2 Korintus
11 Ga ip, Safna Uwa Sanbagirmana kota Korintus je, ane angtane Uwa Sanbagirmana seyafter gemerserem propinsi Akaya je. Surta aaiserem amniwer, Paulus. Uwa Sanbagiri Jei ai ase Jener destabanant ai rasulf gwefe. Jei ams baftanant enggalfe, ai Taterisi Waakena Kristus Yesusem temawer ai agam nasipminennef. Timotius, nem afelna, jeime surta aaiserem ga ajebaner ge baafulu. 2 Ai sembayanga as ge gwebabana Uwa Sanbagirfe, Uwa nemna, ane Tuhan Yesus Kristus mese, Jei waakena Jelemanaiserem ip is ga sege golmini, ane Jei ini imna is sege gwebaipmini waakenfer is ga sege folbamini. 3 Au, nei Uwa Sanbagiri ganma pujite! Jeiba Tuhan nemna Yesus Kristusem Jetam. Uwa Sanbagiri Jei nems nesiktababili, aam temawer ini Jemna waakena. Jeiba Uwa Sanbagiriserem Jesam Jeiba angtane jeber-jeberam batobaabuwena, ane Jei ini angtanemana Jeyam kanautabaipmuwena. 4 Uwa Sanbagiri ini amna as jei se kanautabaipmini ai kabwaktala jam ajeba domolaram jega enggalf, aime angtane nafsi kabwaktala aa jei ne domolaram ini jemna gam asa kanautabaipmini, jes gamserem Uwa Sanbagiri Jei ini amna as gemer kanautabaipminirim. 5 Ai Kristusfar daamfennaber ajewera gwenaram, ane jega jem temawer ai tamtamtala uskambar aya domolwena, jes gamserem Kristus Jei tamtamtala uskambar gwanan aa gam domolwenaram. Ane Uwa Sanbagiri ini Kristusmana aa gemer kanautabanaram, Uwa Sanbagiri Jeime ini amna as gemer kanautabaipmini, ai Kristusfar daamfennaber ajeya gwenaram. 6 Ai tamtamtala jam agma domolaram, tamtamtala jeiserem ga enggalf agma domola, ai ini imna is agma kanautabaipmif, ane ga enggalf Uwa Sanbagiri Jei gwela imna jeber-jeber is gam waakenulmisif. Ane ini amna jam ajeba kanautabaipminirim, gam jega ai ini iman mesna is asa kanautabaipmini, jega aamei tamtamtala jam ijeba domolaram, tamtamtala ai agalap ma domolaram, aamei kanaufer gam isa fina. 7 Ai ini amna seyafter gemerserem jeme, ai enggam amsama towaswena im temawer, aamei kanaufer isa fina aamei tamtamtala jam ijeba domolaram. Ai amsama towaswena aamei kanaufer isa fina, aam temawer ai amsama towaswena aamei tamtamtala jam ijeba domolaram, Uwa Sanbagiri Jei ini imna ga is kanautabaipmini, Jei ini amna as gemer kanautabaipminirim. 8 Am afelen mesna, ai enggam aya gunu kabwaktala uskambarsus ai ajesa domolaram propinsi Asyaminibe, ai kabwaktala jeiserem jem temawer ai isa ajama towastababif. Kabwaktala ai ajesa domolaram, kabwaktala jeiserem tamtamsusu, kabwaktala jeiserem unggwandusa baabeta alemanaiserem jemniwer. Ini amna ase uskambarsus ge jenbamini jamere ai ga aya gunu enggame, "Ai gamjon ajama gweyan. 9 Kabwaktala jeiserem ai bunarsusfer enggam aya enola jam tere gamserem." Bunarsusfer ga enggam, kabwaktala seyafter jeiserem ai ajesa domolaram ga enggalf aya domola, ai agma towaswef ai kabwaktala jeiserem baabeta alemanaiserem jem ajama fibiyen, jengga baabeta Uwa Sanbagirmanaiserem ga ajema fibili, Uwa Sanbagiri angtane jam tereserem aa jei gam irtestenaram terewer. 10 Uwa Sanbagiri ai as Jeyam waakentababisinint tamtamtala jam tereserem ai ajesa domolantam jewer. Ane Jeime namwer ai as Jeyam waakentababisiwena kabwaktala ai ajesa domolwenaram. Ane ini amna unggwan-giri as Jemnip ge folbamini enggame, Jeime ai galap as Jei se waakentababisisi, ai kabwaktala gamjon galap jam ajeba domolaram. 11 Ane ai enggam aya gunu, aamei ai ase enggam isa batobaabili, aamei sembayanga Uwa Sanbagirf isa gwebaibowena am temawer. Ane Uwa Sanbagiri Jei sembayanga imna is gase tamawolbaipmini, ane Jei ai as gase waakentababisisi tamtamtala ai ajesa domolaram jewer. Ane jega jem temawer angtane unggwanfer jei Uwa Sanbagirfe ase samfer golmini ga sene gweyibene. 12 Angtane afweraiserem imniwer jei enggam ge gubili, "Paulus ane angtane Paulusfar awelna aa jei ne gwebilirim jei waakenfer jam naaweyan." Jengga ai ga an ana am temawer aya tetenanna: ai alem inibe bunarsusfer enggam aya towaswena, gwela amna ogiri aaiserem jebe ase waakenfer ge folbamini. Ai ajesa eyeipminirim angtanefe, gwanan nabala ga ip aya eyeipmini, seyafter jeiserem ai waakenfer aya gwebili. Ai asa towaswena gwela amna ase waakenfer ge folbamini, aam temawer ai jeber-jeber ini tabalmer aya eyebuwena, ane Uwa Sanbagiri aa jes bilirim jeiserem ini amna seyafter gemerserem ai ga ajema onsobili. Gwela amna waakena jeiserem, tousa angtanemanaiserem jeme ai jem waakenfer ajama gweyan. Jengga waakensususerem Uwa Sanbagirmana as jes golminirim abe, Uwa Sanbagiri Jei ai ga as jem batobaabili enggalfe, gwela amnaiserem waakenfer as gangge folbamif. 13 Taterisi aaiserem ai isa ajesa tulistabaipminirim ibe, taterisi aaiserem jem igiserem fas is ajama syawulmisiyen. Jengga ini amna unggwan-girfer folbamini enggame, aamei taterisi aaiserem seyafter gemerserem aamei samfer isa gerabistena, ane waakenfer ga isa sarbili. Taterisi jeiserem jem igiserem ga aas: 14 Ini amna ase enggam ge folbamini aamei galap bunarsusfer ga isa towaswena enggame ai waakena tefner aya gwebili, ane jega jem temawer ini imna ga isege saaser-saaserwebaipmini am temawer. Namwer aamei gwela amna waakenfer as ijama damdamtabaipmisiyen. Jengga ini amna ase enggam ge folbamini, galap aamei gwela amna ane awelna ai ajesa eyebilirim ga isa damdamtabaipmisini waakenfersus. Aamei jes gamserem ai as ijewera damdamtababisinirim, gam jega aamei bunarsusfer ga isa towaswena enggame gwela amna ase waakenfer ge folbamini. Namwer ini imna is jam ge saaser-saaserwebaipmiyen am temawer. Jengga aamei ijewera towaswenaram enggame ai waakena tefner aya gwebili, gam jega Tuhan Yesus Jam aa jem warausanaram, ini imna ga isege saaser-saaserwebaipmini am temawer, ai gamserem ini amna saaser-saasersusfer as gam ge folbaminirim im temawer. 15 Ai gwanan alem inip bunarsusfer enggam ai towaswena, aamei ai as isa tebana ini saaser-saasermer ai jam ajep fornaram imnibe. Jega jem temawer ai enggam ai mwangbisinint as gwina imnibe negama dorwefe enggalfe, ai aamei isa gam batobaabif, ane galap ai gamjon as gwina imnibe enggalfe ai gamjon isa gam batobaabif. 16 Ai ga enggam ai mwangbisinint ai gwanan imnip as forna, ai nalefe propinsi Makedonya je ajam sofweyan. Ane ai Makedonyawer jam as warautnaram, ai gamjon ga as forna imnibe, jega enggalf ai jam ajep sofnaram ona Yudeyaminibe, aamei ai as gam isa batobana jam sofwefe. Ai jes gamserem game ai masef mwangbisinint. 17 Ai imnip ajam sofweyan, ai agam mwangbisinintim jes gamserem. Ane jega jem temawer angtane afweraiserem imniwer syefer enggam ge gubili am temawer, "Paulus isar-isarmer mwangbisinint. Jei jam aa galap mwangbisinintim amnip jam sofweyafe, jes galapserem jei jelem inibe jam guyon enggame jei bunarsusfer se sofwa, afa fas. Paulus jei enggala angtane jen jena tefner waakentaasnenele gamserem. Jei enggam gam gunu, ’Ai imnip as sofwa.’, jengga jei jelem inibe jei enggam gam gunu, ’Ai ajam sofweyan.’ " 18 Jengga ai bunarsusfer gamyan! Ai isar-isarmer ajam mwangbisiyen! Uwa Sanbagiri Jei jeber-jeber taterisi bunarsusfer gam nasbili. Jes gemerserem aime gemer, ai taterisi bunarsusfer as nasbili, ai aamei isa ajam afaftababiyen. 19 Silas, Timotius, ane ai, ai taterisi Yesus Kristus, Tane Uwa Sanbagirmanaiserem Jem temawer ai is ajesa nasipminennent ibe. Ane Yesus aa jes nasbilim, seyafter jeiserem ba bunaram, Jei jeber-jeber eyebili Jei Jener aa jes bilirim Jam eyebife. 20 Uwa Sanbagiri aa jes bilirim, seyafter jeiserem Yesus Kristus ga jes eyebili, ane ga jes tabanulsini. Ga jem temawer nei jeber-jeber enggam negama gunu Yesus Kristusem boseme, "Amin, igi ga enggam: taterisi jeiserem ba bunaram, Uwa Sanbagiri aa jes bilirim, seyafter jeiserem Jei bunarsusfer gam eyebili." Ane nei gam nejewera gunurum, Uwa Sanbagiri ga jem negama pujitene. 21 Uwa Sanbagiri Jei Jener eyebaabili, jega enggalf nei Kristusfar daamfennaber ga nesa gwena kanaufer. Uwa Sanbagiri nei nes Jeneram destabaabili enggalfe nei Kristus negama onsobaf. 22 Uwa Sanbagiri Mafnana Jelemana nes mes golminint nebe, ane jega jem temawer nei ga nemsa towaswena enggame, neiba angtane Uwa Sanbagirmanam. Mafnana Uwa Sanbagirmanaiserem nem inip nuniton, ga jem temawer nei ga nesa towaswena enggame, Jei aa jes menetababisinirim jam kitulmife Jelem angtanefe, nei seyafter jeiserem bunarsusfer ga nesa damtabisi. 23 Am afelen mesna, ai sofwela imnip ajes mwangbisinintim, taterisi jeiserem jem temawer ai aamei isa ajam towastababif. Ai enggam ai gunu, afa ai syefer nasbiliye, Uwa Sanbagiri Jei ai as Jei se tamtamtana. Jengga Uwa Sanbagiri Jei ini amna ase Jei towaswebabana, ane Jei tousa taterisi aaiserem ba bunaram. Ai aamei isa ajam afaftababiyen, jengga ai fas ajam warauyan imnibe Korintus je, aam temawer ai bai ini imna is ajam gwebaipmif is jam ge jenbamife, ai jam isa ajep uftabilirim uskambar. 24 Aamei Kristus baabetfer imsa tebana. Jega jem temawer ai aamei isa ajama tergenbaabiyen aamei ijesa taabiliserem jem temawer. Ai imsa batobaabif, jega ini imna is gam sege saaser-saasersweipmini, jeke ini imna is jam ge jenbamif.
21 Ga jem temawer, ai bunarsusfer amsam gunu alem inibe enggame, ai gamjon imnip ajam sofweyan enggalfe ai aamei isa agam uftabaabife, aam temawer ai gwanan agalap fornantam imnibe, ane ai aamei ga isa ai uftabaabilint, jes galapserem ini imna ga is jam ge jenbaminint. Ai bai gamjon ajam eyebif enggalfe, ini imna gamjon is jam ge jenbamife. 2 Ga enggam, afa ai ini imna is jam as gwebaipminirim jam ge jenbamife, gam jega ini amna as jam saaser-saaserswebayan, aam temawer aamei ini amna as ijama saaser-saasertabayan, afa ini imna is jam gangge jenbaminirim. Ga enggam, aamei ini amna as enggalapfener igama saaser-saasertabana, ini imna saaser-saaserfer is jam gangge folbaminirim. 3 Jega jem temawer ai gwanan ajam sofweyan imnibe, jengga ai isa surta tefner ai tulisulminint ibe, jega ai nalef ajam sofweyan imnibe, aamei gwela kapka imna jeiserem gwanan ga jam isa nornortababisini. Jepga ai imnip jam ajep fornaram, aameiba angtane ini amna bunarsusfer ase aamei igama saaser-saasertabana, aamei ijama eyebiyen jega ini amna as jam jenbafe. Ai bunarsusfer enggam ai towaswena, afa ini amna jam as saaser-saaserswebanaram, gam jega aamei seyafter gemerserem ini iman jegme isege saaser-saaserswebaipmini. 4 Ai surta jeiserem jam isa galap tulisulminintim ibe, jes galapserem ini amna ga ase uskambarsus jenbana gwela imnaiserem jem temawer, ane ga as siginswebana, ane uskambarsus ga ai syena. Ai surta jeiserem isa ajam tulisulmiyen enggalfe ini iman jegme is jam ge jenbamife. Fas, gamyan. Jengga igi ga enggalf aamei igama towaswef enggame aiba unggwanfersus imsam nesiktababili. 5 Angtane jeiserem kapka aa jei eyebilintim, ane ini nemna ga nes gweibaipminint jam jenbamife, jei kapka apfener jam eyeibeyen, jengga jei kapka jeiserem is mesam eyeipminint, aamei seyafter jep gemerserem. Ai taterisi angtane jeiserem jem temawer samem-samem ajam nasbif. Jega jem temawer ai enggam ai gunu, aamei seyafter ini is mes ge jenbamini kapka jemnaiserem jem temawer, ane angtane afwenefener imniwereiserem ini jemna ga uskambarsus ga jeman ge jenbamini. 6 Angtane unggwanfer im nenennap jeiserem jei angtane jeiserem mes ne tamtamtana. Tamtamtala jeiserem samfer, aamei gamjon jei ijama tamtamtayan. 7 Jengga enggam, kapka jei aa jes eyebilintim, aamei jeiserem ga jam isa borolbana, ane ini jemna ga jam isa kanautabana, jega ini jemna uskambarsus jam jenbayan jamer gwela jemna se kabwakswebana. 8 Ga jem temawer, ai aamei isa ititmer balbabili enggame, aamei angtane jeiserem jemnip ga ina jam isa gweresona enggame aamei bunarsusfer ijesa nesiktene. 9 Ai surta afwer jeiserem ai isa amsam tulisulminint ibe enggalfe, ai aamei isa ajem unggwasbaabif jega ai agam towaswef enggame, aamke bunarsusfer ai isa ajes bilipminirim jeiserem ke waakenfer ima sarbili ane ga ima eyebili. 10 Angtane kapka aa jei gam eyebilirim jam jep igama borolbanaram, aime kapka jemna as borolbana. Afa angtane imniwer jei kapkaiserem jam gam eyebilirim, ane ai kapka jeiserem agam borolbana, Kristus Jei enggam towaswena ai kapka jeiserem as borolbana enggalfe, aamei seyafter daamfennaber waakenfer igama gwef. 11 Ane ai ibar kapka jemna jam nesa borolbanaram, jega bawasa jei baabeta nem sagabe jam domolyan. Nei nemsama towaswebili kapkaiserem bawasa aa jes mwangbisinirim. 12 Ai agalap fornantam kota Troas je, enggalfe Taterisi Waakena Kristusem temawer agam nasbinennef, jes jepserem ai ga ai towaswena Tuhan Jei dwona ap as mesam gulbanant enggalfe ai awelna jep agam gwebif. 13 Jengga ini amna uskambarsusfer ase gemer jenbana im temawer. Ai gwanan Titus nem afelnaiserem amsam baftanant imnibe, ane ai gunu ai Titusfar as ge dorwena kota Troasminibe enggalfe, jei taterisi im temawer ai as gam towastafe. Jengga ai Titusfar ajam ge dorweyan, jega jem temawer ai angtane Troasmana ga ai mirtebitefala, ane ai propinsi Makedonyawer ga ai sofna. 14 Jengga nei Uwa Sanbagiri ganma pujite, aam temawer tere Kristusmanaiserem jeme, Uwa Sanbagiri Jei baabeta bawasmana, ane bwat kapka seyafter gemerserem baabeta jemna ga jem borolmini. Ane aime baabeta bawasmana, ane bwat kapka baabeta jemnaiserem asa borolmini, aam temawer ai Kristusfar daamfennaber aya gwena. Ane Uwa Sanbagiri Jei ams baftabili enggalfe, ai taterisi Kristusem temawer aaiserem agma towas-towasulminenef tamna seyafter gemerserem jebe, minyak ninsini waakena jam tinwebili gamserem. 15 Ane ini Uwa Sanbagirmana jam saaser-saaserswebana am temawer, ai taterisi Kristusem temawer ajesa towas-towasulminennerem enggalfe Kristus jam ne onsobaf. Ai taterisi Kristusem temawer angtane Uwa Sanbagiri jes waakentababisiliserem ai ga ajeba towas-towasulmini, ane angtane Uwa Sanbagiri jam waakentababisiyeneiserem jep mese. Taterisi Uwa Sanbagirmana jeba minyak ninsini waakena jes galserem, angtane jei jam aalumbif ninsini waakena jeiserem. 16 Angtane jeiserem Uwa Sanbagiri Jam waakentababisiyeneiserem, jeiba angtane taterisi amnaiserem ai ajes nasbinennerem Kristusem temawer jam taayibeyeneiserem, ane jei gase tamtamtababisi jamer abak-abaksus. Jei ga Kristus baif gane gwebana, angtane apgal jigala ninsini kapka baif gwebiliserem jam aalumbife jes gemerserem. Jengga angtane jeiserem Uwa Sanbagiri Jam waakentababisiliserem, jeiba angtane taterisi amna Kristusem temawer jam taayibeleiserem, ane jei waakenfer gwelaiserem jamer abak-abaksus ga sene domolsa. Angtane jeiserem jei ga Kristus ne onsobaf, angtane apgal jigala ninsini waakensususerem jem aalumbif gamserem. Angtane baabeta Kristusmana jam ne domolyanaiserem, jei awelna aaiserem jam ne eyebiyen taterisi Kristusem temawer jam nasibenenefe. 17 Jengga Uwa Sanbagiri Jei Jenfentowai baabeta as mesam golmini enggalfe, ai awelna jeiserem ajema gwebif. Angtane afweraiserem jei Taterisi Waakena gam nasbinenne enggalfe jei doini gam taabif, ane angtane afwer im nenennap jeiserem jei enggam ge gubili aiba angtane jes galserem. Jengga ai fas angtane unggwanfer afweraiserem jes gamserem, ai galyan. Ai Taterisi Waakena aya nasbinenne, aam temawer Uwa Sanbagiri Jei ams baftabili. Ane Uwa Sanbagiri Jei enggam towaswena ai ini tabalmer aya nasbinenne, aam temawer ai Kristusfar daamfennaber aya gwena.
31 Angtane afweraiserem jei syefer ge gubili enggame, ai ajes tulistababilirim, tulisana jeiserem jem ai ana ga ajema tetenanna. Jengga fas, ai anan aner ajama tetenanayan. Ane aime surta ajama balbabiyen jes erbife jemat-jemata nensaiserem jebe, angtane afwer gam ne erbifelerem. Angtane afwer taterisi Kristusem temawer aa jei ne nasibenennerem, angtane jeiserem jei jam gam sofnaram tamna nafsiserem jewer enggalfe taterisi Kristusem temawer jam nasibenenefe, jei jeber-jeber surta gam erbili. Surta jeiserem jemat-jemat nafsiserem jei gane tulistababili. Ane surta jeiserem jep ga enggam gane tulisulu, "Angtane surta aaiserem aa jei gwirinfelerem, jeiba bunarsusfer taterisi Kristusmana gam nasibenenne." Angtane jeiserem jei surta jes galserem gal gam erbili imnibe, ane jei surta jes galserem imniwer gam bilipmini jei jam aa jep gam sofnaram jemata nafsiserem jewer. Angtane afweraiserem jei enggam ge gubili ai surta jes galserem ga jam asa balbabili jam erbife. Jengga ai surta jes galserem ai ajama balbabiyen, 2 aam temawer ai amsama towaswena am inibe, aameiba suratsam jes galserem am temawer. Ai surta kertasap tulisuluserem imniwer isa ajam bilipmiyen enggalfe angtane nafsiserem jep gam golmif jam gerabistefe. Gwela waakena imna angtane seyafter gemerserem jei ga isene domolmini, ane gwela imna jes gemerserem jei jem ga sege towaswebili enggame ai bunarsusfer ba angtane Kristus aa jes baftanaram. 3 Aamei namwer waakenfer gam ijewera gwenaram, aamei ga ijema gwerauwulmini enggame aameiba enggalam surta Kristus aa jes tulisulurum, aam temawer Kristus Jei amsam baftabili enggalfe aamei taterisi Jemnaiserem igama taabif, ane gwela ibirmiserem jem igama gwef. Gwela imna waakenaiserem jei ga enggala, surta Kristus Jener aa jes tulisulurum. Surta Kristusmana jeiserem jeke tintam tulisulu, jengga Kristus Jei surta jeiserem Mafnana Uwa Sanbagirmana Jam teryeneiserem ga Jem tulisulu. Jei tunap Jam tulisulyon Hukumu Nabi Musamana jes gamserem, jengga Jei taterisi Jelemanaiserem ga im inip tulisulu. 4 Ai taterisi seyafter jeiserem aya balbabili, aam temawer Kristus Jei ai as batobaabili ai Uwa Sanbagiri kanaufer agma tebafe, jega enggalf ai awelna aaiserem gam asa gwebili. 5 Ai baabeta fas ajema gufe enggame ai samfer awelna aaiserem asa eyebili. Jengga Uwa Sanbagiri baabeta ga ase Jei golmini abe, jega ai awelna aaiserem waakenfer ga aya gwebili. 6 Jeiba baabeta as Jeyam golmini abe enggalfe, ai taterisi Jemna agma nasibenenef, taterisi ibirmiserem Uwa Sanbagiri aa jes bilipminirim angtanefe, angtane jam waakentababisiliserem jem temawer. Angtane taterisi ibirmi jeiserem aa jei ne onsobilirim, taterisi Uwa Sanbagiri aa jes bilipminirim angtanefe, jei fas hukumu jam ne onsobiyen, Hukumu Nabi Musa aa jes tulistababilim jes galserem. Jengga jei Mafnana Uwa Sanbagirmana gam ne onsoibene. Angtane Hukumu Nabi Musa aa jes tulistababilim masef jam gane unggwasbilirim jam onsobife, ane jei jam gam tererem Uwa Sanbagirem gwetmanap jam gweyan. Jengga angtane aa jei gam onsobilirim Mafnana Uwa Sanbagirmana aa jes towas-towastababilirim, Mafnana Uwa Sanbagirmana Jei gwela ibirmi gam golmini angtane jeiserem jebe, Uwa Sanbagirem gwetmanabe. 7 Hukumu aa jes tulisulum, Hukumu jeiserem ba ton sagabam tulisul. Ane Hukumu jam aa galap tulisulum, nafdusa Uwa Sanbagirmanaiserem ga irebayal. Ane mirmase Nabi Musamana ga aa ge nafabarsweibel. Ane mirmase Nabi Musamana safe abakfer jam nafabarswebayan, nafa jeiserem ga uskambarsus, jega angtane Israelmana jei mirmase Nabi Musamana fas abakfer jam ne geraibeyen. Nei enggam neya towaswena, angtane Hukumu masef jam gane unggwasbilirim jam onsobife, jei jam gam tererem, jei Uwa Sanbagirem gwetmanap jam gweyan. Safe gam, baabeta ane nafa Uwa Sanbagirmana aa jei irebayalam Jei Hukumu Jam aa galap tulisulum, baabeta ane nafa jeiserem ba unggwandusam. 8 Afa ga gam jes gemerserem, gam jega taterisi Uwa Sanbagirmana jam gane nasibenennerem baabeta Uwa Sanbagirmanaiserem jeme, jeiserem ba waaken-waakensusum, baabeta Uwa Sanbagirmana ba unggwandwasusum. Jeiserem ga enggam, nafa Uwa Sanbagirmana jes jepserem ga enggala unggwandwasusu Musamana mirmase aa jem naftabaibelem jemniwer. 9 Taterisi jeiserem ai ajes nasbilirim jem igiserem ga enggam: Hukumu jam aa galap golmilim, nafa Uwa Sanbagirmana ga irebayal, jengga angtane Hukumu jeiserem masef gane unggwasbili jam ne onsobife, ane Uwa Sanbagiri Jei angtane jeiserem gase tamtamtababili. Jengga Taterisi Uwa Sanbagirmana ibirmiserem, aa jei ne onsobilirim, Uwa Sanbagiri Jei angtane jeiserem gase waakentababisi. Ga jem temawer, Uwa Sanbagiri aa jes mwangbisilim ibirmiserem enggalfe angtane jem waakentababisife, jeiserem ba waakensusu Hukumminiwer. Ane ibirmi jeiserem Uwa Sanbagiri aa jes mwangbisilim, jeiserem ga enggam gwerauwulu baabeta Uwa Sanbagirmana ba unggwandwasusum, ane Uwa Sanbagiri angtane jam nesikteleiserem jes mese ba unggwandwasusum. Angtane aa jei ne onsobilirim Uwa Sanbagiri aa jes mwangbisilim ibirmiserem, Uwa Sanbagiri Jei angtane jeiserem gam waakentababili. 10 Hukumu Nabi Musa aa jes tulistababilim gwanan ba igiberem. Jengga namwer Uwa Sanbagiri Jei taterisi ibirmi mesam golmini, ane taterisi jeiserem ga Uwa Sanbagiri aa jes mwangbisilim enggalfe angtane jem waakentababisife, jeiserem ba igsusum Hukumminiwer. 11 Hukumana jeiserem safe waakenam, jemna igiserem abakfer jam falyan. Jengga Uwa Sanbagiri aa jes mwangbisilim ibirmiserem jem igiserem abak-abaksusfer ga jese fala. Jeba waakensusum Hukumminiwer. 12 Ai ini amna seyafter gemerserem ai ajema towaswena bunarsusfer enggame, Uwa Sanbagiri ibirmiserem aa jes mwangbisilim, jeiserem ga jei se fala jamer abak-abaksus. Ga jem temawer ai ajama ereyen taterisi Uwa Sanbagirmana jam nasbinennefe. 13 Ai Nabi Musa galserem ai galyan. Jei mirmase jemna jam matabisil enggalfe, angtane Israelmana jei nafa Uwa Sanbagirmana aa jei irebayalam Nabi Musaminibe, jei nafa jeiserem jam ne domolyan jam bastantowaiswebalabe mirmase Musamanaiserem jewer. 14 Gwanan jes jepserem angtane Israel ini jemna mata, jei Taterisi Uwa Sanbagirmana jam ne saribeyen. Ane namwer aas jepserem jegme gemer, angtane Israel ini jemna ga gemer ge matwebaamini. Taterisi fwatermanaiserem Uwa Sanbagiri angtanef aa jes bilipmilim jam gane gerabistenaram, jei jam ne saribeyen. Ini angtanemana ga enggalapfener gam tertesini, jei Kristus jam aa galap gam tebanaram. Jepga jei Kristusfar daamfennaber ga gangge gwena, ane jei Taterisi Uwa Sanbagirmana waakenfer ga gam saribene. 15 Bunar namwer aas jepserem Hukumu Nabi Musa jam aa galap gane gerabistenaram, angtane Israel ini jemna mata, ane jei jam saribeyen. 16 Jengga angtane Tuhan Yesus jam aa galap gam tebanaram, ini jemna matasiliserem jes jepserem ga gam tertesini, ane jei waakenfer ga gam sarbili. 17 Tuhan Yesus ane Mafnana Uwa Sanbagirmana Jeiba daamfennam. Ane angtane Mafnana Uwa Sanbagirmana aa jem inip gam nunitonom, angtane jeiserem mes gam aftannu Hukumu Nabi Musa aa jes tulistababilim jam onsobiliserem jewer. 18 Ga jem temawer, nei seyafter Yesus nejeya tebanaram, ini nemna nejama matabaabisiyen, ane nei enggam neya towaswena baabeta yo nafa Tuhanmanaiserem ba unggwandwasusum. Tuhan Yesus ane Mafnana Uwa Sanbagirmana Jeiba daamfennam. Ane baabeta Mafnanmana jeme, nei nejama etamwefe Tuhan galaterserem. Ane gwela nemna jeber-jeber ga nesege etamweipmini gwela Jelemana gemerserem.
41 Ini amna ga as jem ge kanausweipmuwena awelna aaiserem jam gwebife, aam temawer ai amsama towaswena Uwa Sanbagiri Jeiba waaken-waakensusum am temawer, ane Jei awelna aaiserem Taterisi Waakena jam nasbinennefe ap ga as golmini. 2 Etam-etama kapka angtane basyamer aa jes ne eyebilirim, ane angtane jena jem ge seferswebiliserem, seyafter jeiserem ai baif aya gwebili, ane ajama eyebiyen. Ai angtane ajama afaf-afaftababiyen, angtane nafsi gamserem. Ai taterisi afaf-afafaiserem Taterisi Waakenaiserem jebar ajama dupdupbulyon enggalfe, nawersamer gam nasbinennef angtane jem malin-malintababif enggalf Yesus jam ne onsobafe. Fas, gamyan. Jengga enggam, ai taterisi Uwa Sanbagirmana bunarsusferaiserem ga jetefener aya nasipminenne angtanefe, Uwa Sanbagirem nwenabe. Jes gemerserem ai gam ajewera eyebilirim, aam temawer ini amna ga ase enggam ge folbamini angtane seyafter gemerserem gangge towaswebif enggame, ai ajesa nasipminennerem jeiserem ba bunaram. 3 Bunarsusfer angtane afwer ini jemna mata, jei fas Taterisi Waakena ai ajesa nasipminennerem jam ne sarbiyen. Angtane jeiserem jeiba angtane Uwa Sanbagiri jam waakentababisiyeneiserem ba jesam. 4 Angtane jeiserem jei Taterisi Waakena Yesusem temawer aaiserem jam ne taabiyen, aam temawer bawasa sanbakf aa jei gwenaram kapka seyafter gemerserem ogiri aaiserem jebe, jei angtane jeiserem ini jemna ga jei gwebaipmini jam matabaipmisife. Bawasa jei ini jemna enggalf matabaipmisini, jega angtane jeiserem jei Taterisi Waakenaiserem jemna nafa fas jam ne domolyan. Taterisi Waakena jeiserem jeyam gwerauwulu enggame Kristus ba waakensusum. Ane Kristus Jei Uwa Sanbagiriserem ga jes gweretana, aam temawer Kristus Jeiba Uwa Sanbagiri galserem. 5 Taterisi ai ajesa nasipminennerem, taterisi jeiserem jeke alem temawer aya nasbinenne, jengga Kristusem temawer aya nasipminenne. Ai ga enggam aya nasipminenne, Yesus Kristus Jeiba Tuhansam. Ane ai ga Yesus sa tikwebaatini, ane Jei ams baftabili enggalfe ai aamei isa ajama batobaabif, awelna ai ajesa gwebilirim jeme. 6 Gwanan-gwanansus Uwa Sanbagiri seyafter gemerserem aa galap eyebaabilim, jes jepserem seyafter ga gwin-gwinsusu. Ane Uwa Sanbagiri Jei enggam gul, "Je ge nafwe!", ane jepga nafwel. Uwa Sanbagiri Jeime ini nemna nes mesam nafabartabaipmini, jega nei ga nesa damdamulsini seyafter Uwa Sanbagirem temawer, Uwa Sanbagiri aasaje sanbagirsusum apgal jigala seyafter gemerserem jemniwer. Seyafter jeiserem Uwa Sanbagirem temawer ga Yesus Kristus se gwerauwulu. 7 Ai safe angtane igyene ane weren-werna, jengga Uwa Sanbagiri Jei am inibe ap as mesam eyeipmini, jega ai ga aya damdamulsini seyafter Uwa Sanbagirem temawer, ane Taterisi Waakena Yesusem temawer. Uwa Sanbagiri Jei jes gemerserem mesam eyebili enggalfe angtane gangge towaswebif enggame, baabeta unggwandwasusu ai ajesa domolaram enggalfe awelna Uwa Sanbagirmana ajama eyebife, baabeta jeiserem ba Uwa Sanbagirminiweram jela, jeke amniwer, ai angtane weren-wernaiserem. 8 Ai safe kabwaktala unggwanfer nafis-nafismer aya damtabili, jengga ai ajama tikweyan Taterisi Waakena jam nasbinennefe. Ini amna safe ase isar-isarmer ge folbamini, jengga ini amna uskambarsus as jam ge jenbamiyen. 9 Ginanggwana amna jei ai as jeber-jeber ne tamtamtababuwena, jengga Uwa Sanbagiri Jei ai as Jam mirtebitefalyan. Ginanggwana amna jei ai ase uskambarsus ne safsaftababuwena, jengga jei fas as jam ne munbobiyen. 10 Angtane jei ai as kakalmer ne nasbabuwena, ane jei ai as jam ne munbobuwef, Yesus jam munbolo gamserem, jengga jei ai as jam ne munbobiyen. Aamei gwela amna ijewera domolaram, aamei ga enggam ima towaswena Yesus Jeiba amnibam nuniton. Ane jeiserem ga enggam gwerauwulu Yesus Jeime gemer gwena. 11 Ai ajeba gwenaram, ai jeber-jeber aya domolwena enggame ai safe as jam ne munbobif, aam temawer ai awelna Yesusmanaiserem ajewera gwebilirim. Ai tamtamtala jes gamserem gam ajewera domolwenaram, jega enggalf angtane ga sene damtabili enggame Yesus Jei am inip gwena. Jei ga sege towaswebili enggame Yesus Jeiba gemeram gwena, aam temawer jei ams ne damtabili, tifni amna safe baabetyena, ai gemer aya gwena baabeta Yesusmanaiserem jeme. 12 Ai tamtamtala unggwandusa amkom fom tere jeber-jeber aya domolwena, aam temawer ai Taterisi Waakena ajewera nasbinenewenaram. Jengga tamtamtala jeiserem igi jemnaiserem ga enggam, aamei gwela waakena abakfer gwelaiserem gam isa domola. 13 Taterisi Uwa Sanbagirmanaiserem jep ga enggam baatultel: "Ai Uwa Sanbagiri ames tebana, ane jega jem temawer ai taterisi Uwa Sanbagirem temawer ga ajewer nasbinenne." (Mazmur 116:10) Aime gemer. Ai Uwa Sanbagiri aya tebana, ane jem temawer ai Taterisi Waakena ga aya nasbinenne. 14 Ai ini amna seyafter gemerserem jeme enggam aya towaswena, Uwa Sanbagiri Jei Tuhan Yesus mesam irtestena terewer. Ane jega jem temawer aime enggam aya towaswena, Uwa Sanbagiri Jei ai as gase irtebaabisi terewer, aam temawer ai Kristusfar daamfennaber aya gwena. Ane Uwa Sanbagiri Jei aamei mese ai seyafter nese aftabifelse Jelem tarnabe. 15 Ai rasulfe ajewera gwenaram, ai seyafter ajesa eyebilirim, ane tamtamtala seyafter ai ajesa damtabilirim, seyafter jeiserem ga enggalf ge etamwebili aamei is jem batobaabif. Namwer nesiktele Uwa Sanbagirmanaiserem angtane bastowaifer jei ne towaswebili. Taterisi Waakena Yesusem temawer angtane bastowaifer jei ne taabili. Jega jem temawer Uwa Sanbagirfe "Ase samfer golmini" bastowaifer gane gweyibene. Jengga ai awelna Uwa Sanbagirmana ajesa gwebili enggalfe angtane unggwanfersus nesiktele Uwa Sanbagirmana gam ge towaswebif, ane angtane unggwanfersus Taterisi Waakena Yesusem temawer gam ne taabif. Gam jega Uwa Sanbagirfe "Ase samfer golmini" unggwanfer gane gweyibene. Ane jei Uwa Sanbagiri jes gamserem gam aa jewer gane balaram, Uwa Sanbagiri ga jem gane pujitene. 16 Nei nemsa towaswena enggame Uwa Sanbagiri Jei nei nes batobaabili baabeta Jelemanaiserem jeme. Jega jem temawer ini nemna ga nes jeber-jeber ge kanausweipmuwena. Tifni nemna safe nes jam gangge werensweipmini jeber-jeber, jengga ini nemna nes jeber-jeber gangge kanausweipmuwena. 17 Kabwaktala nei nejesa domolaram, kabwaktala jeiserem ga nomkefefener negama domola, abakfer jam falyan. Ane kabwaktala jeiserem nei nejesa domolaram, kabwaktala jeiserem bastowaisusu, nei waakena unggwanfersus galap nejesa domolsaram taman waaken-giribe kabwaktala jeiserem jemniwer. Kabwaktala nei namwer nejesa domolaram, jemna igi ga enggam -- nei gwela waakena nesa domolsa Uwa Sanbagirfar jamer abak-abaksus. 18 Jewer ga ini nemna unggwan-girsusu ga nesege folbamini apgal jigala nei nejama damtabiyeneiserem jem temawer, aa jei ge falbilirim taman waaken-giribe, jeke apgal jigala nei nejesa damtabilirim ogiri aaiserem jebe. Apgal jigala nei nejesa damtabilirim ogiribe, jeiserem abakfer jam ge falbiyen, jengga apgal jigala jeiserem nei nejama damtabiyeneiserem taman waaken-giribe, jeiserem ga gemer sege falbili jamer abak-abaksus.
51 Tifni nemna ga jena galserem nei nejeba nwinirim ogiri aaiserem jebe. Tifni nemna ogirmanaiserem ga enggala jena fwatermana galserem. Angtane jena fwatermana gane kwirulsini, ane jena ibirmi ga gam eyebili. Jes gemerserem tifni nemnaiserem jegme gemer, ane ini nemna nes jeber-jeber ge kanausweipmuwena, aam temawer nei nemsama towaswena enggame, nejam jep negama tererem tifni ogirmanaiserem ga negama mirultefala, ane nei taman waaken-giribe tifni ibirmiserem jebar ga negama gwena. Uwa Sanbagiri tifni ibirmiserem nes Jener se eyeipmini nebe. Tifni jeiserem nei jebar ga nesa gwena waakenfer jamer abak-abaksus. 2 Nei tifni ogirmanaiserem nejebara gwenaram, nei tamtamtala ga jem neya domolwena, ane ini nemna nes enggalf ge folbamuwena, nei tifni ibirmi taman waaken-girmana namwer aas jepserem nejama domolf. 3 Angtane fene jam kamwini gamserem, tifni ibirmiserem nejesa domolaiserem ga jes gemerserem. Nei tifinyamer nejama gweyan. 4 Nei tifni ogirmanaiserem nei nejebara gwenaram, ini nemna ga kabwakfer neya entebili tamtamtala nei jes negama domolaram jem temawer. Ane nei enggam neya guwena nei tifni ibirmi nejama damtabif. Jeke enggam nei nejama terf ane tifinyamer ga negama gwena. Fas, gamyan. Jengga ini nemna unggwanfer nes enggalf ge folbamini, nei tifni ibirmi taman waaken-girmanaiserem nejama damtabif, jega tifni nemna jam tereserem ga gam motolsini jamer bar tifni ibirmiserem jeme. Tifni ibirmi jeiserem ga jam teryeneiserem. 5 Uwa Sanbagiri Jei nebe nes Jener eyeipmini enggalfe, nei tifni ibirmi jeiserem negama damtabife. Ane Jei Mafnana Jelemana nes mes golmini nebe enggalfe, nei negama towaswef enggame nei tifni ibirmiserem bunarsusfer ba nesa damtabisi. 6 Mafnana Uwa Sanbagirmanaiserem nem inip nuniton, ane jega jem temawer ini nemna nes jeber-jeber ge kanausweipmuwena. Nei nemsama towaswena enggame, nei tifni ogirmanaiserem nejebara gwenaram, nei tifni jeiserem jeme gemerje Tuhanfar jem nejama gweyan taman waaken-giribe. 7 Nei ogiri aaiserem jep jam neya gwenaram, gwela nemna ga Kristus jam tebalaiserem ga nes galfefener gangge folbamini, jeke Jei jam damtalem temawer. 8 Ba bunaram ini nemna kanaufer nes jeber-jeber ge kanausweipmuwena. Ane ini unggwan-girfer ga nes enggalf ge folbamini tifni nemna ogirmanaiserem nejama aftabaabunnufe, jega nei Tuhanfar ga nesa gwena taman waaken-giribe. 9 Jega jem temawer nei enggam neya guwena ini seyafter gemerserem jeme, nei aaf ogiri aaiserem jep nesa gwenaram, nei ini Tuhanmana nejama saaser-saasertabaf. Ane nei Jebar nejeba gwenaram taman waaken-giribe, nei jegme ini Jemna nejama saaser-saasertabaf. 10 Nei ini Tuhanmana nejama saaser-saasertabaf, aam temawer nei seyafter bunarsusfer ba nesa fisa Kristusem tarnabe enggalfe Jei nei nes gam tenebaabuwef. Jes jepserem seyafter nejesa eyebilirim gwela nemna ogiri aaiserem jebe gase gwerauwulu, jega nei daamfen-daamfennemer fwaina ga nesa tebabisi nei nejesa eyebilirim, jem mwonggaber waakenfer jes eyebiliserem, afa kabwakfer jes eyebiliserem. 11 Ai enggam aya towaswena, Tuhan Jei angtane etam-etamabara se tamtamtababisi, ane jega jem temawer ini nemna ga jese erebaamini. Jega jem temawer ai angtane enggalf ai malin-malintababinenne jei Kristus gam ne tebaf. Uwa Sanbagiri Jei ini amna seyafter gemerserem as mesam damdamtabaipmisini. Jei enggam towaswena, ai ini tabalmer aya eyebuwena. Ane ini amna ase enggam folbana, aamei mese aamei ini amna as ijama damdamtabaipmisif, ane enggam ga isa towaswena ai kapkaiserem ajama eyebiyen. 12 Ai ajes tulistababilirim, jeiserem ai anana ajama tetenanayan. Fas. Jengga ai enggalf ai tulistababili, aamei igama towaswef ai ini tabalmer aya eyebuwena, ane jega jem temawer ini imna is ga sege saaser-saasersweipmini am temawer. Ane ai enggalf ai tulistaabili, aamei angtane waakenfer igama tamawolbaabif jei am temawer syefer jam gangge nasbawenaram, angtane numuwenefener aa jes gane damtanaram, jeke gwela jemna waakenfer aa jewer gam folbanaram. 13 Angtane afweraiserem jei am temawer enggam ne nasbinenne, "Rasul-rasulu jeiserem miri jemna kapka." Jengga safnant jei am temawer jes gamserem gam safnant nasbinenne. Jei ga jes gamserem am temawer ga gam ne nasbinenne, aam temawer ai awelna Uwa Sanbagirmana Taterisi Waakena jam nasbinennefe, uskambarsus jetefener ajewera gwebilirim baabetmer. Ai awelna Uwa Sanbagirmanaiserem jes gamserem gam ajewera gweyibenerem, ai ga enggalf aya gweyibene, ai Uwa Sanbagiri agma gaartef. Bunarsusfer miri amna ba waakenam, kabwakyan. Ane seyafter ai ajesa eyebilirim, ai ajesa eyebilirim jeiserem ga enggalf ai aamei is ajema batobaabif. 14 Ai awelna Uwa Sanbagirmanaiserem uskambarsus aya gwebili, aam temawer nesiktele Kristusmanaiserem gwela amna ga as jem isinbaipmisnenne. Ai ini amna seyafter gemerserem ai ga ajema towaswena, angtane daamfenna aa jei tererem, Jeiba Yesus Kristusam, angtane seyafter gemerserem Jeiba jem temaweram tere. Gam jega enggam, angtane seyafter gemerserem Kristusfar jam tere gamserem. 15 Kristus Jei angtane seyafter gemerserem jem temaweram tere enggalfe, angtane aa jei naawenaram gwela ibirmiserem jeme, jei gamjon jam naaweyan jelem temawenefener. Jengga gwela jemna ibirmiserem ga Kristusem temawenefener se falmini, Kristus aa Jei tererem ane gamjon ga irtestena terewer enggalfe, angtane aa jei naawenaram gwela ibirmiserem jei jem gam kanautababif. 16 Angtane Yesus jam tebayanaiserem jei enggam gane eyebili: jei angtane numuwenefener gane damtabili, jei gwela jemna jam ne domolmiyen. Jengga ai gamjon fas ajama eyebiyen jei gamserem. Ai Kristus nalef ajama tebayan, ai jes jepserem Kristus numuwenefener aya damtana, angtane Yesus jam tebayanaiserem jes gamserem, jengga ai gamjon fas jes gamserem. Gwanan ai enggamfener aya gunu Kristus Jeiba angtanesam, jengga aas jepserem ai enggam aya towaswena Jeiba unggwan-girsusum angtaneminiwer. 17 Angtane Kristusfar daamfennaber gwelaiserem, angtane jeiserem jei mes gam eyebana angtane ibirimfe. Ini jemna fwatermanaiserem gamjon jam folbayan, ini jemna ibirmiserem ga jenefener gam folbana. 18 Seyafter jeiserem Uwa Sanbagiriserem ga Jei gam eyebaabili. Jei nei nes mes gwebabili Jebar jam waakenswefe, tere Kristusmanaiserem jeme. Ane Jei awelna ga nes golmini nebe nei nejesa eyebife, jega angtane nafsi jeime ga sege waakenswebili Uwa Sanbagirfar. 19 Ai enggam aya nasbinenne: Angtane jei gwanan Uwa Sanbagirfar jena jam ne uskamswemini, jengga Uwa Sanbagiri Jei Kristus baftana Jam terfe ti salibibe etam-etama angtanemana seyafter gemerserem jem temawer enggalfe, angtane Uwa Sanbagirfar gam ge waakenswebif. Angtane Kristus jam tebalaiserem, Uwa Sanbagiri Jei angtane jeiserem etam-etama jemna gase wirtabaabili, gamjon jeiserem Jam sarbistaabonyan. Ane Jei awelna as mesam golmini abe enggalfe ai taterisi jeiserem agma nasbinennef, taterisi jeiserem ga Uwa Sanbagirfar jam waakenswelem temawer. 20 Uwa Sanbagiri Jei ai as baftabili enggalfe ai bosna Kristusmanaiserem jem agma nasbinennef. Ai jes gamserem gam ajewera nasbinennerem, jeiserem ga enggala Uwa Sanbagiri Jei is Jener nasipmini gamserem ibe. Ga jem temawer, bosna Kristusmanaiserem jeme, ai ga aamei isa ajem balbabili unggwanfer, Uwa Sanbagirfar ga jam isa waakenswena. 21 Kristus Jei etam-etama kapka Jam eyebiyen, jengga Uwa Sanbagiriserem ga Jei bala etam-etama nemna Jep gulbana Jei gwirinfe, jega nei Uwa Sanbagirfar gasa waakenswena, aam temawer nei Kristusfar daamfennaber nejewera gwenaram.
61 Awelna amna ai ajesa eyebilirim, ai Uwa Sanbagirfar seyafter aya eyebili. Ai ga aamei isa jem temawer aya balbabili unggwanfer, waakenaiserem Uwa Sanbagirmana aamei ijesa taabilirim, waakena jeiserem aamei ijama elsiyen jam taabiliwer. Jengga aamei ijewera eyebilirim seyafter Uwa Sanbagiri aa jes bilirim, ga jem aamei isa gwerauwulu enggame aamei waakenaiserem Uwa Sanbagirmana imsama taabili. 2 Taterisi Uwa Sanbagirmanaiserem jep ga Uwa Sanbagiri enggam gul: "Nunu Ai jam Ajem gunurum Ai aamei isa Ajem batobaabife, nunu jes jemserem aamei Ai As imsa balant Ai aamei isa Ajam batobaabife, ane Ai aamei isa Amsam sarbabilint. Nunu Ai jam Ajem gunurum angtane jem waakentababisife, jes galapserem Ai aamei isa Amsam batobaabilint." (Yesaya 49:8) Uwa Sanbagiri ga gam gul. Ane ai aamei isa enggam ai balbabili: Nunu namwer aas jepserem, Uwa Sanbagiri Jei aamei is jam batobaabif! Nunu namwer aas jepserem ga enggalf Jei aamei is Jam waakentababisif! 3 Ai ajama unggwasa baabeta amna seyafter gemerserem jeme, ai waakena tefner agma eyebili enggalfe, angtane gwela amna aa jei ne domolminirim, jei amnibe kapkaiserem jam ne domolyan. Gam jega angtane afa fas jam irfweyan Yesus jam tikwebaatiliwer ai ajesa eyebilirim jem temawer. Ai waakena jes galserem ai jetefener ajewera eyebilirim, ai ga enggalf aya eyebili, jega angtane fas kabwakfer jam ge gubiyen awelna amna Uwa Sanbagiri ap aa jes golminirim jem temawer. 4 Seyafter ai ajesa eyebilirim, ai ana ga ajema gweraasona enggame, ai awelna Uwa Sanbagirmanaiserem aiba ajesma gwebili. Jega jem temawer ai kanaufer aya fibuwena kabwaktala yo tamtamtala nenes-nenesmer ai jam agalaba domolwenaram. 5 Ai ga asene safsaftababili. Ai bwiyip asene katabaabuntowena. Ai asene sigin-gintababili, angtane unggwanfer jei jame aa jep ge erabanaram. Ai awelna uskambarsus aya gwebili, jamere baabeta ase fom ge barweipmini. Ane gwini afweraiserem jem ajama tayan, ane nunu afweraiserem jem afa ajama twenyan. 6 Ai aaiserem ana ga ajema gweraasona enggame, aiba awelna Uwa Sanbagirmana ajesma gweyibene: Seyafter ai ajesa eyebilirim, ai ini tabalmer aya eyebuwena. Ai Taterisi Uwa Sanbagirmana waakenfer aya towaswebili. Angtane kabwaktala ap as jem gane eyeipminirim, ai kabwakfer jeiserem jafner agma fibili abakfer. Ai angtane nafsiserem agma batobaabili. Mafnana Uwa Sanbagirmana Jei am inip nuniton. Ai bunarsusfer angtane nafsiserem agma nesiktababili. 7 Ai taterisi bunarsusfer aaiserem aya nasbinenne, ane awelna jeiserem baabeta Uwa Sanbagirmanaiserem ga ajema gwebili. Ai waakenfer aya gwena, Uwa Sanbagiri aa jes bilirim ai ga jetefener aya eyebili. Ane jega jem temawer, ai samfer bwat kapka agma orolstefala. Ai waakena tefner jam eyebiliserem ai ga ase jei isinbaabisnenne, jega ai kanaufer gam asa fina bawasa ai jam as jep unggwasbaabilirim. 8 Angtane afweraiserem jei am temawer waakenfer gane nasbili, ane angtane afweraiserem jei am temawer kabwakfer gane nasbili. Angtane afwer jei ai asene kitultena, ane afwer ai as jei sene imei-imeitababili. Jei gangge gubili aiba angtane afaf-afafam. Jengga bunarsusfer gamyan, ai taterisi ba bunarsusfer aya nasbinenne. 9 Angtane afwer jei enggam gangge gubili am temawer, ai angtane igyene, ane angtane jei ai as jam ne towaswebabiyen. Jengga gamyan, angtane unggwanfersus jei ai as mes ne towaswebabili. Ai tamtamsusu jeber-jeber aya domolwena enggame, angtane ai safe as jam ne munbobif, jengga ai gemer aya gwena. Ai ase uskambarsus ne tamtamtababili, jengga ai as jam ne munbobiyen. 10 Ini amna safe ase jam gangge jenbamini kabwaktala ai ajesa domolwenaram jem temawer, jengga ini amna jeber-jeber ase saaser-saaserfer gangge folbamini. Aiba angtane galgalyenaiserem, jengga ai Taterisi Waakena Uwa Sanbagirmana ajewera nasibenennerem, ai ga apgal jigalfe Uwa Sanbagirminiwer aaiserem ai ga unggwanfersus angtanef ga ajesa kitulmini. Ga enggam, ai bunarsusfer galgala fas, jengga seyafter Uwa Sanbagirmanaiserem jeiserem ba amnam. 11 Am afelen mesna Korintusmanaiserem, seyafter ajesa entebilirim am inibe, seyafter jeiserem ai bunarsusfer isa amsama nasbaipmini ibe. Ini amna seyafter gemerserem, ai aamei ga isa jema nesiktababili. 12 Safe gam, ini nemna gemerje daamfennaber nes jam ge folbamiyen. Afa ini nemna daamfennaber nes jam ge folbamiyeneye, jeiserem ga enggalem temawer aamei ai as ijama nesiktababiyen, jeke enggalem temawer ai aamei isa ajama nesiktababiyen. Fas gamyan, ai bunarsusfer ba isa jamerma nesiktababili uskambar. 13 Ai ip isa agemer nasipminirim aameiba enggala tanna amna galserem: Aamei ai as jam isa nesiktababili, ai aamei isa gemera nesiktababilirim. 14 Aamei safnant angtane Yesus jam tebayanaiserem jebar ijama batenwesiyen. Ai ga jes gemerserem aamei ga isa gam balbabili, aam temawer nele waakenfer jem gwelaiserem ane nele kabwakfer gwelaiserem, gwela naura jeiserem jam dupdupsosiyen. Nafa gwinfar jam ge dupweyan. 15 Kristus ane bawas daamfennaber fas jam ge batenweyan. Ga jem temawer angtane Yesus jam tebalaiserem, jei angtane Yesus jam tebayanaiserem jebar daamfennaber fas jam ge batenweyan. 16 Jena Uwa Sanbagirmana ane jena tiborma jam kwiruluserem fas daamfennaber jam eyebiyen. Neiba Jena Uwa Sanbagirmanam, Uwa Sanbagiri aa Jei gwenaram. Uwa Sanbagiri Jeneram gul enggame: "Ai angtane Amnaiserem jem nenennap As nwini, ane Ai jebar seyafter ga Asa gwena. Ai jem Uwa Sanbagirf As gwena, ane jei Am angtanef se naawena." (Yehezkiel 37:27) 17 Ga jem temawer, Tuhan namwer angtane Jelemanaiserem enggam balbabili, Jei gwanan aa gemer balbabilim jes gemerserem: "Angtane jeiserem ga jam isa mirtebitefala, ane aamei ina jemniwer jam isa bijausona. Aamei etam-etama kapkaiserem seyafter gemerserem ijama eyebiyen, ane Ai aamei ga isAs tebabili. 18 Ai im Uwaf As gwena, ane aamei Am tanef isa gwena. Uwa Sanbagiri baabeta uskambarsus Jemanserem Jei ga jes gamserem ga gam gunu." (Yesaya 52:11)
71 Am afelen mesna ai isa ajes nesiktababilirim, bunarsusfer Uwa Sanbagiri Jei mesam gul enggame Jei nem Uwaf gwef. Jega jem temawer, au nei ganma irfwe etam-etama kapka seyafter jam eyebiliserem jewer, ane itana tebalyanaiserem jewer mese. Nei Uwa Sanbagiri ga Jam nesa gaartena ane ga Jam nesa erebene, jega nei waakenfer ga nesa gwena Jelem temawenefener. 2 Am afelen mesna, aamei ai as jam isa nesiktababili, aamei ai baife as ijama gwebabiyen! Aamei angtane syefer aa jei ne nasbilirim am temawer, aamei angtane jeiserem ijama sarbabiyen! Ai angtane seyafter gemerserem imnibe kapkaiserem fas ajama eyeipmiyen. Ai fas angtane afa ajama gwebayan jei kabwakfer jam gwefe. Ai fas angtane afa ajama afaf-afaftababiyen doim temawer. 3 Ai jes gamserem gam isa jewer balbabilirim, jeke enggalf ai aamei is agam sefertababif. Fas! Ai bai jes gamserem gam jam eyebife, aam temawer ai gwanan aamei isa agemer balbabilirim, ai aamei isa uskambarsus aya nesiktababili. Ai aamei ga enggam isa aya nesiktababili, ibar jam gwef ane ibar jam terf. 4 Ini amna isar-isarmer ajam folbayan aamei galap ijesa eyebiliserem jem temawer. Ai angtane nafsi as towas-towastababuwena aamei waakenfer ijesa eyebilirim jem temawer, ane ai bosna imna isas kitulmitena. Ai amsam towaswena aamei waakena tefner isa eyebili, ane jega jem temawer ini amna ase saaser-saaserfer folbana im temawer. Ai safe tamtamtala jam as domolwena, jengga aamei ini amna bunar-bunarsusfer ase gemer ima saaser-saasertabana. 5 Ai aamei isa mesam balbabili ai propinsi Makedonyawer amsama sofwant. Ai propinsi Makedonya je agalaba fornantam, jes jepserem ini amna waakenfer as jam ge folbamiyen. Ai kabwaktala nafis-nafsi jeber-jeber ga aya damtabilint enggame, angtane nafsiserem Yesus jam tebayanaiserem, jei abar aya doksonant taterisi ai ajesa nasbilirim jem temawer. Ane jetefeneryan, ini aman jegme as kabwakfer ge folbaminint, aam temawer ini amna ga as jam ge eseswebamini angtane Yesus aa jei ne tebanaram jem temawer. 6 Jengga Uwa Sanbagiriserem Jei angtane ini jam ge jenbamiliserem jeber-jeber ba Jeyam batobaabuwena, Jei ini amna ase Jeyam kanautabaipminint Titus aa jewer fortyantam. 7 Ini amna jeke ase Titusem temawenefener ge kanausweipmini jei amnip aa jewer fortyantam. Jengga ini aman jegme as enggalem temawer ge kanausweipmini Titus ap aa jes nasipminintim enggame, aamei ini Titusmana imsa kanautabana. Jei ai as enggam balbabilint, "Angtane Korintusmana ini jemna unggwan-girfer ge folbamini ibar jam ge dorwebife. Ini jemna uskambarsusfer ge jenbamini etam-etama kapka ibe gwanan jei ip is jes ne eyeibenentem jem temawer. Ane namwer aas jepserem jei angtane nafsi enggam ne balbabili, ’Paulus jei waakena gam eyebili, jei kapka fas jam eyebiyen.’ " Titus jei taterisi seyafter jeiserem ap as jewer nasbaipminintim, ini amna gamjon uskambarsus ga asege saaser-saasersweipmini gwanan jepserem jemniwer. 8 Surta ai gwanan ibe isa ajes baafulminintim, surta amna jeiserem ini imna safe jem temawer is saf gangge jenbaminint, ai surta jeiserem ibe isa samferam baafulminint. Ai gwanan jam agalap sararam enggame, surta amna jeiserem ini imna ga is jem ge jenbaminint, ini safe is nomkefefener sege jenbamini, ai jes jepserem enggam ai gununt, "Wa aje surta jeiserem abaf eyebilint?" 9 Jengga namwer aas jepserem ini amna ase saaser-saaserfer folbana ai surta jeiserem ip isam baafulminint. Ini amna saaser-saaserfer as jewer folbanaram, jeke aam temawer ini imna is jewer ge jenbaminintim, jengga ini amna ga ase aam temawer saaser-saaserswebana ini imna jam is jewer ge jenbaminintim, jem igiserem aamei ga ijema irfwenant etam-etama kapkaiserem jewer, ane gamjon ga nele Uwa Sanbagirmanaiserem ga ijesa onsobana. Uwa Sanbagiri Jei ga jes gemerserem ga gam mwangbisini. Uwa Sanbagiri Jei ini Jemna saaser-saasera enggame, ini imna is jewer ge jenbaminintim aamei ga etam-etamawer ga ijem temawera irfwena. Jega jem temawer surta jeiserem ai ibe isa ajes tulisulminintim, surta jeiserem igi ba waakensusum ibe, jeke kapka. 10 Angtane ini aa jeimane gam jenbanaram etam-etamem temawer, Uwa Sanbagiri Jei aa gemer gunurum, ini jam jenbalaiserem jes gamserem, jem igiserem ga enggam, angtane jeiserem etam-etamawer ga jam gam tikwena, ane Uwa Sanbagiri angtane jeiserem ga gam waakentaasini. Angtane afa fas ini jam jenbayan jam waakentaasiliserem jem temawer. Jengga angtane Uwa Sanbagiri jam onsobayanaiserem, ini jemna ga enggalem temawenefener gam jenbana, jam tamtamtalaiserem etam-etama jei aa jes gam eyebilirim jem temawer, ane jei etam-etamawer jam irfweyan. Ane jem igiserem jei gwela waakena abakfer gwelaiserem jamer abak-abaksus jam domolyan, jengga jei ter gam domola. 11 Ini imna jes gemerserem gam is jewer ge jenbaminirim, Uwa Sanbagiri Jei aa gemer gunurum jes gamserem, ini jes gemerserem ba waakenam. Gasa gaarabi jemna igi aa je etamwenaram imnibe. Igi jemna waakenaiserem ga enggam: Ini imna unggwan-girfer ga is enggalf ge folbamini, angtane etam-etama kapka im nenennap aa jei ne eyebilirim, aamei jei ijama uftabif etam-etama jeiserem jewer. Namwer aas jepserem ini imna unggwan-giri ga is enggalf sege folbamini, aamei angtane nafsi is jei ne balbabilirim enggame aamei etam-etams ima eyebili, angtane jeiserem aamei ijesa towastababif enggame, "Ai etam-etama jeiserem ajama eyebiyen." Aamei bunarsusfer etam-etama kapka angtane jeiserem jei aa jes ne eyebilirim baif ima gwebili. Aamei tamtamtala Uwa Sanbagirmana imsama erebene. Ini imna unggwan-giri is enggalf ge folbamini abar negama waakenswef, ane abar negama dorwef. Ini imna unggwan-girsusu Uwa Sanbagirfe. Ane angtane jeiserem kapka im nenennap aa jei eyebilirim, aamei jei tatarmer imsa tamtamtana. Seyafter aa jewer etamwenaram angtane jeiserem jem temawer, aamei ga ina ijema gwarasona enggame aamei kapkaiserem jebar ijama eyebiyen. 12 Ga jem temawer, ai surta jeiserem ai angtane kapka aa jei eyebilirim jepfener ajam tulisulboyon. Ane ai surta jeiserem kapka aa jep eyeibenerem, angtane jeiserem jei mese ai jepfener ajam tulisulboyon. Jengga surta jeiserem ai ga enggalf ai tulistaabilint, jega ai aamei igama towaswef enggame, Uwa Sanbagiri Jei tousa aamei bunarsusfer ba amsama nesiktababili. 13 Ane seyafter jeiserem jem temawer, ini amna ga as jam ge kanausweipmini. Ane jetefeneryan, ini amna uskambarsus ase saaser-saaserfer ge folbamini, aam temawer ini Titusmana saaser-saaserferam folbana. Aamei waakenfer ijesa eyebilirim jeme, ini Titusmana gamjon jam eseswebayan im temawer. 14 Titus nalef jam sofweyan imnibe, ai bosna imna is amsam kitulmitena Titusem tarnabe, ane aamei ai as ijama sefertayan, aam temawer aamei Titusminibe ina imsama gweraasona enggame, seyafter waakena jeiserem ai ajes bilirim im temawer bosna imna jam kitulmiteleiserem, seyafter jeiserem ba bunaram. Ai is ajesa bilipminirim ibe, seyafter jeiserem ba bunaram. Ane jes gemerserem aaiserem jegme gemer, ai ajes bilirim im temawer, Titus tousa seyafter jeiserem ba bunaram. 15 Titus jei namwer aas jepserem gamjon aamei is uskambar nesiktababili, aam temawer jei aamei is gemer sarbabistaabonwena enggame, ini imna safe is erelsusu ga folbaminint jei imnip jam aa galap fornantam, aamei jei ini waakenmer ima tebanant. Ane jei aamei is gemer sarbabistaabonwena enggame, jei aa jes gam bilirim jam eyebife, aamei seyafter jeiserem jeter igama eyebili. 16 Ini amna ase uskambarsus saaser-saaserswebana, aam temawer ai bunarsusfer amsam towaswena aamei waakenfer ima gwebuwena.
81 Am afelen mesna, ai enggam aya gunu aamei ijama towaswebif, aa je etamwenantam aam temawer Uwa Sanbagiri Jei waakena Jelemanaiserem aa jewer golminintim jemat-jemata propinsi Makedonyamanaiserem jebe. 2 Angtane jepmanaiserem Yesus aa jei ne tebanaram, jei safe kabwaktala daran-daransusu gane damtabili, ini jemna saaser-saasersusfer gemer ge folbamini. Ane jega jem temawer ini jemna saaser-saaserfer ajewer ge folbaminirim, jei safe angtane galgalyansusu, jei doini unggwanfer mes ne kitulmini enggalfe, angtane Kristen kota Yerusalemmanaiserem jei jem gam batobaabife. 3 Ai ims towas-towastababili bunarsusfer, doini aa jes gane damtabilirim, jei doini jeiserem aane kitulmini. Ane jetefeneryan, ai enggam ai gunu, jei doini uskambar mes ne kitulmini, aa jes ne damtabilirim jewer. Jei jener ge gubili doini uskambarsus jam kitulmife, angtane afa fas jei jam ne taatwebaabiyen. 4 Jei ai ase unggwanfer ne balbabili, ai dwona jep ajama golmife jega jei abar agma dupwesif enggalfe, jeime angtane Kristen Yerusalemmanaiserem jei gane batobaabif. 5 Jei doini unggwanfer ne kitulmini, ane jei uskambarsus ne eyebili ai ajesa mwangbisinintim jemniwer. Jei enggam ne eyebilint, jei nabal-nabalsusu gwela jemna Tuhanf ne kitulbono. Jepga Uwa Sanbagiri aa jes bilirim jeiserem ga aane onsobili enggame, jei jen jena gamjon ga aane dete amnibe enggalfe, ai jes agma bilirim jei jeiserem gam ne eyebif. Uwa Sanbagiri ga gam gunu jes gamserem. 6 Ini amna ase uskambar ne kanautabaipmini, angtane Makedonyamana aa jes ne eyebilintim jeme. Jega jem temawer ai ga Titus unggwanfersus aya bala jei imnip gamjon jam sofwefe. Jei gwanan awelna enggalfe mesam towaiwulunt im nenennabe, aamei doini ijama dupduptof angtane Kristen Yerusalemmanaiserem jei ijema batobaabife. Ane ai ga enggam aya gunu jei awelna waakena jeiserem ga jamer se tabanulu. 7 Seyafter aamei ijesa eyebilirim, aamei waakenfersus ima eyebili angtane Kristen afweraiserem jemniwer. Aamei Yesus kanaufer ima tebana. Taterisi Uwa Sanbagirmana waakenfer ima nasbinenne. Tousa imnaiserem Uwa Sanbagirem temawer is unggwanfersus ge folbamini. Ini imna is unggwan-giri ge folbamini awelna Uwa Sanbagirmana ijama eyebife. Ane aamei ai ase unggwanfersus ima nesiktababili. Seyafter jeiserem im temawer ba waakensusum. Jega jem temawer ai enggam aya gunu, aaiserem jegme waakenfer isa eyebili: aamei angtane Kristen afweraiserem jep jon ga jam isa kitulmini unggwanfer enggalfe aamei jei igama batobaabif. 8 Ai bai aamei isa ajam taatwebaabife aamei angtanef ijama kitulmife. Fas, ai aamei isa ajam taatwebaabiyen. Jengga ai enggam ai gunu aamei ijama towaswebif enggame, angtane Kristen nafsiserem jei angtane Kristen galgalyenaiserem fomfom gane batobaabili. Ane ai aamei isa jam unggwasbaabili aamke angtane nensa bunarsusfer ke isa nesiktababili. Aamei angtane nensaiserem ijewera batobaabilirim, ga ijesa gwerauwulu aamei angtane nafsi ima nesiktababili. Jes gamserem gam isa ajewer towastababilirim, ai ga dwona isa ajem golmini enggalfe, aamei ijama gwerauwulf enggame aameiba angtane nafsiserem bunarsusfer igama nesiktababili. 9 Aamei bunar-bunarsusfer imsa towaswena enggame, Yesus Kristus Tuhan nemna Jei nei nes uskambarsus nesiktababili. Jei Uwa Sanbagirfar baabeta yo waakena seyafter gemerserem ba Jeyam ge damtabil taman waaken-giribe. Jengga Jei ogirip mesam fortya, ane Jen Jena Jener etamtaasini angtane galgalyena gamserem enggalfe nei nes gam waakentababisif. Jei jes gamserem ga gam eyebili, jega nei seyafter waakena taman waaken-giribe Jebaner ga nesa damtabisi. 10 Esorola amna ga enggam doim temawer, doini aamei tahunu gwananmanaiserem jeme ijesa towaitanantam jam dupduptafe enggalfe angtane jem gam batobaabif. Waakenfer ga enggam, aamei doini jeiserem jamer isa tabantaasini jam dupduptalabe. Angtane nabal-nabalsusu ba aameisam doini jam kitulmife, ane aameiba nabal-nabalsusu aameima towaiwulunt doini jam dupduptafe. 11 Gwanan jes jepserem ini imna unggwan-girfer ge folbamini enggalfe, aamei ijama mwangbisif doini jeiserem jam dupduptafe. Jes gemerserem namwer aas jepserem jegme gemer, ini imna unggwan-girfer ga ise enggalf sege folbamini doini jeiserem jam tabantaasif jam dupduptalabe. Doini jes igama damtabilirim, doini jeiserem afwer ga jam isa kitulmini. 12 Uwa Sanbagiri Jei Jam guyon enggame, aamei jam damtabiyeneiserem ga jes isa kitulmini. Ane aamei ijesa damtabilirim enggalfe jam kitulmife, unggwanfer jes igama damtabilirim, afa bastowaifer jes igama damtabilirim, jeiserem igyen. Jengga igiserem ga aas: ini imna unggwan-girfer ga is enggalf sege folbamini ijama kitulmif. Afa ini imna is unggwan-girfer sege folbaminirim jam kitulmife, gam jega ini Uwa Sanbagirmana gase saaser-saaserswebana. 13 Ai aamei isa ajam balbabiyen enggame, aamei doini unggwanfersus isa kitulmini jamere angtane Yerusalemmana jei aa jes ne balbabilirim jam damtabife, jeiserem sene damtabili, ane jega jem temawer enggam se etamwena imnibe: aamei ijesa balbabilirim jam damtabife, jeiserem aamei ijama damtabiyen. Ai jes gemerserem aamei gam isa ajam balbabiyen. Jengga ini amna ga as enggam folbana angtane Kristen seyafter gemerserem jei aa jes ne balbabilirim jam damtabife, jeiserem ga sene damtabili. 14 Namwer aas jepserem imna apgal jigala unggwanfer, jengga angtane Kristen kota Yerusalemmanaiserem jei galgalyena. Jega jem temawer aamei samfer jei isa batobaabili. Ane galap afa aamei galgalyena jam ijeba nwinirim, ane jei aa jep ge galgalabarswebilirim, jeime samfer fwaina ibe isene kitulmini. Afa angtane Kristen seyafter gemerserem jei jes gamserem jena gam jam gane batomuwenaram, gam jega jei seyafter ga gane damtabili jei aa jes gane balbabilirim. 15 Taterisi Uwa Sanbagirmanaiserem jep ga enggam baatultel angtane Jelemanaiserem jem temawer, jei jame aa galap ge wofobilim tampata dwis fennabe: "Angtane tumilgala unggwanfer aa jei ne dupduptababilirim, jei unggwanfersus fas jam ne damtabiyen jei aa jes ne balbabilirim jemniwer. Ane angtane tumilgala bastowaifer aa jei ne dupduptababilirim, jei bastowaifersus jam ne damtabiyen jei aa jes ne balbabilirim jemniwer." (Keluaran 16:18) 16 Ai Uwa Sanbagiri unggwanfer aya bala enggame "Ase samfer golmini.", aam temawer Jei ini Titusmana mesam gwebabanant enggalfe Titus jei bunarsusfer aamei is gam batobaabif, ai aamei is aya batobaabili gamserem. 17 Ai Titus jam agalaba balaram imnip gamjon jam sofwefe, ini jemna ga saaser-saasersusfer folbana. Bunarsusfer ini jemna ba unggwan-giremam folbana enggalfe aamei is jam batobaabife, ane jega jem temawer jei jener ga gunu imnip jam sofwefe. 18 Ai nem afelnaiserem jei mese ai ajesa baftana Titus jei jebar ge sofwef imnibe. Nem afelna jeiserem jei awelna waakensusu gam gwebili Taterisi Waakena Uwa Sanbagirmanaiserem ga jes nasibenenne, ane jega jem temawer jemata aafmana seyafter gemerserem bosna jemna gane gulbatena. 19 Ane jetefeneryan, jemat-jemata jei mesane destabana jei abar seyafter agma sofwef kota Yerusalemwer, enggalfe ai doini aa jes ne dupduptababilirim, doini jeiserem agma girinmifelf angtane Kristen galgalyenaiserem jebe. Awelna waakena jeiserem ajewera gwebilirim, Tuhanmana bosna ga ajema gulbatef, ane ai ajema gwerauwulf enggame, ini amna ba as unggwan-girferam ge folbamini ai angtane Kristen afweraiserem ajama batobaabife. 20 Jei seyafter abar agma sofwef doini uskambar jeiserem jam girinmifelfe, jega enggalf angtane afa fas enggam jam ge gubiyen, "Paulus jelem afelen mesnabar doini jeiserem syefer ne girinfele." 21 Ai doini jeiserem waakenfersus aya gerebaasnenne, aam temawer ini amna as enggalf ge folbamini ai waakena tefner agma eyebif Tuhanem tarnabe, ane angtanem tarnap mese. 22 Ai gamjon nem afelna gamjon nafsiserem ai ajesa baftana, Titus ane nem afelna gwanan ai ajesa balaram jei jebar seyafter gangge sofobif imnibe. Ai gwela jemna amsama geraibowena, ane ai amsama towaswena enggame jei awelna Uwa Sanbagirmana ini jemna seyafter gemerserem ga jem eyebuwena. Ane namwer aas jepserem ini jemanme unggwan-girferam folbana enggalfe jei aamei is jam batobaabif, aam temawer jei bunarsusfer mesam towaswena enggame doini jeiserem aamei jebar isa dupduptababili ini saaser-saasermer. 23 Sa sarbistaabon Titusem temawer enggame, jei abar ai ge nwini, ane jei awelna abar ai ge gwebili enggalfe ai nawersamer aamei isa gam ge batobaabif. Ane nem afelna naura jeiserem Titusfar aa jei ge sofobiliserem imnibe, jei jemat-jemata aafmanaiserem ga jei ne bafsona, ane jei awelna jei aa jes ge gwebilirim, awelna jeiserem jeme jei bosna Kristusmana ga jem ge gulbatena. 24 Ga jem temawer, Titus ane angtane naura jeiserem Titusfar aa jei ge sofobilirim, jei jam aa jep ge forobilirim imnibe, aamei ga waakenater isa eyeipmini jebe, jega enggalf jemat-jemata afweraiserem jei ga sege towaswebili enggame, aamei bunarsusfer ba jei imsama nesiktababili. Ane aamei jes gemerserem gam ijewera eyebilirim, aamei ga ijema gwerauwulu enggame taterisi ai gwanan ajesa nasbilintim gwela imna waakenaiserem jem temawer, taterisi jeiserem ba bunaram.
91 Ai safnant gamjon isa ajam tulisulmiyen, doini aa jes ne dupduptababilirim jem temawer enggalfe, angtane Uwa Sanbagirmana kota Yerusalemmanaiserem jei jem batobaabife. 2 Aiba amsam towaswena enggame, ini imna is unggwan-girfer ge folbamuwena enggalfe angtane jam batobaabuwef. Ane ai bosna imna isa amsam kitulmitenant angtane propinsi Makedonyamanaiserem jemnibe. Ai jei enggam ai balbabilint im temawer, "Tahunu gwananmanaiserem nem afelen mesna kota Korintus propinsi Akayamanaiserem, jei mesam ge menetaasinint enggalfe, doini jam ne kitulmif angtane Yerusalemmanaiserem jebe." Ane jei taterisi jeiserem im temawer aa galap ne sarbilintim, ini jeman jegme ga aa ge kanausweipmini enggalfe, jeime angtane Yerusalemmanaiserem jes ne batobaabif. 3 Jengga ai nem afelen mesna nawer-ningna jeiserem ai as baftabili imnibe, jega enggalf ai ajes nasbilintim bosna imna is ajewer kitulmitenantam, taterisi jeiserem fas jam etamweyan ol kabwakfe. Ai amsam nasbilint enggame, ai jam ajep fornaram imnibe, jes jepserem aamei doini jeiserem fwater isa menetaasini. Angtane nawer-ningna jeiserem aamei is ga sene batobaabili doini jeiserem jam dupduptononnofe, jega aamei doini jeiserem gam isa menetaasini, ai agemer gunurum. 4 Ai angtane Makedonyamana afweraiserem jebar jam ajeba fornaram imnibe, afa aamei doini jeiserem gemerje ijama dupduptoyonnoye, ane gam jega doini jeiserem gemerje jam menetaasiyen angtane galgalyenaiserem jep gaarmife, afa ga gam jes gemerserem, gam jega ai ga jam asa seferswena, aam temawer ai jei amsama balbabili enggame, "Angtane Korintusmana bunarsusfer doini sene menetaasini." Ane afa aamei gemerje ijama menetaasiyeneye, gam jega ai jam ajeba fornaram imnibe, aamei mese aamei jon ga isa sefersona. 5 Jega jem temawer, ai nabala Titus ane nem afelna naura jeiserem ai ga ajes baftabili imnibe, nalefe ai ajama sofweyan imnibe. Ai angtane jeiserem nabala ga ajes baftabili enggalfe, jei aamei is gane batobaabif doini jeiserem jam menetaasif. Jepga ai imnip jam ajeba fornaram, doini unggwanfer jeiserem aamei fwater ijesa balbaminintim jam gaarmife, doini jeiserem ga fwater isa menetaasini. Ane aamei ga jem isa gwerauwulu enggame, doini aamei ijesa kitulminirim, jeiserem ba ini saaser-saasermer ima kitulmini, jeke aamei is jam ne taatwebaabili. 6 Sa sarbistaabon! Angtane twam tanna bastowaifer aa jei gam tonolaram, jei igi jemna bastowaifer gam damtabili. Jengga angtane twam tanna unggwanfer aa jei gam tonolaram, angtane jeiserem jei igi jemna uskambar gam damtabili. Jes gemerserem aaiserem jegme gemer: Afa aamei bastowaifer isa kitulminirim, gam jega aamei bastowaifer isa damtabili. Ane afa aamei unggwanfer isa kitulminirim, gam jega jem fwainfe unggwanfer isa damtabili. 7 Angtane daamfen-daamfennem seyafter gemerserem, jei jener aa jeber gam mwangbanaram jam golmife, jei doini ga jeber gam golmini. Afa ini jam gam folbanaram "Ai doini ajam golmiyen.", afa jam gane taatwebanaram doini jam golmife, gam jega safnant doini jam golmiyen. Afa angtane jam gane tergenbanaram jei doini jam golmife, afa ga jes gemerserem, gam je kapka, aam temawer angtane apgal jigala ini saaser-saasermer aa jei gam golminirim angtanefe, Uwa Sanbagiri Jei angtane jeiserem ga jes gam nesiktene. 8 Uwa Sanbagiri Jei baabetabaram, jega waakena seyafter gemerserem Jei samfer ibe is kitulmini. Jeiba baabetabaram, jega enggalf aamei ijesa balbabilirim, seyafter jeiserem jeber-jeber gam isa damtababuwena. Ane enggalf mese, aamei unggwanfersus gam isa damtabili aamei ijesa bilirim jemniwer. Uwa Sanbagiri Jei jes gamserem gam se eyebili, jega angtane apgal jigala jam ne damtabiyeneiserem jei aa jes gane balbabilirim, aamei jei jem gam igama batobaabili. 9 Taterisi Uwa Sanbagirmana jep ga enggam baatultel, angtane unggwanfer aa jei golminirim jem temawer: "Jei unggwanfer gam golmini angtane galgalyenaiserem jebe; waakenfer jes gamserem gam jam eyebiliserem fas jam tikweyan." (Mazmur 112:9) 10 Uwa Sanbagiriserem twam tanna ba Jeyam gulbana makan anggwafe, ane Jei tumilgala ga nes gam golmini nebe. Ane Jeime ip is gam golmini seyafter aamei jes igama balbabilirim jam damtabife. Ane Jeime aamei jes igama damtabilirim, jeiserem gam gwebabili unggwanfersus jam ge etamwebife. Jei jeiserem ga enggalf gwebabili, aamei angtane unggwanfersus jem igama batobaabif. 11 Uwa Sanbagiri Jei is kitulmini unggwanfersus, jega aamei unggwanfersus angtane nafsiserem jep gam isa kitulmuwena. Ane doini aamei ijesa dupduptonorom enggalfe angtane galgalyenaiserem jep jam gaarmife, doini jeiserem ga ai asa girinmifele jebe. Ane jei doini jeiserem jam aa jep ne tebanaram, jei Uwa Sanbagiri ga sene pujitene, ane jei Uwa Sanbagirfe "Ase samfer golmini" ga sene gweyibene. 12 Doini unggwanfer jep jam ijewera kitulminirim, jemna igi ga naura. Angtane Uwa Sanbagirmana apgal jigala jei aa jes gane balbabilirim jam ne damtabiyeneiserem, jei jem gane damtabili. Ane angtane unggwanfersus Uwa Sanbagiri ga gane bala uskambar, "Ase samfer golmini." 13 Angtane aamei ijesa batobaabilirim jei Uwa Sanbagiri sene pujitene, aam temawer aamei doini unggwanfer ijewera kitulminirim jebe, ane angtane nafsiserem jep mese ijewera kitulminirim. Jei Uwa Sanbagiri jem temawenefener jam ne pujiteyen. Jeime Uwa Sanbagiri sene pujitene, aam temawer aamei ga ijema gwerauwulu enggame, aamei Taterisi Waakena Kristusem temawer ba bunarsusfer ima taabili, ane Uwa Sanbagiri aa jes bilirim, aamei jeiserem waakenfer ima onsobili. 14 Ane jei sembayanga im temawer sene gwebana, ane jei aamei isene nesiktababili unggwanfer, aam temawer jei mes ne domola Uwa Sanbagiri Jei waakena Jelemanaiserem ip is mes golmini unggwanfersus. 15 Au, nei Uwa Sanbagirfe ase samfer golmini ganma gweyibe, aam temawer Jei waakensusu nes mesam golmini nebe! Waakena jeiserem ga aas, Jei Tanna Jelemana mesam baftannu ogiri aaiserem jep foryafe nem temawer. Jeiba waakensusum! Ula angtanemanaiserem, katana afa fas seyafter Kristusem temawer waakenfer jem nasbife, ane seyafter Uwa Sanbagiri nep aa jes golminirim.
101 - 2 Namwer aas jepserem ai Paulus, ai aner aamei isa ajam balbabif, aamei taterisi aaiserem ai ajes bilirim waakenfer isa sarbili! Ginanggwana amna enggam ge gubiwena, "Paulus jei taterisi jelemanaiserem ga jetefener nasbinenne, jei jener aa jes gam bilirim jam eyebife, jei ga jetefener gam eyebili, angtane ogirmana gamserem. Jei taterisi Uwa Sanbagirmana jam nasbiyen, Uwa Sanbagiri aa jes bilirim jei jam eyebiyen. Uwa Sanbagiri Jei Paulus Jam baftayan." Ai aamei isa ajam balbabili, aamei taterisi syefer jes gemerserem gam ijama nasbiyen am temawer, ginanggwana amna jes gamserem. Ai bai aamei is ajam uftabif kakalmer! Ginanggwana amna enggam ge gubiwena, "Paulus jei angtanem tarnap jam gam erne angtane jam uftabife. Jengga jei surta bijuap aa jep gam tulisulurum, jei angtane kakalmer ga jep gam uftabili." Jengga ai surta aaiserem jebe, ula kakalmer jep ajam tulisulyon. Fas. Ai ula waakena tefner ai tulisulu ini jam onabertalaiserem jeme, ini Kristusmana gamserem. Jengga ai imnip jam ajep fornaram, afa angtane afweraiserem imnibe, afa jei syefer gemer ge nasbawelaye am temawer, ai bunarsusfer angtane jeiserem as uftabili kakalmer. O ai aamei isa ajam balbabili unggwanfer, aamei syefer ijama nasoweyan jega ai jam ajep fornaram imnibe, ai aamei isa ajam uftabiyen kakalmer! 3 Ai ginanggwana amnaiserem Kristus baif aa jei ne gwebanaram ai jebar asa erna. Jengga ai safe gemer aya gwena ogiri aaiserem jebe, ai ajama erayan angtane ogirmana gamserem jei aa gam ge erabawefaram. 4 Angtane ogirmana jei jam gangge erabanaram jei ulumu yo ginna ga jes gane erbili, jengga ai ulumu yo ginna ajama erbiyen jem erafe. Fas, gamyan. Ai baabeta Uwa Sanbagirminiwer agma domola enggalfe baabeta bwat kabwakmanaiserem ai ajema artabistefalfe. Ane angtane baif aa jei naawenaram angtane nafsiserem jei Taterisi Waakena ai ajesa nasbinennerem jam ne onsobife, aime angtane jeiserem taterisi jemna jem agma artaipmistefalf. 5 Baabeta Uwa Sanbagirmanaiserem jeme, ai ga taterisi angtane syefer aa jei gane towas-towastababilirim ga jem agma artabistefala. Jei jen jena tefner gane detenanna, ane jei bai Uwa Sanbagirem temawer jam ge towaswebife. Ginanggwa jei ginanggwana jemna gane tebabili, ane ginanggwana aa jes gane tebabilirim, jei ga taterisi Dan Posmanaiserem ga jes gane saribene. Jes gamserem aaiserem jegme gemer: Angtane ini kapka jemnaiserem Kristus baif aa jei ne gwebanaram, angtane jeiserem taterisi jemnaiserem ajama artabistefala. Ane angtane gwanan Kristus baif aa jei ne gwebanaram, ini jemna ga aa ge waakenswebamini enggalfe, jei Kristus tefner gam ne tikwebaatif ini seyafter gemerserem jeme. 6 Ginanggwa taterisi Dan Posmana jam onsoibiyeneiserem, Dan Pos jei ginanggwa jeiserem gam tamtamtababili. Jes gamserem aaiserem jegme gemer: Aamei jam isa gwerauwulu enggame, aamei taterisi Kristusmanaiserem ai isa ajesa bilipminirim ibe, aamei taterisi jeiserem waakenfer ima sarbili, ane ga ima onsobili. Aamei taterisi Kristusmana waakenfer jam ijeba onsobilirim, ai enggam aya gunu, ai amsama menetwesini angtane jam onsobiyeneiserem jei agma tamtamtababif. 7 Aamei am temawer ilem inibe syefer ima gunu, aam temawer aamei ai ase numu tefner ima gerebaipmini, aamei gwela amna ase ijama domolmiyen. Angtane aasaje im nenennap jei enggam gunu, "Ai baabeta Kristusmana bunarsusfer ai domola." Angtane jeiserem jei jamer gam towaswena enggame, ai mese bunarsusfer baabeta Kristusmana amsama domola, jei gemerserem. 8 Angtane afweraiserem im nenennabe enggam ge gubili, "Paulus enggam gunu ’Uwa Sanbagiri Jei ams baftana. Tuhan Jei baabeta Jelemanaiserem ap as mesam gulbana.’ Paulus jei game aa jewer gunurum, jei syefer jena ga jem gaartena." Ai safe baabeta Tuhanmanaiserem an ana jem temawer agam gaartena, ai ajam sefersweyan. Tuhan Yesus Kristus Jei bunarsusfer baabeta ap as mesam gulbana enggalfe, ai ini imna isa agam kanautabaipmif, jeke enggalem temawer ai ini imna isa ajem kabwaktabaipmif. Ai aamei jam isa agalap uftabilirim, jes jepserem ai kabwakfer ajam eyebiyen. 9 Ai bai aamei enggam ijama gufe, "Paulus jei uskambar nems erel-ereltababili surta jemnaiserem jeme." 10 Angtane ai baife as jei ne gwebanaram jei enggam ge gubili, "Paulus jei Rasulyan. Surat-surta jelemanaiserem jei kakalmer eyebaabuwena. Jengga jei nebar jam negama nwinirim, jei jam gam erne nems uftabife, ane jei taterisi Uwa Sanbagirmana jam aa jep gam nasibenerem, jei waakenfer jam nasbiyen." 11 Angtane jes gamserem gam aa jei gangge gubilirim, jei ga jam sege towaswebili enggame, ai im tarnap jam agma nwinirim, ai ga gemer agma eyebili ai surta amnaiserem jep agemer tulisulurum. 12 Ai bunar-bunarsusfer ai ana enggam ajama gitmiyen, ai angtane jen jena aa jei ne tetenaram jei galserem. Jei syefer ge gubili jelem inibe. Jei jener gane mwangbisini waakenaiserem jam eyebife ga fwersa. Ane jei syefer enggam ge gubili, "Waakenaiserem angtane jamer jes ne eyebiliserem ga enggala, ai agalatera eyebuwenaram." Jepga jei jam aa jep gane eyebilirim jei jener aa jes gane mwangbisinirim, jei enggam ga gangge gubili, "Ai waakenaiserem ajesa eyebili." Jei jes gamserem gam aa jewer gangge gubilirim, jei angtane teisyensusu. 13 Ai jei galserem galyan. Uwa Sanbagiri Jei awelna amna as Jener mwanggipmisil. Ane Uwa Sanbagiri aa jes mwangbisilim, jeiserem ai ajewera onsobilirim, ai ga awelna im nenennap ajewera gwebili. Ane awelna jeiserem ai ga ana jem temawenefener aya tetenanna, awelna jeiserem Uwa Sanbagiri ajes golminirim abe. Ai ana ajama tetenanayan awelna Uwa Sanbagiri ap Jam golmiyeneiserem jem temawer. 14 Uwa Sanbagiri Jam aa galap mwangbisilim awelna amnaiserem jem temawer, Jei ai as enggam mwangbabisil ai ga awelna im nenennaber asa gwebili. Jega jem temawer ai imnip jam agalaba sofnantam enggalfe, Taterisi Waakena Kristusem temawer ai isa agma nasipminennef ibe, Uwa Sanbagiri aa jes mwangbisilim, jeiserem ai ajama ayebiyen. 15 Uwa Sanbagiri Jei awelna abe as im nenennap golmini, ane Jei angtane nafsiserem jebe awelna tampata nafsiserem jep kitulmini. Ane ai an ana ajama tetenanayan awelna angtane nafsi aa jes gane eyebilirim jem temawer, jengga tampata Uwa Sanbagiri ap aa jes bilipminirim ai ga awelna ga ajepfenera gwebili. Ane ini amna ase unggwan-girsusemer ge folbamini aamei ga Kristus baabetmer isa tebana, jega ai awelna im nenennap unggwandwasusu gam asa eyebili awelna gwananmanaiserem jemniwer. 16 Ane jepga ai enggam aya gunu ai Taterisi Waakena ajema nasbinennef kotana imnaiserem jem jitefwer aaiserem jewer, taman-tamna Taterisi Waakena jam ne nasbineneyene jepserem. Angtane afweraiserem jei akar-akarem enggam gam naawena, awelna angtane nafsi waakenfer aa jes gane eyebilirim, jei awelna jeiserem jes gane bili enggame, "Awelna waakena jeiserem ba amnam." Ane jei jena ga gane tetenanna awelna angtane nafsiserem jei aa jes gane eyebilirim jem temawer. Jengga jes gamserem ai gam ajama gweyan. Ai awelna Uwa Sanbagiri ap aa jes golminirim, ai awelna jeiserem aner ga ajetefenera goltenanaf. 17 Taterisi Uwa Sanbagirmanaiserem jep ga enggam baatultel: "Angtane jener aa jes gam eyebilirim, jei jeiserem jem temawer jena jam gaartenanayan. Jengga Tuhan aa jes gam eyebilirim, jei ga jetefener gam goltenanna." (Yeremia 9:24) 18 Angtane jen jena aa jei gam gaartenaram, awelna jei jener aa jes gam eyebilirim jem temawer, Uwa Sanbagiri Jei bai angtane jes galserem Jam tebayan. Jengga angtane Tuhan aa jes gam gaartenaram, Uwa Sanbagiri Jei angtane jeiserem ini saaser-saasermer gam tebana.
111 Angtane jen jena aa jei ne detenannaram, jei jener aa jes gane eyebilirim jem temawer, angtane jeiserem jemna miri ba kapkam. Safe gam, ini amna ase enggam folbana aamei am temawer gwanan jam isa fina abakfer, ai ana bastowaifer as gaartena baabeta ai ajes domolaram rasulf gwefe jem temawer. 2 Uwa Sanbagiri Jei aamei is gemer nesiktababilirim, aime bunarsusfer aamei isa gemer nesiktababili ini amna seyafter gemerserem jeme. Ane Jega jem temawer ini amna as unggwan-girfersus folbana enggame, aamei ga Yesus Kristus tefner isa onsobana. Jes gemerserem aaiserem jegme gemer, ini uwamana enggam gam folbana tane yafma jemnaiserem gwela jemna tabalmer falbif enggame, jei yafonsiwirmer aa gemer gam gwenaram, anggwana nafsiber etam-etama jam ge gwebiyen. Ane jei anggwana aa jep gam geraram, jei anggwana daamfenna jeiserem jebarnefener ga gangge gwena. Jes gemerserem ini amna jegme as gemer folbana, aamei jeber-jeber daamfennaber Kristusfar isa gwena, ane aamei angtane nafsi afa ijama onsobayan. 3 Aamei Kristus tefner imsa nesiktene, ane aamei Kristus imsa onsobana ini tabalmer. Jengga namwer aas jepserem ini amna as jam eseswebana, aamei engbar guru ol kapkaiserem jei jam aa jep ge forobilirim imnibe, aamei ga isene afaf-afaftababili, ausa afaf-afafaiserem fwater Hawa aa gam afafulum. Ane aamei jam isene afaf-afaftababilirim, jepga aamei engbar Kristus ga isa mirtetefala. 4 Ini amna im temawer ase jam eseswebana, aam temawer angtane imnip jam forolaiserem taterisi nafsiserem Yesusem temawer jes towas-towastababiliserem, aamei angtane jeiserem ga ini saaser-saasermer igama sarbabili. Taterisi jemna jeiserem safe nafsi ai ajesa towas-towastababilirim jemniwer, aamei taterisi nafsi jeiserem ga igama taabili. Mafnana jei ip aa jes ne bilipminirim, mafnana jeiserem nafsi Mafnana Uwa Sanbagirmana aamei ijesa taabilintim jemniwer. Jengga safe gam, aamei mafnana nafsi jeiserem jam igama taabili. Ane taterisi jemna aa jes ne bilirim waakeneme, taterisi jeiserem bunarsusfer safe nafsi Taterisi Waakena aamei gwanan ijesa sarbilintim amniwer, aamei taterisi jemnaiserem igama taabili. 5 Angtane taterisi afaf-afafa jeiserem aa jei ne nasbinennerem, jei akar-akarem enggame aa jei naawenaram rasul sanbak-sanbaksususerem jei galserem. Jengga fasfasus ai ana enggam ajam balyan ai bastouya angtane afaf-afafa jeiserem jemniwer. 6 Angtane afwer jei enggam ge gubili, "Paulus Taterisi Uwa Sanbagirmana aa galap nasbilirim, jei waakenfer jam nasbiyen." Ai engbar ajam towasweyan taterisi waakenfer jam nasbife, jengga ai taterisi Uwa Sanbagirmana bunarsusferaiserem ai waakenfer amsam towaswebili. Ane aamei bunarsusfer imsama towaswena enggame, ai taterisi Uwa Sanbagirmana ai waakenfer amsam towaswebili, aam temawer ai taterisi seyaftersus jeiserem amsama nasbuwena aamei seyafter gemerserem im tarnabe. 7 Ai Taterisi Waakena Uwa Sanbagirminiwer aaiserem jam isa agalap nasipminennerem ibe, ai jem temawer bastowaifer aamei isa ajam balbabiyen doini ap as ijam gulbafe. Ai jes gamserem gam ajewer eyebilirim, ai ga an ana ajem onabertana. Jeiserem ai ga enggalf ai eyebili, ai aamei isa agam kitultef etam-etama kapkaiserem jewer. Ai jes gamserem gam ajewer eyebilirim, ai fas etam-etama ajam eyebiyen. 8 Ai jame aamei isa agalap towas-towastababilirim Taterisi Waakena Kristusem temawer, jemat-jemat kotana nafsiserem jei doini as jei ne gerbawena abe. Ai engbar samfer enggame as gunu taterisi jeiserem jem temawer, ai doini jemniwer agalap tebabilintim, jeiserem ga enggala ai doini jemniwer ajam komkomtababisili gamserem enggalfe, ai aamei isa ajem batobaabif. 9 Ai ibar jam negalaba nwinirim, ai doini fas ajam domolyan. Jengga gwanan jes jepserem ai doini imniwer isa ajam balbaipmiyen, aam temawer ai bai aamei susanap ijama janfe. Nem afelen mesna aa jei ge jalbilirim propinsi Makedonyawer, jei seyafter ai ajes balbabilirim ap as mes ne kitulbono. Fwater galapserem ai aamei isa ajam balbabiyen aamei ap ase ijama kitulbofe ai ajes balbabilirim. Ane ai bunarsusfer ims towastababili, nunu gamjon galap aaiserem, aime apgal jigala afa fas imniwer isa ajam balbaipmiyen. 10 Jeiserem ai ga ana ajem temawer gaartena. Ane ai aamei isa ajam balbabif, aamei angtane propinsi Akaya je ijeya nwinirim, ai doini fas imniwer isa ajam balbaipmiyen. Ane jega jem temawer angtane jepmanaiserem jei fas ai as jam ne uftayan ai ana ajem gaartelaiserem jem temawer. Seyafter jeiserem ai ajes balbabilirim ba bunaram, aam temawer Kristus aa jes balbabilirim jeba bunaram, ane Jeime jeber-jeber ai ase batobana enggalfe, ai jeber-jeber bunarsusfer gam agam nasowena. 11 Aamei engbar enggam ima gunu, "Paulus jei doini nemniwer fas nes jam balbaipmiyen. Jega jem temawer nei nemsa towaswena jei nei nes jam nesiktababiyen." Jengga fas, gamyan! Uwa Sanbagiri Jei mesam towaswena ai aamei isa uskambarsusam nesiktababili. 12 Namwer ai doini imniwer ajam balbaipmiyen, ane galap mese ai aamei isa ajam balbabuweyan, jega angtane akar-akarem enggam aa jei naawenaram rasul sanbak-sanbaksususerem jei galserem, angtane jeiserem jei fas jena jam ne detenannayan jei enggam aa jewer gangge gubilirim, "Ai awelna enggam aya gwebili, Paulus aa gemer gwebilirim. Ane ai doini imniwer aya taabili, Paulus aa gemer taabilirim." 13 Kristus Jei angtane jeiserem Jam baftabiyen. Jei rasulu ol kapkaiserem. Jei angtane jam ne afaf-afaftababili awelna jei aa jes ne gwebilirim jem temawer. Jei akar-akarem ga enggam naawena angtane Kristus aa jes baftabilirim jei gamserem. 14 Ai ajam bitbitweyan jei akar-akarem jes gamserem gam aa jewer naawenaram, aam temawer bawasa jeiba galateram. Jei akar-akarem enggam gam gwena malaikata nafabara Uwa Sanbagirmana gamserem. 15 Ga jem temawer, ai ajam bitbitweyan angtane awelna bawasmana aa jei ne gweyibenerem jeimba akar-akarem enggam se naawena, angtane waakena Uwa Sanbagiri aa jes gam bilirim jeiserem aa jei gam eyebilirim jes galserem. Nunu umwef jemserem jei ga jem sene tamtamtababisi jei aa jes ne eyebilirim jem mwonggaber. 16 Ai aamei isa gamjon balbabili: angtane jei am temawer fas enggam jam ge gubiyen, "Paulus jei angtane miri kapka galserem, Paulus jei ga gam eyebili." Aamei jes gamserem saf imsa gunu am temawer, jengga aamei ai baife as ijama gwebayan. Ane ai safe angtane miri kapka galserem gam as nasowena, ai as jam isa sarbana, jega ai an ana bastowaifer gam as gaartena baabeta ai ajes domolaram rasulf gwefe jem temawer. 17 Aaiserem ai ajes balbabitowelaiserem, aaiserem ai ase Tuhane balyan jeiserem jam balbabitowefe, aam temawer ai an ana aner ajewer gaartenaram, ai ga enggam as nasowena angtane miri kapka gamserem. 18 Angtane ba unggwanfersusam jei jen jena aa jei ne detenannaram jei ogirip aa jes gane eyebilirim jem temawer. Jei gamserem, ai mese aime ana ajam gaartenanaf bastowaifer, jega aime as jam isa tebana. 19 Aamei in ina enggam ima gitmini, "Tousaiserem nemna ba unggwandwasusum.", jengga aamei taterisi angtane miri kapka aa jes gane nasbilirim, aamei taterisi jemnaiserem ini saaser-saasermer igama saripmini. Gam jega, fomfoma? 20 Angtane jei aamei isene gwebabili angtane jam armantababili jes gamserem, ane jei apgal jigala yo doini imna ga isene eripmifele, ane jei aamei ga isene gwebabili jam isinbaabisnenele gamserem, ane jei jen jena ga sene tetenanna enggalfe im sanbakf nwinfe, ane aamei isene safsaftababili, angtane jes galserem ip gam is jei ne eyeipminirim. Afa aamei angtane jes gamserem jes gam is jei ne eyeipminirim, gam jega aime as jam isa tebana, ai safe angtane miri kapka gamserem gam ai nasowena. 21 Aamei engbar enggam ima gunu, "Paulus jei kapka nebe nes jam eyeipmiyen, angtane nafsi jei aa gala gane eyebilirim. Gam jega nei enggam nes towaswena, Paulus jei angtane erele, baabeta fas." Ai gwanan agemer gunurum, jes gemerserem ai gamjon ga agemer gunu. Angtane jeiserem jei jen jena jam ne detenanna jelem temawer, ane angtane miri kapka jei safe jes gamserem game jena aa jewer ne detenannaram, aime an ana as gaartena alem temawer. 22 Angtane jeiserem kabwakfer is jei ne eyeipminirim ibe, jei jen jena gane detenanna. Jei enggam ge gubili, "Aiba angtane Ibranimanam. Aiba angtane Israelmanam, angtane Uwa Sanbagiri aa jes destabaabilirim. Ane aiba asal-asala Abrahammanam." Ba bunaram jeiba angtane Ibranimanam, jengga ai mese aimba angtane Ibranimanam. Jeiba angtane Israelmanam, jengga ai mese aime gemer, aimba angtane Israelmanam. Ane aimba asal-asala Abrahammanam, jei gemerserem. 23 Angtane jeiserem jei ga sene balbabili jei awelna Kristusmana gane gweyibene. (Ai tousa ai aas gamserem gam ajewer nasbilirim enggalfe ai ana ajem gaartef, ai ga enggam as nasowena angtane miri kapka gamserem!) Jengga awelna Kristusmana waakenfersus ai gweyibene jei seyafter gemerserem jemniwer! Ai awelna uskambarsus ai gwebili angtane jeiserem jemniwer. Ai bwiyibe as unggwanfersus ne katantowena jemniwer. Ai as unggwanfersus ne safsaftawena jamer tamtamsus jemniwer. Ane ai unggwanfersus amkom afom tere. 24 Angtane sanbaka Yahudimana jei ai as jam ne tamtamtalabe ga enggammer tafna gwiri. Jei ai ase enggam ne tamtamtanant, jei tiga pulu sembilan kali ai as jam ne safsaftalabe bana utuboroserem jeme. 25 Angtane sanbak Romamana jem safan mesnaiserem jei ai ase nawer-ningginfer ne safsaftanant time. Ai ase daamfenfer ne munbosont toneme, jengga ai ajam teryen. Ai agalap wofowenantam atdusame, atdusa ga nawer-ningna ai jebar ajam nwintelabe finibe. Ane ai finibe daamfenfener as jam girnenelebe nunu daamfenna, gwini daamfenna. 26 Ai agalap wofowenantam, ai tamtamsusu uskambarsus ai domolwenant. Fona jam tiliserem tamtamsusu jewer agam domola. Ane tamtamsusu afa angtane komkomaiserem jemniwer agam domola. Ane tamtamsusu afa anggwabura alemana Yahudimanaiserem jemniwer agam domola, ane angtane Yahudimanyanaiserem jemniwer mese. Ane tamtamsusu afa kotanaber, ane afa tamanfennap mese, ane afa finip agam domola. Ane angtane akar-akarem aa jei gam naawenaram enggame angtane Kristen am afelen mesna gamserem, ai tamtamtala jemniwer mese agam domola. 27 Ai awelna uskambarsus ai gwebili, jamere baabeta ase fom barwebala. Gwini unggwanfer ajam taweyan. Nunu unggwanfer ai as wisei gam folbana, ane fobotona as gam folbana. Nunu unggwanfer ai tumilgala fas. Ane agam wisimswena aam temawer ai fene fas, ane ai jena fas ai ajep nwinfe. 28 Ai tamtamtala seyafter jeiserem agam domolant, ane gamjon tamtamtala afweraiserem nafis-nafismer agam domolant. Ane seyafter jeiserem jetefeneryan, nunu jeber-jeber ini aman jegme as jam eseswebawena jemat-jemata seyafter gemerserem jem temawer. 29 Afa aasaje Yesus kanaufer jam tebayanaye, ini amna jem temawer as jam gam eseswebana. Afa aasaje etam-etam jam gam eyebilirim, ini amna ga as jem temawer gam jenbana. 30 Ai bai ana ajam gaartenanafe, jengga afa ai an ana jam as gaartenannaram, ai tamtamtala ai ajes domolantam ga jem temawenefener as nasowena, aam temawer taterisi jeiserem angtane nafisfe gase gwerauwulmini enggame, ai baabeta fas. 31 Uwa Sanbagiri, Uwa Tuhan Yesusmanaiserem, Jei tousa enggame, ai aamei isa ajam afaftababiyen. Nei bosna Jemnaiserem ganma pujiwulbo jamer abak-abaksus. 32 Ai taterisi aaiserem jes mese ai ibe is ajam towasulmif. Ai gwanan kota Damsik je agalap nwinintim, jes jepserem ai bunarsusfer amsam towaswena ai baabeta fas. Gubernur Raja Aretasem gwonabe aa jei nwinirim, Gubernur jeiserem jei ginanggwana ga balbabilint kota Damsikmana pintunu jam gerebaabisnenefe enggalfe ai as gam ne tebaf, ai kotana jeiserem jewer jam ajep totintyerem. 33 Pagara kotana jeiserem ga tunawer aa jes ne eyeminirim ane ga tagarsusu. Pagara jeiserem ga irifsusu. Jengga am afelen mesna jena pagar sagap aa jemanem denminirim, ai ga ase jei ne batobanant. Ai keranjan dusap ai kawetenant, ane am afelen mesna jeiserem jem ja mwonawer ga asene tebastaatinint naaweme jamer onabo. Jewer ga ai nunggirinint tafna Gubernurmanaiserem jewer.
121 Bunar-bunarsus ina jam gaartenanalaiserem jemna igi fas. Safe gam, ai gamjon ana ajam gaartenanaf. Namwer aas jepserem ai ibe isa ajam nasipmif Tuhan Yesus Kristusminiwer ai ajes damtabilirim jem temawer, ane taterisi Tuhan ap as jes gweretabaibenerem jes mese. Ai aaiserem ai damtabili: 2 Empat belas tahunu fwater aaiserem, ai as mesam gaarteyal taman waaken-giribe, tamna tagarsususerem Uwa Sanbagiri aa jep nwinirim. (Ai ajam towasweyan ai bunarsusfer ke tifni seyafter gemerserem jebaner gaarteyal taman waaken-giribe, afa as mafnan tefner gulbateyal. Jengga tousa Uwa Sanbagiri Jenfentowaifener.) 3 - 4 Ai aamei isa gamjon age towastababi, ai amsam towaswena aiba as mesam gaarteyal jamer taman waakensususerem, tamna Uwa Sanbagiri aa jep nwinirim. (Ai ajam towasweyan ai bunarsusfer ke tifni seyafter gemerserem jebaner gaarteyal, afa as mafnan tefner gulbateyal. Jengga tousa Uwa Sanbagiri Jenfentowaifener.) Ai tamna jeiserem jebe agalap nwinintim, taterisi waakensususerem ai sarbisinint Uwa Sanbagirminiwer. Ula angtanemanaiserem katana afa fas taterisi jeiserem jem nasbife, ane Uwa Sanbagiri Jei angtane fas Jam balbabiyen taterisi jeiserem jam ne nasbife. 5 Amnibe aa je etamwenantam, jeiserem ba waakensusum, ane ai ga samfer ana jem temawer as gaartena, jengga ai enggam ai gunu ai bai an ana jem temawer ajam gaartefe. Ai gwanan is gemer tulisulminirim, ai taterisi aaiserem ana ga jem temawenefener as gaartena: ai anfentowai baabeta fas ajam domolyan, jengga Uwa Sanbagiriserem ai ga ase Jei batobana. 6 Afa ini amna as enggam se folbana ai ana ajam gaartenanaf, afa ga gam jes gamserem, ai angtane miri kapka jemanserem ai galyan, aam temawer taterisi ai ajes nasbinennerem, taterisi seyafter jeiserem ba bunaram. Jengga ai jam gaarteyalaiserem taman waaken-giribe, ai gamjon jem temawer an ana ajam gaartenanayan, aam temawer ai bai angtane am temawer enggam ge gubife, "Paulus jei waakenaiserem mes domola taman waaken-giribe, ane ga jem temawer jei angtane sanbaka." Ai bai angtane jes gamserem gam jam ge nasbawefe. Awelna Kristusmana ajes eyeibenerem, angtane mes ne domola. Ane Taterisi Waakena ai ajes nasbinennerem, angtane mes ne sarbili. Ai ga enggam ai gunu, angtane ga awelna jeiserem jem temawer jetefener gane nasbili. 7 Seyafter jeiserem ai taman waaken-girip ai ajes damtabilintim, ane Uwa Sanbagiri abe aa jes towastabaibenerem, seyafter jeiserem ba waaken-waakensusum. Ane jega jem temawer Uwa Sanbagiriserem Jei gunu ai tifin bwerna siginsusu ajam domolf enggalfe, ai seyafter ajes damtabilintim taman waaken-giribe, waakena jeiserem jem temawer ai an ana ajam gaartenanayan. Bwerna jeiserem Uwa Sanbagiri ap as jes gulbanaram, bwerna jeiserem ba agwana bawasmanam enggalfe ai as jem saftaf, jega ai ana unggwanfersus ajam gaartenanayan. 8 Ai sembayanga Tuhanfe ajam gwebabalabe nawer-ningna enggalfe, bwerna jeiserem ai as jam aftannufe. 9 Jengga Tuhan Jei ai ase enggam tamawolbana, "Paulus, Ai aamei isa uskambarsus nesiktene, ane Ai aamei isAs batobana, jega enggalf aamei bwerna jeiserem jebar kanaufer gam is fina. Aiba imsam nesiktene, jeter samfer; aamei safnant ijam waakensweyan. Ga enggam, aamei jam igam werenswenaram, gam jega Ai aamei isAs batobana baabeta Amna unggwandwasususerem jeme." Tuhan jes gamserem Jei ams bala. Ga jem temawer, ini amna saaser-saasersusu ai ana ajam gaartenanafe tamtamtala ai ajes domolaram jem temawer, aam temawer ai jam jep agam werenswenaram, jes jepserem ai ana ga agam entene Kristus Jei as gam batobana baabeta Jemnaiserem jeme. 10 Jega jem temawer ini amna saaser-saasera tamtamtala jam domolfe aam temawer ai Yesus Kristus onsobana. Ai safe jam agam werenswena, ini amna as gemer gam folbana saaser-saasermer. Ane angtane safe ai as jam gane imei-imeitana, ane ai safe kapkaiserem jes agam domola angtaneminiwer, safe gam, ini amna as gemer gam folbana saaser-saasermer. Safe kabwaktala seyafter gemerserem as jam gam etamwebana amnibe, ini amna ase saaser-saasermer gam folbana, aam temawer ai jam jep agam werenswenaram, jes jepserem ai baabeta Kristusmana ga agam domola. 11 Bunar-bunarsus ai ana jewer gaartenannaram, ai ga ames nasowena angtane miri kapka gamserem. Ai bai jes gamserem gam ajam eyebife, jengga angtane afweraiserem mesangge gubili, "Uwa Sanbagiri Jei Paulus Jam baftayan. Jei rasulyan." Bunarsusfer angtane taterisi kapkaiserem jam ajep gane nasbilirim am temawer, jes jepserem aamei bosna amnaiserem ga as jam igama gulbatena jemnibe. Bunar-bunarsus ga enggam, afa bosna amna as jam igama gulbatennaram, gam jega ai fas an ana ajam gaartenanayan. Ai safe angtane bastowaisusu, ai bastowaisusyan angtane afaf-afafa jeiserem jemniwer, angtane akar-akarem enggam aa jei naawenaram rasulu sanbak-sanbaksususerem jei galserem. 12 Ai ibar negalaba nwinintim, ai safe kabwaktala nafis-nafsiserem jes agam damtabili, ai kanaufer jafner agam fina. Ane Uwa Sanbagiri Jei baabeta Jelemanaiserem ap as mesam gulbana enggalfe, ai bwembwema unggwandwasusu nafis-nafsiserem ajem eyebif im nenennabe, ane aamei jem temawer ga igama bitbitwena. Ai bwembwema jeiserem ajewer eyebilirim, ai ga ibe isa ajem gwerauwulmini enggame, aiba angtane rasulsam. 13 Ai jemat-jemat seyafter afweraiserem agemer batobaabilirim, aime aamei isa agemer batobaabili. Safe gam, aamei engbar enggam ima gunu, "Paulus jei kapkaiserem nes mes eyeipmini, aam temawer jei Taterisi Waakena nes galap nasipminennentem nebe, jes jepserem jei nei nes jam balbabiyen doife, jemata nafsiserem jei gamserem doif aa gam balbabilirim." Afa ini imna waakenfer abar is jam ge folbamiyeneye taterisi jeiserem jem temawer, ai enggam ai gunu aamei taterisi jeiserem jam isa borola abar. 14 Aaiserem ga nawer-ningnabarf ga aas ai ajam menetwesiwelabe enggalfe, ai imnip ajam sofwef. Ane ai ibar galap jam nejeba nwinirim, jes jepserem ai doini fas imniwer isa ajam balbaipmiyen ap kitulbofe, gwanan gemerserem ai fas doini imniwer is ajam balbaipmiyen. Ai apgal jigal imnip is jei ge falipminirim, fas isa ajam balbaipmiyen, jengga aingga enggamfener ai gunu aamei ai as jam isa nesiktene. Aiba uwa imna galserem, aam temawer Taterisi Yesusem temawer ip is amsam nasipmini, ane aamei taterisi jeiserem imsa taabili. Jega jem temawer ai doini imniwer isa ajam balbaipmiyen, aam temawer tane bastouyaserem jei apgal jigala ene yo jeta aa jes gangge balbabilirim, jeiserem fas jam ne golmiyen. Jengga ene yo jeta apgal jigala ga jei gangge kitulmini jelem tanefe, jei aa jes gane balbabilirim. 15 Aiba uwa imna galserem, ane jega jem temawer, ini amna saaser-saasera galgala amna seyafter gemerserem isa ajam kitulmif ibe. Ane aime ini amna saaser-saasera awelna uskambar ajam gwebife aamei isa ajem batobaabif. Ai isa ini saaser-saasermer batobaabif, jega aamei Yesus kanaufer gam isa tebana. Afa ai aamei isa uskambarsus nesiktababiliye jes gamserem, jeje bafa aamei ai as ijama nesikteyen? 16 Aamei afwer ijeya gunu enggame, "Sya, bunar, Paulus jei doini nemniwer jam balbabiyen. Jengga jei nei nes jam afaf-afaftababili enggalfe doini nemniwer gam taabif. 17 Jei angtanes baftabilint nemnip jam ge jalbife enggalfe nei doini negama dupduptababif. Paulus enggam gunu jei doini jeiserem angtane galgalyenaiserem jep kitulmif, jengga fas, doini jeiserem jei jener tebabif." Jengga bunar-bunarsus fas, ai aamei game isa ajam gwebabiyen. 18 Ai Titus amsam baftanant imnip jam sofwefe, ane ai gamjon nem afelnaiserem ai ajes baftanant, Titus jei jebar ge sofwefe. Aamei tousa angtane naura jeiserem jei bunarsusfer aamei is jam ge afaf-afaftababiyen; jei galgala kabwakmer jam ge tebabiyen imniwer. Ane ai Titusfar awelna ajes ge gwebilirim, ai ini daamfennaber ai ge gwebili. Ane nele ai awelna jeiserem ajem ge gwebinennerem, nele jeiserem daamfennater. 19 Seyafter ai ajes tulistaabilirim, seyafter jeiserem ga enggalf itana imna isa jema kanautabaipmif, jega aamei Kristus kanaufer gam isa tebana. Aamke enggam ima gunu, "Seyafter Paulus aa jes tulistaabilirim jelem temawer, jei ga enggalfefener tulistaabili nei negama balf, ’Paulus ane jem afelen mesna nem tarnap waakena tefner ne eyebili.’ " Jengga jes gamserem ai galfe ajam tulistababiyen. Bunarsusfer ga enggam, seyafter ai ajes tulistababilirim, ai enggalf ai tulistaabili Uwa Sanbagirem tarnabe waakenfer ajes eyebif. Jei tousa enggame, ai ajesa nasbabilirim, Kristus ga jes balbabili ai ajesa nasbabife. Ane seyafter ai ajesa eyebilirim, seyafter ai ajesa nasbilirim, ane seyafter ai ajes tulistaabilirim, seyafter jeiserem ga enggalf itana imna isa jema kanautabaipmif, jega aamei, am afelen mesnaiserem ai isa ajesa nesiktababilirim, aamei Kristus kanaufer gam isa tebana. 20 Ane babitsim imnip ga as sofna, ane ini amna as jam eseswebana, aam temawer ai galap jam ajep fornaram imnibe, ai engbar isa enggam as damtabili, ai baife ajes gwebilirim aamei ijama eyebife, jeiserem aamei ga jes isa eyebili. Ane afa ga gam jes gemerserem, gam jega ai aamei isas nasbabili, ane ai amsam towaswena enggame aamei bai ai ims nasbabife. Ini amna as jam eseswebana aamei engbar etam-etama gemer isa eyebuwena, etam-etama aas galserem: Aamei engbar gemer isa doksowena. Aamei engbar sarabosom gemer igama uskamswebana ilem inibe. Aamei engbar angtane tatarmer igama nasbana, gwanan ijama fiyan. Aamei engbar waakenaiserem ilefefener igama eyebili. Aamei angtane nafsiserem jem temawer syefer igama nasowena, ane afa angtane jam igama imei-imeitababili. Aamei engbar ol kabwak tateris basyamer igama nasbinenne angtane nafsiserem jem temawer. Aamei engbar in ina gemer isa tetenanawena. Aamei jes igama eyebaabilirim, jeiserem aamei engbar ini daamfenmer ijama eyebiyen. 21 Ini amna as jam eseswebana enggame, ai imnip jam ajep fornaram, ai engbar aamei isas damtabili aamei kapkaiserem gemer isa eyebuwena. Ane afa ga gam jes gamserem, Uwa Sanbagiri Jei ai ga ase gwebana ai ajam seferswefe im temawer. Ane ai engbar jam as syena, aam temawer angtane unggwanfer im nenennabe etam-etama kapkaiserem gwanan aa jei ne eyebilirim, jei gemerje jam ge irfwebiyen etam-etamawer, etam-etama enggalaiserem seyafter maaryena jam gwebili galserem, anggwana jei wini nafisemanaiserem jebar gangge gwena.
131 Am afelen mesna kota Korintus ijeya nwinirim, aaiserem ga nawer-ningnabarf ga aas ajam sofwelabe, ai aamei isa ajam damtabisiufenewelabe. Afa angtane im nenennabe kapkaiserem gemer jam sene eyebuwenaram, ai angtane jeiserem ga as tamtamtababifi. Taterisi Uwa Sanbagirmanaiserem jep aa jes tulisulum, ai ga jes as onsobili. Jep ga enggam tulisul: "Afa angtane enggam jam gam gunurum, angtane aasaje kapka gam eyebili, angtane naura afa nawer-ningna jei jam sege gubilirim enggame, angtane jeiserem jei kapka ba bunaram eyebili." (Ulangan 19:15) 2 Fwater gwanan galapserem ai naurabarfe ibar negalaba nwinintim, jes jepserem ai angtane etam-etama aa jei ne eyebisintim amsam balbabisint ititmer. Ai jei enggam ai balbabisint, "Afa aamei ijama tikweyanaye etam-etamawer, ai gamjon galap jam ajep warautnaram imnibe, ai aamei ga isas tamtamtababili." Ane namwer ai imniwer bijaufer nwini, gamjon isa ajam balbabif, aamei etam-etama gwanan ijeya eyebilintim, ane aamei seyafter etam-etama namwer ijeya eyebilirim, bunar-bunarsus ai imnip ajep fornaram, ai angtane etam-etama namwer aa jei ne eyebilirim ga as tamtamtababili. 3 Aamei ase enggam ima bala, "Aamei ase ge saamisi, aamei ap as ijes nasipminirim, jeiserem ba Kristus aa jes bilirim aamei ap as ijam nasipmife." Sya, ai imnip jam as fornaram, ai ip ga isa as ge saamisini. Jes jepserem angtane etam-etama aa jei ne eyebilirim, ai angtane jeiserem ga as tamtamtababili uskambar. Gam jega aamei jem ga isa towaswena enggame, taterisi Kristus ap aa jes gulbanaram, ai ga ajetefener nasbabili. Kristus Jei weren-werenyan, Jei baabeta im sagaber gam domola. 4 Ba bunaram Kristus Jame aa galap ne salibtenentem, jes galapserem Jei angtane weren-werna galserem. Jengga Jei gamjon mesam irtesent terewer, ane namwer aas jepserem Jei ga baabeta Uwa Sanbagirmanaiserem ga jem gwena. Aime gemer, ai Kristusfar daamfennaber aJeya gwenaram. Ai seyafter weren-werna, jengga ai ga baabeta Kristusfaner aya domola, ane ai im tarnap jam agma fornaram, aime baabeta Uwa Sanbagirminiwer agma domola enggalfe ai aamei isa ajama tamtamtababif. 5 Aamei gwanan ini ilemana jam isa damdamtababisnenne aaiserem jem temawer, aamke bunarsusfer Kristus ke imsa tebana baabetmer, afa fas? Aamei bunarsusfer enggam imsama towaswena, afa aamei Kristus Yesus bunarsusfera tebalaye, gam jega Kristus ba im inibam nuniton. Afa aamei Kristus ijama tebayanaye, gam jega Kristus Jei im inip fas Jam nuninonyan. 6 Ini amna as enggam folbana aamei ijama towaswef, gwela aman ba as mesane damdamulbaasini, ane aiba bunarsusfer angtane rasulsam, angtane Kristus aa jes baftanaram. 7 Ai sembayanga Uwa Sanbagirf asa gwebabana, jega aamei kapkaiserem ijama eyebiyen. Ai sembayanga enggalf ajam gwebayan, angtane gam ge towaswebif enggame ai ajesa bilirim aamei ga ijesa onsobili. Afa aamei taterisi ai ajesa bilirim ijama onsobiyeneye, gam jega angtane jem temawer enggam ga sege gubili, "Awelna Paulusmana jam elbesini." Angtane jes gamserem gam aa jewer ge gubilirim, safnant, jeiserem igyen. Jengga igiserem ga aas: Aamei Uwa Sanbagiri aa jes bilirim ga jetefener isa eyebili. 8 Uwa Sanbagiri aa jes bilirim, ai ga jetefener asa eyebili. Ai nafsiserem ajama eyebiyen Uwa Sanbagiri waakena aa jes bilirim jeiserem jemniwer. 9 Ai safe weren-werna, afa aamei waakena tefner igama eyebilirim baabetmer, gam jega ini amna saaser-saasera. Aime sembayanga asa gwebana, jega gwela imna waakenfersus is ga sege folbamuwena. 10 Namwer ai imniwer bijaufer ai nwini, ai esorola amna ai ititmer tulisulu surta aaiserem jebe enggalfe, ai galap jam ajep fornaram imnibe, ai safnant aamei isa ajam tamtamtababiyen, baabeta Tuhan abe as jes gulbanaram jeme. Baabeta jeiserem ga as enggalf gulbana, ai ini imna isa ajem kanautabaipmif Kristus jam tebalabe, jeke enggalem temawer ai ini imna isa ajem gwebaipmif is jam ge jenbamife. 11 Umwef ga enggam am afelen mesna, ini imna ga ise saaser-saaserfer sege folbamini. Gwela imna ga jam isa waakenulsini. Esorol amna aaiserem ga as jam isa taayibene. Ijama doksoweyan, jengga waakenfer isa gwena ini daamfennaber. Afa aamei jes gemerserem gemer jam isa gwenaram, Uwa Sanbagiri nei nes Jei nesiktababilirim, ane ini nemna nes Jei gwebaipminirim waakenfer nes jam ge folbamife, Jei ibar seyafter isa gwena. 12 Aamei ijeba betwenaram, aamei tafna ga jam isa tenanna enggalfe, aamei igama gwerauwulf aamei in ina ba ijama nesiksonanna. Angtane Uwa Sanbagirmana aaf aa jei ge nwinbenerem, angtane seyafter jeiserem jei ims ne balbabili, "Kelek, waakenfer sa gwe!" 13 Ai sembayang as gwebana enggame, Tuhan Yesus Kristus Jei waakena Jelemanaiserem ip ise golmini aamei seyafter gamserem, ane aamei bunarsus gam isa towaswena Uwa Sanbagiri Jei ims nesiktababili, ane aamei ga daamfennaber isa gwena, aam temawer Mafnana Uwa Sanbagirmana Jei im inip nuniton.