1 Timotius
11 - 2 Ga ip, Timotius, tane amna, kota Efesus je. Aamei tane amna, aam temawer ai gwanan aamei isa galap towastanantam taterisi Yesusem temawer, aamei Yesus ga im tebanant. Surta aaiserem amniwer Paulus, kota Roma je. Aiba rasulsam, aam temawer Uwa Sanbagiri ane Kristus Yesus Jei as baftana enggalfe, ai taterisi Yesusem temawer agam nasibenenef. Uwa Sanbagiri Jei nes mes waakentababisini, ane Kristus Yesus Jei jeber-jeber eyebaabuwena seyafter nejesa fibabilirim. Ai sembayanga as gwebabana Uwa Sanbagirfe Uwa nemna, ane Kristus Yesus Tuhan nemna, jega Jei nawersamer waakena Jelemanaiserem ip is ga sege gulbana, ane nesikteleiserem jes mese is ga sege gulbana ibe, ane ini imna is ga sege gwebabana waakenfer is jam folbana. 3 Ai kota Efesus gwanan agalap mirsotefalantam, ane ga ai sofwant propinsi Makedonyawer, jes galapserem ai aamei unggwanfer isa mesam balant enggame, Timotius aamei ga Efesuswer is nwini, aam temawer angtane afwera jep aa jei ge nwinbenerem, jei taterisi kapkaiserem jes ne towas-towastababili. Taterisi jeiserem ga nafsi taterisi bunarsusfer aaiserem Yesusem temawer jewer. Timotius, ai gamjon ga isa ajam bala, aamei kota Efesuswer is nwini, jega aamei angtane jeiserem ititmer gam is balbabili jam ge tikwebife. 4 Gamjon aaiserem jes mese ititmer jes is bilipmini enggame, jei jeber-jeber jam ge nasbaweyan taterisi kapkaiserem jem temawer, ane daftar bwalesusu bosna asal-asalmanaiserem jes mese jam ne nasbiyen, aam temawer angtane taterisi jeiserem jam gane nasbilirim, jei jen jena jafner ga gane nasmini. Angtane jafner aa jei gangge doksobawenaram, jei Uwa Sanbagiri aa jes eyebilirim jei jam ne batobiyen. Jengga angtane Yesus aa jei gane tebanaram, jei Uwa Sanbagiri aa jes gam eyebilirim, ga jei gane batobili. 5 Aamei angtane jes gemerserem is balbabili ititmer, jega angtane Kristen angtane nafsi ga sene nesiktababili. Afa ini jemna etam-etamyana, ane jei afa jeter sene eyebili aa jes ne towaswebilirim waakenaiserem, ane afa jei Yesus jam sene tebanaram ginggitfer, afa jei jes gamserem ga gam eyebili, gam jega jei angtane nafsiserem ga sene nesiktababili. 6 Angtane afwer aaiserem jei mes ge tikwebili waakenaiserem jes eyebiliwer. Jega jem temawer jei ol kabwak tefner gane nasbabili. 7 Jei Hukumu Nabi Musa aa jes tulistababilim ga jes ne towas-towastababili. Ane jei baabetmer ne towas-towastababili, jengga jei jam ge towaswebiyen jei jener aa jes ne towas-towastababilirim jem igiserem. 8 Nei tousa Hukumu Nabi Musa aa jes tulistababilim, hukumu jeiserem ba waakenam, afa angtane Hukumu jeiserem jem igiserem waakenfer jam gane towaswebilirim, ane afa jei jam gane towaswebilirim enggame jeje bafa Uwa Sanbagiri Jei Hukumu jeiserem nep ga nes golmini. 9 - 10 Nei nemsama towaswena Hukumu Nabi Musa aa jes tulistababilim, Hukumu jeiserem angtane waakenfer aa jei ne eyebilirim jep jam tulisulmiyen. Jengga angtane kabwakfer aa jei ne eyebilirim, Nabi Musa Hukumu jeiserem ga jep tulisulmil. Angtane jeiserem jei ga angtane aas galserem: angtane Uwa Sanbagiri jam ne sarbayanaiserem; angtane etam-etamabara; angtane Uwa Sanbagiri tefner jam ne onsobayanaiserem; angtane aa jei ne imei-imeitababilirim angtane Uwa Sanbagiri aa jei ne onsobanaram; angtane maaryena aa jei ne gwebilirim; angtane naura jei wi anggwayan aa jei gangge dorwenaram maaryens gwebife; anggwa nawan afa wi nawan aa jei gangge gwenaram wi anggwa gamserem; angtane, angtane nafsi aa jei ne afaf-afaftababilirim; angtane aa jei ne afaftababilirim angtane nafsiserem jem temawer; angtane, angtane nafsi aa jei ne tebabilirim enggalfe pasarap jam ne jualtababif. Angtane aa jei gane armantababilirim, jei awelna angtane nafsimana gane gweyibene, jengga jei gajini jam ne tebayan. Hukumu Nabi Musamana jeiserem ga angtane aas galserem ga jep tulistabaipmini: angtane, angtane nafsi aa jei ne munbobilirim; angtane iye mese uwa aa jei ne munbobilirim; angtane taterisi bunarsusfer aaiserem jam ne onsobayanaiserem. Hukumu Nabi Musamana angtane aas galserem ga jep tulistabaipmini: angtane aa jes ne eyebilirim Uwa Sanbagiri aa jes bilirim enggame, "Ijama eyebiyen!" 11 Uwa Sanbagiri aa jes bilirim nei nejesa eyebife, seyafter jeiserem Taterisi Uwa Sanbagirmana ga jep batona. Uwa Sanbagiri Jei baabetsusu ane nafabara, nei neJesa pujitenerem. Jei Taterisi Waakenaiserem ap as mes gulbana enggalfe, ai angtane agam towas-towastababif. 12 Ai Kristus Yesus Tuhan nemnaiserem Jebe, ase samfer gulbana ajes gweyibene. Jei baabeta abe as mes gulbana enggalfe, ai awelna Jemna ai waakenfer ajem gweyibef. Ai ase samfer gulbana as gweyibene Jebe, aam temawer Yesus as enggam bala, "Ai tousa aamei awelna aaiserem samfer is gwebili." Jega jem temawer Jei as destabana awelna Jemna gam gwebif, ane ai ase samfer gulbana as bala. 13 Gwanan ai Yesus nalef ajam tikwebaatiyen, ai syefer nasounant Yesusem temawer. Ane ai angtane Yesus aa jei ne tebanaram jes ai tamtamtababilint, ane ai uskamer ai eyeipminint jebe. Safe gam, Tuhan Jei nesiktele Jemnaiserem abe as mes gulbana, aam temawer ai Jei gemerje ajam tebayan waakenfer, ane aam temawer ai teisyena ai ajes eyebilirim jeba kapkam. 14 Kristus Yesus Tuhan nemna, Jei waakena Jelemanaiserem ap as mes gulbana unggwanfer, jega ai namwer Jei ga ai tebana waakenfer, ane ai angtane as nesiktababili Jei gemerserem. Tuhan Jei waakena Jelemanaiserem nep nes mes golmini nei seyafter gemerserem, nei Kristus Yesusfar daamfennaber nejeya gwenaram. 15 Taterisi aaiserem ba bunaram, ane angtane seyafter taterisi aaiserem ga jam sene taabili: Kristus Yesus ga ogirip enggalf fortya, angtane etam-etamabaraiserem jes waakentababif. Ane aiba angtane etam-etamabaram, etam-etama amna unggwanfersus angtane nafsiserem jemniwer. 16 Jega jem temawer Tuhan etam-etama kapkaiserem amna as mes wirulbaasini, jega enggalf Jei jam ge saamisif abakfer fyela Jemna unggwandusaiserem angtane seyafter gemerserem jebe. Jei jeiserem se saamisini, aam temawer Jei fyela unggwanfer amnibe, ai angtane etam-etamabara uskambar angtane nafsiserem jemniwer. Uwa Sanbagiri Jei etam-etama amna as mes wirulbaasini, jega enggalf angtane gam ge towaswebif enggame fyela Yesusmana ba unggwanfer, ane jei Yesus ga sene tebana, ane jei waakenfer gwelaiserem jamer abak-abaksus ga sene domola. 17 Raja aa Jei nwinirim seyafter gemerserem jem Sanbakfe jamer abak-abaksus, Raja jeiserem nei ganma pujitawena jamer abak-abaksus! Nei bosna Jemna nesa gulbatena! Jei Jam teryen, ane nei Jei nejama damtayan. Jei Jentowai ba Uwa Sanbagiriserem! Amin, taterisi jeiserem ba bunaram. 18 Timotius am tane, ai awelna aaiserem ai ip gulbana, aamei taterisi ai isa ajes bilibenerem ibe, taterisi seyafter jeiserem aamei ititmer se towas-towastabaipmini angtanefe. Gwanan jes galapserem angtane sanbaka jemata aa jei ne tebabilirim, jei sembayanga aane gwebabana im temawer, ane Mafnana Uwa Sanbagirmana Jei ula im temawer ga golmini jebe. Sa sarbistaabon ula jeiserem, jega aamei waakenfer gam is towas-towastababili Taterisi Waakenaiserem jem temawer. 19 Aamei jeiserem jam is eyebilirim, Yesus ga jamer is tebana jeber-jeber. Ane aamei ijes towaswebilirim waakenaiserem ane bunar, ga jetefener is eyebili. Angtane afwenefener jei waakenaiserem jes ne towaswebili, jengga jei kapkaiserem ga jes ne eyebili, ane jei ga aa ge tikwebili Yesus jam onsobalawer. 20 Angtane naura bosna Himeneus ane Aleksander, jei aa jes ge eyebilirim jes galserem. Ai angtane naura jeiserem ga ai gitmini, "Sya, aamei bawas sege onsoba!" Ai jes gamserem gam ajewer gitminirim, aam temawer ai enggam ai gunu alem inibe, "Afa jei kabwaktala unggwanfer jam sege domolaram, jei ga sege tikwena etam-etamawer, ane ga sege tikwena syefer nasowelaiserem Uwa Sanbagirem temawer."
21 Timotius, taterisi nabal-nabalsusu ane igsususerem ai ajes bilipminirim angtane Kristenfe, taterisi jeiserem ga aas: Angtane Kristen aa jes ne balbabilirim jam damtabife, seyafter jeiserem ga Uwa Sanbagirf sene balbaibene. Jei seyafter sembayanga sene gwebana angtane seyafter gemerserem jem temawer. Ane jei Uwa Sanbagiri sene bala, "Ase samfer golmini waakena seyafter Aamei ap as Ijes eyeipminirim." 2 Igiserem ga aas: Angtane Kristen jei angtane sanbakfe aa jei ge nwinbenerem seyafter gemerserem sembayanga jem temawer gane gwebana, jega nei waakenfer gam nesa gwena, ane Uwa Sanbagiri tefner ga nesa tikwebaatini, ane nei ga waakena tefner ga nesa eyebili. 3 Uwa Sanbagiri Jei nei nes Jei waakentababisini. Nei angtane seyafter gemerserem jem temawer sembayanga nesa gwebana, aam temawer jeiserem waakensusu, ane ini Uwa Sanbagirmana saaser-saasersusfer ga gam folbana jeiserem jem temawer. 4 Ini Jemna saaser-saasersusu, aam temawer Jei angtane seyafter gemerserem jam waakentababisif. Jei enggam gunu, angtane seyafter gemerserem jei Taterisi Waakenaiserem jam ne towaswebif. 5 Uwa Sanbagiri Jeiba daamfennam. Ane Angtane daamfensusu angtane aa Jei aftabifelerem Uwa Sanbagirminibe, Angtane jeiserem Jeiba Kristus Yesusam, ane Jeiba angtanesam. 6 Uwa Sanbagiri Jei nunu Jener destabili, nunu Yesus Jem tereserem ti salibibe enggalfe etam-etama angtanemana seyafter gemerserem jem gam wirtabaipmif. Nunu jeiserem ga jem ge saasini Uwa Sanbagiri Jei angtane seyafter gemerserem jem waakentababisif. 7 Jega jem temawer Uwa Sanbagiri Jei ams bala enggame, "Aamei rasulu Amna. Se sofwe, taterisi Amnaiserem angtane Yahudimanyanaiserem jep ga is nasipminenne, jega jei Yesus ga sene tebana." Ai ajam afafweyan, taterisi aaiserem ai ajes nasbilirim Uwa Sanbagiri ams balaiserem jeba bunaram. 8 Ai enggam ai gunu, anggwana aa jei ge nwinbenennerem taman-tamna seyafter gemerserem jebe, jei sembayanga jam gane gwebanaram, tafna ga nawersamer gam tetena. Anggwana sembayanga jam gane gwebanaram, jei ini tabalmer gane gwebana, jelem inip ga Uwa Sanbagiri tefner ne onsobaf. Ane jei angtane nafsi jam ne nasbayan, jei angtane nafsi jelem inip jam ne gatasiyen kapkaiserem jam fwayenulbofe. 9 Timotius, ai enggam ai gunu wim temawer: Wini Kristenmanaiserem jei jena jam ne tetenanayan fene waakenaiserem jeme enggalfe anggwana jewer gam ne damtabif. Wini Kristenmanaiserem jei jena jam ne tetenanayan fene hargana unggwanfersus aaiserem jei aa jes gane kabwabilirim jeme, ane inanai hargana unggwanfersus--emas ane mutyara galserem. 10 Jengga wini Kristenmanaiserem jei ga angtane nafsiserem ga jes gane batobaabili. Wini enggam aa jei gangge gubilirim, "Aiba angtane Kristensam.", jei ga waakenater gane eyebili. 11 Wini gerejanap taterisi aa jes gane towas-towasulminirim jebe, jei taterisi seyafter jeiserem ga jafner gane sarbisini ini jam onabertalaiserem jeme. 12 Ai enggam ai gunu unggwanfer, wini gerejanabe anggwana jam ne towas-towastababiyen, ane jei anggwa sanbakfe jam naaweyan. Jengga wini jafner gangge nwinbene. 13 Jei anggwana jam ne towas-towastababiyen, aam temawer Uwa Sanbagiri Jei gwanan ga Adams eyebal, ane amnup ga Hawas eyebil. 14 Ane bawasa jei Adam jam afaftayan, jengga bawasa ga wis afaful, ane jes jepserem wini jeiserem ga eyebil Uwa Sanbagiri aa jes bilipmilim enggame, "Aaiserem ijam ge eyebiyen." 15 Jega jem temawer Uwa Sanbagiri ga wini seyafter enggam balbabil, "Aamei tane jam gerelabe jes jepserem, witifini imna ga siginsusufer igam ensona." Safe gam, wini Uwa Sanbagiri jeber-jeber waakenfer aa jei ne tebanaram, ane angtane nafsi aa jei ne nesiktababilirim, ane waakenaiserem aa jei ne eyebilirim, ane jena jam tetenanayanaiserem, afa jeiserem seyafter jam gane eyebilirim, Uwa Sanbagiri Jei ga wini jeiserem ga gam batobili, jei jam jep gam sartenaram tanes gerefe.
31 Taterisi aaiserem ba bunaram: Angtane aa jei gam gunurum enggame, "Ai angtane sanbaka jemata aa jei gam taabilirim ai galf gwef.", jei ga awelna waakensusuter gam bili. 2 Angtane sanbaka jemata aa jei gam taabilirim, jei enggammer gam eyebili, aas gamserem: Jei angtanefe jeber-jeber waakenater gam eyeipmini. Wini jemna ga daamfenna tefner. Jen jenater gam gerebaasnenne waakenfer. Jei waakenfer gwelaiserem jes gam towaswebili. Angtane jeiserem angtane aa jei gangge wofobilirim jem jenap ga gangge forobitye, jei angtane jeiserem baife jam gwebabiyen. Jei bunar-bunarsus Taterisi Uwa Sanbagirmanaiserem mes gam towaswebili, ane jei taterisi jeiserem ga gam towas-towastababili. 3 Jei anggur fona unggwanfer jam telbiyen. Jei angtane nafsi jam nasbayan. Jei angtane nafsiber jei aaremem jam ge doksobayan. Jei bai jam erafe, jengga ini jemna foler-folermer gam folbana. Jei doini jam nesiktababiyen. 4 Jei wi tane jelemana waakenfer gam gerebaabisnenne. Ane tane mesna gam towas-towastababili waakenfer gam naawefe, ane jetater gane sarbaf, 5 aam temawer anggwana teisyenaiserem wi tane mese jelemana waakenfer jam gerebaabisneneyeneiserem, jei ga jemat Uwa Sanbagirmana ga fomfom gam gerebaabisnenne? Fas, jei jemata jam gerebaabisneneyen. 6 Angtane ibirmi Yesus aa jei gam tebanaram, jei angtane sanbaka jemata aa jei gam taabilirim galfe jam etamweyan, aam temawer afa jei jena syefer galap jam gam gaartenannaram, jepga Uwa Sanbagiri angtane jeiserem ga gam tamtamtana, bawasa gwanan aa gam tamtamtala jes gamserem. 7 Angtane sanbaka jemata aa jei gam taabilirim waakensusuter gam eyebili, jega angtane gane balf jei waakena. Afa jei waakenfer jam eyebiyeneye, angtane nafsi galap ga gane bala jei kapka, ane angtane sanbak jeiserem jei ga gam seferswena, ane ga gam jena bawasem tafnabe. 8 Angtane awelna Uwa Sanbagirmana aa jei ne batoibenerem jematabe, gwela jeman jegme waakenfer gangge folbamini angtane sanbak-sanbaka jemata aa jei ne tebabilirim gwela jemna waakenfer gemerserem. Jei aa jes gane bilirim jam eyebife, seyafter jeiserem jei jamer gane eyebili. Jei angtane jam ne afaf-afaftababiyen. Jei anggur fona unggwanfer jam ne telbebiyen. Jei doini syefer jam ne tebabiyen. 9 Taterisi bunarsusfer aaiserem Uwa Sanbagiri aa jes ge saasinirim, taterisi jeiserem jamer ga sene taabili ini waakenaiserem jeme. 10 Jei gwanan jam gane unggwasbaabili afa jei kapka jam ne eyebiyeneye. Afa angtane Kristen nafsiserem jei jam ne balbabiyen enggame angtane jeiserem kapka gane eyebili, angtane jeiserem samfer jei ga gane destabaabili enggalfe jematap jam ne batobaabife awelna Uwa Sanbagirmana jeme. 11 Wini jeman mesna gwela jemanme waakenfer gangge folbamini, anggwana jelemana gemerserem. Jei ula syefer jam ne nasbineneyen angtane nafsiserem jem temawer. Jengga jei jen jena waakenfer gane gaaramisnenne. Ane angtane nafsiserem jei gangge towaswebili enggame, wini jeiserem jei jeber-jeber waakena gane eyebili. 12 Angtane awelna Uwa Sanbagirmana aa jei gam batoibenerem jematabe, wini jemna ga daamfenna tefner. Ane jam gam towaswena wi tane jemna waakenfer gam gerebaabisnenefe. 13 Angtane aa jei gane batobaabilirim jematabe, angtane nafsi jei angtane jeiserem gane balbabili jei angtane waakena. Ane jei baabetmer ga gane nasipminenne Kristus Yesus aa jewer ne tebanaram jem temawer, ane angtane nafsiserem jei angtane jeiserem jemata aa jei gane batobaabilirim waakenfer gane sarbabili. 14 - 15 Timotius, ai enggam ai gunu, nunu abakferyan ai imnip ajam sofwef. Safe gam jes gamserem, ai surta aaiserem ai ip tulisulbono, jega afa ai imnip tatarfer ajam sofweyanaye, aamei gam is towaswena enggame angtane Uwa Sanbagirmana ga fomfom gam naawena. Neiba Uwa Sanbagirmanam, Uwa Sanbagiri aa Jei gwenaram abak-abaksusfer. Uwa Sanbagiri Jei taterisi bunarsusfer aaiserem nebe nes mesam golmini, ane nei taterisi jeiserem ga jam nesa taabili. Ane nei angtane nafsiserem jep ga nesa towas-towasulmini. 16 Taterisi bunarsusfer jeiserem Uwa Sanbagiri aa jes saamisinirim, jei bunar-bunarsus unggwandwasusu! Taterisi jeiserem Uwa Sanbagiri Jei gwanan angtanef Jam towasulmiyen jamer abaka. Taterisi jeiserem ga Yesus Kristusem temawer, ane taterisi jeiserem ga enggam: Yesus Jei mesam etamwenant angtane tifinfe, ane nei nemsa damtanant. Nei nemsa towaswebanant Jeiba Tuhansam, aam temawer Mafnana Uwa Sanbagirmana Jei Yesus mes irtestenant terewer. Malaikata mes ne damtanant Jei. Angtane Jei aa jei ne tikwebaatinennerem, taterisi Jem temawer anggwabura seyafter gemerserem jep mes ne towas-towasulminennent. Angtane ogiri aaiserem jebe ga aane tebanant. Ane Jei taman waaken-girip ga tawenant, jep ga Jei Uwa Sanbagirfar ga aa ge nwini.
41 Mafnana Uwa Sanbagirmana Jei bunarsusfer enggamam gunu, nunu umwef jepserem angtane afwer sege tikwebili Kristus jam ne tebalawer. Jei bwat kapka afaf-afafaiserem ga sene onsobili, ane taterisi kapka bwat kapka jeiserem jei aa jei ne towastababilirim ga sene tikwebitini. 2 Angtane akar-akarem aa jei naawenaram ane angtane nafsiserem jes gane afaf-afaftababili, jei taterisi kapka jeiserem ga jei sene towas-towastababili. Ane jei enggam ge gubili angtane nafsiserem jeime taterisi kapkaiserem jam ne taabifi. Ini jemna jam ge jenbamiyen, jei etam-etama kapkaiserem jam jep gane eyebilirim jem temawer. 3 Angtane jeiserem syefer aa jei ge nasbawenaram, enggam gane towas-towastababili, "Wini yo anggwana jei jena jam ne tetweyan, ane tumilgala nafsi afwenefener jam ne tombaabiyen. Afa wini anggwana jena jam gangge teterem, ane tumilgala nafsi afwenefener jam gane tombaabilirim, gam jega ini Uwa Sanbagirmana Jei saaser-saasermer Jam folbayan." Taterisi jeiserem jei kabwaksusu afaf-afaf tateris, aam temawer tumilgala seyafter gemerserem ba Uwa Sanbagiriserem Jeyam eyebaabil, jega angtane Yesus aa jei ne tebanaram, taterisi bunarsusfer aaiserem aa jei ne towaswebilirim, jei samfer tumilgala seyafter gemerserem ga jam gane tebabili. Ane jei Uwa Sanbagiri jam gane bala enggame, "Ase samfer golmini tumilgala aaiserem ap as Ijes golminirim." Jepga tumilgala seyafter gemerserem ga gane tombaabili. 4 Seyafter Uwa Sanbagiri aa jes eyebaabilim jei waakena. Angtane enggam jam ge gubiyen, "Nei tumilgala jeiserem nejama tumilyen." Jengga nei tumilgala seyafter samfer negama taabili, ane negama tombaabili, ane Uwa Sanbagiri ga negama bala, "Ase samfer golmini." 5 Nei tumilgala seyafter samfer negama tebabili, ga negama tombaabili, aam temawer Uwa Sanbagiri mesam gunu, "Tumilgala seyafter ga waakena.", ane nei sembayanga fwater negama gwebana enggame, "Ase samfer golmini tumilgala aaiserem jem temawer." 6 Timotius, Kristus Yesus Jei aamei is mes destabana awelna Jemna ijam gweyibefe. Aamei taterisi ai aafe ajes tulisulurum, taterisi aaiserem jam is towas-towasulminirim angtane Yesus aa jei ne tebanaram jebe. Aamei taterisi aaiserem jam is towas-towastabaipmini enggalfe aamei awelna Kristus Yesusmana waakenfer gam is gwebili, ane enggalfe aamei taterisi bunarsusfer Uwa Sanbagirmanaiserem ginggitfer gam is taabili. Taterisi jeiserem ai ibe isa ajes towas-towasulbonontom jeba waakenam, aamei jeber-jeber ga ijeter tikwebitini. 7 Afaf-afaf taterisi Uwa Sanbagiri baife aa jes gwebilirim, taterisi jeiserem ga jam is bijauwulu ileminiwer. Aamei jeber-jeber ini imna ga waakenfer is gerebaasnenne, jega ini Uwa Sanbagirmana saaser-saasermer gase folbana. 8 Afa baabeta tifinipfener nejama domolfe, nei ga enggammer negama gwena: Gwinibener jeber-jeber nei jam negama nunggirnenne, afa gwerem nus negama tana, ane tumilgala waakenater negama tombaabili. Seyafter jeiserem ga waakena, jengga baabeta nebe ga nes nomkef golmini, ogiri aaiserem jep nejeba gwenaram. Afa nei nunu jeber-jeber nei nena waakenfer jam nesa gaaramisnennerem jega ini Uwa Sanbagirmana saaser-saasermer gas folbana nem temawer, jeba waakensusum. Jeiserem jeba waakensusum gwela nemna ogiri aaiserem jebe, ane gwela abaksusfer gamjon nejesa domolaiserem jebe. 9 Taterisi jeiserem ba bunaram, ane angtane taterisi seyafter jeiserem samfer jam sene taabili. 10 Nei taterisi jeiserem negama taabili, ane jega jem temawer nei awelna jeber-jeber uskambar ga negama gwebili angtane jam towas-towastababife, jega enggalf jei Uwa Sanbagiri ga sene tebana. Nei Uwa Sanbagiri unggwanfer nemsa tebana, Uwa Sanbagiri aa Jei gwenaram abak-abaksusfer. Jei angtane seyafter gemerserem Jam waakentababisif, ane angtane Kristus aa jei ne tebanaram jes waakentababisini. 11 Timotius, taterisi seyafter ai aafe ajes tulistababilirim, angtanefe jam is towas-towasulmini, ane jam is balbabili taterisi aaiserem jam ne onsobife. 12 Angtane aamei enggame is jam ne balyan aamei igyen aam temawer tahunu imna bastowaifer. Aamei waakenfer is gwenaram, jega angtane Yesus aa jei ne tebanaram gwela imna jam is jep ne domolbanaram, jei ga sege towaswebili jei ga fomfom se naawena. Gwela imna ga is enggam se folbana: Ula waakena tefner igam nasbili! Waakenfer is gwena! Angtane se nesiktababi! Uwa Sanbagiri se teba waakenfer! Ini imna iner is gerebaasnenne, jega ini imna tabalmer is gase folbana. 13 Jamere ai gamjon as sofna imnibe, aamei Taterisi Uwa Sanbagirmana unggwanfer is gerabistowena angtane unggwanfer jepserem jem tarnabe. Taterisi Uwa Sanbagirmana ga jam is nasbamuwena, ane angtane ga jam is towas-towastababuwena. 14 Angtane sanbaka jemata aa jei ne tebabilirim jei tafna im dwak sagabe jame is galap ne tosobaanswenantam, jes galapserem jei awelna Uwa Sanbagirmana ip ga isene gulbanant. Ane jei ga ula Uwa Sanbagirmanaiserem ga jem ge nasbawenant im temawer. Jes galapserem aamei baabeta Uwa Sanbagirmana ga im domola enggalfe aamei awelna Jemna jem igam gweyibef. Aamei baabeta jeiserem ga jeter is gwirni awelna Uwa Sanbagirmana ijem gweyibefe. 15 Awelna Uwa Sanbagirmana seyafter gemerserem waakenfer is gwebili! Baabetmer is gwebili, jega angtane awelna imna is ga sene domolbana, ane ga sege towaswebili enggame, awelna aamei namwer ijes gwebilirim jeba waakensusum awelna imna gwanan jeiserem jemniwer. 16 Ina waakenfer is gerebaasnenne ijes eyebilirim jem temawer, ane ijes towas-towasulminirim jem temawer mese. Aamei jes gemerserem gam jam is eyebilirim jeber-jeber, ane Uwa Sanbagiri Jei aamei ga is waakentaasini. Ane angtane nafis aamei is jei ne sarbanaram, aamei angtane jeiserem ga igam batobaabili, ane Uwa Sanbagiri Jei angtane jeiserem gase waakentababisini.
51 Timotius, aamei anggwana umuru unggwanfer jemanserem ititmer jemnip ijam nasoweyan! Jengga aamei jei jam igam esoroltana, aamei uwa ilemana gemer igam esoroltanaram. Ane aamei esorol jam is golmini tanisfe, aamei aya mese oso ilemana gam igam esoroltanaram. 2 Ane esorola jam is golmini wini umuru unggwanfer jemanserem, aamei iye ilemana gemer igam esorolulurum. Ane esorola jam is golmini yafonsiwirfe, aamei somol tane ilemana gemer igam esorolulurum, ane ini imna is tabalmer se folbana jemnibe. 3 Saamira wini bunarsus aa jei gam nwinirim jenfentowai ogiribe, angtane Kristen ga jes gane eganulsini waakenfer. 4 Timotius, afa saamira wini tannabaraiserem ane afa ausa tannabaraiserem, igsusu ga aas: Aamei tane mesna afa ausan tane mesna jemnaiserem esorola jep is golmini enggame, "Aameiba angtane Kristensam. Jega jem temawer aamei iye mese abwai ilemanaiserem waakenfer isa egantababisiwena, jega aamei fwaina gam igam golmini iye afa abwai jebe, jei gwanan aamei is gemer gane egantaasiwenaram. Afa aamei jes gamserem gam jam igam eyebilirim, ini Uwa Sanbagirmanaiserem saaser-saaserfer ga gam folbana." 5 Saamira wini bunarsusfer aa jei gam nwinirim jenfentowai, jemna tanna fas ane ausa tanna fas, ini jemna unggwan-giri ga Uwa Sanbagirminip fener gam falbili. Jei enggam gam towaswena Uwa Sanbagiri gam batobili jei. Gwer gwin jei sembayanga Uwa Sanbagirfe jam gam gwebabawena enggalfe Uwa Sanbagiri gam batobif jei. 6 Jengga saamira wini jafner aa jei gam gwenaram ini jam saaser-saaserswebifefener, mafnan jemna fwater gam tere, safe tifni seyafter gemer gam gwena. 7 Taterisi jeiserem ga uskambar is nasipmini angtane Kristenfe, jega angtane nafsi jam ne balbabiyen enggame, "Angtane Kristen jei kapka gane eyebili." 8 Angtane afa enggame aa jei gam gunurum, "Ai Yesus ames onsobana.", jengga jei jelem afelen mesna waakenfer jam egantababisiyen ane jam batobaabiyen, igsususerem ga wi tane jelemanaiserem angtane jes galserem jei bunarsusfer Yesus jam onsobayan. Angtane jeiserem jei aa jes gam eyebilirim, jeiserem kabwaksusu angtane Yesus jam tebayanaiserem jemniwer. 9 Timotius, aamei daftara jam is eyebilirim, saamira wini Yesus aa jei ne tebanaram bosna ga jemna tefner is tulistabaipmini daftarabe. Angtane Kristen jematabe jeiserem, jei saamira wini jeiserem waakenfer jamer ga sene egantababisini. Aamei saamira wini bose bosna i jemna gam tulistabaipminirim, saamira wini jeiserem ga enggala: Jemna umuru enam pulu tahun, umuru jemna enam puluwer jam agabisteyan. Jei maaryena jam gwebiyen, anggwana daamfenfener gam gera. 10 Angtane fwater gane towaswebili enggame, saamira wini jeiserem jei waakena gam eyebili enggalaiserem: Jei tane waakenfer gam taayinbili jamere gam unggwan-gwantababisini. Saamira wini jeiserem jei angtane jem jenap foryalaiserem baife jam gwebayan. Jei angtane Yesus aa jei ne tebanaram jes gam nesiktababili enggame, jei jemniwer afa aa jes gane bilirim jeiserem gam golmini. Angtane ini aa jeman gangge jenbaminirim, jei angtane jeiserem gam batobaabili. Jei awelna waakenfer jeber-jeber gam gwebuwena. Saamirawi jes galserem gam aa jei ne eyebilirim, bose bosna ga jeman is tulistabaipmini daftarabe. 11 Jengga saamirawi angtane Kristen jematabe jei jes ne egantababisiliserem, saamira wini sirwiriserem bose bosna jemna safnant daftarabe ijam tulistabaipmiyen. Ai jes gamserem gam ga aam temawer ai gunu, saamira wini siwiriserem jei gwanan Kristus enggam gane bala, "Ai Im temawenefener asa gwena." Jengga afa ini jemna baabetfer galap jam gangge folbaminirim anggwana jam gaarfe, ane jei anggwana ibirmi gamjon ga gam gera, afa ga gam jes gamserem, gam jega jei Kristusem temawenefener jei jam naaweyan. 12 Ane jega jem temawer jei etam-etama kapkaiserem ga gane eyebili, aam temawer jei jam eyebiyen jei gwanan Kristus aa gemer gam balaram. 13 Jetefneryan, gamjon aas mese, jei jeber-jeber gangge kwaalaamitswebuwena, jafner gangge wofobiyafna je jayo, ane je jayo. Ane kabwaksusu kwaalaamitiwer, jei angtane nafsiserem taterisi jem temawer syefer gane nasbili, ane jei angtane nafsiserem jes gane towas-towastababinenne angtane nafsi jeiserem jei aa jes gane eyebilirim jem temawer. Jei taterisi jam nasbiyeneiserem ga jes gane nasbinenne. 14 Jega jem temawer ai enggam ai gunu, saamira wini siwiriserem jei anggwana gamjon ga jam gam gera, tane gam damtaf, ane anggwa mese tane jelemanaiserem ga jamer gam egantababisini, jega ginanggwa nemna jei bosna nemna kabwakfer nes jam ne nasbaipmineneyen. 15 Ai jes gamserem gam ajewer gunurum, ai ga aam temawer ai gunu, saamira wini siwiriserem afweraiserem jei mes ge tikwebili Yesus jam ne tikwebaatiliwer, ane jei bawasa ga aane tikwebaatini. 16 Jengga wini angtane Kristenf gwelaiserem, afa osona jelemanaiserem, afa ayana jelemanaiserem, afa jelem eneserem saamirawif jam gam gwenaram, angtane Kristen jeiserem saamira wini jeiserem ga jes gam eganulsini, jega angtane Kristen nafsi jematabe jei jam ne eganulsiyen. Jengga angtane Kristen jematabe jei saamira wini bunarsusfer jenfentowaisus aa jei gangge nwinbenerem, saamira wini jeiserem jetefener gam gane egantababisini. 17 Angtane sanbaka jemata aa jei gane taabilirim awelna waakenfer aa jei gane gwebilirim, jei fwaina waakena uskambar gam taabili, nabal-nabalsusu ga angtane taterisi Uwa Sanbagirmana aa jei gane nasbuwenaram baabetmer, jam kwaalaamitsweyan, ane angtane, angtane nafsi aa jei ne towas-towastababilirim. 18 Ai jes gamserem gam ajewer gunurum, ai ga aam temawer gunu Taterisi Uwa Sanbagirmana jep ga enggam baatultel: "Sapini gandum tanna aa je gam jubobinennerem enggalfe gandum tanna jewer gangge fatibitiyef otamawer, ane angtane gandum tanna jeiserem ga gane damtabili. Sapini jeiserem aarema jemna ijam motsobaasiyen. Jeime samfer gandum tanna jeiserem bastowaifer ga gam tombaabili." (Ulangan 25:4) ane "Angtane awelna angtane nafsimana aa jei gam gweyibenerem, jei fwaina gam taabili." 19 Timotius, afa angtane daamfenna enggam guluserem, "Angtane sanbaka jemata aa jei gam taabilirim jeiserem jei kapka gam eyebili.", aamei angtane jeiserem ijam sarbayan. Jengga afa angtane naura afa nawer-ningna jei gangge gubilirim, "Angtane sanbaka jemata aa jei gam taabilirim jeiserem jei kapka gam eyebili.", aamei angtane naura afa nawer-ningna jeiserem jei samfer igam sarbabili. 20 Afa angtane sanbaka jemata aa jei gam taabilirim etam-etama kapkaiserem jam gam eyebilirim, aamei angtane jeiserem ga ititmer is uftana jemat jeiserem jem nwenabe, jega angtane sanbaka nafsi afwer aaiserem jemata aa jei gane tebabilirim jei gam gangge erebili etam-etama jam ne eyebife. 21 Uwa Sanbagirem tarnabe ane Kristus Yesus ane malaikata Uwa Sanbagirmanaiserem, ai aamei is enggam ai bala, aamei seyafter ai ajes bilirim ga jes is sarbili, jam is tikwebitini. Aamei angtane ititmer nalefe ijam uftayan, jengga aamei gwanan angtane jeiserem jem temawer bunarsusfer jam is towaswena, afa jei kapka gam eyebili, afa fas. Waakena tefner ijam eyebiyen im afelen mesenfe, ane angtane nafsiserem jep ga kapkaiserem jetefner igam eyeipmini. Aamei angtane seyafter gemerserem jebe mwongga daamfenna tefner is gwirinmini jam eyeipmife. 22 Angtane ibirmiserem Yesus jam tebalaiserem jemna gwelaiserem gwanan waakenfer jam igam domolbana. Ane afa jei waakenfer gam gwenaram, aamei awelna jep ga igam gulbana, awelna angtane sanbakf jemata jei taabiliserem galf gwelaiserem. Timotius, afa aamei awelna angtane jemat jei taabiliserem awelna jep tatarmer jam igam gulbanaram jebe, ane angtane jeiserem etam-etama kapkaiserem ga gam eyebili, afa ga gam jes gemerserem, aamei kapkaiserem ga jes igam eyebili. Afa angtane nafsi jam sege gubilirim enggame aamei etam-etama kapkaiserem ga ijes eyebili, aamei etam-etama jeiserem ijam eyebiyen. Aamei ga waakena tefner is eyebili. 23 Fo tefner ijam telbiyen, jengga fo angguru jeme bastantowaifer igam telbili, aam temawer witifini imna is bweraf nulabawena, bwerna nenes-nenes mesna. 24 Angtane afwer etam-etama kapkaiserem jei aa jes gane eyebilirim, angtane nafsi jei etam-etama jeiserem tatarmer gane towasweipmini, gane domola nalefe jam ne taanaabisneneyen. Ane angtane afwer etam-etama kapkaiserem basyamer aa jes gane eyebilirim, angtane nafsi jei etam-etama jeiserem jam ne towaswebiyen nalefe jam ne taanaabisneneyen. 25 Ane jes gemerserem aaiserem jegme gemer, angtane afwer waakenaiserem aa jei gane eyebilirim, angtane nafsi jei tatarfer gane towasweipmini jei waakenaiserem aa jes gane eyebilirim. Ane angtane afwer jei safe waakenaiserem basyamer gane eyebili, seyafter jeiserem jes mese angtane galap gane towaswebili.
61 Timotius, aamei angtane aa jes gane armantababilirim Kristenf aa jei naawenaram, jei jam is towas-towastababili enggame, angtane jei aa jei gane armantababilirim angtane jeiserem jei safe Kristenyen, jei angtane sanbaka jelemana jeiserem waakenfer gane sarbabili. Jei waakenfer ga enggalem temawer gane sarbabili, jega angtane Kristenyen jei Uwa Sanbagirmana bosna kabwakfer jam ne nasibeyen, ane enggalf mese angtane Kristenyen jei jam ge gubiyen enggame, "Taterisi angtane Kristen aa jes ne towas-towastababuwenaram, jeiserem kapka." 2 Angtane Kristen aa jes gane armantababilirim, angtane Kristen jeiserem jelem inibe enggam jam ge gubiyen, "Ai angtane sanbaka amnaiserem jebar Yesus daamfennaber amsama tebana. Jega jem temawer ai bai alem sanbaka ajama sarbabiyen." Jei jes gemerserem gam jam ge gubiyen, jengga jei enggamfener gangge gubili, "Alem sanbak mesna jei Yesus mes ne tebana, ga jem temawer ai jei ajama nesiktababili. Ai awelna jemna waakensusfer aya gwebili, jega ai jei gam asa batobaabili." Timotius, seyafter aaiserem ai is ajes towas-towasulbonorom, aamei jeiserem ga jam is towas-towastabaipmini angtane nafsiserem jebe. Ane aamei ga unggwanfer is balbabili, seyafter jeiserem angtane ga jes sene eyebuwena. 3 Yesus Kristus Jei Tuhan nemna, ane Jei taterisi bunarsusfer aaiserem ga nes jes towas-towastabaipmini. Jei nei nes enggam towas-towastababili, Uwa Sanbagiri aa gam gunurum nei game fomfom nesa gwena. Jengga angtane afwenefener jei taterisi bunarsusfer jeiserem jesyan ga jes ne towas-towasulmini, jengga jei taterisi nafsi ga jes ne towas-towasulmini. Angtane jeiserem ga baif naawena Uwa Sanbagiri aa gam gunurum gam gwefe. 4 Angtane jeiserem jei jena syefer ne tetenanna, jei seyafter teisyena. Jemna kapkaiserem ga enggam: Jei jam ge doksobaf aarememfener ula igyeneiserem jem temawer. Jega jem temawer angtane nafsi jelem inibe ga gangge uskamswebili. Jei angtane nafsiber aaremem ga gangge doksobana. Jei angtane nafsiserem jem temawer syefer gangge nasbawena. Ane jei jelem inibe enggam gangge gubili, "Angtane nafsi jei kapkaiserem jes ne eyebaabif." 5 Angtane taterisi nafsi aa jes ne towas-towastababuwenaram, jei jeber-jeber aarememfener gangge doksobana angtane nensabar, aam temawer jemna ini ga fwater gangge kabwakswebamini, ane taterisi bunarsusfer aaiserem jei gamjon jam ne sarbiyen. Angtane kapka jeiserem ga enggam gangge gubili jelem inibe, "Afa ai awelna Uwa Sanbagirmana jam as gweyibenerem, angtane doini ap as ga sene gulbana, ane ai apgal jigala anesusfer gam as tebabili." 6 Aaiserem bunarsus, angtane Uwa Sanbagiri aa jei gane onsobanaram, afa ini jemna saaser-saasersusfer gangge folbamini apgal jigala jei aa jes gane damtabilirim jem temawer, afa ga gam jes gemerserem, gam jega jei nesiktele Uwa Sanbagirmana unggwanfer gane domola, ane baabeta Jemna, ane Mafnana Jemna, ane waakenfer gwelaiserem jamer abak-abaksus jes mese. 7 Nei jam surulu galapserem, apgal jigala afa nejama gwirinyen ogirip jebar foryafe. Ane nei jam tere jepserem, jep jegme gemer apgal jigala afa nejama gwirinfelyen ogiriwer. 8 Afa tumilgal ane fen nei jes negma damtabilirim gwela nemnaiserem jebe, jeiserem jetefener samfer. 9 Jengga angtane aa jei gangge gubilirim jam galgalabarswefe, jei unggwasbala ga gane domola etam-etama kapkaiserem jam ne eyebife. Ga enggam jei bawasem tafnap ga gangge janbili, sobona o mwona jep ga gam jantonom jam tebafe. Ini jemna aa jewer gangge folbaminirim galgala unggwanfer jam damtabife. Jega jem temawer jei gwela waakenaiserem jewer ga gangge irfwebitne, ane jei etam-etama nenes-nensa ga gane eyebili. Ane jepga gwela waakena jei gwanan aa jes gane domolaram, gwela jeiserem ga gangge kabwakswebamini. 10 Angtane enggam aa jei gangge gubilirim jelem inibe, "Ai doini unggwanfer damtabif.", jei kapkaiserem unggwanfer ga gane eyebili. Ai Paulus, ai jes gemerserem gam ajewer gunurum, ai ga aam temawer ai gunu, ai amsam towaswebili angtane afwenefener enggam aa jei ge gubilirim, "Ai doini unggwanfer ajama damtabif." Jei Yesus jam tebalawer mes ge tikwebili. Ane ini jemna ga aa ge jenbamini. 11 Jengga aamei Timotius, aamei Uwa Sanbagiri aamei nesiktene. Jega jem temawer, seyafter kapka jeiserem ai ajes tulistababilirim, aamei jeiserem ijam eyebiyen. Jengga aamei jam is unggwasa aas gemerserem gam eyebife: Aamei Uwa Sanbagiri aa jes bilirim, jeiserem jam is eyebili, ane aamei Uwa Sanbagiri tefner is onsobana. Yesus ga jam is tebana baabetfer. Angtane seyafter gemerserem ga jam igam nesiktababili! Aamei kanaufera is fina kabwaktala jam ijep domolaram. Ane aamei foler-folerater im eyeipmini angtanefe. 12 Aamei Yesus imesam tebana. Jega jem temawer aamei Uwa Sanbagiri tefner is onsobana jeber-jeber. Uwa Sanbagiri Jei aamei is mesam destabana enggalfe aamei waakenfer gwelaiserem jamer abak-abaksus igam domolf. Ane aamei imes nasowena angtane uskambar jem tarnabe enggame aamei Yesus imesam tebana. Jega jem temawer gwela Uwa Sanbagiri ijes gulbanaram ibe, gwela jeiserem ga jam is taabili. 13 Uwa Sanbagiri gwela aa Jes golminirim angtane seyafter gemerserem jebe, Jei waakenfer gwelaiserem jamer abak-abaksus is mes gulbana ibe. Kristus Yesus taterisi waakena aa galap nasbilintim Pontius Pilatusem tarnabe, Jei Jam ereyen. Jei game aa jewer nasounantam, Jei ga ibe is jem ge sabasini aamei Uwa Sanbagiri ga fomfom is onsobana. Jega jem temawer Uwa Sanbagiri ane Kristus Yesus Jem boseme, ai isa enggam ai bala, 14 ai ajes bilirim, aamei seyafter jeiserem ga is eyebili, jamer Tuhan nemna Yesus Kristus gamjon se warautna. Seyafter jeiserem ga waakenfer is eyebili, jega angtane enggam jam ge gubiyen, "Timotius kapka gam eyebili." 15 Yesus Kristus se warausanya nunu Uwa Sanbagiri Jener aa jes bilirim. Uwa Sanbagiri Jei Jenfentowai gwena angtane seyafter gemerserem jem Sanbakfe. Jei Jenfentowai gwena raja-raja seyafter gemerserem ane angtane sanbak-sanbaka seyafter gemerserem jem Sanbakfe. 16 Uwa Sanbagiri Jenefener gwena baabeta termana jam domolyan. Jemna Jam gwela nafapfener, nafa jeiserem angtane jam ne gwetmanulbaasiyen. Angtane seyafter gemerserem gwanan Uwa Sanbagiri jam ne damtayan, ane nei mese masef Uwa Sanbagiri nejama damtayan. Nei bosna Jemna tefner ganma pujiwulbowena, ane baabeta Jemna tefner nesa gomewulbono, jamer abak-abaksus! Amin, jes gamserem ga gamfener. 17 Timotius, angtane Kristen galgala unggwanfer jemanserem, aamei angtane jeiserem ititmer enggam is balbabili, "Ina syefer ijama tetenanayan. Ane ini imna unggwan-giri galgalap is jam ge folbamiyen, aam temawer aamei teisyena nunu fomera aamei ga isa galgalabarswena. Jengga ini imna unggwan-giri ga ise Uwa Sanbagirminip sege folbamini. Jei seyafter gemerserem nep nes mes golmini, jega ini nemna saaser-saaserfer nes ga sege folbamini, ane nei waakenfer ga nesa gwena. 18 Aamei waakenater isa eyebili, jega aamei waakenaiserem unggwanfersus gam isa eyebuwena. Aamei galgala angtanefe tatarmer isa kitulmini. Galgala ilemanaiserem, angtane ga jem isa batobaabili." 19 Afa angtane jei jes gemerserem gemer sene eyebuwenaram, Uwa Sanbagiri apgal jigala waakenaiserem galap jep gase kitulmini taman waaken-giribe. Ane Jei waakenfer gwelaiserem jamer abak-abaksus jep gase golmini. Jei Uwa Sanbagirfer gase naawena, ane ini jemna saaser-saasersusfer ga sege folbamini. 20 O Timotius, Taterisi Waakenaiserem Uwa Sanbagiri ijes gulbanaram ibe, Taterisi Waakena jeiserem ga waakenfer is gerabisnenne. Angtane afwenefener Taterisi Uwa Sanbagirmana aa jei ne nasibenennerem, angtane jeiserem jei Taterisi Uwa Sanbagirmana ula kapkaiserem jebaner ne dupdupbulu. Jei bai Taterisi Uwa Sanbagirmana. Jei enggam ge gubili, "Ai seyafter tousa." Jengga jei teisyena, ane jei Uwa Sanbagiri jam onsobayan. Angtane jes galserem aamei ina ga jam is bijautana jemniwer. 21 Ai jes gamserem gam ajewer gunurum, ai ga aam temawer ai gunu, angtane afwenefener aa jei gangge gubilirim enggame, "Ai seyafter tousa.", jei mes ge tikwebili Yesus jam ne tebalawer. Ai sembayanga as gwebana Uwa Sanbagiri Jei waakena Jelemanaiserem ip ise golmini aamei seyafter gemerserem.