Ibrani

Ibrani

¹ Gwanan-gwanansus Uwa Sanbagiri Jei nabi-nabis balbabil, ane nabi-nabi jeiserem ga taterisi Uwa Sanbagirmana ga gane nasipmil asal-asala nemnaiserem jebe. Uwa Sanbagiri Jei jeiserem jeber-jeber ga gemer eyebuwel, nele nafis-nafismer. ² Jengga nunu umwef aaiserem, Uwa Sanbagiri Jei ga Tane Jemnaiserem ga Jes baftatnant, ane Tane Jemnaiserem Jei taterisi Uwa Sanbagirmanaiserem nep ga nes Jei nasipmini. Uwa Sanbagiri Jei Tane Jelemanaiserem Jebar mes ge eyebil seyafter, ane Uwa Sanbagiri Jei ga Jes destabal Sanbakef Jei nwinfe seyafter gemerserem jem sagabe. ³ Jei numu bunarsusferaiserem Uwa Sanbagirmana, ane nafa Uwa Sanbagirmanaiserem ga Jemniwer jere unggwanfersus. Jei samfer onemanayo ane winsimana seyafter gase gerebaabisnenne. Jei aa jewer gam eyebilirim, aam temawer Taterisi Jemnaiserem baabeta unggwandusa. Jei aa terem etam-etama kapka nemnaiserem nes wirulmini. Gamjon ga aa irwenant terewer. Jei ga aa tawenant taman waaken-giribe, ane jep ga aa nwini Uwa Sanbagirem taasfolawer, Uwa Sanbagiri Jei baabeta Jemna unggwandwasusu. ⁴ Uwa Sanbagiri Jei ga mes eyebili, jega Tane Jemna unggwan-girsusu malaikatminiwer. Ane Jei bosna unggwandwasusu gam gulbal Tane Jemnaiserem jebe. Uwa Sanbagiri bosna jes galserem Jei Jam golmiyen malaikatfe. ⁵ Uwa Sanbagiri Jei Jam balbabiyen malaikata Jelemana, jengga Jei mes bal Tane Jelemanaiserem enggame: "Aamei namwer Tane Amna; ane nunu namwer Ai Im Uwaf As gwena." (Mazmur 2:7) Gamjon Uwa Sanbagiri Jei Jam balbabiyen malaikata Jelemana enggame, jengga Jei mes bal Tane Jelemanaiserem: "Ai As nwinsi Uwa Imnaiserem, ane Aamei ga Is nwinsi Am Tanefe." (2 Samuel 7:14) ⁶ Gamjon Tane Uwa Sanbagirmana daamfennaiserem jame aa galap fortyantam ogiri aaiserem jebe, Uwa Sanbagiri ga gununt: "Malaikata Uwa Sanbagirmana jei seyafter Jes sene pujitawena." ⁷ Uwa Sanbagiri ga enggam gunu malaikatem temawer: "Uwa Sanbagiri Jei malaikata awelna Jemnip aa jei ne gwebilirim ga balbabili, ’Gasa sofwe!’, ane malaikata jeiserem ga sofobili, nindaya jes gam gane fonsobanaram, ane tokwana gam gane ertesinirim." ⁸ Jengga Tane Jelemanaiserem Jem temawer, Jei ga enggam gul: "O Tuhan, Aamei Sanbakef nwini baabetabara abak-abaksus! Aamei Is nwini angtane seyafter gemerserem jem Sanbakfe, ane Aamei ga bunarsusferaiserem ga jetefener Igam eyebili. ⁹ Ini Imna Is gam folbana saaser-saaserfer, Aamei angtane jam Igam damtabilirim bunarsusferaiserem jei jam gane eyebilirim. Ane Aamei angtane jei kapkaiserem jam gane eyebilirim, angtane jeiserem jam Is nasbabili. Ga jem temawer, Ai Uwa Sanbagiri Imna, Ai Aamei Is Ames destabana Im afelen mesna jem sagabe, ane jega jem temawer ini Imna ga Ise saaser-saasersusfer se folbana." (Mazmur 45:6-7) ¹⁰ Ane Uwa Sanbagiri gamjon ga gul: "Aamei, O Tuhan, gwanan-gwanansus jes jepserem, Aamei ogiri aaiserem Im eyebal. Gamjon Iner winsi Im eyebal. ¹¹ Ogiri ane winsi jei sege bakswena, fen iti galserem. Jei nawersamer sege barwesa, jengga Aamei Is gwena. ¹² Aamei Is egwaisosisi ogiri yo winsi, bajunu aa gam gane egwaisosinirim, ane ogiri yo winsi ibirmiserem jewer gamjon ga sene domsosa. Jengga Aamei Is nwini jamer abak-abaksus, ane nunu Imna jam barweyan." (Mazmur 102:25-27) ¹³ Uwa Sanbagiri Jei Jam balbabiyen malaikata Jelemana, jengga Jei mes bal Tane Jelemanaiserem enggame: "Gase nwintya Alem taasfolawer, jamere ginanggwa Imna Im tof gwonap sege nwinbitetya." (Mazmur 110:1) ¹⁴ Gam jega, malaikata jei nansa? Jeiba awelna Uwa Sanbagirmana aa jei ne gweyibenerem. Jei malaikata ga baftabili, ane ga aa ge sofobili nindaya gamserem enggalfe angtane gam ne batobaabif, angtane Uwa Sanbagiri Jena Jam aa jes waakentababisiliserem.

¹ Gam jega au, ganma sarbisi waakenfer taterisi bunarsusfer aaiserem nei nejesa sarbilirim. Jeiserem jam nesa eyebilirim, jega nei nejama syensyanweyan nele bunarsusfer jeiserem jewer. ² Nei ga Hukumu jam nesa onsobili, Hukumu malaikata aa jes ne golmilim asal-asala nemnaiserem jebe. Jeiserem nesa onsobili, aam temawer Hukumu jeiserem jeba bunaram. Angtane Hukumu jeiserem jam ne onsobiyeneiserem, jei fwaina kapkaiserem mes ne domol. ³ Afa game, neiba nemsama towaswena enggame nei nesa domolsa tamtamtala unggwandwasususerem, afa nei nele bunarsusfer Uwa Sanbagirmana jam nesa mirtetefalaram. Nele bunarsusfer jeiserem jeba nele Uwa Sanbagiri nes jewer se waakentababisini. Gwanan Tuhan Yesus nes Jeneram towastababilint nele bunarsusfer jeiserem. Jepga angtane Yesus aa jei ne sarbasinintim jei taterisi jeiserem nep ga nesene golmini, ane jei ga sege gubili enggame taterisi jeiserem jeba bunaram. ⁴ Ane Uwa Sanbagiri Jeiba mesam eyebaabili bwembwema nafis-nafsi ane mujisat-mujisat baabeta Jelemanaiserem jeme. Ane Jei baabeta Mafnana Uwa Sanbagirmanaiserem mes golmini angtanefe, Jei Jener aa gemer gunurum jebe. Jei jeiserem aa jewer eyebaabilirim, jega enggalf angtanef gam saamisif enggame taterisi jeiserem jeba bunaram. ⁵ Ogiri ibirmi nei nejesa taawolbanaram jeba se forosanya. Jengga Uwa Sanbagiri Jei Jam guyon enggame malaikata jei ogiri jeiserem sanbakef jep jei sege nwinbese. ⁶ Jengga Jei enggam gunu angtane jei sanbakef sege nwinbese. Ane angtane aasaje ba mesam tulisul taterisi Uwa Sanbagirmanaiserem jebe ga enggam: "O Uwa Sanbagiri, ai angtane tefner. Aamei angtane fomfom Is gerebaabisnenne, ane jei fomfom Is batobaabili? ⁷ Aamei angtane nomkef Im eyebaabili malaikatem gwonabe. Aamei safe malaikatfe baabeta unggwanfer Im golmini, Aamei gamjon baabeta angtanef Im golmini. Ane Aamei nafa angtanef Im golmini, ane Aamei Im gunu, ’Aamei isa nwini sanbakfe.’ ⁸ Ane Aamei seyafter Imes bunulntena angtanem tof gwonabe." (Mazmur 8:4-6) Taterisi jeiserem jewer ga neya towaswena enggame, Uwa Sanbagiri Jeiba mesam bunulntena seyafter angtanem tof gwonabe, bunar seyafter. Jengga namwer nei nejama damtabiyen angtane jei sanbakef nwinfe seyafter jes gemerserem. ⁹ Jengga nei Yesus neya damtana. Jei nomkef malaikatem gwonap nwini, jega enggalf Jei tamtamtala nemnaiserem Jei gam tyanggwonf ti salibibe. Ane Jeime siginiserem mes enola, jepga terent. Jega jem temawer Uwa Sanbagiri nafa Jep ga gulbana, ane Jei Yesus ga aa bala, "Aamei Is nwini Sanbakfe." Ane nei Yesus ga neya damtana jes gemerserem. Yesus aa terent nem temawer seyafter, ane Uwa Sanbagiri Jei waakena Jelemanaiserem Yesusf ga gulbana Jei sigini jeiserem jam aa galap enolaram. ¹⁰ Uwa Sanbagiri aa eyebil seyafter Jelefener. Jei aa mwangbisil angtane unggwanfer jam waakentababisif, aa eyebili jega samfer jei Jem tanef ge nwinbif, ane jei Jebar gase naawena nafa Jemnaiserem jebe. Ane Uwa Sanbagiri Jei bunarsusfer eyebili. Jei aa eyebili jega samfer Yesus Jei angtane nabal danafe, bunarsusfer Jei se gwena enggalfe angtane jeiserem gam waakentababisif. Jei jeiserem nalefe jam eyebiyen, Jei gwanan ga siginiserem ga jes enola. ¹¹ Yesus ane nei angtane Jei aa jes wirtabaabisinirim etam-etamawer, nei namwer seyafter safna daamfenna, ane Uwa Sanbagiri namwer Jeiba Uwa nemna. Jega jem temawer, Yesus Jei Jam sefersoyan nem temawer jam gufe enggame, neiba Jem afelen mesna. ¹² Jei Uwa Sanbagiri ga aa bala: "Ai As towas-towastababili Am afelen mesna Im temawer. Ai IsAs pujitene gamjon jam Ajeba betwenaram seyafter." (Mazmur 22:22) ¹³ Jeime aa gunu: "Ai Uwa Sanbagiri As tebasini." (Yesaya 8:17) Ane Jeime gamjon aa gunu: "Angtane Uwa Sanbagiri Ap aa jes kitulbonorom, Ai ane jei ai seyafter aaf aya nwini." (Yesaya 8:18) ¹⁴ Angtane jeiserem Jei aa jem temawer gunurum jeiba neisam, ane nei tifnibere, ane Yesus Jena jegme aa etamwena angtanefe, nei gamserem. Jei angtanef aa etamwena, jega samfer Jei gam terf. Gwanan jes jepserem bawasa jei baabeta jam tereserem jei taabili. Jengga Yesus Jei Jam aa galap tererem, Jei ga baabeta bawasmana ga aa borolbana. ¹⁵ Yesus Jei aa ter, tere Jemna jeiserem jeme angtane ga jem aftabunnu, angtane tere aa jei ne erebilirim nunu seyafter jei jam aa gemer ge nwinbenerem. ¹⁶ Aaiserem jeba bunaram, Yesus Jei Jam foroyan malaikata jam batobaabife, jengga asal-asala Abrahammanaiserem ga jes batobaabif. ¹⁷ Ane bunar, Jei aa etamwena angtanefe Jem afelen mesna gemerserem. Gwela Jeman mesna mes etamwebana, gwela Jem afelen mesna seyafter gwela jemna gemerserem. Jei jes gamserem ga enggalf etamwena, Jelem afelen mesna gam batobaabif. Jepga Jei imam sanbagirsusfe gase etamwena, angtane Jei aa jes nesiktababilirim, ane awelna Jemna waakenfer gase gwebili Uwa Sanbagirfe. Jei Jen Jena mes gerant, jega Uwa Sanbagiri Jei etam-etama kapka angtanemana gase wirtabaipmini. ¹⁸ Yesus Jena gwanba mesam unggwasbanant, ane siginiserem ga enolant, jengga Jei kanaufer finant. Ane namwer Yesus Jei angtane gase batobaabili, angtane aa jes ne unggwasbaabilirim.

¹ Am afelen mesna Uwa Sanbagiri ijes jenbebilirim, ane aamei ga Jemna, ai enggam ai gunu aamei waakenfer sa sarbistaabon Yesusem temawer. Jeiba Angtane Uwa Sanbagiri aa jes baftatnaram, jega enggalf Jei gam etamwef nem Imam Sanbagirsusfe. Jeiba Angtanesam nei nejesa tebasinirim, ane neya nasibene taterisi Jemnaiserem. ² Jei Jemna awelna mes gwebili waakenfer Uwa Sanbagirfe, Uwa Sanbagiri Jei aa Jes destabalam. Jei waakenfer aa eyebili Nabi Musa gamserem, awelna Uwa Sanbagirmana waakenfer aa gam gwebilim angtane Uwa Sanbagirmanaiserem jem nenennabe. ³ Jengga Uwa Sanbagiri Jei Yesus pujitene uskambarsus Nabi Musaminiwer. Aamei imsa towaswena enggame angtane aa jei gam eyebilirim, angtane jeiserem bosna jemna unggwanfer gane gulbatenanna, jena jei aa jes gam eyebilirim jewer. Yesus Jei enggala angtane jena aa jei gam eyebilirim, ane Jei pujitalaiserem ga gam domola. Nabi Musa jei ga ja tini jes galserem, gam jega jei pujitele uskambar jam domolyan. ⁴ Angtane aasaje jena gam eyebili, jena jeiserem jei ga jener jam etamweyan. Ane Jei, seyafter aa jei eyebaabilim, Jeiba Uwa Sanbagiriserem Jesam. ⁵ Nabi Musa jei angtane awelna Uwa Sanbagirmana gam gwebil, ane jei awelna jemna waakensusu gam gweyibel angtane Uwa Sanbagirmanaiserem jem nenennabe. Jei taterisi aaiserem ga jes nasipmil jem temawer, taterisi Uwa Sanbagiri galap jes gwerauwulmiliserem bunarsusfer. ⁶ Jengga Kristus Jeiba Tane Uwa Sanbagirmanam, ane Jei awelna Jemna waakenfersus gwebili, Jei angtane Uwa Sanbagirmanaiserem jem Sanbakef aa galap nwinirim. Ane angtane jam aa jem Sanbakef nwinirim, jei ga nei. Ane nei ga angtane Uwa Sanbagirmana, afa nei kanaufer nesa tebasinirim ini saaser-saasermer, gam jega nei nejama ereyen. ⁷ Mafnana Uwa Sanbagirmana Jei ga enggam gunu: "Afa nunu namwer aaiserem aamei jam isa sararam Uwa Sanbagiri Jei ip jam is nasipminirim, ⁸ - ⁹ ini imna ipsama kekeletababisinirim. Ipsama gwenaram enggala asal-asala imna dwisgiribe jam saryana galserem. Tahunu unggwanfer ga empat pulu, jei aane damtabil bwembwema Ai Ajes eyeipmuwelam, jengga jei Asa jam ne sarbayan. Jei Am tefner gane unggwasbana. ¹⁰ Jega jem temawer, Ai Ajam nasbabil angtane jeiserem, ane ga Ai gul, ’Jei baif naawena Ai Agam gunurum, ane jei jam ne sarbiyen Ai Ajes bilipmilim.’ ¹¹ Ai bunarsusfer nasbabili, ane Ai ititmer balbabili, ’Jei fasfasus jam ge kabwiteyan tampata Amna waakena jei jep naawesiliserem.’ " (Mazmur 95:7-11) ¹² Am afelen mesna, aamei ina ga waakenfer isa gaaramisnenne, jega angtane afa fas im nenennabe ini kabwaksusu fas afa jam damtayan, ane Uwa Sanbagiri jam tebayan, Uwa Sanbagiri gemer aa Jei nwinirim abak-abaksusfer. Angtane jes galserem gam aa jei gam gwenaram, jepga jei ga aa tikwena Uwa Sanbagiri Jes onsobafe. ¹³ Nunu Uwa Sanbagiri aa Jes bilirim Taterisi Jemnaiserem jebe, nunu jeiserem jeba nunu namwer aas jepserem nei nejeba gwenaram, jesam. Jega jem temawer, nunu jeber-jeber nei ga nennen waakenfer nesa kanausosiwena. Jam isa eyebili jeiserem, jega samfer angtane daamfenna im nenennabe etam-etama kapkaiserem jam towaiwulyon jam eyebife. Afa aamei gam jam is eyebilirim, gam jega aamei kapkaiserem jes igam eyebili, ane ini imna is mes gam kekeleswebana. ¹⁴ Aaiserem gasa sarbistaabon, nei seyafter daamfennaber neya nwini Kristusfar, afa nei Kristus gemer nesa tebasinirim, nejama aftannuyon jamer nunu umwef jepserem, gwanan gamserem nei Jei negama tebasinintim. ¹⁵ Taterisi is ajes bilipminirim, sa sarbisnenne gamjon: "Afa nunu namwer aaiserem aamei jam isa sararam Uwa Sanbagiri Jei ip jam is nasipminirim, ini imna ipsama kekeletababisinirim. Ipsama gwenaram asal-asala imna dwisgiribe jam saryana galserem." (Mazmur 95:7-8) ¹⁶ Nan angtanesa gwanan taterisi Uwa Sanbagirmana aa jei ne sarbilim, jengga jei jam ne onsobiyen? Jeiba angtane Israelsam, negara Mesir je aa jei ge nwinbelem, ane Nabi Musa aa jei ne onsobalam jewer ga totinyel. ¹⁷ Ane Uwa Sanbagiri Jei ga nans nasbabuwel empat pulu tahunu jeiserem? Jei aa nasbabuwel angtane Israel jeiserem dwisgirip aa jei ge sofobuwelam, ane etam-etama kapka jep ga aane eyebuwel, ane jega jem temawer jei seyafter jep ga aa ge terbil jamer bar. ¹⁸ Uwa Sanbagiri Jei nans balbabil enggame, "Jei fasfasus jam ge kabwiteyan tampata Amna waakena jei jep naawesiliserem."? Jei angtane taterisi Jemna jam ne onsobiyeneiserem ga jes balbabil. ¹⁹ Ga jem temawer nei ga enggam nemsa towaswena, jei jep jam ge kabwiteyan tampata waakena jei jep naawesiliserem, aam temawer jei Uwa Sanbagiri jam ne tebasiyen.

¹ Taterisi Uwa Sanbagirmana gwanan aa jes bilim jeba gemeram fala. Taterisi jeiserem ga enggam, angtane samfer gam kautena tampata waakena Jemna jep gwesiliserem. Au, waakenfer ganma gerabisnenne, jega angtane afa fas im nenennabe nelebe jama afaftaanuyon, ane jega jem temawer jei jam kauteyan tampata Uwa Sanbagirmana jep gwesiliserem jebe. ² Angtane Israel aa gam ne sarbilim, nei nengba nemsama sarbili Taterisi Waakena. Angtane Israel jei taterisi jeiserem aane sarbil, jengga jei jam ne taabiyen, gam jega taterisi jeiserem jei jam batobaabiyen. ³ Jengga nei Uwa Sanbagiri gemer nejeya tebasinirim, nei ga nele jeiserem nejama afaftaanuyon, ane ga nesa kauna tampata Uwa Sanbagirmana waakena jep gwesiliserem jebe. Jengga angtane jem tebayanaiserem, Uwa Sanbagiri ga enggam gul: "Ai bunarsusfer nasbabili, ane ai ititmer balbabili, ’Jei fasfasus jam ge kabwiteyan tampata Amna waakena jei jep gwesiliserem.’ " (Mazmur 95:11) Ane tampata jep gwesiliserem Jei aa jes bilim, Jeiba nes mesam eyeipmil, ane aa tabanulsil awelna Jemna Uwa Sanbagiri Jei seyafter aa galap eyebilim. ⁴ Taterisi Uwa Sanbagirmanaiserem jep ga enggam tulisul nunu nomor tuju jem temawer, "Awelna Uwa Sanbagirmanaiserem jei ga enggam, Jei seyaftersus gam eyebili, jepga nunu nomor tuju Jei ga jem gwesini." ⁵ Gamjon aa tulisul taterisi Uwa Sanbagirmanaiserem jebe, gwanan ai agemer gunurum, "Jei fasfasus jam ge kabwiteyan tampata Amna waakena jei jep gwesiliserem." ⁶ Nei bunarsusfer nemsa towaswena enggame, Uwa Sanbagirmana tampata jep gwesiliserem jeiba jeweram. Ane angtane afwer jep sege kabweitesa, ane Jebar jep gase gwesisi. Jengga angtane gwanan-gwanansus taterisi Uwa Sanbagirmana aa jei ne sarbilim, ane jei jam ne taabiyen taterisi jeiserem, jei jam ge kabwiteyan tampata jep gwesiliserem. ⁷ Jepga tahunu anesus gamjon aaiserem, Uwa Sanbagiri aa bil nunu nafsiserem, ane nunu nafsi jeiserem bosna ga aas, "Nunu namwer aaiserem". "Afa nunu aas jepserem aamei jam isa sararam Uwa Sanbagiri Jei ip jam is nasipminirim, ini imna ipsama kekeletababisinirim." (Mazmur 95:7-8) Taterisi Uwa Sanbagiri angtane Israelf aa jes golmilim, taterisi jeiserem Raja Daudfe jegme jeter gulbal, ane Daud taterisi jeiserem ga aa tulisul. ⁸ Ane gwanan-gwanansus jepserem Daud jei nalef jam foroyan, Yosua jei asal-asala nemnaiserem aa aftabifel tampata Uwa Sanbagiri aa jes bilipmilim angtane jeiserem jei gam ne domsofe. Jengga tampata jeiserem angtane abakfer jep gwesiliserem jesyan, Uwa Sanbagiri aa jes bilim. Gam jega Uwa Sanbagiri tampata jep gwesiliserem jem temawer Jei gamjon enggam ga gul, "Nunu namwer aaiserem jeme, angtane sene domola tampata jeiserem." ⁹ Ane namwer aas jepserem angtane Uwa Sanbagiri Jelemanaiserem jei sene domolsa nunu jem gwesiliserem, nunu Uwa Sanbagirmana jem gwesili jes galserem nunu nomor tuju. ¹⁰ Angtane aa jei gam kautenaram tampata Uwa Sanbagirmana jep gwesiliserem, awelna jemna seyafter taban, ane jei jep ga gam gwesini, Uwa Sanbagiri Jena jes gamserem Jei awelna Jemna jam aa tabanulsilim, ane ga aa gwesil. ¹¹ Gam jega au, nei Uwa Sanbagiri tefner ganma tebasi, jega nei samfer ga nesa kautena tampata nei nejeba gwesiliserem. Au, nei waakenfer ganma gerabisnenne, jega angtane afa fas nem nenennabe jam irfweyan Uwa Sanbagiri jam onsobafe, asal-asala nemna jes galserem gangge irfwebil, ane jam ge kabwiteyan tampata Jemna waakena jei jep gwesiliserem. ¹² Taterisi Uwa Sanbagirmana jeiba baabetabaram, ane jei awelna samfer gam gwebili. Taterisi jeiserem jei binbinsusu samtena jemna binbini afwer-afwer galserem jemniwer. Jei is gam tegiltena jamere inibo, ane jei is gam gwerauwulbana aamei jes igam bilirim ilem inibe, ane ijes eyebife. ¹³ Nei apgal jigala afa fas nejama syawulsiyen Uwa Sanbagirminiwer. Jei seyafter gerebaabili ogiri aaiserem jebe, ane seyafter sitaber ge falbili Jem nwenabe. Galap nei nesa fisa Jem nwenabe, ane jep ga taterisi nemnaiserem ga nesa taawolbaabisi. ¹⁴ Jengga Yesus, Tane Uwa Sanbagirmanaiserem, Jeiba Imam Sanbagirsusu nemnaiserem, ane Jei mes tauna taman waaken-giribe nes gam batobaabif. Gam jega au, nei jeber-jeber Jei ganma tebasi kanaufer. ¹⁵ Nei nenfentowai baabeta fas. Jengga nemna Imam Sanbagirsususerem, Jei mes towaswena enggame nei baabeta fas, ane Jei nes gemer nesiktababuwena. Ane sa sarbistaabon, Jeimba mesam ne unggwasbanant, unggwasbala nafis-nafsiserem jeme, nei gamserem nei nes gam ne unggwasbaabuwenaram. Jengga Jei etam-etama kapkaiserem afa Jam eyebiyen. ¹⁶ Au, nei nejama ereyen, nei nesa gwina Uwa Sanbagirem nwenabe waakena Jelemanaiserem nep nes Jei golminirim. Nei jeiserem nesa eyebili, jega Jei etam-etama kapka nemnaiserem nes gase wirtabaipmuwena. Ane afa galap nei jam negama werenswenaram, Jei ga nes gam batobaabili, nei jam jep negama balaram.

¹ Imam sanbagirsususerem jei jeber-jeber aa jes gane destabanaram, jei angtaneminiwer ne destabana. Jei awelna Uwa Sanbagirmana enggalf gam gweyibene angtane gam batobaabif. Jei berna ane domba tane aa jes ne targabaabilirim ga jes ne kitulbono Uwa Sanbagirfe, etam-etama kapkaiserem angtanemana jem ne motolsife. ² Jei ga samfer angtane gam batobaabili ini foler-folermer, angtane teisyena nele bunarsusferaiserem, angtane nele aa jei gam afaftaanurum. Jei angtane gam batobaabili, aam temawer jeiba angtanesam, baabeta jemna uskambar fas. ³ Jega jem temawer jei ga domba tane aa jes ne targabaabilirim, jei jeke enggalf tefner jam gam gera angtanemana jem gam wirtabaipmisif, jengga enggalf mese etam-etama kapka jelemanaiserem jeme gam wirtabaabif. ⁴ Angtane afa jam guyon jelem temawenefener enggame, "Ai awelna igsusu as gwebili imam sanbagirsusmana." Jengga Uwa Sanbagiri Jei angtane jeiserem enggam gam bala, "Aamei se gwebi awelna imam sanbagirsusmana." Uwa Sanbagiri Jei gwanan ba Harun gamam bal. ⁵ Kristus Jeime Jam guyon Jelem temawenefener, "Ai awelna igsusu As gwebili imam sanbagirsusmana." Jengga Uwa Sanbagiriserem ga Jei bal: "Aamei namwer Tane Amna; ane namwer Ai Im Uwaf As gwena." (Mazmur 2:7) ⁶ Ane Uwa Sanbagiri Jeime aa gul Taterisi Jelemanaiserem jebe: "Aameiba imamsam abak-abaksusfer Is jei gwelaiserem, Melkisedek jes galserem." (Mazmur 110:4) ⁷ Yesus Jei gwanan ogiri aaiserem jep aa galap gwenantam, Jei Uwa Sanbagirfar aa galap ge nasowenantam, Jei nwaafona unggwanfersus ga jebar nasowena. Jei sembayanga ititmer gwebabana Uwa Sanbagirfe, aam temawer Jei tousa enggame Uwa Sanbagiri Jei baabetabara, ane Jei waakenfer se gerebaasnenne, jega Jei Jam teryen. Ane Uwa Sanbagiri jes sarbana, aam temawer Yesus jeber-jeber eyebuwena Uwa Sanbagiri aa jes gam bilirim. ⁸ Bunaram Jei Tane Uwa Sanbagirmanaiserem, jengga Jei siginiserem ga jes enolant. Ane jeiserem je ga Jei towas-towastana bunarsusfer jes eyebiliserem Uwa Sanbagiri aa jes bilirim. ⁹ Jei seyaftersusfer aa galap eyebilintim Uwa Sanbagiri aa jes bilim, Jei ga aa etamwena Angtane Jei angtane nafsi gam waakentababisife abak-abaksus, angtane aa jei ne eyebilirim Jei aa gam gunurum. ¹⁰ Ane Uwa Sanbagiri Jeneram destabal Tane Jelemana gase nwini imam sanbagirsususerem, Melkisedek jes galserem. ¹¹ Ai safe taterisi anesus isa ajama towas-towastabaipmife, jengga gemerje ai seyafter isa ajama towas-towastabaipmiyen, aam temawer aamei samem-samema sarbisiwena. ¹² Gwanan aamei imsa sarbili taterisi Uwa Sanbagirmana. Namwer aas jepserem aamei safe angtane nafsiserem ga jes isa towas-towastababili, aamei ijama towas-towastababiyen. Jengga aamei ijafnera sarbisif pelajarana taterisi Uwa Sanbagirmana gwananmanaiserem. Aamei ga tane bastantouya galserem, mom tefner gam twena. Aamei tumilgala kekelnaiserem ijama tombaabiyen. ¹³ Tantouya mom tefner aa jei gam twenaram jei ga tane bastantouya. Ane jei jam towasweyan waakena fwersa, ane kapka fwersa. ¹⁴ Jengga angtane sanbagiriserem tumilgala kekelnaiserem ga jei gane tombaabili. Taterisi jeiserem jem igiserem ga enggam, jemna nwe mese, aarem, tafa, ane imwa jei fwater mes ne towas-towastababili. Jei waakenfer gane domolfe jeiserem waakena ane nafsiserem jei ga kapka.

¹ Au, nei ganma mirtebitefal pelajarana gwanan jeiserem, pelajarana nei gwanan aa jes sarbilintim nei Kristus negalaba tebanantam. Sa agaiswe pelajarana angtane sanbagirmana. Nunu jeber-jeber jetefener ijama taawolbaabiyen taterisi etam-etama kapka jes mirtebitefalaiserem jem temawer. Etam-etama jeiserem se eyebili nei ga nesa tere. Jetefener ijama taawolbaabiyen. ² Ane jetefener ijama taawolbaabiyen taterisi Uwa Sanbagiri jes tebalaiserem jem temawer, ane taterisi baptisem temawer. Ane aas mese jetefener ijama taawolbaabiyen: taterisi tafna angtanem sagap tosonswelaiserem enggalfe jei awelna Uwa Sanbagirmana gane gweyibef; ane taterisi jem tereserem ane jem irwelaiserem terewer; ane taterisi Uwa Sanbagiri aa jes balbabitowelaiserem enggame, angtane aaiserem jei waakena, jei waakenfer se nwini jamer abak-abaksus, ane angtane nafsiserem jei kapka, jei kabwakfer se nwini jamer abak-abaksus. ³ Ganma agaiswe! Nei ga nesa agaiswesa, afa Uwa Sanbagiri Jei Jam nes batobaabilirim. ⁴ Jengga angtane nafa Uwa Sanbagirmana aa jei gane domolbanaram, Taterisi Waakena aa jei gane sarbilirim, ane gane towaswebili enggame taterisi Uwa Sanbagirmanaiserem jei waakena, angtane jeiserem jei waakenaiserem mes gane taabili taman waaken-giriwer, ane jei angtane nafsiserem jebar Mafnana Uwa Sanbagirmanaiserem mes gane taabili. ⁵ Ane angtane jeiserem aa jei gangge towaswebilirim enggame taterisi Uwa Sanbagirmanaiserem jeiba waakenfennam, ane baabeta Uwa Sanbagirmana aa jes gane domolaram, baabeta bunarsusfer aa jep gwerauwulmisirim nunu umwef jepserem, ⁶ afa angtane jeiserem jei jam gangge irfwebilirim nele Uwa Sanbagirmanaiserem jewer, afa jei jam gangge tikwebilirim Uwa Sanbagiri Jes tebasiliwer, gam jega nele nafsi fas angtane jeiserem jei etam-etama kapkaiserem jewer gamjon jam ge irfwebiyen, ane gamjon ga gangge waraubili Uwa Sanbagirminibe. Jei gamjon jam ge waraubiyen, aam temawer etam-etama kapka jemna aa jes ne eyebaabilirim, jeiserem ga enggalf jei Kristus ti salibibe gamjon jem ne daktanswef, jega angtane nafsi nimnafer ga sege nasbawena Jem temawer. ⁷ Angtane gam aa jei gane eyebilirim, jei tamtamtalaiserem ga sene domolsa. Jengga angtane Yesus jeber-jeber aa jei gam onsobanaram, jei waakenaiserem ga sene domolsa, ona aas galserem ona arouwa aa jep gam nyanwenaram. Afa ona jeiserem nananisi waakena jep jam gangge kokosbilirim, ane galap angtane igiserem jam gane fulurum makanabe, jepga Uwa Sanbagiri enggam ga gam gunu, "Ona jeiserem jei waakena." ⁸ Jengga ona kapkaiserem afa sasfan ane ti utuboro jep jam gangge kokosbilirim, gam jega ona jeiserem je ga kapka, ane Uwa Sanbagiri Jei ona jeiserem ga babapsobana, ane tokwam ga sene dutasa. ⁹ Am afelen mesna ai isa ajesa nesiktababilirim, ai jes gamserem gam amsama gunu, jengga ai amsama towaswena enggame aamei ona kapka jes galserem galyan. Uwa Sanbagiri Jei aamei is mes waakentababisini, ane aamei jeiserem imsa gwerauwulu angtane nafsi jam igalaba batobaabilirim. ¹⁰ Uwa Sanbagiri Jei bunarsusfer jeber-jeber eyebuwena. Jei ijama dirinsweipmiyen awelna aamei ijesa gwebuwenaram. Aamei angtane Kristen nafsiserem imsama batobaabilint, ane gemerje igemera batobaabili. Aamei gam ijewera eyebilirim, aamei ga ijema gwerauwulbana nesiktele imnaiserem Uwa Sanbagirfe. Uwa Sanbagiri Jei jeiserem mesam domola, ane Jei Jam dirinswebiyen fwaina waakenaiserem ip ga is golmisi. ¹¹ Ai uskambar enggam aya gunu, sya aamei seyafter sa goltaani gwanan igemera eyebilintim jamere nunu umwef jepserem. Jes jepserem aamei ga isa taabisi Uwa Sanbagirminiwer seyafter ijesa fibilirim. ¹² Ai baifa gwena aamei kwaalaamitfera nwinfe. Jengga sa eyebi angtane aas galserem, angtane Uwa Sanbagiri aa jei ne tebanaram, ane abakfer aa jei ne fibilirim, jega jei samfer ga sene taabisi Uwa Sanbagiri aa jes bilipminirim jam golmife. ¹³ Uwa Sanbagiri Jei Abraham asal-asala nemnaiserem aa galap balam enggame apgal jigala jep gulbafe, Jei Jena aa gaarstenanal Jelem bosefar. Jei bosna Jelemana tefner bil, aam temawer bosna nafsi afa fas Jem sagabe. ¹⁴ Uwa Sanbagiri Abraham enggam bal, "Bunar-bunarsus Ai waakena Alemanaiserem isAs gulbana ibe, ane Ai isAs gulbana asal-asala unggwanfer aaiserem ibe." ¹⁵ Jewer ga jam fibilibe jamer abaksusfer, Abraham ga aa domola Uwa Sanbagiri aa jes bilibelem jam gulbafe. ¹⁶ Angtane afa jena jam gam gaarstenannaram, jei ga bosna angtane sanbakaiserem jena ga jem bosem gam gaarstenanna. Angtane jena jam aa galap gam gaarstenannaram, jepga taterisi jemna tabana ga jep, ane taterisi angtane aa jes gangge doksobilirim taterisi jeiserem tabana ga jep. ¹⁷ Uwa Sanbagiri Jei taterisi Jemna aa kekelewulsini bosna Jelemanaiserem jeme, taterisi Abrahamf aa jes bilibelem. Jei jeiserem aa eyebil, jega angtane taterisi igi aa jes ne domolaram, jei ga bunar-bunarsusfer ga sege towaswebili enggame Uwa Sanbagiri Jei Jam wirulsiyen taterisi Jemnaiserem. ¹⁸ Uwa Sanbagiri Jei Jam afafweyan. Ane Jei naura aaiserem nes mes golmini: daamfennaiserem ga aas, taterisi Jena aa jes bilirim, ane naurabaraiserem ga aas, Jei Jena mes gaarstenanna enggame Jei jeiserem bunar-bunarsus se eyebili. Naura jeiserem Jei jam wirsosiyen. Gam jega nei nejeya fortyaram enggalfe Jei nei nes Jam waakentababisife, nei baabeta ibirmi nesa domola nelem inibe. Nei ga bunar-bunarsusfer ga sege towaswebili enggame, Jeiba nei nes waakentababisisi, Jei gwanan Jena aa gemer gulum. ¹⁹ Uwa Sanbagiri taterisi Jelemana nes mesam golmini, ane taterisi jeiserem nemsama taabili. Taterisi jeiserem nei ga nes jese gwebabili, jega ini nemna nes gam sege kanausweipmisi. Taterisi jeiserem besi daran-daransusu galserem atdusa jem kanaufer taafe fonabe, ini nes jei tebaipmisinirim. Ane nei Yesus kanaufer jame negalaba tebanaram, nei ga nesa tertesiwili sufa unggwan-giriserem, ane ga nesa kautena mwona Uwa Sanbagirmana waakensususerem jebe. ²⁰ Gwanan, Yesus Jei sufa unggwan-giri jeiserem mesam bitsosisint, ane aa kawetenant mwona jeiserem jebe, jega Jei nes gase batobaabili. Abak-abaksusfer Jei imam sanbagirsusfe mesam etamwena, imam Melkisedek galserem.

¹ Angtane aaiserem bosna Melkisedek jeiba Rajasam kota Salemwer nwin, ane jei awelna Uwa Sanbagirmana imanf gwebil, Uwa Sanbagiri aa jes ne gaartenaram tagarsusup. Jei aa ge dorwel Abrahamfar aa jewer foryalam. Abraham aa waraunal tampata raja-rajafar aa jewer ga eralbalam, ane jei mes menangswel. Melkisedek jei sembayanga aa gwebal Uwa Sanbagirfe, Jei Abrahamfe waakenaiserem gam gulbaf. ² Ane Abraham jei apgal jigala eral tampatap mes damtabil, ane apgal jigala jeiserem jei afwer (sepersepulu) ga Melkisedekf kitulbol. Bosna Melkisedekmana igi ga enggam, "Raja jeber-jeber bunarsusfer eyebuwena." Ane bosna jemna afwer ga enggam, "Raja kota Salem", ane jem igiserem ga enggam, "Raja Eral-erala fas". ³ Jam ne tulisulyon Taterisi Uwa Sanbagirmanaiserem jebe, Melkisedekem uwa ane iye ane asal-asala jemna jem temawer. Ane nunu fas jam ne tulisulyon jei aa jem surulum, afa nunu jei aa jem terem. Jei ga Tane Uwa Sanbagirmana gamserem, jei jam nwini imamf jamer abak-abaksus. ⁴ Gasa sarsi! Melkisedek jeiba bunaram angtane sanbagirsusum. Asal-asala nemna bosna Abraham jeime sanbagirem, jengga jei apgal jigala aa syenul eral tampatawer, ane afwer ga Melkisedekf kitulbol. ⁵ Hukumu Nabi Musa aa jes tulistababilim jep ga enggam tulisul, asal-asala Lewimanaiserem jei imamf jam gam etamwenaram, jei jeber-jeber apgal jigala afwer (sepersepulu) gane taabili angtane Israelminiwer. Jei samfer gane taabili jeiserem, jei safe jem afelen mesna ane seyafter asal-asala Abrahammana. ⁶ Melkisedek jeiba imamsam, jengga jemna asal-asala Lewiminiweryan. Safe gam, jei apgal jigala Abrahamminiwer taabil. Ane jei sembayanga aa gwebabal Uwa Sanbagirf enggalfe Jei waakenaiserem gam gulbaf Abrahamfe. Abraham jeiba taterisi Uwa Sanbagiri aa jes bilim jeyam taabil. ⁷ Ane nemsa towaswena enggame, angtane waakenaiserem aa jei gam taabilirim Uwa Sanbagirminiwer, jei jem gwonap angtane sembayanga Uwa Sanbagirfe aa jei gam gwebabanaram enggalfe waakenaiserem gam gulbaf. Gam jega ga enggam, Abraham jei Melkisedekem gwonap. ⁸ Imam-imamem temawer, jeiba angtane apgal jigala afwer (sepersepulu) aa jei gane taabilirim, ane jei ga galap ga gangge terbili. Jengga Melkisedekem temawer, jeime aa taabili apgal jigala afweraiserem (sepersepulu), jengga angtane enggam ge gubili, jei gemer nwini. ⁹ Angtane enggam gunu, Lewi ane angtane asal-asala Lewiminiweraiserem jei imamf ge etamwebil, ane jei apgal jigala aane taabuwel angtaneminiwer. Jengga Abraham jei apgal jigala afwer Melkisedekfe aa galap kitulbolom, ane Lewi jegme aa kitulbol. Jeiserem je fomfoma? ¹⁰ Angtane gam gunu, aam temawer Lewi jei nalef jam suruyon, jei jes galapserem Abrahamem unup, Melkisedek jei Abrahamfar aa galap ge dorwelam. ¹¹ Gwanan Uwa Sanbagiri Jei Hukumu Jelemanaiserem angtane Israelfe aa golmil. Hukumu jeiserem ga enggam gunu, asal-asala Lewimanaiserem jei awelna imamfe jei sene gwebili. Ane imam-imam jei awelna jemnaiserem gane gwebili, jengga awelna jeiserem angtane jam batobaabiyen waakensusfer jam ge etamwebife Uwa Sanbagirem nwenabe. Afa jeiserem samfer angtane jam batobaabife, gam jega imam safna nafsi Melkisedek jes galserem jei jam foroyan. Imam jeiserem jei safna Harun asal-asala Lewimana galserem galyan. Jengga Imam ibirmi mes fortya safna Melkisedek jes galserem. ¹² Ane safna imam ibirmiserem jam aa jep ge forobityerem, jepga hukumu gwananmanaiserem jei ga gam barwena, ane gamjon ga hukumu ibirmiserem jes gane goltaanni. ¹³ - ¹⁴ Ane Tuhan Yesus Jeiba Imam ibirmiserem Jesam. Nei seyafter nemsa towaswena enggame, Tuhan Yesus Jei asal-asala Lewiminiweryan, Tuhan Yesus Jei asal-asala Yehudamana. Jengga Nabi Musa jei fas jam guyon enggame, asal-asala Yehudamana awelna imamf sene gwebili, gam jega asal-asala Yehudamana jei fas awelna jeiserem jam ne gwebiyen. ¹⁵ Jengga Yesus, Imam ibirmiserem safna Melkisedekmana Jei Jena mes gweretana, ane jewer ga neya towaswena bunarsusfer hukumu gwananmanaiserem jei ga gam barwena. ¹⁶ Jei imamfe jam gweyan aam temawer taterisi fwatermanaiserem jep enggam tulisul, asal-asala Lewimanaiserem imamfe ga jenefener gam gwena. Jengga Jei gam gwena, ane baabeta gam domola jem gwefe abak-abaksus. Jega jem temawer Jei imamfe ga gam gwena. ¹⁷ Taterisi Uwa Sanbagirmanaiserem jep ga enggam baatultel: "Aameiba imamsam abak-abaksusfer Is jei gwelaiserem, Melkisedek jes galserem." (Mazmur 110:4) ¹⁸ - ¹⁹ Hukumu gwananmanaiserem je baabeta fas, ane je nejama batobaabiyen. Je angtane jam batobaabiyen waakensusfer jam ge etamwebife Uwa Sanbagirem nwenabe. Jega jem temawer Uwa Sanbagiri Jei ga aa borolsini taterisi fwatermanaiserem. Namwer ga nele ibirmi ane waakena, ane jewer nei Uwa Sanbagiri ga nesa gwetmantaasini. ²⁰ Uwa Sanbagiri Jei Jena Jam gaarstenanayan angtane nafsi jei imamf aa galap etamwelam. Jengga gwanan jes galapserem Uwa Sanbagiri Jei Jena mesam gaarstenanal, Jei enggam gul Yesus Jei nem imamf se gwena. ²¹ Yesus Jei imamfe aa galap etamwelam, Uwa Sanbagiri Jei Jena enggam ga gaarstenanal: "Tuhan Jei Jena enggam mes gaarstenanna, ane Jei Jam wirulsiyen, ’Aameiba imamsam jamer abak-abaksus.’ " (Mazmur 110:4) ²² Ane aam temawer Uwa Sanbagiri Jei Jena mesam gaarstenanal, taterisi Uwa Sanbagirmana ibirmiserem Jei aa jes bilipminirim Yesusminiwer nejesa domolaram je ga baabetabara, ane mes ayintye taterisi Uwa Sanbagirmana fwatermanaiserem Nabi Musaminiwer nejesa domolaram. ²³ Ane gwanan taterisi Nabi Musamana aa galap ne onsobilim, imam ga unggwanfer awelna aa jei ne gwebilim, aam temawer afwer gangge terbilirim, imam ibirmi ga gangge kabwitetya. ²⁴ Jengga Yesusem temawer ga enggam, Jei jamer se gwena jamer abak-abaksus. Ane Jei imamf se nwini jamer abak-abaksus. ²⁵ Jega jem temawer Jei ga samfer angtane se waakentababisini jamer abak-abaksus, angtane Jei aa jei ne tebanaram, Uwa Sanbagiri aa jei ne gwetmantaasinirim. Jei jes gamserem gam eyebili, aam temawer Jei se gwena abak-abaksus, ane Jei jeber-jeber sembayanga gase gwebaipmuwena angtanefe. ²⁶ Yesus Jei Imam Sanbagirsususerem nemna waakena, Jei nes gam batobaabili. Uwa Sanbagiri aa bala ini Jemna tabalbalsusu aa jemanem folbanaram. Jei etam-etama kapkaiserem Jam eyebiyen. Jei gwanan angtane etam-etama kapkabaraiserem jebar ge nwinbenent, jengga Jena Jei etam-etama kapkaiserem Jam eyebiyen. Jei namwer bunar-bunarsus tagarsusup Uwa Sanbagirfer ge nwini taman waaken-giribe. ²⁷ Imam-imam sanbagirsusu afweraiserem jei ga Uwa Sanbagirfe domba tane aawis gane kitulbono. Domba tane aawisi jeiserem gane kitulbono enggalfe, etam-etama kapka jelemanaiserem ane angtane nafsimanaiserem jem gam wirtabaabif. Jengga Yesus Jei jes galserem galyan. Jei aawisi Jelemana mes gula daamfenfener ti salibibe, ane jes gamserem Jei gamjon jam eyebiyen. ²⁸ Angtane imam sanbagirsusfe aa jei gam etamwenaram Hukumu Nabi Musamana aa gam gulum, angtane jeiserem jemna baabeta fas. Hukumu jeiserem je gwananmanaiserem, jepga Uwa Sanbagiri Jei Jena enggam gaarstenanal, Tane Jelemanaiserem Jei se gwena imamfe. Ane Jei ga bunarsusfer gase gwebili awelna Uwa Sanbagirfe jamer abak-abaksus.

¹ Taterisi aaiserem aas ajesa taawolbaabilirim namwer igi jemna ga enggam: Nemna Imam Sanbagirsususerem Jeiba waakenam, ane Iman jeiserem Jeiba Yesusam. Jei Uwa Sanbagirem taasfolawer nwini taman waaken-giribe. ² Jei imam awelna aa gwebili mwona waakensususerem Uwa Sanbagirmana jep. Ane mwona jeiserem jeba bunaram. Tuhan Jener eyebili, angtane ogirmana jeiserem jam ne eyebiyen. ³ Imam sanbagirsususerem seyafter jei enggalf destabaabili, jega jei samfer apgal jigala ane domba tane aawisi ga gane kitulbono Uwa Sanbagirfe. Jega jem temawer, imam nemna Yesus, Jeimba waakenaiserem mesam gulbana Uwa Sanbagirfe, Jei Jena mesam gerant Uwa Sanbagirminibe. ⁴ Afa Jei ogiri aaiserem jep gemer gam gwenaram, Jei imamf awelna jam gwebiyen, aam temawer ogiri aaiserem jei imamabara apgal jigala aa jei ne kitulbowenaram Uwa Sanbagirfe, Hukumu Nabi Musa aa jes tulistababilim jep aa gam towastababilirim. ⁵ Imam jei ga awelna jep ne gwebili mwona waakenaiserem ogiri aaiserem jebe. Jeiserem ga uwufenna mwona bunarsusferaiserem taman waaken-girip. Sa sarbistaabon, Nabi Musa gwanan Tenda Jena Uwa Sanbagirmana nalefe jam gwitiryen, Uwa Sanbagiri Jei ititmer bal, "Ai ibe Taarena Sinai isa Amsam destababana numu enggala Tenda Jena Amna jeiserem jes galserem. Ga bunarsusfer is eyebili seyafter jes gamserem." ⁶ Jengga awelna Yesus aa jes taabilirim, jeiserem je ga baabetabara. Jei mes ayebaabinni awelna imam nafsiserem jemna aa jes ne gwebilirim. Awelna Yesusmanaiserem je awelna imam-imam aa jes ne gwebilirim mes ayeipmini, aam temawer taterisi ibirmiserem Uwa Sanbagirmana aa jes bilipminirim Yesusminiwer nejesa domolaram jeba baabetsusum, ane taterisi ibirmi jeiserem je ga waakenaiserem Uwa Sanbagirmana angtanefe ga jes towasulmini. Uwa Sanbagiri taterisi ibirmi jeiserem Jei ga Yesus gulbana, ane Yesus Jei ga angtanefe jei nasipmini. Ane taterisi ibirmi jeiserem je ga mes ayebinni taterisi fwatermanaiserem Uwa Sanbagiri Musafe aa jes bilibelem. ⁷ Taterisi fwatermanaiserem Uwa Sanbagiri Musafe aa jes bilibelem, afa taterisi jeiserem bunarsusfer angtane jam gam batobaabilim, gam jega Uwa Sanbagiri taterisi ibirmiserem jebe gamjon Jam bilipmiyen. ⁸ Jengga ini Uwa Sanbagirmana Jei waakenfer jam folbayan taterisi fwatermanaiserem jem temawer. Jega jem temawer Uwa Sanbagiri ga gul: "Ai Tuhansam, Ai enggam Ai gunu, Nunu gamjon aa jep fortyaram, Ai ga gamjon taterisi ibirmi anggwabura Israelmana yo tewe Yehudamana jep As bilipmisi. ⁹ Taterisi ibirmiserem Ai Ajes bilipmisirim, jei enggalyan taterisi fwatermana galserem, Ai Ajes bilipmilim asal-asala jemnaiserem jebe. Taterisi jeiserem Ajep bilipmil, Ai Agalap aftabifelem aa galap ge tobitinilim negeri Mesirwer. Jengga jei taterisi jeiserem waakenfer jam ne onsobiyen, ane Ai ga Ai mirtebitefal. ¹⁰ Aiba Tuhansam, Ai enggam Ai gunu, Nunu gamjon aa jep fortyaram, Ai ga gamjon taterisi ibirmiserem anggwabura Israel jebe ga sege bilipmisi. Taterisi jeiserem ga aas: Ai As eyebisi jega jei ga sege gubisi jelem inibe Hukumu Amnaiserem jem temawer, ane Hukumu jeiserem ga sene egantababisisi jelem inibe. Ai ga As etamwesa jem Uwa Sanbagirfe, ane jei ga sege etamwebisi angtane Amanfe. ¹¹ Angtane seyafter gemerserem, angtane sanbagiri ane angtane bastantouya, jei seyafter ga Asene damdamtaasisi. Jega jem temawer, angtane afa jelem afelnaiserem jam towastayan, ane anggwa jelem sarabosna jam towastayan enggame, ’Tuhan se damdamtaasi!’ ¹² Ai etam-etama kapkaiserem jemna Ase wirulmisi, ane Ai gamjon etam-etama jemna Ai Ajam sarbabistaabonyan." (Yeremia 31:31-34) ¹³ Uwa Sanbagiri taterisi ibirmi jeiserem Jei aa jes bilipminirim aa galap nasbilirim, Jei ga baabeta taterisi fwatermanaiserem Jei mes borolsini. Ane nei ga neya towaswena enggame, apgal jigala fwatermansususerem jei gamjon sege barwebili.

¹ Taterisi fwatermanaiserem Uwa Sanbagiri Nabi Musafe aa jes bilibelem, taterisi jeiserem imam-imam jam towasulmife jei awelna fomfom sene gwebili. Ane ogiri aaiserem jebe jena aasaje ga jep imama awelna jep ne gwebife. ² Jena jeiserem ga tenda galserem, mwona naura. Mwona daamfennaiserem lampunu ga jep gam fina, ane meja mese jem tumilgala jep gangge falbunnu Uwa Sanbagirfe aa jes gane kitulbonorom. Mwona jeiserem ga enggam gane bili, Mwona Waakena. ³ Ane mwona afelnaiserem kaina unggwan-giri jep aa jei gam taantetyaram jem duruwer, mwona jeiserem ga enggam gane bili, Mwona Waakensususerem Uwa Sanbagirmana. ⁴ Mwona jeiserem je mejanabara, mejana emasem gwemiliserem. Wili jep gane giranbaabisini, wili jeiserem asna waakena. Ane mwona jeiserem jep jegme ti petini, taterisi fwatermana Uwa Sanbagiri Nabi Musaf aa jes bilibelem ga jep faliton. Petini jeiserem seyafter cat emasem gwebili. Ane petini jeiserem jem aaremap jegme mangko emasa jep faliton, igi ga roti mana gam faliton. Ane dumu Harunmana gwanan aa jei kokosabarswelam jeme jeber faliton. Ane petini jem aaremap ga ton felfele naura jep nulaiton, Uwa Sanbagiri Jei sepulu Hukumu aa jep tulisulum. ⁵ Malaikata Kerub naura aa jes ne kwirsolam, jei ga peti gwar sagap ge nontena. Farta jemnaiserem ga tampata jeiserem ga jes ge matabaabisini, etam-etama kapka aa jep ne wirtabaabisiwenaram. Malaikata naura ga jep, jega samfer angtane gam ge towaswebif enggame, Uwa Sanbagiri nafabaraiserem ba jebam. Jengga taterisi apgal jigala seyafter jeiserem jem temawer waakenfer namwer ajama nasbiyen. ⁶ Imam-imam jei apgal jigala seyafter jeiserem gane bunulntena mwona naura jeiserem jebe. Jepga jei nunu jeber-jeber gangge kabwitena mwona gwananmanaiserem jebe. Jei ga awelna jep ga gane gwebili. ⁷ Jengga imam sanbagirsususerem jei jentowai mwona afwer aaiserem jep gam kawetena, Mwona Waakensususerem jebe, ane tahunu jeber-jeber jei jep ga daamfenfener gam kautena. Ane jei tafafsamer jam kauteyan, jengga jei aawisiber gam kautena. Aawisi jeiserem ga gam kitulbono Uwa Sanbagirfe, jega enggalf etam-etama kapka jelemana ane etam-etama kapka angtane nafsimana jes gam wirtabaabif. ⁸ Seyafter jeiserem jewer ga Mafnana Uwa Sanbagirmana nes mes gwerauwulmini enggame, afa Tenda Jena jeiserem gemer se finaram, nele Mwona Waakensususerem Uwa Sanbagirmana jewer kautefe je gemerje, jam ne tertesiwiyen. ⁹ Taterisi jeiserem ga awelna jam gwebife Jena Uwa Sanbagirmanaiserem jebe ga nes enggam towas-towastababili namwer, angtane apgal jigala, domba tane aawis, ane kambing tane aawis aa jei gane erbuwenaram, jei ga gane kitulbono Uwa Sanbagirfe. Jengga seyafter jeiserem jei angtane jeiserem jemna ini jam wirtabaipmiyen. ¹⁰ Awelna seyafter jeiserem je ga tumilgalem temawenefener, ane fos telbilim temawer, ane tifni seyafter wirtabaabilim temawer. Awelna jeiserem je ga angtanemanaiserem, ini jem jam wirtabaipmiyen. Ane angtane jei jes gamserem ga sene eyebili jamere Kristus se fortya, ane nele ibirmi gase destabana. ¹¹ Ane Kristus Jei mes fortya. Jeiba Imam Sanbagirsususerem bunarsusfer nes Jei aftabifelfe Uwa Sanbagirminibe. Jei mes kautena mwona waakensususerem jebe, mwona tagarsusup ane waakensus. Angtane mwona jeiserem jam ne eyebiyen tafame, je ogiri aaiserem jemanyan. ¹² Kristus Jei kambing tane ane sapi tane Jam targabaabiyen, ane aawisiserem ga gam erbuwena enggalfe Mwona Waakensususerem Uwa Sanbagirmana jep ga gam kawetefe. Jengga Jei Jener terent, ane aawisi Jemnaiserem jes enggalf gulbanant jep gam kawetefe. Jega jem temawer Jei daamfenfener mes kawetenant mwona waakensususerem jebe, ane nei nes mes aftabuwenant Uwa Sanbagirem gwetmanap jamere abak-abaksus. ¹³ Angtane jei angtane futunu aa jei gam tebanaram tafame, jei jam kaweteyan Jena Uwa Sanbagirmanaiserem jebe. Jega jem temawer imam ga gam sukuskutabaabili kambing aawisem, ane sapini giriserem jem aawisem, ane sapi tane sonem. Jengga jeiserem tifni angtanemana seyafter aaiserem ga jetefener gane wirtabaipsini. ¹⁴ Jengga aawisi Yesusmana je baabetabara, je kambing aawis ane sapi aawisi mes ayebaabinni. Kristus Jei etam-etama kapka jam eyebiyen. Mafnana Uwa Sanbagirmana aa Jei gwenaram abak-abaksusfer, baabeta ga Jei gulbana Jebe, Jen Jena gam gaarf Uwa Sanbagirfe. Ane aawisi Jemnaiserem ga nes wirtabaipmini ini nemna, ane etam-etama kapka nei nes jei aftabifelerem terebe ga jes borolsini, jega nei ga nesa gwena, awelna Uwa Sanbagirmana ga nesa gweyibene, Uwa Sanbagiri abak-abaksusfer aa Jei gwenaram. ¹⁵ Bunarsusfer Kristus Jei Jen Jena mes gera Uwa Sanbagirfe, aawisi Jemnaiserem mes tenbentetya etam-etama nemnaiserem jem temawer. Ga jem temawer, Kristus ba angtane daamfensusum taterisi nep nes Jei gwirinmifeltyerem, taterisi ibirmiserem Uwa Sanbagiri aa jes bilipminirim angtanefe. Kristus enggalfe mesam tere angtane gam aftabunnuf etam-etama kapkaiserem jewer, etam-etama angtane aa jes ne eyebuwenaram jei gwanan aa galap naawenaram taterisi fwatermanaiserem Uwa Sanbagiri aa jes bilipmilim jem gwonabe. Jega jem temawer Kristus Jei taterisi Uwa Sanbagirmana ibirmiserem nep ga nes Jei gwirinmifeltye enggalfe, angtane Uwa Sanbagiri aa jes jenbebilirim jei waakenaiserem Uwa Sanbagirminiwer ga sene domola abak-abaksus. Uwa Sanbagiri Jei fwater mesam gul Jei waakena Jelemanaiserem jam golmife jebe. ¹⁶ - ¹⁷ Nei seyafter nemsa towaswena enggame angtane afweraiserem jei nalef jam teryen, jei angtane bosna ga jase tulistabaipmini galgala jelemana jei tebabife jei aa jep tererem. Angtane jei nalef jam teryen, angtane afa fas galgala jemna jam tebabife. Jengga jam gam tererem, ane jei ga gam gwerauwulu enggame jei bunarsusfer mes tere, jepga taterisi jeiserem jei aa jes gam tulistababilintim ba igiberem. Ane angtane jes jepserem galgala samfer ga sene tebabili, galgala gwanan aa jes gam tulistababilintim jam tebabife. ¹⁸ Jeiserem ga enggala taterisi fwatermanaiserem Uwa Sanbagiri aa jes bilipmilim jes gemerserem. Imam jei nalefe sapi tane jam ne munboyon ane aawisiserem ga gane gulbana Uwa Sanbagirfe, gwanan jes galapserem taterisi fwatermanaiserem Uwa Sanbagiri aa jes bilipmilim jemna igi fas. Jengga imam jepga sapi tane gane munbono ane aawisi jemna gane gulbana Uwa Sanbagirfe, ane jepga taterisi fwatermanaiserem Uwa Sanbagiri aa jes bilipmilim ga igi ga gam domola. ¹⁹ Gwanan Nabi Musa hukumu seyafter gemerserem aa galap tabanulum jam nasipmif angtanefe, hukumu seyafter taterisi Uwa Sanbagirmanaiserem jebe, jepga jei sapi tane aawisi ga goltel, ane ga bunbunul fonabar. Ane hisop alna ga tasowil, ane benang berberem ga fwirel, ane mangkona sapi tane aawisibereiserem jep ga osoltel, ane ga titin-titintabaabil bukunu Hukumu Uwa Sanbagirmanaiserem jebe, ane angtane seyafter jeiserem jemnip mese. ²⁰ Jei jeiserem jam aa galap eyebilim, jei ga enggam gul, "Aawisi aaiserem ga taterisi Uwa Sanbagiri nep nes jes bilipminirim aamei ijesa onsobiliserem ga jem tabanulsini." ²¹ Jes galapserem jei gamjon aa titin-titintabaabil aawisime Tenda Jena Uwa Sanbagirmana, ane apgal jigala seyafter jepmanaiserem. ²² Bunar-bunarsus Hukumu Uwa Sanbagirmana Nabi Musa aa jes tulistababilim ga enggam gunu, amkom seyaftersus aawisem safe jam ne wirtabaabisif. Hukumu jegme gunu, etam-etama kapka angtanemanaiserem jam gane wirtabaipsini aawisemfener afa jam gam tentenaram. ²³ Tenda Jena Uwa Sanbagirmana mese, ane apgal jigala seyafter jeiserem ga sapi tane aawisem wirtabaabisini. Apgal jigala jeiserem ga uwufenna apgal jigala igsususerem, jengga igsususerem jei ga taman waaken-girip. Apgal jigala igsusu taman waaken-girip jeiserem, je aawisi Yesusmanaiserem jemfener je gam wirtabaipsini, sapi tane aawisem fas. ²⁴ Aamei imsama towaswena enggame, Kristus Jei Jam kaweteyan Tenda Jena waakenaiserem angtane tafam aa jes ne eyebilim, aam temawer Tenda Jena jeiserem jei ga uwufenna jena bunarsusferaiserem taman waaken-giribe. Kristus Jei mes kautena taman waaken-giribe, ane namwer ga Uwa Sanbagirem tarnap nwini enggalfe nei nes gam batobaabif. ²⁵ Imam sanbagirsususerem jei tahunu jeber-jeber Mwona Waakensususerem jep gam kawetena domba tane aawisibaner. Jengga Kristus Imam Sanbagirsususerem nemna, Jei unggwanfer jam terweyan etam-etama kapka nemnaiserem jem temawer, ane Jei unggwanfer jam kauteyan taman waaken-girip aawisi Jelemanaiserem jebar. ²⁶ Afa Jei aawisi Jelemana uskambar gam kitulbowena imam sanbagirsususerem ogiri aaiserem jep gamserem, gam jega Jei sigini unggwanfersus gam domolwena gwanan towaiwulu Uwa Sanbagiri ogiri aaiserem aa galap eyebalam. Jengga namwer nunu umwef aaiserem, Jei mesam fortyant ogiri aaiserem jebe, jega Jei samfer etam-etama kapka nemna seyafter gemerserem nes gam wirtabaipmisif daamfenfener, Jei Jena aa galap gerantam. ²⁷ Angtane seyafter jei daamfenfener gam tere, ane jewer ga Uwa Sanbagiri ga gam gunu afa jei waakena gam eyebili, afa kapka gam eyebili. ²⁸ Jes gamserem Kristus Jeime gemer, Jei Jena daamfenfener gerant enggalfe, angtane unggwanfer gemerserem etam-etama kapka jemna gam wirulmif. Ane Jei gamjon aa jep waraufalsanyaram, Jei enggalf jam warauyan etam-etama kapka angtanemana gamjon gam wirtabaipmif. Jengga Jei enggalf se waraufalsanya angtane gam waakentababisif, angtane Jei aa jei ne fibanaram.

¹ Hukumu Nabi Musa aa jes tulistababilim jeba uwufennam Taterisi Waakena aa jei jelam. Jeiserem ga jafner destabana nele Kristusmana ibirmiserem. Hukumu Nabi Musa aa jes tulistababilim, je ga sapi tane ane domba tane aawisi ga nes jem temawer towastababili. Aawisi jeiserem ga Uwa Sanbagirf ne kitulbono, jengga aawisi jeiserem jei angtane jam batobaabiyen. Angtane jeiserem jei ga aawisi gane kitulbono Uwa Sanbagirfe tahunu anesus, jengga jei Uwa Sanbagirem nwenabe masef, jei angtane waakenfe jam ge etamwebiyen. Aawisi jeiserem etam-etama kapka jemna jam wirtabaipmiyen. ² Ane afa enggam, angtane Uwa Sanbagiri Jei aa jei ne pujitenerem, afa jei bunarsusfer aawisem fwater ne wirtabaabili etam-etamawer, jei gamjon etam-etamem temawer ini kapka gamjon jam ne entebiyen. Ane gamjon Uwa Sanbagirfe jei aawisi jam ne kitulboyon. ³ Jengga enggam, aawisi jeiserem jam gane kitulbonorom tahunu jeber-jeber gemerserem, jei ga etam-etama kapka jemna jam wirtabaipmiyen. Ane gam gane eyebilirim, jei etam-etama kapka jam ne dirinswebiyen, jei jeber-jeber gane sarbistaabonwena. ⁴ Ga enggam, sapini giri ane kambing aawisi je fasfasus etam-etama kapka jam wirtabaabiyen. ⁵ Jega jem temawer, Kristus Jei ogiri aaiserem jebe Jame aa galap fortyantam, Jei ga Uwa Sanbagiri ga aa balant: "Aamei sapini yo kambing aawisi baif Im gwebabili, ane apgal jigala afweraiserem, jes mese Ibe Is jes ne kitulbofe. Jengga Aamei tifni seyafter Amnaiserem Ap As Imes gulbana enggalfe, Ina Ijes bilirim jeiserem Ai Agam eyebif. ⁶ Aamei ini Imna saaser-saaserfer Is jam folbayan domba tane aa jes ne giranbaabisinirim jeme, afa kambing aawis mese, enggalfe etam-etama kapka angtanemana jem wirtabaabife. ⁷ Jepga Ai Kristus Ai ga gutena, ’Ai aaf Ai nwini enggalfe, Ai Aamei Ijes bilirim jeiserem Ai Agam eyebif. O Uwa Sanbagiri, taterisi jeiserem ba mesam tulisul Am temawer Taterisi Imnaiserem jebe.’ " (Mazmur 40:6-8) ⁸ Gwanan Kristus Jei Uwa Sanbagiri enggam balant, "Aamei sapini yo kambing aawisi baif Im gwebabili, ane apgal jigala afweraiserem jes mese aa jes ne kitulbonorom enggalfe etam-etama kapka jem gane wirtabaabife. Safe apgal jigala jeiserem ga jep gane tulistaabil Hukumu Nabi Musamanaiserem jep aa jes ne tulistababilim jebe, ini Uwa Sanbagirmanaiserem jigal-jigala jeiserem jeme jam saaser-saaserwebayan." ⁹ Kristus jepga Uwa Sanbagiri aa balant, "Sya, Ai aaf Ai nwini enggalfe, Ai Aamei Ijes bilirim jeiserem Agam eyebif." Gam jega Kristus Jei nele fwatermanaiserem jepga borola, ane nele ibirmiserem jem ga aa fwayenulu. ¹⁰ Yesus Kristus Jei mes eyebili Uwa Sanbagiri aa jes bilirim, ane jega jem temawer nei etam-etama kapkaiserem jewer ga nes mes ne wirtabaabili. Jei tifni seyafter Jelemanaiserem Jena mes gera daamfenfener jamer abak-abaksus enggalfe etam-etama angtane seyafter gemerserem jemna gam wirtabaipmif. ¹¹ Nunu jeber-jeber imama seyafter jeiserem jei awelna jelemanaiserem ga gane eyebili enggalfe, apgal jigala Uwa Sanbagirfe gam kitulbofe. Jengga apgal jigala seyafter jeiserem Uwa Sanbagirfe aa jes gane kitulbowenaram, jei jeme etam-etama kapka angtanemana jam wirtabaipmiyen. ¹² Jengga Kristus Jei Jen Jena daamfenfener gerant enggalfe etam-etama kapka jem wirtabaabisife. Jei Jen Jena aa jewer gerantam Jei ga etam-etama kapka seyafter ga jem wirtabaabisinint jamer abak-abaksus. Jepga Jei Uwa Sanbagirem taasfolawer ga aa sofwant, ane Jei jep ga aa nwintena. ¹³ Kristus Jei jeber nwini jamere Uwa Sanbagiri Jei ginanggwana Kristusmanaiserem se gwebabili, jamer jei sege kabuwili Jelem tof gwonabe, ane jep ga sege jubobili. ¹⁴ Jei Jena Jam aa galap gerantam daamfenfener, Jei ga jeme etam-etama angtanemana ga mes wirtabaipmisini. Jei ga jeiserem ga aa eyebili, jega angtane waakenfer ga sege etamwebili Uwa Sanbagirem nwenabe jamer abak-abaksus. ¹⁵ Ane Mafnana Uwa Sanbagirmanaiserem Jeime nes balbabili jeiserem jem temawer. Jei gwanan ga enggam gunu: ¹⁶ "Tuhan Jei ga enggam gunu: ’Nunu galap aa je fortyaram, Ai taterisi ibirmi ga As bilipmini jebe enggalfe, Ai angtane jeiserem Agam gwebabif jega jei hukumu Amnaiserem jem temawer waakenfer ga sene sarbili, ane jei jelem iniber ga sene eganulsini.’ " (Yeremia 31:33) ¹⁷ Ane Jei gamjon ga gutena: "Ai etam-etama jemna seyafter gamjon Ai Ajam sarbabistaabonyan." (Yeremia 31:34) ¹⁸ Ane afa Uwa Sanbagiri Jei etam-etama jam se wirtabaabisinirim, gam jega apgal jigala fasfasus gamjon jam ne kitulboyon Uwa Sanbagirfe enggalfe etam-etama kapka jem wirtabaabife. ¹⁹ Ga jem temawer am afelen mesna, namwer nei nejama ereyen jam kawetefe Mwona Waakensususerem Uwa Sanbagirmana jebe, aam temawer Yesus Jei mes tere nem temawer. ²⁰ Gwanan Jei aa galap terentem, kaina unggwan-giri Jena Uwa Sanbagirmana jep ga aane bitnetini, ane nele ibirmi Uwa Sanbagirminip ga aa sartabana. Nele ibirmi jeiserem gwela angtanef ga je golmini. ²¹ Ane Kristus Jeiba Imam Sanbagirsususerem nemnam. Jei angtane seyafter Uwa Sanbagirmanaiserem jem Sanbakef nwini. ²² Jega jem temawer, au, nei Uwa Sanbagiri ganma gwetmantaasi, bunar aaiserem nesa waakenulsini nelem inibe, ane nei nejama ereyensus. Nei gam nesa eyebili, aam temawer nei bunarsusfer nemsa towaswena enggame Kristus Jei mes tere etam-etama nemna nes jam wirulmife, ane ini nemna ga nesege waakensweipmini. Ane Jei neime nes mes wirtabaabili fona waakenaiserem jeme. ²³ Nei gwanba nemsama gunu enggame nei Uwa Sanbagiri nei mesma tebana. Nei ga gemer nesa fibili Uwa Sanbagiri ginggitfer negama tebana, aam temawer Uwa Sanbagiri Jei bunar-bunarsus se eyebili Jena aa gam gunurum. ²⁴ Nei nena ganma gaaramisnenne nei nena fomfom nesa batominenne enggalfe, nena negama nesiksonanafe ane waakenaiserem ga nesa eyebili. ²⁵ Nei nejama tikweyan daamfennaber betwefe, angtane afwer galserem jei aa gam ge tikwebilirim. Nei nemsa towaswena enggame Nunu unggwandusa Kristusmono je mes gwetmanswetya. Jega jem temawer, au nei bunarsusfer ini nelemana nen nena ganma kanausonanna. ²⁶ Afa nei taterisi Kristusmana bunarsusferaiserem jam negama sarbilirim, ane ga negama taabili, jengga nei bai nejama tikwefe nunu jeber-jeber etam-etama kapka jam eyebiliwer, gam jega gamjon nele ga fas etam-etama kapka nemna gamjon nes jem wirulmife. ²⁷ Jepga nei ga erelmer nesa nwini nunu jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem. Ane nei nesa eremini tokwagiri ginanggwana Uwa Sanbagirmanaiserem aa jei giranbaabisinirim. ²⁸ Afa angtane jei Hukumu Nabi Musa aa jes tulistababilim jeber-jeber jam gam ayebilirim, jepga angtane ga gane jenbebili, naura afa nawer-ningna. Jei ga gane balbabili enggame, angtane gwanan jeiserem jei bunar hukumu jeiserem mes ayebili afa fas. Afa bunar, waakenaiserem jep jam ne gulbayan. Jei ga gane safsaftana jamere gam tere. ²⁹ Bai se etamwesa angtane enggam aa jei gam eyebilirim: Jei gwanan Tane Uwa Sanbagirmana Jes gam onsobana, jengga jei gamjon galap enggam gam gunu, "Aiba Tane Uwa Sanbagirmanaiserem Jem ginanggwasam." Ane gamjon gam gunu, "Aawisi Yesusmana etam-etama kapka amna as jei wirulbonorom, Uwa Sanbagiri ai as gemer balaram, aawisi jeiserem ga aawis teten, jemna baabeta fas." Ane fomfoma afa angtane jeiserem nimnafer gam nasowena Mafnana Uwa Sanbagirmanaiserem jem temawer, Mafnana jeiserem Jei nes waakena aa gam golminirim Uwa Sanbagirminiwer. Gamjon bai se etamwesa angtane jeiserem jemnibe? Jei gam domola jem fwaina kabwaksususerem. ³⁰ Nei nemsa towaswena ba Tuhansam enggam aa Jei gunurum, "Ai Aner As gulbana fwaina kapkaiserem angtane kapkaiserem jebe." Ane Jeime aa gunu, "Ai As balbabili angtane Amnaiserem, afa kapka aa jei ne eyebilirim, jemna fwaina kapka ga As golmini." ³¹ Aamei bunarsusfer erelmer isa nwini, afa Uwa Sanbagiri aa Jei nwinirim jam is nasbabilirim, ane fwaina kapka ga is golmini. ³² Sa sarbistaabon nunu gwananmanaiserem aamei nafa Uwa Sanbagirmana igalaba domolbanantam, ane Kristus gwanan igalaba tebanantam. Jes galapserem angtane nafsi jei ga kabwaksususerem ip ne eyeipminint, jengga aamei kanaufera finant. ³³ Angtane jei uskambar ge nasbawenant nimnafer im temawer. Jei jeiserem ga angtane uskambar jem nwenap ne eyebilint. Ane jei kapkaiserem ip ne eyeipminint. Ane nunu nafsiserem, aamei jegme imsa batobaabilint angtane tamtamtala gala aa jei ne domolaram. ³⁴ Aamei ima nesiktababilint, ane ima batobaabilint angtane Yesus aa jei ne tebanaram, ane ga aane katabuntenant bwiyibe. Angtane nafis galgala imna is galap ne tamserenbaipminintim aam temawer aamei Yesus ijewera tebanaram, jengga ini imna ise saaser-saasermer ge folbaminint. Ini imna ise saaser-saasermer sege folbamini, aam temawer aamei imsa towaswena enggame apgal jigala waakensususerem is mes ne menetabaipmisini, ane apgal jigala jeiserem ga jesege falbili abak-abaksusfer. ³⁵ Ga jem temawer, aamei ijama ereyen, jengga kanaufer isa fina Yesus ga jamer igalaba tebasinirim. Jepga aamei ga fwaina isa domola waakensususerem. ³⁶ Kanaufer gasa fya baabeta Jemnaiserem jemfener, ane ga isa eyebili Uwa Sanbagiri aa jes bilirim jam eyebife. Jewer ga aamei fwaina waakena ga isa taabili, fwaina Uwa Sanbagiri is jes bilipminintim jam golmife. ³⁷ Taterisi Uwa Sanbagirmana jep ga enggam baatultel: "Abakferyan, nunu unggwanferyan, Angtane aa jei foryalaiserem, Jei gase fortya. ³⁸ Angtane aa jei ne eyebilirim Ai Ajes bilipminirim, jei gase naawena Am tefner sene tebasini. Jengga jei afa angtane daamfenna jemniwer jam se irfwenaram Ams onsobalawer, ini Amna gamjon saaser-saaserfer As jam folbayan angtane jeiserem jem temawer." (Habakuk 2:3-4) ³⁹ Jengga nei enggalyan angtane aa jei gangge irfwebilirim Uwa Sanbagiri Jam onsobalawer, jei galserem nei galyan. Angtane jeiserem jei ga tamtamtala kabwaksusu gane domola. Jengga nei Uwa Sanbagiri nemsa tebana, ane Jei nes mes waakentababisini.

¹ Afa nei Uwa Sanbagiri Jam negama tebasinirim, ga bunarsusfer negama towaswena enggame Uwa Sanbagiri nes jes bilipmilim jam eyebife, ane nei ga Jeiba nefener nesa fina, bunarsus seyafter jeiserem Jei se eyebili. Ane ga neya towaswena enggame apgal jigala namwer nejama damtabiyeneiserem, jeiserem bunarsusfer gemer ge falbili, safe nwem nejama damtabiyen. ² Angtane afwenefener jei gwanan fwater galapserem Uwa Sanbagiriserem Jes ne tebal. Jega jem temawer, ini Uwa Sanbagirmana saaser-saaserfer folbal angtane jeiserem jem temawer. ³ Nei nesa taabili Uwa Sanbagiri aa jes bilim, ane jega jem temawer neya towaswena enggame Uwa Sanbagiri aa gul, jepga seyafter ga aa ge etamwebil. Ga enggam, Uwa Sanbagiri Jei seyafter jam eyebaabiyen apgal jigala nwem jes negama damtabilirim jemniwer. Jei jamfener bil, ane seyafter jeiserem ga etamwel. ⁴ Habel jei Uwa Sanbagiriserem Jes tebal, ane jei apgal jigala aa kitulbol Uwa Sanbagirfe. Ane apgal jigala jemna jeiserem ga waakensusu, ane mes ayebel apgal jigala Kainmanaiserem. Habel jei Uwa Sanbagiriserem Jes tebal, ane jega jem temawer Uwa Sanbagiri ga aa bal jei angtane waakena. Ini Uwa Sanbagirmana saaser-saasersusfer folbal apgal jigala Habel aa jes kitulbolom. Habel jei fwater ter, jengga nei gemera nasowena taterisi jemna Uwa Sanbagiri jei aa jewer tebalam jem temawer. ⁵ Henok jeime Uwa Sanbagiriserem Jes tebal, ane Uwa Sanbagiri aa gaarteyal ogiri aaiserem aa je falaram jewer, jega samfer jei jam teryen. Angtane aane terelbil, jengga jei jam ne damtayan, aam temawer jei Uwa Sanbagiri mes gaarteyal. Ane nalef jei jam gaarteyan, Uwa Sanbagiri Jei enggam gul Henokem temawer, "Ini Amna saaser-saasera jem temawer." ⁶ Angtane afa Uwa Sanbagiri jam tebayana, jepga ini Uwa Sanbagirmana jam saaser-saaserwebayan jem temawer. Ga enggam, afa angtane jei jam gam sofwenaram Uwa Sanbagiri jes pujitefe, jei ga jamer se taabili ane ga enggam gunu, "Ai ames towaswena Uwa Sanbagiri Jei Jam gwena, ane Jei fwaina waakena se gulbana angtane bunarsusfer baif jam gweyanaiserem Jei jam terelbefe." ⁷ Nuh mese jeime Uwa Sanbagiriserem Jes tebal. Uwa Sanbagiri Jei Nuh mes towastal enggame, "Aayai, fanamodusa je ga galap se fortya." Ane Nuh ga taterisi jeiserem ga aa onsobil, ane jei nalefe fodusa jam domolyan, jei ga atdusa ga eyebil enggalfe wi tane jelemana jei seyafter gemerserem jep gam waakentababisif. Jei atdusa jeiserem jame aa galap eyebilim, jei ga aa gwerauwul enggame angtane seyafter jepmana gemerserem jei etam-etamabarfenna. Ane Uwa Sanbagiri Jei jelem temawer ga enggam bal, jei angtane waakena aam temawer jei Ams tebana. ⁸ Abraham jei Uwa Sanbagiriserem Jes tebal. Jei Uwa Sanbagiri jame aa galap towastalam enggame jei jamer se sofwa tampata Uwa Sanbagiri jelef aa jes gulbanaram jebe, jepga jei taterisi jeiserem ga onsobil. Jei ga aa towaiwul tampata jeiserem jewer jam sofwefe, jengga jei safe tampata jeiserem jam towasweyan. ⁹ Jei Uwa Sanbagiri jame aa galap tebasilim, jei ga ona Uwa Sanbagiri jep aa jes balbabalam ga jep ge nwinbel angtane jepmanyana gamserem. Jei nomkef ga tenda jenap ge nwinbel. Isak, tane jemnaiserem, ane Yakub tane Isakmana, jegme jeber ge nwinbel. Jeime Uwa Sanbagiri jep aa jes bilipmilim jam golmife jei ga jes ge fibil. ¹⁰ Abraham jei jes gemerserem gemer gwel, aam temawer jei kotana Uwa Sanbagirmanaiserem jep gam nwinf, jei ga jes fimil. Kotana jeiserem Uwa Sanbagiri ga Jei mwangmisil ane ga eyemil, ane je ga abakfer gase nulna abak-abaksus. ¹¹ Jei Uwa Sanbagiri gemer aa galap tebasilim, Abraham jei baabeta Uwa Sanbagirminiwer mes domola, ane jei safe mes baksona, jei uwaf ga aa etamwel. Ane Sara mese jeime tane jam gereyan. Abraham jei mes towaswel enggame, jeiserem Uwa Sanbagiri aa jes bilipmilim jam eyebife, Jei bunarsusfer se eyebili. ¹² Ane Abraham jemna asal-asala ga anesus, jei safe mes baksona, ane jei mes tikwel wini jelemanaiserem jebar jam ge tafe, Uwa Sanbagiri Jei nalef Jam guyon tane jep Jam gaarmife. Jemna asal-asala ga anesus, unggwanfer ga enggammer matona winsip gemerserem ane dwis bwenna fi dwisip gemerserem. Angtane jam ne eterbaabiyen. ¹³ Ane angtane seyafter jeiserem Uwa Sanbagiri aa jei ne tebalam, jei seyafter mes ge terbil. Jei jeiserem jam ne taabiyen Uwa Sanbagiri jep aa jes bilipmilim jam golmife. Jengga jei jeiserem ga bijauwefener ne domol, ane ini jemna saaser-saaserfer ga aa ge folbamil. Ane jei ga angtane nensaiserem ga aane balbabil, "Ogiri aaiserem je tampata amanyan. Jengga ai aaf nomkef aya nwini, angtane aafmanyan gamserem." ¹⁴ Angtane game aa jei ge gubilim, nei nemsa towaswena enggame, jei nwena jemna mes ne ketatel enggalfe tampata jelemana winsip gane damtabif. ¹⁵ Afa jei gemer ne sarmistaabonwelaye tampata jelemana aa jes ne mirtetefalam, gam jega dwona ga aane domol tampata jelemanaiserem jebe ga aa ge waraubifeltye. ¹⁶ Jengga jei gam jam ne eyebiyen. Ini jemna unggwan-giri tampata waakenaiserem taman waaken-giribe. Tampata jeiserem jep mes ne ayinyel tampata aa jes ne mirtetefalam jemniwer. Uwa Sanbagiri Jei ini saaser-saasera jemnibe, ane Jei ga aa gunu angtane nensaiserem jem tarnabe enggame, jeiba angtane Amnaiserem. Ane Jei kotana mes menetsomisil jebe. ¹⁷ - ¹⁸ Abraham jei Uwa Sanbagiriserem Jes tebal. Uwa Sanbagiri Jei Abraham aa bal enggame, "Ai asal-asala ip isAs gulbana." Jei ga aa gul, "Jeiserem ga Isakminiwer asal-asala imnaiserem jam surufe." Jepga Uwa Sanbagiri Abraham aa galap unggwasbalam, Jei ga bal, "Tane imnaiserem Ap se gerba. Jei se munbo dombana igam munbonorom, ane Ap ga Ase is gerbana." Abraham jei Uwa Sanbagiriserem jes sarbal, ane jei ga aa towaiwul Isak jam munbofe. ¹⁹ Jei mes towaswel enggame, "Afa Isak jam se tererem, Uwa Sanbagiri jei gamjon se irtene terewer." Ane nei saf sa gunu, "Ga enggam, tane Abrahammana mes ter, jengga Uwa Sanbagiri jei mes irtestel, ane Jei tane mes wartabal Abrahamfe." ²⁰ Isak jei Uwa Sanbagiriserem Jes tebal, ane jei ga taterisi waakena jelem tannawanfe ga aa bilipmil Yakubo Esau jebe. Jei ga gwela jelemanaiserem galap jes ge domolaiserem ga jem temawer gitmil. ²¹ Yakub jeime Uwa Sanbagiriserem Jes tebal, ane jei nalefe jam teryen, jei jelem dumube aa galap nurwelam, jei ga taterisi waakena Yusufem tannawanfe ga aa bilipmil. Ane jei ga Uwa Sanbagiri ga aa pujitel. ²² Ane Yusuf jeime Uwa Sanbagiriserem Jes tebal, ane nunu jes jepserem jei nalef jam teryen, jei ga taterisi anggwabura Israelmanaiserem Mesirminiwer aa jei ge tobitinyeleiserem ga jem temawer nasowel. Jei ga enggam gul jelem aalnaiserem ga jamer sene erbafala, jamer ona Uwa Sanbagiri jep aa jes balbamilim ga jep sene tirnnu. ²³ Ene jeta Musamanaiserem jeime Uwa Sanbagiriserem Jes ge tebal. Jepga Musa jei jame aa galap surulum, ene jeta jemna jei aa ge damtal enggame, tane aaiserem jei waakena. Ane jei ga tane jemna jeiserem ga aane syetasil mwara ga nawer-ningna. Jei taterisi Rajamanaiserem jam ne erebiyen taterisi jeiserem jam ge ayebinife. ²⁴ Ane Nabi Musa jeime Uwa Sanbagiriserem Jes tebal. Ane jei jame aa galap sanbakswelam, jei bai angtane nensa enggam ne jenbowefe jei ausatane Raja Mesirmana. ²⁵ Jei ga enggam gul, "Ai as nwini angtane Uwa Sanbagirmanaiserem jebar, jega angtane Mesirmanaiserem jei abe kapka as ga sene eyeibene, anggwabura alemanaiserem jebe etam-etama kapka aa gemer ne eyeipminirim. Ai bai Rajam jenap nwinfe, ane etam-etama ogirmanaiserem jep gam eyebife nunu unggwanferyan." ²⁶ Jeime enggam gul, "Afa ai Mesirminip jam as nwinirim, ai doi mese ane galgala unggwanfer galap as damtabili, jengga ai bai jes gamserem. Jengga waakenfer ga ai Mesias as onsobana, jei safe abe kapkaiserem as jes ne bilibene aam temawer ai aJes onsobana." Jei game aa jewer gutelam, aam temawer jei fwaina waakenaiserem ga jes domolwili nunu gamjon aaiserem jewer. ²⁷ Nabi Musa jei Mesir ga aa mirsotefal, aam temawer jei Uwa Sanbagiriserem Jes tebal. Jei jam ereyen enggame Raja jei galap se nasbana. Jei kanaufer fyal angtane Uwa Sanbagiri jam damtala galserem, safe angtane Uwa Sanbagiri jam ne damtayan. ²⁸ Nabi Musa jei Uwa Sanbagiriserem Jes tebal, ane jega jem temawer jei angtane Israelmanaiserem ga aa towastababil enggame, jei ga Masara Paskamanaiserem jei jewer gane eyebif. Angtane jei ga domba tane ga aane munbobil enggalfe, jemna aawisiserem jei mwa kautela angtane Israelmanaiserem jem gane gwebaipmif. Jei jeiserem ga enggalem temawer ne eyebili, jega malaikata jame aa jep gangge irebityerem enggalfe, tane gwanan aa jei gam surnurum angtane Mesirmana jewer gane munbof, jepga jei ga aawisi mwa kautelaiserem ga gam damtabili, ane jei ga tane gwanan aa jei gam surnurum angtane Israelmanaiserem jei jam munbobiyen. ²⁹ Ane angtane Israelmana afweraiserem jeime Uwa Sanbagiriserem Jes ne tebal. Jei jame aa galap ge forobilim Fi Berberebe jam ge awelbife, jepga fona jeiserem ga aane bitnel, ane ga aa ge gubil ona sertera galserem. Ane angtane Mesirmana jei amnup ga aane surbobil, aa ge nasbasowel enggame, "Nei mese nejama awelef." Jengga nel nenennap fona ga aa matabil, ane jei ga aa ge albitil. ³⁰ Ane angtane Israelmana afweraiserem jeime Uwa Sanbagiriserem Jes ne tebal, ane jei pagar tuna tagara kota Yerikomana jep aa galap ge ayebitinenelem jamere nunu unggwanfer ga tuju, pagar tuna tagara jeiserem ga aane ganamwel. ³¹ Ane wini maaryena aa jei gwebilim bosna ga Rahab, jeime Uwa Sanbagiriserem Jes tebal. Sabanggwana naura angtane Israelmana aa galap ge gwilam kotana Yerikower, jei sabanggwana jeiserem ga batomil. Jega jem temawer angtane Yeriko Uwa Sanbagiri jes ne tebayanaiserem aa galap ne munbobilim, jei jam ne munbiyen. ³² Afa ai ke gamjon jam as tulistababili? Wowo, safnant. Ai ajam tulistaabiyen Gijonem temawer, Barak mese, Simson, Yefta, Daud, Samwel, ane nabi-nabi jes mese jem temawer. Ai ajam tulistababiyen gamjon, aam temawer ai gwanan ajes tulistababilirim jeiserem samfer enggalfe aamei nele igama towaswebaf nele Uwa Sanbagiri jam tebafe. ³³ Angtane seyafter jeiserem, ane nafis-nafis mesna jei Uwa Sanbagiriserem Jes ne tebal. Jei angtane negara nafsiserem jebar ge erabal, ane ga aa ge menangswebil. Jei waakenaiserem jes ne eyebil, ane jei mes ne domol Uwa Sanbagiri aa jes bilipmilim. Jei singga aarema mes ne faarebal. ³⁴ Tokwagiri aa galap ne ertelem, jei jam ne kofsosil. Ane afwer ga aane saftabal ginanggwa jelemanaiserem, jengga jam ge terbiyen. Jei jame aa galap ge werenswebilim, Uwa Sanbagiri jep ga baabeta ga aa golmil. Jame aa galap ge erabalam, jei jam ge erebiyen. Jei baabetabara, ane jei ga ginanggwana negara nafsiserem ga jes ne kalawul. ³⁵ Ane wini nensaiserem jei ga tane jelemanaiserem aa ge terbilim, jei ga gamjon mes damtabil tane aa jei ge irwebilim terewer. Angtane nensaiserem jei ga kapkaiserem ga aane domol angtane kakalaiserem jemniwer. Jei ga kapkaiserem ga aane domol bwiyibe, jega jei gangge tikwebif Uwa Sanbagiri jam tebafe. Afa jei jam ge tikwebif Uwa Sanbagiri jam tebafe, jei ga sege tobitintye, ane kapkaiserem jei gamjon jam ne domolyan. Jengga angtane jeiserem jei jafner ge nwinbel Uwa Sanbagiri ga aane tebal jamer aa ge terbil. Jei gam aane eyebilim, aam temawer jeiba mesam ge towaswebil enggame jei sege terbili, jengga jei gamjon sege irwebili ane waakenfer gase naawena. ³⁶ Angtane afwer ga jam ne imei-imeitababuwel, ane afwer ga jam ne safsaftababuwel, ane afwer ga aane daafrebil rantai naaume, ane afwer ga aane bokolntel bwiyibe. ³⁷ Afwer ga aa ge terbil, aam temawer angtane kakalaiserem jei tonem ne munbobil jamer futu. Ane afwer ga gergajim ne dargabaabil, ane afwer ga nombeyem ne dargabaabil. Angtane kakala jeiserem jei bunarsusfer kapkaiserem ga jes ne eyeipmil. Jei jena fas, jei jafner ge wofobil, ane jei domba tifin ane kambing tifin ga jes ne kabwabil. ³⁸ Jei jam ge wofobil dwisgiribe, ane taarenabe, ane jei ga ton mwonap ane o mwonap ga jep ge tabawel. Angtane jeiserem jeiba waakenam, jengga angtane unggwanfersus ogirmana jeiba kapkam. Jega jem temawer jei angtane kapkaiserem jebar jam naaweyan. ³⁹ Angtane seyafter gemerserem jei Uwa Sanbagiriserem Jes ne tebal, jega ini Uwa Sanbagirmana ga aa saaserswebal jem temawer. Jengga jei jam ne tebabiyen seyafter Uwa Sanbagiri aa jes bilipmilim jam golmife. ⁴⁰ Jei jam ne taabiyen, aam temawer Uwa Sanbagiri Jei mes mwangbisil waakenaiserem jem temawer, ane nem temawer. Jei Mesias baftatnant ogirip jam iryafe, jega angtane jeiserem ane nei mese nes gam dupdupbulsif safna daamfennaber, ane neya seyafter waakenfer gasa etamwesa.

¹ Ane nei ga fomfoma? Sa sarbistaabon angtane unggwanfersus Uwa Sanbagiri gwanan aa jei ne tebalam, jei nem sene gerebaabili. Gam jega au, nei galgala daran-darnaiserem ganma fasawol, ane etam-etama kapka nei jeber-jeber nes je daran-darantababuwenaram jes mese. Au, nei nele Uwa Sanbagiri nep nes jes destabaaminirim jetefener ga nesa onsoba. ² Afa nei nele jeiserem jam nesa onsobanaram, nwena nemna ga Yesusminip fener sege folbamifele. Jeiba Angtanesam nele nep aa jei sartaminirim, ane Jei ga nes jei se aftabifele jamer fwesabo. Jei ga gununt, "Ai tamtamtala As domola, jamer As tere ti salibibe, safe angtane nensaiserem enggam ge gubili je seferabara." Jei Jam irfweyan angtane Jei aa jei ne daktanswefe ti salibibe jemniwer, aam temawer Jei mes towaswena enggame, Jei ini galap se saaserswebana. Jepga Jei ga terewer ga aa irwenant, ane namwer ga aa nwini Uwa Sanbagirem taasfolawer. ³ Yesus sa sarbastaabon, ane etam-etama kakalaiserem angtane kapkaiserem Jep ga jes ne eyeibene, jengga Jei kanaufer fina. Jei sa sarbastaabon, jega aamei ijama ereyen, ane ijama tikweyan Jei jam onsobalawer. ⁴ Jengga aamei enggam ima gunu, "Etam-etama kapkaiserem ajama mirtebif." Jengga jes gamserem jem temawer, aamei gemerje ijama domolyan enggame bubwana unggwandusa, ane aawisi jes mese. ⁵ Aamke imsa dirinswebili taterisi Uwa Sanbagiri is jes nasipminirim enggalfe ini ilemana ijama kanautababife? Jei aamei is enggam balbabili tane Jelemana gamserem: "O tane Amna, Tuhan Jei ibe tamtamtala is galap gulbanaram enggalfe, aamei igam tikwef etam-etamawer, waakenfer se sarsi! Ane ini imna is jam jenbayan Jei aamei enggam is jep balaram, aamei etam-etama imes eyebili. ⁶ Jeiserem sa eyebi, aam temawer Tuhan Jei tamtamtala se golmini angtane seyafter aa jes nesiktababilirim jebe. Ane angtane Jei enggam aa jes balbabilirim tane Jemna gamserem, jei etam-etama kapkaiserem aa galap ne eyebilirim, Jei ga aa balbabili ane tamtamtala jep ga aa golmini." (Amsal 3:11-12) ⁷ Kanaufer sa fya, tamtamtala jam ijeba domolaram Uwa Sanbagirminiwer. Enggam sa sarbistaabon, neiba tane Uwa Sanbagirmanam. Jei tamtamtala nebe nes golmini, jega nei etam-etama nejama eyebiyen. Aamei ke ijama towasweyan enggame uwa jei tamtamtala gam gulbana tane jelemanaiserem jebe, jega enggalf jei etam-etamawer gam tikwef. ⁸ Afa aamei tamtamtala ijama domolyanaye enggame tane seyafter Uwa Sanbagirmana nafsiserem jes gamserem, gam jega aamei tane Uwa Sanbagirmanyan. Aamei ga maaryen tane gamserem, tane jetyena gamserem. ⁹ Sa gu ilem inibe uwa ilemanaiserem jem temawer ogirip aaiserem aa jei naawenaram. Nei etam-etama kapka negalaba eyebilirim, jei nei nes mes ne tamtamtababili. Ane nei ga jes nesa erebaabili, ane nei ga nesa eyebili jei aa gam ge gubilirim. Afa nei uwa nemna ogirip aaiserem jam nesa erebaabilirim, gam jega nei ga jamersus nesa erebene Uwa nemna taman waaken-girip aaiserem. Jei tamtamtala nep jam ne jep golminirim, nei ga jes nesa onsobana, ane waakenfer ga nesa gwena. ¹⁰ Uwa nemnaiserem jei mese tamtamtala nes mes ne golmini jelem inip aa gane mwangbisinirim, nei basantantana galapserem. Jengga Uwa Sanbagiri Jei nes mes tamtamtababili enggalfe nes gam batobaabif, jega nei negama waakenswef Jei waakena gamserem. ¹¹ Ane nei tamtamtala negalaba domolaram, ini nemna jei nes jam ge saasersobamiyen, nei siginiserem nemsa enola. Jengga nei galap sa gunu enggame, "Jeiserem ba waakenam." Nei seyafter tamtamtala nejeya domolaram, nei waakenfer nesa gwena, ane ini nemna nes samfer sege folbamini. ¹² Tafam mese tof imna is jei ge werensweipminirim jam sa kanautababi, ane ga isa onsobana nele Uwa Sanbagirmanaiserem! ¹³ Nele aarekaiserem jesa eyeba, jega angtane tof muli-mulni baabetyenaiserem Uwa Sanbagiri jam onsobafe, jei jam jenyan, jengga jei jam sene waakentana. ¹⁴ Waakenfer isa gwena angtane seyafter gemerserem jebar, ane sa gwe tane Uwa Sanbagirmana gamserem! Afa aamei ijama gweyanaye Tuhan aa gam gunurum, gam jega aamei Tuhan ijama damtayan. ¹⁵ In ina ga jam isa geraamisnenne, jega angtane afa fas jam tikweyan waakena Uwa Sanbagirminiwer jam taabife, waakena Uwa Sanbagiri nep nes Jei golminirim. Gamjon in ina ga jam isa geraamisnenne, jega angtane afa fas tini syelabara gamserem aa je gam kokosaram, ane jemna syelaiserem jei ga angtane unggwanfer jem ga gam kabwaktababili. ¹⁶ Ane in ina ga jam isa geraamisnenne, jega angtane afa maaryena jam gwebiyen, ane jei jam tikweyan Uwa Sanbagirs onsobafe. Ijama eyebiyen Esau, tane ayansusu jei gamserem jei aa gam eyebilim. Jei baabeta jelemanaiserem aa jes taabilim uwa jelemanaiserem jemniwer, jei ga aa jualwul enggalfe tumilgal touya jem gam domolfe. ¹⁷ Ane aamei imsa towaswena enggam, jes galapserem jei baabeta jeiserem gamjon taabif, jengga jeta jelemanaiserem jei baif gwebana. Ane jei safe uskambar aa bal ane ga aa syel, jengga jei nele jei jam damtayan. ¹⁸ Aameiba angtane Kristensam, ane taarena aamei ijeba fornantam, taarena jeiserem enggalyan taarena aamei igala gama damtanaram, ane entenerem, aam temawer aamei angtane Israelmana gamserem gamyan. Jei Taarena Sinaiminip ge forobiyel, ane jes galapserem iris, ane tokwagir, gwin kakat, ane jem deigir mese jep ga aa ge etamwebil. ¹⁹ Ane angtane jep aaiserem jei trompet tisana ga aane sarbabil, ane taterisi Uwa Sanbagirmana jes mese. Ane jei taterisi jeiserem aa galap ne sarbilim, jei ga uskambar ga aane bal enggame Jei ga aa tikwel jam nasowelabe, aam temawer jei uskambarsus ge erebil. ²⁰ Jei jam ge erebil taterisi enggam aa jei gulum, "Afa angtane, afa domba tane, afa nenes-nensa taarena aaiserem jep aa jei jutenaram, jepga jei ga sege terbili, tonem ne munbobili jamer futu." ²¹ Seyafter jep aa jei ge etamwebilim, jei angtane Israelmana enggam eyebaabil jei jam ge erebil jamere Nabi Musa ga aa gutel, "Ai ajamersus erne, ane ajam egegwena!" ²² Jengga aamei ijeya gwenaram angtane Kristenfe, aamei imsa fortya Taarena Siyonminibe. Jeiserem kotana Yerusalem winsiwer; jeiserem kotana Uwa Sanbagirmana nwinsanaiserem taman waaken-girip aaiserem. Ane jep ga malaikata ane-anesus jep aa jei ge betwebilirim, ini jemna saaser-saaserfer aa jei ge folbaminirim. ²³ Ane aamei imsa foryalaye, aamei angtane Uwa Sanbagirmanaiserem jebar ga imsa betwesini, angtane bosna aa jemanem ge batobaminirim taman waaken-giribe. Aamei Uwa Sanbagirminibe imsa fortya, Jei enggam aa jei gunurum angtane waakenayo afa kapka. Ane Jem eyewer ga uwu angtane Uwa Sanbagiri waakenem aa jes balbabilirim, ane jei ga waakenfer ge nwinbene Uwa Sanbagirfar jamer abak-abaksus. ²⁴ Ane aamei Yesusminip ga imsa fortya. Jeiba Imam Sanbagirsususerem taterisi ibirmiserem Uwa Sanbagiri aa jes bilipminirim angtanefe. Aamei aawisi Jemnaiserem jeme is mes wirtabaabili. Aawisi Jemnaiserem jei aawisi Habelmana mes ayebenni, aam temawer aawisi Habelmanaiserem jei nes jafner ge saamisini fwaina etam-etama kapkaiserem jem temawer, jengga aawisi Yesusmanaiserem jei etam-etama kapka nemna nes mes wirtabaipmisini. ²⁵ Taterisi Uwa Sanbagirmanaiserem bunarsusfer gasa sarbisi, ane aamei enggam ijama guyon, "Taterisi jeiserem ai baifa gwebili jam sarbisife." Nabi Musa jei fwater Taterisi Uwa Sanbagirmanaiserem jei mes nasbinennel ogiri aaiserem jebe, jengga angtane jepmanaiserem jei taterisi jeiserem baif ne gwebil jam sarbisife, ane jei ga tamtamtala ga aane domol. Ane namwer aas jepserem aamei fomfoma? Aamei bunarsusfer tamtamtala ga isa domola, afa aamei taterisi Uwa Sanbagiri aa jes nasbilirim taman waaken-giriwer jeiserem ijama sarbiyeneye. ²⁶ Gwanan jes jepserem Uwa Sanbagiri Jei ga aa gutel, ane Jemna tateris gulu jeiserem jem ga ogiri ga jam gin-gintel. Jengga namwer Jei gamjon taterisi nafsiserem ga mwangbisini enggame, "Ai gamjon ogiri aaiserem ga As gin-gintese, gam ke ogiri aaiserem jetefener, jengga winis mese, gwer, muar, ane torbwana mese ga As gin-gintababisi." ²⁷ Jei jam aa galap gutenaram enggame, "Ai gamjon ogiri aaiserem ga As gin-gintese.", nei bunarsusfer nemsa towaswena enggame, seyafter Jei aa jes eyebaabilim, seyafter jeiserem Jei se gin-gintababisi, ane gase bartabaabisi. Jengga jeiserem jam gin-ginweyan aaiserem ga jenefener sege falbisi. ²⁸ Ga jem temawer, au, nei Uwa Sanbagiri jeber-jeber ga enggam nesa pujitawena, "Ase samfer golmini" jesma bilibene, aam temawer Jei tampata nep nes Jei golmini, tampata Jei Sanbakfe aa jep nwinirim, ane tampata jeiserem jei jam ne gin-ginweyan. Ane nei Uwa Sanbagiri ga jam nesa erebene, ane gwela nemna ga nes waakenfer sege folbamini, jega ini Jemna jem ga nesa saaser-saasertabana. ²⁹ Nei ga jes gemerserem ga gemer nesa eyebili, aam temawer Uwa Sanbagiri nemnaiserem Jei ga tokwana jam ertele gamserem, apgal jigala jep ge taabisife jamer fusfusus.

¹ Ayana osona jei jena aa gemer gangge nesiksonaram, aamei jegme ina ga gemer isa nesiksonanna. ² Aamei angtane Kristen taman-tamna nafsiserem jewer aa jei gangge jalbilirim, angtane jeiserem ga jam igama balbabili enggalfe im jenap jam nwinfe. Angtane gam aa jei gane eyebilirim, jei ga malaikat mes gane tebabili, jengga jei teisyena enggame jeiba malaikatsam. ³ Aamei angtane bwiyip aa jei ge nwinbetonom ga jam isa batobaabili, aam temawer aamei ga enggam igama enola ilem inibe, aamei angtane jeiserem jebaner seyafter bwiyip jam nuninona gamserem. Ane aamei angtane kapka aa jei gane domolaram angtane nafsiserem jemniwer, angtane jeiserem ga jam igama batobaabili, aam temawer aamei ga enggam igama enola ilem inibe, kapka jeiserem aameiya domola jei gamserem. ⁴ Angtane seyafter gemerserem jei ga waakenfer sege gubili jelem inibe, wini yo anggwana jei waakenfer gangge nwini jem temawer. Wini jei anggwana jelemanaiserem ga jebanefener gangge tana, ane anggwana jegme gemer. Uwa Sanbagiri Jei fwaina kapkaiserem gam gulbana angtane taterisi wini yo anggwana jem temawer jeiserem aa jei gam ayebenerem, ane angtane maaryena aa jei gam gwebilirim jes mese. ⁵ Imna ini unggwan-giri doi mese apgal jigal jepfener ipsam ge folbaminirim, jengga aamei apgal jigala ijesa damtabilirim, ini imnaiserem ga is jem sege saaser-saasersweipmini. Sa sarbistaabon Uwa Sanbagiri Jei enggam gul: "Ai bunarsusfer aamei isa Ajam mirtebitefalyan; Ai aamei jeber-jeber isa Agam gerebaabisnenne." (Ulangan 31:6) ⁶ Ane nei bunarsusfer ga neya gunu enggame: "Ai ajam ereyen, angtane ap aa jes gane eyeibenerem, aam temawer Tuhan Jei as batobana." (Mazmur 118:6) ⁷ Angtane taterisi Uwa Sanbagirmana ip gwanan is jei ne nasipminirim, angtane jeiserem ijama dirinswebabiyen. Sa sarbistaabon jei fomfom naawena, ane jei fomfom ge terbili. Jei Uwa Sanbagiri aa gemer ne tebanaram, aamei jegme gemer isa tebana. ⁸ Ane gasa sarbistaabon enggame, Yesus Kristus Jei Jam irfifweyan. Jei jeber-jeber galateram, ir, ane namwer mese jamer abak-abaksus. ⁹ Taterisi nafis-nafsiserem ijama onsobiyen. Taterisi jeiserem gam ke taterisi bunarsusfer aaiserem fwater ip is jes ne towas-towasulminintim. Jengga jasa taabi waakenaiserem Uwa Sanbagiri nep nes jes golminirim, je ga nes kanautababili. Hukumu tumilgalem temawenefener jam onsobiliserem, jeiserem nei nes jam kanautababiyen. Angtane hukumu jeiserem aa jei gam onsobilirim, jei jeme jam batobayan. ¹⁰ Nei angtane Kristenfe nejeya gwenaram, nemna tampata ga daamfenna enggalaiserem tampata Uwa Sanbagirfe domba tane aa jep gane giranbaibaasinirim, tampata jeiserem je ga salibi Yesusmanaiserem ga jes Jei aa jep tersentem. Imama awelna Uwa Sanbagirem tenda jenap aa jei ne gwebuwenaram, jei tumilgala fas jam ne domolyan tampata nemnaiserem jewer. ¹¹ Imam sanbagirsusu jemnaiserem jei ga aawisi domba tanemana ane sapi tanemana jeiserem ga erbiwena Mwona Waakensususerem Uwa Sanbagirmana jebe. Jei aawisi jeiserem ga Uwa Sanbagirf gulbana enggalfe, etam-etama angtanemanaiserem jemna jem gam motolmisif. Jengga domba tane ane sapi tane jemna tifni ane niniserem jei ga aa ge tobitintye tampata angtane aa jep ge nwinbenerem jem sitawer, jep ga aa giranbaipmisini. ¹² Jega jem temawer, Yesus Jeime gemer, ti salibibe Jeime ne daktanswenant, ane jep ga ter kotana jeiserem jem mwa kautela sitawer. Jei ga enggalf ter etam-etama angtanemana gam wirulmif aawisi Jelemanaiserem jeme. ¹³ Jega jem temawer au, nei ganma sofwe tampata Yesus aa jep nwinirim, tampata angtane gemer aa jep ge nwinbenerem jem sitawer. Ane au, nei Jei ga ganma onsoba, safe angtane nafsi nes kabwakmer sene balbabili, jei Yesusf kapka aa gemer ne bilibenerem. ¹⁴ Ogiri aaiserem jebe, nei tampata abaksusfer jep nwiniserem nejama domolyan, jengga kotana abaksusfer jep nwiniserem nei ga nejesa fimini, nei nejeba nwiniserem jamer abak-abaksus. ¹⁵ Jeiserem ga enggam, angtane fwatermanaiserem jei domba tane aa gemer ne kitulbowelam Uwa Sanbagirfe, jes gemerserem neime gemer nei jeber-jeber Uwa Sanbagiri ganma pujite, ane nei ga negama gunu, "Ase samfer golmini bosna Yesusmanaiserem jeme." ¹⁶ Ane ijama dirinsweyan waakenaiserem jes eyebife, ane afa aamei galgalabaraye, jeiserem ga afwer ga angtane galgalyenaiserem ga jep igama kitulmini. Jes gemerserem ga gemer isa eyebili, aam temawer ini Uwa Sanbagirmana saaser-saaserfer gam folbana, angtane berna aa jei gam gularam jem temawer. ¹⁷ Angtane im sanbakfe aa jei gam naawenaram, aamei jei ga jamer igama onsobaabili. Jei aa jes gane bilirim, aamei jeiserem ga jamer isa eyebili. Jei jeber-jeber aamei is gane gerebaabisnenne, aam temawer galap jei awelna jemnaiserem Uwa Sanbagirfe gane bilibene. Ane aamei jei ga jamer isa onsobaabili, jega awelna jemna jeiserem ini saaser-saasermer ga gane gwebili. Afa aamei jei ijama onsobaabiyeneye, gam jega awelna jemna waakenfer jam ne gwebiyen, ane jeiserem jeme aamei is jam batobaabiyen. ¹⁸ Sembayanga jeber-jeber ap ga as igama gwebamini. Ai enggam aya towaswena, ai waakena tefner aya eyebili. Jeiserem ga ajesa bilirim, jeber-jeber waakenfer agma gwena. ¹⁹ Ane sembayanga gamjon ga enggam isa gwebana, abakferyan ai gamjon ga as waraufaltya imnibe. ²⁰ Ai sembayanga ga ai gwebabana Uwa Sanbagirfe, ini waakena aa jei kitulmuwenaram angtane Jelemanaiserem jebe. Jei Tuhan Yesus aa Jei irtestenantam terewer. Yesus Jeiba nem Gembalagirsam, nei nes Jei gam gerebaabisnennerem. Ane aawisi Jemnaiserem jeme, Uwa Sanbagiri Jei ga baabeta jem golbili taterisi ibirmi Jelemanaiserem Jei aa jes bilipminirim. Taterisi jeiserem gase fala jamer abak-abaksus. ²¹ Ai sembayanga enggalf ai gwebabana, jega Jei waakenaiserem seyafter ibe is gase kitulmini, jega aamei waakena tefner gam isa eyebili Jei aa jes bilirim jam eyebife, baabeta Yesus Kristusmanaiserem jeme. Ane ai sembayanga as gwebabana enggame, baabeta Jemnaiserem jeme Jei ga awelna nemnip gase gwebili, jega Jei aa jes bilirim nei jetefener negama eyebili. Ane nei ga Jei tefner ga negama pujitene jamer abak-abaksus. Amin, jes gamserem ga gamfener! ²² Am afelen mesna ai isa enggam ai balbabili, aamei taterisi aaiserem ga waakenfer isa sarbisini ini saaser-saasermer. Ai surta aaiserem ga enggalf ai tulisulu aamei is gam batobaabif, jega aamei kanaufer gam isa fina. Ai enggam ai gunu alem inibe surta aaiserem jei bwalenyan. ²³ Ai aamei isa ajam towastababif enggame, nem afelna Timotius jei bwiyiwer mes totintye. Afa jei amnip tatarmer jam se fortyaram, jepga ai ga as ge gwina imnibe. ²⁴ Aamei angtane sanbaka ilemanaiserem, ane angtane Uwa Sanbagirmana seyafter gemerserem jes mese, aamei taterisi amniwer aaiserem ga enggam isa bilipmini, "Kelek, waakenfer sa gwe!" Ane angtane Kristen negeri Italyamanaiserem jei is enggam ne balbabili, "Kelek, waakenfer sa gwe!" ²⁵ Ai sembayanga as gwebabana, jega Uwa Sanbagiri Jei waakena Jelemanaiserem ip ise golmini aamei seyafter gemerserem. Tabana ga aaf. Amin.