1 Jɔɔn

A JƆƆN GÃN NA DE NIE

¹Maa Jɔɔn sɛɛrɛ na kʊrɔ a yɩn na turo a Yesu. A ’yɛr na dɔ̃ɔ be be a wɛr pielfʊ daar, ’lɔ lɛ sɩ wõ a wʊ yele na sɩ nyɛ wʊ. Sɩ nyɛ wʊ naa nɩ a sɩ nɩbie na sɩ sɩɩr wʊ nɩ a sɩ mãɛ nuur. A ’yɛr nyã lɛ ɩ a nyɛvʊr. ²A nyɛvʊr nyã lɛ yi a Nãaŋmɩn sɛ̃ ka wʊ de wiil sɩ a sɩ nyɛ wʊ, ’lɔ lɛ sɩ dire a wʊ dãasɩɛ na sɩ mʊɔlɔ kʊrɔ yɩ ɩka ’lɔ lɛ ɩ a nyɛvʊr na ba tara baarfʊ ɛ. ’Lɔ lɛ dɔ̃ɔ be a Sãa Nãaŋmɩn sɛ̃, ka wʊ wa ir wʊ wiil sɩ. ³Sɩ ’yɛrɛ na kʊrɔ yɩ a lɛ a sɩn mãɛ na nyɛ tɩ wõ, ka a lɛ na vɛ̃ ka sɩn nɩ yɩn na tara nɛbʊ̃’yen, ka a sɩn nɩ a Sãa Nãaŋmɩn ’matãan a wʊ Bie Yesu Kɩrɩsɩto tara a nɛbʊ̃’yen. ⁴A nyã lɛ sɩ sɛɛrɛ kʊrɔ yɩ kaa sɩ chɩlfʊ na sɛɛ.

⁵A ’yɛr wʊn kʊ sɩ ka sɩ mʊɔlɔ kʊrɔ yɩ nɩ nyã, Nãaŋmɩn ɩn chãa ka libe ba be a wʊ ’yɔ̃ɔ jaa ɛ. ⁶Ala ɩ sɩ ’yɛr naa ɩka sɩn nɩ ’lɔ tara na nɛbʊ̃’yen tɩ chɛnɛ chiine a libe pɔ, sɩ ɩn jir ŋmarba na saa turo a yelmãɛ ɛ. ⁷Tɩchɛ ala ɩ sɩ chiine naa a chãa pɔ nɩtãa lɛ a ’lɔ na be a chãa pɔ, sɩn tara na nɛbʊ̃’yen ka a wʊ Bie Yesu jãɩ pɛɛ a sɩ yeldɛbɛ a jaa bar. ⁸Ala ɩ sɩ ’yɛr ɩka saa tara yeldɛɛr jaa ɛ, sɩ bɛlɛ na sɩ mãɛ, na saa tara yelmãɛ ɛ. ⁹Ala ɩ sɩ ’yɛr naa a sɩ yeldɛbɛ kʊ Nãaŋmɩn, wʊn vɛ̃n kʊ sɩ, tɩ pɛɛ a sɩ yeldɛbɛ a jaa bar, bojũu Nãaŋmɩn ɩn yelmãɛ sʊɔ nɩ nɩtor. ¹⁰Ala ɩ sɩ ’yɛr naa ɩka saa maal yeldɛɛr jaa ɛ, sɩ bʊɔlɔ na Nãaŋmɩn jir ŋmara, na saa de a wʊ ’yɛr a sɩ nyãa pɔ ɛ.

¹N bibiir, n sɛɛrɛ naa anyã kʊrɔ yɩ ka yɩ ãsʊɔ jaa taa wa ɩrɛ yeldɛɛr ɛ, tɩchɛ ala ɩ ãsʊɔ wa ɩn yeldɛɛr, sɩ tara na po pire na be a Sãa sɛ̃. ’Lɔ lɛ ɩ a Yesu Kɩrɩsɩto na ɩ a Torfʊ Sʊɔ. ²’Lɔ lɛ lo a sɩ yeldɛbɛ bɔɔr kʊ sɩ, a ba ɩ sɩn tɛɛ ɛ, tɩchɛ a wɛr wʊ jaa.

³A nɩtɔ̃ lɛ sɩ de bɔ̃ɔn ɩka sɩ be naa a wʊ sɛ̃, sɩn turo a wʊ nɛbinsɩ jũu. ⁴Nɩrɛ ’yɛr ɩka wʊ bɔ̃ɔn Nãaŋmɩn tɩ ba ɩrɛ a lɛ wʊn bin a nɛɛ ɛ, a nɩnyɩnɛ ɩn jir ŋmara na waa tara yelmãɛ ɛ. ⁵Tɩchɛ nɩrɛ jaa na turo a Nãaŋmɩn ’yɛr, sɩrɛ jaa Nãaŋmɩn nʊ̃fʊ sɛɛn a wʊ pɔ. Nɩtɔ̃ lɛ sɩ de bɔ̃ɔn ɩka sɩ be naa a wʊ pɔ. ⁶Nɩrɛ jaa na ’yɛr ɩka wʊ be naa Nãaŋmɩn ’yɔ̃ɔ, wʊ chiine a lɛ a Yesu na dɔ̃ɔ chen.

⁷N barmɩne, a ba ɩ nɛbin paalaa lɛ n sɛɛrɛ kʊrɔ yɩ ɛ, tɩchɛ a bʊ̃koraa ’lɔ yɩn tara yi a pielfʊ lɛ, ’lɔ lɛ ɩ a nɛkoraa yɩn wõ. ⁸Tɩchɛ wʊ ɩn bʊ̃paalaa, bojũu a ɩn sɩrɛ a Yesu ’yɔ̃ɔ, naa mɩ ɩ sɩrɛ a yɩ ’yɔ̃ɔ, bojũu a libe tɔɔn ’laa, ka a sɩrɛ chãa chaara. ⁹Nɩrɛ jaa wa ’yɛr ɩka maa ben chãa pɔ, tɩ ’laar a wʊ yɛbɛ, wʊ chɛnɛ na be a libe pɔ. ¹⁰Nɩrɛ ’lɔ jaa na nʊ̃ a wʊ yɛbɛ ben a chãa pɔ, ka bon jaa ba be be na vɛ̃ ka wʊ ŋme gbɛr ɛ. ¹¹Tɩchɛ nɩrɛ ’lɔ jaa na ’laar a wʊ yɛbɛ ben a libe pɔ, na wʊ yʊɔrɔ a libe pɔ, na waa bɔ̃ɔ a jie wʊn chiine ɛ, bojũu a libe jɔ̃ɔ wʊ naa.

¹²N bibiir, n sɛɛrɛ na a gãn nyã kʊrɔ yɩ bojũu Nãaŋmɩn vɛ̃ naa a yɩ yeldɛbɛ kʊ yɩ a lɛ a Yesu na ɩ kʊ yɩ jũu. ¹³Sãamɩne, n sɛɛrɛ na kʊrɔ yɩ bojũu, yɩ bɔ̃ɔn a ’lɔ na yi a wɛr pielfʊ. Pɔlbil, n sɛɛrɛ na kʊrɔ yɩ bojũu yɩ tʊ̃ɔn a dɛɛr sʊɔ. Naa mɩ sɛɛrɛ kʊrɔ a yɩn bibiir bojũu yɩ bɔ̃ɔn a Sãa Nãaŋmɩn. ¹⁴N sɛb kʊ a yɩn sãamɩne bojũu, yɩ bɔ̃ɔn a ’lɔ na yi a wɛr pielfʊ daar. N sɛb kʊ a yɩn pɔlbil a Nãaŋmɩn ’yɛr na be a yɩ ’yɔ̃ɔ jũu, yɩ kpɛ̃mɛ na, na yɩ jɛb tʊ̃ɔ a dɛɛr sʊɔ.

¹⁵Yɩ taa ɩrɛ wa nʊ̃nɔ̃ a Nãaŋmɩn dɔ̃dɔ̃mɔ̃sɩ bɩɩ bon jaa ban tara ɛ. Ala ɩ ãsʊɔ jaa wa nʊ̃n a lɛ, a Sãa Nãaŋmɩn nʊ̃fʊ ba be a wʊ ’yɔ̃ɔ ɛ. ¹⁶Bojũu a bonsɩ anyã sɩn nyɛ ɩ naa a ãgãn nyã vɔlaa nɩ a nɩbie vɔlaa bɩɩ tara jã jɩɩr nɩ bʊ̃tarsɩ. A nyãna a jaa wʊn na ɩrɛ ba yi a Sãa Nãaŋmɩn sɛ̃ ɛ, tɩchɛ a yi naa dɔ̃dɔ̃mɔ̃sɩ sɛ̃. ¹⁷A bɔdɛbɛ anyã mɩ poro na chiine, tɩchɛ nɩrɛ ’lɔ jaa na ɩrɛ a Nãaŋmɩn bɔfʊ na ben be sɔ̃ɔ jaa.

¹⁸N bibiir, a wɛr baarfʊ ta naa, nɩtãa lɛ yɩn dɔ̃ɔ wõ ɩka a bala na ’laar a Kɩrɩsɩto na wa naa, ba yɔɔ lɛ a banyãna na be ka gba. Ala lɛ sɩ de bɔ̃ɔn ɩka a baraa sɔ̃ɔ lɛ. ¹⁹A nɩbɛ banyãna dɔ̃ɔ be a sɩ sɛ̃ tɩ wa yi. Ka a ba yifʊ wiil ɩka baa tara sɩ nɩ nɛbʊ̃’yen ɛ, sɩn nɩ bala ta ɩ bʊ̃’yen, ban taa be naa sɩ sɛ̃, tɩchɛ a ba yifʊ wiil ɩka baa pʊɔ sɩ ɛ. ²⁰Tɩchɛ yɩn ’lɔ, Yesu kʊ yɩ naa a wʊ Sɩɛ ka yɩ jaa bɔ̃ɔ a yelmãɛ. ²¹N ba sɛɛrɛ kʊrɔ yɩ bojũu yɩn ba bɔ̃ɔ a yelmãɛ ɛ, tɩchɛ yɩn bɔ̃ɔ a yelmãɛ lɛ. Bojũu yɩ mɩ bɔ̃ɔn a jir na tɛɛ nɩ yelmãɛ.

²²An lɛ ɩ a jir ŋmara? Nɩrɛ ’lɔ na ’yɛr ɩka a Yesu ba ɩ a Nɩ-iraa ɛ, a nɩrɛ ’lɔ lɛ ’laar a Kɩrɩsɩto. A nɩnyɩnɛ tɔr naa a Sãa nɩ a Bie jaa. ²³Nɩrɛ ’lɔ na tɔr a Bie mɩ tɔr a Sãa, nɩrɛ ’lɔ na ’yɛr chãa pɔ ɩka Yesu lɛ a Nãaŋmɩn Bie, tara na nɛbʊ̃’yen nɩ a Sãa Nãaŋmɩn. ²⁴Yɩ chɛnɛ tara a lɛ nɛ yɩn wõ a Yesu ’yɛr a pielfʊ, yɩn wa chɛnɛ tara a lɛ, yɩn tara na nɛbʊ̃’yen nɩ a Sãa nɩ a wʊ Bie. ²⁵Nɩtɔ̃ lɛ a Nãaŋmɩn ’yɛr ɩka wʊn ɩ naa wʊn vɛ̃ naa ka sɩ tara nyɛvʊr na ba tara baarfʊ ɛ.

²⁶N sɛɛrɛ na a anyãna kʊrɔ yɩ ɩka yɩ bɔ̃ɔnɔ̃ sʊ̃ nɩ a bala na bar yɩ tɩ yi, ba bʊɔrɔ naa ɩka ba bɛl yɩ yin. ²⁷A yɩn ’lɔ, ba kʊ̃ tʊ̃ɔ bɛl yɩ ɛ, bojũu Yesu kʊ yɩ naa a Sɩɛ ka wʊ be a yɩ ’yɔ̃ɔ. A Sɩɛ na ɩ yelmãɛ na wile yɩ jũu, yaa lɛ bʊɔrɔ ɩka nɩrɛ wʊ wiil yɩ a yelmãɛ go ɛ, tɩchɛ a Sɩɛ a Yesu na kʊ yɩ vɛ̃ naa ka yɩ bɔ̃ɔ a yelmãɛ, ka ala mɩ a Sɩɛ na wile ɩ yelmãɛ, jir jaa ba be be ɛ. A lɛ jũu, yɩ chɛnɛ tara a Yesu nɩ nɛbʊ̃’yen nɩtãa lɛ a Sɩɛ na ’yɛr yɩ.

²⁸A lɛ jũu n bibiir, yɩ chɛnɛ tara a Yesu nɩ nɛbʊ̃’yen, ka ’lɔ wa yi a saaju lɩɛb waara a wɛr pɔ, sɩn tara na nyãa ka dãbãɛ kʊ̃ kʊrɔ sɩ a wʊ tuorfʊ ɛ. ²⁹Yɩ bɔ̃ɔn naa ɩka a Yesu yele tor naa, nɩrɛ jaa mɩ na maala a lɛ, mɩ ɩ naa a Nãaŋmɩn bie.

¹Nyɛ lɛ a sɩ Sãa na nʊ̃ sɩ jã. Wʊ sɔɔn bʊɔlɔ sɩ a Nãaŋmɩn bibiir, ka sɩ mɩ sɩr ɩ! A lɛ jũu, a wɛr nɩbɛ ba bɔ̃ɔ wʊ ɛ, ala lɛ so ban ba bɔ̃ɔ sɩ ɛ. ²N barmɩne, pʊ̃pãanyã, sɩ ɩ naa Nãaŋmɩn bibiir, saa bɔ̃ɔ lɛ sɩn na be daar kɔ̃ɔ ɛ, tɩchɛ sɩ bɔ̃ɔn naa ɩka, a Yesu wa lɩɛb wa a wɛr nyã pɔ, sɩn nyɛ naa a lɛ wʊn na be, na sɩ kaara a wʊ kaar. ³Yɩ ãsʊɔ jaa na tara a tɩɛrtɔ nyãna a Yesu ’yɔ̃ɔ, wʊ ir wʊ mãɛ yin dɛɛr pɔ, nɩtãa lɛ a Yesu na ɩ chɛchɛ.

⁴Nɩrɛ ’lɔ jaa na chɛnɛ ɩrɛ yeldɛɛr, a nɩnyɩnɛ sɔ̃ɔnɔ̃ naa a Nãaŋmɩn nɛbinsɩ ala wʊn bin, bojũu waa tara Nãaŋmɩn nɩ nɛbʊ̃’yen ɛ. ⁵Tɩchɛ yɩ bɔ̃ɔn ɩka Yesu ba maal dɛɛr ɛ, a lɛ ka wʊ wa ɩka wʊ wa de a sɩ dɛbɛ bar. ⁶A lɛ nɩrɛ ’lɔ jaa na tara Yesu nɩ nɛbʊ̃’yen, wʊ maa lɛ chɛnɛ ɩrɛ yeldɛɛr go ɛ, tɩchɛ a nɩnyɩnɛ wa chɛnɛ ɩrɛ yeldɛɛr, waa bɔ̃ɔ a Yesu nɩ a nɩnyɩnɛ wʊn ɩ ɛ.

⁷N bibiir yɩ bɔ̃ɔnɔ̃ sʊ̃, ka nɩrɛ jaa taa bɛlɛ yɩ ɛ. Nɩrɛ ’lɔ na maala a lɛ na tor, wʊ ɩ naa nɩtor nɩtãa lɛ Yesu na ɩ nɩtor. ⁸Nɩrɛ ’lɔ jaa na chɛnɛ ɩrɛ yeldɛɛr yi naa a tɩɩ sɛ̃, bojũu ’lɔ lɛ ɩrɛ yeldɛbɛ yi a wɛr pielfʊ. Ala lɛ so ka Yesu na ɩ Nãaŋmɩn Bie wa ɩka wʊ wa sɔ̃ɔ a tɩɩ tʊ̃mɔ̃. ⁹Nɩrɛ ’lɔ jaa na wa ɩ Nãaŋmɩn bie, maa lɛ sɛɛ ɩka wʊ lɛ ɩrɛ yeldɛbɛ go ɛ, bojũu Nãaŋmɩn befʊ be naa a wʊ yɔ̃ɔ. Wʊ kʊ̃ lɛ chɛnɛ ɩrɛ yeldɛbɛ go ɛ, bojũu wʊ ɩn Nãaŋmɩn bie. ¹⁰Nɩtɔ̃ lɛ sɩ de bɔ̃ɔn a Nãaŋmɩn bibiir nɩ a Tɩɩ bibiir. Nɩrɛ ’lɔ jaa na ba wa turo a Nãaŋmɩn nɛɛ ’lɔ wʊn bin bɩɩ na waa lɛ nʊ̃ a wʊ yɛɛr, waa ɩ Nãaŋmɩn bie ɛ.

¹¹An yi a daar ’lɔ jaa yɩn piel sɔɔ Yesu, yɩ wõ naa a Nãaŋmɩn ’yɛr bie na ’yɛr ɩka sɩ nʊ̃ taa. ¹²Yɩ ta ɩ a sɩ kaara a Kain kaar ɛ, wʊ tara na a dɛɛr sʊɔ tɩɛr na wʊ kʊ a wʊ yɛbile. Bo lɛ so wʊn kʊ a yɛbile? Bojũu a Kain tʊ̃mɔ̃ ɩn dɛɛr, tɩchɛ ka a wʊ yɛbile tʊ̃mɔ̃ tor. 3:12 Kain ɩn a Adama nɩ a Hawa bidadɔ̃ɔ. Nyuur jũu, wʊ kʊn a wʊ yɛbile. (A Pielfʊ Gãn 4:1-16)

¹³N yɛɛr, yɩ ta vɛ̃ ka a fɛr yɩ ala ɩ a nɩbɛ na be a wɛr pɔ wa ’laar yɩ naa ɛ. ¹⁴Sɩ bɔ̃ɔn nara ɩka sɩ nʊ̃ naa a sɩ taaba. A wiil ɩka sɩ yin kũu pɔ, tɩ kpɛ nyɛvʊr na ba tara baarfʊ pɔ. Nɩrɛ ’lɔ na ba nʊ̃ a wʊ yɛbɛ ɛ, wʊ chɛnɛ na be kũu pɔ. ¹⁵Nɩrɛ ’lɔ jaa na ’laar a wʊ yɛɛr ɩn nɩkʊrɔ a wʊ nyãa pɔ, ka yɩ mɩ bɔ̃ɔn ɩka nɩkʊrɔ ba tara nyɛvʊr na ba tara baarfʊ ɛ.

¹⁶Sɩ bɔ̃ɔn lɛ a nʊ̃fʊ na be, bojũu Yesu sɔɔn kpi kʊ sɩ, ka a mɩ sɛɛ ɩka, sɩ mɩ sɔɔ kpi kʊ a sɩ yɛɛr. ¹⁷Ala ɩ a yɩ ãsʊɔ tara naa ka a sɛɛn wʊ, tɩ nyɛ a wʊ taa yɛɛr an wõnõ ka wʊ lɩɛb puor yɔ̃ɔ ba, a Nãaŋmɩn nʊ̃fʊ kʊ̃ tʊ̃ɔ be a wʊ sʊɔ ’yɔ̃ɔ ɛ. ¹⁸N bibiir, yɩ ta vɛ̃ ka sɩ nʊ̃fʊ ɩ ’yɛrbie nɩ jãlbir ’yɛrbie ɛ, tɩchɛ yɩ ɩ ka sɩ sʊ̃nɔ̃ taa nɩtãa lɛ a Nãaŋmɩn na nʊ̃ sɩ sɩrɛ jaa.

¹⁹A sɩ befʊ pɔ lɛ sɩn bɔ̃ɔ ɩka sɩ be naa a yelmãɛ pɔ sɔ̃ɔ ’lɔ jaa sɩn wa ara a Nãaŋmɩn niem sʊɔrɔ wʊ, sɩ kʊ̃ lɛ joro dãbãɛ ɛ, ²⁰ala gba ɩ a sɩ tɩɛr ’yɛr ɩka sɩ maal dɛɛr. Bojũu Nãaŋmɩn bɔ̃ɔn yele jaa a sɩ nyãn pɔ, na wʊ bɔ̃ɔ yele jaa sɩn ɩrɛ.

²¹N barmɩne, ala ɩ sɩ bɔ̃ɔn naa a sɩ tɩɛr pɔ, ɩka sɩ maa chɛnɛ maala dɛɛr ɛ, sɩn wa sʊɔrɔ Nãaŋmɩn, sɩ kʊ̃ joro dãbãɛ ɛ, ²²sɩn nyɛn bon jaa sɩn sʊɔr yi a wʊ sɛ̃, bojũu sɩ turo naa a wʊ nɛɛ na sɩ ɩrɛ a lɛ na pɛlɛ a wʊ pʊɔ. ²³Nãaŋmɩn nɛɛ wʊn bin nɩ nyã, ɩka sɩ sɔɔ a wʊ Bie Yesu Kɩrɩsɩto yuor na sɩ nʊ̃ a sɩ taaba, nɩtãa a lɛ wʊn ’yɛr sɩ. ²⁴Bala jaa na turo a Nãaŋmɩn nɛɛ wʊn bin, ba ben a wʊ ’yɔ̃ɔ, ka wʊ mɩ be a ba ’yɔ̃ɔ. Sɩ bɔ̃ɔn naa ɩka wʊ ben a sɩ ’yɔ̃ɔ, a Sɩɛ ’lɔ wʊn de kʊ sɩ jũu.

¹N barmɩne, yɩ taa ɩrɛ wa sɔɔ nɩrɛ jaa na ’yɛr ɩka wʊ tara na a Nãaŋmɩn Sɩɛ ɛ, tɩchɛ yɩ bɛɛr a nɩnyɩnɛ ’lɔ kaa, ka ala ɩ a ’yɛr wʊn ’yɛrɛ yin a Nãaŋmɩn sɛ̃. Bojũu jir ’yɛ’yɛrbɛ yi naa jie jaa na ba ’yɛrɛ ɩka a lɛ ban ’yɛrɛ Nãaŋmɩn lɛ kʊ ba. ²Nɩtɔ̃ lɛ yɩn de bɔ̃ɔn a nɩrɛ ’lɔ na yi a Nãaŋmɩn sɛ̃, nɩrɛ ’lɔ nɩ wa ’yɛr ɩka Yesu wa naa a wɛr pɔ nɩtãa nɩsaal, a nɩrɛ ’lɔ lɛ yi a Nãaŋmɩn sɛ̃. ³Nɩrɛ jaa wa tɔr a lɛ ba yi Nãaŋmɩn sɛ̃ ɛ, a nɩrɛ nyã lɛ ’laar a Kɩrɩsɩto, a ’lɔ yɩn wõ ɩka wʊn wa naa, ’lɔ lɛ be be a wɛr pɔ a pʊ̃pãanyã.

⁴N bibiir, yɩn ’lɔ ɩn Nãaŋmɩn nɩbɛ na yɩ tʊ̃ɔ ba, bojũu a Nãaŋmɩn Sɩɛ ’lɔ na be a yɩ pɔ, bɛrma naa gar a dɛɛr sʊɔ ’lɔ na be a wɛr pɔ. ⁵A jir dẽme banyãna na ’yɛr ɩka Nãaŋmɩn lɛ kʊ ba a wiilfʊ anyãna ɩ naa a wɛr nyã nɩbɛ. Ka a ba wiilfʊ ɩ a wɛr nyã pɔ wiilfʊ, ka a bala na ba ɩ Nãaŋmɩn nɩbɛ ɛ, ma sɔɔ a ba wiilfʊ. ⁶Sɩn ’lɔ ɩn naa a Nãaŋmɩn nɩbɛ. Nɩrɛ ’lɔ jaa na bɔ̃ɔ Nãaŋmɩn, ma sɔɔ naa a lɛ sɩn wile, tɩ nɩrɛ ’lɔ na ba bɔ̃ɔ Nãaŋmɩn ɛ, maa sɔɔ a lɛ sɩn wile ɛ. Nɩtɔ̃ lɛ sɩn tʊ̃ɔ bɔ̃ɔn ka a nɩnyɩnɛ na ’yɛrɛ tara naa Nãaŋmɩn Sɩɛ ’lɔ na ɩ a yelmãɛ, bɩɩ nɩrɛ ’lɔ na yi a Satan sɛ̃ na ɩ a jir ŋmara.

⁷N barmɩne, yɩ vɛ̃ a sɩ wile taa nʊ̃fʊ. N ’yɛr naa a nɩtɔ̃ bojũu Nãaŋmɩn lɛ ma vɛ̃ a sɩ ma tʊ̃ɔ nʊ̃ taa. Nɩrɛ ’lɔ jaa na wa nʊ̃ a wʊ tɔ sʊɔ, a wiil ɩka Nãaŋmɩn bie lɛ wʊ ɩ na wʊ bɔ̃ɔ Nãaŋmɩn. ⁸Nɩrɛ ’lɔ jaa na baa wa nʊ̃ a wʊ taaba ɛ, ba bɔ̃ɔ Nãaŋmɩn ɛ, bojũu Nãaŋmɩn befʊ wʊ jaa ɩn nʊ̃fʊ. ⁹A sɔr nyã lɛ Nãaŋmɩn tu wiil a wʊ nʊ̃fʊ kʊ sɩ. Wʊ vɛ̃n a wʊ Bibʊ̃’yen tɛɛ ka wʊ wa a wɛr pɔ, a wʊ jũu, sɩ tara na a yelmãɛ nyɛvʊr. ¹⁰Nɩtɔ̃ lɛ a nʊ̃fʊ be, a ba ɩ sɩn lɛ nʊ̃ Nãaŋmɩn ɛ, tɩchɛ ’lɔ lɛ nʊ̃ sɩ, na wʊ tʊ̃ a wʊ Bie ka wʊ wa lo a sɩ yeldɛbɛ bɔɔr kʊ sɩ.

¹¹N barmɩne, an ɩ Nãaŋmɩn lɛ nʊ̃ sɩ a nɩtɔ̃, a mɩ sɛɛ naa ɩka, sɩ mɩ nʊ̃ taa. ¹²Nɩrɛ jaa ba nyɛ Nãaŋmɩn lɛ wʊn be ɛ, tɩchɛ sɩn wa nʊ̃ taa, sɩn nɩ Nãaŋmɩn tara na nɛbʊ̃’yen. Ka a Nãaŋmɩn nʊ̃fʊ ’lɔ na be a sɩ ’yɔ̃ɔ chaar kʊ a nɩbɛ.

¹³Nãaŋmɩn kʊ sɩ naa a wʊ Sɩɛ, a lɛ jũu lɛ sɩ bɔ̃ɔn ɩka, Nãaŋmɩn ben a sɩ ’yɔ̃ɔ, ka sɩ mɩ be a wʊ ’yɔ̃ɔ, ala lɛ so sɩn nɩ Nãaŋmɩn na tara nɛbʊ̃’yen. ¹⁴Sɩ nyɛ naa na sɩ mɩ di dãasɩɛ ɩka a Sãa tʊ̃ naa a wʊ Bie ka wʊ wa faa a wɛr nɩbɛ. ¹⁵Nãaŋmɩn tara na nɛbʊ̃’yen nɩ nɩrɛ nyã na ’yɛr chãa pɔ, tɩ sɔɔ ɩka Yesu ɩ naa Nãaŋmɩn Bie, ka sɩ bɔ̃ɔn ɩka Nãaŋmɩn nɩ a nɩnyɩnɛ tara na nɛbʊ̃’yen. ¹⁶A lɛ sɩn ’lɔ, sɩ bɔ̃ɔn naa na sɩ sɔɔ de ɩka, Nãaŋmɩn nʊ̃ sɩn sɔ̃ɔ jaa. Nãaŋmɩn ɩn nʊ̃fʊ sʊɔ. Nɩrɛ mɩ na nʊ̃ Nãaŋmɩn nɩ a wʊ taaba, wʊ ben Nãaŋmɩn ’yɔ̃ɔ, ka Nãaŋmɩn mɩ be a wʊ ’yɔ̃ɔ.

¹⁷Sɩn ’lɔ a Nãaŋmɩn nʊ̃fʊ chaara a sɩ pɔ, ka dãbãɛ kʊ̃ kʊrɔ sɩ a sɔ̃ɔ ’lɔ sɩn wa ara a wʊ niem a ’yɛr tɔɔrfʊ daar ɛ. Bojũu a wɛr nyã pɔ sɩ kaar naa nɩtãa Yesu. ¹⁸Dãbãɛ ba be nʊ̃fʊ pɔ ɛ, tɩchɛ nʊ̃fʊ na chaar ma diin dãbãɛ bar, bojũu dãbãɛ ma kpɛ̃n nɩrɛ wʊn joro gefʊ. Nʊ̃fʊ mɩ na chaar, ba joro dãbãɛ ɛ.

¹⁹Bojũu Nãaŋmɩn lɛ de nie nʊ̃ sɩ, ala lɛ so a sɩ mɩ nʊ̃ wʊ. ²⁰Ala ɩ nɩrɛ ’yɛr ɩka wʊ nʊ̃n Nãaŋmɩn, tɩ chɛnɛ ’laar a wʊ yɛɛr, a nɩnyɩnɛ ’lɔ̃nɔ̃ ɩn jir ŋmara. Bojũu nɩrɛ ’lɔ jaa na ba nʊ̃ a wʊ tɔ sʊɔ wʊn nyɛn nɩbir, kʊ̃ tʊ̃ɔ nʊ̃ Nãaŋmɩn wʊn ba nyɛn nɩbir ɛ. ²¹A nɛɛ lɛ a nyã a Nãaŋmɩn na ’yɛr bin, nɩrɛ ’lɔ jaa na nʊ̃ a ’lɔ Nãaŋmɩn sɛɛ naa ɩka wʊ nʊ̃ a wʊ taaba.

¹Nɩrɛ ’lɔ jaa na sɔɔ ɩka Yesu lɛ ɩ a Nɩ-iraa, ɩ naa Nãaŋmɩn bie. Nɩrɛ ’lɔ na nʊ̃ a sãa mɩ nʊ̃ naa a bie. ²Nɩtɔ̃ lɛ sɩn de bɔ̃ɔn ɩka sɩ nʊ̃ naa a Nãaŋmɩn bibiir ala ɩ sɩ nʊ̃n a Nãaŋmɩn na sɩ turo a wʊ nɛɛ wʊn bin. ³Nɩtɔ̃ lɛ sɩn de bɔ̃ɔn ɩka sɩ nʊ̃n Nãaŋmɩn sɩrɛ jaa, ala ɩ sɩ tun a lɛ jaa wʊn ’yɛr ka sɩ tu. A ba ɩ tuo ka sɩ na tu a lɛ jaa wʊn ’yɛr ɩka sɩ tu ɛ. ⁴Bojũu nɩrɛ jaa na ɩ Nãaŋmɩn bie ma lɩɛb puor ’yɔ̃ɔ a sɔr dɛbɛ ala a nɩbɛ na turo. A lɛ vɛ̃ naa, ka wʊ ma tʊ̃ɔ tɔr a sɔr dɛbɛ ala a nɩbɛ na turo, Yesu wʊn sɔɔ jũu. ⁵An lɛ na tʊ̃ɔ lɩɛb puor ’yɔ̃ɔ a wɛr? Nɩrɛ ’lɔ tɛɛ na sɔɔ ɩka Yesu lɛ ɩ a Nãaŋmɩn Bie.

⁶A Yesu Kɩrɩsɩto nyã lɛ wa a ba so wʊ Nãaŋmɩn kʊ̃ɔ nɩ a wʊ jãɩ. Waa so a kʊ̃ɔ tɛɛ ɛ, tɩ wʊ kpi naa na wʊ kpaar a wʊ jãɩ, ka a Sɩɛ mɩ di a wʊ dãasɩɛ, bojũu Nãaŋmɩn Sɩɛ ma ’yɛrɛ naa yelmãɛ. ⁷Bojũu dãasɩɛsɩ ata lɛ be be, ⁸a Sɩɛ, nɩ a kʊ̃ɔ, nɩ a jãɩ, ka a jaa ata dãasɩɛ ɩ nɛbʊ̃’yen. ⁹Ala ɩ sɩ ma sɔɔ naa nɩsaal dãasɩɛ, sɩn sɔɔ naa Nãaŋmɩn dãasɩɛ ’lɔ wʊn di a wʊ Bie ’yɔ̃ɔ, bojũu Nãaŋmɩn dãasɩɛ bɛrma naa gar nɩsaal dãasɩɛ.

¹⁰Nɩrɛ ’lɔ jaa na sɔɔ a Nãaŋmɩn Bie, a dãasɩɛ nyã be naa a wʊ nyãa pɔ. Nɩrɛ nyã jaa na ba wa sɔɔ Nãaŋmɩn ɛ, wʊ bʊɔl wʊn jir ŋmara bojũu waa sɔɔ a dãasɩɛ wʊn di a wʊ Bie ’yɔ̃ɔ ɛ. ¹¹A dãasɩɛ nɩ nyã, Nãaŋmɩn kʊ sɩ naa nyɛvʊr na ba tara baarfʊ ɛ, ka a nyɛvʊr nyã be a wʊ Bie ’yɔ̃ɔ. ¹²Nɩrɛ ’lɔ na tara a Bie, tara na nyɛvʊr na ba tara baarfʊ ɛ. Nɩrɛ ’lɔ na ba wa tara a Bie ɛ, ba tara nyɛvʊr ɛ.

¹³N sɛb kʊ a yɩn bala na sɔɔ a Nãaŋmɩn Bie yuor, ka yɩn bɔ̃ɔ ɩka yɩ tara na nyɛvʊr na ba tara baarfʊ ɛ. ¹⁴A ’lafʊ nyã lɛ sɩ tara ɩka, sɩn wa sʊɔr Nãaŋmɩn a lɛ wʊn bʊɔrɔ, wʊn wõ naa naa. ¹⁵Ka ala ɩ sɩ bɔ̃ɔn na ɩka Nãaŋmɩn wõ naa a lɛ sɩn ma sʊɔr wʊ, sɩ bɔ̃ɔn naa ɩka sɩ tara na bon jaa sɩn sʊɔr wʊ. ¹⁶Ala ɩ yɩ wa nyɛ naa a yɩ tɔ sʊɔ na ɩrɛ yeldɛɛr kɔ̃ɔ na kʊ̃ sʊ̃ʊ wʊ ɛ, yɩ sʊɔr Nãaŋmɩn ka wʊ vɛ̃ kʊ wʊ. Tɩchɛ yeldɛbɛ amɩne ben be fʊn na ɩ ka Nãaŋmɩn kʊ̃ vɛ̃ kʊ fʊ ɛ, n ba ’yɛr ɩka yɩ sʊɔr a ala ɛ. ¹⁷Yeldɛbɛ a jaa ɩn yelbier, tɩchɛ yelbier a jaa baa kʊrɔ kũu ɛ.

¹⁸Sɩn bɔ̃ɔn naa ɩka nɩrɛ ’lɔ mɩ na wa ɩ Nãaŋmɩn bie, kʊ̃ lɛ chɛnɛ ɩrɛ yeldɛɛr ɛ, Nãaŋmɩn Bie na gu ba naa ka a dɛɛr sʊɔ kʊ̃ sɩɩr ba ɛ. ¹⁹Sɩn bɔ̃ɔn naa ɩka sɩ ɩn Nãaŋmɩn bibiir, ka a wɛr wʊ jaa be a dɛɛr sʊɔ tʊ̃ɔfʊ pɔ. ²⁰Sɩ mɩ bɔ̃ɔn naa ɩka Nãaŋmɩn Bie wa naa, ’lɔ lɛ vɛ̃ ka sɩ bɔ̃ɔ a Nãaŋmɩn nyã na ɩ a yelmãɛ. Sɩ be naa a Nãaŋmɩn nyã nɩ a wʊ Bie Yesu Kɩrɩsɩto ’yɔ̃ɔ. ’Lɔ lɛ ɩ a yelmãɛ Nãaŋmɩn nɩ a nyɛvʊr na ba tara baarfʊ ɛ. ²¹N bibiir, yɩ tɔɔ yɩ mãɛ yin bʊtɩbɛ jaa pɔ.