Rasul

Rasul

¹ Teofilus am afelna, bukunu amnaiserem gwanan jeiserem, ai ames tulistaabilint seyafter gemerserem Yesus aa jes eyebilintim jem temawer. Ane ai ames tulistaabilint Yesus aa jes towas-towastababilintim, nunu Yesus aa jem tawawulsuntum Jei awelnap jem gwefe, ² jamere nunu Jei aa jem tawenantam taman waaken-giribe. Yesus nalefe Jam taweyan taman waaken-giribe, Jei angtane aa jes destabaabilirim Rasulf gwefe ga balbabili Mafnana Uwa Sanbagirmanaiserem jem baabeteme. Jei Rasul-rasulfe ga aas towasulmini, jei aa jes ne eyebiliserem. ³ Yesus Jame aa tererem, Jei Jena gamjon ga gweretana nunu abakfer ga empat pulu, jamere angtane jeiserem jei aa jes destabaabilirim jei aa ge towaswebili enggame, bunar-bunarsusfer Yesusba jamam gwena. Jei Yesus ga aane damtana, ane Jei jebar ga aa ge nasbawena nunu Uwa Sanbagirmana jem temawer, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe. ⁴ Nunu daamfenna jei seyafter aa galap ne dwenaram Jebar, Yesus enggam ga balbabili, "Kota Yerusalem ijama mirsoyan, gwanan ga jeber isa fina, Mafnana Uwa Sanbagirmanaiserem Jes isa fibili. Mafnana jeiserem Uwa Amna ibe is mesam bilipminint ibe is Jam golmife, ane Ai mese Ai ibe is Amesam nasipminint Jem temawer. ⁵ Yohanes jei aamei is fom baptistababili, jengga abakferyan Ai aamei ga isAs baptistababifi Mafnana Uwa Sanbagirmanaiserem jeme." ⁶ Gamjon jes jepserem, angtane Yesus aa jes destabaabilirim jei Yesusfar ga aa ge betwebili. Jei Yesus ga aane tenebana, "Tuhan, Aamke namwer negeri Israelem Sanbakfe ke Aamei Is nwini, angtane gwanan aa gemer naawelam sanbakfe?" ⁷ Yesus ga tamawolbaabili, "Aamei ijama towaswemiyen tanggala yo nunu jeiserem. Uwa Alemana Jener se destabili jeiserem gas etamwena. ⁸ Jengga aamei baabeta isa domolfa, Mafnana Uwa Sanbagirmana aa jep iretyaram imnibe. Ane aamei angtane nafsiserem ga isa towas-towastababili Am temawer kota Yerusalemminibe, ane ona Yudeyaminibe seyafter gemerserem, ane ona Samaryaminip, ane jamer ogiri fwesabo." ⁹ Yesus jeiserem jama tabanulurum jam nasbilibe, Jei ga tawena taman waaken-giribe Jei jemer ne gerebaiswena, ane gara ga matana Jei, aa jep ne gerebaiswenaram. ¹⁰ Gemer aa galap ge gerebaiswenaram winsiwer Yesus aa jewer tawenaram, aafer-aafer angtane naura ga aa ge fyatetya fene sinsinsusu jebaner jem tarnabe. ¹¹ Ane ga ge balbabili, "Aamei angtane ona Galileyamana, jeje bafa aamei jeber ga ima fina, ga ima gaaraiswena winsibe? Jeiserem Jeiba Yesusam aa Jei tawenaram taman waaken-giribe. Jei aamei is Jam mirtebitefala, ane Jei gamjon se waraunu, aamei igemera gerebaiswenaram, jes gamserem ga gemer se iretya." ¹² Jewer ga Rasul-rasulu jeiserem jei taarentumu bosna Saitun ga aane mirtene, gamjon ga kota Yerusalemwer ga aa ge waraubili. Taarentumu jeiserem jemna bijauwer kilometer daamfenna Yerusalemwer. ¹³ Jame aa galap ge forobilirim kotanabe jena nomkef jei jep ge nwinbeleiserem, jei ga aa ge tabwili mwona tagarap aaiserem jebe. Rasulu jeiserem ga aas: Petrus ane Yohanes, Yakobus ane Anderyas, Filipus ane Tomas, Bartolomeus ane Matius, Yakobus tane Alfeusmana, Simon angtane Patriot, ane Yakobus nafsiserem tane jemna Yudas. ¹⁴ Jei jeber-jeber seyafter daamfennaber gangge betwebili, ane ini daamfennaber sembayanga ga gane gwebawena. Jei wi mese jebaner gam betwebili sembayanga jam gwebafe. Maria ene Yesusmana, ane Yesusem oson mesna jei mese jebaner gangge betwebili. ¹⁵ Nunu daamfenna jeme, angtane Yesus aa jei ne tebanaram ga aa ge betwebili sembayanga jam gwebafe. Angtane jeiserem unggwanfer ga engbar ga enggammer 120. Ane Petrus ga irwena jam nasowefe, jei enggam ga balbabili, ¹⁶ "Am afelen mesna, Mafnana Uwa Sanbagirmana Jei Raja Daudfe ini Jeyam gerbal enggalfe tateris Yudasem temawer jam tulistababife Taterisi Uwa Sanbagirmanaiserem jebe. Jei fwater aa jes tulistaabilim Yudas aa jes eyebiliserem jem temawer, jeiserem se tabanwena. Ga enggam, Yudas jei angtane kakalaiserem jei mes balbabilint Yesus jam ne tebafe. ¹⁷ Yesus Jei Yudas mesam balant, jei mese awelna nemnaiserem jes gwebife, ane Yudas jeiserem ba nem afelnam." ¹⁸ (Yudas jei kapkaiserem aa jewer eyebilintim, jei doini ga jem temawer tebanant. Doini jeiserem ona ga jem armantanant, ane jep ga jan, witifini ga aane bitnebaatinint unu gane subatyant, ane ga terent. ¹⁹ Angtane seyafter kota Yerusalem je gemerserem, jei taterisi jeiserem mesam ne towaswebilint. Ona jeiserem ga enggam ne balwena jelem oleme, Akeldama, igi jemna ga enggam "Ona Aawisibere".) ²⁰ Petrus gamjon ga balbabili, "Buku Mazmurube jep mesam baatultel enggame: ’Taman nwini jemna gwanan saf se taman feneswena, angtane jep gwanan jam nwinyen.’ (Mazmur 69:25) Ane gamjon jegme enggam mesam baatultel: ’Safnant, angtane nafsiserem jem dwenabe jei se nwini.’ ²¹ Jega jem temawer am afelen mesna, namwer aas jepserem nei angtane nafsi afa jam nesa destabana, angtane nei nejebara wofowenaram Yesus nebar galapserem, ²² nunu Yohanes aa galap towaiwuluntum angtane jam baptistababife, jamere nei Yesus neya damtanant Jei aa galap tawenantam taman waaken-giribe. Angtane nei jesa destabanaram, jeme angtane nafsi gase towas-towastababili Yesusem temawer nei gamserem. Jei enggam gase towas-towastababili, ’Yesus Jei mesam irwena aa jewer terentem.’ " ²³ Jepga angtane jep aa jei ge betwebilirim, jei angtane naura ga aane gitmini, Yusuf afwer bosewer Barsabas (ane afwer bosewer ga Yustus), ane afelna ga Matias. ²⁴ Jes jepserem jei sembayanga seyafter ga aane gwebana, enggam ga aa ge gubili, "Tuhan, Aamei tousa ini angtanemana seyafter gemerserem. Yudas jei awelna Rasulf gwefe mes mirultefala, jei mes tere. Jega jem temawer angtane naura aaiserem, afelna abe as jam Is destabaamini, bunarsusfer ga nansa Yudasem dwonap jei gwefe. ²⁵ Jei awelna gase eyebili, Rasul Yudas aa jes mirultefalantam, Yudas jei jam sofwena tampata jei jewer sofwelaiserem jewer." ²⁶ Sembayanga jam aane tabantanaram, angtane naura jeiserem jemna bosna ton touyap ga aane tulisomini, ton touya ga aane gin-ginsona, ane tuna bosna Matiasmana aa jep ne tulisulbonorom ga jentya. Jepga Matias ga aane gaartena Rasulfe nomor dua belas, angtane Rasul sebelas jebar ge wofobafe.

¹ Nunu Pentakosta jame aa galap falaram, angtane seyafter Yesus aa jei ne tebanaram jena daamfennaiserem jeber ga aa ge betwebili jenabe. ² Tisana niniber ga aane sarbili winsiwer aa je iretyaram, bwona uskambar ga nane gwebat. Ane bwona jeiserem jena seyafter gemerserem jep ga aane kabwatenanna, ane angtane Yesus aa jei ne tebanaram jenap nwini seyafter gemerserem jei ga aane sarbili. ³ Jewer ga maflama tokwa galserem ga aane damtabili aa ge bwere-bwerebuwena angtane daamfen-daamfennem jem sagabe. ⁴ Mafnana Uwa Sanbagirmana angtane seyafter jeiserem ga tebabili, jepga jei ga aa ge towaiwebili ula nafis-nafsiserem jem jam ge nasbawefe. Jei ga aas ne nasbabili ula Mafnana Uwa Sanbagirmana aa jes golminirim jam nasewefe. ⁵ Jes galapserem angtane Yahudimana jei ga unggwanfersus kota Yerusalem je aa jei ge nwinbenerem, jei negeri nafis-nafsiserem ga jewer ge forobuwetya ogiri seyafter gemerserem. Jei Uwa Sanbagiri jei ne tebana, ane nunu jeber-jeber jei sembayang aane gwebabuwena. ⁶ Tisana jeiserem jame aa galap ne sarbilirim, angtane unggwanfersus jep ga aa ge betwebili. Jei seyafter jam ge bitbitwebili, aam temawer angtane Yesus aa jei ne tebanaram jei jelem olem aa jewer ge nasbawenaram. ⁷ Jei uskambar jam ge bitbitwebili, ane jepga aa ge gubili, "Angtane aa jei ge nasbawenaram ula unggwanfer aaiserem jeme, jei ona daamfenna jewer ge jalbili, ona Galileya! ⁸ Nei ula nemnaiserem daamfen-daamfennem ga fomfom nesa sarbabisini? ⁹ Nei angtane ona Partya, Medya, Elam mese; nafsi ona Mesopotamya, Yudeya, ane Kapadokyaminiwer afwer nejewera jalwena. Ane afwer ga aawer ge jalbili propinsi Pontus ane Asya, ¹⁰ Frigya, ane Pamfilya, negeri Mesir ane ona Libya, kota Kirene aa jem gwetmanfer nulnaram. Angtane afweraiserem nemniwer jei ga kota Romawer ge jalbuwena, ¹¹ jeiba angtane Yahudimana ane angtane anggwabura nafsiserem jei mese agama Yahudi aa jei ne taabilirim. Angtane afweraiserem jei naantei Kretamana, ane afwer negeri Arabwer ga aa ge jalbili. Nei safe ona nafis-nafsiserem nejewera forowetya, nei neya sarbabili nem olem ge nasbawena. Jei ga aas ne nasbili seyafter waakensususerem Uwa Sanbagiri aa jes eyebaabilirim jem temawer!" ¹² Angtane jeiserem seyafter ge bitbitwebili, jena ga aane taanaaminenne, "Aaiserem je fomfoma?" ¹³ Jengga angtane nafsi afwer jei jam ne bweraltababili, enggam ne balbabili, "Angtane jeiserem jei jam ge mabukswebili." ¹⁴ Petrus ga irwena sebelas Rasulu afwer seyafter gemerserem jebaner, ane Petrus ol dagame enggam ga nasowena angtane unggwanfer jem tarnabe, "Aamei angtane Yahudimana ai gemerserem, ane angtane seyafter ijeya nwinirim kota Yerusalem je, ai taterisi aaiserem ibe isa ajam nasipmif. Aamei taterisi aaiserem ga waakenfer isa sarbisini. ¹⁵ Aamei enggam ima gunu, angtane aaiserem jei jam ge mabukswebili, jengga fas, namwer aas jepserem jem sembilan gwinibener. ¹⁶ Jengga aafe aa je etamwenaram ga enggam, Uwa Sanbagiri Nabi Yoel mes bal, ane Nabi Yoel jei nep ga nes jei golmil: ¹⁷ Uwa Sanbagiri enggamam gul, ’Nunu umwef jepserem, Ai Mafnana Amnaiserem As golmisi angtane seyafter gemerserem jebe, jega girtowai tane ane yafontowai tane imnaiserem jei taterisi Amna As ga sene nasibenense, ane angtane tansi ane anggwabak jei eserem sene damtabisi, taterisi Ai Ajes balbaipminirim jebe. ¹⁸ Ane angtane awelna Amnip aa jei ne gwebilirim, wi mese anggwa, Mafnana Amnaiserem As golmisi nunu jeiserem jeme, ane jei taterisi Amnaiserem ga sene nasbisi. ¹⁹ Ane Ai As eyebisi angtane gwanan jam ne domolyanaiserem winis sagabe ane ona gwonabe, angtane sene gerebaabisi aawis, ane tokwa, ane nunggwan murmur. ²⁰ Gwere gwinf se etamwesa, ane mwara se berberswesa, aawisi gamserem ga gas etamwesa, seyafter jeiserem sege etamwebisi, nalefe nunu unggwandusa Tuhanmana jam folbayan, nunu Jei jem foryalaiserem. ²¹ Jes jepserem angtane afa Tuhan aa jei ne gwarenbanaram jam batobaabifi, Tuhan Jei angtane jeiserem se waakentababisini.’ (Yoel 2:28-32) ²² Am afelen mesna angtane Israelmana, taterisi aaiserem ga waakenfer isa sarbisini ai jam as nasbilirim: Yesus angtane tamna Nasaretmanaiserem, aamei imsama towaswena Jem temawer enggame, Uwa Sanbagiri Jei Yesusf awelna mesam gulbana Jei ibe is jes eyeipmiliserem, Jei ibe is mesam eyeipmini aamei ijama domolyanaiserem im nenennabe, bwembwemayo ane nafis-nafsi, seyafter jeiserem jeme aamei inera towaswena. ²³ Angtane Yesus ip is mes ne gaarmini, ane Uwa Sanbagiri mes towaswena aamei kapka ijesa eyeibeleiserem Jebe. Ane Jei ga gunu, ’Sya, aamei sa eyebi angtane kakala nafsiserem jebar.’ Aamei Yesus ga ima munbono, ti salibip ima daktanswena. ²⁴ Jengga Uwa Sanbagiri Jei mes irtestena angtane jam tereserem jemniwer. Yesus bitisiwer mes aftannu, aam temawer baabeta fas Yesus jei tebasili bitisibe. ²⁵ Raja Daud enggam mesam nasowel Yesusem temawer: ’Ai Tuhan jeber-jeber ai gerebawena, Jei am taasfolawer gam fina, ai as jam gerebaasnenefe, jega angtane kapkaiserem jei fas ai as jam ne erelteyen. ²⁶ Jei ai as jewer gerebaasnenewenaram, ini amna saaser-saaserfer ga as jem temawer folbana, ane ai taterisi waakenater ai nasbabuwena. Ai safe jam as tere, ini amna ase unggwan-girem folbana Uwa Sanbagirem temawer. ²⁷ Aamei ai jafner as Ijam gerebayan ona angtane jam tereserem jebe, ane Aamei, Angtane Imna Igam nesiktene, Ijam tatwaltaasiyen Jem futunu jam butswefe. ²⁸ Aamei nele waakenaiserem Ap Asi mesam towastabana enggalfe Ai waakenfer aa jep gwelaiserem. Aamei Ase jewer egantaasinirim Ilem tarnabe, ane ini Amna ga ase jem temawer saaser-saaserswebana.’ (Mazmur 16:8-11) ²⁹ Am afelen mesna, ai isa jamer bilipmini, aamei gam ima towaswena enggame Raja Daud asal-asalgir nemna. Jei mes ter, ane tonmwa bitisip ga aane gaataantel, ane tonmwa bitisi jeiserem gemer fala nemnibe nunu namwer aaiserem aafer fala. ³⁰ Jengga Daud jei gwanan gemer aa galap gwelam, jeiba nabisam, ane jei mesam towaswebil Uwa Sanbagiri aa jes bilibelem jebe. Uwa Sanbagiri ga aas bilibel, ’Bunar-bunarsus Ai tane asal-asala imnaiserem as gaartena Rajafe, aamei gamserem.’ ³¹ Jei tousa Uwa Sanbagiri aa jes eyebiliserem. Raja Daud mes gul Mesias, Angtane Uwa Sanbagiri Jei bunarsus aa Jes balam Jam baftanafe, Jei se irwena angtane jam tereserem jemniwer. Raja Daud enggam gul: ’Uwa Sanbagiri Jei Raja jeiserem jafner Jam gerebayan ona angtane jam tereserem jebe, Jemna tifni jam butsweyan.’ ³² Yesus aaiserem Uwa Sanbagiri ba Jesam irtestena terewer, ane ai seyafter bunarsusfer amsa damtana. ³³ Uwa Sanbagiri Yesus aa galap gaartenaram Jem taasfolawer taman waaken-giribe, Uwa Sanbagiri Jei Mafnana Uwa Sanbagirmana ga Jes gulbana gwanan aa jes bilibenerem. Gam jega seyafter aamei ijesa domolaram, ane ijesa sarbilirim aafe, jeiserem mes ge etamwebili aam temawer Yesus Mafnana Uwa Sanbagirmana ap mes golmini. ³⁴ Raja Daud jentowai jam tauyan taman waaken-giribe, jengga jei ga enggam gul: ’Tuhan Uwa Sanbagiri enggam bal Tuhan amnaiserem: se nwinte Am taasfolawer, ³⁵ jamer ginanggwana Imnaiserem Ai jei As gwebabili ga sege nwinbetena Im tof gwonabe.’ (Mazmur 110:1) ³⁶ Jega jem temawer angtane Israelmana seyafter gemerserem, aamei ga jam isa towaswena bunarsusfer enggame, Yesus ijesa daktanswenantam ti salibibe, Yesus jeiserem Uwa Sanbagiri ba Jesam destabana Tuhanf, ane Mesiasf gwefe." ³⁷ Jame aa galap ne sarbilirim taterisi jeiserem, ini jemna ga aa ge jenbamini. Jepga Petrus ane Rasul-rasul afweraiserem jei mese, jei ga aane tenebaabili, "Am afelen mesna, ai ga bas asa eyebili?" ³⁸ Petrus ga balbabili, "Aamei etam-etama kapkaiserem jewer jam isa irfwena, ane aamei daamfen-daamfennem ga jam isa baptiswena bosna Yesus Kristusmanaiserem jeme, jega etam-etama imna is gase wirtabaipmini, ane waakenaiserem ga isa taabili Uwa Sanbagirminiwer. Waakena jeiserem ga aas, Mafnana Uwa Sanbagirmana. ³⁹ Uwa Sanbagiri ibe aa jes bilipminirim, jeiserem Jeiba ibam bilipmini jega enggalf aamei ane tantantane imnaiserem, ane angtane seyafter tamna bijauwap aa jei ge nwinbenennerem jes mese, angtane Tuhan Uwa Sanbagiri nemnaiserem Jei aa jes jenbebilirim, jei seyafter gemerserem Jemnip ga sege jalbili." ⁴⁰ Petrus bastowaifer jam nasoweyan, jengga jei unggwanfersus nasowena, ititmer enggam ga balbabili, "Tifni seyafter gemerserem sa kitulbo Uwa Sanbagirfe, jega Uwa Sanbagiri Jei kapka ip jam eyeipmiyen, angtane kapkaiserem jep aa jes kitulminirim." ⁴¹ Angtane unggwanfersus taterisi Petrus aa jes nasbilirim, angtane taterisi jeiserem aa jei ne taabilirim jei ga aane baptistababili, ane nunu jeiserem jeme gamjon aane eterbilirim angtane unggwanfer ga enggammer 3.000. ⁴² Nunu jeber-jeber angtane jeiserem jei Rasulu jeiserem, angtane Yesus aa jes baftabilirim, jes ne sarbabisiwena, ane ini jemna saaser-saasera seyafter ga aa ge betwebili. Ane angtane seyafter ga aane dwena, ane jei seyafter sembayanga gane gwebana. ⁴³ Angtane Yesus aa jes baftabilirim jei anesus aa jes ne eyebilirim, angtane gwanan jam domolyan, jei bwembwem mese gane eyebaabili jamere angtane seyafter aa ge erebili. ⁴⁴ Ane angtane seyafter Yesus aa jei ne tebanaram, jei daamfennaber ga naawena, ane galgala seyafter jemnaiserem jei seyafter ga aane bunulu jam erbife. ⁴⁵ Ane jei galgala jemna ga aane jualtababili, ane doini ga aane syentabaabili angtane seyafter gemerserem jebar, jei jena aa jes ne balbabilirim. ⁴⁶ Jei nunu jeber-jeber bunar-bunarsusfer ga aa ge betwebuwena Jena Uwa Sanbagirmanaiserem jebe. Ane angtane seyafter gemerserem jei jelem jenaber gam dwena ini saaser-saasermer, ane ini waakensusu. ⁴⁷ Ane jei Uwa Sanbagiri jeber-jeber ga aane pujitawena, ane angtane nafsi ini jemna jei aa ge saaser-saasersweipmini jebar seyafter jam gwefe. Ane nunu jeber-jeber Uwa Sanbagiri Jei angtane gamjon ga kitulmuwena jebe, angtane Uwa Sanbagiri jes waakentababiliserem.

¹ Nunu daamfenna jeme jema ga nawer-ningna, Petrus Yohanesfar ga aa ge sofna Jena Uwa Sanbagirmanaiserem jebe, sembayanga gam ne gwebaf angtane nafsiserem jebar. Nunu jeber-jeber jema ga nawer-ningna, angtane sembayanga ga jem ne gwebabuwena. ² Jes jepserem angtane muli-mulni aasaje ga jep nwini. Jei muli-mulinmer surnu. Nunu jeber-jeber angtane nafsiserem jei ne girinfelwena mwa totiyele Jena Uwa Sanbagirmanaiserem jebe. Mwa totiyele jeiserem bosna ga aas, "Gerbang Waakensusu". Angtane aa jei gangge kabwitewenaram Jena Uwa Sanbagirmanaiserem jebe, jei doini jemniwer aa gam aber-aberwebaipmini. ³ Angtane jeiserem Petrus ane Yohanes jame aa galap domsonaram jei aa ge kautenaram Jena Uwa Sanbagirmanaiserem jebe, jepga jei ga aberwemini doife. ⁴ Jame aa galap ge damtanaram, Petrus ga bala, "Ams gaarami!" ⁵ Angtane jeiserem ga gaaramini, ane jei enggam ga gunu jelem inibe, "Doini as namwer sege gulbana abe." ⁶ Jengga Petrus enggam ga bala, "Ai doini fasfasus, jengga amnibe aaiserem, ai ga is jes as gulbana ibe. Yesus Kristus angtane tamna Nasaret Jem bosem, gase irwe, ga is wofena!" ⁷ Jepga Petrus tafna jemna taasfolawer ga tainbene, ane ga batobana jam gaartefe. Jes jeberserem angtane jeiserem tof mese molele jemna ga aa ge kanausweibene. ⁸ Jepga fostafna ga fina, ane ga wofena, enggam se gwil enggam se jal. Ane Petruso Yohanes jebaner seyafter ga aa ge kabwitena Jena Uwa Sanbagirmanaiserem jebe. Jes jepserem jei aa jep wofnaram, jei ga fostafe-fostafowena, ane jei Uwa Sanbagiri ga pujitene taterisi aaiserem jeme, "Uwa Sanbagiri Aamei waakena!" ⁹ Angtane unggwanfersus jep aaiserem jei seyafter angtane jeiserem ga aane damtana jei jam wofena, ane Uwa Sanbagiriserem ga pujitenenne. ¹⁰ Jei jam aane damtanaram, ga aa ge gubili enggame, "Ba bunaram angtane aaiserem jeiba doife aa jei aber-aberwoufaram, mwa totiyelebe bosna ’Gerbang Waakensusu’ jep aa jei nwinwefaram Jena Uwa Sanbagirmana jebe!" Angtane seyafter uskambar ga aa ge bitbitwebili aa je etamwenaram angtane muli-mulni jeiserem jemnibe. ¹¹ Jepga jes jepserem angtane jeiserem jei Petruso Yohanes gemer taamisini jei nawer-ningginsamer jam aa galap ge forobityerem tampata bosna "Serambi Salomo" jebe, angtane seyafter gemerserem jewer jei tampata jeiserem ga aa ge nunggirbuwena, aam temawer jei seyafter gemerserem jam ge bitbitwebili. ¹² Petrus angtane unggwanfer jeiserem jame aa galap damtabilirim, jei ga balbabili, "Wa angtane Israelmana, jeje bafa bwembwema aaiserem ga ima bitbitwebili, ane jeje bafa aamei ai ga as ima gerebaabili? Aamei ilem inip ipsama gunurum enggame, angtane aaiserem aa jei wofenaram, jei am baabetem wofna. Ane aamei ipsama gunurum jei aa jewer wofonaram aam temawer ai Uwa Sanbagirfar waakenfer ai ge gwena. Wowo, gamyan. ¹³ Uwa Sanbagiri nei seyafter neJesa pujitawenaram, Jei baabetabara. Jeiba Uwa Sanbagiri Abrahammanam, Isakmanam, Yakubmanam, ane asal-asal nemnaiserem jes mese jemnam. Uwa Sanbagiri Jei baabeta yo nafa Jemna Yesusf mesam gulbawena, Yesus Angtane awelna Uwa Sanbagirmana aa Jei gweyibenerem. Angtane jeiserem ga Yesus, aamei Jei imsa gaarminintim angtane sanbakf aa jei naawenaram jebe. Jepga aamei kapkaiserem ijesa nasbilint Pilatusem tarnabe Yesusem temawer, Pilatus jei Yesus safe jam aftannuf. ¹⁴ Jei etam-etam kapka fas, ane ini Jemna tabalbalsusu, jengga aamei Pilatus enggam ima balant, ’Yesus sa daktanswena ti salibibe! Ane angtane afelnaiserem jei ga ap is aftamunnu, angtane jeiserem jei angtane nafsi mes munbono.’ ¹⁵ Jengga Yesus Jei nem Sanbaka. Jei waakenfer gwelaiserem jamer abak-abaksus nes Jei golmini. Aamei Jei imsa munbonont! Jengga Uwa Sanbagiri gamjon Jei mesam irtestenant angtane jam tereserem jemniwer. Ane ai aner ames ge domolant jeiserem. ¹⁶ Baabeta Yesusmana angtane muli-mulni aaiserem ga jem waakensona. Aamei seyafter angtane aaiserem ga imsa damtana, ane aamei seyafter jei imsa damdamtaasini. Yesus angtane aaiserem mes waakentana im tarnabe, aam temawer ai Yesus ames ge tebana. ¹⁷ Am afelen mesna, ai namwer ga enggam ai towaswena, aamei ane angtane sanbak imna, aamei ijesa eyeibenentem Yesusfe, aamei jeiserem fas ijama towaswebiyen ibasa eyebilint. ¹⁸ Uwa Sanbagiri fwater mesam nasbil Mesiasem temawer. Mesias Jeiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif. Nabi-nabi aa jes ne nasbilim jeme, Uwa Sanbagiri enggam bil, ’Angtane jei Mesiasfe tamtamtala unggwandusaiserem sene gulbasa.’ Am afelen mesna, aamei Yesus igalaba munbonontom, taterisi jeiserem Uwa Sanbagiri aa jes bilim ga mes tabanwenant. ¹⁹ Ga jem temawer, gasa tikwe etam-etama kapkaiserem jewer, ane ga isa warauwa Uwa Sanbagirminibe, jega Jei ga etam-etama imna is gase wirtabaipmini. ²⁰ Ane Tuhan jam se fortyaram imnibe, ane Jei ini imna ga is gwebaipmini waakenfer is jam ge folbamife. Ane Uwa Sanbagiri Jei ga Yesus se bala imnip jem foryafe, aam temawer Uwa Sanbagiri Jei Yesus enggalf mesam destabal Yesus Jeiba Mesias nemnam, gwela waakena nep nes Jei golminirim jamer abak-abaksus. ²¹ Jei taman waaken-girip se nwini jamere Uwa Sanbagiri Jei seyafter ibirmi se eyebaabili, gwanan aa gemer gulum nabi-nabiminiwer. ²² Nabi Musa jei mesam gul, ’Uwa Sanbagiri Jeiba Tuhan imna. Jei angtane se baftana im tamnawer, ai as gam baftanaram. Aamei Jam isa sarbana, seyafter Jei ibe aa jes nasipminirim. ²³ Angtane taterisi nabimana jeiserem jam ne taabiyeneiserem, angtane jes galserem sene surbobili angtane Uwa Sanbagirmana jemniwer, ane ga sene tamtamtababili.’ ²⁴ Ane nabi seyafter gemerserem, Samwel mese ane seyafter aa gemer naawelam jes galapserem, jei seyafter ga aaiserem jes ne nasbil, namwer aa je etamwenaram. ²⁵ Uwa Sanbagiri aa jes bilipmilim nabi-nabi aa jes ne nasbilim, jeiserem jeba ibam bilipmil. Ane taterisi Uwa Sanbagiri gwanan aa jes bilipmilim asal-asala imnaiserem jebe, taterisi jeiserem jeba imnam. Uwa Sanbagiri Abraham ga enggam bal, ’Anggwabura seyafter gemerserem ogiri aaiserem jebe, jei waakena Alamanaiserem ga sene domola, asal-asala imnaiserem jewer.’ ²⁶ Jega jem temawer, Uwa Sanbagiri Jei Tane Jemna ga Jen destabal, Jei imnip gwanan Jei foryaf, jega Jei waakena Jelemanaiserem ibe is gase golmini. Aamei seyafter etam-etama kapkaiserem jewer ijewera tikwenaram, Uwa Sanbagiri waakena Jelemanaiserem is jem kitulmini ibe."

¹ Petruso Yohanes jei taterisi angtanefe gemer ge nasipmini, jepga angtane imam-imam sanbakaiserem, ane angtane sanbaka polisimana Jena Uwa Sanbagirmana aa jei ne gaarabisnenewenaram, ane angtane safna Sadukimana jei ga aa ge forobitye jebe. ² Angtane jeiserem aa jei ge forobityerem jei ga aa ge kakalswebili, aam temawer Petruso Yohanes jei angtane unggwanfer enggam aa jewer ge towas-towastababilirim, Yesus Jei gamjon mesam irwena terewer. Jem igiserem ga enggam, angtane jam gam tererem gamjon sege irwebisi terewer, Yesus gamserem. ³ Jepga jei Petruso Yohanes ga aane taamini ane bwiyip ga aane kasuntena jamere ona naf. Jei aa galap ne taaminirim jes galapserem ona ga jam towaiwena jam gigitswefe. ⁴ Jengga angtane tateris aa jei ne sarbisinirim, Petruso Yohanes jei aa jes ge nasbilirim, angtane jeiserem jei Yesus ga aane tebana, jepga anggwa tefner Yesus aa jei ne tebanaram unggwanfer ga enggammer 5.000 anggwa. Wi mese tane Yesus aa jei ne tebanaram jei jam ertebiyen. ⁵ Jem gwirmer ga Safna Angtane Yahudimana Sanbak-sanbaka Seyafter Gemerserem, ane angtane sanbaka nafsiserem, ane guru-guru Hukumu Nabi Musamana aa jei ne towas-towastababuwenaram, jei seyafter ga aa ge betwebili kota Yerusalem je. ⁶ Jei angtane aaiserem jebar ga aa ge betwebili: Imam Sanbagirsususerem, bosna ga Hanas, ane Kayafas mese, ane Yohanes ane Aleksander, ane anggwana seyafter nafsi imam sanbagirmanaiserem jem jenap aaiserem. ⁷ Ane Petruso Yohanes ga aane afsofala jem tarnap enggalfe gam taanaamif. Jepga jei enggam ga aane taanaamini, "Aamei angtane muli-mulni ifomfom ge waakentana? Baabeta ga nanmana, afa bosna nanmana aamei ga ijem ge eyebili?" ⁸ Jes jepserem Mafnana Uwa Sanbagirmana Petrusminibe gamjon uskambar ga aa kabwatya, jepga Petrus ga tamawolbaabili, "Aamei angtane sanbaka Yahudimana, ane aamei Angtane Sanbak-sanbaka afweraiserem! ⁹ Namwer aamei amsa taanaamini, awelna waakena ai ajes ge eyeibenerem angtane muli-mulniserem jebe. Ane aamei gamjon ijama towaswef jeje fomfoma angtane muli-mulni ga ai ge waakentana. ¹⁰ Uwa, ai namwer aamei isa ajam ge towastababif. Aamei seyafter anggwabura Israelmana aamei enggam isa towaswena, angtane aaiserem jei gwanan muli-mulinmer gwenant, namwer jei waakenfer fina jelem tofeme im nenennabe, ane tifni jemna seyafter mes waakenswebana. Yesus Kristus angtane Nasaretmanaiserem, baabeta Jemnaiserem ai angtane muli-mulni aaiserem ga ajem ge waakentana. Aamei Yesus Kristus imsa daktanswenant ti salibibe, jengga Uwa Sanbagiri gamjon Jei mes irtestenant angtane jam tereserem jemniwer. ¹¹ Raja Daud jei Yesusem temawer mesam tulistababil enggame: ’Jeiba tonsam, ane aamei angtane ton ja aa jei ne eyeminirim, aamei tuna jeiserem imes firtaanunt, jengga tuna jeiserem jeba namwer tuna igsusum.’ (Mazmur 118:22) ¹² Gam jega Yesus Jei nei nes Jener se nes waakentababisini. Ogiri seyafter aa gemer falaram, baabeta nafis afa fas Uwa Sanbagiri aa Jes golminirim angtanefe, nei nes jem waakentababisife." ¹³ Safna Angtane Yahudimana Sanbak-sanbaka Seyafter Gemerserem jei ga jam ge bitbitwebili, jei aa jewer ge nasounaram game jei jam ge ereyen. Ane jei rasul nawana jeiserem mes ne towaswemini jei fas jam ge sekolaweyan. Ane jei aa ge towaswebili enggame, jeiba nawersamer angtane Yesus aa jei ge tikwebaatinennerem. ¹⁴ Jengga Safna Angtane Sanbak-sanbaka seyafter jeiserem jei taterisi kapka jebe afa jam ne bilipmiyen Petrus ane Yohanes jebe, aam temawer angtane jei aa jes ge waakentanaram jei jes ne damtana jei rasul nauna jebar seyafter ge fibili jem tarnabe. ¹⁵ Jepga rasul nawan jeiserem ga aane gitmini, "Aamei mwonawer jasege totini!" Jepga Safna Angtane Yahudimana Sanbak-sanbaka Seyafter Gemerserem jenfentowai ga aa ge nasbawena. ¹⁶ Ga aa ge gubili, "Nei bas nesa eyeipmini angtane naura aaiserem jebe? Angtane seyafter kota Yerusalem je aa jei ge nwinbenerem, jei mes ge towaswebili enggame bwembwema aaiserem ba unggwandwasusum, Petruso Yohanes aa jes ge eyebilirim. Nei bwembwema aaiserem nejama baanbaanwebiyen. ¹⁷ Jengga enggam, taterisi aaiserem uskambar jam ge nasbineneyen angtanefe. Au, nei angtane nawana aaiserem jam nesa nasmini enggame, ’Aamei gamjon bosna Yesusmanaiserem angtanefe ijam ge nasipmiyen.’ " ¹⁸ Ane jepga rasul nawana jeiserem gamjon ga aane jenmini mwonap jam ge kautefe, ga aane gitmini, "Aamei gamjon bosna Yesusmana ijam ge bilibaateyan, ane angtane ijam ge towas-towastababiyen bosna Yesusmanaiserem jeme." ¹⁹ Jengga Petruso Yohanes jei enggam ga aa ge tamawolbaabili, "Iner isa gunu, waakena ga fwersa Uwa Sanbagirem nwenabe, taterisi imnaiserem ai ke ajes ge onsobif, afa taterisi Uwa Sanbagirmanaiserem jes as ge onsobili? ²⁰ Ai ajam ge tikweyan jam nasbinennefe ai aa jes ge domolaram, ane ai aner aa jes ge sarbilirim." ²¹ Safna Angtane Yahudimana Sanbak-sanbaka Seyafter Gemerserem jeiserem jei nele fas jam ne damtayan Petruso Yohanes jei jam tamtamsofe. Jega jem temawer jei rasul nawana jeiserem jafner ga aane nasmini ol dagame. Ane ga aane afsunnu, aam temawer angtane seyafter Uwa Sanbagiriserem jeter ne pujitene bwembwema jeiserem jem temawer. ²² Angtane muli-mulni rasul nawana jeiserem jei aa jes ge waakentanaram, jemna umuru ga empat pulu tahun. ²³ Petruso Yohanes aa galap ne afsunnurum, jei gamjon ga aa ge sofwa jelem afelenminibe, ane imam-imam sanbakaiserem ane angtane sanbaka Yahudimanaiserem jei taterisi seyafter aa jes ne nasbabilirim, taterisi jeiserem ga aa ge nasbaipmini. ²⁴ Jepga jelem afelen mesna jei taterisi jeiserem jam aa galap ne sarbilirim, jei ga seyafter Uwa Sanbagirfe sembayanga enggam ga aane gwebabana, "O Tuhan, Uwa Sanbagiri, Aamei winsi yo ogiri mese, fi ane jigal-jigal seyafter gemerserem Aamei eyebaabil. ²⁵ Aamei Raja Daud asal-asal amnaiserem Imsam bal, jei taterisi Imna ap as jam nasipmife Mafnana Imnaiserem jeme. Raja Daud awelna Imna aa jei gweyibelem enggam ga gutel: ’Jeje bafa Angtane Yahudimanyan jei ga aa ge kakalswebili; jeje bafa anggwabura seyafter gemerserem taterisi kapkaiserem ga masef ne mwangbisini? ²⁶ Ogiri aaiserem raja-raja jemna seyafter mes ge menetwebisini enggalfe jam ge erabafe, ane angtane sanbak-sanbaka jei mes ge betwebili daamfennaber raja-rajafar enggalfe, jei Tuhano Angtane Uwa Sanbagiri aa Jes balam Jam baftanafe Jebar gam ge erabaf.’ (Mazmur 2:1-2) ²⁷ Jeiserem jeba bunaram, aam temawer Raja Herodeso Pontius Pilatus, ane angtane Yahudimanyan, ane angtane negeri Israelmanaiserem seyafter mesam ge betwebili Yesusfar jam ge erabafe. Yesus Jeiba Angtane ini tabalbalsusu aa jemanem folbanaram, ane Jei awelna Imna Is Jei gweyibene. Jei Aamei Ijes balaram Mesias; Jeiba Angtane Aamei bunarsus Ijes balam jam baftaf, Jeiba Jesam. ²⁸ Angtane seyafter jeiserem daamfennaber mesam ge betwebili enggalfe, Aamei gwanan fwater Ijes bilipmilim seyafter jeiserem gam se etamwena. Seyafter jeiserem ba mesam etamwena baabeta Ilemanaiserem jeme, Aamei Iner Igemer gulum. ²⁹ Ane namwer Tuhan, Aamei Imes damtabili jei ams ne nasbabili. Aamei ai ase balbabi, ai awelna Imna aa jeya gweyibenerem, taterisi waakena Imna ajama nasibenenefe ini erelyeneiserem jeme. ³⁰ Baabeta Imna ap se golmi, jega ai angtane bwernabara jem gam asa waakentababili. Ane bwembwema ai ajesa eyebiliserem, seyafter asa eyebili bosna Yesusmanaiserem jeme, Yesus Jei awelna Imna aa jei gweyibenerem, ini Jemna tabalbalsusem folbana." ³¹ Jepga jei sembayanga jam aa galap ne tabantanaram jem gwebalabe, tampata jei aa jep ge betwebilirim, tampata jeiserem ga aa gin-ginwena. Mafnana Uwa Sanbagirmana angtane seyafter jep gemerserem ga aa tebabili, ane jepga taterisi Uwa Sanbagirmana ga aane nasibene, ini jam ge ereyeneiserem jeme. ³² Angtane Yesus aa jei ne tebanaram, jemna ini seyafter daamfenna, ane uwu daamfenna. Angtane jemniwer afa enggam jam guyon, "Galgala amnaiserem jeba amanfenna, ai anfentowai as pakaitababili." Jengga galgala seyafter jes gemerserem jei seyafter sene pakaitababili. ³³ Angtane jeiserem Yesus aa jes baftabilirim jei ga baabeta unggwandusaiserem jem ga aa ge gubitena enggame, "Tuhan Yesus gamjon mes irwenant terewer." Ane Uwa Sanbagiri Jei waakena Jelemanaiserem jei seyafter gemerserem jep ga golmini. ³⁴ Ane jes jepserem angtane daamfenna jemniwer afa fas galgalyanmer jam gweyan, aam temawer angtane onabara ane jenabaraiserem, jei ja mese ona jelemanaiserem sene jualtababili, ane doini jeiserem ga sene erbifele, ³⁵ ane rasul-rasulfe ga sene kitulmini. Jepga doini jeiserem ga aane wektababili angtane jep gemerserem jebar, jena aa gemer gam gunurum. ³⁶ - ³⁷ Yusuf jegme gemer, jei ona jelemana gam jualtana. Ane jei doini aa jes tebanaram, jei doini jeiserem ga girinfele, rasul-rasulf ga gaarmini. Yusuf jemba teu Lewimanam. Jei naantei Siprus je surnu, ane rasul jei enggam ne jenbewena Barnabas. Bosna jeiserem jem igiserem ga enggam, "Angtane ini angtane nafsimana aa jei gam kanautabaipminirim."

¹ Jepga anggwana bosna Ananiyas, ane jemna wini bosna ga Safira, jei obiti jemna jam ge jualtana. ² Ona aa jes ge jualtanaram, doini jeiserem afwer jam ge waakentaasini, ane afwer ga rasulf ge gaarmini, ane jei enggam ga gunu, "Doini seyafter ga aare." Ananiyas jei winabar jenfentowai ge towaswena. ³ Petrus ga enggam bala, "Ananiyas, jeje bafa bawasa ini imna is mes tebabana, jamer aamei Mafnana Uwa Sanbagirmana im afaf-afaftana? Ane doini ona ijes ge jualtanantam, doini afwer ga im ge waakentaasini. ⁴ Ona jeiserem gwanan nalef ijam ge jualtayan galapserem, ona jeiserem imna. Ane ona jeiserem jam im ge jualtanantam, doini jeiserem jeme ilemana. Gam jega, jeje bafa aamei ilem inibe ga im gunu kapkaiserem ijam eyebife? Aamei gam ke angtane tefner im afaf-afaftababili, jengga aamei Uwa Sanbagiriserem Jes mese iJes afaf-afaftana." ⁵ Ananiyas jei taterisi jeiserem jam aa galap sarbilirim, jei onnap ga jena, ane ga aa tere, futu. Angtane seyafter jep gemerserem bwembwema jeiserem jam aane sarbilirim, jei ga aa ge erebili. ⁶ Jepga tansi ga aa ge forobitye, ane Ananiyasem futunu ga aane daferna, ga aane totintye bitisip jam ne tirnnufe. ⁷ Jema nawer-ningna safe gemer ayintyerem, wini Ananiyasmana ga aa fortya, jengga jei teisyena aa je etamwenaram. ⁸ Petrus enggam ga taanaabili, "Aamei ai as im bala, aamke ona ilem anggwafar ijes ge jualtanantam, jemna doini ke enggamfener?" Wini jeiserem ga enggam tamawola, "Bunar ba gemeram." ⁹ Petrus ga bili, "Jeje bafa aamei ane anggwana ilemanaiserem Mafnana Uwa Sanbagirmana ga im ge unggwasibene? Gase sar! Angtane mes ge waraubitne, anggwana imna jem futunuserem aa jei ne tirnunurum, ane jeime im futunuserem isene totini." ¹⁰ Jes jeberserem wini jeiserem ga jena Petrusem tof tarnabe, ane ga aa tere, futu. Ane tansi jeiserem ga aa ge kabwitena, jei wini jeiserem jem futunu ga aane domola, jepga jei ga aane gwirinfele, ane ga aane dornunu bitisibe annaiserem jem tarnabe. ¹¹ Jepga angtane seyafter Yesus aa jei ne tebanaram, ane angtane nenes mesna bwembwema jeiserem aa jei ne sarbilirim, jei seyafter ga aa ge erebili uskambar. ¹² Rasulu jei bwembwema anesus aane eyebilirim, ane angtane uskambar mes ne domola. Ane angtane afweraiserem Yesus aa jei ne tebanaram, jei ini daamfennaber ge betwebili, mwona bosna Salomo Jena Uwa Sanbagirmanaiserem jebe. ¹³ Angtane kotana jeiserem jep aa jei ge nwinbenerem jei enggam ge gubili, "Angtane Yesus aa jei ne tebanaram jei angtane waakena." Safe gam, angtane afweraiserem Yesus aa jei ne tebanaram, jei jam ge erebili seyafter jam ge betwebife, angtane Jena Uwa Sanbagirmanaiserem jep aa jei ge betwebuwefaram jebar. ¹⁴ Safe gam, angtane Yesus aa jei ne tebanaram jep ga aa ge unggwanswebili, anggwa mese, ane wi. ¹⁵ Jei ga aa ge unggwanswebili, aam temawer rasulu jei bwembwema anesus aane eyebilirim. Angtane jes jepserem jei angtane bwernabara ga aane erbifele, nelebe ga aane bunulntena titik sagabe ane tikarap. Petrus jep aa galap ayintyerem, angtane bwernabara jep aa jei ge tabanaram, jei uwu Petrusmanaiserem ga aane domolbana, ane ga aa ge waakenswebili. ¹⁶ Jes jepserem angtane unggwanfersus ga aa ge forobitye taman-tamnawer, kota Yerusalemem gwetmanap aa gemer ge folbanannaram. Jei angtane bwernabaraiserem ane angtane bwat kapkabaraiserem ga jes ne erbifelwetya enggalfe gam waakentababif bwernawer. Ane angtane seyafter bwernawer ga aane waakentababili. ¹⁷ Jepga imam sanbagirsususerem ane angtane jei aa jei ne tikwebaatinennerem, angtane jeiserem jei angtane safna Sadukimana, jei rasul-rasul jam ne uskamswebabili. ¹⁸ Ane rasulu jeiserem ga aane tebabili, ane bwidusabe ga aane katabuntena. ¹⁹ Jengga gwini jeiserem malaikata Tuhanmana bwi mwona jeiserem ga aa tertebabisnenne, ane rasulu jeiserem ga aa tosobaabistena, ane ga balbabili, ²⁰ "Gasa sofwe Jena Uwa Sanbagirmanaiserem jewer, jep ga isa fitna, ane jepga angtanefe waakenfer gwelaiserem jamer abak-abaksus ga isa nasipmini." ²¹ Rasulu jeiserem jei ga gemer naawena malaikata aa gemer balbabilirim. Gwirmerem gwinibenersus ga aa ge sofobisi Jena Uwa Sanbagirmanaiserem jebe, ane jep ga aane towaiwulu angtane jam ne towas-towastababife. Jes galapserem imam sanbagirsususerem ane angtane jei aa jei ne tikwebaatinennerem ga aa ge forobitye, jepga jei ga aa ge betwebili Safna Angtane Yahudimana Sanbak-sanbaka Seyafter Gemerserem. Ane jepga angtane ga aane balbabili jam sofwefe, rasulu jeiserem jam kitulifenefe bwiyiwer enggalfe jemnip gam ge forobiyef. ²² Jengga angtane aa jes ne baftabilirim, jei bwi tarnabe jam aa galap ge forobilirim, jei rasulu jeiserem jam ne damtabiyen jebe. Angtane jeiserem jei aa galap ge waraubilirim, ula jeiserem ga Angtane Sanbak-sanbaka jeiserem aa jei ge betwebilirim jep ga aane nasipmini enggame, ²³ "Ai bwiyibe jam agalaba fornaram, bwi mwona seyafter jam matabaabisnenele waakenfer ge falbili, ane ginanggwana jei seyafter jeber ge fibili bwi mwonabe. Jengga bwi mwona jame aa galap ne tertebabisnennerem, angtane jebe afa ajama damtayan mwonabe." ²⁴ Jepga angtane sanbaka angtane Jena Uwa Sanbagirmana aa jei ne gerabisnennerem, ane angtane imam-imam sanbakaiserem taterisi jeiserem jame aa galap ne sarbilirim, jepga jei enggam ge gubili jelem inibe, "Rasulu jeiserem jei fwer ge gubili? Jei fomfom ge tobitintye bwiyi aaiserem jewer?" ²⁵ Jepga angtane daamfenna ga jela, jei taterisi aaiserem ga nasipmini, "Imsa sarsi, angtane aamei ijesa tebabilintim ane bwiyibe ga ima katabuntenant, jei namwer Jena Uwa Sanbagirmanaiserem angtane unggwanfer ga jep ne towas-towastababili." ²⁶ Angtane sanbaka angtane Jena Uwa Sanbagirmana aa jei ne gerabisnennerem ane angtane jam aa jei ne tikwebaatinennerem, jei ga aa ge sofobili rasul-rasulu gam ne kitulifenefe. Jei rasul jam ne tergenbaabiyen, jengga jei samem-samem ne tebabili, aam temawer jei angtane unggwanfer jep jeiserem jes ne erebaabili. Jei enggam ge gubili jelem inibe, "Angtane jeiserem jei tonem nes ne munbobili." ²⁷ Rasulu jeiserem ga aane aftabifele Safna Angtane Yahudimana Sanbak-sanbaka Seyafter Gemerserem jem tarnabe, ane imam sanbagirsususerem ga aa tenebaabuwena. ²⁸ Enggam ga balbabili, "Ai ititmer aamei isa amsama balbabilint, aamei taterisi afa bosna Angtane jeiserem jem temawer angtane ijama towas-towastababiyen. Jengga ga imsa domol aamei afa ibasa eyebili! Aamei taterisi jeiserem ga angtane seyafter kota Yerusalemmana jei aa gemer ge nwinbenerem ga igemera nasipminenne. Ane aamei ga ima balbabili enggame Angtane jeiserem Jemna tere ga aya eyeibenent." ²⁹ Petrus ane rasulu nensaiserem jei ga aa ge tamawolbili enggame, "Ai Uwa Sanbagiri ai jeter aya sarbana, ane angtane ajama sarbabiyen. ³⁰ Aamei Yesus ti salibibe aameima daktanswenant jamer futu. Uwa Sanbagiri asal-asala nemnaiserem, Jei Yesus gamjon mes irtestenant terewer. ³¹ Ane Uwa Sanbagiri Jei ga Yesusfe taman nwini Jelem taasfolawer mes gulbana, ane Jei baabeta unggwandusa Jep mes gulbana. Jei Sanbakfe nei neJebara nwinfe waakenfer, ane Jei ga nei nes mes waakentababisini. Jei gam ajewer eyebilirim, ga enggalf eyebili anggwabura Israelmana Jei gam ne tebaf, ane ga sege irfwebitne jelem etam-etamawer, ane gasa wirtabaabili. ³² Ai Yesus amsama damtana, ane taterisi Jemna mesna amsama sarbili. Ai mese ane Mafnana Uwa Sanbagirmanaiserem jes mese Uwa Sanbagiri aa jes golminirim angtanefe, angtane Uwa Sanbagiri aa jei ne sarbanaram, ai taterisi jeiserem ga aya nasbili." ³³ Jepga Safna Angtane Yahudimana Sanbak-sanbaka Seyafter Gemerserem jei taterisi jeiserem jame aa galap ne sarbilirim, jei ga aa ge kakalswebili, ane ula ga aane tagalsini daamfennaber enggalfe rasulu jeiserem jam ne munbobif. ³⁴ Jengga jes jepserem angtane safna Farisimana, bosna jemna ga Gamaliyel, jei guruf mesam gwena Hukumu Nabi Musa aa jes tulistababilim, ane angtane seyafter jes ne sarbana. Jepga jei ga irwena Safna Angtane Yahudimana Sanbak-sanbaka Seyafter Gemerserem jem nenennabe, ane ga balbabili, "Rasul aaiserem gasa tosobiste abakefyan!" ³⁵ Ane jei ga aa balbabili, "Am afelen mesna anggwabura Israelmana! Aamei waakenfer isa eyebili angtane aaiserem jem temawer. ³⁶ Gwanan galapserem Teudas jei mes fortyant, enggame jena aa jei balantam, ’Ai angtane unggwan-giri.’, ane jepga angtane unggwanfer 400 jei ga aane tikwebaatinint. Jengga jei aane munbonont jamer futu, ane angtane jei aa jei ne tikwebaatinennerem jei ga aa ge irwalwebilint, ane jemna awelna bar. ³⁷ Jes jepserem taban, gamjon safe gemerserem sensus aa galap ne gwebanantam, angtane bosna Yudas ga fortyant, angtane Galileya teu. Ane jemna tateris nasbilint waakena, ane angtane anesus ga jei ne tikwebaatinennent. Jengga jei mese, mes ne munbonont jamer futu, ane angtane jei aa jei ne tikwebaatinennentem seyafter ga jam ge irwalwebilint. ³⁸ Ga jem temawer, esorola amna ga enggam, angtane aaiserem jebe kapkaiserem ijama eyeipmiyen, je safnant. Afa osiri jemna jei aa jes ne eyebuwenaram angtanemanaye, gam jega jemna osiri gase barwemini. ³⁹ Jengga afa osiri jemna jeiserem ga Uwa Sanbagirmanaye, gam jega aamei masef jei ijama jubobiyen, aam temawer aamei Uwa Sanbagiriserem ga ijesa nasbana." Ane esorola Gamaliyelmana jeiserem, Safna Angtane Yahudimana Sanbak-sanbaka Seyafter Gemerserem jeiserem ga aane taayibene. ⁴⁰ Jepga rasulu jeiserem ga aane jenbebili, ane ga aane saftabana, ga aane balbabili, "Taterisi Yesusem temawer gamjon afa ijama nasbiyen." Ane jepga rasul jeiserem ga aane aftabunnu. ⁴¹ Rasul-rasulu jeiserem Safna Angtane Yahudimana Sanbak-sanbaka Seyafter Gemerserem jame aa galap ne mirtebitefalaram, jemna ini saaser-saasersus ga aa ge folbamini, aam temawer Uwa Sanbagiri Jei mes gunu, "Angtane aaiserem jei samfer sege fibili kanaufer Yesusem temawer jei jame aa jep ne imei-imeitababilirim." ⁴² Ane jei jepga nunu jeber-jeber Jena Uwa Sanbagirmanaiserem ane angtanem jenap, jei angtane jep ga aane towas-towastababuwena. Ane Taterisi Waakenaiserem enggam ga aane nasipmuwena Yesusem temawer: Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.

¹ Jes galapserem angtane Yesus waakenfer aa jei ne tebanaram ga aa ge unggwanswebili. Jewer ga angtane Yahudimana Yunani oleme aa jei ge nasbawenaram, jei ga angtane Yahudimana Ibrani oleme aa jei ge nasbawenaram, jei baif ne gwebabili jebar jam ge nasbawefe. Angtane Yahudimana Yunani olem aa jei ge nasbawenaram, jei ga aa ge gubili, "Saamira wini amnaiserem jei tumilgala nunu jeber-jeber afa jam ne taabiyen, aa galap ne syentabaamuwenaram." ² Jega jem temawer dua belas rasul jeiserem jei angtane seyafter Yesus aa jei ne tebanaram ga aane dupdupbulu, ane jepga jei ga aane balbabili, "Aaiserem je kapka, afa taterisi Uwa Sanbagirmana ajama nasbiyeneye, jengga ai afa tumilgal tefner asa syentabaabili. ³ Am afelen mesna gam jega samfer, aamei angtane imniwer ga tuju igemera destabaabili, angtane nafsi aa jes ne balbabilirim, Mafnana Uwa Sanbagirmana angtane jeiserem ginggitfer mes ne tebabili, ane tousaiserem jemna uskambarsus. Jewer ga ai enggam ga asa balbabili, ’Awelna nensa jeiserem aamei se eyebi!’ ⁴ Jepga ai Uwa Sanbagirfe sembayanga jam asa gwebabawena, ane taterisi Uwa Sanbagirmana aya nasibenenne." ⁵ Angtane seyafter jei enggam ge gubili sya, rasulu jeiserem aa gemer ge gubilirim. Ane jepga Estefanus ga aane destabana, jei Yesus bunarsusfer aa jei tebanaram, ane Mafnana Uwa Sanbagirmana jemnip uskambar ga aa kabwatya. Ane angtane aaiserem gamjon ga aane destabaabili: Filipus, Prokorus, Nikanor, Timon, Parmenas, ane Nikolaus jei angtane kotana Antyokyamana. Jei angtane Yahudimanyan, jengga jei agama Yahudimanaiserem ga jes onsobili. ⁶ Angtane tuju jeiserem rasulminibe ga aane aftabuwena, ane rasulu jeiserem jepga jei sembayanga ga aane gwebana, ane tafna jem sagabe ga aane bunulminiwili. ⁷ Taterisi Uwa Sanbagirmana gamjon aa je wofobanaram, ane angtane Yesus aa jei ne tikwebaatinennerem gamjon anesus kota Yerusalem je. Ane imam-imam mese jeime anesus Yesus ne tebana. ⁸ Uwa Sanbagiri Jei waakena Jelemanaiserem Estefanusfe mes gulbana, ane baabeta jemna unggwanfer enggalfe bwembwema unggwanfer jem gam eyebif angtane uskambar jem tarnabe. ⁹ Jengga angtane afwer jei Estefanus ne nasbana. Jeiba angtane aa jei ge betwebilirim, jena angtane Yahudimana aa jep ge betwebuwefaram bosna enggam aa jes ne bilwenaram "Jena Angtane Bebasmana". Jeiba angtane Yahudimana, jei kotana Kirene yo kotana Aleksanderya ga jewer ge jalbili. Angtane Yahudimana ona Kilikyaminiwer ane propinsi Asyaminiwer jei Estefanusfar jena jam ne uskamswemini, ane jebar aarememfener ga aa ge doksobana. ¹⁰ Jengga jei enggam jam ge gubiyen, "Taterisi Estefanus aa jes bilirim je kapka." Jei taterisi jeiserem jam ge gubiyen, aam temawer Uwa Sanbagiri Jei Mafnana Jelemana Estefanusfe mes gulbana, ane baabeta mese. Jei ga waakenfer nasowelaiserem Uwa Sanbagiri Jei gam gulbana jem nasowefe. ¹¹ Angtane Yahudimana jei angtane nafsi doim ga aane agwitababili enggalfe jei enggam gangge gubitef, "Ai angtane jeiserem amsama sarbana, jei Nabi Musa ane Uwa Sanbagiri nimnafer ga jes nasmini." ¹² Ane jei gamjon angtane seyafter jepmana ga aane taatwebaabili jam ge doksobafe, angtane Yahudimana jem sanbak-sanbakaiserem, ane guru-guru Hukumu Nabi Musamana aa jei ne towas-towastababuwenaram. Jepga jei ga aa ge sofobili Estefanus jam tebafe, ane ga sene aftayala Safna Angtane Yahudimana Sanbak-sanbaka Seyafter Gemerserem jemnibe. ¹³ Jepga angtane nensa ga aane jenbebili, taterisi afaf-afafaiserem aa jei ne nasbabilirim Estefanusem temawer. Angtane nensa jeiserem ga aa ge gubili, "Angtane aaiserem jei ga Jena Uwa Sanbagirmana waakenaiserem, ane Hukumu Nabi Musa aa jes tulistababilim, ga jei imei-imeitababuwena. ¹⁴ Ai amsama sarbana jei enggam gunu, Yesus angtane Nasaret Jei Jena Uwa Sanbagirmana se wirulsini, ane Jei ga osiri nemna seyafter Nabi Musa aa jes golmilim nebe, gase wirulsini." ¹⁵ Angtane seyafter jep aa jei ge betwebilirim Safna Angtane Yahudimana Sanbak-sanbaka Seyafter Gemerserem jemnibe, jei seyafter Estefanus ga aane gerebana. Ane jes galapserem mir mase Estefanusmana ga enggam ge falibene, mir mase malaikatmana gemerserem.

¹ Imam sanbagirsususerem jei ga Estefanus ga tenebana, "Angtane aaiserem seyafter jei aa jes ne biltenaram im temawer, je ke bunar?" ² Jepga Estefanus ga tamawolbana, "Am afelen mesna ane uwa mese! Gwanan amsa sarbasi! Asal-asala nemna Abraham gwanan nalefe jam gwisiyen kota Haranminibe, jei gwanan ona Mesopotamya je aa galap nwinbelem, Uwa Sanbagiri nafabaraiserem jemnip ga aa foryal. ³ Ane ga aa bal, ’Ona ilemana se mirtetefal, ane iye mese uwa imna, aya mese oso jes mese se mirtebitefal, gase sofwe ona Ai ibe isa Ajes destababanaram.’ ⁴ Jepga Abraham jei ona Kasdim ga mirsotefal, jei ga kota Haranwer ga sofwel jamere aa foryal kota Haran je, ane ga jep nwin. Uwa Abrahammana aa galap terem, jepga Uwa Sanbagiri Jei Abraham ga bal, ’Kotana aaiserem se mirtetefal, ane ga is sofwa negeri nafsiserem jewer.’ Ane Abraham ga sofwel jamere ona aaiserem jep aa foryal, ona am afelen mesna ane uwa mese aamei namwer ijeba nwinirim jebe. ⁵ Gwanan jes galapserem, Uwa Sanbagiri Jei ona nemnaiserem Abrahamfe jam gerbayan, obiti bastowaifer fasfasus afa jam gerbayan. Jengga Uwa Sanbagiri Jei Abraham enggam bal, ’Abraham, aamei ane tane imna seyafter gemerserem Ai ona ibe isAs gaarmini.’ Jes galapserem, Abraham ga taneyena. ⁶ Jengga Uwa Sanbagiri ga enggam bal, ’Asal-asala imna ga negeri angtane nenseminip sege nwinbene, negeri jeiserem ga asal-asala imnaiserem jemanyan, jengga angtane nenesemana. Angtane negeri jepmanaiserem jei awelna daran-darna asal-asala imnaiserem jebe ga jei sene golmini, ane ititmer gane balbabili awelna gam gwibife tahunu abakfer ga enggammer 400. ⁷ Jengga Ai angtane negeri jeiserem As tamtamtababisi angtane awelna aa jei ne golmiwenaram asal-asala imnaiserem jebe, ane jei negeri jeiserem jewer sege gubisini, ane jei ga ona aaiserem jep ga Ai ga Asene tebana, ane Ai Asene pujitene.’ ⁸ Jepga Uwa Sanbagiri Jei Abraham ga gulbal gwanan Uwa Sanbagiri aa jes bilibelem. Ane Uwa Sanbagiri ga enggam gul, Abraham ane asal-asala jemna seyafter gemerserem ga jamer sege sunattwebuwena enggalfe gam ne saasif, Uwa Sanbagiri jep aa jes bilipmilim jei jeiserem mes ne taabil. Ane jepga Isak ga surul, tane Abrahammanam. Ane nunu jemna ga delapan, Abraham jei Isak ga sunattal. Ane Isak jeme tane jemna bosna Yakub gam ga sunattal. Ane Yakub ga tane jemna dua belas gemer sunattababil, jeiba asal-asalgir anggwabura Yahudimana gwanan aa jei nawelam. ⁹ Asal-asalgir nemna jeiserem ini jemna ga uskamswebal Yusufe, ane jepga jei ga aane gaar jem fwayenfe doini gam tebaf. Jei Yusuf ne jualtal enggalfe, awelna angtane nafsiminip gam gwebif angtane negeri Mesirmanaiserem jebe. Jengga Uwa Sanbagiri Jei Yusuf waakenfer gerebaasnenewel. ¹⁰ Ane Uwa Sanbagiri Jei Yusuf ga aftannul awelna kabwaksususerem jewer. Raja negeri Mesirmana jei enggam ne jenbewena, ’Firaun’. Yusuf aa galap forolam Firaun jeiserem jem tarnabe, Uwa Sanbagiri angtane nensa ga gwebabil jamere jei enggam aa ge gubil, ’Yusuf jei waakena.’ Ane Uwa Sanbagiri baabeta aa gulbal jamere tousaiserem jemna ga unggwandusa. Ane jepga Firaun jei Yusuf Gubernurfe ga aa destabal Mesir je, ane enggalf mese sanbakf jei gam gwef jena unggwandusa Firaunmana seyafter jep gemerserem. ¹¹ Ane jes galapserem negeri Mesir ane ona Kanan jep wisi unggwandusa ga etamwel, tumilgala seyafter barbarsus, ane angtane jepmana amkom wisi fom bartala. Asal-asala nemna tumilgala afa jam ne domolyan. ¹² Jengga Yakub enggame aa saram, negeri Mesir ba tumilgal gandumuborom. Ane jepga tane jemna mesna, asal-asala nemna, jei ga aa baftabil Mesirwer jam ge sofobife, sofera gwananaiserem. ¹³ Ane sofwera naurabaraiserem Mesirwer jam ge sofobife, Yusuf ga jelem ayan mesna ane osona ga enggam balbabil, ’Aiba Yusufsam.’ Ane jepga Firaun ga towaswel enggame aaba Yusufem afelen mesnam. ¹⁴ Ane jepga Yusuf ga ula jelem jetefe bosna Yakub ga aa baafulbol enggame: jei ane jemna tanem mesna, ane jemna wi tane seyafter gemerserem, jei seyafter gam ge gubisif negeri Mesirwer jep gam ge nwinbef. Angtane jemna seyafter ga tuju pulu lima. ¹⁵ Ane Yakub wi tane jebaner ga aa ge sofobil Mesirwer, ane jep ga aa ge nwinbel jamere Yakub ane asal-asala nemna ga aa barwel. ¹⁶ Jepga jem futunu ga aane wartabinel tamna Sikeminibe, ane ga jep ne tatarbaabunul tonmwa bitisip Abraham aa jes armanulum doime anggwabura Hemorminiwer tamna Sikem je. ¹⁷ Nunu jepga aa gwetmanswel, nunu Uwa Sanbagiri Jei Abrahamfe aa Jes bilibelem, anggwabura nemnaiserem negeri Mesir je ga mes unggwanswebil uskambarsus. ¹⁸ Jes galapserem raja nensaiserem ga jei nwinel Mesir je, ane jei Yusuf jam damdamtaasiyen aam temawer Yusuf mes ter. ¹⁹ Raja jeiserem ga anggwabura nemna gam afaf-afaftababuwel, jei kakalmer gwel asal-asala nemnaiserem jemnibe. Jei angtane enggalf tergenbaabil, tane bastantana namwer suruluserem jes fasawolf jam ge terbife, futu. ²⁰ Ane jes galapserem, Musa ga aa surul; tane aaiserem waakensusu. Jei jetam jenabe jamer nwinibe muara ga nawer-ningna. ²¹ Ane Musa towai jei aa galap ne firtaaniwilim, Firaunem yafma jei ga aa gaartel, ane jei ga aa tain jem tane tainfe. ²² Angtane Mesirmana jei Musa ga aane towas-towastal seyafter aa jes ne towaswebilim. Ane Musa ga aa nasbil, ane ga eyebil baabeteme. ²³ Musamana umuru tahunu empat pulu aa folbalam, jelem inibe ga aa gul, jei angtane jelemana anggwabura Israelmana jam damtabif. ²⁴ Jepga Musa ga angtane Mesirmana ga damtal jei angtane Israelmanfe kapkaiserem jes eyeibel, ane Musa ga angtane Israelmana jeiserem ga jebar ge fyal. Jepga Musa angtane Mesir tewe jeiserem ga saftaniwil, futu. ²⁵ Musa jei jelem inibe enggam gul, ’Anggwabura amnaiserem jei mes ge towaswebil enggame, Uwa Sanbagiri ga as mes destabana ai jei ajam waakentababisife.’ Jengga anggwabura jeiserem jei gemerje jam ge towaswebiyen. ²⁶ Jem gwirmer jon, Musa jeme angtane Israelmana naura gam domsol, jei jam ge eral, ane Musa ga safe jam yostaasif. Musa ga safe enggam gitmil, ’Aamei aya osonem, ga ibas ge erebili?’ ²⁷ Jengga angtane sarabosna jelemanaiserem aa jei saftalam, Musa ga eyewer ga aa baftawil, ane ga aa gutel, ’Aamei ise nane destabana am sanbakf nwinfe, ane ga asis nasipmini ai waakena afa fas? ²⁸ Aamke safe ase ijam saftaniwif, gwanan angtane Mesirmana ir igam saftaniwilintim?’ ²⁹ Ane Musa jei game jam aa galap saram, angtane jeiserem jei gam aa gutelam, Musa ga negeri Mesirwer ga aa nunggir, ga negeri Midiyan je ga jep nwinel. Jepga wini ga gol, tane jepga naura gam domsol. ³⁰ Jep aa galap nwinim tahunu abakfer ga empat pulu tahun, malaikata Musaminip ga aa foryal, dwisgiribe taarena Sinaiyem gwetmanap. Malaikata jeiserem aa jal, ti buktouya aa jei ertesilim tokwanabara. ³¹ Musa aa galap domolam ga jam bitbitwel. Jepga agasiwil gwetmanaber jei jep gam towaswefe enggame je basa. Jepga taterisi Tuhanmana ga aa saribel, Jei aa gutelam, ³² ’Aiba Uwa Sanbagiri asal-asala imnaiserem. Aiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.’ Musa jam erel ane aa egegwel, ane jei ti buktouya jeiserem baif gwebana jam damtafe. ³³ Jepga Tuhan ga gutel, ’Sandala ijes kamwinirim se soksosi! Ona ijep finaram, ona jeiserem ga waakensusu. ³⁴ Ai bunarsusfer aamei isa Amsam damtabili anggwabura Israelmana jei sigini jes ne enolwenaram angtane Mesirminiwer. Ai gwarna jemna Amsam saripmini, ane Ai ga Ajam iritya enggalfe jei Ajewer aftabunnuf. Au! Ai gamjon aamei is Ajam baftana aamei Mesirwer ijam waraufe.’ ³⁵ Musa aaiserem jeiba anggwabura Israelmana jei baife aa jes ne gwebalam, jei enggam ne bal, ’Aamei ise nane destabana am sanbakf nwinfe, ane ga asis nasipmini ai waakena afa fas?’ Jengga Uwa Sanbagiri Jei jes destabal sanbakf jei nwinfe, ane angtane jei gam waakentababisif. Malaikata jeiserem ga jes batobal, malaikata aa fortyaram ti buktouya aa jei ertesilim jebe. ³⁶ Musa jei anggwabura Israelmana negeri Mesirwer ga aa aftabifel. Musa jei bwembwema unggwanfer ga Mesir je eyebil, ane Fi Berberep mese, ane gamjon dwisgirip nunu abakfer ga empat pulu tahun. ³⁷ Musa aaiserem jeiba anggwabura Israelmana jeyam balbabil, ’Uwa Sanbagiri Jei Jener nabi se destabana nemniwer, enggame ai as gemer destabanantam.’ ³⁸ Musa jei anggwabura Israelmana aa jei ge betwebilim dwisgiribe ga jebar ge nwinbel. Jei asal-asal nemnabar jep ge nwinbel, ane jei malaikatfar ga aa ge nasowel, taaren Sinai sagabe. Taterisi waakenaiserem jeyam sarbil malaikatminiwer, ane Nabi Musa jei taterisi Uwa Sanbagirmana jei erakulnonol nem asal-asalminibe enggalfe nep nes gane nasipmif. ³⁹ Jengga asal-asala nemna jei jama sarbayan, jei baif ne gwebal, ane jei gamjon negeri Mesirwer ge waraubif. ⁴⁰ Ane jepga anggwabura Israelmana Harun ga aane bal, ’Aamei tiboroms kwirul nei nejesa pujiwulwefe, jega tiborma jam kwirulu jeiserem nei gam nesa tikwebitini. Nei tiborma jeiserem jes ne tikwebitini, aam temawer nei namwer seyafter teisyena Nabi Musa jei fof nwini, nei Mesirwer nes jei aftabifelyentem!’ ⁴¹ Ane jes jepserem jei tiborma ga aane kwirul enggame, ga aane eyebil lembu tane gamserem. Ane jepga tiborma jam kwirul jeiserem ga aane pujiwul, ane tumilgala ga aane golbil, ane masara ga aane eyebil tiborma jam kwiruluserem jebe, jener aa jes ne eyebilim. ⁴² Jengga Uwa Sanbagiri Jei angtane jeiserem Jam mirtebil, ane Jei jafner balbabil enggame, sya, angtane jei tiborma aa jes ne pujiwulwenaram jamer gen pujiwulwe. Ane jei mato mese winsibe ga aane pujitababuwel. Jeiserem nawersamer ga enggam nabi aa gemer ne baatulum enggame: ’Wai anggwabura Israelmana! Dombana aamei ijesa targabaabilirim, jeke i Aba kitulbof, jem nunu abakef ga empat pulu tahun dwisgiribe. Fasfasus! ⁴³ Tenda jena aamei ijesa gwirinennerem jeba bwata Molokmanam, ane bwat kapka mato bosna ga Refan ijesa gwirinele; tiborma jeiserem iner ijesa kwirtabaabilirim, ijesa pujiwulfe. Ane jem temawer ga Ai isAs fasawola jamer bijuap negeri Babelem jimwer.’ (Amos 5:25-27) ⁴⁴ Tenda Jena Uwa Sanbagirmana aa jep nwinwelam angtane nenennabe, Tenda Jena jeiserem asal-asala nemnaiserem ga jes ne gwirin, dwisgirip aa galap ge nwinbelem. Tenda Jena jatowai jeiserem ga jei ne eyebil, Uwa Sanbagiri Jener Nabi Musa aa gemer balam. Ane seyafter ga Uwa Sanbagiri Nabi Musafe aa gemer ge sabasilim, gemer ne eyebil. ⁴⁵ Tenda Jena Uwa Sanbagirmana jeiserem, nem asal-asala ga jei ne taabil, ga aane gwirinfel jamer ona aaiserem. Jei ga enggalap ne jei Yosuafar aa galap ge sofobilim, ane jei ona jeiserem aa galap ne tebalam angtaneminiwer, angtane Uwa Sanbagiri aa jes surbobilim jem tarnabe. Tenda Jena jeiserem ga jeber fyal jamere Raja Daud jei aa foryal. ⁴⁶ Daud ga ini Uwa Sanbagirmana jam dektebel, ane jei ga enggam bal, ’Uwa Sanbagiri, ai jena afa ke Isas eyeibene, Aamei Uwa Sanbagiri Yakubmana?’ ⁴⁷ Jengga Daud jei jena jeiserem jam eyebiyen, jena jeiserem ga Salomo eyeibel Uwa Sanbagirfe. ⁴⁸ Jengga Uwa Sanbagiri Jemna baabeta unggwandusa, Jei jena angtane aa jei ne eyebilirim jebe Jam nwinyen. Jem temawer nabi taterisi enggam baatultel: ⁴⁹ ’Winsi je taman nwini Amna, ane ogir ga tof jubili Amna. Aamei ga jena Abe ga asi fom isa gwitirbene? Ane taman nwini Amna fofa Ai jafner Ajep nwini? ⁵⁰ Jigal-jigala seyafter gemerserem Aner eyebaabil.’ Uwa Sanbagiri Jei ga gam gutel." (Yesaya 66:1-2) ⁵¹ Estefanus jei gamjon ga gunu, "Uwa mese aamei seyafter gemerserem, duka imna jei ban kankanawa, ane aamei masef ga ima unggwasa Uwa Sanbagiri ijama tebafe! Imwana imna mat, taterisi Uwa Sanbagirmana ijama sarbiyen. Aamei ga enggammer asal-asala ilemana gamserem: aamei Mafnana Uwa Sanbagirmana waakenfer ijama sarbiyen. ⁵² Fomfoma asal-asala imna, jei ke nabini seyafter afa ke jam ne nasbabiyen? Jei angtane taterisi Uwa Sanbagirmana aa jei ne nasibenenelem jei ne munbobil, jamer futu. Gwanan aa jep falam nabi-nabi enggam mes ne nasbinennel, ’Tane Uwa Sanbagirmanaiserem aa Jei eyebilirim Uwa Sanbagiri aa gam gunurum, bunarsusfer Jei gase fortya.’ Ane namwer aa jep falaram aamei Jei imsa gerant angtane kakalaiserem jemnibe, ane ga imsa munbonont Tane Uwa Sanbagirmana jeiserem. ⁵³ Malaikat jei taterisi Uwa Sanbagirmana is mes ne golmini, jengga aamei ijama sarbiyen." ⁵⁴ Jepga Safna Angtane Yahudimana Sanbak-sanbaka Seyafter Gemerserem jei taterisi Estefanusmana aa galap ne sarbisinirim, jemna ini kabwaksus gangge folbamini, ane jei uskambarsus ga aane nasbana. ⁵⁵ Jengga Mafnana Uwa Sanbagirmanaiserem Jei Estefanus ginggitfer tebana. Ane Estefanus jei winsiwer ga anggaswena. Ane jei Uwa Sanbagirmana nafa ga domolbana, ane Yesus Jei Uwa Sanbagirminip fina, Jem taasfolawer. ⁵⁶ Estefanus ga gunu, "Gasa angga! Ai taman waaken-giri ames domsona mes ne tersosini, ane Tane Angtanemana ga Uwa Sanbagirem taasfolawer fina!" ⁵⁷ Ane Safna Angtane Yahudimana Sanbak-sanbaka Seyafter Gemerserem jei imwana jemna ga aane matabaasini, ane jepga jei ga aa ge gwarenbuwena. Jepga jei seyafter ga aa ge nunggirbuwena Estefanusem tarnabe, ane Estefanus ga aane tebana. ⁵⁸ Jepga jei Estefanus kotanawer ga aane aftafala, jepga toneme ga aane towaitana jam munbofe. Angtane erala jeiserem aa jei ne gaarabilirim, jei ga fene jemna ga aane bunulntena nomkefe angtanem tufap. Angtane jeiserem jemna bosna ga Saulus. ⁵⁹ Estefanus aa galap ne munbonorom toneme, Estefanus ga enggam gunu, "Tuhan Yesus, uwu amna ase jam Is tebabatna!" ⁶⁰ Ane jepga somwan dumeme ga nwini, ane ga aa gwarna ititmer, ane ga gutena, "Tuhan, etam-etama kapka aaiserem jebe Ijam fwainulmiyen." Estefanus jei game aa gutenaram, jena enggamserem, futu.

¹ Saulus mese je baife jam gweyan Estefanus munbofe. ² Angtane Uwa Sanbagiri uskambar aa jei ne tebanaram, jei Estefanusem futunu gane tirnunu, ga aane syebawena uskambar. ³ Jengga Saulus jei nels terelbene safna Yesus aa jei ne tebanaram daamfennaber nwiniserem jewer falamulsif. Jei ga fortya jenap ga wofena jepme kawete, ane gamjon jep gam kawetena, ane wi mese anggwa ga aane tebabili, ane ga aa katabuntena bwiyibe. ⁴ Angtane Kristen aa jei ge syensyanwebilirim, jei Taterisi Waakena Yesusem temawer sene nasbinenne aa gemer ge wofobanaram. ⁵ Ane Filipus ga sofwa kotana ona Samaryaminibe, ane jei angtane jepmanaiserem jebe ga nasipmini taterisi Mesiasem temawer. Mesias Jeiba Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. ⁶ Angtane unggwanfer jame aa galap ne sarbilirim Filipus aa jes nasbilirim, ane ga aane gerebaabili bwembwema aa jes eyebaabilirim, jei seyafter waakenfer ne sarbasini jame aa jes nasbilirim. ⁷ Jes jepserem angtane unggwanfer bwat kapka jame aa jes kabwabilirim, jei ga waakentababili. Bwat kapka jeiserem ga aa ge gwarenbuwena, ane ga aa ge tobitintye angtane jeiserem jemniwer. Ane angtane muli-mulni anesus, ane angtane waakenfer jam wofeyanaiserem jei seyafter mes waakentababili. ⁸ Jega jem temawer ini angtanemana saaser-saaserfer ga aa ge folbamini kotana jeiserem jebe. ⁹ Angtane bosna ga Simon jei abakfer nwini, ane jei faatrews eyebili kotana jeiserem jebe, ane angtane Samarya seyafter gemerserem jam ge bitbitwebili. Simon jei aa gunu, "Ai angtane sanbagirsusum." ¹⁰ Angtane seyafter, bastantouya, sanbagiri, jei waakenfer ne sarbasini, ga aa ge gubili, "Angtane aaiserem jei baabeta Uwa Sanbagirmana mes domolbana. Baabeta jeiserem angtane enggam ne bilwena ’Baabeta Unggwandusa.’ " ¹¹ Angtane jei fwatersus jam ge bitbitwebili Simon jei faatrews eyebili, jega angtane jei waakenfer ga sene sarbasini. ¹² Jengga angtane jei taterisi Filipusmana aa galap ne taabilirim, jei jen jena gane tete jam baptistababif, anggwa mese wi. Taterisi aa jei nasbinennerem jeba enggamam, taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, ane taterisi Yesus Kristusem temawer. ¹³ Simon jen jegme taterisi jeiserem aa taabili, jegme aa baptiswena. Jei Filipus ga onsobananna, jep ga aa bitbitwena jame aa galap damtabilirim bwembwema unggwandusa aa je etamwenaram. ¹⁴ Rasulu kota Yerusalem je aa galap ge sarbilirim enggame, angtane ona Samaryamana ga Taterisi Uwa Sanbagirmana ba mesam ne taabilint, jei Petruso Yohanes jewer ga aane bafsowili. ¹⁵ Rasul nauna jeiserem aa galap ge fornaram, sembayanga ga aa ge gwebana jega Mafnana Uwa Sanbagirmana angtane Samaryamana jeiserem ga jemnip gam jalf. ¹⁶ Mafnana Uwa Sanbagirmana Jam ireyan angtane daamfenna jemnibe aa jei naawenaram. Angtane jepmana jei bosna Tuhan Yesusmanaiserem ga jetefener jem ne baptistababili. ¹⁷ Jepga Petruso Yohanes jei tafna ga aa ge bunulntena angtanem sagabe, ane Mafnana Uwa Sanbagirmana jemnip ga jela. ¹⁸ Simon jame aa galap domolaram Mafnana Uwa Sanbagirmana jam aa jelaram, rasulu naura jeiserem tafna ga aa ge bunulnsowena angtanem sagabe, Simon jei dois gaarmif jebe. ¹⁹ Ga gunu, "Ap jon sa gulba baabeta jeiserem, jega ai afa tafna amna angtane sagap jam as tosontenaram, Mafnana Uwa Sanbagirmana jemnip samfer gase jela." ²⁰ Petrus enggam ga bala, "Aamei ane doini imna tokwagirip sa gwi, aam temawer aamei gunu, ’Uwa Sanbagiri aa jes golminirim, ai jeiserem doim as armanulu.’ ²¹ Aamei awelna amna as ijam onsoibiyen, aam temawer Uwa Sanbagiri Jei ini imna is enggam damtabana kapka. ²² Gasa tikwe etam-etama kapka ilemanaiserem, je safnant. Jepga aamei Tuhanfe sembayanga ga is gwebabana, jega nele kapkaiserem is gase wirtabana, Tuhan Jei gamjon jeiserem Jam sarbistaabonyan. ²³ Ai tousa aamei galgala anesus ilem iniber igam balbabili, ane etam-etam aaiserem je ga is mes ne taferna, angtane bwiyip gamserem." ²⁴ Simon jei Petruso Yohanes ga gitmini, "Sembayang Tuhanfe is ge gwebabana, jega aamei ijes bilirim je jam falyan amnibe." ²⁵ Jewer ga Petruso Yohanes jei ga aa ge nasbili jei aa jes ge towaswebilirim Yesusem temawer, ane taterisi Tuhanmana jamer taban. Jepga jei gamjon ga aa ge warautna Yerusalemo. Ane wofera jeiserem jei ga jep ge nasbinenne Taterisi Waakena tamna unggwanfer aa je nulnaram ona Samarya je. ²⁶ Malaikata Tuhanmana Uwa Sanbagiri aa jes baftanaram, jei Filipus ga aa bala enggame, "Se irwe, ane ga is sofwa selatan jitefwer, nele aa je falaram Yerusalemwer igam sofwa jamere Gasayo!" (Nele jeiserem namwer angtane gamjon jei jam ge wofobiyen jebe.) ²⁷ - ²⁸ Jepga Filipus ga sofwa. Nunu jes jemserem pegawai negeri Etyopyamana jei jem ga warautna jelem jenabe kota Yerusalemwer. Jei jep ga Uwa Sanbagirfe sembayanga gwebabana. Jeiba pegawai sanbagiri, jei doini Kandakemana jei tebana seyafter. Kandake jeiba wi sanbaka negeri Etyopya je. Pegawai jeiserem jei jelem kereta sagap nontena, taterisi Nabi Yesayamanaiserem gerabistena. ²⁹ Mafnana Uwa Sanbagirmana Filipus ga bala, "Se gwi ane keretana ga is gwetmanulsini!" ³⁰ Filipus jei tatarmer ga aa nunggirwena, ane angtane jeiserem ga aa sarbasini, jei taterisi Nabi Yesayamana gam gerabistena. Filipus ga tenebana, "Jeiserem aamei ijes gerabistenaram, ke imes towaswebili?" ³¹ Ga aa tamawolbana, "Ai fomfom as towaswena? Ai angtane nensa gam bala ai as jei towas-towastafe." Jepga jei Filipus ga bala, "Se tauya, ane ga is nwintena am tarnabe!" ³² Taterisi Uwa Sanbagirmana jei aa jes gerabistenaram ga enggam: "Jei enggala dombana gemerserem, aa jes gane aftawenaram jamere aa jep gane munbonorom jebo. Jei domba tane galserem safna jam gane targaibaasinirim jam gwarenyan, Jei taterisi afa jam bilteyan. ³³ Jei kapka Jam eyebiyen, jengga angtane gane eyeibene kapka Jebe, Mafnana Jemna bar ogiri aaiserem jebe. Angtane nafsi fas taterisi asal-asal Jemnaiserem jei nasbife." (Yesaya 53:7-8) ³⁴ Pegawai jeiserem Filipus ga bala, "Ai ims tenebana, Nabi aaiserem nans bala? Jelem temawer, afa ke angtane nafsim temawer?" ³⁵ Filipus jei Taterisi Waakena Yesusem temawer ga nasbili. Jei taterisi Nabi Yesaya jes tulisulum ga jewer towaiwulu jam nasbife. ³⁶ Jei gamjon ga aa ge sofwa nele jeiserem jeter, jamer fo eyep aa ge forna. Pegawai jeiserem ga gunu, "Se angga, fona aare! Ai bas as eyebili jega ai gam as baptiswena?" (( ³⁷ Filipus ga bala, "Afa aamei ini seyafter gemerserem jeme Yesus imes tebalaye, aamei samfer jam baptiswefe." Jei ga tamawolbana, "Maa, ames tebana Yesus Kristus Jeiba Tane Uwa Sanbagirmanam.")) ³⁸ Pegawai Etyopyamana jei keretana jeiserem jepga fyatetya, ane nawersamer, Filipuso pegawai jeiserem ga aa ge jutena fonap, ane Filipus ga pegawai jeiserem ga aa baptistene. ³⁹ Saf aa gemer ge jusetyaram fonawer, Mafnana Tuhanmana Jei ga Filipus gaartetya, ane pegawai jeiserem gamjon jam damtayan. Jeman aa sofwa jewer ini saaser-saasermer. ⁴⁰ Filipus jengga kota Asdodwer aa forna tatarfer. Ona jeiserem ga jep wofowena, ane Taterisi Waakena ga nasbinenne kotana seyafter gemerserem jamere aa forna kota Kaisareya je.

¹ Jes galapserem Saulus ga jeber-jeber enggam nasowena, "Ai angtane Yesus aa jei ne tikwebaatinennerem ga as munbobili." Saulus jei imam sanbagirsususerem jemnip ga gwina, ² ane jei surta ga bili imam sanbagirsususerem jemniwer. Surta jeiserem ga Saulus se gwirinwef angtane sanbakef jena angtane Yahudimana aa jep ge betwebuwefaram kota Damsik je. Surta jeiserem ga enggalf gwirni, jega afa jei angtane nele Yesusmana aa jei ne onsobanaram jam se damtabilirim, anggwa mese wi, angtane jeiserem gase tebabitne, gase aftabuwena kota Yerusalemwer. ³ Kota Damsikwer aa galap ge gubilirim, kotana jeiserem jame aa galap ne gwetmansonaram, nafa winsiwer aafer-aafersus ga iretya. Nafa jeiserem ga jam bwere-bwerewena. ⁴ Saulus ga jena onabe, jepga taterisi enggam ga sarbili, "Saulus, Saulus, aamei kapka Ap As ibaf eyeibene?" ⁵ Saulus ga tamawola, "Aamei nansa, Tuhan?" Ane jei taterisi jeiserem gamjon ga sarbili enggame, "Aiba Yesusam, aamei kapkaiserem ijep eyeibenerem. ⁶ Gase irwe, ane kotanap ga is sofwa, jep ip ga isene towasulbono aamei ijes eyebiliserem!" ⁷ Jelem afelen mesna Saulusfar aa jei ge sofobilirim, jei jafner ge fibili, jam ge gubiteyan, aam temawer jei taterisi jeiserem mes ne sarbili, jengga angtane afa fas jam ne damtayan. ⁸ Saulus ga irwena ane ga fina, nwena ga fersona, jengga apgal jigala afa fas jam domolyan. Jepga Saulus ga jam ne tebastowena jamere kota Damsiko. ⁹ Nunu abakfer ga nawer-ningna, Saulus jam anggayan. Ane nunu nawer-ningna jeiserem jeme jei jam twenyan, fona jam telbiyen. ¹⁰ Kota Damsik je, angtane Yesus aa jei tikwebaatinirim jemna bosna Ananiyas ga jep nwini. Ananiyas jei Tuhan eserem jam tala gamserem gam ga damtana, ane Tuhan Jei Ananiyas ga jenbene enggame, "Ananiyas!" Ananiyas ga tamawola, "Tuhan, ai aare!" ¹¹ Tuhan ga aa bala, "Gase gwi jamere nele bosna ’Nele Nornora’ jebo. Nele jeiserem ga jes is onsobana jamere Yudasem jenabo. Ane angtane kota Tarsusmana ga jep is terelbene, jemna bosna Saulus. Jei sembayangs gwebana. ¹² Saulus jei angtane eserem jam tala gamserem ga gam damtana, angtane jeiserem jena Saulus aa jep nwinirim ga jep kawetetya. Angtane jeiserem aa jei fortyaram jemna bosna Ananiyas. Jei tafna jem sagap ga tosobaanswena enggalfe gamjon gam anggasife." ¹³ Ananiyas ga tamawola, "Tuhan, ai angtane jeiserem jem temawer amsam sara enggame, angtane jeiserem jei kabwakfer eyeipmini angtane Imnaiserem kota Yerusalem je. ¹⁴ Ane namwer ga mes jela kota Damsik aaiserem jebe. Imam-imam sanbakaiserem jei baabeta mes ne gulbana, angtane seyafter gam tebabif sembayanga Ibe Is jei ne gwebabanaram." ¹⁵ Tuhan Jei Ananiyas enggam ga bala, "Se sofwe angtane jeiserem jemnip, aam temawer Ai jei Amsam destabana enggalfe awelna Amna As jei gweyibef. Jei bosna Amna As jei se nasibenenne angtane Yahudimanyanaiserem jebe, ane raja-raja jemnaiserem jes mese, ane anggwabura Israelmanaiserem jep mese. ¹⁶ Ai Aner As ge sabasini jebe kapkaiserem jei jes domolaiserem Am temawer." ¹⁷ Ananiyas ga gwina, jena jeiserem jep ga kawetena. Jei tafna ga tosobaanswena Saulusem sagabe, ga bala, "Saulus, am afelna, Tuhan Yesus aamei ijes damtanantam nelebe aamei igalap sofwetyaram, ai ga ase Jei bala imnip jalfe, jega enggalf aamei gamjon igam anggasif, ane Mafnana Uwa Sanbagirmana imnip gam jalf." ¹⁸ Ane jes jeberserem jigal sabala galserem Saulusem nwenawer ga jenbatya, ane jei gamjon waakenfer ga anggasini. Jepga jei ga aa irwena, ane ga aane baptistene. ¹⁹ Ane aa twena jamer taban, jepga jei baabeta gamjon ga enola. ²⁰ Jes jepserem jei ga aa wofna jena angtane Yahudimana aa jep ge betwebuwefaram aa gemer denennerem jebe, ane jep ga towas-towastababinenne enggame, Yesus Jeiba bunaram Tane Uwa Sanbagirmanam. ²¹ Angtane seyafter ula jeiserem jame aa galap ne sarbilirim, jei ula jeiserem ga jam ne bitbitwebili, jei ga aa ge gubili, "Angtane aaiserem jeiba angtane Yesus aa jei ne tebabanaram jeyam munbobuwena Yerusalem je. Jei aafe enggalf fortya, angtane jes galserem jes tebabif, ane gase aftabifele angtane imam-imam sanbakaiserem jem tarnabe!" ²² Jengga Saulus jei taterisi Yesusmana waakenfersus towas-towastababili, jamere angtane gamjon anesus Yesus aa jei ne tebanaram. Jei waakenfersus towas-towastababili enggame Yesus ba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. Jengga angtane Yahudimana aa jei ge nwinbenerem Damsik je, jei enggam ge gubili, "Taterisi jeiserem je ol kabwak." Jengga jei Saulus afa jam ne tamawolbayan. ²³ Jes jepserem nunu unggwanfer jam aa ge ayebintyerem, angtane Yahudimana jei ga Saulus ga aane mwangbisini jam ne munbofe. ²⁴ Jengga Saulus jena mes towaswena angtane Yahudimana jei aa jes ne mwangbisinirim jam ne munbofe. Gwin gwer angtane Yahudimana jei pagara tunawer eyemiliserem, kotana aa jem ne isinmisnennerem jem mwa totiyelep jep ne fibawena, Saulus jam ne munbofe. ²⁵ Jengga gwinem, jem afelen mesna jei Saulus ga aane gaataantena karanjana unggwandusaiserem jebe, ane ga aane tebastaatyene pagara kotana aa jem ne isinmisnennerem jem jitefwer jamer onabo. ²⁶ Saulus jame aa galap fornaram kota Yerusalem je, jei ga angtane Yesus aa jei ne tikwebaatinennerem seyafter jebar ge nwinbef. Jengga angtane Yesus aa jei ne tikwebaatinennerem, jei seyafter jam ge erebili Saulusfar jam ge nwinbefe. Jei jam ge erebili, aam temawer jei jelem inibe enggam ge gubili Saulus jei Yesus gemerje waakenfer jam tebayan. ²⁷ Jes galapserem Barnabas jei Saulusminip ga fortya, ane Saulus ga aftawena rasulminibe, ane taterisi enggam ga aa nasipmini, "Saulus jei Tuhan nelep damtanant, ane Tuhan Jei jebar ge nasowenant. Ane Saulus jei Taterisi Waaken Yesusem temawer baabetfer ga aa towas-towastababilint kota Damsik je." ²⁸ Barnabas jes gemerserem gam jama nasminirim, rasul-rasulu jeiserem ini jemna waakenfer ga aa ge folbamini Saulusem temawer. Jepga Saulus jei seyafter ga aa ge nwinbene jebar. Ane jei baabeta ge domola enggalfe, bosna Yesusmana gam nasibenenefe kota Yerusalem seyafter gemerserem jebe. ²⁹ Ane jegme angtane Yahudimanaiserem Yunani olem aa jei ge nasbawenaram jebar ga aa ge nasbawena unggwanfer. Jengga jei ga enggammer ge gubili, "Saulus jamer nesa munbono." ³⁰ Jengga angtane Yesus aa jei ne tikwebaatinennerem jei taterisi jeiserem jame aa galap ge towaswebilirim, Saulus ga aane aftawena kota Kaisareyaminibe, ane jewer ga aane baftana kota Tarsuswer jam sofwefe. ³¹ Jepga safna Yesus aa jei ne tebanaram seyafter ona Yudeya yo Galileya ane Samarya je, seyafter waakenfer ge nwinbene, ane angtane nafsiserem jebe kapkaiserem afa fas jam ne eyeipmiyen. Mafnana Uwa Sanbagirmana jems batobaabili, ane angtane Yesus aa jei ne tikwebaatinennerem kanaufer ga aa ge fibili, ane angtane unggwanfer Yesus ga aane tebana. Ane angtane waakenfer ga naawena ane Tuhan ga aane erebene. ³² Jes galapserem Petrus ga jep wofowena. Nunu daamfenna jei jem ga gwina angtane Uwa Sanbagirmana aa jep ge nwinbenerem tamna Lida je. ³³ Jep ga angtane ga damtana bosna ga Eneyas, jongolawer tere. Nutarawer jam irweyan, jamere tahunu delapan. ³⁴ Petrus Eneyas ga bala, "Eneyas, Yesus Kristus ga ijewer waakentaf. Gase irwe nutarawer, tikara ga is egwaiwulsini!" Angtane jeiserem jei tatarmer ga irwena. ³⁵ Angtane tamna Lidamana ane ona Saron jep aa jei ge nwinbenerem jei mese, jei seyafter jame aa galap ne damtanaram enggame Eneyas mes waakenswena, jepga jei mese Tuhan ga aane tebana. ³⁶ Wini Yesus aa jei tikwebaatinirim aasaje kota Yope ga jep nwini, bosna jemna Tabita. Bosna jemna Yunani olem ga enggam gane bili Dorkas, bosna jeiserem jem igiserem ga rusa. Wini jeiserem jei nunu jeber-jeber waakensusfer eyebuwena, jei angtane galgalyenaiserem jes batobaabuwena. ³⁷ Jes galapserem jei bwerna ga falbili, jamere aa tere. Wini jeiserem jem futunu jam aa galap ne wirulurum jamer taban, ga aane gwalanswena titikabe mwona bolap aa je falaram. ³⁸ Tamna Lida je gwetmanfer nulna kota Yopefar. Angtane Yesus aa jei ne tikwebaatinennerem Yope je, jei jame aa galap ge sarbilirim enggame Petrus jei tamna Lida je jep nwini, jei angtane naura ga aane bafsona jemnibe. Angtane naura jeiserem jei Petrus enggam ga aa ge bala, "Tatarfersus se gwi Yopewer!" ³⁹ Petrus ga aane gaariufenne, gamjon jebaner seyafter ga aa ge waraubili jamere aa ge forobili Yope je. Jame aa galap ge forobitnerem, jei ga aa ge tabwili mwona bolap jeiserem jebe. Ane saamirawi seyafter jep gemerserem, jei ga aa ge jalbili Petrus gunabener ga aane goronwebana wini jeiserem jem futunu jepserem. Ane baju mese fen seyafter Dorkas gwanan aa jes tatarbaabilintim ga aane saibene. ⁴⁰ Petrus jei wini seyafter ga balbabili, "Sa totini!" Ane Petrus somwan dumem ga aa nwintena, sembayanga ga aa gwebana. Taban, gamjon ga irfwena wini futunu jeiserem jemniwer, ga bili, "Tabita, jase irwe!" Tabita nwena ga fersona, Petrus ga damtana, jes jeberserem jeber ga nwini. ⁴¹ Petrus tafnawer ga taabili, ane ga goltena wini jeiserem ga irwena. Jepga Petrus angtane Yesus aa jei ne tebanaram ane saamirawi mese ga jenbebili, ane ga saamisini enggame wini jeiserem jei gamjon mes fersontyo. ⁴² Ula jeiserem ga aane nasbinenne kota Yope je, ane angtane unggwanfer Tuhan ga aane tebana. ⁴³ Jes jepserem Petrus ga abaktowaifer nwini Yope je, Simonem jenabe. Awelna Simonmana ga enggam, jei sapi tifin mese, ane kambing tifin gwerep gam bunulu jamer sasan.

¹ Kota Kaisareya je angtane aasaje ga jep nwini, jemna bosna Kornelius. Jeiba angtane sanbaka 100 ginanggwa Romamana, aa jes ne jenbenerem "Koramil negeri Italyamana". ² Jei angtane waakena, jei ane angtane jelem jenap seyafter gemerserem Uwa Sanbagiri gane erebene, ane jei galgala anggwabura Yahudimana galgalyenaiserem jep ne kitulmini. Jei sembayanga jeber-jeber ne gwebawena Uwa Sanbagirfe. ³ Nunu daamfenna jema engbar nawer-ningna dafefe jei eserem jam tala gamserem gam ga damtana. Jei enggam damtana, jei malaikata Uwa Sanbagirmana waakenfer damtana aa kauwityerem jelem jenabe, ga aa bala, "Kornelius!" ⁴ Kornelius jei malaikata jeiserem ga erelmer gerebana, ane ga bala, "Uwa basa?" Malaikat jeiserem ga tamawolbana, "Uwa Sanbagiri Jei sembayanga imnaiserem is mes sarbabana, ane waakenaiserem ijes eyebilirim Uwa Sanbagiri is mes towasweibene, jega jem temawer Jei ga ims sarbastaabona. ⁵ Namwer aas jepserem angtane gasa baftabi jei gam ge gubi kota Yopewer enggalfe, angtane bosna Simon jei ga sene gaariufenne. Jemna bosna afwer ga Petrus. ⁶ Petrus jei angtane bosna Simon ga jem jenap nwini. Simon jei kambing tifni gwerep aa jei bunulwenaram jamere sasan, ane jei fi eyep nwini." ⁷ Jepga malaikata Korneliusfar aa jei ge nasowenaram, ga mirtetefala. Kornelius angtane naura awelna jelem jenap aa jei ge gweyibenerem, jei angtane jeiserem ga aa jenmini. Ane jeime ginanggwa daamfenna aa jenbene, ginanggwa jeiserem Kornelius aa jei batobawenaram, ane Uwa Sanbagiri aa jei pujitawenaram. ⁸ Kornelius ga nasipmini jebe seyafter aa je etamwenaram, enggam ga balbabili, "Aamei kota Yopewer sa gwi!" ⁹ Nunu jeiserem jem gwirmer ga, angtane nawer-ningna jeiserem jei ga aa ge sofobili jamere nele nenennap, kota Yope gwetmanap. Ane jes jepserem Petrus ga tawena ja sagabe sembayanga jewer gwebaf. ¹⁰ Petrus jei wisi ga folbana, jei jam twenf. Tumilgala aa jeber ne menetabaibaasinirim, Petrus ga eserem jam domola gamserem aaiserem gam ga domola. ¹¹ Jei winsi ga damtana aane bitnetinirim, ane jewer ga enggalem iretya kaina unggwandusa galserem aa je jerwentetyaram gumu nawer-naura, aa je iretyaram jamer jenabo. ¹² Kaina jeiserem jebe ga enggammer ge falbiton, twena ane twen galserem seyafter tufa nawer-naurabara gemerserem, ane awasa galserem, uftonem wofelaiserem; ane junu onnemana. ¹³ Petrus jei taterisi enggam ga sarbili, "Petrus, se irwe, jeiserem daamfenna ga is tegila, ane ga is tombana!" ¹⁴ Petrus enggam ga tamawola, "Wowo Tuhan, ai gemerje ajam tumilyen tumilgala Nabi Musa aa jes balbabilim angtane Yahudimana jam ne tumilyen, afa matauwa angtane Yahudimana enggam aa jes gane bilirim jam tumilyen." ¹⁵ Gamjon jei taterisi enggam ga sarbili, "Tumilgala Uwa Sanbagiri enggam aa jes bilirim namwer angtane saf gane tombaabili, angtane enggam jam guyon tumilgal aaiserem jam tumilyen." ¹⁶ Taterisi jeiserem jamere nawer-ningna jam gutalabe, ane kaina unggwandusa gamjon ga aa tauna winsibe. ¹⁷ Petrus jelem inipfener ga tenna, "Eserem jam domola gamserem ai ajes domolantam, jem igiserem je basa?" Jes jepserem angtane Kornelius aa jes baftabilirim jei ga aa ge forobitye. Jei jena Simonmana jam aane domolbanaram, jem mwa totiyelebe jep ga aa ge fibitena. ¹⁸ Jei angtane ga aane tenebaabili, "Simon Petrus ke aaf nwini?" ¹⁹ Ane jes jepserem Petrus ga eserem jam domola gamserem jei aa jes domolantam ga sarbistaabona, ane Mafnana Uwa Sanbagirmanaiserem ga bala, "Petrus, angtane nawer-ningna ims ne terelbene. ²⁰ Se irwe, ga is irtena ane angtane jeiserem jebaner seyafter ga isa sofwa! Ini kapka is jam folbayan jebar jam sofwefe, aam temawer angtane jeiserem Ai Aner baftabili." ²¹ Petrus ga iretya, ane ga aa sofwa angtane jeiserem jemnibe, ga balbabili, "Aba jesam ijesa terelbenerem. Aamei ibafa jela amnibe?" ²² Jei ga aane tamawolbana, "Ai ase Kapten Kornelius se balbabili imnip jam jalfe. Ini jemna waakena, ane jei Uwa Sanbagiri gam erebene, ane jei enggam ne balwena waakensusu anggwabura Yahudiminibe. Malaikata Uwa Sanbagirmana Kornelius enggam ga bala, aamei jam is gwina Korneliusem jenap, jega Kornelius jei taterisi imna is gase saribaasini." ²³ Petrus ga angtane jeiserem ga balbabili, "Aamei sa kautya, aaf isa tana." Nunu jeiserem jeme jeber ge tabatisini, ane jem gwinibener Petrus jebaner ga aa ge sofobili seyafter. Ane angtane afweraiserem Yesus aa jei ne tebanaram kota Yope je, jei jebaner ge sofobili. ²⁴ Ane nunu gamjon jeiserem, jeime kota Kaisareya je jep ga aa ge forobili. Kornelius ane jelem afelna mesna ane jelem saraboson mesna jelem jenap aa jei ge betwebilirim, jei ga jes ne fibabili. ²⁵ Petrus jame aa galap kautenaram, Kornelius ga jela ane Petrusem tof tarnap ga aa nwintena Petrus gam sembataf. ²⁶ Jengga Petrus Kornelius ga gaartena, ga bala, "Se irwe, ai aimba angtanesam." ²⁷ Ane Petrus jebar ga aa ge nasowena jei jama kautenaram jenabe, ane angtane unggwanfer aa jei ge betwebilirim ga damtabili. ²⁸ Jepga Petrus angtane jeiserem ga balbabili, "Aamei seyafter imsa towaswena enggame, agama Yahudimana ga enggam, angtane Yahudimana jam kaweteyan jena angtane Yahudimanyanaiserem jebe, afa jebar jam ge betwebiyen. Jengga Uwa Sanbagiri Jei as mes towastana enggame, ai angtane afa ajam balyan enggam jei kapka. ²⁹ Jega jem temawer, Tuhan jame as galap balaram ai ajam jalfe, ai baife ajam gweyan. Namwer aas jepserem, ai ga ajam towaswef, jeje bafa aamei ga as ima bala ajam jalfe?" ³⁰ Kornelius ga bala, "Nunu nawer-ningna gwanan jeiserem, engbar enggalfar jema namwer aas jepserem jema nawer-ningna, ai sembayanga agalap gwebanantam jenabe. Aafer-aafer angtane aasaje ga ai damtanant am tarnabe, angtane jeiserem fene jei aa jes kamwinirim jam ne bwenen-bwenenwena. ³¹ Jei ai ga as balant, ’Kornelius, Uwa Sanbagiri Jei sembayanga imna is mes sarbabana, ane awelna waakena imnaiserem is mes saribestaabona. ³² Angtane se bafta Yopewer, Simon jei gaariufenefe, jemna bosna afwer ga Petrus. Jei Simonem jenap nwini, angtane kambing tifni gwerep aa jei bunulwenaram, finip aa jei nwinirim.’ ³³ Jega jem temawer ai angtane tatarfer ga ai baftabilint ims jenbefe, ane ini imna waakena aamei im jela amnibe. Namwer ai aas aya nwini seyafter Uwa Sanbagirem tarnap, ajesa sarbisif seyafter Uwa Sanbagiri aa jes bilirim, aamei ap is bilipmini." ³⁴ Petrus jei taterisi ga towaiwulu jam nasipmife, "Ai namwer bunarsus enggam ai towaswena, Uwa Sanbagiri Jei angtane seyafter enggam damtabili armanaber nafis-nafismeryan. ³⁵ Angtane seyafter Uwa Sanbagiri aa jei ne erebenerem, ane waakena aa jei ne eyebilirim, Uwa Sanbagiri Jei enggam gunu, ’Angtane jeiserem saf gam jela Amnibe.’ Enggam Jei Jam balyan, ’Aam jei fwermana.’ ³⁶ Aamei seyafter imsa towaswebili taterisi igi Uwa Sanbagiri aa jes bilipminirim angtane Israelfe. Taterisi jeiserem je Taterisi Waakena Yesus Kristusem temawer. Jei mes tere, ane jega jem temawer Uwa Sanbagiri Jei etam-etama kapka nemnaiserem jem temawer nei nes jam nasbabiyen. Nei waakenfer nesa nwini, ane Jeiba angtane seyafter gemerserem jem Tuhansam. ³⁷ Aamei imsa towaswebili seyafter gemerserem aa je etamwenantam ona Yudeya je. Seyafter jeiserem ga mes towaiwena ona Galileyawer, nunu jes jepserem Yohanes Pembaptis aa galap tabanuluntum taterisi baptisanem temawer aa jes nasbilirim. ³⁸ Aamei imsa towaswebili Uwa Sanbagiri Jei Yesus Angtane tamna Nasaretmana mesam destabana, ane Uwa Sanbagiri Jei Mafnana Jemnaiserem, ane baabeta unggwandusa jes mese mesam tetbene. Yesus Jam aa galap wofenantam taman-tamna seyafter gemerserem jebe, Jei waakena gam eyeipminenne angtanefe, ane angtane bawasa aa jes tebabilirim jes waakentababinenne. Yesus Jei seyafter aa eyebili, aam temawer Uwa Sanbagiriserem Jei Jam mirtetefalyan jamer gerebaasnenne. ³⁹ Ai seyafter gemerserem amsama damtabili seyafter aa jes eyebaabilintim ona angtane Yahudimanaiserem jebe, ane kota Yerusalem je. Angtane Jei ga aane daktanswenant ti salibibe, ga aane munbonont. ⁴⁰ Jengga nunu nawer-ningnabaraiserem Uwa Sanbagiri Jei ga jem irtestenant terewer, ane Jei ga angtanef ga aa ge saaminint. ⁴¹ Jengga angtane afweraiserem jei jam ne damtayan, jengga apfener saamisini ai Uwa Sanbagiri as jes destabaabilirim. Jame aa galap irwenantam angtane jam tereserem jemniwer, jepga aya twena ane fo mese aya telbebilint Jebaner. ⁴² Ane Jei ai ga as balbabili, ai Taterisi Waakena ajema nasipminennefe angtane seyafter gemerserem jebe. Ane Jei ai gamjon ga as balbabili, ai angtane ajama towas-towastababife enggame, Yesus Jeiba Angtane Uwa Sanbagiri aa jes destabanaram enggalfe, Jei angtane gemer nwiniserem ane angtane jam tereserem jes teneba-tenebaabuwef. ⁴³ Nabi seyafter gemerserem jei taterisi Jem temawenefener nasbinennel. Jei enggam ne nasbinennel, angtane seyafter Yesus aa jei ne tebanaram, Uwa Sanbagiri etam-etam kapka jemna Jei se wirtabaipmini ane gamjon jam sarbaipmistaabonyan, baabeta bosna Yesusmanaiserem jeme." ⁴⁴ Jes jepserem Petrus jei gemer nasowena, Mafnana Uwa Sanbagirmana ga iretya angtane seyafter jep gemerserem taterisi jeiserem aa jei ne sarbisinirim jemnibe. ⁴⁵ Angtane Yahudimana Yesus aa jei ne tebanaram Petrusfaner aa jei ge jalbilirim kota Yopewer, jei ga aa ge bitbitwebili aam temawer Uwa Sanbagiri Jei Mafnana Jelemana aa jewer golminirim angtane Yahudimanyanaiserem jebe. ⁴⁶ Jei angtane jeiserem mes ne sarbabisini ula nafis-nafsiserem jei jam ne towaswebiyen jem aa jei ge nasbawenaram. Ane jei Uwa Sanbagiri ga aane pujitene, jei enggam ge gubitowena, "Uwa Sanbagiri Aameiba sanbagirsusum!" Petrus ga gunu, ⁴⁷ "Mafnana Uwa Sanbagirmana mes fortya jemnibe, Mafnana gwanan aa gam fortyantam nemnibe. Gamjon ga angtane enggam jam guyon angtane aaiserem jei fome jam baptistababiyen." ⁴⁸ Jepga Petrus ga balbabili, jei ga jam sa baptistababili bosna Yesus Kristusmanaiserem jeme. Jepga jei Petrus ga aane bala, jebar nomkef jam ge nwinbefe.

¹ Rasulu ane angtane Yesus aa jei ne tebanaram ona Yudeya jeiserem jebe, jei enggam ge sarbili, angtane Yahudimanyanaiserem jei jam ne sunattababiyene, jei jegme taterisi Uwa Sanbagirmanaiserem mes ne taabili. ² Petrus jame aa galap fornaram kota Yerusalem je, angtane Yahudimana jam sunattababiliserem Yesus aa jei ne tebanaram, jei Petrus ititmer ga aane tenebana enggame, ³ "Jeje bafa aamei angtane jam sunattababiyeneiserem jem jenap ga im kawetena? Ane jeje bafa aamei jebaner seyafter ga ima twena? Jeiserem kapka." ⁴ Jei Petrus aa jewer ne tenebanaram, Petrus ga seyafter aa je etamwenantam jemnibe jeiserem ga aa nasipmini. ⁵ Jei enggam nasipmini, "Ai sembayanga agalap gwebanantam kota Yope je, winsiwer aa je iretyaram eserem gemerserem gam ga ai domolant. Jeiserem ga enggam ai domolant, kaina unggwandusa galserem aa je jerwentetyaram gumu nawer-naura winsiwer ga iretyant, jamere am tarnabo. ⁶ Kain namsini jeiserem ai jep ga ai anggatenant, ane jep ga enggammer ge falbiton, twena ane twen galserem seyafter tufa nawer-naurabara gemerserem; ane twena onnemana gemerserem; ane awasa galserem uftonem wofelaiserem; ane junu onnemana galserem; seyafter ai damtabitenant. ⁷ Jepga taterisi enggam ga ai sarbilint aa je gutenaram, ’Petrus gase irwe, jeiserem daamfenna ga is tegila, ane ga is tombana!’ ⁸ Jengga enggam ai balant, ’Wowo Tuhan, ai gemerje ajam tumilyen tumilgala Nabi Musa aa jes bilim angtane Yahudimana jam ne tumilyeneiserem, afa tumilgala angtane enggame aa jes gane bilirim jam tumilyene, jeiserem jam kaweteyan am aaremabe.’ ⁹ Ai taterisi gamjon ai sarbilint taman waaken-giriwer enggame, ’Tumilgala Uwa Sanbagiri enggam aa jes bilirim namwer angtane saf gane tombaabili, angtane enggam jam guyon, tumilgal aaiserem jam tumilyen.’ ¹⁰ Taterisi jeiserem ai ajamer sarbilibe unggwanfer ga nawer-ningginfer, jepga kaina jeiserem ga aa dekolstetyant seyafter winsibo. ¹¹ Ane jes jeberserem angtane nawer-ningna aa jes ne baftabilirim kota Kaisareyawer, jei ga aa ge forobityent jena ai nomkef ajep nwinintim. ¹² Jepga Mafnana Uwa Sanbagirmana ga as balant, ’Se sofwe jebaner, baif ijam gweyan!’ Ane angtane enam aaiserem ga ajebara sofwant jamer Kaisareyaminibo. Ga aya kawetenant Korneliusem jenabe. ¹³ Ane Kornelius jei ga as nasipminint enggame, jei malaikata mes damtanant jelem jenabe, ga aa balant, ’Angtane se baftabi kota Yopewer, Simon jei ne gaariufenefe, jemna bosna afwer ga Petrus. ¹⁴ Taterisi Waakena ga is jei se bilibene enggame, Yesus Jei is waakentaasini, ane wi tane imna seyafter gemerserem jes mese.’ ¹⁵ Ane ai jame agalap tawawenantam ajam nasewefe, Mafnana Uwa Sanbagirmana ga iretyant angtane jeiserem jemnibe, Mafnana nemnip gwanan aa gemer iresanyantam. ¹⁶ Jepga ai sarbistaabonant taterisi Tuhan aa jes bilintim enggame, ’Yohanes jei fom baptistene, jengga aamei Mafnana Uwa Sanbagirmana is Jem se baptistababili.’ ¹⁷ Uwa Sanbagiri Jei Mafnana Jelemanaiserem angtane Yahudimanyan jep golmini, gwanan gamserem Jei Mafnana Jelemanaiserem nep nes Jes golmini, nei Tuhan Yesus Kristus negalaba tebanantam. Jega jem temawer ai baabeta fas Uwa Sanbagiri jem wemtafe." ¹⁸ Angtane ula jeiserem jame aa galap ne sarbilirim, jei gamjon Petrus jam ne nasbayan. Jepga jei Uwa Sanbagiri ga aane pujitene, jei ga ge gubili enggame, "Afa gam jes gamserem, gam jega Uwa Sanbagiri Jeime angtane Yahudimanyan nele se gaarmini enggalfe, jei etam-etam kapkaiserem jewer jam ge tikwebife, ane waakenfer gwelaiserem jamer abak-abaksus ga sene domola." ¹⁹ Angtane gwanan Estefanus jam aa galap ne munbonontom, jei kapka gane eyeipmini angtane Yesus aa jei ne tebanaram jebe, ane jewer jon ga aane surbobili. Jei ga aa ge sofobuwena ona Fenisyawer, naantei Siprus, ane kota Antyokyawer. Ane jei Taterisi Waakena anggwabura Yahudifefener jep ga aane nasipminenne. ²⁰ Jengga angtane daamdema Yesus aa jei ne tebanaram, jei naantei Sipruso kota Kireneminiwer ge jalbili, ane jei kota Antyokyawer ge gubili. Ane jei ga angtane Yahudimanyanaiserem ga jebar ge nasbawena. Taterisi Waakenaiserem ga jes ne nasbili enggame, Yesus Jeiba Tuhansam. ²¹ Ane baabeta Tuhanmanaiserem je angtane jeiserem jebar seyafter ge nwinbene, ane jega jem temawer angtane unggwanfer jei Tuhan gane tebana. Jei ga ge gubili, "Tuhan Jei namwer am Sanbaka." ²² Angtane safna Yesus aa jei ne tebanaram kota Yerusalem je, jei taterisi jeiserem aa galap ne sarbilirim, jepga Barnabas ga aane baftawili kota Antyokyawer. ²³ Barnabas jame aa galap forotnaram kota Antyokya je, jepga aa anggana Uwa Sanbagiri Jei waakena Jelemanaiserem mes golmini jebe, jepga ini Barnabasmana saaser-saasersusmer folbana. Jei enggam ga balbabili, "Aamei angtane Tuhan ga waakenfer isa tebana ini imna seyafter gemerserem jeme, ane aamei ijama tikweyan Tuhan jam onsobalawer." ²⁴ Barnabas jei angtane waakena. Jei Mafnana Uwa Sanbagirmana mes taabili, ane jei Yesus uskambarsus tebana, ane jega jem temawer angtane unggwanfer Tuhan ga aane tebana. ²⁵ Jewer ga Barnabas ga gwina kota Tarsuswer, Saulus jam terelbefe. ²⁶ Ane jei Saulus jame aa galap damtanaram, jei Saulus ga kota Antyokyawer ga aftawena. Barnabaso Saulus jei tahunu daamfenna safna Yesus aa jei ne tebanaram jebar jamer ge betwebuwelabe, ane jei angtane unggwanfer ga aa ge towas-towastababuwena. Angtane Antyokyamana jei Yesus aa jei ne tikwebaatinennerem, angtane jeiserem jei jep nabal-nabalsusu enggam ga jes ne balbabili, angtane Kristen. ²⁷ Jes galapserem nabi-nabi Yerusalemwer ge jalbili kota Antyokyaminip. ²⁸ Angtane jemniwer daamfenna aasaje bosna Agabus. Agabus Mafnana Uwa Sanbagirmanaiserem jeme enggam ga gunu, "Ogiri aaiserem seyafter gemerserem wisdusa sene domolsa, tumilgala jam ne damtabiyen abaka." (Taterisi jeiserem ga mes etamwena Kaisar Klaudius jei aa galap gwenaram.) ²⁹ Jega jem temawer angtane seyafter Yesus aa jei ne tikwebaatinennerem jener ga aane nasbili tumilgala yo doini jes ne dupdupbulfe, jelem baabet mwongga jeberserem. Ane jeiserem ga sene kitulmini jelem afelen mesna Yesus aa jei ne tebanaram jebe aa jei ge nwinbenerem ona Yudeya je. ³⁰ Barnabaso Saulus ga aane destamini tumilgala yo doini aa jes ne dupduptababilirim, jei jes ge erbifelfe angtane jematabe sanbakef aaiserem jep gam kitulmife.

¹ Jes galapserem Raja Herodes ga kapkaiserem jes eyeipmini angtane Kristenfe. ² Jei Yakobus, Yohanesem ayana jes bala jam munbofe, ga enggam balbabili, "Nombeyem isa tegila." ³ Angtane Yahudimana jeiserem aa galap ne domolaram, ini jemna saaser-saaserfer ge folbamini angtane Kristen jam ne munbobife. Jega jem temawer Raja Herodes jei Petrus ga bala jam tebafe. Jeiserem ga enggalap etamwena masara Roti Tanyana jes Tombaabif afa masara Paskana aa galap falaram. ⁴ Petrus jame aa galap ne tebanaram, bwiyip ga aane gaataantena. Herodes ga awelna golmini ginanggwana safna nawer-naura jebe, safna daamfenna jep ga ginanggwa nawer-naura, ane jei Petrus ga aane gerebaasnenne. Raja Herodes ga enggam mwangbisini, masar Paskana jam aa jep barwenaram, Raja Herodes ga Petrus gase aftawena angtane unggwanfer jepserem jem nwenabe, ane jep gam tenebawefe. ⁵ Ga jem temawer Petrus ga bwiyip nuniton, jengga angtane safna Yesus aa jei ne tebanaram jei sembayanga jeber-jeber ne gwebabawena Uwa Sanbagirfe Petrusem temawer. ⁶ Gwini daamfenna nalefe Raja Herodes jei Petrus jam aftaweyan angtane unggwanfer jem nwenabe jep gam tenebawefe, Petrus jei bwiyiber nwini. Tafna jemna rantena naura ga jem ne faarebana, ane ginanggwa naura jem terterewer ge tananna. Gamjon mwa kawetelabe, ginanggwa gamjon naura jep ge fina. ⁷ Aafer-aafer malaikata Tuhanmanaiserem Petrusem tarnap ga fyatetya. Ane nafa malaikatmana mwonap ga kautena. Malaikata jeiserem Petrus ga gin-gintene jamer Petrus aa irwena, ane ga aa bala, "Tatar, se irwe!" Jes jepserem rantena jeiserem ga aane fernebaatini Petrusem tafnawer. ⁸ Malaikata jeiserem ga bala, "Ban se ginggitulsi ane tofgola se kamwi!" Petrus jes gemerserem gemer ga aa gwena. Malaikata jeiserem gamjon ga aa bala, "Fene imna sagamanaiserem se kamwi, ane ai ga asis onsobana!" ⁹ Petrus malaikata jeiserem ga onsobana bwiyiwer, jebaner ga aa ge totintye. Petrus jei teisyena jei ke bunar totini, afa jei esers tana. ¹⁰ Jei ginanggwa naura gwanan jeiserem ga aa ge ayemintye, ane gamjon ginanggwa naura jeiserem jes ge ayemintye, jamer aa ge fortya mwa besi unggwandusa jem tarnabe kotanap jewer gwilaiserem. Mwona jeiserem jener ga gwawetini, jei jewer ge totinyefe. Jei ga aa ge totini jitefwer, nels tamer ga aa ge sofwa. Abakferyan malaikata jeiserem Petrus jep ga mirtetefala. ¹¹ Jes jepserem Petrus ga towaswena jeleminip aa je etamwebanaram jeba bunaram. Petrus ga gunu, "Ai ga as towaswel Tuhan ba malaikata Jelemana bunaram baftannu enggalfe ai as gam aamsinfe Herodesem tafnawer, ane seyafter kapka gemerserem angtane Yahudimana jei abe aa jes ne mwanggibaasinirim jewer." ¹² Petrus jame aa galap towaswebilirim jemnip aa je etamwenaram, jei ga aa sofwa Mariyam jenabe, Yohanesem eneserem. Yohanesmana bosna afwer ga Markus. Angtane unggwanfersus Mariyam jenap aa jei ge betwebilirim, jei sembayang ga aane gwebana. ¹³ Petrus mwona aa galap entewilirim sitawer, tane yafma jena jeiserem awelna jep aa jei gwebuwenaram bosna Rode, jei ga jela enggalfe gam damtaf mwona nane enentene. ¹⁴ Pintu tarnabe jei taterisi Petrusmana ga saribene, ini jemna saaser-saasersusfer ga falbili, jengga jei mwona jam tertesiwiyen. Jei gamjon tatar aa gwina angtane jep aa jei ge betwebilirim jam towastababife enggame, "Petrus aa fitna mwa totiyele tarnabe!" ¹⁵ Angtane jep aa jei ge betwebilirim enggam ga aane bili, "Aamke dwak teten?" Jengga Rode jei gamjon uskambar ga gutena, "Bunar-bunarsus jeiba Petrusam!" Jepga jei ga aane tamawolbili, "Fas, jeiba malaikata jemnaiserem." ¹⁶ Jei gemer ge nasbawena, Petrus jei mwona ga enentewili. Jepga jei mwona aa galap ne tertebaasiwilirim, jei ga aa ge bitbitwebili Petrus jam aane damtanaram. ¹⁷ Petrus jei tafna kukmer ga gweipmini enggalfe, jei olgulyamer gam ge nwinbef. Jes jepserem jei ga aa nasipmini Tuhan aa gam geserstenaram bwiyiwer. Ane enggam ga balbabili, "Aaiserem ga jam isa towasulbono Yakobusfe, ane nem afelna afwer gemerserem jei mese jei jam isa towastababili." Jeiserem jame tabanulminirim jam nasipmilibe, Petrus jem ga aa mirtebitefala, tampata nafsiserem jewer ga sofwa. ¹⁸ Jem gwirmer gwinibenersus, ginanggwana era ga aane dena, jei jena jam ne taanaaminenne enggame, "Petrus jei fwera?" ¹⁹ Raja Herodes angtane ga balbabili Petrus jam ne terelbefe, jengga jei Petrus jam ne damtayan. Jepga Herodes ga gunu ginanggwana jam tenebaabife, ane taban angtane nensa ga balbabili ginanggwa jeiserem jam munbobife. Jeiserem taban Raja Herodes ona Yudeyawer ga ge sofobili, kota Kaisareyawer ge gubili, ane ga jep ge nwinbene. ²⁰ Raja Herodes jei angtane kota Tirus ane Sidon jes nasbabili. Jega jem temawer angtane Tiruso Sidonmana ga aa ge betwebili, ane jei safna daamfenna ga jes ne baftabili Raja Herodesminip ge sofobife. Nabal-nabalsusu jei angtane bosna Blastus jemnip ge sofobili. Blastus jei angtane sanbaka jena unggwandusa Herodesmanaiserem jebe. Gamjon jei Raja Herodesminibe ga aa ge gubili waakenfer jewer gwef jes ne bilibene, enggalem temawer tumilgala aa jes ne damtabuwenaram Raja Herodesem onnawer. ²¹ Ane nunu daamfenna aa jes ne bilirim, Raja Herodes fene waakena ga kabwabili, taman nwini Rajamanaiserem jep ga nwintena, angtane unggwanfer taterisi jep ga nasipmini. ²² Ane angtane unggwanfer jei aa jei ne sarbasinirim, jei ga aa ge gubitowena, "Taterisi aaiserem je angtanemanyan, jengga taterisi aaiserem je Uwa Sanbagirmana jes galserem." ²³ Ane jes jeberserem malaikata Tuhanmana jei Raja Herodes ga aa saftana, enggalem temawer jei bosna Uwa Sanbagirmana jam gulbateyan. Ane ufa Raja Herodes ga aane tumna jamere aa tere. ²⁴ Jepga taterisi Uwa Sanbagirmanaiserem ga bijauswebana jam ne nasibenenelebe, ane angtane unggwanfer Yesus ga aane tebana. ²⁵ Barnabaso Saulus jei awelna jemna jam aa galap ge tabanulurum angtane galgalyanaiserem doini jep jam ge kitulminenefe Yerusalem je, jei gamjon ga aa ge warauwa kota Antyokyawer. Ane jei ga Yohanes Markus gemer ge aftayala.

¹ Jes galapserem angtane Kristen kota Antyokya je, afwer nabifam naawena ane afwer gurufam naawena. Jemna bosna ga aas mese: Barnabas; ane Simeon, angtane seiseye; ane Lukius, angtane kota Kirenemana; ane Manahem, jei Gubernur Herodesfar ne sweinint; ane Saulus. ² Nunu nafsiserem jeme jei Tuhan aa galap ne pujitenerem, ane jam ne dwenyan enggalfe Uwa Sanbagiri gam ne pujitef, Mafnana Uwa Sanbagirmana ga balbabili, "Barnabaso Saulus sa serkensosi enggalfe, awelna Amna tefner As jei ge gweyibef." ³ Jame aa galap ge tabanswebilirim tumilgala jam ne tumilyen enggalfe Uwa Sanbagiri gam ne pujitef, ane sembayanga aane gwebana taban, jei tafna ga aane tosomuntena angtane nawana jeiserem jemnibe, ane ga aane bafsona jam ge sofwefe. ⁴ Mafnana Uwa Sanbagirmanaiserem Jei Barnabaso Saulus ga gitmini enggame, "Kota Seleukyawer sege sofwe, ane jewer ga atdusa layarabaraiserem jem ga is ge sofwa jamere naanteya Siprus jebo." ⁵ Jame aa galap ge fornaram kota Salamis je, jepga taterisi Uwa Sanbagirmana ga aa ge nasibenenne jena angtane Yahudimana aa jep ge betwebuwefaram. Ane Yohanes Markus ga jei onsomini jam batomife, taterisi Uwa Sanbagirmana jebar ne nasibenenef. ⁶ Jei naantei jeiserem jem nenenesamer ge sofobili jamere kota Pafoso aa ge forobili. Ane angtane Yahudimana aasaje ga jep ga aane damtana bosna jemna ga Bar Yesus. Jei faatrewabara, ane jei jena enggam bala, "Aiba nabisam." ⁷ Jes jepserem Sergius Paulus jei Gubernurfe ga jei nwini naanteya jeiserem jebe, ane jei Bar Yesus angtane faatrewabara jeiserem jebar jena waakenfer ge damdamsosini. Gubernur jeiserem tousaiserem jemna uskambar, ane jei Barnabaso Saulus ga jenmini. Jei enggam gunu, "Ai tateris Uwa Sanbagirmanaiserem ajewer saribaasif." ⁸ Jengga angtane faatrewabaraiserem bosna Bar Yesus, bosna jemna Yunanim olem jei Elimas, jei Barnabaso Saulus baif gwemini. Jei ini Gubernurmana gam dektebef, jega Gubernur jei Yesus jam tebayan. ⁹ Jepga Saulus, jemna bosna afwer ga Paulus, jei Mafnana Uwa Sanbagirmana mes bugufswebana, jei Elimas ga gerebana, ¹⁰ ane ga bala, "Aamei tane bawasmana gamserem. Aamei waakenaiserem baif im gwebili. Aamei angtane nafsi gam afaftababili uskambar, ane aamei angtane faatrewa imnaiserem ijem afaf-afaftababuwena. Tuhanmana bunarsusferaiserem aamei jeiserem enggamem bili je bunaryan. ¹¹ Namwer aas jepserem tafna Uwa Sanbagirmanaiserem is jese denbene. Nwena imna is jam sene kofnebana jamer abaktouya, gwer nafa ga ijam damtayan." Jes jeberserem angtane jeiserem jei jena ga entene nwena gar seiseye motsobaasinirim, ane jei ga sarananna angtanef enggalfe jei aftafalfe. ¹² Gubernur Sergius Paulus jame aa galap domolaram aa je etamwenaram, jei Yesus ga tebana. Jei taterisi Tuhanem temawer jam bitbitwebili. ¹³ Paulus ane angtane jei aa jebar ge wofobanaram, jei kota Pafoswer ga aa ge sofobili, jamere kota Pergaminibe propinsi Pamfilya je jep aa ge forobili ateme. Jes jepserem Yohanes Markus jei jelem afelen mesna ga jep mirtebitefala, ane jei kota Yerusalemwer ga warauwa. ¹⁴ Paulus ane angtane afweraiserem kota Pergawer ga aa ge sofobili, ga kota Antyokyaminibe ona Pisidya jep ga aa ge forobili. Nunu Sabateme, nunu angtane Yahudimana aa jem ge nwinbisiwefaram, jem ga aa ge gubili jena angtane Yahudimana aa jep ge betwebuwefaram, jep ga aa ge nwinbene. ¹⁵ Taterisi Nabi Musamana ane taterisi nabi nafis-nafsi jei aa jes ne tulistababilim, seyafter jeiserem jam aa galap ne tabanulurum jam gerabaabistelabe, angtane sanbak-sanbaka jena jemnaiserem aa jep ge betwebuwefaram jei ga aane balbabili, "Am afelen mesna, ke samfer aamei taterisi angtane jem kanautababiliserem jes isa nasbili? Ai taterisi jeiserem ajama sarbisif." ¹⁶ Paulus ga irwena, tafna kukmer ga gwemini, ane ga balbabili, "Angtane Israelmana, ane angtane Yahudimanyan Uwa Sanbagiri aaf aa jei ne pujitawenaram, ai as imsa sarbasi! ¹⁷ Uwa Sanbagiri angtane Israelmana aa jes ne pujitawenaram, Jei asal-asal amnaiserem mes destabaabil. Gwanan unggwanferyan jamere unggwanfersus, negeri Mesir je aa galap ge nwinbelem. Jei ga enggam ge nwinbel, angtane foryala gamserem. Jepga Uwa Sanbagiri Jei baabeta unggwandusa Jelemanaiserem jeme, angtane jeiserem jem ga aftabifel negeri Mesirwer, ga aa ge sofobil. ¹⁸ Tahunu ga empat pulu, angtane afweraiserem jemniwer jei safe kapkaiserem jes ne eyebuwel, Uwa Sanbagiri Jei jebaner waakenfer ge nwinbel taman dwisgiribe. ¹⁹ Uwa Sanbagiri Jei anggwabura tuju gam falamulsil ona Kanan je, ane Jei ona jeiserem angtane Jelemanaiserem jep ga gaarmil. ²⁰ Seyafter jeiserem tahunu ga 450 ga jem fal. Seyafter jeiserem taban, jepga Uwa Sanbagiri Jei angtane sanbak-sanbaka jep ga kitulmini enggalfe, angtane jei ne balf bunar afa fas. Ane angtane sanbak jeiserem jei sanbakfe ga jei naawel jamere Nabi Samwel aa foryal. ²¹ Jepga angtane jei Uwa Sanbagiri enggam ga aane bal, ’Uwa Sanbagiri, abe ase Raja se gaarmi.’, ane Uwa Sanbagiri ga Raja Saulus ga gaarmil. Raja Saulus jei tane Kismana, anggwabura Benyaminmanaiserem, ane jei tahunu unggwanfer ga empat pulu sanbakfe jamer nwinibe. ²² Uwa Sanbagiri Jei Raja Saulus aa galap balam, ’Aamei Rajafe gamjon ijam gweyan’, jepga Uwa Sanbagiri gamjon Daud ga gaartel Rajafe. Uwa Sanbagiri Jei Daudtem temawer enggam gul, ’Ai Daud tane Isaimana, Amsa bala: Angtane jeiserem jei samfer, ane jei seyafter gemer gam eyebili Ai gemer Agam gunurum.’ ²³ Ane asal-asala Daudmana Jeiba Yesusam, Uwa Sanbagiri aa Jes gaarminirim angtane Israelfe enggalfe angtane gam waakentababisif, Jei gwanan aa gemer gulum. ²⁴ Yesus nalefe awelna jam gwebiyen, Yohanes angtane Israelmana mesam balbabilint enggame, jei ga etam-etam kapkaiserem jewer gam ge tikwebif, ane gane baptistababif. ²⁵ Ane jes galapserem Yohanes awelna jemna amkom fom tabanulu, Yohanes angtane ga balbabilint, ’Aamei seyafter ifoma gunu, ai nansa? Ai ke angtane aas aamei ijesa fibanaram. Jengga sa angga, Angtane jeiserem se fortya awelna amna ajep tabanulurum. Tofgol newa Jemna ajam fersobaasiyen, aam temawer Jei Tane Uwa Sanbagirmana, ane ai angtane bastantouya.’ ²⁶ Am afelen mesna, asal-asal Abrahammana, ane angtane Yahudimanyan aaf Uwa Sanbagiri aa jei ne pujitawenaram, Uwa Sanbagiri Jei taterisi nes mes golminint enggame, Jei nes fomfom se waakentababili. ²⁷ Angtane Yerusalemmana ane jem sanbakfe aa jei ge nwinbenerem, jei teisyena enggame Yesus Jei angtane se waakentababili. Jei jam ge towaswebiyen taterisi nabi-nabimana aa jes ne gerabistowefaram jeber-jeber nunu Sabateme, nunu angtane Yahudimana aa jem ge nwinbisiwefaram. Taterisi nabi aa jes ne nasbilim jeba bunaram, aam temawer angtane jei Yesus mes ne munbonont, nabi-nabi fwatermana jei gwanan aa gemer ne nasbilim. ²⁸ Safe etam-etama jam ne domolbayan Yesus jem munbofe, jei Gubernur Pilatus enggam ne bala Yesus jam munbof. ²⁹ Ane seyafter jeiserem ga taban, seyafter Yesusem temawer aa jes ne tulistababilim Taterisi Uwa Sanbagirmanaiserem jebe, jei Yesus jam tinswef ti salibiwer, ane gam tirnnuf tonmwa bitisibe. ³⁰ Jengga Uwa Sanbagiri Jei mes irtenent terewer. ³¹ Ane nunu unggwanferyan Jei Jena ga aa ge sanant angtane tarnabe, angtane Jebaner aa jei ge jalbilirim ona Galileyawer jamere kota Yerusalemo. Ane jei ga Yesusem temawer jep ne nasipmini angtane Israelfe. ³² Ane namwer aas jepserem Taterisi Waakena ai is ajama nasipmif, Uwa Sanbagiri asal-asala nemnaiserem jebe aa jes bilipmilim enggame, ’Jeiserem Aba As eyebili.’ ³³ Jeiserem Uwa Sanbagiri abe mes eyeipminint, asal-asala jemnaiserem. Jei ga Yesus gamjon Jam irtef terewer. Mazmur naura jep ga enggam baatultel: ’Aamei Tane Amna, Ai Ames etamwena Im Uwafe nunu namwer aaiserem.’ (Mazmur 2:7) ³⁴ Uwa Sanbagiri Jei Yesus mes irtenent terewer, ane Jei gamjon Jam butsweyan. Taterisi jeiserem ga Uwa Sanbagiri gwanan aa jes bilim: ’Ai waakena IsAs eyeibene Ibe, Ai gwanan Raja Daudfe Ajes bilibenerem.’ (Yesaya 55:3) ³⁵ Gamjon pasala nafsiserem jep bil: ’Aamei Angtane waakensusu Imna Ijam balyan, jam butswefe.’ (Mazmur 16:10) ³⁶ Raja Daud jei ga taterisi Uwa Sanbagirmana mes onsoibel, jei aa galap gwelam, jamere aa tere. Jepga aane tirnnul asal-asala jemnaiserem jem tarnabe, ga jep butswel. ³⁷ Jengga Angtane Uwa Sanbagiri aa Jes irtenentem terewer, Jei Jam butsweyan. ³⁸ Jengga aamei am afelen mesna, aamei seyafter taterisi aaiserem jam isa towaswebili enggame, Yesus Jei etam-etama kapka nes mes wirulmisini, gamjon jeiserem Jam sarbistaabonyan. ³⁹ Aamei seyafter jam isa towaswebili enggame, Yesus seyafter aa jei ne tebanaram, etam-etama jemna mes ge barweipmini, ane Uwa Sanbagiri enggam gunu, angtane jeiserem jei waakena. Jengga Hukumu Nabi Musa aa jes tulistababilim, Hukumu jeiserem jeme etam-etama kapka angtanemana fas jam borolmiyen. ⁴⁰ Ga jem temawer aayai, jega gam jam etamweyan imnibe, nabi-nabi aa jes ne tulistababilim: ⁴¹ ’Se domol, aamei syefer ijesa nasbilirim Uwa Sanbagirem temawer, aamei isa bitbitwena, ane ga isa tere. Namwer aas jepserem, Ai jes As eyebili aamei baife ijesa gwebilirim, safe angtane is jas ne nasipmini ibe.’ " (Habakuk 1:5) ⁴² Pauluso Barnabas jena angtane Yahudimana aa jep ge betwebuwefaram jep aa galap ge totintyerem, jei ga aane gitmini, "Sabata gamjon jepserem, taterisi jeiserem gamjon ga jam is nasbili." ⁴³ Angtane jeiserem jei jam aa galap ge tobitintyerem, angtane Yahudimana unggwanfersus, ane angtane Yahudimanyan Uwa Sanbagiri aa jei ne erebenerem, jei Pauluso Barnabas ga aane onsomini. Rasul nauna jeiserem jei angtane jeiserem ga jes ge towas-towastababili, ititmer ga aa ge balbabili, "Aamei isa fina waakenaiserem Uwa Sanbagirmana Jei aa jes kitulminirim jeme." ⁴⁴ Nunu Sabat gamjon jeiserem, angtane safe seyafter aa gemer ge nwinbenerem kotana jeiserem jebe, jei ga aa ge jalbili enggalem temawer Taterisi Uwa Sanbagirmana jewer ne sarbisif. ⁴⁵ Jengga angtane Yahudimana aa galap ne damtabilirim angtane unggwanfer jeiserem, ini jemnaiserem ga kabwakfer ga aa ge folbamini, ane jei Paulusfe kapkaiserem ga aane nasbaibene, ane baif ne gwebabili taterisi Paulus aa jes nasbilirim. ⁴⁶ Pauluso Barnabas jei jam ge ereyen, jei baabetfer ge nasowena, "Taterisi Uwa Sanbagirmana ai nabala ga ip ge nasipmini, jengga aamei ibaifa gwebili. Aamei enggame ima gunu, ’Waakenfer gwelaiserem jamer abak-abaksus ajama taabiyen.’ Jega jem temawer namwer ai isa jam as ge mirtebitefala, ane ga ajewer ge sofwa angtane Yahudimanyanaiserem jemnip. ⁴⁷ Aaiserem je Tuhan abe as jes bilipmilim: ’Ai ga imter gitmini, aamei nafabara ga aamei is ge nwini angtane Yahudimanyan jemnibe, aam ga taterisi waakenaiserem ga aamei is ge gwirnenne jamere ogiri fwesa jepserem jebo.’ " (Yesaya 49:6) ⁴⁸ Angtane Yahudimanyan taterisi jeiserem aa galap ne sarbilirim, ini jemna saaser-saaserfer ge folbamini, ane ga aa ge gubitena, Taterisi Uwa Sanbagirmana je waakena. Ane angtane seyafter Uwa Sanbagiri aa jes balbabilirim jes ne taabili waakenfer gwelaiserem jamer abak-abaksus, angtane jeiserem ga aane taabili. ⁴⁹ Ane Taterisi Uwa Sanbagirmana ga aane jawola ona jeiserem jebe. ⁵⁰ Jengga angtane Yahudimana jei wi sanbak-sanbaka Uwa Sanbagiri aa jei ne erebenerem, ane angtane sanbak mese kotana jeiserem jebe, ga aane balbabili, "Taterisi jeiserem ijama taabiyen!" Ane kapkaiserem jes ne eyeipmini Pauluso Barnabas jebe, ane ga aane surmini ona jeiserem jewer. ⁵¹ Jepga Pauluso Barnabas tufa ga aa ge tentebaabisini sonabara, jega angtane kotana jeiserem jepmana jei gam ge towaswebif jei kapkaiserem jena ga jes ne eyebili. Ane Pauluso Barnabas kota Ikoniumwer ga aa ge sofwa. ⁵² Ane angtane Yesus aa jei ne tikwebaatinennerem kota Antyokyawer jeiserem, jemna ini saaser-saaserfer ge folbamini, ane Mafnana Uwa Sanbagirmana jei mes bugufswebabili.

¹ Kota Ikonium je, Pauluso Barnabas ga aa ge kawetena jena angtane Yahudimana aa jep ge betwebuwefaram jebe, jei gwanan aa gemer ge kauwewefaram. Jep jegme waakenfer ge towas-towastababili jamere angtane Yahudimana unggwanfer mese angtane Yahudimanyan, jei Yesus ga aane tebana. ² Jengga angtane Yahudimana Taterisi Waakena baif aa jei ne gwebilirim jam taabife, jei angtane Yahudimanyanaiserem jes ne balbabili enggame, "Taterisi jeiserem safnant, ipsama taabilirim!" Jepga angtane Yahudimanyan jei angtane Kristen ga aane nasbabili. ³ Pauluso Barnabas jei abaktowaifer ge nwini jebe, jei jam ge ereyen taterisi Tuhanem temawer jam ge nasbife. Tuhan Jei baabeta Jemnaiserem jes golmini enggalfe, jei bwembwema jem ge eyebif, bwembwema angtane jam ne eyebiyeneiserem, Uwa Sanbagiri tefner gam eyebili. Jei bwembwema ga aa ge eyebili, jega angtane jeiserem gam ge towaswebif enggame taterisi ini waakenaiserem Uwa Sanbagiri angtanefe aa jes golminirim jeba bunaram. ⁴ Angtane unggwanfer kotanap aa jei ge nwinbenerem, jei jam ne bitnaatini nawer biti. Afwer jei angtane Yahudimana jewer ge ayebitini, afwer ga angtane Yesus aa jes bafsonaram angtane naura jeiserem jemniwer ge ayebitini. ⁵ Jepga angtane Yahudimana ane angtane Yahudimanyan jeiserem, ane angtane sanbaka jelemanaiserem jebaner, jei kapkaiserem ga aane mwangbisini enggame, rasul nawan jeiserem tonem sa munmini. ⁶ Rasul nauna jeiserem jame aa galap ge sararam, ga aa ge nunggiri ona bosna Likaunyawer, kota Listra yo kota Derbe, ane ona seyafter gemer falaram. ⁷ Jep ga Taterisi Waakena ga aa ge nasbinenne. ⁸ Kota Listra je, angtane aasaje jep nwini jemna tufa fwater derbenent. Jei jame aa galap surnuntum ga muli-mulinmer surnunt. Jei jafner nwinwena jei jam wofeyan bastantowaifer. ⁹ Jei ga jep nwini, Paulus aa jes nasbilirim ga jes sarbisini. Ane Paulus nwena ga tetena, ga aa towaswena enggame, angtane jeiserem jei taterisi mesam taabili jam waakentafe. Paulus jei jeter gerabaasiwili, ¹⁰ ane ititmer ga bala, "Gase irwe, nornormer ga is fina ilem tofeme!" Angtane jeiserem ga aa fagatana, ga aa irwena, ane ga wofowena enggam gam gwina, enggam gam jela. ¹¹ Jes jepserem angtane unggwanfer ga aane domola Paulus aa jes eyebilirim. Jepga jei ga aa ge tetenbili Likaunyam oleme, "Anggwafwar mes ge irebitye nem nenennabe angtane numu gemerserem." ¹² Barnabas jei enggam ne bosetana Seus, ane Paulus jei enggam ne bosetana Hermes, aam temawer jei waakenfer aa jewer ge nasewenaram. ¹³ Imam Seusem jenawer ga jela. Jena Seus aa jep ne pujitawenaram kota sitawer fina. Imam jeiserem jei sapi giri gam aftabili ane bunga mese jes erbili, pintu pagarawer erbuwena. Imam ane angtane unggwanfer jeiserem sapini aa jei ne giranbaabuwenaram persembahanfe, rasul nauna ga jep ne kitulmif. ¹⁴ Barnabaso Paulus jei jame aa galap ge sararam angtane jeiserem aa jes ne eyebilirim, jei fene jelemana ga aa ge bitabaabisini enggalfe, angtane jepmana gam ge towaswebif enggame jei jam ge kakalswena. Jei ga aa ge nunggiri angtane unggwanfer jepserem jem tarnabe, ga aa ge gwenanna, ¹⁵ "Wai, aamei seyafter gemerserem ibafa gwena game? Angba angtanesam, aamei galaterserem. Ai enggalf ai ge nwini taterisi Uwa Sanbagirmanaiserem ip is agam ge nasipmif, jega aamei etam-etam kapkaiserem igama aafulnuf, ane gamjon ga isa warautna Uwa Sanbagirminibe. Uwa Sanbagiri aa Jei gwenaram, Jei winsi yo ona, ane fi mese, ane seyafter gemerserem aa jei falaram ga Jei eyebaabil. ¹⁶ Gwanan aa jep falam Uwa Sanbagiri Jei angtane seyafter enggam balbabil, ’Sya, saf isa eyebili ina gemer igama gunurum jam eyebife, ane Ai kapkaiserem ibe is Ajam eyeipmiyen.’ ¹⁷ Jengga Uwa Sanbagiri Jei jeber-jeber ip ijes gweretabaipmuwena Jelem temawer enggame, Jei waakenaiserem ip ijes eyeipminirim. Jei arouwa ip gaarmini winsiwer, ane nananis waakenfer is gam ge tenipmif muara jeber-jeber. Jei tumilgala ip kitulmini, ane Jei ga eyebili jega ini imna saaser-saaserfer is ga sege folbamini." ¹⁸ Jengga rasulu nawan jeiserem jei safe jes gamserem gemer ge nasbili, jei masef ge unggwasa angtane jeiserem jam uftabife. Angtane unggwanfer jeiserem rasulu naura jeiserem jeter ne pujisowena, ga aa ge gubili, "Sya, sapini aaiserem aima giranbaabili gamjon ai iba golmif." ¹⁹ Jengga angtane Yahudimana afweraiserem kota Antyokyawer ona Pisidya je ane kota Ikonium jewer ga jalbili. Ane taterisi jelemanaiserem angtane uskambar ga jem ne dektebili jem onsobaabife. Jepga jei Paulus ga aane erana toneme, ane jei Paulus gane tinderfele kota sita jitefwer. Jei enggam ge gubili, Paulus ba mesam tere. ²⁰ Jepga angtane Yesus aa jei ne tebanaram, jei Paulusem tarnap jame aa ge fibitetyaram, Paulus ga irwena, gamjon ga kawetena kotanabe. Gwinibener Paulus Barnabasfaner ga ge sofwa kota Derbewer. ²¹ Pauluso Barnabas jei ga Taterisi Waakena kota Derbe je ga jep ge nasbinenne, ane angtane unggwanfersus jei Yesus ga aane tebana. Jepga jei ga aa ge warau kota Listrawer, jep taban gamjon ga kota Ikoniumwer ga aa ge sofna. Ane jepga jei kota Antyokya ona Pisidya je jewer ga aa ge sofwa. ²² Kotana jeiserem jebe jei angtane Yesus aa jei ne tebanaram ini jemnaiserem ga jes ge kanautabaipmini. Ane jei esorola gam ge golmif, jega jei Yesus jam ne aftannuyon jam tebalawer. Ane enggam ga aa ge gubili, "Ogiri aaiserem jebe nei kabwaktala anesus nesa domolwenaram jamere nunu Uwa Sanbagiri Jei aa jem nwinirim anggwabura seyafter gemerserem jem Sanbakfe." ²³ Taman-tamna seyafter gemerserem, Pauluso Barnabas jei angtane sanbaka jemata aa jei ne tebabilirim ga jes ge destabaabinenne. Ane jei sembayanga ga aa ge gwebana, ane jei tumilgala jam ne tombaabiyen enggalfe Uwa Sanbagiri gam ne pujitef. Jei jes gamserem gam aa jewer gane eyebilirim, jei angtane sanbaka jemata jeiserem jem gane kitulbono Uwa Sanbagirfe, Uwa Sanbagiri Jei aa jes ne tebanaram. ²⁴ Jei ona Pisidya seyafter jamer ge sofwa jam ge batoyan, ane propinsi Pamfilya je jep aa ge forna. ²⁵ Jepga taterisi Uwa Sanbagirmana ga aa ge nasibene kota Perga je, jepga jei ga aa ge sofwa kota Atalyawer. ²⁶ Jewer ga aa ge warauwa atdusame, atdusa layarabaraiserem, jamere kota Antyokyayo, kota jeiserem ga rasul nawana gwanan Uwa Sanbagirfe ga jep ne tetbel enggalfe Uwa Sanbagiri Jei waakena Jelemanaiserem gam golmif jebe, jega jei awelna Uwa Sanbagirmana gam ge gwebif. Awelna jeiserem jei mes ge tabanulu. ²⁷ Jame aa galap ge forobilirim Antyokya je, jei angtane Yesus aa jei ne tebanaram ga aa ge jenbebili, ane jei seyafter ga aa ge betwebili. Jepga jei ga aa ge nasipmini seyafter Uwa Sanbagiri aa gam eyebilirim Jebar aa galap naawenaram. Ane jei gamjon ga aa ge nasipmini enggame, Uwa Sanbagiri Jei nele mes dwotana, jega angtane Yahudimanyan jei Yesus ga sene tebana. ²⁸ Jepga jei abakfer ge nwinbene angtane Yesus aa jei ne tebanaram jebar.

¹ Angtane afwer jei ona Yudeyawer ge jalbili, jamer kota Antyokyayo aa ge forobitye, ane jei angtane Kristen jepmanaiserem ga aane towas-towastababili enggame, "Afa aamei ijama sunattweyanaye Hukumu Nabi Musamanaiserem jep aa gam tulistaabilim, gam jega Yesus Jei aamei is jam waakentababisiyen." ² Pauluso Barnabas jei baibaisus gam jam ge sarfe, jei angtane jeiserem ga aa ge balbabili enggame, "Gamyan, jes gamserem gam je kapka." Ane jei angtane jeiserem jebar ititmer ga aa ge doksobana. Jepga Pauluso Barnabas ane angtane Kristen nensaiserem jewer ga aane destabaabili, ane jei Yerusalemwer ga aa ge sofobili. Jei angtane Yesus aa jes baftabilirim rasulf gwefe jebar ga aa ge betwebili, ane angtane sanbaka jemata aa jei ne tebabilirim jebar mese. Jei enggalf ge betwebili, taterisi sunattem temawer gam ne nasbif. ³ Jemata jep aaiserem jei Pauluso Barnabas ane angtane Kristen nafsiserem ga aane aftabifele jamere kotana sitabo. Ane jei ona Fenisya yo ona Samarya jewer ga aa ge sofobili. Ane taman-tamna jep jeiserem jei ga aas ne nasbinenne angtane Yahudimanyanaiserem jem temawer. Jei enggam ne nasbinenne, angtane Yahudimanyanaiserem jei etam-etama kapkaiserem jewer mes ge tikwebili, ane jei Uwa Sanbagiri mes ne tebana. Angtane Kristen jepmana ula jeiserem aa galap ne sarbilirim, ini jemna saaser-saaserfer ga aa ge folbamini. ⁴ Jame aa galap ge forobilirim Yerusalem je, angtane safna Yesus aa jei ne tebanaram jepmanaiserem, ane angtane Yesus aa jes baftabilirim rasulf gwefe jes mese, ane angtane sanbak-sanbaka jemata aa jei ne tebabilirim, jei seyafter angtane jeiserem aa jei ge forobityerem jes ne kitulnu. Jepga jei ga aane nasbinenne seyafter gemerserem Uwa Sanbagiri aa jes eyebilirim jemnibe. ⁵ Angtane safna Farisimana afweraiserem Yesus aa jei ne tebanaram, jei ga aa ge irwebili, ga aa ge gubili, "Angtane Yahudimanyan jei jam sene sunattababili, ane Hukumu Nabi Musa aa jes tulistababilim jam sene onsobili." ⁶ Jepga angtane Yesus aa jes baftabilirim rasulf gwefe, ane angtane sanbak-sanbaka jemata aa jei ne tebabilirim jes mese, jei ga aa ge betwebili ula jeiserem jam ne nasbife. ⁷ Ula jeiserem jame aa galap ne nasbilirim jamer ne nasbilibe abaktouya, Petrus ga irwena, ane ga balbabili, "Wa am afelen mesna, aamei iner imsama towaswena Uwa Sanbagiri fwater ai as mesam destabanant im nenennabe enggalfe, ai Taterisi Waakena agam nasipminennef angtane Yahudimanyanfe, jega jeime waakenfer ga sene sarbili, ane Taterisi Waakena ga sene taabili. ⁸ Uwa Sanbagiri Jei samfer ini angtanemana gam damtaipmini, ane Jei Mafnana Jelemana mes golmini jebe, nei gemerserem Mafnana nebe nes gemer golminintim. Jei Mafnana jep gam aa jewer golminirim, Jei ga jem gwerauwulu enggame Jei angtane Yahudimanyan jeiserem jes mese mes tebabilint Jelem angtanef naawefe. ⁹ Uwa Sanbagiri Jei enggam Jam guyon angtane Yahudimana jei nafsi, ane angtane Yahudimanyan jeime nafsi. Jei ini jemna Jei se wirtabaipmini, aam temawer jei aa jewer ne tebanaram. ¹⁰ Jega jem temawer, gam je ga bafa aamei Uwa Sanbagiri ga ima unggwasbana, ane angtane Yesus aa jei ne tebanaram daran-darna jep ga ima golmini jei jes ne eyebife? Asal-asala nemna ane nei mese nei jeiserem nejama tyanggonyan. ¹¹ Gamyan, nei enggam nesa gunu Uwa Sanbagiri Jei nes mes waakentababisini, waakena Tuhan Yesusmanaiserem nebe aa jes kitulminirim jeme. Ane Jeime angtane Yahudimanyan Jei mes waakentababisini, waakena Tuhan Yesusmanaiserem jeme." ¹² Angtane seyafter jep jeiserem jei makasfer ge nwinbene, bastowaifer jam ge gubiteyan. Jei Barnabaso Paulus gemer ne sarmisini jei bwembwema seyafter aa jei ge etamwebilirim jem temawer ga jes ge nasbabili. Jei ga aas ge nasbabili Uwa Sanbagiri seyafter aa jes eyebaabilintim, jei aa galap ge wofenantam angtane Yahudimanyanaiserem jem nenennabe. ¹³ Pauluso Barnabas jam aa galap ge tabanulurum jeiserem jam ge nasbilibe, Yakobus ga balbabili, "Am afelen mesna as imsa sarbasi. ¹⁴ Simon Petrus jei namwer mes nasbili enggame, Uwa Sanbagiri Jei nesiktele Jemnaiserem mes gwerauwulunt angtane Yahudimanyanfe, jega angtane Uwa Sanbagiri aa jes destabaabilirim jei gase naawena Uwa Sanbagirem angtanefe. ¹⁵ Taterisi jeiserem jei enggala gwanan nabi aa gemer ne tulisulum. Jei enggam ne tulisul: ¹⁶ ’Tuhan enggam gunu, Ai gamjon As warauwa Raja Daudtem angtaneminibe. Jena Raja Daudmana aa je ganamwenaram, jena jeiserem Ai As eyebili, ane gamjon ga Ai As waakenulsini. Ane jena jeiserem aa je ganamwenaram, Ai As tonolbili kekelefer, ane angtane jepmanaiserem jebe, baabeta ga As golmini jei gwanan aa jes ne domolaram. ¹⁷ Ane angtane nafsi seyafter jei Tuhan ga sene terelbene, angtane Yahudimanyan seyafter aa jei naawenaram Am angtanefe.’ ¹⁸ Taterisi jeiserem ba gamam taterisi Tuhanmanaiserem fwater aa gam gulum." (Amos 9:11-12) ¹⁹ Ane Yakobus gamjon ga balbabili enggame, "Ai enggam ai gunu, angtane Yahudimanyan Uwa Sanbagiri aa jei ne tebanaram, nei safnant nei angtane jeiserem nejama taatwebaabiyen jei etam-etama daran-darna jam ne eyebife. ²⁰ Jengga waakenfer ga enggam, nei surta nesa eyeipmini jebe, ane esorols nesa golmini enggame: ’Tumilgala bwata kapkaiserem jep gulbalaiserem angtane aa jes ne bununtenaram jena bwat kapka aa jep ne pujitababuwenaram jebe, tumilgala jeiserem ijama tumilyen. Ane aamei maaryena ijama eyebiyen. Ane jigal nin aawisibere ijama tumilyen. Ane aawis mese ijama telbebiyen.’ ²¹ Nei esorola jes galserem ga jam nesa golmini, aam temawer gwanan aa jep falam Hukumu Nabi Musa aa jes tulistababilim, Hukumu jeiserem jes ne nasbinenne kotana seyafter gemerserem jebe. Ane taterisi jemnaiserem jes mese, angtane taterisi jeiserem nunu Sabat jeber-jeber ga jes ne gerabistowena, jena angtane Yahudimana aa jep ge betwebuwefaram jebe." ²² Angtane Yesus aa jes baftabilirim rasulf gwefe, ane angtane sanbak-sanbaka jemata aa jei ne taabilirim, ane angtane seyafter jemata jei ga aa ge betwebili. Jei enggalf ge betwebili, angtane afwer jemniwer gam ne destamif, gane bafsof kota Antyokyawer gam ge sofobife Pauluso Barnabas jebaner. Jes jepserem Yudas, jemna bosna afwer Barsabas, ane Silas ga jes ne destamini. Jemat enggam ne gitmini, angtane jeiserem jei waakensusu. ²³ Jei surta ga jep ne golmini. Surta jeiserem ga aas: Ga ip, angtane Yahudimanyan Yesus ijeya tebanaram, kota Antyokya je, propinsi Sirya yo ona Kilikya je. Surta aaiserem amniwer Rasul-rasul ane angtane sanbaka jematabe, im afelen mesna. Ai enggam aya balbabili, waakenfer sa gwe! ²⁴ Ai amsama sara enggame angtane afweraiserem amniwer aa jei ge sofobilirim, angtane jeiserem jei ai ajama baftabiyen imnip jam ge sofobife. Jei imnip ga aa ge forobitne ol kapkabar, ane jes jepserem ini imna ga is kabwakfer ge folbamini, aamei ol kapka jeiserem jam igalaba sarbilirim. ²⁵ Jega jem temawer ai enggam aya gunu, ai angtane naura agma destamini, ane ga aya bafsona imnibe. Jei ga aa ge sofobili nem afelen naunabar, Barnabaso Paulus ai ajesa nesiksonaram. ²⁶ Angtane naura jeiserem saf mes ge tere, awelna Tuhan nemnaiserem Yesus Kristusmana aa galap ge eyebilirim. ²⁷ Ai Yudaso Silas ai ajesa bafsona imnibe enggalfe, taterisi surtap ai ajesa tulistababilirim, taterisi jeiserem ip is gam ge nasipmif. ²⁸ Mafnana Uwa Sanbagirmana enggam gunu, sya, ane aime enggammer aya gunu, ai isa ajama taatwebaabiyen aamei daran-darna ijama eyebife. Ai aatefener aya bili: ²⁹ Tumilgala bwata kapkaiserem jep gulbalaiserem, angtane aa jes ne bununtenaram jena bwat kapka aa jep ne pujitababuwenaram jebe, tumilgala jeiserem ijama tumilyen. Aawisi ijama telbebiyen. Ane jigal nin aawisibere ijama tumilyen. Ane aamei maaryena ijama eyebiyen. Afa aamei in ina jam isa bijausonaram etam-etama jeiserem jewer, aamei ga waakenfer isa nwini. Kelek. Tabana ga aaf, amniwer Rasul-rasul ane angtane sanbaka jematabe. ³⁰ Jeiserem taban, angtane aa jes ne destaipminirim, jei ga aa ge sofwa Barnabaso Paulus jebaner jamere kota Antyokyayo. Jei jep jam aa galap ge forobilirim, angtane safna Yesus aa jei ne tebanaram seyafter ga aane dupdupbulu. Jepga surta ga aane golmini jebe. ³¹ Jemata surta jeiserem jame aa galap ne gerabistenaram, ini jemna saaser-saasermer ge folbamini. Surta jeiserem ga waakensusu. ³² Yudaso Silas jeiba nabisam, jei taterisi Uwa Sanbagirminiwer aaiserem jes ge nasbinenewena, ane jei ini jelem afelen mesenemana jemna gangge kanautabaipmini. ³³ Yudaso Silas jei jep aa ge nwinirim abaktouya, jepga jemata jeiserem jei gamjon ga aane afsunnu jam ge waraufe, angtane gwanan aa jei ne bafsonantam jemnibe. Jei ga aane gitmini, "Ini imna is waakenfer se nulamini." (( ³⁴ Jengga Silas jei enggam gunu, "Ai aafer as nwini.")) ³⁵ Pauluso Barnabas jeime abaktowaifer ge nwini kota Antyokya je. Jei ane angtane nensa unggwanfer jei angtane jepmanaiserem ga aane towas-towastababili, ane Taterisi Tuhanmanaiserem ga aane nasbinenne. ³⁶ Nunu abakfer towaiyan, Paulus jei Barnabas ga bala, "Au, nei gane warau nelem afelen mesnaiserem jemnibe, Yesus aa jei ne tebanaram kotana seyafter gemerserem jebe, taterisi Tuhanmana nei gwanan ne jep ne nasbinennentem. Nei nejes ne anggababif gwela jemna namwer ga fomfom falmini." ³⁷ Barnabas jei Yohanes bosna afwer Markus ga bala, "Au, ams onsomi!" ³⁸ Jengga Paulus jei baif gwena Markus jam aftafe, aam temawer Markus jei gwanan jes mirtebitefalant propinsi Pamfilya je. Jei gwanan baif gwenant awelna seyafter jebar jam ne gwebife. ³⁹ Pauluso Barnabas ititmer ga aa ge doksona, ane jep ga aa ge syanwena. Barnabas jei Markusfar ge sofwa atdusame jamer naantei Sipruso. ⁴⁰ Paulus Silas ga bala jebar ge sofwefe. Nalef jam ge sofweyan, jelem afelen mesna jei Tuhanem tafnap ga aane tete, jega Tuhan Jei waakena Jelemanaiserem gam golmif. ⁴¹ Jewer ga jei ga aa ge sofwa propinsi Sirya yo ona Kilikyawer, jemat jepmanaiserem ga aa ge kanautababili enggalfe jei baabetfer gam ge fibif.

¹ Paulus wofera jemna ga aatfenulu jamer kota Derbeyo ane kota Listra jebe. Angtane Yesus aa jei tikwebaatinirim bosna Timotius ga jep nwini. Iye jemna ga anggwabura Yahudimana, ane jei Yesus mes tebana. Jem jetaserem jei ga anggwabura Yunanimanaiserem jem tewe. ² Angtane Kristen kota Listra je ane kota Ikonium je aa jei ge nwinbenerem enggam ga aa ge gubili, Timotius jei angtane waakena. ³ Ane ini Paulusmana enggam folbana, Timotius jebar ge wofef. Jega jem temawer, Paulus jei Timotius ga sunattana, aam temawer angtane Yahudimana aa jei ge nwinbenerem taman-tamna jeiserem jebe, jei Timotius jam ne nasbayan, afa jei jam sene sunattanaram. Angtane jepmanaiserem seyafter jei mes ge towaswebili enggame jeta jemnaiserem jeiba Yunani teusam. Angtane Yunanimana jei jam ge sunattawebuweyan. ⁴ Kotana seyafter gemerserem jei aa jep ge wofobuwenaram, jei ga angtane Yesus aa jei ne tebanaram surta jeiserem jem temawer jep ga aane nasipmini, surta rasul-rasulu ane angtane sanbak-sanbaka jematabe jei aa jes ne taabilirim kota Yerusalem je. Ane jei angtane Yesus aa jei ne tebanaram esorola ga jep ne golmini enggame, jei taterisi surtap jeiserem gam ne onsobif. ⁵ Ane angtane safna Yesus aa jei ne tebanaram, ini jemnaiserem jei Uwa Sanbagiri uskambar ne tebana. Ane nunu jeber-jeber angtane gamjon anesus Yesus aa jei ne tebanaram. ⁶ Mafnana Uwa Sanbagirmana Jei Paulus ane jem afelen mesnaiserem jam balbabiyen taterisi Uwa Sanbagirmana propinsi Asya je jep jam ne nasibefe. Jega jem temawer jei aa ge sofobili ona Frigya yo propinsi Galatya jewer. ⁷ Jame aa galap ge forobilirim o fwesa ona Misya je, jep ga aa ge unggwasbili propinsi Bitinya jep jam kawewife, jengga Mafnana Yesusmanaiserem Jei jam balbabiyen jep jam ge kabuwife. ⁸ Jega jem temawer jei ona Misya je jep jam ge fibiteyan, jengga jamer ge sofobili jamere kota Troaso. ⁹ Nunu jeiserem gwineme, Paulus jei ga eserem jam tala gamserem gam ga domola. Jei angtane propinsi Makedonya aasaje ga jep damtana jem tarnap fina, gweraastamer gamserem. Jei Paulus unggwanfer ga bala enggame, "Au, se jal aaf Makedonyawer enggalfe, aamei ai as gam is batobaabili!" ¹⁰ Paulus esere jam tala gamserem gam aa galap domolaram, ai enggammer aya gunu, Uwa Sanbagiri as mes jenbebili, Taterisi Waakena gam nasbinennefe angtane Makedonyamanaiserem jebe. Jega jem temawer abakferyan ai nele ga aya terelbene Makedonyawer jam sofwefe. ¹¹ Ai kota Troaswer jam agalaba sofnaram, ai ga atdusame aya sofna jamer naantei Samotrakeyo, jep ga aya forna. Ane jem gwirmer ga kota Neyapolis jep ga aya forna. ¹² Kota Neopoliswer aya sofnaram jamer kota Filipiyo jep ga aya forna. Jes galapserem kota Filipi ga kotana unggwan-girf ga je nulna propinsi Makedonya je, kotana angtane kota Romamanaiserem jei aa jep ge nwinbenerem. Kotana jeiserem ai jebe abakfer ajama nwinyen. ¹³ Nunu Sabateme, nunu angtane Yahudimana aa jem ge nwinbisiwefaram, kotana jeiserem jem mwa totiyelewer ga aya totini. Ai fobinifsamer ga aya sofwa enggalfe, angtane Yahudimanaiserem jei sembayanga aa jep ne gwebawenaram tampata jeiserem agma domolmif. Tampata jeiserem jep ga aya forna, ane jep ga aya kawetena. Jame agalaba nwintenaram, wini jebe aa jei ge betwebilirim jebaner ga aya nasowena. ¹⁴ Wini daamfenna jep aa jei nwinirim, bosna jemna ga Lidya. Jei kota Tyatira jewerman wi, ane jei kaina berbere waakensusu ga jes jualtababuwena. Jei sembayanga Uwa Sanbagirf gwebabawena, ane Tuhan Jei ini jemna ga dwotabili enggalfe, Paulus aa jes towas-towasulminirim, jeiserem jei waakenfer gam sarbisif. ¹⁵ Ane Paulus ga Lidya mese tane seyafter jelem jenap gemerserem ga baptistababili. Lidya jam baptisulube taban, jei ai ga as enggam balbabili, "Afa aamei enggam jam isa gunurum, ai bunarsusfer ai Tuhan amsa tebana, gam jega au aamei nomkef am jenap sa nwin." Jei as jamer tergenbaabilibe jamere aya tikwebitini. ¹⁶ Nunu gwanan jeiserem ai jem agalaba sofnaram sembayang tampata jeiserem jebe, ai wini daamfennaiserem jebar ga aya dorwena, tahunu jemna unggwanferyan. Jei angtane jei aa jei armanulurum awelna ga jemna gam gweyibene. Wini jeiserem bwata kapkaiserem mes kabwili jemnibe, ane jega jem temawer jei ula galap etamwelaiserem jes gam nasbili. Ula jeiserem aa jewer gam nasbilirim, jei jem temawer doini unggwanfer ga gam damtabili, ane jelem sanbakfe ga gam kitulbono. ¹⁷ Wini jeiserem jei Paulus mese ane ai as amnuwer onsobaabili, enggam ga gwefala, "Angtane aaiserem jei awelna Uwa Sanbagirsususerem Jemna gane gweyibene. Jei enggalf ge jalbili ai as gam ne towas-towastababif, nele waakena Uwa Sanbagiri Jei ai as jem waakentababiliserem." ¹⁸ Nunu abakfer touya, wini jeiserem jei jeber-jeber ga gemer gwenanna am amnuwer, jamere Paulus jam fiyan iniwer. Jei ga irfwena, ane bwata kapkaiserem ga bili, "Bosna Yesus Kristusmanaiserem jeme ga isa ajem bili, se totinye wini aaiserem jemniwer!" Jes jeberserem bwata jeiserem ga totintye. ¹⁹ Wini jeiserem jem sanbaka ga enggam gunu jelem inibe, "Nei doini gamjon ga fwer nesa damtabili. Bwata mes totintye wini jeiserem jemniwer." Jei Pauluso Silas ga aane taamini, jepga Pauluso Silas ga aane afsofala angtane sanbaka kota Romamana jem tarnabe, kantor Camat galserem. ²⁰ Jei Pauluso Silas jame aa galap ne afsofalaram angtane sanbaka Romamanaiserem jemnibe, jepga angtane jeiserem jei angtane sanbaka Romamana enggam ne balbabili, "Angtane naura aaiserem jei anggwabura Yahudimana. Jei kabwakfer ge eyebuwena nem tamnabe. ²¹ Jei abe as aas ge towas-towasulmini angtane Romamana jam eyebiyeneiserem jes eyebif. Ai taterisi jemnaiserem ajama taayipmiyen, gamjon ajama saryipmiyen." ²² Angtane anesus aa jei ge ayebitinirim angtane kapkaiserem jemniwer enggalfe, Pauluso Silas jei gam ne gitmif jei kapka gam ge eyebili. Angtane sanbaka Romamana jeiserem ga aane balbabili, "Pauluso Silas fene jemna jasa bitabaipmisi, ane ga isa safsafsona." ²³ Jei Pauluso Silas unggwanfersus ga aane safsafsona, bwiyibe ga aane kasuntena. Angtane sanbaka bwimanaiserem ga enggam ne bala, "Aamei angtane nauna aaiserem waakenfer is geramisnenne." ²⁴ Jei aa gemer ge gubilirim, angtane sanbaka bwimanaiserem jei Pauluso Silas ga aane kasuntena mwona orolsususerem jebe, ane tufa jemna ga aane kasomuntena baloka daran-darnaiserem jem mwonabe. ²⁵ Gwini nenennap Pauluso Silas jei Uwa Sanbagiri ga aa ge pujitene, sembayanga aa ge gwebana ane simala aa ge twola. Ane angtane afwer bwiyip aa jebar ge nwinbenerem jei ga aane sarmisini. ²⁶ Aafer-aafer giniri unggwanfersus ga gwena ona ga gin-gintene, ane bwiyi mese ga gin-ginulu. Ane jes jeberserem bwi pintunu seyafter gemerserem ga tertebabisnenne, ane rantena angtane bwiyip aaiserem jei aa jem ne tafrebaabilirim, rantena jeiserem seyafter tetete. ²⁷ Angtane sanbaka bwimanaiserem ga irwena, ane ga anggana bwi mwona seyafter gemerserem ga tertebaabisilfenna. Jepga jei nombeya ga moltena jena jem tegilfe. Jei enggammer gunu, angtane bwiyip aaiserem ba mesam ge nunggirbili. ²⁸ Jengga Paulus jei uskambarsus ga dagatana, enggam ga bala, "Ina ijam tegilyan, ai seyafter ijar!" ²⁹ Angtane sanbaka bwimanaiserem jei lampunu ga bili, ane nunggirmer ga kawetena mwonabe ini ga jam egegwebana. Jei Pauluso Silas jem tarnap ga nwintena. ³⁰ Jei Pauluso Silas ga gwesaastana mwona jeiserem jewer, ga aa tenaamini, "Uwa nawan, ai bas as eyebili, jega Uwa Sanbagiri ai as gas waakentaasini?" ³¹ Pauluso Silas enggam ga aa ge bala, "Tuhan Yesus is tebana, ane Jei is gase waakentaasini, aamei ane wi tane imna seyafter gemerserem." ³² Jepga Pauluso Silas jei taterisi Tuhanmanaiserem jep ga aa ge nasipmini jebe, ane angtane seyafter jenap aa gemer ge nwinbenerem jep mese. ³³ Gwini nenennap jes jepserem, angtane sanbaka bwimanaiserem jei Pauluso Silas ga gwesaastana, bubwana jemna ga aa wirtabaipmini. Jepga angtane sanbaka bwimanaiserem ane wi tane jemna jei seyafter ga aa ge gubili jam baptiswefe. Gwini jes jemerserem jei jem ga aane baptistababili. ³⁴ Jepga angtane sanbaka bwimanaiserem Pauluso Silas ga afsofala jelem jenabe, tumilgala ga aa kitulmini. Angtane jeiserem wi tane jemna seyafter gemerserem ini jemna saaser-saaserfer ge folbamini, aam temawer jei Uwa Sanbagiri mes ne tebana. ³⁵ Ona jame aa nafwelam, angtane sanbaka kota Romamana jei pegawai polisi ga aane balbabili, "Sa gwi, angtane sanbaka bwimanaiserem enggam isa bala, ’Angtane nawana jeiserem jas afsunnu!’ " ³⁶ Angtane sanbaka bwimanaiserem jei taterisi jam aa galap sarbilirim, jei ga gwina Paulusminibe, ane Paulus ga bala, "Angtane sanbaka Romamana jei aamei is enggam ne gitmini, aamei Silasfar jam afsunnuf. Aawer ga namwer is ge sofwa, ga waakenfer is ge sofwa." ³⁷ Paulus ga pegawai polisi jeiserem enggam ga balbabili, "Jei ai as mes ne safsafsona angtane uskambar jem nwenabe, nalef as jam ne taanamu-taanamuweyan. Ai safe angtane Romamana, jengga jei bwiyibe as mes ne gaataantena. Ane namwer jei ai ase basyamer ne gwesaastef bwiyiwer. Jes gamserem gamyan! Angtane sanbaka Romamanaiserem jei jener sege jalbili, ai as jam ne gwesaastafe." ³⁸ Pegawai polisi ga ula jeiserem ga aane nasipmini angtane sanbaka Romamanaiserem jebe. Jei jame aa galap ge sarbilirim enggame Pauluso Silas jeiba angtane Romasam, jei ga aa ge erebili. ³⁹ Jepga jei ga aa ge sofobili Pauluso Silas jemnibe, ga aane gitmini, "Safnant. Ai waakenfer ajama eyebiyen." Ga aane gwesaastana bwiyiwer, ane ga aane afsoyala sitawer, enggam ga aane gitmini, "Kotana aaiserem jasege mirsotefal!" ⁴⁰ Pauluso Silas jei bwiyi jeiserem ga aa ge mirultefala, ane Lidyam jenap ga aa ge sofwa. Jelem afelen mesna jebe jam aa galap ge damtabilirim, jei taterisi jeiserem ga aa ge nasipmini, ane angtane Lidyam jenap aa jei ge nwinbenerem ini jemna ga aa ge kanausweipmini taterisi jeiserem aa je etamwenaram jeme. Jepga Pauluso Silas jei jewer ga aa ge sofwa.

¹ Pauluso Silas ga kota Amfipoliso kota Apolonya jep jamer ge ayenni, ane ga aa ge forna kota Tesalonika je. Jes jepserem jena angtane Yahudimana aa jep ge betwebuwefaram ga jep tenmini. ² Gwanan gemerserem ga gemer, Paulus ga kawetena jena angtane Yahudimana aa jep ge betwebuwefaram jeiserem jebe. Nunu Sabat nawer-ningna Paulus jamer ge nasbawena jebar, ane Taterisi Uwa Sanbagirmana gane gerabistena. ³ Jei waakenfer nasipmini ane aa ge saamini enggame Mesias jam aangeswena, ane se irwena angtane jam tereserem jemniwer. Ane Paulus enggam ga balbabili, "Yesus ai namwer isa ajes nasbaminirim ibe, Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif." ⁴ Angtane afwer jei Yesus ga aane tebana, ane Pauluso Silas ga aane tikwemitini. Ane angtane Yunanimana unggwanfer Uwa Sanbagiri aa jei ne pujitawenaram jei mese aane tikwemitini, wini sanbak-sanbaka unggwanfer jei mese. ⁵ Jega jem temawer angtane Yahudimana jei ga aa ge uskamswebili, ane angtane kapka jafner aa jei ge wofobuwenaram nelebe jei ga aane jenbebili, ane angtane nafsibar ga aa ge betwebili, ane jei ga enggalf ga aane eyebili angtane aa jei ge nwinbenerem kota Tesalonika je ini jemna kabwakfer gam ge folbamif. Ane angtane unggwanfer jeiserem ga aa ge tetenbinenne, ane ga aa ge erabana. Jei jena Yasonmana ga aane goronwebili enggalem temawer Pauluso Silas jep ne terelmif, gam ne gwesaastef sitabe angtane unggwanfer jem tarnabe. ⁶ Jengga jei Pauluso Silas jebe jam ne domsoyan, jepga jei Yason ane angtane afwer Yesus aa jei ne tebanaram ga aane tebabili, ane onnap gane tinderbifele jamere angtane sanbak-sanbaka jepserem jemnibo. Jei ga jep ga aa ge gwarenbuwena enggame, "Angtane aaiserem jei kabwakfer jei ne eyebuwena aa jep ge wofobuwenaram, ane gamjon ga aaf ge jalbili. ⁷ Ane Yason jei Pauluso Silas jep ga taamini jem jenap jam ge tabafe. Jei seyafter baif naawena jam ne sarbafe Angtane Sanbaksususerem Romamana aa gam gunurum. Jei enggam ge gubili, ’Raja nafsi aare, bosna Jemna Yesus.’ " ⁸ Taterisi jeiserem jame aa galap ne sarbilirim, angtane uskambar ane angtane sanbaka kotanabe seyafter jes gemerserem, jemna kakala jam tikwemiyen. ⁹ Jepga angtane sanbaka jei Yasono angtane afweraiserem Yesus aa jei ne tebanaram ga balbabili, "Gwanan abe ase doisa gaarmini, jega ai aamei isa gam asa aftabunnu." Doini jeiserem jam ne gaarmilibe jamer taban, jei ga aane aftabunnu. ¹⁰ Gwini jeiserem jem afelen mesna jep jeiserem jei Pauluso Silas jes ne gitmini kota Bereyawer ge gwife, aam temawer jei jam ge erebili angtane kapkaiserem jemnibe galap sene eyebili. Jame aa galap ge fornaram jebe, ga aa ge gwina jena angtane Yahudimana aa jep ge betwebuwefaram jebe. ¹¹ Angtane kota Bereyamanaiserem ini jemna ferfersusu, jengga angtane aa jei ge nwinbenerem kota Tesalonika je ini jemna waakenyan. Angtane kota Bereyamanaiserem jei Taterisi Uwa Sanbagirmanaiserem waakenfer jei ne saribene. Ane nunu jeber-jeber jei Taterisi Uwa Sanbagirmanaiserem jes ne gerabistowena enggalfe jei gam ge towaswebif Paulus aa gam gunurum je ke bunar afa fas. ¹² Angtane Yahudimana unggwanfer jebe aa gemer ge nwinbenerem jei Yesus ga aane tebana. Ane wini sanbak-sanbaka Yunanimana unggwanfer, ane anggwa Yunanimana unggwanfer jes mese, jei Yesus ga aane tebana. ¹³ Jepga angtane Yahudimana Tesalonika je aa jei ge nwinbenerem jei aa galap ne sarbilirim enggame, Paulus jei mesam nasbili tateris Uwa Sanbagirmana Bereya je, jei Bereyawer ge sofobili. Ane jei kabwakfer ge nasbawena Paulusem temawer, jega Paulusfar ga sege doksobana, ane angtane Bereyamana unggwanfer ini jeman jeime kabwakfer ge folbamini. ¹⁴ Jengga tatar-tatarmer jelem afelen mesna Paulus ga aane aftafala finibe, jengga Silaso Timotius jei Bereya je jeber ge nwini. ¹⁵ Angtane afwenefener jei Paulus ga aane aftafala jamere kota Atenayo, ane jei gamjon ga aa ge waraubitne Bereyaminibe. Jei ula Paulusmana ga aane gwirinmiyele Silaso Timotius jebe. Paulus aa gam nasipmisiwenaram enggame, "Silaso Timotius jei ai ase tatarfer sege onsobana amnuwer." ¹⁶ Paulus jei Silaso Timotius jes fimini kota Atena je. Ini jemna kabwakfer folbana, aam temawer jei tiborma jam kwirulu gamserem uskambar damtabili kotana jeiserem jebe. ¹⁷ Jega jem temawer jena angtane Yahudimana aa jep ge betwebuwefaram, Paulus jei angtane Yahudimanaiserem jebar jep ge nasbawena, ane angtane Yunanimana Uwa Sanbagiri aa jei ne erebenerem jes mese. Ane nunu jeber-jeber Paulus jei ga angtane pasarap aaiserem ga jebar ge nasbawena. ¹⁸ Ane guru-guru sekola Epikurosmana, ane guru-guru sekola Estoyamanaiserem jep aa jei ge nwinbenerem, jei Paulusfar jena ga aane taanamu-taanamuwena. Afwer jei enggam ge gubili, "Paulus aaiserem jei uskambar nasouna, jengga taterisi jemna igi fas." Ane afwer jeiserem enggam ge gubili, "Paulus aas gamserem gam nasbili, anggwafwar ai ajama towaswebiyen jem temawer." Angtane jeiserem jei gam ge gubili, aam temawer Paulus jei taterisi Yesusmanaiserem ga jes nasbili, ane Yesus terewer jam irwelaiserem. ¹⁹ Jepga Paulus ga aane aftawena Areopagus je, tampata angtane aa jep ge betwebuwefaram, ane Paulus ga aane bala, "Ai enggam aya gunu taterisi ibirmi aaiserem aamei ijes nasbinennerem, ke samfer gamjon ap is towas-towasulmini? ²⁰ Taterisi aamei ijes nasbilirim, taterisi jeiserem gwanan ajama sarbiyen. Jega jem temawer ai taterisi imna jeiserem jem igi ajama towaswebif." ²¹ (Angtane Atenamana seyafter, ane angtane nafis tamnawer aa jei ge jalbilirim ane jep aa jei ge nwinbenerem, jei seyafter enggam ge gubili jafner ge nasbayafef, ane taterisi ibirmi seyafter gemerserem gemer ne sarbabisiyafef.) ²² Paulus ga gwina otum touya bosna Areopagus tampata angtane aa jep ge betwebuwefaram. Ane jep ga fina, ane ga balbabili, "Angtane Atena as imsa sarbasi. Ai isa mesam damtabili aamei seyafter ijesa eyebaabilirim, uskambarsus ga tiborma jam kwiruluserem ga ijesa pujitababili. ²³ Ai agalap wofenaram kotana imnaiserem jebe, ai tiborma jam kwirtabaabiliserem jena jemna unggwanfer ai amesam gerebaabisnenne. Ai jena daamfennaiserem jes mese ai domola, jena jeiserem jep ga enggam ne tulisulu, ’Ga ip, uwa sanbagiri ai gemerje is ajama towaswebayana.’ Uwa Sanbagiri aamei ijesa pujitenerem Jei ijama towaswebayan, jengga namwer Uwa Sanbagiri jeiserem ai ip ga is ajes nasbamif. ²⁴ Uwa Sanbagiri Jei ogir aaiserem aa eyebal, ane seyafter jep gemerserem. Jeiba Tuhansam winsi yo ogiri aaiserem jebe, ane seyafter aa je naawenaram. Jei jena angtane aa jes gane eyebilirim, Jei jep Jam nwinyen. ²⁵ Ane tafna angtanemanaiserem jeme Uwa Sanbagirfe apgal jigala jam ne eyebiyen. Uwa Sanbagiri Jei apgal jigala afa Jam bilyen. Jei baabeta nebe nes Jei golmini, ane mafnan mese, ane seyafter nei nejesa damtabilirim. ²⁶ Angtane daamfennaiserem jemniwer Uwa Sanbagiri Jei anggwabura seyafter gemerserem ga eyebaabili, jega jei ogiri aaiserem seyafter jep gam naawef. Gwanan-gwanansus Jei mesam gul fonggalabara ane fwera angtane seyafter gemerserem ga jep sege nwinbene. ²⁷ Uwa Sanbagiri gam aa jewer eyebilirim, Jei ga enggalem temawer eyebili, jega angtane Jei ga sene terelbene, ane Jei ga sene tebana. Bunar-bunarsus Uwa Sanbagiri Jei bijauyan nemniwer. ²⁸ Angtane nafsi ga enggam gunu, ’Baabeta Jemnaiserem nei ga nejemfenera gwena, ane nei Jebanefenera wofena, ane nei ogir aaiserem nejeba nwini.’ Ane im afelen mesna ga enggam ge nasbawena, ’Nei mese nei Jem tanen mesna.’ ²⁹ Nengba Uwa Sanbagirem tanesam. Jega jem temawer nei enggam nejama guyon, Uwa Sanbagiri Jei patung emas galserem, afa perak, afa ton, angtane inip enggam aa jei gunurum, ’Ai as eyebili.’, gamjon jei se eyebili. ³⁰ Gwanan aa jep falam angtane nalefe jei Uwa Sanbagiri jam ne towaswebayan, Uwa Sanbagiri Jei angtane Jam tamtamtababiyen. Jengga namwer Jei enggam gunu, ’Angtane seyafter gemerserem ogiri aaiserem jebe, jam sege tikwebili etam-etam jemnaiserem jewer.’ ³¹ Nunu daamfenna Jei Jener aa jes bilim, Jei angtane seyafter waakenfer jem tenebaabuwefe, afa jei waakenfer ne eyebili afa kabwakfer ne eyebili. Jei Angtane daamfenna mesam destabal seyafter jeiserem bunarsus Jei eyebife. Ane angtane seyafter jei Angtane jeiserem ga sene towaswebana, aam temawer Uwa Sanbagiri Jei Angtane jeiserem mesam irtenent terewer." ³² Jame aa galap ne sarbilirim enggame angtane jam tereserem mes irwena terewer, angtane afwer jei Paulus jam ne bisobana. Jengga angtane afwer jei Paulus enggam ne bala, "Aamei taterisi jeiserem gamjon ap se nasipmi, galap ai agma sarbisif." ³³ Paulus ga aa sofwa ane angtane jeiserem ga mirtebitefala. ³⁴ Angtane afweraiserem jei Paulus ga aane tikwebaatini, ane jei Yesus ga aane tebana. Angtane Yesus aa jei ne tebanaram, angtane daamfenna jemniwer bosna jemna ga Diyonisyus. Jeiba angtane otumu Areopagus jep aa jei ge betwebuwenaram angtane afweraiserem jebar. Ane wini ga daamfenna aasaje bosna ga Damaris. Ane angtane nafis-nafsi jes mese Yesus gemer ne tebana.

¹ Jeiserem taban, Paulus kota Atena ga mirsotefala, kota Korintuswer ga sofna. ² Kota Korintus je angtane Yahudimana aasaje ga jebar ga aa ge dorwena. Angtane jeiserem jemna bosna ga Akwila. Jei propinsi Pontus je surnu. Jei namwer ge fortya winabar negeri Italyaminiwer. Wini jemna bosna Priskila. Kaisar Klaudius mesam gunu enggame, angtane Yahudimana kotana Roma jam sene mirsotefala. Jega jem temawer Akwila yo Priskila jei kota Roma negeri Italya ga aa ge mirsotefala, ane jei ga aa ge jela Korintus je. Paulus ga gwina jei jam domsofe jelem jenabe. ³ Ane jei jebar ga aa ge nwinbene. Jei awelna jebar seyafter ga aane gwebili enggalfe doini gam ne domolf, ane tumilgala jem armanulf. Awelna Paulusmana ga tenda jas eyebaabuwena, Akwila yo Priskila gamserem. ⁴ Nunu Sabat jeber-jeber Paulus jei gam sofwa jena angtane Yahudimana aa jep ge betwebuwefaram jebe, ane jei taterisi Yesusem temawer jep ga gam nasbili. Jei uskambar gam nasbili enggalfe, angtane Yahudimana ane angtane Yunanimana jei Yesus gam ne tebaf. ⁵ Silaso Timotius jame aa galap ge jelaram propinsi Makedonyawer, gwinibener jeterserem jamer ona gigit, Paulus jei taterisi Uwa Sanbagirmana jetefener nasipmiyafna. Jei bunarsusfer destabana enggame, Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. ⁶ Jes jepserem angtane Yahudimana jei bai Paulus jam ne sarbafe, ane jei ga kabwakfer ne bili Paulusem temawer. Jega jem temawer Paulus jei ga fene jemna sonabara ga tensosini, ane ga balbabili, "Afa aamei Tane Uwa Sanbagiri ijama tebayana, gam jega aamei tamtamtalaiserem ga isa domola. Etam-etama jeiserem je ilemanfenna, ane aamei kabwakfer am temawer gamjon ijama nasbiyen. Namwer as sofwa anggwabura Yahudimanyanaiserem jemnibe." ⁷ Jes jepserem Paulus jei jena angtane Yahudimana aa jep ge betwebuwefaram ga mirultefala. Jei ga aa gwina jena jitefwer aa je fitnaram, jep ga kautena. Jena jeiserem angtane bosna Titius Yustus ga jemna. Jei angtane Yahudimanyan, jengga jei Uwa Sanbagiri mes tebana. ⁸ Ane angtane bosna ga Krispus ga jei nwini sanbakfe jena angtane Yahudimana aa jep ge betwebuwefaram jeiserem jebe. Jei Tuhan mes tebana, ane wi tane jeman mesna, ane angtane seyafter gemerserem jem jenap aa gemer ge nwinbenerem jei mese. Ane angtane Korintusmana unggwanfersus afweraiserem jeime ne sarbisini taterisi Paulus aa jes nasbilirim. Jepga jei Yesus ga aane tebana, ane ga aane baptistababili. ⁹ Gwineme Paulus jei Tuhan eserem jam damtala gamserem gam ga damtasini. Tuhan Jei Paulus ga enggam bala, "Ipsam ernerem! Taterisi Waakena jamer is nasbuwena, ane ijam tikweyan! ¹⁰ Ai ibaner ge wofena, ane angtane nafsi afa fas ibe kapka ijei eyebiliserem, aam temawer angtane kotana aaiserem jebe aa jei ge nwinbenerem unggwanfer ba Amnam." ¹¹ Muara unggwanfer ga delapan belas, Paulus jei kotana Korintus propinsi Akaya jep jamer nwinibe, ane jei Taterisi Uwa Sanbagirmana ga nasbuwena angtanem nenennabe. ¹² Galiyo jam aa galap nwinirim Gubernurfe Akaya je, anggwabura Yahudimana seyafter ga aa ge betwebili daamfennaber, ane Paulus ga aane tebana, ga aane aftawena angtane sanbakminibe, angtane aa jei gam balaram angtane afa waakenfer eyebiliserem afa kabwakfer eyebiliserem. ¹³ Angtane Yahudimana jei enggam ge gubili, "Angtane aaiserem jei angtane unggwanfer ini jemna gam malin-malintabaipmini Uwa Sanbagiri jam pujitefe, nele nafsi Nabi Musa aa jes tulistaabilim jemniwer." ¹⁴ Paulus jame aa galap towaiwenaram jam nasewefe, Galiyo angtane Yahudimana jeiserem ga balbabili, "Wa, aamei angtane Yahudimana, afa aamei abe as jam isa bilibenerem kapkaiserem Paulus aa jes eyebilirim, bastantouya afa unggwandusa, ai samfer isas sarbabisini jamere taban. ¹⁵ Jengga ula aamei abe as ijesa bilibenerem, ula jeiserem jeba taterisi, afa bosna, afa hukum ilemanaiserem jem temawer, gam jega aamei ula aaiserem iner isa nasbabili. Ai bai ula aaiserem gamjon jam sarbife." ¹⁶ Jewer ga Galiyo angtane Yahudimanaiserem ga surbobili mwona jelemanaiserem jewer. ¹⁷ Jepga angtane seyafter jeiserem jei Sostenes ga aane tebana. Jeiba angtane sanbaksam jena angtane Yahudimana aa jep ge betwebuwefaram. Jei jep ga aane tebana, ga aane safsaftana Galiyom meja tarnabe. Jengga Galiyo jei jep jam anggayan. ¹⁸ Paulus jei nunu unggwanfer jam nwinibe kota Korintus je, jepga angtane Yesus aa jei ne tebanaram ga mirtebitefala. Ane jei Priskila yo anggwa jemna bosna Akwila jebar aa ge sofobili atdusa layarabaraiserem jeme propinsi Siryawer. Paulus nalefe jam jusweyan atdusa layarabaraiserem jebe pelabuhan kota Kengkereya je, jei jena ga gaarstenanna Uwa Sanbagirminiwer. Ane jega jem temawer jei nabal safna jemna ga gutunsini. ¹⁹ Kota Efesus je jep jame aa ge forobilirim, Paulus jei Priskila yo Akwila ga mirsotefala jebe. Jei jentowaifener ga kautena jena angtane Yahudimana aa jep ge betwebuwefaram jebe, ane angtane Yahudimanaiserem jebar ga aa ge nasbawena. ²⁰ Jepga jei Paulus ga aane bala, "Paulus, aamei abakfer is nwini aafe." Jengga Paulus jei bai. ²¹ Safe gam, nalef jei jam sofweyan, jei enggam ga gunu, "Afa Uwa Sanbagiri Jei ai jam ase balaram ai gamjon jalfe imnibe, bunar ai gamjon ga as jela imnibe" Ane jei jewer ga aa sofwa kota Efesusminiwer atdusame. ²² Paulus kota Kaisareya je jep jame aa galap fornaram, jei atdusawer ga aa iretya, ane jewer ga sofwa kota Yerusalemminibe. Ane jei ga salamma ga golmini safna Yesus aa jei ne tebanaram jebe. Jewer ga jei kota Antyokyawer ga sofna. ²³ Jei kotana jeiserem jebe nwinibe jamer abaktouya, gamjon ga sofna jewer. Jepga jei propinsi Galatya ane ona Frigya jep ga wofena. Jei taterisi Uwa Sanbagirmana gamjon ga nasipminenne, jega angtane Yesus jep aa jei ne tebanaram jei kanaufer gam ne fibif. ²⁴ Angtane Yahudimana jemna bosna Apolos aa jei surnurum kota Aleksanderya je, jei kota Efesus je jela. Jei waakenfer nasipminenne, ane jei unggwanfer tousa Taterisi Uwa Sanbagirmana jem igiserem. ²⁵ Angtane nafsi jei nele Tuhanmanaiserem Apolosfe mes ne towas-towastabana. Ane Apolos jei baabetmer ga nasowena, ane jei angtane bunarsusfer towas-towastababili seyafter Yesusem temawer. Jengga jei baptisana Yohanesmanaiserem ga jetefener towaswebili. ²⁶ Apolos jei jam ereyen jena angtane Yahudimana aa jep ge betwebuwefaram jep jam nasowefe. Jep ga Priskila ane Akwila jei taterisi Apolosmana ga aa ge saribaasini, ane jei Apolos ga aa ge aftawena jelem jenabo. Jepga jei Apolos ga aa ge towas-towastana Uwa Sanbagiri aa gam mwangbisinirim enggame Yesus Jei angtane jam waakentababisif. ²⁷ Apolos jei gamjon enggam ga gunu, "Ai ajam sofwef Akayawer." Jepga angtane Yesus aa jei ne tebanaram kota Efesus je, jei surta ga aane tulisulmini angtane Yesus aa jei ne tebanaram ona Akaya je jep aa jei ge nwinbenerem jebe. Jei surta jeiserem enggalf ne tulisulu, jega angtane Akayamanaiserem jei Apolos ga sene tebana ini waakenmer. Apolos jei Akaya je jame aa galap fornaram, jei angtane Yesus aa jei ne tebanaram ga batobaabili. Angtane jeiserem jei Yesus mes ne tebana, aam temawer Uwa Sanbagiri Jei waakena Jelemanaiserem jes kitulmini jebe. ²⁸ Apolos jei angtane Yahudimanaiserem jebar uskambar ge nasbawena, jamere jei aa ge tikwebili jam ge nasbawefe. Jei gamjon jam ge nasbaweyan angtane unggwanfer jepserem jem tarnabe. Jei Taterisi Uwa Sanbagirmana ga gerabistena, ane ga aa saamini enggame Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.

¹ Apolos jei kota Korintus je jep nwini. Ane Paulus jei ga aa sofwa jei fistamer jam sofweyan, jamere kota Efesus je aa forna. Jepga angtane Yesus aa jei ne tebanaram afweraiserem ga damtabili. ² Paulus jei angtane jeiserem ga aa tenebaabili, "Mafnana Uwa Sanbagirmana ke mes jela imnibe, aamei Taterisi Uwa Sanbagirmana igalaba taayibenerem?" Jei enggam ga aane tamawolbana, "Gemerje. Ai ajama sarbiyen, Mafnana Uwa Sanbagirmana afa ba aare." ³ Jepga Paulus ga tenebaabili, "Ke gam, aamei ibasa taabili aamei is galap ne baptistababilirim?" Ga aane tamawolbana, "Ai taterisi Yohanes aa jes nasbilirim ga jes aya taabili." ⁴ Paulus ga balbabili, "Angtane Yohanes aa jes baptistababilirim, jei ga jam ne gwerauwulf enggame angtane jeiserem mes ge tikwebili etam-etama kapkaiserem jewer. Jes galapserem Yohanes jei angtane Israelmana gamjon enggam ga balbabili, ’Aamei bunarsusfer Angtane am amnuwer aa Jei fortyaram, Jei ga jam isa tebana. Angtane jeiserem ga Yesus.’ " ⁵ Jame aa galap ne sarbilirim taterisi jeiserem, jei ga aane baptistababili bosna Tuhan Yesusmanaiserem jeme. ⁶ Paulus tafna jame aa galap tosonswenaram jem sagabe, Mafnana Uwa Sanbagirmana ga iretya jem sagabe. Jepga jei aa ge nasbawena ula jei jener jam ne towaswebiyeneiserem jeme, ane taterisi Uwa Sanbagirmana ga aane nasbili. ⁷ Angtane jeiserem unggwanfer engbar ga enggammer dua belas. ⁸ Muara ga nawer-ningna Paulus jei jeber-jeber gwiwena jena angtane Yahudimana aa jep ge betwebuwefaram jebe, jei jam ereyen angtanefar jam ge nasowefe. Jei uskambar enggam ga balbabili, "Seyafter ai ibe isa agemer towas-towasulminirim nunu aaiserem jem temawer, nunu Uwa Sanbagiri Jei aa jem nwiniserem anggwabura seyafter gemerserem jem Sanbakfe, seyafter jeiserem ba bunaram." ⁹ Angtane afwer imwana jemna mat, jei bai Yesus jam ne tebafe, ane jei syefer ge nasbawena nele Tuhanmanaiserem jem temawer angtane unggwanfer jem nwenap. Jega jem temawer, Paulus angtane jeiserem ga mirtebitefala, ane angtane aa jei ne tikwebaatinennerem jebar ga aa ge sofobili. Ane nunu jeber-jeber jei ga aa ge nasbawena jena unggwandusa Tiranusmanaiserem jebe. ¹⁰ Jei taterisi jeiserem jamer nasbuwelabe tahunu ga naura. Jepga angtane aa jei ge nwinbenerem propinsi Asya je seyafter gemerserem, jei ga aane sarbili taterisi Tuhanmanaiserem, angtane Yahudimana mese ane angtane Yahudimanyan. ¹¹ Paulus ga bwembwema waakena ga jem eyebaabili baabeta Uwa Sanbagirmanaiserem jeme. ¹² Jepga angtane lenson afa sof ambona jem taamuwiliserem Paulus gwanan aa jes gwelaawilirim, jei fene jeiserem angtane bwernabaraiserem jep ga aane eripmuwena, ane bwerna ga aa ge barweipmini, ane bwat kapkaiserem ga aa ge toyipmititye angtaneminiwer. ¹³ Ane angtane Yahudimana unggwanferyan ona jeiserem jep ge wofebili, ane jei bwat kapkaiserem ga aane surbobili. Jepga jei enggam ga aa ge gubili bosna Tuhan Yesusmana jes sa bilibene, ane bwat kapkaiserem gase totintye. Angtane Yahudimana jei bwat kapkaiserem ga aane balbabili enggame, "Ai imsa balbabili, bosna Yesusmanaiserem jem Paulus aa jes nasbanaram, sa totinye!" ¹⁴ Imam sanbagiriserem bosna jemna Eskewa, ane tane jemna ga tuju. Tantantane tuju jeiserem jei bwat kapkaiserem jam ne surbobif jes gemerserem. ¹⁵ Jengga bwata kapkaiserem ga enggam gunu. "Yesusba amsam towaswebana Jei baabetabara, ane Paulus amsam sarbana jei mese jei baabetabara, jengga aamei ai teisyena aamei baabeta fas." ¹⁶ Ane angtane bwat kapka aa jei kabwanaram jei ga aa fagawa, ane tantantane tuju jeiserem ga aa saftabana seyafter. Jewer ga jei ga aa ge nunggirbene jenawer, jei ilyak-ilyaksamer ga aa ge nunggirbene, tifni jemna bubwana ga anesus. ¹⁷ Angtane Yahudimana ane angtane Yahudimanyan kota Efesus aa jei ge nwinbenerem, taterisi jeiserem jam aane sarbilirim, jei seyafter ga aa ge erebili, ane bosna Tuhan Yesusmanaiserem unggwanfer ga aane gulbatena. ¹⁸ Angtane unggwanfer Yesus aa jei ne tebanaram, jei ga aa ge jalbuwena angtane unggwanfer jepserem jem tarnabe. Ane etam-etama kapka jei gwanan aa jes ne eyebuwenantam, jei ga aane balbabitowena. ¹⁹ Angtane faatrewabaraiserem jei bukunu jemna ga aane erebuwena, ga aane giranbaabisini angtane unggwanfer jem nwenabe. Buku hargana jeiserem ga enggammer 50.000 doi perak. ²⁰ Jega jem temawer taterisi Tuhanmana ga aane nasibenenne ona seyafter gemerserem jebe. Ane angtane unggwanfer gamjon Yesus ga aane tebana. ²¹ Seyafter jeiserem taban, Paulus ga gunu "Ai ajam sofwef kota Yerusalemwer, propinsi Makedonya ane Akaya ga jeter as ayenni." Jei ga gamjon gunu, "Sofwera jewer taban, ai kota Romawer mese jewer ajam sofwef." ²² Angtane naura bosna Timotiuso Erastus, Paulus aa jei ge batobanaram, Paulus ga jes bafsona propinsi Makedonyaminip ge sofwefe, ane jena ga propinsi Asya ga jep nwini. ²³ Jes galapserem kota Efesus je ula jebe ga kabwakfersus ga fala Nele Yesusmanaiserem jem temawer. ²⁴ Angtane bosna Demetrius, jei apgal jigala perakawer ga jei eyebaabuwena. Jei ja tantane ga perakawer eyebaabili, jam domolabe ga jena unggwandusa galserem patung Artemis ga jem mwonap fiton. Awelna jei aa jes gwebilirim jemna doini ga anesus, ane angtane awelna aa jebar ne gwebilirim, jei mese doini unggwanfer ne tebabili. ²⁵ Jei angtane nafsi ga jenbebili, angtane apgal jigala perakawer aa jei ne eyebaabuwenaram. Jei ga balbabili, "Am afelen mesna, aamei imsa towaswena nei doini uskambar neya damtabuwena awelna aaiserem jewer. ²⁶ Aamei samfer iner isa sarbili ane ga isa domola, Paulus aa jes eyebilirim. Paulus jei angtane mes towas-towastababili, ane angtane unggwanfer ini jemnaiserem jes gwebaipmini, aaf kota Efesus je, ane propinsi Asya seyafter jebe. Jei enggam gunu angtane perak apgal jigal tafam eyebiliserem, jeba anggwafwaryan. ²⁷ Aaiserem kapka, afa awelna nemnaiserem bosna kapka jam se domolaram. Ane gam ke awelna nemanfenna tefner, jengga jena anggwafwar Artemismanaiserem jes mese bosna kapka se domola. Ane angtane jei gamjon jam ge gubiyen enggame, ’Jena jeiserem unggwandusam.’ Anggwabura Asya ane angtane ogiri seyafter gemerserem jei Artemis ga aane pujitene. Galap jemna unggwan-gwanaiserem je gase barwebana." ²⁸ Angtane unggwanfer jepmanaiserem jei taterisi jeiserem jame aa galap ne sarbilirim, witifini jemna uskam-uskamsusfer ga aa ge folbamini, ane jei ga aa ge tetenbuwena enggame, "Angtane Efesusmana jemna anggwafwar Artemis unggwandwasusu." ²⁹ Jepga angtane seyafter kotana jepmanaiserem kakalmer ga aa ge tetenbuwena. Ane angtane uskambar jeiserem jei Gayus ane Aristarkus, ga aane taamini. Jei nawersamer propinsi Makedonyawer ge jela. Ane angtane naura jeiserem jem afelna ga Paulus jei aa jebar ge wofobuwenaram. Angtane uskambar jeiserem jei angtane naura jeiserem ga aane afsofala angtane kakala unggwanfer aa jep betwenaram jebe. ³⁰ Paulus jei jam gwif angtane unggwanfer jepserem jem tarnabe enggalfe, jelem afelna nauna jeiserem jam batomif. Jengga angtane Yesus aa jei ne tebanaram jei enggam ne bala, "Wowo, aamei jewer ijam gwiyan." ³¹ Angtane sanbak-sanbaka propinsi Asyamana, Paulusem afelen mesnaiserem, jei angtane ga aane nasbabisiwena enggame, "Paulus sa bal, jei angtane unggwanfersus aa jep ge betwebilirim tampata jeiserem jebe, jei jena jep jam gweretayan." ³² Jes jepserem angtane uskambar aa jei ge betwebilirim jebe, jei ga aa ge tetenbuwena unggwanfer. Jei seyafter nafis-nafismer ge tetenbuwena. Ane angtane afweraiserem jei teisyena jei bas ne betwebili. ³³ Jepga angtane bosna Aleksander, angtane Yahudimana ga jes ne taatwebana enggalfe gam jalf, angtane uskambar jepserem jem mukanap gam nasowef. Jepga Aleksander jei mukanap ga fyatena, ane tafna ga tetena, ane jei angtane unggwanfer jeiserem ga balbabili enggame, "Angtane Yahudimana jei kapkaiserem fas gam jam ne eyebiyen jega angtane unggwanfer aaiserem ini jemna uskamer jam ge folbamife jeber-jeber jam ge tetenbuwefe." ³⁴ Jengga jei jame aa galap ge towaswebilirim enggame Aleksander jeiba angtane Yahudimanam, jei engbar jema naura jamer ge tetenbuwelabe enggame, "Angtane Efesusmana jemna anggwafwar Artemis unggwandwasusu." ³⁵ Jepga pegawai kota jei angtane unggwanfer jeiserem ga balbabili, "Sa tikwe!" Jepga jei ga aa ge tikwebili. Jei ga balbabili, "Wai angtane kota Efesusmana! Angtane seyafter mes ge towaswebili jena anggwafwar Artemismana je kota Efesus aaiserem jep fina. Ane patunga Artemismana jeiserem winsiwer aa jei iretyaram nei nejesa gerabisnenewenaram. ³⁶ Angtane afa jam guyon taterisi aaiserem je ol kabwak. Ane aas jepserem ipsama tetenwenaram! Etam-etam syefer afa tatarmer ijama eyebiyen, gwanan jam isa sarbisnenne. ³⁷ Aamei angtane naura aaiserem imsa afsoyala aafe, jengga jei apgal jigala afa jei jam ge komkomulsiyen jena anggwafwarmanaiserem jewer, ane ula kabwakfer jam ge bilyen anggwafwarmanaiserem jem temawer. ³⁸ Afa Demetrius ane angtane awelna jebar aa jei ne gwebilirim, afa jei ula aaiserem angtane nafsiserem jep jam ne nasipmife, safnant, aas jepserem aafe jam ne nasbiyen. Jei ula aaiserem angtane sanbakaiserem jemnip sene gwirinfele, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe. Angtane sanbaka jei jelem kantorap nwinwena nunu jeber-jeber. Jep ga jei jebar ga sene nasbili. ³⁹ Afa ula nafsi ijama nasbife, ula jeiserem ga enggalap isa nasbili, angtane seyafter jam aa jep ge betwebilirim ula nafis-nafsiserem jam nasbabife jamer bar. ⁴⁰ Ula aaiserem jem temawer namwer aas jepserem nei nes namwer engbar sene tamtamtababili, aam temawer angtane pemerinta Romamana enggam galap sege gubili, nei nunu namwer aaiserem jeme nei ne kapkaiserem nejesa eyebili. Ane nei waakenfer nejama tamawolbiyen." ⁴¹ Jei jam aa galap tabanwenaram jam nasowelabe, pegawai kota jeiserem jei angtane uskambar jeiserem gamjon ga balbabili, "Aamei jasa sofwe!"

¹ Angtane kota Efesusmana gwanan ini uskamer aa jemanem ge folbaminirim, angtane jeiserem gamjon aa galap ge waakenswebilirim, Paulus jei angtane Yesus aa jei ne tebanaram ga jenbebili, ane ini jemna ga aa kanautabaipmini. Taban, Paulus ga balbabili, "Kelek-kelek." Ane jei ga aa sofwa propinsi Makedonyawer. ² Jei Makedonya ga jep wofena, ane jei angtane Yesus aa jei ne tebanaram, esorola jep ga nasipminenne enggalfe, jega angtane jeiserem ini jemna gam ge kanausweipmif. Jewer ga Paulus negeri Yunaniwer ga sofwa, ane jep ga forna. ³ Jei Yunani je aa nwinirim muara ga nawer-ningna. Jewer ga jei ga gunu, "Ai ajam sofwef propinsi Siryawer atdusame." Jengga Paulus jam aa sararam enggame, angtane Yahudimana Sirya je, jei Paulus mes ne mwangbasini jam ne munbofe, Paulus jei gamjon ga warauwa propinsi Makedonyawer. ⁴ Angtane Paulusfar aa jei ge sofobilirim, bose bosna ga aas seyafter: Sopater tane Pirusmana, kota Bereya jep surnunt; Aristarkus ane Sekundus, angtane nawan jeiserem jei kota Tesalonikawer ge jela; Gayus jei ga kota Derbe tane; Timotius; ane Tikikus ane Trofimus, jei ga propinsi Asyamana. ⁵ Angtane jeiserem nabala ga jei ge danabili, ane jei Paulusfar ai ase kota Troas je jep sene fimini. ⁶ Masara Roti Tanyana jes Tombaabif jamer taban, ai kota Filipiwer ga as ge sofna atdusame, ane nunu unggwanfer ga tafna gwiri kota Troas je jep ga as ge forna, ane angtane jeiserem jebar ga asa dorwena. Jepga minggunu daamfenna ajamera nwinibe. ⁷ Nunu gwanan aaiserem minggunu jeiserem, jepga aya betwena enggalfe, Rotini gam bitabaabif jam tombaabife Yesus gam sarbastaabonf. Paulus angtanefe ga aa ge nasipmini. Jei gwirmer sofwelabar, ane jega jem temawer jei taterisi jam nasbilibe jamer gwini nenennap. ⁸ Mwona bolap jeiserem, ai ajeba betwenaram, lampunu jep ga anesus aane dutabaabilirim. ⁹ Tansi aasaje bosna jemna Etikus, jei jendelanap nontena. Paulus jei abaksusfer nasowena, ane tansi jeiserem Paulus jamer sarbasilibe jamere nunu folbana. Jei jeber ga tastefala, ane ga efsosini tingkata ningnaiserem jewer ga jentya. Angtane jei jame aa galap ne gaartenaram, jei fwater tere, futunuter ne gaartena. ¹⁰ Jengga Paulus ga iretya. Jepga tansi jeiserem jem sagabe jei ga aa tatena, ga tebana. Ane ga balbabili, "Aamei ipsama syenaram, jei gemer gaarasini." ¹¹ Paulus ga warauwa jam tawefe mwona bolabe, jei Rotini ga bitabaabisini, ane seyafter ga dwena. Aa dwena jamer taban, Paulus abaksusu jame aa nasowenaram, jamere ona naf. Jepga Paulus ga aa sofwa. ¹² Angtane jep aaiserem jei tansi jeiserem ga aane girinfele jelem jenabe, ane angtane seyafter gemerserem ini jemna ga kanautabaipmini. ¹³ Ai ajama danna atdusame kota Asoswer, Paulusfar ajeba dorwef jei ai as gam nasbabisiwenantam. Jei tufsamer sofwa os tamer. ¹⁴ Jame aa ge dorwebilirim kotana bosna Asos je, Paulus jei atdusap ga juwili. Jewer ga aya sofwa jamere naanteya Metileneyo. ¹⁵ Jem gwirmer ga aya sofwa jamere ga aya batona naanteya bosna Kiyos jem gwetmanabe. Nunu afelnaiserem jeme naanteya Samoswer ga aya sofwa, ane nunu gamjon jeiserem ga aya forna kota Meletus je. ¹⁶ Paulus mesam gunu enggame kota Efesus je ajama batoyan, enggalem temawer jei bai propinsi Asya je abakfer jam nwinfe. Ini jemna enggam folbana ai tatarmer ajam sofwef jamer kota Yerusalemo, jega enggalf ai fornaram Yerusalem je Nunu Pentakosta nalef jam falyan. ¹⁷ Kota Miletus je, Paulus angtane ga baftana ula jei gwirinfelfe kota Efesuswer enggalfe, angtane sanbaka jemata Efesusmanaiserem aa jei ne taabilirim gam balbabif jam ge jalbife Paulusfar gam ge dorwebif. ¹⁸ Jei jame aa galap ge forobityerem, Paulus ga balbabili, "Aamei imsa towaswena, ai afomfom nwini imnibe, ai agalap fortyantam imnibe propinsi Asya jebe jamere ai aamei is ai mirtebitefalant. ¹⁹ Ini onabertalaiserem, ai awelna Tuhanmana ga ajem gweyibenent nwaafonabaner. Ai unggwasbala unggwanfer ai domolant enggala, angtane Yahudimana kapkaiserem abe ase gala gane eyeibenentem. ²⁰ Aamei imsa towaswena ai taterisi seyafter waakenfer is jei ne batobaabilirim, jeiserem isa ames nasipmini. Ane ai aamei isa mesam towas-towastababili, angtane unggwanfer jepserem, ane ilem jenap mese. ²¹ Ai taterisi Yesusem temawer ames nasbili angtane Yahudimanfe, ane angtane Yahudimanyan jes mese. Ai jei uskambar ames balbabili enggame, ’Sa tikwe etam-etamawer, ga isa jela Uwa Sanbagirminibe, ane Tuhan Yesus ga isa tebana!’ ²² Ane namwer aas jepserem Mafnana Uwa Sanbagirmana ams baftana ai kota Yerusalemwer ajam gwife. Ai teisyena jebe bai se etamwena amnibe. ²³ Ai enggam fener ai towaswena, kotana seyafter gemerserem jebe, Mafnana Uwa Sanbagirmana Jei ai as mes bala enggame ai bwiyip asene gaataantena, ane angtane nafsi jei kapkaiserem ap sene eyeibene. ²⁴ Jengga gwela amnaiserem jem temawer ai ajam ereyen jam terf afa jam gwef. Ini amna ase enggam fener folbana awelna Tuhan Yesus ap aa jes gulbanaram, ai awelna jeiserem jamer as tabanulsini. Awelna jeiserem ga enggam, ai Taterisi Waakena jamer as nasbinenne, Uwa Sanbagiri Jei waakena Jelemanaiserem nep nes jewer golminirim jem temawer. ²⁵ Ane ai ames towaswena enggame aamei seyafter gamjon ase ijama damtayan, safe ai aamei seyafter is amesam towasulmini nunu Uwa Sanbagiri Jei jem gwelaiserem anggwabura seyafter gemerserem jem Sanbakfe jem temawer. ²⁶ Nunu namwer aaiserem ai ga uskambar ai nasowena, afa Uwa Sanbagiri Jei aamei is jam waakentababisiyeneye, jeiserem jeke ai kabwakulu. ²⁷ Ai ajam gwesiyen taterisi Uwa Sanbagirmana seyafter gemerserem ip isa ajam nasipmuwelabe. ²⁸ Aamei in ina waakenfer isa gaaramisnenne, ane jemata seyafter jegme waakenfer isa gerebaabisnenne, aam temawer Mafnana Uwa Sanbagirmana Jei awelna aaiserem ibe is mes golmini. Aamei jemata jeiserem ga enggam isa gerebaabisnenne, angtane domba jelemana aa gemer gam gerebaabisnennerem. Uwa Sanbagiri Jei jemata jeiserem mes armantababilint aawisi Tane Jelemanaiserem jeme, Jame aa galap terentem. ²⁹ Ai amesam towaswena enggame, ai jame ajep sofwaram, angtane kakalaiserem im nenennap ga sege jalbili, ane jei kapkaiserem ga sene eyeipmini angtane Yesus aa jei ne tebanaram jebe. ³⁰ Ane angtane ileminiwer, jei taterisi Uwa Sanbagirmana bunarsusfer jam ne nasbiyen, ane jei ini angtanemana ga sene dektebaipmini jeleminibe, jega jei jeter ga sene onsobaabili. ³¹ Jega jem temawer aamei ina ga waakenfer isa waakensosini! Sa sarbistaabon enggame ai tahunu nawer-ningna, gwin gwer ajam tikweyan ai aamei isa ajam towas-towastababuwelabe nwaafonabaner, aam temawer ini amna ajam eseswebana im temawer. ³² Namwer ai ga isa jam kitulu Uwa Sanbagirem tafnap, jega Jei aamei waakenfer is gase gerebaabisnenne, ane aamei taterisi Jemna ga isa taayibene. Jei baabeta ga is golmini ibe, ane Jei waakena Jelemanaiserem ga is golmini, waakena enggalaiserem Jei aa gala gam golminirim angtane Jelemanaiserem jebe. ³³ Ai doi afa fen afa isa jam bilipmiyen ap gulbafe. ³⁴ Aamei iner imsama towaswena, ai awelnap aner agam gwena doini jam domolfe, jega enggalf tumilgala jem agam armanulu alefe ane alem afelen mesnaiserem jep mese. ³⁵ Seyafter ai ajes eyebilirim, jeiserem jeme ai nele ga isa jem saamisini, jega awelna unggwanfer waakenaiserem jeme nei angtane baabetyenaiserem jem ga nesa batobaabili. Ane taterisi Tuhan Yesusmanaiserem aamei jeber-jeber gam isa sarbistaabona. Jei Jener gunu enggame, ’Afa aamei apgal jigala jam igama taabilirim, ini imna saaserfer ga is gangge folbamini. Jengga afa jam igama gularam ini imna saaser-saasersusfer ga is gangge folbamini.’ " ³⁶ Paulus taterisi jeiserem jama tabanulurum jam nasbilibe, Paulus ane angtane seyafter jep gemerserem ga aa ge nwinbetena somwan dumeme, ane sembayanga ga aane gwebana. ³⁷ Jepga seyafter ga aa ge syebili, ane Paulus ga jamer ne tebasini, ane ga aane aalumbowena, ga aa ge gubili, "Kelek-kelek." ³⁸ Ini jemna seyafter jam ge jenbamini aam temawer Paulus jei enggam aa jewer gunurum, "Aamei ai gamjon ase ijama damtayan." Ane jei Paulus ga aane aftafala jamer atdusabo.

¹ Angtane sanbaka jemat Kristen kota Efesusmana jebar aya syensyanwena jamer taban, jewer ga aya sofwa atdusame jamere naantei bosna Kos jebo. Nunu gamjon jem gwirmer aaiserem naantei Rodos je, ga ajema forna. Naantei Rodoswer ga aya sofwa jamere kota Patarayo. ² Atdusa ona Fenisyawer aa jei sofwaram, atdusa jeiserem ga kota Patara jep ga aya domola. Ai ga atdusa jeiserem ga ajeba juwili, ga aya sofwa. ³ Aya sofwa jamere naantei Siprus gwejawer ga aya damtana, jebe ajamera ayenni, ane propinsi Siryawer ga aya sofwa. Kota Tiruso aya batona enggalfe, angtane atdusap aa jei ne gwebilirim jei galgala kota Tirusmana jep gane gwaasaasif. ⁴ Kota Tirus je angtane Yesus aa jei ne tebanaram ai ga jemnip aya sofwa jam damtabinenefe. Ane jes jepserem ai ga jebar ga aya nwini nunu ga tuju. Mafnana Uwa Sanbagirmanaiserem ini ga gaarmini angtane jepmanaiserem jebe, ane jei Paulus enggam ga aane bala, "Aamei kota Yerusalemwer ijam gwiyan!" ⁵ Jengga nunu tuju jeiserem taban, ai jei ga ai ge mirtebitefala, ane ai ge sofwa. Angtane Yesus aa jei ne tebanaram seyafter jei wi tane mese jebaner ga asene aftabifele jamere kota sitabo. Ane dwisip ga somwan dumem aya nwini, sembayanga Uwa Sanbagirfe ga aya gwebabana. ⁶ Angtane seyafter jeiserem jebar aya syensyanwenaram jamer taban, atdusap ga aya juswena, ane jei ga aa ge waraubili jelem jenabe. ⁷ Kota Tiruswer ga aya sofwa atdusame jamere naantei Tolemaiso. Jes jepserem ai ga angtane Yesus aa jei ne tebanaram jemnip ga aya sofwa jei jam damtabinenefe. Ane ai jebar waakenfer ga aya nasbawena, jebar aya nwinirim nunu ga daamfenna. ⁸ Nunu jeiserem jem gwirmer jon jewer ga aya sofwa jamere kota Kaisareya yo. Kaisareya je angtane Taterisi Waakena jei nasbiliserem bosna jemna ga Filipus jei ga jep nwini. Ai jem jenap ga aya sofwa, jep ga aya nwini. Filipus jeiba angtane daamfennam, angtane tuju aa jes ne destabaabinintim kota Yerusalem je. ⁹ Filipusmana yafom mesna ga nawer-naura, jei gemerje anggwana jam ne ketayan. Jei taterisi Uwa Sanbagirmana jeber-jeber ne nasibenenewena. ¹⁰ Jes jepserem ai abakfer towai ajebara nwinirim, angtane nabi aasaje ga Yudeyawer jela, bosna jemna ga Agabus. ¹¹ Jei amnip jela, ane bana Paulusmana ga goltena. Ane jei tufa yo tafna jelemana jem ga faarena bana jeiserem jeme. Jepga jei enggam ga gunu, "Mafnana Uwa Sanbagirmana ga enggam gunu, ’Aas gemerserem, angtane bana jemanserem, angtane Yahudimana jei ga angtane jeiserem ga enggam sene taferna Yerusalem je, ane jei ga sene gera angtane Yahudimanyanaiserem jem tafnabe.’ " ¹² Ula jeiserem jame agalaba sarbilirim, ai mese ane angtane Yesus aa jei ne tebanaram seyafter jep aa jei ge nwinbenerem, ai Paulus ga uskambar aya bala, "Aamei kota Yerusalemwer ipsam sofnaram!" ¹³ Jengga Paulus jei enggam tamawolbaabili, "Aamei game ijewera syenaram, gam jega ini amnaiserem ga as ijesa kabwaktabana. Ai ames menetwesini, afa angtane as jam ne tafref, sya as saf sene taferna. Ane aime amsam menetwesini Yesusem temawer jam terfe." ¹⁴ Jeiserem taban, Paulus jei gamjon ai as jam sarbabiyen. Jega jem temawer ai gamjon aima nasoweyan taterisi jeiserem jem temawer. Jengga aya gunu, "Safnant, Tuhan aa jes bilirim, jeiserem gase etamwena." ¹⁵ Kota Kaisareya je aya nwinirim jamer taban, galgala aya menetababisini, ane kota Yerusalemwer ga aya sofwa. ¹⁶ Angtane Yesus aa jei ne tikwebaatinennerem afwer ga ajebara sofwa Kaisareyawer jamere Yerusalemo. Jei ga asene aftabifele jamere angtane bosna Manason jem jenabo. Manason jei angtane naantei Siprusmana. Jei Yesus fwater tebanant. Ai ga jem jenap aya nwini. ¹⁷ Ai jame agalaba fornaram kota Yerusalem je, am afelen mesna Yesus aa jei ne tebanaram jebe, jei ai as waakenfer ne tebabili. ¹⁸ Nunu jeiserem jem gwirmer jon, ai Paulusfaner ga aya sofwa, Yakobus jam damtafe. Angtane sanbaka jemata aa jei ne tebabilirim seyafter gemerserem jei mes ge forobitye, ane ga as jep ne fibabili. ¹⁹ Paulus jebe aa galap ge forobilirim, jei ga gutena, "Ai namwer asa foryal." Jepga Paulus ga nasipmini seyafter Uwa Sanbagiri aa jes eyeipminintim angtane Yahudimanyanaiserem jebe, ga enggam Paulus aa jes eyebilirim baabeta Uwa Sanbagirmanaiserem jeme. ²⁰ Taterisi Paulus aa jes nasbilirim jei jame aa galap ne saribaasinirim jamer taban, jei Uwa Sanbagiri ga aane pujitene. Jepga jei Paulus ga aane bala, "Am afelna gase sarbi, angtane Yahudimana unggwanfer Yesus mes ne tebana, ane jei Hukumu seyafter Nabi Musa aa jes tulistababilim jei gemer ne tikwebitini. ²¹ Jengga jei im temawer enggam ge sarbili, aamei angtane Yahudimana seyafter aa jei ge nwinbenerem anggwabura nafsiserem jem nenennabe, aamei angtane jeiserem igemer towas-towastababilirim taterisi Nabi Musa aa jes tulistababilim jam ne aafulnufe. Jei enggam ge sarbabili aamei enggam im gunu, ’Tane imna ijama sunattababiyen, ane osiri asal-asala nemnaiserem nep ne jes ne towas-towasulmilim game ijama gweyan.’ ²² Namwer nei ga enggam nesa eyebili. Angtane Yahudimana Yesus aa jei ne tebanaram jei sege sarbili enggame, aamei imsam jela. ²³ Waakenfer ga enggam, ai aamei isa gemera balaram ga gemer is eyebili. Angtane aaf ga nawer-naura jena aa jei ne testenannaram Tuhanminibe. ²⁴ Sya, sa sofwe angtane jeiserem jebar Jena Uwa Sanbagirmanaiserem jebe, Uwa Sanbagirem nwenabe ini ilemana iner ga isa wirtabaabili. Ane gwanan dois is kitulmini, jega nabal safna jemna ga sene gutunbaipmisini. Jepga angtane Yahudimana seyafter ga sege towaswebili enggame, taterisi jei aa jes ne sarbilirim im temawer, taterisi seyafter jeiserem ol kabwaksam, jengga aamei Hukumu Nabi Musa aa jes tulistababilim igemer eyebili. ²⁵ Jengga angtane Yahudimanyan Yesus aa jei ne tebanaram jem temawer, ai surta jebe amsama baafulmini. Surta jeiserem jemna igiserem ga enggam: Ipsama tumilirim tumilgala angtane jam tumilyeneiserem, aa jes ne bunulntenaram falnabe. Aawisi ijama telbiyen. Ane jigal nin aawisibere ijama tumilyen. Ane maaryen ijama gwebiyen." ²⁶ Gam jamer ge nasbawelabe taban, Paulus ga angtane nawer-naura jeiserem jebar ga aa ge sofobili. Ane nunu gamjon aaiserem jem gwirmer jei Uwa Sanbagirem nwenabe ini jelemana jener jam ne wirtabaabife gane eyebili. Jei jeiserem jam ne eyebilibe nunu unggwanfer ga tuju. Jepga jei ga aa ge kabwitena Jena Uwa Sanbagirmanaiserem jebe enggalfe, imam jam ne towastafe nunu ga fomera nunu tuju jeiserem gase tabanwena, ane imam-imam jei angtane nawer-naura jeiserem galgala jemna ga sene bunulntena Uwa Sanbagirf jam kitulbofe. ²⁷ Nunu tuju jeiserem amkom fom barwela, angtane Yahudimana propinsi Asyawer aa jei ge jalbilirim, Jena Uwa Sanbagirmanaiserem Paulus ga jep ne damtana. Jepga angtane jeiserem jei angtane unggwanfer ga aane balbabili Paulus ga aane temila. ²⁸ Jepga jei enggam ga aa ge tetenbuwena, "Angtane Israelmana, au angtane aaiserem ganma temil! Angtane aaiserem jei anggwabura nafsi seyafter gemerserem ga enggam towas-towastababinenne anggwabura Israel nemnaiserem jei kapka. Ane jei enggam towastababinenne Hukumu Nabi Musa aa jes tulistababilim je waakenyan, ane Jena Uwa Sanbagirmanaiserem jes mese kapka. Ane angtane Yahudimanyan jei safe aaf jam ge kabwiteyan Jena Uwa Sanbagirmanaiserem jebe, jengga Paulus angtane Yahudimanyanaiserem jebar aaf mes ge kabwitetya jena waakenaiserem jebe." ²⁹ (Jei jes gamserem gam aa jewer ge gubilirim jei ga aam temawer ge gubili, jei Trofimus tane Efesusmana gwanan mes ne damtana, jei Paulusfar ge wofena kotanabe. Ane jei ga enggammer ge gubili, Paulus mesam aftawena Jena Uwa Sanbagirmanaiserem jebe.) ³⁰ Jepga angtane kotana jeiserem jepmanaiserem jei seyafter kabwakfer ga aane enola, ane angtane seyafter gemerserem ga aa ge nunggirbifelwetya Paulus ga aane temila, ane Jena Uwa Sanbagirmanaiserem jem mwonawer ga aane tinderfele jamere sitabo. Jes jeberserem Jena Uwa Sanbagirmana jem pintunuserem ga aane matabaabisnenne. ³¹ Angtane jeiserem Paulus jame aa galap ne towaitanaram jam ne munbofe, angtane aasaje ga sofwa ginanggwana sanbaka Romamanaiserem jemnibe enggalfe jei gam towastaf, angtane kota Yerusalemmana jei seyafter uskambarsus kabwakfer ne enola. ³² Ginanggwam sanbaka jeiserem jei tatarfer ga aa ge jalbili jelem safnabaner, jamer tampata angtane uskambar jepserem jebo. Angtane uskambar jei ginanggwam sanbaka jelem safnabaner aa galap ne damtabilirim, jei Paulus ga aane aftannu jam saftalawer. ³³ Ginanggwa sanbaka jeiserem Paulus ga gwetmantaasini, ane ga tebana, safna jelemana ga balbabili Paulus jam tafrefe rantena nauraiserem jeme. Jepga jei Paulus ga tenebana, "Aam jei nansa? Gwanan ibas eyebili?" ³⁴ Angtane unggwanfer jeiserem afwer jei ga aa ge tamawolbili, ane afwer jei ge gubitena, ane tetene jep ga uskambar ga aane eyebana, jepga ginanggwa sanbaka jeiserem jam towasweyan aa je bagal kakalsa. Jega jem temawer jei safna jelemana ga balbabili, "Paulus sa aftafal markasap." ³⁵ Jei Paulus ga aane aftafala jamere tutubwai tarnabo, angtane unggwanfer jei Paulus uskambar gane nasbana. Jega jem temawer ginanggwana Paulus ga aane gaartena, tafam ga aane girni. ³⁶ Angtane uskambarsus aa jei ne onsobaabilirim amnuwer, ga aa ge tetenbifele enggame, "Jasa munbo!" ³⁷ Amkom fom ge kabwitela markasabe, Paulus ginanggwa sanbaka jeiserem ga tenebana, "Ai ke samfer ibar ge nasowefe?" Ginanggwa sanbaka jeiserem jei Paulus ga bala, "Wa, aamei Yunani ula samfer im nasbili. ³⁸ Gam jega enggam, aamei angtane negeri Mesirmanyan, muara gwananaiserem kabwakfer aa jei eyebuwenantam. Jei angtane kapka ginnabaraiserem unggwanfer ga enggammer 4.000 gemer aftabifelent taman dwisgiribe. Ai enggam ai gunu aamei angtane jeiserem jesyan." ³⁹ Paulus ga tamawola, "Aiba angtane Yahudimanam. Ai kota Tarsus je ai surnunt, ona Kilikya je. Kotana jeiserem angtane unggwanfer tousa. Ke samfer ai angtane aaiserem ajebara nasowef?" ⁴⁰ Ginanggwa sanbaka ga aa gunu, sya. Paulus ga tutubwaiyap fina, ane tafna ga aa jawolmini jamere angtane aa jei tikwebili jam nasbawelawer. Jepga Paulus ga balbabili Ibrani oleme.

¹ Jei enggam ga balbabili, "Aamei seyafter, aya mese ane uwa mese, ai as imsa sarbasi! Ai aamei isa ajam balbabili enggame, ai aaf ajes eyebilirim jeiserem kabwakyan." ² Angtane unggwanfer jeiserem Paulus jame aa galap ne sarbanaram Ibrani olem jama nasowenaram, jei ga aa ge tikwebili jam ge nasbawelawer. Paulus enggam ga balbabili, ³ "Ai angtane Yahudimanam, kota Tarsus je ai surnunt, ona Kilikya je. Jengga kotana Yerusalem aaiserem ai ajep unggwan-girswenant, ane guru Gamaliyel ai ga as jei towas-towastanant Hukumu Nabi Musa gwanan aa jes tulistababilim jem temawer. Ai an ana aner amsam gerant Uwa Sanbagirfe, aamei seyafter namwer aas igemera gwenaram in ina ima tetent Uwa Sanbagirminibe aime gemer. ⁴ Ane ai kapkaiserem ai eyebilint jamer angtane ga aa ge terbilint, angtane Nele Tuhanmana aa jei ne tikwebaatinintim. Ai wi anggwa mese ai tebabilint, ane ga ai katabuntenant bwiyibe. ⁵ Imam sanbagirsususerem ane Safna Angtane Yahudimana Sanbak-sanbaka Seyafter Gemerserem jei aamei is jei sene towastababili enggame, ’Angtane aaiserem bosna Paulus, jei bunarsusferam nasouna.’ Angtane seyafter jeiserem surat-surta ap ne kitulbonont, surta aa jes ne tulistabaipminintim jelem afelen mesenfe kota Damsik je aa jei ge nwinbenennerem. Jep ga angtane taterisi Yesusem temawer aa jei ne tikwebaatinintim, ai angtane jeiserem safe ajam tebabif enggalfe kota Yerusalemwer gam aftabuwef, jewer gam tamtamtababif." ⁶ Paulus gamjon ga balbabili, "Kota Damsikwer agalap gwinantam, ai kotana jeiserem jam ai gwetmansonantam gwere bolap, nafa aafer-aafer ga iretyant winsiwer, jam bwere-bwerewena am tarnabe. ⁷ Jepga ai jenant onabe, ane taterisi ga ai sarbilint enggam aa je gutenaram, ’Saulus, Saulus, aamei kapka Ap As ibaf eyeibene?’ ⁸ Ai ga ai tenebanant, ’Aamei nansa, Tuhan?’ Jei ai ga as tamawolbanant enggame, ’Aiba Yesusam, angtane Nasaretmana, kapka ijep eyeibenerem.’ ⁹ Am afelen mesna ai ajebara jelaram, jei nafa jeiserem mes ne domolant, jengga taterisi Jei aa jes bilirim jei jam ne sarbiyen. ¹⁰ Ai ga ai tenebanant, ’Tuhan, ai bas as eyebili?’ Tuhan ga as tamawolbanant enggame, ’Se irwe, ga is gwina kota Damsikwer! Jep ga Ai aamei jewer ga isAs towastatna seyafter Uwa Sanbagiri aa jes bilirim aamei ijes eyebife.’ ¹¹ Jes jepserem ai ajam anggayan, nwena amna as jam ne matnebanant, aam temawer nafa uskambarsus. Am afelen mesna ai ajebara wofenantam, tafnawer ga asene tebasfele, ga asene aftawenant jamer kota Damsiko. ¹² Damsik je angtane aasaje bosna Ananiyas ga jep nwini. Jei Uwa Sanbagiri bunarsusfer tikwebaatini, ane jei Hukumu Nabi Musa aa jes tulistababilim ga waakenfer sarbili. Ane angtane Yahudimana Damsik je aa jei ge nwinbenerem jei enggam ne bala jei angtane waakena. ¹³ Ananiyas jei amnip ga jelant, jei am gwetmanaber ga fyatetyant, ga as balant, ’Saulus am afelna, nwes fersonnu, ga is anggasini!’ Ane jes jeberserem ai gamjon ga ai anggasini, ga ai Ananiyas ga ai gerebanant. ¹⁴ Jei ai ga as balant, ’Uwa Sanbagiri asal-asal nemnaiserem aa Jes ne pujitawenaram, Jei aamei is mesam destabana enggalfe, aamei igam towaswebif Uwa Sanbagiri Jei aa jes bilirim. Ane enggalfe aamei Yesus igam damtaf, ane taterisi Jei Jener aa jes bilirim igam sarbif. ¹⁵ Aamei taterisi jeiserem jam is sarbili, jega aamei gam is nasbili angtane seyafter jemnibe, taterisi Yesusem temawer seyafter ijes damtabilirim, ane ijes sarbabisinirim. ¹⁶ Aamei baf fya? Tatarmer se irwe, is gane baptiste, ane etam-etama kapka imnaiserem ga jam is wirulu, sembayangam ijep gwebanaram Tuhanem boseme.’ " ¹⁷ Paulus gamjon ga balbabili, "Ai kota Yerusalemwer ai warautnantam, ane ai sembayanga agalap gwebanantam Jena Uwa Sanbagirmanaiserem jebe, jes galapserem ai eserem jam damtala gemerserem gam ga ai domolant. ¹⁸ Ai Tuhan ga ai damtanant, ane Jei ga ase enggam balant, ’Tatarsus, aamei kota Yerusalem is mirsona, aam temawer angtane aafmana jei taterisi imna Am temawer is jam ne taabiyen.’ ¹⁹ Ai ga ai tamawolant, ’Tuhan, jei mes ge towaswebili enggame, ai gwanan amsam wofowenant jena angtane Yahudimana aa jep ge betwebuwefaram aa gemer denennerem, ane angtane Aamei Is jei ne tebanaram ga ai tebabinennent, ga ai bokolntenant bwiyibe, ane jep ga ai safsaftababuwenant. ²⁰ Angtane bosna Estefanus jeimba taterisi Imna jeyam nasibenenne jei aa galap ne munbonontom, ai mese aiba ajebam finant. Ane ai mese ai gununt, sya jei sa munbo. Ane angtane Estefanus aa jei ne munbonontom, fene jemna ga am tarnap ge falipminint, ane fena jeiserem ga ai gerebaipmisnennent.’ ²¹ Jengga Tuhan Jei enggam gununt, ’Se sofwe, Ai ims bala, se sofwa angtane Yahudimanyan bijaususup aaiserem jemnip.’ " ²² Angtane unggwanfer jeiserem jei taterisi Paulusmana ga aane sarbasini jamere ula umwef aa jei biltenaram jamer taban. Jengga jepga angtane jeiserem ga aa ge tetenbili enggame, "Angtane aaiserem jei sa munbo, aam temawer jei ogiri aaiserem jewer jam ge gwisi, jei waakenfer jam gweyan!" ²³ Jepga jei aa ge tetenbili, bajunu jelemanaiserem ga aane fasawolnanna, ane sona bolap ga aane fasawolsowena, aam temawer jei jam ge kakalswebili. ²⁴ Jega jem temawer ginanggwam sanbaka ga aa balbabili Paulus jam ne aftawef markasabe enggalfe, Paulus jewer gane tenebaf kakalmer, ginanggwa sanbaka jeiserem gam towaswef jeje bafa angtane unggwanfer baf ge tetenbuwena Paulusem temawer. ²⁵ Jengga Paulus jame aa galap ne tafernaram, ane naawa utuboroserem jem gane safsaftaf, Paulus angtane sanbaka 100 ginanggwamana jep aa jei finaram ga bala, "Aaf ke enggam fala angtane Romamana nalefe jam ne tenebayan jei waakena gam eyebili afa kapka, jengga gwanan ke jam gane safsaftana?" ²⁶ Angtane sanbaka 100 ginanggwamana jeiserem jame aa galap sararam enggame Paulus jeiba angtane Romamanam, jei ga aa gwina jelem sanbakminibe, ga aa tenebana enggame, "Aamei Paulusfe bas is eyeibene? Jeiba angtane Romamanam." ²⁷ Ginanggwa sanbaka jeiserem ga gwina Paulusminibe, ane ga tenebana enggame, "Aamke bunarsusfer angtane Romamana?" Paulus ga tamawola, "Bunar. Aiba angtane Romamanam." ²⁸ Ginanggwa sanbaka jeiserem ga enggam gunu, "Ai doini unggwanfer pemerinta Romamanaiserem jep amsam gaarmini enggalfe ai agam gwef warga Romafe." Jengga Paulus ga gunu, "Wargana jeiserem aiba jewermanam, aam temawer aiba angtane Romamanaiserem agalfam surnunt." ²⁹ Jes jepserem ginanggwana Paulus safe jei ne tenebafe, ga aa ge gubisini jemniwer. Ane ginanggwa sanbaka jeiserem jegme aa erne, aam temawer jei enggam towaswena, "Paulus nei nejesa tafernaram, jeiba angtane Romamanam." ³⁰ Ginanggwam sanbaka jeiserem enggam gunu, "Ai ajam towaswef angtane Yahudimana bas ne kakalswebili Paulusem temawer." Jega jem temawer, ona jama nafwenaram, jei ga balbabili Paulus sa gaasaarste bwiyiwer. Ane jei gamjon ga gunu, "Angtane imam-imam sanbakaiserem ane Safna Angtane Yahudimana Sanbak-sanbaka Seyafter Gemerserem, angtane jeiserem seyafter gemerserem jam sege betwebili." Jepga jei Paulus ga aa aftawena jemnibe, ane Paulus jem tarnap ga fina.

¹ Paulus jei Safna Angtane Yahudimana Sanbak-sanbaka Seyafter Gemerserem jeiserem ga gerebaabili, ane ga balbabili, "Am afelen mesna, jamere nunu namwer aaiserem ai kapka ajam eyebiyen Uwa Sanbagirfe, ane ini amna waakena gwela alemanaiserem jem temawer." ² Paulus jes gamserem game jam aa galap gunurum, imam sanbagirsususerem bosna Ananiyas jei angtane Paulusem gwetmanap aa jei ge fibilirim ga balbabili, "Paulus sa safta aaremap!" ³ Paulus imam jeiserem ga bala, "Bunar Uwa Sanbagiri aamei ise saftana. Aamei angtane enggalaiserem tifni sagap waakena, jengga ini imna orolap kapka. Aamei aafe is nwini enggalfe, angtane igam balf afa jei waakena gam eyebili afa kapka gam eyebili, Hukumu Uwa Sanbagirmanaiserem jep aa gemer tulisulum. Jengga aamei Hukumu jeiserem iner im ayebinni, aam temawer aamei angtane im balbabili ai as jam ne saftafe." ⁴ Angtane Paulusem gwetmanap aa jei ge fibilirim, jei Paulus ga aane bala, "Jeiserem kapka, aamei syefer nasouna imam sanbagirsususerem Uwa Sanbagirmana jebe." ⁵ Paulus ga balbabili, "Am afelen mesna, ai teisyena enggame jeiba imam sanbagirsususerem. Ba bunaram Taterisi Uwa Sanbagirmana jep ga enggam baatultel: ’Aamei syefer ipsama nasounaram angtane sanbaka ilemanaiserem jemnibe.’ " (Keluaran 22:28) ⁶ Paulus jei mesam towaswena enggame, angtane jep aa jei ge betwebilirim, afwer angtane safna Sadukimana, ane afwer jei angtane safna Farisimana. Jega jem temawer jei Safna Angtane Yahudimana Sanbak-sanbaka Seyafter Gemerserem jeiserem uskambar ga balbabili enggame, "Am afelen mesna, aiba angtane safna Farisimanam, asal-asala aman mesna jeimba angtane safna Farisimanam. Aamei ai aafe ase enggalf ima aftafaltya aamei ai as ijama teneba-tenebawef, aam temawer ai taterisi aaiserem ajewer taabilirim, angtane futunuserem gamjon sege irwebili terewer." ⁷ Paulus jei jes gemerserem game aa jewer gunurum, angtane safna Farisimana ane angtane safna Sadukimana ga aane wagnetini, ane ga aa ge doksobana. Angtane safna Farisimana jei gam ge fibili, ane angtane Sadukimana jei gam ge fibili. ⁸ (Angtane safna Sadukimana jei enggam ge gubili, angtane jam tereserem gamjon jam irweyan terewer. Ane jei enggam ge gubili malaikata fas ane bwata fas. Jengga angtane safna Farisimana jei enggam ge gubili, angtane jam tereserem gamjon sege irwebili terewer. Ane jei enggam ge gubili malaikata fasyan ane bwata fasyan, seyafter aare.) ⁹ Jepga angtane jeiserem jei kakala uskambarsus ga aane towaiwulu, ane jei uskambarsus ga aa ge tetenbuwena. Ane guru-guru Hukumu Nabi Musamana aa jei ne towas-towastababuwenaram taterisi angtane Farisimana aa jei ne onsoipminirim, jei ga jep ge fibili ane jei angtane Sadukimanaiserem jebar ga aa ge doksobana enggame, "Ai enggam aya gunu, angtane aaiserem bosna Paulus jei kapka jam eyebiyen. Engbar ke enggam, bwata afa malaikat gwanan ga jebar ge nasouna." ¹⁰ Jepga kakala jeiserem uskambar ga unggwandwaswena, jamere ginanggwam sanbaka jei ga aa erne enggalem temawer angtane Paulus jei uskambar ne safsaftana. Jepga ginanggwa jelemanaiserem ga balbabili, "Sa gwi, Paulus ga isa gaariufenne angtane unggwanfer jeiserem jemniwer, ane ga isa aftayala markas ginanggwamanaiserem jebe." ¹¹ Gwini jeiserem Tuhan ga fortya, Paulusem tarnap ga fina, ane ga bala, "Paulus, ilem inibe ipsam ernerem! Aamei Am temawer waakenfer imsam nasowena aaf kota Yerusalem je, gamjon jegme gemer is nasowena kota Roma je." ¹² Ane ona jame aa nafwelam, angtane Yahudimana jepga ula gane tagalsini, ane jena ga aane testenanna enggame, "Afa ai Paulus ajama munboyonoye, ai ajama twenyan, ane fona ajama telbiyen." ¹³ Angtane ula aa jei ne tagalsinirim unggwanfer ga enggammer empat pulu. ¹⁴ Jei imam-imam sanbakaiserem ane angtane sanbak Yahudimanaiserem jemnip ga aa ge gubili, enggam ga aane balbabili, "Ai bunar-bunarsusfer ana enggam amsama testenanna, tumilgala ajama tombaabiyen afa Paulus ajama munboyonoye. ¹⁵ Jega jem temawer aamei, ane Safna Angtane Yahudimana Sanbak-sanbaka Seyafter Gemerserem, aamei seyafter ginanggwa sanbaka Romamanaiserem enggam isa bala, jei Paulus jam se aftayala imnibe. Aamei akar-akarem enggam isa bala, ’Ai gwanan taterisi Paulusem temawer waakenfer ajama damdamulsiyen, ane namwer ai Paulus gamjon ga ajama teneba-tenebawef.’ Aamei ginanggwam sanbaka jeiserem ga jes gamserem ga gam isa bala, ane jei Paulus jam se aftafaltyaram, ai Paulus nelep asa sowebaasitne jam munbofe. Paulus jei aaf jam foroyan." ¹⁶ Jengga nemel tane Paulusmanaiserem, ula jei aa jes ne tagalsinirim basyamer jam aa galap sarbilirim, jei markasap ga sofwa, ane ula jeiserem ga nasibene Paulusfe. ¹⁷ Jepga Paulus angtane sanbaka 100 ginanggwa Romamanaiserem ga aa jenbene, ane ga aa bala, "Tane aaiserem se aftawe ginanggwam sanbakaiserem jemnip, jei jebar ge nasowef." ¹⁸ Angtane sanbaka 100 ginanggwa Romamana jeiserem jei tane jeiserem ga aftawena ginanggwa sanbakaiserem jemnibe, ane ga bala, "Paulus aa jes ne gaataantenaram bwiyibe, jei ams jenbene ane ga as bala enggame, tane aaiserem ai ajam aftawef imnibe. Jei ibar ge nasowef." ¹⁹ Ginanggwa sanbaka jeiserem jei tane jeiserem tafna jemna ga taayimbene, ane ga dektewili jem gwetmanap jam jalsife, ga aa tenebana, "Aamei abe ase ibas nasibefe?" ²⁰ Tane jeiserem ga enggam tamawolbana, "Angtane Yahudimana ula mes ne tagalsini jei ims ne balf enggame, ’Aamei gwirmer Paulus ijam aftawef Safna Angtane Yahudimana Sanbak-sanbaka Seyafter Gemerserem jemnibe enggalfe, jei Paulus waakensusfer gamjon jewer ne teneba-tenebawef.’ ²¹ Jengga aamei angtane jeiserem ijam sarbabiyen, aam temawer angtane unggwanfer ga empat pulu gemer sege sewebisini, nelep sege sowebisini Paulus jam ne munbofe. Jei jena fwater ne testenanna enggame, ’Ai ajama twenyan, fona ajama telbebiyen, afa ai Paulus ajama munboyonoye.’ Jei namwer mes ge menetwebisini jei taterisi fwayena imniwenefener ne fibili." ²² Ginanggwa sanbaka Romamanaiserem jei tane jeiserem enggam ga bala, "Aamei angtane nafsiserem ijam towastababiyen enggame, ’Ula angtane aa jes ne tagalsinirim Paulusem temawer, ula jeiserem ames nasibene ginanggwam sanbakfe.’ " Jepga jei tane jeiserem ga bala se sofwe jenap. ²³ Jepga ginanggwa sanbaka Romamana jei angtane sanbak nauna 100 ginanggwamana ga jenmini, ane ga gitmini, "Seyafter ga enggammer is ge dupdupbulu: ginanggwa 200, ginanggwana kudanabara 70, ane ginanggwana tombakabara 200. Jam is ge menetababisini kota Kaisareyawer jam ge sofobife. Jem sembilan gwini namwer aaiserem aamei seyafter ga isa sofwa. ²⁴ Kudana ga naurater isa menetsobasini Paulusfe jei jep gase juswena, ane waakenfer ga isa aftawena jamere Gubernur Feliks jemnibo." ²⁵ Ane ginanggwa sanbaka Romamanaiserem jei surta ga enggam eyebili: ²⁶ Ga ip, Angtane sanbaka, Gubernur Feliks, kota Kaisareya je. Surta aaiserem amniwer, Klaudius Lisyas, kota Yerusalem je. Ai is enggam ai bala, waakenfer se nwin! ²⁷ Angtane aaiserem bosna Paulus, angtane Yahudimanaiserem mes ne tebanant, ane amkom saf mes ne munbonont. Jengga ai, ane ginanggwa amnaiserem jep tatarfer ga aya fortyant jemnibe, waakenfer ga aya tebanant, aam temawer ai enggam ai sarbanant jei warga negara Romamana. ²⁸ Angtane aaiserem ai aftawenant Angtane Yahudimana Sanbak-sanbaka Seyafter Gemerserem jemnibe, aam temawer ai agam towaswef angtane unggwanfer jei Paulus bagal temawer ne nasbanant. ²⁹ Jengga angtane aaiserem jei kapka afa jam eyebiyen enggalem temawer jam ne munbofe afa bwiyip ne gaataantef. Angtane Yahudimana jei enggam ge gubili Paulusem temawer, jei Hukumu agama jelemana jam tikwebitiyen, Hukumu Nabi Musa aa jes tulistababilim. ³⁰ Jepga angtane aasaje ga as towastanant enggame, angtane Yahudimana ula mes ne tagalsini Paulus jam ne munbofe. Jega jem temawer ai Paulus tatarfer ajam baftaf imnibe. Ane angtane kabwakfer aa jei ge nasbawenaram Paulusem temawer, ai angtane jeiserem enggam ga as balbabili, "Aamei sa sofwe Gubernur Feliksminip, ane ula aaiserem ga jep isa borola." Tabana ga aaf, amniwer Klaudius Lisyas. ³¹ Jepga ginanggwana jeiserem jei Paulus gwinem ga aane aftawena, ginanggwa sanbaka jelemana aa gemer balbabilirim, ane Paulus jam ne gaarasiufenefe tamna Antipatriswer. ³² Jem gwirmer ginanggwa kudanabaraiserem jei ga aa ge sofobili Paulusfaner, ane ginanggwana afweraiserem ga aa ge waraubitne jelem markasabe. ³³ Ginanggwa kudanabaraiserem jei jame aa galap ge forobilirim kota Kaisareya je, surta jeiserem Gubernurf ga aane gulbana, ane Paulus mese ga aane gerbana. ³⁴ Gubernur surta jeiserem jame aa galap gerabistenaram jamer taban, jei Paulus ga tenebana, "Aamei bunarsusfer fwermana?" Paulus ga bala, "Ai Kilikyamana." Jepga Gubernur ga towaswena enggame, Paulus jeiba ona Kilikyaman tanesam. ³⁵ Ane jei enggam ga bala, "Ula is jem temawer ne tebanantam, ula jeiserem im nasbi, ai agam sarbisif. Ai ula jeiserem agam sarbif, angtane taterisi kapka aa jei ne nasbilirim im temawer aafe aa jep ge forobityerem." Jepga Gubernur ga balbabili Paulus jam ne aftawefe, jena unggwandusa Raja Herodesmanaiserem jebe.

¹ Gamjon nunu tafna gwiri imam sanbagirsususerem bosna Ananiyas, ane angtane sanbaka Yahudimana, ane angtane hukumu pemerintamana aa jei gam towaswebilirim bosna ga Tertulus, jei seyafter ga aa ge jalbili kota Kaisareya je. Jei ga aa ge fibitetya Gubernur Feliksem tarnabe enggalfe ula kapkaiserem Paulusem temawer jep jam ne nasibefe. ² Tertulus ga aane jenbene enggalfe Gubernurf gam nasibef enggame Paulus jei kapka gam eyebili. Jei ga enggam bala, "Uwa Feliks waakenaiserem, fwatersus ona aaiserem jafner aa gemer falantam, jam kabwaksweyan. Aamei sanbakf im nwinirim, ai ase waakenfer im taabili, ane aamei unggwanfer im towaswena, ane aamei unggwanfersus waakenater im eyeipmuwena anggwabura amnaiserem jebe, gwanan galapserem gam fas. ³ Tamna seyafter gemerserem jebe, aamei waakenaiserem imes eyebinenne, ane seyafter jeiserem jem temawer aya gunu ase samfer golmini. ⁴ Jengga ai unggwanfer ajam nasoweyan aafe. Ai ims bala, aamei ai as waakenfer is sarbasini. Ai ibe is ajes nasibeleiserem jeiserem unggwanferyan. ⁵ Ai angtane aaiserem bosna Paulus amsama damtana, jei kapka. Angtane Yahudimana ogiri seyafter gemerserem jebe, jei jam ge betwebili enggalfe gangge erabaf Paulusem temawer. Ane jeiba angtane sanbakaiserem safna Yesus aa jei ne onsobilirim. Yesus Jei angtane tamna Nasaretmana. ⁶ Paulus jeime safe kapkaiserem jes eyebif Jena Uwa Sanbagirmanaiserem jebe, jega jem temawer ai jei tatarmer ga aya tebana. ((Jepga ai safe ajama teneba-tenebawefe Hukumu alemanaiserem jep aa gemer tulisulum, Hukumu Nabi Musa aa jes tulistababilim, ⁷ jengga ginanggwam sanbak bosna Lisyas ga jela, ane jei Paulus amniwer ga as aamsinmini kakalmer. ⁸ Jepga Lisyas ga as balbabili, ’Aamei isa nasbili kapkaiserem Paulusem temawer Gubernur Feliksem tarnabe.’)) Gubernur Feliks, afa aamei Paulus jam is tenebanaram, aamei iner is towasweibene jelem iniwer aaiserem. Ane aamei jam is towaswena enggame, taterisi ai aafe ajes nasbilirim seyafter ba bunaram." ⁹ Ane angtane Yahudimana seyafter jep aaiserem jeime kapkaiserem gane nasbili Paulusem temawer. Jei ga enggam ge gubili, "Taterisi ai ajesa nasbilirim Paulus kabwakfer aa jes eyebilirim jem temawer, taterisi seyafter jeiserem ba bunaram." ¹⁰ Jepga Gubernur jeiserem jei Paulus ga tafamfener ga destabana enggalfe Paulus gam irwef. Ane Paulus ga irwena, ane ga bala, "Gubernur Feliks, ai tousa tahunu unggwanfer gwanan jeiserem aamei anggwabura aaiserem waakenfer imes tebabilint. Jega jem temawer, ini amna ase saaser-saaserem folbana im tarnap jam nasowefe alem temawer. ¹¹ Bunarsusfer ga iner is sarbili enggame, minggunu gwanan aaiserem ai kota Yerusalemwer ga ajem fornant enggalfe Uwa Sanbagiri jep gam pujitef. ¹² Angtane Yahudimana jei fas ai as jam ne damtayan ai angtanefar ge doksola. Ane ai angtane uskambar ajam balbabiyen jam ge betwebife enggalfe gam ge erabafe, safe Jena Uwa Sanbagirmanaiserem jep, ane safe jena angtane Yahudimana aa jep ge betwebuwefaram jep, ane safe tampata nafsi kotanabe. ¹³ Taterisi kapkaiserem aa jes ne nasbabilirim am temawer, jei bunarsusfer fas seyafter. ¹⁴ Jengga ai aamei is enggam ai bala, ai ames nasowena enggame, ai Uwa Sanbagirfe sembayangs ai gwebabana, asal-asala amna gemerserem. Nele Tuhanmanaiserem aime ajes onsobana, nele jei aa jes ne balaram enggame kapka. Jengga Hukumu Nabi Musa aa jes tulistababilim, ane bukunu seyafter nabi-nabi aa jes ne tulistababilim, seyafter jeiserem aime ames tebabili. ¹⁵ Ai jafner fina ai Uwa Sanbagiri agalap tebanaram, angtane Yahudimana aaf aaiserem jei gemerserem jei jafner ge fibili jei Uwa Sanbagiri aa galap ne tebanaram. Ai taterisi aaiserem ajesa taabili: Galap Uwa Sanbagiri se irtebaabili angtane seyafter jam tereserem, angtane waakena ane angtane kapka jes mese. ¹⁶ Jega jem temawer ai tifni ana ga ajewer egantaasiwena, jega ini amna waakenfer as gase folbana gwela alemanaiserem jem temawer, Uwa Sanbagirem tarnap ane angtanem nwenap. ¹⁷ Ane tahunu gwananmanaiserem ai ajam foroyan kota Yerusalem je, jengga minggunu gwanan aaiserem ai gamjon ga ajem fornant Yerusalem je. Ai dois girinmifelent angtane Yahudimana galgalyenaiserem jep gam kitulmif. Ane ai domba tane agam tegilant Uwa Sanbagirf gam kitulbof. ¹⁸ Ai jeiserem agalap eyebilintim, angtane Yahudimana jei ai ga asene damtanant Jena Uwa Sanbagirmanaiserem jebe. Ai tabanwenantam Uwa Sanbagirem danggonawer ini ajam wirtalabe. Angtane unggwanferyan abar, ane jes galapserem angtane jam ge erabayan. ¹⁹ Jengga angtane Yahudimana propinsi Asyawer aa jei ge jalbilirim jei jep ge nwinbene. Bunarsusfer jei gangge forobityerem aafe, ane jei ga gane nasbili kapkaiserem am temawer, afa ai kapka ajam eyebiliye. ²⁰ Afa enggam, angtane aaiserem aaf aa jener ge fibilirim, jei gen bilte kapkaiserem ai ajes eyebilintim, jame agalap finantam Safna Angtane Yahudimana Sanbak-sanbaka Seyafter Gemerserem jem tarnabe. ²¹ Jengga jei mes ne sarbilint taterisi daamfenfener ai ajes bilirim jem tarnabe. Taterisi jeiserem ga aas: Angtane jam tereserem jei gamjon gam irwena. Jega jem temawer ai ga as ne aftafaltya imnibe." ²² Gubernur Feliks jei unggwanfer mes towaswena Nele Tuhanmanaiserem jem temawer. Jepga jei ula Paulusem temawer jeiserem ga baafulsini jam nasbiliwer, enggam ga gutena, "Ginanggwa sanbaka bosna Lisyas aafe jam aa jep fortyaram, jes jepserem ai ula im temawer aaiserem bunarsusfer ga as borolsini." ²³ Feliks ga angtane sanbaka 100 ginanggwamana enggam ga bala, "Paulus jam is tebanaram, jengga jelem afelen mesna ijama nasbabiyen, saf sege jalbili Paulus aa jes balbabilirim saf sene erbiyele." ²⁴ Ane nunu unggwanferyan, Gubernur Feliks ga aa ge fortya winabaner, wini bosna Drusila. Jei Yahudi wi. Jei angtane aasaje ga bala Paulus gase jenbe enggalfe taterisi Paulusmana gam saribaasif. Ane Paulus ga jela, ane ga nasbili jei Yesus Kristus fomfom tebana. ²⁵ Ane Paulus taterisi aaiserem jem temawer ga nasbili: waakenfer gwelaiserem, in ina waakenfer gerebaasneleiserem. Ane jei nunu umwef jemserem Uwa Sanbagiri angtane aa jem waksosisirim jem temawer ga nasbili. Feliks jepga erne, ga gunu, "Gwanan aafer, gase sofwe! Ai gamjon isas jenbene, nunu gamjon jepserem afa ai awelna unggwanfer fas." ²⁶ Ane Feliks jei baiyan afa Paulus jei doini jep gerbafe enggalfe jei Paulus gam aftannuf. Jega jem temawer jei Paulus jeber-jeber jenbewena, jebar jam ge nasowefe. ²⁷ Tahunu ga naura aa galap ne barwenaram, Perkius Festus ga gwena Gubernurfe, Feliksem tabanabe. Ane Feliks ga gunu jelem inibe, "Ai baiyan enggame angtane Yahudimana ai as jam ne balfe ai waakena." Jega jem temawer Feliks jei Paulus jeber mirtetefala bwiyibe.

¹ Gubernur Festus propinsi jeiserem jebe aa galap fornaram, nunu nawer-ningna jewer ga kota Kaisareyawer ga sofwa, kota Yerusalemwer gwina. ² Jepga angtane imam-imam sanbakaiserem, ane angtane sanbaka Yahudimana jei Festusminip ga aa ge jalbili, ane kapkaiserem Paulusem temawer jep ga aane nasbaibene. ³ Jei Festus uskambar ne bala, "Afa ini imna waakena abar, Paulus se jenbe gamjon gase jela Yerusalem je." Angtane jeiserem jei gam aa jewer ge gubilirim, jei aam temawer ge gubili jei ula enggam mes ne tagalbaasini, "Nei Paulus nelep nesa munbono." ⁴ Festus angtane jeiserem ga tamawolbaabili, "Paulus jei bwiyip nwini kota Kaisareya je, ane an mesna nunu abakefyan ai gamjon ga as warauwa jewer. ⁵ Ga enggam, angtane sanbak-sanbaka imnaiserem jei abar asa sofwa Kaisareyaminip, ane jei taterisi kapka Paulusem temawer jep ga sene nasbili, afa Paulus jei kapkaiserem bunar eyebiliye." ⁶ Festus jei nunu delapan afa sepulu jei kota Yerusalem je jam nwinibe. Jepga jei gamjon ga warauwa kota Kaisareyaminibe. Ane jem gwirmer ga Festus jei mwonap nwini, mwona jeiserem ga angtane sanbagiriserem jep nwinf, ga angtane jep teneba-tenebawef enggalfe gam towaswef afa angtane waakena gam eyebili, afa fas. Jepga Festus angtane nafsi ga balbabili, "Paulus aaf sa aftayal." ⁷ Paulus jebe jam aa galap fortyaram, angtane Yahudimana Yerusalemwer aa jei ge jalbilirim, jei Paulus ga aane goronwebana. Ane jei taterisi kabwaksususerem jepga aane nasbaibene Paulusem temawer, jengga angtane daamfenna afa fas bunarsusfer jei nasbife, aam temawer jei jener jam ne damtayan ane jam ne sarbayan Paulus kapkaiserem aa jes eyebilirim. ⁸ Jes jepserem Paulus waakenfer ga enggam tamawolbili jelem temawer, "Ai Hukumu Nabi Musa aa jes tulistababilim baife ajam gwebiyen. Ai syefer ajam nasouyan Jena Uwa Sanbagirmanaiserem jem temawer, afa bosna Kaisar Romamana jem temawer. Seyafter fasfasus." ⁹ Festus enggam ga gunu jelem inibe, "Ai baiyan angtane Yahudimana jei ai as enggam ne bala ai waakena." Jega jem temawer jei Paulus ga tenebana, "Paulus, aamke baiyan aamei jam gwife kota Yerusalemwer enggalfe, ai jewer is agam tenebanaf taterisi kapka aaiserem im temawer?" ¹⁰ Jepga Paulus ga tamawola, "Ai aaf ai fina mwona Kaisar Romamana, mwona aaiserem angtane sanbaka angtane jep ne teneba-tenebabuwena, ane aamei ai as aafer se teneba. Uwa, aamei tousa enggame ai kapkaiserem afa ajam eyeipmiyen angtane Yahudimanfe. ¹¹ Wa, afa ai kapkaiserem jame agam eyebilintim, afa etam-etam kabwaksusu jes agam eyebilint, jega ai jem temawer gam as tere, sya ai samfer as tere. Jengga jemna kapkaiserem aa jes ne nasbabilirim am temawer, afa je bunaryan, angtane afa fas ai as jam ne geryan angtane Yahudiminibe. Ai enggam ai gunu, gwanan asa aftawe Kaisarminip." ¹² Angtane aa jei ne esoroltababuwenaram Festus jebar jam aa galap nasbawenaram jamer taban, Festus jei Paulus ga bala, "Samfer, aamei enggam im gunu, ’As aftawe Kaisarminip.’ Sya, aamei gase gwi Kaisarminip." ¹³ Jepga nunu abakefyan, Raja Agripa yo Bernike ga aa ge fortya kota Kaisareyaminibe enggalfe gam ge guf, "O Festus, samfer aamei aaf nwini." ¹⁴ Jes jepserem nunu gamjon unggwanferyan, Festus ga taterisi Paulus aa jewer nwinirim bwiyibe, Raja Agripaf ga nasibene. Festus enggam ga bala, "Angtane aasaje bwiyip aaf nwini. Angtane jeiserem ga Gubernur Felikse mirtetefalant bwiyibe. ¹⁵ Ai kota Yerusalem je agalap nwinintim, angtane imam-imam sanbakaiserem ane angtane sanbaka Yahudimana, jei ula kabwakfer aa jes ne nasbawenaram Paulusem temawer, ula jeiserem abe as mes ne bilibenent. Jei ams ne bala ai ula kapkaiserem Paulusem temawer ai borolbaf. ¹⁶ Jengga ai enggam ga gununt, angtane Romamana jei enggam ne eyebuwena, angtane ane angtane ula kapkaiserem aa jei gane nasbilirim jem temawer, jei seyafter gangge dorwebili enggalfe gangge nasbawef mwona angtane jep teneba-tenebawelaiserem jebe, jega angtane aa jes gane tebanaram jei jener waakenfer gam nasbif jelem temawer. Angtane Romamana jei angtane jam ne geryan afa gwanan jei daamfennaber jam ne nasbiyeneye. ¹⁷ Ane angtane Yahudimana ai jebara jelantam, ai abakef ajam fiyan. Jem gwirmer ga angtane sanbagiriserem ai jem mejanap ga ai nwinint, ane angtane ga ai balbabilint Paulus amnip jam ne aftayalfe. ¹⁸ Angtane jam aa galap ge irwebilintim enggalfe ula kapkaiserem Paulusem temawer jei ne nasbife, ai alem inibe enggam ga ai gununt jei engbar ba kabwaksususerem ga jes sene nasbili, jengga fas. ¹⁹ Jengga angtane Yahudimana jei Paulusfar ga aa ge doksobana enggalem temawer, Uwa Sanbagiri fomfom gane pujitene. Ane jegme taterisi aas ne nasbili Angtane bosna ga Yesus aa Jei terentem jem temawer, jengga Paulus jei unggwanfer balbabili Angtane jeiserem gamjon mes nwinsanswena. ²⁰ Jengga ai ula aaiserem Paulusem temawer ai teisyena, ai bunarsusfer as nane se nasibene? Jega jem temawer ai Paulus ga ai tenebanant, ’Aamei ifom gunu, ke samfer Yerusalemwer is sofwef, ane ula aaiserem ilem temawer waakenfer ga jewer is nasbitne?’ ²¹ Jepga Paulus ga gununt, ’Wowo, ai bwiyiber as nwini, jamer Kaisar jener aa jep gunurum enggame ula am temawer bar.’ " Ane Festus Raja Agripa gamjon ga bala, "Ai enggam ai gunu, sya afa ga gam, Paulus jei samfer bwiyiber ge nwin, jamer ai dwona ajep domolaram Paulus ga as baftawili Kaisarminibe." ²² Ane jepga Raja Agripa Festus ga aa bala, "Ai mese, aime taterisi Paulusmana aner ajam sarbaf." Festus ga Agripa gamjon ga aa tamawolbana, "Sya, aamei gwirmer is sarbafa!" ²³ Jem gwirmer ga Raja Agripa yo Bernike ane angtane sanbaka 1.000 ginanggwamana, ane angtane sanbaka jepmana seyafter ga aa ge forobitye Paulus gam sarbasif. Angtane seyafter jep gemerserem jei tousa angtane aaiserem jeiba sanbak-sanbakam. Jei seyafter ga aa ge betwebili, ane jena unggwandusa jep ga aa ge kabwitena. Jepga Festus ga balbabili Paulus mese jei ge kawetya. ²⁴ Jepga Festus ga aa gutena, "O Raja Agripa, ane aamei seyafter igemera betwenaram, angtane aaiserem gwanan imsa damta. Angtane Yahudimana seyafter gemerserem jei kapkaiserem jes ne nasbili angtane aaiserem jem temawer. Angtane Yahudimana Yerusalemwer aa jei ge jalbilintim, ane angtane aafmana aa jei ge nwinbenerem, jei seyafter ga enggam tetenbuwena, ’Angtane aaiserem ijam balyan jam gwefe!’ ²⁵ Jengga angtane aaiserem kapka aa jes eyebilirim afa ajam domolbayan afa ajam saribeyen, jega samfer jei jem temawer gase tere. Ane angtane aaiserem jei jener mes gununt, ’Ula amnaiserem Kaisar jener se sarbisini.’ Ane aiba mesam gunu, ai angtane aaiserem Kaisarminibe ajam baftawife. ²⁶ Paulusmana kapka aa jes eyebilirim afa ajam towasweibeyen, jega jem temawer ai teisyena surtabe ajes baatulbofe Paulusem temawer, surta ai Kaisarfe ajes gulbafe. Jega jem temawer ai ga ai balbabili Paulus jam ne aftayalf aaf angtane unggwanfer aaiserem jem tarnabe, nabal-nabalsusu ga aamei Raja Agripa. Nei Paulusfar jam nesa nasounaram jamer taban, ai ga as towaswena ai ajes tulisuluserem surtabe, surta ai ajes eyeibeleiserem Kaisarfe. ²⁷ Ai enggam ai gunu alem inibe, ai angtane ajam baftayan Kaisarminibe, afa ai gwanan kapka jemnaiserem ajam baatulboyonoye surtabe."

¹ Raja Agripa Paulus ga bala, "Ai aamei is ajam bala, aamei namwer samfer se nasbi taterisi im temawer aa jes ne nasbinennerem." Paulus tafna ga tetena, jepga jei jelem temawer waakenfer ga nasbili enggame: ² "Raja Agripa, ai samfersus namwer ai finaram im tarnabe enggalfe, ai agam nasowef waakenfer taterisi kapka jem temawer, taterisi angtane Yahudimana am temawer aa jes ne nasbinennerem. ³ Nabal-nabalsusu ga enggam Raja Agripa, aamei imsam towaswena osiri angtane Yahudimana asal-asala nemnaiserem jem temawer, ane ol tantanna jelemanaiserem. Jega jem temawer ai aamei isa jem bala, aamei gwanan ai as jafner is sarbasini. ⁴ Angtane Yahudimana seyafter gemerserem mesam ge towaswebilint ai ajes bilintim ane ajes eyebilintim ai bastowaisamer agalap agam gwenantam, ona alemanaiserem jep agalap nwinintim, ane kota Yerusalem jep agalap gwenantam galap mese. ⁵ Jei mesam ge towaswebilint am temawer, jei afa enggam sege gubilirim, ai gwanan agalap gwenantam ai angtane safna Farisimana gemerserem ga agam gwenant. Angtane safna Farisimana osiri jemna kanaususu agama nelemanaiserem jebe. ⁶ Namwer ai aasa jep finaram, ai ga enggalf ai fina ai as jam ne tenebaf, aam temawer Uwa Sanbagiri aa jes bilipmilim asal-asala nemnaiserem jebe galap aa je etamwelaiserem, ai jeiserem ajebar fibilirim ai taterisi jeiserem ajamer taabili. ⁷ Taterisi Uwa Sanbagirmana aa jes bilipmilim tewe dua belas Israelmanaiserem jebe, tewe Israel jeiserem jeime taterisi jeiserem namwer jeter ne taabili. Jei Uwa Sanbagiri aa jebar ne pujitawenaram gwinem ane gwerem, jei ga Uwa Sanbagiri aa jes bilipmilim galap aa je etamwelaiserem ga jebar ne fibili. Raja Agripa, anggwabura Yahudimana as jewer ne balaram kabwakeme aam temawer ai enggam ajewer gunurum, taterisi Uwa Sanbagiri aa jes bilipmilim galap se etamwena. ⁸ Jeje bafa aamei angtane Yahudimana ijama taabiyen enggame, Uwa Sanbagiri Jei angtane futunu gamjon gam nwinsantana. ⁹ Gwanan galapserem an mesna alem inibe ai agemeram gununt ai seyafter kapkaiserem as eyebili awelna Yesusmanaiserem jebe. Yesus Jeiba angtane Nasaretmanam. ¹⁰ Ane ai kapkaiserem amesam eyeipminint angtane Kristenfe kota Yerusalem je. Angtane imam-imam sanbakaiserem jei baabeta abe as mes ne gulbanant enggalfe, ai angtane unggwanfer Yesus aa jei ne tebanaram jei agam katabuntowef bwiyibe. Ane ula aa jes ne tagalsinintim enggame angtane Kristen afweraiserem jam ne munbobife, aime ai gununt, ’Sya.’ ¹¹ Angtane unggwanfer Yesus aa jei ne tebanaram, ai angtane jeiserem ai tamtamtababuwenant jena angtane Yahudimana aa jep ge betwebuwefaram seyafter jebe. Ane ai unggwasant angtane Kristen jam taatwebaabife jei taterisi Yesusem temawer baif gane gwebif. Kakala am inibe ga enggam, ai agam sofwa kota-kotana bijua nafis-nafsiserem jebe, kapkaiserem ga agam eyeipmini jebe." ¹² Paulus gamjon ga nasouna, "Ai kota Damsikwer agalap sofwenantam, ai surta imam-imam sanbakaiserem aa jes ne tulisuluntum ga ajes gwirnint. Surta jeiserem ga enggalf angtane nafsiserem jep agam ge saamif, jega angtane gam ge towaswebif enggame imam-imam sanbaka jeiserem jei ai as jei ne balant, ane baabeta jemna abe as mes ne gulbanant. ¹³ Wa Raja, ai jame agalap sofnantam gwere ga bolap, ai nafa winsiwer ga ai domolant. Nafa jeiserem uskambarsus gwer nafa jemniwer. Nafa jeiserem ga jam bwere-bwerewena amnip jamer durga, ai ane angtane ai ajebara wofenantam jem nenennap aya fiton. ¹⁴ Ai seyafter onnap ga aya jenant, jepga ai taterisi Ibrani oleme ga ai sarbilint, ai as balantam enggame, ’Saulus, Saulus aamei kapka Ap As ibaf eyeibene? Aamei bwerafe ina is entene afa aamei sanbaka imna ijam sarbayanaye, lembunu giri gamserem, angtane lembunu jam jemanserem tini aa jei gam girnirim lembunu jam baftafalfe, lembunu jeiserem tini ga gam fetetene tofeme.’ ¹⁵ Ane jepga ai tenebanant, ’Aamei nansa, Tuhan?’ Tuhan ga as tamawolbanant, ’Aiba Yesusam, aamei kapkaiserem ijep eyeibenerem. ¹⁶ Gas irwe, ga is fina! Ai imnibe Ana Ajewer ge sana enggalfe Ai aamei is Agam destabaf awelna Amnaiserem As igam gweibef. Aamei angtane nafsi jam is towas-towastababili aamei namwer ijes domolaram Amniwer, ane galabe isa Ajes bilibeleiserem jes mese is towasulmini. ¹⁷ Ai aamei isAs gerebaasnenne waakenfer anggwabura Israelminiwer ane angtane Yahudimanyan jemniwer. Ane Ai aamei ga isAs baftana jemnibe enggalfe, ¹⁸ nwena jemna gam is fertebaipmunnu, jega aamei angtane jeiserem gam is tergenbaabili gwiniwer gam sege tobitintye jamer nafabo. Gamjon ga is tergenbaabili baabeta bawasmanaiserem jemniwer gam ge irfwebif, jamer baabeta Uwa Sanbagirmanaiserem jebo. Ane angtane jeiserem jei Ai waakenfer As ga sene tebana, etam-etama kapka jemna Uwa Sanbagiri gasa wirtabaipmini, gamjon Jei Jam sarbistaabonyan. Ane jei Uwa Sanbagirem tanefe gase naawena, angtane Uwa Sanbagiri aa jes destabaabilirim.’ " ¹⁹ Paulus gamjon ga nasouna, "Raja Agripa, taterisi jeiserem Yesus ap bilibenent, ane jega jem temawer ai ajes domolantam winsiwer, ane ai ajes sarbilintim, ai seyafter jeiserem ga ai onsobili. ²⁰ Ai taterisi Uwa Sanbagirmana ai bunarsusfer nasibenennent, gwanan-gwanansus angtane kota Damsik je aa jei ge nwinbenerem jep ai nasipminint. Ane angtane kota Yerusalem ane ona Yudeyaminip aa je ge nwinbenerem, ane angtane Yahudimanyan jei mese jep ai nasipminint. Ai enggam ai nasipminennent, ’Gasa tikwe etam-etamawer, ane ga isa irfwena Uwa Sanbagirminibe. Gamjon ga waakenaiserem ga jes isa eyebili, jega angtane jepga sege towaswebili enggame aamei etam-etamawer imsa tikwenant.’ ²¹ Ai jes gemerserem game ajewer balbabilintim, angtane Yahudimana jei ai ga as jem temawer ne tebanant Jena Uwa Sanbagirmanaiserem jebe, ane jei as jam ne munbof. ²² Jengga gwanan jes galapserem jamer namwer aas jepserem Uwa Sanbagiri ams gerebaasnenne waakenfer. Ane namwer ga ai fina imnibe enggalfe, ai angtane bastantouya ane sanbak-sanbakaiserem jep agam nasipmif seyafter bunarsusfer gemerserem. Ane ai ajes nasbilirim jei nafisyen nabi gwanan aa jes ne nasbilim, gamjon ga jese etamwena nabi-nabi seyafter ane Nabi Musa mese aa jes ne bilim. ²³ Jeiserem ga enggam, Kristus, Angtane Uwa Sanbagiri bunarsus aa Jes balam Jam baftanafe, Jei jamer se tere, ane Angtane nabal danala jam irwela terewer ga Jei. Jeiserem mes etamwena jega angtane Yahudimana ane angtane Yahudimanyan jei gam ge towaswebif enggame Uwa Sanbagiri angtane mesam waakentababisini, ane Jei ga nafa Jelemanaiserem mesam bilipmini angtanefe." ²⁴ Paulus jener game aa galap nasounaram, jepga Festus ga gwarna, "Paulus, aamei fofal-fofala! Aamei taterisi anesus imes gerabistena, jega jem temawer aamei ga ijam towaiwulu fofal-fofala ga!" ²⁵ Jengga Paulus ga tamawolbana, "Uwa Festus waakenaiserem, ai ajam fofal-fofalweyan. Jeiserem amnibe fas, ai bunarsusferaiserem ga ajes nasbili. Ula amnaiserem jei fofal-fofalyan. ²⁶ Raja Agripa jegme taterisi aaiserem seyafter mes towaswebili, jega jem temawer ai ajam ereyen taterisi aaiserem jam nasbife Raja Agripam tarnabe. Ai bunarsus ames towaswena enggame, seyafter aa je etamwenaram jei mes towaswebili aam temawer taterisi aaiserem jam seisyawulmiyen. ²⁷ Raja Agripa, aamke taterisi nabi-nabi seyafter aa jes ne nasbilim ke imes taabili? Maa, ai ames towaswena aamei imes taabili." ²⁸ Jepga Raja Agripa Paulus enggam ga bala, "Aamke enggam im gunu taterisi aaiserem man folera, jega ai namwer tatarmer angtane Kristenfe agam gwef?" ²⁹ Paulus ga tamawolbana, "Ai sembayang as gwebabana Uwa Sanbagirfe, afa tatarmer afa samem-samem, aamei ane angtane seyafter ai namwer as ijeya sarbasinirim enggam etamwelaiserem ai gamserem, jengga naau kekelna aaiserem aamei ijama domolyan im tafnabe." ³⁰ Jepga Raja Agripa, Gubernur Festus, Bernike, ane angtane seyafter jep aa jei ge nwinbenerem ga aa ge irwebili. ³¹ Jewer ga jei ga aa ge tobitintye, ane jen jener ga aane gitminenne, "Angtane aaiserem jei kapka afa fas jam eyebiyen nei jei jem temawera tamtamtafe jamer futu, afa jei bwiyip kataf." ³² Raja Agripa jei Festus ga bala, "Jei afa enggam jam guyono, ’Ai gwanan Kaisarminip age gwi.’, gam jega nei angtane aaiserem fwater gane aftannunt."

¹ Jame aa galap ge gubilirim enggame, "Ai negeri Italyaminip aya sofwa atdusame." Paulus ane angtane nafsi afweraiserem bwiyip aa jebar ge nwinbenerem, ga jep ne kitulbono angtane sanbaka 100 ginanggwamana, bosna jemna ga Yulius. Ginanggwana unggwanfer jeiserem jei ga ginanggwana safna Kaisarmana. ² Ai atdusa kotana Adramityumwer aa jei jelaram jep aya juswena. Atdusa jeiserem fwater mes menetwesini jam sofwefe kotana fi eyep aa jei ge folbanannaram propinsi Asya je. Ane ai ga aya sofna atdusa jeiserem jeme. Aristarkus angtane propinsi Makedonyamana, aa jei nwinirim kota Tesalonika je, jei abar seyafter aya sofna. ³ Jem gwirmer ga aya batona kota Sidon je. Yulius jei Paulus waakenfer gwebana, ane ga bala, "Sya Paulus, aamei saf is sofwa ilem afelen mesna jemnibe, jega jei apgal jigala ip is ga sene gulbana aamei ijes bilirim." ⁴ Jewer ga gamjon atdusame ga aya sofna, jengga deye uskambarsus aya domsobana. Jega jem temawer atdusa ga naantei Siprus jewerserem ga jewer sofna. Naantei Siprus jem eyebe deye fas. ⁵ Aya sofnaram finibe ona Kilikya ane propinsi Pamfilya jem gwetmanap, kota Mira ga aya batona propinsi Likya je. ⁶ Jes galapserem angtane sanbaka 100 ginanggwamana atdusa ga aa domola jei negeri Italyaminip sofwa. Angtane sanbaka jeiserem jei ga as balbabili atdusa jeiserem jep ga aya juswena. Atdusa jeiserem ga kota Aleksanderyaminiwer jela. ⁷ Ai atdusa jeiserem jeme ajamera wofelabe samem-sameme nunu jamer anesus. Ane ajamera wofelabe awelna falam, kotana Nidus jem gwetmanabe ga aya forna. Jes jepserem jep jegme deye uskambarsusfer ne gwebana. Ai nele gwanan agma jelaram, nele jeiserem jeter sofwefe, gamjon masef aya unggwasa. Jega jem temawer ai naanteya Kretam eisamer aya sofna. Ane naantiki Salmone jem gwetmanabe deye uskambarsus fas. ⁸ Awelna falam ajamera wofelabe fi eisamer, jamere tampata aasaje bosna ga enggam, "Atdusa Waakenfer jep Daktabisif". Je kota Laseyawer bijauyan. ⁹ Ai agalaba fornaram nunu ga anesus gam barwena, ane nunu unggwandusa angtane Yahudimana tahunu jeber-jeber jei aa jes ne onsobuwena, nunu jeiserem mes ayintye. Nunu jes galapserem taban, angtane jei finip afa jam wofeyan, aam temawer deye unggwanfersus, atdusa waakenfer jam ge wofeyan. Jega jem temawer Paulus esorola enggam ga golmini, ¹⁰ "Am afelen mesna, aamei seyafter ams isa sarbasini! Ai ames towaswena afa nei namwer atdusa aaiserem jem nesa sofwaram, nei ga nesa irfwena. Galgala atdusap seyafter gemerserem sege janbiton finibe, ane atdwas mese, ane nei nesa altini, futu." ¹¹ Jengga angtane sanbaka 100 ginanggwamana jeiserem jei esorola Paulusmana jeiserem jam saribeyen. Jengga jei angtane awelna aa jei ne gwebilirim atdusabe jem sanbaka ane angtane atdusa ata jam jemanserem, ga jes sarbabili. ¹² Tampata atdusa jep daktabisiliserem kapka, aam temawer atdusa jebe abakfer jam teyan muara deiye uskambar aa jem ne gwebawenaram. Jega jem temawer angtane atdwasmanaiserem jei ga aa ge gubili, "Sya, ganma sofwe!" Jei enggam ge gubili, "Nei kota Fenikswer ganma sofwe, ane jep ga nesa nwini jamere muara wisimi uskambar aa jem falwenaram, muara jeiserem sege barwebili." Kotana Feniks jeiserem jebe tampata waakena atdusa jep daktabisife naanteya Kretaminibe. Kotana jeiserem fini banmawer ane fini ulfunup ga jem tarnap nulna. ¹³ Bwona bastantowaifer aa galap ne fonsobanaram gwer anggasyela taasfolawer, angtane atdwasmanaiserem enggam ga aa ge gubili, "Au, nei ganma sofwe nei nejewera gunurum." Ane besini daran-darna jeiserem ga aane dekoltena finiwer, ane ga aane gwalaniwili atdusabe. Jei ga aa ge sofobili gwer kawetenalawer naanteya Kreta jem gwetmansamer. ¹⁴ Jengga jepga abakferyan, deye gamjon uskambarsus ga aane gwebana naanteyawer, deye enggame aa jes ne balbabufaram, deye gwer anggasyelmana. ¹⁵ Deye jeiserem aane gwebanaram, atdusa jeiserem ga weken-wekenwena. Jega jem temawer atdusa waakenfer jam wofeyan deyep jam kawewife. Ai masef aya unggwasa jamere sikfer ajamera gwina. Ane atdusa jeiserem ga ajafnera gerabili, deye jeiserem atdusa ga gwirinfele. ¹⁶ Atdusa naantei towai bosna Kauda jame aa galap gwetmantanaram, jes jepserem deye jebe uskambaryan. Tampata jeiserem jep agalaba kawewilirim, awelna amna falam atouya atdwasmanaiserem ga aya dektestena, ga aya gwetaantena atdusabe. ¹⁷ Atouya jeiserem atdusabe aya gwetaantanaram, ginggitfer ga aya fwirna atdusap, newa atdwasmanaiserem jeme. Newa jeiserem ga kekelsusu, ane jei atdusa jeiserem ginggitfer jem ga aane fwirna. Angtane atdwasmanaiserem jei jam ge erebili enggame ai galap asa tarkowa tamna Sirtis jem dwisibe. Jega jem temawer jei fenbiti layarawer ga aane toinswena, ane deye jeiserem atdusa ga gwirinfele. ¹⁸ Deiye uskambar ane muru unggwanfer jeiserem atdusa afwer taamwer gam sofola, afwer taamwer gam sofola. Jem gwirmer ga angtane atdwasmanaiserem galgala ga aane towaitabana finip jam fasawola. ¹⁹ Nunu gamjon jem gwirmer aaiserem angtane atdwasmanaiserem jei galgala daran-darna atdwasman mesna jes mese ga aane fasawola finibe. ²⁰ Nunu ga anesus ai gwer ane mato mese ajama damtabiyen, ane jeiserem ga jem temawer ai ajama towaswebiyen atdusa amna fomfom se sofwa. Ane deiye uskambar jeiserem jeme atdusa gemer baafulnonno, ane ai alem inibe ga aya gunu, "Nei waakenfer gamjon nejama gweyan, namwer nesa tere." ²¹ Jepga nunu abakfer angtane jei jam dwenyan, Paulus ga irwa, jem nenennap ga fina, ane ga balbabili, "Am afelen mesna, aamei seyafter ams isa sarbasini! Afa aamei esorola amnaiserem ase jam igma saribenenentem, ane naantei Kretawer nejama sofweyana, nei seyafter kapka aaiserem nejama domolyan, ane galgala atdwasmana finip ijama fasawolyan. ²² Jengga namwer ai isa bunarsusfer balbabili, aamei seyafter ini ise saaser-saaserfer sege folbamini, aam temawer nemniwer angtane afa jam teryen, jengga atdusa aaiserem ga jese kabwakswena. ²³ Ai jes gemerserem gam ajewer gunurum, ai ga aam temawer ai gunu, gwini namwer aaiserem malaikata Uwa Sanbagirmana amnip forosanya, Uwa Sanbagiri ai as Jei gerebaasnenewenaram, ane ai ajes tebanaram. ²⁴ Malaikata jeiserem ga as enggam balsa, ’Paulus, ipsam ernerem! Aamei Kaisarminip galap is forna, ane jei ga is tener-tenertana. Uwa Sanbagirmana Jei waakena Jelemanaiserem is mes gulbana, ane angtane seyafter aaiserem aamei ijebara wofenaram afa jam teryen aam temawer aamei jebar ima wofna.’ ²⁵ Am afelen mesna, jega jem temawer ini imna is kanaufer sege folbamini. Ai isa gemer balbabilirim Uwa Sanbagiri Jei abe as gemer bilibenerem, jeiserem gemer se etamwena. ²⁶ Jengga nei atdusabaner nesa tarkowa naantei dwisibe." ²⁷ Gwini empat belasabara aa jem falaram, deiye uskambar atdusa ga baafulu, Adarya Finibe. Gwini nenennap angtane awelna atdusap aa jei ne gwebilirim jei enggam ge gubili, "Neiba ona nemsama gwetmannul." ²⁸ Jega jem temawer jei newa tunabara ga aane dantantena finibe enggalfe jei gam ge towaswebif finigiri fomera. Fona jes jepserem jemna giri ga empat pulu meter. Jepga gamjon abakferyan newa jeiserem ga aane dantantena; fona jes jepserem jemna giri ga tiga pulu meter. ²⁹ Ane jei ga aa ge erebili atdusa ton-girip galap se tarkowa. Jega jem temawer, besini daran-daransusu nawer-nauraiserem jei ga aane dantabuntena atdusa amnuwer. Jep ga aa ge gubili ona tatarmer ge nafwe. ³⁰ Jengga angtane awelna atdusap aa jei ne gwebilirim, jei jena basyamer ga aane orsomunnu jam ge nunggirbif, jepga atouya ga aane dantantena jamer finibo. Jei seiseyam ga naawena besini daran-darna atdusa masnawer jam ne dantabuntef. ³¹ Jengga Paulus angtane sanbaka 100 ginanggwamana ane jem safan mesna uskambar ga balbabili, "Afa angtane awelna atdusap aa jei ne gwelbilirim jei sege nunggirbilirim, aamei waakenfer ijama gweyan." ³² Jega jem temawer, ginanggwana newa atowaimana gane tagalntena, atouya jeiserem ga janton finibe. ³³ Ona gemerje jam nafweyan, Paulus ga uskambar ga balbabili janma twen. Jei enggam ga gunu, "Nunu empat belas aamei ijafnera fyawena erelbwerame, ane tumilgal ijama tombaabiyen. ³⁴ Jega jem temawer ai isa uskambar balbabili jasa twen, jega aamei gamjon baabeta gam isa domola. Aamei seyafter kabwaksususerem ijama domolyan." ³⁵ Paulus jei game aa gutenaram, jei rotini ga goltena, jes jepserem Paulus Uwa Sanbagiri ga bala, "Ase samfer gulbana." Jepga rotini ga aa bitabisini, ane ga dwena. ³⁶ Jepga ini jemna seyafter ga kanautabaipmini, ane seyafter ga dwena. ³⁷ Angtane atdusap jeiserem unggwanfer ga enggammer 276. ³⁸ Jei seyafter jamer dwenabe unubuguf, jepga gandumu ga aane fasawola atdusa gam forelswef. ³⁹ Ona jame aa galap nafwenaram, angtane awelna atdusap aa jei ne gwebilirim je ona mes ne damtana, jengga jei teisyena jes jepserem je fofa. Dwona jep kawewife ga aane domola. Jepga jei ga aa ge gubili, "Nei atdusa aaiserem ga jep nesa tarkawolsitne, afa waakenfere." ⁴⁰ Besi daran-darna jem newa seyafter jeiserem ga aane targabaabisini, ane besi daran-darna jeiserem ga aa ge albitini finibe. Gamjon ga newa naaremdwasa aaiserem ga aane fertebaabuntena. Jei gamjon layara ga aane kaawulntena atdwas masnabe, jega nindaya jam sene gwebanaram. Atdusa jeiserem gase fonola finiwer gase sofwa. ⁴¹ Jengga atdusa jeiserem ga dwisip kenemwena, ane jep ga tarkowa. Masnawer ga aa tarkowa dwisibe, jam ginweyan. Ane burawer atdusa jeiserem muru unggwan-girsususerem ga je sofola, ane muru atdusa jeiserem ga aa bitabisini. ⁴² Jes jepserem ginanggwana safe enggam ne mwangbisini, angtane aa jes ne tebabilirim jei seyafter jam ne munbobif, aam temawer jei jam ge erebili angtane jeiserem galap sege janbuwili jamer tufabo, ane ga sege nunggirbili. ⁴³ Jengga angtane sanbaka 100 ginanggwamana jei baif gwena Paulus jam terfe. Jega jem temawer jei safna jelemana ga balbabili, "Ipsama eyebilirim aamei ijesa mwangbisinirim." Gamjon ga balbabili angtane fonap januwil tousaiserem, "Nabala ga aamei isa janwaton finibe, ane dwisip ga isa janiwena!" ⁴⁴ Ane jei angtane afweraiserem ga balbabili, "Aamei amnup isa jenfalwena, atdwas balbalnaiserem isa tebabili, jem ga isa janiwena jamer dwisibo." Jes gemerserem, ai seyafter waakenfer ga agma janiwena jamer dwisibo.

¹ Dwisibe waakenfer jame agalaba fornaram, jepga aya towaswena ona jeiserem jemna naanteya bosna ga Malta. ² Angtane jepmana jei ga as waakenfersus ne tebabili. Arouwa je mes towaiwena jam nyanfe, ane wisimi ga anesus. Jega jem temawer angtane jepmana jei tokwagiri ga aane surna, ane ai ga asene balbabili, "Aamei seyafter tokwanap sa jal!" ³ Jepga Paulus tini sasana ga kitulnonno. Tini jeiserem jame aa galap bunulniwilirim tokwa sagabe, ane tokwa sarsarem tini jeiserem ga ge taabili, ufwai awasa tiniwer ga totintye tokwa sarsareme. Ane awasa jeiserem tafna Paulusmana ga faarebana, ga jerbene. ⁴ Angtane jepmana jame aa galap ne domolaram awasa jeiserem Paulusem tafnaber jam aa galap taannurum, jei ga jen jena ga aane gitminenne enggame, "Angtane aaiserem jei angtane nafsi gam munbono. Jei safe finip altiliwer jena mes waakentaasini, bwata jemna bosna ’Bwata Bunarsusfer gam Gunu’ jei enggam gunu angtane aaiserem jei jam gweyan." ⁵ Jengga Paulus awasa jeiserem tokwanap ga jawolwili, ane jes jepserem awas ol bwentabe jam siginsweyan. ⁶ Angtane jepmana enggam ga aa ge gubili, "Tafna jemna tatarfer namwer sene fanabana, ane Paulus gase jena onabe, gase tere futu." Jepga abakfer ga aa ge fibili, jengga Paulus jei jena jam enteyen jam bweraswefe. Jepga jei Paulusem temawer nafismer enggam ga aa ge gubili, "Angtane aaiserem jeiba faatrew angtane gemerserem." ⁷ Tampata jeiserem jewer bijauyan, angtane sanbaka anggwabura naanteimana aasaje jep nwini. Bosna jemna ga Publiyus, jemna makana sanbagiri. Jei as waakenfer tebabili, ane ai syewal anggwafe jem jenap aya nwinirim, nunu abakfer ga nawer-ningna. ⁸ Jes galapserem Publiyusem jeta ga bwernabara tifin sarsar ane unufofenna gam nababuwena, titikip gam tantena. Paulus jemnip ga gwina jam damtafe, ane sembayanga ga aa gwebabana jebe, jepga tafna jemna jem sagap ga aa tosobaanswena. Jei ga aa waakenswena. ⁹ Paulus jeiserem jama eyebilirim, angtane bwernabara naanteimana seyafter gemerserem ga aa ge jalbuwena Paulusminibe. Ane seyafter ga waakentababili bwernawer. ¹⁰ Jei abe apgal jigala anesus as gemer ne kitulmini. Ane ai jame agalaba sofwaram gamjon atdusame, seyafter agemera balbabilirim atdusap ga aane bunulniwili. ¹¹ Muara nawer-ningna jam aa ge barwebilirim naanteya jeiserem jebe, ai jewer ga aya sofwa atdusa kota Aleksanderyamanaiserem jeme. Atdusa jeiserem ga naanteyap tena jamer muara wisimi aa jem falwenaram bar. Atdusa jeiserem jemna bosna ga "Bwata Nawer Batana". ¹² Ai agalaba fornaram kotana Sirakusa je, ai jep ajama nwinibe nunu ga nawer-ningna. ¹³ Jewer jon ga aya sofwa atdusame, kotana Regium je ga aya forna. Jem gwirmer jon, deye gamjon ga aane towainebana jam ne gwebafe gwer anggasyela taasfolawer, ane jega jem temawer ai jewer gamjon ga aya sofwa. Nunu ga naura ajamera wofelabe, tamna Putyoli jep ga aya forna. ¹⁴ Kotana jeiserem jebe ai angtane Yesus aa jei ne tebanaram ga aya damtabili. Ane jei ga asene balbabili ai ajebara nwinfe nunu ga tuju. Jepga kota Romawer ga aya sofna. ¹⁵ Angtane Yesus aa jei ne tebanaram kota Roma je, jei ula am temawer mes ne sarbili. Ane jei ga aa ge jalbili, jei ai ase nelep ne fibabitye. Angtane jeiserem ga aa ge jalbili jamer Pasar Apius je ga as jep ne fibabili. Ane angtane afwer jei ga aa ge jalbili jamere tamna bastantouyaserem jebo. Tamna jeiserem jemna syewal anggwa jena ga nawer-ningna. Paulus jei angtane jeiserem jame aa galap damtabilirim, jei Uwa Sanbagiri ga bala, "Asi samfer gulbana." Ane ini Paulusmana kanaufer ga folbana. ¹⁶ Kota Roma je jame agalaba fornaram, ginanggwa sanbaka jeiserem Paulus ga bala, "Sya, aamei infentowai saf is nwini, jengga ginanggwana daamfenna aamei ga is jei se gerebaasnenne." ¹⁷ Nunu unggwanfer ga nawer-ningna Paulus ga angtane sanbaka angtane Yahudimana ga aa jenbebili. Jepga jei ga aa ge betwebili, ane Paulus ga balbabili, "Am afelen mesna, ai kapka afa ajam eyeipmiyen anggwabura nemnaiserem jebe. Ane ai kapkaiserem afa ajam eyebiyen osiri angtane Yahudimanaiserem jem temawer. Ai as jafner ne tebana kota Yerusalem je, ane ga asene gera angtane Romamana jem tafnabe. ¹⁸ Jei jame as galap ne tenebanaram jei safe as jam ne aftannuf, aam temawer ai kapkaiserem afa ajam eyebiyen, jega ai as jem temawer ne tamtamtafe jamer futu. ¹⁹ Jengga angtane Yahudimana jei bai as jam ne aftannufe, jega jem temawer ai jamer ai gunu jam gwife Kaisarminibe. Jengga ai ajam guyon angtane Yahudimana jei kapkaiserem jes ne eyebili. ²⁰ Seyafter jeiserem ga enggalf ai aamei isa gam damtabif, ane ai ibar negama nasowef. Angtane Israelmana jei Mesias ne fibana, ane jega jem temawer ai aaf as nwini, ai as mes ne tebana, ane ai as mes ne daferna ranteme." ²¹ Jepga angtane Yahudimana Paulus ga aane bala, "Ai surta afa ajama domolyan ona Yudeyaminiwer im temawer. Ane angtane jewer aa jei ge jalbuwenaram, jei taterisi kapkaiserem im temawer fas afa jam ne nasbiyen. ²² Jengga ai ajama sarbif taterisi aamei ijes taabilirim, aam temawer aimba amsama sara angtane unggwanfer jei aa jes ne nasbilirim taterisi kapka safna aamei ijes onsobilirim jem temawer." ²³ Jepga jei Paulusfar nunu daamfenna ga gane bili jem dorwefe. Nunu jeiserem jeme, angtane unggwanfersus gamjon ga aa ge forobitye Paulus aa jep nwinirim jebe. Paulus gwinibener towaiwulmini taterisi jam nasipmilibe, ane jei taterisi nasipmini jamer ona dafwel. Jei nunu Uwa Sanbagiri Jem gwelaiserem anggwabura seyafter gemerserem jem Sanbakfe ga jes nasipmini. Ane jei taterisi gamjon uskambar ga nasbili enggalfe angtane jeiserem jei Yesus gam ne tebaf. Bukunu Nabi Musa aa jes tulistababilim, ane buku nabi-nabi nafsiserem jei aa jes ne tulistababilim, ayat-ayata jep aaiserem jeme Paulus jei Yesus angtanef ga jem ge saamisini. ²⁴ Angtane afwer aaiserem jei taterisi Paulus aa jes nasbilirim mes ne taabili, jengga angtane afweraiserem jei jam ne taabiyen. ²⁵ Jei jewer ge tobitinyef, ane jei jenjen aarememfener ga aa ge doksobana. Jes jepserem Paulus jei enggam ga nasouna, "Bunaram Mafnana Uwa Sanbagirmana Jei asal-asala imnaiserem enggamam balbabil, taterisi Nabi Yesayamanaiserem jeme: ²⁶ ’Gasa sofwe angtane aaiserem jemnip, ane ga isa balbabili: Aamei iner isa sarbisini jamer abaksusu, jengga aamei ijama towaswebiyen; Aamei iner isa anggasini jamer abaksusu, jengga aamei ijama damtabiyen. ²⁷ Angtane jeiserem jemna ini kanaufer jam ge folbamiyen; imwana jemna mat, jei bai jam ge sarbife; nwena jemna kof, jei bai jam ne damtabife. Afa nwena jemna jam ne matabaasiyeneye, jei ga sege anggabisini; afa jei imwana jam ne matabaasiyeneye, jei ga sege sarbili; afa ini jemna kanaufer sege folbaminirim, jei ga sege towaswebili. Jei ga sege waraubitne Amnibe, ane Ai angtane jeiserem ga As waakentababili.’ " (Yesaya 6:9-10) ²⁸ Jepga Paulus taterisi jei aa jes nasbilirim, jei taterisi jeiserem enggam tabanulsini, "Am afelen mesna, aamei jam isa towaswena enggame Taterisi Waakenaiserem Uwa Sanbagirminiwer angtane gam waakentaasini. Taterisi jeiserem ai amsam nasbinenne angtane Yahudimanyanaiserem jemnibe. Ane jei mes ne sarbili!" (( ²⁹ Paulus game aa gutenaram, angtane Yahudimana jeiserem jewer ga aa ge sofobili, jepga jei jen jena aarememfener unggwanfer ga aane nasmini.)) ³⁰ Tahunu ga naura Paulus jei kota Roma je jep jam nwinibe, jena jei jener nomkef aa jes armanulurum jebe. Ini jemna saaser-saasera angtane seyafter jemnibe aa jewer ge forobuwetyaram. ³¹ Ane jei jam ereyen taterisi jam nasbife, taterisi Uwa Sanbagiri aa jem gwelaiserem anggwabura seyafter gemerserem jem Sanbakfe jem temawer. Jei taterisi Tuhan Yesusem temawer mese gemer nasipmini. Paulus jei taterisi jeiserem jame aa nasipminirim, angtane enggam afa jam ne balyan jas tikwe.