2 Timotius

2 Timotius

¹ - ² Ga ip, Timotius, am tane ai is ajes nesiktenerem, kota Efesus je. Surta aaiserem amniwer, Paulus, kota Roma je. Aiba rasulu Kristus Yesusmanam. Uwa Sanbagiri Jei ams destabana aiba rasulsam. Uwa Sanbagiri enggam gunu, "Angtane Kristus Yesus aa jei ne tebanaram, jei waakenfer gwelaiserem jamer abak-abaksus ga jei sene domola." Ane Jei ams baftana enggalfe, ai Taterisi Waakena jeiserem ai agam nasipminennef angtanefe. Ai sembayanga as gwebabana Uwa Sanbagirfe, Uwa nemna, ane Kristus Yesus, Tuhan nemnaiserem, jega Jei nawersamer waakena Jelemanaiserem ip is ga sege gulbana, ane nesikteleiserem jes mese is ga sege gulbana ibe, ane Jei ini imna is sege gwebabana waakenfer is gase folbana. towas-towastababili. ³ Asal-asala amna jei awelna Uwa Sanbagirmana gane gwebil, waakenaiserem jes eyebiliserem jei aa jes ne towaswebilim jei ga jetefner ne eyebuwel. Ane ai ga awelna Uwa Sanbagirmana ga agemer gweyibene jei gemerserem. Ane ai Uwa Sanbagiri enggam as bala im temawer "Ase samfer gulbana". Ai sembayanga agalap gwebawenaram gwinem ane gwerem, ai aamei isa jeber-jeber sarbabistaabona. ⁴ Ai aamei isa galap mirtetefalantam, ini imna ga is jenbanant, ane aamei ga im syenant. Ini imna is je jenbanantam, ga ai ajes sarbistaabona, jega jem temawer ai bunarsusfer ibar nejam ne dorwef, jega ini amna saaser-saasersusfer as gase folbana. ⁵ Ai is aas ai saribestaabona aamei Yesus baabetfer iJes tebanaram, ilem abwai Lois ane iye ilemanaiserem Enike, jei nawersamer Yesus aa gemer ge tebanaram. Ai amsam towaswena aamei jegme Yesus imsam tebana, jei gemerserem. ⁶ Jega jem temawer, ai aamei is ajam towastaasini, ai awelna Uwa Sanbagirmana is agalap gulbanantam ibe, ane ai tafna amna is ai tosobaanswenant im dwak sagabe, jes jepserem Uwa Sanbagiri Jei baabeta ip ga is gulbanant. Baabeta jeiserem ga jam is unggwandwasulsini, aamei baabeta jeiserem jeber-jeber ga jeter is gwirni, jega aamei awelna Uwa Sanbagirmana waakenfer gam is eyebili. ⁷ Aamei ijam ereyen, aam temawer Uwa Sanbagiri Jei bai nei nejama erefe. Jengga Uwa Sanbagiri Jei Mafnana Jelemanaiserem nebe nes mes golmini enggalfe nei negama baabetabarswef, ane nejama ereyen. Ane Uwa Sanbagiri Jei Mafnana Jelemanaiserem nebe nes mes golmini enggalfe, nei angtane negama nesiktababif, ane enggalf mese nei nen nena waakenfer negama gaaramisnenef. ⁸ Ga jem temawer, aamei ijam sefersweyan taterisi Tuhan nemnaiserem Jemna jam igam nasibenerem. Ai bwiyibe ajewer nwinirim aam temawer ai taterisi Yesusmanaiserem ai ajewer nasibenennerem, aamei ijam sefersweyan jem temawer. Jengga aamei jam is menetwesini kabwaktala jam taabife ai gamserem, aam temawer aamei Taterisi Waakenaiserem ijes towas-towasulmuwena. Aamei kabwaktala jam ijep domolaram, aamei kanaufer is fina baabeta Uwa Sanbagirmanaiserem jeme. ⁹ Uwa Sanbagiri Jei nei nes mes waakentababisini, ane Jei nes mes jenbebili enggalfe nei Jem tanef negama gwefe. Jei jeiserem aa jewer eyebilirim, jeke enggalem temawer eyebili nei waakenafer nejewera gwenaram. Jengga Jei ga aam temawer eyebili Jei Jener aa gam gunurum, ane ini Jemna waakensusfer aa jewer folbanaram. Jei ogiri aaiserem gwanan nalef Jam etamweyan, Jei nes mes nesiktababil, ane Jei aa gul, "Ai Yesus galap As baftasa." ¹⁰ Ane namwer aas jepserem Yesus ga mes fortya. Yesus aa jewer fortyaram, Uwa Sanbagiri ga nes jem ge saasini enggame Jei nes jam nesiktababili. Yesus Jei baabeta termanaiserem mes jubili, ane Jei nei ga nes mes waakentababisini. Ane Taterisi Waakena ga aas: Angtane Yesus aa jei ne tebanaram, jei waakenfer gwelaiserem jamer abak-abaksus ga sene domolsa. ¹¹ Uwa Sanbagiri Jei ai ga as destabana enggalfe ai rasulf ane guruf agam gwef, jega ai Taterisi Waakena jeiserem agam nasibenenef. ¹² Jega jem temawer ai tamtamtala seyafter nafis-nafsi aaiserem ga ajewer domola. Jengga ini amna as jam jenbayan, aam temawer ai amsam towaswebana ai aJes tebalaiserem. Ane ai bunarsusfer enggam amsam towaswena Taterisi Waakena abe as jewer gulbanaram, Jei baabetabara Taterisi Waakena jeiserem jam gaarabisnenefe, jamer nunu umwef jemserem. ¹³ Timotius, taterisi bunarsusfer aaiserem ai ibe is ajes towas-towasulbonorom, taterisi jeiserem ga jam is towas-towasulmini angtanefe, taterisi nafsiserem ijam towas-towastababiyen jeme. Kristus Yesus waakenfer is tebana baabetmer ane Yesus ga jam is nesiktene, aam temawer aamei Kristus Yesusfar daamfennaber ijewer ge gwenaram. ¹⁴ Mafnana Uwa Sanbagirmana nemnip aa Jei nwinirim, baabeta Jemnaiserem jeme taterisi bunarsusfer aaiserem Uwa Sanbagiri ibe ijes gulbanaram ga jam is gaarabisnenne. ¹⁵ Aamei imsam towaswena enggame, angtane Kristen unggwanfer aaiserem propinsi Asyaminibe jei ai as mes ne mirtetefala, Figeluso Hermogenes jes mese. ¹⁶ - ¹⁷ Jengga Onesiforus jei am temawer jam sefersweyan, ai safe bwiyip ai nwini kota Roma je. Onesiforus wi tane mesnabar kota Romaminibe aa galap ge fortyantam, jei ai uskambar ga as terelbenent jamere ai jebar ai ge dorwenant. Ane jei jeber-jeber amnip ga jei ge forowetya ini amna ga as jei ge saaser-saasertabawena. Ane jega jem temawer ai sembayanga as gwebabana Tuhanfe Jei waakenaiserem gase golmini Onesiforusfe, ane wi tane mese jemnaiserem jebe. ¹⁸ Ane aamei bunarsus imesam towaswena enggame, jei unggwanfer ai as mesam batobanant kota Efesus je. Ai sembayang as gwebabana Tuhanfe Jei waakenaiserem gase gulbana jebe, nunu umwef aa jem falsaram Tuhan angtane seyafter aa jep tenebaabuwesaram jeme.

¹ Timotius am tane, aamei baabetfer is gwena, Uwa Sanbagiri waakena Jelemanaiserem nep nes jes golminirim jeme, aam temawer nei Kristus Yesusfar daamfennaber neya gwena. ² Taterisi ajes nasbilirim angtane uskambar jem tarnabe, taterisi jeiserem aamei imsam sarbili. Aamei taterisi jeiserem ga angtane enggalaiserem ga jep is towas-towasulmini, angtane aamei fwater jes igam towaswebabilirim enggame jei samfer angtane nafsiserem ga sene towas-towastababili. ³ Seisya taterisi nawer-ningna aaiserem ga jam is sarbili: Aamei Yesus jam is tikwebaatini, ane jam is menetwesini kabwaktala ijam taabife, ginanggwana waakena Dan Pos jelemana aa gemer gam tikwebaatinirim, ane ginanggwana jei ga gam menetwesini kabwaktala jam taabife. ⁴ Angtane ginanggwaf aa jei gam gwenaram awelna jemna waakenfer gam eyebili, jega jelem sanbaka Dan Posf aa jei gam nwinirim ini jemna ga gam saaser-saasertabana. Jega jem temawer jei awelna ginanggwamanaiserem jeter gam eyebili. Angtane ginanggwaf jam gweyanaiserem awelna jei aa jes gane gwebilirim, jei jep jam taawiyen. Jei awelna Dan Pos jelemana aa jes gam bilibenerem jam eyebife, jei jetefener gam eyebili. ⁵ Angtane bolna aa jei gam sofobilirim jam donolfe, jei aturna bolamanaiserem jam gam onsobili. Afa jei aturna bolamana waakenfer jam onsobiyeneye, jei fwaina angtane nabal danalaiserem aa jes gam taabilirim, jeiserem jam domolyan. ⁶ Angtane makanap baabetfer aa jei gam gowenaram, Jei nananis makanmana nabala gwanan ga jei gam tebabili. ⁷ Taterisi nawer-ningna jeiserem ai ibe isa ajes seisyatabaibenerem, taterisi jeiserem ga iniber is gwetaasini, ane taterisi jeiserem ga jam is sarbistaabonwena, aam temawer Tuhan Jei aamei is batobana taterisi jeiserem waakenfer ga is sarbili. ⁸ Aamei Yesus Kristus se sarbastaabon! Jei asal-asala Raja Daudmana, ane Jei mes irwa terewer. Jeiserem ga Taterisi Waakena ai ajes nasbinennerem. ⁹ Ai Taterisi Waakenaiserem jeiserem ajewer nasbinennerem, ai kabwaktala ga ajem temawer domola, ane ranteme ga asene taferna angtane kakala gamserem. Jengga taterisi Uwa Sanbagirmana ranteme jam ne fwirebayan. Angtane nafsi Taterisi Uwa Sanbagirmana aa jei ne gwirinbefelwenaram tamna nafis-nafsiserem jewer, angtane jeiserem jam ne uftabiyen. ¹⁰ Jega jem temawer ai kanaufer ai fina kabwaktala seyafter jeiserem jam agalap domolaram enggalfe angtane Uwa Sanbagiri aa jes destabaabilirim ai jei agam batobaabif. Ai jes gamserem gam ajewer eyebilirim, jega enggalf angtane jeiserem jeime Kristus Yesus ga sene tebana. Ane Uwa Sanbagiri Jei angtane jeiserem gase waakentababisini, ane jei waakenfer gwelaiserem Uwa Sanbagirfar jamer abak-abaksus ga sene domola. ¹¹ Taterisi gwonawer aaiserem ba bunaram: Nei afa Jebar Jam negama tererem, nei gamjon Jebar negama gwena. ¹² Nei afa kanaufer jam negama finaram nei kabwaktala seyafter gemerserem jam jep negama damtabilirim, nei Jebar Sanbakfe ga negama nwini anggwabura seyafter gemerserem jem sagabe. Afa nei Tuhan jam negama baanbaanwebanaram, Jeime nei nes gam baanbaanwebili. ¹³ Afa nei enggam nesa gunu, "Ai Yesus ajama tikwebaatif.", jengga nei fas nejama tikwebaatiyen, safe gam, Jei se eyebaabili seyafter Jei aa jes bilirim jam eyebife, aam temawer Jei jeber-jeber se eyebili seyafter Jei aa jes bilirim. ¹⁴ Timotius, aamei angtane Yesus aa jei ne tebanaram jam is towas-towastababili enggame, jei seyafter jeiserem jam ne dirinswebiyen. Angtane jeiserem ga unggwanfer is balbabili Uwa Sanbagirem boseme, jei katana jafner biltelaiserem jem temawer jam ge doksobayan. Kata tefner doksobili jes gamserem jeiserem waakenyan, aam temawer angtane doksola jeiserem aa jei ne sarbilirim, jei ga sege tikwebili Uwa Sanbagiri jam onsobalawer. ¹⁵ Timotius, awelna seyafter imnaiserem aamei ga waaken-waakenfersus is gwebili. Taterisi bunarsusfer aaiserem Uwa Sanbagirmanaiserem waakenfersus is towas-towasulmini. Seyafter jeiserem gam jam is eyebilirim, jega aamei ijam sefersweyan, ane Uwa Sanbagiri Jei aamei ga is bala enggame, "Aamei angtane waakena, awelna imna samfer." ¹⁶ Taterisi kabwakfer nasbiliserem Uwa Sanbagiri baife aa jes gwebilirim, jeiserem ga jam is bijauwulu ileminiwer, aam temawer angtane gam aa jei gangge nasbawenaram, jei jena gane bijausona Uwa Sanbagirminiwer. ¹⁷ Angtane jes galserem, jemna taterisi aa jes gane nasbilirim, taterisi jeiserem angtane nafsi ga gane gwirinenne. Jeiserem ga enggala bubwana unggwandwasusu galserem jam waakenulyonaiserem, jengga jam gam unggwandwaswesini. Taterisi Himeneus ane Filetusmana ga gam jes gamserem. ¹⁸ Jei mes ge tikwena taterisi bunarsusfer aaiserem jam nasbiliwer. Jei angtane enggam ge afaf-afaftababili, "Angtane jam irwelaiserem terewer, jeiserem mes etamwena." Jega jem temawer angtane afweraiserem jei teisyena bas ne taabifi. ¹⁹ Jengga Taterisi bunarsusfer aaiserem Uwa Sanbagirmana jei kanawa. Taterisi Uwa Sanbagirmana jei dutumiriti galserem, kekelna ane baabetabara. Ane Taterisi Uwa Sanbagirmana jep ga enggam baatultel: "Tuhan Jei tousa angtane Jelemana." ane "Angtane enggam aa jei gam gunurum, ’Aiba Tuhanmanam.’, angtane jeiserem jei ga etam-etama kapkaiserem jewer ga jam gam tikwena." ²⁰ Jena unggwandusa jem mwonabe pirni nafis-nafsi ga anesus: afwer emasawer ne eyebaabili ane afwer perakawer eyebaabili, ane afwer tiniwer afa onnawer. Pirni emasawer afa perakawer aa jes ne eyebaabilirim, pirni jeiserem masarmana. Jengga pirni tiniwer afa onnawer aa jes ne eyebaabilirim, pirni jeiserem ga nunu jeber-jeber jes erebuwef. ²¹ Angtane ini jenjen aa jei gam wirtanaram etam-etama kapkaiserem jewer, angtane jeiserem jei waakensusu, pirin emasa galserem. Jei Uwa Sanbagiri tefner onsobaf. Jei enggalf gam menetwesini awelna seyafter gemerserem waakenfer gam gwebif. Ane Uwa Sanbagiri Jei awelna se gulbana angtane jeiserem jebe. ²² Ga jem temawer Timotius, aamei ga ina jam is bijautana angtane tanisfenna kapkaiserem jei jes ne eyebiliserem jewer. Jengga aamei jam is unggwasa aas gemerserem gam ijam eyebife: Seyafter Uwa Sanbagiri aa jes bilirim, jeiserem ga jam is eyebili. Yesus ga uskambar is tebana waakenfer. Angtane seyafter gemerserem ga jam is nesiktababili. Waakenfer isa nwini angtane nafsiber, ijama erayan. Seyafter jeiserem ga jam is eyebili angtane Tuhan bunarsusfer aa jei ne tikwebaatinirim jebar. ²³ Ina jam is bijautana angtane ol kapka syefer aa jei gane nasbilirim jemniwer. Angtane jeiserem jei teisyena. Aamei tousa angtane ol kapka syefer aa jei gane nasbilirim, jepga jei gangge towaiwebili aaremem jam ge doksobafe. ²⁴ Aamei angtane awelna Tuhanmana i jei gweyibenerem, ga jem temawer aamei angtane nafsiserem jebar ijam ge doksoyan. Waakenfer is eyeipmini angtane seyafter gemerserem jebe. Angtane nafsi waakenfer is towas-towastababili. Angtane jam ijep towas-towastababilirim aamei abakfer fyela gamserem ga gam is fyena, tatarmer ijam uskamsweyan. ²⁵ - ²⁶ Afa angtane taterisi bunarsusfer aaiserem baife jam gane gwebilirim, aamei ga waakenfer igam towas-towastababili ini foler-folereme. Bawasa angtane jeiserem fwater gam tebabili, ane jei etam-etama kapka bawas aa jes gam bilirim jei jam ne eyebife, jei etam-etama jeiserem gane eyebili. Timotius, angtane jeiserem jam is towas-towastababili ini foler-folereme, aam temawer nei teisyena Uwa Sanbagiri angtane jeiserem ini jemna ke gam gwebaipmini enggalfe angtane jeiserem jei ini kapkaiserem jam ne aftabaabunnufe, ane jei taterisi bunarsusfer aaiserem ga gane towaswebili. Jepga seyafter jei aa jes gane bilirim jelem inibe ga gangge waakenswebili, ane jei bawasminiwer ga gangge waraubili.

¹ Aaiserem se sarbistaabon: Nunu umwef jepserem kabwaktala unggwanfer se etamwesa, ane angtane Kristen jei kapkaiserem unggwanfersus sene domolsa. ² Angtane nunu umwef jepserem jem aa jei naawesaram, jei angtane nafsi jam ne nesiktababiyen, jengga jei jen jenater sene nesiksonanna, ane jei doini sene nesiktababili. Jei jena sene tetenanna, enggam ga sege gubili, "Ai seyafter tousa." Jei angtane nafsiserem sene imei-imeitababili. Jei taterisi ene jetamana jam ne saripmiyen. Jei teisyena enggam guluserem ase samfer gulbana. Jei bai Uwa Sanbagiri jam onsobafe. ³ Jei ene yo jeta, ane ayana osona, jam nesiktababiyen. Jei etam-etama angtane nafsimana jei bai jam borolmife. Jei ula syefer gane nasbili angtane nafsiserem jem temawer. Jei jen jenater jena jam ne gaaramisneneyen. Jei kakalmer naawena. Jei waakena seyafter gemerserem ini jemna jem temawer jei se kabwaksusfer gangge folbamini. ⁴ Jei jelem afelen mesnaiserem ga gane gera angtane kakalaiserem jemnibe. Jei gwanan jam ne sarbistaabonyan kapkaiserem jam aa jep gane eyebilirim. Jei jena uskambarsus syefer gane tetenanna. Jei ga enggalfefener gam naawena, ini jelemana tefner ne saaser-saaserfer tababif. Jei bai gwela jemna Uwa Sanbagirf ge folbamife. ⁵ Jei akar-akarem gam naawena Uwa Sanbagiri jam pujitefe, jengga jei baabeta Uwa Sanbagirmana baif gane gweyibene. Timotius, angtane etam-etama kapka jes galserem aa jei ne eyebuwenaram, aamei ina ga jam is bijautana jemniwer. ⁶ Angtane afwenefener jes galserem jei wini teisyenaiserem ga gam gane malin-malintababili enggalfe jei gam ge kabwitef wini jeiserem jem jenabe. Ane jei wini jepmana teisyenaiserem ga gane afaf-afaftababili, jega wini jeiserem jei taterisi kapka gane onsobif. Angtane afaf-afafa jeiserem jei wini jeiserem jem jenap nalef jam ge kabwiteyan, wini jeiserem fwater gangge towaswebili jei kapkaiserem unggwanfer mes gane eyebili. Etam-etama kapkaiserem jei aa jes ne bilirim jelem inibe, jeiserem jes ne eyebif. ⁷ Wini jeiserem jei jeber-jeber gangge gubili jei jam ne towas-towastababife, jengga jei taterisi bunarsusfer aaiserem jam ne sarbiyen. ⁸ Gwanan galapserem Yaneso Yambres jei bai angtane nafsi taterisi Nabi Musamana jam ne onsobife. Angtane afaf-afafa jeime gemer angtane naura jeiserem jei gamserem, jei bai angtane nafsi taterisi bunarsusfer aaiserem jam ne onsobife. Angtane jeiserem jei kapka tefner ne bili jelem inibe. Ane Uwa Sanbagiri Jei angtane jeiserem baif gwebabili, aam temawer jei taterisi bunarsusfer aaiserem jam ne taabiyen. ⁹ Jengga angtane jeiserem game jam naaweyan jeber-jeber, aam temawer angtane seyafter gemerserem ga sene towaswebabili enggame angtane afaf-afafa jeiserem jei teisyena, angtane fwatermana jei gemerserem jei aa gam ge towaswebilim enggame Yaneso Yambres jei nawersamer teisyen nauna. ¹⁰ Jengga Timotius, aamei iner imesam towaswebili ai seyafter angtanef ajes towas-towasulminennerem. Aamei gwela amna as imesam towasweibene, ane ai ajes mwangbisinirim gwela amnaiserem jem temawer jes mese aamei imesam towaswebili. Aamei iner imsam towaswena aiba Uwa Sanbagiriserem ajetefener am tebana. Aamei abakfer fyala amna as imsam towasweibene, ane ai angtane ajes nesiktababuwenaram. Aamei imsam towaswena ai kanaufer ai fina unggwasbala jam agalap domolaram. ¹¹ Aamei imsam towaswena kapkaiserem angtane abe as jes ne eyeibenentem, ane ai tamtamtala unggwanfer ga ai domolant. Aamei imsam towaswena amnip seyafter aa je etamwebanantam kota Antyokyaminibe, kota Ikonium je, ane kota Listra mese. Aamei imsam towaswena kapkaiserem unggwanfer angtane jepmanaiserem abe as aa jes ne eyebuwenantam. Jengga Tuhan Jei as mes waakentaasini kakalaiserem angtane ap aa jes ne eyeibenentem jewer. ¹² Bunar-bunarsus angtane seyafter gemerserem Yesus Kristusfar daamfennaber aa jei gam naawenaram, ane Uwa Sanbagiri tefner ga gane onsobana, angtane kakalaiserem jei kapkaiserem ga gane eyeipmini angtane Kristen jeiserem jebe. ¹³ Angtane kakalaiserem, ane angtane, angtane nafsi aa jei gane afaftababilirim, jemna kakala gamjon se unggwandwaswemini, aam temawer angtane afaf-afafaiserem jei angtane nafsiserem sene afaftababili. Ane bawas jei angtane afaf-afafa jeiserem gase afaf-afaftababili. ¹⁴ Jengga aamei Timotius, Taterisi Waakena ibe ijes ne towas-towasulbonontom, ane aamei ijes taabilirim, jewer ijam tikweyan jam taabiliwer. Aamei tousa taterisi jeiserem jeba bunaram, aam temawer aamei imsam towaswena guru-guru imna nansa. ¹⁵ Aamei ga jam is sarbistaabona enggame aamei bastantouya galapserem, aamei Taterisi Uwa Sanbagirmana aa jes ne tulistababilim aamei imsam domolant. Aamei Taterisi Uwa Sanbagirmana igalap sarbilintim, Uwa Sanbagiri Jei tousaiserem ip ga is gulbanant. Aamei Kristus Yesus im tebana waakenfer, ane Uwa Sanbagiri Jei aamei is waakentaasini. ¹⁶ Uwa Sanbagiri Jei Taterisi Jelemanaiserem mesam golmini angtanem inibe Mafnana Jelemanaiserem jeme, ane angtane Taterisi jeiserem ga aane tulistababili. Uwa Sanbagiri Jei Taterisi Jelemanaiserem angtane ga jem towas-towastababili. Angtane Taterisi Uwa Sanbagirmanaiserem jeiserem jem aa jep gane gerabistenaram, Uwa Sanbagiri angtane jeiserem jem gam uftabili etam-etama kapkaiserem jei aa jes ne eyebilirim jem temawer. Ane Uwa Sanbagiri gamjon jeme esorola gam golmini angtanefe waakenaiserem jes eyebife jem temawer. Ane angtane gam towas-towastababili waakenfer gwelaiserem ga fomfoma. ¹⁷ Uwa Sanbagiri ga jes eyebili Taterisi Jemnaiserem jeme, jega angtane Uwa Sanbagiri aa jei ne onsobanaram, jei waakenfer ga sege menetwebisini enggalfe awelna waakena nafis-nafsi seyafter gemerserem gam ne gwebif.

¹ Timotius, Kristus Yesus Jei gamjon se warautna ogiri aaiserem jebe enggalfe, angtane gemer gwelayo ane jam tereserem Jei gam teneba-tenebaabuwef. Ane Jei aa jep forsanyaram, ga enggalf se forsanya nem Sanbakef gam gwef. Jega jem temawer ai aamei isa enggam ai bala unggwanfer, Uwa Sanbagiri yo Kristus Yesus Jem tarnabe: ² Aamei Taterisi Waakena ga jamer is nasbinenne! Aamei jeber-jeber is menetwesiwena Taterisi Waakenaiserem angtanef jam nasipminennefe, angtane aa jei gangge gubilirim Taterisi Waakena jeiserem jam ne sarbisif, ane angtane baif aa jei gam naawenaram jam ne sarbisife. Afa angtane kapkaiserem jam sene eyebilirim, aamei jei jam is balbabili jei kabwakfer ne eyebili. Ane aamei angtane jeiserem ga is uftabili. Waakenfer eyebiliserem jebe jep ga is towas-towasulmini. Aamei angtane abakfer fyelaiserem jem is towas-towastababili. ³ Aamei jeiserem jam is eyebili, aam temawer nunu galap-galap jemserem, angtane taterisi bunarsusfer aaiserem jei bai jam ne sarbife, jengga taterisi nafsiserem ini unggwan-giri ga jep sege folbamisi jes ne sarbabisif. Jega jem temawer jei guru unggwanfer sene dupduptababisi jeleminibe enggalfe jei gam ne sarbabisif, taterisi jei jener aa jes ne balbabilirim jam sarbabisife. Ane jei guru-guru kapka jeiserem ga sene dupduptababisi, aam temawer jei kapkaiserem unggwanfer jes ne eyebaabif. ⁴ Jei taterisi bunarsusfer aaiserem jam ne sarbisife imwana jemna jewer jam gane matabaabisini, ane imwana jemna ga enggalfefener gane erbasini taterisi bunaryanaiserem jewer ne sarbabisif. ⁵ Jengga Timotius, aamei in ina jeber-jeber waakenfer is gerebaasnenewena. Aamei kanaufer is fina kabwaktalaiserem jam ijep domolaram. Taterisi Waakenaiserem Yesusem temawer jamer is nasbinenne. Awelna Uwa Sanbagiri ip ijes bilibenerem gemer ijes eyebife, aamei awelna seyafter jeiserem ga waakenfersus is gwebili. ⁶ Awelna seyafter ai gwanan ajes eyebilirim, aamei namwer awelna seyafter jeiserem ga jamer is eyebili, aam temawer awelna jeiserem ai gamjon ajam eyebiyen. Angtane babitsim ai ga asene munbono, aam temawer ai angtane Yesusem temawer ajewer towas-towastababuwenaram. ⁷ Ai awelna baabetsusfer ames gwebili enggalfe angtane taterisi Yesusmana gam ne towasweibef. Seyafter Uwa Sanbagiri ap ajes bilibenerem ai ajam eyebife, ai ames eyebili jamer taban. Ai ajam tikweyan Yesus Jem tebalawer. ⁸ Ai ames eyebili waakenfer Uwa Sanbagiri ap ajes bilibenerem, ane jega jem temawer Uwa Sanbagiri Jei fwaina abe as mes menetulbaasini ap jes gulbalaiserem. Fwaina jeiserem abe ase Tuhan se gulbafa, nunu umwef jemserem Jei angtane nei seyafter nes jep tenebaabuwesaram. Jei nei nes jep tenebaabuwesaram, nes waaken-waakenfersus se tenebaabuwesa. Jei fwaina waakenaiserem apfener Jam gulbayan, jengga fwaina jeiserem Jei se golmisi angtane seyafter gemerserem enggam aa jei gangge gubilirim, "Ini amna unggwan-gwansusfer ge folbamini Tuhan Yesus gamjon Jam warauyafe." ⁹ Timotius, aamei nele jamer is terelbene jamer amnip is fortya tatarmer! ¹⁰ Demas as mes mirtene, aam temawer ini jemna unggwan-girfer folbana gwela ogirmanaiserem jebe. Jei mes sofwa kota Tesalonikaminibe. Kreskes jei propinsi Galatyaminiwer mes sofwa. Ane Titus ga ona Damaltyawer sofwa enggalfe Taterisi Waakena gam nasbinennef. ¹¹ Lukas jenefener nwini abar. Timotius aamei Markus jam is terelbene jamer is ge dorwena, ane jebaner ga is ge sofwetya amnibe, aam temawer jei ams batobana awelna amnaiserem jebe. ¹² Ai Tikikus ames baftana kota Efesuswer jam sofwefe. ¹³ Aamei aafe jam is jelaram, fene amna fen sagap kamwiliserem as jam is eterbeyele. Fene jeiserem kota Troas ga jep ai mirsonant, Karpusem jenap. Bukunu aman mesna as jam is eribeyele, nabal-nabalsusu bukunu waakensususerem aa jes ne eyebaabilirim ga jes is eribeyele. ¹⁴ Aleksander, angtane galgala besiniwer aa jei eyebaabuwenaram, jei kapkaiserem unggwanfer mes eyebili amnibe. Uwa Sanbagiri Jener se tamtamtana kapkaiserem jei aa jes eyebilirim jem temawer. ¹⁵ Aamei jamer is gerebaasnenne jei imnibe kapkaiserem jam eyebiyen. Jei bai taterisi Yesusem temawer angtanef nejama nasbinennefe. ¹⁶ Ai angtane sanbaka angtane aa jei gam teneba-tenebawenaram jem tarnabe agalap finantam, angtane unggwanfer jei ase enggam ne balant ai kapka gam eyebili. Ai ga enggam ai tamawolbaabilint, "Jei aa jes ne bilirim am temawer, jeiserem bunaryan. Ai kapkaiserem ajam eyebiyen." Angtane enggam aa jei ge towaswebilirim ai kapkaiserem ajam eyebiyen, jei ai as jam ne batobayan, jei seyafter ai as mes ne mirtetefalant. Jei kapkaiserem ga jes ne eyebili, aam temawer jei ai as jam ne batobayan. Jengga ai sembayanga Uwa Sanbagirf ai gwebabana enggame, "Uwa Sanbagiri, Aamei angtane jeiserem Ijam tamtamtababiyen." ¹⁷ Jengga Tuhan Jei abar ai ge nwini, ane Jei abe baabeta as mes gulbana enggalfe ai Taterisi Waakena seyafter gemerserem agam nasipminennef angtane Yahudimanyanaiserem seyafter gemerserem jebe. Mwona angtane sanbakmanaiserem angtane aa jep gam teneba-tenebawenaram, mwona jeiserem jebe angtane Yahudimanyan jep ga nwinbenent. Angtane Yahudimanyan jeiserem jei mese jeme Taterisi Waakenaiserem mes ne sarbilint. Angtane safe ai as jam ne munbof, Uwa Sanbagiri Jei ai ga as aftannunt. ¹⁸ Ane ai amsam towaswena enggame angtane safe kapkaiserem amnibe as jam sene eyeibene, Uwa Sanbagiri Jei ai ase batobana, ane Jei waakenfer ase aftafalfa taman waaken-giribe, Uwa Sanbagiri Jei aa jewer nwinirim anggwabura seyafter gemerserem jem Sanbakfe. Nei Uwa Sanbagiri enggam nesa pujitawena jeber-jeber, "O Uwa Sanbagiri Aamei sanbagirsusu." Amin. ¹⁹ Timotius ai enggam ai gunu, aamei taterisi amnaiserem Priskila yo anggwana jemna bosna Akwila ga jep is bilipmini enggame, "Kelek, waakenfer sege gwe!" Ane wi tane Onesiforusman mesna enggam is balbabili, "Kelek, waakenfer sa gwe!" ²⁰ Erastus jei kota Korintus jep nwini. Trofimus jei ai ames mirtene kota Miletus je, aam temawer jei bwernabara. ²¹ Wisimi nalef jam falyan, arouwa yo deye uskambar jam ne gwebayan, aamei ga nele jamer is terelbene jamer amnip is fortya tatarmer. Afa aamei jam is finaram jamere wisimi se fala, arouwa yo deye uskambar sene gwebana, gam jega aamei fas ijama foroyan. Ebulus, Pudes, Linus, Klaudya, ane angtane Kristen nafsiserem jes mese, jei enggam isa balbabili, "Kelek, waakenfer sa nwin!" ²² Ai sembayanga as gwebana Tuhan Jei baabeta ip is gase gulbana. Ai sembayanga as gwebana Uwa Sanbagiri Jei waakena Jelemanaiserem ip ise golmini aamei seyafter gemerserem.