Yesus Jeiba angtane sanbaksam. 37 Ane Yesus Jei kota Yerusalem ga towaisona jam gwetmansofe, nel iryela otumu Saitunwer aaiserem jebe. Ane angtane unggwanfer Yesus aa jei ne tikwebaatinennerem seyafter jeiserem jei ga aa ge towaiwebili Uwa Sanbagiri jam ne pujitefe ini saaser-saasereme. Ane unggwanfer enggam ga naawewena, "Uwa Sanbagiri asi samfer golmini, bwembwema Yesus aa jes eyebilirim baabeta Jelemanaiserem jeme ai ajesa domolaram jem temawer." 38 Jei ga naawewena: "Uwa Sanbagiri Jei waakena Jelemanaiserem gase gulbana Jebe, Raja aa Jei fortyaram Tuhanem boseme! Au, nei Uwa Sanbagiri ganma pujite uskambar! Jei nei nes waakentababisini! Jei waakensusu; Jei taman waaken-girip nwini, tamna bwalesususerem." 39 Angtane safna Farisimana afweraiserem angtane unggwanfer jeiserem jemniwer, jei Yesus ga aane bala, "Guru, angtane Aamei Is jei ne tikwebaatinennerem jes balbabi, jei jas uftabi!" 40 Yesus ga tamawolbaabili, "Ai ims towas-towastababili, afa jei jam sege tikwebilirim Ams pujitelewer, gam jega Uwa Sanbagiri gase eyebili jega tuna aaiserem jei ga Ai ga Asene pujitene." 41 Ane Yesus Jei amkom fom forola kota Yerusalem je. Jei kotana jeiserem aa galap domsonaram, Yesus ga angtane aa jei ge nwinbenerem Yerusalem je ga syebabili uskambarsus. 42 Ane ga gutena, "O angtane aa jei ge nwinbenerem Yerusalem je, ini Amna As enggam folbana aamei Asi gama tebaf enggalfe, Uwa Sanbagiri Jei aamei is gam waakentababisif, ane aamei Uwa Sanbagirfar daamfennaber gam isa gwena. Jengga namwer aas jepserem aamei Asi baifa gwebana. 43 Nunu se fortya galabe, aamei ga isa domola ginanggwana imnaiserem je ona sene gerentababisnenne jamere kotana imnaiserem durga. Ane jei jem saaserfar ga sege gubili gwetman-gwetmanfer enggalfe aamei is gam ne munbobif. Ane angtane afa fas jam totinyen kotana imnaiserem jewer. 44 Nunu Uwa Sanbagiri Jem foryalaiserem enggalfe aamei is gam waakentababisif, nunu jeiserem mes fortya, aam temawer Aiba aafam. Jengga aamei Asi baifa gwebana. Jega jem temawer ginanggwana imna jei ga aamei isene munbobili seyafter, angtane seyafter igemera nwinirim kota Yerusalem aaiserem jebe. Ane ginanggwana jeiserem jei jena seyafter jeiserem ga sene kwirtabaabisini. Tuna afa fas jam falnteyan jelem tampatabe." 45 Yesus ga kawetena Jena Uwa Sanbagirmanaiserem kota Yerusalem je. Ane Jei ga towaiwena angtane galgala jep aa jei ne jualtababuwenaram angtane jeiserem ga surbobili jewer. 46 Yesus Jei angtane jeiserem ga balbabili, "Taterisi Uwa Sanbagirmanaiserem jep ga enggam tulisul: ’Jena Amnaiserem ga enggalf angtane jei Abar Ajeba nasowef.’ (Yesaya 56:7) Jengga aamei jena aaiserem enggam ima eyebili, Jena angtane komkoma jep ge nwinbele gamserem." 47 Nunu jeber-jeber Yesus Jei angtane ga towas-towastababuwena Jena Uwa Sanbagirmanaiserem jebe. Angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbak-sanbaka Yahudimanaiserem jes mese, jei ini jemna enggam ga aa ge folbamini Yesus jam ne munbofe. 48 Jengga jei nele fas jam ne damtayan Yesus jam munbofe, aam temawer angtane uskambarsus Yesusem tarnap ge fibili, taterisi seyafter Yesus aa jes nasbabilirim ga jes ne sarbisini. Angtane sanbaka jeiserem jei bai angtane unggwanfer jeiserem jam ge erabafe.

20

1 Nunu daamfenna jeme, Yesus angtane ga jem towas-towastababili Jena Uwa Sanbagirmanaiserem jebe, ane Jei Taterisi Waakenaiserem ga jes nasipmini. Jes jepserem angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, angtane seyafter jeiserem Yesusminip ga aa ge jalbili. 2 Ane jei Yesus ga aane tenebana, "As jam Is balbabi, baabeta nanmana Aamei seyafter aaiserem ga Ijem eyebuwena? Baabeta Ise nane gulbana Ibe, Aamei seyafter aaiserem ga Ijem eyebuwena?" 3 Yesus Jei enggam ga tamawolbaabili, "Ai gamjon ims tenebaabili. Aamei Ai jon ga As isa towasta, 4 baabeta Yohanes aa jes domolaram angtane jam baptistababife, baabeta jeiserem ke Uwa Sanbagirminiwer jela, afa angtaneminiwer jela?" 5 Angtane jeiserem jei jenjen ga aa ge doksobana, enggam ga aa ge gubili, "Nei afa enggam jam nesa gunurum Uwa Sanbagirminiwer, Yesus Jei nei enggam nes galap se balbabili, ’Jeje bafa aamei Yohanes ijama tebayan?’ 6 Jengga afa nei enggam nesa gunurum angtaneminiwer, angtane seyafter galap nesene munbobili toneme, aam temawer jei mes ne taabili enggame Yohanes ba angtane nabisam, Uwa Sanbagiri aa jes baftannuntum" 7 Ga jem temawer jei Yesus enggam ga aane tamawolbana, "Ai seyafter teisyena baabeta Yohanesmana je fwer jela." 8 Jepga Yesus ga balbabili, "Gam jega Aimba aamei isa Ajam towastababiyen baabeta nanmana Ai ga seyafter aaiserem ga Ajem eyebili." 9 Jepga Yesus seisya taterisi ga nasipmini angtane jeiserem jebe. Taterisi jeiserem ga enggam: "Angtane aasaje angguru makanap tonola. Jepga jei angtane anggur tonol tousaiserem ga enggam balbabili, ’Ai as sofna negeri nafsiserem jewer, negeri jeiserem ai jebe abakef as nwini. Ai abakfer jewer ajebar nwinirim, aamei samfer anggur makana amna aaiserem nomkef isa armantana, angguru jep ga isa tonola, ane jem igiserem afwer galap ga ap isa kitulbono.’ Ane jena ga sofna negeri nafsibe, ane jei jep ga nwini jamer abaka. 10 Nunu anggur jep fuluserem jam aa galap fortyaram, angtane anggur makana jam jemanserem jei angtane awelna jemnip aa jei gwebilirim ga baftana enggalfe, makana jeiserem jem igiserem afwer jei gam tebabif, angtane anggur makana nomkef aa jei ne armantanaram jemniwer. Jengga angtane anggur makana nomkef aa jei ne armantanaram, jei angtane aa jes baftanaram, angtane jeiserem ga aane safsaftana. Ane jei angtane jeiserem ga aane bala, ’Se dip! Gase warau, makana jem igiserem ijam gwirinyen.’ 11 Angtane makana jam jemanserem jei gamjon angtane awelna jemnip aa jei gwebilirim nafsi jei jon ga baftana. Jengga angtane anggur makana nomkef aa jei ne armantanaram, jei angtane jeiserem jes mese jei jon ga aane safsaftana, ane jep ga aane gwebana jamer jei aa sefersona. Ane jei angtane jeiserem ga aane bala, ’Se dip! Gase warau, makana jem igiserem ijam gwirinyen.’ 12 Makana jam jemanserem jei angtane nawer-ningnabaraiserem jei jon ga baftana. Jengga angtane anggur makana nomkef aa jei ne armantanaram, jei angtane jeiserem jei jon ga aane safsaftana, jamere tifni jemna bubwa teten sobana. Ane ga aane firtaaniwili makana jeiserem jem jitefwer. 13 Jepga angtane anggur makana jam jemanserem jei ga gunu, ’Ai gamjon ga basas eyebili? Ai ga enggam as eyebili, ai tanna amna ajes nesiktenerem, ai jes as baftana. Angtane makana amna nomkef aa jei ne armantanaram, jei bunarsus tanna amna jam ne kabwaktayan.’ 14 Jengga angtane anggur makana nomkef aa jei ne armantanaram, jei tanna jeiserem jam aa galap ne damtanaram, jena enggam ga aane gitminenne, ’Tanna aaiserem ba makana jei se tebana, jeta jam aa jep tererem. Au, nei tanna aaiserem ganma munbo, jega nei makan anggur aaiserem nei gam nesa tebana!’ 15 Ane jei tanna jeiserem ga aane aftawena anggur makan jitefwer, ane ga aane munbono." Ane Yesus ga tenebaabili, "Angtane makana jam jemanserem jei ga base eyeipmini, angtane makana jemna nomkef aa jei ne armantanaram jebe? 16 Bunar-bunarsus ga enggam, jei se jela angtane anggur makana nomkef aa jei ne armantanaram jemnibe, ane jei angtane jeiserem jei gase munbobili. Gamjon makana jeiserem angtane nafsiserem jep gase gaarmini." Angtane jei taterisi Yesus aa jes nasbilirim jame aa galap ne sarbasinirim, jei Yesus ga aane bala, "Ai bai Uwa Sanbagiri Jei enggam gufe kapka jeiserem jam etamwefe!" 17 Yesus angtane jeiserem ga gerebaabili, ane ga tenebaabili, "Afa ga gam jes gamserem, taterisi aaiserem jemna igi ga fomfoma, taterisi Am temawer aaiserem aa jes tulisulum Taterisi Uwa Sanbagirmanaiserem jebe: ’Angtane jena aa jei ne eyebilirim, tuna jei aa jes ne taptasiwilirim, tuna jeiserem mes etamwena igsusfe.’ " (Mazmur 118:22) 18 Ane Yesus gamjon ga balbabili, "Angtane seyafter aa jei ge janbilirim tuna jeiserem jem sagabe, jei sege wasferwebili. Ane tuna jeiserem afa angtanem sagap jam se jentyaram, tuna jeiserem jei ga angtane jeiserem gase jubono, jamere sonf se etamwena. Taterisi jeiserem ga enggam, angtane Ams tebayanaiserem Ai ga As tener-tenertababili, ane ga As tamtamtababili jamer sege wasferwebili." 19 Guru-guru Hukumu Nabi Musamana aa jei ne towas-towastababuwenaram, ane angtane imam-imam sanbakaiserem jei seyafter ga aa ge towaswebili enggame, Yesus seisya taterisi jeiserem jelem temaweram nasipmini. Jei enggam ge towaswebili jeiba angtane kapka makana nomkef aa jei ne armantanaram jes galserem, seisya taterisi Yesus jep aa jes nasbilirim. Ga jem temawer jes jepserem jei nele ga aane terelbene Yesus Jam ne tebafe. Jengga jei angtane unggwanfer jeiserem ga jes ne erebaabili. 20 Angtane Hukumu Nabi Musamana aa jei ne towas-towastababuwenaram, ane angtane imam-imam sanbakaiserem jes mese, jei Yesus ga aane gerbaasnenne nwebitmer enggalfe jei Yesus gam ne tebaf, afa Jei taterisi syefer jam se nasbabilirim. Jega jem temawer jei sabanggwana ga aane baftabiwili Yesusminibe enggalfe, Yesus gam ne unggwasbaf tateriseme. Angtane sanbaka jeiserem jei ga aa ge gubili, "Aamei akar-akarem ini waakenmer jam isa gwenaram, ane Yesus ga isa teneba-tenebawena! Afa aamei seyafter aaiserem jam isa eyebilirim, ai aamei ga isa as armantababili." Angtane sanbaka jeiserem enggam ne mwangbisini, afa Yesus Jei syefer jam se tamawolaram, jei Yesus ga sene gera Gubernurminibe, angtane baabetabara aa jei nwinirim sanbakfe ona jeiserem jebe. 21 Ane sabanggwana Yesusminip ga aa ge gubili, ane jei Yesus enggam ga aane unggwasbana, "Guru, ai amsa towaswena enggame Aamei seyafter Ijes nasbabilirim, ane Ijes towas-towastababilirim, jeiserem ba bunaram. Aamei angtane afa Ijam erebeyen. Aamei taterisi daamfennaiserem ga Ijeter nasipminenne angtane igsususerem jebe, ane angtane igyeneiserem jep jegme taterisi jeiserem Ijeter nasipminenne, nafis-nafismer Ijam nasipmineneyen. Aamei taterisi Uwa Sanbagiri aa jes bilirim, Aamei bunarsusfer ga jetefener Im nasipminenne angtane seyafter gemerserem jebe. 22 Aamei ams towastababi, Hukumu Nabi Musa aa jes tulistababilim jei fomfom gunu, aike samfer pajak doini Kaisar Romamanaiserem asa kitulbono, afa safnant?" 23 Jengga Yesus Jei ini kapka jemna mes towaswebaipmini. Yesus Jei mes towaswena enggame, "Afa Ai enggam jam As gunurum, ’Jamer isa kitulbono.’, gam jega angtane Yahudimana jei Ai As galap sene nasbana. Afa Ai enggam jam As gutenaram, ’Safnant.’, gam jega angtane pemerintamana jei As galap sene nasbana." Jega jem temawer Yesus Jei angtane jeiserem ga balbabili, 24 "Doi perak As imsa sabasi Abe. Gambara yo bosna aa jei ge batobilirim doi peraka jeiserem jebe, jeje bunarsusfer nanmana?" Jei Yesus ga aane tamawolbana, "Kaisarmana, angtane sanbaksususerem Romamana." 25 Jepga Yesus ga balbabili, "Afa ga gam jes gamserem, afa doi perak jemna, ane jei enggam se gunurum, ’Ap sa gerba!’, aamei doi perak jeiserem saf isa gerbana! Ane Uwa Sanbagirmanaiserem, jegme Uwa Sanbagirfe isa gulbana!" 26 Angtane unggwanfer jeiserem jem nwenabe, sabanggwana taterisi syefer Yesusmana fas afa jam ne domolbayan. Jei jam ge bitbitwebili Yesus aa jes tamawolbaabilirim. Jega jem temawer jei gamjon jam ge nasbaweyan. 27 Angtane Yahudimana afwer jei taterisi angtane Sadukimana aa jei ne onsobilirim, ga aa ge jalbili Yesusminibe. Angtane safna Sadukimana jeiserem jei enggam ga aane towas-towastababuwena, angtane jam tereserem jei gamjon jam irweyan terewer. Jei Yesus ga aane tenebana, 28 "Guru, Nabi Musa jei hukumu aaiserem nebe enggam tulisulmil: ’Afa ayanaiserem wini jam gam gularam, ane ayana jam gam tererem, ane jei tanna afa fas jam waliteyen, osona jemnaiserem jei ga saamira wini jeiserem jei gamjon ga jei gam gula, jega ayana aa jei gam tererem jem fwayenfe tanna jep gam eyebafe.’ 29 Ai taterisi aaiserem Is ajama nasibef Ibe, ane ai Aamei ga Is asa tenebana taterisi aaiserem jem temawer. Angtane ayen oson tetena tuju ga gemer naawena. Ayansususerem jei wini gwanan ga jei gam gula. Abakferyan ayana jeiserem ga gam tere, ane jei tanna fas afa jam waliteyen. 30 Jepga osona ayanem malam jutelawer wini jeiserem gamjon jei jon ga gam gula. Jeime gemer ayana gemerserem ga gam tere, jengga tanna fas afa jam waliteyen. 31 Gamjon osonem malam jutelawer wini jeiserem gamjon ga jei gam gula. Ane osona seyafter afweraiserem jeime gemer gangge etamwebili, jamere umwef ga osonsusu jegme gemer, jei umwef ga jei gam tere, jengga tanna fas. 32 Umwef ga saamira wini jeiserem jei gam tere. 33 Ai Aamei Is ajama tenebaf, angtane terewer aa jep ge irwebilirim, wini jeiserem jei gamjon ga nan anggwafar sege nwini? Ayen oson tetena tuju jeiserem jei seyafter gemerserem wini jeiserem mes gane gula." 34 Yesus ga tamawolbaabili, "Angtane namwer aa jei naawenaram, jei jena sene dete. 35 Jengga galap angtane Uwa Sanbagiri aa jes balbabilirim jam ge irwebife terewer, ane taman waaken-girip gase naawena, angtane jeiserem jei fas jena jam ne detyen. 36 Jei enggammer se naawena malaikata gemerserem, ane jei fas jam ge terbiyen. Angtane jeiserem jei tane Uwa Sanbagirmana, aam temawer jei gamjon mes ge irwebili terewer. 37 Nabi Musa jei jener gwerauwul enggame angtane jei sege irwebisi terewer. Jeiserem ga enggalap gwerauwul, jei taterisi ti towai utuboro jeiserem aa jei ertesinirim jem temawer aa galap tulisulum. Taterisi jeiserem jebe, Nabi Musa jei ga enggam gwerauwul Abraham, Isak, ane Yakub, jei angtane gwelemana, termanyan. Abraham, Isak, ane Yakub jei safe fwater mes barwel, Nabi Musa jei ga Tuhanem temawer enggam gul, ’Tuhan Jeiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.’ 38 Taterisi jeiserem jes gamserem gam aa jewer gulum, nei jep ga nesa towaswena enggame, Abraham, Isak, ane Yakub jemna mafnana jei gemer naawena, aam temawer Uwa Sanbagiri Jei angtane jam tereserem jem Uwa Sanbagirfe Jam gweyan. Fas. Uwa Sanbagiri Jeiba angtane jam gwelaiserem ga jem Uwa Sanbagirf gam gwena. Angtane seyafter gemerserem Uwa Sanbagiri aa jes balbabilirim Jelem angtanefe, tifni jemna safe mes ge terbil, jengga jemna mafnanaiserem jei gemer naawenaram, ane tifni jemna jeiserem jei galap ga sege irwebisi terewer." 39 Guru-guru afwenefener Hukumu Nabi Musamana aa jei ne towas-towastababuwenaram, jei Yesus ga aane bala, "Guru, Aamei waakenfersus Im tamawola!" 40 Jega jem temawer angtane seyafter ga aa ge erebili Yesus gamjon jam ne tenebafe. 41 Yesus angtane jeiserem enggam ga tenebaabili, "Fomfom gane bala, Mesias Jei asal-asala Raja Daudmana? 42 Raja Daud jei jener enggam mesam tulisul Mesiasem temawer buku Mazmurube: ’Uwa Sanbagiri Jei Tuhan amnaiserem enggam bala: Se nwinte Am taasfolawer, 43 jamere Ai ginanggwana Imna As eyebaabili, Im tof gwonap sege nwinbitaatiwetya.’ (Mazmur 110:1) 44 Jei jes gamserem gam aa jewer gulum, Raja Daud jei jener gul Mesias Jeiba jem Tuhansam. Gam jega jeiserem ga enggam, Mesias asal-asala Raja Daudmanfenyan, jengga Jei mese Raja Daudtem Tuhansam." 45 Angtane Yesus ga gemer ne sarbasini, Yesus angtane Jei aa jei ne tikwebaatinennerem ga balbabili, 46 "Aayai, guru-guru Hukumu Nabi Musa aa jes tulistababilim jei aa jei ne towas-towastababuwenaram! Jei ga jam wofelabe fene bwalnaiserem ga jes gane kabwabili enggalfe angtane nafsi gam ne damtabif, ane gam ne balbabife jeiba angtane sanbakam. Ini jemna saaser-saaserfer sege folbamini, afa angtane pasarap aaiserem jei bosna jemna jam sene kitulmitenaram. Jei kursini angtane sanbakmanaiserem jep gam ge nonbaantef masarabe, ane jena angtane Yahudimana aa jep ge betwebuwefaram jebe. 47 Jei wini saamirnaiserem jes gane afaf-afaftababili enggalfe galgala jemna gane tamserenbaipmif. Ane jei akar-akarem enggam gam naawena, jei sembayanga gane gwebana bubwalsusfer enggalfe angtane gam ne damtabif, ane gam ne balbabif enggame jei angtane waakena. Uwa Sanbagiri guru jeiserem uskambar se tamtamtababili angtane nafsiserem jemniwer."

21

1 Jena Uwa Sanbagirmanaiserem jebe, Yesus angtane galgalabaraiserem ga gerebaabili doini ga aane bokolntouna kotakabe, doini jeiserem Uwa Sanbagirfe ga jes ne kitulbof. 2 Jei wi saamiran mese ga domola. Wi saamirna jeiserem jemna galgala fasfasus, jei doi naura bastantowaisusu gam natuntena. 3 Yesus ga balbabili, "Ai bunarsusfer ims towas-towastababili, wi saamirna aaiserem jei doini uskambar bokolntena angtane nafsiserem jemniwer. 4 Angtane nafsi seyafter jeiserem jei doini aa jes ne kitulbonorom Uwa Sanbagirfe, doini jeiserem tomnaiserem galgala jelemanaiserem jewer. Jengga saamira wini aaiserem, jei safe galgalyena, jei seyafter aa jes domolaram enggalfe jem gwelaiserem, jei ga jes gulbana." 5 Angtane Yesus aa jei ne tikwebaatinennerem afweraiserem jei ga aane nasibene enggame, "Jena Uwa Sanbagirmana jame waakensusu, tuna waaken-waakensususerem. Ane apgal jigala Uwa Sanbagirfe aa jes ne kitulbowenaram, jes mese waaken-waakensusu Jena Uwa Sanbagirmana jem ne waakenulfe." Ane Yesus Jei angtane jeiserem ga balbabili, 6 "Nunu se fortya galabe, jes jepserem aamei namwer aaf ijesa gaarabilirim, seyafter jeiserem ga sege malbitisi. Ton-giri daamfenna afa je fas jam falnteyan ton-giri afweraiserem jem sagabe. Ton-giri je seyafter sege kwirwebitisi, ane onnap ga sege janbisi." 7 Angtane jeiserem jei Yesus ga aane tenebana, "Guru, taterisi jeiserem Ijes bilirim, ga fonggalabar se etamwesa? Ane ai bagal bwembwems asa domolsa, jega ai agma towaswef enggame seyafter jeiserem jem ge etamwebiliserem nunu jeiserem ga mes foryal?" 8 Yesus ga tamawolbaabili, "Aayai, ga samem-samem jega angtane nensa is jam ne afaf-afaftababiyen, aam temawer angtane unggwanfer jei sege forobisenye bosna Amnaiserem jeme. Ane jei aamei ga isene afaf-afaftababisi, jei enggam jam gam gutenaram, ’Aiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif, aiba jesam.’ ane ’Nunu umwef jepserem mes foryal.’ Jengga safnant aamei angtane jeiserem jei ijama tikwebaabitiyen. 9 Aamei taterisi eralem temawer aaiserem galap ga isa sarbisini. Ane taterisi angtane jam eralaiserem aam temawer jei taterisi pemerintamana baife aa jewer ne gweyipminirim, aamei taterisi jeiserem jes mese galap ga isa sarbisini. Aamei taterisi seyafter jeiserem ijeba sarbisirim, safnant aamei ijama ereyen jeiserem jem temawer. Nabal-nabalsusfer seyafter jeiserem ga jei sege etamwebisi. Jengga nunu umwef jeiserem jei gemerje jam falyan." 10 Ane Yesus taterisi gamjon ga golswenni jam nasbife, "Negara afwer jei negara afweraiserem jebar sege erabasa, ane anggwabura afwer jei anggwabura afweraiserem jebar sege erabasa. 11 Ogiri seyafter gemerserem jebe aaiserem ga jes sege etamwebisi: Ginirdusa uskambarsus gasa gwesa. Angtane jei wisi ga sege folbamisi, aam temawer tumilgala makanap mese jei sege barwebisi. Angtane uskambarsus bweradusa nenes-nensaiserem ga sene domolsa. Ane bwembwemdwas nenes-nensaiserem winsip ga sege etamwebisi, bwembwema jeiserem jei ga ini imna is jei sene ereltabaipmisi. 12 Jengga seyafter jeiserem nalefe jam ge etamwebiyen, nabala ga im sene tebabisi, ane ga isene tamtamtababisi. Aamei isene aftabifelse angtane sanbaka jena angtane Yahudimana aa jep ge betwebuwefaram jemnibe enggalfe, aamei is gam ne tenebaabuwef. Ane ga isene katabuntesa bwiyibe. Aamei isene aftabuwesa Raja ane Gubernur jem tarnabe, aam temawer aamei Ai As ijewera tikwebaatinennerem. 13 Aamei jeiserem jam ijeba domolsaram, jeiserem ga waakensusu, aam temawer jeiserem ba dwona aamei Taterisi Waakena Uwa Sanbagirmana Raja yo Gubernur jebe gam isa nasipmitne. 14 Jengga aamei namwer enggam isa gunu ilem inibe, ’Nalef ai as jam ne aftabifelyen Raja yo Gubernur jemnibe, ai ajama eses-esesweyan ga fomfom asa tamawolbisi, jame as jep ne teneba-tenebaabuwenaram.’ 15 Aamei namwer ga gam isa nasowena jes gamserem, aam temawer Ai taterisi tousaiserem isa Aner As kitulmisi ibe, jega angtane afa fas ginanggwa imniwer is jam ne nasbaweyan. Ane taterisi aamei ijesa nasbabilirim, ginanggwana imna jei taterisi jeiserem jam ne baanbaanwebabiyen. 16 Ane iye mese uwa imnaiserem, ane aya mese oso imnaiserem, ane ilem afelen mesna, ane ilem sarabosna, aamei ga is jei sene kitulsu angtane sanbakminibe enggalfe is gam ne tenebaabuwef, ane is gam ne tamtamtababif. Ane aamei afwer ga isene munbobisi. 17 Angtane seyafter gemerserem aamei kakalmer isene nasbabili, aam temawer aamei Ai As ijewera tebanaram. 18 Jengga seyafter jeiserem safe is jam sene eyeipmisi ibe, Uwa Sanbagiri Jei aamei waakenfer ga is gerebaabisnenne, ane aamei Uwa Sanbagirfar waakenafer jamer ga isa gwena. 19 Aamei unggwasbalaiserem jam ijeba domolaram, aamei jes jepserem afa kanaufera jam isa finaram, aamei abakfer gwelaiserem ga isa domolsa." 20 Yesus Jei gamjon ga balbabili, "Aamei kotana Yerusalem ona Yudeya je, jam ijeba domsosaram ginanggwana jam sene gwanemisirim, aamei ga isa towaswena enggame, kotana jeiserem abakefyan ga sene wasfersosisi. 21 Jes jepserem angtane ona Yudeya je aa jei ge nwinbenerem, jei otumup sege nunggirbese. Angtane kota Yerusalem je aaiserem, jei kotana sene mirsosa. Ane angtane kotanap jam nwinyenaiserem, jei safnant jam ge kabwiteyan kotanabe. 22 Angtane jes gemerserem gam ga sene eyebisi, aam temawer nunu jeiserem jeme, seyafter Taterisi Uwa Sanbagirmanaiserem jep aa gemer tulisulum nunu jeiserem jem temawer, seyafter jeiserem gase tabanswesa. Nunu jeiserem jeme, Uwa Sanbagiri Jei angtane Israelmana gase tamtamtababisi. 23 Nunu jes jepserem jam aa jep etamwesaram, wini udanabaraiserem ane wini tanna momem taayiniserem, jei kabwaktala unggwandusa ga sene domolsa, aam temawer jei tatarfer jam ge nunggirbeyen otumube. Angtane seyafter gemerserem ona Yudeya je aa jei ge nwinbenerem, jei kabwaktala unggwandusa ga sene damtabisi, ane Uwa Sanbagiri Jei angtane Israelmana se tamtamtababisi. 24 Angtane afwer nombeyem sene targabaabisi. Ane angtane afwer jei ginanggwai sene tebabisi, ane ga sene aftabifelse taman-tamna nafsiserem jebe. Ane angtane Yahudimanyanaiserem jei kota Yerusalem ga sene taamini, ga sene juminense, jamere nunu angtane Yahudimanyanaiserem baabeta aa jei ne domolaram se tabanswena." 25 Yesus Jei gamjon ga balbabili, "Galap bwembwema sene domolsa gwer, muar, ane mato mese jebe. Ane ogiribe muru unggwan-gwansusu finibe ga sene detousa, ane fi mur tisna jeiserem ga uskambarsus. Jega jem temawer angtane aa jei ge nwinbenerem negeri seyafter gemerserem ini jemna uskambarsusfer ga sege jenbamisi, ane jei ga sege erebasi jeiserem jame aa jep ne domolsaram, jam aa jep etamwesaram. 26 Seyafter winsip gemerserem ga sege gin-ginwebisi. Angtane ga sege erebisi unggwanfersus amkom fom ge terbili, jei gemer sege fibili seyafter aa jep etamwesaram, ogiri aaiserem seyafter gemerserem jebe. 27 Jes jepserem angtane seyafter aa jei ge nwinbenerem ogiri seyafter gemerserem jebe, jei Ai Tane Angtanemana ga Asene damtasa. Ai winis sinsinibaner As iresanya, baabeta yo nafa unggwandwasususerem jeme. 28 Seyafter jeiserem jam aa jep towaiwesaram jam etamwefe, jes jepserem aamei ga isa irwesa, ane duka ga isa ketatesa, aam temawer Uwa Sanbagiri Jei babitsim ga is waakentababisini." 29 Ane Yesus seisya taterisi aaiserem ga nasipmini jebe: "Ara tini sa gaarabi, ane tini nensa seyafter gemerserem jes mese. 30 Afa tini jeiserem jam isa damtabilirim jam sege kokosbilirim, aamei ga isa towaswena enggame, ososana ga babitsim gase fala. 31 Ga gemer jes gemerserem aaiserem jegme gemer: Afa aamei taterisi Ai Ajes nasbilirim jam isa damtabisirim jam sege etamwebisirim, aamei ga isa towaswesa enggame, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem gase gwetmanswel. 32 Ai bunarsusfer ims towas-towastababili, angtane Yahudimana namwer aa jei naawenaram jei nalefe jam ge terbiyen, taterisi aaiserem seyafter gemerserem Ai Ajes nasbilirim ga sege etamwebisi. 33 Winsi yo ogiri aaiserem jei sege barwesa, jengga taterisi Amnaiserem je jam barweyan." 34 Yesus Jei gamjon ga balbabili, "Ina ga waakenfer isa gaaramisnenne! Aamei masar jeber-jeber ijama eyebiyen, ane aamei fona jem mabukswelaiserem jeber-jeber ijama telbebiyen, ane safnant aamei gwela imna uskambarsus is jam ge esesweipmiyen, aam temawer afa aamei seyafter jes isa eyebaabilirim, gam jega aamei ijama menetwesiyen nunu Ai Tane Angtanemana Ai Ajem foryalaiserem. 35 Nunu jeiserem aafer-aafer ga enggam se etamwesa, twen omwana titikip jam jubolo gemerserem, angtane seyafter aa jei ge nwinbenerem ogiri aaiserem jebe. 36 Aamei jeber-jeber waakenfer ga jam ga isa gaaramisnenne. Ane sembayanga ga jam isa gwebabuwena, jega kabwaktala uskambarsus jam aa jep ge etamwebisirim, aamei ga kanaufera isa fina, ane aamei ijama seferswebiyen nunu isa fibisi Am tarnabe." 37 Nunu jeber-jeber Yesus angtanes towas-towastababuwena Jena Uwa Sanbagirmanaiserem jebe. Ane ona jam gam gigitswenaram Jei kota Yerusalem ga gam mirsotefala, ane ga gam sofna taarentumu bosna Saitun, ane Jei ga jep gam nwini jamer ona naf. 38 Gwinibenersus jeber-jeber angtane seyafter ga aa ge jalbuwena Jena Uwa Sanbagirmanaiserem jebe enggalfe Yesus gam ne sarbasif, Jei aa jes towas-towastababuwenaram.

22

1 Nunu masara Roti Tanyana jes Tombaabif, masara bosna Paska, nunu jeiserem ga babitsim se fortya. 2 Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei angtanes ne erebaabili. Jega jem temawer jei nele ga aane terelbene Yesus basyamer jam ne munbofe. 3 Jepga bawasa Yudasminip ga kautena. Jemna bosna afwer Iskaryot, ane jeiba angtane daamfenna angtane dua belas Yesus aa jei ne tikwebaatinennerem jemniwer. 4 Ane Yudas ga sofna angtane imam-imam sanbakaiserem ane angtane sanbak-sanbaka polisi Jena Uwa Sanbagirmanaiserem jemnibe enggalfe, Jei jebar gam ne nasbif fomfoma jei Yesus jep gam gaarmife. 5 Angtane sanbaka jeiserem taterisi Yudasmana aa galap ne sarbilirim, ini jemna saaser-saasersusfer ga aa ge folbamini. Ane jei Yudas ga aane bala, "Ai doini ip asa gerbana." 6 Yudas ga gunu, "Sya." Ane jei dwona ga terelbili Yesus jep jam gaarmife, angtane jam ge towaswebiyamer. 7 Nunu gas foryal tumilgala Paskamana jem tombaabife. Nunu jes jepserem angtane Yahudimana jei domba tanna Paskamana ga aane tegila, jam tombaabife rotini tanyanaiserem jebar. 8 Yesus Jei Petruso Yohanes ga bafsona. Jei ga gitmini, "Im ge sofwe, ane tumilgala Paska nemna jep ga is ge menetulsini!" 9 Jei Yesus ga aa ge tenebana, "Jena ga fwersa Aamei Ijep gunurum, ai ajewer ge sofwefe tumilgala Paskamana ai ajep ge menetulsife?" 10 Yesus ga tamawolmini, "Aamei kota Yerusalem saf gemer is ge kawetenaram, aamei angtane fona aa jei disultenaram jebar ga isa dorwena. Angtane jeiserem ga is ge onsobana, jamere jena jei aa jep kawetenaram jebo. 11 Angtane jena jam jemanserem aamei ga is ge bala jebar jam nasowefe. Ane angtane jena jam jemanserem jeiserem ga is ge bala, ’Guru ims tenebaf enggame, mwona ga fwersa tumilgala Paskamana Ajeba tombaabife, angtane Amna Ai As jei ne tikwebaatinennerem jebar?’ 12 Jepga angtane jeiserem jei mwona unggwandusa bolap jeiserem ga is destaipmini ibe. Tikar, meja, ane kursi mes menetababisini mwona jeiserem jebe. Tumilgala Paskamana jep ga is ge menetulsini." 13 Angtane naura jeiserem jei ga aa ge sofwa, ane jep ga aa ge damtabili seyafter jes gemerserem Yesus aa gemer gitminirim. Ane jei tumilgala Paskamana jep ga aa ge menetulsini. 14 Jema tumilgala Paskamana jem tumiliserem ga aane fitya, ane Yesus ane angtane Jei aa jei ne tikwebaatinennerem ga aa ge nwinbetena jam dwenfe. 15 Yesus Jei angtane jeiserem ga balbabili, "Ini Amna Ase unggwan-girsusfer folbana Ai tumilgala Paskamana ibar nejama tombaabife, nalef angtane As jam ne tamtamtayan jamer futu. 16 Ai ims towas-towastababili, Ai tumilgala masar Paskamana gamjon Ajam tumilyen, jengga masar Paskana aaiserem jem igi jam aa jep tabanswenaram, jes jepserem nunu gase fortya, nunu Uwa Sanbagiri Jei aa jep gwenaram anggwabura seyafter gemerserem jem Sanbakfe. Ane jes jepserem Ai gamjon ibar ga nesa twensa." 17 Jepga Yesus mangko fo angguruboro ga goltena, ane Uwa Sanbagiri ga bala, "Ase samfer gulbana." Ane Yesus angtane Jei aa jei ne tikwebaatinennerem ga balbabili, "Mangko aaiserem sa teba! Fo angguru aaiserem gasa telbi, daamfen-daamfennem. 18 Ai ims towas-towastababili, Ai gamjon fo angguru Ajam telbiyen, nalefe nunu Uwa Sanbagiri Jei Sanbakfe jem gwefe anggwabura seyafter gemerserem jam foroyan. Ane jes jepserem Ai gamjon ga As telbisi." 19 Jepga Yesus rotini ga goltena, ane Uwa Sanbagiri ga bala, "Ase samfer gulbana rotini aaiserem jem temawer." Ane Jei rotini jeiserem ga bitbababisini, ane angtane Jei aa jei ne tikwebaatinennerem jep ga kitulmini. Jei ga balbabili, "Rotini aaiserem jeba tifini seyafter Amnaiserem Ai isa Ajes kitulminirim ibe. Aamei aaiserem ga jam isa eyebili enggalfe aamei Ai As igama sarbastaabonfe." 20 Mangko fo angguruboro jegme gemer, jei jame aa galap ge tabanswebilirim tumilgala nafis-nafsiserem jam tombaabilibe, Yesus mangko jeiserem ga goltena, ane Jei Uwa Sanbagiri ga bala, "Ase samfer gulbana." Ane ga balbabili, "Mangko fo angguruboro aaiserem jeba aawisi Amnaiserem As jei tenbenteyalaiserem Amniwer im temawer. Ane jega jem temawer Uwa Sanbagiri Jei taterisi ibirmiserem ga is bilipmini enggame, Jei etam-etama imnaiserem ga is wirtabaipmini, ane Jei ga aamei ga is eyebaabili enggame angtane Jelemanfe." 21 Yesus Jei gamjon ga balbabili, "Sa sarsi! Angtane Ai As jei geraiserem ginanggwaminibe, jei Abar seyafter ge nwini mejana aaiserem jebe. 22 Bunarsus, Ai Tane Angtanemana, Ai Ase tere Uwa Sanbagiri aa gemer gulum. Jengga galap kapka unggwandusa se etamwefa angtane Ai As jei geraram ginanggwaminibe!" 23 Jepga jei jena ga aane tenaaminenne, kapka jeiserem ga nane se eyebili. 24 Angtane Yesus aa jei ne tikwebaatinennerem jei jen jena ga aam temawer ge doksobana, jei nans ne balfa sanbagirsusfe gam nwinf jem tarnabe. 25 Yesus ga balbabili, "Raja-raja jeiserem jei negeri seyafter gemerserem ogiri aaiserem jebe, jei baabeta unggwanfer jei gane damtabili angtane seyafter gemerserem negeri jelemanaiserem jep aa jei ge nwinbenerem jem sagabe, ane jei uskamer gam eyeipmini angtane jelemanaiserem jebe. Raja-raja jei safe jes gamserem gam gane eyebili, ini rajamana unggwan-girfer enggam gangge folbamini angtane jelemanaiserem enggam ne balbabif, ’Raja-raja jeiserem jei waakena gane eyebili. Jei nei nes jeber-jeber ne batobaabuwena.’ 26 Jengga aamei jes gamserem game ijama gweyan. Jengga enggam isa gwena, angtane sanbagirsusu im tarnabe, jei gase gwena enggame angtane bastowaisusu galserem. Ane angtane sanbakfe aa jei nwinirim, jei awelna jam se gwena angtane awelna nafsimana aa jei gweyibenerem jei galserem. 27 Angtane sanbaka ga nansa, angtane aa jei gam nwinirim mejanabe jam twenfe, afa angtane tumilgala aa jei gam gwirinyelerem angtane jeiserem jebe? Bunar-bunarsus, angtane aa jei gam nwinirim mejanabe, jei sanbaksusu angtane tumilgala aa jei gam gwirnirim jemniwer. Jengga Ai As gwena im nenennabe, angtane awelna nafsimana aa jei gam gweyibenerem jei galserem. 28 Ai kabwaktala gwanan jam Agalap domolantam, aamei jeber-jeber kanaufer Abaner neya fibilint. 29 Uwa Amna Jei baabeta As mes gulbana Abe, jega Ai gam As nwini Sanbakfe angtane Uwamanaiserem jem sagabe. Jes galserem, Ai baabeta jeiserem Ai ip isAs kitulmini enggalfe, 30 aamei Abar negama twenf, nunu Ai Ajep gwesaram Sanbakfe anggwabura seyafter gemerserem. Ane aamei isa nontesa kursini rajamanaiserem jebe enggalfe, aamei igama nwinf tewe Israelmana dua belas jeiserem jem sanbakfe." 31 Yesus ga gutena, "Simon, Simon, aamei Ai As im sarbasi. Uwa Sanbagiri jei bawasa mes bili, bawasa jei samfer aamei seyafter gemerserem ga is unggwasbaabili kabwaktala uskambarsusfer jeme, jega enggalf angtane ga sege towaswebili angtane Ai aa jei ne tebanaram ga fwersa, ane angtane Ams tebayanaiserem ga fwersa. 32 Jengga Simon, Ai sembayanga Ames gwebana enggalfe, aamei ijam tikweyan Ai Asi jam tebalawer. Aamei Ai As waakenfer is tebana. Ane aamei etam-etamawer jam ijep warautnaram, aamei ilem afelen mesnaiserem ini jemna ga is kanautabaipmini." 33 Simon Petrus ga tamawolbana, "Tuhan, ai ames menetwesini Ims onsobaf jamere bwiyip Is kawetena, ane jamere terebo." 34 Yesus ga bala, "Petrus, Ai ims towastana, gwini aaiserem jeme nalef ayanga giriserem jam guteyan, aamei Ai ga Asis baanbaanwebana nawer-ningginfer." 35 Jepga Yesus angtane Jei aa jei ne tikwebaatinennerem ga balbabili, "Gwanan galapserem Ai ims baftabisint, ane Ai aamei isa enggam ai balbabilint, dompet, fon, ane sandal mese safnant afa ijama erbiyen. Gwanan jes galapserem aamke imsa damtabili seyafter ijesa balbabilirim?" Jei ga aane tamawolbana, "Ai seyafter amsa damtabili." 36 Yesus ga balbabili, "Jengga namwer, aamei jam isa sofwenaram, dompeta ga jam isa erbili, fon mese. Afa nombe imna fas, sya aamei fene imna ga jam isa jualtababili, jega nombeya jem gam igam armanulu! 37 Taterisi Uwa Sanbagirmanaiserem jep ga enggam baatultel Am temawer: ’Angtane enggam ga sene bala, Jei angtane kapka, angtane etam-etama aa jei gam eyebilirim jes galserem.’ (Yesaya 53:12) Ai ims balbabili, taterisi jeiserem ga Am temawer bunarfersus se etamwena. Bunarsusfer seyafter aa jes tulistababilim Am temawer Taterisi Uwa Sanbagirmanaiserem jebe, seyafter jeiserem ba jamam etamwena." 38 Angtane Yesus aa jei ne tikwebaatinennerem jei Yesus ga aane bala, "Tuhan, nombe naura aare." Yesus ga aa tamawolbaabili, "Maas, sa tikwe!" 39 Jepga Yesus kotana Yerusalem ga mirsotefala, ane ga sofsa taarentumu bosna Saitun, gwanan gemerserem ga gemer. Angtane Jei aa jei ne tikwebaatinennerem Yesus ga aane onsobana. 40 Jame aa galap ge forobilirim tampata Yesus jeber-jeber aa jep forowenaram jebe, Jei angtane Jei aa jei ne tikwebaatinennerem ga balbabili, "Aamei sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijama eyebiyen." 41 Jepga Yesus ga gwisini jemniwer, bijauwer tuna jam firtaanulu gamserem. Ane jes jepserem Yesus ga somwan dumem ga nwintena, sembayanga ga gwebabana Uwa Sanbagirfe. 42 Jei ga bala, "Uwa, afa Aamei guluye, tamtamtala uskambarsus aaiserem Amniwer se golsteya. Ai bai tamtamtala aaiserem jam gwirinfe! Jengga Aamei ipsam eyebilirim Ai Ajes bilirim, jengga Uwa, Aamei Iner Ijeter bilirim, ga jeter Is eyebili." (( 43 - 44 Ini Yesusmana uskambarsus ga jenbana, ane jega jem temawer malaikata taman waaken-giriwer ga fortya Yesusminibe enggalfe, baabeta gam gulbaf Yesusfe. Ane Jei sembayanga ga gwebana unggwanfersus gwanan gamserem jemniwer. Ane mofa Jemna ga tenbentena onabe, aawisi jam tentela galserem.)) 45 Yesus sembayanga jam aa tabantanaram, Jei ga irwena, ane ga warautna angtane Jei aa jei ne tikwebaatinennerem jemnibe. Jei ga damtabili nus ge tabana. Tifini seyafter jemna ga jam ge werenswebamini, aam temawer ini jemna unggwanfer ge jenbamini. 46 Ane Yesus ga balbabili, "Aamei ibasa taabili? Jasa irwe, sembayanga ga isa gwebana, jega aamei etam-etama kapkaiserem bawasa is jes bilipminirim ibe, etam-etama jeiserem ijama eyebiyen." 47 Yesus ga gemer nasowena, angtane unggwanfer ga aa ge forobitye. Angtane daamfenna angtane dua belas Yesus aa jei ne tikwebaatinennerem jemniwer, bosna ga Yudas, jei angtane unggwanfer jeiserem ga jei danabaabisnenne. Yudas Yesusem tarnabe ga gwina jam aalumbofe. 48 Jengga Yesus Yudas ga tenebana, "Yudas, aamei Ai Asi jewer aalumbonorom ke enggalf, Ai Tane Angtanemana aamei ijam gaarmif ginanggwafe?" 49 Angtane Yesus aa jei ne tikwebaatinennerem jei jam aa galap ne domolaram aa je etamwenaram, jei Yesus ga aane bala, "Tuhan, ai jam agma era, alem nombeyeme!" 50 Angtane daamfenna awelna imam sanbagirsususerem jem jenap aa jei gweyibenerem jei ga jep fina jem gwetmanabe. Ane angtane Yesus aa jei ne tikwebaatinennerem daamfennaiserem jemniwer jei nombeyeme imwana jemna ga targabaasini jamer te. 51 Jengga Yesus ga balbabili, "Maas, sa tikwe!" Ane Yesus Jei tafna ga tosobaaniwili angtane jeiserem jem imwanabe, ane angtane jeiserem ga waakentana. 52 Jepga Yesus angtane unggwanfer jeiserem ga balbabili, angtane imam-imam sanbakaiserem, angtane sanbak-sanbaka polisi Jena Uwa Sanbagirmana aa jei ne gaarabisnenewenaram, ane angtane sanbaka Yahudimana jes mese. Jei ga balbabili, "Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe? 53 Ai nunu jeber-jeber maga ibaner neya nwinwena Jena Uwa Sanbagirmanaiserem jebe, jengga aamei Ai jep Ase ijama tebayan. Jengga Uwa Sanbagiri Jei mes balbabili, aamei aaiserem namwer ijama eyebife. Baabeta gwinibere aa jemanem folbanaram, baabeta jemnaiserem aamei aaiserem ga ijem olema eyebili." 54 Angtane Yesus ga aane tebana, ane ga aane aftafala jena imam sanbagirsususerem jebe. Petrus jei Yesus amnuwer onsobananna, jei bijautowaifer wofna. 55 Angtane tokwana ga aane surna ja syat nenennabe, jei jep ga aa ge nwinbene tokwa gwetmanabe. Jes jepserem Petrus jei jebar seyafter ge nwinbene. 56 Yafonsiwiri awelna angtanefe aa jei gweyibenerem jei Petrus aa jei nwinirim tokwa nafabe ga damtana. Jei Petrus ga damdamtaasini, ane angtane ga balbabili, "Angtane aaiserem jeime Yesusfar aa jei ge wofobilirim." 57 Jengga Petrus jei ga jam baanbaanwena. Jei yafonsiwiri jeiserem enggam ga bili, "Ai teisyena Angtane jeiserem." 58 Abakferyan angtane nafsi jei Petrus ga damtana, ane ga bala, "Aamei mese aameiba Yesusem afelnam." Petrus ga tamawolbana, "Wowo, ai Jem afelenyan!" 59 Gamjon ga jema daamfenna, angtane nafsi jei jon ititmer ga bala, "Angtane aaiserem jei Galileyamana Yesus gemerserem. Ga jem temawer ai bunarsusferam gunu, jeiba angtane daamfenna Yesus aa jei ne tikwebaatinirim, ba jesam." 60 Petrus ga tamawolbana, "Wowo, ai ajam towasweyan aamei ibas bili." Jes jeberserem jei gemer nasowena, ayanga giriserem ga gutena. 61 Tuhan Yesus ga irfwena, ane Petrus nwenap ga damtana. Jepga Petrus taterisi Yesus gwanan aa jes nasibenentem jebe, jei taterisi jeiserem ga saribaastabona enggame, "Gwini aaiserem jeme nalef ayanga giriserem jam guteyan, aamei Ai ga Asis baanbaanwebana nawer-ningginfer." 62 Ane Petrus ga totintye, ane uskambarsus ga syena. 63 Ginanggwana Yesus aa jei ne gerebaasnennerem jei Yesus ga aane safsaftana, ane ga aane bisobana enggame, 64 jei nwena Yesusmana fenbitem ne faarebana jamer mat, ane ga aane safsaftana, ane enggam ga aane bala, "Sya angtane Aamei Is jei ne safsaftanaram, Aamei angtane jeiserem jem bosen se balbaipmite!" 65 Ane jei ula kapka nenes-nensaiserem Yesus jem ga aane imei-imeitana. 66 Ona jam nafwena, Safna Angtane Yahudimana Sanbak-sanbaka seyafter gemerserem jei ga aa ge betwebili. Angtane jeiserem jeiba angtane sanbaka Yahudimana, angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram. Yesus ga aane aftafala mwona jelemanaiserem jebe, jei aa jep ge betwebuwefaram. 67 Jei Yesus ga aane bala, "Ai as jase towastababi, Aamke Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif?" Yesus ga tamawolbaabili, "Ai safe aamei isa jam As balbabili, aamei Ai Ase ijama tebayan. 68 Ane afa Ai aamei isa jam As tenebaabili, aamei Ase ijama tamawolbayan. 69 Jengga abakefyan, Ai Tane Angtanemana, Ai Uwa Sanbagirem taasfolawer Ase nwini, Uwa Sanbagiri Jei baabetsusu." 70 Angtane jeiserem seyafter ga aane tenebana, "Afa ga gam, Aamke Tane Uwa Sanbagirmana?" Yesus ga tamawolbaabili, "Aamei jes gamserem bunarsusfer ima nasouna. Aiba Jesam, iner imsama gutena." 71 Jepga jener ga aane nasbili, "Nei nener nemsa saribene taterisi Jelemana. Jei enggam gunu Jei Tane Uwa Sanbagirmana. Bunarsus Jei Uwa Sanbagiri gam imei-imeitana! Nei angtane nensa gamjon nejama sarbayan."

23

1 Jepga Safna Angtane Yahudimana Sanbak-sanbaka seyafter gemerserem ga aa ge irwebili, ane Yesus Gubernur Pilatusminip ga aane aftafala enggalfe jei Yesus gam teneba-tenebawef. 2 Jes jepserem jei ga aane tawawulbono taterisi kapkaiserem jam ne nasbabife Yesusem temawer. Jei ga aa ge gubili enggame, "Angtane aaiserem Jei angtane Yahudimana kabwakfer Jeyam towas-towastababiwena, jamere jei taterisi pemerintamana baife ga aane gweyipmini. Jei enggam gunu, angtane Yahudimana jei safnant Kaisarfe pajak doi jam ne armanulyon. Ane Jei enggam gunu Jeiba Angtane Uwa Sanbagiri bunarsusfer aa Jes balam Jam baftanafe, Jeiba Rajasam. Jei jes gamserem aa gemer gunurum, jeba kapkam." 3 Pilatus Jei Yesus ga tenebana, "Aamke anggwabura Yahudimanaiserem jem Raja?" Yesus ga tamawolbana, "Iner imsam gutena." 4 Jepga Pilatus ga balbabili angtane imam-imam sanbakaiserem ane angtane unggwanfer jep aaiserem jes mese, "Ai ajam towasweyan Angtane aaiserem kapka daamfennaiserem afa fas Jam eyebiyen jega ai jeme gam as tamtamtana." 5 Jengga seyafter gamjon ga aa ge gubili uskambar, "Jei angtane seyafter aa jei ge nwinbenerem ona Yudeya seyafter gemerserem, Jei kabwakfer ga jes towas-towastababiwena, jamere jei taterisi pemerintamana baife ga aane gweyipmini. Jei ona Galileyawer towaiwulu jamer aafo, kota Yerusalem je." 6 Gubernur Pilatus taterisi jeiserem jame aa galap sarbilirim, jei angtane Yesus aa jei ne kakalswebanaram ga tenebaabili, "Angtane aaiserem Jei ke angtane Galileyamana?" 7 Ga aane tamawolbana, "Bunar, Jeiba Galileyamanam." Pilatus Yesus ga jem temawer baftana Raja Herodesminibe, aam temawer jes jepserem Herodes sanbakef nwin ona Galileya je. Jes jepserem Herodes jeiba jebam nwini kota Yerusalem je. 8 Herodes bwembwema Yesus aa jes eyebaabuwenantam jem temawer fwater mesam sarbaibaasiwenant. Jega jem temawer safe fwater jei Yesus jam damtaf. Jei enggam gunu jelem inibe, "Bwembwema Yesus aa jes eyebilirim ajam domolf." Jega jem temawer, nunu jeiserem Herodes Yesus jame aa galap damtanaram, jemna ini saaser-saaserfer ga folbana. 9 Jei Yesus uskambar tenebawena. Jengga Yesus Jei taterisi Herodesmana afa fas Jam tamawolbiyen. 10 Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei seyafter jep ge fibili, jei Herodes ga aane bala ini kakalmer, "Yesus Jei angtane kabwakfer ga Jei towas-towastababiwena, jamere jei taterisi pemerintamana baife ga aane gweyipmini." 11 Jepga Herodes mese ginanggwa jelemanaiserem jei Yesus ga aane bisobana, ga aane imei-imeitana. Ane jei fene waaken-waakensusu ga aane doksobaaniwili enggalfe jei akar-akarem gane balf Jeiba Rajasam, ane jem temawer gamjon ga sene bisobana. Ane Herodes jei Yesus ga warautana Pilatusminibe. 12 Herodeso Pilatus jei jena gwanan jam ge nasmiwena, jengga nunu jes jepserem, jei jep ga aa ge waakenswena. 13 Gubernur Pilatus angtane ga jenbebili, angtane imam-imam sanbakaiserem, ane angtane Yahudimana sanbakfe aa jei ge nwinbenerem, ane angtane unggwanfer gemerserem. 14 Ane jei angtane seyafter jeiserem ga balbabili, "Aamei Yesus imsa aftafaltya amnibe. Aamei enggam ima gunu, Jei angtane kabwakfer towas-towastababiwena, jamere angtane jeiserem jei taterisi pemerintamana jam ne onsobaabiyen. Ai Yesus ames teneba-tenebawena im nwenabe, ane ai kapka daamfenna Jemnibe afa fas ajam domolbayan aamei ijesa bilibenerem enggame, Jei kapka gam eyebili. 15 Raja Herodes mese jei Yesus jame aa galap teneba-tenebawenaram, jei kapkaiserem afa jam domolbayan Yesusminibe. Jega jem temawer jei Yesus ga warautatna nemnibe. Bunar-bunarsus Yesus Jei kapkaiserem fas afa Jam eyebiyen nei Jei jem temawer ga nesa munbono. 16 Ga jem temawer, ai ginanggwana amnaiserem ga as balbabili jei Yesus ga jafner sene safsaftana, jepga ai Yesus as aftannu." (( 17 Masara Paska jeber-jeber jam gam falaram, Pilatus jei angtane daamfenna ga jem gam aftannu, angtane bwiyip aa jei gam nwinirim.)) 18 - 19 (Angtane bosna Barabas jei mes gaataantena bwiyibe, aam temawer jeiba angtane daamfenna angtane unggwanfer jemniwer, kapkaiserem aa jei ne eyebilirim kotana jeiserem jebe. Angtane unggwanfer jeiserem taterisi unggwanfer ga aane nasipminenne enggalfe angtane kotana jepmanaiserem jei taterisi pemerintamana baife gam ne gweyipmife. Ane jei aa galap ge erabanantam, jei angtane mes ne munbono.) Pilatus jei jame aa galap gunurum Yesus Jam aftannufe, angtane unggwanfer jeiserem seyafter ga aa ge tetenbili taterisi daamfenmer, "Yesus Jei jasa munbo! Barabas ga ap is aftamunnu!" 20 Jengga Pilatus jei Yesus jewer aftannuf. Jega jem temawer jei gamjon ga nasowena angtane unggwanfer jeiserem jemnibe. 21 Jengga jei uskambar ge tetenbili, "Ti salibip sa daktanswe jamer futu! Ti salibip sa daktanswe!" 22 Pilatus nawer-ningginfer ga jam tenebaabili enggame, "Jeje bafa? Angtane aaiserem Jei kapka fwersa gam eyebili? Ai kapka daamfenna afa fas ajam domolbayan Jei aa jes eyebilirim nei Jei jem temawer ga nesa munbono. Jega jem temawer, ai ginanggwana amnaiserem ga as balbabili jei Yesus ga jafner sene safsaftana, jepga as aftannu." 23 Jengga jei gamjon uskambarsus ga aa ge tetenbili, taterisi uskambarsus jeme, "Yesus ti salibip sa daktanswe jamer futu!" Ane umwef aa jes ge tetenbilirim, tetene jeiserem igibere. 24 Ane Pilatus ga gunu Yesus Jam terfe ti salibibe, jei aa gemer ge gubilirim. 25 Ane Pilatus jei aa jes ne balaram jam aftannufe, jei angtane jeiserem ga aftannu. Angtane jeiserem jei bwiyip nwini, aam temawer jei angtane unggwanfer kotana jeiserem jep aa jei ge nwinbenerem taterisi aa jewer nasipminennerem, jamere angtane jei taterisi pemerintamana baife ga aane gweyipmini, ane angtane mes ne munbono. Ane Pilatus Yesus ga gaarmini jebe, jei gam ne eyebife jei jener jena aa gam ge gubilirim. 26 Ginanggwana Yesus safe aa gemer ne aftafalaram Jam munbofe, jei ga aa ge dorwebili angtane kota Kirenemana jebar, bosna jemna ga Simon. Jei onnawer fortya, ane jei safe kotanabe aa gemer kautenaram, ginanggwana Simon ga aane tebana. Ane jei salibi Yesusmanaiserem Simonem malmap gane tosobaaniwili. Ane jei Simon ga aane tetgenbana salibi Yesusmana jam sutunbofe Yesusem amnuwer. 27 Angtane unggwanfer Yerusalemwer jei Yesus ne onsobananna, wi mese ga gemer ne onsobananna, jei Yesus ne syebananna. 28 Yesus ga irfwena, ane wini jeiserem ga balbabili, "Wini kota Yerusalem je aa jei ge nwinbenerem, aamei Ai As ijama syebayan! Jengga aamei in inater isa syemuwena, ane tane imnaiserem ga jes isa syebabuwena, 29 aam temawer nunu se fortya kabwaktala unggwandusaiserem gase etamwesa. Nunu jes jepserem angtane ga sege gubisi, ’Wini tane gol mata, wini tane gereyanaiserem, ane wini muma tanef gerbayanaiserem, wini jeiserem ini jemna saaser-saasermer sege folbamini, aam temawer jei tane jemna fas kapka jeiserem jam ne domolyan. Jengga jei kapka jener sene domolsa.’ 30 Ane angtanna ga sege gubisi, ’Ai kabwaktala aaiserem bai ajama domolfe! Jengga waakenfer ga enggam, afa ginirdusa jese fortyaram enggalfe taarena gam gintef nem sagap gase jentya, ane otumu ga nes matabili, jega nei ga nesa tere.’ " 31 Ane Yesus gamjon ga balbabili, "Ai safe kapkaiserem Ajam eyebiyen, jengga angtane kabwaksususerem jei Ap ne eyeibene. Afa ga gam jes gamserem, gam jega angtane kapkaiserem aa jei ne eyebuwenaram jep ga bas sene eyeipmisi?" 32 Anggwa nawana nafsi, jei nawersamer kakal nauna, jei Yesusfaner ne aftabifele jam tamtamtababif jamer futu. 33 Jei aa galap ge forobilirim taman bosna "Dwak Otam" jebe, jei Yesus jep ga aane daktanswena ti salibibe. Anggwa kakala nauraiserem ga Jebar ne daktabaabunswena ti salibibe, afelna Jem taasfolawer, ane afelna ga Jem gwejawer. 34 Yesus sembayanga ga gwebana, "Uwa, etam-etama jemna se wirtabaipmi! Jei jam ge towaswebiyen jei aa jes ne eyebilirim." Ane ginanggwana jei olgulup ga naawena tuna bastantouyaserem jeme, bosna undian, fene Yesusmana ga jem ne syenulf. 35 Angtane jep aa jei ge fibilirim, ga jam ne gerabaabili. Ane angtane Yahudimana sanbakfe aa jei ge nwinbenerem, jei Yesus ga aane bisobana. Jei ini kabwakmer Yesusem temawer ga aane bala, "Jei angtane nensa gam waakentaasini. Afa Jeiba Kristuse, Angtane Uwa Sanbagiri bunarsus aa jes destabalam angtane Jei waakentababisife, Jei Jena gase waakentaasini!" 36 Ginanggwa mese ga aa ge jalbili, jei Yesus enggam ga aane bisobana, Jei fo angguru syelabara jafner ga aane sabana. 37 Ane ginanggwana jeiserem jei ga aane bala, "Afa Aamei Raja angtane Yahudimanaye, In Inater Is waakentaasini!" 38 Yesusem salib sagap jep ga tulisan ga aane baatulwili, tulisana jeiserem jep ga enggam ne tulistababili, |scANGTANE AAISEREM JEIBA |scRAJA ANGGWABURA YAHUDIMANAM. 39 Ane kakal anggwana daamfennaiserem jep aa jes ne salibtenerem, jei Yesus enggam ge imei-imeitana, enggam ga aa nasowena, "Aamke Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif? Afa gameye, In Ina Im waakentaasi, ane ai mese ai as Is waakensosini!" 40 Jengga kakal anggwana afelnaiserem, jei afelna ga uftana. Jei ga enggam bala, "Aamke Uwa Sanbagiri ke ijam erebeyen? Nei nawer-ningginsamer nes mesane tamtamtababili jamer amkom nefoma tere. 41 Tamtamtala nemna nei nejesne domolaram, tamtamtala aaiserem ga aam temawer nei etam-etama kapkaiserem nei jes ne eyebuwenaram. Jengga Angtane aaiserem Jei kapkaiserem fas Jam eyebiyen." 42 Jepga jei Yesus ga bala, "Yesus, ai as jam Is sarbastaabona, ane waakena Imnaiserem ap ga as Is gulbana, Aamei gamjon Ijep fortyaram anggwabura seyafter gemerserem jem Sanbakf Ijep gwenaram." 43 Yesus ga tamawolbana, "Ai bunarsus ims towastana, nunu namwer aaiserem aamei Abar nes ne nwini tamna abakfer gwelaiserem jebe." 44 Engbar jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef. 45 Ane kain unggwan-giri aa je taannurum Uwa Sanbagirem Jenabe ga aane bitnetini nenennaber. 46 Yesus uskambar ga gwarna, "Uwa, mafnana Amna ga Is Ajam gulbana." Jes gamserem gam Jama gutenaram, Jei ga tere. 47 Angtane sanbaka 100 ginanggwamana jep jeiserem, jei seyafter jep aa je etamwenaram ga aa domola, ane Uwa Sanbagiri ga pujitene. Ane ga bala, "Bunarsus Angtane aaiserem Jeiba Angtane waaken-waakensusum. Jei kapkaiserem Jam eyebiyen." 48 Angtane seyafter jep aa jei ge betwebilirim jam gerebafe, jei aa je etamwenaram ga aane domola. Ane jei ga aa ge waraubili jelem jenabe, ini ga aa ge jenbamini. 49 Ane Yesusem afelen mesna, ane wi mese Jei aa jei ne tikwebaatinennerem ona Galileyaminiwer, jei ga aa ge fibili bijauwer, seyafter ga aane gerebaabili. 50 - 51 Angtane aasaje bosna Yusuf, jei tamna Arimateya tane, ona Yudeya je. Jei angtane waakensusu, ane jei Uwa Sanbagiri aa jes gam bilirim, ga jetefener gam eyebili. Jei nunu Uwa Sanbagiri jem gwelaiserem anggwabura seyafter gemerserem jem Sanbakfe ga jes fibili. Yusuf safe angtane daamfenna Safna Angtane Yahudimana Sanbak-sanbaka Seyafter Gemerserem jemniwer, jei jam guyon jei aa gam ge gubilirim, ane jei aa jes ne eyeibenerem Yesusfe. 52 Jei Gubernur Pilatusminip ga sofwa, ane Pilatus ga bala, "Yesusem futunu ap se gerba!" 53 Jepga Yesusem futunu ga tinswena ti salibiwer, ga taferna kain waakensusu jeme. Ane jei Yesusem futunu ga gaarantena, tonmwa bitisi ibirmiserem jebe. Tonmwa bitisi jeiserem angtane futunu nafsi afa jam ne gaataanteyan jebe. 54 Nunu jeiserem ga nunu Jumat, ane nunu Sabat, nunu angtane Yahudimana aa jem ge nwinbisiwefaram ga babitsim fom tawaiwela. 55 Wini Yesusfar aa jei ge jalbilirim ona Galileyaminiwer, wini jeiserem jei Yusuf ga aane onsobana, ane tonmwa bitisi jeiserem ga aane domola. Ane ga Yesusem futunu jam ne damtaf angtane fomfom ne gaarantena. 56 Jepga gamjon ga aa ge waraubili jelem jenabe, ane ti alna yo minyaka ninsini waakenaiserem ga aane menetababisini enggalfe, Yesusem futunu gam gwebaf. Nunu Sabateme jei awelna jam ne gwebiyen, jes gemerserem Hukumu Nabi Musamana jep aa gemer tulistaabilim.

24

1 Gwinibenersus nunu Minggunu jeiserem jeme, wini jeiserem ga aa ge sofobisi Yesusem tonmwa bitis tarnabe. Jei ti alna ninsini waakenaiserem jei aa jes ne menetababisinirim ga aane erbifele. 2 Jei jame aa galap ge forobisirim tonmwa bitis tarnabe, jei tuna unggwan-girsususerem tonmwa bitis pintuf aaiserem ga aane damtasa, tuna unggwan-giri pintuf jeiserem mes ne irfifitaansowena tonmwa bitis mwonawer. 3 Jei tonmwa bitis mwonap ga aa ge kabwitena, jengga jei Tuhan Yesusem futunu fas jep jam ne damtainonyan. 4 Jei jeber ga aa ge fibiton, ane jelem iniber ga ge gubili, "Aa jei bai etamwena?", jei aafer-aafer ga aa ge anggabili, angtane naura aa ge fyatetya jem gwetmanabe, fene ga sinsinsusu iris nafa galserem ga gala gangge kabwabili. 5 Wini jeiserem jei uskambar ga aa ge erebili, ane duka ga aane katabaantena. Jengga angtane naura jeiserem jei ga aa ge balbabili, "Jeje bafa aamei Angtane aa Jei gwenaram ga ima terelbene, tampata angtane futunu jep gaataantelaiserem jebe? 6 Yesus Jei aaf fas. Jei mes irwena terewer. Sa sarbistaabon Jei is mesam nasipminint ibe, gwanan Jei ibar igalaba nwinintim ona Galileya je. 7 Gwanan jes galapserem Yesus Jei aamei is enggam balbabilint, ’Ai, Tane Angtanemana, Ai Asene gerfa angtane etam-etamabaraiserem jemnibe, ane jei Ai ga Asene munbofo ti salibibe jamer futu. Ane nunu nawer-ningnabaraiserem Ai gamjon ga jem As irwena terewer.’ " 8 Ane jes jepserem jei taterisi Yesus aa jes nasbisintim, taterisi jeiserem ga aane sarbistaabona. 9 Ane jei jame aa ge waraubitnerem tonmwa bitisiwer, jei ga aane nasipmini seyafter jeiserem sebelas rasulu jei, ane angtane aa jei ne tikwebaatinennerem afweraiserem seyafter gemerserem. 10 Wini jeiserem jem bose bosna ga aas: Maria Magdalena, ane Yohana, ane Maria wini Yakobusmana. Wini nawer-ningna jeiserem, ane wini nenes-nenes mesnaiserem jebaner, jei taterisi aa jei etamwenaram ga aane towas-towastababili angtane jeiserem Yesus aa jes baftabilirim jebe. 11 Jengga Rasulu jeiserem jei ga enggam ge gubili taterisi jeiserem ol kabwak. Ane wini taterisi aa jes ne nasbabilirim, jei taterisi jeiserem fas jam ne tebabiyen. 12 Jengga Petrus ga nunggiri tatarmer tonmwa bitisi jeiserem jewer. Jame aa galap fornaram, jei ga aanwesmer ga anggasnenne tonmwa bitis mwonabe. Ane jei kain tefner ga aa damtabili, kaina Yesusem futunu aa jem ne tafresinintim. Ane jei ga bitbitwena, ane ga sofwa, jei jelem iniber ga tenna aa je etamwenaram jem temawer. 13 Nunu Minggunu jes jemerserem, angtane nawan Yesus aa jei ne tikwebaatinennerem jeme gemer ge sofna, tamna aa jei nulnaram bijauwer ga engbar sebelas kilometer kota Yerusalemminiwer. Tamna jeiserem bosna ga Emaus. 14 Ane angtane nawan jeiserem jei taterisi aa je etamwenaram ga jes ge nasbinenne. 15 Ane jei ga gemer ge nasowena, ane jei jen jena ga aa ge taanaaminenne, Yesus Jenfentowai ga fortya jem gwetmanabe, ane ga aa ge sofobili jebaner. 16 Angtane nawan jeiserem ga aa ge damtana Jei, jengga Uwa Sanbagiri Jei ga gwemini jega enggalf jei jam ge towasweyan enggame, aaiserem jeiba Yesusam. 17 Yesus ga tenaamini jei, "Aamei im ge wofnaram nelebe, ibas ge nasbinenne?" Ane jei ga aa ge tikwena, ini jemna ga jam ge janipmini, ane mirmase ga ge kabwaksweipmini seyafter aa je etamwenaram jem temawer. 18 Angtane afelna bosna ga Kleyopas jei ga tamawolbana, "Angtane seyafter gemerserem kota Yerusalem je aa jei ge nwinbenerem, jei seyafter mes ge towaswebili aa je etamwenaram nunu nawer-ningna aaiserem jeme. Ga fomfoma Aamei Infentowai ke gemerje Ijam towasweyan?" 19 Yesus ga tenaamini, "Bai etamwena?" Ga aa ge tamawolbana, "Aa je etamwenaram Yesusminibe, Angtane Nasaretmanaiserem. Jeiba Nabisam, ane Jei awelna baabetmer gam gwebili, ane Jei baabetmer gam nasouna. Ane seyafter jeiserem ga jem gwerauwulu enggame, Uwa Sanbagirmana ini saaser-saaserfer folbana Jebar. Ane angtane seyafter jeime, ini saaser-saaserfer gangge folbamini Jebar. 20 Angtane imam-imam sanbakaiserem, ane angtane amnaiserem sanbakfe aa jei ge nwinbenerem, jei Yesus mes ne gera enggalfe jei Yesus gane balf enggame Yesus gam tamtamtaf jamer futu. Ane jei Yesus mes ne munbono ti salibibe. 21 Ai gwanan safe enggam aya gunu, Yesus Jei angtane Israelmana gam aftabunnuf ginanggwaminiwer, jengga nunu nawer-ningnabaraiserem mes ayintyent seyafter jeiserem aa jem ge etamwebilintim. 22 Ane wini afweraiserem am anggwabor mesnaiserem jei taterisi ga ai as jei ne towasulmini, ane ai ga aya bitbitwena. Ai ga aas aya bitbitwebisi: Wini jeiserem gwinibenersus ge sofobisi tonmwa bitis Yesusmana jem tarnabe, 23 jengga jei Yesusem futunu fas jam ne damtayan. Ane jei ga aa ge waraubili, ai ga as jei ne towastababili enggame, ’Ai malaikata naura ajeba domsona. Ane jei ga ai as enggam ge balbabili, Yesus Jei mes nwinsanswena.’ 24 Ane am afelen mesna afweraiserem, jei mes ge sofobili tonmwa bitis Yesusmana jeiserem jebe. Jengga tonmwa bitis tetens ne domola, jei Yesusem futunu jam ne damtayan. Ane jei ga aa ge gubili enggame, ’Wini jeiserem ba bunaram ge gubili enggame, Yesusem futunu tonmwa bitisibe fas.’ " 25 Ane Yesus ga angtane naura jeiserem ga gitmini, "Aamei angtane teisyena. Aamei taterisi seyafter nabi aa jes ne nasbinennelem, aamei taterisi jeiserem kwaalaamitmer igama taabili. 26 Bunarsus, Angtane Uwa Sanbagiri aa jes baftanaram angtanes waakentababisife, Jei gwanan tamtamtala uskambar ga Jei se domola, jepga gase nwini baabetabarsusfer Uwa Sanbagirfar taman waaken-giribe." 27 Ane Yesus Taterisi Uwa Sanbagirmana gas towas-towasulmini taterisi Jelem temawer aaiserem, Jam tawawuluwer ga taterisi Nabi Musamanaiserem ga jewer, ane taterisi nabi seyafter gemerserem aa jes ne tulistababilim jes mese ga towasulmini. 28 Jei ga aa ge sofobili jamer aa ge gwetmanswebili tamna jame aa jes ge gitminirim jep forofe, tamna Emaus jeiserem. Ane Yesus ga angtane nawan jeiserem saf jam mirsotefalf tamna jeiserem jebe, Jei ga safe jamer ayenif. 29 Jengga jei unggwanfer ga aa ge bala, "Aamei aaferma nwin abaner, aam temawer ona amkom fom gigitswela." Ane Yesus ga aa ge sofobili seyafter tamna jeiserem jebe enggalfe Jei jebar gam ge nwinbef. 30 Jei jame aa galap nwintenaram jebaner jam dwenfe, Jei rotini ga goltena, ane Uwa Sanbagiri ga bala, "Ase samfer gulbana." Ane Jei rotini jeiserem ga bitabaabisini, ane ga tetmini jebe. 31 Ane jes jepserem Uwa Sanbagiri Jei ga gwemini, jega enggalf jei gam ge towaswef enggame aaiserem Jeiba Yesusam. Jengga jes jeberserem Yesus ga asona, jam ge damtayan Jei. 32 Jei jen jena ga aa ge gitmini, "Jei maga nelebe nei neJebara nasounanna, ayata Taterisi Uwa Sanbagirmana nes mes towasulmini nebe, gwanan jes jepserem ini nemna nese saaser-saaserfersus nulamini!" 33 Ane jes jepserem jei ga aa ge irwena, ane ga aa ge warauwa kota Yerusalemwer. Jei angtane sebelas Yesus aa jei ne tikwebaatinennerem jep ga aa ge damtabili. Jei jam ge betwebili jelem afelen mesnaiserem jebar. 34 Ane angtane jep aa jei ge betwebilirim jei angtane naura jeiserem ga aane gitmini, "Bunarsus, Tuhan Yesus Jei gamjon mes irwena terewer! Jei Jena mes gweretana Simonminibe!" 35 Ane angtane nawan jeiserem jei taterisi seyafter nelep aa je etamwenantam, ga aa ge nasipmini jebe. Ane jei ga enggam ge nasipmini, "Yesus rotini aa galap bitabilirim, jes jepserem ai ga ai ge towaswena enggame Angtane jeiserem Jeiba Yesusam." 36 Ane angtane naura jeiserem jei taterisi ga gemer ge nasbili, aafer-aafer Yesus Jena ga fyatetya jem nenennabe, ane ga balbabili jei, "Waakensusu se etamwena imnibe!" 37 Jei ga aa ge bitbitwebili, ane aa ge erebili uskambar. Jei enggam ge gubili, "Neiba ne angtane uwuserem ba nei jesma damtana!" 38 Jengga Yesus ga balbabili jei, "Jeje bafa aamei ga ima erne? Ane bagal temawer ini imna isar-isarmer ga is ge folbamini? 39 Tafna Amna gasa domsoba, ane tufa Amna aare! Ai Ana ga aare! Asa ente, ane Ai Asa damta! Angtane uwu jei nini fas, ane aalna fas. Jengga aamei Asa damta, Aiba niniberem, ane aalnabaram." 40 Yesus jes gamserem aa gam gutenaram, Jei tafna yo tufa Jemna ga aa ge saamini jebe. 41 Jes jepserem saf gemer ne bitbitwebanaram ini jemna saaser-saasera, jengga jei jam ne tebayan Yesus ba mesam irwena terewer. Ga jem temawer Yesus ga tenebaabili, "Tumilgala aaf ke fas?" 42 Ane jei Yesusfe jigal tokwanap gwelanela ga aane gulbana. 43 Yesus jigala jeiserem ga taabili, ane ga tumili jem nwenabe. 44 Yesus ga balbabili jei, "Ai gwanan ibaner seyafter negalaba nwinsintim ona Galileya je, Ai taterisi isa Amesam bilipmisint ibe, taterisi seyafter aa jei etamwebanaram Abe minggunu aaiserem jeme. Ai aamei isa enggam Ai bilipmisint: taterisi seyafter aa jes ne tulistaabilim Am temawer, seyafter jeiserem gase etamwena, seyafter aa jes ne tulistaabilim buku-bukunu Nabi Musamana, ane nabi nafsiserem jes, ane bukunu Mazmurmanaiserem jep mese." 45 Ane Yesus ini jemna ga fertebaipmunnu enggalfe, Taterisi Uwa Sanbagirmana gam ne sarbif waakenfer. 46 Ane Yesus ga balbabili jei, "Ba enggamam nabi aa jes ne tulistaabilim Taterisi Uwa Sanbagirmanaiserem jebe: Mesias, Angtane Uwa Sanbagiri aa Jes baftanaram angtane jam waakentababisife, Jei tamtamtala uskambarsus se domolsa jamer futu, ane nunu nawer-ningnaiserem Jei gamjon ga jem se irwesa terewer. 47 Ane bosna Jemnaiserem jeme, taterisi etam-etama kapkaiserem jewer jam tikwela jam sene nasipmisi, ane taterisi Uwa Sanbagiri etam-etama jam wirtabaabif jes mese. Anggwabura seyafter gemerserem jei taterisi jeiserem ga sene sarbisini, ga kota Yerusalemwer sene towaiwulu. Nabi ba gamam tulistaabil. 48 Ane Ai ims towas-towastababili: aamei seyafter jeiserem nabi aa jes ne tulistaabilim imsama domola, ane taterisi jeiserem aamei jamer isa towas-towastabaipmini angtanefe. 49 Ane Ai ga Mafnana Uwa Sanbagirmana isAs baafulmunnu ibe, Uwa Amna Jei aa gemer bilipminirim. Jengga gwanan aamei aafe, kota Yerusalem je jeber isa nwini, jamere aamei baabeta isa taabili taman waaken-giriwer." 50 Ane Yesus Jei aa jei ne tikwebaatinennerem ga aftabifele kotanawer jamer tamna Betanyam gwetmanabo. Jepga Yesus tafna ga tetena, ane Uwa Sanbagiri ga bala, "Uwa, Aamei waakena Ilemanaiserem Is kitulmini angtane aaiserem jebe." 51 Ane Yesus Uwa Sanbagiri aa gemer balaram, Jei ga mirtebitefala, ane ga tauna taman waaken-giribe. 52 Jei Yesus ga aane pujitene. Ane jei ini saaser-saasersusmer jei gamjon ga aa ge waraubili kota Yerusalemwer. 53 Ane jei Jena Uwa Sanbagirmanaiserem jebe jeber-jeber ge nwinbewena, Uwa Sanbagiri ga aane pujitawena.