1 Petrus
11 - 2 Ga ip, angtane Uwa Sanbagiri ijes destabaabilim. Angtane kabwaktala unggwanfer ibe is mes ne eyeipmini, aam temawer aamei Yesus imsa onsobana. Ane Jega jem temawer aamei ona ilemanaiserem ga imesa mirtetefala. Ane namwer aas jepserem aamei ona nafis-nafsiserem ga ijeba nwini, propinsi Pontus mese, Galatya, Kapadokya, Asya, ane Bitinya jep mese. Gwanan jes jepserem, Uwa Sanbagiri jei mes destabaabil enggalfe aamei Jelem angtanefe ijama etamwef. Ane Mafnana Uwa Sanbagirmana aamei is enggam gam eyebaabili enggalfe, aamei ga isa gwena ini tabalmer baabeta Jemnaiserem jeme. Jei jeiserem enggalf ge eyebili, Yesus Kristus Jei etam-etama imnaiserem gase wirtabaabili aawisi Jemnaiserem jeme, ane ga enggalf aamei Yesus aa jes bilirim, seyafter jeiserem waakenfer gam isa onsobili. Surta aaiserem ga amniwer, Petrus. Yesus Kristus Jei ams baftana enggalfe awelna Jemna gam gweyibef, jemna igi ga enggam aiba Jem rasulsam. Ai sembayanga Uwa Sanbagirfe as gwebabana enggalfe, Jei ibe waakena Jelemanaiserem ip is gase golmini unggwanfer, ane Jei ini imna samfersus ga is gwebaipmini. 3 Au, nei Uwa Sanbagiri ganma pujite! Jeiba Uwa Yesus Kristusmanam, Tuhan nemnaiserem. Jei nei uskambar nes mes nesiktababili, ane jega jem temawer Jei gwela ibirmiserem nep ga nes golmini. Jei Yesus Kristus mes irtestesant terewer, ane nei taterisi jeiserem negalaba taabilirim, nei gwela ibirmi ga neya domola Uwa Sanbagirminiwer. Ane jega jem temawer namwer aas jepserem nei waakenfer nejama fibili nei Uwa Sanbagiri negemera tebanaram, aam temawer nei nemsama towaswebili enggame, nei gwela waakena jamer abak-abaksusfer ga nesa domolsa. 4 Ane apgal jigala Uwa Sanbagiri aa jes menetababisilim taman waaken-giribe enggalfe Jelem angtanef jes kitulmife, nei nemsama towaswebili nei seyafter jeiserem ga nesa domolsa. Seyafter jeiserem taman waaken-giribe jam ge kabwakswebiyen, jam ge butswebiyen, ane jam ge barwebiyen. 5 Aamei Uwa Sanbagiri imsama tebana, ane jega jem temawer baabeta Uwa Sanbagirmanaiserem je is mes isinbaabisnenne jamer nunu umwef jeiserem jebo. Nunu jes jepserem Uwa Sanbagiri Jei ga jem se tabanulsisi aamei is jem waakentababisiliserem. Ane Jei ga is aftabifelse enggalfe aamei Jebar waakenfer igama nwinf. Ane jes jepserem aamei etam-etama fasfasus afa ijama domolyan, ane gwela imnaiserem ga is waakenfer se falmini. 6 Ini imna saaser-saasersusfer ga sege folbamini, seyafter jeiserem Uwa Sanbagiri ip is jes menetabaipmisinirim jem temawer. Aamei safe kabwaktala uskambar nenes-nensaiserem nomkefe jes isa damtabili aamei ogiri aaiserem jebe igalaba nwinirim, ini imna ga saaser-saaserfer is gemer sege folbamini. 7 Aamei kabwaktala seyafter jeiserem ijesa damtabilirim, jega enggalf Uwa Sanbagiri Jei aamei is gam unggwasbaabif, afa aamei Uwa Sanbagiri ke ibunarsusfera tebana, afa fas. Aamei imesma towaswebili emasem temawer enggame, emasa jei gwanan tokwanap gane giranna enggalfe, oltu tantena jep gam barwef, ane emasa waakenaiserem ga jenefener gam fala. Ane aaiserem jegme gemer, aamei kabwaktala jam ijeba damtabilirim, afa aamei jes jepserem kanaufer jamer isa finaram, ane afa aamei Uwa Sanbagiri baabetmer jam isa tebanaram, gam jega Yesus Kristus Jei gamjon aa jep forsanyaram, Jei bosna imna is gase kitulmitesa, ane aamei jepga Jebaner Jelem nafap ga isa gwesa. Emasa safe waakensusu, jese barwesa. Jengga aamei Uwa Sanbagiri ijewera tebanaram, jeba waakensusu emasa jemniwer. Ane aamei Jei ga isa tebana jamer abak-abaksus. 8 Aamei gwanan Yesus safe ijama damtayan, jengga aamei Yesus igemera nesiktene. Aamei namwer Yesus safe ijama damtayan, jengga aamei Yesus ima tebana, ane jega jem temawer ini imna uskambar saaser-saasersusfer sege folbamini. Katana afa fas ini saaser-saaserswebalaiserem jem temawer waakenfer jem nasbife. 9 Aamei taterisi Kristusem temawer imesma taabili, ane jega jem temawer Jei aamei is waakentababisiwena. 10 Gwanan-gwanansus galapserem Uwa Sanbagiri aa jes mwangbisilim enggalfe aamei is jam waakentababisiliwer, nabi-nabi jei seyafter jem temawer jei jam ne towaswebif, ane jei jeber-jeber ga samem-samem ne terelbuwel enggalfe, Uwa Sanbagiri Jei aa jes mwangbisilim jem igiserem jam ne towaswebif. Ane jei Uwa Sanbagiri angtane jam nesikteleiserem jem temawer ga aane nasipmil, ane aas mese jeme aane nasipmil, Uwa Sanbagiri aa jes mwangbisilim enggalfe angtane jam waakentababisiliserem jem temawer. 11 Mafnana Kristusmanaiserem Jei ini nabi-nabimanaiserem ga jep nuninon, ane jei tamtamtala Kristus aa jes domolaiserem ga jem temawer ga jes ne nasipmil. Ane Kristus galap nafa unggwanfer jebar jem gwelaiserem taman waaken-giribe jem temawer jes mese ga aane nasipmil. Ane jei jeber-jeber ga samem-samem ne terelbuwel enggalfe jam ne towaswebif, seyafter jeiserem ga fomfom se etamwesa, ane je fonggalabar se etamwesa. 12 Uwa Sanbagiri Jei nabi-nabi ga enggam towasulmil, taterisi jei aa jes ne nasbilirim, je fas jam etamweyan nunu jes jepserem jei aa galap naawelam. Jengga seyafter jeiserem galap gase etamwesa, nunu aamei ijeba gwenaram. Ane namwer aas jepserem, rasul-rasulu jei taterisi jeiserem is mes ne towas-towasulmini. Jei Taterisi Waakena jeiserem ga is mes ne towas-towasulminint, baabeta Mafnana Uwa Sanbagirmanaiserem jeme, Mafnana taman waaken-giriwer aa Jei jelaram. Malaikat mese ini jemanme unggwan-giri taterisi jeiserem waakenfer jam sarbife. 13 Ga jem temawer, ini imna enggam isege folbamini Uwa Sanbagirem temawenefener, ane in ina ga jam isa gaaramisnenne waakenfer. Ane enggam ga isa towaswebili ini imna seyafter gemerserem jeme, nunu Yesus gamjon aa jep forsanyaram, nunu jes jepserem apgal jigala waakensususerem Uwa Sanbagiri nep aa jes kitulmiliserem, seyafter jeiserem aamei ga isa tebabisi. 14 Sa sarba Uwa Sanbagiri, ane Jei aa jes bilirim ijema eyebife, seyafter jeiserem gasa eyebi! Aamei nalefe Kristusem temawer ijama towasweyan, kapkaiserem ilem inibe ijesa bilirim jam eyebife, seyafter jeiserem ima eyebilint. Namwer safnant, jes gamserem ijama eyebiyen. 15 Ini Uwa Sanbagirmana ba tabalbalsusem folbana. Ane Jei is mes jenbebili enggalfe, igama gwef Jelem angtanefe. Jega jem temawer, seyafter aamei ijesa eyebilirim, ini tabalmer gasa eyebi! 16 Taterisi Uwa Sanbagirmanaiserem jebe, Uwa Sanbagiri ga enggam gul: "Ini imna ise tabalmer sege folbamini, aam temawer ini Amna tabalmer folbana." (Imamat 11:44-45) 17 Aamei sembayanga Uwa Sanbagirfe ijeba gwebabanaram, aamei Uwa Sanbagiri enggam ima bala, "Uwa amna." Jengga sa sarbistaabon, Uwa Sanbagiri angtane aa jei tenebaabiwenaram, Jei mwongga daamfenna tefner gam girni. Jei enggam Jam eyebiyen, angtane afweraiserem etam-etama jemna jam gam tamtamulmini, jengga etam-etama imna is jam tamtamulmiyen. Ga jem temawer aamei ogiri aaiserem jebe igalaba nwinirim, ane gemerje Uwa Sanbagiriserem Jebar ijama nwinyen, enggam isa gwena ga jam isa erne, tamtamtala Uwa Sanbagiri is jes golmiliserem etam-etama kapkaiserem jem temawer. Ane enggam isa gwena waakena tefner igama eyebili. 18 Jes gemerserem ga gemer isa gwena, aam temawer aamei imsa towaswebili enggame, Uwa Sanbagiri Jei is mes aftabunnu gwela gwananmanaiserem jewer. Aamei gwanan ga enggam ima gwena, taterisi igyeneiserem ane nele kapka asal-asala imnaiserem ga ijesa onsominint. Uwa Sanbagiri Jei aamei is galap aftabunnurum, Jei is Jam armantababiyen apgal jigala ogirmanaiserem jeme, apgal jigala emas galserem afa perak. Apgal jigala seyafter jes galserem je seyafter ga sege barwebisi. 19 Jengga Jei aamei is mes armantababili aawisi Kristusmanaiserem jeme, aawisi Jemnaiserem jeba waakensusum apgal jigala ogirmanaiserem jemniwer. Kristus Jeiba domba tanna waakensusu galserem, Jemnibe kapkaiserem fasfasus. 20 Uwa Sanbagiri Jei ogiri aaiserem nalefe Jam eyebayan, Jei gwanan enggam mes mwangbisil, Kristus Jei se tere etam-etama nemnaiserem jem temawer. Jengga namwer nunu umwef aas jepserem, Uwa Sanbagiri Jei Kristus mes gweretana enggalfe, Jei aamei is gam waakentababisif. 21 Aamei taterisi Kristusem temawer imsa towaswebili, ane jega jem temawer aamei Uwa Sanbagiri ga ima tebana. Jei Kristus mes irtestenant terewer, ane Jei mes eyebili jega Kristus Jei sanbaksusfe gase nwini angtane seyafter gemerserem jemniwer. Ga jem temawer, ini imna unggwan-girsusfer is mes ge folbamini enggalfe Uwa Sanbagiriserem jam tebafefener, ane aamei imsa towaswebili enggame, Jei bunarsusfer gase eyebili seyafter Jei aa jes bilim jam eyebife. 22 Aamei taterisi bunarsusfer Uwa Sanbagirmana imesa sarbili, ga imesa onsobili. Ane jega jem temawer aamei jeber-jeber ga ima gwena ini tabalaiserem jeme, ane aamei bunarsusfer angtane Yesus aa jei ne tebanaram jei ga imsa nesiktababili. Ane ai aamei isa ajam balbabili, aamei in ina ga jamer isa nesiksonanna ini imna seyafter gemerserem jeme. 23 In ina ga jam isa nesiksonanna, aam temawer aamei gwela ibirmi Uwa Sanbagirminiwer aaiserem imsa domola, gwela jam barweyanaiserem. Jeiserem ga enggam, aamei gamjon jam surulu gamserem, ane aamei seyafter Uwa daamfenna ga imsa damtana. Gwela aamei ijesa domolaram iye yo uwa ilemanaiserem jemniwer, gwela jeiserem gase barwesa, jengga gwela imna ibirmiserem je jam barweyan. Aamei gwela ibirmiserem imsa domola, aam temawer aamei taterisi Uwa Sanbagirmanaiserem imsa taabili. Taterisi Jemnaiserem ba mafnanabaram, ane je jam barweyan. 24 Taterisi Uwa Sanbagirmanaiserem jep ga enggam baatultel: "Angtane seyafter gemerserem jeiba kakatara jes gamserem, kakatara jeiserem abakfer jam gweyan, ane ga gam sasanswena. Baabeta angtane seyafter gemerserem, jeba bunga ese jes gamserem, bunga ese jeba waakensusu nunu abakferyan, ane ga gam sasanswena, ane ga gam ge anbitini. 25 Jengga Taterisi Uwa Sanbagirmana je ga gemer fala jamer abak-abaksus." (Yesaya 40:6-8) Ane taterisi jeiserem jeba Taterisi Waakena ibe is jes ne nasipminirim.
21 Uwa Sanbagiri Jei gwela ibirmi is mesam golmini. Ga jem temawer, etam-etama kapkaiserem nafis-nafis mesna seyafter gemerserem jewer ga jam isa irfwena. Angtane ijama afaf-afaftababiyen. Aamei akar-akarem ijama gweyan. Ini imna mamar-mamara is jam ge folbamiyen. Ane taterisi kapkaiserem ijama nasipmiyen angtane nafsiserem jem temawer. 2 - 3 Aamei waakenaiserem Uwa Sanbagirmana imesma damdamulbaasini. Jega jem temawer, etam-etama kapkaiserem nafis-nafis mesna seyafter gemerserem jewer ga jam isa irfwena. Tantowai namwer surulu gamserem ini jemna unggwan-giri ga mom tumafefener gam folbana. Jes gemerserem aaiserem jegme gemer, ini imna unggwan-giri ga Taterisi Uwa Sanbagirmanaiserem ga is jepfener sege folbamini, Taterisi waakensususerem ini imna is je kanautabaipminirim. Aamei Taterisi Uwa Sanbagirmana jeber-jeber isa taayibowena jamere taterisi jeiserem jem isa unggwan-gwanswena, ane Uwa Sanbagiri Jei aamei is waakentababisisi nunu umwef jes jepserem. 4 Au, aamei Kristus ga Jam isa gwetmantaasini! Jei ga tuna jam gwela galserem ga gala. Angtane jei mes ge gubili, "Kristus Jei kapka.", ane Jei baif ne gwebana. Jengga Uwa Sanbagiri Kristus mes destabal, ane Jei ga bal enggame, "Kristus ba waakensusum." 5 Aamei mese ga tuna jam gwela galserem ga gala. Ane angtane jena tonem aa gemer gane eyebilirim, jes gemerserem Uwa Sanbagiri Jeime is gemer se dupduptababili safna daamfennaber. Jei enggalf eyebili aamei jena Jelemana galserem gam igama etamwef, jena jeiserem Mafnana Jelemanaiserem jep nwinf. Aameiba imama Uwa Sanbagirmana Jemna awelna ijeya gweyibenerem. Aamei Jelefefener ima gwena, ane aamei Jei aa jes bilirim seyafter jeiserem jeber-jeber ga ima eyebuwena. Yesus Kristus Jei aamei is jeber-jeber batobaabuwena enggalfe aamei seyafter jeiserem gam eyebif, jega ini Uwa Sanbagirmana gase saaser-saaserswebana seyafter Jebe ijesa eyebilirim jem temawer. 6 Taterisi Uwa Sanbagirmanaiserem jep ga enggam baatultel: "Ai tuna waakensusu ga jes As destabana, tuna jeiserem Ai Ajes gerantelam kota Siyon je. Jeiba tuna igsususerem aa jes ne gerantenaram enggalfe jena jem saaserfe gam fyaf. Ane angtane Jei aa jei ne tebanaram, jei jam ge seferswebiyen, ane jei enggam jam ge gubiyen, ’Wa, ai Angtane jeiserem Jei abaf tebanant?’ " (Yesaya 28:16) 7 Aamei Yesus iJeya tebanaram, aamei enggam ima gunu, "Tuna jeiserem jeba waakensusum." Jengga angtane Yesus jam tebayanaiserem jem temawer, Taterisi Uwa Sanbagirmanaiserem jep ga enggam baatultel: "Tuna angtane jena aa jei gane eyebilirim jei aa jes gane taptasiwilirim, tuna jeiserem jei ga igsusfe mes etamwena." (Mazmur 118:22) 8 Ane Taterisi Uwa Sanbagirmanaiserem jep gamjon ga enggam baatultel: "Angtane jei tuna jeiserem jep gangge tenbistaanni, ane jei ga gangge janbili." (Yesaya 8:14) Jei aam temawer ge janbili, jei Taterisi Waakena Uwa Sanbagirmana jam ne taabiyen. Uwa Sanbagiri Jei jes gamserem mes mwangbisil. 9 Jengga aamei angtane jes galserem galyan. Uwa Sanbagiri Jei aamei is mes destabaabili Jelem angtanefe. Jeiba Rajasam, ane aamei ga imam-imam Jemnaiserem, awelna Jemna ga jetefener ijeya gweyibenerem. Jei aamei enggalf is mes destabaabili aamei Jelem angtanef igama etamwef, ane enggalf mese aamei waakena Uwa Sanbagirem temawer, seyafter jeiserem igama nasibenenef. Uwa Sanbagiri Jei aamei is enggalf jenbebili aamei gwiniwer igama totinyef, ane nafa Jelemana waakensususerem jep ga isa kawewili. 10 Gwanan galapserem aamei angtane Uwa Sanbagirmanyan, jengga namwer aas jepserem aamei angtane Uwa Sanbagirmana. Gwanan jes jepserem aamei nesiktele Uwa Sanbagirmana ijama damdamulbaasiyen, jengga namwer aas jepserem aamei nesiktele Uwa Sanbagirmana imsa damdamulbaasini. 11 Am afelen mesna ai isa ajes nesiktababilirim, aamei ogiri aaiserem jebe inomkefa nwini, aamei angtane ogirmanyan, aamei bunarsusfer angtane taman waaken-girmana. Jega jem temawer ai ititmer ga is ai balbabili enggame, aamei ijama eyebiyen kapkaiserem ini imna unggwan-girfer is jem gangge folbaminirim jam eyebife. Ini imna is jei gangge folbaminirim enggalfe kapkaiserem jewer gam eyebife, jeiserem jei ga mafnana ilemanaiserem ga jem ginanggwa, aam temawer afa aamei kapka jeiserem jam igama eyebilirim, gam jega aamei Uwa Sanbagiri waakenfer ijama onsobayan. 12 Aamei jeber-jeber ga waakena tefner igama eyebili, angtane Kristus tebayanaiserem jem nenennabe. Jam isa gwenaram ga waakena tefner isa eyebili, jega angtane Kristus tebayanaiserem jei safe kapkaiserem im temawer is jes gane nasbaibene, jengga jei bunarsusfer ga gane domola aamei waakenaiserem jes igama eyebilirim. Jega jem temawer, jei Uwa Sanbagiri ga sene pujitese, nunu Jei gamjon aa jem se forosanyaram. 13 Angtane pemerinta ilem sanbakfe aa jei gangge nwinbenerem, taterisi jemnaiserem ga waakenfer isa tasyipmini. Jeiserem ga jes isa eyebili, aam temawer Tuhan Jei Jener gemeram gunu. Aamei Raja ilemanaiserem jemna taterisi ga waakenfer isa taayibene. Jemna baabeta je unggwandwasusu baabeta angtane sanbaka nafsiserem jemniwer. 14 Ane Gubernur jeime gemer, jemna taterisi jegme waakenfer isa taayibene. Raja Gubernur destabana enggalfe angtane kapkaiserem aa jei gam eyebilirim jei gam tamtamtana, ane angtane waakenaiserem aa jei gam eyebilirim jei jemna bosna ga gam gulbatena. 15 Uwa Sanbagiri Jei enggam gunu aamei waakena tefner isa eyebili, jega angtane teisyenaiserem jei im temawer kapkaiserem jei jam bilyen. 16 Aamei gwanan baabeta etam-etama kapkaiserem ga jem gwonap ima gwesant, jengga namwer aas jepserem Uwa Sanbagiri Jei is mes aftabunnu. Aamei gamjon baabeta etam-etama kapka jeiserem jem gwonabe ijama gweyan. Jengga Uwa Sanbagiri Jei aa jes bilirim ga jetefener isa eyebili, aam temawer aamei baabeta Jemnaiserem jem gwonabe imesa gwena. 17 Ini imnaiserem ga is waakenfer sege folbamini angtane seyafter gemerserem jemnibe. Aamei angtane Kristus aa jei ne tebanaram seyafter ga jam isa nesiktababili. Uwa Sanbagiri ga jam isa erebene. Aamei rajaminibe ini waakenaiserem ga jem isa gwena. 18 Aamei awelna angtane nafsimana ijeya gwebilirim, waakenfer isa gwena angtane sanbaka ilemanaiserem jebar. Ane seyafter angtane sanbaka ilemanaiserem jei aa jes gam bilirim, jeter isa eyebili baabeta seyafter imnaiserem jeme. Ga gemer isa eyebili, afa angtane sanbak ilemanaiserem is waakenfer gam balbabili, afa jei is kakalmer gam balbabili. 19 Afa angtane kapka is gane eyeipminirim, safe kabwakfer ijama eyebiyen, je safnant, aamei ini waakenfer jem isa fina. Ga gemer isa eyebili, aam temawer aamei imesa towaswena enggame Uwa Sanbagiri gemeram gunu. Afa aamei jes gamserem jam isa eyebilirim, gam jega ini Uwa Sanbagirmana Jei saaser-saaserfer gam folbana im temawer, ane Jei waakena is golmini ibe. 20 Afa aamei kapkaiserem jam isa eyebilirim, ane jem temawer ga is gane tamtamtababili, ane afa jes jepserem aamei ga ini waakena kanauwaiserem jem igama fina, afa ga gam jes gemerserem, gam jega Uwa Sanbagiri Jei enggam is Jam balbabiyen, "Aamei waakenaiserem ijesa eyebili." Jengga afa aamei waakenaiserem jes igama eyebilirim, ane jem temawer aamei ga is gane tamtamtababili, ane afa jes jepserem aamei ga ini waakena kanauwaiserem jem igama fina, afa ga gam jes gemerserem, gam jega Uwa Sanbagiri Jei enggam ga is gam balbabili, "Aamei waakenaiserem ga ijesa eyebili." Ane Jei ga fwaina waakenaiserem ip ga is gam se golmini. 21 Uwa Sanbagiri Jei aamei is mesam jenbebili enggalfe, aamei ini waakenfer jeme igama fyaf, tamtamtalaiserem ibe is galap ne golminirim aam temawer aamei waakena ijewera eyebilirim. Gasa sarbistaabon, Kristus Jei tamtamtala Jener mesam domolant im temawer. Jei ibe is mesam gwerauwulminint aamei jame ijesa eyebiliserem tamtamtalaiserem ibe is galap ne golminirim. Kristus aa gemer eyebilirim, aamei jegme gemer isa eyebili. 22 Jei etam-etama kapkaiserem afa jam eyebiyen. Ane Jei angtane afa jam afaf-afaftababiyen. 23 Angtane Jei jame aa galap ne imei-imeitanaram, Jei fwainfe kabwakfer jam golmiyen. Kristus Jei tamtamtala jame aa galap ne gulbanaram, Jei enggam Jam guyon, "Ai tamtamtala Amnaiserem ip gamjon As fwainulmini." Fas gamyan, jengga enggam, Jei Jen Jena Jener gera Uwa Sanbagirminibe, aam temawer Jei tousa Uwa Sanbagiri Jeiba Jesam Jei angtane jeber-jeber waakensusfer gam tener-tenerbaabuwena. 24 Kristus Jei tamtamtalaiserem Jenfentowai domola ti salibibe, etam-etama kapka nemnaiserem jem temawer. Jei jeiserem Jei ga enggalf eyebili, nei etam-etama kapkaiserem jewer nejema irfwef, ane nei enggalfe ga nesa gwena, Uwa Sanbagiri Jei aa jes gam bilirim ga jetefener negama eyebili. Aamei is mes waakentababili, aam temawer Kristus mes ne tamtamtana. 25 Aamei gwanan nalefe Kristus ijama tebayan, aam ga domba galserem je aa gemer gam mumalwenaram. Jengga namwer aas jepserem aamei imsa irfwena Kristus gam onsobafe. Jei aamei is waakenfer gerebaabisnenne, gembalna gemerserem jei dombana jelemana aa gemer gam gerebaabisnennerem. Jei ga mafnana imnaiserem ga is gemer gerabaipmisnenne.
31 Jes gemerserem aaiserem jegme gemer, aamei wini anggwanabaraiserem, aamei anggwana ilemanaiserem taterisi jemna ga jamer igam taayibene. Anggwana ilemanaiserem taterisi jemna ga jamer igam taayibene enggalfe, afa anggwana ilemanaiserem jei Taterisi Uwa Sanbagirmana jam ne taabiyeneye, jei ga gwela waakena imnaiserem ga is gam domolbili, ane jega jem temawer jei Yesus ga gam tebana. Aamei safe jemnibe Yesusem temawer ijam nasoweyan, jei Yesus gam tebana, 2 aam temawer jei gwela tabala imnaiserem is jewer gam domolbilirim, ane jeime is gam domola enggame, aamei Uwa Sanbagiri jes igam pujitene ini seyafter imnaiserem jeme. 3 Aamei ini imna unggwan-giri is jam ge folbamiyen apgal jigala waaken-waakenaiserem jem temawer enggalfe gam kabwabif, anggwana jewer is gam domolf. Aamei ilem inibe enggam ipsama gunurum, "Afa nabal safna amna waakensusfer jam agam baatawulurum, ane ai fene jemna hargana unggwanfer jetefener agam kabwabili, ane inanai mese jeme jemna hargana unggwanfersus, afa ai jes gamserem jam agam eyebilirim, gam jega angtane jei ai ga as gane bili enggame, ’Aamei waakensusu.’ " 4 Gamyan, jengga enggam, afa ini imna waakenaye, gam jega aameiba wini waakensusum. Ga jem temawer, ini imna is enggalf sege unggwan-girsweipmini, ini waaken-waakensususerem. Ini imna ga jamer isa onabertabana, ane jeber-jeber baife ijama gweyan. Fene yo inanaiya jemna hargana unggwanfer ga sege barwebili, jengga ini imna waakena jeiserem je jam barweyan. Ane Uwa Sanbagirem nwenabe, ini imna waakena jeiserem jeba igsusum. 5 Wini fwater Uwa Sanbagiri aa jei ne tebalam, ini jemna waakensusu, ane jega jem temawer jeiba wini waakensusum. Wini jeiserem jei mes ne towaswebil enggame, Uwa Sanbagiri Jei aa jes bilirim, jeiserem Jei gase eyebili. Ane wini jeiserem jei taterisi anggwana jelemanaiserem waakenfer aa jewer ne taayipmilim. 6 Ane Sara jeime gemer. Jei taterisi Abrahammana anggwana jelemanaiserem taterisi jemna waakenfer taayibel, ane jei ga enggam jenbewel, "Angtane sanbaka amna." Afa aamei waakenaiserem jam isa eyebilirim, ane ini imna jeber-jeber erel-erelfer is jam ge folbamiyen, gam jega aamei tane yafontowai Saramana galserem. 7 Aaiserem jegme gemer, aamei anggwana winibereiserem, aamei wini ilemanaiserem jebar ga waakenfer igama nwini tousaiserem jeme. Aamei ini imna ga is foler-folerfer sege falipmini wini ilemanaiserem jebar, aam temawer jemna baabeta bastantowaifer imniwer, ane aamei jebaner gwela waakena abak-abaksusfer Uwa Sanbagiri is jes golminirim jebar gam is ge domola. Ane aamei wini ilemanaiserem jebar ga waakenfer igama gwena, jega sembayanga imnaiserem Uwa Sanbagiri Jei is gam sarbaipmini. 8 Umwef ga aas, aamei seyafter gemerserem ga ini daamfennaber isa gwena. Afa angtane daamfenna im nenennap aaiserem jemna ini jam gam jenbanaram, aamei mese seyafter ini imna jebaner is gangge jenbamini. Ane afa angtane daamfenna jei jemna ini saaser-saaserfer jemanem gam folbanaram, aamei mese aamei seyafter ini imna jebaner is saaser-saaserfer gangge folbamini. Ane aamei jeber-jeber ina ga jam isa nesiksonanna, aam temawer aamei seyafter gemerserem ba tane Uwa Sanbagirmanfenna. Aamei ga ina jamer isa batominenne, ane ini imna ga jam isa onabertabana. 9 Afa angtane jei kapkaiserem ip is jam gane eyeipminirim, aamei kapka jeiserem ijama fwainulmiyen. Afa angtane kapkaiserem ip is jam gane nasipminirim, aamei kapka jeiserem ijama fwainulmiyen. Jes gamserem ijama eyebiyen, jengga enggam igama eyebili: Afa angtane kapkaiserem ibe is jam gane eyeipminirim, afa kapkaiserem ibe is jam gane nasipminennerem, aam ga Uwa Sanbagiri ga igama bala enggalfe, Jemna waakenaiserem jep ga gam golmini. Jeiserem gasa eyebi, aam temawer Uwa Sanbagiri Jei aamei is galap jenbebilirim, Jei Jener mes gul enggame Jemna waakenaiserem Jei galap is golmisi. 10 Taterisi Uwa Sanbagirmanaiserem jep ga enggam baatultel: "Afa angtane jei ini jemna jam gam unggwan-girswebanaram enggalfe, gwela waakenaiserem jewer gam domolf, ane ini saaser-saaserfer gam folbaf, gam jega angtane jeiserem jei taterisi kapkaiserem jam nasbabiyen angtane nafsiserem jem temawer, ane jei angtane jam afaf-afaftababiyen. 11 Jei kapka jam eyebiliserem jei jewer ga jam gam irfwena, ane ga waakenaiserem ga jetefener gam eyebili. Ane jei jeber-jeber enggam gase gunu, ini seyafter gemerserem jeme, ’Ai waakenfer agam nwinf angtane nafsiserem jebar, ai bai jam erafe.’ 12 Jes gamserem gasa eyebi, aam temawer Tuhan Jei jeber-jeber gam gerebaasnenne angtane aa jes ne eyebilirim Tuhan aa jes gam bilirim, ane Jei sembayanga jemna jeber-jeber gam sarbaipmini. Jengga angtane kapkaiserem jei aa jes gane eyebilirim, jemniwer Tuhan Jei baif gam gwena." (Mazmur 34:11-16) 13 Afa aamei jeber-jeber waakenaiserem jes igama eyebilirim ini seyafter gemerserem jeme, gam jega kapkaiserem ibe is nane gam eyeipmini? Angtane afa fas. 14 Jengga afa angtane nafsiserem jei tamtamtalaiserem ibe is jam gane eyeipminirim aam temawer aamei waakenaiserem jam igama eyebilirim, Uwa Sanbagiri Jei waakena Jelemanaiserem ip is golmisi. Aamei angtane kapka ip is jei gane eyeipminirim, angtane jeiserem ijama erebeyen. Ane ini imna is jam ge eseswebamiyen. 15 Jes gamserem gamyan, jengga enggam: Aamei in ina ga jamer isa tete Kristusminibe ini seyafter gemerserem jeme, ane enggam ga isa gunu, "Jeiba Tuhan amnam." Aamei jeber-jeber ga jamer isa menetwesini ijama tamawolbaabife, angtane taterisi ip is jes gane tenebaipminirim enggame, "Jeje bafa aamei Kristus ga ima tebana?" 16 Aamei angtane jeiserem ijeba tamawolbaabilirim, ini imna ga ise foler-folermer sege folbamini, ane ini imna ga is waakenfer gangge folbamini jemnibe. Aamei ga waakena ijesa towaswebilirim ga jetefener isa eyebili, jega ini imna waakenfer is ga sege folbamini. Jepga angtane jei kabwakfer aa jeba nasbilirim gwela waakena imnaiserem jem temawer, gwela imna Kristusfar daamfennaber aaiserem, jepga angtane jeiserem jei jener ga gam ge seferswebili taterisi syefer jener aa jes gane nasbabilirim jem temawer. 17 Sa sarbistaabon, afa Uwa Sanbagiri Jei enggam jam gam gunurum aamei tamtamtalaiserem jam igama domolaram, waakenfer ga enggam, aamei tamtamtala isa domola aam temawer aamei waakenaiserem jewer igama eyebilirim. Aas gamserem gamyan, aamei tamtamtala ijewera domolaram aam temawer kapkaiserem jewer igama eyebilirim. 18 Kristus Jeime tamtamtala mes domolant. Jei daamfenfener mes terent, etam-etama kapka angtane seyafter gemerserem jem temawer. Jei etam-etama kapka fas afa jam eyebiyen, jengga Jei angtane etam-etamabaraiserem jem temawer mes terent, jega enggalf Jei nei nes gam aftabifelf Uwa Sanbagirminibe. Angtane Jei mes ne munbonont, ane tifini seyafter Jemnaiserem mes terent. Jengga Mafnana Uwa Sanbagirmanaiserem Jei gwela gamjon Jep mes gulbanant. 19 Ane Mafnana Uwa Sanbagirmanaiserem jeme, Kristus Jei mes sofnant bwiyibe, ane mafnana angtanemana bwiyibe aa jei ge nwinbaitonom, Jei taterisi jep ga aa nasipminint. 20 Mafnana jeiserem jeiba mafnana angtane Uwa Sanbagiri jam tebayanaiserem, gwanan jes galapserem Nabi Nuh jei aa galap gwelam. Nabi Nuh jei atdusa jam aa galap eyebilim, jes galapserem Uwa Sanbagiri Jei abakfer fyal enggalfe, angtane jeiserem jei ke sege irfwebil etam-etama jelemanaiserem jewer. Jengga jei etam-etama jelemanaiserem jewer jam ge irfwebiyen, ane jei ga aa ge albitil fodusa jeiserem jebe. Angtane unggwanfer ga enggammer delapan, angtane jeiserem ga jetefener waakentababisil atdusabe fodusawer. 21 Nabi Nuh ane angtane fodusawer aa jes waakentababisilim, jei fonap jam ge albitiyen, jengga jei gemer naawel. Jei ga angtane jam baptistelaiserem jes galserem. Angtane aa jei gam baptiswenaram, jei fome jame aa jep gane baptistenerem, jei ga enggam gam gwerauwulu, Uwa Sanbagiri jei mes waakentaasini, aam temawer jei Yesusfar daamfennaber, Yesus Kristus aa jes irtestenantam terewer, ane Jei gemer ga aa gwena. Angtane afa fas jam ne baptisteyen enggalfe, jemna nunggunu tifinip aaiserem gam wirulntef. Fas, gamyan. Jengga enggam, baptisan aaiserem jei ga enggam gwerauwulu, angtane jeiserem Uwa Sanbagiri enggam gam bala, "Ai ames irfwena etam-etamawer, ane ini amna ga as tabalmer se folbana." 22 Yesus Jei mes tauna taman waaken-giribe, ane Jei Uwa Sanbagirem taasfolawer jep ga aa nwini. Ane Jei baabeta Uwa Sanbagirfar seyafter ga aa ge domola, ane Jei mafnana seyafter gemerserem jem Sanbakef ga aa nwini, malaikat ane bwata bawasmanaiserem jes mese.
41 Kristus Jei tamtamtala mes domolant Jelem tifinibe, ga jem temawer aamei mese jegme jam isa menetwesini enggalfe tamtamtala jes galserem jam domolfe. Aamei imsama towaswena angtane tamtamtalaiserem aa jei gam domolaram jei waakena aa jewer gam eyebilirim, angtane jeiserem jei bunarsusfer mes gam irfwena etam-etamawer. 2 Ga jem temawer, jei ogiri aaiserem jebe aa gemer gam gwenaram, jei enggam gam gwena Uwa Sanbagiri aa jes gam bilirim ga jetefener gam eyebili. Aamei ijama eyebiyen, kapkaiserem ini imna unggwan-girfer is jem gangge folbaminirim jam eyebife. 3 Aamei Kristus nalefe ijama tebayan, gwanan jes galapserem, aamei abakfer enggam ima gwena, ane enggam ima eyebili, angtane Uwa Sanbagiri jes onsobayanaiserem jei aa gemer gane eyebilirim. Gwanan jes galapserem aamei etam-etama ga enggam ima eyebilint: Ini imna unggwan-giri ga is enggalf gangge folbamini maaryena gam gwebif, ane aamei maaryena igama gwebili. Aamei jeber-jeber ga igama mabukswena. Aamei masara jeber-jeber ga igama gwebili enggalfe jewer igama mabukswef, ane etam-etama kapkaiserem jewer igama gwebif. Ane aamei jeber-jeber kabwaksususerem ga igama eyebili enggame, aamei tiborma jam kwirtabaabiliserem ga igama pujitababili. Jengga namwer aamei Yesus imsa tebana, ane aamei etam-etama jeiserem gamjon ijama eyebiyen. 4 Ane angtane jeiserem Uwa Sanbagiri jes onsobayanaiserem jeiba uskambar gangge bitbitwebili, aam temawer aamei jebar gamjon ijama dorweyan enggalfe etam-etama gam eyebife, etam-etama jei jeber-jeber aa jes ne eyebuwenaram. Ane jega jem temawer jei ims ne imei-imeitababili. 5 Jengga Uwa Sanbagiri Jei angtane jeiserem galap gase teneba-tenebaabuwesa jei aa jes ne eyebuwenaram jem temawer. Ane jei ga sege tamawolbisi. Uwa Sanbagiri mes menetwesini enggalfe Jei angtane gam teneba-tenebaabuwef angtane gemer gwelaiserem, ane angtane jam tereserem jes mese. 6 Jega jem temawer, angtane jam tereserem, Taterisi Waakenaiserem jei gwanan jep mes ne nasipmil. Jeiserem ga aane nasipmil, jega jei safe mes tenebaabuwel ane jei mes ge terbil, angtane seyafter jam tere gamserem, jengga mafnana jemnaiserem jei gemer naawena, Uwa Sanbagiri Jei aa gemer gwenaram. 7 Nunu ogiri aaiserem ane apgal jigala seyafter gemerserem jem barwelaiserem ga jam gwetmanswena. Jega jem temawer, aamei ina ga jamer isa gaaramisnenne, ane ga inibaner isa gwena. Jes gamserem ga gemer isa gwena enggalfe, aamei sembayanga Uwa Sanbagirfe waakenfer gam igama gwebabaf. 8 Igsusu jam ijesa eyebiliserem ga enggam, aamei jeber-jeber in ina ga jamer isa nesiksonanna ini seyafter gemerserem jeme. Jeiserem ga jam isa eyebili, aam temawer aamei angtane nafsiserem jam gam nesiktenerem, gam jega aam ga igam fina jei safe etam-etama kapkaiserem jam gam eyebilirim unggwanfer. 9 Angtane Kristen nafsiserem jei im jenap jam gangge forobityerem, aamei jei ga ini saaser-saasermer igama tebabili. 10 Uwa Sanbagiri Jeiba waakensusum, ane jega jem temawer Jei baabeta nafis-nafsi ip is mes kitulmini. Ga jem temawer aamei awelna ga waakenfer isa gwebili, baabeta Uwa Sanbagiri ip is jes kitulminirim jeme, jega enggalf aamei in ina gam isa batominenne. 11 Afa Uwa Sanbagiri Jei awelna ip enggam is jam gam golminirim taterisi Jemna jam nasibenenefe, aamei taterisi Uwa Sanbagirminiwer aa Jei gam jelalam, ga jamer igama nasbinenne. Afa awelna imna jei enggalf angtane nafsiserem gam batobaabif, aamei angtane jeiserem ga jamer igama batobaabili baabeta Uwa Sanbagiri ip is jes gam kitulminirim jeme. Seyafter aamei jes igama eyebilirim, jeiserem ga jamer igama eyebili enggalfe bosna Uwa Sanbagirmana jem gam pujiwulbofe, aam temawer aamei angtane Yesus Kristusmana. Uwa Sanbagiri Jeiba baabetabaram, ane nei ga Jei jamer negama pujitene jamer abak-abaksus! Amin, taterisi jeiserem ba bunaram! 12 Am afelen mesna ai isa ajes nesiktababilirim, Uwa Sanbagiri Jei aamei is Jam unggwasbaabili enggame, aamei namwer aas jepserem tamtamtalaiserem uskambarsus ga ijesa domola. Uwa Sanbagiri Jei aamei is enggalf unggwasbaabili, aamei ke Uwa Sanbagiri bunarsusfer kimsa tebana, afa fas. Ipsama bitbitwenaram aamei tamtamtala jeiserem jam igama domolaram, aam temawer angtane Kristen jei jeber-jeber tamtamtalaiserem gane domola. 13 Ipsama bitbitwenaram, jengga ini imna ise saaser-saaserfer sege folbamini, aam temawer aamei tamtamtalaiserem imesa domola, tamtamtala Kristus aa gala gam domolaram. Ane jega jem temawer, Kristus Jei gamjon aa jep warausanaram baabeta unggwandusa jeme, nunu jes jepserem ini imna uskambarsus saaser-saaserfer is ga sege folbamisi. 14 Ini imna ise saaser-saaserfer gangge folbamini, afa angtane jei aamei is jam gane imei-imeitababilirim aam temawer aamei Kristus ijewera onsobanaram. Jeiserem aa jep se etamwenaram, jeiserem ga aa gwerauwulu enggame, Mafnana Uwa Sanbagirmana Jei ilem inip faliton, Mafnana jeiserem Jei baabeta unggwandwasusu. 15 Aas gamserem je ga kabwaksusu, afa aamei tamtamtala ga isa domola enggalem temawer, angtanes igama munbono, galgals igama komkomtababisini, aamei awelna angtane nafsimana jes igama momoftabaipmini, afa aamei kapka nafsiserem jes igama eyebili. 16 Seyafter jes galserem jei kapka, jengga waakena ga enggala, afa aamei tamtamtalaiserem jam igama domolaram aam temawer aamei Kristus ijewera onsobanaram. Jeiserem jem temawer ijama sefersweyan, jengga Uwa Sanbagirfe enggam igama bala, "Ase samfer gulbana, angtane jei ase enggam ne bala, ’Aameiba angtane Kristensam.’ " 17 Nunu jep ga mes fal, Uwa Sanbagiri angtane jebe jam tenebaabuwefe. Jei enggam se gusu angtane waakenfer gam ne eyebif, afa kabwakfer. Ane jei ga angtane etam-etamabaraiserem gase tamtamtababisi. Jei ga nemniwer se tawawulsu, angtane Jemnaiserem. Wa afa ga gam, gam jega fomfom se etamwesa angtane Taterisi Waakena Uwa Sanbagirmana jeiserem jam taabiyeneiserem? Bunarsusfer jei fwaina sene domolsa, ane seyafter jeiserem ga kabwaksusu. 18 Taterisi Uwa Sanbagirmanaiserem jep ga enggam baatultel: "Angtane ga jes ne eyebili Uwa Sanbagiri aa gam gunurum, Uwa Sanbagiri angtane jeiserem nalefe Jam waakentababiyen, angtane jeiserem gwanan ga tamtamtalaiserem jes ne domolsa. Afa ga gam jes gamserem, gam jega angtane etam-etamabaraiserem Uwa Sanbagiri jam ne onsobayanaiserem, ane jeber-jeber etam-etama kapka gane eyebili, jei fomfoma jam waakentababisife? Fas, masef." (Amsal 11:31) 19 Ga jem temawer, aamei tamtamtala ijesa domolaram aam temawer Uwa Sanbagiri Jei mes gunu, aamei waakena tefner jamer isa eyebuwena. Ane aamei in ina ga isa tete Uwa Sanbagirminibe. Jei aamei is Jeyam eyebaabilint, ane Jei jeber-jeber ims batobaabili.
51 Aamei angtane sanbaka jemata aa jei gam taabilirim, ai taterisi aaiserem ip ajes tulistaipminirim, ini amna seyafter ai jem tulistaabili. Ai mese ai angtane sanbaka jemata aa jei gam taabilirim, ane ai Kristus mes damtana Jei aa galap domolaram tamtamtalaiserem ti salibibe. Ane galap Uwa Sanbagiri jam se gwerauwulsurum baabeta ane nafa Kristusmana angtane seyafter gemerserem jemnibe, nunu jes jepserem ai mese ibar nesa domolsa baabeta ane nafa Kristusminiwer. Ai isa ititmer balbabili enggame, 2 waakenfer ga isa gerebaabisnenne safna Uwa Sanbagirmana, Uwa Sanbagiri ijes kitulminirim ibe. Jeter isa gerebaabisnenne enggam gamserem gembalna jei domba-dombana jemna gam gerebaabisnenne. Uwa Sanbagiri Jei enggam gunu, jega aamei angtane Jemna ga isa gerebaabisnenne waakenfer, ini saaser-saaserfer isege folbamini. Uwa Sanbagiri Jei bai aamei enggam guluserem, "Ai Uwa Sanbagiri as Jam taatwebana." Sa gerebaabisnenne, jeke enggalem temawer doini gam tebaf, jengga enggalem temawer ini imna unggwan-giri awelna Uwa Sanbagirmana igama gweyibef. 3 Angtane Uwa Sanbagiri ibe ijes kitulminirim, jeber-jeber ijama balbabiyen enggame, "Awelna aasa eyebi, gamjon awelna jesa eyebi!" Game ijama balbabiyen. Jengga waakenfer enggalf isa gwena jem nwenabe, jega jei enggam gase naawena aamei gamserem. 4 Ane Gembala Sanbagiri aa Jei nwinirim sanbakfe gembala nafsiserem, Jei gamjon aa jep warausanaram, nunu jes jepserem aamei fwaina waakensusu ga isa taabisi, fwaina jeiserem jei jam barweyan. 5 Ane aamei tanisfe ijeya gwenaram, aamei ga angtane sanbakaiserem taterisi jemnaiserem ga waakenfer isa taayipmini. Ane aamei seyafter gemerserem, in ina ga jamer isa batominenne ini onabermer. Jeiserem ga jamer isa eyebili, aam temawer Taterisi Uwa Sanbagirmanaiserem jep enggam baatultel: "Uwa Sanbagiri Jei angtane jena jam gaartenanalaiserem Jei jebar gangge erna, jengga angtane ini jemna aa jei gam onabertanaram, Uwa Sanbagiri Jei Jemna waakenaiserem Jei jep gam gulbana." (Amsal 3:34) 6 Ga jem temawer, ini imna ga jam isa onabertabana Uwa Sanbagirem nwenabe, ane Jei ga aamei is gase kitultena nunu Jena aa jep bilsirim jeme. 7 Afa ini imna is jam gangge esesweipminirim, ini imna jes galserem ga Uwa Sanbagirf isa kitulbono, aam temawer Jei aamei is waakenfer gerebaabisnenewena. 8 Aamei ga ina waakenfer isa gaaramisnenne, ane ga kanaufer isa fina, aam temawer bawasa jeiba nem ginanggwasam. Jei ga singgana galserem aa jei gam gwarenannaram. Bawasa jei ga enggam gam wofena angtane aa jewer gam terelbenerem enggalfe, jewer gam tebaf, ane ga gam kabwaktana. 9 Aamei Uwa Sanbagiri ga ginggitfer isa tebasini, jega aamei bawasa is jep unggwasbaabilirim, aamei kanaufer enggam ga igama fina, aamei bawasa aa jes gam bilirim jeiserem ijama eyebiyen. Ane aaiserem jegme jam isa sarbistaabona enggame, angtane seyafter gemerserem ogiri aaiserem jebe Kristus aa jei ne tebanaram aamei gemerserem, jei mese jegme tamtamtalaiserem mes ne domola aamei igemera domolaram. 10 Aamei namwer tamtamtalaiserem ga imsa domola, jengga abakferyan jeiserem gase barwena. Jepga Uwa Sanbagiri Jei Jemna waakenaiserem uskambar ip is jes kitulmuwenaram, Jei aamei is mes jenbebili enggalfe, aamei Kristusfar daamfennaber igama gwef, ane jega jem temawer aamei Uwa Sanbagirfer gam isa gwena Jelem nafabe jamer abak-abaksus. Jega jem temawer Jei ga Jener is gase gwebabili, jega gwela imna gamjon is gase waakenulmisini. Uwa Sanbagiri Jei aamei is gase gwebabili, jega aamei Jei ginggitfersus gam igama tebana, ane Jei ga is gase kanautababili. Jei aamei is gase batobaabili seyafter aa jei ge etamwebilirim jeme. 11 Uwa Sanbagiri Jei baabeta Jemanem folbana jamer abak-abaksus! Jeiserem ba bunaram! Amin. 12 Silas jei amsam batobana enggalfe surta tofora aaiserem jam tulisulfe. Jeime Kristus mesam tebana nei negemera tebanaram, ane ai enggam ai towaswena jei jeber-jeber awelna Uwa Sanbagirmanaiserem jei waakenfer gweyibene. Ai surta aaiserem ajewer tulisulurum, jega enggalf ini imna jem gam kanautabaipmif, ane gamjon ga enggalf aamei gam isa towaswena enggame bunar-bunarsus Uwa Sanbagiri Jei Jemna waakenaiserem ip ise golmini. Aamei kanaufer jem igama fyaf waakena Jemna jeiserem jam taayibefe. 13 Angtane aafmana Kristus aa jei ne tebanaram Babilon je, Uwa Sanbagiri jeime mes destabaabili aamei is gemer destabaabilirim, jei seyafter is enggam ne balbabili, "Kelek, waakenfer sa nwin!" Markus mese jei aaf aa jei nwinirim tane alemana galserem, jei aamei ga is enggam balbabili, "Kelek, waakenfer sa nwin!" 14 Aamei angtane nafsiserem Kristus aa jei ne tebanaram jebar jam igama betwenaram, jepga in ina tafnawer ga igama taaminenne. Jeiserem ga jamer igama eyebili, jega igama gwerau enggame aamei in ina ijama nesiksonanna. Ai sembayanga as gwebana, jega aamei seyafter Kristusfar daamfennaber ijeya gwenaram, ini imna samfer is ga sege folbamini.