1 TƐSALONIKËNYÜÜ

‑KÄTƖ ‑PƆƆKƲLƲ ’PƆƆLË FAA’

TƐSALONIKËNYÜÜ

‑Pɔɔkʋa ’mlɩa wii

Tɛsalonikë bä Masedoanëa bätä kpakö. Masedoanë nya bä Grɛɛsëa ‑tʋtʋ ‑gälɩ. ’Pɔɔlë ’ɔ ‑jɩjra ‑taa ‑pɔɔkʋlʋ, ’ɔ ‑bɛ Silvɛɛn nyra Timotee. Silvɛɛnlɔ nɩ, ’ɔ ’ü ’daraa’ bɩa Silasë; ’üü ji ’Pɔɔlë ‑gba ’ünya ’sri ’cɛcɩ Tɛsalonikëbätä ’kä. ’Pɔɔlë ’nyɩ ’lɩ ‑a ‑wlɛ, ’be juifëlë bäa’ ’lɩ ’nyɩ ’ɔɔn ’casɩ ‑a ‑nyɩ (Akëtë 17). ’Pɔɔlë sɔa’ ’lɩ nɩ, ’ɔnya mi bätälä ’ü ’daraa’ Beree, ‑maa ’ɔnyɩ bɩa ’lɩ ‑a ‑wlɛ ’ɔnya sɔ Masedoanëa ‑tʋtʋ ‑gälɩ ’ɔnya mi Akaiia ‑tʋtʋ ‑gälɩ. ’A Akaiia ‑tʋtʋ ‑gälɩa bätëlë ’ü ’daraa’ Atɛɛnë nyra Korɛɛntë bä. ’A Atɛɛnë ’Pɔɔlë bä kä ’ɔnya ‑gbala Timotee ɔ mi Tɛsalonikë ’ɔmä nyüülü toroa’ Nyɔsʋaplɛ ’jä, üma ‑kaaŋlʋ ’üa nyɔsʋaplɛ ‑wälɩ ’cɛrɛ ‑sʋɛlɛ bäa’ ’lɩ ’ɛa ‑gʋ.

Timotee sɔa’ ’lɩ ’lee ɔ, ‑bɛ ’ɔ jaa’ ’Pɔɔlë ’cɩca ‑gogo nɩ, ’i nʋ ’ɔa dɔrʋ ’ɔnya fa ’üün ‑taa ‑pɔɔkʋlʋ. ’A ’Pɔɔlëa ’klɩsa ‑pɔɔkʋlʋ ’ɔ ‑jɩjraa’ ’ɔa ‑pɔɔkɩa ’fɩɔa ‑tɔrʋpɩɔ. ‑Pɔɔkʋlʋa ’mlɩ nɩ, ’Pɔɔlë ’trɛɛ Nyɔsʋa ’ɔnya ’jrara Tɛsalonikëa nyɔsʋaanyüüa ’klü ’ümä ’üa nyɔsʋaplɛ ’wʋsɔɔrɔ, ’ümä ’klɔɔtrʋ mi.

‑Jäsɩ ‑pɔɔkʋlʋ ’totroa’ ’klɩ:

’Trɔrʋ 1.1

’Sɩrɩ Tɛsalonikënyüü toroa’ Nyɔsʋa plɛ 1.2–3.13

’Klälä käa’ Nyɔsʋa ’tʋ 4.1-12

’Sɩrɩ ’Pläkänyɔɔ ’mäa’ dɛrɩblöö 4.13–5.11

‑Tɔɔ nyra ‑gälɩblörö ’trɔrʋ 5.12-28

’Trɔrʋ

¹’Mɔɔ ’Pɔɔlë ‑bɛ Silvɛɛn nyra Timotee, amɔ ‑jɩjra ’cɛcɩlɛ bäa’ Tɛsalonikëbätä ’wʋ, ɛ bäa’ ana Tʋ Nyɔsʋa ’lɩ, ɛ bäa’ bɩa ’Pläkänyɔɔ Jesu ’Kriisë ’lɩ: abɩa ‑gbinanakʋ nyra plɛgälɩflɛrɛkʋ bä ’amɩ ‑gälɩ i sɔa’ ana Tʋ nyra ’Pläkänyɔɔ Jesu ’Kriisëa ‑nyɛɛ1.1 i sɔa’ ana Tʋ nyra ’Pläkänyɔɔ Jesu ’Kriisëa ‑nyɛɛ: ‑Taa waklüülü ’nyɩ grɛɛkë kätɩpɔɔkɩ ‑mɩdooa ’mlɩ ‑a bä.!

’SƖRƖ TƐSALONIKËNYÜÜ TOROA’ NYƆSƲA PLƐ

1.2–3.13

Tɛsalonikënyüüa nyɔsʋaplɛtorokʋ

²A ’trɛɛ Nyɔsʋa ’plɔʋplɔʋ ’ana ’fɩɔa ‑gʋ, ‑bɛ ’asɩ a bibiea’ Nyɔsʋa ’taɩn a ’fɩɔ ’lɩ nɩ, ’asɩ a ’paa ’ana ‑gä. ³’Asɩ a bibiea’ ana Tʋ Nyɔsʋa nɩ, a ’paa ’jrʋpalä ’ana nyɔsʋaplɛ ‑fɛɛɛa’, ’äa ‑gä plɛ, ’ana ‑wawlakʋlʋ ‑fɛɛɛa’ ’jrʋpa nyra ’ana plɛlɛ ’a ’piea’ ana ’Pläkänyɔɔ Jesu ’Kriisë ‑gälɩ ɛnyɩ sɩaa’. ⁴Nyɔsʋaa ‑wawawlajü ’amɩ, a jre ’imɩ ’sɩrɩ ’ɔ ’baalɩ ’amɩ, ⁵’be ’Mʋfagogolä a ’saraa’ ’lɩ ’amɩ nɩ, ’änyɩ ’fʋflɛ ‑gogo ‑a bä, ‑maa ’Nyüna ‑Susua ’klü bä ’lɩ, anya ’suru ’sɩrɩ ’i bäa ’cɩcasa; ’be ’a ’jä ’sɩrɩ a ’nyɛrɛa’ ’ana ‑tɔrʋpɩɔ, ’ia ’fɩɔlʋ nɩ ’ana ’cɩcasaa ‑gʋ.

⁶’Amɔlɔ nɩ, ’a nʋ ana ’sa nyra ’Pläkänyɔɔa ’sa. ’A ’jä ‑sʋɩa ’fɩɔ, ‑maa ’asɩɛ ’a nʋ dɔrʋlʋ sɔa’ ’Nyüna ‑Susua ‑nyɛɛ ’anya ’nyiere nyɔsʋaawii ’klɩ. ⁷’Anya bä bɩa nyüülü Masedoanënyüü nyra Akaiia ‑tʋtʋ ‑gälɩa nyɔsʋaplɛtoronyüüa ’fɩɔ ’bataa’ ’ümäa’ jajra. ⁸’Be ’Pläkänyɔɔa wiia mimikʋlʋ nɩ, ‑tɛ ’ana ‑nyɛɛ ’i sɔrɔ ’klɩ. ‑Mää Masedoanë nyra Akaiia ‑tʋtʋa ’doo ‑gälɩ ‑a, ‑maa ’ana nyɔsʋaplɛtorokʋa wii mi ‑pɩɔa ’fɩɔ. ’Ia mimikʋa ‑gʋ, a ‑kanyɩ ’ia ‑gäa ’papakʋ ‑a kä. ⁹’Ii känyrɩ, ‑moloo ma bälɩ ’ɔ ’saalɩ ’sɩrɩ ’a nʋa’ ana ’kplakpladɛɛ, ’sɩrɩ ’a ’cɛrɛa’ ‑papanyɔsʋaɩɩ ‑wälɩ ‑bɛ ’a jia’ ’Lɩbä Nyɔsʋalɔ bäa’ ’cɩcasaa ’jrʋpa ‑fɛ. ¹⁰‑Bɛ ’a jia’ ’ɔa ’Jʋlɔ ’mäa’ cɛlɩ sɔ ‑glaa, ’ɔa ’Jʋ Jesu ’ɔ ’baa’ jäjänyüüa ‑tɔrʋpɩɔ, ’ɔɔ ’baa amɩ ’crɛlɛ jöa’ mlɩ1.10 ’crɛlɛ jöa’ mlɩ: ’Iibä ‑gälɩblörö ‑gä. Tɛ 5.9; Jaan 5.24; Rɔmënyüü 1.18..

’Jrʋpalä ’Pɔɔlë ‑fɛɛɛrɛa’ Tɛsalonikë

¹’Na ‑wlajü ’amɩ, ’ana ’mʋgbɛ jre ’iin: ‑mää ’fëflɛsa anyɩ ’ana ‑nyɛɛ ji! ²’A jre ’iin ’sɩrɩ a ’järäa’ ‑sʋɩ Filipëbätä, ’sɩrɩ ’ü nʋa’ amɩ ‑gbigba; ’asɩɛ anya ’pa ana nyüfë ’klü ’lɩ Nyɔsʋaa ’nyrɩklɩ anya ji ’amɩ Nyɔsʋaa ’Mʋfagogo ’lɩsara; ’klü a ’pa anya nʋ ’imɩ. ³’Be ’papawiili a ’saraa’ ’lɩ ’amɩ ’nyɩ ‑gbagblɛ ‑a bä, ’inyɩ cacɩwii, ’aiɛ ‑trɔɔrɔ wii ‑a bä. ⁴‑Maa Nyɔsʋa jrea’ ’saa a ’mrɛɛ a ’sa ’Mʋfagogo nɩ, ’a ’ia ’sa a ’paa wii. Anyɩ ’pawii ‑a ’kä amä nyüü ’tʋkä, ‑maa Nyɔsʋalɔ ’jääa’ ana polu ’wʋ ’ɔɔ a nëmä ’tʋkä.

⁵’A jre ’iin, a ‑kaapɩɔ ‑gbagblɛ dɛtʋ dɛtɛ. A ‑kaapɩɔ ’amɩ yrʋ ‑gba ja amä ’amɩ ’jie; Nyɔsʋa ’jää amɩ ’wʋ! ⁶Anyɩ ’daa abɩa nyüü ’bʋala amɩ ’ana ‑nyɛɛ ’aiɛ ‑pɩɔ ‑mɩdoo. ‑Bɛ a bäa’ ’Kriisëa apotrëɩɩ nɩ, a ’mrɛɛ ɩ a ja ’amɩ ana ’kamakʋ ‑gälɩ2.6 ‑Bɛ a bäa’ ’Kriisëa apotrë nɩ, a ’mrɛɛ ɩ a ja ’amɩ ana ’kamakʋ ‑gälɩ: Grɛɛkë ‑kätɩpɔɔkɩ ‑mɩdooa ’mlɩ ‑taa waklüülü ‑jɩjra 2.7 ’lɩ.. ⁷‑Maa plɛböblösa a kʋ ’ana ‑tɔrʋpɩɔ, ‑beere ’sɩrɩ ’ŋlʋʋ ‑tʋʋäa’ ’ɔa ’jʋ ’nyü ‑gba ‑bɛ ’ɔ ’nyaaa’ ’ɔɔn. ⁸’Asɩ a ‑wa ’amɩ, a ’bata ɩ a ‑nyɩ ’amɩ Nyɔsʋaa ’Mʋfagogo, amä ’nɩmɩ ana ’klä ’sa ’sɩrɩ a ‑waa’ ’amɩ, ’ia ‑gʋ.

⁹’Na ‑wlajü ’amɩ, ’jrʋpalä a ‑fɛa’, ’sɩrɩ a sɩaa’, ’n jresaa ’a ‑kaaŋlʋ ’iin ‑trɔ: ‑srɩ ‑bɛ ‑gbia kɔsɔ, a ‑fɛɛɛ ’jrʋpa a ‑pɩ ’ana nyɔɔ ’doo ’wli kʋ. ’Asɩ a ’sara ’lɩ ’amɩ Nyɔsʋaa ’Mʋfagogo. ¹⁰’A ’jä ’imɩ, Nyɔsʋaa ’mʋgbɛ nya ’jä ’imɩ, ’sɩrɩ a ’nyɛrɛa’ ’ana ‑tɔrʋpɩɔ ’amɔ bäa’ nyɔsʋaa plɛtoronyüü, ’sɩrɩ Nyɔsʋa ’bataa’ ’a ’ia ’sa a ’nyɛ. A ‑gäklɩ, anyɩ ‑fre ’lɩ ‑a bä. Nyɔɔ ’nyɩ ’lɩ ‑a bɩa ɔ ’pa ana ‑gʋ bʋbɔwii. ¹¹’Ana ’fɩɔ jre bɩa ’iin ’sɩrɩ a bä käa’ ’ana ‑tɔrʋpɩɔ ‑beere tʋ ‑bɛ ’ɔa ’jü: ¹²a ’jraraa’ ’ana ’klü, a ‑sɔɔrɔa’ ’ana plɛ ’wʋ ‑bɛ a ’paa ’amɩ ‑tɔɔ ’lɩ ’amä ’nyɛ ’sɩrɩ Nyɔsʋa ’bataa’. ’Ɔɔ we ’amɩ ’amä ’ɔa ’kamaplä nyra ’ɔa ’wliklɩbʋabʋakʋa ’mlɩ pa.

¹³’A ’ia ‑gʋ a ’trɛɛ Nyɔsʋa ’plɔʋplɔʋ, ’be a ‑gbalaa’ ’amɩ nyɔsʋaawii. ’Anyɩ ’iin ’kpla ‑a ’kpla ‑beere nyɔɔa dɛtɛdɛtʋ, ‑maa ’sɩrɩ ’i bäa’ ’tasɩrɩa Nyɔsʋaa wii nɩ, ’asɩ ’a ’kpla ’iin. ‑Bɛ ’ia ’mʋgbɛ ‑fɛɛɛrɛ ’ana ’kläa ’mlɩ ’jrʋpa; ’amɔ toroa’ Nyɔsʋa plɛ. ¹⁴‑Yɛɛ ’na ‑wlajü ’amɩ, ’a nʋ Nyɔsʋaa ’cɛcʋlʋ bäa’ Judeea ’sa, ü bäa’ Jesu ’Kriisë ’lɩ. ’A ’jä bɩa ‑sʋɩ ’ana ’brea nyüüa ‑gʋ, ’sɩrɩ ’ü ’jäa’ bɩa ‑sʋɩ juifënyüüa ‑gʋ. ¹⁵’A ’üü ’bla ’Pläkänyɔɔ Jesu nyra ’üa ’mʋgbɛa nyɔsʋaamlɩpalanyüü; ’a ’üü nʋ amɩ ‑gbigba. Nyɔsʋa ’nyɩ ’üa wii ‑a ‑wa. ’Ü jrara nyüüa ’fɩɔ ’nyüa ’mlɩ2.15 Akëtë 9.23,29; 13.45,50; 14.2,5,19; 17.5,13; 18.12.. ¹⁶’Ünyɩ ‑nyɩ amɩ ’casɩ ‑a amä nyüülü ’nyɩa’ juifë bä wii ‑gba ’pala ’ü ‑pɩ ’lɩmlɩwʋ, ’asɩ ’ü nö ’ü ’papla ’üa ‑balʋ ‑gälɩa ’doo. ‑Maa ’imä ’wlarakalɩ mi nɩ, Nyɔsʋaa ’crɛ blö ’üün ‑gälɩ.

’Pɔɔlë ’bata ’ɔmä ’sɔɔwʋ Tɛsalonikënyüü ’jä

¹⁷‑Maa ’na ‑wlajü ’amɩ, a sɔsrɔa’ ‑gba jrüü jiea ’mlɩ nɩ, anyɩ ’jäjrä ’wʋ ‑a, ‑maa ana polu ’jäjrä ’wʋ. ’Bala ’ia ’taɩn ’lɩ nɩ, a ’paa ’kpɔɔ amä ’amɩ ’jä, ’be ’ana ’tʋ ’si amɩ ’klɩ ‑gböösa. ¹⁸’A ’ia ‑gʋ a ’bata amä ’ana ‑nyɛɛ ji, ‑bɛ ’mɔɔ ’Pɔɔlë nɩ, ’n kätɛ ’nyaa tri, ‑maa Sataan ’nyɩ amɩ ’casɩ ‑a ‑nyɩ. ¹⁹Nyɔɔ ’plɛɛ bä ana plɛgälɩpiepiekʋ le? Ɔ bä ana dɔrʋ le? Ɔ bä ana ’wʋsisikʋa ’pɛpɛɛkʋ i amä ‑pɩ ana ’Pläkänyɔɔ Jesu2.19 ’Pläkänyɔɔ Jesu: Grɛɛkë ‑kätɩpɔɔkɩ ‑mɩdooa ’mlɩ ’i ‑jɩjra: «’Pläkänyɔɔ Jesu ’Kriisë.» srara ‑srɩlɩ kä ’ɔmäa’ ji le, ‑mää ’amɔ ‑a? ²⁰‑Yɛɛ, ’amɔ bä ana ’bʋalakʋ nyra bɩa ana dɔrʋ!

¹A ‑kanyɩa’ ’lɩbɩa amäa’ ‑glaaa nɩ, ’a ’ia ‑gʋ a tɩɔ dotro Atɛɛnëbätä, ²anya blɔ ana ‑wlajʋ Timotee, ɔ a nyra ’ɔɔn ‑fɛɛɛrɛa’ Nyɔsʋa ’jrʋpa ’wʋ a ’saa ’Mʋfagogolä ’paaa’ ’Kriisëa ‑gä. A ‑gbala ’ɔɔn ɔ ’pa ’amɩ ’klü ’lɩ, ‑bɛ ɔ ji ’amɩ ‑gba ’ana nyɔsʋaplɛ ’mä ’wʋsɔɔrɔ, ³nyɔɔa plɛ ‑pɩ ’lɩcakla ‑taa ‑sʋɩlɩa ’mlɩ. ’Be ’ana ’mʋgbɛ jre ’iin ’sɩrɩ ’ia ’samaa ‑sʋɩlɩ käa’ imäa’ amɩ ‑gälɩjrä. ⁴’Be a bä käa’ ’ana ‑tɔrʋpɩɔ nɩ, a ‑gbala ’amɩ ’sɩrɩ amäa’ ‑sʋɩ ’jä. ’A ’i jrälɩ, ’a jre ’iin. ⁵’A ’ia ‑gʋ, ’n ‑kanyɩa’ ’lɩbɩa ’mäa’ ‑glaaa nɩ, ’nyaa blɔ Timotee ɔ ji ɔ ’jä ’sɩrɩ ’ana nyɔsʋaplɛ bäa’. Ŋalɛ ’blaa ’mɩ ’Lɩbenyɔɔ ‑pɩ ’amɩ ’lɩ be, ‑bɛ ’jrʋpalä a ‑fɛ ’ana ‑gʋ ‑pɩ ’flɛɛ ’wʋ tɩɔ.

’Klüjrara ‑gogolä Timotee jaa’

⁶‑Maa ’be ’abɩa Timotee sɔa’ ’ana ‑nyɛɛ nɩ3.6 Akëtë 18.5., ’ɔ ja amɩ ’ana nyɔsʋaplɛa ’mʋfagogo nyra ’ana ‑wawakʋ. ’Ɔ ‑gbala amɩ ’sɩrɩ ’a ‑ka boboa’ ana ’cɩcagbi, ‑bɛ ’a ’bataa’ ana ’jäjäkʋ ’sɩrɩ ana ’mʋgbɛ ’bataa’ ’ana ’jäjäkʋ. ⁷’Na ‑wlajü ’amɩ, ‑sʋɩ nyra sɩsɩakʋlʋ kä ’mlɩ a bäa’ nɩ, ’ana nyɔsʋaplɛ ’pa amɩ ’klü ’lɩ. ⁸’Köklesaplɩɩ nɩ, ana plɛ ‑kanyɩ ‑taara ’lɩ ‑a, ’be ’a ‑sɔɔrɔwʋ ’Pläkänyɔɔ ’lɩ. ⁹‑Asɩ anya nʋ ‑bɛ anya ana Nyɔsʋa ’trɛɛ ’ana ‑gʋ, ’kä dɔrʋlʋ kä ’fɩɔ ’a ‑nyɛɛa’ amɩ ’ɔa ’klʋɩ le? ¹⁰‑Srɩ ‑bɛ ‑gbia ’sɔ Nyɔsʋa a bibie ’ɔmä amɩ ’casɩ ‑nyɩ amä ’sɔɔwʋ ’amɩ ’jä; amä ’lɩ dɛɛlɛ ’makɩa’ ’ana nyɔsʋaplɛtorokʋ ’lɩ ‑tʋ.

¹¹Abɩa ana ’mʋgbɛa Tʋ ’ɔa ’mʋgbɛ, ana Nyɔsʋa, nyra ana ’Pläkänyɔɔ Jesu ’Kriisë3.11 ’Kriisë: ‑Taa ‑waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä. ’sa tatu amä ’ana ‑nyɛɛ ji! ¹²Abɩa ’Pläkänyɔɔ ’papla ’ana ‑wawlakʋ ‑gälɩ, nyra nyüü ‑mölööa ’pɛlɩ, ’sɩrɩ a ‑waa’ ’amɩ. ¹³Abɩa ’Pläkänyɔɔ ‑sɔɔrɔ ’amɩ ’wʋ, ’ia ’taɩn ’lɩ ‑srɩlɩ kä ’mlɩ ana ’Pläkänyɔɔ Jesu ’Kriisë3.13 ’Kriisë: ‑Taa ‑waklöölä ’nyɩ grɛɛkë kätɩpɔɔkɩ ‑mɩdooa ’mlɩ ‑a bä. ’mäa’ dɛrɩ ’blöö, ’ɔɔ ‑bɛ ’ɔa nyüülü kä ’fɩɔ ’ɔ käa’ nɩ, ’anya nyüülü kä ’nyü ’naa’ bäa ana Tʋ Nyɔsʋaa ’klɔɔtrʋ; nyɔɔ ‑nëmä ’amɩ wii ‑a ’kplara3.13 Grɛɛkëa ‑kätɩpɔɔkɩ ‑mɩdooa ’mlɩ ’i ‑jɩjra ’lɩ: ’Asɩ i bä..

’KLÄLÄ KÄA’ NYƆSƲA ’TƲ

4.1-12

’Ba ’nyɛɛ ’sɩrɩ Nyɔsʋa ’bataa’

¹’Na ‑wlajü ’amɩ, ’a ’kpɩara amɩ ‑gba ’sɩrɩ ’amäa’ ’nyɛ ‑bɛ ’amäa’ Nyɔsʋa ’tʋkä; ’ii ’a nö ɩ ‑piii4.1 ’ii ’a nö ɩ ‑piii: ‑Taa waklüülü ’nyɩ grɛɛkë kätɩpɔɔkɩ ‑mɩdooa ’mlɩ ‑a bä.. ‑Maa amɔ ’betre ’amɩ ’iin ’lɩ: a bibie ’amɩ, ’sɩrɩ ’a nyra ’Pläkänyɔɔ Jesu bäa’ ’doo nɩ, ’ia ’nyrɩklɩ, ’ba ’palɩ ’klü ’ba nʋ ’iin a ’doo. ²’Be ’a jre ’kpɩkpɩakʋlʋ sɔa’ ’Pläkänyɔɔ Jesua ‑nyɛɛ, u a ’kpɩaa’ ’amɩ. ³‑Jäsɩ Nyɔsʋa ’bataa’ nɩ, abɩa ’ana ’kläa ’nyü ’na: ’ba tʋŋlɔlɩ ‑sagbili kä ’fɩɔ Nyɔsʋa ’nyɩ ’bataa’ dɛrɩ; ⁴‑moloo ma bälɩ ɔ jre ’ɔa fugbaa ’tierekʋ4.4 ’I ’mrɛɛ i bä bɩa: «‑moloo ma bälɩ ɔ jre ’ŋlʋʋa ’lɩbabakʋ ’nyünanakʋ ’lɩ nyra ’lɩträäräkʋ ’lɩ». ’nyünanakʋa ’mlɩ nyra ’lɩträäräkʋ ’lɩ; ⁵’ɔnyɩ ’cɛrɛ bʋbɔgbi ‑wälɩ ’inyɩ fa ’ɔa plɛ, ‑beere nyüülü ’nyɩa’ Nyɔsʋa jre. ⁶Nyɔɔ ’nyɩ nʋ ’ɔa ‑wlajʋ ’iia ’samaa’ ‑balʋ ‑gba, ’be Nyɔsʋa nya ’ia bʋbɔgbili ’pɔnɩa. Anya ɩ ’amɩ ’iin ‑gbala ’wʋ ’kɔkɔmlɛ ’wʋ. ⁷Nyɔsʋa ’nyɩ amɩ ‑a we amä ‑frepanyüü bä, ‑maa ’ɔ we amɩ amä nyüülü kä ’nyü ’naa’ bä. ⁸’A ’ia ‑gʋ nyɔɔlɔ ’nyɩ ‑trääräa’ ’lɩ ’ia ’kpɩkpɩawiili nɩ, ‑mää nyɔɔa wii ’ɔnyɩ ’balɩ ‑maa Nyɔsʋalɔ ‑nyɛɛa’ amɩ4.8 amɩ: Grɛɛkë ‑kätɩpɔɔkɩ ‑mɩdooa ’mlɩ ’i ‑jɩjra ’lɩ: ’amɩ. ’Nyüna ‑Susu, ’ɔa wii ’ɔ ’baalɩ.

⁹Dɛɛlɛ bäa’ ’sɩrɩ ’cɛcɩnyüü ’mäa’ ‑wawla nɩ, ’anyɩ ’wʋ ‑jɩjrakʋ ‑a kä, ’be Nyɔsʋaa ’mʋgbɛ ’kpɩa ’amɩ ’sɩrɩ ’amäa’ ‑wawla. ¹⁰’A ’ii ’a nö ‑wlajülü kä ’fɩɔ bäa’ Masedoanëa ‑tʋtʋa ’fɩɔ ‑gälɩ. ‑Maa ana ‑wlajü ’amɩ, a ’jrara ’ana ’klü, ’ba ’palɩ ’klü ’ba nʋ ’saa a ’doo. ¹¹’Sɩrɩ ’amäa’ nʋ ‑bɛ ’amäa’ ’pʋpʋɛ ’lɩ kʋ, ’ii ’ba bobo. ’Ana ’mʋgbɛ ’ba ‑fɛ ’jrʋpa ’sɩrɩ a ‑gbalaa’ ’amɩ, ¹²’ana nʋnʋgbi ’mä ‑fälɩa nyüüa ’klɔɔtrʋ ’nara, ‑bɛ ’a ‑pɩ ‑sɛsɛjrʋpa kä.

’SƖRƖ ’PLÄKÄNYƆƆ ’MÄA’ DƐRƖBLÖÖ

4.13–5.11

’Sɩrɩ ’Pläkänyɔɔ ’mäa’ dɛrɩblöö

¹³‑Wlajü ’amɩ, ’n ’bata4.13 ’n ’bata: Grɛɛkëa ‑kätɩpɔɔkɩ ‑mɩdooa ’mlɩ ’i ‑jɩjra ’lɩ: a ’bata. ’ba jre wiili ’palaa’ jäjänyüüa ‑gälɩ, ’a ‑pɩ ɔ ’kpɔɔ ‑beere nyüülü ’nyɩ ‑glaaa’ Jesu. ¹⁴Ama jresaa Jesu jä ’ɔnya tɛkä nɩ, ’ɔɔ Nyɔsʋa ’mä kälɩsrörö ’ɔmä bɩa nyüülü jäa’ ‑gbapapla. ¹⁵‑Jäsɩ a ‑gbalaa’ ’amɩ nɩ, ’Pläkänyɔɔa mlɩa wii bäsaa: amɔ ’lɩbänyüülü ’mäa’ ’lɩbä bä ‑bɛ ’Pläkänyɔɔ ’mäa’ ji nɩ, a ‑nëmä jäjänyüü dɛrɩ ‑a tɩ. ¹⁶’Be ’Pläkänyɔɔ nya ’kamanyɔɔa ’sa ’lɩkäkpöa, ’Aanjë Kpakö nya wii ’paa, Nyɔsʋaa dɛglɛ nya wii ’paa, ’kä ’Pläkänyɔɔa ’mʋgbɛ nya cɛa ’mlɩ ’cie, ’kä nyüülü kä ’fɩɔ järäa’ ’Kriisë ’lɩ nya ‑kätɩ ’wʋsɔ4.16 Jaan 5.25.. ¹⁷Amɔlɔ bäa’ ’lɩbänyüülü tɩɔa’ ’lɩ nɩ, ’kä Nyɔsʋa nya amɩ ’wʋdɔrɔ ’kä ’ɔnya amɩ ’üün ’cakla ’kä ’ɔnya amɩ ‑gbrua ’bö ‑gälɩ ‑tʋ ’ɔmä amɩ fa a nyra ’Pläkänyɔɔ ’mä trara. ’Ia ’taɩn ’lɩ a nyra ’Pläkänyɔɔ nya ‑pɩɔ ’doo ’wʋ kʋa ’taɩn a ’fɩɔ ’lɩ4.17 1 Korɛɛntënyüü 15.51-52.. ¹⁸’Ba nʋ ‑taa ’papawiili ’ba ’papla ’klü ’lɩ.

’Sɩrɩ amäa’ ’Pläkänyɔɔ ‑glaaa

¹Dɛɛlɛ bäa’ ’taɩn nyra ‑srɩ nɩ, ’na ‑wlajü ’amɩ, ’anyɩ kä ‑a kä ’amä ’ia ‑pɔɔkʋ ‑glaaa. ²’Be ’ana ’mʋgbɛ jre ’imɩ ’tasɩrɩ ’sɩrɩ ’Pläkänyɔɔa jijijrüü ’mäa’ ‑beere ’sɩrɩ ’jejienyɔɔ jöa’ ‑gbiara5.2 Matiö 24.43; Lukë 12.39; 2 Piɛɛrë 3.10.. ³’Taɩn ’lɩ ’ümäa’ ’daa: «‑Yrɛ ’a bɩa, wii ‑ka ‑nëmä ’lɩ ‑a bä5.3 wii ‑ka ‑nëmä ’lɩ ‑a bä: Jeremii 6.14; 8.11.» nɩ, ’a ‑plɩɩ ’ümä ‑sʋɩ ’järä ‑beere ’ŋlʋʋ nëmä ‑gu ‑bɛ mɩmɩakʋ ‑fuuöa’ ‑wälɩ, ’i ‑nëmä ’lɩ nyɔɔ ‑a tɩ. ⁴‑Maa ’amɔlɔ nɩ, ‑wlajü ’amɩ, ’anyɩ ’jöjrüükpü ’lɩ ‑a bä. ’Ia ‑srɩlɩ ‑nëmä ’amɩ ‑wälɩ ‑a ‑fu ‑beere ’jejienyɔɔ. ⁵’Be ’ana ’fɩɔ bä ’napɛa ’jü, ’anya bä ‑srɩa ’jü. Anyɩ ‑gbiaa nyüü ‑a bä, anyɩ bɩa ’jöjrüükpüa nyüü ‑a bä. ⁶’Ii känyrɩ nɩ, anyɩ ’mʋmɔ ‑beere ’üün, ‑maa a tɛkä, a ‑tre ana nyufa.

⁷Nyüülü ’mʋmɔa’, ’mʋmɔ ‑gbiara, ‑bɛ ‑mülü ’blaraa’ ’üa nyüfë ’nʋ nɩ, ’u ’blaa ’üün ‑gbiara. ⁸‑Maa amɔ bäa’ ‑srɩa ’jü nɩ, a ‑tre ana nyüfë; a ’sroo nyɔsʋaplɛtorokʋ nyra ‑wawlakʋ ‑beere tafukotu, a ’pie ’lɩmlɩwʋwʋkʋ plɛ ‑gälɩ ‑beere tafuwlugbö5.8 Esaii 59.17.. ⁹’Be Nyɔsʋa ’nyɩ amɩ ’crɛ ‑a tɛrɛ, ‑maa ’lɩmlɩwʋwʋkʋ a kä, ana ’Pläkänyɔɔ Jesu ’Kriisë ’lɩ, ¹⁰’ɔɔ jäa’ ana ‑gʋ, ’ia ’taɩn ’lɩ, ‑bakää anyɩ tɛkä, anyɩ ’mʋmɔ, a nyra ’ɔɔn ’mä ’plä ’wʋ bä. ¹¹’Ii känyrɩ nɩ, ’ba ’papla ‑tɔɔ ’lɩ, ’kä ’a jö ’ana ‑mölöö ‑gba ’ümä ’bʋa, ’sɩrɩ ’a nöa’ a ’doo.

‑Gälɩblörötɔɔɔ nyra ’trɔrʋ

¹²‑Gbala a ‑gbala ’amɩ ‑wlajü ’amɩ, ’ba ‑träärälɩ nyüülü bäa’ ’ana ‑tɔrʋpɩɔ ü ‑fɛa’ ’Pläkänyɔɔa ’jrʋpa, ü ’tierea’ ’amɩ, ü ’paa’ ’amɩ ‑tɔɔlɩ. ¹³’Ba ‑träärälɩ ’ümɩ ‑gböösa ‑bɛ ’ba ‑wa ’ümɩ ’üa ’jrʋpaa ‑gʋ. ‑Yrɛ ’nyɩ bä ’ana ‑tɔrʋpɩɔ.

¹⁴‑Wlajü ’amɩ, a bibie ’amɩ: ’ba ’pa ‑fɛfɛnyüü ’klü ’lɩ ’ümä ’jrʋpa ‑fɛ, ’ba ’pa nyüülü kä ’koi ’jɔklɔa’ ’klü ’lɩ, ’ba ji ‑mülü ’fʋmaa’ ‑gba, ’ba kä plɛpɩpɛ nyüüa ’fɩɔa ’pɛlɩ. ¹⁵’Ba ‑tre ’ana nyüfë, nyɔɔ ’nyɩ nʋ ‑balʋ ’ɔnyɩ ’sa ‑balʋa ’kpa; ‑maa ’ba prɛ wiili ’naa’ dɛrɩ ’taɩn a ’fɩɔ ’lɩ, ’ba nönrö ’iin ’ana ‑tɔrʋpɩɔ nyra nyüüa ’fɩɔa ‑tɔrʋpɩɔ.

¹⁶’Ba nʋ dɔrʋ ’taɩn a ’fɩɔ ’lɩ.

¹⁷’Ba bibie Nyɔsʋa ’taɩn a ’fɩɔ ’lɩ.

¹⁸’Ba ’trɛɛ Nyɔsʋa ’sɩmɩ ’taɩn ’nyɩ bä: ’be a wiili Nyɔsʋa ’bataa’ ’ana ‑gʋ Jesu ’Kriisë ’lɩ.

¹⁹’Anyɩ ’nyrɔlɔ ‑Susu: ²⁰’anyɩ ’pala nyɔsʋaamlɩpalanyüüa wii sa ’wʋ, ²¹wiili kä ’fɩɔ ’ümäa’ ’lɩsa; i ’naa’ ’ii ’ba ’balɩ.

²²’Sɩmɩ ‑balʋ ’nyɩ ’cicri, ’anyɩ blö ’ua ’mlɩ.

²³Abɩa Nyɔsʋalɔ bäa’ ’pʋpʋɛ bere ’amɩ ’klɩ. Abɩa ’ana ’kläa ’fɩɔ: ’ana bobowli, ’ana ‑gälɩasusu nyra ana fugba, bereklɩ. Wii ‑pɩ ’amɩ ’kpla ana ’Pläkänyɔɔ Jesu ’Kriisëa jijisrɩ ’lɩ! ²⁴Nyɔsʋalɔ wea’ ’amɩ ’ɔ bä plɛtorosa: ’ɔɔ nëmä ’iin nʋ.

²⁵‑Wlajü ’amɩ, ’ba bibie bɩa ana ’wlili. ²⁶’Ba ‑gbegbre Nyɔsʋaa ’nyünanyüüa ’sa ‑wlajüa ’fɩɔ.

²⁷’N bibie ’amɩ ’Pläkänyɔɔa ’nyrɩklɩ, ’ba ‑täsrä ‑pɔɔkʋlʋ ‑wlajüa ’fɩɔa ’klʋɩ.

²⁸Abɩa ana ’Pläkänyɔɔ Jesu ’Kriisëa ‑gbinanakʋ bä ’amɩ ‑gälɩ. ’Asɩ i bä5.28 ’Asɩ i bä: ‑Taa waklöölä ’nyɩ grɛɛkë ‑kätɩpɔɔkɩ ‑mɩdooa ’mlɩ ‑a bä..