1 Tɛsalonika

A GÃN DƆ̃Ɔ A PƆƆL NA SƐB KƱ̃ A TƐSALONIKA NƖBƐ

¹Pɔɔl, Silasɩ nɩ Timoti lɛ sɛɛrɛ a gãn nyã kʊrɔ Tɛsalonika pupuorbiir na be a Sãa Nãaŋmɩn nɩ a Soro Yesu Kɩrɩsɩto ’yɔ̃ɔ. Wãɛfʊ nɩ nyã’maar wʊ be a yɩ sɛ̃.

²Sɩ ma puor Nãaŋmɩn yãan sɔ̃ɔ jaa kʊ yɩ, tɩ ma tara a yɩ tɩɛr a sɩ Nãaŋmɩn sʊɔrfʊ pɔ. ³Sɔ̃ɔ jaa lɛ sɩ ma tɩɛr a yɩ sɔɔfʊ tʊ̃mɔ̃, a yɩ nʊ̃fʊ tʊ̃mɔ̃ nɩ a kãnyir yɩn tara chɛlɛ a sɩ Soro Yesu Kɩrɩsɩto nɩ a sɩ Sãa Nãaŋmɩn.

⁴Bojũu sɩ bɔ̃ɔn ɩka, n yɛɛr a yɩn a Nãaŋmɩn na nʊ̃, ’lɔ lɛ kaa ir yɩ. ⁵Bojũu a sɩ ’yɛr nʊ̃ɔ na wa a yɩ sɛ̃, ba ɩ ’yɛrbir tɛɛ ɛ, tɩchɛ wʊ tara na kpɛ̃ɔ na ɩ a Nãaŋmɩn Sɩɛ na ba ɩ baal ɛ. Yɩ mãɛ bɔ̃ɔn a lɛ sɩn be a sɔ̃ɔ ’lɔ sɩn dɔ̃ɔ kpɩɛrɛ nɩ yɩ a yɩ jũu. ⁶Yɩ ɩ naa a sɩn nɩ a Soro tɔtɔɔrbɔ, bojũu dɔɔyɛ kpɛ̃ɛ pɔ lɛ yɩ tu tɩ de a ’yɛrbie nɩ pʊpɛl a Nãaŋmɩn Sɩɛ na tɩr, ⁷lɛ lɛ, yɩn ɩ bʊ̃mansɩ kʊ a bala na sɔɔ de a ’yɛr nʊ̃ɔ be a Masedonɩya nɩ a Akaya tẽn pɔ.

⁸Yɩn lɛ yaar a sɩ Soro ’yɛrbie, a ba ɩ a Masedonɩya nɩ a Akaya tẽn pɔ tɛɛ ɛ, tɩchɛ a yaar jie jaa. A lɛ yɩn sɔɔ a Nãaŋmɩn yaar jie jaa. ⁹Ba mãɛ lɛ man a lɛ yɩn tuor de sɩ, a sɔ̃ɔ ’lɔ sɩn wa a yɩ sɛ̃, nɩ a lɛ yɩn lɩɛb wa a Nãaŋmɩn sɛ̃, tɩ bar a tɩbɛ tɩ wa puoro a nyɛvʊr nɩ a yelmãɛ Nãaŋmɩn, ¹⁰tɩ chɛlɛ a wʊ Bie ka wʊ yi saaju wa, a ’lɔ wʊn vɛ̃ ka wʊ lɩɛb ir a kũu pɔ, Yesu a ’lɔ na faa sɩ yɩn a Nãaŋmɩn suur ’lɔ na waara pɔ.

¹N yɛɛr, yɩn mãɛ jaa bɔ̃ɔn naa ɩka a yɩ sɛ̃ waa ba ɩ pɔrɔ ɛ, ²sɩn gba na dɔ̃ɔ di dɔɔyɛ a ba ge sɩ be a Filipai tẽe pɔ, nɩtãa yɩn mãɛ na bɔ̃ɔn, tɩchɛ sɩ chɛnɛ na tara nyãa a sɩ Nãaŋmɩn pɔ, tɩ man a ’yɛr nʊ̃ɔ jaa chɛchɛ kʊ yɩ, an sɔɔ ɩ baa sɔɔ de a ’yɛr ɛ.

³Bojũu a sɩ sʊɔrfʊ ba yi jir, bɛlfʊ nɩ tɩɛr dɛɛr pɔ ɛ, ⁴tɩchɛ Nãaŋmɩn lɛ kaa ir sɩ ka sɩ ɩ a ’yɛr nʊ̃ɔ wiwiilbe. A lɛ jũu lɛ sɩ ’yɛr ɩka, a ba ɩ ka sɩ pɛl nɩsaal pʊɔ ɛ, tɩ sɩ pɛl Nãaŋmɩn pʊɔ, a ’lɔ na ma kaara a sɩ pʊtɩɛr. ⁵Yɩ bɔ̃ɔn na ɩka Nãaŋmɩn lɛ ɩ a sɩ dãasɩɛ sʊɔ, saa dɔ̃ɔ wa ’yɛr jir ’yɛr bɩɩ ŋmaa jir nyɛ bon ɛ. ⁶Saa bʊɔrɔ ’yɔ̃ɔfʊ nɩsaal sɛ̃ ɛ, a yɩn mãɛ sɛ̃n bɩɩ a sɩ taaba sɛ̃ ɛ, bɩɩ bʊɔrɔ bonsɩ sɩn ɩ Kɩrɩsɩto nɩtʊ̃nsɩ jũu ɛ, ⁷tɩchɛ sɩ siir a sɩ mãɛ a yɩ pɔ, lɛ pɔɔ na ma kaara a wʊ bibiir. ⁸A lɛ jũu, yɩn kaara sɩ lɛ so ka saa bʊɔrɔ ɩka sɩ põn yɩ a Nãaŋmɩn ’yɛr nʊ̃ɔ tɛɛ ɛ, na sɩ lɔ̃ɔn a sɩ mãɛ jaa bojũu a sɩ nʊ̃fʊ ben a yɩ sɛ̃ yɔɔ jaa. ⁹Sɩrɛ jaa n yɛɛr, yɩ tɩɛr a sɩ kãnyir tʊ̃mɔ̃ nɩ a dɔɔyɛ. Sɩ tʊ̃n tãsɔɔ gbulo, nɩ mɔ̃tɔ̃gbulo, ka sɩ ta kʊ nɩrɛ jaa tuor ɛ, a sɔ̃ɔ ’lɔ sɩn ’yɛrɛ a Nãaŋmɩn ’yɛr nʊ̃ɔ kʊrɔ yɩ ɛ.

¹⁰Yɩn lɛ di dãasɩɛ, nɩ a Nãaŋmɩn mɩ na ɩ a Chɛchɛ Sʊɔ nɩ nɩtor tɩ ba tara yele jaa a wʊ ’yɔ̃ɔ ɛ, a sɩ maalfʊ chaar naa a yɩn na ɩ a sɔɔfʊ dẽme. ¹¹Bojũu yɩ bɔ̃ɔn naa ɩka sɩ ma maal vɩla kʊ a yɩ ãsʊɔ jaa lɛ sãa na ma maal vɩla kʊ a wʊ bibiir, ¹²na sɩ ’yɔ̃ɔn yɩ ãkpãɛn, ’maala yɩ tɩ sʊɔrɔ yɩ ɩka yɩ kpɩɛrɛ a lɛ na pɛlɛ a Nãaŋmɩn pʊɔ, a ’lɔ na bʊɔl yɩ ’yɔ̃ɔ a wʊ nãalʊ̃ʊ tɩɩr pɔ.

¹³Ala lɛ so ka sɩ ma puor Nãaŋmɩn yãan, bojũu yɩ sɔɔn de a Nãaŋmɩn ’yɛr yɩn wõ a sɩ sɛ̃, yaa sɔɔ de yaa nɩsaal ’yɛr kaar ɛ, tɩchɛ yɩ sɔɔn de yaa Nãaŋmɩn ’yɛr kaar, ka a tʊ̃nɔ̃ a yɩ bala na sɔɔ de pɔ. ¹⁴Bojũu n yɛɛr, yɩn ’lɔ, yɩ ɩ naa tɔtɔɔrbɔ a Nãaŋmɩn puorbo a Yesu Kɩrɩsɩto pɔ a Judiya, yɩ din dɔɔyɛ a bonsɩ pɔ, a yɩ mãɛ yelsɩ pɔ, nɩtãa lɛ ban tʊ̃ kʊ a Juu dẽme, ¹⁵a bala na kʊ a sɩ Soro Yesu nɩ a Nãaŋmɩn ’yɛ’yɛrbɛ tɩ dii sɩ bar. Ba sɔ̃ɔn Nãaŋmɩn pʊɔ tɩ ba sɔɔ nɩrɛ jaa ’yɛr ɛ, ¹⁶tɩ ba bʊɔrɔ ɩka sɩ ’yɛrɛ nɩ a bala na ba ɩ a Juu nɩbɛ ɛ, ka ban nyɛ faafʊ ɛ. Ba kpɛ̃n a yeldɛbɛ pɔ ’yɔ̃ɔ kɔkɔɛ. Nãaŋmɩn suur ir naa ka wʊn ge ba.

¹⁷Tɩchɛ n yɛɛr, a kor bãlãa sɩn ba lɛ nyɛ taa ɛ, tɩchɛ saa vɛ̃ a yɩ tɩɛr ɛ. Sɩ mʊ̃ɔn nɩbir ɩka sɩ nyɛ yɩ, na sɩ bʊɔrɔ ɩka a sɩn mãɛ sɩ tɩ nyɛ yɩ. ¹⁸A la lɛ so ka sɩ ta bʊɔrɔ ɩka sɩ wa a yɩ sɛ̃, tɩ maa Pɔɔl ta mʊɔrɔ na bʊɔrɔ, tɩchɛ ka Satan pii a sɩ sɔr. ¹⁹Bo lɛ ɩ a sɩ tɩɛrtɔfʊ jie, bɩɩ a pʊpɛl bɩɩ a nyɛvʊr tɩɩr jupil kʊ sɩ a sɩ Soro Yesu waa daar? A ba ɩ yɩn lɛ ɛ? ²⁰Yelmãɛ yɩn lɛ ɩ a sɩ tɩɩr nɩ a sɩ pʊpɛl.

¹Lɛ an wa gar sɩ a sɩ faa tɩ jãnɛ a be Atensɩ tẽe pɔ. ²Sɩ tʊ̃n a sɩ yɛbɛ Timoti mɩ na ɩ a Nãaŋmɩn tʊ̃tʊ̃nɔ̃ ãsʊɔ na wʊ mʊɔlɔ a Yesu Kɩrɩsɩto ’yɛr nʊ̃ɔ ɩka wʊ tɩ ’yɔ̃ɔ yɩ ãkpɛ̃ɔ a yɩ sɔɔfʊ pɔ, ³a lɛ ka yɩ taa wa joro dãbãɛ nɩ a bɛɛr kaa nyã pɔ ɛ. Yɩn mãɛ jaa bɔ̃ɔn naa ɩka a dɔɔyɛ nyã lɛ sɩn di. ⁴Yelmãɛ, sɩn dɔ̃ɔ be a yɩ sɛ̃, lɛ lɛ sɩ ’yɛrɛ kʊrɔ yɩ ɩka sɩn din dɔɔyɛ. Ka a lɛ mɩ ɩ. ⁵A lɛ jũu, ɩn kʊ̃ lɛ tʊ̃ɔ lɛ so, ka tʊ̃ nɩrɛ ɩka wʊ tɩ kaa a lɛ a yɩ sɔɔfʊ na be, n dabãɛ lɛ ɩka a bɛɛr kaa wʊ taa bɛɛr yɩ kaa, kaa sɩ tʊ̃mɔ̃ ɩ pɔrɔ ɛ.

⁶Tɩchɛ Timoti yin a yɩ sɛ̃ wa ’yɛr a ’yɛr nʊ̃ɔ kʊ sɩ, a lɛ yɩn tara a sɔɔfʊ nɩ a nʊ̃fʊ. Wʊ ’yɛr kʊ sɩ ɩka yɩ ma tara sɩn nɩ tɩɛr vɩla sɔ̃ɔ jaa na yɩ ma bʊɔrɔ ɩka yɩ nyɛ sɩ nɩtãa lɛ sɩn mɩ na ma bʊɔrɔ ɩka sɩ nyɛ yɩ. ⁷N yɛɛr, a lɛ jũu, a pʊsɔ̃ɔ nɩ a bɛɛr kaa anyã pɔ, yɩ ’yɔ̃ɔ sɩn ãkpɛ̃ɔ tun a yɩ sɔɔfʊ pɔ yɩn tara jũu. ⁸Bojũu pʊ̃pãanyã, sɩ pãa na ben be yɩn ara kpɛ̃ɔ kʊ a sɩ Soro. ⁹Ŋmɩnɛ lɛ sɩn ɩrɛ wa puor Nãaŋmɩn yãan ka a sɛɛ, a pʊpɛl nyã sɩn nyɛ a Nãaŋmɩn sɛ̃? ¹⁰Tãsɔɔ nɩ mɔ̃tɔ̃ɔ jaa lɛ sɩ ma sʊɔrɔ Nãaŋmɩn ɩka sɩ lɛ nyɛ yɩ go, na sɩ lɛ chɔɔr bon ’lɔ jaa na ba pʊɔ a yɩ sɔɔfʊ pɔ ɛ.

¹¹Pʊ̃pãanyã, sɩ sʊɔrɔ naa a sɩ Sãa Nãaŋmɩn mãɛ nɩ a sɩ Soro Yesu ɩka, ba yuo sɔr ka sɩ lɛ wa nyɛ yɩ. ¹²A sɩ Soro wʊ vɛ̃ ka yɩ waa na yɩ nʊ̃nɔ̃ taa, tɩ na yɩ nʊ̃ nɩrɛ jaa nɩtãa lɛ sɩn nʊ̃ yɩ. ¹³Wʊ vɛ̃ ka yɩ ɩ nɩsʊ̃n na yɩ taa tara dɛɛr jaa a sɩ Sãa Nãaŋmɩn sɛ̃ ɛ, tɩ tãn a sɔ̃ɔ ’lɔ a sɩ Soro Yesu Kɩrɩsɩto nɩ na waan a Nãaŋmɩn nɩbɛ.

¹N yɛɛr, a baaraa nɩ nyã, sɩ kpãana yɩ naa a lɛ a yɩ kpɛfʊ na tʊ̃ɔ pɛlɛ a Nãaŋmɩn pʊɔ, nɩtãa lɛ yɩn ben kpɩɛrɛ. Pʊ̃pãanyã, sɩ sʊɔrɔ yɩ naa na sɩ kpãkpãana yɩ nɩ a sɩ Soro Yesu ɩka yɩ maala a lɛ pʊɔrɔ. ²Bojũu yɩ bɔ̃ɔn wiilfʊ ’lɔ sɩn wiil yɩ tun a sɩ Soro Yesu pɔ.

³A ɩn Nãaŋmɩn bɔfʊ lɛ wʊn ir yɩ ka yɩ ɩ nɩtorsɩ. A lɛ jũu, yɩ tɔɔ yɩ mãɛ yin sɛ̃sɛ̃yele pɔ. ⁴Ka nɩrɛ jaa tʊ̃ɔ nyɔɔ a wʊ mãɛ vɩla, na wʊ ɩ chɛchɛ tɩ tara ’yɔ̃ɔfʊ, ⁵na yɩ ta bʊɔrɔ pʊpɛl bʊ̃bʊɔrsɩ fɩka a nɩbɛ bala na ba bɔ̃ɔ Nãaŋmɩn ɛ. ⁶Nɩrɛ jaa wʊ ta maal dɛɛr bɩɩ ŋmɔɔl a wʊ yɛbɛ anyã pɔ ɛ, a sɩ Soro na gen nɩrɛ jaa na maala a anyãna nɩtãa a lɛ sɩn dɔ̃ɔ ’yɛr kʊ yɩ, tɩ na sɩ kpãa yɩ. ⁷Bojũu a Nãaŋmɩn ba bʊɔl sɩ ɩka sɩ tara vɔldɛɛr ɛ, tɩchɛ wʊ bʊɔrɔ na ɩka sɩ vɛ̃ ka a sɩ kpɛfʊ vɩɛlɛ. ⁸A lɛ jũu, nɩrɛ ’lɔ jaa na tɔr a wiilfʊ nyã, ba tɔr nɩsaal ɛ, tɩchɛ wʊ tɔr a Nãaŋmɩn ’lɔ na kʊ sɩ a wʊ Sɩɛ.

⁹A ba lɛ fɛr ɩka, sɩ lɛ sɛb kʊ yɩ a lɛ yɩn na nʊ̃ taa ɛ, bojũu yɩn mãɛ jaa bɔ̃ɔn naa ɩka, Nãaŋmɩn ’yɛr naa ɩka, yɩ nʊ̃ taa. ¹⁰Sɩrɛ jaa yɩ nʊ̃n a yɛɛr na be a Masedonɩya paal pɔ, tɩchɛ sɩ chɛnɛ na ’yɔ̃ɔnɔ̃ yɩ ãkpãɛn ɩka, yɩ ɩrɛ a lɛ sɔ̃ɔ jaa.

¹¹Yɩ vɛ̃ ka a ɩ yɩ nʊ̃ɔ ka a yɩ kpɛfʊ vɩɛlɛ, na yɩ mʊ̃ɔ nɩbir nɩ a yɩ mãɛ tʊ̃mɔ̃ na yɩ tʊ̃nɔ̃ nɩ a yɩ nuur nɩtãa a lɛ sɩn ’yɛr kʊ yɩ. ¹²Yɩ maal a nɩtɔ̃ ka a yɩ kpɛfʊ na vɩɛlɛ kʊ a bala na ba puor ɛ, na yɩ taa bʊɔrɔ ɩka nɩbɛ ba guolo yɩ ɛ.

¹³N yɛɛr, saa bʊɔrɔ ɩka a lɩɩ yɩ ɛ, nɩ a bala na gur ɛ, na yɩ taa wa tara pʊsɔ̃ɔ fɩka a bala na ba tara tɩɛrtɔ jie kaar ɛ. ¹⁴Sɩ sɔɔn ɩka Yesu kpi naa, tɩ na wʊ lɩɛb ir a kũu pɔ. A lɛ lɛ sɩ sɔɔ, ɩka Nãaŋmɩn na ’mantaa waan a Yesu nɩ a bala na gur. ¹⁵Sɩ den a sɩ Soro ’yɛrbie ’yɛrɛ kʊrɔ yɩ ɩka, a sɩn bala na chɛnɛ vʊrɔ, tɩ tãn a sɩ Soro waa daar, kʊ̃ dɔ̃ɔ a bala na gur nyɛ wʊ ɛ. ¹⁶Bojũu a sɩ Soro mãɛ lɛ na yi a saaju wa tãna ’yɛrɛ, ka a malaka kpɛ̃ɛ bʊɔlɔ nɩ nɛkpɛ̃ɛ, ka a Nãaŋmɩn ɩlɛ pɛɛlɛ ɩrɛ gɔ̃mɔ̃, ka a bala na sɔɔ a Kɩrɩsɩto tɩ kpi, de nie ir. ¹⁷A anyã puor, a sɩn bala na chɛnɛ vʊrɔ, a Nãaŋmɩn pãa ’mɔɔr sɩ, ka sɩ lɔ̃ɔtaa tuor a sɩ Soro be julõjuur pɔ, na sɩ tɩ be a wʊ sɛ̃ sɔ̃ɔ jaa. ¹⁸A lɛ jũu, yɩ ’yɔ̃ɔnɔ̃ taa ãkpãɛn naa ’yɛrbie anyãna.

¹Pʊ̃pãanyã ’lɔ n yɛɛr, a ba fɛr ɩka sɩ sɛb bon jaa ’yɛr kʊ yɩ a daar naa sɔ̃ɔ ɛ. ²Bojũu yɩn mãɛ bɔ̃ɔn naa ɩka a sɩ Soro Yesu bɩbir na wa naa fɩka nãnyie na ma wa tãsɔɔ kaar. ³A sɔ̃ɔ ’lɔ ban wa ’yɛr ɩka, “Nyã’maar ben be, dãbãɛ ba lɛ be be ɛ,” sɔ̃ɔfʊ na pãa wa naa, a ba sɛ̃, fɩka pɔɔ pʊɔ dɔɔfʊ na dũu wʊ, tɩ ba kʊ̃ tʊ̃ɔ faa a ba mãɛ ɛ.

⁴Tɩchɛ yɩn a n yɛɛr, yaa be libe pɔ ɛ, ka a bɩbir nyã na wa dũu yɩ a nãnyie kaar ɛ. ⁵Yɩ jaa ãn chãa nɩ mɔ̃tɔ̃ɔ bibiir, saa ɩ tãsɔɔ bɩɩ, libe pɔ nɩbɛ ɛ. ⁶A lɛ jũu, yɩ pãa ta vɛ̃ a sɩ guro nɩbɛ bamɩne kaar ɛ, tɩchɛ yɩ vɛ̃ a sɩ jɛɔ na sɩ nyɔɔrɔ sɩ mãɛ. ⁷Bojũu a bala na ma guro, ma gur tãsɔɔ, ka a bala na buu, mɩ ma buu tãsɔɔ. ⁸Tɩchɛ an ɩ a chãa lɛ so sɩ, yɩ vɛ̃ ka sɩ nyɔɔrɔ sɩ mãɛ, na sɩ de sɔɔfʊ nɩ nʊ̃fʊ su, fɩka a nyãa wɩɛ nɩ a sɩ tɩɛrtɔfʊ jie na ɩ a sɩ faafʊ kur jupil. ⁹Bojũu Nãaŋmɩn ba ir sɩ ɩka sɩ di dɔɔyɛ ɛ, tɩchɛ ka sɩ nyɛ faafʊ tu a sɩ Soro Yesu Kɩrɩsɩto ’yɔ̃ɔ. ¹⁰’Lɔ lɛ kpi kʊ sɩ, a lɛ jũu, ka sɩ chɛnɛ na nɩbir bɩɩ, sɩ gur naa, sɩn nɩ ’lɔ na ’mataa be be. ¹¹A lɛ jũu, yɩ ’yɔ̃ɔn taa ãkpãɛn na yɩ sʊ̃nɔ̃ taa nɩtãa a lɛ yɩn ben tʊ̃nɔ̃.

¹²Pʊ̃pãanyã n yɛɛr, sɩ sʊɔrɔ yɩ naa ɩka yɩ ’yɔ̃ɔnɔ̃ a bala na ɩ a yɩ nɩbɛrɛ tʊ̃nɔ̃ a yɩ sɛ̃, bala lɛ sʊ̃nɔ̃ yɩ a sɩ Soro sɔr pɔ, na ba kpãana yɩ. ¹³Yɩ ’yɔ̃ɔnɔ̃ ba nɩ nʊ̃fʊ a ba tʊ̃mɔ̃ jũu, na yɩ kpɩɛrɛ nɩ nyã’maar nɩ nɩrɛ jaa. ¹⁴N yɛɛr n sʊɔrɔ yɩ naa ɩka, yɩ kpãana a bala na ɩ a yãan dẽme tɩ na yɩ ’yɔ̃ɔnɔ̃ a bala na sɩɩr a ba mãɛ, na yɩ sʊ̃nɔ̃ a nɩbaalsɩ tara kãnyir nɩ nɩrɛ jaa. ¹⁵Yɩ bɔ̃ɔnɔ̃ sʊ̃, ka nɩrɛ jaa ta de yelbier yãan yelbier sãn ɛ, tɩchɛ yɩ ma maala vɩla kʊrɔ taa nɩ nɩrɛ jaa.

¹⁶Yɩ ma tara pʊpɛl sɔ̃ɔ jãa. ¹⁷Yɩ ma sʊɔrɔ Nãaŋmɩn sɔ̃ɔ jaa. ¹⁸Na yɩ ma puor wʊ yãan yele jaa pɔ, bojũu anyã lɛ ɩ a Nãaŋmɩn bɔfʊ a Yesu Kɩrɩsɩto ’yɔ̃ɔ.

¹⁹Yɩ ta kpĩin a Nãaŋmɩn Sɩɛ bũu ɛ. ²⁰Yɩ ta kpɛrɛ a Nãaŋmɩn ’yɛ’yɛrbɛ wiilfʊ ɛ. ²¹Yɩ bɛɛr yele jaa kaa na yɩ nyɔɔ bon ’lɔ na vɩla. ²²Tɔɔ yi yele jaa na ɩ bier pɔ.

²³Nãaŋmɩn mãɛ na ɩ a nyã’maar sʊɔ wʊ chɔɔr yɩ ka yɩ ɩ chɛchɛ. Wʊ maal a yɩ sɩɩr nɩ a yɩ kpɛfʊ nɩ a yɩ ãgãma ka a ɩ chɛchɛ tɩ ta tara chɛfʊ jaa ɛ, tɩ tãn a sɩ Soro Yesu Kɩrɩsɩto waa sɔ̃ɔ. ²⁴A Nãaŋmɩn nyã na bʊɔl yɩ tara na yelmãɛ, wʊ̃n maal a lɛ.

²⁵N yɛɛr, yɩ sʊɔrɔ Nãaŋmɩn kʊrɔ sɩ. ²⁶Yɩ puor a yɛɛr naa yɛpɔbɔ ba jaa nɩ nʊ̃fʊ puorfʊ. ²⁷N kpãkpãana yɩ naa a sɩ Soro yuor ’yɔ̃ɔ, ɩka yɩ kar a gãn nyã kʊ a yɛɛr ba jaa.

²⁸Ka a sɩ Soro Yesu Kɩrɩsɩto wãɛfʊ be a yɩ sɛ̃.