Efesus

Efesus

¹ Ga ip, aamei angtane Uwa Sanbagirmana, kota Efesus je ijeya nwinirim. Aamei ga seyafter Kristus Yesus imsa tebana, ane imna gwela Jebar ga daamfennaber. Surta aaiserem amniwer Paulus, kota Roma je. Uwa Sanbagiri Jei ams destabana enggalfe ai rasulfe gam gwef. Jei ams baftana enggalfe, ai Taterisi Waakena Kristus Yesusem temawer ai agam nasbinennef. ² Ai sembayanga as gwebabana Uwa Sanbagirfe, Uwa nemna, ane Tuhan Yesus Kristus mese, jega Jei nawersamer waakena Jelemanaiserem ip is ga sege golmini, ane ini imna is sege gwebaipmini waakenfer is ga sege folbamini. ³ Nei Uwa Sanbagiri ganma pujite, Jeiba Uwa Yesus Kristus, Tuhan nemna. Nei Jebar daamfennaber sa gwena, ane jega jem temawer Uwa Sanbagiri bunarfersus waakenaiserem ga nes mes eyeipmini. Jei baabeta nes mes golmini, ane jes mese seyafter waakena Jelemanaiserem taman waaken-giriwer. ⁴ Uwa Sanbagiri ogiri nalef Jam eyebayan, Jei nei nes mes destabaabil enggalfe nei nesa etamwesa angtane Jelemanfe, ane nei Kristusfar daamfennaber negama gwef. Ane Uwa Sanbagiri Jei nes mes destabaabil enggalfe nei negama gwef kapkaiserem nejama eyebiyen, jengga waakena tefner negama eyebili Jelem nwenabe. ⁵ Uwa Sanbagiri nes jewer nesiktababilirim, Jei gwanan-gwanansus ga enggam mwangbisil nem temawer, jega nei gasa etamwesa Jelem tanefe, Yesus Kristus aa jes eyebisirim jeme. Uwa Sanbagiri ba gamam gul. ⁶ Nei Uwa Sanbagiri ganma pujite, aam temawer Jei bunarsusfer waakena unggwandusaiserem Jemna nep nes mes golmini. Ini Uwa Sanbagirmana waakensusu nem temawer, jega jem temawer Jei Tane Jemna aa jes nesiktenerem mes baftannunt enggalfe nei nes gam batobaabif. ⁷ Yesus Jei mes terent nem temawer, aawisi Jemna ga tenbentenant. Ane nei Yesusfar daamfennaber nejewera gwenaram, Uwa Sanbagiri Jei etam-etama kapkaiserem nemna nes mes wirtabaipminint, ane Jei nes mes aftabunnunt etam-etamawer. Waakenaiserem Uwa Sanbagirmana nebe jeba unggwandwasusum! ⁸ Ane Jei waakena Jelemana jeiserem uskambarsus nes mes golminint. Uwa Sanbagirmana tousaiserem jeba unggwandwasusum, ane Jei jeber-jeber tousa apgal jigala seyafter gemerserem jam eyebife. ⁹ Uwa Sanbagiri Jei ogiri nalef Jam eyebayan, Jei mes mwangbisil enggalfe Jener gam eyebif. Jei aa jes mwangbisilim ga enggam bil, "Ai seyafter Ajes mwangbisinirim, As tabanulsisi Kristus aa jes eyebisirim jeme." Angtane gwanan aa jei naawelam, Uwa Sanbagiri aa jes mwangbisilim jeiserem jei jam ne towaswebiyen. Jengga namwer aas jepserem Uwa Sanbagiri Jei aa jes mwangbisilim nes mes towasulmini. ¹⁰ Uwa Sanbagiri aa jes mwangbisilim ga aas: Nunu Uwa Sanbagiri Jener aa jes bilirim, nunu jeiserem jam aa jep fortyaram, Uwa Sanbagiri gas tabantababisi seyafter Jei aa jes eyebaabiliserem, jega Yesus Jener gase nwinsi apgal jigala seyafter gemerserem jem Sanbakfe, taman waaken-girip ane ogiri aaiserem jep mese. ¹¹ Uwa Sanbagiri ga eyebili, jega seyafter jeiserem aa jei ge etamwebilirim, jei daamfennaber ga sege falbili Uwa Sanbagiri aa jes mwangbisilim. Uwa Sanbagiri ogiri nalef Jam eyebayan, Jei nei ga nes destabaabil enggalfe nei nesa etamwesa angtane Jelemanfe, ane nei Kristusfar daamfennaber negama gwef. Uwa Sanbagiri ba gamam gul. ¹² Aiba angtane Yahudimanam, angtane nabal-nabalsusu Kristusmana foryala aJeya fiyibennerem. Ane aga Uwa Sanbagiri ga asa pujitene, ga enggam asa gutena, "Seyafter Uwa Sanbagirem temawer jeba unggwandwasusum!" ¹³ Ane aamei angtane Yahudimanyanaiserem, aamei taterisi bunarsusfer aaiserem igalaba sarbilintim, aamei Taterisi Waakena Kristusem temawer imsa taabilint, ane Uwa Sanbagiri is mes waakentababisinint. Ane Jei mes eyebilint, jega aamei Kristusfar daamfennaber gam isa gwena. Ane Uwa Sanbagiri Mafnana Jelemana aa jes bilim is mes golminint. Ane Jei Mafnana Jelemana ip is jewer golminintim, jega jem temawer aamei ga ima towaswena aamei ga Uwa Sanbagirem angtanesam. ¹⁴ Mafnana Uwa Sanbagirmana nem inip nuniton, ga jem temawer nei bunarsusfer ga neya towaswena neiba Uwa Sanbagirem angtanesam. Ane nei bunarsusfer ga neya towaswena, Uwa Sanbagiri Jei ga nes erbifelse Jeleminibe, ane Jei ga nese golmisi seyafter Jei aa jes bilim nes jam golmife. Nei Uwa Sanbagiri ganma pujite, ga enggam nesa gutena, "Seyafter Uwa Sanbagirem temawer jeba unggwandwasusum!" ¹⁵ - ¹⁶ Ga jem temawer, ai jeber-jeber sembayanga as gwebabawena im temawer. Ai gwanan agalap sarantam aamei Tuhan Yesus imsa tebana ginggitfer, ane aamei angtane Uwa Sanbagirmana seyafter gemerserem imsa nesiktababili, jeber-jeber ai sembayanga as gwebawena, ai Uwa Sanbagiri enggam ai bala, "Ase samfer gulbana, angtane Kristen aa jei ge nwinbenerem kota Efesus je jem temawer." ¹⁷ Uwa Sanbagiri, Uwa nemna, Jeiba baabetabaram ane nafabaram, ane Jeiba Uwa Tuhan Yesus Kristusmanam. Ai Uwa Sanbagirfe sembayanga as gwebabana, jega Mafnana Jelemanaiserem tousaiserem ga is golmini ibe, ane Mafnana Uwa Sanbagirmana Jeiserem, seyafter bunarsusfer gemerserem ga is towas-towastababili. Ai sembayanga as gwebana seyafter jeiserem jem temawer enggalfe, aamei ga Uwa Sanbagiri bunarsusfer gam isa damdamtaasini. ¹⁸ Ai sembayanga as gwebana Uwa Sanbagiri Jei ini imna is gase fertebaipmisini, ane jega jem temawer aamei ga isa towaswena seyafter Uwa Sanbagiri aa jes bilirim Jebaner ga isa damtabisi. Ane aamei ga isa towaswena seyafter Uwa Sanbagiri aa jes bilirim Jam golmife Jelem angtanefe, jeba bunarsusfer waakenam. ¹⁹ Ane aamei ga isa towaswena baabeta Uwa Sanbagirmana jeba unggwandwasusum, ane baabeta jeiserem jeme Uwa Sanbagiri nei ga nes jem batobaabili, nei Jei nejeya tebanaram. Baabeta jes galaterserem jeme, ²⁰ Uwa Sanbagiri Jei Kristus ga Jem irtesent terewer, ane ga aa gaartesant jamer taman waaken-giribo. Jep ga Kristus Jei Sanbakfe ga aa nwini Uwa Sanbagirem taasfolawer. ²¹ Namwer aas jepserem ane jamer abak-abaksus, baabeta Kristus aa jes domolaram Jei Sanbakfe Jam nwinfe, baabeta jeiserem jeba tagarsusum baabeta nenes-nensa seyafter gemerserem jemniwer--baabeta malaikatmana, baabeta bwata bawasmana, ane baabeta angtane sanbakmana. ²² Uwa Sanbagiri ga eyebili jega seyafter gemerserem jeba baabeta Kristusmanaiserem jem gwonawer. Uwa Sanbagiri Jei Kristus destabana, jega angtane seyafter gemerserem Jei aa jei ne tebanaram, Jei jem Sanbakfe gase nwini. ²³ Nei Kristus nemsa tebana, ane Jeiba Sanbaka nemnam. Nei nejeya tebanaram, neiba tifni Jemna galserem, ane Jei ga nem nenennap gase nwini, ane Jei Sanbakfe gase nwini seyafter gemerserem jem sagabe, ogiri aaiserem jebe ane taman waaken-girip mese.

¹ Aamei nalef Kristus ijama tebayan, aamei Uwa Sanbagiri ijama sarbayan, ane etam-etama kapka anesus imsa eyebilint. Jega jem temawer aamei gwela Uwa Sanbagirmana ijama domolbayan, mafnana ilemanaiserem jei jam gweyan, mafnan jeba futunum. ² Jes galapserem gwela imna ga gemer kapkaiserem jetefener igama eyebili, angtane Uwa Sanbagiri jam damdamtaasiyene galserem. Aamei bawas ima onsobana, jei bwata kapkaiserem aa jei ge wofebilirim nem nenennabe, jei ga jem sanbaka. Namwer aas jepserem bawas jei ini angtanemana syefer gemer dektebaipmini, angtane Uwa Sanbagiri jam ne sarbayanaiserem. ³ Bunarsus nalef nei seyafter Kristus nejama tebayan, nei nemsa gwenant angtane kapka jeiserem jes galserem. Gwanan jes galapserem nei gwela angtanemanfenna tefner neya domolant, jega jem temawer nei gwela Uwa Sanbagirmana nejama domolbayan, ini nemna unggwan-giri enggalfe kapkaiserem gam eyebif. Ane nei kapka jeiserem nemsa eyebilint, ane gwela nemna gwela kapkaiserem jem. Ga jem temawer, angtane nensa seyafter gemerserem jebaner, Uwa Sanbagiri ga nes tamtamtababisi. Jei angtane etam-etamabaraiserem seyafter gase tamtamtababisi, nele nensa fas. ⁴ Jengga ini Uwa Sanbagirmana jeba waaken-waakensusum, ane Jei nei nes uskambarsus nesiktababili. ⁵ Jega jem temawer, safe mafnan nemna jam gweyan jeba futunum, ane nei Uwa Sanbagiri nejama sarbayan, Uwa Sanbagiri Jei gwela nes golmini Kristusfar. Ane Uwa Sanbagiri nese eyeipmini, jega nei Kristusfar daamfennaber ga nesa gwena. Ijama dirinswebiyen, ini Uwa Sanbagirmana jeba waaken-waakensusum, ane jega jem temawer Jei aamei ga is waakentababisini. ⁶ Nei daamfennaber Kristus Yesusfar nei nejewera gwenaram, Uwa Sanbagiri Kristus Jam aa galap irtestenantam terewer, Jei seyafter nei nes mes irtebaabili Kristusfaner. Ane Uwa Sanbagiri Kristus aa galap gaartetyaram taman waaken-giribe enggalfe Jei Sanbakfe gam nwinf, Jei nei seyafter ga nese kitultetya Kristusfaner. ⁷ Uwa Sanbagiri jes gamserem gam aa jewer eyebilirim, jega enggalf nunu aas jepserem ane nunu gamjon seyafter jepserem aa jep falaram, angtane jepga sege towaswebili enggame Uwa Sanbagiri Jei nes uskambar nesiktababili. Kristus Yesus aa jes eyebilirim jeme, Uwa Sanbagiri Jei nebe nes enggam gweraulmini, Jei bunar-bunarsus nems nesiktababili. ⁸ Ini Uwa Sanbagirmana jeba waaken-waakensusum, ane jega jem temawer Jei aamei ga is waakentababisini. Jei ga jes eyebili, aamei Kristus igalaba tebanaram. Fas aamei in ina ijama waakensosiyen, jengga aamei Uwa Sanbagiri is mes waakentababisini. ⁹ Uwa Sanbagiri Jei aamei is Jam waakentababisiyen aam temawer aamei waakena ijesa eyebilirim, ane jem fwaina ip is gam golmife. Fas. Ga jem temawer aamei enggam ijama guyon, "Ai waakena tefner as eyebili, ane jega jem temawer Uwa Sanbagiri ga ai as mes waakentaasini." ¹⁰ Uwa Sanbagiri Jei nes Jener eyeipmini nebe, jega gwela nemnaiserem gwela nensa gwananmanaiserem, gwela jeiserem Kristus Yesusfar daamfennaber nes gam falmif. Uwa Sanbagiri jeiserem aa gemer eyebilirim, jega enggalf nei ga nesa gwena waakenater gam sa eyebili, jes gemerserem Uwa Sanbagiri ga gala gam mwangbisil. ¹¹ Aamei angtane Yahudimanyanaiserem, aamei ijama dirinswebiyen gwela ilemanaiserem aamei nalef Kristus ijama tebayan. Aamei ijama suruyon Yahudim teufe. Angtane Yahudimana jei im temawer aamei is enggam ne balbabili, "Aameiba angtane jam sunattababiyeneiserem. Aamei Uwa Sanbagirem angtaneyan." Ane angtane Yahudimana jei enggam ge gubili jelem temawer, "Ai ajama sunattwena. Aiba Uwa Sanbagirem angtanesam." (Angtane jam sunattalaiserem, jengga jei jetefener aa jewer ne eyebilirim, jei angtane Uwa Sanbagirmanfe jam ge etamwebiyen.) ¹² Sa sarbabistaabon, aamei nalef Kristus ijama tebayan, aamei jes galapserem Kristus ga ijama bijautana. Angtane Yahudimana jeiba safna daamfennam, jengga aamei ijama suruyon safna jeiserem jebe. Uwa Sanbagiri ga fwater bilipmil angtane Yahudimanfe enggame, "Bunarsus Ai aamei isAs batobaabili." Jengga aamei jebe fas safna jeiserem, ane aamei ijama domolyan Uwa Sanbagiri aa jes bilipmilim jebe. Aamei imsa gwena ogiri aaiserem jebe, Uwa Sanbagiri ijama towaswebayan. Ane aamei ijama fibiyen enggalfe waakenaiserem ip gas etamwemini ibe. ¹³ Aamei Uwa Sanbagiri ijama bijautana. Jengga Kristus mes terent im temawer, aawisi Jemna ga tenbentenant. Ane namwer aas jepserem, aamei ga Kristus Yesusfar daamfennaber isa gwena, ane Uwa Sanbagiri aamei ga is aftabifele Jelem gwetmanabe. ¹⁴ Kristus Jener Jese eyebili, jega ini nemna waakenfer nes ga sege folbamini. Gwanan jepserem ai angtane Yahudimana ane aamei angtane Yahudimanyanaiserem, nei nena nejama uskamsweminennent. Jengga Kristus mes terent nem temawer, ane Jei garisi nem nenennap jeiserem mes wirtasinint. Ane namwer aas jepserem nei seyafter Kristus nejeya tebanaram, angtane Yahudimana ane angtane Yahudimanyanaiserem jes mese, nei seyafter nemsa etamwenant safna daamfenefe. ¹⁵ Kristus aa galap terentem, Jei hukumu Yahudimana mes borolsinint, ane seyafter aa jes ne tulistababilim enggalfe angtane seyafter gam ne onsobif, jes mese mes borolsinint. Nei hukumu seyafter jeiserem nei gamjon nejama onsobiyen. Kristus jeiserem aa gemer eyebilirim enggalfe, safna naura jeiserem mes ge etamwenant daamfennaber gwefe, ane jei safna ibirmi Kristusfar daamfennaber ga naawena. Ane jem temawer ga ini nemna nese waakenfer sege folbamini. ¹⁶ Kristus aa galap terentem ti salibibe, safna ibirmi daamfenna jeiserem jei Uwa Sanbagirfar ga aa ge waakenswebili. Ane namwer aas jepserem nei gamjon nena nejama uskamswemiyen. ¹⁷ Kristus ga fortyant, ane ga nasipminint angtane seyafter gemerserem jebe, aamei angtane Yahudimanyanaiserem aamei gwanan Uwa Sanbagiri ijama bijautanant, ane ai angtane Yahudimanaiserem Uwa Sanbagiri gwanan aa jei ne gwetmantaasinintim. Kristus ga enggam nasipminint, "Au, aamei Uwa Sanbagirfar gasa waakenswe!" ¹⁸ Kristus Jei mes tere nem temawer, jega jem temawer Mafnana Uwa Sanbagirmana nei seyafter nes batobaabili, jega nei Uwa Sanbagirter ga nesa gwetmantaasini. ¹⁹ Ga jem temawer, namwer aas jepserem aamei gam ke Uwa Sanbagiri jam damtayanaiserem, jengga aamei ane angtane nensa seyafter gemerserem Kristus aa jei ne tebanaram, aamei jebaner safna daamfennam. Neiba seyafter angtane Uwa Sanbagirmanam. ²⁰ Nei ga jena galserem, jena Uwa Sanbagiri aa jes eyebilirim. Rasulu yo nabi Uwa Sanbagirmana jei ga dutumiriti galserem. Ane Kristus Yesus Jena ga jagomelna terterewer galserem. ²¹ Tini janemana seyafter gemerserem jena aa jem gane eyebilirim, jagomelna terterewer aaiserem ga jep gane tafrebaabisnenne, nei Kristusfar daamfennaber ga nesa gwena. Uwa Sanbagiri jena jeiserem Jelefe gase eyebili, jamer se tabanulu. ²² Aameiba daamfennaber isa gwena Kristusfar, ane jega jem temawer Uwa Sanbagiri Jei aamei ga is bunbunulsini angtane nafsi seyafter gemerserem Kristus aa jei ne tebanaram jebar, enggalfe jena Jelef gam eyebif, jena jeiserem Mafnan Jelemanaiserem jep gam nwinf.

¹ Jega jem temawer, ai Paulus sembayanga Uwa Sanbagirfe as gwebabana im temawer. Ai Taterisi Waakena Kristus Yesusem temawer ai isai nasipminenne ibe angtane Yahudimanyanaiserem. Ane ai ga ase jem temawer ne gaataantena bwiyibe. ² Bunarsus aamei imsa sarbili, Uwa Sanbagiri Jei ams destabana enggalfe, ai isa gam nasipmif ibe Uwa Sanbagiri Jei ims nesiktababili. ³ - ⁴ Uwa Sanbagiri ga enggam mwangbisil Jei Jam eyebif Jei aa jes bilirim Kristus galap jes eyebiliserem jeme. Uwa Sanbagiri aa jes mwangbisilim angtane jam ne towaswebiyen jamer abaka. Jengga Uwa Sanbagiri Jei ams towastana Jei aa jes mwangbisilim, ane ai waakenfer ames sarbili. Ai bastowaifer is amsam towastababili jem temawer surta aaiserem jebe. Aamei waakenfer igalaba sarbilirim ilem inibe ai ajes tulistaabilirim, ga isa towaswena ai isa ajes towas-towastabaipminirim Uwa Sanbagiri aa jes mwangbisilim jem temawer. ⁵ Fwater galapserem Uwa Sanbagiri aa jes mwangbisilim, Jei angtanefe Jam towasulmiyen. Jengga namwer aas jepserem Mafnana Uwa Sanbagirmana, Jei mes towastababili Uwa Sanbagiri aa jes mwangbisilim, rasulu ane nabi Jelemanaiserem aa jes destabaabilirim jebe. ⁶ Uwa Sanbagiri aa jes mwangbisilim ga aas: Angtane Yahudimanyan Taterisi Waakena Kristus Yesusem temawer aa galap ne taayibenerem, jei ga aa ge etamwebili Kristusfar daamfennaber ge nwinbefe. Ane angtane Yahudimanyanaiserem jeiserem ga daamfennaber ge etamwebili, angtane Yahudimana Kristus aa jei ne tebanaram jebaner. Angtane Yahudimanyanaiserem ane angtane Yahudimana ga aa ge etamwebili safna daamfennaber. Jeiba seyafter Uwa Sanbagirem angtanesam. Ane jei seyafter ga sene domolsa gwela Uwa Sanbagiri aa jes bilim Jei gase golmisi angtane Jelemanaiserem jebe. ⁷ Uwa Sanbagiri waakena ap as mes eyeibene, ane Jei ai ga as destabana enggalfe Taterisi Waakena gam nasbinennefe. Jei baabeta as mes gulbana, jega ai awelna jeiserem baabetmer gam as gwebili. ⁸ Ai safe angtane bastouya angtane Uwa Sanbagirmana seyafter gemerserem jemniwer, Uwa Sanbagiri Jei awelna waakenaiserem ap gulbana enggalfe, ai angtane Yahudimanyanaiserem ai jei agam towas-towastababinenefe Kristusem temawer. Ane aga jei ga as towas-towastababili Kristus Jeiba waaken-waakensusum, ane Jei waakensususerem ga nese golmini nebe. Seyafter waakensusu jeiserem jam barweyan. ⁹ Uwa Sanbagiri Jei seyafter eyebil, ane Jei aa jes mwangbisilim Jam eyebife Jei angtanefe Jam towasulmiyen jamer abaka. Ane Jei awelna waakenaiserem ap gulbana enggalfe, ai angtane seyafter gemerserem agam towas-towastababif jamer jei waakenfer sene sarbili Uwa Sanbagiri aa jes mwangbisilim. ¹⁰ Uwa Sanbagiri seyafter aa jes mwangbisilim, Jei ga enggalf mwangbisil, namwer aas jepserem mafnana baabetabara seyafter gemerserem winsibe, jei ga sene damtabisi, ane ga sege towaswebisi enggame, safna Kristusmana ibirmi jeiserem jei Kristusfar daamfennaberam naawena. Ane mafnana jeiserem jei ga sege towaswebisi, Uwa Sanbagirmana tousaiserem jeba unggwandwasusum seyafter gemerserem jem temawer. ¹¹ Gwanan-gwanansus jes jepserem Uwa Sanbagiri ga mwangbisil Jei Jam eyebif abakfer aa jei falaiserem. Ane Kristus Yesus, Tuhan nemna, ga jes eyebilint. ¹² Nei Kristus nesa tebana, ane nei Jebar daamfennaber. Jega jem temawer nei nejama ereyen Uwa Sanbagiri jam gwetmantaasife, ane nei gasa towaswena Jei nei nese tebabili. ¹³ Ga jem temawer ai isa enggam ai balbabili uskambarsus, ini imna is jam ge jenbamiyen aam temawer ai bwiyip ajewer nwinirim. Ai bwiyip nwini, ga aam temawer ai Taterisi Waakena isa ajewer nasipminennerem ibe. Tamtamtala amna seyafter gemerserem ga enggalf, aamei is jei batobaabif. ¹⁴ Uwa Sanbagiri aa jes mwangbisilim, jeiserem jem temawer ai agemer sarbisnenne, ai ga somwan dumem ga ai nwini Uwa Sanbagirfe sembayanga ga ai gwebabana im temawer. ¹⁵ Uwa Sanbagiri Jeiba Uwasam angtane Jelemana seyafter gemerserem, taman waaken-girip ane ogiri aaiserem jep mese. ¹⁶ Uwa Sanbagirmana waakenaiserem ane Jemna baabeta jeba unggwandwasusum! Jega jem temawer ai sembayanga ai gwebana enggalfe, Mafnana Uwa Sanbagirmana Jei baabeta ip is gase golmini, jega ini imna kanaufer ga is sege folbamini. ¹⁷ Ai sembayanga as gwebana, jega aamei Kristus ginggitfer gam isa tebana, ane jem temawer ga Jei jeber-jeber im inip gase nuniton. Ai Uwa Sanbagiri enggam ai bala aamei Kristus enggam isa nesiktene, Jei is gemer nesiktababilirim. ¹⁸ - ¹⁹ Neiba nemsama towaswena nei nesiktele Kristusmanaiserem jem tofna nejama domolbayan. Safe gam, ai sembayanga as gwebana enggalfe Uwa Sanbagiri Jei aamei is gase batobaabili, angtane Uwa Sanbagirmana seyafter gemerserem jebaner, jega aamei nesiktele Kristusmana gam isa enola enggame Kristusmana nesiktele jeba unggwandwasusum. Ane jem temawer ga Uwa Sanbagiri Jei ilem tifinip gam se nwini, jamer aamei isa bugufswena waakena Jemnaiserem seyafter gemerserem jeme. Ai seyafter jeiserem ai sembayanga as gwebana im temawer. ²⁰ Nei Uwa Sanbagiri ganma pujite! Jei baabeta mes domola enggalfe seyafter nejesa bilibenerem Jei gase eyebili. Bunar-bunarsus Uwa Sanbagiri Jei baabetabara enggalfe, gam eyebif uskambarsus nei jes negama bilirim nelem inibe jewer. ²¹ Uwa Sanbagiri aa jes mwangbisilim nem temawer jeba unggwandwasusum! Neiba angtane Jelemanaiserem, ane neiba Kristusfar daamfennaberam. Jega jem temawer nei Uwa Sanbagiri ganma pujite, namwer aas jepserem, ane jamer abak-abaksus! Amin, jes gamserem ga gamfener.

¹ Ai awelna Tuhanmana gam gwebili, jega jem temawer ai ga asene gaataantena bwiyibe. Ane ai uskambar ga isai balbabili enggame: Uwa Sanbagiri Jei waakensususerem is mes eyeipmini ibe, jega jem temawer ga gemer isa gwena jes gemerserem Uwa Sanbagiri aa gemer bilirim. Uwa Sanbagiri is galap jenbebilirim Jelem angtanef gwefe, Jei ga enggam gunu aamei jam isa gwenaram ga waakena tefner isa eyebili. ² Ini imna ga jam isa onabertabana. Seyafter jam isa eyeipminirim angtanefe, ga ini foler-folermer isa eyeipmini. Aamei kabwaktala jam isa domolaram, ga jamer isa fina abakfer. Ane safe angtane kapkaiserem is jam sene eyeipmini ibe, aamei angtane jeiserem jam isa nesiktababili. ³ Mafnana Uwa Sanbagirmana Jei is mes eyeipmini, jega aamei daamfen iniber gam isa gwena, ane jega jem temawer ini imna waakenfer is ga sege folbamini. Ina ga waakenfer isa gaaramisnenne, jega aamei jeber-jeber ga ini daamfennaiserem ga jem isa gwena. ⁴ Neiba angtane Kristensam, neiba safna daamfennam. Nei seyafter Mafnana daamfenna ga nesa domola, Mafnana Uwa Sanbagirmanaiserem. Uwa Sanbagiri ga nes jenbebili Jelem angtanef gwefe, ane nei seyafter ga nesa fina enggalfe Jebar negama gwef jamer abak-abaksus. ⁵ Nei seyafter Tuhan daamfennaiserem ga nei Jei sa tebana, Tuhan Yesus Kristus. Nei seyafter sa baptiswena, aam temawer nei Yesus nejewera tikwebaatinirim. ⁶ Uwa Sanbagiri Jeiba daamfennam. Jeiba Uwa nemna nei seyafter gemerserem, ane Jei nem inip nuniton. Jei ga nem Sanbakf se nwini, nei seyafter gemerserem, ane Jei awelna Jemna nes mes golmini, nei ga seyafter awelna Jemna jeiserem ga nesa eyeibene. ⁷ Kristus Jei baabeta nebe nese Jener se golmini daamfen-daamfenneme, Jei Jener aa gemer gam gunurum. Jewer ga nei ga nesa damtabili baabeta nenes-nenesmer enggalfe awelna jem gam gwebif. ⁸ Taterisi Uwa Sanbagirmanaiserem jep ga baatultel Kristus aa jes golminirim jeiserem jem temawer. Ga enggam baatultel: Jei ginanggwana Jemna Jam auleyantaasini, ane Jei ga tauna taman tagarabe, ane Jei apgal jigala ga jes golmini angtanefe. (Mazmur 68:18) ⁹ "Jei aa jewer taunaram", jemna igi ga basa? Jemna igi ga enggam, fwater Jei gwanan mesam irtyesenyant ogiri aaiserem jebe. ¹⁰ Ane Jei gamjon mes warauwant, ga taunant taman tagarsusube winis sagawer enggalfe, ona seyaftersus gemerserem Jei Jener jep gam nwinf, ogiri aaiserem ane winsip mese seyafter gemerserem jebe. ¹¹ Kristus baabeta Jener golmini angtanefe, jega awelna aa jes golminirim jem gane gwebif. Angtane afwer jeiba angtane Yesus Jener aa jes baftabilirim, angtane jeiserem jeiba rasulsam. Afwer jeiba angtane aa jes nasbabilirim Uwa Sanbagiri aa jes bilirim, angtane jeiserem jeiba nabisam. Afwer jeiba angtane aa jei ge wofebilirim taman-tamnabe enggalfe Taterisi Waakenaiserem gam ne nasbinennef, angtane jeiserem jeiba guru penginjilsam. Ane afwer jeiba angtane sanbaka jemata aa jei ne taabilirim, ane Taterisi Uwa Sanbagirmana aa jei ne towas-towaswebilirim, jeiba pendetasam. ¹² Kristus Jei baabeta nes daamfen-daamfennem se kitulmini nenes-nenesmer, jega nei angtane Uwa Sanbagirmanaiserem nei jeber-jeber angtane nafsiserem gam nesa batobaabili. Nei baabeta nenes-nenesmer nei jewera damtabilirim, ane nei angtane nejewera batobaabilirim, jem temawer ga nei kanaufer ga nesa fina safna daamfennaber Kristusfar, gwanan jepserem gamyan. ¹³ Jepga nei seyafter daamfennaber Tane Uwa Sanbagirmana ga nesa tebana, ane nei Kristus ga nesa damdamtaasini. Jei baabetabara ane Jei seyafter tousa, ane nei ga gam nesa etamwena Jei gemerserem. Gwela nemna ga nes etamwemini gwela Kristusmana gemerserem. ¹⁴ Jepga nei gamjon nejama gweyan tantantane aa jes gane afaf-afaftababilirim jes galserem. Angtane tanna bastantana gane afaf-afaftababili, jengga angtane afaf-afafa jeiserem angtane nafsi aa jei gane afaf-afaftababilirim, angtane jeiserem jei nei nes jam ne afaf-afaftababiyen. Fas. Angtane afaf-afafa jeiserem aa jes ne nasbinennerem, jei enggalf ne nasbinenne angtane gam sege gubili enggame, "Taterisi angtane jeiserem jei aa jes ne nasbilirim, taterisi jeiserem jeba Taterisi Waakena Uwa Sanbagirmana, bunarsusfer aaiserem jeba jesam." Jengga angtane afaf-afafa jeiserem jei nes jam sene nasipminirim nebe, nei enggam nejama etamweyan atdusa akwakunu gamserem, fona bugup aa gemer gam weken-wekenwenaram jam sofwelabe. ¹⁵ - ¹⁶ Nei atdusa akwakunu jes gamserem gamyan. Nei nes jam ne afaf-afaftababiyen. Jengga nei enggam nesa gwena: Nei seyafter nena jam nesa nesiksonanna, ane jega jem temawer taterisi bunarsusfer Uwa Sanbagirmanaiserem jam negama nasbilirim, ga ini foler-folermer negama nasbili. Nele nemna gwanan bastouya nele Kristusmana galserem. Jengga nele nemnaiserem jei gase etamwena nele Kristusmana gemerserem, seyafter nejesa eyebilirim jeme. Angtanemana tafa, tof, ane dwak mese jeba tifini seyafter daamfennam, nemna gwela Kristusfar daamfennaber ga gam jes gemerserem. Ane Jei ga nem Sanbakef ga jes, ane Jei baabeta nes mes golmini nebe, jega nei awelna nenes-nensa Jei aa jes bilirim ga nesa gwebili, ane nei ga nena nesa batomini. Nei daamfen-daamfennem awelna nejeba gwebilirim, nei ga nena jam nesa nesiksonanna, ane safna Kristusmana jei ga kanaufer daamfennaber ga sege fibili. ¹⁷ Ga jem temawer, ai isa uskambarsus jam balbabili bosna Tuhanmanaiserem jeme. Aamei gamjon ijama gweyan angtane Uwa Sanbagiri jam damdamtaasiyene jei gamserem. Jei aa jes ne bilirim jelem inibe jeiserem ol kabwak, ¹⁸ ane ini jemna gwin-gwinsusem ge folbamini. Jei seyafter jam ne towaswebiyen, ane jei ini jemna jam kankanausweipmini. Jega jem temawer jei gwela ibirmi Uwa Sanbagiri aa jes golminirim jam ne domolyan. ¹⁹ Jei gamjon jam ge seferswebiyen. Jewer ga jei kapkaiserem ga jetefener ne eyebif. Jei jam ge tikwebiyen etam-etama nenes-nensaiserem jes eyebiliwer, ini jelemana aa gemer ge folbaminirim enggalfe maaryena gane gwebif. ²⁰ Jengga aamei, Kristus Jei aamei is Jam towastababiyen enggam naawefe, angtane jeiserem jei aa gemer gam naawenaram. Fas. ²¹ Bunarsus, aamei Kristus imsa tikwebaatini, ane imsa sarbili taterisi bunarsusfer aaiserem Kristus aa jes towas-towastababilirim. ²² Jewer ga aamei gamjon ijama gweyan enggame, aamei gwanan igama gwenantam jes galapserem aamei nalefe Kristus ijama tebayan! Gamjon gam ijama gweyan. Gwanan jes jepserem aamei ga ijetera eyebili kapkaiserem ijesa bilirim ilem inibe. Aamei enggam syefer ima gunu ilem inibe, "Afa ai kapka jeiserem jam asa eyebilirim, ini amna jei as saaser-saaserfer sege folbamini." Jengga aamei kapkaiserem imsa eyebili, ane jega jem temawer gwela imnaiserem ga is jem wasferwemini. Ga jem temawer gwela jes galserem jewer sa tikwe! ²³ Ini imna ga is sege etamweipmini ibirimfer! ²⁴ Uwa Sanbagiri is mes eyebaabili aamei angtane ibirimsusfer, Jena galaterserem. Jewer ga aamei gam isa gwena angtane ibirimsusu galaterserem! Aamei ga enggam isa gwena, taterisi bunarsusfer Uwa Sanbagirmanaiserem ga jetefener isa onsobili. Gwela waakenaiserem aamei ga jemer isa gwena, Uwa Sanbagiri aa jes bilirim ga jetefener isa eyebili. ²⁵ Ga jem temawer, ina ijama afaf-afafsoyan! Jengga taterisi waakenaiserem ga jes isa nasbinenne, aam temawer nei Kristusfar safna daamfennam. ²⁶ Afa jam igama kakalswenaram, etam-etama kapkaiserem ijama eyebiyen. Gwere nalefe jam kawetenayan, aamei angtane jebar igangge doksonaram, ga jam igangge waakensona jebar. ²⁷ Bawasfe dwona ijama gulbayan enggalfe etam-etama gam eyebife. ²⁸ Afa aamei angtane komkoma, aamei ga jam isa tikwena komkomawer! Waakenfer ga enggam, awelna waakenaiserem uskambar iner igama eyebili, jega aamei jes igama bilirim, gam igama domola. Ane aamei jes igama domolaram, jeiserem afwer angtane galgalyenaiserem jep gam igama kitulmini. ²⁹ Ula kapkaiserem ijama nasbabiyen. Jengga angtane is jei gam sarbasinirim aamei gwanan ini jemnaiserem jam igama towaswebaipmini, ane ula waakena tefner ga igama nasipmini jebe, jega enggalf angtane jeiserem gam batobaabif. ³⁰ Mafnana Uwa Sanbagirmanaiserem ini Jemna jama kabwaktabayan jam jenbafe. Uwa Sanbagiri Jei Mafnana Jelemana is mes golminint ibe, ane jega jem temawer aamei gam isa towaswena enggame aameiba angtane Uwa Sanbagirmanam. Mafnana Uwa Sanbagirmanaiserem nem inip nuniton, ga jem temawer nei ga nesa towaswena enggame, nunu Uwa Sanbagirmana se fortyaram Jei ga nes erbifelse Jeleminibe. ³¹ Etam-etama aaiserem ijama eyebiyen: ini kabwakfer falbalaiserem; angtanes nasbala; ol dagam nasela; syefer nasela; ane amaifar ge doksola. Seyafter jeiserem jam isa tobolsiwili, jeiserem kapka. ³² Jengga aamei enggam isa eyebili: ini imna ga foler-folerfer sege folbamini. Aamei seyafter gemerserem aamei waakenater isa eyeipmini angtane nafsiserem jebe. Ane aamei seyafter gemerserem etam-etama ilem afelenmana ga jam igama borolbana, Uwa Sanbagiri Jei etam-etama imna is gemer gam wirtabaipminirim, Kristus aa jes gam eyebilirim jeme.

¹ Aameiba tane Uwa Sanbagirmanam, Jei uskambar ims nesiktababili. Ga jem temawer, aamei ga waakena tefner isa eyebili, Jei gemerserem. ² Kristus is gemer nesiktababilirim, ane Jei gwela Jemnaiserem aa golmini etam-etama imnaiserem jem temawer, gwela imna ga ina jam isa nesiksonanna. Kristus gwela Jemna aa galap gularam nem temawer, Jei ga eyebili Uwa Sanbagiri aa jes bilirim, ane ini Uwa Sanbagirmana ga saaser-saaserfer folbana jem temawer. ³ Aameiba Uwa Sanbagirem angtanesam. Jega jem temawer angtane im jemata aaiserem jei etam-etama seyafter maaryena galserem jam ne eyebiyen. Ane ini imna unggwan-giri enggalfyan, galgala unggwanfer gam damtabif. Aamei ga waakensusfer isa gwena ini tabalbalmer, jega enggalf angtane enggam jam ge gubiyen, aamei maaryens ima gwebili, ane galgala unggwanfer gam damtabif. ⁴ Ula kapka ijama nasbabiyen maaryens gwebife. Olsin-olsini etam-etama maaryens eyebiliserem jem temawer ijama nasbiyen. Seyafter jeiserem jei kapka enggalfe aamei ijesa nasbife. Jengga aarema imnaiserem jem ga Uwa Sanbagiri tefner isa pujitene, ga isa bala "Ase samfer golmini." ⁵ Bunarfersus aamei aaiserem imsa towaswebili: Angtane maaryena aa jei ne gwebuwenaram, ane angtane ini unggwan-giri aa jemanem ge folbaminirim enggalfe galgala unggwanfer gam damtabif, angtane seyafter jes galserem jei Kristus ane Uwa Sanbagiri Jebar jam naaweyan, nunu Kristus ane Uwa Sanbagiri Jei aa jep ge gwenaram anggwabura seyafter gemerserem jem Sanbakfe. Afa ini imna jeber-jeber unggwan-giri is jam sege folbaminirim enggalfe galgala unggwanfer gam damtabif, jeiserem ga aas gemerserem aamei ga nensar tefner igama damdamulsif. Afa ini imna jes gamserem is gam sege folbaminirim, gam jega ini imna unggwan-giryen enggalfe Uwa Sanbagiri gam damdamtaasife, ane aamei Uwa Sanbagiri ijama pujiteyen. ⁶ Angtane Uwa Sanbagiri jam sarbayanaiserem, ane jei etam-etama jeiserem ga gane eyebili, Uwa Sanbagiri Jei angtane jeiserem ga jese nasbabili, ane Jei gase tamtamtababili. Jewer ga ina jam isa gaaramisnenne! Angtane afweraiserem enggam ge gubili, "Au, nei etam-etama ganma eyebi. Jei kabwakyan." Jengga taterisi jes galserem jei ol kabwak. Aayai, angtane jeiserem is jam ne afaf-afaftababili! ⁷ Aamei angtane jeiserem jemniwer ina ga jam isa bijausona. ⁸ Aamei nalef Kristus ijama tebayan, gwela imna ga gwini gamserem, kapkaiserem ga jetefener igama eyebili. Jengga namwer aas jepserem, aamei Kristusfar daamfennaber, ane aamei nafa imsa domola. Jewer aamei ga jeber-jeber nafaber ga isa gwena, ane waakena tefner ga isa eyebili. ⁹ Angtane nafap aa jei naawenaram, gwela jemna ga enggam: Ini jemna nornorfer ge folbamini. Jei bunarsusfer angtane gane batobaabif, ane jei waakenater gane eyebili. ¹⁰ Sa towaswebi, ga jetefener isa eyebili Tuhan aa jes bilirim ini Jemna gam saaser-saaserwebafe. ¹¹ Angtane gwela enggam aa jei ge folbaminirim gwini gamserem, aamei angtane jeiserem jemniwer ina jam isa bijausona. Ane aamei ijama eyebiyen kapkaiserem jei aa jes ne eyebilirim. Jengga kapkaiserem jei aa jes ne eyebilirim jeiserem gasa nafabarul, jega angtane ga sege towaswebili jei aa jes ne eyebilirim jeba kapkam. ¹² (Afa nei etam-etama angtane gwin-gwini jei basyamer aa jes ne eyebuwenaram, afa nei jam nesa nasbilirim jem temawer, nei ga janma sefersona.) ¹³ - ¹⁴ Nafa aa galap ertenerem apgal jigal sagabe, jepga angtane ga sege anggabili apgal jigala jeiserem je basa. Ane jepga apgal jigala jeiserem ga nafabarsona. Jes gemerserem aaiserem jegme gemer, aamei kapkaiserem angtane aa jes ne eyebilirim jame ijeba nafabarulurum, angtane gwela kapka jem aa jei naawenaram, jei ga sege towaswebili jei aa jes ne eyebilirim jeba kapkam. Ane angtane afwenefener jei ga sege irfwebili, ane kapka ga sene tobolsiwili, ane jei waakenaiserem jetefner ga sene eyebili. Jega jem temawer, ga sene bala: "Aamei angtane ijei tanaram, jase irwe nunuwer, ane jase irwe terewer! Kristus nafa ip is gas gulbana." ¹⁵ Nafa Kristusmana imsa domola, jega jem temawer gwela imna ina waakenfer isa gaaramisnenne. Aamei gam ijama gweyan angtane teisyena jei gamserem, jengga enggam isa gwena angtane tousa jes gamserem. ¹⁶ Nunu aas jepserem angtane uskambar jei etam-etama kapkaiserem jes ne eyebili. Ga jem temawer, aamei dwona jam igama domolaram, jes jepserem aamei jeber-jeber waakenater ga isa eyebili. ¹⁷ Aamei angtane jafner wofoyafelaiserem aamei galyan. Jengga sa towaswebi Tuhan aa jes bilirim aamei ijesa eyebife. ¹⁸ Fo angguru uskambar ipsama telbebilirim, jamer igama mwalswena. Afa aamei jeber-jeber gamfener isa gwenaram enggame, fo angguru igama telbebili ane igama mwalswena, gam jega, gwela imna ga isege wasfer-wasferswebamini. Jengga Mafnana Uwa Sanbagirmanaiserem im inip nuniton jamer dup. ¹⁹ Aamei jam isa nasowenaram angtane nafsibar, ga aas isa balbabitowena, taterisi mazmurmana, ane simal rohani, ane taterisi simala Mafnana Uwa Sanbagirmana ip is jes kitulminirim. Tuhan sa pujite ilem inip, ane simala ga isa twola enggalfe Jei gam pujitef. ²⁰ Bosna Yesus Kristus Tuhan nemnaiserem jeme, ga isa bala Uwa Sanbagiri, Uwa nemnaiserem, "Ase samfer golmini seyafter aa jei etamwenaram jem temawer." ²¹ Aamei seyafter Kristus ijeya tebanaram, ini imna is ferfermer sege folbamini enggalfe ina jam isa sarminenne, Kristus jem gam gaartefe. ²² Aamei wini anggwanabaraiserem, aamei Tuhan igemera sarbanaram, ane ga ima eyebili Jei aa jes bilirim, jes gemerserem aamei anggwana ilemana ga jam igam sarbana. ²³ Ai jeiserem enggam ai bili, aam temawer anggwana ba sanbakfe jei gam gwena wiminibe, jes gemerserem Kristus Jeime nem Sanbaka, nei Jei nejeya tebanaram. Neiba angtane Kristusmanam, ane Jei nes gase waakentababisini. ²⁴ Jewer ga, jes gemerserem angtane Kristusmana ga sene sarbili Kristus aa jes bilirim, aamei wini anggwanabaraiserem, anggwana ilemana ga jamer igam sarbana. ²⁵ Aamei anggwana winibereiserem, wini ilemana ga jam igam nesikulu, Kristus gemerserem Jei nei nes gemer nesiktababilirim, ane Jei nem temawer ga tere enggalfe, ²⁶ nei gasa etamwena angtane Jelemanfe. Jei nems wirtabaabili taterisi Jemna jeme, ane fo mese. ²⁷ Jei enggalf terent nes gam aftabifelf Jeleminibe. Jes jepserem nei etam-etama gamjon nejama eyebiyen, kapkaiserem nemnibe fas, jengga neiba angtane Jelemanam, ini nemna nes tabalmer ge folbamini. Ane nei Jebar ga nesa nwinsi. ²⁸ Aamei anggwana winibereiserem, wini ilemana ga jam igam nesikulu, ane jamer igam gaarabisnenne, jes gemerserem aamei tifini seyafter ilemana gemer igam gerebaasnennerem. Anggwana wini aa galap nesikulurum, jei ga enggala jena aa gemer gam gerebaasnennerem, aam temawer jei winibar daamfennaber. ²⁹ (Aamei imsa towaswebili, angtane jei tifni jelemana jam kabwakulyon, jengga jena waakenfer gam gerebaasnenne, Kristus nes gemer gam gerebaabisnennerem ga gemer, ³⁰ aam temawer neiba angtane Jelemanam, neiba Jebar daamfennaberam.) ³¹ Taterisi Uwa Sanbagirmana jep ga enggam baatultel: "Ga jem temawer anggwana ene yo jeta jam gam mirsonaram, ane wini ga gam gula, gam jega, jei winabar daamfennaber ga gangge nwini." (Kejadian 2:24) ³² Taterisi Uwa Sanbagirmana jeiserem ba bunaram, ane jemna igi ba unggwandwasusum. Ane ai amsam sara jeba Kristus ane angtane Jelemana jem temaweram. ³³ Taterisi bunarsusfer jeiserem ga wi anggwa mese jem temawer. Ai isa gamjon balbabili: Aamei anggwana winibereiserem, wini ilemana ga jam igam nesikulu, aamei in ina gemer igam nesiktenennerem. Ane aamei wini anggwanabaraiserem, aamei ga anggwana ilemanaiserem jem gwonap igam gwena, ane jep ga waakenater igam nasibene.

¹ Aamei tantantane, aamei iye uwa ilemana taterisi jemna ga jam igama saripmini, ane jeter ga igama eyebili iye yo uwa jei aa jes gangge bilirim. Tane Tuhan aa jei ne tikwebaatinennerem, jei ga jes gemerserem ga gemer se naawena, ² aam temawer Uwa Sanbagiri Hukumu Jemna aa galap kitulmilim, Jei enggam bil hukumu nawer-naurabara jeiserem jebe: "Aamei waakenfer isa nwini iye yo uwa jebar, ane bosna iye yo uwa jemna ga jam isa golmitena." (Keluaran 20:12; Ulangan 5:16) Hukumu nawer-naurabara jeiserem, jeba hukumu nabal danalaiserem Uwa Sanbagiri enggam aa jes bilim, afa aamei hukumu jeiserem waakenfer jes isa sarbilirim, aamei waakenaiserem ga isa domola. ³ Jei ga enggam gul, "Ga jes gemerserem ga gemer isa gwena, jega aamei waakenfer gam isa gwena, ane umuru imna is ga sege bwaleswebamini ogiri aaiserem jebe." ⁴ Iye mese uwa, aamei tanna gam ijama gwebabiyen, jamer tanna jeiserem jemna ini gangge kabwakswebaipmini, jengga jebe waakenater igama eyeipmini. Tane ilemana waakenfer igama gerebaabisnenne. Ane jei kapkaiserem jam gam eyebilirim, ga jam igama uftana, ane ga jam igama towas-towastababili taterisi Tuhanmanaiserem waakenfer gwelaiserem jem temawer. ⁵ Aamei angtane awelna nenesfe ijeya gwebilirim, aamei angtane sanbaka ilemana ga jamer igama sarbana, aamei Tuhan gemer igama sarbanaram. Sanbaka ilemanaiserem ga jem gwonap isa gwena, ane jei aa jes gam bilirim ga isa eyebili ini waakenmer. ⁶ Akar-akarem awelna ijama gwebiyen enggalfe angtane sanbak ilemana is gam damtabife, jega jei enggam is gam balbabife aamei awelna waakenfer ima gwebili. Aameiba angtane Kristusmanam, jewer ga aamei awelna waakenfer isa gwebili enggalfe, Uwa Sanbagiri Jei aamei enggam is gam balbabife aamei awelna waakenafer ima gwebili. ⁷ Angtane sanbaka ilemanaiserem awelna jemna ga ini waakenmer isa eyebili, awelna Kristusmana igemera gweyibenerem. Aamei ilem inibe ga enggam igama gunu, "Awelna aaiserem gam ke alem sanbakmanfenna, jengga awelna aaiserem je Kristusmanam." ⁸ Sa sarbistaabon, Tuhan Jei fwaina waakena se golmini angtane awelna waakenfer aa jei ne gwebilirim jebe, angtane awelna nenesfe aa jei gam gwebilirim, ane angtane sanbaka mese jegme gemer. ⁹ Jes gemerserem, aamei angtane sanbakfe ijeya gwenaram, ini imna ga ise waakenfer sege folbamini, angtane awelna imna aa jei ne gwebilirim jem temawer. Ol dagam ijama balbabiyen. Sa sarbistaabon, aamei ane angtane awelna imna aa jei ne gwebilirim, Sanbaka imna ba daamfennam taman waaken-giribe. Ane Jei angtane afa Jam artayan, Jemna fwaina jeiserem armanaber gam syenulu. ¹⁰ Taterisi umwef jeiserem amniwer ga aas: Baabeta Tuhanmana Jeba unggwandwasusum, ane aamei Jebar daamfennaber. Jega jem temawer aamei baabetfer gam isa gwena, baabeta Jemnaiserem jeme. ¹¹ Anggwana ginaf aa gemer gam betwenaram, jigala aa gemer gane menetababisinirim jem erafe, sa taabi Uwa Sanbagiri seyafter is jes golminirim enggalfe kanaufer jem gam isa fina, bawasa ini imna is galap se dektebaipmini. ¹² Ai taterisi jeiserem agam bili, aam temawer ginanggwana nemnaiserem jei angtaneyan. Fas. Ginanggwana nemna jeiba bwat kapka baabetabara seyafter aa jei ge wofebilirim nem nenennabe, ane nei jebar negama eraf. Bwata kapka jeiserem, jei angtane gwin-gwinip aa jei naawenaram jem sagap gwena ogiri aaiserem jebe. ¹³ Ga jem temawer, sa taabi Uwa Sanbagiri seyafter is jes golminirim enggalfe aamei bawasfar ijema erafe! Jepga jeber-jeber bawasa jei gam fortya enggalfe ini imna is gam dektebaipmif, aamei ga jebar baabetfer ga isa erna. Ane bawas safe ini is abakfer se dektebaipmini, aamei kanaufer gemer isa fina. ¹⁴ - ¹⁵ Ga jem temawer aamei kanaufer isa fina! Anggwana ginaf betwela gamserem, jei gane menetababisini nonggolfini gane bunuwili tomonfe, ginna, ulum, fon jega tumilgala jep bokolntef, ane kambata gam kamwini, jega waakenfer gam erafe. Jes gemerserem aamei aaiserem ga gemer isa eyebili, jega aamei bawasfar waakenfer gam isa erna: Aamei jeber-jeber jam isa gwenaram taterisi bunarsusfer Uwa Sanbagirmanaiserem ga jetefener isa onsobili. Aamei jeber-jeber waakena tefner igama eyebili jeiserem jes gamserem Uwa Sanbagiri aa jes bilirim. Aamei jeber-jeber jam isa menetwesini enggalfe Taterisi Waakena gam nasbinennef. Taterisi jeiserem ga enggam: Kristus aa Jes eyebilirim jeme, angtane ga sege etamwebili Uwa Sanbagirfar daamfennaber jam gwefe. ¹⁶ Bawasa ini imna is galap dektebaipminirim, jes gemerserem bawasa ga kajugwana gemer gam afsunnurum im inibe. Anggwana ga jes gemerserem ga gemer gangge erabana, jei dumu jemna jam gam jejetana enggalfe ginna jem taarbaf, anggwana jes gemerserem aamei jegme gemer Kristus jeber-jeber uskambar isa tebana. Jepga bawas kajugwana jam gam afsunnurum, jam ne kaweyan im inibe. ¹⁷ Ane jes gemerserem topi besini angtane duka jem gam motolsinirim jam eralabe, aamei jeber-jeber isa sarbistaabonwena Uwa Sanbagiri aamei is Jeye waakentababisinirim. Taterisi Uwa Sanbagirmana Mafnana Jemna ip aa jes golminirim, jeba nombeya imna galserem. ¹⁸ Mafnana Uwa Sanbagirmana Jei aamei jeme is gemer batobaabilirim, aamei jeber-jeber sembayanga isa gwebabuwena enggalfe Uwa Sanbagiri gam pujitef, ane ga isa bilibene aamei ijesa bilirim Uwa Sanbagirminibe. Aamei ijama tikweyan sembayanga jam gwebafe. Ane sembayanga isa gwebabana Uwa Sanbagirfe angtane Kristen seyafter gemerserem jem temawer. ¹⁹ Ane sembayanga jam isa gwebanaram am temawer mese, jega ai jam ajep nasipminirim angtanefe, Uwa Sanbagiri Jei taterisi Jemna ap as gase gulbana. Ane aamei sembayanga am temawer jam isa gwebabanaram, jega ai ajam ereyen Taterisi Waakena jam ajep nasbinennerem, taterisi angtane gwanan jam ne towaswebiyeneiserem. ²⁰ Yesus Kristus Jei ams baftana enggalfe Taterisi Waakena agam nasbinennef. Ane Taterisi jeiserem ai ajewer nasbinennerem, ai ga as jem temawer ne gaataantena bwiyibe. Yesus Jei awelna jeiserem ap gulbana enggalfe ai Taterisi Waakena jeiserem jem temawer agam nasbinennef. Ga jem temawer, aamei sembayanga as jam isa gwebabana, jega ai ajam ereyen Taterisi Waakena jam ajep nasbinennerem, ane jega ai baabetfer gam as nasbinenne. ²¹ - ²² Ai enggam ai gunu aamei ijama towaswef am temawer aa je etamwenaram, ane ai ajes eyebilirim. Jega jem temawer ai Tikikus, nelem afelna nei nejesa nesiktenennerem, as baftana imnip gwife. Jei awelna Tuhanmana gam gwebili, ini waakenmer. Jei jam se forotnaram imnibe, ga is nasipmini ibe seyafter aa jei etamwenaram am temawer. Ane jei taterisi seyafter angtane aaf ajebara nwinirim, taterisi jemna jem temawer ga is nasbaipmini ibe. Ane jei ga ini imna is gase kanautabaipmini. ²³ Ai sembayanga as gwebana Uwa Sanbagiri, Uwa nemna, ane Tuhan Yesus Kristus, Jei ini imna waakenfer is gas gwebaipmini. Ane Jei aamei is ga sege batobaabili, jega aamei ina gam isa nesiksonanna. Ane Jei baabeta ip ga is golmini, jega aamei Yesus jeber-jeber waakenfer gam isa tebana. ²⁴ Ai sembayang as gwebana Uwa Sanbagiri Jei waakena Jelemanaiserem ip is gase golmini aamei seyafter gemerserem Tuhan Yesus Kristus bunarsusfer iJeya nesiktenennerem.