Yakobus

Yakobus

¹ Ga ip, aamei safna Uwa Sanbagirmana anggwabura Yahudimanaiserem, ogirip igemera nwinbenennerem. Surta aaiserem amniwer, Yakobus. Aiba angtane awelna Uwa Sanbagirmana ane Tuhan Yesus Kristusmana aje eyeipminirim. Ai aamei isa enggam ai balbabili, waakenfer sa gwe! ² Am afelen mesna, afa aamei unggwasbala jam isa damtabilirim gala-gala, ini imna ga ise saaser-saasermer sege folbamini, ³ aam temawer aamei enggam imsa towaswena, aamei unggwasbala jam ijeba domolaram, ane jes jepserem aamei Yesus ga gemer isa tebana, igi jemna ga enggam aamei kanaufer isa fina unggwasbala nafsiserem gamjon ijeba domolaram. ⁴ Aamei ga kanaufera isa fina unggwasbala jam ijeba domolaram. Jewer ga aamei gamjon ginggitfer ga isa tebafa, jega aamei waakenfer gam isa gwena. Ane gwela imnaiserem jebe, ini imna waakena seyafter ga is sege folbamini. ⁵ Afa angtane imniwer tousaiserem jam domolyanaye, jei sembayanga Uwa Sanbagirf enggam gam gwebabana, "O Uwa Sanbagiri tousaiserem ap se gulba.", ane Uwa Sanbagiri Jei angtane jeiserem tousaiserem jep ga gam gulbana. Jei gam gulbana, aam temawer Uwa Sanbagiri Jei angtanefe uskambar kitulmuwena. Angtane safe bastantowaifer gane bala, jengga Jei unggwanfersus gam golmini, ane Jei enggam jam ge gubiyen, "Aamei Ai gamjon As ijama balyan." ⁶ Angtane Uwa Sanbagirminiwer apgal jigala jam gam bilibenerem, jei jelem inibe isar-isarmere jam bilyen, jengga inibersus enggammer gam gunu Uwa Sanbagiri jeiserem se eyebili. Angtane isar-isarabara aa jei gam gwenaram, jei ga enggala ti alna tiniwer antiyele jam irfifwela galserem, bwona enggam gam fonolswena enggam gam fonoltetya. ⁷ - ⁸ Angtane jes galserem, jemna ini daamfennaber jam folbayan, jei namwer enggam gam eyebili, ane galap jei nafismer gam eyebili. Jei enggammersus jam guyon, "Ai waakena Uwa Sanbagirminiwer as domola." ⁹ Angtane Kristen galgalyenaiserem, ini jemna ga saaser-saaserfer gam folbana afa Uwa Sanbagiri galgala jep jam gam gulbanaram. ¹⁰ Ane angtane Kristen galgalabaraiserem, ini jemna ga saaser-saasermer gam folbana afa Uwa Sanbagiri galgala jemniwer jam gam tamserenbaibenerem. Ini jemna ga saaser-saasermer gam folbana, aam temawer angtane galgalabaraiserem ga enggala kakatar ese gamserem, ese jeiserem gam ferwesini abakefyan, gamjon gam werenswena, ane ga gam jentya onnap. Jes gemerserem angtane galgalabara ga gemer gam tere. ¹¹ Gwere jam gam tawetyaram nafa jemna unggwanfer ane sarsara, jepga kakatar ese jeiserem ga gam sasanswena, ese jeiserem gam gam jentya, nei numu waakena jemnaiserem gamjon nejama domolyan. Jes gemerserem angtane galgalabaraiserem jeime gemer, jei awelna jemna jam aa jep gam eyebilirim, jeime gam jena. ¹² Afa angtane kanaufer jam gam finaram jei unggwasbala waakenaiserem jam aa jep gam domolaram, ini jemna waakenfer gam folbana. Angtane kanaufer aa jei gam finaram unggwasbala jam domola jepserem, ini jemna waakenfer gam folbana, aam temawer jei fwaina waakena gam domola. Fwaina waakena jeiserem ga aas: waakenfer gwelaiserem jamer abak-abaksus Uwa Sanbagiri aa jes bilipminirim angtanef jam golmife, angtane Uwa Sanbagiri aa jei ne nesiktenerem. ¹³ Afa angtane unggwasbala kapkaiserem jam gam domolaram, angtane jeiserem jei enggammersus jam guyon, "Unggwasbala kapkaiserem Uwa Sanbagirminiwer jela." Uwa Sanbagiri Jei unggwasbala kapkaiserem fasfasus jam domolyan, ane Jei unggwasbala kapkaiserem Jam golmiyen angtanefe. ¹⁴ Jengga angtane ini unggwan-giri enggam aa jemanem gam folbanaram galgala unggwanfer jam damtabif, ini jes galserem angtane ga jei gam dektene etam-etama jam eyebife. ¹⁵ Gam jega angtane nabala enggam gam gunu jelem inibe, "Ai etam-etama kapka ajam eyebif." ane jei etam-etama jeiserem ga gam eyebili. Ane jei jeber-jeber kapkaiserem ga gam eyebuwena jamere jei gam tere, taman tokwagirip ga gam sofwa. ¹⁶ Am afelen mesna ai isa ajes nesiktababilirim, aayai aamei in ina ijama afaf-afafsoyan! Kapkaiserem afa jam jelyan Uwa Sanbagirminiwer. ¹⁷ Seyafter waakenaiserem ane bunarsusferaiserem, Uwa Sanbagirminiweram jela, Uwa Sanbagiri nafa seyafter aa jei eyebilim winsibe. Ane Uwa Sanbagiri Jei nafis-nafismer Jam eyebaabiyen. Jei aa jes eyebuwenaram, Jei ga jetefner eyebili. Jei ti uwuwu gamserem gamyan. Gwere jam gam anggasetyaram tibol mwongfar timana uwuwu bwalefer gam falbili, ane gwere bolap jam gam fityaram timana uwuwu gam toforswebili. Jengga Uwa Sanbagiri Jei Jam irfifweyan, Jei gamfener. ¹⁸ Gwanan galapserem Uwa Sanbagiri enggam ga gul, "Ai angtane aaiserem Ajam eyebaabif Alefe." Ane taterisi Jelemana bunarsusfer aaiserem nei ga nes jem eyebaabili Jelem angtanefe. Nei Yesus nabala neya tebana waakenfer, ane angtane unggwanfer nafsiserem jei jon Yesus sene tebafa galabe. ¹⁹ Am afelen mesna isa ajes nesiktababilirim, aaiserem ga waakenfer isa sarbisini. Aamei tatarmer igama sarbili, jengga samem-samem igama nasbili, ane samem-samem igama kakalswena. ²⁰ Uwa Sanbagiri Jei nei nes enggam balbabili, "Ini imna ga jam isa wirtabaabili." Jengga afa nei jeber-jeber nesa kakalsowenaram, ini nemna nejama wirtabaipmiyen. ²¹ Jega jem temawer kabwakfer gwela ga jam isa tobolsiwi. Ini imna jam onabertalaiserem jesa tebabi, ane Taterisi Waakenaiserem jem ga isa sarbisini, taterisi Uwa Sanbagiri ijes golminirim ilem inibe. Taterisi jeiserem baabetabara aamei is je waakentabasife. ²² Taterisi jafner ijama sarbisiyen, aam temawer afa aamei jafner jam igma sarbisini, gam jega aamei in inater igma afaf-afafsona. Taterisi Uwa Sanbagirmana aa jes bilirim, ga jam isa eyebili. ²³ Angtane taterisi Uwa Sanbagirmana jafner aa jei gam sarbisinirim jengga jam eyebiyen, angtane jeiserem ga enggala angtane mirmase jelemana serminip jam damtala gamserem. ²⁴ Jei jena jam gam gerebanaram serminibe, ane ga gam sofwa, ane jes jeberserem jei numu jelemana gam dirinswebili fomfom folbana. ²⁵ Taterisi Waakena waakensusu, ane baabetsusu angtane jam geserstefe gwiniwer. Angtane Taterisi Waakena jeiserem aa jei gam terelbilirim jamere waakenfer gam taabili, jei jafner jam sarbisiyen ane jam dirinswebiyen, jengga jei jam gam eyebili Taterisi Waakena jeiserem aa jes gam bilirim, Uwa Sanbagiri Jei waakena Jelemanaiserem angtane jes galserem ga jep gam gulbana, ane jei waakenfer gam gwena. ²⁶ Afa angtane aa jei gam gunurum enggame, "Ai Uwa Sanbagiriserem aJes onsobana.", jengga afa jei maflama jelemana waakenfer jam gerebaasneneyeneye, jei jenjen ga jam gam afaftana, ane jei bunarsus Uwa Sanbagiri jam onsobayan. ²⁷ Angtane ga fwersa Uwa Sanbagiri aa jes balaram waakeneme? Angtane waakenaiserem ga enggala: angtane gwesef tane ane saamirawi aa jei gam gerebaabisnenne waakenfer, afa jei kabwaktala jam gane domolaram. Ane jei jen jena waakenfer gam gerebaasnenne, jega kapka ogirmanaiserem jam dekteyen etam-etamap jam janfe.

¹ Am afelen mesna, aamei angtane Tuhan Yesus Kristus iJeya tebanaram, Tuhan Jei nafabara ane baabetabara. Jega jem temawer aamei waakena tefner ijama eyeipmiyen angtane galgalabaraiserem jebe, ane kapka tefner ijama eyeipmiyen angtane galgalyenaiserem jebe. ² Afa aaiserem jam gam etamwenaram, angtane galgalabaraiserem cincin emas gam gaarawili, ane fene waakenaiserem jes gam kamwini jam gam jelaram, jena aamei jep igama betwenaram jebe. Jepga angtane galgalyenaiserem fene bitfar-bitfaraiserem jes gam kamwini jei mese jei jon ga gam jela. ³ Ane aamei angtane fene waakenaiserem aa jei gam kamwinirim jes igama tebana, ane ga igama bala, "Uwa, sya aaf se nwinte kursini waakenaiserem jebe." Jengga angtane galgalyenaiserem aamei ga enggam igama bala, "Aamei aawer is fitna afa aaf se nwinte titikip." ⁴ Afa aamei jes gamserem gam jam igama eyebilirim, gam jega ini imna kapka. Angtane galgalabaraiserem igama tebana, ane angtane galgalyenaiserem ijama tebayan. Ini imnaiserem ise enggam gangge folbamini angtane afwer waakena, ane angtane afwer je kapka. Afa ga gam, gam jega aamei etam-etama kapkaiserem ga jes igama eyebili. ⁵ Am afelen mesna ai isa ajes nesiktababilirim, aaiserem sa sarbistaabon! Angtane galgalyenaiserem ogiri aaiserem jep aa jei ge nwinbenerem, Uwa Sanbagiri Jei angtane jeiserem se destabaabili enggalfe jei Uwa Sanbagiri ginggitfer gam ne tebaf. Angtane galgalyena jeiserem jei nunu Uwa Sanbagiri Jei aa jep gwenaram anggwabura seyafter gemerserem jem Sanbakfe, jei nunu jeiserem sene domolsa. Uwa Sanbagiri Jei fwater gul enggame, "Angtane Ams nesikteleiserem, jei nunu jeiserem sene domolsa." ⁶ Jengga aamei angtane galgalyenaiserem ijama imei-imeitababili. Jengga angtane galgalyenaiserem jei ke kabwakfer sene eyebili imnibe? Fas! Angtane galgalabaraiserem jei enggam ge gubili, "Ai im sanbakfa nwini." Ane jei aamei ga is jei sene aftabifele angtane jam teneba-tenebawela jepserem jebe. ⁷ Jei Yesus Kristusmana bosna waakena syefer ga jei sene nasibene, bosna Uwa Sanbagiri ijes golminirim aam temawer aamei Kristusmanfe ijewera gwenaram. ⁸ Uwa Sanbagiri Jei fwater enggamam gam gul Taterisi Jelemanaiserem jebe, "Aamei angtane nafsi jam igam nesiktababili, aamei in ina gemer igama nesiksonannaram." Afa aamei jes gamserem gam jam isa eyebilirim, jeiserem ba waakenam. ⁹ Jengga afa aamei waakena tefner igama eyeipminirim angtane galgalabaraiserem jebe, ane kapka tefner igama eyebili angtane galgalyenaiserem jes igama eyeipminirim, gam jega aamei etam-etama kapkaiserem jes igama eyebili, ane Hukumu Uwa Sanbagirmana ga igama ayebili. ¹⁰ Afa angtane Hukumu Nabi Musa aa jes tulistababilim jei seyafter waakenfer jam gam sarbisinirim, jengga daamfennaiserem ga gam ayebili, gam jega jei hukumu seyafter gam ayebaabili. ¹¹ Taterisi jeiserem ba bunaram, aam temawer Uwa Sanbagiri enggam gul, "Maaryen ijama gwebiyen." Ane Jei gamjon enggam gul, "Angtane ijama munboyon." Ga enggam, aamei safe maaryen ijama gwebiyen, jengga afa angtane jam igama munbonorom, gam jega aamei ba angtane Hukumu Nabi Musa aa jes tulistababilim aa jei ne ayebuwenaram ba jesam. ¹² Kristus Jei Taterisi Waakena nes mesam golmini. Taterisi Waakena jeiserem nei nes enggam balbabili, nei nen nena ga jam nesa nesiksonanawena. Ane Taterisi Waakena jeiserem ga angtane jei kitultef enggalfe jei waakenfer gam naawef. Aamei jes igama nasbilirim, ane jes igama eyebilirim, aamei jeiserem jeme in ina jem ga jam igama nesiksonanna, aam temawer Tuhan aa jep gusurum angtane waakena bunarsusfer nansa, ane kapkaiserem jei nansa, jes jepserem Tuhan Taterisi jeiserem gase sarbistaabonsa. Ane Jei Jelem inibe enggam gase gusu nei ke nemsa taabili, afa fas. ¹³ Angtane afa angtane nafsiserem jam ne nesiktababiyeneye, ane waakenaiserem jam ne eyebiyeneye, nunu umwef jepserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei waakenaiserem jam golmiyen angtane jeiserem jebe. Jengga nei afa angtane nafsi jam negama nesiktababilirim, gam jega nejama ereyen nunu umwef jepserem Uwa Sanbagiri angtane aa jem waksosisirim. ¹⁴ Am afelen mesna, jeje bafa angtane enggam ga gam gunu, "Ai Uwa Sanbagiri ames tebana.", jengga jei waakenaiserem jam eyebiyen? Afa jei Uwa Sanbagiri jes gamserem gam gam tebanaram, Uwa Sanbagiri Jei angtane jeiserem Jam waakentaasiyen. ¹⁵ Ai ajafner gunu enggame, afa angtane Kristen im nenennabe jemna fene fas, ane tumilgala fas, ¹⁶ ane afa aamei fen mese ane tumilgal ijama golmiyeneye jebe, jeiserem jei kapka. Aas mese jegme kapka aamei enggam jewer igama gunurum, "Kelek, ipsam dirinsonaram fene waakena se kamwi, ane ga is twena." ¹⁷ Afa angtane Uwa Sanbagiri jam gam tebanaram, ane jei waakenaiserem jam eyebiyen, angtane jeiserem jei Uwa Sanbagiri syefer gam tebana. Ini jemna Uwa Sanbagiri aa jem gam tebanaram igi jemna fas. ¹⁸ Angtane afa enggam jam gam gunurum, "Angtane daamfennaiserem jei waakena tefner gam taabili. Ane angtane nafsiserem jei waakena tefner gam eyebili." Angtane gam aa jei gunurum, ai angtane jeiserem enggam ai tamawolbana, "Ap se destaibe, fomfoma angtane waakenaiserem gam taabili, jengga waakenfer jei jam eyebiyen? Ane ai ga isas destaibene ibe, ai waakenfer ajewer eyebilirim, ai ga aam temawer ai waakenfer ames taabili." ¹⁹ Aamei enggam im gunu, Uwa Sanbagiri Jeiba daamfennam, ke gam? Ba gamam! Bwata kapkaiserem jei mese gam ne taabili, ane sege erebili, ga sege egegwebili! ²⁰ Aamei teisyensusu! Ke samfer ai ibe isa ajam ge saamisife, jeiserem je kapka afa angtane jetefener gam taabili, ane waakena jam eyebiyen? ²¹ Sa damta asal-asala nemnaiserem Abraham. Uwa Sanbagiri Jei Abraham mes waakental, aam temawer jei waakenfer eyebil tane jemna Isak Uwa Sanbagirfe aa galap gerbalam, tampata tunawer aa jes eyebilim jem sagabe. ²² Ba enggamam, Abraham jei Uwa Sanbagiri waakenfer mes tebal, ane jeime waakenaiserem mes eyebil. Jei nawersamer mes eyemil. Jei gam ajewer eyebilim, nei ga nejama towaswena enggame jei bunar-bunarsusfer Uwa Sanbagiri mesam tebal. ²³ Ane Taterisi Uwa Sanbagirmana aa jes ne tulisulum ga enggam mes etamwel: "Abraham jei Uwa Sanbagiri waakenfer mesam tebal, jega jem temawer Uwa Sanbagiri Jei enggam gam gunu Abraham jei waakena." Ane Uwa Sanbagiri Abraham ga bal, "Am afelna." ²⁴ Gam jega aaiserem ba bunarsusferam, Uwa Sanbagiri Jei enggam gunu, angtane ba waakenam afa jei waakenaiserem jam gam eyebilirim, jeke jei jafner aa jewer gam tebanaram, jengga jei nawersamer gam eyeipmini. ²⁵ Wini maaryen-maaryenaiserem bosna Rahab jeiba gamam. Uwa Sanbagiri Jei Rahab enggam bil jei angtane waakena, aam temawer jei waakenfer aa jewer eyebilim. Jei waakenfer aa jes eyebilim ga enggam eyebil, jei sabanggwana Israelmana jelem jenap waakentababisil. Ane jei ga nele nensaiserem jes destabamil, jega angtane jeiserem jewer ge tobitinyefe kotanawer. ²⁶ Umwef ga enggam, mafnana angtanemana tifniwer jam gam totintyerem, tifni jemnaiserem gemer gam folbana, jengga angtane jeiserem jei fwater gam tere. Jes gemerserem aaiserem jegme gemer, angtane aa jei gam gunurum enggame, "Ai Uwa Sanbagiri ames tebana.", jengga afa jei waakenfer jam eyebiyen, angtane jeiserem jei bunarsusfer jam tebayan.

¹ Am afelen mesna, safnant, aamei seyafter guruf ijama gweyan. Angtane daamdema tefner Taterisi Uwa Sanbagirmana ga jep sene towas-towasulmini, aam temawer aamei imsa towaswena ai guruf ajeya gwenaram, nunu umwef jemserem Uwa Sanbagiri angtane aa jem tenebaabuwesaram, nunu jeiserem jeme Uwa Sanbagiri Jei as tenebaabuwena uskambar, ane angtane nafsi Jei Jam tenebaabuweyan uskambar. ² Nei seyafter waakenaiserem fas jeber-jeber nejama eyebuweyan. Jengga angtane taterisi kapkaiserem fas jam nasbiyeneiserem, angtane jeiserem jei ga waakensusu, jei jen jena jamer gam gerebaasnenne tifni seyafter gemerserem. ³ Nei newa janma fwirebaasiwilirim kudam aaremabe enggalfe, nei gemer negama gunurum kudana jeiserem gemer gam eyebif, ane nei kudana jeiserem jamer ganma nornortaasfele nei gemer negama gunurum jewer sofwefe. ⁴ Gamjon atdusa domol. Atdusa jeiserem safe unggwandusa, deye unggwanfersus ga je gwirinfele, ane naarema safe bastouya atdusa jeiserem ga jei gam nornorulsfele. Ane atdusa jeiserem ga gam sofwa angtane naarema aa jei gam taabilirim aa gemer gam gunurum. ⁵ Maflama nemna ga gam jes gamserem. Bunar-bunarsus maflama nemna safe bastantowaisusu, safe gala, ula unggwandusa ba jener gam nasbili. Sa domol, tokwana safe bastantouya, kakatargiri sasana ba jener gam dutana. ⁶ Maflama ga tokwana galserem. Tifni nemnaiserem jebe, maflama ga etam-etama kapka jei gam nasbili, ane kapka jeiserem ga gam wofena tifni nemna seyafter gamserem jebe. Ane bawasa ga tokwana afa maflam jener gam forsona jamer ertefe, ane ini nemna ga nes gam kabwaktabaipmini, ane gwela nemna seyafter nes gangge kabwaksweipmini. ⁷ Seyafter ogiribe aa jei ge wofobilirim, junu seyafter, twen mese, ane jigala seyafter, seyafter jeiserem angtane samfer gane tainbili ofofe, ane fwater mesane tainbil. ⁸ Jengga angtane afa fasfasus maflama jemna waakenfer jam gerebaasnenefe. Maflama kakalsusu, ane angtane maflama fas jam ne gerebaasneneyen. Jei beraakini galserem angtane gam tere. ⁹ Maflama nemnaiserem ga enggalf Uwa Sanbagiri nejema balf enggame, "Ase samfer golmini." Ane maflama jeiserem jeme angtane jem negama babapsobana, angtane Uwa Sanbagiri aa jes eyebaabilirim numu Jemna galserem. ¹⁰ Maflama nemna ga daamfenna, ane maflama jeiserem jeme taterisi waakena yo kapka ga jem negma nasbabili. Am afelen mesna, jes gamserem nepsama eyebilirim! ¹¹ Fo mwona afa ke jere aa jei sosetyaram fona waakena ane fona finibere, fo mwona daamfenna jeiserem jewer? ¹² Am afelen mesna, ti gatara jam teyan eremufe; ane gwili jam teyan gatarfe. Fo mwona finibereiserem je fona waakenaiserem jewer jam totinyen. Ane maflama imnaiserem jei ga gam, taterisi kapka yo waakena jeme ijama nasbabiyen. ¹³ Afa aamei tousaiserem jam isa taabilirim, galabe aamei ina ijama tetenanayan. Ijama tikweyan waakenfer eyebiliserem jewer, jega angtane gam sege towaswebili enggame tousaiserem jeiserem jei bunar. ¹⁴ Jengga aamei afa ina jam isa tetenannaram, ane aamei angtane nafsi afa jam igma nasbanaram, gam jega aamei ijama afaf-afafweyan enggam ga igma gunu, "Ai tousaiserem amsa domola." ¹⁵ Tousaiserem jes galserem je taman waaken-giriwer jam jelyan. Jengga ogiriwer gam etamwena, ini kapka nemnaiserem ga jewer gam jela, ane bawasminiwer gam jela. ¹⁶ Afa angtane jei jena jam gane detenaram, ane jena jam gane nasminirim, doksol-doksola jes jep gam falaram, ane kapkaiserem jes galserem gala ga jep gane eyebaabili. ¹⁷ Jengga tousaiserem winsiwer aa jei gam iretyaram, jei bunarsus tabalbalsusu. Afa angtane tousaiserem jam gam domolaram, angtane jeiserem jei angtane nafsiserem jebar waakenfer ga gangge gwena. Jei angtane nafsi gam tagbana. Jei angtane nafsi uskambar gam nesiktababili, ane jei jeber-jeber waakenater gam eyebili. Jei angtane seyafter gemerserem jebe armanaber gam eyeipmini, jei akar-akarem jam eyeipmiyen. Ane jei aa gemer gam gunurum, ga gemer gam gwena. ¹⁸ Angtane sarabosna aa jei gam taatwebanaram waakenfer jam gwefe, jeiserem ga waaken-waakensusu enggalfe gamjon jem jitefwer seyafter waakenfer gam gwef.

¹ Jeje bafa aamei ga imasefa erawena, ane jeje bafa in ina ga ima nasmuwena ilem nenennabe? Aamei jeber-jeber ima erawena ane ina jeber-jeber ima nasmuwena, aam temawer aamei galgala seyafter gemerserem ijesa tebabif, ane waakenaiserem jeber-jeber ge erawena kapkaiserem jebar ilem tifinibe. ² Aamei galgala ilem inibe safe imsa balbabili jam damtabife, jengga aamei masef ijama damtabiyen. Jega jem temawer aamei angtane nafsiserem igama menetwebasini jam munbofe. Ini imna safe ise unggwan-giri gangge folbamini galgala jam damtabife, jengga aamei masef ijama damtabiyen. Aamei ga ina ijem temawera nasmuwena, ane ijem temawera erawena. Aamei ijama damtabiyen jes igama balbabilirim, aam temawer aamei Uwa Sanbagiri ijama balyan jeiserem jem temawer. ³ Ane aamei safe Uwa Sanbagiriserem jam igama bala, aamei ijama damtabiyen aam temawer ini imna kapka. Ai aamei gam isa ajewer balbabilirim, ai ga aamei isa aam temawer ai balbabili, aamei jes igama balbabilirim jam damtabife jeiserem ilefefener igama damtabili. ⁴ Aamei ba angtane Uwa Sanbagiri jam tebayanaiserem. Aamke imsa towaswena enggame, afa aamei nele kapka jam isa onsobanaram ogiribe, gam jega aamei enggalf ga isa gwena Uwa Sanbagirem ginanggwafe. Jega aaiserem ga jem temawer angtane nele kapka aa jei gam onsobanaram ogiri aaiserem jebe, angtane jeiserem jei ginanggwana Uwa Sanbagirmana. ⁵ Taterisi Uwa Sanbagirmana aa jes tulistaabilirim ga enggam, "Uwa Sanbagiri Jei Mafnana Jemna mes gwetaantena nem tifinibe, ane Mafnana jeiserem ga enggam gunu, nei Uwa Sanbagirfefener nesa gwena." Aamke enggam ima gunu ilem inibe, jeiserem man ol kabwak? ⁶ Jengga Uwa Sanbagiri Jei waakenaiserem Jelemana unggwanfersus nes mes golmini nebe. Taterisi Uwa Sanbagirmanaiserem jep aa gam tulisulurum: "Uwa Sanbagiri Jei angtane jena jam gaartenanalaiserem, Jei jebar gangge erna, jengga angtane ini jelemana aa jei gam onabertanaram, Uwa Sanbagiri Jei waakena Jelemanaiserem angtane jes galserem ga jep gam gulbana." (Amsal 3:34) ⁷ Jega jem temawer aamei tifni ilemana ga jam isa kitulbono Uwa Sanbagirfe, ane aamei ina ga jam isa onabersona. Aamei bawasfar isa erna, ane bawasa gase nunggiri imniwer. ⁸ Aamei Uwa Sanbagiri ga jamer isa gwetmantaasini, ane Uwa Sanbagiri Jegme aamei is gase gwetmantababisini. Tafa sa wirtaba aamei etam-etama kapka ijesa eyebilirim jewer. Ini imna nawerfer is jei ge folbaminirim, afwer waakena afwer kapka, ini jeiserem jasa wirtabaabi! ⁹ Aamei jasa syesyawe, gamjon uskambar isa syesyawena. Ga enggam aamei ini imna saaser-saaserfer is jei ge folbaminirim, ane ini bweral-bweralfer is jei ge folbaminirim, bweral-bwerala imna jeiserem is sege irfweipmini jam syesyawefe. Ane ini imna saaser-saaseraiserem is sege irfweipmini ini is jam ge jenbamife. ¹⁰ Aamei in ina ga jam isa onabersona Tuhanminibe, jega Tuhan aamei is gase kitultena. ¹¹ Am afelen mesna, aamei syefer ijama nasoweyan ilem afelen mesnaiserem jem temawer. Angtane syefer aa jei gam nasowenaram jelem afelnem temawer, afa enggam gam gunu jei kapkaiserem jes eyebili, angtane jeiserem jei Taterisi Waakena Uwa Sanbagirmanaiserem ga jes gam ayebili, ane enggam gam gunu, "Taterisi Uwa Sanbagirmana ai ajam onsobiyen." Afa aamei gam jam igma gunurum, gam jega aamei Taterisi Uwa Sanbagirmanaiserem ga jes igma ayebili, ane enggam ga igama gunu, "Ai ajam tenef Taterisi Uwa Sanbagirmanaiserem jem temawer." ¹² Jengga bunarsusfer, Uwa Sanbagiri Taterisi Jelemana Waakena Jener gam golmini angtanefe, ane Jei angtane Jener gam bala afa angtane waakena gam eyebili afa kapka gam eyebili. Uwa Sanbagiri Jenfentowaifener gwena baabetabara. Jei angtane Jei gam waakentaasini, afa Jam gam firtaaniwili tokwagiribe. Aamei baabeta fas, jega jem temawer aamei ilem afelen enggam ijama balyan jei kapka. ¹³ Am afelen mesna aamei enggam ijeya gunurum, "Ai namwer afa gwirmer asa sofwa kotanabe, ane jep ga asa nwini tahunu daamfenna enggalfe tokona agma eyebif, ane dois terelbef.", aamei esorol sa sarbisi amniwer. ¹⁴ Aamei ijama towaswebiyen gwirmer aa jei etamwelaiserem gwela imnaiserem jebe. Aamei gara galserem, gara nomkef negama damtana, abakferyan gamjon gam barwena. ¹⁵ Jengga jam nasowefe, waakenfer ga enggam igama nasowena, "Afa Tuhan as Jam sa balbabilirim, ai ga gam ga asa gwena, ane enggam ga asa eyebili, afa gam asa eyebili." ¹⁶ Jengga namwer aas jepserem aamei in ina ijama tetenanawena, ane enggam ga ima gunu, "Aiba waakenam." Aamei gam ijewera nasowenaram, seyafter jeiserem je kapka. ¹⁷ Ga jem temawer, angtane waakenaiserem aa jei gane towaswebilirim jam eyebife, jengga afa jei waakena jeiserem jam ne eyebiyeneye, angtane jeiserem jei etam-etama kapkaiserem ga jes gane eyebili.

¹ Ane aamei, angtane doini uskambar jemanserem, aamei esorola amniwer aaiserem imsa sarbisi! Aamei uskambar jam isa syesyawena, aam temawer aamei kabwaksususerem galap isa domolsa, ane isa enolsa. ² Galgala imna uskambar jeiserem mes ge butswebili. Bingini fene imna mes ne tombaipmini. ³ Emas ane perak imnaiserem mes ge sargwet-sargwetabarswebili. Ane nunu Uwa Sanbagiri Jei angtane seyafter aa jem tenebaabuwesaram umwefe, emasa yo peraka sargwet-sargweta jemnaiserem aamei ga is jei sene destabaabisi enggame, emas yo perak imna angtane nafsiserem jebe ijama kitulmiyen. Ane sargwet-sargweta jeiserem tifni imnaiserem ga is jem se taayipmisisi tokwana gamserem. Aamei galgala unggwanfer imsa orobaabili nunu umwef namwer aas jepserem. ⁴ Aamei doini fas ijama kitulmiyen angtane awelna aa jei ne gwebilirim makana imnaiserem jebe. Namwer jei aa jes ge gwarenbuwenaram, aamei gwarna jemna jeiserem jasa saripmi! Angtane nananis aa jei ne tumtumulsiwenaram im makanabe, jei enggam ge gwarenbuwena, "Asa batobaabi!" Ane jei aa jes ge gwarenbuwenaram, Uwa Sanbagiri Jei mes sarbabili imwana Jelemanaiserem jeme, Jeiba Tuhan baabetabaraiserem. ⁵ Aamei ogiri aaiserem jep imesa nwini ini saaser-saasermer, aam temawer aamei galgala anesus ima damtabuwenaram. Tifni imna is mes ge teleberswebamil, tabanap imsa fyal jam targabaabife. ⁶ Angtane kapkaiserem jam ne eyebiyeneiserem, aamei angtane jeiserem jem temawer enggam igama gunu jei jamer sege terbili, ane aamei jei ga igama munbobili, ane jei aamei is jafner ne onsobaabili. ⁷ Ga jem temawer am afelen mesna, abakfer igama fina, ane kanaufer igama fina jamere Tuhan se fortya. Sa damta angtane makana aa jei gam gwebanaram, angtane jeiserem fomfom gam fina jamere ona jeiserem nananisi jem igiserem gam gulbana waakena. Jei arous gam fibana twam tanna nalefe jam tonolyan, ane arouwa afelnaiserem gam fibana nalefe nananisi jam ge eseberswebife. ⁸ Ane aamei mese, aamei abakfer igama fina, ane kanaufer igama fina, aam temawer nunu Tuhan jem foryalaiserem nunu jeiserem ga mes gwetmansweyal. ⁹ Am afelen mesna, aamei taterisi syefer ijama nasbiyen angtane nafsiserem jem temawer, jega Uwa Sanbagiri aamei is Jam teneba-tenebabuweyan. Angtane jam Jei tenebaabuwelaiserem mes menetwesil jewer foryafe. ¹⁰ Am afelen mesna, nabi-nabi fwater aa jei ge nasbawelam Tuhanem boseme, jes sa sarbabistaabon. Angtane nafsi safe kapkaiserem jes ne eyeipmuwel jebe, jei abakfer ge fibil, ane kanaufer ge fibil. Jei waakenfer naawel, ane nei samfer ga gemer nesa gwena jei gamserem. ¹¹ Angtane enggam ne balbabili, nabi-nabi jeiserem ini jemna waakenfer ge folbamini, aam temawer jei kanaufer ge fibil. Aamei imsama sar Nabi Ayubem temawer, jei kanaufer aa gam filam jei tamtamtala uskambar aa galap domolaram. Ane aamei imsa towaswena enggame, Tuhan Jei waakena jep mes gulbal nalefe jam teryen. Tuhan Jei angtane uskambar nesiktababili, ane ini Jemna waakena. ¹² Am afelen mesna, igsusu ga aas: Aamei ina ijama testenanayan taman waaken-girem boseme, safe ogirem bosem, afa apgal jigala nafsiserem jem bosem. Jafner igama biltena, "Sya." afa aamei enggam igma gunu bunar; ane "Fas." afa aamei enggam igma gunurum jeiserem bunaryan. Jes gemerserem aamei ga gemer isa eyebili, jega Uwa Sanbagiri Jei aamei is Jam tamtamtababiyen. ¹³ Afa angtane im nenennabe kabwaktala aa jei gam domolaram, jei sembayang jam gam gwebana. Afa angtane ini saaser-saaserfer aa jeman gam folbanaram, jei simals gam twola, Uwa Sanbagiri ga gam pujitene. ¹⁴ Afa angtane im nenennabe jei bwerna jam gam folbanaram, jei angtane sanbaka jemata aa jei ne taabilirim ga jes gam jenbebili. Angtane sanbak jeiserem jei sembayanga ga gane gwebabana, ane minyakem ga gane gwebana Tuhanem boseme. ¹⁵ Angtane sanbak jeiserem jei sembayanga jam aa jep gane gwebanaram, afa jei bunar-bunarsusfer jam gane tebanaram, angtane bwernabara jeiserem jei ga gam waakenswena. Tuhan Jei angtane jeiserem ga gam waakentana, ane afa jei kapkaiserem jes gam eyebilirim, Tuhan Jei etam-etama kapka jemna jeiserem ga gam wirulbaasini. ¹⁶ Jega jem temawer etam-etama kapka jes igma eyebaabilirim, seyafter ga jam igama nasbabili jam towaswebabife. Ane sembayang ga jam igama gwebabinenne. Aamei sembayanga angtane nafsiserem jem temawer igama gwebana, ane angtane nafsi jei sembayanga im temawer gane gwebana. Ga gemer isa eyebuwena, jega Uwa Sanbagiri aamei is ga gam waakentababili. Angtane aa jei gam eyebilirim Uwa Sanbagiri aa jes gam bilirim, sembayanga jemnaiserem baabeta uskambar. ¹⁷ Nabi Eliya jeiba angtanesam nei galaterserem. Jei sembayanga ini jemna seyafter gemerserem jem gwebal enggame, "Arouwa jam nyenyan.", ane arouwa ga jam nyenyan jamere tahunu unggwanfer ga tiga setenga. ¹⁸ Ane jei sembayanga gamjon aa gwebal, ane jes jemerserem arouwa ga ireyal winsiwer, ane nananis gamjon waakenfer ga aa ge tenbili. ¹⁹ Am afelen mesna, afa angtane im nenennabe jei taterisi Uwa Sanbagirmana bunarsusfer aaiserem baif jam gam gwebilirim, ane angtane nafsiserem jei angtane jeiserem gamjon ga gam batobana jamere angtane jeiserem gamjon gam warauwa Uwa Sanbagirminibe, ²⁰ ayata aaiserem jesa sarbistaabon: Angtane aa jei gam gwebanaram angtane etam-etamabara gamjon gam waraunafe nele kapkaiserem jewer, angtane jeiserem jei angtane etam-etamabara jeiserem uwu jeman gam waakenulbaasini terewer, ane etam-etama unggwanfersusu aaiserem ga gam matabaibasini.