FAS PITA
11 Mi Pita, mi aposol blong Jisas Kraes, mi talem halo long yufala ol man blong God we hem nomo i jusumaot yufala, mo we yufala i stap wanwan olbaot olsem strenja nomo, long ol provins ya Pontas mo Galesia mo Kapadosia mo Esia mo Bitinia. 2 God ya we i Papa blong yumi, hem i jusumaot yufala bifo olgeta, from tingting blong hem nomo. Mo long plan blong hem, Spirit blong hem i mekem yufala i tabu, yufala i man blong hem. Nao yufala i stap obei long Jisas Kraes mo blad blong hem i tekemaot ol sin blong yufala, i mekem yufala i klin. Prea blong mi we oltaem God bambae i stap givhan moa long yufala long gladhat blong hem, mo oltaem hem i stap putum pis i stap wetem yufala. 3 I gud yumi talem tangkiu long God we hem i God mo Papa blong Jisas Kraes, Masta blong yumi. God ya, hem i sore tumas long yumi, nao from samting ya, hem i mekem we yumi bon bakegen, yumi gat niufala laef. Samting ya hem i mekem, taem hem i mekem Jisas Kraes i laef bakegen long ded. Nao from we yumi kam ol niufala man, tingting blong yumi i stap strong long Jisas Kraes, mo i stap kam strong moa oltaem long hem. 4 Mo yumi save se bambae yumi kasem ol gudgudfala samting ya we God i putumgud olgeta oli stap long heven, se oli blong ol man blong hem. Long ples ya ol samting ya oli no save kam nogud, mo oli no save kam roten, mo oli no save lus, from we God i stap lukaot gud long olgeta. 5 Ol gudgudfala samting ya oli blong yufala ya we yufala i bilif finis long God, nao hem i stap yusum bilif ya blong yufala blong lukaot long yufala long paoa blong hem, gogo bambae i sevem yufala. Hem i mekem ol samting oli rere finis blong sevem yufala, mo bambae hem i soemaot ol samting ya long Lasdei. 6 Yufala i save harem gud from ol samting ya. Nating we naoia yufala i mas harem nogud from plante samting we oli stap kam blong traem yufala. 7 Ol samting ya oli stap kam blong soemaot we fasin blong bilif blong yufala i tru. Gol i wan gudfala samting, be i wan samting we i save lus tu. Be oli mas bonem long faea blong faenemaot se i gud no i nogud. Mo long sem fasin, bilif blong yufala we long fes blong God i gud moa i winim gol, be God i save traem bilif ya blong yufala, blong faenemaot se i strong, no i no strong. Nao long Dei ya we bambae Jisas Kraes i kamtru long hem, God bambae i ona long yufala, i presem yufala, mo i leftemap nem blong yufala. 8 Nating we yufala i no luk Jisas Kraes samtaem, be yufala i lavem hem. Yufala i no luk hem naoia, be yufala i stap bilif long hem, nao yufala i stap harem gud tumas, we yufala i glad we i glad, we i no blong talem. 9 Yufala i stap glad olsem from we yufala i stap kasem samting ya we yufala i bilif se bambae yufala i kasem, we God bambae i sevem laef blong yufala. 10 Ol profet blong bifo oli stap lukaot rod ya we God bambae i yusum blong sevem yufala, mo oli stap askem kwestin long hem. Mo long tok we God i givim long olgeta, oli talemaot we hem bambae i givhan long yufala long gladhat blong hem. 11 Oli stap traem faenemaot se long wanem rod mo long wanem taem ol samting ya bambae oli kamtru, from we Spirit blong Kraes we i stap long olgeta, hem i stap poen long ol samting ya. Hem i stap talemaot long olgeta we bambae Kraes i mas harem nogud long bodi blong hem, mo we biaen bambae God i givim hae nem long hem long heven. 12 God i soemaot long ol profet ya, se tok we olgeta oli stap talemaot, i no blong givhan long olgeta, i blong givhan long yufala. Mo ol man ya we oli talemaot gud nius long yufala long paoa blong Tabu Spirit ya we God i sanem i kam, oli talemaot ol tok ya blong ol profet long yufala finis. Ol samting ya, ol enjel tu oli wantem save. 13 Nao from ol samting ya, yufala i mas mekem tingting blong yufala i rere blong yufala i mekem wok. Tingting blong yufala i mas klia gud. Mo yufala i mas putum tingting blong yufala i stap oltaem long God ya we bambae i givhan long yufala long gladhat blong hem, long taem ya we Jisas Kraes bambae i kamtru. 14 Yufala i mas obei long God. Yufala i no letem ol samting ya we yufala i wantem bifo, taem we yufala i no save hem yet, oli pulum tingting blong yufala bakegen. 15 God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud long olgeta samting we yufala i mekem. 16 Long Baebol God i talem se, “Yufala i mas tabu, yufala i mas klin gud, olsem we mi mi tabu, mi klin gud.” 17 Taem God i jajem man, hem i save jajem olgeta man long sem fasin nomo. Hem i stap jajem olgeta from ol fasin we oli stap mekem. Nao sipos yufala i stap prea long hem, mo yufala i stap singaot hem, se “Papa”, be long laef blong yufala long wol ya, yufala i mas ona gud long hem. 18 Yufala i save finis wanem samting we God i yusum blong pemaot yufala, blong tekemaot yufala long rabis laef ya we yufala i kasem long ol olfala blong yufala bifo, blong mekem yufala i fri. Hem i no yusum samting we i save kam nogud, olsem silva no gol. 19 Be blong pemaot yufala, hem i yusum blad blong Kraes we i ron taem hem i ded long kros. Blad ya i olsem blad blong wan smol sipsip we i no gat wan samting nating i rong long bodi blong hem. Mo long fes blong God, blad ya blong Kraes i gud tumas. 20 Bifo olgeta, taem God i no mekem wol yet, hem i jusumaot Kraes blong wokem samting ya. Mo naoia we i no longtaem bambae wol i finis, God i soemaot hem finis blong sevem yufala. 21 Nao from ol samting ya we Kraes i mekem, yufala i bilif finis long God we hem i mekem Kraes i laef bakegen long ded, mo i givim hae nem long hem long heven. Mo from ol samting ya, oltaem yufala i stap bilif strong long God, mo yufala i stap putum tingting blong yufala i stap strong long hem. 22 Yufala i mekem laef blong yufala i klin finis long fes blong God, from we yufala i obei long trutok, nao yufala i save lavem ol brata blong yufala long fasin we i stret gud. Nao from samting ya, yufala i mas lavlavem yufala long olgeta tingting blong yufala, long fasin we i no save jenis. 23 Tok blong God i laef mo i no save lus samtaem, mo tok ya i mekem yufala i bon bakegen, yufala i gat niufala laef we God i Papa blong yufala, mo hem i no save ded samtaem, i stap oltaem gogo i no save finis. 24 Baebol i talem se, “Man i olsem gras nomo, mo ol gudgudfala samting blong hem i olsem flaoa blong gras. Gras i save kam drae, mo ol flaoa blong hem oli save folfoldaon, 25 be tok blong Hae God bambae i stap oltaem, gogo i no save finis.” Mo tok ya, hem i gud nius ya, we oli talemaot finis long yufala.
21 Nao from ol samting ya, yufala i mas lego ol rabis fasin blong yufala. Bambae yufala i no moa letem kros blong yufala i stap longtaem. Bambae yufala i no moa giaman, mo yufala i no moa gat tu tingting. Bambae yufala i no moa jalus, mo yufala i no moa tok nogud long narafala man. 2 Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas. Tok ya i save mekem yufala i kam strong, nao bambae God i sevem yufala. 3 Baebol i talem se, “Yufala i trastem Masta blong yumi, mo yufala i faenemaot finis we hem i gud tumas.” 4 Yufala i mas kam stanap wetem Masta blong yumi. Hem i olsem wan pos we i laef. Ol man blong wokem haos oli sakem hem, be God i jusumaot hem finis, mo long fes blong God, hem i gud tumas. 5 Yufala tu i mas kam olsem ol pos we i laef, blong God bambae i mekem yufala i kam olsem wan haos blong hem we i laef. Nao long haos ya, bambae yufala i olsem ol tabu pris blong God, blong mekem sakrefaes long hem. Mo ol sakrefaes ya blong yufala, hemia we yufala i givim laef blong yufala i go long God. Mo hem i glad blong tekem sakrefaes olsem, from we yufala i joen long Jisas Kraes blong mekem. 6 Baebol i talem se, “Yufala i luk. Long hil ya Saeon, mi mi stanemap wan gudfala pos we mi mi jusumaot. Hem i nambawan pos blong haos, mo mi mi luk we hem i gud tumas. Mo man we i bilif long hem, bambae hem i no save sem.” 7 Long yufala ya we i bilif long hem, pos ya i gud tumas. Be long olgeta we oli no bilif long hem, i olsem tok blong Baebol we i talem se, “Pos ya we ol man blong wokem haos oli sakem finis, naoia hem i kam nambawan pos blong haos.” 8 Mo bakegen, Baebol i talem se, “Hemia wan ston we bambae ol man oli save bangem leg blong olgeta long hem, wan ston we bambae oli save foldaon long hem.” Ol man oli foldaon, from we oli no bilif long tok blong God, mo hemia plan we God i mekem finis blong olgeta. 9 Be yufala, God i jusumaot yufala blong yufala i laen blong hem. Yufala i pris blong King. Yufala i man blong wan kantri nomo, we yufala i tabu man blong God, mo yufala i man blong hem nomo. Hem i mekem olsem long yufala, blong yufala i save talemaot ol gudgudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem. 10 Fastaem yufala i no man blong God, be naoia yufala i kam man blong hem finis. Fastaem yufala i no haremsave we hem i gat sore long yufala, be naoia yufala i haremsave finis we hem i gat sore long yufala. 11 Ol fren. Yufala i stap long wol ya olsem ol strenja nomo, mo olsem ol man we oli no gat hom blong olgeta. Mi mi talem strong long yufala, se bambae yufala i no mekem ol rabis fasin we tingting blong yufala i wantem. Ol fasin ya oli agensem yufala blong spolem laef blong yufala. 12 Naoia ol man we oli no bilif long God oli stap talem se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God i kam blong jajem olgeta, bambae oli save leftemap nem blong God from ol gudfala wok ya blong yufala. 13 Mo from we yufala i man blong Masta blong yumi, yufala i mas obei long olgeta lida we ol man oli putumap. Yufala i mas obei long hed gavman blong yufala we i hae moa long ol narawan. 14 Mo yufala i mas obei long ol man we hed gavman ya i putumap olgeta blong oli givim panis long ol man we oli brekem loa, mo blong oli presem olgeta we oli folem stret fasin. 15 Yumi mas mekem olsem from we hemia wan samting we God i wantem, se long ol stret fasin blong yufala bambae yufala i blokem ol krangke tok blong ol man we oli no gat save. 16 Yufala i kam fri man finis, mo fasin blong yufala i mas soemaot samting ya. Be i nogud yufala i yusum fasin ya we yufala i kam fri man, blong haedem sam fasin we i no stret. Yufala i man blong wok blong God, mo fasin blong yufala i mas soemaot samting ya. 17 Yufala i mas ona long olgeta man, mo yufala i mas lavem olgeta Kristin man, mo yufala i mas ona gud long God, mo yufala i mas ona long hed gavman blong yufala. 18 Ol man blong wok. Yufala i mas obei long ol masta blong yufala, mo yufala i mas ona long olgeta. Yufala i mas mekem olsem long ol masta blong yufala we oli gat sore long yufala, oli stap tingbaot yufala, be i no long olgeta ya nomo. Yufala i mas mekem olsem tu long ol masta ya blong yufala we oli stap mekem i strong tumas long yufala. 19 Maet yufala i mekem ol samting we i stret nomo, be ol masta blong yufala oli stap mekem yufala i harem nogud tumas long bodi blong yufala. Sipos yufala i gotru long hadtaem ya we yufala i stap lukluk long God nomo, God bambae i blesem yufala. 20 Sipos yufala i mekem i no stret, mo oli givim panis long yufala, nao yufala i mekem tingting blong yufala i longfala blong karem panis ya, fasin ya i no samting blong leftemap yufala. Be sipos yufala i mekem i stret nomo, mo oli givim panis long yufala, nao yufala i mekem tingting blong yufala i longfala blong karem panis ya, God bambae i blesem yufala from. 21 Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem. 22 Baebol i talem se, “Hem i no mekem wan samting nogud, mo neva hem i talem wan giaman toktok.” 23 Taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta. Hem i putum tingting blong hem i stap strong long God, we i stap jajem ol man long stret fasin. 24 Taem hem i go long kros, hem i karem olgeta sin blong yumi long bodi blong hem, blong yumi save ded long fasin blong mekem nogud, nao yumi save laef long fasin blong mekem i stret. Ol sobodi ya we hem i karem, i mekem yufala i gud bakegen finis. 25 Bifo, yufala i olsem ol sipsip we oli lusum rod blong olgeta. Be naoia yufala i kambak bakegen long Kraes we i olsem man blong lukaot long sipsip, we hem i prapa man blong lukaot long laef blong yufala.
31 Nao long sem fasin, yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta. 3 Mo i nogud yufala i stap fasem hea blong yufala, mo yufala i stap putum gol jen mo ol flas klos blong yufala, blong flasem yufala. 4 I moa gud yufala i mekem tingting blong yufala i stret long fes blong God, mo yufala i gat pis long laef blong yufala, mo yufala i kwaet woman, we fasin blong yufala i stret gud. Fasin olsem i gud tumas long fes blong God mo i no save lus. 5 Ol woman ya bifo we oli tabu, mo oli klin gud long fes blong God, we tingting blong olgeta i stap strong long hem, olgeta ya, oltaem oli kaen long ol man blong olgeta, mo oli obei long olgeta. Long fasin ya nao oli mekem olgeta oli naes long fes blong ol man blong olgeta. 6 Sera i mekem olsem. Hem i obei long Ebraham, mo i singaot hem, se “Masta blong mi”. Mo sipos yufala i stap mekem ol gudfala fasin, mo yufala i no fraet long sam samting, bambae yufala i kam olsem we yufala i dota blong Sera. 7 Mo long sem fasin, yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala. Yufala i mas mekem olsem blong bambae i no gat samting we i save blokem ol prea blong yufala. 8 Mi wantem finisim tok ya blong mi olsem. Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon. 9 Sipos man i mekem i nogud long yufala, bambae yufala i no givimbak long hem bakegen. Taem man i tok nogud long yufala, bambae yufala i no tok nogud long hem bakegen. Yufala i mas askem long God blong hem i mekem i gud long ol man olsem, from we taem God i singaot yufala, hem i promes se bambae hem i mekem i gud long yufala. 10 Baebol i talem se, “Man we i wantem gudfala laef, we i wantem harem gud evri dei nomo, bambae hem i no mas tok nogud, mo i no mas giaman. 11 Hem i mas lego ol fasin nogud mo i mas mekem ol samting nomo we i gud. Long olgeta tingting blong hem, hem i mas wok had blong mekem pis. 12 Hem i mas mekem olsem, from we Hae God i stap lukluk long ol stret man, mo i stap lesin blong harem ol prea blong olgeta. Be hem i stap agensem olgeta we oli stap mekem ol rabis fasin.” 13 ?Sipos yufala i stap traehad blong mekem ol gudfala fasin, hu man bambae i save spolem yufala? I no gat. 14 Be sipos samtaem ol man oli mekem yufala i stap harem nogud long bodi blong yufala from gudfala fasin blong yufala, be long tingting blong yufala, yufala i save harem gud. Bambae yufala i no fraet long olgeta, yufala i no wari long olgeta. 15 Yufala i mas mekem Kraes i Masta blong yufala, mo yufala i mas mekem hem i nambawan long laef blong yufala. Mo sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta. 16 Be yufala i mas toktok gud long olgeta we yufala i ona long olgeta. Mo oltaem yufala i mas mekem ol stret fasin we tingting blong yufala i klin gud. Nao taem ol man oli tok nogud long yufala, oli talem se ol fasin ya we yufala i stap mekem oli no stret, from we yufala i joen long Kraes, be bambae olgeta oli sem nomo. 17 Sipos i tingting blong God, se ol man oli mekem yufala i harem nogud long bodi blong yufala from we yufala i stap mekem i stret nomo, hemia i moa gud, i winim we yufala i mekem i no stret, nao ol man oli panisim yufala from. 18 Yufala i mas rere blong harem nogud olsem, from we Kraes we laef blong hem i stret olgeta, hem i tekem ples blong yufala we laef blong yufala i no stret, nao i ded blong tekemaot sin blong yufala, blong tekem yufala i kam long God. Hem i ded wan taem nomo, we bambae i no moa save ded bakegen samtaem. Long laef blong hem we hem i man, ol man oli kilim hem i ded, nao God i mekem hem i laef bakegen long laef blong hem we i blong heven. 19 Mo long laef ya blong hem, hem i go prij long ol man we oli ded finis, we oli stap olsem we oli kalabus. 20 Hemia olgeta ya we long taem blong Noa, taem hem i stap wokem bigfala sip blong hem, God i stap wet long olgeta, we tingting blong hem i longfala, be olgeta oli no obei long hem. Nao long sip ya i gat eit man nomo, we God i yusum wota blong sevem olgeta. 21 Wota ya bifo, hem i pija blong baptaes ya we i sevem yufala naoia. Baptaes ya, stamba blong hem i no min se yufala i wasemaot ol doti long bodi blong yufala, be i min se yufala i mekem promes long God we tingting blong yufala i klin gud. Mo baptaes ya i kasem paoa blong sevem yufala from we God i mekem Jisas Kraes i laef bakegen. 22 Jisas ya, hem i go antap long heven, nao hem i stap sidaon long raet saed blong God. Mo God i mekem ol enjel, mo ol haeman, mo ol lida blong heven, oli stap ona long hem.
41 Taem Kraes i stap long wol ya, hem i harem nogud long bodi blong hem. Nao from samting ya, yufala tu i mas tekem sem tingting we hem i gat, blong mekem yufala i strong, from we ol man we oli stap harem nogud long bodi blong olgeta, oli no moa stap mekem sin. 2 Nao from samting ya, i stat naoia, bambae yufala i no moa letem ol rabis samting we tingting blong yufala nomo i wantem, oli bos long yufala. Yufala i mas letem ol samting we God i wantem, oli bos long yufala. 3 Longtaem tumas yufala i stap folem fasin blong ol man we oli no bilif long God. Bifo, oltaem yufala i stap mekem i nogud wetem woman, yufala i stap wantem ol samting nogud, mo yufala i stap dring we yufala i lusum hed. Bifo, oltaem yufala i stap mekem lafet blong ronem woman, mo blong dring grog blong kam fuldrong. Mo yufala i stap prea long ol narafala god long ol fasin we i no stret nating. Naoia i naf. 4 Olgeta ya oli sapraes tumas, from we yufala i no moa go joen wetem olgeta long ol fasin blong olgeta we oli no tingbaot wan samting, oli jes gohed nomo. Mo taem oli luk we yufala i no moa go joen wetem olgeta, oli tok nogud long yufala. 5 Be bambae olgeta ya oli mas talemaot laef blong olgeta long fes blong God, we hem i stap rere blong jajem ol man we oli ded, wetem ol man we oli laef. 6 Taswe Kraes i talemaot gud nius ya long ol man ya we oli ded. Taem olgeta oli stap laef yet, oli kasem panis, oli ded olsem ol narafala man. Be Kraes i talemaot gud nius long olgeta, blong oli save kasem laef olsem we God i gat. 7 Yumi kam klosap finis long taem we ol samting blong wol ya bambae i lus. From samting ya, yufala i mas wekap we tingting blong yufala i klia gud, mo yufala i mas blokem ol samting we yufala nomo i wantem, nao yufala i save prea. 8 Antap long ol narafala samting, yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem. 9 Oltaem yufala i mas rere blong tekem narafala Kristin man i kam long haos blong yufala, we yufala i no toktok tumas from. 10 Long gladhat blong God, hem i givim ol defdefren kaen paoa long yufala blong mekem ol wok blong hem. Yufala i mas yusum ol paoa ya blong hem blong givgivhan long yufala. 11 Sipos yufala i stap prij, yufala i mas talemaot ol tok we God i givim. Sipos yufala i stap givhan long ol man, yufala i mas mekem long paoa we God i givim long yufala. Nao long olgeta fasin ya, nem blong God bambae i save go antap moa, from Jisas Kraes ya, we olgeta paoa mo ol gudgudfala samting oli blong hem, gogo i no save finis. Amen. 12 Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem. 13 I stret blong yufala i harem gud, from we yufala i joen long Kraes, mo yufala i stap kasem haf blong ol samting ya we i mekem hem i harem nogud. Nao taem ol gudgudfala samting blong Kraes oli kamtru, bambae yufala i glad tumas. 14 Sipos ol man oli tok nogud long yufala from we yufala i man blong Kraes, yufala i save harem gud. Hemia i min se Spirit ya blong heven, we i Spirit blong God, hem i kamdaon finis, i stap long yufala. 15 Man we i kilim man, no i stil no i brekem loa, no i stap go insaed long ol bisnes blong narafala man, hem bambae i kasem panis. Be i no stret sipos wan long yufala i kasem panis from ol fasin olsem. 16 Be sipos yufala i stap kasem panis from we yufala i man blong Kraes, hemia i no samting blong sem. Yufala i mas presem God from we nem blong Kraes i stap long yufala olsem. 17 Naoia, taem i kam finis blong God i jajem olgeta man. Mo faswan blong hem, hem i mas jajem ol famle blong hem. Mo sipos hem i statem wetem yumi, be taem hem i finisim wok ya long olgeta we oli no bilif long gud nius blong hem, bambae i nogud tumas long olgeta. 18 Baebol i talem se, “Sipos i strong blong ol gudfala man oli kasem laef, be ol man we oli no ona long God, mo oli stap mekem i nogud, bambae oli no gat rod nating blong kasem laef.” 19 Nao from samting ya, ol man ya we God i letem olgeta oli harem nogud long bodi blong olgeta, oli mas putum laef blong olgeta long han blong hem, from we hem nao i mekem olgeta, mo promes blong hem long olgeta i no save foldaon. Mo oli mas gohed blong mekem ol gudfala fasin.
51 Mi mi wantem givim wan tok long yufala ol elda blong jos. Mi tu mi wan elda, mo mi luk Kraes long ae blong mi, taem hem i harem nogud long bodi blong hem. Mo mi mi gat raet blong joen long gudfala laef blong heven, we Kraes bambae i tekem i kamtru. Mi wantem talem long yufala, 2 se yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Yufala i mas lukaot gud long olgeta, we tingting blong yufala i glad blong mekem, olsem we God i wantem. I nogud yufala i mekem blong kasem pei nomo. Yufala i mas mekem from we yufala i glad long hem. 3 Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala, blong oli save folem, olsem we ol sipsip oli folem man blong lukaot long olgeta. 4 Nao taem man ya we i Nambawan Man blong Lukaot long Sipsip i kamtru, bambae hem i givim hae nem long yufala blong ona long yufala olsem we oli givim medol long man we i win long resis blong ona long hem. Mo hae nem ya we hem bambae i givim long yufala bambae i no save lus samtaem. 5 Mo long sem fasin, yufala ol yangfala, yufala i mas obei long ol olfala. Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se, “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” 6 God i gat paoa, mo yufala i mas putum yufala i stap daon, aninit long han blong hem. Nao long taem we hem i luk se i stret, hem bambae i leftemap yufala. 7 Yufala we i stap wari tumas, yufala i mas putum ol trabol blong yufala long han blong hem, from we oltaem hem i stap tingbaot yufala. 8 Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae. 9 Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem. 10 Be God i stap soemaot we hem i lavem yumi tumas, mo i stap mekem i gud tumas long yumi, mo hem i singaot yufala blong joen long Kraes long gudfala laef ya blong heven we i no save lus samtaem. Bambae yufala i stap harem nogud long bodi blong yufala blong smoltaem, be biaen, God bambae i mekem yufala i stret gud. Hem bambae i mekem yufala i strong, i givim paoa long yufala, i stanemap yufala olsem pos we i no save muv. 11 Mo prea blong mi we olgeta paoa bambae i stap long han blong hem nomo, gogo i no save finis. Amen. 12 Sotfala leta ya blong mi, Silvanas i raetem blong i go long yufala. Mi mi luk hem olsem wan brata blong yumi we mi save bilif long hem. Mi wantem leftemap tingting blong yufala. Mi wantem talemaot we gudfala fasin ya blong God we hem i lavem yumi tumas, mo i stap mekem i gud tumas long yumi, hem i prapawan, mo yufala i mas stanap strong long hem. 13 Ol brata mo sista long jos long Babilon oli talem halo long yufala. God i jusumaot olgeta ya olsem we i jusumaot yufala, mo yufala evriwan i olsem wan brata nomo. Mo pikinini blong mi Mak, hem tu i talem halo long yufala. 14 Taem yufala i talem halo long yufala, i gud yufala i kis long yufala blong soemaot we yufala i joen long Kraes mo yufala i lavlavem yufala. Prea blong mi we bambae pis i stap wetem yufala evriwan, we yufala i man blong Kraes.