Jemesɩ

A JEMESƖ GÃN WƱ̃N SƐB KƱ̃ A JUU NƖBƐ BALA NA PUORO

¹Jemesɩ, na ɩ a Nãaŋmɩn nɩ a sɩ Soro Yesu Kɩrɩsɩto gbãgbaa, puoro naa a Isɩral bala pie nɩ ayi na yaar a wɛr wʊ jaa.

²N yɛɛr, yɩ tara pʊpɛl, ala sɔɔ ɩ yelyɔɔ wõnõ yɩ naa. ³Yɩ bɔ̃ɔ ɩka yɩn jãn naa tara kãnyir a yɩ bɛɛr kaa sɔ̃ɔ. ⁴Yɩn jãn tʊ̃ɔ tara kãnyir, a lɛ na vɛ̃ naa ka yɩ tʊ̃ɔ baa, tɩ na yɩ taa wa faa bon jaa ɛ.

⁵Ala ɩ yɩ ãsʊɔ jaa bʊɔrɔ naa yɛ̃, wʊ sʊɔr yi a Nãaŋmɩn sɛ̃ na kʊrɔ nɩrɛ jaa pɔrɔ, wʊ ɩn nɩmãɛ, wʊ kʊ̃ mɔ̃ɔ fʊ ɛ. ⁶Tɩchɛ yɩn wa sʊɔr bon jaa, yɩ tara sɔɔfʊ na yɩ ta baala ɛ. Nɩrɛ jaa na baala kaara nɩtãa man kʊ̃ɔ sɛsɛbɛ na furo dãdaala. ⁷Ala ɩ fʊ ɩ naa a nɩrɛ nyã tɔ sʊɔ, ta tɩɛr ɩka, fʊn nyɛn bon jaa yi a sɩ Soro sɛ̃ ɛ. ⁸A nɩrɛ na tara tɩɛr ayi, wʊ maa ba gbɛr ara yele jaa pɔ wʊn ɩrɛ ɛ.

⁹Nãaŋmɩn puoro nɔ̃ɔsʊɔ wʊ chɩlɛ, bojũu wʊ do naa. ¹⁰Tɩchɛ a taraa sʊɔ mɩ wʊ chɩlɛ a wʊ suufʊ pɔ, bojũu wʊn suor naa fɩka mɔpuul. ¹¹Bojũu a mɔ̃tɔ̃ɔ ma nyãa naa ka a tʊl ŋme ka a ko suor, a vapuul ma suor naa ka a vɩla baar. Lɛ lɛ a taraa sʊɔ kaara, ’lɔ wa tʊ̃nɔ̃ a wʊ yar tʊ̃mɔ̃.

¹²Pʊpɛl sʊɔ lɛ a ’lɔ na di kãnyir ara a bɛɛr kaa pɔ, tɩ na waa lo ɛ. Bojũu a nɩrɛ ’lɔ lɛ na nyɛ a nyɛvʊr nãa jupil ’lɔ a Nãaŋmɩn na tɩr a nɛɛ kʊ a bala na nʊ̃ wʊ.

¹³Bɛɛr kaa wa wa nɩrɛ sɛ̃, wʊ ta ’yɛr ɩka Nãaŋmɩn lɛ bɛɛr wʊ kaa ɛ. Nãaŋmɩn kʊ̃ de bier bɛɛr nɩrɛ kaa ɛ, a wʊ mãɛ ba bɛɛrɛ nɩrɛ kaara ɛ. ¹⁴Tɩchɛ nɩrɛ ãsʊɔ jaa yelbier vɔlaa lɛ ma bɛɛr wʊ kaa na a nyɔɔ wʊ. ¹⁵A vɔlaa anyãna lɛ na tara pʊɔ naa dɔɔ bier, ka a bier nʊ̃ɔ dɔɔ kũu.

¹⁶N yɛɛr nʊ̃nʊ̃nbɔ, yɩ ta vɛ̃ ka ba bɛl yɩ ɛ. ¹⁷Bʊ̃vɩla nɩ kʊfʊ vɩla jaa yire naa a chãa Sãa na be a saaju sɛ̃. Libe ba be a wʊ ’yɔ̃ɔ ɛ, waa lɩɛrɛ ɛ. ¹⁸An wa ta a lɛ wʊn bʊɔrɔ, wʊ dɔɔ sɩn nɩ a wʊ yelmãɛ ’yɛr ka sɩ ɩ birdɔ̃ɔ a bʊ̃maalsɩ a jaa pɔ.

¹⁹N yɛɛr nʊ̃nʊ̃nbɔ, yɩ bɔ̃ɔn a anyãna yɩ ma chɛlɛ fɔfɔɔ tɩ na yɩ ta ma ’yɛrɛ fɔfɔɔ ɛ, bɩɩ nyɛrɛ suur fɔfɔɔ ɛ. ²⁰Bojũu nɩrɛ wa nyɛ suur, wʊ kʊ̃ tʊ̃ɔ maal yelvɩla ala a Nãaŋmɩn na bʊɔrɔ ɩka a ɩ ɛ. ²¹A lɛ juu, yɩ bar yele jaa na ɩ dɛɛr bɩɩ bier, tɩ na yɩ siir yɩ mãɛ de a ’yɛrbir ’lɔ na bʊr a yɩ nyãa pɔ, ala lɛ na faa a yɩ sɩɩr.

²²Yɩ ta bɛlɛ a yɩ mãɛ a ’yɛr yɩn chɛlɛ tɛɛ ɛ, tɩ yɩ ɩ a ’yɛr mamaalba. ²³A nɩrɛ ’lɔ jaa na wa wõ a ’yɛr tɩ ba sɔɔ de ɛ, wʊ kaara nɩtãa a ’lɔ na chaar a wʊ mãɛ kaa chãana pɔ, ²⁴wʊn wa yi baar wʊ ĩin a lɛ bar wʊn kaara. ²⁵Tɩchɛ a nɩrɛ ’lɔ na mʊ̃ɔ nɩbir turo a nɛbinãa na ba tara chɛfʊ ɛ, na ma vɛ̃ ka fʊ so a fʊ mãɛ, Nãaŋmɩn na sʊ̃ʊ wʊ naa nɩ bon jaa pɔ wʊn maal, ala ɩ wʊ chɛl tɩ sɔɔ, tɩ a ba ɩ wõ tɩ ĩin ɛ.

²⁶Ala ɩ nɩrɛ ãsʊɔ tɩɛr ɩka wʊ ɩn Nãaŋmɩn puorbo tɩ kʊ̃ tʊ̃ɔ nyɔɔ a wʊ jãlbir ɛ, wʊ bɛlɛ na wʊ mãɛ, ka a wʊ puorfʊ ɩ pɔrɔ. ²⁷Puorfʊ ’lɔ na pɛlɛ a Sãa Nãaŋmɩn pʊɔ na wʊ ɩ chɛchɛ na ba tara dɛɛr ɛ. Sʊ̃nɔ̃ a bala na ɩ a kpɩɩr, nɩ a pɔɔkɔɛ, a ba dɔɔyɛ pɔ, tɩ nyɔɔ fʊ mãɛ ka a wɛr ta sɔ̃ɔ fʊ ɛ.

¹N yɛɛr, yɩn sɔɔ de a sɩ Soro Yesu Kɩrɩsɩto tɩɩr sʊɔ, yɩ taa turo nɩbɛ nʊ̃nɔ̃ ɛ. ²Ala ɩ nɩbɛ ayi wa kpɛ naa a yɩ lɔ̃ɔfʊ jie, ka a ãsʊɔ pãɛ na wʊ ’yɔ̃ɔn sɛlma mʊtʊɔ, tɩchɛ ka a ãsʊɔ mɩ ɩ nɔ̃ɔ sʊɔ su bʊ̃jarsɩ. ³Ka yɩ lɩɛb ’yɛr kʊ a ’lɔ na pãɛ, “Jãnɛ ka a dakɔɔ ju,” tɩ ’yɛr kʊ a ’lɔ mɩ na su a bʊ̃jarsɩ, “Ara ka bɩɩ wa jãnɛ ka a tẽe a n gbɛɛ par.” ⁴Ala ɩ lɛ lɛ, a ba ɩ yɩ turo naa a nɩbɛ bamɩne nʊ̃nɔ̃ na yɩ de tɩɛr dɛɛr tɔɔrɔ nɩ a ba ’yɛr ɛ?

⁵N yɛɛr yɩ chɛlɛ, Nãaŋmɩn ir a bala a wɛr nɩbɛ na nyɛ ka ba ɩ nɔ̃n dẽme ka ban tara sɔɔfʊ tɩ kpɛ̃n a wʊ nãalʊ̃ʊ pɔ wʊn tɩr a nɛɛ kʊ a bala na nʊ̃ wʊ. ⁶Tɩchɛ yɩ ma kpɛrɛ na a nɔ̃ɔ sʊɔ. A ba ɩ a taraa dẽme lɛ ma ge yɩ ɛ. A ba ɩ bala lɛ ma nyɔɔ yɩ chiin a ’yɛr tɔɔrfʊ jie ɛ? ⁷A ba ɩ bala lɛ sɔ̃ɔ a yovɩla ’lɔ ban bʊɔlɔ yɩ ɛ?

⁸Ala ɩ yɩ tu naa a nɛɛ ’lɔ na sɛb a Nãaŋmɩn gãn pɔ ɩka, “Fʊ nʊ̃ a fʊ tɔ sʊɔ a fʊ kaar,” (Mosesɩ Gãma Na Tu Ata 19:18) yɩ maal vɩla. ⁹Tɩchɛ yɩn wa turo nʊ̃nɔ̃, yɩ maal dɛɛr, ka a nɛɛ ’yɛr ɩka yɩ bɔr naa na yɩ ɩ a nɛɛ sɔ̃sɔ̃ɔnbɔ. ¹⁰Nɩrɛ ’lɔ jaa na turo a nɛɛr a jaa tɩ wa ’mab bʊ̃’yen, wʊ sɔ̃ɔn a jaa. ¹¹A ’lɔ na ’yɛr, “Taa sɛ̃nɛ ɛ,” (A Yifʊ Gãn 20:14) ’lɔ mɩ lɛ ’yɛr, “Taa kʊrɔ nɩrɛ ɛ.” (Mosesɩ Gãma Na Tu Anũu 5:18) Fʊ̃ʊ ba sɛ̃ ɛ, tɩ kʊ nɩrɛ, fʊ sɔ̃ɔn a jaa.

¹²Yɩ ’yɛrɛ tɩ maala bɔ̃ɔn ɩka Nãaŋmɩn na tɔɔr a yɩ ’yɛr nɩtãa lɛ a nɛɛ ’lɔ na ma vɛ̃ ka nɩrɛ so a wʊ mãɛ na ’yɛr. ¹³Bojũu a ’yɛr tɔɔrfʊ daar, fʊ̃ʊ nyã na ba dɔ̃ɔ tara nɩbibaal jofʊ ɛ, Nãaŋmɩn kʊ̃ mɩ jo a fʊ nɩbibaal ɛ. Nɩbibaal jofʊ tʊ̃ɔn ’yɛr tɔɔrfʊ.

¹⁴Vɩla buor nɩ nyã n yɛɛr, ala ɩ nɩrɛ ’yɛr naa ɩka wʊ tara na sɔɔfʊ, tɩchɛ ba lɔ̃ɔn tʊ̃mɔ̃ ɛ, a sɔɔfʊ nyã na tʊ̃ɔ faa wʊ ɔ? ¹⁵Ala ɩ yɛbɛ ɩn ãgãn kpãakpol tɩ ba tara bʊ̃diir ɛ, ¹⁶ka a yɩ ãsʊɔ ’yɛr kʊ wʊ, “Chiine nɩ nyã’maar, a ɩ vɩla kʊ fʊ ka fʊ nyɛ di tɩɩ,” tɩchɛ na faa sʊ̃ʊ wʊ a ãgãn bʊ̃bʊɔrsɩ ɛ, bo vɩla lɛ a ɩ? ¹⁷A lɛ jũu, sɔɔfʊ ka tʊ̃mɔ̃ ba pʊɔ ɛ, wʊ ɩn bʊ̃kũu.

¹⁸Tɩchɛ nɩrɛ ãsʊɔ na ’yɛr naa, “Fʊ̃ʊ tara na sɔɔfʊ ka maa mɩ tara a tʊ̃mɔ̃.” Wiil ma a fʊ sɔɔfʊ ka tʊ̃mɔ̃ ba pʊɔ ɛ, tɩ n mɩ wiil fʊ a n sɔɔfʊ nɩ a tʊ̃mɔ̃. ¹⁹Fʊ sɔɔ naa ɩka Nãaŋmɩn bʊ̃’yen tɛɛ lɛ be be. A ɩn vɩla. A sɩdɛbɛ gba mɩ sɔɔn de a lɛ, tɩ na ba mɩ joro dãbãɛ.

²⁰Fʊ̃ʊ jɔl nyã, sɔɔfʊ tʊ̃mɔ̃ na ba pʊɔ ɛ, faa bɔ̃ɔ ka bʊ̃kũu lɛ ɛ? ²¹A ba ɩ a sɩ sãakpã Abraham wiil a sɔɔfʊ nɩ a tʊ̃mɔ̃, wʊn dɔ̃ɔ de a wʊ bie Isaakɩ ɩka wʊ lon bɔɔr ɛ? 2:21 (A Pielfʊ Gãn 22) ²²Faa nyɛ a sɔɔfʊ nɩ a tʊ̃mɔ̃ na ’mataa ɛ, ka a wʊ sɔɔfʊ sɛɛ nɩ a lɛ wʊn tʊ̃. ²³Ka a lɛ na sɛb a Nãaŋmɩn gãn pɔ ɩ yelmãɛ ɩka, “Abraham sɔɔn de Nãaŋmɩn, ka a lɛ vɛ̃ ka wʊ ɩ nɩtor.” (A Pielfʊ Gãn 15:6) Ka Nãaŋmɩn bʊɔl wʊ wʊ baraa. ²⁴Yaa nyɛ, nɩrɛ na ɩn nɩtor Nãaŋmɩn niem a lɛ wʊn tʊ̃, a ba ɩ a wʊ sɔɔfʊ tɛɛ ɛ. ²⁵A lɛ nɩ wʊ ju lɛ ba dɔ̃ɔ kaa a sɛ̃sɛ̃ pɔɔ ban bʊɔlɔ Worahab ka wʊ ɩ nɩtor, wʊn dɔ̃ɔ de a tʊ̃tʊ̃nbɔ wiil ba sɔyuo ka ba lɩɛb kul. 2:25 A Worahab dɔ̃ɔ kpɩɛrɛ be a Jeriko tẽe pɔ, na wʊ dɔ̃ɔ sʊ̃ʊ a Nãaŋmɩn nɩbɛ. (Josua 2) ²⁶A lɛ a sɩɛ na ma wa yi a ãgãn pɔ ka wʊ ɩ bʊ̃kũu, lɛ mɩ lɛ a sɔɔfʊ ka tʊ̃mɔ̃ ba pʊɔ ɛ mɩ ɩ bʊ̃kũu.

¹N yɛɛr, yɩ jaa yɩ ta bʊɔrɔ ɩka yɩ ɩ wiwiilbe ɛ, bojũu yɩ bɔ̃ɔn naa ɩka a sɩn bala na ɩ a wiwiilbe na nyɛn ’yɛr tɔɔrfʊ gar nɩrɛ jaa. ²Sɩ jaa ma maal ’mab. Ala ɩ nɩrɛ jaa ba ’yɛr ’mab ɛ, wʊ ɩn nɩtor na wʊ nyɔɔrɔ a wʊ mãɛ.

³Sɩ ma ’yɔ̃ɔn a kur a wiisɩ nɛɛr pɔ, ka a ma tu a sɩ nɛɛr, ka sɩ ma lɩɛb chiin jie jaa sɩn bʊɔrɔ. ⁴Bɩɩ yɩ kaa a gbor bɛrɛ ala a man kpɛ̃ɛ pɔ a sɛsɛkpɛ̃ɛ na ma furo chiine, tɩchɛ a gbor mɔ̃nɔ̃ ma den a vuur mɔ̃ chiin jie jaa wʊn bʊɔrɔ. ⁵Lɛ mɩ lɛ a jãlbir na ɩ jaa pʊʊrbile a ãgãn pɔ tɩ ma fere. Wʊ kaara fɩka bũu bir na lo tuu kpɛ̃ɛ pɔ di wʊ jaa. ⁶A jãlbir mɩ ɩn bũu na ɩ a wɛr dɛɛr na be a sɩ ãgãn pɔ na wʊ sɔ̃ɔ a ãgãn wʊ jaa bar, na wʊ chʊmɔ̃ a ãgãn nɩ a bũu dagel ’lɔ na ba kpĩine ɛ.

⁷Nɩrɛ ma tʊ̃ɔn guol mɔdʊ̃ɔ jaa bʊrɔ, nɩ lubil jaa bʊrɔ, bʊ̃vuuraa jaa bʊrɔ, nɩ a man pɔ bonsɩ. ⁸Tɩchɛ nɩrɛ maa tʊ̃ɔ a wʊ jãlbir ɛ, wʊ ɩn bʊ̃bier na ba pɛ̃nɛ ɛ, na wʊ mɩ ɩ lɔɔ na kʊrɔ.

⁹A jãlbir nyã lɛ sɩ ma de pɛɛn a sɩ Sãa na ɩ a sɩ Soro, na sɩ lɛ de ma pɔn ’yɔ̃ɔ a bala a Nãaŋmɩn na mɛ ka ba kaara a wʊ kaar. ¹⁰A nɛbʊ̃’yen ’lɔ pɔ lɛ a pɛɛfʊ nɩ pɔ’yɔ̃ɔfʊ ma yire. N yɛɛr a ba tor ɛ. ¹¹Kɔ̃vɩla nɩ kɔ̃dɛɛr na tʊ̃ɔ yire bul bʊ̃’yen pɔ bɩɩ? ¹²N yɛɛr, kɔ̃kɔ̃ɔ na tʊ̃ɔ wɔ̃ dãbãɩnãa bɩɩ dãbãɩnãa na tʊ̃ɔ wɔ̃ kɔ̃kɔ̃ɔ ɔ? Lɛ mɩ lɛ, kɔ̃vɩla nɩ kɔ̃dɛɛr kʊ̃ tʊ̃ɔ ’mataar yire bul bʊ̃’yen pɔ ɛ.

¹³A yɩ ãsʊɔ tara na yɛ̃ nɩ bɔ̃ɔfʊ bɩɩ? Vɛ̃ ka a wiil a wʊ maalfʊ pɔ, nɩ lɛ wʊn siir a wʊ mãɛ maala nɩ yɛ̃. ¹⁴Tɩchɛ ala ɩ a yɩ nyãa pɔ, nyuur dɛɛr nɩ tuo, nɩ yobɔyele ben be, yɩ ta wile yɩ mãɛ ŋmara jirsɩ ’yɔ̃ɔnɔ̃ a yelmãɛ ɛ. ¹⁵A yɛ̃ nyã bʊrɔ ba yi saaju wa ɛ, tɩchɛ wʊ ɩ naa a wɛr nyã yɛ̃ nɩsaal na tara ka wʊ yi a sɩdɛɛr sɛ̃. ¹⁶Bojũu jie ’lɔ nyuur, nɩ tuo, nɩ yobɔyele na be, be lɛ guor taa ba be ɛ, ka tʊ̃ dɛɛr jaa bʊrɔ be be.

¹⁷Tɩchɛ a yɛ̃ ’lɔ, na yi saaju ɩn chɛchɛ na wʊ tara nyã’maar nʊ̃fʊ, nɩ sʊ̃ʊfʊ, nɩ mãɛ siirfʊ, nɩ vɩla maalfʊ, na wʊ joro nɩbaal, na wʊ wɔ̃nɔ̃ bisʊ̃n, na waa ooro ɛ, bɩɩ tara nɛɛr ayi ɛ. ¹⁸A bala na ba bʊɔrɔ jɛɛr ɛ, na bʊr nɩ nyã’maar, na ŋman yeltorsɩ.

¹Nyɩnɛ lɛ a jɛɛr nɩ nɛchɩrɛ yi be a yɩ chara pɔ? A ba ɩ a yi naa a vɔlaa ’lɔ na be a yɩ ’yɔ̃ɔ jɛɛr ɛ? ²Yɩ ma bʊɔrɔ na bon kɔ̃ɔ tɩ yɩ maa nyɛ ɛ, na yɩ ma kʊrɔ taa. Na yɩ ma tara nyuur nɩ bomo, tɩ na yɩ maa nyãa ɛ, na yɩ pãa tara jɛɛr nɩ nɛchɩrɛ, tɩ maa nyãa ɛ, bojũu yɩ maa sʊɔr Nãaŋmɩn ɛ. ³Yɩn wa sʊɔr a Nãaŋmɩn sɛ̃, yɩ maa nyɛ ɛ, bojũu yɩ sʊɔr naa nɩ pʊtɩdɛɛr na de maal a lɛ na pɛl a yɩ pʊɔ.

⁴Yɩn sɛ̃sɛ̃ nɩbɛ ba nyã, yaa bɔ̃ɔ ɩka nɩrɛ nyã na ɩ a wɛr baraa ’laar Nãaŋmɩn ɛ? Nɩrɛ ’lɔ jaa na ŋmaa a wɛr nyã baraa ɩn Nãaŋmɩn dɔ̃ sʊɔ. ⁵Ta baala a Nãaŋmɩn gãn na ’yɛr ɩka, yelmãɛ jaa lɛ a Nãaŋmɩn kaara a Sɩɛ ’lɔ wʊn de ’yɔ̃ɔ sɩ. ⁶Tɩchɛ Nãaŋmɩn ma kʊ sɩ naa a wʊ wãɛfʊ, ala lɛ so a Nãaŋmɩn gãn na ’yɛr, “Nãaŋmɩn ma tɔr naa bala na bʊɔr yuor, tɩ na wʊ ma wãɛ a bala na siir ba mãɛ.” (Sʊkpar Gãn 3:34)

⁷A lɛ jũu, yɩ siir a yɩ mãɛ kʊ Nãaŋmɩn, na yɩ tɔɔ yɩ mãɛ yin a sɩdɛɛr sʊɔ sɛ̃, wʊn bar yɩn tɩ jo. ⁸Yɩ tɔɔ gbʊr Nãaŋmɩn, wʊ mɩ na tɔɔn gbʊr yɩ. Yɩn yelbe-ɩrbɛ, yɩ pɛɛ a yɩ nuur na yɩ lɩɛb a yɩ tɩɛr, yɩn tɩɛr ayi dẽme. ⁹Yɩ waala, na yɩ tara pʊsɔ̃ɔ, na yɩ kõnõ. Yɩ vɛ̃ ka a yɩ laar lɩɛb kõn, ka a yɩ pʊpɛl lɩɛb pʊsɔ̃ɔ. ¹⁰Yɩ siir a yɩ mãɛ a sɩ Soro niem, wʊn ’mɔɔ yɩn ka yɩ do.

¹¹N yɛɛr, yɩ ta sɔ̃ɔnɔ̃ taa yoe ɛ. Nɩrɛ ’lɔ jaa na sɔ̃ɔnɔ̃ a wʊ tɔ sʊɔ yuor, wʊ tɔɔr a wʊ ’yɛr, wʊ tɔɔrɔ naa a nɛbinãa ’lɔ ’yɛr. Fʊ̃ʊ wa tɔɔrɔ a nɛbinãa ’yɛr, faa turo a lɛ a nɛbinãa na ’yɛr ɛ, tɩ ɩ a wʊ ’yɛr tɔɔrɔ. ¹²Nãaŋmɩn lɛ bin a wʊ nɛɛ kʊ sɩ, na wʊ ɩ a ’yɛr tɔɔrɔ, ’lɔ lɛ na tʊ̃ɔ faa bɩɩ sɔ̃ɔ bar. Tɩchɛ fʊ̃ʊ mɩ nɩ ana na fʊ tɔɔrɔ a fʊ tɔ sʊɔ ’yɛr?

¹³Yɩ chɛlɛ, a yɩn bala na ma ’yɛr ɩka, “Dɩna bɩɩ bio sɩn chen tẽkpɛ̃ɛ pɔ tɩ maal yuon, da bomo, da nyɛ libie.” ¹⁴Yaa bɔ̃ɔ lɛn na ɩ bio ɛ, bo lɛ a yɩ nyɛvʊr? Wʊ kaara fɩka ul na lo tɩ wɛl ajienaa. ¹⁵Yɩ ta ma ’yɛr ɩka, “Ala ɩ Nãaŋmɩn sɔɔ naa ka sɩ tara nyɛvʊr, sɩn maal nyã bɩɩ anyãna.” ¹⁶Tɩ lɛ an be nɩ nyã, yɩ bʊɔrɔ na yuor, na yɩ wile yɩ mãɛ, ka a mãɛ wiilfʊ nyã ɩ yelbier. ¹⁷Nɩrɛ jaa na pãa bɔ̃ɔ vɩla tɩ ba maal ɛ, wʊ ɩn bier.

¹Yɩ chɛlɛ, yɩn tara dẽme, yɩ kõnõ ŋmiere chɛlsɩ a yele ’lɔ na waara a yɩ ju. ²A yɩ nãbomo pʊ̃ɔ naa, ka yɛlɛ mʊʊ a yɩ fɔɔr. ³A yɩ sɛlma nɩ a libie lon sɔrɔ, ka a ba sɔrɔ lofʊ wiil ɩka an di yɩn bũu kaar. A baarfʊ ta naa, tɩ yɩ chɛnɛ bin a nãbomo. ⁴Yɩ nyɛ a bala yɩn de ka ba tʊ̃nɔ̃ a yɩ por pɔ, tɩ yɩ mɔ̃ɔ ba a yar ka ba kõnõ ’yɔ̃ɔnɔ̃ yɩ, ka a yɩ bʊ̃ŋmarba kõn ta a sɩ Soro na ɩ a Tʊ̃ɔfʊ Sʊɔ. ⁵Yɩ din nʊ̃ɔ ka a wɛr pɔ lɛ yɩn bʊɔrɔ. Yɩ guol naa yɩ mãɛ a lɛ kʊfʊ ’yɔ̃ɔ. ⁶Yɩ ma ’yɔ̃ɔn a bala na tor ’yɛr, na yɩ kʊ ba, tɩ baa maal bon jaa ɛ.

⁷A lɛ jũu, yɛɛr yɩ tara kãnyir tɩ tãn a sɩ Soro waa daar. Kaa nyɛ a lɛ a kʊɔraa na ma tara kãnyir chɛlɛ nɩ a bonsɩ wɔ̃fʊ daar, na wʊ tara kãnyir chɛlɛ a sadɔ̃ɔ nɩ a sabaaraa. ⁸Yɩn mɩ, yɩ tara kãnyir na yɩ ara kpɛ̃ɔ, bojũu a sɩ Soro waa gbʊr naa.

⁹Yɛɛr yɩ ta hũhũnõ ’yɔ̃ɔnɔ̃ taa na yɩ taa nyɛ ’yɛr tɔɔrfʊ ɛ. A ’yɛr tɔɔrɔ ara naa a dɔ̃dɔr nɛɛ.

¹⁰Yɛɛr, yɩ kaa a Nãaŋmɩn ’yɛ’yɛrbɛ bala na de a sɩ Soro yuor ’yɛr ’yɛr, din dɔɔyɛ tɩ tara kãnyir. ¹¹Ala lɛ so ka sɩ bʊɔlɔ ba bɔɔsʊ̃n dẽme. Yɩ wõn a Job kãnyir wʊn tara na yɩ mɩ nyɛ a lɛ a sɩ Soro na maal kʊ wʊ a baaraa. A sɩ Soro ɩn nɩbaal joro, na wʊ maala vɩla.

¹²N yɛɛr, ala na chɛ lɛ a anyã, yɩ taa pɔrɔ nɩ saaju ɛ, bɩɩ a tẽe ɛ, bɩɩ bon jaa ɛ, tɩ yɩ vɛ̃ ka yɩ ɔ̃ɔ, ɩ ɔ̃ɔ, ka yɩ kai, mɩ ɩ kai. Ka yɩ taa kpɛ ’yɛr pɔ ɛ.

¹³Wõm pɔɔn a yɩ ãsʊɔ bɩɩ? Wʊ sʊɔr Nãaŋmɩn. Nʊ̃ɔ kpɛ̃n a yɩ ãsʊɔ bɩɩ? Wʊ yiele yiel dãna nɩ Nãaŋmɩn. ¹⁴A yɩ ãsʊɔ bɩɛrɛ na bɩɩ? Wʊ bʊɔl a pupuorbiir nɩbɛrɛ ka ba wa jɛ wʊ kãa nɩ a sɩ Soro yuor, na ba sʊɔr Nãaŋmɩn kʊ wʊ. ¹⁵A Nãaŋmɩn ban sʊɔr nɩ sɔɔfʊ na sa naa nɩnyɩnɛ baal, a sɩ Soro na nyɔɔ wʊ naa ka wʊ ir. Ala ɩ wʊ mɩ maal dɛɛr, Nãaŋmɩn na vɛ̃n kʊ wʊ. ¹⁶A lɛ jũu, yɩ ’yɛrɛ a yɩ maal dɛbɛ kʊrɔ taa, na yɩ sʊɔrɔ Nãaŋmɩn ’yɔ̃ɔnɔ̃ taa, ka wʊ sãana yɩ. Nɩtor Nãaŋmɩn sʊɔrfʊ tara na kpɛ̃ɔ na maal bon.

¹⁷Elaija ɩn nɩrɛ a sɩ kaar, wʊ sʊɔr Nãaŋmɩn nɩbijɩɛ ɩka saa wʊ ta wa ɛ, ka war ŋmaa yuomo ata nɩ ŋmaa. ¹⁸Wʊ lɛ sʊɔr Nãaŋmɩn go ka a saa wa, ka a bonsɩ bul a tẽe naa wɔ̃.

¹⁹N yɛɛr, ala ɩ a yɩ ãsʊɔ ’mab naa a yelmãɛ sɔr pɔ, ka a yɩ ãsʊɔ lɩɛb wʊ waan, ²⁰yɩ bɔ̃ɔn a anyã ɩka, nɩrɛ ’lɔ jaa na lɩɛb yelbe-ɩrɛ yin a wʊ yelbier pɔ, wʊ faa wʊn yin kũu pɔ, na wʊ mɩ pɔɔ yelbebe yɔɔ jaa.