Yohanes

Yohanes

¹ Gwanan-gwanansus jes jepserem, nalef ogiri aaiserem jam eyebayan, Taterisi Uwa Sanbagirmana Jei maa, gwanan. Taterisi Uwa Sanbagirmana Jei Uwa Sanbagirfar ge nwin, ane Taterisi Uwa Sanbagirmana Jeiba Uwa Sanbagirsam. ² Gwanan-gwanansus jes jepserem, Jei Uwa Sanbagirfar ge nwin. ³ Uwa Sanbagiri Jei Jes baftal seyafter gam eyebaabif. Apgal jigala afa Jam orolyan. ⁴ Gwela angtanefe Jeyam golmini, ane gwela jeiserem jeiba nafa gamserem angtanefe. ⁵ Nafa jeiserem gwini ga jei nafola, ane gwini jam motolsiyen nafa jeiserem. ⁶ Uwa Sanbagiri Jei angtanes baftana. Angtane jeiserem bosna jemna ga Yohanes. ⁷ Jei enggalf fortya angtane gam towas-towastababif nafa jeiserem jem temawer, jega angtane seyafter jeter sene sarbana, ane ga sene tebana. ⁸ Yohanes gam ke nafabara. Jei enggalf fortya nafa jeiserem gam nasbif. ⁹ Nafa bunarsusfer jeiserem Jeiba Yesusam, ane Jei angtane seyafter gemerserem ini jemna ga jei naftabaipmini. Nunu Jena aa jem gwertanaram angtane ogirmanaiserem jemnibe, nunu jeiserem mes gwetmanswel. ¹⁰ Yesus Jeiba Taterisi Uwa Sanbagirmana, ane Uwa Sanbagiri Jei Yesus baftannul enggalfe ogiri gam eyebaf. Ogiri aaiserem Jam eyebalabe taban, Jei ogiri aaiserem jep ga fortyant. Jei aa galap fortyantam, angtane ogiri aaiserem jam ge towaswebiyen Angtane jeiserem Jei nansa. ¹¹ Jei Jelem tamnabam fortya, jengga anggwabura Jelemana jam ne tebayan. ¹² Jengga afwer Jei mes ne tebana, jei mes ne tebana waakenfer. Jei angtane jeiserem ga balbabili, "Aamei angtane Uwa Sanbagirmanf isa gwena." ¹³ Jei angtane Uwa Sanbagirmanf jei se naawena, aam temawer jei Uwa Sanbagirminiwer ge surubisint. Jei Uwa Sanbagirem angtanefe jam naaweyan, aam temawer jei iye yo uwa jemniwenefener ge surubisint. ¹⁴ Taterisi Uwa Sanbagirmana Jei angtanef etamwenant, ane Jei nebar neya nwini. Nei baabeta Jemna nemsa domolbana, aam temawer Tane Uwa Sanbagirmana Jeiba Jenfentowayam, ane Uwa Sanbagiri Jeiba Jem Jetam. Jei waakena Jelemanaiserem angtanef golmini, ane Jei angtanes towas-towastababili taterisi seyafter Uwa Sanbagirmana bunarsusfer jeiserem. ¹⁵ Yohanes angtane towas-towastababilint Jem temawer. Jame aa galap towas-towastababilintim, jei ga ol dagam nasowena enggame, "Gwanan ai jela aafe isa gam towas-towastababif, ane Jei jewer gase fortya. Ai enggam ai gunu, ’Jei sanbagiri, ai sanbakyan Jei galserem, aam temawer ai nalef ajam suruyon, gwanan-gwanansus Jeyam gwel.’ " ¹⁶ Jei waakena Jelemanaiserem nep nes mes golmini. Jei Jam tikweyan waakena Jelemanaiserem nep nes jam golmife. ¹⁷ Hukumu Uwa Sanbagiri aa jes bilim, Nabi Musa ga tulistababil ane asal-asala amnaiserem jep ga towas-towasulmil. Jengga Yesus Kristus enggalf fortyant nes gam ge saamisif enggame Uwa Sanbagiri Jei waakena Jelemanaiserem angtanefe mesam golmini. Ane Jeiba nes mes towas-towastababili taterisi seyafter Uwa Sanbagirmana jeiba bunaram. ¹⁸ Angtane afa fas Uwa Sanbagiri jam damtayan. Jengga Tane Jemnaiserem Jetam tarnabe ga Jei gwena, ane Jei Jeta gam gweretana angtanefe. ¹⁹ Angtane sanbaka Yahudimana kota Yerusalem je, jei angtane Jena Uwa Sanbagirmanaiserem awelna jep aa jei ne gwebilirim, ane angtane Lewimanaiserem ga aane baftabili jam ge sofobif Yohanesminibe enggalfe gam ne tenebaf, ane jei ga aane tenebana, "Aam je nansa?" Taterisi Yohanes aa jes nasipminirim jebe jeiba bunaram. ²⁰ Jei bai taterisi bunarsusfer jeiserem jam syawulsife, jengga jei jelem temawer bunarsusfer nasouna enggame, "Ai Mesiasyan, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif." ²¹ Jei jes ne tenebana, "Gam ga aamei nansa? Afa aamke Nabi Eliya, nabi fwatermana jeiserem?" Yohanes ga tamawola, "Fas, ai jeiyan." Jei gamjon ga aane tenebana, "Aamke Nabi Uwa Sanbagiri fwater aa jes balam Jei jam baftannufe?" Jei tamawola, "Fas." ²² Jei umwef ga aane tenebana, "Aam ga nansa? Ai asim tamawolbaabi, jega fwainfe jeiserem gam asa gwirinmifele angtane ai as jei ne baftabitnentem jebe. Aamei in inis bala, aam jei nansa?" ²³ Yohanes ga tamawolbaabili enggame, taterisi Nabi Yesaya fwater aa jes nasbilim: "Aiba angtanesam ajei jenjenwenaram ona dwisgiribe. Nele nornorsusfer isa eyebabana Tuhanfe!" (Yesaya 40:3) ²⁴ Angtane kota Yerusalemwer aa jes ne baftabilirim, jep jegme angtane safna Farisimana jes mese, ²⁵ jei Yohanes ga aane tenebana, "Afa aamei Kristusyon, ane Eliyayan, ane nabiyen, gam jega angtane ga ibaf baptistababili?" ²⁶ Yohanes jei ga tamawolbaabili, "Ai isa ajam baptistababili fom, jengga Angtane aa Jei finaram im nenennabe, aamei Jei ijama towaswebayan. ²⁷ Gwanan ai agam fortyaram, ane galap Angtane sanbaksusu se fortya. Jei sanbagiri, ai bastantouya, ai tofgol newa Jemna ajam fersobaasiyen." ²⁸ Seyafter aaiserem mes etamwena tamna Betanya je, Fona Yordan jimwer, Yohanes angtane ga jep baptistababili. ²⁹ Jem gwirmer ga Yohanes jei Yesus ga damtana Jama fortyaram. Ane ga balbabili, "Gasa damta, Domba Tane Uwa Sanbagirmana Jei Jam fortya! Jei etam-etama kapka angtane ogirmanaiserem Jei gam wirulmif. ³⁰ Aaba Jesam, gwanan isa ajes nasbaminintim. Ai enggam ai gununt, ’Gwanan ai jela aafe isa gam towas-towastababif, Angtane jeiserem jewer gase fortya.’ Ai enggam ai gunu, ’Jei sanbagiri, ai sanbakyan Jei galserem, aam temawer ai nalef ajam suruyon, gwanan-gwanansus Jeyam gwel.’ ³¹ Ai anfentowai ajam towasweyan Kristus Jei nansa. Jengga ai amsam fortya angtane fom jam baptistababife enggalfe, ai angtane Israelmanfe Kristus agam gweretaamif." ³² Jepga Yohanes jei bunarsusfer nasipmini enggame, "Ai Mafnana Uwa Sanbagirmana ai domola, junu senaya galserem ga gam iritya winsiwer, ane Jemnip ga nwintetya. ³³ Jes jepserem ai gemerje ajam towasweyan Jei nansa. Jengga Uwa Sanbagiri ai as Jei baftanantam angtane fom baptistababife, Jei ai ga as Jei balant, ’Aamei Mafnana Uwa Sanbagirmana is domolfa se iritya winsiwer, ane gase nwintetya Angtanem sagabe, ga Jemnip se nwintetya. Angtane aa Jemnip nwintetyaram, Angtane jeiserem angtane ga Jei se baptistababili Mafnana Uwa Sanbagirmanaiserem Jeme.’ ³⁴ Bunar ai amesam domola jeiserem, ane ai isa bunarsusfer nasipmini, aaiserem Jeiba Tane Uwa Sanbagirmanam." ³⁵ Nunu jeiserem jem gwirmer Yohanes jei gamjon tampata jeiserem jeber ga aa ge fibitetya ai angtane naura jei ajei ge tikwebaatinennerem abar. ³⁶ Yohanes aa galap damtanaram Yesus Jama ayintyerem, jei ga as gitmini enggame, "Ga sege damta, Domba Tane Uwa Sanbagirmana gas ayinyel!" ³⁷ Ai agalap ge sarbanaram Yohanes gam aa jes gitminirim, jewer ga ai ge sofwa, Yesus ga ai ge tikwebaatini. ³⁸ Yesus ga irfwena, ane ga as domsona angtane ai ajes ge onsobanaram, Jei ai ga as tenaamini, "Aamei ibas ge terelbili?" Jepga ai ge tamawolbana, "Rabi, Aamei Ifof nwini?" (Rabi jeiba gurusam.) ³⁹ Yesus ga as gitmini, "Au igme iner is ge domola." Jes jepserem jewer ga ai Jebaner ga aya sofwa, ane tampata Jei aa jep nwinirim ga ai ge domolbana. Jes galapserem ona mes dafwena jema ga nawer-naura, ane nunu jeiserem jeme ai Yesusfar seyafter aya nwini. ⁴⁰ Anderyas, Simon Petrusem osona, ane ai taterisi Yohanesmana ai ge saribene, ane ai Yesus ga ai ge tikwebaatini. ⁴¹ Jes jeberserem Anderyas tatarmer ga sofwa ayanaiserem bosna Simon ga jes terelbene, ane jei ga bala, "Ai Mesias, Angtane Uwa Sanbagiri bunarsus aa Jes balam Jam baftanafe ai Jebar amsa dorwena." (Mesias Jeiba Kristusam.) ⁴² Jepga Anderyas jei Simon ga aftawena Yesusminibe. Yesus Jei Simon ga aa damtana, ane ga bala, "Aamei Simonsam tane Yohanesmana. Ai isa enggam as bosetana Kefas." (Kefas jei ga bosna Petrusmana gemerserem Yunani oleme, igi jemna ga ton.) ⁴³ Jem gwirmer ga Yesus ga gunu enggame, "Ai ajam sofwa ona Galileyaminiwer." Jep ga aa ge dorwena Filipusfar, ane jep ga aa bala, "Au, aamei Amse tikwebaati!" ⁴⁴ Filipus jei tamna Betsaida gwanan jep nwinint. Anderyas ane Petrus jei mese jep ge nwinint. ⁴⁵ Filipus jei Natanyels terelbene, ane ga bala, "Ai Angtanefar ames ge dorwena. Nabi Musa jei mes tulistaabil Jem temawer Hukumu Nabi Musa aa jes tulistababilim jebe. Nabi nensa jes mese mes ne tulistaabil Jem temawer. Angtane jeiserem ga Yesus, angtane tamna Nasaretmana. Jei tane Yusufmana." ⁴⁶ Jengga Natanyel ga tenebana, "Ai ajam bitbitwena! Angtane waakena ke Nasaretminiwer jela?" Filipus ga tamawolbana, "Au, se damta!" ⁴⁷ Yesus Jei Natanyel jam aa galap damtanaram Jemnip aa galap jelaram, Jei Natanyelem temawer ga aa gunu, "Angtane aaiserem bunarsusfer ba angtane Israelmanam. Jemnibe taterisi ol kapkaiserem fas." ⁴⁸ Natanyel jei Yesus ga tenebana, "Aamei ase fomfom Im towaswebana?" Jepga Yesus ga aa tamawolbana, "Ai aamei isa Amesam damtana, aamei ara ti gwonap igalap nwinintim, nalefe Filipus aamei is jam jenbeyen." ⁴⁹ Jepga Natanyel ga aa bala, "Guru, Aameiba Tane Uwa Sanbagirmanam! Aameiba anggwabura Israelmanam ga Ijem Sanbakf nwini!" ⁵⁰ Yesus ga bala, "Aamei ke Ams im tebana, aam temawer Ai enggam Ajewer gutenaram Ai aamei is Ames damtana aamei ara ti gwonap igalap nwinintim? Aamei bwembwema unggwandwasusu galap is domola." ⁵¹ Jepga Yesus gamjon ga aa bala, "Ai ibe isa bunarsusferam nasipmini, aamei isa anggana winsi sene bitnewaram, ane malaikata Uwa Sanbagirmana sege tabwili, ane Am tarnap ga sege irebitye, Ai Tane Angtanemana."

¹ Nunu naura je bar, jepga masara wini jewer golfe ga aane eyebili tamna Kanaminibe, ona Galileya je. Ane Yesusem ene ga jep masara jeiserem ga jes onsobili. ² Yesus ane angtane Jei aa jei ne tikwebaatinennerem jei mese, masara jeiserem jewer mes ne jenbebili jep jam ge forobiyefe. ³ Fo angguru safe aa gemer ge barwebilirim, Yesusem eneiserem jei Yesus ga aa bala, "Jemna fo angguru mes ge barweipmil." ⁴ Jepga Yesus ga aa tamawola, "Iye aamei Ai As ijam balyan. Nunu Amna gemerje jebe As fas fibetya Ai Ana Ajep ge salaserem." ⁵ Jengga Yesusem eneiserem jei angtane masara jeiserem jep aa jei ne taayinbilirim, jei enggam ga balbabili, "Jei is gemer balbabilirim, ga gemer isa eyebili." ⁶ Jep ga fo wesyan enam unggwan-gwana tunawer aa jes ne eyebaabilirim ga jep ge fibili. Fona jeiserem anggwabura Yahudimana jam gane abwilirim osiri jelemana gamserem. Wesyana daamfennaiserem fo mwongga ga 100 liter. ⁷ Yesus ga angtane aa jei ne taayinbilirim, angtane jeiserem ga aa balbabili, "Wesyana jeiserem fona imsa bakbakul." Jei ga wesyana jeiserem fona jep ga aane bakbakulu jamer fona aa ge tenbitye. ⁸ Ane jepga Yesus jei ga aa balbabili, "Aas jepserem fona bastantowaifer imsa jesulte, ane ga isa gwirinbefele, ga isa gulbana masar dwakfe." Jepga fona jeiserem ga aane gwirinfele, ga aane gulbana jebe. ⁹ Ane masar dwak jei fona jeiserem bastantowaifer ga telbili, fona aa je etamwenaram anggurfe. Jei ga teisyena fo angguru jeiserem fwer jela, jengga angtane fona aa jei ne jesultenaram jenefener ge towaswebili. Jewer ga masar dwak jeiserem anggwana wini jam jei gulaiserem ga jenbene, ¹⁰ ane enggam ga bala, "Angtane seyafter enggam ne eyebuwena, fo angguru waakensususerem nabala ga jes gane syenulmini jam telbebife, ane syewal anggwana fo angguru jam gane telbebilirim jamer anesus, gamjon ga fo angguru jeber-jebermanaiserem ga gam syenulmini. Jengga aamei fo angguru waakensususerem ga ijam fener waakenulsini, ane namwer ga is gosortel jam telbife!" ¹¹ Bwembwema jeiserem Yesus nabal-nabalsus ga jes eyebili tamna Kana je, ona Galileyaminibe. Bwembwema jeiserem Yesus baabeta unggwandusa Jelemana ga jem gwerauwulu. Ane ai angtane Jei ajeya tikwebaatinennerem Jei ga aya tebana. ¹² Jes jepserem taban, Yesus ga Jelem eneber ga aa ge sofobili kota Kapernaumminibe, ane Jelem afelen mesna, ane ai mese angtane Jei ajeya tikwebaatinennerem. Ane ai seyafter jep aya nwinirim nunu abakefyan. ¹³ Nunu gamjon abakferyan, anggwabura Yahudimana Masara Roti Tanyana jem Tombaabif ga sene eyebili. Yesus ga jem temawer sofwa kota Yerusalemwer. ¹⁴ Jena Uwa Sanbagirmana Yerusalem je ga jep fina, ane jes jepserem Yesus angtane jep ga damtabili, angtane sapi mese domba, ane junu senai aa jei ne jualtababuwenaram enggalfe gam targabaabif, Uwa Sanbagirfe gane kitulbof. Ane angtane nafsi jep jegme aa damtabili, doini aa jei ne tukartababuwenaram. Jei jelem meja tarnap ge nwinbene. ¹⁵ Yesus agwana ga eyebili naau bormawer, ane angtane jeiserem, sapi mese ane domba jem ga surbobili Jena Uwa Sanbagirmanaiserem jewer. Jei doini angtane aa jes ne tukartababuwenaram ga tutobaipmisnenne, ane mejana jemna ga irfitabaipmini. ¹⁶ Ane angtane junu senaya aa jei ne jualtababilirim, Jei angtane jeiserem ga balbabili enggame, "Aamei aawer sa totini junu seyafter aaiserem jebaner. Uwa Amnaiserem Jena Jemna ijama irfulyon pasarfe." ¹⁷ Jepga ai angtane Jei ajeya tikwebaatinennerem, ai ga ayata Taterisi Uwa Sanbagirmana aa jep tulisulum, ai ayata jeiserem ga aya sarbistaabona enggame, "Ini Amna unggwan-girsusu Jena Imnaiserem jem temawer jei waakenfer se fina, ane Ai jem temawer Ai angtane As saf sene nasbana jamer jei Asene munbono." ¹⁸ Angtane sanbaka Yahudimana jei Yesus ga aane nasbana, jei ga aane tenebana, "Aamei seyafter Ijes eyebiliserem jem temawer Uwa Sanbagiri ke Is mes bala? Wa, afa gameye, Aamke bwembwem abe ke asIs eyeipmini, jega ai gam asa towaswena enggame Aamei Ijes eyebilirim jeba bunaram?" ¹⁹ Jepga Yesus ga aa tamawolbaabili, "Jena Uwa Sanbagirmana aaiserem jasa wirulsi, ane nunu ga nawer-ningginfenna Ai Jena aaiserem gamjon ga jem As gwitiri." ²⁰ Angtane sanbaka Yahudimana ga aane bala, "Angtane Jena aaiserem jam aa galap ne eyebilintim, tahunu unggwanfer ga empat pulu enam jamer ne eyebuwelafe! Jengga Aamei nunu ga nawer-ningginfenna ga jemfener Is eyebili?" ²¹ Jengga Jena Uwa Sanbagirmanaiserem, jei ga Yesus Jen Jena gam syesyatana. ²² Ane Yesus Jame aa galap irwaram terewer, jepga ai angtane Jei ajeya tikwebaatinennerem, ai taterisi jeiserem Yesus gwanan fwater aa jes nasbilintim, ga aya sarbistaabona. Ane jepga ai Taterisi Uwa Sanbagirmana aa jes tulistababilim, ai seyafter jeiserem ga aya taabili, ane taterisi Yesus se biltelaiserem jes mese. ²³ Yesus kota Yerusalem je aa galap nwinirim Masara Roti Tanyana jem Tombaabif galapserem, angtane unggwanfer bwembwema Yesusmana aa jes eyebaabuwenaram jes ne domola, ane Yesus ga aane tebana. ²⁴ Jengga Yesus Jen jei ga Jei Jam tebabiyen, aam temawer Jei ini angtanemana fwater towaswebaipmini. ²⁵ Angtane nensa jei Yesus angtanem temawer jam ne towastayan, aam temawer angtane jelem inibe aa jes gane bilirim, Yesus seyafter jeiserem mesam towaswebili.

¹ Angtane bosna Nikodemus jeiba anggwabura Yahudimanaiserem jem sanbakam. Jei taterisi angtane safna Farisimana gam onsobili. ² Jei Yesusminibe gwinem jela. Ane jei Yesus ga bala, "Guru, ai amesma towaswena Aamei gurusam, ane Uwa Sanbagiri Jei Aamei Is baftana. Ai jes gemerserem amsama towaswena, aam temawer afa Uwa Sanbagiri Jei angtanefar jam ge gweyana, jei bwembwema jam eyebiyen Aamei Ijes eyebilirim." ³ Yesus ga aa tamawola, "Ai enggam isa bunarsusfer bala, afa angtane gamjon jam suruyono, angtane jeiserem jei jam etamweyan angtane Uwa Sanbagiri jem gwonap nwinirim, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe." ⁴ Nikodemus jei Yesus ga tenebana, "Fomfoma angtane gamjon jam surufe afa jei mes unggwanswenaram? Bunarsus, jei jam kaweyan enem tane golabe, ane gamjon ga gam surnu!" ⁵ Yesus ga tamawola, "Ai enggam isa bunarsusfer bala, angtane afa jam suruyon fonawer, ane Mafnana Uwa Sanbagirminiwer, angtane jeiserem jei jam etamweyan angtane Uwa Sanbagiri Jem gwonap nwinirim, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe. ⁶ Iye uwa nemna jei tifni seyafter nemna ga nes jei gangge gerna, jengga Mafnana Uwa Sanbagirmana Jei mafnana nemnaiserem ga nes Jei gam gerna. ⁷ Aamei ipsam bitbitwenaram taterisi Ai Ajes bilirim enggalaiserem, ’Aamei seyafter gamjon isa surnu.’ ⁸ Bwona gam fonsobana aa jewer gam gunurum. Tere igam sarimbene, jengga aamei teisyena fwer gane jelbana, ane fwer gane sofobana. Jes gemerserem aaiserem jegme gemer, aamei teisyena fom igam surnu Mafnana Uwa Sanbagirminiwer." ⁹ Nikodemus ga tenebana, "Jeiserem ga fomfom se etamwena?" ¹⁰ Yesus jei ga tamawola, "Aamke guru sanbagiriserem Israelminibe, ke jes? Gam jega bafa aamei aaiserem ijam towaswebiyen? ¹¹ Ai isa bunarsusfer bala, taterisi Ai Ajes towaswebilirim Ai ga Ajes nasbili, ane Ai Ajes domolaram ga isa Ajes bilipmini ibe. Jengga taterisi Amnaiserem, aamei ijam taabiyen. ¹² Ai taterisi Ajes nasbilirim ogiri aaiserem jem temawer, aamei taterisi jeiserem ijam taabiyen. Gam jega afa Ai taterisi taman waaken-girem temawer jam isAs nasibenerem, taterisi jeiserem ga fomfom is taabili? ¹³ Angtane afa fas jam tauyan taman waaken-giribe, jengga Ai Tane Angtanemana Ajei iretyaram taman waaken-giriwer. ¹⁴ Ane aaiserem enggam mesam tulisul Taterisi Uwa Sanbagirmanaiserem jebe, Nabi Musa dwisgiribe jei awasa aa gemer ge taunaram tini bubwalnaiserem jebe. Aaiserem jegme ga gemer, angtane jei Ai Tane Angtanemana As gemer sene taufa ti salibibe, ¹⁵ jega angtane seyafter Ams tebalaiserem jei waakenfer gwelaiserem jamer abak-abaksus ga sene domola. ¹⁶ Uwa Sanbagiri Jei angtane ogirip aaiserem uskambarsus nesiktababili, ane jega jem temawer Jemna Tane daamfennaiserem Jei aa jes damtanaram, Jei jebe ga Jes gaarmini. Jei Tane Jemna jebe ga Jes gaarmini, jega angtane seyafter Jes tebalaiserem, jei jam teryen, jengga waakenfer gwelaiserem jamer abak-abaksus ga sene domola. ¹⁷ Uwa Sanbagiri Jei Tanna Jemna enggalf Jam baftayan ogiri aaiserem jebe angtane gam tamtamtababif, jengga enggalf Jei angtane ogiri aaiserem jep aa jei ge nwinbenerem ga jes waakentababisini Tane Jemna aa jes eyebilirim jeme. ¹⁸ Angtane Jes tebalaiserem, Uwa Sanbagiri Jei angtane jeiserem Jam tamtamtababiyen. Jengga angtane Jei jam tebayanaiserem, Uwa Sanbagiri angtane jeiserem se tamtamtababili, aam temawer angtane jeiserem jei Tane Uwa Sanbagirmana jam ne tebayan. ¹⁹ Aaiserem ga enggam: Uwa Sanbagiri enggam gunu angtane afwer waakena ane afwer kapka. Nafa Yesusmana mes forobatya ogiribe, jengga angtane jei gwins ne bili ane etam-etama kapka jes ne bili, nafa jam bilyen, aam temawer jei aa jes ne eyebilirim jei kapka. ²⁰ Angtane kapka aa jei gane eyebilirim, jei nafa baif gane gwebili. Ane nafap jam ge jalbiyen, aam temawer jei baif naawena etam-etam kapka jemna nafap jam ge sokoipmitife. ²¹ Jengga angtane aa jei gane onsobilirim taterisi bunarsusfer Uwa Sanbagiri aa jes gam bilirim, angtane jeiserem ga nafap gangge jalbili, jega angtane nafsi enggam gane damtabif jei aa jes ne eyebilirim, jei Uwa Sanbagirfar daamfennaber ne eyebili." ²² Jes jepserem taban, Yesus ane ai angtane Jei ajeya tikwebaatinennerem ai ona Yudeyaminip ga aya sofwa. Ai jep aya nwinirim minggunu unggwanferyan, ane jep ga angtane nafsi ga aya baptistababili. ²³ - ²⁴ Jes galapserem Yohanes Pembaptis bwiyip nalefe jam ne gaataanteyan. Jei mese angtanes baptistababili taman Ainon je, bijauyan kota Salimminiwer, aam temawer fona jewer unggwanfersus. Angtane jemnip ga aa ge forobuwetya, ane jei ga aa baptistababili. ²⁵ Angtane Yohanes aa jei ne tikwebaatinennerem jepga aa ge towaiwebili angtane Yahudimana daamfennaiserem jebar jam ge doksobafe. Jei ga aa ge doksobana osiri jelemanaiserem jem temawer, osiri anggwabura Yahudimana jena aa gam ne wirsowenaram. ²⁶ Jei Yohanesminip ga aa ge sofobili, ane ga aa ge gubili, "Guru, Angtane Fona Yordan jimwer gwanan iJebar ge nasowenantam, aamei iner ap gwanan as ijes destabaamisintim, Jei ga namwer angtane jam baptistababili, ane angtane seyafter ga Jemnip ge sofobuwena." ²⁷ Yohanes ga aa tamawola, "Angtane awelna jam domolyan, jengga Uwa Sanbagiri Jener gam gulbana jebe. ²⁸ Aamei iner imsa sarbili ai agam gunurum, ’Ai Mesiasyan. Ai nabala ams baftatna Jemniwer.’ ²⁹ Anggwana wini jeiserem aa jei gularam, wini jeiserem ga jemna. Anggwana jeiserem jem afelna ga jep fina jei aa jes nasbilirim ga jes saribaasini, ane ini jemna saaser-saaserfer ga folbana. Jes gemerserem, afa angtane unggwanfer Yesusminip jam gangge sofobilirim, ini aman mesna ase saaser-saasersusfer gam folbana. ³⁰ Angtane unggwanfer gwanan ams ne onsobanant, ane angtane bastowaifer ga Jes ne onsobanant. Jengga namwer aas jepserem angtane unggwanfersus ga Jes sene onsobana, ane angtane bastowaifer jei ams ne onsobana." ³¹ Angtane bolawer aa Jei iretyaram, Jei angtane seyafter gemerserem jem Sanbakfe ga Jei se nwini. Ane angtane ogiriwer foryalaiserem jei ga ogirmana, ane jei ga taterisi ogirmanaiserem ga jes ne nasbabili. Jengga Jei taman waaken-giriwer aa Jei iretyaram angtane seyafter gemerserem jem Sanbakfe Jei se nwini. ³² Jei taterisi fwater jes domolaiserem ane jes sarbiliserem ga Jei se nasbabili, jengga angtane afa fas taterisi Jei aa jes nasbabilirim jei ne taayibefe. ³³ Angtane taterisi Jemna aa jei ne taayibenerem, jei enggam ge gubili, sya Uwa Sanbagiri Jeiba bunaram. ³⁴ Angtane Uwa Sanbagiri aa jes baftatnaram, taterisi Uwa Sanbagirmana Jei nasbinennefe, aam temawer Uwa Sanbagiri Jei Mafnana Jelemana Jep gulbana jamer buguf. ³⁵ Uwa Sanbagiri ga Tane Jelemana Jam nesiktene, ane baabeta Jelemana seyafter gemerserem mes gulbana Jebe. ³⁶ Angtane Tane Uwa Sanbagirmana Jei aa jei gam tebanaram, jei ga waakenfer gwelaiserem jamer abak-abaksus ga jei gam domola. Jengga angtane Tane Uwa Sanbagirmana jes saribeyeneiserem, jei waakenfer gwelaiserem jamer abak-abaksus jei jam domolyan, aam temawer Uwa Sanbagiri angtane jeiserem gam nasbana jamer abak-abaksus.

¹ Angtane safna Farisimana jei enggam ge sarbili, angtane Yesus aa jei ne tikwebaatinenewenaram ane Yesus aa jes baptistababilirim, angtane jeiserem jeba unggwanferam. Ane angtane Yohanes aa jei ne tikwebaatinennerem jei unggwanferyan. ² Yesus angtane Jener jam baptistababiyen, jengga angtane Yesus aa jei ne tikwebaatinennerem ga jei ne baptistababili. ³ Jepga Yesus Jei jame aa galap towaswenaram enggame angtane safna Farisimana ula jeiserem mes ne sarbili, Jei ga ona Yudeya ga firsotafala, ane Jei ga aa warauwa ona Galileyaminiwer. ⁴ Jemna wofera jeiserem, Jei ona Samaryastamer gam ayenni. ⁵ Yesus Jei tamna bosna Sikar ona Samaryaminibe ga jep fortya. Tamna jeiserem jei bijauyan ona Yakub fwater aa jes gerbalam tane jelemanaiserem Yusufe. ⁶ Jepga fo mwona Yakubmana ga jep fala. Tufa Yesusmana ga aane werenswebana, Jemna wofera bijua, ga jem temawer Jei ga aa nwintena fo mwa tarnabe. Jes jepserem gwere ga bolap fyal. ⁷ - ⁸ Ai angtane Yesus Jei ajeya tikwebaatinennerem ai kotanap ga aya sofwa enggalfe ai tumilgala jep agma armantababif. Ane abakefyan Samarya wini ga fortya fo mwa tarnabe enggalfe fona gam jesultef. Jepga Yesus jei ga aa bili, "Iye, fona Ap ke samfer Asis gulbana Ai Ajam telbif?" ⁹ Samarya wini jeiserem ga aa tamawolbana, "Aamei angtane Yahudimana, ane ai angtane Samaryamana. Jeje bafa Aamei ai ga as Im bili fos telbife?" (Anggwabura Yahudimana jei anggwabura Samaryamanaiserem jebar daamfennaber waakenfer jam naaweyan.) ¹⁰ Yesus ga aa tamawolbili, "Aamei teisyena Uwa Sanbagiri is bas golbili, ane aamei teisyena Ai nansa aamei is Ajei bilirim fos telbife. Afa aamei tousaye, bunarsus As iner is bala fos telbife, ane Ai fona jem gwelaiserem isAs golbili." ¹¹ Wini jeiserem ga aa gutena, "Uwa, Imna wesyana fas, ane fo mwona aaiserem ga giri. Fona jem gwelaiserem jei ga Ifwir domola? ¹² Yakub asal-asal amna, jei ga fo mwona aaiserem as jei terbemil abe. Jei ga fona jener tesbemitowel jam telbife, jem tanem mesna, ane jem ofo mese aa jes taayinbilim. Aamei ke enggam Im gunu, ’Ai unggwan-giri Yakubminiwer.’?" ¹³ Yesus ga aa tamawolbili, "Angtane fona aaiserem aa jei ne telbilirim, jei fo botona gamjon sege folbamini. ¹⁴ Jengga fona Ai Ajes golminirim, fona jeiserem jes galserem galyan. Angtane fona Ai Ajes golminirim jeiserem jam gane telbilirim, jei gamjon fo botona jam ge folbamiyen jamer abak-abaksus, aam temawer fona ai Ajes golminirim, fona jeiserem ga fo mwafe jese fala jemnibe. Fona jeber-jeber jeweram sowetya, ane ga jei golmini waakenfer gwelaiserem jamer abak-abaksus." ¹⁵ Wini jeiserem ga aa gutena, "Uwa, abe fona jeiserem ase golbi, jega ai fo botona gamjon as jam falbiyen, ane ai gamjon ajam warauyan aafe fos disultefe." ¹⁶ Yesus ga wini jeiserem bili, "Gwanan im gwi, anggwana ilemana ga is gaariufenne, ane aaf ga is ge jela." ¹⁷ Wini jeiserem jei ga tamawolbana, "Ai anggwana fas." Yesus enggam ga gutena, "Ijes bilirim ba bunaram, aamei anggwana fas. ¹⁸ Aamei anggwana tafna gwiri ijamer ketawelabe, ane anggwana namwer ijebar ge nwinirim, jei im anggwayan. Gam jega taterisi jeiserem aamei ijes nasbilirim ba bunaram." ¹⁹ Wini jeiserem enggam ga gutena, "Uwa, ai namwer am towaswena Aameiba nabisam. ²⁰ Asal-asala amnaiserem jei ga Uwa Sanbagiri aaf ne sembatawel taarena aaiserem, jengga anggwabura Yahudimana Imnaiserem, jei ga enggam ge gubili angtane Uwa Sanbagiri sene sembatawena kota Yerusalem jep fener." ²¹ Yesus ga gutena, "Iye, taterisi Amnaiserem bunar, aamei jeter is taabili. Galap enggam se etamwesa: aamei Uwa Sanbagiri gemer is sembatananna, jengga taarena aaiserem jepyan, ane Yerusalemweryan. ²² Aamei anggwabura Samaryamana, aamei teisyena Uwa Sanbagiri ijesa sembataunaram ijama towaswebayan. Ai anggwabura Yahudimana, ai Uwa Sanbagiri ajesa sembatanaram amsa towaswebana, aam temawer Angtane aa jei gam waakentababisinirim, Jeiba anggwabura Yahudiminiwer jela. ²³ Angtane Uwa Sanbagiri bunarsusfer aa jei gam sembatanaram, jei Uwa Sanbagiri enggam sene sembatasa ini seyaftersus gemerserem, ane ini bunarsusfer gemerserem ga jem sene sembatasa. Galap enggam gase etamwesa, ane namwer aas jepserem mesam towaiwena jam etamwefe. Uwa Sanbagiri Jei angtanes terelbaabili, angtane Jei aa jei ne sembatalaiserem. ²⁴ Uwa Sanbagiri Jeiba Mafnansam, ane angtane Jei aa jei ne sembatanaram, jei jamer gane sembatana enggame ini seyaftersus gemerserem, ane ini bunarsusfer gemerserem ga jem gane sembatana." ²⁵ Wini jeiserem jei ga Yesus ga aa bala, "Ai tousa Mesias, aa Jes ne balwenaram Kristus, Jei gase fortya. Jei Jam se forsanyaram, Jei ga taterisi Uwa Sanbagirmana seyafter gemerserem nebe ga nese nasbaipmisi." ²⁶ Yesus ga enggam gunu, "Aiba Jesam, namwer iJebar ge nasounaram." ²⁷ Jes galapserem ai angtane Yesus Jei ajeya tikwebaatinennerem ga aya warautna. Ai ga Yesus jep aya bitbitwebana, Jei wini jeiserem ga jebar ge nasowena. Jengga ai ajama tenebayan, "Ibas bili?" afa "Jeje bafa Aamei jebar Im ge nasouna?" ²⁸ Jepga wini jeiserem jei fo wesyana jemnaiserem jeber ga firultefala, ga aa sofwa kotanap. Jepga jei angtane jepmanaiserem enggam ga aa balbabitne, ²⁹ "Au, sa damta Angtane aaiserem Jei seyafter ai ajes eyebilintim ap ga as jes nasbili. Angtane jeiserem Jeiba engbar Kristusam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif?" ³⁰ Jepga angtane jeiserem jei ga kotana jewer ga aa ge sofobitye, ga aa ge jalbili Yesusminibe. ³¹ Jes galapserem, ai angtane Yesus Jei ajeya tikwebaatinennerem, ai unggwanfer ga aya bala, "Guru, jase twen!" ³² Jengga Yesus ga as enggam tamawolbaabili, "Amnibe tumilgala aare, aamei ijama towaswebiyen jem temawer." ³³ Jepga ai angtane Jei ajeya tikwebaatinennerem an ana ga aya taanaaminenne, "Fomfoma, angtane tumilgala Jebe afa ke mes ne gulbana?" ³⁴ Yesus ga as balbabili, "Tumilgala Amna jeba enggam, Uwa Sanbagiri aa gam gunurum, seyafter jeiserem ga Ai As eyebili. Uwa Sanbagiri Jei Amsam baftannunt, ane awelna Jemna Abe As jes gulbanantam, jeiserem ga As tabanulbono. ³⁵ Angtane enggam ge nasbawena, ’Angtane gane tonola, muara gamjon nawer-naura igi ga gane targabaabili.’ Jengga Ai aamei isa enggam Ai balbabili, nwe sa ketate, makana aaiserem sa damtabi, igi mes ge berswebili, ane saf isa targabaabili. ³⁶ Angtane nananisi aa jei ne targabaabinennerem, jei doini mes ne tebabili. Jei nananisi aane targabaabili, ga aane orobili. Nananisi jeiserem ga aas, angtane waakenfer gwelaiserem jamer abak-abaksus aa jei ne domolaram. Ga jem temawer angtane aa jei tonolaram, ane angtane aa jei targabaabilirim, ini jemna saaser-saaserfer gam nulamini. ³⁷ Taterisi aaiserem angtane jeber-jeber aa jes ne nasbabiwenaram jeiserem ba bunaram, ’Afelnaiserem jam tonola, afelnaiserem jam targabaabili.’ ³⁸ Ai ims baftabili nananisi bereiserem ga isa targabaabili. Aamei awelna jebe ijama gwebiyen. Angtane afwer awelna uskambar ne gwebili, ane aamei isa targabaabili jeiserem aa jes ne tonolaram mofabaner." ³⁹ Angtane Samaryamana unggwanfer kotana jeiserem jebe jei Yesus ne tebana, aam temawer wini jeiserem jei ga enggam gunu, "Jei seyafter ai ajes eyebilintim ap ga as jes nasbili." ⁴⁰ Jepga angtane Samarya jeiserem Yesusfar jame aa galap ge dorwebilirim, jei uskambar ne bala Yesus gwanan jebar ge nwinbefe. Ane Yesus jebar aa ge nwinbenerem nunu ga naura. ⁴¹ Ane jepga angtane unggwanfersus jei Yesus ga aane tebana, aam temawer Jei Jener aa jewer towas-towastababilirim. ⁴² Jei ga wini jeiserem ga aane bili, "Ai ga taterisi ijes bilirim ajama taabili. Jeke enggam aamei ijes nasbilirim jetefener, jengga ai aner amsama sarbasini, ane amsama towaswena enggame, Angtane aaiserem Jei bunar-bunarsus angtane ogirip aaiserem se waakentababisini." ⁴³ Nunu ga naura kotana jeiserem jam nwinibe, Yesus ga ona Galileyaminiwer ga aa sofwa. ⁴⁴ Yesus Jener gwanan mes gutena, "Angtane jei nabi jelemanaiserem jei jam ne sarbayan, aa jei ge nwinbenerem jebar tamna daamfennabe." ⁴⁵ Jengga Jei Galileyaminibe jame aa galap fornaram, angtane jepmana ini saaserfer ge folbamini Jei aa tebanaram. Jei mese kota Yerusalemwer mes ge sofobilint nunu Paska galapserem. Ane jei bwembwema seyafter Yesus aa jes eyebilintim jei mes ne domola jelem nweme. ⁴⁶ Jepga Yesus gamjon ga aa warauwa tamna Kana ona Galileyawer. Yesus Jei gwanan fos eyebilint anggurfe jam etamwefe tamna jeiserem jebe. Angtane awelna pemerintamana aa jei gam gwebilirim, jemna tane bwernabara kota Kapernaum je. ⁴⁷ Jei jame aa saram enggame Yesus Jei mes fortya ona Galileya je, ona Yudeyaminiwer jela, jei ga Yesusminip ga aa sofwa. Jei Yesus ga bunarsusfer sarwobana Jei Jam jalfe Kapernaum je, ane tane jemna gam waakentabaf, jei bwernabara amkom fom tere. ⁴⁸ Yesus angtane jeiserem ga bala, "Afa aamei Ai As ijama damtayanaye, Ai bwembwema unggwanfer As eyebilirim, aamei Ase ijama tebayan." ⁴⁹ Angtane jeiserem ga aa tamawolbana, "Tuhan, tatarfer Is jela, tane amna nalefe jei jam teryen." ⁵⁰ Yesus ga aa bala, "Se sofwe, tane imna jeiserem se gwena, jam teryen." Angtane jeiserem jei samfer taabili Yesus aa jes bilirim, jewer ga sofwa. ⁵¹ Jamer nelep, angtane jemna awelna aa jei ne gweyibenennerem ga aa ge dorwebili, ane ga aane bala enggame, "Tane imna bwernabaraiserem jei mes waakenswena." ⁵² Ane jepga jei aa tenebaabili, "Jema fomera tane jeiserem ga waakenswena?" Jei ga aa tamawolbana, "Ir gwere bolap, jema daamfenna, jemna bwerna ga aa barwebanant." ⁵³ Jepga jeta ga aa sarstaabona enggame, gwer mwongga jes jepserem Yesus jebar balant, "Tane imna jeiserem se gwena, jam teryen." Jepga jen jena ane jem wi tane mese seyafter Yesuster ga aane tebana. ⁵⁴ Yesus ga aa jela ona Yudeyaminiwer, ane Jei bwembwema aa eyebili naurabaraiserem ona Galileya je.

¹ Jes jepserem taban, Yesus kota Yerusalemwer ga aa sofwa, masara anggwabura Yahudimana jep ga aa falmini. ² Yerusalem je "Pintunu Dombamanaiserem" jem gwetmanabe, jep ga foboga touya aasaje ga jep fala, Ibrani oleme enggam gane bala Betesda. Foboga touya jeiserem jem eyebe ja tantane lima jep ga gemer ge tenbili. ³ Jena jeiserem jebe angtane bwernabarfenna ga anesus jep ga gemer ge tabananna, afwer nwena kofa, afwer muli-mulni, afwer angtane tatal mesna jam gangge terebene. ((Angtane jeiserem jei ga aas ne fibili, fona aa jep gin-ginwenaram. ⁴ Galap-galap malaikata Tuhanmana afa jep jam gam iretyaram fona jeiserem jebe, foboga touya jeiserem ga gam gin-ginwena. Angtane bwernabara nabal-nabalsusu jeiserem jei fona jeiserem jep ga gam jutena afa fona jeiserem jam gam gin-ginwenaram, bwerna jemna seyafter aa jes gam domolaram ga gam barwebana.)) ⁵ Anggwana jebe aa jei tawenaram tahunu abakef tiga pulu delapan, bwerna jemna jamer taabilibe. ⁶ Yesus Jei angtane bwernabara aa jei tanaram jes damtana, ane Yesus Jei tousa enggame jemna bwerna jamer taabilibe abaksusu. Yesus Jei angtane jeiserem ga tenebana, "Aamke bai jam waakenswefe?" ⁷ Angtane bwernabara jeiserem ga aa tamawolbana, "Tuhan, fona aa galap gin-ginwenaram, angtane aafmanaiserem afa fas fona aaiserem jebe as jeye gaarantefe. Ane ai fonap safe agemer sofwenaram, angtane nafsi jei gwanan mes jutena." ⁸ Yesus Jei angtane jeiserem ga aa bala, "Se irwe, tikar se golte, ane ga is wofena." ⁹ Yesus jebe jame aa galap balaram, angtane bwernabara jeiserem jei ga waakenswena, ane tikara ga aa goltena, ga aa sofwa. Bwembwema jeiserem jei ga nunu Sabatem etamwena, nunu angtane Yahudimana aa jem ge nwinbisiwefaram. ¹⁰ Jega jem temawer angtane sanbaka Yahudimana jei angtane aa jei waakenswenaram ga aane bala, "Nunu namwer aaiserem nunu Sabat, nunu nei awelna nejama gwebiyen. Hukumu nemna jep ga enggam tulisul, ’Tikara imna ijam golteyan.’ " ¹¹ Jengga angtane jeiserem jei ga enggam tamawolbaabili, "Angtane ai as Jei waakentanaram namwer, Jei ai ase enggam bala, ’Tikar se golte, ga is sofwa!’ " ¹² Jepga aane tenebana, "Angtane jeiserem Jei nansa is Jei balaram tikara imna jas golte, ga is sofwa?" ¹³ Jengga angtane bwernawer aa jei waakenswenaram, jei teisyena jeje nan angtanesa, aam temawer Yesus Jei angtane uskambar jepserem Jei jewer ga samem-samem gwisini. ¹⁴ Jewer ga Yesus gamjon angtane jeiserem jebar ga aa ge dorwena Jena Uwa Sanbagirmanaiserem jebe, ane jepga aa bala, "Namwer aamei ga imes waakenswena. Etam-etama kapka gamjon ijam eyebiyen, jega ula kabwaksusu gamjon ijam domolyan." ¹⁵ Jepga angtane jeiserem ga aa sofwa, ane jei angtane sanbaka Yahudimana ga aa balbabili enggame, "Ai bwernawer ase Yesus se waakentana." ¹⁶ Angtane sanbaka Yahudimana gane towaiwulu Yesusfe kapkaiserem jam ne eyeibefe, aam temawer Yesus Jei angtane bwernabara aa jewer waakentanaram nunu Sabateme, nunu angtane Yahudimana aa jem ge nwinbisiwefaram. ¹⁷ Yesus Jei ga enggam balbabili, "Uwa Amna Jei Jam tikweyan awelnawer, ane Aime awelna jeber-jeber As gwebili." ¹⁸ Angtane sanbaka Yahudimana, jei Yesus uskambarsus ga aane nasbana, ane jei nele ga aane terelbene Jei jam munbofe. Jei Yesus ga aane nasbana, aam temawer nunu angtane Yahudimana aa jem ge nwinbisiwefaram, nunu jeiserem Yesus Jei jem Jam gwesiyen awelnawer. Ane jei Yesus ga aam temawer nasbana Yesus enggam aa jewer gunurum, "Uwa Sanbagiri Jei Am Uwasam." Jei Jelem inip jem gam mwangbilirim Jei daamfennaber Uwa Sanbagirfar. ¹⁹ Jepga Yesus Jei ga balbabili enggame, "Ai bunarsusfer ims towas-towastababili, Aiba Tane Uwa Sanbagirmanam, jengga Ai apgal jigala Aner afa Ajam eyebiyen. Ai Amsam damtanant Uwa Amna awelna aa jes eyebilirim, ane Ai ga jeter Ai eyebili. Jega jem temawer seyafter Uwa Amna aa jes eyebilirim, Aiba Tane Jemnam As eyebili. ²⁰ Uwa Amna Jei Ams nesiktene, ane seyafter Jei aa jes eyebilirim, Jei As jes ge saibaasini. Jei awelna unggwandusa nafis-nafsiserem Ase saibaasini, jamere aamei ga jam isa bitbitwesa. ²¹ Uwa Amna Jei angtane futunu Jei gam irtebaabili, ane gwela gam golmini. Jes gamserem Aimba Tane Jemnam, Aime gwela As golmini angtanefe, angtane Ai Ajes balaram. ²² Ane ga enggam, Uwa Amna Jei angtane kapka Jener Jam tamtamtababiyen, ane angtane waakena Jei fwaina waakenater Jam golmiyen, jengga Uwa Jei Ai As enggam bala, ’Ai baabeta IsAs gulbana Ibe, Tane Amna, seyafter jeiserem angtanefe ga Aamei Is eyeipmini.’ ²³ Uwa Amna Jei jes gemerserem gam aa jewer bilirim, Jei ga enggalf bili angtane Ai As gane balf Aiba sanbagirem, jei Uwa Amna aa gemer ne balaram sanbagireme. Angtane enggam jam ge gubiyeneiserem Aiba sanbagirem, jes gemerserem jeime enggam jam ge gubiyen Uwa Amna Ai As Jei baftannuntum Jeiba sanbagirem. ²⁴ Taterisi Ai isa Ajes nasipminirim jeiba bunaram. Angtane taterisi Amna As jei saribenerem, ane Uwa Amna Ai As Jei baftannuntum Jei aa jei tebanaram, angtane jeiserem jei waakenfer gwelaiserem jamer abak-abaksus mes domola, ane Uwa Sanbagiri Jei angtane jeiserem Jam tamtamtayan. Jei nele termanaiserem mes mirtetefala, ane jei nele waakenfer gwelaiserem ga jes onsobana. ²⁵ Ai isa Ajes nasipminirim jeiba bunaram. Nunu aa jep falfaram, bunarsus nunu jeiserem ba mesam fal, angtane waakenfer gwelaiserem jam ne domolyanaiserem, jei taterisi Amna ga As jei sene saribene. Angtane taterisi Amna jeiserem aa jei ne taabilirim, jei waakenfer gwelaiserem jamer abak-abaksus ga jei sene domola. ²⁶ Jeiserem gase etamwesa, aam temawer Uwa Abe baabeta As mes gulbana, jega Ai waakenfer gwelaiserem gam As golmini angtanefe. Ai jeiserem As eyebili Uwa Amna Jei aa gemer eyebilirim. Gwela seyafter Jemnip, ane Jei waakenfer gwelaiserem angtanef gam golmini. ²⁷ Ane Jei ga Ams bala, ’Aamei angtane kapka Is tamtamtababili, ane angtane waakenater aa jei ne eyebilirim, Aamei fwaina jebe waakenater Is golmini.’ Jei ga jes bili, aam temawer Aiba Tane Angtanemanam. ²⁸ Aamei ijama bitbitweyan Ai Ajes bilirim jem temawer. Nunu jeiserem aa jep falfaram, angtane seyafter aa jei ge terbuwenaram jei taterisi Amnaiserem Asene saribese, ²⁹ ane ga sege tobitisinye bitisiwer. Angtane waakenfer eyebiliserem ga sege irwebisi terewer, ane abakfer gwelaiserem ga sene domolsa. Angtane kabwakfer eyebiliserem jei mese sege irwebisi terewer, ane tamtamtalaiserem ga sene domolsa. ³⁰ Ai apgal jigala Aner Ajam eyebiyen, Aingga angtane jafner Agam teneba-tenebawena aa jes gam eyebilirim jem temawer. Uwa Sanbagiri Jei Ai As gemer balaram, Ai ga jeiserem Agam eyebili. Angtane kapka As tamtamtababili, ane angtane waakena Ai fwaina waakenater As golmini. Taterisi Ai Ajes nasbilirim angtane jeiserem jem temawer ba bunaram, aam temawer Ai Aner gam Agam bilirim Ai game Ajam eyebiyen. Jengga Ai As eyebili, Uwa Sanbagiri Ai As Jei baftannuntum Jei aa gemer gunurum, Ai ga gemer As eyebili." ³¹ Yesus gamjon ga gutena, "Afa Ai Aner As gunurum enggame Ai sanbagiri, angtane jam ne taabiyen Ai Agam gunurum. ³² Jengga Uwa Amna jegme mes gunu Aimba sanbagirem, ane Aimba Amsam towaswena Jei aa jes bilirim Am temawer jeba bunaram. ³³ Aamei angtane imsa baftabilint Yohanes Pembaptisminibe enggalfe Am temawer jes ne tenebaabif, ane jei taterisi bunarsusfer aaiserem mesam nasipmini. ³⁴ Ai ke taterisi angtanemana ke Ajam sarbif? Ai Yohanesem temawenefener gunu, jega Ai aamei isa gam As waakentababili. ³⁵ Yohanes jei ga lampunu gamserem jam ertele, ane ini imna saaser-saaserfer nomkef ga is gangge folbamini taterisi jemnaiserem jem temawer, lampu nafa galserem jeme. ³⁶ Yohanes aa jes bilintim Am temawer jeba igim. Ane awelna Ai namwer Ajes eyebilirim, jeiserem igsusu Ai As je gweretafe. Uwa Amna awelna jeiserem As mes gulbana Abe enggalfe Ai awelna jeiserem Agam tabanulsif. Ai awelna jeiserem Ajam gwebili. Aamei As imsa damtana awelna Ajes gwebilirim, ane imsa gunu, ’Uwa Jes baftannunt.’ ³⁷ Uwa Amna Jei Ai As Jei baftannuntum, Jei mese Am temaweram nasowena. Aamei tateris gulu Jemna ijama saribeyen, ane aamei numu Jemna ijama domolbayan. ³⁸ Ane aamei taterisi Jemna waakenfer ijama waakennulsiyen ilem inibe. Aamei waakenfer ijama waakennulsiyen, aam temawer aamei Ai waakenfer As ijama tebayan. Aiba As Jeyam baftatnant. ³⁹ Aamei Taterisi Uwa Sanbagirmana waakenfer ima gerabistena, aam temawer aamei enggam ima gunu, waakenfer gwelaiserem jamer abak-abaksus jep gam isa domola. Jengga Taterisi jeiserem Am temawer jeteram nasbili. ⁴⁰ Jengga aamei bai Ai As ijama tebafe, jega waakenfer gwelaiserem jamer abak-abaksusu isa gam As golmini. ⁴¹ Ai Ajam guyon Alem inibe enggame, angtane As ga sene bala, ’Aamei sanbagiri.’ ⁴² Ai isa mes towasweipmini aamei ilem inibe ijesa waakennulsinirim. Aamei Uwa Sanbagiri ijama nesikteyen. ⁴³ Uwa Amna Jei As mes baftannunt, ane Ai Jem baabetemam fortyant imnibe, jengga aamei As ijama tebayan. Jengga angtane nensa jam se fortyaram, Uwa Sanbagiri Jei Jam baftayan, aamei ga jes isa tebafa. ⁴⁴ Aamei As ijama tebayan, aam temawer aamei sarabosominiwer ijetera saripminirim enggame is jes ne balbabilirim, ’Aamei waakena!’ Jengga aamei ijama terelbiyen taterisi Uwa Sanbagirminiwer aa gam gunurum enggame, ’Aamei waakena!’ ⁴⁵ Aamei enggam ipsama gunurum ilem inibe, Ai Uwa Amna ga As bala etam-etama kapka ijesa eyebilirim jem temawer. Nabi Musa jeiba angtanesam, jei mesam tulistababil enggalem temawer etam-etama kapka ijesa eyebilintim jem temawer. Jei kapkaiserem jem temawer mesam tulistababil, ane aamei jei ga ima tebana. ⁴⁶ Nabi Musa jei Am temawer mesam tulistababil. Jega jem temawer afa aamei taterisi jemna jam isa taayibenerem, jes gamserem Aime As gemer isa tebana. ⁴⁷ Jengga aamei taterisi jeiserem ijama taabiyene, taterisi Nabi Musa jei aa jes tulistababilim, gam jega taterisi Ai Ajes bilirim ga fomfom isa taabisi?"

¹ Nunu gamjon abakfer towaiyan, Yesus Fobogana Galileya jimwer ga aa ge awelbili. Angtane fobogana jeiserem afwer bosewer ga enggam gane bala Tiberyas. ² Yesus Jei jame aa galap ge forobilirim, angtane anesus ga aane onsobana, aam temawer jei bwembwema Yesusmana aa jes eyebaabuwenantam angtane bwernabarfe, bwembwema jeiserem ga mes ne domolant. ³ Jepga ai angtane Yesus Jei ajeya tikwebaatinennerem ga aya tawena otumube, ane jep ga aya nwini Yesusfaner. ⁴ Jewer ga nunu abakferyan anggwabura Yahudimana jei Masara Roti Tanyanaiserem ga aane eyebili. ⁵ Yesus Jame aa galap anggasnennerem, Jei angtane unggwanfersus ga aa damtabili, jei Jemnip ga aa ge jalbili. Jega jem temawer Jei Filipus ga aa tenebana, "Nei tumilgala ga fof nesa armanulu, jega angtane seyafter aaiserem jem gasa dwena?" ⁶ Yesus Jei bunarsusfer mes towaswena Jam jes eyebiliserem, jengga Jei Filipus jam unggwasbaf. Jei enggamfener ga aa tenebana, jam sarbaf Filipus jei fomfom se tamawolbana. ⁷ Filipus ga aa tamawola, "Awelna doini nunu 200 jeme masef enggalfe rotini jeme jam armanulfe, ane angtane daamfen-daamfennem jes ne tombaabife safe bastantowaifer." ⁸ Angtane nafsi Yesus aa jei ne tikwebaatinennerem, bosna Anderyas osona Simon Petrusmana, jei ga aa gutena, ⁹ "Tane girtowai aaf aaiserem rotini jemna tafna gwiri, ane jigala bastowai nauna. Jengga angtane uskambar aaiserem jem ke nesa taayinbili tumilgala bastantowaifer aaiserem jeme?" ¹⁰ Yesus ga as balbabili, "Angtane aaiserem sa balbabi gangge nwinbete." Jebe kakatar anesus, ane angtane jeiserem jei ga kakatara sagap ga aa ge nwinbitena. Anggwa teten seyafter jeiserem unggwanfer ga enggammer 5.000. ¹¹ Jepga Yesus ga rotini jeiserem ga aa goltena, ane Uwa Sanbagiri ga bala, "Ase samfer gulbana." Jepga Yesus ga rotini jeiserem ga aa syenulmini angtane jep aa jei ge nwinbenerem jebe. Ane jigal jegme gemer eyebili, ane angtane jeiserem gane tombaabili jamer jena aa jeber ge gubilirim. ¹² Jame aa dwenaram jamer unubuguf, Yesus ga ai angtane Jei ajeya tikwebaatinennerem ga as balbabili, "Tumilgal tomna bitbiti jeiserem ga jam isa dupdupbulu, jega tomna afa ijama fasawolyan." ¹³ Jepga tumilgal bitbiti jeiserem ga aya dupdupbulu, ane ga aya bakbakulu burnabara ga dua belas, jamer tip. Tumilgal bitbiti jeiserem jei ga rotini tafna gwiri angtane uskambar aa jes ne tombaabilirim ga jem tomna. ¹⁴ Angtane uskambar jeiserem jei bwembwema Yesusmana jame aane domolbanaram, jei ga aa ge gubili, "Angtane aaiserem Jei bunarsusfer ba Nabisam Nabi Musa aa jes balam Jei Jam foryafe ogiri aaiserem jebe." ¹⁵ Yesus Jei mes towaswena enggame angtane uskambar jeiserem jei enggalf ge jalbili Yesus gane taatwebaf jem rajaf gam gwefe. Jengga Yesus Jei baif gwena ogiri aaiserem rajaf jep Jam gwefe. Jega jem temawer Yesus Jenfentowai gamjon ga aa tawena otumube. ¹⁶ Ona safe aa gemer gigitswenaram, ai angtane Yesus Jei ajeya tikwebaatinennerem, ai ga foboganabe ga aya aartini. ¹⁷ Jepga ai ga aya juwili atdusabe, ane aya sofwa jimwer ga aya awelna kota Kapernaum je. Ona je mes gigitswena, jengga Yesus Jei Jam foroyan amnibe. ¹⁸ Nindaya je uskambar ne fibana, jepga fona muru ga aa gera. ¹⁹ Ai jame agalaba awelnaram jemna bijauwer ga lima afa enam kilometer, ai Yesus ga aya damtana. Jei fo sagap wofentena, ga atdusap jela, ane ai angtane Jei ajeya tikwebaatinennerem ai uskambarsus aya erne. ²⁰ Jengga Yesus ga as enggam balbabili, "Ai aare. Ipsama ernerem!" ²¹ Ane jepga ai ga ini saaser-saasermer ga aya gaarnnu jamer atdusabo, ane atdusa tatarfer ga aa forna tamna ajewera gunurum jam gwife. ²² Nunu jeiserem jem gwirmer, angtane uskambar rotini aa jei ne tombaabilintim jei jeber ge nwinbene fobogana jeiserem jem jimwer. Ane jei ga aa ge gubili, "Ir dafefe atdusa aafe daamfennem tenant, ane angtane Yesus aa jei ne tikwebaatinennerem ga jenefener ge sofobilint, ane Yesus Jei aafer ne firtetefalant." ²³ Jepga atdusa nafsiserem ga aa ge forobitye kota Tiberyusminiwer, ane ga aa ge batobili tamna Tuhan Jei Uwa Sanbagiri aa jep balaram enggame, "Ase samfer gulbana.", ane angtane uskambar rotini aa jep ne tombaabilirim jebe. ²⁴ Angtane uskambar jeiserem jei aa galap ge towaswebilirim enggame, Yesus ane ai angtane Jei ajeya tikwebaatinennerem ai seyafter jebe fas, jei ga atdusa jeiserem jep ga aa ge jubiwena, jei ga kota Kapernaumwer ga aa ge sofobili enggalfe Yesus jep gam ne terelbene. ²⁵ Angtane uskambar jeiserem, jei Yesus fobogana jeiserem jem jimwer jame aa galap ne damtanaram, jei Yesus ga aane tenebana enggame, "Guru, Aamei aafe fonggalabar Im fortyant?" ²⁶ Yesus ga aa tamawolbaabili, "Ai isa bunarsusfer balbabili, aamei seyafter ba i Ams ima terelbene, jeke enggalem temawer aamei bwembwema Amnaiserem ijewera domolantam. Jengga aamei ijewera twenaram jamer unubugufsus, aamei ga Asi jem temawera terelbene. ²⁷ Sa gwe awelnabe, jega isa domola tumilgala kanawa aa jei gularam waakenfer gwelaiserem jamer abak-abaksus. Awelnabe ijama gweyan enggalfe tumilgala jam butswelaiserem, ane jem barwelaiserem, jewer igama domolf. Tumilgala kanawa jeiserem Ai Tane Angtanemana isAs kitulmini ibe. Uwa Sanbagiri Jei Am temawer enggame mesam gunu, ’Sya, Ai Imter bala.’ " ²⁸ Jepga jei Yesus ga aane tenebana, "Ai bas asa eyebili, jega ini Uwa Sanbagirmana saaser-saaserfer gase folbana am temawer?" ²⁹ Yesus Jei ga aa tamawola, "Uwa Sanbagiri aamei ga is enggam balbabili aamei ga enggam isa eyebili: Aamei Ai As jam isa tebana, Uwa Sanbagiri Ajes baftatnurum." ³⁰ Jepga jei Yesus ga aane tenebana, "Wa gameye, Aamei abe ase bagal bwembwem Is golmini, jega ai gam asa domola, ane ai ga Is asa tebana? Aamei Ibas eyebifi? ³¹ Asal-asal nemnaiserem jei tumilgala bosna ’mana’ mes ne dumil dwisgiribe. Taterisi Uwa Sanbagirmana jep ga enggam baatultel: ’Jei rotini taman waaken-giriwer aaiserem ga jem taayinbili.’ " (Keluaran 16:4) ³² Ane jepga Yesus jei ga aa balbabili, "Ai isa bunarsusfer balbabili, Nabi Musa jei asal-asala nemnaiserem rotini taman waaken-giriwer aaiserem jam golmiyen, jengga Uwa Amna Jei jep golmil. Ane namwer Jei rotini igsusu ip se golmini taman waaken-giriwer. ³³ Rotini Uwa Sanbagiri ibe is jes golminirim, Jeiba Jesam Jei taman waaken-giriwer aa Jei iretyaram, ane Jei waakenfer gwelaiserem jamer abak-abaksus angtane ogiribe Jei ga aa golmini." ³⁴ Jei ga aane bala, "Uwa, abe rotini jeiserem jeber-jeber as jam Is kitulmuwena." ³⁵ Yesus ga aa gutena, "Aiba rotisam, waakenfer gwelaiserem ibe is jeye golminirim jamer abak-abaksus. Angtane Amnip aa jei gam jelaram jei wisi jam bitayan jamer abak-abaksus, ane angtane Ams tebalaiserem jei fo botona gamjon jam folbayan. ³⁶ Jengga Ai gwanan is Amsam balbabilint, Ai Ajes eyebilirim aamei jeiserem safe imsa domolant, jengga aamei Ai As ijama tebayan. ³⁷ Angtane seyafter Uwa Sanbagiri Abe As gemer kitulbonorom, jei ga Amnibe sege jalbifi, ane Ai ga Asene tikwebaatifi. Ane angtane Ai aa jei ne tikwebaatinennerem, Ai jei Ajam balbabiyen enggame, ’Sa gwisi, As ijama tikwebaatiyen.’ ³⁸ Ai As gutena, ’Sya Asa tikwebaati.’, aam temawer Ai As eyebili Uwa Amnaiserem Ai aa Jei baftatnantam, Jei aa gam gunurum. Ai Ajam eyebiyen Ai Aner Agam gunurum. Aaiserem ba jem temaweram Ajewer iretyaram taman waaken-giriwer. ³⁹ Uwa Amna Jei Ai As mes baftatnant, ane Jei enggam gunu, ’Angtane seyafter Ai Is Ajes kitulbonorom, waakenfer Is gerebaabisnenne.’ Nunu umwef jeiserem, Ai angtane seyafter jeiserem ga jem As irtebisi terewer. ⁴⁰ Aaiserem jeiba bunaram Uwa Amna gam gunurum: Angtane seyafter Tane aa jei ne damtanaram ane ga sene tebana, angtane jeiserem jei ga sene domola waakenfer gwelaiserem jamer abak-abaksus. Ane Ai angtane jeiserem ga As irtebisi terewer nunu umwef jepserem." ⁴¹ Jepga angtane Yahudimana jei Yesusem temawer syefer ga aa ge nasbawena, aam temawer Yesus enggam aa jewer gunurum, "Aiba rotisam aa jei iretyaram taman waaken-giriwer." ⁴² Jei ga aa ge gubitena, "Angtane aaiserem jei ke Yesus, tane Yusufmana, Jelem ene yo jeta gwanan nejesa domsonaram? Jei ga enggame baf gunu, ’Ai taman waaken-giriwer iritya?’ " ⁴³ Yesus ga tamawolbaabili, "Aamei syefer ipsama nasowenaram! ⁴⁴ Afa angtane Amnip jelaiserem jener gam gunu Amnip jam foryafe, jei jam foroyan Amnibe. Jengga Uwa Ai As Jei baftannuntum, afa Jei angtane jeiserem jam gam jenbenerem Amnip jam foryafe, afa ga gam jes gamserem, angtane jeiserem ga As gam tikwebaatifi. Ane Ai angtane jeiserem ga As irtese terewer nunu umwef jepserem jeme. ⁴⁵ Bukunu nabi-nabimanaiserem jep enggam ne baatultel: ’Uwa Sanbagiri Jei angtane seyafter se towas-towastababili.’ (Yesaya 54:13) Angtane Uwa Sanbagiri aa jei ne sarbanaram ane aa jei ne tebanaram, bunar-bunarsus jei sege jalbili Amnibe ane ga As ne tikwebaatifi. ⁴⁶ Ai Uwaminiwer jelant, ane Ai Uwa Ames damtana. Angtane nafsi Uwa jam ne damtayan. ⁴⁷ Ai isa bunarsusfer balbabili, angtane Ams tebalaiserem jei gase domola waakenfer gwelaiserem jamer abak-abaksus. ⁴⁸ Aiba rotisam waakenfer gwelaiserem jamer abak-abaksus ibe isa je golminirim. ⁴⁹ Asal-asala imnaiserem jei tumilgala bosna ’mana’ mes ne dumil dwisgiribe, jengga jei seyafter mes ge terbil. ⁵⁰ Jengga Ai Ajam nasowena rotim temawer aa jei iretyaram taman waaken-giriwer. Angtane rotini jeiserem aa jei dumilirim jei jam teryen. ⁵¹ Aiba rotisam aa jei iretyaram taman waaken-giriwer. Ai waakenfer gwelaiserem jamer abak-abaksus is Ayam golmini. Afa angtane rotini aaiserem jei se tumili, jei waakenfer gwelaiserem jamer abak-abaksus jei se domola. Rotini aaiserem jeba nini Amnaiserem. Ai Ana jam As gera, jega angtane seyafter ogirip aa jei naawenaram, jei waakenfer gwelaiserem jamer abak-abaksus ga sene domola." ⁵² Jepga angtane Yahudimana ga aa ge towaiwebili jena jam ne nasmife. Jei ga aa ge tenaabili, "Jeje fomfoma Angtane aaiserem Jei nini Jelemana nep se golmini, ane nei ga nesa tombaabili?" ⁵³ Jepga Yesus ga aa balbabili, "Ai isa bunarsusfer balbabili, Ai Tane Angtanemana Ajei iretyaram taman waaken-giriwer. Afa aamei nini Amna As ijama tumilbeyeneye, ane aawisi Amna As ijama telibeyeneye, gam jega aamei bunar-bunarsus waakenfer gwelaiserem ijama domolyan. ⁵⁴ Angtane nini Amna aa jei tumilbenerem, ane aawisi Amna aa jei telibenerem, jei waakenfer gwelaiserem jamer abak-abaksus ga jei gam domola. Ane Ai angtane jeiserem ga As irtese terewer nunu umwef jepserem jeme. ⁵⁵ Jei abaksusfer se gwena, aam temawer nini Amnaiserem je tumilgala waakena, ane aawisi Amnaiserem jei ga fona waakena jam telbiliserem. ⁵⁶ Angtane nini Amna aa jei tumilbenerem, ane aawisi Amna aa jei telibenerem, jei jeber-jeber Abar As ge nwini, ane Ai jeber-jeber jebar As ge nwini. ⁵⁷ Uwa Jei waakenfer gwelaiserem angtanef golmini. Jei Ams baftatnant ogiribe, ane Jei gwelaiserem Ap gulbana. Jes gemerserem Aime gemer, Ai waakenfer gwelaiserem jamer abak-abaksus angtanef Ai As golmini, angtane nini Amna aa jei ne tumilbenerem. ⁵⁸ Aaiserem jeba rotisam aa jei iresanyantam taman waaken-giriwer. Asal-asala imnaiserem jei rotini mes ne dumil, jengga jei seyafter mes ge terbili. Ai rotini jes galserem Ai galyan. Angtane rotini Amnaiserem aa jei gam tumilirim, angtane jeiserem jei ga gam gwena jamer abak-abaksus." ⁵⁹ Yesus taterisi jeiserem ga Jes nasipmini jena angtane Yahudimana aa jep ge betwebuwefaram kota Kapernaum je. ⁶⁰ Angtane unggwanfer Yesus aa jei ne tikwebaatinennerem jei taterisi jeiserem jame aa galap ne sarbilirim, jei ga aa ge gubili, "Taterisi aaiserem jame daran-daransusu. Nane se taabili taterisi aaiserem?" ⁶¹ Yesus Jei tousa enggame angtane Jei aa jei ne tikwebaatinennerem jei syefer ge nasbawena taterisi aaiserem jem temawer, ane Yesus ga aa gutena, "Aamke ijama tikwena Amsa onsobafe taterisi aaiserem jem temawer? ⁶² Afa aamei Ai As jam isa damtanaram Ai Tane Angtanemana gamjon jam As tawenaram tamna Ai gwanan Ajewer iretyantam jewer, aamei jep ke waakenfer ke As isa tebana? ⁶³ Mafnana Uwa Sanbagirmana Jei gwela angtanef jeya golmini, nini angtanemanaiserem je gwelaiserem is jam golmiyen. Taterisi Ai isa Ajes bilipminirim ibe, taterisi jeiserem jei Mafnana Uwa Sanbagirmanaiserem ga jewer jela, ane je waakenfer gwelaiserem jamer abak-abaksus jes golmini. ⁶⁴ Jengga aamei afwer Ai As ijeya onsobanaram, aamei As ijama tebayan." Yesus game aa jewer gunurum, jei ga aam temawer gunu Jei gwanan-gwanansus mes towaswena angtane jes tebayanaiserem. Ane Yesus Jeime gamjon mes towaswena angtane Jei aa jei geraiserem angtane kapkaiserem jem tafnabe. ⁶⁵ Ane jepga Yesus gamjon ga aa gutena, "Aamei As ijeya onsobanaram, aamei afwer Ai As ijama tebayan. Jega jem temawer Ai gwanan Ajes bilirim enggame, afa angtane Amnip jelaiserem jener gam gunu Amnip jam foryafe, jei jam foroyan Amnibe. Afa Uwa baabeta Jam gam gulbanaram jebe, jei galap ga gam fortya Amnibe, ane Ai ga As gam tikwebaatini." ⁶⁶ Ane jes jepserem angtane unggwanfer Yesus aa jei ne tikwebaatinennerem jepga Yesus ga aane mirtene, ane jei gamjon jam ne tikwebaatiyen. ⁶⁷ Jepga Yesus ai angtane dua belas Jei ajeya tikwebaatinennerem, Jei ga as tenebaabili, "Fomfoma, aamei mese ke Ase ijama mirtene?" ⁶⁸ Simon Petrus ga aa tamawolbana, "Tuhan, ai ga nanminip asa sofwa? Taterisi Imnaiserem waakenfer gwelaiserem jamer abak-abaksus as Im golmini. ⁶⁹ Ai taterisi Imnaiserem amsama taabili. Ane amsama towaswebili Aamei Angtane Waakenam, Uwa Sanbagiri Jei Imsam baftatnant." ⁷⁰ Yesus jepga as tamawolbaabili, "Aamei angtane dua belas isa Ames destabaabili, jengga daamfenna im nenennap jeiserem, jei bwata kapkaiserem jem sanbakef jei nwini." ⁷¹ Yesus Jei Yudas tane Simon Iskaryotmana ga jes seisyatana. Jei jeiserem ga aa biltena, aam temawer Yudas safe daamfenna ai angtane dua belas Yesus Jei ajeya tikwebaatinennerem, jei Yesus ga jei se gera angtane kapkaiserem jem tafnabe.

¹ Jes jepserem taban, Yesus jepga aa wofena ona Galileyaminibe. Jei bai ona Yudeyaminiwer Jam gwife, aam temawer angtane sanbaka Yahudimanaiserem jei nels ne terelbene enggalfe Yesus jewer gam ne munbof. ² Jes galapserem Nunu Masara Jatouya jem ne Eyebaabiliserem ga mes gwetmanswena. ³ Jepga Yesus Jelem oson mesna jep ga aane bala, "Ona aaiserem jas mirsotefal, ane ona Yudeyaminiwer ga Is sofwa, jega angtane Aamei Is jei ne tikwebaatinennerem awelna Imna jebe Is ga sene domolbana. ⁴ Afa Aamei enggam Is gunurum, ’Ai angtane unggwanfer As gane damdamtaasife.’, gam jega Aamei awelna basyamer Ijam gwebiyen. Aamei aafe bwembwema unggwanfer Imes eyebaabili. Bwembwema jes galserem gamjon jas eyebaabi, jega angtane ogirip seyafter gemerserem Aamei Is ga sene damdamtaasini." ⁵ Jei gam aa jewer ge gubilirim, aam temawer Yesus Jelem oson mesna jeime Yesus jam ne tebayan. ⁶ Jepga Yesus Jei ga aa balbabili, "Nunu Amna kota Yerusalemwer sofwefe gemerje fas fala. Jengga aamei saf isa sofwa nunu namwer aaiserem afa galap-galap. ⁷ Angtane Amanyanaiserem ogiribe jei aamei is jam ne uskamswebabiyen, jengga jei Am sene uskamswebana. Jei Am sene uskamswebana aam temawer Ai enggam Ai balbabili, ’Aamei kapkaiserem ijesa eyebaabili.’ ⁸ Aamei sa sofwe masara jeiserem jebe! Ai gemerje jewer Ajam sofweyan, aam temawer nunu Amna gemerje jebe fas fala." ⁹ Yesus ga Jelem oson mesna ga gam balbabili, ane Jei ona Galileyaminip nwini. ¹⁰ Yesusem oson mesna jam aa ge sofobilirim kotana Yerusalemwer masara jeiserem jes onsobife, Yesus mese Jeime jewer ga sofwa. Jei Jam ge sofwebiyen angtane uskambar jebar. Jei ga basyamer sofwa, angtane nafsi jam ne damtayan. ¹¹ Angtane sanbaka anggwabura Yahudimana jei ga Yesus ga aane terelbene masara jeiserem jebe. Jei ga aa ge tenaabili, "Angtane jeiserem jeje fwera?" ¹² Jepga angtane unggwanfersus jen jena uskambar ga aane nastumunonno Yesusem temawer. Afwer jei enggam ge gubili, "Yesus Jei Angtane waaken." Afwer jei enggam ge gubili, "Wowo, Jei angtanes afaf-afaftababuwena." ¹³ Angtane Yesusem temawer jena jamfener ga aane nastumunonno, aam temawer jei angtane sanbaka anggwabura Yahudimana ga jes ne erebaabili. ¹⁴ Masara jeiserem ga nenennap, Yesus ga Uwa Sanbagirem Jenap ga aa kautena, jepga angtane aa towaitababili jam towas-towastababife. ¹⁵ Angtane sanbak anggwabura Yahudimana jei ga jam ge bitbitwebili, ane jei ga aa ge tenaabili, "Jeje fomfoma Angtane aaiserem Jei seyafter tousa, Jei safe sekolanabe Jei Jam kaweyan?" ¹⁶ Yesus ga aa tamawola, "Taterisi Ai Ajes towas-towasulminirim jeke Amanfenna. Fas, je Uwamana Ai As Jei baftannuntum. ¹⁷ Afa angtane taterisi Uwa Sanbagirmana waakenfer aa jei saribenerem, jei enggam ga sege towaswebili taterisi jeiserem je ke Uwa Sanbagirmana afa Amanfenna. ¹⁸ Angtane taterisi jener aa jei gam nasbilirim enggam gam gunu, ’Angtane nafsi as gane pujitef.’ Jengga angtane afa jei angtane nafsi aa jei gam towastababilirim enggam gam balbabili, ’Uwa Sanbagiri sa pujite Ai As Jei baftannuntum!’, angtane jeiserem jei bunarsusfer gam nasowena. Taterisi afaf-afafa jemniwer fas. ¹⁹ Nabi Musa jei Hukumu Uwa Sanbagirmana ibe is mes golmil. Jengga aamei Hukumu jeiserem waakenfer ijama sarbiyen. Jeje bafa aamei As ijama munbofe?" ²⁰ Jepga angtane anesus jeiserem jei ga aa ge tamawolbili, "Bwata kapka jei Ims eyebana ga Is kabwaktana, ane jega jem temawer Aam ga gam ga Im gunu. Angtane fas Ims munbofe." ²¹ Yesus ga aa tamawola, "Ai bwembwema ga Ai eyebilint nunu Sabateme, ane aamei seyafter ga ima bitbitwena. ²² Jeje bafa aamei ga ima bitbitwena? Aamei tane girtowai imna nunu Sabateme ima sunattababuwena, aam temawer Nabi Musa jei enggam gul, tane girtowai ga jam isa sunattababili. (Jengga sunat osiri jeiserem, Nabi Musa jam towaiwulyon, jengga asal-asala nemnaiserem ga jei ne towaiwul.) ²³ Aamei tane girtowai ga im sunattana nunu Sabateme, jega aamei hukumu Nabi Musa aa jes tulisulum ijama ayebiyen. Afa jeiserem je bunare, gam jega angtane waakentala jemba bunaram. Jeje bafa aamei ga As ima nasbana aam temawer Ai angtane tifni seyafter gemerserem As waakentana nunu Sabateme? ²⁴ Aamei angtane nwemfener damtalaiserem tatarfer ijama balyan, ’Jei kapka gam eyebili.’ Jengga bunarsusfer jamer igama damtana inibe." ²⁵ Jepga angtane kota Yerusalemmana afweraiserem ga aa ge tenaabili, "Angtane ke aas aa jes ne terelbenerem jam ne munbofe? ²⁶ Gasa damta! Jei jame teisyenfer nasowena angtane uskambar jem nwenabe, ane angtane jei taterisi afa jam ne tamawolbiyen. Angtane sanbakaiserem jei ke mes ge towaswebili enggame, Angtane aaiserem bunarsusfer Jeiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif? ²⁷ Nei nemsama towaswena Angtane aaiserem Jei aa jewer jelaram. Jengga Mesias jeiserem Jei jam se fortyaram, angtane afa jam towasweyan Jei fwer jela." ²⁸ Jepga Yesus aa gemer towas-towastababilirim Uwa Sanbagirem Jenabe, Jei ititmer ga aa gutena, "Aamke tousa Ai nansa, ane Ai ga Afwer jela? Ai Alem baabeteme Ajam foroyan. Ai As Jei baftannu, Jeiba bunaram. Aamei Jei ijama damdamtaasiyen, ²⁹ jengga Ai Jei Ames damdamtaasini, aam temawer Aiba AJemniweram jelant, ane Jei ga Ai As Jei baftannunt." ³⁰ Jes galapserem Yesus ga safe jam ne temilf, jengga angtane afa Jei jam ne temilyan, aam temawer nunu Jemna jepserem gemerje fas fala Jei jem terfe. ³¹ Jepga angtane uskambar jep gemerserem, jei ga Yesus jep ga waakenfer ga aane tebana, ane ga aa ge gubili, "Ga fomfoma, afa Mesias jeiserem Jei jase fortyaram, Jei ke bwembwema anesus gase gwebuwena Angtane aaiserem Jemniwer?" ³² Angtane safna Farisimana ga aa ge sarbili angtane uskambar jep aaiserem jei jena aane nastumunurum Yesusem temawer. Jei game aa jewer ge sarbilirim, angtane imam-imam sanbakaiserem ane angtane safna Farisimana jei ga angtane Jena Uwa Sanbagirmana aa jei ne geraibesnenewenaram, jei ga aane balbabili jam gwife, Yesus jewer gam ne temilfe. ³³ Yesus ga angtane uskambar jeiserem ga aa balbabili, "Ai ibar aafe abakferyan. Ane gamjon ga As warauwa As Jei baftannuntum Jemnibe. ³⁴ Aamei ga As isa terelbene, jengga As ijama damtayan. Aamei ijama foroyan tampata Ai Ajep nwinirim jebe." ³⁵ Jepga angtane sanbak anggwabura Yahudimana jena ga aane tenaaminenne, "Angtane aaiserem Jei fwer se gwina, jega nei ga nejama damtayan? Fomfoma, Jei kota-kotana Yunanimanaiserem jebe ke jep se gwina angtane Yahudimana aa jei ge nwinbenerem, ane anggwabura Yunanimana jep aaiserem ga Jei se towas-towastababili? ³⁶ Igi jemna fomfoma, Jei game aa jewer gunurum enggame, ’Aamei ga As isa terelbene, jengga As ijama damtayan. Aamei ijama foroyan tampata Ai Ajep nwinirim jebe.’?" ³⁷ Masara jeiserem jemna nunu umwef ga, nunu igsususerem, Yesus ga Jena Uwa Sanbagirmana ga jep fiton, ane ititmer ga aa gutena, "Angtane fo botona aa jei gam folbanaram, jei ga Amnip se fortya, ane fona jewer gam telbife. ³⁸ Taterisi Uwa Sanbagirmanaiserem jep ga mes ne tulisul enggame, ’Angtane Ai As jei gam tebanaram, jem inip ga fona abakfer gwelaiserem ga jese forominenne.’ " ³⁹ Yesus ga Mafnana Uwa Sanbagirmanaiserem Jei ga Jem temawer nasowena. Angtane Yesus aa jei ne tebanaram, jei ga Mafnana jeiserem ga jei sene domola. Jes galapserem Uwa Sanbagiri Jei Mafnana Jelemanaiserem Jei nalef jam golmiyen, aam temawer Yesus Jei gemerje Jam teryen, ane Jei gemerje taman waaken-girip Jam taweyan. ⁴⁰ Angtane uskambar ga Yesus ne sarbasini Jei aa gam nasowenaram, ane angtane afweraiserem enggam ga aa ge gubili, "Angtane aaiserem Jei bunarsusfer Nabisam." ⁴¹ Angtane afweraiserem ga enggam ge gubili, "Angtane aaiserem Jeiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif." Jengga afwer ga enggam ge gubili, "Mesias Jei Jam jelyan ona Galileyaminiwer. ⁴² Taterisi Uwa Sanbagirmanaiserem jep ga enggam baatultel, Mesias Jei ga asal-asala Raja Daudmana. Jei ga tamna Betlehemminiwer se jela, tamna Daud aa jep nwinim." ⁴³ Ane jepga angtane uskambar jei Yesusem temawer ga aa ge doksobana. ⁴⁴ Angtane afwer jei enggam ge gubili jei Yesus jam ne temilf, jengga angtane afa Jei jam temilyan. ⁴⁵ Angtane Jena Uwa Sanbagirmana aa jei ne geraibesnenewenaram, jei gamjon ga aa ge waraubitne angtane imam-imam sanbakaiserem ane angtane safna Farisimana mese jemnibe. Imam-imam ane angtane safna Farisimana jei ga aane tenebaabili, "Jeje bafa aamei Yesus aafe ijama aftayalyan?" ⁴⁶ Angtane Jena Uwa Sanbagirmana aa jei ne geraibesnenewenaram jei ga aa ge tamawolbili, "Angtane afa fas game waakenfer jam nasoweyan Jei gamserem." ⁴⁷ Angtane safna Farisimana jei kakalmer ga aane tenebaabili, "Jei ke aamei mese ke is mes afaftababili? ⁴⁸ Fomfoma, angtane sanbaka anggwabura Yahudimana afa angtane safna Farisimana mese, jei ke Yesus ke mes ne tebana? Fas! ⁴⁹ Jengga angtane uskambar aaiserem jei Hukumu Nabi Musa aa jes tulistababilim jei jam ne towaswebiyen. Ane Uwa Sanbagiri Jei angtane uskambar aaiserem se tamtamtababili." ⁵⁰ Nikodemus ga jep fina. Jei mese jeime angtane safna Farisimana. Jei gwanan Yesusminip aa jei fortyantam. Jei ga aa balbabili, ⁵¹ "Hukumu Nabi Musa aa jes tulistababilim jep ga enggam, nei angtane jeiserem gwanan jam negma sarbana, ane kapka jei aa jes gam eyebilirim jeiserem gwanan ga jam negma towasweibene. Jeiserem taban, nei ga angtane jeiserem jem temawer ga negma bala, ’Jei angtane kapka.’ " ⁵² Jepga jei Nikodemus ga aane tamawolbana, "Aamei mese ke angtane ona Galileyamana? Taterisi Uwa Sanbagirmana waakenfer se gerabiste! Aamei jep ga is domoltena, angtane nabi afa Galileyaminiwer jei jam jelyan." (( ⁵³ Jep ga taban, angtane seyafter ga aa ge sofobuwena jelem jenabe.

¹ Jengga Yesus Jei Otumu Saitunwer ga sofwa. ² Nunu jeiserem jem gwirmer Yesus Jei gamjon ga aa warausa Jena Uwa Sanbagirmanaiserem jebe. Ane Jemnibe angtane ga anesus ga aa ge betwebili. Jepga Yesus ga nwintena, ane angtane jeiserem ga aa towas-towastababili. ³ Guru-guru Hukumu Nabi Musa aa jes tulistababilim aa jei ne towas-towastababuwenaram, ane angtane safna Farisimana mese jei wini maaryena aa jei gwebilirim ga aane domola. Ane jepga aane taabili, ga aane afolfala Yesusminibe. Jei wini jeiserem ga aane tergenbili nenennap fyafe, ⁴ ane jei Yesus ga aane bala, "Guru, wini aaiserem amsa domola, ane ga aya taabili jei maaryena jame aa galap gwebilirim. ⁵ Hukumu Musamanaiserem nei nejesa gerabistowenaram jebe enggam baatultel wini maaryena aa jei gwebilirim, jei tonmer gane munbili jamer futu. Aamei Ifom gunu?" ⁶ Jei game aa jewer ne tenebanaram, jei enggalf ne tenebana Yesus gane unggwasbaf, jega jei taterisi kapkaiserem Jem temawer ga sene nasbaibene. Jengga Yesus Jei jamfener aanwestena, ane tafame onnap ga aa tulistaabitena. ⁷ Jei gamjon jame aa galap ne tenebawenaram, Yesus Jei ga duka gamjon ga aa gaartena, ane ga aa balbabili, "Afa angtane imniwer etam-etamyanaiserem, gwan ga wini aaiserem ga jese tabtabili toneme." ⁸ Jes jepserem taban, Yesus Jei gamjon ga aa aanwestena, ane onnap gamjon ga aa tulistaabitena. ⁹ Yesus game aa galap ne sarbanaram, Jei game aa galap gutenaram, jei ga jewer ga aa ge sofobili, daamfen-daamfenneme gwan ga sanbakawer jamer bar. Jepga Yesus ane wini jeiserem jep aa jei finaram ga jetefener ne mirsotefala. ¹⁰ Jepga Yesus duka gamjon ga aa gaartena, ane wini jeiserem ga aa bili, "Iye, anggwana seyafter aaf jeiserem jei fwera? Jei aamei ke is jam ne bilyen jam tamtamulfe?" ¹¹ Wini jeiserem Yesus ga enggam tamawolbana, "Uwa, fas." Yesus ga enggam bili, "Samfer, Ai mese is Ajam bilyen jam tamtamulfe. Namwer gase sofwe, ane etam-etama kapka gamjon ijam eyebiyen.")) ¹² Yesus Jei ga angtane uskambar jep aaiserem jemnip gamjon ga enggam gunu, "Aiba ogiri aaiserem jem nafsam. Angtane Ai As jei gam tikwebaatinennerem, jei gwinip jam wofeyan, jengga jei nafa gam domola, nafa waakenfer jem gwelaiserem aa jei gam destaibenerem." ¹³ Angtane safna Farisimana jei Yesus ga aane bala, "Aamei namwer Iner nasowena Ilem temawer, ane Aamei Ilem temawer Ijes bilirim, je bunaryan. Jengga ai enggam aya gunu, angtane afa nafsi jewer agma sarbaf enggame, taterisi Imna jeba bunaram." ¹⁴ Yesus ga tamawolbaabili, "Ai safe taterisi Alem temawer saf As nasbabili, taterisi Amna jeiserem je bunar, aam temawer Ai tousa Ai Afwer jela, ane Ai fwer As sofwa. Aamei seyafter teisyena Ai Afwer jela, ane Ai ga fwer As sofwa. ¹⁵ Aamei angtane nafsim temawer enggam ima gunu, ’Jei kapka gam eyebili.’ Jengga aamei nwemfener igama domola. Ai angtane nafsiserem jem temawer afa Ai Ajam balyan enggame, ’Jei kapka gam eyebili.’ ¹⁶ Jengga aaiserem ga Ai jafner gunu enggame, afa Ai enggam jam As gunurum angtane jei kapkaiserem ga jes ne eyebili, taterisi Amna jeiserem jei bunar, aam temawer Ai Anfentowaiyan. Uwa Ai As Jei baftannuntum, Jei mese aa gunu enggame taterisi Amna jeiserem je bunar. ¹⁷ Taterisi Nabi Musa ip is jes golmilim jep ga enggam baatultel, taterisi angtane naura aa jes gangge nasbilirim, jeiserem jei bunar. ¹⁸ Taterisi Alem temawer jesa gangge nasbilirim, taterisi jeiserem ga naura; afelna ga Ai nasbili, ane afelna ga Uwa nasbili Ai As Jeye baftannuntum." ¹⁹ Jepga jei Yesus ga aane tenebana, "Uwa Imna Jei fwera?" Yesus ga aa tamawola, "Aamei As ijama damdamtaasiyen, ane Uwa Amnaiserem Jes mese ijama damdamtaasiyen. Afa aamei Ai As jam isa damdamtaasinirim, gam jega Uwa Amnaiserem Jes mese jegme isa damdamtaasini." ²⁰ Yesus Jei taterisi seyafter jeiserem ga enggalap nasbabili, Jei angtane aa galap towas-towastababilirim Jena Uwa Sanbagirmanaiserem jebe. Jei ga angtane jep towas-towastababili mwona doini aa jep ne bokolnsowenaram kotakabe. Jengga angtane Jei jam ne temilyan, aam temawer nunu Jemna jepserem gemerje fas fala. ²¹ Yesus Jei ga gamjon ga aa balbabili, "Ai As sofwa. Aamei Ai ga As isa terelbene, jengga aamei ga isa tere ilem etam-etamabe. Tamna Ai Ajewer sofwaram, aamei jebe ijama foroyan." ²² Ane jepga angtane sanbaka anggwabura Yahudimanaiserem jei ga aa ge gubili, "Jei enggam gunu, ’Tamna Ai Ajewer sofwaram, aamei jebe ijama foroyan.’ Jei engbar ke enggam gunu Jelem inibe, Jei Jenjen se saftaniwili?" ²³ Jepga Yesus ga aa balbabili, "Aamei gwonawer ima fortya, jengga Ai winsiwer Ai iritya. Aamei angtane ogirmana, jengga Ai ogirmanyan. ²⁴ Jeiserem Ai aamei ga isa jem temawer balbabili, ’Aamei ga isa tere ilem etam-etamabe.’ Ane aamei ga isa tere ilem etam-etamabe, afa aamei enggam ijama taabiyeneye, Aiba bunarsusfer Jesam Ai AJei nasounaram." ²⁵ Jepga jei ga Yesus gane tenebana, "Aamei bunarsusfer nansa?" Yesus ga aa tamawola, "Aiba Jesam gwanan fwater isa AJei balbabisintim. ²⁶ Taterisi jame anesus im temawer Ai safe Ajes nasbife, ane is Ajam tener-tenerbaabuwefe. Jengga Jei Ai As Jei baftannuntum, ga Jes isa tebana. Taterisi Jemniwer Ai Ajes saribenerem, Ai taterisi jeiserem ga As nasipminenne angtane ogiri aaiserem jep aa jei ge nwinbenerem." ²⁷ Jei jam ge towaswebiyen enggame Yesus ba taterisi Uwa Jelemanaiserem ga Jem temawer nasbili. ²⁸ Jepga Yesus ga aa balbabili, "Aamei Ai Tane Angtanemanaiserem ti salibip ijeba daktanswefaram, aamei jepga isa towaswena enggame Aiba Jesam Ai AJei gunurum. Ane aamei ga isa towaswena enggame Ai apgal jigala Aner afa Ajam eyebiyen. Jengga Ai jetefener Agam bilipmini, Uwa Amna Ap As jes gam bilibenerem. ²⁹ Jei Ai As Jei baftannuntum, Jei Abar seyafter. Jei Ai As Jam tatwaltaasiyen, aam temawer Ai jeber-jeber Agam eyebili enggalfe ini Jemna jem Agam saaser-saasertabana." ³⁰ Seyafter jeiserem Yesus jame aa nasbilirim, angtane uskambar Jei ga aane tebana. ³¹ Yesus Jei ga aa balbabili angtane Yahudimana Jei aa jei ne tebanaram, "Afa aamei Ai isa gemer balbabilirim gemer isa gwenaram, gam jega aamei bunarsusfer As ijeya tikwebaatinennerem. ³² Jepga aamei bunarsusfer isa towaswena enggame Ai bunarsusferam nasowena, ane jega jem temawer aamei ga isene aftabunnu etam-etama kapkaiserem jewer." ³³ Jei ga aa ge tamawolbili, "Ai seyafter aaiserem asal-asala Abrahammana. Ai gemerje angtane nafsiserem as jam ne armantababiyen. Aamei Ijes bilirim enggame, ’Aamei ga isene aftabunnu.’, taterisi jeiserem jemna igi jei basa?" ³⁴ Yesus ga balbabili, "Ai isa bunarsusfer balbabili enggame, angtane etam-etama kapka aa jei gam gwebilirim, etam-etama jeiserem jei ga jem sanbakfe ga jei gam nwini. ³⁵ Angtane aa jes gam armantanaram, jei abakfer jam nwinyen angtane sanbaka jelemana aa jei gam armantanaram jebar. Jengga tane jelemansususerem jam armantayanaiserem jei ga jeber gam nwini jamer abak-abaksus. ³⁶ Jega jem temawer, afa Ai Tane Uwa Sanbagirmana Ai aamei is Ajes aftabunnurum, gam jega aamei bunarsusfer tifni seyafter ga isa ferwetini. ³⁷ Ai Amesam towaswena enggame aameiba asal-asala Abrahammanam. Ane aamei Ai safe As ijama munbof, aam temawer taterisi Amnaiserem jei fas ilem inibe. ³⁸ Ai Uwa Amnaiserem Jemniwer jes Agam domolbanaram, jeiserem ibe ga is Ajes nasipmini. Jengga ilem temawer, uwa ilemana is jes gane towas-towasulminirim, ga jes igama eyebili." ³⁹ Jei ga aa ge tamawolbili, "Uwa amnaiserem jei Abraham." Jepga Yesus ga tamawolbaabili, "Wowo, afa aamei bunarsusfer tantantane Abrahammanaye, gam jega awelna Abraham aa jes eyebilim awelna jeiserem aamei jon ga jam isa eyebili. ⁴⁰ Ai taterisi bunarsusfer Uwa Sanbagirminiwer jes Agam sarbilirim, ga isa jes Agam nasipmini ibe. Jengga aamei Ai As ijama munbof. Abraham jei game afa jam eyebiyen. ⁴¹ Aamei ga awelna uwa ilemanaiserem awelna jemnaiserem ga ijesa eyeibene." Jei ga aa ge tamawolbili, "Ai gam ke maaryen tane? Uwa amnaiserem Jei daamfenna, Jei ga Uwa Sanbagiri Jenfentowai." ⁴² Jepga Yesus Jei ga aa balbabili, "Wa, afa Uwa Sanbagiri Jei bunarsusfer im Uwaye, gam jega aamei Ai As jam isa nesiktene. Aamei As isa nesiktene, aam temawer Aiba Uwa Sanbagirminiweram jelant, ane namwer ga Ai aaf Ai nwini. Ai Aner Ajam guyon aaf foryafe, jengga As Jeye baftannunt. ⁴³ Jeje bafa aamei waakenfer ijama saryan Ai isa Ajes bilipminirim? Aamei waakenfer ijama saryan, aam temawer aamei taterisi Amnaiserem jei ibaifa gwebili ijama sarbife." ⁴⁴ Yesus gamjon ga balbabili enggame, "Uwa imnaiserem jei ga bawas, ane aamei igemera gwena uwa imna jei aa gemer gunurum. Gwanan-gwanansus galapserem bawasa jeiserem ga jei towaiwul angtane jam munbofe. Jemnibe taterisi bunarsusfer aaiserem je fas. Jei taterisi bunarsusfer aaiserem jam towaswebiyen. Afa jei angtanes gam afaf-afaftababilirim, jei ga bunar je awelna jemna ga gam. Jei afaf-afafsusu, ane afaf-afafa seyafter gemerserem bura ga jemnip tenbisini. ⁴⁵ Jengga Ai taterisi bunarsusfer aaiserem Ai ga isa Ajes bilipmini ibe, ane jega jem temawer aamei taterisi Amnaiserem ijama taabiyen, aam temawer taterisi Amna jeiserem is enggam gweretababili aamei etam-etamabara. ⁴⁶ Angtane afa nansa im nenennabe Am temawer aa jei gunurum enggame Ai etam-etama kapkaiserem ga Ajes eyebili? Afa Ai taterisi bunarsusfer aaiserem ibe is Ajes nasipmiliye, gam jega bafa aamei Ai As ijama tebayan? ⁴⁷ Angtane Uwa Sanbagirmanaiserem jei ga taterisi Uwa Sanbagirmanaiserem ga jei gane saribene. Jengga aamei angtane Uwa Sanbagirmanyan, ane jega jem temawer aamei baife ga ijewera gwena, Ai As ijama sarbasife." ⁴⁸ Angtane Yahudimanaiserem jei Yesus ga aane tamawolbana, "Ke bunar ai enggam aya gunu, ’Aamei angtane Samarya, ane Aamei bwata kapkaiserem ga Is jei kabwana?’ " ⁴⁹ Jepga Yesus ga tamawolbaabili, "Ai bwata kapka As jam kabwayan. Ai Uwa Amnaiserem ga Ajes pujitene, jengga aamei ga As ijama imei-imeitana. ⁵⁰ Ai angtane nafsi Ajam balbabiyen enggalfe Ai As jam ne pujitef. Jengga Ai As Jei pujiteleiserem ga daamfenna, ane jeiserem Jeiba Uwa Sanbagiri. Jei waakenfer Jei se gunu Am temawer. ⁵¹ Ai isa bunarsusfer balbabili enggame, angtane Ai Ajes bilirim jeiserem aa jei ne eyebilirim, jei jam ge terbiyen jamer abak-abaksus." ⁵² Jepga angtane Yahudimana jeiserem jei Yesus ga aane bala, "Namwer ai amsama towaswena enggame Aamei bwat kapkaiserem Is jeyam kabwana! Abraham jena jei mes ter, ane nabi-nabi mese jeime mes ge terbil. Jengga Aamei enggam Im gunu, ’Angtane Ai Ajes bilirim jeiserem aa jei ne eyebilirim, jei jam ge terbiyen jamer abak-abaksus.’ ⁵³ Abraham jena jei mes ter, ane nabi-nabi seyafter jeime mes ge terbil, ane Aamei aaiserem ga nansa? Jeje fomfoma enggame Aamei unggwan-girsusu uwa amna Abrahamminiwer?" ⁵⁴ Yesus ga aa tamawola, "Afa Ai An Ana jam Agam pujitenerem, pujiyana jeiserem je jemna igi fas. Jengga Ai As Jei pujitenerem, Jei ga Uwa Alemanaiserem. Aamei Jei igama jenbewenaram enggame, Uwa Sanbagiri ilemanaiserem. ⁵⁵ Ane aamei Jei waakenfer ijama damdamtaasiyen, jengga Ai Ames damdamtaasini. Afa Ai enggam jam As gunurum Ai Jei Ajam damdamtaasiyen, gam jega Ai angtane ol kabwak, aamei seyafter galserem. Jengga Ai Jei Ames damdamtaasini, ane Ai ga Ai eyebili Jei aa jes bilirim. ⁵⁶ Abrahamem temawer ga enggam, uwa imnaiserem Abraham, jei ini jemna saaser-saaserfer folbal, nunu Ai jem As fortyaram jei se domolsa. Jei nunu jeiserem mesam domol, ane ini jemna saaser-saaserfer folbal." ⁵⁷ Ane jepga angtane Yahudimanaiserem jei ga Yesus ga aane bala, "Imna umuru gemerje tahunu lima pulu. Aamke Abraham ke Imes damtana?" ⁵⁸ Yesus ga aa tamawola, "Ai isa bunarsusfer balbabili enggame, Abraham nalefe jam suruyon, Ai Ames gwena." ⁵⁹ Jepga angtane Yahudimana jeiserem jei tuna ga aane kitultena, jei safe Yesus jem ne munbofe. Jengga Yesus Jei Jena ga Jam syetasnenne, ane ga aa sofwa, Jena Uwa Sanbagirmanaiserem ga aa mirultefala.

¹ Yesus Jei jame aa galap wofenaram, Jei angtane nwe kofaiserem ga damtana. Jei galmer surnunt. ² Ai angtane Yesus ajeya tikwebaatinennerem ai Yesus ga aya tenebana, "Guru, jeje bafa angtane aaiserem nwe kofa ga aane gernant? Etam-etama kapkaiserem ke jei eyebilint, afa ene jeta ke jei ge eyebilint?" ³ Yesus ga as tamawolbaabili, "Jemna nwena kofa jeke enggam jei etam-etamabara, afa etam-etama ene jetamana. Nwena jemna kofa, jega angtane ga sene domolbana baabeta Uwa Sanbagirmana awelna aa jep gwebilirim angtane aaiserem jemnibe. ⁴ Uwa Sanbagiri Ai As Jei baftannuntum, nei awelna Jemna nafamer nesa eyeibene, onafa gemer aa galap falaram. Abakferyan ona gase gigitswena, ane angtane awelnabe afa jam naaweyan. ⁵ Nunu abakfer Ai ogiri aaiserem jep Ajebar nwinirim, Ai angtane ogiri aaiserem jep aa jei ge nwinbenerem Ai jei Ai As naftabili, aam temawer Aiba ogiri aaiserem jem nafsam." ⁶ Yesus game aa gutenaram, Jei maka onnap ga aa sirstena, ane maka jeiserem ona jebaner ga aa sigwalisulu. Jepga angtane nwe kofa jeiserem nwena jem ga aa gweyimbene, ⁷ ane Jei ga aa bala, "Se gwi, fo mwona Siloam nwena jep ga is wirsotna." (Bosna Siloam igi ga enggam, mesam baftana.) Ane angtane jeiserem ga aa gwina, nwena ga aa wirsona, ane ga aa warauwa jelem jenap waakenfer ga anggasini. ⁸ Angtane jeiserem jelem afelen mesna, ane angtane gwanan aa jei ne damtanaram jafner nwiniserem, ane doif ga gam aber-aberwena, jei jena ga aane tenaaminenne, "Aake jes, angtane jamfener aa jeye nwinwefaram, ane ga gam aber-aberwena?" ⁹ Afweraiserem jei ga aa ge gubili, "Jeiba jesam." Jengga afwer ga enggam ge gubili, "Jesyan, jengga jemna mirmasena galserem." Jengga angtane jeiserem jener ga aa gutena, "Aiba jeisam." ¹⁰ Angtane afweraiserem jei ga aane tenebana, "Aam je ifomfom etamwena jamer ga imasef anggasini?" ¹¹ Angtane jeiserem ga aa tamawola, "Angtane bosna Yesus ona makabaner ga Jei sigwalisulu, ane beteka jeiserem jem ga nwena ga as gweyimbene. Jepga as bala, ’Gase gwi fo mwona Siloam nwena jep ga is wirsotna!’ Ane ai jewer ga ai sofna, ane nwena fonabe jam agalap wirsotnaram, ai waakenfer ga ai anggasini." ¹² Jepga jei ga aane tenebana, "Angtane jeiserem ga fwera?" Jei ga aa tamawola, "Ai ke tousa." ¹³ - ¹⁴ Nunu jeiserem nunu ga Sabat, Yesus Jei ona makabar ga jem sigwalisulu, ane angtane nwe kofaiserem jem ga waakentana. Jepga jei angtane gwanan nwe kofaiserem jei aane aftawena angtane Farisiminibe. ¹⁵ Jepga angtane safna Farisimana jeime angtane jeiserem ga aane tenebana, jei fomfom anggasini jem temawer. Jei ga aa tamawola, "Jei ona makabaraiserem nwena amna ga ase jem gweyimbene, ane ai nwena aner ga ai wirsona, jepga ai anggasini." ¹⁶ Angtane safna Farisimana afweraiserem ga aa ge gubili, "Angtane nwena aa Jei gweyimbenerem Jei Uwa Sanbagirminiwer Jam jelyan, aam temawer Jei nunu Sabat awelna nei nejema gwebiyeneiserem, Jei awelna jeiserem ga jem eyebili." Jengga angtane afweraiserem enggam ga aa ge gubili, "Jeje fomfoma angtane etam-etamabaraiserem bwembwema enggalaiserem ga gam eyebili?" Jepga angtane ga aa ge wagwagwebili, ane jenjen ga aa ge doksobana. ¹⁷ Angtane safna Farisimana jei ga angtane gwanan nwena kofa jeiserem gamjon ga aane tenebana, "Aamei ifom gunu ilem inibe Angtane jeiserem jem temawer, Jei nwena imna is Jei waakensobanaram?" Angtane gwanan nwena kofa jeiserem enggam ga tamawola, "Jeiba nabisam." ¹⁸ Jengga angtane sanbaka Yahudimana jeiserem jei taterisi jeiserem jam ne taabiyen enggame, angtane jeiserem jei gwanan nwe kofam, ane namwer aas jepserem jei ga mes anggasini. Jega jem temawer jemna ene yo jeta ga jewer ne jenmini. ¹⁹ Jepga jei ene yo jeta ga aane taanaamini, "Tane aaiserem bunarsusfer ke imna, nwe kofmer aa jei surnuntum? Jei namwer fomfoma anggasini?" ²⁰ Ene yo jeta ga aa ge tamawolbaabili, "Ai enggame ai ge towaswena tane aaiserem jeiba amnam, ane bunar jei nwe kofmer surnunt. ²¹ Jengga ai ajam ge towasweyan jei namwer fomfom anggasini, ane ai ajam ge towasweyan nwena jemna nane waakensobana. Jenater sa teneba; jei mesam sanbagirswena. Waakenfer jener ge nasbi!" ²² Ene jeta angtane jeiserem jei gam aa jewer ge balbabilirim, jei aam temawer ga balbabili angtane sanbaka Yahudimanaiserem ga jes ge erebaabili. Angtane sanbaka Yahudimana jei ula aasaje fwater ne mwangbisini enggame, angtane aa jei gam nasbinennerem angtane nafsife, "Yesus Jeiba Mesiasam, Angtane Uwa Sanbagiri Jei bunarsusfer aa Jes balam Jam baftanafe.", angtane jeiserem jei jamer gan surbono jena angtane Yahudimana aa jep ge betwebuwefaram jewer. ²³ Jega jem temawer angtane jeiserem jem ene yo jeta enggam ga jewer ge gunu, "Jei mesam sanbagirswena; jenater sa teneba!" ²⁴ Ane jei ga angtane gwanan nwe kofaiserem jei ga gamjon ga aane jenbene, ane ga aane bala, "Aamei bosna Uwa Sanbagirmana tefner is pujiwulbono. Angtane ijes balaram Jemna bosna ijam pujiwulboyon, aam temawer ai enggam aya towaswena, Angtane jeiserem jei etam-etamabara." ²⁵ Angtane gwanan nwe kofa jeiserem ga tamawola, "Angtane jeiserem Jei ke angtane etam-etamabara afa fas, ai ke tousa. Jengga ai enggam ai towaswena, ai gwanan ai nwe kofa, jengga aas jepserem ai ames anggasini!" ²⁶ Jepga jei gamjon ga aane tenebana, "Jei ibe is bas eyeibene? Jei is fom gwebana, jega aamei ga im anggasini?" ²⁷ Jei ga aa tamawola, "Aiba ibe isa mesam nasipmini, jengga aamei ijama sarbiyen. Jeje bafa aamei gamjon ijama sarbife? Gam ke aamei mese Jei igama tikwebaatif?" ²⁸ Ane jepga angtane gwanan nwe kofa jeiserem jei ga aane nasbana, ane ga aane bala, "Aamei Angtane jeiserem ijes tikwebaatini! Jengga ai Nabi Musa ajesa tikwebaatini. ²⁹ Ai enggame ai amsama towaswena Uwa Sanbagiri Jei Musafar mes ge nasowel. Jengga Angtane jeiserem ai ajama towaswebayan Jei fwer jela." ³⁰ Angtane gwanan nwe kofa jeiserem jei ga aa gutena, "Jeje fomfoma, aamei Angtane jeiserem ijama towaswebayan Jei fwer jela, ane Jei safe as mes waakentana jamer ai anggasini. ³¹ Nei enggam nemsama towaswena Uwa Sanbagiri Jei angtane etam-etamabara Jei Jam batobaabiyen, jengga Jei angtane enggalaiserem ga jes gam batobaabili, angtane Uwa Sanbagiri aa jei gane sembatanaram, ane aa jei gane eyebilirim Uwa Sanbagiri aa jes gam bilipminirim. ³² Ogiri aa gemer etamwelam, nejama saryan enggame, angtane aasaje angtane nwe kofmer suruluserem ga jes waakentana, ane jei ga aa anggasini. ³³ Afa Angtane aaiserem Jei Uwa Sanbagirminiwer Jam jelyanaye, Jei bwembwema aas galserem afa jam eyebiyen." ³⁴ Jei ga aa ge tamawolbili, "Aamei etam-etamabaner igalap surnuntum, aamke i ams towas-towastababif?" Jepga jei angtane gwanan nwe kof jeiserem ga aane surbono jena angtane Yahudimana aa jep ge betwebuwefaram jewer. ³⁵ Yesus Jei jame aa galap sararam enggame, angtane gwanan nwe kofaiserem jei jena angtane Yahudimana aa jep betwebuwefaram jewer mes ne surbono, Yesus Jei ga angtane jeiserem ga aa terelbene, ane ga aa bala, "Aamke Tane Angtanemana ke imes tebana?" ³⁶ Angtane jeiserem jei Yesus ga aa tamawolbana, "Uwa, gwanan ams towasta Jei nansa, jega ai Jei gam as tebana!" ³⁷ Yesus angtane jeiserem ga aa tamawolbana, "Aamei Jei imesam damtana. Aiba Jesam, namwer aamei iJebar ge nasowenaram." ³⁸ Jepga angtane jeiserem ga aa gutena, "Tuhan, ai Ims tebana!" Ane jei Yesus ga sembatana. ³⁹ Yesus ga aa gutena, "Ai ogiri aaiserem jebe enggalf Ai fortyant angtane Agam syentabaabif, jega angtane nwe kofaiserem jep gam ge anggabisif, ane angtane jam anggasiliserem jemna nwena jep gam ge kofwebaamif." ⁴⁰ Ane angtane safna Farisimana afwer jep aaiserem jei jame aa galap ge sarbilirim Yesus game aa gutenaram, jepga Yesus ga aane tenebana, "Aamke enggam Im gunu, nwena aman mesna ke kofa?" ⁴¹ Yesus ga aa tamawolbaabili, "Afa aamei bunarsusfer seyafter aaiserem ijama towaswebiyeneye, aameiba angtane nwe kofa jes gamserem, ane gam jega aamei tamtamtalaiserem ijama domolyan. Jengga aamei enggam ima gunu, ’Ai ajama anggasini.’ Jega jem temawer aamei tamtamtalaiserem igemera domola."

¹ Yesus Jei seisya taterisi aaiserem ga nasbili, "Ai taterisi bunarsusfer aaiserem isa Ajam nasipmini, angtane domba jenabe aa jei gam kautenaram pagara jam gam taramiswenirim, jei mwonawer jam kauteyan, angtane jeiserem jeiba komkom anggwasam. ² Jengga angtane mwonawer aa jei gam kautenaram, angtane jeiserem jei ga angtane dombana aa jei gam gerebaabisnennerem. ³ Angtane mwona aa jei gam gerebaasnennerem, jei mwona ga gam tertebaasini jebe. Jei ga gam kautena, ane dombana jelemanaiserem ga gam jenbebili bosna jelemanaiserem daamfen-daamfenneme. Domba-dombana jeiserem jei ga gane sarbana, ga gane onsobana, ga gangge tobitintye domba jenawer. ⁴ Angtane jeiserem domba-dombana jam gam tosobaabistenaram, jei ga gam danna. Domba-dombana jeiserem ga gane onsobana amnuwer, aam temawer jei fwater gane towaswebili taterisi gulu jemna. ⁵ Dombana jei angtane nafsi jam ne onsobayan. Jengga enggam jei jemniwer jam gangge nunggirbene, aam temawer jei taterisi gulu angtane nafsi jemna jam ne towaswebiyen." ⁶ Yesus Jei seisya taterisi jeiserem ga jes towas-towasulmini jebe, jengga jei jam ne sarbiyen Yesus Jei bas seisyawulmini. ⁷ Yesus gamjon ga aa balbabili, "Ai taterisi bunarsusfer aaiserem isa Ajam nasipmini, Aiba domba jena mwa kautelaiserem jes galserem. ⁸ Angtane seyafter gwanan aa jei ge forobityerem mwa kautelabe Ai nalef Ajam foroyan galabe, jei ga seyafter komkom anggwa. Ane domba-dombana jei taterisi gulu jemna jam ne saripmiyen. ⁹ Aiba mwa kautela galserem. Angtane Am tarasamer aa jei gam kautenaram, jei ga jes gane waakentababisini. Jei gam kautena, gamjon gam totintye, ane jei tumilgala gane domola, ane afweraiserem jes mese. ¹⁰ Komkom anggwa jei ga galfener gangge forobitye komkoma jep gane gwebif, ane gane munbobif, ane gane kabwaktababif. Jengga Ai ga enggalf Ai fortya, angtane gwela waakenferaiserem jewer gam ne domolf, enggame waakenfer gwelaiserem jamer abak-abaksus. ¹¹ Aiba gembalna waakenaiserem. Gembalna waakena ini jemna samfer gam folbana jam terf domba-dombana jelemanaiserem jem temawer. ¹² Angtane awelna gembalaf aa jei gam gweyibenerem nomkefener, jei gembalna waakenyan. Jengga jei dombana enggalfener gerebaabisnenne jega doini gam taabif, ane domba-dombana jeiserem jei jemanyan. Jei twen kakala jam gam damtanaram, jei domba-dombana ga gam mirtetefala, ane ga gam nunggiri jemniwer. Jepga twena kakala jeiserem jei dombana ga gam jerbene, ane afweraiserem ga gam irwalwena. ¹³ Angtane awelna gembalaf aa jei gam gweyibenerem nomkefener, jei ga gam nunggiri, aam temawer jemna awelna doifener gam gwebili. Jei domba-dombana jeiserem jei jam nesiktababiyen. ¹⁴ - ¹⁵ Aiba gembalna waakenaiserem. Uwa Amna Jei Ai As waakenfer damdamtaasini, ane Ai mese Uwa Sanbagiri waakenfer Agemer damdamtaasini. Ane jes gemerserem aaiserem jegme gemeram, Ai domba-dombana Amna Agam damdamtababisini, ane jeime Ai As mes ne damdamtaasini. Ini Amna samfer As gam folbana Ajam terf jem temawer. ¹⁶ Ane domba-dombana nensa afweraiserem jeime Amnateram. Jei domba jena aaiserem jep jam naaweyan. Domba-dombana jeiserem jeime As aftabifelse. Jeime taterisi gulu Amna Asene saribese, ane jei seyafter daamfennaber gase naawesa gembalna daamfenna jebar. ¹⁷ Uwa Amna Jei Ams nesiktene, aam temawer Ai tifni seyafter Ana jewer geraram jam terfe, ane jepga gamjon ga Ai As irwefa. ¹⁸ Angtane afa fas Ai As jam ne munboyon, afa Ai Aner As gunurum jam terfe. Ai Ana Alem imer ga As gera jam terfe. Ai baabetabara Ai Ana jam gerfe enggalfe Agam terf, ane Ai baabetabara enggalfe gwela jeiserem gamjon Ajam taabife. Uwa Alemanaiserem ga As Jei bala Ai seyafter jeiserem Ajes eyebife." ¹⁹ Ane angtane Yahudimana jep aaiserem jei gamjon ga aa ge doksobana, aam temawer Yesus Jei game aa jewer gutenaram. ²⁰ Jepga angtane uskambar jei ga enggam ga aa ge gubili, "Jei bwata kapkaiserem ga jei kabwana. Jei Jam fafal-fafalwena. Jeje bafa aamei Jei ga ima sarbasini?" ²¹ Jengga angtane afwer ga enggam ge gubili, "Angtane bwat kapka aa jei gam kabwatyaram jei game jam nasouyan. Bwat kapka jei ke angtane nwe kofaiserem jei ke gam waakentana jamer jei gamjon gam anggasini?" ²² Ane jes galapserem ona ga wisimem fala, ane angtane kota Yerusalem je masara ga aane eyebili. Masara jeiserem enggalem temawer ne eyebili, jei Jena Uwa Sanbagirmanaiserem ga jes ne sarbistaabona jame aa galap ne waakenulsilim. ²³ Yesus Jei Jena Uwa Sanbagirmana ga jep wofena mwona bosna Salomo je. ²⁴ Angtane Yahudimana anesus aa galap ge betwebilirim Yesusem tarnabe, jei enggam ga aane tenebana, "Aamei am tarnabe waakenfer ga fonggalabara Is nasouna? Aamei bunarsusfer as jamer se towastababi, Aamke Mesias, Angtane Uwa Sanbagiri bunarsus aa Jes balam Jam baftanafe, afa fas?" ²⁵ Jepga Yesus ga aa tamawolbaabili, "Aiba ibe is Amesam bilipmini, jengga aamei jeiserem ijama taabiyen. Bwembwema Ai Ajes eyebuwenaram Uwa Amnaiserem baabeta Jemnaiserem jeme, jeiserem jei Alem temawer ba jesam destabili. ²⁶ Aamei domba-dombana Amanyan, jega jem temawer aamei Ai As ijama tebayan. ²⁷ Domba-dombana Amnaiserem jeiserem ga aas: Angtane Ai As jei ne tikwebaatinennerem, jei botona Amna Asene saribene. Ai jei As damdamtababisini, ane jei ga Asene tikwebaatini. ²⁸ Ai waakenfer gwelaiserem jamer abak-abaksus As golmini jebe, ane jei jam ge terbiyen jamer abak-abaksus, ane angtane nafsi Am tafnawer jam tamserenbiyen. ²⁹ Uwa Amnaiserem Abe As jei kitulbonorom. Jemna baabeta unggwandwasusu angtane seyafter gemerserem jemniwer, ane angtane nafsi Jem tafnawer jam tamserenbiyen. ³⁰ Ai ane Uwa Amnaiserem Ai Jebar daamfennaber Ai ge nwini." ³¹ Ane jepga angtane Yahudimana tuna gamjon ga aane kitultena jei Yesus jem ne munbofe. ³² Jengga Yesus Jei ga enggam balbabili, "Aamei bwembwema anesus Ai Ajes eyebaabuwenaram imesma domola. Ai bwembwema jeiserem Ai baabeta Uwa Sanbagirmanaiserem ga Ajam eyebaabuwena. Bwembwema seyafter jeiserem ga fwersa aamei As ijewera munbofe?" ³³ Angtane Yahudimana jeiserem jei ga aa ge tamawolbili, "Jeke enggam bwembwema Ijes eyebaabuwenaram toneme ga Isa jem temawer asa munbono, jengga enggalem temawer Aamei Uwa Sanbagiri Ijewer imei-imeitanaram. Aamei safe angtane tefner, jengga Aamei Ina enggam Im bala ’Aiba Uwa Sanbagirsam.’ Aamei jes gemerserem Ijewer gunurum, Aamei Uwa Sanbagiri ga Ijes imei-imeitana." ³⁴ Jepga Yesus ga aa tamawola, "Taterisi Uwa Sanbagirmana jep ga enggam baatultel, Uwa Sanbagiri ga enggam gul, ’Aamei Uwa Sanbagiri galserem.’ ³⁵ Nei nemsa towaswena enggame Taterisi Uwa Sanbagirmana jam se falaram jamer abak-abaksus. Ane angtane taterisi Uwa Sanbagirmana aa jei ne taayibenerem, Uwa Sanbagiri angtane jeiserem ga enggam balbabili, ’Aamei Uwa Sanbagiri galserem.’ ³⁶ Ane Ai fomfoma, Uwa Amna Jei Ai As mes destabana, ane As baftana ogiri aaiserem jebe. Jeje bafa aamei ga As ima bala, ’Aamei Uwa Sanbagiri Ijes imei-imeitana, aam temawer Aamei enggam Im gunu Aamei Tane Uwa Sanbagirmanaiserem.’ ³⁷ Afa Ai Uwa Amnaiserem awelna Jemna Ajam gwebiyeneye, gam jega aamei As ijama tebayan. ³⁸ Jengga afa Ai Uwa Amnaiserem awelna Jemna Ames gweibelebe, aamei samfer awelna Ai Ajes gwebilirim isa taabili. Safe aamei Ai As ijama tebayan, sa taabi bwembwema Ajes gwebuwenaram. Aamei bwembwema aaiserem isa taabilirim, jega aamei bunarsusfer jem ga isa towaswena enggame Uwa Jei Abar daamfennaber Ai ge nwini, ane Ai Uwafar daamfennaber Ai ge nwini." ³⁹ Jei gamjon Yesus safe jam ne temilf, jengga masef, jei jam ne temilyan. ⁴⁰ Yesus Jei gamjon fona Yordan jem jimwer ga aa warauwa, tamna Yohanes gwanan aa jep baptistenentem, ane Jei jep ga aa nwini. ⁴¹ Angtane ga anesus Yesusminibe aa ge forobiwetyaram. Jei ga enggam ge gubili, "Yohanes jei bwembwema jei afa jam eyebiyen, jengga seyafter Yohanes aa jes bilirim Yesusem temawer ba bunaram." ⁴² Ane angtane uskambar jepmanaiserem Yesus ga aane tebana.

¹ Angtane bosna Lasarus jei ga bwernabara. Jei tamna Betanya ga jep ge nwinbene jelem ayanawanabar Maria yo Marta. ² Maria aaiserem jeiba wisam minyak ninsini waakena Yesusem tufap aa jei sutobaabuntowenantam, ane jelem nabal safam ga wirtabaibetenant. Jemna osona Lasarus, jei bwerna ga aa folbana. ³ Lasarusem ayan nauna jeiserem jei angtanes ge baftana taterisi jei gwirinfeleiserem Yesusminibe, "Tuhan, Lasarus Ijes nesiktenerem jei bwernabara." ⁴ Yesus taterisi jeiserem jame aa galap sarbilirim, Jei ga aa gutena, "Jei bwerna aaiserem safam domolt, jei se gwena. Aaiserem mes etamwena, jega angtane baabeta Uwa Sanbagirmana ga sene domola. Ane tere aaiserem jei ga baabeta Tane Uwa Sanbagirmanaiserem jes mese ga jes destabili." ⁵ Yesus Jei Marta, Maria, ane Lasarus Jei jam nesiktababili. ⁶ Jengga Yesus Jei taterisi enggam jame aa galap sarbilirim Lasarus jei bwernabara, Jei ga jeber nwini jamer nunu naura. ⁷ Jeiserem taban, Yesus ga aa gutena ai angtane Jei ajeya tikwebaatinennerem, "Au nei gamjon nejama warauwa ona Yudeyaminibe." ⁸ Ai ga aya tamawolbana, "Guru, nunu uskambaryan gwananaiserem angtane Yahudimana jei safe Is tonem ne munbof. Ke bunar, Aamei namwer ga enggam Im gunu Aamei gamjon Ijewer warauf?" ⁹ Yesus enggam ga balbabili, "Nunu daamfenna jemna gwer nafa dua belas jam, ke bunar? Angtane gwerem aa jei gam wofenaram jei jam dargasoyan, aam temawer jei ogir nafaiserem jeter gam gerebana. ¹⁰ Jengga angtane gwinem aa jei gam wofenaram jei gam dargasona, aam temawer jemnibe nafa fas." ¹¹ Yesus game aa gutenaram, Jei gamjon ga aa gutena, "Nem afelna Lasarus jei mes tana, jengga Ai As gwina, ane jei ga As irtestetna." ¹² Ai angtane Yesus ajeya tikwebaatinennerem ai ga aya gutena enggame, "Tuhan, afa Lasarus jei jam talaye, jei se waakenswena." ¹³ Yesus Jei aas seisyawulu enggame Lasarus jei mes tere, jengga ai angtane Jei ajeya tikwebaatinennerem ai alem inibe enggam aya gunu Lasarus ba nusam tana. ¹⁴ Jega jem temawer Yesus Jei gamjon Jam seisyawulmiyen, jengga enggam ga balbabili, "Lasarus jei mesam terent. ¹⁵ Jengga ini Aman mesna Ase saaser-saaserem folbana Ai jebe fas, aam temawer jeiserem ibe waakenfer ga ise falmini jega aamei mese gam isa taabili. Au nei ganma sofwe Lasarusminibe." ¹⁶ Tomas aa jes ne jenbewenaram "Nawer Bateneme", jei ga jelem afelen mesna ai Yesus ajeya tikwebaatinennerem ga as balbabili, "Au, nei mese ganma tikwebaati, nei Jebaner saf nesa tere!" ¹⁷ Yesus Jei tamna jeiserem jep safe gemer fornaram, Lasarus jei tonmwa bitisibe mes ne waakentaasinint nunu ga nawer-naura. ¹⁸ Tamna Betanya je kota Yerusalemwer bijauyan, jemna bijua kilometer nawer-ningna. ¹⁹ Jes jepserem angtane Yahudimana unggwanfer ga aa ge forobitye enggalfe, Marta yo Maria gam ne domsof. Jei enggalf ge forobitye Marta yo Maria ini jemna gam ne kanausomif, aam temawer osona jemna mes tere. ²⁰ Marta jei jame aa galap sararam enggame Yesus mes gwetmansweyal, jei ga aa totintye enggalfe Yesusfar gam ge dorwef, jengga Maria jei jenaber nwini. ²¹ Marta jei Yesus ga aa bala, "Tuhan, afa Aamei aafer baiserem jes galapserem, gam jega bunar osona amna jei jam teryen. ²² Safe gam ai tousa enggame, namwer aas jepserem Uwa Sanbagiri Jei se eyebili Aamei Jep Ijes bilibenerem." ²³ Yesus Jei Marta enggam bili, "Osona imna jeiserem jei gamjon sefersontyo." ²⁴ Marta ga aa tamawolbana, "Ai enggam ai towaswena Lasarus jei gamjon sefersontyo, angtane jam tereserem jam sene irtebisirim nunu umwef jepserem jeme." ²⁵ Yesus Jei Marta enggam ga bili, "Aiba Jesam angtane fwater tereserem As irtebaabisi terewer, ane Ai waakenfer gwelaiserem jamer abak-abaksus As golmisi jebe. Angtane Ams tebalaiserem, jei safe gam tere, jei gamjon gam irwa. ²⁶ Ane angtane gemer gwelaiserem, ane Ai As jei ne tebanaram, jei abak-abaksusfer jam teryen. Aamke taterisi aaiserem ke is taabili?" ²⁷ Jei ga enggam tamawola, "Ngga Tuhan, ai as taabili Aameiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. Aameiba Tane Uwa Sanbagirmana ogiri aaiserem jep aa jei fortyaram." ²⁸ Marta jei jame aa galap tabanwenaram jes gamserem gam jam nasowelabe, jei osona jemna Maria ga aa gubili, ane jei ga aa nastubunuwili enggame, "Guru Jei aafe mes foryal, ane Jei ims tenaabisini." ²⁹ Maria jei game aa galap sararam, jei tatarsusfer nunuwer ga aa irwa, ane jei Yesusminip ga aa gwina enggalfe jei Jebar gam ge dorwef. ³⁰ Jes galapserem Yesus ane ai angtane Jei ajeya tikwebaatinennerem ai gemerje tamna jeiserem ajama kauteyan. Ai jeber aya fina tampata Martafar ajebara dorwenaram. ³¹ Angtane Yahudimana ini Mariamana aa jei ne kanautaabilirim jenabe, jei Maria ga aane domola jei nunuwer tatar-tatarsusfer aa galap irwenaram, ane jam aa galap totintyerem. Ane jei Maria ga aane onsobili, aam temawer jei jelem inibe enggam ge gubili, Mariaba tonmwa bitisiweram gwina enggalfe jep gam syefe. ³² Maria jei tampata ai Yesusfar ajeba finaram jep aa galap fornaram, ane jei Yesus ga damtana, jepga Maria jei ga Yesusem tof tarnabe ga aa jena, ane ga aa bala, "Tuhan, afa Aamei aafer baiserem jes galapserem, gam jega bunar osona amna jei jam teryen." ³³ Yesus Maria jame aa galap domolaram jam syelabe, ane angtane Yahudimana Mariafar seyafter aa jei ge jalbilirim jei mese jegme aa ge syebili, ini Jemna ga jenbana ane Jei Jelem inibe uskambarsusfer enola. ³⁴ Jepga Yesus ga angtane jeiserem ga aa tenebaabili, "Aamei jem futunu ifofa gerna?" Jei ga aane tamawolbana, "Au Tuhan, gase damta!" ³⁵ Jepga Yesus ga aa syena. ³⁶ Ane angtane Yahudimana jei ga jepga aa ge gubili, "Gasa angga, Yesus Jei Lasarus uskambarsus nesiktene!" ³⁷ Jengga angtane afweraiserem enggam ge gubili, "Jei angtane nwe kofaiserem gam waakentana jamere gam anggasini. Gam jega bafa Jei Lasarus Jam waakentayan, jei nalefe jam teryeneye?" ³⁸ Yesus Jei gamjon Jelem inibe uskambarsusfer enola, ane ai ga aya forna bitisibe. Bitisi jeiserem jei ga tonmwa bitis, ane tuna unggwan-giriserem ga jem ne motolsini. ³⁹ Yesus enggam ga aa gutena, "Tuna unggwan-giri jeiserem imsa irfitaaniwi!" Marta jei angtane aa jei tererem jem ayana, jei ga aa tamawolbana, "Tuhan, jei nunu nawer-naura tonmwa bitisibe, ane jei mes asnabarswena." ⁴⁰ Yesus Jei ga Marta ga aa bili, "Aike is Ajam towasulyon enggame, afa aamei taterisi Amnaiserem jam is taabilirim, aamei ga baabeta unggwandusa Uwa Sanbagirmana ga is domolbana?" ⁴¹ Ane jepga tuna unggwan-giri jeiserem ga aane irfitaanwili. Jepga Yesus winsiwer ga aa anggaswena, ane ga aa gutena, "Uwa, Ase samfer gulbana, aam temawer Aamei As Imes sarbana. ⁴² Ai Amsam towaswena enggame Aamei jeber-jeber As Igam sarbana, jengga Ai enggam Ai gunu jega angtane aaf aaiserem jei taterisi aaiserem ga sene sarbili, ane jega taterisi aaiserem ga sene taabili enggame Aiba As Aamei Am baftannunt." ⁴³ Yesus Jei game aa galap gutenaram, Jei ol dagam ga aa gutena, "Lasarus gase totinye!" ⁴⁴ Ane jepga angtane fwater tere jeiserem jei ga aa totintye. Jemna tafa mese ane tof jei fen sinsineme aa gemer ne tafresinirim jebaner je, ane jemna mirmase mese jei fenbitem aa gemer ne mataibaasinirim gemerje. Yesus angtane jeiserem enggam ga balbabili, "Fene sinsini jemna jeiserem jasa fertebaibaasi, jega jei waakenfer gase wofena." ⁴⁵ Angtane Yahudimana anesus aa jei ge forobityerem Marias domolfe, jei Yesus ga aane tebana, aam temawer jei bwembwema Yesus aa jes eyebilirim aa jewer ne domolaram. ⁴⁶ Jengga angtane afwer jep aaiserem, jei ga aa ge gubili angtane Farisiminibe, ane jei ga aane nasipmini bwembwema Yesus aa jes eyebilirim jem temawer. ⁴⁷ Jega jem temawer, angtane safna Farisimana ane angtane imam-imam sanbakaiserem, jei seyafter Safna Angtane Yahudimana Sanbak-sanbaka seyafter gemerserem jebar ga aa ge betwebili enggalfe taterisi daamfennaber jewer gam ne nasbif. Jei jen jena ga aane taanaaminenne, "Nei ga nebasa eyebifi? Angtane aaiserem Jei bwembwema anesusfer eyebaabuwena. ⁴⁸ Afa nei Angtane aaiserem nei jamfener nesa gerebanaram bwembwema se eyebilirim, gam jega angtane seyafter Jei sene tebana. Ane gam jega angtane sanbaka Romamana ga sege forobitye, ane Jena Uwa Sanbagirmana ga sene wirulbaasini, ane anggwabura nemna seyafter gemerserem ga sene munbobili." ⁴⁹ Jepga angtane jemniwer aaiserem jemna bosna Kayafas, jei imam sanbagirsususerem tahunu jeiserem, jei ga aa gutena, "Aamei seyafter teisyenfenna! ⁵⁰ Aamke ijama towasweyan enggame waakenfer ga aas, angtane afa daamfennam se tere, jega anggwabura seyafter gemerserem jam barweyan." ⁵¹ Kayafas jei taterisi game aa jewer biltenaram, jeiserem gam ke jelemanfener nasowena. Jengga jeiba imam sanbagirsususerem tahunu jeiserem jeme, ane jei taterisi Uwa Sanbagirmana bunarsusfer aa jei se etamwenaram ga jes nasbili enggame, Yesus Jei se tere anggwabura Yahudimana seyafter gemerserem jem temawer. ⁵² Ane gam ke anggwabura Yahudimanaiserem jetefener. Fas, jengga Jei tantantane Uwa Sanbagirmana ogiri aaiserem jep aa jei ge syensyanwebilirim, gam dupdupbulsif safna daamfennaber. ⁵³ Nunu jeiserem jeme angtane sanbaka anggwabura Yahudimana ula ga aane dagalsini enggame Yesus jewer gam ne munbof. ⁵⁴ Jega jem temawer Yesus Jei anggwabura Yahudimana jem nenennap Jam wofeyan. Ai ona Yudeya ga aya mirsotefala, ane ai ga tamna bosna Efraim jewer ga aya sofwa dwisgir gwetmanabe. Ai jep ga aya nwini Yesusfar. ⁵⁵ Jes galapserem ga Masara Paska anggwabura Yahudimana ga mes gwetmanswemini, angtane anesus jei tamnawer aa jei ge jalbiwenaram, jei kota Yerusalemwer mes ge sofwebili. Jei jewer ga enggalf ge sofwebili, jega jei ini jemna gam ne wirtabaabif Uwa Sanbagirem danggonabe, nunu Paskana jeiserem je nalefe jam falyan. ⁵⁶ Jei Yesus ga aane terelbene, ane Jena Uwa Sanbagirmanaiserem jebe aa galap betwenaram, jei ga jen jena ga aane taanaaminenne, "Aamei ilem inibe ifomfoma gunu? Jei ke masar aaiserem jep gase fortya, afa fas?" ⁵⁷ Jei game aa jewer ge gubilirim, jei ga aam temawer ge gubili angtane imam-imam sanbakaiserem ane angtane safna Farisiman mesna jei ula mes ne dagalsini, ane angtane ga aane balbabili enggame, "Angtane afa tamna Yesus aa jep nwinirim jei aa jei towasweminirim, jei ga as jei se towastababili jega ai Jei ga asa temila."

¹ Nunu enam masara Paska nalefe jam falyan, Yesus ane ai tamna Betanyaminiwer ga aya sofwa. Lasarus Yesus aa jes nwensantanantam terewer, jei tamna jeiserem ga jep nwini. ² Jepga angtane tumilgala ga aane eyebaipmini Yesusfe, ane Marta ga jei batobaabili tumilgala ga jei bunulntena mejanabe. Lasarus ane angtane afwer gemerserem jei Yesusfaner seyafter mejanap ga aa ge nwinbitena. ³ Jepga Maria ga aa fortya, jei botol ga jes gwirni. Botolap aa je falitonom minyaka wangi narwastu. Minyaka jeiserem ga litera nenennap, jemna ninsini waakensusu, ane jemna hargana unggwanfer. Ane Maria ga minyaka jeiserem Yesusmana tufa jem ga sukusobana, ane nabal safna bwalna jelemana jeiserem jem ga tufa Yesusmana ga gweyimbene. Ane jena jeiserem minyak waaken ninsin tetenem ga fina. ⁴ Jengga Yudas Iskaryot, jeiba daamfenna amniwer angtane Yesus Jei ajeya tikwebaatinennerem, ane jei Yesus aa jei se geraram angtane kapka jem tafnabe, jei enggam ga tenebaabili, ⁵ "Jeje bafa nei minyaka aaiserem nejama jualtababiyen hargana 300 doi perakeme, ane doini jeiserem angtane galgalyenaiserem jep ga negama kitulmini?" ⁶ Yudas jei game aa jewer gutenaram, aam temawer jei angtane komkoma, jeke enggalem temawer jei angtane galgalyenaiserem jes gerebaabisnenefe. Ane jei doini basyamer gam gosortena, doini funawer jei aa jes girnennerem, doini ai angtane dua belas seyafter ajesa orobanaram. ⁷ Jengga Yesus ga aa gutena, "Safnant, wini aaiserem jamfener sa gerabi. Jei aaiserem enggalf eyebili, nunu Ai As jem ne gaataantena tonmwa bitisibe, jei Ap ga As jes menetulbaasini. ⁸ Angtane galgalyenaiserem jei jeber-jeber ibaner ima nwenwena, jengga Ai ibar abakef seyafter nejama nwinweyan." ⁹ Angtane Yahudimana anesus jei enggam jame aa galap ge sarbilirim Yesus Jei Betanyawer, jei jewer ga aa ge sofobili. Jei jewer aa jewer ge sofobilirim jeke enggalfefener Yesus jewer ne damtaf, jengga jei Lasarus mese jewer gam ne damtaf, Lasarus Yesus aa jes nwensantanaram terewer. ¹⁰ - ¹¹ Angtane Yahudimana anesus jei bwembwema Lasarusminibe aa je etamwenantam jei gane towaswebili. Ane jei angtane imam-imam sanbakaiserem jam onsobaabiliserem jewer ne mirtebitefalf, ane jei Yesus ga aane tebana. Jega jem temawer angtane sanbaka imammana jei Lasarus mese gam ne munbof. ¹² Jem gwirmer angtane anesusfer ga aa ge forobitye Paska Masara gam ne gwebif, jei enggam ga aa ge sarbili Yesus Jei nelep jam jela kota Yerusalemwer. ¹³ Ane jei jepga garam alna ga aane dasona, jei ga aa ge sofobili enggalfe Yesusfar gam ge dorwebif, ane jei ga aa ge tetenbuwena, "Nei Uwa Sanbagiri ganma pujite! Uwa Sanbagiri waakena Jelemanaiserem gase gulbana Jebe, Angtane aa Jei fortyaram Tuhanem boseme! Uwa Sanbagiri waakenaiserem Raja Israelfe gase gulbana!" ¹⁴ Yesus Jei jepga keledai tane ga domola, ane Jei jem sagap ga aa juswena, Jei kotanap jem gam kautefe. Jei jeiserem ga enggalf eyebili, jega taterisi gwanan aa jes baatultelam Taterisi Uwa Sanbagirmanaiserem jebe, jeiserem gam etamwef: ¹⁵ "Aamei angtane kota Siyonmana ijama ereyen! Gasa damta, Raja imnaiserem Jei mes foryal, Jei keledai tane sagap nunnu." (Zakharia 9:9) ¹⁶ Seyafter jes galapserem aa galap etamwenaram, ai angtane Yesus Jei ajeya tikwebaatinennerem ai waakenfer ajama towaswebiyen. Jengga Yesus jame aa galap ne gaartetyaram taman waaken-giribe, ai jepga aya sarbistaabona enggame, Taterisi Uwa Sanbagirmana Yesusem temawer mesam tulisul, ane seyafter aa jes tulisulum jem temawer, angtane Jebe mes ne eyeibene. ¹⁷ Angtane unggwanfer jebe seyafter aa jei ge fibilintim Yesus Lasarusam futunu aa galap jenbenentem terewer jam nwensantafe, ane tonmwa bitisiwer jam totinyefe, angtane unggwanfersus jeiserem jei ga bwembwema jeiserem ga aane nasbinenne. ¹⁸ Angtane unggwanfer jeiserem jame aa galap ge sarbilirim enggame Yesus Jei bwembwema jeiserem ba Jeyam eyebilint, jei Yesusminip ga aa ge sofobili Jebar gangge dorwebife. ¹⁹ Jepga angtane safna Farisimana jeiserem jei jena ga aane towas-towasona enggame, "Nei apgal jigala afa nejama eyebiyen angtane jem ge tikwebife Yesus jam ne onsobalawer. Gasa angga, angtane ogiribe seyafter gemerserem, jei Jeter ne tikwebaatini!" ²⁰ Angtane unggwanfer kota Yerusalemwer ga aa ge sofobili enggalfe, jei Uwa Sanbagiri gam ne pujitef masara jeiserem jebe. Angtane afweraiserem angtane aa jei ge sofobilirim jemniwer, jei ga angtane Yunanimana. ²¹ Angtane Yunanimana jeiserem jei Filipusminip ga aa ge jalbili, ga aane bala, "Uwa, ai enggam aya gunu, ai Yesusfar ajama dorwef." Filipus jei angtane tamna Betsaidamana, ona Galileyawer, ane jei Yesus mesam tikwebaatini. ²² Filipus jewer ga sofwa enggalfe jei taterisi jeiserem Anderyasfe gam nasibef. Ane gamjon ga jei nawersamer ga aa ge sofwa taterisi jeiserem Yesusfe ga aa ge nasibene. ²³ Jepga Yesus ga aa gitmini, "Nunu Amna ga As mes fibayal enggalfe Uwa Sanbagiri Ai Tane Angtanemana angtaneminibe As jam gwertafe, ane waakensususerem Amnaiserem jes mese. ²⁴ Ai isa bunarsusfer nasipmini, afa miru tanna daamfenna afa jam ne tonolyan, gam jega jei jam kokosyan, ane tifni jam butsweyan. Jengga afa angtane jei miru tane jeiserem jam gam tonolaram, alna gam subamitye, ane tifni ga gam butswena, ane gamjon ga gam kokosa, ane jemna igiserem uskambar ga gam tena. Ane Ai ga gam miru tane jes galserem. ²⁵ Angtane afa jei gwela jelemana jam gam nesikulu ogiri aaiserem jebe, gwela jemna jeiserem taman waaken-giribe gam asobana. Jengga angtane gwela jelemana uskambar jam nesikulyonaiserem ogiri aaiserem jebe, jei gwela waakena jemna abak-abaksusfer taman waaken-girip aaiserem ga jei gam domola. ²⁶ Angtane awelna Amna As jei gam gweyibenerem, jei gwanan Am gam tikwebaatini. Jei Amter gam tikwebaatini, jega tampata Ai Ajep nwinirim jei mese jeme seyafter Abaner ga As ge nwini. Angtane awelna Amna As jei gam gweyibenerem, Uwa Alemanaiserem Jei angtane jeiserem jem temawer enggam gam bala, angtane jeiserem jei waakenaiserem ga jes eyebili." ²⁷ Yesus gamjon ga aa gutena enggame, "Ini Amna As jam jenbana. Ai namwer aas jepserem ga bas As biltena? Ai ke enggam As gutena, ’Uwa, As jam Is waakentaasini kapkaiserem jewer.’? Fas, Ai gam Ajam guyon. Jengga Ai nunu aaiserem ga enggalf Ai fortya kapkaiserem jeme Agam domolf. ²⁸ Jengga Ai enggam Ai gutena, ’Uwa, Aamei waakensusu unggwandusa Imnaiserem angtanefe gwanan Im gwerauwulmi.’ " Ane jepga taterisi taman waaken-giriwer ga aane sarbili, enggam aa jei gutenaram, "Ai waakensusu Alemanaiserem Ai mesam gwerauwulunt, ane Ai gamjon Ajam gwerauwulf." ²⁹ Angtane uskambar jep seyafter aa jei ge fibilirim, jei taterisi jeiserem ga aane sarbili, jei ga aa ge gubili enggame, "Jeba iris tersam." Jengga afweraiserem jei enggam ge gubili, "Jeiserem jeiba malaikata Yesusfar aa jei ge nasowenaram." ³⁰ Jepga Yesus Jei ga as balbabili, "Taterisi nei nejesa sarbilirim, jeiserem gam ke Ai As gam batobaf, jengga aamei is jei batobaabif. ³¹ Namwer ga nunu jebe ga mes fala angtane ogiri aaiserem jebe aa jei ge nwinbenerem gam tamtamtababife. Ane namwer ga bawasa ogiri aaiserem aa jem saaser falaram ga jei gase surbono. ³² Afa Ai As jam sene gaartenaram ti salibibaner ogiri aaiserem jem sagabe, Ai jepga angtane seyafter gemerserem ga As dupdupbulsini Aleminibe." ³³ Yesus Jei game aa jewer gutanaram, Jei enggam ga jem gweraulmini Jei se tere ti salibibe. ³⁴ Angtane uskambar jep gemerserem jei ga Yesus ga aane bala, "Taterisi Uwa Sanbagirmana jep ga enggam baatultel, Mesias, Angtane Uwa Sanbagiri bunarsus aa Jes balam Jam baftanafe, Jei jamer se gwena nunu abak-abaksus. Aamei Ibaf gutena enggame Tane Angtanemanaiserem Jei ti salibibaner sene gaartena ogiri aaiserem jem sagabe? Tane Angtanemana jeiserem Jei ga nansa?" ³⁵ Yesus ga aa tamawolbaabili, "Nafa je nomkef im tarnabe. Gasa wofwe nele ilemanaiserem jebe nafa jeiserem aa gemer falaram, gwini nalefe jam jelyan. Angtane gwinibe aa jei gam wofenaram, jei teisyena jei fomfom gam sofwa. ³⁶ Aamei Angtane nafa aa jei gularam, Angtane jeiserem ga jamer isa tebana, Angtane nafa aa jei gularam Jei ibar aas galapserem. Jei sa teba, jega aamei Angtane nafa aa jei gularam Jem tanefe gam isa gwena." ³⁷ Yesus Jei safe bwembwema uskambar eyebuwenant jem nwenabe, jengga jei gemerje jei Yesus jam ne tebayan. ³⁸ Seyafter jeiserem gam mes etamwena, jega taterisi Nabi Yesaya aa jes nasbilim, gase etamwena: "Tuhan, taterisi nemnaiserem ga nan mese sene taabili? Baabeta Tuhanmanaiserem ga nan mese sene domola?" (Yesaya 53:1) ³⁹ Angtane jeiserem jei jam ne taabiyen, aam temawer Nabi Yesaya jei enggam bil: ⁴⁰ "Uwa Sanbagiri Jei ga enggam gul: ’Ai nwena jemna As koftabaipmisini, jega jei jam ge anggabisiyen. Ane Ai ini jemna As kekeletabaipmisini, jega jei waakenfer jam ge towaswebiyen. Ai gam Ajewer gwebabilirim, jega jei gamjon Amnibe jam ge waraubifelyen, ane Ai jei ga As waakentababisini.’ " (Yesaya 6:10) ⁴¹ Yesaya jei game aa jewer gulum, jei ga aam temawer gul jei Yesusmana waakena unggwandusaiserem jei mesam domolbana, ane jei ga Jem temawer nasowena. ⁴² Angtane sanbaka unggwanfer angtane Yahudimanaiserem jemniwer jei Yesus mes ne tebana. Jengga jei enggam jam ge gubiyen, "Nei Yesus nemsa tebana.", aam temawer jei angtane Farisimanaiserem ga jes ne erebaabili. Afa angtane safna Farisimana jam sege towaswebilirim angtane jei Yesus mes ne tebana, jei galap sege gubili enggame, "Aamei jena angtane Yahudimana aa jep ge betwebuwefaram jep ijama kauteyan." ⁴³ Angtane safna Farisimana jeiserem, ini jemna saaser-saaserfer ga enggalf ge folbamini afa angtane enggam jam sege gubilirim, "Angtane safna Farisimana jei angtane waaken." Ini jemna unggwan-girfer jam ge folbamiyen taterisi Uwa Sanbagirminiwer jam sarbife enggame, "Aamei waaken." ⁴⁴ Jepga Yesus uskambar ga aa gutena, "Angtane Ams tebalaiserem, jei ke enggam Am tefner gam tebana, jengga Uwa mese Jes gam tebana Ai As Jei baftannuntum. ⁴⁵ Ane angtane Ams damtalaiserem, jeime Uwa gam damtana Ai As Jei baftannuntum. ⁴⁶ Ai ogiri aaiserem jebe enggalf Ai fortya Aiba nafa gamserem, jega angtane Ams tebalaiserem jei gwinibe jam ge nwinbeyen. ⁴⁷ Angtane taterisi Amnaiserem aa jei saribenerem, jengga jei jam tikwebaatiyeneye, Ai angtane jeiserem Ajam tenebaweyan. Ai ke aam temawer Ai jela angtane ogiri aaiserem jebe aa jei ge nwinbenerem Agam tenebaabuwef, jengga Ai angtane ogirip aaiserem jei Agam waakentababisif. ⁴⁸ Angtane afa baife Ai As jei gwebanaram, ane jam eyebiyen Ai jesa gam bilibenerem, nunu umwef jepserem jei tamtamtala gase domolsa. Taterisi Ai Ajes nasipminirim, nunu umwef jepserem taterisi jeiserem angtane ga jese tamtamtasa. ⁴⁹ Ai Ajam nasoweyan baabeta Alemanaiserem jemfener, jengga Uwa Ai As Jei baftannuntum, Jei ga Ams bala seyafter Ai ibe isa Ajes nasipmife. ⁵⁰ Ane Ai Amsam towaswena enggame, taterisi jeiserem afa jam taabiliye, gam jega taterisi jeiserem angtane jeiserem gase aftabifele waakenfer gwelaiserem jamer abak-abaksusu jebe. Uwa Sanbagiri Jei Abe Ase gemer nasibenentem, Ai ga ibe isa gemer nasipmini."

¹ Nunu daamfenna Paska Masara jei nalef jam falyan, Yesus Jei mes towaswena enggame nunu Jemna ga mes folbayal enggalfe Jei ogiri aaiserem jewer gam firtetefalf, ane Jei gamjon jewer gam warauf Jelem Uwaminibe. Jei angtane Jei aa jei ne tikwebaatinennerem ogiri aaiserem jebe, Jei gemer nesiktababili. Ane Jei safna Jelemana jeiserem gase nesiktababili jamer nunu Jemna umwef aa jep folbanaram. ² Yesus ane ai angtane Jei ajeya tikwebaatinennerem ai gwinem ga aya twena. Baabeta bawasmana jei ini Yudasmanaiserem jebe mes kautena enggalfe jei Yesus gam gaarfe angtane kakalaiserem jem tafnabe. Yudas jei tane Simon Iskaryotmana. ³ Yesus Jei mes towaswena enggame Uwa Jelemana Jei baabeta seyafter Jep mes gulbana. Ane Jeime mes towaswena enggame Jei gwanan Uwa Sanbagirminiweram jelant, ane Jei gamjon Uwa Sanbagirminip se warauwa. ⁴ Jega jem temawer Jei ga irwa, ane jubana Jelemana sagawer aaiserem ga aa soksosini. Ane jepga handuku ga aa egwaiwulu Jelem ambonabe. ⁵ Jeiserem taban, Jei fona ga suwulntena bokolabe, ane tufa amna ai angtane Jei ajeya tikwebaatinennerem ga as towaitabaipmini as jam wirtabaipmife. Ane handuku ambonabe aa jes egwaiwulurum, tufa amna jem ga as gwebaipmini. ⁶ Yesus Jei Simon Petrusminibe aa agasiwityerem, Simon jei Yesus ga tenebana, "Tuhan, jeje fomfoma tufa amna ga as Aamei Is wirsobana?" ⁷ Yesus ga aa tamawolbana, "Namwer aamei ijam towasweyan enggame, Ai namwer Abas eyebili, jengga aamei galap is towaswena." ⁸ Petrus jei Yesus enggam ga aa bala, "Tuhan, safnant. Tufa amna as Ijam wirsobayansus." Jengga Yesus ga enggam tamawola, "Wa, afa Ai aamei is Ajam wirtayanaye, gam jega aamei gamjon Abar daamfennaber nejam ne nwinyen." ⁹ Jepga Simon Petrus ga aa gutena, "Afa gameye, Tuhan, gam jega tof tefner as Ijam wirsobayan, jengga tafa mese ane dwak ase jebaner Is wirtana." ¹⁰ Yesus ga enggam bala, "Angtane fona aa jei gam abwilirim, jei tifni seyafter jena mes gam waakentana. Jei gamjon jena jam waakentayan, jengga tof tefner. Aamei imsa waakenswena, jengga aamei seyafteryan." ¹¹ Yesus Jei mes towaswena enggame, Jei nane se gera angtane kakalaiserem jem tafnabe. Jei ga jem temawer ga enggam gutena, "Aamei imsa waakenswena, jengga aamei seyafteryan." ¹² Yesus Jei tufa amna as jamer wirtabaipmilibe taban, Jei jubana Jelemana jeiserem gamjon ga aa kamwini, ane gamjon ga aa nwintena. Jepga Yesus Jei ga as balbabili, "Aamke imesa towaswebili Ai ibe isa Abas eyeipmini? ¹³ Aamei Ai As enggam ima jenbewena Guru, afa Tuhan, ane jeiserem jeba bunaram. ¹⁴ Afa Ai Tuhan imna ane Guru imnaye, ane namwer Ai tufa imna is Ajam wirtabaipmini, aamei ga ini imna jam isa onabertabana, ane aamei mese in ina ga isa wirsonanna tufabe. ¹⁵ Ai aaiserem ga isa nels destabaamini, jega aamei mese gam ga isa eyebili, Ai ibe isa gemer eyeipminirim. ¹⁶ Ai isa bunarsusfer nasipmini, angtane awelna angtanefe aa jei gam gweyibenerem jei sanbakyan sanbaka jelemanaiserem jemniwer. Ane angtane taterisi aa jei gam gwirinfelerem sanbakyan angtane jei aa jei gam baftanaram jemniwer. ¹⁷ Afa aamei seyafter aaiserem jam isa towaswebilirim, ini imna waakenfer ga isege folbamini, afa jeiserem jam isa eyebilirim." ¹⁸ Yesus gamjon ga balbabili, "Ai taterisi ibe isa Ajes bilipminirim namwer, taterisi aaiserem jeke aamei seyafter gemerserem jem temawer. Ai Amesam towaswena nan mesesa Ai Ajes destabaabilirim. Jengga Taterisi Uwa Sanbagirmana jep aa jes tulisulum, taterisi jeiserem jese etamwena. Taterisi jeiserem ga enggam, ’Angtane Ai rotini Ajebar ge tumilirim, galap jei Am ginanggwaf se gwena.’ ¹⁹ Taterisi jeiserem namwer ga ibe is Ajes nasipmini, gwanan nalefe jam etamweyan, jega taterisi jeiserem jam se etamwenaram, aam ga As isa tebana enggame, bunarsusfer Aiba Jesam Ai aa jei gunurum. ²⁰ Ai isa bunarsusfer nasipmini, angtane Ai As jei baftannurum, afa angtane nafsi jei angtane jeiserem jam gam tebanaram, gam jega angtane nafsi jeiserem jeime Ai mese As gam tebana. Ane afa angtane As jei gam tebanaram, gam jega angtane jeiserem jeme Uwa Sanbagiri mesam tebana, Ai As Jei baftannuntum." ²¹ Yesus Jei game aa gutenaram, ini Jemna ga aa jenbana, ane Jei ga aa gutena, "Ai bunarsusfer aamei isa Ajam towas-towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe." ²² Jepga ai angtane Yesus Jei ajeya tikwebaatinennerem jep ga ana gaya anggaminenne, aam temawer ai ajama towaswebiyen Jei bunarsusfer nans bala. ²³ Aiba daamfenna angtane Yesus aa jei ne tikwebaatinennerem, aiba jesam Yesus aa jes nesiktenerem, ai ga Yesusem gwetmanap nwini. ²⁴ Jepga Simon Petrus tafamfener ga as mwanggibaasini ai jebar ajam ge nasowefe, ane ga gutena, "Aamei Yesus im teneba, Jei bunarsusfer nans bala." ²⁵ Jepga ai Yesusminiwer ga ai agasiwili, ane ga ai tenebana, "Tuhan, jei jam ga nansa?" ²⁶ Yesus ga aa tamawola, "Rotini mangkonap Ai Ajes osoltenaram, rotini jeiserem Ai Ajep gulbanaram, angtane jeiserem jei ga jes." Jepga Yesus rotini ga goltena, ane mangkonap ga osoltena, Yudasfe ga aa gulbana. Yudas jei tane Simon Iskaryotmana. ²⁷ Yudas jei rotini jeiserem jame aa taabilirim, jepga jes jepserem bawasa jem inip ga aa kabwatya. Jepga Yesus Yudas ga aa bala, "Aamei tatarfer se eyebi ijes bilirim jam eyebife." ²⁸ Yesus Jei Yudas game aa galap balaram, ai angtane Jei ajeya tikwebaatinennerem seyafter afweraiserem ai ana ajama towaswebiyen enggame, Yesus Jei Yudas game baf bala. ²⁹ Yudas jei doini ai angtane dua belas ajeye orobanaram, doini seyafter jeiserem jeye girnenne. Jega jem temawer, afwer ai alem inip enggam aya gunu, Yesus Jei ke Yudas enggalf bala, jei apgal jigala afa gam armanulf masar aaiserem jem temawer, afa ke angtane galgalyenaiserem doini jep gam gaarmif. ³⁰ Yudas jei rotini jeiserem jame aa galap taabilirim, jena ga aa totintye. Jes galapserem ona ga mes gwinswena. ³¹ Yudas jei jewer aa galap sofwenaram, Yesus ga aa gutena, "Namwer aas jepserem, angtane enggam sege anggabili baabeta Amnaiserem jeba unggwandwasusum. Ane Ai Tane Angtanemana, baabeta Uwa Sanbagirmana unggwandwasusu jeiserem jei As ge saamini angtanefe. ³² Ai baabeta unggwandwasususerem Uwa Sanbagirmana Agalap ge saaminirim, Uwa Sanbagiri jegme baabeta unggwandwasususerem Amna ga aa ge saamini. Aiba Tane Jemnam, ane Uwa Sanbagiri Jei jeiserem tatarfer gase eyebili. ³³ Am tantantane, Ai gamjon abakfer ibar nejam nwinyen. Aamei ga As isa terelbene, jengga Ai gwanan angtane Yahudimana enggam Agam balbabilintim, Ai gamjon Aime isa gemer balbabili, ’Tamna Ai Ajewer sofweram, aamei jewer ijama foroyan.’ ³⁴ Taterisi ibirmi Ai ip isa Ajes bilipminirim, taterisi jeiserem ga enggam, ’Aamei in ina ga jam isa nesiksonanna. Enggammer Ai aamei isa gemer nesiktababuwenaram, aamei mese igme ina ga gemer isa nesiksonanna. ³⁵ Afa aamei ina jam isa nesiksonannaram, gam jega angtane seyafter ga sege towaswebili enggame, aameiba Amsama tikwebaatini.’ " ³⁶ Simon Petrus jei ga Yesus aa tenebana, "Tuhan, Aamei fwer Is gwina?" Yesus ga enggam tamawolbana, "Ai Ajewer sofwaram, aamei namwer jewer As ijam tikwebaatiyen, jengga aamei Ai As galap is tikwebaatifi." ³⁷ Petrus ga aa tenebana, "Tuhan, jeje bafa enggame ai namwer Is ajam tikwebaatiyen? Ai baife ajam gweyan Im temawer ajam terfe." ³⁸ Jepga Yesus ga aa tamawola, "Aamei bunarsus Am temawer ke is tere? Ai bunarsus ims towastana, nalefe ayanga giriserem jam guteyan, aamei Ai ga Asis baanbaanwebana nawer-ningginfer."

¹ Yesus ai angtane Jei ajeya tikwebaatinennerem ga as balbabili, "Ini imna is jam ge jenbamiyen. Uwa Sanbagiri Jam isa tebana, ane Ai mese Asi jam isa tebana. ² Uwa Amna Jem jenabe, mwona anesus angtane jep ge nwinbeleiserem. Afa mwona unggwanferyanaye, Ai enggame Ajam guyon, mwona jei ane. Jengga jep ga mwona unggwanfer, ane Ai ga Ajam sofna jewer, Ai mwona ibe isa gam menetabaipmisif. ³ Ai As sofnaram tamna ibe is Ajewer menetabaipmisif jamer taban. Jewer ga Ai ga gamjon gas warautna, ane aamei ga isAs aftabifele jebe, jega Ai Ajep nwinirim, aamei mese aameime jep isa nwini. ⁴ Aamei imsa towaswebana nele Ajewer sofnaram." ⁵ Jepga Tomas Yesus ga aa tenebana, "Tuhan, ai ajama towasweyan Aamei Ijewer sofnaram. Nele jeiserem ai fomfom asa towaswebana?" ⁶ Yesus ga aa tamawola, "Aiba nelsam Uwa Sanbagiri ijewera damtafe. Seyafter Ai Ajes bilirim jei bunar, ane Ai waakenfer gwelaiserem jamer abak-abaksus As golmini angtanefe. Angtane jei gam ge forobili alem Uwaminibe, jengga nele jemna Am tarasamer gangge jalbili. ⁷ Afa aamei imsa towaswena Aiba nansa, aamei gamjon isa towaswena Uwa Amnaiserem Jeiba nansa. Namwer isa towaiwena As isa towaswebana. Jega jem temawer aamei jegme isa towaswebana Uwa Amna Jei nansa, ane aamei Jei imsa damtana." ⁸ Jepga Filipus Yesus ga aa bala, "Tuhan, Uwa Imna As jasege saamisi, ga jetefener aya bili." ⁹ Jengga Yesus ga aa tamawola, "Ai safe abaka ibar jam wofelabe, Filipus, jeje bafa aamei gemerje ijam towasweyan Ai nansa? Enggam ijam guyon, ’Uwa Sanbagiri Im ge saasi amnibe.’ Jeiserem ga ijam guyon, aam temawer angtane Ai aa jei ne damtanaram, jei mes ne damtana Uwa jeiserem. ¹⁰ Aamei ga aater is taabili, Ai Uwafar daamfennaber ge nwini, ane Uwa Jei Abar daamfennaber Ai ge nwini. Taterisi is Ajes bilipminirim, jei ke Amanfenna. Taterisi jeiserem jeba Uwamana aa Jei nunitonom Amnibe. Jei baabeta Jelemanaiserem Ap gulbana, jega Ai awelna Jelemana jeiserem Agam gwebif. ¹¹ Aamei ga aater isa taabili Ai Ajes bilirim, Ai Uwafar daamfennaber ge nwini, ane Uwa Jei Abar daamfennaber ge nwini. Afa aamei ijama taabiyen Ai Ajes bilirim, gasa domol bwembwema Ai Ajes eyebilirim. Jepga aamei isa taabili Ai Ajes bilirim jeba bunaram. ¹² Aaiserem bunar Ai Ajes bilirim. Angtane Ai As jei gam tebanaram, jei gam eyebili Ai jes Agam eyebilirim. Ai Ajam sofwa Uwa aa jep nwinirim. Ga jem temawer angtane jeiserem gase eyebili Ai jes Agam eyebilirim, ane jei gamjon nensa waakensususerem gase eyebili. ¹³ Aamei As ijeya tebanaram, seyafter ijesa bilirim Am boseme, Ai isAs eyeipmisi ibe, jega Ai is gam As ge saamisini baabeta unggwandusa Uwa Amnaiserem Jemna. ¹⁴ Afa aamei As ijeya tebanaram, apgal jigala jes igama bilirim Amnibe, Ai isAs gam eyeipmi ibe." ¹⁵ Yesus gamjon ga gutena, "Afa aamei Ams isa nesiktene, seyafter Ai Ajes bilirim, ga jeter isa eyebili. ¹⁶ Ai Uwa As balfa, ane Jei is gaarmini ibe Angtane is Jei batobaabife, Ai gamserem isa gam batobaabilirim. Jeiba Mafnana Uwa Sanbagirmana, Jei nes Jei ge saamisini jeiserem seyafter ba bunaram. Jei ijebara gwef jamer abak-abaksus. ¹⁷ Angtane Amanyanaiserem ogiribe, jei Mafnana Uwa Sanbagirmana jam ne domolyan, ane jam ne towaswebiyen. Ga jem temawer Mafnana Uwa Sanbagirmana Jam nwinyen jem inibe. Jengga aamei Jei imesa domola, ane Jei ibar daamfennabera nwini, ane Jei mes fortya im inibe. ¹⁸ Ai isAs mirtebitefala, jengga Ai isa jam mirtebitefalyan infentowai gwesef tane gamserem. Ai gamjon As warautna imnibe. ¹⁹ Abakefyan, angtane Ai Ams tebayanaiserem jei Ai As jam ne damtayan, jengga aamei gamjon As isa damtana. Ai gamjon As gwena, ga jem temawer aamei gamjon isa gwena. ²⁰ Nunu jes jepserem, aamei isa towaswefa, Ai Uwa Alemanabar daamfennaber As ge nwini, ane aamei Abar daamfennaber nesa nwini, ane Ai ibar daamfennaber nesa nwini. ²¹ Angtane As jei gam nesiktenerem, angtane jeiserem taterisi Amnaiserem mes gam taabili, ane jei ga gam eyebili Ai Ajes gam bilirim. Uwa Amna jei se nesiktene, jei As jei nesiktenerem. Ane Ai mese jeime As nesiktene, ane Ai Ana gase gweretana jemnibe." ²² Jepga Yudas nafsi (jeke Yudas Iskaryot, jesyan) jei ga gutena, "Tuhan, aam je bafa Ina ga Im gweretana amnibe, jengga Ina Ijam gweretayan angtane Ims tebayanaiserem jemnibe?" ²³ Yesus ga aa tamawola, "Afa angtane As jei nesiktenerem, jei gase eyebifi Ai Ajes bilirim. Uwa Amna jei se nesiktene, ane Ai Uwafar ga As ge fortya jemnibe, ane jebar ga nesa nwini. ²⁴ Jengga angtane As jei nesikteyeneiserem, jei jam eyebiyen Ai Ajes bilirim. Taterisi Amna ijesa sarbilirim jeke Amanfenna. Fas, jei Uwamana, Uwa Ai As Jei baftannuntum. ²⁵ Seyafter aaiserem Ai ibe Ajes nasipminirim, aas jepserem Ai ibar negalaba nwinirim. ²⁶ Jengga Uwa Amna Jei se baftafa Angtane is Jei batobaabife, Jeiba Mafnana Uwa Sanbagirmana. Uwa Sanbagiri Jei Mafnana se baafulnu, aam temawer Ayam gunu. Mafnana Uwa Sanbagirmana is towas-towastababili seyafter bunarsusfer jeiserem, ane Jei ga is Jei se batobaabili, jega aamei ijama dirinswebabiyen seyafter Ai isa jes nasipminirim ibe. ²⁷ Ai As eyebili jega ini imna samfer ga isege folbamini. Ini Amna Ase samfer folbana, ane aaiserem Ai ip golmini. Ai isa jes golminirim ibe, enggamyan ini samfer is jam ge folbamiyen, angtane enggalaiserem Ams tebayanaiserem ogiribe. Ini imna kabwakfer is jam ge folbamiyen, ane ijama ereyen. ²⁸ Aamei imesma sara Ai enggame Ajes gutenaram, ’Ai Ase sofwa, jengga Ai gamjon imnibe As waraufalsanya.’ Afa aamei As jam isa nesiktenerem, aamei ga ini saaser-saasersus is gam sege folbamini, aam temawer Ai Uwa Sanbagirminibe As gwina. Ai sanbagiri, jengga Jei sanbagirsusu Amniwer. Ga jem temawer Ai sofwa Jemnibe. ²⁹ Ai namwer ga ibe isa jes bilipmini gwanan nalefe seyafter jei jam ge etamwebiyen, jega galap jam aa jep ge etamwebilirim, aamei ga isa taabili Ai Ajes bilirim ba bunaram. ³⁰ Ai gamjon ibar abakfer nejama nasouyan, aam temawer bawasa ogiri aaiserem jem sanbakef aa jei nwinirim jei gase fortya. Jengga jemna baabeta Amnibe fas. ³¹ Jengga Ai jeber-jeber Agam eyebuwena seyafter Uwa aa jes gam bilirim, jega angtane ogiri aaiserem jebe jei sege towaswebili Ai Uwa As nesiktene. Sya, au ganma sofwe."

¹ Yesus Jei ga gamjon ga gutena, "Aiba anggur timi galserem, nafsi afa fas Ai galserem. Aamei As ijeya tikwebaatinennerem, aamei tirni galserem. Uwa Amna Jeiba nems gerebaabisnenne. ² Tirni gemerserem Amnibe jam teyanaiserem, Jei ga gane targasini, ane tirni aa jewer gam tenaram, jem alna afwer gam fulsini, ane gam saaramulsini jega uskambar ga gam tena. ³ Taterisi Ai is Ajes nasipminintim, jei ga maa ini imna is jei waakentabaipmini. ⁴ Jeber-jeber Abar sa nwini, jepga Ai jeber-jeber ibara nwini. Afa tirni timip jam tensiyen, tirni jeiserem jam teyan. Aamei jegme gemer; afa jeber-jeber aamei Abar nejama tensiyen, afa ga enggam nei daamfennaber nejama nwinyen, gam jega aamei igi ijama domolyan, ga enggam aamei waakenfer ijama eyebiyen. ⁵ Aiba anggur timi galserem, ane aamei tirni galserem. Afa angtane jeber-jeber Abara nwini, ane Ai jebar ge nwini, tirni jes galserem je timip gam tensini, jepga jei igi gase damtabili unggwanfer, ga enggam jei waakenfersus gam eyebili. Afa aamei Abar ijama nwinyen, aamei seyafter ijama eyebiyen. ⁶ Afa angtane jei jeber-jeber Abar jei Ajam ge nwinyeneye, jei tirni gamserem timip jam tensiyen. Tirni jeiserem angtane gam fasawolwili, ane tirni jeiserem ga gam sasanswena. Jewer ga angtane ga gane kitulstena, tokwanap gane fasawolwili, jep gangge taabisini jamer fus. ⁷ Afa aamei jeber-jeber Abar negama nwinirim, ane aamei taterisi Amna waakenfer isa sarbisini, apgal jigala ijesa domolfe, jam isa bala Uwa Amnaiserem Jemnibe. Jepga jigala jeiserem ip ga is golmini ibe. ⁸ Afa aamei igiserem unggwanfer isa damtabili, ga enggam aamei waakenfer isa eyebili, jewer ga angtane ga sene damtana Uwa Amna Jeiba sanbagirem. Ane angtane ga sege towaswebili aamei Amsa tikwebaatini. ⁹ Uwa Jei Ams nesiktene, jes gemerserem Aime isa gemer nesiktababili. Gasa eyebi Ai isa Ajes bilipminirim, ane Ai jeber-jeber isAs nesiktababili. ¹⁰ Ai Ames eyebili Uwa Amna aa jes bilirim, ga jem temawer Jei jeber-jeber Ams nesiktene. Jes gemerserem, afa Ai Ajes bilipminirim aamei jeiserem ga isa eyebili, Ai jeber-jeber Aime isAs nesiktababili. ¹¹ Seyafter aaiserem Ai ims towas-towastababili, jega ini imna is saaserfer sege folbamini, ini Amna gamserem saaser-saasera. Ane ini imna ga uskambar saaser-saasersus sege folbamini. ¹² Aaiserem is Ajes balbabilirim ibe: Aamei in ina jam isa nesiksonanna, Ai gamserem Ai isa gam nesiktababilirim. ¹³ Angtane bunarsusfer aa jei gam nesiktababilirim sarabosna jemna, angtane jes galserem saf gan tere, jega sarabosna jemna jewer ga gam naawena. ¹⁴ Afa aamei isa eyebili is Ajes bilipminirim, aamei mese jemba Am sarabosna. ¹⁵ Ai aamei is Ajam balbabiyen aas galserem, angtane awelna angtanefe aa jei ne gweyipminirim, aam temawer angtane awelna angtanefe aa jei gam gweyibenerem jei teisyena seyafter ini sanbaka jemnaiserem aa gam gam folbanaram. Ai ga ims balbabili aameime Am sarabosnam, aam temawer Ai is Ames towas-towastababili seyafter Ajes sarbilintim Am Uwaminiwer. ¹⁶ Aamei As ijama balyan, ’Aamei Tuhan amna.’ Jengga Ai ims balbabili Aamei Am tane. Ane Ai ga isAs baftabili, ga isa sofwa, ane igiserem unggwanfer ga isa damtabili, ga enggam isa eyebili waakenfer. Ane waakenfer aaiserem ijesa eyebilirim, jei jam tikweyan jamer abak-abaksus. Gam jega seyafter ijesa bilirim Am Uwaminiwer, afa aamei Ams isa tebana, Jei ga is golmini ibe. ¹⁷ Aaiserem Ai isa Ajes bilipminirim ibe, aamei in ina ga jam isa nesiksonanna." ¹⁸ Yesus Jei gamjon ga gutena, "Namwer aas jepserem angtane ogirmanaiserem jei Uwa Sanbagiri teisyena, ane jei im sene nasbabili. Gasa sarbistaabon, gwanan jeiba As gama ne nasbana. ¹⁹ Angtane safna Ai As jei ne tebayanaiserem, jei jenjen sene nesiksonanna. Afa aamei safna jeiserem jebar daamfennaber isa nwinirim, jeime aamei isene nesiktababili. Jengga Ai isa mes balbabili, ’Au, safna angtane Ai As jam ne tebayanaiserem, angtane jeiserem sa mirtebitefal, Amnip ga isa jela, aamei gamjon jebar ijama nwinyen.’ Jega jem temawer jei kakalmer ga im sene nasbabili. ²⁰ Gasa sarbistaabon taterisi gwanan is Ajes nasipminintim: ’Angtane awelna angtanefe aa jei gam gweyibenerem jei sanbakyan sanbaka jelemanaiserem jemniwer.’ Aiba im Tuhansam. Angtane afweraiserem jei kapka Abe As mes ne eyeibene. Jes gemerserem angtane afweraiserem jegme kabwakfer isene eyeipmini imnibe. Angtane afweraiserem jei taterisi Amna waakenfer ne sarbili. Jes gemerserem angtane afweraiserem jegme taterisi imna waakenfer ga sene sarbili. ²¹ Angtane jei kapka seyafter ip ga sene eyeipmini, aam temawer aamei As imesa tebana, ane jei jam ge towaswebiyen Uwa Sanbagiri Ai As Jei baftannunt. ²² Ai Amesam fortya ogiribe. Ai angtane Amesam towas-towastababili, jengga jei jam ge tebayan. Jesam etam-etama kapka jemna. Afa Ai Ajam foroyana, ane angtane Ajam towas-towastababiyeneye, angtane enggam jam ge gubiyen, ’Ai etam-etamabara aam temawer ai Yesus ajama tebayan.’ ²³ Angtane seyafter Ai As jei ne nasbanaram, jeme Uwa Amnaiserem gane nasbana. ²⁴ Angtane afa fas bwembwema jam eyebiliwer Ai gamserem, ane angtane mes ne domola seyafter Ai Ajes eyebilirim. Afa Ai Ajam eyebiyene bwembwema jem nenennabe, angtane enggam jam ge gubiyen, ’Ai etam-etamabara aam temawer ai Yesus ajama tebayan.’ Jengga jes gamserem gamyan, jei mes ne domola Ai Ajes eyebilirim, ane jei kakalmer Ai As gemer sene nasmini, Ai Alem Uwafar. ²⁵ Jei kakalmer Am sene nasbana enggalfe Raja Daud aa jes tulistaabilim Taterisi Uwa Sanbagirminibe jeiserem gase etamwena. Ga enggam tulistaabil, ’Ai safe kapkaiserem jebe Ajam eyeipmiyen, jei kakalmer Am sene nasbana.’ ²⁶ Angtane is Jeye batobaabiliserem gase forofya. Jeiba Mafnana Uwa Sanbagirmana, ane Jei is bunarsusferam nasipmini. Jeiserem Ai isAs baafulmisene, Ai jam Ajep fornaram Alem Uwaminibe. Jei Jam se jelaram Alem Uwaminiwer, Jei ga angtane gase towas-towastababifi Am temawer. ²⁷ Ane aamei jegme gemer, aamei angtane Am temawer isa towas-towastababifi aam temawer aamei Abar neya nwini Ai Agalap towaiwulu angtane Ai jam towas-towastababife.

¹ Taterisi seyafter aaiserem is Ayam towas-towasulmini, jega aamei jewer ijama tikweyan Amter isa tikwebaatini. ² Aamei saf isa sofwa jena angtane Yahudimana aa jep ge betwebuwefaram, jengga angtane jebe isene balbabili enggame, ’Ipsama kaunaram aafe!’ Jei ke jetefener. Nunu galap-galap jemserem angtane ga isene munbobili, aamei As ijeya tebanaram. Jepga jei ga enggam sene balbabili, ’Ai awelna Uwa Sanbagirmana ga ajesa gwebili.’ ³ Jei kapka jeiserem jes ne eyeipmini aam temawer jei Uwa Sanbagiri ane Ai As jam ne towaswemiyen. ⁴ Taterisi aaiserem Ai is Ajes towas-towasulminirim galap gase etamwesa. Angtane kapka jame is jep ne eyeipminirim ibe aamei ga enggam isa gusu, ’Tuhan abe gwanan as gam bilipminintim, aaiserem ga je etamwena.’ " ⁵ Jengga Ai namwer Ai Ajam warauwa Alem Uwaminip Ai As Jei baftannuntum. Gam jega, jeje bafa aamei As ijama tenebayan, ’Aamei Ifwir gwina?’ ⁶ Ai isa mesam balbabili enggame Ai gamjon As sofwa. Ga jem temawer ini imna is mes ge jenbamini. ⁷ Ini imna safe is jam sege jenbamini, Ai is Ajes nasipminirim jeba bunaram ga enggam: Sofwera Amna jeba waakena ilem temawer. Afa Ai Ajam sofweyanaye, Ai Angtane is Jei batobaabife Ai Ajam baftanayan. Afa Ai jam As sofwaram, Ai Jei ga As baftatna imnibe. ⁸ Jei aa jep fortyaram, Jei enggam gase gweraulmisi angtane ogirip aa jei ge nwinbenerem jebe jei etam-etama kapka mes ne eyebili. Jeime Am temawer ibe ise gweraulmisi enggame, Uwa Sanbagiri aa jes bilirim Ai bunarsusfer jeiserem Ai jetefeneram eyebili. Ane Jei Uwa Sanbagirem temawer enggam gase gweraulmisi, Uwa Sanbagiri Jei angtane kapka aa jei gane eyebilirim, angtane jeiserem gase tamtamtababisi. ⁹ Jei angtanefe enggam gase gweraulmisi, jei etam-etama kapka mes ne eyebili aam temawer jei Ai As jam ne tebayan. ¹⁰ Jei enggam gase gweraulmisi Uwa Sanbagiri aa jes bilirim Ai bunarsusfer jeiserem Ai jetefeneram eyebili, aam temawer Ai Ajam sofwa Alem Uwaminibe, ane aamei gamjon Ai As ijama damtayan. ¹¹ Jei enggam gase gweraulmisi Uwa Sanbagiri Jei angtane kapkaiserem jes tamtamtababisi, aam temawer Uwa Sanbagiri mes gunu enggame, Jei bawasa se tamtamtasa, bawasa angtane kapkaiserem jem sanbakfe aa jei nwinirim. ¹² Ai taterisi unggwanfer nafsiserem ibe isa jam nasipmife, jengga namwer aas jepserem aamei gemerje ijama taabiyen. ¹³ Jengga Mafnana Uwa Sanbagirmana taterisi bunarsusfer aaiserem aa Jei nasounaram, Jei aa jep fortyaram, Jei taterisi seyafter bunarsusfer aaiserem ga ise towas-towasulmisi. Jei taterisi Jelemmanfenaiserem Jei Jam nasbiyen. Jengga Jei aa jes sarbisinirim Jei jeiserem ga jes nasbili, ane galap aa jei etamwesaram jes mese ibe is nasipmini. ¹⁴ Ai Ajes bilirim ane Ai Ajes eyebiliserem, Jei ibe is towas-towasulmini. Jei game aa jewer towas-towasulminirim, jepga angtane ga enggam sege gubili, ’Yesus Jeiba sanbagirsusum!’ ¹⁵ Seyafter Uwa Sanbagiri aa jes bilirim ane aa jes eyebilirim, Ai ga Agemer gunu ane Aime Agemer eyebili. Ga jem temawer Ai enggam Ai gunu, seyafter Ai Agam gunurum ane Agam eyebilirim, Mafnana Uwa Sanbagirmana Jei seyafter jeiserem imse towas-towastababisi. ¹⁶ Abakferyan aamei gamjon As ijama damtayan. Jepga nunu unggwanferyan gamjon As isa damtafa." ¹⁷ Jepga ai angtane Jei ajeya tikwebaatinennerem ai ana ga aya taanaaminenne, "Jei nebe nes bas bilipmini enggame, ’Abakferyan aamei gamjon As ijama damtayan.’ ane ’Nunu unggwanferyan gamjon As isa damtafa.’ ane ’aam temawer Ai Ajam sofwa Alem Uwaminibe’?" ¹⁸ Ai ana gemer aya taanaaminenne, "Aa jei bagal taterisa enggame, ’Abakefyan’ ane ’Nunu unggwanferyan’? Nei nejama towaswebiyen Jei nebe nes bas bilipmini." ¹⁹ Yesus Jei mes towaswena enggame ai safe ajesa tenaibefe, ane jega jem temawer Jei ga as balbabili. "Ai isa mesam balbabili, ’Abakferyan aamei gamjon As ijama damtayan. Jepga nunu unggwanferyan gamjon As isa damtafa.’ Aamke taterisi jeiserem ina ga ijem temawera taanaaminenne? ²⁰ Ai taterisi isa Ajes nasipminirim jeba bunaram. Ai Ajep tererem, aamei jepga uskambar isa syawena, jengga angtane nafsi ogiri aaiserem jep aa jei ge nwinbenerem jemna ini saaser-saaserfer sege folbamini. Ini imna gwanan jam sege jenbamisi, jengga galap ini imna gamjon isege saaser-saaserswebamini. ²¹ Wini jame jena aa jep gam enolaram tane jam gerefe, jei ga jam gam syena aam temawer jei jena siginsusfer gam enola. Jengga tane jemna jam gam surnurum, jei sigini jemna gamjon jam sarbistaabonyan. Jemna ini saaserfer falbili aam temawer tane jemna mes surnu. ²² Aamei mese jemba gamam. Namwer aas jepserem ini imna ga is jam ge jenbamini, jengga Ai gamjon jam As nwensanswenaram terewer, jepga gamjon ga isAs damtabisi, ane ini imna saaser-saaserfer isege folbamini. Angtane afa fas ini imna saaser-saaserfer jeiserem is jei uftabaipmife. ²³ Ane nunu jes jepserem, aamei taterisi Abe afa As ijama taanaibeyen. Taterisi aaiserem Ai isa Ajes nasipminirim jeba bunaram, apgal jigala Uwa Sanbagirminiwer ijesa balbabilirim, seyafter jeiserem Uwa Amna Jei ibe is golmisi, aam temawer aamei Am tefner As ijewera tebanaram. ²⁴ Gwanan aamei Uwa Amnaiserem ijama balyan Jei apgal jigala ip is Jam golmife aam temawer aamei Amtera tebana. Jengga namwer aas jepserem sa bil, ane Jei ga is golmini, jega ini imna saaser-saaserfersus is ga sege folbamini. ²⁵ Taterisi seyafter aaiserem is Ajes nasipminirim ibe, seyafter ga is Ajamfener syetabaipmisini. Jengga abakferyan, Ai jamfener is Ajam syetabaipmisiyen. Jes jepserem Ai bunarsusfer ga isAs towas-towastababili Uwa Amnaiserem jem temawer. ²⁶ Jes jepserem aamei Uwa Amnaiserem ga isa bala, aam temawer aamei Amtera tebana. Ane aamei ijesa bilirim jeiserem Ai Uwa Alemanaiserem Jep Ajam bilibeyen. ²⁷ Uwa Amna Jei is sarbabisi, aam temawer Jei ims nesiktababili. Aamei Ams isa nesiktene, ane aamei imsama gununt, ’Bunar Yesus Jei Uwa Sanbagirminiweram jela.’ Ga jem temawer Uwa Sanbagiri Jei ims nesiktababili. ²⁸ Ai Uwaminiwer Amsam iretyant, ane Ai enggalf Ai fortyant angtane ogiri aaiserem jebe aa jei ge nwinbenerem jebar Agma nwinf. Jengga namwer aas jepserem Ai ogiri aaiserem ga As firtetefala, ane Ai gamjon ga As warauwa Uwa Alemanaiserem Jemnibe." ²⁹ Jepga ai angtane Yesus ajeya tikwebaatinennerem ga aya bala, "Namwer aas jepserem taterisi Aamei Ijes nasbilirim, taterisi jeiserem jeme waakenfer ga as jem Im gweraulmini. Ane jamfener gamjon Ijam syawulsiyen. ³⁰ Namwer aas jepserem ai amsama towaswena enggame, Aamei seyafter gemerserem Imesam towaswena. Aamei itana amna as Imes towaswebaipmini ai nalef Is ajama tenebayan, gam jega angtane afa fas Is jam ne tenebayan. Jega jem temawer ai amesa taabili Aameiba Uwa Sanbagirminiweram jela." ³¹ Yesus jei ga as tamawolbaabili, "Wa, aamei Ase imesma tebana. ³² Gasa sar! Babitsim aamei seyafter ga isa nunggiri ilem jenabe. Aamei Anfentowai As isa mirtetefala. Jengga Aike Anfentowai As nwini. Fas, Uwa Amna Jei Abar ge nwini. ³³ Taterisi seyafter aaiserem Ai ip nasipmini jega ini imna waakenfer ga isege folbamini, aam temawer aamei daamfennaber Abar ga isa gwena. Jame isa nwinirim ogiri aaiserem jebe, angtane Ams tebayanaiserem jei kapkaiserem ibe ga isene eyeipmini. Jengga ipsama ernerem! Ai Ames amsonbana baabeta bawasmana ogiri aaiserem jebe."

¹ Yesus taterisi seyafter jeiserem Jam aa galap tabanulurum jam nasbilibe, jepga Jei winsiwer ga aa anggaswena, ane ga aa gutena, "Uwa, nunu jeiserem mes fal, nunu Aamei Ijes bilim jam etamwefe. Ase gwerta angtaneminibe enggame Ai Tane Imna Aiba sanbagirem, jega Aime Aamei Is gam As gweretana angtaneminibe enggame Aamei mese Aamei sanbagiri. ² Aamei baabeta Abe As Im gulbal, jega Ai gam As nwini angtane seyafter gemerserem jem Sanbakfe. Aamei baabeta jeiserem Ap Ase enggalf Im gulbal, jega Ai waakenfer gwelaiserem jamer abak-abaksus angtanef Agam golmif, angtane seyafter Aamei Ijes balbabilirim Amnip jam ge forobiyefe. ³ Ane jei nele waakenfer gwelaiserem jamer abak-abaksus ga sene damtana, nele jeiserem ga enggam Imter sene tebana, O Uwa Aameiba bunarsusfer Aameisam, nafsi fas. Ane jeime ga Asene tebana, Ai Ase Aamei Am baftannunt ogiri aaiserem jebe. ⁴ Ai mese angtaneminibe Isa mesam gweretanant enggame Aameiba sanbagirem, aam temawer awelna Ap As Ijes bilibelem Ai awelna jeiserem Amsam eyebilint. ⁵ Uwa, gwanan ogiri aaiserem nalef Nejam Ne eyebayan, Ai gwanan ga Ibar Ai ge gwel. Jes galapserem Aiba sanbagirem. Ane namwer aas jepserem Aamei Ijep nwinirim Ai gamjon As jep Is sanbagirtaasini. ⁶ Angtane Imnaiserem aa jei naawenaram ogiribe, Aamei angtane jeiserem enggam Im balbabilint jei Amter sene tikwebaatini. Ai Aamei Is Ames gweretanant jemnibe. Aamei Ijes bilipminirim, jeiserem jei mes ne eyebilint. ⁷ Ane jei mes ge towaswebili enggame seyafter Ai Ajes nasbilirim ane Ai Ajes eyebilirim, jeba baabeta Imnaiserem jemam. ⁸ Jeiserem jei mes ge towaswebili, aam temawer Aamei taterisi As Im nasibene, ane Ai taterisi jeiserem jebe Amsam nasipmini. Jei ga aane balbabili, ’Taterisi aaiserem jeba Uwa Sanbagirmanam.’ Jei mes ge towaswebili ba bunaram Ai Imniweram jelant. Jei ga aane balbabili, ’Ba bunaram Uwa Sanbagiri Jei Yesus baftannunt.’ ⁹ Ai sembayanga angtane jeiserem jem temawer As gwebana, jega Aamei jei gam Is batobaabili. Ai sembayanga Ajam gwebayan angtane nafsi ogiri aaiserem jep aa jei naawenaram jem temawer. Ai sembayanga angtane Aamei Abe As Ijes kitulbonorom ga Ajem temawer gwebana, aam temawer angtane jeiserem jeiba Imnam. ¹⁰ Angtane seyafter As jei ne tikwebaatinennerem jeiba Imnam. Ga jem temawer angtane Imnaiserem jes mese jeiba Amnam. Ane angtane jeiserem jei Ai ga Ase jei sene gweretana angtane nafsiserem jemnibe enggame Aiba sanbagirem. ¹¹ Ane abakferyan Ai ga As forna Imnibe. Ai gamjon Ajama nwinyen angtane ogirip aaiserem jebar. Jengga angtane Abe As Ijes kitulbonorom, jei gemer ga jei se naawena ogiribe. Uwa, ini Imna tabalbalsusu, angtane jeiserem baabeta Imnaiserem ga jem Is gerebaabisnenne. Baabeta Imnaiserem Ai Amsam gwerauwulmini angtanefe. Jei jamer Is gerebaabisnenne, jega jei daamfennaber gase naawena, Ai yo Aamei Nei Negemer Ne gwenaram daamfennaber. ¹² Angtane dua belas gwanan Ai As jei ne tikwebaatinenewenaram Ai jebar Agalaba nwinintim, angtane jeiserem baabeta Aamei Ap As Ijes gulbanaram ga Ajem gerebaabisnenne. Ai jei jamer Ai gerebaabisnenewena, jamere jei afa jam tikweyan Ams ne onsobalawer. Jengga daamfennaiserem ga jei tikwenant Ai As jam onsobalawer, ane angtane jeiserem ga jam Is tamtamtana jamer abak-abaksus. Jeiserem mes etamwena enggalfe, taterisi nabi fwater aa jes tulisulum gam tabanwef. Nabi aa jes tulisulum ga enggam, ’Daamfennaiserem se tikwesa Aamei Is jam onsobalawer.’ ¹³ O Uwa, Ai babitsim Imnip ga As forna. Taterisi aaiserem Ai Ip nasibene, Ai ogiribe nomkef aafe Ajep gwenaram. Ane angtane Aamei Ap As Ijes kitulbonorom, jei taterisi aaiserem gam sene sarbili, jega ini jemna saaser-saasersusfer ga sege folbamini, Ai gemerserem ini Amna saaser-saasersusfer As gemer folbanaram. ¹⁴ Aamei taterisi Ap As Ijes nasibenerem, Ai taterisi jeiserem jebe Amesam nasipmini. Ane angtane ogirmanaiserem jei Ai As jam ne tebayan, jei angtane Amna jeiserem jam ne nasbabili, aam temawer jei angtane ogirmana jeiserem jebar jam naaweyan, Ai gamserem Ai jebar Ajama gweyan. ¹⁵ Ai enggam Ajam guyon, ’Aamei jei jam Is aftabifele ogiri aaiserem jewer.’ Jengga Ai enggam Ai gunu, ’Aamei jei bawasminiwer jam Is gerebaabisnenne.’ ¹⁶ Jei angtane Ai As jei ne tebayanaiserem jei jebar jam ge nwinbeyen, Ai gemerserem Ai jebar Ajama nwinyen. ¹⁷ Taterisi seyafter Ijes nasipminirim jeba bunaram. Taterisi bunarsusfer aaiserem waakenfer se towas-towastababi, jega jei angtane waakenfe gase naawena, ane Aamei Ijes bilirim jei jeiserem ga sene eyebili. ¹⁸ Ai Ase Aameiyam baftannunt ogiri aaiserem jebe. Jes gemerserem Aime gemer angtane Ai As jei ne tikwebaatinenewenaram Ames baftabili angtane ogirip aaiserem aa gemer ge nwinbenerem jemnibe enggalfe jei taterisi Imna gam ne towas-towasulbononof. ¹⁹ Ai jep ga enggam Ai eyeipmini, Aiba Amesam menetwesini Aamei Ijes bilirim Ai Ajam eyebife, seyafter jeiserem Ai jetefner As eyebili. Ai jes gemerserem gam Ajewer eyebilirim, Ai ga enggalf Ai eyebili angtane Ai As jei ne tikwebaatinennerem jeime bunarsusfer angtane waakenfe gam naawef, ane Aamei Ijes bilirim jei jetefner jeiserem ga sene eyebili. ²⁰ Ai angtane jeiserem sembayanga jem temawenefener Ajam gwebayan. Jengga angtane nafsiserem Ai galap As jei ne tebalaiserem, Ai sembayanga jem temawer mese ga Agalf gwebana. Angtane jeiserem jei taterisi Am temawer jam sene sarbisinirim angtane As jei ne tikwebaatinenewenaram jemniwer, ane jei Ai ga Asene tebafa. ²¹ Ai sembayanga enggalf Ai gwebana, jega jei daamfennaber gam ge nwinbif, Uwa ga enggam, Nei daamfennaber Nei gemer Ne nwinirim. Aamei Abar daamfennaber Nei Ne nwini, ane Aime Ibarme daamfennaber Ne nwini. Ai sembayanga Ai gwebana enggame jei seyafter Nebar daamfennaber ga nesa nwini, jega angtane ogirip aaiserem jei enggam ga sege gubili, ’Uwa Sanbagiri ba Yesus Jeyam baftannunt awelna Jemna Jei gweyibefe.’ ²² Uwa, Aamei Abar daamfennaber Nei Ne nwini, ane jega jem temawer Aiba sanbagirem. Jes gemerserem Aime gemer, Ai angtane Ai As jei ne tikwebaatinennerem jebar daamfennabera Aya nwini, ane jega jem temawer jeime sanbak-sanbakam. Ai ga jem inip Ai nuniton enggalfe jei daamfennaber gam naawef, Nei gemerserem Nei daamfennaber Nei gam Ne nwinirim. ²³ Ai jem inip Ai nuniton, ane Aamei Am inip Im nuniton enggalfe jei daamfennaber gam naawef. Jepga angtane ogirip aaiserem jei enggam ga sege gubili, ’Uwa Sanbagiri ba Yesus Jeyam baftannunt, ane Jei angtane Yesus aa jei ne tikwebaatinennerem ga jes nesiktababili, Jei Yesus aa gemer nesiktenerem.’ ²⁴ Ogiri aaiserem gwanan nalef Nejam Ne eyebayan, Aamei jeber-jeber As Im nesiktawel. Jega jem temawer Aamei Ai As Im sanbagirtaasini. Uwa, Ai Isa enggam Ai bala, angtane Ap As Ijes kitulbonorom, Ai Ajep gwenaram, angtane jeiserem jeime jeber se naawena, jega Ai As ga damtana enggame Aiba sanbagirem. ²⁵ Uwa Sanbagiri, Aamei seyafter Ijes eyebilirim ba waakenam. Angtane ogirmanaiserem jei Aamei Is jam ne towaswebayan, jengga Ai Aamei Is Ames towaswebana. Ane angtane As jei ne tikwebaatinennerem jei mes ge towaswebili enggame Aiba Ase Aameiyam baftannunt. ²⁶ Ai Aamei Isa mesam gweretanant jemnibe, ane Ai Ajam tikweyan jei jam towas-towastababife Im temawer. Ai jes gemerserem gam Ajewer eyebilirim, Ai ga enggalf Ai eyebili jei angtane nafsi gam ne nesiktababif, Aamei Ai As Igemer nesiktenerem, ane enggalf Ai jem inip Agam nuninonf."

¹ Yesus sembayanga jame aa galap tabantanaram, Jei ga ai angtane Jei ajeya tikwebaatinennerem abar ga Fona Kidron jimwer ga aya awelsiwili. Tampata aasaje ga jep fala, saitun ti teten aa jep ge tenbilirim, ane Yesuso ai angtane Jei ajeya tikwebaatinennerem Jei abaner jep ga aya kawena tampata jeiserem jebe. ² Yudas, Yesus aa jei geraram ginanggwaminibe, jei tampata jeiserem jei tousa, aam temawer Yesus ane ai angtane Jei ajeya tikwebaatinennerem ai Yesusfar abaka tampata jeiserem ajeba betwewefaram. ³ Jepga Yudas tampata jeiserem jewer ga aa sofwa. Jei ginanggwana ga aftabifeltye, ane angtane Jena Uwa Sanbagirmana aa jei ne gaaraibesnennerem jes mese. Angtane imam-imam sanbakaiserem ane angtane safna Farisimana, jei angtane Jena Uwa Sanbagirmana aa jei ne gaaraibesnennerem, mes ne baftabili enggalfe tampata jeiserem jewer gam ge sofwebif. Jei lampu, ane jem amanti, ane gina mese nombe ga jes ne erbili. ⁴ Yesus Jei mes towaswena seyafter aa jei etamwelaiserem Jemnibe, jewer ga Jei angtane jeiserem ga aa gwetmantababisini, ane ga aa tenebaabili, "Aamei inansa terelbene?" ⁵ Jei enggam ga aane tamawolbana, "Ai Yesus, angtane tamna Nasaretmanaiserem ga ajesa terelbene." Yesus ga aa gutena, "Aiba Jesam." Ane Yudas Yesus aa jei geraram ginanggwaminibe, jei angtane jeiserem ga jebaner ge fibili. ⁶ Yesus Jei gam jame balbabilirim enggame, "Aiba Jesam.", angtane seyafter jei ga aa ge agabistena, ane onnap ga aa ge janbili. ⁷ Yesus Jei gamjon ga aa tenebaabili, "Aamei inansa terelbene?" Ane jei ga aane tamawolbana, "Yesus, angtane tamna Nasaretmanaiserem." ⁸ Jepga Yesus jei ga aa balbabili enggame, "Aiba isa mesam balbabili Aiba Jesam. Wa, afa aamei bunarsusfer Amsa terelbeleye, gam jega angtane Ai aa jei ne tikwebaatinennerem jei jasa aftabunnu." ⁹ (Yesus gam aa jewer nasounaram, taterisi Yesus fwater aa jes nasbilintim, namwer gase tabanswena. Jei fwater enggam aa jes nasbilintim, "O Uwa, angtane Abe As Ijes kitulbonorom enggalfe Ai waakenfer Ase jei ne gerebaasnenef, Ai daamfenna afa Ajam afaftaanuyon.") ¹⁰ Simon Petrus jei nombeya ga jei gwirni, jei nombeya ga fotoltena, ane jei ga angtane awelna imam sanbagirsususerem jem jenap aa jei gweyibenerem, jei ga aa ge aafwebana jam tegilfe, jengga jemna imwana taasfolawer aaiserem ga jes targabaasini jamer te. Angtane jeiserem jemna bosna ga Malkus. ¹¹ Yesus Petrus ga aa bala, "Nombe imna gamjon jase gwetaante jelem golap! Aamke enggam im gunu ilem inibe, Ai tamtamtala aaiserem Ajam domolyan, Uwa Sanbagiri Abe aa jes menetulbaasinirim?" ¹² Jepga ginanggwa ane jem komandan, ane angtane Jena Uwa Sanbagirmana aa jei ne gaaraibesnennerem jes mese, jei ga Yesus ga aane tebana, ane naawem ga aane taferna. ¹³ Yesus Jei nabala ga Hanasminip ne aftafala. Hanas jei imam sanbagirsususerem tahunu gwanan jepserem, ane jei Kayafasem ebona. Kayafas jeiba imam sanbagirsususerem tahunu jes jepserem jeme. ¹⁴ Kayafas jei gwanan anggwabura Yahudimanaiserem esorola jebe jeyam nasipminint enggame, "Waakenfer ga enggam, angtane daamfennaiserem jei gam tere, angtane seyafter gemerserem jem temawer." ¹⁵ Simon Petrus ane ai Yesus amnuwer ga ai ge onsobana. Ai imam sanbagirsususerem jebar ames ge mesmeswesini. Jega jem temawer Yesus aa galap ne katantenaram imam sanbagirsususerem jem ja sitabe, ai mese ai jon ga ai kautena. ¹⁶ Jengga Petrus jei pagar mwa tarnap fina. Ai imam sanbagirsususerem jebar ajei ge meserem, ai jei gamjon ga ai warauwa pagar mwona jeiserem jebe. Ane ai ga yafonsiwiri mwona aa jei gerebaasnennerem gwanan ga ajebar ge nasowena. Jepga Petrusfaner ga ai ge kautena. ¹⁷ Yafonsiwir jeiserem mwona aa jei gerebaasnennerem jei Petrus ga aa tenebana, "Wa, aamke Yesus ke aamei meseya tikwebaatinenewena?" Petrus ga enggam tamawola, "Wowo, aiyan." ¹⁸ Jes jepserem, ona ga wisimim fala. Jega jem temawer angtane awelna jena jeiserem jebe aa jei ne gwebilirim, ane angtane jena jeiserem aa jei ne gaaraibesnennerem jes mese, jei ga mujan tokwana enggalf ga aane surna jei jep gam ge itswebif. Ane Petrus mese jei jebaner seyafter ge fibili jam ge itswebife. ¹⁹ Ane jena jeiserem jem mwonabe, jep ga imam sanbagirsususerem jei ga Yesus ga tener-tenertana ai angtane Jei ajeya tikwebaatinennerem am temawer, ane Jei aa jes towas-towasulminennerem jem temawer mese. ²⁰ Jepga Yesus ga aa tamawola, "Ai taterisi jamer Agam nasbili angtane seyafter gemerserem jem tarnabe, taterisi Amna Ajam syawulsiyen. Ai taterisi jeber-jeber Agam nasbili jena angtane Yahudimana aa jep ge betwebuwefaram jebe, ane Jena Uwa Sanbagirmana jep mese angtane Yahudimana aa jep ge forobiwetyaram. Ai taterisi basyamer afa Ajam bilteyan. ²¹ Jeje bafa aamei Ai ga As im tenebana? Waakenfer jese tenebaabi jei Ai ga Ase jei ne sarbasini. Bunarsusfer jei tousa taterisi Ai Ajes nasipminintim jebe." ²² Yesus Jei game aa gutenaram, ginanggwa daamfenna Jem gwetmanap aaiserem, jei ga Yesus tafa felfeleme ga aa saftana, ane ga aa bala, "Jeje bafa Aam ga imam sanbagirsususerem gam ga Im tamawolbana?" ²³ Yesus ga aa tamawola, "Ai taterisi afa syefer Ajam nasbiliye, gam jega taterisi syefer Ai Ajes nasbilirim, taterisi jeiserem aamei se bilte. Afa Ai taterisi bunarsusfer nasbiliye, gam jega aamei Ai As ibaf saftana?" ²⁴ Jepga Hanas angtane ga balbabili enggalfe, Yesus gam aftawefe imam sanbagirsususerem bosna Kayafas jemnibe. Yesus Jei aa gemer ne tafernaram, ga gemer ne aftananna. ²⁵ Simon Petrus jei jes jepserem gemer fina aa jep ge itswebilirim. Jepga angtane ga aane tenebana, "Aamke Angtane aaiserem ke aamei meseya tikwebaatinenewena?" Jengga Petrus jei jam baanbaanwena, ane ga aa gutena, "Wowo, aiyan." ²⁶ Angtane daamfenna angtane awelna jena imam sanbagirsususerem jebe aa jei ne gwebilirim, angtane Petrus imwana aa jemna gam targabaasinirim ga jem afelnaiserem, jei Petrus ga tenebana, "Ai ke im domsona Angtane jeiserem Jebar, tampata ti tetena jeiserem jebe?" ²⁷ Jepga Petrus gamjon ga aa baanbaanwebana, ane jes jepserem ayanga giriserem ga aa gutena. ²⁸ Gwinibenersus angtane sanbak-sanbakaiserem Yahudimana jei Yesus ga aane aftafalsa Kayafasem jenawer, jamere jena unggwandusa Gubernur Pilatusem jenabo. Angtane sanbaka Yahudimana jeiserem jei jener jam ge kabwiteyan jena Gubernurmana jeiserem jebe, aam temawer jei angtane Yahudimanyan, ane jei waakenfer gam naawef hukum agama jelemanaiserem jeter gam ne tikwebitif. Afa jei jena Gubernurmanaiserem jep jam gangge kabwitenaram, jei Paska tumilgala jam ne tumilyen. ²⁹ Jega jem temawer Pilatus ga aa totintye jemnibe, ane ga aa tenebaabili, "Angtane aaiserem Jei kabwakfer bas eyebili? Jeje bafa aamei Angtane aaiserem ga ima aftafaltya amnibe?" ³⁰ Jei jepga aa ge tamawolbili, "Wa, afa Jemna kapka fasaye, gam jega ai ga Jei imnibe ajama aftayalyan." ³¹ Jepga Pilatus ga aa balbabili, "Iner sa teba, ga isa tamtamtana hukumu ilemana gemerserem." Jengga angtane Yahudimana jeiserem jei ga enggam ge tamawolbili, "Ai angtane ajama tamtamtayan enggame jamer jei gam tere." ³² (Jeiserem mesam etamwena, jega taterisi Yesus Jei aa jes bilintim Jelem terem temawer, taterisi jeiserem gase tabanwena.) ³³ Pilatus gamjon jelem jenap ga aa kawetena, ane Yesus ga aa jenbene, ane jepga aa tenebana, "Aamke anggwabura Yahudimanaiserem ke jem Raja?" ³⁴ Yesus ga aa tamawola, "Fomfoma taterisi jeiserem je ke ilem inipfener biltena, afa angtane nafsiserem aamei ke is jei ne towastana Am temawer?" ³⁵ Pilatus jei ga aa tamawola, "Ai gam ke angtane Yahudimana? Aamei Is jei ne geraram amnibe, angtane jeiserem jeiba anggwabura Ilemanam, ane angtane imam-imam sanbakaiserem jes mese. Aamei kapkaiserem afa Ibas eyebili?" ³⁶ Yesus ga aa gutena, "Tamna Ai Ajep gwenaram Sanbakfe, gam ke aaf ogiri aaiserem jebe. Afa Tamna Ai Ajep gwenaram Sanbakfe aaf ogiri aaiserem jewer, angtane Ai aa jei ne onsobanaram jei angtane sanbak-sanbaka Yahudimanaiserem ga jebar gangge erabana, jega Ai As jam ne geryan jemnibe. Jengga tamna Ai Ajep gwenaram Sanbakfe jei ogiri aaiserem jepyan." ³⁷ Ane Pilatus jei Yesus ga aa tenebana, "Wa gameye, Aam ke Raja?" Yesus jei ga aa tamawola, "Aamei game bunarsusfer im gutena Aiba Rajasam. Ai ogiri aaiserem jebe Ai jela, ane Ai ga Ai surnunt enggalfe ula igsusu daamfenna aaiserem: Ai taterisi bunarsusfer aaiserem Agam nasipminennef. Angtane taterisi bunarsusfer aaiserem aa jei ne taabilirim, jei ga Am sene sarbasini." ³⁸ Pilatus jei Yesus ga aa tenebana, "Taterisi bunarsusfer aaiserem jeje basa?" Jepga Pilatus jei jena unggwandusawer gamjon ga aa totintye, ane angtane sanbak-sanbaka Yahudimana ga balbabili, "Ai Angtane aaiserem Jemna kapka afa ajam domolbayan. ³⁹ Jengga osiri imna gamserem, Nunu Paska jam gam falaram, ai afa angtane jam agam balaram jam aftannufe, ai angtane bwiyip aa jei gam nwinirim ga jam agam aftannu. Fomfoma aamke bai, ai Angtane aaiserem Raja imna ai ip isa ajam aftamunnufe?" ⁴⁰ Angtane unggwanfer jeiserem jei ga uskambarsusfer ga aa ge tamawolbana, "Wowo, Jeiyan. Jengga Barabas is aftannu!" (Ga enggam, Barabas jei ga komkom anggwa.)

¹ Pilatus ginanggwana ga balbabili, "Aamei Yesus awer jasa aftafal, ga jewer isa safsaftatna." ² Ginanggwana jei Yesus ga enggam ne bisobana, jei newa utuboro gane egwaisobana topini gamserem, ane topini utuboro jeiserem ga aane gwelebatena Yesusem dukabe, Raja topini gemer gam gweltenaram jelem dukabe. Jeiserem taban, gamjon ga fene bwalna berbere Yesusfe ga aane doksobaaniwili, jes galserem raja aa galater gam kamwinirim. ³ Jepga ginanggwana jei ga aa ge forobuwetya Yesusminibe, ane jei enggam ga aane bisobana, "Se gwe abakfer Raja anggwabura Yahudimana!" Ane jepga jei Yesus ga aane safsaftana tafame. ⁴ Pilatus jei gamjon ga aa totintye, ane angtane Yahudimana uskambar jes jepserem jei ga aa balbabili, "Gasa angga, ai Yesus ibe isa jam gaasarmistena, jega aamei gam isa towaswena enggame ai kapkaiserem Jemnibe afa ajam domolbayan." ⁵ Jepga Yesus ga aa totintye topini utuboro gam gweltena, ane fene bwalna berbere gam kamwini. Pilatus jei ga angtane uskambar jeiserem jei ga aa balbabili, "Angtane aaiserem gasa damta! Jei bunarsus baabeta fas angtane jem kabwaktababife." ⁶ Angtane imam-imam sanbakaiserem, ane angtane Jena Uwa Sanbagirmana aa jei ne gaarabisnenewenaram, jei ga Yesus jame aa galap ne damtanaram, jewer jei uskambar ga aa ge tetenbuwena enggame, "Ti salibip sa daktanswe! Ti salibip sa daktanswe!" Jengga Pilatus jei ga aa balbabili, "Aamei iner sa gaarfe, ane tinip ga isa daktanswena. Ai Jemnibe kapkaiserem afa ajam domolbayan." ⁷ Angtane sanbaka Yahudimana jei ga aa ge tamawolbili, "Jei ga Jelem temawer Jena ga enggam bala, ’Aiba Tane Uwa Sanbagirmanam.’ Hukumu Nabi Musa aa jes tulistaabilim jep ga enggam baatultel, ’Angtane aa jei gam gunurum, jei Tane Uwa Sanbagirmanam, jei jamer gane munbono.’ Jega jem temawer Yesus Jei jamer sene munbono." ⁸ Pilatus jei game aa sarbabilirim angtane game aa ge gubitenaram, jei uskambarsusfer ga erne. ⁹ Ane jep ga Pilatus jem ga jelem jenap gamjon ga aa kautena, jei Yesus ga aa tenebana, "Aamei fwermana?" Jengga Yesus afa fas Jam tamawolbayan. ¹⁰ Ane Pilatus jei Yesus gamjon ga aa tenebana, "Aamke bai abar jam nasowefe? Aamke Ijam towasweyan enggame, aafe baabeta amanem folbana ai as gunu Aamei Is ajam aftannufe, afa Is ajam daktanswef ti salibibe?" ¹¹ Yesus ga aa tamawola, "Wa afa Uwa Sanbagiri Jei baabeta ibe is Jam gulbayanaye, aamei baabeta Amnibe fas. Jega jem temawer angtane Ai imnibe As jei geraram, jemna etam-etama kapka unggwandwasusu imniwer." ¹² Pilatus jei jame aa galap sararam, jei ga nele ga aa terelbene enggalfe Yesus jam aftannufe, jengga angtane sanbaka Yahudimana jei ga uskambar ga aa ge tetenbuwena, "Afa aamei Yesus jam is aftannurum, aamei Kaisarem afelenyan. Angtane enggam aa jei gam gunurum, ’Aiba Rajasam.’, Jei ga ginanggwa Kaisarmana!" ¹³ Pilatus jei taterisi jeiserem jame aa galap sarbilirim, jei Yesus ga aa ge totintye jenawer, ane Pilatus ga aa nwintena tener-tener taman nwinibe. Taman nwini jeiserem jemna bosna ga "Ton Titik". (Ibrani olem ga enggam gane bili, "Gabata".) ¹⁴ Jes galapserem gwere bolap ga amkom fom fyala, nunu Paskamana nalefe jam falyan. Pilatus jei ga angtane Yahudimana jeiserem ga aa balbabili, "Raja imnaiserem ga aare!" ¹⁵ Ane jei ga uskambar ga aa ge tetenbuwena, "Sa munbo! Sa munbo! Sa daktanswe ti salibibe!" Pilatus ga aa tenebaabili, "Aike raja imnaiserem ke jamer as daktanswena?" Angtane imam-imam sanbakaiserem ga aa ge tamawolbili, "Angtane aaiserem Jei am rajayan. Raja aman jengga Kaisar tefner!" ¹⁶ Umwef ga, Pilatus jei Yesus jep ga aa gaarmini enggalfe jewer gane daktanswef ti salibibe jamer futu. Jes jepserem jei Yesus jewer ga aane aftafala Pilatusminiwer, ane Jebar ga aa ge sofobili. ¹⁷ Yesus ga aa totintye, ane Jei ti salibi jeiserem Jener ga sutunfolo, jamere tamna bosna "Taman Dwak Otam" jebo. (Ibranim olem otumu jeiserem ga enggam gane bala, "Golgota".) ¹⁸ Yesus jepga aane daktanswena ti salibibe. Ane jei gamjon anggwa nawan gane doksonswena ti salibibe nafsiserem jebe, afelnaiserem jei gwejawer, afelnaiserem jei taasfolawer, Yesus ga nenennap. ¹⁹ Pilatus jei angtane ga balbabili, "Aamei taterisi papanap ga enggam isa tulisulu, |scYESUS JEIBA ANGTANE NASARETMANAM, |scJEI RAJA ANGGWABURA YAHUDIMANAM. Ane aamei papana jeiserem ga isa baatulswena Yesusem ti salibibe." ²⁰ Angtane Yahudimana anesus tulisana jeiserem jame aane gaarabistaaniwenaram, aam temawer tamna Yesus aa jep ne salibtenerem kotana jewer bijauyan. Tulisana jeiserem ga Ibrani olem ne tulisulu, ane Latin olem, ane Yunani olem mese. ²¹ Angtane imam-imam sanbakaiserem jei taterisi Pilatusmana ga aane targabana enggame, "Wowo gamyan, gam ijam tulisulyon, ’Jeiba Raja anggwabura Yahudimanam.’ Jengga enggam is tulisulu, ’Angtane aaiserem Jei Jener aa gam gutenaram enggame, Aiba Rajasam anggwabura Yahudimanam.’ " ²² Jengga Pilatus ga aa tamawola, "Ai ajes tulisulurum, jeiserem jam wirulsiyen, je jeter se batona." ²³ Ginanggwana jeiserem jei Yesus jame aane tabantanaram jam salibtelebe, jei fene Yesusmana ga aane kitulbotena. Jei fene jeiserem ga aane syentabaabili ga nawer-naura, ginanggwana jeiserem daamfen-daamfennem ga aane kitultowena. Jengga jubana Jemna gemer nulna. Jubana jeiserem jewer tertelaiserem jei fas, seyafter matakala bwalesamer. ²⁴ Ginanggwana jeiserem jei jener ga aa ge gubili, "Jubana aaiserem nejama targamisneneyen. Au, nei gwanan olgulup nesa gwena tuna bastantouyaserem jeme, jega nei ga nesa towaswena fene Yesusmana ga nane se taamini." Seyafter jeiserem aa jewer etamwenaram, jega Taterisi Uwa Sanbagirmanaiserem jep aa jes tulisulum, taterisi jeiserem gase tabanswena. Taterisi Uwa Sanbagirmana jep ga enggam baatultel: "Jei fene Amna Asene syentabaibene, ane jei tuna bastantouyaserem sene taptasnenne enggalfe, angtane aasaje jubana Alemana gam taamife." (Mazmur 22:18) Ane jeiserem ba bunaram ginanggwana ga jes ne eyebili. ²⁵ Ti salibi Yesusmanaiserem wini nawer-naura ga jep ge fibili: Yesusem ene, ane jem eneiserem ga jem osona, ane Maria Klopasem wina, ane Maria Magdalena. ²⁶ Yesus Jei Jelem eneiserem aa domola, ane Jeime ams damtana, aiba angtane Yesus aJei tikwebaatinirim Yesus ajes nesiktenerem, aiba jesam. Yesus ai ga as jep domsona, ga ajep ge fina. Yesus ene ga aa bili, "Iye, angtane aaiserem jei ga aamei is jese eganulsini, jeiba tane ilemana galserem." ²⁷ Jepga Yesus ga as bala, "Wini aaiserem jei ga gemer is eganulsini, iye ilemansusu galserem." Jes jepserem, ai ga iye Yesusmana ga ai taabili, ane ga ai afolfala alem jenap nwinfe. ²⁸ Yesus Jei mes towaswena enggame, "Namwer aas jepserem awelna Amna seyafter ga maa, As mes tabanswebana." Ane jega Taterisi Uwa Sanbagirmana jep aa gam tulisulum gase tabanwena, Jei ga aa gutena, "Ai Ase fobotoi folbana." ²⁹ Jep ga mangko daamfenna ga jep fala fo angguruboro, fo angguru jamer tenbisini, ane fo angguru jeiserem ga garsama. Jei fenbiti fo anggurup ga aane osoltena, ane ga aane tyantena ti hisop jem fwestamabe, ane Yesusem mifip ga aane gwirinbaiswena. ³⁰ Yesus ga fo angguru jeiserem ga aa soromola, ane ga aa gutena, "Ga maa, taban!" Jepga duka Jemna ga nortantena, ane mafnana Jemna ga aa gula. ³¹ Nunu Yesus aa jem ne salibtenerem, nunu jeiserem ga Jumat. Angtane sanbaka Yahudimana jeiserem jei bai angtane futunu ti salibip aaiserem jei jeber ge taabunufe nunu Sabateme. Nunu jem gwirmer ga nunu Sabat igsususerem, jeba nunu Paska jem falaiserem. Jega jem temawer, angtane sanbaka Yahudimana jei Pilatus ga aane bala enggame, angtane ti salibibe jeiserem jemna tufa jam gane taarbaipmisini enggalfe jei tatarfer gam ge terbife. Ane jei enggalf bala jem futunu gam tatanbiswef ti salibiwer. ³² Jepga ginanggwa jei ga aa ge gubili, ane angtane naura Yesusfaner aa jes ne salibtababilirim, jemna tufa ga aane taarbaipmisini. ³³ Jengga jei Yesusminibe jame aa galap ge forobilirim, jei Yesus ga aane damtana enggame Jei mesam tere, ane tufa Jemna ga jam ne tortebaasiyen. ³⁴ Jengga ginanggwana daamfenna jei Yesus usuyup ga aa fosolbaswena tumbakeme, ane aawisi yo fona tatarmer ga aa ge suwebaatitye Yesusminiwer. ³⁵ Taterisi ai Yohanes ai aner ajes domolaram, ai ga ajes tulistaabili. Ane taterisi aaiserem ai ajes tulistaabilirim jeba bunaram. Ai tousa ai ajes tulistaabilirim jeba bunaram, ane ai ga jes tulistaabili jega igme Yesuster gam isa tebana. ³⁶ Jeiserem aa jewer etamwenaram, jega Taterisi Uwa Sanbagirmanaiserem jebe aa gam tulisulurum gase tabanswena. Jep ga enggam baatultel: "Aalna Jemna daamfenna afa jam ne tortebaasiyen." (Mazmur 34:20) ³⁷ Ane gamjon Taterisi Uwa Sanbagirmana jep ga enggam tulisul: "Jei ga sene damtana Jei aa gam ne fosolbanantam." (Zakharia 12:10) ³⁸ Jeiserem taban, Yusuf jei tamna Arimateya teu, jei Pilatusminip ga sofwa, ane Pilatus ga bala, "Uwa, Yesusem futunuserem ap se gerba." (Yusuf jei angtane Yesus aa jei tikwebaatinirim, jengga jei basyamer tikwetinenne, aam temawer jei angtane sanbaka Yahudimanaiserem ga jes erebaabili.) Pilatus ga aa bala sya, ane Yusuf ga aa gwina, ane Yesusem futunuserem ti salibiwer ga aa tinswena. ³⁹ Ane Nikodemus gwanan gwinem aa jei forsyanantam Yesusminibe, jei Yusufar seyafter ge sofwa. Nikodemus jei apgal jigala aa jes gwirnirim jemna ninsini waakensusu, jemna bosna ga muru yo gaharu, ane jemna darna ga tiga pulu kilo. ⁴⁰ Angtane nauna jeiserem jei Yesusem futunu ga aa ge girni, ane jei osiri angtane Yahudimana gamserem angtane aa gane tatarbaabunuwenaram, jei Yesusem futunu gam ga aa ge gwebana, sof sinsinibe muru yo gaharu ninsini jemna waakensusu jei aa ge bununtenaram, ane Yesusem futunu jebaner ga aa ge tafresini. ⁴¹ Tampata Yesus aa jep ne salibtenerem, jep ga tampata ti tetena jep ge tenbili. Ane tampata jeiserem jep ga tonmwa bitis ibirmi aasa ga jep fala. Jes jepserem angtane futunu jep afa jam ne gaataanteyan. ⁴² Tonmwa bitisi jeiserem gwetmana, ane nunu Sabat babitsim gase towaiwena. Jega jem temawer jei Yesusem futunu jep ga aa ge gaarantena.

¹ Nunu Minggu jem gwinibener, ona gwini ga gemer, Maria Magdalena jei Yesusem tonmwa bitis tarnap ga aa sofsa. Jei tuna unggwandusa pintuf aaiserem tonmwa bitisi aa jem ne motolsinirim enggam damtasa, mes ne irfitaanwili tonmwa bitisiwer. ² Ane jepga Maria ga aa nunggiri, Simon Petruso ane ai Yohanes gas terelmisi. Aiba angtane afwer Yesus aJei tikwebaatinirim Yesus aa jes nesiktaunaram. Ane jei ga as gitmisi, "Tuhan Jei tonmwa bitisiwer mes ne gaasaarstena, ane ai ajam towasweyan Jei ga fof ne gerna." ³ Jepga Petrus ane ai, ai ga tonmwa bitis tarnap ga ai ge sofwa. ⁴ Ai jamer ge nunggiri, jengga ai tatarmer ai nunggiri Petrusminiwer, ane nabala gwanan ai forna tonmwa bitis tarnabe. ⁵ Ai tonmwa bitisip ga ai naarwetena, ane ai ga sufa sinsini tefner ai damtana, sufa jeiserem ga jenefener faliton, jengga ai ajam kauteyan. ⁶ Ane Simon Petrus jei ga am amnup forna tonmwa bitisi jeiserem jebe, ane jei ga jamer kautena tonmwa bitisibe. Jei ga sufa sinsini tefner damtana, sufa jeiserem jep ga jenefener faliton. ⁷ Jengga sufa Yesusmana duka aa jem ne fwirebanantam, sufa jeiserem egwaitaasili ga jenefener faliton, sufa nafsi jem tarnap afa fas jam falyan. ⁸ Ai safe nabala ai forna tonmwa bitisi jeiserem jebe, jengga ai amnup ai kautena. Ai ga anggasnenne, jepga taabili enggame ba bunaram Yesus mes irwena terewer. ⁹ (Jes galapserem, bunarsus ai gemerje ajam ge saryan Taterisi Uwa Sanbagirmana jebe aa jes tulisulurum enggame, Jei gamjon se irwa terewer.) ¹⁰ Jepga ai Yesus aa jei ge tikwebaatinennerem, gamjon ga ai ge warauwa alem jenabe. ¹¹ Maria Magdalena jei tonmwa bitis tarnap fina, ane jei ga aa syena. Jame aa galap syenaram, jei tonmwa bitisip ga aa naarwetena enggalfe, mwona gam domolf. ¹² Jepga jei malaikata naura fen sinsinibere ga domsotena. Malaikata naura jeiserem jei Yesusem futunu aa jep ne gaarantenaram ga jep ge nuniton, afelna duka jewerserem ga jewer nwini, ane afelna tufa jewerserem ga jewer nwini. ¹³ Malaikata jeiserem jei ga Maria ga aa ge taanaabili, "Iye, aamei ibaf syena?" Jepga Maria ga aa tamawolmini, "Tuhan amna mes ne gaasaarstena tonmwa bitisiwer, ane ai teisyena jei ga fof ne gerna." ¹⁴ Maria jei game aa gutenaram, jei jelem duruwer ga aa irfwena, jepga Angtane aasaje ga damtana Jei jep fina. Angtane jeiserem Jei Yesus, jengga Maria jam towasweyan enggame Jeiba Yesusam. ¹⁵ Yesus Maria ga aa taanaabili, "Iye, aamei ibas syebili? Ane aamei inans terelbene?" Maria jei enggam gunu jelem inibe angtane aaiserem jeiba tampata aaiserem aa jei gaarabisnennerem, ane Maria jei ga aa bala, "Uwa, wa afa aamei geserstelaye aawer, gwanan asim bil Jei ifof gerna, jega ai jep gam as gaarfeya." ¹⁶ Jepga Yesus bosna jelemanaiserem jewer ga aa jenbili, "Maria." Maria jei Yesusminiwer ga aa irfwena, ane Ibrani olem ga aa gutena, "Rabuni!" (Nem olem je Guru.) ¹⁷ Jepga Yesus Maria ga aa bili, "Aamei Ase ijam tebasneneyen, aam temawer Ai Uwaminibe gemerje Afas warauwa. Jengga aamei gase sofwe angtane Alemana Ai aa jei ne tikwebaatinennerem jemnip, ane jep ga is nasipmini enggame, namwer ga Ai Ajam warauwa Alem Uwaminip, ane Uwa imnaiserem Jemnip. Ai Ajam warauwa Alem Uwa Sanbagirminip, ane Uwa Sanbagiri imnaiserem Jemnip." ¹⁸ Jepga Maria Magdalena ga aa sofwa, ane ai angtane Yesus Jei ajeya tikwebaatinennerem enggam ga as towastababili, jei Tuhan ga mes damtana. Ane taterisi Yesus aa jes nasbilirim enggalfe angtane Jei ajeya tikwebaatinennerem abe as gam nasipmif, seyafter jeiserem Maria ga as nasbaipmini abe. ¹⁹ Nunu Minggunu jes jeterserem, ona jame aa galap gigitswenaram, ai angtane Yesus Jei ajeya tikwebaatinennerem ai jenap ga aya betwena, ane pintunu seyafter ga aane matabaabisnenne. Pintunu jeiserem ga aam temawer ne matabaabisnenne, ai angtane sanbaka anggwabura Yahudimanaiserem ga ajesa erebaabili. Yesus jepga aa fortya, ane am nenennabe ga aa fyatetya, ane ga as balbabili, "Waakensusu ise etamwemini ibe!" ²⁰ Yesus Jei game as balbabilirim, Jei tafna yo usuyu Jemna ga as ge saamini. Jes jepserem ai Tuhan jame agalaba damtanaram, ini amna ga ase saaser-saasersusfer ge folbamini. ²¹ Ane jepga Yesus Jei gamjon ga as balbabili, "Waakensusu ise etamwemini ibe! Uwa Sanbagiri Ai As gemer baftatnantam, Aime aamei isa gemer As baftabili." ²² Ane jepga Yesus mafnana Jelemana ga as forolmini abe, ane ga as balbabili, "Mafnana Uwa Sanbagirmanaiserem gasa taayibe. ²³ Afa aamei etam-etama kapka angtanemana jam igama borolminirim, Uwa Sanbagiri Jeime etam-etama kapka jemnaiserem ga gam wirtabaipmini. Afa aamei etam-etama angtanemana ijama borolmiyeneye, Uwa Sanbagiri etam-etama kapka jemnaiserem ga jam wirtabaipmiyen." ²⁴ Tomas aa jes ne jenbewenaram "Nawer Bateneme", jei angtane daamfenna ai angtane dua belas Yesus Jei ajeya tikwebaatinennerem, jei jep fas Yesus Jena aa galap ge sanaram amnibe. ²⁵ Jepga ai angtane Yesus Jei ajeya tikwebaatinennerem afweraiserem, ai Tomas ga aya bala, "Ai Tuhan amesa damtana!" Jengga Tomas jei ga enggam tamawolbaabili, "Afa ai paku bwenta Jem tafnap ajam domsobayanaye, afa tafabola amna jem paku bwentabe ajam ensobayan, afa ai tafna amna Jem tumbak bwenta usuyube ajam kasoniwiyeneye, ai taterisi imnaiserem nalefe ajam taabiyen." ²⁶ Minggunu gamjon jeiserem, ai angtane Yesus Jei ajeya tikwebaatinennerem ai jena gwanan jeiserem gamjon ga jeber aya betwena, ane Tomas mese. Pintunu seyafter ga jam matabaabisnenele, jengga Yesus Jei am nenennabe ga aa fyatetya, ane Jena ga aa ge sana amnibe, ane ga as balbabili, "Waakensusu ise etamwemini ibe!" ²⁷ Jepga Yesus Tomas ga aa bala, "Tafna Amna ga Asim domsoba. Ane tafabola imna aaf gase gaarante. Tafna imna se bisouye, ane Am usuyube ga is kasoniwitye. Aamei isar-isaryamer is gwena, jengga taterisi Am temawer aaiserem, taterisi jeiserem ga jamer is taabili." ²⁸ Jepga Tomas Yesus ga aa bala, "Aameiba am Tuhansam, ane Aameiba Uwa Sanbagiri amnam." ²⁹ Ane Yesus ga aa bala, "Aamei As imes damtana, jega jem temawer aamei Ai ga Asim tebana. Ini angtanemana waakenfer aa jemanem ge folbaminirim, jei Ai Ajei ne tebanaram, jei safe Ai As jam ne damtayan." ³⁰ Bwembwema afwer safe anesus Yesus aa jes eyebaabuwenaram ai angtane Jei ajeya tikwebaatinennerem am tarnabe, jengga bwembwema unggwanfer jeiserem bukunu aaiserem jebe ajam tulistaabiyen. ³¹ Jengga aaiserem ai ames tulistaabili, jega aamei gam isa taabili enggame Yesus Jeiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif. Jeiba Tane Uwa Sanbagirmanam. Ane aamei Jei ijewera tebanaram, aamei waakenfer gwela ga jem temawer isa domola bosna Jemnaiserem jeme.

¹ Jes jepserem taban, Yesus gamjon Fobogana Tiberyas je, Jei Jena jep ga aa ge sana amnibe, ai angtane Jei ajeya tikwebaatinennerem. Jeiserem ga enggam etamwena: ² Ai angtane Yesus Jei ajeya tikwebaatinennerem ga aya betwena, angtane aaiserem ga aa ge betwebili: Simon Petrus, Tomas enggam aa jes ne jenbewenaram "Nawer Bateneme", Natanyel jei tamna Kana ona Galileyaminiwer jela, ai ane aya amna tane Sebedeusmana, ane angtane naura nensaiserem Yesus aa jei ge tikwebaatinennerem jes mese. ³ Jepga Simon Petrus ga as balbabili, "Ai ajam sofwa jigalf." Jei ga aya bala, "Ai is agma onsoba." Ane ai seyafter ga aya sofwa jamer atdusabo aya juswena. Jengga gwini jeiserem jamer onanaf, ai jigala afa ajama fatabiyen somanabe. ⁴ Ona safe aa gemer nafwenaram, Yesus ga dwisip fina, jengga ai angtane Jei ajeya tikwebaatinennerem ai ajama towasweyan enggame Jeiba Yesusam. ⁵ Jepga Yesus Jei enggam ga as jenbebuwili, "Am afelen mesna, jigala afa ke imsa damtabili?" Ai ga aya tamawolbana, "Fas, ai jigala afa ajama damtabiyen." ⁶ Yesus Jei ga as balbabili, "Somana taasfolawer isa firulnu atdusa jewerserem, jes jewerserem aamei jigala ga isa damtabili." Jepga ai somana jeiserem jewer ga aya tobolsini, jengga ai somana jeiserem masef ga aya unggwasbili gamjon ajama dekoltefe, aam temawer jigala jame anesus ga aa ge tarbitinirim somanabe. ⁷ Jepga ai angtane Yesus aa jes nesiktenerem, ai Petrus ga ai bala, "Jeiserem Jeiba Tuhansam!" Jepga Simon Petrus jei jame as galap sarbanaram enggame Jeiba Tuhansam, jei ga bajunu ga aa kamwini, bajunu gwanan aa jes soksosinirim, ane jener ga janton fonabe. ⁸ Ane ai angtane Jei ajeya tikwebaatinennerem afwer ga amnuwer aya onsobatna atdusame, somana jigalabaner jem atdusa jebar samem-samem ga aya dekola jamer dwisibo. Ai dwisiwer ajama bijausweyan, jemna bijauwer enggammer afa 100 meter. ⁹ Ai dwisip jame agalaba batonaram, ai tokwana uma ga aya domsona, ane jigala ga jem sagap ge falbuntena, ane roti mese. ¹⁰ Yesus Jei ga as balbabili, "Jigala aamei namwer ijesa towanbilirim, afwer imsa erbiyel aafe." ¹¹ Simon Petrus atdusabe ga aa tauna, ane jepga somana ga aane dekolwili jamer tufabo. Somana jeiserem jigala unggwan-gwanserem jeme jamer erge-ergesus, ane jigala jeiserem unggwanfer ga enggammer 153. Ane jigala unggwanfer safe gam, somana jeiserem jei jam bitfarweyan. ¹² Yesus jepga as balbabili, "Au, nei ganma twen!" Ai angtane Jei ajeya tikwebaatinennerem ai seyafter ajama erebene Jam tenebafe enggame, "Aam jei nansa?", aam temawer ai amsa towaswena enggame Jeiba Tuhansam. ¹³ Jepga Yesus ga aa gwina, Jei rotini ga aa kitultena, ane ap ga as kitulmini. Ane jigal mese jegme gemer eyebili. ¹⁴ Ane aaiserem ga nawer-ningnabaraiserem Yesus Jei ai angtane Jei ajeya tikwebaatinennerem amnibe Jena Jam saafe, Jei terewer safe aa gemer irwenantam. ¹⁵ Jes jepserem ai jame aa ge tabanswebilirim ajama dwenabe, Yesus Simon Petrus ga aa tenebana, "Simon tane Yonammana, aamei Ai ke Ase bunarsusfer im nesiktene, angtane aaiserem jemniwer jei As gane nesiktenerem?" Petrus jei ga aa tamawolbana, "Bunar Tuhan, Aamei Imes towaswena ai Ims nesiktene." Yesus Jei Petrus ga aa bala, "Domba tane Amnaiserem ga waakenfer is gerebaabisnenne." ¹⁶ Yesus Jei Petrus gamjon ga aa tenebana, "Simon tane Yonammana, aamei Ai ke Ase bunarsusfer As im nesiktene?" Petrus jei ga aa tamawolbana, "Bunar Tuhan, Aamei Imes towaswena ai Ims nesiktene." Yesus Jei Petrus ga aa bala, "Dombana Amna ga waakenfer is gerebaabisnenne." ¹⁷ Yesus Jei Petrus nawer-ningnabarfer ga aa tenebana, "Simon tane Yonammana, aamei Ai ke Ase im nesiktene?" Petrus jep ga ini ga aa jenbana, aam temawer Yesus Jei Jam tenebalabe jamer nawer-ningnabarfer, "Aamei Ai ke Ase im nesiktene?" Petrus gamjon ga aa tamawolbana, "Tuhan, Aamei seyafter gemerserem Imes towaswebabili. Aamei Imes towaswena ai Ims nesiktene." Jepga Yesus Jei Petrus ga aa bala, "Dombana Amna ga waakenfer is gerebaabisnenne. ¹⁸ Ai aamei isa bunarsusfer bala, aamei tanismer gwanan igalap gwenantam, aamei bana iner igam gwelawili, ane aamei ga igam sofwa ina jewer igam gunurum jam sofwefe. Jengga aamei jam ijep bakswenaram, aamei tafna ilemana ga jam is tetefa, ane angtane nafsi jei tafna imna ga isene faarebafa, ane aamei ga isene aftafala tampata aamei baife ijes gwebilirim jewer jam gwife." ¹⁹ (Yesus taterisi jeiserem gam aa jewer nasbilirim, taterisi jeiserem Yesus Petrus ga jem ge saasini jei fomfom se tere. Jei se tere angtane sene munbono. Ane tere jeiserem jeme, jei ga bosna Uwa Sanbagirmana jem gase gulbatena.) Jeiserem jamer taban, Yesus Jei Petrus ga aa bala, "Au, Amse tikwebaati!" ²⁰ Jepga Petrus jame aa galap irfwenaram jelem duruwer, jei jep ga ai Yohanes ga as damtana. Aiba angtane Yesus aJei tikwebaatinirim nafsiserem Yesus aa jes nesiktenerem. (Ai Yesusem gwetmanap ai nwinint gwanan agalaba twenantam, ane ai Yesus enggam aJei tenebasantam, "Tuhan, Aamei Is nane se gera ginanggwaminibe?") ²¹ Petrus ai jame aa galap damtanaram, jei Yesus ga aa tenebana am temawer. Jei enggam tenebana, "Tuhan, jemnibe bai se etamwena?" ²² Yesus ga aa tamawolbana, "Afa Ai enggam jam As gunurum, Yohanes gemer se gwena jamere Ai gamjon As fortya, aamei taterisi jeiserem jebe ijam taawiyen. Jengga aamei Amse tikwebaati." ²³ Jega jem temawer taterisi jeiserem angtane Yesus aa jei ne tikwebaatinennerem jei jener ga aane nasbinenne enggame, "Yohanes jei jam teryen." Jengga Yesus Jei enggam Jam guyon ai as tere, afa ajam teryen. Jengga Jei jafner gunu, "Afa Ai enggam jam As gunurum Yohanes gemer se gwena jamere Ai gamjon As fortya, aamei taterisi aaiserem jebe ijam taawiyen." ²⁴ Ai Yohanes, aiba ai amsam gunu taterisi aaiserem jeba bunaram, ane ai taterisi aaiserem ga ai tulistaabili. Ai ga aya towaswena enggame, Jei aa jes bilirim jeba bunaram. ²⁵ Yesus aa jes eyebaabilirim nafis-nafsiserem jei ane-anesus. Afa seyafter jeiserem angtane daamfen-daamfenneme jam gane tulistababilirim, ai enggam ai gunu, bukunu jeiserem ogiri aaiserem jep jam ne egantababisiyen, aam temawer bukunu jeiserem unggwanfersus.