12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Petrus

1

1 Ga ip, aamei angtane Kristus iJeya tebanaram, ai agemera tebanaram. Yesus Kristus Jeiba Uwa Sanbagiri nemnam. Jei jeber-jeber waakensusfer eyebuwena, ane Jeiba nei nes gemeram waakentababisiwena. Jei Jener waakenfer mesam eyebili, jega ai Kristus amsama tebana, ane jega jem temawer ai waakenfer gam asa gwena. Ane Uwa Sanbagiri Jeime waakenfer eyebili, jega aamei Kristus imsa tebana, ane gwela imna ba waakenam, amna gamserem. Surta aaiserem amniwer, Simon Petrus. Yesus Kristus Jei ams destabana ai rasulf gwefe, ane ai awelna Jemna gam as gweyibene. 2 Aamei Uwa Sanbagiri ane Yesus Tuhan nemna, imsama damdamtaasini waakenfer. Ane ai Uwa Sanbagirfe sembayanga as gwebabana, jega aamei Uwa Sanbagiri galap ga isa damdamtaasini unggwanfer. Ane jega jem temawer Uwa Sanbagiri Jei waakena Jelemanaiserem ip ise golmini unggwanfer, ane Jei ini imna samfersus is ga sege folbamini. 3 Baabeta Uwa Sanbagirmana ba unggwandwasusum, ane baabeta Jelemanaiserem jeme, Jei mes eyebili jega nei Yesus Kristus nemsa damdamtaasini. Ane jega jem temawer, Jei apgal jigala seyafter gemerserem nes mesam kitulmini enggalfe, gwela nemnaiserem nei waakensus nesa gwena, Uwa Sanbagiri aa jes bilirim ga jetefener nesa eyebili. Uwa Sanbagiri Jei nes mes jenbebili, jega nei baabeta yo gwela waakena Jelemanaiserem ga nesa domsona Jebaner. 4 Ane baabetdusa Jelemanaiserem jeme, Uwa Sanbagiri waakensususerem nebe seyafter nes mes kitulmini, Jei nebe nes jes bilipminirim. Angtane Kristus jam tebayanaiserem, ini jemna unggwan-girfer ga gangge folbamini kapkaiserem jam eyebife, maaryen mese jam ne eyebife, ane jega jem temawer gwela jemnaiserem ga kabwaksusfer gam falmini. Jengga afa aamei jam isa tebabilirim seyafter Uwa Sanbagiri nebe nes jes bilipminirim, afa ga gam, gam jega aamei samfer gam isa irfwena kapkaiserem jam eyebiliserem jewer, kapkaiserem ini imna unggwan-girfer is jep ge folbaminirim jam eyebife. Ane aamei Uwa Sanbagirfar daamfennaber ga isa gwena, gwela imna ga gwela Uwa Sanbagirmana gemerserem. 5 Uwa Sanbagiri seyafter jeiserem mesam eyebili im temawer. Ga jem temawer aamei ga uskambar isa unggwasa enggalfe, aamei Kristus ijewera tebanaram, aamei jegme gamjon waakenfer gam isa gwena. Ane aamei waakenfer ijewera gwenaram, aamei gamjon ga isa etamwena angtane towasfe. 6 Ane aamei angtane towasfe ijewera gwenaram, aamei gamjon in ina jam isa gaaramisnenne waakenfer, jega kapkaiserem ini imna is jep ge folbaminirim jeiserem jam eyebife, aamei seyafter jeiserem ijama eyebiyen. Ane aamei in ina waakenfer jam isa gaaramisnennerem, aamei gamjon kanaufer gam isa fina aamei kabwaktala jam ijeba domolaram. Ane aamei kanaufer jam isa finaram, aamei gamjon ga Uwa Sanbagiri aa jes bilirim aamei ga jetefener isa eyebili. 7 Ane aamei Uwa Sanbagiri aa jes bilirim jam isa eyebilirim, aamei gamjon im afelen mesna Yesus aa jei ne tebanaram ga jes isa nesiktababili. Ane im afelen mesna jam isa nesiktababilirim, aamei gamjon ga angtane seyafter gemerserem ga isa nesiktababili. 8 Afa aamei jes gemerserem gam jam isa gwenaram, nele waakena seyafter jeiserem jam isa onsobaabilirim, ane afa aamei namwer nele waakena jeiserem bastowaifer jam isa onsobaabilirim, jengga galap aamei nele waakena jeiserem unggwanfersus gamjon ga isa onsobaabili, afa ga gam jes gemerserem, gam jega aamei ga jem isa gwerauwulu enggame, aamei Tuhan nemna Yesus Kristus bunarsusfer ima damdamtaasiwena. Ane afa aamei nele waakena seyafter jeiserem jeter jam igama onsobaabilirim, gam jega awelna Yesusmana ijesa gweyibenerem, awelna jemnaiserem jeba igiberem, jam elsiyen. 9 Angtane jam gwelaiserem nele waakena seyafter jeiserem jam onsobiyeneiserem, angtane jeiserem jei ga enggala angtane nwe kofa galserem, aam temawer jei Yesus jam damdamtaasiyen. Ane jei mes gam dirinswena enggame, Uwa Sanbagiri etam-etama kapka jemna ba mesam wirtabaibene, etam-etama jei gwanan aa jes gam eyebilirim. 10 Am afelen mesna, Uwa Sanbagiri Jei is mesam jenbebili, ane Jei aamei is mesam destabaabili aamei Jem angtanef gwefe. Ga jem temawer ini imna seyafter gemerserem jeme, aamei ga uskambar isa unggwasa jega enggalf, aamei gamfener isa gwena Uwa Sanbagiri aa gemer gunurum aamei igama gwefe. Afa aamei jam isa onsobilirim nele waakena seyafter jeiserem ai sagawer ajes tulistaabilirim, afa ga gam, aamei Yesus jam tebalawer ijama irfweyan. 11 Afa aamei jes gamserem gam jam isa gwenaram, nele waakena seyafter jeiserem jetefener isa onsobilirim, Uwa Sanbagiri aamei ga is balbabili ini saaser-saasermer, aamei taman waaken-girip ijama kawetefe. Yesus Kristus Tuhan nemna nei nes Jei waakentababisiwenaram, baabetabara ga Jei se nwini Sanbakfe taman waaken-giri jeiserem jebe, jamer abak-abaksus. 12 Taterisi jeiserem sagawer ai ajes tulistababilirim, aamei seyafter jeiserem imsama towaswebili, ane taterisi bunarsusfer Uwa Sanbagirminiwer aaiserem, aamei taterisi jeiserem kanaufer imsama taabili. Safe gam, ai enggam as mwangbisini, ai taterisi seyafter jeiserem ai isa jeber-jeber as towas-towasulmuwena jega aamei waakenfer gam isa sarbabistaabonwena. 13 - 14 Tuhan Yesus Kristus Jei ai as mes towastana enggame, abakefyan ai ga as tere. Jega jem temawer ai enggam ai gunu aaiserem jeba waakenam ajes eyebiliserem, ai gemer agalaber gwenaram, ai jeber-jeber ga isas towas-towasulmuwena taterisi seyafter jeiserem ga jem temawer. 15 Ai uskambar as unggwasa, jega ai ajep tererem, aamei taterisi aaiserem ai isa ajes tulistaipminirim ibe, taterisi seyafter jeiserem ga jeber-jeber gemer ga isa sarbabistaabonwena. 16 Taterisi ai ip isa ajesa towasulminintim Tuhan nemna Yesus Kristusem temawer ga enggam: Yesus Jeiba baabetabaram, ane Jei galap gamjon se forsanya. Ai taterisi jeiserem ibe isa agalaba towasulminintim, jes galapserem ai noftitini angtane jener aa jes ne towaitababuwenaram, ai noftitini jeiserem ibe isa ajama nasbaipmiyen. Fas. Jengga nafdusa Yesusmanaiserem aa galap ertenentem ai alem nweme anera domolant, ane ai taterisi jeiserem ga isa jetefener aya towas-towasulminint ibe. 17 - 18 Ai gwanan Yesusfar taaren sagap agalaba nwinintim, taarena Uwa Sanbagiri aa jes destabalam enggalfe Yesus jep gaarteyafe, jes galapserem taterisi Uwa Sanbagiri anera sarbilint alem imwame. Taterisi jeiserem taman waaken-giriwer jelant. Jes galapserem Uwa Sanbagiri, Uwa nemna, Jei nafdusa Yesusf gulbanant, ane Jei Yesus uskambar gaartenant. Uwa Sanbagiri Jeiba nafabaram, ane baabeta Jemna ba unggwandwasusum, ane Jei Yesusem temawer enggam gununt, "Tane aaiserem ba Amnam Ai Ajes nesiktenerem. Jei ini Amna gam saaser-saasertabana." 19 Nabi Uwa Sanbagirmana jei taterisi Yesusem temawer fwater mes ne tulistababil, ane ai seyafter jeiserem amesa domolant, ane ga aya sarbilint. Jega jem temawer namwer aas jepserem ai kanaufer asa tebabili enggame, taterisi seyafter nabi aa jes ne tulistaabilim jeba bunaram. Ane ai enggam aya towaswebili, taterisi nabi gwanan aa jes ne tulistaabilim, seyafter jeiserem gase tabanswesa. Ane ai enggam aya gunu, afa aamei taterisi nabimanaiserem waakenfer jam isa sarbabilirim, aamei jem temawer waakenfer ga isa eyebili, aam temawer taterisi jemna jeba lampunu jam ertele jes gamserem, gwini ogiri aaiserem jebe. Aamei taterisi nabimana ga waakenfer isa sarbabili, jamer nunu Tuhan nemna Yesus Kristus gamjon se forsanya, ane Jei ilem inibe gase eyebili, jega aamei Uwa Sanbagiri waakenfer ga isa damdamtaasisi. Je ga enggam gwer nafa im inip is ga gangge folbaminirim. 20 Taterisi igsususerem ga aas, aamei ga waakenfer isa sarbili: Angtane afa fas jei Taterisi Uwa Sanbagirmana nabi aa jes ne tulistaabilim jentowai jam sarbife, jengga Uwa Sanbagiri Jei angtanes gam batobana enggalfe, jei Taterisi Uwa Sanbagirmana waakenfer ga gam sarbili. 21 Angtane afa fas jei Taterisi Uwa Sanbagirmana jentowai jam saribefe, aam temawer nabi-nabi Uwa Sanbagirmana jei jener fas jam ge gubiyen jei jes ne nasipmife, jengga Mafnana Uwa Sanbagirmana nabiminip ge kabwitel, jega nabi Taterisi Uwa Sanbagirminiwer gane nasipmif.

2

1 Gwanan jes galapserem nabi ol kapkaiserem jei angtane Yahudimanaiserem jem nenennap ge nwinbel. Jes gemerserem guru-guru ol kapkaiserem jeime gemer jei sege forobuwetya, im nenennabe ga sege nwinbene. Guru ol kapka jeiserem jei taterisi afaf-afafaiserem ane Taterisi Waakena Uwa Sanbagirmanaiserem jebaner ga sene dupduptababisi jam ne towas-towastabafe, ane jega jem temawer angtane taterisi jemna aa jei ne onsobilirim jei Yesus jam ne tebayan. Guru ol kapka jeiserem jei Tuhan Yesus Kristus ga sene baanbaanwebafa, enggam sege gubifi, "Taterisi tere Yesusmana jem temawer enggalfe etam-etama amnaiserem jam wirtabaabife, ane enggalfe Jei ai as jam waakentababisiliwer, taterisi jeiserem ba ol kabwaksam." Jei Yesus gam aa jewer ne baanbaanwebanaram, jemna igiserem ga enggam, Uwa Sanbagiri Jei guru ol kapka jeiserem ga aafer-aafer gase wasfertababili. 2 Angtane unggwanfer enggam naawena maaryens sene gwebabuwena, guru ol kapka jeiserem jei gamserem jei aa gemer naawenaram maaryens ne gwebife. Ane jega jem temawer angtane gwela Yesus jam tikwebaatiliserem ga sene imei-imeitababili, gwela bunarsusfer jeiserem. 3 Guru ol kapka jeiserem ini jemna unggwan-girfer ge folbamini doim temawer, ane jega jem temawer jei ibe ga isene nasbaipmini taterisi afaf-afafaiserem jener aa jes ne towaitababilirim, jega enggalf jei doini gane tebabife imniwer. Jengga Uwa Sanbagiri Jei fwater gwanan mes mwangbisil angtane jeiserem jam tamtamtababife, ane Jei bunarsusfer guru ol kapka jeiserem abakefyan gase wasfertababili. 4 Nei nesa towaswebili enggame, Uwa Sanbagiri Jei angtane kapkaiserem aa jei ne eyebilirim gase wasfertababili, aam temawer malaikata kapkaiserem aa jei ne eyebilim, Uwa Sanbagiri Jei malaikata jeiserem fas Jam aftabunnyon tamtamtalawer, jengga Uwa Sanbagiri Jei malaikata jeiserem ga aa fasawolwil tamna gwin-gwinsususerem jebe, jep ga aa ge kabwitel enggalfe jei jep gam tebabisif, jamere nunu Uwa Sanbagiri malaikata jeiserem aa jep tenebaabuwesaram, ane jep ga tamtamtababisi. 5 Jes gemerserem aaiserem jegme gemer, angtane gwananmanaiserem etam-etama aa jei ne eyebaabuwelam, nunu Nabi Nuh aa galap gwelam ogiri aaiserem jebe, jes galapserem Uwa Sanbagiri Jei angtane jeiserem fas Jam aftabunnyon tamtamtalawer. Jengga Uwa Sanbagiri Jei fanamodusa ga aa bil jam suwefe ogiribe, ane angtane jeiserem Uwa Sanbagiri jam onsobiyeneiserem, jei ga aa ge albitil, futu. Jengga Nabi Nuh aa jes nasbilim angtane ga aa sene eyebili Uwa Sanbagiri aa jes bilirim jam eyebife, ane angtane nafsi unggwanfer ga tuju jes mese, Uwa Sanbagiri Jei angtane jeiserem ga jetefener waakentababisil. 6 Ane jes gemerserem aaiserem jegme gemer, angtane kabwaksususerem aa jei ge nwinbelem kota Sodomo kota Gomora je, Uwa Sanbagiri Jei angtane seyafter jeiserem ga aa wasfertababil jamer fus, tokwame. Uwa Sanbagiri Jei angtane jeiserem ga aa munbobil enggalfe, negama towaswef enggame bai se etamwemisi angtane kabwakfer aa jei naawenaram jemnibe. 7 - 8 Jengga Uwa Sanbagiri Jei angtane bosna Lot ga jes waakentaasil, aam temawer jei Uwa Sanbagiri aa jes bilim ga jes onsobil. Lot jei ga gwel kota Sodom je, angtane kabwaksususerem jem nenennabe. Jei maaryena uskambar ne gwebuwel, ane jei hukumu jemna ga aane ayebil. Ane nunu jeber-jeber Lot, angtane waakena jeiserem, jei angtane jeiserem ga aa gerebaabuwel, angtane kabwaksususerem aa jei naawelam. Ane Lot jei taterisi jemnaiserem ga aa sarbabisnenel, taterisi kabwaksususerem aa jes ne nasbabinenelem. Ane jega jem temawer Lotmana ini waakenaiserem ga jenbal uskambar. 9 Taterisi seyafter jeiserem malaikata kapka ane angtane kabwaksususerem jem temawer, taterisi jeiserem ga nes mes gweraulmini enggame, Tuhan Jei baabeta gam domola enggalfe angtane waakena jem waakentababisife, jei kabwaktala aa galap ne damtabilirim. Ane taterisi jeiserem ga nes mes gweraulmini enggame, Uwa Sanbagiri Jei baabeta gam domola enggalfe angtane kapka jem tebabisif taman tamtamtalabe, jamere nunu umwef jemserem Uwa Sanbagiri angtane aa jem waksosisirim, ane angtane kapka aa jei ne eyebilirim gase tamtamtababisi. 10 Uwa Sanbagiri Jei nabal-nabalsusu ga angtane aas galserem gase tamtamtababisi: angtane kapka aa jei ne eyebuwenaram, etam-etama kapka ini jelemana unggwan-girfer aa gemer gangge folbaminirim jam eyebife, maaryen mese jam ne eyebife. Ane Uwa Sanbagiri Jeime nabal-nabalsusu angtane aas galserem ga jes tamtamtababisi: angtane baabeta baif aa jei ne gwebilirim, baabeta Uwa Sanbagirmanaiserem, ane baabeta angtane sanbakf aa jei naawenaram jeman mesna. Guru ol kapka jeiserem jei jen jena gane detenanna, jei jam ge erebiyen kapkaiserem jes nasbinennefe malaikata taman waaken-girip aaiserem jem temawer. 11 Guru ol kapkaiserem jemna baabeta bastantowaifer, jengga baabeta malaikatmana ba uskambarsusum. Safe gam, malaikata baabetsususerem Tuhanem tarnap aa jei ge fibilirim, jei enggam jam aa galap ge gubilirim guru ol kapka jeiserem jei kapkaiserem mes ne eyebili, jes galapserem malaikata jeiserem jei guru ol kapka jeiserem jam ne imei-imeitababiyen. 12 Guru ol kapka jeiserem jei taterisi imei-imeitalaiserem jes ne nasbabili, taterisi jei waakenfer jam ne sarbiyeneiserem jem temawer. Jeiba twena onnemana jes galserem. Twena onnemana jei jafner gam eyebili, jei fas jam sarbistaabonyan jelem inibe. Guru ol kapkaiserem jeime gemer jafner gane eyebili, jei fas jam ge sarbistaabonyan jelem inibe enggame, "Ai ajesa eyebilirim jeba waakenam, afa kapka." Twena onnemana enggalf gam surnu, angtane jei gane tebaf, ane gane munbof enggalfe jam tombaf. Ane Uwa Sanbagiri guru-guru ol kapkaiserem jegme gemer gase munbobili jamer wasfer. 13 Jei kapkaiserem ga jes ne eyeipmini angtanefe, ane jega jem temawer Uwa Sanbagiri Jei kapkaiserem gase eyeipmini guru ol kapkaiserem jebe. Etam-etama kapkaiserem seyafter gemerserem ini jelemana unggwan-girfer aa gemer ge folbaminirim jam eyebife, jei seyafter jeiserem ga gwerem gane eyebili angtanem nwenabe, ane ini jemna jem temawer saaser-saaserfer gangge folbamini. Aamei jam igalaba betwenaram jam twenfe, angtane afaf-afafa jeiserem jei ga aa ge jalbili, aamei seyafter jebaner ga ima twena. Ane jes jepserem jei kapkaiserem ga jes ne eyebili. Jei kapkaiserem ga enggam ne eyebili: Jei twentwen faarena, ane syefer gangge nasbawena, ane jei maaryenem temawer jam ge nasbawena, jengga jei jam ge seferswebiyen. Jei aa jes ne eyebilirim, jei ga safna imna is jem ne kabwaktabaipmini, bubwa ninsini kapka jes galserem. 14 Guru-guru ol kapka jeiserem jei bai etam-etamawer jam ge tikwebife. Ini jemna unggwan-girfer enggam gangge folbamini, maaryens ne gwebuwef wini seyafter gemerserem jebar. Jei angtane Yesus kanaufer jam tebayanaiserem enggalfe ga aane malin-malintababili, etam-etama kapka jebaner seyafter gane eyebif. Ini jemna jeber-jeber unggwan-girfer enggalf gangge folbamini, apgal jigala gamjon jam ne tebabif. Uwa Sanbagiri Jei bunarsusfer mesam mwangbisil enggalfe, Jei guru-guru ol kapka jeiserem jam tamtamtababife jamer wasfer. 15 Jei baif naawena nele Uwa Sanbagirmana nornorsususerem jam ne onsobafe, ane jei ga jam ge towaswebiyen fomfom se naawena waakenfer. Jei ga nele aas ne gaarswenni, nele Bileyam, tane Beyormanaiserem, jei gwanan-gwanansus aa jes onsobalam. Bileyam jei ga enggam gul, jei doini jam taabif etam-etama kapkaiserem jam eyebife jem temawer. 16 Jengga Uwa Sanbagiri Jei Bileyam uskambar enggam uftal etam-etama jelemanaiserem jewer: Keledai jemna gwanan jam nasoweyanaiserem, keledai jeiserem jei ga nasowel taterisi angtanemanaiserem jeme, ane keledai jeiserem game aa jewer nasowelam, Uwa Sanbagiri Jei Nabi Bileyam ga jem tergenbal etam-etama fafal-fafalawer jam tikwefe. 17 Guru jeiserem jeiba fo mwa tetena galserem. Jei omyana galserem, nei omyana negama domsobana unggwanfer jengga arouwa jam nyenyan, deye giri omyana ga gam fonsobana. Ga jem temawer Uwa Sanbagiri Jei tampata gwin-gwinsususerem mes menetulmisil enggalfe, guru-guru ol kapkaiserem jei jep ge nwinbefe. 18 Guru ol kapka jeiserem jei jen jena ga aane detenanna, ane jei ga taterisi igyeneiserem ga jes ne nasipminenne. Jei angtane Yesus namwer aa jei ne tebanaram syefer ne towas-towastababuwena. Jei enggam gane towas-towastababili, "Etam-etama kapkaiserem ini ilemana unggwan-girfer is jep ge folbaminirim jam eyebife, aamei seyafter jeiserem samfer isa eyebili." Jei jes gemerserem gam aa jewer ne towas-towastababilirim, jei angtane ga jem ne malin-malintababili, jega enggalf jei gangge tikwebif Yesus jam tikwebaatiliwer. 19 Guru-guru ol kapka jeiserem jei safe etam-etama kapkaiserem jem isinbaasnenele, jei safe kapkaiserem jes ne eyebili jemna ini unggwan-giri aa jep ge folbaminirim jam eyebife, safe gam, jei enggam ne towas-towastababuwena, "Afa aamei jam isa onsobanaram nele jam gwelaiserem amna, gam jega aamei ga isene aftabunnu Hukumuwer, aamei gamjon is jam isinbaabisneneyen." Jengga ga enggam, angtane jei kapka tefner gam eyebilirim, jei ga mes isinbaasnenne etam-etama kapkaiserem jeme. 20 Angtane ogirmana kapkaiserem aa jei ne eyebilirim, gwela jemna mes kabwakswemini. Jengga angtane Tuhan nemna Yesus Kristus aa jei ne tebanaram, Jei nes waakentababisinirim, angtane jeiserem jei mes ne aftabunnu etam-etama kapka jewer ini jemna unggwan-giri aa jep ge folbaminirim jam eyebife. Jengga afa jei gamjon jam gangge waraubilirim kapkaiserem jei gwanan aa jes ne eyebuwenantam jebe, ane ga jetefener gam eyebili kapkaiserem ini jemna unggwan-giri aa jep ge folbaminirim jam eyebife, afa ga gam, gam jega gwela jemna gamjon mes kabwakswemini, uskambarsus gwananmanaiserem jemniwer. 21 Angtane afa nele waakena Uwa Sanbagirmanaiserem jam towaswebayana, jeiserem ba kapkam. Jengga angtane afa taterisi Uwa Sanbagirmana jam gam towaswebabanaram, taterisi gwela nele waakenaiserem jem temawer, ane afa angtane jeiserem taterisi Uwa Sanbagirmana jeiserem jei baif jam gam gwebilirim, ane jei gamjon jam gam warauwaram gwela kapka jei gwanan aa gemer gam gwenaram jebe, afa ga gam jes gemerserem, jeiserem ba kabwaksusum. Angtane jeiserem uskambarsus gase tamtamtababisi angtane jem towaswebiyeneiserem jemniwer. 22 Angtane jeber-jeber ga enggam gangge nasbawena: "Gwalna jei gamjon gam tombaabili, gwanan jena aa jes gam taunaram." ane "Twena jam wirtalaiserem, jei gamjon ga gam irfwefwena betekabe." Taterisi jeiserem ba bunaram angtane Taterisi Uwa Sanbagirmana aa jei gam saribenerem, ane gamjon baife gam gweyibene ga jem temawer.

3

1 Am afelen mesna ai isa ajes nesiktababilirim! Surta aaiserem ga naurabaraiserem ai isa ajes tulisulminirim ibe. Surta gwananmanaiserem ane surta aaiserem jep mese, ai enggalf ai tulisulu, jega aamei ini tabalmer igama sarbistaabonwef, taterisi aamei ijesa towaswebilirim. 2 Ini amna as enggam folbana aamei ijama sarbabistaabonwef taterisi nabi-nabi Uwa Sanbagirmanaiserem gwanan-gwanansus aa jes ne nasbabinenewelam, ane taterisi Tuhan nemnaiserem Jei aa jes bilintim jes mese ga jam isa sarmistaabonwena, Tuhan Yesus nei nes Jei waakentababisinirim. Ane Rasulu ga taterisi jeiserem ip ga is jei ne nasipminennent. 3 Taterisi igsususerem ga aas, aamei taterisi aaiserem ga waakenfer isa sarbili: Nunu umwef aa jep falsaram, Yesus nalef Jam foroyan, angtane afweraiserem jei ga aamei ga isene bisobaabisi. Angtane jeiserem jei kapkaiserem ini jelemana unggwan-girfer aa gemer ge folbaminirim jam ne eyebife, jei kapka jeiserem ga sene eyebisi. 4 Jei aamei enggam ga isene bisobaabisi, taterisi enggam aaiserem jeme, "Yesus Jei fwater aamei enggam is mes bilipminint, Jei gamjon se fortya, jengga Jei fofa? Jei Jam foroyan. Iye uwa nemnaiserem jei mes ge terbili, jengga Uwa Sanbagiri ogiri aaiserem jam aa galap eyebalam, jes jepserem ga jep towaiwel, jamer namwer aas jepserem, apgal jigala seyafter gemerserem gemer ge falbili, ane Yesus Jei fas gamjon Jam foroyan." 5 Angtane jeiserem jei jener enggam ge gubili, "Ai Taterisi Uwa Sanbagirmana gwanan aa jes tulisulum, ai taterisi jeiserem ajama dirinswebif." Jei aa jes ne dirinswebilirim ga aas: Gwanan-gwanansus jes galapserem Uwa Sanbagiri Jei jafner nasowel, ane winsi yo ogiri ga aa ge etamwel. Jei ogiri fonawer eyebal, ane fome gam eyebal. 6 Ane seyafter ogirip gwanan aa jei ge falbilim ga aa ge wasferwebil fome, fanamona unggwandusaiserem aa galap tilim. 7 Jengga winsi yo ogiri namwer aas jepserem aa jep nulnaram, winsi yo ogiri ga gemer nulna Uwa Sanbagirem oleme, jega enggalf galap gam wasfertababisif tokwame. Winsi yo ogiri gemer gase nulna jamere nunu angtane Uwa Sanbagiri jam tebayanaiserem jei jem teneba-tenebaabuwefe, ane jes jepserem gase wasfertababisi. Jes jepserem Uwa Sanbagiri Jei winsi yo ogiri aaiserem gase dososa, jamer fus. Angtane aamei is jei ne bisobaabuwenaram, jei taterisi seyafter jeiserem mesam dirinswebili. 8 Jengga aamei, am afelen mesna ai isa ajes nesiktababilirim, taterisi daamfenna aaiserem ijama dirinswebiyen, taterisi daamfenna aaiserem ba igsusum: Tuhanem inibe, nunu daamfenna ane tahunu 1.000 jeba numu daamfennam. Tahunu 1.000 ane nunu daamfenna jei nawersamer galnaunater Tuhanfe. 9 Angtane afweraiserem syefer enggam ge gubili, "Uwa Sanbagiri Jei mes bilipmil enggame, Yesus Jei gamjon se fortya. Jengga Uwa Sanbagiri Jei abakfer fina Yesus gamjon Jam baftafe." Angtane gam aa jei ge gubilirim, jei kabwakfer ge nasbawena. Uwa Sanbagiri Jei aa jes bilipmilim, Jei samem-samem Jam eyebiyen. Ga enggam, Yesus Jei gemerje Jam foroyan, aam temawer Uwa Sanbagiri Jei ims fyebabili, jega aamei seyafter gam isa irfwena etam-etama kapka ilemanaiserem jewer. Jei bai gwena angtane jam tamtamtababife jamer wasfer, jengga Jei enggam gunu angtane seyafter gemerserem etam-etama jelemanaiserem jewer jam ge tikwebif. 10 Bunarsusfer Uwa Sanbagiri Jei ims fyebabili, jengga nunu Jei Jena jam aa jep bilirim, Yesus Jei aafer-aafer gase fortya, jes jepserem angtane fasfasus jam ge towaswebiyen, angtane komkoma aa gam fortyaram, angtane jam ne towaswebayan jes gamserem. Jes jepserem winsi gase barwesa tisna uskambarsus jeme. Ane apgal jigala seyafter gemerserem winsip aaiserem ga sege taabisi tokwanabe jamer fusfusus, ane ogir mese ane apgal jigala ogirip seyafter gemerserem ga sege taabisisi jamer barbarsus. 11 Bunarsusfer Uwa Sanbagiri Jei apgal jigala seyafter gemerserem gase wasfertababisi jeiserem jes gemerserem, ga jem temawer aamei ga fom isa gwena? Aamei ga waakenfer isa gwena ini tabalmer, ane Uwa Sanbagiri aa jes bilirim ga jetefener isa eyebili, 12 aamei nunu gemer ijeba fibilirim Uwa Sanbagiri aa jes bilirim Yesus Jem foryafe. Ga waakenfer isa gwena enggalfe Yesus tatarfer gam foryaf. Nunu Yesus aa jep forsanyaram, winsi gase giransisi jamer fus. Tokwana sarsaraiserem jeme, apgal jigala winsip aaiserem jei ga sege etamwebisi fona gamserem. 13 Jengga nei Yesus nejeya tebanaram, nei ga jes nesa fibili Uwa Sanbagiri nes jes bilipmilim nebe. Jei nei jes bilipmilim ga aas winsi ibirmiyo ane ogiri ibirmiserem. Winsi yo ogiri ibirmiserem jep ga angtane enggalaiserem ga jenefener sege nwinbese, angtane Uwa Sanbagiri aa jes gam bilirim jam eyebife jei aa jei gane eyebilirim. 14 Ga jem temawer, am afelen mesna ai ajes nesiktababilirim, aamei nunu gemer jam ijeba fibilirim seyafter jeiserem jem ge etamwebiliserem, aamei enggalf ga jam isa unggwasa ini imna seyafter gemerserem jeme, jega aamei jafner gam isa eyebili Uwa Sanbagiri aa gemer bilirim aamei igama eyebife, ane jega ini imna Uwa Sanbagirfar waakenfer is ga sege folbamini. 15 Gasa sarbistaabon, Tuhan nemna Jei angtanes waakentababisif, ane jega jem temawer Jei angtane gemer fibabili Jems tebafe. Rasul Paulus nem afelnaiserem nei nejesa nesiktenerem, jeime ibe is mes tulisulminint jes gemerserem, tousaiserem Uwa Sanbagiri jei aa jes gulbanaram jeme. 16 Jem surtap seyafter aaiserem, Paulus jei jeber-jeber tulistaipminint tousaiserem Uwa Sanbagirmanaiserem jeme, jei taterisi Yesus jam foryalaiserem jem temawer aa galap tulisulminintim, ane taterisi gwela waakena jem temawer jes mese. Taterisi afweraiserem jei aa jes tulisulurum, jeba taterisi orolemanam, ane jega jem temawer angtane masef waakenfer jam ne sarbiyen. Ane angtane teisyenaiserem, ane angtane Yesus waakenfer jam tebayanaiserem jei jam ne eyebili jega enggalf, taterisi Paulusmana jeiserem gofgofulu. Ane angtane jeiserem jei Taterisi Uwa Sanbagirmana afweraiserem jes mese gam ne gofgofulu. Uwa Sanbagiri Jei angtane jeiserem gase wasfertababisi. 17 Am afelen mesna ai isa ajes nesiktababilirim, aamei imsama towaswena enggame guru ol kapkaiserem jei ims ne afaftababif. Ga jem temawer, aamei ga in ina waakenfer isa gaaramisnenne, jega angtane afaf-afafa jeiserem aamei is jam ne aftabifelyen kapkaiserem igama eyebife. In ina ga waakenfer isa gaaramisnenne, jega aamei fas ijama irfwebiyen taterisi Uwa Sanbagirmana bunarsusferaiserem jam onsobiliwer. 18 Namwer aamei imsa towaswena bastowaifer enggame, "Tuhan Yesus Kristus nei nes Jei waakentababisinirim, Jei waakena Jelemanaiserem nep nes mes golmini. Jeiba nem Sanbakfam gwena." Ane aamei bastowaifer Yesus imsa damdamtaasini. Jengga aamei ga enggamfener isa gwena, jega enggalf aamei galap uskambar gam isa towaswebili enggame, "Yesus Jei waakenaiserem ga nes jetefener golmini nebe." Ane aamei ga enggamfener isa gwena, jega enggalf aamei galap Yesus gam isa damdamtaasiwena uskambar. Tuhan Yesus Kristus Jeiba baabetabarsusum ane Jeiba sanbagirsusum! Au, nei Jei ganma pujite, aas jepserem jamer abak-abaksus! Amin.