12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Tesalonika

1

1 Ga ip, Safna Yesus iJeya tebanaram, kota Tesalonika je. Aameiba angtane Uwa Sanbagirmanam, Uwa nemna, aameiba Tuhan Yesus Kristusmanam. Surta aaiserem amniwer, Paulus, Silas, ane Timotius. 2 Ai sembayang asa gwebabana Uwa Sanbagirfe, Uwa nemna, ane Tuhan Yesus Kristus, Jei waakena Jelemanaiserem ibe is ga sege golmini, ane Jei ini imna is ga sege gwebaipmini waakenfer is ga sege folbamini. 3 Am afelen mesna, ai Uwa Sanbagiri jeber-jeber enggam asa bala im temawer, "Ase samfer golmini". Jeiserem waakena ai jes gamserem ai ase samfer golmini gam ajewera gweyibenerem, aam temawer aamei gwanan Yesus bastantowaifer ima tebana, jengga namwer aamei ginggitfersus ima tebana. Ane aamei gwanan ina bastantowaifer ima nesiksonanna, jengga namwer aamei ina unggwanfersus ima nesiksonanna. 4 Aamei jes gemerserem ijewera eyebuwenaram, ai aner jem temawer waakenfer agma nasbili im temawer, safna Uwa Sanbagirmana nafis-nafsiserem Yesus aa jei ne tebanaram jebe. Ai bosna imna aya golmitena angtane Kristen jeiserem jem tarnabe, aam temawer aamei kanaufer ima fina, ane aamei Yesus gemer ima tebana. Angtane nafsiserem jei safe kabwaktala ibe ise unggwanfer ne eyeipmini, ane aamei tamtamtala uskambar ima domola, jengga aamei jeber-jeber kanaufer ima fina, ane Yesus ginggitfer ima tebana. 5 Seyafter jeiserem nes mes gwerauwulmini enggame, Uwa Sanbagiri Jei angtane bunarsusfer teneba-tenebaabuwena. Jei waaken-waakensusfer teneba-tenebaabuwena, ane Jei enggam gunu aamei waakena. Uwa Sanbagiri Jei anggwabura seyafter gemerserem jem Sanbakf nwini, ane Jei aamei waakenem is jewer balbabilirim, Jei ga jem temawer nwini im Sanbakfe, ane aamei tamtamtala seyafter jeiserem ga ijem temawera domola. 6 Uwa Sanbagiri Jei bunarsusfer eyebuwena. Angtane aamei is jei ne tamtamtababilirim, Jei angtane jeiserem se tamtamtababisi. 7 Ane tamtamtala aamei ijesa domolaram, ane ai mese ajesa domolaram, Uwa Sanbagiri Jei nei nesa aftabaabunsu tamtamtala seyafter jeiserem jewer. Tuhan Yesus malaikata baabetabaraiserem ane tokwagir jam ertesiliserem ga jebar sege irebisinye taman waaken-giriwer. Nunu Tuhan Yesus aa jem iresanyaram, nunu jeiserem jeme Uwa Sanbagiri Jei nei ga nes jem se aftabaabunnsu. 8 Jes jepserem Uwa Sanbagiri Jei angtane gase tamtamtababisi, angtane Uwa Sanbagiri baife aa jei ne gwebanaram jam tebafe, ane angtane Taterisi Waakena Tuhan Yesusem temawer jam ne sarbiyeneiserem. 9 Yesus Jei angtane jeiserem bunarsusfer se tamtamtababisi jamer abak-abaksus. Jei angtane seyafter jeiserem se bijautababisi Jeleminiwer, ane baabeta Jelemana unggwandwasususerem jewer mese. 10 Uwa Sanbagiri seyafter jeiserem Jei se eyebisi nunu Yesus aa jem iresanyaram, jega angtane Uwa Sanbagirmanaiserem jei bosna Jemna ga sene gulbatena, ane angtane Jei aa jei ne tebanaram jei waakenater ga sene nasbili Jem temawer. Aamei mese jep isa fisa angtane jeiserem jem nenennabe, aam temawer taterisi ai gwanan ibe is ajesa bilipminintim ibe, taterisi jeiserem aamei imsama taabili. 11 Jeiserem ga jem temawer ai ga sembayanga im temawer jeber-jeber ai ge gwebawena. Ai sembayang asa gwebawena, jega Uwa Sanbagiri Jei aamei enggam is gase balbabili, "Aamei waakena, aamei ga isa gwena gwela Ai aamei isa Ajewer jenbebilirim jam gwefe." Ane aime sembayang asa gwebawena Jei jegme baabeta is gase golmini ibe enggalfe aamei waakenater gam isa eyeipmini angtane nafsife, ini imna is gemer ge folbaminirim jam eyebife. Ane Jei baabeta gamjon enggalf is gase golmini, jega aamei seyafter waakenater gam isa eyebili, aam temawer aamei Yesus imsa tebana. 12 Aamei seyafter waakenater ijewera eyebuwenaram, angtane bosna Yesusmana ga jem temawer ne gulbatena. Ane Yesus Jeime bosna waakena ip ise golmini, aam temawer aameiba angtane Jemnam. Waakena seyafter jeiserem imnibe is etamwemini, aam temawer Uwa Sanbagiri ane Tuhan Yesus Kristus Jei waakena Jelemanaiserem ip is gemer golmuwena ibe.

2

1 Am afelen mesna, namwer aamei isa ajam towastababili Tuhan Yesus Kristus Jam foryalem temawer, ane nei Jebar nejama betwelaiserem jem temawer. Nunu jeiserem jem temawer ai ga aamei isa enggam ai balbabili, 2 ini imna tatarmer is basangge eseswebaminirim, ane ijama ereyen taterisi aamei ijesa sarbilirim nunu jeiserem jem temawer. Aamei imsama sarbili enggame, nunu Tuhan Yesus gamjon jem foryalaiserem, nunu jeiserem mes ayintye. Taterisi jeiserem ba afaf-afaf taterisam. Ai teisyena taterisi jeiserem fwer jela. Angtane engbar ke jafner gam gunu taterisi Mafnana Uwa Sanbagirmanaiserem ga jei nasbili? Afa angtane taterisi jeiserem jener gam towas-towastababili? Afa angtane nafsi aasaje jei gam gutena ai jes gamserem amsama tulisulunt surta amnaiserem jebe? 3 Angtane aamei is jei ne afaf-afaftababilirim, aamei angtane jeiserem ijama sarbabiyen! Ai aamei jes gamserem gam isa ajewera balbabilirim, ai ga isa aam temawer aya balbabili, Nunu jeiserem nalef jam forobayan, taterisi naura aaiserem nabala ga jei se etamwesa: Angtane unggwanfer Uwa Sanbagiriserem Jebar sege erabasa. Ane Angtane Kabwaksususerem se forsanya, angtane Yesus jes firtaaniwiliserem tokwagiribe Uwa Sanbagiri aa gam gunurum. Jewer ga Nunu unggwandusa jem gas forofya. 4 Angtane Kabwaksusu jeiserem jeba ginanggwana Uwa Sanbagirmanam. Jei jena jam se gaartenansa apgal jigala seyafter gemerserem Uwa Sanbagirmana jem sagabe, ane seyafter angtane aa jes gane pujitababuwenaram jem sagabe. Ane jei Jena Uwa Sanbagirmana kota Yerusalemwer jep se kautesa, jep gase nwintesa jebe, enggam gase gusu, "Aiba Uwa Sanbagiriserem jesam." 5 Sa sarbabistaabon enggame aiba aamei isa mesam towas-towastababilint taterisi seyafter jeiserem jem temawer, ai gwanan ibar negalaba nwinintim kota Tesalonika je. 6 Aamei imsa towaswena, Angtane nafsi Jei Angtane Kabwaksusu jeiserem mes tebasnenne, ane jei jamer tebasnenewena jamere nunu Uwa Sanbagiri aa jep bilsirim Angtane Kabwaksusu jeiserem nunu jeiserem jem gase gwertasa. 7 Mafnana Angtane Kabwaksusumanaiserem angtane unggwanfer basyamer gam taatwebaabili enggalfe jei kabwakfer gane eyebif. Jengga Angtane jei aa Jei tebasnennerem, Jei gemer tebasnenne jamere Uwa Sanbagiri aa jem bilsirim Angtane Kabwaksusu jeiserem jem jam aftannufe. 8 Jepga Angtane Kabwaksusu gase gweretana. Ane Tuhan Yesus Angtane Kabwaksusu jeiserem gase munboso mafnana Jelem aaremawer aaiserem jeme, ane gase ninbirintaasisi nafdusa Jelemanaiserem jeme Jei Jam aa jep forsanyaram. 9 Angtane Kabwaksusu baabeteme se forsanya, baabeta jei aa jes domolaram bawasminiwer. Ane jei bwembwema anesus ane bwembwema teisyen mesna gase eyebaabisi, bwembwema angtane jem afaf-afaftababiliserem. 10 Ane jei angtane Uwa Sanbagirminiwer jena aa jei ne bijausonaram, gase afaf-afaftababisi etam-etama kapka nafis-nafsiserem jeme. Angtane jeiserem sene tamtamtababisi, aam temawer jei taterisi bunarsusfer aaiserem Yesusem temawer jam ne sarbiyen, ane jei taterisi jeiserem bai jam ne taabife, taterisi Uwa Sanbagirmana angtane aa jei waakentababisiwenaram. 11 Angtane jeiserem jei jes gemerserem gam aa jewer ne eyebilirim, Uwa Sanbagiri ga jem temawer se balbabili sya, angtane jeiserem jei samfer Angtane Kabwaksususerem taterisi afaf-afafa jemna seyafter gemerserem jem gan taabif ini jelemana seyafter gemerserem jeme. 12 Ane jem igiserem ga enggam: Uwa Sanbagiri Jei angtane jeiserem se tamtamtababisi taman tokwagiribe. Jei angtane jeiserem se tamtamtababisi, aam temawer jei taterisi bunarsusfer aaiserem Yesusem temawer jam ne taabiyen, jengga etam-etama kapkaiserem jei aa jes ne eyebilirim, ini jemna saaser-saasersusfer ga jem temawer ge folbamini. 13 Am afelen mesna Tuhan ijes nesiktababilirim, ai Uwa Sanbagiri jeber-jeber enggam asa bala im temawer, "Ase samfer golmini". Jeiserem waakena ai ase samfer golmini gam ajewera gweyibenerem, aam temawer Uwa Sanbagiri Jei aamei is fwater destabaabil enggalfe aamei is jam waakentababisife. Jei aamei baabeta Mafnana Jelemanaiserem aamei ga is jem waakentababisini. Mafnana Uwa Sanbagirmana Jei ini imna is gwebaipmini jega ini imna tabalbalsusmer is gam ge folbamif. Aamei taterisi bunarsusfer aaiserem ijewera taabilirim, Uwa Sanbagiri Jei aamei ga is jem temawer waakentababisini. 14 Uwa Sanbagiri Jei aamei ga is jem temawer jenbebilint, Taterisi Waakena ai ajesa nasbinennentem jeme. Jei aamei ga is enggalf jenbebilint aamei jegme nafap gam igama gwef, Tuhan Yesus Kristus nafap aa gemer gwenaram. 15 Uwa Sanbagiri Jei ibe waakena unggwanfer is mes eyeipmini. Gam jega am afelen mesna, aamei ga kanaufer isa fina. Ane Taterisi Waakena ai ibe isa ajesa towas-towasulminintim, taterisi seyafter jeiserem ga jeter isa taabili, taterisi ai aaremem ajesa nasbabilirim, ane surtap ajesa tulistababilirim jes mese. 16 - 17 Uwa Sanbagiri, Uwa nemna, nes mes nesiktababili. Ane Jei waakena Jelemanaiserem nep nes mes golmini enggalfe ini nemna nes gam kanautabaipmif jamer abak-abaksus, ane enggalf mese nei bunarsusfer negama towaswef nei waakenaiserem ba nesa damtabili. Uwa Sanbagiriserem ane Tuhan nemna Yesus Kristus ai sembayanga Jep aya gwebamini, jega Jei ini imna is gam sege kanautabaipmini, ane Jei baabeta ip ga is sege golmini enggalfe aamei waakena seyafter gemerserem jem eyebaabif, ane taterisi waakena seyafter gemerserem jem igama nasbabif.

3

1 Umwef ga enggam am afelen mesna, aamei sembayanga am temawer jam isa gwebana, jega angtane unggwanfer taterisi Tuhanmana gamjon tatarmer ga sene sarbili, jegme taterisi jeiserem ga sene taabili, aamei gwanan igemera taabilirim. 2 Aamei sembayanga gamjon jam isa gwebana, Uwa Sanbagiri Jei ai as gase isinbaabisnenne waakenfer, jega angtane kakalsususerem jei abe kapkaiserem as jam ne eyeipmiyen. Ai jes gamserem gam ajewera gunurum, ai ga aam temawer aya gunu angtane unggwanfer jei taterisi Tuhanmana jam ne taabiyen, ane jei kapkaiserem ap ne eyeipmif. 3 Jengga Tuhan Yesus Jei jeber-jeber gam eyebili Jei aa jes bilirim jam eyebife. Jei ini imna is kanautabaipmini, ane Jei waakenfer is gerebaabisnenne Kabwaksusu Jeiserem jewer. 4 Ai Tuhan Yesuster aya tebana, ane ini amna unggwan-giri ase Jemniber ge folbamini im temawer, aam temawer aamei Yesus waakenfer imsa tebana. Ane ai alem inibe enggam aya gunu, ai ibe isa ajesa towas-towastabaipminintim ibe, aamei jeiserem waakenfer imsa sarbili, ane aamei ima onsobili. Ane aime enggam aya gunu, aamei taterisi ai ajesa tulistaabilirim surta aaiserem jebe, aamei taterisi aaiserem jes mese isa sarbili, ane ga isa onsobili. 5 Ai sembayanga Tuhanfe asa gwebabana enggalfe, aamei igama towaswef enggame Uwa Sanbagiri Jei aamei is uskambarsus nesiktababili. Ane enggalf mese aamei igama towaswef Yesus Jei baabeta is golmini, angtane kapkaiserem jam is jep ne eyeipminirim ibe. 6 Am afelen mesna, bosna Tuhan Yesus Kristusmanaiserem jeme, ai aamei ga isa ajama balbabili unggwanfer enggame, angtane kwaalaamitiserem awelnap jam naaweyanaiserem, aamei angtane jeiserem jemniwer iner jam isa bijausona. Angtane jeiserem jei taterisi ai isa ajesa towas-towasulminintim jam ne onsobiyen. 7 Ai ibar gwanan negalaba nwinintim, ai ajama kwaalaamitsweyan. Ane aamei iner imsa towaswena, aamei ga gemer isa gwena, aamei iner isa eyebili ai agemera eyebilirim. 8 Ai tumilgala angtane nafsimana ajama tombaabiyen, jengga jam agma armanulu. Gwerem ane gwinem ai awelnap agma gwena unggwanfer, jega apgal jigala ai ajesa balbabilirim jam damtabife, angtane imniwer jeiserem abe as jam ne armanulmiyen. 9 Aaiserem jeba bunaram, aamei iner imsa towaswena ai tumilgala imniwer samfer agma bili, jengga ai ajama bilyen. Ai awelnap agma gwena enggalfe ai tumilgala aner agma armanulf. Ai jeiserem ajewera eyebilirim, ai enggalf aya eyebili aamei igama gaarasif jega aamei awelna jem towasfar gam isa eyebili. 10 Ai gwanan ibar negalaba nwinintim, ai aamei unggwanfersus isa mesama towas-towastababili enggame, "Afa angtane awelnap jam gwefe baif gam gwenaram, angtane jeiserem jei safnant jam twenyan." 11 Ai jes gamserem gam isa ajewera tulisulminirim surta aaiserem jebe, ai ga aam temawer tulisulu angtane nafsi jei ai as enggam ne balbabili, angtane afweraiserem im nenennabe jei bai awelnap jam gwefe. Jei jafner gam wofena, awelna angtane nafsimanaiserem ga jes jep gam taayiwena. 12 Bosna Tuhan Yesus Kristusmanaiserem ai angtane kwaalaamiti jeiserem awelnap jam naaweyanaiserem ga ajema balbabili unggwanfer enggame, jeime jam ge kwaalaamitswebiyen, baabetmer se naawena. Jei awelna jamer gam naawena, jega jei tumilgala gam gane domola. 13 Ane aamei am afelen mesna, aamei baife ijama gweyan waakenaiserem jam eyebife. 14 Angtane afa jei taterisi aaiserem ai ajesa tulistaabilirim surta aaiserem jebe waakenfer jam sarbiyeneiserem, bosna jemna ga jam isa baatulbotena, ane jebar ijama betweyan jega enggalfe jei ga gam seferswena. 15 Jengga aamei jei enggam ijama gwebayan ginanggwana gamserem, jengga aamei jei jafner igma esoroltana ilem afelna gamserem. 16 Tuhan Yesus Jei ini angtanemana se gwebaipmini enggalfe, ini jemna waakenfer gam ge folbamif. Jega jem temawer ai sembayanga Tuhanfe ga asa gwebabana, Jei ini imna is gase gwebaipmini jega ini imna waakenfer is ga sege folbamuwena gwela imna seyafter gemerserem jeme. Ane ai sembayanga asa gwebana Tuhan Jei ibar gam isa gwena aamei seyafter gemerserem. 17 Ai Paulus, ai taterisi aaiserem ga aner tulisulu: |bAi ga is enggam ai balbabili, kelek, waakenfer sa gwe!|r Ai aner jes gamserem gam ajewer tulisulurum, jega enggalf igama towaswef surta aaiserem ba amniweram. 18 Ai sembayanga asa gwebabana Tuhan Yesus Kristus, Jei waakena Jelemanaiserem ip is gase golmini aamei seyafter gemerserem.