1 Tesalonika
11 Ga ip, Safna Yesus iJeya tebanaram, kota Tesalonika je. Aameiba Uwa Sanbagirmanam, Uwa nemna, aameiba Tuhan Yesus Kristusmanam. Surta aaiserem amniwer, Paulus, Silas, ane Timotius. Ai sembayanga asa gwebabana Uwa Sanbagirfe, Jei waakena Jelemanaiserem ip is gase golmini, ane Jei ini imna is gase gwebaipmini waakenfer is ga sege folbamini. 2 Ai sembayanga jeber-jeber asa gwebabawena Uwa Sanbagirfe. Ai agma bala ase samfer golmini aamei seyafter jes gemerserem im temawer, ane ai bosna imna agma bilipmitena sembayanga jam gwebalabe. 3 Wa, sembayanga jam agma gwebabanaram Uwa Sanbagirfe, Uwa nemnaiserem, ai isa gemer aya sarbabistaabonwena. Ai aamei isa agemera sarbabistaabonwena, aamei awelnap waakenfer fomfom isa gowena aam temawer aamei Yesus imsa tebanant; ane aamei awelnap unggwanfer ga fomfom isa gowena aam temawer aamei Yesus imsa nesiktene; ane aamei kanaufer ga fomfoma isa fina aamei Yesus Kristus Tuhan nemna igalaba tebanaram. 4 Am afelen mesna, ai amsama towaswena enggame Uwa Sanbagiri Jei ims nesiktababili, ane Jei ims destabaabili enggalfe aamei igama etamwef angtane Jelemanfe. 5 Ai jes gamserem gam amsama towaswena, aam temawer ai Taterisi Waakena Yesusem temawer ip aya towas-towasulminint. Ai taterisi alem iniwer jeiserem jafner ajama balbabiteyan, jengga baabeta yo Mafnana Uwa Sanbagirmanaiserem ai ga aamei isa ajema towas-towastababilint. Ane ai ga aya towaswena enggame taterisi jeiserem jeba bunarsusferam. Aamei imsama towaswena ai fomfom aya gwena ibar negalaba nwinintim. Ai waakenfer aya gwena enggalfe ai nele waakenaiserem ibe isa gama destabamif. 6 Aamei ai as imsa onsobaabilint waakenfer gwefe, ane Tuhan mese aamei imsa onsobanant. Angtane nafsiserem jei ibe safe ise kapkaiserem is jes ne eyeipminint, jengga aamei taterisi Yesus Kristusem temawer imsa taabili, ane jes jepserem Mafnana Uwa Sanbagirmana Jei ibe ini saaser-saasera ip ga is kitulmini. 7 Aamei waakenfer ijewera gwenaram, angtane Yesus aa jei ne tebanaram propinsi Makedonya je, ane Akaya je, jei gwela imnaiserem ijes ne domolmini, ane jeme waakenfer ga aa naawena aamei gamserem. 8 Angtane anesus taterisi Tuhanem temawer mes ne sarbili imniwer, propinsi Makedonya ane Akaya jepfeneryan, jengga angtane taman-tamna unggwanfer gemerserem jei mes ge sarbili enggame aamei Uwa Sanbagiriserem ijesa tebana. Ga jem temawer ai gamjon ajama nasoweyan im temawer. 9 Angtane seyafter jeiserem enggam ge gubili, aamei ase waakenfera tebabilint ai kotana imnaiserem jep agalaba fortyantam. Jei ga enggam ge gubili, aamei imsa aafulnunt tiborma jam kwiruluserem enggalfe, aamei awelna Uwa Sanbagirmana tefner igama gweyibef, Uwa Sanbagiri bunarsusfer aaiserem ane nwinsanaiserem. 10 Ane aamei Tane Jemna taman waaken-giriwer aa Jei jelaiserem ijesa fibana. Tane Jemna bosna ga Yesus, Uwa Sanbagiri aa jes irtestenantam terewer, ane Jei ga nei ga nes waakentababisini kakala Uwa Sanbagirmanaiserem jewer. Uwa Sanbagiri Jei kakala Jemna angtanefe se golmisi, aam temawer Jei etam-etama kapkaiserem angtanemana jem temawer kakalsona.
21 Am afelen mesna, aamei iner imsa towaswena wofera amna imnibe jei syeferyan. 2 Aamei imsama towaswena enggame, ai gwanan nalefe imnip ajama sofweyan, kota Filipi je angtane jepmanaiserem jei abe ase kapka gane eyeipmini, ane ai as ne imei-imeitababili. Angtane unggwanfer jei safe ai as jam ne nasbabili, jengga Uwa Sanbagiri nemnaiserem Jei baabeta as mes golmini enggalfe ai Taterisi Waakena Uwa Sanbagirmanaiserem ibe isa gama nasipmif. 3 Taterisi Waakena ai isa ajesa golminirim ibe, ai isa ajama afaf-afaftababiyen, jengga ini amna ba waakenfennam, ai bunarsusfer aya gunu. 4 Ga enggam, ai jeber-jeber asa nasbuwena, Uwa Sanbagiri aa jes bilirim ai ajama nasbife ai ga jes asa nasbuwena, ane Jei ai as mes balbabili ai Taterisi Waakena aaiserem ajama nasbinennefe. Ai jeiserem fas ajama nasbiyen enggalfe ini angtanemana saaser-saaserfer gam ge folbamif, jengga enggalf ini Uwa Sanbagirmana saaser-saaserfer gam folbaf, ane Jei ini nemnaiserem nes jam unggwasbaipmiliserem jem temawer. 5 Aamei imsa towaswena, ai imnibe enggalf ajama jelyan aamei isa ajama malin-malintababif ai ajesa nasbabilirim jeme. Ane ai doini imniwer ajama tebayan, fas, Uwa Sanbagiri Jei jeber-jeber nei nes Jener se gerebaabili. 6 Ai awelna enggalf ajama gwebiyen, jega aamei as igma balbabif enggame awelna amna waakensusu. Ai jes gemerserem awelna gam ajama gwebiyen im nenennabe, afa angtane nafsiserem jem nenennabe. 7 Jengga bunar-bunarsus aiba angtane Yesus aa jes baftabilirim, ane ai galgala samfer agma balbabili imniwer. Jengga jeiserem ajama eyebiyen. Ai im nenennabe agalaba nwinintim, ai ga an ana ajamera gaaramisnenewenant, wini tannabara gamserem tane jamer aa gemer gam gerebaabisnennerem. 8 Ai aamei isa uskambar aya nesiktababili, ga jem temawer ai Taterisi Waakena Uwa Sanbagirmana jeiserem ip ga is aya golmini, ane gam ke enggam taterisi jeiserem jetefner, jengga gwela aman mesna ai isa jesa golmini ibe, aam temawer ai aamei isa uskambarsus aya nesiktababili! 9 Am afelen mesna, aamei gemer ima sarbabistaabonwena awelna amna ajesa gwebilirim baabetmer. Gwer gwin amna awelna gemer agma eyebili, jega angtane imniwer ai daran-darna jebe afa ajama golmiyen, ai Taterisi Waakena Uwa Sanbagirmana jam isa agalaba nasipminirim ibe. 10 Aamei awelna amnaiserem iner as imsama domolmini, ane Uwa Sanbagiri mese Jei as mes domolmini ai ajesa eyebilirim. Aamei Yesus ijeya tebanaram, ai gwanan ibar agalaba nwinintim, jes galapserem ai kapka ajama eyebiyen. Ai ibar waakenfer aya nwinint, ane etam-etama kapka im tarnabe ai ajama eyebiyen. 11 Aamei ba imsama towaswena enggame, ai ipma eyeipminint aamei seyafter gemerserem, uwa jei jelem tanefe aa gemer gam eyeibenerem. 12 Ai aamei isa ajama esoroltababilint, ane ai ini imna ga isa aya kanautabaipminint, ane ai ga isa jafnera balbabilint enggame aamei waakenfer isa gwena, jega aamei gam isa eyebili ini Uwa Sanbagirmana aa gemer folbanaram. Ane Uwa Sanbagiri Jei is jenbebili enggalfe aamei Jem angtanef igama gwef Tamna Jelemanaiserem jebe, ane nafa Jemna ga isa domolsa. 13 Jes jepserem ai taterisi Uwa Sanbagirmana jam isa agalaba nasipminintim ibe, aamei taterisi jeiserem ga ima sarbili, ane taterisi jeiserem ga ima taabili, ane ga ima gunu, "Taterisi aaiserem gam ke angtanemana, jengga taterisi aaiserem bunar-bunarsusfer ba Uwa Sanbagirmanam." Ane Uwa Sanbagiri awelna ga Jei gwebili ilem inibe, aam temawer aamei Yesus ijewera tebanaram. Ane seyafter jeiserem jem temawer ai Uwa Sanbagiri ajewera pujitawenaram enggame ase samfer golmini. 14 Am afelen mesna, tamtamtala safna Uwa Sanbagirmana Yesus Kristus aa jei ne tebanaram ona Yudeya je, tamtamtala jei aa jes ne domolantam, tamtamtala jeiserem aameime imsa domolant. Aamei kabwakfer gwelaiserem imsa domola, aam temawer anggwabura ilemana kapkaiserem is jei ne eyeipminint. Jei kapkaiserem ibe is jes ne eyeipminintim, kapka jeiserem ga enggala angtane Yahudimana jei kapkaiserem aa gala gane eyeipminintim angtane Yesusmanaiserem jebe ona Yudeya je. 15 Angtane Yahudimana afweraiserem jei nabi gwananmanaiserem jei aane munbobil, ane angtane Yahudimana nafsiserem jei Tuhan Yesus jes ne munbonont, ane jewer ga ai asene surbobili. Ini Uwa Sanbagiri angtane jeiserem jebar Jam saaser-saaserswebayan. Angtane jeiserem jeiba ginanggwasam angtane seyafter gemerserem. 16 Taterisi Waakena Uwa Sanbagirmanaiserem jei safe angtane jeiserem jam waakentababisif, angtane jeiserem jei enggam ge gubili, "Taterisi Uwa Sanbagirmana ijama nasipmiyen angtane Yahudimanyanfe." Angtane Yahudimana jeiserem jei etam-etama ga jem ne eyebili, gamjon ga aane eyebili jamer anesus. Ane namwer Uwa Sanbagiri Jei Jam fiyan, Jei tamtamtababiliserem jebe mes golmini! 17 Jengga amniwer am afelen mesna, ai gwanan ibar negalaba syanwenantam nwenawer nomkefe, nei iniwer nena nejama bijausoyan. Ai imsa sarbabistaabona, ane ini ga ase jam ge jenbamini. Ane ai nele ga ajem temawera terelbene enggalfe ai aamei gamjon isa agma damtabif. 18 Ai gamjon ajama warauf imnibe. Ai Paulus, ai nels terelbene daamfenfeneryan jam waraufe imnibe, jengga nele ase bawase isinbaamisnenewena. 19 Ai imnip gamjon ajama warauf, ai imsa nesiktababili, ane im temawer amna ini saaser-saasersusu. Nunu Tuhan Yesus aa jem waraufaltyaram, nei nesa fisa seyafter Jem tarnabe, ane Jei ga nesa pujitefe. 20 Bunaram ai Taterisi Waakena ipma nasipmini, ane Taterisi jeiserem ima taabili. Ai jeber-jeber waakena asa nasbili im temawer, ane im temawer ini amna saaser-saasera ga asege folbamini.
31 Ai bunarsusfer imnip gamjon ajama warauf, ane ai gamjon ajama fiyan, jega jem temawer ai Silasfar kota Atena je jep ai ge nwinint antowai, 2 ane nem afelna Timotius ai jei ga aya baftanant imnibe. Jei angtane awelna Uwa Sanbagirmana aa jei gweyibenerem, ane jei awelna abar ajeya gwebilirim enggalfe Taterisi Waakena Kristusem temawer ajama towas-towastababif. Ai Timotius enggalf aya baftanant, jei ini imna is gam kanautabaipmif, jega aamei Yesus gam isa tebana unggwanfersus. 3 Ane ai Timotius imnip enggalf aya baftanant, jega aamei ijama tikweyan Yesus jam tebalawer, aamei tamtamtala jam ijeba domolaram. Aamei iner imsa towaswena, Uwa Sanbagiri nelemanaiserem Jei mes gunu enggame, bunarsus angtane nafsiserem jei kapkaiserem nesene eyeipmini nebe. 4 Ai ibar gwanan negalaba nwinintim, ai aamei gwanan isa amsama towastababilint enggame nei tamtamtala nesa domola. Ane aamei iner imsama towaswebili jeiserem jei bunarsus mesam etamwena. 5 Jega jem temawer ai Timotius nabala ga ai baftanant imnibe. Ai gamjon ajam fiyan. Ai Timotius tatarfer enggalfe ai baftanant, jei ai as gam towastaf enggame aamei Yesus ifomfoma tebana. Ai alem iniber enggam ai gununt bawasa engbar aamei is mes unggwasbaabilint, ane awelna amnaiserem im nenennabe jei ga tamtaf asa gwebili. 6 Jengga Timotius jei mes warautna amnibe, ane jei taterisi saaser-saaserserem jes gwirinyele enggame aamei Uwa Sanbagiri gemer ima tebana, ane aamei angtane nafsiserem imsa nesiktababili. Jei ai as mes balbabili enggame ini imna ise saaser-saasermer ga ge folbamuwena aamei ai as jam igma sarbabistaabonaram. Ane aamei igemera gunurum abar jama dorwefe, jes gemerserem aime agemera gunu enggame ai ibar nejama dorwef. 7 Angtane jei kabwaktala nafis-nafsiserem ap safe ase ga sene eyeipmini, jengga am afelen mesna, taterisi ai ajesa sarbilirim im temawer, taterisi jeiserem ini amna ga as jem kanautabaipmini. Aamei Yesus ijewera tebanaram, ini amna ga saaser-saaserfersus ga as jewer ge folbamini. 8 Namwer ga enggam ai bunarsusfer ajama gwena, aam temawer aamei Tuhan jamer ima gwetmanwebaasini. 9 Ai Uwa Sanbagirfe ase samfer golmini im temawer agma gweyibene. Ai Uwa Sanbagiri ajewera balaram enggame ase samfer golmini, ai ga aam temawer aya bala ini amna ase saaser-saasersusfer ge folbamini Uwa Sanbagirem tarnap im temawer. 10 Gwer gwin ai Uwa Sanbagiri uskambarsus agma bala, ai aner ibar nejama dorwef enggalfe ai aamei isa agma batobaabif, jega aamei bunar-bunarsus Yesus gam isa tebana ginggitfer. 11 Ai sembayang asa gwebabana Uwa Sanbagirfe, Uwa nemnaiserem, ane Tuhan nemna Yesus, Jei nele ap as gase dwotamini enggalfe ai imnip agma sofwef. 12 Ai Tuhanf sembayanga ga aya gwebabana, jega aamei im afelna Yesus aa jei ne tebanaram jei gam isa nesiktababili. Ane aamei angtane seyafter gemerserem gam isa nesiktababili unggwanfer, ane gamjon ga unggwanfersus isa nesiktababili, ai aamei isa agemera nesiktababuwenaram. 13 Afa aamei jes gemerserem jam isa eyebilirim, Uwa Sanbagiri ini imna is gase kanautabaipmisini, jamere aamei jepga waakenfer gam isa gwena, aamei etam-etama ijama gwebiyen. Ane nunu Tuhan nemna Yesus gamjon aa jep forsanyaram angtane seyafter Jei aa jei ne tebanaram jebaner, nunu jeiserem jeme aamei Uwa Sanbagiri Uwa nemnaiserem Jem tarnabe gam isa fisa ini tabalbalmer, etam-etama imnibe fas is jam ge folbamiyen.
41 Am afelen mesna umwef ga enggam, ai ibar gwanan negalaba nwinintim, ai aamei isa amsama towas-towastababilint aamei fomfom isa gwena, jega ini Uwa Sanbagirmana saaser-saaserfer gase folbana. Ane ai amesa towaswena aamei jes gamserem gam ba imsama gwena. Ane namwer aas jepserem bosna Tuhan Yesusmanaiserem ai aamei uskambarsus ga isa ajema balbabili, ane ga isa asa tergenbaabili, jega aamei waakenfersus gamjon gam isa gwena. 2 Taterisi ai isa ajesa nasipminintim ibe baabeta Tuhan Yesusmanaiserem jeme, aamei taterisi jeiserem imsama towaswebili. 3 Aaiserem Uwa Sanbagiri ga is jes bilipmini ibe: Uwa Sanbagiri aa jes bilirim aamei ijema eyebife, aamei seyafter jeiserem aamei ga jetefner isa eyebili. Ane aamei seyafter maaryena ijama gwebiyen. 4 Anggwana seyafter gemerserem jeime jam sege towaswebili, jei tifni jelemana fomfom gane gerebaabisnenne, jega Uwa Sanbagiri aa jes bilirim jei jeiserem gam sene eyebili, ane jei angtane nafsiber waakenfer gase naawena. 5 Maaryena ijama eyebiyen, angtane Uwa Sanbagiri jam towaswebayanaiserem galserem. 6 Taterisi seyafter jeiserem jewer, angtane jelem afelenfe kapka jam eyeibeyen, jei maaryena jam gwebiyen. Ai gwanan aamei ititmer isa mesama towastababilint enggame, angtane etam-etama jes galserem gala jam eyebiliserem, Tuhan Jei angtane jeiserem se tamtamtababisi. 7 Uwa Sanbagiri Jei nei nes mesam jenbebili enggame, "Au, aamei enggam isa gwena anggwabura Amna gamserem, ane aamei maaryena ijama gwebiyen, jengga aamei ini tabalbalmer isa gwena." 8 Gam jega, afa angtane taterisi aaiserem baife aa jei ne gweyibenerem jam onsobiliwer, jei gam ke taterisi angtanemanaiserem baife jes gane gwebili jam onsobife, jengga jei taterisi Uwa Sanbagirmanaiserem baife ga jes gane gweyibene jam onsobiliwer, Uwa Sanbagiri Mafnana Jelemanaiserem ibe is Jei golminirim. 9 Ai ibe gamjon isa ajama tulisulmiyen enggalem temawer, aamei ilem afelen mesna Yesus aa jei ne tebanaram ifomfoma nesiktababili. Uwa Sanbagiri Jei fwater aamei is mesam towastababilint enggame, aamei fomfoma in ina ijama nesiksonanafe. 10 Ane aamei jes gamserem gam imsama eyeipmini, ilem afelen mesenfe seyafter aa jei ge nwinbenerem propinsi Makedonya je. Jengga am afelen mesna, ai aamei isa gamjon aya balbabili unggwanfer enggame, aamei angtane unggwanfer isa nesiktababuwena. 11 Aamei enggam isa gwena, ai gwanan aamei isa agemera balbabilintim. Aamei ijama wofoweyan aaremfener ga igama doksona. Angtane nafsiserem taterisi jemnaiserem jep ijama taawiyen. Jengga aamei awelnabe iner igama gwena enggalfe aamei tumilgala igama damtabif. 12 Aamei afa jes gamserem gam jam isa gwenaram, angtane Yesus jam tebayanaiserem jei ga sege gubili aamei waakena. Ane aamei awelnabe ijewera gwenaram, aamei apgal jigala afa ijama balbabiyen angtane nafsiserem jemniwer. 13 Am afelen mesna, ai aamei isa ajama towastababif angtane jam tereserem jem temawer. Afa aamei taterisi bunarsusfer aaiserem jam isa towaswebilirim, ini imna is jam ge jenbamiyen, angtane nensa gamserem. Angtane jeiserem ini jemna enggam jam ge folbamiyen terewer jam irwelaiserem jem temawer. 14 Nei aaiserem Yesusem temawer jes nesa taabili, Yesus mes tere ane Jei gamjon mes irwena terewer. Jega jem temawer aaiserem jes mese jam nesa taabili: Nunu Yesus aa jem warausanyaram, nunu jes jemserem angtane jam tereserem Yesus aa jei ne tebanaram, Uwa Sanbagiri Jei angtane seyafter jeiserem se iretebabisi terewer, ane jei Yesusfar ga sege jalbisi. 15 Taterisi aaiserem ai ibe isa ajesa towas-towasulminirim, taterisi aaiserem jeba Tuhanminiweram jela enggame: Nunu Tuhan Yesus aa jem forsanyaram, nunu jeiserem jeme nei gemer nejeya gwenaram, angtane gwanan aa jei ge terbuwenaram, nei fas angtane jeiserem nejama danabaabiyen. 16 Uwa Sanbagiri gase nasousa ititmer, malaikata sanbagirsususerem ititmer se nasousa, ane trompeta Uwa Sanbagirmana gase forolsa, ane jes jepserem Tuhan Yesus Jener gase iresanya taman waaken-giriwer. Ane angtane gwanan aa jei ge terbuwenaram Kristus aa jei ne tebanaram, jei nabala ga jei sege irwebisi nemniwer. 17 Ane jes jepserem nei gemer nejeya gwelaiserem, Uwa Sanbagiri Jei nei seyafter ga nes kitultesa angtane jeiserem jebaner, ane winsibaner ga nes erbifelse enggalfe Tuhanfar negama dorwef winsibe. Jepga nei Tuhanfar ga nesa gwena jamer abak-abaksus. 18 Ga jem temawer aamei ini imna in ina ga jam isa kanautababuwena taterisi jeiserem jeme.
51 Am afelen mesna, taterisi nunu jeiserem jam etamwelaiserem jem temawer ai ibe isa ajama tulisulmiyen, 2 aam temawer aamei bunarsusfer imesa towaswena enggame, nunu Tuhan aa Jem foryalaiserem, aamei ijama towaswebiyen fonggalabara nunu jeiserem gase etamwesa, jes gemerserem nunu komkom anggwana jam foryalaiserem jegme gemer aamei ijama towaswebiyen. 3 Angtane enggam jam aa jep ge gubisirim, "Seyafter mes waakenswel, erala gamjon fas.", jes jepserem jei tamtamtala aafer-aafer ga sene domolsa, jei tamtamtala jeiserem jewer jam ge tobitinyen. Jes gemerserem aaiserem jegme gemer wini tane jam gerala gamserem, jei sigini aafer-aafer jam enola gamserem. 4 Jengga aamei am afelen mesna, aamei gam ke angtane gwinip nwiniserem jei galserem, aamei jes galserem galyan. Aamei ijama bitbitweyan nunu jeiserem jam aa jep forsanyaram, angtane komkoma jam foryala gamserem. 5 Uwa Sanbagiri Jei nafa Jelemana is jeteram golmuwena, jega aamei seyafter gemerserem igama etamwef angtane gwermanfe. Nei gam ke gwinmana, nei angtane gwinmanyan. 6 Gam jega nei nepsama tanaram angtane nafsi gamserem, nei nwena nesa ketatena. Ane imwana nemna jamer taa, angtane mabuk gamserem gamyan. 7 Angtane jam tala, jei gwinem gam tana; angtane mabuka, jei gwinem gam mabukswena. 8 Jengga nei aaiserem nei angtane gwermana, nei angtane mabuk gamserem gamyan. Ginanggwa jei baju besi ane topi besi gane kabwabili, jega ginanggwana jemnaiserem ginna jei aa jes gane erbilirim, jem ula jep ga gangge fagabisiufenef. Jemna igi ga enggam, "Uwa Sanbagiri Jei bunar nes waakentababili.", neime ginggitfer nesa tebana ane Jei ga nesa nesiktene, jega bawasa nep kapka nes jam eyeipmiyen. 9 Uwa Sanbagiri Jei nei nes Jam destabaabiyen kakala Jemnaiserem nei nejama taabife. Jengga Jei nei nes enggalf destabaabili nes jam waakentababisif Tuhan nemna Yesus Kristusmanaiserem jeme. 10 Yesus Jei nem temawer mes terent, ane Jei gamjon se warautna nem temawer. Afa nei gemer nesa gwena afa nei nemsa tere, Jei jam aa jep forsanyaram nei Jebaner ga nesa gwena. 11 Ga jem temawer aamei ini ilemana ga jam isa kanautababinenne, ane aamei in ina ga jam isa batominenne, aamei namwer aas jepserem igemera eyebilirim. 12 Am afelen mesna, ai isa unggwanfer aya balbabili, aamei angtane im sanbakef jeiserem ga jeter isa sarbabisini, aam temawer Tuhan Jei angtane jeiserem mes destabaabili is jei sene gerebaabisnenne, ane aamei is jei sene towas-towastababili. 13 Aamei jeber-jeber jei waakenfer isa sarbabisini, ane aamei jei isa nesiktababili, aam temawer jei awelna ip ne gweipmini. Waakenfer isa nwini angtane nafsiber, ijama erayan. 14 Am afelen mesna, ai gamjon aamei isa unggwanfer aya balbabili: Angtane awelna baife aa jei ne gwebilirim, aamei angtane jeiserem jam isa balbabi jeiserem kapka. Angtane aa jei ge erebilirim, ini jemna ga jam isa kanautabaipmini. Aamei angtane nafsi seyafter jebar gwanan ga jam isa fina. 15 Afa angtane kapkaiserem is jes gane eyeipminirim ibe, aamei kapkaiserem ijama fwayenulmiyen. Jengga aamei enggam isa eyebuwena jeber-jeber, aamei waakenaiserem jetefner igama eyeipmini angtane ilem jemata jeiserem jebe, ane aamei jegme angtane seyafter gemerserem jebe waakenater igma eyeipmini. 16 Aamei jeber-jeber ini ise saaser-saaserfer sege folbamuwena. 17 Aamei sembayanga jeber-jeber isa gwebawena. 18 Ane seyafter gemerserem aa jei gangge etamwebilirim, aamei jeiserem jem temawer Uwa Sanbagirfe ase samfer golmini jam igma gweyibene. Uwa Sanbagiri Jei ga enggam gunu, "Aamei jes gamserem ga gemer isa eyebili, Yesus Kristus gemer igemera tebasinirim." 19 Awelna Mafnana Uwa Sanbagirmana jeiserem ijama aafulnuyon. 20 Angtane nafsiserem Taterisi Uwa Sanbagirmana aa jei ne nasibenerem Mafnana Uwa Sanbagirmanaiserem jeme, taterisi jeiserem enggam ijama bilyen je kapka. 21 Aamei taterisi seyafter gemerserem waakenfer ga jam igama damdamulsnenne, waakenaiserem jeter ga igma taabili, 22 ane kapkaiserem ga jam igma bijauwulu ileminiwer. 23 Uwa Sanbagiri Jei ini nemna waakenfer nes gase gwebaipmini. Ane ai sembayanga asa gwebana, Uwa Sanbagiri Jei aamei seyafter is gase gerebaabisnenne, jega ini imna tabalmer is gam sege folbamini jamere, nunu Tuhan Yesus Kristus gamjon aa jep warausanyaram nunu jeiserem se fala. Gam jega nunu jeiserem jeme mafnana imna ane tifni imna seyafter gemerserem etam-etama fas. 24 Uwa Sanbagiri aamei is Jei jenbebilirim, Jei jeiserem se eyebili aam temawer Jei aa jes gam bilirim Jam eyebife, Jei seyafter jeiserem gam eyebili. 25 Am afelen mesna, aamei sembayanga Uwa Sanbagirfe am temawer jam isa gwebabana. 26 Aamei angtane seyafter Yesus aa jei ne tebanaram jes isa balbabili enggame, "Kelek, waakenfer sa gwe!", jepga tafna isa tena. 27 Ai isa unggwanfer balbabili bosna Tuhanmanaiserem jeme, surta aaiserem jam isa gaaraipmistena angtane seyafter Yesus aa jei ne tebanaram jebe. 28 Ai sembayanga asa gwebabana Tuhan Yesus Kristusfe, Jei waakena Jelemanaiserem ip is gase golmini aamei seyafter gemerserem.