1 Korintus
11 - 3 Ga ip, Safna Uwa Sanbagirmana, kota Korintus je. Uwa Sanbagiri Jei aamei is mes jenbebili enggalfe, aamei igama etamwef angtane Jelemanfe. Aamei daamfennaber ijewera gwenaram Kristus Yesusfar, ane jega jem temawer aameiba safna daamfennam angtane seyafter gemerserem Yesus Kristus aa jei ne pujitawenaram jebar, tamna seyafter gemerserem jebe. Yesus Kristus Jeiba Tuhan jemnam, ane Jeiba Tuhan nemnaiserem jesam. Surta aaiserem amniwer, Paulus, kota Efesus je. Uwa Sanbagiri Jei ai ase Jener destabanant ai rasulf gwefe. Jei ams baftanant enggalfe, ai Taterisi Waakena Kristus Yesusem temawer ai agam nasipminennef. Ai ane Sostenes, nem afelen mesna, ai sembayanga as ge gwebabana Uwa Sanbagirfe, Uwa nemna, ane Tuhan Yesus Kristus mese, Jei waakena Jelemanaiserem ip is ga sege golmini, ane Jei ini imna is sege gwebaipmini waakenfer is ga sege folbamini. 4 Ai jeber-jeber im temawer Uwa Sanbagiri enggam ai bala, "Ase samfer gulbana." Aamei daamfennaber Kristus Yesusfar, ane jega jem temawer Uwa Sanbagiri Jei waakena Jelemanaiserem is mes golmini ibe. 5 Aamei Kristus Yesusfar daamfennaber ijewera gwenaram, ane jega jem temawer waakena seyafter gemerserem aamei ga ima tebabili Uwa Sanbagirminiwer. Uwa Sanbagiri mes eyebili, jega tousaiserem imna unggwanfersus is ga sege folbamini taterisi Uwa Sanbagirmana jem temawer, ane aamei taterisi Uwa Sanbagirmana jeber-jeber waakenfer ga ima nasbinenne. 6 Ai taterisi Kristusem temawer is amsama nasipminennent waakenfer ibe, ane Uwa Sanbagiri mes eyebili jega aamei taterisi jeiserem imsa taabili ginggitfer im inibe. 7 Ga jem temawer, Mafnana Uwa Sanbagirmana Jei baabeta afa karunya Jemna ip golmini, ane aamei seyafter jeiserem imsa tebabili, aamei nomkefe Tuhan nemna Yesus Kristus ijebara fibanaram ini saaser-saasermer Jei gamjon Jam foryafe. 8 Uwa Sanbagiri Jei aamei ise Jener se kanautababili, jega aamei Kristus ginggitfer gam isa tebana jamer nunu umwef jepserem, nunu Tuhan nemna Yesus Kristus Jei gamjon jem foryalaiserem. 9 Uwa Sanbagiri Jei jeber-jeber eyebili seyafter Jei Jener aa jes bilirim Jam eyebife. Uwa Sanbagiri Jei aamei is mes jenbebili enggalfe, aamei daamfennaber igama gwef Tane Jemna Yesus Kristus, Tuhan nemnaiserem Jebar. Ane Uwa Sanbagiri Jei bunarsusfer aamei jeber-jeber is kanautababuwena, ane Jei aamei fas is Jam mirtebitefalyan. 10 Am afelen mesna, ai aamei isa unggwanfer balbabili, bosna Tuhan nemna Yesus Kristusmanaiserem jeme, aamei daamfen iniber isa gwena. Aamei ina jam isa amaisona, jega aamei ijama syensyanweyan. Aamei seyafter daamfen iniber isa gwena, ane ga daamfenna tefner isa bili. 11 Am afelen mesna, angtane afwenefener aa jei ge nwinbenerem Kloem jenabe, jei ai as enggam ne towastana angtane im nenennabe jei jenjen ge doksobana. 12 Aamei imsa towaswena ai igi jame isa jem temawer balbabilirim, ga enggam, aamei seyafter nafis-nafismer ga ijesa balbabili. Angtane afweraiserem imniwer jei enggam ge gubili, "Ai Paulus asa tikwebaatini." Ane angtane afweraiserem jei enggam ge gubili, "Ai Apolos asa tikwebaatini." Ane nafsiserem jei enggam ge gubili, "Ai Petrus asa tikwebaatini." Ane nafsiserem jeme ge gubili, "Ai Kristus asa tikwebaatini." 13 Aamei gam ijewera gunonnorom, jeiserem kapka! Gam jega aamei Kristus imsa syentasnenne! Ai Paulus, ajam teryen ti salibibe im temawer. Aamei jame is jep ne baptistababilirim, aamei bosna amanaiserem jeme is jam ne baptistababiyen. 14 Ini amna saaser-saasersusfer folbana Uwa Sanbagiri Jei mes gwebili enggame, ai angtane nawerfenna gam baptisona, jei ga Krispuso Gayus jetefener. Ai angtane Korintusmana nafsiserem ai ajam baptistababiyen. 15 Angtane afa fas enggam jam guyon, "Paulus jei angtane jeiserem jam se baptistenerem enggalfe, angtane jeiserem gam etamwef Paulus tikwebaatinenefe." 16 (O, ai namwer as sarbistaabon. Ai angtane Estefanusfar aa jei ge nwinbenerem jem jenabe, ai angtane jeiserem ai ames baptistababili Estefanusfaner. Afa ai angtane nafsiserem ai ajes baptistababilirim, ai fas ajam sarbabistaabonyan.) 17 Kristus Jei ai enggalfe as Jam baftayan, ai angtanes baptistababinennefe. Jengga Jei ai as enggalf baftana, ai Taterisi Waakena ai agam nasbinennef. Ai Taterisi Waakena jeiserem jam agalap nasbinennerem, ai ajam nasipmiyen tousaiserem angtanemanaiserem jeme, aam temawer ai bai angtane taterisi amna tefner ne saribefe. Afa jei taterisi amna tefner sene saribenerem, gam jega baabeta tere Kristusmanaiserem ti salibibe enggalfe angtane jem gam waakentababisife, baabeta jeiserem je ga jam se elsini. 18 Angtane Kristus jam tebayanaiserem, angtane jeiserem jei jam waakentababisiyen. Angtane jeiserem jei syefer enggam ge gubili jelem inibe, taterisi tere Kristusmanaiserem ti salibibe, taterisi jeiserem ba ol kabwaksam. Jengga nei Kristus nejeya tebanaram, Uwa Sanbagiri Jei nei nes waakentababisini. Ane nei ga nesa towaswena taterisi tere Kristusmanaiserem jeme, Uwa Sanbagiri ga baabeta Jelemana nep ga nes jem ge saamisini. 19 Taterisi Uwa Sanbagirmanaiserem jep ga enggam baatultel: "Ai As eyebili, jega angtane tousaiserem aa jei ne domolaram, tousa jemna jeiserem Ai ga As wasferulmisini. Ai As eyebili, jega angtane unggwanfer aa jei ge belajarwebilirim, seyafter jei aa jes ne mwangbabisinirim, jeiserem ga sege elbesini." (Yesaya 29:14) 20 Ga jem temawer, angtane aa jes gane balbabilirim enggame jei seyaftersus tousa, ane angtane nafsi aa jei gam towas-towastanaram, ane angtane waakenfer aa jei ne nasbabilirim jes mese, angtane seyafter jeiserem namwer aa jei naawenaram, jemna tousaiserem fas. Bunarsus Uwa Sanbagiri mes ge saamisini tousa angtanemanaiserem ogiri aaiserem jebe, tousa jemnaiserem ol kabwak. 21 Tousaiserem Uwa Sanbagirmana jeba unggwandwasusum! Uwa Sanbagiri Jei mes eyebili, jega tousa angtanemanaiserem jeme angtane Uwa Sanbagiri jem jam ne damdamtaasiyen. Jengga Uwa Sanbagiri Jei enggam gul, Taterisi Waakena ga jamer sene nasbinenne. Ane Jei angtane Taterisi Waakena jeiserem aa jei ne taabilirim, ga jese waakentababisini. Angtane ogirmanaiserem jei Taterisi Waakena jeiserem enggam ne bili ol kabwak. 22 Angtane Yahudimana jei bwembwem tefner ne bili jam damtabif enggalfe, jei taterisi Uwa Sanbagirmana gane taabif. Ane angtane Yahudimanyanaiserem jei tousaiserem angtane ogirmanaiserem ga jetefener ne taabif. 23 Jengga ai taterisi tere Kristusmanaiserem ti salibibe ai ga ajetefenera nasbinenne. Ini angtane Yahudimana kakalmer gangge folbamini taterisi jeiserem jem temawer, ane angtane Yahudimanyanaiserem jei enggam ge gubili, "Taterisi Kristusem temawer jeiserem ba ol kabwaksam." 24 Jengga angtane Yahudimana ane angtane Yahudimanyanaiserem Uwa Sanbagiri aa jes jenbebilirim, jei seyafter enggam mes ge towaswebili Uwa Sanbagiri Jei baabeta Jemna ane tousaiserem Jemna Jei mes ge saamisini, tere Kristusmanaiserem jeme. 25 Angtane safe enggam sege gubili taterisi tere Kristusem temawer jeiserem jeba ol kabwaksam, jengga taterisi jeiserem jeme Uwa Sanbagiri ga jem se gweraulmini tousaiserem Jemna ba unggwandwasusum angtanemanaiserem jemniwer. Ane angtane safe enggam sege gubili Uwa Sanbagiri Jei baabetabaryan, baabeta Uwa Sanbagirmana ba unggwan-girsusum baabeta angtanemanaiserem jemniwer. 26 Am afelen mesna, ima towaswena Uwa Sanbagiri is galap jenbebilintim, gwanan jes jepserem angtane imniwer bastowaifefener bosna unggwandusa gane domolant, angtane imniwer bastowaifer baabeta gane domolant, ane angtane galgalabaraiserem imniwer jeime bastowaifefener. 27 Jengga angtane enggam aa jes gane balbabilirim "angtane jei teisyena", Uwa Sanbagiri Jei angtane jeiserem ga jes gam destabaabili enggalfe Jelem angtanefe jam naawefe. Uwa Sanbagiri Jei angtane jeiserem gase destabaabili jega enggalf, angtane enggam aa jes gane balbabilirim "angtane jei tousa", angtane jeiserem ga gam sege seferswebili. Ane angtane enggam aa jes gane balbabilirim "angtane jeiserem weren-werna", Uwa Sanbagiri ga angtane jeiserem ga jes gam destabaabili jega enggalf, angtane enggam aa jes gane balbabilirim "angtane jei baabetabara", angtane jeiserem jei gam sege seferswebili. 28 Uwa Sanbagiri Jei angtane enggalaiserem ga jes destabaabili: angtane enggam aa jes gane balbabilirim "angtane jeiserem bastouya", angtane baife aa jes gane gwebanaram, ane angtane igyeneiserem. Jei angtane jes galserem ga jes destabaabili jega enggalf, angtane sanbaka ogirmanaiserem jei gam sege etamwebili bastowaife. 29 Ga jem temawer, angtane afa fas jen jena jam gaartenanna, ane enggam gunu Uwa Sanbagirem nwenabe, "Aiba waakenaiserem as mes eyeibene, ane jega jem temawer ai an ana ames waakentana." 30 Jengga Uwa Sanbagiri Jei Jener mesam eyebili, jega aamei Kristus Yesusfar daamfennaber ga ima gwena. Ane nei Kristus Yesusfar daamfennaber nejewera gwenaram, jem temawer ga nei tousaiserem ga neya domola, ane nei Uwa Sanbagirfar ga neya waakenswena, ane neiba Uwa Sanbagirem angtanesam, ane nei nes mes aftabunnu etam-etamawer ane terewer. 31 Jega jem temawer aamei enggammer igama eyebili, Taterisi Uwa Sanbagirmana jep aa gam baatultelam ga jes gemerserem ga gemer: "Angtane jener aa jes gam eyebilirim, jei jeiserem jem temawer jena jam gaartenanayan. Jengga Tuhan aa jes gam eyebilirim, jei ga jetefener gam goltenanna." (Yeremia 9:24)
21 Am afelen mesna, ai gwanan agalap nwinintim imnibe, ai taterisi Uwa Sanbagirmana Kristusem temawer jeiserem ai ga is ajes nasipminint ibe. Jes galapserem ai is ajam nasipmiyen tousa angtane ogirmana jes gamserem. Ane ai is ajam nasipmiyen angtane malin-malin taterisi aa jei gam nasbilirim jei gamserem. 2 Ai angtane jes gamserem gam is ajam nasipmiyen, aam temawer ai enggam ames gunu, ai ibar jam nesa gwenantam, ai taterisi Yesus Kristusem temawer aaiserem ga is jetefener as nasipminenne, ane taterisi tere Jemna ti salibibe aaiserem ga jem temawer. 3 Ai agalap fortyantam imnibe, ai enggam ai towaswena ai baabeta fas taterisi igsusu jeiserem jem nasbife, ane ai uskambarsus ai erne jamere ai egegwena. 4 Ai tousa angtanemanaiserem jeme ajam towas-towastababiyen, ane ajam malin-malintababiyen. Jengga Uwa Sanbagiri baabeta Mafnana Jelemanaiserem ga jeme, Jei ga enggam ge saasini taterisi ai ajes towas-towastababilintim, taterisi jeiserem ba bunaram. 5 Ga jem temawer, aamei Kristus ijewera tebanaram enggalem temawer baabeta Uwa Sanbagirmanaiserem, jeke enggalem temawer tousa angtanemanaiserem. 6 Ai gam jes ajewer nasbinennerem, aamei enggam ijama guyon, "Paulus jei taterisi tousaiserem jam nasbiyen." Aamei jes gemerserem ijama guyon, aam temawer jame agalap nasipminennerem angtane Kristus kanaufer aa jei ne tebanaram jebe, ai taterisi tousaiserem ga jem as nasipminenne. Jengga taterisi tousa jeiserem je angtanemanyan, ane angtane sanbakfe aa jei naawenaram ogiri aaiserem jebe jemanyan. Angtane sanbaka jeiserem, baabeta jemna sege wasferweipmini. 7 Jengga tousaiserem ai taterisi ajem nasipminirim jeba Uwa Sanbagirmanam, tousaiserem Uwa Sanbagiri angtanefe gwanan Jam towasulmiyen, jengga Jei namwer mes gweraulmini angtanefe. Uwa Sanbagiri Jei nalefe ogiri Jam eyebayan, Jei mesam mwangbisil tousa Jemna jeme, jega enggalf Jei nafa yo baabeta Jemnaiserem nes gase tetmisi. 8 Angtane afa fas sanbakfe aa jei naawenaram ogiri aaiserem jebe, jei tousa Uwa Sanbagirmana fas jam ne damdamulbaasiyen. Afa jei tousa Uwa Sanbagirmanaiserem jam gane damdamulbaasinirim, afa ga gam, gam jega jei Tuhan waaken-waakensususerem jei jam ne munboyon ti salibibe. 9 Taterisi Uwa Sanbagirmana jep ga enggam baatultel Uwa Sanbagiri nei nep jes golmisirim jem temawer: "Uwa Sanbagiri seyafter aa jes menetababisinirim enggalfe jam golmife angtane Jei aa jei ne nesiktenerem jebe, seyafter jeiserem angtane afa fas jam ne domolyan, ane jam ne sarbiyen, ane jam ne bilyen jelem inibe." (Yesaya 64:4) 10 Jengga Uwa Sanbagiri Jei Mafnana Jelemanaiserem jeme, Jei tousa Jelemanaiserem ga nes jem gweraulmini nebe, nei nejeya tebanaram. Mafnana Uwa Sanbagirmana Jei seyafter tousa, seyafter Uwa Sanbagirem temawer ane seyafter Uwa Sanbagirem inip mese. 11 Angtane ini jelemana jener gam towaswebana jei aa jes gam bilirim jelem inibe, angtane nafsi jei ini nafsimana jam towaswebabayan. Jes gemerserem angtane jei ini Uwa Sanbagirmana jam towasweyan, Mafnana Uwa Sanbagirmana Jei Jenefener gam towaswena seyafter Uwa Sanbagirem inip aaiserem. 12 Ane Uwa Sanbagiri Jei Mafnana Jelemanaiserem nes mes golmini nebe. Jei mafnana angtane ogirmanaiserem nep nes jam golmiyen. Jei Mafnana Jelemanaiserem nes mes golmini, jega enggalf nei waakenfer negama towaswebabif Uwa Sanbagiri seyafter nes jes kitulminirim nebe. 13 Ai taterisi Mafnana Uwa Sanbagirmana Jei ap as jes towasulminirim, taterisi jeiserem ga ajema nasbinenne. Jeke tousa angtanemanaiserem ajesa domolaram ajema nasbinenne, jengga Mafnana Uwa Sanbagirmana as jes golminirim ga ajema nasbinenne. Angtane Mafnana Uwa Sanbagirmana aa jem inip gam nunitonom, angtane jeiserem Taterisi Mafnana Uwa Sanbagirmana ga ajeba towas-towastabaipmini. 14 Angtane Mafnana Uwa Sanbagirmana jem inip jam nuninonyanaiserem, angtane jeiserem jei Taterisi Mafnana Uwa Sanbagirmana jam ne taayibeyen, aam temawer jei enggam gam gunu taterisi jeiserem ba ol kabwaksam. Angtane jeiserem jei Taterisi Uwa Sanbagirmana waakenfer fas jam ne saribeyen, aam temawer Mafnana Uwa Sanbagirmana Jei jem inip Jam nuninonyan. 15 Angtane Mafnana Uwa Sanbagirmana aa jem inip gam nunitonom, jei seyaftersus gam damdamulsini Mafnana Uwa Sanbagirmana aa jes gam towasulminirim. Ane gwela jemna aa jes gam naawenaram, angtane nafsi gwela jemnaiserem jem temawer jam ne teneba-tenebaabuweyan. 16 Nei taterisi jeiserem nemsa towaswena, aam temawer Taterisi Uwa Sanbagirmana jep ga enggam baatultel: "Angtane afa fas ini Tuhanmana jam towaswebabayan. Angtane afa fas jei esorola Tuhanfe jam gulbayan." (Yesaya 40:13) Jengga nei, nei ini Kristusmana nemsa damtabana.
31 Am afelen mesna, ai gwanan ibar negalaba gwenantam, jes galapserem gwela imna Kristusfar ga enggala tantouya bastantouya galserem, aam temawer aamei gemerje Kristus waakenfer ijama damdamtaasiyen. Aameiba angtane ogirmana jes gamserem. Aameiba angtane Mafnana Uwa Sanbagirmana aa jem inip gam nunitonom jes galserem galyan. 2 Jega jem temawer ai gwanan taterisi Uwa Sanbagirmana is agalap nasipminintim, jes galapserem taterisi ai isa ajes nasipminintim, taterisi jeiserem ga tumilgala tantouya bastantouya jemna galserem, jeke tumilgala angtane sanbakmana galserem galyan. Jes galapserem taterisi Uwa Sanbagirmana orolemanaiserem aamei gemerje ijama menetwesiyen taterisi orolemana jeiserem jes taabife. Taterisi orolemana jeiserem ga tumilgala angtane sanbakmana jes galserem. Ane aamei bunarsusfer gemerje isa menetwesini taterisi orolemana jeiserem waakenfer ijama taabife, 3 aam temawer aamei angtane ogirmana galserem aamei ga igemera gwena. Aamei igalaba gwenaram ini uskamer, ane in iner jeber-jeber ijewera doksowenaram, aamei jes gamserem gam ijewera gwenaram, gwela jeiserem aamei ga ise jei gweretababili aamei angtane ogirmana galserem, angtane Yesus jam tebayana jei galserem. 4 Angtane afweraiserem imniwer jei enggam ge gubili, "Ai Paulus asa tikwebaatini." Ane angtane afweraiserem jei enggam ge gubili, "Ai Apolos asa tikwebaatini." Aamei jes gemerserem gam ijewera gunurum, gam jega aamei ga enggala angtane ogirmana jei galserem. 5 Ga enggam, ai Paulus ane Apolos, ai nawersamer angtane ig nawanyan. Uwa Sanbagiri Jei ai as enggalf bafsonant, ai awelna Jemna agam ge gweyibef im nenennabe. Ane ai awelna jeiserem Uwa Sanbagiri aa jes bilirim, ga ajetefener ge eyebaabili. Ane awelna ai ajes ge gwebilirim jeme, Uwa Sanbagiri Jei ga mes eyebili, jega aamei Kristus imsa tebana. Jega jem temawer aamei ijama doksoweyan am temawer. Uwa Sanbagiri Jei awelna abe ase nensa gam gulbana, ane Jei awelna Apolosfe nafsiserem jes gulbana. 6 Aiba angtane twam tanna aa jei gam tonolaram jei galserem, ai taterisi Uwa Sanbagirmana isas nasipminint ibe. Ane Apolos jei angtane awelna makanap jam gwebili gamserem, jei gamjon taterisi Uwa Sanbagirmanaiserem aamei ga is jem temawer towas-towastababilint. Jengga Uwa Sanbagiri Jei Jener se eyebili, jega aamei taterisi Jemna jeiserem gam isa sarbili waakenfer, ane ga isa onsobili. 7 Ga jem temawer igsususerem ga Uwa Sanbagiri Jenfentowai, aam temawer Jei Jener se eyebili jega aamei samfer unggwanfersus waakenfer gam isa sarbili, gwanan jepserem jepyan. Ai angtane aa jei nasbinennerem, ane Apolos aa jei towas-towastababilirim, ai nawersamer angtane ig nawanyan. 8 Angtane aa jei gam tonolaram, ane angtane awelna makanap aa jei gam gwebilirim, jei awelna ini daamfennaber ge gwebili. Ane Uwa Sanbagiri Jei fwaina daamfen-daamfenneme gase kitulmini angtanefe, angtane daamfen-daamfennem awelna jena aa gemer ne gwebinennerem. 9 Ai ane Apolos ai nawersamer awelna Uwa Sanbagirfar aya gwebili, awelna Uwa Sanbagirmana. Ane aamei angtane Uwa Sanbagirmana, aameiba makana Uwa Sanbagirmana jes galserem. Ane aameiba Jena Uwa Sanbagiri aa jes eyebilirim jes galserem. 10 - 11 Ane aiba angtane Jena Uwa Sanbagirmana aa jei eyebilirim jei galserem. Angtane jena waakenfer jam se gwitiririm, jei gwanan temen jagomelna igsususerem ga jes tonola. Jes gemerserem Uwa Sanbagiri Jeime ai as gemer baftana, ane Jei baabeta Jemna ap gulbana enggalfe, aiba angtane nabal danalam taterisi Uwa Sanbagirmana igsususerem Yesus Kristusem temawer gwanan is agam nasipmif ibe. Yesus Jeiba temen jagomelna igsusu galserem. Ane angtane nafsi jei gamjon am amnup is mes towas-towastababilint taterisi Uwa Sanbagirmanaiserem jem temawer. Angtane nafsi jeiserem jeiba angtane aas galserem, angtane aa jei gane batobanaram jena jam eyebife. Jengga angtane seyafter taterisi Uwa Sanbagirmana aa jei ne towas-towastababilirim, jei ga nimnafer jam ne towas-towastababiyen, jengga jei waakenfersus jam sene towas-towastababili. Taterisi Uwa Sanbagirmana igsusu jeiserem ai nabal-nabalsusu isa ajes nasipminintim ibe, taterisi jeiserem ga Yesus Kristusem temawer. Taterisi igsusu nafsiserem fas, aam temawer Uwa Sanbagiri Jei enggam gunu taterisi igsususerem ga Yesusem temawenefener. 12 Angtane afwenefener aa jei gane batobanaram jas eyebife, jei ga apgal jigala waakensuster gane kitulnonno jena jem eyebife. Apgal jigal waakensusu jeiserem ga aas: emas, perak, ane tuna waakensususerem hargana unggwanfer. Apgal jigala jeiserem jei tokwanabe jam ge fuswebiyen. Angtane afweraiserem aa jei gane batobanaram jas eyebife, jei apgal jigal hargana bastowaiferaiserem ga jes gane kitulnonno jena jem eyebife. Apgal jigala jeiserem ga aas: ti, ane kakatar, ane tesala. Seyafter jeiserem ga tokwanap gangge fuswebili tokwame. 13 Nunu Kristus aa jem forsanyaram enggalfe angtane seyafter jem tenebaabuwefe, nunu jes jemerserem angtane seyafter Kristus aa jei ne tebanaram, awelna jemna jei aa jes ne gwebilirim gase gweraulmisi enggame afa waakena afa kapka. Nunu jes jemserem, angtane Kristus aa jei ne tebanaram, awelna jemna ga jem se gweraulmisi tokwame. Awelna waakenfer aa jes gane eyebilirim, jeiserem jam wasferulyon tokwame. Jengga awelna kabwakfer aa jes gane gwebilirim, awelna jeiserem ga jem se wasferulsu. 14 Angtane Kristus aa jei tebanaram, afa awelna jemna jam wasferweyana, Uwa Sanbagiri jei fwaina waakenaiserem gase gulbasa angtane jeiserem jebe. 15 Jengga angtane Kristus aa jei tebanaram, afa awelna jemna jam gam wasferulurum, Uwa Sanbagiri Jei angtane jeiserem gase waakentaasisi, jengga angtane jeiserem jei awelna jemna jeiserem jem fwaina jam taabiyen. Angtane jeiserem ga enggala, angtane tokwanawer jam dektesiwili galserem. 16 Aamei angtane Uwa Sanbagiri iJeya tebanaram, aamei sa sarstaabon, aameiba Jena Uwa Sanbagirmanaiserem, ane Mafnana Uwa Sanbagirmana Jei im inip gam nuniton. 17 Angtane Mafnana Uwa Sanbagirmana aa jem inip gam nunitonom, angtane jeiserem jeiba Uwa Sanbagirmansusum, ane angtane jeiserem aameiba jesam. Jega jem temawer angtane afa aamei is jei gam kabwaktababilirim, jei aa jes gam towas-towastababilirim kapkaiserem jeme, Uwa Sanbagiri Jei angtane jeiserem gase tamtamtasa. 18 Aamei inin ijama afaf-afafsoyan. Afa angtane imniwer jei jen jena enggam jam gam balaram, "Aiba angtane tousam, angtane ogirmana jem nwenabe.", angtane jeiserem tousa ogirmanaiserem jam se aftabunnu, ane jei Kristusem gwonap gase gwena. Ane jepga jei bunarsusfer gase etamwena angtane towasfe. 19 Taterisi jeiserem ba bunaram, aam temawer tousaiserem angtane ogirmana aa jes gane bilirim waakeneme, Uwa Sanbagiri Jei tousa jeiserem enggam gam bili, tousa jeiserem ol kabwak. Nei nemsa towaswena Uwa Sanbagiri Jei tousa jeiserem enggam bili ol kabwak, aam temawer Taterisi Uwa Sanbagirmana jep ga enggam baatultel: "Uwa Sanbagiri Jei angtane aa jes gane balaram enggame jei tousa, Uwa Sanbagiri Jei angtane jeiserem gam uftana, tousa jemna jeiserem jewer." (Ayub 5:13) 20 Ane Taterisi Uwa Sanbagirmana gamjon jep ga enggam baatultel: "Tuhan Jei enggam towaswena angtane aa jes gane balaram towaseme jem temawer, seyafter jei aa jes gam bilirim jelem inibe, taterisi jeiserem gam elbesini, jam igiberswebayan." (Mazmur 94:11) 21 Ane ga jem temawer aamei ina ijama tetenanayan angtane jam tikwebaatiliserem jem temawer! Bunarsusfer angtane seyafter ba imnam. 22 Ai Paulus, Apolos mese Petrus, ai seyafter ajesa eyebilirim, jeiserem ga enggalf ai aamei isa agma batobaabif. Ane seyafter gemerserem jeiba imnam, ogiri aaiserem, ane jam gwelaiserem, ane jam tereserem, namwer aas jepserem, ane nunu galap aa jep falaram. Uwa Sanbagiri Jei seyafter gemerserem mes golmini ibe, jega enggalf seyafter jeiserem jei ims batobaabif. 23 Ane aameiba Kristusmanam, ane Kristus Jeiba Uwa Sanbagirmanam.
41 Ga jem temawer aamei enggamfener isa gunu am temawer, ane Rasulu afweraiserem jem temawer, "Kristus Jeiba Rasulem Sanbakf se nwini. Ane Rasulu jei ga awelna Kristusmana gane eyeibene. Uwa Sanbagiri Jei Rasulu enggalf baftabili, jei taterisi Uwa Sanbagirmana waakenfer gane nasbinennef, taterisi Uwa Sanbagiri Jei gemerje Jam towasulmiyen angtanefe." 2 Angtane awelna nafsimana aa jei gweyibenerem, igsususerem ga enggam, jei waakensusfer gam eyebili angtane sanbak jemna seyaftersus aa jes gam bilibenerem jei jam eyebife. 3 Am temawer, je igyene aamei afa angtane nafsi, awelna ai ajes gwebilirim aamei awelna jeiserem ijesa tenaabi-tenaabiwefe, awelna amnaiserem waakena afa kapka. Ane aime an ana aner ajam teneba-tenebaweyan awelna alemanaiserem jem temawer. 4 Ai aner alem inip enggam ai gunu, afa ai kabwakfer ames eyebili, kapka jeiserem jem temawer ai ajam towasweyan. Jengga ai jes gamserem gam ajewer gunurum, jeiserem jam saasiyen enggame ai kabwakfer ajam eyebiyen. Tuhan Jei ai ase Jenefener se bala, ai awelna waakenfer ai gwebili, afa ai kabwakfer ai gwebili. 5 Ga jem temawer, aamei tatarfer enggam ijama guyon, afa guru Kristen jei waakenfer ne eyebili afa jei kabwakfer ne eyebili. Ga jamer isa fina jamere Tuhan Jei gamjon se forosanya. Jes jepserem Tuhan Jei angtane basyamer seyafter aa jes ne eyebilirim, Tuhan Jei seyafter jeiserem se nafabertababili. Ane Tuhan Jei se gweretababili, angtane jelem inibe seyafter aa jes gane balbabilirim. Jes jepserem angtane seyafter ga sege towaswebili, bagal awelsa Uwa Sanbagiri aa jes bilirim angtane daamfen-daamfennem waakenfer jes eyebife. 6 Am afelen mesna, seyafter jeiserem ai ajes nasbilirim, jeiserem ai Apolosem temawer ai nasbili, ane alem temawer mese, jega enggalf aamei igama towaswef waakenfer jam gwefe, taterisi Uwa Sanbagirmanaiserem jep aa gemer baatultelam. Aamei enggammer isa gwena, aamei in ina ijama tetenanayan taterisi aas gemerserem game, "Guru aaiserem jei sanbagirsusu guru afweraiserem jemniwer." 7 Jeje bafa aamei in ina ga ima tetenanna guru imna jem temawer? Aamei in ina ijama tetenanayan, aam temawer angtane nafsi afa fas aamei is jam balbabiyen aamei sanbaksusu angtane nafsiserem jemniwer. Ane seyafter aamei ijesa damtabilirim, tousaiserem ane baabet mese, Uwa Sanbagiri Jei seyaftersus ip is mes golmini. Afa ga gam jes gamserem, gam jega aamei gamjon in ina ijama tetenanayan ijesa damtabilirim jem temawer. In ina ijama tetenanayan aamei enggam ijewera gunurum, "Nei nejesa damtabilirim jeiserem nener neya damtabili, jeke nese Uwa Sanbagirem kitulmini nebe." Jes gamserem gam ijama guyon. 8 Aamei syefer ima gunu ilem inibe enggame, "Nei nes mes ge bugufsweipmini waakena seyafter gemerserem Uwa Sanbagirminiwer jeme. Nei baabeta Uwa Sanbagirmana gamjon nejama bilibeyen. Nei baabeta nesa domola enggalfe nei negma gwef angtane sanbaka gamserem. Neiba angtane unggwan-gwansusum guru amnaiserem jemniwer." Aamei gam ijewera gunurum, jeiserem ba kabwaksusu. Ini amna as enggam folbana aamei bunarsusfer angtane sanbakef imsama etamwena. Afa aamei angtane sanbaksam, ai taterisi Uwa Sanbagirmana ajeya nasbinennerem, ai ibar seyafter sanbakfe negama gwef. 9 Jengga ai taterisi Uwa Sanbagirmana ajeya nasbinennerem, ai raja gamserem ai game ajama gweyan. Ai enggam ai gunu alem inibe, Uwa Sanbagiri Jei ai as mes eyebaabili bastowaife. Ai ga enggala, angtane kapkaiserem aa jei ne eyebilirim jei galserem, ane angtane sanbaka jei ga gane bala angtane jeiserem jam terfe kabwaktala jei aa jes gane eyebilirim jem temawer. Angtane jes galserem ai ga gala, ane ai angtane ogirip seyafter aa gemer naawenaram, ane malaikat mese jem nwenabe, ai agma fyaf enggalfe jei ai as gane imei-imeitababif. 10 Angtane am temawer enggam ne balbabili, ai angtane teisyena aam temawer ai taterisi Kristusem temawer ajewera nasbinennerem. Jengga aamei in ina enggame ima gitmini, aamei angtane tousa, aam temawer aamei Kristus imsa tebana. Angtane am temawer enggam ne balbabili ai angtane baabetyan, jengga aamei in ina iner enggam ima gitmini aamei baabetabaram. Angtane aamei kitultenanna, jengga jei ai ase jam ne imei-imeitababili. 11 Nunu jeber-jeber jamer nunu namwer aaiserem, ai ase wisei ge folbamini, ane ai ase fobotoi ge folbamuwena. Ai fene kabwaksusuter aya kabwabuwena. Angtane ai asene safsaftababili. Ane ai jena fas ajeba nwinfe. 12 Ai awelna uskambarsus aner asa gwebili enggalfe, ai ajesa balbabilirim jeiserem agma damtabif. Angtane ai as jei gam balbabilirim ai babapsobala ajama domolf, safe gam ai sembayanga asa gwebabana Uwa Sanbagirfe, jega Jei waakena Jelemanaiserem gase golmini angtane jeiserem jebe. Angtane kabwaktala ap as galap ne eyeipminirim abe, ai jafner aya fina kanaufer. 13 Angtane taterisi kapkaiserem syefer aa galap ne nasbilirim am temawer, ai taterisi waakena tefner agma tamawolbili. Angtane jei ai as enggam ne eyebaabili, angtane bastowaisusu galserem. Jamer nunu aas jepserem, angtane ogiri aaiserem jep aa jei naawenaram, jei ai asene balbabili ai angtane oltunu galserem. 14 - 15 Am afelen mesna, ai taterisi aaiserem ai ip is ajes tulistabaipminirim, jeke enggalf ai aamei isa ajem sefertababif. Jengga aamei tane alemansusu galserem, ai ajes nesiktababilirim. Ane aiba uwa imna galserem, aam temawer Taterisi Waakena Yesusem temawer ip is ames nasipmini, ane aamei taterisi jeiserem imsa taabili. Jega jem temawer ai taterisi aaiserem ai ip is ajes tulistabaipminirim enggalfe, ai aamei isa gam esoroltababif. Angtane safe uskambarsus aamei is jei ne towas-towastababilirim daamfennaber gwelaiserem Kristusfar jem temawer, jengga uwa imnaiserem jei am tefner. 16 Ga jem temawer, ai aamei isa ititmer balbabili, aamei enggam isa gwena, ai agemer gwenaram. 17 Ane ai Timotius ai ajes nesiktenerem, ai jei as baftana imnibe. Jeiba tane alemansusu galserem, ane jei awelna Tuhanmana waakenfersus gwebili. Jei gwela amna daamfennaber Kristus Yesusfar jem temawer aamei is gase towas-towastababili. Jei is gase towas-towastababili, ai safna Yesus aa jei ne tebanaram jei agemer towas-towastababilirim, taman-tamna seyafter ai ajep wofowenaram. 18 Angtane afwenefener im nenennabe jei enggam ge gubili, "Paulus jei jener jam jelyan enggalfe nei nes gam towas-towastababife." Jega jem temawer angtane jeiserem jei jen jena uskambarsus ne detenanna. 19 Jengga afa Tuhan Jei ai jam ase balaram imnip jam sofwefe, ai abakferyan as forna imnibe. Ai amsam towaswena angtane jena aa jei ne detenannaram, jei aa jes ne balbabilirim. Jengga ai jam as fornaram imnibe, jes jepserem ai angtane jeiserem ga as damtabili, afa jei baabeta Uwa Sanbagirmanaiserem jeme bunarsusfer naawena, afa fas. 20 Ga enggam, angtane aa jei naawenaram Uwa Sanbagiri jem Sanbakf nwinfe, angtane jeiserem jei baabeta Uwa Sanbagirmanaiserem ga jem se naawena, jeke jei aa jes gane nasbinennerem jem gam naawena. 21 Aamei iner isa gunu, afa ai imnip ajam forof enggalfe, ai aamei is agam uftabaabif, aam temawer aamei gemerje kabwakfer gemer ima gwena. Afa ai imnip ajam forof enggalfe, ai aamei isa gam towas-towastababif ini foler-folermer ane nesikteleiserem jeme, aam temawer aamei waakenfer imsa gwena.
51 Ai taterisi kapka ames sarbili enggame, bunar-bunarsus angtane im nenennabe aasaje maaryens gwebuwena. Angtane jeiserem jei wini jetamana afelnaiserem maaryena ga jebar ge gwebuwena. Angtane Uwa Sanbagiri jam damtayanaiserem jei fas etam-etama kapka jes gamserem ga jam ne eyebiyen! Jengga aamei Uwa Sanbagiri ijeya damtawenaram, angtane aasaje im nenennap aaiserem, jei etam-etama maaryens gwebili jeiserem jei eyebuwena. 2 Safe gam aamei in ina gemer ima tetenanna. Aamei angtane jeiserem jei ijama uftayan. Ai ajam bitbitwena! Waakenfer ga enggam, aamei jam jep igama towaswebilirim enggame, angtane im nenennap aasaje maaryens gwebuwena, aamei ga ini jem temawer is jam gangge jenbamini uskambarsus. Ane aamei angtane jeiserem ga jam igama surbono jemata imnaiserem jewer. 3 Ai safe ibar nejama nwinyen, ai jeber-jeber ims sarbabistaabonwena, ane jega jem temawer mafnana amna jei ibar gamserem. Ane ai ibar jam nwini gemerserem, ai bosna Tuhan Yesusmanaiserem jeme, ai angtane jeiserem etam-etama kabwaksusu aa jei gwebuwenaram, ai angtane jeiserem ames balbabili jam se tamtamtana. 4 Ane ai aamei isa enggam ai balbabili, aamei jam isa betwena, ane aamei ijeba betwenaram, aamei enggammer isa gunu ai ibaner neya betwena. Ane baabeta Tuhan Yesusmanaiserem jem mese, 5 aamei angtane jeiserem ga jam isa surbono jemata imnaiserem jewer, ane ga jam isa gera bawasem tafnabe enggalfe, bawasa jei angtane jeiserem tifini seyafter jemna gase tamtamtana. Angtane jeiserem jei tifni tamtamtalaiserem gase domola enggalfe, Yesus Jei mafnana jemna gam waakenulbaasif, nunu Tuhan Yesus gamjon aa jem warausanaram. 6 Angtane im nenennabe safe maaryena gemer gwebuwena, jengga aamei in ina ijama tetenanna enggam igama gunu, "Jemata amna waakena." Aamei roti tanna bunarsusfer ba imsama towaswebili enggame, roti tanna bastowaifer rotini seyafter ga jei gam gwebili ga gam tawetya. Jes gemerserem aaiserem jegme gemer, angtane afa daamfenna tefner etam-etama aa jei gam gwebuwenaram, jemata seyafter gangge wasferwebili. 7 Ga jem temawer aamei etam-etama seyafter jeiserem ga jam isa aftabunnu, jega aamei ini tabalbalmer gam isa gwena. Bunarsus ini imna is mes ge tabalbalsweipmini, aam temawer Kristus, dombana Uwa Sanbagirmanaiserem, mes ne munbono enggalfe nei nes gam aftabunnuf etam-etamawer. 8 Ga jem temawer, nei angtane Kristen nejeya gwenaram, au nei ganma gwe ini nemna unggwan-giri Uwa Sanbagirfe nejesa kitulbonorom jeme. Nei gwela gwananmanaiserem ganma tobolsiwi. Nei gwanan ga enggam neya gwena, ini nemna nese kabwakfer ge folbamini, ane etam-etama seyafter neya eyebaabili. Au nei ganma gwe enggame ini waakenmer, ane nei ga waakena tefner negama eyebili. 9 Surta ai gwanan ip is ajes tulisulminintim, ai surta jeiserem jep ga enggam ai tulisulunt, aamei angtane maaryens gwebiliserem aamei jem gwetmanabe ijama gweyan. 10 Taterisi amna surta jeiserem jebe, igi jemnaiserem jeke angtane Yesus jam tebayanaiserem jem temawer. Angtane jeiserem jei ga enggam naawena: maaryena gane gwebili, ini jemna unggwan-girem gangge folbamini enggalfe galgala unggwanfer gam damtabif, apgal jigala komkomulsife, ane tiborma jam kwiruluserem jes pujiwulf. Ai angtane ogirmanaiserem etam-etama jes gemerserem gam aa jei ne eyebilirim, ai angtane jeiserem jem temawer surta jeiserem jep is ajam balbabiyen enggame, aamei angtane etam-etamabara jes galserem aamei jem gwetmanabe ijama gweyan. Ai jes gemerserem isa ajam balbabiyen, aam temawer afa aamei ina jam isa bijausonaram angtane seyafter jeiserem jemniwer, afa ga gam, gam jega aamei ogiri aaiserem ga jam isa mirtetefala! 11 Surta jeiserem ai gwanan ip is ajes tulisulminintim, taterisi amna surta jeiserem jebe igi jemna ga enggam: Angtane enggam aa jei gunurum, "Aiba angtane Kristus aa jei tebanaram, aiba jesam.", jengga jei jes gamserem game safnam gut, jei etam-etama gemer eyebuwena, aamei safnant angtane jeiserem jem gwetmanabe ijama gweyan. Afa jei etam-etama aaiserem jam gam eyebilirim: maaryen gam gwebili, ini unggwan-giri gam folbana enggalfe galgala unggwanfer gam damtabif, tiborma jam kwiruluserem jes gam pujiwulu, syefer gam nasowena angtane nafsi jem temawer, jeber-jeber gam mabukswena, galgala gam komkomtababisini, afa ga gam, aamei safnant angtane jes galserem aamei jebar ijama twenyan! 12 - 13 Awelna nemna enggalfyan, angtane Yesus jam tebayanaiserem, angtane jeiserem nei nejesa teneba-tenebaabuwefe. Uwa Sanbagiri Jei angtane jeiserem ga Jener se teneba-tenebaabuwena. Jengga awelna nemna bunarsusfer ga aas: nei angtane Yesus aa jei ne tebanaram nem jematabe, nei angtane jeiserem nener ga jes nesa teneba-tenebaabuwena. Taterisi Uwa Sanbagirmana jep ga enggam baatultel: "Angtane kabwaksusu aa jei eyebuwenaram imnibe, aamei angtane jeiserem ga jam isa surbono imniwer!" (Ulangan 22:21-24)
61 Angtane Kristen naura im nenennap jei jam gangge doksonaram, jei angtane Kristenyenaiserem safnant jam ge balbabiyen enggalfe, taterisi aa jes gangge doksobilirim, taterisi jeiserem gam ne borolmife. Ai baibaisus aamei jes gamserem gam ijewera eyebilirim, jeiserem ba kabwaksusum! Jengga waakenfer ga enggam, angtane Kristen jeiserem jei angtane Kristenter gam balbabili enggalfe, taterisi jei aa jes gangge doksobilirim, taterisi jeiserem gam ne borolmife. 2 Nei angtane Kristus nejeya tebanaram, neiba Uwa Sanbagirem angtanesam. Aamke ijama towasweyan enggame, angtane Uwa Sanbagirmanaiserem jei angtane galap sene teneba-tenebaabuwesa, angtane seyafter ogiri aaiserem jep aa jei ge nwinbenerem. Jewer ga aamei bunarsusfer angtane seyafter ogiri aaiserem jebe, aamei jei galap isa teneba-tenebaabuwesa. Afa ga gam jes gemerserem, gam jega bunarsusfer aamei taterisi bastouya angtane aa jes gangge doksobilirim im nenennabe, aamei taterisi jeiserem samfer iner igama borolmini. 3 Aamke ijama towasweyan enggame, nei angtane Uwa Sanbagirmanaiserem, nei malaikata taman waaken-girip aaiserem, nei galap nesa teneba-tenebaabuwesa jei? Afa ga gam, gam jega aamei taterisi aa jes gangge doksobilirim gwela ogirmanaiserem jem temawer, aamei taterisi jeiserem samfer iner igama borolmini. 4 Ga jem temawer, afa angtane Kristen im nenennabe jei jam gangge doksobanaram taterisi gwela ogirmanaiserem jem temawer, aamei angtane Kristus jam tebayanaiserem jemnibe safnant ijama sofweyan enggalfe, aamei jes igama doksobilirim jeiserem jemnip gam ne borolmife. 5 Ai taterisi aaiserem ip tulistabaipmini enggalfe, aamei ijema seferswef. Angtane tousa im nenennap afa ke fas enggalfe, angtane Kristen taterisi aa jes gane doksobilirim, taterisi jeiserem angtane tousa jeiserem ga jei is gam borolmif? Angtane tousa bunar jere im nenennabe. 6 Safe gam, angtane Kristen daamfenna jei jelem afelnabar jam gangge doksonaram, ane jei ga gam sofwa angtane Kristenyenaiserem jemnibe enggalfe, taterisi jeiserem gam ne borolmif. Jeiserem ba kabwaksusum! 7 Aamei angtane Kristen, aamei in ina jam igama doksonaram, aamei jes gamserem gam jam igama gwenaram, gam jega gwela imna jeiserem jeme aamei ga jem igama gwerauwulu enggame, aamei gwela Kristusmana ijama onsobiyen. Jengga waakenfer ga enggam, afa angtane Kristen nafsi kapka is jam gane eyeipminirim ibe, afa galgala imnaiserem is jes gane komkomtabaipmisini, aamei safnant fwaina kapkaiserem jebe ijama eyeipmiyen. Aamei safnant taterisi jeiserem angtane nafsiserem jemnip ijama gwirinfelyen enggalfe, taterisi jeiserem jep gam ne nasipmife. 8 Jengga aamei waakena jeiserem ijama eyebiyen. Aamei kapkaiserem imsa eyeipmini. Ane apgal jigala angtane nafsife im jematabe ijama komkomtababisnenne. Aamei gam ima eyeipmini angtane Kristen ilem sarabosenfe! Jeje bafa aamei gam ga ima eyebili? 9 Aamei in iner ina ijama afaf-afafsonanayan. Angtane kabwakfer aa jei naawenaram, Uwa Sanbagiri Jei Jam gweyan angtane jeiserem jem Sanbakfe. Aamei aaiserem imsa towaswebili: angtane bwat kapkaiserem aa jei gane sarwebabilirim; angtane maaryena aa jei gane gwebuwenaram; tansi yo yafonsiwir jei maaryena gam gangge gwebili; anggwa nawan jei gam ge gwef wi anggwa gamserem; wi nawan jei gam ge gwef wi anggwa gamserem; Uwa Sanbagiri Jei Jam gweyan angtane jes galserem jem Sanbakfe. 10 Ane angtane aas galserem: angtane komkomaiserem; angtane ini unggwan-giri aa jemanei ge folbaminirim enggalfe galgala unggwanfer gam damtabif; angtane aa jei ge mabukswebuwenaram; angtane taterisi syefer aa jei gam nasbilirim angtane nafsiserem jem temawer; angtane komkoma uskam-uskamsususerem; -- angtane seyafter jes galserem jei Uwa Sanbagirem gwonabe jam naaweyan, nunu Uwa Sanbagiri Jei aa jep gwenaram anggwabura seyafter gemerserem jem Sanbakfe. 11 Aamei nalef Kristus ijama tebayan, jes galapserem angtane afwenefener im nenennabe jei ga angtane kapka jes galserem ga gemer naawena. Jengga aamei etam-etamawer is mes wirtabaabili, ane aamei imsa etamwena angtane Uwa Sanbagirmanfe. Aamei Tuhan Yesus Kristus imsama tebana, jega jem temawer baabeta Mafnana Uwa Sanbagirmanaiserem jeme, aamei Uwa Sanbagirfer ga imsa waakenswena. 12 Angtane afweraiserem im nenennabe jei enggam ge gubili, "Kristus Jei nei nes mes aftabunnu, ga jem temawer nei samfer nesa eyebili, seyafter nei nejesa bilirim afa waakena afa kapka jam eyebife." Jengga ai enggam ai gunu, seyafter jam eyebiliserem jeiserem nei nes jam batobaabiyen enggalfe, jega nei waakenfer negama gwefe Tuhan jam onsobalabe. Ai bai ajes eyebilirim as je isinbaasnenefe. 13 Angtane afweraiserem im nenennabe jei gamjon enggam ge gubili, "Uwa Sanbagiri Jei tumilgala nebe nese enggalf eyebaipmil, nei negama tombaabif jamer unubuguf. Ane Jei witifini nemna nese enggalf eyebaipmil, tumilgala jes negama tombaabilirim jep gangge falbinonf." Ane ai enggam ai gunu, tumilgala jam tombaabiliserem ba waakenam, jengga Uwa Sanbagiri Jei enggam gunu, tumilgala ane witifin nemna galap gase borolsisi. Ane Jei bai nei tumilgala uskambar nejama faarenswebabife jam tombaabiliwer. Jes gemerserem aaiserem jegme gemer, afa wini yo anggwana jei jena jam gangge teterem jeba samfer, waakenam. Jengga Uwa Sanbagiri Jei tifni nemna enggalf nes Jam eyebaipmiyen nei maaryena negama gwebif. Fasfasus, gamyan! Uwa Sanbagiri Jei tifni nemna nese enggalf eyebaipmini, tifni nemna Tuhanfefener negama kitulbof. Ane tifni nemna jeiserem Tuhan ga jes gam gerebaabisnenne. 14 Uwa Sanbagiri Jei Tuhan Yesus mesam irtestena terewer. Jes gamserem baabeta Uwa Sanbagirmana jeime gemer, Jei tifni nemna nese irtebaipmisi terewer. 15 Aamke ijama towasweyan enggame, tifni nemnaiserem ga daamfenna tifni Kristusmanaiserem jebar? Ga jem temawer tifni nemna daamfenna Kristusfar aaiserem, nei tifni nemna jeiserem nei nejama eyebiyen daamfennaber falfe wini maaryens gwebiliserem jebar. Fasfasus, gamyan! 16 Aamke ijama towasweyan enggame, anggwana wini maaryen-maaryenaiserem jei jena jebar maaryena jam gangge gwebilirim, jei ga mes gangge etamwena tifni daamfennaiserem jebar. Nei nemsa towaswena jei daamfen tifniber mes ge etamwena, aam temawer Taterisi Uwa Sanbagirmana jep enggam baatultel: "Anggwana jei winabar tifni daamfennaber ga gangge etamwena." (Kejadian 2:14) 17 Jengga angtane Tuhanfar daamfennaber aa jei gangge gwenaram, mafnana Tuhanmanaiserem ane mafnana angtane jeiserem jemna jeime daamfennaber. 18 Aamei ina ga jam isa bijausona etam-etama maaryen gwebili galserem jewer. Bunarsusfer ga enggam, angtane maaryena aa jei gam gwebilirim, angtane jeiserem tifni jemna ga gam kabwakswebana, mes gam etamwebana tabalyamer, etam-etama maaryena jena aa jes gam gwebilirim jeme. Jengga angtane etam-etama kapka nafsiserem aa jei gam eyebilirim, tifni jemna jam kabwakswebayan. 19 Aamke ijama towasweyan enggame, tifni imnaiserem jeba Jena Mafnana Uwa Sanbagirmanaiserem ba Jemnam. Uwa Sanbagiri Jei Mafnana Jelemana ip ise Jener golmini, ane Mafnana Uwa Sanbagirmana jeiserem Jei im inip nuniton. Tifni imna jeiserem ilemanfenenyan, jengga tifni imnaiserem jeba Uwa Sanbagirmanam. 20 Uwa Sanbagiri Jei aamei is mesam armantababili, hargana unggwandwasusfer jeme, hargana jeiserem ga aawisi Tane Uwa Sanbagirmana aa Jei tererem ti salibibe. Ga jem temawer, tifni ilemanaiserem aamei jem ga waakena tefner isa eyebili, jega tifni imna jeiserem aamei Uwa Sanbagiri jem gam isa pujitene.
71 Surta aamei gwanan ap as ijesa tulisulbonontom, surta jeiserem jebe aamei taterisi gala-gala ap as ijesa tenebaaibowenantam. Namwer aas jepserem aamei as ijesa tenebaaibowenantam, ai ga isa jes tamawolbaipmif. Aamei as enggam ima tenebanantam, afa anggwana wini jam gulyana, jeiserem ke samfer? Ai is enggam ai tamawolbaabili, jeba samferam. 2 Jengga bunar-bunarsus ai bai angtane jei maaryens ne gwebuwefe. Jega jem temawer waakenfer ga enggam, anggwana ga wini jelef jam gam gula. Ane wini jegme gemer anggwana jelef jamer gam gera. 3 Wini yo anggwana jafner jam gangge tananaram, wi afa anggwa jei ini jam gam folbanaram jam gwefe wi anggwa gamserem, afa wi gam gunurum, anggwana jei baife jam gweyan. Ane afa anggwa gam gunurum, wini jei baife jam gweyan. Ini jemna nawersamer ga saaser-saaserfer gam nulamini, 4 aam temawer tifni winemanaiserem jei jelemanfenenyan, jengga tifni wimanaiserem jeba anggwana jelemanaiserem jemanam. Ane tifni anggwamanaiserem jegme gemer, tifni anggwamanaiserem jei jelemanfenenyan, jengga tifni anggwamanaiserem jeba wini jelemanaiserem jemnam. 5 Aamei wi mese anggwa ina ijeya tetwenaram, jam tala jepserem wi afa anggwa jam gam gunurum, baife ijam gweyan. Jengga afa wini yo anggwana jei enggam gangge gunurum, "Au, nei nomkef nejam ne gweyan enggalfe, nei sembayanga ne gam ne gwebaf, ane Uwa Sanbagiri ne gam ne pujitef." Afa wi anggwana jei gam jam gangge gunurum, jeba samferam. Jengga sembayanga jeiserem jam gangge tabantanaram, wi anggwana gemerserem gamjon gam ga gangge gwena. Afa jei gamjon jam ge gweyana wini yo anggwana gamserem, bawasa jei wi afa anggwa afelna jam aa jep gam unggwasbanaram maaryen gwebife angtane nensa jebar, wi afa anggwa jeiserem jei bawasa ga gam onsobana, aam temawer ini jemna unggwan-giri aaf gam nulamini jam ge gwef wi anggwa gamserem. 6 Ai aamei isa ajam balbabiyen anggwana wini jam golfe, jengga afa aamei ini is jam gam folbanaram wis golfe, aamei samfer wini saf igam gula. 7 Ai wini fas, ane ai enggam ai gunu, ini amna saaser-saasersus afa aamei jegme wini ijama ketabaabiyen, ai gemerserem. Jengga Uwa Sanbagiri Jei baabeta angtanefe daamfen-daamfenneme jeber-jeber mesam golmuwena. Wini yo anggwana jena aa jei gangge teterem, jei baabeta gangge domola enggalfe, jei nawersamer waakenfer jem gangge gwef. Ane tanis mese yafonsiwir jeime baabeta gane domola enggalfe, jeime jena waakenfer gam naawefe. 8 Yafonsiwir mese tanis, aamei gemer ijeya gwenaram ina ijama tetyamer, ane aamei saamirawi mese, ai aamei isa enggam ai balbabili, enggam jei samfer, afa aamei jafner isa gwena ina ijama tetyen, ai gemerserem. 9 Jengga afa ini tanismana unggwanfersus gam folbanaram yafonsiwirfar ge gwefe wi anggwa gamserem, ane jei jen jena jam uftayan, ai enggam ai gunu tanis jeiserem waakenfer ga wini jamer gam gula. Ane yafonsiwirem temawer jegme gemer. Afa ini jemna unggwanfersus jam gam falbilirim tanisfar ge gwefe wi anggwa gamserem, ane jei jen jena baife jam gweyan, waakenfer ga enggam jei anggwana jamer gam gera. Wini yo anggwana jei jena gam gane teterem jeba waakenam. Jengga tansi yo yafonsiwiri ini jemna afa jeber-jeber unggwan-girsusfer gangge folbaminirim jam gwefe wi anggwa gamserem, jengga jena jam ne tetyen, jeiserem jeba kabwaksusum. Ga jem temawer, waakenfer ga enggam, jei samfer jena ga jamer gangge tete. 10 - 11 Aamei angtane Kristen ina ijeya teterem, ai aamei isa enggam ai balbabili -- (taterisi aaiserem bunarsusfer ai aner ajam bilyen, jengga taterisi aaiserem ga ise Tuhane bilipmini ibe:) Wini anggwana jemna jam mirtetefalyan. Ane anggwana jegme gemer wini jemna jam mirultefalyan. Jengga afa wini jei anggwaminiwer jam gam yoswetinirim, jei safnant gamjon anggwana nafsi jam geryan. Afa jei gamjon jam warauf anggwana gwanan aa jes gam mirtetefalaram, jei samfer gam warauwa jemnibe. 12 Ai angtane Kristen nafsiserem ai jei enggam ai balbabili -- esorola aaiserem ga amniwer, Tuhanminiweryan: Afa anggwana Yesus aa jei gam tebanaram, ane wini jemnaiserem jei Yesus jam tebayan, ane wini jei ini jemna saaser-saaserfer gam falbilirim anggwana jemna jeiserem jebar ge nwinfe, afa ga gam jes gamserem, gam jega anggwana jeiserem jei wini jemna jam mirultefalyan. 13 Ane wi jegme gemer, afa wini Yesus aa jei gam tebanaram, ane anggwana jemnaiserem jei Yesus jam tebayan, ane anggwa jeiserem ini jemna saaser-saaserfer gam folbanaram wini jemna jeiserem jebar ge nwinfe, afa ga gam jes gamserem, gam jega wini jeiserem jei anggwana jemna jam mirtetefalyan. 14 Jei anggwana jemna jam mirtetefalyan, aam temawer anggwana Yesus jam tebayanaiserem, afa wini jemna jei Yesus mes gam tebana, Uwa Sanbagiri Jei anggwana jeiserem baife jam gweyan. Ane wini Yesus jam tebayanaiserem, afa anggwana jemna jei Yesus mes gam tebana, Uwa Sanbagiri Jei wini jeiserem baife jam gwebiyen. Wi anggwa jeiserem tane jemnaiserem Uwa Sanbagiri jeime baife jam gwebaipmiyen. Afa Uwa Sanbagiri Jei tane jemnaiserem baife jam gam gwebaipminirim, gam jega tane jemnaiserem ga enggala angtane Yesus jam tebayanaiserem tane jemna galserem. 15 Anggwana Yesus jam tebayanaiserem, afa jei baif jam gam gwenaram wini jemna Yesus aa jei gam tebanaram jebar seyafter gwefe, sya wini jei anggwana jeiserem jam tebasneneyen, saf gam aftannu. Ane wini Yesus jam tebayanaiserem, afa jei baif jam gam gwenaram anggwana jemna Yesus aa jei gam tebanaram jebar seyafter gwefe, sya anggwana jei wini jeiserem jam taabisneneyen, saf gam aafulnu. Jei jes gamserem gam samfer gane eyebili, aam temawer Uwa Sanbagiri Jei enggam gunu angtane Jelemana waakenfer gangge gwef. 16 Wini Yesus aa jei gam tebanaram, afa jei anggwana Yesus jam tebayanaiserem jei jamer gam tebana, jam aftannuyon, wini jeiserem jei bunarsusfer jam towasweyan enggame, afa jei se eyebili jega annaiserem jei Yesus galap gase tebana, afa fas. Ane anggwana Yesus aa jei gam tebanaram jeime gemer, afa jei wini Yesus jam tebayanaiserem jei jamer gam taabili, jam aafulnuyon, anggwana jeiserem jei jam towasweyan enggame, afa jei se eyebili jega wini jemna jei Yesus galap gase tebana, afa fas. 17 Aamei jeber-jeber etam-etamyamer ijes eyebuwenantam, Uwa Sanbagiri jei aamei nalefe is jam jenbeyen enggalfe Yesus jam tebafe, jeiserem jei Tuhan mes mwangbisini. Aamei Yesus ijep tebanaram, aamei ga gemer jam is eyebuwena, aamei gwanan jes gemerserem igam eyebuwenantam. Jeiserem ai safna Yesus aa jei ne tebanaram seyafter gemerserem jebe, ga jes ajes nasipminenne. 18 Ga enggam, afa aameiba angtane Yahudimanam, Uwa Sanbagiri Jei aamei nalef is jam jenbeyen enggalfe Yesus jam tebafe, ane aamei nunu jeber-jeber is eyebuwena angtane Yahudimana aa gam gane eyebaabuwenaram, aamei Yesus ijep tebanaram, aamei safnant ijam towaiwulyon jam eyebife angtane Yahudimanyan gamserem. Ane afa aameiba angtane Yahudimanyan, Uwa Sanbagiri Jei nalefe is jam jenbeyeneye enggalfe Yesus jam tebafe, aamei Yesus ijep tebanaram, aamei safnant ijam towaiwulyon jam eyebife angtane Yahudimana gamserem. 19 Ga enggam, angtane Yahudimanaiserem jei jam sunattababili, ane angtane Yahudimanyanaiserem jei jam sunattababiyen. Angtane jam sunattabasiliserem, afa angtane jam sunattababiyeneiserem, nawersamer jeiserem je igyen. Jengga igsususerem ga aas: Uwa Sanbagiri aa jes bilirim jam eyebife, angtane ga jes gase eyebili. 20 Angtane etam-etamyamer jeber-jeber aa jes eyebuwenantam, Uwa Sanbagiri nalefe angtane jeiserem jam jenbeyen enggalfe Yesus jam tebafe, angtane jeiserem Yesus jep gam tebanaram, jei ga gemer jam se eyebuwena, jei gwanan jes gamserem gam eyebuwenantam. 21 Ga enggam, afa aamei awelna angtane is jei gam armantanaram jemans igam gweyibenerem, Uwa Sanbagiri Jei aamei nalef ijam jenbeyen, safnant gwela imna jeiserem jem temawer. Jengga afa dwona is jam gane gulbanaram angtane jeiserem aamei is jam aftannufe, dwona jeiserem is jam gane gulbanaram aamei samfer dwona jeiserem jamer igam onsobili. 22 Afa angtane aa jes gam armantanaram jei Yesus mes gam tebana, jei awelna angtane aa jei gam armantanaram jemna safe gemer gam gweyibuwena, Tuhanem Jei Jelem inibe angtane jeiserem jem temawer enggam gam gunu, angtane jeiserem jei ga enggala angtane jam armantayana galserem. Ane angtane jafner gwelaiserem, angtane nafsi fas jam armantayanaiserem, jei Yesus jam gam tebanaram, jei enggam gam gwena Kristus se armantala gamserem, jei awelna Kristusmana gam gweyibene. 23 Uwa Sanbagiri Jei aamei is mesam armantababili hargana unggwandwasusfer jeme, hargana jeiserem jeba aawisi Tane Uwa Sanbagirmanaiserem aa Jei terem ti salibibe, ane jega jem temawer aameiba Uwa Sanbagirem angtanesam. Jewer ga, aamei angtane Uwa Sanbagirmanyanaiserem jei safnant ijama onsobaabiyen, jengga aamei Uwa Sanbagiri tefner isa onsobana. 24 Am afelen mesna, ga jem temawer, aamei etam-etamyamer gwanan igemera eyebuwenantam, Uwa Sanbagiri Jei aamei nalefe is jam jenbebiyen enggalfe Yesus jam tebafe, aamei Yesus ijeba tebanaram, gwela imna ga is gemer sege folbamini Uwa Sanbagirfar, gwela imna gwanan is gemer ge folbaminintim. 25 Surta aamei gwanan ap as ijesa tulisulbonontom, surta jeiserem jebe, aamei ga angtane Kristen jena jam ne tetyeneiserem jem temawer ap as ijesa tenaibenentem. Ai aaf ga isa ajes tamawolmif. Tuhan Jei taterisi angtane Kristen jena jam ne tetyeneiserem jem temawer ai as Jam balyan, jengga esorola amna aaiserem ai isa ajam nasipmif ibe. Tuhan Jei ams nesiktene, jega jem temawer angtane taterisi amna samfer as ga sene taayibene. 26 Namwer aas jepserem nei angtane Kristen nejeya gwenaram, tamtamtalaiserem ga nes jes ne kitulmini. Ga jem temawer ai enggam ai gunu, waakenfer ga enggam, aamei namwer aas igemera gwenaram, gwela imna jeiserem gamjon ga gemer isa gwena. 27 Afa aamei winibere, aamei wini imna baife ijam gwebiyen jebar gwefe. Afa wini imna fas, safnant aamei wini ijam terelbiyen. 28 Jengga afa aamei wini jam golfe, jeiserem etam-etama kabwakyan. Ane wini jegme gemer, afa jei anggwana jam gaarfe, jei etam-etama kapka jam eyebiyen. Jengga wini yo anggwana jena aa jei gangge teterem, jei tamtamtalaiserem aa jep gane golminirim, ini jemna tamtamsusu gam nulamini angtane jena jam ne teteyanaiserem jemniwer. Ane ini amna ase unggwan-girem folbana aamei ini tamtamsusu jeiserem ijama domolyan. 29 Am afelen mesna, ai aamei isa enggam ai balbabili, nunu nemna unggwanferyan enggalfe nei awelna Uwa Sanbagirmana nejama gweyibefe ogiri aaiserem jebe. Jega jem temawer aamei seyafter namwer isa towaiwena, Tuhan aa jes bilirim jam eyebife, jeiserem ga jamer isa eyebili ini ilemana seyafter gemerserem jeme. Anggwana winibereiserem jei ga enggammer se gwena, tanismer gwela gamserem. Igi jemna ga enggam, anggwana winibereiserem enggam jam ge gubiyen, "Ai winibere, jega jem temawer ai awelna Tuhanmana ajam gweyibeyen." 30 Ane angtane ini aa jemanem gangge jenbaminirim, jei ga enggam se naawena, angtane ini jam jenbayana galserem. Ane angtane ini saaser-saaserfer aa jemanem gangge folbaminirim, jei ga enggam se naawena, angtane ini jam jenbamili galserem. Ane angtane galgalabaraiserem jei mese jegme gemer se naawena, angtane galgalabaryena galserem. Igi jemna ga enggam, angtane ini aa jemanem gangge jenbaminirim, enggam jam ge gubiyen, "Ini amna mes jenbana, jega jem temawer ai awelna Tuhanmana ajam gweyibeyen." Ane angtane ini saaser-saasersusu aa jeman gangge folbaminirim, ane angtane galgalabaraiserem jes mese, jeime jes gamserem jam gangge gubiyen. Angtane seyafter jeiserem awelna Uwa Sanbagiri aa jes bilirim jei jamer sene eyebili ini jelemana seyafter gemerserem jeme. 31 Ga enggam, ini imna unggwanfersus is jam ge folbamiyen gwela imnaiserem jem temawer ogiri aaiserem jebe, aam temawer ogiri aaiserem aa jei falaram se wasferwesa. 32 Ini amna ase enggam folbana, aamei ini is jam ge eseswebamiyen gwela ilemanaiserem jem temawer. Tansi Kristen jei ini awelna Tuhanmanaiserem jepfener gam folbana, aam temawer jei ini Tuhanmana gam saaser-saasertabaf. 33 Jengga anggwana Kristen winibereiserem, ini jemna unggwan-girem gam folbana gwela ogirmanaiserem jem temawer enggalfe, jei wini jelemanaiserem ini jemna gam saaser-saasertaabif. 34 Jega jem temawer anggwana Kristen winibereiserem ini jemna ga naura gam nulabana: jei awelna Tuhanmanaiserem jes gweyibef, ane wini jelemanaiserem ini jemna jes saaser-saasertaabif. Nawersamer jeiserem ini jemna ga jei gangge dektebene. Yafonsiwiri yo wini anggwanabaraiserem jeime gemer jes gemerserem. Yafonsiwir Kristen jei awelna Tuhanmanaiserem ini jepfener gam falbili enggalfe, tifni yo mafnana, gwela jemna jeiserem seyaftersus gam kitulbof Tuhanfe. Jengga wini Kristen anggwanabaraiserem, ini jemna unggwan-giri gam falbili gwela ogirmanaiserem jem temawer enggalfe, jei anggwana jelemanaiserem ini jemna gam saaser-saasertabaf. 35 Ai taterisi seyafter jeiserem ibe isa enggalf ai tulistaipmini, ai aamei isa ajem batobaabif, jeke enggalem temawer ai aamei isa ajam isinbaabisnenef wini jam golem temawer, ane anggwana jam gaarem temawer. Ini amna ase enggam folbana, aamei ga waakenfer isa gwena, ane ini imna seyaftersus ga ise Tuhanminiber sege folbamini. 36 Afa tanis jei yafonsiwirs jam gam nesikulu, ane ini jemna unggwanfersus jam gam folbanaram yafonsiwirfar jam ge gwef, afa ga gam jes gamserem, ai enggam ai gunu tanis yo yafonsiwir jeiserem waakenfer ga jei jena jamer gangge tete. Jeiserem etam-etama kabwakyan. 37 Jengga afa angtane tansi jam gane balyanaye enggame jei wini jam gulyansus, ane tansi jeiserem jei jener enggam jam gam gunurum jelem inibe, "Ai bai wini jam golfe.", ane afa tanis jeiserem jei ini jemna aa jei gam folbanaram wifer jam ge gwef, afa ini jemna jeiserem waakenfer jam gam gerebaasnennerem, jeiserem ga waakensusu afa jei wini jam gulyana. 38 Ga jem temawer tansi wini aa jei gam gularam jei waakenfer gam eyebili, jengga tansi wini jam gulyanaiserem jei waaken-waakensusuter gam eyebili. 39 Wini Kristus aa jei gam tebanaram, afa anggwana jemna gemer gam gwenaram, wini jeiserem jei anggwana jemna jam mirtetefalyan. Jengga afa anggwana jemna jam gam tererem, wini jeiserem jei anggwa nafsiserem jei aa jes gam balaram jam garfe, jei samfer anggwana jeiserem gam gera. Jengga anggwana jeiserem jeime Kristuster gam tebana. 40 Jengga ai aner enggam ai gunu, afa wini jeiserem jei gamjon anggwana jam geryana, jemna ini saaser-saasersusfer gam falbili anggwana jam gaarfe jemniwer. Taterisi jeiserem ai isa aner ai bilipmini ibe. Jengga ai enggam ai gunu, jeiserem ai baabeta Mafnana Uwa Sanbagirmanaiserem ai ga isa jem balbabili.
81 Surta aamei gwanan ap as ijesa tulisulbonontom, surta jeiserem jebe, aamei matauwa tiborma jam kwirtabaabiliserem jep aa jes gane kitulminirim, matau jeiserem aamei ai ga ase jem temawera tenebana enggame, "Matauwa jeiserem ke samfer negama tombaabili?" Ai aaf ga isa ajes tamawolmif. Ga enggam, angtane afweraiserem im nenennabe enggam ge gubili, "Nei seyafter tousaiserem nemsa domola." Jeba bunaram, jengga angtane aa jei gam gunurum enggame, "Ai waakenfer ames towaswena.", angtane jeiserem jei jes gamserem gam ajewer gam gunurum, jei jena ga jam gam gaartenanna, ane jei angtane nafsi Yesus aa jei ne tebanaram jam kanautababiyen. Jengga angtane, angtane nafsi aa jei gam nesiktababilirim, angtane jeiserem jei safna Yesus aa jei ne tebanaram ga jes gam kanautababuwena. 2 Angtane enggam aa jei gam gunurum, "Ai unggwanfersus ames towaswebabili.", angtane jeiserem jei bunarsusfer taterisi orolemanaiserem jam towaswebabiyen. 3 Jengga angtane Uwa Sanbagiri aa jei gane nesiktenerem, Uwa Sanbagiri Jei angtane jeiserem gam damdamtaasini. 4 Ga jem temawer, ai enggam ai gunu matauwa jeiserem jam tombaabiliserem jem temawer, matauwa tiborma jam kwirtabaabiliserem jep aa jes gane kitulminirim: Nei nemsama towaswena tiborma jam kwirtabaabiliserem jeba igyenem, tiborma jeiserem jei Uwa Sanbagiriserem jesyan. Uwa Sanbagiri ba daamfensusum. 5 Angtane afwer enggam ge gubili, "Mafnana nenes-nensa ba unggwanferam, aa jei naawenaram taman waaken-giribe ane ogiri aaiserem jep mese. Ane mafnana jeiserem jeba Uwa Sanbagiri galserem." Angtane afwer ga jes gemerserem ga gam ge gubili, ane jei mafnana jeiserem ga jem gwonap naawena jelem sanbaka gamserem. 6 Jengga nei nemsama towaswena enggame Uwa Sanbagiri ba daamfensusum. Jeiba nem Uwasam, Jeiba seyafter Jeyam eyebaabil. Ane nei jam nesa gwenaram ini nemna seyaftersus ga nes Jemnipfener sege folbamini. Ane Tuhan jeime daamfensusu, Tuhan jeiserem ga Yesus Kristus. Seyaftersus aa jes eyebaabilim, jeiserem ba baabeta Tuhanmanaiserem jemam eyebaabil. Ane Jei gwela nes mesam golmini nebe. 7 Jengga angtane Kristen afweraiserem jei waakenfer jam ge towaswebiyen enggame, tiborma jam kwirtabaabiliserem jei baabeta fas nem sagabe. Angtane jeiserem jei nalefe Yesus jam ne tebayan, jei tiborma jam kwirtabaabiliserem ga jes ne pujitababuwena jeber-jeber. Jega jem temawer jamer namwer aas jepserem, afa angtane jeiserem jei matauwa tiborma jam kwirtabaabiliserem jep aa jes gane kitulminirim, afa jei matauwa jeiserem jam gane tombaabilirim, jei jen jena jelem inipfener jena ga aane tenaaminenne enggame, "Matau jeiserem ke tiborma jam kwirtabaabiliserem, ke jemna? Afa ai matau jeiserem jam asa tombaabilirim, ai engbar ga ai etam-etama asa eyebili?" Angtane jeiserem jei Yesus gemerje kanaufer jam ne tebayan, ane jega jem temawer jei jam ge towaswebiyen enggame, waakena jes eyebiliserem ga fwersa, ane kapkaiserem jam eyebiliserem ga fwersa. 8 Bunarsusfer nei nemsa towaswena, tumilgala nei nejesa tombaabiliserem, tumilgala jeiserem jeme nei Uwa Sanbagiri jem nejama gwetmanwebaasiyen. Afa nei matauwa jam negama tombaabilirim, Uwa Sanbagiri Jei nei enggam nes Jam balbabiyen neiba waakenam. Ane afa nei matauwa nejama tombaabiyeneye, Uwa Sanbagiri Jei nei enggam nes Jam balbabiyen nei kapka. 9 Safe gam, aamei ina ga waakenfer isa gaaramisnenne tumilgala aamei ijesa tombaabilirim, angtane nafsiserem jem nwenabe. Bunarsusfer ga enggam, tumilgala seyafter ba samfer igama tombaabili. Jengga aamei ijama eyebiyen, jega angtane nafsiserem jei etam-etama kapka galap ga sene eyebili. Jeiserem ijama eyebiyen, aam temawer angtane Kristen afweraiserem jam ge towaswebiyen waakena jam eyebiliserem ga fwersa, ane kapka jam eyebiliserem ga fwersa. 10 Taterisi amna jem igiserem ga aas: Aameiba imsama towaswena enggame tumilgala seyafter gemerserem aamei samfer igama tombaabili. Jengga enggam aamei matauwa tiborma jam kwirtabaabiliserem jep aa jes gane kitulminirim, matauwa jeiserem jam igama tombaabili jena tiborma jam kwirtabaabiliserem jebe. Afa ga gam, ane angtane Kristen jam towasweyeneiserem enggame matauwa jeiserem ba samfer jam tumilfe, jei aamei ga is gam damtabili aamei jam igama twenaram jena jeiserem jebe. Afa ga gam jes gemerserem, gam jega angtane jeiserem ini jemna ga gam tabwatya enggalfe, jeime matauwa jeiserem jam tumilfe. Ane jei matauwa jeiserem ga gam tumili. 11 Aamei matauwa imsa tombaabili, matauwa aamei ijesa towaswebabilirim enggame aamei matauwa jeiserem samfer jam tombaabili. Ane enggalem temawer aamei matauwa jes imesa tombaabili, im afelna jeiserem Kristus kanaufer jam tebayanaiserem, jei gase tumili, ane jei etam-etama kapka gam eyebili, im afelna jeiserem Kristus ga jem temawer tere! 12 Aamei matauwa jeiserem jam igalaba tombaabilirim, ane jei aamei ga is damtabili, ini jemna ga tabwatya matauwa jeiserem jam tumilfe, ane jeime gam tumili. Ane jei matauwa jeiserem aa jewer gam tumilirim, jei etam-etama kapka ga jem temawer gam eyebili. Jei etam-etama kapka gam eyebili, aam temawer jei gwanan enggam gam gunu, "Afa ai matauwa jeiserem jam as tumilirim, ai engbar etam-etams as eyebili." Aamei gam jes ijewera eyebilirim, aamei ilem afelna jeiserem jebe kapka ga ima eyeibene. Ane angtane jeiserem kapka jep gemer igama eyeibenerem, aamei jegme kapka gemer igama eyeibene Kristusfe. 13 Ga jem temawer, afa am afelen mesna jei etam-etama kapka jam gane eyebilirim, aam temawer ai matauwa jam agam tumilirim, afa ga gam jes gemerserem, ai matauwa gamjon ajam tumilyensus. Ai baibaisus am afelen mesna jei etam-etama jam ne eyebife am temawer.
91 Bunar-bunarsusfer ai angtane nafsi jem gwonap ajam gweyan. Bunar-bunarsus ai Yesus Tuhan nemnaiserem amsam damtana, ane Jei ams baftana enggalfe ai rasulfe agam gwef, awelna Jemna agam gweyibef. Ane ai awelna Jemna ames gweyibene im nenennabe, ane jega jem temawer aamei Yesus imsa tebana. 2 Angtane afweraiserem jei enggam ge gubili, "Paulus jei Rasulyan." Safe gam, imsa towaswena aiba rasulsam, aam temawer ai taterisi Kristusem temawer ames nasbili, ane aamei taterisi jeiserem imsa taabili. Ane aamei Tuhanfar daamfennaber ima gwena, ane aamei Tuhanfar daamfennaber ijewera gwenaram, aamei ga ijema gwerauwulmini angtane nafsiserem jebe, enggame aiba rasulsam. 3 Angtane afweraiserem jei taterisi kapka am temawer ne nasbili enggame ai Rasulyan. Ai ga enggam as tamawola: 4 Aiba bunarsusfer Rasulsam, ane je kabwakyan afa ai tumilgala jam as tebabilirim awelna ajes gwebilirim jem fwainfe, Rasulu nafsi afwer gamserem. 5 Rasulu afweraiserem, Yesusem oson mesnaiserem ane Petrus mese, jei wini jemna Yesus aa jei ne tebanaram ga gemer ne aftabifele jei aa jewer ge sofobilirim. Jeke kapka afa ai jegme gemer as eyebilirim, ane wini ga as afolfala ai ajewer sofnaram, ane ai jem fwaina ga as ge taabili ai ajes ge bilirim jem temawer? Jeiserem kabwakyan. 6 Rasulu afweraiserem jei awelna jelem tafam jam gwebiyen enggalfe, jei tumilgala ane seyafter nafsiserem gam damtabif jei aa jes ne balbabilirim jam damtafe. Jeje bafa ai ane Barnabas ai awelna anfentowaifener alem tafamer ga ai ge gwebili enggalfe, ai agam ge damtabif tumilgala ane seyafter nafsiserem ai ajes ge balbabilirim jam damtabife? 7 Bunarsusfer, ginanggwana jei awelna jelemana aa jep gane wofebilirim, jei aa jes gane balbabilirim, tumilgal mese fen enggalfe jei awelna jeiserem jebar ne wofobif, seyafter jeiserem jei jener jam ne armantababiyen. Makan anggwana jei samfer nananisi makanawer aa jes gane damtabilirim, jei jes gane tombaabili. Ane angtane dombana aa jei gane gerebaabisnennerem, jei samfer susunu dombana jeiserem jewer aa jes gane damtabilirim, jei susunu jeiserem ga jes gane telbebili. 8 Angtane jeber-jeber jei ga jes gemerserem ga gemer ne eyebuwena. Jengga ai angtane aa jes gane eyebuwenaram, ai jem temawenefener ajam nasbiyen. Aime Hukumu Nabi Musa aa jes tulistababilim Taterisi Uwa Sanbagirmanaiserem jebe, ai ip ga isa ajes nasipmini. 9 Hukumu jeiserem jep ga enggam baatultel: "Sapini gandum tanna jeiserem jam gam jubobinennerem, jega enggalf gandum tanna jewer gangge fatibitiyef otamawer, ane angtane gandum tanna jeiserem ga gane damtabili, sapini jeiserem aarema jemna ijam motsobaasiyen, jega jeme samfer gandum tanna jeiserem bastanfer ga gam tombaabili." (Ulangan 25:4) Uwa Sanbagiri taterisi aa jes bilim, taterisi jeiserem sapim temawenefener Jam guyon. 10 Bunar-bunarsusfer taterisi jeiserem Jeiba am temaweram bilipmil, ai Taterisi Waakena ajeya nasbinennerem. Jei ga jes gemerserem ga gam bil enggalf gam gweraulmife, angtane awelna Kristusmana aa jei ne gwebilirim, jei samfer fwaina gam taabif, angtane jei aa jes gam batobaabilirim jemniwer. Angtane makana aa jei gane menetababisinirim, ane angtane nananis aa jei gane fulurum, ini jemna ga enggalf gangge folbamini jei nananis aa jes gane fulurum afwer tomnawer gane tebabif. 11 Jes gemerserem aime taterisi Uwa Sanbagirmana ga agemera tonolnanna im inibe. Afa ga gam jes gemerserem, aime samfer jem fwainfe galgala asa damtabili. 12 Angtane nafsi taterisi Uwa Sanbagirmana ip is jei ne towas-towastabaipminirim, jei fwaina gane taabif imniwer, jega jem temawer aiba waakensusum afa aime fwaina ajama taabife imniwer. Safe gam, ai apgal jigala afa fas imniwer fwainfe isa ajama bilipmiyen. Fas. Bunarsusfer ga enggam, ai safe kabwaktala seyafter gemerserem jam agma damtabili, ai jafner agma fina. Ane ai awelna alem tafamer agma gwebili enggalfe, ai seyafter jes agma bilirim jam damtabife gwela alemanaiserem jem temawer, ai seyafter jeiserem agma damtabili. Ai apgal jigala imniwer fwainfe isa ajama bilipmiyen, aam temawer ai bai angtane enggam jam ge gubife, "Rasulu jeiserem jei awelna Kristusmana enggalfefener gwebili, doini gam ne taabif." Afa angtane jei jes gemerserem gam jam gangge gubilirim, gam jega, engbar jei baif gam naawena Taterisi Waakena Kristusem temawer jam taabife. 13 Aamei bunarsusfer imsa towaswena, angtane awelna Jena Uwa Sanbagirmanaiserem jebe aa jei gane gwebilirim, jei tumilgala gane tebabili Jena Uwa Sanbagirmana jeiserem jewer. Ane imam tumilgala aa jei gane bunulnsounaram mejana Jena Uwa Sanbagirmanaiserem jebe enggalfe Uwa Sanbagirfe gam gulbaf, imam-imam jeiserem jei tumilgala jeiserem afwer ga gane syenulu. 14 Angtane jeiserem jei gemerserem angtane Taterisi Waakena aa jei ne nasbinennerem jeime gemer. Tuhan mesam balbabili, angtane Taterisi Waakena aa jei ne nasbinennerem, jei fwaina sene taabili angtane Taterisi Waakena aa jei ne sarbilirim jemniwer. 15 Jeiserem safe waakena ini amna as jewer folbanaram enggalfe, awelna ajes gwebilirim jem fwaina agam taabif, ai fwaina angtaneminiwer aner ajam bilipmiyen. Ane ai surta aaiserem jebe, ajam tulisulyon enggalfe ai fwaina ajam taabif imniwer. Fasfasus! Ai gam ajam tulisulyon. Ini amna saaser-saasersusfer ga as enggam folbana, ai Taterisi Waakena ip isa ajes nasbaipmuwenaram, taterisi jeiserem jem fwaina isa ajam bilipmiyen. Ai safe ase wisei se folbana jamer ai afom tere, ai fwaina imniwer isa ajam bilipmiyen. 16 Ai Taterisi Waakena ajewer nasbabuwenaram, ai jem temawer ajam guyon enggame ai waakenfer eyebili, aam temawer Uwa Sanbagiri Jei ams baftana ai Taterisi Waakena jeiserem agam nasbinennef. Afa ai Taterisi Waakena ajam nasbineneyeneye, galap kapka as etamwesa abe! 17 Afa ai aner agam gunurum ai Taterisi Waakena jam as nasbinennefe, afa ga gam jes gemerserem, gam jega ini amna samfer ga as jep gam folbana enggalfe ai doini jam tebafe, awelna amna jeiserem jem temawer. Jengga ai aner ajam guyon Taterisi Waakena jam nasbinennefe. Jengga Uwa Sanbagiriserem ai ga ase Jei bala, ane awelna Jei ap as jes gulbanaram, ai awelna Jemna jeiserem ga waakenfer as gweyibene. 18 Afa ga gam jes gemerserem, gam jega ai jem fwainfe ga basas taabili? Fwainaiserem ga aas: ini amna ase saaser-saasersusfer se folbana, aam temawer ai Taterisi Waakena jam agam nasipminirim angtanefe, ai angtane jeiserem jemniwer doini ajam bilipmiyen, taterisi ai jes agam nasipminirim jem fwayenfe. Aiba taterisi Uwa Sanbagirmana ba ayam nasibenenewena. Jega jem temawer ai taterisi jeiserem jam jep agam nasipminirim angtanefe, ai samfer fwaina jemniwer agam taabili. Jengga ai fwaina ajam taabiyen, ane jem temawer ga ini amna saaser-saaserfersus folbana. Ini amna jes gamserem gam ajewer folbanaram, fwaina amna ba jesam ai ajes taabife. 19 Bunar-bunarsus angtane afa fas am sanbakfe afa jam gweyan ai ajem olem gwefe. Safe gam, ai ga enggam as gwena, angtane seyafter am sanbaka gamserem. Jes gemerserem ai ga gemer as gwena, jega enggalf angtane unggwanfer Kristus gam sene tebana. 20 Ga enggam, ai angtane Yahudimanaiserem jebar agalap nwinirim, ai ga agemer gwena gwela jemna gemerserem. Ai agemer gwena jes gemerserem, jega ai samfer Taterisi Waakena gam agam nasipmini jebe, ane jei Yesus ga sene tebana. Bunarsusfer ai ajam gweyan Hukumu Nabi Musa aa jes tulistababilim jem gwonabe. Jengga ai angtane Hukumu jeiserem jem gwonap aa jei naawenaram jebar agalap nwinirim, ai Hukumu jeiserem ga ai onsobili, jega aime samfer Taterisi Waakena gam agam nasipmini angtane Hukumu jeiserem jem gwonap aa jei naawenaram jebe, ane jei Yesus ga sene tebana. 21 Ane aime angtane Yahudimanyanaiserem jebar agalap nwinirim, ai ga agemer gwena gwela jemna gemerserem. Angtane Yahudimanyanaiserem jei Hukumu angtane Yahudimanaiserem fas jam ne onsobiyen. Ane ai angtane Yahudimanyanaiserem jebar agalap nwinirim, aime gemer Hukumu ajam onsobiyen, jega enggalf ai Taterisi Waakena jebe samfer gam agam nasipmini, ane jei Yesus ga sene tebana. Ai safe Hukumu ajam onsobiyen, jengga Uwa Sanbagiri aa jes bilirim jeiserem ai ajam mirultefalyan, aam temawer Kristus aa jes bilirim jeiserem ai ajesam onsobili. 22 Ane ai agalap nwinirim angtane Yesus kanaufer jam ne tebayanaiserem jebar, ai ajam eyebiyen seyaftersus ai ajes towaswebilirim enggame, angtane Kristen jei samfer jam ne eyebife. Ai ga jetefener agam eyebili angtane jeiserem jei aa jes gane bilirim, jega enggalf angtane jeiserem jei Yesus kanaufer ga sene tebana. Ai angtane jebar agalap nwinirim enggalfe, Taterisi Waakena agam nasipmif, ai ga gemer ai gwena angtane jeiserem jei aa gemer gwenaram. Gwela amna nafis-nafismer folbana, angtane nafis-nafsiserem jemna gwela gemerserem, jega ai Taterisi Waakena samfer gam as nasipmini angtane unggwanfersus jebe, ane angtane afwer Yesus ga sene tebana. 23 Ai seyafter jeiserem ajewer eyebilirim, ai ga enggalf ai eyebili, angtane unggwanfersus jei Taterisi Waakena Yesusem temawer ga sene taabili. Ane seyafter jeiserem aime enggalf ai eyebili, jega ai angtane seyaftersus Yesus aa jei ne tebanaram, ai jebar waakena Uwa Sanbagirmanaiserem ga asa taabili. 24 Aamei bunarsusfer imsa towaswena enggame, angtane jam gangge nunggirbenerem enggalfe, gane damtabif tatarfersus nane se nunggiri, jei seyafter tatarfersus gangge nunggirbene jamere garis tabanabo. Jengga jei aa jei gangge nunggirbenerem jemniwer, angtane daamfensususerem angtane nabal danalaiserem baabetfersus aa jei gam nunggiririm, fwaina ga jei gam taabili. Angtane jeiserem jei aa gemer ge nunggirbilirim enggalfe fwaina gam taabif, gwela imna waakenfer ga is gemer se falmini Kristus jam tebafe, jega enggalfe aamei fwaina Uwa Sanbagirminiwer gam isa taabili. 25 Angtane aa jei gam olaragawenaram, jei nalef olaragana angtane unggwanfer aa jes gane onsobilirim jebe jam kawiyen, jei jeber-jeber uskambarsus gam latihansouna jamer tifni jemna baabetfer gam folbana. Jei jewer gane eyebilirim, jega enggalf jei olaragana jeiserem jep jam gam kawewilirim, jei fwaina gam taabili angtane nabal danalaiserem jei aa jes gam taabilirim. Fwaina olaragaminiwer aa jes gane taabilirim, fwaina jeiserem abakfer jam falyan. Jengga nei Kristus nejeya tebanaram, gwela nemna waakenfer nesa gerebaabisnenne enggalfe, nei fwaina Uwa Sanbagirminiwer gam nesa taabili. Fwaina jeiserem abak-abaksusfer ga je gam fala. 26 Ga jem temawer, ai jam as gwenaram ini amna ga ase nornormer se folbana Uwa Sanbagirminibe, angtane lombana tatarfer nunggiri jam onsobili gamserem. Angtane jeiserem jei jam gangge nunggirbenerem ga garis tabana jep tikwelaiserem, ga jewer gangge nunggirbifele nornormer, jei irsime syefer jam ge nunggirbifelyen. Jei nornormer gemer gangge nunggirbifelerem, ai jes gemerserem ga agemer gwena. Ai jam as gwenaram ini amna ga ase nornormer se folbana Uwa Sanbagirminibe, enggam mese angtane olaraga tinju jam onsobili gamserem, jei olaragana jeiserem jam gam onsobilirim tafna syefer tamanfennap jam firsonuweyan. Jei ga angtane olaragana jeiserem aa jebar gangge onsobilirim ga jeter gam saftawena. 27 Angtane aa jei gam olaragawenaram jei jeber-jeber uskambarsus gam latihansouna enggalfe, tifni gam baabetabarulsif jamere gam mesmeswesini, jega jei olaragana waakenfer ga gam onsobili. Ai ga jes gamserem ga agemer gwena. Ai ini waakensusfer ai gerebaasnenne enggalfe, ai baabetfer gam as gwena Uwa Sanbagiri aa jes bilirim jetefener gam as eyebili. Ai angtane nafsiserem amsam towas-towastababili Kristus waakenfer jam onsobalem temawer, ane ai ga gemer as gwena angtane nafsi ai agemer towas-towastababinennerem. Afa ai gam ajam gweyana, ai ajam taabiyen fwaina Uwa Sanbagiri aa jes golminirim angtane Kristen waakenfer aa jei naawenaram jebe.
101 Am afelen mesna, aamei jeber-jeber jam isa sarbistaabonwena, gwanan galapserem asal-asala nemna Nabi Musa aa galap ne onsobalam negeri Mesirwer. Asal-asala nemnaiserem jei gara Uwa Sanbagiri aa jes baftannulum jei seyafter ga jem saaserfar ge sofobil. Ane jei fona aa jes ne bilwenaram "Fi Berbereme", jei seyafter waakenmer jeter ga aa ge awelbisiwil. 2 Gara jei aa jem saaserfar ge sofobilim, ane fona aa jes ne awelbisiwilim, jeiserem ga enggala asal-asala nemna fona yo gara jeiserem jei ge baptistele gamserem, jega asal-asala nemna jei gam etamwef Nabi Musas tikwebaatife. 3 - 4 Ane Tuhan Jei bwembwema angtane jeiserem jep eyeipmil. Jei tumilgala taman waaken-giriwer ge irebitye jep ga aa kitulmil, ane fona tunawer mese jep ga aa kitulmil. Ane jeiserem ga gwerauwulu enggame Kristus ba jebar seyafteram nwinbel jam batobaabife. 5 Uwa Sanbagiri Jei waakena uskambarsus saf gam eyebaipmil jebe, Uwa Sanbagiri Jei angtane unggwanfersus jemniwer jeiserem ga jes nasbabil kapka jei aa jes ne eyebaabuwelam jem temawer. Ane Uwa Sanbagiri ga munbobil jei, jem futunuserem ga dwisgirip ge falbinenewel. 6 Seyafter jeiserem aa jei etamwemilim asal-asala nemnaiserem jebe, seyafter jeiserem ga enggalf etamwemil, jega nei samfer negama towaswef ini nemna unggwan-girfer safnant nes jam ge folbamiyen kapkaiserem jam eyebife, jei gamserem. 7 Asal-asala jemniwer afweraiserem jei tiborma jam kwiruluserem gane pujiwul, jengga nei safnant jeiserem nei nejama pujiwulyon. Taterisi Uwa Sanbagirmanaiserem jep ga enggam baatultel: "Angtane jeiserem ga aa ge nwinbitena jam twenfe ane fos telbif mese, ane jei ga aa ge irwebili jam tesarabife enggalfe tiborma jam kwiruluserem gam pujiwulf." (Keluaran 32:1-6) 8 Asal-asala jemniwer afweraiserem jei maaryena gane gwebil. Jengga nei safnant jes gamserem nei nejama eyebiyen, aam temawer nunu daamfennaiserem jeme, Uwa Sanbagiri Jei angtane 23.000 jemniwer ga jem munbobil. 9 Ane asal-asala jemniwer afweraiserem jei Tuhan jes gemerserem ne unggwasbal. Jengga nei safnant Tuhan jes gamserem gam nejama unggwasbayan, aam temawer jei aa se tamtamtababil ga awase dwortabaabil, jei ga aa ge terbil. 10 Asal-asala jemniwer afweraiserem jei angtane sanbaka Uwa Sanbagiri jep aa jes kitulmilim, asal-asala jeiserem jei angtane sanbakem temawer kabwakfer ne nasbabuwel. Nei safnant jei gamserem nei nejama eyebiyen, aam temawer malaikata aa jes ne bilwenaram "Malaikata Terserem" Uwa Sanbagiri aa jes baftabilim, jei asal-asala jeiserem mes ne munbobil. 11 Seyafter jeiserem aa jei etamwemilim asal-asala nemnaiserem jebe, seyafter jeiserem ga enggalf etamwemil, jega nei ga nesa towaswena Uwa Sanbagiri Jei bai etam-etama kapka jei aa jes ne eyebilim, nei nejesa eyebife. Nunu umwef ogiri jam barwefe, nunu jeiserem namwer aa jei falaram. Ane taterisi seyafter jeiserem ga enggalf ne tulistaabil Taterisi Uwa Sanbagirmanaiserem jebe, jega nei taterisi jeiserem gam nesa gerabistefe. Ane nei nejewera gerabistenaram, nei ga nesa towaswena Uwa Sanbagiri Jei angtane etam-etama aa jei ne eyebilirim, asal-asala nemnaiserem jei gamserem jei aa galater eyebilim, Uwa Sanbagiri Jei angtane jeiserem se tamtamtababili. 12 Ga jem temawer, afa aamei ilem inibe enggam igam gunurum, "Ai etam-etama kapka asal-asala jei aa gala gane eyebilim, ai fas jeiserem ajam eyebiyen.", afa aamei jes gemerserem gam jewer igam gunurum, aamei ga ina waakenfer igam gerebaasnenne. Aamei ga ina waakenfer igam gerebaasnenne, aam temawer aamei gam saf igam gunu, jengga aamei engbar etam-etama kapka igam eyebili. 13 Unggwasbala seyafter aamei ijes domolaram, unggwasbala jeiserem angtane nafsi seyafter gemerserem jegme jeter ne domola. Jengga Uwa Sanbagiri Jei aamei is enggam bilibene, "Ai aamei isAs batobana, jega unggwasbala jeiserem jam unggwandwasweyan baabeta imna kanaufer jam fyalaiserem jemniwer." Aamei samfer Uwa Sanbagiri kanaufer gam is tebana, aam temawer Uwa Sanbagiri Jei jeber-jeber se eyebili Jei seyafter Jener is jes bilibenerem ibe. Aamei unggwasbala jam ijep domolaram, Uwa Sanbagiri Jei baabeta ip ga ise gulbana, jega aamei gam is bijauswena unggwasbala jeiserem jewer, ane aamei etam-etama kapka ijam eyebiyen. 14 Ga jem temawer am afelen mesna ai isa ajes nesiktababilirim, aamei tiborma jam kwiruluserem jam pujitef, aamei ina ga jam isa bijausona jewer. 15 Ai angtane tousaiserem jebe agemer nasbaipminirim, ai ip jegme isa gemer nasbaipmini. Jewer ga taterisi ai isa ajes nasbaipminirim ibe, aamei waakenfer isa sarsini, ane taterisi aaiserem ga iner isa bili afa bunar, afa fas. 16 Nei Kristus nejeya tebanaram, nei jam negama betwenaram enggalfe tere Kristusmanaiserem negama saribestaabonf, jes jepserem nei fo angguru ga negama telbebili, fo angguru nei jes negama telbebilirim Uwa Sanbagirfe "Ase samfer golmini" ga jem temawer negama gweyibene. Nei fo angguru jeiserem jewer negama telbebilirim, nei ga tere Kristusmanaiserem ga jes negama sarbistaabona, aawisi Jemna aa galap tenbentetyaram. Ane nei nena ga nejema gweraasona enggame neiba safna daamfennaberam Kristusfar. Ane nei rotini jeiserem jam negama syenulnonnorom, ane rotini jeiserem nei jewera tombaabilirim, nei tere Kristusmanaiserem ga nejesa sarbistaabona, tifni Jemnaiserem aa galap ne tamtamtanaram, ane nei nena ga nejama gweraasona enggame neiba tifni daamfennam Kristusfar. 17 Nei safe angtane unggwanfer, nei seyafter rotini daamfenna tefner nejesa tumilirim, ane jega jem temawer neiba tifni daamfennam Kristusfar. 18 Sa sarbistaabon angtane Yahudimanaiserem jem temawer. Angtane Yahudimana tumilgala Uwa Sanbagirfe aa jes gane kitulbonorom mejana Jena Uwa Sanbagirmanaiserem jem sagap bununtelaiserem, ane tumilgala afwer aa jes gane tombaabilirim, jei jeiserem aa jewer gane eyebilirim, jeiba safna daamfennam Uwa Sanbagirs jes gane pujitene. 19 Ai seyafter isa ajes nasipminirim jeme, ai ajam guyon enggame tiborma jam kwirtabaabiliserem jeba igsusum. Ane ai ajam guyon tumilgala tiborma jam kwirtabaabiliserem jep aa jes gane kitulminirim, tumilgala jeiserem ba igsusum. Fasfasus, ai jes gamserem ai gam ajam guyon. Tiborma jam kwirtabaabiliserem, tiborma jeiserem ga igyene. 20 Jengga taterisi amnaiserem jem igiserem ga enggam: Angtane tumilgala tiborma jam kwiruluserem jep aa jei gane kitulminirim, tumilgala jeiserem jei Uwa Sanbagirfe fas jam ne kitulboyon, jengga bwat kapkaiserem ga jep gane kitulmini. Ane angtane tumilgala jeiserem aa jewer gane kitulminirim, jei ga bwat kapkaiserem ga jes gane pujitababili. Afa aamei tumilgala jeiserem jam isa tombaabilirim, angtane tumilgala tiborma jam kwiruluserem jep aa jei ne kitulminirim jebar, gam jega, aamei mese bwat kapkaiserem jes isa pujitababili. Ane ai baibaisus aamei bwat kapka jeiserem ijesa pujitababife. 21 Aamei Kristus iJeya tebanaram, aamei jam igama betwenaram enggalfe tere Kristusmanaiserem gam saribestaabonf, jes jepserem aamei fo angguru igama telbebili, fo angguru angtane Kristusfar daamfennaber aaiserem jei aa jes gane telbebilirim. Ane aamei rotini angtane Kristusfar daamfennaber aaiserem jei aa jes gane tombaabilirim, aamei tumilgala jeiserem igama tombaabili. Afa ga gam jes gemerserem, aamei angtane fo angguru yo tumilgala aa jes gane kitulminirim bwat kapkaiserem jebe enggalfe gam pujitababif, aamei safnant jebar enggam ijama etamweyan safna daamfennaber gamserem, fo angguru jeiserem ijewera telbebilirim, ane tumilgala jeiserem ijewera tombaabilirim jeme. 22 Afa aamei tumilgala Kristusmanaiserem jam isa tombaabilirim, ane tumilgala aa jes gane kitulminirim bwat kabwakmanaiserem jebe jes mese jam igama tombaabilirim, aamei gam ijewera eyebilirim, gam jega Kristus Jei aamei ise nasbabili, ane ga is tamtamtababili. Baabeta imna unggwandwasyan baabeta Kristusmanaiserem jemniwer. 23 Aamei enggam ima gunu, "Nei Kristus nemsa tebana, ane Jei nei nes mesam aftabunnu, ga jem temawer nei nejesa bilirim jam eyebife, seyafter etam-etamabaryanaiserem samfer nesa eyebili." Jeba bunaram, jengga seyafter jam eyebiliserem, seyafter jeiserem angtane nafsi jam batobaabiyen. Bunarsusfer nei samfer nesa eyebili seyafter nei nejesa bilirim jam eyebife. Jengga seyafter jam eyebiliserem, seyafter jeiserem safna Kristus aa jei ne tebanaram jam kanautababiyen, jega nei waakenfer negama gwefe Kristus jam onsobalabe. 24 Angtane Kristus aa jei ne tebanaram jei jam eyebiyen igsusu jelefefener, jengga angtane nafsiserem igsususerem ga jem temawer mese ga galf gam eyebili. 25 Aamei matauwa pasarap aa jes gane jualtababilirim, aamei matau seyafter jeiserem samfer igama tombaabili. Aamei safnant angtane afa ijama tenebayan matauwa jeiserem jem temawer enggame, "Matauwa aaiserem ke mes ne golmini tiborma jam kwiruluserem jebe, afa fas?" Aamei ijama tenebayan matauwa jeiserem jem temawer, jega ini imna is jam ge folbamiyen jam sarstaabonfe enggame, "Matauwa aaiserem ke waakena jam tombaabife, afa kapka?" 26 Aamei tumilgala seyafter gemerserem samfer isa tombaabili, aam temawer Taterisi Uwa Sanbagirmanaiserem jep enggam baatultel: "Ogiri aaiserem ane apgal jigala seyafter aa gemer falaram ogiri aaiserem jebe, jeba Tuhanmanam." (Mazmur 24:1) 27 Afa angtane Kristus jam tebayanaiserem jei aamei jam is gam balaram jena jemnaiserem jep sofwefe enggalfe jam twenf, ane afa aamei jam igam gunurum jam sofwef jem jenabe, tumilgala seyafter gemerserem jei ip ijes gam kitulbonorom, aamei tumilgala jeiserem samfer jamer igam tombaabili. Aamei safnant angtane jeiserem ijam tenebayan tumilgala jeiserem jem temawer enggame, "Tumilgala aaiserem ke imes kitulmini tiborma jam kwiruluserem jebe, afa fas?" Gam jega, ini imna is jam folbayan jam sarstaabonf enggame, "Tumilgala aaiserem ke waakena jam tombaabife, afa kapka?" 28 - 29 Jengga angtane nafsi afa jei aamei jam is gam balaram enggame, "Tumilgala aaiserem mes ne kitulmini tiborma jam kwiruluserem jebe.", afa jei aamei jes gamserem gam jam is gam balaram, aamei tumilgala jeiserem ijam tombaabiyen. Tumilgala jeiserem ijam tombaabiyen, aam temawer angtane nafsi jeiserem aamei is jei gam balaram, jei engbar jelem inibe enggam gam gunu, "Afa ai tumilgala jeiserem jam as tombaabilirim, ai engbar ga etam-etams as eyebili." Angtane nafsi jeiserem jei engbar ga gang gam gunu jes gamserem. Ane afa aamei tumilgala jeiserem jam igam tombaabilirim, angtane nafsi jeiserem ini kapkaiserem ga jes gam damtana tumilgala jeiserem jam tombaabiliserem jem temawer. Angtane imniwer afweraiserem jei engbar ai as tenebana enggame, "Ai tousa, afa ai tumilgala jeiserem jam agam tumilirim, ai etam-etama fas ajam eyebiyen. Jengga angtane nafsi enggam gam gunu jelem inibe, ’Afa ai tumilgala jeiserem jam as tumilirim, ai engbar etam-etama as eyebili.’ Jeje bafa angtane nafsi aa jewer gam gunurum jem temawer, ajam tikwefe tumilgala jeiserem jam tumiliwer? Angtane nafsi jei waakenfer jam towasweyeneiserem. Jeje bafa jem temawer ai ga as tikwena jam eyebiliwer? 30 Ga enggam, ai tumilgala jam jep agam tumilirim, ai Uwa Sanbagiriserem ga agam bala, ’Ase samfer gulbana tumilgala aaiserem jem temawer.’ Jengga angtane ai enggam ga as gane bala, ’Aamei tumilgala jeiserem ijewer tombaabilirim, aamei kapka gam eyebili.’ Jeje bafa gam ga aa ge gubili tumilgala ai ajes tombaabilirim jem temawer, tumilgala jem temawer ai Uwa Sanbagirfe ’Ase samfer gulbana’ amsam gweyibene?" 31 Ai taterisi jeiserem enggam ai tamawolibene jei ai ase jewer tenebanaram: Aamei seyafter ijesa eyebife, jam tumiliserem ane jam telbiliserem jes mese, seyafter jeiserem ijama eyebaabili, jega enggalf ilem afelen mesnaiserem jemna ini gam ge kanausweipmif Yesus jam tebalawer. Aamei jes gemerserem ijewera eyebilirim, aamei Uwa Sanbagiri jem igama pujitefe. 32 Aamei ga enggammer isa gwena, jega angtane nafsi jei aamei ijesa eyebilirim is jam sene domolminirim, angtane nafsi jeiserem jei etam-etama jam ne eyebiyen. Angtane jeiserem ga enggalfener angtane Yahudimana, angtane Yahudimanyan, ane im afelen mesna Kristus aa jei ne tebanaram jei mese. 33 Aamei ga enggammer isa gwena, ai agemer gwenaram. Seyafter ai ajes eyebaabilirim, ai ga enggalf ai eyebaabili, jega ai angtane seyafter gemerserem gam as batobaabili. Ai awelna alem temawer ajam gwebiyen enggalfe, ai ana tefner batobaf. Jengga ai seyafter enggalf ai gwebili angtane nafsi gam batobaabif, jega angtane unggwanfersus jei Kristus ga sene tebana, ane Uwa Sanbagiri Jei angtane jeiserem gase waakentababisini.
111 Ga jem temawer, ai ga enggammer ai gwena Kristus aa gemer gwenaram, aamei jegme gemer is gwena, ai agemer gwenaram. Kristus ba jem Sanbaksam. 2 Aamei waakenfer ga enggam ima eyebili: Taterisi Kristus ap ajes gulbanaram, taterisi jeiserem ai ga isa ajes nasipmini ibe, aamei taterisi jeiserem jeber-jeber ima sarbabistaabonwena, ane taterisi jeiserem ima onsobili. 3 Jengga ini amna ase enggam folbana, aamei taterisi daamfennaiserem ijesa towaswebif. Taterisi jeiserem ga aas: Uwa Sanbagiri Jeiba Kristusem Sanbaksam. Ane Kristus Jeiba anggwana seyafter gemerserem jem Sanbaksam. Ane anggwana jeiba wini seyafter gemerserem jem sanbaksam. 4 Wini imna ba tandanabaram enggalfe jeiserem jem gwerauwulu enggame, wimana sanbaka ba anggwasam. Tandana wimana jeiserem jei jena jem gwerauwulf ga enggam: Jemata jam aa jep gangge betwebilirim sembayangabe, wini seyafter gemerserem duka jam gane matabaabisini fenbiteme. Anggwana fas duka jemna jam ne matabaabisiyen. Aamei ga jes gamserem ga igama eyebuwena. Jega jem temawer, jemata jame aa jep gangge betwebilirim, anggwana afa sembayanga jam aa jep gam gwebanaram, ane afa jei taterisi Uwa Sanbagirminiwer namwer aa jes gam domolaram jam aa jep gam nasibenerem, jes jepserem afa jei duka jelemana jam gam motolsinirim, afa ga gam jes gemerserem, jeiserem kapka. Afa anggwana taterisi Uwa Sanbagirmana jam aa jep gam nasibenerem, ane jes jepserem jei duka jam gam motolsinirim, jeiserem ga kabwaksusu. Je kabwaksusu, aam temawer afa jei jes gamserem gam jam gam eyebilirim, gam jega jeiserem ga jem gam gwerauwulu Kristus Jei jem sanbakyan, jengga anggwana jeiserem jei ga anggwana afweraiserem ga jem gwonap gam gwena. Jei jes gamserem gam jam gam eyebilirim, gam jega jei Kristus gam imei-imeitana. 5 Ane wini jei ga enggam, afa jemata jame aa jep gangge betwebilirim, afa jes jepserem wini jei duka jelemana jam motolsiyeneye, jei sembayanga jame aa jep gam gwebanaram, afa taterisi Uwa Sanbagirminiwer namwer aa jes gam domolaram jam aa jep gam nasibenerem, afa ga gam jes gemerserem, gam jega jei anggwana jelemanaiserem ga jes gam sefer-sefertana, anggwana enggam gam gwebana jem sanbakyana gamserem. Afa jei duka jam motolsiyeneye, jei gam aa jewer gam eyebilirim, jei ga aas galserem ga jes gam eyebili, wini maaryen-maaryena galserem aa gemer gane eyebilirim -- nabal safna jemna seyafter aa jes gane gutunbisinirim enggalfe wini jeiserem jam sefer-seferulf. 6 Afa wini jei duka jemna jam motolsiyeneye, wini maaryen-maaryena galserem, gam jega nabal safna jemna ga jamer gane targaibisini guntinggeme enggalfe jei ga gam sefer-seferswefe. Wini nabal safna jam targabiliserem, afa jam gutunsiliserem, wini jeiserem jei ga jam gam seferswena. Jega jem temawer wini waakenfer ga duka jamer gam motolsini. 7 Anggwana safnant duka jam motolsiyen, aam temawer Uwa Sanbagiri Jei anggwana enggalf eyebal Uwa Sanbagiri Jena galaterserem, ane jega jem temawer anggwana jei Uwa Sanbagirmana bosna ga gam gulbatena. Ane wini jei bosna anggwana jelemanaiserem ga jes gam gulbatena. 8 Bunarsusfer jeba gamam, aam temawer anggwana nabal-nabalsusu Uwa Sanbagiri aa jes eyebalam, jei wiminiwer fas jam suruyon, jengga Uwa Sanbagiri Jei anggwana jeiserem Jener eyebal. Ane wini nabal-nabalsusu Uwa Sanbagiri aa jes eyebilim, wini jeiserem ga anggwaminiwer eyebil. 9 Ane Uwa Sanbagiri Jei anggwana wife Jam eyebayan, jengga Jei wini anggwaf eyeibel. 10 Jega jem temawer, wini jei duka jemna ga jam gam motolsini, jega enggalf malaikata ga gane domola wini jeiserem jei anggwana jelemanaiserem jem baabetem gwonap gwena. 11 Safe gam, nei seyafter Tuhanfar daamfennaber nesa gwena, ane nei Tuhanfar daamfennaber nejewera gwenaram, wini jenfentowai jam gweyan, anggwaminiwer jena jam bijauwulyon. Ane anggwa mese, anggwana jei jenfentowai jam gweyan, jei jena jam bijautayan wiminiwer. Wini yo anggwana jei jen jena ga jam gangge batominenne. 12 Taterisi jeiserem ba bunaram, aam temawer wini nabal-nabalsusu ga anggwaminiwer eyebil, jengga namwer aas jepserem anggwana jei wiminiwer gam surnu. Ane seyaftersus gemerserem, wi mese anggwa, Uwa Sanbagiriserem ga Jei eyebaabil. 13 Aamei angtane kota Korintus je ijeya nwinirim, aamei ga iner isa bili, afa wini sembayanga Uwa Sanbagirfe jam gam gwebabanaram jemata aa jep gangge betwebilirim jebe, duka jam motolsiyenmer, jeiserem ke waakena, afa kapka? 14 Angtane seyafter gemerserem enggam gangge towaswebili jelem inibe, afa anggwamana nabal safna bwalesusu gam folbanaram, wimana gamserem, gam jega anggwana jeiserem jei ga gam seferswena. 15 Jengga, afa nabal safna wimana bwalesusfer gam falbilirim, jeiserem ba waakensusum. Uwa Sanbagiri Jei nabal safna bwalna ga wif golmini enggalfe, duka jem motolsif. 16 Afa angtane esorola ai ajes nasbilirim baif sene gwebilirim jam taabife, ai ga enggamfener ai gunu: ai ane rasulu afweraiserem jei mese ai ga agma towas-towastababinenne jes gemerserem. Ane jemata Uwa Sanbagirmana afweraiserem tamna nafsiserem jeime, jes gemerserem ga gemer ne eyebili. 17 Namwer ai taterisi nafsiserem ga isa ajes nasipmif ibe. Ai ajam guyon aamei waakenfer eyebife. Aamei jam igalaba betwenaram enggalfe tere Yesusmanaiserem jam saribestaabonf, jes jepserem aamei kapkaiserem ga ijesa eyebuwena. Aamei ijesa eyebuwena jeme, aamei ina ijama batomuweyan enggalfe Yesus kanaufer gam tebaf. Jengga aamei ijesa eyebuwenaram jeme, aamei ina ga ijema bijausona Yesusminiwer. 18 Ai taterisi amsam sarbilint im temawer enggame, jemata imnaiserem jam gangge betwebilirim, aamei seyafter ga igama wagwagwena, ane safna daamfennaiserem jei safna afweraiserem jes gane nasbabili. Aamei jes gamserem gam ijewera eyebuwenaram, jeiserem kapka. Ane ai ga enggam ai gunu, ini amna mes jenbana, aam temawer taterisi ai ajes sarbilintim im temawer, taterisi afweraiserem engbar ba bunaram. 19 Jemata ga jam sege wagwagwebili, jeiserem kabwaksusu! Jengga jemata aa jewer ge wagwagwebilirim, jei ga angtane ga sege towaswebili angtane Uwa Sanbagiri kanaufer aa jei ne tebanaram im nenennabe ga fwersa. 20 Aamei jam igalaba betwenaram enggalfe tere Yesusmanaiserem jam saribestaabonf, jes jepserem aamei ijesa eyebilirim, jeiserem ga kabwaksusu. Aamei safe rotini jeiserem igama tumili, ane fo angguru jeiserem igama telbebili, safe gam, aamei bunarsusfer tumilgala Tuhanmanaiserem fas ijama tumilyen. 21 Ai jes gemerserem gam ajewer gunurum, aam temawer angtane seyafter afweraiserem jei nalefe jam ge forobiyen, aamei tumilgala jeiserem aamei igama towaitababili jam tombaabife. Ane jem temawer ga, angtane afweraiserem jei tumilgala jam ne damtabiyen, ane jei wismer ga gangge waraubili jelem jenabe. Jengga angtane afweraiserem jei tumilgala uskambar ga jei gane tombaabili, ane fo angguru uskambar jei gane telbebili jamere jei gangge mabukswebili. Aamei jes gamserem gam ijewera eyebilirim, aamei ga kabwaksususerem ga jes igama eyebili! 22 Fomfoma? Jeje bafa gam je? Aamke jena ke fas, aamei ijeba twenfe? Fasyan, aamei samfer ilem jenaber igama twena, ane fo mese ga jep igama telbebili. Aamei kabwaksusu jes gemerserem gam ijewera eyebilirim, gam jega aamei jemata Uwa Sanbagirmanaiserem ga ijesa imei-imeitabaibef. Ane aamei ilem afelen mesna galgalyenaiserem ga ijesa sefer-sefertababif. Ai ga ibe isa abas bilipmif? Ai ke aamei isa enggam as balbabili, aamei waakenaiserem ijesa eyebili? Fasfasus! Ai bai aamei kabwaksusu jes galserem aamei ijesa eyebife! Aamei ijesa eyebilirim, jeiserem ai aamei gam isa jam towas-towastababiyen. 23 Tuhan ap as jes towas-towastabaibenentem, jeiserem ai ga isa ajes towas-towastabaipminint ibe. Taterisi jeiserem ga enggam: Gwini jeiserem jeme Tuhan Yesus ga jem gaarant ginanggwaminibe, gwini jeiserem Jei rotini ga jem goltenant, 24 ane Jei Uwa Sanbagiri ga balant, "Ase samfer gulbana rotini aaiserem jem temawer." Ane Jei rotini jeiserem ga bitabisinint tafame, ane ga balbabilint, "Rotini aaiserem jeba tifini seyafter Amnaiserem, Ai isa Ajes kitulminirim ibe. Aaiserem ga jam isa eyebili enggalfe, aamei Ai As igama sarbastaabonf." 25 Mangko fo angguruboro jegme gemer, jei jam aa ge tabanswebilirim tumilgala nafis-nafsiserem jam tombaabilibe, Yesus mangko jeiserem ga goltenant, ane Jei Uwa Sanbagiri ga balant, "Ase samfer gulbana." Ane ga balbabilint, "Mangko fo angguruboro aaiserem jeba aawisi Amna Ase jewer tenbentetyaram im temawer. Ane jega jem temawer Uwa Sanbagiri Jei taterisi ibirmiserem ga is bilipmini enggame, Jei etam-etama imnaiserem ga is wirtabaipmini, ane Jei ga aamei ga is eyebaabili enggame angtane Jelemanfe. Aamei jeber-jeber fo angguru aaiserem ga jes isa telbuwena, enggalf isa telbili aamei Ai As igama sarbastaabonf." Yesus ga gam gununt. 26 Bunarsusfer, aamei rotini jeiserem jeber-jeber ima tombaabuwena, ane fo angguru jeiserem ima telbebuwena, aamei jes gamserem gam ijewera eyebilirim, aamei tere Tuhanmanaiserem ga jes igama gweraulmini. Jes gemerserem ga gemer isa eyebili, jamere Tuhan Jei gamjon se fortya. 27 Jega jem temawer, angtane rotini Tuhanmana aa jei gam tumilirim, ane fo angguru Tuhanmana aa jei gam telibenerem ini kabwakmer, angtane jeiserem jei etam-etama kapkaiserem Tuhanem tarnabe ga jes gam eyebili, aam temawer jei tifni yo aawisi Tuhanmanaiserem jam teteyan. 28 Jewer ga, angtane nalef rotini jeiserem jam tumilyen, ane fo angguru jeiserem nalef jam telbiyen, angtane daamfen-daamfennemer jei ini jelemana gwanan ga jamer gam damdamtaasnenne, ane etam-etama aa jes gam eyebilirim gase bilibene Uwa Sanbagirfe. 29 Angtane afa rotini jeiserem jam gam tumilirim, ane fo angguru jeiserem jes mese jam gam telbilirim, ane jes jepserem afa jei rotini yo fo angguru jeiserem jam damdamsosiyeneye enggame, jeba tere Tuhanmanaiserem jem bwenetem temaweram, angtane jeiserem tamtamtala gam domola Uwa Sanbagirminiwer. 30 Aamei rotini jeiserem ijewera tumilirim, ane fo angguru jeiserem ijewera telbebilirim ini kabwakmer, Uwa Sanbagiri Jei jem temawer aamei ga is enggam tamtamtababili, angtane unggwanfer imniwer jei bwerna aa ge folbamini, ane ga aa ge werenswebuwena. Ane angtane afwer jei mes ge terbili. 31 Jengga afa nei nalef rotini jeiserem nejama tumilyen, ane fo angguru jeiserem nalef nejama telbiyen, nei ini nemna gwanan nabala ga jam negama damdamtababisnenne. Afa nei jes gamserem gam jam negama eyebilirim, gam jega Uwa Sanbagiri Jei nei nes jam tamtamtababiyen. 32 Jengga nei Yesus nejeya tebanaram, Uwa Sanbagiri Jei nei nes galap tamtamtababilirim, tamtamtala jeiserem nei nejesa domolaram, tamtamtala jeiserem ga enggalf nei etam-etamawer negama tikwef, jega angtane Yesus jam tebayanaiserem jei aa jep tamtamtababisirim, nei tamtamtala nejama domolyan jebar. 33 Ga jem temawer am afelen mesna, jam jep igama betwenaram enggalfe tumilgala gam tombaabif, ane enggalf tere Yesusmanaiserem gam saribestaabonf, aamei ina ga jam isa fimini jamere aamei seyafter isa betwesini. 34 Wisi afa aa jei gam folbanaram, jei gwanan ga jenaber se twena, jega aamei jam jep igama betwenaram, jes jepserem aamei kabwakfer ijama eyebiyen, ane gam jega aamei tamtamtala ijama domolyan Uwa Sanbagirminiwer. Taterisi nafsiserem jem temawer, ga ai ajep fornaram imnibe, ga isas nasbaipmini ibe.
121 Surta aamei gwanan ap as ijesa tulisulbonontom, aamei ga ams ima tenebana baabetem temawer, baabeta afa karunya Mafnana Uwa Sanbagirmana angtane Kristus aa jei ne tebanaram jep aa jes kitulminirim. Am afelen mesna, baabeta Mafnana Uwa Sanbagirmana aa jes kitulminirim, baabeta jeiserem ga nafis-nafsim kitulmuwena. Ai enggam ai gunu, ai aafe isa ajam towasulmif baabeta nafis-nafsiserem jem temawer enggalfe, aamei waakenfer gam isa sarbili. 2 Aamei imsa sarbistaabona enggame, aamei Kristus nalef ijama tebayan, jes galapserem bwat kapka unggwanfer jei aamei is jeteram afaf-afaftababuwenant, ane jega jem temawer aamei tiborma jam kwirtabaabiliserem igama pujitababif, tiborma baabetyenaiserem. 3 Jega jem temawer, ini amna ga as enggam folbana, aamei taterisi aaiserem waakenfer ijama towaswebif: Angtane aa jei gam nasounaram baabeta Mafnana Uwa Sanbagirmanaiserem jeme, angtane jeiserem jei fasfasus enggam jam guyon, "Yesus se babapsoba!" Angtane aa jei gam nasounaram baabeta Mafnana Uwa Sanbagirmanaiserem jeme, angtane jeiserem jei enggam gam gunu, "Yesus Jeiba Tuhansam." 4 Baabeta Mafnana Uwa Sanbagirmana nep nes jes kitulminirim nei Kristus nejeya tebanaram, baabeta jeiserem jeba nafis-nafsim aa jes kitulmuwenaram. Jengga baabeta seyafter jeiserem safe nafis-nafsi, Mafnana daamfennaiserem ga Jei gam kitulmuwena. 5 Nei Kristus nejeya tikwebaatinennerem, awelna nei nejesa gwebilirim, awelna jeiserem nafis-nafsi. Jengga awelna nei seyafter nejesa gwebilirim, awelna jeiserem ga Tuhan daamfennaiserem ga neJeba gweyibene. 6 Uwa Sanbagiri Jeiba daamfennam, jengga Jei awelna nafis-nafismer gam gwebili, nei angtane Kristen seyafter gemerserem gwela nemnaiserem jebe. 7 Mafnana Uwa Sanbagirmana Jei baabeta Uwa Sanbagirmana nebe nes daamfen-daamfennem kitulmuwena, jega enggalf angtane Kristen seyafter gemerserem gam gane batobaabili. 8 Mafnana Uwa Sanbagirmana Jei tousaiserem enggalf se golmini angtane Kristen afweraiserem jebe, taterisi waakenfer gam ne nasbinennef, taterisi Uwa Sanbagirem temawer, ane Taterisi Waakena bunarsusferaiserem. 9 Mafnana daamfenna jeiserem Jei baabeta enggalf golmini angtane Kristen afweraiserem jebe, jega jei kanaufer gane tebaf enggame, Uwa Sanbagiri Jei ga etam-etama unggwandwasususerem gase eyebili. Ane angtane nafsiserem jep jegme baabeta enggalf golmini, angtane gam waakentababif bwerna nafis-nafsiserem jewer. 10 Mafnana Uwa Sanbagirmana Jei baabeta enggalf golmini angtane Kristen afweraiserem jebe, jei bwembwema waakensusu jem gane eyebif. Ane angtane nensa jep jegme baabeta enggalf golmini, jei taterisi gane nasbinennef, taterisi Uwa Sanbagirminiwer namwer aa jes gane domolaram. Mafnana jeiserem Jei angtane nafsiserem baabeta jep jegme enggalf golmini, angtane jeiserem jei gam gangge towaswebili angtane aa jei gam nasbilirim jem temawer. Jei enggam gangge towaswebili angtane jeiserem jei ke baabeta bwata kapkaiserem jem gam nasowena, afa jei ke baabeta Mafnana Uwa Sanbagirmanaiserem jem gam nasowena. Ane Mafnana Uwa Sanbagirmana Jei angtane Kristen afweraiserem jep jegme baabeta enggalf golmini, jei gam ge nasbawef ula nafis-nafsiserem jeme, ula jei jener jam ne towaswebiyeneiserem, ula jeiserem angtane fas jam ne towas-towastayan. Ane angtane nafsiserem jep jegme baabeta enggalf golmini, jega jei ula nafis-nafsi jeiserem jei jam towaswebiyeneiserem jem igiserem ga gam sarbili, ane angtane nafsiserem jep ga gam towasulmini. 11 Baabeta seyafter jeiserem safe nafis-nafsi, jengga Mafnana Uwa Sanbagirmana daamfenna jeiserem nebe ga nes Jei kitulmuwena. Ane Mafnana Uwa Sanbagirmana Jei nei seyafter gemerserem nebe nes daamfen-daamfennem se kitulmuwena, Jei Jener aa gemer gam gunurum. 12 Tifni imna seyafter ba daamfennam, jengga tifni imna jeiserem jebe safna anesus. Ane tifni imna jeiserem safan mesna safe unggwanfer, jengga tifni imna ga daamfenna, safna seyafter jeiserem jemniwer. Jes gemerserem aaiserem jegme gemer, nei angtane Kristus nejeya tebanaram safe unggwanfer, jengga nei seyafter tifni daamfennam, tifni Kristusmanaiserem. 13 Nei seyafter Kristus nejeya tebanaram, nei nes mesam baptistababili Mafnana daamfennaiserem jeme, jega enggalf nei gam nesa etamwena daamfen tifniber Kristusfar. Angtane afweraiserem nemniwer jei angtane Yahudimana, ane afwer ga angtane Yahudimanyanaiserem. Angtane afwer nemniwer jei angtane bastowaisusu, ane afweraiserem jei angtane sanbaka. Safe gam, neiba tifni daamfennam, ane Uwa Sanbagiri Jei nei seyafter gemerserem Mafnana daamfenna nes mesam golmini nem inibe. 14 Tifini seyafter imna ga daamfenna, jengga tifini seyafter imna jemna safna daamfenyan, safna tifinmanaiserem ga unggwanfersus, ane awelna safanemana ga nafis-nafsi. Awelna nei jes negama eyebilirim baabeta nafis-nafsiserem Mafnana Uwa Sanbagirmanaiserem nep nes jes gam kitulminirim jeme, jeiserem ga safna nafis-nafsi tifinmana gemerserem. Angtane Kristen afweraiserem jei ga enggam ge gubili, "Awelna amnaiserem je igyen, ane jega jem temawer ai safna daamfenna tifin Kristusmanyan." Angtane jei gam aa jewer gangge gubilirim, jeiserem ga enggalam: 15 Afa tufa angtanemana jam gam gunurum enggame, "Ai tafayan, jega jem temawer ai safna tifinmanyan." Tufa safe jes gamserem gam gang gunu, tufa jeiserem jei jenfentowai jam nulayan tifinminiwer, tufa jeiserem gemer nulna tifinibe. 16 Ane afa imwana jam gam gunurum enggame, "Ai nweyan, jega jem temawer ai safna tifinmanyan." Imwana safe jes gamserem gam gang gunu, imwana jeiserem jei jenfentowai jam tensiyen tifinminiwer. 17 Afa tifni imna is jam gam etamwebanaram nwefefener, gam jega aamei ga fomfom igam sara? Ane afa enggam tifni imna seyaftersus gemerserem is jam gam etamwenaram imwafe, gam jega aamei apgal jigala fomfom igam aalumbili? 18 Jengga bunarsusfer Uwa Sanbagiri Jei tifni nemna aa galap eyebaabilim, Jei tifni nemnaiserem jem safanfe unggwanfersus eyebaabil, tof mese imwa, nwe, aarem. Jei tof teten fas Jam eyemiyen. Ane tof mese imwa, nwe, aarem seyafter gemerserem, daamfen-daamfennemer mesam bunulntenannal tampata jeberserem jebe, Jei Jener aa gemer gulum. Tafa je jelem tampataber, ane nwe jeme jelem tampataber. 19 Afa tifini seyafter imna is tof tefner gam eyebaipmilim, gam jega tifni imna fas! 20 Jengga bunar-bunarsusfer ga enggam, tifini imnaiserem safna jemna unggwanfersus, ane safna seyafter gemerserem aamei ga ijesa balbabili, jengga tifni imna ga daamfenna. Jes gemerserem aaiserem jegme gemer: Uwa Sanbagiri Jei mes eyebili jega nei seyafter Kristus nejeya tebanaram, nei ga safna tifini Kristusmanfe ga neya etamwena. Ane Uwa Sanbagiri Jei ga angtane Kristenf ga awelna daamfen-daamfennem kitulmini jematabe, Jei Jener aa gemer gam gunurum. 21 Nei angtane Kristenfe nejeya gwenaram, Mafnana Uwa Sanbagirmana Jei baabeta daamfen-daamfennem nep kitulmuwena enggalfe, angtane Kristen seyafter gemerserem jem negama batobaabuwef. Jega jem temawer, nei nen nena nejama tetenanayan baabeta Mafnana Uwa Sanbagirmana nep nes jes kitulmuwenaram jem temawer. Ane nei angtane Kristen nafsiserem enggam nejama balyan, "Ai aamei isa baif gwebana jemata aaiserem jebe." Tifni imnaiserem jem temawer, nwena imna, tafna imna enggam fasfasus jam gitmiyen, "Afa aamei amnip fas, ai samfer anfentowai as gwena." Ane duka imna, tufa imna enggam fasfasus jam gitmiyen, "Ai aamei isa bai gwemini. Ai anfentowai gwef." 22 Gamyan! Safna tifinmanaiserem aa jes gane balbabilirim enggame werna, jeba bunarsusfer safna igsusu. 23 Ane safna tifinmanaiserem aa jes gane balbabilirim enggame safna jeiserem jei igyen, nei safna jeiserem bunarsusfer ga negama gerebaabisnenne. Ane safna tifinmanaiserem aa jes gane balbabilirim angtane nafsi fas jam ne domolyanaiserem, nei safna jeiserem jeber-jeber jam negama matabaabisiwena. 24 Jengga safna tifinmanaiserem aa jes gane balbabilirim angtane samfer jam ne damtabiliserem, nei safna jeiserem nejama matabaabisiyen. Uwa Sanbagiri Jei tifni nemna nes mesam eyebaipmil. Ane tof mese imwa, nwe, aarem, Uwa Sanbagiri Jei safna seyafter gemerserem daamfen-daamfenneme waakenfer mesam bunulntenannal tampata jeberserem jebe, jega enggalf safna tifinmanaiserem aa jes gane balbabilirim igyene, safna jeiserem ga waakensusfer gane gerebaabisnenne. 25 Uwa Sanbagiri Jei tifni ga gam eyebaabil jes gemerserem, jega tifni seyaftersus jeiserem jam wagwagweyan, jengga safna seyafter gemerserem jei jena ga jam gane batominenne. 26 Afa safna tifinmana daamfennaiserem jei gam siginswenaram, tifni seyafter gemerserem ga gam sigin-ginswena. Ane jes gemerserem aaiserem jegme gemer, afa safna tifinmana daamfennaiserem waakenfer gane gerebaabisnennerem, tifni seyafter gemerserem ga saaser-saaserfer gam fala. 27 Nei Kristus nejeya tebanaram, nei seyafter gemerserem neiba tifni Kristusmanam. Ane aamei daamfen-daamfennemer seyafter gemerserem, aamei ga safan mesna tifni Kristusmanaiserem jebe. 28 Uwa Sanbagiri Jei tampata daamfen-daamfennem is mesam destabaipmini jematabe, aamei Kristus ijeya tebanaram seyafter gemerserem. Jei angtane aas galserem mesam destabaabili: Nabal-nabalsusu ga rasuls destabaabili. Naurabarf ga, angtane taterisi Uwa Sanbagirminiwer namwer aa jei gane domolaram enggalfe taterisi jeiserem jei gane nasbinennef. Nawer-ningginf ga, guru-guru taterisi Uwa Sanbagirmana aa jei ne towas-towastababilirim, Jei ga jes destabaabili. Ane Jeimba mesam destabaabili angtane aas galserem: angtane bwembwema aa jei ne eyebuwenaram jei mese; angtane baabeta aa jep ne kitulminirim enggalfe angtane jem waakentababif; angtane, angtane nafsi aa jei ne batobaabuwenaram; angtane awelna jematabe aa jei ne taabilirim; ane angtane ula nafis-nafismer aa jei ne nasbabuwenaram, ula jei jener jam ne towaswebiyeneiserem. 29 Bunar-bunarsusfer, angtane jematabe jei seyafter rasulyan. Jei seyafter taterisi Uwa Sanbagirminiwer namwer aa jes gane domolaram jam ne nasbabiyen. Jei seyafter guruyon. Fas angtane seyafter jematabe jei baabeta jam ne domolyan enggalfe, bwembwema jem gam eyebaabife. 30 Jei seyafter angtane nafsi jam ne waakentababiyen. Jei seyafter ula nafis-nafsiserem jam ne towaswebiyeneiserem fas jam ne nasbabuweyan. Ane jei seyafter ula nafis-nafsi jeiserem jem igiserem jam ne sarbiyen, ane jei jam ne nasbiyen. 31 Jega jem temawer, ini imna unggwanfer ga is enggalf sege folbamuwena, aamei baabeta igsususerem igama damtabif. Ane ai nele waakenaiserem isa jes ge saamisini ibe, nele aaiserem jei waaken-waakensusu nele seyafter afweraiserem jemniwer. Nele jeiserem ga aas: nei angtane nafsi ga jam nesa nesiktababuwena.
131 Ai safe ula nafis-nafsi angtanemanaiserem jem as nasowena, jengga afa ai angtane nafsiserem ajam nesiktababiyeneye, gam jega ai ajes nasbinennerem jemna igi fas. Ai safe ula ai aner ajam towasweyeneiserem Mafnana Uwa Sanbagirmana ap as jes gulbanaram, safe jem as nasowena, ane safe malaikatem olem as nasowena, jengga afa ai angtane nafsiserem ajam nesiktababiyeneye, gam jega ai aa jes nasbinennerem, jeiserem uskambarsus tisanfennaiserem jei ga gam falbili, igi jemna fas. 2 Ai safe baabeta enggalf jam as domolwena taterisi agam nasibenenef, taterisi Uwa Sanbagirminiwer namwer ajes domolaram; ane ai safe taterisi Uwa Sanbagiri aa jes mwangbisilim, Uwa Sanbagiri Jei taterisi jeiserem angtane gwanan fas Jam towasulmiyen jamer abaka, ai safe taterisi jeiserem jam as sarbabuwena waakenfer, jengga afa ai angtane nafsi ajam nesiktababiyeneye, gam jega ai igyene. Ane ai safe tousaiserem Uwa Sanbagirem temawer seyaftersus jam as damtabuwena; ane ai safe Uwa Sanbagiri kanaufer jam as tebana enggalfe, ai taarena agam balf jam gwisife jelem tampatawer, ane taarena jeiserem se gwisini jewer; safe seyafter jeiserem jam agam eyebili, jengga afa ai angtane nafsi ajam nesiktababiyeneye, gam jega ai igyene. 3 Ai seyafter ajes damtabilirim, jeiserem ai safe jam as kitulmini angtane galgalyenaiserem jebe; ane ai safe an ana jam as gera enggalfe jam giransif; jengga afa ai angtane nafsi ajam nesiktababiyeneye, gam jega seyafter jeiserem igi ga fas, jam sege elbesini. 4 Afa aamei angtane nafsi jam igam nesiktababuwenaram, aamei jafner igam fina angtane kapkaiserem ip jam is gane eyeibenerem. Ane angtane nafsiserem jam igam batobaabili. Afa aamei angtane nafsi jam igam nesiktababuwenaram, imna ini uskamer is jam folbayan galgala angtane nafisemanaiserem jem temawer. Aamei in ina ijam gaartenanayan, ane aamei waakenfer jes igam eyebilirim, jeiserem ijam nasbineneyen. 5 Afa aamei angtane nafsi jam igam nesiktababuwenaram, apgal jigala angtanef jes igam eyeipminirim, aamei ini kabwakmer ijam eyeipmiyen. Ane ini imna unggwan-giri is jam folbayan enggalfe, waakenaiserem ilefefener ijam eyebife. Afa aamei angtane nafsi jam igam nesiktababuwenaram, aamei tatarfer ijam uskamsweyan. Ane aamei angtane ilem witifinip fas ijam gatasiyen enggalfe kapkaiserem ijam fwainulbofe. 6 Afa aamei angtane nafsi jam igam nesiktababuwenaram, ini imna saaser-saaserfer ijam folbayan, angtane nafsi jei etam-etama kapka aa jep gane eyebilirim. Jengga ini imna saaser-saasera ga is aam temawenefener gam folbana, gwela waakenaiserem jem temawer. 7 Afa aamei angtane nafsi jam igam nesiktababuwenaram, angtane etam-etama is jei gane eyeibenerem ibe, aamei etam-etama jeiserem ga jeber-jeber igam borolmini. Ini imna jeber-jeber is waakenfer gam folbana angtane nafsiserem jem temawer. Ane aamei safe tamtamsusu jam igam domola, jengga aamei kanaufer igam fina. 8 Angtane, angtane nafsiserem ga jamer sene nesiktababuwena jamer abak-abaksus. Jengga angtane baabeta aa jei ne domolaram enggalfe, taterisi Uwa Sanbagirminiwer namwer aa jes ne domolaram jem gane nasbinennef, angtane jeiserem jei galabe sege tikwebisi taterisi jeiserem jam ne nasbinenelewer. Ane angtane baabeta aa jei ne domolaram enggalfe, jei ula nafis-nafsi jei jener jam ne towaswebiyeneiserem ula jeiserem jem gangge nasbawefe, angtane jeiserem jei galabe ula nafis-nafsi jeiserem jeme jam ge nasbaweyan. Ane angtane baabeta aa jei ne domolaram enggalfe, jei taterisi Uwa Sanbagirem temawer jem ne nasbinennefe, taterisi jei waakenfer aa jes ne towaswebilirim, angtane jeiserem jei galabe taterisi jeiserem gamjon jam ne towaswebiyen. 9 Angtane jei jes gemerserem jam nasbiliserem galabe sege tikwebisi, aam temawer taterisi seyafter galap aa je etamwesaram jem temawer, taterisi jeiserem nei namwer bastowaifefener neya towaswena, ane namwer nei bastowaifer neya nasbili. 10 Jengga galap, Uwa Sanbagiri Jei se eyebaabisi enggalfe, nei seyafter taterisi seyaftersus gemerserem negama towaswebabif. Jes jepserem baabeta nei namwer bastowaifer nejeya damtabilirim, baabeta seyafter jeiserem sege barwebisi. 11 Ga enggam, ai gwanan bastowaisamer galapserem, jes galapserem ai tantouya bastouya galserem ai ga agemer nasowenant, ane ai tantouya bastouya galserem ai ga agemer gunu alem inibe, ane tantouya gemerserem ai ga gemer agam sara. Jengga namwer aas jepserem ai ames unggwan-girswena, gwela amna as jei folbanantam enggame tantowaimana gwela galserem, gwela amna jeiserem ames firulniwili. 12 Jes gemerserem aaiserem jegme gemer, namwer nei Uwa Sanbagiri bastowaifer neya towaswebana, kacana kaburu mir mase bastowaifer jep jam damtabitela gamserem. Jengga galap seyafter gemerserem nei waakenfer ga nesa towaswebisi, Uwa Sanbagiri Jei nei nes gemer damdamtababisinirim waakenfersus. 13 Bunarsusfer, nei taterisi nawer-ningna ga jamer nesa eyebuwena jamer abak-abaksus. Taterisi nawer-ningna jeiserem ga aas: Nei Uwa Sanbagiri jamer nesa tebana. Neiba nemsama towaswena enggame, Uwa Sanbagiri aa jes bilirim Jam eyeipmife, Jei seyafter jeiserem se eyebili. Ane nei Uwa Sanbagiri ga jam nesa nesiktauna, ane angtane nafsiserem jes mese nei ga jam nesa nesiktababuwena. Taterisi nawer-ningna jeiserem jemniwer, igsususerem ga aas: Uwa Sanbagiri ane angtane nafsiserem jes nesikteleiserem. nasbinennef, taterisi Uwa Sanbagirminiwer namwer aa jes ne domolaram, |iane baabeta ula nafis-nafsiserem jener jam ne towaswebiyeneiserem jem ne nasbinennef)
141 Ga jem temawer, gwela imnaiserem jeme nabal-nabalsusu ga aas isa eyebili, aamei angtane nafsiserem ga jam isa nesiktababuwena. Ane ini imna unggwanfersus ga is enggalf sege folbamini, baabeta afa karunya-karunya Mafnana Uwa Sanbagirmana aa jes gam kitulminirim jeiserem jam tebabife. Nabal-nabalsusu aamei jam ijesa taabife ga aas: baabeta enggalf taterisi Uwa Sanbagirminiwer namwer ijesa domolaram, jeiserem ijema nasbinennefe. Jeiserem ba igsusum. Ula nafis-nafsiserem jam towaswebiyeneiserem jem jam nasoulaiserem je igtouya. 2 Afa aamei nafis olem jam igam nasounaram, ula aamei iner ijam towaswebiyeneiserem, aamei angtanefar ijam ge nasoweyan, jengga aamei Uwa Sanbagirfar igangge nasowena, aam temawer angtane afa fas ula nafsi aamei jem igam nasounaram is jei saribefe. Mafnana Uwa Sanbagirmana Jei aamei is gam gwebana, taterisi Uwa Sanbagiri Jenfentowai aa jes gam towaswebilirim aamei jeiserem igam nasbili. 3 Jengga afa aamei taterisi Uwa Sanbagirminiwer namwer jes igam domolaram jeiserem jes igam nasbinennerem, aamei ga angtane nafsiserem jep igam nasipminenne enggalfe jemata jem gam kanautababife, ane enggalf jei gam batobaabif, ane enggalf ini jemna jam ge jenbamiyen jei kabwaktala jam aa jep gane domolaram. 4 Angtane nafis olem jei jener jam towaswebiyeneiserem aa jei gam nasounaram, jei ga ini jelemana tefner gam kanautana. Jengga angtane taterisi Uwa Sanbagirminiwer namwer aa jei gam domolaram angtanef aa jei gam nasipminirim, jei ga jemata ga jes gam kanautababili. 5 Ini amna safe ase saaser-saaserfer se folbana, afa aamei seyafter ula nafis-nafsiserem aamei iner ijama towaswebiyeneiserem jem jam isa nasounaram, jengga ini amna unggwan-girfer ga as enggalf folbana, aamei taterisi Uwa Sanbagirminiwer namwer ijesa domolaram ga jes isa nasipminenne angtanefe. Angtane taterisi Uwa Sanbagirminiwer namwer aa jei gam domolaram aa jei gam nasbinennerem, angtane jeiserem ba sanbakam. Angtane ula nafis jei jener jam towaswebiyeneiserem aa jei gam nasbabilirim jei sanbak touya. Jengga jei sanbaka gase etamwena afa aaiserem aa jep etamwenaram: afa angtane nafsi jemata jeiserem jebe jei ula nafis jeiserem jem igiserem jam gam sarbilirim, ane jemata jeiserem jep ga gam towasulmini enggalfe jei gam kanautababif. 6 Am afelen mesna, afa ai jam agam fornaram imnibe, ane ai ula nafis ajam towaswebiyeneiserem jem ga agam nasowena, ula aamei mese ijama towaswebiyeneiserem, afa ula jeiserem jemfener agam nasowena, gam jega aamei ai jes agam nasbilirim igi jemna ijama sarbiyen, ane ai aamei isa ajam batobaabiyen. Jengga taterisi bunarsusfer aaiserem Uwa Sanbagiri ap as jes gwerauwulbonorom, afa ai taterisi jeiserem isa jam agam nasipminirim ibe; afa ai taterisi Uwa Sanbagirem temawer isa jam agam nasipminirim ibe; afa ai Taterisi Uwa Sanbagirminiwer namwer ajes domolaram, taterisi jeiserem jam as nasbilirim; afa ai Taterisi Uwa Sanbagirmana ip isa jam as towas-towasulminirim; afa ai seyafter jeiserem gam jam agam nasipmini ula aamei ijesa sarbilirim jeme, gam jega ai ims agam batobaabili. 7 Ane aaiserem jegme gemer, afa alat musiki busu jam forforulu galserem, ane gitara jam enenuluserem, afa tisna jemna ga daamfennaber gam nulamini, gam jega angtane fas jam ge towaswebiyen enggame, jei ga simala aaiserem ga jes ne gwebana. 8 Ane afa enggam, ginanggwana daamfenna trompeta jam gam forolaram enggalfe, ginanggwa nafsi jem ge towaswebif jei jam ge menetwebisif enggalf jam ge erabaf, afa ginanggwana daamfenna jeiserem jei trompeta syefer jam gam forolaram, gam jega ginanggwa afweraiserem jei waakenfer jam ge sarbiyen, ane jei jam ge menetwebisiyen enggalfe jam ge erabaf. 9 Jes gemerserem im temawer jegme gemer. Afa aamei angtanefar jam igama nasounaram, ula nafis-nafsiserem jei jam ne towaswebiyeneiserem jeme, gam jega taterisi aamei ijes nasbilirim angtane afa fas is jam ne sarbiyen. Taterisi imna jeiserem ga enggala tamanfennap nasowela gamserem. 10 Ogiri aaiserem jebe ula nafis-nafsi unggwanfersus, ane ula seyafter jeiserem jeba igiberem. 11 Angtane afa jam gam nasounaram ula nafsi ajam sarbiyeneiserem jeme, gam jega jei taterisi aa jes gam nasbilirim, ula jemna ga jem tisna tefner agam sarbabisini. Afa ga gam jes gamserem, gam jega angtane jeiserem jei abar ga enggala, ai jebar jam ge dorweyana galserem. 12 Jes gemerserem im temawer jegme gemer. Ai amesam towaswena enggame, ini imna is unggwan-giri ge folbamini enggalfe, baabeta Mafnana Uwa Sanbagirmana aa jes gam kitulminirim, baabeta jeiserem ijama damtabife. Jengga nabal-nabalsusu ini imna ga is enggalf sege folbamini, baabeta aaiserem ijama tebabif, baabeta jeiserem jega enggalf aamei jemata Kristus aa jei ne tebanaram jei gam isa kanautababili. 13 Ga jem temawer, afa aamei ula nafsiserem jeme igam nasounaram, ula aamei iner ijam towaswebiyeneiserem, aamei Uwa Sanbagirfe sembayanga ga jam igam gwebabana enggalfe, Mafnana Uwa Sanbagirmana Jei baabeta gamjon ip is gam gulbaf, jega baabeta aamei jem igam nasounaram ula nafsiserem jeme jem igiserem gam igam sarbili, ane angtane nafsiserem jep ga igam towasulmini. 14 Afa Mafnana Uwa Sanbagirmana ai jam as gam gwebanaram sembayanga jam gwebafe, ula nafsiserem ai aner ajam towaswebiyeneiserem jeme, ai mafnana amnaiserem sembayanga jem agam gwebana, jengga ini amnaiserem jebe, ai ajam towasweyan taterisi jeiserem jem igiserem. 15 Jega jem temawer, ai ga enggam as eyebili: Nunu afweraiserem ai sembayanga as gwebana Mafnana Uwa Sanbagirmanaiserem jeme, ula nafsiserem ai aner ajam towaswebiyeneiserem. Ane aime nunu afweraiserem ai sembayanga as gwebana, ula jem igiserem ai ajes towaswebilirim jeme. Ane nunu afweraiserem ai simala as twola Mafnana Uwa Sanbagirmanaiserem jeme, ula nafsiserem ai ajam towaswebiyeneiserem. Ane aime nunu afweraiserem ai simala as twola, ula jem igiserem ai ajes towaswebilirim jeme. 16 Afa Mafnana Uwa Sanbagirmana Jei aamei jam is gwebabilirim, aamei Uwa Sanbagiri ijama pujitefe ula aamei ijama towaswebiyeneiserem jeme, ane angtane nafsi jei jep aa jei gangge nwinbenerem, jei ula jeiserem fas is jam ne saripmiyen, gam jega angtane jeiserem enggam fas jam ge gubiyen, "Amin, jem igiserem ga enggam, sembayanga jeiserem aa jewer gwebanaram ba bunaram." Jei jes gemerserem jam ge gubiyen, aam temawer jei taterisi aamei ijesa nasbilirim, igi jemna fas jam ne sarbiyen. 17 Sembayanga imna jeiserem Uwa Sanbagirfe ase samfer gulbana jewer igama gweyibenerem, ane sembayanga jeiserem aamei jes ijewera gwebanaram ula jam towaswebiyeneiserem jeme, jei safe waaken-waakensusu Uwa Sanbagirfe, jengga sembayanga imna jeiserem angtane nafsi fas jeme ijama batobaabiyen. 18 Ai Uwa Sanbagiri enggam ai bala, "Ase samfer gulbana.", aam temawer ai ula nafis-nafsiserem ai aner ajam towaswebabiyeneiserem, ula jeiserem ai ajem nasowena uskambarsus aamei seyafter gemerserem imniwer. 19 Jengga ini amna ga as enggalfe folbana, jemata aa jep gangge betwebilirim, angtane jematap jeiserem jei waakenfer gane sarbili ai jes agam nasbilirim. Afa ai katana bastowaifefener agam nasbili enggalfe angtane gam towas-towastababif, ane angtane katana bastowaifer jeiserem waakenfer gane sarbili, jeiserem ba waakenam. Jengga afa ai katana unggwanfersus, ula nafis-nafsi angtane jam sarbiyeneiserem jem agam nasbilirim jemnibe, jeiba kapkam. 20 Am afelen mesna, gwela imna ga is enggam sege folbamini tanna bastantouya gamserem, etam-etama kapka jam eyebiyeneiserem. Jengga aamei ijesa bilirim ilem inibe, ini imna safnant is jam ge folbamiyen enggame tantowaimana ini galserem. Aamei safnant in ina ijama tetenanayan baabeta ijesa domolaram jem temawer, baabeta ula aamei iner ijama towaswebiyeneiserem jem jam nasowefe. Jengga ini imna ga is enggam sege folbamini ini angtane sanbak-sanbakmana gamserem. 21 Gwanan jes galapserem angtane Yahudimana jei taterisi Uwa Sanbagirmana baife aa galap ne gweyibelem jam ne saribefe, nabi Uwa Sanbagirmana jei Taterisi Uwa Sanbagirmanaiserem jep ga enggam baatultel angtane Yahudimanaiserem jem temawer: "Aiba Tuhansam, Ai enggam Ai gunu, ’Ai angtane Amnaiserem jep enggam As nasipmini: angtane negeri nafis-nafsiserem ga sege forobuwetya, ga ula jemnaiserem jem sene nasipmini. Safe gam, angtane Amnaiserem jei baif sene gwebili As jam ne sarbasife.’ " (Yesaya 28:11-12) Jes gemerserem aaiserem jegme gemer, aamei angtanefar igalaba nasounaram, ula jei jam ne towaswebiyeneiserem jeme, gam jega aamei is baif sene gwebabili is jam ne sarbabisife, ane aamei angtane jeiserem ijama batobaabiyen. 22 Baabeta aa jes gane domolaram, ula nafis-nafsiserem jei jener jam ne towaswebiyeneiserem jem gam nasowefe, baabeta jeiserem jeba tandana galserem. Angtane ula nafis-nafsi jeiserem jem aa jewer gangge nasbawenaram, jei ga baabeta Uwa Sanbagirmana jem ga aa saamisini, angtane Kristus jam tebayanaiserem jebe, angtane Kristus aa jei gane tebanaram jepyan. Ane baabeta jes gane domolaram enggalfe, taterisi Uwa Sanbagirminiwer namwer aa jes gane domolaram jeiserem angtanef jem gane nasbinennef, baabeta jes mese tandana galserem. Jengga baabeta jeiserem ga baabeta Uwa Sanbagirmana jem aa saamisini angtane Kristus aa jei ne tebanaram jebe, angtane Kristus jam tebayanaiserem jemnipyan. 23 Jewer ga, afa angtane seyafter jemata imnaiserem jebe jei jam gangge betwebilirim, ane afa aamei seyafter ula nafis-nafsiserem aamei iner ijama towaswebiyeneiserem jeme jam igama nasounaram, ane afa angtane Kristus jam tebayanaiserem, afa angtane jei baabeta Mafnana Uwa Sanbagirmana angtanef aa jes gam golminirim jem temawer jam ne towaswebiyeneiserem, afa angtane jeiserem jam gangge forobityerem, ane jei aamei ga is gane sarbabisini ula nafis-nafsi jeiserem jem jam igama nasounaram, afa ga gam jes gemerserem, gam jega jei aamei seyafter ga is gane balbabili miri imna kapka, ula nafis-nafsi ijama towasweyeneiserem jem ijewera nasounaram. 24 Jengga afa aamei seyafter gemerserem, taterisi namwer jes igama domolaram Uwa Sanbagirminiwer jeme jam igama nasowenaram, ane jes jepserem angtane Kristus jam tebayanaiserem, afa angtane jei baabeta Mafnana Uwa Sanbagirmana angtanef aa jes gam golminirim jem temawer jam towaswebiyeneiserem, afa angtane jes galserem jam gam fortyaram, ane jei taterisi aamei jes igama nasbilirim jei jeiserem ga gam sarbabisini, gam jega angtane jeiserem jei bunarsusfer ga gam towaswebili enggame, "Aiba angtane etam-etamabaram." Ane jei jelem inibe etam-etama jei aa jes gam eyebuwenaram ga gam sarbabistaabonwena. 25 Taterisi jei jelem inip basyamer aa jes gam gwaataasinirim, jei taterisi jeiserem ga gam nasbili jemata jem tarnabe. Ane jei jen jena ga gam onabertana, ane Uwa Sanbagiri ga gam pujitene. Ane jei enggam ga gam gunu, "Bunar-bunarsus Uwa Sanbagiri Jei im nenennap gwena!" 26 Ga jem temawer am afelen mesna, aamei jam jep igama betwenaram enggalfe Uwa Sanbagiri gam pujitef, aamei ga enggam isa eyebili: Angtane afwer jei simala jei sene twola, afwer angtane jei gane towas-towastababili, afwer taterisi Uwa Sanbagiri aa jes gwerauwulurum jei gane nasbili, afwer jei ula nafis jei jener jam ne towaswebiyeneiserem jei jem gangge nasbawena, ane afwer ula nafis-nafsi jeiserem jem igiserem ga jes ne towasulmini. Aamei seyaftersus jeiserem ga jamer isa eyebili enggalfe, safna Kristus aa jei ne tebanaram jei gam kanautababif. 27 Angtane afa imniwer jei ula nafis-nafsiserem jei jener jam ne towaswebiyeneiserem jam gangge gubilirim jem nasowefe, waakenfer ga angtane nawerfenna, afa uskambar gam jega nawer-ningna tefner, ga jei sene nasbabili, daamfen-daamfennem. Ane angtane aasaje ga ula nafis-nafsi jeiserem aa jes ne nasbabilirim jem igiserem ga jam se towas-towasulmini. 28 Jengga angtane afa fasaye jei towasulmiliserem jei aa jes ne nasbiliserem jem igiserem, gam jega angtane jeiserem ula nafsi jei jener jam towaswebiyeneiserem aa jei gunurum jem jam nasowefe, jei safnant jes gemerserem gam jam nasowefe jemata aa jep gangge betwebilirim jebe. Jei samfer jelem inipfener ga gam nasowena Uwa Sanbagirfar, ula nafsi jeiserem jeme. 29 Angtane naura afa nawer-ningna taterisi namwer aa jes gane domolaram Uwa Sanbagirminiwer jei aa jes gane nasbinennerem, jei ga jamer sene nasbinenne. Ane angtane nafsi taterisi jeiserem aa jei ne sarbisinirim, jei jemata ga sene balbabili taterisi jeiserem afa Uwa Sanbagirminiwer jela, afa fas. 30 Taterisi angtane Uwa Sanbagirminiwer namwer aa jei gam domolaram, angtane taterisi jeiserem jam gam nasbilirim, jes jepserem afa Uwa Sanbagiri Jei taterisi jam gam gwerauwulurum angtane nafsi jep aa jei gam nwinirim jemnibe, afa ga gam, angtane aa jei gam nasounaram, jei ga jam se tikwena, jega angtane nafsi jeiserem jei jon ga gam nasowena. 31 Aamei seyafter gemerserem taterisi Uwa Sanbagirminiwer namwer jes igama domolaram, aamei taterisi jeiserem samfer daamfen-daamfennem igama nasbabili, jega aamei seyafter igama towaswebif Uwa Sanbagiri aa jes bilirim, ane aamei seyafter gemerserem ini imna gam isa kanautababili. 32 Angtane aa jei nasbinennerem taterisi namwer jei aa jes gam domolaram Uwa Sanbagirminiwer, angtane jeiserem jei baabeta gam domola enggalfe, jei jam gwanan jam gam fina jamere angtane gwanan aa jei gam nasounaram jei gam tikwena. 33 Waakenfer jam eyebiliserem daamfen-daamfenneme jei jam aa jep gangge betwebilirim, Uwa Sanbagiri ga jes bili jam eyebife. Jemata aa jep gangge betwebilirim, jes jepserem angtane seyafter jei afa nafis-nafismer ga gane eyebaabilirim, daamfen-daamfennem jam ne eyebiyen, Uwa Sanbagiri jeiserem ga jes gwebili baife. Jemata imna aa jep gangge betwebilirim enggammer isa eyebili, jemata Uwa Sanbagirmana seyafter gemerserem jei aa gemer gane eyebilirim. 34 Jemata imna jam aa jep gangge betwebilirim, jes jepserem wini safnant jemata jam ne towas-towastababiyen. Jei taterisi anggwana aa jes gane towas-towastababilirim jei taterisi jeiserem jafner gane sarbisini, aam temawer Hukumu Nabi Musa aa jes tulistababilim jep ga baatultel, wini jei anggwam gwonap gam gwena. 35 Afa wini jam gangge gubilirim taterisi Uwa Sanbagirem temawer jam tenaabife, jei ga anggwana jenaber gane tenebana. Afa jemata aa jep gangge betwebilirim, jes jepserem wini jam gangge nasbawenaram, jeiserem kapka. 36 Afa aamei taterisi ai ip ajes nasipminirim, afa aamei baif gwebife, gasa sarbistaabon: Taterisi Uwa Sanbagirmanaiserem, taterisi jeiserem jei imniweryan! Ane taterisi jeiserem ipfener is jam ne nasipmiyen! 37 Angtane afa aa jei gam gunurum enggame, "Ai baabeta amsam domola enggalfe, taterisi namwer ai ajes domolaram Uwa Sanbagirminiwer jem agam nasibef.", afa jei baabeta nafsiserem jes gam domolaram, baabeta Mafnana Uwa Sanbagirmana aa jes gam kitulminirim, angtane jeiserem ga jamer gam towaswena enggame, ai ajes tulistababilirim, aaiserem jeba Tuhan aa jes bilirim. 38 Afa angtane jeiserem jei jam taabiyeneye enggame, ai ajes tulistababilirim jeiserem jeba Tuhan aa jes bilirim, gam jega aamei angtane jeiserem taterisi jemna ijama saribaasiyen. 39 Ga jem temawer am afelen mesna, ini imna unggwanfersus ga is enggalf sege folbamuwena, baabeta igama domolf jega enggalf taterisi namwer aamei ijesa domolaram Uwa Sanbagirminiwer taterisi jeiserem ijama nasbinennefe. Ane angtane ula nafis-nafsiserem jei jener jam ne towaswebiyeneiserem aa jei gane nasbilirim, aamei angtane jeiserem safnant ijama uftabiyen. 40 Jengga seyafter aamei ijesa eyebiliserem jemata aa jep gangge betwebilirim, seyafter gemerserem ga waakenfer isa eyebili daamfen-daamfenneme.
151 Am afelen mesna, ai enggam ai gunu, aamei Taterisi Waakena Kristusem temawer, ai gwanan fwater isa ajes nasipminintim ibe, aamei Taterisi Waakena jeiserem gamjon ga jam isa sarbistaabona. Aamei Taterisi Waakena jeiserem imsa taabili, ane Taterisi Waakena jeiserem jem temawer aamei Kristus ga ima tebana kanaufer. 2 Afa aamei Taterisi Waakena jeiserem Kristusem temawer, ai isa ajes nasipminintim ibe, afa aamei taterisi jeiserem jeber-jeber jam isa tebabuwenaram kanaufer, gam jega Uwa Sanbagiri Jei aamei ga is waakentababisini. Jengga afa aamei jam isa tikwenaram Taterisi Waakena jeiserem jam taabiliwer, Uwa Sanbagiri Jei aamei is Jam waakentababisiyen, aam temawer afa aamei jam isa tikwenaram jam tebalawer, gam jega igi jemna ga enggam, aamei bunarsusfer gwanan Kristus ijama tebayan. 3 Taterisi igsususerem ap aa jes gulbanantam, aime Taterisi Waakena jeiserem aime ga isa ames nasipminint ibe. Taterisi igsususerem ga aas: Kristus Jei nem temaweram tere enggalfe, Uwa Sanbagiri Jei etam-etama kapka nemna nes gam wirtabaipmif. Gwanan-gwanansus Kristus nalef Jam teryen, taterisi jeiserem tere Kristusmanaiserem jem temawer mesam tulisul Taterisi Uwa Sanbagirmanaiserem jebe. 4 Ane Kristus Jei mes ne tirnnunt tonmwa bitisibe, jengga nunu nawer-ningnabaraiserem Jei gamjon ga irtestenant terewer. Jeiserem jes mese fwater mesam tulisul Taterisi Uwa Sanbagirmanaiserem jebe. 5 Ane ai taterisi aaiserem jes mese isa ames nasipminint enggame: Kristus Jama irtestenantam terewer, Jei Jena Petrusminip ga aa ge sana, ane gamjon ga Jei Jena ga aa ge sana dua belas rasul afwenefener jemnibe. 6 Jepga Jei gamjon ga Jena ga aa ge sana angtane 500 unggwanfer jemniwer Jei aa jei ne tikwebaatinennerem jei aa jep ge betwebilirim daamfennaber. Angtane afwer angtane 500 jeiserem jemniwer, jei mes ge terbili, jengga unggwanfersus jei gemer naawena. 7 Jepga Kristus gamjon ga Yakobusminip jon Jena ga aa ge sana, ane rasulu seyafter gemerserem jemnip mese. 8 Ane umwef ga Jena amnip ge sana. Aiba tantouya galserem jei aa jei gam surnurum nunu jem suruluserem jei gemerje jam folbayan, aam temawer ai rasulfe agalap etamwenantam, jes galapserem rasul-rasulu afweraiserem jei mes naawenant rasulfe. 9 Rasulu Tuhanmanaiserem seyafter gemerserem jemniwer, bastowaisusu ga ai. Ai aner gunu angtane jei ai as jam ne balyan rasuleme, aam temawer ai Kristus nalef ajam tebayan, ai jemat-jemata Uwa Sanbagirmanaiserem uskamer ai tamtamtababilint. 10 Jengga Uwa Sanbagiri Jei ams nesiktene, ane Jei waakena Jelemanaiserem as mes gulbana abe. Ane jega jem temawer aiba rasulsam. Uwa Sanbagiri Jei waakena Jemnaiserem as Jam gulbayan jam elsife. Fas. Jengga Jei waakena jeiserem abe as jewer gulbanaram, jemna igi ga enggam, ai awelna baabetfersus ai gwebili rasulu seyafter afweraiserem jemniwer. Ai awelna jeiserem ai baabeta alemanaiserem jeme ajam gwebiyen. Jengga ai awelna seyafter ai ajes gwebilirim, ai jeiserem ga aam temawer ai gwebili, Uwa Sanbagiri Jei waakena ap as jewer gulbanaram abe. 11 Ane Taterisi Waakena aamei gwanan ijesa sarbilintim, Taterisi Waakena jeiserem ai angtanef ai nasipminenne, ane Rasulu nafsiserem jeime Taterisi jeiserem jeter ne nasbinenne. Taterisi Waakena daamfenna jeiserem ai ga seyafter ajetera nasbinenne, ane aamei Taterisi Waakena jeiserem ga imsa taabili. 12 Ai ajesa nasbinennerem, jeiserem ai ga enggam aya nasbinenne, Kristus Jeiba mesam irtestena terewer. Jega jem temawer, aamei ijeya gunurum enggame, "Angtane fas jam irtebaabisteyan terewer.", jes gamserem aamei game syefer ima gunu. 13 Afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega Kristus mese Jei Jam irtesteyan terewer. 14 Ane afa enggam, Kristus Jei Jam irtesteyanaye terewer, afa ga gam jes gamserem, gam jega ai taterisi ajesa nasbinenewenaram igi jemna fas. Ane afa ga gam, gam jega aamei taterisi jeiserem ijewera taabilirim, igi jemna fas. 15 Ane gamjon aaiserem jes mese, afa Kristus Jei Jam irtesteyanaye terewer, gam jega jeiserem se gwerewa enggame ai rasulu seyafter gemerserem, ai angtane afaf-afafa, aam temawer ai angtane jam agalaba towas-towastababinennerem Uwa Sanbagirem temawer, ai ga enggam aya nasipminenne Uwa Sanbagiri Jei Kristus mesam irtestena terewer. Afa aamei igama gunurum enggame, angtane jam tereserem jei gamjon fas jam irtebaabisteyan terewer, afa jes gamserem bunare, gam jega Uwa Sanbagiri Jeime fas Kristus Jam irtesteyan terewer. 16 Bunarsusfer ga enggam, afa angtane jam tereserem jam irtebaabisteyanaye terewer, gam jega Kristus mese Jei fas Jam irtesteyan terewer. 17 Ane afa Kristus Jam irtesteyanaye terewer, gam jega aamei taterisi afaf-afafa aaiserem imsa taabili, ane etam-etama kapka ijesa eyebilirim fas is Jam wirtabaipmiyen. 18 Afa Kristus Jam irtesteyanaye terewer, gam jega angtane Kristus aa jei ne tebanaram aa jei ge terbuwenaram, jei jam waakentababisiyen. 19 Nei Kristus nejeya tebanaram, ini nemna unggwan-girfer ga nes enggalf sege folbamini, nei Kristusfar negama gwef taman waaken-giribe, jeke ogiri aaiserem jepfener. Jengga afa angtane jam tereserem jei fas jam irtebaabisteyanaye, gam jega nei taterisi afafaiserem nei nemsa taabili, ane angtane jei enggam sege gubili nem temawer, "Nesik, gwela jemna Kristus aa jewer ne tikwebaatinirim, gwela jemna jeiserem jam se elmisini." 20 Jengga gamyan! Taterisi bunarsusfer aaiserem ga enggam, Kristus Jei mesam irtestena terewer. Ane jem temawer nei ga nesa towaswena enggame, angtane seyafter Kristus aa jei ne tebanaram jeime ga sene irtebaabisi terewer. 21 Angtane seyafter gemerserem ga jam ge terbuwena, angtane daamfennaiserem jei aa jes eyebilim jem temawer. Jes gemerserem aaiserem jegme gemer, angtane gase irtebaabisi terewer, Angtane nafsiserem Jei aa jes eyebilirim jem temawer. 22 Angtane seyafter gemerserem jeiba asal-asala Adammanam, ane aam temawer Adam jei aa jewer terem, angtane seyafter gemerserem ga jem temawer ge terbuwena. Jes gemerserem aaiserem jegme gemer, angtane seyafter Kristus aa jei ne tebanaram jei se irtebaabisi terewer, aam temawer Kristus mesam irtestena terewer. 23 Angtane seyafter gase irtebaabisi terewer, nunu jes jepserem Uwa Sanbagiri Jam aa jep gunurum. Angtane nabal-nabalsusu ga Kristus se irwena terewer. Ane jep jon ga Kristus Jam aa jep forsanyaram, angtane Kristusmanaiserem jei gase irtebaabisi terewer. 24 - 26 Jeiserem umwef ga jes. Kristus Jei Sanbakfe gase nwinsi jamer Jei ginanggwana Jemna seyafter gemerserem baabeta jemna gase taayipmisi, angtane sanbakf aa jei ge nwinbenerem, ane bwat kapka baabetabara aa jei ge nwinbenerem jes mese. Kristus Jei Sanbaksusfe Jei se nwinsi, jamere Uwa Sanbagiri ginanggwana seyafter gemerserem se gwebabisi Kristusem gwonap ga sege nwinbese. Ginanggwana umwef Kristus jes borolaiserem, ginanggwana jeiserem ga aas, tere angtanemanaiserem. Jep jon ga Kristus Jei baabeta Jelemanaiserem gase gulbasa Uwa Sanbagirfe, Uwa Jemna, baabeta Jei aa jes domolaram Sanbakf gwefe. 27 Taterisi Uwa Sanbagirmanaiserem jep ga enggam baatultel: "Uwa Sanbagiri Jei apgal jigala seyaftersus gwebabili Jem gwonap naawefe." (Mazmur 8:6) Bunarsusfer nei nemsama towaswena enggame, katana aaiserem "apgal jigala seyaftersus" jem temawer, Uwa Sanbagiri Jei Jena jep Jam batawiyen enggalfe Kristusem gwonap gwefe, aam temawer Uwa Sanbagiri Jei apgal jigala seyafter gemerserem ga Kristuse gwebabili Jem gwonap naawefe. 28 Nunu umwef jes jepserem, apgal jigala seyafter gemerserem mesam ge etamwebili Kristusem gwonap naawefe, jep jon ga Kristus Jei Jen jon Jena gase gwebasa enggalfe, Jei Uwa Sanbagirem gwonap gam gwefe. Kristus Jei Jena Jener se gwebana Uwa Sanbagirem gwonap gwefe, jega enggalf Uwa Sanbagiri Jei gam se gwena seyafter gemerserem jem Sanbakfe. 29 Angtane afwer imniwer aaiserem jei enggam ge gubili, "Angtane jam tereserem jei gamjon jam irtebaabisteyan terewer." Jengga aamei isa towaswena enggame, angtane taterisi jeiserem aa jei gane nasbinennerem, jei ga syefer gane nasbinenne, aaiserem ga jem temawer: Angtane afweraiserem jei enggam gane eyebili, angtane jam baptisteyamer aa jei gam tererem, angtane gemer gwelaiserem ga jem fwayenf gane baptistene bosna jemnaiserem jeme enggalfe, angtane jeiserem aa jei gam tererem jei gam gane bala mes ne baptistene. Afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega jeje bafa angtane jes gemerserem ga aane eyebili? 30 Am temawer mese ai rasulfe ajeya gwenaram afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega ai awelna aaiserem aya jam gwebiyen, awelna tamtamtala uskambarsus ajem temawera domolwenaram. 31 Am afelen mesna, bunarsusfer amsam towaswena nunu jeber-jeber angtane jei tamtamtala ap ga as gane gulbana enggalfe, jei ai as jam ne munbofe. Uwa Sanbagiri tousa ini amna ase saaser-saasersusfer folbana, aam temawer aamei Kristus Yesus Tuhan nemnaiserem imsama tebana, ane gwela imna waakenfer ga is jem temawer ge folbamini. Ane jes gemerserem Uwa Sanbagiri Jeime gemer towaswena enggame, tamtamtala ai jeber-jeber ajes domolwenaram, jeiserem bunarsusfer ba unggwandwasusum. 32 Ai tamtamtala aafe uskambarsus ames domola kota Efesus je, aam temawer ginanggwana amnaiserem ga enggala twena unggwan-giri kakalsusu galserem ai as jei dwortafe. Ai kabwaktala ai ajes domolwenaram, afa ai seyafter jeiserem gwela ogiri aaiserem jem temawenefener agam domolaram, gam jega seyafter jeiserem igi ga fas, jam sege elbesini. Afa angtane jam tereserem fas jam irtebaabisteyanaye terewer, afa ga gam, gam jega taterisi angtane aa jes ne bilwenaram ga jes nesa onsobili. Taterisi jeiserem ga aas: "Au, nei ganma twen, fo mese ganma telbili masara gemerserem, ane ini nemna ga nese saaser-saaserfer sege folbamini, aam temawer nei ne gwirmera tereber, gamjon nejama gweyan." Jengga nei taterisi jeiserem nejama tikwebitiyen, aam temawer angtane ba se irtebaabistesa terewer. 33 Angtane safnant aamei is jam ne afaftababiyen! Taterisi aaiserem angtane aa jes ne bilwenaram jeba bunaram: "Afa angtane waakenfer aa jei gam naawenaram, jei seyafter jeber-jeber jam gam naawenaram angtane gwela kabwakfer aa jei gam falminirim jebar, gam jega angtane gwela waakenfer aa jei gam naawenaram, gwela jemna ga jei gam kabwakulmini." 34 Aamei ga jam isa tikwena taterisi syefer ilem inip jes igama damtabilirim, ane aamei ini waakenaiserem ga is jener sege folbamini! Ane aamei etam-etama safnant gamjon ijama eyebiyen! Aamei bunarsusfer ga jam isa seferswena, aam temawer angtane im nenennabe afwer jeiserem jei Uwa Sanbagiri jam ne damdamtaasiyen. 35 Angtane afweraiserem afa engbar ke gam tenna enggame, "Angtane futunu jeje gamjon fomfom gam irtestena terewer? Angtane jam aa jep gam irtestenaram terewer, tifini seyafter ibirmi jemna gamjon fonggals gam domola?" 36 Angtane jes gamserem gam aa jei gam tennaram, angtane jeiserem jei teisyensusu! Twam tanna jam tonolaiserem jem temawer gase sarbistaabon. Ga enggam, aamei twam tanna jam jep igama tonolaram onabe, twam tanna jeiserem nalefe jam kokosyan, twam tanna jeiserem gwanan nabala ga tarnaiserem jei gangge subamitye, ane tifini ga gangge butswebili. 37 Aamei ijesa tonolaram onabe, jeiserem ga tanna tefner ima tonola, afa gandum tan, afa twam tanna nafsiserem jem tanna. Aamei twam tanna jem kokosaiserem unggwan-gwansus jam telaiserem, jeiserem ijama tonolyan. 38 Uwa Sanbagiri Jei twam tanna aa jei gangge kokosbilirim numu Jeneram golmini. Jei twam tanna aa jei gangge kokosbilirim jemna numu daamfen-daamfennemer ga nafis-nafismer gam golmini, Jei Jener aa gemer gam gunurum. 39 Matauwa ninibere seyafter gemerserem numu jemna daamfenyan, jengga nafis-nafismer. Angtane nini numu jemna daamfenna. Ane matauwa twen mese fenes, nini jemna numu nafis-nafsi, nini angtanemanaiserem jemniwer. Ane jumana nini nensa matauminiwer, ane angtaneminiwer. Ane jigal nin mese jemna numu nensa matau nini afweraiserem jemniwer. 40 Uwa Sanbagiri Jei apgal jigala unggwanfersus aa jes eyebaabilim, winsi yo ogiri aaiserem jebe, apgal jigala seyafter jeiserem jam domolabe ba waakensusum. Jengga apgal jigala winsip aaiserem jam domolabe, ane apgal jigala ogiri aaiserem jam domolabe, numu jemna daamfenyan, jam domolabe jeba nenes-nensam. 41 Gwer naf, ane mwar naf, ane nafa torbwanmana, nafa seyafter jeiserem ba waakensusum. Jengga gwer nafa jei nenesmer mwar nafminiwer. Ane torbwanmana jegme nafa nenesmer gwer nafa yo mwar nafa jemniwer. Ane torbwana daamfennaiserem nafa jemna nenesmer torbwana afweraiserem jemniwer. 42 Jes gemerserem angtane futunu gamjon jam irtestelaiserem terewer jem temawer jegme gemer. Angtane futunu aa jebar gane gaataantenaram bitisibe, tifni jeiserem jei nenesmer tifni terewer aa jebar gam irtestenaram jemniwer. Tifni angtane futunu gam butswena. Jengga tifni terewer aa jebar gam irtestenaram, tifni jeiserem fas jam teryen, ane jam butsweyan. 43 Angtane futunu aa jebar gane gaataantenaram bitisibe, tifini seyafter futunu jeiserem kapka, ane baabeta jemna fas. Jengga tifni terewer aa jebar gam irtestenaram, tifni jeiserem waakensusu ane baabetsusubara. 44 Angtane futunu aa jebar gane gaataantenaram bitisibe, tifni jeiserem ogirmana. Jengga tifni angtane Kristen terewer aa jebar gam irtestenaram, tifni jeiserem taman waaken-girmanam, tifni Mafnana Uwa Sanbagirmanaiserem aa jes gam gulbanaram. Nei tifni enggalf ma damtabili ogiribe nejebara gwef. Jes gamserem gam ba bunaram, ane aaiserem jegme bunar, nei jam nes jep irtebaabistesaram terewer, nei tifni nafsiserem ga jes nesa damtabisi enggalfe taman waaken-giribe nei jebara gwef. 45 Taterisi Uwa Sanbagirmana jep ga enggam baatultel: "Anggwana nabal-nabalsusu Uwa Sanbagiri aa jes eyebalam bosna ga Adam, Uwa Sanbagiri Jei mafnana tifni Adammanaiserem jep gulbal enggalfe, Adam jei angtanefe gam etamwef." (Kejadian 2:7) Jengga Kristusem aa jes ne jenbenerem "Adam umwef aaiserem", Jeiba Mafnansam, Mafnana gwela jamer abak-abaksus aa Jei golminirim. 46 Gwela nemnaiserem taman waaken-giribe jamer abak-abaksus, abakfer gwela jeiserem nabal-nabalsusu nejama domolyan taman waaken-giribe. Jengga ga enggam nei gwanan nabala ogirip negama gwena. Ane gwela umwef aaiserem ga taman waaken-girmana. 47 Adam nabal-nabalsusu aa jes eyebalam, Adam jeiserem onnawer eyebal. Jengga Kristus aa jes ne jenbenerem "Adam naurabarfe", Jei taman waaken-giriwer jela. 48 Angtane seyafter gemerserem jeiba asal-asala Adammana, ane tifni angtanemana ga enggala tifni Adammana galserem, ominiwer eyebaabili. Jengga angtane Kristusmanaiserem tifni jemna enggam sege etamwebamisi, tifni Kristusmana galserem, tifni jeiserem ga taman waaken-girmana. 49 Tifni nemna ogiri aaiserem jebe jem gwefe, tifni jeiserem ga enggala tifni Adam nabal-nabalsusu aa jes eyebalam onnawer jes galserem. Jes gemerserem aaiserem jegme gemer, tifni galap nejesa damtabiliserem, tifni jeiserem ga enggala tifni Kristusmana gemerserem, tifni jeiserem ga taman waaken-girmana. 50 Am afelen mesna, taterisi jeiserem ai ajes nasipminirim, igi jemna ga aas: Tifni nemna, ninibereiserem ane aawisibereiserem, tifni nemna jeiserem nei Uwa Sanbagirfar fas jem nejama gweyan, nunu Uwa Sanbagiri Jei aa jep gwesaram nem Sanbakfe anggwabura nei seyafter gemerserem. Tifni nemna jam tereserem ane ga gam butswena, nei tifni jeiserem jeme abak-abaksusfer nejama gweyan. 51 Taterisi Uwa Sanbagiri aa jes mwangbisilim Jam eyebife, taterisi jeiserem Jei angtanefe Jam towasulmiyen jamer abaka, taterisi jeiserem ga waakenfer isa sarbisini. Taterisi jeiserem ga aas: Nei seyafter nejama teryen, jengga nei seyafter tifni ibirmiserem nes Jese golmisi. 52 Trompeta umwef jam aa jep forolsaram, nei aafer-aafer jes jeberserem, nwena jam kamalsola gamserem, nei tifni ibirmi ga nesa damtabisi. Trompet tisna jeiserem jam aa jep ne sarbisirim, angtane jam tereserem jei se irtebistesa terewer, ane tifni ibirmiserem jebar gase naawena jamere abak-abaksus. Ane jes jepserem nei gemer nejeya gwenaram, nei tifni ibirmiserem ga nesa damtabisi. 53 Nei ogirip nejeba gwenaram, nei tifni enggalf neya damtabili ogiri aaiserem jebar jep gam gwef. Tifni nemna jeiserem sege terbili. Jengga nei tifni ibirmiserem ga galap nesa damtabisi, tifni enggalfe taman waaken-girip jebar jep gam gwef. Tifni nemna jeiserem fas jam ge terbiyen, jengga tifni jeiserem nei abaksusfer ga jebaner nesa gwena. 54 Nei tifni ogirmanaiserem nejesa damtabilirim, tifni jam tereserem, nei tifni jam teryeneiserem taman waaken-girmanaiserem, tifni jeiserem jam nejeba damtabisirim, jes jepserem Taterisi Uwa Sanbagirmanaiserem jep aa jes tulisulum gase etamwesa. Taterisi jeiserem ga enggam: "Angtane jei gamjon jam ge terbiyen, aam temawer Uwa Sanbagiri Jei tere angtanemana mes borolmini." (Yesaya 25:8) 55 Nei gamjon fas tere nejama erebiyen, aam temawer angtane gamjon fas jam ge terbiyen! Nei gamjon fas angtane jam tereserem nejama syebabuweyan, aam temawer angtane ba jamer se naawena jamer abak-abaksus! 56 Angtane jei tere jam ne erbili, aam temawer jei mes ge towaswebili enggame, angtane jam aa jep gam tererem, jei gam tamtamtana etam-etama jelemanaiserem jem temawer. Jei mes ge towaswebili enggame, jeiba angtane etam-etamabaram, aam temawer jei masef ge unggwasbili Hukumu Uwa Sanbagirmana jam tikwebitife. 57 Jengga au, nei Uwa Sanbagiri ganma pujite enggame nejewera gunurum, "Ase samfer golmini"! Yesus Kristus Tuhan nemna aa jes eyebilirim jeme, Uwa Sanbagiri Jei mes eyebili jega nei gamjon nejama ereyen jam terfe. 58 Ga jem temawer, am afelen mesna ai unggwanfersus isa ajes nesiktababilirim, aamei kanaufer isa fina. Ane aamei Tuhan jamer isa tebana, aamei ijama aftannuyon. Aamei awelna Tuhan ibe aa jes golminirim, aamei awelna jeiserem jeber-jeber isa gweyibuwena, aam temawer aamei imsama towaswena enggame, awelna ijesa gwebilirim baabeta Tuhanmanaiserem jem gwonabe, awelna jeiserem jam ge elbesiyen.
161 Namwer aas jepserem, ai aamei isa ajam nasipmif doim temawer, doini aamei ijesa dupduptalaiserem enggalfe, nem afelen mesna Kristus aa jei ne tebanaram kota Yerusalemwer jep jam gaarmif. Ai aamei isa enggam ai balbabili, aamei ga enggammer isa eyebili, ai jemat-jemata propinsi Galatyamana agemer balbabilirim jam ne eyebife. Aamei ga jes gemerserem ga gemer isa eyebili. 2 Nunu nabal-nabalsusu minggunu seyafter gemerserem jeme, aamei seyafter gemerserem daamfen-daamfenneme, doini ga jamer isa egantababisiwena enggalfe angtane nafsiserem jep gam gaarmif. Doini jes igama damtabilirim, doini jeiserem afwer ga jam igama egantababisini. Afa doini unggwanfer jam igama damtabilirim, unggwanfer ga jam isa egantababisini. Afa aamei doini bastowaifer jam igama damtabilirim, bastowaifer ga jam isa egantababisini. Doini jeiserem ga jam isa egantababisini jamere ai as fortya imnibe, jega ai jam ajep fortyaram, jes jepserem aamei doini ijama terelbaabiyen jam gaarmife, aamei doini ijesa egantababisinirim, doini jeiserem jamer gam isa dupduptana. 3 Ai jam ajep fortyaram, angtane aamei ijesa destabaabilirim, ai angtane jeiserem gam as baftabili enggalfe, jei doini jeiserem ijesa gaarminirim, jei ga sene girinfele kota Yerusalemwer. Ane ai ga surta as golmini angtane jeiserem ai ajes baftabilirim jebe, jega angtane Kristen Yerusalem je jei ga sege towaswebili enggame, angtane jeiserem jei doini ijesa gaarminirim jei ga jes ne girinfele jemnibe. 4 Ane afa ai as gunu, "O samfer ai as sofwa.", ai mese ai ga as sofwa Yerusalemwer, gam jega jei abaner ga asa sofwa. 5 Ai nalefe ibar nejama dorweyan kota Korintus je, ai gwanan ajam sofwa propinsi Makedonya jebe. Ai jam ajep sofnaram, ai enggam ai mwangbisini ai jep ga jafner as wofena tamna nafis-nafsiserem jebe, ai abakfer jep ajam nwinyen. 6 Jengga ai imnip ajep fortyaram, ai enggam ai gunu, ai ibar abakfer nesa nwini. Afa musim arouwa yo deye uskambar ane ona wisimsusu jam ajep falaram, ai engbar abakfer ibar ga galap nesa nwini jamer musim jeiserem se barwena. Musim jeiserem jam se barwenaram, aamei samfer ai ga as isa batobana ai gamjon jam as sofnaram imniwer, ai ajewer gunurum jam sofwefe. 7 Afa ai gwanan propinsi Makedonyawer as sofwa, gamjon ai imnip as sofwa, afa ga gam jes gamserem, gam jega ai abakfer ibar nejama nwini. Afa ai gwanan imnip jam as sofnaram, gam jega ai abakfer ibar nejama nwinyen. Ai bai jes gamserem. Jengga afa Tuhan Jei ai as Jam se balaram, ini amna ase enggam folbana, ai ibara nwinf jamer abaka. 8 Ai namwer aas jepserem ajam sofweyan propinsi Makedonya je. Ai kotana aaiserem ajep nwinf, kota Efesus je, jamere nunu angtane Yahudimana masar aa jep ne eyebilirim se fala, masara Pentakostamana, jeba masara nananisi jem igiserem aa jep ne fulurum. 9 Ai aafe as nwini, aam temawer angtane safe unggwanfer baif aa jei naawenaram ai Taterisi Waakena ajam nasipminennefe, ai aafe dwona unggwanfersus ai domola enggalfe ai awelna Tuhanmana ajes gweyibenerem jem igi agam damtabif. 10 Timotius jei jam aa jep fornaram imnibe, aamei waakenfer isa tebana jei, jega ini jemna saaser-saaserfer gase folbana ibar ijama nwinfe. Aamei Timotius waakenfer isa gaarnnu, aam temawer jeimba ai galaterserem, jeime awelna Tuhanmana gam gweyibene. 11 Angtane fas Timotius jam ne balyan enggame, "Timotius jei igyene." Jengga jei ga jam isa batobana, jega jei gamjon waakenfer gase warautna amnibe. Ai Timotius fibana, ane am afelen mesna afweraiserem jei mese jeime Timotiuster ne fibana. 12 Ai aamei isa enggam ai towastababili nem afelnaiserem Apolos jem temawer. Ai Apolos unggwanfer ititmer amsam balwena enggalfe, jei nem afelen mesnabar afweraiserem jam ge sofobif imnibe. Jei namwer aas jepserem ini jemna gemerje jam folbayan enggalfe imnip jam sofwefe. Jengga jei dwona jam aa jep domolaram, jei gase sofwa imnibe. 13 Aamei ga angtane Kristenf ima gwena, gwela imna jeiserem ina jewer ga jamer isa gaaramisnenne. Aamei Yesus ga kanaufer isa tebana. Aamei Yesus weren-werenmer ijama tikwebaatiyen, jengga baabetmer isa tikwebaatini. 14 Seyaftersus aamei ijesa eyebilirim, ga waakenfer isa eyebili ini imna ga is enggammer sege folbamini, angtane jam nesiktababif. 15 Aamei bunarsusfer Estefanus wi tannabar jem temawer ba imsa towaswemini. Jei nabal-nabalsusu Kristus jeyam ge tebana propinsi Akaya je, propinsi imna. Jei awelna ini jemna seyafter gemerserem ga jem ge gwebili enggalfe, jei angtane Uwa Sanbagirmanaiserem gangge batobaabif. 16 Ini amna seyafter gemerserem ai ga aamei isa ajem balbabili, angtane seyafter Estefanus galserem, aamei ga esorola jemna ga jam isa onsobaipmini. Ane esorola angtane nafsi, awelna Tuhanmana Estefanusfar aa jei ne gwebilirim ane jemata aa jei ne batobaabuwenaram, esorola jemnaiserem jes mese ga jam isa onsobaipmini. 17 Ini amna saaser-saasersusu Estefanus, Fortunatus, ane Akaikus jei aaf aa jewer ge forobityerem. Aamei ijama jelyan ams batobafe, jengga jei ge jalbili ai ga ase jei ne batobana. 18 Jei taterisi im temawer ap as mes ne nasbaibene, ane ai taterisi jeiserem ai sarbabilirim, ini amna ga as jem ne kanautabana, ini imna is gemer ne kanautabaipminirim, taterisi am temawer ip aa jes ne nasbinennerem jeme. Angtane jes galserem, bosna jemna ga jam isa kitulmitena. 19 Jemat-jemata aaf propinsi Asya je, jei ims ne balbabili, "Kelek, waakenfer sa gwe!" Akwila yo wini jemna bosna Priskila ane jemata jem jenap aa jei ge betwebilirim jei mese, jei uskambarsus ga is enggam ne balbabili aamei seyafter Kristusfar ijeya gwenaram, "Kelek, waakenfer sa gwe!" 20 Angtane Kristus aaf aa jei ne tebanaram kota Efesus je, jeime is enggam ne balbabili, "Kelek, waakenfer sa gwe!" Aamei ijeba betwenaram, aamei tafna ga jam isa tenanna enggalfe, aamei igama gwerauwulf aamei in ina ba ijama nesiksonanna. 21 Ai taterisi aaiserem ip ga aner tulisulmini:|b Kelek, waakenfer sa gwe! 22 Angtane Tuhan jam nesikteyeneiserem, Uwa Sanbagiri Jei angtane jeiserem jamer se babapsobana! Maranata! Kata jeiserem igi jemna ga aas "Tuhan Yesus, au se forya!" 23 Ai sembayang as gwebana, Tuhan Yesus Kristus Jei waakena Jelemanaiserem ip ise golmini aamei seyafter gemerserem. 24 Ai aamei seyafter isas nesiktababili, aam temawer nei seyafter Kristus Yesusfar daamfennaber nei jewera gwenaram.