’SƆƆA NU ‑PƆƆKƲLƲ ’PƆƆLË FAA’
TƐSALONIKËNYÜÜ
‑Pɔɔkʋa ’mlɩa wii
‑Pɔɔkʋlʋ kʋa’ ‑pɩ nɩ, ’a ’sɔɔa nu ‑pɔɔkʋlɔ ’Pɔɔlë faa’ nyɔsʋaanyüülü bäa’ Tɛsalonikëbätä. ’Ua ’mlɩ nɩ, ’Pɔɔlë ’trɛɛ ’sɔɔwʋ ’Pläkänyɔɔ, ’be nyɔsʋaanyüülü bäa’ Tɛsalonikë ’nyɩ ’üa nyɔsʋaplɛ ‑wälɩ ‑a ’cɛrɛ; ‑sʋɛlɛ kä ’fɩɔ ’ü ’jäa’ ’ɛa ’mlɩ, ’ü ‑wawla. ’Pɔɔlë ‑jɩjra ’üün ’wʋ, ’ɔmä ’üa ’klü ’jrara, ‑bɛ ’ɔmä bɩa ’üün ‑gbaji dɛɛlɛ bäa’ bɩa ’üa ‑sʋɩ nyɔsʋaa ’cɛcɩnyüüa ‑tɔrʋpɩɔ.
‑Pɔɔkʋlʋ ’klɩsa ’papawii ’dooa ’mlɩ nɩ, ‑gbili ’ü nöa’ ’üün ‑gba nɩ, ’a ’ia ‑gʋ ’Pɔɔlë ’jrara ’üa ’klü, ‑bɛ ’ɔ ’paa ’üün plɛ ’sɩrɩ Jesu ’mäa’ ’üün ’lɩmlɩbakalɩ ji, ‑bɛ ’ɔmäa’ nyüülü ‑tʋʋäa’ ’üün ‑sʋɩ ’lɩ, ‑sʋɩ ’lɩ ‑tʋ. ’Sɔɔa ’papawiia ’mlɩ nɩ, ’Pläkänyɔɔa jijikʋa ‑gä ’Pɔɔlë ’paa, ’be nyüü ’jɔklɔ ‑mölööa ’klü. ’Ü ‑gbala ’üün ‑maa ’Pläkänyɔɔ ’a kä ji. ’Pɔɔlë nya ‑gbala ’üün ’sɩrɩ ‑Gbakäklɛnyɔɔ (Sataan) ’mäa’ ‑kätɩ ‑fälɩ blö ’fɩɔwʋ ‑bɛ Jesu ’mäa’ ji. ’Ɔɔ ’klaa bʋbɔdiia ’klü kälɩ, ’ɔ nyra Nyɔsʋa käklä wii. ‑Maa ’Pläkänyɔɔ Jesu ma ji nɩ, ’ɔnya nyɔɔlɔ ’blaa. Sɔ ’papawii ’sɔɔ ‑gälɩ ‑a ji tääa ni ‑gälɩ nɩ, ’Pɔɔlë ‑gbala ’cɛcɩnyüü ü ‑sɔɔrɔ ’wli ’wʋ ’üa nyɔsʋaplɛa ’mlɩ ‑bɛ ü bibie Nyɔsʋa.
’Pɩrɩgälɩ nɩ, tääa ’papawiia ’mlɩ wiili bäa’ ’üa ’cɛcɩa ’mlɩ, i ’Pɔɔlë ’nua’ ’wli nɩ, ’ii ’ɔ ‑gbala ’üün; ’ii ’ɔ ’blörö ‑gälɩ. Wiili ’ɔ ’nua’ ’wli nɩ, ’iibä nyüü bä ’cɛcɩa ’mlɩ, ’ünyɩ ’bataa’ ’jrʋpaa ‑fɛfɛkʋ ‑a. ’Ɔ ‑gbala ’üün ’ü tʋŋlɔlɩ ’ia nü ‑fɛfɛnyüülü dɛrɩ, ’üa nʋnʋgbi nyra wiili ’ü ’kpɩaa’ ’nyɩ dɛɛ ’dee ‑a bä.
’Ɔnya ’pa ’üün ’nɩ ‑pɔɔkʋa bɩarafa ’wʋ.
‑Jäsɩ ‑pɔɔkʋlʋ ’totroa’ ’klɩ:
’Trɔrʋ 1.1-2
’Pɔɔlë ’trɛɛ Tɛsalonikënyüü 1.3-12
’Pläkänyɔɔ Jesu ‑kaaŋlʋ dɛrɩ ’blöö 2.1-12
Nyɔsʋaplɛa ’wʋsɔɔrɔkʋ 2.13-17
Nyɔsʋabibiekʋ nyra ’jrʋpa 3.1-15
’Täpa ’trɔrʋ 3.16-18
1’Trɔrʋ
1’Mɔɔ ’Pɔɔlë ‑bɛ Silvɛɛn nyra Timotee, amɔ ja Tɛsalonikënyüülü bäa’ ana Tʋ Nyɔsʋa nyra ’Pläkänyɔɔ Jesu ’Kriisë ’lɩ, ’üa ’cɛcɩ ‑pɔɔkʋ. 2Abɩa Nyɔsʋalɔ bäa’ ana Tʋ nyra ana ’Pläkänyɔɔ Jesu ’Kriisëa ‑gbinanakʋ nyra plɛgälɩflɛrɛkʋ bä ’amɩ ‑gälɩ.
’Pɔɔlë ’trɛɛ Tɛsalonikënyüü
3‑Wlajü ’amɩ, ’ana ‑gʋ a kä amä Nyɔsʋa ’trɛɛ ’taɩn a ’fɩɔ ’lɩ. ’Inya ’nara ’lɩ, ’be ’ana nyɔsʋaplɛ ’papla ‑gälɩa ’doo, ‑bɛ ’ana ‑wawlakʋa ’mʋgbɛ ’papla ‑gälɩa ’doo. 4’Ana ’wʋsɔɔrɔkʋ nyra ’ana nyɔsʋaplɛa ‑gʋ, ’a kä amɩ dɔrʋ ’wʋ Nyɔsʋaa ’cɛcɩnyüüa ‑tɔrʋpɩɔ, ’anya srara ’iin nyüülü ’järäa’ ’amɩ ‑sʋɩ ’lɩ ‑bɛ ’a ’kpɔa. 5Nyɔsʋa srara ’ia ‑plɩɩlɩ ’sɩrɩ ’ɔa ‑gätʋtʋkʋ bäa’ ’cɩcasa, ’amä Nyɔsʋaa ’kamaplälä kä ‑gʋ ’a ’jääa’ ‑sʋɩ, ’klɩ ’wʋ. 6’I ’na ’kä nyüülü ’järäa’ ’amɩ ‑sʋɩ ’lɩ nɩ, Nyɔsʋa ’mä bɩa ’üün ‑sʋɩ ’lɩ ’järä, 7‑bɛ ’amɔlɔ bäa’ nyatɛrɩ ’lɩ ’ɔmä ’amɩ ‑fʋflʋ ’papakʋ ‑nyɩ, a nyra amɔ ’sɔ ’taɩn ’lɩ ’Pläkänyɔɔ Jesu ’mäa’ cɛlɩ ’cie ‑bɛ ’ɔmäa’ ’ɔa nyufa srara, ’ɔɔ ‑bɛ ’ɔa ’klükä ’aanjë ’sɔ. 8Kapu ‑gbogboa ’mlɩ ’ɔmä kʋ ’ɔmä ji. ’A ‑plɩɩ ’ɔmä nyüülü ’nyɩa’ Nyɔsʋa jrea ‑gä ‑tʋ1.8 Esaii 66.15., nyra bɩa nyüülü ’nyɩ ‑trääräa’ ’lɩ ana ’Pläkänyɔɔ Jesu ’Kriisëa1.8 ’Kriisë: ‑Taa waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä. ’Mʋfagogo. 9’Üülü nɩ, ’üa ’pɛpɛɛkʋ bä ’üa ’mɔlɔkʋ ’plɔʋplɔʋa ‑gʋ, ’ü ‑nëmä ’Pläkänyɔɔ nyra ’ɔa ’wliklɩbʋabʋakʋa ’klü ‑gba ‑a jijrö; ’ünya ’lɩdɛrɩtʋŋlɔa1.9 Esaii 2.10; 19.21.. 10’Taɩn ’lɩ ’ɔmäa’ ji ‑bɛ ’ɔa ’nyünanyüü ’mäa’ ’ɔɔn ’bʋala, ’a ‑plɩɩ ’ü kä ’fɩɔ toroa’ ’ɔɔn plɛ ’mä ’ɔɔn ’kɔlɔ. ’Anya ’lɩbäa ’ia ‑srɩlɩa ’mlɩ, ’be a toro ana ’papawii plɛ.
11’A ’ia ‑gʋ a bibie ’ana ’wlili ’taɩn a ’fɩɔ ’lɩ, ana Nyɔsʋalɔ wea’ ’amɩ ’mä ’lɩ ’amɩ ’kʋɛɛ, ‑bɛ ’ɔmä ’amɩ ’klülɩpa, ’amä wiili kä ’fɩɔ ’naa’ nʋ ’ɔa ’klü ’lɩ ’ana nyɔsʋaplɛtorokʋa ‑gʋ. 12’Asɩ ana ’Pläkänyɔɔ Jesu ’Kriisëa1.12 ’Kriisë: ‑Taa waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä. ’nyrɩ ’mä ’amɩ ’lɩ ’bʋala, ‑bɛ ’amä ’ɔmɩ ’lɩ ’bʋala bɩa, ana Nyɔsʋa nyra ’Pläkänyɔɔ Jesu ’Kriisëa ‑gbinanakʋa ‑gʋ.
2‑Gbakäklɛnyɔɔa bʋblɔkʋ
1‑Wlajü ’amɩ ’amɔ a ‑gbala, dɛɛlɛ bäa’ ’Pläkänyɔɔ Jesu ’Kriisëa jijisrɩ nyra ’ɔa ‑gbaa trarakʋ nɩ, 2’ana ’klü ’nyɩ ’jɔklɔ sɔsɔ. Nyɔɔ ma ji ‑bɛ ɔma ’daa Nyɔsʋa ‑gbala ’ɔɔn, ’aiɛ nyɔɔ ma ‑gbala ’amɩ, ’aiɛ ɔma ’daa amɔ ja ‑pɔɔkʋ ‑maa ’Pläkänyɔɔa jijisrɩ2.2 ’Pläkänyɔɔa jijisrɩ: Grɛɛkëa ‑kätɩpɔɔkɩ ‑mɩdooa ’mlɩ ’i ‑jɩjra: ’Kriisëa jijisrɩ. ’a ‑si nɩ, ’ana bobowli ’nyɩ ’caklalɩ. 3Nyɔɔ ’doo nyɔɔ ’doo ’nyɩ ’sara ’amɩ ‑gbagblɛa dɩjɔ ’doo. Nyüü nya Nyɔsʋa ’nyüamlɩjraraa ‑kätɩ, ‑Balʋa Nyɔɔ nya ‑fälɩ blöa, ’ɔɔlɔ ‑glaaa’ ’ɔa ‑gbogblookʋ. 4’Ɔɔ bä ‑Gbakäklɛnyɔɔlɔ ‑tʋa’ ’ɔa nyufa diili kä ’fɩɔ a ’daraa’ Nyɔsʋa ’ia ’wliklɩ, diili kä ’fɩɔ a ‑pʋpʋaa’ a ’wliklɩ, ɔ möa’ ɔ paa’ ’nɩmɩ Nyɔsʋaanyuku kpaku ‑wälɩ ’ɔmä ‑wälɩkʋ, ‑bɛ ɔ sraraa’ ’ɔa nyufa ‑beere Nyɔsʋa2.4 ‑Tɛklɩ nɩ, Nyɔsʋaanyuku kpakulu bäa’ Jerusalɛɛmë ’üü ’daa. Tɛ Daniɛɛlë 11.36; Esekiɛɛlë 28.2..
5’N ‑gbala kä ’amɩ ’iin ’taɩn ’lɩ ’n bä käa’ ’ana ‑nyɛɛ; ’a ‑kaaŋlʋ ’iin plɛpa? 6‑Bɛ ‑plɩɩlɩ a bäa’ ‑plɩɩ nɩ, ’a dɛɛlɛ kaa’ ’ɔɔn ’klɩ; ’taɩn nëmä ’lɩjrä ’fɩɔwʋ ‑a ji ’ɔmä ’ɔa nyufa srara. 7’Be ‑balʋa ‑sisieklü bä ’jrʋpa ’lɩ, ‑maa nyɔɔlɔ kaa’ ’ɔɔn ’klɩ ma sɔ ‑plɩɩ ’fɩɔwʋ ’kä ’ɔnya ’wʋcrɛrɛ. 8’A ‑plɩɩ ‑Gbakäklɛnyɔɔ ’mä ’wʋcrɛrɛ, ’kä ’Pläkänyɔɔ Jesu2.8 Jesu: ‑Taa waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä. nya mlɩa ‑fʋflʋ nʋ ’kä ’ɔnya ’ɔɔn bʋblɔ ’ɔa jijisrɩ ’lɩ2.8 Esaii 11.4.. 9’Taɩn ’lɩ ‑Gbakäklɛnyɔɔ ’mäa’ ‑srɩɩ ji nɩ, Sataan a ’klü ’ɔmä ja ‑bɛ ’ɔmä ’ɔa ’klüa ’kaɩn ’kaɩn, ‑saragbia tie nyra ‑gbagblɛ plɛklɩkalawii nʋ2.9 Matiö 24.24.. 10Yrʋ nyra ‑gbagblɛ ’kɔkɔmlɛ ’ɔmä nʋ ‑bɛ ’ɔmä nyüülü möa’ ’mɔlɔ ’nyʋfɔ ’wʋ ’kpla. ’Be ’ünyɩ ’lɩ ’cɩcasalä ’mäa’ ’ü ’lɩmlɩba ‑a ‑wa. 11’A ’ia ‑gʋ Nyɔsʋa ja ’üün ’mɔlɔkʋa ’klü, ’ümä ‑gbagblɛwii wii ’dara. 12‑Bɛ nyüülü kä ’fɩɔ ’nyɩa’ ’cɩcasa wii ’dara, ‑bɛ ‑gbagblɛ käa’ ’tʋ nɩ, ’üa ‑gä ’mä ‑träärä.
’Ba nyɔnyrɔ
13Amɔlɔ nɩ, ‑wawawlajü ’amɩ, ’amɔ ’Pläkänyɔɔ ‑waa’ nɩ, a kä amä Nyɔsʋa ’trɛɛ ’taɩn a ’fɩɔ ’lɩ ’ana ‑gʋ, ’be ’amɔ ‑kätɩ Nyɔsʋa ’balɩ ’amä ’lɩmlɩwʋ, ’be Nyɔsʋaa ‑Susu kpëtä ’amɩ ‑bɛ ’a toro ’cɩcasa plɛ. 14’A ’ia ‑gʋ ’ɔ ‑srörö bɩa ’Mʋfagogolä a ’saa’ ’amɩ kälɩ ’amä ana ’Pläkänyɔɔ Jesu ’Kriisëa ’wliklɩbʋabʋakʋa ’mlɩ dɛɛ kälä. 15’Ii känyrɩ ‑wlajü ’amɩ, ’ba nyɔnyrɔ ’kä ’a ‑träärälɩ wiili a ’kpɩaa’ ’amɩ. ‑Bɛ ‑pɔɔkʋ a ja ’amɩ, ’aiɛ dɛtrɛ a dɛtrɛ ’amɩ, ’ba ‑träärälɩ ’imɩ.
16Abɩa ana ’Pläkänyɔɔ Jesu ’Kriisëa ’mʋgbɛ nyra ana Tʋ Nyɔsʋalɔ ‑waa’ amɩ ‑bɛ ɔ ‑nyɩa’ amɩ ’flɛɛlɩ ’klülü ’nyɩ bɩaraa’ nyra ’cɩca plɛpiepiegälɩkʋ, 17ɔ ’pa ’amɩ ’klü ’lɩ. ’Kä ɔ ‑nyɛɛ ’amɩ ’klü ’amä wiili kä ’fɩɔ ’naa’ nʋ ’cɩcawii ’mä bɩa ’ana mlɩ sɔ!
3’Ba bibie ana ’wlili
1‑Jäsɩ ’n blöa’ nɩ, ‑wlajü ’amɩ, ’ba bibie ana ’wlili ’Pläkänyɔɔa ’papawii ’mä ’klɔɔtrʋ mi a ’doo ‑bɛ ’imä ’bʋala ’sɩrɩ ’i bäa’ ’ana ‑nyɛɛ, 2amä ‑balʋnyüü nyra plɛbʋbɔnyüü mlɩ ’wʋ; ’be ’üa ’fɩɔ ’nyɩ nyɔsʋaplɛ ‑a kä. 3‑Maa ’Pläkänyɔɔ ’wʋ plɛtorokʋ ’klɩ: ’ɔnya ’amɩ ’klülɩpaa ’kä ’ɔnya ’amɩ ’nyiöligäälä Plɛbʋbɔsusua3.3 Plɛbʋbɔsusu: Sataan a ’nyrɩ bäsaa. ‑gʋ. 4A ’suru ’kä ’Pläkänyɔɔa ’nyrɩklɩ, ’sɩrɩ ’a nöa’ wiili a ’daaa’; ‑bɛ ’a ‑nëmäa’ ’ia nʋnʋkʋa ‑gʋ fio. 5Abɩa ’Pläkänyɔɔ ’tiere ’ana polu Nyɔsʋaa ‑wawakʋa ’pɛlɩ, nyra ’Kriisëa ’wʋsɔɔrɔkʋ ’lɩ!
’Jrʋpaa ‑fɛfɛkʋa wii
6A ‑gbala ’amɩ ‑wlajü ’amɩ, ana ’Pläkänyɔɔ Jesu ’Kriisëa ’nyrɩklɩ, ’ba tʋŋlɔlɩ ‑wlajülü kä ’fɩɔ ‑fɛɛɛa’ dɛrɩ, ünyɩ ‑trääräa’ ’lɩ wiili a ’kpɩaa’ ’amɩ. 7’Ana ’mʋgbɛ jre ’iin ’sɩrɩ ’amäa’ ana ’sa nʋ, ’be a bä käa’ ’ana ‑nyɛɛ nɩ, ‑mää ‑fɛfɛnyüüa ’sa a ma ’nyɩ ’nyɛ. 8Anyɩ nyɔɔa jijrɛ ‑a ji ’flɛɛlɩ. ‑Sʋɩa ’mlɩ a ma ‑fɛɛɛrɛ ’jrʋpa ‑srɩ ‑bɛ ‑gbia, a ‑pɩ ‑gʋ nyɔɔ ‑molooa ‑gblɛ bä3.8 1 Tɛsalonikënyüü 2.9.. 9‑Mää ’kä anyɩ kä ‑a kä amä ’iin nʋ ‑a, ‑maa ana ’mlɔɔ nʋ ’sa amä ’amɩ srara ’sɩrɩ ’amäa’ bɩa nʋ. 10A bä käa’ ’ana ‑nyɛɛ nɩ, ‑jäsɩ a ’daa käa’ ’ba nʋa’: nyɔɔ ma ’nyɩ ’bata ’jrʋpa ‑a ‑fɛfɛkʋa nɩ, ’ɔnyɩ ji bɩa dɛɛ3.10 1 Tɛsalonikënyüü 4.11.! 11‑Bɛ a ’nöö ‑maa ’ana ‑tɔrʋpɩɔa nyüü ‑mölöö bälɩ ’ü ‑fɛ, ’ünyɩ ‑fɛ ’jrʋpa ‑a. ‑Maa nyüüa wiia mlɩ ’ü ’papla ’më. 12‑Jäsɩ a ‑gbalaa’ ’ia nyüülü nɩ, ’klü ’lɩ a ’paa ’üün ’Pläkänyɔɔ Jesu ’Kriisëa ’nyrɩklɩ, ü ‑fɛ ’jrʋpa tee, ü ji ’üa ’mʋgbɛa ’jrʋpaa jijrɛ.
13’Amɔlɔ nɩ, ‑wlajü ’amɩ, ’anyɩ fio ’cɩcagbia nʋnʋkʋa ‑gʋ. 14Nyɔɔ ma ’nyɩ ‑träärälɩ wiili a ‑jɩjraa’ ‑taa ‑pɔɔkʋlʋa ’mlɩ nɩ, ’ba ‑tʋ ’ɔɔn ’nyügba ’mʋfasa, ’a nyra ’ɔɔn ‑kanyɩ ’nönröwli, ’nyüsü ’mä ’ɔɔn ’bla. 15‑Maa ’anyɩ ’jä ’ɔɔn ‑beere ’nyüamlɩjraranyɔɔ, ‑maa ’ba kolo ’ɔa ’nyiöli ’wli ‑wlajʋsa.
’Täpa ’trɔrʋ
16Abɩa plɛgälɩflɛrɛkʋa ’Pläkänyɔɔa ’mʋgbɛ ‑nyɩ ’amɩ plɛgälɩflɛrɛkʋ ’taɩn a ’fɩɔ ’lɩ, ‑pɩɔ o ‑pɩɔ! Abɩa ’Pläkänyɔɔ bä ’ana ’fɩɔa ‑tɔrʋpɩɔ!
17’Na ’mʋgbɛ bäa’ ’Pɔɔlë ’mɔɔ ‑jɩjra ’trɔrʋa ’pɛlɛ. ’A ’na ‑pɔɔkɩa ’fɩɔa tie; ’a ’na ‑jɩjrawlu. 18Abɩa ana ’Pläkänyɔɔ Jesu ’Kriisëa ‑gbinanakʋ bä ’ana ’fɩɔ ’lɩ! ’Asɩ i bä3.18 ’Asɩ i bä: ‑Taa waklüülü ’nyɩ grɛɛkë ‑kätɩpɔɔkɩ ‑mɩdooa ’mlɩ ‑a bä..