Kolose

Kolose

¹ - ² Ga ip, aamei angtane Uwa Sanbagirmana, kota Kolose je ijeya nwinirim. Aamei am afelen mesna, aamei seyafter Kristus Yesus waakenfer imsa tebana, ane imna gwela Jebar ga daamfennaber. Surta aaiserem ga amniwer, Paulus, kota Roma je. Timotius nem afelen mesna, jegme surta aaiserem ga ajebaner ge baafulu. Uwa Sanbagiri Jei ams destabana ai rasulf gwefe. Jei ams baftana enggalfe, ai Taterisi Waakena Kristus Yesusem temawer ai agam nasipminennef. Ai sembayanga as ge gwebabana Uwa Sanbagirfe, Jei waakena Jelemanaiserem ip is gase golmini, ane Jei ini imna is gase gwebaipmini waakenfer is ga sege folbamini. ³ Ai sembayanga im temawer agalaba gwebanaram, ai jeber-jeber Uwa Sanbagiri agma bala enggame, "Ase samfer golmini." Uwa Sanbagiri Jei Uwa Yesus Kristusmana, Tuhan nemna. ⁴ Ai ajewera balaram enggame "Ase samfer golmini.", ga aam temawer ai amsama sarant enggame, aamei Yesus Kristus baabetfer ima tebana, ane aamei angtane Uwa Sanbagirmana nafsi seyafter gemerserem ima nesiktababili. ⁵ Aamei nabala taterisi bunarsusfer aaiserem igalaba sarbilintim, Taterisi Waakena Yesusem temawer jeiserem, aamei jes galapserem taterisi Uwa Sanbagirfar gam gwefe ga imsa sarbili. Ane namwer aamei Yesus ima tebana, ane aamei angtane Uwa Sanbagirmana ga ima nesiktababili, aam temawer aamei ima fina enggalfe Uwa Sanbagirfar igama gwefe taman waaken-giribe. ⁶ Taterisi Waakena jeiserem angtanef ga sene nasipmini, tampata unggwanfer ogiri aaiserem jebe, jes gemerserem Taterisi Waakena jeiserem is gemer nasipminintim ibe. Ane angtane unggwanfer gemerserem ga taterisi jeiserem ga jes ne taabili, ane jei gwela waakenaiserem ga jemfener naawena, aamei gemerserem aamei ima taabili ane ga ima gwena. Aamei Taterisi Waakena jam igalaba sarbilintim, ane aamei ga ima gunu enggame, "Ba bunaram Uwa Sanbagiri ba nemsam nesiktababili.", aamei ga ima taabili, ane aamei ga ima towaiwena waakenfer gwefe. ⁷ Nem afelna Epafras nei nejesa nesiktenerem, jei awelna Kristusmana gam gweyibene, ai Timotiusfar gamserem. Jei Taterisi Waakena jeiserem is mes nasipminint ibe, ane jei jeber-jeber awelna Kristusmana waakenfer gweyibene enggalfe aamei is gam batobaabif. ⁸ Epafras jei ai as enggam towastababili aamei angtane Uwa Sanbagirmana seyafter ima nesiktababili, baabeta Mafnana Uwa Sanbagirmanaiserem jeme. Seyafter jeiserem jem temawer, ai Uwa Sanbagiri agma bala, "Ase samfer golmini." ⁹ Ai seyafter jeiserem ajesa sarbabilintim im temawer, jega jem temawer ai sembayanga jeber-jeber ga aya gwebana im temawer. Ai jam isa galaba sarbabilintim enggame aamei waakenfer ima gwena, ai ga aya towaiwenant sembayanga jam gwebafe im temawer, ane ai ajama tikweyan sembayanga Uwa Sanbagirfe jam gwebabalabe im temawer. Ai Uwa Sanbagiri agma balfe enggame Mafnana Jemna aamei is gam batobaabife, jega aamei tousaiserem gam isa domola. Ane aamei ga isa sarbili waakenfer enggame bunarsusfer ga fwersa ane afaf-afafaiserem jei ga fwersa. Ane aamei ga isa towaswebili seyafter Uwa Sanbagiri aa jes bilirim aamei ijesa eyebiliserem. ¹⁰ Jepga aamei gam ga isa gwena, Tuhan aamei is gemer balbabilirim jam gwefe. Ane ini Jemna saaser-saaserfer gase folbana, aamei seyafter ijesa eyebilirim jem temawer. Aamei ga enggam aas gemerserem ga isa eyebaabili: Aamei waakenater isa eyebaabili gala-gala angtanefe. Namwer aas jepserem aamei Uwa Sanbagiri bastowaifer ima damdamtaasini, jengga afa aamei Uwa Sanbagiri Jei aa jes bilirim jeiserem jam isa onsobilirim, aamei Jei uskambar ga isa damdamtaasini. ¹¹ Baabeta Uwa Sanbagirmana unggwandwasusum, jega jem temawer ai sembayanga Jep asa gwebabana enggame Jei baabeta ip is gase golmini. Ane jem temawer ga tamtamtala jam ijeba domolaram, aamei kanaufer gam isa fina ini saaser-saasermer. ¹² Ane aamei Uwa Sanbagiri ga isa bala, "Ase samfer golmini.", aam temawer Uwa Sanbagiri Jei mes eyebili, jega aamei ane angtane nafsi Jei aa jei ne tebanaram, aamei seyafter jebaner gam isa domola Uwa Sanbagiri aa jes golminirim angtane Jelemanfe, ane aamei nafa Jemnaiserem jep ga isa gwena jamer abak-abaksus. ¹³ Nei gwanan nalefe Yesus nejama tebayan, bawasa jei nem sanbakf nwinint, ane jes galapserem nei ga gwinip neya gwenant. Jengga Uwa Sanbagiri Jei nei nes mes waakentababisini, ane Jei nei nes mes erbifele Jelem Tanem gwetmanabe, Tanna Jam aa jes nesiktenerem, ane Tanna jeiserem Jei ga Jei se nwini nem Sanbakfe. ¹⁴ Kristus aa jes eyebilintim jeme, Uwa Sanbagiri etam-etamawer nei ga nes jem aftabunnu, Jei etam-etama kapka nemna nes mes wirtabaipmisini. ¹⁵ Angtane fas Uwa Sanbagiri jam ne damtayan, jengga Kristus Uwa Sanbagiri ga nes Jei gweretaamisini nebe, aam temawer Kristus Jeiba Uwa Sanbagiri galserem. Kristus Jeiba unggwan-girsusum, Jei Uwa Sanbagiri seyafter aa jes eyebaabilim jem sagabe Jei nwinf Sanbakfe. ¹⁶ Uwa Sanbagiri seyafter ga Jei eyebaabil baabeta Kristusmanaiserem jeme, taman waaken-girip ane ogirip mese, apgal jigala jam sokotiliserem ane jam sokotiyeneiserem, malaikata baabetabara seyafter gemerserem-- malaikata sanbaka ane jem bastantouya jes mese. Uwa Sanbagiri seyafter ga eyebaabil baabeta Kristusmanaiserem jeme, ane seyafter aa jes eyebaabilim jeiserem ga enggalf Kristus Jelef. ¹⁷ Gwanan nalefe apgal jigala seyafter gemerserem jam eyebaabiyen, nabal-nabalsusu ga Kristus se gwel. Kristus Jener eyebaabili baabeta Jemnaiserem jeme, jega gwer, muar, fi ane apgal jigala seyafter gemerserem jelem tarnabe ga sege falbili, jam ge irwalwebiyen. ¹⁸ Angtane seyafter Kristus aa jei ne tebanaram, jeiba tifni daamfenna galserem, ane Kristus Jena ga tifni daamfenna jeiserem jem Duka. Jei Jebar daamfennaber se naawena, ane Jei gwela gase golmini jebe. Jeiba nabal-nabalsusu Jeyam irwenant terewer enggalfe, Jei seyafter gemerserem jem sagabe Sanbakfe gam nwinf. ¹⁹ Gwela Uwa Sanbagirmana seyafter ga Kristusminip. Kristus Jeiba Uwa Sanbagiri galserem, Jei nenesyan. Uwa Sanbagiri Jener ba gamam gul. ²⁰ Uwa Sanbagiri ga enggam mwangbisil, Kristus ga ti salibip se terse, ane aawisi Jemna gase tenbentesa, ane etam-etama angtanemana jem gase wirtabaipmisi. Ane jega jem temawer seyafter taman waaken-girip aaiserem ane ogirip aaiserem ga sege waraubisi Uwa Sanbagirminibe, ane jei Jem gwonap gase naawena Jena ga Sanbakf se nwini. Kristus aa jewer terentem, jem temawer ga angtane ga samfer Uwa Sanbagirfar daamfennaber ga naawena. ²¹ Aamei nalefe Kristus ijama tebayan, ini imna jes galapserem ga kapka, ane aamei kapkaiserem jetefener igama eyebili. Ane jem temawer aamei ina ga ima bijausona Uwa Sanbagirminiwer, ane aamei Jei baif ima gwebana, ginanggwana galserem. ²² Jengga namwer Kristus Jei mes terent, jem temawer ga Uwa Sanbagiri Jei aamei ga is aftabifele Jelem gwetmanabe. Jei aamei is aftabifelserem Jem gwetmanabe enggalfe, aamei galabe jam isa fisaram Uwa Sanbagirem danggonabe, jes jepserem aamei kapkaiserem imnibe fas, jengga waakenmer isa gwena. ²³ Jengga aamei Taterisi Waakena Kristusem temawer ga jamer isa taabili ginggitmer. Aamei Kristus igalaba tebanantam, jes galapserem aamei ga ima towaiwenant Kristus ini saaser-saasermer ga ima fibana Jam waraunafe, ane enggalf Jei aamei is gam aftabifelf taman waaken-giribe Jebar seyafter gam gwef. Aamei Jei jeber-jeber jamer isa fibawena. Taterisi Waakena ba mesam ne nasipminenne angtanefe tampata unggwanfer aa gemer falaram ogiri aaiserem jebe. Ane Uwa Sanbagiri Jei awelna abe as mes gulbana, awelna jeiserem ga enggalf angtanefe Taterisi Waakena agam nasipminennef. ²⁴ Kristus Jei ai as enggam bala ai tamtamtala as domola enggalfe, ai angtane Kristusfar daamfennaber aa jei naawenaram, ai angtane ajes batobaabif. Tamtamtala Kristus aa gemer domolantam, ai jegme agemer domola. Ane namwer ini amna ase saaser-saaserfer folbana, aam temawer ai tamtamtala jeiserem im temawer domola. ²⁵ Uwa Sanbagiri Jei ams destabanant enggalfe ai angtane Jelemana agam batobaabif, ane enggalfe Jei aa jes mwangbisilim ai seyafter jeiserem aamei angtane Yahudimanyanaiserem ai isa agam nasipminennef ibe. ²⁶ - ²⁷ Gwanan-gwanansus Uwa Sanbagiri Jener mwangbisil enggalfe Jener gam eyebif. Ane Jei Jener aa jes mwangbisilim jeiserem angtanefe Jam towasulmiyen jamer abaka. Jengga Uwa Sanbagiri aa jes mwangbisilim, jeiserem namwer Jener gwerauwulmif angtane Jelemanaiserem jebe, angtane tampata unggwanfer aa jei ge nwinbenerem jebe, angtane ula nafis-nafsi unggwanfer aa jei ne nasbabilirim. Seyafter Jei aa jes mwangbisilim jeiba bunarsusfer ba waakenam. Jeiserem Jei aa jes mwangbisilim ga aas: Afa Kristus Jei im inip Jam se nunitonom, aamei jeber-jeber nafa Jemnaiserem Jebar seyafter jep ga isa gwena. ²⁸ Jewer ga ai angtane seyafter ga as ge towastababinenne Kristusem temawer. Ai unggwanfer as ge balbabinenne, angtane etam-etamawer ga jam sege tikwebili, ane ai bunarsusfer as ge towas-towastababili tousaiserem jeme. Ai gam ajewer ge eyebilirim, jega enggalf jei Kristusfar daamfennaber gam naawef, ane gwela jemnaiserem jem waakena tefner sene eyebili. ²⁹ Jeiserem jem temawer, ai awelna jeber-jeber uskambarsus ga ajem temawer gwebili, baabeta uskambar jeiserem jeme. Ai samfer jeiserem as eyebili, aam temawer Kristus Jei baabeta Jemnaiserem as mes gulbana abe, baabeta unggwandwasususerem.

¹ Ai enggam ai gunu aamei ijama towaswef, ai sembayanga Uwa Sanbagirfe unggwanfer as gwebabawena im temawer, ane angtane Kristen aa jei ge nwinbenerem kota Laudikya je jep mese, ane angtane Kristen seyafter nafsiserem jei ai as jei ne damtayanaiserem jep mese. ² Ai sembayanga as gwebabana enggalfe ini imna gam kanautabaipmif, ane aamei daamfennaber in ina gam isa nesiksonanna. Ane aamei bunarsusfer Taterisi Waakena Uwa Sanbagirmana waakenfer gam isa damdamulsini. Ane aamei ga isa towaswebili seyafter Uwa Sanbagiri fwater aa jes mwangbisilim, Jei aa jes mwangbisilim angtane jam ne towaswebiyen jamer abaka. Uwa Sanbagiri Jei aa jes mwangbisilim ga aas: Jei aamei is waakentababisini Kristus aa jes eyebilirim jeme. ³ Kristusmana tousa ba unggwandwasusum, ane tousa jeiserem jam barwebayan. Angtane enggam aa jei gangge gubilirim, "Ai tousaiserem ajama domolf.", jei ga Kristuster gane damdamtaasini. Angtane nensaiserem jei tousaiserem jam ne domolyan Kristus gamserem. ⁴ Ai jeiserem isa ajam towasulmini ibe Kristusem temawer, jega angtane nafsi ip is galap gane towas-towasulmit nafis-nafsi, ane jei ga sege gubili, "Taterisi ai ajesa towas-towastababilirim, taterisi jeiserem ba bunaram.", angtane jeiserem jei aamei is jam ne afaf-afaftababiyen, ane aamei safnant jei aa jes ne towas-towastababilirim jeiserem ijama onsobiyen. ⁵ Ai bai angtane ims ne afaf-afaftababife, ane jeiserem jem temawer, ai safe ibar seyafter nejama nwinyen, jengga ai alem inibe aamei isa jeber-jeber sarbabistaabonwena, ane ga jem temawer ai aafe taterisi aaiserem ip isas tulisulmini. Ini amna ase saaser-saaserfer folbana, aamei seyafter daamfen iniber ima gwena, ane aamei Kristus ginggitfer ima tebana. ⁶ Aamei Kristus Yesus imsama tebanant im Tuhanfe, jega jem temawer gasa gwe Jebar daamfennaber. ⁷ Aamei Jei ijama aftannuyon, jengga Jei jamer isa tebasini, tini unggwandusa gamserem ganam fyat sakarabara jei ga jem gam taasini onabe. Ane ga gemer isa gwena Kristus aa gemer gunurum. Ane aamei jeber-jeber Taterisi Waakena seyafter jeiserem ga jam isa taabili, ip is jes towas-towasulminirim. Ane aamei ga jem kanaufer isa fina. Ane jeber-jeber Uwa Sanbagirfe "Ase samfer golmini" ga igama gweyibene. ⁸ Aayai aamei ga inibaner isa gwena, aamei taterisi afaf-afafa gala-gala ijama onsobiyen, taterisi aa jes ne afaf-afaftababilirim. Angtane afwerfener taterisi angtanemana gam towas-towasulmini angtanefe, taterisi jeiserem Kristusminiweryan. Taterisi asal-asala jelemana aa jes gane golminirim, jei taterisi jeiserem ga jes gane towas-towastababili, ane taterisi bwata kapkaiserem jemniwer, bwata kapka aa jei ge wofebilirim ogiri aaiserem jebe. Afa aamei jes isa tikwebaabitinirim, taterisi angtanemana jeme is jem ne towas-towasulminirim, gam jega aamei ga isene tebabili twena gamserem, twena omwanap gemer gam jantonom. Aayai! Gasa sarsi waakenfer! ⁹ Gwela Uwa Sanbagirmana seyafter ga Kristusminip. Kristus Jeiba Uwa Sanbagiri galserem, Jei nenesyan. ¹⁰ Ane aamei daamfennaber ijewera gwenaram Kristusfar, jem temawer ga aamei gwela Uwa Sanbagirmana ga ima domolbana. Baabeta Kristus aa jes domolaram enggalf Jei Sanbakfe gam nwinf, baabeta jeiserem jeiba tagargarsusum baabeta nenes-nensa seyafter gemerserem jemniwer--baabeta malaikatmana, baabeta bwata bawasmanaiserem jemna, ane baabeta angtane sanbakmana. ¹¹ Angtane Yahudimana jei jen jena jener ne sunatsowena, ane jei enggam ge gubili jelem inibe, "Nei nes mes ne sunattababili, ane jega jem temawer neiba Uwa Sanbagirem angtanesam." Jengga jei tifni jelemana tefner ne targabaabisini, ane jei tifni tefner aa jewer ne targabaabisinirim, gam jega ini jemna Uwa Sanbagirfar jam ge waakenswebiyen. Gwanan galapserem ini imna unggwansusu enggalfe etam-etama kapkaiserem ijesa eyebif. Jengga namwer Kristus aa jes eyebilirim jeme, aamei ga ijama etamwena Uwa Sanbagirem angtanefe. Angtane aa jes ne eyebilirim jeme, aamei Uwa Sanbagirem angtanefe jem ijama etamweyan. Kristus Jei tifni imna Jam targabaipmisiyen, jengga ini imnaiserem ga is jes gwebaipmini Uwa Sanbagirfar gam waakenswef. Ane aamei Kristusfar daamfennaber ga ima gwena, ane Kristus ga aamei is Jem aftabunnu etam-etamawer. ¹² Aamei jame is galap ne baptistababilintim, jeiserem ga enggam aamei jam tere gamserem, ane ga is gane tertaannu Kristusfar seyafter. Aamei jame is galap ne baptistababilintim, jeiserem ga enggam gamserem aamei is mes irtebaabili Kristusfaner. Baptisana jeba gamam, aam temawer aamei baabeta Uwa Sanbagirmana unggwandwasususerem ga ijesa taayibene, ane baabeta jeiserem jeme Uwa Sanbagiri ga Kristus jem irtestena terewer. ¹³ Aamei nalefe Kristus ijama tebayan, gwanan jes galapserem aamei etam-etamabara, ane ini imna unggwan-giri kapkaiserem jam eyebife. Jega jem temawer mafnana imna jei jam gweyan. Jengga namwer Uwa Sanbagiri Jei gwela is mes golmini Kristusfar, ane Uwa Sanbagiri etam-etama imna ga is jem wirtabaipmini. ¹⁴ Hukumu Nabi Musa aa jes tulistababilim ga enggam baatultel: "Aaiserem samfer isa eyebili. Aaiserem safnant ijama eyebiyen." Hukumu jeiserem ga batasa galserem nem nenennabe--aawer nei, aawer Uwa Sanbagiri, aam temawer nei hukumu jeiserem nejama onsobiyen. Kristus aa galap terentem, Uwa Sanbagiri ga jes galapserem hukumu jeiserem galap borolsinint. Ane Jei etam-etama nemna nes mes wirtabaipmini. ¹⁵ Kristus aa jes eyebilirim jeme, Uwa Sanbagiri baabeta bawasmana, ane bwata bawasmana mesna gamjon mes tamserenbili. Ane jeiserem jeme, angtane seyafter ga sege towaswebili enggame, baabeta bawasmana bastouya, unggwandwasusyan. ¹⁶ Ga jem temawer, afa angtane aamei enggam is jam sene balbabilirim, tumilgala aamei ijesa tombaabilirim, ane ijesa telbebilirim jem temawer, "Tumilgala jeiserem safnant ijama tombaabiyen!", aamei angtane jeiserem safnant ijama sarbabiyen. Ane afa angtane hukumu ibe is jei towas-towasulminirim enggame masarem temawer: Nunu unggwandusa aa jep gam falaram aamei ga masaras igama eyebili; afa mwara ibirmi jam gam garauwityerem, aamei masaras igama eyebili; afa jei aamei is enggam sene towas-towastababilirim, aamei ga jamer isa onsobili nele nunu Sabatmana gamserem, angtane jeiserem safnant ijama sarbabiyen. ¹⁷ Hukumu seyafter jeiserem ga enggala angtane uwu fotonap gemer gam batonaram, fotonap ga num fenna gam batobana, uwu fotonap jeiserem je angtane igyen. Fotona jeiserem igyen, jengga fotona jeiserem nes jei gweretaamini angtane jeiserem. Hukumu jeiserem jemna nele ga gam jam onsobilibe, uwu fotonap aa gemer gam batonaram jes gemerserem. Hukumu jeiserem bastowaifer gweretababili Kristus aa jes eyebaabiliserem jem temawer. Hukumu seyafter jeiserem jemna igi ga bastowaifer, jengga Kristus aa jes eyebaabilirim seyafter jeiserem jei igsusu. ¹⁸ Afa angtane aamei enggam is jei towas-towastababilirim enggame, "Ai ana ames onabertana, ane malaikata ga ai pujitababili.", ane afa jei aamei jam is balbabilirim enggame, aamei mese malaikata sa pujitababi, angtane jeiserem safnant ijama sarbayan. Jei eserem aa jes gam damtabilirim, jeiserem ga jes gam nasbabili uskambar, ane jei aa jes nasbabilirim jeiserem jeme, jei jena ga jem se gaartena. Jengga seyafter jei aa jes nasbabilirim jeiserem ol kabwak, taterisi jei aa jes nasbabilirim taterisi jeiserem ogirmana. ¹⁹ Angtane jeiserem jei daamfennaber jam ge gweyan Kristusfar, Kristus Jeiba Duka nemnam. Kristus Jei nem Duka nei seyafter Jei nejeya tebanaram, ane nei Jebar daamfennaber, jes gemerserem tifni angtanemana duka jeman mesna jeiba daamfennam. Ane Kristus gwela yo baabeta nep nes mesam tetmini, ane nei ga nesa etamwena angtane safna daamfennaber ginggitfer jem gasa gwena. Uwa Sanbagiri ga gam mwangbisil jes gamserem. ²⁰ Aamei Kristusfar seyafter imsa tere, ane bwata kapka aa jei ge wofebilirim ogiri aaiserem jebe, aamei bwata kapka jeiserem baif imsa gwebabili. Afa ga gam jes gamserem, jeje bafa aamei ga ima gwena jes gamserem angtane ogirip aa gemer naawenaram, bwata kapkaiserem ga jeter ne onsobili? Ini amna as mes jenbana im temawer! Jeje bafa aamei hukumu aas galserem gala ga ima onsobili, aaf aa gemer tulisulurum enggame: ²¹ "Aaiserem safnant ijama tebabiyen! Tumilgala jeiserem safnant ijama unggwasbiyen jam enolfe! Aaiserem safnant ijama enentababiyen!" ²² Hukumu jeiserem ga angtane aa jes ne towas-towastababilirim enggalfe aamei ijama eyebif, hukumu jeiserem jei Uwa Sanbagirminiweryan. Uwa Sanbagiri tumilgala nes jes kitulminirim nebe ga enggalf jam tombaabif. Tumilgala ane seyafter gemerserem jeba ogirmanam seyafter. Ane seyafter jeiserem sege barwebisi. ²³ Angtane hukumu jeiserem aa jei ne towas-towastababilirim ga enggam ne towas-towastababili, "Aamei ina ga jam isa onabersona, ane malaikata ga isa pujitababili. Tifni ilemana ga isa tamtamtababili. Ane ijesa eyebilirim jeiserem jeme, aamei ina ga jem isa gwaarasona enggame, aamei ina imsama onabersona." Angtane jam aa galap ne sarbilirim jei aa jes ne towas-towastababilirim jeiserem, jei ga aa ge gubili, "Jei jes ne towas-towastababilirim, jeiserem ba waakenam." Jengga jei aa jes ne towas-towastababilirim, jeiserem kapka. Jeiserem taterisi afaf-afafaiserem ga jes ne towas-towastababili. Jei aa jei ne towas-towastababilirim, jeiserem nele jemna gamserem afa nei jes nesa onsobilirim, ane gemer ga nesa gwena aa jes ne towas-towastababilirim, jeiserem nei nes jam batobaabiyen enggalfe nei nejama tikwef kapkaiserem jes nasbiliserem nelem inibe, ane jam tikwef kapkaiserem jes eyebiliserem jewer. Angtane jam aa galap ne tikwebitinirim jei aa jes ne towas-towasulminirim, angtane jam aa jei ne sarbilirim taterisi jeiserem, jei jen jena jafner ga aane detenanna.

¹ Aamei Kristusfar seyafter Jebaner imsa tere, jengga Uwa Sanbagiri Kristus Jam aa galap irtenentem terewer, Jei aamei is mes irtebaabili seyafter Kristusfaner, ane Jei gwela ibirmi Jebaner is mes golmini. Kristus Sanbakfe ga aa nwini taman waaken-giribe, Uwa Sanbagirem taasfolawer. Ga jem temawer ini imna unggwanfer ga apgal jigala taman waaken-girip aaiserem is jep sege folbamini, jengga ini unggwan-giri apgal jigala ogirmanaiserem jep is jam ge folbamiyen. ² Enggam ga isa gunu, "Ini amna unggwan-giri enggalfe Uwa Sanbagiri aa jes bilirim jam eyebife jeiserem ajam eyebif. Ai nele Kristusmana jeiserem ajes onsobaf, ai bai nele angtanemanaiserem jam onsobafe." ³ Gam isa gunu, aam temawer jame igalaba towaiwenantam Kristus Jam onsobalawer, jes jepserem aamei nele angtanemana imsa aftannunt jam onsobafe. Ane aas jepserem ini imna Kristusfar ga daamfennaber, ane aameiba angtane Uwa Sanbagirmanam. Angtane ini imna is jam ne damtabiyen, afa ini imna Kristusfar daamfennaber, afa fas. ⁴ Jengga Kristus aa jep warausanyaram ogiri aaiserem jebe, aamei nafa Jemnaiserem Jebar seyafter jepga isa gwesa, aam temawer Kristus Jei gwela yo baabeta is mesam tetminint ibe. ⁵ Ga jem temawer, ini imna unggwan-giri is jei ge folbaminirim enggalfe kapkaiserem gam eyebif, ini jeiserem ga jam isa fasawolwili, aamei jeiserem gamjon ijama sarbabistaabonyan. Etam-etama seyafter maaryena galserem ijama eyebiyen. Ini imna unggwan-giri enggalfyan maaryens gwebife, ane galgala unggwanfer jewer gam damtabif. Afa ini imna unggwan-giri galgala unggwanfer jewer gam damtabif, jeiserem ga enggala aamei nensar tefner igama damdamulsif. Afa ini imna galgalem temawenefener is gangge folbaminirim, afa ga gam jes gemerserem, gam jega ini imna unggwan-giryen enggalfe Uwa Sanbagiri gam damdamtaasife, ane aamei Uwa Sanbagiri ijama pujiteyen. ⁶ Angtane etam-etama kapka seyafter jeiserem aa jei gane eyebilirim, ane Uwa Sanbagirs sarbayanaiserem, Uwa Sanbagiri Jei angtane jeiserem ga jam se nasbabili, ane Jei angtane jeiserem gase tamtamtababisi. ⁷ Aamei nalefe Kristus ijama tebayan, aamei gwanan ga angtane jes galserem ga gala, aamei mese Uwa Sanbagiri ijama sarbayan. Ane jes galapserem aamei etam-etama kapka seyafter jeiserem ga imsa eyebilint. ⁸ Jengga namwer aamei etam-etama seyafter aas galserem jewer ga jam isa tikwena: Angtane ijama nasbabiyen. Kapkaiserem ijama eyebiyen. Taterisi kapka ijama nasbiyen ilem inibe angtane nafsiserem jem temawer. Angtane ijama imei-imeitababiyen. Ula kapka maaryens gwebife, aamei taterisi jeiserem ijama nasbabiyen. ⁹ Aamei in ina ijama afaf-afafsoyan, aam temawer aamei imsama tikwenant gwela kapkaiserem jewer gwanan ijewera gwenantam, ¹⁰ ane aamei imsa towaiwena ibirimfer gwefe. Uwa Sanbagiri aamei is mes eyebaabili angtane ibirimfe, ane Jei jeber-jeber se eyebili, jega aamei gam isa etamwena Jei galserem. Uwa Sanbagiri ga Jener eyebili jes gemerserem, jega enggalf aamei bunarsusfer Jei gam isa damdamtaasini. ¹¹ Uwa Sanbagiri aamei is gase eyebaabili ibirimfer, aamei ina enggam ijama gitmiyen, "Nei nafis-nafsi." Aaiserem igyen afa aamei angtane Yahudimana, afa angtane Yahudimanyan. Aaiserem jei igyen afa aamei jam sunattwela, afa aamei jam sunattweyana. Aaiserem igyen afa aamei awelna angtane nafsimana igam gwebili, afa aamei angtane sanbakf igam gwena. Jengga igsusu ga Kristus tefner, ane Jei ga nem inip nwini, nei angtane Jei nejeya tebanaram. ¹² Aameiba angtane Uwa Sanbagirmanam. Jei ims nesiktababili, ane Jei ims destabaabili enggalfe aamei igama etamwef angtane Jelemanfe. Ga jem temawer aamei ijesa eyeipminirim angtanefe, seyafter jeiserem ini waakenmer isa eyeipmini. Ina ga jam isa batominenne aamei ina ijesa balbabilirim jeme. Ini imna ga jam isa onabertabana. Seyafter ijesa eyeipminirim angtanefe, jeiserem ga ini foler-folermer isa eyebili. Angtane safe kapkaiserem is jam sene eyeipmini ibe, aamei jafner isa fina abakfer. ¹³ Aamei ini kapka ijama damtabiyen enggalfe, kapka is jes gane eyeipminirim ibe jeiserem gam fwayenulmif jebe. Jengga kapka jeiserem is jes gane eyeipminirim, ga jam igama nasbili waakenfer jam borolfe. Etam-etamawer ina jam isa nesiksonanna, Kristus gemerserem Jei etam-etama imna is gemer wirtabaipminirim. ¹⁴ Ane in ina ga jam isa nesiksonanna, jeiserem ba igsusum seyafter afweraiserem jemniwer. Aamei ina ijeba nesiksonannaram, jes galapserem aamei daamfen iniber ga ima gwena. ¹⁵ Uwa Sanbagiri Jei ims jenbebili enggalfe safna daamfennaber gam gwef. Ane ini Jemna unggwan-girsusu enggalfe ini imna waakenfer is jam sege folbaminirim angtane nafsiserem jebar. Kristus mesam eyebili jega ini imna waakenfer is gam sege folbamini angtane nafsiserem jebar. Jega jem temawer angtane nafsiserem jebar ga waakenfer isa gwena. Ane Uwa Sanbagiri jeber-jeber ga isa bala, "Ase samfer golmini." ¹⁶ Taterisi Waakena Kristusmanaiserem ga jeter isa waakenulsini ilem inibe. In ina ga jam isa towas-towasona nele waakenaiserem jem gwefe jem temawer. Ane in ina ga jam isa esorolsona tousa jes igam domolaram jeme. Simala mazmurmana, ane simala rohanimana, ane taterisi simala Mafnana Uwa Sanbagirmana ip is jes kitulminirim, seyafter jeiserem ga isa twola enggalfe, Uwa Sanbagiri gam pujitef ini saaser-saasermer. ¹⁷ Seyafter aamei ijesa eyebilirim, ane seyafter ijesa balbabilirim, seyafter jeiserem aamei isa eyebili ane isa balbabitowena bosna Tuhan Yesusmanaiserem jeme. Ga isa bala Uwa Sanbagiri, Uwa nemnaiserem, "Ase samfer golmini, seyafter Kristus ap as jes eyeipminirim jem temawer." ¹⁸ Aamei wini anggwanabaraiserem, anggwana ilemana ga jamer igam sarbana. Wini Tuhan aa jei ne tikwebaatinirim ga jes gamserem ga gemer gam eyebili. ¹⁹ Aamei anggwana winibereiserem, wini ilemana ga jam igam nesikulu. Wini safnant ipsam nasbit, ane kapkaiserem ijam eyebiyen jebe. ²⁰ Aamei tantantane, aamei iye uwa ilemana taterisi jemna ga jam igam saripmini seyafter gemerserem jem temawer. Afa aamei jeiserem jam igam eyebilirim, ini Uwa Sanbagirmana ga saaser-saaserfer gam folbana. ²¹ Iye mese uwa, aamei tanefe kapkaiserem ijama eyeipmiyen, jega tanna jeiserem ini jemna kakalmer galap gangge folbamini. Afa aamei kapka jam igam eyeipminirim jebe, ini jemna gangge jenbamini. ²² Aamei angtane awelna nenesfe ijeya gwebilirim, angtane sanbak ilemana ga jam igam sarbana seyafter aa jes gam bilirim jem temawer. Awelna ga waakenfer igama gwebili--enggamyan, angtane sanbak ilemana jam igama damtanaram, aamei akar-akareme awelna gamjon ga igama gwebili, jega angtane sanbak imna jeiserem aamei is gam balbabifi enggame aamei awelna waakenfer ima gwebili. Jengga safe jei aamei is jam gerebaabisneneyen awelnabe, aamei awelna jei aa jes gam bilirim, awelna jeiserem ga ini waakenmer igama eyebili, aam temawer aamei Tuhans ima nesiktene, ane enggalf Tuhan Jei aamei is gam balbabife aamei awelna waakenfer ima gwebili. ²³ Awelna seyafter gemerserem ip is jes gane golminirim, aamei awelna jeiserem ga waakenfer igama gwebili ini saaser-saasermer, awelna jes gemerserem Tuhan jeme ip is gemer gam golmini, ane awelna gam ke angtaneminiwerfener. ²⁴ Aamei ijama dirinswebiyen enggame aamei Tuhanminiwer fwaina isa domolsa. Tuhan aa jes menetabaipmisinirim angtane Jelemanaiserem jebe, aamei seyafter jeiserem isa damtabisi. Bunar-bunarsus Kristus Jeiba im Sanbakam. ²⁵ Ane angtane afa kapka aa jei gane eyebilirim, Uwa Sanbagiri Jei angtane jeiserem se tamtamtababisi kapka aa jes gane eyebilirim jem mwonggaber. Uwa Sanbagiri Jei mwongga daamfenna tefner se girinsi angtane seyafter gemerserem jebe. Uwa Sanbagiri Jei enggam Jam eyebiyen: Angtane afweraiserem etam-etama kapkaiserem aa jei gane eyebilirim, Jei angtane jeiserem gam tamtamtababili. Ane angtane nafsi etam-etama kapkaiserem aa jei gane eyebilirim, Jei Jam tamtamtababiyen. Gamyan.

¹ Aamei angtane sanbakfe ijeya gwenaram, aamei waakenater isa eyeipmini ini foler-folermer, angtane awelna imnip aa jei ne gwebilirim jebe. Ane afa jei awelna waakenfer gane gwebili, aamei jegme fwaina waakenater igama golmini jebe. Ijama dirinswebiyen, aamei mese angtane aa jei nwinirim im Sanbakfe, Jei taman waaken-girip. ² Aamei sembayanga jeber-jeber isa gwebabuwena. Aamei sembayanga jam isa gwebabilirim, aamei taterisi nafis-nafsi ijama balbabiyen ilem inibe. Jengga aamei sembayanga jam igama gwebanaram, ini imna unggwan-giri ga is Uwa Sanbagirminipfener gangge folbamini. Ane aamei sembayanga jam igama gwebanaram, Uwa Sanbagiri ga igama bala enggame, "Ase samfer golmini." ³ Aamei sembayanga am temawer ga as isa gwebamini Uwa Sanbagirfe, jega Uwa Sanbagiri Jei dwona ap as gase golmini enggalfe ai taterisi Kristusem temawer ai agma nasbinennefe, taterisi angtane gwanan jam ne towaswebiyeneiserem. Ai taterisi jeiserem ajewer nasbinennerem, ai bwiyip ga ajem temawer nwini. ⁴ Uwa Sanbagiri Jei ai as mes balant ai taterisi jeiserem ajam nasbinennefe. Jega jem temawer aamei sembayanga isa gwebana jega ai taterisi jeiserem waakenfer gam as nasipminenne, Uwa Sanbagiri ap as gemer bilibenentem jes gemerserem. Ane ai waakenfer ajewer nasipminennerem, jeiserem jeme angtane waakenfer ga sene damdamulsini. ⁵ Aamei ijeba gwenaram angtane Yesus jam tebayanaiserem jebar, aamei tousaiserem ga jemfener isa gwena, ane gwela waakenaiserem ga jem isa gwena. Dwona jeber-jeber jam igama domolaram, aamei Taterisi Waakena jeiserem Yesusem temawer ga igama nasipmini angtane Yesus tebayanaiserem jebe. ⁶ Seyafter ijesa nasbaipminirim, jeiserem jem ga isa malin-malintababili, jega angtane is jei ne sarbabilirim, ini jemna saaser-saaserfer ga sege folbamini. Ane aamei ga jamer isa towaswena enggame, ga fomfom isa tamawolbaabili angtane aamei is jei ne tenebaabiwenaram. ⁷ Tikikus nem afelna nejesa nesiktenerem, jei aamei is towas-towastababili amnip aa je etamwenaram bwiyibe jem temawer. Jei awelna Tuhanmana abar waakenfer seyafter ai ge gwebili. ⁸ Ai jei as baftana imnip gwife enggalfe aamei gwela amna as igam towasweipmif, ane ini imna saaser-saaserfer is gam ge folbamif. ⁹ Onesimus jei Tikikusfar sege sofna. Jei ibar safna daamfennam kota Kolose je, aamei Yesus ijeya tebanaram. Jei angtane awelna waakenfer aa jei gwebilirim, ane ai jei ajesa nesiktenerem. Jei Tikikusfar aamei isege towas-towastababili seyafter aaf aa jei etamwenaram jem temawer. ¹⁰ Aristarkus ai ajebar ge nwinirim bwiyibe, jei aamei is enggam balbabili, "Kelek, waakenfer sa gwe!" Markus jeime is gemer balbabili. Jei Barnabasem afelna. (Aamei taterisi ai isa ajes baafulminintim ibe, aamei taterisi jeiserem imsama sarbili enggalfe, afa Markus jei jam se gwinaram imnibe, jei ga waakenfer isa tebana.) ¹¹ Angtane nafsi aasaje bosna Yosua, ane bosna afwer ga Yustus, jeime aamei is enggam balbabili, "Kelek, waakenfer sa gwe!" Angtane Yahudimana nawer-ningna jeiserem Tuhan Yesus aa jei ne tebanaram, ai awelna ga ajebanefenera gwebili. Angtane Yahudimana nafsi Yesus aa jei ne tebanaram, jei awelna amna as jam ne batoibeyen. Aristarkus, Markus, ane Yustus as jenefener ne batobana enggalfe ai taterisi Uwa Sanbagirmana ajebara nasibenenefe, ane angtane Uwa Sanbagiri gam sene tebana, ane Uwa Sanbagiri Jei jem Sanbakfe gase gwena. Angtane nawer-ningna jeiserem jei as waakenfer ne batobana. ¹² Epafras jeime is enggam balbabili, "Kelek, waakenfer sa gwe!" Jei mese ibar safna daamfennam Kolose je, aamei Yesus ijeya tebanaram. Jei awelna Kristus Yesusmana gam gweyibene, ane jei sembayanga im temawer baabetmer jeber-jeber gwebawena. Jei sembayanga enggalf gwebana jega aamei kanaufer gam isa fina, ane aamei waakenfer gam isa sara Yesus Jam tikwebaatiliserem jem temawer, ane aamei Uwa Sanbagiri aa jes bilirim jam eyebife, jeiserem aamei waakenfer ga isa onsobili. ¹³ Ai awelna Epafrasmana aner amesam domolbanant, ane ai ga isa jewer towastababili enggame Epafras jei awelna ip is baabetmer gweyipmini, ane angtane aa jei ge nwinbenerem kota Laudikya je, ane kota Hirapolis jep mese. ¹⁴ Doktor Lukas nei nejesa nesiktenerem, ane Demas jei mese, jei nawersamer is enggam ge balbabili, "Kelek, waakenfer sa nwin!" ¹⁵ Aamei ijeya nwinirim kota Kolose je, aamei taterisi aaiserem amniwer angtane Kristen kota Laudikya jep aa jei ge nwinbenerem ga enggam isa balbabili, "Kelek, waakenfer sa gwe!" Ane Nimfa jegme gemer isa bili, ane jemata aa jei ge betwebilirim Nimfam jenabe jegme gemer isa balbabili. ¹⁶ Afa surta aaiserem jep jam isa gerabistenaram jamer taban, gamjon jewer ga isa baafulmini jemata Laudikyamanaiserem jebe enggalfe jeime gam ne gerabistef. Surta ai ajes tulisulminirim jemata Laudikyamanaiserem jebe, surta jeiserem jame is jep ne baafulmitnerem, aamei surta jeiserem ga iner isa gerabistena, surta Laudikyawer ip is jes ne baafulmuwityerem. ¹⁷ Ane aamei angtane Kolosemana, aamei Arkipus isa towastana enggame, awelna Tuhanmanaiserem jep aa jes ne gulbanaram, awelna jeiserem ga jam se tabanulu! ¹⁸ Ai taterisi seyafter surta aaiserem jebe ai ajafner nasowena, ane angtane nafsiserem ga jei tulistababili. Jengga taterisi aaiserem ga aner tulisulu: |bAi Paulus is enggam ai balbabili, kelek, waakenfer sa gwe!|r Aamei ai as ijama dirinswebayan, ai bwiyip gemerje agemer nwini! Ai sembayang as gwebana Uwa Sanbagiri Jei waakena Jelemanaiserem ip is gase golmini aamei seyafter gemerserem.