2 PIƐƐRË

PIƐƐRËA ’SƆƆA NU ‑PƆƆKƲ

2 PIƐƐRË

‑Pɔɔkʋa ’mlɩa wii

Piɛɛrë ‑jɩjra ‑pɔɔkʋlʋ kʋa’ ‑pɩ ’ɔnya fa ’uun ’cɛcɩnyüüa ’fɩɔ. ’Ɔ ‑gbala ’üün ’sɩrɩ ’ɔmäa’ jä jrüüa ’mlɩ. ’Ia ‑gʋ ’ɔ ’paa ’üün plɛ wiili ’ɔ ’kpɩa käa’ ’üün. Piɛɛrëa ’klɩsa ‑pɔɔkʋa ’mlɩ nɩ, ’ɔ ‑gbala ’cɛcɩnyüü, a bɩa ’üa nyɔsʋaplɛtorokʋ ‑sɔɔrɔwʋ ‑bakää nyüü nö ’üün ‑gbigba; ’kä ’ü kä ’ia plɛ ’sɩrɩ diia ’fɩɔa ’mäa’ bɩa nyra ’sɩrɩ ’üa ’nyüamlɩjraranyüüa ‑gä ’mäa’ ‑träärä.

‑Taa ’sɔɔa nu ‑pɔɔkʋlʋa ’mlɩ nɩ, ’ɔ ‑gbala ’üün ’sɩrɩ ‑gbagblɛ ’kpɩkpɩanyüü sɔa’ ’cɛcʋa ‑tɔrʋpɩɔ ‑bɛ ’ü ’kpɩa bɩa nyüü diibʋblɔkʋ. ‑Maa ’üülü nɩ, ü ‑träärälɩ ‑srɩ o ‑srɩ wiili ’ü ’kpɩaa’. ’Ɔnya ’sri bɩa ’üa plɛ ’kä ’ɔnya ‑gbala ’üün ’sɩrɩ Nyɔsʋa ’mäa’ wiili ’ɔ ’daaa’ nʋ: ‑gätʋtaɩn nya jia nyra cɛ dëdrä nyra ‑tʋtʋ dëdrä (3.13).

‑Jäsɩ ‑pɔɔkʋlʋ ’totroa’ ’klɩ:

Jesu ’Kriisë jejrekʋ ’lɩa ’bʋalakʋ 1.1-11

Plɛpapakʋ, ’sɩrɩ ’Pläkänyɔɔ Jesu ’Kriisë ’mäa’ ’klüsa ji 1.12-21

‑Gbagblɛ nyɔsʋaamlɩpalanyüü 2.1-3

Nyɔsʋa jre ’sɩrɩ ’ɔmäa’ nyüülü bäa’ ’ɔɔn dɛrɩ ’pʋɔ 2.4-10a

‑Gbagblɛ ’kpɩkpɩanyüü 2.10b-22

Plɛpapakʋ, ’sɩrɩ ’Pläkänyɔɔ ’mäa’ ji 3.1-13

Jesu ’Kriisëa ‑gbinanakʋ ’lɩa ’bʋalakʋ 3.14-18

’Trɔrʋ

¹’Mɔɔ Simɔɔ Piɛɛrë, Jesu ’Kriisëa ‑geei nyra ’ɔa apotrë, ’mɔɔ ‑jɩjra ü kä nyɔsʋaplɛ ’bʋaa’ ‑beere ana nɛ ’wʋ. Ana Nyɔsʋa nyra ’Lɩmlɩbanyɔɔ Jesu ’Kriisë ’klɩgägäkʋa ’nyrɩklɩa ‑gʋ a ’klaa ’ia nyɔsʋaplɛlɛ. ²Abɩa ‑gbinanakʋ nyra plɛgälɩflɛrɛkʋ bä ’amɩ ‑gälɩ ‑gböösa, ana Nyɔsʋaa jejrekʋ nyra ana ’Pläkänyɔɔ Jesu ’lɩ.

Jesu ’Kriisë jejrekʋ ’lɩa ’bʋalakʋ

³’Be ’ɔa ’nyrɩ ’klüa ‑gʋ, Nyɔsʋa ‑nyɩ amɩ diia ’fɩɔ amäa’ ’plä ’wʋ kʋ ‑bɛ amäa’ ’ɔɔn dɛrɩprɛ. ’Ɔɔlɔ sara amɩ nyɔɔlɔ werea’ amɩ ’ɔa ’mʋgbɛa ’wliklɩbʋabʋakʋ ’lɩ nyra ’ɔa ‑gbinanakʋ ’lɩ. ⁴’Wliklɩbʋabʋakʋlʋ nyra ’klülüa ’mlɩ nɩ, Nyɔsʋa ‑nyɩ amɩ ’cɩcadii nyra ’perubʋadiili ’ɔ ’daa käa’ ’ɔmäa’ ‑nyɩ. ’Iili nɩ, ’ɔ ’bata ’a nyra Nyɔsʋa bä dɛɛ ’dee, ’amɔlɔ fɔlɔa’ ‑fɛfɛdii ’klɩ ’plälä kʋa’ ‑pɩa ’mlɩ dɛɛnyükäkäkʋa ‑gʋ.

⁵’Ii känyrɩ nɩ, ’ba ’palɩ ’klü, ’ba ’pa ’ana nyɔsʋaplɛa ‑gälɩ ’cɩca nʋnʋgbi, ‑bɛ ’cɩca nʋnʋgbia ‑gälɩ nɩ, ’ba ’palɩ wiijejrekʋ, ⁶wiijejrekʋa ‑gälɩ nɩ, ’ba ’palɩ ’ana ’mʋgbɛa ’tierekʋa jejrekʋ, ’ana ’mʋgbɛa ’tierekʋa ‑gälɩ nɩ, ’ba ’palɩ plɛblöblökʋ ‑sʋɩa ’mlɩ, plɛböblökʋa ‑gälɩ nɩ, ’ba ’palɩ Nyɔsʋaa ‑gbaa kpasrakʋ, ⁷Nyɔsʋaa ‑gbaa kpasrakʋa ‑gälɩ nɩ, ’ba ’palɩ ‑wawlakʋ, ‑bɛ ‑wawlakʋa ‑gälɩ nɩ ’ba ’palɩ ’tasɩrɩa ‑wawakʋ. ⁸’Be ’ama ’klaa ’samaa nʋnʋgbi nɩ, ‑bɛ ’ima bä ’amɩ ’lɩa ’doo nɩ, ’inya ’iin nʋa ’kä ana ’Pläkänyɔɔ Jesu ’Kriisëlɔ a jrea’, ’ɔa ’jrʋpa ‑nëmä tɩɔ ‑a tɩɔ. ⁹‑Maa ‑mɔlɔ ’nyɩa’ ’iin ’klaa nɩ, ’ɔ ‑beere ’nɔnɔnyɔɔ ɔnyɩ ’jäa’ ’kä; ɔ ‑trɔa’ ’sɩrɩ ’ɔa ‑balʋ nya käa’ kpëträ. ¹⁰’Na ‑wlajü amɩ, ’a ’ia ‑gʋ ’ba ’palɩ ’klü ’amä ’iin srara ’sɩrɩ ’kasa Nyɔsʋa ’baa’ ’lɩ ’amɩ; ’be ’ama nʋ ’imɩ nɩ, ’a ‑nëmä blö ‑a blö ’plɔʋ. ¹¹’Inya ’amɩ ana ’Pläkänyɔɔ, ana ’Lɩmlɩbanyɔɔ Jesu ’Kriisëa ’kamaplälä ’nyɩa’ blöröfa kä, ’äa tatu ’klɩsaa.

Plɛpapakʋ, ’sɩrɩ ’Pläkänyɔɔ Jesu ’Kriisë ’mäa’ ’klüsa ji

¹²’A ’ia ‑gʋ, ‑bakää ’a jre ’imɩ ‑bɛ ’a kpasra ’cɩcasalä ’a ’klaaa’ ‑gba nɩ, ’nëmä ’ana plɛpapakʋa ‑gʋa sɩa ’taɩn a ’fɩɔ ’lɩ. ¹³‑Bɛ ’n ‑ka bä ’plɔʋ nɩ, ’n kä ’mä ’amɩ plɛpa ’amä ’ana nyüfë ‑tre. ¹⁴’Be ’n jresaa ’n jö ’lee ’mä ’ana ‑tɔrʋpɩɔ sɔ, ’sɩrɩ ana ’Pläkänyɔɔ Jesu ’Kriisë sraraa’ ’mɩ ’iin. ¹⁵’Nyaa ’ia ’fɩɔ nʋa, ’ia ’taɩn ’lɩ ama mi nɩ, ’anya ’iin plɛ ’paa ’plɔʋplɔʋ.

¹⁶’Taɩn ’lɩ a sraraa’ ’amɩ ana ’Pläkänyɔɔ Jesu ’Kriisëa ’klü nyra ’ɔa jijisrɩ nɩ, ‑mää ’nänë anyɩ ’amɩ ’klɩ pala. ‑Maa ana ’nyü ’jä ’ɔa ’bʋabʋakʋ. ¹⁷’Be ana Tʋ Nyɔsʋa ‑nyɩ ’ɔɔn ’nyrɩbʋalakʋ nyra ’wliklɩbʋakʋ, ’taɩn ’lɩ ’papawii sɔa’ ’Wʋsi ’Bʋalakʋa ‑nyɛɛ ‑bɛ ’i ’daa ’a: « ’Ɔ kʋa’ ‑pɩ, ’ɔɔ bä ’na plɛ ‑gälɩa ’Jʋ, ’ɔɔ ’lɩ ’n ‑tʋ ’na dɔrʋa ’fɩɔ.» ¹⁸Cɛa mlɩ ’papawiili sɔ, anya ’nu ’iin ’wli, ’taɩn ’lɩ a nyra ’ɔɔn ma bäa’ ’nyüna ’dʋgba ’wli1.18 Matiö 17.1-5; Marëkë 9.2-7; Lukë 9.28-35..

¹⁹’A ‑plɩɩ a jresaa wiili nyɔsʋaamlɩpalanyüü ’sa käa’ ’lɩ bä ’cɩcasa. ’Mʋfagbi ’a nʋ ’anya ‑tʋ ’iin ’ana plɛ ’klɩ. ’I ‑beere ’sɩrɩ ’napɛ ŋʋalaa’ ’jöjrüükpü ’lɩ ‑bɛ ‑srɩ jräa’; ‑bɛ ‑suwlaa ‑särëeji ŋʋala ’ana polua ’mlɩ. ²⁰’Ana ’fɩɔ ’ba jre ‑kätɩ ’saa nɩ, nyɔsʋaamlɩpalanyüüa wiili kä ’fɩɔ bäa’ nyɔsʋapɔɔkʋ ’lɩ nɩ, ‑mää nyɔɔa ’mʋgbɛa plɛklɩa wii ‑a. ²¹’Be nyɔsʋaamlɩpalanyɔɔ ’doo ’nyɩ ’ɔa ’mʋgbɛa plɛklɩ wii ‑a ’ba, ’ɔnyɩ nyɔsʋaawii nyüü ‑gba ‑a ’pala. ‑Maa ’Nyüna ‑Susu ’uu ma ’tuto nyüü1.21 Grɛɛkë kätɩpɔɔkɩ ‑mɩdooa ’mlɩ ’i ‑jɩjra: nyɔsʋaanyünanyüü. ‑bɛ ’ü ma ’paa nyɔsʋaawii.

‑Gbagblɛ nyɔsʋaamlɩpalanyüü

¹’Be ‑kätɩsa nɩ, ‑gbagblɛ nyɔsʋaamlɩpalanyüü ’cie nyüüa ‑tɔrʋpɩɔ, ’asɩ ‑gbagblɛ ’kpɩkpɩanyüü ’mä bɩa ’ana ‑tɔrʋpɩɔ bä. ‑Gbagblɛwii ’ümä ’amɩ ’kpɩa, ’ümä ‑gʋ ’amɩ ’käkpa. ’Ünya ’iin nʋ nʋ ’kä ’ünya ’daa ’ünyɩ ’nɩmɩ ’cifilɔ ‑sua’ ’üün ‑a jre. ’Asɩ ’ü were ’üa nyüfë ‑sʋɩ ’wʋ sɔsɔ. ²Nyüü ’kɔkɔmlɛ nya ’üün dɛrɩprɛa ’üa bʋbɔgbilia ’mlɩ, ’üa ‑gʋ ’kä nyüü ‑ka ‑nëmä ’cɩcasaa ’nyʋfɔ wii ‑a ’dara. ³Dɛɛnyü nyra ‑gbagblɛwii ’ümä nʋ ’ümä ’amɩ ‑trɔɔrɔ. ‑Mää ‑mlatɩkä ’üa ‑gä ’nyɩ ‑träärä, ’üa ‑gbogblookʋ ’nyɩ ’nyüglö ‑a ’nyüglö.

Nyɔsʋa jre ’sɩrɩ ’ɔmäa’ nyüülü bäa’ ’ɔɔn dɛrɩ ’pʋɔ

⁴’A jre ’iin ’sɩrɩ, Nyɔsʋa ’nyɩa’ ’aanjëlü nʋa’ ‑balʋ ’klɩ ‑a bere, ‑maa ’ɔ be ’üün ’lɩtʋŋlɔbütügbaa ’mlɩ, ’ü ’pala ’cɩ ’jöjrüükpü ’lɩ; ’üa ‑gätʋtaɩn ’ü ‑glaaa. ⁵Nyɔsʋa ’nyɩ bɩa ‑kätɩ ’plälä nʋa’ ‑balʋa nyatɛrɩ ‑a ’jä. ’Ɔ ja ’nʋŋlʋ kpaku ’unya dara ’üün dara ‑tʋtʋa nya ’si ’nɩ ’klɩ. ‑Maa ’ɔ ’balɩ Noe mlɩ; ’cɩcasaa ’lɩsanyɔɔ, ’ɔɔ bä ‑uuntääa nyɔɔlɔ Nyɔsʋa ’baa’ ’lɩmlɩ nyra ’ɔa ‑gböölia nyüü ‑uunsɔɔ ‑mölöö. ⁶Nyɔsʋa nya ja kapu ’ɔnya nrörö Sodɔɔmëbätä nyra Gomɔɔrëbätä ’pʋpʋ ’lɩ. ’Asɩ nyüülü ’nyɩ ‑trääräa’ ’lɩ Nyɔsʋaa ni ’mä bɩa bä, ’ümä wiili ’mäa’ ’üün ‑gälɩjrä jre2.6 Jenɛɛsë 19.24.. ⁷’Ɔnya ’balɩ ’klɩgänyɔɔlɔ ’ü ’daraa’ Lɔɔtë mlɩ; nyɔɔlɔ nɩ, bätëlëa ’mlɩa nyüüa ‑balʋgbi ma kä ’ɔɔn ’nyüsü ’wʋ. ⁸’Be ’üa ‑tɔrʋpɩɔ ’klɩgänyɔɔlɔ ma kʋ, ‑srɩ o ‑srɩ ’ɔ ma ’jää ‑bɛ ’ɔ ma ’nöö ’üa nʋnʋgbili ’nyɩ ‑trääräa’ ’lɩ ‑dɔ; ’i ma ’yagba ’ɔa ’klɩgä ‑gälɩa ‑susu. ⁹’Ia ’fɩɔlʋ ’ii srara ’sɩrɩ ’Pläkänyɔɔ jrea’ ’sɩrɩ ’ɔmäa’ ’klɩgänyüü ‑sʋɩ ’lɩba, ‑bɛ ’sɩrɩ ’ɔmäa’ nyüülü ’nyɩa’ ’klɩgä ‑wälɩtʋ ‑bɛ ’üa ‑gätʋtaɩn ’mäa’ ’wlijrä. ¹⁰Nyɔsʋa nya nyüülü ’nyɛrɛa’ bʋbɔdiili ’üa fugba ’bataa’ ’pɔnɩa. ’Ia nyüülüa plɛ ’sosowʋ ‑frepadiia ‑gʋ, ’üa ‑gbʋʋ ’nyɩ ’kamakʋ ‑gba ‑a bä.

‑Gbagblɛ ’kpɩkpɩanyüü

’Ü toro ’üa nyüfë plɛ ‑gböösa; ’ü bɔtɔ ‑tɔklʋ ‑bɛ ’ü ‑jejre ’wliklɩbʋa ‑sisili bäa’ cɛa ’mlɩ. ¹¹‑Bɛ ’aanjëlü käa’ ’klü ü ‑sia’ ’üün ’wʋ nɩ, ’ünyɩ ‑jejre ’wliklɩbʋasisi ‑a Nyɔsʋaa ’klɩ. ¹²‑Maa nyüülü nö dii ‑beere ’klʋɛɛa mlaa, ’ünyɩ bobo bobo ‑a. ’Ü kʋ ‑plɩɩ ’kplakplakʋ nyra ’blablakʋa ‑gʋ. ’Be dɛɛlɛ ’ünyɩa’ jre ’ɛɛ ’ü ‑jejre; ü kʋa’ ‑plɩɩ sakakʋa ‑gʋ, nya sakaa. ¹³‑Balʋlʋ ’ü nʋa’, ’ünya ’ua ’pɛɛ ’wʋdɔrɔa. ’I kä ’ümɩ ’tʋ ’ümä bʋbɔ wiili ’üa plɛ ’bataa’ ‑srɩ ’klɩ nrörö. ’Ü bä ’ana ‑gbaa ’kpafë, ’ü pla ’amɩ ‑fre ’a nyra ’üün ma tara ’wʋ; nyüüa ‑trɔɔrɔkʋ kä ’ümɩ dɔrʋ ’wʋ. ¹⁴Bätësaa ’dooa wii ’ü bobo, ‑balʋa nʋnʋkʋa ’doo bä ’üa plɛ ’klɩ. ’Ü ’kʋɛɛrɛ ü ’fʋmaa’ ’üa nyüfë ‑gba, ’üa polu ’si dɛɛnyükäkäkʋ ’klɩ. Nyɔsʋaa busukʋ bä ’üün ‑gälɩ. ¹⁵’Ü sɔ ’cɩca ’nyʋfɔ ’wʋ ’ünya ’mɔlɔ. Bɔsɔrëa ’jʋlɔ ’ü ’daraa’ Balaamë, ’ü ’pɛɛa’ ‑balʋa2.15 Nɔɔbrë 22.1-35. nʋnʋkʋa ‑gʋ nɩ, ’ɔɔ ’ü prɛdɛrɩ. ¹⁶‑Maa ’ɔnya ’dara ’ɔa ‑balʋa ‑gʋ: ‑sʋbre ’nyɩ ’paa’ wii nɩ, ’ɛnya ’pa nyɔɔa mlɩa wii ’ɛnya ’pala ’ɔɔn wii ‑gba; ’ɛnya ‑gbala nyɔsʋaamlɩpalanyɔɔlɔ ɔ ’nyüglö ’ɔa dɛɛgbagbili ’ɔ ’bata ɩa’ ’ɔmäa’ nʋ.

¹⁷’Üülü nɩ, ü ‑beere ’sɩrɩ ’nie maa’, ’sɩrɩ ‑fʋflʋ faa’ ‑gbru. Nyɔsʋa tɛrɛ ’üün kʋfa i kä ’fɩɔ ’kpöröa’; ’ii ’ümä kʋ ’plɔʋplɔʋ2.17 ’plɔʋplɔʋ: ‑Taa waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä.. ¹⁸’Be ’fëflɛwiia ’kpɔ ’ü ’saalɩ. Bʋbɔgbili käa’ plɛ ’tʋ nyra ‑sagbili käa’ ’nyüsü ’üü ‑srörö kälɩ ‑bɛ ’ü ’kʋɛɛ ‑mülü ‑ka ’wʋ ɩa’ ɩ ’lɩmlɩ ü sɔa’ ‑mülü ’nyɛrɛa’ ‑gbagblɛ ’lɩa ‑tɔrʋpɩɔ. ¹⁹’Ü ‑gbala ’üün ‑maa ’ü ‑kanyɩ ‑balʋa ‑goou ‑a bä, ‑bɛ ’üa ’mʋgbɛ bä ’üa plɛklɩa wiili bʋblɔa’ ’üün, ’ia ‑goou. ’Be nyɔɔ o nyɔɔ bä dɛɛlɛ ’ɔ ‑waa’ ‑gböösa, ’ɛa ‑geei. ²⁰‑Maa ‑mülü jrea’ ’Pläkänyɔɔ ’Lɩmlɩbanyɔɔ Jesu ’Kriisë nɩ, ’üma ’cɛrɛ ’pläa ‑fre ‑wälɩ, ‑bɛ üma ’cɛrɛ ’sɔɔwʋ ’ia diili ‑wälɩ ’ima kʋ ’üün ‑gälɩ nɩ, ’üa ’klä nya bʋbɔa ‑gböösa ’kä ’inya ’üa ‑kätɩdɛɛ ’wʋsi. ²¹’Be ’i ’na ɩ ’nɩmɩ ’kä ’ünyɩ jre ’nyʋfɔlʋ ‑gäa’ ’klɩ; ‑maa jre ’uun ‑bɛ ‑a ‑sɔ ’nyünawiili ‑kpɩaa’ dɛrɩ nɩ, ’i bʋbɔ. ²²‑Maa wiili jräa’ ’üün ‑gälɩ nɩ, ’a wiili ’cɩca Tapönänë ‑gbaa’: «‑Fɛ ’a ’ɛa ‑wɔsɔdii ‑gälɩ dɛrɩ ’blöö2.22 Tapönänë 26.11.», ‑bɛ «’Ü bɩaa’ ’ään ‑futokʋ ’nɩ, ’bösarä nya ’blöö paplua ’mlɩ dɛrɩ.»

’Pläkänyɔɔa jijikʋ

¹’Na ‑wawanyüü ’amɩ, ’sɔɔa nu ‑pɔɔkʋ kʋ ‑pɩ ’uu ’n ja ’amɩ. ’Ia ’sɔɔlɩa ’mlɩ nɩ, ’ana bobowli ’n ’bata ’mä ’kätɛrɛ ’imä bobowlili ‑gäa’ ’klɩ bä, ²’amä wiili ’nyüna nyɔsʋaamlɩpalanyüü ‑gbala käa’ ’amɩ plɛpa, ‑bɛ ’amä bɩa ’Pläkänyɔɔlɔ bäa’ ana ’Lɩmlɩbanyɔɔ ’ɔa ’kamaawiili amɔ bäa’ apotrë a ’kpɩaa’ ’amɩ nɩ, amä ’iin plɛpa. ³‑Jää wiili ’a käa’ ’amäa’ jre: ’Täpa jrüü ’lɩ nɩ, nyüüsrörönyüü nya jia, ’kä ’ünya ’üa bʋbɔwiili käa’ ’üün ’tʋ ‑gälɩ ’nyɛrɛ. ⁴’Kä ’ünya ’daa: «’Ɔnyɩ ’daa ’ɔnya jia, ‑bɛ ‑a ’jää ’ɔɔn le? Ana tʋɩɩ ’mä käa’ jä nɩ, ’sɩrɩ dii bä käa’ ’pläa ’käkolofa ’wʋ nɩ, ’asɩ ’i ‑ka bä ‑pɩɔ!» ⁵‑Maa ’ü ‑jɔjɔ ’ünya ‑trɔ wii ’doo; ’iibä: ’Papawii Nyɔsʋa nʋ ’ɔnya nʋ kä cɛ nyra ‑tʋtʋ. ’Ɔnya ’sasra ‑tʋtʋ nyra ’nieɩɩ ‑gba, ’ɔnya ’papla ’uun ‑gba ’nieɩɩa ‑tɔrʋpɩɔ. ⁶’Abɩa ’nɩ ’ɔ ’sie kä bɩa ‑tʋtʋ ‑gälɩ, ’ɔnya ‑gblooo ’plä. ⁷‑Maa ’a ’papawii ’doolʋ nɩ, ’ii ‑tʋʋä ’saarɩa ‑tʋtʋ nyra cɛ ‑wälɩ, ’kä ‑gätʋsrɩ nɩ, ’taɩn ’lɩ Nyɔsʋa ’mäa’ ‑balʋnyüü ‑gblooo nɩ, ’a ‑plɩɩ cɛ nyra ‑tʋtʋ ’mä fi.

⁸‑Maa ’na ‑wawanyüü ’amɩ, wii ’doo bälɩ ’anyɩ kä ‑a kä ’amä ’iin ‑trɔ; ’iibä ’Pläkänyɔɔa ’klʋɩ, jrüü ’doo ‑beere ‑sɩa ‑diisɔɔ ‑glʋɩpʋ (1 000), ‑bɛ ‑sɩa ‑diisɔɔ ‑glʋɩpʋ ‑beere jrüü ’doo. ⁹’Pläkänyɔɔ ‑nëmä dɛrɩ ‑a ‑wlɛ ’kä ’ɔnya wiili ’ɔ ’daaa’ nʋ. ‑Mölöö nɩnɩa ’ɔ ‑pʋala ’kä ’ɔmä wiili ’ɔ ’daaa’ nʋ. ‑Maa ’ɔ kä plɛblöblökʋ ana3.9 ana: Grɛɛkë ‑kätɩpɔɔkɩ ‑mɩdooa ’mlɩ ’i ‑jɩjra: ’ana. ’pɛlɩ, ’be ’ɔnyɩ ’bata ’bata ‑a nyɔɔ ’mä ana ‑tɔrʋpɩɔ sɔ; wiili ’ɔ ’bataa’ nɩ, ’ü toro ’lɩ ‑balʋ ‑gälɩ.

¹⁰‑Maa ’Pläkänyɔɔa jrüü nya ‑beere ’sɩrɩ ’jejienyɔɔ jöa’ ‑gbiara3.10 ‑gbiara: ‑Taa waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä.; cɛ nya ‑yrɛ kpaki nʋa ’kä ’ɛnya saka, ’pläa ‑dɔ3.10 Galaatënyüü 4.9; Kolɔɔsënyüü 2.8,20. Wiili ’Pɔɔlë ’daaa’ nɩ, ’i ’mrɛɛ ’i bä ‑dɔlʋ nyüülü ’nyɩa’ juifë bä ’paa’ ’lɩ, u bäa’ sriia ’böbökʋ nyra ’ia ’sama ‑dɔ ‑mɩdoo, ’ia ‑gooua bäbäkʋ ’Pɔɔlë ’daa Galaatënyüüa ‑pɔɔkʋ ’lɩ (9-10). ’I ’mrɛɛ ’i bä bɩa ‑sisili a ‑pʋpʋaa’ i nröröa’ ’amɩ ‑goou ’lɩ anyɩ käa’ Jesu jre. nya fia kä ’inya saka, ’kä ‑tʋtʋ nyra diili kä ’fɩɔ nyɔɔ nröröa’ ’ua ‑gälɩa ’fɩɔ nya fi. ¹¹‑Bɛ diia ’fɩɔ ’mäa’ ’saa saka nɩ, ‑asɩ ’ana nʋnʋgbi nya bä le? Abɩa ana ’nyɛnyɛbeia ’nyü ’na ‑bɛ abɩa ’ia tie bä Nyɔsʋaa ’lɩträäräkʋ. ¹²Nyɔsʋaa jijisrɩ ’a ‑glaaa, ‑bɛ ’a ’paa ’kpɔɔ ’imä ’lɩjrä sɔsɔ. ’Ia ‑srɩlɩa ’mlɩ nɩ, kapu nya cɛ ’pütöa, ’kä ’pläa ‑dɔ3.12 ’pläa ‑dɔ: Tɛ wiili ‑jɩjraa’ 3.10 ‑wälɩ. nya kapua ’mlɩ frere ’kä ’unya saka. ¹³‑Maa Nyɔsʋa nɩnɩa ’ɔnya cɛ dëdrä nyra ‑tʋtʋ3.13 Esaii 65.17; 66.22. dëdrä nʋa, ’a ’ua ‑gälɩ ’klɩgägäkʋ ’mä kʋ. ’A ’ii a ‑glaaa.

Jesu ’Kriisëa ‑gbinanakʋ ’lɩa ’bʋalakʋ

¹⁴’A ’ia ‑gʋ ’na ‑wawanyüü ’amɩ, ’a ‑glaaa’ wiili nɩ, ’ba ’pa ’kpɔɔ ’amä nyüülü ‑fre ’nyɩa’ ’lɩbä bä, nyüülü wii ’nyɩa’ ‑gälɩ bä bä, nyüülü nyra Nyɔsʋa ’Nönröa’ ’wli bä. ¹⁵‑Bɛ ’ba jresaa ana ’Pläkänyɔɔa plɛböblökʋ bä ’ana ’lɩmlɩwʋwʋkʋ. ’Lɩgaglakʋlʋ Nyɔsʋa ‑nyɩa’ ana ‑wawawlajʋ ’Pɔɔlë nɩ, ’asɩ ’ɔ ‑jɩjra amɩ ’wʋ. ¹⁶’Asɩ ’ɔ nö ‑pɔɔkɩ ’lɩ kä ’mlɩ ’ɔ ’palaa’ ‑taa wiilia ‑gä. ’Papawii ‑mɩdoo bälɩ ’mlɩ ’ia ’wlinunukʋ klalɩ, nyüülü ’nyɩa’ wii jre, nyra nyüülü kä polu ‑ka ‑piiea’ ’lɩklɩ, ’ü totrolɩ ’ia ‑gbaa ‑gälɩ. ’Asɩ ’ü nö bɩa nyɔsʋapɔɔkɩ ‑mɩdooa ’mlɩ; ’üa ’mʋgbɛ ’bata ’üa bʋblɔkʋ.

¹⁷’Na ‑wawanyüü ’amɩ, ’be ’a jre ’iin sököö, ’ii känyrɩ ’ba ‑tre ’ana nyüfë, nyüüa ‑balʋgbi ‑pɩ ’iin nʋ ’a ‑pɩ ’ana nyüfë ’mɔlɔ. ’Asɩ ’ana nyɔsʋaplɛ ’mä nyɔnyrɔ ’mʋfasa. ¹⁸‑Maa ’ba ’bʋala Jesu ’Kriisëa ‑gbinanakʋ ’lɩ ’kä ’a jre ’ɔɔn ‑gböösa, ’ɔɔlɔ bäa’ ana ’Pläkänyɔɔ nyra ana ’Lɩmlɩbanyɔɔ. ’Ɔɔ kä ’wliklɩbʋbʋakʋ ’köklesaplɩɩ, ’plɔʋplɔʋ! ’Asɩ i bä.