FILIPAE

FILIPAE

¹ Mi Pol, wetem Timoti, mitufala i man blong wok blong Jisas Kraes, mitufala i talem halo long yufala long Filipae we yufala i joen long Jisas Kraes, yufala i Kristin man. Mo mitufala i talem halo long yufala, ol bisop mo ol dikon tu. ² Prea blong mitufala, we God, Papa blong yumi, wetem Jisas Kraes, Masta blong yumi, tufala bambae i stap givhan long yufala long gladhat blong tufala, tufala i putum pis i stap wetem yufala. ³ Oltaem, taem mi mi stap tingbaot yufala evriwan, mi stap talem tangkiu long God from yufala. ⁴ Mo taem mi prea from yufala, oltaem mi stap prea, we tingting blong mi i glad tumas, ⁵ from we mi stap tingbaot fasin blong yufala, we yufala i stap givhan long mi long ol wok blong gud nius blong Kraes, i stat long stat blong hem, i kam kasem tede. ⁶ Mo mi savegud se God ya we i statem gudfala wok ya long yufala fastaem, hem bambae i save gohed long hem, gogo i finisim long Lasdei ya we bambae Jisas Kraes i jajem olgeta man long hem. ⁷ Oltaem, mi mi stap tingbaot yufala, mo i stret nomo blong mi mekem olsem, from we yufala i stap joen long mi long olgeta wok we God i givim long mi long gladhat blong hem, blong mi mekem. Naoia we mi stap long kalabus, mo bifo we mi fri blong witnes long gud nius se i tru, mo mi stap mekem ol man oli bilif strong long hem, be yufala evriwan i stap joen gud long mi long ol wok ya. ⁸ God i savegud we mi wantem tumas blong luk yufala, from we mi lavem yufala tumas, olsem we Jisas Kraes i lavem yufala. ⁹ Mi mi stap prea we oltaem bambae yufala i save kam we yufala i stap lavlavem yufala moa. Mo mi prea we long fasin ya, oltaem bambae yufala i save kam waes moa, mo yufala i save luksave ¹⁰ wanem fasin we i stret gud olgeta blong yufala i save jusumaot. Nao long fasin ya, long Lasdei ya we Kraes bambae i jajem olgeta man long hem, bambae laef blong yufala i klin gud, i no gat wan man nating we i gat poen agens long yufala. ¹¹ Nao long laef blong yufala, bambae yufala i gat ol stret fasin ya we Jisas Kraes i save mekem i kamtru long laef blong yumi, blong yumi save presem God, mo blong yumi save leftemap nem blong hem i go antap oltaem. ¹² Ol brata mo sista. Mi mi wantem blong yufala i save we ol samting ya we oli kam kasem mi, oli stap givhan long wok blong gud nius blong Kraes. ¹³ Nao from ol samting ya, olgeta soldia we oli stap gad long haos blong Sisa, mo ol narafala man tu long ples ya, oli save finis we mi mi stap long kalabus, from we mi mi man blong wok blong Kraes. ¹⁴ Mo from we mi stap long kalabus, bighaf blong ol brata blong yumi oli stap bilif strong moa long Masta blong yumi. Naoia olgeta oli no moa fraet, mo oltaem oli stap mekem tingting blong olgeta i strong moa blong talemaot tok ya blong God. ¹⁵ I tru, i gat sam man we oli stap talemaot Kraes from we oli jalus long mi, nao oli stap traem mekem trabol long mi. Be i gat plante man oli stap prij, we tingting blong olgeta i stret gud nomo. ¹⁶ Olgeta ya oli stap prij olsem from we oli lavem ol man tumas, mo oli save we God i givim wok ya long mi, blong mi witnes long gud nius se i tru. ¹⁷ Be ol narafala man ya oli no mekem long gudfala tingting. Oli stap talemaot Kraes from we oli jalus long mi, nao oli wantem leftemap olgeta nomo, mo oli wantem mekem trabol bakegen long mi naoia, we mi stap long kalabus. ¹⁸ Be nating we oli stap mekem long stret fasin, no long fasin blong giaman, be oli stap talemaot Kraes, mo samting ya i stap mekem mi mi glad. Mo bambae mi save stap glad yet, ¹⁹ from we mi savegud se samting ya bambae i gat frut blong hem, we God bambae i mekem mi mi fri. Hemia bambae i kamtru, from we yufala i stap prea from mi, mo from we Spirit blong Jisas Kraes i stap givhan long mi. ²⁰ Wan samting nomo we mi mi wantem tumas, mo mi stap putum tingting blong mi long hem, hemia we bambae mi no mekem wan samting nating we mi save sem long fes blong Kraes from. Mi wantem we tingting blong mi i strong gud, nao sipos naoia, mi mi ded, no mi stap laef, be olgeta samting blong laef blong mi bambae i leftemap nem blong Kraes, olsem we mi stap mekem oltaem. ²¹ Long tingting blong mi, sipos mi mi stap laef, hemia bambae mi stap joen long Kraes, mi stap leftemap nem blong hem, mo sipos mi mi ded, bambae i gud moa. ²² Be sipos mi stap laef, hemia i min se bambae mi save mekem sam gudfala wok long wol ya. Naoia i gat tu rod long fes blong mi, mo mi mi no save wanem rod i stret blong mi jusum. Long saed blong mi, mi wantem tumas blong mi aot long laef ya blong go stap wetem Kraes, mo hemia bambae i gud moa i winim we mi stap long wol ya. ²⁴ Be mi luk se i moa gud blong mi stap yet long wol ya blong mi save givhan long yufala. ²⁵ Nao from we mi savegud se seken rod ya i win, mi save talem se bambae mi stap laef yet, nao bambae mi stap wetem yufala evriwan. Bambae mi save mekem yufala i gohed moa, yufala i harem gud moa long bilif blong yufala. ²⁶ Nao long fasin ya, taem mi kam luk yufala bakegen, bambae yufala i glad tumas, nao yufala i save presem Jisas Kraes, from we mi mi kambak long yufala bakegen. ²⁷ Yufala i mas mekem we fasin blong laef blong yufala evri dei, i stret gud long mak blong gud nius blong Kraes. Nao sipos mi kam luk yufala, no mi stap longwe yet long yufala, be bambae i sem mak nomo. Bambae mi save harem nius we yufala i gat wan tingting nomo, yufala i stap stanap strong, nao yufala i stap wok olsem wan tim nomo, blong traehad blong mekem ol man oli bilif long gud nius. ²⁸ Mo mi save harem we yufala i no seksek nating long ol enemi blong yufala, tingting blong yufala i stap strong. Fasin ya i olsem wan saen we God i soem long ol enemi ya blong yufala, se olgeta bambae oli mas lus, be hem bambae i mekem yufala i win. ²⁹ Hem bambae i mekem olsem, from we hem i makemaot wan gudfala rod blong yufala finis, i no blong yufala i bilif nomo long Kraes, be blong yufala i kasem hadtaem tu long laef blong yufala, from hem. ³⁰ Naoia, yumi evriwan i stap faet long sem faet nomo. Hemia sem faet ya we yufala i luk finis we mi mi stap faet long hem bifo, mo we mi stap faet long hem yet, olsem we yufala i stap harem.

¹ Laef ya we yufala i gat from we yufala i joen long Kraes, hem i stap mekem yufala i strong. Mo fasin ya blong God we hem i stap lavem yufala, hem i stap givhan long yufala. Tabu Spirit i stap wetem yufala. Yufala i stap mekem i gud long yufala, mo yufala i gat sore long yufala. ² Nao from samting ya, yufala i mas mekem we tingting blong yufala i kam wan, mo yufala evriwan i mas lavlavem yufala, mo yufala i mas holem fasin ya we yufala i gat wan tingting nomo. Sipos yufala i mekem olsem, bambae yufala i mekem mi mi harem gud olgeta. ³ I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala. ⁴ Mo yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo. ⁵ Tingting blong yufala i mas kam stret gud wetem tingting blong Jisas Kraes. ⁶ Fastaem, bifo olgeta, hem i olsem God nomo, be hem i no ting se hem i mas holemtaet fasin ya we hem i sem mak wetem God. ⁷ Hem nomo i lego olgeta fasin ya, nao i kam olsem man blong wok nomo. Hem i bon long wol ya, i kam man. Hem i karem fasin blong man, ⁸ mo i mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long kros. ⁹ Nao from samting ya, God i leftemap nem blong hem i go antap olgeta, i givim nem long hem we i hae moa long ol narafala nem. ¹⁰ Nao olgeta long heven, mo long wol, mo long Hom blong ol Dedman, bambae oli bodaon oli ona long nem blong hem, ¹¹ mo olgeta man bambae oli talemaot we Jisas Kraes, hem i Hae God, i Masta blong olgeta, blong leftemap nem blong God, Papa blong yumi. ¹² Ol fren blong mi. Bifo, long taem ya we mi stap yet wetem yufala, yufala i stap obei long mi, mo naoia we mi no moa stap wetem yufala, i gud moa blong yufala i obei long mi. Yufala i mas gohed blong wok had, we yufala i ona long God, mo yufala i fraet tu long hem. Yufala i mas mekem olsem, blong yufala i save finisim wok ya we hem i stap mekem blong sevem yufala. ¹³ Mi talem olsem, from we oltaem God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem. ¹⁴ Yufala i mas mekem olgeta samting long fasin ya we yufala i no toktok tumas, mo yufala i no raorao long yufala. ¹⁵ Nao long fasin ya, bambae tingting blong yufala i klin gud, mo i no gat man we i gat poen agens long yufala. Bambae yufala i olsem ol pikinini blong God we yufala i stret gud olgeta. Mo bambae yufala i givimaot tok ya blong laef long ol man ya we oli gat ol krangke fasin, mo oli agens long evri samting. Yufala i mas saenaot long medel blong olgeta, olsem ol sta long skae. Nao long fasin ya, long Lasdei ya we bambae Kraes i jajem olgeta man, be mi bambae mi save glad long yufala, from we yufala i soemaot we mi mi no resis blong nating, mo mi no hadwok blong nating nomo. ¹⁷ Fasin blong yufala blong bilif long God, hem i olsem sakrefaes we yufala i stap givim long God blong mekem wosip long hem. Nao sipos mi mi ded we blad blong mi i ron olsem wan presen blong go wetem sakrefaes ya blong yufala, be mi bambae mi glad tumas wetem yufala from samting ya. ¹⁸ Mo long sem fasin, yufala tu i mas harem gud, yufala i glad wetem mi. ¹⁹ Sipos Jisas, Masta blong yumi i glad, mi mi tingting se bambae i no longtaem, mi save sanem Timoti i kam luk yufala. Nao bambae mi save kasem sam nius blong yufala, blong mekem mi mi harem gud. ²⁰ I no gat narafala man long ples ya we i gat sem tingting we Timoti i gat, we hem i stap tingbaot yufala tumas. ²¹ Olgeta narafala man oli stap tingbaot ol wok blong olgeta nomo, be oli no save tingbaot wok blong Jisas Kraes. ²² Be hem, yufala i save we hem i soemaot fasin blong hem finis, from we hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem. ²³ Nao from samting ya, mi mi stap tingting se taem we mi save wanem we bambae i hapen long mi, bambae mi sanem hem i kam luk yufala. ²⁴ Mo mi bilif strong long Masta blong yumi, se bambae i no longtaem, mi tu mi save kam luk yufala. ²⁵ Mi mi stap tingting finis blong sanem Epafrodaetas i kambak long yufala bakegen. Hem i wan brata blong mi we mitufala i joen blong mekem sem wok, mo blong faet long sem faet. Bifo ya, yufala i sanem hem long nem blong yufala blong hem i kam givhan long mi. ²⁶ Be naoia, hem i wantem tumas blong luk yufala evriwan, mo i stap harem nogud tumas, from we yufala i harem nius ya we hem i sik. ²⁷ Yes, i tru ya. Hem i bin sik we klosap i ded, be God i sore long hem, mo i no sore long hem nomo, i sore long mi tu, nao i blokem samting ya we bambae i save mekem mi mi harem nogud moa. ²⁸ Nao from samting ya, mi mi glad moa blong sanem hem i kambak long yufala bakegen, blong taem yufala i luk hem, bambae yufala i save harem gud. Nao long fasin ya, mi tu bambae mi no moa wari, mi save harem gud bakegen. ²⁹ Yufala i mas glad blong luk hem, from we hem i joen long Masta blong yumi finis, i wan brata blong yumi. Yufala i mas ona gud long ol man olsem. ³⁰ Klosap hem i ded long wok blong Kraes, be hem i no fraet blong lusum laef blong hem, nao i gohed blong finisim ol wok blong givhan long mi, we yufala i no gat rod blong mekem.

¹ Ol brata mo sista. Lastok blong mi i olsem. Yufala ya we i joen long Masta blong yumi, yufala i mas glad. Mi mi no harem se i strong blong mi talemaot bakegen long yufala, tok ya we mi raetem finis i kam long yufala. Mo long yufala, tok ya i save mekem yufala i stap gud. ² Yufala i mas lukaot gud long olgeta ya we oli olsem wael dog nomo. Yufala i mas lukaot gud long olgeta ya we oli stap mekem ol rabis wok. Mo yufala i mas lukaot gud long olgeta ya we oli stap mekem sakomsaes long man. ³ Yumi ya nao, yumi kasem prapa sakomsaes, from we yumi joen long Spirit blong God blong mekem wosip, mo yumi save tok flas from Jisas Kraes nomo. Yumi no save putum tingting blong yumi i stap long ol samting blong bodi nomo. ⁴ Yes i tru, mi mi gat raet blong putum tingting blong mi long ol samting olsem. Sipos i gat man we i ting se hem i save putum tingting blong hem long ol samting blong bodi blong hem, mi bambae mi save winim hem. ⁵ Mi mi wan laen blong Isrel we mi kamaot long laen blong Benjamin. Mama mo papa blong mi, tufala i laen blong Isrel, mo from samting ya, mi mi laen blong Isrel stret. Taem mi mi bon, long namba eit dei blong mi, olgeta oli mekem sakomsaes long mi. Mo long saed blong Loa blong mifala, mi mi wan Farisi. ⁶ Long saed blong skul blong mifala, mi mi strong long bilif blong mifala, nao mi stap mekem i nogud tumas long ol man blong jos. Mo long saed blong folem Loa ya, i no gat man nating we i gat poen agens long mi. ⁷ Be from ol samting we Kraes i mekem from mi, ol fasin ya we bifo mi luk olgeta olsem we oli blong mekem mi mi win, naoia mi luk olgeta olsem we oli blong mekem mi mi lus nomo. ⁸ Be i no finis long ples ya. Naoia mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes, ⁹ mo blong mi save joen gud long hem. Naoia mi mi no moa folem fasin ya we mi stap folem Loa blong kam stret man long fes blong God long paoa blong mi nomo. Naoia, mi kam stret man long fes blong God from we mi bilif long Kraes. God i mekem mi mi stret man long fes blong hem, from we mi bilif. ¹⁰ Wan samting nomo we mi wantem naoia, mi wantem blong mi savegud Kraes, mo blong mi kasem paoa ya we God i yusum blong mekem hem i laef bakegen long ded. Mi wantem joen long Kraes blong kasem haf blong ol samting we oli mekem hem i harem nogud long bodi blong hem. Mo mi wantem laef blong mi i folem fasin blong ded blong hem, ¹¹ blong bambae God i save mekem mi mi laef bakegen long ded. ¹² Mi mi no save talem se mi kam stret man finis, we mi kasem mak blong Kraes, nogat. Be from we Kraes i mekem mi mi man blong hem, mi stap traehad blong mekem fasin blong hem i fasin blong mi. ¹³ Ol brata mo sista. Tok ya blong mi i tru. Mi mi no ting se mi holem ol fasin ya finis, olsem we mi win finis. Hemia no yet ya. Be wan samting nomo mi stap mekem. Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. ¹⁴ I olsem we mi stap resis i go stret long mak, we i gat praes blong man we i win. Mo praes ya, hemia we God i singaot yumi blong yumi joen long Jisas Kraes, yumi go stap antap, long ples blong hem. ¹⁵ I stret nomo blong yumi evriwan we i kam olsem bigman finis long ol fasin blong Kraes, yumi gat sem tingting ya nomo. Be sipos sam long yufala oli gat narafala tingting, God bambae i mekem samting ya i moa klia long olgeta. ¹⁶ Be fastaem, yumi mas gohed long rod ya we yumi stap folem kam kasem naoia. ¹⁷ Ol brata mo sista. I gud yufala evriwan i biaen long mak blong mi. Mifala i soemaot stret fasin finis long fes blong yufala, mo i gud yufala i stap luklukgud long olgeta we oli folem ol fasin ya. ¹⁸ I gat plante man naoia, we long laef blong olgeta, oli enemi blong gud nius blong ded blong Kraes long kros. Mi mi talem tok ya long yufala plante taem finis, mo naoia mi talem bakegen, we wota i stap ron long ae blong mi. ¹⁹ Olgeta ya oli man blong lus nomo. Kakae nomo i god blong olgeta, mo ol fasin we olgeta oli flas from, i stret nomo blong olgeta oli sem from. Olgeta oli stap putum tingting blong olgeta long ol samting blong wol ya nomo. ²⁰ Be long yumi i narafala. Yumi man blong heven, yumi gat raet insaed long ples ya, mo yumi stap wet blong luk Jisas Kraes, Masta blong yumi, we bambae i save kamaot long heven blong sevem yumi. ²¹ Hem bambae i save jenisim ol rabis bodi ya blong yumi, we oli blong wol ya nomo, blong oli kam olsem gudfala bodi ya blong hem, we i blong heven. Blong mekem olsem, hem bambae i yusum sem paoa ya blong hem, we i save yusum blong mekem olgeta samting blong wol ya oli bodaon long hem.

¹ Ol brata mo sista. Mi mi lavem yufala tumas, mo mi wantem tumas blong luk yufala. Yufala i stap mekem mi mi harem gud, mo mi glad tumas long yufala. Mi mi lavem yufala tumas. Nao from samting ya, yufala i mas stanap strong long paoa blong Masta blong yumi from we yufala i joen finis long hem. ² Yuodia mo Sintike. Mi mi talem strong long yutufala, se from we yutufala i woman we i joen long Masta blong yumi, yutufala i mas gat wan tingting nomo. ³ Yes, mo yu tu we yumitufala i bin wok tugeta longtaem finis, mi wantem blong yu yu givhan long tufala woman ya. Tufala ya i wok strong wetem mi, mo Klemen, mo ol narafala man ya we oli wok wetem mi long ol wok blong gud nius blong Kraes. Nem blong olgeta ya i stap finis long buk ya blong God, we nem blong olgeta we oli gat laef, i stap long hem. ⁴ Yufala we i joen long Masta blong yumi, oltaem yufala i mas glad. Mi mi talem bakegen, se yufala i mas glad. ⁵ Yufala i mas soemaot long olgeta man, we yufala i kwaet man. Bambae i no longtaem Masta blong yumi i kamtru. ⁶ Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. ⁷ Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes. ⁸ Ol brata mo sista. Mi wantem talem wan samting moa long yufala. I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya. ⁹ Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long hem, nao yufala i lanem olgeta finis. Nao God ya we i stamba blong pis, hem bambae i stap kampani wetem yufala. ¹⁰ Mi mi stap harem i gud tumas, mi presem Masta blong yumi, from we naoia, yufala i soemaot bakegen we yufala i gat sore long mi. Longtaem finis, yufala i no moa mekem sam samting blong givhan long mi, be i no from we yufala i no moa tingbaot mi, be from we yufala i no gat rod blong givhan. ¹¹ Mi mi tok olsem, i no from we mi stap sot long sam samting, nogat. Mi mi lanem finis, se long wanem rod we mi stap long hem, be mi save stap gud nomo. ¹² Sipos mi trabol, be mi save rod blong samting ya finis. Sipos mi gat plante samting, be mi save rod blong samting ya tu, from we mi gotru long ol samting ya finis. Nao long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating. ¹³ Mi save mekem evri samting, long paoa blong Kraes ya we i stap mekem mi mi strong. ¹⁴ Be taem yufala i givhan olsem long ol trabol ya blong mi, yufala i mekem i gud tumas long mi. ¹⁵ Yufala man Filipae, yufala i savegud, we long taem ya we wok blong gud nius i jes stat nomo long ol ples ya, taem mi aot long Masedonia, yufala nomo i givhan long mi. I no gat narafala jos we i givim sam samting long mi blong givhan long mi long rod. ¹⁶ Mo taem mi stap long Tesalonaeka, i no wan taem nomo we yufala i givhan long mi, long taem ya we mi trabol long mane. ¹⁷ Be plis yufala i no ting se mi mi wantem kasem sam samting long yufala, nogat. Mi wantem we yufala i gat frut long laef blong yufala, blong leftemap yufala. ¹⁸ I olsem we yufala i pemaot kaon blong yufala long mi finis, nao yufala i mekem antap bakegen. Naoia, mi kasem ol samting ya long Epafrodaetas, we yufala i sanem i kam, mo mi mi no moa sot long wan samting. Ol samting ya we yufala i givim long mi, hem i olsem wan presen we yufala i givim i go long God, we i gat gudfala smel blong hem, mo we God i glad blong kasem. ¹⁹ Mo God blong yumi we i rij tumas, mo i gat olgeta paoa long heven, hem bambae i lukaot long yufala we i joen long Jisas Kraes, i givim olgeta samting long yufala we yufala i sot long hem. ²⁰ God i Papa blong yumi, mo bambae yumi stap leftemap nem blong hem, gogo i no save finis. Amen. ²¹ Mi mi talem halo long yufala evriwan, we yufala i joen long Jisas Kraes, yufala i Kristin man. Ol brata blong yumi we oli stap wetem mi long ples ya, oli talem halo long yufala. ²² Olgeta Kristin man long ples ya, oli talem halo long yufala. Antap bakegen, ol Kristin man long haos blong Sisa, oli talem halo long yufala. ²³ Prea blong mi, we Jisas Kraes, Masta blong yumi bambae i stap givhan long yufala long laef blong yufala, long gladhat blong hem.