Galatya

Galatya

¹ - ² Ga ip, angtane safna seyafter Yesus iJeya tebanaram, propinsi Galatya je aa jei ge nwinbenerem. Surta aaiserem amniwer, Paulus. Aiba rasulu Yesus Kristusmana ane Uwa Sanbagirmanam. Angtane jei ai as jemne destabayan, ane angtane ai as jemne baftayan Taterisi Waakena ajewer nasbinenne. Jengga Yesus Kristus ane Uwa Sanbagiri nemna, Jei Yesus aa Jei irtestenantam terewer, Jei nawersamer am ge destabana ai rasulf gwefe, ane Jei am ge baftana ai Taterisi Waakena ajewer nasbinennef. Nem afelen mesna aafe ai ajebara nwinirim, jei ims ne balbabili, "Waakenfer se naawetna." ³ Ai sembayanga as gwebabana Uwa Sanbagirfe, Uwa nemna, ane Tuhan Yesus Kristus mese, Jei waakena Jelemanaiserem ip is ga sege golmini, ane Jei ini imna is sege gwebaipmini waakenfer is ga sege folbamini. ⁴ Kristus Jei mes sarbili ane ga eyebili seyafter Uwa Sanbagiri, Uwa nemna, Jei aa jes bilim Kristus Jam eyebife. Kristus Jei Jenjen gera Jam terf enggalfe etam-etama kapka nemnaiserem gam wirtabaipmisif, ane enggalf nei kapkaiserem seyafter ogiri aaiserem jewer nes gam aftabunnuf. ⁵ Uwa Sanbagiri Jeiba sanbagirsusum. Nei ganma pujite jamer abak-abaksus! Amin. ⁶ Uwa Sanbagiri Jei ims nesiktababili, ane Jei aamei ga is jenbebili enggalfe Jem angtanef igama gwef. Jengga ai uskambarsus bitbitwena aamei tatarfer Uwa Sanbagiri jam tikwebaatiliwer imsa aftannu. Ane aamei namwer angtane taterisi nafsi aa jei ne nasbabilirim Uwa Sanbagirminiweryan, aamei ga ijesa tikwebaabitini. ⁷ Angtane afwenefener jei enggam ge gubili taterisi jemna ba waakenam, jengga taterisi jemna jeiserem jei kabwaksusu; Taterisi Waakenaiserem ga Uwa Sanbagirmanfenna. Angtane jeiserem ga is jei sene towas-towastababili, jamere aamei ijama towasweyan taterisi waakenaiserem bunarsusfer ga fwersa. Jei tousa Taterisi Waakena Uwa Sanbagirmana, jengga jei Taterisi Waakena jeiserem jem igiserem jam ne nasipmiyen. Jei igi nafsiserem jes ne nasipmini. Jei aamei ga is enggam ne afaf-afaftababili, "Aamei Kristuster imsa tebana, jeiserem ba waakenam. Jengga aamei Hukumu Nabi Musamanaiserem jes mese ga jamer isa onsobili, ane aamei ga is jam sene sunattababili. Afa aamei Hukumu jeiserem ijama onsobiyeneye, ane is jam ne sunattababiyeneye, Uwa Sanbagiri Jei aamei is Jam waakentababisiyen." ⁸ Ai gwanan Taterisi Waakenaiserem isa ajesa nasipminint ibe. Afa ai, afa malaikata taman waaken-girmanaiserem, taterisi nafsi Taterisi Waakena jeiserem jemniwer is jam sene nasipminirim ibe, bunar-bunarsus Uwa Sanbagiri Jei angtane afa malaikat jes gamserem gam aa jei ne nasbilirim, Jei gase baftabili taman tokwagiribe. ⁹ Ai isa ajesa bilipminintim ibe, ai gamjon jeiserem isa jeter bilipmini ibe: Aamei gwanan Taterisi Waakena imsa taabilint. Afa angtane taterisi nafsi Taterisi Waakena jeiserem jemniwer is jam sene nasipminirim ibe, bunar-bunarsus Uwa Sanbagiri Jei angtane jeiserem gase baftabili taman tokwagiribe. ¹⁰ Ai ajes nasbilirim jeiserem jeme, aamei ga jem isa towaswena ini amna unggwan-giri as jam folbayan, jega angtane as gane balfe ai waakenferam nasowena. Jeiserem jei fas. Jengga ini amna ase unggwan-girsus as gam folbana Uwa Sanbagirminibe, jega Uwa Sanbagiri Jener as gase bala enggame, "Aamei iwaakenfer towas-towastababili Taterisi Amnaiserem angtanefe." Wa ini amna angtaneminipfenere, gam jega bunarsusfer Kristus ajam onsobayan, ane awelna Jemna ajam gweyibeyen. ¹¹ Am afelen mesna, ai enggam ai gunu aamei igama towaswef, Taterisi Waakena ai isa ajes nasipminintim ibe, jei angtanemanyan. ¹² Ai Taterisi Waakena jeiserem ajam sarbiyen angtaneminiwer, ane guru jei fas taterisi jeiserem ap as jam ne towas-towasulbayan. Jengga Yesus Kristus Taterisi Waakena jeiserem ap ase Jener towasulbonont. ¹³ Aamei gwela amna as imsa saribenent, ai nalefe Yesus ajam tebayan. Gwanan jes galapserem, ai agama Yahudimana gam onsobilint, ane ai angtane Uwa Sanbagirmana safna seyafter Yesus aa jei ne tebanaram ai uskamer tamtamtababilint. Ai awelna kakalmer ai gwebilint enggalfe angtane Yesus gane aftannuf jam tebalawer. ¹⁴ Ai agama Yahudimanaiserem waakenfer ga ai tikwebitinint angtane Yahudimana afweraiserem jemniwer, angtane umuru amna jebarserem. Ane ai awelna uskambar ai gwebilint enggalfe, angtane Yahudimana jei jeber-jeber ga sene tikwebitini gwela asal-asala alemana jei ap as jes towas-towasulminirim. ¹⁵ Jengga ai nalef ajam suruyon, Uwa Sanbagiri Jei ai as mes destabal ai Jem angtanef gwefe. Ini Uwa Sanbagirmana waakensusu, jega jem temawer Jei ai ga as jenbenent enggalfe ai awelna Jemna agam gweyibef. ¹⁶ Nunu Uwa Sanbagiri Jena aa jes bilim, jepga Jei Tane Jelemana abe enggalfe ga as gweretabanant, ai Taterisi Waakena Yesusem temawer agam nasipminennef angtane Yahudimanyanaiserem jebe. Jes galapserem ai esorola angtaneminiwer ajam bilyen. ¹⁷ Ai esorola rasul nafsiminiwer ajam bilyen. Angtane rasulf gwanan gwelaiserem, ai galap rasulfe nalef ajam gweyan, jei kota Yerusalemwer ge nwinbene, jengga ai jewer ajam gwiyan. Ai ajamer sofnant negeri Arabwer, ane jepga ai gamjon ga as warauwa kota Damsikwer. ¹⁸ Tahunu nawer-ningnabaraiserem jame aa barwenantam, ai kota Yerusalemwer ga ai sofnant enggalfe ai Petrusfar agam ge dorwef. Ai jebar ai ge nwinintim minggunu abakfer ga naura. ¹⁹ Ai Petrus ane Yakobus ai ajetefener domsonant, Yakobus Tuhanem osonaiserem. Ai rasulu nafsiserem ajam damtabiyen. ²⁰ Ai aaiserem ajes tulistababilirim jeba bunaram. Uwa Sanbagiri Jei tousa ai aamei isa ajam afaftababiyen. ²¹ Jewer ga ai sofwant propinsi Sirya ane ona Kilikyawer mese. ²² Jes galapserem angtane Kristen jemata nafsiserem ona Yudeya je, jei gemerje abar ajama dorweyan. ²³ Jei ga enggamfener ge sarbisini, "Angtane Kristen gwanan aa jei tamtamtababinennentem, ane awelna kakalmer aa jei gwebilintim jega angtane Yesus gane aftannuf jam tebalawer, jei namwer taterisi Yesus jam tebaf ga jes nasbinenne." ²⁴ Ane jei Uwa Sanbagiri ga aane pujitene, aam temawer Uwa Sanbagiri Jei waakena as mes eyeibene abe.

¹ Tahunu empat belas jam aa ge barwebilintim, ai Barnabasfar gamjon ga ai ge warausanant kota Yerusalemwer. Ane ai Titus ai aftanant. ² Ai ga ai sofwant, aam temawer Uwa Sanbagiri Jei ams balant jam sofwefe. Ai agalap fornantam Yerusalemwer, ai nabala ga angtane sanbaka Kristenmanaiserem ai jebanefener aya dorwenant, ane jepga taterisi ajes nasipminirim angtane Yahudimanyan jebe jem temawer ga ai towastababilint. Ini amna as jam eseswebanant enggalem temawer, angtane sanbaka Kristenmana jei ai as galap sene bala enggame, "Aamei ijes towas-towastababilirim, jei nafsi ai ajesa towas-towastababilirim, numu daamfenyan." Afa angtane sanbaka jeiserem jei enggam sege gubilirim, taterisi amnaiserem jei numu daamfenyan, gam jega awelna amnaiserem ga ase elbesini. Jewer ga ai Taterisi Waakena ajes nasipminirim angtane Yahudimanyanfe, ai taterisi jeiserem waakenfer ga ai nasipminint angtane sanbaka jeiserem jebe. Ai ga aas gamserem agam balbabilint, "Angtane Yahudimanyan Yesus aa jei ne tebanaram, jei Hukumu Nabi Musa aa jes tulistababilim safnant jam ne onsobiyen, jei safnant jam ne sunattababiyen. Uwa Sanbagiri Jei angtane jam gam waakentaasinirim, afa angtane jei Yesus tefner gam tebana." ³ Ai taterisi jeiserem agalap tabanuluntum jam nasipmilibe, angtane sanbaka jeiserem jei ai ga asene balant, "Taterisi aamei ijes nasipminirim angtanefe, taterisi jeiserem ba waakenam." Ane angtane sanbaka jeiserem jei jam guyon enggame, "Titus jam sunattafe." Titus, jei abar ajeya finaram, jei angtane Yahudimanyan, jei angtane Yunanimana, ane ga jem temawer jei fas jam ne sunattayan. ⁴ Jengga angtane afwenefener jep aaiserem ga jei ge gubilint ititmer, "Titus jei Yesus mes tebana, ga jem temawer jeime jam isa sunattana." Angtane jeiserem jei Yesus akar-akarem ne tebana. Angtane jei jam balbabiyen abar jam betwefe, jengga jener ge jalbilint ini kabwakmer jena ai ajeba betwenaram jebe. Angtane jeiserem jei sabanggwana galserem. Jei enggalf ge jalbilint, jei gam ge towaswebif ai ane angtane sanbaka jeiserem ai ajesa nasbilirim. Jei gam ge towaswebif enggame, ai ane angtane sanbaka jeiserem ai hukumu Yahudimana jeiserem ke ajetera onsobili, afa fas ai ajama onsobiyen. Angtane kapka jeiserem, ini jemna unggwan-giri angtane Kristen taatwebaabife, hukumu seyafter jam onsobife. Jengga bunarsusfer nei Kristus Yesusfar daamfennaber nesa gwena; Jei nei nes mesam aftabunnunt hukumu jeiserem jam onsobiliwer. ⁵ Jega jem temawer ai fasfasus angtane kapka jeiserem ajama sarbabiyen, ane ai Titus ajama sunattayan. Ai baifa gwena aamei taterisi nafsi ijama sarbife, ai enggam aya gunu aamei Taterisi Waakena tefner isa sarbili. ⁶ Ane angtane sanbaka jeiserem jei taterisi nafsi ap as jam ne gulbayan. Jei ga ai as enggam ne balant, "Aamei Taterisi Waakena jeiserem Kristus jam tebalaiserem jem temawer ga jeter is nasbinenne, aamei igemer nasbinennentem. Taterisi jam sunattababiliwer, ane Hukum onsobiliwer jei ijam nasbineneyen." (Angtane sanbaka jeiserem jem temawer, ai alem inip enggame ajam gunu, jeba igyen angtane jeiserem angtane sanbaksam. Ai jes gamserem gam ga ajewer gunurum, ai ga aam temawer gunu Uwa Sanbagiri Jei enggam gunu jeba igyen afa angtane sanbaka afa bastouya. Uwa Sanbagiri Jei mwongga daamfenna gam gwirinmini angtane seyafter gemerserem jebe.) ⁷ Angtane sanbaka jei ga ai as enggam ne balant, "Aamei Taterisi Waakena jeiserem ga jeter is nasbinenne." Jei enggam ge towaswebilint, Uwa Sanbagiri Jei awelna aaiserem abe as mes gulbana enggalfe, ai Taterisi Waakena agam nasipmif angtane Yahudimanyan jebe, jes gemerserem Uwa Sanbagiri Jeime awelna Petrusfe mesam gulbana enggalfe, Taterisi Waakena gam nasipmif angtane Yahudimanaiserem jebe. ⁸ Bunarsusfer ga enggam, Uwa Sanbagiri Jei baabeta ap as mes gulbana enggalfe ai Rasulf gwefe, ane ai angtane Yahudimanyanaiserem jei agam towas-towastababif. Ane Uwa Sanbagiri Jeime Petrusfe baabeta mesam gulbana enggalfe jei angtane Yahudimana gam towas-towastababif. ⁹ Yakobus, Petrus, ane Yohanes jei angtane sanbaka Kristenmana aa jei ge nwinbenerem kota Yerusalem je, jei nunu jes jepserem ga aa ge sarbili waakenfer enggame, Uwa Sanbagiri Jei waakena Jemnaiserem ap as mesam gulbana, ane Jei awelna Jemna as mesam gulbana abe. Jepga angtane sanbaka seyafter jep gemerserem ai Barnabasfar tafna jemna ga ai ge tebaipmini, ane ai tafna jemna ajewer ge tebaipminirim, angtane gam ge towaswebif ai jebar daamfennaber agma gwef. Ai Barnabasfar awelna agam ge gwebif angtane Yahudimanyanaiserem jem nenennabe. Ane angtane sanbaka jeiserem jei awelna angtane Yahudimanaiserem jem nenennap gam ne gwebif. ¹⁰ Jei ap ga ase aa tefner ne bilipmini Barnabasfar, angtane galgalyenaiserem jes batobaabif. Ane ini amna as mesam unggwan-girswebana afa jeiserem ai ajes eyebife. ¹¹ Petrus aa galap nwinintim kota Antyokya je, ai Petrus ga ai uftanant angtane Kristen jep aa jei ge nwinbenerem jem nwenabe, aam temawer jei syefer eyebili. ¹² Petrus aa galap fornantam kota Antyokya je, jei ini saaser-saaserfer folbana angtane Yahudimanyan jebar jam twenfe. Jengga Yakobusem afelen mesna jam aa galap ge forobilintim jebe, jem afelna afweraiserem jei ga enggam ge gubilint, "Angtane Yahudimanyan Yesus aa jei ne tebanaram jei ga jam sene sunattababili. Ane afa jei jam ne sunattababiyene, aamei jebar ijama twenyan." Petrus jem temawer ga erne, ane jei jena ga bijautanant angtane Yahudimanyan jemniwer, ane jei ga tikwena jebar gamjon jam ne dwenyan. ¹³ Petrus jei enggam gwenant angtane akar-akarem aa jei naawenaram jei gamserem, aam temawer jei mes towaswena enggame, "Aiba samfer asa twena angtane Yahudimanyan jebar." Angtane Yahudimana afweraiserem Yesus aa jei ne tebanaram, jei ga aa ge towaiwebili akar-akarem naawefe, Petrus gamserem. Ane Barnabas mese jei jena ga bijautana angtane Yahudimanyan Yesus aa jei ne tebanaram jemniwer, ane jei bai jebar seyafter jam twenfe. ¹⁴ Angtane Taterisi Waakena aa jei ne onsobilirim, jei ga waakenfer se naawena, jei akar-akarem jam naaweyan. Ai agalap damtabilintim Petrus ane angtane Yahudimana afwer jeiserem jei akar-akarem jes gamserem ga gam naawena, ai Petrus ga enggam ai balant angtane Kristen jem nwenabe, "Aameiba angtane Yahudimanam, jengga aamei hukumu angtane Yahudimana fas ijam onsobiyen. Afa ga gam, jeje bafa aamei angtane Yahudimanyan ga im taatwebaabili hukumu jeiserem jes onsobife? Jeiserem waakenyan." ¹⁵ Neiba nei angtane Yahudif ma surnunt. Nei nejama suruyon angtane Yahudimanyanfe, angtane Hukumu jam ne onsobiyeneiserem. ¹⁶ Jengga nei nemsama towaswena, afa angtane jei ga Yesus Kristus tefner gam tebana, gam jega Uwa Sanbagiri Jei enggam gunu, "Angtane jeiserem jei Abar mes ge waakenswena." Jeke enggalem temawer Hukumu Nabi Musamana aa jewer gane onsobilirim, Uwa Sanbagiri jem temawer Jam guyon, "Angtane jeiserem jei Abar mesma waakenswena." Gamyan. Ga jem temawer nei Yesus Kristus nemsa tebana enggalfe Uwa Sanbagiri nei nes gase balbabili nei Jebar nemsa waakenswena, nei Kristus nejeya tebanaram jeme, jeke enggalem temawer Hukumu jeiserem nei jewer ne onsobilirim. Angtane afa fas Uwa Sanbagirfer jam ge waakensweyan, afa jei Hukum jeiserem gam onsobilirim. ¹⁷ Ini nemna unggwan-giri ga nes enggalf ge folbamini Uwa Sanbagirfar jam waakenswef, Kristusfar daamfennaber nejewera gwenaram jeme. Ane jega jem temawer nei gamjon Hukumu nejama onsobiyen, jengga nei Kristus nemsa tebana. Angtane Yahudimana afwenefener jei enggam ge gubili nem temawer, "Jei Kristus tefner ne tebana, jei Hukumu fas jam ne onsobiyen, ane jega jem temawer jei angtane etam-etamabara. Jei Kristus aa jewer ne onsobanaram, jeba mesam etamwena angtane etam-etamabarfe." Taterisi jeiserem jei ol kabwak, jeiserem bunarsusferyan! ¹⁸ Gwanan ai angtane enggam ai balbabilint, "Aamei Hukumu ga jam isa onsobili." Jengga ai Kristus agalap tebanantam enggalfe ai Uwa Sanbagirfer waakenfer agam ge gwef, jes galapserem ai ga ai towaiwena angtane jam towas-towastababife enggame, "Hukumu gamjon ijama onsobiyen." Jengga ai afa namwer gamjon jam as warautnaram enggam gas towas-towastababili, "Aamei Hukumu jeiserem ga jam isa onsobili.", afa ai angtane jes gamserem gam jam as towas-towastababili, gam jega angtane ga sege towaswebili aiba bunarsusfer kapka gam eyebili. Jengga ai gamjon ajam warauyan angtane jam towas-towastababif Hukumu jam onsobife. ¹⁹ Gwanan ai Hukumu Uwa Sanbagirmana Nabi Musa aa jes tulistababilim ai ajes unggwasbilint jam onsobife, jengga ai hukumu jeiserem seyafter ajam onsobiyen. Ga jem temawer ai jes jepserem ai ga ai towaswena enggame, aiba angtane etam-etamabaram. Hukumu jeiserem jep ga enggam tulisul, angtane etam-etam aa jei gam eyebilirim, angtane jeiserem ga jamer gam tere. Jengga Kristus Jei etam-etama amna as mes taayibenent, ane Uwa Sanbagiri Jei Kristus ga tamtamtanant, ane Jei ti salibip ga aa terent. Ai daamfennaber Kristusfar, ga jem temawer jeiserem ai Jebar jam tere gamserem. Ane ai gamjon ajam gweyan Hukumu jeiserem jem gwonabe jega enggalf, namwer aas jepserem ai as gwena Uwa Sanbagiri tefner as onsobana. ²⁰ Ai Uwa Sanbagiri gamjon ajam unggwasbayan jam onsobaf baabeta amnaiserem jeme, jengga ai namwer Kristusfar daamfennaber as ge gwena, ane ai Uwa Sanbagiri ga as onsobana baabeta Kristusmanaiserem jeme. Ane ai ogiri aaiserem jep gemer jam as gwenaram, ai jes gamserem gam ajewer gwenaram, ga aam temawer ai Tane Uwa Sanbagirmana ames tebanant. Jei ams nesiktene, ane Jei Jen Jena aa gera am temawer. ²¹ Bunarsusfer Uwa Sanbagiri Jei nems nesiktababili, jengga angtane afwenefener jei Taterisi Waakena jeiserem baif ne gwebili jam sarbife. Jengga Taterisi Waakena jeiserem ai as taabili; ai ajam guyon enggame taterisi Yesusem temawer jeiserem igyen. Afa angtane jei Uwa Sanbagirfer jam gangge waakenswenaram aam temawer jei Hukumu jeiserem aa jewer gam onsobilirim, afa ga gam, gam jega tere Yesusmanaiserem jei igyen. Jengga gamyan. Bunarsusfer tere Yesusmana jeba igsusum.

¹ Aamei angtane ijeya nwinirim propinsi Galatyaminibe, aamei bunar-bunarsusfer angtane teisyena waakenayo ane kapka jei ga fwersa. Aamei is nane afaf-afaftababili? Gwanan ai taterisi tere Yesus Kristusmanaiserem ti salibibe jem temawer ai isa mesam towas-towasulminint waakenfer, ane aamei taterisi jeiserem ga imsa taabili. Jengga namwer aamei taterisi jeiserem aamei waakenfer ijama onsobiyen. Ai ajam saryan waakenfer jeje bafa aamei ga isene afaf-afaftababili. ² Ai isa jam tenebaabili ula daamfenna aaiserem jem temawer: Uwa Sanbagiri Jei ke Mafnana Jelemanaiserem ke is mes golminint ibe, aam temawer aamei Hukumu Nabi Musa aa jes tulistababilim ijewera onsobilirim? Fasfasus! Uwa Sanbagiri Jei Mafnana Jelemanaiserem is mes golminint ibe, aam temawer aamei Taterisi Waakena Kristusem temawer jeiserem imsama taabili. ³ Jeje bafa aamei ga ima etamwena angtane teisyensusu gamserem? Jeje bafa aamei namwer Hukumu ijama onsobife? Uwa Sanbagiri Mafnana Jelemana ibe is galap golminirim, aamei ga ima towaiwena ibirimfer jam gwefe, Yesus Kristusfar daamfennaber, ane aamei Uwa Sanbagiri ga isa onsobana baabeta Jelemanaiserem jeme. Fomfoma? Aamei namwer ke ijama unggwasa Uwa Sanbagiri ijama onsobafe baabeta ilemanaiserem jeme? ⁴ Aamei kabwaktala uskambarsus imsa domola aam temawer aamei Yesus ijewera tebanaram. Ai ajam bitbitwena afa aamei Yesus jam tikwebaatiliwer jam isa mirtetefalaram! Ai ajam bitbitwena, aam temawer afa aamei Yesus jam isa mirtetefalaram, gam jega kabwaktala aamei ijesa domolaram, jeiserem jei igyen. ⁵ Uwa Sanbagiri Jei ke jeber-jeber Mafnana Jelemana is golmini ibe, ane Jei bwembwema im nenennabe jeber-jeber eyebili, aam temawer aamei Hukumu ijewera onsobilirim? Fasfasus! Uwa Sanbagiri Jei waakena jeiserem is jewer eyeipminirim, ga aam temawer aamei Taterisi Waakena ijewera taabilirim. Ai ajam saryan jeje bafa aamei ga isene afaf-afaftababili! ⁶ Sa sarbistaabon Abrahamem temawer! Taterisi Uwa Sanbagirmanaiserem jep ga enggam baatultel Abrahamem temawer: "Abraham jei Uwa Sanbagiri mes tebanant. Jei Uwa Sanbagiri aa jewer tebanaram, Uwa Sanbagiri Abraham ga jem temawer bala enggame, Abrahammana ini waakena." (Kejadian 15:6) ⁷ Ga jem temawer aamei enggam ga ima towaswena: Angtane seyafter gemerserem Uwa Sanbagiri aa jei ne tebanaram, Uwa Sanbagiri Jei enggam gunu angtane jeiserem jei bunar-bunarsus asal-asala Abrahammana. ⁸ Gwanan-gwanansus Uwa Sanbagiri Jei enggam mwangbisil afa angtane Yahudimanyan jei Uwa Sanbagiri jam sene tebanaram, Jei angtane jeiserem Jebar ga sege waakenswebili. Uwa Sanbagiri Jei angtane Yahudimanyanaiserem jebar nalefe jam ge waakenswebiyen, Uwa Sanbagiri Jei Taterisi Waakena jeiserem nabal-nabalsusu ga jes bilibel Abrahamfe enggame: "Asal-asala imnaiserem Jei aa jes eyebisirim jeme, Ai waakena Amnaiserem As kitulmini anggwabura seyafter gemerserem jebe." (Kejadian 12:3) ⁹ Abraham jei Uwa Sanbagiri gam tebal, ane Uwa Sanbagiri Jei waakenaiserem ga gulbal jebe. Jes gemerserem Uwa Sanbagiri Jeime waakena Jelemanaiserem ga gemer golmini, angtane seyafter gemerserem Jei aa jei ne tebanaram jebe. ¹⁰ Angtane aa jei gangge gubilirim, "Ai Hukumu asa onsobili, ane jem temawer ga ai Uwa Sanbagirfer amsa waakenswena." Angtane gam aa jei gangge gubilirim, angtane jeiserem Uwa Sanbagiri bunarsusfer ga jes gam babapsobabili. Nei nemsama towaswebili Uwa Sanbagiri Jei angtane jeiserem se babapsobabili, aam temawer Taterisi Uwa Sanbagirmanaiserem jep ga enggam baatultel: "Angtane jeber-jeber jam eyebiyeneiserem seyafter aa jei ge batobilirim Hukumube, Uwa Sanbagiri Jei angtane jeiserem bunarsusfer ga jes gam babapsobabili." (Ulangan 27:26) ¹¹ Uwa Sanbagiri Jei enggam Jam guyon, "Afa angtane jei Hukumu jam gam onsobilirim, jei samfer Abar agma waakenswena." Fas, gamyan. Nei nemsama towaswebili jei gamyan, aam temawer Taterisi Uwa Sanbagirmanaiserem jep ga enggam baatultel: "Angtane Tuhan aa jei gam tebanaram, Uwa Sanbagiri Jei angtane jeiserem gam balbabili ini jemna waakena, ane angtane jeiserem jei gwela ibirmi gam domola Uwa Sanbagirfer gam gwefe." (Habakuk 2:4) ¹² Gwela Tuhan nejewera tebanaram, jei nenes-nensa gwela Hukumu nejewera onsobilirim. Nabi Musa jei ga aatefener tulisul Hukumu jam onsobiliserem jem temawer. Jei enggam tulisul: "Angtane bunarsusfer aa jei gam eyebilirim, Hukumube seyafter gemerserem aa jes tulistababilirim, angtane jeiserem jei gwela ibirmi ga sene domola Uwa Sanbagirfer jam gwefe." (Imamat 18:5) ¹³ Seyafter aa jes tulistababilim Hukumube jeiserem nei nejama eyebiyen, ane jega jem temawer nei nemsa towaswena Uwa Sanbagiri Jei nei nese babapsobabili. Jengga Kristus Jei mes terent ti salibibe. Ane jes jepserem Jei tamtamtala nemnaiserem mes taabili, ane Jei nei ga nes mes aftabunnunt babapsobala Uwa Sanbagirmanaiserem jewer. Nei enggam neya towaswena Uwa Sanbagiri Kristus mes babapsobana, aam temawer Taterisi Uwa Sanbagirmanaiserem jep ga enggam baatultel: "Angtane aa jes gane daktanswenaram tinibe, Uwa Sanbagiri Jei angtane jeiserem ga jam babapsobana." (Ulangan 21:23) ¹⁴ Kristus tamtamtala nemnaiserem mes taabili Jei ti salibibe aa galap terentem enggalfe, waakenaiserem Uwa Sanbagiri aa jes gulbalam Abrahamfe, waakena Jemna jeiserem angtane Yahudimanyanfe jes mese se golmini. Ane Jei enggalf tere nei seyafter Kristus nejeya tebanaram, nei Mafnana Uwa Sanbagirmana Jener aa jes bilim ga nesa taabili. ¹⁵ Am afelen mesna, ai namwer aamei isa ajam towastababif Uwa Sanbagiri Abrahamf aa jes bilibelem jem temawer, jeiserem ga enggam angtane nunu jeber-jeber aa gemer ne eyebuwenaram ogiri aaiserem jebe. Jeiserem ga enggam: Angtane naura aa jes gangge mwangbisinirim, afelnaiserem jei fwaina afelenfe gam gulbana, jei jelem afelenfe aa jes gam bilibenerem jam gulbafe, jeiserem gam gulbana. Jei jem afelna jeiserem jam afaftayan, ane jam guyon enggame, "Safnant." Ane jei aa jes gam bilibenerem gamjon nensa jam baatulteyan. ¹⁶ Jes gemerserem aaiserem jegme gemer, Uwa Sanbagiri Jeime gwanan-gwanansus Abraham ane asal-asala Abrahammanaiserem ga gemer gitmil enggame, "Aamei Ijes eyebilirim jeme, Ai waakena Amnaiserem As kitulmini anggwabura seyafter gemerserem jebe." Uwa Sanbagiri aa jes bilim, jeiserem gase etamwesa, jeiserem jam elsiyen. (Ula "asal-asala" ayata aaiserem jep aa jes tulisulurum, ula jeiserem jem igiserem ga angtane uskambaryan, jengga ula jeiserem jemna igi ga enggam Angtane daamfenna tefner. Angtane daamfenna jeiserem ga aas: Kristus.) ¹⁷ Taterisi amna seyafter aaiserem igi jemna ga enggam: Uwa Sanbagiri Jei taterisi Jelemanaiserem nabal-nabalsusu ga Abrahamf bilibel. Jepga tahunu 430 aa galap barwelam, Uwa Sanbagiri Jei Hukumu Jemna ga gulbal Nabi Musafe. Nabi Musa Hukumu aa galap tulistababilim, jei afa jam wirulsiyen Uwa Sanbagiri Abrahamfe aa jes bilibelem jewer. Fas, Uwa Sanbagiri aa jes bilibelem Abrahamfe jei gemer fala. ¹⁸ Angtane afa jei Uwa Sanbagirmana aa jes bilim jam golmife angtane Jelemanaiserem jebe, afa jei waakena jeiserem sene taabili aam temawer jei hukumu aa jewer ne onsobilirim, gam jega Uwa Sanbagiri aa jes bilibelem Abrahamfe, jei ga jam se elsini. Jengga gamyan. Uwa Sanbagiri Jei Abrahams nesiktel, ane Jei waakena Jemnaiserem Abrahamfe ga aa gulbal aam temawer Jei mes bal jam gulbafe, jeke enggalem temawer Abraham jei Hukumu jeiserem aa jewer onsobilirim. ¹⁹ Afa ga gam jes gamserem, jeje bafa Uwa Sanbagiri Jei Hukumu Jelemana ga golmini angtanefe? Jei Hukumu jeiserem ga enggalf golmini, angtane gam ge towaswebif enggame, kapka jei aa jes gam eyebilirim jeiserem bunarsus ga etam-etamabara. Uwa Sanbagiri ga gul Hukumu jeiserem ga jei se fala jamere Kristus Jei se fortya. Jei asal-asala Abrahammana daamfenna jeiserem. Uwa Sanbagiri Abrahamf aa jes bilibelem, jeiserem ga Kristusem temawer bal. Uwa Sanbagiri Jei Hukum Jemna Jener fas Jam golmiyen angtanefe. Fas. Jengga Jei nabala malaikatf towasulmil, ane malaikata jeiserem jei Hukumu jeiserem Nabi Musaf ga aane towasulbol, ane Nabi Musa ga Hukumu jeiserem ga tulisulmil angtane Yahudimanaiserem jebe. ²⁰ Jengga Uwa Sanbagiri Jei aa jes bilibelem Abrahamfe, Jei Jener bilibel jebe. Jei aa jes bilibelem, nabala malaikatfe fas Jam towasulmiyen, ane Nabi Musaf mese Jam towastayan. Malaikata yo Nabi Musa jei Uwa Sanbagiri yo Abraham jem nenennabe fas jam naaweyan. ²¹ Ke enggam Uwa Sanbagiri nele naura gam tetmini, jega enggalf angtane Jebar samfer gam gangge waakenswena? Fasfasus, gamyan, aam temawer afa jeme Hukumu jam gane onsobilirim, Hukumu jeiserem gwela ibirmi ga gam golmini angtanefe, afa ga gam jes gamserem, gam jega angtane Hukumu aa galap onsobilirim, jei gwela ibirmiserem ga gane taabili Uwa Sanbagirfer. Jengga Hukumu gwela ibirmi angtanefe jam golmiyen Uwa Sanbagirfer. ²² Jengga Taterisi Uwa Sanbagirmanaiserem jep ga enggam tulisul, angtane seyafter ogirip aaiserem jei etam-etama kapkaiserem mes ne eyebili, ane jei baabeta bawasmana ga jem gwonap naawena. Ga jem temawer angtane enggam aa jei ge gubilirim, "Aiba angtane etam-etamabaram. Jengga ai Yesus Kristus tefner as tebana enggalfe ai as gam aftannuf etam-etamawer.", angtane jeiserem jei ga jetefener sene taabili waakena Uwa Sanbagirminiwer, Jei aa jes bilibelem angtane Jei aa jei ne tebanaram jebe. ²³ Kristus nalefe jam foroyan, angtane jes galapserem gwan ga Hukums ne onsobilint. Hukumu aa galap ne onsobilintim, jepga jena enggam ne ensonant jam isinbisnenele Hukumume jes gamserem, ane jei jam ge tobitinyen jewer. Ane ga gemer fala jes gemerserem, jamere Uwa Sanbagiri Taterisi Waakena Kristusem temawer nesege saamisinint nebe. Ane jes galapserem Hukumu ga barwenant. ²⁴ - ²⁵ Hukumu jeiserem ga angtane sanbaka gamserem nei nes jei gam taabilirim. Angtane sanbaka nei nes gemer gam balbabilirim enggame, aaiserem jam isa eyebili, ane jeiserem ijama eyebiyen. Hukumu jegme gemer. Nei ga gemer neya gwenant jamere Kristus aa fortyant, ane nei Jei ga neya tebana, ane nei ga Uwa Sanbagirfer nemsa waakenswena. Ane jega jem temawer Hukumu Uwa Sanbagirmana gamjon fas nei nes jam isinbaabisiyen. ²⁶ Aamei seyafter ba tane Uwa Sanbagirmanam, aam temawer aamei Kristus Yesus ijewera tebanaram. ²⁷ Ane aamei seyafter is mes ne baptistababili bosna Kristusmanaiserem jeme, ane aamei Jebar daamfennaber ga ima gwena, ane aamei ilem inibe gwela Kristusmana imsa taayibene. ²⁸ Aamei seyafter Yesus Kristusfar daamfennaber ijewera gwenaram, aamei ga jem temawer enggam ijama guyon angtane Yahudimana yo angtane Yahudimanyan jei nafis-nafsi. Ane aamei gamjon enggam ijama guyon, angtane awelna angtane nafsiminip aa jei gane gwebilirim ane angtane sanbakaiserem jei nafis-nafsi. Ane wini yo anggwana jei ijama balbabiyen jei nafis-nafsi. Bunar-bunarsus aamei seyafter ba daamfennam Yesus Kristusfar. ²⁹ Aameiba angtane Kristusmanam, ane ga jem temawer aamei bunarsusfer ba asal-asala Abrahammanam, ane aamei isa taabili waakenaiserem Uwa Sanbagiri Jei aa jes bilibelem Abrahamf Jam gulbafe, ane asal-asala Abrahammanaiserem jep mese.

¹ - ² Taterisi amna seyafter jeiserem, taterisi jeiserem ga enggala aas galserem: Tane jei galgala jetamana jei gam tebabili, afa ene yo jeta nawersamer jam gangge tererem. Jengga jei bastouya galapserem, ausana jelemanaiserem ga jei gangge egantaasini, ane galgala jeman mesna, jamere tane jeiserem gam unggwan-girswena, jepga galgala jemnaiserem ga gam tebabili ausanminiwer. Jei bastouya galapserem, jei ga ausana aa jes gangge bilibenerem jam eyebife, jei gemer gam eyebili, angtane awelna angtane nafsiminip aa jei ne gwebilirim jei gamserem. ³ Nei ga gam jes gemerserem. Nalefe Kristus Jam foroyan, nei ga enggala tantouya galserem. Jes galapserem nei ga bwat kapka ogiri aaiserem aa jei ne tebanaram, nei ga baabeta jemnaiserem ga nei jem gwonaba gwena. ⁴ Jengga nunu Uwa Sanbagiri aa jes bilim, nunu jeiserem jam se fortyaram, Uwa Sanbagiri Jei Tane Jelemana gam baftannunt ogiri aaiserem jebe. Tane jeiserem Jei angtanef gam etamwenant, ane Jei ga aa gwena Hukumu Nabi Musa aa jes tulistababilim, Hukumu jeiserem ga onsobili. ⁵ Jei ga enggalf fortya nei nes gam aftabunnuf Hukumu jam onsobiliwer, jega nei Uwa Sanbagirem tanefe gam nesa etamwena. ⁶ Uwa Sanbagiri Mafnana Jemna mes baafulnu nem inibe, jega nei gam nesa towaswena neiba tane Uwa Sanbagirmanam. Ane Tane Jemna galserem, nei Uwa Sanbagiri ga nesa bala, "Uwa, Aameiba am Uwasam." ⁷ Ga jem temawer nei gamjon nejama gweyan Hukumu jem gwonabe, jengga nei ga bunarsusfer tane Uwa Sanbagirmanam. Ane jega jem temawer nei nesa tebabili seyafter Jei aa jes bilim Jam golmife, tane Jelemanaiserem jebe. ⁸ Aamei gwanan nalefe Kristus ijama tebayan, jes galapserem aamei Uwa Sanbagiri ijama damdamtaasiyen. Jes galapserem aamei ga baabeta mafnana nenes-nensaiserem aamei ga ijem gwonap ba gwenant. Angtane afwer jei mafnana jeiserem enggam ne bili "Mafnana jeiserem jeba Uwa Sanbagiri galserem." Jengga fas, mafnana jeiserem jei Uwa Sanbagirmanyan. ⁹ Jengga namwer aamei Uwa Sanbagiri imsa damdamtaasini. Bunarsusfer jengga enggam, Uwa Sanbagiri Jei ims damdamtababisini, ane Jei ims destabaabili aamei Jem angtanef igama gwef. Am afelen mesna, ai ajam bitbitwena! Jeje bafa aamei gamjon ga ima warauwa enggalfe, baabeta bwata kapkaiserem jem gwonabe gam gwef? Bwata kapka jeiserem jei aamei is jam ne batobaabiyen, jemna baabeta bastowaifer. ¹⁰ Aamei ima unggwasa Uwa Sanbagirmana ini Jam saaser-saasertabafe Hukumu ijewera onsobilirim, hukumu aam temawer aaiserem nunu igiserem, ane muar igiserem, ane tahunu igiserem jes mese. Ini gam is jewer ge folbaminirim Hukumu jam onsobife, ini jeiserem kapka. ¹¹ Ini amna ase jam jenbana im temawer. Awelna amna im nenennabe ke as jam se elbesini? ¹² Am afelen mesna, gwanan galapserem aamei Hukumu fas ijama onsobiyen. Ai Kristus agalap tebanaram, ai ga ai etamwena aamei gemerserem, ane ai ga ai tikwena Hukumu jam onsobiliwer. Namwer ai aamei isa ititmer balbabili, ini seyafter gemerserem jeme, aamei isa etamwena ai gemerserem, ane Hukumu safnant ijama onsobiyen. Ai gwanan agalap nwinintim im tamnabe, aamei kapkaiserem abe as ijama eyebiyen. ¹³ Aamei igemera sarbistaabonwena ai nabal-nabalsusu agalap forsanyantam im tamnabe, jes galapserem ai ga aam temawer ai fornant ai ase bwerai folbasant. Ane jes galapserem ai ga Taterisi Waakenaiserem isa ajes nasipminint ibe. ¹⁴ Gwanan jes galapserem aamei awelna uskambar imsa gwebilint ams batobafe, ane jega jem temawer aamei kabwaktala ga ima domola. Safe gam, aamei ai as ijama nasbayan, ane aamei ai baife as ijama gwebayan im tamnap nwinfe. Fas. Jengga jes galapserem aamei ai as enggam ima tebanant malaikata Uwa Sanbagirmana gamserem. Ane ai as enggam ima tebanant Kristus Yesus jam tebala gamserem. ¹⁵ Jes galapserem ini imna ise saaser-saasersusfer ge folbamini am temawer. Ai enggam ai towaswena im temawer: gwanan jes galapserem ini imna unggwan-girsusu ise enggam ge folbamini ams batobafe; aamei saf isa tere am temawer waakena ijewera eyebilirim. Bai se etamwena? Jeje bafa aamei namwer ini imna is jam ge saaser-saaserswebamiyen am temawer? ¹⁶ Aamei namwer ai ke as enggam ima bala, ai im ginanggwa aam temawer ai Taterisi bunarsusfer Uwa Sanbagirmana ai isa ajewer nasipminirim ibe? ¹⁷ Angtane jeiserem jei aamei is jam ne afaf-afaftababili Taterisi Uwa Sanbagirmanaiserem jem temawer, angtane jeiserem jemna ini unggwan-girsusu aamei taterisi jemna ijama taayipmife. Jengga jei aa jes ne eyebilirim imnibe, jeiserem kapka. Ini jemna unggwan-girem ge folbamini enggalfe aamei gamjon ai as ijama onsobayan, jega ini imna unggwan-girsusu enggalfe aamei angtane jeiserem ijesa onsobaabife. ¹⁸ Afa ini angtanemana unggwansusu jei waakena jam eyebife, ini amna saaser-saasersusu afa angtane jeiserem jei aamei is jam sene batobaabilirim, ai safe ibar nejama nwinyen. Jengga afa ini jemna unggwan-girsusu jam sege folbaminirim kapkaiserem jes eyebife, afa ga gam, ai bai taterisi jemnaiserem ip is jam ne nasipmife. ¹⁹ Am afelen mesna ai isa ajes nesiktababilirim, aamei tane amna galserem. Ane ini amna siginsusu im temawer. Ai ana enggam ai entene alem inibe, wini tane jam gerala gamserem witifin sigini jena aa gam enolaram. Ini amna as jam waakenswebayan jamere ai as towaswena aamei isa gwena Yesus Kristusmana gwela gemerserem. ²⁰ Ai enggam ai gunu ini amna as enggam folbana unggwan-girfer afa ai namwer ibar jam negama dorwenaram, jega samfer nei seyafter gam negama nasowena, ane jega samfer aamei gam igama towaswena ai ana agam entenerem alem inibe. Ai teisyena ai gamjon ga isa basa ge bilipmi, ane gamjon ga isa basa ge eyeipmi ibe. ²¹ Aamei enggam ijeya gunurum, "Ai Hukumu Nabi Musamanaiserem ai ajem gwonaba gwef.", ai ims tenebaabili, "Aamke bunarsusfer ijama sarbiyen seyafter aa jes tulistaabilim Hukumube?" ²² Enggam aa jes tulistaabilim: Abrahammana tane naura. Tane naura jeiserem, daamfenna jemna bosna Ismael, ane afelna Isak. Iye Ismaelmanaiserem jemna bosna Hagar. Jei awelna Abrahammana ane wini Abrahammanaiserem jemna gam gweyipmil. Iye Isakmanaiserem Sara, jei Abrahamem winsusu. ²³ Ismael, tane Hagarmana, jei surul aam temawer ini Abrahammana ane Saramana unggwan-girsusu tanes damtafe. Isak jei surul aam temawer Uwa Sanbagiri Jei Abraham ane Sara ga enggam gitmil, "Aamei tane is ge damtasa." ²⁴ - ²⁵ Taterisi jeiserem tane Abrahammanaiserem jem temawer, taterisi jeiserem ba igiberem. Taterisi jemna igsususerem jeiserem ga Taterisi naura Uwa Sanbagiri aa jes tetminirim angtanefe ga jem temawer. Wini naura jeiserem, Hagar ane Sara, jei ga enggala Taterisi naura Uwa Sanbagiri aa jes tetminirim angtanefe. Taterisi daamfenna Uwa Sanbagiri aa jes bilibelem Abrahamfe; Sara jei taterisi jes galserem. Taterisi afelna nauraiserem jei Hukumu Uwa Sanbagiri aa jes gulbalam Nabi Musafe Taarena Sinai je. Hagar jei Hukumu jes galserem. Taarena Sinai jeba Negeri Arabminibam, ane jewer ga Taarena Sinai jeiserem bosna ga Taaren Hagar. Hagar jei awelna Abraham ane Sara jemna gam gweyipmil, ane Abraham o Sara jei aa jes gangge bilirim jam eyebife, Hagar ga jes gam eyebili. Jega jem temawer tane ane asal-asala Hagarmana jei mese jei awelna angtane nafsiserem jemnip gane gwebili. Angtane Hukumu aa jei ne onsobilirim, jei ga gemer tanna yo asal-asala Hagarmana gemerserem. Hukumu aa gemer gam gunurum, jei ga gemer gam naawena. Hagar jeime kota Yerusalem galserem, aam temawer angtane kota Yerusalem je aa jei ge nwinbenerem, jei Hukumu jeiserem jes ne onsobili. ²⁶ Jengga Sara jei ga enggala kota Yerusalem ibirmi taman waaken-girip aaiserem jes galserem. Ane kotana jeiserem jei ga kotana nemna, aam temawer nei Kristus nemsa tebana, ane Hukumu safnant nejama onsobiyen. Ane Sara, winsusu Abrahammana, jei iye nemna galserem. ²⁷ Taterisi Uwa Sanbagirmanaiserem jep ga enggam baatultel: "Aamei wini taneyenaiserem, ini imna ise saaser-saaserfer se falbili! Aamei witifini siginsusu ijam ensoyan tane geralawer, ini imna ise saaser-saasersusfer se falbili, aam temawer aamei tane unggwanfer is damtabisi galabe. Wini anggwafar aa jei gangge nwinirim, jei tane bastowaifer gam damtabili." (Yesaya 54:1) Sara ga jes gemerserem jei ga gam, Sara mesam bakswena, ane tane jemna fas. Jepga jei Isak gerel, ane asal-asala Saramanaiserem unggwanfer. ²⁸ Am afelen mesna, aamei Kristus iJeya tebanaram, aamei ga Isak galserem, tane Abraham o Sara jemna. Isak aa jei surulum, jei ga aam temawer surul Uwa Sanbagiri Jei Abraham aa jewer balam. Ane aamei bunarsusfer asal-asala Abrahammanam, aam temawer aamei Uwa Sanbagiri aa jes bilim jeiserem imsa taabili. ²⁹ Abrahammana tane Ismael aa jei surulum, jei ga enggalem temawer surul ini Abrahammana unggwan-girsusu aa jewer folbalam tanes damtafe. Jengga Isak tane Saramana aa jei surulum, jei ga enggalem temawer surul Mafnana Uwa Sanbagirmana Abraham aa jewer balam. Gwanan jes galapserem Ismael jei Isak tamtamtal. Jeiserem namwer ga gemer fala. Angtane Hukumu aa jei ne onsobilirim enggalfe Uwa Sanbagirfer gam ge waakenswebif, angtane jeiserem jei angtane Uwa Sanbagiri ga jes sene tamtamtababili, angtane aa jei ge etamwebilirim Uwa Sanbagirem angtanefe Mafnana Uwa Sanbagirmanaiserem jeme. ³⁰ Jengga Taterisi Uwa Sanbagirmanaiserem, Sara jebe Abraham ga enggam bala Hagarem temawer: "Wini awelna nemna nes jei gweyipminirim, wini jeiserem jase surbi, tane jemnaiserem jebaner, aam temawer tane jemnaiserem jei Uwa Sanbagiri ibe is jes bilibenerem, jei fas jeiserem jam taabiyen. Jengga Isak tane amnaiserem, jei Uwa Sanbagiri ibe is jes bilibenerem, jeiserem jei se taabili." (Kejadian 21:9-10) Taterisi jeiserem igi jemna ga enggam: Angtane Hukumu Nabi Musa aa jes tulistababilim, angtane Hukumu jeiserem aa jei ne onsobilirim, angtane jeiserem jei Uwa Sanbagiri aa jes bilim, jei jeiserem fas jam ne taabiyen. Jengga angtane Uwa Sanbagiri aa jes bilim jeiserem aa jei ne taabilirim, gam jega jei ga sene taabili Uwa Sanbagiri aa jes bilim. ³¹ Am afelen mesna, ga jem temawer nei gam ke Hagarmanaiserem jem asal-asala, Hagar jei awelna angtane nafsiserem jemnip aa jei gwebilim. Jengga Saramanaiserem nei ga jem asal-asala. Sara jeba Abrahamem winsusum.

¹ Kristus Jei bunar-bunarsus nei nes mesam aftabunnu enggalfe nei nejama gweyan Hukums onsobife. Ga jem temawer aamei kanaufer isa gwena! Angtane nafsi aamei is jam ne afaf-afaftababiyen. Angtane jeiserem aamei is jam sene towas-towastababilirim Hukumu jam onsobife, aamei angtane jeiserem ijama onsobaabiyen. ² Ai Paulus ai isa ajes bilipminirim ibe, aamei aaiserem ga jam isa sarbili! Taterisi aaiserem ga igsusu! Afa aamei taterisi afaf-afafa jeiserem jam isa sarbilirim, ane aamei isene sunattababili enggalfe Uwa Sanbagirfer gam waakenswefe, afa ga gam jes gamserem, gam jega Kristus aa jes eyebilirim, aamei jeme is jam batobaabiyen. Fas! ³ Ai gamjon aamei isa ititmer balbabili: afa aamei is jam sene sunattababilirim enggalfe Uwa Sanbagirfer gam waakenswef, afa ga gam jes gemerserem, aamei Hukumu seyafter gemerserem ga jamer isa onsobili. ⁴ Aamei Hukumu ijeya onsobilirim enggalfe Uwa Sanbagirfer gam waakenswef, gam jega aamei gam ijewera eyebilirim, Kristus ga ijama mirtetefala. Aamei imsa irfwena Uwa Sanbagirminiwer, jega Jei waakena Jemnaiserem ibe is Jam golmiyen. ⁵ Ai Kristus ga aya tebana. Mafnana Uwa Sanbagirmana Jei ams batobaabili, ane jega jem temawer ai ga aya towaswena Uwa Sanbagiri Jei ams gwebabili Jebar gam waakenswef, ane ai ga ajesa fibili jam taabife, Jei ap as jes bilipminirim jam golmife angtane Jelemanfe. ⁶ Nei Kristus nejeya tebanaram, nei ga Kristusfar daamfennaber nesa gwena. Jega jem temawer afa nei nes jam sene sunattababilirim, afa fas nes jam ne sunattababiyene, jeiserem igyen. Jengga igsususerem ga aas: nei ga Kristus nesa tebana. Ane nei Kristus nejewera tebanaram, jem temawer ga nei angtane nafsi ga jam nesa nesiktababili. ⁷ Aamei gwanan Taterisi Uwa Sanbagirmana waakenfer imsa saribene Kristusem temawer, ane aamei taterisi jeiserem ga imsa taabili. Jengga angtane aasaje aamei is jei afaf-afaftababili, ane aamei taterisi bunarsusfer jeiserem gamjon ijama onsobiyen. ⁸ Uwa Sanbagiri aamei is Jei jenbebilirim, Jei bunarsusfer angtane aamei is jei afaf-afaftababilirim, Jei fas angtane jeiserem ibe is Jam baftamiyen. ⁹ Aamei enggam ima towaswena, ini jam gam kasafwebanaram, matau nini seyafter gemerserem syelfenna. Jes galserem aamei ga gam, afa aamei taterisi afaf-afafaiserem daamfenna tefner jam igama taabilirim, gam jega aamei taterisi afaf-afafaiserem seyafter gemerserem ga gemer igama tebabili. ¹⁰ Jengga nei daamfennaber neya gwena Tuhanfar, ane jega jem temawer ai tousa aamei taterisi afaf-afafa jeiserem isa mirultefala, ane aamei ga isa onsobili ai isa ajes towas-towasulminirim ibe. Ane ai tousa enggame, Uwa Sanbagiri Jei angtane afaf-afafa jeiserem se tamtamtana, jei safe sanbaka. ¹¹ Am afelen mesna, angtane afwenefener jei enggam ge gubili ai enggam ai towas-towastababili, "Aamei ga is jamer sene sunattababili enggalfe aamei Uwa Sanbagirfer gam isa waakenswena." Jengga bunar-bunarsus ai jes gamserem game fas ajam towas-towastababiyen. Taterisi jeiserem jei afaf-afaf tateris. Jengga ai bunarsusfer ga enggam ai towas-towastababili, "Sa taabi bunarsusfer taterisi Yesus aa jem temawer tererem ti salibibe etam-etama imnaiserem jem temawer, ane Uwa Sanbagiri Jei aamei ga is waakentababisini." Ane ai jes gamserem gam ajewer nasbilirim, angtane jeiserem ga jem temawer abe kapkaiserem asene eyeibene. ¹² Angtane aamei is jei towas-towastababilirim taterisi kapkaiserem jeme, jamere aamei ini imna isege kabwakswebamini, ane aamei ijama towasweyan bunarsusfer ga fwersa aamei ijesa onsobiliserem, ai bai angtane jeiserem aamei seyafter ijebara nwinfe! Ai enggam ai gunu, jei aamei is jam ge mirtebitefal. ¹³ Am afelen mesna, Uwa Sanbagiri Jei ims jenbebili aamei Jem angtanef igama gwef, jega aamei gamjon Hukumu ijama onsobiyen. Jengga aamei enggam ijama guyon, "Nei Hukumem gwonap nejama gweyan. Ga jem temawer nei samfer nesa eyebili etam-etama ini nemna unggwan-giri aa gemer gam gunurum jam eyebife." Fas, jes gamserem gamyan. Jengga bunarsusfer ga enggam, aamei in ina ga jam isa nesiksonanna, ane jega jem temawer aamei ina ga jam isa batominenne. ¹⁴ Uwa Sanbagiri Jei nebe nes enggam bilipmini, "Aamei angtane nafsiserem ga jam isa nesiktababili, in ina gemer igama nesiktenerem." Wa aamei taterisi daamfenna jeiserem jam isa tikwebitinirim, afa ga gameye, gam jega aamei hukumu seyafter Nabi Musa aa jes tulistababilim seyafter imsa onsobili. ¹⁵ Ga jem temawer, aamei waakenfer isa gwena seyafter. Aamei ina ijama nasmiyen. Afa aamei jam isa doksowenaram, ane aamei ina jam isa nasmi-nasmiwenaram, gam jega aamei galap ga isa syensyanwena nenes-nenesmer. Ane aamei jepga daamfennaber ijama gweyan, jengga jam isa irwalwena. ¹⁶ Taterisi amnaiserem igi jemna ga enggam: Aamei jeber-jeber ga enggam isa gwena, Mafnana Uwa Sanbagirmana aa jes bilirim ga jeter isa eyebili. Afa aamei gam isa gwenaram jes gamserem, gam jega ini imna unggwan-giri is jei ge folbaminirim kapkaiserem jam eyebife, seyafter jeiserem ijama eyebiyen. ¹⁷ Ai jes gamserem game ajewer gunurum, ga aam temawer ini nemna nese naurem ge dektebaipminenne. Ini nemna unggwan-giri kapkaiserem jam eyebife, ane ini nemna jei bai Mafnana Uwa Sanbagirmana aa jes gam bilirim jam eyebife. Ane Mafnana Uwa Sanbagirmana Jei bai ini nemna aa jes gam bilirim kapkaiserem jes eyebife. Ini nemna ga jes gemerserem naurem ge dektebaipminenne. Jem ga nena ne masefa unggwasmini. Jega jem temawer ini nemna unggwan-giri nes galap ge folbaminirim kapkaiserem jam eyebife, gam jega Mafnana Uwa Sanbagirmana aa jes gam bilirim jam eyebife, nei nejama onsobiyen. ¹⁸ Jengga afa aamei jam isa eyebilirim Mafnana Uwa Sanbagirmana aa jes bilirim, afa jes gamserem, gam jega aamei Hukumu jeiserem jem gwonap ijama gweyan. ¹⁹ Nei seyafter tousa etam-etama kapkaiserem ini nemna unggwan-giri aa jes gam bilirim jam eyebife. Etam-etama jeiserem ga enggam: Maaryena igam gwebili. Anggwa jei wini nafisemanaiserem jebar gangge dorwena makanabe. ²⁰ - ²¹ Bwata nensarmana ane bwata nafsiserem jes igama sarwebabili ims batobaabife. Angtane nafsi igama etam-etamtana faatreweme. Angtane jam igam nasbanaram, ga aarememfener igangge doksona. Afa aamei sarabosom witifinip jam igam gatasinirim enggalfe kapkaiserem ijewer fwainulbof. In inater jewer igam waakentaasinirim. Sarabosom jewer igam uskamswebanaram ilem inibe, ane angtanes igam imei-imeitana. Angtanefar jewer igangge ernaram, afa angtane jewer igam munbonorom. Angtane tamna daamfennaber aa jei gangge nwinbenerem, afa jei jam gangge doksobanaram, jei ga gangge wagnetini. Afa masaras igama eyebili enggalfe ijewera mabukswef, ane etam-etama kapka jewer gam eyebaabif. Ane etam-etama nafis-nafsiserem seyafter gemerserem jes mese. Ai aamei isa ititmer balbabili, ai gwanan aamei isa gemer balbabilirim, angtane gam aa jei naawenaram etam-etama jeiserem aa jei ne eyebilirim, angtane jeiserem jei angtane Uwa Sanbagirmanfe jam ge etamwebiyen. Ane Uwa Sanbagiri Jei Jam gweyan angtane jeiserem jem Sanbakfe. ²² - ²³ Jengga afa Mafnana Uwa Sanbagirmana Jei nem inip Jam se nunitonom, Jei nei ga nes batobaabili, ane nei waakenfer ga nesa gwena aas gemerserem: Nei angtane nafsi ga gemer nesa nesiktababili. Ini nemna bunarsusfer nesege saaser-saaserswebamini. Nei angtanefar ga jam nesa waakenswena, ane jebar ga nesa gwena waakenfer. Afa angtane kabwakfer nes jam sene eyeipminirim nebe, nei jafner nesa fina abakfer. Nei nena ga jam nesa batominenne. Nei angtane nafsiserem jep ga waakenater ma eyeipmini. Nei jeber-jeber ga waakenater nesa eyebili, nei nejesa bilirim jam eyebife. Ini nemna ga jam negama onabertababili. Nei nejama eyebiyen ini nemna unggwan-giri nes jep ge folbaminirim jam eyebife. Hukumu fas enggam jam guyon, seyafter waakena jeiserem aamei ijama eyebiyen. ²⁴ Angtane Kristusfar daamfennaber aa jei naawenaram, jei mes ge tikwebili kapkaiserem jam eyebife, ini jelemana aa jes gam bilirim jam eyebife. Jei kapkaiserem baif gam gwebili. ²⁵ Mafnana Uwa Sanbagirmana Jei gwela ibirmi nebe nes mes golmini. Ga jem temawer au, nei ganma eyebi, Jei aa jes bilirim. ²⁶ Ane nei nena nejama tetenanayan. Afa nei nena jam nesa tetenannaram, angtane nafsi jei nei nesene nasbabili jem temawer, ane jei nei nesene uskamswebabili.

¹ Am afelen mesna aamei Kristus ijeya tebanaram, afa angtane daamfenna imniwer etam-etama kapka jam gam eyebilirim, aamei ijeya gwenaram Mafnana Uwa Sanbagirmana aa gemer gunurum jeme, aamei ga angtane jeiserem jebar isa nasowena, ini foler-folermer. Ane aamei angtane jeiserem ga jam isa batobana, jega jei etam-etamawer gase tikwena. Jengga aamei jei jam isa batobanaram, aamei ina ijama tetenanayan. Afa aamei ina jam isa tetenannaram, bawasa aamei jam is unggwasbaabilirim, aamei bawasa ga isa sarbana, ane etam-etama ga isa eyebili. ² Aamei kabwaktala jam isa domolaram, ina ga jam isa batominenne. Aamei ina jam ijeba batominennerem, gam jega Kristus aa jes bilirim aamei ga jes isa eyebili. Kristus aa jes bilirim ga aas: in ina jam isa nesiksonanna. ³ Afa angtane daamfenna imniwer enggam jam se gunurum, "Ai angtane sanbaka. Ai kapkaiserem ajam eyebiyen.", afa jei gam se gunurum, jei ga jen jenater gam afaftana, aam temawer jei bunarsusfer angtane bastouya. ⁴ Angtane daamfen-daamfenneme jei jen jena ga tenebana jei gwanan aa jes gam eyebilirim jem temawer, afa jeiserem waakena, afa kapka. Afa jei jam gam towaswenaram enggame, "Ai waakenaiserem ajes eyebilint.", jei samfer ini jemna saaser-saasermer ga gam folbana. Jengga jei enggam jam guyon, "Ai waakena gam eyebili angtane nafsiserem jemniwer." ⁵ Jei jes gamserem game jam guyon, aam temawer angtane daamfen-daamfennem awelna jelemana jenfentowai ga waakenfer gam gwebili, awelna Uwa Sanbagiri aa jes gam golminirim jebe. ⁶ Angtane aamei jam is gane towas-towastababilirim Taterisi Uwa Sanbagirmanaiserem jeme, aamei ga angtane jeiserem jebar jam is ge syentabaabili aamei ijes damtabilirim. ⁷ Aamei ina ijama afaf-afafsoyan enggame ijesa bilirim, "Afa etam-etama kapkaiserem ai jam as eyebilirim, Uwa Sanbagiri Jei Jam towasweyan ai etam-etama jeiserem ai ajes eyebilirim." Aamei Uwa Sanbagiri ijama afaftayan. Angtane aa jei gam tonolaram, jei ga jes gam damtabili. ⁸ Afa aamei kapkaiserem jam igama eyebilirim ini ilemana unggwan-giri is jei gangge folbaminirim jam eyebife, aamei fwaina kapka ga isa taabili Uwa Sanbagirminiwer. Jengga afa aamei jes isa eyebilirim Mafnana Uwa Sanbagirmana aa jes bilirim, Mafnana Uwa Sanbagirmana Jei waakenfer gwelaiserem jamer abak-abaksus is golmini ibe. ⁹ Jewer ga, nei nejama kwaalaamitsweyan waakenaiserem jam eyebife. Afa nei nejama kwaalaamitsweyanaye, ane waakenater ga negama eyebili, jepga nunu Uwa Sanbagiri aa jes bilirim, nei fwaina waakena ga jem nesa taabili Uwa Sanbagirminiwer. ¹⁰ Ga jem temawer nei dwona jeber-jeber jam negama domolaram, angtane seyafter gemerserem ga jam negama batobaabili, nabal-nabalsus ga angtane Yesus Kristus aa jei ne tebanaram ga jes ma batobaabili. ¹¹ Ai taterisi seyafter surta aaiserem jebe ai ajafner nasowena, ane angtane nafsiserem ga jei tulistababili. Jengga ula umwef aaiserem ai aner tulisulu hurufu unggwan-gwanaiserem jeme. Ula aaiserem ga waakenfer isa sarbisini. ¹² Angtane aamei is jei ne towas-towastababilirim jam sunattababife, jei gam is jewer ne towas-towastababilirim enggalfe, angtane Yahudimana gam ne balbabif, "Angtane enggam aa jei towas-towastababilirim angtane jam sunattababife, jeba unggwan-gwanam." Jei jam ge erebili angtane Yahudimana jei kabwaktala jebe sene eyeipmini. Jei enggam ge gubili jelem inibe, "Wa afa ai ajama towas-towastababiyeneye angtane jam sunattababif, ane afa ai ga taterisi tere Yesusmanaiserem ti salibibe jem temawenefener as nasipminirim, afa gameye, gam jega angtane Yahudimana jei kabwaktala abe asene eyeipmini." Jega jem temawer jei Taterisi Waakena tere Yesusmanaiserem enggalfe etam-etama angtanemana gam wirtabaipmif, jem temawenefener jam ne towas-towasulmiyen angtanefe. Jengga jei jeber-jeber ne towas-towasulmini Hukum jam onsobiliserem jem temawer, jega kabwaktalaiserem angtane Yahudiminiwer jam domolyan. ¹³ Guru jeiserem enggam aa jes ne towas-towastababilirim jam sunattababilem temawer, jei Hukumu Nabi Musa aa jes tulistababilim, hukumu afwer seyafter jeiserem jam ne onsobiyen. Jengga jei enggam ge gubili aamei jamer isa sunattwena enggalfe, jei ga im temawer enggam ga sege gubili, "Jei ams ne tikwebaatini." Jei game ajewer ge gubilirim jei jen jena gam ne detenanaf. ¹⁴ Jengga ai galyan angtane jes galserem. Ai jeber-jeber as towas-towastababuwena tere Yesus Kristusmanaiserem jem temawer. Jeiba nem Tuhansam. Jei aa jewer ne salibtenerem enggalfe etam-etama nemna nes gam wirtabaipmisif. Ane ai ga bosna Jemanserem jes as gulbatena. Jei am temawer tere, ane jega jem temawer ai ames tikwena gwela kapkaiserem jewer, angtane ogirmana jei aa gam naawenaram. Ane angtane ogirip aa gemer naawenaram, jei ai ase baif ne gwebana aam temawer ai Kristus onsobana. ¹⁵ Uwa Sanbagirem inibe jeiserem jei igyen afa angtane jam sunattala, afa fas jam sunattweyana. Jengga igsususerem ga aas: nei gwela ibirmi Kristusfar nemsa domola. ¹⁶ Aamei angtane taterisi jeiserem ijeya taabilirim, ga Kristus tefner isa tikwebaatini, ai sembayanga Uwa Sanbagirfe as gwebabana, ini imna waakenfer is ga sege folbamini, ane Uwa Sanbagiri Jei nesikteleiserem is gas golmini. Ai sembayanga jes gamserem im temawer as gwebana, ane angtane Uwa Sanbagirmana seyafter gemerserem jep mese. ¹⁷ Ai bunarsusfer ba rasulu Uwa Sanbagirmanaiserem jesam. Aiba Taterisi Waakena Kristusem temawer ayam nasbinenne, jega jem temawer ginanggwana Kristusmanaiserem jei ai ga ase jem temawer ne safsaftana, ane bubwabwenta ga ase unggwanfer ge falibene am tifinibe. Ga jem temawer aamei ini amna as ijeya gwebabanaram jam jenbafe, ai aamei umwef ga isa enggam ai balbabili, "Aamei safnant ini amna gamjon ase ijama gwebabayan jam jenbafe. Aamei ga jam isa tikwena guru afaf-afafa jeiserem gamjon ijama onsobaabiyen, jengga Kristus tefner isa tikwebaatini!" ¹⁸ Am afelen mesna, ai sembayanga as gwebana Tuhan Yesus Kristus Jei waakena Jelemanaiserem ip ise golmini aamei seyafter gemerserem. Amin.