Yelwiilsɩ

A YESU KƖRƖSƖTO YELWIILSƖ GÃN

¹A yelwiilsɩ ala a Nãaŋmɩn na kʊ a Yesu Kɩrɩsɩto ɩka wʊ wiil kʊ a wʊ gbãgbaa ala kʊ̃ yaar tɩ ɩ ɛ. Yesu tʊ̃ naa a wʊ malaka ɩka wʊ tɩ ’yɛr kʊ a wʊ gbãgbaa Jɔɔn. ²Jɔɔn mɩ man naa a ala a jaa wʊn nyɛ na ɩ a Nãaŋmɩn ’yɛr nɩ lɛ a Yesu Kɩrɩsɩto na ’yɛr. ³Pʊpɛl sʊɔ lɛ a ’lɔ na kar a gãn nyã. Pʊpɛl dẽme mɩ lɛ a bala na wõ tɩ de ’yɔ̃ɔ a ba nyãn pɔ, lɛ an sɛb a gãn nyã pɔ, bojũu a bɩbir gbʊr naa.

⁴Maa Jɔɔn lɛ sɛb a gãn nyã kʊrɔ a yɩn pupuorbiir gbulsɩ ayopõi na be Asɩya paal pɔ. Wãɛfʊ nɩ nyã’maar yi a Nãaŋmɩn sɛ̃, ’lɔ lɛ ɩ, ’lɔ lɛ be be, nɩ ’lɔ lɛ na wa, naa yi a Sɩɩr ayopõi na ara a Nãaŋmɩn dakɔɔ niem, ⁵naa yi a Yesu Kɩrɩsɩto sɛ̃, ’lɔ lɛ ɩ a yelmãɛ dãasɩɛ sʊɔ, na wʊ ɩ a bidɔ̃ɔ ’lɔ na ir a kũu pɔ ɩ vʊr, ’lɔ lɛ ɩ a nãmɩne ba jaa nãkpɛ̃ɛ na be ka a wɛr pɔ. ’Lɔ lɛ nʊ̃ sɩ na wʊ de a wʊ jãɩ pɛɛ sɩ yin a sɩ yeldɛɛr pɔ na wʊ faa sɩ, ⁶na wʊ maal sɩ a wʊ nãalʊ̃ʊ nɩbɛ nɩ Nãaŋmɩn bɔɔr lorbo ka sɩn tʊ̃nɔ̃ kʊrɔ a wʊ Nãaŋmɩn na ɩ a Sãa, ’lɔ lɛ so a tɩɩr nɩ a kpɛ̃ɔ a bɩbir nɩ bɩbir jaa! A ɩ a lɛ. ⁷Yɩ nyɛ, wʊn yi naa a sajulõjuur pɔ waara, ka a nɩbɛ ba jaa nyɛ wʊ lɔ̃ɔn a bala na chɔr wʊ, a nɩbʊrsɩ na be ka a tẽe na kõnõ naa a wʊ waa jũu. Lɛ lɛ an ɩ! A ɩ a lɛ.

⁸A sɩ Soro Nãaŋmɩn na ɩ a kpɛ̃ɔ jaa sʊɔ ’yɛr naa, “Maa lɛ a Pielfʊ nɩ a Baaraa. Maa lɛ dɔ̃ɔ be be. Maa lɛ chɛnɛ be be. Maa lɛ na wa.”

⁹Maa Jɔɔn na ɩ a yɩ yɛbɛ, n pʊɔ yɩ naa a dɔɔyɛ pɔ a Yesu tufʊ jũu. Maa nɩ yɩn jaa ben a Nãaŋmɩn nãalʊ̃ʊ pɔ tɩ chɛnɛ tara kãnyir. N ben a man dõdol pɔ ban bʊɔlɔ Patimosɩ bojũu n ’yɛr naa a Nãaŋmɩn ’yɛr naa di a Yesu dãasɩɛ. ¹⁰A sɩ Soro Bɩbir Daar, Nãaŋmɩn Sɩɛ ir ma naa ka n wõ nɛkpɛ̃ɛ na tãn a n puor fɩka ɩɩl ban pɛɛl, ¹¹ka a kɔkɔr ’yɛr, “Sɛb a ala a jaa fʊn nyɛ ’yɔ̃ɔ a gãn pɔ, na fʊ tɩr kʊ a pupuorbiir gbulsɩ ayopõi. Efesus, Semena, Pergamum, Tayatira, Saadisɩ, Feladelfiya nɩ Laodisea.”

¹²N lɩɛb ɩka n kaa an lɛ ’yɛrɛ a lɛ kʊrɔ ma. Ɩn wa lɩɛb, n nyɛn sɛlma fãtɩnɛ dɔɔlfʊ jie jiir ayopõi. ¹³A fãtɩnɛ dɔɔlfʊ jiir anyãna sãlsɔɔ, n nyɛn nɩrɛ na kaara fɩka Nɩsaal Bie (Danɩɛl 7:13) na wʊ su fuu wõo ka wʊ ta a gbɛɛ pɔ, tɩ a sɛlma gãn bãbã a wʊ nyãa ju. ¹⁴A wʊ jukɔɔl pɛl fɩka gõn, ka a nɩbie kaara fɩka bũu na ’lɩrɛ. ¹⁵Ka a gbɛɛ nyɩlɛ fɩka kur jɩɛ ban juu ir sãa pɔ, ka a kɔkɔr wʊn ’yɛrɛ nyɛtãan kɔ̃kpɛ̃ɛ na joro. ¹⁶Ŋmɛrbie ayopõi be naa a wʊ nũsʊ̃ɔ pɔ, ka a sɔbʊraa na dire a jiir a jaa ayi, yi a wʊ nɛɛ pɔ. Ka a wʊ nie nyɩlɛ fɩka mɔ̃tɔ̃ɔ na ara gar ju sãlsɔɔ.

¹⁷Ɩ̃n wa nyɛ a lɛ, ka n lo kpa a wʊ niem gã fɩka kũu. Ka wʊ pãa dɔɔl ma a wʊ nũsʊ̃ɔ tɩ ’yɛr kʊ ma, “Ta joro dãbãɛ ɛ. Maa lɛ a Pielfʊ nɩ a Baaraa. ¹⁸Maa lɛ ɩ a Nyɛvʊr Sʊɔ. Nyɛ, n dɔ̃ɔ kpi, tɩchɛ n ir naa ɩ vʊr, n kʊ̃ lɛ kpi go ɛ. Maa lɛ tara a kũu nɩ a kpĩisɩ tẽe pãn bir.

¹⁹“A lɛ juu sɛb a ala fʊn nyɛ na dɔ̃ɔ ɩ nɩ a pʊ̃pãanyã, nɩ a ala na wa ɩ daar kɔ̃ɔ. ²⁰A yelsɔɔlaa ’lɔ na be a ŋmɛrbie ayopõi ala fʊn nyɛ a n nũsʊ̃ɔ pɔ nɩ a sɛlma fãtɩnɛ dɔɔlfʊ jie jiir ayopõi par nɩ nyã. A ŋmɛrbie ayopõi ala ɩ naa a pupuorbiir gbulsɩ ayopõi malakasɩ, fãtɩnɛ dɔɔlfʊ jie jiir ayopõi mɩ ɩ a pupuorbiir gbulsɩ ayopõi.

¹“Sɛb kʊ a malaka ’lɔ na ara kʊ a Efesus pupuorbiir ɩka, a ’lɔ na tara a ŋmɛrbie ayopõi a wʊ nũsʊ̃ɔ pɔ na wʊ chiine a sɛlma fãtɩnɛ dɔɔlfʊ jie jiir ayopõi sãlsɔɔ ’yɛr lɛ a anyãna. ²N bɔ̃ɔ naa a lɛ fʊn be, naa bɔ̃ɔ a fʊ tʊ̃mɔ̃ nɩ a fʊ kãnyir. N bɔ̃ɔn naa a lɛ fʊn ba ’maa nɩbir kʊ a putudẽme ɛ, ala lɛ so ka fʊ bɛɛr a bala na ’yɛr ɩka Yesu nɩtʊ̃nsɩ lɛ ba ɩ na fʊ nyɛ ka ba ɩ jir ŋmarba. ³Fʊ tara na kãnyir na fʊ di dɔɔyɛ a n yuor jũu, tɩ faa bal ɛ. ⁴Tɩchɛ n chɛnɛ na tara fʊ nɩ ’yɛr. Fʊ bar naa a fʊ dɔ̃ɔ nʊ̃fʊ ’lɔ. ⁵Tɩɛr kaa a lɛ fʊn dɔ̃ɔ be tɩ wa lo! Lɩɛb a fʊ tɩɛr na fʊ be a lɛ fʊn dɔ̃ɔ be. Ala ɩ fʊ̃ʊ ba wa lɩɛb a fʊ tɩɛr ɛ, ɩn wa naa wa ’lɔɔ a fʊ fãtɩn dɔɔlfʊ jie bar. ⁶Tɩchɛ a lɛ fʊn ba nʊ̃ nɩ nyã, fʊ ’laar naa a Nikolayitɩ nɩbɛ maalfʊ, n mɩ ’laar naa a ba maalfʊ. ⁷Nɩrɛ ’lɔ na tara toor wʊ chɛlɛ a ala a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ. A ’lɔ na jɛb tʊ̃ɔ, ɩn kʊ wʊn sɔr ka wʊ kpɛ a Nãaŋmɩn jɔɔ pɔ pɔr a nyɛvʊr tɩɛ wɔ̃mɔ̃ na wʊ di.

⁸“Sɛb kʊ a malaka ’lɔ na ara kʊ a Semena pupuorbiir ɩka, a ’lɔ na ɩ a Pielfʊ nɩ a Baaraa, a ’lɔ na kpi tɩ ir ɩ vʊr ’yɛr lɛ a anyãna. ⁹N bɔ̃ɔ naa a fʊ wõm nɩ a fʊ nɔ̃ɔ tɩchɛ fʊ ɩn taraa sʊɔ! N bɔ̃ɔ naa a gagarsɩ bala na ’yɛr ɩka Juu nɩbɛ lɛ ba ɩ tɩ na baa ɩ ɛ, ba ɩ naa Satan lɔ̃ɔfʊ dẽme. ¹⁰Taa joro dãbãɛ a dɔɔyɛ na wa a fʊ sɛ̃ ɛ. Nyɛ, a tɩɩ na vɛ̃ naa ka ba nyɔɔr a yɩ bamɩne ’yɔ̃ɔ pɔɔfʊ die pɔ, bɛɛr yɩ kaa, ka yɩ di dɔɔyɛ ber pie. Ala ɩ yɩn kpin gba, yɩ taa bara a yɩ sɔɔfʊ ɛ, ka ɩn kʊ yɩ a nyɛvʊr ’lɔ na kaara a nãa jupil kaar. ¹¹Nɩrɛ ’lɔ na tara toor wʊ chɛlɛ a lɛ a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ. Nɩrɛ ’lɔ na jɛb tʊ̃ɔ, a gbɛɛ ayi kũu kʊ̃ lɛ sɩɩr wʊ go ɛ.

¹²“Sɛb kʊ a malaka ’lɔ na ara kʊ a Pergamum pupuorbiir ɩka, a ’lɔ a sɔbʊraa na dire a jiir a jaa ayi ’yɛr lɛ anyãna. ¹³N bɔ̃ɔ naa a jie fʊn kpɩɛrɛ, be lɛ ɩ a Satan dʊʊ, tɩ faa vɛ̃ a n yuor bʊɔlfʊ ɛ. Fʊ chɛnɛ na sɔɔ a n yuor. Fʊ gba na wa nyɛ a Antipasɩ na dire a n dãasɩɛ ka ba kʊ wʊ a yɩ tẽe pɔ be a Satan dʊʊ na be. ¹⁴Tɩchɛ n chɛnɛ na tara fʊ nɩ ’yɛr. Fʊ chɛnɛ na tara nɩbɛ ka ba turo a Balaam wiilfʊ, ’lɔ lɛ wiil a Balak ɩka wʊ bɛr a Isɩral nɩbɛ nɛɛ ka ba maal dɛɛr na wʊ ɩka ba di a bʊtɩbɛ bʊ̃diir na ba gãna nɩ taa. 2:14 A Balaam dɔ̃ɔ ɩ Nãaŋmɩn ’yɛ’yɛrɛ na sɔɔ ɩka wʊn den libie tɩ pɔ ’yɔ̃ɔ a Isɩral nɩbɛ. Wʊn wa chiine, malaka ŋmaa wʊn sɔr ka waa tʊ̃ɔ ɩ a lɛ ɛ. (A Sɔrfʊ Gãn 22–24) ¹⁵A lɛ nɩ wʊ ju mɩ lɛ fʊ mɩ chɛnɛ tara a nɩbɛ na turo a Nikolayitɩ nɩbɛ wiilfʊ. ¹⁶Lɩɛb a fʊ tɩɛr, ka lɛ ba lɛ ɛ, ɩn wan fɔɔ wa jɛb a nɩbɛ bala nɩ a sɔbʊraa ’lɔ na yi a n nɛɛ pɔ. ¹⁷Nɩrɛ ’lɔ na tara toor, wʊ chɛlɛ a lɛ a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ. A ’lɔ na jɛb tʊ̃ɔ, ɩn kʊ wʊn a maana ala na sɔɔl. Naa lɛ kʊ wʊ kusɩr pɩla ban sɛb yopaalaa dɔɔl nɩrɛ jaa na ba bɔ̃ɔ ɛ, a ’lɔ na so lɛ bɔ̃ɔ. 2:17 A manna anyãna ɩn bʊ̃diir a Nãaŋmɩn dɔ̃ɔ kʊ a Isɩral nɩbɛ be a mɔgɔ̃ɔ pɔ, ka ba di. (A Yifʊ Gãn 16:4-36, nɩ Jɔɔn 6:31, 49)

¹⁸“Sɛb kʊ a malaka ’lɔ na ara kʊ a Tayatira pupuorbiir ɩka, a Nãaŋmɩn Bie ’yɛr lɛ a anyãna. A ’lɔ nɩbie na kaara a bũu ’lɩraa kaar ka a wʊ gbɛɛ nyɛtãan fɩka kur jɩɛ na be bũu pɔ. ¹⁹N bɔ̃ɔ naa a fʊ tʊ̃mɔ̃, a fʊ nʊ̃fʊ, a fʊ sɔɔfʊ nɩ a fʊ kãnyir. A lɛ fʊn tʊ̃nɔ̃ a pʊ̃pãanyã gar a lɛ fʊn dɔ̃ɔ tʊ̃. ²⁰Tɩchɛ n chɛnɛ na tara fʊ nɩ ’yɛr. Fʊ bal kʊ a pɔɔ ’lɔ ban bʊɔlɔ a Jejebɛl ’lɔ na bʊɔlɔ a wʊ mãɛ a Nãaŋmɩn ’yɛ’yɛrɛ. Wʊ wile naa a n tʊ̃tʊ̃nbɔ ka ba sɛ̃nɛ na ba ɔɔrɔ nɩ a bʊtɩbɛ nʊ̃nɔ̃. ²¹N kʊ wʊn sɔ̃ɔ ɩka wʊ lɩɛb a wʊ tɩɛr yin a wʊ sɛ̃sɛ̃yele pɔ, tɩchɛ waa sɔɔrɔ ɛ. ²²Lɛ ɩn vɛ̃n ka baal nyɔɔ wʊ ka bala naa ’lɔ na sɛ̃nɛ, ka bala baa lɩɛb bar a wʊ sɔr ɛ. ²³Ɩn kʊ naa a bala na turo wʊ, ka a pupuorbiir gbulsɩ bɔ̃ɔ ɩka maa lɛ bɔ̃ɔ nɩrɛ tɩɛr nɩ nɩrɛ nyãa naa na yab ãsʊɔ jaa nɩ wʊ tʊ̃mɔ̃. ²⁴Tɩchɛ a yɩn na chɛ a be a Tayatira na ba de a pɔɔ wiilfʊ bɩɩ jãn a Satan yelsɔɔlsɩ ɛ, n chɛnɛ na tara ’yɛr na ’yɛr kʊ yɩ. N kʊ̃ de yele jaa dɔɔl yɩ ɛ. ²⁵Yɩ chɛnɛ nyɔɔ a lɛ nɛ wa tãn a daar ’lɔ ɩn na wa. ²⁶Nɩrɛ ’lɔ na jɛb tʊ̃ɔ na wʊ ɩrɛ a lɛ ɩn bʊɔrɔ, ɩn kʊ wʊn kpɛ̃ɔ ka wʊ tʊ̃ɔ a paalsɩ ba jaa, ²⁷‘Wʊn kaara ba naa nɩ kur dãgbal na wʊ ma ŋmɛr ba lamɩɛr kaar.’ (Yiel Gãn 2:9) Nɩtãa lɛ ɩn nyɛ a kpɛ̃ɔ yin a n Sãa sɛ̃. ²⁸N mɩ na kʊ wʊ naa a bivɩɛ ŋmɛrbir. ²⁹Nɩrɛ ’lɔ na tara toor wʊ chɛlɛ a ala Nãaŋmɩn Sɩɛ na ’yɛrɛ kʊrɔ a pupuorbiir gbulsɩ.

¹“Sɛb kʊ a malaka ’lɔ na ara kʊ a Saadisɩ pupuorbiir ɩka, a ’lɔ na tara a Nãaŋmɩn Sɩɩr ayopõi nɩ a ŋmɛrbie ayopõi, n bɔ̃ɔ naa a fʊ tʊ̃mɔ̃. A fʊ yuor yire na ɩka fʊ ɩn bʊ̃vʊr tɩchɛ bʊ̃kũu lɛ fʊ ɩ. ²Jɛɔ ir! Na fʊ ’yɔ̃ɔ a bala na chɛ na kpire ãkpãɛn, bojũu n jʊʊr nyɛ ka a fʊ tʊ̃mɔ̃ ba sɛɛ a n Nãaŋmɩn sɛ̃ ɛ. ³Tɩɛr tɔ a ala fʊn de tɩ wõ, turo a ala tɩ na fʊ lɩɛb a tɩɛr. Tɩchɛ fʊ̃ʊ ba jɛɔ ir ɛ, ɩn wan nãnyie kaar ka fʊ kʊ̃ bɔ̃ɔ a sɔ̃ɔ ’lɔ ɩn na wa a fʊ sɛ̃ ɛ. ⁴Tɩchɛ fʊ chɛnɛ na tara nɩbɛ bãlãa a ba be a Saadisɩ ka a ba fɔɔr ba nyɔɔr dɛbɛ ɛ. Bala nɩ maa na ’mantaa chiine, ka ba su bʊ̃pɩɛl, bojũu ba sɛɛn naa. ⁵Nɩrɛ ’lɔ jaa na jɛb tʊ̃ɔ a ba kaar mɩ na sun a bʊ̃pɩɛl. N kʊ̃ kpĩin a wʊ yuor bar a nyɛvʊr gãn pɔ ɛ, tɩchɛ ɩn pʊr a wʊ yuor a n Sãa nɩ a wʊ malakasɩ niem. ⁶Nɩrɛ ’lɔ na tara toor, wʊ chɛlɛ a ala a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ.

⁷“Sɛb kʊ a malaka ’lɔ na ara kʊ a Feladelfiya pupuorbiir ɩka, a ’lɔ na ɩ a chɛchɛ sʊɔ nɩ a yelmãɛ sʊɔ ’yɛr lɛ a anyã, ’lɔ lɛ tara a Nãkpɛ̃ɛ David pãn bir. ’Lɔ wa yuo, nɩrɛ kʊ̃ tʊ̃ɔ pɔɔ ɛ, ’lɔ mɩ wa pɔɔ, nɩrɛ kʊ̃ tʊ̃ɔ yuo ɛ. ⁸N bɔ̃ɔ naa a fʊ tʊ̃mɔ̃ a jaa. Nyɛ, n yuo naa a pãn bar, nɩrɛ jaa na kʊ̃ tʊ̃ɔ pɔɔ ɛ. N bɔ̃ɔ naa a fʊ kpɛ̃ɔ na ba jã bon ɛ, tɩchɛ fʊ chɛnɛ na tara a n ’yɛr na faa chiir a n yuor ɛ. ⁹N bɔ̃ɔ naa a bala na ɩ a Satan lɔ̃ɔfʊ dẽme tɩ na ba ’yɛr ɩka Juu nɩbɛ lɛ ba ɩ, jir ŋmarba lɛ ba ɩ. Ɩn vɛ̃ naa ka ba wa gbur dumo a yɩ niem na ba bɔ̃ɔ ɩka n nʊ̃ yɩ naa. ¹⁰A lɛ fʊn tu a n ’yɛr na fʊ di kãnyir, ɩn gu fʊ naa a sɔ̃ɔ ’lɔ a dɔɔyɛ na wa a nɩbɛ ba jaa jie na kpɩɛrɛ ka a wɛr pɔ. ¹¹N kʊ̃ kor tɩ wa ɛ. Nyɔɔ a lɛ nɛ fʊn tara, ka nɩrɛ jaa taa faa a fʊ nãa jupil ɛ. ¹²A ’lɔ na jɛb tʊ̃ɔ, ɩn maal wʊn a luur a n Nãaŋmɩn puorfʊ yir. Wʊ kʊ̃ lɛ vʊ̃ɔ go ɛ. Ɩn sɛb naa a n Nãaŋmɩn yuor nɩ a n Nãaŋmɩn tẽe yuor na ɩ a Jerusalɛm paalaa wʊn bar ka wʊ yire a saaju suro waara mar wʊ, naa mɩ lɛ sɛb a n yopaalaa mar wʊ. ¹³Nɩrɛ ’lɔ na tara toor, wʊ chɛlɛ a lɛ a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ.

¹⁴“Sɛb kʊ a malaka ’lɔ na ara kʊ a Laodisea pupuorbiir ɩka, a ’lɔ ’yɛrbie na ɩ A Ɩ A Lɛ, a yelmãɛ dẽ dẽ sʊɔ nɩ a yelmãɛ dãasɩɛ sʊɔ, ’lɔ ’yɔ̃ɔ lɛ a Nãaŋmɩn tu mɛ bomo a jaa. ¹⁵N bɔ̃ɔ naa a fʊ tʊ̃mɔ̃, faa ’maa ɛ, faa lɛ tʊlɔ mɩ ɛ. An taa nʊ̃mɔ̃ ma naa ala ɩ fʊ ta ’maa naa bɩɩ tʊlɔ. ¹⁶A lɛ fʊn ben ɩ a ʊlɔ ʊlɔ jũu, faa tʊlɔ ɛ, faa mɩ lɛ ’maa ɛ, ɩn chɩr fʊn bar a n nɛɛ pɔ. ¹⁷Fʊ ’yɛr ɩka taraa sʊɔ lɛ fʊ ɩ, na fʊ tara nãbonsɩ na faa faa bon jaa ɛ. Tɩchɛ faa bɔ̃ɔ ɩka fʊ ɩn nɩkɔ̃ɔ nɩ nɩbaal nɩrɛ, nɩ nɔ̃ɔ sʊɔ, na fʊ ɩ jɔ̃ɔ nɩ sal’mʊɔr. ¹⁸N sʊɔrɔ fʊ naa ɩka fʊ da sɛlma a n sɛ̃ ɩn ’yɔ̃ɔ bũu pɔ maal na fʊ ɩ tara sʊɔ. Na fʊ mɩ da fɔpɩla a n sɛ̃ pɔɔ a fʊ sal’mʊɔr vĩ, na fʊ lɛ da a nɩbie tãɩ mɩ ’yɔ̃ɔ a nɩbie pɔ nyɛrɛ. ¹⁹N ma gɔ̃ naa a bala ɩn nʊ̃, naa tɔɔ ba toor. A lɛ mɔ̃ nɩbijɩɛ lɩɛb a fʊ tɩɛr. ²⁰Nyɛ, n ara naa dɔ̃dɔr nɛɛ bʊɔlɔ, ala ɩ ãsʊɔ jaa wa wõ naa a n kɔkɔr na wʊ yuo a pãn, ɩn kpɛ naa ka a maa naa nɩnyɩnɛ a sɩ tɩ ’mataa dire. ²¹Nɩrɛ ’lɔ na jɛb tʊ̃ɔ, ɩn kʊ wʊn sɔr ka wʊ jãnɛ a n lõboor nɩtãa lɛ ɩn jɛb tʊ̃ɔ naa jãnɛ a n Sãa lõboor. ²²Nɩrɛ ’lɔ na tara toor, wʊ chɛlɛ a lɛ a Nãaŋmɩn Sɩɛ na ’yɛrɛ kʊrɔ a pupuorbiir gbulsɩ.”

¹A anyã puor, n lɛ kãan nyɛ a saaju pãn na yuo ara. Ka a kɔkɔr ’lɔ ɩn dɔ̃ɔ wõ a ɩɩl ban pɛɛl kaar ’yɛr kʊ ma, “Do wa, ka n wiil fʊ a ala na ɩ a anyã puor.” ²Ajienaa kaa ɩ Nãaŋmɩn Sɩɛ de ma naa ka n nyɛ a nãa dakɔɔ a be a saaju nɩrɛ kɔ̃ɔ na jãnɛ. ³Ka a nɩrɛ ’lɔ na jãnɛ a nãa dakɔɔ ju nyɩlɛ jaa pala pala fɩka gar kʊsɩr, nɩ kʊsɩr wolo wolo, ka a sagõgoraa na nyɩlɛ ŋmaa jilʊ̃ a nãa dakɔɔ. ⁴Dakɔɔr lɩjɛr nɩ anaar mɩ ben be jilʊ̃ a nãa dakɔɔ, ka a nɩbɛrɛ lɩjɛr nɩ anaar mɩ jãnɛ a ju, na ba su bʊ̃pɩɛl na ba sun sɛlma jupile. ⁵Saa nyɩɩrfʊ nɩ gɔ̃mɔ̃ na tãna yire naa a nãa dakɔɔ par. Ka a fãtɩnɛ ayopõi mɩ ’lɩrɛ a nãa dakɔɔ par, anyãna lɛ ɩ a Nãaŋmɩn Sɩɩr ayopõi. ⁶A nãa dakɔɔ niem bon ben be kaara man kʊ̃ɔ kaar jaa wel wel wel, na wʊ nyɩlɛ chãana kaar. A bʊ̃nɩbie anaar jil naa a nãa dakɔɔ tara nɩbie a jiir a jaa a puor nɩ a niem.

⁷A bʊ̃nɩbir ’lɔ na de nie nyɛtãan jukpɛ̃ɛ, ka a ayi sʊɔ mɩ nyɛtãan narbile, ka a ata sʊɔ mɩ nyɛtãan nɩsaal, ka a anaar sʊɔ mɩ nyɛtãan tuu. ⁸A bʊ̃nɩbie anyãna ãsʊɔ jaa tara naa pɩbɛ ayʊɔb, ka a nɩbie pɔɔ a ãgãn wʊ jaa naa pɩbɛ pɔ. Ba ma yiele nɩ yiel mɔ̃tɔ̃ɔ nɩ tãsɔɔ ɩka, “Chɛchɛ, chɛchɛ, chɛchɛ ’lɔ lɛ ɩ a sɩ Soro Nãaŋmɩn nɩ a kpɛ̃ɔ jaa sʊɔ. ’Lɔ lɛ be be, ’lɔ lɛ ɩ, ’lɔ lɛ na wa.” ⁹Sɔ̃ɔ ’lɔ jaa a bʊ̃nɩbie ala na ma wa puoro pɛɛrɛ dãna nɩ a ’lɔ na jãnɛ a nãa dakɔɔ ju, ’lɔ lɛ be be jaa kpo kpo, ¹⁰a nɩbɛrɛ lɩjɛr nɩ anaar bala gãn kpa tẽe tɩ puor a ’lɔ na jãnɛ a nãa dakɔɔ ju, ’lɔ lɛ na be be jaa kpo kpo. Ba yãan a ba nãjupile bin a nãa dakɔɔ par tɩ ’yɛrɛ, ¹¹“A sɩ Soro nɩ a sɩ Nãaŋmɩn, fʊ̃ʊ lɛ a sɛɛn ɩka fʊ de a tɩɩr, ’yɔ̃ɔfʊ nɩ a kpɛ̃ɔ. Bojũu fʊ̃ʊ lɛ maal a bomo a jaa, a fʊ bɔfʊ pɔ lɛ a jaa maal naa be be.”

¹N pãa nyɛn a ’lɔ na jãnɛ a nãa dakɔɔ ju ka wʊ tara a kõr gãn ’lɔ ban pilʊ̃ a wʊ nũsʊ̃ɔ pɔ, ka a sɛbie be a pʊɔ pɔ nɩ a yõo, na ba de jãnsɩ ayopõi mar pɔɔ. ²N nyɛn a malaka kpɛ̃ɔ sʊɔ ’lɔ na de nɛkpɛ̃ɛ sʊʊr, “An lɛ sɛɛ ɩka wʊ ’lɔɔr a jãnsɩ tɩ yuo a gãn?” ³Tɩchɛ nɩrɛ jaa ba be a saaju, bɩɩ a wɛr pɔ, bɩɩ a tẽe par na tʊ̃ɔ yuo a gãn kar ɛ. ⁴Ka n kõ nɩbaal kõn bojũu nɩrɛ jaa na ba be be sɛɛn na yuo a gãn kar kaa ɛ. ⁵Be lɛ a nɩbɛrɛ bala ãsʊɔ pãa ’yɛr kʊ ma, “Ta kõnõ ɛ. Nyɛ a Jukpɛ̃ɛ ’lɔ na yi a Juda bʊrɔ pɔ, na ɩ a Nãkpɛ̃ɛ David yɔ̃ɔ na jɛb tʊ̃ɔ. ’Lɔ lɛ sɛɛ na tʊ̃ɔ ’lɔɔr a jãnsɩ ala bar tɩ yuo a gãn.”

⁶N pãa lɛ nyɛn Pɛraabile ka wʊ nyɛtãan bon ban dɔ̃ɔ kʊ ka wʊ ara a nãa dakɔɔ par, ka a bʊ̃nɩbie anaar nɩ a nɩbɛrɛ ara jilʊ̃ wʊ. Wʊ tara na ɩlɛ ayopõi nɩ nɩbie ayopõi, ala lɛ ɩ a Nãaŋmɩn Sɩɩr ayopõi wʊn ma tʊ̃ a wɛr pɔ jiir a jaa. ⁷’Lɔ lɛ tɩ de a gãn a nɩrɛ ’lɔ na jãnɛ a nãa dakɔɔ ju nũsʊ̃ɔ pɔ. ⁸Wʊn wa de a gãn ka a bʊ̃nɩbie anaar bala nɩ a nɩbɛrɛ lɩjɛr nɩ anaar bala, ba jaa gãn kpa tẽe a Pɛraabile niem, ka ãsʊɔ jaa tara kõrõjom nɩ sɛlma lapʊɛ na sɛɛn a tãɩ nyũu vɩla, ala lɛ ɩ a Nãaŋmɩn nɩbɛ sʊɔrfʊsɩ. ⁹Bala lɛ yiele a yiel paalaa na ba ’yɛrɛ, “Fʊ̃ʊ lɛ sɛɛn ɩka fʊ de a gãn na fʊ ’lɔɔr a jãnsɩ, bojũu fʊ̃ʊ lɛ ba kʊ, ka fʊ de a fʊ jãɩ yab den nɩbʊrɔ, ’yɛr bʊrɔ, balsɩ ba jaa nɩ a paalsɩ a jaa kʊ Nãaŋmɩn. ¹⁰Fʊ̃ʊ lɛ maal ba ka ba ɩ a Nãaŋmɩn nãalʊ̃ʊ nɩbɛ nɩ a bɔɔrlorbo tʊ̃nɔ̃ kʊrɔ a sɩ Nãaŋmɩn, bala lɛ na wa ɩ a wɛr nyã wʊ jaa nãmɩne.”

¹¹Be lɛ n pãa kaa nyɛ malakasɩ turo turo fʊn kʊ̃ bɔ̃ɔ a ba nɛɛ ɛ, ka ba ara jilʊ̃ a nãa dakɔɔ nɩ a bʊ̃nɩbie ala nɩ a nɩbɛrɛ bala. ¹²Ba yiele naa nɩ kɔkɔkpɛ̃ɛ ’yɛrɛ, “A Pɛraabile ’lɔ ban dɔ̃ɔ kʊ lɛ sɛɛn ɩka wʊ tara a kpɛ̃ɔ nɩ a nãbomo, nɩ a yɛ̃, nɩ a fɔ̃ɔ, nɩ a ’yɔ̃ɔfʊ, nɩ a tɩɩr, nɩ a dãnfʊ.”

¹³Be lɛ n wõ a bʊ̃maalsɩ a jaa na be a saaju, nɩ a tẽe, nɩ a tẽe par, nɩ a man pɔ, nɩ bomo a jaa na be a ba pɔ, na ba yiele yiel ’yɛrɛ, “A ’lɔ na jãnɛ a nãa dakɔɔ ju, nɩ a Pɛraabile lɛ so a dãnfʊ, nɩ a ’yɔ̃ɔfʊ, nɩ a tɩɩr, nɩ a kpɛ̃ɔ, bɩbir jaa.” ¹⁴Ka a bʊ̃nɩbie anaar bala ’yɛr, “A ɩ a lɛ,” ka a nɩbɛrɛ bala gbur dumo puor a ’lɔ na jãnɛ a nãa dakɔɔ ju nɩ a Pɛraabile.

¹Ka n kaa naa nyɛ a Pɛraabile na ’lɔɔ a jãnsɩ ayopõi ala ban mar a gãn ’lɔ na de nie, be lɛ n wõ a bʊ̃nɩbie anaar bala ãsʊɔ kɔkɔr fɩka saa na tãn, ka wʊ bʊɔl, “Wa!” ²Be lɛ n kaa nyɛ ka a ɩ wii pɩla lɛ, ka a ’lɔ na do, jã tam a ba de nãa jupil kʊ wʊ ka wʊ yin darfʊ an ɩ tʊ̃ɔfʊ sʊɔ lɛ wʊ ɩ.

³A Pɛraabile na lɛ ’lɔɔ a jãnsɩ ayi sʊ̃ɔ, n wõn a bʊ̃nɩbie ala ayi sʊɔ na ’yɛr, “Wa!” ⁴Ka a wii jɩɛ wa yi, a ’lɔ na do ba kʊ wʊn kpɛ̃ɔ ɩka wʊ faa a nyã’maar tɩ vɛ̃ ka jɛɛr ir a wɛr wʊ jaa, ka a nɩbɛ kʊrɔ taa. Ka ba kʊ wʊ a jɛɛr sɔkpɛ̃ɛ.

⁵A Pɛraabile na lɛ ’lɔɔ a jãnsɩ ata sʊɔ, n wõn a bʊ̃nɩbie ata sʊɔ na ’yɛr, “Wa!” Ka n kaa ka a ɩ wii sɔɔlaa lɛ, ka a ’lɔ na do tara bʊ̃mansɩ a nũu pɔ. ⁶Be lɛ n wõ a bʊ̃nɩbie anaar bala chara pɔ fɩka kɔkɔr na ’yɛrɛ, “Kɔ̃ lo naa, chi bʊ̃manãa nɛbʊ̃’yen na da naa nɩbʊ̃’yen bɩbir gbul sãyar. Ka a kamaana mɩ nɛɛr ata mɩ da nɩbʊ̃’yen bɩbir gbul sãyar, tɩ taa ɩrɛ wa sɔ̃ɔnɔ̃ a kãa nɩ a dãa bara ɛ.”

⁷A Pɛraabile na lɛ ’lɔɔ a jãnsɩ anaar sʊɔ, n wõ naa a bʊ̃nɩbie anaar sʊɔ na ’yɛr, “Wa!” ⁸Ka n kaa nyɛ wii ul a nɩdaa. Ka a ’lɔ na do yuor di kũu, ka a kpĩisɩ tẽe mɩ turo a wʊ puor. Ba kʊ ban kpɛ̃ɔ ɩka ba de sɔkpɛ̃ɛ, nɩ kɔ̃, nɩ baal, nɩ mɔdʊ̃n kʊn a wɛr nɩbɛ ala ɩ ba põn a tẽe a wʊ jiir anaar.

⁹Wʊn lɛ ’lɔɔ a jãnsɩ anũu sʊɔ, n nyɛn a nɩsɩɩr bala ban dɔ̃ɔ kʊ a Nãaŋmɩn ’yɛr nɩ a wʊ dãasɩɛ jũu ka ba be a Nãaŋmɩn bɔɔr lofʊ jie pĩlem. ¹⁰Ba tãna naa nɩ nɛkpɛ̃ɛ ’yɛrɛ, “A Tʊ̃ɔfʊ sʊɔ, nɩ chɛchɛ sʊɔ, nɩ yelmãɛ sʊɔ, a wa ta dabor ka fʊ tɔɔr a wɛr nɩbɛ ’yɛr na fʊ yab a sɩ jãɩ sãma?” ¹¹Be lɛ ba kʊ ba jaa bʊ̃pɩɛl tɩ ’yɛr ɩka ba di kãnyir bãlãa ka ba baar kʊ a ba tʊ̃tʊ̃taaba nɩ a yɛɛr a ba kaar ka a ta.

¹²N kaara naa ka wʊ lɛ ’lɔɔ a jãnsɩ ayʊɔb sʊɔ. Ka a tẽe mĩi wʊ jaa, ka a mɔ̃tɔ̃ɔ sɔb fɔsɔɔlaa kaar, ka a ŋmɛraa mɩ lɩɛb jãɩ kaar jaa kpãn kpãn, ¹³ka a ŋmɛrbie mɩ yi a saaju pɔrɔ loro a tẽe pɔ fɩka tɔ̃ɔ kara sɛsɛkpɛ̃ɛ na fu lɔb. ¹⁴Be lɛ a saaju pilʊ̃ fɩka sɔ̃gãnãa ban pil, ka a tɔ̃n a jaa nɩ a dõdolsɩ a jaa mɩ ir a ba jiir.

¹⁵Ka a tẽe nyã nãmɩne, a tẽe nyã nɩbɛrɛ, a fɔ̃ɔ dẽme, taraa dẽme, a gãdaar, nɩ a gbãgbaar ba jaa, nɩ a sumɩne ba jaa pãa sɔɔlɔ a tɔ̃n bɔɔr pɔ nɩ a tɔ̃n kʊsɩbɛ pɔ. ¹⁶Ba pãa bʊɔlɔ na a tɔ̃n naa kʊsɩpãnsɩ, “Yɩ lo pii sɩ ka sɩ taa lɛ nyɛ a ’lɔ na jãnɛ a nãa dakɔɔ ju ɛ, na sɩ ta mɩ lɛ nyɛ a Pɛraabile suur ɛ! ¹⁷A ba sukpɛ̃ɛ bɩbir vɩɛ naa, an lɛ na tʊ̃ɔ ara a ba niem?”

¹A anyã puor, n nyɛn a malakasɩ anaar ka ba ara a tẽe lõbobo anaar, na ba nyɔɔ a sɛsɛbɛ taa lɛ ɩka wʊ taa furo a wɛr pɔ, naa man pɔ, bɩɩ tɩɛ ju ɛ. ²Be lɛ n nyɛ a malaka ãsʊɔ ka wʊ yi a mɔ̃tɔ̃ɔ purfʊ jie waara na wʊ tara a Nãaŋmɩn vʊr sʊɔ jãnɛ. Wʊ bʊɔl naa a malakasɩ anaar bala nɩ nɛkpɛ̃ɛ ban kʊ sɔr ɩka ba sɔ̃ɔ a tẽe wʊ jaa naa man ’yɛrɛ kʊrɔ ba, ³“Yɩ taa ɩrɛ wa sɔ̃ɔnɔ̃ a tẽe, naa man, naa tɩɩr ɛ, a sɩ ’yɔ̃ɔ a sɩ Nãaŋmɩn tʊ̃tʊ̃nbɔ a jãnsɩ a ba gbersɩ pɔ baar.” ⁴N pãa wõ naa a nɩbɛ bala ban ’yɔ̃ɔ a jãnsɩ nɛɛ ka ba ɩ, nɩbɛ turo kɔbaa lɩjaayi nɩ anaar (144,000) na yi a Isɩral balbʊrsɩ pɔ. ⁵A bala na yi a Juda bʊrɔ pɔ ban ’yɔ̃ɔ a jãnsɩ ɩn nɩbɛ turo pie naa yi (12,000), ka a Wuruben bʊrɔ mɩ a nɩbɛ turo pie nɩ ayi (12,000), ka a Gad bʊrɔ mɩ ɩ a nɩbɛ turo pie nɩ ayi (12,000), ⁶ka a Aserɩ bʊrɔ mɩ ɩ a nɩbɛ turo pie nɩ ayi (12,000), ka a Naftalɩ bʊrɔ mɩ ɩ a nɩbɛ turo pie nɩ ayi (12,000), ka a Manasɛ bʊrɔ mɩ ɩ a nɩbɛ turo pie nɩ ayi (12,000), ⁷ka a Simeon bʊrɔ mɩ ɩ a nɩbɛ turo pie nɩ ayi (12,000), ka a Levi bʊrɔ mɩ ɩ a nɩbɛ turo pie nɩ ayi (12,000), ka a Isakar bʊrɔ mɩ ɩ a nɩbɛ turo pie nɩ ayi (12,000), ⁸ka a Jebulun bʊrɔ mɩ ɩ a nɩbɛ turo pie nɩ ayi (12,000), ka a Josefʊ bʊrɔ mɩ ɩ a nɩbɛ turo pie nɩ ayi (12,000), ka a Benjamin bʊrɔ mɩ ɩ a nɩbɛ turo pie nɩ ayi (12,000).

⁹A anyã puor, n lɛ nyɛn nɩyɔɔ nɩrɛ na kʊ̃ tʊ̃ɔ ba sɔr ɛ, ka ba yi a paalsɩ a jaa pɔ, balbʊrsɩ, nɩbʊrsɩ, ’yɛrbʊrsɩ a jaa pɔ, na ba ara a nãa dakɔɔ nɩ a Pɛraabile niem. Ba sun fɔpɩɛl tɩ tara bɛ wilsɩ a ba nuur pɔ. ¹⁰Bala lɛ chɩlɛ ’yɛrɛ, “A faafʊ yi naa a sɩ Nãaŋmɩn na jãnɛ a nãa dakɔɔ ju nɩ a Pɛraabile sɛ̃.” ¹¹Ka a malakasɩ bala na ara jilʊ̃ a nãa dakɔɔ, nɩ a nɩbɛrɛ, nɩ a bʊ̃nɩbie anaar bala gãn kpa a nãa dakɔɔ niem puoro a Nãaŋmɩn ’yɛrɛ, ¹²“A ɩ a lɛ! Nãaŋmɩn son pɛɛfʊ nɩ tɩɩr, nɩ yɛ̃, nɩ dãnfʊ, nɩ ’yɔ̃ɔfʊ, nɩ kpɛ̃ɔ nɩ fɔ̃ɔ. A ɩ a lɛ!”

¹³Be lɛ a nɩkpɛ̃ɛ ãsʊɔ sʊʊr ma, “A bala na su a bʊ̃pɩɛl, ba boo lɛ, nɩ nyɩnɛ lɛ ba yi?” ¹⁴Ka n ’yɛr ɩka, “Nɩkpɛ̃ɛ, fʊ̃ʊ ba lɛ bɔ̃ɔ ba.” Ka wʊ ’yɛr, “A banyãna, bala lɛ yi a dɔɔyɛ kpɛ̃ɛ ’lɔ pɔ. Ba pɛɛn a ba fɔɔr nɩ a Pɛraabile jãɩ. ¹⁵Ala lɛ so ka ba ara a Nãaŋmɩn nãa dakɔɔ par tʊ̃nɔ̃ kʊrɔ wʊ mɔ̃tɔ̃ɔ nɩ tãsɔɔ a wʊ puorfʊ yir. A ’lɔ na jãnɛ a nãa dakɔɔ ju na ’yɩɛr pɔɔ ba. ¹⁶Kɔ̃ kʊ̃ lɛ kpɛ ba go ɛ, kɔ̃nyũur mɩ kʊ̃ lɛ kpɛ ba go ɛ. Mɔ̃tɔ̃ɔ kʊ̃ lɛ ŋme ba go ɛ, tʊl kʊ̃ lɛ kʊrɔ go ɛ. ¹⁷A Pɛraabile na ara a nãa dakɔɔ sãlsɔɔ lɛ na chãnɛ ba. Wʊn ma ŋmaa ban chiin a nyɛvʊr kʊ̃ɔ par, ka Nãaŋmɩn pãa ’yɩɛr a ba nɩbikʊ̃ɔ a jaa bar.”

¹Be lɛ a Pɛraabile ’lɔɔ a jãnsɩ ayopõi sʊɔ ka a saaju wʊ jaa ŋmaa vʊʊr jaa chɩr chɩr chɩr kor bãlãa.

²Ka n nyɛ a malakasɩ ayopõi bala na ara a Nãaŋmɩn niem ka ba kʊ ba ɩɩl pɛɛlsɩ ayopõi.

³A malaka ãsʊɔ na tara a sɛlma lapʊr, wa ara naa a bɔɔrlo bomo chʊmfʊ jie. Ba den a tãɩ nyũu vɩla ala kʊ wʊ ɩka wʊ de pʊɔ a Nãaŋmɩn nɩbɛ ba jaa sʊɔrfʊsɩ a sɛlma bɔɔrlo bomo chʊmfʊ jie kʊ a ’lɔ na jãnɛ a nãa dakɔɔ ju. ⁴A tãɩ nyũu vɩla jʊʊr yire naa a sɛlma lapʊr ’matãan a Nãaŋmɩn nɩbɛ sʊɔrfʊ yi a malaka nũu pɔ, duoro a Nãaŋmɩn sɛ̃. ⁵Be lɛ a malaka lɛ mʊ̃ɔ bũu bie a sɛlma bɔɔrlo bomo chʊmfʊ jie sɛɛ a lapʊr na wʊ lɔb bar ka a wɛr pɔ ka tãnfʊ, nɩ gɔ̃mɔ̃, nɩ saa nyɩɩrfʊ ka a tẽe wʊ jaa dam.

⁶Ka a malakasɩ ayopõi bala na tara a ɩlɛ, go a pɛɛlfʊ.

⁷A malaka ’lɔ na de nie pɛɛl naa a wʊ ɩɩl, ka a sakpʊlõbie nɩ bũu na ’matãan jãɩ loro a wɛr pɔ. Ka a tẽe jiir ata jibʊ̃’yen di wʊ jaa, ka a tɩɩr mɩ jiir ata jibʊ̃’yen mɩ di lɔ̃ɔn a mɔ’yɔlɔ a jaa.

⁸Ka a malakasɩ ayi sʊɔ mɩ pɛɛl a wʊ ɩɩl, ka ba ’lɔb bon na nyɛtãan tɔ̃kpɛ̃ɛ na nyɔɔ bũu ’yɔ̃ɔ a man pɔ. A man jiir ata jibʊ̃’yen lɩɛb jãɩ, ⁹ka a bʊ̃nɩbie mɩ jiir ata jibʊ̃’yen kpi, ka a gborbɛrɛ ala mɩ jiir ata jibʊ̃’yen mɩ wɛ.

¹⁰Ka a malakasɩ ata sʊɔ mɩ pɛɛl a wʊ ɩɩl, ka a ŋmɛrbir kpɛ̃ɛ na ’lɩrɛ fɩka bũu yi a saaju lo a põnsɩ nɩ a bulsɩ jiir ata a jibʊ̃’yen pɔ. ¹¹A ŋmɛrbir yuor din, Bʊ̃tuo. Ka a kɔ̃n jiir ata jibʊ̃’yen be tuo, ka a nɩbɛ bala na nyũ a kɔ̃tuo ala, ka yɔɔ jie kpi.

¹²A malakasɩ anaar sʊɔ pɛɛl naa a wʊ ɩɩl, ka ba ŋme a mɔ̃tɔ̃ɔ jiir ata jibʊ̃’yen nɩ a ŋmɛraa jiir ata jibʊ̃’yen naa ŋmɛrbie ka ba jiir ata jibʊ̃’yen ɩ libe. A bɩbir jiir ata jibʊ̃’yen ba tara chãa ɛ, ka a ŋmɛraa naa ŋmɛrbie mɩ ba chaar a tãsɔɔ jiir ata jibʊ̃’yen ɛ.

¹³Be lɛ n kaa naa wõ tuu na ɔɔrɔ be a saaju ’yɛrɛ nɩ nɛkpɛ̃ɛ, “Nɛbier! Nɛbier! Nɛbier! Yele na wa naa nɩsaal jaa na be a wɛr pɔ, ala ɩ a malakasɩ ata bala na chɛ wa pɛɛl naa a ba ɩlɛ.”

¹A malakasɩ anũu sʊɔ na wa pɛɛl a wʊ ɩɩl, ka n nyɛ a ŋmɛrbir ’lɔ na dɔ̃ɔ yi a saaju lo a tẽe. A ŋmɛrbir nyã lɛ ba de a bɔɔ fulom pãn bir kʊ. ²Wʊn wa yuo a bɔɔ fulom nyã nɛɛ, ka jʊʊr yire fɩka bũu kpɛ̃ɛ jʊʊr. A jʊʊr anyãna na yire a bɔɔ fulom nyãna pɔ liin pɔɔ a mɔ̃tɔ̃ɔ naa tẽe wʊ jaa. ³A jʊʊr anyãna pɔ lɛ soor yi yaar a tẽe wʊ jaa ka ba kʊ ba lɔɔ fɩka lɔ̃n lɔɔ. ⁴Ba ’yɛr kʊ ba ɩka ba taa ɩrɛ wa ɔɔrɔ mɔɩ bɩɩ bʊ̃bul nɩ a tɩɛ vaar ɛ, tɩchɛ a dʊ̃nɔ̃ a nɩbɛ bala tɛɛ na ba tara a Nãaŋmɩn jãnɛ a ba gbersɩ pɔ ɛ. ⁵Baa kʊ ba sɔr ɩka ba kʊrɔ ɛ, tɩchɛ ba ge a nɩbɛ ŋmɛrsɩ anũu. Ka a ba dʊ̃fʊ ɔɔr kaara fɩka lɔ̃ɔ na dʊ̃ nɩrɛ ɔɔrɔ. ⁶A ber anyãna pɔ nɩbɛ na bʊɔrɔ na kũu tɩchɛ ba kʊ̃ nyɛ wʊ ɛ. Ban bʊɔrɔ naa ɩka ba kpi tɩchɛ a kũu kʊ̃ lɛ kʊ ba gba ɛ.

⁷A soor nyɛtãan wiisɩ ban pãɛ jɛɛr ’yɔ̃ɔ, ka a jur kaara fɩka sɛlma jupile ban su, ka a ba nin nyɛtãan nɩsaal nie. ⁸A ba kɔɔl kaara fɩka pɔbɔ jukɔɔl, ka a nyɩmɛ mɩ kaara fɩka jukpɛ̃ɛ nyɩmɛ. ⁹Ba tara na nyãa pɔɔrsɩ ka a kaara fɩka kue, ka a pɩbɛ dɔ̃ɔnɔ̃ fɩka torkosɩ a wiisɩ na tɔɔrɔ joro chiine jɛɛr jie. ¹⁰Ba tara na jʊɛ dʊ̃nɔ̃ nɩ lɔ̃n kaar, a jʊɛ ala tara na fɔ̃ɔ na dʊ̃n nɩbɛ ge ba ŋmɛrsɩ anũu. ¹¹Ba tara na nãa na kaara ba, ’lɔ lɛ a malaka ’lɔ na kaara a bɔɔ fulom ’lɔ. Heburu nɩbɛ bʊɔlɔ wʊ naa, Abadɔn, ka a Greek nɩbɛ mɩ bʊɔlɔ, Apolyɔn. A par lɛ, sɔ̃sɔ̃ɔnɔ̃.

¹²A nɛbier ’lɔ na de nie lɛ a nyã na tal, tɩchɛ ka a ayi sʊɔ chɛnɛ be puor waara.

¹³Ka a malakasɩ ayʊɔb sʊɔ pɛɛl a wʊ ɩɩl, n wõn kɔkɔr na yire a sɛlma tãɩ nyũu vɩla chʊmfʊ jie kpʊ̃kpʊɛ, be lɛ ba ma chʊm a kãnyũu na be a Nãaŋmɩn niem. ¹⁴A kɔkɔr ’yɛr kʊ a malaka ayʊɔb sʊɔ ’lɔ na tara a ɩɩl, “For a malakasɩ anaar bala ban lũ a be a Yufɩrɩtɩ põn kpɛ̃ɛ pɔ.” ¹⁵A wʊ for a malakasɩ anaar ba nyãna ban dɔ̃ɔ lũ gun a sɔ̃ɔ ’lɔ̃nɔ̃, a bɩbir ’lɔ̃nɔ̃ nɩ a chuu ’lɔ̃nɔ̃ naa yuon ’lɔ̃nɔ̃ ɩka ba kʊ a nɩsaal jiir ata jibʊ̃’yen bar. ¹⁶Ka a bala na do a wiisɩ ba bʊɔl naa a ba nɛɛ fʊn kʊ̃ tʊ̃ɔ ba sɔr ɛ.

¹⁷A wiisɩ nɩ a bala na do ɩn nyɛ a jãna pɔ, a nyãa pɔɔrsɩ mʊ̃ɔ naa fɩka bũu, ka amɩne mɩ ɩ bufulo, ka amɩne mɩ ɩ bʊ̃dʊɔr. Ka a wiisɩ jur nyɛtãan jubɛrɛ jur, ka a bũu jʊʊr nɩ jerbɩ mɩ yire a ba nɛɛ pɔ. ¹⁸A gefʊ ata ala na yi a wiisɩ nɛɛ pɔ lɛ, bũu, nɩ jʊʊr, nɩ jerbɩ, ala lɛ ba kʊn nɩbɛ jiir ata jibʊ̃’yen. ¹⁹A wiisɩ anyã fɔ̃ɔ be naa a ba nɛɛ pɔ naa jʊɛ pɔ, a ba jʊɛ kaara fɩka waba naa tara jur, ala lɛ ba de gere nɩ a nɩsaal.

²⁰A nɩsaalba bala na chɛ, na baa kpin a gefʊ nyã ɛ, ba sɔɔ bar a tɩbɛ ala ban maal nɩ a ba nuur ɛ. Ba chɛnɛ na puoro a sɩdɛbɛ, nɩ a bʊtɩbɛ ban maal a sɛlma, nɩ a kur pɩɛl, nɩ a kur jɩɛ, nɩ a kusɩbɛ, nɩ a daar na ba wõnõ ’yɛr ɛ, ba kʊ̃ tʊ̃ɔ chen ɛ. ²¹Baa mɩ lɩɛb a ba tɩɛr bar a nɩkʊyelsɩ, nɩ sɔyelsɩ, nɩ sɛ̃sɛ̃yelsɩ, nɩ nãnyiyelsɩ ɛ.

¹N lɛ nyɛn a malaka kpɛ̃ɔ ãsʊɔ na yi a saaju suro waara. Wʊ vaar naa julõjuur ka a sagõgoraa dɔɔl a jum. A nie kaara fɩka mɔ̃tɔ̃ɔ, ka a gbɛɛ mɩ kaara fɩka bũu lɩraa. ²Wʊ tara na gãn bile na yuo a wʊ nũu pɔ, na wʊ de a nũsʊ̃ɔ gbɛr ’lɔr a man pɔ tɩ a gʊbaa gbɛr dɔɔl a gogoro ju, ³tɩ na wʊ pãa tãn kpɛ̃ɔ jaa fɩka jukpɛ̃ɛ na uor. Wʊn wa tãn a lɛ ka a kɔkɔɛ ɩ ayopõi mɩ tãn satanaa kaar. ⁴An wa tãn a gbɛɛ ayopõi a lɛ, ka n ta bʊɔrɔ ɩka n sɛb tɩchɛ n wõn kɔkɔr na yi a saaju ’yɛr, “A tãnfʊ ayopõi ala na ’yɛr sɔɔl bar, ta sɛb bin ɛ.”

⁵Be lɛ a malaka ’lɔ ɩn nyɛ na ’lɔr a nũsʊ̃ɔ gbɛr a man pɔ tɩ dɔɔl a a gʊba gbɛr a gogoro ju, jɛɛn a nũsʊ̃ɔ a saaju. ⁶Wʊ pɔn naa a Nãaŋmɩn nyã na be be jaa kpo kpo, ’lɔ lɛ mɛ a saaju, nɩ a tẽe, nɩ a man, nɩ bomo a jaa na be a ba pɔ, “A kʊ̃ lɛ kor go ɛ! ⁷Tɩchɛ a bɩbir ’lɔ a malakasɩ ayopõi sʊɔ na wa pɛɛl a wʊ ɩɩl, a Nãaŋmɩn yelsɔɔlaa na pãa maal baar nɩtãa a lɛ wʊn man kʊ a wʊ gbãgbaar ’yɛ’yɛrbɛ.”

⁸Be lɛ a kɔkɔr ’lɔ ɩn dɔ̃ɔ wõ a saaju lɛ ’yɛr kʊ ma go, “Chen tɩ de a gãn bile ’lɔ na yuo a malaka ’lɔ na ara a man pɔ naa gogoro ju nũu pɔ.”

⁹Ka n chen a malaka sɛ̃ tɩ sʊɔr wʊ ɩka wʊ kʊ ma a gãn bile. Ka wʊ ’yɛr, “De ’wɔb, wʊn mire naa a fʊ pʊɔ pɔ tɩ nʊ̃mɔ̃ a fʊ nɛɛ pɔ sɩkãa kaar.” ¹⁰N den a gãn bile a malaka nũu pɔ ’wɔb. Ka wʊ nʊ̃mɔ̃ a n nɛɛ pɔ a sɩkãa kaar, tɩchɛ ɩn wa vɔl baar, ka wʊ mire a pʊɔ pɔ. ¹¹A ba lɛ ’yɛr kʊ ma go, “’Yɛr ’yɛr kʊ a nɩbʊrɔ, nɩ paalsɩ, nɩ ’yɛrbʊrsɩ nɩ a nãmɩne.”

¹Be lɛ a nɩrɛ kɔ̃ɔ de dãgbal na kaara a damanaa kaar kʊ ma tɩ ’yɛr, “Chen tɩ man a Nãaŋmɩn puorfʊ yir nɩ a bɔɔr lofʊ jie na fʊ sɔr a nɩbɛ bala na puoro a be. ²Tɩchɛ taa ɩrɛ wa mana a yõo ɛ, bojũu be lɛ a bala na ba ɩ a Nãaŋmɩn nɩbɛ ɛ, na be ’mu ’mulo a tẽchɛchɛ nyãna ŋmɛrsɩ lɩjaayi nɩ ayi. ³Ɩ̃n kʊ naa a n yelmãɛ dãasɩɛ nɩbɛ ayi ka ba su fɔjãrsɩ tɩ mʊɔlɔ na ba ’yɛrɛ ber tur dɔɔl kɔɔr ayi nɩ lɩjaata (1,260).” ⁴A dãasɩɛ dẽme ayi bala ɩ naa a kãa tɩɩr ayi nɩ a fãtɩnɛ dɔɔlfʊ jie jiir ayi, ba ara naa a Soro nyã na ɩ a wɛr wʊ jaa niem. ⁵Ala ɩ nɩrɛ bʊɔrɔ naa ɩka wʊ maal ba bier, bũu ma yi naa a ba nɛɛ pɔ di a bala na ɩ a ba dɔ̃dɔ̃mɔ̃sɩ. Nɩtɔ̃ lɛ a nɩrɛ ’lɔ na tɩɛr a ba sɔ̃ɔfʊ ma kpi. ⁶A nɩbɛ bala tara na kpɛ̃ɔ na nyɔɔ saa a saaju ka a saa kʊ̃ wa a sɔ̃ɔ ’lɔ ban mʊɔlɔ ɛ. Ba mɩ tara na kpɛ̃ɔ na lɩɛb a kɔ̃n a jaa ka a ɩ jãɩ, na ba mɩ na tʊ̃ɔ vɛ̃ ka yelbier wa a tẽe pɔ sɔ̃ɔ jaa ban bʊɔrɔ.

⁷Ala ɩ ba wa baar naa a dãasɩɛ difʊ, a mɔdʊ̃ɔ ’lɔ na yi a bɔɔ fulom ’lɔ pɔ na ŋmaan ban jɛɛr na wʊ tʊ̃ɔ ba na wʊ kʊ. ⁸Ka a ba ãgãma gã be a tẽkpɛ̃ɛ ’lɔ sɔkpɛ̃ɛ ju. A tẽkpɛ̃ɛ nyã lɛ ba lɔɔrɔ sʊkpa bʊɔlɔ nɩ Sodom bɩɩ Ijipitɩ, be lɛ ba kpa a ba Soro a daa ju. ⁹Nɩbʊrɔ, nɩ ’yɛrbʊrɔ, nɩ balsɩ ba jaa, nɩ paalsɩ a jaa na kaara naa a ba ãgãma ban tɔr a ũufʊ bɩbie ata nɩ bʊ̃ŋmaa. ¹⁰Nʊ̃ɔ na kpɛ̃n a nɩbɛ na kpɩɛrɛ a wɛr pɔ ka ba chɩlɛ kʊrɔ taa bonsɩ, bojũu ba kʊ naa a ’yɛ’yɛrbɛ ayi banyãna na dɔ̃ɔ ge a wɛr nɩbɛ.

¹¹Tɩchɛ a bɩbie ata nɩ a bʊ̃ŋmaa ala na wa po, Nãaŋmɩn ’yɔ̃ɔ ban nyɛvʊr ka ba lɛ ir ɩ vʊɛ, ka a dãbãɛ kpɛ a bala na nyɛ ba. ¹²A ’yɛ’yɛrbɛ ayi banyãna pãa wõn nɛkpɛ̃ɛ na yi saaju ’yɛr, “Yɩ do wa ka.” Ka ba tu a julõjuur pɔ duoro a saaju ka a ba dɔ̃dɔ̃mɔ̃sɩ kaara ba.

¹³Be lɛ ajienaa ka a tẽe mii ka a tẽkpɛ̃ɛ ’lɔ̃nɔ̃ yie jiir pie jibʊ̃’yen lo naa kʊ nɩbɛ tur ayopõi (7,000) ka a dãbãɛ kpɛ a bala na chɛ a ba pɛɛrɛ a Nãaŋmɩn nyã na be a saaju.

¹⁴A nɛbier ayi sʊɔ lɛ a nyã na po, tɩchɛ a ata sʊɔ mɩ turo naa.

¹⁵A malakasɩ ayopõi sʊɔ pɛɛl naa a wʊ ɩɩl, ka a kɔkɔyɔɔ ’yɛrɛ be a saaju, “A wɛr nyã nãalʊ̃ʊ ɩ naa a sɩ Soro nɩ a wʊ Nɩ-iraa nãalʊ̃ʊ, ’lɔ lɛ na di a nãa jaa kpo kpo.” ¹⁶A nɩbɛrɛ lɩjɛr nɩ anaar bala na jãnɛ a ba nãa dakɔɔr ju a Nãaŋmɩn niem gãn kpa tẽe puor a Nãaŋmɩn ¹⁷tɩ ’yɛrɛ, “Sɩ puor naa a Soro Nãaŋmɩn na ɩ a Tʊ̃ɔfʊ Sʊɔ, ’Lɔ lɛ ɩ, nɩ ’Lɔ lɛ dɔ̃ɔ be be, bojũu wʊ den a wʊ kpɛ̃ɔ piel kaara nɩ a wɛr wʊ jaa. ¹⁸A paalsɩ vʊ̃n fʊn nɛɛ ka fʊ suur mɩ dire. A sɔ̃ɔ ta naa ka fʊn tɔɔr a kũn ’yɛr, na fʊn yab a fʊ gbãgbaar na ɩ a ’yɛ’yɛrbɛ lɔ̃ɔn a fʊ nɩbɛ naa bala na ’yɔ̃ɔnɔ̃ a fʊ yuor, a bil naa bɛrɛ ba jaa, na fʊn sɔ̃ɔ a bala na sɔ̃ɔ a wɛr.”

¹⁹Ka a Nãaŋmɩn yir na be a saaju pãn pãa yuo ka ba nyɛ a nɛtɩraa daka be a yir pɔ. Ka saa nyɩɩrfʊ, gɔ̃mɔ̃, nɩ tãnfʊ, ka a tẽe wʊ jaa mii, ka a sakpʊlõbibɛrɛ loro.

¹A nɛ’maa yelbɛrɛ na yi a saaju ka a pɔɔ vaar mɔ̃tɔ̃ɔ fɩka fɔbaa tɩ dɔɔl a gbɛɛ a ŋmɛraa ju, ka a ŋmɛrbie pie nɩ ayi ɩ nãa jupil ka wʊ su. ²Pʊɔ lɛ wʊ tara ka wʊ dɔɔfʊ ta ka wʊ kõnõ nɩ. ³Be lɛ ka a nɛ’maa yele ãsʊɔ lɛ yi a saaju kaara fɩka dajɩl na ɩ jɩɛ na wʊ tara jur ayopõi nɩ ɩlɛ pie ka a nãa jupile be a jur pɔ. ⁴A wʊ jʊʊr pɩɩr naa a ŋmɛrbie jiir ata jibʊ̃’yen a saaju ’lɔb a tẽe. Tɩ ara gu a pɔɔ ’lɔ na bʊɔrɔ a dɔɔfʊ ɩka ’lɔ wa dɔɔ wʊ vɔl a bie. ⁵A pɔɔ dɔɔn a bie ka wʊ ɩ dabile, ’lɔ lɛ na kaara a paalsɩ a jaa nɩ la kpɛ̃ɔ ’lɔ na kaara a kur dãgbal kaar. Ba jãan a pɔɔ bie nyã don a Nãaŋmɩn sɛ̃ ka wʊ tɩ be a wʊ nãalʊ̃ʊ pɔ. ⁶Tɩ ka a pɔɔ mɩ jo kpɛ a mɔgɔ̃ɔ pɔ na wʊ tɩ be a jie Nãaŋmɩn na chɔɔr bar ka ban kaara wʊ maal ber tur kɔɔr ayi dɔɔl lɩjaata (1,260).

⁷Ka a jɛɛr lo be a saaju. Maɩkɩl nɩ a malakasɩ jɛɛr nɩ naa a dajɩl, ka a dajɩl nɩ a wʊ malakasɩ mɩ lɩɛb jɛɛrɛ nɩ a Maɩkɩl nɩ a wʊ malakasɩ. ⁸Tɩchɛ ba tʊ̃ɔ naa a dajɩl nɩ a wʊ malakasɩ, dii ba bar a be a saaju. ⁹Ba lɔb a dajɩl kpɛ̃ɛ nyã bar a yõo, a kõr waa ’lɔ̃nɔ̃ na ɩ a dɛɛr sʊɔ, nɩ a Satan, ’lɔ lɛ bɛlʊ̃ a wɛr nɩbɛ ba jaa. Ba lɔb wʊn bar ka a wɛr pɔ, nɩ a wʊ malakasɩ.

¹⁰Be lɛ n wõ nɛkpɛ̃ɛ na ’yɛr be a saaju, “Pʊ̃pãanyã, a faafʊ bɩbir vɩɛ naa, a sɩ Nãaŋmɩn wiil naa a wʊ kpɛ̃ɔ, nɩ a wʊ nãalʊ̃ʊ, nɩ a wʊ Nɩ-iraa kpɛ̃ɔ. Bojũu a ’lɔ na bɛrɛ a sɩ yɛɛr nɛɛ, ’lɔ lɛ bɛrɛ ba a nɛɛ a Nãaŋmɩn niem mɔ̃tɔ̃ɔ nɩ tãsɔɔ, ba daa wʊn lɔb. ¹¹Ba tʊ̃ɔ wʊ naa nɩ a Pɛraabile jãɩ nɩ a ba dãasɩɛ ’yɛrbie. Ba sɔɔn kũu na baa de a ba nyɛvʊr ka wʊ ɩ bon ɛ. ¹²A lɛ jũu, saaju naa bala na kpɩɛrɛ a be, yɩ chɩlɛ! Tɩchɛ nɛbier ben a yɩn na be a wɛr nɩ a man pɔ, yɩn din dɔɔyɛ, bojũu a dɛɛr sʊɔ suun a yɩ sɛ̃! Ka a wʊ suur dire, bojũu a wʊ ber ba waa ɛ.”

¹³Lɛ a dajɩl na wa nyɛ ka a ɩ tẽe lɛ wʊ lo, wʊ dire naa a pɔɔ ’lɔ na dɔɔ a dabile. ¹⁴Ka ba kʊ a pɔɔ tuu kpɛ̃ɛ pibɛ ayi, ɩka wʊ ɔɔ chen a jie ban chɔɔr bar be a mɔgɔ̃ɔ pɔ, be lɛ ban tɩ kaara wʊ yuom ata nɩ bʊ̃ŋmaa ka a waa taa pɔɔ wʊ ɛ. ¹⁵Be lɛ ka a waa chɩr kʊ̃ɔ a nɛɛ pɔ põn kʊ̃ɔ kaar, ɩka a di a pɔɔ, ¹⁶tɩchɛ ka a tẽe sʊ̃ʊ a pɔɔ haa a nɛɛ nyũ a kʊ̃ɔ ala a dajɩl na chɩr a nɛɛ pɔ. ¹⁷Ka a dajɩl pãa nyɛ suur ’yɔ̃ɔ a pɔɔ na wʊ chen tɩ ŋmaan a pɔɔ bibiir bala na chɛ jɛɛr. A bala na turo a Nãaŋmɩn nɛɛ na ba mɩ tara a Yesu ’yɛr yelmãɛ.

¹Ka a dajɩl ara a man gogoro nɛɛ. N nyɛn mɔdʊ̃ɔ na yire a man pɔ na wʊ tara jur ayopõi tɩ bul ɩlɛ pie ka a nãa jupile su a ɩlɛ ala pɔ. A jur ala pɔ yoe ben be na fere sɔ̃ɔnɔ̃ Nãaŋmɩn yuor. ²A mɔdʊ̃ɔ ’lɔ ɩn nyɛ nyɛntãan gbɔ̃gbɔ̃ɔ tɩchɛ ka a gbɛɛ kaara fɩka pɛɛlaa gbɛɛ ka a nɛɛ mɩ kaara fɩka jukpɛ̃ɛ nɛɛ. Ka a dajɩl de a wʊ kpɛ̃ɔ nɩ a wʊ nãa dakɔɔ nɩ a wʊ tʊ̃ɔfʊ kʊ a mɔdʊ̃ɔ ’lɔ̃nɔ̃. ³A mɔdʊ̃ɔ ju ãsʊɔ kaara fɩka bon ban chɛ ɩrɛ na kʊ tɩchɛ ka a chɛfʊ jie ’lɔ ’mɔ̃ pɔɔ. Nɛɛ ’maan a nɩrɛ jaa na be a wɛr pɔ tɩ na ba turo a mɔdʊ̃ɔ ’lɔ. ⁴Ka nɩrɛ jaa pãa pɛɛrɛ a dajɩl bojũu ’lɔ lɛ de a wʊ kpɛ̃ɔ kʊ a mɔdʊ̃ɔ ’lɔ na ba mɩ pɛɛrɛ a mɔdʊ̃ɔ ’lɔ ’yɛrɛ nɩ tɩ sʊrɔ, “An lɛ kaara a mɔdʊ̃ɔ nyã kaar? Nɩ an lɛ na tʊ̃ɔ ŋmaan wʊ jɛɛr?”

⁵A mɔdʊ̃ɔ nyã tara na nɛɛ na ’yɛrɛ ɛ jãjɩɩr ’yɛr na wʊ fere, wʊ tara na sɔr ɩka wʊ ’yɛr a wʊ yobɔ ’yɛr maal ŋmɛrsɩ lɩjaayi nɩ ayi (42). ⁶A wʊ ’yɛrbie chɩrɛ nɩ naa Nãaŋmɩn na wʊ fere sɔ̃ɔnɔ̃ a Nãaŋmɩn yuor nɩ a jie ’lɔ wʊn be nɩ a bala na kpɩɛrɛ a saaju. ⁷Ba kʊ wʊn sɔr ɩka wʊ jɛb a Nãaŋmɩn nɩbɛ na wʊ tʊ̃ɔ ba na wʊ mɩ tʊ̃ɔ a nɩbʊrɔ, nɩ ’yɛrbʊrɔ, nɩ balbʊrɔ, nɩ paalsɩ. ⁸A bala ba jaa yuor na ba dɔ̃ɔ sɛb a Pɛraabile ban dɔ̃ɔ kʊ a nyɛvʊr gãn pɔ ɛ, tɩ a wɛr wa mɛ, na gbur dumo puor a mɔdʊ̃ɔ nyãna.

⁹Nɩrɛ ’lɔ na tara toor, wʊ chɛlɛ. ¹⁰Ala ɩ ãsʊɔ jaa nyɔɔfʊ lɛ ban nyɔɔ wʊ, ban nyɔɔ wʊn chiin. Ala ɩ sɔkpɛ̃ɛ mɩ lɛ ban kʊn ãsʊɔ, a sɔkpɛ̃ɛ lɛ ban kʊn wʊ. A lɛ jũu a bala na ɩ Nãaŋmɩn nɩbɛ, ba tara kãnyir nɩ yelmãɛ.

¹¹N pãa lɛ nyɛn a mɔdʊ̃ɔ ãsʊɔ na yire a tẽe tara ɩlɛ ayi fɩka pɛraabile tɩ ’yɛrɛ fɩka a dajɩl. ¹²Wʊ yin de a mɔdʊ̃dɔ̃ɔ ’lɔ kpɛ̃ɔ na wʊ wiil wʊ mãɛ a mɔdʊ̃dɔ̃ɔ ’lɔ niem tɩ fɩr a nɩbɛ ba jaa na be ka a wɛr pɔ ka ba gbur dumo puor a mɔdʊ̃dɔ̃ɔ ’lɔ chɛfʊ jie na ’mɔ pɔɔ. ¹³Wʊ tʊ̃n nɛ’maa tʊ̃mɔ̃sɩ na wʊ gba ma vɛ̃ ka bũu yi saaju suu wa a tẽe ka nɩbɛ ba jaa nyɛ. ¹⁴A wʊ nɛ’maa tʊ̃mɔ̃ anyãna jũu, ba kʊ wʊn kpɛ̃ɔ ka wʊ de a mɔdʊ̃dɔ̃ɔ ’lɔ jie, na wʊ bɛl a wɛr nɩbɛ. Ka wʊ ’yɛr ba ka ba mɛ bʊtɩbɛ ’yɔ̃ɔnɔ̃ nɩ a mɔdʊ̃ɔ ’lɔ ban dɔ̃ɔ chen a sʊɔ tɩ wʊ ’mɔ pɔɔ. ¹⁵Ba kʊ wʊn sɔr ɩka wʊ kʊ a bʊtɩɩ ’lɔ nyɛvʊr wʊn mɛ ka wʊ nyɛtãan a mɔdʊ̃dɔ̃ɔ ’lɔ, ka wʊ na tʊ̃ɔ ’yɛr ka ba kʊ a bala na tɔr a bʊtɩɩ puorfʊ. ¹⁶Wʊ mɩ fɩr nɩrɛ jaa, ka bile lɛ wʊ ɩ bɩɩ kpɛ̃ɛ lɛ, taraa sʊɔ bɩɩ nɔ̃ɔ sʊɔ, sumɩne bɩɩ gbãgbaa, ka ba ’yɔ̃ɔ ba jaa jãnsɩ a nũsʊ̃ɔ nũu pɔ bɩɩ a gberaa pɔ. ¹⁷Nɩrɛ jaa kʊ̃ tʊ̃ɔ daara bɩɩ da bon ka baa ’yɔ̃ɔ wʊ a jãnɛ na ɩ a mɔdʊ̃ɔ yuor bɩɩ a wʊ jãnɛ ’lɔ na ɩ a wʊ yuor ɛ.

¹⁸Ka ’lɔ yɛ̃ ’yɛr lɛ, ala ɩ nɩrɛ tara na bɔ̃ɔfʊ, wʊn tʊ̃ɔ sɔr a mɔdʊ̃ɔ sɛbie an ɩ nɩsaal sɛbie lɛ. A sɛbie ɩ naa kɔɔr ayʊɔb dɔɔl lɩjaata nɩ ayʊɔb (666).

¹Be lɛ n kaa nyɛ a Pɛraabile ka wʊ ’mataa ara nɩ nɩbɛ turo kɔbaa lɩjaayi nɩ anaar (144,000) a Jiyon tɔ̃ɔ ju ka wʊ yuor nɩ a Sãa yuor sɛb ’mar a ba gbersɩ pɔ. ²N wõn kɔkɔɛ a saaju na gɔ̃nɔ̃ fɩka kɔ̃kpɛ̃ɛ na joro bɩɩ saa na tãn. A gɔ̃mɔ̃ mɩ kaara fɩka kõrõjomsɩ ban ŋmiere. ³Ba yiele naa yiel paalaa a nãa dakɔɔ niem nɩ a bʊ̃nɩbie anaar bala nɩ a nɩbɛrɛ bala niem. Nɩrɛ jaa ba be be na tʊ̃ɔ a yiel jãn ɛ, ka a nɩbɛ turo kɔbaa lɩjaayi nɩ anaar (144,000) bala tɛɛ a Nãaŋmɩn na faa ka a wɛr pɔ ba lɛ ɛ. ⁴A banyãna lɛ ba sɔ̃ɔ ba mãɛ nɩ pɔbɔ ɛ, bojũu ba gun ba mãɛ ɩ chɛchɛ, na ba ma turo a Pɛraabile jie jaa wʊn chiine, bala lɛ ba da de kʊ Nãaŋmɩn fɩka bʊ̃dɔ̃ɔ ban de kʊ Nãaŋmɩn nɩ a Pɛraabile. ⁵Baa haa nɛɛ ŋmaa jir ɛ. Baa tara chɛfʊ bãlãa jaa ɛ.

⁶N pãa lɛ nyɛn a malakasɩ ãsʊɔ na ɔɔrɔ be a saaju tɩ tara a ’yɛr kpo kpo bʊɔrɔ ɩka wʊ ’yɛr kʊ a bala na be ka a wɛr pɔ, nɩ paalsɩ a jaa, nɩ balbʊrsɩ a jaa, nɩ ’yɛrbʊrsɩ a jaa, nɩ nɩbʊrsɩ a jaa. ⁷Wʊ tãn na nɩ nɛkpɛ̃ɛ, “Yɩ joro a Nãaŋmɩn dãbãɛ na yɩ kʊrɔ wʊ tɩɩr, bojũu a wʊ bɩbir vɩɛ naa ka wʊn tɔɔr a nɩbɛ ’yɛr. Yɩ puor wʊ, ’lɔ lɛ maal a saaju, nɩ a wɛr, nɩ a man nɩ a kʊ̃ɔ yifʊ jiir.”

⁸A malakasɩ ayi sʊɔ mɩ tun wa ’yɛrɛ, “Wʊ wɛl naa, wʊ wɛl naa, a Babilon tẽkpɛ̃ɛ nyã ’lɔ lɛ maal a paalsɩ a jaa a ba nyũ a wʊ sɛ̃sɛ̃yele dãa ala na tɔɔ Nãaŋmɩn suur waan.”

⁹Ka a malakasɩ ata sʊɔ mɩ tu wa ’yɛrɛ nɩ kɔkɔkpɛ̃ɛ, “Ala wa ɩ ãsʊɔ jaa puor naa a mɔdʊ̃ɔ nyãna naa bʊtɩɩ nyãna ban mɛ a wʊ kaar, na wʊ sɔɔ ka ba ’yɔ̃ɔ wʊ a jãnɛ a gberaa pɔ bɩɩ a nũu pɔ, ¹⁰wʊ mɩ na nyũn a dãa ala na ɩ a Nãaŋmɩn suur, ala lɛ ba pʊr ’yɔ̃ɔ a ŋmele pɔ na ɩ a suur. Ban ge wʊ naa nɩ a jerbɩ bũu na dire a malaka chɛchɛsɩ bala naa Pɛraabile niem. ¹¹A ba gefʊ jʊʊr na uro ba tara ŋmaafʊ ɛ. Pɛ̃nfʊ ba be be kʊ a bala na gbur dumo puor a mɔdʊ̃ɔ nɩ a bʊtɩɩ ’lɔ ban mɛ a wʊ kaar mɔ̃tɔ̃ɔ bɩɩ tãsɔɔ ɛ, bɩɩ ãsʊɔ jaa na sɔɔ de a jãnɛ na ɩ a mɔdʊ̃ɔ yuor ɛ.” ¹²A lɛ jũu, a bala na ɩ Nãaŋmɩn nɩbɛ na ba turo a wʊ nɛɛ na ba mɩ ara nɩ yelmãɛ kʊ a Yesu ba tara kãnyir.

¹³N pãa lɛ wõn kɔkɔr na yi a saaju ’yɛrɛ, “Sɛb a anyãna an yi a dɩna chiine, pʊpɛl sʊɔ lɛ a ’lɔ na kpi a Soro sɔr pɔ.” “Ɔ̃ɔ,” lɛ a Nãaŋmɩn Sɩɛ ’yɛr, “Ban pɛ̃n naa a ba dɔɔyɛ pɔ. Bojũu a lɛ ban dɔ̃ɔ tʊ̃, na turo ba naa.”

¹⁴N lɛ kãan nyɛ julõjupɩla, ka a nɩrɛ ’lɔ na jãnɛ a julõjuur ju kaara fɩka nɩsaal bie (Danɩɛl 7:13) na wʊ su sɛlma jupil a ju pɔ, tɩ na wʊ tara bʊ̃ŋma sɔkpɛ̃ɛ na dire a nũu pɔ. ¹⁵Be lɛ a malaka ãsʊɔ mɩ yi be a Nãaŋmɩn yir wa bʊɔlɔ ’yɛrɛ kpɛ̃ɔ jaa kʊrɔ a ’lɔ na jãnɛ a julõjuur ju, “De a sɔkpɛ̃ɛ na fʊ piel tʊ̃mɔ̃ bojũu a tʊ̃mɔ̃ sɔ̃ɔ ta naa, bojũu a wɛr nyã ban na ŋma mʊ̃ɔ naa.” ¹⁶Lɛ lɛ a ’lɔ na jãnɛ a julõjuur ju jaal a sɔkpɛ̃ɛ bar a wɛr pɔ na wʊ ŋma a wɛr wʊ jaa.

¹⁷A malaka ãsʊɔ mɩ na yi a be a Nãaŋmɩn puorfʊ yir a saaju na wʊ mɩ tara a bʊ̃ŋma sɔkpɛ̃ɛ diir ãsʊɔ. ¹⁸Ka a malaka ãsʊɔ mɩ ’lɔ lɛ kaara a bũu ka wʊ wa yi a be a tãɩ nyũu vɩla chʊmfʊ jie bʊɔl a ’lɔ na tara a bʊ̃ŋma sɔkpɛ̃ɛ diir kpɛ̃ɔ jaa tɩ ’yɛr, “De a fʊ bʊ̃ŋma sɔkpɛ̃ɛ diir ’lɔ na fʊ ŋman a tɩɛ wɔ̃mɔ̃, a wɛr lɛ ɩ a tɩɛ ka wʊ wɔ̃mɔ̃ mʊ̃ɔ.” ¹⁹A malaka jaal a wʊ sɔkpɛ̃ɛ bar ka a wɛr pɔ ka wʊ ŋmara a wɔ̃mɔ̃ kpaara ’yɔ̃ɔnɔ̃ a be ban ma nɛɛrɛ ŋmɛrɛ, na ɩ a Nãaŋmɩn suur. ²⁰Ba nɛɛrɛ ban a be a nɛŋmɛrfʊ jie a tẽkpɛ̃ɛ ’lɔ yõo, ka a jãɩ joro a ŋmɛrfʊ jie ɩrɛ na ta mɛl kɔɔr ayi ka a wii mɩ ma kpɛ ka a nɛɛ ’lɔr.

¹N nyɛ naa a nɛ’maa yelwiilaa jãnɛ ãsʊɔ a saaju, malakasɩ ayopõi na tara wõmsɩ ayopõi, ala lɛ ɩ a baaraa na vɛ̃ ka Nãaŋmɩn suur lo. ²N lɛ nyɛn bon na kaara fɩka man kʊ̃ɔ jaa wel wel nyɩlɛ chãana kaar lɔ̃ɔtãan bũu ka nɩbɛ ara a wʊ gogoro par. Bala lɛ jɛb tʊ̃ɔ a mɔdʊ̃ɔ nɩ a wʊ bʊtɩɩ nɩ a yuor jãnɛ. Nãaŋmɩn kʊ ban kõrõjomsɩ ³ka ba yiele nɩ a wʊ gbãgbaa Mosesɩ nɩ a Pɛraabile yiele ’yɛrɛ, “A Soro Nãaŋmɩn na ɩ a Tʊ̃ɔfʊ Sʊɔ, a fʊ tʊ̃mɔ̃ ’maan nɛɛ tɩ põn bar, fʊ ɩn nɩtor nɩ yelmãɛ sʊɔ, fʊ̃ʊ lɛ ɩ a nãmɩne ba jaa Nãa. ⁴An lɛ kʊ̃ joro a fʊ̃ʊ Soro dãbãɛ na wʊ kʊ a fʊ yuor tɩɩr ɛ? Bojũu fʊ̃ʊ tɛɛ lɛ ɩ chɛchɛ. A paalsɩ a jaa na wa gãn kpa tẽe a fʊ niem, bojũu nɩrɛ jaa nyɛ naa a fʊ tʊ̃torsɩ.”

⁵Bojũu a anyã puor, n kãan nyɛ a saaju ka a Nãaŋmɩn puorfʊ yir a jichɛchɛ ’lɔ na ɩ a dãasɩɛ jie ka wʊ yuo. ⁶Ka a malakasɩ ayopõi yi a jichɛchɛ nyãna na ba tara a Nãaŋmɩn suur wõmsɩ ayopõi sun bʊ̃pɩɛl na nyɩlɛ ka a sɛlma bʊ̃lunsɩ bãbã a ba nyãn pɔ. ⁷Be lɛ ka a bʊ̃nɩbie anaar bala ãsʊɔ kʊ a malakasɩ ayopõi bala sɛlma laar ayopõi na sɛɛr nɩ a Nãaŋmɩn nyã na be be jaa kpo kpo suur. ⁸Ka a jʊʊr sɛɛ a Nãaŋmɩn puorfʊ yir yi a Nãaŋmɩn tɩɩr nɩ a wʊ kpɛ̃ɔ pɔ, ka nɩrɛ jaa kʊ̃ tʊ̃ɔ kpɛ a puorfʊ yir ka a malakasɩ ba wa baar a Nãaŋmɩn suur wõmsɩ ala baar ɛ.

¹N wõn nɛkpɛ̃ɛ na yi a be a puorfʊ yir ’yɛrɛ kʊrɔ a malakasɩ ayopõi bala, “Yɩ chen tɩ kpaar a Nãaŋmɩn suur a laar pɔ bar a wɛr.”

²Ka a malaka dɔ̃ɔ ’lɔ chen tɩ kpaar a wʊ laa bar ka a tẽe ka a natɩdɛbɛ na bɩɛrɛ tɛ a nɩbɛ bala na tara a mɔdʊ̃ɔ ’lɔ jãnɛ tɩ mɩ gbur dumo puor a bʊtɩɩ.

³A malaka ayi sʊɔ mɩ kpaar a wʊ laa bar a man pɔ, ka a kʊ̃ɔ lɩɛb fɩka kũu jãɩ, ka a bʊ̃vʊʊrsɩ a jaa na be a man pɔ kpi.

⁴A malaka ata sʊɔ mɩ kpaar a wʊ laa ’yɔ̃ɔ a põnsɩ nɩ kʊlsɩ pɔ, ka a kɔ̃n mɩ lɩɛb jãɩ. ⁵Be lɛ n wõ a malaka ’lɔ na kaara a kɔ̃n ’yɛr, “Fʊ̃ʊ lɛ ɩ a Torfʊ Sʊɔ, a fʊ ’yɛr tɔɔrfʊ nyã tor naa, fʊ̃ʊ lɛ ɩ, fʊ̃ʊ mɩ lɛ dɔ̃ɔ be be Chɛchɛ Sʊɔ a yelsɩ anyãna fʊn tɔɔr a ’yɛr jũu. ⁶Bojũu a putudẽme bala lɛ kʊ a fʊ nɩbɛ nɩ a fʊ ’yɛ’yɛrbɛ a fʊ kʊ ba a jãɩ ɩka ba nyũ, a lɛ sɛɛn ba naa.” ⁷Be lɛ n wõ kɔkɔr na ’yɛr be a bɔɔr lofʊ jie, “Ɔ̃ɔ, n Soro Nãaŋmɩn na ɩ a Tʊ̃ɔfʊ Sʊɔ, a fʊ ’yɛr tɔɔrfʊ ɩn yelmãɛ tɩ mɩ tor.”

⁸A malakasɩ anaar sʊɔ kpaar a wʊ laa ’yɔ̃ɔ mɔ̃tɔ̃ɔ ka wʊ tara kpɛ̃ɔ vuul a nɩbɛ nɩ bũu. ⁹A mɔ̃tɔ̃ɔ tʊl vuul ba naa tɩ ba chɛnɛ tʊrɔ a Nãaŋmɩn yuor an ɩ ’lɔ lɛ tara a gefʊ anyãna a jaa kpɛ̃ɔ na baa lɩɛb ba tɩɛr kʊ wʊ tɩɩr ɛ.

¹⁰A malakasɩ anũu sʊɔ kpaar a wʊ laa ’yɔ̃ɔ a mɔdʊ̃ɔ nãa dakɔɔ ju, ka a wʊ nãalʊ̃ʊ wʊ jaa lɩɛb libe, ka a wõnõ a nɩbɛ ka ba ɔɔrɔ jãlbie ¹¹tɩ chɛnɛ tʊrɔ a Nãaŋmɩn nyã na be a saaju a ba natɩɛ nɩ an bɩɛrɛ ba jũu. Tɩchɛ baa lɩɛb a ba tɩɛr bar a ba tʊ̃dɛbɛ ɛ.

¹²A malakasɩ ayʊɔb sʊɔ mɩ kpaar naa a wʊ laa ’yɔ̃ɔ a Yufɩrɩtɩ põn kpɛ̃ɛ pɔ, ka a kʊ̃ɔ sɩr chɔɔr a sɔr bar kʊ a mɔ̃tɔ̃ɔ purfʊ jie nãmɩne. ¹³N lɛ nyɛn a sɩdɛbɛ na kaara pãtɩɛ kaar ka a yire a bon ’lɔ na kaara a dajɩl kaar nɛɛ pɔ, naa lɛ yire a mɔdʊ̃ɔ ’lɔ mɩ nɛɛ pɔ, naa mɩ lɛ yire a jir ŋmarba ’yɛ’yɛrbɛ nɛɛr pɔ. ¹⁴A sɩɩr anyã ɩ naa a tɩɩ sɩɩr na tʊ̃nɔ̃ nɛ’maa tʊ̃mɔ̃sɩ. Ba chen naa a wɛr wʊ jaa nãmɩne sɛ̃ tɩ lɔ̃ɔ taa na ŋmaan a Nãaŋmɩn Tʊ̃ɔfʊ Sʊɔ jɛɛr a wʊ bɩbir kpɛ̃ɛ ’lɔ daar.

¹⁵“Nyɛ ɩn wan nãnyie kaar. Bɔɔsʊ̃n sʊɔ lɛ a ’lɔ na ba gur ɛ, tɩ mɩ tara a wʊ bʊ̃sursɩ jɛn na wʊ kʊ̃ wa chiine nɩ sal’mʊɔr ka a ɩrɛ wʊ vĩ ɛ.”

¹⁶Be lɛ a sɩɩr lɔ̃ɔtaa a nãmɩne a jie ’lɔ a Heburu nɩbɛ na bʊɔlɔ Amagedɔn.

¹⁷A malakasɩ ayopõi sʊɔ kpaar naa a wʊ laa ’yɔ̃ɔ sɛsɛbɛ pɔ, ka kɔkɔr yi be a Nãaŋmɩn puorfʊ yir a nãa dakɔɔ par ’yɛrɛ kpɛ̃ɔ jaa, “A maal naa!” ¹⁸Be lɛ ka saa nyɩɩrfʊ, nɩ gɔ̃mɔ̃, nɩ saa tãnfʊ wa, ka a tẽe dam wʊ jaa miin kpɛ̃ɔ. An yi a lɛ daar jaa, nɩsaal na be ka a wɛr pɔ a tẽe ba mii a kpɛ̃ɔ a lɛ ɛ. ¹⁹Ka a tẽkpɛ̃ɛ ’mar jiir ata, ka a paalsɩ tẽbɛrɛ mɩ lo lo. Nãaŋmɩn chɛnɛ na tɩɛr tɔ a tẽkpɛ̃ɛ Babilon na wʊ gbʊ̃m wʊ a dãa na sɛɛ ŋmele na ɩ a wʊ suur. ²⁰Dõdolsɩ a jaa bɔr naa ka fʊ kʊ̃ lɛ nyɛ tɔ̃ɔ go ɛ, ²¹ka a sakpʊlõbibɛrɛ na tɩrɛ yire a saaju loro ŋmiere a nɩbɛ ka ba tʊrɔ a Nãaŋmɩn a sakpʊlõbie gefʊ nyã jũu.

¹A malakasɩ ayopõi na tara a laar ayopõi, ãsʊɔ wan wa ’yɛr kʊ ma, “Wa, ɩn wiil fʊn a lɛ a pɔɔ baa nyã yuor na yi na jãnɛ a mansɩ nɛɛ ’yɛr tɔɔrfʊ. ²’Lɔ lɛ a wɛr nãmɩne gãn ka a wɛr nɩbɛ mɩ buu nɩ a wʊ sɛ̃sɛ̃yele.”

³Be lɛ, a malaka ’mɔɔ man a Sɩɛ pɔ chiin a mɔgɔ̃ɔ pɔ. Be lɛ n tɩ nyɛ a pɔɔ na jãnɛ a mɔdʊ̃jɩɛ ju. Ka a mɔdʊ̃ɔ nyã ãgãn wʊ jaa pɔɔn yoe na fere nɩ Nãaŋmɩn na wʊ tara jur ayopõi nɩ ɩlɛ pie. ⁴A pɔɔ vaar naa fɔjɩ ile ile na wʊ pãɛn sɛlma nɩ kʊsɩsʊ̃n nɩ lɛrbikpãɛn. Wʊ tara naa a sɛlma ŋmele a wʊ nũsʊ̃ɔ pɔ a wʊ tʊ̃ kakaba nɩ a wʊ sɛ̃sɛ̃yele na sɛɛ. ⁵Yuor sɛb mar a wʊ gberaa pɔ, “Fʊn kʊ̃ tʊ̃ɔ bɔ̃ɔ a par ɛ, a Babilon na yi yuor, pɔɔ baar ma, nɩ a wɛr tʊ̃ kakabsɩ ma.” ⁶N nyɛn a pɔɔ na nyũ a Nãaŋmɩn nɩbɛ jãɩ buu, a bala na di a Yesu dãasɩɛ. Ɩn wa nyɛ wʊ a lɛ, nɛɛ ’maa ma naa.

⁷Ka a malaka sʊʊr ma, “Ŋmɩnɛ a nɛɛ ’maa fʊ? Ɩn wiil fʊ naa a pɔɔ nɩ a mɔdʊ̃ɔ wʊn do na tara jur ayopõi nɩ ɩlɛ pie yelsɔɔlaa par. ⁸A mɔdʊ̃ɔ ’lɔ fʊn nyɛ, wʊ dɔ̃ɔ be be, pʊ̃pãanyã waa lɛ be be go ɛ. Wʊn yi naa a bɔɔ fulom pɔ na wʊ chen a sɔ̃ɔfʊ jie. A wɛr nɩbɛ bala yoe na ba sɛb a nyɛvʊr gãn pɔ ɛ, yi a wɛr maalfʊ daar ɛ, bala wa nyɛ a mɔdʊ̃ɔ nyã, nɛɛ na ’maa ba naa bojũu wʊ dɔ̃ɔ be be na waa lɛ be be ɛ, tɩ na wʊn lɩɛb wa.

⁹“A ka ɩ naa tɩɛr na tara yɛ̃ ’yɛr. A jur ayopõi ɩ naa a tɔ̃n ayopõi a pɔɔ na jãnɛ, nɩ a nãmɩne ayopõi. ¹⁰A ba anũu kpi naa tɩ ka bʊ̃’yen chɛnɛ, bʊ̃’yen mɩ ba wa sɛrɛ ɛ. Tɩchɛ ’lɔ wa wa, wʊn kor bãlãa. ¹¹A mɔdʊ̃ɔ ’lɔ na dɔ̃ɔ be be na waa lɛ be be go ɛ, wʊ ɩ naa a nãmɩne aniin sʊɔ na pʊɔ ayopõi bala pɔ na chiine a sɔ̃ɔfʊ jie.

¹²“A ɩlɛ pie ala fʊn nyɛ ɩ naa nãmɩne pie na ba di a nãa sɛrɛ ɛ, tɩchɛ ban kʊ ban kpɛ̃ɔ ka ba ɩ nãmɩne lɔ̃ɔn a mɔdʊ̃ɔ sɔ̃ɔ bãlãa. ¹³Ba jaa tɩɛr ɩn bʊ̃’yen, ka ba de a ba kpɛ̃ɔ nɩ fɔ̃ɔ kʊ a mɔdʊ̃ɔ. ¹⁴Ban ŋmaan naa a Pɛraabile jɛɛr, tɩchɛ ka a Pɛraabile na tʊ̃ɔ ba, bojũu ’lɔ lɛ ɩ a sorbo ba jaa Soro nɩ a nãmɩne ba jaa Nãa. A bala wʊn bʊɔl na wʊ chɛl ir ka ba turo nɩ yelmãɛ, na pʊɔ wʊ naa.”

¹⁵Ka a malaka ’yɛr kʊ ma, “A kɔ̃n ala fʊn nyɛ be a pɔɔ baa ’lɔ na jãnɛ, ɩ naa a nɩbʊrsɩ, nɩyɔɔ, paalsɩ nɩ ’yɛrbʊrsɩ. ¹⁶A mɔdʊ̃ɔ nɩ a ɩlɛ pie ala fʊn nyɛ ban ’laar naa a pɔɔ baa nyãna na ba tɔɔ wʊ chɩɛr tɩ chɛ wʊ sal’mʊɔr. Ban ’wɔb wʊ naa tɩ chɛ ’yɔ̃ɔ bũu pɔ ka wʊ di. ¹⁷Bojũu an ɩ Nãaŋmɩn lɛ de ’yɔ̃ɔ a ba tɩɛr pɔ ka ba na ɩ a wʊ bɔfʊ, ka ba jaa tɩɛr ɩ bʊ̃’yen ka ba sɔɔ de a ba kpɛ̃ɔ kʊ a mɔdʊ̃ɔ ka wʊ di nãa ka Nãaŋmɩn ’yɛr wa maal baar. ¹⁸A pɔɔ fʊn nyɛ ɩ naa a tẽkpɛ̃ɛ ’lɔ nãa na tʊ̃ɔ a wɛr nãmɩne ba jaa.”

¹A anyã puor, n nyɛn a malaka ãsʊɔ na yi a saaju suro waara. Wʊ tara na kpɛ̃ɔ. A chãa na be a wʊ ’yɔ̃ɔ chaar naa a wɛr wʊ jaa. ²Na wʊ tãn kpɛ̃ɔ nɩ nɛkpɛ̃ɛ ’yɛrɛ, “Wʊ wɛl naa! A Babilon tẽkpɛ̃ɛ ’lɔ wʊ wɛl naa! Wʊ lɩɛb dɛɛr dẽme gaa jie, nɩ sɩdɛbɛ, nɩ lubil dɛbɛ nɩbɛ na ba ɔɔrɔ ɛ kpɛfʊ jie. ³Bojũu an ɩ a paalsɩ ba jaa buu naa nɩ a wʊ sɛ̃sɛ̃yele, ka a nãmɩne na be ka a wɛr pɔ gãn wʊ. A yayarba na be a wɛr pɔ len tu a wʊ bʊ̃yɔɔ pɔ.”

⁴Be lɛ n lɛ wõ kɔkɔr ãsʊɔ na yi a saaju ’yɛr, “Maa nɩbɛ, yɩ wa yi a wʊ pɔ na yɩ taa ɩrɛ wa pʊɔ a wʊ dɛɛr pɔ ɛ, bɩɩ na yɩ pʊɔ a wʊ wõm pɔ ɛ. ⁵Bojũu a wʊ maal dɛbɛ dɔɔl taa tɩ ta a saaju, ka Nãaŋmɩn tɩɛr tɔ a wʊ dɛɛr wʊn maal. ⁶Yɩ kʊ wʊ nɩtãa lɛ wʊn kʊ yɩ. Yɩ yab wʊ tɩ lɛ dɔɔl wʊ. Yɩ kʊ wʊ a dãa nɩ a wʊ ŋmele nɛɛr ayi ka wʊ nyũ. ⁷Ge wʊ ka wʊ waal, a yuor nɩ a nʊ̃ɔ wʊn bʊɔrɔ kʊrɔ a wʊ mãɛ. Wʊ ma chɛn nyãa ’yɛr, ‘N ɩn pɔɔ nãa jãnɛ, n ba ɩ pɔɔ kʊɔr ɛ. Nɩbaal kʊ̃ wa kpɛ ma jaa ɛ.’ ⁸A lɛ jũu, bɩbir bʊ̃’yen lɛ a wõm na wa a wʊ ju, kũu, nɩ kõn, nɩ kɔ̃. Bũu lɛ ɩ a di wʊ an ɩ a Soro Nãaŋmɩn nyã na tɔɔr a wʊ ’yɛr ɩn tʊ̃ɔfʊ sʊɔ.

⁹“Ka a wɛr nãmɩne na dɔ̃ɔ gãn wʊ na ba ’mataa din wʊ a nʊ̃ɔ, bala wa nyɛ a lɛ wʊn dire ka a jʊʊr uro, an ɩrɛ ban nɩbaal ka ba kõnõ kʊrɔ wʊ. ¹⁰Dãbãɛ kpɛ ba naa a ger nyã jũu, ban ara na tɛɛr jaa tɩ kõnõ ’yɛrɛ, ‘Nɛbier, nɛbier, a fʊ̃ʊ tẽkpɛ̃ɛ nyã, pa Babilon, a fʊ̃ʊ nyã na tara a kpɛ̃ɔ, bɩbir bʊ̃’yen lɛ a sɔ̃ɔfʊ be wa a fʊ ju.’

¹¹“A yayarba na be a wɛr pɔ na kõnõ na tɩ waala bojũu nɩrɛ ba be be na da a bonsɩ go ɛ. ¹²A sɛlma, kpãna, kʊsɩsʊ̃n nɩ a lɛrbikpãɛn, nɩ fuu pɩɛl, nɩ fuujɩ ile ile, nɩ fuu saalsɩ, nɩ a fuujɩ kpãn kpãn, nɩ a daar ala nyũu na nʊ̃mɔ̃, nɩ bomo ala jaa ban de wab chɛlɛ maal. A daar ala daa na be tuo, a kurjɩɛ, nɩ kursɔɔlɔ, nɩ a kʊsɩkpũlo bie. ¹³A kãnyũu vɩɛl ala, nɩ a dãn, nɩ a kãn, nɩ a jɔ̃n, nɩ chir, nɩ a niin, nɩ a piir, nɩ a wiisɩ, nɩ a wiisɩ torkosɩ, nɩ a gbãgbaar.

¹⁴“A bʊ̃vɩɛlsɩ ala na ɩrɛ fʊ a vɔlaa, a jaa chen naa. A fʊ nãbomo naa fʊ yobɔyele a jaa bɔr naa. Fʊ kʊ̃ lɛ nyãa go ɛ. ¹⁵A yayarba na da a bomo kʊ wʊ na ba le, nɛɛ na ’maa ba naa a wʊ ge fʊ nyã pɔ, ka ba sɛr yi tɛɛr jaa tɩ kõnõ waala ¹⁶’yɛrɛ nɩ, ‘Nɛbier, nɛbier, a fʊ̃ʊ tẽkpɛ̃ɛ nyã, a fʊ̃ʊ na ma su a fɔpɩɛl, nɩ a fɔjɩ ile ile, nɩ a fɔkpãn kpãnsɩ. Na fʊ ma pãɛn a sɛlma, nɩ a kʊsɩsʊ̃n, nɩ a lɛrbikpãɛn. ¹⁷Mɔ̃tɔ̃ bʊ̃’yen lɛ a fʊ nãbomo anyãna be wɛ a jaa.’ A bala na kaara a gborbɛrɛ ala a man kpɛ̃ɛ pɔ, nɩ a nɩbɛ bala na be be, nɩ a bala jaa na tʊ̃nɔ̃ dire be a man pɔ, na ara na tɛɛr. ¹⁸Bala wa nyɛ a jʊʊr ban kõnõ na ’yɛrɛ nɩ, ‘Tẽbuor lɛ be ka na wʊ ta a tẽkpɛ̃ɛ nyã?’ ¹⁹Ban ɔɔn tãna ’yɔ̃ɔnɔ̃ a jur pɔ tɩ kõnõ tɩ waala ’yɛrɛ nɩ, ‘Nɛbier, nɛbier, a fʊ̃ʊ tẽkpɛ̃ɛ nyã. A jie nyã a bala jaa na tara a gborbɛrɛ yʊɔrɔ nɩ a man pɔ, ba jaa len tu a fʊ jie, tɩ mɔ̃tɔ̃ bʊ̃’yen a fʊ be wɛ a nɩtɔ̃?’ ²⁰Saaju, chɩlɛ a wʊ jũu, yɩn Nãaŋmɩn nɩbɛ nɩ a nɩtʊ̃nsɩ nɩ a ’yɛ’yɛrbɛ yɩ chɩlɛ. Nãaŋmɩn tɔɔr a wʊ ’yɛr nɩtãa a lɛ wʊn maal yɩ.”

²¹Be lɛ ka a malaka kpɛ̃ɔ pãa ’mɔɔ kʊsɩr kpɛ̃ɛ na jãtãan nɩɛr lɔb ’yɔ̃ɔ a man pɔ tɩ ’yɛr, “Nɩtɔ̃ lɛ ɩn lɔb fʊ bar, a fʊ̃ʊ Babilon tẽkpɛ̃ɛ nyã ka nɩrɛ kʊ̃ lɛ nyɛ fʊ jaa go ɛ. ²²Ba kʊ̃ lɛ wõ kõrõjom ŋmefʊ, nɩ yiel yielbe, nɩ daa pɛɛlbɛ, nɩ ɩlɛ pɛɛlbɛ jaa go ɛ. Tʊ̃tʊ̃nbɔ jaa bʊrɔ kʊ̃ lɛ be be go ɛ, ba kʊ̃ lɛ wõ jɔ̃ nãɛnbɛ dɔ̃ɔn go ɛ. ²³Fãtɩn bũu kʊ̃ lɛ chaar be go ɛ. Ba kʊ̃ lɛ wõ pɔɔ paalaa nɩ wʊ sɩrɛ kɔkɔr go ɛ. A fʊ yayarba lɛ dɔ̃ɔ yi yuor a wɛr pɔ. A fʊ tãsɔɔ yele lɛ fʊ de bɛl a paalsɩ jaa ka ba bɔr. ²⁴A wʊ pɔ lɛ ba nyɛ a ’yɛ’yɛrbɛ nɩ a Nãaŋmɩn nɩbɛ jãɩ nɩ bala ba jaa ban dɔ̃ɔ kʊ a wɛr pɔ.”

¹A anyã puor, n wõn gɔ̃mɔ̃ fɩka nɩyɔɔ na tãna be a saaju ’yɛrɛ nɩ, “Dãnfʊ wʊ ta Nãaŋmɩn! Faafʊ nɩ tɩɩr nɩ kpɛ̃ɔ ɩ naa a wʊ tʊɔr, ²bojũu a wʊ ’yɛr tɔɔrfʊ ɩn yelmãɛ tɩ mɩ tor. Wʊ ’yɔ̃ɔn a pɔɔ baa na ’yɛr, ’lɔ lɛ sɔ̃ɔ a wɛr nɩbɛ nɩ a wʊ sɛ̃sɛ̃yele. A wʊ gbãgbaar wʊn kʊ, wʊ yab wʊn a sãn.”

³Ba lɛ tãna na go, “Dãnfʊ wʊ ta Nãaŋmɩn. A wʊ jʊʊr na uro duoro ba tara ŋmaafʊ ɛ.”

⁴Ka a nɩbɛrɛ lɩjɛr nɩ anaar nɩ a bʊ̃nɩbie anaar bala gãn kpa tẽe puor a Nãaŋmɩn na jãnɛ a nãa dakɔɔ ju pɛɛrɛ wʊ ’yɛrɛ nɩ, “A ɩ a lɛ. Dãnfʊ wʊ ta a Nãaŋmɩn.”

⁵Be lɛ ka a kɔkɔr yi be a nãa dakɔɔ par ’yɛrɛ, “A yɩn na ɩ a Nãaŋmɩn gbãgbaar na yɩ joro wʊ dãbãɛ. Ka bil bɩɩ bɛrɛ lɛ, yɩ pɛɛrɛ a sɩ Nãaŋmɩn!”

⁶N pãa lɛ wõn dɔ̃ɔn fɩka nɩyɔɔ na gɔ̃nɔ̃, bɩɩ fɩka kɔ̃kpɛ̃ɛ na joro, bɩɩ saa na tãna kpɛ̃ɔ jaa, “Dãnfʊ wʊ ta Nãaŋmɩn! Bojũu a sɩ Soro Nãaŋmɩn na ɩ a Tʊ̃ɔfʊ Sʊɔ, lɛ di a nãa. ⁷Yɩ ɩ a sɩ chɩlɛ ka sɩ ãgãn ’maa a sɩ kʊ a Nãaŋmɩn tɩɩr an ɩ a wʊ Pɛraabile pɔɔ kulfʊ bɩbir vɩɛ naa, ka a pɔɔ mɩ chɔɔr a wʊ mãɛ baar. ⁸Wʊ sun bʊ̃pɩɛl na vɩɛlɛ tɩ nyɩlɛ.” A bʊ̃pɩɛl anyãna lɛ a Nãaŋmɩn nɩbɛ yeltorsɩ.

⁹Ka a malaka ’yɛr kʊ ma, “Sɛb a anyãna, ‘An ɩn pʊpɛl kʊ a bala ban bʊɔl a Pɛraabile pɔɔ kulfʊ lɔ̃ɔ di jie.’ ” Ka a malaka mɩ ’yɛr pʊɔ, “A Nãaŋmɩn ’yɛr anyãna ɩn yelmãɛ.”

¹⁰Ka n gã kpa tẽe ɩka n puor wʊ, tɩchɛ ka wʊ ’yɛr kʊ ma, “Ta maal a lɛ ɛ. N mɩ ɩ naa a gbãgbaa nɩtãa a fʊ̃ʊ nɩ a fʊ yɛɛr kaar, bala lɛ tara Yesu dãasɩɛ. Puor Nãaŋmɩn! Bojũu, a Yesu dãasɩɛ lɛ ɩ a Sɩɛ ’yɛr.”

¹¹N nyɛn a saaju na yuo, ka a ɩ wii pɩla lɛ, ka a nɩrɛ ’lɔ na do yuor di, yelmãɛ sʊɔ nɩ nɩtor. Yeltorsɩ lɛ wʊ ma tɔɔr a wʊ ’yɛr tɩ ŋmaan wʊ jɛɛr. ¹²A wʊ nɩbie ’lɩrɛ naa fɩka bũu, ka a nãjupil yɔɔ su a wʊ ju pɔ. Yuor sɛb mar wʊ nɩrɛ jaa na ba bɔ̃ɔ ɛ, ka ’lɔ tɛɛ ba lɛ ɛ. ¹³A fuu wõo wʊn su ɩn jãɩ wʊ jaa ka a yuor di, “Nãaŋmɩn ’Yɛr.” ¹⁴A saaju sojasɩ sun bʊ̃pɩɛl don wii pɩɛl turo nɩ wʊ. ¹⁵Ka a sɔkpɛ̃ɛ diir yi a wʊ nɛɛ pɔ, ’lɔ lɛ wʊ de chɩɛrɛ nɩ a paalsɩ ba jaa, “Wʊn kaara ba jaa nɩ a kpɛ̃ɔ ’lɔ na kaara a kur dãgbal kaar.” (Yiel Gãn 2:9) Wʊn nɛɛrɛ ban ŋmɛrɛ be a tɩɛ wɔ̃mɔ̃ nɛŋmɛrfʊ jie nɩ a Nãaŋmɩn na ɩ a Tʊ̃ɔfʊ Sʊɔ suur. ¹⁶Yuor nyãna lɛ be a wʊ fuu wõo na suu a gbɛkpɛ̃ɛ pɔ ɩka, A NÃMƖNE BA JAA NÃA, NƖ A SORBO BA JAA SORO.

¹⁷N nyɛn malaka na ara a mɔ̃tɔ̃ɔ ju tɩ bʊɔl a lubil a jaa na ɔɔrɔ be a saaju nɩ kɔkɔkpɛ̃ɛ, “Yɩ lɔ̃ɔ taa wa a Nãaŋmɩn lɔ̃ɔ di jie. ¹⁸Lɛ lɛ, yɩ wa dire a nãmɩne ãgãma nɩ a fɔ̃n dẽme nɩ a kpãɛn dẽme, a wiisɩ nɩ a ba duorbo, gbãgbaar nɩ sumɩne, a bil nɩ a bɛrɛ, a nɩbɛ banyãna ba jaa ãgãma.”

¹⁹Ka n nyɛ a mɔdʊ̃ɔ nɩ a wɛr nãmɩne nɩ a ba sojasɩ lɔ̃ɔn taa ŋmaan a ’lɔ na do a wii nɩ a wʊ sojasɩ jɛɛr. ²⁰Tɩchɛ ba nyɔɔn a mɔdʊ̃ɔ lɔ̃ɔn a jir ŋmara ’yɛ’yɛrɛ na tʊ̃ a nɛ’maa tʊ̃mɔ̃ a mɔdʊ̃ɔ niem. A nɛ’maa tʊ̃mɔ̃ anyãna lɛ wʊ de bɛlʊ̃ a bala na tara a mɔdʊ̃ɔ jãnɛ tɩ puor a bʊtɩɩ. Ba lɔb ba jaa ayi bʊ̃nɩbie ’yɔ̃ɔ a jerbɩ bũu na dire pɔ. ²¹A bala na chɛ, a ’lɔ na jãnɛ a wii ju kʊ ba naa nɩ a sɔkpɛ̃ɛ diir ’lɔ na yi a wʊ nɛɛ pɔ, ka a lubil pãa di a ba ãgãma tɩɩ.

¹N nyɛn a malaka na yi a saaju suro waara tara a bɔɔ fulom ’lɔ pãn bir nɩ bɔ̃jɔr gbor. ²Wʊ tʊ̃ɔ naa a dajɩl ’lɔ na ɩ a kõr waa, ’lɔ lɛ ɩ a dɛɛr sʊɔ na ɩ a Satan na wʊ lũ wʊ nɩ a bɔ̃jɔr gbor ka wʊ̃n maal yuomo tur (1,000). ³Wʊ lɔb wʊn ’yɔ̃ɔ a bɔɔ fulom nyã pɔ, tɩ kpal na wʊ ’yɔ̃ɔ jãnɛ a wʊ kʊ̃ lɛ tʊ̃ɔ a paalsɩ bɛl go ɛ, ka a yuomo tur (1,000) wa baar. A ala puor, ban yuo wʊ naa ka wʊ maal ber bãlãa.

⁴N nyɛn nãa dakɔɔr, ka a bala na jãnɛ, ba kʊ ban sɔr ɩka ba tɔɔr ’yɛr. N lɛ nyɛ naa a bala na dɔ̃ɔ dire a Yesu dãasɩɛ nɩ a Nãaŋmɩn ’yɛr jũu ban kʊ, n nyɛn a ba sɩɩr. Bala lɛ ba sɔɔ puor a mɔdʊ̃ɔ nɩ a bʊtɩɩ ɛ, bɩɩ sɔɔ de a wʊ jãnɛ a ba gber pɔ bɩɩ a nuur pɔ ɛ. Ba ir naa a kũu pɔ ɩ vʊɛ ka bala naa Yesu lɔ̃ɔ di nãa a yuomo tur (1,000). ⁵A kũn bala na chɛ baa ir ɛ, ka a yuomo tur (1,000) ala ba wa baar ɛ. A dɔ̃ɔ dɔ̃ɔ kũu pɔ irfʊ lɛ a anyã. ⁶Pʊpɛl lɛ kʊ a nɩ chɛchɛsɩ banyãna na de nie ir a kũu pɔ ɩ vʊɛ. A gbɛɛ ayi kũu kʊ̃ lɛ pɔɔ ba go ɛ, tɩchɛ ban ɩn a Nãaŋmɩn bɔɔr lorbo, ka bala nɩ a Nɩ-iraa lɔ̃ɔ di nãa a yuomo tur (1,000) ala pɔ.

⁷A yuomo tur wa ta, a malaka na yuo naa a Satan a bɔɔ fulom ’lɔ pɔ na wʊ for wʊ bar, ⁸ka wʊ yi bɛlʊ̃ a wɛr kõkobo anaar wʊ jaa nɩbɛ, Gɔɔg nɩ Magɔgɩ na wʊ lɔ̃ɔ ba jaa ka ba ŋmaa jɛɛr. A nɩbɛ waa naa fʊn kʊ̃ tʊ̃ɔ ba sɔr ɛ. ⁹Ba yɛr a wɛr wʊ jaa na ba wa jilʊ̃ a Nãaŋmɩn nɩbɛ jaa jie a tẽe ’lɔ a Nãaŋmɩn na nʊ̃. Tɩchɛ ka a bũu yi saaju lo di ba jaa. ¹⁰Ka a dɛɛr sʊɔ ’lɔ na bɛlʊ̃ ba, ba lɔb wʊn ’yɔ̃ɔ a jerbɩ bũu na dire pɔ, be lɛ a mɔdʊ̃ɔ nɩ a jir ŋmara ’yɛ’yɛrɛ be. Ban ge ba naa mɔ̃tɔ̃ɔ nɩ tãsɔɔ wʊ jaa, ka ba be be jaa kpo kpo.

¹¹N pãa lɛ nyɛn a nãa dakɔɔ pɩla, ka a ’lɔ na jãnɛ. A tẽe nɩ a saaju bɔr a wʊ niem, baa lɛ tara jie go ɛ. ¹²N nyɛn a kũn, bil naa bɛrɛ ka ba ara a nãa dakɔɔ niem, a ba yuor gãma bin. Ba lɛ yuon a gãn ãsʊɔ na ɩ a nyɛvʊr gãn. Ba tɔɔr naa a kũn bala ’yɛr nɩtãa a lɛ ban dɔ̃ɔ maal a ba sɛb ’yɔ̃ɔ a gãn pɔ bin. ¹³A man tɩr naa a kũn ala wʊn tara, ka a kũu nɩ a kpĩisɩ tẽe mɩ tɩr a kũn bala ban tara, ka ba tɔɔr nɩrɛ ãsʊɔ jaa ’yɛr a lɛ wʊn dɔ̃ɔ maal. ¹⁴Ba lɔb a kũu nɩ a kpĩisɩ tẽe ’yɔ̃ɔ a bũu dagel pɔ. A bũu nyã na dire lɛ a kũu gbɛɛ ayi. ¹⁵Ala ɩ nɩrɛ jaa yuor ba wa sɛb a be a nyɛvʊr gãn pɔ ɛ, ban lɔb wʊn ’yɔ̃ɔ a bũu dagel nyã pɔ.

¹A anyã puor, n pãa nyɛn saaju paalaa nɩ tẽpaalaa, bojũu a saaju koraa nyã nɩ a tẽkoraa nyã bɔr naa, ka a man ba lɛ be be go ɛ. ²N nyɛn a Tẽchɛchɛ na ɩ a Jerusalɛm paalaa ka wʊ yi a saaju a Nãaŋmɩn sɛ̃ suro waara fɩka, pɔɔsaraa na pãɛn bʊ̃kãkaɛ gun a sɩrɛ kulfʊ. ³Ka n wõ kɔkɔr na yi a be a nãa dakɔɔ par ’yɛrɛ, “Pʊ̃pãanyã, Nãaŋmɩn na kpɩɛraa a nɩsaalba pɔ, na wʊ be a ba sɛ̃. Ban ɩn a wʊ nɩbɛ, ka wʊ mɩ be a ba sɛ̃ ɩ a ba Nãaŋmɩn. ⁴Wʊn ’yɩɛr naa a ba nɩbikʊ̃ɔ a nie pɔ bar. Kũu kʊ̃ lɛ be be go ɛ. Waal ba lɛ be be go ɛ. Kõn mɩ ba lɛ be be go ɛ. Nɩrɛ ba lɛ bɩɛrɛ be go ɛ. Bojũu a yelkoro a jaa põn chen.”

⁵Ka a ’lɔ na jãnɛ a nãa dakɔɔ ju ’yɛr, “N maala naa a bomo a jaa bʊ̃paalaa!” Na wʊ pãa lɛ ’yɛr kʊ ma, “Sɛb a anyãna bin, baal ba be be ɛ, a ɩn yelmãɛ.”

⁶Wʊ ’yɛr kʊ ma, “A maal naa. Maa lɛ a Pielfʊ nɩ a Baaraa. ’Lɔ jaa a kɔ̃nyũur na kpɛ, ɩn kʊ wʊn a nyɛvʊr kʊ̃ɔ na yi a bulo pɔ ka wʊ nyũ pɔrɔ. ⁷Nɩrɛ ’lɔ jaa na jɛb tʊ̃ɔ, ɩn kʊ wʊn a anyãna a jaa. Ka n ɩ a wʊ Nãaŋmɩn ka wʊ mɩ ɩ a n bie. ⁸Tɩchɛ a bala na ɩ a dãbãn dẽme, nɩ bala na ba sɔɔ de ɛ, nɩ tɩɛr dɛbɛ dẽme, nɩ nɩkʊrbɔ, nɩ sɛ̃sɛ̃nbɛ, nɩ sʊɔbɔsɩ, nɩ tɩpuorbo, nɩ jir ŋmarba ba jaa, a ba jie ɩ naa be a jerbɩ bũu dagel pɔ. A nyã lɛ ɩ a kũu gbɛɛ ayi.”

⁹Ka a malakasɩ ayopõi na tara a wõm ayopõi ’lɔ na tara a baaraa wa ’yɛr kʊ ma, “Wa, ka n wiil fʊ a pɔɔsaraa na ɩ a Pɛraabile pɔɔ.” ¹⁰A malaka ’mɔɔ man a Sɩɛ pɔ don a tɔ̃ wõo kpɛ̃ɛ ju na wʊ tɩ wiil ma a Tẽchɛchɛ na ɩ a Jerusalɛm na yi a Nãaŋmɩn sɛ̃ suro waara. ¹¹Wʊ chaar wʊ jaa nɩ a Nãaŋmɩn tɩɩr, a chaarfʊ kaara fɩka a kʊsɩsʊ̃n na wʊ nyɩlɛ chaar jaa wel wel a kʊsɩbɛ ala ban bʊɔlɔ a jasɩpa kaar. ¹²Dachin wõo na kpɛ̃mɛ jilʊ̃ wʊ jaa na wʊ tara dɔ̃dɔɩ pie nɩ ayi, ka a dɔ̃dɔr ãsʊɔ jaa tara malaka na kaara. Ba sɛb a Isɩral bal pie nɩ ayi yoe mar a dɔ̃dɔɩ pɔ. ¹³Dɔ̃dɔɩ ata ben a mɔ̃tɔ̃ɔ purfʊ jie, ka ata mɩ be a kõkoor, ka ata mɩ be a kõkoor nyã, ka a ata mɩ be a mɔ̃tɔ̃ɔ mʊrfʊ jie. ¹⁴Dachin par kparsɩ pie nɩ ayi ju lɛ a dachin dɔɔl. Ala pɔ lɛ ba sɛb a Pɛraabile nɩtʊ̃nsɩ pie nɩ ayi yoe dɔɔl.

¹⁵A malaka ’lɔ na ’yɛrɛ nɩ ma tara na sɛlma damanaa ɩka wʊ man a tẽe dɔ̃dɔɩ nɩ a dachin. ¹⁶A tẽe par kparaa jãtaa, a wõofʊ nɩ a yalfʊ wʊ jaa. Wʊ man a tẽe nyɛ ka wʊ ɩ mɛl tur dɔɔl kɔɔr anaar (1,400). A wõofʊ nɩ a yalfʊ, a dofʊ, nɩ a jãafʊ. ¹⁷Wʊ man a dachin ka a yal ɩ gbɛɛ kɔɔr ayi dɔɔl pie nɩ ayʊɔb (216). A malaka man a lɛ a nɩsaal na ma man. ¹⁸A kʊsɩbɛ ala ban bʊɔlɔ a jasɩpa lɛ ba mɛn a dachin, ka a tẽe wʊ jaa ɩ sɛlma na wʊ chaar chãana kaar. ¹⁹Kʊsɩsʊ̃n a jaa bʊrɔ lɛ ba de kpar a tẽe par kparaa. A par kpardɔ̃ɔ ’lɔ ɩn a kʊsɩsʊ̃n ala ban bʊɔlɔ a jasɩpa, ka a ayi sʊɔ mɩ di safer, ka a ata sʊɔ di agete, ka a anaar sʊɔ mɩ di ɛmerald, ²⁰ka a anũu sʊɔ di ɔnɩksɩ, ka a ayʊɔb sʊɔ mɩ di kanɩlian, ka a ayopõi sʊɔ di keresolɩtɩ, ka a aniin sʊɔ mɩ di berl, ka a pie forbir sʊɔ di topajɩ, ka a pie sʊɔ di kɩrɩsopɩrase, ka a pie nɩ bʊ̃’yen di jasɩntɩ, ka a pie nɩ ayi sʊɔ mɩ di amɛtesete. ²¹A dɔ̃dɔr nɛɛ pie nɩ ayi ala ɩ naa a kʊsɩsʊ̃n pie nɩ ayi. Kʊsɩbʊ̃’yen lɛ ba maal a jaa. A sɔkpɛ̃ɛ na be a tẽkpɛ̃ɛ nyã pɔ sɛlma lɛ wʊ jaa ka wʊ chaar chãana kaar.

²²N ba nyɛ puorfʊ yir be a tẽe pɔ ɛ, bojũu a sɩ Soro Nãaŋmɩn na ɩ Tʊ̃ɔfʊ Sʊɔ nɩ a Pɛraabile lɛ ɩ a puorfʊ yir. ²³A tẽe nyã ba bʊɔrɔ mɔ̃tɔ̃ɔ, bɩɩ ŋmɛraa chãa ɛ, bojũu a Nãaŋmɩn tɩɩr lɛ ɩ a chãa, ka a Pɛraabile ɩ a wʊ fãtɩn. ²⁴A chãa nyã pɔ lɛ a paal bʊrsɩ nɩbɛ na yʊɔrɔ, ka a wɛr nãmɩne mɩ waan a ba nãbomo a be. ²⁵A wʊ dɔ̃dɔr nɛɛ ba be na wa pɔɔ a mɔ̃tɔ̃ɔ ɛ, an ɩ tãsɔɔ ba lɛ be be go ɛ. ²⁶A paal bʊrsɩ nɩbɛ nãbomo nɩ a ba tɩɩr, ban waan naa be. ²⁷Bʊ̃dɛɛr kʊ̃ kpɛ be ɛ, bɩɩ bala na tʊ̃nɔ̃ vĩ tʊ̃mɔ̃, bɩɩ nɩbɛlbɛ, tɩchɛ a bala tɛɛ yuor na sɛb a Pɛraabile nyɛvʊr gãn pɔ.

¹Ka a malaka pãa wiil ma a nyɛvʊr põn kʊ̃ɔ ka wʊ ɩ jaa wel wel ka a joro yire a Nãaŋmɩn nɩ a Pɛraabile nãa dakɔɔ par, ²naa joro a tẽe sɔr kpɛ̃ɛ sãlsɔɔ. Nyɛvʊr tɩɛ ara naa a põn lõbobo, ka a jaa ma wɔ̃nɔ̃ wɔ̃bʊrsɩ pie nɩ ayi yuon jaa, ka a wiil ɩka a ma wɔ̃ naa ŋmɛraa jaa gbɛbʊ̃’yen. A vaɩ lɛ ban sãan a paalsɩ a jaa nɩbɛ baal. ³Nãaŋmɩn pɔ’yɔ̃ɔfʊ ba lɛ be bon jaa pɔ go ɛ. Nãaŋmɩn nɩ a Pɛraabile nãa dakɔɔ na ben a tẽe pɔ, ka a wʊ gbãgbaar tʊ̃nɔ̃ kʊrɔ wʊ. ⁴Ban nyɛn a wʊ nie, ka a wʊ yuor be a ba gber pɔ. ⁵Tãsɔɔ kʊ̃ lɛ be be go ɛ. Baa lɛ bʊɔrɔ fãtɩn chãa ɛ, bɩɩ mɔ̃tɔ̃ɔ chãa ɛ. Bojũu a sɩ Soro Nãaŋmɩn mãɛ na chaar ba naa a wʊ chãa, na ba di nãa bɩbir jaa.

⁶Ka a malaka ’yɛr kʊ ma, “Baal ba be a ’yɛrbie anyãna pɔ ɛ, a ɩn yelmãɛ. A Soro Nãaŋmɩn na ma kʊ a wʊ Sɩɛ a wʊ ’yɛ’yɛrbɛ tʊ̃ naa a wʊ malaka ɩka wʊ wa wiil a wʊ gbãgbaa yele ala na kʊ̃ yaar tɩ ɩ ɛ.”

⁷“Nyɛ, n kʊ̃ yaar tɩ wa ɛ! Pʊpɛl sʊɔ lɛ a ’lɔ na sɔɔ a ’yɛrbie anyãna a jaa na sɛb a gãn nyã pɔ.”

⁸Maa Jɔɔn lɛ wõ tɩ nyɛ a anyãna. Ɩn wa wõ tɩ nyɛ a lɛ baar, n gãn kpa tẽe ɩka n puor a malaka, ’lɔ lɛ wile ma a anyãna. ⁹Tɩchɛ ka wʊ ’yɛr kʊ ma, “Ta maal a lɛ ɛ! N mɩ ɩ naa a gbãgbaa nɩtãa a fʊ̃ʊ nɩ a fʊ yɛɛr ’yɛ’yɛrbɛ nɩ bala jaa na turo a gãn nyã ’yɛr. Puor Nãaŋmɩn!”

¹⁰Ka a malaka pãa ’yɛr kʊ ma, “Ta sɔɔl a ’yɛ’yɛrɛ ’yɛr nyãna a gãn nyãna pɔ bar ɛ, bojũu a sɔ̃ɔ gbʊr naa. ¹¹Vɛ̃ ka a ’lɔ na ɩ nɩdɛɛr, wʊ chɛnɛ ɩrɛ a dɛɛr. Vɛ̃ ka a ’lɔ mɩ na maala yeldɛbɛ, ka wʊ chɛnɛ maala a yeldɛbɛ. Vɛ̃ ka a ’lɔ na tor, wʊ chɛnɛ ɩ a nɩtor. ’Lɔ mɩ na ɩ chɛchɛ, wʊ chɛnɛ ɩ a chɛchɛ.”

¹²“Nyɛ, n kʊ̃ yaar tɩ wa ɛ! N tara na a n yar na kʊ nɩrɛ jaa lɛ wʊn tʊ̃. ¹³Maa lɛ a Pielfʊ nɩ a Baaraa, a nidɔ̃ɔn nɩ a puor sʊɔ.

¹⁴“Pʊpɛl dẽme lɛ a bala na pɛɛ a ba fuusɩ. Ban tara na sɔr di a nyɛvʊr tɩɛ wɔ̃mɔ̃, na ba tu a dɔ̃dɔr nɛɛ kpɛ a tẽe pɔ. ¹⁵Tɩchɛ baar, nɩ a sʊɔbɔsɩ, nɩ a sɛ̃sɛ̃nbɛ, nɩ a nɩkʊrbɔ, nɩ a tɩpuorbo, nɩ a bala jaa na nʊ̃ jir ŋmaafʊ, ban ara na a yõo.

¹⁶“Maa Yesu lɛ tʊ̃ a n malaka nɩ a dãasɩɛ nyãna a yɩ sɛ̃ kʊ a pupuorbiir gbulsɩ. Maa lɛ ɩ a David nyɩɩr nɩ a wʊ yɔ̃ɔ, nɩ a bivɩɛ ŋmɛrbir na chaar.”

¹⁷Ka a Sɩɛ nɩ a pɔɔ paalaa ’yɛr, “Wa!” Ka a ’lɔ mɩ na wõ naa ’yɛr, “Wa!” Nɩrɛ jaa kɔ̃nyũur na kpɛ, vɛ̃ ka wʊ wa, nɩrɛ jaa na bʊɔrɔ, vɛ̃ ka wʊ wa de a nyɛvʊr kʊ̃ɔ kʊfʊ nyũ pɔrɔ.

¹⁸N kpãan ãsʊɔ jaa na wõnõ a ’yɛ’yɛrɛ ’yɛr a gãn nyãna pɔ. Ala ɩ ãsʊɔ jaa wa den bon dɔɔl a ’yɛr nyã pɔ, Nãaŋmɩn mɩ na dɔɔl wʊ naa a wõm ala a gãn nyã na ’yɛr a ba ’yɛr. ¹⁹Ka ala ɩ nɩrɛ ãsʊɔ jaa mɩ wa ir bon bar a ’yɛ’yɛrɛ ’yɛr a gãn nyã pɔ bar, Nãaŋmɩn mɩ na mɔ̃ɔ wʊ naa a nyɛvʊr tɩɛ wɔ̃mɔ̃ nɩ a tẽchɛchɛ pɔ kpɛfʊ a gãn nyã na ’yɛr a wʊ ’yɛr.

²⁰A ’lɔ na di a anyãna dãasɩɛ ’yɛr naa, “Ɔ̃ɔ, n kʊ̃ yaar tɩ wa ɛ.” A ɩ a lɛ. Wa sɩ Soro Yesu.

²¹A sɩ Soro Yesu wãɛfʊ wʊ be a Nãaŋmɩn nɩbɛ sɛ̃. A ɩ a lɛ.