1 Pita

A PITA GÃN NA DE NIE

¹Maa Pita na ɩ a Yesu Kɩrɩsɩto nɩtʊ̃nãa lɛ sɛɛrɛ a gãn nyã kʊrɔ a yɩn a Nãaŋmɩn na chɛl ir a yɩ ɩ sãanba yɛ̃yɛl ka a wɛr pɔ, na yɩ be a Pontus, nɩ Galatiya, nɩ Kapadosiya, nɩ Asɩya, nɩ a Bitiniya. ²A Sãa Nãaŋmɩn den nie bɔ̃ɔ yɩ, ka a wʊ Sɩɛ oo yɩ, a yɩ ɩ chɛchɛ, yɩn wõnõ a Yesu Kɩrɩsɩto toor jũu, ka wʊ mɩr yɩ a wʊ jãɩ. Wãɛfʊ nɩ nyã’maar na dɔɔlɔ yɩn taa.

³Pɛɛfʊ wʊ ta a Nãaŋmɩn na ɩ a sɩ Soro Yesu Kɩrɩsɩto Sãa! A wʊ nɩbaal bɛrma naa, ka wʊ dɔɔ sɩ dɔɔ paalaa, na wʊ kʊ sɩ tɩɛrtɔ vʊr tu a Yesu Kɩrɩsɩto wʊn sãɩ a kũu pɔ, ⁴nɩ a nãbomo ala wʊn bin gun sɩ be a saaju, a ba wɛrɛ ɛ, a ba sɔ̃ɔnɔ̃ ɛ, bɩɩ jʊɔlɔ ɛ. ⁵A tu naa yɩ sɔɔfʊ pɔ, ka a Nãaŋmɩn Kpɛ̃ɔ ger pɔɔ yɩ, tɩ tãn a bɩbir baaraa ’lɔ a faafʊ ’lɔ na chɔɔr baar na wa nyɩr. ⁶A anyãna pɔ lɛ yɩ chɩlɛ yɔɔ jaa, an sɔɔ ɩ ɩka yɩn din dɔɔyɛ bɛɛr kaa bʊrɔ bʊrɔ pɔ. ⁷A anyãna wa naa ka a yɩ sɔɔfʊ na kpɛ̃mɛ gar a sɛlma na ɩ bʊ̃sɔ̃ɔnãa ban ma dʊʊl bũu pɔ ir a dɛɛr bar. A yɩ sɔɔfʊ na lɩɛb ɩ pɛɛfʊ, nɩ tɩɩr, nɩ ’yɔ̃ɔfʊ a sɔ̃ɔ ’lɔ a Yesu Kɩrɩsɩto na wa nyɩr. ⁸Yɩ gba na ba nyɛ wʊ ɛ, tɩ na yɩ nʊ̃ wʊ. Yaa gba nyɛ wʊ a pʊ̃pãanyã ɛ, tɩ sɔɔ wʊ, na yɩ sɛɛn a pʊpɛl tɩɩr ’lɔ nɩrɛ na kʊ̃ tʊ̃ɔ man ɛ. ⁹Bojũu yɩ nyɛrɛ naa a yɩ sɔɔfʊ bon na ɩ a yɩ sɩɩr faafʊ.

¹⁰A faafʊ nyã ’yɛr lɛ a Nãaŋmɩn ’yɛ’yɛrbɛ dɔ̃ɔ ’yɛr a wãɛfʊ nyã na wa a yɩ sɛ̃. Ba vɩɛr naa a faafʊ nyã na ba chɛ̃pɛ̃ wʊ jaa nɛ nɛ. ¹¹Ba mʊ̃ɔn nɩbir ɩka ba bɔ̃ɔ a sɔ̃ɔ nɩ a yelsɩ ala a Kɩrɩsɩto Sɩɛ na be a ba sɛ̃ na wile ba, a lɛ wʊn ’yɛr a dɔɔyɛ a Kɩrɩsɩto na di nɩ a tɩɩr ala na turo. ¹²Nãaŋmɩn wiil naa a wʊ ’yɛ’yɛrbɛ banyãna ɩka a ba ɩ ba mãɛ ’yɔ̃ɔ lɛ ba tʊ̃nɔ̃ a lɛ ɛ, tɩ chɛ yɩn ’yɔ̃ɔ lɛ. A lɛ ban ’yɛr a nyãna yɩn ben wõnõ a pʊ̃pãanyã a bala na mʊɔlɔ a ’yɛr nʊ̃ɔ tu a Nãaŋmɩn Sɩɛ wʊn tʊ̃ a wʊ yi a saaju. A malakasɩ mɩ gba ta bʊɔrɔ naa ɩka ba muul kaa a anyãna.

¹³A lɛ jũu, yɩ chɔɔr a yɩ tɩɛr gun tʊ̃mɔ̃, na yɩ nyɔɔrɔ yɩ mãɛ. Yɩ de a yɩ tɩɛrtɔ ’yɔ̃ɔ a wãɛfʊ ’lɔ a Yesu Kɩrɩsɩto na kʊ yɩ a wʊ waa daar. ¹⁴Yɩn wõnõ a Nãaŋmɩn toor jũu, yɩ taa lɛ maala a kõro mamaalbie ɛ, a lɛ yɩn ba dɔ̃ɔ bɔ̃ɔ ɛ. ¹⁵Tɩchɛ nɩtãa lɛ a ’lɔ na bʊɔl yɩ na ɩ chɛchɛ, yɩ mɩ ɩ chɛchɛ a yɩ yelmaalsɩ a jaa pɔ. ¹⁶Bojũu a sɛb ɩka, “Yɩ ɩ chɛchɛ, bojũu n ɩn chɛchɛ.” (Mosesɩ Gãma Na Tu Ata 19:2)

¹⁷Yɩn ma bʊɔlɔ wʊ a yɩ Sãa, ’lɔ lɛ na tɔɔr nɩrɛ jaa ’yɛr, na waa turo ɛ, yɩ kpɩɛrɛ a yɩ kpɛfʊ nɩtãa sãanba, na yɩ joro wʊ dãbãɛ. ¹⁸Bojũu yɩ bɔ̃ɔn naa ɩka a ba ɩ bʊ̃sɔ̃ɔnãa fɩka libir, bɩɩ sɛlma lɛ Nãaŋmɩn de yab den yɩ yin a yɩ sãakpãmɩne yelpɔrsɩ ala na lũ yɩ pɔ ɛ, ¹⁹tɩchɛ a ɩ naa a Kɩrɩsɩto jãɩ vɩla ala na ɩ a pɛraabile na ba tara chɛfʊ ɛ, bɩɩ jãnɛ jaa ɛ. ²⁰Nãaŋmɩn ir wʊ naa tɩ wa bɩɛr maal a wɛr, tɩchɛ wʊ vɛ̃n ka wʊ nyɩr a sɔ̃ɔ baaraa a yɩ jũu. ²¹A wʊ jũu lɛ yɩ sɔɔ de a Nãaŋmɩn na ir wʊ a kũu pɔ na wʊ kʊ wʊ tɩɩr, ka a yɩ sɔɔfʊ nɩ a yɩ tɩɛrtɔ na be a Nãaŋmɩn ’yɔ̃ɔ.

²²Pʊ̃pãanyã yɩn chɔɔr a yɩ mãɛ yɩn turo a yelmãɛ jũu, yɩ nʊ̃nɔ̃ naa a yɛɛr sɩrɛ jaa. Yɩ nʊ̃nɔ̃ taa nɩ a yɩ nyãa wʊ jaa. ²³Bojũu yɩ nyɛn dɔɔ paalaa ’lɔ na ba ɩ bʊ̃kpiraa ɛ, tɩchɛ wʊn ben be, na ba tu a Nãaŋmɩn ’yɛr na ɩ vʊr, na be be bɩbir jaa. ²⁴Bojũu, “Nɩsaal kaara naa fɩka mʊɔr, ka a ba tɩɩr wʊ jaa kaara fɩka a mɔpuul. A mʊɔr wa jʊɔl, a puul mɩ ma suor naa. ²⁵Tɩchɛ a sɩ Soro ’yɛr ’lɔ ben be bɩbir jaa.” (Isaiya 40:6-8) A ’yɛr nyãna lɛ ba mʊɔl kʊ yɩ.

¹A lɛ jũu, yɩ ir yɩ mãɛ yin a yosɔ̃ɔ ’yɛr, bɛlfʊ, nɛɛr ayi tarfʊ, nyuur, nɩ kporfʊ jaa bʊrɔ pɔ. ²Yɩ kaara fɩka bipɩlɛ, na yɩ bʊɔrɔ a Nãaŋmɩn ’yɛr ka ɩ yɩ vɔlaa a bɩr kaar, a yɩn tʊ̃ɔ nʊ̃ɔ a yɩ faafʊ pɔ, ³bojũu an ɩ yɩ lɛm kaa lɛ a sɩ Soro na nʊ̃mɔ̃.

⁴An ɩ yɩ wa naa a wʊ sɛ̃ na ɩ a Kʊsɩr vʊr a nɩsaal na tɔr bar, tɩchɛ ka a Nãaŋmɩn ir wʊ a wʊ ɩ bʊ̃sʊ̃, ⁵yɩn mɩ na ɩ fɩka a kʊsɩvʊɛ a ba mɛn yɩ, nɩ a Nãaŋmɩn yir ka yɩ ɩ a wʊ bɔɔrlo chɛchɛsɩ, na yɩ loro a wʊ bɔɔr wʊn sɔɔ tu a Yesu Kɩrɩsɩto ’yɔ̃ɔ. ⁶A sɛb a Nãaŋmɩn gãn pɔ ɩka, “Nyɛ, n bin a kʊsɩr be a Jiyon tẽe pɔ, a kʊsɩr vɩla ’lɔ ɩn kaa ir ka wʊ ɩ a kʊsɩr ju, ka nɩrɛ ’lɔ jaa na sɔɔ de wʊ, vã kʊ̃ di wʊ ɛ.” (Isaiya 28:16)⁷Pʊ̃pãanyã a yɩn bala na sɔɔ de wʊ, wʊ ɩn kʊsɩr sʊ̃. Tɩchɛ a bala na ba sɔɔ de wʊ ɛ, “A kʊsɩr ’lɔ a mɩmɩɛrbɛ na tɔr bar, ’lɔ lɛ ɩ a kʊsɩr ju,” (Yiel Gãn 118:22)⁸na, “Wʊ ɩ a kʊsɩr ’lɔ a nɩbɛ na ŋmiere a gbɛɛ, na wʊ ɩ a pie ’lɔ ban bãra loro.” (Isaiya 8:14) Ba ŋmiere naa ba gbɛɛ bojũu ba tɔr naa a ’yɛr ’lɔ ’yɔ̃ɔ a Nãaŋmɩn na dɔ̃ɔ bin ba.

⁹Tɩchɛ yɩn ’lɔ, Nãaŋmɩn lɛ ir yɩ a yɩ ɩ a wʊ bɔɔrlo nãmɩne, na yɩ ɩ nɩchɛchɛsɩ, na yɩ ɩ a Nãaŋmɩn sofʊ, ka yɩ na pɛɛrɛ wʊ, an ɩ ’lɔ lɛ bʊɔl yɩ yin a libe pɔ waan a wʊ chãa herete pɔ. ¹⁰Yaa dɔ̃ɔ ɩ a wʊ nɩbɛ ɛ, tɩchɛ pʊ̃pãanyã yɩ ɩ naa a Nãaŋmɩn nɩbɛ. Yaa dɔ̃ɔ tara a Nãaŋmɩn nɩbaal ɛ, tɩchɛ pʊ̃pãanyã yɩ tara wʊ naa.

¹¹N barmɩne, n sʊɔrɔ yɩ naa nɩtãa nɩyʊɔrsɩ nɩ sãanba ka a wɛr pɔ ɩka, yɩ ir yɩ mãɛ yin a ãgãn vɔlaa na ma jɛɛrɛ nɩ a yɩ sɩɩr. ¹²Yɩ kpɩɛrɛ vɩla a bala na ba puoro sɛ̃, ban sɔɔ gba kpɛrɛ yɩ ɩka dɛɛr lɛ yɩ maala, bala wa nyɛ a yɩ vɩla maalfʊ ban ’yɔ̃ɔn Nãaŋmɩn tɩɩr a wʊ waa bɩbir.

¹³A sɩ Soro jũu, yɩ siir yɩ mãɛ kʊ a tʊ̃ɔfʊ dẽme, ala sɔɔ ɩ a nãkpɛ̃ɛ ’lɔ lɛ, ¹⁴bɩɩ a nãbil bala wʊn ir bin a tẽn tẽn ka ba kpãana a bala na maala dɛɛr tɩ pɛɛrɛ a bala mɩ na maala a lɛ na tor. ¹⁵Bojũu Nãaŋmɩn bɔfʊ lɛ ɩka yɩn maala vɩla na yɩ pɔɔ a ba bɔ̃ɔ dẽme na ɩ a jɔlɔ nɛɛr. ¹⁶Yɩ kpɩɛrɛ nɩtãa sumɩne, tɩchɛ yɩ taa de a mãɛ sofʊ nyã pɔɔn yelbier ɛ, tɩ yɩ kpɩɛrɛ fɩka Nãaŋmɩn gbãgbaar. ¹⁷Yɩ ’yɔ̃ɔnɔ̃ nɩrɛ jaa na yɩ nʊ̃ a yɩ taa Yesu turbo, na yɩ joro Nãaŋmɩn dãbãɛ, tɩ ’yɔ̃ɔnɔ̃ a nãa.

¹⁸Gbãgbaar, yɩ siir yɩ mãɛ kʊ a yɩ tʊ̃nbɔ nɩ ’yɔ̃ɔfʊ, a ta ɩ a bala na bal nɩbir maala yɩ vɩla tɛɛ ɛ, tɩchɛ a bala mɩ na kpɛ̃mɛ a nɩbir. ¹⁹Bojũu a Nãaŋmɩn na maal vɩla kʊ nɩrɛ ’lɔ na tara tɩɛr vɩla, na wʊ di dɔɔyɛ na ba tara sɔr ɛ, bojũu wʊ tara na Nãaŋmɩn tɩɛr. ²⁰Tɩchɛ bo lɛ na ɩ a yɩ tɔ̃nɔ̃, ala ɩ ba ŋme yɩ naa yɩn tʊ̃ dɛɛr jũu? Tɩchɛ ala ɩ yɩ din dɔɔyɛ yɩn maal vɩla jũu, an ɩn tɔ̃nɔ̃ kʊ yɩ Nãaŋmɩn niem. ²¹A anyãna jũu lɛ a Nãaŋmɩn bʊɔl yɩ, bojũu Kɩrɩsɩto mɩ dɔ̃ɔ di dɔɔyɛ, na wʊ maal wiil yɩ ɩka yɩ turo a wʊ pala. ²²“Ka waa dɔ̃ɔ maal dɛɛr jaa ɛ, bɩɩ ka bɛlfʊ yi a wʊ nɛɛ pɔ ɛ.” (Isaiya 53:9)²³A lɛ ban dɔ̃ɔ tʊrɔ wʊ, waa mɩ tʊ yaa a sãn ɛ. A dɔɔyɛ na pɔɔ wʊ, waa jo dãbãɛ ɛ. Tɩchɛ wʊ den a wʊ mãɛ kʊ a Nãaŋmɩn na tɔɔrɔ a ’yɛr jaa dẽ dẽ. ²⁴A wʊ mãɛ lɛ tuo a sɩ yeldɛbɛ a wʊ ãgãn pɔ a daa ju, ka sɩ mɩ na kpi kʊ yelbier tɩ be be kʊ yeltorsɩ. A wʊ fɛlɛ ala jũu lɛ sãa sɩ. ²⁵Na yɩ kaara fɩka piir na dɔ̃ɔ bɔrɔ, tɩchɛ pʊ̃pãanyã yɩ lɩɛb wa a pɛchinɛ na kaara a yɩ sɩɩr sɛ̃.

¹Pɔbɔ, a lɛ nɩ wʊ ju mɩ lɛ, yɩ sɩɩr yɩ mãɛ kʊ a yɩ sɩrbɛ. Bamɩne baa sɔɔ puor ɛ, tɩchɛ a yɩ befʊ na tʊ̃ɔn lɩɛb a ba tɩɛr a ba puoro, ²bala wa nyɛ a lɛ a yɩ maalfʊ na ɩ vɩla, nɩ lɛ yɩn ’yɔ̃ɔnɔ̃ a yɩ mãɛ. ³Yɩ ta vɛ̃ ka a yɩ vɩla ɩ a yõo pãɛfʊ tɛɛ ɛ, nɩtãa a ju wobfʊ, sɛlma bɔ̃jɔrsɩ yarfʊ, nɩ a fɔnɩbikpãɛn sɛfʊ ɛ. ⁴Tɩchɛ yɩ vɛ̃ ka a yɩ pãɛfʊ be pʊɔm na ba jʊɔlɔ ɛ, na ɩ vɩla, hɛ lɛ lɛ lɛ, nɩ jomm, ala lɛ ɩ vɩla a Nãaŋmɩn niem. ⁵Bojũu nɩtɔ̃nɔ̃ lɛ a mama pɔɔsʊ̃n bala na tara a Nãaŋmɩn tɩɛr ma maal a ba mãɛ vɩla. Na ba sɔɔ turo, na ba sɩɩr ba mãɛ kʊ a ba sɩrbɛ. ⁶Lɛ mɩ lɛ a Saara na dɔ̃ɔ wõnõ a Abraham toor na wʊ ma bʊɔlɔ wʊ a wʊ soro. Yɩn lɛ ɩ a wʊ bibiir, ala ɩ yɩ maala na a lɛ na vɩɛlɛ na yɩ kʊ̃ joro dãbãɛ ɛ.

⁷Sɩrbɛ a lɛ nɩ wʊ ju mɩ lɛ, yɩ tɩɛrɛ a yɩ pɔbɔ yɩn lɔ̃ɔ kpɩɛrɛ nɩ. Yɩ kaara ba nɩ ’yɔ̃ɔfʊ, bojũu baa tara kpãɛn jã yɩ ɛ, tɩ na ba pʊɔ yɩ a Nãaŋmɩn wãɛfʊ kʊfʊ ’lɔ na ɩ nyɛvʊr, ka bon jaa taa var a yɩ Nãaŋmɩn sʊɔrfʊ ɛ.

⁸A ’yɛr baaraa lɛ a anyã, yɩ jaa yɩ tara tɩɛr bʊ̃’yen, na yɩ kaara taa nɩbaal, na yɩ nʊ̃ taa maala vɩla kʊrɔ taa nɩ mãɛ siirfʊ. ⁹Yɩ ta de yelbier yãan yelbier sãn ɛ, bɩɩ tʊbir yãan tʊbir sãn ɛ, tɩchɛ yɩ ’yɛr nɛvɩla ’yɔ̃ɔ ba, bojũu a anyã ’yɔ̃ɔ lɛ a Nãaŋmɩn bʊɔl yɩ ɩka yɩn nyɛn sʊ̃ʊfʊ. ¹⁰Bojũu, “Ala ɩ nɩrɛ nʊ̃n nyɛvʊr na wʊ bʊɔrɔ bɩbivɩɛlsɩ wʊ ir wʊ nɛɛ yin ’yɛrdɛɛr nɩ bɛlfʊ pɔ. ¹¹Wʊ lɩɛb puor ’yɔ̃ɔ yelbier tɩ maala vɩla, na wʊ bʊɔrɔ nyã’maar joro turo a wʊ puor. ¹²Bojũu a sɩ Soro kaara naa a bala na tor, na wʊ wõnõ a ba sʊɔrfʊ. Tɩchɛ a sɩ Soro pʊɔ ma sɔ̃ɔ naa nɩ a bala na ma maala yelbier.” (Yiel Gãn 34:12-16)

¹³An lɛ na ge yɩ ala ɩ yɩ mʊ̃ɔ nɩbir maala vɩla? ¹⁴Tɩchɛ ala ɩ yɩ gba din dɔɔyɛ yɩn maala vɩla jũu, Nãaŋmɩn na sʊ̃ʊ yɩ naa. “Yɩ ta joro dãbãɛ nɩ a ba vuurfʊ ɛ. Yɩ taa joro dãbãɛ ɛ,” (Isaiya 8:12)¹⁵Tɩchɛ a yɩ nyãn pɔ, yɩ ’yɔ̃ɔnɔ̃ a Kɩrɩsɩto na ɩ a yɩ Soro. Na yɩ ma chɔɔr sɔ̃ɔ jaa ala ɩ nɩrɛ wa sʊʊr yɩ naa a tɩɛrtɔ ’lɔ yɩn tara, tɩchɛ yɩ ma man naa jomm nɩ ’yɔ̃ɔfʊ, ¹⁶na yɩ vɛ̃ ka a yɩ tɩɛr chaar, ka a bala na sɔ̃ɔnɔ̃ a yɩ yuor yɩn turo a Kɩrɩsɩto jũu, ka vã na kpɛ ba, nɩ a ba yosɔ̃ɔ ’yɛr. ¹⁷An ɩn vɩla ala ɩ Nãaŋmɩn bɔfʊ lɛ, yɩn di dɔɔyɛ vɩla maalfʊ jũu, gar yɩn na di dɔɔyɛ dɛɛr maalfʊ jũu. ¹⁸Bojũu Kɩrɩsɩto kpi naa a yɩ yelbier jũu gbɛbʊ̃’yen tɛɛ, a ’lɔ na tor kʊ a bala na ba tor ɛ, ɩka wʊ waan yɩ Nãaŋmɩn sɛ̃. Ba kʊ naa a wʊ ãgãn, tɩchɛ ka a Nãaŋmɩn Sɩɛ sãɩ wʊ a kũu pɔ, ¹⁹a Sɩɛ nyã lɛ a Kɩrɩsɩto chiin a kpĩi tẽe na wʊ tɩ mʊɔl kʊ a kpĩisɩ bala na be a pɔɔfʊ die pɔ. ²⁰A banyãna lɛ tɔr a Nãaŋmɩn nɛɛ, tɩchɛ ka wʊ di kãnyir ka a Nowa wa maal a daka bulomtum baar. A nɩbɛ bãlãa na ɩ aniin tɛɛ wa nyɛn faafʊ a kʊ̃ɔ pɔ. ²¹A kʊ̃ɔ nyã nyɛtãan fɩka a Nãaŋmɩn kʊ̃ɔ sofʊ na faa yɩ mɩ a pʊ̃pãanyã, a ba ɩ ãgãn dɛɛr pɛɛ barfʊ lɛ ɛ, tɩchɛ a nɛɛ yɩn tɩr kʊ Nãaŋmɩn nɩ pʊtɩvɩla. Yɩ nyɛn faafʊ tu a Kɩrɩsɩto kũu irfʊ pɔ. ²²’Lɔ lɛ do a saaju tɩ jãnɛ, a Nãaŋmɩn nũsʊ̃ɔ jie ka a malakasɩ, nɩ a tʊ̃ɔfʊ dẽme, nɩ a kpãɛn dẽme ba jaa turo a wʊ nɛɛ.

¹A lɛ jũu, a Kɩrɩsɩto na di dɔɔyɛ a wʊ ãgãn pɔ, yɩ mɩ su a tãjɛbonsɩ ala gun a tɩɛr ’lɔ̃nɔ̃, bojũu a ’lɔ na di dɔɔyɛ a wʊ ãgãn pɔ ba lɛ pʊɔ yelbier pɔ ɛ. ²Ala lɛ so, wʊ ta lɛ kpɩɛrɛ a wɛr pɔ nɩ a ãgãn vɔlaa ɛ, tɩchɛ wʊ kpɩɛrɛ a lɛ a Nãaŋmɩn na bʊɔrɔ. ³Bojũu a kõro jaa, yɩ mɩ sɔ̃ɔn sɔ̃ɔ na yɩ maala a lɛ a bala na ba puoro ɛ, na maala, na baa tʊɔrɔ a ba mãɛ nyɔɔrɔ ɛ. Ka a ãgãn vɔlaa, nɩ dãburo, nɩ a pepe dib, na yɩ pʊɔ a dãnyurbo gbul pɔ, na yɩ maala tɩbɛ na sɔ̃ɔnɔ̃ a Nãaŋmɩn nɛɛ. ⁴Ban tɩɛr naa ɩka yelsãan lɛ, yɩn ba lɛ pʊɔ ba a befʊ ’lɔ̃nɔ̃ pɔ ɛ, ka ba pãa piel tʊrɔ yɩ. ⁵Tɩchɛ ban man a ba nɛɛ ’yɛr kʊ a Nãaŋmɩn na wa tɔɔr a vʊɛ nɩ a kpĩisɩ ’yɛr. ⁶A anyãna jũu lɛ so ka ba gba mɩ mʊɔl a ’yɛr nʊ̃ɔ kʊ a kpĩisɩ, ɩka ban tɔɔr a ba ’yɛr nɩtãa lɛ ban na tɔɔr nɩrɛ jaa ’yɛr, tɩchɛ ka ba kpɩɛrɛ a sɩɩr pɔ Nãaŋmɩn kaar.

⁷A bonsɩ a jaa baarfʊ tara naa, a lɛ jũu yɩ mʊ̃ɔ nɩbir na yɩ kpãa a yɩ mãɛ tʊ̃ɔ sʊɔrɔ Nãaŋmɩn. ⁸A ala na gar a jaa lɛ a anyã, yɩ chɛnɛ vɛ̃ ka a nʊ̃fʊ be a yɩ pɔ, bojũu nʊ̃fʊ ma pɔɔn yeldɛbɛ yɔɔ. ⁹Yɩ ma diere taa a yɩ yie tɩ ta ma ɩrɛ gbʊrɔ̃ gbʊrɔ̃ ɛ. ¹⁰Ɩ̃sʊɔ jaa wʊ de a Nãaŋmɩn kʊfʊ wʊn nyɛ tʊ̃nɔ̃ kʊrɔ nɩ a wʊ taaba nɩ yelmãɛ nɩ a Nãaŋmɩn wãɛfʊ a jaa. ¹¹Ala ɩ nɩrɛ jaa ’yɛrɛ na, wʊ ’yɛrɛ a Nãaŋmɩn ’yɛrbie ala. Ala ɩ wʊ ɩn tʊ̃tʊ̃nɔ̃, wʊ tʊ̃nɔ̃ nɩ a kpɛ̃ɔ ’lɔ a Nãaŋmɩn na kʊ wʊ, ka a yele a jaa pɔ, ka Nãaŋmɩn nyɛ tɩɩr tu a Yesu Kɩrɩsɩto pɔ. ’Lɔ lɛ so a tɩɩr nɩ kpɛ̃ɔ bɩbir bɩbir jaa. A ɩ a lɛ.

¹²N yɛɛr nʊ̃nʊ̃nbɔ, yɩ ta vɛ̃ ka nɛɛ ’maa yɩ nɩ a bɛɛr kaa tuo na vulo yɩ fɩka yelsãan kɔ̃ɔ lɛ ɩrɛ yɩ ɛ. ¹³Tɩchɛ yɩ chɩlɛ an ɩ yɩ pʊɔ naa a Kɩrɩsɩto dɔɔyɛ difʊ pɔ, ka nʊ̃ɔ na kpɛ yɩ a wʊ tɩɩr wa nyɩr. ¹⁴Ala ɩ ba tʊ yɩ naa yɩn bʊɔlɔ a Kɩrɩsɩto yuor jũu, Nãaŋmɩn na sʊ̃ʊ yɩ naa, bojũu Nãaŋmɩn Sɩɛ ben a yɩ ’yɔ̃ɔ. ¹⁵Ala ɩ yɩ din dɔɔyɛ, a ta ɩ fɩka nɩkʊrɔ, bɩɩ nãnyie, bɩɩ nɩdɛɛr, bɩɩ tɔ’yɔ̃ɔnbɔ lɛ yɩ ɩ ɛ. ¹⁶Tɩchɛ ala ɩ a yɩ ãsʊɔ jaa wa dire na dɔɔyɛ wʊn turo Kɩrɩsɩto jũu, wʊ ta vɛ̃ ka vã kpɛ wʊ ɛ, tɩchɛ wʊ pɛɛrɛ Nãaŋmɩn a yuor nyã wʊn di jũu. ¹⁷Bojũu a ’yɛr tɔɔrfʊ sɔ̃ɔ ta naa, ka Nãaŋmɩn na piel tɔɔrɔ a wʊ nɩbɛ ’yɛr. Ala ɩ sɩn lɛ wʊn piel, ŋmɩnɛ lɛ an kaara kʊ a bala na tɔr a Nãaŋmɩn ’yɛr nʊ̃ɔ? ¹⁸A sɛb ɩka, “Ala ɩ an ɩn kpɛ̃ɔ kʊ a nɩtor, ŋmɩnɛ lɛ an kaara kʊ a bala na ba puor ɛ, nɩ a yelbe-ɩrbɛ?” (Sʊkpar Gãn 11:31)

¹⁹A lɛ jũu, vɛ̃ a bala na dire a dɔɔyɛ a Nãaŋmɩn bɔfʊ jũu, de ba mãɛ kʊ a Nãaŋmɩn yelmãɛ sʊɔ na mɛ ba, tɩ mʊ̃ɔ nɩbir maala vɩla.

¹A maa na ɩ a nɩdiere naa nyɛ a Kɩrɩsɩto dɔɔyɛ nɩ nɩbir, naa mɩ ɩ nɩrɛ nyã na pʊɔ a tɩɩr ’lɔ na wa nyɩr, n ’yɔ̃ɔnɔ̃ na a nɩdierbe na be be a yɩ pɔ ãkpãɛn, ²ɩka ba kaara a Nãaŋmɩn piir a wʊn de ’yɔ̃ɔ a yɩ nuur pɔ, na yɩ tʊ̃nɔ̃ kaara nɩ ba, a ta ɩ fɩrfʊ ɛ, tɩchɛ a ɩ yɩ bɔfʊ, bojũu lɛ lɛ a Nãaŋmɩn bʊɔrɔ. A ta ɩ libie ’yɔ̃ɔ ɛ, tɩchɛ ka a nʊ̃mɔ̃ yɩ a tʊ̃fʊ. ³Yɩ ta pirpire a bala yɩn kaar ɛ, tɩchɛ yɩ ɩ jãnɛ kʊ a piir. ⁴A pɛchiin gbɔɔraa wa wa, yɩn nyɛn a sãyar na ɩ a tɩɩr na ba jʊɔl ɛ.

⁵Lɛ nɩ wʊ ju mɩ lɛ a yɩn bala na ɩ a pɔlbil, yɩ siir yɩ mãɛ kʊ a yɩ nɩdierbe. Yɩ jaa jaa yɩ ma siir yɩ mãɛ na yɩ ma tʊ̃nɔ̃ kʊrɔ taa, bojũu a sɛb ɩka, “Nãaŋmɩn ’laar a bala na ’mɔɔrɔ a ba mãɛ, tɩ ma sʊ̃nɔ̃ a bala na ma siir ba mãɛ.” (Sʊkpar Gãn 3:34)⁶A lɛ jũu, yɩ siir yɩ mãɛ a Nãaŋmɩn kpɛ̃ɔ sʊɔ nuur pɔ, ka wʊ ’mɔɔ yɩ a yɩ do a sɔ̃ɔ ’lɔ wʊn bʊɔrɔ. ⁷Yɩ de a yɩ yelwõnsɩ a jaa kʊ wʊ, bojũu ’lɔ lɛ ’yɔ̃ɔnɔ̃ a yɩ tɔɔ.

⁸Yɩ gu yɩ mãɛ na yɩ ’yɔ̃ɔnɔ̃ jũmɔ̃, a yɩ dɔ̃sʊɔ tɩɩ kaara naa jukpɛ̃ɛ kaar, na uoro yʊɔrɔ na wʊ pãa kaara bʊɔrɔ nɩrɛ ɩka wʊ nyɔɔ ’wɔb. ⁹Yɩ var wʊ sɔr, na yɩ ba gbɛr ara a yɩ sɔɔfʊ pɔ, bojũu yɩ bɔ̃ɔn naa ɩka a yɩ taaba na be a wɛr wʊ jaa, mɩ dire na a dɔɔyɛ nyãna tɔ yɩn dire.

¹⁰Yɩn wa di a dɔɔyɛ nyãna bãlãa a Nãaŋmɩn na ɩ a wãɛfʊ sʊɔ a ’lɔ na bʊɔl yɩ ’yɔ̃ɔ a tɩɩr nyã na ba tara baarfʊ pɔ a Kɩrɩsɩto ’yɔ̃ɔ, wʊ mãɛ na maal yɩ naa na wʊ ’yɔ̃ɔ yɩ ãkpɛ̃ɔ tɩ na wʊ vɛ̃ a yɩ ara kpɛ̃ɔ kʊ̃ dãm ɛ. ¹¹’Lɔ lɛ so a kpɛ̃ɔ bɩbir nɩ bɩbir jaa. A ɩ a lɛ.

¹²Silasɩ na ɩ a yɛbɛ yelmãɛ sʊɔ lɛ sʊ̃ʊ ma ka n sɛb a gãn bile nyãna, naa ’yɔ̃ɔn yɩ ãkpãɛn din dãasɩɛ ɩka anyãna lɛ ɩ a Nãaŋmɩn sɩrɛ wãɛfʊ. Yɩ ara kpɛ̃ɔ. ¹³A yɩ taaba pupuorbiir na be a Babilon Nãaŋmɩn na ’mataa ir yɩ, puor yɩ naa, ka a n bidaba Maakɩ mɩ puoro yɩ. ¹⁴Yɩ puor puor taa nɩ nʊ̃fʊ. Nyã’maar wʊ be a yɩn bala na be a Kɩrɩsɩto ’yɔ̃ɔ.